MANGGAD: TINIROK NGA PANURATAN SAN LAVEZARES, NORTE SAN SAMAR

“Maupay!”

Mao ini an ginsusugad san kada Lavezaresnon nga naghahangyo nga makadáyon sa sayô nga panimalay, basî makigsangkay san tagbalay. May dara nga maupay nga pamahung-pahong, ideya, ngan makaruruyag nga mga istorya.

Diri la sa pakigsangkay ngan pagkarawat sin bisita naiimod an pagkamaupay san mga Lavezaresnon. Mababasa sa aton mayaman nga literatura (o panuratan) an mga surumatanon, patigo, awit, siday, ngan puplunganon nga nagsasalamin san aton kaagi, kultura, ngan kinaiya. Mao ini an aton Manggad nga ginpasa-pasahan tikang pa sa panahon san aton kaapoy-apoyan. Dara san istorya san hiwa, nagburubalhin ini sa iba-iba nga mga henerasyon.

Kaurugan san mga lakip sini nga koleksyon an mga panuratan nga nagtikang o nahimo sa bungto san Lavezares, Northern Samar o ginsurat san mga Lavezaresnon. Mayaon liwat sin diri didi orihinal nga nagtikang, pero ginhubad, paborito, o nagin kaparte na san uru-adlaw nga pangabuhi san mga Lavezaresnon.

Nagtikang ini nga mapainubsanon nga gios sin pagtirok san panuratan san aton pinalangga nga bungto san Lavezares komo sayô nga proyekto sa eskwelahan san 2007. San 2014, nahimo ini nga barasahon nga “Manggad: The Treasures of Lavezares” nga gingamit san pipira nga mga magturukdo ngan mga estudyante sa mga eskwelahan. San 2017, nagkamay-ada ini sin online version.

Sa sulod san pira katuig, naparig-on san mga mambarasa an mga natirok nga panuratan. Hingyap sini nga makaduso pa sin mas haluag ngan mas halarom nga panirok ngan pag-aram san aton panuratan ngan kultura.

“Dáyon kamo!”

Sulod kita sa iba-iba nga panahon! Burungyod kita pagbasa san panuratan nga Lavezaresnon!

– Randy Ortego Canales