ISAJON SULTONNING "ALISHER NAVOIY" ROMANIDA NAVOIYNING SO'FIYLIK HAQIDAGI QARASHLARI VA XALQPARVARLIGI FAZILATLARINING AKS ETISHI

“Bugun oʻzbek nasri xazinasi isteʼdodli yozuvchi Isajon Sultonning “Alisher Navoiy” nomli yangi romani bilan boyidi. Aslida, “emas oson bu maydon ichra turmoq...”. Oʻzbek adabiyoti tarixida hazrat Alisher Navoiy obrazi bor, teatr va kino talqinlari ham. Ammo maʼnaviy zaruratga koʻra, adib Alisher Navoiy siymosiga qayta murojaat qildi”.1 O’zbek adabiyoti tarixida Hazrat Alisher Navoiy siymosi bir necha bor yaratilgan. O’tgan asrda ko’plab ijodkorlar Navoiy obraziga murojaat qilishdi. Navoiy obrazi badiiy asarlarda ham, teatr va kino sohasida ham, rassomchilik va haykaltaroshlik sohasida ham bunyod etildi. O’tgan asrda Alisher Navoiy haqidagi badiiy asarlarda adiblarimiz ko’proq tarixiy voqeabandlikka va badiiy to’qimaga erk berishardi. Ya’ni Navoiy e’tiqodi, uning islomiy hayoti mavzusi biroz chetlab o’tilar edi. Bu ham siyosat taqazosi tufayli shunday bo’lgan.