Políticas públicas de comunicación audiovisual na UE e España. Análise histórica dunha regulación ineficaz para a plurallidade informativa e a democratización mediática

Un sistema de medios robusto e plural contribúe á construción de sistemas democráticos mediante a creación dunha esfera social crítica que proporcione unha plataforma adecuada para unha sociedade informada, permitindo aos seus membros participar nos debates da esfera pública e tomar decisións de maneira informadas sobre as cuestións que lles afectan (García-García e Lema-Blanco, 2021). O pluralismo dos medios aparece como unha preocupación compartida polos estados democráticos europeos, aínda que historicamente estes centraron as súas políticas de comunicación en promover a convivencia dun sector público forte cun sector dos medios audiovisuais privado-comerciais cada vez máis liberalizado. Porén, a concentración da propiedade dos medios, a minguante presenza de medios locais, e maila falta de transparencia na propiedade das empresas de comunicación e dos intermediarios dixitais constitúe un serio risco para a pluralidade informativa nunha trintena de países europeos  (Media Pluralism Monitor, 2020).