Avicultura artesanal na Reserva da Biosfera Mariñas Coruñesas. Guía para persoas novas entrantes

Esta guía está adaptada ao contexto territorial  da Reserva da Biosfera “Mariñas coruñesas e Terras do Mandeo”. O seu  Órgano Xestor é a Asociación de Desenvolvemento Rural Mariñas Betanzos. Polo tanto, as referencias e os interlocutores están vinculados ó ámbito específico desta área.

A Reserva de Biosfera “Mariñas Coruñesas e Terras do Mandeo”, é unha das Reservas da Biosfera máis poboadas de España, dispoñendo dun gran centro de consumo na zona de influencia, como é a cidade da Coruña. Isto supón unha grande oportunidade para a comercialización de produtos alimentarios orixinarios deste territorio, idóneo para as pequenas producións agroecolóxicas e para o establecemento de persoas novas entrantes.

Un dos sectores que se considera de interese é o da avicultura artesanal, téndose detectado un incremento no número de persoas interesadas nesta actividade. É unha actividade que pode acometerse con facilidade dende un inicio como NE, sen ter que realizar unha gran inversión. Cómpre destacar que a avicultura artesanal ten que ser entendida como unha actividade complementaria á renda, pois como única actividade pode non ser o suficientemente rendible. Porén, pode supoñer unha parte moi interesante do proxecto produtivo, compatible e mesmo positivo para as outras producións contempladas.

Este documento pretende servir de guía de apoio as persoas novas entrantes na avicultura artesanal na Reserva da Biosfera Mariñas Coruñesas.