2013.04.26. Тамара МЕРОВА О̄лупсав нэ̄пакн хансаве. Ма̄ньполь э̄тпост ля̄ххал тотнэ ма̄хум Ханты-Мансийский государственный архивколн во̄виньта̄лве̄сыт. Тот рӯпитан хо̄тпат та̄нанылн йильпи та̄ратым нэ̄пакыт урыл потыртасыт ос дискыт суссылтасыт. Пе̄с порат Самароват Пётр Ефимович Кузнецов о̄лум. XIX нот оигпам та̄лытыт ос XX нот палытыл Кузнецовыт ще̄мья о̄лыглам тэ̄лат ань пуссын та̄рапаттуве̄сыт. Та̄н пе̄с хурияныл ос документаныл архивыт о̄выл щёс суссылтаве̄сыт. Ань рӯтаныл Тюмень ос Ярославль ӯсыт о̄лэ̄гыт. Тувыл кит йильпи нэ̄пакыг та̄ратавесы̄г. Акв нэ̄пак О. В. Буксина ос мо̄тан О. Н. Гаврилова хассы̄г, тэ̄н нэ̄пакаге̄н архивт рӯпитан хо̄тпатн та̄ратаӈкве нё̄твесы̄г. Ольга Владимировна Буксина (Маслова) такви Москват о̄лы ос «Новости Югры» газетан ля̄ххалыт хансы. Тав «Мой жизненный закат прекрасен» нампа нэ̄паке̄т Иван Михайлович Губкин академик урыл потыртас. О̄йка 45 та̄лэ порат Варвара Боярская, ма̄ньлат нэ̄, ёт хо̄нтхатас. То̄нт нэ̄ ва̄т нупыл акв та̄лэ то̄влыс. Тэ̄н акван ат минасы̄г кос, ос то̄внакт аквъёт рӯпитым яласасы̄г. Иван Михайлович ма̄во̄й киснэ ма̄т рӯпитас, Варвара картат по̄сыт по̄слыс. Тувыл о̄йка сымын э̄рнэ а̄гитэ̄нтыл тэ̄нки халэ̄нт пищмат хасмы̄г. 1939 та̄лт Губкин а̄тимыг е̄мтыс, ос ётыл са̄р э̄кватэ̄н пищманэ Российский АН архивколн тотымат. Та̄наныл тот Валентина Васильевна Патранова, «Новости Югры» газетат рӯпитан э̄ква, ка̄сала̄санэ ос Ольга Буксинан нэ̄пак щё̄питаӈкве ла̄выс. Ань ос тамле пӯмыщ йильпи нэ̄пак ва̄рвес. Мо̄т «Детство, опалённое войной» нампа нэ̄пакт Ольга Гаврилова Урай ӯст о̄лум матумпа̄ла хо̄тпат потраныл хассанэ. Та ӯст школат ханищтахтын ня̄врамыт «Росток» нампа объединеният о̄с потрыт хансым яласэ̄гыт. Ань яныгпа̄ла хо̄тпат о̄лум та̄рвитыӈ тэ̄ланыл урыл хансым потраныл пуссын акв нэ̄пакын щё̄питаве̄сыт. Ханты-Мансийск ӯсув урыл «Город Солнца» нампа диск ва̄рима. «Архивы Югории» №12 йильпи журнал ос «Югорский калейдоскоп событий на 2013» календарь суссылтавесы̄г. Ты нэ̄пакыт манос дискыт пуссын 2012 та̄лн хансыглым проектыт щирыл ва̄рве̄сыт. Ань ты та̄л ты архивкол «История исчезнувших деревень» нампа мо̄т проект щирыл рӯпитаӈкве паты. Налыман та̄л ювле хультум порат 292 ма̄нь па̄выл округ янытыл картан хансым о̄лсыт. Ань 194 ма̄нь па̄влытт ма̄хум о̄луӈкве туп хультмыт. Мо̄т па̄вылквет хоталь со̄ймысыт, хумле е̄мтсыт? Хунь та̄н о̄лве̄сыт, маныр нам о̄щсыт? Хотьют тот о̄выл кол ӯнттыглас ос хоты хо̄тпат тув о̄лмыгта̄лсыт? Пуссын ты тэ̄лат та̄рапаттын ма̄гыс округт о̄лнэ ма̄хум китыглавет. Хотьют нё̄туӈкве ка̄сащи ке, аквъёт рӯпитаӈкве во̄вавет. Таима̄гыс ма̄хум та̄нки самын патум ма̄нь па̄вланыл урыл потыртаӈкве ве̄рме̄гыт. Пе̄с хурит, матыр документыт о̄ньще̄гыт ке, архивын о̄с вос тотнуваныл. 2014 та̄лт архивт рӯпитан хо̄тпат «Памяти исчезнувших сёл и деревень Ханты-Мансийского района» нэ̄пак щё̄питаӈкве ла̄вхатсыт. Ма̄н ос ма̄нки ма̄ньщи ма̄хманув о̄лум па̄влыт нэ̄пакн щё̄питануванӯв ке, такем ёмас о̄лнӯв. Са̄выӈпа̄лэ туп ащо̄йканув самын патум пе̄с нэ̄паканылт хансым хультсыт . О̄влэ̄т хум хо̄тпанув репрессия та̄лытыт хотталь тотыгпаве̄сыт. Тувыл мо̄таныт хо̄нтлан ма̄т порславе̄сыт. Па̄вланувт ма̄ньщи ще̄мьят мощщамасыт. Ётыл колхозыт ква̄лтапаптуве̄сыт. Ма̄нь па̄влыт акв яныг па̄влын тотве̄сыт. Тащирыл ма̄ньщи па̄вланув суйта̄лыг та патсыт. То̄внакт наманыл э̄ргытт хӯнтлыгла̄лыянӯв ос пе̄с йис мо̄йтытт ловиньталыянув: Ме̄сыг па̄выл, Кӯртья па̄выл, Мувынке̄с, Ра̄ктья па̄выл, Сӯма па̄выл, Хохаӈья па̄выл. . Ос пе̄с потыр о̄ньщегы̄н ке, на̄н gahm a o @ y a n d e x . r u электронный почтан ла̄тыӈ хансэ̄н. Ты тэ̄лат ма̄гыс Светлана Владимировна Тюлина пуӈктоты. Мо̄лал та архивыт акванатым пе̄с документыт, хурит пуссын ищхӣпыӈ утын по̄слуве̄сыт. Ос «Электронный архив Югры» нампа сайтын ва̄рве̄сыт. На̄н ань матыр э̄рнэ пе̄с нэ̄пакыт тот сунсыглаӈкве ве̄рмияны̄н. Ты ла̄тӈыт щирыл кисхатэ̄н: arhivugra. admhmao. ru манос gahmao. ru Ма̄хум ань потраныл манос хурияныл пищмал ке̄тыянын ке, адресэ тамле: 628011, Ханты-Мансийск ӯс, Энгельса ӯсхулы, 14 колэ. Манос 8(3467) 32-97-76, 33-14-67 телефоныг хосыт звонитэ̄н. 1050 2013.04.26. Людмила ТЕТКИНА ТЕТКИНА Советский ӯст Ӯринэ̄ква хо̄тал янытлавес. «Ӯринэ̄ква хо̄тал» янытлан ма̄гсыл Советский ӯскант са̄в мир акванатхатыгласыт. Са̄в ма̄хум районныл тув во̄виньта̄лве̄сыт. Ӯсыӈ мир ты хо̄тал урыл пуссын ва̄гыт ос таве янытлаӈкве ка̄сыӈ тӯя ёхталэ̄гыт. Та̄л сыс Советский ӯст ос районт 12 ма̄ньщи ос ханты ня̄врам самын патсыт. Ялпыӈ хо̄тал о̄вылтахтам порат та̄н ща̄няныла̄щаныл пуссын янытлаве̄сыт ос мӯйлупсал мӯйлуптаве̄сыт. Ӯскант тыналахтын ос суссылтан ва̄рмалиг рӯпитасы̄г. Ма̄щтыр хо̄тпат та̄нки ва̄рум пормасаныл ос сувенираныл тот тыналасаныл. Ня̄врамыт о̄с са̄всыр щирыл пӯмщалаве̄сыт, та̄н са̄лыӈ сун ӯлтта поргысыт, тыньщаӈ па̄хвтысыт. Мӯй ма̄хум пуссын тот со̄ламатыл тыттуве̄сыт ос ща̄ил айтве̄сыт. Ӯсанылт ос та районт о̄лнэ ансамблит э̄ргысыт ос йӣквысыт. Та ма̄т ань мощща соссаӈ хо̄тпа о̄лы. Ма̄н ма̄ньщи ос ханты йӣкванув рущ йӣквыт ёт аквантэ̄лыгтаве̄сыт. Ос маснутыт яныг хансал ю̄нтавет. Тамле супыт соссаӈ хо̄тпанув нэ̄мхуньт ат ю̄нтыгласыт. Туп таи ёмас, ты та̄л тув ма̄ньщи ос ханты э̄ргыт, йӣквыт ва̄нэ хо̄тпат во̄виньта̄лве̄сыт. Маргарита Рябова ос Людмила Хомляк Белоярский ӯсныл «Увас хурамат» ансаблит э̄рге̄г, Фаина Иштимирова А̄с-угорский театрыт рӯпиты ос Виктор Банк «Ешак най» ансаблит йӣкви, та̄н аквъёт концерт ва̄рыгласыт. Та̄н ма̄ньщи ос ханты щирыл э̄ргуӈкве ос йӣквуӈкве ёмащаквег ха̄сэ̄гыт. Тамле ялпыӈ хо̄тал ань округувт таима̄гсыл ва̄рыглаве, мо̄т мирыт ма̄н культурагув урыл са̄внув вос ва̄гыт. Ма̄ньщит, хантыт пе̄с йис ва̄рмаляныл ул вос ёрувлыяныл. Ты ялпыӈ хо̄тал ва̄рыглам хо̄тпат тох ла̄всыт, Советский ӯст о̄лнэ мир «Ӯринэ̄ква хо̄тал» янытлаӈкве сака э̄руптэ̄гыт. Ты та̄л кон сака ащирмаӈ ос во̄тыӈ хо̄тал о̄лыс, мощща ма̄хум тув ёхталас. Ялпыӈ хо̄тал о̄лум порат ам районныл ёхталам ма̄ньщит ёт потрамаӈкве тахсум ос китыглахтуӈкве, ты ялпыӈ хо̄тал та̄нанылн мӯстыс ман а̄ти. Туп акв нэ̄ Ольга Чистякова (Дунаева) Таёжный па̄вылныл ам ётум потыртас. Мо̄таныт пуссын молях сысы тахасыт. Округ янытыл яласым ам акваг са̄в ма̄хум ёт хо̄нтхатыглэ̄гум, тамле ва̄рмаль воссыг нэ̄мхо̄т ат ва̄щиньтасум. Манрыг потыртаӈкве ат ка̄сащасыт, аты торгамтаслум. 1050 2013.04.26. Александр ВЬЮТКИН ВЬЮТКИН Па̄сcаӈ ка̄тыл каснэ ма̄т та̄ксарыг о̄лы. Э̄тпос о̄вылтахтам порат ма̄ньщи боксёрув Руслан Проводников юв Ха̄льӯсн миннэ лё̄ӈхе̄т Ханты-Мансийск ӯсн хо̄иглас. Тыг ёхталаме̄т тав «Югра» телерадиоком– паниян потыртаӈкве во̄виньта̄лвес. Тувыл технолого–педагогический колледжин ма̄ньлат ма̄хум ёт потыртан ма̄гсыл щалтсас. Хӯрмит ма̄н тав округ мирколн яныг кӯщаит ос Н. В. Комарова губернаторув ёт хо̄нтхатыглаӈкве Ассамблеят рӯпитан ма̄хманувн во̄виньта̄лвес. Боксёрув ёт ва̄йхатнэ кастыл яныгса̄т ляпатем ма̄ньлат хо̄тпа тув ёхталасыт. О̄влэ̄т Руслан такви ще̄мьятэ ос мо̄лалнув о̄лум касылэ урыл мощ потыртас. На̄н тав потре э̄лаль ло̄виньтэлы̄н. – Хунь ам ты касылн щё̄питахтасум, США ос Россия то̄ва ма̄т о̄лнэ ма̄хум а̄нумн интернет хосыт са̄всыр пищмат хассыт: «Руслан, наӈ Тимоти ёт касуӈкв щар наска̄ссыг ла̄вхатсын. Наӈ ё̄рын тав ё̄ре̄н щар ат ёхты. Тав наӈын ринг тӣврыт о̄выл тит раундыт тах ра̄тытэ. Ве̄рми ос тох е̄мтуӈкв, Руслан, наӈ тувыл титка̄тпалыл пувим ма̄хманы̄н рингыл кональ нас ва̄нттавен». Та̄н те̄тум пищманылн ам та̄ра ювле ла̄тыӈ ла̄всум. Ам а̄ти наска̄ссыг ты касылн щё̄питахтасум, ам таве ве̄рмилум. Хотьют ты касыл сунсыс, тав ва̄гтэ, ме̄н халме̄нт хотьютаме̄н ма̄к ё̄рыг о̄лы». Тав потыртан ма̄ныл а̄стуме юипа̄лт, титыглаӈкв о̄вылтавес. – Руслан, наӈ хунь хоса юн ат о̄лыглэ̄гын, ще̄мьян маныр ты урыл ла̄ве̄гыт? – Со̄ль, тыи пуссын о̄лыглы, ме̄н э̄кваме̄нтыл ме̄нти халме̄нт ты урыл потыртасме̄н. Э̄квам наме Наталья, тав а̄нумн хуньт хосат боксыл по̄хан минуӈкв ла̄выглас. Ам таве̄н ла̄всум: «Бокс – тыи ам рӯпатам, ам тыгыл по̄хан ат минэ̄гум». Та па̄сныл ты урыл потыр воссыг аты е̄мталас. Ань Наташам а̄нумн аквписыг нё̄ты. – Руслан, ань о̄лнэ тренерын Фреди Роуч ёт хумус наӈ ва̄йхатсын? – Фреди Роуч – тав яныг намыӈ тренер, мир янытыл ёмщакв ва̄ве. Тав Лос-Анджелес ӯст о̄лы, тот рӯпиты. Хунь щар о̄выл порат ам тав ётэ ва̄йхатасум, тав ётэ по̄слахтасум, та па̄сыл ты хум урыл ам са̄в ёмас ла̄тыӈ ла̄вуӈкв ве̄рме̄гум. Тав ётэ рӯпитаӈкве са̄в ма̄хум ка̄саще̄гыт. Ос Фреди Роуч таве̄н э̄рнэ боксёр такви пе̄рии. Хунь ам тав палтэ е̄мтсум, пуссын ла̄всыт: «Наӈ со̄тыӈ хо̄тпа о̄лнэн». О̄влэ̄т ам намум нэ̄мхотьютын атыпыл хӯлыглавес. Хунь хотьютын э̄рмыглэ̄гум, та̄н «Эй, Русский» намыл а̄нум во̄всаныл. Тох о̄лыглам порат ам нас номсысум, э̄ри мощ ве̄ритаӈкв. Фреди Роуч ёт хунь щё̄питахтуӈкв патсум, та юипалт та̄н ам ётум о̄с ва̄йхатуӈкв патсыт. Ань ос Тимоти Бредли ёт алхатамум юипа̄лт та̄н но̄хлю̄лим ка̄тпатта ра̄тсыт. Ань та̄н намум ва̄ганыл, хоты ма̄ныл ам о̄лэ̄гум о̄с ва̄гыт. Ма̄ньлат ма̄хмыт ёт потыртаме юипа̄лт, Руслан та̄ра округ мирколн минас. Тот Т. С. Гоголева ёт тэ̄н са̄всыр э̄лаль ва̄рнэ тэ̄ланэ̄н урыл потыртасы̄г. Э̄типа̄лаг ос боксёрув кӯщаит ёт потыртас. Хотьютын ма̄ныр пӯмащ о̄лыс, тав та урыл Руслан та титыгластэ. Соссаӈ мир Ассамблея кӯщаиг о̄лнэ хум Е. Д. Айпин Руслан ка̄тсор щё̄сыл мӯйлуптастэ ос пуста̄гыл о̄лнэ ла̄тӈыл ла̄выстэ. Та юипа̄лт Н. В. Комарова Руслан ёт хо̄нтхатыглаӈкве ёхтыс. Ма̄ньщи хум такви каснэ па̄ссатэ губернаторувн мӯйлуптастэ. Потре̄н халт Наталья Владимировна титыглахтас: «Бокс ёмщакв э̄лаль тотнэ ма̄гсыл иӈ маныр э̄ри? » Руслан ювле ла̄выс: «Ты ма̄гсыл касуӈкве ханищтахтын ёмас колыт ос каснэ кастыл щё̄питахтын пормасыт ёвтуӈкве э̄ре̄гыт». Губернаторув округувт о̄лнэ боксыл ханищтан колытын нё̄туӈкв ла̄вхатас. Та юипа̄лт Н. В. Комарова такви ва̄ӈын кӯщаиг о̄лнэ хумитэ Алексей Путин Руслан ёт потыртаӈкве ла̄выстэ ос титыглахтуӈкв, ты касыл э̄лаль тотнэ ма̄гсыл маныр э̄ри. Руслан такви номтанэ пуссын таве̄н потыртасанэ. Алексей Путин Ха̄льӯс районныл округ мирколн заявка нампа нэ̄пак те̄туӈкв ла̄выс. Та нэ̄пак тыг те̄тнэ юипа̄лт, аквта та̄ра пуссын э̄рнэ пормасыт тах ёвтавет. 1050 2013.04.26. Тамара МЕРОВА Ма̄н таве 95та̄лэ̄тыл янытлылӯв! Мо̄лал Саранпа̄вылныл пищма ёхтыс. Ма̄навн музеит рӯпитан кӯщай нэ̄ Вера Павловна Комкова хансыс. Тав тамле ща̄гт ла̄тыӈ ке̄тыс: ты э̄тпос хӯрмит хо̄талэ̄т Анастасия Ивановна Сангилева 95 та̄лэ то̄влыс. Тав та па̄влыт щар яныгпа̄ла хо̄тпаг о̄лы. Э̄ква Алы Няхлаӈ па̄вылт самын патыс, а̄ще Иван Иванович Вынгилев тувыл о̄лыс, оматэ ос Дарья Яковлевна Ромбандеева Мувынке̄с па̄вылныл о̄лум нэ̄. Ты э̄кваго̄йкаг хӯрум пыг ос кит а̄ги янмалтасы̄г. Колта̄гланыл щёлыӈыг о̄лыс, са̄в са̄лы ос ӯйхул о̄щсыт. Каӈканэ а̄ще ёт са̄лы ӯрим яласасыт, Наста ма̄нь та̄гыл Марья увщитэ̄нтыл оматэ̄н колсори рӯпата ва̄руӈкве нё̄тсы̄г. 1938 репрессия пилыщмаӈ та̄лытыт Сангилевыт колта̄гыл са̄лыяныл, ӯйхуланыл хотняртумтаве̄сыт. Туп акв мисыл, лувыл ос матахмат са̄лыл хультуптымат. Александр, Фома, Семён каӈканэ о̄с хотталь ва̄та̄л ма̄н тотыгпаве̄сыт. Мо̄лтынув ущ та̄рапатыс, та̄н пуссын Ханты-Мансийскат порслымат. Яныг хо̄нт е̄мтум порат Наста 23 та̄лэ то̄влыс. То̄нт нэ̄ хо̄тпат пуссын хӯл алыщласыт. Тыи сака та̄рвитыӈ рӯпата, э̄тэхо̄талэ ва̄гта̄л патнэ мус ма̄хум тот та рӯпитасыт. Хӯл алыщлым яласыматэ тав тот Иван Сангилев ёт хо̄нтхатас. Ётыл тэ̄н акванминасы̄г. Иван Егорович Ха̄ӈла па̄вылныл о̄лыс. 1945 та̄л тӯяг тэ̄н ты па̄вылн ва̄нтлысы̄г, аквъёт хӯл алыщлан пиркатат рӯпитаӈкв патсы̄г. Э̄кваго̄йкаг Николай, Пётр, Дорофей пыганэ̄н ос Даша а̄гитэ̄н янмалтасы̄г. 1952 та̄л та̄н Саранпа̄вылн ва̄нтлысыт. Анастасия Ивановна мис поснэ ма̄т рӯпитаӈкве патыс. Ос э̄типа̄лаг юн ла̄мпатэ пе̄ламтытэ, колканын ӯнтым маснут ю̄нтыс. О̄йкатэ ос ня̄враманэ ла̄гыл маснутыл, сахил, мольщаӈыл такви ю̄нтыгласанэ. Анастасия Ивановна сака ёмас ос нёмса хо̄тпа. Тав нэ̄мхуньт мо̄т э̄лумхо̄лас нупыл лю̄ль ла̄тыӈ ат ла̄выглас, тав ёмас сымыл, ёмас номтыл о̄лы. Ма̄ньлат а̄гитнпыгытн э̄ква ла̄выглы, са̄ртын ма̄хум сака щёлыӈыг ат о̄лсыт, нуса ва̄сыт ос та̄нки халанылт сака юртыӈыщ о̄лсыт, пуссын акваннё̄тхатсыт. Ань тай ла̄кква ма̄н миныгласыт, мо̄рсыӈ порат акванхо̄нтхатыглэ̄гыт. Щир мус та̄нки халанылт потыртаӈкве аман ат ха̄сэ̄гыт, аман ат таӈхе̄гыт. Э̄ква ань Дарья а̄гитэ̄нтыл аквъёт о̄лэ̄г. Апганэ̄н уральтаве, та̄н пуссын мӯйлуӈкве ёхталэ̄гыт. Анастасия Ивановна ла̄ви, тав акваг ка̄ркамыг рӯпитас, таима̄гыс са̄в та̄л о̄лы. Э̄лумхо̄лас рӯпатаныл нэ̄мхуньт ул вос пилы ос таквина̄тэ ул вос са̄литытэ. Я̄тил Анастасия Ивановна, ма̄н наӈын яныг намхо̄талыл янытлылӯв! Са̄в та̄л сыс наӈ са̄всыр та̄рвит ва̄рмалит ва̄щиньтасын. Та̄наныл пуссын ёмщакв ва̄рсанын, по̄хан лаквтысанын. Таима̄гыс ма̄н яныг пӯмащипа ла̄ве̄в, ма̄н ань наӈынныл аквтох э̄лаль о̄луӈкве ханищтахтэ̄в. Мо̄т э̄лумхо̄лас нупыл сымыӈыщ суснэ хо̄тпаг, ёмас номтыл о̄лнэ хо̄тпаг вос хультэ̄в. Са̄в со̄т, са̄в щунь наӈын ла̄ве̄в! Ма̄н, ма̄ньщи газетат рӯпитан хо̄тпат, Анастасия Ивановнан паща ла̄тыӈ ке̄тэ̄в ос 95 та̄лыл янытлылӯв! Пус ка̄т, пус ла̄гыл таве̄н, То̄рум ёт, О̄тыр ёт! 1050 2013.04.26. Галина КОНДИНА Ма̄н таве янытлылӯв. Яныгполь э̄тпос 22 хо̄талт яныг ма̄ньщи учёныюв, доктор нам о̄щнэ хо̄тпав Евдокия Ивановна Ромбандеева намхо̄талэ, тав 1928 та̄лт Ха̄льӯс район Хо̄сло̄х па̄вылт самын патыс. Ма̄ньта̄гыл ханищтахтуӈкве ка̄сащас, матыра̄ти пуссын сымыӈыщ ва̄рыс. Та порат самын патум ма̄хум ма̄ньта̄гыл рӯпитасыт. Евдокия Ивановна тэ̄лы ханищтахтас, туи пум, щилос ва̄рим, хӯл алыщлым рӯпитас. Са̄т класс Кульпас па̄вылт а̄стлас ос Ханты-Мансийск ӯсн педучилищан ханищтахтуӈкве минас, 1947 та̄лт таве а̄стластэ. 1947-49 та̄лытт Хо̄сло̄хт ня̄врамыт ханищтас. То̄нт ты торгамтастэ – ханищтан нэ̄пак щар ат то̄вылхаты. Тувыл э̄лаль Ленинград ӯсн А. А. Жданов нампа университетн ханищтахтуӈкве минас. Тот ханищтахтаме сыс ня̄врамыт ловиньтан ма̄гсыл нэ̄пакыт ма̄ньщи ла̄тӈыл толмащлас. 1954 та̄лт «Мансийскоруcский словарь» та̄ратас. 1964 та̄лт кандидатский диссертациятэ хансыс ос сака ёмщакв таве вуянтастэ, та та̄л кандидат наук намыл майвес. Евдокия Ивановна са̄в та̄л Москва ӯст о̄лыс, тот рӯпитас. 1990 та̄лыт порат округ кӯщаитын тав рӯпитаӈкве тыг во̄ввес. Ань тыг мус тав А̄с-угорский институт рӯпиты. Нотэ палытыл Евдокия Ивановна 150 са̄виттем нэ̄пак та̄ратас. Тэ̄лытӯяг йильпи, осыӈ нэ̄паке «Медвежьи эпические песни манси (вогулов)» ва̄рвес, тав 657 страница о̄ньщи. Ань тав наме округт о̄лнэ ка̄сыӈ хо̄тпан ва̄ве, мо̄тпал хо̄н ма̄т ос тыт тав хансум нэ̄паканэ щирыл ма̄хум ма̄ньщи ла̄тӈув ханищтыяныл. Та̄рвитыӈ порат яныгмам хо̄тпа матъёмас наука щирыл э̄лаль рӯпитаӈкве патыс ос ма̄н ла̄тӈув ань молях ат ёрувлаве. Евдокия Ивановна са̄в янытлан нэ̄пакыт ос ма̄гылт о̄щнэ по̄сыт о̄ньщи: «За заслуги перед Отечеством II степени», «Заслуженный деятель науки Российской Федерации», «Заслуженный работник образования», «Почётный гражданин ХМАО», «Труженик тыла», «Ветеран труда», «50 лет Победы в ВОВ 1941-45 г. г. », «60 лет Победы в ВОВ 1941-45 г. г. » ос мо̄таныт. А̄с-угорский институт та хо̄тал конференция ва̄рыглас, тув учёный хо̄тпат са̄в па̄лыл ёхталасыт, та̄нти потраныл ловиньтасыт. Та урыл мо̄тыт газетавт ловиньтэ̄н. 1050 2013.04.26. Тамара МЕРОВА Хӯлтыглан ла̄тыӈ. Округ губернаторув Наталья Комарова ва̄ӈын хо̄тпанэ акванатыгласанэ. Та̄н ма̄хум пенсиянылн но̄хнё̄тнэ олныт ос мо̄т са̄всыр нё̄тмилыт урыл потыртасыт. Рӯпатаныл по̄хан минам пенсионерыт ты та̄л о̄вылтахтам па̄сныл пенсия коныпал олннё̄тмилыл (рущ щирыл «дополнительный пенсияг» ла̄ваве) ойтуӈкве о̄с патавет. Тыи туп 2010 та̄л яныг таквс э̄тпос ва̄т хо̄тал мус пенсияныл ма̄гыс заявление хансум ма̄хум та̄н тамле олныл тах ойтавет. Мо̄лты та̄л сӯкыр э̄тпос па̄сныл яныг нам о̄щнэ манос ма̄гылн тагатан по̄сыл маим хо̄тпат туп та̄н акв тамле олннё̄тмилыл майлуве̄сыт. Ань округ экономика департаментыт о̄лнэ кӯщай хум Павел Сидоров ла̄выс: «Ты та̄л ва̄т са̄грапнал э̄тпос о̄выл хо̄талэ̄ныл ты олннё̄тмилыл рӯпатаныл по̄хан минам пенсионеранув пуссын ойтуӈкве патавет. Тох ка̄сыӈ яныгпа̄ла хо̄тпа кит «прожиточный минимум» мус пенсиятэ са̄вми». Округ Правительство па̄лыл ты ва̄рмаль ма̄гыс 20132015 та̄лытн 435 млн. арыгкем солко̄ви та̄стым о̄лы. Югра янытыл тамле пенсия олннё̄тмилыл 170 со̄тыра хо̄тпа мивет. Губернатор прессслужбаныл ке̄тым ла̄тыӈ Т. МЕРОВА ма̄ньщи ла̄тӈыл хансыстэ. 1050 2013.04.26. Раиса Решетникова (RUS)Валентина Хозумова (MAN) Мощщаг хультум мирыт акванатхатыгласыт. Ювле хультум э̄тпос 27-30 хо̄талытт Салехард ӯст Лӯима̄ янытыл о̄лнэ мощщаг хультум мирыт съезданыл о̄лыс. Ты VII съезданыл Север, Сибирь ос Дальний Восток ассоциацияныл ва̄рыглас. Ань Россия са̄всыр ма̄ныл ос мо̄т хо̄н ма̄ныл 356 хо̄тпа тув ёхталасыт. Съезд рӯпататэ о̄вылтан э̄лыпа̄лт яныгпа̄ла хо̄тпат койп ра̄тым по̄йкщасыт ос мощ пӯрлахтасыт. Тувыл съезд рӯпататэ та о̄вылтавес. Са̄всыр ма̄ныл ёхталам депутатхо̄тпат ос кӯщаит потыртасыт. Титыт хо̄талт йильпи президент пе̄риявес. Ты э̄лыпа̄л рӯпитам Сергей Харючи нила щёс тув пе̄рия̄лвес. Та̄лыт пуссын акван те ловиньтаӈкв, хо̄тхуйплов та̄л тав тот кӯщайлахтас. Тав рӯпитаме̄т ты ассоциация «Уставыг» ла̄внэ ма̄к яныг нэ̄паке мо̄т щирыл хасвес: ты хосыт президентыг пе̄рияхтын хо̄тпа кос манах щёс тув пе̄рияхтуӈкв ве̄рми. Ювле хультум та̄лт Москва кӯщаитн та̄н ла̄вве̄сыт, нэ̄паканыл пуссын са̄ккон щирыл вос хансыяныл. Ань таима̄гыс ты ва̄рмаляныл пуссын та̄рапаттысаныл ос э̄рнэ щирыл ва̄рсаныл. Ассоциация кӯщаиг ос мо̄т хо̄тпа пе̄риявес – Григорий Ледков, тав Государственный Дума депутатыг ос по делам национальностей комитетыт рӯпиты. Тав о̄с тах нила та̄л рӯпитаӈкв паты. Ань са̄всыр ма̄ныл атхатыглам ма̄хум пуссын та̄нти та̄рвитыӈ ва̄рмаляныл урыл потыртасыт. Кос хоты э̄лы ма̄т та̄н о̄лэ̄гыт, ва̄рмаляныл пуссын аквхурипат: ла̄тӈаныл ня̄врамыт ат ва̄ганыл, пе̄с ва̄рмаляныл, пе̄с наканыл ла̄щлакв та ёрувлахтэ̄гыт, о̄лнэ ма̄нылныл мо̄т ма̄н ва̄нтлуӈкв кащилтавет. Ань туп са̄лы о̄щнэ хосыт ма̄нь мирыт пе̄с о̄лупсаныл э̄лаль тотуӈкв ве̄рмияныл. Ос са̄лыӈ ма̄хум ла̄ве̄гыт, са̄лыяныл ӯрнэ ма̄гыс ма̄ ат то̄вылхаты, са̄лы тэ̄пыӈ ма̄ моще̄ртын ат хульты. Ма̄во̄й ос газ ма̄ныл но̄хняртын предприятият акваг хильта̄л ма̄ныл нупыл ла̄щлакв та лакве̄гыт. Ты хосыт соссаӈ ма̄хумн ос мо̄т ма̄н ва̄нтлуӈкв э̄ри. Ань съездын ёхталам мир резолюциянэ̄пак хассыт, тув потыртам ва̄рмаляныл пуссын хӯлтсаныл. Э̄лаль ты нэ̄пак ёт Россия Правительство яныг кӯщаит рӯпитаӈкв патэ̄гыт. Раиса Решетникова хансум потыр ма̄ньщи ла̄тӈыл Валентина Хозумова толмащластэ. 1050 2013.04.26. Людмила ТЕТКИНА 9 май кастыл яныгпа̄ла хо̄тпат олныл ойтавет. Ты тэ̄ла урыл Наталья Комарова такви ва̄ӈын хо̄тпанэ ёт сапра̄нит потыртас. Ань та̄н ты урыл ла̄всыт, 9 май ялпыӈ хо̄тал кастыл округувт 9 со̄тыра арыгкем э̄лумхо̄лас олныл тах ойтавет. Хо̄нтлам яныгпа̄ла хо̄тпат хӯрум со̄тыра солко̄вил мивет, блокадный Ленинград ӯст о̄лум ма̄хум, «Труженик тыла» нам о̄щнэ хо̄тпат, концлагерит саватым хо̄тпат кит со̄тыра солко̄вил ойтавет. Ос яныг хо̄нтлан нак порат порслым ма̄хум ня̄враманыл акв со̄тыра солко̄вил мивет. Наталья Комарова ос округувт о̄лнэ мир ты ялпыӈ хо̄тал янытлаӈкве пуссын во̄всанэ. Яныгпа̄ла ма̄хум хо̄нтлым са̄в ё̄р пинсыт ос ты яныг ва̄рмаль урыл хотёрувлаӈкве щар ат ро̄ви. О̄с аквта порат кӯщаит са̄лыӈ ма̄хум урыл потыртасыт ос постановлениенэ̄пак пирмайтасыт. Наталья Комарова ла̄выс: «Ань ма̄ньлат ма̄ньщи, ханты хо̄тпат та̄нки пе̄с йис ва̄рмаляныл нупыл ат сунсэ̄гыт ос са̄лы ӯруӈкве ат ка̄саще̄гыт. Ты ва̄рмаль урыл Белоярский ӯсн ялмум порат соссаӈ ма̄хум а̄нумн потыртасыт. Округувт о̄лнэ са̄лыӈ ма̄хум ма̄гсыл йильпи касыл ва̄рыглаӈкве тах патэ̄в. Та̄нки йис о̄лупсаныл нупыл вос сунсэ̄гыт ос э̄лаль вос тотыяныл». Та̄н ат номинацият щирыл касуӈкве патэ̄гыт. Ка̄сыӈ та̄л ре̄тыӈ ю̄свой э̄тпост «День оленевода» ялпыӈ хо̄таланыл о̄лыглан порат но̄хпатум хо̄тпат тот янытлавет. Совхозыт, общинат, фермат ос та̄нки ма̄гсыланыл са̄лыт янмалтан ма̄хум пуссын касуӈкве тот ве̄рме̄гыт. Губернатор прессслужбатэ ке̄тум ля̄ххал ма̄ньщи ла̄тӈыл Л. Тасманова хансыстэ. 1050 2013.04.26. Людмила ТЕТКИНА Во̄р янмалтан ва̄рмаль – ты яныг рӯпата. Ка̄сыӈ та̄л яныгполь э̄тпос 10 хо̄талэ̄т А. А. Дунин-Горкавич самын патум хо̄талэ кастыл Ханты-Мансийск ӯст во̄р ӯргалан хо̄тпат конференциян акванатхатыглэ̄гыт. Тот та̄н ма̄вит ӯргалан, во̄р янмалтан ва̄рмалит урыл потыртэ̄гыт. Александр Дунин-Горкавич 1854 – 1927 та̄лыт сыс о̄лыс, тав налыман арыгкем та̄л лӯима̄т во̄р ӯргалым рӯпитас. Тыт тав соссаӈ ма̄хум о̄лупсаныл урыл нэ̄пакыт о̄с хансыс. Ты рӯпата ва̄рим ма̄ньщи, ханты мирыг ма̄гсыл са̄в э̄рнэ тэ̄ла тотыс. Ты та̄л о̄лум конференциян Москва, Екатеринбург ӯсыгныл ос округувныл ма̄хум ёхталасыт. Михаил Гиряев, Московский университетт рӯпитан хум, во̄р янмалтан ва̄рмаль урыл потыртас. Тав ла̄вме щирыл ань яныг та̄рвит: хус та̄л сыс Россият во̄р ӯргалан урыл о̄лнэ са̄кконыт акваг пе̄нтавет, йильпи щирыл хансавет. Ань са̄всыр постановленият, правовой актыт ос мо̄т нэ̄пакыт о̄лэ̄гыт, ма̄хум хоты нэ̄пакыт хосыт э̄лаль рӯпитаӈкве – ат ва̄гыт. Тыил ос мо̄т та̄рвит е̄мтыс, ань мӯсхалыг во̄р ат ӯргалаве. Са̄в йӣвыт хотса̄гравет, йильпи во̄р яныгмаӈкве ат а̄лыми. Россият яныгман во̄р пуссын мӯсхалыг ханищтаӈкв ос йӣвыт номсахтым хотса̄груӈкве э̄ри, туп то̄нт ма̄витув сыстамыг паты ос во̄р хотса̄грим са̄в олн сэ̄луӈкве ро̄ви. Тамле рӯпата ва̄рнэ э̄лумхо̄лас о̄с ат то̄вылхаты, ма̄ньлат ма̄хум во̄р ӯргалан хо̄тпаг ханищтахтуӈкве ань ат ка̄саще̄гыт. Михаил Гиряев ла̄выс, ты э̄лыпа̄лт во̄р ӯргалан ма̄хум сака янытлаве̄сыт. Ань Россият са̄т ӯст ты ма̄хум ма̄гсыл памятникыт тӯщтуве̄сыт. Акв тамле ут Ханты-Мансийск ӯст Александр Дунин-Горкавич хурил ва̄рвес. Ты ма̄хум яныг рӯпата ва̄рим са̄в щёл государстван тотэ̄гыт. Ты конференция 2005 та̄лныл Ханты-Мансийск ӯст ва̄рыглаве, ма̄ньлат хо̄тпат тот та̄нки потраныл ловиньтаӈкве о̄с во̄виньта̄лавет. Ос ты коныпал та̄н ма̄гсыланыл А. А. Дунин-Горкавич нампа премия ва̄рвес, тав касыл щирыл миве. Ты та̄л Виктория Русакова, ЮГУ нилыт курсыт ханищтахтын а̄ги, но̄хпатыс ос конференция о̄лум порат тав янытлавес. Тамле ва̄рмаль таима̄гсыл ва̄рыглаве, ма̄ньлат а̄гитпыгыт ты тэ̄ла нупыл вос сунсэ̄гыт ос ханищтахтуӈкве а̄стланэ̄ныл юипа̄лт во̄р ӯргалаӈкве вос минэ̄гыт. Конференцият ма̄хум ат секция щирыл уртхатым рӯпитасыт, тот ма̄хум во̄р янмалтан, ма̄вит ӯргалан, мӯйлын, ма̄вит сыстамтан ва̄рмалит ос А̄с-угорский мирыт урыл потыртасыт. 1050 2013.04.26. Галина КОНДИНА «Победа» ма̄шинал минэ̄гыт. Яныг хо̄нтыт но̄хпатум хо̄тал янытлан ма̄гсыл мо̄лты та̄л па̄сныл автопробегыг ла̄внэ лё̄х ва̄рыглаӈкве патвес. Константин Репин, ма̄ньлат ма̄хум халт Югра парламентыт кӯщаиг о̄лнэ пыг, «Победа – одна на всех» нампа проект хансыс. Тот рӯпитан ма̄ньлат а̄гитпыгыт ты номт э̄лаль тэ̄лаг ва̄руӈкве патсаныл. Ань ты тӯя ма̄хум «Победа» нампа са̄т пе̄с ма̄шинал хӯрумхуйплов ӯс та̄ра 6 362 км атхуйплов хо̄тал сыс тах минэ̄гыт. Ты ӯсыт пуссын город-Герой нам о̄ньще̄гыт. Мурманск ӯсныл яныгполь э̄тпос ва̄т нупыл атыт хо̄талт минмыгтэ̄гыт СанктПетербург, Москва, Тула, Смоленск, Минск, Брест, Киев, Одесса, Севастополь, Керчь, Новороссийск ӯсытын хо̄иглэ̄гыт ос я̄ӈк на̄тнэ э̄тпос нёлолов щислат Волгоград ӯсн ёхтэ̄гыт. Ка̄сыӈ ӯст та̄н Победа хо̄тал кастыл ва̄рыглан мероприятиятыт та̄нти лё̄ӈханыл урыл потыртаӈкве патэ̄гыт. Ре̄тыӈ ю̄свой э̄тпос 1943 та̄лт Сталинград ӯс по̄хыт немцыт ма̄н ма̄хманувн ёмщакв алыщлаве̄сыт, ӯс ляпан щар ат та̄ртве̄сыт. То̄нт ты ГАЗ М-20 ма̄шина ва̄руӈкве о̄вылтавес, ётыл тав «Победа» намыл пинвес. Ань са̄т тамле ма̄шина Тюменил, Няганил, Екатеринбургыл, Ханты-Мансийскыл, Фёдоровский па̄вылныл ос Мурманск ӯсныл Победа хо̄тал янытлаӈкве минмыгтэ̄гыт. Ты пе̄с ма̄шинат пуссын ёмщакв хотщё̄питаве̄сыт ос лё̄ӈханыл хӯрум государство та̄ра паты – Россия, Украина, Белоруссия. Ты автопробег мо̄лты та̄л о̄вылтавес, ма̄хум Нижневартовсканыл Екатеринбург мус титхуйплов ӯс та̄ра хус «Победа» ма̄шинал минасыт. Ка̄сыӈ ӯст, ка̄сыӈ па̄вылт ня̄врамыт ос яныг ма̄хум тамле ма̄шинатыл сака пӯмщалахтасыт. Хуньт пе̄с порат ва̄рим утыт ань тыг мус рӯпитэ̄гыт ос мирн та пилыщмаӈ, та̄рвитыӈ пора хотёрувлаӈкве ат мыгыт. Молодёжный парламентыл те̄тым ля̄ххал Г. Кондина ма̄ньщи ла̄тӈыл хансыстэ. 1050 2013.04.26. Александр ВЬЮТКИН Ва̄ӈын кӯщай потре. Мо̄лалнув Ханты-Мансийск ӯст Алексей Путин, губернатор ва̄ӈын хум, ля̄ххал тотнэ хо̄тпат ёт хо̄нтхатыглас. О̄влэ̄т ня̄врамыт туи ӯщлахтын урыл потрув минас. Тав ла̄выс: «Ты та̄л ня̄врамыт ӯщлахтын ма̄гсыл округ бюджетныл 700 млн. солко̄ви майвес. Та олнытыл вожатыиг рӯпитан ма̄ньла̄т ма̄хум тах ойтавет. Тыгыл э̄лы ма̄н тотыглан ня̄врамыт э̄лаюв ялнэ лё̄ӈханыл ос тот о̄лнэ хо̄таланыл о̄с ты олныл ойтавет. Тувыл округувт ня̄врамыт пуста̄гыл яныгман ма̄гсыл матыра̄ти пуссын ва̄руӈкв э̄ри. Ня̄врамыт ӯщлахтын колытт ле̄ккарыт вос рӯпитэ̄гыт. Тэ̄нут па̄йтнэ ма̄т сыстамыг вос о̄ньщавет. Ты ва̄рмалит пуссын ня̄врамыт ӯщлахтын э̄лыпа̄лт уральтыянув. Ма̄н са̄в рӯпата ва̄ре̄в, ня̄враманӯв ӯщлахтын хо̄таланыл ёмасыг вос о̄лэ̄гыт». Э̄лаль кӯщай пусмалтахтын колыт урыл потре о̄лыс: «Ань пӯльницатт са̄всыр специальность щирыл рӯпитан ле̄ккарыт щар ат то̄вылхатэ̄гыт. Хумус ань ла̄ваве, ат та̄л сыс ёмас, яныг пӯльница ӯнттаве. Акв та̄л сыс таве са̄всыр а̄гм пусмалтан йильпи пормасыл ёвтаве. Тот рӯпитан ёмас ле̄ккар ханищтан ма̄гсыл ловмантем та̄л э̄ри. Таи ёмас, ма̄н ма̄ньлат ма̄хманув ле̄ккарыг ханищтахтын ма̄гсыл са̄в нё̄тмилыл ва̄риянӯв. Са̄всыр нё̄тмилолныл ойтыянӯв. Тувыл рӯпата олныт о̄с ёмщакв но̄хнё̄тсанӯв». Хӯрмит потре садикыт урыл о̄лыс: «Ань ма̄нь ня̄врамыт о̄щнэ колыт ат то̄вылхатэ̄гыт. Хуньт пе̄с садикыт мо̄т колыг ва̄рыглаве̄сыт. Таима̄гсыл ань йильпи садикыт ӯнттуӈкв э̄ре̄гыт. 2013 та̄л сыс округувт нила яныг садик пӯнсаве. Тув са̄т со̄тыра ляпатем ня̄врам ялантаӈкве ве̄рме̄гыт. 2014-2015 та̄лыг сыс о̄с аквта са̄вит ня̄врам ма̄гсыл акв тамле са̄т кол округув янытыл ӯнттаве». 1050 2013.04.26. Александр ВЬЮТКИН Ялэ̄н, ӯщлахтэ̄н. Ханты-Мансийск ӯст турист ма̄хум ёт рӯпитан «Союз турпредприятий Югры» ос «Региональный информационноаналитический центр STI» тит колыг акваннё̄тхатнэ ма̄гсыл нэ̄пакт хасхатсы̄г. «Союз турпредприятий Югры» ма̄н округув янытыл рӯпиты. Таве Наталья Комарова губернаторув 2011 та̄лт ва̄руӈкв номылматыстэ. Мо̄т компания Доминикана мо̄т хо̄н ма̄ ёт рӯпиты. Россия ма̄хум тув яласаӈкв 2004 та̄л па̄сныл о̄вылтахтасыт. О̄выл та̄л сыс 6 со̄тыра э̄лумхо̄лас тув ялсыт. Мо̄лты та̄л сыс 167 со̄тыра хо̄тпа ма̄н ма̄вныл тот ӯщлахтасыт. Округувт туризм ёт рӯпитан кӯщай нэ̄ Дана Гуц ла̄выс: «Ма̄навн ты акваннё̄тхатнэ ва̄рмаль сака э̄ри. Та̄н са̄в э̄рнэ рӯпата ма̄навн хӯлтуӈкв ве̄рме̄гыт». Мо̄т компания кӯщае Виталий Наумов ювле таи потыртас: «На̄н о̄лнэ ма̄н со̄тыӈ. Тыт во̄ре сыстам, витэ сыстам, ӯйхул са̄в. Соссаӈ ма̄хум са̄лы о̄ньще̄гыт. Туристыт тыг во̄внэ ма̄гсыл нэ̄матыр воссыг ат э̄ри. Мӯсхал щирыл щё̄питахтуӈкв – тувыл та». Потраныл оигпам юипа̄лт акваннё̄тхатым рӯпитан нэ̄паканылт тит кӯщаиг ка̄тпосанэ̄н та по̄стысы̄г. 1050 2013.04.26. Александр ВЬЮТКИН Ва̄сыт па̄тлуптан пора. Округувт ӯйхул ӯргалан Департамент колт прессконференция о̄лыс. Алы ма̄ныл тыг ёхтын товлыӈ ӯит ка̄тынпаттын урыл ма̄н ётув потыртаӈкве ӯйхул ӯргалан тит кӯщаиг ёхталасы̄г. Акватэ наме Юрий Васильевич Василенко, тав округув янытыл ӯйхул ос во̄р ӯргалан кӯщаиг о̄лы. Мо̄танэ наме Алексей Николаевич Залибеков, тав ос во̄р ӯйхул ӯргалан кӯщаиг рӯпиты. Тэ̄н алы ма̄ныл ёхтын то̄влыӈ ӯит па̄тлуптан хо̄талыт урыл потыртасы̄г. Округув онтолов район щирыл ла̄ккваурты мо̄лы. Мо̄лты та̄л па̄сныл тыт лов хо̄талын ва̄с па̄тлуптан ва̄рмаль ва̄рвес. Алы нила районанув (ты Советский, Кондинский, Ханты-Мансийский ос Нефтеюганский) я̄ӈк на̄тнэ э̄тпост 4 щислат во̄раян ва̄рмаляныл о̄вылтахты. Мо̄т ат лӯи (Октябрьский, Белоярский, Ха̄льӯс, Сургутский ос Нижневартовский) районыт 11 щислат ва̄с па̄тлуптаӈкв та̄ртаве. Акв э̄т сыс хӯрум хум ва̄с, акв лунт па̄тамтаӈкв ро̄ви. Мо̄лты та̄л хольт ва̄с ӯрнэ лицензия тын щирыл миӈкве патаве, рущ щирыл «госпошлинаг» ла̄ваве, тав тынэ 420 солко̄ви. Ка̄тынпаттын ка̄сыӈ ва̄с манос лунт та̄ра л и ц е н з и я н э̄ п а к ы н по̄стуӈкв э̄ри. Ӯйхул ӯргалан ма̄хмытын хунь уральтаве̄н, нэ̄паканы̄н та̄тылат те, штрафыл пинаве̄н. Ва̄с ма̄гсыл 900 солко̄ви, лунт ос 1500 солко̄ви. Ха̄пыл яласанэ̄н порат писаляны̄н патроныл ул пинэ̄н. Ос писалит сыпаляныл тӣвырн пиным тотыглаӈкв э̄ре̄гыт. Мо̄т щирыл о̄с штрафыл хансаве̄н. Ма̄колыӈ о̄йка ка̄тынпаттын лицензия ат те о̄ньщегы̄н, карабин нампа писаляны̄н ёт тотыглаӈкв ат ро̄ви. Лицензия та̄л таве ёт тотыглым хо̄нтаве̄н те, та̄ра хотвиве. Ювле ве̄рмаве ат миӈкв. Ма̄ньщит хумыт, во̄раян со̄т вос о̄ныще̄гын, ӯйхул ӯргалан ма̄хмытын ул вос пуваве̄н. 1050 2013.04.26. Людмила ТЕТКИНА Во̄рт о̄лнэ ма̄хум ва̄рмаляныл. Во̄раян ос хӯл алыщлан ма̄хум Сургутский район Русскинские па̄вылн акванатхатыгласыт. Та̄н районанылт хӯрум со̄тыра арыгкем соссаӈ хо̄тпа пе̄с йис щирыл о̄лэ̄гыт. Ка̄сыӈ та̄л ма̄ньполь э̄тпост район янытыл та̄н Русскинские па̄вылн сапра̄нин во̄виньта̄лавет. Ань тув Сергей Черкашин, Сургутский район кӯщай ва̄ӈын хум, Анатолий Прасолов, Русскинские миркол кӯщай, ос налоговый инспекцият рӯпитан нэ̄ ёхталасыт. С. А. Черкашин са̄в та̄л сыс пе̄с йис ма̄т о̄лнэ ханты ма̄хум ёт рӯпиты, тав ка̄сыӈ ще̄мья ёмащаквег ва̄гтэ, ка̄сыӈ хо̄тпан нё̄туӈкве таӈхи. Ёмас, ка̄ркам хум соссаӈ ще̄мьятын сака янытлаве. Сургутский районт 157 родовой угодие о̄лы, та̄н халанылт 50 пе̄с йис ма̄ ханты ос ё̄рн ще̄мьят та̄нки нупыланыл хансуӈкве ат а̄лымасаныл. Ань йильпи са̄кконыт щирыл соссаӈ ма̄хум родовой угодияныл та̄нкина̄нылн хансуӈкве Москва ӯст туп ве̄рме̄гыт. Ос мо̄т та̄рвит, хумус ты рӯпата ва̄руӈкве, та ма̄хум о̄с ат ва̄гыт. Тыима̄гсыл ханты ще̄мьятын мощ ӯрхатуӈкве э̄ри. Сергей Черкашин ла̄вме щирыл, та̄н ты та̄рвитыӈ ва̄рмаль урыл ёмщакв ва̄гыт ос э̄лаль рӯпитаӈкве тах патэ̄гыт. Кӯщай хум писалит урыл ла̄тыӈ о̄с ла̄выс. Йильпи са̄ккон щирыл писаль ёвтнэ хо̄тпан о̄влэ̄т ханищтахтуӈкве э̄ри. Ханищтахтын ма̄ныл а̄сты, тувыл нэ̄пакыл миве, рущ ла̄тӈыл «разрешение на ношение оружия» намаим о̄лы. Ос та юипа̄лт ёвтум писале полицият хансуӈкве э̄ри. Сургутский районт писалил па̄тлуптаӈкве туп акв организация ханищты. Ты рӯпата ма̄гсыл хо̄т со̄тыра солко̄ви выг. Тамле нэ̄пак ат о̄щнэ во̄раян хотпат ань пуссын ханищтахтуӈкве ла̄вве̄сыт. Соссаӈ ма̄хум во̄раян ва̄рмаль урыл китыглахтасыт. Ань квота щирыл та̄н акв та̄л сыс туп 50 лэ̄ӈын ка̄тынпаттуӈкве ве̄рме̄гыт. Ты ва̄рмаль урыл Сергей Александрович ювле таи ла̄выс: «На̄н о̄лнэ ма̄нанын охотугодияг ке хансыяны̄н, то̄нт на̄н акв со̄тыра лэ̄ӈын алыщлаӈкве ве̄рмегы̄н. Родовой угодиянын ань «Территории традиционного природопользования» ловиньтахтэ̄гыт oc са̄в во̄руй тот ка̄тынпаттуӈкве на̄н ат ве̄рмегы̄н». Хӯл алыщлан урыл потыр о̄с о̄лыс. Ань соссаӈ ма̄хум ка̄сыӈ та̄л заявлениенэ̄пак хансэ̄гыт ос квота щирыл акв хо̄тпа та̄л сыс тэ̄нэ ма̄гсыл 266 кила я̄ӈк хӯл пувуӈкве ве̄рми. Мо̄т хӯл тыгыл са̄внув пyвуӈкве ро̄ви. Та ма̄т о̄лнэ хантыт са̄лыяныл хӯлыл тыттыяныл. Таима̄гсыл та̄н сака са̄в хӯл пуве̄гыт. Кӯщай хум ла̄выс, ты квота ат ке то̄вылхаты, ты коныпал о̄с ёвтуӈкве ро̄ви. Ты нэ̄пак туп 20 солко̄ви тынэ. Налоговый инспекцияныл ёхталам нэ̄ ос налоголн урыл потыртас. Ань пе̄с йис ма̄т о̄лнэ ще̄мьят нефтяникыт ёт соглашениенэ̄пак хансэ̄гыт. Ма̄во̄й но̄хвинэ ма̄хум та̄нанылн компенсацияолн ойтэ̄гыт, «Бураныл», моторыл, ха̄пыл мыганыл. Тувыл акв компания налог такви ойты ос мо̄т компания ты олныт такви ат ойтыянэ, ханты ма̄хмытын ойтхатуӈкве э̄ри. Налоговый инспектор соссаӈ хо̄тпатын ла̄выс, ты ва̄рмаль урыл губернаторын пищма вос хансэ̄гыт. Э̄рыӈ то̄нт нефтяникыт ёт потыртахтэ̄гыт ос налоголн пуссын таит ювле ойтуӈкве патэ̄гыт. Сапра̄нит ма̄хум ма̄вит ӯргалан урыл тох ла̄всыт, ань тыг мус то̄ва ма̄т ма̄во̄й мори со̄сантаве, тувыл нефтяникыт ма̄ хотсыстамтаӈкве сака ат ка̄саще̄гыт. Сергей Черкашин ювле ла̄выс, тамле ва̄рмаль хунь е̄мты, хури вос ва̄ре̄гыт манос кина вос по̄слэ̄гыт. Ос ма̄вит ӯргалан департаментын вос ке̄тыяныл. Ань тамле лю̄ль тэ̄ла ва̄рнэ ма̄гсыл нефтяникыт яныг штрафолныл пинавет. То̄нт моляхнув нёвсуӈкве патэ̄гыт ос ма̄вит хотсыстамтыяныл. Та ма̄т о̄лнэ хантыт пуссын туп та̄нки ла̄тӈыл потыртэ̄гыт. То̄ват рущ ла̄тыӈ щар ат ва̄гыт, Аграфена Сопочина ма̄хманэ потраныл кӯщаитын рущ ла̄тӈыл толмащласанэ. Тамле ва̄рмаль, улпыл, ань туп та ма̄т ка̄салаӈкве ро̄ви. Та̄н та̄нки пе̄с йис ва̄рмаляныл э̄лаль тотыяныл. 1050 2013.04.26. Тамара МЕРОВА Пе̄с накыт э̄лаль тотавет. Ханты-Мансийск ӯсн Карелияныл, Коми, Мордовия, Удмуртия, Марий Эл ос Ямал ма̄ныл мӯй ма̄хум ёхталасыт. Та̄н пуссын «Нематериальное наследие финноугорских народов как объект сохранения» нампа конференциян во̄виньта̄лве̄сыт. Тамле ва̄рмаль культура департаментыт ос творческий объединение «Культура» колт рӯпитан хо̄тпат щё̄пита̄лсыт. Мӯй ма̄хум пе̄с йис накыт ёмщаквег ханищтан ос э̄лаль ма̄кыг тотнэ урыл аквъёт потыртасыт. «Нематериальный наследияг» йис пораныл о̄лнэ потрыт, мо̄йтыт, пе̄с йӣквыт, э̄ргыт, соссаӈ ма̄хум янытлан ялпыӈ хо̄талыт, сыресыр ёнгилыт ла̄вавет. Россия янытыл ань манхурип пе̄с накыт ӯргалавет ос э̄лаль тотавет, ты о̄вылтыт Москваныл ёхталам нэ̄ Мери Вахтанговна Русанова потыртас. Ос ма̄хум хоты порат маныр ва̄ре̄гыт, манырсыр пе̄с потрыт, мо̄йтыт о̄ньще̄гыт – пуссын та̄рапаттуве̄сыт ос реестрнэ̄пакын хасве̄сыт. Финноугорский мирыт ты ва̄рмалит ёт о̄с я̄нас рӯпитаӈкве патсыт. Сыктывкар ӯст финноугорский ма̄хум культурный центр ва̄рсыт, тот Татьяна Тихоновна Барахова пуӈктоты. Ка̄сыӈ мирныл тув хо̄тпа о̄с пе̄риявес. Ханты ос ма̄ньщи ма̄хмытныл Елена Михайловна Полоникова, творческий объединение «Культура» колт кӯщай нэ̄, тув паттыма. Тав э̄лыпа̄лэ̄т о̄с аквты колт рӯпитам хум Пётр Носов тот кӯщайлахтам. Ань тыг мус та реестрын ма̄н ялпыӈ хо̄таланув, э̄рганув, йӣкванув тув иӈ ат хасве̄сыт. Округ па̄лыл культура департаментыт рӯпитан хо̄тпат ма̄н ва̄рмалянув хӯлтыглан ма̄гыс ущты э̄рнэ нэ̄пак та̄ратасыт. Ялпыӈ хо̄талыт, пе̄с потрыт, э̄ргыт манос ёнгыт тув хаснэ э̄лыпа̄лт о̄влэ̄т комиссиян сунсавет. Та комиссиян хус хо̄тпа атсыт. Ань ма̄ньщит, хантыт тӯлыглапаныл ос Ӯринэ̄ква ялпыӈ хо̄таланыл щар са̄ртын тув хансуӈкве э̄ре̄гыт. Ты конференция минам порат ты пе̄с накыг урыл мӯйлын ма̄хум потыртаве̄сыт. Валентина Перова, Саранпа̄вылт искусство школат рӯпитан кӯщай нэ̄, тӯлыглапыт урыл потыртас ос ма̄нь кина суссылтас. Тав а̄тятэ Дмитрий Георгиевич Агеев са̄в э̄ргыт, та̄ныт, йӣквыт матумпа̄ла хо̄тпатныл ханищтас. Та̄н пуссын ёлхансым о̄лэ̄гыт. Ань хоты хо̄тпа ты пе̄с э̄ргытыл, потрытыл ос са̄ӈквылтан та̄нытыл э̄лаль пӯмщалахтуӈкве паты ке, матыр нэ̄пак манос кина ва̄руӈкве номылматы ке, та̄н таве̄н о̄с тах нё̄тэ̄гыт. Лариса Новикова, Нягань ӯсныл ос Тамара Пятникова, Белоярский ӯсныл ёхталасы̄г. Тэ̄н Ӯринэ̄ква ялпыӈ хо̄тал о̄вылтыт потыртасы̄г. Пе̄с ханты э̄ргыт хансуӈкве ос та̄наныл ханищтаӈкве Раиса Загородняя Тэ̄к па̄вылн ялыс. Тав та урыл потыртас. Мария Кузьминична Волдина пӯмыщ ос ощхуль ва̄рнэ урыл потыртас. Э̄лумхо̄лас хумус са̄всыр ёнгилыл ос сыресыр суй ва̄рнэ утыл таквина̄тэ пӯмщалаӈкве ве̄рмитэ – таи суссылтас. Эрика Петровна Сургутскова, «То̄рум Маа» музеит рӯпитан э̄ква, Ханты-Мансийскат «Тылащ пори» пе̄с ялпыӈ хо̄тал урыл потыртас. Мо̄тыт хо̄талт мӯй ма̄хум пуссын Ӯринэ̄ква хо̄тал янытлаӈкве тотыглаве̄сыт. Тав Археопарк нампа ӯскант ва̄рыглавес. Ты о̄вылтыт на̄н хурит сунсэ̄н. 1050 2013.04.26. Анна АЛГАДЬЕВА Ӯринэ̄ква хо̄тал. Тӯя хо̄тал хо̄талэ посыӈ, Тӯя хо̄тал хо̄талэ хоса, Тӯя хо̄тал палытэ хоса. Щаквщуӈкв хо̄талэ то̄вылхаты, Ма̄щтырлаӈкв хо̄талэ то̄вылхаты. Ощхультаӈкв ос ёнгасаӈкв, Ня̄врамытн поргащлаӈкв о̄с то̄вылхаты. Ма̄хум ла̄ве̄гыт: «Ӯринэ̄ква ёхтум – тӯяпа̄лаг та патыс, ма̄лтыпыг ты е̄мты». Ха̄льӯс е̄рт Хулюмсӯнт па̄вылт «Ӯринэ̄ква хо̄тал» тох ты минас. Мо̄лты ка̄сыӈ е̄мт ты хо̄талув ма̄ньщи па̄вылт Та̄гт ва̄тат ва̄рыгла̄лвес. Ань ос са̄р тӯя па̄сныл Александр Константинович ос Елена Ильинична Адиныг кол по̄хыт ва̄рыглаӈкв патыслӯв. Миркол па̄лыл ты хо̄тпаг кол по̄хыт йӣквнэ каныл ва̄рвесӯв. О̄влэ̄т ма̄хум атхатнэ сыс Валерия Лыткина, 9 классыт ханищтахтын а̄ги, сыгсов тынтлас. Татьяна Сивцова, 9 классыт ханищтахтын а̄ги, хумыс хӯлуп тыяве, суссылтас ос ма̄ньщи ня̄врамыт пе̄с пора ёнгынутыт пасанын та̄рамта̄лас. Надежда Константиновна Маслова са̄нсква̄лыг сагнэ ва̄рмаль суссылтас. Ма̄хум са̄выг е̄мтсыт, ущ концерт о̄вылтаслӯв. Ам ӯринэ̄кваг масхатыгласум, ёхтум ма̄хмытн ос ня̄врамытн паща ла̄тыӈ ла̄всум. Ня̄врамыт Ӯринэ̄ква yрыл ма̄ньщи ла̄тӈыл ос рущ ла̄тӈыл стихотвореният потыртасыт, э̄ргыт э̄ргысыт. Сака ма̄щтырыг э̄ргысы̄г, нё̄тнэг йӣквсы̄г ос пӯмащиг тӯлыглахтасы̄г Марина Александровна Алгадьева ос Оксана Алексеевна Алгадьева. Константин Георгиевич Адин ма̄нки ма̄в урыл кит рущ э̄рыг э̄ргыс. Акв йильпи ва̄рмаль о̄лыс. Пуссын нэ̄ хо̄тпат, а̄гит, а̄гирищит, хо̄ӈха ма̄ньщи ӯламыл хорамаӈыг масхатым о̄лсыт, пyссын сценан во̄виньта̄лве̄сыт. Тот ла̄квыг ё̄мыгтасыт, супаныл суссылтасыт. Ос хотьют ка̄сащасыт, йӣквуӈкв лю̄люмта̄лсыт. Ты халт ханты супыл ос халатыл масхатым кит ханты нэ̄г о̄лсы̄г – Зоя Емельяновна Адина, пенсият о̄лнэ э̄ква, ос Альбина Ксенофонтовна Таратова, школат ханищтан нэ̄г рӯпиты. Ос са̄всыр конкурсыт о̄лсыт, хо̄т ня̄врамыт номтанылтыл ос ё̄ранылтыл а̄рталахтасыт. Ты сыс Ольга Васильевна Баранова, миркол кӯщай нэ̄в, Альбина Ксенофонтовна Таратова ос Галина Константиновна Алгадьева, пенсият о̄лнэ хо̄тпа, а̄ращ па̄лтсыт, нё̄выль пӯт ос хӯл исмит па̄йтсыт. Хо̄ӈха ка̄сащас, ма̄ньщи тэ̄нут а̄рталаӈкв ос атыӈ ут а̄лмаяӈкв – пасан ва̄тан ялсыт, тэ̄пъяласыт, потрамасыт ос ущ ла̄ккваминыгласыт. Ма̄н, Хулюмсӯнт ма̄хум, «Ӯринэ̄ква» хо̄талув тох та парласлӯв. Ты ёнгум ос ка̄с тотум хо̄талув Татьяна Андреевна Головина, школат ханищтан нэ̄г рӯпитан хо̄тпа, яныгнув ня̄врамыт ёт щё̄питас. Ка̄сыӈ та̄л Ӯринэ̄ква хо̄талт та̄л сыс самын патум ня̄врамыт ма̄нь мӯйлупсал уртыглыянӯв. Ты та̄л щар яныг хо̄тпат о̄с ма̄нь мӯйлупсал майласанӯв. Ка̄сыӈ е̄мт мӯйлупсат ос конкурсыт а̄рталахтын ма̄т ма̄гыс миркол па̄лыл олн ло̄мтыл майла̄лаве̄в. О̄c яныг пӯмащипа ла̄тыӈ Геннадий Иванович Просунковын, УТТиСТ кӯщай хумн ла̄ве̄в, тав ка̄сыӈ та̄л колпо̄х тӯйт хотняртнэ ё̄р майлы – ма̄хум ос ня̄врамыт ёмщакв ос лощитыг вос поргащлэ̄гыт. Пуссын ма̄ньщи ма̄хманув, Хо̄ӈха ма̄ньщи ла̄тыӈ торгамты, Хо̄ӈха ма̄ньщи щирыл о̄луӈкв вораты – Пуссын пуста̄гыл о̄лэ̄н! Пупыгн-То̄румн вос ӯргалаве̄н! 1050 2013.04.26. Валентина УЗЕЛЬ Са̄лыт о̄щнэ колта̄глыт. Сургутский район Русскинские па̄выл Лӯима̄ нупыл о̄лы, Когалым ӯс ляпат. Тот са̄в ханты ма̄хум та̄нти родовой угодиянылт о̄лэ̄гыт. Ма̄н тув ялмувт тот ялпыӈ хо̄тал о̄лыс, са̄лыӈ ма̄хум та̄нти халанылт кассыт. Тот ам таи ка̄саласум – э̄кват, нэ̄ хо̄тпат пуссын та̄нти маснутыл масхатым о̄лэ̄гыт ос пуссын кастэ̄гыт. Округув янытыл тамле ва̄рмаль воссыг нэ̄мхот ат ва̄слум. Та е̄рт о̄лнэ ханты ма̄хум та̄нти халанылт туп ща̄нь ла̄тӈыл потыртэ̄гыт, то̄ват рущ ла̄тыӈ щар ат ва̄гыт. Ня̄враманыл о̄с тох янмалтыяныл. Школан миннэ пораныл ёхты, интернатн тотавет. О̄лнэ ма̄наныл ляпат нефтяникыт рӯпитэ̄гыт. Хотьют родовой угодияныл та̄нти нупыланыл хассаныл, та̄н ще̄мьянылт ка̄сыӈ хо̄тпа олныл ойтаве. Ты урыл а̄нумн Лидия Антоновна Сопочина потыртас. Тэ̄н о̄йкатэ̄нтыл ос пыге̄н такви колта̄глэ ёт акв ма̄т о̄лэ̄гыт. Та̄н родовой угодияныл №16 по̄сыл пиным о̄лы, Пихтовый я̄ ва̄тат о̄лэ̄гыт. Та̄н ляпанылт иӈ нёлолов ще̄мья о̄лэ̄гыт. Ханты э̄ква ла̄выс, ма̄наныл сака ма̄ниг хасвес. Та̄н са̄лы о̄ньще̄гыт, са̄лыяныл ӯрнэ ма̄гыс ма̄ ат то̄вылхаты. Нефтяникыт ёт договор щирыл рӯпитэ̄гыт, угодиянылт нефтепровод пиным о̄лы. Таи ёмас, манах та̄л тав тот хуи, нэ̄мхуньт па̄лыг иӈ ат маныгта̄лвес. Лидия Антоновна ла̄выс, хӯрум э̄тпос сыс акв хо̄тпа ма̄гыс та̄н туп 5 со̄тыра 500 солко̄вил ойтавет. Ос хӯрум та̄л сыс акв щёс на̄йив сартнэ «Дружбал», на̄йпос ва̄рнэ станциял ос кол ӯнттын ма̄гыс са̄всыр э̄рнэ утыл мивет. Тыи пуссын э̄ри, ань тот о̄лнэ хантыт ё̄рнкол ат о̄ньще̄гыт, нор кол ӯнттэ̄гыт. Тав о̄йкатэ Владимир Иванович ань самаге сака лю̄льсаӈ на̄ӈке̄г, рӯпитаӈкв сака ат ве̄рми. Тэ̄н пенсият о̄лэ̄г, сас 7 со̄тыра солко̄вил ойтаве̄г. Па̄вылт о̄с кол о̄ньще̄г, тув ойтхатнэ ма̄гыс о̄с са̄в олн мины. Ня̄враманэ̄н пуссын янгыт, я̄нас о̄лэ̄гыт. Акв а̄гитэ̄н Муравленко ӯст о̄лы, нила а̄ги о̄ньщи. Таве̄н о̄с нё̄туӈкв э̄ри. Э̄ква такви ю̄нсхатуӈкв сака ха̄сы, та̄л сыс хӯрум сахи ю̄нтум, пуссын тыналасанэ. Ань са̄в хо̄тпа ла̄гыл маснут манос мо̄т пормас таве̄н ю̄нтылтэ̄гыт. Ты ще̄мья во̄рт о̄лым са̄в пил ва̄тэ̄гыт, хӯл, нё̄выль тыналэ̄гыт. Ты хосыт олн мощ о̄с сэ̄лэ̄гыт. Тамле ты ма̄хум ёт ма̄н ва̄щиньтахтасӯв. Ань туп во̄рт о̄лнэ ма̄хум пе̄с йис щирыл о̄луӈкв ве̄рме̄гыт. Туп та̄н нэ̄мхотьютн ул вос новавет ос кӯщаитн вос нё̄тавет. 1050 2013.04.26. Валентина УЗЕЛЬ Тав йӣвныл са̄всыр пормас ёрги. Виктор Сергеевич Зы рянов Сургутский район Белый Яр па̄вылт о̄лы. Тув тав Свердловский областиныл ёхтыс, са̄в та̄л геологыг рӯпитас. Э̄кватэ хӯл алыщлаӈкв сака э̄рупты, тав ты о̄йкатэ во̄рн ялуӈкв акваг ётво̄выгластэ. Са̄т та̄л ювле хультум порат о̄йка во̄рт ё̄мыгтыматэ яныг поталыӈ ха̄ль ка̄саластэ. Та йӣв ёлсартыстэ ос йӣв поталытэ юв тотыстэ. Номсыс, матыр пормас тах ёрги. О̄выл щёс нэ̄матыр ат тэ̄лыс, йӣве тувто̄сыс. Хумус йӣв ёт рӯпитаӈкв тав ханищтахтуӈкв патыс. Нэ̄пакыт хо̄нтыс, ищхӣпыӈ утыт са̄в потыр ловиньтас. Ань о̄выл щёс Ханты-Мансийск ӯст суссылтапе ва̄рвес. Са̄всыр пӯмыщ утанэ тыг тотыгласанэ. А̄ныиг манос мо̄т пормасыг ань иӈ ат ва̄рсанэ. О̄йка тох ты ла̄ви: «Ка̄сыӈ йӣв такви щирыл яныгми, тӣвраныл пуссын са̄всырыт. А̄нумн тыи пӯмщиг о̄лы, ос матыр а̄ны манос хусап ва̄руӈкв ам тах ханищтахтэ̄гум». Тав э̄кватэ̄н акваг нё̄таве. Ань ты выставка ва̄рнэ ма̄гыс э̄кватэ хо̄та̄ти титыглахтас, потыртахтас. Тэ̄н акв пыг о̄ньще̄г, пыге̄н ань яныг, такви ня̄врамыӈыг е̄мтыс. Та̄н пуссын сака юртыӈыщ о̄лэ̄гыт, халанылт нё̄тхатэ̄гыт. Тох о̄луӈкв ос рӯпитаӈкв, ва̄им, сака ёмас. 1050 2013.04.26. Людмила ТЕТКИНА Мӯтраӈ о̄йка хӯнтлаӈкве сака пӯмащ. Ханты-Мансийск ӯст библиотекаколт стихыт, потрыт хаснэ ё̄рн хум Юрий Вэлла ма̄хум ёт хо̄нтхатыглас. Тав такви хансум нэ̄паканэ урыл потыртас. Ты мӯтраӈ о̄йка хӯнтлаӈкв сака пӯмащ о̄лыс. Юрий Кылевич ла̄выс: «Ам яныг ос осыӈ нэ̄пакыт хансуӈкве ат ха̄сэ̄гум, «Ветерок с озера» нэ̄пакум щар янгыг о̄лы. Ам таве хосат хансуӈкве о̄вылтаслум. Хунь а̄стласлум, о̄лнэ колум на̄йин ё̄свес. То̄нт номсысум, нэ̄пакум витыг та минас. Ос на̄й хунь лапхарыгтаслӯв, колув ӯнлын ма̄т хансум нэ̄пакум хо̄нтыслум, ловиньтан ке̄мыг о̄лыс. Потрум ловиньтаслум, тувыл мо̄т щирыл хансыслум та юипа̄лт нэ̄пакыг та̄ратаслум. Ань таи торгамтаслум, ка̄сыӈ потыр такви пора о̄ньщи, о̄выл хансум потрум улпыл лю̄льсаӈ хансым о̄лыс». Са̄всыр мо̄йтыт, а̄мщит, мӯтраӈ потрыт тав о̄с акванатыянэ. То̄ва потрыт, а̄мщит тав «Азбука оленевода» нэ̄паке̄т хассанэ. Ты нэ̄паке са̄т ла̄тӈыл толмащлавес. О̄выл стихе тав 4 классыт хансыстэ. 1979 та̄лт хансум потранэ журналын ва̄рве̄сыт. Ма̄хум ёт потыртым тав ла̄выс: «Ам 65 та̄лум то̄влыс, ань тыг мус ханищтахтэ̄гум. Школа а̄стламум юипа̄лт э̄лаль ханищтахтуӈкве ат минасум. Туп 40 та̄лум то̄влум порат литературный институтт ханищтахтуӈкве патсум. Ань ам заочный щирыл юристыг китыт курсыт ханищтахтэ̄гум. Пе̄с йис ма̄т о̄лым ос нефтяникыт ёт воритотым, ам гражданский, жилищный ос ма̄, во̄р урыл хансым кодексыт пуссын мӯсхалыг ханищтасанум. Амки нэ̄пакыт ловиньтаӈкве щар ат э̄руптэ̄гум». Юрий Кылевич китыглавес: «Наӈ стихотвореният, потрыт акваг хансэ̄гын манос хунь номтын паты? » Тав ла̄выс: «Ам хунь тыг йисум, акв номт ёхтыс, ма̄шинам ёлпо̄илттаслум, стихум молях нэ̄пакын хансыслум, ул вос ёрувлахты. Ос туп сыстам нэ̄пакн хансуӈкве ат ха̄сэ̄гум, тув стихыт лю̄льсаӈ хасхатэ̄гыт. Нэ̄пакло̄мт ще̄пыт акваг о̄ньще̄гум, э̄рыӈ пуӈкумн матыр ёмас ла̄тӈыл ёхтавем, ёлхансуӈкв вос а̄лымаслум». Юрий Вэлла потыртаӈкве сака ёмащакв ха̄сы, ма̄хум таве кит арыгкем щё̄с китыгласаныл. 1050 2013.04.26. Н. П. Чернякова (Вынгилева) Ты стихотворение Н. П. Чернякова (Вынгилева) хансыстэ. Ты стихотворение Н. П. Чернякова (Вынгилева) хансыстэ. Тэ̄лы а̄нумн те̄тсанэ, тот тамле ла̄тӈыт хансыс: «Галина Рудольфовна, тыныӈ оман такем ёмас хо̄тпа о̄лум, ань мус мӯтраӈ ла̄тӈанэ хӯлъянум. Наӈын Пе̄с Ва̄щиль хо̄талыл янытлылум, амки хансум э̄рыгсовла̄тӈыл мӯйлуптылум». Ётыл тав ма̄н палтув ёхталаме̄т, ме̄н потыртахтасме̄н ты стихотворениятэ яныгполь э̄тпост газетан ва̄руӈкве. То̄нт ам омам Аксинья Степановна Мерова а̄тимыг е̄мтум хо̄талэ. Ань тэ̄натэ̄н ка̄стым ты ла̄тӈыт та ловиньтыяны̄н. Ты стихотворение Н. П. Чернякова (Вынгилева) хансыстэ. Тэ̄лы а̄нумн те̄тсанэ, тот тамле ла̄тӈыт хансыс: «Галина Рудольфовна, тыныӈ оман такем ёмас хо̄тпа о̄лум, ань мус мӯтраӈ ла̄тӈанэ хӯлъянум. Наӈын Пе̄с Ва̄щиль хо̄талыл янытлылум, амки хансум э̄рыгсовла̄тӈыл мӯйлуптылум». Ётыл тав ма̄н палтув ёхталаме̄т, ме̄н потыртахтасме̄н ты стихотворениятэ яныгполь э̄тпост газетан ва̄руӈкве. То̄нт ам омам Аксинья Степановна Мерова а̄тимыг е̄мтум хо̄талэ. Ань тэ̄натэ̄н ка̄стым ты ла̄тӈыт та ловиньтыяны̄н. Ищпан о̄йка а̄ги ла̄вум ла̄тыӈ Ищпан о̄йка а̄гиа̄гикве Ма̄ньщи номткве таве̄н э̄рикве, Ла̄тӈе щар ат ёрувлытэ, Нэ̄пакн хансым э̄лтотытэ. Я̄тил, посыӈ ма̄ньщи нэ̄кве Яныг ӯсыт о̄лантыкве, Хосат та̄гыл таве ва̄глум, О̄лнэ (миннэ) лё̄ӈхе кои ла̄глыл. Окщинья оматэ ма̄щтыр о̄лыс, Ма̄н музеювн ёхтала̄лас, Са̄всыр пормас ва̄руӈкв ха̄сыс, Ма̄ньлат мир тав ханищта̄лас. Э̄ква номтэ ёмас о̄лыс, Потре, ла̄тӈе сохтыг овтыс, Пе̄с йис ва̄рмаль тав та ва̄с, Са̄всыр э̄рнэ потыр потыртас. Хотитн ма̄н ань ханищтаве̄в? По̄ри ла̄тыӈ ул вос ла̄ве̄в: Халувт роттыг, со̄ймыг вос о̄лэ̄ва, То̄пал ма̄хум ат хӯнтлэ̄ва. То̄пал ма̄хум хотыл нэ̄глы? Та̄н щар охсар хурип лэ̄гыл Ха̄йтнэ лё̄хрищаныл хосувлыяныл, То̄пал ва̄рмаляныл тӯйтыгпияныл. Хо̄тпа ха̄сэ̄гыт портуптаӈкве, Щисгим ве̄рме̄гыт ро̄ӈхантаӈкве, Щар туп оссам ня̄врамрищит Полщит ва̄рим ха̄йтантырищит. Та̄н ураныл яныг ма̄хум Ла̄выгласыт тамле ла̄тыӈ: «Ты кӯняррищит номтаныл ва̄ти, Таима̄гыс щисге̄гыт (ха̄йтэ̄гыт) хо̄та̄ти, Та̄н номтаныл – полщиг овтэ̄гыт, Та̄н потраныл по̄ри минэ̄гыт. Тамле ма̄хум э̄лнув ӯрена, Та̄н ляпаныл ул ё̄мыгтэ̄на. Тамле то̄пал э̄лумхо̄ласыт Са̄внув мирув портуптасыт, Па̄выл ёрт хольт ха̄йтантэ̄гыт, О̄лнэ лылыт сакватэ̄гыт Э̄рыг тотнэ пыганува, Э̄рыг тотнэ а̄гиянува, На̄нан наска̄ссыг хунь нёвитасанува, Наска̄ссыг хунь янмалтасанува. О̄лумминам ва̄рмаляквет Хосат хультсыт йис пораквет, Та̄кыӈномтыӈ ня̄врамаквет Э̄лаль кинсэ̄гыт о̄лнэ накыт» Тамле посыӈ, ёмас ла̄тӈыт, Яныг ма̄хум койнэ потрыт, Нотум палыт хӯлыглэ̄гум, Мӯтраӈ хо̄тпа хунь хо̄нтэ̄гум Январь 12 хо̄талт 2013 та̄лт, Нина Чернякова (Вынгилева) 1050 2013.04.26. Татьяна Бахтиярова Ульяна урыл (ма̄ньщи мо̄йт). Э̄кваго̄йкаг о̄лэ̄г, акв āги о̄ньщēг. Нё̄р вāтат о̄лэ̄гыт, о̄йка сāв сāлы о̄ньщи, мо̄рсыӈыщ юн о̄лыгла̄лы. Акв порат о̄с та щё̄питахтас нёрн минуӈкве, нэ̄тэ ётворатас. Āгирищ пāвлэ̄т такке̄т хультыс, тэ̄лы хо̄талыт лю̄льсыт, ща̄няге-āщаге нё̄рн сāлыянэ̄н уральтаӈкве та минасы̄г . Ульяна кӯтюве ёт поргыс, ёнгыс, турманлаӈкв патыс. Тыттыстэ, ёлнэ̄гыстэ, такви юв щалтыс. Āвитэ то̄рттыстэ, сунсы, юн мулыпāлт такем мāнь пыгрищ ӯнлы. Тав э̄лыпа̄лэ̄т āны ӯнлы, витэ – пāлэ сэ̄мыл, пāлэ – посыӈ. Ӯнлы, акваг тувле āны нупыл та сунсы. Āнытэ акв пāлэ сэ̄млыг ēмты, мо̄т пāлэ ос посыӈыг ēмты, тувыл ос пе̄нтхатэ̄г. Тове̄рт лылыепыл тāртытэ, тове̄рт щар хумп ат нэ̄глы, тувыл ня̄нь ло̄мт выг, мāниг тапыртытэ, о̄с витын паргалтытэ. Āгирищ сунсы, кон тӯюӈкв та патыс, щар сома ня̄нь ло̄мт парги. Тове̄рт кантмим самыл сунсы, тувыл нумпа̄лыл о̄с витыл со̄сытэ, тувыл āны о̄влэ мāнь хӯмпыл ле̄ӈкталытэ. Ӯнлы, ӯнлы, мовалы, лāщлакв ре̄гыӈ лылыепыл тāртытэ. Акваг тащир хотум та хитырты. Āгирищ мощ хотрохтыс. Ро̄ӈхуӈкв āл та патыс, та кӯм щащēкватэ номылматастэ. Мāньнув порат лāвыгла̄лвес, хунь самсай нэ̄глы, ат ро̄ви ро̄ӈхуӈкве, мори лоскуӈкве, тув новхатаӈкве о̄с ат ро̄ви, ат тайи. Тащир э̄тпалыт ӯнлыс, суйта̄л сунсыс, мат кӯмт ёлоилматвес, ат номитэ. Āлпыл са̄йкалас, сунсы – нэ̄мхотьют āтим. Пыгрищ мат халт минам, щар хиле āтим. Квāлыс, номсы, ул ӯлмаяс. Тащир такке̄т о̄лыме̄т, кит сāт та холас. Ща̄няге-āщаге та ёхтысы̄г, та вāрмаль āгирищ ёрувластэ. Ща̄няге̄нāщаге̄н ат потыртастэ. Та пāсыл āгирищ такке̄т хульты, юн о̄луӈкве щар ат пилы. Пыгрищ тове̄рт нэ̄глалы, аквта щир ӯнлы, ӯнлы, тувыл ос постыглан э̄лыпāлт та мины. Тащир атхуйплов тāл та холас. Āги янгыг ēмтыс, ща̄нягеāщаге хотталь щалтсы̄г, Ульяна такке̄т хультыс. Акв порат ӯнлы, лю̄ньщи. Āще сāлыт, номсы, хотьютн ань тах о̄ньщавет, хотьютн ка̄сыӈ порат акванатавет, ха̄йтнутн ювтэ̄вет, такем сāлит. Ке̄рнялянэ, лэ̄санэ тох та во̄рт хультсыт, лап ат пантым, такви ат вāгтэ, хо̄т о̄лэ̄гыт, āще кос хунь такви ялантас. Тащир лю̄ньщиме̄т та турманлас. Самаге но̄хлаплас, номсы – пос пēламтаӈкв э̄ри, хо̄тал палыт нэ̄матыр ат вāрыс, тэ̄ӈкв такем тахмаяс. Конквāлыс, о̄рас тӯлыс. Щалтыс, сунсы, юн пыг такем ты пос пēламты, мольщаӈыл, вāйил масхатам, щар э̄лмхо̄лас. Ла̄тыӈ ла̄вуӈкв ат āлымас, пыг такви та потрамас: Наӈ такем ёмас āги о̄лсын, атхуйплов тāл о̄лсын, а̄нум ва̄щиньта̄лсын, нэ̄мхотьютн ат потырта̄лэ̄гын, щаще̄кван лāвум ла̄тӈыт ёмащакв номиянын. Āщин вāрмалянэ ма̄гыс сымын акваг та āгмыӈ. Наӈ ляльтылын воссыг сунсуӈкв ат ве̄рмысум, рӯт ат о̄ньще̄гын, нё̄тнэ ма̄хум наӈ палтылын ат ёхты. Ам наӈын сака э̄руптылум, хосаг е̄мтыс, вāглум. Таӈхе̄гум наӈын ань акваг нё̄тнэ юртыг о̄луӈкв, матыр таӈхе̄гын – пуссын вāре̄гум, наӈ туп лāвен, лю̄ль ва̄рмаль нэ̄мхуньт ат тотэ̄гум, ат вāре̄гум. А̄ги номсы: « Я– ты, аман хомус юв щалтыс». Такем хотум пилыщмаӈ суйты. Сунсы, со̄ль, та сāр пыгрищ хурип, туп янгыг ēмтум. Щёровн пилыщман ёхтаве, кӯре молях пēламтастэ, пӯтанэ ӯнттыс. Пыгрищ о̄с потыртаӈкв та патыс: – Тыхо̄тал па̄сыл наӈ воссыг тэ̄нут пāйтуӈкв ат патэ̄гын, тувыл тāрвитаӈ вāрмаль вāруӈкв наӈын воссыг ат э̄ри, кос маныр ань ам вāруӈкв патэ̄гум, туп лāвен, ам вāрапе̄гум. То̄нт пасан щар тāглэ сырсыр тэ̄нутыл та тэ̄лапавес. Маныр таӈхе̄гын, кос маныр о̄лы. Колэ о̄с самаге сунсым щар та̄глэ, осэ̄ва̄тал пормасыл тэ̄лапавес, щар мувал нас вольги. Пыгрищ то̄румыл тартым о̄лыс, тав ка̄сыӈ порат тāл пēнты, тӯйт, ракв вāри, таӈхихо̄тал нэ̄глы. Тове̄рт турап вāри, тӯйт паргалты. Тове̄рт щахлыӈ хо̄тал вāри, тувыл ос сыстам хо̄тал вāри. Тащир тāлпалыт та хитырты. Āги о̄влэ̄т акваг хурахлым о̄лыс. Акваг Ульяна матыр таӈхи, пыг со̄ль, щар пуссын вāрапи. Нё̄рн ялыс, сāлыт по̄сас, во̄рт кēрнялит, лэ̄сыт пуссын но̄ххо̄нтсанэ, ёмщакв хотщё̄питасанэ, ёмщакв но̄хӯнттысанэ. Āще кӯтювыт акваг во̄рн тотыгла̄лыянэ, щар ат пилэ̄гыт, сома щар тав та о̄траныл. Кос маныр вāри, кос маныр вēрми, сома щар āще хольтыл. Тащир матпалыт о̄лсы̄г, аквматэ̄рт āги номсы, тав тāлэ воссыг ат вēрми тах о̄луӈкв, такем ханьщувлас, ёмас пыгрищ, акваг мовала̄лым матыр вāри, щар ат тāрвитлахты. Потыртахтасы̄г, акван та о̄лмыгтасы̄г. Колэ̄н нумпа̄лт акваг хо̄тал посты, турапыг нэ̄мхуньт ат ēмталас. Ань та о̄лэ̄г, ань та щуне̄г. Амки хансум мо̄йтум. 1050 2013.04.26. Валентина УЗЕЛЬ Ты ня̄врамыт ма̄щтырлаӈкв сака ха̄сэ̄гыт. Ка̄сыӈ та̄л школат ханищтахтын ня̄врамыт ма̄гыс Ханты-Мансийск ӯст научнопрактический конференция ва̄рыглаве, «Ремёсла и промыслы: прошлое и будущее» тамле намыл пиным о̄лы. Ты та̄л ремёсла Центр колт рӯпитан ма̄хум нёлоловит щёс ня̄врамыт округув янытыл акванатыгласаныл. Ань са̄всыр районытныл, ӯсытныл ос ма̄нь па̄влытныл ня̄врамыт тыг ёхталасыт. Ка̄сыӈ хо̄тал о̄влэ̄т ня̄врамыт та̄нти хансум номтыӈ потраныл ловиньтасаныл, тувыл ос та̄нти халанылт ханищтахтасыт. Ха̄льӯс район Хулюмсӯнтныл Надежда Константиновна Маслова ёт тит а̄гирищиг Маша Лаверина ос Татьяна Сивцова ёхталасы̄г. Таня Сивцова о̄выл хо̄талт «Хултнэ сов» урыл потре ловиньтастэ. Пе̄с порат Та̄гт я̄ алгаль о̄лум ма̄ньщи ма̄хум тамле алыщлапыл хулюмхӯл пувсыт. Танян Константин Георгиевич Адин ты урыл потыртас. Тувыл а̄гирищакве такви ма̄щтырыг хӯлп сагуӈкв ханищтахтам. Маша Лаверина ос ма̄ньщи сансква̄лыг сагнэ урыл потыртас, са̄в хури суссылтас. Ань конференцият о̄лум ня̄врамыт сагуӈкв тэ̄н о̄с ханищтасанэ̄н. Тэ̄натэ̄н Н. К. Маслова ханищтыяге. Ты Центр кӯщай нэ̄ Ольга Дмитриевна Бубновене ань Надежда Константиновна сака янытластэ. Нилыт та̄л тав няврамыт тыг тотыглыянэ, та̄н акваг ёмащакв щё̄питахтэ̄гыт, потрыт хансэ̄гыт, ма̄щтырлэ̄гыт. ЮГУ рӯпитан Диана Васильевна Герасимова жюрихо̄тпаг о̄лыс. Тав хӯрум хо̄тал ня̄врамыт потраныл хӯнтлысанэ, сунсыс – та̄н маныр ха̄сэ̄гыт, халанылт хумус ханищтахтэ̄гыт. Тав тох ла̄выс: «Ам студентыт ёт рӯпитанэм сыс ань таи ла̄ве̄гум – ты ня̄врамыт пуссын школат ханищтахтэ̄гыт, ос та̄н потраныл татем ёмащакв, номтыӈыщ ос пӯмщиг хасматныл. Ам ханищтан студентанум тох хансуӈкв ат ха̄сэ̄гыт. Та̄наныл ханищтан хо̄тпатн яныг пӯмащипа ла̄тыӈ ла̄ве̄гум, та̄н яныг ос э̄рнэ рӯпата ва̄ре̄гыт. Ты ня̄врамаквет о̄с э̄лаль вос ханищтахтэ̄гыт, ты рӯпатаныл ул вос хультуптыяныл». Лянтор ӯст о̄лнэ ма̄хум о̄с сака э̄сгуве̄сыт. Та̄н ка̄сыӈ та̄л тыг ёхталэ̄гыт, ня̄враманыл ма̄щтырлаӈкв сака ёмащакв ха̄сэ̄гыт. Акв ханты а̄ги Настя Обирина са̄лы сов ёт рӯпитас, сыстамтастэ, тынтластэ. Мо̄т а̄ги хансаӈ па̄сса сагыс, ёнгынутыт суссылтасыт. Сургут ӯсныл ёхталам ня̄врамыт нирныл хусапыт ва̄руӈкв ма̄хум ханищтасаныл. Тамле рӯпата кӯпнит хунь. Ма̄н ня̄врамыт ёт о̄с тамле хусапыт ва̄руӈкв ханищтахтасӯв, ма̄щтырлаӈкв пӯмыщ о̄лыс. Мо̄тыт та̄л тыт о̄с акв тамле конференция тах ва̄рыглаве. Ня̄враманы̄н тыг те̄тсуӈкв ка̄сащегы̄н те, ремёсла Центрыт рӯпитан ма̄хум ёт потыртэ̄н. А̄гитпыгыт пе̄с ва̄рмалянув э̄лаль тотуӈкв вос ханищтахтэ̄гыт. 1051 2013.05.10. Людмила ТЕТКИНА Ӯйхул янмалтан хо̄тпат урыл. Ӯйхул янмалтан, хӯл алыщлан хо̄тпат Ханты-Мансийск ӯсн сапра̄нин акванатыглаве̄сыт. Та̄н 2012 та̄л сыс хумус рӯпитасыт, та урыл потыртасыт. Ӯйхул янмалтан ва̄рмаль ма̄гсыл округув акваг са̄в олн холты. Ювле хультум та̄лт бюджетныл акв миллиард арыгкем солко̄ви хансыглавес. Ань «Развитие агропромышленного комплекса, заготовка и переработка дикоросов в ХМАО-Югре до 2015 года» нампа яныг программа рӯпиты. Ты хосыт ӯйхул янмалтан ма̄хум нё̄тавет. Александр Киселёв, природный ресурс департаментыт рӯпитан хум, та урыл потыртас, 2012 та̄л сыс манаса̄вит тонна хӯл тыт пуввес, манхурип хӯл тэ̄нутыг ва̄рвес. Манаса̄вит щаквит посвес, мис нё̄выль, са̄лы нё̄выль тыналавес. Та та̄лт ӯйхул янмалтан 57 йильпи ферма рӯпитаӈкве о̄вылтахтасыт. Та̄н пуссын ты программа щирыл нё̄тавет ос субсидияолныл ойтавет. Соссаӈ ма̄хум общинат о̄с тувыл нё̄тавет, та̄н хӯл алыщлан, ӯйхул янмалтан, пил ва̄тнэ ос ла̄хыс атнэ ма̄гсыл грантолныл мивет. Сельский хозяйстват рӯпитан хо̄тпат ёмащакв кос рӯпитасыт, тувыл ань тыг мус иӈ са̄в та̄рвитыӈ ва̄рмаль о̄лы. Ты урыл кӯщай хум таи ла̄выс: «Округувт ань нила со̄тыра арыгкем э̄лумхо̄лас ӯйхул янмалтэ̄гыт, хӯл алыщлэ̄гыт. Таи туп лю̄ль, та̄н тамле та̄рвитыӈ рӯпата ва̄рим, мощща олн сэ̄лэ̄гыт. Ма̄ньлат хо̄тпат па̄вылн минуӈкве ос ты рӯпата ва̄руӈкве ат ка̄саще̄гыт. Ос мо̄т та̄рвит, тыт лӯима̄т ӯйхул тыттын ма̄гсыл са̄всыр комбикорм мо̄т ма̄ныл тыг тотуӈкве э̄ри. Ты хосыт нё̄выль тыныӈнувег е̄мты». Сэ̄мыл охсар янмалтан предприятие урыл кӯщай тох ла̄выс. Та̄н мӯсхалыг рӯпитаӈкве о̄с ат ве̄рме̄гыт. Охсар сованыл тынта̄л э̄лаль тыналыяныл ос охсар янмалтаӈкве, тыттуӈкве са̄в олн э̄ри. Тыил олн сэ̄луӈкве щар ат ве̄рме̄гыт. Ма̄н округувт туп Белоярский район Касум па̄вылт ос Кондинский район Шугур па̄вылт о̄лнэ совхозыгт сэ̄мыл охсарыт янмалтавет. Хӯрум частный предприятие ты рӯпата о̄с кос ва̄ре̄гыт. Та̄н о̄с торыӈ щирыл олн сэ̄луӈкве ат ве̄рме̄гыт. Са̄всыр районныл ёхталам хо̄тпат та̄нки рӯпатаныл ос та̄рвитыӈ ва̄рмаляныл урыл кӯщаит э̄лыпа̄лт потыртасыт. 1051 2013.05.10. Л. Обросова (RUS) Г. Кондина (MAN) Яныг хо̄нт юипа̄лт о̄лум та̄ланув нэ̄мхуньт ат ёрувлыянӯв. Ма̄н редакциявн Лидия Григорьевна Обросова такви а̄гитэ ёт рущ ла̄тӈыл хансум пищматэ те̄тыс. Э̄ква Кондинский район Леуши па̄вылт о̄лы, а̄тятэ ма̄ньщи хум о̄лыс, яныг хо̄нтыт хо̄нтлыс. Оматэ рущ нэ̄ о̄лум, та̄н хуньт тыг те̄тым ма̄хум. Лидия хо̄нтаӈ ма̄т 1945 та̄лт самын патыс. На̄н тав яныгмам та̄ланэ урыл потре ловиньтэлы̄н. Нахрачи па̄выл. Кондинское па̄выл пе̄с порат Нахрачи ла̄ввес, тав 90та̄лыт мус районный центрыг о̄лыс. Тот са̄всыр мирыт – хантыт, ма̄ньщит, рущит о̄лсыт, 50та̄лыт мус калмыкыт, евреит о̄с о̄лсыт. Ётыл та̄н «Храбрый» на̄иӈха̄пыл та̄нти самын патум ма̄нылн ювле тотве̄сыт. То̄нт ма̄в сака щёлыӈ о̄лыс, тыт нё̄тнэ, ёмас во̄рквет са̄в пил, ла̄хыс яныгмас, са̄всыр ӯйхул во̄рт ха̄йтыгтас, я̄нув хӯлыӈыт о̄лсыт, ос янгыщ тыт ка̄ркам ма̄хум о̄лсыт. Хум ма̄хум во̄раясыт, хӯл алыщласыт, нэ̄ хо̄тпат ӯйхул о̄щсыт, тэ̄пкант са̄всыр тэ̄нут янмалтасыт. Атнэ пиланув тыт рӯпитам заводыт са̄всыр тэ̄нутыг – са̄ккар ёт па̄йтым пилыг, айнэ витыг, винаг ва̄рве̄сыт. Са̄в та̄л та заводыт ам омам Клавдия Никитична Панова рӯпитас. Па̄влувт хӯл щё̄питан завод, ӯйхул янмалтан ферма, клубкол ӯнттуве̄сыт. Пилыщмаӈ ла̄тыӈ. Акв порат ла̄тыӈ тотвес, яныг хо̄нт о̄вылтахтам. Ам а̄тям Григорий Егорович Иженяков та̄ра хо̄нтлуӈкв та вуйвес. Аквта порат тав ягпыгаге Михаил ос Пётр тотвесы̄г. Пуссын ла̄кква ма̄н е̄мтсыт. 1941 та̄л сака та̄рвитыӈ о̄лыс, а̄тям та урыл потыртаӈкве щар ат ка̄сащас. Немцыт товлыӈха̄пыл таса̄вит ӯсыт, па̄влыт сакватасыт, ма̄ мо̄т талиӈ ё̄ӈхтавес, таса̄вит миркве порыславес. А̄тям 1942 та̄лт Ленинград нупыл хо̄нтлыс. То̄нт ювле лаквуӈкв щар ат ро̄выс, щар акв ӯсыл ювле ва̄руӈкве ат тайис, «За Родину! » ла̄тӈыт ро̄ӈхим, па̄тлуптым са̄лтатыт э̄лаль ха̄йтсыт. А̄тям тот сакватавес, пуӈке̄н тит те̄рло̄мтыг хо̄яме̄н мус тӣврын щалтсы̄г. Госпитальт акватэ хотвиӈкве ве̄рмувес, то̄нт нила э̄тпос потыртаӈкве щар ат ве̄рмыс. Мо̄тыт те̄рло̄мт пуӈке̄т тох та хультыс, ле̄ккарыт таве̄н ла̄всыт, аквман налыман та̄л мус туп о̄луӈкве тах ве̄рми. Тав 73 та̄л о̄лыс. Войнаныл юв те̄твес, инвалид о̄выл группал хасвес. Хо̄нт оигпам юипа̄лт а̄тям ягпыгаге Михаил ос Пётр юв ёхтысы̄г. Хунь тотве̄сыт, пуссын та̄ксар, ма̄ньлат хумыт о̄лсыт, юв ёхтуманылт сакватым, а̄гмлахтан хо̄тпаг е̄мтмыт. О̄пагумщаще̄кагум ща̄гтсы̄г, матъёмас лылыӈыт юв ёхытхатсыт. Нэ̄ хо̄тпат рӯпитасыт. Война порат нэ̄ хо̄тпатын о̄с сака та̄рвитыӈ о̄лыс. А̄гит ос ня̄врам та̄л нэ̄т нор яктуӈкве во̄рн те̄тавет. Та̄н халанылт ам омам рӯпитас. Нэ̄матыр техника а̄тим о̄лыс, пуссын та̄нти ё̄рыл рӯпитасыт. Сартнэ те̄рыл яныг йӣвыт сартсыт, йӣв товыт са̄грапыл са̄грысаныл ос норыт акв аняг поварттасаныл. Тэ̄лы тӯйт тӣвырт, ащирмат, туи вощлах халт лё̄мвоил ат пилым тох та рӯпитасыт. Хотьют по̄льтахтыглас, а̄гмыл е̄мталас те, хоса ӯщлахтуӈкве ат та̄ртвес. Титхӯрум хо̄тал ащирмаӈ колсовт те̄ркӯр ляпат исылтахтым пусмалтахтэ̄гыт, тувыл о̄с э̄лаль рӯпитаӈкве та те̄тавет. Торыӈ ёмас маснут ат о̄щсыт, кӯр ляпат мощ то̄слыяныл о̄с та масапияныл. То̄ват пе̄нтхатнэ маснут ат пыл о̄щсыт. Тох акваг рӯпитаӈкве марщум о̄лыс, ва̄им халанылт ощхуль ва̄рсыт. Омам ка̄ркам, ощхуль ва̄рнэ а̄гииг о̄лыс, э̄типа̄лаг ӯщлахтын порат э̄ргысыт, То̄рум нупыл по̄йкщасыт, моляхнув хо̄нт вос по̄йты. Ты ёмас номтыл туп э̄лаль о̄лсыт. Хо̄нт оигпам юипа̄лт омам «Труженик тыла» ме̄талил майвес. Йильпи колта̄гыл. 1943 та̄лт омагума̄тягум акванминасы̄г. А̄тям хӯл щё̄питан завод па̄лыл хӯл алыщлан ма̄л майвес. Ты ма̄ 15 ве̄рыстат Кондинское па̄вылныл о̄лыс. Тот тэ̄н о̄влэ̄т ма̄ньнув кол, ётыл ос яныг, ёмас кол ӯнттысы̄г. Ма̄н тот са̄т ня̄врам самын патсӯв. То̄нт ще̄мьят пуссын янгыт о̄лсыт, ма̄ньта̄гыл рӯпитаӈкве ханищтавесӯв. А̄тяв хӯл алыщлас. Камкат, пителит такви ва̄рыс, хӯлпыт о̄с такви туис. Са̄лы совныл ма̄навн ла̄гыл маснут ю̄нтыс, ма̄нь суныт, яныг суныт такви ва̄рыс. А̄мпанэ но̄хте̄рсас, тав ат а̄мп сун та̄гыл о̄ньщас. Ма̄н ос ма̄нь сунсовыл сыпт акваг тахсысӯв. Омав осыӈ нуил супыт, ёлысовыт ю̄нтыс, а̄мп пуныл носкит, па̄ссат сагыс. Война юипа̄лт о̄лупсав иӈ та̄рвитыӈ о̄лыс, тэ̄нут карточка щирыл майвес. Тэ̄лы а̄тяв палт хум ма̄хум ёхталасыт, пувум хӯланэ сунытын та̄глэкв та̄лттавет, нумыл парщиныл лаппантавет, ёмщаквег ёлхасавет ос Кондинское па̄вылн та тотавет. Туи ма̄н омав ёт яныг пӯщкатын хӯл солвалтэ̄в, тувыл то̄слаӈкве но̄хтагатыянӯв. То̄нт яныг хӯл са̄в о̄лыс. Сорт, хулюмхӯл, тӯрхул, сымри, та̄рка – тамле хӯл а̄тяв пувиньтас. Та̄лыт молях минэ̄гыт. Ловмантем та̄лум порат ам номилум, хумус ма̄н мисув ма̄гсыл пув ва̄рсӯв, тэ̄пкант картёпка пинсӯв, сартнэ те̄рыл на̄йив сартсӯв. Таквсы са̄в сӯйпил ва̄тыгласӯв, а̄тявн заготконторан мивет, та олнытыл школан миннэ маснутыл, нэ̄пакытыл, сумкатыл ёвтаве̄в. Пил ва̄туӈкве хоса ма̄н яланта̄лсӯв, номилум, хумус па̄йпыӈ та̄гыл я̄ӈкылмат ӯлтта та ё̄ме̄в. Та̄рвитыӈ кос о̄лыс, мощ ӯщлахтэ̄в ос э̄лаль та рӯпитэ̄в. Нэ̄мхотьютув ат лю̄ньщиглас, рӯпатаныл по̄хын ат оиглас. Ащирмаг е̄мтнэ мус ня̄рла̄глыл ха̄йтыгтасӯв, нэ̄матыр а̄гмыл ат е̄мталасӯв. Ма̄нь порав та̄рвитыӈ кос о̄лыс ос ма̄н таве со̄тыӈыг номилӯв. Ма̄н то̄нт о̄лупсавн та̄кмалтавесӯв. Ёмас ос са̄в маснут ат о̄щсӯв, юн то̄выль тармыл хуясӯв, ос тыи яныг ва̄рмаль хунь, ма̄н омавн э̄руптым ос та̄глыӈ со̄ргыл ха̄йтыгтым янмалтавесӯв. ЯНЫГМАМ МА̄ТЕ̄В Яныгмамӯв сыс, са̄в ма̄квет ла̄хс атым, пил ва̄тым, па̄кв паттым ла̄глыл ха̄йтсанӯв. Са̄вни, та̄хтпил, морах, сӯйпил, саӈквлыпил ва̄тсӯв. Ос ма̄н, Хо̄нтаӈ ма, пиланув та̄н ты сака атыӈыт. Во̄рт ё̄мыгтым са̄всыр ӯйхул ва̄щиньтасӯв: са̄лыт, лэ̄ӈныт, ра̄щит, кощарыт, во̄нтырыт, анта̄трыт. Тот о̄лум во̄рув, витув сака нё̄тнэт, щёлыӈыт о̄лсыт. Хо̄талкве ёлӯнтнэ порат во̄р нас суртги, нас вольги. Тӯранув, я̄нув сака сыстамыт о̄лсыт. А̄тявн тот о̄луӈкве ос рӯпитаӈкве сака ёмас о̄лыс, тав ма̄витэ э̄руптастэ. Пуссын ты рӯпата ва̄руӈкве таве̄н омав нё̄тыс, тэ̄н акваг акваннё̄тхатым рӯпитасы̄г. А̄тяв войнат пилта̄л хо̄нтламе ма̄гыс тамле по̄сытыл майвес: – Орден Отечественной войны I степени; – Медаль за отвагу; – Медаль за оборону Ленинграда; – Медаль за Победу над фашистской Германией. Ма̄н акв ва̄с о̄лтыл хольт молях яныгмасӯв, Ла̄кква ма̄н та тыламласӯв, Колув ма̄нав ат ва̄щиньтым, Савалапыг та хультыс. Ам ла̄щлаквег колтем ляпан ё̄мантэ̄гум, Ос ла̄щлаквег ла̄ве̄гум: «Паща, колтем! » Самвитанум ёлаль та̄нти та овтэ̄гыт, Тыт ам нэ̄мхотьютын воссыг ат уравем Яныг ялпыӈ хо̄талув – Победа хо̄талув ка̄сыӈ хо̄тпан тыныӈ! Ты ялпыӈ хо̄тал порат номтанув ёмасыт, матъёмас яныг ма̄хманув странав вуянтаӈкве ё̄раныл ёхтыс, ма̄н ань мирыӈ порат о̄лэ̄в ос ма̄нти Родинав э̄руптылӯв. Пуссын пуста̄гыл вос о̄лэ̄гыт, ветераныт э̄руптым ос янытлым вос о̄ньщавет. Со̄т ос щунь на̄нан посыӈ хо̄талт о̄луӈкве! Л. Обросова потре Г. Кондинан ма̄ньщи ла̄тӈыл хасвес. 1051 2013.05.10. Тамара МЕРОВА Учёныит акванатхатыгласыт. А̄с-угорский институтт рӯпитан хо̄тпат «Этнокультурное и социальноэкономическое развитие коренных малочисленных народов Севера» нампа конференция щё̄питасыт. Тав Ханты-Мансийск ӯст кит щёс ва̄рыглаве ос тот доктор наук нам о̄щнэ кит хо̄тпаг янытлаве̄г. О̄влэ̄т яныгпо̄ль э̄тпост Е. И. Ромбандеева 85 та̄лэ то̄влуме кастыл ханты ос ма̄ньщи ла̄тӈыг ханищтан ма̄хум акванатыглаве̄сыт. Ос я̄ӈк на̄тнэ э̄тпост Т. Г. Харамзин 75 та̄лэ то̄влынэ̄т кастыл мо̄т учёныит тах акванхо̄нтхатыглэ̄гыт. Ань о̄выл конференцият Евдокия Ивановна са̄в ма̄хумн янытлавес. Таи туп са̄ль о̄лыс, такви конференциян ёхталаӈкве ат ве̄рмыс, пӯльницан пинвес. Ос таве̄н ла̄вим ёмас ла̄тӈыт, тав ма̄гсылэ са̄ӈквылтым «Па̄йпыӈо̄йка» та̄н тав сыме̄н вос ёхтэ̄гыт. Ма̄н ос ты урыл газетат хансэ̄в. В. М. Куриков, округ Думат советникыг о̄лнэ хум, ла̄выс: «Ам номилум, хумус ма̄н ты яныг намыӈ хо̄тпа Москваныл тыг ёхтуӈкве во̄выслӯв. То̄нт соссаӈ ма̄хум институт ущты ва̄руӈкве о̄вылтаслӯв. Тав ёхтуме па̄сныл ма̄н соссаӈ мирагув наука ма̄гыс сака са̄в ва̄рыс. Ань тав ла̄внэ мӯтраӈ ла̄тӈанэ на̄н номим вос о̄щсаны̄н, ос та̄наныл э̄лаль ёмас тэ̄лаг вос ва̄рсаны̄н». Округ архивколт рӯпитан кӯщаиг В. М. Комаров-Распутин ос Л. Д. Сажаева таве̄н паща ла̄тыӈ ке̄тсы̄г. Вячеслав Михайлович ла̄выс: «Ань ты яныгпа̄ла хо̄тпа урыл рущ ла̄тӈыл ла̄вуӈкве ке, тав – «человеческий оберег» манси. Тав такви мирке̄тэ сака э̄руптытэ ос ӯргалытэ». Людмила Дмитриевна Евдокия Ивановна ёт хосат та̄гыл ва̄йхатэ̄г, тав ос тох потыртас: «Ты э̄лумхо̄лас ам ма̄гсылум о̄лнэ хо̄талт посыӈ поскве. Тав са̄в ма̄хум матыр о̄вылтыт номсахтуӈкве ханищтас, та̄в хансум нэ̄паканэ ловиньтым, аквтуп йильпииг о̄луӈкве ханищтахтэ̄в». Тувыл конференциян атхатам ма̄хумн Валентина Перова Саранпа̄вылныл ке̄тум паща ла̄тӈе ловиньтавес. Эстер Рутткай-Миклиан, Венгрияныл ёхталам нэ̄н, Будапештыт ла̄тӈыт ханищтан институтныл Марта Чепреги ос Анна Вандор э̄квагныл о̄с щуньпаща ла̄тӈыл тотвес. Евдокия Ивановна венгр ма̄хманэ̄н нэ̄пак хурип хорамыӈ то̄тапсовыл ва̄рима ос хансум паща ла̄тӈаныл та то̄тап кӣвырн пинманыл. Ма̄ньщи мирке̄в Венгрия ма̄т ёмщаквег ва̄ве, та̄н ма̄н нупылув сымыӈыщ сунсэ̄гыт, ос ма̄нав ляпа рӯтыг ловиньтыяныл. Образование ос наука департаментныл кӯщай ва̄ӈын нэ̄ В. А. Безуевская потыртас: «Ща̄нь ла̄тыӈ ма̄ньта̄гыл ва̄ӈкве – тыи сака яныг со̄т. Ань туп таи лю̄ль, лӯима̄ ма̄хум та̄нки ла̄тӈаныл молях ёрувлаӈкве патсаныл. Ма̄ньщи ма̄хум ща̄нь ла̄тӈаныл ул вос ёрувласаныл, Евдокия Ромбандееван са̄в ханищтан нэ̄пакыл хасве̄сыт. Ань ты нэ̄пакыт хосыт ня̄врамыт школат ос мо̄т ханищтахтын колытыт ма̄ньщи ла̄тӈыл потыртаӈкв ханищтавет. Округ янытыл кит со̄тыра са̄вит ня̄врам школанылт ос 180 соссаӈ студентыт са̄всыр институтыт ос колледжитт ханты манос ма̄ньщи ла̄тыӈ ханищтэ̄гыт». Т. В. Пуртова, окружной библиотекат рӯпитан э̄ква, Евдокия Ивановна самын патум ма̄тэ ос о̄лупсатэ урыл потыртас. Ма̄хумн тав хуриянэ суссылтаве̄сыт. Т. С. Гоголева ос С. С. Динисламова ма̄хум э̄лыпа̄лт ма̄ньщи ла̄тӈыл мощ потыртасы̄г. Светлана Селивёрстовна Санкт-Петербургныл А. И. Герцен нампа универститетныл ке̄тым паща ла̄тыӈ ловиньтастэ. Ос тувыл потыртас: «Акв щёс А̄с-угорский институт рӯпитан ма̄хум сапра̄нин атхатыгла̄лсыт. Тот о̄с ма̄ньщи ма̄хманув о̄вылтыт потыртасӯв, тувыл ам Евдокия Ивановна нупыл а̄ӈкватасум. Тав иснас по̄хат лю̄лис, ос сунсэ̄гум, самвитанэ нэ̄глумыт. Ам хотрохтысум ос китыглылум: маныр е̄мтыс, матыр та̄рвит о̄ньщи? Тав а̄нумн то̄нт ювлела̄выс: «Ам ма̄ньщи мирум моще̄ртын хотталь ты со̄йми, ла̄тӈе моще̄ртын ты ёрувлахты. Ам ос тыт амккем щар нэ̄матыр ва̄руӈкве ат ве̄рме̄гум». Ты ла̄вум ла̄тӈанэ ань тыг мус номтумт о̄ньщиянум. Ос ма̄ньщи ла̄тӈув нэ̄мхотьют ул вос ёрувлавес, ня̄врамыт ла̄тыӈ вос ханищтасыт, та па̄сныл та̄н ма̄гсыланыл потрыт хансуӈкве патсум». Тувыл хо̄тал палыт 19 хо̄тпа та̄нки хасум научный потраныл ловиньтасаныл. Мо̄тыт хо̄талт Т. С. Гоголева ма̄хум я̄нас атыгласанэ. Ты о̄вылтыт мо̄т газетат тах хансэ̄гум. 1051 2013.05.10. Валентина УЗЕЛЬ Та̄нтирот о̄лнэ ос рӯпитан ма̄хум. Белоярский район Касум па̄выл ляпат «Осетные» нампа община рӯпиты. «Осетыг» пе̄с ханты па̄выл ла̄ввес, тот хосат нэ̄мхотьют ат о̄лы. Ос та община кӯщай Андрей Александрович Ерныхов та ма̄ныл о̄лы, таима̄гыс общинатэ тамле намыл пиныстэ. Тув нила ще̄мья хансым о̄лэ̄гыт. Та̄н общинанылт титса̄т арыгтем са̄лы о̄ньще̄гыт. Мо̄лты та̄л та̄н акв миллион солко̄вил майлуве̄сыт, ты олныт во̄рт о̄лнэ колыт ӯнттын ма̄гыс, са̄лы пӯсас ва̄рнэ ма̄гыс мивет. Ты та̄л о̄с 185 со̄тыра арыгтем солко̄ви тах мивет, Ань ка̄сыӈ са̄лы ма̄гыс олн ойтаве, ты олныт субсидияг ла̄вавет. Тав э̄кватэ наме Татьяна Филипповна Ерныхова. Тэ̄н нила ня̄врам янмалтасы̄г: тит а̄ги, тит пыг, та̄н пуссын янгыт. Тэ̄нти ос ань яныгпа̄лаг е̄мтсыг, о̄йка 70 та̄лэ то̄влыс, э̄ква – 65 та̄лэ. Марина яныг а̄гитэ̄н хуме саран, сас та общинат рӯпитэ̄г, ща̄няге̄на̄щаге̄н са̄лы ӯруӈкв нё̄тэ̄г. Татьяна Филипповна ты а̄гитэ ёт тэ̄лы маснут ос пурка ю̄нтэ̄г, тувыл тыналыянэ̄н. Туи са̄в пил ва̄тэ̄гыт, Казымский рыбкоопн мыганыл. Саӈквлыпил акв кила тынэ 75 солко̄ви, сӯйпил ма̄гыс ос 85 солко̄ви ойтаве. Ты хосыт та̄н олн о̄с сэ̄лэ̄гыт. Мо̄т а̄гитэ̄н Ирина, тав Санкт-Петербург ӯс университетт ханищтахтас. А̄стластэ, юв ёхтыс. Са̄лыӈ ма̄хум ялпыӈ хо̄таланыл о̄лум порат Касум па̄вылн мо̄т хо̄н ма̄ныл са̄в туристыт ёхталасыт, пуссын рущ ла̄тӈыл потыртаӈкв ат ха̄сэ̄гыт. Ирина та̄н ётаныл английский ла̄тӈыл потыртас. Мо̄лты та̄л тав школан рӯпитаӈкв вуйвес, ань ня̄врамыт та хащта̄л ла̄тӈыл потыртаӈкв ханищтыянэ. Ты ще̄мья палт Максим Григорьевич Тарлин о̄лы, ты яныгпа̄ла ханты о̄йка 85 та̄лэ то̄влыс. Тав хосат такте̄т хультыс, э̄кватэ а̄тимыг е̄мтыс, ня̄врам тэ̄н ат о̄щсы̄г. А. А. Ерныхов таве̄н рӯтыг о̄лы, таима̄гыс ты та̄нти палтаныл висаныл. Ма̄ньполь э̄тпос та е̄рн Наталья Комарова губернаторув ялыс, тав «Осетные» нампа общинан тотыглавес. Та ма̄хум титыгласанэ, хумус та̄н о̄лэ̄гыт, матхурип ва̄рмаль о̄ньще̄гыт ман а̄ти, та̄н ётаныл ща̄й аис. То̄нт ты тав ла̄выс, община ты та̄л олныл о̄с тах миве. 1051 2013.05.10. Анна АЛГАДЬЕВА Яныг лё̄ӈх ва̄та ма̄нь па̄влыт. Ӯйхул о̄щнэ хо̄тпат нё̄туӈкв патыме̄ныл па̄сныл, са̄в ма̄хум ӯйхул рӯтмалтаӈкв патсыт. Хо̄ӈха мис ман лув о̄ньщи, та̄л сыс акв щёс государство па̄лыл олныл ойтыглавет. Акв мис ма̄гыс лов со̄тыр солко̄ви, лув ма̄гыс хӯрум cо̄тыр атса̄т солко̄ви миве. Ха̄р мисыт, ха̄р лувыт тай ат ойтавет. Ӯйхулыт акваг уральтым о̄ньщавет, са̄всыр прививкал ва̄равет. Са̄ро̄вылт э̄лы ма̄т о̄лнэ па̄влыт уральтавет. Лё̄ӈх о̄лнэ торыг ӯйхул ле̄ккарытн рӯпатаныл ва̄руӈкв а̄лымаӈкв э̄ри. Тох лё̄ӈх о̄лум торыг Хулюмсӯнтыӈ ос Ня̄хщамво̄лиӈ ӯйхул ле̄ккарыг Людмила Мартыновна Алгадьева ос Семён Константинович Артеев ӯянэ̄н yральтаӈкв Ма̄ньясӯнтын ос Яныгпа̄вылн ялсы̄г, мисыт, кӯтьвыт, лувыт прививкал ва̄рсы̄г. Ам о̄с тэ̄н ётэ̄н ялсум. Яныг лё̄ӈх. Ялум лё̄ӈхув Яныгпа̄выл та̄ра Ма̄ньясӯнт па̄выл мус о̄лыс. Мощ мо̄лтынув мус ты лё̄ӈх яныг лё̄ӈхыг ла̄ввес. Матыр йис па̄сныл о̄лум ма̄к яныг лё̄ӈх. Са̄лыӈ суныл, лувыӈ суныл ты хосытыл сӯлттавес. Лӯйсуп ма̄хум, алысуп ма̄хум пуссын ты лё̄ӈх хосыт нё̄ргала̄ласыт. Мӯйлым ман рӯпата щирыл пормас хартым пуссын тыгыл яласасыт. Купсат тэ̄нутпормас хартсыт. Ссылкан ке̄тыглым ма̄хум, улпыл, о̄с ты та̄ра тотве̄сыт. Бензин ос соляра Са̄псаныл тыгле хартвес. Тыгыл тувле ос во̄руй сов, хӯл тотвес. Ань ты лё̄ӈх ат э̄рнэг патыс. Ма̄ньясӯнтыл э̄лаль Са̄пса нупыл воссыг ат щё̄пита̄лаве. Йильпи лё̄ӈхыт Агириш па̄выл ос Нягань ӯс та̄ра ва̄рве̄сыт. Ма̄ньясӯнт па̄выл – хум ма̄хум па̄выл. Ма̄ньясӯнт па̄выл хуньт янгыг кос о̄лум. Ань нила кол тyп о̄лаве. Нэ̄матыр ла̄пка, пе̄карня, пӯльница а̄тим. Та̄нки ё̄ранылтыл ма̄хум о̄лэ̄гыт. Ня̄нь та̄нки ва̄ре̄гыт. Тэ̄нут ма̄гыс Ня̄хщамво̄ль па̄вылн ялантэ̄гыт. Матарн ул вус я̄рме̄гыт лё̄ӈх о̄лнэ торыг са̄внув тэ̄нут ёвтэ̄гыт, со̄пас ва̄ре̄гыт. Я̄ па̄лыг паты, тӯяг ос таквсы я̄ хосыт яласаӈкв ро̄ви. Туи яласаӈкв та̄рвитаӈ, витэ ма̄ниг е̄мты. Я̄ хосытыл Ня̄хщамво̄ль па̄выл мус 90 ве̄рыста, лё̄ӈх хосыт 45 ве̄рыста. Я̄тэ наме Та̄гт, Та̄гт талях Нё̄рО̄йканыл овты. Па̄выл алыо̄вылт Семён Семёнович Самбиндалов о̄лы, акв мис о̄ньщи. Ма̄н ёхталамув порат такке̄тэ о̄лыс. Пётр ягпыге ла̄ви, Ханты-Мансийск ӯсн пӯльницан пусмалтахтуӈкв минас. Рӯтанэ, апганэ ва̄тихал тав палтылэ ёхтала̄лэ̄гыт. Мо̄лты тув ла̄ви, Ма̄ньясӯнт па̄вылныл налыман ве̄рыстат «Арбыньят» рущит палт рӯпитас, тув палыт ня̄нь ва̄рыс. Тот со̄рни ловтнутыт рӯпитасыт. Ань колнор тот яктаве, ла̄ве̄гыт, щёлыӈ ма̄хум ма̄гыс па̄выл ва̄руӈкв кусаве. О̄с акв Ма̄ньясӯнтыт о̄лнэ хум – Валентин Ильич Ануфриев. Таве̄н 62 та̄л, такке̄тэ о̄лы, акв поснэ мис ос хӯрум мис пыгрищ о̄ньщи. Потрыӈ, ка̄ркам яныг хо̄тпа. Юрий Анатольевич Ивукин – са̄в мисыӈ хум, о̄с Ма̄ньсунт па̄вылт кол о̄ньщи. Ма̄н тув ёхталамувт такке̄тэ о̄лыс. Тав ётэ о̄лнэ кит ягпыгаге Анатолий ос Иван юн а̄тимыг о̄лсы̄г. Пуссын аквъёт нилахуйплов мис, хӯрум лув о̄ньще̄гыт. Ма̄н ялмув порат то̄ва мисанэ иӈыт ӯнттэ̄гыт, ань мус ущпыл са̄выг е̄мтсыт. Та коныпал ос кӯтьвыт о̄нще̄гыт. Акв ё̄рыл, акв номтыл, акваннё̄тхатым тох та о̄лэ̄гыт. Щаквитаныл мисво̄йиг, творогыг ва̄рияныл, тувыл Ня̄хщамво̄льн тыналаӈкв тотъяныл. Ха̄р мисаныл таквсы нё̄влиг ра̄тъяныл, о̄с олныг минэ̄гыт. Па̄выл щар лӯйо̄вылт Алексей Владимирович ос Пётр Владимирович Самбиндаловыг колэ̄н ӯнлы, о̄с тэ̄нкетэ̄н нэ̄ хо̄тпа та̄л о̄лэ̄г. Яныгпа̄выл. Ювле йимувт ущ Яныгпа̄вылн хо̄игласӯв. Ня̄хщамво̄ль па̄вылныл Яныгпа̄выл мус лё̄ӈх хосыт 12 ве̄рыста, я̄ хосыт 25 ве̄рыста. Хуньт Яныгпа̄влыг ла̄вим па̄вылт кит о̄лнэ кол туп хультсы̄г. Акв колт Пётр Николаевич Самбиндалов ще̄мьяӈ та̄гыл о̄лы. Коланылт нила хо̄тпа – э̄кватэ Дарья, котиль а̄гитэ – Галина ос пыге Иван о̄лэ̄гыт. Мис о̄ньще̄гыт. Ка̄сыӈ во̄рт о̄лнэ ма̄ньщи хо̄тпа хольтыл во̄раян кӯтьвыт о̄ньще̄гыт. Ма̄н ёхталамув торыг колыӈ ма̄хум Ня̄хщамво̄льт яласасыт. Юн яныг а̄гиятэ Светлана о̄лыс, тав нас юв ёхталас, такви Хулюмсӯнт па̄вылн хум ва̄рыс, ань тот о̄лы. Китыт колт Алексей Андреевич Самбиндалов такке̄тэ о̄лы, (омагеа̄тяге ёт о̄лме щирыл) мис о̄ньщи. Ӯнтари ягпыге мо̄лты та̄л а̄тимыг е̄мтыс. Оматэ Евдокия Николаевна, а̄ги о̄парищ наме Аментьева, хӯрмит та̄л хотталь щалтыс. А̄щаныл Андрей Ефимович хосат а̄тимыг е̄мтыс. Прокопий Кириллович ос Василий Кириллович Самбиндаловыг тыт кол о̄ньще̄г. Тэ̄нки ще̄мьяӈ та̄гыл Ня̄хщамво̄ль па̄вылт о̄лэ̄г. Рӯтанэ̄н ос ня̄враманэ̄н нас тыг ёхталэ̄гыт. О̄с акв кол – ты Тимофей Константинович Самбиндалов тав колэ. Такви Ня̄хщамво̄ль па̄вылт о̄лы. Омагеа̄тяге о̄лум колн ва̄тихал яланты, тыт во̄раи, хӯл алыщлы, нас ӯщлахты. Ма̄нь па̄влыӈ ма̄т та̄рвита̄ӈ о̄луӈкв. Ульйив, вит тотуӈкв э̄ри. Колыт исум тур ре̄гыл ат исыглэ̄гыт, кол кӣвырт вит ат со̄схаты. Ма̄хум о̄лэ̄гыт, ӯйхул янмалтэ̄гыт. Пил понсы, пил ва̄тэ̄гыт. Са̄внув ва̄тэ̄гыт, тыналыяныл. Ла̄хыс атэ̄гыт. Па̄кв паттэ̄гыт, па̄квсам ва̄ре̄гыт. Во̄рае̄гыт, хӯл алыщлэ̄гыт. Тох та яныг лё̄ӈх ва̄тат ма̄нь па̄влыӈ ма̄хум о̄лэ̄гыт. 1051 2013.05.10. Галина КОНДИНА Округ кӯщаюв рӯпататэ ёмщакв ва̄ритэ. Округ губернаторув Наталья Комарова яныгполь э̄тпос оигпам порат Правительствав 2012 та̄л сыс ва̄рум рӯпататэ урыл депутатыт э̄лыпа̄лт потыртас. Ты потре ва̄т нупыл титыт сапра̄нит ловиньтастэ. Тав ла̄выс: «Ма̄н ва̄рум рӯпатав урыл хансум потрум интернетын щё̄питаслӯв ос тот ты э̄тпос лов хо̄талныл ма̄хум таве ловиньтаӈкве патсаныл. Мирув пуссын акван те ловиньтаӈкве, хо̄т со̄тыр атса̄т э̄лумхо̄лас ты потрыл пӯмщалахтасыт. Та̄н ма̄н ва̄рнэ рӯпатав са̄выӈпа̄лэ ёмасыг ла̄всаныл. То̄ва хо̄тпат та̄нти номтаныл тув хӯлтсаныл. Мо̄лты та̄л сыс ма̄хманув сэ̄лум олнаныл 12, 2 процентын но̄хяныгмасыт ос котиль зарплатав 51 со̄тыра 60 солко̄ви са̄витыг е̄мтыс. Ханищтан хо̄тпат, ле̄ккарыт ос мо̄т бюджетный ма̄т рӯпитан ма̄хум олнаныл акваг но̄хнё̄тавет. Рӯпата та̄л о̄лум ма̄хум – па̄лэ ань рӯпатал хо̄нтсанӯв. Округув янытыл та̄л сыс акв миллион кв. метра о̄лнэ кол ӯнттуӈкве а̄лымасӯв. Юио̄выл ва̄т нупыл ат та̄л сыс тыса̄вит о̄лнэ кол нэ̄мхуньт ат ӯнтталавес. Ты ос мо̄т тэ̄ланув ма̄гсыл ма̄н са̄в олн та̄стыгласӯв. Савалап ня̄врамыт, яныгпа̄ла хо̄тпат ос ма̄нь ня̄врамыт ма̄гсыл ойтнэ олныт ма̄н о̄с акваг но̄хнё̄тыянӯв. Ще̄мьят са̄в ня̄врамыӈыг е̄мтэ̄гыт. Ща̄нит хӯрмит ня̄враманыл ма̄гсыл «Югорский семейный капитал» олныл о̄с ойтавет. Та̄л сыс округувт 27 686 ня̄врам самын патсыт. Тыгыл 56 процент ще̄мьят титыт манос хӯрмит ня̄враманыл. Самын патнэ сака ма̄нь ня̄врамыт «перинатальный центрыг» ла̄внэ пӯльницатыт пусмалтавет ос янмалтавет. О̄лнэ те̄мыг хунь е̄мтэ̄гыт, юв ущ мивет. Ма̄н номсэ̄в, хӯрум та̄л сыс пуссын ня̄врамыт садикыӈыг е̄мтэ̄гыт. Ань Лангепас, Радужный, Когалым ӯсытт, Советский, Белоярский ос Нефтеюганский районытыт ня̄врамакв ань пуссын садикын ялантэ̄гыт. Культура ос спорт урыл о̄с ат ёрувлэ̄в. Та̄л сыс хо̄т йильпи культуракол рӯпитаӈкве патсыт. Каснэ ма̄гсыл о̄с 57 кол ӯнттуве̄сыт». Наталья Владимировна потре а̄стум юипа̄лт депутатытн титыглавес. Н. Г. Алексеева, Саранпа̄вылныл о̄лнэ депутат нэ̄, ла̄выс, са̄в па̄влыт связь, на̄йпос ат о̄ньще̄гыт, та̄н хуньт ва̄равет ман а̄ти? Ос ва̄равет те – хоты порат? Кӯщаюв ювле потыртас: «2015 та̄л мус хансым «Цифровое эфирное телевидение» нампа федеральный программа рӯпиты. Та мус ловмантем цифровой телеканал ма̄хум сунсуӈкве патэ̄гыт. «Ростелеком» ос Газпромкосмос» э̄лн о̄лнэ па̄влытын интернет ва̄ре̄гыт. Ты та̄лн 3 миллион солко̄ви та̄стым о̄лы, та̄л оигпан мус та̄н хо̄т муниципалитетыт, ла̄ве̄гыт, рӯпатаныл а̄стлыяныл. Ань округувт 60 па̄выл ЛЭП на̄йква̄лгытын о̄лтым ат о̄лэ̄гыт. То̄ва та̄нти ма̄нылт на̄йпос ва̄рнэ станция о̄ньще̄гыт. Та̄л оигпан мус 15 па̄выл ЛЭП на̄йква̄лгытын о̄лтавет. Мо̄т па̄влытыт аквтит со̄тыр хо̄тпа о̄лэ̄гыт. Тот на̄йпос ва̄рнэ станцияныл ёмащакв хотщё̄питавет». Кӯщаюв э̄лаль мо̄т депутатытн о̄с хоса титыглавес. Та̄н потраныл оигпам юипа̄лт мирн пе̄риим ма̄хум тав ва̄рум рӯпататэ ма̄гсыл пуссын нэ̄пак та̄ратасыт. Ос э̄лаль рӯпитан са̄в ёмас ла̄тӈыл ла̄всаныл. Ты сапра̄нит «О бюджете» нампа са̄ккон урыл потраныл о̄с о̄лыс. Губернатор ва̄ӈын нэ̄ В. Дюдина округувт олныт сэ̄лнэ ос олныт холтнэ урыл та̄нанылн потыртас. Ты та̄л округ бюджетын 155 миллиард 578 со̄тыра солко̄ви та̄ставе ос 177 миллиард 38 со̄тыра солко̄ви холтуӈкве номсаве. 22 миллиард солко̄ви ат то̄вылхаты, тав рущ щирыл «дефицитыг» ла̄ваве. Депутатыт ты са̄ккон о̄с пирмайтасаныл. 1051 2013.05.10. Людмила ТЕТКИНА Са̄всыр ва̄рмалит урыл тав китыглавес. Ханты-Мансийск ӯст ля̄ххал тотнэ ма̄хум Наталья Комарова, губернаторув, ёт хо̄нтхатыгласыт. Округ Правительство 2012 та̄л сыс ва̄рум рӯпататэ урыл таве китыгласаныл. Та та̄л округувт са̄в о̄лнэ кол ӯнттувес, журналистыт ты ва̄рмаль урыл пӯмщалахтасыт. Кӯщай нэ̄ ла̄выс, щар са̄в ще̄мьят Ханты-Мансийск, Сургут ос Нижневартовск ӯсытт йильпи колн ва̄нтласыт. Щар мощща кол Сургутский районт ӯнттувес. Округувт 2012 та̄лт 9 со̄тыра э̄лумхо̄лас ипотекаолн висыт ос кол ёвтсыт. Са̄в ма̄хум Нижневартовск, Лангепас ӯсыгт ос Белоярский, Советский, Нефтеюганский районытт о̄лнэ колыл та та̄лт майве̄сыт. Ос иӈ са̄в ще̄мьят колыл миӈкве э̄ре̄гыт, та̄н пуссын очеридин хансым о̄лэ̄гыт. Когалым ӯсныл ля̄ххал тотнэ нэ̄ многофункциональный центрыт урыл китыглахтас, хунь тамле кол та̄н ӯсанылт ӯнттаве. Наталья Комарова ты урыл ла̄выс: «Когалым ӯст тамле центр 2013 та̄лт рӯпитаӈкве о̄вылтахты. Ань округувт нила центр о̄лы. Ты та̄л сыс 15 тамле кол пӯнсаве. Та̄н, тот рӯпитан хо̄тпат, ка̄сыӈ э̄лумхо̄ласн нё̄туӈкве тах патэ̄гыт. 2012 та̄лт Ханты-Мансийск ӯст о̄лнэ центрын хо̄т со̄тыра хо̄тпа ёхталасыт. Тот са̄всыр нэ̄пакыт моляхнув ва̄руӈкве нё̄тве̄сыт. Мо̄т ма̄т нэ̄пакыт акванатуӈкве ань щар ат э̄ри». Туризм урыл потыр ос о̄лыс. Ты хосыт о̄с са̄в рӯпата ва̄раве. Ты урыл кӯщай нэ̄ таи потыртас: «Пе̄с йис та̄гыл тыт соссаӈ ма̄хум о̄лэ̄гыт. Та̄н культурал са̄в мир пӯмщалахтэ̄гыт ос о̄лупсаныл сунсуӈкве ка̄саще̄гыт. Ань Ха̄льӯс по̄хат «Со̄рни сэ̄й» нампа па̄выл ӯнттувес. Тот рӯпитан соссаӈ ма̄хум та̄нки пе̄с йис ва̄рмаляныл ёмащаквег ва̄ганыл ос мӯй хо̄тпат тув ӯрияныл. Йильпи та̄л хоталытт 45 со̄тыра мӯй хо̄тпа Ханты-Мансийск ӯсн мӯйлуӈкве ёхталасыт. Аквта порат 155 со̄тыра мӯй ма̄хум Юграт ты ялпыӈ хо̄тал янытласыт. Финляндият са̄в э̄лумхо̄лас Йильпи та̄л янытлэ̄гыт, тыил тот ма̄хум са̄в олн сэ̄лэ̄гыт. Ма̄н о̄с лӯима̄т о̄лэ̄в, тыт о̄с мӯйлуӈкве ро̄ви, махум тыг во̄виньталуӈкве акваг патэ̄в». Ма̄нь па̄вылквет о̄лнэ мир хумус нё̄тавет, кӯщай нэ̄ тох ла̄выс, тамле ма̄т ма̄ньщит, хантыт ос ё̄рн ма̄хум о̄лэ̄гыт. Ты ва̄рмаль урыл пуӈктотнэ ма̄хум ат ёрувлэ̄гыт ос ка̄сыӈ па̄вылн нё̄тэ̄гыт. Соссаӈ ма̄хум та̄нки ма̄нылт о̄лым пе̄с ва̄рмаляныл э̄лаль вос тотыяныл. Журналистыт са̄всыр мо̄т рӯпата урыл таве о̄с китыгласаныл. 1051 2013.05.10. Людмила ТЕТКИНА Та̄н ма̄вит ӯргалэ̄гыт. Округувт ма̄вит ӯргалан службат Сергей Пикунов кӯщаиг о̄лы. Тав ля̄ххал тотнэ ма̄хум э̄лыпа̄лт ва̄рнэ рӯпатаныл урыл потыртас. Кӯщай хум ла̄выс, ма̄вит ӯргалан ва̄рмаль хосыт о̄влэ̄т акв департамент, тувыл мо̄т департамент рӯпитас. Ань тох е̄мтыс, ма̄хум сака ат ва̄гыт, хотьют ты рӯпата ва̄ри. Ма̄хум хоты ма̄т порс а̄нят ке ка̄салэ̄гыт манос нефтяникыт ма̄вит ке па̄ӈктэ̄гыт – та̄нанылн ты службавн хансуӈкве ос хурит ке̄туӈкве ро̄ви. Хащта̄л хо̄тпат во̄р ке са̄гре̄гыт манос на̄йн ке ё̄саве ты урыл о̄с та̄н палтаныл ла̄тыӈ вос ке̄тэ̄гыт. Мавит ӯргалан хо̄тпат во̄раян ма̄хум ёт ань о̄с рӯпитэ̄гыт. Ма̄хмытын охотничий билетыт хасылтэ̄гыт ос хунь ва̄с ос мо̄т товлыӈ ӯй па̄тлуптаӈкве ро̄ви, ла̄тыӈ хӯлтэ̄гыт. Ӯйхул па̄тлуптаӈкве лицензиянэ̄пак о̄с та̄н тыналэ̄гыт. Ань та̄н сака са̄в рӯпата о̄ньще̄гыт. Ма̄вит ӯргалым округ янытыл акваг яласэ̄гыт. Юграт нефтяникыт рӯпитэ̄гыт, та̄н ва̄тихал ма̄ тармыл нефть со̄сантэ̄гыт. Ты та̄л хӯрум э̄тпос сыс та̄н палтаныл 734 лю̄ль нак е̄мталас ос таима̄гсыл яныг штрафолныл пинве̄сыт. Ювле хультум та̄лт та̄н пуссын ма̄вит ӯргалан са̄всыр организациятын 6 миллион солко̄ви штарфолныл пинве̄сыт. Ювле та̄н 5 миллион 300 со̄тыра солко̄ви ойтсыт. Тамле яныг олныл таима̄гсыл хансавет, ма̄витув сыстамыг ос ӯргалым вос о̄ньщияныл. Журналистыт пе̄с йис ма̄т о̄лнэ соссаӈ ма̄хум урыл о̄с китыглахтасыт. Та̄н о̄лнэ ма̄нылт нефтяникыт то̄ва порат порс хультуптэ̄гыт, ювле хультум та̄лт во̄рт о̄лнэ манаса̄вит ханты хо̄тпа та̄н палтаныл ёхталасыт манос ты урыл пищма хансыгласыт. Сергей Пикунов ювле ла̄выс: «Тамле ма̄т о̄лнэ ще̄мьят ат ва̄гыт, хоты кӯщаин ты лю̄ль ва̄рмалит урыл п от ы рт а ӈ к в е . 2 0 1 2 та̄л сыс туп лов ханты хо̄тпа ма̄н палтув ты урыл пищма хансыгласыт. Ма̄н нефтяникыт ёт потыртахтасӯв, та̄н соссаӈ ма̄хум о̄лнэ ма̄наныл хотсыстамтасаныл. Ам номсэ̄гум, тамле лю̄ль ва̄рмаль са̄внув кос о̄лыглы, ос хантыт та̄нки нефтяникыт ёт потыртахтэ̄гыт, «Бураныл», ха̄пыл манос моторыл маяпавет, та̄н э̄лаль о̄лэ̄гыт». Во̄раян хо̄тпат урыл Сергей Пикунов ла̄выс: «2012 та̄л сыс 40 э̄лумхо̄лас писаляныл хотвисанӯв. Та̄н разрешениенэ̄пак ос охотничий билет ат о̄щсыт. Округувт 78 со̄тыра э̄лумхо̄лас тамле нэ̄пак о̄ньще̄гыт. Ма̄н во̄раян хо̄тпат йильпи охотничий билетыл мыганув. Ань 58 со̄тыра хо̄тпа йильпи нэ̄пак о̄ньще̄гыт. Мо̄таныт пе̄с нэ̄паканыл пе̄нтуӈкве тыг о̄с вос ёхталэ̄гыт». Ань ма̄вит ӯргалан хо̄тпат во̄рт най о̄с харыгтэ̄гыт. Ты та̄л тэ̄лы тӯйт са̄в патыс, я̄ӈк на̄тнэ э̄тпос ты ёхтыс, тӯйт пуссын иӈ ат толыс. Кӯщай хум ла̄выс, тыи сака ёмас, э̄рыӈ, ты тув сыс са̄в во̄р на̄йн ат тэ̄ве. Во̄р са̄грын урыл тамле ла̄тыӈ ла̄выс. Ты та̄л хӯрум э̄тпос сыс во̄р хартын яныг ма̄шинат ялнэ лё̄ӈханылт пуссын уральтаве̄сыт. Тамле рӯпата о̄с ва̄тихал ва̄рыглаӈкве патаве, са̄всыр по̄х хо̄тпат тыт во̄р ул вос са̄гре̄гыт. 1051 2013.05.10. Александр ВЬЮТКИН Йильпииг паттым кӯщай. Ань э̄тпостемыг ты е̄мтыс, губернаторув то̄ва ва̄ӈын хо̄тпанэ хотпе̄нтсанэ. И. С. Петров пе̄нтсыл А. С. Филатов кӯщаиг ӯнттувес. Ты хум ля̄ххал тотнэ ма̄хмытын титыглавес. Потыртамув порат «Югория» телекомпаният корреспондентыг рӯпитан нэ̄ Ольга Ефремова ля̄ххал тотнэ соссаӈ ма̄хум урыл титыглахтас: «Ла̄вен, ща̄нь ла̄тӈыл телевизор хосыт суссылтан программат ос ма̄ньщи, ханты ла̄тӈыл хаснэ газетаг ма̄н округувт э̄ре̄гыт манос а̄ти? Та̄наныл о̄щнэ щирыл округ бюджетныл олныт наска̄ссыг холтавет? » Андрей Сергеевич ювле ла̄выс: «Ханты ос ма̄ньщи ла̄тӈыл та̄ратан газетат ос журналыт ма̄гсыл ма̄н олн по̄хан щар ат па̄хвтэ̄в. Та̄н ты ма̄ тармыл ма̄к кӯщаиг о̄лэ̄гыт. Та̄нанылн акваг нё̄туӈкв э̄ри. Ты мирыг халт щар акв хо̄тпа те хульты, газетаг о̄с аквтох э̄лаль та̄ратаӈкв патэ̄в. Ма̄навн ты кастыл матыра̄ти пуссын ва̄руӈкв э̄ри. Ос пе̄с та̄гыл о̄лнэ о̄лупсаныл э̄лаль тотуӈкв нё̄тыянӯв. Ты коныпал ма̄н та̄н ла̄тӈанылтыл ва̄рнэ ля̄ххаланыл са̄вмалтаӈкве патыянӯв. Округувт газетат хумус ловиньтан ма̄хмыт палт тотавет, тыи уральтаӈкв э̄ри». Тувыл «Ханты ясаӈ» газетат рӯпитан нэ̄ Ирина Самсонова титыглахтас: «Манырсыр рӯпата на̄н соссаӈ нэ̄пакыт та̄ратан ма̄гыс ва̄руӈкв номсэгы̄н? » Кӯщаюв ла̄тӈанэ ты: «Ам мощ мо̄лалнув ты рӯпитан ма̄н паттуве̄сум. О̄влэ̄т ань на̄н а̄нумн нё̄тмил ва̄ре̄н. Кӯщаянын ёт ам хо̄нтхатыгланэм юипа̄лт ущ ла̄ве̄гум, хумус на̄нан нё̄туӈкв э̄ри». Ам округув янытыл ля̄ххал тотнэ газетат, журналыт ос телевидениет рӯпитан ма̄хум ёт хо̄нтхатыглаӈве ос ва̄йхатуӈкв таӈхе̄гум. На̄н о̄щнэ номтанын а̄нумн потыртэ̄н, маныр ёмаснувег ос хумус ва̄руӈкв. Тувыл ам на̄нан нё̄тыянум. На̄н туп рӯпатан мӯсхал щирыл ва̄релы̄н». 1051 2013.05.10. unknown author Ты тӯя яныг вит ат ва̄ри. Та э̄тпост округ МЧС яныг кӯщае Александр Тиртока журналист ма̄хум акванатыгласанэ. Тав потыртас, ты та̄л я̄ӈк на̄тнэ юипа̄лт вит сака о̄нты ман а̄ти. Ка̄сыӈ тӯя кастыл яныг кӯщаит ос МЧС ма̄хум тэ̄лы па̄сныл щё̄питахтуӈкв о̄вылтахтэ̄гыт. Та̄н та̄нти ос округувт о̄лнэ мир нэ̄мхотьют ат ва̄г, тӯя манхурипаг е̄мты. Ань я̄ӈк на̄тнэ э̄тпос ты о̄вылтахтас. Тэ̄лы сака ат тӯйис, таима̄гыс яныг вит ат ва̄ри. Ос ты ва̄рмаль туп тӯйтныл хунь е̄мты, Россия янытыл вит акванатнэ «гидротехнический сооруженияг» ла̄внэ тӯр хурип утыт рӯпитэ̄гыт. То̄ват Алтай ма̄т ӯнттым о̄лэ̄гыт. Хунь тот са̄в вит атхаты, та ляпат овтнэ я̄тытн та̄ртаве. То̄нт ты то̄ва па̄влыт а̄маравет ос яныг пилыщмаӈ нак та е̄мты. А. Тиртока ань ла̄выс, я̄ӈк Иртыш я̄ хосыт сака атхаты, таима̄гыс ань э̄тэхо̄тал ма̄хум ты я̄ уральтыяныл. Ос ма̄лтыпыг е̄мтме па̄сыл округув янытыл 18 группа рӯпитэ̄гыт та ма̄хум я̄т пуссын уральтым о̄ньщияныл. «Центро-Спас Югория» акв бригада атсыт, тот о̄лнэ ма̄хум я̄ӈк взрывчаткал пиныяныл ос та щирыл сакватыяныл, витэ молях вос мины. Э̄лаль тав ла̄выс, то̄ва ма̄хум коланыл тӯяг витн ул вос а̄маравет, Россия Президентын манос округ губернаторн пищма хансэ̄гыт. Тамле ма̄хум ёт я̄нас потыртаӈкв э̄ри, та̄н ма̄гсыланыл нэ̄пакыт щё̄питаӈкв – тот вос хансаве, яныг вит порат та̄нанылн хоталь минуӈкв э̄ри, хоталь звонитаӈкв ро̄ви. 1051 2013.05.10. Валентина УЗЕЛЬ О̄лнэ колыт акваг уральтаӈкв патавет. Ань о̄лнэ колыт пуссын акв хотты управляющий компания нупыл хансым о̄лэ̄гыт. Ты компаният вит, на̄й ос ре̄г ма̄гыс ма̄хумныл олн атэ̄гыт. Ос э̄лаль ты олныт хумус холтавет, нэ̄мхотьют аты ва̄г. Ань таима̄гыс Россия Правительство йильпи постановлениела̄тыӈ хансыс. Олн атнэ компаният рӯпатаныл уральтан окружной Службат ань кӯщаиг Кирилл Минулин о̄лы, тав журналист хо̄тпат акванатыгласанэ ос ты урыл потыртас. Ань пуссын управляющий компаният нэ̄пакыл мивет, тот тах хансаве – маныр та̄нанылн уральтаӈкв э̄ри, хоты колыт ёмащакв щё̄питаӈкв э̄ре̄гыт. Ань тув яныгса̄т арыгтем ва̄рмаль хансым о̄лы. Ты подъездыт, кол ляпат пиным лё̄ӈхыт, йӣвыт о̄с та̄н вос ӯнттэ̄гыт, порс ка̄сыӈ хо̄тал хот вос выганыл, ня̄врамыт ма̄гыс ёнгын площадкат вос ва̄ре̄гыт. Ос колытт о̄лнэ ма̄хум та̄нти акван те потыртахтэ̄гыт, ты управляющий компаният о̄с уральтаӈкв ве̄рмияныл. 1051 2013.05.10. Валентина УЗЕЛЬ Колыт тынта̄лнувег вос ва̄равет. Ты та̄л о̄лнэ колыт акв квадратный метра тынэ сака яныгмас. Ты таима̄гыс тох е̄мтыс, ань округувт о̄лнэ ма̄хум субсидиял мивет. Та̄н ипотекаолн выгыт, процент мощща ойтэ̄гыт. Округ Правительства па̄лыл ты ма̄хум нё̄тавет. Ос 2014 та̄лныл ты рӯпата мо̄т щирыл ва̄руӈкв патаве. Колыт тынаныл мощщанувег вос е̄мты, округ бюджетныл са̄выӈпа̄лэ олныт кол ӯнттын ма̄гыс холтуӈкв патавет. 1051 2013.05.10. Татьяна Бахтиярова Паща ла̄тыӈ ще̄мь ямн к е̄тэ̄гум. Щāнюм мо̄рсыӈыщ ва̄щиньтылум, тāл кит щёс. Тав Ке̄расколыӈъя пāвылт о̄лы. 2010 тāлт ам ишкола холтсум, тувыл Ханты-Мансийск ӯсн ханищтахтуӈкве минасум. Та па̄сыл ме̄н мо̄рсыӈыщ ва̄щиньтахтыглыме̄н, юв туи ёхтала̄лэ̄гум, тувыл тэ̄лы. Кāсум сака та̄кыщ холы. Ма̄ньщи ма̄хум тох та о̄лэ̄гыт, рӯтаныл янгыг е̄мтэ̄гыт, ла̄кквамингалэ̄гыт. таквсы хо̄тал, Сымум кāсэ акваг холы. Наӈ, ща̄ня, хосат о̄лэ̄гын, Ам яныг а̄гииг е̄мтсум, Щёровн наӈ та̄лын о̄луӈкв лю̄ль, Мовиньтэ̄гум наӈ ма̄гсылын, Э̄рге̄гум наӈ ма̄гсылын, Ханищтахтэ̄гум наӈ ма̄гсылын, Наӈ туп ёмащакве о̄лэ̄н, ща̄нюм, Йирищум, тувыл а̄пщирищум янмалтэн, Тэ̄н иӈ сака ма̄ньрищиг Ам ёхтэ̄гум тыгыл, Мовиньтаӈкв на̄н ма̄гсылын патэ̄гум, Э̄ргуӈкв на̄н ма̄гсылын патэ̄гум, На̄н туп ёмащакв о̄лэ̄н, Ам тай ёхтэ̄гум, Тэ̄лыиг е̄мты, туииг паты, Лильпи та̄л ёхты пе̄нтхатуӈкв ты та̄л ёт, Тōнт ам а̄вин лохуӈкв та патэ̄гум! ! ! Ща̄нюмн яныг паща ла̄тыӈ ке̄тэ̄гум, вос таквитэ ӯргалытэ, йигрищагумягпыгагум вос ёмщакв янмалты. Та̄нанылн во̄р па̄вылт та̄рвитаӈ о̄луӈкв, вос ва̄ганыл, ам пуссын ще̄мьям сака янытлыянум. Светлана Пеликова ам яга̄гим, тувыл а̄щум П. Т. Бахтияров, ягпыгум Бахтияров Сергей – та̄н о̄с во̄р па̄вылт о̄лэ̄гыт, пуссын ма̄хманумн яныг паща ла̄тыӈ о̄с ке̄тэ̄гум, пуста̄гыл ос акваннё̄тхатым вос о̄лэ̄гыт. 1051 2013.05.10. Галина КОНДИНА Ва̄т нупыл ат пормас. Мо̄лты та̄л оигпам порат «То̄рум Маа» музей рӯпитанэ̄тэ па̄сныл 25 та̄лэ то̄влыс. То̄нт та̄н тамле мӯйлуптан ва̄рмаль ва̄рыгласыт. Ва̄т нупыл ат та̄л кастыл ма̄хмытын ва̄т нупыл ат пормасыл вос мӯйлуптавет. Та̄н то̄нт музейн ханты ос ма̄ньщи ма̄хманувн хо̄тпан нупыл акв пормасыл тотве̄сыт. Та̄н та пормасыт пуссын ёмщакв ханищтасаныл, нэ̄пакн хассаныл ос суссылтап та ва̄рсыт. Ань ос ма̄хум мӯйлуӈкве, пормасыт сунсуӈкве во̄вияныл. Выставканыл «Дары и дарители» намыл намтсаныл. Суссылтап о̄вылтым порат музей кӯщаяныл В. Н. Кочетыгова пормас мӯйлуптам хо̄тпатын яныг пӯмащипа ла̄тыӈ ла̄выс. Н. Чайникова пе̄с ма̄ньщи са̄ӈквылтап мӯйлуптам, ты Тӯрва̄т па̄вылныл тотым са̄ӈквылтап 18 нот порат ва̄рим о̄лыс. Ты коныпал са̄сныл ю̄нтым са̄всыр а̄ныса̄ныт, а̄канит, касаит сыпалиӈ та̄гыл маимат. Е. А. Нёмысова тав ва̄т нупыл ат пормас музейн мӯйлуптам, са̄всыр а̄канит, супыт, турло̄псыт, пальсакыт ос сакныл хартым хорамыт. Е. А. Белявская, Саранпа̄вылт о̄лнэ э̄ква, ще̄пт о̄щнэ телефон пинумтан хӯрыгсов мӯйлуптас. Хӯрыгсове са̄лы совныл ю̄нтыстэ ос хорамыл по̄слыстэ. Владимир Шесталов Софья э̄кватэ̄нтыл Юван Николаевич ма̄ньщи супе о̄с та музейн тотыстэ̄н, мӯйлуптастэ̄н. Юван Шесталов тав ты музей ва̄руӈкве о̄вылтастэ ос са̄в ё̄ре ты ёмас тэ̄ла ма̄гсыл пиныстэ. Ань ма̄ньщи поэтув супе тот сунсыглым о̄ньщуӈкве патаве. Ма̄н номсэ̄в, са̄в мир тав пормасэ сунсыглаӈкве ёхталаӈкве патэ̄гыт. Музейт рӯпитан нэ̄ И. С. Ксенофонтова ка̄сыӈ пормас урыл ёхталам ма̄хумн потыртас. Колледжит ханищтахтын а̄гит А. Р. Станиславец ос И. М Молданова ёт тув ёхталасыт. Ма̄ньлат хо̄тпатын соссаӈ мир урыл матыр а̄ти ва̄ӈкве, ва̄им, пӯмыщ. Та̄н тот татем ты ёмщакв хӯнтлысыт ос маныр ат торгамтасыт, тот рӯпитан ма̄хум титыгласаныл. 1051 2013.05.10. Тамара МЕРОВА Ма̄ньщит – То̄рум-А̄щ ня̄врамаквет. «Хо̄тал» нампа А̄с-угорский театрыт йӣквнэ ма̄хум акваг йильпи спектаклит щё̄пита̄лэ̄гыт. Ос таквсы порат артистыт рӯпатаныл акв хотты ёнгилыл о̄вылтыяныл. Мо̄лты таквс та̄н «Дети неба» нампа спектакль суссылтасыт. Йильпи щё̄питам ёнгиланыл артистыт ма̄ньщи ма̄хум ма̄ тэ̄лум ос ма̄ ӯнтхатам ялпыӈ мо̄йт щирыл ва̄рсаныл. Ты ялпыӈ мо̄йтыт ос э̄ргыт ань рущ ла̄тӈын Евдокия Ивановна Ромбандеева толмащласанэ. Ос «Героический эпос манси (вогулов)» нэ̄пакыг ва̄рсанэ. Ёнгил щё̄питаманыл порат Анна-Ксения Вишневская, театрыт режиссёрыг рӯпитан нэ̄н, ос таве̄н нё̄тнэ кит рущ хо̄тпагн ханты ос ма̄ньщи ма̄хум йис мо̄йтыт ловиньтаӈкве ос хащта̄л пищит торгамтаӈкве э̄рсыт. Тувыл ты мирыг культуранэ̄н акван ул вос тэ̄лыгтавесы̄г, та̄н туп ма̄ньщи ялпыӈ мо̄йтыт ханищтаӈкве патсыт. То̄ва пе̄с йис накыт ат торгамтаманыл порат, маныр ма̄гыс манос хумус та̄н о̄лэ̄гыт, Светлана Алексеевна Попова китыгласыт. Тав ань ма̄ньщи ма̄хум пе̄с потрыт ос мо̄йтыт ёмщаквег ханищтыянэ, тувыл диссертация нэ̄пакыг хансыянэ. Ты ва̄рмалитыл аквтох Александр Тургачёв пӯмщалахты, тэ̄н акваннё̄тхатым спектаклин э̄рнэ ла̄тӈыт хӯлтсы̄г. Пе̄с йис ялпыӈ потранув ос мо̄йтанув рущ мир ёнгилыг щё̄питаӈкве, ты о̄с ялпыӈ накыг е̄мты. Мори матыр ва̄руӈкве, суссылтаӈкве ос ля̄галаӈкве На̄йО̄тыранувн ма̄н ат та̄ртаве̄в. Мария Литвинова ос Вячеслав Игнатов, Москваныл ёхтум режиссёрыг, тамле тэ̄ла о̄с торгамтастэ̄н. Тувыл э̄лумхо̄ласын На̄йО̄тырыг ёнгуӈкве о̄с ат ро̄ви. Тащирил ке маныр ва̄руӈкве? То̄нт режиссёрыт ёмас номтын хӯлтве̄сыт. Та̄н хурит по̄слысыт ос та хурит на̄йил постым ма̄ тэ̄лум ос ма̄ ӯнтхатам ялпыӈ мо̄йтыт ма̄хумн потыртасыт. Рущ щирыл ке ла̄вуӈкве, та̄н «теневой театр» ва̄рсыт. Ты ва̄рмалит ва̄рнэ ма̄гсыл та̄нанылн Вячеслав Зайчиков ос Павел Мизёв сака ёмщаквег нё̄тсы̄г. Вадим Важенин хум хо̄тпа потрыт сымыӈыщ ловиньтасанэ ос на̄йил постым На̄й-О̄тыранув хурияныл суссылтас. Тав ляпатэ̄т Юлия Яркина ӯнлахо̄лыс ос матыра̄ти нэ̄ хо̄тпа тэ̄лат ва̄рыс. Ты спектаклит во̄т суй, щахыл кургын суй, мо̄т сыресыр лӯргын манос са̄ӈлын суит хӯнтлысанӯв. Тот звукорежиссёр о̄с ёмщаквег рӯпитас. Яныгпо̄ль э̄тпост соссаӈ артистанув ты ёнгиланыл Санкт-Петербург ӯст «Арлекин – 2013» нампа фестивалит суссылтасаныл. Са̄ртын жюри хо̄тпат са̄в театрытын щё̄питым 65 спектакль суссыт. Та̄н тувыл туп нёлолов спектакль э̄лаль каснэ ма̄гыс пе̄риясыт. «Дети неба» нампа ма̄н спектаклюв о̄с тув во̄ввес. Ань ты касылыт ма̄хманув нила номинацият но̄хпатсыт. Тыи «Лучшее художественное оформление спектакля», щар ёмас премия – «Глазами детей» ос Юрий Пронин «Лучшая работа драматурга» премиял майве̄сыт. Вячеслав Игнатов ос Мария Литвинова жюрихо̄тпатытн «Эксперимент» я̄нас премиял мӯйлуптавесы̄г. Та̄н ма̄гсыланыл ма̄н о̄с ща̄гтым о̄лэ̄в. 1051 2013.05.10. Людмила ТЕТКИНА Та̄н культурат са̄в рӯпата ва̄ре̄гыт. Ань округувт 400 арыгкем са̄всыр культураколытт 13 со̄тыра э̄лумхо̄лас рӯпитэ̄гыт. Яныгполь э̄тпос 25 щислат ка̄ркамыг рӯпитан хо̄тпат Ханты-Мансийск ӯсн во̄виньта̄лве̄сыт. Библиотекат, музейт, культураколт рӯпитан хо̄тпат ос са̄в мо̄т ма̄хум тыт янытлаве̄сыт. Та хо̄талыт та̄н Ханты-Мансийск ӯст о̄лнэ музеит сунсуӈкве ос Геннадий Райшев, ка̄тыл хурит по̄слан хум, ёт хо̄нтхатыглаӈкве тотыглаве̄сыт. Ос итипа̄лаг искусство центрколт ма̄хум кӯщаитн янытлаве̄сыт. Алексей Путин, губернатор ва̄ӈын хум, та̄нанылн ла̄выс: «Юграв щёлыӈ ма̄, тыт са̄в ка̄ркам, ёмас, сымыӈ ма̄хум о̄лэ̄гыт. На̄н на̄нки рӯпатан ва̄рим тыт о̄лнэ ма̄хумн са̄в ща̄гт тотэгы̄н. Округувт ань яныг ӯсытт манос ма̄нь па̄вылквет библиотекат, музеит, культураколыт ӯнттавет. Ма̄н аквъёт ва̄тихал са̄всыр мирхал фестивалит, конференцият тыт щё̄пита̄лэ̄в, на̄н ты рӯпата мӯсхалыг ва̄рилы̄н. Тыима̄гсыл на̄нан яныг пӯмащипа ла̄тыӈ ла̄ве̄гум . О круг правительство акв э̄рнэ нэ̄пак ань щё̄питы, тав тох намаим о̄лы: «Стратегия развития культуры в ХМАО– Югре до 2020 года». Ты нэ̄пак хосыт ма̄н са̄всыр культура колыт округувт ӯнттуӈкве э̄лаль патэ̄в. Ос тув ма̄н акв э̄рнэ тэ̄ла хассӯв, культурат рӯпитан ма̄хум сэ̄лнэ олнаныл тах о̄с но̄хнё̄тыянӯв». Тув ёхталам ма̄хум са̄всыр янытлан нэ̄пакытыл, «Почётный грамотал», «Благодарственный пищмал» ос «Заслуженный деятель культуры» намыл майве̄сыт. Ос акв та порат грантолн вим хо̄тпат янытлаве̄сыт. Ты олн винэ ма̄гсыл ма̄хум 2012 та̄лт нэ̄паканыл ке̄тыгласаныл. Но̄хпатум лов хо̄тпа сертификатнэ̄пакыл миӈкве Людмила Алфёрова ёхталас. Ты лов э̄лумхо̄лас халт А̄с-угорский ма̄ньлат ма̄хум организацият рӯпитан а̄ги Виктория Сязи но̄хпатыс. Тав «Человек рисующий» проектэ ва̄рнэ ма̄гсыл олныл майвес. Андрей Тарханов «Иволга поёт» ня̄врамыт ма̄гсыл хансум нэ̄паке олныл о̄с та̄стувес. Еремей Айпин, округ Думат рӯпитан депутат, ма̄хум о̄с янытласанэ, Благодарственный пищмал мӯйлуптасанэ. Тав пӯмащ ла̄тыӈ ла̄выс: «Пе̄с пора та̄гыл культурат рӯпитан ма̄хум мощща олныл ойтавет. Та̄н акваг тэ̄та̄л о̄лым, са̄в ёмас нэ̄пакыт хассыт, са̄в нё̄тнэ хурит по̄сласыт ос э̄ргынта̄ныт хассыт. Ань ма̄н ты нэ̄пакыт ловиньтыянӯв , музыка хӯнтлэ̄в ос хурит сунсуӈкве музейн ялантэ̄в. Э̄лумхо̄лас хунь сыме э̄тгалаве, то̄нт ёмащакве номсахтуӈкве ве̄рми, хунь тэ̄г ос со̄рге та̄гиньты, нёвсуӈкве ат ве̄рми, номсахтуӈкве ат таӈхи. Ам ты урыл таима̄гсыл потыртэ̄гум, на̄н ань культурат рӯпитым ос мощща олн сэ̄лым, улпыл, мощ тэ̄та̄л о̄лэгы̄н, тыщирыл са̄в э̄рнэ тэ̄ла ос ща̄гт мир тотэгы̄н. Ты ощхуль ла̄тыӈ пӯмащ ма̄гсыл ла̄выслум. Ма̄н ань мо̄т порат о̄лэ̄в, ка̄сыӈ хо̄тпан ёмащакве тэ̄ӈкве э̄ри. Ань культуранув урыл ат ёрувлэ̄в, на̄н пуссын сэ̄лум олнаны̄н но̄х тах нё̄тавет. То̄нт на̄нтыгыл са̄внув рӯпата тах ва̄регы̄н». Тав ма̄ньщи ос ханты пе̄с йис ва̄рмалит э̄лаль тотнэ ма̄хум янытлан нэ̄пакыл мисанэ. Ты ма̄хум халт Виктор Журавлёв, «Югра» телекомпаният рӯпитан хум, янытластэ. Тав «Северный дом» нампа передачат са̄в та̄л кӯщаиг о̄лы. Тот рӯпитан ма̄хум соссаӈ хо̄тпат культураныл, о̄лупсаныл, та̄рвитыӈ ва̄рмаляныл урыл потыртэ̄гыт. Са̄в ма̄хум ты передача сунсэ̄гыт. Валентина Перова, Саранпа̄вылт искусство школат кӯщай нэ̄, тыг о̄с во̄виньта̄лвес. Та школат ня̄врамыт са̄ӈквылтапыл са̄ӈквылтаӈкве, ма̄ньщи э̄ргыт э̄ргуӈкве ос йӣквуӈкве ханищтавет. Ня̄врамыт ханищтан нэ̄ о̄с э̄сгын нэ̄пакыл майвес. Аграфена Сопочина Сургутский районныл тыг ёхталас. Тав та районт о̄лнэ соссаӈ ма̄хманэ ма̄гсыл са̄всыр кӯщаит ёт са̄в та̄л воритоты. Ханты э̄ква акваг нефтяникыт ёт потыртахты, такви ма̄хманэ уркуптаӈкве щар ат мыг. Аграфена Сопочина пе̄с йис ма̄т са̄лыянэ ӯрим о̄лы ос А̄с-угорский институтыт рӯпиты. Ханты ла̄тӈыл сургутский диалетыл ханищтан нэ̄пакыт хансы. Еремей Айпин ты э̄ква о̄с янытластэ. Культурат са̄в та̄л рӯпитам яныгпа̄ла хо̄тпат ялпыӈ хо̄талын о̄с во̄виньта̄лве̄сыт. Та̄н о̄с пуссын янытлан нэ̄пакыл майве̄сыт. Евлампий Осокин хо̄нтлаӈкве ялум о̄йка, ос война юипа̄лт налыман арыгкем та̄л культурат рӯпитас. Тав «Почётный грамотал» майвес ос 9 май кастыл янытлавес. 