JAG'LARNI O'TKIR ODONTOGEN PERIOSTITINI ERTA TASHXISLASH VA DAVOLASHNI TAKOMILLASHTIRISH

Yuz-jag‘ soxasi periostiti — bu suyak usti qavati bo‘lgan periostning yallig‘lanishi bilan kechadigan, og‘riqli, o‘tkir yoki surunkali yiringli jarayon bo‘lib, u asosan odontogen (tish ildizi bilan bog‘liq) sabablar tufayli yuzaga keladi. Ushbu kasallik stomatologiyada keng tarqalgan bo‘lib, o‘z vaqtida aniqlanmagan yoki noto‘g‘ri davolangan hollarda og‘ir asoratlar, jumladan, osteomiyelit, flegmona, limfadenit va hatto umumiy infeksion-toksik holatlar bilan kechishi mumkin. Maqolada yuz-jag‘ soxasi periostitining etiologiyasi (kelib chiqish sabablari), klinik kechish shakllari (seroz, yiringli, diffuz va surunkali turlari), ularning simptomatikasi, tashxis qo‘yish mezonlari va davolash bosqichlari haqida batafsil ma’lumot beriladi. Xususan, periostitning ilk belgilari — og‘riq, yumshoq to‘qimalar shishi, tana haroratining ko‘tarilishi, og‘iz ochilishining cheklanishi, limfa tugunlarining kattalashuvi kabi klinik belgilar asosida kasallikning og‘irlik darajasini baholash metodlari tahlil etiladi. Maqolada, shuningdek, zamonaviy tashxis vositalari — radiologik tekshiruvlar (rentgen, ortopantomogramma, CBCT), laborator ko‘rsatkichlar va vizual ko‘riklar asosida periostitni boshqa yuz-jag‘ yallig‘lanish kasalliklaridan farqlash (differensial diagnostika) yondashuvlari yoritilgan. Davolash bosqichlarida mahalliy og‘riqni kamaytirish, yallig‘lanishni bostirish, yiringli o‘choqlarni drenajlash, antibiotik va yallig‘lanishga qarshi terapiyani to‘g‘ri tanlash kabi muhim jihatlarga e’tibor qaratilgan. Muallif, periostit bilan og‘rigan bemorlarni davolashda individual yondashuvning ahamiyatini, ayniqsa, bemorning yoshi, umumiy holati va kasallik bosqichiga qarab davolash rejasini tanlash zarurligini ta’kidlaydi. Reabilitatsiya bosqichida esa bemorning og‘iz bo‘shlig‘i gigienasiga amal qilishi, immun tizimini mustahkamlash va takroriy yallig‘lanishlarning oldini olish yo‘llari ko‘rib chiqiladi. Mazkur maqola stomatologik amaliyotda keng uchraydigan periostit kasalligini erta aniqlash, to‘g‘ri tashxislash va samarali davolashga doir bilim va tajribalarni chuqurlashtirishga xizmat qiladi. U nafaqat stomatolog mutaxassislar, balki umumiy amaliyot shifokorlari uchun ham amaliy jihatdan foydali metodik qo‘llanma vazifasini bajaradi.