मराठी आदिवासी साहित्याचे भारतीय साहित्यात योगदान

मराठी साहित्यात १९६० नंतर उदयास आलेला एक महत्वाचा साहित्य प्रवाह म्हणून आदिवासी साहित्याकडे बघितले जाते, जो आदिवासी समाजाच्या सामाजिक, सांस्कृतिक आणि राजकीय वास्तवाचे प्रतिबिंब चित्रित करतो. या साहित्यातून आदिवासी जमातींचे जीवन, त्यांची मौखिक परंपरा, त्यांचे सण-उत्सव, श्रद्धा आणि त्यांच्यावरील अन्याय याविषयीची जाणीव निर्माण होते. आदिवासी साहित्य केवळ सांस्कृतिक वारसा जपण्यास मदत करत नाही, तर आदिवासी समाजाच्या व्यथा - वेदना, संघर्ष आणि नकाराचे तत्त्वज्ञान मांडून एका वेगळ्या आणि स्वतंत्र वाङ्मयीन प्रवाहाला दिशा देते.