TURK-MONIY TAVBANOMALARI

Turkiy adabiyotning islomga qadar bo‘lgan davri bir necha adabiy jarayonlarga bo‘linadi. Shulardan biri fanda turk-moniy adabiyoti deb nomlanadi. Nomlanishidan sabab o‘sha davrda yaratilgan adabiyot namunalari moniylik ta’sirida, moniy ta’limotining tushuncha-atamalari, mazmun-mohiyati singanidir. Ushbu davrda turli mazmundagi janrdagi matnlar yaratilgan bo‘lib, ulardan bir guruhi turk-moniy tavbanomalari deb nomlanadi. Tavbanoma –kishining biror ayb-gunohlaridan kechirim so‘rash, yolvorish mazmunidagi tavba matnlaridir. Ularning mazkur davr adabiyotida o‘ziga xos o‘rni mavjud. Xususan, o‘ziga xos matn tuzilishi, janr xususiyatlariga ega. Mazkur maqolada turk-moniy adabiyotida yaratilgan, kunimizgacha qo‘lyozmalari yetib kelgan tavbanomalar haqida so‘z boradi. Ularning qayerda saqlanishi, kimlar tomonidan tahlil etilgani, nashr etilgani, asar qo‘lyozmasining o‘ziga xos xususiyatlari, kimlarga atab bitilgani va shu kabi masalalar qamrab olingan.