СОВЕТ ҲОКИМИЯТИНИНГ ТУРКИСТОНДА ПАХТАЧИЛИКНИ РИВОЖЛАНТИРИШ БЎЙИЧА АМАЛГА ОШИРГАН ЧОРА-ТАДБИРЛАРИ ХУСУСИДА

Биринчи жаҳон урушида йўқотилган ишчи кучлари, истиқлолчиларнинг қизил армия ва советларга қарши қуролли кураши ҳамда советлар томонидан “ҳарбий коммунизм” сиёсатининг амалга оширилиши оқибатида Туркистон қишлоқ хўжалиги чуқур таназзулга учради. Натижада, барча деҳқон хўжаликлари хонавайрон бўлди. Деҳқонлар, жумладан, пахтакорларнинг қашшоқлашиш даражаси ошиб кетди. Шаҳар ва қишлоқ аҳолисининг кун кечириш учун зарур бўлган миқдордаги озиқ-овқат маҳсулотлари билан таъминоти йўқ даражага тушиб қолди.