РАҚОБАТЛАШМАСЛИК ҲАҚИДА КЕЛИШУВ ТУЗИШНИНГ БИЗНЕС СУБЪЕКТЛАРИ ФАОЛИЯТИДАГИ АҲАМИЯТИ

Бозор иштирокчилари аксарият ҳолларда ўзаро рақобатлашадилар, бироқ баъзи ҳолатларда бизнес субъектлари рақобатлашмасликка келишишга ҳаракат қиладилар. Рақобатлашмаслик – бу ходимнинг меҳнат муносабатлари давом этаётган вақтда ёки меҳнат муносабатларини тугатиш вақтида ёки ундан кейин иш берувчи билан рақобат муносабатида бўлган ташкилотга ишга жойлашмаслик, шунингдек, рақобатлашадиган ташкилот ташкил этмасликдир. Ўзбекистон меҳнат қонунчилигида рақобатлашмаслик ҳақидаги қоидаларнинг меҳнат шартномасига киритилиши ёки илова қилиниши ходимларнинг ҳуқуқларини қонунлар ва шартномаларга нисбатан ёмонлаштириш, деб ҳисобланади. Бундай қарашлар замонавий дунё учун аллақачон эскирган бўлиб, рақобатлашмаслик ҳақидаги келишувларда илғор тажрибадан фойдаланиш мақсадга мувофиқ саналади.