ЖЫРДЫҢ ТОЛАССЫЗ БҰЛАҒЫ, ӨШПЕС ӨНЕГЕСІ

«Ертеден келе жатқан мұралардың ең қымбаты – сөз. Сөз күн шалмас қараңғы көңілді шалады,  күн жылытпас суық көңілді жылытады. Асылы адам да,  нәрсе де тозады,  жоғалады.  Асыл сөз мәңгі жасайды» -, халықтың біртуар перзенті Ғабиден  Мұстафин айтқандай ұлттық  мәдениетіміздің ерекше бір көрінісі  ақындар мен шешендердің асыл сөздері тарлан ғасырлардың жемісі. Осындай қасиетті ұлы сөзді шешен тілмен көркемдеп құлпырта жазу, әрі мың құбылта нәрлі де, әрлі сөйлеу асқақ талант иелерінің бәріне ортақ қасиет [5, 41-56]. Әр сөзінен нәзік сезім, өрнек зері құлпырып жарқырап шығатын ақын,  қазақ әдебиетінің  шүғылалы асқар биігі,  ұлы Абай Құнанбаев сөз жібек жіптен өлең өнерін өретін сөздің айтулы шебері.