"MENTALITET" TUSHUNCHASINING TARIXIY KELIB CHIQISHI

"Mentalitet" so'zi turli jamiyatlarda ilmiy va keng omma tomonidan turli ma’no birliklarini anglatish uchun qo'llanilgan zamonaviy atamadir. Bu so'z lotin tilidan olingan bo'lib, mentalis - “aqliy” degan ma’noni anglatadi va taxminan XIV asr manbalarida uchraydi. Bu tushunchaning mazmuni o‘z-o‘zidan juda noaniq va ancha kengdir. “Mentalitet” jamiyat, millat, jamoa yoki alohida shaxsning tarixiy tarkib topgan tafakkur darajasi, madaniy salohiyati, ularning hayot qonunlarini tahlil etish kuchi, muayyan ijtimoiy sharoitlardagi aqliy qobiliyati, ruhiy quvvati kabi tushunchalarni anglatadi.