BOLALARDA 1-TIP ODDIY GERPES VIRUSI BILAN BOG'LIQ OG'IZ SHILLIQ QAVATI ZARARLANISHLARINI MAHALLIY DAVOLASHNING ZAMONAVIY YONDASHUVLARI

1-tip oddiy gerpes virusi (OGV-1; HSV-1) bolalarda og‘iz bo‘shlig‘i shilliq qavati zararlanishlarining etakchi etiologik omillaridan biridir. Ushbu infeksiya bolalik yoshida ko‘pincha o‘tkir gerpetik gingivostomatit (O‘GS) ko‘rinishida namoyon bo‘ladi. Kasallik o‘z-o‘zidan cheklanuvchi xarakterga ega bo‘lishiga qaramay, u bilan kechadigan og‘riqli eroziya va yaralar, diffuz gingivit, yuqori isitma hamda ovqatlanish va suyuqlik qabul qilishning qiyinlashishi bolalarda og‘ir klinik holatlarni keltirib chiqaradi [1, 2].