1051 2013.05.10. Тамара МЕРОВА Йис о̄лупсаныл э̄руптыяныл. Ам Варъёган па̄вылн ялмум порат интернатыт о̄лнэ соссаӈ ня̄врамыт ёт ва̄йхатсум. Та̄н оманыла̄тяныл во̄рт о̄лэ̄гыт ос а̄гирищитпыгрищит тув ханищтахтуӈкве тотыглавет. Ам кит пыгрищаквег потранэ̄н на̄нан толмащласагум. Тэ̄н хотыл ёхтысы̄г, во̄рт о̄лнэ сыс маныр ва̄ре̄г, тыт хумус о̄лэ̄г, та урыл потыртасы̄г. – А̄нумн нёлолов та̄л, тыт о̄выл классыт ханищтахтэ̄гум. Омагума̄тягум во̄рт са̄лыт янмалтэ̄г. Тэ̄н ётэ̄н кит а̄пщиягум ос акв ма̄нь йигрищкем тот о̄лэ̄гыт. Та̄н та̄ланыл ка̄сум холы, ос тахольт каникулыт а̄тямн юв тотыглавем. Стойбищав мус ма̄шинал манос «Бураныл» яласэ̄в. Во̄рт о̄лнэ па̄влув Покачи ӯс ляпат о̄лы. Ос та ӯст ханищтахтуӈкве ос о̄луӈкве ма̄навн та̄рвит. Аган па̄вылт интернат лаппантвес, таима̄гыс ман, соссаӈ ня̄врамыт, пуссын тыг ке̄твесӯв. Ань та̄лохса сыс Варъёган школаинтернатыт о̄лэ̄гум. Арсений ос Кирилл, ам ётум ханищтахтын пыгрищиг ёт, румалахтасум. Ка̄сыӈ хо̄тал нила урокыл ва̄раве̄в. А̄нумн математика ханищтаӈкве ос окружающий мир урок мӯсты. Акв колнакт о̄лнэ яныгнув юртанумн ищхӣпыӈ утыл рӯпитаӈкве ханищтавем. Ты Артём нёлолов классыт ханищтахты, Андрей онтоловит классыт ос Сергей лов классыт. Ма̄нки халувт хосат та̄гыл ва̄йхатэ̄в ос пуссын акваннё̄тхатэ̄в. Ханты ла̄тӈум ам ва̄глум, ма̄н юн омава̄тяв ёт потыртэ̄в. Стойбищат о̄луӈкве сака ёмас ос пӯмыщ. Ма̄н коныпалув тот ат ще̄мья о̄с о̄лэ̄гыт. Сергей Тылчин – Ам Ватьеган я̄ тольхыт о̄лнэ ма̄ныл тыг ёхтысум. Ты а̄тям тав самын патум ма̄тэ, ты ма̄в Покачи ӯсныл са̄т ве̄рыстат о̄лы. Варъёган школат лов классыт ханищтахтэ̄гум. Ма̄н тыт хӯрум а̄пщиянум ос йигрищум интернатыт о̄лэ̄в. Юн са̄лы ма̄нки ань ат о̄ньще̄в, а̄тям ос о̄ньгум хӯл алыщлэ̄г ос во̄рае̄г. Аким тав са̄лы янмалты, тэ̄н таве̄н нё̄тэ̄г. Тувыл сасгум о̄с са̄лы о̄ньщи. Тот о̄лнэ ма̄вт рӯтанум ат кол ӯнттысыт. Ня̄врамыт нила класс мус ханищтахтын колыл ва̄рве̄сыт. Ам са̄ртын о̄с тот ханищтаве̄сум. Тувыл Аган па̄вылн ке̄тыглавесӯв, мо̄лты та интернатув лаппантвес. Ты та̄л тыг тотвесӯв. Та школат ханищтам хо̄тпанум акваг номиянум: Ольга Валерьевна Тэвлина, Лидия Николаевна Айваседа, Лидия Фёдоровна Сидорова ос Людмила Николаевна Каюкова. Та̄н ма̄нав ханты ла̄тӈыл ёмщакв потыртаӈкве ханищтасаныл. Та̄нанылн пӯмащипа ла̄тыӈ ла̄ве̄гум. Омам ос а̄тям ты кос сас ханты хо̄тпаг, ос ма̄н юн матрыг акваг рущ ла̄тӈыл потыртасӯв. Варъёган школан ос интернатын ущ ханьщувлаӈкве патсӯв. Тыт а̄пщиянум, йигрищум ёт пуссын акв ляпат о̄лэ̄в. Мо̄т ня̄врамыт ёт ань о̄с румалахтасӯв. Тэ̄лы ӯщлахтын порат «Бураныл» юв тотыглавесӯв. Са̄ртын Аган па̄вылныл о̄лнэ ма̄в мус атпанкем ве̄рыста минуӈкве э̄рыс. Ань тыгыл хо̄тпан ве̄рыста минэ̄в. Юн хӯлпыл хӯл алыщлэ̄в. Ань моторха̄пыл амки яласаӈкве патсум. Мо̄лты та̄л а̄тям ёт во̄раяӈкве ялсуме̄н. Писалил о̄выл щёс майлуве̄сум, та̄ра ва̄с па̄тамтасум. Янгуй ка̄тынпаттуӈкве хум хо̄тпат та̄нки ялантэ̄гыт. Ты школат ам «Охотоведение» ос «Краеведение» кружокын хасхатсум. Сака пӯмыщ, са̄всыр э̄рнэ ва̄рмалит та̄рапаттыянум. Туи во̄рт о̄лмув сыс ма̄н ма̄ке̄в тахольт яныг на̄йн ат ёхталавес. На̄й мощ по̄ханыл минас. Ма̄н о̄лнэ ма̄вныл э̄лаль сунсуӈкве ке, тыгыл Аган я̄ хосыт, ат ве̄рыстат на̄й тэ̄с. Тахольт ма̄н ляпавт ма̄во̄й ат хилаве ос матъёмас нефтяникытныл э̄лыннув о̄лэ̄в, таима̄гыс во̄рув ляпат по̄х хо̄тпат сака ат яласэ̄гыт. Ма̄ке̄в иӈ сыстамыг о̄лы. 1051 2013.05.10. Тамара МЕРОВА Хурит по̄слын юртхумыг. Ханты-Мансийскат Г. С. Райшев рӯпитан галлерея колэ̄т «Берега» нампа суссылтап ва̄рвес. Тот Алексей Бачурин ка̄тыл по̄слум хуриянэ ма̄хумн суссылтавет. Ты хум Екатеринбург ӯсныл тыг ёхтыс ос искусство колледжит а̄гитпыгыт по̄слуӈкве ханищтыянэ. Геннадий Райшев ос Алексей Бачурин ка̄тыл по̄слум хуриянэ̄н мощ аквхурипаг сусхатэ̄гыт. На̄н тэ̄н по̄слум картинанэ̄нт ма̄вит, сыресыр пормасыт ос э̄лумхо̄лас ма̄к хурияныл ат ка̄салыяны̄н. Тэ̄н сас тэ̄нки щирыл по̄слэ̄г. Щуртмиланэ̄н са̄всыр о̄льпыл сартыянэ̄н. Тувыл по̄слум утанэ̄н нупыл хоса сунсуӈкве ос номсахтуӈкве ке, то̄нт ущ хурияныл та̄рапатэ̄гыт. Ань ты йильпи искусство урыл потыртаӈкве тэ̄н сас ӯсыӈ ма̄хум ёт хо̄нтхатыгласы̄г. Алексей Бачурин ма̄хумн китыглавес, тав суссылтапе манрыг «Берега» ла̄тӈыл намтыстэ. Тав ювле потыртас: «Ме̄н Геннадий Степанович ёт, насати, сас я̄ ва̄тат ӯнлахо̄луӈкве сака тахнэме̄н. Нё̄тнэ ма̄виткве, нас вит нупыл пӯмщалахтым сунсуӈкве, витэ хоталь нупыл овты, я̄ мо̄тпал ва̄татэ сунсыглым, тыи ме̄н ме̄нки щирме̄нтыл э̄лаль по̄слыянме̄н. То̄ва суссылтан хуриянум ам Ханты-Мансийскат 2009 та̄лт «Большая вода» о̄лум фестиваль порат по̄слысанум». 1051 2013.05.10. Светлана Садомина Ӯринэ̄квав Эстоният хӯрум хōтал янытлавес. Эстоният ма̄н Ӯринэ̄ква хōталув хӯрум хōтал сыс мӯйлувес. Тув хӯрум хōтпа ялсыт: Татьяна Мерова, Любовь Зорина, Светлана Динисламова. Ӯринэ̄ква хōтал мӯйлын ва̄рмаль Эстоният титынтыг ты ва̄раве, та минам та̄лт тув ханты хōтпат ялсыт, ты та̄л ма̄ньщи хōтпанув тув во̄виньта̄лве̄сыт. Ма̄ньщи хōтпат ща̄гтым молях атапахтасыт, яныгполь э̄тпос 7 щислат СанктПетербург ӯсн товлыӈха̄пыл та минасыт. Тот визанэ̄паканыл кӯстырыг, тагапан та̄л, ва̄рапасаныл, 10 щислат автобусыл Эстония Таллинн ӯсн та ёхтысыт. Таллинн ӯсн ёхтуманылт – хум хо̄тпан, тав наме Яак Прозес, гостиницан тотве̄сыт, тувыл та̄ранув Музыка колн концерт ва̄руӈкве та ва̄нттаве̄сыт. Музыка колт яныг колнакт каминыг ла̄внэ нё̄тнэ щовал ва̄рим о̄лы, ма̄ньщи нэ̄т щовал па̄лтсаныл, на̄йкве по̄хат концертаныл та о̄вылтасаныл. Са̄ртын та̄н хӯрум ла̄тӈыл: ма̄ньщи, эстонский ос рущ ла̄тӈыл пащалахтасыт, та̄нти уранылт аквтит ла̄тыӈ ла̄всыт ос кина суссылтасыт. Ты Татьяна Мерова тав по̄слум кинатэ, тот Галина Константиновна Алгадьева суссылтавес. Ты э̄лыпа̄лт Татьяна ла̄выс: «Я̄тил миркве! Ма̄н ма̄ньщи мирув такви о̄лнэ ма̄тэ̄т о̄лнэ те̄м о̄лы, на̄н ань на̄нти ка̄салэгы̄н: хумус ма̄нь па̄вылт ма̄хум о̄лэ̄гыт, маныр ва̄ре̄гыт, маныр ма̄щтырлэ̄гыт » Кина ма̄ньщи ла̄тӈыл о̄лыс, ос атхатам мирн нэ̄матыр толмащлаӈкв ат э̄рыс – та̄н Галина Константиновна нупыл сунсым, та̄нти торгамтасаныл: ма̄ньщи мирув ёмасыг о̄лы, ма̄хум та̄нти ща̄нь ла̄тӈыл потыртэ̄гыт, э̄ргыт э̄рге̄гыт, нё̄тнэ пормасыт ю̄нтэ̄гыт. Кина а̄стум юипа̄лт Светлана Динисламова ма̄ньщи мир урыл ла̄тыӈ ла̄выс, Ӯринэ̄ква урыл ма̄хумн потыртас. Тувыл тит ма̄ньщи хо̄тпаг – э̄кваго̄йкаг Марья ос Юван сценан та нэ̄глапасы̄г, тэ̄н татемта пӯмщиг ёнгысы̄гэ̄ргысы̄г, ма̄хум маттем ка̄тпатта та ра̄тсыт. На̄н улпыл та̄ра паттыслын: сценка Татьяна Мерова ос Любовь Зорина ёнгысы̄г, тэ̄н щар артистканэ̄г олнэтэ̄н. Ты юипа̄лт хӯрум ма̄ньщи нэ̄т пӯрлахтын пасан щё̄пита̄лсыт, са̄всыр тэ̄п а̄нысупытн пинсыт, хӯрум ща̄рка ӯнттысыт, со̄с косамтасыт, тувыл ма̄ньщи ла̄тӈыл Ӯринэ̄ква янытлан ла̄тыӈ С. Динисламова ла̄выс, ты ла̄тӈыт рущ ла̄тӈыг Татьяна Мерова толмащласанэ. Ла̄тӈыт тох ты о̄лсыт: «Ты та̄л Ӯринэ̄ква а̄квув мо̄ртым хумпа хумпыӈ ма̄ныл Эстония ма̄т о̄лнэ саӈквлыпил са̄т я̄ӈкыл манисуӈкве матъёмас номылматам. Ты нё̄тнэ ма̄т, ты щуниӈ ма̄т ма̄нь а̄ги, ма̄нь пыг са̄в вос нёвитануве, са̄в вос янмалтануве. Ты хосыт тах Ӯринэ̄ква по̄лим ла̄глаге, по̄лим ка̄таге та̄н са̄п анянылт толтыглыянэ, ре̄гылттыянэ » Со̄лькве, Эстония ма̄хумн ты ла̄тӈыт хӯнт амлаӈкве пӯмыщ о̄лыс, та̄н кӯньгиммовала̄лым хӯнтласыт, тувыл ка̄сыӈ хо̄тпа йӣв товытн а̄ссын тагатас ос пӯрлахтам тэ̄п а̄рталасыт, ща̄ркат ка̄тын вуйласыт. Ты юипа̄лт та̄н ма̄ньщи нэ̄т ёт йӣквсыт, титыглахтасыт: хумус ман мирув о̄лы, хо̄т ма̄хум рӯпитэ̄гыт, маныр ва̄ре̄гыт. Тамле концерт тит щё̄скем минас, ма̄ньщи нэ̄т концертаныл хӯрум ӯс щирыл ва̄рсаныл. Титыт хо̄тал та̄н Тарту ӯст ма̄хум пӯмщаласыт, тот Ӯринэ̄ква яныг Музеит янытласаныл; хӯрмит хо̄тал мир Варна ӯст атхатыгла̄лсыт, тот библиотекат ёнгын кол ва̄рыглавес. Ка̄сыӈ ма̄т ма̄ньщи нэ̄т ёт корреспондентыт потыртасытта̄н учёный хо̄тпат ёт, писателит ёт, кӯщаит ёт хо̄нтхатыгла̄лсыт. Са̄в ёмас ла̄тыӈ тан хӯнтласыт, са̄в ёмас ла̄тыӈ та̄н та̄нти Эстония ма̄хумн ла̄всыт. Ань ма̄ньщи нэ̄т юв, та̄нти о̄лнэ ма̄нанылн ёхтысыт, ка̄сыӈ хо̄тал Эстонияныл пищмал ёхтавет. Маныр ла̄вуӈкве хо̄йхаты? Ма̄ яныт о̄лнэ мир акв Со̄рниӈ хо̄талаквен о̄лнэ лё̄ӈханыл поставет, ма̄ янытыл о̄лнэ мир акв вит ае̄гыт, акв лылые̄пыл лылтэ̄гыт. Ка̄сыӈ хо̄тпа такви ла̄тыӈ о̄ньщи, такви ма̄ о̄ньщи. Хо̄тпат та̄нти халанылт нэ̄матыр нур ат тинсэ̄гыт, нэ̄матыр лю̄ль номт ат о̄ньще̄гыт. Ка̄сыӈ ма̄т ща̄гтым ӯравет, ща̄гтым о̄ньщавет. Туп мирыт халт нэ̄матыр лю̄ль нак ул вос е̄мтапи, вос э̄лаль са̄в хо̄тал, са̄в йис юртыӈыщ о̄лэ̄гыт. Яныг пӯмащипа ла̄тыӈ Эстоният о̄лнэ Яак Прозес хумкве̄н «Лӯима̄ нэ̄т» ла̄ве̄гыт. Ос Тарту ӯст о̄лнэ хум Эдгар Саар газета хосыт пащалахтын ла̄тыӈ Евдокия Ивановна Ромбандеева ма̄гыс те̄ты. Ты хум са̄в щёс ма̄н о̄лнэ ма̄вн ёхталас, са̄в хо̄тпат ва̄г, та̄н уранылт титыглахтас, пӯмщалахтас. Эстониян ялмув ма̄гыс пӯмащипа ла̄тыӈ Ӯринэ̄квавн о̄с ла̄ве̄в! 1052 2013.05.24. Александр ВЬЮТКИН Нила хо̄тал акв хо̄тал хольт минасыт. Ва̄с па̄тлуптан ва̄р маль округув янытыл та оигпас. Ты э̄лыпа̄л ӯйхул ӯргалан ма̄т рӯпитан тит кӯщаиг ёт прессконференция о̄лыс. А. Н. Залибеков ос Ю. В. Василенко тэ̄н сас во̄рт о̄лнэ ӯйхул ӯргалан ма̄т кӯщаиг рӯпитэ̄г. Та порат ла̄всы̄г: «Ва̄с па̄тлуптан кастыл винэ лицензия нэ̄пак Россия янытыл акв тыныл о̄лы – 420 солко̄ви». Ам хунь та нэ̄пак ма̄гсыл минасум, 840 солко̄ви ойтуӈкв ла̄вве̄сум. Тынэ урыл ам тот та̄ра титыглахтасум. Та̄н ла̄всыт: «Залибеков ос Василенко тэ̄н тэ̄нти нэ̄матыр ат ва̄гы̄г, хо̄т манырсыр тын щирыл о̄лы». Хунь тын урыл титыглахтасум, алыщлан ма̄хум о̄с а̄нумныл титыглахтасыт: «Кӯщаяныл ман со̄ль тох ла̄всыт, манос наӈ нас тох мовиньтэ̄гын? » Та̄н ты урыл ва̄ӈкв ат ва̄гыт, хӯлуӈкв ат хӯлыгласыт. Манырсыр тыныл ла̄вавет, таса̄вит та ойтэ̄гыт. Та юипа̄лт ам ва̄нэ ма̄хманум палт Сургут, Нефтеюганск ос Нягань ӯсытын тын та̄рапаттын ма̄гсыл звонитасум. Та̄н ӯсанылт ты нэ̄пак тынэ 420 солко̄ви са̄вит о̄лнэ̄тэ. Тӯяг ёхтын ва̄с та̄л ма̄н о̄луӈкв ат ве̄рме̄в. Во̄рн нила хо̄талын юрт хо̄тпанув палт Владимир Меров ёт ялсуме̄н. Победа хо̄талт ме̄н Шапша па̄выл нупыл Анатолий Вадичупов во̄раян ма̄н минасме̄н. Ва̄с ӯрмувт аквписыг лӯима̄ е̄рныл ащирма тӯйтыӈ ос раквыӈ во̄т во̄тыс. Улпыл таима̄гсыл ты во̄раян сыс яныг аняӈ ва̄с щар ат ва̄сув. Торыӈ щирыл ва̄с па̄тлуптаӈкв ат а̄ртмалас. Тӯрт вит ва̄та я̄ӈкыл по̄лиглавес, хо̄тыл о̄с няӈра ащирмаӈ во̄тл во̄тыс. Ла̄вуӈкве те, ва̄с ӯрнэ ва̄рмаль ты та̄л щар ат а̄ртмыс. Ты пор ва̄с па̄тлуптан ва̄рмаль мощ ётылнув ва̄руӈкв кос э̄рыс. 1052 2013.05.24. Галина КОНДИНА Мӯй нэ̄ мощщаг хультум мирытыл пӯмщалахты. Финляндияныл ма̄н ма̄вн мӯй ма̄хум ёхталасыт. Хелена Аутио Мелони, Москва ӯст посольстват рӯпитан нэ̄, соссаӈ мир Ассамблеян во̄виньтавес. Тот хӯрум депутатанув Е. Айпин, Н. Алексеева ос А. Филипенко тав ётэ потыртасыт. Хелена ла̄выс, та̄н та̄нти щирыл о̄лнэ ма̄хум, тыг ёхтыс сунсуӈкве, хумус мощщаг хультум мирыт мо̄т яныг мирыт халт о̄лэ̄гыт. Хумус та̄н культураныл э̄лаль тотыяныл, та̄нти ла̄тӈыл потыртэ̄гыт, манхурип та̄рвитыӈ ва̄рмалит о̄ньще̄гыт. Тамле яныг округт акв миллион атса̄т со̄тыра э̄лумхо̄лас халт туп хус со̄тыра соссаӈ хо̄тпа о̄лэ̄гыт. Еремей Данило вич ювле потыртас, соссаӈ мир Ассамблея хо̄тхуйплов та̄л рӯпиты, ты сыс соссаӈ ма̄хум ма̄гсыл са̄в са̄ккон пирмайта̄лвес, то̄ват хотарыгтаптуве̄сыт. Ань ма̄н ма̄гсылув титхуйплов са̄ккон о̄лы. Ты ща̄нь ла̄тыӈ ӯргалан са̄ккон, пе̄с йис э̄ргыт, мо̄йтыт, потрыт, ялпыӈ ма̄т, общинат, са̄лы ӯрнэ ма̄хум ма̄гсыл ос мо̄т са̄кконыт хансым о̄лэ̄гыт. Ты коныпал округувт атпан нупыл нёлолов са̄кконт о̄с я̄нас ло̄мтыт ма̄ньщит, хантыт ос ё̄рныт ма̄гсыл хасве̄сыт. Россияв янытыл нэ̄мхот ты ма̄т тыса̄вит са̄ккон а̄тим. Ма̄н округ Думавт таи ёмас, хунь матхурип са̄ккон щё̄питаве, Ассамблея депутатыт номтаныл ат те паты, тав э̄лаль ат пирмайтаве. Тув ат ро̄внэ ла̄тӈыт хунь мӯсхал щирыл хансавет, то̄нт ущта пирмайтаӈкве та̄ртаве. Ты урыл Дума Устав нэ̄пакт тох хансым о̄лы. Хелена ёт театрыт рӯпитан ма̄хум ёхталасыт. Та̄н тыт ӯст Еремей Айпин хансум потре щирыл спектакль суссылтасыт. Ты урыл мо̄тыт газетат тах ловиньтэ̄н. 1052 2013.05.24. unknown author Во̄рув ӯргалым о̄ньщелы̄н. Я̄ӈк на̄тнэ э̄тпос нилахуйплов хо̄талныл округувт во̄р ӯргалан ва̄рмаль о̄вылтавес. Ты урыл природный ресурс ос несырьевой сектор экономика департаментныл ла̄тыӈ те̄твес. Мо̄лты тув сыс сака са̄в ма̄т во̄рув на̄ин та̄йвес. Таима̄гыс ты та̄л на̄й харыгтан са̄в хо̄тпа рӯпитаӈкве вуйвес. Ань округув янытыл 1005 хо̄тпа ты рӯпата ва̄руӈкв патэ̄гыт. Са̄всыр ма̄шинат ос э̄рнэ пормасыт ёвтве̄сыт. Хусахтем Ми-8 вертолёт ос Ан-2 товлыӈха̄п ты кастыл щё̄питаве̄сыт. Акв ищхӣпыӈ товлыӈха̄п о̄лы, тав э̄лумхо̄лас та̄л тыламлы ос та хосыт на̄й тэ̄нэ ма̄т хо̄нтавет. Ты товлыӈха̄п рущ ла̄тӈыл «беспилотный летательный аппарат» ла̄ваве. 1052 2013.05.24. unknown author Пенсия винэ хо̄тпат олнаныл но̄хнё̄тве̄сыт. Пенсия олн винэ ма̄хум Ханты-Мансийский Негосударственный Пенсионный Фондын ты э̄тпос олнаныл но̄хнё̄тве̄сыт. Ты кастыл яныгполь э̄тпост округ правительство кӯщаянув пенсият ос социальный пособият 5, 5 процентын но̄хнё̄тнэ ма̄гсыл нэ̄пак хассыт ос округ думав таве пирмайтасаныл. Ты олныт ма̄хум «губернаторский» олныг ла̄вияныл. Ань ты олныт та̄л о̄вылтахтам па̄сныл ловиньтавет ос я̄ӈк на̄тнэ э̄тпост (нила э̄тпос сыс) ойтавет. Хӯрум та̄л сыс ты олныт акваг но̄хнё̄тавет. Ханты-Мансийский НП Фондыныл 200 со̄тыр хо̄тпа пенсияолныл ойтавет. Та̄н Россияв янытыл о̄лэ̄гыт. Хуньт тыт рӯпитасыт ос ӯщлахтуӈкв минаманыл порат мо̄т ма̄н о̄лмыгтасыт. Йильпи са̄ккон щирыл тыт округувт ро̄ви ат о̄луӈкве. 1052 2013.05.24. unknown author Па̄вылн миннэ ле̄ккарыт олныл ойтавет. Наталья Комарова, губернаторув, такви ва̄ӈын хо̄тпанэ ка̄сыӈ са̄т акванатыглыянэ. Тот та̄н са̄всыр постановление ос распоряжениела̄тыӈ пирмайтэ̄гыт. Ань тамле сапра̄нит кӯщаит ма̄ньлат ле̄ккарыт ма̄гсыл хансым нэ̄пак урыл потыртасыт. Ханищтахтын ма̄ныл а̄стын ма̄ньлат хо̄тпа па̄вылн ле̄ккарыг рӯпитаӈкве ке мины, тав акв миллион солко̄вил ойтаве. Рущ ла̄тӈыл ты олныт «подъёмныиг» ла̄вавет. 2012 та̄л сыс 22 ма̄ньлат ле̄ккар са̄всыр па̄влытн ма̄хум пусмалтаӈкве минасыт. Ань йильпи пирмайтым нэ̄пак щирыл ма̄нь ле̄ккарыт олныл о̄с нё̄туӈкве патавет. Акушерыг ос фельдшерыг ханищтахтын ма̄ньлат а̄гитпыгыт хоты ма̄нь па̄вылн рӯпитаӈкве ке минэ̄гыт, та̄н о̄с 500 со̄тыра солко̄вил тах мивет. Наталья Комарова ла̄выс: «Ты та̄л сыс округ янытыл ма̄нь па̄вылкветт йильпи ФАПыт та хӯнттавет. Ма̄ньлат хо̄тпат йильпи пӯльницан рӯпитаӈкве вос ёхтэ̄гыт». Тамле пӯльница по̄хыт ӯнттым колытт па̄вылн ёхтум ле̄ккарыт о̄лнэ̄ колыл мивет. Аквта сапра̄нит ма̄хум о̄с акв нё̄тмил урыл потыртасыт. Пирмайтым нэ̄пак щирыл 16 ӯсыт ос районыт олныл та̄ставет. Та̄н халанылт акв миллиард солко̄ви ла̄кквауртаве. Ты хосыт та̄н мир ма̄гсыл рӯпитан ма̄хум сэ̄лнэ олнаныл но̄хнё̄тыяныл. Ма̄шинал яласан лё̄ӈхыт урыл потыр о̄лыс. Ты рӯпата ма̄гсыл ань о̄с яныг олн та̄стувес. Ты та̄л та̄стым олнытыл Вах я̄ ӯлтта унсах ва̄раве. Ос ты коныпал о̄с са̄в лё̄ӈхыт ёмащакв щё̄питавет. 1052 2013.05.24. Тамара МЕРОВА Пыгыт лусытаӈкве тотве̄сыт. Мо̄лал ля̄ххал тотнэ хо̄тпат Юрий Буров, округувт рӯпитан комиссаркӯщай, ёт хо̄нтхатыгласыт. Хум журналистытн ма̄ньлат пыгыт лусытан о̄вылтыт ос Победа янытлан хо̄тал урыл китыглавес. Тав ювле маныр ла̄выс, потре э̄лаль ловиньтэ̄лын. Яныгпо̄ль э̄тпос о̄выл хо̄талэ̄ныл ма̄ньлат пыгыт армиян винэ э̄лыпа̄лт ле̄ккарытын сунсуӈкве патве̄сыт. Округ янытыл 22 комиссия рӯпитасыт. Ань Югра ма̄вныл 1 со̄тыра 427 пыг армиян минэ̄гыт. Ты э̄тпос атхуйплов щислат о̄выл атхуйплов пыг Президентский нампа полкын лусытаӈкве тотве̄сыт. Мо̄таныт лӯпта э̄тпост тах ке̄тавет. Ма̄н пыганув са̄всыр ӯсыӈ манос па̄влыӈ ма̄н тотавет. Ос пыгыт хоталь вивет, округ комиссар ос мо̄т военный хо̄тпат ат ва̄ганыл. Тамле ва̄рмалитыл Генеральный штабт рӯпитан ма̄хум та̄нки кӯщайлахтэ̄гыт. Та кӯщаитн ла̄тӈыл ке̄тавет, округныл манаса̄вит пыг армиян атуӈкве э̄ри, та̄н тащирыл э̄лаль та рӯпитэ̄гыт. Тувыл ма̄н са̄лтатанув янгыщ пуссын то̄сам ма̄ тармыл лусытэ̄гыт, ос хӯрумса̄т са̄вит пыг Морфлотын во̄вавет. Ос сака та̄ксар ма̄ньлат хо̄тпат ВДВ, ФСБ, ДРУ нампа ма̄н вивет. Тот пуссын ёмщаквег ханищтавет. Военный армият лусытаӈкв ат тахнэ пыгыт нас рӯпитан щирыл патхатэ̄гыт. Рущ щирыл тав «альтернативный службаг» ла̄ваве. Тох ма̄ньлат хо̄тпат пӯльницан рӯпитаӈкве вивет, колкан ловтнэ манос мо̄т рӯпатан ке̄тавет. Тыт то̄ва пыгыт Нижневартовскат матумпа̄ла ос а̄гмыӈмосыӈ, сакватахтам хо̄тпат о̄щнэ интернатколт рӯпитэ̄гыт. Ос армияныл тӯйтыглахтын хо̄тпат та̄н та̄нки ат кинсыяныл, таима̄гыс то̄ва пыгыт лусытан та̄ланыл то̄влынэ̄ныл мус (ва̄т нупыл са̄т та̄л) хо̄т тӯйтыглахтэ̄гыт, тувыл армиян воссыг ат вивет. Военный комиссариат ань полиция ос УФМ службаг ёт акваннё̄тхатым рӯпитаӈкве ла̄вхатсыт. Ма̄ньлат пыгыт нэ̄мхо̄т ат ке лусытэ̄гыт, та̄н государство па̄лыл нэ̄матыр нё̄тмилыл ат мивет манос тамле хо̄тпа ётыл кӯщаиг рӯпитаӈкве тах ат та̄ртаве. Та та̄ланэ то̄влын мус туп сутытым хо̄тпа армиян ат виве. 1052 2013.05.24. unknown author Тот титыглахтуӈкве ро̄ви. Мо̄лалнув па̄сныл округувт Единый информационносправочный служба ва̄рвес. Ань ка̄сыӈ хо̄тпа тув свонитаӈкве ве̄рми, тав тот хӯлтаве, хоты департаментыт манос хоты кӯщай ёт потыртаӈкве ве̄рми. То̄ва э̄лумхо̄лас щар ат ва̄гтэ, такви та̄рвитыӈ ва̄рмалянэ ёт хоталь минуӈкве, хотьют титыглаӈкве. Ань 8-800-100-8472 телефон хосыт свонитаӈкве ве̄рмегы̄н. Тыи ма̄гыс олн щар ат виве, ще̄пт о̄щнэ телефоныл те потыртэгы̄н, о̄с олн щар ат пуваве. 1052 2013.05.24. Людмила ТЕТКИНА Москваныл ёхталам кӯщай. Александр Сергеевич Галушка «Деловая Россия» нампа организацият рӯпитан кӯщай хум Ханты-Мансийск ӯсн ёхталас. Ты организация 2011 та̄лт я̄ӈк на̄тнэ э̄тпост рӯпитаӈкве о̄вылтахтас. Тот «Почта России, «Российские железные дороги» ос мо̄т са̄всыр организацият акваннё̄тхатым рӯпитэ̄гыт. Александр Галушка округ кӯщаит ёт хо̄нтхатыглас ос са̄всыр рӯпата урыл та̄н ётаныл потыртас. Ос тыт предпринимателит хумус рӯпитэ̄гыт, ты урыл тав о̄с пӯмщалахтас. Югра ма̄вт манаса̄вит ма̄во̄й но̄хвиве, ты урыл округ губернатор ва̄ӈын хум Александр Ким ла̄тыӈ ла̄выс. Ма̄н округув ты рӯпатал са̄в олн сэ̄лы. Юио̄выл хӯрум та̄л сыс акваг мощщанув ма̄во̄й но̄хвиве. Округувт 16 ӯс о̄лы, та̄н туп ты рӯпата ва̄рим олн сэ̄лэ̄гыт. Ты ӯсытт ос округув янытыл мир хумус э̄лаль о̄луӈкве паты, ань номсахтуӈкве э̄ри. Тыима̄гсыл тамле предпринимателит тыт о̄с сака э̄ре̄гыт. Ты та̄л сыс Россия янытыл 450 со̄тыра предпринимателит рӯпата та̄л хультсыт. Та̄н пуссын та̄нки рӯпатаныл хосыт ще̄мьяныл тыттысаныл ос та̄н палтаныл рӯпитам хо̄тпат о̄с по̄хын та ке̄тсаныл. Ты яныг та̄рвитыӈ ва̄рмаль урыл та̄н Россия Президентын потыртасыт. Ты ма̄хум ва̄рмаляныл хотёрувлаӈкве ат ро̄ви. Та̄н мӯсхалыг ке рӯпитэ̄гыт о̄с са̄в олн сэ̄лэ̄гыт, Россияв ты хосыт о̄с щёлыӈыг е̄мты. Ты юипа̄лт кӯщай хум ля̄ххал тотнэ ма̄хум ёт хо̄нтхатыглас. Ос та̄нки организацияныл ва̄рнэ рӯпататэ урыл потыртас. Лӯпта э̄тпост та̄н яныг съездын тах атхатыглэ̄гыт, то̄т ка̄сыӈ ка̄сащан э̄лумхо̄лас «Общественный народный фронд» нампа организациян хасхатуӈкве ве̄рми. Ань тув са̄всыр партият хансым о̄лэ̄гыт. 1052 2013.05.24. Людмила ТЕТКИНА Яныг ӯст о̄лум суссылтап. Ты э̄тпост «Сокровища Севера – 2013» нампа суссылтап Москва ӯст рӯпитас. Ма̄н округувныл ма̄хум ма̄ньщи, ханты са̄всыр пормасыт, маснутыт суссылтаӈкве ос тэ̄нут тыналаӈкве тув ялсыт. Тув хо̄т община «Колмодай», «Росомаха», «Обь», «ВерхнеВахская», «Лангки», «Регион-К» во̄виньта̄лве̄сыт. Та̄н нё̄выль, хӯл, пил, ла̄хыс, па̄квсам ос са̄в мо̄т тэ̄нут тот тыналасыт. Тув тотыглам тэ̄нутаныл ат хо̄тал сыс пуссын тыналасаныл. То̄ва общинат 150 со̄тыра солко̄ви сэ̄лсыт, мо̄таныт тыгыл са̄внув 400 со̄тыра солко̄ви. Ма̄щтыр хо̄тпат та̄нки ва̄рум, ю̄нтум, сагум пормасаныл суссылтаӈкве тув о̄с тотыгласаныл. Тот турло̄псыт, пальсакыт, са̄сныл ва̄рим са̄всыр то̄тапыт, ра̄ктыл по̄щгим а̄ныса̄ныт сусылтаве̄сыт ос тыналаве̄сыт. Ма̄щтыр хо̄тпат суссылтапын ёхталам ма̄хум ма̄щтырлаӈкве ханищтасаныл. Та̄н сакныл хорамыт хартсыт, а̄канит ю̄нтсыт ос мо̄т са̄всыр щирыл ма̄щтырласыт. Суссылтап рӯпитам сыс округ ма̄хманув тот янытлаве̄сыт. Тыгыл тотыглым выставка «Диплом I степени» нэ̄пакыл майвес. Ты коныпал ка̄сыӈ ма̄щтыр хо̄тпа о̄с янытлан нэ̄пакыл мӯлуптавес. 1052 2013.05.24. Николай Меров Па̄вылт рӯпитан миркол хум. Ха̄льӯс район Саранпа̄вылт миркол кӯщаиг Николай Никитович Артеев китыт та̄л рӯпиты. Тав тув пе̄риим порат та̄ра ма̄нь па̄влытын ялыс. Сунсыс, хумус тот ма̄хум о̄лэ̄гыт, маныр ва̄рмаль та̄н о̄ньще̄гыт. Ты э̄лыпа̄лт Николай Никитович мо̄т ма̄т о̄лыс. Университет а̄стламе юипа̄лт хӯрум та̄л Саранпа̄выл школат кӯщаиг рӯпитас. Тувыл ос ня̄враманэ̄н тот о̄луӈкве ат а̄ртмыс. Таима̄гыс тав ще̄мьяӈ та̄гыл мо̄т ма̄н о̄луӈкве ва̄нтлыс. Та па̄сныл пуссын аквъёт ва̄т нупыл са̄т та̄л па̄вылт а̄т о̄лыс. Ань ня̄враманэ пуссын янгыт, та̄нки ще̄мьяӈыг е̄мтсыт. Хум яныгмам ма̄тэ та̄л ка̄сэ холас, таима̄гыс ювле ёхтыс. Тав хунь Саранпа̄вылн ёхтыс, тот миркол кӯщай пе̄риян пора ляпамас, тав о̄с тув пе̄рияхтуӈкве номылматас. Э̄рнэ нэ̄паканэ атсанэ. Мощ о̄лыс, пе̄рияп та е̄мтыс. Тав тот о̄лнэ мирн ёмщакв ва̄ве. Таима̄гыс па̄влыӈ ма̄хум са̄внув нэ̄пак тав ма̄гсылэ та̄ратасыт. Николай Никитович тох ла̄выс: «Ам ма̄нь па̄влыт ма̄гыс сымум сака ща̄рги. Таима̄гыс тыг ёхтысум, матыр э̄рнэ тэ̄ла ма̄хум ма̄гыс ва̄руӈкве таӈхе̄гум. Та̄н о̄лупсаныл кӯпнитнувег ке ва̄рилум, а̄нумн ёмас паты. Хумус ве̄рме̄гум, таил нё̄тэ̄гум. Ма̄нь па̄влыт но̄хво̄рмалтаӈкве э̄ре̄гыт. Сӯкыръя, Сортыӈъя, Ло̄пмус ос мо̄т ма̄нь па̄влытт са̄в та̄рвит ва̄рмаль о̄лы. Пе̄с порат ма̄хум акваннё̄тхатым о̄лсыт. Па̄влытт мирн пуссын рӯпата о̄щсыт. Ӯйхул янмалтасыт, хӯл алыщласыт ос во̄раим яласасыт. Ань торыӈ рӯпата а̄тим. Хуньт са̄в мирн о̄лым па̄влыт ань акваг вуньщалыг патэ̄гыт, ма̄ньлат хо̄тпат э̄л миныглэ̄гыт. Ань тамле номт тотуӈкве э̄ри, ма̄хум акванюрщхатым вос о̄лэ̄гыт. Аквъёт ма̄н са̄в э̄рнэ тэ̄ла ва̄ре̄в. Э̄рыӈ ла̄щалла̄щал па̄вланув но̄хво̄рмалтыянӯв». 1052 2013.05.24. Тамара МЕРОВА Са̄в пормас атсыт. Нижневартовскан ялмум порат ам Лариса Хайрулина, музейт рупитан нэ̄, ёт ва̄йхатасум. Ме̄н рущ ма̄хум музейколт акванхо̄нтхатсуме̄н ос тав рӯпататэ о̄вылтыт а̄нумн потыртас. Та̄н ӯсанылт краеведческий музей о̄лы. Яныг таквс э̄тпос о̄выл хо̄талэ̄т та кол 40 та̄лэ то̄влы. Лариса Алтафовна ла̄выс: Мо̄т музеит пуссын ётыл ва̄рве̄сыт. Ос ты краеведческий музей Т. Д. Шуваев намыл пиным о̄лы. Ты о̄йка тав тамле кол щё̄питаӈкве номылматас. Тимофей Дмитриевич 1970 та̄лытыт история урокыт ня̄врамытн ханищтас. Лӯима̄н о̄луӈкве ёхтуме̄т, ты ма̄ о̄вылтыт мощща ва̄с. Тувыл соссаӈ ма̄хмытыл ос та̄н о̄лупсал пӯмщалахтуӈкве патыс, такви соссаӈ ма̄хум палт ялантас, та̄н ётаныл румалахтас. Ханты ос ё̄рн ма̄хум, та̄н щёлыӈ ма̄наныл урыл ня̄врамытн потыртас. Ос тувыл тотум пормасыт а̄гитынпыгытын суссылтас. Школанылт акв колнак ва̄рсыт, пормасыт тув атуӈкве патсаныл. Ётыл Тимофей Шуваев ӯст музей ва̄руӈкве номылматас. Тав акванатум пормасанэ ань пуссын ма̄н фондувт о̄лэ̄гыт. Тыи янгыщ Нижневартовский районт о̄лнэ хантыт ос ё̄рныт та̄н пормасаныл. Та̄н хоты ма̄ныл, хотьютн ос хунь тотве̄сыт – ма̄н пуссын нэ̄пакн хассанӯв. Ты коныпал Тимофей Дмитриевич ма̄хумныл са̄всыр потрыт хансыс. Ань научный рӯпата э̄лаль хаснэ̄в порат, та̄н сака э̄рмыгла̄лэ̄гыт. Тувыл Юрий Вэлла музейн минэ ма̄гыс акв сӯмъях хо̄нтыс. Тыи Сардаковыт ще̄мья та̄н сӯмъяханыл тыг тотвес. О̄йка ва̄нэ̄тэ щирыл ё̄рнкол тӯщтуӈкве о̄с нё̄тыс, хумус э̄ри хӯлтыглас. 2010 та̄лт краеведческий колув ёмщакв хотщё̄питан ма̄гыс лаппантвес. Музеюв онтолов накпа лю̄лит яныг колт щар ёлы наке̄т о̄лы, тот яныг колнакыт о̄ньще̄в. Та̄н щё̄питаӈкве о̄вылта̄лве̄сыт кос, тувыл на̄й ке̄рква̄лгыт ос ке̄ртурыт мо̄т щирыл мощ ва̄руӈкве э̄рсыт. Ань тамле колыт пуссын ищхӣпыӈ утыл ёвтавет, кумыскаӈ а̄вил ва̄равет ос са̄в лампочкал тагатавет. Таима̄гыс олн са̄в э̄рмыглас, рӯпата хосан ёлпо̄илтта̄лвес. Тув та̄стыглым олныт ат то̄вылхатсыт, о̄с йильпииг ловиньтаве̄сыт. Ётыл олн ущ тув та̄стысыт. Ань яныг таквс э̄тпос мус щё̄питаӈкве ве̄рмияныл ке, такем ёмас о̄лнув. Ма̄н тыт тэ̄ла та̄л о̄с ат ӯнлантэ̄в. Ты колув «музей истории русской избы» рущ щирыл ла̄ваве. Тав краеведческий музеюв нупыл ловиньтахты. Тыг са̄в ма̄ныл мӯй ма̄хум ёхталэ̄гыт, ханищтан ня̄врамыт тыг тотыглавет. Ма̄нки о̄с школатын, культура колытын ялантэ̄в, тот суссылтапыт ва̄рыглэ̄в. Тувыл ищхӣпыӈ утыл рӯпитаӈкв ха̄снэ ма̄гыс ханищтаве̄в. Ханты-Мансийскан о̄влэ̄т «Ма̄вит ос э̄лумхо̄лас» ос ётыл «Ма̄во̄й ос газ» нампа музеигн ханищтахтуӈкве во̄виньта̄лвесӯв. Округт культура проектыт ма̄н о̄с щё̄питэ̄в ос вуянтыянӯв. Ма̄н ётув рӯпитан нэ̄ Ирина Игонина олныл майлувес, ос тав «Лук. Облас. Берёсто» нэ̄пак щё̄питас ос та̄ратас. Нэ̄паке̄т ваховский хантыт хумус ня̄лыт, ма̄ньхапыт ва̄ре̄гыт ос са̄с ёт хумус рӯпитаӈкве ха̄сэ̄гыт – пуссын тув хасве̄сыт. Ты ха̄снэ ва̄рмаляныл Г. М. Дмитриев-Садовниковын 1920 та̄лт хасве̄сыт ос хурин по̄слуве̄сыт. Ирина Владимировна ты потрыт ос хурит Тобольский музейт хо̄нтсанэ ос тувыл тахольт нэ̄пак та̄ратас. Ань ос «Исчезнувшие технологии ваховских ханты» мо̄т проект щё̄питасӯв. Тот «чип» ос «сарга» та ма̄хумн ва̄нэ пе̄с накыг урыл потрыт хансуӈкве таӈхе̄в. Ань музейный фондувт маныр пормасыт о̄ньще̄в, пуссын нэ̄пакн хансыянӯв. Ты хо̄тал мус пе̄с пораныл акванатнэ маснутыт, пормасыт, ма̄ ёлыпа̄лт хо̄нтым пе̄с утыт, са̄всыр хурит, документыт о̄ньще̄в. Пуссын аквъёт 600 со̄тыра са̄вит пормас атхатас. 1052 2013.05.24. unknown author Щисуп о̄йка. Хосат, хунь āщум мощ мāньнувег о̄лме порат о̄памн потрыл потыртавес. Свердловский область Ивдельский районт Кимыӈщупа пāвыл о̄лы. Тот ам самын патсум. Пēс тот ам о̄пагумщаще̄квагум о̄лсы̄г, Тимофей Прокопьевич ос Анастасия Михайловна Бахтияровыг. Пāвыл нё̄р ляпат о̄лы, лов ве̄рыстат Щисуп о̄йка ӯнлы. Пēс о̄пам ла̄выс, тот ат ро̄ви ӣтипа̄лаг ро̄ӈхуӈкв, кисгуӈкв, тувыл мори щисгуӈкв ме̄ӈквыт ва̄глэ̄гыт. Āщум то̄нт сāлы о̄ньщас, акв ва̄тихал нё̄рт о̄лыс. Та юио̄выл порат āщум сāлыяныл Тумпя̄ӈкыт ӯрсаныл, Щисуп о̄йка ляпат. То̄нт āщум щāнюм ущ нэ̄гыг тотастэ. Тувыл юв ялантаӈкв ляпанув о̄лыс, ща̄нюм то̄нт нё̄туӈкв э̄рыс, мāн иӈ мāнит о̄лсӯв. Пēс мāхум о̄с ка̄сащасыт воращлаӈкв. Акв порат āщум ла̄ви, о̄пам сāлы ӯрын ма̄хманэ̄н ты Щисуп о̄йка урыл потыр потыртас. Анямов Улякщи ат агтыс, ла̄ви: «Ам тай ань кон ты ялапа̄лэ̄гум, кисувлэ̄гум, щар нэ̄матыр тах а̄ти! » Квāлапас, кон ё̄мантас, тувыл та кисувлас. То̄нт акв ювле аквтащир Щисуп о̄йканыл та щисувлас. Ма̄хум пуссын хотьют о̄лыс, сома по̄лям витыл равтасаве̄сыт, суйта̄л та патапасыт. Молях юв щалтапасыт. Та юипа̄лыт воссыг нэ̄мхотьют ат воратас воращлаӈкв. Ётылнув а̄щум Улякщил Щисуп ва̄тат ӣтипа̄лаг ё̄ме̄г, тавант, та порат во̄т щар ат во̄тыс. Йӣвыт хотьютна сома нас хо̄илтавет, тэ̄н юипа̄лэ̄нт акваг та хосгавет, сома хотьют ат на̄ӈкын яныг хо̄тпа юйит ё̄ми. Щар ювле ат сунсым суйта̄л са̄лы ӯрын ё̄рнколэ̄н молях та ё̄мсы̄г. Тахольт ляпаннув патсы̄г, ат на̄ӈкнэ матарен юит та хультыс. То̄нт а̄ртмын ва̄рмаль о̄лыс, ляпат ё̄рнколэ̄н о̄лыс. Хо̄т хосат ке турманлавесы̄г, улпыл то̄нт та лапаяптувесы̄г. Нас пилтвесы̄г. Пе̄с ат ро̄выс тох паль по̄х тамле потыр та̄ртаӈкв, э̄рыс хӯнтлаӈкв, тувыл ва̄руӈкв тох, хомус яныг хо̄тпат ла̄ве̄гыт. Ат ро̄ви ке ат ро̄ви. Тамле сака воращлан ма̄хмыт ме̄ӈквытн щар во̄рн тотуӈкв ве̄рмынувет. Наска̄ссыг хунь Щисуп наме тамле, улпыл щар пе̄с ма̄хмыт ёмщакв ва̄саныл ты ва̄рмаль, тувыл то̄на та тох намтсаныл. 1052 2013.05.24. Татьяна Бахтиярова Ме̄ӈкв ва̄глум потыр. Мария Тасманова потыртам потыр. Тав щар са̄ртын ня̄йт хум о̄ньщас, наме о̄лыс Василий Миронович Самбиндалов. Тав пе̄с о̄с са̄лы ӯрыс. Мариял акваг нё̄рт яласасы̄г, ня̄врам ат о̄щсы̄г. Акв порат туи нё̄рт са̄лы кинсым ё̄мсы̄г. Ва̄гтал патсы̄г, ёлӯнтсы̄г. Сунсэ̄г мувал, са̄лыянэ̄н кос кинсэ̄г. Аквмат порат, хосат, нё̄р о̄вылт матырсырмат сэ̄мыл поталы нэ̄глыс. Ващька ла̄ви: «Ул во̄рто̄лн о̄йка. Хосат, ос аманур такем яныг? » Э̄лаль сунсыглахтэ̄г. То̄н май та э̄ртум ла̄вум во̄рто̄лн о̄йкатэ̄н акваг тэ̄н палтылэ̄н молях та ё̄ми. Щар во̄рто̄лн о̄йка хурип а̄ти. Яныг, пуныӈ поталы э̄лумхолас хурип. Ващка ань ня̄йт о̄лыс. Ня̄йтн та ёхтувес, ос воссыг нэ̄матыр ат ве̄рме̄г ва̄руӈкв, тох ке ты пуваве̄г. Потыртас, ня̄йтыс, ня̄йтыс. Ме̄ӈкве̄н та пе̄румтахтас, самаге̄н сунсым щар мо̄т ляльт тувыл та минас. Та юипа̄лт воссыг нэ̄мхуньт ат ва̄щиньтастэ̄н. Мария такви тамле ва̄рмаль ат ва̄нэ нэ̄, сака хотрохтыс, ла̄ви, сака пилыщмаӈ, хунь тамле ма̄н е̄мтэ̄гын. Ня̄йт ма̄хум ё̄рыт о̄лсыт, лю̄ль матыр щеркит, са̄й ут нэ̄глы ке, та̄н ве̄рмысыт молях ня̄влуӈкв. Та̄н ё̄рт о̄лсыт, пе̄с тэ̄найнут та̄наныл пилсыт. Ань тамле э̄лмхо̄лас а̄тим. Са̄й утыт ӣти юн ё̄муӈкв патсыт, э̄лмхо̄ласыт анькег акваг пилата̄луӈкв патве̄сыт, пилэ̄гыт. Ты хурит Мария Тасманова по̄слым о̄лы. 1052 2013.05.24. Галина КОНДИНА Пе̄с пормасыт ёмщакв о̄ньщавет. Я̄ӈк на̄тнэ э̄тпос нёлоловхуйплов щислат музеит янытлан мирхал хо̄талыг о̄лы, таве 1978 та̄л па̄сныл янытлаве. Ма̄н округувт соссаӈ мир культура суссылтым са̄в музеит рӯпитэ̄гыт. Тот са̄всыр маснутыт, ёсат, а̄пат о̄ньщавет ос хунь э̄ри, выставкат ва̄рыглавет, пе̄с йис пормасыт мирн суссылтавет. Ма̄н ма̄ньщи ос ханты пормасанув «То̄рум Маат» о̄ньщавет ос тув та̄л сыс 20 со̄тыра хо̄тпа ёхталэ̄гыт. Музейт рӯпитан ма̄хум та̄нти ялпыӈ хо̄таланыл янытлан ма̄гсыл, пормасыт мӯйлуптам хо̄тпат ос мо̄т мӯй ма̄хум тув во̄виньта̄лсаныл. Пормасыт коныпал З. С. Рябчикова ловиньтан нэ̄пакыт тотыс. Тав ла̄выс: «Ам хота̄ти финноугорский мирыт о̄лнэ ма̄тын ялантасум, са̄всыр ёмас нэ̄пакытыл мӯйлуптаве̄сум, ань та̄наныл на̄н музеин мыганум. Ка̄сащан хо̄тпат тыг вос ёхталэ̄гыт ос тыт тах ловиньтэ̄гыт». Г. С. Райшев такви по̄слум картинатэ хуньт ты музеин мӯйлуптастэ. Тот ӯльпа по̄слым о̄лы. Ла̄выс, хунь ӯльпат по̄слы, акваг «То̄рум Маа» номтын ёхты. Со̄ль, картинатэ щар та ма̄ хурипаг сусхаты. Са̄всыр пормасыт мӯйлуптам хо̄тпат музей кӯщай нэ̄н В. Н. Кочетыгован нё̄тнэ а̄нытыл ос тынта̄л экскурсиятын ялантан нэ̄пакло̄мтытыл мӯйлуптаве̄сыт, пӯмащипа ла̄тӈыл ла̄вве̄сыт. М. К. Волдина нила сампа нуй тармыл ю̄нтум А̄яс о̄йка хансатэ о̄с ты музейн мистэ. Тав ла̄выс: «Ты ам э̄ргын ос йӣквнэ ансамблюм ма̄гсыл ю̄нтыглам нуюм. Ань таве о̄щнэм ва̄т нупыл хӯрум та̄лыг е̄мтыс. Йильпииг ю̄нтуӈкве таӈхе̄гум, таима̄гыс тыим музейн мӯйлуптылум. Амти мо̄тан ю̄нтэ̄гум, ты нуй тармыл ю̄нтум хансам ма̄н хо̄та̄ти яласым ёттотыгласлӯв, е̄ранэ мощ хотрасмуӈкве патсыт. Ам ва̄глум, тыт «То̄рум Маат» тав мӯсхал щирыл о̄ньщаве. Хуньт ня̄врамытын, апганумн сунсыглаӈкве тах патаве». Мо̄тыт ёмас тэ̄ла тамле о̄лыс: тот рӯпитан учёный э̄ква Е. А. Нёмысова 77 та̄лэ то̄влыс. Тав тот ма̄хмытын янытлавес, са̄в ёмас ла̄тӈыл ла̄ввес, са̄всыр мӯйлупсатыл мӯйлуптавес. Тит са̄т щислаге ма̄гсыл атыӈ тэ̄нутыӈ пасан ва̄рыглас, хӯлыӈ ос нё̄влиӈ ня̄нил ма̄хум тыттуве̄сыт, ща̄ил айтве̄сыт. Ань о̄лнэ то̄рмувт сыреса̄т ищхӣпыӈ ут о̄лы. Тох ты музей ма̄гсыл тамле лов ищхӣпыӈ уткве ёвтвес, рущ ла̄тӈыл та̄н «аудиогид» ла̄вавет. Тув З. Н. Лозямова ос В. Ю. Кондин музей урыл потыртан экскурсиянэ̄н хансым о̄лэ̄гыт. Мӯй хо̄тпа тамле утыл миве, тав музей янытыл ё̄мыгты, та ищхӣпыӈ утэ таве̄н та потырты. Тув английский ла̄тӈыл потыр о̄с хансым о̄лы, мо̄т хо̄н ма̄ныл ёхтын мӯй хо̄тпат о̄с аквта щирыл соссаӈ ма̄хум музейт ё̄мыгтаӈкве патэ̄гыт. Ань йист тох та е̄мтыс, ма̄ньщи ос ханты пормасыт са̄выӈпа̄лэ туп музейт ка̄салаӈкве ве̄рмиянӯв. Тамле ма̄т рӯпитан хо̄тпат культурав э̄лаль ялтуптан ма̄гсыл сака ёмас ос э̄рнэ тэ̄ла ва̄ре̄гыт. Та̄наныл ма̄н ялпыӈ хо̄талыл янытлыянӯв, о̄с аквтох сымыӈыщ э̄лаль вос рӯпитэ̄гыт. 1052 2013.05.24. Людмила ТЕТКИНА А̄ги ты ще̄мьят э̄руптаве. Ты хурит Ольга Тимофеевна Чистякова ос Аня Дунаева по̄слым о̄лэ̄г. Тэ̄натэ̄н ам Советский ӯст Ӯринэ̄ква хо̄тал янытлан порат по̄слысагум. Тэ̄н тув Советский район Таёжный па̄вылныл ёхталасы̄г. Ольга Тимофеевна о̄йкатэ̄нтыл кит пыг о̄ньще̄г. Яныг пыге̄н Алексей колта̄глэ ёт Югорск ӯст о̄лы. Ань ма̄во̄й винэ ма̄т рӯпиты. Ма̄нь пыге̄н Павел ос нёлолов классыт ханищтахты. Ольга Тимофеевна такви Советский район Тимкапа̄вылныл о̄лы. Та па̄выл по̄хыт тав родовой угодие о̄ньщи. Ма̄ньщи нэ̄ ла̄выс, о̄лнэ ма̄тэ ма̄гсыл нэ̄паканэ̄н сака хоса ва̄рсы̄г. Ань о̄йкатэ Сергей Павлович пенсият о̄лы, во̄раим ос хӯл алыщлым акваг тот яласы. Аня ща̄нягеа̄щаге ёт Тимкапа̄вылт о̄лыс. Школан минаме порат Советский ӯсн интернатын ке̄твес. То̄нт Ольга Тимофеевна каӈке а̄гирищкве такви палтэ вистэ. Аня Таёжный па̄выл школат ханищтахтуӈкве патыс. Сымыӈ нэ̄кве ты урыл таи ла̄выс: «Ам амки яныгмам порам ёмащакв номилум, ма̄нь па̄вылквеныл яныг ӯсн интернатын о̄луӈкве ке̄твесӯв. Интернатыт о̄лым акваг юв воратасӯв. Тыима̄гсыл каӈкум а̄гирище Таёжный па̄вылн амки палтум о̄луӈкве тотыслум». Аня школат ханищтахтме̄т ӯщлахтын порат ща̄нягеа̄щаге палт юв ялантас. А̄тятэ хунь а̄тимыг е̄мтыс, оматэ палт ня̄врам ат хультуптавес. То̄нт Ольга Тимофеевна а̄гирищакве нэ̄паканэ пуссын ва̄рсанэ, ань тав опекунхо̄тпаг ловиньтахты. Тэ̄н о̄йкатэ̄нтыл Аня тэ̄нки ня̄врамакве̄н хольт э̄руптым янмалтытэ̄н. Ам ты колта̄гыл ще̄мья янытлан хо̄талыл янытлылум, пуста̄гыл э̄лаль вос о̄лэ̄гыт. Са̄в со̄т, са̄в щунь та̄нанылн. То̄румн, О̄тырн вос ӯргалавет. 1052 2013.05.24. Александр ВЬЮТКИН Ка̄тыл по̄слым ёмас хурит. Я̄ӈк на̄тнэ э̄тпос котильт Ханты-Мансийск ӯст В. А. Игошев нампа музейколт выставка ва̄рвес. Ты кол ма̄нь таквс э̄тпос 2001 та̄лт пӯсвес, то̄нт В. А. Игошев, ка̄тыл хурит по̄слум о̄йка, 80 та̄лэ то̄влыс. Ань ты суссылтап Сочи ӯст ва̄рнэ яныг касыл 2014 та̄л кастыл ва̄рвес. Выставка о̄вылтан ма̄гсыл Россия ма̄ янытыл ка̄тыл по̄слын ма̄хум ёхталасыт. Та̄н халанылт Сергей Леонидович Подверсткий о̄лыс. Тав ма̄ янытал са̄в ма̄т яласас, ёмщаквег ва̄ве. Хум ла̄выс: «Ам хунь Ханты-Мансийск ӯсн ёхталаӈкв во̄вве̄сум, амтирот номсэ̄гум, лӯима̄т о̄лнэ ма̄нь ӯст маныр тот а̄нумн пӯмащ о̄лы. Хунь ам ёхтысум, на̄н ӯсын мо̄т хо̄н ма̄ ӯс хольт сыстамыг сусхаты. Аквтупмат, со̄ль, хотты мо̄т ма̄н ёхтысум. Тыт о̄лмум сыс хӯрум музеин ялсум. Та̄н а̄нумн пуссын мӯстысыт». Потраныл оигпам юипа̄лт хурит суссылтан ва̄рмаль щар нуми колнакыл о̄вылтавес. О̄влэ̄т Владимир Александрович Москва ӯст о̄лме порат юио̄выл по̄слум хуриянэ суссылтаве̄сыт. Тот тав мо̄т хо̄н ма̄т о̄лнэ мир по̄слуманэ. Ёлынув колнакт округувт о̄лме порат по̄слум хуриянэ суссылтаве̄сыт. Са̄выӈпа̄лэ хуриянэ̄т Ня̄хщамво̄ль ос Сӯева̄т па̄выл ма̄ньщи ма̄хманув по̄слым о̄лсыт. Ка̄сыӈ хуритэ̄т янгема̄не пуссын та̄нти щир пӯмащиг тэ̄лсыт. Хунь хосанув хуриянэ нупыл сунсэ̄гын, аквтупмат наӈ тот по̄слым ма̄хмыт ёт ва̄йхатым о̄лэ̄гын. Ёхталам ма̄хум пуссын ёмас, сыстам номтыл тувыл сысы минасыт. Ка̄сыӈ хо̄тпа тув ялуӈкв ве̄рми. Э̄рыӈ на̄н ва̄нэ ма̄хманы̄н тот ка̄салыяны̄н. 1052 2013.05.24. Тамара МЕРОВА Ня̄врамыт ул вос марщумлавет. Варъёган па̄вылт 2005 та̄л па̄сныл ня̄врамыт йильпи школат ханищтахтуӈкве патсыт. Интернатаныл о̄с аквты колт о̄лы. Тот ня̄врамыт хумус ханищтавет, маныр пӯмыщ ва̄ре̄гыт, ты урыл школа кӯщай ва̄ӈын нэ̄ Наталья Сергеевна Карабаева потыртас. Ам тыт 1988 та̄л па̄сныл рӯпитэ̄гум, о̄выл классыт ня̄врамыт ханищтасанум. Та̄н хосат школав а̄стласыт, ань та̄нки ня̄враманыл тыг ялантэ̄гыт. Ётыл ханищтан тэ̄латыт пуӈктотнэ хо̄тпаг рӯпитасум, мо̄лты ос кӯщай ва̄ӈыг хо̄тпаг паттуве̄сум. Ты та̄л тыт 122 а̄ги – пыг ханищтахтэ̄гыт, та̄н халанылт 111 – ты соссаӈ ня̄врамыт. Хус ня̄врам во̄рт о̄лнэ ма̄ныл тыг тотве̄сыт, та̄н пуссын интернатыт о̄лэ̄гыт. Варъёгант о̄с са̄в соссаӈ ма̄хум о̄лы. Щар яныг ханты колта̄глыг тыт Айпиныт, Казамкиныт ос Сардаковыт ловиньтахтэ̄гыт. Ос ё̄рн яныг колта̄глыт тыи Иуси ос Айваседа. Ма̄н школав национальныиг ла̄ваве, та̄нки ща̄нь ла̄тӈыл потыртаӈкве ханищтавет. Тувыл лӯима̄ ма̄хум литература ос история Югры нампа урокыл ва̄равет. Ты коныпал та̄н кружокытын ялантэ̄гыт. Тот а̄гит сакныл пальсакыт, турло̄псыт хартэ̄гыт ос хорамыӈ супыт ю̄нтэ̄гыт, пыгыт матыр са̄гре̄гыт, ёрге̄гыт. Совныл манос пунныл ёмас пормасыт ма̄щтырлэ̄гыт. А̄гит сов ю̄нтуӈкве ос сак хартуӈкве Дарья Даниловна Айваседан ханищтавет. Та̄н аквъёт такем хорамыӈ пормасыт ва̄ре̄гыт. Ва̄рум утаныл мӯй ма̄хумн та̄ра ёвтавет. Пыгытн «Охотоведение, рыболовство» кружок мӯсты. Ня̄врамыт ёт тот Семён Алексеевич Айпин рӯпиты. Тав йӣвныл хорамыӈ щаӈквыт ёргуӈкве ха̄сы, таима̄гыс РФ ма̄щтыр нам о̄ньщи. Тувыл я̄ ва̄тавт «учебнопромысловый база» нампа колыл ӯнттувесӯв. Тот во̄руйвитхӯл алыщлан пормасыт ня̄врамытн суссылтавет. Ты пормасыт труд урокыт та̄нки ва̄руӈкве о̄с вос ве̄рмияныл. Пыгрищит тот лэ̄с ӯнттуӈкве ханищтавет ос ка̄ркамыг хӯл алыщлэ̄гыт. А̄гит хӯл исмит па̄йтэ̄гыт. Тув ялнэ хо̄талыт ня̄врамытн сака мӯстэ̄гыт. Ня̄врамыт акв сменал ханищтахтэ̄гыт, обед юипа̄лт 1-6 классытт ханищтахтын а̄гитпыгыт продлёнкан хультэ̄гыт. Мо̄т аныткружокытын ха̄йтэ̄гыт. Па̄вылт манос интернатт о̄лнэ ня̄врамыт тыт нэ̄мхуньт ат марщувлавет, тэ̄ла та̄л ат о̄лэ̄гыт. Школавт аквхуй плов сыресыр кружок рӯпитэ̄гыт. Ма̄н «Театр народной сказки» о̄ньще̄в, ня̄врамыт тыт ёнгалтым ща̄нь ла̄тӈыл потыртаӈкве ханищтавет. Тувыл каснэ ма̄н ялантэ̄гыт. Ма̄нки палтув рӯпитан хумыт коныпал Новоаганск па̄вылныл «Олимп» нампа центр хо̄тпат ня̄враманув тренировайтаӈкве тыг о̄с ёхталэ̄гыт. Ханищтан хо̄тпат ос воспитателит тыт тахольт то̄вылхатэ̄гыт. Ма̄н ты ма̄хманув ёт хосат та̄гыл аквъёт рӯпитэ̄в. Туп ма̄ньлат хо̄тпа тыт мощща, та̄н ня̄врамыт ёт рӯпитаӈкве ул хурахлэ̄гыт. Ос таи ёмас, ма̄н школав а̄стлан а̄гитпыгыт тыт о̄с рӯпитаӈкве патсыт. Роза Гордеевна Казамкина Ханты-Мансийскат колледж а̄стламе юипа̄лт тыг рӯпитаӈкве ёхтыс. Мо̄т а̄ги Излучинск па̄вылн рӯпитаӈкве минас. Школа а̄стлам а̄гиянувпыганув са̄выӈпа̄лэ Нижневартовск ӯсн строительный манос педагоический колледжин э̄лаль ханищтахтуӈкве минэ̄гыт. То̄ват Ханты-Мансийскан минуӈкве ка̄саще̄гыт. Ты та̄л ма̄н аквхуйплов класс ат о̄ньще̄в, мо̄лты та̄л онтолов классыт ханищтахтам ня̄врамыт пуссын ла̄кквамингаласыт. Ос ты та̄лт ат ня̄врам лов классыт ханищтахтэ̄гыт. Интернатт о̄лнэ ня̄врамыт ул вос марщувлаве̄сыт ос ёмщаквег вос ханищтахтасыт, ма̄н тыт матыр пӯмащ тэ̄лат акваг ва̄рыглэ̄в. 1052 2013.05.24. Валентина УЗЕЛЬ Та̄н ща̄нь ла̄тӈыл потыртаӈкв ат ка̄саще̄гыт. Касум па̄выл интернатт са̄в соссаӈ ня̄врам о̄лы, та̄н тув Нумто ос Юильск па̄влыгныл тотавет. Ща̄няныла̄щаныл пуссын са̄лы ӯре̄гыт, ос та ма̄нь па̄влыгт школа а̄тим, таима̄гыс ты та̄н интернатн атавет. Ань тув 45 ханты ос ё̄рн ня̄врам тотыглавет. Ма̄ньнув ня̄врамыт о̄выл этажт о̄лэ̄гыт, яныг ня̄врамыт ос нумын. Тув ялмув хо̄талт тот са̄лыӈ ма̄хум ялпыӈ хо̄таланыл о̄лыс. Кос а̄лпыл са̄т щё̄с о̄лыс, ма̄нь ня̄врамыт нэ̄мхотьют ат хуяс, пуссын коридорт ӯнлахо̄лсыт манос тыглетувле нас ё̄мыгтасыт. Э̄ти рӯпитан нэ̄ Валентина Евтифеевна Багишева та̄н ётаныл ӯнлыс, то̄ва а̄гирищит а̄таныл сагсанэ. Пыгрищит ос пуссын ляпат роттыг ӯнлантасыт. Нэ̄ титыгласлӯв, ущты са̄т щё̄сыг е̄мтыс, ня̄врамыт манрыг ат хуе̄гыт, тав ювле ла̄выс: «Ща̄няныла̄щаныл во̄рныл касуӈкв тыг ёхтысыт, таима̄гыс ня̄врамыт та̄наныл ӯрим ӯнлантэ̄гыт, ань тах рӯтанылн юв вивет». Интернат урыл тав ла̄выс, ня̄врамыт школан миннэ пораныл хунь ёхты, интернатн тотавет. Туп тэ̄лы каникул порат юв ялэ̄гыт. Ань тыгыл маснутыл ат мивет, ляпа рӯтанылн ёвтавет. Интернатт о̄лнэ̄ныл порат ка̄саныл сака холы, юв воратэ̄гыт. «Татем та̄наныл са̄ль», – нэ̄ ла̄выс. Такви В. Багишева о̄с Касум па̄вылныл о̄лы, тот самын патыс, хум ва̄рыс, пыге ань яныг, 24 та̄лэ то̄влыс. Интернатт нёлолов та̄л рӯпиты, нэ̄мхо̄т ат ханищтахтас, ты рӯпатал та майвес. Па̄вылт рӯпитан ма̄ воссыг а̄тим. Воспитателиг та хо̄талт Любовь Викторовна Захарова о̄лыс. Тав школат о̄выл класс учителиг рӯпиты, нас та хо̄талт интернатн рӯпитаӈкв во̄ввес. Тав ётэ потыртамме̄н порат та̄рапатыс, Мария Волдина – тав а̄кве, оматэ Валентина Кузьминична таве̄н э̄щиг о̄лум. Л. Захарова школат хус та̄л рӯпиты. Ня̄врамыт урыл ла̄выс, ань ханты ос ё̄рн ня̄врамыт во̄рт ща̄няныла̄щаныл ёт кос о̄лэ̄гыт ос ща̄нь ла̄тӈаныл ат ва̄ганыл. Халанылт янгема̄не пуссын рущ ла̄тӈыл потыртэ̄гыт. То̄ват торгамтэ̄гыт кос ос матыр ла̄вуӈкв сака э̄ссамтэ̄гыт. Яныг классыт ханищтахтын ня̄вра мыт то̄ват о̄с кос потыртаӈкв ха̄сэ̄гыт, ос та̄н хунь матыр потыртаӈкв во̄вавет, ювле ла̄ве̄гыт: «А̄нумн ханты ла̄тыӈ щар ат э̄ри, нэ̄мхуньт аты э̄рмыглы». Ханищтан нэ̄ титыгласлум: «Манрыг тох е̄мтыс? » Тав ла̄выс: «Ты ща̄нит ос а̄щит та̄н ня̄враманыл ёт юн ат потыртэ̄гыт». Ам таве э̄лаль титыглылум: – Наӈ о̄йкан хотьют? – Ханты. – Нэ̄н юн нэ̄нти халынт ханты ла̄тӈыл потыртэгы̄н? – А̄ти, то̄ванакт, хунь ня̄врамагме̄нныл матыр ёлтӯйтуӈкв э̄ри. – Ня̄врамагын ла̄тыӈ торгамтэ̄г манос потыртэ̄г? – А̄ти, сас туптуп, аквтит ла̄тыӈ торгамтэ̄г. Тох ты е̄мтыс, ма̄нти ла̄тыӈ ва̄гув кос, ос ня̄враманув ла̄тӈув щар ат ва̄ганыл. Ва̄им, ты ва̄рмаль ма̄ янытыл о̄лы. Лӯима̄ янытыл о̄лнэ мощщаг хультум мирыт пуссын тамле ва̄рмальн ань я̄рмысыт. Э̄лаль Любовь Захарова акв ё̄рн а̄ги урыл потыртас. Ты а̄гирищкве школан 1996 та̄лт тотвес, рущ ла̄тӈыл щар ат потыртас, аты торгамтас. Школат ханищтахтаме сыс рущ ла̄тӈын ханищтавес. Школа а̄стластэ, хум ва̄рыс, ань хо̄т Дагестан ма̄н тотвес, тот о̄лы. Ань ма̄ньщи, ханты ман ё̄рн ла̄тыӈ э̄лаль тотнэ ма̄гыс са̄в рӯпата кос ва̄раве – са̄кконыт хансавет, хотьют ща̄нь ла̄тыӈ ёт рӯпиты, олныл ойтавет. Ос матрыг ла̄тӈанув та ёрувлахтэ̄гыт. 1052 2013.05.24. Николай Меров Са̄лыӈ колт яласан нэ̄кве. Тэ̄лы порат ам Ха̄льӯс район Саранпа̄вылн рӯпатам щирыл ялсум. Тот акв нэ̄ ёт потрамасум. Тав наме Анна Дмитриевна Ромбандеева. Ты ма̄ньщи нэ̄ Ха̄льус район Ло̄пмус па̄вылт яныг ще̄мьят 1970 та̄лт самын патыс. Кульпас па̄выл школат нёлолов класс а̄стлас. Та юипа̄лт 1987 та̄лт хум ва̄рыс. Тувыл о̄йкатэ̄н са̄лыӈ колн тотвес. Та па̄сныл акваг тот ты рӯпиты. Хунь са̄лыӈ колн о̄выл щёс ёхтыс, тот рӯпитаӈкве та̄рвитыӈ о̄лыс. Ётыл ла̄щалла̄щал ханьщувлас. Анна Дмитриевна ё̄рнколт са̄лы совныл са̄всыр маснут ю̄нты, тэ̄нут па̄йты. О̄йкатэ наме Василий Владимирович Ромбандеев. Тав са̄в та̄л са̄лыӈ колт рӯпиты. Нэ̄кхумыг ат ня̄врам янмалтасы̄г. Яныг а̄гитэ̄н Людмила Ханты-Мансийск ӯст нэ̄пак ловиньтан колт рӯпиты. Кит а̄гияге̄нпыгаге̄н Ханты-Мансийскат ханищтахтэ̄г. Пити патта ня̄враме̄н Женя иӈ ма̄нь, тэ̄н ётэ̄н о̄лы. Яныг пыге̄н Яков школа а̄стламе юипа̄лт о̄с тэ̄н палтэ̄н рӯпитаӈкве минас. Ты та̄л са̄лыл каснэ ва̄рмаль о̄лыс. Та̄н пуссын касылын на̄лув ва̄гылсасыт. Са̄лыӈ нэ̄ ла̄ви, рӯпататэ ма̄гыс сака мощща олныл ойтаве. Э̄тпос сыс нилахуйплов со̄тыра солко̄вил туп миве. Ты ва̄рмаль ма̄гыс совхоз кӯщай палт са̄в щёс потрамаӈкве ёхталас. Ос олныт но̄х аты нё̄тве̄сыт. Таима̄гыс ма̄ньлат хо̄тпат са̄лыӈ колт рӯпитаӈкве ат касаще̄гыт. Ты та̄л рупата олныт но̄хнё̄туӈкве ла̄вве̄сыт кос, ос манса̄вит ат ва̄ганыл, ань ма̄хум ӯрхатэ̄гыт. Анна Дмитриевна оматэ Наталья Григорьевна ос а̄тятэ Дмитрий Петрович Таратовыг Ло̄пмус па̄вылт о̄лсы̄г. Э̄кваго̄йкаг о̄лме̄н палытыл хӯл алыщлым ос во̄раим яласасы̄г. Ань сас а̄тимыг. Ам Анна Дмитриевна колта̄глэ янытлан ла̄тӈыл ке̄тылум. Ня̄враманы̄н, рӯтаны̄н, юртаны̄н ос ва̄нэ хо̄тпаны̄н ёт пуста̄гыл са̄в та̄л э̄лаль о̄лэ̄н. 1052 2013.05.24. Тамара МЕРОВА Соссаӈ мирыт посыӈ хо̄талн агтэ̄гыт. А̄с-угорский институтт рӯпитан хо̄тпат китынтыг конференциян атхатыгласыт. Тыг са̄всыр яныг ӯсытныл ос мо̄т ма̄ныл учёныит ёхталасыт. Та̄н «Современные проблемы природопользования и вопросы традиционной культуры коренных народов Севера» ва̄рмалит урыл потыртасыт. Ос о̄влэ̄т ма̄хум кит учёный хо̄тпаг янытласыт, тыи Т. Г. Харамзин ос С. А. Попова. Ханты о̄йка Терентий Герасимович Харамзин 75 та̄лэ то̄влыс. Тав соссаӈ ма̄хманув та̄рвитыӈ ва̄рмалит та̄рапаттыянэ, та̄наныл мӯсхалыг ханищтыянэ ос ётыл э̄рнэ̄г щё̄питан нак кинсы. Ма̄вит ӯргалан ва̄рмалит ос са̄лы янмалтан урыл са̄всыр потрыт ос нэ̄пакыт хансыс. О̄йка социология наукат доктор нам о̄ньщи, ты коныпал «Заслуженный деятель науки РФ» яныг намыл майвес. Светлана Алексеевна Попова 60 та̄лэ̄тыл янытлавес. Тав история наукат кандидат нам о̄ньщи, ань ос наука доктор нам ма̄гыс э̄лаль рӯпататэ хансытэ. Нэ̄ диссертация нэ̄паке̄т ма̄ньщи ма̄хум пе̄с йис о̄лупса ва̄рмалит акванатыянэ. Тав 1993 та̄лт Ха̄льӯст мо̄йтыт, пе̄с йис потрыт акванатнэ фондкол пӯнсыс. Ань тыг ёхталам учёныит кит секциян уртхатым рӯпитасыт. О̄выл секцият историкыт, культорологыт ос лингвистыт акванатхатыгласыт. Та̄н «Вопросы реконструкции традиционных праздников и обрядов в современных условиях» ва̄рмалит урыл потыртасыт. Ань пе̄с йисныл о̄лнэ наканув янытэ̄т оснпаттуӈкве э̄ре̄гыт манос а̄ти, хумус та̄наныл э̄лаль тотуӈкве, маныр суссылтаӈкве ро̄ви, ма̄ньлат а̄гитпыгыт На̄йО̄тыранувн агтэ̄гыт манос а̄ти – пуссын ты о̄вылтыт акванатхатам ма̄хум та̄нки халанылт мощ воращласыт ос ётыл акв тэ̄ла ва̄рнэ ла̄тыӈ хассыт. Пе̄с ма̄хманув мо̄т мирыт ёт хурахлым о̄лсыт, та̄наныл ляпан ат та̄ртыгласаныл. Ялпыӈ ма̄т ӯргаласаныл, пӯрлахтын канын по̄х хо̄тпа щар ат во̄виньта̄лсыт. Тувыл ка̄сыӈ са̄т та̄л хум хо̄тпат та̄нки На̄й-О̄тыр канытн йирхатуӈкве ялсыт. Нэ̄ хо̄тпат о̄с та̄нки пӯрлахтын ма̄ о̄щсыт. Тамле тэ̄лат хунь ва̄рыглаӈкве, ул ня̄йт хо̄тпатн хӯлтыглаве̄сыт ос э̄лын о̄лнэ хум ма̄хум акв порат акванхо̄нтхатыгла̄лсыт. Ань тай мо̄т пораг е̄мтыс, хум ма̄хум ка̄сыӈ са̄т та̄л ялпыӈ ма̄н ат ялантэ̄гыт. Ты нак ань иӈ э̄ри ман а̄ти, хумус та̄наныл э̄лаль тотуӈкве ро̄ве̄гыт, ты урыл Т. А. Молданов, Е. И. Ромбандеева, М. К. Волдина, Л. В. Кашлатова та̄нки номтаныл ла̄всаныл. Ма̄ньлат пыгыт ты тэ̄лан вуйхатэгы̄т ке, хумус та̄нанылн нё̄туӈкв ро̄ви. Пе̄с йис наканув ань ёрувлаӈкве патве̄сыт, яныгпа̄ла хо̄тпат матыр сака ат потырта̄лсыт. Хунь ялпыӈ канн атхатыглаӈкве, маныр ва̄руӈкве ты тэ̄лат торыӈ ёмщаквег ат ханищта̄лве̄сыт ос нэ̄пакн ат хансыглаве̄сыт. Ма̄ньщит ос хантыт туп мо̄т ма̄хумн ла̄ве̄гыт: «Тыи ат ро̄ви, таи ат тайи, тув ул новхатэ̄н, тув ул пӯхтэ̄н». Ос маныр ма̄гыс ат ро̄ви, манрыг ат та̄ртаве манос о̄лы? Тыгыл э̄лаль ат хӯлтыглавет, ма̄нки о̄с тӯйтыглахтэ̄в. Тувыл рущ манос мо̄т хащта̄л ма̄хум ялпыӈ ма̄н минэ̄гыт, хо̄т ат э̄ри ха̄хталахтэ̄гыт, пе̄с пормасыт новияныл, тармыл ялыглыяныл манос ёт а̄лмайияныл. Таима̄гыс соссаӈ ма̄хманувн лю̄ль е̄мты, ёмас о̄лнэ хо̄тал ат хо̄нтэ̄гыт, номтаныл саватавет. Ань тамле тэ̄лат ёлпо̄илттан ма̄гыс ма̄хум ёт ёмщаквег потыртаӈкве э̄ри. Матыр хӯлтыглан ла̄тыӈ «Памятка» нэ̄пакло̄пс щё̄питануве ке, ёмас о̄лнув. Ос соссаӈ ма̄ньлат а̄гитпыгыт ёт ва̄тихал акван хо̄нтхатыглаӈкве э̄ри, та̄нанылн пе̄с йис ва̄рмалит урыл потыртаӈкве. Мо̄т секцият социолог ос экономист учёныит акванатхатыгласыт. Та̄н ос ма̄вит ӯргалан ва̄рмалит урыл потыртасыт. Са̄лы тэ̄пыӈ ма̄ са̄в хультыс ман а̄ти, хумус та̄н ӯргалавет – та урыл ла̄тыӈ хассыт. 1052 2013.05.24. Людмила ТЕТКИНА Са̄в ня̄врам о̄ньще̄г. Зоя Васильевна Кирилишина ще̄мьяӈ та̄гыл Сургутский район Русскинская па̄вылт о̄лы. О̄йкатэ̄нтыл хо̄т савалап ня̄врам янмалтэ̄г. Тэ̄нки а̄гитэ̄н янгыг е̄мтыс, такви ще̄мьяӈ. Зоя Васильевна ла̄выс: «А̄гим янгыг е̄мтыс, ам савалап пыгрищ янмалтаӈкве патсум, то̄нт тав кит та̄лэ то̄влыс. Ты юипа̄лт о̄с акв ма̄нь савалап а̄гирищ вислум. Ты ня̄врамаквег ам амки нупылум хассагум, то̄нт нэ̄мхотьют а̄нум ат ла̄выс, тыщир ва̄руӈкве ат кос э̄рыс. Ань тэ̄н савалап ня̄врамыг воссыг ат ловиньтахтэ̄г. Пособиеолныл ойтаве̄г кос, тувыл са̄всыр льгота ат о̄ньще̄г. Ос хунь яныгме̄г, савалап ня̄врам хольт о̄лнэ колыл тах ат миве̄г. Ты а̄гирищигпыгрищиг янмалтым ам о̄с нила ня̄врамакве амки палтум висанум. Ты ня̄врамыт нэ̄паканыл хунь ва̄рсанум, то̄нт ла̄вве̄сум, амки нупылум воссыг ул вос хансыянум. Тыщирыл та̄н са̄внув льгота о̄ньще̄гыт ос са̄внув олныл ойтавет. Ос янгыг хунь е̄мтэ̄гыт, колыл мивет. Па̄влувт ань рӯпата а̄тим, ня̄врамыт янмалтан ма̄гсыл о̄йкаме̄нтыл олныл ойтавеме̄н. Ты ва̄рмаль рущ ла̄тӈыл «замещающая семья» ла̄ваве. Та̄наныл пуссын ма̄ниг о̄лманыл порат висанме̄н. Ме̄наме̄н ща̄нига̄щиг ла̄вияныл. Яныг пыгум са̄т та̄лэ хунь то̄влыс, ма̄н Русскинская па̄вылн ва̄нтласӯв. Ты э̄лыпа̄лт та̄л сыс во̄рт о̄лсӯв. Ань туп туи порат пе̄с йис ма̄вн ялантэ̄в. Тот ма̄н са̄лы ӯрим, во̄раим, хӯл алыщлым о̄лэ̄в. Ня̄враманме̄н са̄всыр национальностил о̄лэ̄гыт, та̄н ётаныл ам ханты ла̄тӈыл туп потыртэ̄гум, ла̄тӈув о̄с вос ва̄ганыл. Рущ ла̄тӈыл потыртаӈкве школат ханищтавет. Ань ам кӯщаит палт акв та̄рвитыӈ ва̄рмаль ёт ялантэ̄гум. Таса̄вит ня̄врам о̄ньщиме̄н, колув сака ма̄нь. Ань са̄в ня̄врамыӈ ще̄мьят ма̄л мивет. Ам о̄с заявлениенэ̄пак очередь ма̄гыс хассум . О̄йкам ёт субсидияолн виӈкве нэ̄паканме̄н ке̄тсанме̄н. Русскинская па̄вылт яныг кол ӯнттуӈкве таӈхиме̄н. Олн винэ очередь моще̄рт ты ёхты, ма̄ ат о̄ньщиме̄н. Па̄влувт кол ӯнттын ма̄ ат то̄вылхаты. Сергей Черкашин, Сургутский район миркол кӯщай ва̄ӈын хум, Русскинская па̄вылт сапра̄ни ва̄рыглас. Ам таве̄н амки та̄рвитыӈ ва̄рмалюм урыл потыртасум. Кӯщай хум нё̄туӈкве ла̄вхатас, ма̄л мивеме̄н, мощ ӯрхатуӈкве туп э̄ри». Ам ты нэ̄гхумыг ще̄мья янытлан хо̄талыл янытлыягӯм. Ня̄враманэ̄н са̄в ща̄гт тэ̄натэ̄н вос тотэ̄гыт. Кол ӯнттын ма̄л моляхнув вос миве̄г, йильпи кол ӯнттын порат туп ня̄врамыт мовиньт тот вос сӯйты. 1052 2013.05.24. Николай Меров Саран ма̄хум акванатхатыгласыт. Ха̄льӯс район Саранпа̄вылт са̄лыл каснэ ва̄рмаль о̄лум порат саран ма̄хум тэ̄нэ колт акванатхатыгласыт. Атыӈ тэ̄нутыӈ пасаныт щё̄пита̄лве̄сыт. Тот ща̄й айсыт ос пе̄с йис о̄лупса номылматыгла̄лсыт. Э̄лыл ёхталам мӯй ма̄хум о̄с тув во̄виньта̄лве̄сыт. Маныр урыл та̄н тот потыртасыт, на̄н ань э̄лаль ловиньтэ̄н. Ка̄сыӈ хо̄тпан ва̄ӈкве э̄ри, хо̄тыл тав о̄патэ, ащо̄йкатэ о̄лэ̄гыт. Саран ма̄хум тув хуньт Коми Республиканыл ва̄нтлысыт. Пе̄с порат нё̄р тапалыт сараныт са̄лыяныл матыр а̄гмыл е̄мтсыт. Ты хосыт са̄в са̄лы патыглас. Ма̄хум яласан ут ос тэ̄нут та̄л хультсыт. Таима̄гыс онтоловхуйплов нот о̄вылтахтам порат то̄ва саран хо̄тпат хультум са̄лыяныл ёт нё̄р ӯлтта тыг ва̄нтлысыт. Ма̄нья хосыт порыл ло̄ӈхаль та̄ртахтасыт. О̄влэ̄т Я̄сунт па̄вылн ёхтысыт. Па̄влыӈ хо̄тпатн тэ̄нутыл майве̄сыт. Ос о̄луӈкве тот ат та̄ртве̄сыт. Тувыл та̄н ло̄ӈхальнув на̄тылтасыт. Саквъя̄ ва̄тат карснув ма̄ хо̄нтсыт, тот ё̄рнколаныл тӯщтысаныл. Тӯяг та ма̄ витын ат а̄мараве. Ань ты па̄выл Саранпа̄влыг ла̄ваве. Хум хо̄тпат тӯяг кол ӯнттын ма̄гыс норыт яктысыт. То̄ва ма̄хум ма̄колт о̄лсыт. О̄выл колыт Филипповыт, Каневыт, Артеевыт ӯнттысыт. Тыгыл э̄лаль Ануфриевыт, Истоминыт, Хозяиновыт, Рочевыт, Кустышевыт, Семяшкиныт, Вокуевыт о̄с ӯнттуӈкве патсыт. Э̄лыл ёхтум ма̄хум во̄руиӈ, хӯлыӈ, пилыӈ ма̄ тармыл яныг ща̄гтыл о̄лмыгтасыт. Та па̄сныл са̄в та̄л минас. То̄ва хо̄тпат ань тыг мус та рӯтаныл ёт ва̄йхатэ̄гыт. Ва̄тихал мӯйлуӈкве нё̄р тапалын ялантэ̄гыт. Тувыл то̄ва хо̄тпат рӯтаныл Саранпа̄вылн ёхталэ̄гыт. Саранпа̄вылт ма̄тэ сака нё̄тнэ, атырхари хо̄талытт нё̄рквет нас вольге̄гыт, сыстам я̄т сак хольт овантэ̄гыт. Мӯй ма̄хумн тот ӯщлахтуӈкве сака мӯсты. То̄ва хо̄тпат ос та̄нки рӯтаныл ань тыг мус ат ва̄ганыл. Нё̄р ӯлтта ва̄нтлуманыл па̄сыл ат ва̄щиньтахтасыт, иӈ кисхатэ̄гыт. Тувыл ос я̄нас миннэ тованыл урыл потыртасыт. 1903 та̄лт Саранпа̄вылн Иван Ефимович Истомин Евдокия э̄кватэ̄нтыл ёхтысы̄г. Тэ̄натэ̄ныл ты Саранпа̄вылт о̄лнэ Истоминыт э̄лаль са̄вме̄гыт. Э̄кваго̄йкаг ще̄мьят ат ня̄врам янмалтасы̄г. Истоминыт ань тыг мус яныгса̄т лов та̄л Саранпа̄вылт о̄лэ̄гыт. Яныг хо̄нт о̄лум порат Саранпа̄вылныл са̄в саран хо̄тпа хо̄нтлуӈкве тотве̄сыт. То̄ва хо̄тпат юв ат ёхтысыт, та̄н уранылт ань о̄лнэ ма̄хум акваг номияныл. Ты та̄л па̄вылт са̄лыл каснэ ва̄рмаль о̄лум порат Нё̄р тапалыл Коми Республиканыл саран ма̄хум ёхталасыт. Та̄н рӯт ма̄хманыл ялпыӈ хо̄тал кастыл сака янытласаныл. Ань нё̄р тапалт о̄лнэ саран хо̄тпат са̄лыл каснэ ва̄рмаль ат ва̄рыглэ̄гыт. Та̄нанылн тыи сунсуӈкве сака пӯмащ о̄лыс. Тувыл о̄с акв тэ̄ла урыл потыртасыт. Саран ма̄хум пе̄с йис порат нё̄р ӯлтта минам лё̄ӈханыл хотщё̄питаӈкве номсыяныл. Хуньт тувыл яласаӈкве э̄рыӈ патэ̄гыт. Та лё̄ӈх палытэ нёлса̄ткем ве̄рыста о̄лы. Сапра̄ни о̄лум порат Ха̄льӯс район кӯщай Любовь Константиновна Коротун о̄с тот о̄лыс. Тав ма̄хум пуссын янытласанэ. То̄ва саран хо̄тпат мӯйлупсал ос янытлан нэ̄пакыл мисанэ. Ты нё̄тнэ ма̄хумакветн са̄в сымыӈ ла̄тыӈ ла̄выс. Ты ва̄рмаль оигпам юипа̄лт саран ма̄хум аквъёт по̄слахтасыт. Ва̄тихал акванатхатыглаӈкве ла̄вхатсыт. 1052 2013.05.24. Людмила ТЕТКИНА Ягрим па̄вылт о̄лнэ нэ̄. Аквнакт ам Ха̄льӯс район Ягрим па̄вылн тэ̄ла мус ялсум. Ма̄нки па̄вланувт хо̄тал кито̄вылт миннэ ё̄р ат яласы. Матыр тэ̄ла ма̄гыс хоталь минмыгтэ̄гын, матпалыт та яласэ̄гын. Ягрим па̄вылт акв ма̄ньщи нэ̄ ёт хо̄нтхатыгласум, наме Зоя Алексеевна Мелентьева. Мен потруме̄н э̄лаль ловиньтэлы̄н. Зоя Алексеевна, наӈки урынтыл мощ потыртэн. Омагна̄тягн хотыл о̄лсы̄г? Хумыс наманэ̄н? – Омам Ульяна Алексеевна Саратина, а̄тям Алексей Спиридонович Мелентьев Люлюкары па̄вылт о̄лсы̄г, тот акванхо̄нтхатсы̄г. Хунь Ягримн ва̄нтласы̄г, омам совхозт рӯпитас, а̄тям на̄й харыгтан ма̄т рӯпитас. О̄пам Спиридон Лазаревич, а̄тям тав а̄тятэ, лю̄лиг ё̄ӈхтахтыглым порат Сортыӈъят репрессировайтавес. Щаще̄квам нила ня̄врамыӈ та̄гыл ювле Люлюкары па̄вылн ва̄нтласыт. – Яга̄ги, ягпыга̄пщи о̄ньще̄гын? – Ма̄н нила о̄лсӯв, Геннадий, Валерий, Григорий ос ам. Кит ягпыгагум а̄тимыг. Яныг ягпыгум Краснодар ӯс нупыл ва̄нтла̄лас, Кубаньт о̄лыс. Тот на̄й харыгтан ма̄т рӯпитас, олн атыс, кол ёвтыс. Э̄ла минас, сыме̄тыл лю̄лиг е̄мтыс. Пыгаге ос э̄кватэ хультсыт, тот о̄лэ̄гыт. То̄ва порат та̄н палтаныл яланта̄лэ̄в. Акв ягпыгум витн патыс. Ме̄н Григорийме̄нтыл тыт Ягримт о̄лыме̄н. – Хо̄т ханищтахтасын? Хо̄т рӯпитэ̄гын? – Школа а̄стламум юипа̄лт Ханты-Мансийск ӯст педучилищат нила та̄л ханищтахтасум. Педучилище а̄стламум юипа̄лт ювле ёхтысум, садикт рӯпитаӈкв патсум. 2000 – 2007 та̄лытт Санкт-Петербург ӯсн Герцен нампа институтн ханищтахтуӈкв ялантасум, «Культурология ос учитель родного языка и литературы» факультет а̄стласум. Ма̄ньщи ла̄тыӈ торгамтэ̄гум, мощнув потыртэ̄гум, сак хартэ̄гум. Садикт рӯпитамумт «национальный кружок» ва̄рыгласум, ма̄ньщи о̄лнэ ва̄рмаль ня̄врамытн ханищтасум, мо̄йтыт, ёнгыт, ёнгынутыт, ӯйхул ос ма̄витув урыл потыртасум. 26 та̄л садикт рӯпитасум, стажум то̄влыс ань ат рӯпитэ̄гум. Юн о̄лэ̄гум, матыр ва̄ре̄гум, юн о̄с рӯпата то̄вылхаты. Рӯщ ла̄внэ щирыл «Древо жизни» хассум. Рӯтанум пӯссын ёлхассанум. Щаще̄квамныл Ульяна Петровнаныл о̄вылтахты. О̄пав репрессировайтавес, хуритэ о̄с ат хультыс. Тамле потыр Зоя Алексеевна такви уре̄тыл потыртас. Ты потруме̄н ме̄н мо̄лты та̄л ёлхансысламе̄н, ань Зоя Алексеевна детскоюношеский Центрколт рӯпиты, ня̄врамыт ма̄ньщи ла̄тӈыл ханищты ос сак хартнэ ва̄рмаль суссылты. Ты ка̄ркам, нёмса, сымыӈ хо̄тпан ам паща ла̄тыӈ ке̄тэ̄гум. Пуста̄гыл вос о̄лы, со̄тыӈыг, щуниӈыг вос о̄лы. О̄выл хурит З. А. Мелентьева Санкт-Петербург ӯст ма̄ньщи ла̄тыӈ экзамен миме порат по̄слыма. Китыт хурит та̄в яблоня йӣв по̄хыт лю̄ли. Ёлы хурит аквъёт ханищтахтам нэ̄т: Н. К. Маслова, З. А. Мелентьева, Н. К. Тасманова, Е. И. Адина. 1053 2013.06.07. Тамара МЕРОВА 111 со̄тыӈ та̄лыл янытлылӯв. Мо̄лал редакциявн ищхӣпыӈ ут хосыт пищмал ке̄твесӯв. Тыи Р. М. Капшук, Саранпа̄выл школат са̄в та̄л ня̄врамыт ханищтан нэ̄, ма̄навн ля̄ххал хансыс. Ты потыр тав ётэ рӯпитан нэ̄н Т. В. Хатанзееван ма̄ньщи ла̄тӈыг толмащлавес. Ань тэ̄н хансум ля̄ххалэ̄н э̄лаль ловиньтэ̄н. Саранпа̄выл школа 2013 та̄лт сака янытлылӯв . Мо̄лалма̄н номсысӯв, хумус ты ханищтан колув яныгса̄т та̄лыл янытлаӈкве патылӯв. Тувыл научнопрактический конференциян щё̄питахтамув порат пе̄с нэ̄пакыт щирыл та̄рапатыс – Саранпа̄выл школа яныгполь э̄тпос о̄выл хо̄талэ̄т 1902 та̄лт пӯнсыма. Ты э̄лыпа̄лт ня̄врамыт Сӯкыръят ханищтаве̄сыт. Та школа 1893 та̄л па̄сыл рӯпитас (тав ос 120 та̄лэ то̄влыс). А̄гирищитпыгрищит ханищтаӈкве патве̄сыт, па̄выл та̄ра са̄в номтыӈ хо̄тпал са̄вмыс. Та па̄сныл ня̄врамыт ханищтан ва̄рмаль акваг э̄лаль тотвес. Ань Саранпа̄вылт ханищтан кол коныпал искусство школа о̄лы, тувыл «Поиск» нампа центр рӯпиты. Ты колыгт а̄гитпыгыт йӣквуӈкве, э̄ргуӈкве ос са̄всыр каснэ тэ̄латн ханищтавет. Та̄н ты щирыл та̄ксарнуве̄г ос пуста̄гыл яныгме̄гыт. Ма̄н школав яныгса̄т та̄лэ янытлан ма̄гыс «Ханищтан кол 100 та̄лэ» нампа проект щё̄пита̄лсӯв. Ань та проектув хосыт э̄лаль рӯпитэ̄в. Таве школа яныгса̄т аквхуйплов та̄лэ янытлан кастыл мо̄т ла̄тӈыл хансыслӯв. 111 та̄л – ты о̄с са̄в со̄тыӈ ос пӯмащ ва̄рмаль. Ты проект щирыл ма̄хум ань рӯпитаӈкве о̄вылтахтасыт. Любовь Николаевна Гребенева ханищтан хо̄тпат пе̄с хурияныл акванатыянэ ос нэ̄пакн хансыянэ. 1930 та̄л порат по̄слым хурит тав о̄с хо̄нтыс. Агния Егоровна Рокина са̄в та̄л школат рӯпитас, хосат пенсиян патхатас кос, ос ань пионерыт о̄лум урыл потрыт хансуӈкве ка̄ркамыг вуйхатас. Наталья Евгеньевна Фомина «Одноклассники» ос «Вконтакте» хосыт школа а̄стлам хо̄тпат кинсыянэ ос та̄н ётаныл нё̄тмил ва̄рнэ ма̄гыс потыртахты. Та̄н пуссын ты проект урыл вос ва̄гыт ос пе̄с хурит манос ханищтахтам пораныл о̄вылтыт матыр потыр вос хансэ̄гыт. Онтолов классыт ханищтахтын а̄гииг Наташа Кудус ос Люба Артеева о̄с са̄всыр рӯпатат нё̄тэ̄г. Пуссын ты рӯпата ва̄рнэ ма̄гыс манса̄вит олн холтаве, тыи Любовь Павловна Стаканова сметанэ̄пак щё̄питас. Ха̄льӯс образование комитетыт рӯпитан хо̄тпат о̄с нё̄туӈкве ла̄вхатсыт. Ты проектув «Нот палыт о̄лэ̄н ос нот палыт ханищтахтэ̄н» намыл пиныслӯв. Тав сӯкыр э̄тпос мус рӯпитаӈкве паты ос ма̄нь таквс э̄тпост оигпан э̄лыпа̄лт ялпыӈ хо̄тал тах ва̄рыглэ̄в. Ань ос та кастыл ма̄хум щё̄питахтэ̄гыт. Ма̄н касыл ва̄ре̄в ос на̄нан нё̄туӈкве во̄виянӯв. Хотьют школа ма̄гыс, тувыл спортивный ос номт тотнэ касылыт палт щар ёмас герб манос эмблема щё̄питы, ханищтахтын маснут палт эмблема по̄слы ос пӯмыщ гимнэ̄ры хансы– ма̄навн вос ке̄тыяныл. Ня̄врамыт ос хурит по̄слуӈкве, потыр хансуӈкве ве̄рме̄гыт. Ань хотьютматыр рӯпата ва̄руӈкве ка̄сащи ке, на̄н Саранпа̄выл школан Вокуев ӯсхулы, 12 кол адресын пищма хансэ̄н манос sch86-saranpaul. na-rod. ru ищхӣпыӈ ут щирыл ла̄тыӈ ке̄тэ̄н. Хунь конференция ва̄ре̄в, тот тах тамле ва̄рмалит урыл потыртэ̄в: – Ам омагума̄тягум пионерыг о̄лсы̄г; – Школа а̄стлам хо̄тпанув янытлыянӯв; – Школа о̄лупса; – Ты сака ёмас ханищтан хо̄тпат; – Мо̄рсыӈ пормасыт; – Ва̄та̄л ва̄рмалит та̄рапаттавет. 1958 та̄л па̄сныл 1 со̄тыра 500 арыгкем хо̄тпа Саранпа̄выл школа а̄стласыт. Та̄н ань Россия янытыл ла̄кква ма̄н мингаласыт. То̄ват мо̄т хо̄н ма̄н о̄луӈкве минасыт. Ма̄н номсэ̄в, ань ты проектын акванюрщлаве̄в, акванхо̄нтхатэ̄в, школат ханищтахтам порав номылматылӯв ос сымын ро̄внэ са̄в пӯмыщ ла̄тыӈ ла̄ве̄в. 1053 2013.06.07. Николай МЕРОВ Йильпи суссылтап рӯпиты. Я̄ӈк на̄тнэ э̄тпос 18 щисла музеит янытлан мирхал хо̄талыг о̄лы. Ялпыӈ хо̄тал кастыл Ханты-Мансийск ӯст «Геология, нефть ос газ» музей кӯщай нэ̄ Татьяна Кондратьева ос пе̄с йис суссылтапыт щё̄питан хум Андрей Головнёв ля̄ххал тотнэ ма̄хум ёт ва̄щиньтахтасы̄г. Ты этнограф хум исторический наукат доктор нам о̄ньщи, Екатеринбург ӯст о̄лы. Ты музейкол хус та̄л рӯпиты. Рӯпитанэ̄тэ сыс хорамыӈ яныг кол ӯнттувес ос йильпи ищхӣпыӈ утыл ёвтвес. Тот ань пуссын аквъёт 33 со̄тыра арыгкем са̄всыр пормас атым о̄лы. Суссылтап ва̄рнэ ма̄гыс яныг колнакыт та̄стуве̄сыт. Ань аквторыг тот 4-6 выставка ва̄руӈкве ро̄ви. Тувыл ань ты музей колт «Энергия Югры» нампа йильпи проект ва̄рвес. Ты выставка акваг рӯпитаӈкве паты. Хӯрум накпа лю̄лит колт суссылтап паты. Пуссын э̄рнэ пормасыт тув атнэ ма̄гыс хӯрмахкем та̄л тах мины. Ты ва̄рмаль щё̄питан хум Андрей Головнёв ла̄выс: «Ма̄н тох ва̄ре̄в, суссылтапын ёхталан хо̄тпа, аквтупмат ма̄во̄й но̄хвинэ ма̄н вос ликми. Хумус ма̄во̄й но̄хвиӈкве о̄вылтавес, манарыл но̄хняртаве ос мо̄т тэ̄лат урыл тот ка̄сыӈ хо̄тпа такви ка̄салы ос ёмщакв та̄рапаттыянэ». О̄выл колнакт ма̄ ё̄лыпа̄лт о̄лнэ щунит суссылтаӈкве патавет. Тувыл хо̄тпа буровой вышка хосыт китыт накпа колн ха̄ӈхылтап хосыт но̄ӈхаль ха̄ӈхи. Ос ма̄ нумипа̄лн хумус ма̄во̄й но̄хвиве, таи суссылтаве. Хӯрмит накпа колт ос ищхӣпыӈ утыл ма̄во̄йныл маныр ва̄раве, та урыл суссылтап щё̄питаве. Тамле ты пӯмащ ва̄рмаль та̄стувес. Ты музей кӯщай нэ̄ Татьяна Валентиновна ялпыӈ хо̄тал кастыл музейт рӯпитан хо̄тпат ос суссылтапын ёхталан ма̄хум пуссын сымыӈыщ янытласанэ. Ма̄хумаквет, на̄н ос тамле пӯмащ тэ̄ла сунсуӈкве хуньт ты музейн ялэ̄н. На̄нан ты ва̄рмаль тах сака мӯсты. 1053 2013.06.07. Александр ВЬЮТКИН Та̄л сыс туп акв э̄т ёхталаӈкв ро̄ви. Я̄ӈк на̄тнэ э̄тпост «Ночь в музее» нампа мирхал акция округувт титыт та̄л ва̄рыглавес. Ханты-Мансийск ӯст «Ма̄вит ос э̄лумхо̄лас», «Ма̄во̄й ос газ» ос «Картинная галерея Г. С. Райшева» нампа хӯрум музей э̄ти рӯпитасыт. Та э̄т сыс акв со̄тыр атса̄т хо̄тпа музеитын ёхталасыт. Хӯрум музей халт са̄всыр пӯмащ о̄лыс. «Ма̄вит ос э̄лумхо̄лас» музейт ка̄сащан ма̄хум пе̄с пора хольт ю̄нтым маснут масыглаӈкв ос тох по̄слахтуӈкве ве̄рмысыт. «Ма̄во̄й ос газ» колт ос са̄всыр химия утыт аквантэ̄лыгтым суссылтаве̄сыт. Г. С. Райшев ка̄тыл по̄слын колэ̄н ёхталам ма̄хум та̄нти матыр по̄слуӈкв ве̄рмысыт. Ам та э̄типа̄лаг ка̄тыл по̄слын ханты о̄йка палт ялсум. Ёхталам ма̄хум ще̄мьяӈ та̄гыл о̄лсыт. Ма̄нь ня̄врамыт ёнгасан ма̄гсыл колса̄м ва̄рим о̄лыс. Тот та̄н ёнгысыт ос по̄слысыт. Та̄н ма̄гсыланыл тот ёнгынут ос по̄слынут пуссын щё̄питым о̄лсыт. Оманыл, а̄тяныл Геннадий Степанович по̄слум хуриянэ сунсыглым ос та урыл хӯнтлым колэ янытыл ё̄мыгтасыт. То̄ва мӯй ма̄хум пуссын ты хӯрум музейн э̄ти сыс щалтсасыт. Та̄н ла̄всыт, тыи сака пӯмащ, са̄внув тамле хо̄талыт о̄лсыт те, та̄н аквписыг ёхталанувыт. 1053 2013.06.07. Александр ВЬЮТКИН Во̄рув са̄литым о̄ньщелы̄н. Ма̄н округувт ма̄вит ӯргалан щирыл рӯпитан ва̄рмаль я̄ӈк на̄тнэ э̄тпост аквхойпловитыг о̄вылтавес. Ты кастыл Ханты-Мансийск ӯст са̄всыр пӯмащ тэ̄лат ва̄рыглавет. Ӯсянытылмо̄тмо̄т ма̄т ма̄нь йӣвыт ӯнттуве̄сыт. Ты акция о̄вылтым хо̄талт ос субботник ва̄рыглавес. Ма̄хум ӯс янытыл мори па̄хвтым порсыт акванатсыт. Ты коныпал ня̄врамыт ма̄гсыл ма̄вит ӯргалан са̄в ханищтапыт тах ва̄рыглавет. Ань ты «Спасти и сохранить» нампа акция округувт лӯпта э̄тпос оигпан мус рӯпитаӈкв паты. Ма̄вит ӯргалан акция «Археопарк» нампа ма̄т рӯпататэ о̄вылтавес. Округ губернаторув Наталья Комарова тув ёхталас ос мирн ёмас ла̄тӈыт ла̄выс: «Ам номсэ̄гум, хунь мо̄т хо̄н ма̄т ма̄н округув урыл потыртаве, та̄н потраныл а̄ти туп ма̄во̄й ос газ но̄хвинэ урыл мины. Та̄н ань о̄лнэ ма̄вит ӯргалан акцияв урыл о̄с са̄в ва̄гыт ос потыртэ̄гыт. Ты хо̄тал Россия янытыл са̄в яныг ӯсыӈ ма̄т о̄с акв тамле ма̄вит ӯргалан ва̄рмалит рӯпитэ̄гыт». 1053 2013.06.07. Людмила ТЕТКИНА Кол ӯнттын ма̄нанын на̄нки нупылын хансэ̄н. Наталья Комарова, губернаторув, па̄влыӈ ос ӯсыӈ миркол кӯщаит ак¬ванатыгласанэ. О̄влэ̄т тав кит хо̄тпаг яныт¬ласаге. Россия янытыл миркол кӯщаит ка¬сылыл ва̄рыглавет. Та̄н тув та̄нки ва̄рум рӯпатаныл ос проектаныл ке̄тыглыяныл. 700 ке̄тум заявканэ̄пакыт халт ма̄н окру¬гувныл кит проектыг но̄хпатсы̄г. Ханты-Мансийск ӯс миркол «Лучший му¬ниципальный проект» нампа номинацият хӯрмит места вис. Сургут ӯст миркол кӯщай Дми¬трий Попов мо̄т мир¬кол кӯщаит халт но̄хпатыс, китыт местал майвес. Наталья Кома¬рова тэ̄натэ̄н ты яныт¬ласаге. Ты юипа̄лт та̄н налоголн урыл потыртасыт. Ань рӯпитан са̄кконыт щирыл ма̄ о̄щнэ хо̄тпат налоголн ойтэ̄гыт, тыил государствав о̄с са̄в олн сэ̄лы. Па̄влыӈ ма̄хум ко¬ланыл ӯнлын ма̄ та̄нки нупыланыл хансуӈкве ань о̄с ла̄вавет. Сапра̄нит миркол кӯщаит китыглаве̄сыт, манаса̄вит олн та̄н тыил сэ̄лэ̄гыт ос хумус ма̄хум ёт ты тэ̄ла хосыт рӯпитэ̄гыт. Вячеслав Куликов, Урай миркол кӯщай хум, рӯпатаныл урыл тамле ла̄тыӈ ла̄выс. Кит та̄л сыс акваг мощщанув ма̄хум налоголн ойтуӈкве пат¬сыт. 2010 та̄лт Урай ӯст о̄лнэ мир пуссын аквъёт 28 миллион солко̄ви ойтсыт, 2012 та̄лт туп 16 миллион. Ань са̄всыр льготат ва̄рве̄сыт, са̄в ма̄хум ты олныл воссыг ат хансавет. Та̄н мирко¬ланылт рӯпитан ма̄хум ань са̄всыр акцият ос ре¬клама ва̄рыглэ̄гыт, кол ӯнттум, гараж ӯнттум ма̄наныл ма̄гсыл ма̄хум нэ̄паканыл моляхнув вос ва̄рияныл. О̄с та порат кӯщаит акв тэ̄ла урыл потырта¬сыт. Ань мо̄т хо̄н ма̄ныл ёхтын таджикыт, узбе¬кыт, киргизыт ос мо̄т по̄х хо̄тпат тыт ма̄ ёвтэ̄гыт ос та̄нки нупыланыл молямтахтым хаслыг¬тыяныл. Кӯщаит китыглахтасыт, ты ма̄хум ма̄ тыт ёвтуӈкве манрыг та̄ртавет. Прокуратурат рӯпитан нэ̄ Валентина Балута ювлела̄выс, са̄ккон щирыл та̄н олн ке о̄ньще̄гыт, кос хо̄т Рос¬сия янытыл ма̄ ёвтуӈкве ве̄рме̄гыт. Сапра̄нит о̄с акв на¬лог урыл потыр о̄лыс. Ань многоквартирный колт о̄лнэ ще̄мьят ты олныт ойтуӈкве о̄с ла̄вавет. Кӯщаит ань тыг мус ты тэ̄ла хумус мӯсхалыг ва̄руӈкве, та̄нки ат торгамтэ̄гыт. Яныг колт о̄лнэ ма̄хум халт ты олныт хумус уртуӈкве ос кол по̄хат о̄лнэ ма̄тэ ма̄гсыл налоголн виӈкве ман а̄ти о̄с ат ва̄гыт. Тамле колт о̄лнэ ма̄хмытын та̄нкина̄нылн ты нэ̄пакыт щё̄питаӈкве э̄ри. Нэ̄пакыт ва̄руӈкве та̄н о̄с ат ка̄саще̄гыт. Ты та̄рвитыӈ ва̄рмаль ань яныг ӯсытт о̄лы, тот там¬ле кол са̄в ӯнттаве. Сергей Зайцев, Горно¬правдинск па̄выл миркол кӯщай, о̄с акв та̄рвитыӈ ва̄рмаль урыл ла̄выс. Тав па̄влыӈ ма̄хманэ кол ӯнттын ма̄наныл та̄нки нупыла¬ныл хансуӈкве пуссын кос таӈхияныл. Ма̄ ур¬тнэ (межевание) ва̄рнэ хо̄тпат тув ат ёхталэ̄гыт. Ань ты рӯпата вос ва̄раве, па̄вылт лов хо̄тпа заявлениенэ̄пак х а с ы т, т а̄ л с ы с т ы ӯрхатэ̄гыт. Моляхнув нэ̄паканыл ва̄рсаныл ке, налоголн ойтуӈкве о̄вылтахтынувыт. Ма̄ уртнэ хо̄тпат ювле ла̄всыт, тамле рӯпата ва̄руӈкве э̄лумхо̄лас ат то̄вылхаты, тувыл ка̄сыӈ ма̄нь па̄вылн акв хо̄тпа о̄лнэ ма̄тэ по̄слуӈкве ос нэ̄паканыл ва̄руӈкве, та̄н о̄с ат ве̄рме̄гыт. Тыи ма̄гсыл ма̄хум хоса та ӯрхатэ̄гыт. Та сапра̄нит кӯщаит ма̄вит ӯргалан урыл о̄с потыртасыт. Ань мир¬кол кӯщаит ка̄сыӈ па̄выл по̄хат порс ул вос атэ̄гыт, порс атнэ полигоныт вос щё̄питэ̄гыт. Наталья Комарова ла̄вме щирыл, округувт акв програм¬ма пирмайтавес ос ты хосыт мирколыт олныл та̄ставет. Советский рай¬он миркол кӯщай хум Вячеслав Толстогузов ла̄выс, та̄н та̄нки райо¬нанылт порс атнэ акв по¬лигон щё̄питасыт, Пионерский, Малиновский, Таёжный ос Алябьево па̄влытныл порс тув то¬таве. Наталья Комарова ты программа хосыт пус¬сын кӯщаит рӯпитаӈкве ла̄всанэ. Ос ка̄сыӈ рай¬онт тамле порс атнэ ма̄ вос ва̄раве, па̄влыт ля¬пат ма̄хум ма̄ныл ул вос па̄ӈктыяныл. 1053 2013.06.07. Валентина УЗЕЛЬ Кол ёвтнэ ма̄гыс минэ олн мощщан ёлпо̄илтта̄лаве. Тӯяг а̄ти сака хосат округ губернаторув Н. Комарова ла̄выс, ань округув янытыл о̄лнэ колыт тынаныл сака янгыг е̄мтсыт. Ты ва̄рмаль таима̄гыс осннэ̄глыс, ма̄хум субсидиял мивет ос ипотекаолн винэ порат процент акв па̄лэ Правительство па̄лыл ювлеойтаве. Кол ӯнттын округ Департаментыт кӯщай ва̄ӈын хо̄тпа Андрей Кривуляк ос анти монопольный службат рӯпитан хум Василий Иванов журналист ма̄хум акванатыгласанэ̄н ос ты ва̄рмаль урыл потыртасы̄г. Ань яныг ӯсытт са̄в кол ӯнттаве, ма̄хум тот кол ёвтуӈкв та̄ра ат ве̄рме̄гыт. Ты колыт о̄влэ̄т са̄всыр по̄х хо̄тпатн ёвтавет, та̄н «посредникыг» ла̄вавет. Тувыл та хо̄тпат квартират э̄лаль та тыналыяныл. Ты хосыт ань колыт сака тыныӈыг е̄мтсыт, акв квадратный метра 100 со̄тыра солко̄ви ляпатемн ёхтыс. Ань округ миркол кӯщаянув мо̄т щирыл ва̄руӈкв таӈхе̄гыт – ты та̄л лӯпта э̄тпос о̄выл хо̄талэ мус квартират хо̄нтум ма̄хум туп та̄н субсидиял мивет ос ипотека процентаныл ойтуӈкв нё̄тавет. Ос та юипа̄лт очередит о̄лнэ ма̄хум хумус э̄лаль нё̄туӈкв патавет, ань ты кӯщаиг тох ла̄всы̄г – ты ма̄хум ма̄гыс 2014-2020 та̄лытн мо̄т йильпи жилищный программа хансаве. А. Кривуляк ла̄выс, ань субсидия винэ ма̄гсыл ма̄хум очередин хансуӈкв ат патавет, ты рӯпата мощщан ёлпо̄илтта̄лаве. Ос 2013 та̄л сыс жилищный программат пе̄с щирыл ёмащакв рӯпитаӈкв патэ̄гыт. Тувыл э̄лаль кӯщаит маныр номылматэ̄гыт – манос о̄лы. Ты та̄л оигпан мус ань ма̄ньлат ще̄мьят ма̄гыс 1 млрд. 270 млн. солко̄ви та̄ставе. Соссаӈ ма̄хум программан 404 млн. солко̄ви. Ань юио̄выл тит та̄лыг сыс округувт о̄лнэ кол сака мощща ӯнттувес, ос са̄в ма̄хум субсидияолныл майве̄сыт. Колыт тыналан ма̄хум таима̄гыс ты тох сака тыныӈыщ кол тыналэ̄гыт. Ань ос кол ӯнттын ма̄гыс олн са̄выӈпа̄лэ бюджетныл миӈкв патаве. Строительный компаният пуссын нё̄туӈкв патавет – ма̄ло̄мтыл мивет, межевание ва̄руӈкв те э̄ри, о̄с тах нё̄тавет. Тувыл э̄лы ма̄ныл кол ӯнттын са̄всыр э̄рнэ пормасыт ман мо̄т утыт ул вос тотавет, стройматериалыт тыт ва̄руӈкв ос тыналаӈкв патавет. Тувыл кӯщаиг титыглавесы̄г, акв квадратный метра тынэ хумус ловиньтаве, манрыг субсидия винэ порат акв метра ма̄гыс Сургут ӯст 50 со̄тыра солко̄ви миве, ос тыгыл са̄внув манрыг ат миве? А. Кривуляк ла̄выс, ань Минрегионразвитият рӯпитан ма̄хум та̄н ловиньтэ̄гыт, Россия янытыл хо̄т ос манах тын хансуӈкв ос манса̄вит солко̄ви субсидия ма̄гыс миӈкв э̄ри. Ка̄сыӈ ӯст манос районт субсидияолн са̄всыр са̄витыг хансым о̄лы, колыт ма̄гыс тыныт пуссын са̄всырыт. Ань лӯпта э̄тпос о̄выл хо̄талэ ювле та хультыс. Э̄лаль хумус субсидияолн миве, на̄н тах ля̄ххалыт акваг ловиньтэ̄н. Округувт 2013 та̄л о̄выл хӯрум э̄тпос сыс ань акв кв. метра ма̄гыс тыса̄вит субсидияолн миве: – Сургут ӯс 50 286 солко̄ви, – Ханты-Мансийск ӯс 50 308 солко̄ви, – Урай ӯс – 43 567 солко̄ви, – Нижневартовск ӯс – 49 004 солко̄ви. – Нефтеюганск ӯс – 46 196 солко̄ви; – Мегион ӯс – 49 321 солко̄ви; – Когалым ӯс – 44 986 солко̄ви; – Югорск ӯс – 45 966 солко̄ви; – Радужный ӯс 44 830 солко̄ви; – Пыть-Ях ӯс – 45 799 солко̄ви; – Нягань ӯс – 43 102 солко̄ви; – Лангепас ӯс – 50 007 солко̄ви; – Покачи ӯс – 40 177 солко̄ви; – Советский район – 43 732 солко̄ви; – Нижневартовский район – 47 198 солко̄ви; – Нефтеюганский район – 46 228 солко̄ви; – Белоярский район – 45 281 солко̄ви; – Сургутский район – 44 400 солко̄ви; – Кондинский район – 42 543 солко̄ви; – Ханты-Мансийский район – 46 025 солко̄ви; – Октябрьский район – 47 164 солко̄ви; – Бере̄зовский район – 41 698 солко̄ви. 1053 2013.06.07. Галина КОНДИНА Сэ̄лнэ олнаныл та̄нти ма̄нылт вос о̄ньщияныл. Мирн пе̄риим ма̄хум тӯя хо̄талыт оигпан порат акванатхатыгласыт. Та хо̄тал та̄н хусахтем са̄ккон пирмайтасыт ос то̄ва кӯщаит ва̄рум рӯпатаныл урыл потраныл хӯнтлысыт. Щар яныг тэ̄лаг таи о̄лы – округ олнанув хумус холтавет. Та урыл потыртаӈкве В. А. Дюдина во̄виньта̄лвес, тав губернатор ва̄ӈын хо̄тпаг рӯпиты ос олн ловиньтан Департаментыт кӯщаиг о̄лы. Вера Аркадьевна ла̄выс: «Ты та̄л о̄выл хӯрум э̄тпос сыс бюджетувн 21 миллиард 800 арыгтем солко̄ви пинвес. Мо̄лты та̄л аквты э̄тпосыт сыс лов миллиард солко̄виныл са̄внув атыгласӯв. Ты таима̄гыс тох о̄лы, ма̄во̄й тынэ мощщаг е̄мтыс. Мо̄лты аквты порат ма̄во̄й тынэ баррель ма̄гыс 117, 5 доллар о̄лыс, ань – 111, 4 доллар. На̄локолн о̄с аквта щирыл организацият кос ойтэ̄гыт. Ос ты тӯя ма̄ньполь э̄тпос ва̄т щислатэ ӯщлахтын хо̄талын е̄мтыс. Таима̄гсыл та̄н са̄выӈпа̄лэ туп яныгполь э̄тпос о̄выл хо̄талт олнаныл ойтсаныл. Та̄лув о̄выл хӯрум э̄тпосанэ сыс 27 миллиард арыгтем солко̄ви ма̄н са̄всыр ва̄рмалитын та̄стысӯв ос мисанӯв. Ты олнытыл мир пусмалтан ма̄гыс – 26, 5 %, ханищтан ма̄гыс – 23, 6 %, мирн нё̄тнэ кастыл – 18, 7 % та̄стысӯв». Олн ловиньтан кӯщаюв ла̄тӈе щирыл, хӯрум э̄тпос сыс ат миллиард 800 миллиард арыгтем солко̄ви ат то̄вылхатас, рущ щирыл тав «дефицитыг» ла̄ваве. Мир пусмалтан са̄кконт то̄ва ла̄тӈыт о̄с мо̄тнув щирыл хасве̄сыт. Ань ма̄ньлат ле̄ккарыт ма̄нь па̄влытын рӯпитаӈкве минуӈкве вос ка̄саще̄гыт, та щирыл ва̄раве. Мо̄лты рӯпитам са̄ккон о̄с э̄лаль ты та̄лн хасвес, 2013 та̄л сыс па̄влын миннэ ле̄ккарыт акв миллион солко̄вил, фельдшерыг ос акушерыг рӯпитан хо̄тпат 500 со̄тыр солко̄вил ойтавет. Депутатыт та̄нти ма̄гсыланыл ос са̄всыр мирколт рӯпитан кӯщаит ма̄гсыл тамле са̄ккон пирмайтасыт. Ань мо̄т хо̄ныӈ ма̄т банкыт та̄нти олнаныл о̄ньщуӈкве ат ро̄ви. Туп тыт Россият банкытын вос пиныяныл. Ты щирыл кӯщаитын, тувыл та̄н э̄кванылн ос нёлоловхуйплов та̄ланыл ат то̄влум ня̄враманылн ты са̄ккон хосыт о̄луӈкве э̄ри. Акв тамле са̄ккон Государственный Думат пирмайтавес, таима̄гыс округувт о̄с тох ва̄руӈкве э̄рыс. 1053 2013.06.07. Тамара МЕРОВА Сыстам ма̄т о̄луӈкве пуссын таӈхе̄гыт. Ханты-Мансийскат ма̄вит ӯргалан кастыл мирхал конференция ва̄рыглавес. Тот учёныит коныпал ня̄врамыт хансум потраныл о̄с хӯнтлуве̄сыт. Мо̄лал ЮНЕСКО хо̄тпат ты конференция В. И. Вернадский, учёный хум, 150 та̄лэ то̄влын кастыл тав наме̄тыл намтысаныл. О̄йка о̄лме сыс ма̄ ос то̄румыт о̄лнэ са̄всыр тэ̄лат та̄рапаттыс ос наука ма̄гыс са̄в рӯпата ва̄рыс. Ань ты ва̄рмалит о̄вылтыт мо̄т учёныит о̄с потыртэ̄гыт. Тувыл ма̄ янытыл о̄лнэ мирув ма̄витув ӯргалан урыл та̄нки о̄с номсуӈкве патсыт. Ма̄ке̄в ань сыстамыг о̄ньщуӈкве ат ке патылӯв, ётыл ма̄н юипа̄лувт самын патнэ ня̄врамыт лю̄льсаӈ о̄луӈкве патэ̄гыт тах. Ня̄врамытн ты о̄вылтыт ва̄тихал потыртаӈкве э̄ри. Ань экология урыл та̄н хумус ханищтаӈкве э̄ре̄гыт, образованият рӯпитан кӯщаит аквъёт номсахтасыт. Анатолий Захлебный, Российский академият экологический образование ма̄гыс пуӈктотнэ хум, ла̄выс: «Учёныит ва̄тахкем та̄л аквъёт номсахтэ̄гыт, хумус лылые̄п, ма̄витэ сыстамыг хультуптаӈкве ро̄ви. То̄ва мирыт сэ̄иӈ ма̄т, тунра манос хара ма̄т о̄лэ̄гыт. Ка̄сыӈ мир такви ма̄тэ̄т о̄луӈкве ханьщувлас ос ма̄витув ӯргалым о̄ньщитэ. Ань та̄н аквтох о̄лнувыт ке, мо̄т ма̄ныл ёхтын ма̄хмыт ханищтанувыт, та̄н са̄в та̄лын сака ёмас по̄льса э̄лаль тотнувыт». Ханищтап ос ма̄ньлат ма̄хум Департаментыт кӯщаиг о̄лнэ нэ̄ Антонина Урсу-Архипова потыртас: «Ты таквс школатыт ма̄нь ня̄врамыт ма̄гыс ханищтан хо̄тпанув щар о̄выл урокытыт ма̄вит ӯргалан урыл тах потыртэ̄гыт. Ань ка̄сыӈ ня̄врам такви самын патум ма̄тэ э̄руптаӈкве патытэ ке, тав мо̄т ма̄ о̄с ӯргалытэ». Японияныл ёхталам нэ̄ Йоко Мошизуки ла̄выс: «Ам ос ня̄врам ы т н л а̄ в е̄ г у м , х умус та̄н о̄лнэ ма̄в ань ёмасыг ва̄руӈкве ве̄рмияныл. Ка̄сыӈ э̄лумхо̄лас ма̄ньта̄гыл вос номсахты, о̄лнэ̄тэ сыс тэ̄лата̄л вит ул вос со̄сы, на̄й лампочкат наска̄ссыг ул вос постэ̄гыт, порыс хо̄та̄ти ул вос па̄хвты. Туп аквкит хо̄тпа ты ма̄нь тэ̄лат ва̄рнэ̄ныл юипалт ма̄витув маткем сыстамыг е̄мтнув, ос ка̄сыӈ хо̄тпа тох ке ва̄рнув – ма̄ке̄в са̄в та̄лын со̄тыӈыг хультнув». Стефани Ходж ЮНИСЕФ образование тармыл рӯпитан нэ̄, йильпи щё̄питым проектыт урыл потыртас. Ма̄ янытыл о̄лнэ мирыт ма̄в ӯргалаӈкве акван вос юрщхатэ̄гыт ос акван вос нё̄тхатэ̄гыт. Югра ма̄вт экология урыл хосат та̄гыл са̄в потыртэ̄гыт, ёмас тэ̄лат ва̄ре̄гыт. Таима̄гыс ань мирхал конференция тыт ва̄рыглавес ос са̄в ма̄хум акванхо̄нтхатыгласыт, та̄нки халанылт аквъёт рӯпитан щирыл потыртахтасыт. 1053 2013.06.07. Николай МЕРОВ Пенсияолн са̄ртын атэ̄н. Та э̄тпост Ханты-Мансийск ӯст прессконференция о̄лыс. Тув кит кӯщай хо̄тпаг ёхталасы̄г. Ты Алексей Путин, округ губернатор ва̄ӈын хум, ос Алексей Охлопков, Ханты-Мансийский негосударственный пенсионный фондыт рӯпитан кӯщай. Тэ̄н ля̄ххал тотнэ хо̄тпатн пенсияолн та̄стын урыл потыртасы̄г. На̄н э̄лаль тэ̄н потре̄н ловиньтэлы̄н. Ань рӯпитан хо̄тпат п е н с и я о л н т а̄ н к и атуӈкве ве̄рме̄гыт. Ты кастыл бюджетный организациятт рӯпитан хо̄тпат ма̄гыс тамле тэ̄ла щё̄питавес. Хо̄тпа та̄л сыс китхуйплов со̄тыра солко̄ви Ханты-Мансийский негосударственный пенсионный фондын ке̄туӈкве паты ке, округ па̄лыл ос аквтаса̄вит олныл нумыл тув тах пинаве. Ты ва̄рмаль ма̄гыс на̄нан рӯпатанынт заявлениенэ̄пак хансуӈкве э̄ри. Пенсия ма̄гыс атнэ олнанын тув вос пинавет. Ты хосыт пенсияолныт кит щёс но̄хса̄вме̄гыт. Яныгпа̄ла хо̄тпаг е̄мтнэ̄н порат ёмас са̄вит олныл ойтуӈкве тах патаве̄н. Негосударственный пенсионный фондын олнанын пинуӈкве ул пилэ̄н. Нэ̄мхотталь ат тотавет, та̄н тот ӯргалым о̄ньщавет. Ты коныпал на̄н хунь ка̄сащегы̄н, ты олнаны̄н аквторыг ювлевиӈкве ве̄рмияны̄н. Тувыл ань китса̄т со̄тыра яныгпа̄ла хо̄тпа пенсияолн выгыт. Кӯщаиг ань ла̄внэтэ̄н щирыл, ка̄сыӈ та̄лныл акваг са̄внув хо̄тпа тув ёхтэ̄гыт. Са̄ртыннув олнаны̄н тув пинуӈкве патыяны̄н ке, пенсиян патнэ̄н мус са̄в олн атхаты. Ты ва̄рмаль урыл ань номсахтуӈкве э̄ри. Са̄выӈпа̄лэ ма̄хум налыман нупыл ат та̄ланыл то̄влын порат пенсияныл урыл ущта номсахтуӈкве о̄вылтахтэ̄гыт. На̄н о̄с хоса ул ӯрхатэ̄н, матнэ̄н порат са̄внув пенсияолн виӈкве таӈхегы̄н ке, олнаны̄н ань тув пинэ̄н. На̄нки о̄с ёмщакв номсахтэ̄н. 1053 2013.06.07. Галина КОНДИНА Пе̄с э̄ргыт, мо̄йтыт, потрыт нэ̄пакн вос хансавет. Соссаӈ мир Ассамблея депутатыт Дума сапра̄ни ва̄рнэ э̄лыпа̄лт акванатхатыгласыт. Е. Д. Айпин ос А. В. Филипенко мо̄т ма̄н хотталь во̄виньтавесы̄г, таима̄гыс тув ат а̄лымасы̄г. Надежда Геннадьевна Алексеева, соссаӈ м а̄ х у м Ас с а м б л е я т кӯщай ва̄ӈын хо̄тпаг рӯпитан нэ̄, сапра̄ни о̄вылтастэ. Тув округ депутат Т. С. Гоголева, ханты ос ма̄ньщи учёныянув, ля̄ххал тотнэ хо̄тпат ос культура департаментыт рӯпитан нэ̄ Н. М. Казначеева ёхталасыт. Тот пе̄с йис потрыт, мо̄йтыт, а̄мщит, э̄ргыт ос Ӯй йӣквнэ ва̄рмаль урыл потраныл о̄лыс. Округувт 1991 та̄л па̄сныл фольклорный архивыт рӯпитаӈкве патсыт. Щар са̄ртын Белоярский районт, тувыл 1993 та̄лт Ха̄льӯст тамле кол пӯсвес. Ань Нижневартовский ос Сургутский районыгт архивколы̄г о̄с рӯпитэ̄г. Ты рӯпата щар о̄влэ̄т м а̄ н о к р у г у в т Е в а Шмидт, венгр учёный нэ̄, ва̄руӈкве патыс. Тав ты архивколыт рӯпитан ма̄гсыл са̄в ё̄ре тув пиныс, тот о̄лнэ то̄ва ма̄хум ханищтас, хумус потрыт, мо̄йтыт хансуӈкве э̄ри, ищхӣпыӈ утыл хумус рӯпитаӈкве – суссылтас. Ётыл, а̄тимыг е̄мтме э̄лыпа̄лт тав нэ̄пак хансум ос хультуптам, та нэ̄пак щирыл тав хансум ос атум са̄всыр рӯпатанэ хус та̄л новуӈкве ат ро̄ве̄гыт. Туп 2022 та̄лт та̄наныл ловиньтаӈкве ос нэ̄пакыг та̄ратаӈкве тах ро̄ви. Ань нэ̄мхотьютын новхатуӈкве ат э̄ри. Ос матрыг А̄с-угорский институтт рӯпитан ма̄хум тав 1980 та̄лт ёлхансум Г. Г. Гришкин мо̄йтанэ нэ̄пакыг ва̄рманыл. Та институтт рӯпитан кӯщай нэ̄ В. И. Сподина о̄с ты сапра̄нин кос во̄виньта̄лвес, тав тув ат ёхталас. Ань сапра̄нин атхатыглам ма̄хум округ кӯщаювн пищма щё̄питэ̄гыт ос пуссын тот хасхатэ̄гыт. Ты ва̄рмаль тох хультуптаӈкве ат ро̄ви. В. И. Сподина ань па̄влыӈ ма̄т архивколытыт рӯпитан хо̄тпат ла̄щалла̄щал по̄хын те̄тыянэ. Тав ла̄внэ̄тэ: «Э̄ргыт, мо̄йтыт пуссын хасве̄сыт, маныр ань та̄н ва̄руӈкве патэ̄гыт». Ма̄н соссаӈ мир депутатанув, ва̄им, тох номтаныл ат патэ̄гыт. Яныг ма̄хманув ка̄сыӈ номнэ мо̄йтаныл, потраныл, э̄рганыл вос хансавет. Ос пе̄с порат хансым пе̄с йис потрыт, мо̄йтыт ищхӣпыӈ утытныл нэ̄пакн хансуӈкве э̄ри, кассетат плёнканыл пе̄сыг е̄мтэ̄гыт, ла̄кквапарге̄гыт, ань ты а̄лымаӈкве э̄ри. Су р г у т с к и й р а й онт «Яун-Ях» общинат рӯпитан ма̄хум 2008 та̄лт грантолныл майве̄сыт. Та̄н ань ка̄сыӈ хо̄тпа по̄слыяныл, о̄лупсатэ урыл потыр хансэ̄гыт ос тав матыр потыр, мо̄йт ва̄г – пуссын диктофонын хансыяныл. Ты сака ёмас ос э̄рнэ тэ̄ла ва̄ре̄гыт. Культура Департаментыт рӯпитан нэ̄ та̄нти ва̄рнэ рӯпатаныл урыл депутатытн потыртас. Мо̄лты та̄л сыс округув янытыл со̄тыр са̄тхуйплов са̄всыр фестивалит, конференцият ос ялпыӈ хо̄талыт ва̄рыгласыт. Тот хантыт ос ма̄ньщит культураныл суссылтаве̄сыт. Округувт 34 э̄ргын ос йӣквнэ коллектив о̄лы. Та̄н ва̄тихал э̄ргуӈкве ос йӣквуӈкве хо̄та̄ти во̄виньта̄лавет. 1053 2013.06.07. Александр ВЬЮТКИН Са̄лыӈ ма̄хум палт ялсӯв. Тӯяг Татьяна Гоголева ма̄хманэ ёт Савелий Самбиндалов палт Тӯрва̄т па̄вылн са̄лыт по̄стын ос ма̄хум ханищтан щирыл ат хо̄талын ялсыт. Щар юио̄выл щёс та̄н тув тэ̄лы са̄лыӈ суныл яласан хо̄пт ханищтаӈкв ялсыт. Та порат акв са̄лыӈ суныл яласан ма̄гсыл хӯрум хо̄пт те̄рыгласыт. Ань тув ялум хо̄таланыл урыл а̄нумн Елена Фризоргер потыртас. Тыгыл э̄лаль тав потре ловиньтэлы̄н: – Х а н т ы М а н с и й с к ӯсныл ма̄н Советский ӯс та̄ра минасӯв. Ялум ма̄хум ты: Т. С. Гоголева, А. Р. Станиславец, Х. Х. Хужахметов ос тувыл Ханты-Мансийский технологопедагогический колледжит ханищтахтын студентыт Галина ос Сергей Ромбандеевыг ос Анастасия Хозумова. Хайдарян Хужахметов Советский район Усть-Тапсуй па̄вылт ӯйхул янмалтан ма̄т рӯпиты. Тав тыгыл э̄лаль са̄лыт са̄вмалтан ма̄гсыл са̄лы ёвтуӈкв номсы. Таима̄гсыл ань тав Тӯрва̄т ма̄хманув палт ялыс. Хум ла̄выс, улпыл тэ̄лы порат матахтам са̄лы тах ёвты. Тув тотыглым ма̄ньлат студентыт пуссын ма̄ньщит. Та̄н ос са̄лыт палт ханьщувлан ма̄гсыл т у в т о т ы гл а в е̄ с ы т. Э̄рыӈ хотьютаныл са̄лы о̄ньщуӈкв паты. Ма̄н Тӯрва̄тн вертолётыл ёхтысӯв, та юипа̄л хо̄талт Савелий Дмитриевич пыганэ ос тав палтэ ёхталам хум ма̄хманэ ёт са̄лыянэ акванатуӈкв ялсыт. Хо̄нтум са̄лыяныл кол по̄хат о̄лнэ яныг пӯсас тӣврын по̄ссаныл. Савелий яныг пыге Олег потырты: «Хунь са̄лыянув палт минэ̄в, та̄н э̄лумхо̄лас юипа̄лт о̄лтхатым Тӯрва̄т па̄выл мус ёхталэ̄гыт. Ня̄нь тэ̄гыт ос акв ювле ща̄рканыл о̄лнэ ма̄н та минэ̄гыт. То̄ва порат ос та̄нти ёхталэ̄гыт». Ты тӯя та̄н онтолов нэ̄ви са̄лыяныл ӯнттысыт. Ань та̄н халанылт сэ̄мыл, я̄ӈк, выгыр ос хансаӈ па̄сыгрищит ха̄йтыгтэ̄гыт. Тӯяг Тӯрва̄т па̄выл ляпан са̄лыт ла̄щиглым пупа̄пщите̄в ёхталас. Таима̄гсыл м а̄ н ь п а̄ с г ы ӈ н э̄ в и са̄лыяныл сака э̄л, во̄рн ат ялантэ̄гыт. Во̄рто̄лнут по̄хан ӯрнэ ма̄гсыл Савелий пыганэ пӯсасаныл мувлахи, коныпа̄лт аквписыг а̄ращит па̄лтыглэ̄гыт. Ты та̄л Савелий Дмитриевич йильпи о̄лнэ кол ӯнттын ма̄гсыл субсидия олныл майвес. Та кол ты тув сыс Та̄гт я̄ ос Сысъя̄ акванпатнэ ма̄т ӯнттыяныл. 2010 та̄лт хум ма̄хум тот са̄лы о̄щнэ пӯсас ва̄рсыт. Та юипа̄лт яныгнув пыгыг Олег ос Илья пӯсас по̄хат во̄раян кол ӯнттысы̄г. Ты та̄л ос яныг ёмас кол тот ӯнттэ̄гыт. Са̄лыяныл пуссын тув по̄сыяныл. Сысъя̄ ос Та̄гт я̄ акванпатнэ ма̄н ам ялсум. Во̄ре са̄лы о̄щнэ ма̄гсыл сака ёмас. Ща̄рк тот тэ̄пыӈ, нюсыӈ ос са̄всыр лӯптапумыӈ. Тувыл нё̄раныл мус щар а̄ти хоса. Та ма̄наныл мус тэ̄лы порат «Бураныл», туви ос нас ла̄глыл ёхтуӈкв ро̄ви. Таима̄гсыл ты Савелий Дмитриевич са̄лыянэ тув по̄суӈкв номсыянэ. Ма̄н, ӯсыӈ ма̄ныл ёхталам ма̄хум, аквп и с ы г в а̄ с н ё̄ в л и л ос сыстам я̄т уигтан хӯлыл па̄йтыглавесӯв, тыттувесӯв. Ювле пуссын ёмас, сыстам номтыл та минасӯв». 1053 2013.06.07. Александр ВЬЮТКИН «Выгыр нэ̄пак». Ма̄вит ӯргалан ва̄рмаль щирыл «То̄рум Маа» музейколт о̄с акв суссылтап о̄вылтавес. Рӯщ ла̄тӈыл: «Красная книга Югры глазами детей» ла̄ваве. Ань округув янытыл 71 са̄всыр ӯйхул, 140 са̄всыр нампа лӯптапум «Выгыр нэ̄пакн» тув хансым о̄лэ̄гыт. Ма̄вит ӯргалан ма̄хум ла̄ве̄гыт: «Ань о̄лнэ «вы¬гыр нэ̄пакув» йильпииг э̄ри хансуӈкв. То̄нт тав осыӈнувег е̄мты. Ка̄сыӈ та̄л округт о̄лнэ ӯйхул ос лӯптапум мощщами, тыи ты сака лю̄ль». «Выгыр нэ̄пакн» хансым ӯйхулыт ня̄врамыт пумныл сагсыт, то̄рныл та̄нти ю̄нтсыт ос по̄слысаныл, ты хурит ань выставкан щё̄питаве̄сыт. Суссылтапын савалап ня̄врамыт тотыглаве̄сыт. Та̄н ётаныл ты сус¬сылтап тотум нэ̄ Оль¬га Павловна Стытьюх потыртас. Тав Талинка па̄вылт ня̄врамыт ха¬нищтахтын колт о̄лнэ музейт кӯщаиг рӯпиты. Ня̄врамытын тав ла̄выс: «Ма̄ янытыл са̄в мир о̄лы. Таима̄гсыл ка̄сыӈ хо̄тал са̄в порс па̄хвтаве. Таи туп ёмасыг о̄лы, хунь па̄хвтын порсыт акв аняг пинавет. Ма̄н халувт са̄в ма̄хум о̄лэ̄гыт, та̄н ма̄в сыстамыг ат о̄ныщияныл, ат ӯргалыяныл. Тыима̄гсыл са̄в ӯйхулыт, са̄всыр те̄рыӈхомлахыт ос лӯптапумыт хотталь та со̄йме̄гыт». Ань ва̄рум акцияныл са̄выӈпа̄лэ ня̄врамыт ёт рӯпитан щирыл о̄лы. Но̄х яныгман хо̄тпат ма̄ньта̄гыл ма̄витув ӯргалаӈкв вос ханьщувлэ̄гыт. То̄нт о̄лнэ ма̄в хосан сыстамыг хульты. 1053 2013.06.07. Николай МЕРОВ Ма̄вит ӯргалан хо̄тпат потыртасыт. Яныгполь э̄тпост Терентий Герасимович Харамзин, социологический наукат доктор нам о̄щнэ ханты о̄йка, 75 та̄лэ то̄влыс. Ты кастыл учёный хо̄тпат акванатхатыгласыт ос ма̄вит ӯргалан ва̄рмаль урыл потыртасыт. Ма̄вит ӯргалан хо̄тпат ва̄тихал я̄т уральтым округув янытыл яласэ̄гыт. Наталья Владимировна Мирошкина ма̄вит ӯргалым рӯпиты. Тав ла̄внэ̄тэ щирыл, «Кондинские озёра» ос «Нумто» заповедникыг о̄лнэ ма̄нэ̄н сака па̄ӈктымаг. Тот о̄лнэ я̄тныл ос тӯрытныл вит а̄рталан ма̄гыс вуйлувес. Та витыт арген са̄в ртуть хо̄нтвес. Ртуть ты сака лю̄ль ут, э̄лумхо̄лас тамле утыл тэ̄лыгтым вит аи ке, тав са̄всыр та̄рвит а̄гмыл е̄мтуӈкве ве̄рми. Округувт Приполярный Уралт нё̄р а̄хвтас, ма̄во̄й, газ ос мо̄т са̄всыр ма̄щунь но̄хвиве. Таима̄гыс экологыт ты ма̄в акваг уральтым о̄ньщияныл. Ос манрыг витын ртуть патыс, Ханты-Мансийск ӯст о̄лнэ лабороторият рӯпитан хо̄тпат ма̄ ё̄лыпа̄лт, ма̄ нумипа̄лт ос я̄ӈкылмат витэ ёмщакв ханищтасаныл ос тох ла̄всыт. Ртуть вит хурипа ка̄миньт, тав ма̄ па̄лыгпатнэ асыл, тувыл ос газ но̄хвинэ порат витын овтуӈкве ве̄рми. 2001-2002 та̄лыгт Та̄гт ос Ма̄нь А̄с я̄г уральтавесы̄г. Тот о̄с арген са̄в ртуть витыт хо̄нтвес. Саранпа̄вылныл алгаль Ма̄нья витэ о̄с уральтавес, нэ̄матыр лю̄ль ат хо̄нтвес, тот витэ сыстам. Ма̄н ань нё̄ранувт тыныӈ а̄хвтас но̄хвиве, тот са̄в предприятият рӯпитэ̄гыт. Та предприятият ма̄вит ӯргалан хо̄тпатын пуссын уральтаве̄сыт. Тот рӯпитан хо̄тпат вит ат па̄ӈктыяныл, ма̄витув такви тамле та̄рвит тэ̄ла тоты. 1053 2013.06.07. Тамара МЕРОВА Ща̄гт тотнэ ма̄гыс са̄в рӯпитэ̄гыт. Дарья Белова Югорск ӯст о̄лы. Ма̄навн тав мо̄лал пищма ке̄тыс, ос ань тав потре хансылӯв. Тав «Прометей» нампа колт рӯпатан о̄вылтыт потыртас. Ань ханищтан хо̄тпат хумус ня̄врамыт ёт рӯпитэ̄гыт, маныр ва̄ре̄гыт, та урыл ловиньтэ̄н. Ты центрыт хус са̄всыр кружок рӯпитэ̄гыт. Тот ка̄сыӈ а̄гирищкве ман пыгрищакве такви сыме̄н э̄рнэ тэ̄ла хо̄нты. Тув нила та̄лныл ос онтоловхуйплов та̄ланыл то̄влын мус ня̄врамыт ялантэ̄гыт. Та̄н та̄нки халанылт румалахтэ̄гыт ос аквъёт юртыӈыщ о̄лэ̄гыт, ма̄ янытыл о̄лнэ ма̄хум культураныл ос э̄рганыл, йӣкваныл ханищтэ̄гыт. Ма̄витув э̄руптым ос ӯргалым о̄луӈкве ханищтавет. Кӯщай нэ̄ Н. А. Антонова такви рӯпататэ сака ёмщакв ва̄ритэ. Тав ня̄врамыт ман яныг хо̄тпат ёт кӯстырыг потыртахтуӈкве ха̄сы. Аквъёт матыр ва̄рмалин вуйхатым, акваннё̄тхатым, та̄н са̄в ёмас тэ̄ла ва̄ре̄гыт. 2007 та̄лт Сургут ӯст ва̄рыглым касылт «Прометей» нампа ня̄врамыт ханищтан кол щар ёмасыг ла̄ввес. То̄нт таима̄гыс кӯщаяныл я̄нас мӯйлупсал майвес. Ос 2008 та̄лт ты центр «Лучшее учреждение дополнительного образования» округ номинация щирыл э̄сгувес. Тот ня̄врамыт ханищтан хо̄тпат та̄нки рӯпатаныл э̄руптым, мӯсхалыг ва̄рияныл. Та̄н ня̄врамыт нё̄тнэ̄г э̄ргуӈкве ос йӣквуӈкве, ма̄щтырыг по̄слуӈкве ос мо̄т тэ̄латын ханищтыяныл. Ка̄сыӈ ня̄врам то̄румын хӯлтым такви ха̄стулэ э̄лаль тотуӈкве ос са̄вмалтаӈкве вос ве̄рмыстэ, ты колт пуссын нё̄тавет. Ня̄врамаквет э̄рнэ торыг тот ёмас ла̄тыӈ хӯнтамлэ̄гыт, аквъёт юртыӈыщ тот ёнгасэ̄гыт. Тувыл мощ поргащлаӈкве та̄ртавет, таима̄гыс нэ̄мхуньт ат ля̄выльттавет. А̄гирищитпыгрыщит мощ ёнгасэ̄гыт, тувыл та̄нки ёл та ротме̄гыт ос та юипа̄лт э̄лаль сэ̄ръёрыг рӯпитэ̄гыт. Маныр ва̄руӈкв ханищтаве̄сыт, таи ӯст о̄лнэ ма̄хумн суссылтыяныл, тувыл хо̄та̄ти касэ̄гыт. А̄гитпыгыт э̄ с г а в е т о с х а н и щ тан ма̄хманыл ёт ёмащакв ва̄рум рӯпатаныл ма̄гыс дипломнэ̄пакыл мӯйлуптавет. 2012 та̄лт яныг таквс э̄тпост касыл о̄лыс, тот Л. Е. Микушина но̄хпатыс. А. П. Феофанова ос Д. И. Белова тот дипломнэ̄пакыл мӯйлуптавесы̄г. Д а р ь я И в а н о в н а п и щ м а т э̄ т м а̄ н а в н хансыс: «Ам декорат и в н о п р и к л а д н о й искусство кружокыт ханищтан хо̄тпатн яныг пӯмащипа ла̄тыӈ ке̄т э̄ г у м . Т а̄ н а̄ н у м н ищхӣпыӈ утыл суссылтап ва̄руӈкве нё̄тсыт. Тувыл хӯрум хо̄тал сыс ма̄н ня̄врамыт ёт ма̄ньщи йӣкв йӣквуӈкве ханищтахтасӯв. Тумраныл Анна Владимировна Зайцева ёнгыс, тав «Югра лылыеп» ассоциацият рӯпиты. Ты йӣквув ма̄гыс «Приз зрительских симпатий» дипломыл майвесӯв. Й и л ь п и т а̄ л ё х тын кастыл ня̄врамыт ма̄гыс акваг ялпыӈ хо̄тал ва̄рыглэ̄в. Та̄наныл са̄всыр щирыл ёнгалтыянӯв. То̄нт О. Н. Шульга рущ ос лӯима̄ ма̄хум мо̄йтыт щирыл Татья – ма̄ньщи а̄ги урыл ёмас спектакль щё̄питас. Ольга Радченко Татья а̄гииг о̄лыс. Ня̄врамыт во̄рт пилуптахтын утыт урыл спектакль суссыт. Артистыт ос мӯй хо̄тпат пуссын аквъёт ёнгысыт, поргысыт, капыртасыт. Ты йильпи та̄л янытлан хо̄тал та̄нанылн сака мӯстыс, са̄в ща̄гт тотыс. Центрыт рӯпитан хо̄тпат са̄в ёмас сымыӈ ла̄тӈыл ла̄вве̄сыт». Ма̄н ты ма̄хум ос ня̄врамаквет лӯпта э̄тпос о̄выл ялпыӈ хо̄талыл янытлыянӯв. Туи сыс ёмщакв вос ӯщлахтэ̄гыт, пусмалтахтэ̄гыт, таквсы кастыл та̄ксарыг е̄мтэ̄гыт ос ёмас номтыл э̄лаль ханищтахтуӈкве вос ёхтэ̄гыт. Д. И. Белова Югорск ӯсныл ке̄тум пищматэ ма̄ньщи ла̄тӈыг Тамара МЕРОВАН толмащлавес. 1053 2013.06.07. Тамара МЕРОВА А̄лпыл сэ̄рипо̄с Финляндият постыс. Финныт «Ханты, или Звезда утренней зари» Еремей Айпин нэ̄паке щирыл спектакль ва̄рсыт ос суссылтан ма̄гыс тыг Ханты-Мансийскын ёхталасыт. Кит хумыг щё̄с арыгкем тэ̄нки халэ̄нт потыртасы̄г. Суснэ ма̄хум халт уральтахтым режиссёрхум Ари-Пекка Лахти о̄лыс. Ты ма̄ньлат хо̄тпат Коккола ӯсныл тыг ёхталасыт, та̄н тот театрыт рӯпитэ̄гыт. Еремей Данилович хансум потре щирыл та̄н режиссёраныл спектакль ва̄руӈкве номылматас. Ты потыр ловиньтаме юипа̄лт тув хансым номтыт таве̄н сака сымын хо̄ясыт. Э̄лумхо̄лас о̄лнэ̄тэ сыс такви о̄лупсатэ урыл акваг номсахты, хумус тав о̄лы. Ёмас тэ̄лат лю̄ль пищит ёт аквантэ̄лыгтахтэ̄гыт. Э̄лумхо̄лас номтэ савалы – хоталь таве̄н патхатуӈкве ос хотьютн агтуӈкве ро̄ви, хумус э̄лаль о̄луӈкве э̄ри. Ань ты номтанэ тав ма̄хумн потыртыянэ. Демьян пыгыг Яркко Лахти о̄лыс, ос Томас Роунакари о̄влэ̄т ня̄йт хумыг, тувыл мо̄т хо̄тпаг, тэ̄н спектаклит сака ма̄щтырыг ёнгасасы̄г. Щё̄с арыгкем сыс спект а к л ь суснэ ма̄хум Демьян о̄лупсатэ урыл са̄всыр о̄лыглам ва̄рмалит суссыт ос хӯнтлысыт. Томас «ня̄йт хо̄тпа» э̄рыг э̄ргыс ос наръсюхыл, тувыл са̄ӈквылтапыл са̄ӈквылтас. Тав э̄рыг ла̄тӈыт ос э̄рыгсов та̄ныт такви хассанэ, тув ровнэ̄г щё̄питасанэ. Яркко ётыл а̄нум потыртас: «О̄влэ̄т ёнгуӈкве сака та̄рвит о̄лыс, то̄ва хащта̄л ва̄рмалит ам ат торгамтасанум. Та̄наныл ла̄щмарт ханищтасанум ос та̄рапаттысанум. То̄нт ма̄н х а н т ы м а̄ х у м о̄л н э ма̄нылн ялсӯв, та̄н ётаныл стойбищат о̄лсӯв. Тот ка̄сыӈ ла̄вум ла̄тыӈ хӯнтлысӯв. Ма̄н суссӯв, хумус та̄н иӈ пе̄с щирыл о̄лэ̄гыт. Ань ты тэ̄лат пуссын та̄рапаттысанӯв, пормасыт, маснутыт э̄рнэ̄г щё̄питасанӯв. Демьян пыг ёнгынэм порат, ам та ханты ма̄хум о̄вылтыт номсэ̄гум ос то̄нт тав о̄лум о̄лупсатэ суссылтэ̄гум». Та̄н нупыланыл сунсуӈкве пӯмщиг о̄лыс. Тот ня̄врам турсуйил Яркко пыге, Вильям Лахти, потыртас. Ханты-Мансийскат о̄лнэ ма̄хум финн ла̄тыӈ ат ва̄гыт кос, ос хумус хумы̄г потыртасы̄г, маныр тот ва̄рсы̄г, та̄н торгамтасыт. Режиссёр о̄с сэ̄ръёрыг, номсахтым рӯпитас, ёмас спектакль ва̄рыс. Ты о̄вылтыт хурит по̄слын о̄йка Г. С. Райшев, губернатор ва̄ӈыг хумыг Г. Ф Бухтин ос А. А. Путин ла̄всы̄г. Спектакль о̄вылтахтан э̄лыпа̄лт Еремей Данилович Айпин ос Хелена–Аутио Мелони, Москват Финляндия посольстват рӯпитан нэ̄, А̄с-угорский театрыт рӯпитан а̄гитпыгыт ос журналистыт ёт хо̄нтхатыгласы̄г. Мӯй нэ̄ культура ва̄рмалит ёт рӯпиты, тав ла̄выс: «Финн ма̄хум театрколн ялуӈкве сака э̄руптэ̄гыт. Финляндият ка̄сыӈ ӯст театр о̄лы, ань тот 600 театркол рӯпитэ̄гыт. Та̄н са̄всыр мирыт потраныл щирыл спектаклит ва̄рыглэ̄гыт. Финский пе̄с потрыт рущ ла̄тӈыг толмащлавет ос ма̄хумн суссылтавет. Тох Московский художественный академический театр та̄н ётаныл рӯпиты. На̄н А̄с-угорский мир театр о̄ньщегы̄н, ты сака ёмас. Ва̄глум, та̄н российский театральный касылт лауреатыг е̄мтсыт, са̄всыр янытлан нэ̄пакыл мӯйлуптаве̄сыт. Туп артистыт та̄нки рӯпитан кол ат о̄щнэ̄ныл, манрыг тох? Тувыл ӯст о̄лнэ ма̄хум театрколыӈыг е̄мтэгы̄т ке, тыи о̄с ёмас о̄лнув». Ам ос на̄нан таи ла̄вуӈкве таӈхе̄гум, 1996 та̄лт Финляндият о̄лмум порат ма̄ньщи ма̄хум о̄вылтыт спектакль суссум. Ты спектакль «Когда качало меня солнце» Юван Шесталов хансум потре щирыл ва̄рыглавес. Тот акв нэ̄ хо̄тпа туп ёнгыс, наме Мерья о̄лыс, о̄парищ наме хотёрувлслум Финныт рӯтыг о̄лнэ мирыт ва̄ганыл, ты урыл пӯмщалахтэ̄гыт ос та̄нки ма̄хманылн потыртэ̄гыт. Тамара МЕРОВА Ты хурит Томас Роунакари по̄слым о̄лы. 1053 2013.06.07. Людмила ТЕТКИНА Советский ӯст рӯпитан суссылтап. Ка̄сыӈ та̄л я̄ӈк на̄тнэ э̄тпос 18 щислат Россият музеит ӣти рӯпитэ̄гыт. Тамле ва̄рмаль о̄лум порат Ханты-Мансийск ӯст са̄в мир музейн ёхталасыт. Ты тэ̄ла таима̄гсыл ва̄рыглаве, ма̄хум ва̄тихалнув тув вос ялантэ̄гыт ос культурал вос пӯмщалахтэ̄гыт. Советский ӯст о̄лнэ музейн акваг са̄в ма̄хум ёхталэ̄гыт. Тот рӯпитан хо̄тпат са̄всыр суссылтапыт, ялпыӈ хо̄талыт ва̄рыглэ̄гыт, ня̄врамыт ос яныг ма̄хум та̄нки палтаныл во̄виньтыяныл. 1970 та̄лыт Советский ӯст о̄лнэ ма̄хум акв колнакт пе̄с нэ̄пакыт, пормасыт акванатуӈкве патсаныл. Ӯст музей а̄тим о̄лыс, акванатум пе̄с пормасаныл, акв колныл мо̄т колн ва̄нлупта̄лве̄сыт. Акв порат суссылтап школат ва̄рыглавес, тувыл «Малая Сосьва» нампа заповедникыт рӯпитан хо̄тпат та̄нки коланылт пе̄с пормасыт суссылтасаныл. Тох тыглетувле выставкат тотыглаве̄сыт, то̄ва пе̄с нэ̄пакыт, пормасыт хотӯстуве̄сыт. Советский ӯст туп 1985 та̄лт районный музей ва̄рвес. Заповедникыт рӯпитан хо̄тпат музейн акваг нё̄тсыт. Ань тув ёхталан ня̄врамыт «Малая Сосьва» заповедник урыл ос Советский районт манхурип ӯйхул о̄лы, манхурип йӣвыт, пилыт, ла̄хсыт тот яныгме̄гыт, ты урыл о̄с потыртавет. Музейт 27 со̄тыра арыгкем са̄всыр пе̄с пормасыт, хурит, нэ̄пакыт акванатве̄сыт. Тот Советский район историятэ урыл суссылтап о̄лы, мо̄т ма̄т ма̄ньщи ма̄хум пе̄с пормасаныл суссылтавет. Ма̄ньщи маснутыт ос пормасыт 2000 та̄л па̄сныл суссылтаӈкве о̄вылтаве̄сыт. Ты э̄лыпа̄лт музейт рӯпитан хо̄тпат тот о̄лнэ ма̄ньщит палт ялантасыт, о̄лупсал пӯмщалахтасыт ос пе̄с пормасыт ханищтасаныл, то̄ват музейн тотсаныл. Ань тот археологический суссылтап ва̄рвес, Советский районт хо̄нтым ра̄кт, ке̄р пе̄с пормасыт тот о̄лэ̄гыт. Музейт рӯпитан ма̄хум округувт о̄лнэ музеит ёт ва̄йхатэ̄гыт ос рӯпитэ̄гыт. Са̄всыр конференцият ос мо̄т ханищтан тэ̄лат о̄лыглан порат та̄н о̄с во̄виньта̄лавет. Тот рӯпитан хо̄тпат та̄нки музеяныл урыл нэ̄пакыт хансэ̄гыт, хансум научный статьяныл ос нэ̄пакыг щё̄питыяныл. Ань музей акв та̄рвит о̄ньщи, рӯпитан хо̄тпа тот а т то̄ в ы л х а т ы . Ма̄ньлат ма̄хум тамле рӯпатал щар ат пӯмщалахтэ̄гыт. Надежда Михайловна Гисс, музей кӯщай нэ̄, ла̄выс, ань ма̄хум тот мощща олныл ойтавет ос тыима̄гсыл нэ̄мхотьют рӯпитаӈкве ат ка̄сащи. Ты коныпал о̄с акв та̄рвит музей пе̄с колт о̄лы. Ты э̄лыпа̄лт тот садик о̄лыс. Тамле колт са̄всыр пе̄с пормасыт о̄ньщуӈкве, ӯргалаӈкве та̄рвитыӈ. Кӯщай нэ̄ ла̄вме щирыл, музей йильпи колыл ке ӯнттувес, то̄нт та̄н са̄всыр йильпи суссылтапыт ва̄руӈкве ве̄рмынувыт, са̄внув ма̄хум тув во̄виньта̄лнувыт. Ос тамле ёмас йильпи музейколн, э̄рыӈ, ма̄ньлат хо̄тпат рӯпитаӈкве ёхтынувыт. 1053 2013.06.07. Анна АЛГАДЬЕВА Ня̄врамыт йӣвыт ӯнттысыт. Мо̄лты та̄л па̄сныл Хулюмсӯнтыӈ ня̄врамыт ханищтахтын та̄л оигпан ляпат йӣв ӯнттуӈкв патсыт. Ты ва̄рмаль кастыл са̄ртын та̄гыл щё̄питахтэ̄гыт. Манырсыр йӣв, хоты ма̄н ӯнттуӈкв потыртахтэ̄гыт. 9 ос 11 классыт ханищтахтын ня̄врамыт ка̄сыӈ торгыл ля̄мйив, пащарйӣв ман ха̄льпыгрищ ӯнттэ̄гыт. Мо̄т классыӈ ня̄врамыт хо̄ӈха ка̄сащи, аква ман китыг йӣв аквъёт ӯнттэ̄гыт. Йӣваныл па̄вылкан лё̄х по̄хан ӯнттыяныл, та̄раныл ке вуйхатэ̄гыт – ёмщакв яныгмаӈкв патэ̄гыт, тӯяг пил лӯптал щё̄риявет, па̄вылканув нё̄тнэг паты. 2 «А» классыт ханищтахтын а̄гирищит школа по̄хыт акв ха̄льпыгрищ ӯнттысыт, хорамыӈ то̄рса̄лмыл нэ̄гсаныл. То̄рса̄лманыл нэ̄гманыл порат пуссын акв номт о̄щсыт – мо̄тыт та̄л, таквсы ханищтахтын та̄ланыл, та̄нки школанылт вос о̄вылтыяныл. Ты та̄л палыт ня̄врамыт ла̄кква ма̄т ханищтахтасыт, халанылт торыӈ ат ва̄щинтахтыгласыт. Аквъёт акв колт пуссын самт о̄лэ̄гыт. Йӣв ӯнттум хо̄талувт мощнув ащирм во̄тыӈ хо̄тал о̄лыс, таима̄гыс о̄выл классыт ханищтахтын ня̄врамыт та хо̄тал йӣв ат ӯнттысыт. Та̄н я̄ӈк на̄тнэ э̄тпос 21 хо̄талт ущ акванатыглаве̄сыт. Ущта ёрыӈ номтыл пуссын ве̄траӈ, ке̄рма̄нтыӈ та̄гыл школа по̄хын ёхтысыт. Йӣвыт ӯнттынэ̄ныл э̄лыпа̄лт 7 ос 8 классыт ханищтахтын ня̄врамыт о̄влэ̄т ӯльпат, таргыт урыл потыртасыт. Хумыс ос ман палыт йӣв яныгми, маныр во̄рныл ва̄раве потыртасыт. Тувыл аквъёт, акв ё̄рыл 19 ма̄нь ӯльпа школа пӯсас кӣвырт ӯнттысыт. Рущ мир халт тамле ла̄ттальпи о̄лы: «Акв йӣв ке ӯнттэ̄гын, То̄рум наска̄ссыг ат о̄лэ̄гын». Ёмас ва̄рнэ ва̄рмаль – кос хунь э̄рнэ ва̄рмаль. Ва̄им, ня̄врам ка̄тыл ӯнттым йӣвыт та̄раныл ёмщакв вуйхатэ̄гыт ос янгыг, та̄кыг э̄лаль яныгме̄гыт. Ня̄врамыт сыманылт, номтанылт ты ва̄рмаль ма̄кыг хульты ос о̄лнэ ма̄ныл э̄руптаӈкв, ма̄вит, во̄р сыстамыг о̄ньщуӈкв патыяныл. 