ମନୋଜ ଦାସଙ୍କ 'ଶେଷ ବସନ୍ତର ଚିଠି' ଏକ ଅନନ୍ୟ ସୃଷ୍ଟି

ମାନବର ମନ ମସ୍ତିଷ୍କର କେଉଁ ଏକ ଅଜଣା କ୍ଷେତ୍ରରେ ଜନ୍ମ ଜନ୍ମର ସଂସ୍କାର ବୀଜ ରୂପେ ସଞ୍ଚିତ ଥାଏ । ସମୟାନୁକ୍ରମେ ପରିସ୍ଥିତି ରୂପେ ତାହା ପ୍ରତିଭାତ ହୁଏ । ସେହି ବୀଜ ତତ୍ ଭାବ ଯୁକ୍ତ ହୋଇ ସୂକ୍ଷ୍ମରୁ ସ୍ଥୂଳ ରୂପ ନିଏ । ଏହି ଅଦ୍ଭୁତ ଭାବଗୁଡ଼ିକଦ୍ୱାରା ସେ ପ୍ରଭାବିତ ହୋଇଥାଏ, ଯାହା ବ୍ୟକ୍ତିର ଆଚରଣ ତଥା ସମାଜ ଉପରେ ପ୍ରଭାବ ପକାଏ । ଏହି ଭାବଧାରାକୁ ଅନ୍ୟମାନେ ବାଚାଳ ମନେ କରିଥାଇ ପାରନ୍ତି, କିନ୍ତୁ ଦୃଷ୍ଟି ସମ୍ପନ୍ନ ମହାତ୍ମା, ମନସ୍ତତ୍ତ୍ୱୀ ତାହାର ଉଚିତ ଆକଳନ କରି ପାଠକ ସମ୍ମୁଖରେ ଉପସ୍ଥାପନ କରିଥାନ୍ତି । ସେପରି କେତେକ ଗଳ୍ପମାନଙ୍କର ସଂକଳନ ‘ଶେଷ ବସନ୍ତର ଚିଠି’ । ଏହି କ୍ଷୁଦ୍ର ପ୍ରବନ୍ଧରେ ଗାଳ୍ପିକଙ୍କ ରଚିତ ‘ଶେଷ ବସନ୍ତର ଚିଠି’ ଗଳ୍ପ ସଂକଳନରେ ଥିବା ମୌଳିକତା ଓ ସ୍ୱାତନ୍ତ୍ର୍ୟତାକୁହିଁ ଆକଳନ କରା ଯାଇଛି । ଉକ୍ତ ସଂକଳନରେ ମୋଟ ପନ୍ଦରଟି ଗଳ୍ପ ରହିଛି । ଏ ଗୁଡ଼ିକରେ ମୁଖ୍ୟତଃ ସାମାଜିକ, ରାଜନୈତିକ, ଅର୍ଥନୈତିକ, ମନସ୍ତାତ୍ତ୍ୱିକ ତଥା ପଲ୍ଲୀଠାରୁ ସହର ପର୍ଯ୍ୟନ୍ତ ସାଧାରଣ ମଣିଷମାନଙ୍କ ସମସ୍ୟାର ଚିତ୍ର ବର୍ଣ୍ଣିତ । ତାଙ୍କ ପ୍ରତ୍ୟେକ ଗଳ୍ପର ଅନ୍ତରାଳରେ ଛପି ରହିଛି ଜୀବନର ଏକ ସୂକ୍ଷ୍ମ ଅନୁଭବ ।