БУХОРО ВОҲАСИНИНГ ҚАДИМГИ ИРРИГАЦИЯСИГА ДОИР АЙРИМ МУЛОҲАЗАЛАР

Бухоронинг қадимги суғорилган ерларида олиб борилган археологик тадқиқотлардан маълум бўлишича, милоддан аввалги I аср ва милод бошларида Қизилқир ва Хўжапорсонтепа каби археологик ёдгорликлар комплекси жойлашган район тўла ўзлаштирилган. Бу даврда суғориб обод этилган ерларнинг майдони бу районда максимал даражада кенгайиб, у қарийб 20-25 минг гектарга етган. Милоднинг I-II асрларида Занданаруднинг чиқарилиши билан бу территория деярли сувсиз қолган. III-IV асрларда Қизилқир ва Хўжапорсон атрофларидаги обод ерлар­нинг майдони деярли 4-5 баробар қисқариб, унинг умумий ҳаж­ми 5 минг гектардан ошмаган. VI-VIII асрларда, айниқса, IX-XI асрларда, бу районнинг шимолий қисми яна қайта обод этилиб, III - IV асрлардагига нисбатан у 3—4 марта кенгайтирилган. Бу даврда тахминан 15—18 минг гектар ер суғорилган.