1053 2013.06.07. Галина КОНДИНА Та̄л сыс маныр ва̄руӈкв ханищтаве̄сыт. «Лылынг союм» нампа колн ялантан ня̄врамыт та̄л сыс маныр ва̄руӈкве ханищтаве̄сыт, таи суссылтан ма̄гсыл та̄н я̄ӈк на̄тнэ э̄тпос ва̄т нупыл хо̄тыт хо̄талт пуссын тув атыглаве̄сыт. Кол тӣвырн хунь щалтэ̄гын, та̄ра ка̄салылын манса̄вит ня̄врам тот ханищтахтэ̄гыт, таса̄вит нё̄тнэ рисункат та̄н по̄слумыт. Норт онтсыл са̄всыр о̄льпыл по̄слым хурит ханэ̄гыт. Ня̄врамыт мо̄йтаныл тащир о̄вылтавес. Та̄н палтаныл Евтя намп а х а н т ы х у м А̄с я̄ныл тув аквтупмат ма̄ньхапыл товантас, ма̄ньхапыл тув ёхтыс. А̄гирищитпыгрищит титыглыянэ: «Ам хӯлыгласлум, тыт ня̄врам ы т с а к а ё м щ а к в йӣквуӈкве, са̄ӈквылтаӈкве ха̄сэ̄гыт. А̄нумн суссылтэ̄н. Ам тах хунь юв, амти ма̄мн, ёхтэ̄гум, тот о̄лнэ ма̄хманумн потыртэ̄гум. А̄сн са̄в я̄квет, посалыт овтэ̄гыт, та̄н ва̄таныл хосыт ханты, ма̄ньщи мир о̄лэ̄гыт, ӯсыӈ ня̄врамыт маныр ха̄сэ̄гыт – та̄нанылн хӯнтлаӈкве сака пӯмыщ паты». Яты, о̄влэ̄т Е. Комарован ханищтан ма̄нь а̄гирищквет «Эвие» йӣкв йӣквсыт. Екатерина такви фортепианал ёнгыс, Алексей Рещиков са̄ӈквылтапыл са̄ӈквылтас. Тот соссаӈ а̄гирищквет коныпал мо̄т мирыл о̄лнэ а̄гирищиг о̄с татем ёмщакв ханьщувламы̄г, маттем та йӣкващласыт. Та а̄гирищквет юипа̄лт Алексей Рещиковын ханищтан ня̄врамыт са̄всыр та̄ныт са̄ӈквылтасыт. Та̄н ансамбляныл «Торые» намыл пиным о̄лы. Лиза Посохова «Куккук» ос Алика Воеводкина Ангашупов о̄йка та̄нэ та̄рыгсыплувйӣвыл са̄ӈквылтасы̄г. Акв та̄н хӯрум са̄ӈквылтапыл ос тит та̄рыгсыплувйӣвыл са̄ӈквылтасыт. Ты са̄всыр та̄ныт аквторыг ёнгысаныл, рущ щирыл «музыкальная сюита» ла̄ваве. Владимир Меров ханищтан пыгрищаквет а к в а л а к в а л с а̄ ӈ квылтаӈкве во̄виньтаве̄сыт. Пуссын ма̄щтырыг ха̄сэ̄гыт, тулё̄вланыл татем ты молях капыртэ̄гыт. Арсентий Ли ос Игорь Хромов ня̄лыт ёт хум йӣкв йӣквсы̄г, Владимир Савельевич ты мус койп ра̄тыс. Любовь Федоркив (Молданова) ёт ханты ла̄тыӈ ханищтан ня̄врамыт Вова Хромов, Миша Хромов А̄с ла̄тӈыл стихотвореният ловиньтасыт, Маша Федоркив «Тёйтёй, рапщрапщ» ма̄нь ня̄врам ёлоилтан э̄рыг э̄ргащлас, ты мус рущ куклатэ ка̄тыт нёвитас. Маша Гришкина «Кӯринька» такви э̄ргыс ос йӣквыс. А̄ги щар ма̄к пе̄с ма̄хманув хольт ха̄снэ̄тэ. Щар яныг кӯщаиг тот Татьяна Вадичупова о̄лы. Тав пуссын а̄гирищитпыгрищит грамотатыл мӯйлуптасанэ, то̄ват хӯрмахылнилахыл мисанэ. Та̄н са̄в ма̄т ханищтахтуӈкве а̄лымасыт, ла̄тыӈ ханищтасыт, по̄слысыт, сакныл хорамыт хартсыт, са̄ӈквылтасыт ос йӣквсыт. Татьяна Савельевнан ос тот рӯпитан хо̄тпатын та̄н ёмас ӯщлахтын хо̄талытыл ла̄вве̄сыт. Тув сыс ёмщакв вос ӯщлахтэ̄гыт, та̄ксарыг, ё̄рыг вос е̄мтэ̄гыт ос таквсы аквт ох с ы м ы ӈ ы щ в о с ханищтахтэ̄гыт. Ща̄нита̄щит пӯмащипа ла̄тӈыӈ пищмал мисанэ, ня̄врамыт ка̄сыӈ хо̄тал тув тотыглыяныл, ты та̄н ё̄раныл хосыт ня̄врамыт са̄в ва̄ӈкве ос ха̄суӈкве патэ̄гыт. Юио̄вылт Татьяна Савельевна пуссын ка̄сащан хо̄тпат «Кӯринька» йӣквуӈкве во̄всанэ. Вероника Мумракова «Рябиновый пир» А. С. Тарханов рущ ла̄тӈыл хансум стихотворение ловиньтастэ. Та̄н нупыланыл сунсуӈкве сака ка̄сыӈ о̄лыс. Та̄н э̄рыӈ хуньт ёмас артистыг манос ка̄тыл по̄слын, м а̄ щ т ы рл а н хо̄т п а г е̄мтэ̄гыт ос э̄лаль о̄лнэ посыӈ хо̄тал хо̄нтэ̄гыт. Ня̄врамыт та̄л сыс ка̄тыл ма̄щтырлам пормасаныл пуссын тот кумыска норма тармыл пиным о̄лэ̄гыт. Мӯй ма̄хум ос ща̄нита̄щит маттем о̄щатахтыглым тот та сунсыглахтасыт. Ня̄врамыт ёт тот са̄в ханищтан хо̄тпат рӯпитэ̄гыт. Ма̄ньщи ос ханты ла̄тӈыг ня̄врамыт Ольга Норова (Анямова) ос Любовь Федоркив ёт ханищтэ̄гыт. Са̄ӈквылтапыл, нарсъюхыл са̄ӈквылтаӈкве, хум йӣквыт йӣквуӈкве пыгрищит Алексей Рещиков ос Владимир Меров ханищтыянэ̄н. А̄гирищквет Екатерина Комарован о̄выл та̄л йӣквуӈкве ос э̄ргуӈкве ханищтавет. Ты коныпал са̄в ня̄врамаквет сакныл са̄всыр пальсакыт, ка̄тсор хорамыт хартуӈкве ха̄сэ̄гыт. Ты ёмас ва̄рмальн та̄н Евгения Вьюткина, Галина Молданова, Раиса Гаврильчик (Анямова) ёт ханищтахтэ̄гыт. Ня̄врамаквет туи сыс ёмщакв вос ӯщлахтэ̄гыт ос То̄рум ёт, О̄тыр ёт со̄тыӈыг вос яныгме̄гыт. 1053 2013.06.07. Людмила ТЕТКИНА А̄гирищкветпыгрищаквет тот ӯщлахтуӈкве ӯравет. Югра янытыл туи пора сыс 468 ма̄ньщи, ханты ос ё̄рн ня̄врамыт этностойбищат, этноцентрыт ос этнолагерит ӯщлахтуӈкве ӯравет. Ня̄врамыт тот ща̄нь ла̄тӈыл потыртаӈкве, са̄всыр щирыл ма̄щтырлаӈкве, йӣквуӈкве, э̄ргуӈкве ос са̄в мо̄т пе̄с йис ва̄рмалитын ханищтавет. Ты та̄л ма̄ньполь э̄тпост туп 15 хо̄тпа та̄нки хансум 16 проектаныл Ханты-Мансийск ӯсн ке̄тыгласаныл. Мо̄лты аквты порат 29 проект халт щар ма̄к ёмас ӯщлахтын ма̄т пе̄рияве̄сыт. Ты та̄л Кондинский, Белоярский, Ханты-Мансийский, Ха̄льӯс районытыт ос Урай ӯст ня̄врамыт тах ӯщлахтэ̄гыт. Ма̄хум та̄нки проектаныл мӯсхал щирыл вуянтасаныл ос олныл майве̄сыт. Ты та̄л округ Думат, «Центроспас-Югория», образование Институтыт, ЮГУт, «Югра лылыеп» нампа организацият ос культура департаментыт рӯпитан ма̄хум жюрихо̄тпаг рӯпитасыт. Та̄н касыл щирыл лов хо̄тпа грантолныл мисаныл. «Комплексный проект» нампа номинация: Белоярский район Касум па̄вылт «Нумсанг ёх» этностойбищат кит сменат 50 ня̄врам тах ӯщлахтэ̄гыт. Кондинский район Кондинское па̄вылт «Ня̄врамыт ӯс» этнолагерин хо̄т сменан 90 ня̄врам во̄виньта̄лавет. «Трудовой проект» нампа номинация: Ха̄льӯс район Я̄сунт па̄вылт «Ма̄нь Ӯскве» этностойбищат кит сменат 60 ня̄врам ӯщлахтуӈкве патэ̄гыт. Белоярский район Касум па̄вылт «Пяшие» этноплощадка акв смена ва̄ри, тав 30 ня̄врам ма̄гсыл тах рӯпиты. Ханты-Мансийский район Кышик па̄вылт «Ка̄ркам ёш» стойбищат 25 а̄гирищпыгрищ акв сменан тах ёхталэ̄гыт. «Историкокраеведческий проект» нампа номинация: Урай ӯст «Юрсил» ӯщлахтын ма̄т кит сменан 50 ня̄врам во̄вавет. «Специальный проект» нампа номинация: Белоярский район Касум па̄вылт «Нумсанг ёх» этностойбищат акв сменат 35 ня̄врам ӯщлахтуӈкве ве̄рме̄гыт. Х а̄ л ьӯ с т п о̄ х а т «Со̄рни сэ̄й» ӯщлахтын ма̄т хӯрум сменан 78 ня̄врам ӯравет. «Спортивнооздоровительный проект» нампа номинация: Ханты-Мансийский район Луговской па̄вылн 20 ня̄врам акв сменан во̄виньта̄лавет. Белоярский район Касум па̄вылт 30 ня̄врам ма̄гсыл кит сменаг рӯпитаӈкве патэ̄г. Культура Департаментныл ке̄тым потыр ма̄ньщи ла̄тӈыг Людмила ТЕТКИНА хансыстэ. 1054 2013.06.21. Светлана РОМБАНДЕЕВА Ёмас тэ̄лат урыл потыртэ̄н. Округ губернаторув Наталья Комарова ня̄врамыт матарыл акваг нё̄тумта̄лыянэ. Та̄наныл янытлан мирхал хо̄талт, лӯпта э̄тпос о̄выл хо̄талэ̄т, тав о̄с а̄гирищитпыгрищит са̄всыр мӯйлупсатыл мисанэ. 2013 та̄л округув янытыл ёмас тэ̄ла ва̄рнэ та̄лыг намаявес. Тувыл ань ля̄ххал тотнэ ма̄хум ка̄сыӈ ёмас тэ̄ла урыл хо̄та̄ти акваг вос потыртэ̄гыт. Телевизор хосыт са̄в ёмас передачат суссылтавет, хумус ма̄хум ня̄врамытын ман а̄гмыӈмосыӈ хо̄тпатын нё̄тэ̄гыт. Ма̄к ёмас передачат тах 2014 та̄лт та̄л котиль э̄тпосэ̄т ла̄вавет ос ты передачат ва̄рнэ ма̄хум янытлавет, мӯйлупсатыл мӯйлуптавет. Округувт 15 районыт ты ёмас ва̄рмаль ва̄руӈкве ка̄сащасыт. Ха̄льӯс район кӯщаит ань районаныл ялпыӈ хо̄талэ кастыл 420 са̄виттем ёмас тэ̄ла ва̄руӈкве ла̄всыт. Интернет щирыл «Карта добрых дел Югры» нампа программа хосыт ма̄хум халанылт потраме̄гыт ос румалахтэ̄гыт, хотьют ве̄рми, нё̄тмил ӯрнэ хо̄тпан нё̄тумты. Ты э̄рнэ программа хосыт са̄в хо̄тпа о̄лупсаныл урыл хассыт. Округ кӯщаюв ка̄сыӈ пищма ловиньтастэ, ка̄сыӈ хо̄тпан нё̄тыс, мӯйлупсат мӯйлуптас, са̄в ёмас, сымыӈ ла̄тыӈ ла̄выс. Губернатор прессслужбаныл ке̄тым ля̄ххал ма̄ньщи ла̄тӈыл С. Ромбандеева толмащластэ. 1054 2013.06.21. Светлана РОМБАНДЕЕВА Кӯщаянув тох ты уральтаӈкве патыянув. Лӯпта э̄тпос атыт хо̄талэ̄т Ханты-Мансийск ӯст «Югра» телекомпания колт ля̄ххал тотнэ ма̄хум акванатыглаве̄сыт. Москва ӯсныл Россия Общественный палатат рӯпитан нэ̄ Елена Анатольевна Лукьянова ёхталас. Тав МГУ юридический факультет кафедратэ̄т профессорыг о̄лы. Тувыл тув о̄с акв нэ̄ во̄виньта̄лвес, Наталья Рудегеровна Маслова. Тав ань округ Общественный палатат рӯпиты, ты коныпал Томский область кӯщай хумн нё̄тым рӯпиты. Акв хум о̄с о̄лыс, Виктор Владимирович Заболоцкий, тав округув Общественный палатат кӯщаиг о̄лы. Ты нэ̄г ос хум ля̄ххал тотнэ ма̄хум ёт ань округув янытыл электронный демократия тэ̄ла урыл потыртасыт. Акв журналист хум китыглахтас: «Ань Россия янытыл ка̄сыӈ областьт ос округт ма̄хум акв йильпи хащта̄л тэ̄лаханищтэ̄гыт, ла̄ваве электронный п р а в ительство. Ос «ГосМенеджмент » журналт тамле ля̄ххал хансыма, ань ма̄н округув ты хащта̄л ва̄рмаль ханищтан ма̄т ма̄нь таквс э̄тпост 2012 та̄лт 21 местан хансым о̄лыс, ос та̄л котиль э̄тпост 2013 та̄лт 41 местан хасвес. Аман манрыг тох? Ма̄н округувт матыра̄ти пуссын о̄лы, олнта̄л о̄с сака ат савалэ̄в». Профессор нэ̄ Е. А. Лукьянова ла̄выс: «А̄ти, ты на̄н лю̄льсаӈ о̄лнэ̄н ма̄гыс хунь, округынт о̄лупсан ёмас, то̄ва областит ма̄хум сака нусаг о̄лэ̄гыт. Нас ань са̄в ма̄т тамле электронный демократия тэ̄ла ёт ма̄хум рӯпитаӈкве патсыт. Са̄в хо̄тпа ханищтахтэ̄гыт электронный правительство нампа йильпи программа ёт рӯпитаӈкве. Тувыл ма̄хум интернет хосыт па̄выл манос ӯс кӯщаяныл ёт вос потыртэ̄гыт, матыр тэ̄ланыл урыл таве̄н вос хансэ̄гыт. Ань кӯщаяныл хумус рӯпиты, ёмащакв ман лю̄льсаӈ, ты урыл тув о̄с вос хансэ̄гыт. Кӯщаянылн ат те нё̄тавет, ат те хӯнтлавет, тав тах аквта та̄ра рӯпататэ̄ныл по̄хан минуӈкве ла̄ваве. Па̄выл ман ӯс кӯщаит ань тох номсуӈкве ханищтахтэ̄гыт: та̄н нас кӯщаит хунь, та̄н мирн пе̄риим хо̄тпат, ос мир ма̄гыс вос рӯпитэ̄гыт. Рӯпатаныл хумус ва̄рияныл, пуссын на̄ӈки. Тувыл ка̄сыӈ хо̄тпа кӯщае урыл пищмало̄мт хансы, электронный адрес хосыт ке̄тасаптытэ, пищматэ аквта щё̄с тув та ёхтыгпи. Ма̄хум ва̄тихал матыр ла̄вуӈкве ос кӯщаяныл урыл пилта̄л потыртаӈкве патэгы̄т те, то̄нт пуссын тах на̄ӈки, кӯщай хо̄тпа мӯсхалыг рӯпиты ман а̄ти. Кӯщай то̄пал те, мо̄т мӯсхал хо̄тпа пе̄рияве, то̄нт о̄лупса ёмаснувег е̄мты». Н. Р. Маслова ос тох потыртас: «Ат та̄л сыс молях рӯпитан интернет ка̄сыӈ ма̄нь па̄вылт тах ва̄раве. Компьютер ва̄нэ ма̄хум тах ка̄сыӈ ма̄нь па̄вылн ялантаӈкве патэ̄гыт, яныг ман ма̄нь ма̄хум пуссын ханищтаӈкве э̄ре̄гыт. Та̄н хунь ханьщувлэ̄гыт, интернет та̄рапаттыяныл, о̄с тах пищма хансуӈкве ве̄рме̄гыт. Хоты са̄ккон та̄нанылн ат те мӯсты, ты урыл о̄с хансуӈкве э̄ри. Тувыл тах ты электронный демократия щирыл пуссын на̄ӈкуӈкве паты, хоты са̄кконыт мирн э̄ре̄гыт. Кӯщаянув тах туп ма̄к э̄рнэ са̄кконыт пирмайтаӈкве патэ̄гыт». 1054 2013.06.21. Галина КОНДИНА Я̄нув э̄рыӈ хӯлыӈыг е̄мтэ̄гыт. Ма̄н округувт Ханты-Мансийск ӯст 2011 та̄л па̄сныл Иртыш я̄ ва̄тат Югорский рыбоводный завод рӯпиты. Тот по̄рныл ма̄нь хӯлыт янмалтавет. Мо̄лал щар о̄выл щёс лӯпта э̄тпос са̄тыт щислат тит та̄л янмалтым хӯлыт я̄н та̄ртве̄сыт. Ты 2 со̄тыра 400 сӯкыр ос 2 со̄тыра 700 нялк хӯл. Ань завод акв цехе туп рӯпиты, мо̄т колнакыт иӈ ва̄равет. Кӯщаит ла̄ве̄гыт, 2015 та̄л мус тав янытэ̄тыл ӯнттын ма̄ныл а̄стлаве. Ос ка̄сыӈ та̄л тах 50 миллион са̄вит са̄всыр ма̄нь хӯлкве я̄н та̄ртуӈкве патаве, ты халт 1, 5 миллион супыгхӯл та̄ртаве. Василий Алексеевич Сысуев тот кӯщаиг рӯпиты, тав ла̄выс: «Ты туп о̄выл ма̄нь ӯсыл, ты яныг ос э̄рнэ тэ̄ла ма̄гыс иӈ са̄в рӯпата ва̄руӈкве э̄ри. Моще̄ртын ма̄н ма̄нти нэ̄паканув государственный касылын те̄туӈкве ве̄рмиянув, тувыл э̄рыӈ квотал миӈкве патаве̄в. Квота щирыл заводув ёл ат по̄илттаве, акваг рӯпитаӈкве паты». Природный ресурс ос несырьевой сектор экономика Департаментныл те̄тым ля̄ххал ма̄ньщи ла̄тӈыл Галина КОНДИНА хансыстэ. 1054 2013.06.21. Людмила ТЕТКИНА Ка̄сыӈ хо̄тпа тав палтэ ялуӈкве ве̄рми. Ханты-Мансийский округувт 2011 та̄лныл акв йильпи кӯщай рӯпитаӈкве паттувес, Александр Сидоров тав ань «Уполномоченный по правам человека» хо̄тпаг рӯпиты. Тав палтэ ка̄сыӈ э̄лумхо̄лас такви та̄рвитыӈ ва̄рмалянэ ёт ялуӈкве ве̄рми. Ты э̄лыпа̄лт хум са̄в та̄л Сургут ӯс кӯщаиг рӯпитас. Ля̄ххал тотнэ ма̄хум ёт хо̄нтхатыгламе̄т тав 2012 та̄л сыс ва̄рум рӯпататэ урыл потыртас. Кӯщай хум та урыл ла̄выс, ань Россия янытыл ка̄сыӈ округт ман областьт тамле хо̄тпа рӯпиты. Тувыл таи лю̄ль, та̄нанылн прокуратура, сут, полиция ос мо̄т организацият ёт хумус рӯпитаӈкве э̄ри, са̄кконыт мӯсхалыг ат хасве̄сыт. Тыима̄гсыл то̄ва организацият ёт та̄нанылн рӯпитаӈкве сака та̄рвитыӈ. 2012 та̄л сыс ты кӯщай палт 400 арыгкем э̄лумхо̄лас та̄нки та̄рвитыӈ ва̄рмаляныл ёт ёхталасыт. Ты халт щар са̄в ма̄хум о̄лнэ коланыл урыл потыртасыт. Акв ще̄мья общежитияныл коння̄влаве, мо̄таныт субсидияолн винэ ма̄гсыл очередин ат хансавет. Рӯпатаныл по̄хын ке̄тым, сутытым ма̄хум та̄нки ва̄рмаляныл урыл таве̄н пищма о̄с хансэ̄гыт. Кӯщай хо̄тпа ла̄выс, ос таи лю̄ль, э̄лумхо̄лас ёхты, нё̄тмил во̄ви, аквтыщёс таве̄н нё̄туӈкве тав о̄с ат ве̄рми. О̄влэ̄т акв кӯщай, тувыл мо̄т кӯщай палт пищма хансы, тувыл акв э̄тпос сыс пищма ювле ӯруӈкве э̄ри. Тыщирыл са̄в хо̄тал ювле та хульты, хо̄тпа та ӯрхаты. Та та̄л сыс янгыщ Сургут ӯсныл щар са̄в э̄лумхо̄лас пищма хансыгласыт, ос Покачи ӯсныл щар мощща хо̄тпа Александр Сидоров палт та̄рвитыӈ ва̄рмаляныл ёт ёхталасыт манос пищма хассыт. Кӯщай хум китыглавес, ма̄ньщи ос ханты ма̄хум тав палтэ нё̄тмил во̄вуӈкве ёхталасыт ман а̄ти. Тав ювле ла̄выс: «Пе̄с йис ма̄т о̄лнэ хантыт тав палтэ пищма хансыгласыт. Та̄н нефтяникыт ёт воритотэ̄гыт. Ма̄во̄й но̄хвинэ ма̄хум хантыт о̄лнэ ма̄т рӯпитасыт, соссаӈ ма̄хум туп пропускнэ̄пак щирыл тув та̄рата̄лсаныл. Тувыл, улпыл, хотёрувлахтасыт, такем кӯщайлахтуӈкве тот патсыт, ханты ще̄мья та̄нки о̄лнэ ма̄нанылн та̄ртуӈкве ат патсаныл. Ма̄н ты компания ёт потыртасӯв, ань пе̄с йис ма̄т о̄лнэ ма̄хум са̄всыр нэ̄пак та̄л та̄нки о̄лнэ ма̄нылн ялантэ̄гыт. О̄с акв ханты пыг ам палтум ёхталас, тав 18 та̄лэ то̄влыс. Во̄р па̄вылт о̄лы, писаль о̄щнэ ма̄гсыл разрещениенэ̄пак ва̄руӈкве таӈхыс. Таи пӯмащ, хунь ня̄врамыг о̄лыс, тамле нэ̄пакыл майвес, писалил па̄тлуптаӈкве ро̄выс. Ань янгыг е̄мтыс, ты нэ̄пакыл ат миве. Ос та ма̄т рӯпитан полиция ёт хоса потыртасув, рӯпитасӯв, ань пыг ты нэ̄пакыл ва̄рвес. 1054 2013.06.21. Светлана РОМБАНДЕЕВА Савалап ня̄врамаквет нё̄тавет. Лӯпта э̄тпос аквхуйпловит хо̄талэ̄т ля̄ххал тотнэ ма̄хум ос Елена Владимировна Немчинова савалап ня̄врамаквет урыл потыртасыт. Елена Владимировна Югра ма̄вт мирн нё̄тнэ Департаментыт кӯщай ва̄ӈын нэ̄г рӯпиты. То̄ва ня̄врамыт ща̄ньа̄щ о̄ньще̄гыт кос, ос юн мӯсхал щирыл ат янмалтавет, нэ̄мхотьютн ат уральтавет, ӯльнаг ха̄йтэ̄гыт. Ты а̄гирищитпыгрищит ос савалапыг хультум ня̄врамыт аквъёт о̄лэ̄гыт, государствавн аквте̄м нё̄тавет, пуссын о̄лнэ колыл мивет, маставет, тыттаветайтавет. Елена Владимировна китыглавес: – Округувт ня̄врамыт хумус нё̄тавет? – Ма̄н Югра ма̄вт савалап ня̄врамаквет манос ща̄ньа̄щныл хотвуим ня̄врамаквет янгыщ колта̄глытыт о̄лэ̄гыт. Ты тэ̄ла щирыл ма̄н округув Россия янытыл атыт местат хансым о̄лы ань мо̄ртым ма̄т о̄лнэ республикат халн хансыма. Та ма̄т май туп мо̄рсыӈ порат ня̄врам ща̄ньа̄щта̄л хульты. Округувт ня̄врам о̄щнэ колт ань 383 ня̄врамакве о̄лэ̄гыт. Та̄н о̄с пуссын колта̄глыт о̄ л у ӈ к в е т а ӈ х е̄ г ы т, ӯрхатэ̄гыт, э̄рыӈ хотты хо̄тпан вивет. Колта̄глын о̄лмыгтанувыт, ща̄ньа̄щ о̄щнувыт. Горноправдинск па̄вылт ос Ха̄льӯст ня̄врам о̄щнэ колыг лаппантвесы̄г. Тот о̄лум ня̄врамыт пуссын ще̄мьятын вуйве̄сыт. Ань савалап колт хультум а̄гирищитпыгрищит ще̄мья хольт о̄лэ̄гыт, колнакт акв ман кит ня̄врам тӯп о̄лы. Та̄н ань ще̄мьян винэ̄ныл ма̄гсыл ма̄н сака яныг рӯпата ва̄ре̄в. Тувыл ос тамле йильпи ва̄рмаль номылматсув: ня̄врамыт ань пе̄рнаӈ а̄щ ман пе̄рнаӈ ща̄нь вос о̄ньще̄гыт, та̄н палтаныл юв вос ялантэ̄гыт. Пе̄рнаӈ ща̄ньа̄щаныл ёт матыр ва̄руӈкве ве̄рме̄гыт, щаквщуӈкве манос матыр рӯпата ва̄руӈкве. Тох ла̄щалла̄щал о̄луӈкве ханьщувлэ̄гыт. Ма̄ныр ла̄вуӈкве, рӯпатав нас тох тай ёмас щирыл мины, ос туп таи та̄рвитыӈ: яныгнув ня̄врамыт, 12-18 та̄л яныт, ще̄мьятын сака ат вивет. Ма̄хум акваг ма̄ньнув ня̄врам виӈкве таӈхе̄гыт манос ущ самын патум ня̄врам. То̄ва ма̄ньта̄гыл янмалтаӈкв таӈхитэ, ань а̄ти тав самынпаттыстэ, та̄ра ул вос паты. Округувт сака са̄в хо̄тпа савалап ня̄врам янмалтанувыт, ос ущты ла̄всум, янгыщ ущ самын патум ня̄врам янмалтаӈкве ка̄саще̄гыт. Тувыл ос округувт тамле ня̄врам мощща, ма̄хум Россияв янытыл мо̄т ма̄т а̄гирищит ос пыгрищит выгыт, тыг тотыяныл. Мо̄лты та̄л округувн 322 ня̄врам тотвес. Мо̄т ма̄ныл ня̄врам тотуӈкве ро̄ви, са̄кконт ты урыл хансым о̄лы. – Ня̄врамыт ань мо̄т хащта̄л хо̄тпан вивет, янмалтавет, ос тох о̄лыглы: тав та колта̄глыт лю̄камтаве манос нас ювле тотаве? Ювле атхунь тотыглавет. Мо̄лты та̄л 36 ня̄врам ювле тотве̄сыт, ты э̄лыпал та̄лт ос 42 ня̄врам. Ма̄н ка̄сыӈ тамле колта̄гыл ёт потыртэ̄в, китыглыянув, манрыг аквъёт о̄луӈкве ат ве̄рме̄гыт. Тувыл та̄н халанылт воссыг ат те кантлэ̄гыт, лю̄ль номт ат те о̄ньще̄гыт, о̄с э̄лаль аквъёт та о̄лмыгтэ̄гыт. Тох о̄лыглы, хунь ня̄врам кол т а̄ г ы л т с а̄ в т а̄ л о̄лыс, яныгмас. Ка̄сыӈ колта̄гылт маныр ат о̄л ы гл ы , н я̄ в р а м ы т ща̄ньа̄щаныл ёт халмалтахтыглэ̄гыт, ля̄втыгла̄лэ̄гыт, тувыл о̄с э̄лаль та о̄лэ̄гыт. Тыт о̄с аквтох. То̄ва ня̄врам пуӈк а̄гм о̄ньщи, мори капырты, ат ве̄ритаптаве, тувыл ювле та тотаве. То̄ванакт ос ща̄нь ман а̄щ а̄гмыӈыг е̄мты, ня̄врам ювле виве. – Хунь яныгме̄гыт, училищат ман институтыт ханищтахтынэ̄ныл порат улпыл о̄с нё̄тавет? – Атхунь нё̄тавет. Стипендия олныл ойтавет, тэ̄нут, маснут ёвтын ма̄гсыл олныл мивет. Э̄лнаӈ 23 та̄л мус туп ойтве̄сыт, ань ос ханищтахтын ма̄ныл а̄стынэ̄ныл мус ойтавет. 18 та̄ланыл то̄влынэ̄ныл юипа̄лт о̄лнэ колыл мивет. Ань ня̄врам колыл миве, ат та̄л уральтаве, хумус о̄лы. Йильпи са̄ккон щирыл, ты та̄лыт сыс тав колэ тыналаӈкве манос мо̄т колын пе̄нтуӈкве ат ве̄рмитэ. Тувыл колэ̄т о̄лнэ̄тэ ат та̄л то̄влы, ёмащакв те о̄лы, рӯпиты, колэ тав нуплэ та паты. Такви нуплэ хансуӈкве ве̄рмитэ, таӈхи те, мо̄т ӯсын пе̄нтытэ манос тыналытэ. Хунь ты са̄ккон а̄тим о̄лыс, ня̄врам колыл миве, хотты ощмарыӈ хо̄тпан уркуптаве, колэ̄ныл хотня̄влаве ос колэ э̄лтыналаве. Тувыл ня̄врам кон та хульты, о̄с та савалы. Округувт ты та̄л, ат э̄тпостем сыс, 180 хо̄тпа о̄лнэ колыл майве̄сыт. Ос тыгыл э̄лаль 400 са̄виттем хо̄тпа о̄лнэ колыл тах мивет. Ты ня̄врамаквет ань государствавн ущпылнэ̄г такыщ ӯргалавет, таима̄гсыл та̄наныл ро̄внэ са̄всыр са̄кконыт та хансэ̄в. Ща̄ньа̄щ ат о̄ньще̄гыт, воссыг ты а̄ти, хоталь щалтэ̄гыт, сакати о̄лнэ кол вос о̄ньще̄гыт. 1054 2013.06.21. Александр ВЬЮТКИН Тэ̄рпит урыл ля̄ххал. Мощ мо̄лалнув Ханты-Мансийск ӯст мир пусмалтан Департаментыт ва̄ӈын кӯщаиг рӯпитан хум Сергей Щукин ос тэ̄рпит уртнэ ма̄т кӯщаиг о̄лнэ нэ̄ Наталья Тайлакова ёт прессконференция о̄лыс. О̄влэ̄т С. В. Щукин олн ойтта̄л тэ̄рпи винэ ма̄хум урыл потыртас: – 2013 та̄лт ты кастыл округ бюджетныл 2 млрд. солко̄ви майвес. Округув янытыл 216 со̄тыра 919 са̄вит хо̄тпа са̄всыр а̄гм о̄ньще̄гыт. Олн ойтта̄л 561 хо̄тпа тэ̄рпил мивет. Та̄н халанылт то̄ва ма̄хум э̄тпос сыс айнэ тэ̄рпияныл тынэ 45 – 50 со̄тыра солко̄ви са̄витыг е̄мты. Тыгыл мо̄т хультум ма̄хум тынэ акв па̄лэ ойтым тэ̄рпил тыналавет. Ты та̄л та̄рвитыӈ а̄гмыт пусмалтан ма̄гсыл Россиявт иӈ акв са̄ккон пирмайтавес. Та са̄ккон щирыл пусмалтан ма̄хум а̄гманыл«Орфанные» нампа ла̄тӈыл ла̄вавет. Тыи мо̄рсыӈ а̄гмытыл 100 со̄тыра мир халт лов хо̄тпа туп тамле а̄гмыл е̄мтэ̄гыт. Россия янытыл 24 са̄всыр та̄рвитыӈ а̄гм о̄лы. Округувт ос 175 хо̄тпа 17 тамле а̄гмытыл пусмалтавет. Ты кастыл округ бюджетныл 173 млн. 480 солко̄ви та̄стувес. Ля̄ххал тотнэ хо̄тпат титыглахтасыт: «А̄гмыӈ хо̄тпа хумус та̄рапаттуӈкв ве̄рмитэ, тав льгота о̄ньщи ман а̄ти? » Ты урыл ювле Н. И. Тайлакова потыртас: – Тыи ма̄гсыл а̄гмыӈ хо̄тпан такви пусмалтан ле̄ккаре̄ныл анализ ос обследование нэ̄пакло̄мтыт виӈкв э̄ри. Ле̄ккарытын сунсаве, та юипа̄лт ущ та̄рапаты, тав олн ойтта̄л тэ̄рпил миве ман а̄ти. Кущай нэ̄ о̄с акв ва̄рмаль урыл титыглавес: «Округув янытыл э̄лын о̄лнэ па̄влыт мус ма̄хум тэ̄рпил хумус тотыглавет ос ле̄ккарыт тув хумус ялантэ̄гыт? – Ма̄н округувт са̄в па̄влыт о̄лэ̄гыт, тув ма̄н та̄л сыс тит щёс ёхталаӈкв туп ве̄рме̄в. Тэ̄лы ма̄шинал, тӯи ос н а̄ и ӈ х а п ы л . Та м л е п а̄ в л ы т ы н м а̄ н х ӯрумнила э̄тпосын то̄вылхатнэ са̄вит тэ̄рпи тотэ̄в. То̄ванакт тэ̄рпи вертолётыл те̄тыглэ̄в. Тыима̄гсыл округувт ма̄хум тэ̄рпил пуссын то̄влавет. Я̄тил ма̄хумаквет, на̄н матыр тэ̄ла ат те торгамтэгы̄н, мир пусмалтан Департаментын ты телефоныг хосыт звонитаӈкве ве̄рмегы̄н: 8(3467) 35-16-94 ос 33-47-09 1054 2013.06.21. Тамара МЕРОВА На̄нки та̄рвит о̄с ул ва̄ре̄н. Округ янытыл ня̄врамыт тэ̄ланыл ӯргалан кӯщай нэ̄ Татьяна Дмитриевна Моховикова журналистыт ёт хо̄нтхатыглас. Тав рӯпататэ о̄вылтыт таи потыртас: – Ам палтум 2012 та̄л сыс 527 нё̄тмил ва̄рнэ ла̄тыӈ ке̄тыглавес. Тот 566 са̄всыр та̄рвит тэ̄латыт нё̄туӈкве э̄рыс. Ты э̄лыпа̄л оигпам та̄лт ма̄хум таса̄вит пищма ат хансыгласыт, то̄нт са̄в хо̄тпа ма̄н рӯпатав о̄вылтыт ат ва̄сыт. Ань ке̄тым пищмат пуссын уральтасанӯв ос 70 процент тув хансым тэ̄лат ма̄кыг та̄рвит о̄ньще̄гыт. Са̄выӈпа̄лэ ма̄хмытын нё̄тмил ва̄рсӯв, хультум тэ̄лат ёт иӈ рӯпитэ̄в. То̄ва ща̄нита̄щит ёт нас потрамаӈкве, мощ ханищтаӈке э̄рыс. Ма̄хум янгыщ кол ат о̄щнэ ма̄гыс ма̄навн хансэ̄гыт. Тыи а̄гмыӈмосыӈ, сакватахтам ня̄враманыл ёт са̄в та̄л кол ӯре̄гыт. Савалап а̄гитпыгыт то̄внакт очередин та̄ра ат хансавет, сыресыр нэ̄пакыт акванатуӈкве ла̄вавет. Тувыл ма̄ньлат ще̄мьяӈ хо̄тпат о̄с ма̄н палтув нё̄тмил кинсэ̄гыт. Ты ма̄хум 35 та̄ланыл то̄влын юипа̄лт колыл минэ программаныл по̄хан вивет. Та̄н субсидия олныл воссыг ат ойтавет ос ня̄врамыӈ та̄гыл кол та̄л та хультэ̄гыт. То̄ват са̄ртыннув кол ёвтэ̄гыт кос, мощщалмощщал та̄нки ойтхатэ̄гыт, ос олннё̄тмил ма̄гыс очередит э̄лаль ӯрхатэ̄гыт. Тувыл аквта та̄ланыл то̄влэ̄гыт, та̄н по̄хан та вивет. То̄нт, ва̄им, та̄нки сэ̄лнэ олныл коланыл ма̄гыс э̄лаль ойтхатуӈкве ат ве̄рме̄гыт. Ань тыг мус та программаныл 1205 ма̄ньлат хо̄тпа по̄хан ты вивет. Тамле хо̄тпат сакати ня̄враманыл ма̄гыс ма̄навныл нё̄тмил кинсуӈкве ве̄рме̄гыт. Мо̄т та̄рвитыӈ лю̄ль ва̄рмалиг тыи ща̄ньа̄щит та̄нки ня̄враманыл лю̄льсаӈ янмалтыяныл. То̄ в н а к н т а̄ н а н ы л н тэ̄ла а̄тим, а̄гияныл манос пыганыл хумус ханищтахтэ̄гыт, хо̄т кон мори ха̄йтыгтэ̄гыт, маныр ва̄ре̄гыт. Тувыл тамле ма̄хмыт ёт рӯпитан хо̄тпанув то̄внакт та̄нки о̄с лю̄льсаӈ потыртэ̄гыт. Э̄рнэ торыг ёмас ла̄тыӈ ат ла̄ве̄гыт, та̄н ётаныл ос ювле ля̄втуӈкве о̄вылтахтэ̄гыт. Пуссын ты тэ̄лат ёт ма̄н акваг рӯпитэ̄в ос та̄наныл уральтым о̄ньщиянӯв. 1054 2013.06.21. Анна АЛГАДЬЕВА Ёвтымсо̄с хум пыг ня̄врамыт. Тыкос ща̄нь ла̄тыӈ ос йис о̄лупса ханищтан урыл са̄всыр сапра̄ни ва̄рыглаве. Ла̄тыӈ ва̄нэ хо̄тпа са̄выг ат е̄мты. Ма̄ньщи ла̄тыӈ ва̄нэ хо̄тпа ос толмащлан хо̄тпа ань сака мощща хультыс. Туп во̄р па̄вылт яныгман ня̄врамыт ща̄нь ла̄тӈыл потыртэ̄гыт. Рущ халт па̄влыӈӯсыӈ ма̄т о̄лнэ ма̄хум аман э̄ссамтэ̄гыт, аман нас ат таӈхе̄гыт та̄нки ла̄тӈанылтыл потыртаӈкв. Тыкос а̄гитпыгыт институтыт ман педагогический колледжит а̄стлэ̄гыт, па̄вланылн рӯпитаӈкв ювле ат ёхтэ̄гыт. Мощ мо̄лалнув Ня̄хщамво̄лиӈ школат рӯпитан хо̄тпа ёт хо̄нтхатыгласум, тав са̄в та̄л ма̄ньщи ла̄тыӈ ханищтан нэ̄г о̄лы. Ань ме̄н потруме̄н э̄лаль ловиньтэ̄лан: – Наталья Константиновна, наӈ хо̄т самын патсын? – Искарский па̄вылт, па̄выл о̄вылт яныг хо̄вт ёлыпа̄лт ма̄ньколт самын патсум. Ты Яныгпа̄выл, пе̄с наме тох о̄лыс. Китхуйплов нот порат сараныт ӯнттум ӯс. Тувыл хо̄тхуйплов нотыт хантытн ӯс хотвуйвес, нёлоловхуйплов нот юипа̄лт ма̄ньщи Искарский ӯсыг патыс. Ань о̄лнэ Яныгпа̄выл я̄ мо̄т па̄лэ̄т ты ӯс о̄лыс. Кит яныг во̄ӈхаг ань мус о̄лэ̄г. Ма̄н ма̄нь поравт тув новхатуӈкв ат та̄ртавесӯв. – Омагна̄тягн хотьютыг, хотыл о̄лсы̄г? –А̄щум Ёвтымсо̄с хум рӯт, Самбиндалов Константин Васильевич о̄лыс. Ща̄нюм Мария Григорьевна Тасманова, Халпа̄выл нэ̄ о̄лыс. Манрыг Ёвтымсо̄с ты ам йис о̄пам, хуньт ты ма̄н ёхтыс, ва̄т нёхс ма̄гыс ты ма̄ ёвтыстэ ос э̄лаль тот о̄луӈкв патыс. А̄щум такви хо̄т лӯнн са мын патыс. Э̄лнаӈ во̄иӈ хӯл алыщлым хоса ма̄ яласасыт, тув палыт хӯл алыщлым я̄ палытыл ва̄нтала̄лсыт. Ма̄н колувт са̄т ня̄врам нила а̄ги, хӯрум пыг о̄лсӯв. Ам питипатта. Яныг яга̄гим Галина Константиновна Алгадьева а̄гипыг ня̄враманэ ёт Хулюмсӯнт па̄вылт о̄лэ̄гыт. Анна Константиновна Самбиндалова Тэ̄к па̄вылт а̄гиянэ, а̄ги ня̄враманэ ёт о̄лэ̄гыт, школат ханищтан нэ̄г рӯпиты. Тимофей Константинович Самбиндалов ща̄нягеа̄щаге о̄лме̄н порат Яныгпа̄вылт о̄лыс, рӯпитас, во̄раяс. Пенсиян патыс, Ня̄хщамво̄льн о̄лмаяс. Елена Константиновна Самбиндалова ще̄мьятэ ёт Хӯлюмсӯнтыт о̄лыс, пенсиян патыс, Ня̄хщамво̄льн о̄лмыгтас, ла̄пкат пирикаскаг рӯпиты. Нэ̄пак хаснэ ма̄хум ма̄ньщи ва̄рмаль урыл матыр китыглаӈкв та̄н палтаныл ва̄тихал ёхталэ̄гыт: Е. Г. Федорова ос В. С. Иванова Санкт-Петербург ӯсныл о̄лнэ учёный нэ̄г, Ханты-Мансийск ӯсныл Т. Д. Слинкина, С. А. Попова, С. С. Динисламова. – Хо̄т о̄лэ̄гын? Хо̄т рӯпитэ̄гын? Ня̄хщамво̄ль па̄вылт о̄лэ̄гум, налыман нупыл кит та̄л школат рӯпитэ̄гум, ма̄ньщи ла̄тыӈ ос литература ханищтан нэ̄г рӯпитанэм хус та̄лыг е̄мтыс. Яныг классыт ос история ХМАО-Югры ханищтэ̄гум. Хӯрум ня̄врам о̄ньще̄гум. Яныг а̄гим такви колылще̄мьял о̄лы. Пыгум о̄с такви а̄ще колт я̄нас о̄лы. Ма̄нь а̄гим амки ётум о̄лы, ты тӯя нёлолов класс а̄стлас. – Наӈки хо̄т ханищтахтасын? – Салехард ӯст библиотекариг кит та̄л ханищтахтасум, ётыл Санкт-Петербург ӯст культурологыг ос ма̄ньщи ла̄тыӈ ханищтан нэ̄г ханищтахтасум. Яныг а̄гим Настям кит ня̄врам о̄ньщи, о̄с школат ханищтан нэ̄г рӯпиты. Хунь ам хотталь командировкан тэ̄ла мус минэ̄гум, ам пе̄нтсылум ма̄ньщи урокыт ханищтаӈкв тав патталаве. – Ма̄ньщи ла̄тыӈ ва̄нэ ня̄врам школат о̄лы? Ня̄врамыт ла̄тыӈ ханищтаӈкв ка̄саще̄гыт? – Ловманкем ня̄врам ма̄ньщи ла̄тӈыл потыртэ̄гыт, ва̄тахкем словарь хосытыл толмащлэ̄гыт. Са̄выӈпа̄лэ ня̄врамыт ла̄тыӈ ханищтаӈкв ка̄саще̄гыт. Хоты ат ка̄сащи, юн улпыл лю̄ль номтыл ма̄ньщит нупыл о̄лэ̄гыт. Ка̄сащан ня̄врамыт са̄всыр районный, окружной конкурсыт, конференцият, олимпиадат касэ̄гыт. О̄выл местат вуйла̄лэ̄гыт. Па̄влыӈ клубколт ма̄ньщи йӣквыл йӣкве̄гыт, э̄рге̄гыт. «Лӯима̄ сэ̄рипос» газетан потырмо̄йт ке̄тыглэ̄гыт. Туи ӯщлахтын порат хӯрум накыл Саранпа̄выл ляпат о̄лнэ «Ма̄нь Ӯсквен» ня̄врамыт ёт ялсум. Тот яныг ма̄хум пе̄с йис ма̄ньщи ва̄рмалит койгалаӈкв ня̄врамытн нё̄тэ̄гыт. Ня̄врамыт ка̄саще̄гыт тамле ма̄т яласаӈкв. Ханты-Мансийск ӯсн 2008 та̄лт атыт финноугорский конгрессын ялсум. Таквсы мо̄т хо̄ныӈ ма̄н Венгриян во̄выглаве̄сум. Ма̄н школаӈ ня̄врамыт ёт В. А. Игошев посла̄лам э̄лумхо̄ласыт урыл потрыт кинсэ̄в, о̄лнэ ва̄рмаляныл урыл та̄н рӯтаныл ёт потрыт щё̄питэ̄в. Хунь потранув са̄выг е̄мтэ̄гыт, музейт рӯпитан хо̄тпат та потрыт щирыл нэ̄пак та̄ратэ̄гыт. Хуньт ты о̄йка по̄слам хуриянэ ла̄тӈыӈыг вос е̄мтэ̄гыт. Игошев о̄йка са̄в щёс Ня̄хщамво̄льн ёхтала̄лас. Ос Сӯйва̄т па̄выл ма̄хум са̄в хурит по̄слым о̄лэ̄гыт, Ханты-Мансийск ӯст музей колэ̄т ты по̄слам хуриянэ ханэ̄гыт. Наталья Константиновна ща̄нягеа̄щаге нотэ̄н палытыл ма̄ньщи щирыл о̄лсы̄г, ма̄ньщи о̄лнэ ва̄рмаль ня̄враманэ̄н хӯлистэ̄н. Таима̄гыс ты Ёвтымсо̄с пыг ня̄врамыт ма̄ньщи ва̄рмаль, ма̄ньщи ла̄тыӈ ёмщакв ва̄ганыл ос э̄лаль ня̄враманылн ханищтыяныл. 1054 2013.06.21. Александр ВЬЮТКИН Лӯи Ня̄рихумит па̄выл о̄лупсатэ. Октябрьский районын ялмум порат, Александр Георгиевич Фомин ёт хо̄нтхатыгласум. Тав Октябрьский район Лӯи Ня̄рихумит па̄вылт миркол кӯщаиг рӯпиты. Хумус ма̄хманув тот о̄лэ̄гыт ос хо̄т рӯпитэ̄гыт, тав потре э̄лаль ловиньтэлы̄н. – Лӯи Ня̄рихумит па̄выл мирколэ Перегрёбный па̄выл нупыл ловиньтахты. Па̄влувт пуссын аквъёт 530 хо̄тпа о̄лэ̄гыт. Тувыл акв па̄лэ соссаӈ ма̄хум. Ань па̄влувт рӯпитан ма̄ мощща. Олн сэ̄лнэ ма̄гсыл та̄н па̄выл янытыл са̄всыр рӯпата ва̄ре̄гыт, яныгпа̄ла хо̄тпатын нё̄тэ̄гыт. Тыима̄гсыл туп рӯпата та̄л о̄лнэ нэ̄пакыт щирыл олнло̄мт выгыт. Тувыл рӯпата та̄л о̄лнэ ма̄хум па̄влув янытыл са̄в. Та̄н халанылт ма̄хум во̄рае̄гыт ос хӯл алыщ лэ̄гыт, ка̄тынпаттын утаныл э̄лаль тыналым олн сэ̄лэ̄гыт. Рӯпатаныл ат пилнэ ма̄хум рӯпата та̄л ат о̄лэ̄гыт. Хотьют савлахты, тав такви рот ла̄щал та о̄лы. Па̄влувт матыр рӯпата те е̄мты, та̄ра хотьют тув та паттаве. Ты та̄л ойттур э̄тпост на̄й харыгтан кол пӯнсаве. Тув атхуйплов ма̄ньлат хум пе̄риясӯв. Пе̄риян ма̄хманув халт тит ханты ос нила ма̄ньщи пыг. Та̄н вина ул вос ае̄гыт, ул вос алхатэ̄гыт ос рӯпитан номтаныл ёмасыг вос о̄лы. Тыима̄гсыл ма̄н та̄наныл пе̄риясанӯв. Ты та̄л па̄влув сыспалт аквхуйплов кварт и р а ӈ й и л ь п и кол ӯнттувес. Йильпи колыл са̄выӈпа̄лэ пе̄с колт о̄лум ще̄мьят тах мивет. Та̄н халанылт ат ма̄ньщи колта̄гыл тув о̄лмыгтэ̄гыт. Ты таквс о̄с ат йильпи о̄лнэ кол ӯнттуӈкв о̄вылтаве. Ма̄н иӈ ат ва̄глув, манса̄вит ще̄мья ма̄гсыл та кол ӯнттуӈкв патаве. Юи о̄ в ы л т Я г р и м мус ялнэ лё̄ӈх урыл потыртасме̄н. Тав ла̄выс: «Ягримныл Лӯи Ня̄рихумит па̄выл нупыл мо̄лты онтолов ве̄рста лё̄ӈх асфальтыл пинвес. Тувыл э̄лаль лё̄ӈхув ма̄нь а̄хвтасыл со̄сантавес ос тувыл та. Тӯяг ос таквсы раквнэ порат ты лё̄ӈх халэ ма̄шинал яласаӈкв щар ат хо̄йхаты, раквыл лё̄ӈхув яныг во̄ӈхаг хотловтаве. Тув палыт Ха̄льӯс район ма̄хум са̄выӈпа̄лэ ма̄н па̄влув ӯлтта яласэ̄гыт. Ты коныпал са̄т хо̄тал сыс Приобье па̄вылныл ма̄шина тотнэ хӯрум яныг паром ма̄н та̄лтувн пӯхталэ̄гыт. Мощ мо̄лалнув ам Е. Д. Айпин палт лё̄ӈхув щё̄питан ма̄гсыл нё̄тмил во̄внэ пищма те̄тыгласум. Ань ӯрхатэ̄в, хунь манырсыр ля̄ххал ма̄навн тав те̄ты. Ты урыл ты Александр Георгиевич ёт потруме̄н о̄лыс. 1054 2013.06.21. Тамара МЕРОВА Тав яныгпа̄ла хо̄тпат пусмалты. Светлана Петровна Парфёнова ёт ме̄н тав рӯпитан ма̄тэ̄т акванхо̄нтхатыгласме̄н. Нэ̄ матумпа̄ла хо̄тпат пусмалты. Ме̄н акв колн аквъёт щалтсасме̄н. Тот Маина Михайловна Ярославцева такке̄тэ о̄лы, тав 1934 та̄лт Кальманово па̄вылт самын патыс. А̄ще ханты, наме Михаил Аптышев о̄лыс, хо̄нтлын ма̄н тотвес, тот порыславес. Светлана Петровна ос такви уре̄тыл таи потыртас: – Ам амки о̄парищ н а м у м В ы н г и л е в а , а̄тям Пётр Егорович о̄с хо̄нтлыс. Ам яныг ще̄мьят яныгмасум. Ма̄н колта̄глувтыл Няхлаӈ па̄вылт о̄лсӯв. Ам школа а̄стламум юипа̄лт Ханты-Мансийскан медучилищан ханищтахтуӈкве минасум. Тот фельдшерыг ханищтахтасум. О̄влэ̄т Хо̄нтаӈ ма̄н рӯпитаӈкве ке̄тыглаве̄сум. Тувыл кит та̄л Саранпа̄выл ляпат Нёро̄йка па̄вылт о̄йкаме̄нтыл о̄лсуме̄н. Нё̄рт о̄йкам ма̄шинал яласас, ам ос ма̄хум пусмалтасум. Тувыл Ягрим па̄вылн ва̄нтлысме̄н. Та па̄вылт ам китхуйплов та̄л о̄с ле̄ккарыг рӯпитасум. Тувыл Ха̄льӯсн о̄лмыгтасме̄н. Ам тот районный пӯльницан рӯпитаӈкве патхатыгласум. Ань са̄т та̄л Ханты-Мансийскат о̄лэ̄гум, тыт «Светлана» нампа колт ле̄ккарыг рӯпитэ̄гум, матумпа̄ла ма̄хмытын нё̄тмил ва̄ре̄гум. Ты рӯпатам а̄нумн мӯсты. Ам ка̄сыӈ хо̄тал яныгпа̄ла хо̄тпат палт ялантэ̄гум ос э̄рнэ торыг пусмалтыянум. Давленияныл сунсыянум, аптекат тэ̄рпил ёвтыянум, уколыл тӯщтыянум, сартхатнэ тэ̄рпил сартыянум ос матыр колсори рӯпата ва̄руӈкве о̄с нё̄тыянум. Та̄н ам ётум ёмщакв потыртэ̄гыт, ам та̄н ётаныл о̄с юртыӈыщ о̄лэ̄гум. Ма̄н акв ляльт сымыӈыщ сунсэ̄в. «Светлана» нампа колувт кӯщаиг Олег Валерьевич Яковлев о̄лы, ос ва̄ӈын нэ̄в наме Ольга Викторовна Шайхудинова. Тэ̄н ёмас сымыӈ хо̄тпаг. Тувыл ты колувт акв ма̄ньщи ле̄ккар нэ̄ о̄с рӯпиты, тыи Людмила Рудольфовна Мерова. Ам ты ма̄хманум пуссын ле̄ккарыт ялпыӈ хо̄талыл янытлыянум ос пуста̄гыл о̄лнэ ла̄тыӈ ке̄тэ̄гум. 1054 2013.06.21. Тамара МЕРОВА Та̄хтыт ла̄кква ма̄н тотве̄сыт. Ханты-Мансийскат «Спасти и сохранить» нампа акция рӯпитам порат ос ты э̄тпос нилыт хо̄талэ̄т о̄с аквты щирыл намтым XVII телефестиваль Борис Лосев нампа ӯскант о̄вылта̄лвес. Ёмас ма̄лтып э̄типа̄лаг мӯй ос ӯсыӈ ма̄хум тув акванатхатсыт. Та̄н ма̄гсыланыл о̄влэ̄т «Хо̄тал» нампа А̄с-угорский театрыт рӯпитан хо̄тпат йӣквсыт ос э̄ргысыт. Са̄тхуйплов та̄л яныт а̄гитпыгыт тыглетувле поргащласыт, йӣквсыт. Ты фестиваль рӯпитаӈкве о̄вылтахтам порат ты ня̄врамыт ущты самын патсыт. Тувыл са̄всыр кӯщаит мӯй ма̄хум ёт пащалахтасыт. Ӯс кӯщай хум Василий Филипенко, «Югория» нампа телерадиокомпания кӯщай э̄ква Тамара Сутягина ос губернатор ва̄ӈын хо̄тпаг рӯпитан хум Сергей Полукеев «Спасти и сохранить» па̄нт вольгын па̄рт тармыл хансым ла̄тӈыт Ханты-Мансийскат о̄лнэ ма̄хумн мӯйлуптасыт. Ты па̄рт памятник щирыл ты ӯскант тах ма̄н ёлпинаве. Ма̄хум ёмщакв ӯщлахтын ма̄гыс тот а̄канит ма̄щтырлаӈкве ос са̄всыр ӯйрищит по̄слуӈкве ханищтаве̄сыт. Оркестр са̄всыр ёмас э̄рыгсовыт ёнгыс. Мо̄т хо̄таланылт телевидение ма̄гыс по̄слуӈкве ха̄снэ ханищтапыт ва̄рыглаве̄сыт. О̄выл хо̄талт Удмуртияныл ёхталам кина по̄слын хум Лев Вахитов ма̄хум ёт рӯпитас. Мо̄тыт хо̄талт Екатеринбургныл «Этно Кино» нампа фестивалит кӯщаиг о̄лнэ хум Иван Головнёв ёмас кина по̄слуӈкве ма̄хманэ ханищтасанэ. Ос та сыс телефестивальт рӯпитан жюри хо̄тпат ма̄вит ӯргалан урыл ма̄нь кинат суссыт ос щар ёмас утыт пе̄риясыт. Ты та̄л телефестивалит 35 ма̄ныл 350 по̄слым са̄всыр кинат сусве̄сыт. Та̄н лов номинация щирыл ла̄кквауртве̄сыт. Тувыл ты касылыт но̄хпатум хо̄тпат Ханты-Мансийс к а н во̄виньтаве̄сыт ос та̄хт хуриӈ статуэткал мӯйлуптаве̄сыт. Ань о̄выл щёс ня̄врамытын по̄слым кинат касылн ке̄тыглаве̄сыт. Тот Ярославль ӯсныл «Детектив» нампа студия статуэткал майвес. Яныг ма̄хум халт Новосибирсканыл «Промысел» намыл пиным кина но̄хпатыс. Екатеринбург ӯст о̄лнэ хо̄тпат ня̄врамытын ёмас телепередачат ва̄рнэ ма̄гыс э̄сгуве̄сыт. Хо̄т мӯйлупса Москва, Салехард, Санкт-Петербург, Якутск ӯсытын ос Тыва, Белоруссия ма̄н тотве̄сыт. Мо̄т хо̄н ма̄т халт Норвегия щар ёмас операторский рӯпата ма̄гыс ос Англия щар ёмас публицистический программа ма̄гыс мӯйлуптавесы̄г. «Югория» нампа тел е р а д и о к о м п а н и я т рӯпитан хо̄тпат о̄с кит щёс но̄хпатсыт. Та̄н акв рӯпатаныл «Лучший журналистский дебют» щирыл я̄нас мӯйлупсал щё̄питаве̄сыт. Ос «Журналисткое расследование» нампа номинацият Наталья Маковецкая ос Дмитрий Никитин «Тром-Аган: опалённые огнём» по̄слум кинатэ̄н ма̄гыс э̄сгувесы̄г. Ты коныпал «Югория» нампа рӯпитан коланыл ГранПри яныг мӯйлупсал майвес. Та̄н 100 со̄тыра солко̄вил та̄стуве̄сыт. Т. Е. Сутягина, кӯщаиг о̄лнэ э̄ква, ла̄выс: «Ма̄н ты олныт «ЛянторИнформ» телекомпаниян тах мыганӯв. Та̄н ты олнытыл ма̄вит ӯргалан ма̄гыс кинат о̄с вос по̄слэ̄гыт, тувыл ты фестивальн касуӈкв вос ке̄тыяныл. То̄внакт тот рӯпитан ма̄хумн ёмас тэ̄ла ва̄руӈкве олныл ат то̄влавет, ма̄н ань та̄нанылн нё̄тэ̄в». 1054 2013.06.21. Александр ВЬЮТКИН Яныг колта̄глыӈ хум. Ты хурит Сергей Андреевич Евлахов по̄слым о̄лы. Тав А̄с я̄ ва̄тат о̄лнэ Алы Ня̄рихумит па̄вылт самын патыс. Ань Лӯи Ня̄рихумит па̄вылт о̄лы. А̄тятэ наме Андрей Кириллович Евлахов во̄раян ос хӯл алыщлан хумыг о̄лыс, ты коныпал тав Саранск ӯст олн ловиньтан хо̄тпаг ханищтахтас. Па̄влэ̄т колхоз о̄лум порат, Андрей Кириллович тот ма̄хум сэ̄лнэ олнаныл ловиньтым рӯпитас. Оматэ наме Фёкла, Посал па̄вылныл о̄лыс. Тав о̄лме палытыл хӯл алыщлас, ня̄врамыт янмалтас. Нэ̄гхумыг нёлолов ня̄врам о̄щсы̄г – та̄н халанылт ат а̄ги, хӯрум пыг. Сергей Андреевич щар яныг увщитэ наме Татьяна, тав ань Лӯи Н я̄ р и х у м и т п а̄ в ы л т ще̄мьяӈта̄гыл о̄лы. Титыт увщитэ Глафира. Тувыл Светлана, тав ань Ханты-Мансийск ӯст о̄лы. Нилыт ня̄врамыг Сергей о̄лы. Тав ёлыпа̄лэ̄т Екатерина э̄ще ще̄мьяӈта̄гыл Радужный ӯст о̄лы. Катя ёлыпал а̄пщитэ наме Алексей. Таве̄ныл ма̄ниг о̄лнэ э̄щаныл наме Александра. Тав ань о̄с Радужный ӯст о̄лы. Тувыл питипатта а̄пщияныл Николай. Тыи ты акв яныг юртыӈ колта̄гыл. Сергей о̄выл хӯрум класс Алы Ня̄рихумит па̄вылт а̄стлас. Тувыл тав Перегрёбный па̄вылн ханищтахтуӈкв те̄твес. Тот н ёл ол о в к л а сс а̄стламе юипа̄лт Тюмень по̄хат о̄лнэ Успенка ӯсын тракторыл яласан хумыг ханищтахтуӈкв минас. Тот тав хӯрум та̄л ханищтахтас. Ос та̄ра ювле такви па̄влэ̄н ёхтыс. Тыт тав трактористыг совхозын рӯпитаӈкв вуйвес. То̄нт трактор мощща о̄лыс, рӯпата то̄вылхатас. Э̄тэхо̄талэ кол ӯнттын ма̄гсыл нор, кӯр па̄лтыглан на̄йив район янытыл хартыглас. Тэ̄лы ос осыӈ тӯйт порат лё̄ӈх ялыглым аквписыг яласас. Тракторыл ва̄тахтем та̄л рӯпитас. Та сыс манырсыр тракторыт о̄лсыт, пуссын яласасанэ. Мо̄лты Октябрьский па̄вылт тракторыл яласан ма̄гыс э̄рнэ нэ̄паканэ йильпииг щё̄питасанэ. Ань та ат са̄всыр нампа тракторыл ос ма̄шинал яласаӈкв ве̄рми. Сергей Андреевич ань такте̄т о̄лы. А̄нумн тав ла̄выс: «Ме̄н э̄кваме̄нтыл акван ёмщакв ро̄влахтаӈкв ат ве̄рмысме̄н». Тэ̄н ще̄мьятэ̄н яныг, ат ня̄врам янмалтасы̄г. Щар яныг а̄гитэ̄н наме Татьяна. Тав ань Турция мо̄т хо̄н ма̄т о̄лы. Тыт о̄лме порат Ханты-Мансийск ӯст ле̄ккарыг ханищтын кол а̄стлас. Та юипа̄лт та̄ра мо̄т хо̄н ма̄н о̄луӈкв минас. Та̄л сыс акв щёс юв мӯйлуӈкв аквписыг ёхталы. А̄гитэ̄н ёлыпал пыг о̄ньще̄г, наме Андрей. Тав ос Ягрим па̄вылт йӣвныл матыр ма̄щтырлан хумыг ханищтахтас. Титыт пыге̄н наме Володя, тав юн о̄лы. Школа а̄стлас ос автомеханикыг ханищтахтас. Па̄вылт тамле рӯпитан ма̄ а̄тим, та пе̄нтсыл ань тав клубт сторожиг рӯпиты. Хӯрмит пыге̄н наме Юра. Тав Ханты-Мансийск ӯст инженермеханикыг юио̄выл та̄л ханищтахты. Щар ма̄нь а̄гитэ̄н наме Лидия. Тав мощ мо̄лалнув ма̄нь ня̄врамыӈыг е̄мтыс. Ня̄врам а̄тятэ моще̄ртын армияныл юв ты ёхты. Тамле ёмас ма̄ньщи хумын ам са̄в щуньпаща ла̄тыӈ те̄тэ̄гум. На̄й-О̄трын ще̄мьятэ вос ӯргалаве. Сергей Андреевич са̄в та̄л пуста̄гыл вос о̄лы. 1054 2013.06.21. Тамара МЕРОВА Ма̄нки ё̄рыл та о̄лэ̄в. Марк Тэвлин ханты пыг ёт ам Нижневартовский район Варъёган интернатыт хо̄нтхатыгласум. Тав школа мо̄лты та̄л а̄стлас, ос тув йигирище уральтаӈкве щалтсас. Ам пыг о̄лупсатэ урыл китыгласлум. Марк иӈ номсахты, па̄вылт о̄луӈкве хульты манос ювле во̄рн мины. Марк таи потыртас: – А̄нумн нёлоловхуйплов та̄л. Ам Русскинская па̄выл школат ханищтахтасум ос тот интернатыт о̄лсум. Ма̄н са̄ртын та па̄выл ляпат о̄лсӯв. Омагума̄тягум во̄рт са̄лы янмалтым акваг о̄лсы̄г, тэ̄н акванминаме̄н порат са̄т са̄лы туп о̄щсы̄г, ётылнув ущ щёлыӈыг е̄мтсы̄г. Ань Лана йигирищум Варъёган интернатыт о̄лы, ам таве уральтан ма̄гыс тыг ёхталэ̄гум. Ты е̄рт ма̄н а̄ти сака хосат о̄луӈкве патсӯв. А̄тяв а̄тимыг е̄мтум юипа̄лт, омам ётыл мо̄т хум ва̄рыс, ос ма̄н тыгле яглаӈув о̄лнэ ма̄тэ̄н ва̄нтлысӯв. Тыгыл ма̄н па̄влув 60 ве̄рыстат о̄лы. Ма̄н ще̄мьяв коныпал тот Айваседа, Покачевыт, Айпиныт о̄с о̄лэ̄гыт. Пуссын аквъёт атпан арыгкем са̄лы о̄ньще̄гыт. Тыи та̄нки янмалтам са̄лыяныл, нэ̄мхуньт мо̄т ма̄ныл ат ёвтыгласыт. Юн акв каӈкум ос а̄пщим хультсы̄г, омавн ос яглаӈувн нё̄тэ̄г. Ос акв йигирищув нила та̄лэ то̄влыс. – Во̄рт о̄лнэ ма̄хманын хумус о̄лэ̄гыт, та̄н матыр та̄рвит о̄ньще̄гыт ман а̄ти? – Мо̄лты тув са̄лыянув тэ̄лы о̄щнэ ма̄в ляпат на̄й пе̄ламлас. Ма̄н матахкем хо̄тал та ма̄н ялантасӯв ос хумус ве̄рмысӯв, ма̄нки ё̄рувтыл на̄й та харыгтаслӯв. Мувлахи ма̄ хилым ос на̄й сэ̄йил лаппа̄хвтым тот та кап ы рт а с ӯ в . В и т л я пат а̄тим о̄лыс. Стойбищаныл ма̄н ловманкем хо̄тпа аквана тх а т ы гл а с ӯ в . Р у щ па̄вылныл манос ӯсныл щар нэ̄мхотьют ма̄навн нё̄туӈкве ат ёхталас, ла̄тыӈ ке̄тыгласув кос. Ма̄во̄й но̄хвинэ хо̄тпат манос пожарникыт туи вертолётыл манос ма̄шинал тыг ат иӈ ёхталэ̄гыт. Тэ̄лы па̄влувт колув туп на̄йн ат новвес ос са̄лыянув тэ̄пыӈ ма̄тэ витыг та тотвес. Са̄лы тэ̄пыӈ ма̄ о̄с иӈ о̄ньще̄в кос, ос та е̄рт ма̄во̄й но̄хвинэ ма̄хум манос мо̄т рӯпатат ва̄рнэ хо̄тпат тыглетувле яласэ̄гыт. Та̄н ёмас тэ̄пыӈ ма̄ яныг ма̄шинал пулигялыгласаныл. Ань та ляпат лё̄х ва̄рсыт, са̄в ма̄хум ма̄шинал яласаӈкве патсыт, са̄лыянув пилэ̄гыт ос ла̄ккваха̄йтэ̄гыт. Район кӯщаянувн пищма хансыгласӯв, ань тыг мус нё̄тмил ӯре̄в. Ма̄во̄й хилнэ ма̄хум ёт потранув акван ат ёхтэ̄гыт. Та̄н ос район кӯщаянув ма̄н тэ̄ланув ювле лаквтыяныл, мощ ӯрхатуӈкве ла̄ваве̄в, э̄рттам матыр договор– нэ̄пак хансэ̄гыт. Та сыс ма̄во̄й но̄хвинэ ма̄хум а̄лыматта̄л тот э̄лаль рӯпитэ̄гыт. Ос кӯщаит хо̄т суйта̄л о̄лэ̄гыт. Ма̄навн хота мус тох э̄лаль о̄луӈкве ро̄ви? Пе̄с щирыл о̄луӈкве манаре кос лю̄ль, ма̄хманув та̄рвит порат пуссын акваннё̄тхатым ос акванпотыртахтым о̄лсыт. Во̄р ӯргалым, сыстамыг о̄щсаныл. О̄лнэ ма̄наныл ляпат тамле яныг на̄й ат ва̄щинтасыт. Таима̄гыс ма̄н на̄й харыгтан са̄всыр утыт урыл нэ̄мхуньт ат номсысӯв. Тувыл ва̄глӯв, на̄й харыгтан хо̄тпат хо̄т рӯпитэ̄гыт, ма̄н тах о̄с нё̄таве̄в. Ань тай хотьютн агтуӈкве ро̄ви ман а̄ти, ат ва̄глув. Пыг а̄нум тамле ты савалан номтанэ ла̄выс. Та̄н кӯщаитн ты тув на̄й харыгтан утыл тотуӈкве ос олныл нё̄туӈкве ла̄вве̄сыт. Ос туп са̄лы тэ̄пыӈ ма̄нылт нэ̄матыр ва̄руӈкве ат ве̄рме̄гыт. Акв тэ̄пыӈ ма̄ныл пулиго̄хтыртавес, мо̄т ма̄ныл на̄йин ё̄свес. Ань са̄лы тэ̄п воссыг хунь тот тэ̄лы, сака са̄ль. Тувыл та ма̄т о̄лнэ ма̄хумке̄нув ма̄витаныл ма̄гыс сыманыл ща̄рге̄гыт. Ос ӯст о̄лнэ кӯщаит ёмщакв о̄лэ̄гыт, номтаныл ат савалэ̄гыт. Та̄н та̄нки апганылн э̄лаль о̄лнэ посыӈ хо̄талыт урыл аман ат номсахтэ̄гыт. 1054 2013.06.21. Тамара МЕРОВА 70та̄лэ̄тыл янытлылӯв! Ты э̄тпос нила щислат Дмитрий Иванович Юхлымов 70 та̄лэ то̄влыс. О̄йка ма̄вит ӯргалан округ Департамент па̄лыл нам хо̄талэ̄т янытлавес. Ма̄н, газетат рӯпитан нэ̄тхумыт, таве о̄с янытлылӯв ос щуньпаща ла̄тыӈ ке̄тэ̄в. Дмитрий Иванович Ха̄льӯс районыт акваг во̄р ӯргалан хо̄тпаг рӯпитас. О̄влэ̄т ва̄т нупыл кит та̄л Касум па̄выл лесничестват рӯпитас. Ос 1992 та̄лт тав Ха̄льӯс лесхозколн кӯщаиг паттувес. Тот 2005 та̄л мус пуӈктотыс. Ты о̄йка са̄в хо̄тпан э̄руптаве, тав ма̄кыг ва̄рум тэ̄ланэ ань тыг мус ма̄хумн номавет. Са̄в мӯтраӈ ва̄рмалитын таве̄ныл ханищтахтасыт. Ма̄вит ӯргалан хо̄тпат ты э̄лумхо̄ласын пуссын яныг пӯмащипа ла̄тыӈ ла̄ве̄гыт, о̄с са̄в ёмас посыӈ хо̄тал ще̄мьятэ ёт э̄лаль вос о̄лы. Ма̄н ос ма̄ньщи щирыл та̄наныл янытлыянӯв, тамле со̄тыӈ ла̄тӈыл ке̄тыянӯв пус ка̄т, пус ла̄гыл, То̄рум ёт, О̄тыр ёт вос о̄лэ̄гыт! 1054 2013.06.21. Тамара МЕРОВА «Хо̄тал» аквтох посыӈыг вос посты. «Хо̄тал» нампа А̄с-угорский театр рӯпитанэ̄тэ па̄сыл мо̄лты таквс лов та̄л ты то̄влыс. То̄нт кӯщаит йӣквнэ ос э̄ргын ма̄хум янытлаӈкве та̄ра ат ве̄рмысаныл. Тувыл артистыт мо̄т хо̄н ма̄т ёнгим са̄в яласасыт. Ты ма̄хум пуссын ань я̄ӈк на̄тнэ э̄тпост ущ акванхо̄нтхатсыт ос ялпыӈ хо̄тал ва̄рыгласыт. Спектаклит сунсуӈкве э̄руптан ма̄хум «ЮграКлассик» яныг колн во̄виньта̄лве̄сыт. Тув щалтмув порат ма̄н пӯмащ суссылтап ка̄саласӯв. Йӣквнэ ос э̄ргын хо̄тпат пуссын такем нё̄тнэ̄г нас хаснэйӣвыл хурин по̄слымат. Ты хурит Павел Мизёв по̄слысанэ. «Сэ̄мыл э̄рыг» нампа спектаклил о̄с то̄ва накыт по̄слым о̄лсыт. Таит Вячеслав Зайчиков по̄слуӈкве номылматас. Ты ма̄ньлат хо̄тпаг сас театрыт рӯпитэ̄г. Са̄всыр ёнгилыт порат тэ̄н сцена хорамтытэ̄н, хо̄т э̄ри, лампочкал постытэ̄н ос мо̄т са̄всыр пормасыт щё̄питэ̄г. Тувыл кӯщаит о̄влэ̄т йӣквнэ ос э̄ргын хо̄тпат янытласыт, сымыӈ ла̄тӈыт ла̄всыт ос мӯйлупсал мисаныл. Владимир Букаринов, Ханты-Мансийск ӯс кӯщай ва̄ӈын хум, потыртас: «Ам ма̄ньта̄гыл ты ӯст самын патум ма̄хманум ёт театр о̄вылтыт акваг о̄с номсысум. Ань матумпа̄лаг ты е̄мтсӯв, тахольт ты номтув тэ̄лаг е̄мтыс. Ма̄нки соссаӈ ма̄хум артистыт о̄ньще̄в, та̄н ёнгиланыл сунсуӈкве ща̄гтым ёхталэ̄в. Туп та̄н ма̄гсыланыл театркол ӯнттуӈкве э̄ри, ма̄н ты ва̄рмаль э̄лаль о̄с уральтылӯв». Игорь Ширматов ос Надежда Алексеева округ Дума па̄лыл нэ̄тхумыт ёмас рӯпатаныл ма̄гыс о̄с пӯмащипа ла̄тыӈ ла̄всы̄г. «Югра лылыеп» ассоциация кӯщай хум Александр Новьюхов ос округ культура Департаментыт рӯпитан хо̄тпат ёмас ла̄тыӈ ла̄всыт. Ты кӯщаит пуссын артистыт са̄всыр грамотал мӯйлуптасаныл. АннаКсения Вишневская, режиссёр нэ̄, сысы ул вос мины, тыт акваг э̄лаль рӯпитаӈкве во̄ваве. Москваныл Лидия Богова, А. П. Чехов нампа МХАТ редакторыг о̄лнэ нэ̄, ёхталас. Марина Корнакова, Санкт-Петербург ӯст «Зазеркалье» нампа ня̄врамыт ма̄гыс ёнгын театрыт кӯщай нэ̄ тыг во̄виньта̄лвес. Ты нэ̄г российский театральный касылыт сака ёмас рӯпата ва̄ре̄г, тэ̄н ты искусстват мӯтраӈ хо̄тпаг ос са̄в ва̄гы̄г. Нэ̄г сас соссаӈ ма̄хум театрув э̄сгыстэ̄н, тэ̄н ла̄внэтэ̄н щирыл, ма̄н артистанув ма̄кыг рӯпитаӈкве ха̄сэ̄гыт. Театрув «Золотая маска» ос «Арлекин» нампа фестивалит наска̄ссыг хунь дипломыл майвес. Та юипа̄лт мӯй ма̄хум пуссын «Любить» нампа спектакль суссыт. Ты ёнгил Еремей Айпин хансум ма̄нь потранэ щирыл щё̄питавес. Тот тав ма̄нь поратэ ос ма̄ньлат порат о̄лыглам тэ̄лат суссылтаве̄сыт. Вадим Важенин ма̄щтырыг ёнгыс, ос ма̄нь поратэ Игорь Хромовын ёнгувес. Ты пыгрищакве я̄ӈк на̄тнэ э̄тпос ва̄т нупыл нёлолов хо̄талт о̄с лов та̄лэ то̄влум. Тэ̄н ты театр ёт акв янытыг о̄лнэтэ̄н, аквъёт ёмщакв ос щуниӈыг э̄лаль вос яныгме̄г. Те а т р ы т рӯ п и т а н нэ̄тхумыт са̄выӈпа̄лэ о̄с ня̄врамыӈыг е̄мтсыт. То̄ва нэ̄квет юн ма̄нь ня̄враманыл янмалтэ̄гыт, мо̄таныт ань та̄рвитыӈыщ о̄лэ̄гыт. Мӯй ма̄хум мовиньтэ̄гыт, та̄н та̄нки ма̄гсыланыл мо̄т ёмас соссаӈ артистыт янмалтэ̄гыт. Ма̄н «Хо̄тал» нампа театрын щуньпаща ла̄тыӈ ке̄тэ̄в. Та̄н пуста̄гыл, акваннё̄тхатым ос юртыӈыщ вос о̄лэ̄гыт. Са̄в ща̄гт ма̄хумн э̄лаль вос тотэ̄гыт. 1054 2013.06.21. Галина КОНДИНА Туи ёхтын хо̄тал янытлавес. Лӯпта э̄тпос о̄выл хо̄талт «То̄рум Маа» музейт ня̄врамыт ма̄гсыл ялпыӈ хо̄тал ва̄рыглавес, пе̄с порат та хо̄тал хо̄нтаӈ ма̄ньщит «Ворщик хо̄тал» янытламыт. Ворщик хунь ма̄н ма̄вн ёхты, я̄ӈк тармыл исы, лэ̄ге хосгащлым я̄ӈкыт э̄рттам та сакватыянэ. Тав ёхтынэ̄т порат, туииг та е̄мты. Ты урыл Анна Митрофановна Конькова ловиньтан нэ̄паке̄т хансым о̄лы. Пе̄с порат хо̄нтаӈ ма̄т па̄влыӈ ма̄хум пуссын акванатхатэ̄гыт, ка̄сыӈ нэ̄ хо̄тпа юил тэ̄нут тоты. Акв яныг э̄ква пе̄рияве, тав Ща̄нит Ща̄ниг ла̄ваве. Та̄н на̄лми ва̄тат пасан ва̄ре̄гыт, ул пӯрлахтэ̄гыт. Пыгрищит ма̄гсыл Комполэн нампа пилуптахтын ут вильтхопитэ са̄снёлыг ва̄раве. Та са̄снёл нупыл пыгрищит ня̄л па̄хвтэ̄гыт, халанылт касэ̄гыт. А̄гирищит ос йӣкве̄гыт, э̄рге̄гыт. Тох ты ялпыӈ хо̄тал янытласаныл. Пыгрищит па̄тлуптаӈкве, ворт ё̄мыгтаӈкве ул вос пилсыт, таима̄гсыл са̄снёл нупыл ня̄л та̄ртуӈкве та ханищтаве̄сыт. А̄гирищит ос ул вос э̄ссамтасыт, йӣквуӈкве ос э̄ргуӈкве вос ха̄ссыт. Ань пе̄с йис ва̄рмалит хот ул вос ёрувлахтасыт, таима̄гыс ка̄сыӈ порат соссаӈ хо̄тпат музейн ты ялпыӈ хо̄тал янытлан ма̄гыс ёхталаӈкве патэ̄гыт. «Ворщик хо̄тал» рущ ялпыӈ хо̄талн паты, то̄нт мир янытыл ня̄врамыт янытлан хо̄талыг о̄лы. Ня̄врамыт ма̄гсыл са̄всыр ёнгын ма̄т ва̄рыглавет, та̄н тот та̄нти халанылт касэ̄гыт, ёнге̄гыт. «То̄рум Маа» музейт ня̄врамыт ма̄гсыл А̄с-угорский театрыт рӯпитан ма̄хум концерт ва̄рыгласыт. Нё̄тнэ супыл масхатам нэ̄ сценан нэ̄глапас, аквтуп та исгащлы, та поргащлы, щар ворщик ӯйрищакве хольт. Ня̄врамыт ща̄няныла̄щаныл ёт янытласанэ. Ка̄сащам ня̄врамыт туи пора урыл стихотвореният потыртасыт. Ка̄сыӈ ня̄врам ма̄нь мӯйлупсал майвес. Та юипа̄лт а̄мщил а̄мщуве̄сыт, хотьют а̄мщ ханьщис, ос ма̄нь ёнгынутыл майвес. Ня̄врамыт татем ка̄сащим стихотвореният потыртасыт, туйхатым сценан воратасыт. Та юипа̄лт «Лылыӈ со̄юм» колн ялантан ня̄врамыт са̄ӈквылтасыт ос йӣквсыт. Сып но̄ӈхальнув ня̄врамыт ма̄гсыл каснэ ма̄ о̄лыс. Тот тит хо̄тпа акв ляльт то̄выль тармыл ӯнтэ̄г ос йӣво̄выл титтыгхартытэ̄н. Хотьют ка̄тэ̄т йӣв хульты – тав но̄х та паты. Сун ӯлтта поргысыт. Тот о̄с халанылт туйхатым воратасыт. Ка̄сыӈ ня̄врам касуӈкве таӈхыс, ва̄им тот ос ёнгынутыл майве̄сыт. Та хо̄тал ащирмаӈ кос о̄лыс, тыхал тӯйтсамыл паргыс. Ос ня̄врамыт ха̄йтыгтым, ёнгасым атыпыл по̄льве̄сыт. Ёнганыл а̄стум юипа̄лт пуссын ёхталам ма̄хум, ня̄врамыт ща̄ил айтве̄сыт, ка̄миньт, атыӈ ня̄нил тыттуве̄сыт. 1054 2013.06.21. Валентина УЗЕЛЬ Тав са̄в пе̄с потыр ос мо̄йт атыс. Ты та̄л лӯпта э̄тпос 28 хо̄талэ̄т Ева Шмидт 65 та̄лэ то̄влынӯв. Ос тав хотталь ловумтаме па̄сыл ань аквхуйплов та̄лыг ты е̄мтыс. Тэ̄лы Белоярский ӯст о̄лмувт тав рӯпитам архивколн щалтсасӯв, ты кол Ева Шмидт ё̄ре̄тыл пӯсвес. Тав 1948 та̄л лӯпта э̄тпос 28 хо̄талэ̄т Венгрия ма̄т Будапешт ӯст самын патыс. А̄щагеща̄няге а̄гитэ̄н Еваг намтыстэ̄н, пыге̄н ос Адам намыл. 1966 та̄лт тав художественный училище а̄стластэ, тувыл Будапештский университетт та̄ра тит специальность щирыл э̄лаль ханищтахтуӈкв патыс – венгр ла̄тыӈ ос литература, английский ла̄тыӈ ос литература. Титыт курсыт мо̄т факультетн минас, финноугроведение, этнография ос фольклор ханищтас. Та университетт ханищтахтаме̄т 1969-1970 та̄лыгт Ленинград ӯсн ялыс, тот ханты ла̄тыӈ ханищтас. Тот о̄лме̄т студентыт ёт тэ̄лы Тугияны ос Полноват па̄влыгн ялыс. Та па̄сныл ты тав ханты ма̄хум ёт ва̄йхатуӈкв патыс. 1984 та̄лт ЦК КПСС яныг кӯщаитн хансум. Ос 1992 та̄лт Белоярский ӯст архивкол рӯпитаӈкв о̄вылтахтас, ты кол кӯщаиг Ева Шмидт патыс. То̄нт тав ётэ рӯпитам А̄с ма̄хум (ты Тимофей ос Татьяна Молдановыг, Людмила Хомляк, Тамара Пятникова ос мо̄т хо̄тпат) ханты мир пе̄с йис потраныл, мо̄йтаныл акванатуӈкв патсаныл. Та юипа̄лт Ха̄льӯст архивкол пӯсвес. Ты яныг учёныиг о̄лум хо̄тпа сака са̄в потыр атыс. Мо̄йтыт ос пе̄с потрыт потыртам ма̄хум пуссын тинан по̄слуманэ, пуссын аквъёт 400 щё̄с по̄слыс, 300 арыгтем потыр «диктофоныг» ла̄внэ ищхӣпыӈ утын хассанэ. Са̄в потыр нас нэ̄пакн хансым о̄лэ̄гыт. Ань та архивколт Тамара Романовна Пятникова кӯщаиг о̄лы, тав ла̄выс: «Ева сака ёмащакв ос са̄в рӯпитаӈкв ха̄сыс. Потыртаве, хотты ма̄нь па̄вылт яныгпа̄ла хо̄тпа о̄лы, тав о̄влэ̄т та хо̄тпа ёт потыртахты, титыглахты – тав ётэ хунь хо̄нтхатыглахтуӈкв ро̄ви. Тувыл ущ тав палтэ мины. Кос хоты хо̄тпа ёт хо̄нтхаты, акваг са̄в потыр ман мо̄йт та хо̄тпаныл хансы. То̄ванакт сака э̄лы ма̄т о̄лнэ ханты ма̄хум палт яланта̄лыс, рюкзаке ёмащакв щё̄питытэ, по̄слын ут, хаснэ ут, тина ва̄рнэ ут пуссын ётвыганэ, ёт та харттыянэ. Са̄в ве̄рыста ла̄глыл ё̄мыглас. Ювле ёхты, татем ва̄гтал патнэ̄тэ, ос ма̄н таве̄ныл нэ̄мхуньт ща̄ргын ла̄тыӈ ат хӯлыгласӯв. Яныг хо̄тпанув пуссын янытласанэ, э̄руптасанэ. Сака ёмас сымыӈ хо̄тпаг о̄лыс». Хунь тав а̄тимыг е̄мтыс, Венгрия ма̄ныл нила хо̄тпа та архивколн ёхталасыт, та̄н Еван атым потрыт копияг ва̄рсаныл ос пуссын ёттотсаныл, ань та̄н Венгерский Академия наук языкознание институтт тот хо̄т о̄лэ̄гыт. Ева Шмидт ханты ла̄тӈыл сака ёмащакв потыртас, ма̄ньщи ла̄тӈыл о̄с ха̄сыс. Аквхуйплов та̄л округувт о̄лме сыс наука ма̄гыс сака са̄в рӯпата ва̄рыс. Ань Белоярский ӯст рӯпитан архивкол тав наме̄тыл пиным о̄лы. Тав ётэ рӯпитам ма̄хум таве пуссын номияныл. 1054 2013.06.21. Галина КОНДИНА Саран ла̄тӈыл хаснэ газета 95 та̄лэ то̄влыс. Саран ма̄хум о̄лнэ ма̄т Коми Республикат «Коми му» нампа газета та̄ратаве. Лӯпта э̄тпос лов щислат ты газета 95 талэ то̄влыс. То̄нт са̄в ма̄ныл Марий Эл, Удмуртияныл, ма̄н округувныл са̄всыр газета кӯщаит ёхталасыт ос та̄нти ва̄рнэ рӯпатаныл урыл потыртасыт. Российский ассоциациян хасхатам финноугорский журналистыт 2013-15 та̄лыт сыс маныр рӯпата ва̄руӈкве патэ̄гыт – та урыл потыртахтасыт. Финноугорский пресса хо̄тыт фестивалин ты таквс тах атхатыглэ̄гыт. Ты та̄л хурит по̄слын хо̄тпат ма̄гсыл ханищтап Марий Эл ос Ямал ма̄т ва̄рыглэ̄гыт. «Коми му» газета янытлан ма̄гсыл ма̄хум ня̄врамыт ханищтахтын гимназият аквана тх а т ы гл а с ы т. Щ а р о̄влэ̄т 1918 та̄лт хунь газета та̄ратаӈкве патвес, то̄нт «Зырянская жизнь» намыл хансым о̄лыс. Яныгса̄т нупыл ат та̄л сыс хо̄тхуйплов кӯщай пе̄нтхатас. Ань рӯпитан хо̄тпат газетаныл яныгса̄т та̄лэ то̄влын кастыл нэ̄пак та̄ратаӈкве таӈхе̄гыт. Та хосыт ловиньтан ма̄хум ва̄ӈкв патыяныл, хумус газета ва̄раве ос хумус та хо̄тпаныл рӯпитэ̄гыт. Вячеслав Гайзер Коми Республикат кӯщаиг олнэ хум ла̄выс, ты газета хосыт са̄в ёмас хо̄тпа э̄лаль о̄лнэ посыӈ лё̄х хо̄нтсыт. Редакцият Виктор Савин, Вениамин Чисталев, Михаил Лебедев ос мо̄т намыӈсуиӈ хо̄тпат рӯпитасыт. Саран ма̄хум кӯщаяныл ла̄выс, та̄н ты ма̄кыг культура ныл ос ща̄нь ла̄тӈаныл э̄лаль ялтуптыяныл. Тав тот рӯпитан хо̄тпат пуссын янытласанэ ос янытлан нэ̄пакыл мӯйлуйптасанэ. «Коми му» издательский колт кӯщаиг рӯпитан нэ̄ Надежда Быковская «Заслуженный работник Республики Коми» намыл майвес. Ашот Джазаян, журналистыт Союзт секретариг рӯпитан хум, тамле ты номтэ тот ла̄выс, «Коми му» нампа премия ва̄руӈкве э̄ри ос журналитыг ёмщакв ханищтахтын а̄гитын ос пыгытын миӈкве. Ты коныпал каснэ ва̄рмаль ва̄рыглаӈкве, таве ос тамле намыл намтуӈкве – «От «Коми му» к «Коми ру». Ёхталам ма̄хум та газетат рӯпитан хо̄тпат п у с с ы н я н ы тл а с а ныл, са̄в сымыӈ ла̄тыӈ ла̄всыт ос мӯйлупсат мӯйлуптасыт. Раиса РЕШЕТНИКОВА хансум потре ма̄ньщи ла̄тӈыл Галина КОНДИНА толмащластэ. 1054 2013.06.21. unknown Тэ̄кыӈ Коля. Ты мо̄йтпотрыг Николай Иванович Хозумов потырта̄лсаге, тав Ха̄льӯс район Хо̄рыӈпа̄вылт самын патыс. Ань а̄гитэ палт Ханты-Мансийск ӯсын ва̄нтлыс. Тэ̄кыӈ Коля сака мӯтраӈ хум ōлыс, ня̄йт хум ōлыс. Юн колта̄гыл ōньщис. Милицияныл ва̄ӈнаныл пōсыӈ утыт ёхтэ̄гыт таве пувуӈкве, а̄ви пунсэ̄гыт, ювщалтэ̄гыт. Тав Тэ̄кыӈ Коля пасан ва̄тат ӯнлы, тув мус та мӯтраӈ ōлыс, шуба ōньщи. Тайит ювщалтэ̄гыт, ла̄ве̄гыт: «О! Юн ōлэ̄гын, наӈын ты пувилув». Тэ̄кыӈ Коля шубатэ нёвумты, лапаяптытэ, нōхмасапитэ, та̄н та̄раныл кон та тахи. Та̄н шубатэ штыкыл такос пувтыяныл, акваныл тох та мины, пувуӈкве ат ве̄рмияныл. Тувыл пуваве, тотаве сутытаӈкве ка̄снаколн, тот саватаве. Не̄лме конхасумтаве, ва̄ӈкрипыл мастапаве, ка̄тпалэ̄тыл нōхтагатаве, тох та саватаве. Пōханква̄лэ̄гыт, а к в х у м и я н ы л ёл ы н ё̄мыгты. Тув мус та мӯтраӈ ōлыс, ня̄йт ōлыс, номсэ̄гыт та пувсаныл. Ōс пувияныл, хотмуса̄ти та утыяныл, сунсэ̄гыт, акваныл ōс лыпащ ōлы. Сыреса̄т щирыл такос саватасаныл, тōванакт э̄рттам та аласаныл. Ка̄тэла̄глэ хотякытлыяныл, ла̄кквапа̄хвтыяныл. Тувыл пōхыннув минэ̄гыт, нё̄влянэ та сыпге̄гыт, акван та натыглахтэ̄гыт. Сунсэ̄гыт, акваныл ты ё̄ми, юипа̄лыл такос па̄тлуптыяныл, тоха та мины, алуӈкве ат ве̄рмияныл. Тувыл ос ма̄ныр ва̄руӈкве, тове̄ртын кинсаве, юн а̄тим. Колта̄глэ ня̄враманэ саватаӈкве патве̄сыт. Ёхтэ̄гыт, юн а̄тим, китыглаве хоталь минас, ня̄враманэ ма̄ныр ла̄ве̄гыт. Тэ̄кыӈ Коля ла̄ви: «Маныр а̄нум наска̄ссыг ня̄влалылы̄н, на̄н а̄нум алуӈкве ат ве̄рмилы̄н». Тувыл таквина̄тэ хӯлтытэ: «Амти палтум пе̄рна ва̄рим ōлы, пупыг ня̄лыл а̄нум те па̄тамтылын, ущта алуӈкве ве̄рмилы̄н. Нас тох тай а̄нум алуӈкве ат ве̄рмилы̄н». Тувыл хунь ва̄ве, аман аласаныл, аман а̄ти. Улпыл нас сам пе̄нтыс, самсайн патхатас. Тамле та Тэ̄кыӈ Коля ōлыс. Тав уре̄т ам са̄в ма̄т, са̄в щёс хӯнтла̄лсум, ма̄хум акваг потырта̄лэ̄гыт. 1054 2013.06.21. Светлана Ромбандеева Кит савыӈ утыг. Пе̄с кит савыӈ матарыг о̄лсы̄г, ма̄ньлатнув пыгрищиг. Тув мус савыӈыг, нōх ат ква̄лэ̄г, акваг та хуе̄г. Акв пӯтит хуе̄г, такос нōхква̄лттаве̄г, са̄ӈвхаве̄г. Акватэ а̄ла ква̄лы, мōтанэ̄н туяве: – Ул нёвсэн, нас хуен, сав а̄ти? ! Тох та хуе̄г акваг, нōхква̄луӈкве ат ве̄рме̄г. Тувыл ма̄ныр ва̄руӈкве тамле савыӈ хо̄н нёлыг ман хо̄ныӈ лэ̄ниг ёт, тэ̄н тох ла̄ввесы̄г. Нёвсалтаӈкве патаве̄г, акватэ ла̄ви: – Тэ̄хам, ул нёвсэня, нас хуен, сав а̄ти? ! Тамле савыӈ утыг хумле ва̄руӈкве, нōхква̄лттуӈкве ат ве̄рмаве̄г. Тувыл колта̄гыл ма̄хманэ̄н ща̄няге̄на̄щаге̄н ёт номылматсыт: «Тэ̄н пōхе̄нт на̄й па̄лтэ̄в, котараӈкве патаве̄г, тах нōхква̄лапе̄г». Яты, на̄йил па̄лтвесы̄г, акватэ котараӈкве патвес: – Тэ̄м, нōхква̄лыме̄н. – Тэ̄м, нас хуен, нōхква̄луӈкв сав а̄ти? ! Тох та на̄йин порславесы̄г савыӈ утыг, нōх ат иӈ ква̄лсы̄г. Ты мо̄йтпотрыг нэ̄пакн Светлана Ромбандеева хассаге. 1054 2013.06.21. Мария Михайловна Мелентьева Уля ра̄туӈкве ат ро̄ви. (мо̄йтпотыр) Э̄ к в а о̄л ы с , м а̄ н ь а̄гирищ о̄ньщас. Ма̄нь а̄гирище са̄сн ӯнттыстэ, щёвал по̄хан ӯнтыс. Та порат щёвал па̄лтыглавес, щёвал ва̄тан ӯнтсыг. Лотых йӣв вис, уля та ра̄тытэ, та ра̄тытэ. А̄гирище̄нтыл тай, ань а̄гирище са̄сын ӯнттыстэ, та мовиньтэ̄г, та мовиньтэ̄г. Аквмат мовиньтасы̄г, мовиньтасы̄г, лотых йӣвыл лотхыт та ра̄тыянэ, Уляэ̄ква кантмаявес, а̄гирищ ка̄тпаттан ма̄нь лотых патыс. А̄гирищ ань ка̄тпаттатэ ща̄ргуӈкве патыс, лю̄ньщи. А̄ӈке̄н такос по̄илттаве, а̄гирищ лю̄ньщи, ка̄тэ ща̄ргаве. Э̄ква патыс ля̄выльттаӈкве уля: Наӈ тамле, тымле, ам наӈын ульйӣвыл тотылум, па̄лтыглылум. Лавум ке ёхты, ам са̄грап выгум, наӈын щар ра̄выг са̄грилум, витыл со̄сылум. А̄гирищ акваг лю̄ньщ и , л ю̄ н ь щ и . Э̄ к в а кантмаявес, со̄ль, вистэ са̄грап, а̄ращщёвал ра̄выг са̄грыстэ, вит ве̄тра вис, витыл лапсо̄сантастэ, уля та харыглас. Хо̄тал о̄лсы̄г, э̄тэ о̄лсы̄г, кол ащирмаӈыг е̄мтыс, колт по̄люӈкве патвесы̄г. Номсы: хоталь минуӈкве, ащирмаӈ колт тах тувпо̄лявеме̄н. Кон минас, колэ по̄хат матум э̄ква о̄лыс, матум э̄кваныл уля во̄ви: – А̄нум уля маен. А̄ви пӯнсуӈкве патыстэ, матум э̄ква щёвалэ уля лап та харыглас. Матум э̄ква ла̄ви: – Наӈ улпыл матыр уля ёт ва̄рсын? Ань ма̄н ты па̄вылт тах сох ащирман тэ̄ве̄в. Ам улям лапхарыглас. Манрыг уля ра̄тыслын, лотых йӣвыл ос витыл манрыг со̄сыслын? Уля ёт ёнгуӈкве ат ро̄ви. Минас мо̄т колн, мо̄т колн а̄ви пӯнсытэ, о̄с уля та харыглы. Манса̄вит кол о̄лы, сох яласасанэ, сох колыӈ ма̄хум улята̄л хультсыт, по̄люӈкве патве̄сыт. Ос юв ёхтыс, ань колэ по̄хат о̄лнэ матум э̄кватэ палт минас, ла̄ви: – Маныр ва̄руӈкве? Ащирман ты тэ̄ве̄в, па̄вылт ма̄хум ащирман по̄лявет. Э̄ква ань кантмаявес: – А наӈ манрыг ра̄тыслын уля, са̄грыслын, витыл манрыг со̄сыслын? ! Тэ̄н потыртанэтэ̄н сыс, тэ̄н э̄лыпа̄лэ̄нт уляӈ кӯщай лю̄ли, ла̄гланэка̄танэ щар лотах хурипат, сэ̄млыт, алпитэ ос восых хурипа. Э̄ква нупыл потырты: – Наӈ маныр ва̄рсын ам ётум? Сунсэн, ам хумус е̄мтсум, алпим восых хурипа, ка̄танумла̄гланум сэ̄млыт. Маныр ва̄руӈкве, матум э̄ква по̄йки: – Пе̄ламлэн но̄х, ма̄н ащирман ты по̄ляве̄в. – Ам то̄нт пе̄ламлэ̄гум, хунь ань та уля ра̄тум нэ̄ сыме а̄нум мыгтэ, ам то̄нт но̄хпе̄ламлэ̄гум. Нэ̄ а̄гирище вистэ, анигластэ, сыпыгластэ, акв ляпат о̄лнэ матум э̄кван мистэ о̄ньщуӈкве. Матум э̄ква анигластэ, сыпыгластэ, ла̄ви: – А̄гирищум янмалтэ̄лын, наӈ о̄ньще̄лын. Такви та порыгмас уля кӯщай палт, акванпӯхтысы̄г, уля та пе̄ламл а с . Н о̄хп е̄л а м л а с , щар ма̄н хо̄тлы, хоты са̄м нупыл а̄ӈкватэ̄гыт, акваг уля хорги, та хоргуӈкве патыс. Таима̄гыс ты йис потыр щирыл, яныг хо̄тпа акваг ма̄нь хо̄тпан потырты, ма̄нь ня̄врамын: уля ра̄туӈкве ат ро̄ви. Ты мо̄йтпотыр Мария Михайловна Мелентьева Восыӈтӯр па̄вылт потырта̄лыстэ, тав а̄ги о̄парищ наме Хозумова о̄лыс. М. М. Курлинын хасвес. 1055 2013.07.12. Светлана РОМБАНДЕЕВА Ма̄ньлат ма̄хум мӯйлысыт. Ма̄н о̄лнэ ма̄вт, Россиявт, са̄в мир о̄лы, таима̄гыс ма̄в рущ щирыл та ла̄ваве: многонациональное государство. Округувт о̄с аквтох – тыг хотыла̄ти са̄в мир та ювыт, Россияв янытыл ман э̄лы хо̄н ма̄ныл тыг та ёхтахтэ̄гыт, о̄лмыгтэ̄гыт. Тыт ань рӯпата хо̄нтыгпе̄гыт, олныл ойтавет. То̄ва ха̄снэ ма̄хум, ка̄ркам ма̄хум, та̄нти ма̄гсыланыл рӯпитэ̄гыт, яныг олн сэ̄лэ̄гыт. Тувыл тыт о̄луӈкве ханьщувлэ̄гыт, ще̄мьяныл тыг тотыяныл, ня̄враманыл тыт ханищтахтэ̄гыт. Са̄всыр мирыт акв по̄хат о̄лнэ̄ныл порат то̄ванакт ла̄тӈаныл акван ат ёхтэ̄гыт, тувыл халанылт халмалтахтэ̄гыт, воритотэ̄гыт. Яныгх о̄ т п а н т а̄ р в и т ы ӈ , ос ня̄врамытын манос ма̄ньлат хо̄тпатын, в а̄ и м , у щ п ы л н э̄ г та̄рвитыӈ. Та̄нанылн э̄ри юртыӈыщ о̄луӈкве, а к в ъё т ё н г а с а ӈ к в е , потрамаӈкве, ос ты пе̄нтсыл та̄н халанылт ля̄втэ̄гыт, алхатэ̄гыт. Ань тамле ва̄рмаль хотмус ёлпо̄илттан ма̄гыс Россия ос округ янытыл ма̄ньлат мир са̄всыр организациятыт рӯпитан ма̄хум та̄н вуйхатасыт. Лӯпта э̄тпос 27 хо̄талт образование ос молодежный политика Департаментыт рӯпитан хум А. Е. Тимкин, Российский Союз молодежи общественный организация кӯщай М. В. Смехов ос округ А̄с-угорский ма̄ньлат ма̄хум организацият рӯпитан нэ̄ Н. А. Молданова ля̄ххал тотнэ ма̄хум ёт акванхо̄нтхатыгласыт. Та̄н, насати, ма̄ньлат мир ма̄гыс фестиваль ва̄руӈкве номылматмыт. А н то н Тимкин ла̄выс: Мо̄лты та̄л ма̄н ма̄ньлат мир аквхуйплов организацият аквъёт рӯпитаӈкве пот ы р т а х т а с у в , с а̄ в э̄рнэ нэ̄пакыт хассӯв, щё̄питасӯв. Ань округ янытыл о̄лнэ ма̄ньлат ма̄хум ва̄тихал акван вос хо̄нтхатыглэ̄гыт, вос румалахтэ̄гыт. Ка̄сыӈ та̄л фестиваль ва̄руӈкве патэ̄в, тох намаяслӯв: «Через многообразие к единству». Ты та̄л Ханты-Мансийск ӯст лӯпта э̄тпос 28 хо̄талэ̄т е̄мты. Мо̄лты та̄л Нижневартовск ӯст ва̄рыгласлӯв. Тот нёлолов са̄всыр мир э̄ргысыт ос йӣквсыт, ты та̄л ос аквхуйплов мир мӯйлуӈкве ка̄сащасыт. Борис Лосев нампа паркыт ка̄сыӈ мир такви о̄лупсатэ суссылты: тэ̄нутаныл, маснутаныл, ка̄тыл ва̄рим пормасаныл. Мощ э̄лнуве сцена ва̄раве, тот ма̄хум йӣквуӈкве ос э̄ргуӈкве патэ̄гыт. Я̄нас пасан ӯнттэ̄в, ка̄сыӈ хо̄тпа тув ляпан ро̄влахтыглаӈкве ве̄рми, хотты номт о̄ньщи те, вос ла̄ви, тамле ялпыӈ хо̄тал таве̄н мӯсты ман а̄ти. Ма̄хум тот тах касэ̄гыт, ка̄сыӈ мир та̄нти касыланыл суссылтэ̄гыт. Ам номсэ̄гум, ка̄сыӈ хо̄тпан э̄ри тув ялуӈкве, самыл ка̄салаӈкве, сака пӯмыщ. Э̄лаль Максим Смехов потыртас: Тыг украинцыт, белоруссыт, рущит, ма̄ньщит, хантыт, татарыт, киргизыт, казахыт, таджикыт, узбекыт, азербайджанцыт ёхтэ̄гыт. Ка̄сыӈ мир маныр ха̄сы манос о̄лупсатэ манхурипа – ма̄хум вос сунсэ̄гыт, вос ка̄салэ̄гыт, са̄всыр мирыт хумус юртыӈыщ ве̄рме̄гыт о̄луӈкве, аквъёт йӣкващлэ̄гыт, аквъёт ощхулит ва̄ре̄гыт. Надежда Молданова о̄с аквкит ла̄тыӈ ла̄выс: Ма̄н соссаӈ ма̄хманув ка̄тыл ва̄рум пормасаныл мирн суссылтыяныл. Ханты а̄гиюв Лариса Миляхова йӣкви ос э̄рги. Тав турсуе сака нё̄тнэ. Акв ма̄ньщи ос акв ханты ансамблиг э̄ргуӈкве ос йӣквуӈкве патэ̄г. Кит проектыг щё̄питасагӯв: «Время поющих стрел» (Евгения Вьюткина тав хансыс) ос «Фестиваль национальных фотографий». О̄выл рӯпата ня̄врамыт та̄н «Ма̄нь Ӯскве» стойбищаныл урыл, китыт рӯпата ос по̄слын хурит урыл. Ань ты фестиваль порат ка̄сыӈ мир мо̄т хотты ма̄хум по̄слуӈкве патыяныл. Тувыл яныг таквс э̄тпост, «День народного единства» хо̄тал порат, пуссын хурит тах колнорн но̄хтагталавет, сунсыглаӈкве патыянув. Ты проектыг но̄х те патэ̄г, ма̄н пуссын хотща̄гтэ̄в. Акв тамле ёмас проектув но̄хпатыс, тох намаим о̄лы: «Мастерская по изготовлению одежды обских угров». Таквсы порат ма̄хум соссаӈ мир маснут ю̄нтуӈкве о̄вылтахтэ̄гыт. Пуссын ты ва̄рмалит ма̄н таимагыс ва̄ре̄в, ань са̄всыр ма̄хум халанылт вос ва̄йхатэ̄гыт, акван вос румалахтэ̄гыт, юртыӈыщ вос о̄лэ̄гыт. Ма̄н, ма̄ньщи ос ханты ма̄хум, э̄лы хо̄н ма̄хум ляльт ка̄миньт номтыл сунсэ̄в. Та̄н ётаныл сымыӈыщ о̄лнувув, ос туп та̄н ма̄навн нэ̄матыр лю̄ль ул вос ва̄рнувыт, ма̄н ма̄вт нас роттыг вос о̄лнувыт. Ты хӯрум ка̄ркам, номтыӈ а̄гипыг тамле потыр та о̄щмыт. Ла̄вум потраныл тэ̄лаг вос е̄мты, кӯщаитын вос нё̄тавет, ма̄к ёмас проектаныл но̄х вос патэ̄гыт. Э̄рыӈ, со̄ль, тах ма̄ньлат ма̄хум халанылт юрщмахтэ̄гыт, мо̄т мир о̄лупса ва̄ӈкве ос янытлаӈкве патэ̄гыт. Хурит Максим Смехов, Антон Тимкин ос Надежда Молданова послым о̄лэ̄гыт. 1055 2013.07.12. unknown Мирн пе̄риим ма̄хум ӯщлахтуӈкве минасыт. Са̄ккон пирмайтан хо̄тпанув туи ӯщлахтуӈкве миннэ̄ныл э̄лыпа̄лт лӯпта э̄тпос оигпан порат са̄пранин акванатхатыгласыт. Тот та̄н ва̄т нупыл нила са̄ккон урыл потыртасыт ос та̄наныл пирмайтасыт. Та хо̄тал, лӯпта э̄тпос ва̄т нупыл са̄тыт щислат, Е. Д. Айпин 65 та̄лэ т о̄ в л ы с . З а сед а н и е о̄вылтахтам порат таве янытлаӈкве Г. Ф. Бухтин, губернатор ва̄ӈын хум, ёхталас. Геннадий Федорович губернаторн те̄тым ла̄тӈыт ловиньтас ос такви о̄с ёмас, сымыӈ ла̄тӈыт ла̄выс, хорамыӈ лӯптал мӯйлуптастэ. В а̄ т н у п ы л н и л а са̄ккон халт ма̄н соссаӈ ма̄хманув ма̄гсыл хансым са̄кконыг «О развитии северного оленеводства» ос ма̄ньщи, ханты ла̄тӈыл та̄ратан газетаг, передачат урыл тот потыр о̄лыс. Округувт са̄лыт янмалтым тит предприятияг рӯпитэ̄г, тот пуссын аквъёт 18 445 са̄лы о̄ньщаве. «Осетные», «Юильские оленеводы», «Ильгиборская», «Вар», «Айтупос» общинат 796 са̄лы янмалтэ̄гыт. Белоярский районт ва̄т нупыл акв фермерский хозяйство о̄лы, тот 3 206 са̄лы о̄ньщаве. Ты коныпал ма̄хум та̄нти са̄лы о̄с о̄ньще̄гыт, та̄н 14 571 са̄лы янмалтэ̄гыт. Югра янытыл пуссын са̄лыт аквъёт те ловиньтаӈкве – 37 018 са̄лы ма̄н округувт ха̄йтыгты. Та̄н акваг уральтым о̄ньщавет. Са̄всыр тэ̄рпиӈ уколыл ва̄рыглавет. Са̄лы нё̄выль тыналан э̄лып а̄ л т, л е̄ к к а р ы т ы н ё м щ а к в у р а л ьт а в е . 2012 та̄лт 248, 5 тонна нё̄выль тыналавес. Са̄р та̄лныл 4, 9 процентын са̄внув о̄лыс. Тох о̄лы, тыт ӯйхул нё̄влянув ат то̄вылхатэ̄гыт, мо̄т ма̄ныл о̄с тотаве. Округувт тит газетаг ханты ос ма̄ньщи ла̄тӈыл хансаве̄г. Ты коныпал тӯя па̄сыл сайтыг ла̄внэ ищхӣпыӈ ма̄т газетаг тув о̄с ва̄раве̄г. Тот www. khanty-yasang. ru ля̄ххалыт рущ, ма̄ньщи ос ханты ла̄тӈыл хансым о̄лэ̄гыт. Т. С. Гоголева ла̄выс: «Югория» телекомпания округ бюджетныл та̄л сыс 180 миллион солко̄вил та̄стувес. Телевизор хосыт ханты ла̄тӈыл та̄л сыс са̄т щё̄с ля̄ххалыт суссылтавет ос ма̄ньщи ла̄тӈыл та̄л сыс туп 90 минута. Тот ма̄ньщи ла̄тӈыл потыртан акв хо̄тпа рӯпиты. Ам губернаторувн ты урыл пищма хансыгласум, ювле ла̄тыӈ те̄тсыт, са̄внув щё̄с уртуӈкве та̄н ат ве̄рме̄гыт. Ты урыл ам кӯщаит ёт иӈ э̄лаль рӯпитаӈкве патэ̄гум. Тох сунсуӈкве те, Марий Эл ма̄т тот ка̄сыӈ хо̄тал титхуйплов щё̄с ща̄нь ла̄тӈыл передачат ва̄равет. Ма̄н ма̄вт та̄л сыс ты са̄витын ат ёхты». 1055 2013.07.12. Николай МЕРОВ Хӯл ла̄щал янмалтаве. Округув я̄т мохсаӈ, ӯсхул, ка̄рай, супыг ос нялк хӯлыт ка̄сыӈ та̄лныл мощщаме̄гыт. Та̄наныл са̄вмалтан ма̄гыс 2008 та̄лт хӯл янмалтан завод ӯнттуӈкве патвес. Ты ма̄гыс округ бюджетныл кит миллиард солко̄ви майлувес. Ос завод ӯнттын сыс то̄ва тэ̄лат э̄рнэ щирыл ат ва̄рве̄сыт. Ань ты ва̄рмалит мӯсхалыг щё̄питан ма̄гыс иӈ акв миллиард солко̄ви майвес. То̄нт кӯщаит ла̄всыт, завод 2013 та̄лт рӯпитаӈкве о̄вылтахты. Со̄ль, ань ты та̄л лӯпта э̄тпост округ рыбокомбинатыт ос хӯл янмалтан пе̄рмат рӯпитан хо̄тпат Ханты-Мансийск ӯсн ёхталасыт. Югорский рыбзаводыт конференция о̄лыс. Хӯл янмалтан ма̄хум сыресыр ва̄рмалит урыл потраныл ловиньтасыт. Та заводыт кӯщаиг Василий Сысуев рӯпиты. Тав ла̄внэ̄тэ щирыл, хӯл янмалтан хо̄тпат ищхӣпыӈ утыт ос ма̄нь хӯлыт тыттын тэ̄нут та̄нки ёвтэ̄гыт. Ты ма̄гыс банкыт кредитолн выгыт. Ос ётылнув акв тонна хӯл янмалтан порат округ бюджетныл са̄тлов со̄тыра солко̄ви са̄вит компенсацияолныл ойтавет. Ты олныт ос то̄нт ойтавет, хунь хӯлыт яныгме̄гыт. Тувыл ань я̄нас рӯпата ва̄рнэ хо̄тпа ма̄нь тӯр аукцион щирыл лов со̄тыра солко̄ви ойтым ёвтуӈкве ве̄рмитэ. Ос ты тэ̄ла ва̄нэ хо̄тпат ла̄внэ̄ныл, а̄ти ка̄сыӈ тӯр сортыл та̄гиньтаптуӈкве ро̄ви. То̄ва тӯрыт э̄лын о̄лэ̄гыт, тот лё̄ӈх ос на̄йпос а̄тим. Ты та̄л Югра ма̄т туп налыман са̄вит тӯр хӯл алыщлан ма̄гыс тыналавес. Ос акв тамле ва̄рмаль ань о̄лы. Та̄нки рӯпата ва̄рнэ хо̄тпат ма̄нь хӯл э̄лаль янмалтан ма̄гыс нэ̄мхо̄т ёвтуӈкве ат ве̄рме̄гыт. Югорский завод туп та̄л арыгтем рӯпиты. Тот иӈ са̄в та̄рвит ва̄рмаль о̄лы. То̄ва ищхӣпыӈ утыт иӈ ат ӯнттуве̄сыт. Ань а̄рталан ма̄гыс ма̄нь цех рӯпиты. Югра ма̄т яныгса̄т арыгтем предприятиятыт ма̄хум хӯл алыщлым рӯпитэ̄гыт. Мо̄лты та̄л сыс та̄н онтоловиткем со̄тыра тонна хӯл пувсыт. Са̄р та̄лныл нила процентын са̄внуве̄г о̄лы. О к р у г у в я н ы т ы л тӯрытыт ос я̄тыт пуссын аквъёт ва̄тахкем са̄всыр хурип хӯл уигты. Са̄выӈпа̄лэ сорт, хулюмхӯл, ка̄сэв ос щапак тыт о̄лы. Ты хӯлыт а к в а г а л ы щ л а ӈ к в е р о̄ в е̄ г ы т. М а н а с а̄ в и т ка̄сащегы̄н, таса̄вит пувуӈкве ве̄рмегы̄н. Мохсаӈ тай хӯрум та̄л сыс кит щёс мощщаг е̄мтыс. Таима̄гыс ты хӯл мори алыщлаӈкве ат та̄ртаве, нэ̄пак та̄л хӯл пувнэ хо̄тпат яныг штрафолныл пинавет. Мо̄тынтыг мохсаӈ пувнэ ма̄гыс квота мощщаг ва̄раве, 7 тонна туп пувуӈкве тах та̄ртаве. Ты ва̄рмаль ханищтан специалистхо̄тпат ла̄внэ̄ныл щирыл, 2015 та̄л мус мохсаӈ щар мощщаг е̄мты, выгыр нэ̄пакын хансаве тах. Таима̄гыс ань хӯл янмалтан завод округувт сака ты э̄ри. Тот рӯпитан ма̄хум т ох н о м с э̄ г ы т, а н ь хӯрум та̄л сыс завод иӈ ва̄рияныл, ётыл ёмщакв рӯпитаӈкве паты. Тувыл э̄лаль ты колныл ка̄сыӈ та̄л атпан миллион ма̄нь мохсаӈ хӯлкве Иртыш я̄н та̄ртуӈкве номсэ̄гыт. Ты хосыт я̄т о̄с э̄рыӈ атыӈ хӯлыл са̄вме̄гыт тах. Ты коныпал тот ань тыналан ма̄гыс хӯл о̄с янмалтаӈкве патаве. 1055 2013.07.12. Тамара МЕРОВА Э̄лумхо̄лас тэ̄ланэ уральтавет. Ханты-Мансийскан са̄всыр ма̄ныл э̄лумхо̄лас тэ̄лат ӯргалан кӯщаит ёхталасыт. Рущ щирыл та̄н «Уполномоченный по правам человека» ла̄вавет. Ма̄н округувт тамле кӯщаиг Александр Сидоров о̄лы. Ос Россия янытыл э̄лумхо̄лас тэ̄лат ӯргалан хо̄тпаг Владимир Лукин рӯпиты. Ты хо̄тпат ань та̄нки рӯпатаныл о̄вылтыт потыртасыт ос ма̄н соссаӈ ма̄хманув урыл пӯмщалахтасыт. О̄выл хо̄тал са̄в ма̄ныл ёхтум мӯй хо̄тпат «Югра лылыеп» ассоциация колн ялсыт. Тот ассоциацият пуӈктотнэ хум, Совет старейшин, ма̄ньлат ма̄хум организация ос ӯйхул алыщлан община кӯщаит ёт акванхо̄нтхатыгласыт. Кӯщаянув ма̄нав ӯргалан ва̄рмалит урыл потыртасыт. Ма̄н, насати, нэ̄мат сака та̄рвит ат о̄щнэ̄в. Хоты хо̄тпа та̄н палтаныл нё̄тмил ма̄гыс пищма хансы, та̄н тав тэ̄ланэ ёмщакве̄г щё̄питаӈкве нё̄тэ̄гыт. Ань йильпи российский паспортыт э̄лумхо̄лас национальносте хансуӈкве ат патвес. Ос матыр нё̄тмил киснэ порат та̄н хотыл ва̄вет, хоты ще̄мьяныл о̄лэ̄гыт, нас ла̄тӈын ат агтавет. То̄ва хо̄тпат сут щирыл нэ̄паканыл щё̄питасаныл. Тувыл ма̄хум округ кӯщаянувн нэ̄пак хансыгламыт, т а ю и п а̄ л т со сс а ӈ ма̄хум пе̄с паспортаныл ка̄тн маимат. Ня̄врам намнэ̄паке̄т национальность тахольт хультуптавес. Ос то̄ванакт щар по̄х ма̄хум та̄нкина̄ныл м а н о с н я̄ в р а м а н ы л ма̄ньщииг манос хантыиг хансыяныл, тох соссаӈ ма̄хум са̄вми. Ла̄тӈагув ос культурав та̄н ат ва̄ганыл, ханищтаӈкве о̄с ат таӈхияныл. А̄нумн таи са̄ль, соссаӈ ма̄хум ма̄гыс та̄стым олннё̄тмилыт наска̄ссыг ла̄кква та уртгалавет, ос щар ма̄к ма̄ньщит ос хантыт вуньщалыг хультэ̄гыт. Программат мӯсхалыг ке рӯпитанувыт, соссаӈ ма̄хманув пуссын хосат та̄гыл колыӈыг е̄мтнувыт, нуса ат тотнувыт. Мо̄тыт хо̄талт мӯй ма̄хум е̄ӈта пасан ва̄тат акванатхатыгласыт. Та̄н «Коренные народы в контексте бизнеса и прав человека» ва̄рмалит урыл потрыт хӯнтлысыт. Мӯй ма̄хум ёт округ губернаторув Наталья Комарова пащалахтас ос соссаӈ ма̄хум ӯргалан са̄всыр программат урыл потыртас. Женева ӯсныл Самия Слимэин, ООН колыл ёхталам нэ̄, ма̄ янытыл соссаӈ ма̄хум ма̄гыс манхурип мирхал са̄кконыт о̄лэ̄гыт ос маныр ӯргалан статьят та̄н о̄ньще̄гыт, хумус та̄н щиранылт э̄лумхо̄лас тэ̄ланэ вуянтавет – ты урыл потыртас. Тувыл семинар оигпам юипа̄лт Владимир Лукин журналистыт ёт хо̄нтхатыглас, тав ла̄выс: «Ма̄н са̄в э̄рнэ рӯпата тыт ва̄рсув, с а̄ в с ы р т э̄л а т т а̄ р а паттысанӯв. На̄н соссаӈ ма̄хманын палт, со̄ль, са̄в та̄рвит ат о̄щнэ̄н. Россия коныпал 70 арыгкем мо̄т хо̄н ма̄тыт мощщаг хультум соссаӈ ма̄хум ва̄рмаляныл ёт о̄с акваг рӯпитэ̄гыт. Ма̄н ань аквъёт ханищтахтэ̄в, хумус тэ̄лат мӯсхалыг щё̄питаӈкве акванн ё̄ т х а т э̄ в . Т ы т о с акв тэ̄ла э̄лаль ёмща к в х а н ищт а ӈ к в е о с т о р г а м т а ӈ к в е таӈхилӯв. Югра ма̄т газ ос ма̄во̄й но̄хвиве, ты ва̄рмалит ма̄гыс ма̄во̄й ёт рӯпитан кӯщаит соссаӈ ма̄хманын ёт халмалтахтэ̄гыт, пот р а н ы л а к в а н а т ёхтэ̄гыт. Хотьютаныл ёт потыртахтуӈкве ро̄ви ос хумус нё̄туӈкве, ма̄н иӈ та̄ра ат паттылӯв. Соссаӈ ма̄хум праваныл вуянтан ма̄гыс хотьютаныл ёт потыртахтуӈкве э̄ри, туп хантыт, ма̄ньщит ёт манос та̄н са̄всыр кӯщаяныл ёт? Тот ка̄сыӈ хо̄тпа тэ̄ла такви щире̄т пе̄рыгтытэ, таима̄гыс са̄всыр тэ̄лыгтан накыт е̄мтэ̄гыт. Ма̄во̄й ёт рӯпитан кӯщаит са̄в олн сэ̄лнэ ма̄гыс ла̄палахтыглэ̄гыт. Ма̄н ань тыт мощ сунсыглахтасӯв, нэ̄пакыт ловиньтасанӯв ос матыр ла̄тыӈ э̄лаль тах тотэ̄в». 1055 2013.07.12. Тамара МЕРОВА Ня̄врамыт яныгхо̄тпат ханищтыяныл. Мо̄лал «Спасти и сохранить» нампа акция оигпас. Тот маныр ёмас тэ̄лат ва̄рве̄сыт ос э̄лаль хумус рӯпитаӈкве патэ̄гыт – ты ва̄рмалит урыл журналистытн губернатор ва̄ӈын хум Сергей Полукеев, ма̄вит ӯргалан Департаментыт кӯщай хум Борис Костюхин ос ма̄вит осэ уральтан экспертнэ̄ Виктория Кравцова потыртасыт. Ня̄врамыт ма̄витув ӯргалаӈкве сака ёмщакв нё̄тэ̄гыт. Ка̄сыӈ е̄мт са̄в ня̄врам йӣвыт ӯнттэ̄гыт, порсыт акванатыяныл, та̄нки порс мори ат па̄хвтэ̄гыт ос аквта щирыл о̄луӈкве яныг хо̄тпат ханищтэ̄гыт. Мо̄лты та̄л Сургут ӯс по̄хат дачат о̄лнэ ма̄т ня̄врамыт ма̄вит ӯргалан урыл хансым нэ̄пакло̄мтыт ос порс атнэ хӯрыгсовыт ма̄хумн майласыт. Та па̄сныл ма̄хум порсаныл хо̄та̄ти па̄хвтуӈкве ат патсыт ос та̄нки о̄лнэ ма̄наныл ёмщакве̄г хотщё̄питасаныл. Нижневартовск ӯс нупыл ма̄шинал яласан лё̄ӈх хосыт са̄в ма̄т па̄ртло̄мтыт тӯщтуве̄сыт, тот хансым о̄лы: «Ты ма̄ ма̄нь ня̄врамытн сыстамтавес! » Ань та юипа̄лт, со̄ль, ты лё̄ӈх палытэ̄т щар сыстамыг е̄мтыс, тот нэ̄мхотьют воссыг порс ат па̄хвты. Акция ва̄рыглым сыс Югра янытыл ань 76 со̄тыра ӯльпа ос лов со̄тыра лӯптаӈ йӣв ӯнттуве̄с. Телефестиваль о̄лум порат Китай, Австралия, Новая Зеландия ос США ма̄ныл о̄выл щёс мӯй ма̄хум ёхталасыт. Тувыл ма̄во̄й но̄хвинэ ма̄т рӯпитан хо̄тпат III эколог Съёзд тыт ва̄рыгласыт. Тыт яныгса̄ткем хо̄тпа акванхо̄нтхатыгласыт о с с а̄ в с ы р т а̄ р в и т ва̄рмалит урыл потыртасыт. «Спасти и сохранить» нампа акция тэ̄лат округ коныпал мо̄т ма̄т ва̄рыглавет тах. Ань ты акция щирыл ма̄хум Ямал ма̄т, Коми республикат ос Свердловский областит рӯпитаӈкве патэ̄гыт. 1055 2013.07.12. Тамара МЕРОВА Россиян о̄луӈкве ёхтэ̄гыт – рущ ла̄тыӈ вос ва̄гыт. Округ губернаторув Наталья Комарова са̄всыр национальностил о̄лнэ кӯщаит акванатыгласанэ. Та̄н Юграт о̄лэ̄гыт ос та̄нки мираныл торыг пуӈктотэ̄гыт. Округ кӯщаюв культура ос рущ ла̄тыӈ ханищтан урыл та̄н ётаныл потыртас. Тав ла̄выс: «Яныгполь э̄тпост Владимир Путин, Россия Президентув, 2014 та̄л культура та̄лыг ва̄руӈкве ла̄выстэ. Ань таима̄гыс пе̄с йис накыт э̄лаль тотыянӯв, нэ̄пакн хансыянӯв ос та̄рвит в а̄ р м а л и т ё м щ а к в щё̄питыянӯв. Россия культурав ма̄ янытыл о̄с суссылтылӯв. Мо̄т ма̄ныл ёхтум ма̄хум ма̄гыс ма̄н о̄с са̄всыр программат манос проектыт щё̄питаӈкве ве̄рме̄в. Ань щар э̄рнэ тэ̄лаг таи о̄лы ты хо̄тпат рущ ла̄тӈыл ханищтаӈкве э̄ре̄гыт. Любовь Ковешникова, образование, наука ос ма̄ньлат хо̄тпат тэ̄ланыл ёт рӯпитан Департаментыт кӯщай нэ̄, потыртас: «Округувн мо̄т ма̄ныл ёхтум ня̄врамыт сака та̄рвитыӈ ханищтаӈкве. Ань 30 ня̄врам рущ ла̄тыӈ щар ат ва̄гыт, 400 са̄виткем рущ ла̄тыӈ мощ торгамтэ̄гыт кос ос школат лю̄льсаӈ ханищтахтэ̄гыт. Рущ ла̄тыӈ ва̄нэ ня̄врамыт ёт о̄с са̄в рӯпитэ̄в. Та̄н мо̄т хо̄н ма̄ныл ёхтум ня̄врамыт ёт юртыӈыщ вос о̄лэ̄гыт, акван вос нё̄тхатэ̄гыт». Кӯщаит потыртасыт, ань тамле ня̄врамыт я̄нас ханищтаӈкве э̄ре̄гыт. Ханищтапыт туи порат вос ва̄рыглавет. Ня̄врамыт ща̄няныла̄щаныл ёт аквторыг вос ханищтавет. Та̄н са̄выӈпа̄лэ рущ ла̄тыӈ о̄с ат ва̄гыт, юн та̄нки ща̄нь ла̄тӈыл туп потыртэ̄гыт. Ня̄враманыл тыг тотыяныл ос маныр та̄рвит та̄н тыт о̄ньщуӈкве патэ̄гыт, хумус ханищтахтэ̄гыт, ща̄нита̄щит ат номсахтэ̄гыт. Таима̄гыс са̄всыр национальностил о̄лнэ кӯщаит та̄нки респ у бл и к а н ы л ё х т у м ма̄хумн нё̄туӈкве ла̄вве̄сыт. Александр Новьюхов, «Югра лылыеп» ассоциация кӯщай хум, округт о̄лнэ ма̄хум соссаӈ хо̄тпат пе̄с йис наканыл ӯргалаӈкве ла̄всанэ. Тав потыртас: «Ханты ос ма̄ньщи пе̄с потрыт манос йис мо̄йтыт ва̄нэ хо̄тпа моще̄ртын щар ат хульты. Тамле хо̄тпат ань туп щар сытам во̄р ма̄т хультсыт, тув мо̄рсыӈ порат мо̄т ма̄хум ёхталэ̄гыт. Ма̄н тот та̄мле та̄рвит о̄ньще̄в, ты ма̄хманув палт мо̄т то̄рмын по̄йкщан хо̄тпат о̄лмыгтамыт. Та по̄х хо̄тпат соссаӈ ма̄хманувн та̄нки то̄рманыл урыл потыртэ̄гыт. Тувыл ма̄н ма̄хманув номтаныл тэ̄лыгтыяныл ос та юипа̄лт аквъёт ялпыӈ ма̄н минэ̄гыт ос тот пе̄с йис тагыл акванатым пормасыт но̄хпе̄ламтыяныл. Тамле лю̄ль, пилыщмаӈ пищит ёлпо̄илттаӈкве э̄ре̄гыт. Ма̄н на̄нан ханты ос ма̄ньщи пе̄с йис наканув ӯргалаӈкве о̄с ла̄виянӯв». Акванатхатыглам ма̄хум «Диалог национальных культур» нампа проект щирыл аквъёт рӯпитаӈкве патэ̄гыт. Ос культура Департаментыт рӯпитан хо̄тпат ма̄нь таквс э̄тпос мус «Реестр объектов нематериального культурного наследия Югры» нэ̄пак тах щё̄питыяныл. Ань пуссын тув хансым пе̄с йис потрыт, мо̄йтыт, э̄ргыт, йӣквыт ма̄кыг ӯргалаӈкве патавет, ос ялпыӈ ма̄н воссыг нэ̄мхотьют ул вос новхаты. 1055 2013.07.12. Светлана РОМБАНДЕЕВА Кульпас па̄выл тох ты о̄лы. Хурит Назарова Светлана (15 та̄л), Албина Фаина (14 та̄л), Садомина Татьяна (14 та̄л) ос Батманова Раиса (16 та̄л) по̄слым о̄лэ̄гыт. Та̄н миркол па̄лыл рӯпитаӈкве патхатасыт. Ань май са̄ккон щирыл 14 та̄л яныт ня̄врамыт туи каникуланыл порат рӯпитаӈкве ве̄рме̄гыт, хотьют ка̄сащи. Тувыл тах олнло̄мтыл ойтавет. Хо̄тал сыс кит щё̄с арыг тӯп ро̄ви рӯпитаӈкве. Лӯпта э̄тпост та̄н ань са̄т ня̄врам ты рӯпитэ̄гыт, па̄выл янытыл матыр э̄рнэ рӯпата ва̄ре̄гыт, порс атэ̄гыт, сырыт о̄льпыл сартыяныл ос мо̄т са̄в ма̄т рӯпитым яласэ̄гыт. А̄гит ла̄внэ̄ныл щирыл, рӯпитаӈкве та̄нанылн мӯсты, янгыщ та порат пӯмыщ, хунь матыр о̄льпыл сартлэ̄гыт. Тамле ка̄ркам а̄гит Кульпас па̄вланыл о̄льпыл ёмащакв та нопитыяныл, ялпыӈ хо̄тал кастыл щё̄питыяныл. Пуссын пуста̄гыл вос о̄лэ̄гыт. Хурит Лелятова Полина ос Гындыбина Вика по̄слым о̄лэ̄г. Полина нёлолов та̄лэ, таквсы порат тах хӯрмит классын ханищтахтуӈкве мины. Оматэ Тамара Петровна, а̄ги о̄парищ наме Чупрова. А̄тятэ Аркадий Иванович. Полина увщитэ наме Оля. Вика ос лов та̄лэ, атыт классыт ханищтахтуӈкве паты. Оматэ Наталья Владимировна, а̄ги о̄парищ наме Лелятова. А̄тятэ Николай Абрамович. Люда увщи о̄ньщи, ос а̄пщитэ Абрам. А̄гирищиг ла̄внэтэ̄н щирыл, тэ̄н ёмащакв ханищтахтэ̄г, школан ща̄гтым ялантэ̄г. Ты я̄тил ма̄ньщи ня̄врамакве̄г пуста̄гыл вос о̄лэ̄г, со̄тыӈыщ вос яныгме̄г. 1055 2013.07.12. Николай МЕРОВ Ма̄ньха̄пыл кассыт. Лӯпта э̄тпост Сургут ӯсн соссаӈ ма̄хум са̄в па̄лыл акванатхатыгласыт ос тот ма̄ньха̄пыл кассыт. Пе̄с порат ма̄хум туи о̄вылтахтын порат касыл ва̄рыгласыт, хунь я̄т ӯсхул нёвумты. Сургут ӯст ты ялпыӈ хо̄тал 2000 та̄лныл янытлаве. Ма̄ньха̄пыл товнэ хо̄тпат о̄влэ̄т «Витхон» янытлан ма̄гыс пуӈк пинсыт. Тувыл каснэ хо̄тпат ма̄ньха̄п тармыл ӯнлым олнке̄р витын та̄ратасыт. Сайма я̄н На̄й-О̄тыранув вос сэ̄гамалэ̄гыт, нэ̄матыр лю̄ль нак ул вос е̄мты. Та юипа̄лт ма̄хум касуӈкве о̄вылтахтасыт. Я̄ ва̄тат пуссын аквъёт 28 каснэ хо̄тпа о̄лыс. Сургутский район ТромАган, Сытомино, Русскинская, Чеускино па̄влытныл ос Сургут, Лянтор, Ханты-Мансийск ӯсытныл ма̄хум ёхталасыт. Ка̄сыӈ хо̄тпа ка̄ркамыг товыс. Каснэ ва̄рмаль оигпам юипа̄лт ка̄сыӈ хо̄тпа янытлан нэ̄пакыл ос мӯйлупсал майвес. Хум хо̄тпат халт о̄выл места Леонид Русскин, китыт места Данил Сопочин, хӯрмит места Руслан Богордаев висыт. Нэ̄т халт ос о̄выл места Ирина Мултанова, китыт места Лилия Покачева, хӯрмит места Любовь Кузнецова висыт. Владимир ЕНОВ потре ма̄ньщи ла̄тӈыл Н. МЕРОВ хансыстэ. 1055 2013.07.12. Александр ВЬЮТКИН Тэ̄нут щё̄питан кол. Ханты-Мансийск ӯст «Югралесхоз» колт сапра̄ни о̄лыс. Тот во̄рт о̄лнэ ӯйхулыт ос во̄рт яныгман пилыт, ла̄хсыт тэ̄нутыг щё̄питан урыл потыр о̄лыс. Сапра̄ни э̄лыпа̄лт о̄влэ̄т ма̄н, тув ёхталам ма̄хум, тэ̄нут щё̄питан колыл суссылтавесӯв. Хумус тот са̄лы нё̄выль ма̄ниг сакватаве, то̄славе ос тушёнкаг ва̄раве – суссӯв. Тот пилныл варенье па̄йтаве, по̄лям та̄гыл тыналан ма̄гсыл ла̄кквапинтлан колнакн о̄с щалтсасӯв. Та юипа̄лт ӯльпа па̄квсамыт щё̄питан колнак суссӯв. Колнак ёмщакв рӯпитан ма̄гсыл мощнув иӈ ат а̄стлавес. Па̄квсамыл во̄й пащиртан ма̄шина иӈыт ӯнттавет. Сапра̄ни о̄вылтым порат о̄влэ̄т губернатор ва̄ӈын хо̄тпатэ Сергей Полукеев потыртас, тав ла̄выс: «Тыхо̄тал тэ̄нут щё̄питан кол янытыл ё̄мыгтым ам таи ка̄саласум, ань тыт рӯпитан ма̄хум та̄нти рӯпатаныл ёмщакв ва̄ганыл, таима̄гсыл мӯсхал щирыл ва̄рияныл. Ма̄ янытыл о̄лнэ мир ань сыстам ма̄т яныгман тэ̄нут тинсэ̄гыт. Ма̄н округ во̄рувт яныгман тэ̄нут са̄в. Ань ма̄навн округув янытыл па̄влыӈ ма̄т са̄внув тамле завод ӯнттуӈкв э̄ри. То̄нт ма̄хум рӯпатаӈыг е̄мтэ̄гыт». С. М. Полукеев юипа̄лт «Югралесхоз» кӯщай Алексей Николаевич Павлов та̄нти ва̄рнэ рӯпатаныл урыл потыртас: «ГП «Югралесхоз» кол 2008 та̄лт пӯсвес. Та па̄сныл тот са̄всыр проектыт щирыл рӯпитасӯв. Нё̄выль, пил по̄льтын яныг холодильник 2009 та̄лт ёвтсӯв. Тав тынэ 24 млн. 727 со̄тыра солко̄ви. Пил ос па̄квсам ма̄ниг сакватан утыт 2010 та̄лт ёвтве̄сыт, 117 млн. солко̄ви та̄н ма̄гсыланыл ойтсӯв. Таи ты лю̄ль, пилыт, ла̄хсыт, нё̄выль мо̄т тэ̄нутыг ва̄рнэ утыт пуссын атуӈкв иӈ ат ве̄рмиянӯв. Ма̄н ты мӯтрат ма̄гсыл олн та̄ра кос ойтсӯв. Та̄наныл ва̄рнэ ма̄т матрыг хосанув о̄щве̄сыт, мощ мо̄лалнув ущта тотве̄сыт. Ань э̄рнэ щирыл ӯнттавет, ёмщакв ва̄руӈкв э̄ре̄гыт, тувыл та. Ань тыналан тэ̄нутанув иӈ сака мощщат. Ам номсэ̄гум, таквсы тах ма̄н ма̄нти хусапсовыт тӣврын пиным пил, ла̄хс ос па̄квсам округув янытыл тыналаӈкв патэ̄в. Ва̄рнэ тэ̄нутанув тыналан ма̄гсыл ла̄пка пӯнсэ̄в. 2012 та̄лт нё̄выль тэ̄нутыг ёмщакв щё̄питан кол ӯнттысӯв. Тот ань фарш, котлета, пельмень ос то̄сам нё̄выль пуссын са̄лы нё̄влил ва̄раве. Са̄лы нё̄выль Ямал ма̄ныл тыг тотэ̄в. Ма̄нти округувт са̄лы нё̄выль кила ма̄гсыл 280 солко̄ви во̄ваве. Ты тынэ ма̄навн сака яныг. Лӯи ма̄ныл тотнэ нё̄выль т ы н э 1 6 0 сол ко̄ в и . Ма̄навн э̄лы ма̄ныл ёвтуӈкв тынта̄лнуве. Ань о̄щнэ холодильникувн 220 тонна нё̄выль ла̄пи. Тэ̄лы порат ма̄н таве та̄глэ̄кв нё̄влил тотыгласлӯв. О к р у г у в я н ы т ы л 90 община о̄лы. Ма̄н ётув «Рахтынья», «Колмодай», «Вар», «Карым», «Устрём», «Сетави», «Ямал хо̄тал» ос «Ӯльпа» нампа общинат рӯпитэ̄гыт. Та̄н ётаныл договорнэ̄пак хассӯв. Хӯл, нё̄выль, ӯльпа па̄кв, пил ма̄гсыл ма̄н олныл ойтхатэ̄в. Хо̄т та̄л сыс общинат рӯпитан ма̄хмытын ма̄н 23 млн. солко̄ви ойтсӯв. Округ янытыл 320 хо̄тпа ёт рӯпитэ̄в». С а п р а̄ н и о и г п а м юипа̄лт ма̄н то̄сам ос па̄йтым нё̄влил, колпасыг ва̄рим нё̄влил, сакватым са̄всыр са̄ккарыӈ пилыл ос атыӈ па̄квсамыл тыттувесӯв. Пуссын атыӈыг щё̄питым о̄лсыт. 1055 2013.07.12. Тамара МЕРОВА Та̄наныл акваг номиянӯв. Ха̄льӯс район Ягрим па̄выл ляпат хуньт Люлюкары пе̄с ма̄ньщи па̄вылкве о̄лыс. Е. И. Ромбандеева нэ̄паке̄т тав ма̄ньщи ла̄тӈыл Ялъю̄с па̄влыг хансым о̄лы. Ань тот туп хара ма̄ хультыс. Хум хо̄тпат пуссын хо̄нтлуӈкве минасыт ос хо̄та̄ти порславе̄сыт. Тувыл 1960 та̄лытт ма̄нь па̄влыт акв яныг па̄вылн тотве̄сыт. Ялъю̄ст хультум ще̄мьят о̄с мо̄т ма̄н ва̄нтлуптаве̄сыт. Ос ты па̄вылквет самын патум ма̄хум та̄нки ма̄ке̄ныл нэ̄мхуньт ат ёрувла̄лыяныл, акваг номияныл. Та̄н хо̄нтлам ма̄н тотым рӯтаныл ма̄гыс памятник ва̄рсыт. Россия янытыл лӯпта э̄тпос 22 щисла хо̄нтлан ма̄т порслым ма̄хум ка̄стын хо̄талыг о̄лы. Ань Ялъю̄с па̄вылкве̄т памятник ва̄рвес ос та хо̄тал о̄выл щёс ма̄хумн суссылтавес. А̄лпыл ма̄хум тув катерыл тотве̄сыт, мо̄таныт моторха̄пыл минасыт. Тамле ёмас ва̄рмаль «Наследие» нампа клубт пуӈктотнэ нэ̄ Людмила Галкина щё̄питас, ос таве̄н ма̄ньщи э̄кват нё̄тсы̄т. Та̄н пуссын Ягрим па̄вылт о̄лэ̄гыт. Людмила Григорьевна потыртас: «Тыт памятник ва̄руӈкве а̄нумн хосат та̄гыл Ялъю̄ст самын патум нэ̄т ла̄выгласыт. Ам туи порат ханищтахтын ня̄врамыт тыг ӯщлахтуӈкве тотыгласанум. Тыт сака нё̄тнэ сыстам ма̄. Ня̄врамыт хара ма̄т ха̄йтыгтасыт, я̄т пувлысыт ос ма̄нки нялк алыщласӯв. Ма̄н т ы м а̄ у р ы л э̄л а л ь пӯмщалахтуӈкве патсӯв. Н. К. Захарова (Саратина) ёт ва̄йхатасӯв, тав ты па̄вылт самын патыс. Э̄ква ма̄навн са̄в потыртас, мо̄т ма̄хум ёт о̄с хо̄нтхатыгласӯв. Тувыл ты ма̄хманув ёт 2005 та̄лт Ялъю̄с на̄лми ва̄тат акванатхатыгласӯв ос то̄нт аквъёт тыт памятник ва̄рнэ урыл потыртахтасӯв». Та сыс са̄в та̄л ювлехультыс кос, ма̄ньщи ма̄хманув акваг ӯрхатсыт. Та̄н ос Людмила Галкина, Ягрим миркол кӯщай, ос пыгыт армиян винэ комиссият рӯпитан хо̄тпат нё̄туӈкве во̄всаныл. Ня̄врамыт ты яныгпа̄ла хо̄тпатныл атум потраныл нэ̄пакн хассаныл ос са̄всыр касылын ке̄тыгласаныл. Тот но̄хпатсыт, олныл майлуве̄сыт. Та щирыл пуссын ва̄гыт, тыи сака э̄рнэ ва̄рмаль, таве э̄лаль тотуӈкве э̄ри. Ань памятник тахольт а̄стлавес. Тав Ягримт катерыт щё̄питан ма̄хумн ва̄руӈкве нё̄твес. Та̄н памятник ос пӯсас ва̄рсыт. Тувыл ма̄хум Ялъю̄сн тотыглан ма̄гыс о̄с та̄н катер майласыт. Хо̄нтлым ма̄н тотым хо̄тпанув наманыл миркол кӯщаитын вольгын па̄рт тармыл хасве̄сыт. Ты па̄рт Нягань ӯсн ва̄рылтасаныл. Ялъю̄ст самын патум ма̄ньщи ма̄хманув ань пуссын ёмас номтыл о̄лсыт. Та̄н а̄гиянылпыганыл, апганыл ёт тув ялсыт. Хо̄тал палыт нё̄тнэ ма̄кве сунсыгласыт, ма̄нь пораныл номылматыгласыт ос ты урыл потыртасыт. Надежда Константиновна Захарова ос Анна Николаевна Гындыбина памятник лаппантым то̄р хотвистэ̄н. Евгений Мельник, ялпыӈколт рӯпитан хум, по̄йкщан ла̄тыӈ ловиньтас ос ялпыӈ вит паргалтас. Мо̄т мӯй хо̄тпат о̄с ёмас ла̄тӈыт ла̄всыт, ня̄врамыт стихыт ловиньтасыт, хо̄нт урыл э̄ргыт э̄ргысыт. Тувыл пуссын хорамыӈ лӯптат памятник по̄хан пинсыт. Ёхталам ма̄хум пасан ва̄рыгласыт. Тот К. К. Пуховец (Саратина) атыӈ тэ̄нут па̄йтыс. Ма̄н порслым ма̄хумке̄нув ка̄стысанӯв. 1055 2013.07.12. Светлана РОМБАНДЕЕВА Кульпас па̄выл 80 та̄лэ то̄влыс. Ты та̄л лӯпта э̄тпос 29 хо̄талэ̄т Ха̄льӯс район Кульпас па̄вылт ма̄хум мӯйлысыт. Па̄выл ань 80 та̄лэ то̄влыс. Ты яныг ялпыӈ хо̄тал э̄лыпа̄лт Кульпаст ам па̄выл кӯщай палт ялсум, тав наме Тихонова Людмила Тихоновна. Китыглахтасум, ань та̄н хумус мӯйлуӈкве патэ̄гыт, ялпыӈ хо̄тал кастыл маныр щё̄питэ̄гыт. Людмила Тихоновна тох ты потыртас: – Кульпас па̄вылн ма̄хум о̄лмыгтаманыл па̄сыл 80 та̄л ты то̄влыс. Ты ялпыӈ хо̄тал кастыл ма̄н са̄в ма̄хум оргкомитетын пе̄риясӯв, тувыл рӯпитаӈкве та о̄вылтахтасӯв. Россия янытыл о̄лнэ ма̄хманувн нёлса̄т ляпатем пищма манос открытка ке̄тсӯв. Ма̄хум тыг во̄виянув, хотьютаныл ве̄рми, вос ёхталы. Омск ӯсн ке̄тсӯв, Тюмень ӯсн, округув янытыл о̄лнэ ма̄хманувн ке̄тсув. Та̄н пуссын хуньт тыт о̄лсыт, рӯпитасыт. Тувыл мо̄т ма̄н о̄луӈкве ва̄нтлысыт, ос Кульпас па̄вланыл акваг номим о̄ньщияныл. Ва̄им, та̄н тыт о̄лсыт, яныгмасыт, ханищтахтасыт, рӯпитасыт, ня̄враманыл янмалтасыт. Па̄вланыл хумус ёрувлыяныл. Тыт тах акванхо̄нтхатыглэ̄гыт, п о т р а м е̄ г ы т, ю в л е хультум та̄ланыл номылмата̄лыяныл. Ка̄сыӈ хо̄тпа мӯйлупсал щё̄питаслув, то̄ва ма̄хманув почетный грамотатыл мыганӯв. Ялпыӈ хо̄тал ловм а н те м щ ё̄ с п о р а т па̄вылкант ня̄врамыт ма̄гсыл сыреса̄т касыл ва̄раве. Тувыл аквта торыг тот тах выставка щё̄питаве, ма̄щтыр ма̄хум ка̄тыл ва̄рум пормасаныл суссылтавет. Клуб колт ос «Ам па̄влум» нампа выставка рӯпитаӈкве паты. Тот тах кина хосыт пе̄с хурит суссылтавет, па̄выл э̄лнаӈ манхурипаг о̄лыс, пе̄с колыт та маныр пуссын по̄слым о̄лэ̄гыт. Китхуйплов щё̄с порат ма̄хум пуссын клубын атхатэ̄гыт. Ха̄льӯс район кӯщай ла̄тыӈ ла̄ви, ма̄хум мӯйлупсатыл мӯйлуптыянэ, грамотал мыганэ. Та юипа̄лт конква̄лэ̄в, кон мӯйлэ̄в, яныг сцена ва̄раве. Тыт, Кульпаст, о̄лнэ а р т и с т а н у в к о н ы пал э̄ргын ос йӣквнэ ма̄хум Саранпа̄вылныл ос Ло̄пмус па̄вылныл ёхтэ̄гыт. Хо̄тал палыт маттем та э̄рге̄гыт, йӣкве̄гыт. Клуб кол ляпат тах матыр тыналаӈкве п а т а в е , т э̄ н у т м а н ка̄тыл ва̄рим пормасыт. Ма̄хум я̄ ва̄тат ё̄мыгтаӈкве ве̄рме̄гыт, ӯнлахо̄луӈкве. Па̄влув ань ущпылнэ̄г нё̄тнэ̄г е̄мтыс, йильпииг са̄в йӣв яныгми, лылые̄пе с ы ст а м , л ы л т у ӈ к в е кӯпнит. Э̄типа̄лаг концерт ва̄раве, выступайтан ма̄хум тах э̄рге̄гыт, й ӣ к в е̄ г ы т. Та ю и па̄лт ма̄ньлат хо̄тпат ос яныгхо̄тпат ма̄гыс йӣквнэ кан ва̄раве. Па̄выл кӯщай тамле потыр та потыртас. Тувыл ялпыӈ хо̄тал минаме юипа̄лт ам Кульпас па̄вылн звонитасум, ма̄ньщи ма̄хманув китыгласанум, хумус та̄н мӯйлысыт. Лидия Дмитриевна Кугина (а̄ги о̄парищ наме Таратова) ла̄внэ̄тэ щирыл, ялпыӈ хо̄таланыл та̄нанылн мӯстыс, па̄выл мир ёмащакв мӯйлысыт. С а р а н п а̄ в ы л н ы л о с Ло̄пмус па̄вылныл э̄ргын, йӣквнэ ма̄хум ёхталасыт, сака пӯмщиг выступайтасыт. А̄лпыл клубт сапра̄ни ва̄рыглавес, Ха̄льӯс район кӯщай потыртас, па̄выл мир янытласанэ, са̄в ёмас, сымыӈ ла̄тыӈ ла̄выс. «Рыбкооп» организация ос «Рахтынья» община па̄лыл ма̄хум са̄всыр тэ̄нут тыналасыт, тортыт ман шашлыкыт ва̄рыгласыт. Тох тай пӯмыщ кос, ос туп та хо̄тал сака ащирмаӈ ос во̄тыӈ олыс. Таима̄гыс мир хоса ат мӯйлыс, юв молямлас. 1055 2013.07.12. Светлана РОМБАНДЕЕВА Школат рӯпитам хо̄тпа потре. Ханты-Мансийск ӯст ам Владимир Вячеславович Хромов хо̄нтыгласлум. Ты хо̄тпа са̄в та̄л Кульпас па̄вылт о̄лыс, школат ня̄врамыт ханищтым рӯпитас, кӯщаиг са̄в та̄л о̄лыс. Ётыл колта̄глэ ёт Ханты-Мансийск ӯсн ва̄нтлыс, тыг о̄лмыгтас. Таве ам Кульпас па̄выл урыл китыгласлум, хумус тот о̄лыс, рӯпитас. На̄н ань э̄лаль тав потре ловиньтэ̄лын: Кульпас па̄выл са̄в мирн ӯнттувес. Пе̄с порат ма̄хум э̄лы хо̄н ма̄ныл ёхталасыт, колыт ӯнттысыт ос мо̄т са̄в рӯпата ва̄рсыт. Мо̄т ма̄ныл ёхталам ма̄хум коныпал па̄выл о̄с аквтох соссаӈ ма̄хумн ӯнттувес. Адиныт, Анямовыт, Гындыбиныт, Сековыт, Пакиныт, Лелятовыт, Кугиныт рӯпитасыт. Лувыӈ суныл э̄рнэ пормасыт тотсыт, кол ӯнттын ма̄т рӯпитасыт, то̄ват ла̄тыӈ толмащлаӈкве нё̄тсыт. Тамле о̄парищ нам о̄щнэ ма̄хум ань ты хо̄тал мус тот о̄лэ̄гыт. Ты урыл ам «Очаг культуры» нэ̄пакт хансыгласум. Та порат рыбоучасток ӯнттувес, ма̄хум хӯл алэ̄гыт, тув тотыяныл. Хӯланыл ётыл Ха̄льӯсн тотантавет, тот панка тӣвырн пинавет, лаппантавет, тыналан ма̄гыс э̄л та ке̄тавет. Ма̄хум во̄раясыт, во̄руй алыщласыт, план то̄варттан ма̄гыс ПОХколн майласыт. То̄нт ты олимпиада ва̄руӈкве патвес, ма̄хум мӯйлысыт, са̄всыр касыл ва̄рыгласыт, кассыт. Ш к о л а ӯ н т т у ӈ к в е о̄вылтавес. Алексей Васильевич Голошубин, ня̄врамыт ханищтан хум, о̄влэ̄т Ло̄пмус па̄выл школат рӯпитас, тувыл Кульпас па̄выл йильпи школан кӯщаиг паттувес. Тав тот рӯпитаме порат ня̄врамыт ма̄гыс ма̄ньщи ла̄тыӈ урок ва̄рвес. О̄йка такви о̄с ма̄ньщи ла̄тӈыл потыртас. Ам тув колта̄глум ёт 1970 та̄л во̄ртур э̄тпост ёхтысум. Па̄выл то̄нт ма̄нь о̄лыс, ӯсхуланэ ощщат, та порат машинат хунь яласэ̄гыт. На̄йпос т у п а̄ л п ы л м о щ щ а н пе̄ламта̄лвес. Ха̄льӯсныл образование кол па̄лыл Валентина Ивановна Ахтямова ёхталас, ма̄н та̄ра колыл ёвтвесув, Фаина Алексеевна Артеева тав колэ. Э̄квам Анфиса Михайловна, а̄ги о̄парищ наме Гындыбина о̄лыс. Кит пыг янмалтасме̄н. Яныг пыгме̄н Вася, та та̄л хӯрмит классыт ханищтахтуӈкве патыс. Ма̄нь пыгме̄н Серёжа, о̄выл классын ущ минас. Школа сака пе̄с о̄лыс, ма̄н ёляныгмас, т о т р ӯ п и т а ӈ к в е т а о̄вылтахтасум. 1975 та̄лт ам ща̄ньа̄щ комитетт рӯпитан ма̄хум акванатсанум, ла̄всум, ма̄навн э̄ри йильпи школа ӯнттуӈкве. Тувыл Тюмень ӯст о̄лнэ областной Совет Трудящихся колн ма̄н пищма хассув, ань йильпи школал вос ӯнттаве̄в. Хассув, тыт рӯпитаӈкве сака та̄рвитыӈ, ащирмаӈ порат ня̄враманув по̄лявет. Кӯ щ а и т к а̄ с а щ а с ы т, кит та̄л сыс школав та ӯнттувес. 1978 та̄л порат ма̄н ща̄гтым йильпи школан та ва̄нтлысув. Ханищтахтан колнакыт янгыт, йильпи партат, уласыт тотве̄сыт. Ре̄гыӈ, кӯр па̄лтуӈкве ат э̄ри. Пе̄с школат Вынгилева э̄ква тав акваг кӯрыт палтыс, тот и о̄лыс. На̄йив са̄гри, а̄лумтыянэ, рущ ла̄тӈыл потыртаӈкве щар ат ха̄сыс. Пыгрищитын акваг нё̄твес, та̄н во̄рн на̄йвын ялантасыт, кит лув о̄щсув. Та о̄лупсав урыл потыр са̄в о̄лы. Кульпас школат ме̄н э̄кваме̄нтыл ва̄т нупыл са̄т та̄л рӯпитасуме̄н. Ам рӯпатамт ты ма̄к ёмас та̄ланум о̄лсыт. То̄ванакт та̄рвитыӈ о̄лыс, то̄ванакт ос ёмас хо̄талыт о̄лсыт. Са̄в мутраӈ ма̄хум ня̄врамыт ханищтасыт: Тамара Ивановна Костина (Отличник народного образования), Татьяна Яковлевна Шишигина – математика ханищтас, Мария Брандис, Екатерина Федоровна Елфимова, Агния Николаевна Пакина, Ульяна Павловна Гындыбина, Лидия Павловна Бешкильцева, Дарья Никитична Голошубина, Лидия Григорьевна Вовк. Пётр Парамонович Кимлобазов география урок ханищтас, ты о̄с сака ёмас, мутраӈ о̄йка о̄лыс. Математика урок ханищтас Леонид Тарасович Костин. Ос мо̄т са̄в ёмас ма̄хум тот рӯпитасыт. Хунь ам Кульпасн ёхтысум, ма̄ньщи ма̄хум янгыщ пуссын ща̄нь ла̄тӈыл потыртасыт. Сака ёмащакв потыртасыт Лопмус ос Кимкьясуй ня̄врамыт. 70й та̄лыт порат ма̄хум сака йӣквсыт, э̄ргысыт. Г а р м о ш к а л С к в о р цов о̄йка ёнгасас, сака пӯмщиг ха̄сыс. Ты э̄лыпа̄лт ам колта̄глум ёт Саранпа̄вылт о̄лсум, тот ма̄хум сака ат выступайтасыт, тох ат э̄ргысыт. Э̄ргын ма̄хманув пуссын номиянум: Т. Е. Усольцева, А. Н. Пакина, Н. А. Кузнецова, Д. Н. Голошубина ос мо̄т са̄в нэ̄квет. Та̄н сака нё̄тнэ турсуил э̄ргысыт. Тыт о̄лнэм атхуйплов та̄лыг ты е̄мтыс, э̄квам хосат а̄тим. Пыгагум ос апыгрищанум ёт о̄лэ̄гум. Нэ̄пакыт хансэ̄гум. Ты э̄тпос сыс эвенкийский ла̄тӈыл календарь щё̄питэ̄гум, ты ам ща̄нь ла̄тӈум. Ка̄сыӈ э̄тпос урыл хассум, хурит тув ва̄рсум. Апыгрищанум ма̄ньщи йӣкв йӣкве̄гыт, э̄рге̄гыт. Амти яныгмам ма̄м нупыл ялуӈкве таӈхе̄гум, хурит ёт выгум, тот тах ла̄ве̄гум, сунсэ̄н, ма̄ньщи ос ханты ня̄врамыт пе̄с йӣкв йӣкве̄гыт, ла̄тӈанылт потыртэ̄гыт. Владимир Вячеславович, ты я̄тил сымыӈ хо̄тпав, пуста̄гыл вос о̄лы, о̄с са̄в ёмас нэ̄пак вос хансы. 1055 2013.07.12. Николай МЕРОВ Йис о̄лупса э̄лаль тотытэ̄н. Ха̄льӯс районт Саранпа̄выл совхозт са̄лы ӯрим ань нила бригада хультыс. Тэ̄лы порат тот са̄лыл каснэ ва̄рмаль о̄лыс. Ты кастыл Валентина Анатольевна Хозяинова па̄вылн ёхталас. Тав китыт бригадат рӯпиты. Валентина ща̄няге̄на̄щаге̄н ма̄нь та̄гыл са̄лыӈ колт тотыглавес, тот акваг яныгмас. Тав Нё̄рыт сака э̄руптыянэ. Таима̄гыс хум ва̄рме юипа̄лт, та̄ра тув минас. О̄выл порат мощ та̄рвитыӈ о̄лыс. Ань матыра̄ти кӯстырыг ва̄ри. Тэ̄лы ляпат вит а̄тим, нэ̄ хо̄тпат тӯйт а̄лумтэ̄гыт ос толтыглэ̄гыт. Па̄стухыт ма̄гыс тэ̄нут па̄йтэ̄гыт. Ё̄рнколт нила ще̄мья о̄лэ̄гыт. Ка̄сыӈ нэ̄ такви са̄ме̄т пормасанэ о̄ньщиянэ. Кот тынтлэ̄гыт, маснут ю̄нтэ̄гыт ос мо̄т са̄всыр рӯпата ва̄ре̄гыт. Ты ва̄рмалин ма̄нь та̄гыл ханищтахтэ̄гыт. Мольщаӈ, ня̄ра, са̄хи, ва̄й, са̄всыр пормасыт мащтырыг ю̄нтыяныл. Ащирмаӈ ос во̄тыӈ хо̄талыт хо̄тпа тамле маснутыл ат по̄ляве. Бригаданылт та̄нки с а̄ л ы я н ы л о с с о в х о з с а̄ л ы т а к в ъ ё т о̄ньщияныл. Ань та̄н пӯӈанылт хӯрум со̄тыра са̄вит са̄лы о̄ньщаве. Та̄л палыт ва̄нтлым яласэ̄гыт, туп тэ̄лы порат хӯрум э̄тпос акв ма̄т лю̄ле̄гыт. Туи кастыл са̄лыяныл ос Нё̄рн ва̄нтлуптыяныл. Валентина Анатольевна о̄йкатэ саран хум, наме Яков Яковлевич Хозяинов, китыт бригадат кӯщаиг олы. Тав ща̄нягеа̄щаге о̄с йис та̄гыл са̄лы ӯрим яласасы̄г. Ань нэ̄гхумыг рӯтанэ̄н щирыл йис о̄лупса э̄лаль тотытэ̄н. Э̄лнаӈ ма̄хум са̄в са̄лы о̄щсыт. Ётыл сыресыр ва̄рмаль щирыл ла̄щалла̄щал холасыт. Тувыл ань ё̄рнколт са̄выӈпа̄лэ яныг хо̄тпат хультсыт. Ма̄ньлат хо̄тпат мо̄рсыӈ порат тув рӯпитаӈкве ёхтэ̄гыт. Ня̄врамыт школа а̄стланэ̄ныл юипа̄лт э̄л ханищтахтуӈкве минэ̄гыт. Са̄лыӈ колт о̄луӈкве ат ка̄саще̄гыт. Валентина Анатольевна о̄йкатэ̄нтыл кит ня̄врам янмалтэ̄г. Тэ̄н ханищтахтынэ̄тэ̄н порат Саранпа̄выл интернатт о̄лэ̄г. А̄гитэ̄н нилахуйплов та̄лэ, пыге̄н ос нёлолов та̄лэ то̄влыс. Туи ӯщлахтын порат тэ̄н са̄лыӈ колн ёхталэ̄г. Ще̄мьят рущ ла̄тӈыл потыртэ̄гыт. Ня̄врамаге̄н саран ла̄тыӈ ат ва̄гы̄г. Ань а̄гитэ ла̄ви: «Омакве, ам ё̄рнколт о̄луӈкве ат таӈхе̄гум, э̄лаль ханищтахтуӈкве минэ̄гум». Ма̄ньлат ма̄хум ань номтаныл тувле ат паты. Н э̄ гх у м ы г с а̄ л ы ӈ колн ёхтуме̄н па̄сныл ань хо̄тхуйплов та̄лыг то̄влыс. О̄с аквтыса̄вит та̄л тот о̄луӈкве номсэ̄г. Валентина Анатольевна а̄ще ё̄рн хум, оматэ ос ма̄ньщи нэ̄ о̄лыс. Оматэ акваг саран ма̄хум ёт о̄лыс. Таима̄гыс саран ла̄тӈыл ёмщакв потыртас. Валентина ос ма̄ньщи ла̄тыӈ мощ торгамты, оматэ̄н ханищта̄лвес. Ам ты ще̄мьян пуста̄гыл о̄лнэ ла̄тыӈ ла̄ве̄гум. То̄румн вос ӯргалавет. Пус ка̄т, пус ла̄гыл вос о̄лэ̄гыт. 1055 2013.07.12. Валентина УЗЕЛЬ Та̄н сака ёмас рӯпата ва̄ре̄гыт. Ханты ма̄хманув са̄выӈпа̄лэ Белоярский районт о̄лэ̄гыт. 1992 та̄л па̄сныл тот архивкол рӯпиты, ань тыг мус тот рӯпитан ма̄хум сака са̄в пе̄с потыр, мо̄йт, э̄рыг атсыт. Ань кӯщаиг тот Тамара Романовна Пятникова о̄лы. Ва̄рнэ рӯпатаныл урыл тав потре ловиньтэлы̄н. – Ам ма̄нь ня̄врамыт садикколт рӯпитаӈкв о̄вылтахтасум. Матахмат та̄л тот рӯпитасум, тувыл 1990 та̄лытт «Югра лылыеп» ассоциация рӯпитаӈкв тыт о̄вылтахтас. Ам та̄ра тув минасум, то̄нт ма̄н, со̄ль, са̄в ёмас ва̄рмаль соссаӈ ма̄хманув ма̄гыс ва̄рсӯв. Пуссын юртыӈыщ, акваннё̄тхатым рӯпитасӯв. Тувыл ам Лӯима̄ комитетн специалистхо̄тпаг во̄вве̄сум. Та порат ты ам Ева Шмидт ёт ва̄йхатасум. Аквщёс ма̄н рӯпатавн рущ о̄йка ёхтыс. Ка̄тэ̄т тетрадка о̄ньщас, а̄нумн суссылтытэ – тот ханты ла̄тӈыл са̄всыр потрыт ос мо̄йтыт хансымат. Рущ ла̄тӈыг та̄наныл толмащлаӈкв а̄нум во̄выстэ. Ам хумус ве̄рме̄гум, та щирыл та хассанум. Тувыл тав ханты букват урыл титыглахтуӈкв патыс, ам хотыл ва̄глум, та̄н хумус хансавет. Ева палт та те̄тыслум. Мощ ётылнув Ева Шмидт такви ам палтум ёхтыс, титыглахты – ханты ла̄тыӈ ам ёмащакв ва̄глум ман а̄ти. – Ва̄глум кос, таве̄н ювле ла̄ве̄гум. – Ам архивкол пӯнсылум, потрыт рущ ла̄тӈын толмащлаӈкв щар ат а̄лыме̄гум, а̄нумн нё̄тэ̄гын? титыглахты. – Ва̄им, нё̄тэ̄гум. Тох ты ам архивколт рӯпитаӈкв патсум. Ань тот рӯпитанэм нёлоловхуйплов та̄лыг ты е̄мтыс. Ты та̄лыт сыс ма̄н са̄в рӯпата ва̄руӈкв а̄лымасӯв, э̄лаль иӈ ва̄ре̄в. Ма̄навн йис потрыт, мо̄йтыт мо̄йтыглам ань са̄в хо̄тпа а̄тимыт. Ань ты йист о̄лнэ ма̄хум тох потыртаӈкв ат ха̄сэ̄гыт, мо̄йтуӈкв ат ве̄рме̄гыт. Матъёмас ма̄н ты рӯпата ва̄рим пе̄с ма̄хманув потраныл нэ̄пакн хассанӯв. Ка̄сыӈ хо̄тпа хурин по̄слыслӯв, я̄нас нэ̄пакло̄мтын о̄лупсатэ хансыслӯв. Пуссын аквъёт яныгса̄т арыгтем хо̄тпа е̄мты. Ань ам ётум рӯпитэ̄гыт – Римма Слепенкова, Евдокия Каксина, Елена Юрьева, Римма Потпот. Ань рӯпитаӈкв ма̄навн та̄рвитыӈ, сака мощща олныл миве̄в. Ма̄нь па̄влытт о̄лнэ ма̄хум ёт туп ялпыӈ хо̄талыт о̄лнэ порат ва̄щинтахтэ̄в. Ма̄нти хунь во̄ваве̄в, то̄нт минэ̄в. Тыт ӯсувт яныг хо̄тпат ма̄гыс я̄нас кол рӯпиты, рущ ла̄тӈыл «дом престарелых» тох ла̄ваве. Хотьют ляпа рӯт ат о̄ньщи, та̄н тув тотавет, тот о̄ньщавет. Мо̄лтынув тот акв яныгпа̄ла о̄йка о̄лыс, Яков Рандымов. Ма̄н тав палтэ акваг ялантасӯв, тав ма̄навн са̄в пе̄с потыр потырта̄лыс. Тав о̄с а̄тимыг е̄мтыс. Ань ос тот тит ханты э̄кваг о̄лэ̄г, тэ̄натэ̄н Римма ёт акваг уральтыягме̄н. Тэ̄н о̄с са̄в номе̄г, са̄в потыртэ̄г. Яныг хо̄тпа ёт потыртанэ̄в порат, маныр ма̄навн ва̄ӈкв э̄ри, та урыл та̄ра титыглахтэ̄в. Та̄ра ат те титыглылӯв, тувыл та мины. Матах та̄л минам юипа̄лт ман «филиалыг» ва̄рвесӯв. Яныг колув Ханты-Мансийск ӯст о̄лы. Кӯщаиг тот Ольга Даниловна Ерныхова рӯпиты. Ма̄н нэ̄пакн хансум потранув, мо̄йтанув тув те̄тыянӯв. Та̄н тот ищхӣпыӈ утн хансыяныл, копия ва̄ре̄гыт. Тувыл ювле тыг та те̄тыяныл. Тамара Романовна титыгласлум, та̄н таса̄вит рӯпата наука ма̄гыс ва̄ре̄гыт, ос манрыг хотты наукат кандидатыг ат ханищтахтэ̄гыт? Тав ювлела̄выс: «Ма̄н – пенсият о̄лнэ ма̄хум. Сака илямтаӈкв те патаве̄в, молях пенсиян минэ̄в. Ань та̄ланув ма̄нит хунь, ӯщлахтуӈкв о̄с э̄ри». Тамле ты ёмас хо̄тпат ёт ма̄н хо̄нтхатыгласӯв. Та̄н рӯпатаныл э̄лаль вос ва̄рияныл, ма̄ньлат ма̄хум та̄н палтаныл рӯпитаӈкв вос ёхтэ̄гыт ос ты сака э̄рнэ рӯпата э̄лаль вос тотыяныл. 