МЕДИАМАТНДА ИМПЛИКАТУРА БИРЛИКЛАРИНИНГ ИФОДАЛАНИШИ

Газета матнларида ахборот баёни яширин (имплицит) шаклда ифодаланиши муаллифнинг коммуникатив мақсади, нияти билан боғлиқ. «Ахборотнинг яширин шакли ошкора баён таркибига жойлаштирилади. Бу яширин мазмун деб юритилади.» [18, 75-93] Тилшунос олим Г.П.Грайс мазмуннинг яширин компонентлари ҳисобланган импликация, имплицит ифода, импликатура, импликат атамаларини умумий тушунча сифатида таърифлайди.  У илк бор импликатура тушунчасини прагмалингвистикага оид ҳодиса сифатида тадқиқ қилди ва  матнда ҳосил бўладиган яширин маънони импликатура ҳодисаси дея талқин қилди.  Файласуф П.Грайснинг прагматика назариясига кўра, нутқий акт орқали узатилган ахборот икки қисмга ажралади: нима дейилди? («what is said»), нимани назарда тутилди? («what is meant»), айнан бу оппозицияда импликатура жойлашади. (2, 217-237) Импликатура – сўзловчи (матн муаллифи – таъкид М.С.) назарда тутган тингловчи (ўқувчи, газетхон – таъкид М.С.) англаши, илғаб олиши лозим бўлган имплицит ахборотдир. (11) Кўплаб тадқиқотларда яширин (имплицит) ахборот тушунчаси билан бирга импликатура, импликация, импликационал, импликат, имплицитлик атамалари ҳам юритиб келинмоқда ва бу тушунчаларнинг қўлланиши борасида аниқлик киритиш зарурати пайдо бўлмоқда.