ARTISHOK "GREEN GOLD" NAVINING OʻSISH VA RIVOJLANISH FAZALARI.

Inson oʻz hayoti davomida doimiy foydalaniladigan oʻsimliklardan tashqari boshqa serhosil, yangi turlar hisobiga oziqa beruvchi oʻsimliklarni uzluksiz koʻpaytirib borishi maqsadga muvofiqdir. Ana shunday oʻsimliklardan biri, Qoqioʻtdoshlar (Asteraceae) oilasiga mansub artishok (Cynara scolymus L.)  hisoblanadi. Hozirgi kunda dunyo aholisi sonining ortishi, oʻz navbatida, oziq-ovqat va dori-darmon mahsulotlariga boʻlgan talabni yanada oshirmoqda. Artishok Oʻzbekiston uchun noanʻanaviy boʻlgan istiqbolli qimmatbaho oʻsimlik boʻlib, undan yashil holida silos, senaj, quruq yem-xashak, oziq-ovqat, farmasevtika sanoati uchun xomashyo va chorva mollariga ozuqa sifatida muhim ahamiyatga egadir.