1055 2013.07.12. Александр ВЬЮТКИН Э̄ргыт, йӣквыт суссылтым кассыт. Лӯпта э̄тпост Чувашия республикат Чебоксары нампа ӯст Россия янытыл о̄лнэ мирыт халт э̄ргын ос йӣквнэ фестиваль ва̄рыглавес, та̄н тот халанылт кассыт. Рущ ла̄тӈыл тох о̄лыс «Вместе мы – Россия» Ты фестиваль В. В. Путин Президентув номтэ щирыл ва̄рыглавес. Тыи Россия мирыт халанылт юртыӈыщ вос о̄лэ̄гыт. Ма̄н округувныл тув ат коллектив ялсӯв: рущит «Калинка» ос «Млада», тит ханты коллективы̄г «Торые» ма̄ньщи щирыл – «Лунт», тувыл ос «Мощ хот» «Мо̄йтыӈ кол». «Мощ хот» ма̄хум Ханты-Мансийский район Кышик нампа ханты па̄вылныл о̄лэ̄гыт. Ма̄н «Э̄ргыт, йӣквыт пувлын ма̄хум» нампа ма̄ньщи коллектив о̄с тув ялсӯв. Та кастыл щё̄питахтамув порат, ма̄н йӣкванув, э̄рганув ос са̄ӈквылтан та̄нанув акв юипа̄лт суссылтан ма̄гыс ва̄рсанӯв. О̄влэ̄т ма̄н, ма̄ньщит о с х а н т ы т, а к в а н нё̄тхатым йӣквсӯв ос с а̄ ӈ к в ы л т а с ӯ в . М а̄ н юипа̄лувт округувныл о̄лнэ рущит йӣквсыт ос э̄ргысыт. Ма̄нав тот йӣквуӈкве ос э̄ргуӈкве щё̄питан режиссерхо̄тпаг Михаил Панков о̄лыс. Тав ань соссаӈ мир пе̄с йӣквыт ма̄ньлат ма̄хмытын ханищтым рӯпиты. Чебоксар ӯст акв со̄тыра ляпатем хо̄тпа нёлоловхуйплов ма̄ныл акванатхатыгласыт. Ка̄сыӈ ёхталам мир та̄нти йӣкваныл, э̄рганыл ос са̄ӈквылтан та̄наныл суссылтасыт. Ма̄н халувт кассӯв, жюрихо̄тпат ос но̄хпатум ма̄хмыт пе̄риясыт. Фестиваль хӯрум хо̄тал рӯпитас, та сыс са̄тлов нупыл хӯрум са̄всыр коллектив сусвес. Но̄хпатум ма̄хум Москва ӯсн Кремль нампа колн тах во̄вавет. I степень дипломнэ̄пакыл «Торые» а̄гитпыгыт са̄ӈквылтапыл с а̄ ӈ к в ы л т а м а н ы л ма̄гсыл мӯйлуптаве̄сыт. Тувыл мо̄т хӯрум коллективыт «Млада», «Калинка» ос «Э̄ргыт, йӣквыт пувлын ма̄хум» II степень дипломнэ̄пакыл майве̄сыт. III степень дипломнэ̄пакыл «Мощ хот» мӯйлуптавес. Ам та урыл ла̄вуӈкв таӈхе̄гум, ханты ма̄хманув тув тотыглам йӣкваныл ос са̄ӈквылтан та̄наныл – тыи са̄выӈпа̄лэ п у с с ы н м а̄ н ь щ и йӣкванув, та̄нанув. Та̄н ос ла̄ве̄гыт, э̄рттам, ты Кышик па̄вылт о̄лнэ ханты ма̄хум та̄н утаныл. Тох ва̄руӈкве щар ат кос ро̄ви. 1055 2013.07.12. Мария КУМАЕВА Э̄квапыгрищ урыл мо̄йт (ма̄ньщи мо̄йт). Дарья Степановна Самбиндалова мōйтыглам мōйт ам Ха̄льӯс район Хулюмсӯнт пāвылт 1996 тāлт хансыгласлум. Э̄кваг-ōйкаг ōлэ̄г, ня̄врам ат ōньщēг. А к в м а т э̄ р т ō й к а э̄кватэ вōрт ё̄ми, сунсы: мāнь ня̄врам āпат хуи. Ня̄врам юв тотыстэ. О̄йкатэ̄н лāви: «Ам ня̄врам вōрт хōнтсум āпат». Ōйкатэ лāви: «Нōхпēсталэ̄лн, маныр ня̄врам? Тав хотьют арыгтаптам ня̄враме тув ӯнттыгпамтэ? » «Тав ул арыгтаптувес». Э̄ква пēсталастэ ня̄врам – пыгрищ. Э̄квапыгрищ – наме э̄лаль тащир та пинвес. Э̄рыгхум, мōйтхум хоса хунь яныгми. Пыгрищ āще нупыл лāви: «Āнум ё̄вт вāрен, ня̄л вāрен. Ня̄врамыт такем ё̄втыӈня̄лыӈ тāгыл хāйтыгтэ̄гыт. Ам о̄с таӈхе̄гум ё̄втыӈня̄лыӈ тāгыл хāйтыгтаӈкв, ёнгуӈкв». Ё̄втыл вāрвес, ня̄лыл вāрвес. Кон та хāйтыгты, ёнгасы. А̄ще аквмат āгмыл та ēмтыс, хотталь та щалтыс. Ӯс тāгыл, пāвыл тāгыл мирн вōрн та тотвес. Пāг щё̄питавес. Пыгрищ āкве нупыл лāви: «Ам ос мощ кон хāйтыгтэ̄гум, ёнгēгум». «Я, наӈ мощ ёнгасэн, хāйтыгтэн. Наӈ ня̄врам, юн ӯнлуӈкв наӈын марщум». Пыгрищ кон хāйтыгты, ёнгасы. Ӯйрищ алыщлы. Аквмат щёпыр алас, юв хāйттастэ, рōӈхи: «Āква, āква! Ам танай тамле та ӯй аласум! » «Тыя, апыгкве, щёпыр», э̄ква лāви. Э̄квапыгрищ хоса хунь яныгми, акваг янгыг та ēмтанты. Акваг ос ман вāс, ман ӯйхул та алыщлы. Аквматэ̄рт сытый та ēмтсыг āквēнтыл. Аквмат пыгрищ вōрн минас. Ё̄ми, сунсы: я, йӣвыт кӯтюв ӯнлы. П ā т а м т а ст э н я̄ л ы л , кӯтюв ёл та рагатас. Ята, юв та харттытэ. Юв харттастэ, рōӈхи: «Āква, āква! Ам рущ кӯтюв аласум! » «Тыя ман рущ кӯтюв, тыя тӯлмах, тав вōрт ōлы». Āкве нупыл лāви: «Я, хомус тав нуяве? » А̄квēн хотнуйвес, тōславес. «А, тащир та нуйнэ, тащир та тōсланэ», āкве нупыл лāви. «Ам тах о̄с хуньт алэ̄гум, тах тыщир та нуилум, тащир та тōслылум». Тōсластэ̄н. Āкве лāви: «Ам тах мāнь вāтахум палт тотылум. Тэ̄нутыл, лӯтыл тах мивемēн. Пыгрищ тай āкве хунь хӯнтлы, лāви: «Āква, āква, ам тотылум». «Ам ты хӯрыг кӣвырн мāнигтаслум, пēраслум, наӈ тах нōх ул лэ̄ватэ̄лн. Яныг вāтахумн тах хот āлмаяве, тэ̄нутыл ат мивемēн, нэ̄матарыл ат мивемēн. Ня̄нь лōмт ōс ат ōньщимēн. Юиōвыл колас лōмтумēн уляня̄ниг ты тōслылум», ща̄не лāвыс. «Ам тах āти, āти, нōх ат суссылтылум. Ам тах тотылум мāнь вāтахум палт», пыгрищ лāвыс. Я, тувыл мощ тувнув патыс, āлмаястэ хӯрыгсове, тай ӯс котильт кāт та хосгитэ: «Я, сунсэ̄н, сунсэ̄н! » Пāвыл тāгыл ня̄врамыт нупыл та рōӈхи: «Ам танай, тӯлмах аласум! Ань мāнь вāтахум палт тотылум, тэ̄нутыт мāгыс. Коласыл тах мивем». Я н ы г в ā т а х у м н кāсалавес, конквāлапас, та рōӈхи: «Пыгрищ, пыгрищ! Тыг тотэ̄лн, ам выглум! » А тав ман ӯрум хум, тув та хāйтыс, лāви: «Āти, ам āквум лāвыс: мāнь вāтахум палт тув тотэ̄лн. Мēнамēн о̄с тэ̄нут э̄ри, ты колас мāгыс». Яты, вāтахум лāви: «Ам мыглум, мыглум, юв кол кӣвырн щалтымēн». Тувыл юв та щалтсы̄г. Юв щалтсы̄г, тӯлмах хот та няртумтавес, такви кон пувтмавес. Тувыл яныг вāтахум та рōӈхи: «Минэн, минэн! Тӯлмах аласлын, ам наӈын манрыг мыглум». Яты, пыгрищ юв та вораты, юв та вораты, юв та щалтыс. Яныг вāтахум лāви: «Наӈ мāныл тэ̄лум, витыл тэ̄лум яныг сōрниӈ лӯптап хāль тыг ат ке тотылын, ам наӈын алылум ты тӯлмахын мāгыс». Тувыл пыгрищ юв та минас лю̄ньщим, тыстым. Юв минас, āкве лāви: «Я, хумле? Майвēсын колас ы л ? » « Ā т и , я н ы г вāтахумн тӯлмахум х о т н я р т у м т а в е с . Хӯрыгсовт ōньщаслум, āнум кāсалас, āнум юил ня̄влыстэ, тӯлмахум хотняртумтастэ, хӯрыгсовум. Юв тӯлыгпавēсум, тувыл тох лāви: «Минэн, мāныл тэ̄лум, витыл тэ̄лум сōрниӈ лӯптап яныг хāль тыг тотэ̄лн. Ты мōрсыӈ, та мōрсыӈ мāт». «Ты, пыгкве, ща̄не лāви, таи тотуӈкв маныр мат хоса хунь, тотылын. Тав тай тах тыг хунь пōйты, акв хумин тах, тыг тав ат пōйты, акв э̄лумхōлас хунь тāяпāлас, акв э̄лумхōлас хунь алапāлас. Ань тай тāен, тувыл ёлхуен, холытан тах тай āлпыл квāлэн». Тувыл сōль, пыгрищ тэ̄с, āстыс, ёл та хуяс лю̄ньщим, тыстым. Ёлхуяс, а а̄кве ё̄хтлаттāл ё̄рнхӯрыг паттатэ нōхё̄хтлатастэ, сōрни лумтэ сэ̄тап поталытэ нōхвистэ – акв сōрнитэ кон овты, акв сōрнитэ кол кӣвырн овты. Я, тувыл āлпылыг ēмтыс. Э̄квапыгрищ нупыл лāви: Квāлэн, апыг, минэн, ань хōтал ты нэ̄глы». Сōль, нōхквāлыс, конквāлыс, ювщалтыс, хотловтхатас. Хōтал акваг сэ̄рипос тэ̄лам. Яты, тэ̄пъялас, аис, сэ̄тап поталыл ма̄йвес, мāнь хӯнтсовыл майвес. «Ты ня̄нь лōмтын тах тув ёхталэ̄гын, хōталъяткем порат тув ёхтэ̄гын, ты щакни вāрнэ, хоталь ōлн хансаӈ вāрт вāрнэ касаюм, хоталь ōлн лылыӈ вāрт вāрнэ касаюм тытты тыя ёттотэ̄лн, хōтал пāлнэ сунсэ̄гын. Лӯпта, сāт лӯпта ханэ̄гыт. Нōххāхсэн, сāграпēн тытаныл, тувыл ты хӯрыг кӣвырн тыг мāгēн». Сōль, пыгрищ тув минас. Хāйтыс, хāйтыс, вāгтāл патыс. Тув ёхтыс, нōӈхаль сунсы: хāль, хōтал нэ̄глапан пāлыл сāт лӯпта ханэ̄гыт. Щар сōрнияныл ёлаль пāсгēгыт, сōрнияныл нōӈхаль суртгēгыт, нас хōтыллы. Нōх та хāӈхыс, нōххāхсас, та сāграпасанэ. Āкве майлам совхӯрыг кӣвырн та мāгсанэ, ёлвāглыс. Ня̄нь лōмтэ тōвтащлас. Сэ̄тап поталытэ тāрматас, та юипāлт та хāйты. Э̄т котилькем порат юв ёхтыс. Ща̄не лāви: «Минэн, хāйтэн. Тыт ты вит āнысуп, тыянын тах иснас кол ёлыпāлн тув тӯщтыгпен, ос ты витыл сōсыгпēн. Ты хāль тах тув тэ̄лы. Сōль, пыгрищ хāйттасанэ тув, кол иснас ёлыпāлн сома тӯщтыгпасанэ, витыл сōсыгпасанэ. Нōӈхаль та лю̄люмтасыт хāль лӯптат. Такви юв хāйтыс, тэ̄пъялас, лӯтыс, ёлхуяс. Āлпыл тув минас, лāви: «Я, ань тай ойтхатэн, ань тотаслум». Яныг вāтахумитэ иснасныл кональ сунсы: сōль, хāль лю̄ли. «Я, ты маныр сар сāт ощмарп хум! Манур тотастэ? Āти, ам ат ойтхатэ̄гум. Наӈ ань щāрщ котильт аквантэ̄лум сāт тӯр тыг ат ке тотъянын, ам наӈын ты тӯлмахын мāгыс алылум. Ты Тōрум тав ōщнэ ӯй ōлас, манрыг аласлын? » Пыгрищ лāви: «Ам сымум э̄тгалаве, манрыг ат алылум». «Наӈ ос манрыг вōрн ат минэ̄гын? Вōрн минэн, о̄с алыщлэн. Юн хот ёралахтэ̄гын? » Тав такос воритотас, кон пувтмāлаве, юв щалтапи, кон пувтмāлаве, юв щалтапи. «Ам наӈын лāвсасум, та сāт тӯрыт тыг тотэ̄н». Кон пувтмавес, ос лю̄ньщим, тыстым юв та ё̄мантас. Āкве лāви: «Тав хум ос такем вāрмаль. Тах та тотылын, хӯрмит мāн тах ōс кēтавен». «Хомус тотылум? Тот тах алавем. Тав воссыг ул ат кēтавем. Тыятэ тах тотуӈкв ке вēрмилум, ам тах таве такви алылум». Āкве лāви: «Наӈ тэ̄пъялэн, тувыл ёлхуен, ам матыр пищ, матыр ощмар вāрēгум». Пыгрищ тэ̄пъялас, ёлхуяс. Āкве вōрн минас, товтыг сāгрыс, ты касаēтыл. Товтыг йӣвныл э̄т палыт вāрыс. Та āстысы̄г. Аквматэ̄рт лāви: «Я, квāлэн, апыгрищ, ань минэн». Нōхквāлттастэ. Кон пыгрищ кāсалас, сунсы: сōль, хōтал сэ̄рипос тэ̄лам. Юв щалтыс, ловтхатас, лӯтыс, тэ̄пъялас. Лущвитыл, полхвитыл тыттыстэ, уля ня̄ньлōмт о̄с та щēпын мāгумтас. Ща̄не лāвыс: «Ань ты касаин ёт вуēлын, товтыг тыт ты. Тув ёхтэ̄гын тах, сāт тӯр котильт яныг тӯр. Яныг тӯр котильт сāт сорт ӯнлэ̄гыт. Тыт ты сыгсов хӯрыгсов наӈын мыглум. Ты сыгсов хӯрыгсов кӣвырн вит āмарматэн. Та ё̄хнэн мос сыс та̄ӈхе сāграпēлн. Тав тах сыгсов хӯрыг кӣвырн такви рагаты. Тая яныг сорт тах». Я, тувыл пыгрищ та минас. Минас, аквматэ̄рт хōталъят кēмыг улпыл та ēмтыс. Тув ёхтыс, сунсы: щар сортыт осаныл нас суртгēгыт. Сунсы: сортыт халт, сōль, акв сорт яныг. Вит āмарматас сыгсов хӯрыг кӣвырн. Сорт та сāграпастэ, тувыл та сыгсов хӯрыг кӣвырн нас нёпатāлас. Тувыл пāг ёхтыс, ёсаге тармыл ворил лю̄ли. Тāкыщ ӯргалахтым пāг ёхтыс. Сунсы: мат яныт мā тӯрыг та равмтавес та сортытна. Пāг ёхтыс, ня̄нь лōмтэ тōвтащластэ, сыгсов хӯрыгсов лапн э̄ г у м т а с т э . Н ō х хӯнтмыгтастэ, ос ёсаге тармыл лю̄лис, юв та нуигтавес. Товтагēтыл юв нуигтавес. Аквматэ̄рт юв та ёхтыс э̄т котилькēм порат. Āквелāви: «Наӈ минэн тув сōсыгпēн сорт та̄ӈхыт, манарыт». Тув минас пыгрищ, сōсыгпасанэ сорт та̄ӈхыт, кол сысын тув равтасасанэ. Аквмат юв та минас. Пуӈке, саме мāньмыгтас, ёл та хуигпас. Āлпыл нōхквāлас, ат тэ̄пъялас, тох тув хāйтыс яныг вāтахум палт. Утэ нōхквāлум. Пыгрищ тав нуплэ лāви: «Я, ань тай ойтхатэн». Яныг вāтахум кональ сунсы: сōль, щар ованыл, вōт хумп вāрыс, нор кол хольт та поварēгыт. Мо̄йт э̄лаль мо̄тыт газетат ловиньтэ̄н. 1055 2013.07.12. Анна АЛГАДЬЕВА Ма̄ньщит ща̄рыщн ялсыт. Туи пора – ӯщлахтын пора ёхтыс. Кос хоталь ро̄ви минуӈкв – туп олн вос о̄лыс. Анькег ма̄хум акваг мо̄тпал хо̄ныӈ ма̄т ӯщлахтым яласэ̄гыт: Турциян, Египетн Ма̄н о̄с Хулюмсунтыӈ ма̄хум ос Ня̄хщамво̄лиӈ китыг, пуссын аквъёт китхуйплов хо̄тпа Краснодарский крайн ща̄рщ ва̄тан ялсӯв. Ня̄враманув туп школаныл а̄стапасыт, та̄ра та та̄лматсӯв. Ма̄нь ма̄хум, ня̄врамыт та̄н акваг ӯрхатым о̄лсыт, хунь сар, хунь минмыгтэ̄в. То̄ва м а̄ х м а н у в щ а̄ р ы щ т о̄лыгла̄лсыт, то̄ват о̄выл щёс ща̄рщ сунсуӈкв минуӈкв а̄стысыт. Э̄лаль минамувт нила хо̄тал ма̄ сунсыглым поездыл минасӯв. Поезд иснасыл кональ сунсэ̄гын, такем нё̄тнэ па̄влыт, яныг тэ̄пканкапаит та хультэ̄гыт, Нё̄рыт, урыт халт та минэ̄в, матыр я̄т ӯлтта та тотаве̄в. Волга я̄ ӣти минаслӯв, хуньт хультыс – аты мосталаслӯв. Волгоград ӯст о̄лнэ «Родина-Мать зовёт» скульптуракапай тай хосаныл на̄ӈки. Хунь та та̄ра минасӯв, ня̄врамыт маткем та о̄щатахтыгласыт, вагонт о̄лум ма̄хум о̄с пуссын иснасын ка̄ртсыт. Ща̄рыщн ёхтысӯв – со̄ль, матыр ла̄тыӈ ла̄внэ щирыл: «щар ща̄рщ хурип» яныг о̄лнэ̄тэ, йӣванэхуранэ ат на̄ӈке̄гыт, витэ то̄румл акванови, акванке̄лы. Ща̄рщ ва̄тат соссаг о̄лнэ ма̄хум туи ат ӯщлахтэ̄гыт, ты ма̄хум туп туи порат олн сэ̄лэ̄гыт. Туи сака са̄в ма̄хум ща̄рыщн пувлуӈкв ёхты. Хотьют о̄лнэ кол ман гостиница ке о̄ньщи, та ма̄хум тай ёмщакв олн сэ̄лэ̄гыт. Акв яныг хо̄тпа, таксил яласан о̄йка, ла̄ви: «Туи шортал ке ё̄мыгтэ̄гын – тэ̄лы о̄с шорта пис ё̄мыгтаӈкв патэ̄гын». Тав таи ла̄ви, туи ӯщлахтэ̄гын ке, тэ̄лы ёлысуп та̄л патэ̄гын. Ма̄н тай маныр, ман ӯщлахтуӈкв ёхтум ма̄хум. Кит са̄т ща̄рщ ва̄тат о̄лсӯв, ты сыс кит хо̄тал туп турап хо̄талыг о̄лсы̄г. Мощ ты пувлысӯв, хо̄тал ля̄льт исылтахтасӯв, понслахтасӯв. Я̄ по̄х ос ща̄рщ ва̄та хосыт таса̄вит са̄всыр ёнгын ма̄: писалил па̄тлуптаӈкв, са̄всыр ма̄нь ма̄шинал тахсаӈкв, хӯл пувуӈкв, кина сунсуӈкв ро̄ви. Таса̄вит тэ̄нэайнэ колпа̄лыт, тыналахтанва̄талахтан колхусапыт. Акв хо̄тал дельфиныт сунсуӈкв ялсӯв ты номтыӈ, пӯмащ ӯит. Маткем та суссӯв. Ня̄враманув иӈ хоса ты урыл потыртаӈкв патэ̄гыт тах. Аквщёс Сочи ӯсн «Ривьера» нампа паркын ялсӯв. Такем нё̄тнэ ма̄, та щё̄ри, таса̄вит са̄всыр йӣв. Тот тай ма̄к са̄в ос са̄всыр ёнгын ма̄. Ам аквщёс акваг ё̄хнэ ма̄нн та̄лсасум, матыр карсытыл та ё̄хтавесӯв. Та юипа̄лт матпалыт сымум нас хантас, воссыг нэ̄матхуньт тамле ма̄н ат та̄лэ̄гум. Ня̄врамыт тай нэ̄матараныл а̄ти, мо̄тмо̄т ма̄т ёнгим та ха̄йтэ̄гыт, ха̄хталахтэ̄гыт, туп олн ойтэн. Аквапаркын ялсӯв, тот о̄с пӯмащ о̄лыс. Ня̄врамыт сыпныл тахамтэ̄гыт, витн та пӯсатэ̄гыт. Ща̄рыщ ва̄тат тахсан ма̄гыс катер о̄лы. Ман о̄с та катерн та̄лсасув. Щё̄с арыг ща̄рыщ хосыт яласасӯв. «Гора Киселёва» ке̄расн тотыглавесӯв. Хуньт ты ке̄рас по̄хыт ва̄нэ кина «Бриллиантовая рука» по̄славес. Андрей Миронов ты ке̄рас ёлыпа̄лт ща̄рщ ва̄тат ты ё̄ми. О̄лум па̄влувӯсув я̄тэ Небуг, па̄влэ о̄с Небуг. Па̄выл такем нё̄тнэ ма̄т о̄лы, мувал акваг урыт, соссаӈ ма̄хум Нё̄рыг ла̄вияныл, тувыл ща̄рщ акв тыт. Я̄тэ тай то̄сам, туп а̄хвтасанэ хуе̄гыт. Такем хащта̄л э̄тыт турманыт. Онтолов щё̄ст ла̄мпа пе̄ламтан пораг та е̄мты, лов щё̄ст щар турман, хо̄тса̄т щё̄ст ущ постыглы. Ты яласамув сыс са̄всыр ма̄хмыг та ла̄ваве̄в. То̄ват китыглахтэ̄гыт: «На̄н хотыл о̄лгӣн? » То̄ват ла̄ве̄гыт: «На̄н хатанит? » Казахыг, марийцыг та патсэ̄в. Ма̄ньщи хо̄тпа ат ва̄гыт. Ма̄н ла̄ве̄в: «Ма̄н лӯима̄ е̄рыл о̄лэ̄в». Косманкем ща̄рщ ва̄тат ёмас, наӈки ма̄ке̄нт ёмаснув. Ювле ягмыгтасӯв, ня̄врамыт сома хотща̄гтмыт. Тувле ща̄гтым минасӯв ща̄рыщн минэ̄в. Ювл е у щ п ы л щ а̄ г т ы м минэ̄в – юв минэ̄в. Такем ка̄сув холас, ювле товлыӈха̄пыл йисӯв, молях та юв ёхтыгпасӯв. Ань ты ялум лё̄ӈхув иӈ хоса потыртаӈкв патылӯв ос по̄слам хуриянув сунсыглыянӯв. 1056 2013.07.26. Людмила ТЕТКИНА Кӯщаюв ма̄ньщит ёт хо̄нтхатыглас. Наталья Комарова губернаторув са̄всыр кӯщаянэ ёт Ха̄льӯс районын Ло̄пмус, Кульпас ос Кимкъясуй па̄влытт о̄лнэ ма̄хум палт ялыс. О̄влэ̄т тав Ло̄пмус па̄вылт о̄лнэ мир ва̄рмаляныл урыл пӯмщалахтас. Та па̄вылт акв яныг та̄рвит о̄лы таквсы ос туи порат тув нэ̄мхотмус минуӈкве. Наталья Комарова мирн ла̄выс: «Ман ты ва̄рмаль урыл ёмащакв ва̄глӯв, ань акваг номсахтэ̄в, маныр рӯпата ва̄руӈкве, на̄н та̄л сыс тыглетувле яласаӈкве вос ве̄рмысы̄н. Ма̄н ань тох ва̄руӈкве таӈхе̄в: тыт о̄лнэ вертолёт и с ы гл а н м а̄ ё м а щакв вос щё̄питаве, ос Ха̄льӯсныл Кульпас па̄выл мус яласан вертолёт тыт о̄с вос исыгла̄лы. Тыщир на̄н тах таквсы ос туи порат яласаӈкве ве̄рмегы̄н. Ты коныпал ань «Марс 2000» нила на̄иӈха̄п ёвтсӯв. Кит на̄иӈха̄п Ха̄льӯс районын ке̄таве̄г. Ты на̄иӈха̄пыг я̄ хосыт ос ма̄ тармыл яласаӈкве ве̄рме̄г. Аквторыг 18 э̄лумхо̄лас тув та̄луӈкве ве̄рми. Ты ха̄п Кульпасныл Саранпа̄вылн мус миннэ̄тэ порат тыг о̄с вос пӯхталы. Вертолётыл ман на̄иӈха̄пыл яласаӈкве ка̄сащегы̄н ке, на̄нки номсахтэ̄н». Мо̄т та̄рвитаныл ос тамле – ёмас связь ос интернет тот а̄тим. Ты ва̄рмаль урыл ма̄хум кӯщайн о̄с потыртасыт. Та̄н ла̄вве̄сыт, Ло̄пмус па̄вылт 2014 та̄лт сотовый связь ва̄раве. Клубкол ӯнттын ва̄рмаль урыл кӯщай нэ̄ таи ла̄выс, ма̄нь п а̄ в ы л к в е т т а м ле кол ӯнттын э̄лыпа̄лт номсахтуӈкве э̄ри, хумус мӯсхалыг ва̄руӈкве ро̄ви. Ха̄льӯс район миркол кӯщай нэ̄ Любовь Коротун ла̄вме щирыл, та̄н хӯрум ма̄нь па̄вылквет Ло̄пмуст, Кимкъясуйт ос Сӯкыръя па̄вылт клуб тах ӯнттэ̄гыт. Ань ка̄сыӈ ма̄нь па̄вылт йильпи пӯльница о̄с ӯнттаве. Акв тамле ФАПкол Ло̄пмуст рӯпитаӈкве паты. Ты та̄л я̄ витэ молях ма̄ниг е̄мтыс, ты кол ӯнттын ма̄гыс норыт ос мо̄т утыт па̄вылн тотуӈкве ат а̄лымаве̄сыт. Губернатор кӯщаит ты хосыт э̄лаль рӯпитаӈкве ла̄всанэ. Ты пӯсмалтан колыт ма̄нь па̄влытт 2014 та̄л мус ӯнттуӈкве э̄ре̄гыт. О̄с акв ва̄рмаль па̄вланылт «Югра» нампа акв телеканал туп суссылты. Ма̄хум китыглахтасыт, телевидениял хунь ва̄равет. Та̄н па̄вланыл цифровое телевидение 2015 та̄лныл суссылтаӈкве о̄вылтаве. С а п р а̄ н и о̄ л у м порат Наталья Ком а р о в а п а̄ в л ы ӈ ма̄хум мӯйлупсал мӯйлуптасанэ. Па̄вылт с п о рт и в н ы й п л о щадка тах ва̄раве. Ня̄врамыт тот футболыл, волейболыл, баскетболыл ёнгуӈкве патэ̄гыт. Ло̄пмуст кӯщаюв ма̄щтыр хо̄тпат ёт о̄с хо̄нтхатыглас, та̄н рӯпатаныл урыл пӯмщалахтас. Та̄н пуссын «Рахтынья» нампа общинат рӯпитэ̄гыт. Нэ̄т са̄всыр нё̄тнэ турло̄псыт, па̄льсакыт ос мо̄т утыт сакныл хартэ̄гыт. Хум хо̄тпат йӣвха̄пыт ос ма̄ньха̄пыт, тупыт ос мо̄т э̄рнэ пормасыт ва̄ре̄гыт. Ты община Кульпас па̄вылт са̄в та̄л рӯпиты. Ань Ло̄пмус па̄вылт о̄лнэ ма̄хум тув рӯпитаӈкве о̄с вивет. Та хо̄талт Кульпаст хӯл алыщлан ма̄хум янытлаве̄сыт. Н а т а л ья Ко м а р о в а м а̄ х у м я л п ы ӈ хо̄талыл янытлаӈкве тув о̄с ялыс. Па̄влыӈ мир янытламе порат Павел Хозумов Благодарностьнэ̄пакыл мистэ. Ты юипа̄лт кӯщай нэ̄ Кимкъясуй па̄вылн тотыглавес. Тот о̄лум сапра̄нит ма̄хум о̄влэ̄т пусмалтахтын ва̄рмаль урыл китыглахтасыт. Кит та̄л «Николай Пирогов» нампа на̄иӈха̄п ма̄хум п у с м а л т а ӈ к в е о с уральтаӈкве тув ат ёхталы. Тэ̄лы лё̄ӈх о̄лнэ порат ле̄ккарыт та̄наныл уральтаӈкве о̄с ат ёхталэ̄гыт. Ты ва̄рмаль урыл Виктор Рыбалко, Ха̄льус районный пӯльницат кӯщай, ювле ла̄выс, п л а в п ол и к л и н и к а тув ёхталаӈкве ат а̄лыми, я̄ витэ молях ёлмины. Наталья Комарова кӯщаит пуссын ла̄всанэ, ма̄нь па̄вылквет о̄лнэ мир урыл ул вос ёрувлэ̄гыт. Ле̄ккарыӈ на̄иӈха̄п яласан планын тамле па̄влыт о̄с вос хансавет. Па̄влыӈ ма̄хум пӯмщалахтасыт, Кульпаст йильпи интернат рӯпитаӈкве хунь о̄вылтахты. Ла̄вве̄сыт, ты интернаткол яныг таквс э̄тпос а̄стлаве, та̄н ня̄враманыл тув тах ва̄нтлэ̄гыт. Ты коныпал ма̄хум ФАП, сотовый связь, во̄раян ва̄рмаль ос са̄в мо̄т тэ̄лат урыл яныг кӯщай нэ̄ китыгласыт. 1056 2013.07.26. Светлана РОМБАНДЕЕВА Са̄внув та̄л рӯпитаӈкве патэ̄в. Ханты-Мансийск ӯст о̄лнэ Пенсионный фонд колн ля̄ххал тотнэ ма̄хум акванво̄выглаве̄сыт. Тот М. А. Топилин хум, Россия янытыл рӯпитан Министр труда ос социальный защита, телевизор хосыт потыртас. Тав ла̄внэ̄тэ щирыл, Россиявт та̄л котиль э̄тпосныл 2015 та̄лт Пенсионный фонд йильпи са̄ккон щирыл рӯпитаӈкве паты. Ань хо̄тпа рӯпитанэ̄тэ палыт рӯпата олнанэ̄ныл манса̄вит солко̄ви пенсионный страхова ниян ке̄таве, пенсиян патхатнэ̄тэ порат олныл тувыл ловиньтаве. Манах та̄л рӯпиты, сака ат ловиньтаве, пенсия олн ма̄гыс ма̄кыг ат о̄лы. Тувыл са̄в та̄л рӯпитан хо̄тпа ос мощща та̄л рӯпитан хо̄тпа пенсия олн а̄ла ты аквтем выгы̄г. Ос ань йильпи са̄ккон щирыл хо̄тпа ка̄сыӈ рӯпитан та̄лэ ловиньтаве. Нэ̄ хо̄тпа 35 та̄л, хум хо̄тпа – 40 та̄л манос тыгыл са̄внув рӯпиты те, пенсия олнэ арген но̄хлапи. Ты коныпал нэ̄ хо̄тпа 30 та̄лныл 40 та̄л мус (хум хо̄тпа ос 35 та̄лныл 40 та̄л мус) рӯпитан та̄ланэ ма̄гыс щар яныг пенсиял хансаве. Ма̄ньлат ма̄хум армиян ялнэ та̄ланыл ос нэ̄ хо̄тпат юн ня̄врам янмалтан та̄ланыл пуссын ловиньтаӈкве патавет. Ты йильпи са̄ккон щирыл, э̄лумхо̄лас са̄в та̄л рӯпиты те, яныг олныл ойтуӈкве патаве. Э̄ква 55 та̄л ос о̄йка 60 та̄л то̄влын порат пенсиян ущ патхаты те, сака яныг пенсия олныл хансаве. Ты коныпал хо̄тпа рӯпата олныл са̄в ойтаве те ос са̄в та̄л рӯпитас те, щар ма̄к яныг пенсия олн тав та виӈкве паты. 2025 та̄л порат щар мощща рӯпитан та̄л – 15 та̄лыг е̄мты. А̄щта̄л манос омата̄л хультум ня̄врамыт ос а̄гмыӈмосыӈ ма̄хум пенсия олнаныл ань хумус ойтавет, аквта щирыл о̄с э̄лаль ойтуӈкве патавет. 1056 2013.07.26. Светлана РОМБАНДЕЕВА Тэ̄н о̄с янытлавесы̄г. Ойттур э̄тпос 8 хо̄талэ̄т Ханты-Мансийск ӯст Э̄лумхо̄лас ос Ма̄вит нампа музейт ма̄хум янытлаве̄сыт. Та хо̄тал ань май колта̄гыл ос э̄рупса янытлан ялпыӈ хо̄талыг о̄лы. О̄выл ла̄тыӈ округ губернатор Наталья Комарова тав ла̄выс: «Ма̄н Колта̄гыл совет ва̄рыгланэ̄в порат округ янытыл о̄лнэ ма̄хманув акваг янытла̄лыянӯв. То̄ в а хо̄т п а н у в с а̄ в ня̄врам янмалтэ̄гыт, то̄ва культура тэ̄ла палт матыр ёмас ва̄рмаль ва̄ре̄гыт ос то̄ванув ня̄врамытын манос яныгпа̄ла хо̄тпатын нё̄тэ̄гыт. Тыхо̄тал ма̄н о̄с сома колта̄гыл, пуссын акванёхтысӯв, ма̄хманув янытлыянӯв». Мо̄лты та̄л Юван Николаевич Шесталов намыл пиным премия ва̄рвес. Ань соссаӈ мирныл, ма̄ньщи ос ханты ма̄хум халт, хотьют матыр ёмас, хо̄йхатнэ тэ̄ла ва̄ри те, тамле премиял миве – янытлан нэ̄пакыл ос олныл миве. Та хо̄тал ань кит соссаӈ нэ̄г янытлавесы̄г, Шесталов о̄йка нампа премиял майвесы̄г – Ханты-Мансийск ӯст Югорский университетт ма̄ньлат ма̄хум ханищтан ма̄ньщи нэ̄ Светлана Селиверстовна Динисламова ос Белоярский район Ванзеват па̄выл библиотекат рӯпитан ханты нэ̄ Нина Васильевна Шабаршина. Ань тыгыл э̄лаль соссаӈ ма̄хманув тох ва̄тихал янытлаӈкве патавет, хотьют культура палт, каснэ ма̄т манос ма̄щтырлан ма̄т матыр мӯтраӈ тэ̄ла ва̄рапи. Ю. Н. Шесталов ма̄ньщи ла̄тӈыл о̄выл нэ̄пакыт тав ты хансыс. О̄йка о̄лме палытыл ма̄ньщи мире сака янытластэ, ща̄нь ла̄тӈе сака э̄руптастэ. Мо̄т ма̄хум о̄с янытлаве̄сыт. Нижневартовск ӯст культура Центрыт рӯпитан нэ̄ Инна Сергеевна Антонова «Заслуженный деятель культуры Югры» намыл майвес. Ты коныпал хо̄тхуйплов ма̄ньлат ма̄хум янытлаве̄сыт, то̄ва ханищтахты, янгыщ рӯпитэ̄гыт. Пуссын наманыл ла̄вве̄сыт, янытлан нэ̄пакыл ос хорамыӈ лӯптал майве̄сыт. 1056 2013.07.26. Николай МЕРОВ Мощщаг хультум мирыт китыт лов та̄ланыл та минэ̄гыт. Мо̄тынтыг сӯкыр э̄тпост хо̄н ма̄т ООН мирхал организацият рупитан хо̄тпат яныг конференция ва̄ре̄гыт. То̄нт ма̄ янытыл мощщаг хультум мирыт китыт лов та̄ланыл (2005-2014 та̄лыт) ювле та хультэ̄гыт. Ань ты кастыл лӯпта э̄тпост Норвегия ма̄т, Альта ӯст мир янытыл о̄лнэ соссаӈ ма̄хманув акванатхатыгла̄сыт. Югра ма̄ныл округ Дума депутатыг Надежда Алексеева ос Татьяна Гоголева тув ялсы̄г. Ты урыл Надежда Геннадьевна тыи потыртас: «Хо̄н ма̄т конференция е̄мтнэ урыл ме̄н хо̄т нас хӯнтамласме̄н. Молях округ Дума па̄лыл тув ялуӈкве во̄вхатсуме̄н. Ма̄н, мощщаг е̄мтум ма̄хум, таима̄гыс тув атхатыгласӯв, соссаӈ мирын нё̄тмил ва̄рнэ нэ̄пакыт аквъёт хассӯв. ООН мо̄тыт мирхал конференция о̄лнэ порат, ты пирмайтам рекомендацият э̄лаль тах тотыянӯв. Ма̄в янытэ̄т са̄т геополитический регион щирыл ла̄кквауртым о̄лы тыи Южная Америка, Северная Америка, Карибы, Африка, Тихоокеанский регион, Арктика ос Россия. Ка̄сыӈ ма̄ныл соссаӈ хо̄тпат тув минэ̄гыт. Россияныл тув о̄с ма̄хум ялэ̄гыт. Ты сапра̄нит нила ва̄рмаль щирыл э̄рнэ нэ̄пакыт щё̄питасанӯв. О̄выл нэ̄пак ма̄ ос соссаӈ ма̄хманув йис та̄гыл о̄лнэ ма̄нанылт ма̄щунит урыл потыр хасвес. Хумус ты ва̄рмаль ӯргалаӈкве ос маныр ва̄руӈкве тот ро̄ви. Китыт тамле тэ̄ла хасвес ООН организацият соссаӈ мирытн нё̄тнэ ма̄гыс я̄нас структура вос ва̄раве. Ань тот соссаӈ ма̄хум нас представителяныл рӯпитэ̄гыт. Хӯрмит тэ̄ла соссаӈ ма̄хманув ёмщакв ӯргалаӈкве ос нё̄туӈкве э̄ре̄гыт. Нилыт тэ̄ла я̄нас щё̄питавес, тот хасвес ка̄сыӈ государстват, хо̄т соссаӈ ма̄хум о̄лэ̄гыт, та̄н ты пирмайтым ва̄рмалит щирыл нё̄тмилыл вос ва̄равет». Ты потрыт пуссын нэ̄пакн хасве̄сыт. Ань та̄н хотты порат, э̄рыӈ, соссаӈ мирн э̄рмыглэ̄гыт. 1056 2013.07.26. Валентина УЗЕЛЬ Таквсы пе̄риян ва̄рмаль ва̄раве. Сӯкыр э̄тпос 8 хо̄талэ̄т округув то̄ва ӯсытт ос то̄ва па̄влытт пе̄риян ва̄рмаль ва̄раве. Таквсы 186 избирательный участкат ма̄хум нэ̄пак та̄ратаӈкв патэ̄гыт, 59 па̄влыӈ ос ӯсыӈ ма̄т кӯщаит тах пе̄риявет. Ос 71 па̄влыӈ ман ӯсыӈ Советын депутатыт атавет. Ты кастыл ань Координационный совет ва̄рвес. Тот ань пе̄риян ва̄рмаль щё̄питан ма̄хум, полиция ма̄хум ос са̄всыр кӯщаит рӯпитэ̄гыт. Округ кӯщаюв Н. Комарова ты э̄тпост о̄выл щёс та̄наныл акванатыгласанэ ос тох ла̄всанэ: та̄н пуссын ёмащакв вос рӯпитэ̄гыт, ма̄хманув т а̄ н т и х о т ы х о̄ т п а пе̄рияӈкв таӈхе̄гыт, та хо̄тпа вос пе̄рияныл. Округув янытыл 688 «избирательный участкаг» ла̄внэ нэ̄пак та̄ратан ма̄ ва̄рим о̄лы. Тот 7 со̄тыра арыгтем хо̄тпа рӯпиты. Ка̄сыӈ политический партия такви хо̄тпанэ тот о̄с о̄лэ̄гыт. Ань титхуйплов партияныл ма̄хум пе̄рияхтуӈкв тах патэ̄гыт. Яныг кӯщаюв ка̄сыӈ хо̄тпа ла̄выстэ, ты пе̄риян ва̄рмаль ёмащакв вос мины. Ма̄хум нэ̄пак хумус та̄ратаӈкв патэ̄гыт, ты рӯпата акваг вос уральтаве. 1056 2013.07.26. Людмила ТЕТКИНА Миркол кӯщаит акванатыглаве̄сыт. Ханты-Мансийск ӯст Правительство колт акв яныг сапра̄ни о̄лыс. Округ янытыл рӯпитан миркол кӯщаит пуссын тыг во̄виньта̄лве̄сыт. Кӯщаит ЖКХа урыл потыртасыт. О̄йттур э̄тпос о̄выл хо̄талныл вит, ре̄г, на̄йпос ойтнэ олн но̄хнё̄тве̄сыт. Н. Комарова, губернаторув, ты ва̄рмаль акваг уральтаӈкве кӯщаит ла̄всанэ. Ты олныт но̄хнё̄тым, ма̄хум ул вос урккуптавет, сака са̄в олн та̄нанылныл ул вос виве. Раис Закиевич Салахов, Югорск ӯст миркол кӯщай, ты урыл таи ла̄выс, та̄н са̄всыр программат щирыл ЖКХа нупыл са̄в олн кос та̄стэ̄гыт. Тувыл вит тотнэ турпат, на̄йпо̄с ква̄лгыт ос мо̄т утыт пе̄нтуӈкве иӈ сака са̄в олн э̄ри. То̄ва ма̄хум вит, ре̄г, на̄йпо̄с ма̄гсыл ойтхатуӈкве о̄с ат молямлэ̄гыт. Нуса ще̄мьят субсидияолныл ань нё̄тавет. Ты олн ка̄тынпаттым та̄ра о̄с ат ойтхатэ̄гыт. Ань предприятият мӯсхалыг рӯпитаӈкве ос олн сэ̄луӈкве ат ве̄рме̄гыт. Мо̄т миркол кӯщаит ты тэ̄ла хосыт хумус рӯпитэ̄гыт, о̄с потыртасыт. Та юипа̄лт библиотекаколыт урыл потыр о̄лыс. Ань округувт 237 нэ̄пак ловиньтанкол рӯпиты. 2012 та̄л сыс тув 267 со̄тыра арыгкем йильпи нэ̄пак ёвтвес. Ань пуссын ловиньтанколыт са̄всыр нэ̄пакыл ёвтнэ ма̄гсыл иӈ 56 миллион солко̄ви э̄ри. 1056 2013.07.26. Людмила СПИРЯКОВА Тамара МЕРОВА Соссаӈ мир ла̄тӈагув ӯргалаве̄г. Ты э̄тпос о̄выл хо̄таланэ̄т Когалым ӯст «Законодательное обеспечение и вопросы развития языка, литературы и сохранения фольклорного наследия коренных малочисленных народов Севера Ханты-Мансийского автономного округаЮгры» мирхал конференция о̄лыс. Тав округ Дума хус та̄л рӯпитанэ̄тэ кастыл ва̄рыглавес. 2014 та̄лт яныгполь э̄тпос хо̄тыт хо̄талэ̄т хус та̄лэ тах то̄влы. Ты конференцият округ Дума Ассамблеят кӯщай хум Еремей Айпин пуӈктотыс. О̄влэ̄т конференция о̄ в ы л т а х т а м п о р а т Светлана Динисламова На̄й-О̄тыранув нупыл по̄йкщан ла̄тыӈ ла̄выс. Ма̄хум тэ̄ланыл ёмасыг о̄лнэ̄ныл ма̄гыс пуссын по̄йкщасыт. Еремей Данилович округ Дума рӯпататэ о̄вылтыт потыртас. Та̄н Ассамблеянылт щар о̄выл са̄ккон ханты ос ма̄ньщи ла̄тӈыг урыл хассыт. Ка̄сыӈ соссаӈ мир такви ла̄тӈе э̄лаль тотуӈкве вораты. Таи ма̄гыс та̄н ла̄тыӈ урыл са̄ккон, тувыл соссаӈ ма̄хум ла̄тӈыл потыртан радиопередачат, телепередачат щё̄питан ос газетат ва̄рнэ са̄кконыт щё̄питасыт. Тувыл ялпыӈ ма̄наныл ӯргалан са̄ккон ос мо̄т э̄рнэ тэ̄лат ма̄гыс рӯпитасыт. Округ Дума кӯщай Борис Хохряков соссаӈ ма̄хумн ке̄тум пищматэ Игорь Шимановн ловиньтавес. Ос са̄всыр йильпи са̄кконыт урыл хум потыртас, тав яныг кӯщайн нё̄тнэ хо̄тпаг рӯпиты. Губернатор ва̄ӈын хум Геннадий Бухтин ке̄тум паща ла̄тӈе Людмила Алфёрован ловиньтавес, э̄лаль э̄ква ла̄выс: «Ущнув касыл о̄лыс, ёмас проектыт но̄хпатсыт. Тох ханты ос ма̄ньщи ла̄тӈыл та̄ратан журналыг ма̄гыс субсидияолн та̄стувес. 2014 та̄лныл ханты ла̄тӈыл «Шоврие» нампа журнал ва̄раве, ос ма̄ньщи ня̄врамыт ма̄гыс «Витсам» нампа журнал. Ты коныпал сургутский диалектыл потыртан хантыт ма̄гыс я̄нас газета та̄ратаӈкве патаве. Мо̄т хо̄н ма̄ныл ёхталам мӯй хо̄тпат Россияв ёт акванюрщхатым о̄с са̄в рӯпитэ̄гыт. Марьё Мяенпяа, образование ос культура тэ̄лат советникыг о̄лнэ финка нэ̄, таи хӯлтыс: «Еремей Айпин «Ханты, или Звезда утренней зари» хансум потре финн ла̄тӈын толмащлавес. Са̄в финн хо̄тпат ты мир о̄лупсатэ о̄вылтыт о̄выл щёс матыр ва̄ӈкве патсыт. Ань Е. Айпин китыт потре «Божья матерь в кровавых снегах» толмащлыяныл. Ты рӯпата ва̄руӈкве, грантолн висыт». Франция ма̄ныл ёхталам э̄ква Ева Тулуз потыртас: «Ма̄н Сорбонский универститетувт ассоциация о̄лы, тот 2008 та̄лныл аквкит хо̄тал финноугорский ма̄хум о̄вылтыт потыртан нак ва̄рыглаве. Тот марийцат ос удмуртыт ёт акванхо̄нтхатыгласӯв, ты таквс мордва ма̄хум ёт ва̄щинтахтэ̄в тах. Мо̄тыт та̄л хантыт ос ма̄ньщит ёт хо̄нтхатыглаӈкве таӈхе̄в. Тувыл ё̄рн о̄йка Юрий Вэлла ос ханты о̄йка Еремей Айпин хансум потранэ̄н французский ла̄тӈын толмащлавет». Тав ётэ ёхталам хум Доминик Самсон Норман де Шамбур лов та̄л Лӯима̄т о̄лнэ мирыт ёт ва̄йхаты. Тэ̄н «Идентичность в движении» проект щирыл сас рӯпитэ̄г. Хо̄тал нэ̄глын е̄рт о̄лнэ ма̄хум ла̄тӈыт ханищтан институтт «Сибирские языки» ос «Ненецкий для начинающих» йильпи ханищтапыг ва̄рвесы̄г. Ты кит хо̄тпаг ханты ос ма̄ньщи ма̄хум ла̄тӈыг ос культурав ханищтэ̄г, пе̄с ва̄рмалянув пуссын пӯмщалэ̄г. Тэ̄н маныр ва̄гыг, тэ̄нки ма̄хманэ̄н акваг потыртэ̄г. Ань нэ̄пакыт та̄ратан ма̄гыс щар мощща олн та̄стуӈкве патвес. Москва ӯсныл ёхталам мӯй хо̄тпа Вячеслав Огрызко таима̄гыс то̄ва кӯщаит мощ ля̄выльттасанэ. Тох воссыг ул вос ва̄ре̄гыт, лӯима̄ мирыт о̄лупсаныл урыл мо̄т ма̄хум о̄с вос ва̄ганыл. Л. СПИРЯКОВА хансум потре ма̄ньщи ла̄тӈыл Тамара МЕРОВА хансыстэ 1056 2013.07.26. Светлана РОМБАНДЕЕВА Кульпас па̄выл школа. Ха̄льӯс район Кульпас па̄вылн ялмум порат ам школан щалтсасум. Ня̄врамыт ханищтахтан ма̄ныл а̄стысыт, экзаменаныл мисаныл. Ос тот рӯпитан ма̄хум иӈ пуссын рӯпитэ̄гыт, школаныл сыстамтыяныл, таквсы кастыл щё̄питыяныл. Ханищтахтын колнакытын щалтсасум, нэ̄квет иснасыт о̄льпыл сартэ̄гыт. Тэ̄нут пайтнэ колт манос нэ̄пакыт о̄щнэ колт о̄с пуссын рӯпитэ̄гыт, колхусапаныл ловтыяныл. Кӯщай нэ̄ колнакын щалтсасум, наме Наталья Александровна Слепцова. Ань лӯпта э̄тпос юио̄выл хо̄таланэ хультсыт, таве̄н о̄с рӯпатаӈ. Отчётнэ̄пак хансуӈкве э̄ри, экзаменыт мим ка̄сыӈ ня̄врам нэ̄паканэ щё̄питаӈкве э̄ре̄гыт. Ам Наталья Александровна школа урыл китыгласлум: Наталья Александровна, экзамен минэ ва̄рмалин хумус о̄лыс? Ты та̄л ня̄врамыт экзаменаныл пуссын ёмащакв мисаныл. 11 класс – са̄т хо̄тпа а̄стласыт, 9 класс – онтолов хо̄тпа а̄стласыт. Тох мощща хо̄тпа нэ̄мхуньт а̄тим о̄лыс. Ос таи ёмас, ань таквсы порат о̄выл классын ва̄т нупыл акв ня̄врам ёхты. Юио̄выл та̄лыт сыс школав рӯпататэ ёмас щирыл мины. Ма̄н ня̄враманув ёт са̄всыр олимпиадат касыглэ̄в, грантолн винэ ма̄т то̄ванакт но̄хпатыглэ̄в. Школавныл са̄всыр ма̄т 171 ня̄врам кассыт, 37 ня̄врам но̄хпатсыт о̄выл, китыт ос хӯрмит места висыт. «Спасти и сохранить» акцият о̄лум порат па̄выл янытыл са̄в йильпи йӣвыт ӯнттысӯв. «Аллея выпускников» ва̄рсӯв, школа а̄стлан ка̄сыӈ хо̄тпа ма̄нь йӣв ӯнтты. Интернатт манах ня̄врам о̄лы? Ты та̄л тот налыман нупыл акв ня̄врам о̄лыс, мо̄тыт та̄л налыман нупыл ат ня̄врам ханищтахтуӈкве ёхты. Сортыӈъя, Ло̄пмус ос Кимкъясӯй па̄вылныл о̄лэ̄гыт. Интернатын тай сака хоса та ӯнттаве. Хунь а̄стлаве? Со̄ль, такос ӯнттаве, аман хунь а̄сты, ат ва̄глӯв. Ань тот рӯпитан ма̄хум ла̄внэ̄ныл щирыл, яныг таквс э̄тпост ты а̄стлапияныл. Ювле хультум кит э̄тпос сыс ма̄хум ёмащакв рӯпитэ̄гыт, кол китыт наке ӯнттуӈкве о̄вылтавес. Ӯрхатэ̄в, номсэ̄в, моще̄ртын ня̄враманув йильпи интернатн о̄лмыгтэ̄гыт. Школант манах ня̄врам ханищтахты? Ты та̄л 171 ня̄врам ханищтахтас, таквсы ос 189 ня̄врам ёхты. Ань май са̄всыр йильпи ищхӣпыӈ утыт, компьютерыт, та маныр, ква̄лтапаптуве̄сыт, тамле матарыт на̄н о̄с о̄ньщегы̄н? Матыра̄ти э̄рнут ма̄н пуссын о̄ньще̄в, ня̄врам ханищтан ка̄сыӈ хо̄тпа компьютер ман ноутбук о̄ньщи. Интернет рӯпиты, ка̄сыӈ колнакувт электронный па̄рт о̄лы. Ло̄пмус па̄вылн тамле па̄рт о̄с тотэ̄в тах. Кимкъясӯй па̄выл школа Саранпавыл нупыл паттувес, олныл ань тувыл нё̄таве. Ня̄врам ханищтан хо̄тпа то̄вылхаты? Аквхотты порат школант английский ла̄тыӈ ханищтан хо̄тпа а̄тим о̄лыс. Ань тай ханищт а н м а̄ х у м п усс ы н о̄л э̄ г ы т, рӯ п и т э̄ г ы т. Таквсы кастыл хӯрум хо̄тпа ёхтысыт, география, обществознание ос физкультура урок ханищтаӈкве патэ̄гыт. Ка̄сыӈ хо̄тпа образование о̄ньщи. Интернатт рӯпитан ма̄хум о̄с о̄лы. Школант ёмащакв ханищтахтан ня̄врам са̄в о̄лы? Са̄в ня̄врам ёмащакв ханищтахты, отличникыт о̄ньще̄в, ударникыг са̄в ня̄врам о̄лы. Школавт ня̄врамыт халт 34% ёмащакв ханищтахты. Та̄н ёмащакв ханищтахтанэ̄ныл коныпал мо̄т са̄в э̄рнэ рӯпата ва̄ре̄гыт, тамле ка̄ркамыт, ханищтан ма̄хманылн акваг нё̄тэ̄гыт. Наталья Александровна , н а̄ н н я̄ в р а манын па̄вылт о̄лнэ яныгхо̄тпатын матыр нё̄тмил ва̄рыглэ̄гыт? Атхунь нё̄тыглэ̄гыт. «Акция милосердия» ва̄тихал ва̄рыглэ̄в. Тувыл ма̄хум школавн нэ̄пак хансэ̄гыт, пӯмащипа ла̄тыӈ ла̄ве̄гыт, ма̄н о̄с та ня̄врамыт янытлыянӯв. Мо̄тынтыг ма̄нь таквс э̄тпост школав 80 та̄лэ то̄влы. Ос ты ялпыӈ хо̄талув 2015 та̄лт тах ущ ва̄рилӯв. Ань ма̄нь таквс э̄тпост тыг нэ̄мхотьют ёхтуӈкве ат ве̄рми, та порат я̄ ущ поляве. Таима̄гыс ма̄н та юипал та̄лт ма̄ньполь ман лӯпта э̄тпост мӯйлуӈкве номсэ̄в. Иӈ ат ва̄глӯв, хоты э̄тпос пе̄рие̄в, хунь та̄рапаты, тах ла̄ве̄в. Ялпыӈ хо̄тал кастыл ма̄н ань щё̄питахтэ̄в, район кӯщаитын пищмат хассӯв, тыт рӯпитам ос ань рӯпитан ма̄хманув пуссын янытлан нэ̄пакыл вос мивет, матыр мӯйлупсал вос мӯйлуптавет. Ты ляпа та̄лыт сыс ань ты школав пе̄нтсыл йильпи школа ӯнттаве тах. Интернат по̄хан ӯнттаве, аквано̄лтаве̄г, халэ̄нт ре̄гыӈ унсах ва̄раве. Тох тай ты школав иӈ ёмас, ре̄гыӈ, тыг ёхталан ка̄сыӈ хо̄тпан тав мӯсты, ма̄навн ос тыт рӯпитаӈкве сака ёмас. Ма̄н туп ёмас номтыл рӯпитэ̄в, ёмас номтыл э̄лаль сунсэ̄в, ня̄врамыт ханищтэ̄в, янмалтэ̄в. Тох ты потыртас школа кӯщай нэ̄ Наталья Александровна. Татем ёмас сымыӈ нэ̄, сусте̄мт, ня̄врамыт э̄руптыянэ, школат рӯпитан ма̄хум янытлыянэ. Газетан ва̄рнэ ма̄гыс хурит мис. Школа янытэ̄т суссылтастэ, мощ ё̄мыгтасме̄н. Ханищтан колнакытн щалтсасуме̄н, тот ань нэ̄квет рӯпитэ̄гыт, иснасыт о̄льпыл сартэ̄гыт манос колкан ловтэ̄гыт. Со̄ль, ка̄сыӈ колнакт колнорн электронный партыт тагатым о̄лэ̄гыт, компьютерыт, та маныр пуссын о̄лы. Школат рӯпитан я̄тил ма̄хум ос ня̄врамаквет пуссын пуста̄гыл вос о̄лэ̄гыт, То̄рум ёт, О̄тыр ёт вос о̄лэ̄гыт. 1056 2013.07.26. Тамара МЕРОВА Ялъю̄с сымын э̄рнэ ма̄кве. Ягримт а̄лпыл но̄хква̄лсум, кон ма̄нь раквсамыл раквыс. Э̄типа̄ла па̄сныл тот о̄лнэ ма̄ньщи ма̄хманув ёт Ялъю̄с па̄вылн ялуӈкве щё̄питахтасӯв. Та хо̄тал хо̄нтлан ма̄т порслым ма̄хум ка̄стыглан хо̄талыг о̄лыс. Тав кос ащирмаг, тав кос раквыг вос о̄лы ма̄н о̄выл щёс памятник сунсуӈкве тув минэ̄в. Тувыл Ялъю̄сын ёхтумув порат тулыт хотталь та во̄тасаве̄сыт ос посыӈыг та е̄мтыс, хо̄талэ но̄х та нэ̄глыс. Акв щё̄ст тув ёхтум ма̄хум пуссын памятник по̄хат акванатхатасыт. О̄выл ла̄тыӈ кӯщаит ла̄всыт. Ма̄ньщи хо̄тпанув, та̄н ня̄враманыл, апганыл о̄с потыртасыт. Тот памятник па̄ртэ тармыл хансым хум хо̄тпат о̄парищ наманыл ловиньтасанув ос та̄рапатыс – тот кит ще̄мьяныл хум хо̄тпат пуссын хо̄нтлуӈкве тотымат ос тот хо̄т порслымат. Надежда Констатиновна Захарова (Саратина) са̄в рӯтанэ ёт тув ёхталас. Тав ла̄выс: « А̄тяв Константин Алексеевич Саратин хо̄нтлан ма̄ныл юв ёхталас, ла̄глаге сакватым о̄лсы̄г. Тав колхозт рӯпитас, Лёня а̄пщив 1946 та̄лт самын патыс. Ма̄н пуссын тыт Ялъю̄ст о̄лсӯв, яныгмасӯв. Ань ты сымн э̄рнэ ма̄ке̄вн ма̄н рӯтанув ка̄стуӈкве акваг ёхталаӈкве патэ̄в». Саратин колта̄глыныл ат хум хо̄тпа ты ма̄нь па̄вылныл хо̄нтлуӈкве тотве̄сыт: Саратин Артём Васильевич (Саратовский областьт ёлщё̄питавес), Саратин Василий Николаевич (хоттыпыс), Саратин Константин Алексеевич (1945 та̄лт юв ёхтыс), Саратин Тихон Николаевич, Саратин Ион Елисеевич – тэ̄н уре̄нт «Книга памяти» нэ̄пакт нэ̄матыр хансым ат о̄лы. Ань хотты рӯтаныл матыр ла̄тыӈ ке̄тнувыт ке, сака ёмас о̄лнув. Ягримт тамле потрыт Людмила Галкина нэ̄пакн хансыянэ. Ма̄хум ла̄ве̄гыт, хо̄нт порат са̄выӈпа̄лэ хум хо̄тпат Ленинград ӯс по̄хат порславе̄сыт. Анна Николаевна Гындыбина Кимкъясуй па̄вылныл тув ёхталас. Э̄ква о̄с Ялъю̄ст самын патыс, тав а̄ще Николай Егорович Сангилев та па̄вылныл хо̄нтлан ма̄н тотвес, тот хоттыпыс. Мо̄т ма̄хмыт наманыл памятникн о̄с хансым о̄лэ̄гыт: Сангилев Иван Егорович (Латвия ма̄т ёлщё̄питавес), Сангилев Дмитрий Егорович (1947 та̄лт юв ёхтыс), Сангилев Алексей Степанович (нэ̄пакыт Александр намыл хансыма, тав Колпино ӯст Ленинградский областьт ёлщё̄питавес), Сангилев Артём Степанович (Саратовский областьт ёлщё̄питавес), Сангилев Пётр Степанович (хоттыпыс), Сангилев Василий Степанович, Сангилев Василий Петрович (тэ̄н нэ̄пакн хансым ат о̄лэ̄г), Сангилев Николай Алексеевич (нэ̄пакт Александровичиг хансым о̄лы, аман тав? Саранпа̄вылт о̄лыс, 1944 та̄лт а̄тимыг е̄мтыс). Тувыл Гындыбин Семён Иванович (1945 та̄лт юв ёхтыс) ос Марсьянов Михаил Романович, Марсьянов Пётр Романович хансым о̄лэ̄гыт. Та̄н палтаныл апганыл ёхталасыт. Ягрим депутат хум Сергей Байбародов ма̄хумн ёмас ла̄тыӈ ла̄выс: «Ань Ялъю̄с ма̄ньщи па̄вылкве хосат та̄гыл а̄тим кос, ос ма̄н пуссын ва̄глӯв, тыт ёмас, ка̄ркам хо̄тпат о̄лсыт. Нэ̄квет ня̄враманыл ёт та̄нккеныл хультсыт. Ос та̄н хо̄нтлан ва̄рмальт о̄лум хум хо̄тпат ма̄гыс п усс ы н рӯ п и т а с ы т, са̄в хӯл алыщласыт, во̄раясыт. Са̄всыр тэ̄нут фронтын ке̄тыгласыт. Та па̄сныл са̄в та̄л ювле хультыс, яныгпа̄ла ма̄хмыт а̄тимыг е̄мтсыт. Ос на̄н, то̄нт ня̄врамыг о̄лум хо̄тпат, та пора номилы̄н о с э̄л а л ь т от ы л ы̄ н . А̄тяны̄н, о̄паны̄н ма̄гыс тыхо̄тал ёмас ва̄рмаль ва̄рсы̄н. Ма̄н на̄нан яныг пӯмащипа ла̄тыӈ ла̄ве̄в». 1056 2013.07.26. Николай МЕРОВ Са̄лыӈ хум пенсиян патыс. Тэ̄лы Саранпа̄вылт Сергей Георгиевич Чупров ёт хо̄нтхатыгласум. Тав ма̄ньлат поратэ̄т са̄лыӈ колн рӯпитаӈкве минас. Ще̄мьятэ ёт тот о̄лы. Ам ты хум о̄лупсатэ урыл китыгласлум. На̄н тав уре̄тыл потырохса э̄лаль ловиньтэ̄н. Сергей Георгиевич Ха̄льӯст самын патыс. Тот школат хӯрум класс а̄ стл а с . Т у в ы л т а̄ н колта̄глыл Саранпа̄вылн ва̄нтлысыт. Ща̄нягеа̄щаге тот са̄лыӈ колт рӯпитаӈкве патсы̄г, Ще̄рки ос ханищтахтас, Саранпа̄вылт о̄лыс. Тувыл 1979 та̄лт нёлолов класс а̄стламе юипа̄лт та̄ра са̄лыӈ колн рӯпитаӈкве минас. Та па̄сныл са̄лыт ӯрим ань тыг мус яласы. Са̄ртын, са̄внув бригада о̄лум порат, тав бригадирыг рӯпитас. Тувыл салыт мощщамасыт, то̄ва бриг а д а т а к в а н т от в е̄ сыт. Ань о̄йка китыт бригадат па̄стухыг рӯп и т ы . А̄тя т э н а м е Егор Георгиевич Чупров, оматэ ос Евдокия Сергеевна Чупрова. Тэ̄н о̄лме̄н палытыл акваг са̄лыӈ колт яласы̄г. Ще̄рки э̄кватэ наме Марина Алексеевна, тэ̄н кит пыг янмалтэ̄г. Яныг пыге̄н Ханты-Мансийск ӯст катерыл яласаӈкве ханищтахты. Ма̄ньнув пыге̄н ос Саранпа̄выл школат ловит класс а̄стлас. Ре̄тыӈ ю̄свой э̄тпос 25 щислат Сергей Георгиевич намхо̄талэ о̄лыс. Са̄лыӈ хум 60 та̄лэ то̄влыс. Ань пенсиян патыс, ос э̄лаль иӈ рӯпиты. Тав ла̄выс, нэ̄матыр ва̄рмаль а̄тим кос, ос са̄лы ӯрнэ рӯпата сака та̄рвитыӈ, олн о̄с сака мощща ойтаве. Ам ты ще̄мьян щуньп а щ а л а̄ т ы ӈ к е̄ т э̄ гум. О̄лупсаныл кӯпнитыг вос о̄лы. Колта̄гланыл, рӯтаныл, юрт хо̄тпаныл ёт са̄в та̄л пуста̄гыл э̄лаль вос о̄лэ̄гыт. 1056 2013.07.26. Александр ВЬЮТКИН Ма̄н таве сымыӈыщ янытлылӯв. Ты хурит Октябрьский па̄вылт о̄лнэ ма̄ньщи нэ̄ Альбина Петровна Волосовская по̄слым о̄лы. Такви а̄ги о̄парищ наме Анямова. Ойттур э̄тпос о̄выл хо̄талт тав хо̄тпан та̄лэ то̄влыс. Альбина Петровна са̄в та̄л па̄выл пӯльницат ле̄ккарыг рӯпиты. Па̄выл ма̄хманэ̄н тав ёмщакв ва̄ве ос э̄руптаве. Пенсиян минаме юипа̄лт юн ӯнлуӈкв ат ка̄сащи, таима̄гсыл тав иӈ рӯпиты. Тамле ёмас ма̄ньщи э̄кван ам са̄в щуньпаща ла̄тыӈ т е̄ т э̄ г у м . Н а̄ й О̄ т ы р а н э н ще̄мьятэ вос ӯргалаве ос са̄в та̄л ма̄хум пусмалтым такви пуста̄гыл вос о̄лы. 1056 2013.07.26. Николай МЕРОВ Ма̄хманув ма̄ньха̄пыл кассыт. О̄йттур э̄тпос 5-7 хо̄талытт Нефтеюганский районт «Сказка» нампа ӯщлахтын ма̄т ханты ос ма̄ньщи хо̄тпат ма̄гыс ма̄ньха̄пыл каснэ ва̄рмаль щё̄пита̄лвес. Ты касыл Пойковский па̄вылт 2002 та̄лныл ва̄рыглаве. 2011 та̄лныл ты каснэ ва̄рмаль «Кубок губернатора по гонкам на обласах» намыл пинвес. Ка̄сыӈ та̄л са̄всыр районытныл ос ӯсытныл соссаӈ ма̄хманув касуӈкве тув ёхталэ̄гыт. Ань ты та̄л китхуйпловит щёс ма̄хум тот акванатхатыгласыт. Соссаӈ мирыт пе̄с пораныл ма̄ньха̄пыл яласэ̄гыт. Ты хосыт ма̄н о̄лэ̄в, я̄т хӯл алыщлэ̄в, во̄рае̄в, таима̄гыс ка̄сыӈ ма̄ньщи ос ханты хо̄тпа ма̄ньха̄пыл кӯстырыг яласаӈкве ха̄сы. Ты та̄л округ са̄всыр ӯсытныл, па̄влытныл ос Тюменский областиныл 17 команда касуӈкве тув ёхталасыт. Пуссын аквъёт яныгса̄т атпан са̄виткем хо̄тпа о̄лыс. О̄выл хо̄тал каснэ ва̄рмаль пуснэ кастыл округ губернатор ва̄ӈын хум Геннадий Бухтин, Нефтеюганский район кӯщай Владимир Семёнов ос Россия янытыл этноспорт э̄лаль тотнэ хум Алексей Кыласов ёхталасыт. Та̄н пе̄с йис тэ̄ла э̄лаль тотнэ ма̄гыс ма̄хум пуссын янытласаныл. Нефтеюганский район кӯщай ла̄выс: «Ма̄н, тыто̄лнэ ма̄хум, ты ва̄рмалил сака янытлахтэ̄в. Ка̄сыӈ та̄л мӯй ма̄хум яныг ща̄гтыл тыт ӯриянӯв. Каснэ ма̄хум а̄ти туп о̄выл места винэ ма̄гыс тыг ёхтысыт, щар яныг ва̄рмаль ты пе̄с о̄лум нак но̄хво̄рмалтэ̄в, э̄лаль тотылӯв. Каснэ хо̄тпатын но̄хпатуӈкве ла̄виянум. Суснэ ма̄хум, та̄нанылн о̄с ёмщакв нё̄тэ̄н. Пуста̄гыл о̄лэ̄н, То̄румн вос ӯргалаве̄н». Тувыл хо̄талъятт ос округ губернатор Наталья Комарова каснэ ма̄хум янытлаӈкве ёхталас. Тав о̄с янытлан ла̄тыӈ ла̄выс: «Я̄тил соссаӈ ма̄хумаквет, ты сака ёмас ва̄рмаль, на̄нки йис о̄лупсаны̄н э̄лаль тотылы̄н. Ты ялпыӈ хо̄талт ка̄ркам, та̄ксар нэ̄ ос хум хо̄тпаквет к а с н э̄ н ы л ё̄ р а н ы л т арталахтэ̄гыт. Ка̄сыӈ хо̄тпа такви командатэ ма̄гыс сыме вос ща̄рги. Каснэ хо̄тпат моляхнув вос тове̄гыт, налми ва̄тат лю̄льнэ ма̄хум руманыл сака нё̄тэ̄гыт. Ты хосыт каснэ хо̄тпат ё̄р хо̄нтэ̄гыт, та̄кыщ э̄лаль тове̄гыт. Таима̄гыс ты ва̄рмаль нупыл сунсуӈкве сака пӯмащ. Ты касыл 2001 та̄лныл губернатор мӯйлупса щ и р ы л в а̄ р ы гл а в е . Ос акв ёмас ва̄рмаль о̄лы: ты ялпыӈ хо̄тал ма̄тъёмас тув котильт о̄лы. Ма̄хум яныг ща̄гтыл т ы г ӯ щ л а х т у ӈ к в е ёхталэ̄гыт. Ты коныпал ойттур э̄тпос 7 хо̄талэ̄т «Иван Купала» христиан ма̄хум ялпыӈ хо̄талыг о̄лы. Таима̄гыс тув атхатыглам ма̄хум Витхонын по̄йкщасыт, вит тармыл нэ̄матыр лю̄ль ул вос е̄мты. Ань нёлоловхуйплов та̄л яныт ня̄врамыт ма̄гыс о̄с я̄нас мӯйлупса щё̄питасӯв. Та̄н ты каснэ ва̄рмаль са̄в нотын э̄лаль тах тотыяныл. Ма̄н ос хумус ве̄рме̄в, та̄нанылн нё̄тэ̄в. Мо̄тынтыг ма̄ньха̄пыл каснэ ва̄рмаль коныпал тыт по̄йкщан ос пӯрлахтын ва̄рмаль щё̄питэ̄в. Ты кастыл пе̄с йис тэ̄лат ва̄нэ яныгпа̄ла хо̄тпат тыг во̄виянӯв тах. Йӣквнэ, э̄ргын ос са̄ӈквылтан хо̄тпат о̄с мӯйлуӈкве во̄выглыянӯв. Ам ань ты сунсэ̄гум, хумус на̄н тыт ӯщлахтэгы̄н. А̄нумн тыт о̄с сака мӯсты. Ты каснэ ва̄рмальт но̄хпатнэ хо̄тпат ам пуссын янытлыянум. Ам номсэ̄гум, ма̄н аквъёт ты пӯмащ ва̄рмаль са̄в та̄лн э̄лаль тотуӈкве ве̄рмилӯв». Тувыл округ кӯщаюв каснэ мир халт но̄хпатум хо̄тпат мӯйлупсал ос янытлан нэ̄пакыл мисанэ. А̄гит халт о̄выл места – Ксения Айваседа Нижневартовский районныл, китыт места – Нина Покачева, о̄с Нижневартовский районныл, хӯрмит места Анастасия Сироткина Нефтеюганский районныл висыт. Пыгыт халт ос о̄выл места – Степан Микушин Нефтеюганский районныл, китыт места–Василий Сардаков, Нижневартовский район, хӯрмит места – Константин Антонов Сургут ӯсныл висыт. Губернатор нэ̄ ты ня̄врамыт ищхӣпыӈ утыл (компьютерыл) мӯйлуптасанэ. Ос щар молях каснэ ма̄хум пуссын аквъёт ловиньтаве̄сыт, е̄мтыс тох: о̄выл места – Нижневартовский районныл ёхталам хо̄тпат висыт, китыт местат Нефтеюганский районныл ёхталам ма̄хум, хӯрмит места о̄с Нижневартовский районныл ёхталам хо̄тпат висыт. Но̄хпатум хо̄тпат пуссын мӯйлупсал майве̄сыт. Нижневартовский район китхуйпловит щёс губернатор кубоке юв тотсаныл. Ха̄льӯс районныл са̄т хо̄тпа ёхталас. Ты Валентина Вьюткина, Василий Артеев Саранпа̄вылныл, Эдуард Лещук, Ирина Сайнахова, Любовь Кустышева Сӯкыръяныл, Леонид Бабанин Ха̄льӯсныл ос Надежда Челданова Ло̄пмусныл ёхталасыт. Та̄н ты кос ка̄ркамы̄г товсыт, ос ты а̄ти, юв хультсыт. Ань хащта̄л ха̄пыл товуӈкве та̄рвитыӈ. То̄ва хо̄тпатн товуӈкве ат а̄ртми. А̄с ма̄хум ма̄ньха̄п янытэ̄т акволп йӣвыл са̄грияныл. Тамле ха̄пыл яласаӈкв о̄с мощ ха̄суӈкве э̄ри. Ань мо̄тынтыг, э̄рыӈ, тамле ха̄пыл ва̄равет. Губернатор нэ̄ ты ва̄рмаль щирыл нё̄тмил ва̄руӈкве ла̄вхатас. Таве̄н ты касыл сака мӯстыс. Э̄лаль маныр е̄мты, мо̄тынтыг тах та̄ра паты. 1056 2013.07.26. Людмила ТЕТКИНА Хо̄нтаӈ нэ̄ ва̄рнэ рӯпататэ. Ма̄ньщи ос ханты культураг но̄хво̄рмалтан урыл ань акваг са̄в потыртаве. Округувт ва̄тихал конференцият, семинарыт ос са̄всыр ханищтапыт ва̄рыглавет – соссаӈ ма̄хум та̄нки пе̄с йис ва̄рмаляныл ул вос ёрувлыяныл ос э̄лаль вос тотыяныл. Светлана Кузьмина ю̄нсхатуӈкве, сакныл х а рт у ӈ к в е о̄ с с а к а э̄рупты. Ты ма̄ньщи нэ̄ Кондинский район Половинка па̄вылт самын патыс. Та ма̄т о̄л н э м а̄ н ь щ и т п е̄ с йис ва̄рмаляныл хосат хотёрувласаныл, ща̄нь ла̄тӈыл о̄с ат потыртэ̄гыт. Светлана Викторовна ма̄ньта̄гыл рущ ма̄хум халт яныгмас, такви ма̄ньщи пе̄с йис ва̄рмалит нупыл сака ат сунсыс. Советский ӯсн о̄луӈкве хунь ва̄нтлыс, садикт местодистыг рӯпитаӈкве патыс. То̄нт тав акв колнакыт са̄всыр ма̄ньщи пормасыт, ня̄врам ёнгын утыт акванатуӈкве ос суссылтаӈкве ла̄ввес. Та па̄сныл тав ма̄ньщи культурал пӯмщалахты. Ханты-Мансийск ӯст са̄всыр ханищтапыт о̄лнэ порат акваг тув ялантас. Тот тав ю̄нсхатуӈкве, сакныл хартуӈкве ханищтахтас. Ма̄щтыр хо̄тпат ёт хо̄нтхатыгламе̄т, та̄нанылныл са̄всыр ва̄рмалит урыл пӯмщалахтас. Ань тав Мария Волдина, Зоя Лозямова, Сургутский ос Нефтеюганский районыгт о̄лнэ ма̄щтыр хо̄тпат ёт ва̄йхаты ос ханищтахты. Ты юипа̄лт Советский ӯст музей–колт «Ханса» нампа кружок ва̄рыглас, тув ня̄врамыт, нэ̄ хо̄тпат сакныл хартуӈкве, ю̄нсхатуӈкве во̄виньта̄лсанэ. Са̄в ма̄хум тув ёхталасыт. Тамле кружокыт тав ма̄ньщи ос ханты культураг урыл та̄нанылн п от ы рт а с . М а̄ щ т ы р нэ̄ ла̄выс, таи лю̄ль ты кружок хоса ат рӯпитас, лаппантвес. Ань тав туп садикт ня̄врамыт ю̄нсхатуӈкве ханищтыянэ. Ты коныпал Советский ӯст училищат а̄гит ёт турло̄псыт, пальсакыт сакныл харты ос а̄канит, тучаӈыт ю̄нты. Тамле ка̄ркам нэ̄ ӯст ёмащакв ва̄ве, ялпыӈ хо̄талытын акваг во̄виньта̄лаве. Ты та̄л ма̄ньщи ос ханты ма̄хум Ӯринэ̄ква хо̄таланыл янытлым порат тав мир э̄лыпа̄лт со̄с косамтас ос То̄румныл пуста̄гыл о̄лнэ хо̄тал по̄йкщас. Тув ёхталам а̄гирищитп ы г р и щ и т м а̄ г с ы л са̄всыр ёнгыт ос касылыт ва̄рыглас. Тав о̄с та̄н ётаныл то̄рса̄лмыт йӣвн нэ̄гсалас. Тамле ялпыӈ хо̄талытт тав такви ва̄рум, ю̄нтум пормасанэ суссылтыянэ. Ам ты хо̄нтаӈ ма̄ньщи нэ̄н паща ла̄тыӈ ке̄тэ̄гум. Пуста̄гыл э̄лаль вос о̄лы, аквты щирыл ма̄ньщи культурал э̄лаль вос пӯмщалахты. Ня̄врамыт ма̄щтырлаӈкве э̄лаль вос ханищтыянэ. 1056 2013.07.26. Галина КОНДИНА Ма̄щтырлаӈкв ма̄нь та̄гыл вос ха̄сэ̄гыт. Ка̄сыӈ тув Я̄сунт па̄вылт «Ма̄нь Ӯсквег» ла̄внэ ма̄т ня̄врамыт мовиньт суй та сумыллы. Та̄н тув ща̄гтым атхатэ̄гыт. Ӯщлахтын коныпал ня̄врамыт ос ханищтахтэ̄гыт. А̄лпыл ня̄врамыт гитарал ёнгим но̄хса̄йкатавет. Тувыл луваныл са̄маныл ка̄мнямтым зарядка ва̄ре̄гыт, ловтхатэ̄гыт ос тэ̄ӈкв та ха̄йтэ̄гыт. Тэ̄нэ юипа̄лт ё̄рнколаныл хот щё̄питыяныл , колкан хотхосге̄гыт, па̄вылкант порссаквыт хотатэ̄гыт. Ос ущ ханищтахтуӈкве о̄вылтахтэ̄гыт. Ты тув хӯрум смена ва̄рыглаве. Ам о̄выл сменан во̄виньтаве̄сум. Тав ма̄щтырлан сменаг ла̄ваве ос тох намаим о̄лы: «Ане̄квам ханса». Ты смена ам омам Аксинья Степановна Мерова номнэ ос ка̄стыглан ма̄гсыл тох намтвес. Тав 1996 та̄л па̄сыл ка̄сыӈ туи тув ялантас. Ня̄врамыт ёт са̄сныл со̄втыт, са̄ныт, ма̄нь а̄пат, са̄с а̄канит ю̄нтыс ос са̄всыр ма̄ньщи мӯтратын та̄наныл ханищтасанэ. Ань ос ам та̄наныл ма̄ньщи ла̄тӈыл потыртаӈкве ханищтасанум. Ос то̄ва а̄гирищитпыгрищит ёт са̄сныл со̄втыт, са̄ныт ю̄нтсӯв. Ня̄врамытын са̄с ю̄нтуӈкве, ва̄им, та̄рвит. Та̄н тулё̄вланыл ва̄гталыт, тох о̄лы, матыр та ю̄нтсӯв. Мат хал Г. К. Алгадьева е̄мты, та̄н ам палтум та ёхтыгпа̄лэ̄гыт. Пуссын аквторыг та̄н ётаныл рӯпитаӈкве хунь ве̄рме̄гум, таима̄гсыл хӯрмахнилах ня̄врамыл ёхталасыт. О̄влэ̄т ня̄врамыт мохлыл ва̄руӈкве ат ха̄сэ̄гыт. Та̄наныл ам ла̄щал ханищтасанум. То̄ва порат тулё̄вланыл пе̄лтэ̄гыт, ле̄ккар палт ха̄йтталэ̄гыт, тэ̄рпил сартавет о̄с э̄лаль та рӯпитэ̄гыт. Нэ̄мхотьют мори ат ня̄ӈхыс. Пыгрищит ёт рӯпитаӈкве Вячеслав Юрьевич Кондин ёхталас. Тав хум хо̄тпа э̄нтап ва̄руӈкве пыгрищит ханищтасанэ. Са̄лы а̄ньт э̄рнэ янытаг сартытэ, хорамыл пыгрищит та̄нти ва̄рияныл. Са̄всыр яныт корпиныл асыт сартэ̄гыт, ка̄ралэ̄гыт, тох а̄ньтлӯптат хорамыӈыг та е̄мтэ̄гыт. Акв э̄нтап ма̄гсыл са̄т лӯпта э̄ри. Э̄нтап та̄йтыт Вячеслав Юрьевич такви ва̄рсанэ. Пыгрищит ка̄таныл иӈ ва̄гталыт, ты та̄рвитыӈ рӯпата мӯсхал щирыл ва̄руӈкве иӈ ат ве̄рмияныл. Игорь Тихонов сака ма̄щтырыг э̄нтапе ва̄рыстэ. Хорамыӈ лӯптат хумус совн ю̄нтуӈкве, тав Вячеслав Юрьевичин суссылтавес ос э̄лаль такви ва̄рыс. Са̄лы а̄ньт мощща о̄щсыт, таима̄гыс то̄ва э̄нтапыт та̄сыг ва̄рим аргин лӯптал ю̄нтсаныл. О̄выл хо̄тал пыгрищит ос са̄сныл сыпаль ва̄рсыт. Хумус варуӈкве, та̄н о̄с Вячеслав Юрьевичин ханищтаве̄сыт. А̄гирищит ёт Мария Сергеевна Мерова ос Галина Константиновна Алгадьева ва̄таӈ то̄рыт ос ма̄ньщи супыт ю̄нтсыт. Ма̄ньнув а̄гирищит то̄рыл йинве̄сыт, ва̄таӈ то̄р ю̄нтсыт. Яныг а̄гит «Время поющих стрел» смена кастыл супыт та̄нтина̄нылн ю̄нтэ̄гыт. Хотьют суп ат ю̄нты, та сменан ат виве. То̄ва яныг а̄гит хо̄тал палыт ӯнлэ̄гыт, мощщан хотпо̄йтсэ̄гыт ос э̄лаль та ю̄нсхатэ̄гыт. Галина Константиновна Ха̄льӯс район Хулюмсӯнт па̄вылныл ёхталас. Тав ётэ ня̄врамыт ханищтаӈкве Хулюмсӯнтныл ос акв нэ̄ Надежда Константиновна Маслова ёхталас. Та̄н аквъёт по̄слысыт ос сакныл са̄всыр хорамыт хартсыт. Са̄выӈпа̄лэ ня̄врамыт ка̄тсорт о̄щнэ хорамыт ва̄рсыт. Пальсак манос турло̄пс хоса ва̄руӈкве э̄ри, моляхыл а̄стлаӈкве ат а̄лымияныл. По̄слуӈкве ня̄врамыт о̄с пуссын ялантасыт. Хотьют ат ха̄сыс, о̄с ханищтахтасыт. Ханищтахтынэ̄ныл коныпал ня̄врамытын, ва̄им, ёнгасаӈкве э̄ри. Ёмас хо̄талт та̄н кон та ха̄йтыгтэ̄гыт, ёнгасэ̄гыт. Ты кастыл са̄всыр яныт мячикыт о̄ньще̄гыт. Ос та̄н сака э̄руптан ёнгиланыл ты «титхуйплов йӣво̄выл», рущ щирыл «двенадцать палочек» ла̄вияныл. Ма̄н ня̄врамытын ос та̄н ётаныл рӯпитан хо̄тпатын пуста̄гыл о̄лнэ ла̄тыӈ те̄тэ̄в. А̄гирищитпыгрищит туи сыс ёмщакв вос ӯщлахтэ̄гыт, та̄ксарыг, ка̄ркамыг вос яныгме̄гыт. 1056 2013.07.26. Мария КУМАЕВА Э̄квапыгрищ урыл мо̄йт (ма̄ньщи мо̄йт). Дарья Степановна Самбиндалова мōйтыглам мōйт ань э̄лаль ловиньтэлы̄н, о̄выл охсатэ №13 газетат хансым о̄лы. Ань тай ойтхатэн, пыгрищ лāви. Āти, ам сар ат ойтхатэ̄гум. Сāт ё̄рн потыртан пупыг тыг ат ке тотэ̄гын, ам наӈын ты тӯлмахын мāгыс алылум. Пыгрищ лāви: Вос тав, матар ю̄рм вāг хосытыл, матар вōньщам вāг хосытыл та сāт ё̄рн потыртан пупыг тыг ке тотэ̄гум, ам тах наӈын алылум. Тувыл ос кон та пувтмавес. Пыгрищ юв та минас, лю̄ньщим, тыстым. Āкве лāви: – Я, хумле, майвēсын? – Манаре мыг, сāт ё̄рн потыртан пупыг хōт щāрыщ вāтат ōс лāвылты. Манос ōлы, ос хомус тотуӈкв? Ам тув ос ялэ̄гум, сэ̄тап поталын ōс майлэ̄лн, пыгрищ лāвыс. – Ань тай урм холас, пищум холас. Ань тай ягāгим палт тах ты сэ̄тап поталын ёт холытан минэ̄гын. Вāпсагумягāгиягум матар ощмар ōньщēг, матар пищ ōньщēг, тэ̄н та нё̄тэ̄г. Тув кēтсам э̄лмхōласыт нэ̄мхотьют юв ат ёхталас. Наӈ, танай, манос ōлы, ягāгиягумвāпсагум хосытыл та ёхтэ̄гын. Пыгрищ пуӈке, саме мāньмыгтас, ёл та хуигпас. Āлпыл ща̄не̄н о̄с та квāлттаве: – Квāлэн, тувыл минэн. Сэ̄тап поталытэ майвес. Тэ̄с, āстыс ос тувыл та минас. Сэ̄тап поталытэ тāрматастэ. Сэ̄тап юипāлт та хāйты. Хāйтыс, хāйтыс, вāгтāл та патыс. Вāгтāл патыс, сунсы: кит хāль āӈквалыг лю̄лēг. Номсы: «Я, ты яныг хāль āӈквалыг пōхын ёлӯнтэ̄гум, ня̄нь лōмтум ювтōвтащлылум». Аквматэ̄рт āкарыгщ ā щ и г т у в ы л ко н квāлапасы̄г. Щар ты пураве, та пураве. Яты, кос хомус щāнтыглахты, а к в м а т э̄ р т ю н н э̄ потыртанэ̄т суйты: – Нэ̄нан рōвнэ э̄лмхōлас ке ёхтыс, тӯйтэ, я̄ӈке нёлувлэлан, ювпувтмелан. Нэ̄нан ат рōвнэ э̄лмхōлас ке ёхтыс, пāсса тōвлиг маныгтэлан, ня̄ра тōвлиг маныгтэлан. Аквматэ̄рт тӯйтэ, я̄ӈке нёлмтавес, колын юв тāрматавес. Ща̄не ягāги лāви: – Сōрникве, наӈ ос манарн тыт кинсэ̄гын? Манарын тыт вāрēгын? Маныр я̄рмын патсын, маныр вōньщумн патсын? Матъёмас вāпсын вōрт ат хōнтвēсын, ювтāяпанувен. Аквматэ̄рт сōрӈтэ̄п, мāгыӈтэ̄п пасанн ӯнттувес, тэ̄с, аис. Тэ̄нэ мāтэ̄ныл пōйтуӈкв ты патыс, кол пāӈк салатас. Ща̄не ягāгитэ лāви: – Вāпсын ювле ты ё̄ӈхыс лё̄х паттатэ̄ныл. Потыртасы̄г, матарасы̄г. Пыгрищ лāви: – Ам тыг кēтвēсум сāт ё̄рн потыртан пупыг палт. Э̄ква лāви: – Вāпсын ке матыр ощмар пищ ōньщи, вāпсын ощмар хосытыл сāт ё̄рн потыртан пупыг кāтын та паттэ̄гын. Вāпсын матыр ощмар, матыр пищ ат ке ōньщи, миннэн мāт тот та алавен. Сāт ё̄р нё̄тмил хоталь вēритэ̄гын наӈ кēмын э̄лмхōлас. Наӈ э̄лыпāлынт мансāвит э̄лмхōлас кēтсыглавес. Сāтнёлолов э̄лмхōлас. Та мāхмыт юв ат ёхталасыт, наӈ юв ат ёхтэ̄гын. Аквматэ̄рт китынтыг сāм кол пāӈк салатас. Э̄квапыгрищ накаматастэ, мокаматастэ – ощща ю̄нтупыг вāрапастэ, сунтук паттан тув мāгумтастэ, пувтмастэ. Хӯрмиттыг ёса паттал кол пōх салатас. Вāпсэ ёса паттаге рāтуӈкв та патсаге, щахыл турыл миргēг, щахыл турыл поклэ̄г. Юв щалтыс, лāви: – Я, колын тай ты самльтты, пальтты. – Ос хōт ялымен, матар тāяпасын, кисувласын. Ам колум манарыл самльтты, пальтты? э̄кватэ лāви. – Āти, наӈ колын самльтты, пальтты, ōйкатэ лāвыс. Хӯрминтыг ōйкатэ лāви: – Я, маныр тав, ул ӯп ня̄врамрищин тыг ёхтыс? Ос хōт ōлы? – Ос наӈ юв илттыг щалтэ̄гын, ам пилэ̄гум, атиӈк вāгтāл патнэн урыл ювтāяпилын, э̄кватэ лāви. Лōхса̄м паттан хāхсас, накаматастэ, мокаматастэ, э̄лмхōласыг колкан тӯщтыгпастэ. Ята, та аниглаве, сыпыглаве. Яты, котьле пāс юв аялāлытэ, кон а̄йтапитэ. Колканын тāрматастэ, китыглытэ: – Я, маныр вōньщумн патсын, ня̄врам? Маныр я̄рум? – Я, наӈ хум тэ̄пъялэн, аен, тувыл ущ китгалэ̄лн. Маныр я̄румн, маныр вōньщумн патыс? Тав такви оссаме паттат, маныр я̄рум тоты, маныр вōньщум тоты, таимāгыс тыг ты ёхтыс, э̄кватэ лāвыс. Тувыл ӯнлын āнытэ щар тāглэ тэ̄нутыл хӯнвес, нё̄влил щар тāглэ. Акв ōвлыӈ āнытэ пуссын тāяпастэ, мōт ōвыл āнытэ пыгрищ тōвтащлас, пуращлахтас. Э̄кватэ мощ тэ̄пъялас. Яты, āнытэ пуссын тав та тāяпастэ. Исмит пӯт котьле мос юваяластэ, сāт палюп аргин пӯтэ. Тувыл апге нупыл лāви: – Я, маныр я̄рм? – Тав маныр я̄рм, маныр вōньщум? Тав тӯлмах алыглам, яныг вāтахумын маяпаме. Ман мулм кāтэ̄тыл, ман мулм лāглэ̄тыл хāйтыгтэмēтэ, таимāгыс тӯрыг, хāлиг тотмаге. Сāт ё̄рн потыртан пупыг палт кēтыма. Ос таитэ тотуӈкв ёхтыс. Наӈ матар ощмар ōньщēгын, матар пищ ōньщēгын? Наӈ ё̄рынтыл тах кāтын та паттыглан, э̄кватэ лāвыс. – Я, тав такем вāрмаль, сāт ё̄рныт, тāн мōтхōтал тах йирхатэ̄гыт, пупганыл йирēгыт, вина аēгыт. Тав тах кāтын ман хосал паты, мēн кāтагмēн, ōйкатэ лāви. Тувыл сāграпе кӣвтастэ, касаянэ кӣвтсанэ, ёл та хуяс. Пыгрищ мулыпāлн хуяс. Хуясыт, тувыл та оилматвēсыт. Āлпыл ōйка нōхквāлыс. Э̄кватэ тэ̄нут вāрыс, лӯтыс. Ōйка тэ̄пъялас, лӯтыс. Сāграпе, касае вис, та минас. Миннэ̄тэ э̄лыпāлт э̄кватэ лāвыс: – Пыгрищ тах нōхквāлы. Аман хомле тах вāрыглаӈкв? Тав кон мори хāйтыгтаӈкв паты, э̄кватэ лāви. – А тав тах тув ке кēтылын, лāвēлн, тах тув э̄ргим, кисгим вос мины, ам палтум. Ам тах вāглум, тав пāвыл пāлыл тах юв, ōйкатэ лāвыс. Тувыл тав ман э̄рыгхум, мōйтхум нōхквāлыс. Тэ̄пъялас, лӯтыс. Āкве агāгитэ нупыл лāви: – Ам сар мощ кон ёнгим хāйтыгтэ̄гум. – Я, наӈ хāйтыгтэ̄гын, хāйтыгтэн. Пыгрищ лāви: – Я̄ тапāл урт аман хотьют сāгырхатнэ̄т суйты. Āкве лāви: – А тая тай наӈ вāпс ōйкан суйты. Тав сāгырхаты. Тувыл ос кон та хāйтыгты, ёнгасы. Кон хāйтыгты, тувыл ос юв щалты, лāви: – Ам сар тув хāйтталэ̄гум. – Я, наӈ илттыг тув ул хāйтэн, наӈын ювтāяпитэ. – Я, ос хомус минуӈкв? – Наӈ тыгыл минэн, э̄рген, кисген, рōӈхен, тащир минэн, э̄ква лāви. Тувыл ос тэ̄пъялас, аис. Āквен тыттувес, айтвес, тувыл та минас. Э̄ргим, щисгим, кисгим, рōӈхим тув та ёхтыс, сунсы: вāпсэ тай товлыӈ хāпе āстам. Пыгрищ китыглахты: – А тыя маныр? – Тыя тай ам товлыӈ хāп вāрсум. Э̄рыг йисхум, мōйт йисхум порат тамле мōйт тах нас мōйтаве. Хōяӈ рущхум пыг āртэ̄н паты, хōяӈ юхурпыг āртэ̄н паты, ты вāрмаль тах э̄лмхōлас исыӈ тōрм паты и э̄лмхōлас нотыӈ тōрм паты, э̄лмхōласытна тах ты вāрмаль э̄лаль тотуӈкв патаве. Ос мощ матар аньщаранэ волкалтасанэ. Тувыл та тāлсы̄г. Та тыламласы̄г юв, юв ёхтысы̄г. Ōйка лāви: – Тав ты аньщаре, та аньщаре ат тōвлы. Пыгрищ лāви: Ам сар ань тыламлэ̄гум. – Āти, вāпс ōйкатэ лāви, холытан тах ущ тыламлэн. Холытан тах ё̄рныт йирхатэ̄гыт, пуӈканыл тах а̄гмыӈыг ēмты – сомъяхыт ӯнлы. Наӈ тах āлымēгын таве виӈкв. Тувыл вāпсэ ос тэ̄пъялас, аис, ос товлыӈхāпе ёмащакв щё̄питастэ. Нōхтыламласы̄г: я, ёмащакв рӯпиты! Ёлӯнтсы̄г, йӣвна нэ̄гыстэ̄н. Акитэ лāви: –Э̄рыӈ тах такви атиӈк тыламлы, вōтыг ēмты. Йӣвна ёлнэ̄гыстэ̄н. Тувыл ёл та хуясы̄г. Аквматэ̄рт тувыл āлпыл пыгрище ханищтаӈкв та патыстэ: – Наӈ тах тув ёхтэ̄гын, сунсэн, э̄лыл сунсэн. Наӈ тах сунсэ̄гын, тāн юв та щалтэ̄гыт, наӈ нумыл тах о̄влэ̄т ё̄ӈхен. Тāн тах наӈ нуплын ман тэ̄ланыл ōлы. Та̄н аēгыт, сāлы нё̄вляныл, лӯтаныл тах щё̄питэ̄гыт. Тāн юв щалтын порат тах сомъяханыл пāлыгхуи, наӈ тах ёлисапāлэн. Тав тах ты пуклатэ̄тыл консыгтэ̄лн, тав тах пōйтыгпа̄лы. Исапāлэн, тāлтапēлын, тувыл тармыл ӯнтэ̄лн. Тав тох хотквāлапи, порыгми. Акитэ лāвыс: – Наӈ тах номылматэн, матыр лю̄ль ке ēмтуӈкв паты, наӈ āнум номылматэн. Ам тах тāнаныл щё̄питыянум. Та халт наӈ оигпēгын. Āлпыл пыгрищ тув та минас, тув ёхтыс. Нумыл тай та ё̄ӈхи товлыӈхāпēтыл. Аквматэ̄рт ё̄рныт та тэ̄пъяласыт, лӯтсыт. Такви тай пыгрищ такем тэ̄ӈкв таӈхи кос, номсы: «Ам сар юв ёхтын мос вēритэ̄гум». Сунсы: акваг нё̄влит, лӯтыт щё̄питаве̄сыт. Тувыл юв та щалтсыт. Юв щалтнэ̄ныл халт, пыгрищ ёлисапас. Сōль, сомъяхыт пупыг та э̄рги такви урēт, та каи. Консыгтастэ, āлмаястэ, т о в л ы ӈ х ā п к ӣ в ы р н щēлтумтастэ, тармыл ӯнтылматастэ. Товлыӈхāпе квāлтапаптастэ, нōх та тыламлас. Тыламлас, та мины. А таятэ тай та рōӈхи, пыгрищ манакем вēрми, та мины. Аквматэ̄рт ювле сунсы, вāпсэ̄н лāвсавес: «Наӈ ювле уральтахтым минэн». Ювле сунсы: сāт хулахыг ēмтапасыт. Сāт хулахыг та тыламласыт. Яты, юил та ня̄влаве, юил ты ёхтаве. Аквматэ̄рт номылматас: «Яты, вāпс ōйк, ам ты алавем тах». Аквматэ̄рт э̄лыпāлыл сунсы: лунт нэ̄глапас. Лунт нэ̄глапас, ювле сунсы: тай хулаханэ ювле лунтна та ё̄хтавēсыт. Лунтна ювле ё̄хтавēсыт, ювле ос āӈкватāнты: хулаханэ ёлаиссыт, лунт ōс тув ёлисас. Аквмат щāрыщта та ловтхаты, та манари. Аквматэ̄рт товлыӈхāп вāрум урн пыгрищ та ёхтыс. Ювле сунсы: лунт ōс тыламлас, тав юйпа̄лэ̄т та юв. Тав ос тот нумыл та ё̄ӈхи. Ёлисас (пыгрищ), юв щалтыс. Вāпс ōйкатэ маснутанэ хотāӈхвиянэ, щар та хащлумыт, та манарыт. Пыгрищ китыглахты: – Я, вāпс ōйк, наӈ ос маснутанын манрыг тох ēмтсыт? Хоталь ялсын? – Наӈ ос сāртын номылматуӈквкен, сāртын ля̄галаӈквен, таят тай хулахыг та ēмтапасыт, тэ̄лапасыт. Наӈ ань илттыг номылматсын, ам ань нāӈк урта, ӯльпа урта наӈ сāинтта хāйтымем маснутанум пулигманыгтавēсыт. Н а ӈ ы н л э̄ с т а л а ӈ к в хāйтсум. Мо̄йт э̄лаль мо̄тыт газетат ловиньтэ̄н. 1057 2013.08.09. Людмила ТЕТКИНА Пил ва̄тнэ ма̄ ма̄гсыл олн ойтуӈкве э̄ри. Ханты-Мансийск ӯст мирколт рӯпитан ма̄хум сапра̄ни ва̄рыгласыт, округувт рӯпитан общинат ос мо̄т предприятият кӯщаяныл тув во̄виньта̄лсаныл. Ань ма̄н округувт пил ва̄тнэ, ла̄хыс атнэ, па̄квсам ва̄рнэ, тэ̄рпиӈ лӯптат атнэ общинат, предприятият субсидияолныл нё̄тавет. Ань йильпи са̄кконыт щирыл, ма̄хум пил ва̄тнэ̄ ма̄наныл та̄нкина̄нылн хансуӈкве ве̄рме̄гыт. Туп акв ва̄рмаль о̄лы– тыи ма̄гсыл арендаолн ойтуӈкве э̄ри. Ма̄хум тамле нэ̄пакыт щё̄питаӈкве ат молямлэ̄гыт. Ты тэ̄ла урыл ма̄хум о̄лум сапра̄нит потыртасыт. Округувт Ханты-Мансийский, Белоярский, Кондинский, Нижневартовский, Октябрьский, Сургутский ос Ха̄льӯс районытт туп 34 хо̄тпа во̄р арендан винэ нэ̄паканыл щё̄питасаныл. Са̄кконыт щирыл та̄н 10-40 та̄лн та̄нки нупыланыл та во̄р хансуӈкв ве̄рме̄гыт. Ма̄хум ос ла̄всыт, о̄влэ̄т ты нэ̄пакыт ва̄руӈкве та̄н ка̄сащасыт, тувыл ловиньтасыт, манаса̄вит олн ойтуӈкве патэ̄гыт, э̄лаль нэ̄пакыт атуӈкве ат патсыт. Олег Шатин, «Союз общин» рӯпитан кӯщай, тох ла̄выс: «Пил ва̄тнэ во̄рум ма̄гсыл 3 миллион солко̄ви ойтуӈкве э̄ри. Ос на̄нан китыглыянум: манаса̄вит тонна пил, ла̄хыс ос мо̄т тэ̄нут ма̄навн тыналаӈкве э̄ри, ты олн сэ̄лнэ ма̄гсыл. Ты та̄л пил ат ке тэ̄лы, а̄нум маныр ва̄руӈкв, хотыл таса̄вит олн выгум. Ань па̄влыӈ ма̄хумныл манос по̄х хо̄тпаныл пил ёвтуӈкве патэ̄гум, амки ма̄хманум во̄рн аты ке̄тыянум. Ты э̄лыпа̄лт туп соссаӈ ма̄хум ты рӯпата ва̄рсыт, та̄н са̄всыр субсидияолныл ойтве̄сыт, нё̄тве̄сыт. Ань тай пуссын предприятият ты олныл мивет. Ты щирыл э̄лаль ке мины, соссаӈ ма̄хум ты рӯпата ва̄руӈкве ат патэ̄гыт». Александр Киселев, та департаментыт рӯпитан хум, ла̄выс, ань во̄р пил ва̄тнэ хо̄тпат пуссын субсидиял нё̄тавет, йильпи са̄кконт тох хансым о̄лы. Пётр Монин, Ханты-Мансийский районныл ёхталам хум, ты та̄рвитыӈ ва̄рмаль урыл тох ла̄выс: «Ам общинам ма̄гсыл во̄р арендан вислум ос олн ойтэ̄гум. Тувыл тамле ва̄рмаль е̄мтыс, ам олн ойтэ̄гум ос ка̄сыӈ по̄х хо̄тпа ам о̄лнэ ма̄мт пил ва̄туӈкве ве̄рми. Ань ты китыглахтуӈкве т а ӈ хе̄ г у м , т а̄ н п и л ва̄тэ̄гыт ос манрыг ам олн ойтэ̄гум? » Кӯ щ а и т о с ю в л е ла̄всыт, та̄н нэ̄матыр ва̄руӈкве ат ве̄рме̄гыт, ань тамле са̄ккон Россия янытыл рӯпиты. Ос ма̄хумн ты нэ̄пакыт атуӈкв нё̄туӈкве ла̄вхатсыт. 1057 2013.08.09. Людмила ТЕТКИНА Тэ̄ла урыл тот потыртасыт. Округувт соссаӈ ма̄хумн нё̄тнэ ос та̄н пе̄с йис ва̄рмаляныл э̄лаль тотнэ ма̄гсыл «Социальноэкономическое развитие КМНС» нампа программа 2013 та̄л оигпан мус рӯпиты. Ань ты нэ̄пак йильпииг хансаве, ос 2014-2020 та̄лытн пирмайтаве, акв миллиард 205 миллион 912 со̄тыра солко̄ви тув тах та̄ставе. Ань природный ресурс департамент ты программа щирыл пуӈктоты. Мощщаг хультум мирыт культураныл э̄лаль тотнэ ма̄гсыл 8 департаментыт олныл мивет. Ты хосыт культура департамент са̄всыр фестивалит, ханищтапыт, ялпыӈ хо̄талыт ва̄рыглы. Спорт департамент ос Нефтеюганский районт ка̄сыӈ та̄л ма̄ньха̄пыл каснэ касыл щё̄пита̄лы. Мо̄таныт пе̄с йис ва̄рмалит но̄хво̄рмалтан ма̄гсыл олныл та программаныл о̄с та̄ставет. Манхурип э̄рнэ тэ̄лат йильпи программан хансуӈкве э̄ре̄гыт, ты ма̄гсыл соссаӈ ма̄хум сапра̄нин акванатыгл а в е̄ с ы т о с к и т ы главе̄сыт. Еремей Айпин, округ Дума депутат, тув о̄с во̄виньта̄лвес. Тав ла̄вме щирыл, ты нэ̄пак мӯсхалыг иӈ ат хасвес. Ос ка̄сыӈ департамент китыгластэ, соссаӈ ма̄хумн нё̄тнэ ма̄гсыл та̄нанылн манаса̄вит олн э̄ри. Культура департамент акв та̄лн туп кит миллионыл тах миве, та̄н лов миллион кос во̄всыт. Спорт щирыл рӯпитан департаментыт о̄с са̄в олн тув хансыгласыт, о̄с мощща олныл хасве̄сыт. Мо̄таныт о̄с акв тыщирыл мощща олныл тах мивет. Тыи ма̄гсыл Еремей Айпин кӯщаит пуссын ты ва̄рмаль урыл э̄лаль потыртаӈкве сӯкыр э̄тпост тах во̄выглыянэ. Степан Молданов, Белоярский ӯст о̄лнэ ханты хум, сапра̄нит ла̄выс: «Ань община ва̄рнэ порат са̄в нэ̄пак атым, Ханты-Мансийск ӯсн акваг ялантаӈкве э̄ри. Ма̄нь па̄вылт о̄лнэ ма̄хманув тыглетувле яласаӈкве таса̄вит олн хо̄т выгыт? Программан та̄н тыглетувле ялнэ лё̄ӈхолнаныл тув вос хансавет». Советский район Коммунистический па̄вылт о̄лнэ Николай Проскуряков, ле̄ккар хум, ос тамле тэ̄ла урыл ла̄тыӈ ла̄выс. Ань ма̄ньщит, хантыт щар пуссын со̄рыгӯй о̄ньще̄гыт, пусмалтахтуӈкве ат ка̄саще̄гыт, ты а̄гмыл са̄в хо̄тпа а̄тимыг е̄мты. Та̄н санаториян ты а̄гм пӯсмалтаӈкве вос ке̄тыглавет. Ань та̄н ӯщ лахтын ма̄н кос ялантэ̄гыт. Тувыл нэ̄мхотьют ат ва̄г, манса̄вит э̄лумхо̄лас пусмалтахтуӈкве яланты. Акв программа хосыт ке пусмалтавет, то̄нт тай ёмаснувег паты». Сапра̄нит ма̄хум ты яныг нэ̄пак урыл хоса потыртасыт. Евгений Платонов, природный ресурс департаментыт кӯщай хум, ла̄выс, пуссын потыртам тэ̄лат ёмащакв ханищтыяныл ос а̄ртме̄гыт ке, ты программанэ̄пакн хансыяныл. 1057 2013.08.09. Людмила ТЕТКИНА А̄гирищитпыгрищит ӯщлахтэ̄гыт. Ня̄врамыт ӯщлахтын ва̄рмаль кӯщаит акваг ӯральтым о̄ньщияныл. Ань ты накт Ханты-Мансийск ӯст ты ва̄рмаль палт рӯпитан ма̄хмыт акванатыглаве̄сыт ос о̄выл сменат ня̄врамыт хумус ӯщлахтасыт, та урыл китыглаве̄сыт. Лӯпта э̄тпост округ янытыл 428 са̄всыр ӯщлахтын ма̄ рӯпитас, тот 28 со̄тыра 471 а̄гирищпыгрищ ӯщлахтасыт. Ты халт 120 ня̄врам этностойбищатн ялсыт. 4 со̄тыра 862 ня̄врам ща̄рыщ ва̄тан тотыглаве̄сыт. Елена Немчинова, мир ӯргалан департаментыт рӯпитан кӯщай нэ̄, ла̄выс, ӯщлахтын коныпал ня̄врамыт пӯсмалтавет. Акв тэ̄ла урыл та̄н хоса потыртасыт. Нягань ӯст о̄лнэ ӯщлахтын ма̄н акв а̄гмыӈ ня̄врам ке̄твес, хо̄тал палыт акв ма̄т о̄лым, аквъёт ёнгим 12 а̄гирищпыгрищ о̄с агмыӈыг е̄мтсыт. Тыи ма̄гсыл ка̄сыӈ ӯщлахтын ма̄т ле̄ккарыт пуссын мӯсхалыг рӯпитаӈкве ла̄вве̄сыт. Майя Соловьёва, Роспотребнадзорыт рӯпитан нэ̄, тув ёхталам кӯщаитн ла̄выс, ёмащакв вос ловиньтэ̄гыт, хоты ма̄т ос манаса̄вит ня̄врам ӯщлахты. Та̄н мир ӯргалан департаментын акв нэ̄пак ке̄тэ̄гыт, тув мо̄т нэ̄пак ёхты. Та̄н аты ва̄ганыл, манаса̄вит ня̄врам о̄выл сменат ӯщлахтасыт. 1057 2013.08.09. Людмила ТЕТКИНА Номтыӈ ня̄врамыт Юграт о̄лэ̄гыт. Любовь Ковешникова, образование департаментыт рӯпитан кӯщай нэ̄, ля̄ххал тотнэ ма̄хум э̄лыпа̄лт ЕГЭ урыл потыртас. Ты та̄л округув янытыл 11 со̄тыра 508 а̄гитпыгыт ЕГЭ хассыт. Рущ ла̄тыӈ ос математика та̄н пуссын хансэ̄гыт, мо̄т хотты предмет та̄нки пе̄рие̄гыт. Ты та̄л 5 со̄тыра 622 ня̄врам обществознание хассыт. Ань 104 ня̄врам щар ма̄к ёмащакв ЕГЭ хассыт, 2012 та̄л туп 19 тамле ня̄врам о̄лыс. Кӯщай нэ̄ ла̄вме щирыл, ань школат ня̄врамыт мӯсхалыг ханищтавет, та̄нки ос ёмащакв ханищтахтуӈкве ка̄саще̄гыт. Ты та̄л акв пыг хӯрум экзамен 100 баллыл хассанэ. Ты мус нэ̄мхотьют тох ты экзаменыт ат хансыглас. Номтыӈ пыг ань э̄лаль ханищтахтуӈкве са̄в университетытн во̄ваве. Кӯщай нэ̄ ос акв ва̄рмаль урыл ла̄выс. Ань ЕГЭ пуссын акв ма̄н атавет, рущ ла̄тӈыл «региональный центр обработки информации» тох намаим о̄лы. Ня̄врам э̄лаль университетын манос мо̄т ханищтахтын колн туп такви нэ̄паканэ мыганэ, «свидетельство ЕГЭ» ке̄туӈкве тув ат э̄ри. Ханищтан колытт рӯпитан хо̄тпат ня̄врамыт хансум ЕГЭ нэ̄паканыл та̄нки тот сунсуӈкве ве̄рме̄гыт. 1057 2013.08.09. Николай МЕРОВ Та̄нки рӯпата ва̄рнэ хо̄тпат ӯргалавет. Мо̄лал Ханты-Мансийск ӯст предпринимателит ёт рӯпитан кӯщай пе̄риявес. Тот нила хо̄тпа рӯпитаӈкве ка̄сащасыт: ты Юрий Кирзнер, Олег Шиян, Наталья Литвинова ос Ольга Белоножкина. Ка̄сыӈ хо̄тпа такви программатэ урыл потыртас, хумус ты ма̄хумн тав нё̄туӈкве паты. Пе̄рияп са̄ткем хо̄тал минас. Ма̄хум са̄внув нэ̄пак Ольга Белоножкина ма̄гыс та̄ратасыт. Ойттур э̄тпос юио̄выл хо̄талытт окружной совет о̄лыс. Тот малый ос средний бизнес ва̄рнэ кӯщай хо̄тпат акванатхатыгласыт. Муниципалитет кӯщаит кина суснэ то̄тап хосыт та̄н ётаныл са̄всыр ва̄рмалит урыл потыртасыт. Ты коныпал Москва ӯсныл тыг яныг кӯщай Борис Титов ёхталас, тав Президентув палт предпринимателитн нё̄тым рӯпиты. Та сапра̄нит губернатор нэ̄ Наталья Комарова йильпи кӯщаиг Ольга Белоножкина паттыстэ. Ты ма̄гыс яныг кӯщай нэ̄ э̄рнэ нэ̄пакт хасхатас. Ольга Белоножкина ла̄выс: «Ам ты э̄лыпа̄лт прокуратурат хо̄тахкем та̄л рӯпитасум. Арбитражный сутыт ма̄хумн нё̄тсум. Ос тамле тэ̄ла о̄лы, то̄ва хо̄тпат са̄кконыт ёмщакв ат ва̄ганыл. Са̄выӈпа̄лэ ты ма̄гыс та̄рвит ва̄рмаль е̄мты. Ам са̄кконыт пуссын ёмщакв ва̄ганум. Я̄нас миннэ тов щирыл рӯпата ва̄рнэ хо̄тпатн нё̄туӈкве патэ̄гум». Борис Титов кӯщай нэ̄ о̄с янытластэ. Тувыл ты сапра̄нит кӯщай хо̄тпат ос са̄всыр мо̄т тэ̄лат урыл потыртасыт. 1057 2013.08.09. Николай МЕРОВ Я̄ӈк хӯланув са̄вмалтавет. Хультум э̄тпос 14 хо̄талэ̄т Россият хӯл алыщлан ма̄хум ялпыӈ хо̄таланыл о̄лыс. Ты природный ресурс Департамент кӯщай Евгений Платонов мирколт хӯл янмалтан ос хӯл алыщлан хо̄тпат акванатыгласанэ. Ты ва̄рмалин общинат рӯпитан хо̄тпат, хӯл са̄вмалтан заводыт рӯпитан ма̄хум ос некоммерческий организацият са̄всыр кӯщаит тув во̄виньта̄лве̄сыт. Яныг кӯщай ва̄ӈын хум Александр Киселёв ла̄выс, ань Югра ма̄т хӯл пувим 164 предприятие рӯпиты. Та̄н ка̄сыӈ та̄л 15-17 тонна я̄ӈк хӯл алыщлэ̄гыт. Мо̄лты та̄л сыс онтоловкем со̄тыра тонна хӯл пувсыт. Ос ювле хультум хӯрум та̄лытныл ты пора сака мощща хӯл катынпаттувес. Ты таима̄гыс тох е̄мтыс, ань сака са̄в хо̄тпа мори хӯл алыщлэ̄гыт. Тувыл ос акв тэ̄ла хосыт хӯланув мощщаме̄гыт, округувт ма̄щунит но̄хвивет, тыил я̄т витаныл сака па̄ӈктавет. Хӯл алыщлан ма̄хум ла̄всыт, па̄ӈкыӈ вит урыл нэ̄мхо̄т щар нэ̄матыр потыр ат о̄лыглы, тыи ос мо̄т та̄рвитыт ёлтуйтыглым о̄ньщавет. Ань матъёмас округувт хӯл са̄вмалтан завод ӯнттувес. Тот мохсаӈ, ӯсхул, ка̄рай ос мо̄т я̄ӈк хӯлыт янмалтавет. Мощ яныгманэ̄ныл юипа̄лт та̄н я̄тытн, тӯрытн та̄рталавет. Хӯл са̄вмалтан ма̄гыс 20112013 та̄лытн окружной программа пирмайтавес. Ты хосыт 2011 та̄лт хӯл янмалтан ма̄гыс 111 миллион солко̄ви, 20122013 та̄лт 120 миллион солко̄ви холтвес. Муниципалитет кӯщаит хӯл алыщлан хо̄тпатын о̄с нё̄тэ̄гыт. Тох ты та̄л 68 миллион солко̄ви са̄всыр ва̄рмалит ма̄гыс холтвес. Евгений Платонов ла̄выс: «Округ правительство кӯщаянув хӯл алыщлан ма̄хум та̄рвит в а̄ р м а л я н ы л у р ы л ва̄ганыл. Ты тэ̄лат мӯсхал щирыл щё̄питаӈкве нё̄тэ̄гыт. Югра ма̄т нот па̄лытыл тыныӈ хӯл пуваве. Таима̄гыс ты ва̄рмаль ма̄н та̄кыщ уральтаӈкве патылӯв». 1057 2013.08.09. Николай МЕРОВ Молях ха̄йтнэ пыг. Мо̄лалнув Италия ма̄т Риета ӯст мирхал касыл о̄лыс. Ма̄н округувныл тув Павел Иващенко касуӈкве ялыс. Тав са̄всыр ма̄ныл ёхталам пыгыт ёт касыс. О̄влэ̄т ниласа̄т метра акв юипа̄лт ха̄йтым са̄ртын ёхтыс, тувыл пуссын аквторыг ха̄йталтахтынэ̄ныл порат о̄с но̄хпатыс. Ойттур э̄тпос 25 хо̄талт ты пыг Ханты-Мансийск ӯсн юв ёхталас. Павел ма̄гылн тагатан кит со̄рни по̄с тотыс. Ань тав двухкратный чемпион Европы е̄мтыс. Россия янытыл о̄лнэ ма̄ньлат хо̄тпат халт тав щар молях ха̄йты. Ты э̄лыпа̄лт Юрий Борзаковский чемпионыг о̄лыс. Павел таве̄ныл хӯрум секундан моляхнув ёхтыс. Ос таи ла̄вуӈкве э̄ри. Тав ань Сургут ӯс университетыт ханищтахты, китыт та̄л а̄стлас. Университет кӯщай пыг урыл тох ла̄выс: «Павел ханищтахтын ма̄н акваг яланты, юв ат хульты». Тав тот ханищтахтуӈкве о̄вылтахтаме порат ха̄йтыгтаӈкве патыс. Кит та̄л лёгкий атлетика щирыл Ханты-Мансийск ӯст о̄лнэ хум Владимир Власов таве ханищтас. Ты хум каснэ ва̄рмаль ёмщакв ва̄гтэ, тав хосытэ ты ма̄ньлат пыг чемпионыг е̄мтыс. Павел а̄лпыл нила щё̄ст товлыӈха̄пыл э̄лы ма̄ныл Сургут ӯсн ёхтыс. Аэропортыт ща̄нягеа̄щаге, тувыл университет кӯщай ос тав ётэ ханищтахтын а̄гитпыгыт яныг ща̄гтыл таве ӯрсаныл. Яныг нэ̄пак тагатасыт, тот тав уре̄тыл янытлан ла̄тыӈ хассыт. Ты касыл урыл та̄н хоса потыртасыт, пыг маттем та янытласаныл. Ань э̄лаль во̄ртур э̄тпос 10-18 хо̄талытт о̄с акв тамле касыл Москва ӯст щё̄питаве. «Лужники» нампа стадионт ха̄йтнэ лё̄ӈхыт ва̄рве̄сыт. Россият тамле ва̄рмаль китыт щёс тах мины. Са̄ртын 2006 та̄лт аквхуйпловит касыл щё̄пита̄лвес. Ань нилахуйпловит касыл о̄с ма̄н ма̄вт е̄мты. Павел ань тув щё̄питахты. Ма̄н таве̄н пуста̄гыл о̄лнэ ла̄тыӈ ке̄тэ̄в. Ты ка̄ркам пыгкве та касылт но̄х вос паты. Ма̄н таве сака янытлылӯв. 1058 2013.08.23. Людмила ТЕТКИНА Рӯпатаныл по̄хын ке ке̄таве̄н, тув хансэ̄н. Элумхо̄лас сэ̄лум олнанэ ат ке ойтавет манос рӯпатаныл по̄хын ке ке̄таве, Государственный инспекцият рӯпитан хо̄тпатн хансуӈкве ро̄ви. Ты инспекция кӯщай хо̄тпаг Евгений Кривобоков о̄лы. Тав округувт рӯпитан организацият пуссын уральтыянэ. Кӯщай хум ля̄ххал т о т н э махум ёт хо̄нтхатыглас ос ты та̄л хо̄т э̄тпос сыс ва̄рум рӯпатаныл урыл потыртас. Ты пора сыс акв со̄тыра800 арыгкем э̄лумхо̄лас та̄нки ва̄рмаляныл урыл Государственный инспекциян хассыт. Ань 700 обращениенэ̄пакщирыл инспекция иӈ рӯпиты. Ты сыс 157 э̄лумхо̄лас рӯпитым сакватахтасыт, та̄нхаланылт 12 хо̄тпаа̄тимыге̄мтсыт. Ань ма̄хумрӯпатаолныл ат ке ойтавет, организацият о̄сяныгштрафолныл пинавет. Округувт ЗАО «Аган-Бурение» ос ЗАО «Нефтемонтажспецстрой» нампа ма̄трӯпитанма̄хум3-4 э̄тпосолнылатойтавет. Ань государственный инспекция хо̄тпаттот рӯпитэ̄гыт Евгений Кривобоков «Электронный инспектор» нампа акв йильпи тэ̄ла урыл потыртас та̄н палтаныл ань интернет хосыт ла̄тыӈ ке̄туӈкве манос китыглахтуӈкве ро̄ви Тыщирыл та̄н ма̄хумн моляхнув нё̄туӈкве патэ̄гыт. Кӯщай хум округувт о̄лнэ мирн тамле ла̄тыӈ ке̄тыс «Тамле та̄рвитыӈ ва̄рмаль ке о̄ньщегы̄н нас тох ул ӯнлэ̄н ма̄нпалтув ёхталэ̄н манос ла̄тыӈ хансэ̄н». 1058 2013.08.23. Валентина УЗЕЛЬ О̄лнэ кол. Ань ка̄сыӈ та̄л ма̄н округувт о̄лнэ кол мощща ӯнттаве Ты ва̄рмаль урыл потыртан ма̄гсыл Ханты-Мансийск ӯст яныг кӯщаит акванатыглаве̄сыт Та̄н потыртасыт, маныр э̄лаль ва̄руӈкв э̄ри са̄внув о̄лнэ кол во сӯнттаве. Ты э̄лыпа̄лт округ кӯщаюв Н. Комарова тамле ла̄тыӈ ла̄выс, акв та̄л сыс 1 миллион са̄вит квадратный метра кол ӯнттуӈкв э̄ри. Ань нёлолов э̄тпос сыс округув янытыл туп 276 со̄тыра метра ӯнттыма. Дмитрий Шаповал губернатор ва̄ӈын хумыг рӯпиты, тав тох ла̄выс. Радужный ӯс, Ханты-Мансийск ӯс ос Советский районт о̄лнэ кол щар мощща ӯнттувес. Туп Югорск ӯст, Сургутский ос Октябрьский районыгт план щирыл колыт ӯнттавет. Ань та сапра̄нит та̄н нэ̄пакн хансым плананыл пуссын ёмащакв ловиньтасаныл, суссаныл, иӈ манах метра кол ӯнттуӈкв э̄ри. Ос тот та̄рапатыс, кол ӯнттын ма̄гыс сака мощща олн округ бюджетныл та̄ставе . Округувт «Союз строителей Югры» рӯпиты. Та̄н ты олныл лю̄льсаӈ мивет. Ос олн та̄л колыт хумус ӯнттуӈкв. Тувыл иӈ тамле ва̄рмаль та̄н о̄ньще̄гыт кол ӯнттын ма̄гыс ма̄ ёвтуӈкв э̄ри Вит ос ре̄г тотнэ тӯрпат тув мус хартуӈкв э̄ре̄гыт Тыи ма̄гыс о̄с са̄в олн э̄ри . Ос ты яныг кӯщай ла̄выс ты та̄л оигпан мус хультум нила э̄тпоссыс та̄н700 со̄тыра са̄вит квадратный метра кол тах ӯнттэ̄гыт акв миллион метраг тах е̄мты Мо̄лты2012 та̄лсыста̄н1 миллион. 21, 8 со̄тыра са̄вит метра ӯнттумыт. 1058 2013.08.23. Людмила ТЕТКИНА Ле̄ккарыт палт. Александр Филимонов, мир пусмалтан Департаментыт кӯщай, ос мо̄т ле̄ккарыт ля̄ххал тотнэ хо̄тпат ёт хо̄нтхатыгласыт. Та̄н мир пӯсмалтан ва̄рмаль урыл потыртасыт. Ань ма̄хум уральтахтуӈкве ле̄ккарыт палт во̄вавет. Александр Филимонов ла̄выс: «Ма̄хманув а̄гмыл е̄мтнэ̄ныл порат туп то̄нт пӯльницан минэ̄гыт. Ань Юграт 45% хо̄тпат сым а̄гмыл а̄тимыг е̄мтэ̄гыт, 16% рака̄ г м ы л хот т а л ь щалтэ̄гыт. Пӯльницан са̄ртынув ке ёхтынувыт, а̄гманыл пусмалтаӈкв ро̄ви. Ты та̄л 15 хо̄тпа уральтахтыманыл порат рака̄гманыл хо̄нтве̄сыт. Та̄н а̄гмыл ущ е̄мтсыт, пуссын пусмалтаве̄сыт. Тыи ма̄гсыл ле̄ккар палт ва̄тихал ялуӈкв э̄ри. Ань са̄в хо̄тпат вина аим, хохса хартым ос са̄в та̄им а̄гмыл е̄мтэ̄гыт. Ты ма̄хмытын ле̄ккарыт о̄с нё̄туӈкве ве̄рме̄гыт». Та т ья н а М о г и л ь н и ц к а я , о к р у ж н о й пӯльницат рӯпитан ле̄ккар нэ̄, ты ва̄рмаль урыл ос тох ла̄выс: « У р а л ь т а х т у ӈ к в е к а̄ с а щ а н х о̄ т п а терапевтле̄ккар палт в о с м и н ы . Л е̄ к к а р таве̄н направлениенэ̄пакыт пуссын мыганэ. Акв хо̄тал сыс са̄всыр ле̄ккарыт палт ялуӈкве ро̄ви. А̄гм ке хо̄нтаве, э̄лаль уральтахтуӈкве ла̄ваве. То̄нт тай са̄внув хо̄тал э̄рмыглы. Ань федеральный са̄ккон щирыл, рӯпитан хо̄тпа пӯльницан ялнэ ма̄гсыл кӯщайн акв хо̄талн та̄ртаве. Ам номсэ̄гум, ты ва̄рмаль урыл ка̄сыӈ организация кӯщай ёмащакв ва̄гтэ. Ты «диспансеризацияг» ла̄внэ ва̄рмаль щирыл, 200 со̄тыра арыгкем хо̄тпа уральтаӈкве э̄ри. Ань туп 85 со̄тыра 490 э̄лумхо̄лас пӯльницан ёхталасыт. Округувт о̄лнэ ма̄хум, на̄нки урынт ул ёрувлэ̄н, пӯльницан ёхталэ̄н. 1058 2013.08.23. Валентина УЗЕЛЬ Пе̄риян ва̄рмаль о̄ста ва̄раве. Сӯкыр э̄тпос 8 хо̄талэ̄т округувт то̄варайонытт ос па̄влытт пе̄риян ва̄рмаль ва̄раве. Районный манос па̄влыӈ. Советытн депутатыт ос то̄ва ма̄т па̄выл кӯщаит пе̄рияӈкв патавет . Ты ювле хультум са̄тыт избирательный комиссия кӯщай хум Андрей Павкин ос таве̄н нё̄тнэ хум Денис Корнеев потыртасы̄г ты пе̄риян ва̄рмаль кастыл та̄н ань хумус щё̄питахтасыт маныр рӯпата ва̄рсыт . Э̄лы ма̄т ос во̄рт о̄лнэ соссаӈ ма̄хум вахта щирыл рӯпитан хо̄тпат ты э̄тпос 21 хо̄талныл нэ̄пак та̄ратаӈкв тах патэ̄гыт. Та̄н палтаныл ялнэ ма̄гыс вертолётыт ман мо̄т техника миве. Сӯкыр э̄тпос 3 хо̄талэ мус досрочный голосование тах ва̄раве . Округувт 186 пе̄риянма̄ пӯнсаве. 59 па̄влытт кӯщаит пе̄рияӈкв э̄ри. Аньтув 171 хо̄тпа пе̄рияхтуӈкв ка̄сащи. Па̄выл ман район депутатыг 1 со̄тыра 145 хо̄тпа пе̄рияхтэ̄гыт ос та̄н халанылт туп 819 хо̄тпа ма̄гыс нэ̄пак та̄ратаӈкв э̄ри . Ос таи ты кӯщаиг ла̄всы̄г? ты пе̄рияхтын ма̄хум халт са̄выӈпа̄лэ ма̄хум та̄ланыл янгыт, та̄н 50 59 та̄ланыл то̄влысыт Ма̄ньлат ма̄хум мощща та̄нос 30 та̄ланыл иӈ ат то̄влысыт. Ань са̄в нэ̄ кӯщаиг ман депутатыг о̄с рӯпитаӈкв ка̄саще̄гыт. 1058 2013.08.23. Людмила ТЕТКИНА Во̄рт о̄лнэ хантыт. Сургутский районт ань хӯрум со̄тыра арыгкем соссаӈ ма̄хум пе̄с йис щирыл о̄лэ̄гыт. Тот нефтяникыт ма̄во̄й но̄хвуим рӯпитэ̄гыт. Ханты ще̄мьят о̄лнэ ма̄т рӯпитым, та̄нанылн компенсацияолн ойтэ̄гыт, моторыл, ха̄пыл ос са̄всыр мо̄т пормасыл мыганыл. Та районт кӯщай ва̄ӈын хум Сергей Черкашин ты соссаӈ ма̄хумн нефтяникыт ёт потыртахтуӈкве нё̄ты. Районанылт 157 родовой угодия о̄лы рущ ла̄тӈыл та̄н «территории традиционного природопользования» намаим о̄лэ̄гыт. Кӯщай хум ла̄вмещирыл родовой угодият урыл постановление рӯпитам порат, Сургутский районт 107 хо̄тпа пе̄с йис ма̄наныл «родовой угодияг» хассаныл ос 50 хо̄тпа тамле нэ̄пак ань ат о̄ньще̄гыт та̄н о̄с пуссын во̄рт кос о̄лэ̄гыт. Ты э̄лыпа̄лт нефтяникыт тамле нэ̄пакытат о̄щнэ ханты ще̄мьят ёт договор хансуӈкве ос та̄нанылн нё̄туӈкве ат ка̄сащасыт Сергей Черкашин ты урыл ла̄выс «Ма̄н юристхо̄тпат ёт номсахтасӯв, маныр ва̄руӈкве ты ханты ще̄мьят о̄с воснё̄тавет Та̄н наманыл акв нэ̄пакн хассанӯв, рущ ла̄тӈыл тох намаяслӯв «список семей, ведущих традиционный образ жизни», ты нэ̄пакщирылнефтяникыт ёт ань э̄лальрӯпитэ̄в. Акв та̄рвит о̄ньще̄вма̄хманув о̄лнэ ма̄наныл та̄нки на̄нылн хансуӈкве ань ты мус ат ве̄рме̄гыт. Ты нэ̄пакыт Москва ӯст ва̄равет» . Ань округ постановление щирыл пе̄с йис ма̄т пуссын реестр нэ̄пакын хансавет. Тыхосыт кӯщаит, нефтяникыт ва̄ӈквепатэ̄гыт хоты ма̄т соссаӈ ма̄хум о̄лэ̄гыт. Ань ты рӯпата Сургутский ос Нижневартовский районыгт ва̄раве Тувыл мо̄трайонытт во̄рт о̄лнэ ще̄мьят реестр нэ̄пакн хансуӈкве патавет. Э̄лаль ты кӯщай хум тамле ва̄рмаль урыл потыртас: «Сургутский районт са̄в ще̄мья са̄лы о̄ньще̄гыт. Тыил мо̄т та̄рвит тэ̄пыӈ ма̄ ань ат то̄вылхаты. Э̄кваго̄йкаг ня̄враманэ̄н яныгме̄гыт, я̄нас о̄лмыгтэ̄гыт ос та̄нки са̄лыяныл ӯруӈкве о̄вылтахтэ̄гыт. Тыт ханты ма̄хум йис та̄гыл о̄лэ̄гыт, ка̄сыӈ ще̄мья такви са̄лы ӯрнэ ос во̄раян ма̄ о̄ньщи. Та̄н тай са̄всыр нэ̄пак та̄л ва̄гыт, хо̄т границаныл о̄лэ̄гыт. Ань ма̄ ат то̄вылхаты, хантыт та̄нки халанылт воритотэ̄гыт, ля̄втэ̄гыт, мо̄т ще̄мьят о̄лнэ ма̄н са̄лыяныл ёт воратэ̄гыт. Ты ва̄рмаль урыл Наталья Комарова, губернаторув, о̄с ёмащакв ва̄гтэ. Туи порат Сургутский районт во̄рт о̄лнэ ще̄мьят ёт хо̄нтхатыглас. Тав та̄нанылн ла̄выс, ты родовой угодият границаныл, э̄рыӈ, хотвиӈкве, ка̄сыӈ ще̄мья хоты ма̄т таӈхи, тот такви са̄лыянэ вос о̄ньщиянэ. Тыщирыл ва̄руӈкве хантыт ат ка̄сащасыт. Ань э̄лаль хумус рӯпитаӈкве, номсахтэ̄в. Ла̄выгласанӯв, са̄лыяныл акв ма̄т вос о̄ньщияныл ос мисыт хольт комбикормыл вос тыттыяныл. То̄нт ма̄ тах то̄вылхаты. Ма̄хманув ювле ла̄ве̄гыт, комбикорм акваг ёвтуӈкве са̄волнэ̄ри ты щирыл ва̄руӈкве о̄с ат артми. 2012 та̄лт туи порат са̄в во̄р на̄ин ё̄свес ос са̄лыӈ тэ̄пыӈ ма̄ мощща хультыс. То̄ва ще̄мьят о̄лнэ колт а̄лхультсыт. Ань о̄с аквты щирыл ул вос е̄мтыс ма̄н во̄рт о̄лнэ ще̄мьят огнетушителил мисанӯв. Тувыл пуссын торгамтэ̄в хунь о̄выл е̄мтапи тамле утыл нэ̄матыр ва̄руӈк ве ат а̄лыме̄гыт. Та̄н р а й о н я н ы т ы л о̄лэ̄гыт ка̄сыӈ ще̄мья по̄хыт на̄й харыгтан хо̄тпат ат рӯпитэ̄гыт ма̄шинал миӈкве о̄с ат ве̄рмиянӯв». Та районт во̄рт о̄лнэ ще̄мьят та̄л сыс акв щёсяныг сапра̄нин акван атхатыглэ̄гыт кӯщаитн та̄рвитыӈ ва̄рмаляныл урыл потыртэ̄гыт Сергей Черкашин тув ка̄сыӈ та̄л ёхталы тыи ма̄гсыл та̄н о̄лупсаныл ёма щакв ва̄гтэ. 1058 2013.08.23. Светлана РОМБАНДЕЕВА Ня̄врамыт ханищтам хо̄тпа. Кульпас па̄вылт ня̄врамыт ханищтам ма̄хум са̄в о̄лы Та̄н халаныл такв тамле ёмас ма̄ньщи хо̄тпаУльяна Павловна Гындыбина, а̄ги о̄парищ наме Пуксикова. Лӯпта э̄тпост Кульпасн ялмум порат тав колэ̄н щалтсасум ӯнлахо̄лсуме̄н потрамасме̄н Ульяна Па̄вловна школат са̄в та̄л рӯпитас о̄выл классытт ханищтаннэ̄г о̄лыс. На̄н ань тав потре ловиньтэлын: – Ам Алы Няхлаӈ па̄вылт самын патсум 1942 та̄лт ва̄т са̄грапнал э̄тпост. Па̄влув яныг о̄лыс тот ма̄нь школа пӯльница, почта о̄лыс Са̄выӈпа̄лэ ма̄ньщи ма̄хум, э̄лылёхталам рущит о̄с о̄лсыт са̄всыр ма̄трӯ питасыт пӯльницат, школат, почтат, ла̄пкат О̄влэ̄т тот ханищтахта сум. Тувыл та юипа̄лт Кульпас школат ханищтахтасум, 1958 та̄лтшко ла а̄стласум Аквта̄люн о̄лсум Э̄лнаӈня̄в рамыт туп педучилищан ман медучилищан поступайта̄лсыт то̄ват хотьют тахсыт, Салехардын зоовет техникумын минуӈкве ка̄сащасыт Ту выл 1959 та̄лтам Ханты-Мансийск ӯс педучилищан ханищтахтуӈкве минасум. Тот нила та̄л ханищтахтасум, 1963 та̄лта̄стласум То̄нтпедучилищат ма̄ньщиня̄в рам сака са̄ва̄тимо̄лыс Ма̄н группавт тай Ха̄льӯс район ма̄ньщи ханищтахтасыт, рущ ня̄врамыт о̄с о̄лсыт. Училище а̄стласум Кимкъясуй школат нила та̄л рӯпитасум Тувыл. Сортыӈъя̄н ке̄тве̄сум, тот атхуйплов та̄л рӯпитасум. Па̄вылт интернат о̄лыс, ня̄врамыт тув са̄в ма̄ныл тотыглаве̄сыт Октябрьский районныл, Ха̄льӯс, Кульпас, Ло̄пмус, Кимкъясуй па̄влытныл о̄лсыт. Ма̄нь ня̄врамыт ханищтаӈкве а̄нум сака мӯстыс. Ханищтам ня̄враманум пуссын номиянум. Школа кӯщаиг то̄нт Докукин о̄йка о̄лыс. То̄ванакт ла̄тыӈ ат хӯнтлын ня̄врам тотаве, та̄ра ам классум та ӯнттыгпаве. Ам ла̄ве̄гум: «Ам классумт сака са̄в ня̄врам, пуссын ат ве̄ритаптыянум». Кӯщай о̄йкав ла̄ви: «Наӈ ве̄рмегын, наӈ палтын та̄н роттыг о̄лэ̄гыт! » Ня̄врамыт ляльт ам нэ̄мхуньт ат ро̄хсум, ат ля̄выльтта̄лсанум. Нас ла̄виянум, та̄н ротме̄гыт, мӯсхал щирыл ӯнлэ̄гыт, урок хӯнтлэ̄гыт. Акв щёс сака пӯмыщ о̄лыс, ам ань Рая а̄гим порат а̄гмыл о̄лсум, ат рӯпитасум. Класс журнал ам палтум о̄лыс, ань кисмаяве. Акв пыгрищ ам палтум ялуӈкве во̄вхатас, о̄парищ наме Верёвкин, э̄лы хо̄н ма̄ныл о̄лыс. Ханищтан нэ̄ нупыл ла̄вум: «Журнал ма̄гыс ам ялэ̄гум». Колумн щалтыс, сусте̄мт тамле ка̄ста̄л, ам нуплум кантыӈыщ ла̄ви: «Ульяна Павловна, манрыг наӈ ма̄нав ат ханищтылын? ! Ам таӈхе̄гум, ма̄нав наӈ вос ханищтанувлын». Ань ты хо̄тал мус таве номилум. Ущ рӯпитаӈкве патнэм порат, о̄выл ня̄врамыт сака пӯмщит о̄лсыт. Та̄н ань пуссын пенсионерыг е̄мтсыт. 1982й та̄лт школав лаппантвес, са̄всыр ма̄н ке̄твесув, хотьют Хулюмсӯнтын, Светлыйин. Ам тай Кульпасн во̄вхатасум, ма̄хманум ляпан. Омам Дарья Петровна, онтырса̄т та̄лэ то̄влуме порат а̄тимыг е̄мтыс, юио̄выл та̄ланэ̄т тав Кимкъясуй па̄вылт о̄лыс. А̄тям 1948 та̄лт хотталь щалтыс, а̄гмыӈыг о̄лыс. Каӈк о̄щсум, наме Кущта. Кит увщи о̄щсум, Соня ос Настащи. Ань та̄н пуссын а̄тимыт. Ойкам ёт Кимкъясуй па̄вылт акванхо̄нтхатсуме̄н, тав тот киномеханикыг рӯпитас, клубт кӯщаиг о̄лыс. Ты э̄лыпа̄лт Салехардыт ханищтахтас. Ме̄н нила ня̄врам о̄щсуме̄н, китгагме̄н а̄тимыг, о̄йкам о̄с а̄тим. Людам Тюмень ӯст яныг леккарыг ханищтахтас, а̄гипыг о̄ньщи. Ма̄нь пыгум Витям тыт, Кульпаст, ще̄мьятэ ёт о̄лы, ат ня̄врам о̄ньщи. Школат налыман нупыл нёлолов та̄л рӯпитасум, тувыл пенсиян минасум. Пенсиян миннэм юипа̄лт Кимкъясуй школан рӯпитаӈкве во̄выглаве̄сум, ханищтан хо̄тпаныл ня̄врам урим юн о̄лыс. Ам ка̄сащасум, та̄л арыгтем тот рӯпитасум, тувыл та по̄йтсум. Ань пенсият о̄лэ̄гум, пенсия олныл ойтавем. Пыгумн нё̄тавем, хӯлыл тотыглавем. О̄лнэ колум пе̄с, раквнэ порат витэ юв посы. Йильпи кол ӯнттын ма̄гыс субсидия олн во̄выгласум. Ювле пищмал ёхтуве̄сум, кол уртнэ кӯщаит хансэ̄гыт, ам ань кол о̄ньще̄гум, колум яныг. Пе̄с колумт тох та о̄лэ̄гум. Нас тох тай колум ёмас ма̄тӯнлы я̄ ва̄тат . Ульяна Павловна, я̄тил хо̄тпав са̄вта̄л пуста̄гыл восо̄лы На̄й О̄тыранэ̄н вос ӯргалаве. 1058 2013.08.23. Валентина УЗЕЛЬ Та̄н ща̄нь ла̄тӈаныл. Ань соссаӈ мир ня̄врамыт ханищтаӈкв та̄рвитыӈ та̄н ща̄нь ла̄тӈаныл ат ва̄ганыл ёмас ос э̄рнэ ханищтан нэ̄пако̄с а̄тим. Нэ̄пакыт хансавет кос ос ня̄врамыт та нэ̄пакыт щирыл ханищтахтуӈкв ат ве̄рме̄гыт школа ма̄гыс та̄ щар ат а̄ртме̄гыт. Ты урыл Касум па̄вылшкола кӯщай э̄квапотыртас, тав наме Татьяна Павловна Чагина. Касум па̄вылнтав 2009 та̄лтёхтыс та̄ра школа кӯщаиг рӯпитаӈкв патыс. Тот рӯпитанэ̄тэ ань атыт та̄лыг ты е̄мтыс. Ты э̄лыпа̄лт тав Сургутский район Русскинские па̄выл школат кӯщаиг о̄лыс тувылтав ты па̄вылнте̄твес Рӯпитан та̄ланэ акванте ловиньтаӈкв, налыман та̄лт авшколат рӯпиты Ань ты школат 215 ня̄врам ханищтахты 177 – ты ханты ос ё̄рн ня̄врамыт са̄в саран ня̄врам То̄ват ща̄няныл а̄щаныл са̄лы ӯрим са̄лыӈ колт яласэ̄гыт таима̄гыса̄ гиянылпыганыл ханищтахтынэ̄ныл порат интернатт о̄лэ̄гыт Тувыл Юильск ос Нумто па̄влыгнылня̄врамыттувтотавет. Ты ма̄нь па̄влыг сака э̄лы ма̄т о̄лэ̄г школатот а̄тим Ш к о л а н ы л Татьяна Павловна такви ма̄навн суссылтастэ. Та яныг колкапай 2008 та̄лт ӯнттыма Ма̄нтот щар ка̄сыӈ кабинетн щалтсасӯв. Ханты ла̄тыӈ ханищтан кабинет, музей колнаке татем пӯмщиг ва̄римаг. Щар маныр ро̄ви ханты, ё̄рн ос саран мирыт пе̄с пормасаныл маснутаныл, алыщлапаныл пуссын тув атым о̄лэ̄гыт Ань школат 80 хо̄тпа рӯпиты, та̄н халанылт 44 хо̄тпа – ты пуссын ханты ман ё̄рн хо̄тпат. Ань па̄вылт яныгмам ма̄хум э̄лаль ханищтахтуӈкв ялэ̄гыт те, рӯпитаӈкв ювле ювыт. 53 хо̄тпа – ты та̄н па̄влыӈ ма̄хманыл. Ань 39 хо̄тпа ня̄врамыт ханищтэ̄гыт. То̄ва предметыт ханищтан ма̄гыс учитель ат твылхаты. Тит та̄л ювле хультум порат мо̄т хо̄н ла̄тыӈ, история ос рущ ла̄тыӈ ханищтан ма̄гыс специалист хо̄тпат тув во̄вве̄сыт. Акватэ Омск ӯсныл, мо̄танэ Самара ӯсныл ёхтысы̄г. Мо̄т хо̄н ла̄тӈын ня̄врамыт ань Ирина Александровна Молданован ханищтавет. Ты а̄ги Санкт-Петербург ӯст ханищтахтас. Та мо̄т мир ла̄тӈе татем ёмащакв ва̄гтэ туристыт ёхталанэ̄ныл порат тав ла̄тыӈ акваг толмащлы. Ханты ня̄врамыт ань о̄выл классныл ща̄нь ла̄тӈыл потыртаӈкв ханищтавет. Та̄н янгыщ потыртаӈкв ат ха̄сэ̄гыт. Аквтит ня̄врам туп, мо̄таныт рущ ла̄тӈыл потыртэ̄гыт. А̄щанылща̄няныл пуссын та̄нти ла̄тӈаныл ва̄ганыл, са̄лы ӯрим та̄нти ще̄мьяӈ та̄гыл та̄лэтуве во̄рт о̄лэ̄гыт. Ос матрыг ня̄враманыл ёт рущ л а̄ т ӈ ы н х а н и щ т ы яныл. Ос ла̄тыӈ ва̄нэ ня̄врамыт ханты ла̄тӈыл потыртаӈкв э̄ссамтэ̄гыт. Ханты ла̄тыӈ ханищтан нэ̄ ма̄навн ла̄выс, ня̄врамыт таима̄гыс ла̄тӈаныл ханищтаӈкв ат ка̄саще̄гыт, та̄н пуссын ла̄ве̄гыт – ханты ла̄тыӈ та̄нанылн щар ат э̄ри, нэ̄мхуньт та̄нанылн ат э̄рмыглы. Ты па̄выл школа, рущит ла̄внэ̄ныл щирыл, «экспериментальный площадкаг» ла̄ваве. Ма̄нь ня̄врамыт хо̄талъят мус ханищтахтэ̄гыт, тувыл та̄н ётаныл ат щё̄с мус воспитателит рӯпитэ̄гыт. Акв колнакт нёлолов хуйнэ ма̄ щё̄питым о̄лы. Э̄рыӈ хотты ня̄врам сака ва̄гтал паты, тав мощ хуюӈкв тот ве̄рми. То̄ва ханищтан ма̄хум ёт потыртамув порат та̄н тох ла̄всыт, ты кӯщай э̄ква рӯпитаӈкв о̄вылтахтаме порат школаныл щар ёмащакв рӯпитаӈкв патыс. Ка̄сыӈ та̄л щар матыр йильпи мебелил, мо̄т матыр э̄рнэ утыл та ёвтавет. Рӯпитаӈкв пӯмыщ, та̄н тох ла̄ве̄гыт. 1058 2013.08.23. Светлана РОМБАНДЕЕВА Во̄ртур э̄тпос 9 хо̄талэ –ма̄ янытыл о̄лнэ соссаӈ мирыт хо̄таланыл! Ма̄ янытыл о̄лнэ соссаӈ мирыт хо̄таланыл ООН Генеральный Ассамблеят рӯпитан ма̄хум1994 та̄лт ва̄т са̄грапнал э̄тпосэ̄т ва̄руӈкве ка̄сащасыт. Ты э̄лыпа̄лт ос ты хо̄тал номылматан ма̄хум1992 та̄лт во̄ртур э̄тпос 9 хо̄талэ̄т о̄выл щёс акван хо̄нтхатыгласыт ты хо̄тал урыл потыртасыт Тувыл э̄лаль во̄ртур э̄тпос 9 хо̄талэ ма̄ янытыл о̄лнэ соссаӈ мирыт хо̄талыг та ла̄ввес. Ма̄ янытыл 70 странатт 370 миллион са̄вит соссаӈ хо̄тпа о̄лы. Халанылт та̄н ат со̄тыра ляпатем са̄всыр ла̄тӈытыл потыртэ̄гыт. Соссаӈ ма̄ху ань ты хо̄тал мус йис пора щирыл о̄лэ̄гыт о̄лнэ ма̄наныл э̄руптыяныл янытлыяныл. Ма̄витаныл во̄раныл сыстамыг о̄ньщияныл ӯйхуланыл мори ат алыщлыяныл, ӯргалым о̄ньщияныл. Мирхал наследие щирыл, соссаӈ мирыт йис пора о̄лупсанылт планетавн (о̄лнэма̄вн щарма̄кёмас тэ̄лава̄ре̄гыт? о̄лнэма̄ ӯргалым о̄ньщияныл тав ань ул вос па̄ӈктаве наска̄ссыг ул вос хилаве, хурщипыг ул вос е̄мты Ты коныпал соссаӈ мирыт культураныл, ла̄тӈаныл йис потраныл мо̄йтаныл э̄рганыл мирхал наследиян ӯргалым о̄ньщавет сака э̄руптавет янытлавет. Округувт са̄в соссаӈ мирыт о̄лэ̄гыт? ма̄ньщит хантыт ненцыт, селькупыт, эвенкыт, саамыт, шорцыт. Ос та̄н халанылт ма̄к соссаӈ мирыт? ма̄ньщит(12 со̄тыра272 хо̄тпа, хантыт(19 со̄тыра528 хо̄тпа осё̄рныт(1 со̄тыра273 хо̄тпа. Ты ма̄хумныл са̄выӈ па̄лэ Ха̄льӯс район то̄лэ̄гыт(18, 5%), Кондинский (16, 8%), Сургутский (9, 4%), Ханты-Мансийск ӯст (9, 1%), мо̄т районытыт остыгыл мощщанув ма̄хум о̄лэ̄гыт. ОКРУГ КӮЩАЮВН ЯНЫТЛАВЕСУВ. Округ кӯщаюв Наталья Комарова Югра ма̄вт о̄лнэ мир соссаӈ ма̄хум ялпыӈ хо̄таланылт янытласанэ. Мирколт рӯпитан ма̄хум рӯпатаныл щирыл акванатхатыгламаныл порат Наталья Комарова тох ла̄выс ? ООН ка̄сыӈ та̄л акв хотты ва̄рмаль ты хо̄тал кастыл щё̄питы ма̄хум тот ма̄к э̄рнэ манос та̄рвитыӈ ва̄рмаль урыл потыртэ̄гыт. 2013 та̄лт та урыл потыр о̄лыс «Ма̄ янытыл о̄лнэ соссаӈ мирыт э̄рнэ нэ̄паканыл (савсырдоговорыт) хаснэ̄ныл щё̄питанэ̄ныл ма̄гыс та̄к организацият ва̄руӈкве э̄ри» . Округувт тамле кол о̄с э̄ри ва̄руӈкве тот туп номтыӈма̄хумвос рӯпитэ̄гыт мутраӈюристытвос рӯпитэ̄гыт соссаӈ мирн э̄рнэ нэ̄пакыт хансуӈкве вос нё̄тэ̄гыт. Тыт о̄лнэ соссаӈ мир(ма̄ньщит хантыт, ё̄рныт осма̄во̄й но̄хвинэ ма̄хум то̄ванакт ла̄тӈаныл акван ат ёхтэ̄гыт Та̄нанылн нё̄туӈкве э̄ри ань акванпотыртахтуӈкве вос ве̄рмынувыт. Нё̄туӈкве патавет те то̄нт нэ̄паканыл пуссын мӯсхал щирыл хансыяныл, ёлынт хасхатэ̄гыт Тувыл тах ма̄во̄й но̄хвинэ ма̄хум соссаӈ мир ла̄палаӈкве ат ве̄рме̄гыт та̄н ётаныл мӯсхал щирыл о̄луӈкве потыртаӈкве патэ̄гыт . О̄ЙКА СА̄В ЁМАС ЛА̄ТЫӇ ЛА̄ВЫС. Округ дума кӯщай Борис Хохряков соссаӈ мирн о̄ссавёмас сымыӈ ла̄тыӈ ла̄выс: – Югра ма̄т о̄лнэ я̄тил ма̄хум ма̄н округ Думадепутатыт на̄нан ма̄ янытыл о̄лнэ соссаӈ мирыт хо̄таланылт янытлыянӯв . Йис та̄гыл ты ма̄т ма̄ньщи ос ханты ма̄хум о̄лсыт ос ань ты хо̄тал мус та̄н йис пора щирыл о̄лэ̄гыт та̄нти На̄й-О̄тыраныл янытлыяныл. Югра ма̄вт о̄лнэ соссаӈ ма̄хум Россия культуратэ ма̄гыс щар ма̄к яныг парыс тотэ̄гыт. Ты ма̄хманув ёт странав ущпылнэ̄г янытлаве, ущпылнэ̄г пӯмщиг о̄лы Таима̄гыс Думат ос округ мирколт рӯпитан хо̄тпат соссаӈ ма̄хманувн акваг нё̄тэ̄гыт? та̄н ань о̄лнэ кол вос о̄ньще̄гыт по̄х хо̄тпатын ул вос лю̄камтавет са̄всыр общинат вос ва̄ре̄гыт вос рӯпитэ̄гыт ща̄нь ла̄тӈанылт вос потыртэ̄гыт та̄нти касыланылт вос касэ̄гыт ӯйхул вос алыщлэ̄гыт. Ос мо̄т э̄рнэ ва̄рмалит палт соссаӈ ма̄хманув акваг нё̄тыянӯв та̄н ма̄гсыланыл са̄всыр са̄кконыт хансэ̄в акв та та̄ра пирмайтыянӯв . Ам номсыте̄мт ты ма̄ пе̄с йис о̄лупсатэ, йис потранэ ос мо̄йтанэ ма̄н пуссын аквъёт ӯргалаӈкве патыянӯв. Я̄тил ма̄хум пуссын пуста̄гыл о̄лэ̄н туп ёмас номт вос о̄ньщегы̄н со̄тыӈыщ щуниӈыщ о̄лэ̄н ! 1058 2013.08.23. Александр ВЬЮТКИН Па̄влыӈ ня̄врамыт ханищтан кол. Октябрьский район Лӯи Ня̄рихумит па̄вылн ялмум порат ня̄врамыт ханищтахтын колн щалтсасум, тот ва̄ӈын кӯщаиг рӯпитан нэ̄ ёт хо̄нтхатыгласум. Тав наме Елена Владимировна Максимова. Елена Владимировна а̄нумнпотыртас «Ты та̄л ма̄н Лӯи Ня̄рихумит па̄вылт о̄лнэ школав 85 та̄лэ то̄влыс Ты йильпи ёмас, кирпащил ӯнттым яныг колн 2000 та̄лт ва̄нтлысӯв. Пуссынак въёт онтырса̄т нупыл хӯрум ня̄врам тув яланты. Та̄н халанылтхо̄тпан нупыл хӯрум соссаӈ ня̄врамыт. Таима̄гсыл ма̄н школав ма̄ньщи ла̄тыӈ ханищтан колыг ловиньтахты. Ма̄ньщи ла̄тыӈ ня̄врамыт щар о̄выл классныл ханищтыяныл. Ща̄нь ла̄тӈыл потыр таӈкве Клавдия Семеновна Плеханован, тав а̄ги о̄парищ наме Яркина, ханищтавет. Яныгнув классыт а̄гит пыгыт ма̄ньщи литература урок ос округт ма̄вит ӯргалан урок ханищтэ̄гыт Пыгрищит во̄раяӈкв ос хӯлалыщ лаӈкв ханищтавет, та̄н во̄раяӈкв восха̄сэ̄гыт во̄рт хот ул вос тыпе̄гыт ос ха̄пылв ос яласэ̄гыт. Таи лю̄ль ма̄н ня̄враманув во̄рн ат тотыглыянӯв тот ма̄ ато̄ньще̄в. Та̄л сыс титаххӯрмах щёс ня̄враманув во̄рн тотыглаӈкве те, та̄нма̄гс ы л а ны л п ӯ м ы щ о̄лнӯв. А̄гирищанув«Миснэ»нампа кружокн ялантэ̄гыт ка̄тыл матыр акваг ма̄щтырлэ̄гыт. Та̄наныл Лариса Николаевна Карпенко (Хозумова) ханищты. Тот та̄н а̄канит ю̄нтэ̄гыт сакныл са̄всырхорамыт хартэ̄гыт хуритпо̄слэ̄гыт. Ма̄н па̄влыӈ ня̄враманув халанылт юртыӈыщ о̄лэ̄гыт «Ребячья республика» нампа кружок ва̄рсӯв Тувяныгнув классыт ханищт а х т ы н н я̄ врамыт ялантэ̄гыт. Са̄всыр сапра̄ни о̄лыглан порат аквписыг ёхталэ̄гыт. Ма̄нь ня̄врамытын ханищтахтуӈкв о̄с нё̄тэ̄гыт. Яныг хо̄тпат нупыл ёмас самыл сунсэ̄гыт. Тыи ма̄гыс ма̄н сыманув ща̄гтым о̄лэ̄гыт Таи туп лю̄ль ма̄ньлат ма̄хум па̄влыӈ ма̄т рӯпитаӈкв ат ка̄саще̄гыт. Мо̄лты мо̄т хо̄н ма̄ ла̄тӈыл потыртаӈкв ня̄врамыт ханищтан ма̄ньлат а̄ги ёхтыс. Тыт рӯпитанэ̄тэ моще̄ртын та̄лыг ты то̄влы. Тав, матъёмас, тыгыл сысы минуӈкв ат таӈхи». 1058 2013.08.23. Александр ВЬЮТКИН Ва̄с па̄тлуптан пора ты ёхты. Округувт ӯйхул ӯргалан Департамент колт прессконференция о̄лыс. Алы ма̄н миннэ товлыӈ ӯит ка̄тынпаттын урыл ма̄н ётув потыртаӈкв ӯйхул ӯргалан хӯрум кӯщай ёхталасыт. Акватэ наме Юрий Васильевич Василенко, тав округув янытыл во̄рӯйхул ӯргалан кӯщаиг о̄лы Мо̄т хум наме Леонид Николаевич Перевозкин, тав Ханты-Мансийск ӯс ляпат «Имитуй» нампа ӯщлахтын ма̄ тармыл кӯщай ва̄ӈын хумыг рӯпиты. Хӯрмит хумияныл Владимир Альбертович Борноволоков, тав ос округ янытыл во̄рӯйхул ловиньтан колт ва̄ӈын кӯщаиг о̄лы. Таквсы ӯйхул ка̄тын п а т т ы н в а̄ рмаль о̄влэ̄ тво̄ртур э̄тпост са̄тхойплов хо̄талыт пӯнсуӈкв номсысыт. То̄нт мо̄ртым ма̄ нупыл миннэ товлыӈ ӯит товланылн иӈыт лапе̄гыт. Таима̄гсыл ань округувт ӯйхул ӯргалан ма̄хум во̄раян ва̄рмаль мощётылнув ла̄всаныл. Ты пора во̄ртур э̄тпос оигпан хо̄талытт та хпӯнсаве. Акв э̄т сыс нила ва̄с ос акв лӯнт па̄тамтаӈкв рови Ва̄с ма̄гсыл лицензия нэ̄пактынэ 420 солко̄ви. Ка̄тынпаттым ӯйит та̄ра лицензия нэ̄пакн хансуӈкв э̄ре̄гыт Ос во̄раян ма̄хум тот нэ̄матыр ат те хансэ̄гыт штрафыл пинавет. Акв ва̄сма̄гсыл – 900 солко̄ви лунт ос 1 со̄тыра 500 солко̄ви . Мансын, щёпыр, тисупа ос а̄ӈха ма̄гсыл во̄раян ва̄рмаль сӯкыр э̄тпос котиль хо̄талытт тах е̄мты Во̄раян сыститмансын, ат щёпыр ос акв хо̄тал сыс тит а̄ӈха ос тит тисупарищ па̄тамтаӈкв та̄ртаве . Округ янытыл ӯйхул ӯргалан ма̄гсыл ва̄т бригада рӯпиты. Та̄нанылн полиция ос казакыт нё̄тэ̄гыт. М а̄ньщи ма̄хум, во̄раян кастыл э̄рнэ нам нэ̄паканын акв писыгёт тотыглэ̄н. 1058 2013.08.23. Анна АЛГАДЬЕВА Пусумлахтын ос ӯщлахтын ма̄. Хус ве̄рыстат Нефтеюганск ӯсныл пусумлахтын ос ӯщлахтын ма̄ о̄лы наме«Юган». Ты ма̄ «санаторияг» ла̄ваве Санаторий пунсыме̄тэ па̄сныл ва̄т та̄лыг е̄мтыс. Тыт ма̄к матыр а̄гммос хо̄нтнэ ле̄ккар а̄тим. Матарын ке а̄гмыӈ, тыг йинэ э̄лыпа̄лт хо̄т яныг ле̄ккарыӈ ма̄т суссылтахтуӈкв э̄ри. Тыт а̄ртмын хурип пусумлан пищил (процедурал) ла̄ваве̄н. Хо̄ӈха ва̄тихал а̄гмыӈ, са̄всыр витаминаӈ ща̄ил айтавет, не̄рыл тыттавет. Тур а̄гмыӈ, ка̄квполх а̄гмыӈ ма̄хум ингаляциял, тэ̄рпиӈ витуп ва̄ннал ва̄равет. Сыс а̄гмыӈ, ка̄т нак –са̄с нак а̄гмыӈ хо̄тпат сэ̄мыл исве̄щал, магнитыл исылта̄вет. Солвалыл о̄с пусумлавет. Солвалыӈ колнак о̄лы, хо̄т солвалыӈ э̄пыл щё̄с охсакем лылтуӈкв э̄ри. Пуӈк а̄гмыӈ хо̄тпат матырмат орпыл пуӈканыл оргавет. Хо̄ӈхан укол э̄ри, уколыл о̄с ва̄равет. Са̄всыр массаж, гимнастика ва̄рнэ ма̄ о̄лы. Ня̄врамыт ма̄гыс ёнгын колнак, кон тай таса̄вит са̄всыр тахсан, тятялахтын, ха̄хталахтын ут ва̄рим о̄лы. Тэ̄нэ колнак яныг, са̄всыр тэ̄нутыл ёмщакв тыттавет, о̄лнэ колнакыт сыстамыт, телевизор, холодильник, ловтхатнэ ма̄ о̄ньще̄гыт. Хӯрмит ос нилыт корпусыгт о̄лнэ ма̄хум тэ̄ӈкв мо̄т колн ялантэ̄гыт, наӈки тэ̄лал ялнэ коланыл коридорат о̄лы. Ӯщлахтын ос пусумлахтын нэ̄пак па̄влыӈ пӯльница па̄лыл миве, манос нас ёвтуӈкв о̄с ро̄ви. Ма̄нь ня̄врамыт тыг ат вивет, туп нила та̄лныл ос тыгыл янгыг о̄лнэ ня̄врамыт тыг ке̄тавет. Омата̄тят, о̄парищит, ане̄кват, пенсият о̄лнэ ма̄хум, н я̄ в р а м у р ы л о̄л н э э̄кват, пусумлахтуӈкв ос ӯщлахтуӈкв ка̄сащан хо̄тпат тыг ёхтэ̄гыт. Ӯщлахтын ма̄ сыстам во̄р кӣвырт о̄лы. Тыт пил о̄с тэ̄лы, ма̄хум такем са̄вни (пил) таим ё̄мыгтэ̄гыт. Лэ̄ӈныт, со̄врыт ха̄йтыгтэ̄гыт. С а̄ т п у ӈ к хо̄т а л т л е̄ к к а р ы т юв миныглэ̄гыт, та хо̄тал нэ̄матыр процедура а̄тим, ма̄хум нас о̄лэ̄гыт. Ӯщлахтын хо̄талытт хотталь ялнэ экскурсия ва̄раве. Итипа̄лаг йӣквнэ колнак пӯнсаве. Мо̄рсыӈыг э̄ р г ы н а р т и с т а т ёхталэ̄гыт. Тох акв хо̄тал Нефтеюганск ӯст о̄лнэ э̄ргын хум Агаев ёхталас, такем са̄в ёмас пе̄с ос йильпи хансым э̄ргыт нё̄тнэ̄г э̄ргыс. Ма̄хум маткем та хӯнтла̄сыт ос ка̄тпатта ра̄тсыт. Тох ты ма̄хум ӯщлахтэ̄гыт ос пусумлахтэ̄гыт. 1058 2013.08.23. Людмила ТЕТКИНА Соссаӈ ма̄хум. Ты туи порат Швейцария Женева ӯст ма̄ янытыл о̄лнэ соссаӈ ма̄хум акванатхатыгласыт. Тот Организация Объединённых Наций та̄н ма̄гсыланыл ханищтап ва̄рыглас. Ты организация соссаӈ ма̄хум ва̄рмаляныл ӯральтым о̄ньщиянэ. Ты кастыл китынтыг лов та̄л(2004-2014) ты мирыт янытлан та̄лыгла̄всанэ. Ты лов та̄лыт оигпан порат 2014 та̄л Нью-Йорк ӯст мирхал конференция ва̄раве Ос лов та̄л сыс мирыт хумус нё̄тве̄сыт хумус ос э̄лаль нё̄туӈкве э̄ри тыурыл потыртаӈкве тах патэ̄гыт Та̄н та̄рвитыӈ ва̄рмаляныл урыл кӯщаит ул вос ёрувлэ̄гыт са̄всыр ялпыӈ хо̄талыт ва̄рыглавет. Ань ка̄сыӈ та̄л ре̄тыӈ юсвой э̄тпос 21 хо̄талэ ща̄нь ла̄тӈыт янытлан мирхал хо̄талыг о̄лы. Ос во̄ртур э̄тпос 9 щислат ма̄ янытыл о̄лнэ соссаӈ ма̄хум ялпыӈ хо̄талыг ла̄ваве. Ань та о̄лум ханищтапт ты организация рӯпататэ ос соссаӈ ма̄хум хумус нё̄туӈкве ве̄рмавет та урыл потыртасыт. Ма̄н округувныл Ольга Власова тув ялыс. Тав А̄с-угорский ма̄ньлат ма̄хум организацият рӯпиты. Ханты нэ̄ ла̄выс та̄н тот са̄в э̄рнэ тэ̄ла урыл хӯлтве̄сыт. Тамле организация мирн ёмащакв нё̄ты туп таи лю̄льсоссаӈ мирыт ты урыл ат ва̄гыт тыи ма̄гсылань тамле ханищтапыт ва̄рыглавет. Са̄лы ӯрнэ хо̄тпат ма̄во̄й но̄хвинэ ма̄хум ёт воритотэ̄гыт ке ла̄тӈаныл акван ат ке ёхтэ̄гыт ты та̄рвитыӈ ва̄рмаляны лурыл ООН ма̄н пищма хансуӈкве ве̄рме̄гыт. Ань тамле пищма интернет хосыт ООН Управление Верховного Комиссара по правам человека тув ке̄туӈкве www. ohchr. org э̄ри. 1058 2013.08.23. Александр ВЬЮТКИН Ня̄врамыт ханищтан ма̄ньщи нэ̄кве. Ты хурит Лӯи-Ня̄рихумит па̄вылт ня̄врамыт ханищтахтын колт рӯпитан ма̄ньщи нэ̄ по̄слым о̄лы Тав наме Лариса Николаевна Карпенко, а̄ги о̄парище наме Хозумова. Ха̄льӯс район Хо̄рыӈпа̄вылт самын патыс. А̄тятэ наме Николай Иванович Хозумов, во̄раян ос хӯл алыщлан хумыг ма̄ньта̄гыл рӯпитас. Яныг хо̄нт о̄вылтахтам порат Николай Иванович лов та̄л яныт пыгрищиг о̄лыс. Тав ань Ханты-Мансийск ӯст Люда ма̄нь а̄гитэ палт о̄лы. Н и к о л а й И в а н о вич потре ло̄виньтэлы̄н: «Хӯл алыщлаӈкве аквписыг А̄с я̄н те̄тыглавесӯв. То̄нт хосасо р п р е з и н а ӈ со̄пак ат о̄щсӯв, таквсы а̄щирмаӈыг е̄мтнэ порат ма̄тэ по̄ляве, таима̄гсыл ла̄гланув витын тартыянӯв, тох толтыглахтасӯв. Акв щёс тӯйт патнэ э̄лыпа̄лт ма̄н хӯрум хум. Хо̄рыӈпа̄влувн оясӯв». Лариса оматэ наме Аксинья Михайловна Хозумова, тав Хо̄слох па̄вылныл о̄лыс. Оматэ о̄лме̄т хӯл алыщлас, са̄в ня̄врам янмалтас. Нэ̄гхумы̄г са̄т ня̄врам о̄щсы̄г: хӯрум а̄ги, нила пыг. Лариса Николаевна ня̄врамыт ханищтан кол Саранпа̄вылт а̄стлас. Тувыл та̄ра Ханты-Мансийск ӯсн э̄лаль ханищтахтуӈкв минас. 