BANK KAPITALINI BOSHQARISH TIZIMI VA UNING TARKIBINI TAKOMILLASHTIRISH.

Bank kapitali tijorat banklarining moliyaviy barqarorligi, risklarni qamrab olish qobiliyati va faoliyatini kengaytirish imkoniyatlarining asosi hisoblanadi. Mazkur tezisda bank kapitalining tuzilmasi, uni boshqarishning nazariy asoslari hamda amaliy jihatlari tahlil qilinadi. Xususan, Basel III standartlari doirasida yadro va qo‘shimcha kapital elementlari, kapital yetarliligini baholash tizimlari (ICAAP) va stress-testlar asosida riskga mos boshqaruv strategiyalari o‘rganiladi. O‘zbekiston bank tizimida mavjud kapital strukturasining zaif tomonlari, kapital zaxiralari yetishmovchiligi, diversifikatsiyalash darajasi va xalqaro moliyaviy vositalardan foydalanish holatlari amaliy misollar asosida ko‘rib chiqiladi. Tadqiqot natijalariga ko‘ra, bank kapitalini boshqarish tizimini takomillashtirish uchun kapital tarkibini diversifikatsiyalash, raqamli xavflarga tayyorlikni oshirish va strategik kapital siyosatini joriy etish zarurligi ta’kidlanadi. Taklif etilgan chora-tadbirlar banklar moliyaviy barqarorligini mustahkamlashga xizmat qiladi.