O'ZBEK TILSHUNOSLIGIDA TAQLID SO'ZLARNING O'RGANILISHI

     Ushbu ilmiy maqola zamonaviy o’zbek tilida taqlid so’zlarning o’rganilish jihatlari yuzasidan ayrim tahlillarga bag’ishlanadi va bu borada xususiy xulosalarni taqdim etadi. Turkiy tillar tilshunosligida taqlid so’zlarni o’rganishga bag’ishlangan maxsus ishlar o’tgan asrning yigirmanchi yillaridan keyin yuzaga kelgan va turkiy tillarning ko’pchiligida taqlidiy so’zlar kategoriyasi u yoki bu darajada ishlangan. O’zbek tilshunosligida esa bu masala 60-yillargacha alohida tadqiqot obyekti sifatida o’rganilgan emas. O’sha paytgacha o’zbek tili bo’yicha yozilgan grammatikalarda va qo’llanmalarda taqlidiy so’zlarga juda kam o’rin berilgan va ularning ko’pchiligida taqlidiy so’zlar undov so’zlarning ajralmas qismi sifatida ko’rsatilar edi.