1993 та̄лт педагогический училище а̄стламе юипа̄лт. ЛӯиНя̄рихумит па̄вылн ня̄врамыт ханищтан нэ̄г рӯпитаӈкв те̄твес. Ты та̄л рӯпитанэ̄тэ хус та̄лыг ты то̄влыс. О̄йкатэ̄нтыл тэ̄н хӯрум ня̄врам янмалтэ̄г. Щар яныг пыге̄н наме Сергей, тав ань Ханты-Мансийск ӯст машинал яласан хумыг ханищтахты. Котиль а̄гирище̄н наме Лена. Тав нёлолов класс а̄стлас. Щар ма̄нь пити патта пыгрищ наме Вова. Ань ты во̄ртур э̄тпост хӯрум та̄лэ то̄влыс. Тамле ёмас ма̄ньщи ще̄мьян ам са̄в щуньпаща ла̄тыӈ те̄тэ̄гум. На̄й-О̄тыранылн вос ӯргалавет. А̄тяныл, о̄паныл, ащо̄каныл Николай Иванович са̄в та̄л пуста̄гыл вос о̄лы. 1058 2013.08.23. Светлана РОМБАНДЕЕВА Кульпаст «Рахтынья» община рӯпиты. Ха̄льӯс район Кульпас па̄вылт «Рахтынья» нампа община рӯпиты. Кӯщаиг Александр Игоревич Голошубин тав о̄лы. Тот яныгса̄т арыгтем хо̄тпа рӯпитэ̄гыт. Ма̄хум янгыщ хӯл алыщлэ̄гыт. Община ла̄пка о̄ньщи, та̄лэтуве тув тэ̄нут ман са̄всыр э̄рнэ пормас тотаве, тыналаве. На̄н ань э̄лаль Александр Игоревич потре ловиньтэлын. «Рахтынья» община коныпал ос кит предприятияг рӯпитэ̄г«ИП Голошубин» ос «Северная Сосьва». О̄выл предприятияв ма̄к яныг тавты. Ма̄хум янгыщ тот рӯпитэ̄гыт яныгса̄т арыгтем хо̄тпа Хӯл алыщлан хо̄тпа ат то̄выл хаты Ань ты тэ̄лы хӯл щар мощща о̄лыс Ло̄пмус па̄вылныл онтоловхуйплов хо̄тпа акваг рӯпитэ̄гыт то̄ват ос договор щирыл вуйлыянув рӯпатаныл ва̄рияныл олныл ойтавет, тувыл по̄хан та минэ̄гыт. Кульпаст, Ло̄пмустос Кимкъясуйт хӯл п и р м а й т э̄ в. Ма̄хум хӯлпъе̄гыт хӯланыл мыганыл, олныл та̄ра ойтыянӯв. Пил, ла̄хс манос па̄квсам пирмайтэ̄в Ка̄тыл ва̄рнэ ка̄тыл щаквщин са̄всыр пормасыт ёвтэ̄в– йӣвныл ма̄щтыр лама̄ныс а̄нытсакныл хартым олнкасыт, турло̄псыт пальсакыт, нуйил ман суп ю̄нтнэ то̄рыл ю̄нтым маснут, тувыл са̄сныл ва̄рим са̄всыр хусапсовыт, со̄втыт та маныр. Ха̄пыт ма̄ньха̄пыт тӯпыт ва̄рылтэ̄в. Хӯлалыщлан ос мо̄т рӯпата ва̄рнэ ма̄хманув пусс ы н р ӯ п а т а м а с н у т ы л м а й л ы я н ӯ в . Ты та̄л хӯл мощща. Аньмунт ам Горковский (Ямало-Ненецкий автономный округ) ос Ха̄льӯс рыбзаводыгн звонита̄лсум кӯщаит ёт потыртасум. Та̄н ла̄внэ̄ныл щирыл, ань тыгыл э̄лаль китахтем та̄л хӯл ма̄ннуплув ат ёхты. Юио̄выл та̄лытт витэ ма̄нь о̄лыс хӯлыт сэ̄рнэ юипа̄лт по̄раныл ма̄ тармыл хультсыт, пум халн тэ̄лыгласыт тувто̄ссыт Ты та̄лтайвитэяныг . « Р а х т ы н ь я » о б щина кӯщаиг тамле ка̄ркам номтыӈхумта о̄лы Александр Игоревич ще̄мья о̄ньщи э̄кватэ наме Марина кит ня̄врам янмалтэ̄гэ. Ты я̄тил сымыӈ хо̄тпав ще̄мьятэ ёт пуста̄гыл вос о̄лы па̄выл ма̄хманэ̄н ос общинат рӯпитан ма̄хманэ̄н вос нё̄ты . Нэ̄гхӯлщё̄питэ̄г. Ты хурит ос ма̄ньщи нэ̄кве̄г Любовь Константиновна Кожемяка (а̄ги о̄парищ наме Волдина) ос Ольга Семеновна Хозумова (а̄ги о̄парищ наме Носкина) по̄слым о̄лэ̄г. Тэ̄н о̄с «Рахтынья» общинат рӯпитэ̄г. Хӯл щё̄питан колт пӯщкат ловтэ̄г, хӯргыт посэ̄г, хӯл пирмайтан ма̄гыс колнакыт сыстамтэ̄г. Кӯщае̄н Александр Игоревич янытлытэ̄н. Люба ос Ольга Кульпаст яныгмасыг, школа тот и а̄стласыг Люба та̄л котиль э̄тпост1969 та̄лт самын патыс Аквпыг о̄ньщи наме Никита. Ольга ва̄т са̄грапнал э̄тпост 1971 та̄лт самын патыс. Тав ос ат а̄гио̄ньщиАлена Лида Ольга, Рая ос Настя. Ты нэ̄квег Кульпас па̄влэ̄нэ̄ руптытэ̄н ла̄ве̄г па̄влэ̄н сака нё̄тнэ лылые̄пе сыстам. Са̄в йильпи колыт ӯнттуве̄сыт ня̄врамыт ёнгасан ма̄гыс яныг площадка ва̄рвес . А̄гитэ̄нуттыналы. Хурит ма̄ньщиа̄гиЮлия Павловна Радостева по̄слымо̄лы Тав«Рахтынья» община ла̄пкаттыналахтан нэ̄грӯпиты Ла̄пкатрӯпитанэ̄тэкитыт та̄лыгтыто̄влы Юлия ла̄внэ̄тэщирыл рӯпитаӈкве таве̄нмӯс ты. Кӯ щ а я н ы л А л е ксандр Игоревич Голошубин ёмас хум, матыр та̄рвитва̄рмалье̄мтапи тав аквта щё̄сёхтыгпи, нё̄тумтавет Йильпитэ̄нутва̄тихалтотаве тынаныл сака мат яныг а̄ти Юлия во̄ртурэ̄тпостсамын патыс 1989 талт. Оматэ Екатерина Савельевна, а̄гио̄парищнаме Хозумова. Юлия каӈк о̄ньщиМаксим а̄пщиигОлегосЖеня аквйӣгрищ о̄ньщи намеП а н а . Та м л е я̄ тилма̄ньщиа̄гиювще̄мьятэёт пуста̄гылвосо̄лы То̄рум ёт, О̄тырётвосо̄лы! 1058 2013.08.23. unknown Соссаӈ мир культура Культура коренных народов Севера. Ма̄ янытыл о̄лнэ соссаӈ мир хо̄таланыл порат Ханты-Мансийск ӯст о̄лнэ ма̄ньщи ос ханты ма̄хум «Торум маа» музейт мӯйлысыт. Ань ты хуритыт та̄н по̄слым о̄лэ̄гыт. 1058 2013.08.23. Светлана РОМБАНДЕЕВА Соссаӈ мир ялпыӈ хо̄тал. Во̄р турэ̄тпос 9 хо̄талэ ма̄ янытыл о̄лнэ соссаӈ мир хо̄талыг ла̄ввес Ханты-Мансийск ӯст «Югра» нампа колт ля̄ххал тотнэ ма̄хум акванатыглаве̄сыт. Тотань округ кӯщай ва̄ӈынхум ёт рӯпитан нэ̄ Людмила Александровна Алферова ос «Союз общин коренных малочисленных народов Севера» нампа организация кӯщай хум Олег Густавович Шатин соссаӈ мир хо̄тал урыл потыртасыг. О̄выл ла̄тыӈ Людмила Александровна тав ла̄выс. – Округт о̄лнэ мир ты ялпыӈ хо̄талыл ам пуссын янытлыянум. Тыт ань 31 со̄тыра арыгтем соссаӈ хо̄тпа о̄лы. Округув янытыл та хо̄талт 181 ӯсытт ос па̄влытт ма̄хум мӯйлысыт. Нижневартовский районт 16 ма̄т ма̄хум мӯйлысыт Нягань ӯст 8, Октябрьский районт 10, Ханты-Мансийск ӯст 11, Ха̄льӯс районт 16, Советский районт 6 ос мо̄т са̄в ма̄т маттем та мӯйлысыт. Ты я л п ы ӈ хо̄тал ва̄руӈкве са̄в ма̄хум с а̄ в организацият вуйхата̄лсытбиблиотекат, культура центрыт, школат, туи порат ва̄рыглан ня̄врамыт площадканыл, кина ва̄рнэ центрыт этнографический музеит. Са̄всыр выставкат ва̄рыглаве̄сыт касылыт ёнгилыт, экскурсият. Ма̄хум матыр ю̄нтуӈкве м а н ща к в щ у ӈ к в е ханищтаве̄сыт Сургутский ос Нижневартовский районыгт о̄лнэ соссаӈ ма̄хманув ма̄щтыр лаӈкве сака ха̄сэ̄гыт са̄всыр мастерклассыт ва̄ти хал ва̄рыглэ̄гыт яныг хо̄тпат ос ня̄врамыт ханищтэ̄гыт. Хотьют ка̄сащас хотьют ве̄рмыс тав та мӯйлыс. Ха̄льӯс па̄вылт кит экскурсия ва̄рыглавесы̄г акватэ тох намая̄лвес «Я творчество своё народу посвятил». Тот ань ма̄н ма̄ньщи хо̄тпав Пе̄тр Ефимович Шешкин ва̄рум рӯпатанэ мирн суссылтаве̄сыт. Китыт экскурсия «Гармония и мир», тот ос ханты о̄йка Митрофан Алексеевич Тебетев ка̄тыл по̄слум хуриянэ суссылтаве̄сыт Ха̄льӯсрайон Восыӈтӯр па̄вылт «Этот великий Юван» выставка ва̄рыглавес ма̄хум библиотека такванатхатыгласыт, ма̄ньщи хо̄тпав Юван Николаевич Шесталов урыл потыртасыт. Та ялпыӈ хо̄талт ка̄сыӈ ма̄т ма̄хум ма̄ньщи ос ханты хо̄тпанув урыл потыртасыт, хотьют такви мире ма̄гыс ща̄нь ла̄тӈе ма̄гыс са̄в ёмас тэ̄ла ва̄рыс . О к р у г у в я н ы т ы л ка̄сыӈ районт-Советский, Октябрьский, Кондинский, Сургутский . , ка̄сыӈ ӯст са̄в выставкат ва̄рыглаве̄сыт то̄ваныл тох намая̄лве̄сыт «Радуга традиций», «Родинки народные», «Край мой гордость моя», «Приглашают в гости угры», «Под открытым зонтиком добра», «У нас единая семья», «Народов малых не бывает», «Язык моих предков угаснуть не должен». Сунсэ̄н ань ты выставкат наманыл щирыл на̄ӈки хумус ма̄хум та̄нти о̄лнэ ма̄наныл э̄руптыяныл ка̄сыӈ мир ка̄сыӈ ла̄тыӈ янытлыяныл. Ня̄врамыт мощ с у с сыт, т у в ы л т а х ла̄щмарт та̄нти о̄лнэ ма̄наныл э̄руптаӈкве ханищтахтэ̄гыт ща̄нь ла̄тӈаныл янытлаӈкве патыяныл, йис пора о̄лупса урыл ва̄ӈкве патэ̄гыт . Ханты-Мансийск ӯст ос «То̄рум маа» музейт ма̄хманув акванатхатыгласыт, тот са̄всыр касылыт ва̄рыглаве̄сыт артистанув э̄ргысыт ос йӣквсыт. Клуб колт ханты мир урыл «Красный лёд» нампа кина суссылтавес, библиотекат «Сохраняя культуру и традиции» выставка ва̄рыглавес Ремёсла центр «Река, лодка, жизнь» нампа выставкан ос ма̄хум во̄ртур э̄тпос сыс ялуӈкве ве̄рме̄гыт . Людмила Александровна тох та потыртас. Тав юипа̄лэ̄тос Шатин хум ла̄тыӈ вис Тав ля̄ххал тотнэ хо̄тпатын общинат ва̄рмаляныл урыл китыглавес. Олег Густавович тай сака хоса потыртас, ам туп потырохс атэ нэ̄пакын хансыслум, на̄н ань ловиньтэлы̄н О к р у г у в т а н ь 102 община рӯпиты, нёлса̄т арыгтем государствавн нё̄тавет. Налыман общинат хӯл алыщлэ̄гыт то̄ват ос во̄руй алыщлэ̄гыт пил ла̄хсатэ̄гыт щё̄питэ̄гыт 2012 та̄лсыс общинат кит со̄тыра са̄вит тон на хӯл пувсыт. То̄ват та̄нти хӯл щё̄питэ̄гыт солвалтэ̄ыт тыналэ̄гыт . Кондинский районт «Карым» община о̄лы кӯщаиг тот Евгений Александрович Вахрушев тав рӯпиты. Ты сака ёмас, ка̄ркам о̄йка АВ Филипенко рӯпитаме порат Евгений Александрович о̄лнэ ма̄тэ̄н ялум та юи па̄лт таве̄н хӯл щё̄питан кол ӯнттуӈкве нё̄тыс. Ты кол сака тыныӈ, хӯл щё̄питан (яктынман солвалтан) ма̄гыс са̄всыр колнакт(цехыт) о̄ньщи Ань Евгений Александрович общинатэ рӯпиты, ма̄хум та̄нти ма̄гсыланыл олн та̄нти сэ̄лэ̄гыт. Мо̄тма̄т (Советский, Октябрьский, Ханты-Мансийский ос мо̄т районытт ма̄хум о̄с аквты щирыл рӯпитэ̄гыт олн сэ̄лэ̄гыт. Тамле номтыӈ, ка̄ркам ма̄хум са̄в вос о̄лнув. Кӯщаянув ма̄навнакваг нё̄тэ̄гыт Са̄вёмасла̄тыӈ пӯмащипала̄тыӈА. В. Филипенкан ос Н. В. Комарован ла̄ве̄в Наталья Владимировна округ янытыл улпыл ка̄сыӈпа̄вылто̄лыс. Мо̄рсыӈ кӯщай тох яласы, ма̄хум уральтыянэ, хумус о̄лэ̄гыт матыр та̄рвит о̄ньще̄гыт ман а̄ти. Олег Густавович ос та урыл ла̄выс, ань округт о̄лнэ ханты ос ма̄ньщи ма̄хум лувыт о̄ньщуӈкве патэ̄гыт. Лув о̄щнэ, лув янмалтан ма̄гыс та̄н ань ма̄ кинсэ̄гыт, ма̄ щё̄питэ̄гыт. Аквкит ла̄тыӈ туризм урыл ла̄выс. М а̄ х у м э̄ л ы х о̄ н ма̄ныл округувн вос ёхталэ̄гыт, тыт округув янытыл вос яласэ̄гыт, вос ӯщлахтэ̄гыт, соссаӈ мир о̄лупсанылт вос пӯмщалахтэ̄гыт. Хотьют ка̄сащи, хӯл вос алыщлы, вос во̄райи. Ты хум ла̄внэ̄тэ щирыл, ань турист ма̄хум тыг ёхталанэ̄ныл кастыл са̄в рӯпата ва̄руӈкве э̄ри, о̄лнэ колыт та маныр ӯнттуӈкве э̄ри. 1058 2013.08.23. Светлана РОМБАНДЕЕВА Ма̄хум маттем та мӯйлысыт. Ханты-Мансийск ӯст «Торум маа» музейт ма̄ янытыл о̄лнэ соссаӈ мирыт ялпыӈ хо̄тал ва̄рыглавес Тув са̄в мир атхатыгласяныг кӯщаит о̄лсыт э̄ргын ос йӣквнэ ма̄хум яныгхо̄тпат ня̄врамыт. Яныг сцена ва̄рыглавес тот артистанув ма̄ньщи ос ханты э̄ргыт э̄ргысыт йӣквсыт са̄всыр пӯмыщ сценкат суссылтасыт о̄щхульласыт. Тувыл пе̄с ма̄хманув хольт кассытсув тыньщаӈ нумпа̄лн ре̄пыгтасыт са̄грап ос ня̄л па̄хвтысыт са̄лыӈ сун ӯлтта поргысыт. Ня̄врамаквет тот щар ща̄гтым кассыт та̄нанылн ня̄л па̄хвтуӈкве ман поргащлаӈкве атхунь пӯмыщ. Но̄хпатум ма̄хум пуссын почётный грамотатыл ос мӯйлупсатыл майве̄сыт. Ялпыӈ хо̄тал оигпаме э̄лыпа̄лт мӯй ма̄хум хӯл исмит ос исум ща̄й айсыт со̄ламат тэ̄сыт. 1058 2013.08.23. Александр ВЬЮТКИН Нё̄рн ялнэ пӯмащ. Ты тув «Ма̄нь ӯскве» ня̄врамыт Нё̄рн тотыглан ма̄гсыл олн ат та̄стлавес. Та пе̄нтсыл ма̄нти Нё̄рт ӯщлахтан хо̄талыт ва̄рыгласӯв. Пуссын аквъёт титхойплов хо̄тпа о̄лсӯв. Нё̄рыт мус ма̄нав тотнэ ма̄шина ёт ос тэ̄нут ёвтнэ ма̄гсыл ма̄н акванпинхатам олныл ойтхатсӯв. Сменав Луссуп нё̄р мус ялнэ щирыл о̄лыс. Ойттур э̄тпос котиль хо̄талт Саранпа̄вылныл Торговый я̄ нупылма̄няныг колёсаӈ ма̄шинал Р. Р. С е м я ш к и н ы н тотвесӯв. Тав ма̄навн Пуйва я̄ ляпат о̄лнэ урнумпа̄лн туп тотуӈкве ве̄рмыстэ. Тувыл э̄лаль ма̄н яныг хӯнтхӯргыл хӯнтхатым Торговый я̄ нупыл та ё̄мсӯв . Э̄ти титхойплов щё̄с порат палаткат ӯнттын ма̄н ущта ёхтысӯв. Я̄ ва̄тат э̄тхӯлымав тэ̄пъяласӯв Л. П. Стаканова ос щар ма̄нь пыгрищ Коля Семяшкин тот хультуӈкв ка̄сащасы̄г. Ма̄нос э̄лаль Коми р е с п у бл и к а н у п ы л о̄внэ Патак ма̄нь я̄рищ ва̄тан ва̄глысӯв. Палаткат ӯнттымав юипа̄лтме̄н Володя Меров ёт кумхӯл нясыл пувуӈкв мощщаквен ялсуме̄н Ловмантем минута сыс хӯрумхойплов хӯл па̄г харттысме̄н. Ань тот ма̄нь Патак я̄т нэ̄мхотьют ат ня̄слыглы таима̄гсыл тот хӯлэ са̄в пуссынянгыт ос во̄йиӈыт. Мо̄т а̄лпыл онтолов щё̄с порат я̄ ло̄ӈхаль Луссуп нё̄р нупыл э̄лаль минмыгтасӯв. Тувыл э̄лалье̄ри яныг а̄хвтасы ма̄н е̄мтсӯв тамлема̄ щирыл ё̄муӈкв лю̄ль. Ты коныпал ре̄гыӈ хо̄талт тамле ё̄мнэ ма̄т ва̄гтал патсӯв. Хо̄тыл тэ̄нэ ма̄гсыл ма̄н я̄ ва̄тан ва̄глысӯв. Тэнэ̄в юипа̄лт я̄ ва̄татэ хосыт ё̄мсӯв. Акваг те тох ё̄муӈкве ма̄н э̄типа̄лаг Луссуп нё̄р мус ёхтуӈкв а̄лыманувӯв. Тот ё̄мимавт хо̄талув тул са̄йн та па̄тырас Э̄типа̄лаг ос раквуӈкв о̄вылтахтас . Ракв витын та̄рапосвесӯв. Э̄лаль ё̄мнэ̄в порат а̄хвтасыт раквыл ёсыманыл юипа̄лт ла̄гыл паттат хислуӈкв патсыт. Таима̄гсыл ма̄н тот э̄т хӯлуӈкв хультсӯв Палатканув ӯнттысанӯв, тувыл ме̄н Сергей Стаканов ёт няслуӈкв ялсуме̄н. Х ӯ л т о т ы м а м е̄ нт, ма̄хманув та̄ра хӯл исмит па̄йтнэ ма̄гсыл пӯта̄ращ нумпа̄лын тагатасыт. Во̄рыт ма̄н нёлолов хо̄тал о̄лымавт ка̄сыӈ хо̄тал хӯл та̄л тэ̄ӈкв щар ат ӯнтсасӯв. Ка̄сыӈ е̄мт тэ̄нэ̄в порат солвалыл расалтым хӯл, ня̄рхӯл, па̄йтым ос а̄ращ посымыт во̄сытым кумхӯл пасаныт о̄лыс. Нас тыи ма̄гсыл. Нё̄рын ялуӈкв р о̄ в и . Ё т т от ы гл а м тэ̄нутанув са̄выӈпа̄лэ нас тох хультсыт. Тот э̄т хӯлымав юипа̄лт о̄выл э̄т хӯлнэ ма̄ нупыл минмыгтасӯв. Ювле о̄с тит хо̄тал ё̄мсӯв. Торговый я̄н ёхтумувт Любовь Павловна Колятэ̄нтыл ма̄навн ла̄всы̄г, тэ̄н иӈ тит хо̄тал ӯрхатуӈкв номсысы̄г. Ма̄н Луссуп нё̄р нумпа̄лын ат ялсӯв, т а и м а̄ г с ы л с а̄ р т ы нёхтысӯв. Тот ма̄н нас ӯщлахтым, иӈ тит хо̄тал о̄лсӯв. Ре̄гыӈ хо̄талыӈ хо̄талыт лё̄мво̄й та̄л о̄лсыт. Хо̄тал палыт самвит хольт сыстам. Торговый я̄ витыт пувлысӯв. Юио̄выл хо̄талувт Саранпа̄выл нупыл о̄с аквта лё̄ӈхыл ювле минасӯв. 1058 2013.08.23. Людмила ТЕТКИНА Ма̄ньлат хо̄тпат акванатхатыгласыт. Финляндия ма̄т Хельсинки ӯст финноугорский ма̄ньлат ма̄хум XI мирхал Конгрессаныл рӯпитас. Эстонияныл, Финляндияныл ос Россия янытыл о̄лнэ яныгса̄т арыгкем хо̄тпа тот акванатхатыгласыт. Ма̄н округувныл Ольга Власова, Алла Иштимирова-Посохова ос Ирина Самсонова тув ялсыт. Конгресс о̄вылтахтам порат о̄влэ̄т Василий Немечкин, финноугорский ма̄ньлат хо̄тпат Ассоциацият кӯщай хум, кит та̄л сыс ва̄рум рӯпатаныл урыл потыртас. Ты юипа̄лт ка̄сыӈ финноугорский регион маныр рӯпата ва̄рыс, та урыл ла̄выс. Ма̄н округувт ма̄ньщит ос хантыт пе̄с йис о̄лупса но̄хво̄рмалтан ма̄гсыл манхурип рӯпата ма̄хум ва̄ре̄гыт, ты урыл Ольга Власова ос Алла Иштимирова-Посохова потыртасы̄г. Тэ̄н «Сохраним язык в семье», «Развитие традиционных видов спорта», «Информационнопознавательный этножурнал» ос са̄в мо̄т проектыт урыл тот потыртасы̄г. Ма̄ньлат хо̄тпат мирхал ассоциацияныл хосат та̄гыл рӯпиты. Ос акваг са̄в ма̄хум тув пирмайтаве. Конгресс о̄лум порат 13 финноугорский организацият тув хасхатуӈкве ка̄сащасыт. Ты организацият Финляндият, Эстоният, Мурманский областьт, Санкт-Петербург ос Москва ӯсыгт рӯпитэ̄гыт, та̄н о̄с пуссын тув хасве̄сыт. Китыт хо̄талт ма̄хум хӯрум секциян ла̄кквауртхатым рӯпитасыт. Акв секцият хансум проектаныл урыл потыртасыт. Та̄н са̄всыр йильпи тэ̄лат ва̄руӈкве номылматэ̄гыт. Финноугорский рокфестиваль ва̄руӈкве, тувыл интернет сайт щирыл са̄всыр мирыт пе̄с пормасаныл тыналаӈкве, са̄всыр словарит та̄ратаӈкве, ты коныпал «Финноугр года» касыл ва̄рыглаӈкве таӈхе̄гыт. Ос са̄в мо̄т фестивалит, ханищтапыт ос йильпи ва̄рмалит та̄нки рекомендациянэ̄пакн хассаныл. Мо̄т секцият ос ООН ос ЮНЕСКО ма̄т ты мирхал ассоциация хумус э̄лаль рӯпитаӈкве паты, ты урыл потыртасыт. 2014 та̄лт я̄ӈк на̄тнэ э̄тпост ООН ма̄т форум рӯпитанэ̄тэ порат ма̄ньлат хо̄тпат ассоциация ос финноугорский ма̄хум янытлан хо̄талыт ва̄рыглаӈкве номсы. Ос та юипа̄лт ма̄хум йильпи президентхо̄тпа ос МАФУН правлениет рӯпитан ма̄гыс йильпи э̄лумхо̄ласыт пе̄риясыт. Ма̄н округувныл Алла ИштимироваПосохова тот рӯпитаӈкве паты. Президентхо̄тпаг хӯрум хо̄тпат Сампса Холопайнен (Финляндия), Норманн Лангерак (Финляндия) ос Лаур Лехмус (Эстония) рӯпитаӈкве ка̄сащасыт. Са̄внув хо̄тпа Сампса Холопайнен ма̄гсыл катпос пинсыт. Тав ань э̄лаль кит та̄л сыс ты Ассоциацият президентыг рӯпитаӈкве паты. Россияныл кит хо̄тпаг Яна Сажина ос Василий Немечкин президент ва̄ӈын хо̄тпаг пе̄риявесы̄г. Эстония, Коми республика ос Санкт-П е т е р бу р г ӯс х а л т XII мирхал Конгресс рӯпитан ма̄ пе̄риявес. Мо̄тыт щёс ма̄ньлат хо̄тпат Эстоният акван тах атхатыглэ̄гыт. Ты та̄л сыс финноугорский ма̄т халт «Культурная столица финноугорского мира» нампа касыл ва̄рыглавес. Тув 8 заявканэ̄пак ке̄тыглымат, та̄н халанылт туп хӯрум проект пе̄риявес: Вешкелица па̄выл (Коми Республика), Обиница па̄выл (Эстония) ос Старые Быги па̄выл (Удмуртия). Конгресс оигпам э̄лыпа̄лт ос ты касылт но̄хпатум Старые Быги па̄выл ла̄ввес. Ань Удмуртия ма̄т о̄лнэ ты па̄вылкве «Культурная столица финноугорского мира» нам о̄ньщи. 1058 2013.08.23. Тамара МЕРОВА Яныг ӯсн о̄лмыгтам э̄ква. Ягрим па̄вылт ам Глафира Васильевна Саратина ёт ва̄щинтахтасум. Ме̄н хосат та̄гыл ва̄йхатыме̄н кос, ос ам туп Анатолий Константинович о̄йкатэ урыл хансыгласум. О̄йкатэ хосат а̄тимыг е̄мтум. Ам ань э̄ква такви о̄лупсатэ урыл китыгласлум. Глафира Васильевна тох потыртас: Ам Алы Нярихумит па̄вылт самын патсум тот яныгмасум. Школа а̄стламум порат Ханты-Мансийскан минасум, тот 1954-1958 та̄лытт педучилищат ханищтахтасум. Тувыл кит та̄л Сургутский районт во̄рт о̄лнэ ня̄врамыт о̄вылт классыт ханищтасанум. Ты юипа̄лтЛенинград ӯсн А. И. Герцен нампа институтн э̄лаль ханищтахтуӈкве ке̄тве̄сум. Тот 1960-1965 та̄лыт сыс ханищтахтасум. Педагогический институт а̄стламумпорат Ягримн ёхтысум, тыг та о̄лмыгтасум. Тот колыл майве̄сум колумт ащирмаӈ, вит тотуӈкве о̄сэ̄рыс. Школат са̄в тэ̄ла юв ёхтэ̄гум колсори рӯпатат ва̄риянум. Тетрадкат сунсуӈкве щар э̄типа̄лаг ӯнтэ̄гум кӯр па̄лтта̄л ёлӯнтэ̄гум ке, ка̄тагум тувполяве̄г нэ̄матыр хансуӈкве ат ве̄рме̄гум. Тувыл па̄влыӈ а̄гииг Надя Саратина ос Валя Ульянова ёт юрщхатасум, акваг акваннё̄т хатсӯв. Тэ̄лы Надя Саратина а̄нум такви палтэ о̄луӈкве во̄выстэ . Тэ̄н каӈке̄т тэ̄нки колэ̄нт о̄лсы̄г. Тув ёхтэ̄гын коланыл акваг ре̄гыӈ по сыӈ. Амкина̄мн ка̄сыӈ хо̄тал кӯр па̄лтуӈкве вит тотуӈкве ат э̄рыс ёмас. Тэ̄гув ос тетрадканум сунсуӈкве та̄ра та ӯнтылматэ̄гум Надя Анатолий каӈке ёт ва̄йхатсум тувыл нэ̄г татотве̄сум. О̄йка ме̄нтыл а̄ги ос пыг янмалтасме̄н. А̄гиме̄н Марина Марьямова Тюмень ӯст о̄лы бухгалтер кӯщаиг рӯпиты. Пыгме̄н Алексей Миасс ӯст о̄лмыгтас рынкан нё̄выль ма̄шинал тотыглы. Ам о̄йкам а̄тимыг е̄мтме юипа̄лт Тюмень ӯсн о̄с ва̄нтлысум. Анатолий Константинович са̄вта̄л «Игримгаз» колт рӯпитас, ме̄н тувыл квартирал майвесме̄н. 2007 та̄лт тув о̄лмыгтасум ла̄щмарт ӯсн ханьщувласум. Тюменит «Югра» нампа организация о̄лы тот са̄в хо̄тпат акван атхатыглэ̄гыт. Пуссын пенсиян патхатам ма̄хум, округув янытыл хо̄та̄ти рӯпитасыт. Та̄н са̄всыр ялпыӈ хо̄талыт ва̄рыглэ̄гыт аквъёт матыр пормасыт сагуӈкве, маснут ю̄нтуӈкве манос э̄ргуӈкве акван хо̄нтхатыглэ̄гыт «Строитель» нампа культура колн о̄сялантэ̄гум. Тот Любовь Собянина ханты ос ма̄ньщи ма̄хум акванатыглыянэ. Тувыл «Миснэ» нампа э̄ргынкружокт э̄рге̄гум Ма̄н са̄всыр ялпыӈ хо̄талыт э̄ргуӈкве во̄виньта̄лаве̄в. Таима̄гыс яныгпа̄ла хо̄тпат театрын ялнэ ма̄гыс олнта̄л билетыл мивет. Та щирыл ма̄н сыресыр спектаклит сунсуӈкве ве̄рме̄в. Сэ̄тапыл сагим пормасанув савалап ня̄врам колын ёвтавет манос мо̄т матумпа̄ла хо̄тпатын майлавет. Тувыл Галина Проскурякова «Посиделки» нампа кружок ва̄рыс. Ма̄н тот ма̄нкио̄щнэ хансаӈ супыт ю̄н туӈкве ханищтахтэ̄в. Марщумлаӈкве ат а̄лы ме̄в акваг матыр а̄ти ва̄рыглэ̄в. Поравакв ты щёс мины. Ам ос ка̄сыӈ туи тыг Я̄гримн ёхталэ̄гум. Надежда Констатиновна палт мощ о̄лэ̄гум. Нярихуми лӯи па̄вылн рӯтанум палт ялапа̄лэ̄гум ос ювлеӯсн та минэ̄гум. Наӈ на̄нки омагына̄тягын урыл о̄с мощ потыртэ̄н Ам амки о̄парищн а м у м Е н и з о р о в а о̄лыс А̄щум Василий Мануйлович Енизоров хо̄нтлуӈкве тотыг лавес а̄гмыӈмосыӈыг ювёхтыс. Вежакоры ос Мулигорт колхозыт председателиг пе̄риявес рӯпитас Тот хӯл алыщлан артелит о̄лсыт Омам Евдокия Ивановна Паштор па̄вылныл о̄лыс тав са̄ртын а̄тимыг е̄мтыс. Омагума̄тягум хӯрум пыг ос акв а̄гио̄щсы̄г янмалтасы̄г. П ӯ м а щ ӣ п а . Ам ва̄глум наӈ налыман та̄л школат рӯпитасын са̄в ня̄врам ханищтасын. Ты та̄л ма̄ньполь э̄тпост 75 та̄лын то̄влыс. Ма̄н газетат рӯпитан хо̄тпат наӈын янытлылӯв! Пуста̄гыл э̄лаль о̄луӈкве ла̄вилӯв, са̄в сымыӈ хо̄тпа ляпат вос о̄лэ̄гыт а̄гин пыгын ос апганын ӯргалым вос о̄ньщаве̄н. Ханищтан ня̄врамытн акваг вос номавен, матыр номт о̄ньще̄гынке тэ̄лагвосе̄мты. Пуска̄т пус ла̄гыл. То̄румёт О̄тырёт. 1059 2013.09.06. Анна АЛГАДЬЕВА Ханищтахтын та̄л ты о̄вылтахтас. Сӯкыр э̄тпос о̄выл хо̄талэ та ёхтыс. Ка̄сыӈ школа а̄висӯнтэ я̄ӈк бантыл сагхатым, формал ос костюмыл масхатым, хорамыӈ, щё̄риӈ ка̄тыӈ ня̄врамытыл та та̄гиньты. Ты хо̄тал о̄выл та̄л ха нищтахтуӈкв миннэ ня̄врамыт ма̄к ща̄гтэ̄гыт. Ты хо̄тал та̄н сака ӯрияныл. Ӯрхатэ̄гыт, хунь о̄выл щёс школан щалтэ̄гыт, парта ва̄тан ӯнтэ̄гыт. Ха̄льӯс район Хулюмсӯнт па̄выл школан ты та̄л са̄в ма̄ньщи ня̄врам о̄выл классн минас. Школав ханищтахтын кастыл атнув а̄стыс. Таима̄гыс ханищтан хо̄тпат, ня̄врамыт, ща̄нита̄щит ос мо̄т рӯтыт пуссын ты хо̄тал ФОК кол а̄висӯнтын атхатыгла̄лсыт. Ишкола директор нэ̄ Г. В. Третьякова ня̄врамыт школат рӯпитан хо̄тпанэ ос тыг атхатыглам ма̄хум пуссын янытласанэ, ёмщакв рӯпитан хо̄тпат грамотал мӯйлуптасанэ ос о̄выл та̄л ханищтахтуӈкв ёхтум ня̄врамыт нупыл тох ла̄выс: «Ка̄сыӈ школа кӣвырт хащта̄л нак о̄лы, рущ ла̄внэ щирыл – чудо. Ма̄нки ханищтахтын колувт о̄с тамле хащта̄л нак о̄лы. Ты хащта̄л нак ка̄сыӈ хо̄тал на̄нан ӯритэ. Ка̄сыӈ хо̄тал на̄н йильпи номт пуӈкын выгын, тувыл ты номтанын ка̄сыӈ та̄лыл са̄выг атыяны̄н. (Тыячудагтыла̄ваве. ) Ты ка̄сыӈ хо̄тал ханищтан номтын та̄кыщ пуӈкын ке вуйхаты, нэ̄мхуньт нэ̄матхотьютн хотвиӈкв ат ве̄рмаве » Со̄ль, ёмащакв ханищтахтын ня̄врам нотэ палытыл номтыӈыг о̄луӈкв паты . Ханищтахтын та̄л о̄вылтахтас. Пуссын ханищтахтын ня̄врамыт посыӈ номтыл ёмащакв вос ханищтахтэ̄гыт, ханищтан хо̄тпаныл ла̄тыӈ вос хӯнтлэ̄гыт, халанылт ёмащакв вос торгамтахтэ̄гыт. Ханищтан хо̄тпат ос ня̄врамыт палт рӯпитан ма̄хум та̄ксарыг ос ёмас номтыл вос рӯпитэ̄гыт, пуста̄гыл вос о̄лэ̄гыт» . 1059 2013.09.06. Людмила ТЕТКИНА Округ губернаторув Наталья Комарова Юграт. Округ губернаторув Наталья Комарова Юграт о̄лнэ мир сӯкыр э̄тпос о̄выл ханищтахтын хо̄талыл ня̄врамыт, та̄н ща̄няныла̄щаныл ос ма̄во̄й, газ но̄хвинэ хо̄тпат хо̄талыл янытласанэ. Яныг кӯщай нэ̄ ла̄выс. «Ты та̄л кит ялпыӈ хо̄талы̄г акв хо̄талн е̄мтсы̄г. Ос ма̄в янытыл ма̄хум акв хо̄талт мӯйлысыт. Ты э̄лыпа̄лт ма̄во̄й ос газкиснэ хо̄тпат ка̄ркамыг тыт рӯпитасыт, та̄н нупыланыл сунсым ма̄но̄с ка̄ркамыг рӯпитаӈкве ханищтахтэ̄в. Ветеранхо̄тпат ос ань нефть ос газ но̄хвинэ ма̄хум пуста̄гыл э̄лаль о̄луӈкве ла̄виянум. Ханищтан хо̄тпат, школан миннэ ня̄врамытын ос та̄н ща̄няныла̄щаныл са̄в ёмас ла̄тӈыл ке̄тыянум ос са̄в сымыӈ ла̄тыӈ ла̄ве̄гум». 1059 2013.09.06. Людмила ТЕТКИНА Я̄тил ня̄врамыт, ханищтан хо̄тпат, ща̄нита̄щит! Я̄тил ня̄врамыт, ханищтан хо̄тпат, ща̄нита̄щит! Округ Думат рӯпитан депутатыт ос ам на̄нанн о̄выл ханищтахтын хо̄талыл янытлыянӯв. Сӯкыр э̄тпос о̄выл хо̄талт та ма̄хум янытлавет, хотьют ханищтахтуӈкве ка̄сащи, хотьют йильпи ос пӯмащ ва̄рмалит урыл ва̄ӈкв таӈхи. Ты хо̄тал ос студентыт, ханищтан хо̄тпат, о̄выл классын минам ня̄врамыт пуссын ӯре̄гыт. Ань тамле порат школат а̄гитпыгыт са̄всыр ищхӣпыӈ утыт щирыл ханищтавет. Тох та̄н са̄внув ва̄ӈкве патэ̄гыт ос номтыӈыг яныгме̄гыт . Ханищтап тэ̄ла хосыт рӯпитан кӯщаит, ня̄врамыт ханищтан хо̄тпат, ща̄нита̄щит та̄н пуссын аквъёт акв э̄рнэ тэ̄ла ва̄ре̄гытня̄врамыт ханищтэ̄гыт. Я̄тил юртыт! Ня̄врамыт, студентыт, э̄лаль туп ёмащакв ханищтахтэ̄н, ща̄нита̄щит о̄с мӯтраӈыг е̄мтэ̄н ос на̄нки ня̄враманын э̄руптэ̄н ос ханищтан хо̄тпан аквтох э̄лаль э̄рнэ рӯпата мирн ма̄гсыл ва̄ре̄н. Ханищтан та̄л сыс пуста̄гыл пуссын о̄лэ̄н! 1059 2013.09.06. Александр ВЬЮТКИН Соссаӈ ма̄хум акванатхатыгласыт. Во̄ртур э̄тпос ва̄т нупыл титыт хо̄талт Сургут ӯст соссаӈ ма̄хум ма̄во̄й но̄хвинэ ма̄т рӯпитан хо̄тпат ёт сапра̄ни ва̄рыгласыт, рущ ла̄тӈыл«Коренные народы. Нефть. Закон» намаим о̄лыс. Ты ва̄рмаль тит хо̄тал минас. Округув янытыл са̄в соссаӈ ма̄хум ос кӯщаит тув ёхталасыт. Соссаӈ хо̄тпат халт яныг кӯщаиг Еремей Данилович Айпин о̄лыс. Тав соссаӈ мир Ассамблеят председателиг о̄лы. Тувыл ос Григорий Петрович Ледков о̄лыс. Тав тыта̄лт Россия Лӯима̄ янытыл са̄всыр ла̄тӈыл потыртан соссаӈ ма̄хум Ассоциациянылт кӯщаиг пе̄риявес. Лӯима̄в сака яныг, ты минам та̄л сыс тав са̄в ма̄т о̄лыс, мощщаг хультум мирыт уральтасанэ. Ма̄во̄й ос газ но̄хвинэ ма̄хум ёт потыртан ма̄гыс Нижневартовский, Белоярский, Сургутский ос Ханты-Мансийский районытт о̄лнэ ханты хо̄тпат конференциян ёхталасыт. Та̄н пуссын са̄лы о̄ньще̄гыт во̄рт о̄лэ̄гыт. Нефтяникма̄хум са̄выӈпа̄лэ та̄н о̄лнэ ма̄нанылт рӯпитым яласэ̄гыт. То̄ва ма̄т ма̄во̄й, газ но̄хвинэ вышкат ос те̄ртур хосыт газ мо̄т ма̄н няртнэ насосыт ӯнттым о̄лэ̄гыт. Ма̄ ялыгланэ̄ныл ма̄гсыл са̄лы тэ̄п мощщами. Ты ма̄гсыл ханты ма̄хум акваг сака кантлэ̄гыт ос та̄кыщ вуянтахтым о̄лэ̄гыт. Сургутский районт о̄лнэ ханты ма̄хум урыл Дмитрий Васильевич Макущенко потыртас. Тав та район кӯщаиг пе̄риим о̄лы, тав ла̄выс: «Тыт пе̄с йис ма̄т 157 ханты ще̄мьят во̄раим ос са̄лы ӯрим о̄лэ̄гыт. Аквъёт пуссын хӯрум со̄тыра ляпатем хо̄тпа та̄нти ма̄нылт во̄р коланылт о̄лэ̄гыт. Сургутский районт хус нефтяной компаният 110 буровой вышканыл ма̄во̄й но̄хвим рӯпитэ̄гыт. Округув янытыл тот щар са̄в ма̄во̄й ма̄ныл но̄хвиве. Нефтяникыт ханты ма̄хмытын аквписыг нё̄тэ̄гыт. «Бураныл», яласан ма̄гсыл олнта̄л бензиныл, во̄йил, соляркал ос колыт ӯнттын норыл, па̄ртыл, те̄рсолил ос колала лаппантнэ те̄рыл нё̄тыяныл. 2012 та̄л сыс хӯрум млн. солко̄вил ойтсаныл». Та ма̄т о̄лнэ ханты ма̄хмыт ос тох потыртасыт: «Са̄лыянув ка̄сыӈ е̄мт буровой вышка ляпан минэ̄гыт. Тот ма̄тэ ма̄шинал но̄хо̄хтыртым о̄лы. Са̄всыр лю̄ль ут ма̄ тармыл со̄сантыма. Са̄лыянув тот атыньтахтынэ̄ныл юипа̄лт, а̄гмыл та е̄мтэ̄гыт. Тувыл ма̄во̄й но̄хвинэ ма̄т рӯпитан ма̄хум са̄лы тэ̄ттын ма̄гсыл минэ сыртэп о̄с хоттымат лю̄ль а̄гм о̄ньщи». Щар со̄ль, хунь са̄лы а̄гманыл урыл потыр о̄лыс, ӯйхул пусмалтан ма̄т рӯпитан нэ̄ ла̄выс: «Хо̄т ань ма̄во̄й ос газ но̄хвинэ ма̄хум рӯпитэ̄гыт, тот са̄в мосыӈ са̄лы о̄лы. Са̄выӈпа̄лэ мосыӈ са̄лы Сургутский ос Нижневартовский районыг халт о̄лэ̄гыт. Таима̄гсыл ма̄н са̄лыӈколт яласан ма̄хмытын такос ла̄ве̄в, ня̄р нё̄выль сака ул вос тэ̄гыт, па̄йтым щирыл туп тэ̄ӈкв ро̄ви». Са̄лы о̄щнэ ё̄рн хум Юрии Кылевич Вэллэ ты урыл о̄с потыртас. Тав ос мо̄т ва̄рмале ма̄гсыл Сургут ӯсн ёхталас. Тав о̄лнэ ма̄тэ̄т «ЛУКОЙЛ» компания рӯпиты, та о̄лнэ ма̄тэ ляпат нефтяникма̄хум ма̄шинал ӯлтта лё̄ӈх ялыгласыт. Юрий Кылевич хунь ты урыл потыртас, тот рӯпитан хум ювле тох ла̄выс: «Ма̄навн хо̄т э̄ри, тот яласэ̄в! » Аграфена Семёновна Сопочина ос ялпыӈ ма̄т урыл потыртас: «Во̄рт рӯпитан ос во̄раим яласан по̄х ма̄хум ялпыӈ ма̄н новхатуӈкв патсыт. Ялпыӈ канын пиным пе̄с йис пормасыт, те̄р олныт та̄н пуссын ёт выганыл. Ты урыл о̄с хотмус ёмщакв номсахтаӈкв ос матыр ма̄навн ва̄руӈкв э̄ри». Тит хо̄тал рӯпитамув сыс са̄в тэ̄ла урыл потыр о̄лыс. Конференция оигпам порат кӯщаит соссаӈ ма̄хмытын э̄рнэ са̄в йильпи са̄кконыт пирмайтаӈкв ла̄всыт. 1059 2013.09.06. Людмила ТЕТКИНА Ӯсув 420 та̄лэ то̄влыс. Во̄ртур э̄тпос оигпам э̄лыпа̄лт Ха̄льӯст о̄лнэ ма̄хум ялпыӈ хо̄талыл ва̄рыглаве̄сыт. Та̄н па̄вланыл 420 та̄лэ то̄влыс ос 60 та̄л ювле хультум порат тот газ хо̄нтвес. Округ Правительство Ха̄льӯст ты ялпыӈ хо̄тал ва̄рнэ ма̄гсыл, краеведческий музей, Искусство школа ремонтыл ва̄рнэ ос па̄выл хотщё̄питан ма̄гсыл олн та̄стыглас. Ос ня̄врамыт ёнгын ма̄гсыл кит йильпи площадкаг ёвтвесы̄г . Та порат газ хо̄нтум хо̄тпат ань яныгпа̄лаг е̄мтсыт. Та̄н пуссын Россия янытыл са̄всыр ма̄т о̄лэ̄гыт. Ялпыӈ хо̄талн мӯйлуӈкве тув во̄виньта̄лве̄сыт. Та̄наныл янытлаӈкве Наталья Комарова, округ губернаторув, Ха̄льӯсн ёх т а л а с . Ка̄ркамыг рӯпитан ма̄хмыт янытлан нэ̄пакыл мисанэ. Са̄всыр ма̄ныл ёхталам яныг хо̄тпат маткем тот та потыртасыт, ос та пора номылматыгласыт. Тувыл яныгпа̄ла хо̄тпат Ха̄льӯс ос тот рӯпитан музей сунсуӈкве тотыглаве̄сыт. Па̄выл на̄лми ва̄тат на̄иӈха̄пыт па̄гпухтын яныг авторечвокзалкапай ӯнттаве. Акв па̄лэ ялпыӈ хо̄тал э̄лыпа̄лт а̄стлавес, мӯй ма̄хум ты ут сунсуӈкве во̄виньта̄лве̄сыт. Акв та порат Ха̄льӯст «Скважина Р-1» нампа мемориал пӯсвес. 60 та̄л ювле хӯльтум порат газ хо̄нтум ма̄т тӯщтувес. Ос Ха̄льӯс 420 та̄лэ то̄влуме кастыл «Петру и Февронье» нампа памятник ва̄рвес. Яныгпа̄ла хо̄тпат таве сунсыглаӈкве о̄с ялсыт. Та хо̄талт Ха̄льӯст са̄всыр организациятт рӯпитан ма̄хумакван атхатыгласыт ос са̄в хорамыӈ лӯптат, шарикыт ка̄тыт пувим па̄выл хосыт ё̄мсыт. Та̄н ётаныл ма̄ньщит, хантыт калмыкыт, рущит, хатанит ос мо̄т мирыт та̄нки маснутыл масхатым ё̄мсыт. Аквъёт пуссын такем нё̄тнэ̄гсусхатасыт . Ха̄льӯс кант ма̄ньщит, хантыт са̄с то̄тапыт турло̄псыт ос ка̄тыл ва̄рим мо̄т са̄всыр пормасыт суссылтасыт, тыналасыт. «Элаль» нампа предприятие тот ё̄рнкол тӯщталас, ма̄хум тот хӯлыл, хӯл исмитыл тыттысаныл ос ща̄ил айтысаныл. Мо̄т ё̄рнколт ос са̄всыр сувенирыт тыналаве̄сыт. Ӣтипа̄лаг Любовь Коротун, Ха̄льӯс район миркол кӯщай нэ̄, ӯскант акванатхатам мир янытластэ. Тав ла̄выс: «Я̄тил Ха̄льӯст о̄лнэ ма̄хум ос газ хо̄нтум хо̄тпат, ам на̄нан ты кит ялпыӈ хо̄талыл янытлыянум. Щар со̄ль, ма̄н ӯсув Россия янытыл мирн ва̄ве. Ма̄н районувт сымыӈ, ка̄ркам ма̄хум о̄лэ̄гыт. Ма̄н пуссын ма̄нки о̄лнэ ма̄в э̄руптылӯв, ос аквъёт э̄лаль Ха̄льӯс районув ма̄гсыл рӯпитаӈкве патэ̄в». Тувыл тав ка̄ркамыг рӯпитан хо̄тпат янытлан нэ̄пакыл мӯйлуптасанэ. Татьяна Гоголева, округ Думат ма̄ньщи депутат, тот о̄с янытлавес. Тав «Почётный гражданин Берёзовского района» намыл майвес. Ольга Филиппова, «Элаль» нампа предприятие кӯщай нэ̄, тув янытлаӈкве о̄с во̄виньта̄лвес. Тав «Лауреат премии ХМАОЮгры» За развитие культуры малочисленных народов Севера» нампа Почётный намыл майвес. Ялпыӈ хо̄талт ня̄врамыт ёнгалтаве̄сыт ос са̄всыр касылыл ва̄рыглаве̄сыт. Концерт о̄лум порат район янытыл ос Ханты-Мансийск ӯсныл ёхталам артистыт ӣти мус тот э̄ргысыт йӣквсыт. Ма̄хум маткем тот та мӯйлысыт. Ты та̄л Ха̄льӯс район 90 та̄лэ то̄влыс. Район янытлан кастыл тот та̄л сыс са̄всыр суссылтапыт, ялпыӈ хо̄талыт ва̄рыглавет. Ос акв яныг ялпыӈ хо̄талн ма̄хум яныг таквс э̄тпост Ха̄льӯст тах акван атхатыглэ̄гыт. 1059 2013.09.06. Александр ВЬЮТКИН Та̄н мирн нё̄туӈкв патэ̄гыт. Ювле хультум во̄ртур э̄тпост Ханты-Мансийск ӯс мирколт рӯпитан ма̄хум «Народный фронт «За Россию» нампа сапра̄ни ва̄рыгласыт. Тув округув янытыл нёлса̄т нупыл хо̄т хо̄тпа ёхталасыт. Та̄н пуссын са̄всыр ма̄тт о̄лэ̄гыт ос рӯпитэ̄гыт. Ань та̄н акваннё̄тхатуӈкв ла̄вве̄сыт. Ты э̄тпос 8 хо̄талэ̄т округувт пе̄риян ва̄рмаль тах ва̄раве. Ты «Народный фронтыг» ла̄внэ ма̄т пуӈк тотнэ хумыг Россия Президент В. В. Путин о̄лы. Ос ты о̄лум сапра̄ни кӯщаиг Лариса Белоцерковцева о̄лыс, тав Москва ӯсныл тыг ёхталас. Акванатхатыгламаныл порат ла̄вве̄сыт, округувт региональный штаб тах ва̄раве, тот ва̄т нупыл хо̄т хо̄тпа рӯпитаӈкв патэ̄гыт. Тувыл та̄н халанылт иӈ хӯрум ва̄ӈын кӯщаит пе̄рияве̄сыт. Ты пе̄риим ма̄хум округув янытыл мирн нё̄туӈкв патэ̄гыт. 1059 2013.09.06. Валентина УЗЕЛЬ Са̄в ня̄врамыӈ ще̄мьят олныл нё̄тавет. Ма̄хум са̄внув ня̄врам вос о̄ньще̄гыт, са̄всыр нё̄тмил ва̄раве – о̄лнэ колыл, олныл акваг мивет. Ань ты ёмас рӯпата кӯщаит ва̄рнэ̄ныл ма̄гсыл, юио̄выл та̄лыт сыс ще̄мьяӈ ма̄хум са̄в ня̄врам о̄ньщуӈкв таӈхе̄гыт. Округувт рӯпитан кӯщаянув, дума депутатанув ты хосыт о̄с рӯпитэ̄гыт. Са̄всыр са̄ккон ос постановлениела̄тыӈ та̄н акваг та пирмайтэ̄гыт. Ань тамле йильпи ла̄тыӈ та̄н та хассыт. Ты та̄л о̄вылтахтам па̄сныл са̄в ня̄врамыӈ ще̄мьят ма̄гыс акв йильпи нё̄тмил округувт ва̄раве. Хӯрум ня̄врам ос тыгыл са̄внув ня̄врам о̄щнэ ще̄мьят ка̄сыӈ э̄тпос 9 со̄тыра 6 солко̄вил ойтуӈкв патавет. Ос ка̄сыӈ ще̄мья тох ат нё̄таве. Та̄н ня̄враманыл 2013 та̄лт та̄л котиль э̄тпос о̄выл хо̄тал юи па̄лт самын те патсыт то̄нт ущ. Ты э̄лыпа̄лт самын патум ня̄врамыт тамле пособияолныл ат ойтавет. Ты олннё̄тмил винэ ма̄гыс ща̄нига̄щиг мощща олн вос выгы̄г «прожиточный минимум» тыгыл са̄внув олн ул вос сэ̄лэ̄г. Тыи ма̄гыс юи о̄выл хӯрум э̄тпос сыс рӯпатанылт справканэ̄пакыл вос мивет тот сэ̄лум олнаныл вос хансавет. Акв та̄л мины, тувыл ос нэ̄пакыт пуссын йильпииг атуӈкв э̄ре̄гыт. Ань нёлолов э̄тпос сыс округувт туп 585 ще̄мья ты олныл ойтавет. Та̄л оигпан мус акв со̄тыра арыгтем тамле ще̄мья е̄мты. 1059 2013.09.06. Валентина УЗЕЛЬ Округ Дума кӯщай Ха̄льӯсн ялыс. Та э̄тпос котиль хо̄таланэ̄т округ Дума кӯщай Борис Хохряков Ха̄льӯсн ялыс. О̄влэ̄т тав я̄ ва̄тан тотыглавес, тот авторечной вокзал ӯнттаве. Та юипа̄лт пӯльницан минас. Тот рӯпитан ма̄хум пуссын акванатыглаве̄сыт, округ Дума депутатыт рӯпатаныл урыл тав та̄нанылн потыртас. Тувыл ма̄хум мощ титыглахтасыт ос та̄нти та̄рвитыӈ ва̄рмаляныл урыл таве̄н потыртасыт. Ты та̄л сыс Ха̄льӯс пӯльница са̄всыр йильпи ищхӣпыӈ утыл ёвтвес, та̄н хосытаныл а̄гмыт моляхнув хо̄нтуӈкв ро̄ве̄гыт. Хӯрум «скорый помощь» йильпи ма̄шинат ёвтве̄сыт, поликлиника кол ёмащакв щё̄питавес, ӯлщ пуӈкыт пусмалтан пӯльница моще̄рт я̄насыг ӯнттаве. Ань округ бюджетныл тув 60 миллион солко̄ви тах та̄ставе. Э̄лаль кӯщай о̄йкаполицият рӯпитан ма̄хумёт хо̄нтхатыглас. Ты 2013 та̄л сыс Саранпа̄вылт, Приполярныит, Хулюмсӯнтыт, Кульпаст, Светлыйт ос Ха̄льӯст «участковый пунктыг» ла̄внэ рӯпитан колыт тах ӯнттавет. Тув ань 20 миллион солко̄ви миве. Тувыл иӈ са̄в олн мир уральтан ва̄рмаль ма̄гыс холтаве, са̄всыр ма̄тт «видеоконтролиг» ла̄внэ ищхӣпыӈ утыт тах ва̄равет. Э̄тэхо̄талэ ма̄хум камера хосыт сунсыглаӈкв патавет. Ты рӯпата таима̄гыс ва̄раве, полицият рӯпитан ма̄хум ёмащакв вос рӯпитэ̄гыт ос матыр лю̄ль нак е̄мтнэ порат та̄ра вос ка̄салыяныл. 1059 2013.09.06. Людмила ТЕТКИНА Ха̄льӯс район ма̄ янытыл ва̄ве. Округувт «Стратегия социальноэкономического развития ХМАО-Югры до 2020 года и на период до 2030 года» нампа нэ̄пак щирыл кӯщаит рупитэ̄гыт. Ты э̄лыпа̄лт ты программа урыл ка̄сыӈ э̄лумхо̄лас интернетт ловиньтаӈкве ос ла̄тыӈ ке̄туӈкве ве̄рмыс. Та̄н ловиньтаманыл юипа̄лт ты программа пирмайтавес. Ха̄льӯс район Общественный советт рӯпитан хо̄тпат Ха̄льӯст акванатхатыгласыт. Та̄н районный мирколаныл ты нэ̄пак щирыл э̄лаль хумус рӯпитаӈкве паты, яныг сапра̄нит потыртасыт. Наталья Комарова, губернаторув, тув о̄сёхталас. Ма̄хумн тав ла̄выс «60 та̄л ювле хультум порат Ха̄льӯст газ хо̄нтвес, та пораныл округув ма̄во̄й, газ но̄хвиве. Ты щёлыл Россия ос Югра са̄в олн сэ̄лы. Тувыл таи лю̄ль, Ха̄льӯс районт то̄ва ма̄хум нуса тотым о̄лэ̄гыт. Тыт ёмас яласаӈ лё̄ӈх а̄тим, связь, ЖКХ лю̄льсаӈ рӯпитэ̄гыт са̄в э̄лумхо̄лас рӯпата ат о̄ньще̄гыт. Ха̄льӯс районт мир ёмаснувег о̄лнэ̄ныл ма̄гсыл ма̄н акваг олн та̄стыглэ̄в, 2011 та̄л округбюджетныл 74 млн. солко̄ви тыг ке̄тыгласӯв, 2012 та̄л90 млн. солко̄ви. Ты коныпал са̄всыр грантыт щирыл предпринимательхо̄тпат о̄с олныл мивет. Ха̄льӯсныл Ягрим мус ос Ягримныл Приобье мус ма̄шинал яласан лё̄ӈх тах ва̄раве. Ты лё̄ӈх проектнэ̄паке ань щё̄питаве. Тамле рӯпата ма̄гсыл олн ма̄н ань хассув». Ма̄хум э̄лыпа̄лт потыртым, тав районный миркол кӯщаит лю̄льсаӈ ва̄рнэ рӯпатаныл урыл ла̄выс. Таса̄вит олн та̄стыглаве, олнаныл номсахтым холтуӈкве э̄рыс. Тыи ма̄гсыл тав та̄наныл по̄хын минуӈкве манос ханищтахтуӈкве ла̄всанэ. Кӯщай нэ̄ ла̄вме щирыл, Ха̄льӯс район са̄в щёл о̄ньщи. Та̄гт я̄т о̄лнэ нялк, нё̄тнэ Нё̄рыт урыл ма̄хум ма̄ янытыл ва̄гыт ос тув ёхталаӈкве ка̄саще̄гыт. Са̄в мӯй хо̄тпат тув ёхтала̄лэ̄гыт ке, са̄в о̄лн сэ̄луӈкве ро̄ви. Туп ка̄ркамыг ос номсахтым рӯпитаӈкве э̄ри . Любовь Кашлатова, Ха̄льӯст А̄с-угорский институт филиалэ̄т рӯпитан э̄ква, акв тэ̄ла урыл сапра̄нит потыртас. Тот соссаӈ ма̄хум ма̄гсыл Культура центр а̄тим, ты ва̄рмаль урыл лов та̄л сыс са̄всыр сапра̄нит кӯщаитн акваг потыртэ̄гыт. Ва̄тихал туристыт ёхталэ̄гыт, та̄н пуссын ма̄ньщит, хантыт культурал пӯмщалахтэ̄гыт. Ань Ха̄льӯст национальный творчество отдел ма̄нь пе̄сколт о̄лы, мӯй ма̄хум тув во̄выглаӈкве та̄н эссамтэ̄гыт. Ма̄ньщи архив хус та̄л палыт о̄с сака пе̄с колт рӯпиты. Архивколаныл ань А̄с-угорский институт нупыл ловиньтахты. Любовь Кашлатова ла̄выс, тамле Культура центр Ха̄льӯст хосат та̄гыл ва̄руӈкве э̄ри. Тамле кол туристын суссылтаӈкве э̄сырма ат паты. Наталья Комарова ханты э̄ква хунтлым, ювле таи ла̄выс: «Ань ма̄н туризм щирыл пуссын рӯпитэ̄в. Тамле Культура центрыт са̄в пӯмащ ва̄рмаль сунсуӈкве, улпыл со̄ль, ро̄ви. Тувыл мӯй ма̄хум а̄ти тыи ма̄гсыл тыг ёхталэ̄гыт, ма̄нь па̄вылквет ма̄ньщит, хантыт хумус о̄лэ̄гыт ос тот та̄нки пе̄с йис ва̄рмаляныл э̄лаль хумус тотыяныл, та̄нанылн тыи пӯмащ. Ам номсэ̄гум, тамле яныг центр ӯнттуӈкве тыт ат э̄ри. Ос на̄н миркол кӯщаитн ла̄ве̄гум, на̄н ма̄гсылын мо̄т рӯпитан колыт вос ӯнттэ̄гыт манос ёвтэ̄гыт». Туризм ва̄рмаль урыл Владислав Панкин, ООО «Бедкаш» нампа предприятият кӯщай хум, о̄с ла̄тыӈ ла̄выс. Та̄н са̄в та̄л сыс Ха̄льӯс районын мӯй хо̄тпат хӯл алыщлаӈкве, во̄раяӈк ве тотыглыяныл. Ань та̄наныл Нё̄рн ялуӈкве во̄виньтыяныл. Ос са̄внув ма̄хум тув вос яласанувыт, Саранпа̄вылт яныг гостиницакол ӯнттуӈкве э̄ри. Тамле колт аквторыг 50 э̄лумхо̄лас о̄луӈкве вос ве̄рми. Ты хум ла̄вме щирыл та̄н таяныт колкапай ӯнттуӈкве олн ат о̄ньще̄гыт. Наталья Комарова ты ва̄рмаль о̄с ёмас тэ̄лаг ла̄выстэ, ювле олн миӈкве ат ка̄сащас. Ань округувт предпринимателит са̄всыр олннё̄тмилыл мивет, та̄н са̄всыр кредитыт виӈкве ос са̄всыр грантолн ма̄гсыл нэ̄паканыл ке̄туӈкве ве̄рме̄гыт ос ты хосыт гостиницакол ӯттуӈкве. Сапра̄нит Нё̄рт са̄всыр тыныӈ а̄хвтасыт киснэ рӯпата урыл потыр о̄лыс. Учёныит та ма̄т о̄лнэ щёлыт ань мӯсхалыг ханищтыяныл. Кӯщай нэ̄ тувле номтэ о̄с ат патыс. Тав ла̄выс, Нё̄рыт пулигхилым тот сыстам я̄квет, нё̄тнэ ма̄квет па̄ӈктавет. Тамле рӯпата о̄вылтан э̄лыпа̄лт ма̄вит ӯргалан ва̄рмаль урыл номсахтуӈкве э̄ри. 1059 2013.09.06. Анна АЛГАДЬЕВА Ке̄расколыӈъя̄ ня̄врамыт. Ты хурит Ке̄расколыӈ па̄выл ня̄врамыт по̄слым о̄лэ̄гыт. Ке̄расколыӈъя̄ па̄выл – ты ам яныгмам па̄влум. Ам яныгмамумт па̄влув яныг о̄лыс: налыман арыг э̄лумхо̄лас, нёлолов о̄лнэ кол, ка̄сыӈ колт ня̄врамыт о̄лсыт. Са̄в ня̄врам аквъёт яныгмасӯв . П а̄влув суиӈ, мо̄тмо̄т ма̄т туп ро̄хтахтын суюв. Тэ̄лы порат тахсан сыпув тох та ва̄рилӯв, яласан ма̄ссынат сыпын но̄хха̄ӈхуӈкв ат ве̄рме̄гыт, ха̄ӈраӈ урыл ювле тотавет. Ань па̄влувт кит о̄лнэ кол туп хультыс. Акв колт ам ща̄нюм Александра Васильевна, Валера ягпыгум ос Лиза яга̄гим ма̄нь а̄гиягепыгаге ёт о̄лэ̄гыт. Китыт колт Михаил Тимофеевич Пеликов э̄кватэ̄нтыл о̄лэ̄г кит ня̄врам о̄ньще̄г. То̄ва ма̄хманув Висумтыт па̄вылнва̄нт ласыт. Тот Лусумыг-Висмаг акванпатнэ ма̄т мощ мо̄лтынув онтолов кол ӯнттувес. Арыгтамкем Лӯсум ма̄ньщит тот та о̄лэ̄гыт. Нэ̄матыр рущ рӯпата тыт а̄тим по̄льница ла̄пка пекарня, школа, садик а̄тим. Ма̄хум пе̄с йис нот щирыл о̄лэ̄гыт. Пос о̄с а̄тим. Пос пе̄ламтан станция пуссын кос о̄ньще̄гыт, туп ка̄сыӈ хо̄тал ман э̄таӈхо̄тал курыгтаӈкв бензинсоляра э̄ри. Ма̄н пуӈк пе̄лы, ка̄сыӈ е̄мт ёвтуӈкв. Рущ па̄вылн ёхтэ̄гын, са̄ро̄вылт тэ̄нут ломт ёвтуӈкв э̄ри. Пе̄с Сӯйва̄т па̄выл о̄лум порат Сӯйва̄т па̄вылт ла̄пка о̄лыс ка̄сыӈ э̄тпос пирикаска ёхталас. Та порат са̄в ма̄ньщи о̄лыс. Ка̄сыӈ э̄тпос 20 хо̄талт ма̄хум тув ялантасыт, маныр э̄ри тот ёвтыгласыт . Ань Висумтыт павылт тох ке ва̄рнуве ка̄сыӈ е̄мт яласаӈкв ат э̄рнув. Туп хунь матарн сака ке я̄рме̄гын, ущ хотталь минуӈкв ос ня̄в рамыт уральтаӈкв ялуӈкв. Ня̄врамыт Полуночное па̄вылт интернатт ханищтахтэ̄гыт, туп каникулытн юв ёхтала̄лэ̄гыт. Ты во̄р па̄влыгт о̄лнэ ма̄ньщит пуссын та̄нки ща̄нь ла̄тыӈке̄нылтыл потыртэ̄гыт . Туп таи лю̄ль. Нё̄рн миннэ ос Лӯсум алгаль миннэ лё̄ӈх ты та̄ра о̄лы. Туи ос таквсы щар кӯм а̄ти, ка̄сыӈ хо̄тал ма̄шинат ёл ат по̄йтса̄лэ̄гыт. Нё̄рн миннэ утНё̄рн мины, Са̄псан миннэ ут Са̄псан мины. Я̄ хосытыл та на̄тылтэ̄гыт. Туп тэ̄лы ос тӯяг, яныг вит порат мощ сытамнуваг патса̄лы, сака ат яласэ̄гыт. Висумтыт па̄выл урыл мо̄тынтыг тах хансэ̄гум. 1059 2013.09.06. Александр ВЬЮТКИН Хӯлупъян урыл потыр. Сургут ӯст «Коренные народы. Нефть. Закон» нампа конференция ва̄рыглым порат са̄в ва̄рмаль урыл потыр о̄лыс. Акв тамле потыр округ янытыл вит ӯргалан тармыл кӯщай ловиньтас. Тав наме Виктор Евгеньевич Харламов. Докладэ̄т тав вит ӯргалан ма̄хум ва̄рнэ рӯпатаныл урыл потыртас. Виктор Евгеньевич ла̄выс «Ка̄сыӈ та̄л А̄с я̄т о̄лнэ хӯлэ мо̄щщами. Хӯрум та̄л ювле хультум порат хӯл са̄в о̄лыс, ань мощща ос пуссын ма̄нит. Хӯл алыщлан ма̄хум та̄нти о̄с лю̄ль ва̄ре̄гыт. Ка̄рай хӯл алыщлан хӯлп саманыл 28-30 мм. , тамле хӯлпыл на̄тылтэ̄гыт. Тох алыщланэ̄ныл, хӯл сэ̄рнэ ма̄наныл мус хумус ёхты. Я̄т хоты хӯл о̄лы, тамле ма̄нь хӯлпыл пуссын пувавет. Ты та̄л сыс округув янытыл 3 млн. со̄лкови са̄виттем штрафолныл ма̄хум пинве̄сыт. Штрафат ойтнэ хо̄тпа ха̄пе, моторе хотвуйлаве. Ос олн ойтнэ юипа̄лт пормасыт кӯщаянылн ювле мивет. Тох 2012 та̄лт о̄лыс, нэ̄пак та̄л хӯл пувнэ хо̄тпат хӯл ӯргалан ма̄хум нупыл алхатым ква̄лапа̄лсыт. Та нак щирыл алхатнэ ма̄хум сутытаве̄сыт. Нэ̄мхотьют турманколн ат ӯнттувес, нас штрафыл пинве̄сыт . Мощ мо̄лалнув Ханты-Мансийский районт хӯл алыщлан хо̄тпаг тэ̄нти халэ̄нт алхатсы̄г. Акватэ мо̄т хумитэ такви э̄лыпа̄лэ̄н на̄тылтаӈкв ат кос та̄ртыстэ. Тав э̄лыпа̄лэ̄н воратан хум «травматический пистолет» нампа писаль ёт о̄ньщум. Мо̄т хумитэ вильтыт па̄тамтастэ. Па̄тамтам хо̄тпатэ саме̄т хо̄йвес, ань тав саме пусмалтым пӯльницат хуи. Ты та̄л округувт 3 со̄тыра122 соссаӈ хо̄тпан «квота» нампа хӯл алыщлан нэ̄пак майвес. Хӯл алыщлан порат квотанэ̄пакыт ёт тотыглаӈкв э̄ре̄гыт. Нэ̄пак юн те хультуптылы̄н, та̄нанылн суссылтан мус хӯлпанын хотвиӈкв ве̄рмавет. Хӯл пувнэ порат, но̄ххартнэ хӯланын та̄ра нэ̄пакын по̄стуӈкв э̄ре̄гыт. Нэ̄пакыт ат те по̄ставет, ёмас са̄вит штрафыл пинаве̄н. То̄ва соссаӈ ма̄хум та̄нти яласан мотораныл, ха̄паныл ос квота нэ̄паканыл мо̄т по̄х хо̄тпан хасылтыяныл. Тох ва̄руӈкв щар ат ро̄ви . Хӯл ӯргалан ма̄хум титыглахтэ̄гыт «Мо̄т хо̄тпа нэ̄паканэ манрыг на̄н палтылын о̄лэ̄гыт? » Ювле ла̄ве̄гыт: «Тав нэ̄паканэ ма̄навн хӯл алыщлан ма̄гсыл такви мисанэ». Со̄ль, то̄ва соссаӈ ма̄хум нэ̄паканылт нотариус палт хӯл алыщлан ма̄хум наманыл хансыяныл. Та щирыл о̄с ат ро̄ви. На̄нти квота нэ̄паканын нэ̄мхотьютын ул мае̄н . Са̄в хӯл пувуӈкв ма̄хум та̄ртыянув те, иӈ акв та̄л мохсаӈ ос ка̄рай тэ̄гӯв. Та юипа̄лт я̄т та̄тылаг та е̄мтэ̄гыт. Таима̄гсыл ты ма̄н са̄в тыныӈ хӯл пувуӈкв ат та̄ртахтэ̄в. Моще̄ртын атыӈ во̄йиӈ мохсаӈ ос ка̄рай хӯлагув Тюменский область «Выгыр нэ̄пакын» хансуӈкв ве̄рмаве̄г. Хӯл алыщлан браконьерыт пе̄нтсыл иӈ са̄в хӯл ма̄во̄й ос газ но̄хвинэ компаният порслэ̄гыт. Я̄ хосыт яласан на̄иӈха̄пыт А̄с я̄ витын са̄всыр арыгтаптам во̄яныл со̄сантыяныл. Ма̄н та̄наныл ва̄тиха̄л уральтыянӯв. Ма̄н ат ке рӯпитасӯв, юио̄выл хӯланув хосат ювта̄япанувет» . 1059 2013.09.06. Светлана РОМБАНДЕЕВА Музейт акванхо̄нтхатыгла̄лсув. Ханты Мансийск ӯст «Торум Маа» музейт рӯпитан ма̄хум мо̄т са̄всыр ма̄т рӯпитан ма̄ньщи ос ханты ма̄хум та̄нти палтаныл ва̄тихал во̄виньта̄лыяныл. Аквъёт ӯнлахо̄лэ̄гыт, ща̄й ае̄гыт, акв хотты ва̄рмаль урыл потраме̄гыт. Во̄ртур э̄тпос ва̄т нупыл хо̄тыт хо̄талэ̄т ма̄н, ма̄ньщи ос ханты газетаг редакцият рӯпитан ма̄хум, тув о̄с ялсув. Ты щёс ос ма̄хум та урыл потыртасыт, ань ё̄рнколт хум хо̄тпа па̄л ос нэ̄ хо̄тпа па̄л о̄лы. О̄лнэ колт май о̄с аквтох. Пе̄с порат ма̄хманув сака ӯргалахтасыт. Нэ̄ хо̄тпа хум хо̄тпа па̄лн нас тох ат щалтсас, туп па̄л сыстамтанэ̄тэ манос колкан ловтнэ̄тэ порат тув ё̄масаӈкве ве̄рмыс . Аграфена Семёновна Сопочина Сургутский хантыянэ урыл потыртас, ма̄хум са̄лыӈ коланылт хумус о̄лэ̄гыт. Та̄н ты хо̄тал мус пе̄с ма̄хманыл хольт о̄лнэ̄ныл, ка̄сыӈ хо̄тпа такви па̄лэ ва̄гтэ. Аграфена Семёновна ка̄сыӈ ма̄ нэ̄пак тармыл хаснэ йӣвыл щуртыстэ хум хо̄тпа па̄л, нэ̄ хо̄тпа па̄л, ня̄врам а̄патэ ханнэ ма̄. Коны ма̄т о̄с аквтохкол ман ё̄рнкол ляпат на̄йиваня лю̄ли, а̄мпкол, ня̄нь ва̄рнэ кӯр манос пӯткол ӯнлэ̄гыт. Ка̄сыӈ кол манос кӯр мори ат ӯнттыгпаве, ка̄сыӈ такви я̄нас ма̄ о̄ньщи. Кон о̄с э̄кван мори ё̄мыгтаӈкве ат ро̄ви, тав ма̄гсылэ я̄нас ма̄ о̄лы. Ка̄сыӈ хо̄тпа ма̄нь та̄гыл ва̄гтэ, хумус таве̄н э̄ри о̄луӈкве, хо̄т ё̄мыгтаӈкве, хо̄т хуюӈкве э̄ри. Ты ханты э̄ква щё̄с арыгтем потыртас. Тав ла̄внэ̄тэ щирыл, ка̄сыӈ э̄лумхо̄лас такви щире̄т ялпыӈ. Э̄лумхо̄лас щар ма̄к ялпыӈ ма̄тэ пуӈке ос ва̄ӈнаге, тэ̄н То̄рум ляпат о̄лэ̄г. Таима̄гыс ке̄нтыт ман пуӈкто̄рыт мори па̄хвтуӈкве ат ро̄ви. Ты коныпал тав во̄рт яныгман йӣвыт ос товлыӈ ӯит урыл о̄с сака хоса потыртас. Аграфена Семёновна тамле мӯтраӈ ханты хо̄тпа, са̄в мӯтра ва̄г, са̄в потыр о̄ньщи. Таве хӯнтлуӈкве ма̄навн сака пӯмыщ о̄лыс. 1059 2013.09.06. Евдокия Ивановна РАМБАНДЕЕВА Ёмас ля̄ххал. «Пупа а̄пщите̄в э̄ргыт» ты о̄вылтыт нэ̄пак хассум, яныг нэ̄пак капай 658 страница о̄ньщи. Ты нэ̄пак урыл профессор ойка Евгений Александрович Игушев тох хансыс: «Ты э̄ргыт йисэнотэ па̄сыл ущ ты рущ ла̄тӈыл толмащлымат. Пе̄с йис ма̄ньщи ма̄хумте̄ныл та̄наныл Ӯй йӣквнэ порат пупа а̄пщияныл э̄лыпа̄лт лю̄лим э̄ргыгласаныл. Мир та̄глын колт ма̄хум э̄ргыт та хӯнтлыяныл, руталиг хӯнтлым янгема̄не̄тыл та ӯнлэ̄гыт. Ты нэ̄паккапайт хансым ма̄ньщи э̄ргыт венгерский учёныигн Антал Регули ос Бернат Мункачи тэ̄н хансыгласанэ̄н 1843 -1889 та̄лытыт. Евдокия Ивановна э̄ргыт рущ ла̄тӈыл толмащласанэ, научный комментарият о̄с такви хассанэ . Ань йис ма̄хум ты э̄ргыт ловиньтате̄вт, алпихаранув нас нуйгалахтэ̄гыт, тувмос та ёмас э̄ргыглымат, тувмос та ма̄хумте̄ныл номтыӈыт о̄лмыт. Венгрия хумыгучёныиг ёт рӯпитамыт: Василий Кириллович Номин (Ня̄хщамволь хум), Илья Егорович Волков, Родион Семёнович ос Василий Григорьевич Ромбандеевыг (Сакв ма̄хум), Гаврил Петрович Сотин (Нюрум па̄влыӈ хум), Анисим Кириллович Сотин (А̄нъя па̄влыӈ хум), Илья Филиппович Тасманов (Хал па̄влыӈ хум), Михаил Иванович Укладов (Лӯсум талих хум), Ефим Петрович Юрьев (Ме̄сыг па̄влыӈ хум) та̄н о̄вылтытаныл 585 страницат сунсэлы̄н. Хансым э̄ргыт ма̄щ тыраквет, та̄н ма̄нав о̄луӈквехӯлуӈкве ханищтыяныл, номтыл хӯлтаве̄в. Ты нэ̄пак «Пупа а̄пщите̄в э̄ргыт» ловиньтан хо̄тпа вос ва̄гтэ, ма̄ньщи ма̄хум (вогулыт) тамле ма̄щтыр йис э̄ргыт та о̄щмыт. Та̄н нэ̄пакыл ат ха̄ссыт, э̄рганыл пуссын номтыт о̄щсаныл, номтыл потырта̄лсаныл. Турман э̄тыт, на̄йта̄л колт та̄н та э̄рге̄гыт, та мо̄йтэ̄гыт. Та̄наныл хӯнтлаӈкве пӯмщиг о̄лыс» . Ма̄ньлат ма̄хумате̄нувн ты йис э̄ргыт, потрыт вос ловиньтавет, номтыг вос пувавет. Пе̄с йис ма̄хманув хольт нёмсаг, роттыг о̄луӈкве вос ха̄сэ̄гыт, тамле нэ̄пакыт хосыт вос ханищтахтэ̄гыт, намыӈ суиӈ э̄лмхо̄ласыг вос е̄мтэ̄гыт. Ма̄н ма̄ньщи мирте̄в халт номтыӈ а̄гиквет, пыгквет о̄лэ̄гыт . Ма̄ньлат ма̄хумте̄в халт ёмас э̄лмхо̄ласаквет о̄ньще̄в, ня̄враманув та̄н ханищтэ̄гыт школатт, университетт. Туи хо̄талыт ня̄врамате̄нув ӯщлахтуӈкве атыглыяныл, тыттыяныл, ӯргалыяныл, йис ва̄рмалянув та̄нанылн хӯлтыглэ̄гыт, ла̄тӈув ханищтэ̄гыт, ня̄врамыт мори ат капыртэ̄гыт . Ты ва̄рмаляныл ма̄гыс Любовь Павловна Стаканован (Саранпа̄вылт, Надежда Константиновна Маслован ос Елена Ильинична Адинан (Хулюмсӯнтыт) яныг пӯмащипа ла̄ве̄в, та̄н ётаныл рӯпитан ма̄хумакве̄тн о̄с акв тох ла̄ве̄в. Пус ка̄т, пус ла̄гыл вос о̄лэ̄гыт, На̄янувн-О̄тыранувн вос ӯргалавет, вос са̄ялта̄лавет. Саранпа̄выл музыкальный школат о̄с ёмас номтыӈ ма̄хумакве рӯпитэ̄гыт – Дмитрий Георгиевич Агеев ос тав а̄гитэ, ва̄псэ. Та̄н ханищтам а̄гияныл пыганыл ань Ханты-Мансийскат рӯпитэ̄гыт («Лылыӈ со̄юмт», «Ма̄ньщи театрыт»). Ма̄нти ма̄ньщи ла̄тӈыӈ газетате̄вт «Лӯима̄ сэ̄рипос» палт о̄с сака ёмас ма̄хумакве рӯпитэ̄гыт, газетате̄в сака номтыӈ щирыл ва̄раве, ма̄хумаквет тот ёмщакв по̄слынэ̄т. Сунсыглаӈкве, ловиньтаӈкве пӯмщиг о̄лы. Ме̄н Евгений Александрович ёт пуссын ма̄ньщи ма̄хумакве̄н со̄т по̄йкиме̄н, нот по̄йкиме̄н. 1059 2013.09.06. Светлана РОМБАНДЕЕВА Кимлобазов рӯт нэ̄. Хурит Наталья Николаевна Кимлобазова по̄слым о̄лы. Ты ма̄ньщи нэ̄ Ха̄льӯс район Кульпас па̄вылт самын патыс, ма̄нь таквс э̄тпост 1968 та̄лт. Школат рӯпитанэ̄тэ хусахтем та̄лыг ты то̄влы. На̄н ань На̄таля потырохсатэ ловиньтэлы̄н: Омам Дарья Александровна (а̄ги о̄парищ наме Анемгурова) Ня̄хщамво̄ль па̄вылныл о̄лыс, а̄тям Николай Васильевич Кимлобазов. Ще̄мьявт ма̄н са̄т ня̄врам самын патыгласӯв. Щар яныг каӈкум Пе̄тр, тувыл Саша, Кӯщта, Альбина, Валера, Сережа ос ам щар ма̄нь. Та̄н ань пуссын а̄тимыт, ам амттем хультсум. Школа тыт а̄стласум, лов класс. Э̄лаль ханищтахтуӈкве тахсум кос, а̄гирищит ёт Ханты-Мансийск ӯс мус ялсӯв. Та порат сака са̄в ня̄врам поступайта̄лсыт, местал ат то̄влувесув, тох иӈ ат вуйвесув, ювле та йисув. Ань тыт школат колкан ловтым рӯпитэ̄гум. Кит пыг о̄ньще̄гум. Яныг пыгум Саша, ва̄т нупыл ат та̄лэ, интернат кол ӯнттын ма̄т рӯпиты. Ма̄нь пыгум Ваня, хо̄тхуйплов та̄лэ то̄влыс, школат ханищтахты, ты таквсы ловит классын мины. На̄таля тамле нёмса, сымыӈ нэ̄. Ты я̄тил ма̄ньщи хо̄тпав пыгаге ёт пуста̄гыл вос о̄лы, На̄й-О̄тыранэ̄н вос ӯргалаве. 1059 2013.09.06. Людмила ТЕТКИНА Ма̄хум хӯрум хо̄тал мӯйлысыт. Ха̄льӯст ялпыӈ хо̄талыт о̄лум порат са̄в мир акванатхатыгласыт. Район янытыл са̄в ма̄хум тув мӯйлуӈкве во̄виньта̄лве̄сыт. Ха̄льӯст о̄лнэ соссаӈ ма̄хум ты ялпыӈ хо̄тал янытлаӈкве о̄с ёхталасыт. «Югра лылыеп» та па̄вылт о̄лнэ отделеният рӯпитан хо̄тпат мо̄т мирыт ёт па̄выл хосыт парадыт о̄с ё̄мсыт. Культура центр рӯпитан ма̄ньщит, хантыт та̄нки ва̄рум рӯпатаныл суссылтасаныл. Та̄н ты кастыл са̄всыр сувенирыт ос мо̄т нё̄тнэ утыт ю̄нтсыт ман ка̄тыл ва̄рсыт ос ӯскант тыналасаныл. 1059 2013.09.06. Светлана РОМБАНДЕЕВА Ма̄хум лув сыс тармыл кассыт. Во̄ртур э̄тпос 22-25 хо̄таланэ̄т Ханты-Мансийск ӯст «Мустанг» нампа конноспортивный комплексыт лувыл каснэ ва̄рмаль о̄лыс. Ты мирхал касыл атыт щёс ва̄рыглавес, ма̄хум ань ос Ханты-Мансийск ӯст кассыт. Та̄н са̄в ма̄ныл ёхталасыт Германияныл, Бельгияныл, Люксембургныл, Эстонияныл, Латвияныл, Польшаныл, Украинаныл, Белоруссияныл, Кыргызстаныл ос Казахстаныл, атпан нупыл ат хо̄тпа о̄лыс Тыкасыл намаявес «Кубок Югры». Но̄хпатум хо̄тпа 56 со̄тыра са̄вит э̄лы хо̄н ма̄ евро нампа олныл майвес. Ты яныг касыл э̄лыпал хо̄талытт конноспортивный клубт ня̄врамыт ма̄гыс са̄всыр конкурсыт, мастерклассыт, ёнгилыт ва̄рыглаве̄сыт. Са̄всыр хурит ка̄тыл по̄слысыт ка̄сыӈ ня̄врам мӯйлупсал майвес. 24 щислат, э̄типа̄лаг, хо̄тахтем щё̄с порат, мир ла̄щалла̄щал акванатхатас. Россия гимн э̄рыгсуе та сумыллас, ма̄хум пуссын но̄хлю̄льсыт, суйта̄л та лю̄лянтэ̄гыт. Сунсэ̄в, ань каснэ ма̄хманув лув сыс тармыл ӯнлым та нэ̄глысыт. Луваныл тамле нё̄тнэт карсыт. О̄траныл о̄с татем нё̄тнэ̄г масхатамыт, то̄ваныл выгыр пальтасовыл о̄лэ̄гыт, то̄ваныл ос сэ̄мыл. Лувыт пуссын акв юипа̄лт та ё̄ме̄гыт. Та̄кыщ потыртан микрофон хосыт ка̄сыӈ хо̄тпа, ка̄сыӈ лув наме ла̄ввес, хотьют хотыл о̄лы, каснэ ма̄т манах щёс но̄хпатыглас. Хум хо̄тпат халт нэ̄ хо̄тпат о̄лнэ̄ныл. Са̄выӈпа̄лэ тыг ань Россият о̄лнэ ма̄хум ёхтысыт. Наманыл ла̄вве̄сыт, луваныл суссылтасаныл, лув сыс тармыл ӯнлым ма̄хум мощ ё̄ӈхатахтыгласыт, ты юипа̄лт пуссын ювле та минасыт. Тамле ва̄рмаль рущ щирыл ла̄ваве – открытие, та па̄сыл ань касыл рӯпататэ та о̄вылтахтас. Тувыл мо̄т лувыӈ ма̄хум тыгле нэ̄глысыт – нила хум лув сыс тармыл ӯнлэ̄гыт. Та̄н тыг, насати, Москва ӯсныл ёхтумыт, мир э̄лыпа̄лт выступайтан ма̄гсыл во̄вимат. Лув сыс тармыл сӯлыньтасыт, сыресыр ищхип щирыл капыртасыт, ань тӯлыглахтан ма̄хманув хольт мир ма̄гыс пӯмыщ ва̄рсыт. Ты нила хум яласанэ̄ныл ма̄гсыл ёмас яныт ма̄ щё̄питавес. Аква лув сыс тармыл лю̄лим сӯлыньты ка̄тэ̄т Россия флаг пуви. Мо̄тан ос лув сыс тармыл ня̄лытё̄втыт ёт сӯлтты та па̄тамты, шарик палт ман йӣв па̄рт тармыл ня̄лэ тув та хо̄и. То̄ва ос сырай ка̄тэ̄т пуви, арбуз нампа пил капай манос витыл та̄глыӈ капрон сулья та са̄грапитэ. Китыг ос акв лув сыс тармыл акв ляльт ӯнтмыг, ма̄н та̄рав нуйхатэ̄г, яты, ос ка̄ртал ёнге̄г. Акваныл ос лув сыс тармыл миннэ̄тэ сыс ка̄таге̄тыл но̄хво̄ртумтахты, хоми пуӈкыл та тотаве, тувыл акв тув ювле ӯнтылматы. Мо̄тананыл лув сыс тармыл миныматэ, ма̄ннёл ню̄нсыгта̄лы, тот хуям ке̄нт манос то̄рло̄мт но̄ха̄лмаитэ. Лувыӈ ма̄хум тох та ощхульласыт. Та пӯмыщ, та мовиньт, ма̄хум маттем та о̄щатахтыгласыт. Юио̄выл хо̄талт, 25 щислат, ма̄к яныг касыл о̄лыс. Ма̄хум луваныл ёт маттем та кассыт. Ка̄сыӈ хо̄тпа луве̄нтыл каснэтэ̄н э̄лыпа̄лт, наманэ̄н ла̄ваве̄г, каснэ кан котильн нэ̄глэ̄г хо̄тпа лув сыс тармыл ӯнлы. Щё̄сэ̄н ёхты, лув та нёвумты. Мощ ха̄йты, тувыл сыр ӯлтта та порыгми, э̄лнув ха̄йты, о̄с та порыгми. Сырыт ма̄нныл 1м. ос 50 см. лю̄литтем но̄хва̄рим о̄лэ̄гыт. Лув ловмантем ма̄т порыгма̄лы. То̄ва сыр ёлпаттытэ, то̄ва ос нумыл татем кӯпнитыӈыщ порыгми. Акв хум луве поргуӈкве щар ат ве̄рмыс сырыт акваг ёл та патталыянэ, порыгманэ̄тэ порат тоӈханэ сырн хо̄е̄гыт. То̄ва лув ань по̄ри хуйнэ сыр э̄лыпа̄лт ёллю̄люмты, мощ лю̄ли, тувыл ос илттыг порыгмаӈкве ат ве̄рми. Ма̄хманув тох та кассыт, щё̄с арыгтем яласасыт. Тув ёхталам мир пӯмщалахтым суссыт. И пумыщ о̄лыс, и пилыщмаӈ о̄лыс. Ва̄им пилыщмаӈ, ты карсыт ма̄ ӯлтта лувыт аман хумус порге̄гыт, та̄нти та ва̄ганыл. Касыл оигпаме юипа̄лт, но̄хпатум хо̄тпа наме ла̄ввес ты Виктория Крашевич, луве Ариньо. Виктория Московский областьт о̄лы. Китыт места о̄с Россия хум Геннадий Гашибаязов тав вис, луве тай ос Фелю. Хӯрмит места Украинаныл ёхталам хум Константин Ярошенко ос луве Овиван тэ̄н висы̄г. Виктория нэ̄ ты э̄лыпа̄лт, насати, Свердловский областьт но̄хпатум, тот о̄с касыл ва̄рыглыма. Тав тамлета ка̄ркам, ё̄р нэ̄ о̄лнэ̄тэ. Мо̄тынтыг Ханты-Мансийск ӯст тамле касыл тах о̄с ва̄раве. 1059 2013.09.06. Тамара МЕРОВА Пе̄тра хо̄талт пӯрлахтасыт. Ойттур э̄тпост ам марий ма̄хум палт мӯйлуӈкве ялсум. Та̄н палтаныл акв пе̄с ялпыӈ нак суссум. Марийцат пе̄с йис та̄гыл «Сюрем» нампа ялпыӈ хо̄тал янытлэ̄гыт, тав Пе̄тра хо̄талт ва̄рыглаве. Тамле тэ̄ла ма̄хум пум са̄грын э̄лыпа̄лт ос ня̄ньпум атнэ о̄вылтан мус ва̄рыгласаныл. Ань ма̄н финно угорский журналистыт, Пе̄тра хо̄талт Шоруньжа па̄вылн о̄с тотыглавесӯв. Тот пе̄с та̄гыл ва̄рум ва̄рмаляныл ва̄щиньтасӯв. Ты па̄выл по̄хат марий ма̄хум пӯрлахтын кан о̄ньще̄гыт. Та̄н тув акваг атхатыглэ̄гыт. Ка̄сыӈ хӯрмит та̄лэ̄т тот яныг пӯрлахтын нак ва̄раве, тув са̄всыр ма̄ныл са̄в ма̄хум ёхталы. Ты э̄лыпал та̄лыт порат Шоруньжа па̄влыӈ ма̄хум та̄нти тот акванхо̄нтхатыгласыт. Та во̄рт ат хара ма̄ о̄лы, ка̄сыӈ ма̄т я̄нас а̄ращ па̄лтаве. Ка̄сыӈ ма̄ ло̄мтаныл ос а̄ращаныл хотты На̄йО̄тыраныл кастыл ва̄рим о̄лэ̄гыт. Тувыл ма̄хум та̄нкина̄нылн э̄рнэ канын минэ̄гыт ос а̄гманыл пусмалтан о̄вылтыт манос со̄т, щунь во̄внэ ма̄гыс тот по̄икще̄гыт. Яныг ялпыӈ хо̄талыт ва̄рнэ порат хум хо̄тпат а̄ращит пуссын па̄лтыяныл ос тэ̄нут па̄йтэ̄гыт. Ты э̄лыпа̄лт а̄лпыл та̄н йир ва̄ре̄гыт. Нуми -То̄руманылн «Сюрем юмо» йирыг не̄выр тотэ̄гыт, То̄рум ля̄ххал тотнэ о̄тыранэ̄н (рущ щирыл вестник) ма̄гыс ва̄с ос таве ӯргалан о̄тыранэ̄н («хранителиг» ла̄вавет) ма̄гыс па̄ля тотэ̄гыт. Ты во̄р канын щалтнэ ма̄гыс та̄н хӯрум пӯсас о̄ньще̄гыт. Акв пӯсасыл йирыг тотнэ ӯйхул ёт щалтэ̄гыт, китыт пӯсас та̄ра вит а̄лумтэ̄гыт. Та ма̄ ляпат со̄юм овты, ма̄хум тувыл сыстам, атыӈ вит выгыт. Ос мо̄т пӯсасныл тув ёхталан мӯй ма̄хум щалтэ̄гыт, мо̄т ма̄ныл тув щалтуӈкве та̄нанылн ат ро̄ви. Ань пуссын матыра̄ти э̄рнэ тэ̄лат хум хо̄тпатн ва̄равет. Та̄н та̄нки исмит пӯт па̄йтэ̄гыт ос ма̄хум тыттэ̄гыт. Нэ̄ хо̄тпат тот ат пувиньтахтэ̄гыт, та̄н юн нас щаньканя̄нь ва̄ре̄гыт ос пасанын ӯнттыяныл. Ётыл ты щаньканя̄няныл ла̄кквауртыяныл ос мӯй ма̄хумн мыганыл. Та пасан карс йӣвыт ляпат ӯнттаве. Тувыл акв хотты йӣв ялпыӈыг щё̄питаве, ма̄хум тав по̄хатэ̄т акванатхатыглэ̄гыт. Ка̄сыӈ канытыт яныг хум хо̄тпа пе̄рияве, тав ялпыӈ йӣв по̄хат лю̄ли ос ма̄хум ла̄внэ ла̄тӈыт хӯнтлыянэ, тувыл тав но̄ӈхальсунсым такви э̄лаль То̄румн потырты. Марийцат тамле хум хо̄тпат «картыг » намтысаныл ос та̄н ня̄йт хо̄тпа хольт та̄наныл о̄ньщияныл. Ма̄хум таве̄н матыр пуӈкто̄р манос вильт сэ̄гнэ то̄р мигыт, олн тув пинэ̄гыт ос та̄нки та̄рвит тэ̄ланыл о̄вылтыт потыртэ̄гыт. Тувыл ты мӯйлупсат «карт»хо̄тпан но̄хщё̄питавет. Ты та̄лт тот хӯрум а̄ращ па̄лтыглавес ос хӯрум я̄нас ма̄т ма̄хум по̄икщасыт. Ма̄н тот яныгпа̄ла ма̄хум халт са̄в ма̄ньлат хо̄тпат ка̄саласанӯв. Тыи сака ёмас, та щирыл пе̄с йис ва̄рмалит иӈ э̄лаль тотуӈкве патавет ос молях хот ат ёрувлавет тах. То̄ва ма̄ньлат ма̄хум рӯпата ат о̄щнэ̄ныл ма̄гыс ань мо̄т ӯсыӈ ма̄н о̄лмыгтасыт. Ос ты ялпыӈ нак ва̄рнэ порат та̄н юв акваг ёхталэ̄гыт. Тот кит ма̄ньлат пыгыг ёт потыртасӯв, тэ̄н ань, насати, Сургут ӯст о̄лэ̄г рӯпитэ̄г ос ка̄сыӈ та̄л тув ёхталэ̄г. Мо̄таныт Иркутск, Тюмень, Екатеринбург ӯсытт хо̄т рӯпитэ̄гыт. Марийцат коныпал рущит ос мо̄т мирыт о̄с тот мӯйлуӈкве патсыт. Та̄н о̄с пуста̄гыл о̄луӈкве таӈхе̄гыт, э̄лаль о̄лнэ посыӈ, ёмас хо̄тал тот кинсэ̄гыт . «Передовик» нампа сельхозпреприятият кӯщаиг рӯпитан хум Юрий Игнатов ла̄выс: «Ма̄н ма̄ньта̄гыл Нуми-То̄румн агтуӈкве ханищтавесӯв, ты пе̄с йис ва̄рмалянув ань тыг мус э̄лаль тотыянӯв. Ты вераагтув рущ щирыл «язычестваг» ла̄ваве. То̄ват нёсаралым ма̄н нупылув сунсэ̄гыт, лю̄льсаӈ мовиньтэ̄гыт. Яа, тав кос. Ма̄н тыт матыр лю̄ль хунь ва̄ре̄в. Ма̄н о̄с християнство, ислам, буддизм верат хольт, туп во̄р халт ма̄нки щирыл Нуми-То̄рмув нупыл по̄икще̄в. Ма̄ви тув янытлэ̄в, таве̄ныл вим тэ̄нэайнэ тэ̄нутанув ма̄гыс пӯмащипа ла̄тыӈ ла̄ве̄в, исылтахтын ос тэ̄нут па̄йтнэ ма̄гыс на̄йлылы янытлэ̄в. Э̄лаль ёмас, со̄тыӈыщ о̄луӈкве воратэ̄в. Тувыл тыт э̄лумхо̄лас э̄лаль о̄лнэ ё̄р, посыӈ номт выг, лю̄ль номтанэ̄ныл хотсыстамтахты, пуӈке ат тэ̄лыглы». Ам о̄с тох номсэ̄гум. Нуми-То̄румн агтым пуссын пе̄с йис ма̄ньщи ма̄хманув о̄лсыт, ты хосыт са̄в со̄тыра нот э̄лаль о̄лсыт, щуньсыт. Та щирыл э̄лаль о̄луӈкве ма̄нав о̄с ханищтасаныл. Со̄ль, ма̄н номтанув Нуми-То̄румн ёхтэ̄гыт, тувыл та̄рвит порат маныр ёмас тэ̄ла ва̄руӈкве, аквтупмат нас хӯлтыглаве̄в. Ты щирыл ма̄н Ма̄витув о̄с ёмщаквег ӯргалылӯв. Таве наска̄ссыг ат па̄ӈктылӯв, мори вит ат со̄сантэ̄в, э̄типа̄лаг суй ат ва̄ре̄в, пе̄с ма̄хманув ла̄внэ̄ныл щирыл, э̄тпос яныгман порат пӯрлахтэ̄в. Са̄всыр хо̄нтлан пилыщмаӈ нак ат ва̄рыглэ̄в, мо̄т мирыт нупыл сымыӈыщ сунсэ̄в. Ань марий ма̄хумпалт ялмум юипа̄лт ам ва̄глум, та̄н о̄с ма̄н хольтув Нуми-То̄румн агтым о̄лэ̄гыт. Та̄н та̄нки На̄й-О̄тыранылн пуӈк пинэ̄гыт, йир ва̄ре̄гыт. Хум хо̄тпат пе̄с ма̄хманыл щирыл маныр хумус ва̄рсыто̄с аквта хольт йис наканыл э̄лаль тотыяныл. Ты рӯтыг о̄лнэ марий ма̄хумн ам яныг пӯмащӣпа ла̄тыӈ ке̄тэ̄гум. «Картыг» ла̄внэ яныг ня̄йт хо̄тпа журналистытныл пӯмщалахтас, хоты ма̄ныл ма̄н о̄лэ̄в. Тувыл ка̄сыӈ хо̄тпа ос тав мире ма̄гыс Нуми То̄румн о̄с по̄икщас. Ма̄н о̄с ла̄ве̄в: «Пус ка̄т, пус ла̄гыл, То̄рум ёт, О̄тыр ёт марий ма̄хум вос о̄лэ̄гыт». 1059 2013.09.06. Валентина УЗЕЛЬ Сака пе̄с хурит суссылтаве̄сыт. Тамара Степановна Траки Касум па̄выл музейн тэ̄лы мощщан рӯпитаӈкв во̄выглавес. То̄нт са̄лы ӯрнэ ма̄хум каснэ хо̄таланыл о̄лыс. Ос татем пӯмыщ выставка тот ва̄рыглавес, тав ты выставка урыл мӯй ма̄хумн потыртас. Та суссылтап ханты ма̄хум ла̄тӈыл тох намаим о̄лыс – «Йис ёх, йис вер», (ма̄ньщи ла̄тӈыл те ла̄вуӈкв, тох толмащлаӈкв ро̄ви – «Йис ма̄хум, йис ва̄рмалит»). Та па̄вылн Санкт-Петербург ӯст о̄лнэ Российский этнографический музейныл сака пе̄с хурит тотыглаве̄сыт. Ты хурит Сергей Иванович Руденко 1910 та̄л порат по̄слуманэ. Ты хум яныг учёныиг о̄лум, антрополог, археолог, технический наукат доктор намыт о̄ньщум. Тав 1909 та̄л порат я̄ӈк на̄тнэ э̄тпосныл ре̄тыӈ ю̄свой э̄тпос мус ма̄ньщи ос ханты ма̄хум палт тыг ёхталам. А̄с я̄, Сакв я̄, Та̄гт я̄, Сыня, Вогулка ос Войкар я̄т хосыт о̄лум соссаӈ ма̄хум палт ялыс. Та̄наныл пуссын хурин по̄слысанэ. То̄нт, пе̄с порат, фотоаппаратыт хунь о̄лсыт, тав кумыскал ва̄рим негативыт ёттотыгласанэ. Хо̄тса̄т арыгтем хури ва̄рум. Ялум лё̄ӈхе, маныр пӯмыщ тав ка̄сала̄лыс, тав пуссын нэ̄пакн хассанэ. Ань тав по̄слум пе̄с хуриянэ туп Санкт-Петербург ӯст о̄лнэ музейт ка̄салаӈкв ро̄ви. Касум па̄вылн тотыглым хурит ань ювле этнографический музейн тотве̄сыт. Ты хӯрум пе̄с хури С. И. Руденко по̄слуманэ. Ань ты хури сунсыглэ̄н. Э̄рыӈ на̄н пе̄с рӯтанын тот по̄слым о̄лэ̄гыт. Са̄литан ла̄тыӈ Ма̄н Зоя Валентиновна Пахомован ос тав ще̄мьятэ̄н са̄литан ла̄тыӈ ке̄тэ̄в. Ты ма̄ньщи э̄ква Сургут ӯст о̄лы. Во̄ртур э̄тпост Дмитрий пыге а̄тимыг е̄мтыс. Ты ёмас сымыӈ хум хо̄тпа о̄лыс. Тав акваг ӯсыӈ ма̄т о̄лыс кос, ос хӯл алыщлаӈкве, во̄раяӈкве сака ха̄сыс. Оматэ ат а̄лыманэ̄тэ торыг хӯлыт такви нилиянэ, исмитыг па̄йтыянэ манос нас саритыянэ. Ма̄ньнувег о̄лме̄т тав Хо̄рыӈпа̄вылн тотыглавес, тот рӯт ма̄хманэ̄ныл са̄всыр мӯтраӈ ва̄рмалитыл пӯмщалахтас. Ос ӯст о̄лме̄т ма̄ньщи телепередачат суссылтан пора урыс о̄с сунсыс. Тувыл такви колнаке акваг сыстамыг о̄ньщистэ. Руманэ тав уре̄т о̄с са̄в ёмас потрыт потыртасыт, во̄рт о̄лнэ са̄всыр та̄рвит ва̄рмалитын та̄н Диман ханищтаве̄сыт Зоя Валентиновна Владимир Петрович о̄йкатэ̄нтыл номтыӈ пыг янмалта̄лсы̄г. Ань ты рӯт ма̄хум э̄лаль о̄лнэ хо̄талытн пуссын вос та̄кмалтахтэ̄гыт. 1059 2013.09.06. Светлана РОМБАНДЕЕВА Э̄квапыгрищ мо̄йт. Э̄квапыгрищ ща̄нягеа̄щаге ме̄ӈквын алвесы̄г ман та̄йвесы̄г. Тав савалап пыгрищ а̄квынэ̄кватэ̄н янмалтавес. Тувыл яныгмас, манарас, а̄квынэ̄кватэ̄н кон ат та̄ртаве ла̄ви: Э̄л ул минэн, тыт ме̄ӈквыт о̄лэ̄гыт манса̄вит. А̄щагын ща̄нягын ме̄ӈквытын алвесы̄г, та̄йвесы̄г. Та в ё̄рыг е̄мтыс, ме̄ӈкв хо̄лат пуссын тав ты по̄кыльтасанэ алыщласанэ. А н ь а̄квэ̄кватэ̄н хунь хӯнтлы, акв ла̄гылсоре̄ныл ня̄л ва̄рыс, мо̄т ла̄гылсоре̄ныл ё̄вт ва̄рыс, сорлуве̄ныл. Тувыл а̄квэ̄кватэ нупыл ла̄ви: Ам кон ква̄ллэ̄гум, кон ёнге̄гум, ӯйрищит матыр па̄хвтэ̄гум, алыщлэ̄гум. А̄квэ̄кватэ̄н ат та̄ртаве: Ул минэн, ул минэн, э̄л ул минэн! Ме̄ӈквын хо̄нтавен тах, алавен! Тав ка̄сыӈ хо̄тал та яласы, ӯйрищит алыщлы, та мaныр, ё̄мыгты. Мощ э̄лнув, мось э̄лнув, тоха та э̄лаль мины. Аквматэ̄ртн хӯрмит хо̄талыг е̄мтыс, а̄кве̄н ты тыпылтавес. Лю̄ньщим кинсытэ, ё̄мыгты. А тав, Э̄квапыгрищ, э̄лнув минас, хӯрмит хо̄тал, сунсы, ме̄ӈкв о̄йка ты ё̄ми, пувумтавес, лапаяптувес, такос щисги, ро̄ӈхи, та тотаве. Тувыл тотвес, хоса ман ва̄ти тотвес, со̄ль аквмат колрищин ты тӯлвес. Та ме̄ӈкв о̄йка а̄гирищигпыгрищиг о̄ньщи, ань хотща̄гтсы̄г, ла̄ве̄г: А̄щме̄н лылыӈ ке̄лп ман лылыӈ нё̄выль тотыс. А тав, Э̄квапыгрищ, ла̄ви: Наӈ тай а̄нум ань ул алэ̄лн, сунсэн, ам урум ман мaныр. Нё̄влюм ман нё̄выль атыл пасы, мущ о̄ньще̄лн тувыл ущ алэ̄лн а̄нум. Тувыл ме̄ӈкв о̄йка номсы: «Тав со̄ль, мощ тыттылум, тах нё̄влете̄лпе атыӈыг е̄мты, ёмасыг е̄мты». Ёлхуясыт. Ань Э̄квапыгрищ ул вос ояс, ме̄ӈкв о̄йкан такви пӯтитэ̄н хуюптавес. Таяныт ме̄ӈкв поталы, лылые̄пе та хурип та, торгиньты ман лылы хасумты, юв а̄лты аялаве, тот та тыгтув хартата̄лаве лылтнэ̄тэ мус. Хотмус хуясыт ман манарасыт, а̄лпылыг е̄мтыс. Ме̄ӈкв хотталь минуӈкве ты щё̄питахты, улпыл о̄с алыщлаӈкве хотталь во̄рн мины, матыр ӯйхул ма̄гыс. Э̄квапыгрищ та̄кыщ ёлпе̄рсаластэ, тыттыстэ, ня̄врамаге̄н ла̄выс: Сунсэ̄н, хот ул та̄ртэлы̄н! Хот те та̄ртылы̄н, нэ̄н тах алаве̄н. Тав, Э̄квапыгрищ, мӯтраӈ, ве̄рми матыр ва̄рапаӈкве. А̄ти, ме̄н ат та̄ртыламе̄н. Тувыл та минас во̄рн ё̄мыгтаӈкве, ёсаге масыс. Э̄квапыгрищ тэ̄натэ̄н китыглыяге: Нэ̄н, а̄гирищигпыгрищиг, ӯмпи матыр о̄ньщегы̄на? А ме̄н ӯмпил маныр ва̄риме̄н. А̄нум алэгы̄н тах, исум те̄лп ман маныр аюӈкве. А̄ти, ат о̄ньщиме̄н. Ат те о̄ньщегы̄н, ам ха̄сэ̄гум, нэ̄нанн ӯмпил матарыл ва̄риягум. А̄щин матыр са̄грапкасай о̄ньщи? Тэ̄н ва̄гтэ̄н, ла̄ве̄г: О̄ньщи. О̄ньщи те, тотэ̄н сaграпкасай, пе̄лпыт? Ам нэ̄нанн те̄лп аюӈкве ӯмписовыл ва̄риягум, а̄нум алэгы̄н, те̄лп аюӈкве патэгы̄н. Тав со̄ль, йильпи ӯмпил те̄лп айиме̄н. А̄нум хотта̄ртэлы̄н, нэ̄нанн ӯмпил ва̄риягум, тувыл а̄нум тах ущ ёлнэ̄гелы̄н. О̄влэ̄т са̄грапкасай тотэ̄н, ӯмпи ва̄руӈкве э̄ри, ӯмпи ва̄руӈкве патэ̄гум. Тэ̄н маныр, номсэ̄г со̄ль, ха̄йтсы̄г, са̄грапкасай тотсы̄г. Э̄квапыгрищ лави: Ань а̄нум хотта̄ртэлы̄н, а̄щин ялнэ̄тэ сыс ам нэ̄нанн ӯмпил ва̄риягум те̄лп аюӈкве. Номсэ̄г со̄ль тав тах, тувыл хотта̄ртвес. Э̄квапыгрищ йӣв са̄грыс, йӣвсупыт пиныс, ла̄ви: Тыг хуигпа̄лэрищин, ам нэ̄нан мо̄ртым ӯмпи ва̄ре̄гум. Ам нэ̄нан мо̄ртыягум, тыг йӣвсупыт палт хуигпе̄н, ман яныт э̄ри, ам мо̄ртэ̄гум. Тувыл акватэ та хуигпас, хуигпас, сыплуве супыг та са̄грапастэ. Мо̄танэ̄н о̄с ла̄выс хуигпаӈкве, тувыл таитэ хуигпас, о̄с пуӈке мaн сыплуве хот та са̄грапастэ. Тувыл маныр ва̄руӈкве, пуӈканэ̄н висаге, колошкаг ва̄рыс. (Ме̄ӈкв о̄йка аман хоталь ё̄мыс, аман йӣв са̄грысёргыс). Тув а̄ӈквал тӯщтыгпас, а̄ӈквал пуӈк паттан пуӈканэ̄н тув мастысаге, вильтанэ̄н а̄ще̄н йинэ лё̄ӈх ляльт тӯщтыгпасаге. Тувыл молямтахтым нё̄выль якытлапыс, на̄лув па̄йтлыгтас, мощ па̄йтахтас ман манарас. Моще̄ртын ме̄ӈкв хо̄ла ты ёхты, молямтахтым а̄ны хӯнумтас, тав йӣнэ лё̄ӈх сӯнтэ̄н тув ӯнттыгпастэ. Та торыг ме̄ӈкв о̄йка тув нэ̄глапамисум а̄ны, исум пӯт ӯнттымаг, сэ̄ӈвкыл иӈ па̄йтахтэ̄г. Номсалы: «Ты улпыл а̄гирищагумпыгрищагум Э̄квапыгрищ аластэ̄н, па̄йтыстэ̄н, тыг ӯнттыгпасыг а̄ны». Тувыл ёмас щирыл нё̄выльло̄мт вис, та то̄втытэ. Илттыг консалямитэ, ла̄ви: Анана̄, амти лувумнё̄влюм атыл пасы. Мо̄т а̄ны атыньты, пуссын такви лувенё̄вле атыл пасы. Тувыл номсахты: «Тэ̄н улпыл Э̄квапыгрищ хотта̄ртыстэ̄н, ня̄врамагум алвесы̄г». Ань пуӈканэ̄н та ма̄ныр хо̄нтсанэ, такви ня̄врамаге пуӈкы̄г. Та кантмувес, аа, Э̄ква пыгрищ хот та оигпас. Лю̄ньщимтыстым юв ты щалты, со̄ль ня̄врамаге а̄тимыг. Та халт Э̄квапыгрищ ойи юв колэ̄н, юв щалты а̄квынэ̄кватэ̄н хо̄нтаве, та аниглаве: Ма̄ныр ты палыт сыс во̄рт ва̄рсын? Ам ме̄ӈквын пувиньтаве̄сум, а̄лты алве̄сум тэ̄ӈкв. Ам по̄йкыслум таве, тувыл хультуптаве̄сум. Нё̄влюм, ла̄ве̄гум, маныр атыл пасы, мощ о̄ньще̄лын, ам тах нё̄влюм ялты, ёмащакв тыттэ̄лын, ущ а̄нум алэ̄лын, по̄йкщислум. Хунь ёлхуясув, тав лылтыторгиньты, ам тыгтув та нуйгата̄лавем, лылаянэ̄тэ сыс а̄лты юваялавем. Тувыл а̄лпыл ёлнэ̄гсалаве̄сум, такви во̄рн минас, та сыс ам ня̄врамаге аласагум, амти оясум. А̄кве̄н аниглавесыпгаве, та лю̄ньщи: Ам ты ла̄ве̄гум воссыг э̄л ул минэн . Тав Э̄квапыгрищ та кантмувес, воссыг а̄кве ла̄тыӈ хӯнтлуӈкве ат патыс. Акв хо̄тал о̄лэ̄г, о̄с э̄л ат та̄ртаве а̄кве̄н, атав ва̄гтэ ме̄ӈкв о̄йка лё̄ӈх, хоталь тотвес, колэ хо̄т о̄лы. Э̄типа̄лаг а̄кве̄н о̄с та тыпылтавес, тыстылю̄ньщи, номсы: «О̄с та пуввес апыгтем, алаве тах». Э̄квапыгрищ ме̄ӈкв о̄йка колэ̄н ёхтыс, юн а̄тим, хотталь минам. А̄раще̄ныл ве̄тра выг, хӯлюм ве̄тран пины та̄глэ̄кв, но̄х колалан та ха̄хтытэ. А̄лпыл хӯнтлы ты йинэ̄т суйты, хоттӯйтхатас, тувщакыртахтас. Пе̄с ань щовалыт о̄лсыт, а ме̄ӈкв о̄йка колэ щовалыӈ, тувыл щовал сӯнтын тув хотталь тӯйтхатас, я̄ртхатас. Ме̄ӈкв о̄йка ос юн тэ̄нут ва̄рыс, ӯй ман матыр алам, па̄йты. Тав ос Э̄квапыгрищ хунь пилы, сэ̄й хулюм кос та̄гыл выг, щовал ас хосыт сӯнтыл юв та та̄рталы, пӯт сӯнтэ̄н та патыглэ̄гыт. Пӯтэ мощ па̄йтахты, а̄рталытэ: «Я а, манырман сэ̄й ман ма̄ныр, аман витум тамле». Та̄глэ̄кв утыстэ, тэ̄нэ хурип пыл а̄ти . Тавагт, такви тувыл аман ояс, ат номилум. Ме̄ӈкве аман та̄ра алыстэ, манос ётыл ёхтыс, ня̄лыл вусщкасастэ. 1059 2013.09.06. Татьяна Дмитриевна Слинкина Кар ос ощща урыӈ ю̄нтуп. Татьяна Дмитриевна Слинкина ня̄врамыт ма̄гыс мо̄йт нэ̄пак хансыс «Кар ос ощща урыӈ ю̄нтуп». Ты мо̄йт Е. И. Ромбандеева хосат ёлхасме, таве̄н Овёсова Ульяна Иосифовна мо̄йтыглас. На̄н ань э̄лаль ты мо̄йт ловиньтэлы̄н. Карыг ос ощща урыӈ ю̄нтпыг тэ̄нттетэ̄н ма̄т во̄рт о̄лэ̄г. Тох о̄лыматэ̄н аквэ̄рт акватэ̄н ла̄ви: Во̄рн ялырищме̄н. Тот та та̄лтхатсыг, минэ̄г, ва̄ӈныл хартэ̄г. Урыӈ ю̄нтпе та харты сунэ, каре коныл товлыл мины. Тох миныматэ̄н, урыӈ ю̄нтпе тахурип тарыгкве хо̄нтыс: Маныр ӯй норма па̄рт са̄грынэ хурип йӣвкве, па̄ртыг тах! Ань каре та ро̄ӈхитэ: Каро̄в! Пуна ю̄хрых, пуна ю̄хрых! Щиньхпиньх ла̄пщих! Ань кар тыг ёхтыгпас, ла̄ви: Хумле? Ам тахурип ӯй норма ва̄рнэ хурип па̄ртквет ма̄гыс тарыг хо̄нтсум! Я, ӯй хо̄т ка̄тынпаттыме̄н? Яты, ань ощща урыӈ ю̄нтуп каре̄н тарге палт ю̄ныгтавес, тот та харты, тот та лэ̄вата̄нты, аквэ̄ртын та лэ̄гматас, о̄с та хартанты, мины. Тох хартыматэ тахурип ха̄ль хо̄нтыс, ӯй э̄лыпа̄л са̄н ва̄рнэ са̄с о̄ньщи. Ам ань картем вос ро̄ӈхыгланувлум: Каро̄в! Пуна ю̄хрых, пуна ю̄хрых! Щиньхпиньх ла̄пщих! Каре о̄ста ла̄пщатас, тав палтэ ёхтыс, ла̄ви: Хумле? Ӯй э̄лыпа̄л са̄н ва̄рнэ са̄скве хо̄нтсум. Тэ̄хам, ме̄н ӯй хо̄т ка̄тынпаттыме̄н? Ань каре̄н о̄ста тув ле̄ӈктапавес. О̄ста тот лэ̄ватахты, та харты. Аквматэ̄рт та лэ̄гматас, о̄ста э̄лаль хартанты. Тох хартыматэ, но̄ӈхаль сунсы: тахурип со̄скве, ӯй э̄лыпа̄лт со̄с косамтаӈкве. Ам ань карум вос ро̄хнувлум: Каро̄в! Пуна ю̄хрых, пуна ю̄хрых! Щиньхпиньх ла̄пщих! Я, тыг та ла̄пщатас каре. – Я, хумле? – ла̄ви. – Тахурип ӯй э̄лыпа̄лт косамтан хурип со̄скве, хусатылме̄н! Ань ощща ю̄нтуп со̄сэ̄нн тув та ле̄ӈктыгпавес! Каре та тахас, о̄ста хультыс, о̄ста лэ̄ватахты, аквматэ̄ртн та лэ̄гматас. Э̄лаль о̄луӈкв ла̄вим ут хотум хунь е̄мты! О̄ста хартанты. Аквматэ̄рт ня̄рн нэ̄глыс, татем морхыӈ! Пупакве тот морых ва̄ты, лакватахтыглы. Тот утыматэ, ань ощща урыӈ ю̄нтуп яныг морах тинсыс, та тӣвырн тув щалтапас, ань пупакве̄н ювва̄тасавес. Воссыг ма̄ныр ӯрум хум! Пищпище хольт та щалтсы. Пупатэ ка̄тнпаттыстэ конква̄лапас. Ам ань карум вос ро̄хнувлум: -Каро̄в! Пуна ю̄хрых, пуна ю̄хрых! Щиньхпиных ла̄пщих! Ань каре, я, тыг та ла̄пщатас. Я, сунсэн, мо̄лхо̄тал ат агтэ̄гын, аньсунсэ̄н! Ятэ, та ёнге̄г, та капыртэ̄г тэ̄нттетэ̄н. Яты, ва̄ӈын сунэ̄нн та̄лттапастэ̄н, та хартэ̄г, та хартэ̄г. Ань со̄сэ̄н хусатасы̄г, ха̄ле̄н нуйсы̄г, тарге̄н са̄грысы̄г, колэ̄нн та хартэ̄г. Ёхтысы̄г, ӯе̄н ӯнттысы̄г. Каре са̄ӈквылты, урыӈ ю̄нтпе йӣкви! Урыӈ ю̄нтпе са̄ӈквылтаӈкве паты, каре йӣкви. Тот та кае̄г, аман ань иӈ та йӣкве̄г. Ань та хӯлэ̄г, ань та щуне̄г мат хомлыг! Утьща ӯй ка̄тнпаттысы̄г! Нас ощща ю̄нтуп ё̄ре тамле та! 1060 2013.09.20. Александр ВЬЮТКИН Ща̄нь ла̄тӈыл ня̄врамыт ханищтан нэ̄. Хурит ма̄ньщи нэ̄ Клавдия Семёновна Плеханова по̄слым о̄лы. Тав Октябрьский район Лӯи Ня̄рихумит па̄вылт колта̄глэ ёт о̄лы. Клавдия Семёновна Алы Ня̄рихумит па̄вылт самын патыс. Ты па̄выл урыл Клавдия Семёновна потырты: «Та Алы Ня̄рихумит па̄выл ураме̄т щар о̄влэ̄т тув хотты порат саран ма̄хмыт о̄лмыгта̄лсыт. Хумус ты урыл ва̄ве? Пе̄с порат сараныт тит накпа лю̄лит колыл о̄лсыт. Кол ёлы наке̄т ӯйхуланыл о̄щсаныл. Нумын ос та̄нти о̄лсыт. Та па̄вылт ань мус иӈ акв ёллоньхатам кол ёр по̄хе хультыс. Тувыл ущ са̄т Яркин пыг тув о̄лмыгтасыт. Яркин о̄парищ наманыл щирыл тан Ка̄рай рӯт ма̄хмыг о̄лэ̄гыт». Клавдия Семёновна оматэ ос рӯтанэ урыл а̄нумн потыртас. Оматэ наме Александра Кирилловна Яркина о̄лыс. Тав 1914 та̄лт самын патыс. Александра Кирилловна хӯрум та̄л яныт порат корь а̄гмыл е̄мталас. Та а̄гм паттат самаге посталыг е̄мтсы̄г. Мощ ка̄салан самаге̄тыл тав юн о̄лнэ рӯпата пуссын ва̄рыс. Та коныпал хӯл алыщлым ос пил ва̄тым ма̄хманэ ёт яласас. Хо̄тал сыс уча ве̄тра пил ва̄туӈкв ве̄рмыс. Ма̄ньлатыг о̄лме порат Александра Кирилловна самаге пусмалтаӈкв ве̄рмувесы̄г кос, тав матрыг такви ат ка̄сащас. Э̄ква са̄р о̄йкатэ Камратка па̄вылныл о̄лыс, наме Семён Адин. Аквъёт о̄лыматэ̄н о̄йкатэ а̄тимыг е̄мтыс. Нэ̄кве ма̄нь ня̄враманэ ёт такви па̄влэ̄н о̄луӈкв ва̄нтлыс. Клавдия Семёновна оматэ акв увщи, тит каӈк ос акв а̄пщи о̄ньщас. Увщитэ Матрёна, тав ёлыпал каӈке наме Николай. Тав Финский хо̄нт порат тот пулемётчикыг хо̄нтлас. Хо̄нтыт пистыглавес. Военный госпиталит пусмалтахтаме юипа̄лт Ха̄льӯсн пусмалтахтуӈкве те̄тыглавес. Пуссын кос ёмас такви о̄лнэ ма̄тэ̄т, аквматэ̄ртын тав сепсис а̄гмыл е̄мтыс. Ты лю̄ль а̄гмын хотталь та тотвес. Титыт каӈке наме Григорий. Тав яныг хо̄нт э̄лыпа̄лт Ханты-Мансийск ӯсын ханищтахтуӈкв те̄тыглавес. Ӯс мус минаманылт лувыӈ сунаныл я̄ӈк ёлыпа̄лн ра̄гматыглас. Пыгрищ по̄льтахтас ос та юипа̄лт а̄гмыл е̄мтыс, тувыл нэ̄мат хоса ат о̄лыс. Питипатта а̄пщитэ наме Борис. Яныг хо̄нт о̄лум порат 1944 та̄лт Борис нёлоловхуйплов та̄лэ туп то̄влыс, та̄ра хо̄нтлын ма̄н вуйвес. Тав лусытам ма̄тэ̄т онтоловхуйплов ма̄ньщи хум о̄лсыт. Та̄н халанылт Борис рущ ла̄тӈыл такте̄т потыртас. Хо̄нт юипа̄лт Кульпас па̄вылныл аквъёт хо̄нтлум акв юрт хумитэ ёт туп ва̄щиньтахтас. Клавдия Семёновна ань ня̄врамыт школат ма̄ньщи ла̄тыӈ ос ма̄ янытыл о̄лнэ я̄т, тӯрыт, нё̄рыт ос ща̄рщит ханищтан нэ̄г рӯпиты. Та коныпал тав округ янытыл ня̄врамыт ща̄нь ла̄тӈыл ханищтан ма̄хум халт аквписыг касы. Ты касыланыл Ханты-Мансийск ӯст ва̄рыглаве. Клавдия Семёновна ва̄тихал но̄хпатыглы. Тамле ёмас ка̄ркам хо̄тпа янытлаӈкв ос ӯргалаӈкв э̄ри. Таима̄гсыл Клавдия Семёновнан ам са̄в щуньпаща ла̄тыӈ те̄тэ̄гум. На̄й-О̄тыранылн ще̄мьятэ вос ӯргалаве, са̄в та̄л пуста̄гыл вос о̄лы. 1060 2013.09.20. Тамара МЕРОВА Э̄рнэ нэ̄пакыт акв колт ва̄равет. Округув янытыл та̄л сыс «Многофункциональный центр Югры» нампа колыт рӯпитэ̄гыт. Мо̄т щирыл та̄н МФЦ Югры хансавет. Тот ма̄хум са̄всыр справканыл, э̄рнэ нэ̄паканыл са̄в ма̄ныл акванатуӈкве нё̄тавет. Ханты-Мансийскат ты колыт рӯпитан кӯщай Александр Сучков ла̄выс: «Ань та̄л сыс ма̄н палтув хус со̄тыра са̄вит э̄лумхо̄лас та̄нки тэ̄ланыл ма̄гыс нё̄тмил во̄вуӈкве ёхталасыт. Ма̄хум сака са̄в э̄рнэ нэ̄паканыл Россия янытыл киссанӯв. Ты ка̄сыӈ хо̄тпа хо̄т о̄лыс, хоты ма̄ныл тыг ёхтыс, ма̄н ищхӣпыӈ утыт хосыт тув ла̄тыӈ ке̄тыглэ̄в ос ювле пищмал хансаве̄в. Ма̄н палтув янгыщ нё̄тмил ва̄рнэ ма̄гыс, миграция ос налог службаныл сыресыр э̄рнэ нэ̄пакыт ва̄руӈкве ёхталэ̄гыт. Ань тамле нэ̄пакыт пуссын мӯсхалыг щё̄питан ма̄гыс, ма̄н са̄всыр ӯсыӈ колыт ёт аквъёт рӯпитан щирыл потыртахтасув. Тувыл хоты ӯст, хоты колыт ёт ма̄н рӯпитаӈкве ве̄рме̄в, на̄н на̄нки ищхӣпыӈ ут хосыт: http: //mfchmao. ru. ты урыл ловиньтэ̄н. Манос 8-800-101-0001 телефон хосыт ма̄н ётув потыртаӈкве ве̄рмегы̄н. Пуссын тамле тэ̄лат ма̄гыс на̄нан олн ойтуӈкве ат э̄ри». О̄с акв тамле МФЦ колыт Мегион, Нижневартовск, Нефтеюганск, Нягань, Пыть-Ях, Сургут, Урай, Югорск ӯсытыт ос Ха̄льӯст рӯпитэ̄гыт. 1060 2013.09.20. Людмила ТЕТКИНА Тот ма̄к тэ̄лат урыл хансым о̄лы. Округувт этнотуризм щирыл рӯпитан ма̄хум грантолн ма̄гсыл та̄нки нэ̄паканыл ке̄туӈкве ве̄рмияныл. Ань са̄в предприятият, община мӯй хо̄тпат Нё̄рн ялуӈкве, хӯл алыщлаӈкве, во̄раяӈкве ос во̄рт о̄лнэ соссаӈ ма̄хум палт мӯйлуӈкве во̄вияныл. Ты хосыт са̄в ма̄хум рӯпитаӈкве, олн сэ̄луӈкве ань ка̄саще̄гыт. Ос та̄нки проектаныл Ханты-Мансийск ӯсн касылн ке̄тыглыяныл. Тувыл то̄ват но̄хпатуӈкве ат ве̄рме̄гыт, нэ̄паканыл мӯсхалыг ос э̄рнэ щирыл ва̄руӈкве ат ха̄сэ̄гыт. Природный ресурс департамент сборникнэ̄пакыт та̄ратас. Тот са̄в э̄рнэ тэ̄ла урыл ловиньтаӈкве ро̄ви. Са̄всыр резюменэ̄пак, бизнеспланыт, финансовый план ос са̄в мо̄т нэ̄пакыт хумус ёмащакв ва̄руӈкве э̄ри – тот пуссын хансым о̄лэ̄гыт. Ка̄сыӈ хо̄тпа ты нэ̄пак хосыт ханищтахтуӈкве ве̄рми. 1060 2013.09.20. Людмила ТЕТКИНА Пе̄риян хо̄тал о̄лыс. Ты э̄тпос 8 щислат Россия янытыл пе̄риян хо̄тал о̄лыс. Ма̄н округувт то̄ва ӯсытт ос па̄влытт ма̄хум миркол кӯщаит ос депутатхо̄тпат пе̄риясыт. Округувт избирательный комиссият рӯпитан кӯщаит ля̄ххал тотнэ ма̄хум ёт хо̄нтхатыгласыт ос ты ва̄рмаль урыл потыртасыт. Югра янытыл 688 избирательный участок о̄лы. Ты э̄тпос 8 щислат 186 пе̄риян кол рӯпитасыт, 266 со̄тыра э̄лумхо̄лас нэ̄пак та̄ратаӈкве тот ве̄рмысыт. Тот о̄лнэ мир 50 йильпи миркол кӯщай ос 719 депутатхо̄тпа пе̄риясыт. Щар са̄внув э̄лумхо̄лас Белоярский, Нефтеюганский ос Ханты-Мансийский районытыт ка̄тпос пинсыт. Ос сака мощща ма̄хум Сургутский ос Нижневартовский районыгт избирательный участкан ёхталасыт. Ты ва̄рмаль урыл ма̄хум ул вос ёрувласыт, округувт ань пе̄риян участкат мирн ва̄нэ ма̄хум намыл пинавет. Округувт 14 тамле кол ань о̄лы. Ха̄льӯс район Восыӈтӯр па̄вылт избирательный участок Юван Шесталов намыл намаявес. Андрей Павкин, округ избирательный комиссия кӯщай хум, ла̄вме щирыл ма̄хум миркол кӯщаит ос депутатхо̄тпат пе̄рияӈкве ще̄мьяӈ та̄гыл ёхталасыт. Кондинский район Междуреченский па̄вылт Татьяна ос Владислав Ульяновыг та хо̄тал пӯри ва̄рсы̄г ос ка̄тпос пинуӈкве пуссын мӯй ма̄хманэ̄н во̄всы̄г. Ха̄льӯст Вертковыг э̄кваго̄йкаг хо̄т ня̄враманэ̄н ёт ӯс миркол кӯщай ос депутатыт пе̄рияӈкве ёхталасы̄г. Ха̄льӯст Кирилл Егорович Семяшкин щар яныг о̄йка наблюдателиг рӯпитас. Тав 82 та̄лэ то̄влыс, «Труженик тыла» нам ос ма̄гылн та̄гатан са̄всыр по̄сыт о̄ньщи. Варъёган па̄вылт 90 та̄л яныт э̄ква Акиния Соболевна Казамкина нэ̄пак та̄ратаӈкве ёхталас. Округувт пе̄риян хо̄тал о̄лум порат 48% арыгкем ма̄хум та̄нки кандидатаныл ма̄гсыл хасхатуӈкве ёхталасыт. Ксения Дмитриева, округ избирательный комиссият рӯпитан нэ̄, ла̄выс: «Сӯкыр э̄тпос 8 хо̄талэ̄т йильпииг пе̄риим 50 миркол кӯщаит халт 44 хо̄тпа «Единый Россия» нампа партияныл о̄лэ̄гыт, хӯрум хо̄тпа КПРФ хасхатым о̄лэ̄гыт, акв хо̄тпа ЛДПР рӯпиты ос «самовыдвиженцыг» ла̄внэ щирыл кит хо̄тпаг пе̄риявесы̄г. Ты коныпал ма̄хум 719 депутат пе̄риясыт. Та̄н пуссын ӯсыӈ, районныӈ манос па̄влыӈ Думат депутатыг рӯпитаӈкве тах патэ̄гыт». 1060 2013.09.20. Александр ВЬЮТКИН Лё̄ӈхыт ӯргалахтым о̄лэ̄н. Ка̄сыӈ таквс акв порат са̄в ма̄нь ня̄врамыт о̄выл щёс оманылн, а̄тянылн ханищтахтын колытын ва̄нттавет. Ня̄врамын лё̄ӈхыт матыр ва̄нэ урыл ёмщакв потыртаӈкв э̄ри. Тав таквирот матыр ёмас тэ̄ла ва̄рнэ̄тэ ма̄гсыл на̄н таве э̄рнэ пормасыл мӯйлуптэлы̄н. Ханищтахтын колн миннэ ня̄врам ма̄гсыл щар ёмас мӯйлупса, таи а̄лпыл са̄йкатан щё̄с, тав будильникыг ла̄ваве. Таве̄н мӯйлуптым щё̄с такви ӯнттуӈкве вос ха̄сытэ, о̄с ханищтэлы̄н. Омат, а̄тят, ня̄врамын ва̄нэ титыт ва̄рмаль, таи тав ханищтахтын колэ мус миннэ лё̄ӈхе ёмщакв вос ва̄гтэ. Ня̄врамын ёт ловмантем щёс та лё̄ӈхыл э̄лаюв ялэ̄н. Лё̄ӈхыт ӯлтта миннэ ма̄т ёмщакв потыртэлы̄н. Хоты нупыл, хунь э̄ри сунсуӈкв ос хоты порат лё̄ӈх ӯлтта ё̄мантаӈкв ро̄ви. На̄нти та урыл ханищтанэ̄н коныпал, ты урыл школат о̄с потыртавет. 1060 2013.09.20. Александр ВЬЮТКИН Яныг вит ва̄рыс. Сӯкыр э̄тпос титхуйплов хо̄талэ̄т Ханты-Мансийск ӯст журналистыт нупыл потыртан ма̄гсыл тит кӯщаиг ёхталасы̄г. Сергей Малый, округ янытыл мир ӯргалан департаментыт ва̄ӈын кӯщайиг о̄лы ос Людмила Низамова, тав мирн нё̄тмил ва̄рнэ департаментыт ва̄ӈын кӯщаиг рӯпиты. Тэ̄н Дальний Восток ма̄т яныг вит ва̄рум урыл потыртасы̄г. О̄влэ̄т Сергей Малый коланыл а̄марим ма̄хум ма̄гсыл ва̄рнэ нё̄тмил урыл потыртас. Тав ла̄выс: «О̄выл яныг вит хунь ёхтыс, ма̄н округ мирколувт та̄ра сапра̄ни ва̄рыгласӯв. Та юипа̄лт Благовещенск ӯст э̄рнэ пормасыт хӯрум хо̄тал сыс атсӯв ос Ханты-Мансийск ӯсныл та тотве̄сыт. Аквъёт пуссын 8 млн. 600 со̄тыра солко̄ви са̄вит са̄всыр пормас тув ёвтсӯв. Ань титыт яныг товлыӈха̄п Сургут ӯсныл Хабаровск ӯсн те̄туӈкв щё̄питэ̄в. Тув те̄тнэ пормасанув 12 тонна 500 кила та̄рвитын ёхты. Те̄тнэ пормасыт халт па̄лтыглахтын кӯрыт, на̄йпос ва̄рнэ генераторыт, вит хартнэ помпат ос ре̄гыӈ маснутыл те̄тыянӯв. Сургут ӯст товлыӈха̄пыт тыламлан ма̄ по̄хат пормас, тэ̄нут атнэ кол щё̄питавес. Пормасыт пирмайтан кол э̄тэхо̄талэ, ӯщлахтын хо̄талыт та̄л рӯпиты. Округувт рӯпитан «Центроспас Югория» ма̄хманув щё̄питахтым о̄лэ̄гыт, э̄рмыглэ̄гыт те, тув миннэ кастыл акв щё̄с сыс атапахтэ̄гыт. Ма̄навн нё̄тмил ва̄рнэ̄ныл ма̄гсыл ам Ханты-Мансийск ос Сургут ӯсыгт товлыӈха̄пыт тыламлан колагувт рӯпитан хо̄тпатын яныг пӯмащипа ла̄тыӈ те̄тэ̄гум». Хум юипа̄лт Людмила Низамова потыртас: «Сӯкыр э̄тпос хо̄тыт хо̄талныл округув янытыл маснут ос тэ̄нут пирмайтан налыман нупыл ат кол рӯпитэ̄гыт. Тот сӯкыр э̄тпос оигпан мус тэ̄нут ос пормас тах пирмайтаве. Хотьют ка̄сащи, ре̄гыӈ маснут ос хосанув о̄щнэ тэ̄нут тув тотэ̄н. Ты коныпал ма̄хум олн тув те̄туӈкв ве̄рме̄гыт. Олн те̄туӈкве ка̄сащан хо̄тпат ты урыл почта колт вос титыглахтэ̄гыт. Тот на̄н ёмщакв хӯлтаве̄н. Хо̄т хо̄тал сыс округув янытыл 4 млн. со̄тыра солко̄ви тув те̄твес. Ты ма̄гсыл ам яныг пӯмащипа ма̄хманувн ла̄ве̄гум». Со̄ль, ма̄хум хотьют ве̄рми ос ка̄сащи, пормасыт пирмайтан ма̄н ялэ̄н, накын патум мир матарыл нё̄тэ̄н. Ханты-Мансийскыт тамле кол адресэ: Энгельса ӯсхулы, 45 кол, блок А. Телефон тот 8 (3467) 301-494. Ам мощ мо̄лалнув тув ялсум, ащирмат о̄щнэ маснут тотсум. Олн те̄туӈкве ты утыт хосыт ро̄ви: ИНН 2801123618, КПП 280101001, получатель: УФК по Амурской области (минфин АО л/с 04232003600), Р/С 40101810000000010003, Банк: ГРКЦ ГУ БАНКА РОССИИ ПО АМУРСКОЙ ОБЛАСТИ г. Благовещенск БИК 041012001, ОКАТО 10401000000, КБК 015 2 07 02030 02 0000 180. 1060 2013.09.20. Людмила ТЕТКИНА Та̄н яныг ӯсн суссылтап тотыгласыт. Мощ мо̄лалнув Челябинск ӯст суссылтап ва̄рыглавес. Уральский округныл тотым са̄всыр тэ̄нут акв ма̄т ёвтуӈкве ро̄выс. Ма̄н округувныл 21 предприятият рӯпитан ма̄хум тув ялсыт. Та̄н нё̄выль, хӯл, щаквит, пил, ла̄хс ос са̄в мо̄т тэ̄нут суссылтапын тотыгласыт. Та выставкат щар ма̄к ёмас солвалыӈ хӯл, атыӈ мисво̄й ос мо̄т тэ̄нут касыл щирыл пе̄рияве̄сыт. Округувныл ялум ма̄хум «Высокое качество продукции» ос «Новый вид продукции» номинацият кассыт. – Ха̄льӯст ОАО «Сибирская рыба» нампа хӯл щё̄питан предприятие солвалыӈ нялк ма̄гсыл дипломыл ос ме̄талил майвес. – Ханты-Мансийск ӯст о̄лнэ хӯл щё̄питан комбинат о̄с солвалыӈ мохсаӈ хӯл ма̄гсыл янытлавес. – Ханты-Мансийск ӯст «Лесосервисная компания «Югралесхоз» ос са̄лы нё̄влил ва̄рнэ тэ̄нутаныл тот суссылтасыт. Тыима̄гсыл та̄н ос дипломыл майве̄сыт. – Ханты-Мансийский районт «Обь» общинат рӯпитан соссаӈ ма̄хум пе̄с йис ва̄рмалит э̄лаль тотнэ̄ныл ма̄гсыл янытлан нэ̄пакыл майве̄сыт. – Ханты-Мансийский райот рӯпитан «Колмадай» община ты суссылтапын о̄с ялсыт, тувыл дипломнэ̄пак юв тотсыт. – Югорск ӯст рӯпитан ОАО «Югорское» предприятие щаквит ма̄гсыл о̄с янытлавес. Тот дипломнэ̄пакыл, ме̄талил майвес. – Сургут ӯст рӯпитан ООО «Обьрегион» нампа птицефабрика ань о̄с дипломнэ̄пак, ме̄таль о̄ньщи. Та ӯсыт ёмас мӯӈит ос атыӈ щищкурек нё̄выль тыналаве. – Белоярский ӯст «Лагуна» хӯл щё̄питан кол ос солвалтым, па̄йтым хӯл суссылтапын тотыглас. Хӯл щё̄питан кол тот дипломнэ̄пакыл ос ме̄талил майвес. 1060 2013.09.20. Тамара МЕРОВА Са̄лыянэ о̄щнэ хум. Виталий Казамкин ёт ме̄н Варъёган па̄вылт ва̄йхатсуме̄н. Тав тув са̄лыл яласан касылын ёхталас. Ты па̄выл по̄хат ща̄нягеа̄щаге во̄рт са̄лы янмалтым акваг о̄лсы̄г, Виталий тот самын патыс. Каснэ э̄лыпа̄лт хум са̄лыянэ по̄хат лю̄лим ам ётум мощ потыртас: – Ам са̄лыл яласан касылын хӯрмиттыг манос нилыттыг ёхтысум. Мо̄лты та̄л Аган па̄вылн касуӈкве ялсӯв, ты та̄лт тахольт Варъёганыт ва̄раве. А̄щум Егор Андреевич ос ща̄нюм Екатерина Константиновна ань о̄с тыт о̄лэ̄г. Тэ̄н хӯл ос пил тыналэ̄г, тащирыл мощ олн сэ̄лэ̄в. Ме̄н Нэля э̄кваме̄нтыл касуӈкве тах патыме̄н. Тувыл Варъёгант ня̄врамагме̄н ханищтахтэ̄г ос тэ̄н ётэ̄н ва̄щиньтахтыме̄н. Максим пыгме̄н лов классыт ханищтахты, Виолетта а̄гиме̄н нёлолов классыт. Амки о̄с ты па̄вылт школа а̄стласум. Антон ма̄нь пыгме̄н ёт тотыглылме̄н, тав садикн яланты. – Колта̄глыл акваг во̄рт манос хотты мо̄т ма̄т о̄лэ̄гын? – Ма̄н во̄рт о̄лнэ ма̄в Варъёган па̄вылныл ва̄т ве̄рыстат о̄лы. Ань та колувн мӯйлын ма̄хум ёхталэ̄гыт. Мо̄лал ам этнотуризм щирыл проект щё̄пита̄лсум ос таима̄гыс грантолныл майвесӯв. Ты проект ам Нижневартовскат «Спутник» нампа колт рӯпитан хо̄тпат ёт ва̄рилум. Та̄н соссаӈ ма̄хум о̄лупса пӯмщалаӈкве са̄всыр туристыт ам стойбищамн тотыглыяныл. Ты э̄лыпа̄л пуссын Варъёганыт музейн щалтсэ̄гыт, тот соссаӈ мир культура о̄вылтыт матыра̄ти потыртаве. Ос тувыл ущ ам палтум тотавет. Ань Радужный, Нижневартовск ӯсыгт о̄лнэ ма̄хум ос мо̄т хо̄н ма̄ныл ёхталам хо̄тпат мӯйлысыт. Та̄н туп хо̄тал па̄лыт мӯйлэ̄гыт, э̄типа̄лаг ювле минэ̄гыт. Тот о̄лнэ коланув, сӯмъяхыт, пормасанув сунсыглэ̄гыт, ханты маснутыл масхатыглэ̄гыт ос по̄слахтэ̄гыт. Тувыл та̄нанылн са̄лыӈ суныл яласаӈкве сака мӯсты. Ма̄н пе̄с щирыл хӯл манос нё̄выль исмитыл па̄йтыянув, тувыл по̄лям ня̄рхӯлыл о̄с тыттыянӯв. Хо̄талыӈ хо̄талт мӯй хо̄тпат та̄нки хӯл алыщлаӈкве ве̄рме̄гыт. Хӯл камкал алыщлаӈкве ханищтыянӯв. Этнотуризмыл са̄в олн ат кос сэ̄лэ̄в, ос ма̄н, ханты ма̄хум, хумус о̄лэ̄в, таил пӯмщалахтэ̄гыт. – Ос на̄н ма̄во̄й но̄хвинэ хо̄тпатын хотмус нё̄таве̄н ман а̄ти? – Ма̄н договорнэ̄пакыт щирыл э̄тпос сыс акв э̄лумхо̄лас ма̄гыс хо̄тса̄т солко̄вил ойтаве̄в. Тыи ман олн? Ня̄враманув аквты тыттуӈкве, мастуӈкве э̄ре̄гыт. Са̄ртын ам ма̄во̄й но̄хвинэ ма̄т электросварщикыг рӯпитасум, ос номтум савалас – са̄лы о̄ньщуӈкве тахсум. Таима̄гыс этнотуризм рӯпатан вуйхатасум, ты тэ̄лам пӯмыщ кос, туп са̄всыр налоголныт ойтуӈкве ос нэ̄пакыт ювле хансуӈкве э̄ри. Тувыл 2012 та̄лт туи па̄сныл ам во̄рт о̄лнэ ма̄мт мӯй хо̄тпат ат мӯйлысыт. Та ляпат геофизикыт рӯпитасыт, са̄лыянув ма̄шина суйил пилэ̄гыт ос ла̄ккваха̄йтэ̄гыт. Са̄лы тэ̄пыт пулиг ул вос ялыглаве̄сыт ос на̄йин ул вос пе̄ламлаве̄сыт, ма̄нки акваг ӯргаласанӯв. Тох ат ке ӯргаласанӯв – вуньщалыг патнувӯв. На̄й харыгтан утыт торыӈ о̄с ат о̄щсӯв. Районный кӯщаитн нё̄тмил ва̄рнэ ма̄гсыл китыгласанум, нэ̄матыр ат мисыт. Ла̄ве̄гыт: «На̄н ма̄во̄й но̄хвинэ ма̄ныл олныл нё̄таве̄н, на̄нки ёвтэ̄н». Ма̄н договорнэ̄паканувт тамле тэ̄лат о̄вылтыт щар акв ла̄тыӈ хансым ат о̄лы. Тувыл хо̄тса̄т солко̄ви манарыг то̄вылхаты. Ма̄навн э̄рнэ щирыл мо̄т ла̄тыӈ тув хансуӈкве о̄с ат ка̄саще̄гыт, тох та о̄лэ̄в. Ань са̄лыл яласан каснэ ва̄рмалит о̄вылтыт таи ла̄ве̄гум, тамле касылыт ка̄сыӈ та̄л вос ва̄рыглавет. Ӯсытыт о̄лнэ ма̄хумн тыи пӯмыщ, ма̄нки са̄лы о̄щнэ ма̄хманув о̄с тыг акванатхатыглэ̄гыт. Хӯл алыщлан ос во̄раян хо̄тпат о̄с тыт касэ̄гыт, тувыл ма̄ньлат а̄гитпыгыт та̄нки халанылт ва̄йхатуӈкве патэ̄гыт. Тыи ёмас. 1060 2013.09.20. Тамара МЕРОВА Хосат та̄гыл Ялъӯсн ат ёхталас. Ха̄льӯс район Ялъӯс на̄лми ва̄тан о̄с акв моторха̄п па̄гпӯхтыс. Ма̄хум йильпи памятник сунсуӈкве тув ёхтысыт. Сунсэ̄гум, ха̄пныл хорамыӈ супыл масхатым акв ма̄ньщи э̄ква па̄гква̄луӈкве нё̄твес. А̄врах ва̄тат лю̄льнэ нэ̄ хо̄тпат потыр суяныл хӯнтамласлум: «Яа, Нюра ёхтыс? Со̄ль, тав ты о̄лнэ̄тэ! » Та сыс э̄ква на̄лми ва̄таныл па̄гле а̄ӈкватас, мощ сунсыглахтас ос сэ̄й хосыт па̄гле та ё̄мантас. Тыи Анна Николаевна Гындыбина о̄лум. Тав Ялъӯс па̄вылт самын патыс, тот яныгмас. Ос хум ва̄рме юипа̄лт Кимкъясӯй па̄вылн тотвес, та па̄сныл тав Ялъӯсн ат ёхталас. «Па̄вылкем тыттыя, щар ня̄ртпум оспаг е̄мтум! Ам хо̄тпан та̄л тыг ат ёхталасум. Ме̄н тумпуме̄н, хо̄т хасап нэ̄гыгласме̄н, та янытаг та е̄мтум. Хориме̄н тыи? » э̄ква ма̄ньта̄гыл о̄ньщнэ Надя юрта̄гитэ китыгластэ. Надежда Константиновна Захарова ла̄выс: «Нюраме̄нтыл ма̄нь таргыт ёлыпа̄лт хасап нэ̄гиме̄н, ва̄тихал тот ӯнлахо̄лсуме̄н. Хасап кӣвырт тав маньнэ нё̄тнэ хансаӈ суп ос хорамыӈ то̄рыт ю̄нтым ӯнлыс, пӯри ва̄руӈкве щё̄питахтас». Аннэ э̄ква мовалас, пуӈке хӯтувьяптастэ: «Аа, ам то̄нт хорамыӈ а̄кань о̄с ю̄нтсум». Э̄кваг ма̄ньпора та̄ланэ̄н номылматыглым, хуньт тэ̄нки о̄лум ма̄тэ̄нт ё̄мыгтасы̄г, ань ос туп хара ма̄ хультыс. Тувыл хоты кол, хоты ще̄мья тот о̄лсыт, тэ̄н таи потыртасы̄г. «Манах кол ос манса̄вит ма̄хумаквет тыт о̄лсыкет. Ка̄сыӈ колта̄гыл ня̄врамыл та̄глэ̄кв. Ма̄н пуссын тыт ха̄йтыгтасӯв, ёнгасасӯв, йӣвын ха̄ӈхыгласӯв, – Анна Николаевна потырты, тувыл акв ма̄т ёллю̄люмтас, О̄пам кол ёре тох та пумын яныгмима. Ма̄н колта̄глувт ат пыг, ам амккем а̄гирищ о̄лсум. Ня̄врамыг о̄лмувт ня̄р ла̄глыл пуссын тыт ха̄йтыгтасӯв, мувлахи сэ̄й о̄лыс. Ань сунсэ̄н, ты ма̄в пумын, нирщахлын лапяныгмима. О̄пам наме Егор Петрович Сангилев о̄лыс, щаще̄квам Матрёна Николаевна Нахрачёва. Тэ̄н мисытлувыт о̄щсы̄г. Хо̄нтлан ва̄рмаль е̄мтум порат Ёхор о̄пам хӯл алыщлаӈкве пиркатирыг паттувес. Анана, то̄нт 10-13 та̄л яныт ня̄врамыт, пуссын хӯл алыщлаӈкве тотыглаве̄сыт. Ам ётыл о̄памн о̄с ёттотыглаӈкве патве̄сум. Сака та̄рвит пора о̄лыс. Са̄в хӯл алыщласӯв, пувнэ хӯланув хо̄нтлан ма̄хманув палт ке̄тыглаве̄сыт. Акв щёс толыг хартым ам ква̄лгыӈ та̄гыл витн хасумтаве̄сум. О̄пам ка̄саластэ, ро̄ӈхувлас: «А̄гикве, ӯрхатэ̄н сар, ӯрхатэ̄н! » А̄нум пувумтаӈкве а̄лымас. Ма̄н иӈ ня̄врамыг о̄лсув, юв ёхтэ̄в, тэ̄гув ос кон ха̄йтыгтаӈкве та атхатэ̄в. Э̄типа̄лаг мус та ёнгысӯв, рӯпитан та̄рвитув хот та ёрувлылӯв. Ос а̄лпыл о̄памн но̄хса̄йкатавем, о̄ста хӯл алыщлаӈкве минэ̄в. Омам Евдокия Андреевна а̄ги о̄парищ наме Явлина о̄лыс, тав А̄нъя па̄вылныл о̄лум нэ̄. А̄тям Николай Егорович Сангилев армиян тотвес, ам ат та̄лум то̄влыс. То̄нт, номилум, ам маткем та лю̄щсум. Хум хо̄тпат на̄иӈхапын та̄лттуве̄сыт, Ха̄льӯсн тотве̄сыт, ос тувыл хо̄нтлуӈкве ке̄тве̄сыт. Та па̄сныл а̄тям воссыг ат та ва̄щиньтаслум. Ань Ялъӯс о̄лнэ ма̄ньщи ма̄ке̄вт такем ёмас ва̄рмаль тыт ва̄рсыт. Тыг ёхтысум, мощ ё̄мыгтасум, номтум ёмас. Ань тай тыг ва̄тихал вос тотыглавем тах! » э̄ква мовалас. Ма̄ньщи мирув иӈ са̄в нот сыс пе̄с йис ма̄хманэ вос ка̄стыянэ ос номиянэ. А̄що̄йкануво̄панув номуӈкве патыянув ке, тащирыл ма̄н та̄кыг э̄лаль о̄лэ̄в. 1060 2013.09.20. Александр ВЬЮТКИН Соссаӈ мир культура кол ат та̄лэ то̄влыс. Сӯкыр э̄тпос атыт хо̄талт Нягань ӯст рӯпитан соссаӈ мир культура кол ты таквс ат та̄лэ то̄влыс. Тыи янытлан кастыл са̄в ма̄хум ёхталасыт. Кол кӯщай нэ̄ наме Дина Фалиевна Батришина. Ты кол ханты ос ма̄ньщи ня̄врамыт ёт рӯпитан ма̄гсыл ӯнттувес. Ня̄врамыт тот ра̄ктыл а̄ныт пощгуӈкве, йӣвныл матыр ёргуӈкв, сакныл хорамыт хартуӈкв ос са̄сныл са̄всыр хусапсовыт, со̄втыт, па̄йпыт ю̄нтуӈкв ханищтавет. Та̄наныл ханищтан ма̄хум ла̄ве̄гыт: «Щар акваг ёхталан ос ёмщаквег ханищтахтын хо̄тпат, таи ат ос хо̄т та̄л яныт ня̄врамыт. Та̄н ханищтахтын щё̄саныл коныпал намыл иӈ хультуптахтэ̄гыт. Таи ты ёмас, оманылн, а̄тянылн ня̄врамыт ё̄р ва̄гыл юв ат во̄вавет. Ня̄враманыл ма̄щтырлан пормас а̄стлын мус аквъёт ва̄рияныл». Соссаӈ мир культура кол ат та̄лэ то̄влуме кастыл Нягань ӯс кӯщай Александр Рыженков ос тав ва̄ӈын хо̄тпатэ Иван Ямашев ма̄хум янытлаӈкве ёхталасы̄г. Тэ̄н тув ёхтуме̄нт ма̄хум ханты ос ма̄ньщи хорамыӈ супыл масхатасыт. Ханты-Мансийск ӯсныл ос Людмила Алфёрова ёхталас. О̄влэ̄т мӯй ма̄хум соссаӈ мир культура колыл суссылтаве̄сыт. Та юипа̄лт ма̄хум янытлан ва̄рмаль о̄вылтасыт. Пе̄с йис о̄лупса щирыл рӯпитан ма̄хум пӯмащипа ла̄тӈыӈ пищмал ос дипломнэ̄пакыл мӯйлуптаве̄сыт. Ме̄н Владимир Меров ёт та̄н ма̄гсыланыл са̄ӈквылтасме̄н ос йӣквсуме̄н. Тот о̄лнэ то̄ва ма̄хум са̄ӈквылтапыл са̄ӈквылтан та̄н щар нэ̄мхотты порат ат хӯлыгласыт. Та̄н ма̄гсыланыл тыи сака пӯмыщ о̄лыс. Александр Рыженков ма̄хум янытламе юипа̄лт ла̄выс: «На̄н ва̄рнэ рӯпатан ма̄гсыл ам яныг пӯмащипа ла̄тыӈ ла̄ве̄гум. Округув янытыл са̄внув тамле кол о̄лыс те, соссаӈ ня̄врамыт мир халт ат тыпылтахтынувыт. Ань ня̄врамыт са̄выӈпа̄лэ та̄нти мираныл пе̄с о̄лупса ат ва̄ганыл. Ма̄н ӯсувт о̄лнэ ня̄враманувн ты ва̄рмаль сака мӯстыс». Ялпыӈ хо̄тал оигпаме юипа̄лт ма̄хум халанылт хоса потрамасыт ос ла̄кква минуӈкве ат молямласыт. 