ФУҚАРОЛАР СОҒЛИҒИНИ САҚЛАШ ТУШУНЧАСИ ВА УНИНГ ЮРИДИК ТАВСИФИ

Фуқаронинг соғлиғи масаласи ўзига хос номоддий неъмат ва ижтимоий қадрият, шахсий номулкий ҳуқуқ сифатида ҳар томонлама талқин этилиши ва тушинилиши мумкин бўлган категория ҳисобланади. Бунда фуқаро соғлиғи тушунчаси энг аввало фуқаронинг инсон – биологик индивид сифатидаги организмларининг тўлиқ ва белгиланган даражада ишлаши сифатида тушунилиши ҳам мумкин. Бироқ юридик категория сифатида фуқаронинг соғлиғи аввало унинг шахсий номулкий ҳуқуқи ҳамда фуқаролик ҳуқуқларининг объекти сифатида номоддий неъматдир. Шу сабабли мазкур номоддий неъматнинг фуқаролик ҳуқуқлари объектлари тизимидаги ўрни белгиланиши талаб этилади. ФКнинг 81-моддаси фуқаролик ҳуқуқлари объектлари таркибига шахсий номулкий ҳуқуқлар ва бошқа моддий ҳамда номоддий бойликлар киради, бу эса ўз навбатида, юридик категория сифатида фуқароларнинг соғлиғи шахсий номулкий ҳуқуқ ва номоддий бойлик сифатида тан олинишини кўрсатади.