Tiatrantlo Vinod ani Tiatr Machievele Vinodi Kolakar

Tiatrachea 133 vorsanchea itihasant, tiatr machier veg-veglle vinodi kolakar yevun apli bhumika korun lokank hansoun gele. Thodde aiz sounsarachea podd’ddea add gele, zalear thodde tiatr machiek aplem yogdan dit asat. Tiatr machier namna zoddil’le vinodi kolakaram modem Joao Agostinho Fernandes, Anthony Mendes, Jacinto Vaz, Jephsis Hitler, Thomas Coogan, Champion Peter adi hanchem nanv aspavta. Toxech kolakar ani vinodi gitam gavpeam modem C. Alvares, M. Boyer, H. Britton adi kolakaranim lokanchem borench monoron’jon kelem. Tea kallar tannim ‘comedyk’ ek agllem-vegllem rup diun lokank pott futtosor hansoile. Tea kallavele tiatr borovpi, comedy ho tiatrachoch bhag mhunnon, comedy mull kothent zoddun ghetale. Adlea vinodi kolakaranchi sfurti ghevun tiatr machier zaite vinodi kolakar nirmann zaleat, punn ‘comedychem’ rup ani akar mat khoim tori sanddla oxem disunk laglam. Aiz zaitea tiatranim comedy choddxe ‘side shows’ zaleat ani mull kothek dhorinastana ‘comedychich’ ek veglli kotha tiatrant disunk laglea. Comedy tiatrache mull kothek dhorun vochunk zai zalear atanchea borovpeanim, adlea tiatr borovpeanche tiatr vachpachi goroz asa. Adlea vinodi kolakaranim ‘clean comedy’ korun lokank hansoile, punn aiz mat zaite vinodi kolakar pozddeponnachim, bhemoryadichim, double meaning axil’lim utram vaprun lokank hansovpacho proytn kortat.