1060 2013.09.20. Анна АЛГАДЬЕВА Яласан лё̄ӈханув. Туи пора та минас. Ӯщлахтым яласам ма̄хум па̄вланылн ювле ювыт. Хулюмсӯнт, Ня̄хщамво̄ль ос Приполярный па̄влытн миннэ хо̄тпат. Хо̄ӈха ке̄р лё̄ӈх хосыт Советский ӯс та̄ра вертолётыл юв, яныг та̄рвитал та ювыт. Советский ӯсн ёхтэ̄гыт, Ютэйр вертолётн билет ёвтнэ очередин э̄т котиль па̄сныл лю̄люӈкв э̄ри. Хӯрумнила ат щё̄с па̄сныл аэропорт кол а̄висӯнтыт та лю̄лянтэ̄гыт, по̄льлахтэ̄гыт. То̄ват ма̄шинал ёхтэ̄гыт ос э̄т палытыл ма̄шина кӣвырт ӯнлэ̄гыт. Аэропорт нёлолов щё̄ст ущ па̄лыгпӯнсаве, онтолов щё̄ст касса пӯнсаве. Мо̄лты та̄л са̄ртын ювле хасхатуӈкв ро̄выс. Ма̄хум э̄лаль миннэ̄ныл мус та̄ра ювле хасхатэ̄гыт, матпалыт яласэ̄гыт, ювле ёхтэ̄гыт, номсахтуӈкв ат э̄ри, ва̄ганыл тыламлэ̄гыт. Ты тӯя хотьют ля̄втум. Та па̄сныл воссыг нэ̄мхотьют ёл ат хансаве. Хотьют са̄ртын ёхты ос хотьют ка̄тэ хоса тав та тыламлы. Газпром АВИА вертолёт о̄с о̄лы, суббота коныпал, ка̄сыӈ хо̄тал яласы. Хулюмсӯнт мус билет тынэ 7800 солко̄ви, Приполярный мус 11310 солко̄ви. Хо̄ӈха рӯпата па̄лыл ӯщлахтым яласэ̄гыт, лё̄ӈх олнаныл ювле ойтавет, тай тыныӈ рейсыл яласэ̄гыт. Хотьют матыр тэ̄ла мус яласы, хо̄ӈха лё̄ӈх олнанэ ат ойтавет, то̄ва ма̄хум колта̄гыл пуссын – ман пуӈк пе̄лы билет ёвтуӈк. П. Завальный «Тюменьтрансгаз» кӯщаиг о̄лме порат ты урыл тох ла̄выс: «Хотьют ще̄пе лощит а̄ти, тынта̄л вертолётыл вос яласы». Тынта̄л рейс са̄т сыс нила щёс кос яласы, аквторыг хӯрум па̄выл мус мины. Билет олн тынэ Хулюмсӯнт мус 2260 солко̄ви, Ня̄хщамво̄ль мус 2400 солко̄ви, Приполярный мус 3700 солко̄ви. Таквсы са̄в ма̄хум отпусканыл ювле ювыт, билетыл ат то̄влавет, китхӯрум хо̄тал Советский ӯст та ӯнлэ̄гыт. Хотьют сака молямлы, тай воссыг хоталь щалты, тыныӈ билет та ёвты. 1060 2013.09.20. Светлана РОМБАНДЕЕВА Ма̄хманув ма̄щтырласыт. Ты э̄тпос 9-13 хо̄талытт Ханты-Мансийск ӯст ма̄ньщи ос ханты ма̄хум ма̄гыс научнопрактический семинар ва̄рыглавес. Хум хо̄тпат хӯл алыщлан пормасыт ва̄рсыт, нэ̄ хо̄тпат ос са̄сныл са̄всыр пормасыт ю̄нтсыт. Ма̄хманув са̄ттем ма̄щтырласыт. Семинар «Торум Маа» музейт ва̄рыглавес. Аквты хольт ма̄хум о̄выл щёс тот 1999 та̄лт атхатыгласыт. Ювле хультум атхуйплов та̄л сыс ма̄н ма̄щтыр ма̄хманув са̄в рӯпата суссылтасыт – са̄сныл са̄всыр пормасыт, хорамыӈ супыт ю̄нтсыт, са̄пса сагсыт, ма̄ньха̄пыт ва̄рсыт ос са̄в мо̄т щирыл ма̄щтырласыт. То̄ва пормасыт ань йист ат ва̄равет, хотёрувлаве̄сыт. Ос ма̄ньщи ман ханты мир халт пе̄с йис мӯтра ва̄нэ хо̄тпат то̄ва ма̄т иӈ о̄лэ̄гыт. Музейт рӯпитан ма̄хумн та̄н та̄рапаттавет ос ты ӯсн во̄выглавет. Ты порат тот нила ма̄ньщи ос нила ханты ма̄щтыр хо̄тпа рӯпатаныл мирн суссылтасаныл. О̄выл хо̄тал ма̄хум научный докладыт хӯнтлын ма̄гыс яныг библиотекан во̄виньта̄лве̄сыт. Са̄в хо̄тпа о̄лыс учёныит, ма̄щтыр ма̄хум, студентыт, ля̄ххал тотнэ хо̄тпат. То̄ва хо̄тпат Ха̄льӯс, Белоярский, Сургутский районытныл ёхталасыт. Акв яныг учёный э̄ква Елена Геннадьевна Фёдорова Санкт-Петербург ӯсныл ёхталас. Тав исторический наука кандидатыг о̄лы, антропология ос этнография музейт (Кунсткамерат) старший научный сотрудникыг рӯпиты. Ловиньтам потре тох намаим о̄лыс: «Ханты и манси – рыболовы бассейна Оби». Ха̄льӯс район Тэ̄к па̄вылныл ёхталам нэ̄ Галина Михайловна Курганова та урыл потыртас, ань школат ня̄врамыт ханищтахтынэ̄ныл сыс, тав та̄наныл са̄сныл са̄всыр хусапсовыт ва̄руӈкве ханищтыянэ. Галина Михайловна ты коныпал тот география учителиг о̄лы. Никита Калистратович Партанов А̄с ма̄ньщит хӯл алыщлан пормасаныл урыл потыртас. Тав «Торум Маа» музейт научный сотрудникыг рӯпиты. Докладыт янгыщ Ханты-Мансийск ӯст о̄лнэ ма̄хманув, учёныянув та̄н ловиньтасыт. Китыт хо̄тал ма̄хум пуссын «Торум Маа» музеин минасыт. А̄лпыл, лов щё̄с порат, рӯпатаныл та о̄вылтахтас. О̄влэ̄т музей кӯщай Валентина Николаевна Кочетыгова потыртас. Акванатхатам мирн тав са̄в ёмас, сымыӈ ла̄тыӈ ла̄выс, ма̄щтыр ма̄хманув наманыл пуссын ла̄всанэ, та̄н халанылт вос ва̄йхатэ̄гыт. Ты юипа̄лт ма̄хум рӯпитаӈкве, ханищтахтуӈкве та вуйхатасыт. Ка̄сыӈ хо̄тпа маныр ва̄руӈкве таӈхыс, таве̄н ро̄внэ ма̄щтыр хо̄тпатэ палт минас, тав ётэ рӯпитас, матыр пормас ва̄рыс, щаквщис. Аквкит ла̄тыӈ ма̄щтыр ма̄хум урыл хансэ̄гум. О̄влэ̄т ма̄ньщи ма̄хманув наманыл ла̄виянум: ты Анатолий Николаевич Хомяков, хо̄нтаӈ ма̄ньщи, Кондинский район Половинка па̄вылныл ёхталас. О̄йка па̄влэ̄т Учинский историкоэтнографический музей ӯнттыс. Анатолий Николаевич хӯл алыщлан камка ва̄рыс. Камка ва̄рнэ йӣв охса тав юил тотыс, тав ла̄внэ̄тэ щирыл, тыт илттыг хо̄т хо̄нтыгпе̄гыт. Таима̄гыс тав тыг тотум э̄рнэ пормасанэ хосатта̄гыл атсанэ. Са̄глат тыт ёргысанэ, ӯльпа та̄р о̄с тыт щё̄питас. Рудольф Васильевич Меров Ха̄льӯс район Хо̄рыӈпа̄вылныл ёхталас. Тав ос толыг хасыс. Ты э̄лыпа̄лт тав э̄тпостем са̄глат ёргыс, та̄р щё̄питас. Хӯрмит ма̄щтыр хо̄тпав ты Рудольф Васильевич тав а̄гитэ Галина Рудольфовна Кондина. Тав Ханты-Мансийск ӯст о̄лы, ты ма̄ньщи газетавт кӯщаиг рӯпиты. Галина па̄йп ю̄нтыс, та халт ханищтахтын а̄гит, ёхталам нэ̄квет со̄втыт, са̄ныт, ма̄нь па̄йпыт ю̄нтуӈкве ханищтасанэ. Тав ётэ ка̄сыӈ хо̄тал ловмантем хо̄тпа рӯпитас. Анатолий Васильевич Вадичупов о̄с Ханты-Мансийск ӯст о̄лы, «Торум Маа» музейт рӯпиты. Тав са̄сныл витвит ва̄рыс, ма̄хум тав нупылэ суссыт, пӯмщалахтасыт. Ханты ма̄хумныл о̄с нила хо̄тпа ма̄щтырласыт. Ханты-Мансийск ӯст о̄лнэ о̄йка Юрий Григорьевич Кондин овам камка ва̄рыс. Ты камка ва̄рнэ ма̄гыс Рудольф Васильевич са̄глат ёргыс, та̄р щё̄питас. Ос хӯрум нэ̄ хо̄тпат са̄сныл са̄всыр пормасыт ю̄нтсыт ты Галина Михайловна Курганова Ха̄льӯс район Тэ̄к па̄вылныл ёхталас, Жанна Александровна Хохлянкина Нижневартовский район Корлики па̄вылныл о̄лыс ос Зоя Никифоровна Лозямова, Ханты-Мансийск ӯст о̄лнэ э̄ква. Та хо̄талыт сыс ты музейт рӯпитан хум Вячеслав Юрьевич Кондин ос косум ва̄рыс. Тав са̄с ӯльпа та̄рыл акваню̄нтыстэ, косум сӯнтэ ос паттатэ ля̄мйив тэ̄лыщ та̄рыл ю̄нтыстэ. Музейн ёхталам мир ма̄щтыр хо̄тпат ёт са̄всыр пормасыт ва̄рсыт, та̄нанылныл ханищтахтасыт, ма̄щтырласыт. Хотьют ка̄сащас, нэ̄ хо̄тпат ёт са̄сныл матыр ва̄рыс, ю̄нтыс. То̄ва хум хо̄тпат ёрыгхатсыт, камка манос толыг ва̄руӈкве нё̄тсыт, ханищтахтасыт. Юио̄выл хо̄тал, э̄типа̄лаг, ма̄щтыр ма̄хум ос ханищтахтам ма̄хум ва̄рум пормасаныл аквантотсаныл, суссылтасаныл. Ты хо̄талыт сыс та̄н аквъёт насати 47 пормас ва̄рмыт, ма̄щтырламыт. Музей кӯщай В. Н. Кочетыгова ла̄тыӈ ла̄выс, ма̄хум янытласанэ. Валентина Николаевна ла̄внэ̄тэ щирыл, ты пормасыт пуссын та̄нти палтаныл хультуптыяныл, ка̄сыӈ хо̄тпа наме тув хансаве, тав ань музей ма̄гыс яныг тэ̄ла та ва̄рыс. 1060 2013.09.20. Людмила ТЕТКИНА Ма̄ньщиянув Нё̄р тапалн мӯйлуӈкве ялсыт. Коми республикат Ижимский районт саран ма̄хум о̄лнэ ма̄т ка̄сыӈ та̄л ойттур э̄тпост «Луд» нампа ялпыӈ хо̄тал ва̄рыглаве. Ты та̄л ма̄н округувныл ма̄ньщит тув о̄с ялсыт. Валентина Дорофеевна Саратина ты ва̄рмаль урыл ма̄ньщи газета ма̄гсыл потыртас: – Ма̄н хӯрум ма̄ньщи Тамара Семёновна Мезенцева, Марина Сергеевна Вынгилева ос ам, Коми республикан «Луд» ялпыӈ хо̄тал янытлаӈкве минасӯв. Ха̄льӯст о̄лнэ творчество центрыт рӯпитан нэ̄т тув во̄виньта̄лве̄сыт. Та̄н тув ялуӈкве ат ве̄рмысыт. Ма̄н, пенсият о̄лнэ хӯрум э̄ква, тув та минасӯв. Лё̄ӈхув Салехард ӯс та̄ра о̄лыс. Тот Лабытнанги ӯст поездын та̄лсӯв ос станция Ираёль мус йисӯв. Тув ёхтысӯв, матъёмас тот ӯрвесӯв ос Ижма па̄влын тотвесӯв. О̄выл хо̄тал ма̄н, мӯй ма̄хум, Мохча па̄выл сунсуӈкве во̄виньта̄лвесӯв. Ма̄н тай, хӯрум ма̄ньщи э̄кват, ювхультсӯв. Тувыл о̄йка ма̄н ляльтув ма̄шинал мины, ма̄нав китыглы: «На̄н Ханты-Мансийский округныл о̄лэгы̄н? » Ма̄шинан та̄лттувесӯв, Мохча па̄вылн та тотвесӯв. Та па̄выл школат Раиса Сметанина ос Василий Рочев, ёсал ха̄йтнэ спортсменыг, ханищтахтасы̄г. Тот о̄лнэ ма̄хум тыил сака янытлахтэ̄гыт, тэ̄н ханищтахтам школатэ̄н ма̄навн суссылтавес ос экскурсиял ва̄рыглавесӯв. Китыт хо̄тал ялпыӈ хо̄талув та о̄вылтахтас, ма̄н ос тот ма̄ньщи э̄ргыт э̄ргысӯв. Акваме̄н Тамара Семёновна туре а̄гмыӈ о̄лыс, э̄ргуӈкве ат ве̄рмыс. Ме̄н Марина Сергеевнал «Со̄выркве» э̄рыг э̄ргиме̄н, тав ос суссылты, хумус со̄выркве па̄сса саги, хумус па̄сса масы. Ос тувыл «Куккук» китыт э̄рыг э̄ргысме̄н. Ӣтипа̄лаг ма̄хум пуссын акв ма̄н атхатсыт, ма̄н о̄с тув ялсӯв. Пуссын нуй сахил, ма̄ньщи супыл масапахтасӯв. Ма̄нав ка̄саласыт, та пӯмщалахтэ̄гыт, та китыглахтэ̄гыт, хотыл ёхтум мӯй ма̄хум. Та̄н ётаныл маткем та по̄слахтасӯв. Та̄нанылн ос пӯмащ, ма̄ньщит хунь ва̄щиньтасыт. Сараныт та̄нки ос щар пуссын саран маснутыл масхатым о̄лсыт. Ос та̄нки ла̄тӈыл потыртэ̄гыт, э̄рге̄гыт, йӣкве̄гыт. Та̄н саран ла̄тӈыл потыртэ̄гыт, ам ты ла̄тыӈ мощ хӯлылум, торгамтылӯм. «Луд» ялпыӈ хо̄тал урыл са̄всыр финноугорский ма̄т ань ва̄ве. Тув ёхталам мӯй ма̄хум ма̄навн та̄нки о̄лнэ ма̄нылн мӯйлуӈкве во̄всаныл. Ам амкирот номсэ̄гум, лё̄ӈхув ке ойтвес, ма̄н ялнувӯв. Ижма па̄вылн ма̄нки ялсӯв. Ма̄н пенсият о̄лэ̄в, са̄в олн хунь о̄ньще̄в. Спонсорхо̄тпат такос киссӯв, тув звонитасӯв, тыг звонитасӯв, ювле ла̄ввесӯв, са̄ртын ла̄тыӈ ке̄туӈкве э̄рыс. Ма̄нки мувиньтэ̄в, нё̄тнэ ма̄ньщи суп ю̄нтэ̄в э̄лаль тыналэ̄в, тыщир олн сэ̄лэ̄в. Ос ты ё̄рыл э̄лаль о̄лэ̄в. Ижма па̄вылт ма̄н о̄с суссылтап ва̄рыгласӯв, ма̄ньщи пормасыт тот суссылтасӯв. Китгагум ю̄нтум пормасанэ̄н тот тыналасы̄г, ма̄хум такем ёвтсыт. Ам нэ̄матыр ат тыналасум, нас суссылтаӈкве тотыгласум. Ялпыӈ хо̄талт «Хоровод невест» нампа касыл ва̄рыглавес. Тамле пӯмащ кас, а̄гит о̄влэ̄т та̄нки уранылт потыртасыт, тувыл ка̄тыл ва̄рум манос ю̄нтум пормасаныл суссылтасыт. Ос э̄ргысыт, йӣквсыт, хотъют маныр ха̄сы, таи та суссылтас. Ма̄н ётув Салехард ӯсныл ёхталам а̄ги ос касыс, тот китыт места вис. Тох тай ма̄навн ты ялпыӈ хо̄тал сака мӯстыс, ёмащакв мӯйлысӯв, ща̄гтым ювле ёхтысӯв. Ам Валентина Дорофеевна потре ма̄гсыл пӯмащипа ла̄тӈыл ла̄вилум. Ялпыӈ хо̄талт суссылтап ва̄рыглым ос ма̄ньщи э̄ргыт э̄ргим, ма̄ньщи культурав мо̄т мирн суссылтасаныл. Ос Нё̄р тапалт о̄лнэ ма̄хум, хумус мӯйлэ̄гыт, та̄н суссыт, тыи о̄с ёмас тэ̄ла. Ты коныпал ам Валентина Дорофеевна самын патум хо̄талыл янытлылум, ты тӯя тав 60 та̄лэ то̄влыс. Ёмас, сымыӈ ла̄тыӈ ке̄тэ̄гум. То̄рум ёт, О̄тыр ёт, пус ка̄т, пус ла̄гыл вос о̄лы. 1060 2013.09.20. Светлана Динисламова Туи пора. Ты потыр Светлана Динисламова «Мы есть » нампа нэ̄паке̄т рущ ла̄тӈыл хансым о̄лы. Ма̄ньщи ла̄тӈыг М. Т. Двинянинован толмащлавес. Ты хо̄тал ма̄н такем ёмас рӯпитасӯв. Э̄лыннув о̄лнэ пуманув ре̄псӯв, кит яныг са̄при ва̄рсӯв. Тувыл а̄щув минмыгтас “завеска”сунсуӈкв, ма̄нь хӯлыт хотатуӈкв ос порыс саквыт хотпа̄хвтуӈкв, овын хӯлуп онтсыл роплавет. «Завеска» ам хӯлнэм щирыл аквтуп занавеска, тувыл тэ̄н аквхурипаг о̄лэ̄г. Ма̄нь я̄кве ӯлтта ӯсмал хартым о̄лы, кит о̄выл мус, я̄ китпалын, йӣвын ёланэ̄гсалым ӯсма о̄лы. Э̄лыл сунсым ты ищхип сагим то̄рыгтюлиг а̄ӈкватахты. Тове̄рт номсэ̄гум: хотяктапаӈкв тамле ло̄мткве, тувыл ке̄лылыл ке̄ллаӈкв ос колувт тагатаӈкв иснас то̄р пе̄нтсыл, улпыл хорамыӈ о̄лнув. Туп омам ат та̄ратахты тох ва̄руӈкв, таима̄гыс тувыл номсан номтанум ам ётум та о̄лэ̄гыт. А̄щум ха̄пнёлэ на̄лувнарумтамув юипа̄лт, ме̄н омаме̄нтыл минмыгтасме̄н сосыг ва̄туӈкв, хӯрум ма̄нь э̄щанум ра̄ӈнум а̄ращ ва̄тат, посым ре̄г ляпат, а̄канил ёнгасым хультсыт. Ты та̄л сосыг такем усырыг о̄лы. Пил та̄глыӈ тованыл, щар ма̄н хо̄йнэг хӯтнэ̄ныл, пум тармыл хуе̄гыт. Ка̄сыӈ сосыгйӣв анял та пӯмщалахтэ̄гум, ка̄сыӈ пил та̄глыӈ товыл, пил мо̄рил, тамле хорам, тамле щёл нэ̄мхо̄т а̄тим. Пӯмащ, омам тох о̄с номсы? Титапаӈкв таве ты урыл хурахлэ̄гум, тувыл ос э̄лын ань о̄лы. Самагумтыл кинсэ̄гум агтпи, То̄рум нупыл а̄ӈквата̄лэ̄гум, хотьют ул кос ва̄гтэ тамле щунь о̄лнэ урыл. Матахмат ӯйрищакве тыламлас, нумын кар ёхты, хо̄т халэв ро̄ӈхыгланэ̄тэ суйты, та̄н пуссын сосыг нупыл тэ̄ланыл а̄ти. Самсаил тай хотьют сунсы, о̄лнэ хо̄тал мим самсайут. Тав пуссын сунсыглыянэ, маныр щирыл ёлын о̄лэ̄гыт, ка̄сыӈ урыл пуссын ва̄гтэ. Тав ма̄гсылэ пуссын аквхурипат ма̄хум, ӯйхулыт, ӯйрищит, пумыт . Аквмат, мостыслум, аквтуп хотьют ам нупылум сунсы. Ща̄гтым ос мостын щирыл кӯньге̄гум тав яссатэ. Ла̄тыӈ мыгум ёмас хо̄тпаг о̄луӈкв ла̄ве̄гум. Ам ва̄глум, ма̄н То̄румн ла̄ввесӯв ёмас ва̄руӈкв, янгыщ ёмас ка̄с миӈкв ляпа ма̄хманувн. Ам ёмас ще̄мьят о̄лэ̄гум. Ма̄н ща̄нягувна̄щагувн э̄руптым о̄ньщаве̄в. Ам номсэ̄гум, мир халыт хумус о̄лы ос то̄рум тэ̄лтан пумтар. Ань ты сосыгйӣв щахыл. Тав ща̄гтыл пиланэ мыг, танай тав пиланэ хунь ма̄н хотва̄тэ̄в тованэ та̄тламе̄гыт. Тувыл сохтыл нюсэ̄гыт. Э̄лумхо̄лас со̄втэ та̄гиньты, о̄с ща̄гты. Атхунь, пилыт атыӈыт ос по̄ртыӈыт. Тох номсэ̄гум, тымус молямтахтым сосыг ва̄тэ̄гум. Молямлан ва̄рмаль ма̄н омавыл о̄ньще̄в. Тав по̄хе̄т матыр ла̄щал ва̄рункв ат ве̄рме̄в. Ма̄н рӯпитэ̄в тох, аквтуп хотталь молямлэ̄в. Тыщирыл тувыл ва̄тум пиланув порыс ул вус о̄ньще̄гыт, пумкан коснэ порат, пумтар ул вус хульты, хӯлпыт ма̄нь хӯлкве ул вус хульты. Ёмас рӯпатав ма̄гысща̄нягува̄щагув ма̄н нупылув ща̄гтальпиӈ самыл а̄ӈквата̄лэ̄г. Омам самыл кинсылум. Тав та̄глыӈ со̄втыл ам нупылум юв. Ве̄трагме̄н та̄гиньтасы̄г, ос я̄ ва̄тан а̄лумтыягме̄н, тувыл ме̄нки мощщан посым ляпан ёлаӯнтсыме̄н ӯщлахтуӈкв. Омам ты халт э̄щанум пуӈк а̄тыт нюсы ос саги, ам тай та̄нанылтыл пӯмщалахтэ̄гум. Ма̄хманум пуссын сэ̄мыл самыл, щар сосыгсам хольт сусхатэ̄гыт. Висум кит яныг сосыг пил ос ма̄нь йигирищум самыгн а̄рталыягум аквхурипаг о̄лэ̄г. Тахмаясум мощ ёнгуӈкв, пилуптым ла̄ве̄гум: «Ам наӈ самагын ювтаяпиягум! Ам! » тувыл та таяпиягум пилсамы̄г. Омам ла̄ви: «Тыщир ат таи, тох ат ро̄ви». Йигирищанум тай ос тох ёнгуӈкв о̄вылтахтасыт. Аквматэ̄рт мотор суй сумыллас, ляпан ёхты. Ща̄гтым на̄лув ха̄йтэ̄в, хотьют са̄ртын ха̄пнёл ка̄салытэ. Омав тай та халт пормасанув аты, посым лапхарыгты. А̄щув ёхтыс, пормасанув ос пиланув та̄лттапасӯв, ма̄нки ха̄пын та̄лсӯв, тувыл та минмыгтасӯв, хоса атке̄пыл минуӈкв, ма̄навн ка̄сащан лё̄ӈх. Миннэ халув сака тыныӈ. Тыныӈ таима̄гыс, ха̄пыл миннэ̄в сыс лё̄мвоит, ма̄ньуит ювле хультэ̄гыт, тувыл сэ̄кв во̄т ре̄гын во̄тгащлаве̄в, та̄рвитыӈ рӯпата юипа̄лт алпиянуввильтанув ӯщлахтэ̄гыт. Нас ӯнлэ̄в, ӯщлахтэ̄в, тымус тыглетувле сунсыглахтэ̄в, тулыт нупыл пӯмщалахтэ̄в. Халанылт каснэ хольт акв юипалт та нуйхатэ̄гыт. Кӯтюванув ос ва̄та хосыт ха̄йтэ̄гыт, та̄н ха̄йтым лё̄хъяскве ня̄ксыт. Тове̄рт тыпщахыл са̄йл ва̄сыт тыламлэ̄гыт, кӯтювытн рохтуптавет, ос ма̄нь ва̄спыгрищит витын ла̄кквауйлыгтапе̄гыт. Ва̄с ще̄мьят рущ щирыл выводокыг ла̄вавет. Ты торгамтахты тыщирылмӯӈиныл ва̄с ква̄лапас. Ам номтыл самагумтыл сунсылум, хумус ва̄сыт ня̄враманыл ёт яласэ̄гыт. То̄сам ма̄т ат ва̄щиньтасанум, вит тармыл тай ва̄щиньтэ̄гум такем ёрыӈыщ, сытхатым уйгалэ̄гыт, оманыл сусхаты: «Сунсэ̄н, маныр нё̄тнэ ня̄врамаквет ам о̄ньще̄гум, та̄н ам хольтум щар нё̄тнэт ос номтыӈыт». Ня̄враманэ, улпыл, о̄с тыщирыл номсэ̄гыт, оманыл юипа̄лт уйгалым. Лё̄хквет акваг халэвыт ма̄н юипа̄лувт ро̄ӈхим яласэ̄гыт. Тув мус ро̄ӈхе̄гыт, тове̄рт мотор суй ат суйты. Хоты хурахлатта̄л тай щар хӯл то̄тапын тув исапи. Ща̄нягува̄щагув ат суснэ халт, ма̄н ма̄нь хӯлквет витн та па̄хвтэ̄в, номтанувтыл халэвыт мӯйылтэ̄в. Та̄н такем апрыӈыг ос мащтырыг а̄лмаияныл ос ювта̄япияныл. О̄с акв во̄ль хультыс, тувыл юв ма̄н о̄лнэ па̄влувн ёхтэ̄в, тумп сэ̄мыл оляӈ карыс ховтыӈ ос ӯльпаӈ ма̄. Ма̄навн тувле нупыл сунсуӈкв ос тот ё̄мыгтаӈкв ат ро̄ви. Та ма̄т ма̄н пупганувто̄рманув о̄лэ̄гыт. Самыл пупганувто̄рманув атке̄пыл на̄ӈке̄гыт, ма̄н тӯлмахыл тох та а̄ӈквата̄нтэ̄в ты сэ̄мылоляӈ во̄р нупыл. Тове̄рт, я̄ртуп, сусхатэ̄гыт йӣвыт са̄йт сэ̄мыл хурит. Та порат ялыщмаг о̄лы. Тувыл хунь во̄р ювле хульты, ма̄н сысы патэ̄в, аквтуп, хотьютын юил сунсаве̄в. Таххаты ювле а̄кватаӈкв, тувыл ос пилыщмаӈ. Ты ма̄ та̄ра миннэв порат ща̄нягува̄щагув вильтанэ̄н мо̄т хурипаг е̄мтапе̄г, саманэ̄н лапнув то̄рыл хартым ос пуӈканэ̄н ёлаль та̄ртым. Аквматэ̄рт па̄влувн ты нэ̄глысӯв, ма̄н таве колыг ла̄вилув. Ма̄н колув яныг парщин палатка. А̄ращ па̄лтнэ ма̄в алатэ па̄ртыл лапва̄рим о̄лы, э̄лыннув пасанув ос ӯнлын хоса уласыт ма̄н ёла рамим о̄лэ̄гыт. Палатка колув хӯрум са̄ме во̄рын ё̄ӈхаве. Кӯтюванув ща̄гтым о̄тылахтуӈкв ля̄льт ха̄йтэ̄гыт, а̄лымасыт ма̄н э̄лыпа̄лувт ха̄йтлыгтаӈкв. Ха̄пув туп па̄г карсатас, акв кӯтюв щисгим ха̄пын порыгмас, улпыл номсы, тав ма̄гсылэ пӯхтысӯв. Тав порыгмаме мус ха̄пув на̄лув хульмытас, яты, ма̄н тыт та ро̄ӈхе̄в, кӯтюв нупыл ка̄т хосге̄в. Тав ха̄пныл хотпорыгмас, ма̄н ущпыл на̄лув лохщувесӯв, ос па̄г тӯпыл товсӯв, тох о̄лы ка̄сыӈ ха̄пыл яласанэ е̄мт. Яты, ань тай ма̄н юн. Ёмас ка̄сыл о̄лэ̄в. Ма̄нки ма̄гсылув ос кӯтюванув ма̄гыс тэ̄нут кит а̄ращит па̄йтэ̄в. Рӯпатав такви хӯлтыглахты: хӯл якытлэ̄в, на̄йив во̄рныл а̄лумтэ̄в ос кӯтюврищанув посымыл пинэ̄в. Ка̄сыӈ кӯтюв такви торыг колхусап о̄ньщи, та̄нки йӣв та̄р ёлыпа̄лн ва̄рапасыт. Э̄лумхо̄ласыт хольт кӯтювыт коланыл аквхурипат, а̄ти са̄всырыт. То̄ват коланыл такем а̄ртме̄гыт, тыт турап порат, лё̄мвоитыл тӯйтыглахтэ̄гыт, тэ̄лы ащирманыл вуянтахтэ̄гыт. Ам вит тотуӈкв ла̄вве̄сум, та̄рвитыӈ рӯпата а̄ти. Я̄ акв тытты, ве̄трам о̄с яныг а̄ти. Юн па̄влувт (Кульпаст) тай вит тотуӈкв та̄рвитыӈ, сыпе сака карыс. Тот тай кит ве̄тра вит тотнэ йӣвл а̄лумтэ̄в, щар та̄рвитыӈ хунь сыпн но̄ӈхаль ха̄ӈхе̄в. Та̄л ювле, ам хунь сыпын но̄хёхтэ̄гум, ӯщлахтэ̄гум. Ты та̄л йильпи щирыл тотэ̄гум – сып но̄ӈхаль ха̄йтпарыл ювум, тыщирыл ва̄гтал ат патэ̄гум. Омам нас та мовиньты, хумус тох ве̄рме̄гум, тыт во̄рыт пӯмащ вит тотуӈкв. Ляпат я̄ о̄лы. Ӣтипа̄лаг я̄ такем сэ̄кв ре̄гыг е̄мты, атыӈ ат пасы, хо̄тал палыт хо̄тал ре̄гыл тотнэ атыӈ пумтар ат пуссын витын пӯхты. Я̄ ва̄тат о̄лнэм накыт, са̄всыр урыл номсахтэ̄гум: о̄лнэё̄мыгтан ма̄ урыл, маныр са̄вит мир о̄лы, ма̄н во̄р кӣвырыт о̄лнэ ма̄хум урыл, хумле а̄ращ ва̄тат ӯнлахо̄лэ̄в. Мир о̄лнэ со̄т урыл. Ка̄сыӈ хо̄тпа такви щирыл со̄тыӈ. Ам со̄тум сунсылум ос хӯлылум тыныӈ во̄румвитум атыл, ӯйрищ луйгын суйквел, со̄рниӈ хӯлкве уйгалан суил ос я̄тил рӯтте̄нум ёт. Та̄н уранылтыл номсанэм порат, сымум ща̄гтым путги ос алпихар нё̄влюм сымта̄ра ле̄нтгасым та хасумты. О̄лнэ палаткав нупыл самагум патапе̄г; сунсэ̄гум, мӯлгын посым ос э̄щанум на̄ӈке̄гыт ёнгим, мокара̄лым ос омам хӯл со̄мхилты, а̄тям коснэйӣв пуӈк ёрги. Лылые̄п юв пувим, амкирот восге̄гум: «Таӈхе̄гум акваг тыщирыл вос о̄лы. Ща̄нягува̄щагув аквписыг ма̄н по̄хувт вус о̄лэ̄г. Ам пуссын э̄руптыянум, таима̄гыс вус ӯргалаве̄н матпӯсум а̄гумныл. Ты ла̄тӈыт акваг ла̄всыянум, хосат та̄гыл улпыл атахкем та̄лыг е̄мтыс. Щаще̄квам о̄лум порат о̄с акваг ла̄всум: «Щаще̄квав вус о̄лы ма̄н ётув. Туп мо̄лты таквсы тав а̄тимыг е̄мтыс. Тав юипа̄лэ̄т ма̄навн та̄рвитыӈ о̄лыс, ӯстыгпаслӯв илторыг ат ха̄схаты. Та па̄сыл торгамтаслум, хо̄тпа ӯстын та̄рвит ос сымум аквтуп нирасахтас. Пилуӈкв патсум акваг, хунь матыр лю̄ль хӯлэ̄гум, сымум нас то̄рги, ща̄нягума̄щагум ма̄гыс номсэ̄гум. Тэ̄н та̄лэ̄н со̄тув та холы, воссыг э̄лаль щуньнэ хо̄тал а̄тим. Со̄т, ты маныр? Яртуп ты нас хо̄тпа номсан номт, тамле номт вус о̄лыс э̄ри матыр акволп ут, хунь ла̄ве̄гын тох: «Ам мощнув со̄тыӈ манос аквпал со̄тыӈ». Э̄руптахтан хо̄тпа со̄тэ, хунь ювле хӯлы аквтыхурип э̄рпыщ, ома со̄тыӈ, хунь ня̄враманэ пусыт, сытыт. Ня̄врам со̄тыӈ, хунь оматэ тав ётэ о̄лы. Ам пуста̄глыӈ со̄тум ще̄мьям ёт о̄лэ̄гум. Э̄лыл ма̄хманум юипа̄лт сунсэ̄гум, самвитум нэ̄глы, сымум ща̄гтым путги, маныр ёмас ще̄мьям ёт ё̄ӈхуӈкв. Я, то̄влы, тыгыл минуӈкв э̄ри, тох хоса ялпыӈ виткем ва̄тат рощасасум. Ма̄н тэ̄пъялэ̄в. Пасан котильт хоса а̄ныт хӯл хӯным о̄лы ос ка̄сыӈ такви торыг хӯл исмит курыскатэ ӯнлы. А̄ныпис кӣвырт ос солвал вит, тув хӯл пувтма̄нтэ̄в. Сака атын ты щирыл тэ̄ӈкв туи хара ма̄т ос а̄ращ ва̄тат. Потыр э̄лаль мо̄тыт газетат ловиньтэлы̄н. 1060 2013.09.20. Людмила ТЕТКИНА Та̄нанылн тот ӯщлахтуӈкве мӯстыс. Китыт та̄л туи порат Ха̄льӯс по̄хыт «Со̄рни сэ̄й» нампа ня̄врамыт ӯщлахтын ма̄ рӯпиты. Ты та̄л хӯрум смена сыс 80 арыгкем ня̄врам тот ӯщлахтасыт. Тамле ӯщлахтын ма̄ «Элаль» нампа предприятие ва̄рыглы ос а̄гирищитпыгрищит тув во̄виньтыянэ. Тот Ольга Константиновна Филиппова кӯщаиг о̄лы. Ня̄врамыт хумус ты туи порат ӯщлахтасыт, та урыл таве китыгласлум. Ольга Константиновна тамле ла̄тыӈ ла̄выс: – Ма̄н нила та̄л ювле хультум порат Восыӈтӯр па̄выл по̄хат Чуанели ӯщлахтын ма̄т ня̄врамыт о̄выл щёс акванатыгласанӯв. Тувыл грантолн ма̄гсыл нэ̄паканув щё̄питасанӯв ос Ханты-Мансийск ӯсн ке̄тсанӯв. Тот касыл щирыл олныл майвесӯв ос Ха̄льӯс по̄хат «Со̄рни сэ̄й» ӯщлахтын ма̄ ӯнттуӈкве о̄вылтахтасӯв. О̄выл та̄л ня̄враманув ё̄рнколт о̄лсыт. Ты та̄л грантолныл пувлынкол ӯнттысӯв, вит айнэ скважинал ва̄рвесӯв. Аквторыг пуссын рӯпата ва̄руӈкве олн ат о̄ньще̄в, ты та̄л о̄с тах грантолн ма̄гсыл нэ̄паканув ке̄тыянув, э̄рыӈ матыр олныл о̄с тах миве̄в. Ань туи порат «Со̄рни сэ̄й» ӯщлахтын ма̄н Ханты-Мансийск ӯсныл, Тэ̄к, Восыӈтӯр, Кульпас, Саранпа̄выл, Шайтанка ос Ха̄льӯсныл ня̄врамыт ёхталасыт. Ма̄н савалап ня̄врамыт, яныг ще̄мьят яныгман, нуса тотнэ а̄гирищитпыгрищит тыг выганӯв. Тӯяг ма̄н район янытыл рӯпитан миркол кӯщаит ёт потыртасӯв, па̄влыӈ ня̄враманыл ма̄н палтув вос ке̄тыглыяныл. Нэ̄паканув щирыл акв сменат 26 ня̄врам ӯщлахтуӈкве ве̄рмысыт. Тох тыгыл са̄внув ня̄врам ёхталас. Ка̄сыӈ сменат та̄н ма̄ньщи культура урыл потыртаве̄сыт ос са̄всыр щирыл ёнгалтаве̄сыт. Акв смена «спортивныиг» ла̄выглавес, мо̄т «экологическииг» ос хӯрмит смена «туристическииг» намаяслӯв. Во̄рт хот ул вос тыпе̄гыт, хумус а̄ращ па̄лтуӈкве ос тот ща̄й па̄йтуӈкве ня̄врамыт ханищтаве̄сыт. Ос са̄в мо̄т э̄рнэ ва̄рмалит ва̄ӈкве та̄н патсыт. Ма̄н МЧС рӯпитан хо̄тпат, ма̄вит ӯргалан хо̄тпат тыг во̄виньта̄лсанӯв, та̄н о̄с э̄рнэ тэ̄лат урыл ня̄врамытын потыртасыт. Ма̄ньщи ла̄тыӈ ос культура ва̄нэ ма̄хум ёт ма̄н акваг рӯпитэ̄в. Та̄наныл «Со̄рни сэ̄й» ӯщлахтын ма̄н о̄с во̄виньта̄лыянӯв. Учёныйхо̄тпат ёт ва̄йхатэ̄в. Ты та̄л ма̄н палтув Светлана Алексеевна Попова ёхталас. Ма̄ньщи учёный са̄в та̄л сыс ма̄ньщи культура урыл нэ̄пакыт хансы. Тав ня̄врамыт ёт рӯпитаӈкве сака ха̄сы. А̄гирищитнпыгрищитын тав ётэ пӯмащ о̄лыс, ёнгил щирыл са̄всыр ребусыт хассыт, спектаклит, тӯлыглапыт ва̄рыгласыт. Светлана Алексеевна туп акв сменан ёхталас. Ня̄врамыт акваг китыглахтасыт, хунь Светлана Алексеевна о̄с тув ёхталы. Ёнгил щирыл ма̄ньщи культура урыл потыртаве̄сыт, та̄нанылн тох сака пӯмащ. Ня̄врамытын тыт ӯщлахтуӈкве сака мӯстыс, ань ва̄тихал китыглахтэ̄гыт, хунь о̄с ӯщлахтын ма̄в рӯпитаӈкве о̄вылтахты. Ма̄н тэ̄лы порат о̄с ӯщлахтын сменат ва̄руӈкве таӈхе̄в. Ань тэ̄нут па̄йтнэ кол ӯнттэ̄в, тэ̄лы ӯщлахтын порат тув ня̄врамыт акванатыянув. Ма̄н ётув предприятият, школат рӯпитэ̄гыт, ня̄враманыл ос тыг ке̄тыглаӈкве ка̄саще̄гыт. Тыи ма̄гсыл олн ойтуӈкве патэ̄гыт. Ань ты ва̄рмаль хосыт ты рӯпитэ̄в. 1061 2013.10.04. Светлана РОМБАНДЕЕВА Лусытан ос пенсия олн урыл. «Югра» телерадиокомпаният ля̄ххал тотнэ ма̄хум акванатыглаве̄сыт. Тув Москва ӯсныл Совет Федерация Комитетт рӯпитан хум Н. А. Федоряк ёхталас. Ты хум тот рӯпитан ма̄гыс округувныл пе̄риявес, оборона ос безопасность ва̄рмаль палт пуӈктоты. Николай Александрович ля̄ххал тотнэ хо̄тпатын армия урыл, пенсия ва̄рмаль, э̄лы хо̄н ма̄ныл ёхталан ма̄хум ос мо̄т тэ̄лат урыл китыглавес. Тав ла̄выс, 2020 та̄л ляпат ма̄н армиявт туп ма̄к ха̄снэ ма̄хум лусытаӈкве патэ̄гыт. Ма̄ янытыл о̄лнэ мир туп ё̄р государстват э̄руптэ̄гыт. Пенсия ва̄рмаль урыл аквкит ла̄тыӈ ла̄выс. Ань йильпииг ва̄руӈкве номсаве, олнло̄мтанув э̄рттам но̄хнё̄тавет. Пенсиян миннэ хо̄тпа олныл мӯсхал щирыл вос ойтаве, ул вос савалы, сыме ул вос э̄тгалаве. Ань ма̄н ма̄вн мо̄т хо̄н ма̄ныл са̄в мир юв, тыг нё̄ргалэ̄гыт, тыт рӯпата кинсэ̄гыт. Ты урыл тав тох ла̄выс: «Сака са̄в мир Россияв янытыл янгыщ Москва ос Санкт-Петербург ӯсн минэ̄гыт, Ставропольский ос Краснодарский крайиг янытыл нё̄ргалэ̄гыт. Ты ва̄рмаль палт ма̄н са̄в рӯпитэ̄в, э̄рнэ нэ̄пакыт хансэ̄в. Йильпи са̄ккон хосыт тыг нэ̄мхотьют мори ёхтуӈкве ат ве̄рми, рӯпата тыт тах сака ат хо̄нтэ̄гыт. Ма̄нти ма̄хманув сака рӯпитаӈкве ат таӈхе̄гыт, та̄н ла̄внэ̄ныл щирыл, рӯпата олнаныл сака мощща. Ань май пуссын высший образование ма̄гыс ханищтахтэ̄гыт, ос училищат ханищтахтуӈкве ат ка̄саще̄гыт. Пуссын юристыг ман психологыг рӯпитаӈкве таӈхе̄гыт. Ма̄н ань училищатт ханищтахтан ва̄рмаль но̄хво̄рмалтаӈкве номсэ̄в. Ма̄ньлат ма̄хум тот вос ханищтахтэ̄гыт, ёмас рӯпата вос о̄ньще̄гыт, олныл мӯсхал щирыл вос ойтавет». 1061 2013.10.04. unknown Таве ма̄н сымыӈыщ янытлылув. Ты йист ма̄нки мирув халт пе̄с йис ва̄рмаль ос пе̄с накыт ва̄нэ хо̄тпа сака мощща хультыс. Тамле хо̄тпат ва̄ӈкв, янытлаӈкв ос ӯргалаӈкв э̄ре̄гыт. Ха̄льӯс район Хулюмсӯнт па̄вылт Галина Константиновна Алгадьева о̄лы. Ты хо̄тпа са̄в пе̄с ва̄рмаль, потыр, э̄рыг ва̄г. Ща̄няге̄на̄щаге̄н тав ма̄нь та̄гыл ма̄ньщи щирыл янмалтавес. Таима̄гыс тав ма̄ньщи о̄лнэ ва̄рмаль ёмщакв ва̄гтэ ос э̄лаль ня̄враманэ̄н, манянэ̄н, а̄гиа̄гиянэ̄н, а̄гипыганэ̄н, пыгпыганэ̄н, пыга̄гиянэ̄н, апганэ̄н ма̄ньщи ва̄рмалит хӯлтыглыянэ, ханищтыянэ. Хотьют матыр китыглаӈкв тав палтылэ ёхты – кос хунь нё̄тытэ, хӯлтыглытэ. Ма̄ньлат ма̄хум, ня̄врамыт ёт ос акваг рӯпиты. Я̄сунтыт «Ма̄нь Ӯсквен» ва̄тихал яланта̄лы, тот пе̄с о̄лум ва̄рмалит койгалаӈкв нё̄ты, ня̄врамыт ю̄нсхатуӈкв ханищты. Ма̄нь таквс э̄тпос 3 хо̄талт Галина Константиновна самын патум хо̄талэ. Та хо̄тал тав 70 та̄лэ то̄влыс. Та ёмас, сымыӈ, ка̄ркам, нёмса омаке̄в, щаще̄квав ос ане̄квав самын патум хо̄талэ̄тыл сымыӈыщ янытлылӯв ос пуста̄гыл о̄лнэ хо̄тал, со̄тыӈыг о̄лнэ хо̄тал таве̄н ла̄ве̄в. Хоса нот ос щунь таве̄н. Ма̄н таве э̄руптылав ос аниглылав. Тав ня̄враманэ, ня̄враманэ ня̄врамыт, манянэ, ва̄псанэ, э̄щанэ, а̄пщитэ ос апганэ. 1061 2013.10.04. Людмила ТЕТКИНА Яныг вит пилыщма тотыс. Югра ма̄т рӯпитан предпринимательхо̄тпат о̄с нё̄тмил ва̄рсыт. Ты э̄рнэ тэ̄ла урыл Ольга Сидорова, «Фонд предпринимателей Югры» нампа ма̄т кӯщай нэ̄, ос Альфия Павкина, Торговопромышленный палатат кӯщай нэ̄, ля̄ххал то̄тнэ ма̄хум э̄лыпа̄лт потыртасы̄г. Округувт ань 85 со̄тыра э̄лумхо̄лас та̄нки ма̄гсыланыл рӯпитэ̄гыт. Ка̄сыӈ та̄лныл предпринимателит са̄внувег е̄мтэ̄гыт. Ольга Андреевна ла̄вме щирыл, та̄н та̄нки ма̄гсыланыл ка̄ркамыг рӯпитэ̄гыт, олн сэ̄лэ̄гыт. Та̄н пуссын аквъёт Дальний Востокт о̄лнэ мир ма̄гсыл о̄с са̄в пормас, олн атсыт. Тувыл э̄лаль тав Николай Колоб, Лангепас ӯст о̄лнэ хум, урыл потыртас. Тав ос мо̄т предпринимателит акв тонна арыгкем са̄всыр пормас, тэ̄нут атсыт ос тув ке̄тсыт. Та̄нанылн тыима̄гсыл яныг пӯмащипа ла̄тыӈ ла̄выс. Альфия Ансаровна Павкина ла̄выс: «Дальний Востокыт яныг вит порат са̄в колыт а̄мара̄лве̄сыт, ма̄хум тэ̄пкананыл вит ёлыпа̄лт кит э̄тпос ӯнлысыт. Ань са̄в ма̄хум коланыл, пормасаныл та̄л вуньщалыг хультсыт. Тыт лӯима̄т, ёмас, сымыӈ ма̄хум о̄лэ̄гыт, ма̄н пуссын аквъёт иӈ нё̄тмил ва̄руӈкве патэ̄в». Ань округ янытыл 35 центр рӯпиты, тот пормасыт, тэ̄нутыт пирмайтавет. Ка̄сыӈ э̄лумхо̄лас тув матыр ке̄туӈкве ве̄рми. 1061 2013.10.04. Тамара МЕРОВА Ня̄врамыт э̄руптым янмалтэ̄н. Ты э̄лыпа̄лт кӯщаит акв тамле о̄выл сапра̄нин Бурятият акванатхатыгласыт. Мо̄лты Америкат Чикаго ӯст о̄лыс. Ма̄н округувт ня̄врамыт ёмащакв ос пуста̄гыл о̄лнэ̄ныл ма̄гыс правительствав са̄в рӯпиты. Та̄н ма̄гсыланыл сыресыр ханищтахтын центрыт, пусмалтахтын колыт ӯнттавет. Савалап колытныл ня̄врамыт ань са̄выӈпа̄лэ хотты ще̄мьятын вивет. Юио̄выл хультум ат та̄л сыс округувныл ня̄врамыт нэ̄мхотьют мо̄т хо̄н ма̄н ат тотве̄сыт. Ань пуссын тамле ва̄рмалит та̄рапаттын ос ня̄врамыт ёт рӯпитан колыт уральтан ма̄гыс са̄в ма̄ныл мӯй ма̄хум тыг атхатыгласыт. Павел Астахов, Россия янытыл ня̄врамыт тэ̄ланыл ӯргалан хум, сапра̄нит о̄выл ла̄тыӈ ла̄выс. Наталья Комарова губернаторув ос мо̄т хо̄тпанув рӯпатаныл ёмщакв ва̄рнэ̄ныл ма̄гыс мӯйлупсал мисанэ. Тувыл ма̄хум ла̄кквауртхатым рӯпитасыт. Та̄н са̄всыр тэ̄лат ос ня̄врам ӯргалан о̄вылтыт хансым са̄кконыт урыл потыртасыт. Хоты ла̄тӈыт тэ̄ла мус тот хо̄йтхатэ̄гыт, хоты ла̄тӈыт мо̄т щирыл хансуӈкве э̄ре̄гыт. США ма̄ныл ёхталам мӯй хо̄тпат та̄нки палтаныл о̄лум тэ̄лат хӯлтсыт. Ос ма̄н ма̄хманув ма̄гыс са̄всыр ханищтапыт ва̄рыгласыт. То̄ванакт яныг хо̄тпат, ща̄нита̄щит ма̄нь ня̄врамыт ёт сака кантыӈыщ потыртэ̄гыт, ля̄выльттыяныл, лю̄льсаӈ о̄ньщияныл ос ра̄тыяныл. Тащирыл о̄щнэ а̄гирищитпыгрищит о̄с лю̄ль, кантыӈ хо̄тпаг яныгме̄гыт. То̄ват номтаныл савалэ̄гыт ос тыгыл а̄гмыӈыг е̄мтэ̄гыт. Тамле ня̄врамыт ёт са̄в рӯпитаӈкве ос э̄рнэ торыг та̄наныл пусмалтаӈкве э̄ри. Ань ханищтан хо̄тпатытн, ле̄ккарытын ос нё̄тмил ва̄рнэ ма̄хумн хумус ня̄врамыт ёт рӯпитаӈкве э̄ри – таит та̄н ханищтасыт. Алексей Путин, губернатор ва̄ӈын хум, ла̄выс: «Мӯй хо̄тпатын пуссын ма̄н ва̄рнэ рӯпатав суссылтаслӯв, та̄нанылныл матыра̄ти тэ̄латн ханищтахтасӯв. Ань ня̄врамыт то̄ва та̄рвит тэ̄ланыл хумус ма̄кыг щё̄питаӈкве, о̄с ва̄глув. Ма̄н округувт «Единый Россия» партия ка̄сыӈ та̄л «Мирн э̄руптан ле̄ккар», «Мирн э̄руптан ханищтан хо̄тпа», «Мирн э̄руптан ма̄нь ня̄врамыт ёт рӯпитан хо̄тпа» са̄всыр тамле касылыт ва̄рыглы. То̄нт округт о̄лнэ ма̄хум та̄нки щар ёмас хо̄тпа пе̄рие̄гыт ос та хо̄тпа ма̄шинал мӯйлуптаве. Ты та̄лт «Любимый соцработник» касыл о̄лыс. Тот Ирина Смирнова Сургут ӯсныл но̄хпатыс, тав та ӯст ня̄врамытн нё̄тмил ва̄рнэ колт рӯпиты. Ма̄н таве ёмас рӯпататэ ма̄гыс янытлылӯв». Тувыл нэ̄ э̄сгын нэ̄пакыл ос ма̄шинал мӯйлуптавес. 1061 2013.10.04. Валентина УЗЕЛЬ Ма̄ньщи ла̄тыӈ хо̄т ханищтаве. Ха̄льӯс районт ма̄ньщи ла̄тыӈ ханищтан ня̄врамыт пуссын аквъёт ловиньтаӈкв те, атса̄т ня̄врам ат е̄мты. Саранпа̄вылт, Кульпаст, Ня̄хщамво̄льт, Восыӈтӯрт, Кимкъясӯйт, Ло̄пмуст ос Сӯкыръят о̄лнэ ня̄врамыт туп тот ща̄нь ла̄тӈыл потыртаӈкв ханищтавет. Са̄выӈпа̄лэ ма̄ньщи ма̄хманув тот ты о̄лэ̄гыт. Кондинский районт о̄с ма̄хманув кос о̄лэ̄гыт, ос тот туп Шугур па̄выл школат о̄выл классытт хусахтем ня̄врам потыртаӈкв ханищтавет. Яныг классыт ла̄тыӈ щар ат ханищтаве. Нижневартовский районт Сосновоборск па̄выл о̄лы. Ты па̄выл наме ат хӯлыгласлӯв, ос ма̄ньщиянув та палыт ма̄н о̄с о̄лмыгтамыт. Тот ос нила ня̄врам ма̄ньщи ла̄тӈын ханищтавет. Октябрьский районт Лӯи Ня̄рихуми па̄вылт о̄с са̄в ма̄ньщит о̄лэ̄гыт. Ня̄врамыт школат Лариса Николаевна Карпенкан ос Клавдия Семеновна Плеханован ханищтавет, пуссын аквъёт атпан ня̄врам ат е̄мты. Округув янытыл лов школатт ня̄врамыт ма̄ньщи ла̄тӈыл потыртаӈкв ханищтавет, 16 школатт – ханты ла̄тӈын, 1 школат – ё̄рн ла̄тӈын, ос Саранпа̄выл школат – иӈ саран ла̄тӈын. Хӯрум со̄тыра арыгтем ня̄врам та̄нти ща̄нь ла̄тӈаныл ханищтыяныл, та̄н халанылт акв со̄тыра арыгтем – ты ма̄ньщи ня̄врамыт. Тыг школан, садикн ос образовательный центрытн ялантан ня̄врамыт пуссын ловиньтаве̄сыт. Ты ня̄врамыт округ образование департаментыт рӯпитан ма̄хумн ловиньтаве̄сыт. Ос ма̄ньщи ла̄тӈыл потыртан ка̄сыӈ хо̄тпа ва̄гтэ – ань яныгман ня̄врамыт, ма̄ньлат хо̄тпат халт янгыщ нэ̄мхотьют потыртаӈкв ат ве̄рми. Туп то̄ва ма̄нь па̄влытт о̄лнэ аквтит ще̄мьят ня̄враманыл потыртаӈкв ха̄сэ̄гыт. 1061 2013.10.04. Людмила ТЕТКИНА Ма̄во̄й ос газ тыт иӈ са̄в о̄лы. 50 та̄л сыс округувт 10 миллиард тонна ма̄во̄й но̄хвуйвес. Наталья Комарова ла̄вме щирыл, тыт 20 миллиард тонна иӈ о̄лы. Ты ва̄рмаль урыл яныг кӯщай нэ̄ прессконференция о̄лум порат ла̄выс. Тав ос Дмитрий Кобылкин, Ямал ма̄ губернатор, 60 та̄л ма̄во̄й ос газ хо̄нтым кастыл ля̄ххал тотнэ ма̄хум ёт хо̄нтхатыгласы̄г. Москва, Ханты-Мансийск ос Салехард ӯсытыт о̄лнэ журналистыт пӯмщалахтасыт ма̄во̄й ос газ ань хумус но̄хвиве, ос манаса̄вит та̄лын ты ма̄ щунь иӈ тах то̄вылхаты. Наталья Комарова ла̄выс, Юграт то̄ва месторожденият иӈ сака са̄в ма̄во̄й о̄лы. Ты э̄лыпа̄лт нефть молях но̄хвуйвес, тав а̄ти мил ма̄т о̄лыс. Ань сака милыщ хультыс, таве но̄хвиӈкве та̄рвитыӈ. Дмитрий Кобылкин ла̄вме щирыл, Ямалт о̄с иӈ са̄в газ о̄лы. Ты мус тот 16 триллион кубометра газ но̄хвуйвес. Ань 147 триллион ма̄ ёлыпа̄лт иӈ о̄лы. О̄с са̄в та̄лн тах то̄вылхаты. Ма̄во̄й киснэ ва̄рмаль урыл ля̄ххал тотнэ ма̄хум китыглахтасыт. Наталья Комарова ла̄выс, ань ма̄н округ янытыл туп 30% ма̄т нефтяникыт рӯпитэ̄гыт ос тот ма̄во̄й но̄хвыгыт. То̄ва ма̄нув мӯсхалыг иӈ ат ханищтаве̄сыт. Ювле хультум та̄лт федеральный бюджетныл ма̄во̄й киснэ ма̄гсыл Югра 407 миллион солко̄вил майвес. Мо̄тыт та̄лыт тах 634 миллион солко̄вил округув тах та̄ставе. Ма̄во̄й но̄хвинэ компаният та̄нки ты та̄л сыс 25 миллиард солко̄ви ма̄во̄й кинсым холтэ̄гыт. Мо̄тыт та̄л 29 миллирад солко̄ви тувле нупыл мыгыт. Ямалыт газ ос ма̄во̄й киснэ ма̄гсыл о̄с сака са̄в олн та̄ставе. Ма̄хум газ кинсым хосат ща̄рыщ ва̄тан ёхтысыт, ань тот рӯпитэ̄гыт. Та̄н Карский ща̄рыщт витпа̄лыт газ но̄хвыгыт ос тот йильпи месторожденият кинсэ̄гыт. Дмитрий Кобылкин ты ва̄рмаль урыл потыртым ос ма̄вит ӯргалан ва̄рмаль урыл ла̄выс. Та ма̄т хо̄т э̄лумхо̄лас о̄луӈкве ат ве̄риты, са̄в ӯйхӯл о̄лы, тыима̄гсыл тув ёхтын ос рӯпитаӈкве о̄вылтахтын хо̄тпат щар о̄влэ̄т ма̄вит урыл номсахтэ̄гыт ос ӯргалым о̄ньщияныл. Ты коныпал кущай хум ос акв ва̄рмаль урыл потыртас. Ань йильпи са̄кконыт щирыл мавой ос газ нохвинэ компаният мощщанув налоголн ойтуӈкве патсыт. Тыимагсыл та̄нанылныл округ бюджетн о̄с мощщанув налоголн ёхтыс. Тувыл таи ёмас, газовикыт са̄всыр пӯльницат, ханищтан колыт ос мо̄т э̄рнэ колыт ӯнттуӈкве ань нё̄тэ̄гыт. Ямалт сака ащирмаӈ, то̄ва ма̄хум о̄луӈкве тот ат ве̄ритэ̄гыт. Тув ёхтум лов хо̄тпан халт туп аква о̄луӈкве тот хульты. Кӯщай ла̄вме щирыл, та̄н ты урыл ёмащакв ва̄гыт, тот хультум ма̄хум ма̄гсыл йильпи колыт, яныг школат, ёмас пӯльницат ӯнттэ̄гыт. Ты э̄лыпа̄лт ма̄хум Екатеринбург, Тюмень, Ханты-Мансийск ос мо̄т ӯсытын пусмалтахтуӈкве ке̄тыглаве̄сыт. Ань тот о̄лнэ мир та̄нки ма̄нылт уральтавет ос пусмалтавет. Ня̄враманыл ёмас, ре̄гыӈ школат ханищтахтэ̄гыт. Тамле ащирмаӈ лӯима̄т о̄лнэ мир о̄лупсаныл мощ кӯпнитыг ва̄рияныл. Ма̄н округувт о̄с са̄в рӯпата ва̄раве, Наталья Комарова ла̄выс, 2012 та̄л сыс Юграт 27 со̄тыра арыгкем ня̄врам самын патыс. Ты э̄лыпа̄лт таса̄вит ня̄врам нэ̄мхуньт самын ат патыглас. Ка̄сыӈ та̄лныл тыт мир са̄вми. Округувт са̄в ще̄мьят хӯрум ня̄врам янмалтэ̄гыт. Та̄н пуссын Югра ма̄ э̄руптыяныл ос та̄нки колыг ловиньтыяныл. Ос мо̄т ма̄н ва̄нтлуӈкве ат таӈхе̄гыт. Ля̄ххал тотнэ ма̄хум ёт потыртым Наталья Комарова ла̄выс, тыт ма̄во̄й иӈ са̄в кос о̄лы, тувыл та̄н во̄р, хӯл, на̄йпос ос мо̄т щёлыт урыл ат ёрувлэ̄гыт, ты хосыт о̄с са̄в рӯпитэ̄гыт. 1061 2013.10.04. Галина КОНДИНА Ма̄хманув хумус о̄лэ̄гыт. Потыр ювле хаснэ нэ̄пакт ма̄хмытын наманыл хансуӈкве ат э̄рыс, таима̄гыс та̄н ат э̄ссамтым матыр та̄рвитыӈ ва̄рмалит урыл тот хассыт. Соссаӈ хо̄тпанув янгыщ о̄лнэ кол урыл, рӯпата ос пусмалтахтын ва̄рмалит урыл ла̄всыт. Титыглым ма̄ньлат ма̄хум халт 40% са̄вит хо̄тпа насати рӯпата хо̄нтуӈкве ат ве̄рме̄гыт. Таима̄гыс ос туп пособиеолн вуим нусаг о̄лэ̄гыт. Саранпа̄выл миркол хум Николай Артеев ла̄тӈе щирыл, па̄вланылт хӯрум со̄тыратем э̄лумхо̄лас о̄лы, ты халт 30% рӯпата ат о̄ньще̄гыт. Олнта̄л о̄лым та̄н коланылт вит, ре̄г ос на̄йпос ма̄гсыл ойтхатуӈкве ат ве̄рме̄гыт, ЖКХат яныг а̄рнта о̄ньще̄гыт. То̄ва ще̄мьят материнский капитал урыл аты хӯлыгламыт, хумус тув нэ̄пакыт атуӈкве – аты ва̄ганыл. Акв ма̄ньлат ня̄врамыӈ нэ̄ ты урыл титыглавес, тав ла̄выс, ат ва̄гтэ ос нэ̄мхотталь справканэ̄пакыт ат атыглас. Тамле потрыт хӯнтлым, таи туп ла̄вуӈкве ро̄ви. Кӯщаитын са̄всыр нё̄тмилыт урыл па̄влыӈ мирн акваг потыртаӈкве кос э̄ри. Рӯпата та̄л о̄лнэ хо̄тпат са̄выӈпа̄лэ хӯл алыщлым ос во̄раим о̄лэ̄гыт. Ос та̄нти ма̄ныл мо̄т ма̄н нэ̄мхотталь ва̄нтлуӈкве ат таӈхе̄гыт. Ма̄н та̄наныл титыгласанӯв: «На̄н о̄лнэ ма̄нынт манарыл янытлахтэгы̄н манос ёралахтэгы̄н? » Та̄н ювле нё̄тнэ ма̄те̄ныл ос пе̄с йис о̄лупсаныл урыл потыртасыт. Са̄лыӈ колт рӯпитан акв ма̄ньлат хум та урыл ла̄выс, са̄лыӈ ма̄хум рӯпата олнаныл но̄х те нё̄тве̄сыт ос па̄вылт колыл те майве̄сыт, э̄рыӈ то̄нт ма̄ньлат а̄гитпыгыт ты та̄рвитыӈ рӯпатан вуйхатнувыт. Са̄в ма̄ньлат ще̄мьят ос та̄н оманыла̄тяныл ёт потыртасӯв, таима̄гсыл ма̄н та̄нанылн пӯмащипа ос пуста̄гыл о̄лнэ ла̄тыӈ те̄тэ̄в. Та̄н потраныл ма̄н пуссын акв нэ̄пакн хансыянӯв ос округ миркол кӯщаитын мыганӯв. Тувыл э̄лаль кӯщаит номсахтуӈкве патэ̄гыт, хумус ты та̄рвитыӈ ва̄рмалит ёт та̄н рӯпитаӈкве патэ̄гыт. 1061 2013.10.04. Светлана РОМБАНДЕЕВА Мо̄т хо̄н ла̄тыӈ ханищтан нэ̄. Ха̄льӯс район Кульпас па̄выл школат мо̄т хо̄н ла̄тыӈ ханищтан нэ̄г Людмила Васильевна Николаева рӯпиты. Тав ня̄врамыт английский ла̄тӈыл ханищтыянэ. Людмила Васильевна Кульпасн Марий Эл республиканыл ёхтыс, тот о̄лнэ̄тэ хӯрумхуйплов та̄лыг ты то̄влыс. На̄н ань э̄лаль тав потре ловиньтэлы̄н: – Ам Марий Эл республикат Звениговский районт 1977 та̄лт самын патсум, тот яныгмасум. Марийский государственный университет а̄стласум, марийский ла̄тыӈ ос литература, английский ла̄тыӈ ос литература учителиг ханищтахтасум. Университет а̄стламум порат, профессор о̄йка ам нупылум ла̄выс: «А̄гикве, наӈ Кульпас па̄вылн рӯпитаӈкве минэн, ёмас па̄выл, наӈын тах тот о̄луӈкве мӯсты». Ам ка̄сащасум, ань тыт школат английский ла̄тыӈ ханищтан учителиг рӯпитэ̄гум. Тыт ще̄мьям ёт о̄лэ̄гум, о̄йкам наме Валера, хӯрум пыг о̄ньщиме̄н. Яныг пыгме̄н Никита, хӯрумхуйплов та̄лэ то̄влыс, тувыл Костя, таве̄н лов та̄л. Ань ка̄тыт ты пувилум, ты щар ма̄нь пыгме̄н, наме Илья. Омам наме Лидия Викторовна, са̄тлов нупыл хӯрмит та̄лэ ты то̄влыс. А̄тям а̄тимыг е̄мтыс. Омам марийский ос рущ ла̄тӈыл потырты. Мари-Луговая па̄вылт о̄лы, ты сака нё̄тнэ па̄вылкве Волга я̄ ва̄тат ӯнлы. Марий Эл ма̄т луговой ос горный марийцыт о̄лэ̄гыт, ам ще̄мьям – луговой марийцыт. Ма̄н ма̄ньщи ос ханты ма̄хум ёт ща̄нь ла̄тӈанув щирыл рӯтыӈыщ о̄лэ̄в, та̄н хольтаныл ма̄н о̄с финноугорский ма̄хум. Людмила Васильевна ла̄внэ̄тэ щирыл, Кульпаст о̄луӈкве та̄нанылн ёмас, ханьщувласыт. Па̄вылт хо̄тпа нупыл сымыӈ ма̄хум о̄лэ̄гыт. Ос туп таи та̄рвитыӈ, па̄влыт халанылт сака э̄лынт о̄лэ̄гыт, тыгтув яласаӈкве рӯпатаӈ. Са̄в хо̄тал ӯрхатэ̄гыт, тувыл Ха̄льӯсн ущ та тыламлэ̄гыт манос на̄йиӈхапыл минэ̄гыт. Тамле ёмас, сымыӈ нэ̄ ще̄мьятэ ёт пуста̄гыл вос о̄лы, На̄й-О̄тыранэ̄н вос ӯргалаве. 1061 2013.10.04. Светлана РОМБАНДЕЕВА Ло̄пмус па̄выл а̄ги. – Омам Елена Константиновна Хозумова, а̄ги о̄парищ наме Юрьева, Ме̄сыг па̄вылныл о̄лыс. А̄тям Владимир Устинович Хозумов Пупйисум па̄вылт самын патыс, тот яныгмас. Тэ̄н ань сас а̄тимыг. Ам нила каӈк о̄ньще̄гум – Валера, Саша, Сережа ос Лёня. Котиль каӈкагум – тэ̄н юртыӈ ня̄врамы̄г. Та̄н пуссын Ло̄пмус па̄вылт о̄лэ̄гыт, ще̄мья о̄ньще̄гыт. Кульпаст ам нёлолов класс а̄стласум, тувыл э̄лаль Иваново ӯсн ханищтахтуӈкве минасум. Тот текстильный фабрикат ленточницаг кит та̄л рӯпитасум. 1984 та̄лт хум ва̄рсум, наме Журакул Хамраевич, Узбекистан ма̄ныл о̄лы. Кит ня̄врам о̄ньщиме̄н, пыгме̄н наме Умид, а̄гиме̄н ос Гульнара. Тэ̄н мощ яныгмасы̄г, тувыл ма̄н Узбекистанын минасӯв, тув о̄лмыгтасӯв. Кол ӯнттысӯв, ня̄врамагме̄н школан минасы̄г. Тот атхуйплов та̄л о̄лсув. Сака ре̄гыӈ ма̄ кос, ос ам тув татем ханьщувласум, ла̄тӈаныл ханищтаслум, потыртаӈкве ха̄сэ̄гум. Гуля нёлолов класс а̄стламе юипа̄лт, ма̄н тыгле йисӯв. Тыт тав аквхуйплов класс а̄стлас, тувыл Узбекистанын минас, тот педагогический университетт нила та̄л ханищтахтас. Ань школат учителиг рӯпиты. Хум ва̄рыс, наме Бохатыр. Пыгрищ о̄ньще̄г, наме Буниёт. Пыгме̄н ще̄мьяӈ та̄гыл Кульпаст о̄лы, кит пыг о̄ньщи. Э̄кватэ ма̄ньщи нэ̄, наме Надя. Ам тыт интернатт рӯпитэ̄гум, ня̄врамыт ма̄гыс тэ̄нут па̄йтэ̄гум, рӯпатам э̄руптылум. Школа кӯщаюв ёмас нэ̄, матыр та̄рвит е̄мтапи те, тав ка̄сыӈ хо̄тпан нё̄ты. О̄йкам ос кол ӯнттын ма̄т рӯпиты, та̄н ань интернат ӯнттэ̄гыт. Кульпас па̄вылт о̄луӈкве ма̄навн мӯсты. Тыт о̄лнэ̄в ань са̄тыт та̄лыг ты е̄мтыс. Ты я̄тил ма̄ньщи нэ̄кве ще̄мьятэ ёт пуста̄гыл вос о̄лы, На̄й-О̄тыранэ̄н вос ӯргалаве. 1061 2013.10.04. Тамара МЕРОВА Тэ̄н ща̄нь ла̄тӈыл ханищтэ̄г. – Ам намум Роза Гордеевна Казамкина. Ты школат ам ня̄врамыт ханты ла̄тӈыл потыртаӈкве ханищтыянум. Ма̄н, ты е̄рт о̄лнэ ханты ма̄хум, ла̄тӈув ваховский диалектыг ла̄ваве ос потранув мощ сургутский диалект хурипаг о̄лэ̄гыт. Ваховский ла̄тӈыл потыртан хо̄тпа а̄ти сака са̄в. Ма̄н ла̄тӈув щирыл хансым ханищтан нэ̄пакыт ат о̄ньще̄в. Ань матахмат ханищтан нэ̄пак сургутский диалектыл хасвес. Ам школат ня̄врамыт та нэ̄пакытыл ханищтыянум. Ма̄н аквъёт та потрыт ваховский диалектын толмащлыянӯв. Ос букват ма̄нки о̄щнэ суянув щирыл ла̄виянӯв, таима̄гыс то̄ва ла̄тӈыт мощ мо̄тнув по̄сыл хансыянӯв. Ня̄врамыт ща̄нь ла̄тыӈ китыт классныл са̄т класс мус ханищтэ̄гыт. Ань са̄тыт классыт аквхуйплов ня̄врам ла̄тыӈ ханищтэ̄гыт, щар мощща ня̄врам китыт классыт о̄лы, тот нила хо̄тпа. Акв са̄т сыс акв щё̄с туп ханищтыянум. Ты, ва̄им, мощща. Мо̄тыт щёс та̄н палтаныл ёхтэ̄гум, ня̄врамыт ла̄тӈыт ос э̄рнэ потрыт хотёрувлыяныл. Ам 2003 та̄лт Ханты-Мансийский педколледж а̄стласлум. О̄влэ̄т Аган па̄выл музейт рӯпитасум, тувыл ня̄врам о̄щсум ос тав ётэ юн о̄лсум. Та юипа̄лт Варъёган па̄вылн ва̄нтлысӯв, тыт о̄с музейн патхатыгласум. 2011 та̄лт школан рӯпитаӈкве во̄вве̄сум. Ща̄нь ла̄тӈум ам ма̄ньта̄гыл ва̄глум, ма̄н во̄рт о̄лсӯв, тот яныгмасӯв. Ос рӯтанув ёт ма̄нки халувт ханты ла̄тӈыл потыртасӯв. Омагума̄тягум са̄лыӈ хо̄тпаг о̄лсы̄г. Туп а̄тям ат номилум, ам э̄тпосум ущ то̄влыс, тав а̄тимыг е̄мтыс. Тувыл аквхуйплов та̄лум порат омам та̄л хультсум. Та̄рвит о̄лыс, ос хо̄та̄ти рӯтанумн, мо̄т ма̄хумн нё̄тве̄сум. Ань э̄лаль ханищтахтуӈкве о̄с номсэ̄гум. Тувыл тыт акв ма̄т ат ӯнлантэ̄в, сыресыр ханищтапыт ва̄рыглавет, ма̄н тув ялантэ̄в. Китыт нЭ̄ потре – Ам намум Валентина Вальчевна Комарова, ня̄врамыт ё̄рн ла̄тӈыл потыртаӈкве ханищтыянум. Тыт китыт классыт ханищтахтын ня̄врам ма̄гыс ща̄нь манос а̄щь заявление хансы. Ос ня̄враме хоты ла̄тыӈ ханищты, таи тот хӯлты. Тувыл ме̄н Роза Гордеевна ёт са̄т класс мус та̄наныл ханищтыянме̄н. Ам палтум ань китыт классыт лов ня̄врам ханищтахты, ты сака ёмас. Ня̄врамыт та̄нки ща̄нь ла̄тӈыл потыртаӈкве ат ха̄сэ̄гыт. То̄ват ща̄няныл хантыт, а̄щаныл ё̄рныт, юн ты ла̄тӈыгтыл ат потыртэ̄гыт. Тувыл школан тотавет, ма̄н та̄наныл тыт ущ ханищтаӈкве о̄вылтыянӯв. Ма̄н, Юграт о̄лнэ ё̄рныт, Ямал ма̄т о̄лнэ ё̄рнытыл ла̄тӈув мо̄т хурипаг о̄лы. Ма̄нки ханищтан нэ̄пак о̄с ат о̄ньще̄в. Ямальский ё̄рн ла̄тӈыл ма̄н ня̄враманув ханищтаӈкве мощ та̄рвитыӈ. То̄ва ла̄тӈанув акван щар ат ёхтэ̄гыт. Тувыл ма̄н та̄н щиранылт потыртаӈкве ат ве̄рме̄в. Ань ня̄враманум ул вос тэ̄лыгтахтасыт, ам амки йильпи нэ̄пак та̄ратасум. То̄ват рущ букват хотвисанум, ма̄нки щирыл ла̄внэ суйит тув хассанум. Тох кӯпнитнувег ла̄тӈув ханищтаӈкве патыс. Тувыл ня̄врамыт юн та̄нки ща̄няныл манос а̄щаныл торгамтыяныл. Нэ̄пакыт ам Ханты-Мансийскат А̄с-угорский институтыт рӯпитан ма̄хум ёт акваннё̄тхатым щё̄питыянум. О̄выл классыт ханищтахтын ня̄врамыт ма̄гыс нэ̄пак ос я̄нас тетрадь ва̄рсум. Ань мо̄тыт классыт ма̄гыс хансэ̄гум. Ам Роза Гордеевнан ос Валентина Вальчевнан пӯмащипа ла̄тыӈ ла̄ве̄гум. Ос ханищтан хо̄тпатын ялпыӈ хо̄таланыл кастыл пуста̄гыл о̄лнэ ла̄тыӈ ке̄тэ̄гум. 1061 2013.10.04. Светлана РОМБАНДЕЕВА Светлана ХОЗУМОВА Ханты ла̄тӈе э̄руптытэ. Хурит Ханты-Мансийск ӯст о̄лнэ ханты э̄ква Евдокия Андреевна Немысова по̄слым о̄лы. Евдокия Андреевна о̄лнэ̄тэ палытыл ня̄врамыт ханищты ос школат ма̄гыс нэ̄пакыт хансы. Рӯпитанэ̄тэ атпан та̄лыг ты е̄мтыс. «Отличник народного просвещения» ос «Заслуженный работник образования ХМАО-Югры» намыл маим о̄лы. Школа а̄стламе юипа̄лт Ханты-Мансийск ӯст педучилищат ханищтахтас, ты юипа̄лт Ленинград ӯст А. И. Герцен нампа институт а̄стлас. Ханты ла̄тыӈ ос рущ ла̄тыӈ учителиг са̄в та̄л рӯпитас, А̄с-угорский институт кӯщаиг о̄лыс, ЮГУт Научный языковой центр ва̄рыс. Евдокия Андреевна ань «Торум Маа» музейт научноисследовательский ос методический деятельность отделт рӯпиты. 1061 2013.10.04. Светлана РОМБАНДЕЕВА Тав са̄в та̄л школат рӯпитас. Дарья Никитична школат ня̄врамыт ханищтым атпан нупыл нила та̄л рӯпитас, «Заслуженный учитель Российской Федерации» яныг намыл майвес. Ты тув Кульпасн ялмум порат, ам тав палтэ щалтсасум. Дарья Никитична ёт ме̄н ӯнлахо̄лсуме̄н, потрамасме̄н. На̄н ань э̄лаль тав потре ловиньтэлы̄н. – Ам Кимкъясӯй па̄вылт 1940 та̄л порат ма̄нь таквс э̄тпос 26 хо̄талт самын патсум, тот яныгмасум. О̄выл классытыт Няхлаӈ па̄вылт ханищтахтасум, то̄нт Кимкъясӯй па̄влувт школа а̄тим о̄лыс. Атыт классын ос тыг, Кульпасн тотвесӯв, школа тыт а̄стласум. Ханты-Мансийск ӯсн минасум, тот педучилищат нила та̄л ханищтахтасум. Тувыл ювле йисум, о̄выл классытыт ня̄врамыт ханищтым акваг тыт та рӯпитасум. Рӯпитанэм порат юио̄выл та̄лытт яныг классытт ханищтахтам ня̄врамыт ма̄ньщи ла̄тӈыл ханищтасанум. Омам наме Варвара Васильевна, а̄ги о̄парищ наме Канева. А̄тям Никита Павлович Рокин. Тэ̄н нё̄рт яласасы̄г, са̄лыӈ колт о̄лсы̄г. Ам хом ты номилум, тэ̄н нё̄рн минэ̄г, а̄нум то̄ванакт На̄ста щаще̄квам палт хультуптытэ̄н. Ще̄мьявт ма̄н лов ня̄врам о̄лсӯв. О̄йкаме̄нтыл ме̄н Кимкъясӯй па̄вылт акванхо̄нтхатасме̄н, тав о̄с тот яныгмас, наме Игорь Алексеевич. Ма̄ньщи ла̄тӈыл потыртаӈкве сака ха̄сыс, рыбакыг рӯпитас, бригадирыг о̄лыс. Хотталь щалтме китхуйплов та̄лыг ты е̄мтыс. Хӯрум ня̄врам о̄ньщиме̄н. Яныг пыгме̄н Олег, ще̄мьяӈ та̄гыл тыт о̄лы. Люда а̄гиме̄н Ягримт о̄лы, ня̄врам садикыт воспитателиг рӯпиты. Ще̄мья о̄ньщи, пыгаге янгыг. Ма̄нь пыгме̄н Саша о̄с тыт о̄лы, кит ня̄врам о̄ньщи. Ам пенсиян минамум юипа̄лт школат иӈ нилахуйплов та̄л рӯпитасум. Ань ат рӯпитанэм, онтолов та̄лыг ты е̄мтыс. О̄влэ̄т номсэ̄гум, рӯпитаӈкве ат патэ̄гум, юн маныр ва̄ре̄гум. Юн, насати, са̄в тэ̄ла о̄лы. Ам ань ане̄ква ос яныг щаще̄ква, хо̄т апыгрищ ос акв апыг апыгрищ о̄ньще̄гум. Дарья Никитична тамле ёмас, сымыӈ хо̄тпа. Тав ань юн колсори рӯпата ва̄рнэ̄тэ коныпал, ка̄тыл са̄всыр пормасыт ма̄щтырлы, щаквщи. Ань ты э̄тпос 26 щислат тав самын патум хо̄талэ. Ма̄н, редакцият рӯпитан ма̄хум, ты я̄тил хо̄тпав нам хо̄талыл ос ня̄врам ханищтан ма̄хум ялпыӈ хо̄талыл янытлылув! Са̄в та̄л пуста̄гыл вос о̄лы, На̄янэ̄н-О̄тыранэ̄н вос ӯргалаве. 1061 2013.10.04. Анна АЛГАДЬЕВА Щисуп. Пе̄с ма̄хманув потырта̄ласыт: «Хунь То̄рум со̄схатам порат Нё̄рыт исум витн лапа̄мара̄лве̄сыт. Туп то̄ва Нё̄рыт Нё̄рала ма̄нь ло̄мтке̄ныл хультса̄лмыт. Щисупат ня̄врам щисгын суй суйтнэ палыт ма̄ арыгта̄лам. Таима̄гыс Щисупаг ты ла̄ва̄ве. Яныгкоть, Ма̄нькоть нампа Нё̄рыг о̄лэ̄г. Тыт о̄с яныг кот ос ма̄нь кот яныт ма̄ ло̄мты̄г, Нё̄р алат хультсамы̄г». Ма̄ янытыл ла̄вылтан Хо̄латщахл, рущ щирыл гора Дятлова, ла̄ве̄гыт, акв хо̄ла – акв э̄лумхо̄лас ла̄пнэ, хуйнэ яныт ма̄ арыгта̄лам. Таима̄гыс тох ты ла̄ваве. Хуньт, пе̄с порат онтолов ма̄ньщи тот порсыгламыт. Туристат тай ётыл ущ тот порсысыт. Потрув э̄лаль Щисуп урыл мины. Ке̄расколыӈъя̄ па̄вылныл ос Висумтыт па̄вылныл Щисуп ёмщакв на̄ӈки. Ке̄расколыӈъя̄ныл Щисуп мус ва̄т нупыл атахкем ве̄рыста. Висумтытныл ущпыл ляпа. Мо̄лты, хунь ты ма̄ӈ ма̄хум са̄лыӈыт о̄лсыт, са̄лыяныл тэ̄лы порат то̄ванакт Щисупан по̄сыгла̄лсаныл. Щисуп яныг Нё̄р, палытэ хоса, тэ̄пево̄ре то̄вылхаты. Туп нумитэ сака яныг а̄хвтасыӈ ос яныг курщип во̄ӈхаӈ. Са̄лы тув ке рагаты, тот та порсы. 1980 та̄лытт Щисуп ва̄тат Серов ӯс па̄лыл са̄лтатыт о̄лсыт. Матахмат та̄л военный часть тот о̄лыс. Та са̄лтатыт о̄влэ̄т матпалыт Щисуп алан лё̄ӈх ва̄рсыт. Тувыл щар нумын Нё̄ралат а̄нах ке̄рыл ос фанера па̄ртыл ва̄рим кит яныг локаторыг тӯщтала̄лсыт. Висумтыт ос Ке̄расколыӈъя̄ па̄влыгныл ты локаторыг ёмщакв на̄ӈксы̄г. Вижай па̄вылныл порыгтурыл ро̄всы̄г ка̄салаӈкв. Матыр ма̄гыс ва̄рыглавесы̄г – я̄ссаг ат ва̄йхаты. Военный ма̄хум мори ат потыртасыт, нас э̄лумхо̄ласыт тот яласаӈкв ат та̄ртве̄сыт. Тувыл нэ̄мат хоса та локатораганыл ат ве̄ритасы̄г, во̄тн пулигманлыгтавесы̄г. Хара Нё̄ралат маныр ве̄риты? Са̄лтатыт та̄нки о̄с хоса ат о̄лсыт, ювле ва̄нтласыт. Ювле минаманылт ма̄хумн ва̄йве̄сыт, ла̄ве̄гыт, та̄глэкв та̄лттым хусахкем ма̄шина акв юипа̄лт ва̄нтласыт. Кӯщаянылгенераланыл о̄с о̄лсыт. Хультум локатор ло̄мтаныл ань мус Нё̄ралат во̄тгащлавет. Ань мус ма̄ньщит ты фанера ло̄мтытыл нып ва̄ре̄гыт. Колъёраныл о̄лум ма̄т ань мус са̄всыр ке̄рло̄мтыт хо̄нтавет. Аквнакт Са̄псаныл о̄лум ке̄р атнэ я̄мсыкыт ке̄р атуӈкв ялмыт. Ке̄р атсыт ман а̄ти, та̄нки ва̄ганыл. Ӣти тахольтыл та пилтуптымет. Таяныт а̄хвтасыт патыглаӈкв та патмыт – акв ла̄гл о̄щмыт, ӣти Висумтыт па̄вылн та оямыт. Такем рохтумыт, пуӈк пинсыт, акваг воссыг тув ат минэ̄гыт. О̄с потыр о̄лы. Пе̄с, ла̄ве̄гыт, акв о̄йка во̄рн минам. Во̄рн минам – хот– ӯстыме. Юн ма̄хманэ такос ӯрхатнэ̄ныл – ат ёхты. Кинсуӈкв патыме – Щисуп ва̄тат хо̄нтыме, по̄хе̄н яныг на̄ӈк товсуп вущкасыме. Нэ̄матыр лё̄ӈх а̄тим, на̄ӈкыт та ляпат о̄с ат яныгме̄гыт. Пе̄с ня̄йтыт ла̄внэ̄ныл, матыр во̄р утын порславес, на̄ӈк товсупыл ю̄ныгта̄вес. Туристаг яласан ма̄хум Щисупан торыӈ ат ялантэ̄гыт. Э̄рыӈ, хотьют ос рохтупта̄лыгла̄лаве. Ка̄с кинсым, ма̄ сунсыглым ос йильпи ма̄ ханищтым яласан ма̄хум пуссын акв лё̄ӈх о̄ньще̄гыт – Хо̄лат-Щахл ос Ма̄ньпупыг Нё̄р. Акваг ты Нё̄рыгн минуӈкв воратэ̄гыт. Тӯяг Хо̄лат-Щахл телевизор хосыт суссылтаӈкв ква̄лтапа̄лвес. Манах канал о̄лы, улпыл пуссын ты урыл передача ва̄рыгласыт. Нэ̄мхотьют я̄ссаг ат и ла̄выс, 1959 та̄лт маныр е̄мталас. Нё̄р палытыл ка̄сыӈ а̄хвтас, ка̄сыӈ урам я̄нас йис потыр, э̄рыг кос о̄ньщи. Туп хотьют ань ты урыл китыглаӈкв? Хо̄лат-Щахл пилтахтынэ̄тэ ам ат хӯлыглылум. Щисуп тай, со̄ль, пилтахты, во̄ре вуянтахты, Щисуп о̄выл ме̄ӈкванэ̄н ма̄тэ ӯргалаве. Наска̄ссыг хунь рущ ма̄хманув пилата̄лыглавет. Порыгтур – суснэтур Нып – матыр та̄рвитаӈ ут а̄лумтан хӯнт Кисуӈкв – кисгуӈкв Щисгуӈкв – такыщ лю̄ньщуӈкв Я̄мсык – кос хоты мо̄т хо̄тпа. 1061 2013.10.04. Светлана РОМБАНДЕЕВА Хӯл алыщлан камка. – Ам камка ва̄рнэ ма̄гыс са̄глат ёрге̄гум (тав та̄наныл рущ ла̄тӈыл жалинкаг ла̄виянэ). Камка ань улпыл нэ̄мхо̄т ат ва̄раве. Половинка па̄влумт, хунь ам музей ва̄руӈкве о̄вылтаслум, камка урыл номылматсум. Камка кисмаясум, акв ма̄ньщи хо̄тпа Илья Григорьевич Мотышев палт хо̄нтсум. Тав камкатэ ке̄рта̄ныл ва̄рим о̄лы. Хумус ва̄раве, тав номыстэ, ха̄сыс ва̄руӈкве, ос ӯльпа та̄р ат о̄ньщис, проволкал ва̄рыстэ. Ты камка музеювт о̄лы. Тувыл Карым па̄вылт кит камка хо̄нтсум, насати ма̄ньщи хум тав ва̄рыгламаге. Ӯльпа та̄рыл татем ма̄щтырыг сагим о̄лэ̄г. Хӯрмах та̄л ювле хультум порат, ам амти о̄с акв камка ва̄рсум. Ты хӯрум камкат пе̄с щирыл ва̄рим о̄лэ̄гыт. Ам ащо̄йкам наме Иван о̄лыс, тамле талква о̄йка, ос Марья ане̄квам сас ма̄ньщииг о̄лсы̄г. Тэ̄н акваг камка ва̄рсы̄г, яныг хо̄нт порат ущпылнэ̄г са̄в ва̄рсы̄г. Хӯл алыщласы̄г, тыхал камка сагсы̄г. Колхоз па̄лыл ма̄хум тэ̄натэ̄н камка ва̄рылтэ̄гыт, заявканэ̄пак хансэ̄гыт. Туи порат са̄глат щё̄питэ̄г, йӣв та̄рыт хилэ̄г, тувыл та̄рыт ёмащакв щё̄питыянэ̄н, аквансо̄хтыянэ̄н. Тэ̄лы ос камкат ва̄рсы̄г. Ащо̄йкагумане̄квагум рӯпататэ̄н тамле та о̄лыс. Ам пуссын номилум, хумус тэ̄н ма̄щтырласы̄г. Э̄лнаӈ май тэ̄лы порат матыр пормас юн ва̄раве. Тэ̄н о̄с юн рӯпитасы̄г. Ань ты хо̄тал мус номилум, камка яныг, карс, колала мус а̄ла ты ёхты, ащо̄йкам уласн но̄хлю̄ли, тох та саги. Тэ̄н холаме̄н юипа̄лт, са̄в пормас хультыс, щё̄питалум йӣванэ̄н, хилыглам та̄ранэ̄н, та маныр. Ётыл ам о̄с та патсум ма̄щтырлаӈкве. О̄влэ̄т акв камкам ва̄рыслум, тувыл китыт, хӯрмит. Аквам щар пе̄с щирыл на̄ӈк йӣвыл, ӯльпа та̄рыл сагыслум. Дуня а̄квум та̄ра кит камка ёвтыс. О̄влэ̄т ам таве̄н миӈкве ат кос ка̄сащасум, тав а̄нум мӯӈи, щищкурек ос олн тотыс, по̄йкщим во̄всаге. Омам ла̄ви: «Мае̄гын, таве̄н сака э̄ре̄г, наӈтина̄н тах мо̄тан ва̄ре̄гын». То̄нт хум хо̄тпат хо̄нтлын ма̄н вуйве̄сыт, э̄кват та̄нти хӯл алыщласыт. Ра̄хта я̄т а̄рпи о̄лыс, камкаге тув ӯнттысаге, тувыл уральтаӈкве такви ялантас, вит во̄ӈха ва̄ри. Ты юипа̄лт ос хус арыгтем ва̄рыгласум. Акв камка хӯрмах хо̄тал ва̄раве, хо̄тал палыт туп таве те ва̄руӈкве. Ос ты э̄лыпа̄лт йӣв щё̄питаӈкве э̄ри, ӯльпа щахылт та̄р хилуӈкве та маныр, тай сака хоса, сака рӯпатаӈ. Яныг хо̄нт порат э̄кват о̄с ва̄рсыт. Ам юн воссыг ат ва̄ре̄гум, ань камкал хӯл ат алыщлэ̄в. Ань ос тыг семинарын во̄вве̄сум. Никита Партанов ам палтум ёхталас, ме̄н тав ётэ э̄рнэ йӣвыт щё̄питасме̄н, тыг тотсанаме̄н, ань тыт ты ёргащлыме̄н. Анатолий Николаевич ам ща̄нягеа̄щаге урыл китыгласлум, хо̄т яныгмас. Э̄лаль о̄йка мощ о̄с потыртас: – Омам Анастасия Ивановна ма̄ньщи нэ̄ о̄лыс, Учинья па̄вылт самын патыс. Тот пуссын ма̄ньщит о̄лсыт, о̄парищ наманыл Кауртаевыт. А̄тям ос рущ, Николай Власович, ма̄ньщи ла̄тӈыл ёмащакв потыртас. Учинья па̄выл ло̄ӈхаль Та̄п па̄выл ӯнлыс, Иван ащо̄йкам ты па̄влыг халт, Ра̄хта я̄т, хӯл алыщлан ма̄л майвес. Тав тот о̄лнэ кол ӯнттыс, тувыл мо̄т ма̄хум о̄с тув о̄лмыгтасыт. Ло̄ӈхаль Учинья па̄выл мус минуӈкве хус ве̄рыста, ос алгаль Та̄п па̄выл мус хус ве̄рыста. Тувыл тув о̄лмыгтам ма̄хум па̄вланыл Половинкаг ла̄вуӈкве та патсаныл. Ам ань онтырса̄т нупыл хӯрмит та̄лум ты то̄влыс. Ат ня̄врам о̄ньще̄гум, пыгум а̄тимыг е̄мтыс. А̄гиянум хум ва̄рсыт, ня̄враманыл янмалтэ̄гыт. Са̄в апыг о̄ньще̄гум, аман манах, ловиньтаӈкве э̄ри. Анатолий Николаевич тамле ка̄ркам, мӯтраӈ о̄йка, сымыӈ хо̄тпа, ощхульлы, потрами. Такви та̄ланэ янытаг ат сусхаты, ма̄ньнуве̄г а̄ӈкватахты. Ты я̄тил хо̄тпав пуста̄гыл вос о̄лы, На̄янэ̄н-О̄тыранэ̄н вос ӯргалав. 1061 2013.10.04. Светлана РОМБАНДЕЕВА Па̄выл ле̄ккар потре. Ты тув Ха̄льӯс район Кульпас па̄вылн ялмум порат ам пӯльницан щалтсасум. Яныг ле̄ккарыг тот Инесса Анатольевна Мельникова рӯпиты. Ты нэ̄ ёт ам потыртасум, таве пӯльница рӯпататэ урыл китыгласлум. На̄н ань Инесса Анатольевна потре ловиньтэлы̄н. – Россияв янытыл ань пусмалтан ва̄рмаль йильпи щирыл ва̄раве. Ма̄нь па̄влытыт э̄тэхо̄талэ рӯпитан пӯльницат лаппантуӈкве патве̄сыт, 70 % са̄вит лаппантвес. Пӯльницан ма̄хум ань туп хо̄тыл порат ёхталэ̄гыт. Тот о̄с аквта щирыл пусмалтавет, тэ̄рпиӈ ю̄нтпыл ва̄равет, тэ̄рпил мивет, тувыл юв та минэ̄гыт, тот э̄т ат хӯлэ̄гыт. Россия здравоохранение щирыл, тамле ма̄нь пӯльницат нэ̄мат польса ат тотэ̄гыт, лаборатория, та маныр та̄н ат о̄ньще̄гыт, тамле кол пӯльницаг ла̄вуӈкве ат ро̄ви. Тыт, Кульпаст, о̄с аквтох. Тувыл ань лабораторият рӯпитан хо̄тпа тыг во̄вуӈкве э̄ри, таве̄н о̄лнэ кол о̄с э̄ри. Ам тыт нилыт та̄л ты о̄лэ̄гум, о̄лнэ кол ат о̄ньще̄гум, пӯльница па̄лыл колнакыл майве̄сум, тыт ты о̄лэ̄гум. Э̄лнаӈ ка̄сыӈ тамле пӯльницат са̄в хо̄тпа рӯпитас, пуссын рӯпата олныл ойтуӈкве э̄рыс. Ты ва̄рмаль сака рӯпатаӈ, са̄в олн тув минас. – Ос хотты хо̄тпа илттыг те а̄гмыл е̄мтапи, таве хо̄т пусмалтылы̄н? – Ма̄н та̄ра санборт во̄ве̄в, хо̄тпа вертолётыл Ха̄льӯсн тотаве. Хо̄тыл порат ма̄хум тыг ёхталэ̄гыт, та̄наныл ма̄н пусмалтыянӯв. Ӯщлахтын хо̄талт пӯльница ат рӯпиты. Здравоохраненият рӯпитан кӯщай ма̄хум пуссын ты накыт урыл номсысыт, олныт ловиньтасаныл. Тувыл та̄рапаттысаныл, ань та̄н ла̄внэ̄ныл щирыл, санборт во̄внэ порат олн са̄в ат холтэ̄гыт, ос пӯльницат э̄тэхо̄талэ рӯпитаманыл порат сака са̄в олн холтсыт. Ты пӯльницат ма̄н ань ловмантем хо̄тпа рӯпитэ̄в. – Тэ̄рпи о̄ньщегы̄н? – Э̄рнэ тэ̄рпи ма̄н Ха̄льӯсныл во̄ве̄в, сака мат ат миве̄в, мощщал ке̄таве̄в. То̄ванакт во̄внэ тэ̄рпиянув ат иӈ ке̄тавет. Ань май страховой медицина ква̄лтапаптувес, ты йильпи ва̄рмаль щирыл, ма̄н олн ма̄нти вос сэ̄лэ̄в – рӯпата олн манос тэ̄рпи ёвтнэ олн. Хумус ма̄н сэ̄лэ̄в, олнло̄мтрищанув сака хоталь то̄вылхатэ̄гыт. Тох хотмус та рӯпитэ̄в. – Ня̄врамыт са̄всыр прививкатыл тыт ва̄равет манос Ха̄льӯсн тотыглавет? – Прививкат пуссын тыт ва̄равет. – Инесса Анатольевна, ты па̄вылт о̄луӈкве наӈын мӯсты? – Кульпас – ты ёмас, нё̄тнэ па̄вылкве. Ос туп таи лю̄ль, тыглетувле яласаӈкве сака ат ве̄рме̄в, лё̄ӈх та̄л ма̄т о̄лэ̄в. Торыӈ лё̄ӈх о̄лыс те, матыр те яласанув, санборт ва̄тихал ат во̄выгланувӯв. Товлыӈха̄панув Саранпа̄выл, Ягрим ман Ня̄хщамво̄ль та̄ра минэ̄гыт, ма̄хум местал ат то̄влавет, матах хо̄тал тыт та ӯрхатэ̄гыт. Ха̄льӯсныл тыг ёхтуӈкве о̄с рӯпатаӈ. Па̄выл ле̄ккар Инесса Анатольевна тох та потыртас. Таве̄н ма̄н са̄в ёмас, сымыӈ ла̄тыӈ ла̄ве̄в, пус ка̄т, пус ла̄гыл вос о̄лы. Йильпи пА̄вылныл О̄лнэ нЭ̄ Ты пӯльницат яныг ле̄ккар ва̄ӈын хо̄тпаг ма̄ньщи нэ̄ рӯпиты, Тамара Сергеевна Логвиненко, а̄ги о̄парищ наме Сюмина. Таве ам рӯпататэ урыл о̄с китыгласлум, на̄н ань Тамара Сергеевна потре ловиньтэлы̄н. – Тыт ам 1989 та̄л па̄сныл рӯпитэ̄гум. Хӯрум та̄л ювле хультум порат ам ма̄нь ле̄ккарыг рӯпитан щирыл йильпииг ханищтахтасум. Ань яныг леккар ёт рӯпитэ̄гум. Ты э̄лыпа̄лт ос ня̄врамыт пусмалтан леккарыг рӯпитасум. Медучилищат ам фельдшерыг ханищтахтасум. Прививкат тыт пӯльницат ня̄врамытын ос яныгхо̄тпатн ва̄ре̄в. Ам Йильпи па̄вылт (Новинские па̄вылт) самын патсум. Омам Валентина Алексеевна Сюмина, а̄тям Сергей Романович Лыпщиков. Тэ̄н акван ат хасхата̄лсы̄г, таима̄гыс ам омам о̄парищ намыл яныгмасум. А̄тям тэ̄пхӯрге а̄гмыӈ о̄лыс хотталь щалтыс. Омам нёлса̄т нупыл китыт та̄лэ то̄влыс. Тав акваг Восыӈтӯр па̄вылт о̄лыс, ань а̄гмыӈыг е̄мтыс, Тэ̄к па̄вылн яныг увщим палт тотвес, тот о̄лы. Оматем палт ам ва̄тихал ялантэ̄гум, тэ̄лы порат ялсум, уральтаслум. Ве̄рмынэ̄тэ порат тав тыг такви акваг ёхталас. Ма̄н хӯрум яга̄ги о̄лэ̄в, акв а̄пщи о̄щсӯв, ма̄ньлат порат а̄тимыг е̄мтыс. Ам тыт хум ва̄рсум, наме Владимир Анатольевич. Ме̄н хӯрум ня̄врам о̄ньщиме̄н. Яныг пыгме̄н ва̄т нупыл акв та̄лэ, а̄гиме̄н са̄тхуйплов та̄лэ, ма̄нь пыгме̄н хӯрумхуйплов та̄лэ то̄влыс. Ты па̄вылт о̄луӈкве ёмас, ня̄враманум тыт яныгме̄гыт, ты ма̄ ам э̄руптылум. Хотталь ялнэм порат, номтум ювле та о̄лы, ювле та молямлэ̄гум. Тамара Сергеевна хо̄тпа нупыл сымыӈ нэ̄, мӯтраӈ ома. Ты я̄тил ма̄ньщи хо̄тпав пуста̄гыл вос о̄лы, На̄янэ̄н-О̄тыранэ̄н вос ӯргалаве. 1061 2013.10.04. Людмила ТЕТКИНА Э̄ква ӯсн мӯйлуӈкве ялыс. Тох Нина Алексеевна Таратова ёт ам ва̄йхатсум ос тав ётэ потыртасум. Тав лӯпта э̄тпост самын патум ма̄тэ̄н мӯйлуӈкве ялыс. Яныг э̄ква ла̄выс: «Хӯрум э̄тпос яласасум, маткем та мӯйлысум. Кимкъясӯй па̄вылн рӯтанум палт ялсум. Ань ювле Касум па̄вылн минэ̄гум. О̄йкам тав рӯтанэ палт тыт о̄лэ̄гум, юв минуӈкве кусыгласум, Алёшам э̄кватэ Ольга ла̄выс, тыт ялпыӈ хо̄талн вос хультэ̄гум. Ялпыӈ хо̄тал янытлаӈкве та хультсум. Ма̄ньщит ёт тыт, э̄рыӈ, ва̄щинтахтэ̄гум, потраме̄гум. Касум па̄вылт ма̄ньщи тай а̄тим. Тот ханты ла̄тыӈ хӯлуӈкве патсум, потыртаӈкве сака ат ха̄сэ̄гум, рущ ла̄тӈыл тай ханьщувласум, рущ э̄кваг ты е̄мтсум. Ань Кимкъясӯй па̄вылт омам э̄ще ня̄врамыт Лыткиныт о̄лэ̄гыт. Та̄н ам рӯтанум ты, нэ̄мхотьют воссыг ат о̄ньще̄гум. Ма̄нь порат Няхлаӈ па̄выл школат кит та̄л туп ханищтахтасум, тувыл ам аквписыг а̄гмыӈ о̄лсум. Омам ханищтан нэ̄н ла̄выс: «Ханищтахтуӈкве ат ве̄рми, та̄ртэ̄лн, юн вос о̄лы». Тувыл та̄ртве̄сум, юн та о̄лсум. Омам а̄гмыӈыг е̄мтыс, колхозт рӯпитаӈкве патсум. Тот рӯпитым са̄в олныл ат ойтвесӯв, ань пенсия олнум щар мощща. Кульпаст зверофермат рӯпитым, хум ва̄рсум. Акв порат хӯлылум, са̄лы сун та юв. Ха̄йталаве̄сум, Нё̄рн са̄лыӈ колн та тотыгпаве̄сум. О̄йкам Николай Степанович Новьюхов о̄лыс. О̄йкаме̄нтыл Нё̄рт са̄лыӈ колт яласасме̄н. Тувыл Тутлеймын о̄йкам па̄вылн ювле йисме̄н. Ань тот воссыг нэ̄мхотьют а̄тим, то̄нт яныг па̄вылт са̄в мир о̄лыс. О̄йкам хотталь щалтыс, та па̄вылныл Касумн ва̄нтласум. Саранпа̄выл совхозт са̄лы ӯрим китыт бригадат рӯпитасме̄н. Ань тай мувиньтэ̄гум, улпыл, са̄лы нё̄выль тэ̄ӈкве тахсум, таима̄гсыл са̄лыӈ хум ва̄рсум. То̄нт тай са̄лыӈ ма̄хум щёлыӈыт о̄лсыт. Амки ня̄врам ат о̄ньщигласум, о̄йкам тав хӯрум пыганэ, хӯрум а̄гиянэ янмалтасанум. Та̄н а̄нум омаг ла̄вияныл. То̄нт пуссын ма̄ниг о̄лсыт. Ня̄враманум ёмасыт, ёмщакв о̄ньщавем. Касум па̄вылт пуссын о̄лэ̄гыт, ам о̄с тув та ва̄нтласум. Мӯйлуӈкве рӯтанум палт хунь минасум, а̄гим ва̄псум ёт билет ёвтсы̄г. Тыг Ха̄льӯсн та тыламласум. Тыт ос на̄иӈхапын та̄лсум ос Кульпас па̄выл нупыл минасум. Валя яныг а̄гим ос звонитас, китыглахтас, хумус тыт о̄лэ̄гум, мӯйлэ̄гум, ла̄выс, мощщаквен минуӈкве кусыгласум, мӯйлым хӯрум э̄тпосыг ты е̄мты. Тох тай потыр са̄внув кос олы, номылматаӈкве э̄ри». Нина Алексеевна а̄тятэ война о̄вылтахтам порат хо̄нтлаӈкве вуйвес, юв воссыг ат ёхталас. Тав а̄тятэ та̄л яныгмас. Та та̄рвитыӈ порат ма̄ньта̄гыл рӯпитаӈкве о̄вылтахтас. Пенсиян миннэ̄тэ мус ка̄ркамыг рӯпитас. Ам таве яныгпа̄ла хо̄тпат янытлан хо̄талыл янытлылум. Паща ла̄тыӈ таве̄н ке̄тэ̄гум. То̄рум ёт, О̄тыр ёт. Пус ка̄т, пус ла̄гыл вос о̄лы. 1061 2013.10.04. Александр ВЬЮТКИН Хурит по̄слуӈкв вос ха̄сэ̄в. Санкт-Петербургныл тит хо̄тпаг о̄лсы̄г. Александр Иосифович Беленький, Алексей Николаевич Смышляев тэ̄н ты ма̄нав ханищтасы̄г. Александр Беленький фотоаппаратыл по̄слын ма̄хум халт тав намыӈсуиӈ хо̄тпаг о̄лы. Ты коныпал тав университетт фотожурналистика факультетт ма̄ньлат ма̄хум ханищты. Алексей Смышляев ос ма̄ньлат ма̄хум, ня̄врамыт ханищтан кол о̄ньщи. Ты та̄л колэ рӯпитанэ̄тэ лов та̄лыг е̄мтыс. О̄выл э̄типа̄лаг, хунь ма̄н Салехард ӯст пуссын акванатхатсӯв, А̄с я̄ ва̄тат ма̄хар памятник палт тотыглавесӯв. Тот ханты ос ё̄рн ма̄хмыт э̄ргысыт ос йӣквсыт. Хури по̄слын семинарн ёхтум ма̄хум о̄влэ̄т та̄нтина̄ныл ёмас хурит по̄слын хо̄тпаг ловиньтасаныл. Та̄н ла̄всыт: «Манрыг ма̄н акв ма̄т ӯнлын, потрыт хӯнтлын тамле ханищтапыл ва̄рвесӯв. Ма̄н ма̄нти хотьют э̄ри, ханищтаӈкв ве̄рме̄в». Хунь ханищтапув о̄вылтахтас, ма̄хманув астал о̄лым, акв ма̄т ӯнлантым хӯнтлысыт. Э̄типа̄лаг ос ма̄нти хуриянув суссылтасанӯв. Тэ̄н ос ма̄н хуриянув урыл маныр ёмас ос лю̄ль хӯлтыгласы̄г. Титыт хо̄талт Александр Беленький такви по̄слум хуриянэ ма̄навн суссылтасанэ. Хо̄талъят юипа̄лт ос музей колн по̄слуӈкв тотыглавесӯв. Та э̄лыпа̄лт ма̄нав ханищтан хум ла̄выс: «На̄нан ань аквтит ёмас хури по̄слуӈкв э̄ри». Ма̄н тот хумус ве̄рмысӯв ос самув хумус ка̄салас, са̄всыр щирыл лю̄люмта̄лым, та по̄слысӯв. Мо̄т хо̄талт «И. С. Шимановский» нампа музейт ма̄н ва̄рум хуриянув сусве̄сыт. Александр Беленький ка̄сыӈ хо̄тпа по̄слум хуритытныл аквтит хури пе̄рияс. Вим хурит урыл таи ла̄выс: «Хунь хӯрмит хуриӈ нэ̄пакын ва̄раве, ам то̄нт на̄н хуриянын ёлыпа̄лт наманын хансыянум. Ма̄хум вос сунсэ̄гыт ос ханищтахтэ̄гыт». Та юипа̄лт Алексей Николаевичин ханищтаӈкв о̄вылтавесӯв. Тав ма̄навн фотоаппаратыл хурит по̄слын порат на̄й но̄ххорая̄лнэ урыл потыртас. Хунь, хоты порат ос хумус на̄й ёт по̄слуӈкв ро̄ви хӯлтыглас. Тувыл ос хумус яныг ӯсыӈ ма̄т по̄слуӈкве э̄ри, таи потыртас. Яныг ӯст то̄ва ма̄т ос то̄ва порат по̄слуӈкв щар ат ро̄ви. Таима̄гсыл хансым са̄кконыт ва̄ӈкв э̄ри. Атиӈк по̄слын утын полициян хотвиӈкв ве̄рмаве. Ты коныпал ос мо̄т хотты по̄х ма̄хмытын яныг тынпа фотоаппаратын пулигве̄латаӈкв ос на̄нти ра̄туӈкв ве̄рмаве̄н. Са̄ккон ва̄им, на̄нан та̄н ётаныл кӯстырыг потыртаӈкв а̄ртми. Э̄типа̄лаг ос Салехард ӯс сунсуӈкв тотыглавесӯв. Алексей Николаевич ма̄навн хащта̄л ма̄хум по̄слуӈкв ла̄выс. Ма̄нав ат ва̄нэ хо̄тпат то̄ват мовиньтэ̄гыт, титыглахтэ̄гыт, мо̄таныт кантыӈ самыл сунсэ̄гыт ос лю̄ль ла̄тӈыл ля̄втэ̄гыт. Ханищтан хум ла̄выс: «Хунь тох е̄мталанэ порат на̄н ущ торгамтылы̄н, фотоаппарат манырсыр яныг ё̄р о̄ньщи». Юио̄выл хо̄талувт ка̄сыӈ хо̄тпа ханищтахтаме урыл потыртас. Тамле ханищтап ма̄навн мӯстыс. Ка̄сыӈ хо̄тпа таквина̄тэ̄н матыр пӯмащ ос ёмас номт хансыс. Э̄типа̄лаг Горнокнязевск па̄влын тотыглавесӯв. Тот ё̄рн ма̄хум са̄лыӈ коланыл ос пе̄с йис о̄лупсаныл урыл музей кант экскурсиял ва̄рыглавесӯв. Ё̄рнколт пасаныл щё̄пита̄лвесӯв. Тот ма̄н во̄иӈ мохсаӈ хӯлыл, атыӈ са̄лы нё̄влил ос са̄ккарыл тэ̄лыгтым морахыл тыттувесӯв. 1061 2013.10.04. Тамара МЕРОВА Ялпыӈ ма̄т урыл. Ам марий ма̄хум та̄н ялпыӈ ма̄наныл урыл хансэ̄гум. Марийцыт тахольт тамле ма̄наныл ань тыг мус ӯргалым о̄ньщияныл, ос ты урыл ма̄ньлат хо̄тпатн потыртэ̄гыт, э̄лаль ӯргалаӈкве ханищтыяныл. Пе̄с тамле ма̄ныл коммунист кӯщаитытн о̄с хотсакватаӈкве тахве̄сыт. То̄нт мо̄т щирыл о̄лвес, э̄лумхо̄лас ка̄сащи манос а̄ти, ос яныг кӯщаит ла̄тӈын хӯнтлуӈкве э̄рыс. Тувыл тӯйтыглахтым то̄ва ялпыӈ ма̄т марийцыт сытамыг о̄щсаныл. Та̄нки са̄в та̄л тув ат ялантасыт, нэ̄мхотьютын ат хӯлтыгласаныл. Ётыл йильпииг пе̄риим кӯщаит о̄лупса нупыл мо̄т щирыл сунсуӈкве патсыт. То̄нт пе̄с йис веран агтнэ ма̄хум ялпыӈ ма̄ныл палт ва̄тихал ёхталаӈкве патсыт. Марий ма̄т Моркинский районыт Ю. Н. Алексеев кӯщайлахтын та̄ланэ сыс ты ялпыӈ ма̄т ӯргалан ма̄гыс са̄в рӯпата ва̄рыс. Ма̄хмыт ёт акваннё̄тхатым пӯрлахтын ма̄т ёмщаквег хотщё̄питасаныл. Ань тув са̄в ма̄ныл ма̄хум пӯрлахтуӈкве манос э̄лаль о̄лнэ ёмас номт во̄вуӈкве ёхталэ̄гыт. То̄ват пусмалтахтын ма̄гыс тув ялантэ̄гыт. Туи порат ма̄н, финноугорский журналистыт, тамле ма̄н тотыглавесӯв. Э̄типа̄лаг Юрий Никитич ос Елизавета Арсентьевна Алексеевыг ёт хо̄нтхатыгласӯв. Ма̄н аквъёт пе̄с йис о̄лупса урыл са̄в потыртасӯв. Ты э̄лыпа̄лт о̄йка няслуӈкв ялум ос тэ̄н э̄кватэ̄нтыл атыӈ хӯл исмит па̄йтмыг, ты коныпал нё̄влил тыттувесӯв. Э̄кваго̄йкаг мо̄лтынув пенсиян патхатсы̄г. Тэ̄н атпан нупыл акв та̄л аквъёт о̄лэ̄г, ань пыгаге̄на̄гияге̄н ня̄врамыт янмалтаӈкве нё̄тэ̄г. Тыгыл э̄лаль пӯрлахтын ма̄ урыл хансэ̄гум. Ё̄р ма̄ Акв ялпыӈ ма̄ныл марийцыт рущ щирыл «Гора золы» ла̄вияныл. Таве та̄н сака ё̄р ма̄г ловиньтыяныл. Тот пе̄с йис пораныл ма̄хум акванатхатыгласыт, пӯрлахтасыт, йирхатсыт ос а̄ращ па̄лтыгласыт. Тувыл а̄ращныл хӯльм хотхосгыгласаныл ос мо̄т хара ма̄н акванатыгласаныл. Та па̄сныл хӯльм урыт янгыг е̄мтсыт, таима̄гыс ты ялпыӈ ма̄ тамле намыл пинвес. Ты ма̄ щар во̄р щахылт о̄лы, акв ма̄т ощща лё̄ӈх хосыт ма̄шинал тотвесӯв. Тувыл во̄р хосыт ла̄глыл мощ ё̄мсув, ос хара ма̄н нэ̄глапасӯв. Тот па̄рт колыт ӯнттым о̄лсыт, то̄ва йӣвытын са̄всыр то̄р са̄лмыт, пуӈк то̄рыт нэ̄гсалым о̄лсыт. Ма̄н тот мо̄т па̄лыл ощща лё̄хъяс хосыт ёлва̄глуӈкве ла̄ввесӯв. Тот сыстам со̄юмт по̄лям вит айсӯв, вильтанув ловтсанӯв ос ювле во̄ввесӯв. Ты лё̄хъяс хосыт минамувт, ма̄н са̄всыр йӣвыт ка̄сала̄лсӯв ос потыртавесӯв, хоты йӣвын манхурип мӯйлупсат ма̄хум тагатэ̄гыт. Ос но̄хйинэ̄в сыс ма̄нки матыр номт во̄вуӈкве ос мӯйлупса хультуптаӈкве ве̄рмысув. Хум ва̄рнэ ма̄гыс нэ̄ хо̄тпат манос нэ̄ тотнэ ма̄гыс хум хо̄тпат йӣвытын пуӈкто̄р нэ̄гсалэ̄гыт. Тот акв та̄рныл кит йӣвыг яныгме̄г ке, тамле йӣвыгн мӯйлупсат нэ̄гсалавет. Хум хо̄тпат ос нэ̄ хо̄тпат та̄нки я̄нас йӣвыт о̄ньще̄гыт. Мо̄т йивытын ма̄хум щуниӈыг ос пуста̄гыл о̄лнэ ма̄гыс, вильт сэ̄гнэ то̄рыт, то̄р са̄лмыт нэ̄гсалэ̄гыт. Хум хо̄тпат то̄ва йӣвытын носкит тагатэ̄гыт, маныр ма̄гыс тай ма̄н, нэ̄ хо̄тпат, ат хӯлтвесӯв. Ня̄врам ат о̄щнэ ма̄хум о̄с тот по̄йкще̄гыт, ма̄нь ня̄врам маснут тув тотэ̄гыт. Тот, со̄ль, ма̄тэ ё̄рыг о̄лы ос сытам. Ӯйрищит хо̄т луйгынэ̄ныл суйтэ̄гыт, со̄юмт витэ овтнэ̄тэ суйты, то̄ванакт во̄трег хо̄иглы. Номтанув ёмасыг е̄мтэ̄гыт, ос ма̄нки ё̄ранув аквтуп ювлеёхтэ̄гыт. Карман Курык Ты ма̄ заповедникыг ла̄ваве, ты сака нё̄тнэ ма̄. Карман курык – тыи яныг уркапай. Тот акв ма̄т са̄всыр йӣвыт яныгме̄гыт, мо̄т па̄лэ хара. Ма̄ тот са̄всыр лӯптал ос пилыл яныгмаве. Тот хоты лӯптал манос пилыл яныгман ма̄тэ̄т лю̄ле̄гын, тот аквта хурип атэ нёлсамасагын атаяхты. Ам хосат та̄гыл тамле хорамыӈ ма̄ ат ва̄щинтасум ос са̄всыр лӯптаӈ атыл ат лылтсум. Тув яныг ӯсыӈ ма̄т о̄лнэ ма̄хум вос ёхталанувыт, ма̄витув пе̄с йис та̄гыл хумле щирыл о̄лы ос маныр ма̄навн мыг, вос суснуваныл, ма̄ атэ атая̄лнуваныл. То̄нт ул торгамтэ̄гыт, маныр ма̄гыс ма̄ке̄в сыстамыг о̄ньщуӈкве э̄ри. Марий ма̄т о̄лмумт ам тамле номтын ёхтуве̄сум. Та̄н пе̄с йис щирыл ань тыг мус по̄йкще̄гыт, ялпыӈ ма̄наныл акваг ӯргалым о̄ньщияныл, То̄румн та̄нки о̄с ӯргалавет, ань ул таима̄гыс та̄н ма̄нанылт са̄в со̄юм о̄лы. Тот щар сыстам атыӈ вит овты. Ма̄хум са̄в ма̄т со̄юмныл вит аюӈкве ве̄рме̄гыт. Тувыл то̄ва ма̄т пувлынколыт ва̄римат, ма̄хум по̄лям витыл со̄сантахтуӈкве тув щалтсэ̄гыт, пусмалтахтэ̄гыт. Та щирыл та о̄лэ̄гыт. 1061 2013.10.04. Мария Двинянинова Туи пора. А̄ӈкватэ̄гум, хумус ма̄нь э̄щум оматэ юипа̄лт койхатым, хӯл солвал витын пувтма̄нтым тэ̄г. Номтэ̄тл, улпыл, яныг хо̄тпаг таквина̄тэ номсытэ. Ам тай яныг. А̄нумн атхуйплов та̄л. Туп тыщирыл номылматаӈкв а̄лымасум, омам ла̄выс, тэ̄н а̄щумтыл холытан тэ̄нут ма̄гсыл Кульпасн минэ̄г. А̄нум янгыг хультуптытэ̄н. Омам тымус ӯрыс пищмала̄тыӈ яныг ня̄врамаге̄ныл. Тэ̄н э̄лы са̄м ӯст о̄лэ̄г. Таима̄гыс омам сыме сака ща̄рги ос номсахты. Ты потыр хӯлмум юипа̄лт, ат ва̄глум маныр ва̄руӈкв: хумус ма̄нкке̄в во̄рт хультэ̄в? По̄ри ла̄вуӈкв куссум, тувыл ат ве̄рмысум. Ты щирыл, яныг хо̄тпа хольт о̄луӈкв патэ̄гум! Э̄щанум хӯнтлым хумус ла̄ве̄гум, ам пилэ̄гум ка̄сыӈ матыр сырыхтан суил, ӯйрищ илтторыг луйгасан суил. Матырсыр во̄рӯйн те нэ̄главе̄в? Норкол кӣвырыт те о̄лсӯв, тай ос мо̄т ва̄рмаль, ты парщинпалатка са̄й хунь ва̄ри. Хоталь щалтапе̄в, матарын те ёхтаве̄в? Йӣвн но̄хха̄ӈхуӈкв э̄щанум ат ве̄рме̄гыт, иӈ ма̄нит. Писалил хультуптаве̄в манос а̄ти? Улпыл, хультуптаве̄в. А̄ращ туп, тя̄какв тав ве̄рми во̄рт ма̄нав вуянтаӈкв. Э̄ри са̄внув ӯльйив тотуӈкв. Ты хо̄тал хунь, тах номылматавемхурахлэ̄гум. Хурахлан ва̄рмаль тай лю̄ль. Хунь ща̄нягума̄щагум о̄лэ̄г, ам хурахлан нупыл тэ̄лам а̄ти, коспыл э̄лын вус о̄лэ̄г. Ма̄н ётув яныг кӯтюв о̄йкав, таима̄гыс номтанув мощ та̄кыт. Та̄к номтыӈыг ва̄рхатым, китыглахтэ̄гум. – Хунь ёхтэгы̄н? – Хо̄т щё̄с юипа̄лт, ӣтипа̄лаг, – омам ла̄ви. – А̄лпыл ла̄пкан ялэ̄гум, пиланув промхозн мыгум ос пищма хаслыгтапе̄гум – ке̄тэ̄гум. Тувыл мисагум послыгтэ̄гум щаквит тыг тотуӈкв. Ӣтипа̄лаг тэ̄пъяламув юипа̄лт, ка̄сыӈ хо̄тал ва̄рнэ рӯпатав о̄вылтахтас. Омав хӯл то̄слаӈкв щё̄питы, йильпи ма̄нь ка̄сэврищитыл ёхул ва̄ри ос сорых хӯлныл ёхул щё̄питы. То̄слым хӯл ос ёхул тэ̄лы кастыл кӯтюв пӯт па̄йтуӈкв та̄сытлыянэ. А̄щум хӯлпанэ щё̄питы. Ам ос тӯр ва̄тат а̄ны ловтэ̄гум, тӯр ляпатнув о̄лы, я̄ мус хоса. Тӯр ма̄нькве, таима̄гыс хӯл ат о̄ньщи, туп ондатрыт уйгалэ̄гыт. Мощ улпыл ондатр о̄лы, йильпи пум саквыт ты на̄тгащлавет. Тӯр ва̄тат ма̄н ха̄ӈхуп о̄ньще̄в, хунь ё̄мнэ порат такем ёмащакв хосгащлахтэ̄гыт. Та̄рвитыӈ матыр тотнэ порат витн ёла щалтапи. Ам тай ха̄ӈхылтап оигпан ма̄т а̄ныса̄н ловтэ̄гум, кӯпнит ма̄гыс витын ат а̄мараве. Хо̄тал ӯнтнэ ма̄ нупыл сунсэ̄гум, тӯп йӣв тальхыт са̄йт ты на̄ӈки, тыгыл э̄т котилиг е̄мты. Хо̄тал ӯнтнэ ма̄тэ выгрыг те̄лум, холытан тах во̄тыӈ хо̄талыг паты. Тувыл омамн нё̄тсум ёхул тагталаӈкв. Тав ща̄гтым ла̄ви: «Холытан ёмас, во̄тыӈ хо̄тал, ёхланув ёмащакв во̄тавет, то̄сэ̄гыт. Хорёхланум ёмщакв то̄сэ̄гыт, Ленинградн ня̄врамагум палт ке̄тэ̄гум » Омам такви о̄с во̄т во̄внэ мӯтра ва̄г. Тыщирыл о̄лыглы, хунь пум то̄слан порат, пумканыт. Ӯщлахтуӈкв ӯнтэ̄в, э̄щагум саглэ̄г – сака ре̄гыӈ, тувыл омам но̄хлю̄ли, а̄рталытэ, хотыл ве̄рми во̄трег йиӈкв ос о̄вылтахты кисгащлаӈкв, во̄т аки во̄вуӈкв, тай такви ве̄саре ва̄гтэ, э̄рнэ щирыл та кисгащлы. Ма̄н тай лылтасаттал, суйта̄л та ӯнлэ̄в. Тувыл, со̄ль, во̄трег ла̄щалакв ты ёхты, тав ма̄н та̄рав тахы ос пум кӯпнат ёт ёнгим, пум ло̄мт но̄хлаплым та мины. Омам тав по̄йкитэ: «Во̄тэнво̄тэн во̄трег Лё̄моит, ма̄ньуйит хотнуясаптэ̄н. Ня̄враманум вус ӯщлахтэ̄гыт». Яты! Тувыл ӣтипа̄лаг мус ман ос пумканув та во̄таве̄в. Колсори рӯпатав а̄сты, ёлхуюӈкв щё̄питахтэ̄в. Яныг ситец то̄рыл ю̄нтым хасап кӣвырт хуе̄в, палатка кӣвырн нэ̄гсалым о̄лы. Хасапув са̄всыр хорамыӈыг толтым ситецыл ю̄нтым о̄лы. Нумитэ ос хасап китпа̄лаге – вуйкан атырхари оспа хорамыӈ лӯпта ситец. Са̄манэ – солиг щирыл иныг щё̄ри оспа нила са̄мп хансаӈ ситец. Мо̄т о̄влаге ос хо̄тахтем сыр хансап то̄рыл. Ма̄н ёлойнэ̄в мус тыт та щӯрнитэ̄в, хотьют маныр ты то̄рытыл ю̄нтыс, тувыл питасыӈ лё̄мой пангын суил ёл та ояве̄в. Омам турсуил но̄хса̄йкалэ̄гум: «А̄гикве, ква̄лэн». Ла̄щлакв хасапныл конква̄лэ̄гум, хасап о̄вланэ ёмащакв ёлатохрим, лё̄мой ул вус щалты. Такем посыӈ, хо̄талыӈ хо̄тал. Лургимщиньгим ха̄пка йӣв лӯптат лэ̄нтге̄гыт, ӯйрищаквет хо̄та̄ти луйге̄гыт. Ӯлмум хотрагатас, туп номтын патапас китгагум миннэ лё̄ӈх. Тувыл ос ёлыпал номтумт – номсэ̄гум, э̄рыӈ пуссын аквъёт минэ̄в. Тӯр ва̄тан минэ̄гум ловтхатуӈкв. Вит ат атае̄гум, маныр ёт аквхурипаг о̄лы? Ма̄нь порам ёт, омам ёт манос тыныӈ ма̄тем ёт? Маныр ёт? Омам ёхтыс, китыглылум: «Ома, вит маныр атыл пасы? » Куньгасым ла̄ви: «Вит атыл. Маныр пуссын такви ат о̄ньщи». Омам а̄нумн ла̄ви маныр ва̄руӈкв. Такем ка̄смоста̄л патсум, со̄ль, тэ̄н минэ̄г. Савакыт хӯланув ханэ̄гыт, матыр хащта̄л мотор суй сумыллы, ёхланув хотталь во̄рын вус тӯйтыянӯв. Ань сорых пувуӈкв ат ро̄ви, а̄щув истрапыл пинаве. Ща̄нягува̄щагув молях минасы̄г. Мотор суе̄н ла̄щалла̄щал оигпи, аквмат суе щар та холас. Хурахлаӈкв патсум. Акваг хӯнтала̄лэ̄гум. Кӯтюванум нупыл сунсэ̄гум, роттыг о̄лэ̄гыт, ро̄ви ат пилуӈкв. Э̄ри о̄вылтахтуӈкв матыр ва̄руӈкв, то̄сам йӣв а̄ращ по̄хан тотуӈкв. Ты рӯпата ва̄рим э̄щагум а̄нум ка̄саластэ̄н, таима̄гыс тэ̄нэ̄в юипа̄лт е̄мталасы̄г тӯйтыглахщтым ёнгуӈкв, ам э̄ла ат та̄ратасагум. Тувыл кукланэ̄н ёт ёнгуӈкв патсыг, ам а̄кань супыл ю̄нтсагум. Ат и мо̄сталаслӯв, хунь хо̄талъ я̄тыг е̄мтыс. Аквматэ̄рт мотор суй сумыллас, ма̄н о̄лнэ ма̄в нупыл ты нуйхаты. Ёла ва̄ӈклата̄лым молях ёхланум во̄рн та а̄лумтыянум. Пасант яныг касай а̄лмаясум, э̄щагум во̄власум – во̄рн та ха̄йтэ̄в. Хунь то̄сам йӣв атмум порат ёлахусылам яныг йӣв ва̄сум, тыгыл но̄хха̄ӈхе̄гын, о̄лнэ ма̄в ёмащакв на̄ӈки. Рущ о̄йка ёхтыс хопсат а̄тыӈ, щаклиӈ пуӈкыӈ. Ам таве ва̄глум, тав пиркатирыг о̄лы, хӯл алнэ ма̄хум тармыл. Палатка ляпан йис, кӣвырн а̄ӈквата̄лыс, тувыл пасан ва̄тан йис, ща̄йпут поньсалас, улпыл а̄рталастэ исум манос а̄ти. А̄ращ ва̄тат мощ лю̄ляхо̄лыс, ро̄ӈхувла̄лыс, а̄щум во̄выс, тувыл со̄пасыг китах щёс патамта̄лыс. Тувыл нэ̄пакло̄мт хансыс ос та минас. Ма̄н во̄рт мощ о̄с о̄лсӯв, тувыл палаткав ляпан йисӯв. Надя э̄щум китыглахты: – Наӈ манрыг касай висын? – Нэ̄нан вуянтаӈкв. – Хотьютыл вуянтаӈкв? – Э̄рыӈ, мори матарыт ёхтысыт. Нэ̄пакло̄мт ловиньтылум: «Селивёрст, Па̄льят ка̄сэвыт минмыгтасыт, э̄ри тув минуӈкв, хӯл алыщлаӈкв». Аквматэ̄рт пилыщмам хотталь минас, такем ёмас патыс. Амкирот номсэ̄гум, во̄рте̄мын вуянтавем, са̄йлавем. О̄с хӯлэ̄гум мотор, о̄с э̄щагум во̄рн тотыягум. Тот тай ма̄н нэ̄мхотьютын ат новаве̄в. Ань а̄ращ ва̄тат хунь ӯнлэ̄в, э̄ри во̄рт о̄лнэ рӯпата ва̄руӈкв. Кӯтюванув лыпащ та̄ратасанӯв, минасӯв э̄лы тӯрын, хӯлпанув сунсуӈкв. Са̄в хӯл пувсӯв, ма̄нки щё̄питасанӯв, тувыл пӯт пе̄тсӯв, ӣтипа̄лаг е̄мтыс, омагува̄тягув ёхтэ̄г. Тувыл ха̄йтталасум сосыг ва̄туӈкв, ве̄тра та̄гыл ва̄тсум ос аквматэ̄рт мотор сумыллас, ты тай ма̄н моторув суй. Тав суе ма̄н мо̄таныт ёт ат тэ̄лыгтылӯв. Ща̄гтым со̄втанув ве̄тран равтасасӯв, нир халыт вораталым, на̄лув ха̄йтэ̄в. Хотьютув са̄ртын а̄лыми на̄лув ёхтуӈкв. Атхунь, ма̄н э̄лыпа̄лувт кӯтьванув на̄яныл палт нуйхатэ̄гыт. Ма̄н о̄с ха̄йтсӯв, омав палт сынумтахтасӯв, хоса сынгатахтыгласӯв. Омате̄в атыл лылтсӯв, ма̄кыг ма̄н атув. Такем солгев, ща̄гтым потыртэ̄в, тымус тэ̄пъялэ̄в. Омав ма̄навн пищмат ловиньтас: увщим Валя ос каӈкум Слава хансум пищманэ̄н. Тахольт ёмащакв, пуста̄гыл о̄лэ̄г. Ма̄н ос тыт о̄лнэ потранув халувт торастахтым потыртэ̄в. Ва̄гтал патнэг мовиньтым, пиркатир ёхталам урыл потыртэ̄в, тох та минас торгамтатта̄л, а̄ращ тэ̄г, курыскат ща̄иӈ та̄гыл ӯнлэ̄гыт, нэ̄мхотьют а̄тим Туп а̄щув тав супне̄лум та̄л ӯнлыс, нэ̄матыр ат ла̄выс, суйта̄л пӯмщалахтым ма̄нав хӯнтлас. Ос тове̄рт ля̄галанты ма̄нав пуӈкыт вотгащлым: «Надятем, Маринатем, Светатем». Манарыл майве̄сум ос хультуптаве̄сум ам номтумт ты хосахоса туи хо̄талакве̄н? Ёлыпал номтумт номсэ̄гум, ам ве̄рме̄гум во̄рт о̄луӈкв. Хумус во̄рт о̄луӈкв э̄ри – ха̄сэ̄гум. Во̄ртем э̄ри янытлаӈкв, ӯехӯлэ ёт э̄руптаӈкв. Тав таима̄гыс са̄в пӯмащ, со̄т мыг. Сыстам во̄рквет сыстам номт ёхты, о̄лнэхӯлнэ ка̄сын пӯмащигщуниӈыг е̄мты. Посыӈ то̄румн сунсавен, лӯр гын хо̄талаквен ё̄ӈхавен! 1062 2013.10.18. Галина КОНДИНА Са̄в о̄лнэ кол ӯнттаве. Округ губернаторув Наталья Комарова ва̄ӈын хо̄тпанэ акванатыгламе порат ла̄выс, ты та̄л ювле хультум нёлолов э̄тпос сыс 308 со̄тыра кв. метра са̄вит о̄лнэ кол ӯнттувес. Мо̄лты округув янытыл ты э̄тпосыт сыс о̄с аквты са̄вит ӯнттуӈкве а̄лымавес. «Ань иӈ са̄в колыт моще̄ртын ты а̄стлавет, ма̄хмытын тув о̄лмыгтан ма̄гсыл туп нэ̄пакыт мӯсхал щирыл ва̄руӈкве хультыс. Та̄лув оигпан мус иӈ тит э̄тпос о̄лы. Ӯнттуӈкве о̄вылтым колыт пуссын а̄стлаӈкве э̄ре̄гыт», округ кӯщаюв ла̄выс. 1062 2013.10.18. Николай МЕРОВ Лю̄ль пищ ла̄щал мощщами. Мо̄лал округ полиция кӯщай Василий Романица ля̄ххал тотнэ ма̄хум ёт ва̄щинтахтас. Ань округувт лю̄ль пищ ва̄рнэ нак хомлег о̄лы, тав ты урыл потыртас. Кӯщай хум ла̄внэ̄тэ щирыл, ты та̄л онтолов э̄тпос сыс округ полицият рӯпитан хо̄тпат хо̄тса̄т арыг коррупция ва̄рмаль та̄рапаттысыт. Коррупция ты хунь ма̄хум хотты кӯщаитн матыр ва̄рмаляныл ма̄гыс взяткаолн мыгыт. Ос таи ёмас, мо̄лты та̄лныл ань мощщаннув тамле пищ ва̄раве. Полицият рӯпитан хо̄тпат ты тэ̄ла та̄кыщ уральтым о̄ньщияныл. Таима̄гыс ань округувт тамле преступление морсыӈ порат е̄мталы. Та сыс, иӈ са̄в рӯпата ва̄руӈкве э̄ри. Ты та̄л коррупция ва̄рмаль китса̄ткем миллион солко̄ви са̄вит та̄рвит тотыс. Ты олнытыл туп налыман нупыл кит миллион ювле ойтвес. Мо̄лты та̄л ос са̄тпан нупыл хо̄т миллионныл туп китхуйплов миллион ювле ойтвес. Тамле лю̄ль пищ са̄выӈпа̄лэ Сургут, Ханты-Мансийск, Нижневартовск, Нягань ӯсытт ос Сургутский районт о̄лы. Ты о̄щмарлап янгыщ мир пусмалтан ос ханищтап ва̄рмалигт е̄мталы. Взяткаолн винэ манос майлын хо̄тпат пувуӈкве сака та̄рвитыӈ. Ань хо̄тпа полициян то̄нт мины, хунь тав такви олнанэ э̄л миӈкве ё̄рыл яртаве. Полиция кӯщай э̄лаль ла̄выс: «Мир пусмалтан хосыт са̄выӈпа̄лэ тамле ва̄рмаль е̄мталы, ма̄хум юн ӯщлахтынэ̄ныл ма̄гыс а̄гмта̄л ле̄ккарыт палт пӯльница нэ̄пак ёвтэ̄гыт. Тувыл ос матыр рӯпата ва̄рнэ ма̄гыс арге̄н са̄в олн во̄ве̄гыт. То̄ва организацият ос тох ва̄ре̄гыт: хо̄тпа хосат та̄гыл тот ат рӯпиты ос тав ма̄гсылэ олн выгыт. Ты коныпал ос мо̄т са̄в о̄щмарлан ва̄рмаль о̄лыглы. Ос ханищтап ва̄рмалит таи ёмас о̄лыс, ты та̄л экзамен ос ЕГЭ о̄лум порат взяткаолн минэ нак ат е̄мталас». 1062 2013.10.18. Людмила ТЕТКИНА Соссаӈ ма̄хум тах нё̄тавет. Во̄ртур э̄тпос порат Ханты-Мансийск ӯст соссаӈ ма̄хум акванатыглаве̄сыт ос «Социальноэкономическое развитие коренных малочисленных народов Севера на 2014-2020 годы» нампа йильпииг хансым программа урыл китыглаве̄сыт. Сапра̄нин во̄виньта̄лым ма̄хум та̄нки о̄щнэ номтаныл урыл тот потыртасыт. Ты ва̄рмаль хосыт рӯпитан кӯщаит ёхтум мир хӯнтлысаныл ос ювле ла̄всыт, та̄н потыртам тэ̄ланыл ке артме̄гыт, ты йильпи программан тах хансыяныл. Ма̄нь таквс э̄тпос о̄вылтахтам порат Правительство кӯщаит йильпи щирыл хансым нэ̄пак та пирмайтасаныл. Ты программа хосыт соссаӈ ма̄хум культура э̄лаль тотаве, общинат нё̄тавет ос са̄в рӯпата ты мирыт ма̄гсыл ва̄раве. Ты коныпал этнотуризм, ма̄ньлат хо̄тпат ханищтан ма̄гсыл, о̄с ты программанныл олн тах та̄ставе. Са̄т та̄л сыс соссаӈ ма̄хмытын нё̄тым округ бюджетныл 1 млрд. арыгкем солко̄ви тах хансаве. Акв та̄л сыс 700 миллион солко̄ви ты программан тув та̄ставе. Кӯщаит ла̄внэ̄ныл щирыл, щар ка̄сыӈ ма̄ньщи, ханты, ё̄рн хо̄тпа нё̄туӈкве патаве. Аквта сапра̄нит яныгпа̄ла хо̄тпат урыл кӯщаит потыртасыт. Ва̄т са̄грапнал э̄тпост округув янытлан хо̄тал кастыл пенсият о̄лнэ ма̄хум олныл ойтавет. Округувт о̄лнэ яныгпа̄ла ма̄хум акв со̄тыра солко̄вил ос Тюменский областьт о̄лнэ хо̄тпат 650 солко̄вил мивет. Округув янытлан кастыл ты олныл 221 со̄тыра э̄лумхо̄лас ойтаве. Наталья Комарова, округ кӯщай нэ̄, ла̄выс: «Ты олн ат рӯпитан хо̄тпат та̄н мивет, та̄нанылн са̄всыр заявлениенэ̄пак хансуӈкве ос очередит лю̄люӈкве ат э̄ри. Ты ма̄хум округув янытлан хо̄тал э̄лыпа̄лт ты олныл тах ойтавет. Ам номсэ̄гум, та̄н пуссын ты ялпыӈ хо̄тал ёмас номтыл тах янытлыяныл». 1062 2013.10.18. Валентина УЗЕЛЬ Та̄н акв щирыл вос рӯпитэ̄гыт. Округувт «предпринимателиг» ла̄внэ са̄в хо̄тпа рӯпиты. Та̄н та̄нти ва̄рнэ рӯпатаныл са̄кконыт щирыл ва̄рияныл. Ос кӯщаитн сака ул вос лю̄камтавет, ФАСыг ла̄внэ федеральный антимонопольный служба рӯпиты. Та ма̄т кӯщай ва̄ӈын хумыг Илья Тарханов о̄лы. Тав ля̄ххал хаснэ ма̄хумн ва̄рнэ рӯпатаныл урыл потыртас. Ты йист та̄нти я̄нас рӯпитан предпринимательхо̄тпат матыр рӯпата та̄нти тинсэ̄гыт. Ос та̄н та рӯпатал та̄ра ат мивет, о̄влэ̄т акв тамле рӯпата ва̄рнэ хо̄тпат халанылт касуӈкв ла̄вавет. Хотьютаныл мощщанув олн во̄ви манос та рӯпата ёмащаквнувег ва̄ритэ, тав ты но̄хпаты. Рущит ты ва̄рмаль «госзаказыг» ла̄вияныл. Ос то̄ва кӯщаит та̄нти ва̄нэ предпринимательма̄хманыл туп таит рӯпатал мыганыл. Мо̄таныт по̄хат та хультэ̄гыт. Ты лю̄ль ва̄рмалит та̄рапаттын ма̄гыс ФАС ты рӯпиты. Ань ты мус та̄нанылн 1 со̄тыра 200 хо̄тпа полщ тотнэ пищма хассыт, та̄н хансум ва̄рмаляныл пуссын уральтаве̄сыт, ос лю̄ль ва̄рум кӯщаит штрафыл пинве̄сыт. Пуссын аквъёт та̄н 8 млн. солко̄ви штрафолн ойтсыт. Ос ань са̄кконытт кӯщаит урыл тох хансым о̄лы. Та̄н акв та̄л сыс хӯрум щёс матыр лю̄ль ва̄рмаль те ва̄ре̄гыт, туп то̄нт та̄н штрафыл пинавет, 15 со̄тыра солко̄ви ойтэ̄гыт. Штрафолн ойтэ̄гыт, тувыл э̄лаль та рӯпитэ̄гыт. Тох ва̄руӈкв ат кос ро̄ви. ФАСт рӯпитан ма̄хум ань то̄ва са̄кконытт мо̄т щирыл хансуӈкв таӈхе̄гыт. Акв щёс матыр лю̄ль ва̄рум кӯщай тав та̄ра по̄хан вос те̄таве, матах та̄л кос хо̄т кӯщаиг рӯпитаӈкв щар ул вос та̄ртаве. 1062 2013.10.18. Людмила ТЕТКИНА Савалап ня̄врам янмалтан ще̄мьят урыл. Ты э̄тпост округ Дума депутатыт акванатхатыгласыт ос 42 са̄ккон пирмайтасыт. Та̄н савалап няврамытын ойтнэ пособиеолныт, пенсият, ханищтап ва̄рмаль, округ бюджет ос са̄в мо̄т э̄рнэ тэ̄лат урыл потыртасыт. Сапра̄ни о̄вылтахтам порат депутатыт стихыт хансум ё̄рн хум Юрий Вэлла ка̄стысаныл. Борис Хохряков, округ Дума кӯщай, ла̄выс: «Сӯкыр э̄тпост Юрий Вэлла а̄тимыг е̄мтыс. Тав соссаӈ ма̄хум пе̄с йис ва̄рмалит но̄хво̄рмалтан ма̄гсыл яныг рӯпата ва̄рыс. Округув тамле мӯтраӈ хо̄тпа та̄л та хультыс». Ты юипа̄лт ма̄хум рӯпитаӈкве о̄вылтахтасыт. Та̄н савалап ня̄врамыт ӯргалан ва̄рмаль урыл са̄ккон пирмайтасыт. Ты ня̄врамыт янмалтан ма̄хум ань са̄в олныл мивет. Тамле ня̄врамыт вим нэ̄гхумыг сас акв э̄тпос сыс 10 со̄тыра арыгкем солко̄вил ойтаве̄г. Та̄нанылн ойтнэ олныт о̄с тах но̄хнё̄тавет, акв э̄тпос сыс акв хо̄тпа 13 со̄тыра солко̄вил ойтуӈкве патаве. Ма̄хум яныг а̄ги ман пыгыт виӈкве сака ат ка̄саще̄гыт, тыима̄гсыл яныгнув ня̄врамыт янмалтым, мощ са̄внув олныл тах ойтавет. 12 та̄лныл яныгнув савалап ня̄врам ще̄мьян о̄с ке виве, ты ня̄врам ма̄гсыл 1 со̄тыра 775 солко̄вил са̄внувег миӈкве патавет. Сапра̄нит депутатыт ос «прожиточный минимум» урыл хансым са̄ккон урыл потыртасыт. Ты олныт мо̄тыт та̄лныл о̄с тах но̄хнё̄тавет. 2014 та̄лт яныгпа̄ла ма̄хум 8 со̄тыра 985 солко̄виныл мощщанув ке выгыт, та̄н ты са̄вит мус олнаныл но̄хнё̄тавет. Рущ ла̄тӈыл ты тэ̄ла «социальный доплатаг» ла̄ваве. Мо̄тыт та̄лт округувт 20 со̄тыра 619 э̄лумхо̄лас тамле доплатаолныл тах ойтаве. Ханищтап ва̄рмаль урыл депутатыт о̄с потыртасыт. Соссаӈ ма̄хум Ассамблеят рӯпитан хо̄тпат акв э̄рнэ рӯпата ань ва̄ре̄гыт. Та̄н ё̄раныл хосыт ма̄ньлат хо̄тпат ос ханищтап щирыл рӯпитан департаментыт соссаӈ ма̄хум отдел тах ва̄раве. Тот хӯрум э̄лумхо̄лас ма̄ньщи, ханты ос ё̄рн ма̄ньлат ма̄хум, ня̄врамыт ханищтан тэ̄ла щирыл рӯпитаӈкве патэ̄гыт. Еремей Айпин ла̄выс, ань тот 30 арыгкем э̄лумхо̄лас рӯпитаӈкве ка̄саще̄гыт. Та̄н халанылт каснэ̄ныл юипа̄лт хӯрум хо̄тпа тах пе̄риявет. Округт рӯпитан депутатыт «депутатский фондыг» ла̄внэ олн пуссын о̄ньще̄гыт. Ты олнаныл урыл депутатыт о̄с потыртасыт. Ань ка̄сыӈ э̄лумхо̄лас манос организация та̄нанылныл нё̄тмил во̄вуӈкве ве̄рми. Та̄лув оигпан э̄лыпа̄лт хӯрум э̄тпосн депутатыт пуссын аквъёт 55 миллион солко̄вил тах та̄ставет. То̄ва депутатыт олнаныл хоталь холтыяныл ань ва̄ганыл. Та̄н ты олныл ханищтан колыт, культура колыт ос пӯльницат са̄всыр ищхӣпыӈ утыл тах ёвтыяныл. Ханты-Мансийск ӯст рӯпитан пӯльница са̄всыр оборудованиял ёвтаве. Ха̄льӯст о̄лнэ районный пӯльница ма̄хум пусмалтан ма̄гсыл ищхӣпыӈ утыл о̄с тах та̄ставе. Округув янытыл рӯпитан садикыт тувыл о̄с олн во̄ве̄гыт. Ма̄нь ня̄врамыӈ колыт депутатыт са̄всыр ёнгынутыл, мо̄т э̄рнэ пормасыл ёвтнэ ма̄гсыл о̄с тах олныл мыганыл. 1062 2013.10.18. Светлана РОМБАНДЕЕВА Ня̄врамыт ёмащакв ӯщлахтасыт. Ханты-Мансийск ӯс мирколт кӯщаиг о̄лнэ ма̄хум ос ля̄ххал тотнэ хо̄тпат акванатыглаве̄сыт. Ань туи порат округ янытыл манах ня̄врам хо̄т ӯщлахтасыт ос пусмалтахтасыт, ты ва̄рмаль ма̄гсыл округ бюджетныл манах солко̄ви та̄стыглавес – пуссын ты урыл тот потыр о̄лыс. О̄выл ла̄тыӈ А. А. Путин тав ла̄выс, ты хум ня̄врамыт ӯщлахтын тэ̄ланыл палт рӯпитан комиссият кӯщаиг о̄лы. Тав ла̄внэ̄тэ щирыл, ты туи округ янытыл ня̄врамыт ӯщлахтын ва̄рмаляныл мӯсхал щирыл о̄лыс. Са̄в ня̄врам ӯщлахтас, то̄ват пусмалтаве̄сыт. Ос ма̄к таи ёмас, о̄лыс, туи сыс нэ̄мат лю̄ль ва̄рмаль ат е̄мталас, мо̄т хо̄н ма̄н ялум ня̄врамаквет пуссын пуста̄гыл юв ёхтысыт. Тав юипа̄лэ̄т ня̄врамыт ос ма̄ньлат ма̄хум ёт са̄всыр ма̄тт рӯпитан нэ̄хумит потыртасыт. Савалапыг хультум ня̄врамыт урыл Департамент кӯщай ва̄ӈын нэ̄ Е. В. Немчинова тох ла̄выс: «Кос хоты колта̄гыл ня̄враме ӯщлахты те, ща̄ньа̄щин ёмас, ань ня̄враме туи та ӯщлахтас, мо̄т хотты ма̄н та ялыс. Округ янытыл о̄лнэ ня̄врамыт ӯщлахтынэ̄ныл ос пусмалтахтынэ̄ныл ма̄гыс округ бюджет ты туи 1 миллиард 56 миллион 998 со̄тыра арыгкем солко̄ви ойтыс. Округувт ня̄врамыт ма̄гыс 488 ӯщлахтын ос пусмалтахтын колыт рӯпитасыт, тув 42 со̄тыра 475 ня̄врам тотыглавес». Ты нэ̄ са̄в потыртас, ань хоты колт манах ня̄врам ӯщлахтас, манах пусмалтахтас, хоты колт ма̄хум щар ма̄к ёмащакв рӯпитасыт, хоты организацият ня̄врамытын нё̄тсыт, олн майласыт, манах а̄гмыӈмосыӈ ня̄врам, манах савалапыг о̄лы, та маныр. Пуссын та̄рапаттым о̄щнэ̄ныл, нэ̄пакын ёмащакв хасманыл. 1062 2013.10.18. Людмила ТЕТКИНА Яныг кӯщаит сапра̄нин ёхталасыт. Москва ӯст Совет Федерацият рӯпитан кӯщаит ма̄н округувн ёхталасыт ос тыт Думат сапра̄ни ва̄рыгласыт. Ань Совет Федерацият лов комитет рӯпитэ̄гыт, тот кӯщаит са̄всыр ва̄рмалит щирыл пуӈктотэ̄гыт. Акв тамле комитетт Россият о̄лнэ соссаӈ ма̄хум ва̄рмаляныл щирыл та̄н рӯпитэ̄гыт. Ань та̄нки рӯпатаныл урыл Ханты-Мансийск ӯст потыртасыт. Конституция щирыл Государственный Думат рӯпитан депутатыт Россия янытыл о̄лнэ мирн пе̄риявет. Ос Совет Федерациян рӯпитаӈкве ка̄сыӈ округныл, краил манос областил кит хо̄тпа ке̄таве, та̄н сенаторыг ла̄вавет. Акв хо̄тпа депутатытныл пе̄рияве ос китыт хо̄тпа губернатор такви пе̄рии ос тув ке̄тытэ. Вадим Тюльпанов, Совет Федерацият рӯпитан кӯщай хум, ты урыл ла̄выс: «Ты ва̄рмаль урыл тох Россия Конституцият хансым о̄лы, ка̄сыӈ регион кит э̄лумхо̄лас ке̄ты, тэ̄натэ̄н мир ат пе̄рии. Тувыл ань са̄в ма̄хум таи ла̄ве̄гыт, сенаторыт о̄с пе̄рияӈкве э̄ри, по̄х хо̄тпат тот ул вос рӯпитэ̄гыт. Ты ва̄рмаль урыл ма̄н акваг номсахтасӯв ос йильпи са̄ккон хассӯв, ань губернатор такви хо̄тпатэ депутатыт халт о̄с пе̄рияӈкве ве̄рми. Сӯкыр э̄тпост пе̄риян хо̄тал о̄лум юипа̄лт ма̄н палтув 26 регионныл йильпи сенаторыт рӯпитаӈкве ёхтысыт. Аман Тулеев улпыл ты йиильпи са̄ккон мӯсхалыг ат ловиньтастэ ос ма̄н палтув такви ва̄ӈын хуме рӯпитаӈкве ке̄тыстэ. Ма̄н таве ювле минуӈкве ла̄выслӯв, ань А. Тулеев такви сенаторе депутыт халт пе̄рияӈкве тах паты». Сапра̄нит Борис Хохряков ос округ Думав рӯпататэ урыл потыртас. Ты халт ос соссаӈ ма̄хум Ассамблея урыл ла̄тыӈ ла̄выс. Тот рӯпитан депутатыт ма̄ньщи, ханты ос ё̄рн мирыт ма̄гсыл са̄всыр э̄рнэ са̄кконыт хансэ̄гыт. Тамле Ассамблея Россия янытыл воссыг нэ̄мхо̄т а̄тим. Виктор Пичугов, Совет Федерацият ма̄н округувныл рӯпитан хум, ос парламентыт ва̄рум рӯпатаныл урыл потыртас. Ань Россия янытыл ка̄сыӈ ма̄т та̄нки са̄кконыт пирмайтым депутатыт рӯпитэ̄гыт. Тувыл таи лю̄ль, щар ка̄сыӈ ма̄т та̄н са̄всыр щирыл намаим о̄лэ̄гыт: Областной Собрание, Государственный Собрание, Народный Собрание ос са̄в мо̄т нам о̄ньще̄гыт. Ма̄н округувт Думаг намаим о̄лы. Виктор Пичугов ла̄вме щирыл, региональный парламентыт пуссын ань акв щирыл намаяӈкве э̄ре̄гыт. Ты коныпал ос депутатыт сэ̄лнэ олнаныл урыл потыртас. Москва ӯст рӯпитан депутатыт щар са̄в олныл ойтавет. Та̄н са̄в э̄рнэ ос ёмас са̄ккон Государственный Думан ке̄тыгласыт. Ма̄н округ Думав рӯпитан ма̄гсыл 2012 та̄л сыс 448 миллион солко̄вил та̄стыглавес. Мо̄т са̄кконыт пирмайтын парламентыт халт тыи а̄ти сака мощща. Виктор Пичугов ловиньтам спискатэ̄т округ Думав са̄тытыг хансым о̄лыс. Ос ты та̄лыт сыс ма̄н депутатанув Государственный Думан туп нила са̄ккон ке̄тсыт, тыи мощща а̄ти. 1062 2013.10.18. Николай МЕРОВ Сӯкыръя па̄выл хо̄тпаг потре̄н. Туи порат Нефтеюганский районт ма̄ньха̄пыл каснэ ва̄рмаль щё̄пита̄лвес. Округныл са̄всыр па̄влытныл ос ӯсытныл соссаӈ ма̄хманув касуӈкве акванатхатыгласыт. То̄нт Ха̄льӯс районныл Сӯкыръя па̄вылныл кит хо̄тпаг тув ёхталасы̄г. Ты Ирина Даниловна Сайнахова ос Эдуард Николаевич Лещук. Ты хо̄тпаг а̄нумн тэ̄нки уре̄нтыл мощ потыртасы̄г. Ирина Даниловна Сӯкыръя па̄вылт ма̄ньщи ще̄мьят яныгмас. Ща̄нягеа̄щаге хо̄т ня̄врам янмалтасы̄г: хӯрум пыг, хӯрум а̄ги. Ирина Саранпа̄выл школа а̄стламе юипа̄лт, э̄лаль ханищтахтуӈкве ат минас, ня̄врамыӈыг е̄мтыс. Таима̄гыс Сӯкыръят о̄луӈкве хультыс. Тот са̄всыр ма̄т рӯпитым ла̄щал о̄ланты. О̄йкатэ наме Евгений Петрович Сайнахов, ма̄ньщи хум, о̄с Сӯкыръяныл о̄лы. Тав хӯл алыщлым рӯпиты. Нэ̄гхумыг аквъёт са̄в та̄л о̄лэ̄г. А̄гитэ̄н ань янгыг е̄мтыс, наме Светлана, ще̄мьяӈ та̄гыл я̄нас о̄лы. Ла̄пкат тэ̄нут тыналы. Светлана о̄йкатэ саранхум, ма̄шинал яласым рӯпиты. Эдуард Николаевич о̄с Сӯкыръя па̄вылт ще̄мьяӈ та̄гыл о̄лы. Тав ань ты накт ат рӯпиты. Юн са̄всыр рӯпата ва̄ри. Ӯйхул о̄ньщи, хӯл алыщлым ос во̄раим яласы. Э̄кватэ ма̄ньщи нэ̄, наме Галина Петровна, такви о̄парищ наме Сайнахова. Ма̄нь ня̄врам колт ня̄врамыт ӯргалым рӯпиты. Тэ̄н аквъёт хӯрум ня̄врам янмалтасы̄г. Кит пыгаге̄н Пётр ос Иван юртыӈ ня̄врамыг. Тэ̄н Саранпа̄выл школа а̄стламе̄н юипа̄лт э̄лаль Ханты-Мансийск ӯсн медицинский академиян фельдшерыг ханищтахтуӈкве минасы̄г. Ма̄нь а̄гитэ̄н наме Анастасия, тав школат иӈ ханищтахты. Ты хо̄тпаг ёт каснэ ва̄рмалин мо̄т ма̄хум о̄с ёхталасыт. Ха̄льӯсныл Леонид Бабанин, тав ань рӯпата та̄л о̄лы. Кульпас па̄вылныл Надежда Чалданова, ма̄ньщи а̄ги, ёхталас. Тав ос школат ня̄врамыт ханищты. Тувыл ос пенсият о̄лнэ кит хо̄тпаг ёхталасы̄г. Ты Василий Артеев, Сӯкыръя хум, ос Валентина Вьюткина, Саранпа̄вылт о̄лнэ нэ̄. Ка̄сыӈ та̄л ты каснэ ва̄рмальн Ха̄льӯс районныл ма̄хманув ёхталэ̄гыт. Ос та̄н ты урыл потыртасыт. Ханты ма̄хум ха̄паныл мо̄т хурипат, янытэ̄т акволпа йӣвныл са̄грим о̄лэ̄гыт. Ма̄ньщи хо̄тпатн тамле хащта̄л ха̄пыл товуӈкве ат а̄ртми. Таима̄гыс акваг юв хультэ̄гыт. О̄лнэ ма̄нанылт тамле ха̄п о̄щнувыт ке, ла̄щалла̄щал ханищтахтынувыт. Мо̄т районытныл ёхталан ханты хо̄тпат пуссын тамле ха̄п о̄ньще̄гыт, каснэ ва̄рмаль э̄лыпа̄лт та̄н юн пуссын товыгтэ̄гыт. Ань губернаторув ты ва̄рмальт нё̄туӈкве ла̄вхатас. Мо̄тынтыг тамле ха̄пыл ёвтавет ке, ма̄ньщи хо̄тпанув о̄с мӯсхал щирыл щё̄питахтуӈкве патэ̄гыт тах. Тувыл о̄с акв ва̄рмаль урыл потыртасыт. Ка̄сыӈ та̄л ты кос касуӈкве ёхталэ̄гыт, ос аквта хо̄тпат но̄хпатэ̄гыт. Тав кас, ос ма̄хум ка̄ста̄л сысы минэ̄гыт, ань то̄ват воссыг тув ёхталаӈкве ат ка̄саще̄гыт. Ювле хультум командат нас пӯмащ ма̄гыс матыр мӯйлупсал ке майлынувет ос ёмас о̄лнув. 1062 2013.10.18. Светлана РОМБАНДЕЕВА Нё̄тмил ва̄рмаль урыл. Хурит Ольга Алексеевна Ануфриева по̄слым о̄лы. Тав Ха̄льӯс район Кульпас па̄выл мирколт рӯпитас, соцзащита па̄лыл хо̄тпатын э̄рнэ нэ̄пакыт хансуӈкве ос акванатуӈкве нё̄тыс са̄всыр нё̄тмил ма̄гыс манос ня̄врамыт олнло̄мтаныл винэ ма̄гыс нэ̄пакыт хансыс. Туи Кульпасн ялмум порат, мирколт ам Ольга Алексеевна хо̄нтыгласлум, рӯпататэ урыл китыгласлум. На̄н ань тав потре ловиньтэлы̄н: – Кульпас, Ло̄пмус ос Кимкъясӯй па̄влытт 36 а̄гмыӈмосыӈ хо̄тпа о̄лы, 40 ще̄мья са̄в ня̄врам о̄ньще̄гыт, 2 ще̄мьягт ня̄врамыт ома ат о̄ньще̄гыт, 8 ще̄мьятт а̄гмыӈмосыӈ ня̄врамыт яныгме̄гыт, 10 ня̄врам ща̄ньа̄щ ат о̄ньще̄гыт, рӯтанылн ман по̄х хо̄тпан янмалтавет, 3 хо̄тпа яныг хо̄нт порат рӯпитасыт, 28 хо̄тпа «Ветеран труда ХМАО-Югры» ос 32 хо̄тпа «Ветеран труда Российской Федерации» намыл маим о̄лэ̄гыт. Та̄н пуссын соцзащита па̄лыл нё̄тавет, олныл ойтавет манос мо̄т нё̄тмилыл майлавет. Ольга Алексеевна яныг таквс э̄тпос 1980 та̄лт самын патыс. Хӯрум а̄ги о̄ньщи яныг а̄гитэ нилахуйплов та̄лэ, котиль а̄гитэ аквхуйплов та̄лэ, щар ма̄нь а̄гитэ хо̄т та̄лэ. Мо̄лты та̄л о̄йкатэ Евгений Анатольевич а̄тимыг е̄мтыс. Ня̄враманэ такте̄т янмалтыянэ. Оматэ ма̄ньщи нэ̄, Анна Павловна Гындыбина, Кульпас па̄вылт самын патыс. Ольга Алексеевна ма̄ниг о̄лме порат, оматэ̄н Светлый па̄вылн тотвес, тув о̄лмыгтасы̄г, тав тот яныгмас. Ань о̄йкатэ холам юипа̄лт, тав ня̄враманэ ёт яныгмам па̄влэ̄н минуӈкве номсы. Ольга Алексеевна ла̄внэ̄тэ щирыл, рӯпататэ ёмас кос, э̄руптытэ. Ты ма̄ньщи нэ̄кве ще̄мьятэ ёт пуста̄гыл вос о̄лы, На̄янэ̄н-О̄тыранэ̄н вос ӯргалаве! 1062 2013.10.18. Светлана РОМБАНДЕЕВА Яныг колта̄гыл а̄ги. Ты хурит ма̄ньщи нэ̄ Евдокия Митрофановна Михайлова по̄слым о̄лы, а̄ги о̄парищ наме Сайнахова. Тав Ха̄льӯс район Кульпас па̄вылт о̄лы, школат тэ̄нут па̄йтнэ колнакт рӯпиты. О̄йкатэ̄нтыл тэ̄н кит савалап ня̄врам янмалтэ̄г, кит пыгрищ. Евдокия Митрофановна ре̄тыӈ ю̄свой э̄тпост 1967 та̄лт самын патыс. Оматэ Ирина Алексеевна, а̄ги о̄парищ наме Кугина, Ме̄сыг па̄вылт самын патыс, тот яныгмас. А̄тятэ Митрофан Ильич, Ма̄нья па̄вылныл о̄лыс. Оматэ рыбучасток зверофермат рӯпитас, охсарыт ма̄гыс тэ̄нут па̄йтыс. А̄тятэ ос колыт ӯнттын ма̄т ман па̄рт сылнэ ма̄т рӯпитас, йӣв ха̄пыт ва̄рыс. Э̄кваго̄йкаг хотталь щалтме̄н хо̄тса̄т та̄лыг ты е̄мтыс. Тэ̄н са̄т ня̄врам янмалтасы̄г – Ольга, Илья, Альбина, Ще̄рти, Дуся, Володя ос Света. На̄н ань э̄лаль Евдокия потре ловиньтэлы̄н: – Ам школат рӯпитанэм са̄тхуйплов та̄лыг ты е̄мтыс, ня̄врамыт ма̄гыс тэ̄нут па̄йтэ̄гум. Ты э̄лыпа̄лт лов арыгтем та̄л рыбучасткат звероводыг рӯпитасум. Тувыл рыбучасткав лаппантвес, охсарыт о̄ньщуӈкве ат патве̄сыт, ма̄н рӯпата та̄л хультсӯв. Ётыл ам школан та патхатасум. О̄йкам Александр Генрихович Михайлов Сыктывкар ӯст яныгмас. Хӯл алыщлан ос во̄раян хумыг о̄лы. Рӯпататэ̄т янытлаве, мо̄лты та̄л сака са̄в нё̄хыс ка̄тынпатталас. Ме̄н кит ня̄врам о̄ньщиме̄н, пыгме̄н Руслан, а̄гиме̄н Лена. Тэ̄н сас ще̄мьяӈыг, ня̄врамыӈыг, пуссын тыт, Кульпаст, о̄лэ̄гыт. Руслан рыбкоопт рӯпиты, Лена о̄с школат рӯпиты. Ме̄нти ня̄врамагме̄н яныгмасы̄г, ань кит савалап пыгрищиг янмалтыме̄н, Никита ос Ваня. Никита оматэ ты па̄вылт о̄лы, тэ̄н колэ̄н хотё̄свес, таима̄гыс пыгрищ ань ма̄н палтув о̄лы. Оматэ̄нтыл ва̄щинтахтэ̄г, тав ма̄н палтув ёхталы, Никита то̄ванакт оматэ палт о̄с яланта̄лы. Ваня ос савалап ня̄врам, тамле номтыӈ пыгрищакве, ёмащакв ханищтахты. Ня̄врамыг ань ща̄рщ ва̄тат Геленджик ӯст ӯщлахтэ̄г, пувлэ̄г. Тамле ёмас потыр Евдокия Митрофановна та потыртас. Ты я̄тил сымыӈ хо̄тпав колта̄глэ ёт пуста̄гыл вос о̄лы! 1062 2013.10.18. Александр ВЬЮТКИН Мирн нё̄тмил ва̄рнэ ма̄хум. Ты э̄тпос нилыт хо̄талэ̄т Россия янытыл нё̄тмил ва̄рнэ МЧС рӯпитанэ̄ныл онтырса̄т нупыл акв та̄лэ то̄влыс. Ты кастыл та э̄лыпал хо̄талт Ханты-Мансийск ӯст МЧС колт ля̄ххал тотнэ ма̄хум ёт А. Н. Некрасов хо̄нтхатыглас. Тав полковник нам о̄ньщи, округ МЧС тармыл кӯщаиг о̄лы. Тав потыртас, хумус МЧС ва̄рвес: «Тамле рӯпата 1932 та̄лт ва̄руӈкв патвес. То̄нт мо̄т щирыл ла̄ввес – «Местная противовоздушная оборона» (МПВО). Та̄н палтаныл мир пусмалтан, на̄й харыгтан ос кол ӯнттын ма̄хум хасхатым о̄лсыт. О̄влэ̄т та̄н ва̄рум рӯпатаныл ма̄гсыл олн ат висыт. Яныг хо̄нт юипа̄лт ущ олн винэ рӯпатаг ва̄рвес. Противоздушный оборонаг 1991 та̄л мус намтым о̄лыс. Тувыл э̄лаль Россия МЧСыг намтвес. Ань щар ма̄к мирн нё̄тмил ва̄рнэ яныг колыг ловиньтахты. Ма̄ янытыл воссыг нэ̄мхотты мир тамле нё̄тмил ат о̄ньще̄гыт. МЧС Россия ма̄в янытыл о̄лнэ ма̄хум ӯргалым рӯпиты. Ма̄н округувт ос акв тамле нё̄тмил «Центроспас Югория» ва̄ри. Ма̄н акваннё̄тхатым акв рӯпата ва̄ре̄в. Мо̄лты округ бюджет олнытыл «Центроспас Югория» ма̄гсыл палаткаӈ па̄выл ёвтвес. Тамле колыӈ па̄выл воссыг нэ̄мхо̄т а̄тим. Тав тынэ 17 млн. солко̄ви. Пӯльница, ня̄врамыт садик, ханищтахтын ос пувлынкол тот о̄лы. Пуссын аквъёт хӯрум со̄тыра хо̄тпа тув о̄луӈкве ла̄пи. МЧС янытлан хо̄талувт ма̄н ётув рӯпитан ма̄хум ма̄гыс яныг ханищтап ва̄раве. Ка̄сыӈ ӯст мо̄тмо̄т ханищтапыл ва̄раве̄в. Хоты ӯст манырсыр ханищтап е̄мты, ма̄н та̄ра Москва ӯсныл ат ла̄ваве̄в. Таве хунь а̄стлылӯв, та̄ра ювле ла̄тыӈ те̄тэ̄в» 1062 2013.10.18. Александр ВЬЮТКИН Са̄лыт пуста̄гыл вос о̄ньщавет. Сургут ӯст соссаӈ хо̄тпат ос ма̄во̄й, газ но̄хвинэ ма̄т рӯпитан ма̄хум сапра̄ни ва̄рыгласыт, та̄н тот са̄всыр ва̄рмаль урыл потыртасыт. Аквта порат округувт са̄лыт янмалтан урыл потраныл о̄лыс. Ветеринарыг о̄лнэ нэ̄ Н. В. Ососова такви рӯпататэ урыл потыртас. Наталья Владимировна округувт ӯйхул пусмалтан ва̄ӈын кӯщаиг ос государственный инспекторыг рӯпиты. Тав ла̄выс: «2012 та̄л порат округув янытыл налыман нупыл са̄т со̄тыра са̄лы о̄щвес. Тӯяг са̄лыт ӯнттуманыл юипа̄лт хо̄т со̄тыран пӯӈ са̄внувег е̄мтыс. Щар ма̄к манса̄вит, нэ̄мхотты порат ёмщакв ловиньтаӈкв ат ве̄рмаве. Са̄в са̄лыт та̄нтирот, ӯльнаг яласэ̄гыт. Юио̄выл ат та̄л сыс са̄лыянув бруцеллёза̄гмыл ха̄хтуве̄сыт. Ма̄н, ӯйхул ӯргалан ма̄хум, та а̄гм хотыл ёхтыс, уральтаслӯв. Са̄выӈпа̄лэ ты ма̄во̄й ос газ ёт рӯпитан ма̄хмытн тотнэ комбикормыныл ты а̄гмыл са̄лыянув ха̄хтуве̄сыт. Та сыртэпыл тыттын са̄лыт нё̄вляныл ос те̄лпаныл тамле атыӈыг ос ёмасыг ат е̄мтэ̄гыт. Хо̄т ань ма̄во̄й ос газ но̄хвинэ ма̄хум рӯпитэ̄гыт, тот са̄в мосыӈ са̄лы о̄лы. Са̄выӈпа̄лэ мосыӈ са̄лыт Сургутский ос Нижневартовский районыг халт о̄ньщавет. А̄гм та̄л, нё̄вляныл сыстам са̄лыт Ха̄льӯс ос Белоярский районыгт ха̄йтыгтэ̄гыт. Та ма̄т яласан са̄лыӈ ма̄хмыт ка̄сыӈ таквс са̄лыяныл ловиньтавет ос те̄лпаныл уральтаӈкве вивет. Ва̄гталнув са̄лыяныл, ма̄нь па̄сыгрищаныл ос са̄лыӈ а̄мпаныл тэ̄рпиӈ уколыл тӯщтаве̄т. Бруцеллёза̄гмыл е̄мтум са̄лы то̄слым ос по̄льтым нё̄вле палт а̄гм иӈ хоса о̄луӈкв ве̄рми. Па̄йтнэ порат лю̄ль утанэ ущта хотталь холтавет. Таима̄гсыл ма̄н са̄лыӈколт яласан ма̄хмытын такос ла̄ве̄в: «Ня̄рта̄гыл ос то̄слым са̄лы нё̄выль ул та̄е̄н, ювӯрхатым о̄лэ̄н. На̄нти ты лю̄ль а̄гмыл е̄мтуӈкв ве̄рмегы̄т. Пусмалтахтуӈкве тах са̄в тэ̄рпи ос са̄в хо̄тал э̄рмыглы». Ӯйхул пусмалтан ма̄хум та бруцеллёза̄гм коныпал са̄лыт о̄щнэ по̄хӯйит алыщлан тэ̄рпил тӯщтыяныл. Акв по̄х ӯй са̄лы лылыӈ та̄гыл ва̄тахтем грамм са̄вит нё̄вле тэ̄г. Са̄в по̄хӯй о̄щнэ са̄лы ты ӯйитн то̄славе, ты мосыӈ ӯйхул хоса ат о̄лы. А̄гмыт уральтан ма̄гыс ос э̄лаль та̄н ул вос та̄рамлэ̄гыт, округув янытыл ка̄сыӈ та̄л ат со̄тыра чип нампа ищхӣпыӈ ут са̄лы сов ёлыпа̄лн ӯнттаве. Ка̄сыӈ чип такви номерыӈ, та номере щирыл са̄лы тах уральтаве». Наталья Владимировна потре оигпам порат ос ла̄выс: «Манырсыр ӯйхул нё̄выль о̄ньщегы̄н, ня̄р та̄гыл ул та̄е̄н. А̄ртмын порат ма̄н палтув уральтаӈкв тотыглэлы̄н». Хурит Алексей Хозяинов по̄слым о̄лы. Тав Саранпа̄вылт ӯйхул пусмалтан ле̄ккарыг рӯпиты. 1062 2013.10.18. Тамара МЕРОВА Та̄н налыман та̄л ат ва̄щинтахтасыт. Мо̄лалнув Ханты-Мансийск ӯст са̄всыр ма̄ныл ёхталам лов э̄ква акванхо̄нтхатыгласыт. Та̄н пуссын 1969 та̄лныл ос 1973 та̄л мус Ханты-Мансийский педучилищат ханищтахтасыт. Тувыл то̄ват педучилище а̄стламаныл па̄сныл та̄нки халанылт щар ат ва̄щинтахтасыт. Ань налыман та̄л юипа̄лт ущты акванатхатыгласыт. Та̄н 93 номер группанылт ня̄врамыт о̄выл классытт ханищтан хо̄тпаг ва̄т нупыл нёлолов а̄ги ханищтахтасыт. Тыг ань лов хо̄тпа туп ёхталасыт, мо̄т ловманкем хо̄тпа ёхталаӈкве ла̄вхатсыт кос, ос тувыл ат а̄лымасыт. То̄ваныл хо̄т о̄лэ̄гыт ат ва̄ганыл, ищхӣпыӈ ут хосыт кисхатсыт ат хо̄нтманыл. Мо̄таныт урыл хӯлыгласаныл а̄тимыг е̄мтмыт. Нэ̄ хо̄тпат пуссын Софья Ильинична Власенкован атыглымат. Мо̄лты та̄лт тав аквъёт ханищтахтам а̄гиянэ ищхӣпыӈ то̄тап хосыт киссанэ ос тувыл Ханты-Мансийскат акванатхатыгланэ урыл та̄н ётаныл потыртахтас. Софья Ильинична такви о̄парищ наме Рукова, тав А̄нъя па̄вылт яныгмас, Сортыӈъя школат ханищтахтас. Э̄ква хосат та̄гыл Жиздра ӯст Калужский областит ще̄мьятэ ёт о̄лы. Тав та ӯсныл холодильникын ханувъяптын ма̄нь ӯс хурит ос ка̄т сэ̄гнэ то̄рыт тотыс, ос аквъёт ханищтахтам юртанэ̄н мӯйлуптас. Та̄н пуссын хотща̄гтсыт ос ла̄всыт: «Ты маныр ёмас сымыӈ э̄лумхо̄ласакве, ма̄нав пуссын тыг атсанэ, мӯйлупсал тотвесӯв, такви та палыт хоса ма̄ныл тыг ёхтыс! » Софья Ильинична пуссын сыныгтасаныл, анигласаныл. Ты э̄кват Малый Атлым, Перегрёбное, Приобье, Октябрьский, Болчары, Нялино па̄влытныл ос Урай, Нижневартовск ӯсыгныл тыг ёхталасыт. Щар о̄выл хо̄талт ат хо̄тпа акванхо̄нтхатсыт, халанылт маткем та потыртасыт. Э̄типа̄лаг та̄н А̄с-угорский «Хо̄тал» нампа театрын ялсыт ос «И дольше века длится день» спектакль суссыт. Тот, насати, Надежда Денисовна Молданова (Яркина) Женя а̄гитэ рӯпитанэ̄тэ. Та спекталит Евгения Молданова о̄влэ̄т ща̄нь хо̄тпаг ос ётыл Витхо̄н нэ̄г ёнгыс. Мӯй хо̄тпатын соссаӈ артистанув ёнгиланыл сака мӯстыс. Такви Надежда Денисовна педучилище а̄стламе юипалт Ванзеват па̄вылн юв минас ос тот налыман нупыл нила та̄л ма̄нь ня̄врамыт колт рӯпитас. Ань пенсиян патхатас. Китыт хо̄талт Ханты-Мансийский педколледж а̄висӯнтыт та̄н мо̄т ёхтум хо̄тпаныл ёт акванхо̄нтхатасыт. Тот та̄нки халанылт мощ хащхатсыт. Тувыл педколледжит о̄лнэ музей колнакын щалтсыт. Тот са̄всыр хурит суссыт. О̄выл ханищтам хо̄тпаг Илья Демьянович Петровец о̄лыс, тувыл Евгения Тимофеевна Блохо, тэ̄н уре̄нтыл та̄н китыглахтасыт. Педучилищат рӯпитам хо̄тпат пуссын ёмас сымыӈ ла̄тӈыл ка̄стысаныл. Надежда Викторовна Азизова (Шкляева) тот такви хансум потранэ хо̄нтсанэ ос та̄наныл ловиньтасанэ. Александра Ивановна Готман (Бричко) ма̄хманэ̄н пӯмыщ хури суссылтас. Тот та̄н 93 группаныл пуссын аквъёт по̄слым о̄лыс. Акв хури тав музейн мӯйлуптастэ ос ма̄хманэ̄н о̄с акв тамле хурит мис. Тувыл э̄кват педучилище коридор хосыт мощ ё̄мыгтасыт, тот са̄всыр хурит, по̄сыт, янытлан нэ̄пакыт суссыт. Та̄н ханищтахтам коланыл мо̄т хурипаг е̄мтыс. Ӯс хосыт ё̄мыгтым, та̄н о̄с нэ̄матыр ат хащсыт, тав янгыг е̄мтыс, сака нё̄тнэ ос са̄в накпа лю̄лит колытыл ӯнттувес. Людмила Ивановна Гущина ла̄выс: «Ма̄н общежитият са̄в хо̄тпа о̄лсӯв. То̄нт кӯрыт на̄йивыл па̄лтыглаве̄сыт. 7 ноября хо̄талт са̄в мир ёт ӯсхулы хосыт ё̄мсӯв, педучилищат ханищтахтын а̄гиянувпыганув акробатический касылыт щё̄пита̄лсыт ос ма̄хумн суссылтасыт. Сака пӯмыщ о̄лыс». Ётыл та̄н тэ̄нэ колн щалтсыт, тот ӯнлахо̄лсыт, та̄нки о̄лупсаныл, школат манос ня̄врам ӯрнэ рӯпатаныл ос ще̄мьяныл урыл са̄в потыртасыт. О̄с хотты накт акванатхатыглаӈкве номсэ̄гыт. То̄нт аквъёт ханищтахтам хо̄тпаныл пуссын ёхталаӈкве вос ве̄рмынувыт. 1062 2013.10.18. Анна АЛГАДЬЕВА Ма̄н о̄мав. Мощ мо̄лалнув ма̄н о̄мав самын патум хо̄талэ о̄лыс. Ма̄н о̄мав Галина Константиновна Алгадьева, тав Хулюмсунт па̄вылт ка̄сыӈ хо̄тпан ва̄ве. Хо̄ӈха матыр ма̄ньщи ва̄рмаль кисмаи, пуссын та̄ве китыглэ̄гыт. Галина Константиновна такви Яныгпа̄вылт самын патыс. Ща̄нягеа̄щаге Мария Григорьевна ос Константин Васильевич Самбиндаловыг о̄лсыг. Ня̄хщамво̄льт 8 класс а̄стлас. Ханты-Мансийск ӯст акв та̄л ле̄ккарыг ханищтахтас. Ня̄врамыт халт тав щар яныг о̄лыс, юн нё̄туӈкв э̄рыс. Ханищтахтуӈкв о̄с олн э̄рыс, ат минас. Та порат пуссын рӯпитаптуве̄сыт. Тох Яныг па̄выл а̄ги Хулюмсунтын охсарыт о̄ньщуӈкв ке̄твес. Тыт Илья Никитич Алгадьевыл акванминасы̄г. Тэ̄н интернатт ханищтахтаме̄н па̄сыл ва̄йхатым о̄лсы̄г, румаӈыщ о̄лсы̄г. Аквъёт хо̄т ня̄врам янмалтасы̄г. Мис, лув о̄щсы̄г, рӯпитасы̄г. Илья Никитич тракторыл яла̄сас, пос пе̄ламтан ма̄т рӯпитас, лесникыг о̄лыс, ЛПУ организацият слесариг рӯпитас, рущ рӯпата коныпал вораяӈкв а̄лымас. 2006 талт о̄пав, а̄щув, акиюв а̄тимыг е̄мтыс. Омав такке̄тэ хультыс. Ка̄сыӈ хо̄тал ня̄враманэ ёхталэ̄гыт, конюн та порге̄гыт. Ма̄н коланувн юв тахе̄в, омав ла̄ви: «На̄н юв тахейин, кол тупъер сэ̄квыг е̄мтапи, марщумыг патапи». Ня̄враманэ «ома» ла̄ве̄гыт, а̄гипы̄г ня̄враманэ ане̄кващаще̄ква пе̄нтсыл о̄с «ома» ла̄ве̄гыт. Колпо̄х ня̄врамыт то̄ват номсэ̄гыт, «Ома» – тав наме. Тох та пуссын «Ома» ро̄ӈхе̄гыт. Са̄р газетат ма̄н о̄мав самын патум хо̄талэ̄тыл янытласлӯв, ань потрум э̄лаль мины. – Наӈки урынтыл мощ потыртэн. Хо̄т, хумыс яныгмасын? –Яныгпа̄вылт яныгмасум. Ща̄нянува̄щанув колхозт рӯпитасыт, ӣти туп ва̄щинта̄лсагӯв. А̄лпыл та минэ̄г, ӣтипа̄лаг ущ юв ёхтэ̄г. Щаще̄квав ё̄рыл яныгмасӯв. Тав ма̄навн тэ̄нутлӯт па̄йты, тыттаве̄в, айтаве̄в. Туииг е̄мты, а̄щув рыбакыг ке̄таве, ма̄н юн о̄лэ̄в. Ща̄нюм о̄с туи юн ат о̄лы, Ня̄хщамво̄льн во̄ваве. Картопка ӯнттын пора е̄мты, картопка пинэ̄гыт, тувыл лю̄ль пумн тэ̄лавет – лю̄ль пум маныгтэ̄гыт, тувыл окучивайтыяныл. Таяныт пӯсаскапаит о̄лсыт, колхоз пӯсасыт. Тувыл о̄с парникыт, грядкат о̄лсыт. Таит пуссын витыл со̄сантаӈкв э̄рсыт. То̄нт ва̄ӈныл вит а̄лумта̄сыт. Пум ва̄рнэ мус тот та лоӈхитахтэ̄гыт. Янмалтан утаныл нэ̄глапе̄гыт, ма̄ньщи э̄кват пум ва̄руӈкв минэ̄гыт. Ос тот хультнэ саран э̄кват та̄н та таквсы мус тэ̄пкананыл со̄сантыяныл. – Хумыс, манарыл ёнгасасын? –Са̄выӈпа̄лэ а̄каньлахтасӯв, матпусум хал е̄мтапи. Ма̄нки то̄р а̄каньрищит ю̄нтэ̄в. Ётылнув пупсикыт нэ̄глысыт, ос щаще̄квавн рущ а̄кань о̄ньщуӈкв ат та̄ратаве̄в. Тамле рущ а̄канянме̄н тай тӯйтыглым Аннэ э̄щме̄нтыл о̄щсанме̄н. Щаще̄квав тыглетувле тэ̄нут ва̄рим конаюв ё̄ми, ме̄н а̄канянме̄н колканн ӯнттыянме̄н, тав ляпан йиӈкв паты, хоттуйтыгпиянме̄н, ма̄ньщи а̄канянме̄нтыл а̄каньлахтыме̄н. – Манрыг рущ а̄канил ёнгуӈкв ат та̄ртвесы̄н? – Ка̄тыӈла̄глыӈ ут, ӣти тыян кон хартаве̄н, ла̄ви. Пупсикыт нэ̄глын э̄лыпа̄лт интернатт о̄с ка̄тыӈла̄глыӈ то̄р а̄канит ю̄нтсӯв. Та̄н ётаныл о̄с туп интернатт ёнгысӯв. Супыл ю̄нтъянӯв. Таянувтыл тот та хо̄нтлэ̄в. – Манах та̄л яныт порат интернатн майве̄сын? – Матах та̄лум о̄лыс, ат номилум. 49 та̄лт школан минасум. Каникулн юв тотыглаве̄сум, ща̄нюм юн о̄лыс. Тувыл туп ханищтахтуӈкв минасӯв, Дарьяэ̄кв а̄квув тэ̄нут ма̄гыс са̄лыл ёхталас. Ам па̄лтум интернатын ёхтыс, ла̄ви, ня̄лыӈё̄втыӈ пыгрищин ёхтуве̄сын, пилым о̄лэн, ня̄лыл тах па̄тамтаве̄н. Ам то̄нт ат торгамтылум, матыр ня̄лыӈё̄втыӈ пыгрищ. Тувыл, ла̄ви, ща̄нин пыгрищ о̄ньщас, а̄пщирищин ёхтуве̄сын. Аннэ та порат иӈ юн о̄лыс. Мо̄лал Люба Морозова ла̄ви: «Ам наӈын торыӈ ат и номилум, интернатскийт аквъе̄мт по̄слахтэ̄гыт, наӈ нэ̄мхо̄т а̄тимын. Ма̄н матпӯсум ӯщлахтын хо̄тал манос холытан каникулыт ты о̄вылтахтэ̄гыт – юв ха̄йтэ̄в. Такем ма̄ – аквкитхуйплов ве̄рыста. Яныг ма̄хманув ва̄ганыл, ханищтахтын ма̄ныл ты а̄стэв, тэ̄лы ке, са̄лыл ёхтыгпа̄лаве̄в, юв тотыгпаве̄в. То̄нт тай са̄лыл, лӯв иӈ ат о̄щсӯв. Интернатыл а̄стумум юипа̄лт, ханищтахтуӈкв кос ялсум. Мощнув ханищтахтасум. Тувыл ще̄мьявт таса̄вит э̄лумхо̄лас. Ща̄нюв рӯпитаӈкв ат патыс. Щанюм, тувыл о̄с мо̄т э̄кват кӯпнит рӯпатан ла̄вве̄сыт. Ма̄ниг о̄лманылт са̄всыр колхоз пӯсасыт ва̄риме̄ныл, та̄рыӈ йӣвыт пе̄рыгтыме̄ныл пуссын грыжан яныгмаве̄сыт. То̄ва э̄кват тай операциял ва̄рыглаве̄сыт, то̄ват ат тахмаясыт. Тувыл а̄гманыл хо̄саг е̄мтсыт, тох о̄лсыт. Ос а̄юмкӣтум рӯпатан паттуве̄сыт, пум консуӈкв ялантасыт, пил ва̄туӈкв ро̄выс. Ульйив са̄груӈкв ат ро̄выс. Интернат, школа, садик ма̄гыс ульйив са̄грувес. Па̄влыӈ э̄кват са̄грысыт. Щанюм тай па̄выл хал ӯлта ат ялантас, тэ̄лы юн о̄лыс. Тувыл щаще̄квав мощнув са̄мпыльта̄л о̄лыс. Ма̄н ня̄врамыт са̄в. Хотьютн о̄ньщаве̄в? Хунь ам ма̄нь порамт, война порат, тай номилум, ща̄нюм са̄лыл яласас. Такке̄тэ а̄ти, юрт ёт. Ёрн э̄квагойкаг ёт, тувыл Рокин о̄йка ёт яласас. Са̄пса нупыл хӯл ман нё̄выль тотэ̄гыт, ювле керасин манос матыр тэ̄нут харттэ̄гыт. Тыт сака хӯл ат ала̄ве, ӯс па̄лыл тыг хӯл тота̄ве. Ты та̄ра ос Са̄пса нупыл ке̄р лё̄ӈхын. Са̄лыл харттаве. Колхоз са̄лыл яласа̄сыт. Хотьют такви са̄лы о̄ньщи, ве̄рмыс такви са̄лыянэ̄тыл сӯлттаӈкв. О̄пав такви сохт ханищталас, тай такви са̄лытэ саро̄вылн ке̄ри. – Колхоз са̄лы са̄в о̄лыс? – Колхоз са̄лы тай са̄в о̄лыс. Ка̄сыӈ па̄выл бригада щирыл о̄щсаныл. Ма̄ньясунт па̄выл та̄нки Нё̄рт тотыгласаныл. Ня̄хщамво̄льт та̄нки о̄щсаныл. Китхӯрум ще̄мьял яласасыт. Ня̄хщамво̄льт са̄выӈпа̄лэ сараныт яласасыт Рокиныт, Рочевыт. Ма̄ньясунт тай ма̄ньщит, Яча-Илья о̄йка тав пыганэ ёт са̄лы ӯрсыт. Та̄н Ма̄ньясунт нупыл ва̄нтласыт, о̄пав са̄лыянэ тувле сӯста̄лсанэ. Таквсы са̄лыт на̄лув нё̄рыгтавет, я̄н по̄савет. О̄парищув та порат ул хусва̄тахкем са̄лы о̄ньщас. Ётыл тай са̄тловке̄мыг е̄мталасыт. Сун по̄сумн са̄лы нэ̄ги, а̄иктаӈкв патыянэ, са̄лыянэ тав юипа̄лэ̄т та о̄лтумтахтэ̄гыт. Юв по̄сыглыянэ, э̄т хӯлэ̄гыт ос Лэ̄пла па̄вылн тотыянэ. Са̄лы о̄щнэ кол тот о̄щсӯв. Щаще̄квав Дарьял тув ва̄нтлуптаве̄г. Мисанэ̄н о̄с ёт ва̄нтлуптыянэ̄н. Са̄лыт Нё̄рн тотнэ мус тот та о̄лэ̄г. О̄пам наме Василий Устинович Самбиндалов о̄лыс. Щаще̄квам Мария Порфириевна о̄лыс. Порфирий нам ат ва̄г, тав ла̄ви Марья Прокопьевна, тувыл нэ̄паканэт о̄с тох хансым о̄лыс. Такви Сондина, А̄нъя нэ̄. Пе̄с о̄парищув хо̄т лӯнн ме̄тхумыг яласыме̄т хо̄нтам А̄нъя нэ̄тэ ёт та̄лтапастэ. Тохта пе̄с ма̄хманув яласасыт, о̄лсыт. Потрум оигпан ляпат о̄мав о̄с сымыӈыщ янытлылӯв. Пуста̄гыл вос о̄лы. Посыӈ хо̄тал, нотыӈ хо̄тал таве̄н ла̄ве̄в. Пус ка̄т, пус ла̄гыл. 1062 2013.10.18. Александр ВЬЮТКИН Ханты ос ё̄рн ма̄хум па̄вланыл. Салехард ӯсн ялмув порат, ма̄н Горнокнязевск нампа ма̄нь па̄влын экскурсиян тотыглавесӯв. Та ханты па̄выл А̄с я̄ ва̄тат ӯнлы, Лӯима̄ ща̄рыщ ляпат о̄лы. Па̄выл урыл потыртам нэ̄ ла̄выс, Горнокнязевск па̄вланыл щар о̄влэ̄т XVII нот порат нэ̄пакыт хансым о̄лыс. Та па̄выл о̄лнэ урамн щар о̄влэ̄т Василий Тайшин ка̄нащ пе̄с порат тув о̄лмыгтас. То̄нт то̄пал пора о̄лыс, ма̄хум халанылт аквписыг хо̄нтласыт. 