AYOL VA UNING JAMIYAT HAYOTIDAGI OʻRNI. OʻZBEKISTONDA GENDER TENGLIK

Ayolni e’zozlash, unga ehtirom koʻrsatish Sharq xalqlariga, jumladan, oʻzbek xalqiga xos xususiyatdir. Tariximizga bir nazar solsak, qanchadan qancha buyuk ishlar boshida Toʻmaris, Bibixonim, Nodirabegim, Uvaysiy, Zulfiya kabi ayollar turganiga guvoh boʻlamiz. Ular oʻz jasorati, aql-idroki va mardligi bilan tarixga oʻz ismlarini muhrlab qoʻygan. Shunday siymolar davomchilari ekanligimizning oʻziyoq bugungi kun xotin-qizlarga gʻurur va sharaf tuygʻularini his qilishga sabab boʻla oladi. Muborak hadisi sharifda keltirilgan “Jannat onalar oyogʻi ostidadur”,“Avval onangizga, yana onangizga, va yana onangizga, soʻngra otangizga yaxshilik qiling”, degan benazir soʻzlarda ham ana shu adoqsiz ehtirom namoyon boʻlib turibdi.