SUN'IY INTELLEKT ASOSIDAGI HRMDA XODIMLARNING INNOVATSION XULQINI RIVOJLANTIRISH: ISH SAMARADORLIGI VA ISH XAVFSIZLIGI O'RTASIDAGI MUVOZANAT

Mazkur tezisda sun’iy intellekt asosidagi inson resurslarini boshqarish (AI-HRM)ning xodimlar faoliyatiga bir yo‘nalishli emas, balki ikki tomonlama ta’sir ko‘rsatishi masalasi tahlil qilinadi. Tadqiqotning asosiy e’tibori AI-HRM texnologiyalarining bir tomondan ish jarayonlarini tezlashtirish, qaror qabul qilishni takomillashtirish va innovatsion xulqni rag‘batlantirish, ikkinchi tomondan esa ish o‘rnining xavfsizligi, kasbiy rolning o‘zgarishi va texnologik nazorat bilan bog‘liq xavotirlarni kuchaytirishi mumkinligiga qaratilgan. Zamonaviy tadqiqotlar AI-HRMning xodimlar samaradorligiga ta’sirini oddiy “ijobiy” yoki “salbiy” natija sifatida izohlash yetarli emasligini ko‘rsatmoqda. Xususan, 2026-yildagi empirik tadqiqotda AI-HRM raqamlashtirilishi xodimlar faoliyatiga innovatsion ish xulqi orqali ijobiy, ishga oid skeptitsizm orqali esa salbiy ta’sir ko‘rsatishi aniqlangan. Ushbu jarayonda xodimning vazifalarni bajarishdagi mustaqilligi muhim chegaraviy shart sifatida namoyon bo‘ladi [1]. Shundan kelib chiqib, tezisda inson kapitalini strategik boshqarishning “texnologik samaradorlik — xodim avtonomiyasi — innovatsion xulq — ish xavfsizligi” o‘rtasidagi muvozanatga asoslangan yondashuvi taklif etiladi.