1607 та̄лт ма̄хум хунь пе̄рнапос пиннэ щирыл ка̄щилтаӈкве патве̄сыт, Москваныл ёхталам ка̄нащ ма̄хмытын Василий Тайшин порславес. Тав юипа̄лт Момрук нампа пыге ка̄нащ хумыг матнэ мус о̄лыс. Пыге юипа̄лт ос Ермак апыгрище та ляпа ма̄т тармыл кӯщайлахтас. Василий Тайшин ня̄враманэ Горнокнязевск па̄выл ӯнлын ма̄тэ̄т ань тыг мус о̄парищ наманыл хансым о̄лы. Тув ёхтумувт ма̄н музейн тотвесӯв. Музеяныл ма̄н «Торум Маа» музеюв хольт кон ва̄рим о̄лы. Музейн щалтнэма̄т ма̄н по̄лям мохсаӈ ня̄рхулыл ос атыӈ саӈквлыпилыл тыттувесӯв. Тот о̄лнэ соссаӈ ма̄хум пе̄с пораныл о̄щнэ алыщлап пормасаныл ма̄навн суссылтаве̄сыт. Э̄лаль ос са̄лыӈ ма̄хум яласан ва̄нтсунаныл урыл потыртавесӯв. Хумус та̄н ва̄нтлэ̄гыт ос ва̄нтсун хартнэ хо̄пт са̄лыяныл сунын хумус те̄равет. Тувыл ё̄рнкол тӣврын щалтуӈкв во̄ввесӯв, тот таве хумус тӯщтаве, та урыл потыртавесӯв. Мо̄т ё̄рнколт ма̄н ма̄гсылув пасан ва̄рыглавес. Ма̄н мохсаӈ хӯлыл, атыӈ са̄лы нё̄влил ос са̄ккарыл тэ̄лыгтым морахыл тыттувесӯв. Салехард ӯсн ёхталан мӯй ма̄хум акваг та̄н палтаныл тотыглавет. Тот рӯпитан ма̄хум ёхталан мир пе̄с щирыл та̄глыӈ пасан ва̄тан ӯнттыяныл ос мӯсхал щирыл тыттыяныл. 1062 2013.10.18. Светлана РОМБАНДЕЕВА Тэ̄к па̄выл ма̄щтыр э̄ква. Ханты-Мансийск ӯст «Торум Маа» музейт о̄лум семинар урыл потрум э̄лаль мины. Ха̄льӯс район Тэ̄к па̄вылныл ханты э̄ква Галина Михайловна Курганова ёхталас. Тав са̄сныл са̄всыр пормасыт ва̄ри, со̄втыт, а̄ныса̄ныт, хусапсовыт, хорамыл щуртыянэ. Ты ма̄щтыр хо̄тпа щаквщинэ̄тэ сыс, ка̄тыл ва̄рум пормасанэ урыл китыгласлум, такви уре̄т ос хо̄т яныгмас. На̄н ань тав потре ловиньтэлы̄н: – Ты семинарт ма̄н нила хо̄тал рӯпитасӯв. О̄влэ̄т ам номсысум, тасавит хо̄тал, ма̄ныр тот ва̄руӈкве патэ̄в, тувыл ань та̄рапатыс, ты насати мощща. Матыр пормас мӯсхал щирыл ва̄руӈкве те, акв хо̄тал хунь мины. Ма̄щтыр хо̄тпа ма̄шина хольт хунь рӯпиты, тав о̄влэ̄т номсащлахты, тувыл ка̄таге̄тыл ущ рӯпиты, э̄лаль щаквщи. Мо̄лхотал со̄втум ва̄руӈкве о̄вылтаслум, тувыл хоса номсахтасум, э̄лаль ос хумус ва̄рилум. Ята, ва̄рыслум, хорамыл щуртыслум, ос тувыл номтум ат паты. Аман манаре мӯсхал щирыл ат ва̄рыслум, тавагт. Ам номсэ̄гум, ты ма̄гсыл тох, ань молямласум. Атхунь, хумус тыт ёмащакв ва̄руӈкве, номсуӈкве, ма̄н тыт пуссын молямлэ̄в, ва̄рнэ пормасанув а̄стлаӈкве вос а̄лыме̄в. Мо̄т хо̄тпа ханищтаӈкве о̄с э̄ри, тав ётэ потыртаӈкве та маныр, пуссын а̄лымаӈкве э̄ри. Акв ма̄нь со̄вт ва̄рнэ порат китаххӯрмах хо̄тал э̄ри. Тыг ёхталам ма̄ньлат ма̄хум пӯмщалахтым рӯпитасыт, ма̄щтырласыт. Ты тэ̄ла та̄н ва̄ӈкве тахмаясыт, татем ёмащакв рӯпитасыт, акваг китыглахтасыт, ты ло̄мтэ, та ло̄мтэ хумус ва̄руӈкве, ханищтахтасыт. Ам ос номтум татем ёмас. Матыр пормас наӈти ка̄тагынтыл ва̄рилын те, тав воссыг нэ̄мхотты пормас ёт аквхурипаг ат паты. Та̄н ань са̄с ва̄ӈкве патыяныл, хумус рӯпитаӈкве, тулял ю̄нтуӈкве ханищтахтасыт. Туля та̄л са̄сныл нэ̄матыр ю̄нтуӈкве ат ве̄рме̄в, туля та̄л сака та̄рвитыӈ. Сакати мощ ханищтахтасыт, матыр ва̄рсыт, щаквщисыт. Ань ты тэ̄ла э̄лаль тотуӈкв патыяныл. Ам во̄ртур э̄тпос 1947 та̄лт Тэ̄к па̄вылт самын патсум, а̄ги о̄парищ намум Новьюхова. А̄тям Михаил Андреевич о̄лыс, тав хо̄нтлын ма̄т саквата̄лвес, юв ла̄гыл па̄лыг ёхтыс. Тох та хӯл алыщлас, во̄раяс. Омам Екатерина Семёновна, а̄ги о̄парищ наме Рябчикова, Пугоры нампа пе̄с па̄вылт самын патыс. Ма̄н нёлолов ня̄врам о̄лсув, китгагув яныг хо̄нт э̄лыпа̄лт самын патсы̄г, ма̄н ос, хо̄т ня̄врам, ётылнув самын патсӯв. Юио̄выл кит йигтегӯва̄пщиягӯв юртыӈ ня̄врамыг. Ма̄н рӯтанув халт са̄в тамле ня̄врам самын патыглы. Ам ань кит апыгрищагум юртыӈ ня̄врамыг. Ам Тэ̄к па̄вылт яныгмасум, тот школат нила класс мус ханищтахтасум. Омагума̄тягум пе̄с Тэ̄к па̄вылт о̄лсы̄г, ам ос йильпи Тэ̄к па̄вылт ханищтахтасум, тот интернатт о̄лсум. Э̄лаль ханищтахтуӈкве Ха̄льӯсн тотве̄сум, интернатт о̄лсум, тот лов класс а̄стласум. Ма̄нь та̄гыл омагума̄тягум ёт торыӈ ат иӈ о̄лсум, интернатт яныгмасӯв. Тувыл Челябинский область Миасс ӯсн минасум, тот Геологоразведочный техникумт ханищтахтасум. Техникум а̄стламум порат, техникгеофизик нэ̄пакыл майве̄сум, рӯпитаӈкве Ташкент ӯсн ке̄тве̄сум, Узбекистанын. Тот ам ва̄т нупыл ат та̄л о̄лсум. Сэ̄йиӈ ма̄т (пустынят) ос нё̄рт рӯпитасум, вит киссув. Хум ва̄рсум, кит пыгагум самын патсы̄г, аквам ма̄нь та̄гыл а̄тимыг е̄мтыс. Хунь Советский Союз ла̄кквауртвес, ам ще̄мьям ёт ювле йисум, амти яныгмам па̄влумн ва̄нтлысӯв. Пыгум наме Дима, Тэ̄к па̄выл школат информатика учителиг рӯпиты. Ам о̄с та школат ня̄врамытын география урок ханищтэ̄гум. Ты коныпал атыт классныл са̄тыт класс мус Культура народов Севера урок ханищтэ̄гум. Школат ма̄н «Северяночка» нампа кружок о̄ньще̄в, тот ам ня̄врамыт са̄сныл матыр ю̄нтуӈкве ханищтыянум, са̄всыр хусапсовыт ва̄ре̄в, со̄втыт, па̄йпыт ма̄щтырлэ̄в, хансал щуртыянӯв. Э̄лнаӈ Тэ̄к па̄вылт ма̄хманув хумус ма̄щтырласыт, ма̄н ня̄врамыт ёт ты ва̄рмаль та̄рапаттылӯв, пуссын аквъёт ханищтахтэ̄в, щаквще̄в. Ка̄сыӈ пормас пе̄с ма̄хманув ва̄рум хольт щё̄питылӯв, йильпи щирыл нэ̄матыр тув ат нё̄тэ̄в. Э̄лаль ам таве ща̄нь ла̄тӈаныл урыл китыгласлум, школанылт хумус ханищтаве. Тав ла̄внэ̄тэ ширыл, ня̄врамыт ща̄нь ла̄тӈыл ат потыртэ̄гыт, то̄ват мощ торгамтэ̄гыт, ос ювле рущ ла̄тӈыл ла̄ве̄гыт. Са̄т сыс ханты ла̄тыӈ ханищтан акв урок туп о̄лыглы. Па̄выл ма̄хум юн ня̄враманыл ёт ща̄нь ла̄тӈыл ат потыртэ̄гыт, нас та̄нти халанылт ханты ла̄тӈыл мощ потраме̄гыт, са̄выӈпа̄лэ рущ ла̄тӈыл потыртэ̄гыт. Галина Михайловна тамле ёмас, сымыӈ э̄ква, мӯтраӈ учитель. Пуста̄гыл вос о̄лы, На̄янэ̄н-О̄тыранэ̄н вос ӯргалаве! 1062 2013.10.18. Тамара МЕРОВА Нот палытыл о̄лнэ пе̄с накыт. «Хо̄тал» нампа А̄с-угорский театрыт рӯпитан ма̄хум туи сыс ӯщлахтаcыт ос ущтынув рӯпитаӈкве патсыт. Ты э̄лыпа̄лт, я̄ӈк на̄тнэ э̄тпост, «И дольше века длится день» намаим спектакляныл ма̄хумн суссылтасыт. Ань та̄н таквсы о̄с таве̄тыл рӯпатаныл о̄вылтасаныл. Анна-Ксения Вишневская, режиссёр нэ̄, ос таве̄н нё̄тнэ хо̄тпат ты ёныг Чингиз Айтматов, киргиз о̄йка, хансум потранэ щирыл щё̄питасыт. Та̄н спектакляныл кит потыр охсаг уртым ва̄рсаныл. Акватэ «И дольше века длится день», мо̄танэ «Пегий пёс, бегущий краем моря». Артистыт тот потрыт ханты манос ма̄ньщи ла̄тӈыл о̄влэ̄т ля̄галыяныл, ос аквторыг та̄н рущ ла̄тӈыл толмащлавет. Спектакль суснэ ма̄хум тот о̄выл щёс хащта̄л э̄рыгсов та̄ныт хӯнтамласыт. Турыл э̄ргын суйит Вадим Важенин э̄ргысанэ, Татьяна Огнёва о̄с са̄всыр турсуйил э̄ргыс. О̄выл потраныл Найман-Аны ща̄нь хо̄тпа урыл о̄лыс, (ты Евгения Молданова ёнги). Тот пе̄с порат о̄лум накыт суссылтаве̄сыт. Сарозекский сэ̄йиӈ ма̄т жуньжуанма̄хум мо̄т найман ма̄хум нупыл нур тотым о̄лсыт. Жуньжуаныт найман хум хо̄тпат пувнэ̄ныл юипа̄лт тув мус та̄наныл саватанэ̄ныл, пыгыт номт та̄л хультнэ̄ныл. Наманыл хумус, хоты ща̄ньа̄щныл манос хоты мирныл та̄н о̄лсыт ос маныр ва̄рсыт щар нэ̄матыр ат номсыт. Тамле хо̄тпа китхалпаты, ос тав тот «манкуртыг» ла̄ваве. Та па̄сыл манкурт кӯщай о̄ньщи, та утэ та кӯщайлахты. Ань акв тамле пилыщмаӈ накн патум пыг (ты Валентин Тарлин ёнги) ща̄не̄н кисмаявес. Нэ̄ пыге хо̄нтыстэ, тав ётэ потырты ос юв во̄витэ. Ма̄ньлат пыг нэ̄матыр ат номи, ща̄не ат ханьщитэ. То̄нт ща̄не лю̄ньщим ла̄выс: «Э̄лумхо̄лас такви о̄лнэ ма̄ та̄л вос хультыгланув, щёлэ кос вос хотвинуве, ос хоты сымта̄л о̄лнэ хо̄тпан тав номтэ хотвиӈкве э̄рмыглас». Нэ̄ наска̄ссыг тув минас, пыге ань туп йильпи кӯщай ла̄тӈе хӯнтлы. Ща̄нь пыге̄н та алвес. Китыт пӯмыщ ёнгиланыл пе̄с мо̄йт хольт мо̄йтсаныл. О̄влэ̄т хӯрум ягпыг нэ̄тыл ха̄йталаве̄сыт. Артистыт тот ма̄ньщи ла̄тӈыл потыртасыт. Яныгнув пыг са̄лыӈ хумыг о̄лыс, котиль пыг во̄раян хум. Апщитэ̄н но̄хыс, тав хӯл алыщлан хо̄тпа, ос а̄гитн хумыг виӈкве ат тахмаявес. Пыг (ты Александр Тургачёв ёнги) хӯл алыщлым такке̄т та о̄лантас. Ты китыт мо̄йт щирыл, э̄рттам, ма̄хум ща̄рыщ ва̄тат о̄лэ̄гыт. Тот па̄ртныл ха̄п ва̄рапасыт, витыл равтхатэ̄гыт. Нумыл о̄с вит со̄ссыт, э̄рттам раквалтахтас. Пуссын тамле пӯмащ рӯпатат Павел Мизёв, художникпостановщик, ва̄рыс. Но̄хнэ пыг акв щёс Витхон нэ̄н нэ̄глапавес. Тэ̄н акванюрщхатсы̄г. Тувыл Витхон нэ̄ тав хотталь та тыпылтастэ, а̄тим. Ётылнув ха̄пе̄т ня̄врам лю̄щ хӯнтамлас. Хум ня̄врам ка̄тынвистэ ос па̄г та минас. Ня̄враме, пыгке̄тэ, (Игорь Хромов ёнги) такви янмалтастэ, тэ̄н аквъёт хӯл алыщлаӈкве ялантасы̄г. Ос хум Витхон нэ̄тэ та̄л ка̄смоста̄лыг о̄луӈкве патыс, акваг таве та кинсыгла̄лыстэ, ӯлмаястэ. Аквматнакт ща̄рыщн та вущкасахтас. Потыр та оигпас. Татьяна Огнёва по̄слум хурииг. 1062 2013.10.18. Людмила ТЕТКИНА Мӯйлуӈкве тув во̄вавет. Са̄в та̄л ювле хультум порат Ха̄льӯс район Саранпа̄вылт «Элаль» нампа предприятие рӯпитаӈкве о̄вылтахтас. Тот Ольга Константиновна Филиппова кӯщаиг о̄лы. Саранпа̄вылт та̄н ма̄ньщи супыт, буркат ос са̄всыр мо̄т пормасыт ю̄нтсыт, са̄всыр сувенирыт ва̄рсыт. Хо̄т та̄л сыс ты предприятие Ха̄льӯст рӯпиты. Ольга Константиновна «Элаль» нампа предприятие рӯпататэ урыл ма̄ньщи газетав ма̄гсыл потыртас. – Та порат ма̄н Саранпа̄вылт о̄лнэ ма̄щтыр ма̄хум акванатсанӯв, са̄всыр ма̄ньщи пормасыт ю̄нтуӈкве патсӯв. Та па̄вылт совхоз рӯпиты, тыи ма̄гсыл ма̄н тот цех пуссӯв, ма̄щтыр ма̄хум пуркат ю̄тсыт ос са̄лы со̄выл са̄всыр сувенирыт ва̄рсыт. Тувыл са̄всыр то̄рыт, нуй, сак та палыт ма̄н тотуӈкве сака та̄рвитыӈ о̄лыс. То̄нт акваг налоголн ойтуӈкве ос ма̄хум сэ̄лым олнаныл та̄нанылн ойтуӈкве ат ве̄рмысӯв. Ос ю̄нтым пормасанув э̄лаль хоталь тыналаӈкве, о̄с ат ва̄слӯв. Яныг суссылтапын ке во̄ваве̄в, тот пормасанув ке тыналыянӯв, тай ёмас. Тох рӯпитым ма̄н номсахтуӈкве патсӯв, э̄лаль рӯпитаӈкве ке таӈхе̄в, мощ мо̄т щирыл ос мо̄т ма̄т рӯпитаӈкве э̄ри. То̄нт Ха̄льӯсн «Элаль» предприятие ва̄нтлуптаслӯв. Тыт о̄лым ма̄н районувт о̄лнэ ма̄щтыр ма̄хум ёт рӯпитаӈкве патсӯв. Ань тай округ янытыл ва̄ве̄в, акваг са̄всыр суссылтапын ялантэ̄в, то̄ва порат Москва ӯсн манос мо̄т хо̄н ма̄н во̄виньта̄лаве̄в. Са̄в та̄л сыс рӯпитым ёмащакв ва̄глӯв, хоты выставкат манхурип пормас манос сувенир тыналаӈкве ро̄ви. Ка̄сыӈ та̄л «Товары земли Югорской» суссылтапыт ма̄н пӯркат пуссын молях тыналыянӯв. Ань ма̄хум ва̄ганыл, Саранпа̄вылт пӯркат ма̄щтырыг ю̄нтавет, хоса о̄ньщуӈкве ро̄ве̄гыт. «Дух огня» нампа кина суссылтан фестиваль о̄лыглан порат ос хӯл со̄выл ю̄нтым са̄всыр тучаӈыт, са̄сныл, то̄рыл ва̄рим а̄канит, турло̄псыт ос са̄в мо̄т нё̄тнэ сувенирыт тыналэ̄в. Акв порат ты фестивалин Лариса Долина ёхталас, хӯл со̄выл ю̄нтым ат тучаӈ ёвтыс. Манрыг таве̄н таса̄вит, аты ва̄глув. Биатлон о̄лнэ порат ос мо̄т пормасыт тыг тотыянӯв. Ма̄щтыр ма̄хум биатлон ма̄гсыл сувенирыт о̄с ва̄ре̄гыт. Мӯй ма̄хум тамле утыт о̄с сака ёмащакве ёвтэ̄гыт. О̄влэ̄т биатлон хунь туп о̄вылтахтас, ма̄н тув во̄виньта̄лвесӯв, акв ё̄рнколт тот тӯщтыгласӯв. Мӯй ма̄хум са̄лы нё̄влил, хӯл исмитыл тыттысанӯв, ща̄ил айтсанӯв. Ань Ханты-Мансийск ӯсн хунь ёхталэ̄в, таса̄вит ё̄рнкол тот тӯщтавет, таса̄вит сувенирыт тыналавет. Ам тамле ва̄рмаль ка̄салэ̄гум, сымумт такем ёмас, соссаӈ ма̄хманув та̄нки рӯпитэ̄гыт, олн сэ̄лэ̄гыт. Ма̄н Ха̄льӯсн хунь ва̄нтласӯв, ня̄врамыт ёт рӯпитаӈкве патсӯв. О̄влэ̄т Во̄сыӈтӯр по̄хат «Чуанели» ӯщлахтын ма̄т ня̄врамыт акванатыгласанӯв. Грантолн ма̄гсыл нэ̄паканӯв тув ке̄тыгласанӯв, тот кас щирыл но̄хпатсӯв. Ос ня̄враманув тув ӯщлахтуӈкве тотыгласанӯв. Ань Ха̄льӯс по̄хат «Со̄рни сэ̄й» нампа ӯщлахтын ма̄ ӯнттэ̄в. Тот туи порат ня̄врамыт ӯщлахтэ̄гыт, мо̄т порат ос мӯй ма̄хум тув мӯйлуӈкве во̄виньта̄лыянӯв. Ань «Югратур» ос «Спутник» нампа туроператорыг ёт рӯпитаӈкве патэ̄в. Тох э̄рыӈ са̄внув туристыт тыг ёхталаӈкве патэ̄гыт. Ня̄враманув туп туи порат ӯщлахтэ̄гыт, мӯй ма̄хум ка̄сыӈ хо̄тал о̄с ат ёхталэ̄гыт. Ма̄н ань ма̄нки ӯнттум па̄влувт Ха̄льӯст о̄лнэ ма̄хум пӯри ва̄руӈкве, намхо̄таланыл ос са̄в мо̄т ялпыӈ хо̄талыт тыт янытлаӈкве ве̄рме̄гыт. Тох ма̄н о̄с мощ олн сэ̄лэ̄в. Ань иӈ са̄в рӯпата тот ва̄руӈкве э̄ри. «Со̄рни сэ̄й» па̄влувт мӯй хо̄тпат ма̄гсыл колыт ӯнттуӈкве таӈхе̄в. Ювле хультум та̄л грантолныл ма̄н тот пӯвлыӈкол ӯнттыслӯв, скважина вит ма̄гсыл хилсӯв. Тув иӈ сака са̄в олн э̄ри, ань ос грантолн ма̄гсыл нэ̄паканув о̄с тах ке̄тыянӯв. Тамле олныт ма̄навн сака ёмащакве нё̄тэ̄гыт. 1062 2013.10.18. Светлана Динисламова Россият о̄лнэ финноугор ма̄хум атыт съезданыл о̄лыс. Сӯкыр э̄тпос 26-28 щислат Мордовия ма̄т Саранск ӯст Россият о̄лнэ финноугор махум атыт съездын атхатыгласыт. Тув са̄в ма̄ныл 214 делегат ёхталасыт, ты коныпал наблюдателиг пе̄риим 96 хо̄тпа о̄лсыт, ос во̄виньта̄лым яныг кӯщаит манос учёныит 25 хо̄тпа о̄лсыт, ты халт Финляндияныл, Венгрияныл, Эстонияныл ёхталасыт. Атхатам мир потраныл финноугор мир урыл о̄лыс, ос хумус акв ма̄т, Россият, о̄лнэ мирыт юртыӈыщ, акваннё̄тхатым вос о̄лнувыт. О̄выл ла̄тыӈ М. Магометов ла̄выс, тав В. В. Путин щё̄питам ла̄тӈе ма̄хумн ловиньтас. Президентув тамле ла̄тӈыт ты те̄тыс: "Финноугор мирыт са̄в ёмас ва̄рмалит наукат, образованият, искусстват Россияв ма̄гыс ва̄ре̄гыт. Та̄н о̄щнэ ос э̄лаль тотнэ пе̄с йис потраныл, о̄лтуланыл, ялпыӈ хо̄таланыл ма̄н янытлыянӯв, туп ка̄сыӈ мир хосыт ма̄н Россияв ё̄рыг ты о̄лы". Тав юипа̄лэ̄т атхатам ма̄хмытын В. Д. Волков ла̄тыӈ ла̄выс, тав Мордовият пуӈк кӯщаиг о̄лы. Хум мир ёт сымыӈыщ пащалахтас, потре ма̄тэ урыл о̄лыс. Тав ла̄выс: «На̄н ань ка̄саласлы̄н, манхурип нё̄тнэг ма̄н ӯсув е̄мтыс, са̄в йильпи кол ӯнттувес, ӯсхулыт па̄хвыӈыг ва̄рве̄сыт, хотхорамтаве̄сыт. 2018 та̄лт тыт мирхал касыл ва̄раве – футболыл ёнгын Чемпионат». Финноугор ассоциацият кӯщаиг о̄лнэ хум П. Н. Тултаев ёхталас. Таве хӯнтлаӈкве сака пӯмыщ о̄лыс: "Нила та̄л минам порат ма̄н рӯпатав хосыт са̄в ва̄рмаль ат торгамтасӯв, мощ хурахласӯв, сыманув то̄ргим то̄ванакт путгысыт. Ва̄им, то̄нт ма̄н нупылув сунсуӈкве, ма̄нав хӯнтлаӈкве кӯщаит ат тахсыт. Ань мо̄т щирыг е̄мтыс, тыхо̄тал ма̄н ва̄рмалянув э̄сгавет, янытлавет. Ма̄н ань акванюрщхатым рӯпитэ̄в, ла̄тӈанув но̄хво̄рмалтэ̄в. Кӯщаитын хӯнтлаве̄в, нё̄туӈкве патвесӯв". Овыл хо̄тал кӯщаит та̄нти ла̄тӈаныл потыртасаныл, та юипа̄лт делегатыт потраныл ловиньтасаныл. Ка̄сыӈ мирныл акв хо̄тпа такви ща̄нь ла̄тӈе̄тыл потыртас. Ханты мирныл Т. В. Волдина докладэ ловиньтастэ, ма̄ньщи мирныл доклад ам щё̄пита̄лсум. 27 щислат съезд титыт хо̄тал рӯпитас. Нила секциян уртхатсӯв, хо̄тпат потраныл тот ловиньтасаныл. Ма̄ньлат хо̄тпат ма̄гыс я̄нас секция о̄лыс. Тот ма̄ньлат хо̄тпат та̄нти рӯпатаныл урыл потыртасыт, маныр та̄н пӯмыщ ва̄рмалит, проектыт щё̄питасыт, маныр та̄рвит рӯпатанылт о̄лыгла̄лы. 28 щислат ма̄хум о̄с акванатхатсыт, резолюцияг ла̄внэ нэ̄пак ёт рӯпитасыт. Съезд рӯпататэ а̄стлан э̄лыпа̄лт пе̄риян ва̄рмаль о̄лыс, финноугор ассоциация кӯщаиг Пётр Николаевич Тултаев о̄с э̄лаль пе̄риявес. Ты хо̄тпа, со̄ль, сака са̄в ва̄рмаль ма̄н миранув ма̄гыс ва̄ри, ёмас хо̄тпат тав ётэ рӯпитэ̄гыт, са̄в рӯпата ва̄руӈкв а̄лыме̄гыт. Кӯщаиг о̄луӈкве таве̄н, ва̄им, хо̄йхаты. Ловиньтам потрум ты: «Ам ма̄ньщи ма̄м – ам колум» Паща о̄лэ̄н, я̄тил финноугор рӯтанум! Ам тыг ма̄ньщи ма̄ныл ёхтысум, ам ма̄ньщи хо̄тпа. Ка̄сыӈ мир о̄лупсатэ хосыт такви ла̄тӈе та̄л о̄луӈкве ат ве̄рми. Ла̄тыӈ хосыт са̄всыр номт, сымныл миннэ са̄всыр ла̄тыӈ ля̄галаӈкв ро̄ви. Пе̄с йис потранув, йильпииг хаснэ потранув, хумус пе̄с порат ма̄н мирув о̄лыс, э̄лаль потыртаӈкв ве̄рмиянӯв. Тыхо̄тал 12 со̄тыра 269 ма̄ньщи хо̄тпаныл туп со̄тыраныл мощщанув э̄лумхо̄лас ща̄нь ла̄тӈыл потыртэ̄гыт. Ма̄н ма̄ньщи ла̄тӈув тыпылтаӈкве ве̄рмилӯв, ты урыл сыманув лов та̄л минам порат ща̄ргысыт, то̄нт щар ма̄к ла̄тӈув урыл номсахтуӈкве ты патсӯв. Ос тыса̄вит та̄л ювле хультыс, ханты ос ма̄ньщи миранув халт номтыӈ, ка̄ркам хо̄тпат ялтсыт, та̄н са̄в ва̄рмаль ва̄руӈкве о̄вылтахтасыт. Та̄н хосытанылт ма̄ньщи мирув такви о̄лупсатэ ос ла̄тӈе торгеннув янытлаӈкве патыстэ. Та минам та̄лытт ма̄н округувт яныг кӯщаянув ма̄н ётув э̄рнэ щир рӯпитасытнё̄тсыт. Округувт я̄нас Департамент о̄лыс, тот соссаӈ ма̄хманув нё̄тмилыл ва̄рве̄сыт. Ань ты Департамент хотвуйвес, ос ань Югорский университетт о̄лум институт, хо̄т ханты ос ма̄ньщи а̄гитпыгыт ханищтахтасыт, лаппантвес. 2010 та̄лт ма̄ньщи, ханты ла̄тӈыг ханищтан ос «Финноугроведение» кафедра о̄с лап пантве̄сыт. Та урыл тох е̄мтыс: сака мощща студентыт ма̄н институтувн ханищтахтуӈкве ёхталасыт: тот ханищтахтын ма̄гыс та̄нанылн иӈ тит экзамен миӈкве э̄рыс. Ос школа а̄стлан порат ты экзаменыг миӈкве хотпе̄рнямавет, тот рӯпитан хо̄тпат хурахлэ̄гыт: ня̄врамыт лю̄льсаӈ ул вос хансэ̄гыт. Ань ма̄ньщи ла̄тыӈ ханищтан школат щар мощщаг е̄мтсыт. Тот са̄т сыс туп акв урок ва̄раве. Тыхо̄тал ма̄ньщи ла̄тыӈ ханищтан са̄т школа туп хультыс: тыи Саранпа̄вылт, Та̄гт па̄вылт, Восыӈтӯрт, Ня̄хщамво̄льт, Ло̄пмуст ос Кимкъясӯйт. Акв тамле школа Октябрьский районт о̄лы Ня̄рихумит па̄вылт. Ос Хо̄нтаӈ район Шугур па̄вылт ня̄врамыт ма̄ньщи ла̄тыӈ кружокт ханищтыяныл. Са̄т сыс акв урок, ва̄им, сака мощща. Образование Департаментыт рӯпитан хо̄тпат ловиньтасыт, минам та̄л сыс ма̄ньщи ла̄тыӈ 372 ня̄врам ханищтасыт. Ань э̄лаль ёмас ва̄рмалит урыл потыртэ̄гум. 2007 та̄л порат Ханты-Мансийск ӯст "Лылыӈ со̄юм" центр пӯсвес. Тот ня̄врамыт ёт ла̄тыӈ ва̄нэ хо̄тпат рӯпитэ̄гыт, та̄н ня̄врамыт нарсъюхыл ос са̄ӈквылтапыл са̄ӈквылтаӈкве, э̄ргыт э̄ргуӈкве ос йӣквыт йӣквуӈкве ханищтыяныл. Ты ва̄рмаль Алексей Рещиков ос Владимир Меров ва̄ре̄г. Тэ̄н коллективанэ̄н намаим о̄лэ̄г – «Торые» ос «На̄й султум». Ка̄сыӈ туи сыс ня̄врамыт ма̄гыс тот лагерь рӯпиты, тав ла̄ваве «Лӯима̄ мо̄йт», ты та̄л тув 23 ня̄врам ялсыт. Ты тув сыс та̄н мирн ва̄нэ хо̄тпат ёт хо̄нтхатыгласыт, по̄слуӈкве ман ма̄щтырлаӈкве ханищтахтасыт. Яныг нё̄тмил этностойбищат ва̄ре̄гыт. Акв тамле рӯпитан ма̄ намаим о̄лы – «Ма̄нь Ӯскве», тав Ха̄льӯс район Я̄сунт па̄вылт о̄лы, 1994 та̄л порат тав рӯпататэ о̄вылтавес. Ка̄сыӈ тув сыс тот хӯрум смена рӯпиты – тыи ма̄щтырлахтын смена «Ане̄квам ханса», тот ня̄врамыт йинуӈкве, ю̄нсхатуӈкве ос йӣвныл матыр ёргуӈкве ханищтавет, титыт сменат яныг ня̄врамыт Нё̄рн тотыглавет, «Э̄ргын ня̄лыт пора» сменан 40 ня̄врам ёхталэ̄гыт. "Ма̄нь Ӯсквет" ня̄врамыт ёт ма̄к ла̄тыӈ ос ма̄ньщи пе̄с йис о̄лупсав ва̄нэ хо̄тпат рӯпитэ̄гыт. Ня̄врамыт хунь та̄нти ла̄тӈаныл акваг те хӯлэ̄гыт, то̄нт ща̄нь ла̄тӈаныл моляхнуве номылматэ̄гыт ос та̄нти мираныл о̄лупса ва̄ӈкв патэ̄гыт. Хо̄тпа такви мире урыл хунь са̄в ва̄г, то̄нт таве̄н кӯстырнувег о̄луӈкве тах паты. Ос та урыл ла̄ве̄в: Ханты-Мансийск ӯст ты та̄л №3 школат ос №1 гимназият ня̄врамыт соссаӈ мир ла̄тӈын ос литературан ханищтавет. Ос педколледжит соссаӈ мир ма̄гыс я̄нас отделение пӯсвес. Ма̄н округувт матъёмас ма̄ньщи ра̄дива, кина по̄слын ма̄ иӈ рӯпитэ̄гыт, "Лӯима̄ сэ̄рипос" нэ̄пак та̄ратаве, ловиньтан нэ̄пакыт хансавет. А̄с ма̄хум институтт КАМИС нампа йильпи программа ва̄рвес, тот ма̄ньщи ос ханты пе̄с йис потрыт ёлхансавет, ка̄сыӈ хо̄тпа ве̄рми тыи хӯнтлаӈкве. Ла̄ве̄гыт, та ла̄тӈыт молях ёрувлахтэ̄гыт, хоты ла̄тӈыл нэ̄пак ат та̄ратаве ос ла̄тыӈ школат ат ханищтаве. Номтанув ёмасыт кос, ос сыманув иӈ ща̄рге̄гыт: ра̄дива хосыт са̄т сыс туп 40 минута потыртаве , телевизор хосыт ма̄ньщи ла̄тӈын 2 кина туп э̄тпос сыс суссылтаве. «Лӯима̄ сэ̄рипос» нэ̄пакув мощ мо̄лалнув ка̄сыӈ са̄т сыс та̄рата̄лвес, ань э̄тпос сыс туп тит щёс та̄ратаӈкве патвес. Таи ёмас ань ма̄ньщи мирув газета ма̄гыс олн та̄нти ат ойтэ̄гыт, ка̄сыӈ хо̄тпан тамле нэ̄пак олнта̄лтотаве. Ма̄н номсэ̄в, ма̄ньщи мир ёт акваг хо̄нтхатыглаӈкв э̄ри, ла̄тыӈ урыл ос о̄лупса урыл та̄н ётаныл акваг потыртаӈкве. Ты ва̄рмаль Ха̄льӯс районт о̄лнэ соссаӈ мир ма̄гыс ва̄руӈкве э̄ри. Та̄н ла̄тӈаныл ёмащакв кос ва̄ганыл, ос та̄нти ня̄враманылн пе̄с йис о̄лупса урыл ат потыртэ̄гыт, ща̄нь ла̄тӈын ня̄враманыл ат ханищтыяныл. Ты хо̄тпат ма̄гыс программат ва̄руӈкве э̄ре̄гыт, тот са̄всыр лекцият ос семинарыт урыл хансуӈкве э̄ри, ос ты ва̄рмаль ва̄рнэ ма̄гыс олн тинсуӈкве э̄ри па̄влытн миннэ лё̄ӈх олн. Та минам та̄лт ЮГУт "Нёхс пити" ла̄тыӈ ханищтан курсыт ва̄рыгла̄лсӯв. Ма̄н палтув ма̄ньлат ма̄ньщи хо̄тпат, рӯпитан хо̄тпат ёхтала̄лсыт. Ты курсыт 3 хо̄тпа ва̄рсыт, та̄н потраныл туп та̄нти ла̄тӈыл о̄лыс, са̄в потыр потыртасыт, мо̄йтсыт, пе̄с йис потрыт номылматыгла̄лсыт. Ёхталам хо̄тпат, хотьют ма̄ниг о̄лманыл порат ма̄ньщи ла̄тыӈ хӯлыгласыт, та̄н титынтыг ёхтуманыл порат та̄нти ла̄тӈанылтыл потыртаӈкве та патсыт, ла̄тӈаныл та номылматсаныл. Та̄наныл хӯнтлым сыманув ща̄гтсыт – ла̄тӈув суе ат соймыс. Ты ма̄ньлат хо̄тпатын ла̄тӈув э̄лаль ӯргалаӈкве патаве. 1062 2013.10.18. Александр ВЬЮТКИН Ма̄ньщи йӣкванув мирн суссылтасанӯв. Сӯкыр э̄тпос ва̄т нупыл хо̄тыт хо̄талт Мордовия республикат Саранск ӯст Россия ма̄ янытыл о̄лнэ мирыт «Финноугорский транзит родственных встреч» нампа э̄ргын ос йӣквнэ фестиваль о̄лыс. Саранск ӯст таве юио̄вылт ва̄рыглавес. Ты кастыл округувныл соссаӈ ма̄хум ма̄н туп хӯрум коллектив тув во̄винта̄лвесӯв. Халувт акв коллективув тув минуӈкв ат ве̄рмыс. Ха̄льӯс район Саранпа̄вылт о̄лнэ «Са̄лыӈ лё̄ӈх» ня̄врамыт Ханты-Мансийск ӯсн ёхтуӈкв ат ве̄рмысыт. Ха̄льӯсныл тыг тыламлан хо̄талт турапыг о̄лыс, то̄рмувн ат та̄ртве̄сыт. Ма̄н та̄наныл хо̄тал палыт товлыӈха̄пыт иснэ колт ӯрсанӯв. Хунь самолёт мо̄т хо̄талн ла̄ввес, ма̄навн мощ марщумнувег е̄мтапас. Ма̄н, «Э̄ргыт, йӣквыт пувлын ма̄хум», хуньт пуссын Д. Г. Агеев палт ялантасӯв. Манырсыр са̄ӈквылтан та̄н ос йӣкв ха̄сэ̄в тыи пуссын Дмитрий Георгиевичин ханищтавесӯв. Таима̄гсыл ма̄н таве̄н яныг пӯмащипа ла̄тыӈ те̄тэ̄в. «Лылыӈ со̄юм» колн ялантан ня̄врамыт ма̄н ётув Саранск ӯсн ялсыт. Ты «Торые» а̄гитпыгыт са̄ӈквылтапыл, нарсъюхыл ос та̄рыг сыплув йӣвыл са̄ӈквылтэ̄гыт. Торые ма̄ньщи щирыл «лунт» тох ла̄ваве. Ма̄н ты лов хо̄тпа Мордовия республикан ялсӯв. Тув те̄р лё̄ӈх хосыт тит хо̄тал минасӯв. Саранск ӯсн ёхтумувт, акв хо̄талын ювхультмув. Коллективыт та э̄лыпал хо̄талт суссылтапаныл пе̄рияве̄сыт. Ма̄н ёхтумув хо̄талт та̄н республика янытыл экскурсиял ва̄рыглаве̄сыт. Э̄типа̄лаг та̄н ётаныл ущта ва̄йхатасӯв. Ма̄н яныгпа̄ла ос а̄гмыӈмосыӈ ма̄хум пусмалтан «Надежда» нампа пансионатколт о̄лсӯв. Та кол Саранск ӯсныл ва̄т ве̄рыста мощ по̄хатнув о̄лы. Ка̄сыӈ хо̄тал а̄лпыл онтолов щё̄с порат тувыл ӯсн тотаве̄в, э̄типа̄лаг ос аквхуйплов щё̄с порат ювле ущ тотыглавесӯв. О̄выл хотал ма̄н йӣкванув сусве̄сыт ос пе̄рияве̄сыт. Тув ма̄н коллективувтыл нила суссылтап щё̄пита̄лсӯв: са̄ӈквылтапыл са̄ӈквылтан тит та̄н ос тит ма̄ньщи хум йӣквы̄г. Тувыл ма̄н акв йӣквув туп пе̄риявес. «Торые» ня̄врамыт йӣкв ат о̄щсыт, та̄н акв са̄ӈквылтан та̄наныл пе̄риявес. Ты фестиваль о̄лум порат Российский Федерация Ассоциация финноугорский миранэ атыт съездэ о̄лыс. Та̄н съезданыл оигпам хо̄талт ма̄н ос ма̄к концертув ва̄рыглавес, та кастыл щё̄пита̄лум э̄рганув, йӣкванув та̄нанылн суссылтасанӯв. Россия ма̄ янытыл са̄всыр ла̄тӈыл потыртан мирыт халт э̄ргын ос йӣквнэ суссылтан фестиваль хӯрум та̄л сыс ва̄рыглаве. Ты сыс хӯрумса̄ттем са̄всыр коллективныл юио̄выл концерт мус туп нёлоловхуйплов хультуптавес. Ка̄сыӈ ма̄хум та̄нти щир ёмас э̄рыг, йӣкв ос са̄ӈквылтан та̄н о̄ньще̄гыт. Ма̄навн та̄н нупыланыл сунсуӈкв нас пӯмащиг о̄лыс. Концертув оигпам юипа̄лт пӯмащипа ла̄тӈыӈ пищмал ос дипломнэ̄пакыл мӯйлуптавесӯв. Титыт хо̄тал а̄лпыл ос Темниково па̄выл сунсуӈкве тотыглавесӯв, тот ма̄н о̄с йӣквсӯв, э̄ргысӯв. Ма̄н ётув Наръян-Мар ӯсныл ос Эстония ма̄ныл ма̄хум тув ялсыт. Мордва ма̄хум ма̄ныл яныг. Па̄выл нупыл нила щё̄с минамув сыс, ма̄н я̄ӈкылмат ос во̄рыт торыӈ щирыл ат ва̄санув, тот мощща. Са̄выӈпа̄лэ тот са̄всыр сыртэп янмалтан тэ̄пканкапаит о̄лэ̄гыт. Па̄вылн ёхтумувт, ма̄н ка̄миньт ня̄нил ля̄льт ӯрвесӯв. Ма̄н исум ня̄ньломт сакватасӯв ос солвал а̄нын пувтмалым тэ̄сӯв. Ты Россия янытыл мӯй ма̄хум тох ӯравет. Та хо̄тал ащирмаӈ, во̄тыӈ хо̄талыг о̄лыс. Таима̄гсыл ма̄н ма̄гсылув щё̄питым пасан клубколт ва̄рыглавес. Мордва ма̄хум тэ̄нутаныл та̄нти щирыл атыӈыг о̄лсыт. Э̄типа̄лаг ма̄н, ёхталам мӯй ма̄хум, концерт ва̄рыгласӯв. Щё̄стем са̄ӈквылтасӯв, йӣквсӯв, э̄ргысӯв ос тувыл о̄лнэ колувн та тотвесӯв. Хӯрмит хо̄тал ювле о̄лнэ ма̄нувн та минмыгтасӯв. 1063 2013.11.08. Валентина УЗЕЛЬ Валентина Хозумова Округ миркол кӯщаит сапра̄нияныл. Моще̄рт ты та̄л ты оигпи. Таима̄гыс йильпи та̄л кастыл манах олн ань та̄ставе, ты урыл потыртан ма̄гыс округ правительстват рӯпитан кӯщаит акванатыглаве̄сыт. Ма̄н округув налоголн хосыт о̄лы. Манах олн атаве, таса̄вит олн ла̄кква та уртаве. Ка̄сыӈ та̄лныл ма̄во̄й мощщами, ань газ ёт рӯпитан организацият округ па̄лыл нё̄туӈкв патавет. Та̄н туп 50% са̄вит налог ойтуӈкв патэ̄гыт. Газыл яласан ма̄шинат о̄с мощща налоголныл тах пинавет. Ты рӯпата таима̄гыс ва̄раве, ма̄витув сака ат па̄ӈктаве ос округув янытыл о̄лнэ па̄влыт ос ӯсыт мус газ тотнэ турпат моляхнув вос пинавет. Та̄рвитыӈ а̄гмыт урыл кӯщаит о̄с потыртасыт. Ты та̄л Ханты-Мансийск ӯст ос Ханты-Мансийский районто̄лнэ са̄в хо̄тпа туляремияа̄гмыл е̄мтсыт. Э̄лмхо̄лас ты а̄гмыл ма̄порсӯитн, лё̄мвоитн ха̄хтаве. Ань ты а̄гм э̄лаль ул вос та̄рамлы, миркол кӯщаит нила миллион солко̄ви ӯс ма̄гыс ос 2 миллион солко̄ви район ма̄гыс та̄стысыт. Ань ты олныт хосыт ла̄пкат, тэ̄нут о̄щнэ колыт ма̄порсӯит алнэ ма̄гыс тэ̄рпил акваг паргалтавет. Ӯс ляпат о̄лнэ вит во̄ӈхат, лё̄х по̄хыт лю̄льнэ во̄р о̄с тэ̄рпил со̄сантавес. Ань ты рӯпата акваг ва̄руӈкв патаве. Хо̄псы а̄гмыл о̄с са̄в хо̄тпа а̄гмыӈыт. Та̄наныл пусмалтан ма̄гыс ань иӈ са̄в олн округ бюджетныл тах миве. Кол ӯрнэ ма̄хум ма̄гыс ос тамле нэ̄пак пирмайтавес. Ань жилищный программа арыг 560 миллион солко̄вил хасвес. Ты олнытыл йильпи колыт ӯнттуӈкв патавет, рущ щирыл ла̄вавет – арендный дом. Ос тот туп ма̄ньлат ще̄мьят, ма̄ньщи ман ханты ще̄мьят ос бюджетникыт колыл тах мивет. Та кол тыналаӈкв ат ро̄ви, туп аренда щирыл тот ма̄хум о̄луӈкв тах патэ̄гыт. 1063 2013.11.08. Людмила ТЕТКИНА Ты а̄гм 87 хо̄тпа палт хо̄нтвес. Та э̄тпост 7 хо̄талныл 10 хо̄талэ мус «Диабет. Время действовать» нампа акция ва̄рыглавес. Нижневартовск, Ханты-Мансийск, Сургут ӯсыт ос Сургутский район янытыл «мобильный диабетцентрыг» ла̄внэ ма̄шина яласас. Ка̄сыӈ ка̄сащан хо̄тпа тув ялыс, тав «сахарный диабет» а̄гм о̄ньщи ман а̄ти, уральтавес. Ле̄ккарыт хо̄тпа ке̄лп анализе хосыт ты а̄гм молях хо̄нтуӈкве ве̄рме̄гыт. Хӯрум хо̄тал сыс акв со̄тыра 500 арыгкем э̄лумхо̄лас ле̄ккарытын уральтаве̄сыт. Ань 87 хо̄тпа палт ты а̄гм хо̄нтвес. Ты ма̄хум тамле та̄рвитыӈ а̄гм о̄ньще̄гыт, та̄н аты ва̄мыт. Ле̄ккарыт ла̄ве̄гыт, а̄гм «сахарный диабетыг» таима̄гсыл ла̄ваве, ма̄хум о̄лэ̄гыт, номсэ̄гыт, а̄гм ат о̄ньще̄гыт. Ты а̄гм щар ат суйты. Ос э̄лаль ле̄ккарытн воссыг пусмалтаӈкв ат ве̄рмаве. А̄гмыӈ хо̄тпа о̄лнэ̄тэ сыс туп инсулинтэ̄рпи укол таквинатэ̄н тӯщтым э̄лаль о̄лы. Тамле та̄рвитыӈ нак ул вос е̄мтыс, ма̄хум пуссын ва̄тихал уральтахтуӈкве ла̄вавет. Ле̄ккарытн ке̄лп виве, ос тот са̄ккар са̄внув ке хо̄нтаве, а̄гм та̄ра пусмалтаӈкве о̄вылтаве. Ань ты диамобильма̄шина туп яныг ӯсыт ос Сургутский район хосыт яласас. Тэ̄лы лё̄ӈхыт хунь ва̄равет, ле̄ккарыт ма̄нь па̄влытын минэ̄гыт, тот о̄лнэ ма̄хум о̄с тах уральтыяныл. Ма̄н округувт 45 со̄тыра арыгкем хо̄тпа сахарный диабет а̄го̄ньще̄гыт, ос манаса̄вит хо̄тпа ат уральтахтасыт ос ты а̄гм о̄ньще̄гыт, нэ̄мхотьют ань ат ва̄г. 1063 2013.11.08. Александр ВЬЮТКИН Са̄в ул вос тулмантэ̄гыт. Мощ мо̄лалнув Ханты-Мансийск ӯст прокуратурат рӯпитан тит кӯщай хумыг Александр Кондратьев ос Ринат Кунсбаев ёт прессконференция ва̄рыглавес. Хумыг та урыл потыртасы̄г, хумус ла̄палахтыглым яныг кӯщаиг рӯпитан ма̄хмытныл олн во̄ве̄гыт. «Ты та̄л сыс округув янытыл нёлса̄т ва̄т са̄всыр тамле ва̄рмаль щирыл прокуратурат рӯпитан ма̄хум тэ̄ла пӯнсыгласыт. Тувыл нёлса̄т ляпатем кӯщаит олн во̄внэ̄ныл ма̄гсыл пувве̄сыт. Щар са̄в тамле лю̄ль ва̄рмаль Сургут ос Нижневартовск ӯсыгт рӯпитан ма̄т хо̄нтвес. Са̄выӈпа̄лэ тыи са̄в мирыӈ ос са̄в олн винэ ма̄т е̄мталы. Ма̄н округувт пӯльницатыт ос ня̄врамыт ханищтан колытыт нэ̄пакыт пе̄нтым ос олн та̄нтина̄нылн пиным щар са̄в лю̄ль ва̄рыглавес. Са̄в ма̄хум ма̄навн та̄нти потыртэ̄гыт. Хумус та̄нанылныл хотты кӯщай матыр во̄ви, та̄н ма̄навн та урыл ла̄тыӈ те̄тэ̄гыт. Ма̄н аквты та̄ра та кӯщай уральтылӯв. Кӯщаиг о̄лнэ ма̄хум ма̄н та̄наныл ва̄тихал уральтым о̄ньщиянӯв. Та̄н ты урыл кос ва̄гыт, та̄нти э̄лаль аквта щиранылт лю̄ль ва̄ре̄гыт. Мощ мо̄лалнув кӯщаиг о̄лнэ акв ле̄ккар ва̄нэ юрт хо̄тпатэ аквтуп рӯпитаӈкв ат ве̄рмынэ̄тэ ма̄гсыл нэ̄пакыл ва̄рыстэ. Та нэ̄пак щирыл тав пенсиян минас. Ос та̄ланэ ат кос то̄влысыт. Тэ̄н о̄с пуввесы̄г. 1063 2013.11.08. Людмила ТЕТКИНА То̄ва са̄кконыт йильпи щирыл хасве̄сыт. Округ Думат рӯпитан депутатыт сапра̄нин акванатхатыгламаныл порат хусахтем са̄всыр са̄ккон пирмайтасыт. Ты халт та̄н о̄лнэ колыт урыл потыртасыт. «О регулировании отдельных жилищных отношений» нампа са̄ккон щирыл округувт колыт ӯнттуӈкве тах патавет. Борис Хохряков, округ Дума кущай хум, ла̄выс, ты са̄ккон округ Думат Молодёжный палатат рӯпитан ма̄ньлат хо̄тпат хансуӈкве номылматсыт. Ты нэ̄пак щирыл тамле колт о̄лнэ ще̄мьят мощща олн ойтуӈкв патэ̄гыт. Тамле колыт Нефтеюганск, Ханты-Мансийск ос Сургут ӯсытт тах ӯнттавет. Тамле колыт ӯнттым округув олн тах сэ̄лы. Мо̄т са̄ккон «Обеспечение доступным и комфортным жильём жителей Югры 2014-2020 годы» хосыт ма̄хум йильпи щирыл кол ёвтуӈкве тах патэ̄гыт. Ань рӯпитан программа хосыт соссаӈ, ма̄ньлат ще̄мьят, бюджетыт рӯпитан ма̄хум субсидияолныл кол ёвтнэ ма̄гсыл мивет. Йильпи 2014 та̄лныл кол ёвтуӈкве ка̄сащан хо̄тпат та̄нки олн атуӈкве патэ̄гыт ос ипотечный агентстван олнаныл тах пиныяныл. Тувыл 2018 та̄л юипа̄лт та̄н ты олныл кол ёвтуӈкв тах нё̄тавет. Кӯщаит ла̄всыт, округувт ты программа хосыт 5 со̄тыра арыгкем э̄лумхо̄лас кол тах ёвтэ̄гыт. Ос акв са̄ккон щирыл яныг ма̄шинал манос автобусыл яласан хо̄тпат «транспортный налогыг» ла̄внэ олн ань туп 50% са̄вит ойтуӈкв патэ̄гыт. «Природный газыл» яласан ма̄шина о̄щнэ хо̄тпат туп та̄н мощщанув налоголн тах ойтэ̄гыт. Ты коныпал сапра̄нит ма̄хум са̄в та̄л рӯпитан хо̄тпат Почётный грамотал мисаныл. Тувыл судьяхо̄тпат пе̄риясыт. Ос са̄в мо̄т э̄рнэ са̄кконыт тот пирмайтасыт. 1063 2013.11.08. Николай МЕРОВ Нэ̄хо̄тпат уйигтым ёнгысыт. Ма̄нь таквс э̄тпост округувт акв пӯмащ ёнгын ва̄рмаль ва̄рыглавес. Нэ̄т витыт уйигтым мечикыл ёнгысыт. Рущ щирыл ты ёнгил «Водное поло» ла̄ваве. Россия янытыл Нижний Новгород, Кириши, Москва ӯсытныл нэ̄ хо̄тпат тыг ёхталасыт. Ма̄н округувныл а̄гиквет о̄с ёнгысыт. Ханты-Мансийск ӯст Югорский университет колнаке̄т ты ёнгын ва̄рмаль ма̄гыс бассейн щё̄питым о̄лы. Нэ̄ хо̄тпат хӯрум хо̄тал тот кассыт. Ты ёнгын тэ̄ла округт о̄лнэ ня̄врамытн сака мӯсты. А̄гитпыгыт тамле касылын ханищтахтуӈкве сака ка̄саще̄гыт. Ты ёнгын ва̄рмаль э̄лаль акваг тыт ва̄рыглаӈкве тах патаве. На̄н хуньт ты ёныг урыл хӯнтамлэгы̄н ке, пӯмащ ма̄гыс тув о̄с ялэ̄н, мощ сунсэ̄н. 1063 2013.11.08. Тома мерова Олныт ловиньтаве̄сыт ос э̄лаль ла̄кквауртве̄сыт. Югра правительстват рӯпитан кӯщаит 2014 та̄лн ос тыгыл э̄лаль 2015-2016 та̄лыг кастыл бюджет олныт ёмщакв ловиньтасаныл ос са̄всыр программат щирыл ма̄кыг ла̄кквауртсаныл. Ты о̄вылтыт губернатор ва̄ӈын нэ̄ Вера Аркадьевна Дюдина журналистытн потыртас. Округувт та̄л сыс манса̄вит тонна ма̄во̄й но̄хвиве ос ма̄ янытыл акв баррель ма̄гыс манса̄вит тын пинаве, кӯщаит тув ро̄влахтым олныт э̄лаль ловиньтыяныл. Мо̄тыт та̄лт 253, 5 млн. тонна ма̄во̄й тах но̄хвиве. Ос баррель ма̄гыс та̄н 101 доллар са̄вит тын пинсыт. 2015 та̄лт 249, 7 млн. тонна, 2016 та̄лт 247 млн. тонна ма̄во̄й виӈкве таӈхе̄гыт ос 100 доллар са̄вит тыныл тыналаӈкве хассаныл. Тувыл та щирыл пуссын сэ̄лнэ олныт РФ янытыл са̄всыр ма̄н ла̄кквауртавет. Ань 2014 та̄лн округ бюджет ма̄гыс 166, 4 млрд. солко̄ви та̄стувес. Та̄н 25 са̄всыр программа щирыл тах холтавет. 2015 та̄лн 172, 3 млрд. солко̄ви, ос 2016 та̄лн 178, 9 млрд. солко̄ви ловиньтасыт. Ты коныпал «резервный фонд Югры» ла̄внэ олн атнэ ма̄н 13 млрд. солко̄ви со̄пасыг пинсыт. Ка̄сыӈ та̄л кол ӯнттын программан са̄внув олн та̄ставе, пе̄с колыт хоткуритаӈкве ос ЖКХат са̄всыр ва̄рмалит ёмщакв щё̄питан ма̄гыс о̄с я̄нас олн та̄стэ̄гыт. 2014 та̄л «Культура та̄лыг» ла̄ввес. Таима̄гыс тув хансым программатытн 538 млн. солко̄ви миве. Тыгыл 400 млн. солко̄ви культурный центрыт, клубыт манос театрыт ӯнттын ма̄гыс холтавет тах. Мо̄т программат олн та̄л о̄с ат хультэ̄гыт. 1063 2013.11.08. Валентина УЗЕЛЬ Валентина Васильева Ма̄нь таквс э̄тпос 30 хо̄талэ – 1937-39 та̄лытт наска̄ссыг порслым ма̄хум ка̄стын хо̄тал. Ханты-Мансийск ӯст ты ма̄хум ма̄гыс памятник тӯщтым о̄лы. Ка̄сыӈ та̄л та хо̄талт тот са̄в мир акванатхатыгла̄лы. Кӯщаит, яныгпа̄ла хо̄тпат та пилыщмаӈ пора номылматыгла̄лыяныл. Ань мир нупыл такви рӯтанэ урыл акв матум рущ э̄ква потыртас, тав наме Надежда Ивановна Кумирова. Тав ща̄нягеа̄щаге ма̄ньлатыг о̄лсы̄г, хунь та̄н ще̄мьяныл тыг те̄твес. Ань э̄ква та та̄рвитыӈ пора урыл лю̄ньщим потыртас. Тав ла̄выс, ты наска̄ссыг порслым ма̄хум наманыл нэ̄мхуньт ул вос ёрувлавет. 1063 2013.11.08. Людмила ТЕТКИНА Та̄н ма̄хумн нё̄тэ̄гыт. Округ янытыл Ханты-Мансийск ӯсн са̄в ма̄хум ёхталасыт. Та̄н пуссын общественный объединеният рӯпитэ̄гыт, та̄н ма̄гсыланыл ты сапра̄ни ва̄рыглавес. О̄с аквта порат «Социальная ярмарка некоммерческих организаций ХМАО-Югры» о̄лыс. Ка̄сыӈ общественный организация тот я̄нас суссылтап ва̄рыглас. Та̄н мирн суссылтасыт, манхурип рӯпата ва̄ре̄гыт. Ты организацият рӯпатаныл хосыт яныг тэ̄ла ва̄ре̄гыт та̄н ма̄хумн нё̄тэ̄гыт. Ань та̄н та̄нки халанылт вос ва̄йхатэ̄гыт, акванюрщхатым ос мирн нё̄тым э̄лаль ёмащакв вос рӯпитэ̄гыт. Суссылтапын ёхталам ма̄хум, ветераныт, а̄гмыӈмосыӈ хо̄тпат, яныгпа̄ла хо̄тпат, са̄в мо̄т организацият рӯпатаныл урыл пӯмщалахтасыт. Соссаӈ ма̄хум организацият тув о̄с во̄виньта̄лве̄сыт. А̄с-угорский ма̄ньлат хо̄тпат организация, «Югра лылыеп» Белоярский отделениятэ суссылтапыг тот о̄с ва̄рыгласы̄г. Ярмарка ос форум о̄лум порат ма̄хум са̄всыр ва̄рмаль урыл потыртасыт. Округувт о̄лнэ са̄всыр мирыт та̄нки халанылт хумус о̄лэ̄гыт, «Многонациональная Югра» нампа секцият ма̄хум тот ты урыл потыртасыт. Сапра̄ни оигпам юипа̄лт та̄н нэ̄пакн хассыт, ань са̄всыр мирыт халанылт юртыӈыщ вос о̄лэ̄гыт, Общественный палата, культура департамент, районный миркол кӯщаит са̄всыр фестивалит, ялпыӈ хо̄талыт ос са̄в мо̄т э̄рнэ рӯпата ва̄тихал вос ва̄ре̄гыт. 1063 2013.11.08. Валентина УЗЕЛЬ Валентина Хозумова Кол ёвтнэ ма̄гыс хоса ӯрхатуӈкв э̄ри. Ма̄н округувт о̄лнэ кол манос субсидияолн ма̄гыс 53 со̄тыра ще̄мья очередин хансым о̄лэ̄гыт. Тув ма̄ньлат ще̄мьят, ма̄ньщи ос ханты хо̄тпат ос бюджетный ма̄тт рӯпитан ще̄мьят ловиньтаве̄сыт. Ань кӯщаянув йильпи программа хассыт 2014-2020 та̄лыт сыс округувт о̄лнэ ма̄хум колыл хумус миӈкв патавет. Ты урыл губернатор ва̄ӈын хум Д. Шаповал, Ипотечный агентстват кӯщай хум Е. Чепель ос кол ӯнттын департаментыт кӯщай А. Кривуляк потыртасыт. Округ мирколт рӯпитан хум Дмитрий Шаповал ла̄выс, ань ты программа таима̄гыс щё̄питавес, юиовыл та̄лыт сыс са̄в ма̄хум субсидияолныл, социальный квартирал майве̄сыт. Кол ӯнттын ва̄рмальн округ бюджетныл сака са̄в олн мины. Округувн ущты ёхтум ма̄хум, са̄в та̄л тыт о̄лнэ манос тыт яныгмам ма̄хум пуссын акв щирыл очередин хансавет ос кол ёвтнэ ма̄гыс субсидияолныл мивет. Ань кӯщаянув ты ва̄рмаль та̄рапаттысыт, ос таима̄гыс та̄н ты программа мо̄т щирыл хассаныл. Ань субсидияолныл манос квартирал та хо̄тпат мивет, хотьют 15 арыгтем та̄л акваг тыт о̄лэ̄гыт манос тыт яныгмасыт, рущ ла̄тӈыл ты ва̄рмаль «ценз оседлости» тох ла̄ввес. 2014-2020 та̄лытн колыт ма̄гыс туп 26 миллиард солко̄ви миве. Мо̄тыт 2014 та̄лн 8, 9 млрд. солко̄ви. Олн кос миве, ос кӯщаянув ань ла̄всыт, субсидияолн ӯрнэ ма̄хум хосанув ӯрхатуӈкв патэ̄гыт. Ты э̄лыпал та̄лытт ма̄хум титаххӯрмах та̄л очередит ӯрхатсыт, ань лов та̄л мус ӯрхатуӈкв патэ̄гыт. Тувыл иӈ тамле йильпи ва̄рмаль ань ва̄рвес, рущ ла̄тӈыл «накопительный ипотекаг» ла̄ваве. Ань кол ёвтуӈкв ка̄сащан хо̄тпат та̄нти олн атуӈкв вос о̄вылтахтэ̄гыт. Округувт «Ипотечный агентства» рӯпиты, тув хӯрум та̄л ка̄сыӈ э̄тпос 6 со̄тыра 250 солко̄ви хо̄тпа пинуӈкв те паты, тав кол ёвтнэ̄тэ порат округ бюджетныл ос 450 со̄тырал тах нё̄таве. 1063 2013.11.08. Николай МЕРОВ Нэ̄пак та̄ратан урыл потыр. Ты та̄л Россия Конституция рӯпитанэ̄тэ па̄сныл хус та̄лэ то̄влы. Ты кастыл Ханты-Мансийск ӯст нэ̄пак та̄ратан ва̄рмаль урыл яныг сапра̄ни ва̄рыглавес. Россия янытыл са̄всыр ма̄ныл яныг кӯщаит тыг ёхталасыт. Рущ щирыл ты ва̄рмаль «Избирательная политика и избирательная система России» намаим о̄лыс. Ань юио̄выл та̄лытт ты ва̄рмаль урыл ма̄хум ва̄тихал потыртэ̄гыт. Ты а̄ти, нэ̄пак та̄ратан порат ощмарлан нак иӈ е̄мталы. Ос Россия янытыл Уральский Федеральный округт пе̄рияпыт ма̄к ёмасыг минэ̄гыт. Тыг ёхталам кӯщай хо̄тпат ла̄всыт: «Нэ̄пак та̄ратан порат са̄внув мир вос ёхталы. На̄н хоты хо̄тпа пе̄риегы̄н, тох та э̄лаль о̄луӈкве патэгы̄н. Ань матъёмас юио̄выл та̄лытт пе̄рияп мӯсхал щирыл мины, нэ̄пак та̄ратан ма̄хум ты ва̄рмаль та̄нки о̄с уральтым о̄ньщияныл. Ощмарлан ва̄рмаль молях та̄рапаттаве. Нэ̄мхотьют ул хӯнтлэ̄н, хотты кӯщай нупыл номтын паты, ёхтэ̄н, тав ма̄гсылэ нэ̄пак та̄ратэ̄н». 1063 2013.11.08. Николай МЕРОВ Ма̄нки са̄всыр тэ̄нут ва̄ре̄в. Мо̄лалнув округ губернаторув ва̄ӈын хум Сергей Полукеев ля̄ххал тотнэ ма̄хум ёт хо̄нтхатыглас. Тав агропромышленный комплекс уральтан кӯщаиг рӯпиты. Ань ты ва̄рмаль э̄лаль хумлег о̄лы, тав ты урыл потыртас. Округ агропромышленный комплекс э̄лаль тотнэ ма̄гыс ань ма̄хум субсидиял майлавет. Ка̄сыӈ та̄лныл ты ва̄рмаль 6-7 процентын но̄хса̄вми. Югра ма̄т мис о̄щнэ хо̄тпат та̄л сыс хусахкем со̄тыра са̄вит литра щаквит, онтоловхуйпловкем со̄тыра кила нё̄выль тыналан ма̄гыс та̄стэ̄гыт. Ты коныпал мо̄лалнув Сургутский район Белый Яр па̄вылт щищкуре̄кыт янмалтан яныг пе̄рма пӯсвес, тувыл са̄в мӯӈи тыналаве. Ань мус ма̄н предприятиянув 41 процент са̄вит са̄всыр хӯл, 9, 5 процент нё̄выль, 3, 5 процент щаквит, 51 процент карто̄пка Югра ма̄т о̄лнэ мир ма̄гыс тыналэ̄гыт. Тыгыл э̄лаль ос ма̄вит ӯргалан урыл потыр о̄лыс. Округувт ма̄щунь но̄хвуим ма̄витув сака ат па̄ӈктаве кос, ос 1986-2006 та̄лыт сыс ма̄во̄ил со̄сантым ма̄ ань 2020 та̄л мус хотсыстамтаӈкве тах э̄ри. Ань ос хоты ма̄т ма̄во̄й ма̄н посы ке, та ма̄ та̄ра хотсыстамтаве, тох ат оссувлаве. Тувыл кӯщай хум ос мохсаӈ хӯл урыл потыртас. Ань ка̄сыӈ та̄лныл ты хӯл мощщами. Тыт хӯл янмалтан завод рӯпиты кос, ос хунь э̄рнэ са̄вит хӯл е̄мты, ӯрхатуӈкве э̄ри. Мо̄лал Ямал ма̄ губернатор Дмитрий Кобылкин ла̄выс, Югра ма̄т мохсаӈ хӯл пувуӈкве акв та̄лн ёлпо̄илтта̄лаве ке, Ямал ты ма̄гыс компенсацияолн ойты тах. Сергей Полукеев ты урыл тох ла̄выс: «Тыи ёмас ва̄рмаль о̄лнув. Ма̄нь мохсаӈ хӯлыт хӯрум та̄ланыл то̄влын мус Ямалт А̄с я̄т ӯйигтэ̄гыт. Ётыл ущ та̄н Ханты-Мансийский округн ма̄н А̄с я̄вн та̄ратахтэ̄гыт. Ос ань ты хӯлыт пувуӈкве щар хот ат по̄илттаве. Мо̄тыт та̄лныл ма̄н учёный хо̄тпат ёт ты ва̄рмаль ёмщакв ханищтылӯв. Тувыл ущ хӯланув са̄вмалтан ма̄гыс э̄рнэ тэ̄ла ва̄ре̄в. Ма̄н ты вармаль туп акваннё̄тхатым мӯсхал щирыл щё̄питаӈкве ве̄рмилӯв». 1063 2013.11.08. Светлана РОМБАНДЕЕВА Пусмалтан ва̄рмаль. Ханты-Мансийск ӯст округ здравоохранение Департамент колт ля̄ххал тотнэ ма̄хум акванатыглаве̄сыт. Ань округув янытыл пусмалтан ва̄рмаль палт ма̄к яныг кӯщаиг Александр Вячеславович Филимонов о̄лы. Ты хум китыглавес, ма̄н ма̄вт пусмалтан ва̄рмаль манхурипаг о̄лы, ма̄хум пусмалтан ма̄гыс олн то̄вылхаты ман а̄ти. На̄н ань э̄лаль тав потре ловиньтэлы̄н: – Ма̄н, округт о̄лнэ ма̄хум, э̄лы хо̄талув урыл номсуӈкве ве̄рме̄в. Ты ма̄гыс олн о̄ньще̄в. Пӯльницанувн са̄всыр тыныӈ оборудованият ва̄тихал ёвтыглэ̄в, йильпи пӯльницат ӯнттэ̄в, округувн номтыӈ ле̄ккарыт во̄ве̄в, рӯпата олныл мӯсхал щирыл ойтуӈкве ве̄рмиянӯв. Россияв янытыл воссыг нэ̄мхотты область ман округ тох ат о̄лы, тыса̄вит олн ат о̄ньщи. Округувт ма̄хум янгыщ давление а̄гмыл савалэ̄гыт, ке̄лпаныл келпта̄рс хосыт мӯсхал щирыл овуӈкве ат ве̄рми. Ущ самын патум са̄в ня̄врам а̄тимыг е̄мты. Хо̄псы ос бронхиальная астма а̄гмыл о̄с сака са̄в хо̄тпа савалы. Са̄в наркоманыт о̄лэ̄гыт, вина айнэ ос хохса хартнэ хо̄тпа о̄с са̄в. Описторхоз ос туляремия а̄гмыл сака са̄в хо̄тпанув а̄гмыӈыт. Ма̄н тыт ань хӯлыӈ ма̄т о̄лэ̄в, таима̄гыс описторхоз а̄гмыл ма̄хманув е̄мтэ̄гыт. Ты сака пилыщмаӈ а̄гм, ма̄йт ӯйитын щалтаве, тувыл рак нампа а̄гмыл э̄лумхо̄лас та е̄мты. Тамле а̄гм пусмалтаӈкве та̄рвитыӈ, хо̄тпа хоса пыл ат савалы, а̄тимыг та е̄мты. Ты а̄гм пусмалтаӈкве э̄ри, ма̄йт ӯйит алуӈкве э̄ре̄гыт. Ты а̄гм щирыл Россияв янытыл ма̄н о̄выл местат хансым о̄лэ̄в. Ам номсыте̄мт, ма̄ янытыл ма̄н о̄с о̄выл местан хаснуве̄в. Са̄в ма̄хум ма̄шинал яласан порат лё̄ӈхыт холэ̄гыт. Ты о̄с сака пилыщмаӈ ва̄рмаль. Тамле ма̄т са̄в ня̄врам порсы, то̄ват ос лылыӈ та̄гыл хультэ̄гыт те, а̄гмыӈмосыӈыг е̄мтэ̄гыт. Мир пусмалтан ма̄гыс, ма̄н округт о̄лнэ ле̄ккарыт ёт яныг рӯпата ва̄ре̄в. Ма̄нь па̄влытыт о̄лнэ пӯльницат ань пуссын лаппантыянӯв, ма̄хум туп хо̄тыл тот пусмалтавет. Ос матыр та̄рвитыӈ а̄гм та̄рапаттаве те, хо̄тпа яныг ле̄ккарыӈ ма̄н тотаве, тот мӯсхал щирыл уральтаве, пусмалтаве. Тамле пӯльницатын номтыӈ ле̄ккарыт во̄вуӈкве э̄ре̄гыт. Ле̄ккар хо̄тпа ма̄нь па̄вылн ёхтуӈкве ка̄сащи те, тав акв миллион солко̄вил ойтаве, о̄лнэ колыл миве. Ма̄нь хо̄тпа ман яныг хо̄тпа ты э̄лыпа̄лт хо̄т рӯпитас ман а̄ти – ты нупыл сунсуӈкве ат патэ̄в. Ма̄к таи, ань хо̄тпа рӯпитаӈкве вос тахнув ос рӯпататэ ёмащакв вос ва̄гтэ. Округув янытыл ка̄сыӈ пе̄с пӯльница пе̄нтсыл, йильпи пӯльница ӯнттэ̄в, иӈ налыман нупыл ат пӯльница ӯнттын щирыл о̄лы. Округт о̄лнэ я̄тил тыныӈ ма̄хум, матыр а̄гмын сумыллы те, ле̄ккар палт та̄ра минэ̄н, уральтахтэ̄н. То̄ванакт пилыщмаӈ а̄гм ущ суйтнэ̄тэ порат та̄рапаттаве те, пусмалтаве, хо̄тпа э̄лаль о̄с са̄в та̄л о̄лы. Пуссын пуста̄гыл о̄лэ̄н! 1063 2013.11.08. Тамара МЕРОВА Ня̄врамыт ма̄гыс олн ат са̄литэ̄гыт. Туи сыс манса̄вит ня̄врам, хоты ма̄т ӯщлахтасыт, хо̄т пусмалтаве̄сыт, манса̄вит олн тув ойтвес, пуссын ты о̄вылтыт ля̄ххал тотнэ ма̄хум э̄лыпа̄лт хӯрум кӯщай хо̄тпа потыртасыт. Елена Немчинова, нё̄тмил ва̄рнэ департаментыт кӯщай ва̄ӈын нэ̄, ла̄выс: «2013 та̄лт ня̄врамыт ӯщлахтын ма̄гыс округ бюджетныл 800 млн. солко̄ви та̄стувес. Та̄рвит ва̄рмальн я̄рмум ще̄мьят ня̄враманыл ӯщлахтын манос пусмалтан ма̄гыс российский бюджет па̄лыл 40 млн. солко̄ви та̄стувес ос мо̄т олныт са̄выӈпа̄лэ са̄всыр муниципальный образованияныл майве̄сыт. Ань пуссын ты олныт хосыт 60 со̄тыра а̄гитпыгыт са̄всыр ма̄т ӯщлахтасыт». Юграв янытыл туи сыс 486 ня̄врам ма̄гыс ӯщлахтын ос пусмалтахтын колыт рӯпитасыт. То̄ва лагерит школатт щё̄питым о̄лсыт. Тот ня̄врамыт тыттуве̄сыт, студентыт та̄н ётаныл ёнгысыт, матарыл пӯмщалаве̄сыт, ос хӯрум щё̄с юипа̄лт юв та та̄ртыглаве̄сыт. Ты коныпал округ янытыл 22 палаткаӈ лагерит ва̄рыглаве̄сыт. Мо̄тынтыг тот ня̄врамыт ёмщакв тыттын ма̄гыс субсидия щирыл са̄внув олныл та̄ставет. Тувыл Ха̄льӯс, Хо̄нтаӈ, Белоярский, Ханты-Мансийский районытыт ос Урай ӯст соссаӈ ня̄врамыт ма̄гыс этноцентрыт рӯпитасыт. Тув ханты, ма̄ньщи а̄гитпыгыт коныпал мо̄т мир ня̄врамыт о̄с ӯщлахтуӈкве ялантэ̄гыт. Та̄нанылн тот сака мӯсты. Тамле этноцентрыт ос этнолагерит ва̄рнэ ма̄гыс соссаӈ хо̄тпанув округ па̄лыл грантолныл э̄лаль вос нё̄тавет. Антон Тимкин, образование департаментыт кӯщай ва̄ӈын хум, о̄с потыртас. Та̄н ня̄врамыт ӯщлахтын ос пусмалтан тэ̄лат та̄л палыт уральтэ̄гыт. Каникулыт порат то̄ва ня̄врамыт лагерьн ялуӈкве ве̄рме̄гыт. Та̄н са̄всыр ёмас тэ̄лат ва̄руӈкве студентытн акваг нё̄тавет. Ты та̄л туи сыс 682 студент ня̄врамыт ёт лагерьн ялнэ коныпал 452 кол по̄хат ос 283 школьный клубыт рӯпитасыт. Игорь Крутько, спорт тэ̄лат палт кӯщай ва̄ӈын хум, ла̄выс: «Округ янытыл 239 спортивный площадкат рӯпитасыт. Туи сыс 75 со̄тыра арыгкем ня̄врам тув ялантасыт. Ла̄тыӈ ат хӯнтлын подросткат ты площадкатын о̄с во̄виньта̄лсанӯв. Та̄н ма̄ньлат спортсменыт ёт ме̄чикыл ёмщакв ёнгуӈкве, поргуӈкве ос пувлуӈкве ханищтаве̄сыт». Тувыл туи ӯщлахтын колыт рӯпитанэ̄ныл сыс нэ̄мхотты ня̄врам ёт лю̄ль ва̄рмаль тот ат е̄мталас. Пуссын пуста̄гыл юв ёхтысыт, хо̄та̄ти ёмщакв ӯщлахтасыт, пусмалтахтасыт. Та̄н ётаныл рӯпитан хо̄тпат ва̄гтал сака ат патсыт. 1063 2013.11.08. Александр ВЬЮТКИН Такви ё̄ре ва̄нэ хум. Ма̄нь таквс э̄тпос онтоловхуйплов хо̄талт Америкат Колорадо нампа ма̄т Денвер ӯст ма̄ньщи боксёрув Руслан Проводников Майк Альварадо ёт алхатым касыс. Боксёрув янытлан щирыл округувныл ма̄н нёлолов хо̄тпа тув ялсӯв. Ма̄н ётув Руслан оматэ Раиса Алексеевна о̄лыс, тав пыге каснэ ма̄н щар о̄выл щёс ялыс. Ма̄ньлат хумиюв касуӈкв щё̄питахтын кастыл иӈ ойттур э̄тпост тув минас. Руслан ёт касум хум та̄ксар ос ё̄р боксёрыг ловиньтахты. Ты э̄лыпа̄лт тав налыман нупыл ат щёс рингыт алхатас. Налыман нупыл нила щёс но̄хпатыглас. Тав ётэ алхатам ма̄хманэ ва̄т нупыл нила щёс ёлса̄ӈала̄лым ра̄тсанэ. Такви акв щёс туп ра̄тыглавес. Русланын манрыг та̄рвитыӈ о̄лыс? Ты касыл Альварадо о̄лнэ ӯст ва̄рыглавес. Таима̄гсыл Русланын мощ та̄рвитыӈнув о̄лыс. Тот о̄лнэ мир са̄выӈпа̄лэ та̄нти боксёраныл сака янытлыяныл. Хунь ма̄н са̄тхуйпловит щислат тув ёхтысӯв, Руслан ёт рӯпитан хум Вадим Корнилов ма̄н ётув пащалахтуӈкв та̄ра ёхтыс. Та̄н ма̄нав гостиницан о̄луӈкв тотсаныл. Руслан ос Альварадо халэ̄нт потыртан прессконференциян ма̄н Вадимын во̄ввесӯв. Вадим то̄нт ла̄выс: «Руслан такви ма̄хманэ тыг ёхтысыт, таима̄гсыл тав номтэ ёмасыг е̄мтыс». Хунь ма̄н прессконференциян ёхтысӯв, Руслан ла̄выс: «Ам ма̄хманум тыхо̄тал ёхтысыт, ань та̄н пуссын тыт о̄лэ̄гыт. Та̄н халанылт тыт ам омам о̄лы». Фотоаппаратыл по̄слын ма̄хум та̄ра Раиса Алексеевна по̄слуӈкв патсаныл. Тув ёхтумувт, со̄ль, Альварадо янытлан ма̄хум са̄в. Прессконференция оигпан э̄лыпа̄лт Руслан Альварадон футболкал мӯйлуптавес, тот Альварадо наме хансым о̄лыс. Мо̄тыт хо̄талт каснэ хумыг ве̄скалавесы̄г. Альварадо Русланныл 420 грамм та̄рвитыӈнувег о̄лыс. Таима̄гсыл тав мощ кӯпняман ма̄гсыл тит щё̄сыл майлувес. Альварадо та̄рвитэ э̄рнэ мус ат те а̄лымастэ ва̄руӈкв, халэ̄нт касуӈкве ат та̄ртнувег. Каснэ хо̄талт ма̄н Руслан ёт хо̄тыл порат мощщакве̄н акванхо̄нтхатыгласӯв. Тав ма̄хманэ ёт тувыл та̄ра касылын щё̄питахтуӈкв минас. Э̄типа̄лаг ма̄н ма̄ньщи маснутанув массанӯв, койпанув ёт висанӯв ос тув минасӯв. Тув ёхтумувт, полициян койпанув тӯлуӈкв ат та̄ртвесӯв. Ты коныпал ма̄навн Руслан ёт ринг мус минуӈкв э̄рыс. Тув ма̄н о̄с ат та̄ртвесӯв. Щалтнэ а̄виныл та̄ра касыл сунсуӈкв те̄твесӯв. Каснэ мус Русланув иӈ щё̄с арыгтем такте̄т о̄лыс. Аквматэ̄ртын Руслан Проводников наме ла̄ввес, рингын та нэ̄глыс. Хумыг каснэ ва̄рмале̄н та о̄вылтахтас. Руслан тав ётэ каснэ хумитэ о̄выл раундыл ра̄туӈкв о̄вылтастэ. Альварадо хотмус такви щире̄т аквписыг ювле лаквим ринг янытыл со̄выррищ хольт ха̄йтыгтас. Руслан таве нёлоловит раундыт тит щёс ёлпаттыгластэ. Рефери хум Тони Викс та̄ра ловиньтаӈкв патыс. Руслан тӯяг Тимоти Бредли ёт касме порат, рефериг о̄лнэ хум о̄влэ̄т ӯрхатас, хунь Тимоти пуӈке мощ ёмаснувег е̄мты, тувыл ущ ловиньтаӈкв о̄вылтахтас. Ань ловит раундыт Руслан Альварадо хӯрмиттыг та̄кыщнув вильтэ̄т ю̄ныгтастэ. Альварадо ринг янытыл тыглетувле тотыглаӈкв патвес, ворил ты ве̄ритас. Ринг са̄мын такви минуӈкв ат ве̄рмыс, ань пуӈке сака торнувес, таима̄гыс ринг мо̄т са̄ме нупыл ё̄мыс. Тони Викс Альварадо э̄лаль каснэ урыл титыгластэ. Майк Альварадо э̄лаль алхатуӈкв воссыг ат ка̄сащас. Ма̄н то̄нт пуссын но̄хква̄лапасӯв, аквансыныгтахтым, аниглахтым «Русланчемпион» ро̄ӈхуӈкв та патсӯв. Раиса Алексеевна ос Татьяна Степановна ринг тӣврын Руслан палт во̄ввесы̄г. Тот о̄лнэ ма̄хум йильпи чемпион хум янытласыт. Пуссын ла̄ве̄гыт: «Чемпион э̄нтап Руслан Проводниковын хосат миӈкв э̄рыс». Касыл юипа̄лт Руслан янытлаӈкве ма̄н таве кон ӯрыслӯв. Хунь тав ма̄хманэ ёт конква̄лыс, ма̄н ё̄р ка̄тыӈ хумиюв э̄лыпа̄лт ма̄ньщи хум йӣкв йӣквсӯв. Тох ты ма̄н, нёлолов хо̄тпа, Руслан Проводников, йильпи чемпионув, янытлан ма̄гсыл яныг ща̄рщ ӯлтта Американ ялсӯв. 1063 2013.11.08. Светлана РОМБАНДЕЕВА Школат рӯпитан нэ̄. Белоярский район Полноват па̄вылт акв ка̄ркам, сэ̄ръёр ма̄ньщи нэ̄ о̄лы, Надежда Ивановна Слинкина, а̄ги о̄парищ наме Хозумова. Школат тав ва̄т нупыл нёлолов та̄л рӯпиты, рущ ла̄тыӈ ос литература урок ня̄врамытн ханищты. Тав Саранпа̄вылныл о̄лы, тот самын патыс, яныгмас. Школа а̄стламе юипа̄лт Тобольск ӯсн минас, тот Д. И. Менделеев нампа институтт ханищтахтас. Институт а̄стламе юипа̄лт Полноват па̄вылн рӯпитаӈкве ке̄твес. Тот хум ва̄рыс, о̄йкатэ Александр Вячеславович. Кит ня̄врам о̄ньще̄г, а̄гитэ̄н Ольга, пыге̄н Евгений. Ня̄врамаге̄н школат ёмащакв ханищтахтасы̄г, школа а̄стламе̄н порат со̄рни металил майвесы̄г. Ма̄нь таквс э̄тпос хо̄тхуйплов хо̄талэ̄т Надежда Ивановна атпан та̄лэ то̄влыс. Намхо̄талэ кастыл таве̄н ма̄н са̄в ёмас, сымыӈ ла̄тыӈ ла̄ве̄в. Пус ка̄т, пус ла̄гыл, со̄тыӈыщ, щуниӈыщ вос о̄лы! Хурит Надежда Ивановна э̄щаге ня̄врамыг ёт по̄слым о̄лы. Рӯт ма̄хманэ. 1063 2013.11.08. Валентина УЗЕЛЬ Валентина Васильева Хурит по̄слуӈкв ханищтаве̄сыт. Округувт ма̄ньщи ос ханты ма̄ньлат ма̄хманув организацияныл рӯпиты, рущ ла̄тӈыл тох ла̄ваве – молодёжная организация обскоугорских народов ХМАО-Югры. Кӯщаиг тот ка̄ркам ханты а̄ги Надежда Молданова о̄лы. Ювле хультум э̄тпост та̄н ка̄тыл хури по̄слын ма̄хум Ханты-Мансийск ӯст акванатыгласаныл, ханищтап та̄н ма̄гсыланыл ва̄рыгласыт, «Человек рисующий» тох намаясаныл. Ха̄льӯс, Белоярский, Сургутский районныл хурит по̄слуӈкв ха̄снэ ма̄хум тув ёхталасыт. Та̄н са̄всыр ма̄тт рӯпитэ̄гыт, художникнам нэ̄мхотьют ат о̄ньщи. Та̄нти ла̄щал матыр по̄слэ̄гыт, то̄ванакт хурияныл ловиньтан нэ̄пакытн ва̄равет. Та̄наныл хури по̄слуӈкв ханищтан ма̄гыс ань акв ё̄рн хум во̄выглавес, тав наме – Леонид Лар. Тав мирн ва̄нэ художникхо̄тпаг о̄лы. По̄слум хуриянэ са̄всыр выставкат суссылтавет, мо̄т хо̄н ма̄н тотыглавет. Леонид Ямал ма̄т самын патыс, тот яныгмас. Ща̄нягеа̄щаге сас ё̄рныг о̄лсы̄г. Ма̄ниг о̄лме порат тав такви ляпа рӯтанэ ёт ялпыӈ ма̄н ялантас, ма̄хманэ хумус пӯрлахтасыт, ня̄йт хо̄тпат хумус кайсыт, пуссын сунсыс. Тав школат ханищтахтаме̄т ща̄ньа̄щ та̄л хультыс. По̄слуӈкв ул ёмащакв ха̄сыс, таима̄гыс Москва ӯсн училищан ханищтахтуӈкв те̄твес. Рӯпитаӈкв юв ёхтыс, Салехард ӯст ня̄врамыт ханищтасанэ. Тувыл Тобольск ӯсн минас. Тот ханищтахтуӈкв а̄стламе юипа̄лт, тув о̄лмыгтас. Тобольский педагогический академият хусахтем та̄л преподавателиг рӯпиты, лекцият ловиньты. Та сыс наука рӯпата ва̄руӈкв патыс, кандидат нам о̄ньщи. Тав «шаманизм» тэ̄лал пӯмщалахты. Ты урыл са̄в научный нэ̄пак хансыс. Рӯпитанэ̄тэ сыс хурит акваг по̄слы. Хуриянэт такви ё̄рн ма̄хманэ, та̄н о̄лупсаныл, са̄всыр ялпыӈ ва̄рмалит по̄слы. Тобольск ӯст рӯпитаӈкв о̄вылтахтаме порат тав юв командировкан те̄твес. Наука рӯпататэ ва̄рнэ ма̄гыс, таве̄н ня̄йт хо̄тпа хо̄нтуӈкв э̄рыс. Ня̄йт хо̄тпа тот хо̄нтыс, та хо̄тпа таве̄н ла̄выс, ты ве̄сар ва̄нэ ма̄гыс мощ ханищтахтуӈкв э̄ри. Ямал ляпат Лӯи щарыщ нупыл тумп о̄лы, ла̄ваве – Белый остров. Та тумп ё̄рн ма̄хум ма̄гсыл сака ялпыӈыг о̄лы. Тув ты Леонид ня̄йт хо̄тпан те̄твес, тэ̄нутыл ёт щар ат майвес. Ла̄ввес, тит са̄т тот вос о̄лы, тэ̄нут такви вос тинсы. Ань атхатыглам мир нупыл хум ты урыл тох ла̄выс: «Тит са̄т тот о̄лмум сыс ам ка̄тыл хӯл пувсум. Со̄ль, хо̄тпа тэ̄та̄л о̄лнэ̄тэ порат номсахтуӈкв мо̄т щирыл паты, о̄лупсатэ о̄с щар мо̄т щирыл мины. Амти На̄янум, амти О̄тыранум нупыл акваг по̄йкщасум. Аквтуп тот матарын ёхталаве̄сум. Хо̄таланум ювле хультсыт, ам ювле ня̄йт о̄йка палт та ёхтысум. То̄нт ам койп ка̄тын виӈкв та̄ртве̄сум. Тав а̄нумн такви койпе ат мистэ, ла̄выс амти ма̄гсылум койп амти вос ва̄ре̄гум. Тох ты койп ра̄туӈкв та̄ртве̄сум». Хус арыгтем та̄л сыс ты хум ё̄рныт о̄лнэ са̄всыр ма̄н ялантас – Архангельский областьн, Красноярский крайн. Тот о̄с ня̄йт ма̄хум ёт хо̄нтхатыглас. То̄ват тав ётэ ва̄щинтахтуӈкв ос потыртаӈкв ат ка̄сащасыт. Леонид тох ла̄выс: «Ат ро̄внэ ма̄н ам нэ̄мхуньт ат ялсум. Яныг ма̄хум ла̄тӈын хӯнтлысум ос ань тыг мус хӯнтлэ̄гум». Са̄всыр ма̄т яласым, тав ялпыӈ ма̄т хурин по̄слыянэ. Ань та хурит мирн суссылтасанэ. Ань ты о̄лум ханищтапт тав ма̄хум ка̄тыл хурит по̄слуӈкв ханищтасанэ. Тувыл ты хурит акванатавет ос нэ̄пакыг тах ва̄равет. 1063 2013.11.08. Николай МЕРОВ Лӯима̄ касылыт э̄лаль тотавет. Округувт са̄всыр мирыт аквъёт юртыӈыщ о̄лнэ кастыл, ма̄нь таквс э̄тпос 21-25 щислат Сургутский район Солнечный ос Белый Яр па̄влыгт ня̄врамыт ма̄гсыл каснэ ва̄рмаль ва̄рыглавес. Рущ щирыл ты тэ̄ла «Зимние первенства по северному многоборью» ла̄ваве. Ты ва̄рмаль Ханты-Мансийский округт «Этнос» нампа соссаӈ мирыт каснэ колт рӯпитан ма̄хум та̄н щё̄пита̄лсаныл. Кӯщаиг тот Олег Андреевич Хатанев, ма̄ньщи хум, рӯпиты. Сургутский район янытыл касыл кӯщаиг Григорий Николаевич Рабий о̄лы. Тав Молдавия ма̄т самын патыс. Школат ханищтахтаме порат пыгрищит ёт пе̄рщуӈкве ялантас. Ты ва̄рмаль щирыл «мастер спорта» намыл майвес. Сургут ӯсн 1978 та̄лт комсомольский путевка щирыл ёхтыс. 1983 та̄лт ты каснэ тэ̄лан минас. Ань ва̄т та̄л ня̄врамыт ты каснэ ва̄рмальн ханищтыянэ. Тав ты урыл а̄нумн мощ потыртас: Тамле касыл ма̄н ва̄тихал ва̄рыглэ̄в. Ка̄сыӈ та̄л са̄всыр па̄влытныл, ӯсытныл ня̄врамыт акванатыглыянӯв. Хотьютаныл ка̄ркамнувег о̄лэ̄гыт, тыт та̄н ё̄раныл а̄рталэ̄гыт. Ты сака э̄рнэ касыл, та̄л сыс кит щёс щё̄пита̄лылӯв. Таквсы порат ня̄врамыт Солнечный па̄вылт касэ̄гыт. Тӯяг ос Нижневартовский район Излучинск па̄вылн тотыглыянӯв. Тот о̄с акв тамле каснэ кол та̄стым о̄лы. Ты ва̄рмальн маныр э̄ри, пуссын ёмщакв щё̄питэ̄в. Ня̄врам хотум ул вос е̄мтыс, каснэ коланувт ле̄ккарыт рӯпитэ̄гыт. Посыӈ, лощит колнакыт та̄н э̄т хӯлэ̄гыт, ёмщакв ӯщлахтэ̄гыт. Хо̄тыл сыс хӯрум щёс тэ̄нутыл тыттыянӯв. Ня̄врамытн тыт касуӈкве сака мӯсты. Та̄н тыг яныг ща̄гтыл ёхталэ̄гыт. О̄выл щёс ёхталам ня̄врамыт ань ка̄ркамнувег ос та̄ксарыг е̄мтсыт. Каснэ колт ня̄врамыт мӯсхал щирыл пирмайтыянӯв ке, та̄н номтаныл ёмасыт, касыл порат но̄хпатнэ̄ныл ма̄гыс та̄н са̄в ё̄р пинэ̄гыт. Ань таквсы касылн 12-13, 14-15, 16-17 та̄л яныт ня̄врамыт ёхталасыт. Тувыл ос акв тамле пӯмащ о̄лы, таквсы касылн ёхталан а̄гит та̄н пыгыт ёт аквте̄м касэ̄гыт. Таима̄гыс таквсы порат щар ё̄р, та̄ксар ня̄врамыт тыг тотыглавет. Ма̄н ка̄сыӈ та̄л ат ва̄рмаль щирыл касыл ва̄рыглэ̄в. О̄выл ва̄рмаль: кит ла̄глыл хӯрум щёс э̄лаль порыгме̄гыт – ты сака та̄рвитыӈ касыл. Ка̄сыӈ ня̄врам тох порыгмаӈкве ат ве̄рми. Ань Магадан ӯсныл о̄лнэ хо̄тпа 11 метра 81 сантиметра рекорд ва̄рыс. Э̄рыӈ иӈ хоса нэ̄мхотьют тыгыл са̄внув порыгмаӈкве ат ве̄рми тах. Китыт ва̄рмаль: йӣво̄выл ёт ха̄йтэ̄гыт, таве мо̄танынмо̄танын таве майлыяныл. Ма̄ньнув ня̄врамыт акв ве̄рыста ха̄йтэ̄гыт. Яныг ня̄врамыт халт а̄гит кит ве̄рыста, пыгыт хӯрум ве̄рыста ха̄йтэ̄гыт. Хӯрмит ва̄рмаль: са̄грап па̄хвтаве. Йис потыр щирыл, пе̄с ма̄хум ма̄к тамле са̄грапыл во̄раяӈкве ялантасыт. Ка̄ркам хо̄тпат тыламлан манос вит тармыл уйигтан товлыӈ ӯйит алыщласыт. То̄ванакт тамле са̄грап вущкасым янгуй манос са̄лы алыгласыт. Ӯй та̄кыщ ке хо̄яве, э̄л минуӈкве ат ве̄рми. Во̄раян хо̄тпа таве лё̄ӈхе хосыт юил коитэ, тыщир нё̄выль ка̄тын ты паттыгласыт. Нилыт ва̄рмаль: тыньщаӈ па̄хвтаве. Ты о̄с сака пӯмащ касыл, ня̄врамытн сака э̄руптаве. Атхуйпловкем метран э̄лнув сув тӯщтаве, тыньщаӈыл та йӣв ре̄пыгтаӈкве э̄ри. Ты касылт са̄лыӈ колт яныгман ня̄врамыт та̄н щар ма̄щтырыг па̄хвтэ̄гыт. Ты а̄ти, рущ, хатань, молдован, украинец ня̄врамыт халт са̄в ма̄щтыр хо̄тпа о̄с о̄лы. Та̄н ань ос тыньщаӈ ёмщакв па̄хвтуӈкве ханищтахтасыт. Ань о̄лум касылыт тыньщаӈ па̄хвтынэ̄ныл порат соссаӈ ня̄враманув о̄выл хӯрум местан ат ликмысыт. Ма̄ньнув ня̄врамыт халт тай ос Русскинские па̄вылт о̄лнэ ханты пыгрищит но̄хпатсыт. Атыт ва̄рмаль: сун ӯлтта поргын касыл. Тот щар ё̄р хо̄тпат о̄выл местат вуйлэ̄гыт. Ты щирыл ловиньтаве, команда хоты места выг. Ка̄сыӈ хо̄тпа ва̄гтэ, тав манаса̄вит балл о̄ньщи. Хо̄тпа поргын порат сун ла̄глыл хо̄илтытэ манос акв ла̄глэ но̄ха̄лмаитэ ке, касыл та̄ра ёлпо̄илттаве. Таима̄гыс ты касылт сака ӯргалахтым поргуӈкве э̄ри. Хоты команда са̄внув щёс сун ӯлтта порыгми, та̄н но̄х та патэ̄гыт. Ты каснэ ва̄рмаль хо̄тал палыт мины. Хо̄тпа поргынэ̄тэ порат са̄в ё̄р, номт пины. Туп ха̄снэ щирыл поргын хо̄тпат но̄хпатэ̄гыт. Ань ты накт ма̄нь ня̄врамыт халт акв пыг китса̄т хус щёс сун ӯлтта порыгмас. Яныгнув ня̄врамыт халт пыг атса̄т хус щёс, а̄ги ниласа̄т акв щёс сун ӯлтта порыгмасы̄г. Ня̄врамыт ла̄внэ̄ныл щирыл, колкан ат а̄ртми, поргуӈкве та̄рвитыӈ, са̄внув щёс порыгмаӈкве кос ро̄выс. Тыгыл э̄лаль ты каснэ ва̄рмальт хотьютаныл но̄хпатсыт, 16-17 та̄л яныт ня̄врамыт халт щар та̄ксар ат пыг, нила а̄ги вивет, я̄нас команда щё̄питаве. Та̄н э̄лаль Краснодарский крайн Россия касылн ма̄н округув ма̄гыс касуӈкве минэ̄гыт тах. Ня̄врамыт тув ликмуӈкве сака таӈхе̄гыт. Таима̄гыс ва̄гтал патнэ̄ныл мус та касэ̄гыт. Тот о̄с аквтох ат ва̄рмаль щирыл касыл е̄мты тах. Григорий Николаевич ма̄щтыр нам о̄ньщи. Тав Россия янытыл рекордсменыг о̄лы. Ты касылн ханищтахтуӈкве Солнечный па̄вылт о̄вылтахтас. Ка̄сыӈ хотал Сургут ӯсныл такви касуӈкве тув ялантас. Ань тав тот кӯщаиг рӯпиты. Ты ва̄рмаль та̄л сыс акв щёс Сургутский районт школат халт ва̄рыглаве. Ань Сургутский район янытыл ниласа̄т арыг ня̄врам ты касылн ялантэ̄гыт. Ты сака ёмас тэ̄ла, ня̄врамыт лӯима̄ мирыт касылыт э̄лаль тотыяныл. Тувыл ос касыл оигпаме юипа̄лт Олег Андреевич тув ёхталам ня̄врамыт пуссын янытласанэ. Но̄хпатум а̄гитпыгыт пуссын ма̄гылн тагатан по̄сыл мисанэ. Ос ма̄к яныг кубок Нефтеюганский районныл ёхталам ня̄врамыт висаныл, та̄н та̄ксарнувег кассыт, о̄выл места висыт. Котиль кубок ос Сургутский район вис, та̄н китыт ме̄стан е̄мтсыт. Ма̄нь кубок ос Ханты-Мансийск ӯсныл ёхталам ня̄врамыт юв тотсаныл, та̄н хӯрмит местан патсыт. 1063 2013.11.08. Тамара МЕРОВА Канащиг о̄лум Молтан о̄йка рӯтанэ. «Торум Маа» музейт рӯпитан хо̄тпат «История семьи в истории страны след прожитой жизни» нампа проектаныл щирыл э̄лаль рӯпитэ̄гыт. Та̄н ань Молданов яныг рӯт урыл йильпи суссылтап щё̄питасыт ос таве «Хранители Казымской богини» намтсаныл. Ань Ханты-Мансийскат Молдановыт музейн акванатыглаве̄сыт, тот та̄н та̄нки пе̄с рӯтаныл о̄вылтыт ос та̄нки урыл потыртасыт. Касум ма̄т XIV нотыт Молтан нампа канащ хум о̄лум. Ты урыл Ольга Кравченко (Молданова) пе̄с нэ̄пакытт потыр хо̄нтум. Тот 1483-1485 та̄лытыт канащаныл ёт о̄лыглам ва̄рмалит хансым о̄лсыт. Тувыл «Югра» телерадиокомпания та йис ва̄рмалит о̄с та̄рапаттысаныл ос та̄наныл «Фамилии Югры» программа ма̄гыс кинан по̄слысаныл. Та кина ань мӯй ма̄хумн суссылтавес. Мо̄т пе̄с нэ̄пакт тамле ля̄ххал хо̄нтсыт: «1782 та̄лт Юильск па̄вылт Молданов о̄парищ намыӈ 11 хум ос 11 нэ̄ хо̄тпат о̄лсыт». Са̄тпан арыгкем та̄л ювлехультум порат тамле о̄парищ намыл 74 э̄лумхо̄лас ловиньтавес. 1990 та̄л па̄сныл Татьяна Александровна Молданова рӯт ма̄хманэ пуссын акванхансуӈкве патсанэ. Ань тав яныг рӯтэ пуссын нэ̄пакло̄псын хансыстэ. Тот са̄т аква̄рт Молдановыт акванатым о̄лэ̄гыт. Ниласа̄т арыгкем хо̄тпа наманыл тув хансымат. Та̄н Югра ос Ямал ма̄н ла̄кквао̄лмыгтамыт ос то̄ват мо̄т о̄парищ нам о̄ньще̄гыт, тыи Вагатовыт, Вэнку, Лозямовыт, Кетовыт, Рандымовыт, Сенгеповыт, Тарлиныт, Тасьмановыт, Тоголмазовыт, Шугановыт. То̄ваныл иӈ та̄ра ат паттыяныл, ты рӯпататэ Татьяна Александровна тах э̄лаль тотытэ. Ты яныг рӯт ма̄хумныл то̄ват хӯл алыщлэ̄гыт, во̄рае̄гыт, са̄лы янмалтэ̄гыт, то̄ват ня̄врам ханищтэ̄гыт, ма̄хум пусмалтэ̄гыт, ханты культура ос наука ма̄гыс са̄в тэ̄ла ва̄ре̄гыт. Репрессия та̄лыт порат то̄ва хум хо̄тпаныл порславе̄сыт, мо̄тананыл хо̄нтлуӈкве тотве̄сыт. Ань музейн ёхталам Молдановыт халт ка̄сыӈ хо̄тпа такви уре̄тыл ос ще̄мьятэ урыл потыртас. Татьяна Александровна ос Тимофей Алексеевич история наукат сас кандидат нам о̄ньще̄г. Тэ̄н ханты пе̄с йис накыт ханищтэ̄г ос нэ̄пакыт хансэ̄г. Ольга Кравченко а̄ще, Александр Михайлович Молданов, урыл потыртас. Тав «Казымский» нампа совхозт бухгалтерыг рӯпитас. Суссылтапыт пе̄с хурит сунсыгласанӯв, ты то̄ва хурит а̄ще̄н по̄слымат. Хурит коныпал выставкат мо̄т са̄всыр пормасыт суссылтаве̄сыт. Тыи пуссын та̄н рӯт ма̄хманылн ва̄рим пормасыт. Нэ̄ хо̄тпат ма̄щтырыг маснут ю̄нтэ̄гыт, сак хартэ̄гыт, хум хо̄тпат йӣвныл матыр ёрге̄гыт. Мария Кузьминична Волдина ос Ульяна Николаевна Шульгина ты рӯтныл о̄лэ̄г, мо̄лал тэ̄н ты музейн тэ̄нки ю̄нтум хорамыӈ супанэ̄н, лэ̄пта мӯйлуптасы̄г. Ульяна Николаевна ань Молданов рӯтанэ ма̄гыс такви э̄ргаге э̄ргысаге. Любовь Федоркив, Ирина ос Надежда Молдановыг о̄с та̄нки ща̄ньа̄щаныл урыл потыртасыт. Любовь «Лылынг союм» нампа колт ос Ирина технологопедагогический колледжит ня̄врамыт ханищтэ̄г, Надежда соссаӈ ма̄хум культура колт рӯпиты. Молдановыт та̄нки халанылт э̄руптахтым о̄лэ̄гыт, нэ̄мхотьютаныл о̄вылтыт ат ёрувлэ̄гыт. Ань акваннё̄тхатым рӯтаныл нэ̄пакын э̄лаль хансуӈкве тах патыяныл. Ты хурит Ханты-Мансийскат о̄лнэ Молдановыт по̄слысанум. 1063 2013.11.08. Тамара МЕРОВА Йис потрыт, э̄ргыт рущ ла̄тӈыл хасве̄сыт. Юван Шесталов хуньт о̄вылтам рӯпататэ рӯтанэ̄н ос руманэ̄н э̄лаль ва̄раве. Ань та̄н «Именитые богатыри обского края» нампа китыт нэ̄пак та̄ратасыт. Аквта щирыл намаим о̄выл нэ̄пак 2010 та̄лт та̄ратавес. Та нэ̄пак та̄ратан ма̄гыс лӯима̄ ма̄хум департаментныл олныл та̄стыглаве̄сыт. То̄нт потрыт Юван Николаевич такви щё̄питасанэ. Ос ма̄ньщи На̄й-О̄тыранув урыл пе̄с йис потрыт, мо̄йтыт рущ ла̄тӈын толмащлаӈкве кит ма̄ньщи нэ̄ хо̄тпаг нё̄тсы̄г, тыи Светлана Динисламова ос Альбина Мехнина. Рущ потрыт ёт э̄лаль Ирина Рябий, Вадим Орлов (Югорский университетт рӯпитан хо̄тпаг) ос Герман Ионин (Санкт-Петербург ӯсныл) рӯпитасыт. Та̄нанылн Юдит Дмитриева нё̄тыс. Тав ЮГУт венгерский ла̄тыӈ ханищтан нэ̄г рӯпитас. Хунь ма̄ньщи потрыт рущ ла̄тӈын та̄рвитыӈ толмащлаӈкве о̄лыс, Юдит тав о̄влэ̄т венгерский ла̄тӈыл хансым потрыт ловиньтасанэ, ос та юипа̄лт рущ ла̄тӈыл потыртасанэ. Тох ма̄ньщит, рущит ос венгр нэ̄ халанылт хӯлтыглахтым потрыт ёмщакв хассаныл. Ань таима̄гыс «Именитые богатыри обского края» нампа нэ̄пакыг хӯрум ла̄тӈыл хансым о̄лэ̄г. Ты пе̄с потрыт, мо̄йтыт Антал Регули ос Бернат Мункачи, венгр учёный о̄йкагн, хуньт ма̄ньщи ма̄хумныл атве̄сыт. Тувыл 1892-1921 та̄лыт сыс та̄н венгерский ла̄тӈын толмащлаве̄сыт ос нила нэ̄пакыг ва̄рве̄сыт. Ётыл 1952 ос 1963 та̄лытт Бела Кальман, венгр учёный хум, то̄ва потрыт немецкий ла̄тӈыл хассанэ ос кит нэ̄пак та̄ратас. Та нэ̄пакыт урыл са̄всыр учёныит пӯмщалахтэ̄гыт. Рущ ла̄тӈын та̄н нэ̄мхотьютн ат толмащла̄лве̄сыт. Хосат венгрыт Бернат Мункачи хансум нэ̄пакыт Юван Шесталовн мӯйлуптасыт. Та па̄сыл тав ма̄ньщи пе̄с потрыт рущ ла̄тӈыл хассанэ. Ань тав о̄вылтам рӯпататэ тахольт аквта руманэ̄н, рӯтанэ̄н э̄лаль тотаве. Та̄н китыт нэ̄пак ущты та̄ратасыт. Тот редакторыг Вадим Орлов о̄лы. Ты та̄л Светлана Селивёрстовнан ос Альбина Николаевнан ма̄н ма̄ньщи учёный хо̄тпав Анастасия Ильинична Сайнахова нё̄тыс. Тувыл потрыт Динара Саидовна а̄гитэ̄н пуссын ищхӣпыӈ утын печатайтаве̄сыт. Ты нэ̄пакыгн потрыт, тув по̄слым хансат Ирина Семёнован ёмщакв щё̄питаве̄сыт. Китыт нэ̄паканыл ма̄гыс ма̄хманув округ па̄лыл олныл нё̄тве̄сыт. Ты рӯпатаныл та̄н соссаӈ ма̄хум культура ӯргалан ос но̄хво̄рмалтан проект хосыт ва̄рсаныл. Ма̄ньщи пе̄с йис потрыт кит щёс рущ ла̄тӈыл нэ̄пакыгт хансым о̄лэ̄гыт. О̄влэ̄т потрыт Светлана Динисламован рущ ла̄тӈыл хумус толмащлаве̄сыт, та щирыл хасве̄сыт. Та̄н рущ щирыл «подстрочный переводыг» ла̄вавет. Ос та юипа̄лт ты потрыт «литературный переводыг» рущ хо̄тпатн ёмащакв щё̄питаве̄сыт. Тох рущ ма̄хум о̄выл нэ̄пакт А̄скотиль о̄йка, Аяс-То̄рум тэ̄рниӈ э̄рге, тав мо̄йтанэ ос Ларӯс о̄тырыт тэ̄рниӈ э̄рыг ловиньтаӈкве ве̄рме̄гыт. Ань йильпи та̄ратым нэ̄пакт та̄н Мир-Суснэ-Хум, Э̄квапыгпыгрищ тэ̄лум мо̄йт, Мир-Суснэ-Хумто̄румпыг яныгманэ э̄рыг, тӯрхотаӈ, А̄схотаӈвойкано̄тыр, Та̄гтталих о̄йка тэ̄рниӈэ̄рге вос ловиньтэ̄гыт. Ма̄ньщи пе̄с мӯтрат та̄рапаттыяныл. Пуссын ты ма̄хмытын ма̄н яныг пӯмащипа ла̄тыӈ ке̄тэ̄в. Та̄н э̄лаль о̄лнэ са̄в нот кастыл сака э̄рнэ рӯпата ва̄рсыт. XVII-XX нотыт о̄лум венгр, финн учёныит мӯсхалыг ва̄рум рӯпатаныл щирыл ма̄ янытыл ва̄вет. Ань ты рущ нэ̄пак ва̄рум хо̄тпанув аквтох вос ва̄ве̄т, та̄н о̄с та̄рвит рӯпата ва̄рсыт. Ам номсыке̄мт, та̄н наманыл хуньт тах суиӈыг е̄мтэ̄гыт. 1063 2013.11.08. Светлана РОМБАНДЕЕВА Нэ̄пак ловиньтан колнак. Ха̄льӯс район Кульпас па̄выл школат нэ̄пак ловиньтан колнак о̄лы. Кӯщаиг тот Елена Анатольевна Вовк рӯпиты. Школан щалтсамум порат ам ты нэ̄ ёт потрамасум, рӯпататэ урыл китыглахтасум, на̄н ань тав потре ловиньтэлы̄н: Йильпи нэ̄пакытыл ма̄н мо̄рсыӈыщ тотыглаве̄в. Ня̄врамыт ловиньтанэ̄ныл ма̄гыс торыӈ нэ̄пак а̄тим, колнакувт янгыщ ань пе̄с нэ̄пакыт о̄лэ̄гыт. Ка̄сыӈ та̄л ма̄н па̄выл яныт мирн ла̄выглэ̄в, ань хотьют юн арыг нэ̄пак о̄ньщи те, манос хотты нэ̄паке са̄ль а̄ти те, ма̄н палтув вос тотытэ. Сакати ты нэ̄пакыт ня̄врамыт ловиньтэ̄гыт. Ань май интернет нампа ищхӣпыӈ ут о̄лы, та ут та̄ра ма̄н са̄в ма̄хум ёт потраме̄в, халанувт пищма хансэ̄в. Акв хум ёт потыртахтасӯв, тав ма̄навн нэ̄пак ке̄туӈкве ла̄выс. Соссаӈ ма̄хум литература о̄с сака мощща, нэ̄пакыт пуссын пе̄сыт. Ань йис ня̄врамыт ловиньтан нупыл тэ̄ланыл сака пыл а̄ти, юн са̄всыр компьютерт ман интернет о̄ньще̄гыт, номтаныл тувле нупыл мины. Тыт ханищтахтан ня̄врамыт ёт ма̄н са̄всыр конкурсыт ос выставкат ва̄рыглэ̄в. Тӯяг ма̄н С. Я. Маршак хансыглам «Кошкин дом» потре щирыл спектакль суссылтасӯв. Ня̄врамыт ёт ам акваг рӯпитэ̄гум ка̄тыл са̄всыр хурит по̄слэ̄в, библиотечный урокыт ва̄рыглэ̄в. Ты коныпал интернет хосыт ма̄н са̄всыр олимпиадатт ос Россияв янытыл ва̄рыглан конкурсытт участие пирмайтэ̄в. Та̄н туп ловиньтаӈкве вос тахнувыт, нэ̄пак хаснэ ма̄хум наманыл вос ва̄нувыт. Кит а̄гирищиг, Ксюша Черникова ос Лолита Солкуцан, а̄нумн акваг нё̄тэ̄г, библиотечный советн ёхталэ̄г. Пе̄с нэ̄пакыт хотманыгтахтам ма̄наныл э̄льмыл акванханлыянув, лолтал пиныянув. Елена Анатольевна о̄йкатэ наме Андрей Михайлович. Кит ня̄врам о̄ньще̄г а̄гитэ̄н нёлоловхуйплов та̄лэ, пыге̄н хӯрумхуйплов та̄лэ. Ма̄ньнув э̄ще о̄с Кульпаст о̄лы, хӯрум ня̄врам о̄ньщи. Яныгнув э̄ще самын патум ма̄нанылн ювле минас, тот о̄йка ва̄рыс, о̄с хӯрум ня̄врам янмалты. Ты хӯрум яга̄гит иӈ ма̄ниг о̄лманыл порат оманыл ёт Кульпасн ва̄нтлысыт, а̄ги о̄парищ наманыл Скитёва. Та̄н Свердловский область Асбест ӯст самын патсыт, тот о̄лсыт. Оманыл хотталь щалтме ат та̄лыг ты е̄мтыс. Сака ёмас, хо̄тпа нупыл сымыӈ э̄ква о̄лыс, Кульпас па̄выл ла̄пкат са̄в та̄л рӯпитас. Елена Анатольевна тамле ёмас, каркам нэ̄. Школат тав ня̄врамытын э̄руптаве, тав ётэ матыр ва̄руӈкве та̄нанылн пӯмыщ. Ты я̄тил нэ̄те̄в кӯщаянэ̄н вос нё̄таве, са̄в ёмас нэ̄пакыл вос тотаве. Ще̄мьятэ ёт пуста̄гыл вос о̄лы, пус ка̄т, пус ла̄гыл! Хурит Ксюша Черникова, Елена Анатольевна ос Лолита Солкуцан по̄слым о̄лэ̄гыт. 1063 2013.11.08. Тамара МЕРОВА Лӯима̄ мир сунсуӈкве ёхталэ̄н. Ханты-Мансийскат Ма̄вит ос Э̄лумхо̄лас нампа музейт са̄всыр суссылтапыт щё̄питым о̄лэ̄гыт. То̄ват аквписыг тот рӯпитэ̄гыт, пе̄с йис порат о̄лум ӯйхулыт, соссаӈ ма̄хум пе̄с о̄лупсаныл ос нё̄р а̄хвтасыт суссылтавет. Мо̄т выставкат йильпииг ва̄равет, та̄н китхӯрум э̄тпос юипа̄лт мо̄т ӯсн э̄лаль тотавет. Ань ты музейт «Путешествие по Северу» нампа суссылтап ва̄рвес. Тув щалтнэ ма̄хум тот са̄всыр по̄слым хурит ка̄салэ̄гыт. Хурит 1970-1986 та̄лыт порат по̄слуве̄сыт. Са̄выӈпа̄лэ сэ̄мыл хаснэйӣвыл по̄слым хурит о̄лсыт кос, ос лӯима̄ ма̄хум о̄лупсаныл та та̄лыт порат хумле о̄лыс, пуссын та̄н тэ̄ланыл ма̄щтырыг ос сака нё̄тнэ̄г та хурит сусхатэ̄гыт. Хурит по̄слум хо̄тпат С. В. Смирнов, К. Б. Назаров, Э. С. Сивцев, В. Н. Петров-Камчатский, М. А. Рахлеева соссаӈ ма̄хум палт Архангельский областин, Бурятиян, Чукоткан, Якутиян, Красноярский е̄рн ос Ненецкий автономный округын ялсыт ос тот рӯпитасыт. Хосат та̄н по̄слум хурияныл «РОСИЗО» нампа Москват о̄лнэ центрын ёвтве̄сыт ос тувыл са̄всыр музеитытн ла̄кквауртве̄сыт. 2010 та̄лт то̄ва хурит Ханты-Мансийскан тотве̄сыт ос Ма̄вит ос Э̄лумхо̄лас музейн мӯйлуптаве̄сыт. 1063 2013.11.08. Валентина УЗЕЛЬ Халувт юртыӈыщ вос о̄лэ̄в. Яныг таквс э̄тпос 4 хо̄талэ ялпыӈ хо̄талыг о̄лы, рущ ла̄тӈыл тох ла̄ваве – День народного единства. Ань са̄всыр мирыт халанылт юртыӈыщ вос о̄лэ̄гыт, та хо̄талт та̄н акванатыглавет. Та̄нти маснутаныл, йӣкваныл, э̄рганыл мо̄т мирн суссылтыяныл. Ты хо̄тал кастыл Ханты-Мансийск ӯст «Югра многоликая» фестиваль ва̄рыглавес. Округув янытыл са̄всыр ӯсытт о̄лнэ национальный объединеният ма̄н ӯсувн пуссын во̄выглаве̄сыт. Са̄в ма̄щтыр хо̄тпат тот о̄с о̄лсыт. Соссаӈ ма̄хумныл ты та̄л тув акв ма̄щтыр хо̄тпа во̄выглавес, Шиянова Галина Токчевна. Тав ё̄рн э̄ква, ще̄мьяӈ та̄гыл са̄в та̄л тыт ӯсувт о̄лы. Тав са̄всыр сувенирыт, маснут ю̄нты. Са̄лы совныл ла̄гыл маснут, пӯркат ю̄нты. Тувыл тыналыянэ, тох мощ олн сэ̄лы. Мо̄т ма̄щтыр хо̄тпа Галина Молданова, тав ос «Лылыӈ союм» студия па̄лыл тув во̄выглавес. Та центрын ялантан ня̄врамыт ос тот рӯпитан ма̄хум ма̄ньщи ос ханты супыл ю̄нтыянэ, сакныл турло̄псыт ос пальсакыт харты. Тав сака ма̄щтырыг ю̄нсхатуӈкв ха̄сы, хораманэ татем ма̄ниг ю̄нтыянэ. Мо̄т мирныл тот хатань, азербайджан ма̄хум, рущ ос украина ма̄хум о̄лсыт. Ӯс кӯщаиг рӯпитан хум Василий Филипенко ос мо̄т кӯщаит тув ёхтуманыл порат та̄н ма̄гсыланыл азербайджан ня̄врамыт татем ёмащакв йӣквсыт. Ты фестивальн ёхталам ка̄сыӈ мир, ка̄сыӈ ма̄щтыр хо̄тпа янытлавес. Та̄н пуссын дипломнэ̄пакыл майве̄сыт. Та юипа̄лт концерт о̄лыс, мирыт та̄нти ща̄нь ла̄тӈыл э̄ргыт э̄ргысыт, йӣквсыт. 1063 2013.11.08. Тамара МЕРОВА Ща̄гтым акванхо̄нтхатыгласыт. Саранпа̄выл школа рӯпитанэ̄тэ па̄сыл 111 та̄лэ то̄влыс. Тыса̄вит та̄лыт мо̄лал пе̄с документ хосыт та̄рапаттуве̄сыт. Тувыл школат рӯпитан хо̄тпат конференция ва̄руӈкве номылматсыт. Таве ма̄нь таквс э̄тпос о̄выл са̄тыт ва̄рыгласаныл. Наталья Михайловна Шиятая, Ханты-Мансийск ӯст искусство центрыт рӯпитан нэ̄, тув мӯйлуӈкве во̄выглавес. Ам таве мӯйлын тэ̄лат урыл мощ китыгласлум, на̄н потруме̄н э̄лаль ловиньтэлы̄н. – Саранпа̄вылн ялмум ма̄гыс ань тыг мус хотща̄гтым о̄лэ̄гум. Тот ам школат са̄тхуйплов та̄л ня̄врамыт английский ла̄тӈыл потыртаӈкве ханищтасанум. Ань хо̄тхуйплов та̄л Ханты-Мансийск ӯст о̄лэ̄гум, са̄всыр искусстван ханищтахтын ня̄врамыт ёт э̄лаль рӯпитэ̄гум. Ос ам та па̄сыл Саранпа̄вылн ат ялсум. Ма̄н ань тув хунь иссӯв ос товлыӈха̄пныл тӯйт тармыл ва̄глысӯв, кон ащирмаӈ о̄лыс. То̄нт Ханты-Мансийскат иӈ ма̄лтып о̄лыс, ос раквыс. Па̄выл щар мо̄тхурипаг е̄мтум, са̄в колыт ӯнттуве̄сыт. Йильпи яныг школа ам ка̄саласлум ос тув ща̄лтмум порат а̄нумн тот сака мӯстыс. Коланыл посыӈ, сыстам, пормасыт, нэ̄пакыт пуссын та̄нки э̄рнэ ма̄т о̄лэ̄гыт, иснасха̄пытт хорамыӈ лӯптат янмалтавет. Ня̄врамыт ханищтахтын пасананыл, уласаныл о̄с сыстамыт. Та щирыл школат рӯпитан кӯщаит та̄н ва̄рум ва̄рмаляныл оснпатэ̄гыт. Ам амки хосат та̄гыл школат рӯпитэ̄гум, ос ва̄глум, хумус ня̄врамыт хо̄та̄ти мори по̄слэ̄гыт, хансэ̄гыт. Тувыл ты ялпыӈ хо̄таланыл ма̄гыс пуссын ёмщакв щё̄питахтамыт. Саранпа̄выл школа а̄стлам хо̄тпат та̄ланыл щирыл я̄нас нэ̄пакло̄псын хансым о̄лсыт. Тот пуссын ханищтахтам ос са̄в та̄л рӯпитан ма̄хум хуритыт суссанум. Ялпыӈ хо̄тал ва̄рнэ яныг колнакт са̄в ма̄хум атхатсыт. Ам тот аквъёт рӯпитам ма̄хманум ёт хо̄нтхатсум, пуссын хотща̄гтсӯв. Та̄н наманыл газетат ла̄вуӈкве таӈхиянум, тыи М. А. Истомина, Н. К. Филиппова, Э. И. Артеева, Е. С. Квашнина, Н. Г. Рочева, Э. Н. Илюшникова, А. Е. Рокина, Н. Н. Сироткина, Е. Н. Артеева, Л. Я. Мотоусова. Валентина Александровна Кустышева ёт ётыл акванхо̄нтхатыгласме̄н, тав ла̄глэ сакватам. Мо̄т ханищтан хо̄тпанув Саранпа̄вылн ёхтуӈкве ат ве̄рмысыт. Сака са̄ль, та̄н уранылт о̄с потыртасӯв, ос паща ла̄тыӈ та̄нанылн ке̄тэ̄в. Тыи А. Б. Скрипниченко, Н. Ф. Денисова, Н. М. Кугаевская, А. Ф. Козельская, Л. М. Копыльцова ос мо̄таныт. Та̄н та̄нки о̄с яныг паща ла̄тыӈ хасмыт ос тув ке̄тмыт. Мо̄т хо̄тпат ке̄тум ла̄тӈаныл ос тот ловиньтаве̄сыт. Акванхо̄нтхатыглам порав сака ёмасыг минас, Дмитрий Георгеевич Агеев ханищтан ня̄враманэ сака нё̄тнэ̄г э̄ргысыт, йӣквсыт. Раиса Михайловна Капшук, Саранпа̄выл школа кӯщай ва̄ӈын э̄ква, ма̄навн пе̄с документнэ̄пак суссылтастэ ос са̄в та̄л сыс школат рӯпитам кӯщаит наманыл ла̄всанэ. Андрей Дмитриевич Попов, школа кӯщай хум, са̄в та̄л рӯпитан хо̄тпат пуссын э̄сгысанэ, мӯйлупсал мисанэ. Вера Павловна Комкова та̄н уранылт потыртас. Тувыл хосат школа а̄стлам ма̄хум та̄нки ханищтахтум та̄ланыл ка̄стысаныл. Та̄н потыртаманылт ищхӣпыӈ ут хосыт сыресыр хурит такталаве̄сыт. Пуссын «последний звонок» ялпыӈ хо̄таланыл, «зарница» ёнгиланыл сымыӈыщ номияныл. Тувыл ам рӯпитамум порат ханищтам ня̄враманум ёт хо̄нтлам хо̄тпат палт колсори рӯпата ва̄руӈкве ялсӯв. Школат ханищтахтам ос рӯпитам та̄ланув сака пӯмщиг о̄лсыт. Наталья Михайловнан яныг пӯмащипа ла̄тыӈ ла̄ве̄гум. Ма̄н, газетат рӯпитан хо̄тпат, о̄с Саранпа̄выл школа а̄стлысӯв, таве ялпыӈ хо̄талыл янытлылӯв. 1064 2013.11.22. Валентина УЗЕЛЬ Валентина Хозумова Мирн пе̄риим хо̄тпат рӯпатаныл. Ты э̄тпос 7 хо̄талэ̄т округ Думат рӯпитан депутатыт акв хо̄тал сыс тит заседание ва̄рыгласыт. А̄лпыл та̄н атхуйплов кӯм (минута) сыс округув щар ма̄к яныг бюджетнэ̄паке пирмайтасаныл. Ань тув хансым олныт хосыт ма̄н э̄лы хӯрум 2014-15-16 та̄лыт сыс о̄луӈкв патэ̄в. Хо̄талъят юипа̄лта̄н титынтыг атхатыгласыт. Ва̄тахтем кӯм сыс атхуйплов са̄ккон пирмайтасыт. Ань то̄ва са̄ккон урыл я̄нас потыр хансэ̄в. Округ Думат са̄всыр партия па̄лыл депутатхо̄тпат рӯпитэ̄гыт. Ма̄к воритотнэ хо̄тпаг ЛДПР ма̄хум ловиньтахтэ̄гыт. Кос хоты са̄ккон пирмайтаве, та̄н акваг матыр по̄ри ла̄тыӈ ля̄галэ̄гыт. Ань ты заседание э̄лыпа̄л хо̄талт кӯщаит са̄всыр комиссиятт рӯпитасыт, та̄н ловиньтасыт – манах олн хӯрум та̄лн э̄рмыглы. То̄нт ЛДПР депутатыт сака ля̄втсыт, та̄н ты округ бюджет пирмайтаӈкве щар ат ка̄сащасыт. Мо̄тыт хо̄тал Дума заседаниятэ ты о̄лыс. Та̄н пуссын тув ат ёхтысыт. Ос ля̄льт ла̄внэ хо̄тпа хунь а̄тим, депутатыт рӯпатаныл сака молях ва̄рапияныл, атхуйплов кӯм сыс округ бюджет та пирмайтасаныл. Ань та̄н тамле олныл округув хассаныл: – 2014 та̄л – 166, 4 млрд. солко̄ви; – 2015 та̄л – 172, 3 млрд. солко̄ви; – 2016 та̄л – 178, 9 млрд. солко̄ви. Ос ань таи та̄рапатыс, «дефицитыг» ла̄внэ ва̄рмаль о̄с ловиньтавес. Сака са̄в олн тах ат то̄вылхаты: – 2014 та̄лт – 21 млрд. солко̄ви; – 2015 та̄лт – 20, 5 млрд. солко̄ви; – 2016 та̄лт – 15, 7 млрд. солко̄ви. ЛЕ̄ккарыт мА̄нь пА̄влытн вос минЭ̄гыт Ма̄нь па̄влыӈ ма̄т ле̄ккар ань ат то̄вылхаты. Ма̄хум институт ман училище а̄стланэ̄ныл юипа̄лт тув вос минэ̄гыт, ань та̄нанылн нё̄тнэ са̄ккон мо̄т щирыл хасвес. Ты э̄лыпа̄лт 35 та̄ланыл иӈ ат то̄влын ма̄хум туп та̄н нё̄тве̄сыт, ань ос та̄ланыл уральтаӈкв ат патавет. Ань кос хотьют ма̄нь па̄влыт рӯпитаӈкв те ка̄сащи, та̄н пуссын акв щирыл тах олныл ойтуӈкв патавет. Ле̄ккар хо̄тпат 1 млн. солко̄вил тах мивет, фельдшерыг ла̄внэ ле̄ккарыт – 500 со̄тырал миӈкв патавет. МА̄щтыр мА̄хум мА̄гыс сА̄ккон Ма̄н округувт са̄в ма̄хум сака ёмащакв ма̄щтырлаӈкв ха̄сэ̄гыт. Ань та̄наныл янытлан ма̄гыс йильпи са̄ккон хасвес, рущ ла̄тӈыл тох ла̄ваве – «О народных художественных промыслах в ХМАО-Югре». Тот тох хансым о̄лы, ань туп ма̄к ма̄ньщи ман ханты пормас ва̄рнэ хо̄тпа туп тав ма̄щтырыг ла̄вуӈкв патаве. Хотьют са̄всыр щирыл ма̄щтырлы, такви щире̄т пормасыт ю̄нты, тав тамле намыл миӈкв ат патаве. Ма̄ньщи мирув халт са̄в хо̄тпат «Народный мастерыг» ла̄вуӈкв кос э̄ре̄гыт. Ос та̄нанылн акваг са̄всыр выставкат ва̄руӈкв э̄ри, акв та̄л сыс са̄в пормас ман маснут ю̄нтуӈкв э̄ри. Та̄н ма̄нь па̄влытт о̄лыманыл нэ̄мхотталь ялуӈкв ат ве̄рме̄гыт. Тох э̄лаль та о̄лантэ̄гыт. Ань ты са̄ккон щирыл та̄н тах нё̄туӈкв ос янытлаӈкв патавет. Соссаӈ мА̄хум мА̄гыс олныт урыл Еремей Айпин титыглавес, соссаӈ ма̄хум программан манах олн хасвес. Тав ювлела̄выс, ка̄сыӈ та̄л туп 100 млн. солко̄ви ты программан миӈкв патаве, ты олнытныл 75 млн. солко̄ви колыт ма̄гыс тах миве. Э̄лаль тав ла̄выс: «На̄н ань на̄нти ловиньтэ̄н, 166 млрд. солко̄витныл 100 млн. солко̄ви, тыи манах процент са̄витыг е̄мты? Сака мощща». Тав потыртаме юипа̄лт Дума кӯщай хум Борис Хохряков ла̄выс, ты э̄лыпа̄лт тит та̄л ювле хультум порат ма̄ньщи ос ханты ще̄мьят кол ёвтнэ субсидияолн ма̄гыс 1 млрд. арыгтем солко̄ви майлувес, ты олныт о̄с ловиньтаӈкв э̄ри. Мо̄т ма̄хум о̄с аквтох ёмащакв нё̄туӈкв э̄ре̄гыт. 1064 2013.11.22. Тамара МЕРОВА Пенсия урыл ва̄е̄н. Ты э̄тпос о̄выл щислат Россия янытыл Пенсионный фондыт рӯпитан хо̄тпат Министерство труда ос ма̄хум нё̄тмил ва̄рнэ кӯщай Максим Топилин ёт, статссекретарь Андрей Пудов ёт, Председатель Правления ПФР ва̄ӈын хо̄тпа Александр Кустин ёт видеоконференция хосыт потыртасыт. Ань пенсиян миннэ тэ̄лат йильпи щирыл ханищтаве̄сыт ос са̄кконыг щё̄питаве̄сыт. Россия Правительство па̄лыл та̄н о̄с уральтаве̄сыт. Ос 2015 та̄л о̄вылтахтын порат ӯщлахтуӈкве патхатам ма̄хум пенсияолнаныл йильпииг ловиньтаӈкве тах патавет. Ань пенсиян миннэ ма̄гыс ма̄хум рӯпитан та̄ланыл э̄лаль но̄хнё̄тавет, та̄н 6 та̄лныл 15 та̄лыт мус ва̄равет. Тыи ка̄сыӈ та̄лт рӯпитаӈкве ёхтум хо̄тпат та̄н рӯпитан стаж та̄ланыл э̄лаль са̄вмалтавет. Ты коныпал 2015 та̄лныл 6, 6 пенсионный коэффициентаныл 2025 та̄л мус ла̄щал 30 са̄витыг тах яныгми. Тувыл страховой взнос ойтнэ олныт о̄с са̄вме̄гыт, тыи 2015 та̄лт хо̄тпа сэ̄лум олнанэ̄тыл 7, 39 пенсионный коэффициентэ виӈкве тах патаве, ос 2021 та̄лыт мус тах 10 са̄витке̄мыг е̄мты. Тох 2015 та̄лт рӯпитаӈкве ущты патхатам хо̄тпат пенсияныл щар йильпи са̄ккон щирыл ойтуӈкве тах патавет. Ань рӯпитан хо̄тпат пенсияныл 2014 та̄л па̄сыл мо̄т щирыл ла̄щал о̄с ловиньтавет. Йильпи са̄ккон щирыл хум хо̄тпат армиян ялнэ та̄ланыл, нэ̄ хо̄тпат 1, 5 та̄л яныт мус ма̄нь ня̄враманыл ёт, а̄гмыӈмосыӈ, сакватахтам ня̄врам ёт, 80 та̄лэ то̄влум юипа̄лт а̄гмыӈ матумпа̄ла хо̄тпа ёт юн ӯнлум та̄ланыл пуссын рӯпитан стажиг ловиньтаӈкве патавет. Тувыл ты са̄ккон хосыт э̄лумхо̄лас та̄ланэ то̄влум порат пенсиян та̄ра ат ке мины, тав ат та̄л э̄лаль рӯпитаме сыс пенсия олнанэ э̄лальнув са̄вме̄гыт. Та̄н «премиальный коэффициентыг» ла̄ваве̄т. Ань ты са̄кконын хансым пуссын йильпи ва̄рмалит урыл радио, телевидение хосыт иӈ потыртэ̄гыт манос газетат тах хансэ̄гыт. Ос на̄н матыр э̄рнэ ля̄ххал Пенсионный Фондыт рӯпитан хо̄тпатныл о̄с китыгла̄лэ̄н. 1064 2013.11.22. Людмила ТЕТКИНА Ня̄врамыт ля̄ххалыт хансуӈкве ханищтаве̄сыт. Ты э̄тпос Ханты-Мансийск ӯст ня̄врамыт ма̄гсыл «СМИшка» нампа фестиваль рӯпитас. Округ янытыл 57 ня̄врам хӯрум хо̄тал сыс Югорский университетыт ханищтахтасыт. Фестиваль ва̄рыглам хо̄тпат ла̄ве̄гыт, та̄н хӯрмит та̄л ня̄врамыт тыт акванатыглэ̄гыт ос ля̄ххалыт хансуӈкве ханищтыяныл. Фестиваль «СМИшка против наркотиков» нам о̄ньщи. Илья Стечкин, ЮГУт рӯпитан хум, таи ла̄выс: «Тамле намыл пиным та урыл номсысув, а̄гирищитпыгрищит тамле лю̄ль пищ нупыл ул вос сунсэ̄гыт». Ты э̄лыпа̄лт округ янытыл 25 команда та̄нки рӯпатаныл ке̄тыгласаныл ос та̄н халанылт 19 команда пе̄рияве̄сыт ос тыг во̄вве̄сыт. Ня̄врамыт «Югра» телерадиокомпаният ос «Новости Югры» нампа газетат ма̄хум хумус рӯпитэ̄гыт – суссылтаве̄сыт. Ня̄врамыт хӯрум щирыл кассыт ты интернет, газета ос телерадиокомпания. Тот но̄хпатум а̄гитпыгыт школа а̄стланэ̄ныл юипа̄лт Югорский университетын ханищтахтуӈкве вивет. Тамле фестиваль общественный связь ос внутренний политика департаментыг, ЮГУ, «Новости Югры» нэ̄пак та̄ратан кол ос «Югра нампа телерадиокомпания аквъёт ва̄рыглэ̄гыт, ля̄ххал тотнэ ма̄т са̄внув а̄гитпыгыт рӯпитаӈкве вос ка̄сащасыт. Ос э̄лаль ты профессия щирыл вос ханищтахтасыт. 1064 2013.11.22. Александр ВЬЮТКИН Лӯима̄ мирыт тармыл о̄лнэ кӯщай. Григорий Петрович тот такви рӯпататэ урыл потыртас: «Ты та̄л ма̄ньполь э̄тпост «VII Съезд коренных малочисленных народов Севера, Сибири и Дальнего Востока» о̄лум порат тот ты кӯщаиг пе̄рияве̄сум. Та юипа̄лт ам та̄ра хо̄тал нэ̄глын е̄рт о̄лнэ мощщаг хультум ма̄хманув уральтасанум. Рӯт ма̄хманувн аквписыг матыр нё̄тмилыл нё̄туӈкв э̄ре̄гыт. Таима̄гсыл ты ам ма̄ янытыл ма̄хманув о̄лупсаныл сунсым яласэ̄гум. Ань на̄н палтын ты ёхтысум. Россия ма̄в лӯипалъе̄р ма̄тэ̄т са̄всыр ла̄тӈыл потыртан соссаӈ ма̄хум о̄лэ̄гыт. Ма̄нти о̄лупсав ос ла̄тӈанув ул вос ёрувлэ̄в, ты кастыл са̄в ва̄руӈкв э̄ри. Э̄лаль хумус рӯпитаӈкве, таи сунсым ам яласэ̄гум. Мо̄т съездын хунь атхатыглэ̄в, то̄нт э̄лаль рӯпитан хо̄таланув ма̄гсыл план щё̄питэ̄в. Та план хосыт э̄лаль рӯпитаӈкв о̄вылтахтэ̄в». 1064 2013.11.22. Людмила ТЕТКИНА Кӯщаит кол ӯнттын ва̄рмаль урыл потыртасыт. Югра янытыл ты та̄л лов э̄тпос сыс 472 со̄тыра арыгкем квадратный метра кол ӯнттувес. Ты ва̄рмаль ма̄гыс Наталья Комарова, губернаторув, такви ва̄ӈын хо̄тпанэ акванатыгласанэ. Владимир Путин, Россия Президентув, 2012 та̄лт я̄ӈк на̄тнэ э̄тпос 7 хо̄талэ̄т Россия янытыл о̄лнэ мирн ла̄тыӈ ке̄тыс, то̄нт кол ӯнттын ва̄рмаль урыл потыртас. Тав пуссын кӯщаит ты тэ̄ла та̄рапаттым о̄ньщуӈкве ла̄всанэ. Са̄внув ще̄мья йильпи колн вос ва̄нтлэ̄гыт, график щирыл колыт вос ӯнттавет. Ма̄н округ яныг кӯщай нэ̄в ты рӯпата акваг уральтым о̄ньщитэ. Такви ва̄ӈын хо̄тпанэ э̄лыпа̄лт тав ла̄выс: «Ань ты рӯпата ма̄н график щирыл ва̄рилӯв. Акв ва̄рмаль урыл ла̄ве̄гум, ты та̄л мощща ма̄ньлат ще̄мья о̄лнэ кол ёвтсыт. Ты программа хосыт рӯпитан кӯщаитн мӯсхалыг ос ка̄ркамыг э̄лаль рӯпитаӈкве ла̄виянум. Ты рӯпата ёмащакв ва̄релы̄н, ма̄хум ӯрхатэ̄гыт. Та̄л оигпан мус са̄внув ма̄ньлат ще̄мьят йильпи колн вос ва̄нтлэ̄гыт». Сапра̄ни о̄лум порат кӯщаит потыртасыт, округув янытыл хумус колыт ӯнттавет. Наталья Комарова ла̄выс, мо̄лты та̄л о̄с акв ты лов э̄тпос сыс мощщанув кол ӯнттувес. Ты та̄л са̄внув йильпи кол тах ӯнттаве. Тувыл губернатор пуссын ӯсыӈ, районыӈ ос па̄влыӈ миркол кӯщаит ӯнттым йильпи колыт ёмащакв ловиньтаӈкве ла̄всанэ. Та̄н акв нэ̄пакт аквса̄вит квадратный метра хансэ̄гыт, мо̄т нэ̄пакт мо̄т хурип щисла хансэ̄гыт. Кӯщай нэ̄ ла̄выс: «Ань та̄н ке̄тум нэ̄паканыл щирыл мощща кол Нягань, Покачи, Радужный, Мегион, Ханты-Мансийск, Сургут ӯсытт ос Нефтеюганский, Нижневартовский, Советский районытт ӯнттувес. Тот кӯщаит пуссын мӯсхалыг рӯпитаӈкве ла̄виянум». Губернатор прессслужбатэ ке̄тум ля̄ххал ма̄ньщи ла̄тӈыл Людмила ТЕТКИНА хансыстэ. 1064 2013.11.22. Александр ВЬЮТКИН Тэ̄ланыл ма̄гсыл во̄внэ нё̄тмиланыл. Ма̄н ӯсувт грант нампа нё̄тмил ма̄гсыл каснэ ма̄хум акванатыглаве̄сыт. Округув янытыл аквъёт пуссын 26 заявканэ̄пак тотыглавес. Тит хо̄тал сыс Природный ресурс ос несырьевой сектор экономика департаментыт рӯпитан кӯщаитын та̄н хӯнтлуве̄сыт. Ты та̄л сыс округув янытыл са̄в йильпи община пӯсвес. Cа̄выӈпа̄лэ соссаӈ ма̄хум та̄нти ва̄рум общинаныл. Тот рӯтыг о̄лнэ ма̄хманыл рӯпитэ̄гыт. Олн сэ̄лнэ ма̄гсыл са̄всыр пормас ма̄щтырлэ̄гыт, во̄рт пил ва̄тэ̄гыт, ӯльпа па̄квсам щё̄питэ̄гыт ос ла̄хс то̄слэ̄гыт. Та коныпал пувнэ хӯланыл хӯл щё̄питан колн тыналыяныл. Сэ̄лнэ олнанылтыл та̄нтина̄нылн э̄рнэ пормаc ёвтэ̄гыт. Департамент колт туризм щирыл рӯпитан нэ̄ Ирина Арканова ла̄выс: «Округувн ёхталан мӯй ма̄хмыт соссаӈ мир пе̄с йис о̄лупсал пӯмщалахтэ̄гыт. Ма̄н округув Бурятия ос Саха (Якутия) республикаг ёт акв ляпа щирыл мӯй ма̄хум тыг тотыглаӈкв ве̄рме̄в. Со̄ль, соссаӈ ма̄хум рӯпитаӈкв ка̄саще̄гыт, таӈхе̄гыт ос ве̄рме̄гыт. Туристыт ёт округувт иӈ мощща рӯпитэ̄в. Пе̄с йис пораныл тыт о̄лнэ ма̄хмытын хумус ве̄рме̄в, та щирыл та нё̄тэ̄в. Турист ма̄хум ёт рӯпитанэ̄в хӯрум та̄лыг ты то̄влыс. Ты та̄лыт сыс округувт атхуйплов община тэ̄ланыл ёмас минасыт». 2013 та̄лт округ бюджетныл титхуйплов миллион солко̄ви та̄стувес. Ты порат щар яныг нё̄тмил хӯрум миллион атса̄т со̄тыра солко̄ви во̄виньта̄лвес. Кӯщаит тамле яныг олн миӈкв ат ве̄рме̄гыт. 1064 2013.11.22. Тамара МЕРОВА Потыртахтын ма̄гыс акванатхатыгласыт. Мо̄лал Тюмень ос Салехард ӯсыгныл са̄кконыт ёт рӯпитан кӯщаит Ханты-Мансийскан ёхталасыт ос са̄всыр тэ̄лат аквъёт ва̄рнэ щирыл потыртахтасыт. О̄влэ̄т акванатхатам кӯщаит депутатыг о̄лнэ нила хо̄тпа ёмас рӯпатаныл ма̄гыс э̄сгын нэ̄пакыл мӯйлуптасаныл: тыи С. М. Сарычев, Е. Д. Айпин, Л. А. Чистова ос Е. Г. Зленко. Та̄н Тюменский областьт, Ямалт ос Юграт ма̄хум ёмщакв о̄лнэ̄ныл ма̄гыс ка̄ркамыг рӯпитэ̄гыт, са̄кконыт мӯсхалыг щё̄питэ̄гыт. Тувыл кӯщаит са̄всыр мо̄т э̄рнэ тэ̄лат урыл потыртасыт. Ты та̄л ва̄т са̄грапнал э̄тпос китхуйплов хо̄талт РФ Конституция хус та̄лэ то̄влы. Ос ты йильпи Конституция щирыл Россият о̄лнэ са̄всыр округыт, республикат, областит манос крайит то̄ва ва̄рмаляныл палт та̄нки кӯщайлахтуӈкве патсыт. Ма̄н ма̄вт Тюменский область, Ямал ос Югра та̄нки я̄нас Дума ва̄рсыт, та̄н та̄нки мирн э̄рнэ са̄кконыт щё̄питэ̄гыт ос пирмайтэ̄гыт. Мо̄тыт та̄л во̄ртур э̄тпос нилахуйплов хо̄талт Тюменский область о̄лнэ̄тэ па̄сыл 70 та̄лыг е̄мты. Ос аквты э̄тпос атхуйплов хо̄талэ̄т Александр Протазанов яныгса̄т та̄лэ тах то̄влы. Ты о̄йка 1960-1962 та̄лытыт Тюменский облисполкомыт кӯщаиг о̄лыс, ма̄во̄й но̄хвинэ ма̄т са̄в тэ̄лат но̄хво̄рмалтас. Ты ялпыӈ хо̄талыг янытлан ма̄гыс ма̄хум са̄всыр пӯмыщ культурный программал щё̄питавет. Ань ты кастыл хӯрум Дума кӯщаянув ос та̄н ва̄ӈын хо̄тпаныл ты ва̄рмалит та̄рапаттысаныл ос олн нё̄тмилыл та̄стуӈкве ла̄вхатсыт. Тувыл та̄н ма̄ньлат ма̄хум ёт мо̄т колнакт акванатхатыгласыт. Тот общественный организацият рӯпитан ма̄ньлат хо̄тпат потраныл хӯнтлысыт. Сергей Ямкин, Ямалныл ёхталам хум, ла̄внэ̄тэ щирыл, ань ма̄ньлат хо̄тпат депутатыг о̄с вос пе̄рияӈкве та̄ртавет. Та̄н та̄нки ма̄ньлат мир та̄рвит тэ̄ланыл пуссын ва̄ганыл ос государство янытыл та̄наныл э̄лаль ёмщакв тотнэ ма̄гсыл мӯсхалыг, ве̄щкатыг тах рӯпитаӈкв патэ̄гыт. Думат рӯпитан кӯщаит ка̄сащасыт кос, ос таи ювлела̄всыт, та̄н са̄в та̄л о̄лэ̄гыт, са̄всыр накыт ва̄щинтэ̄гыт, са̄в ёмас ва̄рмалитн ханищтахтасыт, ос са̄всыр са̄кконыт хаснэ порат таи номияныл ос тув а̄рталахтым та̄н са̄кконыт ма̄кыг щё̄питыяныл. Тувыл акванатхатам ма̄хум «Сотрудничество» программа щирыл аквъёт э̄лаль рӯпитаӈкве потыртахтасыт ос документнэ̄паканылт хасхатасыт. 1064 2013.11.22. Валентина УЗЕЛЬ Са̄лы ӯрнэ хум. Ты хурит ханты хум Николай Анатольевич Тасьманов по̄слым о̄лы. Тав Касум па̄вылт самын патыс, тот яныгмас. Ань тав са̄лы ӯрнэ хумыг о̄лы, са̄лыянэ ма̄гыс нэ̄пакыт атыянэ. Рущит ла̄внэ̄ныл хольт – «Оленеводческое крестьянскофермерское хозяйство» ва̄ри. Иш-Юган нампа ма̄т са̄лыянэ ӯруӈкв паты, ты ма̄ Касум па̄вылныл хусахтем ве̄рыстат о̄лы. Ань тот са̄лы о̄щнэ пӯсас ва̄ри, колыт ӯнтты. Са̄лыяныл а̄пщиянэ ос акитэ ёт о̄ньщуӈкв патыянэ. Та̄н о̄влэ̄т тав ётэ рӯпитаӈкв ат ка̄сащасыт. Ань акванпотыртахтым матах са̄лы иӈ тах ёвтэ̄гыт. Николай ла̄выс: «Ань ма̄к са̄лы ӯрнэ яныгхо̄тпат а̄тимыг е̄мтэ̄гыт, са̄лыт ос молях мощщаме̄гыт, са̄в са̄лы во̄рт ха̄йтыгтыманыл во̄р са̄лыт халн тэ̄лыглэ̄гыт. Ань амти са̄лыянум па̄вылныл мощ э̄лыннув о̄лэ̄гыт, моще̄рт па̄выл ляпаннув тах ня̄влыянум». 1064 2013.11.22. Николай МЕРОВ Саквъя̄н хӯл ёхтуӈкве ат ве̄рми. Ре̄тыӈ ю̄свой э̄тпост Ха̄льӯс район кӯщай нэ̄ Любовь Коротун Саранпа̄вылт о̄лнэ ма̄хум ёт ва̄йхатуӈкве ёхталас. Тав школа ос ма̄нь ня̄врам колыт уральтас. Любовь Константиновна Саранпа̄выл мир клубколн акванатыгласанэ. Тав ётэ потыртаӈкве са̄в хо̄тпа тув ёхталас. Любовь Константиновна о̄влэ̄т ювле хультум та̄л сыс ва̄рум рӯпата урыл потыртас. Тувыл ма̄хманув кӯщай нэ̄ са̄всыр ва̄рмалит урыл китыгласаныл. Ос са̄выӈпа̄лэ хум хо̄тпат сорых хӯл пувнэ урыл китыглахтасыт. Саранпа̄вылт о̄лнэ хум Николай Николаевич Фролов ла̄выс: – Ма̄н я̄вн ка̄сыӈ та̄л сорых, сӯкыр, нялк ос мо̄т са̄всыр хӯлыт сэ̄руӈкве ювыт. Ма̄хум йис та̄гыл хӯл алыщлым о̄лэ̄гыт. Ос юио̄выл та̄лытт сорых хӯл щар мощщаг е̄мтыс. Таима̄гыс мо̄лты та̄л ты хӯл пувуӈкве хотпо̄илтта̄лвес. Са̄всыр ма̄ныл тыг рыбинспекторыт ёхталасыт. Хотьют пувыглавес, та̄н яныг штрафолныл хасве̄сыт. Ма̄хум тӯйтыглахтым хӯл алыщласыт. Та сыс, хӯл алыщлан общинат сорых э̄лаль тох та пуве̄гыт. Кульпас па̄вылт «Рахтынья» нампа община о̄лы. Та община кӯщаиг Александр Голошубин рӯпиты. Хӯл алыщлан ма̄наныл хускем ве̄рыста палытэ. Хӯл сэ̄руӈкве па̄гле миннэ порат, та̄н Та̄гт я̄ яныг толгыл лапто̄варттыяныл. Таима̄гыс Саквъя̄н хӯл ёхтуӈкве ат ве̄рми. Тувыл ос ань юио̄выл та̄лытт туп ма̄нь сорх сэ̄руӈкве Саквъя̄н юв, яныгмаӈкве ат а̄лыми, алыщлаве. Ам таи китыглаӈкве таӈхе̄гум, хотьютын ты община рӯпататэ уральтаве, ос манрыг та̄нанылн сэ̄рнэ хӯл пувуӈкве ро̄ви, нас о̄лнэ хо̄тпат ос ат та̄ртавет? Ха̄льӯс район кӯщай ёт Вадим Васильевич Максимов ёхталас, тав ты ва̄рмаль ёмщакв ва̄гтэ, ты урыл тох ла̄выс: – Александр Голошубин хӯл э̄лаль са̄вмалтан ма̄гыс сорых по̄р аты ос государстван мыг. Таима̄гыс таве̄н ты хӯл пувуӈкве ро̄ви. Отчётнэ̄паке щирыл тав туп ро̄внэ са̄вит хӯл пуви. Ты коныпал рыбоинспекторыт ва̄тихал таве уральтаӈкве тув ялантэ̄гыт. Ань ты хо̄тал мус нэ̄матыр лю̄ль ва̄рмаль ат хо̄нтвес. Тав матыр ощмар ва̄ри ке, на̄н рыбинспекторн ла̄ве̄н. Тувыл о̄с акв хум потре э̄лаль минас: – Николай Николаевич щар со̄ль ла̄ви. Таве̄н та я̄ ломт хӯл алыщлан ма̄гыс майвес. Ма̄н ты ва̄рмаль урыл са̄всыр кӯщаитн потырта̄лсӯв, хотальа̄ти нэ̄пак хансыгласӯв, ты тэ̄ла хумус о̄лыс, тохи хультыс. Хумус тох е̄мтыс, Саквъя̄т, Ма̄нья̄т хӯл сэ̄рнэ порат алыщлаӈкве ат ро̄ви, Та̄гт я̄т ос хӯл алыщлаӈкве та̄ртаве? Любовь Константиновна ювлела̄выс: – Нан ва̄глын, ты федеральный са̄ккон а̄ти ма̄н пирмайтасӯв. Ты хӯл Голошубин а̄ти такви ма̄гсылэ алыщлы. Тав Тюмень ӯс институт ёт договорнэ̄пак хансыс. Та институт сорых хӯл са̄вмалтым рӯпиты. Мо̄лалнув ма̄н палтув округ губернаторув Н. Комарова ёхталас. Ме̄н Шайтанка ос А̄нъя па̄влыгн ялсуме̄н. А̄нъя па̄вылт Владимир Ендырев ме̄н ёхтынэ̄ме̄н кастыл ёмщакв щё̄питахтас. Атхатам ва̄рмалит пуссын таве̄н потыртасанэ. Тав ла̄выс, хус та̄л сыс ма̄нь сорых хӯл сака мощщаг е̄мтыс, яныгмаӈкве ат а̄лыме̄гыт, та̄ра пувавет. Э̄лаль тыщир паты ке, ма̄н хӯл та̄л хультэ̄в. Сорых яныгмаӈкве вос а̄лымас, ты хӯл хотты порат пувнэ ма̄ныл хотпо̄илтта̄луӈкве э̄ри. Ты ва̄рмаль щирыл яныг сапра̄ни ва̄рыглан ма̄гыс, губернатор нэ̄ таве округ правительстван ёхтуӈкве ла̄выстэ. Китыт тэ̄ла, ань Николай Николаевич ла̄вум ва̄рмалит урыл китыглахтас. А. Голошубин о̄с тот о̄лыс. Тав тот ты ла̄выс, сорых хӯл по̄р минэ ма̄гыс алыщлы. Ты сапра̄ни юипа̄лт аквты хо̄тал ам Александр Голошубин ёт ва̄щинтахтасум. Ты ва̄рмаль урыл таве китыгласлум. На̄н ме̄н потруме̄н мо̄т газетат э̄лаль ловиньтэ̄н тах. 1064 2013.11.22. Николай МЕРОВ Ма̄н редакциявн округ Дума колыл пищма ёхтыс. Людмила Тимофеевна Юдина, са̄в та̄л пӯльницат ле̄ккарыг рӯпитам э̄ква, 74 та̄лэ то̄влум порат а̄тимыг е̄мтыс. Тав «Заслуженный работник здравоохранения автономного округа», Почётный донор России, «Ветеран труда РФ» намыт о̄ньщас. Юио̄выл та̄лытт Людмила Тимофеевна соссаӈ мир Ассамблеят ветеран хо̄тпат Советыт рӯпитас. Тав ётэ рӯпитам хо̄тпат ла̄ве̄гыт, тав сака сымыӈ, ка̄ркам ос номтыӈ э̄лумхо̄ласыг о̄лыс. Ма̄н таве сака э̄руптаслӯв. Ты мӯтраӈ э̄ква ма̄н акваг номуӈкве патылӯв. Ляпа рӯтанэ̄н ос таве ва̄м хо̄тпатн сым ща̄ргын ла̄тыӈ ке̄тэ̄в. Округ Дума Ассамблея ке̄тум ла̄тыӈ ма̄ньщи ла̄тӈыг Н. МЕРОВ хансыстэ. 1064 2013.11.22. Людмила ТЕТКИНА Мо̄тынтыг Леуши па̄выл 430 та̄лэ то̄влы. Леуши па̄выл Кондинский район Туман нампа ӯрай ва̄тат ӯнлы. Ань ты па̄выл нупыл мо̄т хӯрум па̄выл Лиственичный, Ягодный ос Дальний о̄с ловиньтахтэ̄гыт. Елена Кульчицкая, Леуши па̄вылт ня̄врамыт ханищтан нэ̄, пе̄с нэ̄пакытт кисхатым таи хо̄нтыс, та̄н па̄вланылн 1584 та̄л порат ма̄хум о̄лмыгтасыт. Мо̄тыт та̄л Леуши тах 430 та̄лэ то̄влы. Ма̄хум ты ялпыӈ хо̄тал янытлаӈкве ань щё̄питахтэ̄гыт. Леушит 1300 арыгкем э̄лумхо̄лас о̄лы, та̄н халанылт 200 хо̄тпа ма̄ньщииг ловиньтахтэ̄гыт. Рущит ос мо̄т мирыт хосат тув о̄луӈкве ёхтысыт, хо̄нтаӈ ма̄ньщиянув мо̄т мирыт халн тэ̄лыгласыт. Та̄н ань та̄нки пе̄с йис ва̄рмаляныл ат ва̄ганыл, ща̄нь ла̄тӈаныл о̄с хотёрувласаныл. Ты э̄лыпа̄лт тот во̄р яктын яныг леспромхоз о̄лыс, па̄влыӈ ма̄хум пуссын тот рӯпитасыт. Ань туп школат, садикыт, клубт ос пӯльницат рӯпитан ма̄ о̄лы. Ты коныпал воссыг мо̄т рӯпата а̄тим. Таи ёмас, Леуши Междуреченский па̄выл по̄хат о̄лы, ка̄ркамыг о̄лнэ хо̄тпат тув рӯпитаӈкве ялантэ̄гыт. Ань па̄вланыл ляпат ӯйхул янмалтан нила предприятие рӯпитэ̄гыт, тувыл мӯсхалыг рӯпитаӈкве о̄с ат ве̄рме̄гыт. Акв фермат предпринимательхо̄тпа перепёлкаг ла̄внэ товлыӈ ӯйрищит янмалты. Акв хо̄тал сыс 600 арыгкем мӯӈи тотэ̄гыт. Тыи ёмас ва̄рмаль кос, тувыл фермат рӯпитан ма̄хум мӯӈи э̄лаль тыналаӈкве ат ве̄рме̄гыт. Сӯкыр э̄тпост пе̄риян хо̄тал о̄лум порат ты нила па̄влытт о̄лнэ мир Владимир Зольколин миркол кӯщаиг пе̄риясыт. Кӯщай хум ка̄ркамыг рӯпитаӈкве вуйхатас. Тав ё̄ре хосыт па̄вылт на̄й ке̄рква̄лгыт йильпииг ва̄рве̄сыт. Па̄выл лё̄ӈхыт о̄с ёмасыг щё̄питаӈкве о̄вылтаве̄сыт. Леушит о̄лнэ мир па̄вланыл янытлан хо̄тал ӯре̄гыт ос ты кастыл ань щё̄питахтуӈкве патсыт. Ирина Самсонова хансум потре ма̄ньщи ла̄тӈыл Людмила ТЕТКИНА хансыстэ. 1064 2013.11.22. Светлана РОМБАНДЕЕВА Ма̄хманув акванхо̄нтхатыгласыт. Сургут ӯст ма̄ньщи ос ханты ма̄хманув ма̄гыс научнопрактический конференция ва̄рыглавес, тох намаим о̄лыс: «О подготовке ХМАО-Югры к Всемирной конференции Организации Объединенных Наций по правам коренных народов». Ма̄хум тув са̄в ма̄ныл ёхталасыт – Россия янытыл о̄лнэ яныг учёныит, профессорыт, юристыг рӯпитан нэ̄тхумит. Округ ма̄ньщиянув ос хантыянув о̄с о̄лсыт – Сургутский ос Нижневартовский районыгныл са̄лыӈколыӈ ма̄хум о̄лсыт, Белоярский ос Ха̄льӯс районыгныл нэ̄квет ёхталасыт. Са̄в хо̄тпа ма̄ньщи ос ханты супыл масхатыгласыт. Сургут ӯст насати яныг университет ӯнттыма, атах ман хо̄тах накпа лю̄лит нё̄тнэ кол капай. Конференцияв тот ты о̄лыс. Са̄в хо̄тпа доклад ловиньтасыт. О̄выл ла̄тыӈ Сургутский университет кӯщай о̄йка Сергей Михайлович Косенок тав ла̄выс: «Ма̄ янытыл 370 млн. са̄вит соссаӈ хо̄тпа о̄лы (ма̄ янытыл о̄лнэ мирныл – 5%). Та̄н 70 государстватт о̄лэ̄гыт. Соссаӈ мир – ты сака та̄к ма̄хум. Та̄н пе̄с о̄лупса щирыл ань ты хо̄тал мус о̄лэ̄гыт, ща̄нь ла̄тӈанылт потыртэ̄гыт. То̄ваныл са̄лыӈколыӈ ма̄хум, са̄лы ӯре̄гыт, янмалтэ̄гыт. Округувт о̄лнэ ма̄ньщи ос ханты ма̄хманув халт са̄лыӈ ще̄мьят о̄с о̄лэ̄гыт. Та̄нанылн э̄ри нё̄туӈкве, ты урыл кӯщаит вос номсэ̄гыт, э̄рнэ са̄кконыт вос хансэ̄гыт. Ань май Красноярский крайт Институт по правам человека о̄лы. Ма̄н округувт тамле Институт о̄с э̄ри ва̄руӈкве. То̄нт соссаӈ ма̄хманув мӯсхал щирыл нё̄туӈкве патавет». Сергей Михайлович сака хоса потыртас, ма̄ньщит ос хантыт урыл са̄в ёмас ла̄тыӈ ла̄выс. Профессор о̄йка, юридический наука доктор Владимир Алексеевич Кряжков тох ты потыртас: «Ма̄н странав соссаӈ мирн нё̄туӈкве вуйхатас, са̄всыр э̄рнэ са̄кконыт хасве̄сыт, ань ты хо̄тал мус иӈ хансавет, щё̄питавет. О̄выл са̄кконыт СССР о̄лум порат хансуӈкве о̄вылтаве̄сыт. Та порат ты родовой угодият урыл о̄выл щёс потыр о̄лыс. Ос туп таи лю̄ль, са̄кконт хансым ат о̄лы, ань э̄лумхо̄лас о̄лнэ ма̄тэ, алыщлан ман во̄раян ма̄тэ, тав а̄тимыг е̄мтнэ̄тэ юипа̄лт ня̄враманэ нупыл вос паты. Ты урыл ос мо̄т са̄в ва̄рмалит урыл э̄рнэ са̄кконыт ань ты хо̄тал мус иӈ ат та хасве̄сыт. Са̄кконыт пуссын пе̄сыг е̄мтсыт, та̄наныл э̄ри йильпииг хансуӈкве». Татьяна Степановна Гоголева, округ Дума депутат, ла̄выс: «Ма̄н округ депутатыт ёт 1989 та̄л па̄сныл, ловмантем та̄л сыс, ма̄к э̄рнэ са̄в са̄ккон та порат ты хассӯв. «Спасение Югры» организация ма̄ньщи ос ханты ма̄хманувн са̄в нё̄тмил ва̄рыс. Ань ты организация рӯпататэ щар ат на̄ӈки, аман маныр ва̄ре̄гыт, тавагт. Ща̄нь ла̄тӈыл потыртан мир сака молях мощщами, ма̄ньлат ня̄врамыт ань та̄нти ла̄тӈанылт ат потыртэ̄гыт». Москва ӯсныл яныг э̄ква ёхталас – Евдокия Александровна Гаер. Тав исторический наукат доктор намыл маим о̄лы, РАЕН академик, Россия янытыл о̄лнэ соссаӈ мирытн нё̄ты. Мо̄тыт та̄л тав нёлса̄т та̄лэ то̄влы. Тамле талква э̄ква, ла̄щлакв лакватахтыглы, щёл сака ат о̄ньщи, ос тот ла̄вылтам та̄рвитыӈ тэ̄ланув ма̄гыс сыме ща̄рги. Таима̄гыс Сургутын ты ёхталас, о̄с хоса потыртас. Тав ла̄внэ̄тэ щирыл, ня̄врамыт ща̄нь ла̄тӈыл потыртаӈкве юн вос ханищтавет, та̄н ётаныл юн акваг потыртаӈкве э̄ри. Школат тай нас грамотан ханищтавет, ла̄тыӈ сака мат хунь ханищтэ̄гыт. Хо̄талъя̄т юипа̄лт ма̄хум ла̄кквауртхатасыт, ат ва̄рмаль щирыл рӯпитасыт. Ка̄сыӈ ва̄рмаль урыл потыр я̄нас колнакт о̄лыс. Ам «Язык, образование и этнические процессы обскоугорских народов: будущее и современность» урыл потыр хӯнтлысум. Тот о̄с ма̄хум докладыт ловиньтасыт. Мо̄т колнакытыт са̄лыӈколыӈ ма̄хманув ос ма̄во̄й но̄хвинэ хо̄тпат урыл потыр о̄лыс. Та̄н ань акван ат ла̄пе̄гыт, потраныл акван ат ёхтэ̄гыт. Мирхал са̄кконыт урыл потыр о̄лыс, э̄лы хо̄н ма̄т ма̄хум хумус рӯпитэ̄гыт, са̄кконаныл ёмасыт ман а̄ти. Акв колнакыт ос ма̄хманув пуста̄гыл о̄лнэ урыл потыртасыт. Ма̄н, ма̄ньщит ос хантыт, ань манхурип а̄гм о̄ньще̄в, пусмалтахтэ̄в ман а̄ти. Конференция оигпаме э̄лыпа̄лт, э̄типа̄лаг, ма̄хум о̄с акванатхатасыт. Кӯщай хо̄тпат ла̄внэ̄ныл щирыл, та̄н ань ма̄н та̄рвитыӈ ва̄рмалянув пуссын нэ̄пакын хансыяныл, ООН организациян ке̄тыяныл. 