SAIDA ZUNNUNOVA ASARLARIDA KURASHCHAN QAHRAMON TALQINI

XX asr o'zbek adabiyotida Saida Zununovaning o'z o'rni bor. Istiqlol yillarida tariximizga, ma'naviy merosimizga munosabat tubdan o'zgardi. Mustabid tuzum davrida toptalgan milliy-adabiy qadriyatlarimizni tiklash borasida qator ishlar amalga oshirildi. Fitrat,  Abdulla Qodiriy,  Cho'lpon singari qatag'on qurbonlari ijodini yangicha baholash,  talqin etish bilan barobar yakkahokim mustabid mafkura, sho'ro adabiyoti siyosati ta'siri, zug'umi, tahdidi ostida qalam tebratgan G'afur G'ulom, Oybek, Abdulla Qahhor singari so'z ustalari ijodiy merosini qaytadan xolis o'rganish jarayoni  boshlandi. XX asr o'zbek adabiyoti  rivojida yuqorida tilga olingan adiblar  Zulfiya, Maqsud Shayxzoda, Mirtemir, Said Ahmad va Asqad Muxtor  singari  adabiy avlod vakillari qatorida  nasrda va nazmda tanho bo'lgan  Saida Zununovaning ham muayyan xizmati bor. Shoira murakkab va  tahlikali  zamonda ta'qibu tazyiqlar ostida yashab, ijod qildi.