1064 2013.11.22. Галина КОНДИНА Атыӈ тэ̄нут па̄йтнэ нэ̄квег. Туи порат хунь ам «Ма̄нь Ӯскве̄н» ялсум, то̄нт тит ма̄ньщи нэ̄г ня̄врамыт ма̄гсыл тэ̄нут па̄йтым рӯпитасы̄г. Надежда Савельевна Пузина (Мерова) хосат та̄гыл тув рӯпитаӈкве туи порат ёхталы. Татьяна Николаевна Мерова (Кугина) ты тув ущ о̄выл щёс тув рӯпитаӈкве во̄ввес. Тэ̄натэ̄н ам ма̄нь та̄гыл ва̄гагум. Акв па̄вылт яныгмасӯв, акв школат ханищтахтасӯв. Надежда Савельевна такви а̄ги о̄парищ наме Мерова, тав Хо̄сло̄х па̄вылныл о̄лы. Та̄н колта̄гыл пуссын тот яныгмасыт. А̄тяныл Савелий Прокопьевич наме о̄лыс, оманыл Лидия Анатольевна ань Саранпа̄вылт ня̄враманэ палт о̄лы. Хунь ханищтахтын пора ёхты, а̄тянылн Саранпа̄выл интернатын тотавет, тот о̄лсыт ос ханищтахтасыт. Надежда школа а̄стлас, э̄лаль ханищтахтуӈкве минас, са̄всыр атыӈ са̄ккарыӈ ня̄нит ва̄руӈкве ханищтахтас, рущ щирыл кондитерыг ла̄ваве. Тувыл юв ёхтыс ос рыбкоопт са̄в та̄л ня̄нь ва̄рим рӯпитас. Тав пе̄карнит рӯпитаме̄т сака атыӈ ня̄нь ва̄рвес. Ань тав садикыт рӯпиты, ма̄нь ня̄врамыт ма̄гсыл тэ̄нут па̄йты. Надежда Савельевна тит пыг о̄ньщи. Яныг пыге Женятэ школа а̄стламе юипа̄лт Ханты-Мансийск ӯст ма̄шинал яласан хумыг ханищтахтас. Па̄влэ̄т ханищтахтаме̄т национальные виды спорта каснэ ма̄н акваг ялантас. Туи оматэ ла̄ви, пыге па̄вылт рӯпата хо̄нтуӈкве ат ве̄рми, хо̄та̄ти пуссын рӯпата та̄лыт о̄щнэ хо̄тпа виве. Тав ханищтахтын ма̄ныл туп а̄стыс, рӯпитан та̄лыт хотыл выг. Ма̄нь пыге наме Миша, тав иӈ школат ханищтахты. Туи оматэ ёт тот «Ма̄нь Ӯсквет» ӯщлахтас. Татем ка̄ркам, ёмас пыгрищакве. Ам ня̄врамыт са̄сныл матыра̄ти ю̄нтуӈкве ханищтасанум. Миша ам по̄хумн ӯнты, ёмщакв сунсы, хумус э̄ри ва̄руӈкв, тувл такви та о̄вылтахты со̄вткве ю̄нтуӈкве. Ам туп то̄ванакт мощ хӯлтыглылум. Тулял ат ха̄сы, тох хотмус та ве̄рми. Акв матах хо̄тал сыс ма̄нь со̄вткве, тувыл мощ яныгнув со̄вт, са̄нсов ю̄нтыс. Рӯпататэ хунь а̄стлытэ, оматэ палт та ха̄йты, оматэ̄н суссылтыянэ. Ю̄нтум а̄ныса̄нанэ сака ма̄щтырыг тэ̄лсыт. Оматэ ла̄ви, тав Саранпа̄вылт боксыл каснэ ма̄н яланты. Ам таве̄н ё̄рыг яныгман ла̄тыӈ те̄тэ̄гум. Э̄рыӈ хуньт намыӈсуиӈ хо̄тпаг е̄мты. Надежда Савельевна пыгаге ёт пуста̄гыл вос о̄лэ̄гыт. Ня̄врамаге таве̄н туп ща̄гт вос тотэ̄г, На̄й-О̄тыранылн вос ӯргалавет. Надежда Савельевна сака ка̄ркам ос хо̄тпа нупыл ёмас нэ̄, тав ощхультым, мовиньтым ня̄врамытын атыӈ тэ̄нут ва̄ри. Татьяна хурит ма̄нь пыгте̄тэ ёт по̄слыслум. Тэ̄н тув рӯпитаӈкве аквъёт ёхтысы̄г, пыгрищате̄тэ та̄л арыгтем яныт. Яныг пыгаге Вася ос Костя школат ханищтахтэ̄г. Та порат хотталь ща̄рыщн ӯщлахтуӈкве тотвесы̄г. Татьяна омагеа̄тяге сас ма̄ньщи хо̄тпаг о̄лсы̄г, оматэ Клавдия Герасимовна Солянова, а̄тятэ Николай Кугин. Ма̄ньлат порат са̄лыӈ колт яласасы̄г, ётыл ос на̄лув ва̄глысы̄г, па̄вылт о̄лсы̄г. Ань сас а̄тимыг е̄мтсы̄г. О̄лме̄нт хӯрум ня̄врам янмалтасы̄г: Татьяна, Евгений ос Лилия. Ты ма̄ньщи нэ̄квег Надежда Савельевна ос Татьяна Николаевна Ща̄нь хо̄талыл янытлыягӯв. Ка̄сыӈ та̄л яныг таквс э̄тпост Ща̄нит янытлавет, рущ щирыл ла̄ваве – День матери. Тэ̄н сас ня̄врамыӈ нэ̄г, пыганэ̄н пуста̄гыл вос яныгме̄гыт, э̄лаль о̄лнэ ёмас хо̄тал вос хо̄нтэ̄гыт. Ка̄сыӈ ома хунь ня̄враме ёмщакв о̄лы, таве̄н тыи ты со̄т. 1064 2013.11.22. Людмила ТЕТКИНА Леуши па̄выл ще̄мьят йильпи колн ва̄нтласыт. Кондинский район Леуши па̄вылт пе̄с пора та̄гыл ма̄ньщит ос мо̄т мирыт о̄лэ̄гыт. Ма̄хум хумус о̄лэ̄гыт, тув ялмум порат, ам Владимир Зольколин миркол кӯщай, китыгласлум. – Владимир Константинович, ань ма̄нь па̄влыт пуссын акв та̄рвит о̄ньще̄гыт, са̄в ма̄хум рӯпата та̄л тот о̄лэ̄гыт. Тамле ва̄рмаль тыт о̄с о̄лы? – Леуши, ос ты коныпал Лиственичный, Дальний ос Ягодный тыг ловиньтахтын па̄влытт, туп 43 э̄лумхо̄лас ат рӯпитэ̄гыт. Ты э̄лыпа̄лт Кондинский совхозт ос Леушинский леспромхозт ма̄хум пуссын рӯпитасыт. Ань тыт ӯйхул янмалтан нила ферма о̄лэ̄гыт, школат, садикт, пӯльницат, клубт рӯпитан ма̄ о̄с о̄лы. Ань Кондинский районт щар ка̄сыӈ па̄вылт пил, ла̄хыс, па̄квсам пирмайтан колыт рӯпитэ̄гыт, пил ва̄тым олн сэ̄луӈкве о̄с ро̄ви. Пирмайтым пилыт Междуреченский па̄вылн тотавет. Тот завод ӯнттувес, пилныл са̄всыр тэ̄нут ва̄раве. Ты завод «Сады России» нампа фирма ёвтыс, ма̄хманув пуссын тув пил тыналэ̄гыт. Ма̄н о̄лнэ ма̄вт тай пил ёмащакв тэ̄лы, са̄в ва̄туӈкве ро̄ви. Ам таи ла̄ве̄гум, туп савыӈ хо̄тпа рӯпата ат хо̄нты. – Па̄вылт о̄лнэ соссаӈ ма̄хум кол ёвтнэ ма̄гсыл субсидияолныл мивет. На̄н ма̄хманы̄н кол тыт ӯнттэ̄гыт манос мо̄т ма̄т кол ёвтэ̄гыт? – Ма̄ньщит ос хантыт акторыг кит очеридин хасхатэ̄гыт, акв ма̄т та̄н соцнайм щирыл кол ӯре̄гыт, китыт ма̄т ос субсидияолн ма̄гсыл хансавет. Соцнайм щирыл ке мивет, мо̄т очередил хотвивет. Ты та̄л сыс хӯрум соссаӈ ще̄мья субсидияолныл майве̄сыт. Та̄н пуссын тыт о̄лнэ кол ёвтсыт. Ань ла̄ве̄гыт, округувт о̄лнэ соссаӈ ма̄хум субсидияолныл ке мивет, та̄н яныг ӯст манос па̄вылт кол ёвтэ̄гыт. Ма̄н ма̄хманув пуссын тыт кол ёвтэ̄гыт, тыт о̄луӈкве хультэ̄гыт. Тувыл та̄нки кол ӯнттуӈкве ат ка̄саще̄гыт, ёвтэ̄гыт. Ос ты та̄л сыс хо̄т соссаӈ ще̄мья соцнайм щирыл колыл майве̄сыт. Па̄влувт ты та̄л яныгполь э̄тпост соцнайм щирыл онтолов кол ӯнттуӈкве о̄вылтаве̄сыт. Сӯкыр э̄тпос са̄т ще̄мья йильпи колн о̄луӈкве ва̄нтласыт. Акв кол моще̄ртын о̄с тах а̄стлаве. Ты халт кит колыг савалап ня̄врамыг ма̄гсыл ӯнттувесы̄г. Та̄н уранылт ма̄н о̄с ат ёрувлэ̄в. Ань йильпи щирыл ма̄н рӯпитэ̄в. Са̄ртын аукцион ва̄ре̄в, хоты кол ӯнттын компания но̄хпаты, тыт та рӯпиты. Ма̄н па̄влувт ты онтолов кол кит предпринимателиг ӯнттысы̄г. Акватэ тай молях хо̄т кол а̄стласанэ, мо̄танэ тох молях рӯпитаӈкве ат ве̄рми, ла̄ви, олнанэ холасыт. Колаге хунь а̄стэ̄г, ма̄н туп то̄нт ты колыг ма̄хманув ма̄гсыл выгагӯв. О̄влэ̄т предпринимателит та̄нки олныл колыт ӯнттэ̄гыт, ма̄н туп а̄стлым колыт ёвтэ̄в. Тох тай ёмас кос, тувыл акв компания олн ат о̄ньщи, ще̄мьяг та ӯрхатэ̄г. Ты э̄лыпа̄лт ма̄хманув соцнайм щирыл кол са̄в та̄л ӯрсыт. Ань моляхнув колыл мивет. Па̄влувт са̄в ще̄мьят савалап ня̄врамыт янмалтэ̄гыт. Тамле ня̄врам янмалтым ань то̄вылхатнэ са̄вит олныл ойтавет, тыима̄гсыл ма̄н па̄влувт тамле ще̄мья са̄в е̄мтыс. Ты ще̄мьят йильпи колн о̄с моляхнув ва̄нтлэ̄гыт. – Ань на̄н па̄влын ёхтум ле̄ккарыт, ня̄врам ханищтан хо̄тпат манос мо̄т специалистыт рӯпитаӈкве ке ёхтэ̄гыт, о̄лнэ колыл мивет? – Ань школат ханищтан хо̄тпат э̄ре̄гыт, тувыл тыг ёхтуӈкве ос тыт рӯпитаӈкве, ма̄хум сака ат ка̄саще̄гыт. Ня̄врамыт ханищтан хо̄тпат ке ёхтэ̄гыт, «служебныиг» ла̄внэ колыл мыганӯв. Тамле кол ма̄н о̄ньще̄в. Ань па̄влувт полицейскийхо̄тпа а̄тим. Ты хо̄тпа ма̄гсыл яныг кол ӯнттуӈкве о̄вылтавес, аквпа̄лэ̄т тав о̄лнэ колыл ва̄раве, мо̄т па̄лэ̄т ос полицейский участок рӯпитаӈкве паты. 2014 та̄лт я̄ӈк на̄тнэ э̄тпост кол ӯнттуӈкве а̄стлаве. Ам номсэ̄гум, то̄нт тах ма̄н палтув участковый рӯпитаӈкве ёхты. Пӯльница урыл ке ла̄вуӈкве, ле̄ккарыт тыт о̄лэ̄гыт, та̄н пуссын о̄лнэ кол о̄ньще̄гыт. Ма̄хум тыт пусмалтаӈкве ат ке ве̄рмавет, Междуреченский па̄вылн тув ке̄тавет, тот районный пӯльница рӯпиты. Матъёмас, ты яныг па̄выл ляпат о̄лэ̄в, тув мус са̄т ве̄рыста. Ань ка̄сыӈ ще̄мья такви ма̄шина о̄ньщи, тув ялуӈкве пуссын ве̄рме̄гыт. 1064 2013.11.22. Светлана РОМБАНДЕЕВА Ма̄щтыр ма̄хманув урыл. Ханты-Мансийск ӯст «Торум Маа» музейт о̄лум семинар урыл потрум э̄лаль мины. Ма̄щтыр ма̄хманув тот ма̄щтырлахтынэ̄ныл сыс ка̄тыл ва̄рум пормасаныл урыл китыгласанум. Ань ос кит ханты нэ̄кве̄г потранэ̄н ловиньтэ̄н, тэ̄н са̄сныл со̄втыт, а̄ныса̄ныт, са̄всыр хусапсовыт ва̄рсы̄г. Корлики пА̄выл нЭ̄ Жанна Александровна Хохлянкина Нижневартовский район Корлики па̄вылт 1967 та̄лт самын патыс. На̄н ань тав потре ловиньтэлы̄н: – Омам наме Раиса Петровна. Ма̄н ще̄мьявт хо̄т ня̄врам о̄лэ̄в, омавн янмалтавесӯв, а̄тяв хосат а̄тимыг е̄мтыс. Омам са̄сныл са̄всыр пормасыт ма̄щтырлы, са̄с тармыл хорамыт щурты, а̄нум тав ты ханищтастэ. Тав ань онтырса̄т нупыл нила та̄лэ ты то̄влыс. Ам нила ня̄врам о̄ньще̄гум, кит а̄ги, кит пыг. Ма̄нь а̄гим щаквщуӈкве о̄с ханищтылум, таве̄н ат та̄л. Рӯпитанэм порат, матыр по̄слэ̄гум ман яктэ̄гум, таве во̄вилум, вос сунсы, ма̄нь та̄гыл вос ханищтахты. Ам па̄квпалыӈ суп ю̄нтэ̄гум, сакныл турло̄пс ман пальсак хартэ̄гум. Ты семинарт рӯпитаӈкве а̄нум сака мӯстыс. Ам ётум ловмантем нэ̄ хо̄тпат ма̄щтырласыт. Та̄нанылн пӯмыщ о̄лыс, пӯмщалахтым рӯпитасыт. Ка̄сыӈ китхӯрум пормас ва̄рыс, акваныл тыт хӯлияныл, мо̄тананыл ос ёт выганыл. Нэ̄квет ла̄внэ̄ныл щирыл, ка̄тыл ва̄рум утаныл тыт хӯлюӈкве татем са̄ль. Тыг ос хуньт во̄вавем те, атхунь ёхтэ̄гум. Ма̄хманувн ма̄н тыт акваг тыттувесӯв, хӯлыл па̄йтыглавесӯв, исум исмитыл ос ща̄ил айтвесӯв. Сургут ӯст О̄лнэ нЭ̄ Любовь Кузьмовна Тарлина Сургут ӯст о̄лы, «Старый Сургут» нампа Историкокультурный центрыт методистыг рӯпиты. Тав тох ты потыртас: – Тыт музейт о̄луӈкве, рӯпитаӈкве а̄нум сака мӯстыс. Са̄с ёт, ля̄мйив ёт рӯпитасум, пе̄с вармалит номылматсанум. Суссум, хумус ӯльпа та̄р щё̄питаве. Тыхо̄тал ам толыг хасуӈкве Рудольф Васильевич Меровын нё̄тсум, таве̄ныл ханищтахтасум. Нила хо̄тал сыс са̄сныл ам хӯрум пормас ва̄рсум – кит ма̄нь хусапсовыг ос акв со̄вт. Хусапсовагум тай нас пӯмыщ ма̄гыс ва̄рсагум, со̄втыл ос во̄рт пил ва̄туӈкве ро̄ви. Ам Комсомолец па̄вылт самын патсум. Ты па̄выл Сургутский районт о̄лыс, ань а̄тим, нэ̄мхотьют тот ат о̄лы. Э̄лнаӈ тот хантыт, рущит, калмыкыт о̄лсыт, э̄лыл хотыл тув ке̄тыглаве̄сыт. Па̄влувт школа ос ла̄пка о̄лыс. Э̄лы ма̄ныл ёхталам хо̄тпат соссаӈ ма̄хманув хольт пуссын во̄раясыт, хӯл алыщласыт. Ще̄мьявт ма̄н нила а̄ги о̄лэ̄в – Мария, Елизавета, Нина ос ам. Омав Фёкла Яковлевна Каткалева, 78 та̄л о̄лыс. А̄тяв наме Кузьма Афанасьевич Манин. Ам тыт, Ханты-Мансийск ӯст, педучилище а̄стласум, э̄лаль Ленинград ӯст ханищтахтасум. Школат психология специальность щирыл ва̄т нупыл ат та̄л рӯпитасум. Тувыл са̄тхуйплов та̄л социальный службат рӯпитасум. Ам 1951 та̄лт самын патсум, хӯрум ня̄врам о̄ньще̄гум. Яныг а̄гим Наталя ля̄ххал тотнэ ма̄т рӯпиты. Татья а̄гим тыт, Ханты-Мансийск ӯст, округ Дума ханты депутатув Е. Д. Айпин палт нё̄тнэ нэ̄г о̄лы. Евгений пыгум ос кол ӯнттын ма̄т рӯпиты. Ты я̄тил ма̄щтыр ханты хо̄тпагув тох та потыртасы̄г. Тэ̄натэ̄н са̄в ёмас сымыӈ ла̄тыӈ ла̄ве̄в, пуста̄гыл вос о̄лэ̄г, На̄янэ̄н, О̄тыранэ̄н вос ӯргалаве̄г! 1064 2013.11.22. Александр ВЬЮТКИН Александр АНЯМОВ Олн сэ̄лнэ ханищтап. Ханты-Мансийск ӯст соссаӈ ма̄хум ма̄гсыл ханищтап ва̄рыглавес, рущ щирыл «Организация и планирование деятельности некоммерческих организаций обскоугорских народов Югры» ла̄ваве. Ты кастыл Екатеринбургныл тит ма̄ньлат а̄гииг ёхталасы̄г – Анастасия Рагулина ос Александра Лисечко. Рӯпитан проектаныл рущ ла̄тӈыл «Дорогами добра» ла̄ваве. Тэ̄н рӯпитан колэ̄н а̄гмыӈмосыӈ ос савалап ня̄врамытын нё̄ты. Ня̄врамыт пусмалтан ма̄гсыл са̄всыр щирыл олн атэ̄гыт. Та̄нанылн нё̄тнэ щирыл савалап ня̄врамыт о̄с нё̄тэ̄гыт. Ня̄врамыт та̄нти ка̄тыл ма̄щтырлан пормасаныл по̄хан тыналыяныл ос олнаныл аквпа̄лэ а̄гмыӈ ня̄врамыт пусмалтан ма̄гсыл э̄рнэ тыныӈ тэ̄рпил ёвтнэ ма̄н мыганыл. Олн сэ̄лнэ титыт мӯтраныл рущ ла̄тӈыл «Конверт сбора пожертвования» ла̄ваве. Та конвертаныл хотты кӯщаитн манос са̄в олн сэ̄лнэ ма̄т рӯпитан хо̄тпатын мыганыл. Конвертаныл ювле ёхтын ма̄гсыл, тав аквпа̄лэ̄т адресэ хансым о̄лы. Тох те̄тым, са̄в пищма ювле ат ёхталы. Хотьютаныл пищманыл ювле те̄тыс, та ма̄хум пищманыл ёхтыс ман а̄ти – та̄нти уральтыяныл. Александра ла̄выс: «Ма̄навн нё̄тмил те̄тум хо̄тпа ма̄н нэ̄мхуньт ат ёрувлылӯв. Мо̄тмо̄т ма̄т та̄наныл телевизор ос нэ̄пакыт хосыт ва̄тихал номылматыглыянӯв, янытлыянӯв». Ма̄н ётув тэ̄н хо̄тал палыт рӯпитасы̄г. Анастасия «Ма̄нь Ӯскве» ня̄врамыт ӯщлахтын ма̄н ёхталанэ̄тэ, тит та̄лыг ты е̄мтыс. Тав ва̄гтэ, тот хумус ня̄врамыт о̄лэ̄гыт. Таима̄гсыл ма̄нав ты ханищтыянэ. 1064 2013.11.22. Александр ВЬЮТКИН Мирн ва̄нэ хум такви ма̄тэ̄т сака ӯрвес. Яныг таквс э̄тпос о̄вылтахтын хо̄талт Ханты-Мансийск ӯсн ма̄ньщи мирув халт та̄ксар ма̄ньлат хумиюв Руслан Проводников ёхталас. Американыл юв Ха̄льӯсн миннэ лё̄ӈхе̄т Москва, Екатеринбург, Сургут, Нижневартовск ос Ханты-Мансийск ӯсытын хо̄иглас. «Чемпион мира» намыӈыг ань е̄мтыс, тав са̄в ма̄н ёхталаӈкв во̄ввес. Таима̄гсыл Руслан юв миннэ лё̄ӈхе̄т округ ӯсыт та̄ра минас. Ханты-Мансийск ӯсн ёхтум хо̄талэ̄т товлыӈха̄пыт иснэ колт ма̄ньлат соссаӈ ма̄хум таве хо̄тал палыт ӯрсаныл. Та хо̄тал сэ̄ӈквыӈ хо̄талыг о̄лыс. Руслан ӯсувн хӯрум щё̄с юипа̄лт ущ та ёхтыс. Тувыл таве округ губернаторув Наталья Комарова такви палтэ та̄ра ёхталаӈкв во̄выстэ. Ты кастыл телевизор хосыт Сургут, Нижневартовск ӯсыг ос Ха̄льӯс ёт акв ля̄льт потыртан ва̄рмаль ва̄рыглавес, рущ щирыл «видеомостыг» ла̄ваве. Руслан Наталья Владимировна ёт хо̄нтхатыгламе̄т такви номтанэ э̄лаль потыртасанэ. Тав са̄выӈпа̄лэ Ха̄льӯс район урыл ла̄тыӈ ла̄выс: «Тӯяг, хунь ам Саранпа̄вылн ялсум, школат ханищтахтын ня̄врамыт ёт хо̄нтхатыгласум. Тот о̄лнэ ня̄врамыт компьютерыт нупыл сака иӈ ат сунсэ̄гыт, аквписыг кон ха̄йтыгтэ̄гыт. Ханищтахтын коланыл по̄хат ме̄чикыл ёнгын ёмас ма̄ о̄ньще̄гыт, тот ме̄чик са̄ӈвхим порге̄гыт. Тэ̄лы порат ос ханищтахтын коланылт о̄лнэ спортзалыт ёнге̄гыт. Ня̄врамыт ма̄гсыл па̄вланылт каснэ кол ӯнттуӈкв э̄ри. То̄нт та̄н та̄нти пе̄рие̄гыт, маныр э̄лаль о̄лнэ ма̄гсыл та̄нанылн э̄ри. Пуста̄гыл о̄лнэ ё̄р ня̄враманув – та̄н ма̄н намув э̄лаль тотуӈкв патыяныл». Наталья Владимировна ювлела̄выс: «Ма̄н округувт бокс касылын ханищтахтын ма̄ньлат ма̄хум ка̄сащим ялантэ̄гыт. Ма̄н боксёранув Россия мир халт каснэ̄ныл порат аквписыг но̄хпатыглэ̄гыт. Боксын щё̄питахтын ма̄хум – нэ̄матарыл ат пилнэ ос ма̄к ё̄р хо̄тпат. 2015 та̄л оигпанэ̄тэ мус Ха̄льӯст бокс касылын ханищтахтын яныг кол ӯнттаве. Касыл ма̄гсыл э̄рнэ пормасыт пуссын округ па̄лыл тах ёвтавет». Тувыл губернаторув телевизор хосыт потыртан ма̄хманэ титыгласанэ: «Йильпииг ӯнттын каснэ колув манырсыр намыл пинылӯв? » Ха̄льӯс район тармыл кӯщаиг о̄лнэ нэ̄ Любовь Коротун та̄ра ла̄выс: «Наталья Владимировна, ты урыл хоса номсахтуӈкв ат э̄ри. Ам номсэ̄гум, та йильпи каснэ кол «Руслан Проводников» намыл пинуӈкв э̄ри». Та юипа̄лт Сургут ос Нижневартовск ӯсыгт бокс касылын ня̄врамыт ханищтан ма̄хмыт Русланын э̄лаль ёмщакв каснэ ла̄тӈыт ла̄всыт. Мо̄тыт хо̄талт Руслан ӯст о̄лнэ соссаӈ ма̄хум ёт «Миснэ» гостиницат тэ̄нэ колт акванхо̄нтхатыглас. Аквъёт пуссын налыман ляпатем хо̄тпа Руслан ёт потыртаӈкв пасан ва̄тан атхатыгласыт. Тув ёхталам яныгпа̄ла ма̄ньщи ос ханты ма̄хумн ма̄ньлат хумув са̄в янытлан ла̄тӈыл ла̄ввес. Э̄лаль аквта щирыл каснэ ё̄р вос о̄ньщи. Мария Сергеевна Мерова такви ю̄нтум ма̄ньщи супе Руслан Проводниковын мӯйлуптастэ. Руслан ла̄выс: «Ам ты ёмас, хорамыӈ ма̄ньщи суп акваг масыглаӈкв патылум». Тувыл Светлана Динисламова такви ма̄ньщи ос рущ ла̄тӈыл нэ̄пакн хансум стиханэ ос э̄рганэ Русланын мӯйлуптасанэ. Русланын тамле мӯйлупса мӯстыс. Хум ла̄тӈанэ ты: «Тыгыл хотты стих тах ханищтаӈкв э̄ри». 1064 2013.11.22. Людмила ТЕТКИНА Тыг са̄в э̄лумхо̄лас мӯйлуӈкве ёхталы. Ты э̄тпос 14-16 хо̄талытт Ханты-Мансийск ӯст «ЮграТур – 2013» нампа суссылтап рӯпитас. Округ янытыл общинат ос са̄в мо̄т организацият рӯпитан ма̄хум тыг ёхталасыт. Выставкат та̄нки рӯпатаныл урыл потыртасыт ос са̄всыр сувенирыт тыналасыт. Та̄н суссылтапын ёхталам ма̄хум та̄нки палтаныл мӯйлуӈкве во̄всаныл. Тамле суссылтап ка̄сыӈ та̄л таима̄гсыл ва̄рыглаве, са̄внув ма̄хум туризм щирыл вос рӯпитэ̄гыт, то̄нт са̄внув мӯй хо̄тпат тыг ёхталаӈкве патэ̄гыт. Ань округ Правительство кӯщаит туризм та̄рапаттым о̄ньщияныл. Тамле тэ̄ла щирыл рӯпитаӈкве ка̄сащан хо̄тпат та̄нки проектнэ̄паканыл грантолн ма̄гсыл ке̄туӈкве ве̄рме̄гыт. Соссаӈ общинат этнотуризм щирыл рӯпитаӈкве о̄с о̄вылтахтасыт, мӯй ма̄хум та̄нки палтаныл мӯйлуӈкве во̄виньта̄лыяныл. Та̄н ка̄сыӈ та̄л та̄нки нэ̄паканыл грантолн винэ ма̄гсыл ке̄тыглыяныл. Ты та̄л касыл щирыл но̄хпатум общинат ос организацият янытлаӈкве Наталья Комарова, губернаторув, ёхталас. «Самутнёл» Белоярский районт рӯпитан соссаӈ община «Развитие инфраструктуры этнотуризма» номинацият но̄хпатыс. Ты коныпал Ханты-Мансийский районт рӯпитан «Обь» община грантолныл майвес. «ЮграМегаТур» нампа компания ня̄врамыт ос ще̄мьят ӯщлахтын ма̄гсыл олныл тах та̄ставе. Нижневартовск ӯст «Спутник» нампа турфирма о̄с грантолныл майвес. Та̄н мӯй ма̄хум Нижневартовский районт соссаӈ ще̄мьят о̄лнэ пе̄с йис ма̄н тотыглыяныл. Ханты-Мансийск ӯст о̄лнэ предпринимательхо̄тпа Александр Кахнович са̄всыр сувенирыт ва̄рнэ ма̄гсыл олныл майвес. «Медиахолдинг» нампа компания касылт о̄с но̄хпатыс. Округ яныг кӯщай нэ̄ ты компаният пуссын янытласанэ. Ма̄хум э̄лыпа̄лт Наталья Комарова ла̄выс: «Тыхо̄тал но̄хпатум хо̄тпат пуссын яныг рӯпата ва̄ре̄гыт, ма̄н палтув мӯй ма̄хум во̄ве̄гыт. Ам ма̄ янытыл яласым ос тот о̄лнэ мир ма̄н палтув мӯйлуӈкве акваг во̄виянум. Акв щёс тыг ёхталэ̄гыт ке, та̄н пуссын ма̄н о̄лнэ ма̄вн ва̄тихалнув ёхталаӈкве тах патэ̄гыт. Пе̄с йис та̄гыл ты ма̄т соссаӈ ма̄хум о̄лэ̄гыт, та̄н культурал, о̄лупсал са̄в ма̄хум пӯмщалахтэ̄гыт ос тыг ёхталаӈкве ка̄саще̄гыт». Кӯщаит ла̄внэ̄ныл щирыл, ювле хультум та̄лт ма̄н округувн 450 со̄тыра э̄лумхо̄лас мӯйлуӈкве ёхталас. Ань ты та̄л лов э̄тпос сыс ос аквтаса̄вит хо̄тпа соссаӈ ма̄хум о̄лупсал пӯмщалахтуӈкве, хӯл алыщлаӈкве, во̄раяӈкве ос нё̄рыт сунсыглаӈкве ёхталасыт. Аквта порат ка̄ркамыг рӯпитан ма̄хум о̄с са̄всыр янытлан нэ̄пакыл майве̄сыт. Та̄н халанылт Анатолий Кауртаев, Нижневартовский районт «Югра лылыеп» организация отделениятэ̄т рӯпитан о̄йка, янытлавес. Тав лов арыгкем та̄л ювле хультум порат соссаӈ ма̄хум халт ма̄ньха̄пыл каснэ ва̄рмаль ва̄руӈкве номылматас. Ань ка̄сыӈ та̄л округ янытыл ма̄ньщит, хантыт ос ё̄рныт Нефтеюганский районын акванатхатыглэ̄гыт. Анатолий Кауртаев такви ма̄хманэ ёт о̄с ка̄сыӈ та̄л тот касы. Ань ты та̄л суссылтапын Болгария, Словакия, Чешская республика ос мо̄т хо̄н ма̄ныл, ма̄хум та̄нки суссылтапаныл тыг о̄с тотыгласаныл. Тыт о̄лнэ мир та̄нки палтаныл мӯйлуӈкве во̄всаныл. 1064 2013.11.22. Александр ВЬЮТКИН Та̄н ё̄раныл а̄рталасаныл. Яныг таквс э̄тпост Сургутский район Русскинские па̄вылт ханты ма̄хум халт «Нюлтахли» акванпӯхтым пе̄рщин касыл нампа ва̄рыглавес. Тох тав ханты ла̄тӈыл ла̄ваве, ма̄ньщи щирыл нас «Пе̄рщиме̄н» паты. Хуньт хосат аквтох соссаӈ ма̄хум аквписыг ё̄раныл а̄рталым пе̄рщисыт. Таима̄гсыл физкультура ос спорт Департаментыт рӯпитан кӯщаитын ты соссаӈ мир касылув мо̄лты но̄хялтуптаӈкв номылматвес. Ты пе̄рщин касыл щирыл та̄н та̄л сыс рӯпитаманыл юипа̄лт ма̄нь таквс э̄тпост «Нюлтахли» Санкт-Петербург ӯсн суссылтым тотыгласаныл. Тот са̄всыр каснэ ма̄хмытын ма̄н соссаӈ мир пе̄рщилув мӯстыс. Ань э̄лаль ма̄ньщит ос хантыт халт ялтуптаӈкв таве номсаве. Хум хо̄тпат Русскинские па̄вылт халанылт ё̄рыл а̄рталахтасыт, касыл округувт щар о̄выл щёс ва̄рыглавес. Пе̄рщин э̄лыпа̄лт па̄выл миркол хум Александр Сытов ла̄выс: «Хунь ты касыл ма̄н па̄влувт ва̄руӈкве щё̄питахтасув, па̄влыӈ ма̄хманув хотща̄гтсыт. Ань ты юипа̄лт округув янытыл ты касылув э̄лаль ва̄рыглаӈкв патаве. Яныг пӯмащипа ла̄тыӈ ам касыл щё̄питан ма̄хмытын ла̄ве̄гум». Губернаторув ва̄ӈын хо̄тпатэ палт рӯпитан советникхум Михаил Савченко о̄с ла̄выс: «Соссаӈ ма̄хум ма̄гсыл ты касыл иӈ акв ёмас, э̄рнэ пӯмащ. Халынт ё̄рыл а̄рталахтын ва̄рмаль ма̄гыс на̄нан маныр нё̄тмил э̄рмыглы те – нё̄тэ̄в». Анатолий Тедорадзе, судьяг о̄лнэ хум, ла̄тыӈ ла̄вуӈкв во̄виньта̄лвес. Анатолий каснэ ма̄хум нупыл сунсым рӯпитас, ань хотьютаныл ёрнуве манос ва̄гталнуве – пе̄рияс. Тав ла̄выс: «Ты «Нюлтахли» касыл ма̄н округувт о̄лнэ яныгпа̄ла соссаӈ ма̄хум халт хо̄нтыслӯв. Ань ты пе̄рщил хумус пе̄с порат ма̄хманув пе̄рщисыт, таве тащирыл ты ва̄рыслӯв. Округув о̄лнэ ма̄тэ яныг, таима̄гсыл ка̄сыӈ па̄вылт та̄нти щирыл пе̄рщисыт. Ань тыт Русскинские па̄вылт каснэ ма̄т ла̄гыл нёлыл хо̄тпа ёлпаттуӈкве ва̄ӈкырлым щар ат ро̄ви. Ка̄танын мо̄т хум сыспа̄лн акванпувим ё̄р ва̄гыл пе̄рщуӈкв э̄ри. Ам касуӈкве ёхтум ма̄хмытын яныг пӯмащипа ла̄ве̄гум. Халынт ла̄палахтта̄л ос сакватахтын та̄л пе̄рще̄н». «Нюлтахли» пе̄рщин ма̄н хус хо̄тпа ёхталасыт. Когалым, Нижнесортымский, Сургут, Ханты-Мансийск ӯсытныл ос Русскинские па̄вылныл ма̄хум о̄лсыт. Та̄н халанылт щар яныг хум Алексей Русскин касыс, тав Русскинские па̄вылт о̄лы. Ты та̄л таве̄н атпан нупыл онтолов та̄л то̄влыс. Пе̄рщин э̄лыпа̄лт ве̄скалаве̄сыт ос та̄рвитаныл щирыл ла̄кквауртве̄сыт. Кӯпнитнув ма̄хум та̄рвитаныл 72 кила мус. Мо̄таныт ос щар та̄рвитыӈ хумияныл 112 кила са̄вит о̄лыс. О̄влэ̄т ма̄хум халанылт пе̄рщисыт. Та̄н щё̄с арыгтем капыртасыт. Тувыл та̄рвитыӈнув ма̄хум касуӈкв пӯхтыгласыт. Та̄н о̄с щё̄стем пе̄рщим повара̄лсыт. Аквты та̄рвитпа хумыт пе̄рщуманыл юипа̄лт «Абсолютный» нампа ё̄раныл а̄рталан ва̄рмаль о̄вылта̄лвес. Хӯрмит нампа касылт ве̄скалахтын та̄л пе̄рщисыт. Ханты ма̄хум халт щар ма̄к ё̄р хум Мултанов Виталий, тав Нижнесортымский па̄вылт о̄лы. Тав ётэ касум ма̄хманэ пуссын ёлпаттысанэ. Каснэ ма̄хум ё̄раныл сунсум хум Анатолий Северьясович касыл оигпан порат ла̄выс: «Ам номсэ̄гум, ма̄н на̄н ётын хосан ла̄кква ат минэ̄в. Щё̄питахтэ̄н, пуста̄гыл о̄лэ̄н». Тащирыл ты соссаӈ мир халт «Пе̄рщиме̄н» нампа щар о̄выл пе̄рщил минас. На̄н о̄с халынт пе̄рщим, пуста̄гыл о̄лэ̄н. 1064 2013.11.22. Тамара МЕРОВА Хурит хосыт о̄лупса ва̄глӯв. Мо̄лалнув ам Удмуртияныл ёхтысум. Ма̄н тув хуритныл ва̄рим суссылтапын во̄виньта̄лвесӯв. Тот Ольга Чичирко, «Увинская газета» нампа колт рӯпитан нэ̄, такви по̄слум хуриянэ ма̄хумн суссылтасанэ. Тав ля̄ххалыт хаснэ хо̄тпаг ханищтахтас ос мо̄лты та̄лт рӯпататэ ёмащакв ва̄рнэ ма̄гыс «Заслуженный журналист Удмуртской республики» намыл майвес. Тав лов та̄л ювле хультум пораке̄мт хурит по̄слын ва̄рмалил пӯмщалахтуӈкве патыс. Нэ̄ са̄всыр ля̄ххалыт, потрыт газетан хансы ос такви по̄слум хуриянэ тув ва̄риянэ. Ма̄хумн тав хуриянэ сака мӯстэ̄гыт. Ань са̄всыр ма̄т по̄слум хуриянэ тав Ува па̄выл ма̄хманэ̄н суссылтаӈкве о̄с акванатсанэ. Суссылтап «Маленькие истории большой России» намаястэ. Тав краеведческий музеит ва̄рвес ос ты та̄л оигпан мус тах рӯпиты ос тувыл мо̄т ма̄н тотыглаӈкве патаве. Тот ань яныгса̄ткем хуриянэ̄т са̄всыр ӯсыӈ манос па̄влыӈ ма̄хум по̄слым о̄лэ̄гыт. Ма̄н ханты, ма̄ньщи ос ё̄рн ма̄хманув ма̄нки о̄щнэ хорамыӈ маснутыл масхатым о̄с тот ка̄саласанӯв. Ольга мо̄лты та̄л Ханты-Мансийск ӯсн ос Шеркалы па̄вылн, тувыл ты таквсы Салехард ӯсн финноугор ма̄хум хурит по̄слын ханищтапын ёхталас. Ты коныпал Нумто тӯр ва̄тат ханты ос ё̄рн ма̄хум пӯри ва̄рнэ порат о̄с тув ялыс. Ты яласам ма̄нэ̄т по̄слум хуриянэ такем нё̄тнэ̄г ос пӯмщиг сусхатэ̄гыт. Суссылтапын ёхталам мӯй хо̄тпат пуссын тыи сака пӯмщаласаныл ос мо̄т са̄всыр ва̄рмалит урыл ма̄нав о̄с китыгласаныл. То̄ват ханты ос ма̄ньщи хо̄тпат щар ат ва̄щиньтасыт, тувыл ма̄н я̄нас кит мирыг о̄лнэ̄в урыл ущты та̄рапаттысаныл. Ма̄н о̄с та̄н о̄лупсаныл ты хурит щирыл ка̄саласлӯв. Тув ёхталам мӯй хо̄тпат ты хурит хосыт са̄всыр мо̄т мирыт лӯима̄т хумус о̄лэ̄гыт, са̄в ва̄ӈкве патсыт. Светлана Сунцова ос Надежда Воронцова ищхӣпыӈ ут хосыт ты суссылтап урыл сака ёмас кина щё̄питасы̄г. Владимир Головин, Ува па̄влыӈ кӯщай, тувыл Удмуртият са̄всыр газетат рӯпитан хо̄тпат, финноугорский ма̄ныл ёхталам мӯй хо̄тпат, юртанэ Ольга по̄слум пӯмыщ хуриянэ ма̄гыс са̄в сымыӈ ла̄тӈыл ла̄ввес. Ольга Чичирко оматэ номтэ о̄с ёмасыг е̄мтыс, тав потырты, а̄гитэ мо̄лал ля̄выльтта̄лытэ. Тав ман ат та̄л журналистыг наска̄ссыг ханищтахтас, ань мо̄тмо̄т ма̄т яласы ос тулё̄влыл фотоаппарат кнопочкатэ туп понюмта̄лытэ, тувыл маныр? Ань Галина Георгиевна а̄гитэ ма̄к рӯпататэ ущты торгамтастэ ос аквтох ёмщакв рӯпитаӈкве ла̄выстэ. 1064 2013.11.22. Тамара МЕРОВА (MNS) Р. Решетникова (RUS) Ханты газета ва̄рум о̄йка. Григорий Дмитриевич Лазарев о̄лыс ке, 2012 та̄лт 95 та̄лэ то̄влынув. Тав о̄лум та̄ланэ ос рӯпататэ ма̄хумн вос номавет, наме янытлан ма̄гыс «Григорий Лазарев. Страницы жизни и творчества» нэ̄пак та̄ратавес. Ты э̄лыпа̄лт Эдуард Нестеров проект хансыс ос тувыл округ Правительство па̄лыл грантолныл майвес. Нэ̄пакн хансым потрыт С. Н. Нестерован, С. П. Берендееван, М. А. Лапинан ос Ф. М. Лельхован щё̄питаве̄сыт. Григорий Лазарев Большой Атлым па̄вылт самын патыс. Ма̄нь та̄гыл ща̄няге̄на̄щаге̄н хӯл алыщлаӈкве, во̄раяӈкве тотыглавес. Школа а̄стламе юипа̄лт Остяко-Вогульск (ань Ханты-Мансийск) ӯсн педучилищан ханищтахтуӈкве минас. Пыг тот ты потрыт, стихыт хансуӈкве патыс. Тувыл В. Сенкевичин ос И. Гудковын, кит ханищтан хо̄тпагн, лӯима̄ ма̄хум творчество кружокын во̄ввес. Ётыл «Ханты-Манчи Шоп (Шой)» газетат литературный кружок ва̄рвес, тав такви хансум потранэ тув майлысанэ. Ос 1935 та̄лныл ты газетат тав стиханэ ханты ос рущ ла̄тӈыл хасве̄сыт. Училище а̄стламе юипа̄лт тав акв та̄л школат рӯпитас. Тувыл рӯпататэ ка̄ркамыг, ве̄щкатыг ва̄рме ма̄гыс, Григорий Лазарев Свердловский партийный школан э̄лаль ханищтахтуӈкве ке̄твес. Ханты-Мансийскан ювле ёхтуме порат Григорий Дмитриевич «Стахановец» нампа газетат рӯпитас. Ос 1939 та̄лт тав «Остяко-Вогульская правда» газетат рущ ла̄тӈыл хансым ля̄ххалыт ханты ла̄тӈыг толмащлаӈкве во̄ввес. Тот акв ло̄пс ханты ла̄тӈыл хасвес. То̄нт хум я̄нас ханты газета ва̄руӈкве номылматас ос таима̄гыс са̄всыр э̄рнэ нэ̄пакыт щё̄питаӈкве патыс. 1957 та̄лт Григорий Лазарев «Ленин патн хуват» («По ленинскому пути») нампа ханты газетат кӯщаиг паттувес ос тот рӯпитас. Тав 1973 та̄лт пенсиян минас ос тыгыл Конотоп, ётыл Омск ӯсын ва̄нтлыс. 1979 та̄лт ма̄нь таквс э̄тпос хусыт щислат а̄тимыг е̄мтыс. Ань нэ̄пак щё̄питан нэ̄т Г. Д. Лазарев о̄лум та̄ланэ о̄вылтыт ос тав ётэ рӯпитам манос таве ва̄м хо̄тпат потраныл акванатсаныл. Тот тав о̄выл стиханэ, потранэ, мо̄йтанэ, газетан хансыглам то̄ва ля̄ххаланэ ва̄рим о̄лэ̄гыт. Тувыл о̄йка хо̄т яныгмас, хоты ма̄т ханищтахтас ос маныр ва̄рыс, тыи пуссын «Основоположник» нампа глават ма̄хум ловиньтаӈкве ве̄рме̄гыт. Ханты ма̄хум литератураныл Г. Д. Лазаревын хансуӈкве о̄вылтавес. Ты коныпал тав ханты ла̄тӈыл я̄нас газета ва̄рыс, таима̄гыс тав «основоположникыг» ла̄ваве. М. К. Волдина тав юипа̄лэ̄т ты газетат кӯщаиг рӯпитас, э̄ква Григорий Дмитриевич урыл са̄в ёмас ла̄тыӈ ла̄выс. А. С. Глухих тав уре̄т «Новости Югры» рущ газетат потыр о̄с хансыглас. Ань ты потрыг сас нэ̄пакт 208-227 ло̄псыт хансым о̄лэ̄г. Тувыл Е. С. Роговер, педагогический наукат доктор нам о̄щнэ хо̄тпа, тав театр ос литература хосыт са̄всыр мирыт культураныл ханищтас. Ты о̄йка Григорий Лазарев творчестватэ мӯсхалыг та̄рапаттыстэ ос ты о̄вылтыт методический рӯпата хансыс. Григорий Дмитриевич хо̄нтлан ма̄н о̄с ялыс. Тав 1941 та̄л ма̄нь таквс э̄тпос атхуйплов хо̄талт хо̄нтлуӈкве тотвес. 83 полкыт лусытам ма̄хманэ ёт Сталинград ӯсныл Прага (Чехословакия ма̄ яныг ӯсэ) мус ёхтысыт. Юв ёхтуме̄т о̄йка са̄в щёс разведкан аквъёт ялантам юртанэ номылматыгла̄лыс. Хо̄нт оигпам юипа̄лт ла̄кквамингаласыт, та̄нки халанылт хоттыпсыт. Тувыл акв юрт хумитэ, Миша Шилин, военкомат хосыт таве хо̄нтме. Михаил то̄нт Алтай ма̄н целинан рӯпитаӈкве минам, тот о̄лум. Ос хо̄нт юипа̄лт хунь ва̄т та̄л ювле хультыс, тав ты юртэ ёт Украинат хо̄нтхатыглас. Григорий Дмитриевич «Орден Красной Звезды», «Орден Отечественной войны II степени», ты коныпал тав «За оборону Сталинграда», «За победу над Германией в Великой Отечественной войне 1941-1945 гг. » ме̄талит о̄ньщас. Р. Решетникова рущ ла̄тӈыл хансум потре ма̄ньщи ла̄тӈыг Т. МЕРОВАН толмащлавес. 1064 2013.11.22. Николай Иванович ХОЗУМОВ Светлана РОМБАНДЕЕВА Ё̄рныт ёт хо̄нтлум пыг. Акв хум яга̄гитэ̄нтыл тэ̄нттетэ̄н о̄лсы̄г. Такви нэ̄ ат о̄ньщис, яга̄гитэ о̄с о̄йка ат о̄ньщис. То̄рум са̄лыт, О̄тыр са̄лыт о̄щсы̄г, ӯрсы̄г. Во̄рт о̄лэ̄г, са̄в са̄лы о̄щсы̄г. Хӯрум сун са̄вит са̄лы о̄щсы̄г, са̄кваляк сампа хӯрум хо̄птыт, хансаӈ, хорамыӈ хо̄птыт мутраӈыт о̄лсыт. Аквмат хо̄тал ща̄ркыл юв ёхтыгпасыт, О̄тыраныл мувылтахи ё̄хсыт, самвитаныл пуссын во̄ртыпал нупыл овтмыт, ла̄ве̄гыт: – О̄тыракве, О̄тыракве, тыхо̄талхӯрмит хо̄тал ма̄н тах ё̄рн хо̄нын ты ёхтаве̄в, хотталь ое̄в ман тӯйтхатэ̄в. Тав са̄лыянэ̄н ат хӯнтлы, та̄н нупланыл ла̄ви: – Ул хурахлэ̄н, вос ёхтэ̄гыт. Тамле потыр тотсыт о̄тыранылн, тувыл о̄с ща̄ркын та минасыт. Хӯрмит хо̄талыг е̄мтыс, ёсаге массаге, са̄лыянэ уральтаӈкве ща̄ркын минас, ёвтня̄л ёт ат вис. Яга̄гитэ такте̄т юн хультыс. А̄мпыт хорталтахтэ̄гыт, нэ̄ конква̄лы, хӯрум ё̄рн хо̄ла ты ёхтыгпасыт, со̄ль, ё̄рн хо̄нын ёхтуве̄сыт. Яты, маныр ва̄ри, лю̄ньщимтыстым та ё̄мыгты. Ё̄рнытын китыглаве: – А̄пщин хоталь минас? – Такви тэ̄латэ̄т хотталь во̄рн минас ё̄мыгтаӈкве. Таит ла̄ве̄гыт: – Колын паттэ̄лын, сунанын щё̄питэ̄н, наӈын ёттотылӯв. Нэ̄ тувыл рохтыс, са̄лыянэколанэ та вивет, ягпыге хо̄т тах алаве. Лю̄ньщимтыстым та ё̄мыгты ща̄рк лё̄хт, са̄лыянэ̄н тотыглым лё̄хт. Сытамыл таит ва̄та̄л ня̄ланэёвтанэ вис, пӯтин ма̄гсанэ, та лё̄х ва̄тан тотсанэ, йӣвн тув но̄хтагатасанэ. Номсы, а̄пщитэ ёхты тах колэ уральтаӈкве, ка̄салыянэ. Тэ̄нутыл о̄с пиныстэ хӯрыгсовн, акв по̄хан тагатасанэ, такви лю̄ньщи, ла̄ви: – Тах э̄рыӈ хо̄нтыянэ, тэ̄ӈкве тахмаи, тэ̄ганэ. Тувыл маныр, колэ паттувес, сунанэ та̄лттуве̄сыт. Яты, ща̄ркын минасыт, са̄лыт па̄ланыл мантем хо̄нтсыт, висыт, та хӯрум хо̄пт о̄с вуйве̄сыт. Хотьют ве̄рмысыт, та висаныл, хотьют ат ве̄рмысыт, хо̄та̄ти та хультсыт. Пуссын хунь ве̄рмавет ёт виӈкве, сака са̄в. Са̄лыт пувсыт, нэ̄ а̄насанэ акванатсанэ, та̄лтхатас, лю̄ньщимтыстым са̄лыӈлӯтыӈ та̄гыл та нёвумтаптуве̄сыт, та тотавет. Хоса ман ва̄ти минасыт, о̄лнэ ма̄нанылн ёхтысыт. Сунаныл, коланыл тӯщтысыт, са̄лыяныл та̄ртысаныл, тот та о̄лмыгтасыт. Акв осыӈ, яныг пукип ё̄рынрищ кӯщаиг о̄лы, тав а̄ги ё̄рыл нэ̄г вистэ. Тувыл хӯрум хо̄пт урыл ла̄ви: – Ты са̄лыт тах ам о̄ньщуӈкве патыянум. Щёлыӈыг е̄мтсыт, са̄лы алэ̄гыт, тэ̄пъялэ̄гытманаре̄гыт. Аквмат хо̄тал та кӯщаиг о̄лнэ утаныл ла̄ви: – Мощ касэ̄в, хотьютув но̄хпаты. Ты хӯрум хо̄пт ам пувиянум, ке̄риянум, ам та̄нанылт яласэ̄гум, на̄н ос мо̄таныт пе̄рие̄н. Са̄лыт пувве̄сыт, ке̄рве̄сыт, та̄н ань мӯтраӈыт, та сӯлттэ̄гыт, яласэ̄гыт. Ань хум (а̄ги ягпыге) ялыялы, юв ёхты, колэ ос са̄лыянэ а̄тимыт, колэ паттыма, та̄тыл колъёре о̄лы. Колъёре̄т лю̄ньщимтыстым та ё̄мыгты, номса̄лы: «Са̄кваляк сампа хӯрум хо̄птум матырпищ тыг вос ёхтынувыт». Са̄лыт та касэ̄гыт, сӯлттэ̄гыт, ань хунь О̄тыраныл тох номылматас, та̄н ха̄йтнэ̄ныл щирыл илттыг ювле ё̄ӈхыгпасыт, ань ё̄рн о̄йка капай сунэ̄ныл э̄л та рагатас. Ос хӯрум хо̄пт тотым лё̄ӈханыл хосыт О̄тыраныл палт та тахасыт, та нуйхатэ̄гыт. Аквматэ̄ртын О̄тыраныл палт лылтым тув та куратасыт, не̄лманыл ӯлщ ӯлтта патмыт. Ань са̄лыянэхо̄птанэ тав палтэ ёхтыгпасыт, хум ща̄гтыс. Ня̄ланэёвтанэ хо̄нтсанэ ос йим о̄вланыл хо̄т о̄лэ̄гыт, та минэ̄гыт са̄лыянэ. Та палыт ма̄, э̄тимаӈкве ты патыс. Тув колн ёхтэ̄гыт, са̄лыт О̄тыраныл нупыл ла̄ве̄гыт: – Тыт ты о̄лэ̄гыт. Тав тувыл нёлква̄лге ёл ат нэ̄гыстэ, ёлпиныстэ, суве о̄с пиныстэ та̄лматан щирыл. Та̄н мӯтраӈ са̄лыт, тав та̄лэ хоталь тахе̄гыт. Тувыл хум сунэ̄ныл ёлва̄глыс, ня̄ланэёвтанэ вис, кол по̄хе̄н лаквхатас, хӯнтлы. Юн мӯйлэ̄гыт, ае̄гыт ман матаре̄гыт, суяныл суйты. Тав ла̄щлакв совъя касаил па̄лыгяктыстэ, ма̄нь халыл сунсы ювле, таса̄вит са̄лы нё̄выль, та маныр па̄йтэ̄гыт. Та яныг пукип ё̄рн о̄йка хо̄нысо̄рыл хуи, лылты, со̄рыг ва̄рим повара̄лы, ань со̄рге сыт, та маныр. Щар тав торгылэ тыт ты хуи о̄йка. Тувыл та асныл ня̄ланэ нарыгтасанэ, хартсанэ, пукит та по̄хсатаптытэ ня̄лыл, кивтасаптытэ, хо̄ла та холас. Тувыл ха̄йтыс са̄лыянэ палт, сунэ̄н та̄лматас, са̄лыянэ̄н аквтув та нуясаптувес. Кӯщай о̄йка алыстэ, та юипа̄лт ё̄рыг е̄мтыс. Ань кит хо̄ла хультсы̄г. Ёты хо̄тал тув ос са̄лыянэ̄т минас, та утыг о̄с ня̄лыл па̄хвтысаге, щамакивтасаптысаге. Увщитэ̄нтыл колэ̄н паттысы̄г, пормасанэ̄н сунын та̄лттысанэ̄н, та нёвумтасы̄г. Са̄лыянэ̄н мӯтраӈыт, та̄нти та нёвумтасыт о̄лум ма̄нанылн. Та щирыл та аласанэ пуссын ё̄рн хо̄лат. Увщитэ̄нтыл ань та о̄лэ̄г, щуне̄гхӯлэ̄г. Ты мо̄йт Николай Иванович Хозумов тав мо̄йтыстэ, нэ̄пакын С. РОМБАНДЕЕВАН хасвес. 1065 2013.12.06. Николай МЕРОВ Суссылтап щё̄пита̄лвес. Яныг таквс э̄тпос 21-22 хо̄талыгт Ханты-Мансийск ӯст ханищтап щирыл выставка ва̄рыглавес. Рущ ла̄тӈыл ты ва̄рмаль «Образование Югры – 2013.Непрерывное образование» ла̄ввес. Округ губернаторув Наталья Комарова тув о̄с ёхталас. Ань ханищтан хо̄тпат ос ня̄врамыт са̄всыр пӯмащ ва̄рмаль ва̄ре̄гыт. Ка̄сыӈ та̄л йильпи проектыт щё̄питэ̄гыт. Тыима̄гыс ань ва̄рыглым суссылтапт яныг ос ма̄нь школатт рӯпитан ма̄хум, дошкольный образование э̄лаль тотнэ хо̄тпат та̄нки проектаныл суссылтасыт. Пуссын аквъёт са̄тлов арыгкем учреждение та̄нки рӯпатаныл суссылтаӈкве ёхталасыт. Ань акушерыт, фармацевтыт ос ма̄нь ле̄ккарыт манарыл ханищтавет, ты ищхӣпыӈ утыт яныг кӯщаин суссылтаве̄сыт. Тувыл Нижневартовск ӯс ня̄врамыт ос ханищтан хо̄тпат «Робототехника в образовании» нампа проект суссылтасыт. Та̄н са̄всыр военный техника ос мо̄т э̄рнэ тэ̄ла ва̄рсыт. Ты рӯпатаныл ма̄гыс кӯщаювн янытлаве̄сыт. Ты коныпал Наталья Комарова ос мо̄т са̄в рӯпатат суссанэ. Тав ёхталам ма̄хум пуссын янытласанэ. Ос ла̄выс, мо̄тынтыг ты выставка тох ва̄руӈкве э̄ри, ты технология хумус рӯпиты, сунсуӈкве ёхталан хо̄тпат та̄нки уральтаӈкве вос ве̄рмысаныл. 1065 2013.12.06. Александр ВЬЮТКИН Ка̄сыӈ таквс аквты порат. Консультативный комитетт рӯпитан финноугорский хо̄тпат яныг таквс э̄тпос ва̄т нупыл хо̄тыт хо̄талт Москва ӯст заседаниен атхатыгласыт. Ты порат ва̄рыглым заседание «промежуточныиг» ла̄ваве. Ань тав Москва ӯст саран ма̄хум представительство колт ва̄рыглавес. Акв хо̄тал минас. Ты кастыл халувт потыртан ма̄гсыл са̄в ма̄ныл, са̄всыр ла̄тӈыл потыртан мир тув ёхталас. Аквъёт пуссын ва̄т нупыл ат хо̄тпа о̄лыс. Ёхталам ма̄хум ма̄ янытыл о̄лнэ рӯт мирыт янытлан ос юртыӈыщ о̄лнэ урыл потыртасыт. Консультативный комитет мо̄т хо̄н ла̄тӈыл потыртан Венгрия, Эстония, Финляндия мирыт ёт рӯпиты. Рӯпатаныл акваннё̄тхатым ва̄рияныл. Са̄в тэ̄лат урыл потыртан ма̄гсыл Москва ӯсн ёхталасыт: «Финляндия-Россия» обществат рӯпитан Генеральный секретарь Мерья Ханнус, Эстонияныл Андрес Хейнапуу, Эстония ма̄т Тарту ӯс университетт ма̄ньщи ос ханты ла̄тӈыг ханищтан хум Тыну Сейлентхаль оc Венгрияныл Д. Нановски. Ма̄ янытыл о̄лнэ ма̄хум ма̄гсыл 2014 та̄л сӯкыр э̄тпос 22-24 хо̄таланэ̄т Америка ма̄т Нью-Йорк ӯст конференция тах ва̄раве. Тот мо̄т хо̄н ма̄т «Ма̄ янытыл о̄лнэ соссаӈ ма̄хум э̄лаль о̄лнэ хо̄талыт урыл» потыртаӈкв патэ̄гыт. Та урыл э̄лаль мо̄т щёс тӯя̄г ма̄ньполь э̄тпост акванатхатыглахтанэ̄в порат потыртаӈкв ла̄вхатсӯв. 1065 2013.12.06. Валентина УЗЕЛЬ Округ кӯщаюв ля̄ххал тотнэ ма̄хум ёт потыртас. Ювле хультум э̄тпост Ханты-Мансийск ӯсувт журналистма̄хум акванатыглаве̄сыт. О̄выл хо̄тал а̄лпыл та̄н ётаныл потыртан ма̄гсыл Наталья Комарова губернаторув ёхталас. Акв щё̄с арыгтем сыс тав са̄всыр ва̄рмалит урыл титыглавес. Ань округувт о̄лнэ ма̄хум ма̄гыс о̄лнэ колыт ӯнттын ва̄рмаль ос субсидияолн минэ ва̄рмаль щар ма̄к яныг тэ̄лаг о̄лэ̄г. Сургут ӯсныл ёхталам журналистхо̄тпатн кӯщай нэ̄ ты урыл титыглавес. Та̄н ӯсанылт сака са̄в о̄лнэ кол ӯнттаве. Ос са̄в та̄л ӯст о̄лнэ ма̄хум аквтох э̄лаль пе̄с колытт манос балокытт о̄лэ̄гыт. Йильпи колт акв метра ма̄гыс 90 со̄тыра арыгтем солко̄ви ойтуӈкв э̄ри. Колыт сака тыныӈыт, мощща олн винэ ма̄хум та̄нти кол ёвтуӈкв ат ве̄рме̄гыт. Ты ма̄хум колыл о̄с вос мивет, э̄лаль кӯщаянув ты хосыт рӯпитаӈкв патэ̄гыт. Наталья Комарова ювле тох ла̄выс, пе̄с колытт, балокытт о̄лнэ ма̄хум ос очередин хансым ма̄хум, ва̄им, э̄лаль нё̄туӈкв патавет. Ос та̄н ма̄гсыланыл колыт аквтит та̄л сыс хунь ӯнттавет, ты ва̄рмаль ма̄гыс 150 миллиард солко̄ви э̄ри. 50 со̄тыра арыгтем ще̄мья нё̄туӈкв э̄ре̄гыт. Ос тыгыл мо̄т ва̄рмаль осннэ̄глы – кол ӯнттын ма̄гыс ма̄ э̄ри, ты ма̄ло̄мтыт ёмащакв щё̄питаӈкв, са̄всыр тӯрпат тув мус хартуӈкв. Ты рӯпата ва̄рнэ ма̄гыс мо̄т программанныл о̄с са̄в олн та̄стуӈкв э̄ри. О̄лнэ кол ӯрнэ ма̄хумн хоса ӯрхатуӈкв э̄ри, воссыг маныр ва̄руӈкв. Приобье па̄вылт вокзал хунь ӯнттаве, ты урыл кӯщаюв о̄с титыглавес. Тав ла̄выс, ань РЖД (Российские железные дороги) та̄н вокзалкол ӯнттуӈкв вуйхатасыт. Ос А̄с я̄ ӯлтта ӯнсах ӯнттын ма̄гыс 25 миллиард солко̄ви э̄ри. 2014-2015 та̄лыгт проектва̄рмаль щё̄питаӈкв ос ты рӯпата ва̄руӈкв ущ о̄вылтахтэ̄гыт. «Урал Промышленный Урал Полярный» проект рӯпататэ ань мощщан ёлпо̄илттавес. Округ губернаторув титыглавес, э̄лаль рӯпитаӈкв те патэ̄гыт, ма̄витув хотьютн ӯргалаӈкв патаве. Тав ла̄выс, ань ты яныг проект хосыт лё̄ӈхыт пинавет, электростанцият ӯнттавет. Ос хунь та̄н ма̄к Ха̄льӯс районт рӯпитаӈкв патэ̄гыт, то̄нт ты та̄н рӯпатаныл сака уральтаӈкв патаве. Ань туп Нё̄ранув ляпат сыстам ма̄виткве хультыс. 1065 2013.12.06. Людмила ТЕТКИНА Кол ӯнттын ма̄ урыл. Округ яныг кӯщай нэ̄ Наталья Комарова па̄выл ос ӯс миркол кӯщаит акванатыгласанэ. Та̄н общественный организацият ва̄рнэ рӯпатаныл урыл ос кол ӯнттын ма̄ урыл потыртасыт. Губернатор кӯщаит э̄лыпа̄лт ла̄выс: «Ма̄нь таквс э̄тпост Ханты-Мансийск ӯст общественный организациятт рӯпитан ма̄хум акванатхатыгласыт. Та̄н ва̄рыглам суссылтапанылт округ янытыл щар ма̄к ёмас проектыт суссылтаве̄сыт. Ты организациятт рӯпитан хо̄тпат хумус мирн нё̄тэ̄гыт, та̄н та урыл потыртасыт». Э̄лаль тав ла̄выс, то̄ва тамле организацият сака ёмащакв рӯпитэ̄гыт ос то̄ват щар ат рӯпитэ̄гыт. Покачи ӯст ос Кондинский районт мирн нё̄тнэ тамле организация щар а̄тим. Ос общественный связь департамент ты ва̄рмаль мӯсхалыг ханищтаӈкве ос акв яныг программа хансуӈкве ла̄вхатас. Тамле некоммерческий организацият Югра янытыл хо̄та̄ти вос рӯпитэ̄гыт. Алла Бадина, Нижневартовск ӯс миркол кӯщай нэ̄, ла̄выс, та̄н ӯсанылт 260 общественный организацият рӯпитэ̄гыт, та̄н пуссын мирн нё̄тэ̄гыт. А̄гмыӈмосыӈ хо̄тпат ма̄гсыл рӯпитан организацият ма̄хумн нё̄тым олн ат сэ̄лэ̄гыт, тыи ма̄гсыл тамле рӯпата ва̄рнэ организацият та̄нки грантолныт ос са̄всыр мо̄т нё̄тмил во̄вуӈкве ве̄рме̄гыт, ты хосыт э̄лаль о̄лэ̄гыт ос мирн нё̄тэ̄гыт. Кол ӯнттын ма̄ урыл потыртыманыл порат ос губернаторнэ̄ таи ла̄выс: «Ань то̄ва организацият молях колыт ӯнттуӈкве таима̄гсыл ат ве̄рме̄гыт, кол ӯнттын ма̄ ма̄гсыл нэ̄пакыт мӯсхалыг щё̄питаӈкве сака са̄в хо̄тал манос э̄тпос э̄ри. Э̄рнэ нэ̄пакыт ӯрим са̄в э̄тпос наска̄ссыг ювле та хульты». Вячеслав Арчиков, Нефтеюганск ӯс миркол кӯщай хум, ӯсанылт ты рӯпата хумус мины, та урыл потыртас. Нефтеюганскыт ты та̄л лов э̄тпос сыс кол ӯнттын ма̄гсыл 377 участок майвес. Ювле хультум та̄л сыс 362 участок та̄н ма̄хум халт уртсаныл. Дмитрий Макущенко Сургутский район миркол кӯщаиг о̄лы, тав ла̄выс, та̄н районанылт Белый Яр, Солнечный ос Барсово па̄влытт кол ӯнттын ма̄ а̄тим. Та па̄влытт иӈ са̄в ще̄мья кол ӯнттын ма̄ ӯре̄гыт. Ты па̄влыт пуссын Сургут ӯс ос я̄ ва̄та ляпат ӯнлэ̄гыт. Ос тот «Барсова гора» нампа заповедникыг ла̄внэ ӯргалан ма̄ о̄лы. Таима̄гсыл тот та̄н кол ӯнттын ма̄ло̄мт щар ат о̄ньще̄гыт. Сапра̄ни оигпаме э̄лыпа̄лт кӯщаит та̄нки Советанылн мо̄т хо̄тпат пе̄риясыт, тот миркол мо̄т кӯщаит рӯпитаӈкве тах патэ̄гыт. Ань тыг мус рӯпитам хо̄тпатын губернаторув яныг пӯмащипа ла̄тыӈ ла̄выс. 1065 2013.12.06. Галина КОНДИНА Олннё̄тмил. Округув 83 та̄лэ то̄влын кастыл пенсия винэ ос ат рӯпитан хо̄тпат яныг таквс э̄тпос ва̄т нупыл са̄тыт щисланыл олннё̄тмилыл ойтуӈкве о̄вылтавет, рущ ла̄тӈыл тав «единовременный выплатаг» ла̄ваве. Ос ва̄т са̄грапнал э̄тпос лов хо̄талэ мус та̄н пуссын ты олныл мивет. Тамле ля̄ххал мирн нё̄тнэ департаментыт рӯпитан хо̄тпат ла̄всыт. Та̄н ловиньтанэ̄ныл щирыл, 221 со̄тыра э̄лумхо̄лас тамле олннё̄тмилыл ойтавет. Ма̄н округувт о̄лнэ ма̄хум акв со̄тыра са̄витыл ойтавет, ос хотьют Тюменский областин ва̄нтлыс, та̄н 650 солко̄вил те̄тавет. Ты олннё̄тмил округ правительствав хунь ма̄нь таквс э̄тпост акванатхатыгласыт, то̄нт тамле ла̄тыӈ пирмайтасыт. 1065 2013.12.06. Галина КОНДИНА Ще̄мьят моляхнув колыӈыг вос е̄мтэ̄гыт. Ма̄н округувт са̄в ще̄мьят субсидияолн минэ манос кол ӯрнэ очередин хасхатым о̄лэ̄гыт, ос та̄н матса̄вит та̄л тот та ӯрхатэ̄гыт. Таима̄гыс ань кӯщаянув йильпи ва̄рмаль номылматсыт ва̄руӈкве – «арендное жилье в Югре» ла̄ваве. Ты кастыл Москваныл ос Нижегородский областил тыг мӯй хо̄тпат во̄виньта̄лсыт. Кӯщаит халанылт потыртасыт, хумус тамле программа ёт рӯпитаӈкве ро̄ви. Ань округувт хӯрум ӯст – Нефтеюганскыт, Ханты-Мансийскыт ос Сургутыт хӯрум кол ӯнттуӈкве таӈхе̄гыт, тот 600 квартира паты. Ос мо̄тыт та̄л лӯпта э̄тпост ты колыт вос а̄стлавет. Ты та̄л Нефтеюганск ӯст 94 квартираӈ кол ӯнттуӈкве о̄вылтавес. Тот са̄выӈпа̄лэ акв колнакыӈ квартират ва̄равет. Тамле колыт ӯнттын ма̄гсыл кӯщаянув инвесторыт тинсэ̄гыт. Инвесторыт ты олныӈ хо̄тпат манос компаният колыт ӯнттын ма̄гсыл олн та̄стэ̄гыт. Ос ты колытын о̄лмыгтан хо̄тпат ювле ла̄щалла̄щал ойтхатэ̄гыт. Арендное жилье нампа колыл соссаӈ хо̄тпат ос бюджетыт рӯпитан ма̄хум мивет. Ос та̄н ка̄сыӈ э̄тпос олн ойтым тот о̄лэ̄гыт, ты квартира та̄нти нупыланыл хансуӈкве тах ат ве̄рмияныл. Ты кастыл я̄нас очередин ма̄хмытын хасхатуӈкве э̄ри. Округувт ты программа 2020 та̄л мус рӯпитаӈкве паты, та сыс 250 со̄тыра квадратный метр са̄вит о̄лнэ кол кӯщаянув ӯнттуӈкве номсэ̄гыт. 1065 2013.12.06. Светлана РОМБАНДЕЕВА Яныгхо̄тпат о̄лнэ кол. Сургут ӯс ляпат Снежный нампа па̄вылт «Геронтологический центр» о̄лы. Ты хащта̄л ла̄тыӈ «геронтология» – греческий ла̄тыӈ, ма̄ньщи ла̄тӈыл те толмащлаӈкве – ты «матум хо̄тпа» манос пе̄сыг е̄мтнэ ва̄рмалит ханищтан наука. Э̄лумхо̄лас хунь матумыг е̄мты, ты наукан о̄с ханищтаве. Та центрыт яныгхо̄тпат о̄лэ̄гыт. О̄лнэ коланыл яныг, са̄в я̄нас кол ӯнттым о̄лы, корпусыг ла̄вавет. Центр Калинки нампа я̄ ватат ӯнттувес, сыстам ма̄т, ляпат нэ̄матыр промышленный кол а̄тим. Э̄лнаӈ тот нор колыт о̄лсыт, пе̄с мат колхусапыт, 1982 та̄лт ӯнттыглаве̄сыт. Ань тай йильпи нё̄тнэ колквет ӯнлэ̄гыт, халанылт ре̄гыӈ унсахыл о̄лтве̄сыт. Кӯщаиг Андрей Иванович Чирков тав о̄лы. 1994 та̄л па̄сныл акв отделение туп рӯпитас, 30 хо̄тпа тот о̄лсыт. Ань ос 10 са̄всыр отделение рӯпитэ̄гыт, 250 хо̄тпа аквторыг о̄луӈкве ве̄рми. Ты центрын 50 та̄л то̄влум э̄кват ос 55 та̄л то̄влум о̄йкат о̄луӈкве вивет. Э̄лы хо̄н ма̄ныл ёхтум хо̄тпа тув ат виве, туп округт о̄лнэ ма̄хум тот о̄лэ̄гыт. Хо̄тпа ня̄врам ос рӯт ат те о̄ньщи, центрыт акваг о̄лы. Матум хо̄тпа манос сака а̄гмыӈ э̄лумхо̄лас тот о̄ньщаве, пусмалтаве. Тув путёвканэ̄пак щирыл ялуӈкве ро̄ви, хо̄тпа ле̄ккаре̄н 14 манос 21 са̄вит хо̄талыл хансаве. Ты нэ̄паке щирыл тот о̄лы, ӯщлахты, пусмалтаве, тувыл юв мины. Ам тув ялмум порат кӯщай хум ёт потрамасум. Тав ла̄внэ̄тэ щирыл, та̄н коланыл матум хо̄тпа ос ва̄гтал хо̄тпа ма̄гыс о̄лы. То̄ва ня̄врам ман рӯт ат о̄ньщи, нэ̄мхотьютын нё̄туӈкве ат ве̄рмаве. То̄ва ос пуӈк а̄гм о̄ньщи, юн ма̄хманэ̄н ат ве̄ритаптаве, таве̄н акваг ле̄ккарыт ляпат о̄луӈкве э̄ри. Тамле ма̄хум тыт о̄лэ̄гыт, ка̄сыӈ хо̄тпа мӯсхал щирыл о̄ньщаве, тыттавеайтаве. А̄гмыӈ хо̄тпа ос пусмалтаве. Ты кол ще̄мьяӈ кол хурипа, хо̄тпа сома юн о̄лы, тыт тав э̄руптаве, янытлаве. Центрыт туп сымыӈ ма̄хум рӯпитэ̄гыт. Кӯщай хум коныпал ва̄ӈын нэ̄гаге ёт потрамасум – акватэ Яна Владимировна Зубарева, мо̄танэ ос Екатерина Александровна Дереповская. Татем ёмас, сымыӈ нэ̄кве̄г. Ма̄хум о̄лнэ колнакыт суссылтасы̄г, центр урыл потыртасы̄г. Со̄ль, яныгхо̄тпат татем ёмащакв о̄ньщавет, ре̄гыӈ, сыстам колнакытыт о̄лэ̄гыт. Ма̄хум ӯнлахо̄лэ̄гыт, халанылт потраме̄гыт, то̄ва хуйгала̄лы. Спортивный колнак о̄ньще̄гыт, тот нёвсынэ ман хӯтсан ма̄гсыл са̄всыр те̄рсупыт о̄лэ̄гыт. Яна Владимировна ла̄внэ̄тэ щирыл, ты колнак яныгхо̄тпат сака э̄руптыяныл, тув ва̄тихал щалтсэ̄гыт, хӯтсэ̄гыт манос матыр зарядка ва̄ре̄гыт. Яныгхо̄тпат Сургут ӯсн тотыглавет, тот са̄всыр музеитын ялантэ̄гыт, пӯмщалахтэ̄гыт. Нэ̄кве̄г китыгласагум, тот ма̄ньщи ос ханты ма̄хум о̄лэ̄гыт? О̄лэ̄гыт, насати, онтолов хо̄тпа – Ханты-Мансийский, Октябрьский ос Ха̄льӯс районытныл ёхтысыт. Акв ма̄к яныг э̄ква о̄лы, Мария Ермолаевна Выртыпенкова, 1918 та̄лт самын патыс, таве̄н ань яныгса̄т нупыл ат та̄л. Мария Ермолаевна ханты э̄ква, Ха̄льӯс район Тэ̄к па̄вылт самын патыс, а̄ги о̄парищ наме Макарова. Тав ла̄внэ̄тэ щирыл, ня̄врам ат о̄ньщиглас, рӯт ма̄хманэ пуссын а̄тимыт, хум хо̄тпат хо̄нтлын ма̄т патсыт. Ты центрын кос хоты хо̄тпа минуӈкве ве̄рми, тув о̄лмыгтаӈкве. Ты урыл китыглахтан адрес: г. Сургут, ул. Мира 44-2. Хотьют ка̄сащи те, акв э̄тпосныл хо̄т э̄тпос са̄вит тот о̄луӈкве ве̄рми. Хо̄тпа олнло̄мт ойты, тот мощ о̄лы, ӯщлахты. Ты урыл ос центрын звонитэ̄н, телефонаныл: 8 (3462) 74-78-44, 74-78-05.Адресаныл: г. Сургут, пос. Снежный, ул. Еловая д. 4. Тув пуӈк а̄гм о̄щнэ хо̄тпа ат виве, вина айнэ ос наркоман хо̄тпа, хо̄псы а̄гм, рак, ВИЧинфекция, СПИД, са̄всыр алписов а̄гм, инфекционный ос венерический а̄гм о̄щнэ хо̄тпа ат виве. Хотьют ты центрыл пӯмщалахты те, тув звонитэ̄н, китыглахтэ̄н. Тот ёмас ма̄хум рӯпитэ̄гыт, на̄нан та̄н э̄рнэ тэ̄лат урыл потыртэ̄гыт. 1065 2013.12.06. Людмила ТЕТКИНА А̄гирищ ты ще̄мьят э̄руптым янмалтаве. Ань савалап ня̄врам янмалтан ма̄гсыл нэ̄тхумит са̄всыр пособиеолныл мивет ос зарплатаолныл ойтавет. Кондинский район Леуши па̄вылт ань са̄в ще̄мьят савалап ня̄врамыт янмалтэ̄гыт. Алевтина Альбертовна Бельтюкова о̄йкатэ ёт о̄с ма̄нь а̄гирищ Урай ӯст висы̄г. Ма̄ньщи нэ̄ а̄нумн ты урыл тох ла̄выс: –Ам акваг са̄в ня̄врам о̄ньщуӈкве тахсум. Ме̄н о̄йкаме̄ныл кит ня̄врам янмалтасме̄н. Пыгме̄н такви рӯпиты, а̄гиме̄н Екатеринбург ӯст ханищтахты. Тэ̄н сас мо̄т ма̄т о̄лэ̄г, о̄йкаме̄нтыл ме̄нккеме̄н хультсуме̄н. Ня̄врам та̄л о̄луӈкве марщум. Номсахтуӈкве патсум ос о̄йкамн ла̄всум, э̄рыӈ, Урай ӯсн ялыме̄н ос тот савалап ня̄врам выгме̄н. Тув минасме̄н, тот ам Кира ма̄нь а̄гирищакве ка̄саласлум, та порат таве̄н туп ат э̄тпос то̄влыс. А̄гирищакве ка̄тын вислум, тав о̄влэ̄т сака хоса ам нупылум сунсыс, тувыл мувиньтаӈкве патыс. То̄нт та̄ра та торгамтасум ты ам а̄гирищум. Ты та̄л Кира са̄т та̄лэ то̄влыс. Тав о̄выл классыт ханищтахты. Урай ӯст щар ма̄нь ня̄врамаквет о̄ньщавет, рущ ла̄тӈыл ты кол «специализированный дом ребёнка» намаим о̄лы. Тув ялуӈкве сака та̄рвитыӈ о̄лыс, таса̄вит а̄гирищитпыгрищит ща̄няныла̄щаныл та̄л о̄лэ̄гыт. Хумус сым та̄л нэ̄т та̄нки самын паттум ня̄врамакве̄ныл пӯльницат хультуптаӈкве ве̄рмияныл? А̄гирищум нэ̄паканэ акв э̄тпос сыс щё̄питасанӯв, ты э̄тпос мӯсхалыг хуюӈкве ат ве̄рмысум. Такем сымум ща̄ргыс, акваг номсахтасум, моляхнув нэ̄паканум вос ва̄равет. Полициял акв справканэ̄пак сака хоса ӯрыслум. Ам амки пӯльницат са̄в та̄л рӯпитасум, ле̄ккар кӯщаит а̄нумн нё̄тсыт. Ань тай ла̄ве̄гыт, савалап ня̄врамыт винэ ще̄мьят тыгыл са̄внув э̄тпос ӯрхатэ̄гыт ос сака са̄в справканэ̄пакыт атэ̄гыт. Кира ме̄наме̄н омага̄тяг ла̄вияге. Ма̄ньнув о̄лыс, та урыл хунь номсахтас, школан минас, китыглахтуӈкве патыс, манрыг тав мо̄т о̄парищ нам о̄ньщи. Ла̄выслув, тав ане̄кватэ о̄парищ намыл мислӯв. Хунь янгыг е̄мты, ущ тах ла̄вилӯв. Ма̄нь па̄вылт о̄лэ̄в, пуссын ва̄гыт, хо̄т ма̄н Кирав вислӯв, ань пилэ̄гум, нэ̄мхотьютын ул вос потыртаве. Ты та̄л тав ханищтахтуӈкве патыс, школан минас, ам рӯпатаныл по̄хын минасум. А̄гирищум а̄лпыл школан ва̄нттылум, ханищтахтын ма̄ныл а̄сты, са̄всыр кружокытын ос тотыглылум. Ёмащакв кос о̄лэ̄в, тувыл акв та̄рвит о̄ньще̄в, колув я̄ ва̄тат ӯнлы. Кит ма̄н хӯрум та̄л сыс тӯя̄г па̄выл ва̄татэ такем молях ёлнилюӈкве патвес. Ань пилым о̄лэ̄в, я̄ ва̄татэ ма̄н пӯсасув мус ты ёхтыс. Колув ва̄т арыгкем та̄л ты ма̄т ӯнлы. Па̄влыӈ миркол кӯщай ма̄н ва̄рмалюв урыл ёмащакв ва̄гтэ. Тувыл нэ̄матыр ва̄руӈкве ат ве̄рми. Мо̄т кол ма̄гсыл очередин о̄с ат хансаве̄в, ты колув ёмас. Тыналаӈкве ос мо̄т ма̄т ёвтуӈкве о̄с ат ве̄рме̄в, тамле ма̄т ӯнлын кол хотьютн ёвтаве. Ам ты та̄рвитыӈ ва̄рмаль урыл мо̄тмо̄т кӯщаитын такос хансэ̄гум. МЧС рӯпитан хо̄тпат ёхталасыт, я̄ ва̄та ос колув сунсыгласыт. Тувыл ювлела̄всыт, колув ёмас, э̄лаль вос о̄лэ̄в, ул вос пилэ̄в. Ос ла̄всыт, са̄кконыт щирыл тох о̄лы, туп та ще̄мья мо̄т колыл миве, хотьют кол та̄л хультыс манос коланыл на̄йн ё̄свес, ман яныг витын а̄мара̄лвес. Ты урыл хансым нэ̄пакыт а̄нумн ке̄туӈкве ла̄вхатсыт, ань тыг мус ма̄н ӯрхатэ̄в. Ма̄н по̄хавт о̄лнэ кит ще̄мьяг о̄с акв тамле та̄рвитыӈ ва̄рмаль о̄ньще̄г. Та̄н картопка ӯнттын тэ̄пкананыл о̄с ёлнильвес. Ты колт ма̄н соцнайм щирыл о̄лэ̄в. Ме̄н о̄йкаме̄нтыл кол ӯнттуӈкве кос тахсуме̄н, нас тох ӯнлахо̄луӈкв ос ӯрхатуӈкв, хунь колув ёллоньхаты, ат ка̄сащиме̄н. Тувыл ма̄ло̄мтыл о̄с ат миве̄в, миркол кӯщай ювлела̄ви, па̄влувт кол ӯнттын ма̄ щар а̄тим. Э̄лаль маныр ва̄руӈкве ат ва̄глум. 1065 2013.12.06. Тамара МЕРОВА 50та̄лэ̄тыл янытлылӯв. Ты э̄тпос хо̄тыт щислат Раиса Калистратовна Бардина (Партанова) 50 та̄лэ то̄влы. Ма̄н нэ̄ намхо̄талэ̄тыл янытлылӯв ос э̄лаль тав уре̄тыл потыр хансэ̄в. Тав Ха̄льӯс район Йильпи па̄вылт самын патыс. Школа а̄стламе юипа̄лт Ленинград (ань Санкт-Петербург) ӯст А. И. Герцен нампа институтыт «художественная графика» факультетыт ханищтахтас. Тувыл Ханты-Мансийск ӯсн о̄лмыгтас. О̄влэ̄т та̄л арыгкем телевидение ос радиовещание колт рӯпитас. Тот ма̄ньщи ла̄тӈыл передачат ва̄рыс. Ты юипа̄лт округ краеведческий музейт, обскоугорский ма̄хум институтыт, «Торум Маа» нампа музейт соссаӈ ма̄хум о̄лупсав ханищтым са̄в та̄л рӯпитас. Ос 1995 та̄лныл 1998 та̄л мус «Лӯима̄ сэ̄рипос» газетан рӯпитаӈкве патхатыглас. То̄нт А̄с ма̄ньщи ла̄тӈе̄тыл ля̄ххалыт, потрыт хансыс. Раиса Калистратовна пуссын ты колытыт рӯпитаме̄т са̄в па̄влытын ялантас. Соссаӈ мирныл пе̄с потрыт, мо̄йтыт, э̄ргыт китыглас ос та̄наныл ищхӣпыӈ утын хассанэ. То̄ва ма̄ньщи потрыт ма̄хум радио хосыт хӯнтлысаныл. Аквматнакт тав палтэ Н. М. Садомин ёхталас ос такви хансум стихотворениятэ «Радио-Рая, радио-Рая» мӯйлуптастэ. Ты о̄йкан нэ̄ са̄в щёс нё̄тыгла̄лвес, матыр ёмас хӯлтыглан ла̄тӈыл потырта̄лвес. Ань нэ̄кве таве ёмас номтыл ка̄стытэ. Тав Рая потранэ̄тыл ощхуль ва̄рыс ос ла̄выс: «А̄с ма̄ньщит щар ма̄нь ня̄врамыт хольт ла̄тӈаныл ля̄галыяныл». Николай Михайлович «Рущ ла̄тыӈо̄йка» такви хансум пӯмыщ потре о̄с радио хосыт ма̄хумн ловиньта̄лыстэ, аквта порат А. Р. Станиславец «Лӯима̄ сэ̄рипос» газетан ты потыр хансыстэ. Таи ёмас, Раиса ма̄ньщи ос ханты ма̄хманув хуритын по̄слыс. Ос акванатум потранэ, хуриянэ ётыл о̄с э̄рмыгласыт. Тав Новосибирский госуниверситетт ос Томский госуниверситетт учёный хо̄тпат ёт ва̄йхатас. То̄нт соссаӈ ма̄хум история ос этнография тэ̄лат пӯмщалаӈкве патсанэ ос научный нэ̄пак щё̄питаӈкве о̄вылтахтас. Хо̄тхуйплов са̄всыр научный потыр хансыс. 2007 та̄лт Раиса Каллистратовна Томск ӯст «Этносоциальная история обских и нижнесосьвинских манси в конце XVIII– начале XXI вв. » диссертациятэ вуянтастэ, та щирыл тав исторический наукат кандидатыг е̄мтыс. Нэ̄ мо̄лты та̄л па̄сыл такви рӯпитан щирыл проект щё̄питас ос ань «индивидуальный предпринимателиг» о̄лы, тав наука рӯпатат такви э̄лаль тотыянэ. Потрыт хансы ос та̄наныл нэ̄пакыг ва̄рнэ ма̄гыс такви олнанэ ойтыянэ манос то̄внакт хотты по̄х хо̄тпатын олныл нё̄тыглаве. Тувыл та та̄ратан нэ̄паканэ̄тыл мощ олн сэ̄лы. Раиса Бардина хансум хӯрум нэ̄паканэ тыи: «Обские и нижнесосьвинские манси: этносоциальная история в конце XVIII – начале XXI века», «Материалы по этносоциальной истории обских и нижнесосьвинских манси в XX– начале XXI века» ос «Угорское население Нижнесосьвинского Приобья (XVIII– начале XXI века)». Та̄н пуссын 2009, 2010 ос 2011 та̄лытт Новосибирскат СО РАН издательство колыт та̄ратаве̄сыт. Ань тав «Портреты обских угров» йильпи хуриӈ нэ̄пак янытэ̄т щё̄питастэ, ва̄рыстэ ос ань та̄ратаӈкве олныл ат то̄влаве. Тав мо̄тыт та̄лт тах ущ та̄ратаве. Ты пӯмыщ нэ̄паке̄т са̄всыр ма̄хум 1930-1970 та̄лыт порат хурин по̄слуве̄сыт. Тот хантыт ос ма̄ньщит пе̄с щирыл масхатым о̄лэ̄гыт. Ос ты урыл А. А. Богордаева «Традиционная одежда обских угров в 1930-1970 гг. » потыр хансыс. Тамле ва̄рмалит этнографытн, историкытн ос соссаӈ ма̄хум о̄лупсал пӯмщалахтын хо̄тпатын, ханищтахтын ня̄врамытын сака э̄рмыглэ̄гыт. Ам ань Раиса такви ма̄ньпора о̄лупсатэ урыл китыгласлум, тав потре э̄лаль ловиньтэлы̄н. МА̄ньпора тА̄ланум номиянум – Ам Йильпи па̄вылт самын патсум, яныг колта̄гылт яныгмасум. Са̄в яныг ягпыг о̄щсум: Володя, Юра, Гена, Никита ос Костя. Ам питипатта ма̄нь а̄гииг о̄лсум. А̄щумн сака э̄руптаве̄сум, ам тав а̄ӈке̄н (оматэ̄н) ля̄хтхатасум. Номилум, а̄ӈкум ягпыганум ёт пум ва̄руӈкве ялэ̄гыт, а̄щум акв хотты каӈкум ёт хӯл алыщлаӈкве мины. Ам ос юн хультуптавем, матыр колсори рӯпата ва̄ре̄гум, а̄ныса̄ныт ман колкан ловтэ̄гум, тэ̄нут па̄йтэ̄гум. Хунь яныгнувег е̄мтсум, ма̄хманув маснутаныл посуӈкве патсум. Ты щирыл ма̄нь та̄гыл юн та рӯпитасум. А̄ӈкум хотталь мӯйлуӈкве мины, ягпыганум хӯл тотэ̄гыт. Ам хӯл са̄м нилюӈкве ос хӯл якытлаӈкве щар ат тахсум, ты хӯл а̄ным а̄мпарн тӯлыгпилум, тув та ӯнттыгпилум. Ягпыганум воращлэ̄гыт: «Манрыг хӯлыт ат щё̄питыянын? » Та̄нанылн ювлела̄ве̄гум: «Ам хӯл нилюӈкве щар ат ха̄сэ̄гум, на̄нки щё̄питэ̄н». Ос тот та пувтавем, ам лю̄ньщуӈкве о̄вылтахтэ̄гум, ты мус я̄ртхатэ̄гум, хӯл рӯпатан воссыг ат пувхатэ̄гум. Мис о̄с о̄щсӯв. Мис посуӈкве ӯнттуве̄сум. Тав посуӈкве мори ат майхатас, сака вориӈ мис о̄лыс. Ка̄тагум мис посуӈкве ат ве̄рмысы̄г. Тамле рӯпата ва̄руӈкве о̄с маткем воритотсум. Ма̄н а̄щув Ялпӯс па̄вылт самын патыс, тав хунь ще̄мьяӈыг е̄мтыс, а̄ӈкум о̄лнэ Сакырпа̄вылн о̄лмыгтас. Тувыл ма̄н Йильпи па̄вылн ва̄нтлысӯв, ётыл ос Ёлка-Шапкат о̄лсӯв. Ка̄сыӈ туи Ялпӯсын тотыглавесӯв. Ты па̄вылт туп кит колыгт ма̄хум о̄лсыт. Акв колт Василий Костин э̄кватэ ёт, мо̄т колт Тарас Григорьевич Костин о̄лыс. Ма̄н хунь ёхтэ̄в, тав колэ̄т мӯйлысӯв. Ам номилум, о̄йка колкан хосгын ла̄пкаӈ куращ (хоссуп) о̄ньщис. Ам тамле ут иӈ ат ва̄щинтасум, таве̄тыл сака пӯмщалахтасум. Тот о̄лнэ̄в сыс ты куращил аквписыг колкан та хосгилум, та хосгилум. А̄нумн ты куращ такем та мӯстыс. Ялпӯст Ялпыӈ кан, Тоя па̄выл кан, Щохрыӈо̄йка кан пуссын яласыянӯв, тувыл э̄лаль ювле минэ̄в. Шамаш па̄вылн (Чемаши) Кирилл аким палт мӯйлуӈкве о̄с яланта̄лэ̄в. То̄ва порат Тукъякын Микула мо̄т акиюв палт тотыглаве̄в. Тыи а̄щув тав ягпыгаге. Тащир та о̄лантасӯв. А̄щув Калистрат Прокопьевич Партанов хӯл алыщлам хо̄тпаг о̄лыс. Тав Ха̄льӯс рыбокомбинатыт рӯпитас. Рӯпататэ сака ка̄ркамыг ва̄рме ма̄гыс тав са̄всыр э̄сгын нэ̄пакыл ос ма̄гыл по̄сыл мӯйлупта̄лвес. Тав «Победитель соцсоревнования» ос «Ударник коммунистического Труда» по̄сыгыл майлувес. 1943 та̄лт хо̄нтлуӈкве тотыглавес, юв 1947 та̄лт ёхтыс. Аӈкум Анна Петровна Тынзянова Камратка па̄вылт ос ётыл Вежакоры ла̄пкат рӯпитас. Тэ̄н акванминасы̄г, ня̄врамыӈыг е̄мтсы̄г, ма̄нав янмалтасаге̄н. Ань ме̄н Никита каӈкуме̄нтыл хультсуме̄н, сас Ханты-Мансийскан о̄лмыгтасме̄н. Мо̄т рӯтанув ёт о̄с ва̄йхатыме̄н. Ма̄н ане̄квав Пелагея Макаровна Тынзянова яныг колта̄гылт яныгмас, тот атхуйплов ня̄врам о̄лыс. Ань тав акв а̄гитэ Тарья Ермачкова, оньгаме̄н Ягримт о̄лы. Кирилл аким, та е̄р рӯтанув, Шамашыт ос Кевавтнёл па̄вылт (Перегрёбныит) о̄лэ̄гыт. Костя ягпыгме̄н а̄ги ос пыг о̄ньщас, ня̄врамаге Ягримт ос Восыӈтӯр па̄вылт о̄лэ̄г. Ма̄н, газетат рӯпитан хо̄тпат, Раиса Калистратовна намхо̄талэ̄тыл янытлылӯв. Мӯтраӈ номтыт, потрыт нэ̄пакын хаснэ̄тэ ма̄гыс яныг пӯмащипа ла̄тыӈ таве̄н ла̄ве̄в. Пус ка̄т, пус ла̄гыл! То̄рум ёт, О̄тыр ёт э̄лаль вос о̄лы! 1065 2013.12.06. Николай МЕРОВ Сорых Кульпас торыг сэ̄руӈкве ӯнты. Мо̄лал Ха̄льӯс район кӯщай нэ̄ Любовь Коротун Саранпа̄вылт сапра̄ни ва̄рыглас. Па̄влыӈ ма̄хум хӯл алыщлан ва̄рмаль урыл таве̄н потыртасыт. Та̄н ла̄внэ̄ныл щирыл, Кульпас па̄вылт «Рахтынья» нампа общинат рӯпитан ма̄хум сорых хӯл сэ̄руӈкве алгаль миннэ̄тэ порат Та̄гт я̄ толгыл па̄ӈвхитэ̄т лапто̄варттыяныл. Ма̄хум потраныл щирыл, ань тыима̄гыс юио̄выл та̄лытт Саранпа̄вылн мощща хӯл ёхты. Хумус тох е̄мтыс, Саквъя̄ ма̄хум хӯл алыщлаӈкве ат та̄ртавет, «Рахтынья» общинан ос хус ве̄рыста я̄ палытэ̄т сорых пувуӈкве ро̄ви. Аман хотьютын та̄н хӯл сэ̄рнэ порат я̄т хӯл алыщлаӈкве та̄ртве̄сыт. Ам ты урыл са̄р нэ̄глум газетат хансыгласум. То̄нт ам Александр Голошубин, «Рахтынья» община кӯщай, ёт хо̄нтхатыгласум. Ты ва̄рмалит урыл таве китыгласлум. Маныр ты урыл тав потыртас, на̄н ань э̄лаль ловиньтэ̄н: – Александр Игоревич, наӈки общинан урыл потыртэн. Хумус наӈ хӯл алыщлан ва̄рмаль щирыл рӯпитаӈкве о̄вылтахтасын? – Советский Союз ла̄кквапатме порат предприятият пуссын вуньщалыг е̄мтсыт. Та порат туп савыӈ хо̄тпа ат тӯлмантас. Са̄выӈпа̄лэ па̄влыӈ ма̄хум рӯпата та̄л хультсыт. О̄лнэ ма̄тем ма̄гыс сымум сака ща̄ргыс. То̄нт ам хӯл алыщлым рӯпитасум. А̄щум ма̄н палтув бригадирыг о̄лыс. Тувыл 2001 та̄лт ам хӯл алыщлан община ва̄руӈкве номылматасум. Община ва̄рмум порат нэ̄матыр ат о̄щсум. Амки ё̄румтыл ла̄щалла̄щал матыра̄ти ёвтсум, а̄щумн нё̄тве̄сум. Моторанум, «Бурананум» тыналасанум. Ты олнанум пуссын община э̄лаль тотнэ ма̄гыс ойтсанум. То̄нт ам ётум хӯл алыщлым мощща хо̄тпа рӯпитас. Пувум хӯланув амки па̄га̄лумтасанум, тыналаӈкве тотыгласанум. Тыщир ты ла̄щлакв общинам но̄хво̄рмалтаслум. Ань рӯпитанэ̄в па̄сныл китхуйплов та̄лыг е̄мтыс. Хӯрум предприятие о̄ньще̄гум. Пуссын аквъёт китса̄т хо̄тпа ам палтум рӯпитэ̄гыт. О̄влэ̄т пувум хӯланув нас тыналасанӯв. Ань ва̄тахкем процент са̄вит пувум хӯланув ма̄нки тэ̄нутыг ва̄риянӯв. Хӯланув солвалтэ̄в, то̄слэ̄в, восытэ̄в, пельменит, котлетат, фарш ва̄ре̄в. Ха̄льӯст, Ягримт, Кульпаст ла̄пкат пуссӯв. Ва̄рнэ тэ̄нутанув тот тыналэ̄в. Ты коныпал ма̄н округ янытыл ос э̄лаль мо̄т ма̄н тэ̄нутанув тыналаӈкве тотыянӯв. – Саранпа̄выл ма̄хум ла̄ве̄гыт, на̄н община хо̄тпанын я̄ па̄ӈхвитэ хоса толгыл янытэ̄т лапто̄варттыяныл. Тыима̄гыс Саквъя̄н сорых сэ̄руӈкве сака мощща ёхты. Наӈ ты урыл хомле номсэ̄гын? – А̄ти, тыи сумп потыр. Ма̄н квотал миве̄в. Тыгыл са̄внув хӯл ат пуве̄в. Ты ва̄рмаль а̄ти я̄ то̄варттан хосыт е̄мты. Сорых хӯл ка̄сыӈ та̄лныл матрыг акваг ло̄ӈхальнув сэ̄руӈкве ӯнты. Ам номсэ̄гум, Саквъя̄ то̄самыг е̄мтнэ ма̄гыс хӯл алгаль ат мины. Са̄ртын ма̄н рыбаканув тэ̄лы порат хӯл алыщлаӈкве Саранпа̄вылн ялантасыт. Ань юио̄выл хо̄тахкем та̄л сыс сорых Та̄гт я̄т сэ̄руӈкве ӯнты. Са̄ртын тот хӯл щар мощща хультсас. Мо̄лты та̄л тох о̄лыс. Хӯл сэ̄рнэ порат я̄т витэ ма̄ниг е̄мтыс. Тыима̄гыс хӯл по̄р то̄ва ма̄т па̄гто̄свес. Тувыл ос то̄ва сорхыт со̄рганыл щар та̄тылат, кӣвырт няльщ туп хо̄нтыгласӯв. Я̄ витэ ма̄нь, хӯлытн тэ̄ӈкве нэ̄матыр, э̄лаль яныгман ва̄рмаль а̄тим. Таима̄гыс ты мощщами. – Ха̄льӯс район кӯщай ла̄выс, на̄н сорых хӯл са̄вмалтан ма̄гыс по̄р государстван мыгы̄н. – Ма̄н Тюмень ӯс наука институт ёт договорнэ̄пак хассӯв. Аквхуйпловкем та̄л палыт хӯл по̄р тув та̄стэ̄в. Та по̄р Тобольск ӯсн хӯл янмалтан заводн тотаве. Акв па̄лэ ювле я̄н та̄ратаве. Мощло̄мт ос ла̄пкат тыналаве. – Саранпа̄выл ма̄хум ла̄ве̄гыт, на̄н хӯл алыщлаӈкве та̄нанылн ат мыгы̄н, хӯл алгаль ёхтуӈкве ат ве̄рми. – Ятаты, хумус ат мыгӯв. Я̄ тармыл ка̄сыӈ хо̄тпа хӯл алыщлаӈкве ве̄рми. Саранпа̄выл, Ло̄пмус, Кимкъясӯй, Кульпас, Ягрим па̄влытт о̄лнэ ма̄хум пуссын аквте̄м алыщлэ̄гыт. Нэ̄матыр ат ла̄ве̄в. – Та̄нанылн ты урыл маныр ла̄ве̄гын? – Та̄н та̄нки ма̄вит па̄ӈктысаныл. Арген са̄в сыресыр техника тот яласы. Тэ̄лы порат я̄ хосыт «Бураныл» яласэ̄гыт, я̄ӈк то̄рнаве, хӯл рохтуптахты. Тувыл нё̄рт со̄рни ловтаве. Тыил о̄с я̄ витэ сака па̄ӈктаве. Таима̄гыс хӯл тув минуӈкве ат таӈхи. Ты коныпал та̄нки о̄с хӯл сака мори алыщлэ̄гыт. Сорых, сӯкыр, нялк миннэ порат а̄лыматта̄л пуве̄гыт. Ётыл ос ла̄ве̄гыт, э̄рттам ма̄н общинав хосыт хӯл мощщами. Саквъя̄ ма̄хум ос община кӯщай потраныл тох акван аты ёхтысыт. Ос та сыс, ка̄сыӈ та̄лныл я̄нанувт матыр ва̄рмаль щирыл сорых акваг та мощщами. Ты тэ̄ла учёный хо̄тпатн ёмщакв ханищтаӈкве э̄ри. Атиӈк хотты порат хӯл та̄л хультэ̄в тах. 1065 2013.12.06. Людмила ТЕТКИНА Самутнёлн ӯщлахтуӈкве во̄ваве̄н. Яныг таквс э̄тпост Ханты-Мансийск ӯст «ЮграТур -2013» нампа суссылтап рӯпитас. Наталья Комарова, округ губернаторув, тув о̄с ёхталас. Тав грантолн вим ма̄хум янытласанэ ос сертификатнэ̄пакыл мӯйлуптасанэ. Ты та̄л грантолн винэ ма̄гсыл округ янытыл Ханты-Мансийск ӯсн 26 заявка ке̄тыглавес. Тамле касылыт но̄хпатум общинат манос организацият 500 со̄тыра солко̄ви ос 3 миллион 500 со̄тыра солко̄ви са̄вит грантолныл майве̄сыт. Валентина Ирган (Юрьева), Белоярский район «Самутнёл» нампа общинат кӯщай нэ̄, «Развитие инфраструктуры этнографического туризма» нампа номинацият но̄хпатыс. Ам Валентина Дмитриевна общинатэ урыл китыгласлум. Тав ювле таи потыртас: –Ма̄н общинав са̄в та̄л рӯпиты. О̄влэ̄т ма̄н хӯл алыщлым, пил ва̄тым, ӯльюв сартым олн сэ̄лсӯв. Хӯрум та̄л ювле хультум порат о̄с акв тамле суссылтапын ёхталасӯв, хӯл, пил, ӯйхул совыт тыналасӯв. Акв хум ма̄нав китыгластэ, ма̄н о̄лнэ ма̄вн хӯл алыщлаӈкве ёхталаӈкве ро̄ви ман а̄ти. Ма̄н таве Самутнёл па̄вылн няслуӈкве, ӯщлахтуӈкве во̄выслӯв. Тав такви юртанэ ёт туи хӯл алыщлаӈкве ёхталас. Ань ка̄сыӈ та̄л са̄в мӯй ма̄хум ма̄н па̄влувт мӯйлы. Общинав Самутнёл па̄вылт ва̄рыслӯв ос акв тамле намыл пиныслӯв. Ань тот нэ̄мхотьют ат о̄лы, ма̄н туп хӯл алыщлаӈкве тув ёхталэ̄в. Ты па̄выл Ванзеват ляпат о̄лыс. Па̄влыӈ мир мо̄т ма̄н ва̄нтласыт ос та̄нки пе̄с коланыл, со̄мьяханыл тот хультсыт. Ма̄нки о̄лнэ кол тот ӯнттысӯв. Мӯй ма̄хманув ма̄н культурав урыл о̄влэ̄т сака ат пӯмщалахтасыт. Тувыл акв порат китыглахтасыт, со̄мьях по̄хат по̄слахтуӈкве ро̄ви ман а̄ти. Ам ювлела̄всум: «Манрыг ат ро̄ви, по̄слахтэ̄н». Ты юипа̄лт та̄н са̄всыр ва̄рмалит урыл китыглахтуӈкве патсыт, манрыг тамле со̄мьях ӯнттаве, хумус пе̄с порат хантыт о̄лсыт, хумус хӯл алыщласыт. Ма̄хум ёт потыртым тыи торгамтасум, туристыт а̄ти нас няслуӈкве тыг во̄виньтаӈкве э̄ри. Ма̄нки ханты ос ма̄ньщи культурагув урыл потыртаӈкве о̄с э̄ри, то̄нт са̄внув ма̄хум ёхталаӈкве тах патэ̄гыт. Туи ка̄саще̄гыт ке, пил ва̄туӈкве, ла̄хыс атуӈкве тотыглыянӯв. Ос суссылтыянӯв, хантыт па̄йтнэ ма̄гсыл хӯл хумус яктыяныл, хумус солвалтыяныл ос то̄слыяныл. Ань округувт «Беткаш» нампа организация рӯпиты. Та̄н уранылт са̄в туристыт ва̄гыт, са̄в э̄лумхо̄лас тув яланта̄лы. Ма̄н пе̄с йис ва̄рмалянув урыл потыртым, о̄с са̄внув олн сэ̄луӈкве ве̄рме̄в. Ань таи ёмас, ты рӯпата ва̄рнэ ма̄гсыл грантолн миве. То̄нт ма̄н проектнэ̄пак хассӯв ос тыг ке̄тсӯв. Ты олныл ма̄н Самутнёл па̄вылт мӯй ма̄хум ма̄гсыл о̄лнэ колыт ӯнттуӈкве тах патэ̄в. Ань па̄влувт акв яныг кол о̄лы, аквторыг тот 12 э̄лумхо̄лас о̄луӈкве ве̄рми. Ты коныпал тот ма̄н пувлынкол ӯнттэ̄в. Ты э̄лыпа̄лт хум хо̄тпат туп хӯл пувуӈкве ёхталасыт. Тамле колыт ке ӯнттэ̄в, ма̄хум ще̄мьяӈ та̄гыл тот ӯщлахтуӈкве патэ̄гыт. Ос таи ёмас, Белоярский район миркол кӯщаит ма̄навн о̄с нё̄тэ̄гыт. Ты э̄лыпа̄лт ма̄н районный грантолн ма̄гсыл нэ̄паканув ке̄тыгласанӯв. Тувыл олныл майвесӯв, то̄нт ма̄н ё̄рнкол ёвтсӯв. Касум па̄выл нупыл о̄лнэ ма̄хум са̄лыяныл ёт яласым ё̄рнколт о̄лсыт. Ма̄н, А̄с я̄ хосыт о̄лнэ хантыт, тамле кол ат о̄щсӯв. Туристыт ма̄гсыл тӯщтыслӯв, та̄нанылн тыи пӯмащ. Туи порат ка̄саще̄гыт ке, тот хуюӈкве ве̄рме̄гыт. Мӯй хо̄тпанув акв хо̄тал ма̄гсыл ат со̄тыра солко̄ви ойтэ̄гыт. Ма̄хум Москва ос мо̄т э̄лы ма̄ныл тыг ёхталэ̄гыт, та̄н ма̄гсыланыл ты а̄ти са̄в олн. Аквторыг яныг группа 10-12 э̄лумхо̄лас ёхты ке, та̄н пуссын аквъёт туп 15 со̄тыра солко̄ви ойтэ̄гыт. Ань са̄в рӯпата о̄лы, соссаӈ хо̄тпанув тыг рӯпитаӈкве выганӯв. Таса̄вит ма̄хум ма̄гсыл тэ̄нут па̄йтуӈкве, пувлынкол па̄лтыглаӈкве ос няслуӈкве тотыглаӈкве, рӯпитан хо̄тпа са̄в э̄ри. Ӣтипа̄лаг ос та̄нанылн пе̄с йис мо̄йтыт, а̄мщит, потрыт потыртэ̄в. Тамле рӯпата туп соссаӈ ма̄хманув ва̄руӈкве ха̄сэ̄гыт. 1065 2013.12.06. Валентина УЗЕЛЬ Са̄в номтыӈ ма̄хум Ха̄льӯсн ёхталасыт. Ха̄льӯст Российский научный конференция о̄лыс, «Меншиковские чтения – 2013». Тув са̄всыр ма̄ныл наука рӯпата ва̄рнэ ма̄хум ёхталасыт. Ты конференция 2003 та̄л па̄сныл ва̄рыглаве, тит та̄л сыс акв щёс. КА̄нащ О̄йка урыл Меншиков Александр Данилович – тав хо̄нын нё̄тум хумыг о̄лыс, ка̄нащ нам о̄ньщис. 1673 та̄лт самын патыс, ще̄мьяныл щёлыӈыг сака ат о̄лыс, таима̄гыс та̄ра лусытаӈкве вуйвес. Тот ты тав сака ка̄ркамыг о̄лме ма̄гыс, яныг кӯщаитн ка̄салавес. Хус та̄лэ то̄влуме порат тав Петр I хо̄н ляпан рӯпитаӈкв во̄ввес. Та порат ма̄хум халанылт сака хо̄нтлысыт, Александр Меншиков са̄всыр ма̄т хо̄нтлым яласас. 1711 та̄лт Пётр I Молдавия ма̄ нупыл хо̄нтлуӈкве минас, ты юртэ Санкт-Петербург ӯст хультуптастэ. Акв та̄л сыс Меншиков ё̄ре хосыт ты ӯс са̄в хорамыӈ дворецколытыл ӯнттувес, та̄н ань пуссын «памятникыг» ла̄вавет. Ос ты хум акв лю̄ль пищ о̄ньщис – олн сака тӯлмантас, мо̄т щёлыӈ ма̄хум коланыл, ма̄наныл пуссын такви нупылэ хассанэ. Ты лю̄ль ва̄рмалит урыл хо̄нув ма̄хмытын акваг потырта̄лвес, аквмат порат тав туре̄н ёхтыс ос ляпа юртэ Александр Меншиков ла̄выстэ, таитэ тӯлмантам олнанэ пуссын ювле вос мыганэ. Тувыл ты яныг хо̄н хотталь щалтыс, мо̄т ма̄хум тув воратаӈкв патсыт. Та̄н А. Меншиков ат э̄руптасаныл, пуссын ты о̄лум ва̄рмалит Пётр II йильпи хо̄нын потыртасыт. 1727 та̄лт Александр Меншиков та пуввес, ще̄мьятэ ёт тыг Лӯима̄н Ха̄льӯсн те̄твес. Ты е̄рн минаманыл порат лё̄ӈхыт э̄кватэ а̄тимыг е̄мтыс, хум пыге ос а̄гиянэ ёт та хультыс. Ха̄льӯсн ёхтуманыл порат Мария а̄гитэ холас. Такви тав о̄с тит та̄л туп о̄лыс, тувыл хотталь щалтыс. Ты йис урыл Ань лов та̄лыг ты е̄мтыс, са̄всыр яныг учёныит Меншиков ка̄сталан ма̄гсыл Ха̄льӯсн ёхталэ̄гыт. Ты та̄л о̄с аквтох – Москва, Тюмень, Омск ӯсытныл, Оренбургский областьныл ос ма̄н округувныл ма̄хум тув ялсыт. Та̄н халанылт са̄выӈпа̄лэ пуссын ты ка̄нащ о̄лупсатэ урыл потыртасыт. Нижневартовск ӯсныл история наукат доктор нам о̄щнэ хум В. В. Цысь ёхталас, тав ос ты урыл потыртас – Ха̄льӯс ма̄т советский власть хумус ва̄рвес. Ма̄хум о̄лэ̄гыт, аты ва̄гыт – мо̄т власть кӯщаит ёхтумыт. О̄лэ̄гыто̄лэ̄гыт, власть о̄с мо̄таныг та е̄мтум. Ха̄льӯс школат ханищтахтын ня̄врамыт Ира Кустышева, Саша Белоцерковцева ос Наташа Левданская Сергей Собянин урыл потыр щё̄пита̄лсыт, хумус тав Ня̄хщамво̄льт яныгмас, хо̄т рӯпитас. Потыртаманылт сыс пе̄с хурит мирн суссылтасыт. Тит ханты нэ̄ хо̄тпаг М. Лапина ос Р. Решетникова о̄с потыртасы̄г. Маина Лапина Тэ̄к па̄влэ урыл потыртас. Раиса Решетникова та урыл ла̄тыӈ ла̄выс, ма̄ньщи ос ханты газетагт хоты та̄л па̄сныл пе̄с ва̄рмалянув, пе̄с наканув урыл ма̄хум потрыт хансуӈкве патсыт. 1065 2013.12.06. Светлана РОМБАНДЕЕВА Хо̄рыӈпа̄выл ма̄щтыр хум. Ханты-Мансийск ӯст «Торум Маа» музейт о̄лум семинар урыл потрум э̄лаль мины. Ма̄щтыр ма̄хманув тот ма̄щтырлахтынэ̄ныл сыс ка̄тыл ва̄рум пормасаныл урыл китыгласанум. Ха̄льӯс район Хо̄рыӈпа̄вылныл ма̄ньщи хум Рудольф Васильевич Меров ёхталас. Тав ос толыг хасыс. Ты э̄лыпа̄лт э̄тпостем тав са̄глат ёргыс, та̄р щё̄питас. Ам таве китыгласлум, тав ма̄нь та̄гыл толыг хасы? На̄н ань э̄лаль Рудольф Васильевич потре ловиньтэлы̄н. – Ма̄нь порат тай нас сунсэ̄в, яныгнув е̄мтсув ос хо̄т матыр нё̄тэ̄в. Ӯсма хосатнув туйсув, ма̄нти сэ̄тапыл, то̄нт ёмщакв хӯлп ат нэ̄глы, ӯсма а̄тим. Ла̄пка сэ̄тапыл, 10й номерыл, нас хлопчатобумажный осыӈнув сэ̄тапыл ӯсма туе̄в. Ве̄рмуӈкве патсув, тай а̄тянувн нё̄тэ̄в, туе̄в, нэ̄гсалэ̄в. Ӯнлуӈкве э̄ри хоса, нэ̄гсалаӈкве, матараӈкве. Хасуӈкве тай ма̄нь порат ат ха̄сэ̄в, а̄тям такви хасыянэ. Ӯсма туйнэ ма̄т тай нё̄тэ̄гум, ве̄рмуӈкве патсум, ханьщувласум. Хӯлпыт то̄ват па̄лиг туюӈкве э̄ри, то̄ва хараг. Нялк ма̄гыс тай сака ма̄нь, та̄рвитыӈ туюӈкве ӯсма. Хара ут тай кӯстырнуве, пувиньтахтуӈкве ка̄т лапсы. – Ла̄пкат ань май матырсырмат китайский хӯлпыт тыналавет, таит улпыл во̄втат? – Таит тай сака во̄втат. Ань пуссын рущ щирыл о̄луӈкве патсыт, ла̄пканыл хотыла̄ти выгыт. Та̄н о̄с са̄всырыт, тувыл саманыл о̄с са̄всыр самыл о̄лэ̄гыт, хотьют хара, хотьют па̄ль. Ащирма порат та̄нанылт пувиньтахтуӈкве сака торас, ка̄миньтыт, то̄ват тув хотталь тэ̄лумтэ̄гыт. О̄влэ̄тнув ат ха̄ссум тамле хӯлпытыл алыщлаӈкве, ха̄пыт сака таглэ̄гыт. Тувыл ань тай ханьщувласум, ущты мощ алыщлэ̄гум. Нас капрон ӯсмал ва̄рнэ хулпыт ань сака тыныӈыт, китайский утрищит тай тынта̄лнувет, жилканыл ва̄рим утыт. Пенсия винэ хо̄тпа аквман хӯлп выг, пенсиятэ тув та мины. Ты семинарт ам са̄всыр рӯпата ва̄рсум са̄гла ва̄рсум, та̄р щё̄питасум. Та̄р ма̄гыс ма̄н Иртыш я̄ ӯлтта ялсув, хусахтем ве̄рста ма̄шинал во̄рн минасув. Ӯльпа та̄р висув, тот са̄выӈ ма̄т осытнув о̄лэ̄гыт. Мо̄т та̄рыт саквалэ̄гыт, ӯльпа та̄р мощ нюпыщнуве, мори ат саквалы. Ань ос тыхо̄тал хӯлпум ёт капыртэ̄гум. Толгум акв па̄лэ, тыхо̄тал аман а̄сты. Атхуйплов метра ва̄рсум, иӈ ловмантем метра хультыс. – Рудольф Васильевич, наӈ хо̄т самын патсын? – Ам Хо̄сло̄хт самын патсум, 1947 та̄лт ойттур э̄тпост. О̄влэ̄т Ло̄пмуст ханищтахтасум нила класс мус. Э̄лаль Кульпаст ханищтахтасум, тот нёлолов класс а̄стласум. Тувыл ханищтахтын ма̄ныл та по̄йтсум, рӯпитаӈкве патсум. А̄тям Василий Никитич Меров, Мувыӈте̄сныл о̄лыс, соссаӈ. Колхоз ва̄руӈкве патвес, пуссын акванатве̄сыт, Хо̄сло̄хн ва̄нтлысыт. Омам Мария Николаевна Гоголева, тав тай Кӯртъя па̄вылныл о̄лыс, А̄нъя по̄хат. А̄тям ань хӯл алыщлым яласэ̄гыт, А̄сн хо̄та̄ти, яласанэ̄тэ мус хо̄т акванхо̄нтхатсы̄г, тувыл Хо̄сло̄хн та ёхтысы̄г. Ма̄н онтолов пыг о̄лсув, кит яга̄ги. Ам котиль. Ань хум хо̄тпаныл амттем хультсум, йӣгрищум наме О̄лька, Ня̄хщамво̄льт о̄лы. Ам Хо̄рыӈпа̄вылт рӯпитаӈкве патсум. Тот известка ва̄рнэ промкомбинат о̄лыс, известка щаритасӯв. Известка щаритым лов та̄л рӯпитасум, тувыл завод хотпо̄илттавес, известка воссыг ва̄руӈкве ат патвес. Ань туп колъёре о̄лы, кӯрыг о̄лум утыт та маныр, ёл ты нилявет. Та юипа̄лт акв та̄л ла̄пкат рӯпитасум, рӯпата е̄мты, са̄всыр рӯпатан патхата̄лсум. Ань тай ня̄враманум яныгмасыт, ма̄нь а̄гим тыт Ханты-Мансийск ӯст ще̄мьятэ ёт о̄лы. Э̄лнаӈ Хо̄рыӈпа̄вылт са̄в мир о̄лыс. Ань ма̄н хӯрмахнилах хо̄тпа хультсӯв, тармыл аквагнув о̄лэ̄в. То̄ват ёхталэ̄гыт, минэ̄гыт та̄ра, коланыл хом ӯнлэ̄гыт кос. Рӯпата а̄тим, нэ̄матыр ва̄руӈкве, пуссын миныгласыт, хо̄т рӯпата о̄лы. Хӯл алыщлаӈкве тамле та̄рвитыӈнув рӯпата, ань хӯлэ пыл а̄тим, тох ат та̄ртаве мори алыщлаӈкве. Хосатнув те, хо̄т хӯл матыр алыщлэ̄в, рыбкоопн ман хотталь мыганӯв, вуйве̄сыт. Ань нэ̄пакло̄мт ат те о̄ньще̄гын, алыщлаӈкве ат та̄ртавен. Ань тэ̄нэ хӯлув ма̄гыс нэ̄пакыл миӈкве ат патвесӯв, ат та̄ртуӈкве патвесӯв. Ляпат тэ̄нэ хӯл алуӈкве ат ве̄рме̄в, хӯлэ а̄тим, ань сорых а̄тим. Рудольф Васильевич тох та потыртас. Ты я̄тил ма̄ньщи хо̄тпав пуста̄гыл вос о̄лы, На̄янэ̄н-О̄тыранэ̄н вос ӯргалаве. 1065 2013.12.06. Тамара МЕРОВА Ощхуль ва̄рнэ э̄типа̄ла о̄лыс. Ты э̄тпос атхуйплов щислат Ханты-Мансийскат о̄лнэ ма̄хум са̄выӈпа̄лэ «Югра-Классик» колын щалтсуӈкве тахсыт. Ка̄тыт билет о̄щнэ ма̄хум молямтахтым тув щалтсыт, мо̄таныт кон мо̄т хо̄тпат халт ё̄мыгтасыт ос арыг билет китыгласыт. Та э̄типа̄лаг тот «Тэ̄лы пора КВН» касыл ва̄рыглавес. Ханты-Мансийск ӯсн нила команда ёхталасыт, тыи: «Союз» Тюменский областьныл, «Парапапарам» Москваныл, Сборная физтеха Долгопрудный ӯсныл ос Астраханский е̄рныл Камызяк ӯсныл мӯй хо̄тпат. Та̄н пуссын хӯрум касылыт ощхуль ва̄рим та̄нки халанылт кассыт. Жюрихо̄тпаг тот Государственный Думат рӯпитан депутат Леонид Симановский, округ Дума кӯщай Борис Хохряков, телевидениет рӯпитан хум Вячеслав Смуров, чемпионыг о̄лнэ боксёр Руслан Проводников ос Мариинский театрыт э̄ргын нэ̄ Ольга Кондина о̄лсыт. Ка̄с ва̄рнэ ма̄хум халт «Союз» командат акв нэ̄ туп о̄лыс, мо̄т команданылт нэ̄ хо̄тпа ёныг пыгытн ёнгуве̄сыт. Ань Камызякыт палт акв та̄лква хум сака пӯмащиг ощхуль ва̄рыс. Акв касыл ва̄рнэ порат «Парапапарам» намаим пыгыт залныл кит а̄ги во̄виньта̄лсыт. Тэ̄натэ̄н турсуил са̄всыр суит ва̄руӈкве э̄рыс, тыи а̄ви хумус щихыртым па̄лыгпӯсхаты, матыр са̄ӈлатым ёлпаттаве ос са̄всыр э̄рыгсовыт. Ма̄хум маткем тот та мовиньтасыт. Тувыл «Разминка» касылыт хоты хо̄тпа матыр китыглаӈкве ка̄сащи, такви микрофонын ла̄вуӈкве ве̄рмыс. Ос щар ощмарыӈ ла̄тӈаныл ма̄гыс та̄н хотты командан мӯстысыт, тувыл мӯйлупсал (футболкал) мӯйлуптаве̄сыт. Тамле пӯмащ ва̄рмалит аквта щёс молях оигпасыт. Ма̄хум са̄в мовиньтасыт, ёмащакв ӯщлахтасыт. Камызяк ӯсныл ёхталам пыгыт ва̄рум ощхуляныл жюри ос пуссын ма̄хмытн сака мӯстысыт, та̄н но̄хпатсыт. Китыт местан «Парапапарам» ос «Союз» командаг пе̄риявесы̄г. Долгопрудный ӯсныл ёхталам пыгыт хӯрмит места висыт. 1065 2013.12.06. Тамара МЕРОВА Хо̄тпа ёт ёмащакв о̄луӈкв ханищтаве̄в. Ханты-Мансийск ӯст о̄выл щёс «Культура и развитие» нампа форум ва̄рыглавес. Культура тэ̄лат хосыт рӯпитан ма̄хум тыг акванатхатыгласыт. Хӯрум хо̄тал сыс э̄ргын ос йӣквнэ ханищтапыт, суссылтапыт, касылыт ос концертыт ва̄рыглаве̄сыт. О̄выл хо̄талт ӯсыӈ манос районыӈ культура колытт рӯпитан кӯщаит е̄ӈта пасан ва̄тан атыглаве̄сыт. Тот 2014 та̄л «Культура та̄лыг» намаим о̄вылтыт ла̄вве̄сыт. Ты кастыл манхурип тэ̄лат ва̄рыглаӈкве ос хоталь са̄внув олн холтуӈкве э̄ри, хоты ӯст манос па̄вылт йильпи культурный центрыт, клубыт ӯнттуӈкве ро̄ве̄гыт, ос театрыт манос э̄ргынйӣквнэ хо̄тпатын яласан ма̄гыс хотыл олн виӈкве, пуссын ты о̄вылтыт аквъёт потыртасыт. Тувыл са̄в мирыт та̄нки халанылт юртыӈыщ о̄луӈкве вос ха̄ссыт, ты о̄вылтыт о̄с я̄нас потрамасыт. Са̄всыр мирыт культураныл щирыл акванюрщхатым о̄с акваннё̄тхатэ̄гыт ке, ты сака ёмас о̄лнув. Рущ щирыл тыи «толерантность» ла̄тӈыг ла̄ваве. Округувт 130 са̄вит са̄всыр мирыт о̄лэ̄гыт, та̄н тыт та̄нки йӣкваныл, э̄рганыл э̄лаль суссылтаӈкве о̄с вос ве̄рмияныл. Таима̄гыс ня̄врамыт, ма̄ньлат хо̄тпат ма̄гыс касылыт, фестивалит вос ва̄рыглавет. То̄нт э̄ргынйӣквнэ ма̄хум та̄нки халанылт ва̄йхатуӈкве патэ̄гыт, ос матыр яныг номтыӈ тэ̄латытн аквъёт ханищтахтэ̄гыт. Ань округув янытыл о̄лнэ са̄всыр ӯсытныл манос па̄влытныл 24 э̄ргынйӣквнэ коллективыт ёхталасыт. Та̄н тыт «Возьмёмся за руки, друзья» нампа фестивальт кассыт. Ты коныпал та̄н са̄всыр ханищтапын, суссылтапын во̄виньта̄лве̄сыт. «Академический вокал» нампа ханищтап Ольга Кондина ва̄рыглас. Ты нэ̄ Мариинский театрыт нё̄тнэ турсуил э̄рги. Ос мо̄т хо̄тпат ма̄хум йӣквуӈкве, са̄ӈквылтан утыл ёнгуӈкве ханищтасаныл. Тамле ханищтапыт «Центры искусств Валерия Гергиева для юных дарований России» нампа проект щирыл ва̄рыглавет. Ты э̄тпос са̄т щисланыл ос лов щислатэ мус Сургут ӯст о̄с акв ханищтап тах ва̄раве. Тув культурат рӯпитан ма̄хум атыглавет, та̄н «Мир через культуру» урыл тах потыртэ̄гыт. Андрей Петренко, Мариинский театрыт хормейстерыг о̄лнэ хум, тот ма̄хум ханищтаӈкв патыянэ. Тувыл 2012 та̄л сыс «Событие» нампа касылыт но̄хпатум хо̄тпат э̄сгуве̄сыт. «Время молодых» ос Н. В. Лангенбах намыл пиным библиотечный тэ̄лагт касум ос но̄хпатум хо̄тпат олннё̄тмилыл мӯйлуптаве̄сыт. Ты олннё̄тмилыл ва̄рнэ рӯпатаныл та̄н аквтох ве̄щкатыг э̄лаль вос тотыяныл. «Возьмёмся за руки, друзья» касылыт са̄всыр ма̄ныл ёхталам хо̄тпат халт «Лылыӈ союм» ос «Са̄лы лё̄ӈх» э̄ргынйӣквнэ ня̄враманув са̄в номинациятт э̄сгуве̄сыт ос дипломыл майве̄сыт. Гран-При яныг мӯйлупса «Кавказ» нампа коллективын мӯйлуптавес. Та̄н российский фестивальн ялнэ путёвкал майве̄сыт. Ма̄ньлат а̄гитпыгыт Нижневартовсканыл тыг ёхталасыт, кӯщаяныл Ибрагим Ибрагимов та ӯст о̄лнэ университетыт рӯпиты. 1065 2013.12.06. Николай МЕРОВ Па̄вланувт са̄в ма̄щтыр хо̄тпат о̄лэ̄гыт. Ха̄льӯс район Саранпа̄вылт ёмас музей рӯпиты. Ты пе̄с йис пормасыт атнэ кол 1990 та̄лт па̄вылт о̄лнэ ветеран Советт рӯпитан ма̄хум та̄н ва̄руӈкве номылматсаныл. Та̄н э̄рнэ нэ̄пакыт щё̄питасыт ос 1993 та̄лт «Этнографический центр» пӯссыт. Тувыл э̄лаль хотьют хури, хотьют пе̄с йис пормас тув тотуӈкве патыс. Ётылнув 1999 та̄лт ты этнографический центр музеиг намаявес. 2002 та̄лт музей Ха̄льӯс район нупыл пе̄с йис пормасыт атнэ кол палт хасвес. 2007 та̄лныл ты кол «Саранпаульский краеведческий музей» намыл майвес. Э̄лаль рӯпитан ма̄гыс Саранпа̄выл миркол па̄лыл олн ойтаве. Кульпас па̄вылт о̄лнэ «На̄й О̄тыр Маа» нампа музей о̄с Саранпа̄выл музей нупыл хансым о̄лы. Тот о̄с са̄в пӯмащ, пе̄с йис пормасыт атым о̄лэ̄гыт. Яныг хо̄нт порат о̄лум писалит, маснутыт ос са̄всыр пормасыт тот ты ка̄салаӈкве ро̄ви. Тувыл хо̄нтлум хо̄тпат юв ке̄тыглам пищманыл тот о̄ньщавет. Йис порат ма̄хум хумус о̄лсыт, пе̄с хурит хосыт ёмщакв та̄рапаттуӈкве ро̄ви. Па̄влыӈ музеянувт рӯпитан хо̄тпат са̄всыр конференцият, семинарыт ва̄тихал ва̄рыглэ̄гыт. Пе̄с йис о̄лупса урыл ня̄врамытн акваг потыртэ̄гыт. 2012 та̄лт Саранпа̄выл музей Ха̄льӯс район янытыл щар ёмас музеиг ла̄ввес. Та музейт кӯщаиг Вера Павловна Комкова рӯпиты. Тэ̄лы порат ам тув ялсум. Тот клубколт суссылтап о̄лыс. Ты суссылтап са̄лыӈ ма̄хум каснэ ва̄рмаль кастыл щё̄пита̄лвес. Вера Павловна ты урыл мощ потыртас. На̄н тав потре э̄лаль ловиньтэлы̄н: –Ты суссылтап ма̄н Саранпа̄выл ма̄щтыр ма̄хум ё̄рыл ва̄рыгласлӯв. Пормасыт тыт о̄лнэ хо̄тпат ос ня̄врамыт та̄нки ма̄щтырласаныл. Саран ос ма̄ньщи мир о̄лнэхӯлнэ наканыл ос йис о̄лупса суссылтасӯв. «Оленёнок» нампа ма̄нь ня̄врам колт ос «Альянс» нампа колн ялантан яныгпа̄ла хо̄тпат ю̄нтум ос сэ̄тапыл сагум пормасаныл о̄с суссылтаӈкве майлысаныл. Ты Елена Никитична Бешкильцева сэ̄тапыл сагум хорамыӈ то̄ранэ. Тувыл сакныл ва̄рим са̄всыр пормас тот о̄лыс. Галина Николаевна Ларионова, Екатерина Сергеевна Ларионова, ма̄ньщи ма̄щтыр нэ̄г, сакныл хартум хуриянэ̄н суссылтасанӯв. Ирина Спиридоновна Филиппова ма̄ньщи суп ос пальсак тотыглас. Татьяна Фёдоровна Розявченко такви ва̄рум тучаӈ хӯрге тотыгластэ. Валентина Назаровна Волчок о̄с са̄в пормас тыг тотыглас. Такви ю̄нтум ос сэ̄тапыл сагум пормасанэ майлысанэ. Надежда Михайловна Устенцова хорамыл ю̄нтым нё̄тнэ а̄канянэ суссылтасанӯв. Тувыл Лариса Геннадьевна Николаева сэ̄тапыл сагум пормасанэ о̄с тотыгласанэ. Тав клубколт «Спицы мастерицы» нампа кружокн яланты. Кӯщаиг тот Наталья Валерьяновна Салтыкова о̄лы. Ты коныпал ос мо̄т са̄в хо̄тпат та̄нки рӯпатаныл тыг тотыгласаныл. Ты музейт рӯпитан ма̄хум ос ма̄щтыр хо̄тпат ма̄н пуссын янытлыянӯв. Та̄н сака э̄рнэ рӯпата ва̄ре̄гыт, пе̄с йис ва̄рмалит э̄лаль тотыяныл. 1065 2013.12.06. Светлана РОМБАНДЕЕВА Щахыл тōрум( ма̄ньщи мо̄йт ). Щахыл Тōрум Э̄квапыгрищил юртыӈыщ, румаӈыщ ōлсы̄г. Акв хōтал Э̄квапыгрищ Щахыл Тōрум палт мӯйлуӈкв ялуӈкве номылматас. Ёсаге масыс, та минмыгтас. Ё̄мыс, ё̄мыс, аквматэ̄ртн тольхыӈ нё̄р щахылн ёхтыс, Щахыл Тōрум ōлнэ мāн нэ̄глыс. Сунсы, Щахыл Тōрум ёсаге ущ тэ̄лум нирн, ущ тэ̄лум пумн нōхтагатамаге. Таквирот номсахты: «Лылыӈ во̄нтырсов ёсаге хумус тув ханасы̄г, татем пумн, татем нирн нōхтагатамаге». Хумус ё̄мыс, ёсарищаге тох ӯнттыгпасаге. Нё̄р щахыл сунсыглытэ, нэ̄матыр ас āтим, ёсаге ханэ̄г, лё̄ӈханэ ōлэ̄гыт. Сунсыглахтас, сунсыглахтас, мāнь мат хал хōнтыс. Ёмащакв сунсы, насати, āви, пӯнсыстэ, ювщалтыс. Та хурип нё̄тнэ кол, акв сōрнитэ ёлпаты, акв сōрнитэ нōххāӈхи. Нэ̄ ю̄нсхатым ӯнлы, ōйкатэ хуи. Э̄квапыгрищ пащалахтас. О̄йка пōхт касай хуи, нэ̄ ōйкатэ касаил тӯщтыгпастэ. Аквматэ̄рт кāкуӈкве патыс, тувыл ке̄лпыӈ полх сальгим нōх ты ӯнтыс, пащалахтас, лāви: – Тахурип та мӯйхум ёхтыс. Ул хосат ёхтыс, моляхнув āнум квāлттуӈквен. Тав лāвыс: – А̄ти, ам ущты ёхтысум. Тувыл пащалахтасы̄г, утсы̄г, э̄кватэ нупыл лāвыс: – Тэ̄нут ман матыр пасанн щё̄питэн, мӯй хōтпа ёхтыс. Э̄кватэ пасан вāрыс, Щахыл Тōрум ос Э̄квапыгрищ акванӯнтсы̄г, хоса ман вāти ӯнлысы̄г, сāт мӯйлысы̄г. Щахыл Тōрум тав нуплэ лāви: – Конквāллэн, ялэн матыр āнысāн ёт вōвен. Кон лāвен: «А̄ны-ōвыл, сāн-ōвыл ёт йӣен, ювщалтыме̄н». Э̄квапыгрищ конквāлыс, номсахтас, номсахтас, хотьют тыт ōлы, юв āла щалты. Ювщалтуӈкв āрталахтуӈкве патыс, аквматэ̄ртн ня̄рм ōвыл сове̄ныл та пувумтавес. Ювле āӈкваты, тахурип нё̄тнэ нэ̄, акв сōрнитэ ёлпаты, акв сōрнитэ нōххāӈхи. Акванпӯхтысы̄г, юв та щалтсы̄г. Тувыл та мӯйлэ̄гыт, тэ̄пъялэ̄гыт. Щахыл Тōрум лāви: – Та нэ̄н ты ам э̄щум. Тувыл акван та минасы̄г. Хоса айсы̄г ман вāти айсы̄г, тэ̄пъяласы̄г. Э̄квапыгрищ руматэ нупыл лāви: – Хоса айсуме̄н ман вāти айсуме̄н, ам амти мāм нупыл ювле номсэ̄гум, амти мāмн минуӈкве таӈхе̄гум. Руматэ лāви: – Наӈ юв минуӈкве те таӈхе̄гын, минэн, наӈти нāйиӈ-ōтырыӈ мāхум хум. Наӈ хом минэн, тыхōтал хӯрмит хōтал тах колынёрын хотщё̄питэ̄лын, нэ̄н тах ёхты такви. Аквматэ̄ртн сōль хӯрмит хōталыг е̄мтыс, кон матыр мирги ман матыр суйты, āмпанэ хортэ̄гыт. Колъёрт нэ̄гылттахты, нэ̄тэ āнысуныл, вāнтсуныл ты ёхтыс, тасавит сāлы, сāлыӈлӯтыӈ тāгыл ёхтыс. Э̄квапыгрищ хотща̄гтыс, юв щалтсы̄г. Тав пōхе̄т нэ̄мат хосат ōлы Ӯс ōтыр ōйка пыгрищ. Аквмат хōтал Ӯс ōтыр ōйка пыгрищ номылматы: «Ты май ам ань рума ōньще̄гум, тувле нэ̄гылттахтэ̄гум». Ёсаге масыс, та ё̄ми, аквматэ̄ртн Э̄квапыгрищ ōлнэ мāн тув ёхтыс. Оо! Э̄квапыгрищ татем щёлыӈыг е̄мтум, акваг колэ сōрнитэ ёмас, тасавит сāлы, та маныр. Тув ё̄мыс, ёсаге хотрāтсаге, нōхтӯщтысаге, тувыл юв повартты: – Тэ̄хам, маныр ёмас наӈын. Э̄квапыгрищ, маныр щирыл тох щёлыӈыг е̄мтсын? Тэ̄сы̄г ман утсы̄г, Э̄квапыгрищ лāви: – Маныр, ам Щахыл Тōрум румам палт ялсум, та урыл щёлыӈыг е̄мтсум. – Тэм, маныр ёмас наӈын, āнум тув тотыглэ̄лын. – Наӈ кāсаще̄гын те, ялыме̄н. Та ё̄ме̄гманаре̄г, Э̄квапыгрищ ань лё̄ӈх ман мā вāгтэ. Нё̄р щахылн ёхтысы̄г. Ань Ӯс ōтыр ōйка пыгрищ Щахыл Тōрум лылыӈ во̄нтырсов ёсаге кāсалыяге, ущ тэ̄лум нирн, ущ тэ̄лум пумн нōхтагатымаг. Тав ат ве̄риты, та рōӈхалтахты: – Хумус ханасы̄г ёсаг ущ тэ̄лум нирн, ущ тэ̄лум пумн? ! Э̄квапыгрищ ос мōлты ё̄мнэ̄тэ хольт хумус ё̄мыс, тох ёсаге āӈхвыгтасаге, хотпаргалтасаге, тӯйтын та ӯнттыгпасаге. Та пыгрищ ос ёсаге такос ханлы пумн, ёсаге ат лапе̄г, нирт ёлхӯтэ̄гыт. Тав Э̄квапыгрищ мӯтраӈыг ōлыс, тав мӯтратэ̄л хотталь ворил та ханлысаге ёсаге нōх. Ӯс ōтыр ōйка пыгрищ китыглахты: – Наӈ ос манрыг ат тагатыягын нōх? – Маныр ам ёсагум, вос хуе̄г, хоталь минэ̄г. Тувыл ювщалтсы̄г, ань Э̄квапыгрищ āви вāгтэ, ювле нэ̄глэ̄г, пащалахтэ̄г. Сунсэ̄г, кит кол са̄м нупыл ща̄няге-āщаге кит йӣвсуп ӯнттым ōлэ̄г. Та пыгрищ ат ве̄риты, лāви: – Вот пӯмыщ, хумус тав ща̄нягеа̄щаге питил ва̄рсаге, но̄хӯнттысаге? Э̄квапыгрищин кāтыл тыкос туяве: «Астал ōлэн, астал». Тон кӯмт нэ̄ ю̄нсхатым ӯнлы, о̄с ōйкатэ касаил тӯщтыгпастэ. Та пыгрищ оста рōӈхалтахас: – О̄йкатэ та аластэ! Аквматэ̄ртн Щахыл Тōрум нōхрохтыс, ке̄лпыӈ полх сальгим, лāви: – Мӯйхумыг ёхтумыг. Ул хосат ёхтысын, манрыг āнум тāра ат квāлттыслын? Тувыл аквмат ōйка нōхӯнтыс, полх сальгыс, э̄кватэ̄н лāви: «Мӯйхумыг ёхтумы̄г, āнум нōхквāлттуӈкве. Матыр тэ̄нут щё̄питэн, пасан вāрен». Э̄кватэ пасан вāрыс, пасан вāтан ӯнтсыт. Щахыл Тōрум та Ӯсыӈ ōтырыӈ пыгрищ конке̄тытэ: – Минэн, конквāллэн, рōӈхен, āны-ōвыл, сāн-ōвыл юрт вōвен. Конквāлыс, та хāйталахты, āны-ōвыл, сāн-ōвыл юрт урыл ат номсы, та рōӈхи: – А̄ны-ōвыл, сāн-ōвыл ёт нэ̄ йийен. Нэ̄мхотьют ат ёхты, номсы хōӈха ōлы, ос ювщалтуӈкве патыс, аквматэ̄рт сыспāлт та пувумтавес. Номсы, аман хотьютн пувумтавес, ювле āӈкваты, яа, сампал нэ̄. Тав ат кāсащас кос, тамле нэ̄л маныр вāри, тувыл юв та щалтсы̄г. Юв щалтсы̄г ос та мӯйлэ̄гыт, ӯнлахōлэ̄гыт. Яныг вāпсэ лāви: – Хом ты мӯйлысуме̄н, айсуме̄н, амти мāмн миныме̄н. Щахыл Тōрум яныг вāпсэ нупыл лāви: – Нэ̄н минуӈкве таӈхегы̄н, хотьют пуве̄гум, та минэгы̄н, нэ̄н кӯщай. Минэ̄н, нэ̄н нэ̄нти витыӈмāӈ хумыг. Тувыл та мат ут нупыл лāви: – Наӈ юв ёхтэгын, колн щё̄питэ̄лын, тах тыхōталхӯрмит хōтал э̄кван ёхты. Тав Ӯс ōтыр ōйка пыгрищ номсы: «Ам тамле сампалсӯппал нэ̄л маныр вāре̄гум». Щахыл Тōрум Ӯс ōтыр ōйка пыгрищ нупыл кантмувес, тав торгамтастэ, ань тайитэ тох номсы. Тувыл Э̄квапыгрищ вāпсэ нупыл лāви: – Тыхōталхӯрмит хōтал кон ул квāллэн, юн ōлэн. Ам раквсамыл, вōтсамыл ёхтавем, ат вāглум, маныр вāре̄гум. Нэ̄н палтын тах тыхōталхӯрмит хōтал ёхтэ̄гум. Тōнт иӈыт сака кантмаве, мощ ань торгамтастэ, манхурип тав Ӯсыӈ ōтыр ōйка пыгрищ, ман щёлыӈ ут. Сōль, тэ̄н минаме̄н юипāлт хӯрмит хōтал Щахыл Тōрум матыр та вāрыс. Кон щахыл курги ман матари, та мирги. Аквматэ̄ртн та нак холас, Э̄квапыгрищ конквāлы, яа, Щахыл Тōрум такви тав палтэ ёхтыс. Сāттем мӯйлысы̄г ман манарасы̄г, тувыл вāпсэ нупыл лāвсы: – Тōвлы, ялыме̄н ань та вāпсуме̄н палт, Ӯс ōтыр ōйка пыгрищ палт, хумус ōлы тав. Яты, тув ёхтысы̄г, хумус ё̄мсы̄г матыр ёсанэ̄н кон та вущкасасанэ̄н, юв щалтсы̄г. Ӯсыӈ ōтыр ōйка пыгрищ ща̄ниг-āщиг ōньщи, пōщгум колсāмн тув ханлыяге. Ща̄няге-āщаге нōх такос ханлыяге, манрыг нōх ат ханэ̄г, тэ̄н та рōӈхе̄г, щисге̄г, ня̄ӈхе̄г. О̄с Э̄квапыгрищ мӯтрал ворил та нōхханлысаге. Тувыл э̄кватэ касайил куратаптыстэ, акватэ акваг āла та хуяс, ōс Э̄квапыгрищ мӯтрал хотталь нōхсāйкатавес. Тувыл лāвса̄лы: – Мӯй китыг ёхтумы̄г. Ул хосат ёхтысы̄г, манрыг āнум нōх ат сāйкатаслын? Э̄квапыгрищ лāви: – Хосат хунь ёхтысаме̄н, ущ ёхтысаме̄н. Тувыл ӯп ōйкатэ вāрыглаӈкве та патыстэ. Щахыл Тōрум номтэ̄т татем тāрвитыӈ патыс, тувыл аквматэ̄рт яныг вāпсэ нупыл лāви: – Я, тōвлы, ме̄нти мāмме̄н миныме̄н. Э̄квапыгрищ вāпсэ̄нтыл та минасы̄г. Юн ōс мӯйлысы̄г, манарасы̄г. Щахыл Тōрум ōйка лаве та ёхтыс, вāпсэ нупыл лāви: – Тыхōталхӯрмит хōтал наӈ кон ул нэ̄гылттахтэн. Ам тах юв ёхтэ̄гум, хунь вāглум матыр вāре̄гум, матыр раквсамыл, вōтсамыл хōюӈкве патавем, кон ул нэ̄гылттахтэн. Тувыл сōль, хӯрмит хōтал е̄мтыс, матыр курыгтаве, мирыгтаве, щахлыт та утэ̄гыт, нас кургимирги. Щахыл минас, Э̄квапыгрищ коннэ̄гылттахтыглы. Ӯсыӈ ōтыр пыгрищ ōлум колъёре ман пāвылъёре тāтыл сэ̄ӈкв, щар витыг тотыма. Ань манрыг Щахыл Тōрум вāрыгластэ, витыг та тотвес. 1065 2013.12.06. Светлана РОМБАНДЕЕВА Кульпас па̄выл ма̄ньщи нэ̄. Хурит ма̄ньщи нэ̄ по̄слым о̄лы, Евдокия Ильинична Сайнахова, а̄ги о̄парищ наме Оманова. Тав Ха̄льӯс район Кульпас па̄вылт самын патыс, ре̄тыӈ ю̄свой э̄тпост, 1976 та̄лт. Евдокия иӈ ма̄нь о̄лыс, акв та̄лэ туп то̄влыс, оматэ Галина Васильевна а̄тимыг е̄мтыс, а̄ги о̄парищ наме Лелятова о̄лыс. Евдокия увщияге ос а̄тятэ ёт яныгмас. А̄тятэ Илья Семёнович, увщияге Ольга ос Вика. Кульпас па̄выл школат онтолов класс а̄стлас. Китхуйплов та̄л пӯльницат рӯпитас. Ань май ма̄нь па̄влытт пӯльницат йильпи щирыл рӯпитаӈкве патсыт, Кульпаст о̄с аквтох, са̄в ма̄хум рӯпатаныл по̄хан ке̄тве̄сыт. Евдокия о̄с рӯпата та̄л хультыс. Ань школан патхатас, тот рӯпиты. А̄гипыг янмалты – Максим ос Валентина. О̄йкатэ наме Сергей Валерьевич, Ягрим па̄вылныл о̄лы. Яныг увщитэ Ольга ще̄мьятэ ёт о̄с Кульпаст о̄лы. О̄йкатэ Василий Лаверин, а̄гипыг о̄ньще̄г – Алена ос Андрей. Вика увщитэ хосатнув хотталь щалтыс, кит ня̄врамаге савалапыг хультсы̄г. Ня̄врамыг Евдокиян вуйвесы̄г, тав янмалтыяге Галя ань Ханты-Мансийск ӯст ханищтахты, нёлоловхуйплов та̄лэ то̄влыс, Кирилл ос ловит классыт ханищтахты, таве̄н хо̄тхуйплов та̄л. Ты я̄тил ма̄ньщи ще̄мьяв пуста̄гыл вос о̄лы. То̄рум ёт, О̄тыр ёт, пус ка̄т, пус ла̄гыл! 1065 2013.12.06. Анна АЛГАДЬЕВА Ка̄тыл по̄слаӈкв ха̄снэ а̄гит. Мощ мо̄лалнув Хулюмсӯнт па̄выл школа искусств колн ялантан ня̄врамыт ханищтан хо̄тпаганыл ёт Белоярский ӯсн ялсыт. Тот «Северные Артдиалоги» нампа окружной конкурсвыставка ва̄рыглавес. Са̄в ма̄щтыр ка̄тыӈ ма̄хум ос ня̄врамыт тув атхатыгласыт, тот та̄н халанылт ханищтахтасыт ос по̄слам хурияныл суссылтасыт. Н. К. Маслова, ня̄врамыт ханищтан нэ̄, тав палтылэ ялантан китхуйплов та̄л яныт хӯрум а̄ги ёт тотыглас, ты Мария Лаверина, Екатерина Алгадьева ос Виктория Боженко. Конкурсн минуӈкв са̄в ня̄врам кос ка̄сащас, туп хӯрум ня̄врам ёт виӈкв ро̄выс. Ты а̄гирищит атыт та̄л Надежда Константиновна палт ялантэ̄гыт. Ты сыс са̄в матыра̄ти ва̄руӈкв ханьщувласыт. Ханищтан нэ̄ныл ёт та̄н о̄льпыл по̄слаӈкв, ю̄нтуӈкв ос сак хартуӈкв ханищтахтэ̄гыт. Ма̄щтыраныл а̄рталаӈкв миннэ̄ныл э̄лыпа̄лт суссылтаӈкв тотнэ картинаныл ёт таквсы каникул хо̄таланылт ка̄сыӈ хо̄тал рӯпитасыт. Пуссын аквъёт о̄льпыл по̄слым хӯрум картина ос сэ̄тапыл ю̄нтым, сакыл хартым са̄т панно ёт тотыгласыт. Рӯпатаныл порсыг ат минас, Анастасия Просункова ос Таня Сивцова сакыл хартым ос сэ̄тапыл ю̄нтым картинанэ̄н ма̄гыс о̄выл местал майвесы̄г, Виктория Боженко о̄льпыл по̄слам картинатэ о̄выл места вис. Ты коныпал ня̄врамыт пуссын грамотал майве̄сыт ос конкурс кубокыл мӯйлуптаве̄сыт. Ос акв по̄слан кружокт ханищтан нэ̄ А. А. Снегирёва о̄с хӯрум а̄гирищквет ёт аквты конкурсн ялсыт, та̄н о̄с ка̄тыл по̄слым ат хӯри суссылтан ма̄гыс ёт тотыгласыт. Ты Яна Таратова, Елизавета ос Дарья Абрамовыг. Лиза Абрамова о̄льпыл по̄слам хуритэ ма̄гыс китыт местал майвес. Ты ня̄врамыт иӈ ма̄ньнуват, торыӈ щирыл матыр ва̄руӈкв сака иӈ ат ха̄сэ̄гыт, ущ ханищтахтэ̄гыт. Яныг а̄гияныл нупыл сунсым ос мо̄т ма̄хмытн а̄ӈкваталым ханищтахтэ̄гыт, яласым ты ня̄врамыт та̄нкина̄нылн э̄рнэ номт пуӈкын выгыт, хуньт э̄рыӈ та̄н ты матарыг е̄мтэ̄гыт. Ам Мария Лаверина яласам лё̄ӈханыл урыл китгаласлум, ме̄н потруме̄н тох ты о̄лыс: – Хумус яласасы̄н? Маныр хащсы̄н? – Ёмщакв яласасӯв. А̄нумн Белоярский ӯс мӯстыс, ма̄нь ӯскве, коланэ такем нё̄тнэт, хорамаӈыт. Такем ёмас гостиницат о̄лсӯв. По̄слан хум Сергей Николаевич Устюжанин ёт румалахтасӯв, тав по̄слан урыл «мастеркласс» суссылтас. Касум па̄вылн тотыглавесӯв. – Маныр пӯмащ ва̄сын? – Музейн тотыглавесӯв. Тот ханты супыл масхатам а̄ги по̄сласлӯв, тувыл ханты супыӈ а̄ги а̄кане ёт о̄с по̄сласлӯв, нас ханты пормасыт щуртата̄лсӯв. По̄слым хурит сунсыгласӯв. Ос во̄р кӣвырт ё̄мыгта̄сӯв, ӯйхулыт ма̄гыс о̄лнэ са̄всыр алщит ва̄сӯв: тӯлмах, во̄рто̄лнут, охсар, щёпыр, лэ̄ӈын ма̄гыс о̄лнэ алщит, хӯл пувнэ камка. Колн щалтсасӯв, кол кӣвырт такем яныг па̄л, акв сэ̄мыл охсар сов, кит выгыр охсар совыг ва̄сув, тувыл ва̄йиг ос са̄всыр кол пормасыт о̄лсыт. Та̄н о̄с сӯмъях о̄ньще̄гыт, туп ха̄ӈхылтапаныл мо̄т хурипат. – Манхурипат? – Тамле пуврыт, ё̄маспил нас щёрхилтымат, тувыл е̄ри тӯщтыма. Ма̄н ха̄ӈхылтапанув мо̄тхурипат. Тамле ты потыр ме̄н потыртасме̄н. Ам Маша ла̄выслум, ма̄ньщи ма̄хум ха̄ӈхылтапаныл о̄с тамле пуврыт ос нас щёрхилтым о̄лсыт, щёрхилыӈ ха̄ӈхылтапыг ла̄вве̄сыт. Ань о̄щнэ сӯмъяханув са̄выӈпа̄лэ то̄сыӈ рущ ха̄ӈхылтап о̄ньще̄гыт, ёлано̄х кӯстырыг вос яласаӈкв. Пувыр ха̄ӈхылтапыл молямтахтым ла̄гыл хотхисатаӈкв, хотволкатаӈкв ве̄рми. Кӯстыр кинсым пе̄с ха̄ӈхылтапыт по̄хын патсыт. Ань ӯнттын йильпи сӯмъяхыт, хоса вос ве̄ритасыт, порсӯйит мори ул вус но̄хворатасыт, ке̄р ла̄глыл ва̄равет. Пе̄с ма̄хманув щёрхилыӈ ла̄глуп сӯмъяхыт ӯнттала̄лыгласыт. Ань са̄всыр ке̄р таса̄вит, хумус а̄ртми, маныр кӯпнитнуваг ва̄рапаӈкв – ма̄хум тащирыл матыр ӯнттэ̄гытва̄ре̄гыт. Тыгыл э̄лаль туп музеиӈ ма̄т ма̄к пе̄с сӯмъяхыт пӯмщалахтын ма̄гыс хультэ̄гыт. 1066 2013.12.20. Людмила ТЕТКИНА Людмила Алгадьева Ты та̄л та̄н юио̄выл щёс акванатхатыгласыт. Та̄л оигпан э̄лыпа̄лт округ Думат юио̄выл щёс сапра̄ни ва̄рыглавес. Депутат хо̄тпат 30 са̄всыр са̄кконыт, постановлениенэ̄пакыт пирмайтасыт. О̄влэ̄т ма̄хум э̄лыпа̄лт Борис Хохряков, округ Дума кӯщай хум, ла̄тыӈ ла̄выс. Та̄наныл тав округув 83 та̄лэ ос Россия Конституция 20 та̄лэ то̄влын ка̄стыл янытласанэ. Борис Хохряков ла̄выс: «1993 та̄лт Конституция пирмайтым юипа̄лт округувт о̄лнэ мир йильпи щирыл о̄луӈкве патыс. Яныгполь э̄тпос 6 хо̄талэ̄т о̄выл щёс округ Думан пе̄риим депутатыт акванатхатыгласыт. Ты хус та̄л сыс са̄в рӯпата ва̄рвес, са̄в э̄рнэ са̄ккон пирмайтавес». Сапра̄нит депутатыт ханищтап, пӯсмалтан ва̄рмаль урыл ос мо̄т са̄в тэ̄лат урыл потыртасыт. Тувыл Александр Филимонов, мир пусмалтан департамент кӯщай, ла̄тыӈ ла̄выс. Депутатыт китыглахтасыт, ань ма̄нь па̄вылн рӯпитаӈкве миннэ ле̄ккарыт акв миллион солко̄вил ойтавет, округ янытыл о̄лнэ пӯльницатт ле̄ккар хо̄тпа то̄вылхаты ман а̄ти. Кӯщай хум ла̄внэ̄тэ щирыл, ань ка̄сыӈ па̄вылт ле̄ккар хо̄тпа о̄лы. Любовь Ковешникова, ханищтап департаментыт кӯщай нэ̄, садикыт урыл потыртас. Йильпи са̄ккон щирыл, ка̄сащан хо̄тпат та̄нки садик ва̄руӈкве ве̄рме̄гыт. Округувт туп акв тамле садик рӯпиты. Ты э̄лыпа̄лт ма̄нь ня̄врамыт ӯргалан кол ва̄рнэ ма̄гсыл сака са̄в нэ̄пак акванатуӈкве э̄рыс. Любовь Николаевна ла̄выс, «частный» садикыг ла̄внэ кол ань Юграт 17 э̄лумхо̄лас ва̄руӈкве ка̄сащи, та̄н пуссын нэ̄паканыл ань щё̄питыяныл. Депутатыт э̄лыпа̄лт Вера Дюдина, олн ловиньтан департаментыт кӯщай нэ̄, та урыл потыртас, ты та̄л нёлолов э̄тпос сыс округ бюджетныл манаса̄вит олн холтвес ос хоты программат халт уртве̄сыт. Ты э̄тпост бюджетын 96 миллиард арыгке̄м солко̄ви ёхтыс ос тувыл аквта торыг 110 миллиард солко̄ви холтвес. Та сапра̄нит ма̄хум э̄рнэ са̄ккон урыл о̄с потыртасыт. Ань пирмайтым са̄ккон щирыл, 1996 та̄л мус ӯнттым колыт ремонтыл ва̄рнэ ма̄гсыл субсидияолн та̄стуӈкве патаве. Ты э̄лыпа̄лт пе̄с колытт о̄лнэ ще̄мьят коланыл та̄нки хотщё̄питасаныл. Ос акв постановлениенэ̄пак ма̄хумн пирмайтавес. Ань ка̄сыӈ депутат такви «депутатский фонд» о̄ньщи, тот са̄в олн о̄лы. Йильпи та̄л о̄выл хӯрум э̄тпосанэ сыс хоталь та̄н ты олнаныл холтыяныл, ань нэ̄пакын отчёт хассыт. Округ Дума кӯщай Б. Хохряков ла̄выс, тамле ва̄рмаль щирыл депутатыт са̄в ма̄хумн манос са̄всыр организациятн нё̄тэ̄гыт. 1066 2013.12.20. Александр ВЬЮТКИН Ля̄ххал тотнэ ма̄хум ханищтаве̄сыт. Ювле хультум яныг таквс э̄тпост Ханты-Мансийск ӯст «Информационный мир Югры» нампа форум онтоловит щёс ва̄рыглавес. Ма̄н округувт ты ва̄рмаль ка̄сыӈ та̄л акв ты порат о̄лыглы. Округув янытыл телевизор хосыт потыртан, газетатт рӯпитан журналистыт ханищтан кастыл акванатыглаве̄в. Ля̄ххал тотнэ ма̄хум ма̄гсыл – ты ма̄к э̄рнэ ханищтап. Ты та̄л терроризм, мо̄т хо̄н мирыт ос са̄всыр ла̄палахтын ва̄рмаль урыл хумус ля̄ххал мирн тотуӈкв э̄ри, та урыл потыртасыт. Ань та урыл са̄в ва̄ӈкв э̄ри. То̄ва порат лю̄льсаӈ хансым потыр ма̄гсыл ма̄хум сутытахтын мус тэ̄ланыл мины. Сутытахтын мус ва̄рмаль ул вос ёхты, та щирыл са̄в ва̄ӈкв э̄ри. Ань ма̄нав ханищтан ма̄гсыл са̄всыр яныг ӯсыӈ ма̄ныл ма̄хум тыг во̄виньта̄лве̄сыт. Та̄н ма̄навн э̄лаль ёмаснув рӯпитан ма̄гсыл са̄в ёмас номт хӯлтсыт. Ань ма̄ янытыл са̄всыр ищхӣпыӈ йильпи пормас о̄лы. Та утыт ёт э̄рнэ щирыл хумус рӯпитаӈкве э̄ри, о̄с хӯлтвесӯв. Форум о̄лум порат фотоаппаратыл по̄слым хурит тит суссылтапыгт суссылтаве̄сыг. «Югра в лицах» ос «Люди из Средней Азии» намаим о̄лсы̄г. Та коныпал иӈ журналистыг рӯпитан ма̄хум халт потрыт хаснэ щирыл касылыт о̄лсыт. «Информационный мир Югры» ханищтап о̄вылтан хо̄талт конкурсыт но̄хпатум ма̄хум ёмас, э̄рнэ ос тыныӈ мӯйлупсал мӯйлуптаве̄сыт. 1066 2013.12.20. Александр ВЬЮТКИН Кӯщаиг е̄мтуӈкв щё̄питахтын ма̄хум. Мощ мо̄лалнув Ханты-Мансийск ӯс мирколт ма̄ньлат ма̄хум ма̄гсыл кӯщаиг рӯпитан хо̄тпат ёт ханищтап ва̄рыглавес. Ты ханищтап рущ ла̄тӈыл «УДАР» тох ла̄ваве, ос ка̄сыӈ букванэ щирыл те ла̄вуӈкв – «Учёба Для Актива Региона». Округув янытыл пуссын аквъёт са̄тса̄т ляпатем мирныл онтолов хо̄тпа туп тув пе̄риим о̄лыс. Та̄нти хансум проектаныл щирыл округ Дума колт тит хо̄тал рӯпитасыт. Тув ёхтуманыл порат, о̄влэ̄т Дума председателиг о̄лнэ хум Борис Хохряков палт щалтсасыт. Тав та̄нанылн э̄лаль ёмщакв рӯпитан кастыл янытлан ла̄тыӈ ла̄выс. Ты ка̄ркам ма̄хум халт акв ханты ма̄ньлат хум Руслан Богордаев о̄лыс. Руслан соссаӈ ма̄хум палт туристыг ёхталан мир урыл проект хансыс. Ты йильпи тэ̄ла ёмащакв щё̄питан ма̄гсыл Еремей Айпин ёт рӯпитас. Проектаныл э̄лаль рӯпитанэ̄ныл ма̄гсыл, та̄н кӯщаиг о̄лнэ ма̄хум э̄лыпа̄лт докладыт ловиньтасыт. Руслан проектэ щирыл э̄лаль рӯпитаӈкве кӯщаитн ат та̄ртвес. Ты урыл Руслан тох ла̄выс: «Ам проектум щирыл округувт мощща ма̄хум рӯпиты. Таима̄гсыл са̄в са̄ккон ва̄ӈкв э̄ри. Ань о̄лнэ са̄кконанув то̄ват тув щар ат ро̄ве̄гыт ос ат рӯпитэ̄гыт. Та̄н рӯпитанэ̄ныл ма̄гсыл, та̄наныл мощ мо̄тщирнуве̄г хансуӈкв э̄ри. То̄нт матыр ущ тах а̄ртми». 1066 2013.12.20. Людмила ТЕТКИНА Номтыӈ а̄гитпыгыт олныл ойтуӈкве патавет. Ка̄сыӈ са̄тыт губернаторув Наталья Комарова такви ва̄ӈын хо̄тпанэ акванатыглыянэ. Акв тамле сапра̄нит кӯщаит йильпи нэ̄пак пирмайтасыт. Номтыӈ ос ёмащакв ханищтахтан ня̄врамыт ань олныл ойтуӈкве патавет. Тамле тэ̄ла таи ма̄гсыл ва̄раве, са̄внув а̄гирищитпыгрищит мӯсхалыг ханищтахтуӈкве вос патсыт. Российский манос окружной олимпиадатт но̄хпатум ня̄врамыт о̄с олныл миӈкве патавет. Яныг кӯщай нэ̄ ла̄выс, ма̄ньщи манос ханты ла̄тыӈ, литература ханищтан ня̄врамыт окружной олимпиадат но̄хпатэ̄гыт ке, ня̄врамыт о̄с тах олныл ойтавет. Ты коныпал ос ка̄сыӈ ханищтахтын та̄л ёмащакве а̄стлан а̄гитпыгыт о̄с янытлаӈкве патавет ос мӯйлупсал манос олныл мивет. Наталья Комарова ла̄выс: «Номтыӈ ня̄врамаквет акваг ӯргалым янмалтаӈкв э̄ре̄гыт. Та̄н школа а̄стлыманыл юипа̄лт э̄лаль вос ханищтахтэ̄гыт ос профессионалыг вос е̄мтэ̄гыт». Ханищтап ос ма̄ньлат хо̄тпат ёт рӯпитан департаментыт кӯщай нэ̄ Любовь Ковешникова ла̄вме щирыл, российский манос окружной касылт о̄выл места вим ня̄врамыт 5 со̄тыра солко̄вил миӈкв патавет, китыт места ма̄гсыл – 4 со̄тыра солко̄вил ос хӯрмит места вим а̄гитпыгыт 3 со̄тыра солко̄вил тах ойтавет. Ос лов класс ёмащакв а̄стлан ня̄врамыт 5 со̄тыра солко̄вил тах мивет ос школа мӯсхалыг ке а̄стлэ̄гыт, 10 со̄тыра солко̄вил ойтавет. Губернатор прессслужбатэ ке̄тум ля̄ххал ма̄ньщи ла̄тӈыл Людмила ТЕТКИНА хансыстэ. 1066 2013.12.20. Людмила ТЕТКИНА Ня̄врамыт школат ёмащакв вос тыттавет. Наталья Комарова такви ва̄ӈын хо̄тпанэ акванатыгламе порат ла̄выс: «Югра янытыл ка̄сыӈ ня̄врам школат мӯсхалыг вос ханищтаве ос ёмащакв вос тыттаве». Ань школан ялантан а̄гирищитпыгрищит а̄лпыл пуссын тыттавет, ща̄няныла̄щаныл ты ма̄гсыл олн щар ат ойтэ̄гыт. Йильпи та̄лныл школат ня̄врамыт тыттын ма̄гсыл округныл са̄внув олн та̄стуӈкве патаве. Ка̄сыӈ ня̄врам тыттын ма̄гыс округ бюджетныл 44 солко̄ви акв хо̄тал сыс тах холтаве. Нуса ос яныг ще̄мьят яныгман ня̄врамыт школат кит щёс тыттавет. Йильпи та̄лныл ты ня̄врамыт акв хо̄тал сыс 112 солко̄вил тах мивет. 2014 та̄лт ты вармаль ма̄гсыл бюджетныл 1, 7 миллиард солко̄ви тах та̄ставе. Акв та порат кӯщаит а̄гмыӈмосыӈ ня̄врамыт урыл потыртасыт. Ты ня̄врамыт ос ханищтахтуӈкве вос ве̄рмысыт, округувт са̄в программат пирмайтавет ос са̄в олн та̄ставе. Ты ня̄врамыт ханищтан, ӯргалан ма̄гсыл мо̄тыт та̄лт округув 60 миллион солко̄ви тах мыг. Губернатор прессслужбатэ ке̄тум ля̄ххал ма̄ньщи ла̄тӈыл Л. Тасманова хансыстэ. 1066 2013.12.20. Александр ВЬЮТКИН Яныг касыл е̄мты. Мощ мо̄лалнув тыньщаӈ ма̄щтырлан ва̄рмаль о̄лум порат «Югра лылыеп» организацият кӯщаиг о̄лнэ хум Александр Новьюхов ма̄хум нупыл потыртас, тав ля̄ххалэ э̄лаль ловиньтэлы̄н: – Ма̄н округув янытыл са̄в соссаӈ ма̄хум халанылт касуӈкв ка̄саще̄гыт. Ты ма̄гсыл мо̄тынтыг 2014 та̄лт тэ̄лы порат са̄лыӈколыӈ ма̄хум халт мирхал касыл ва̄рыглаӈкв номсэ̄в. Ты касыл о̄выл щёс тах е̄мты. Таве нэ̄мхо̄т ос нэ̄мхотты порат щар ат ва̄рыглавес. Мо̄тынтыг Ханты-Мансийск ӯст таве тах щё̄питаве. Каснэ ма̄гсыл ма̄н палтылув хӯрум мо̄т хо̄н ма̄ныл – Финляндияныл, Норвегияныл, Швецияныл саами ос ё̄рн са̄лыӈ ма̄хманув касуӈкв тыг тах ёхталэ̄гыт. Ань та̄н ётаныл нас потыртахтуӈкв э̄ри, тувыл та. Са̄лыӈ ма̄хум касыланыл коныпал, иӈ корякский ос ё̄рн ла̄тӈыл потыртан ма̄хум ёт ма̄нь ха̄пыл каснэ ва̄рмаль ва̄рыглаӈкв номсэ̄в. Та кастыл та̄н «каяк» нампа ма̄нь ха̄паныл ма̄нти ма̄гсылӯв во̄вуӈкве таӈхе̄в. Ты тит касылыгт но̄хпатнэ ма̄гсыл, ма̄нав са̄в щё̄питахтуӈкв э̄ри. Ам на̄нан ла̄вуӈкв таӈхе̄гум, пуста̄гыл о̄лэ̄н, касылын щё̄питахтэ̄н. 1066 2013.12.20. Людмила ТЕТКИНА Людмила Тасманова Ща̄нь ла̄тыӈ ханищтан урыл тав потыртас. Ты та̄л «Единый Россия» нампа партия 12 та̄лэ то̄влыс. Ты кастыл ва̄т са̄грапнал э̄тпос о̄выл хо̄талэ̄т Россия янытыл партия отделениянэ пуссын рӯпитасыт, ка̄сыӈ э̄лумхо̄лас такви та̄рвитыӈ ва̄рмалянэ ёт депутат палт ялуӈкве ве̄рмыс. Та хо̄талт Ханты-Мансийск ӯст округ Дума депутат ос «Единая Россия» нампа партият рӯпитан нэ̄ Наталья Западнова палт нё̄тмил во̄вуӈкве ос та̄нки ва̄рмаляныл урыл потыртаӈкв 25 э̄лумхо̄лас ёхталас. Валентина Соловар, А̄с-угорский институтт рӯпитан учёный ханты нэ̄, тув о̄с ялыс. Тав ханты ла̄тыӈ ханищтан ва̄рмаль урыл Н. Западнован потыртас. Югорский университетт а̄гитпыгыт ма̄ньщит ос ханты ла̄тӈын хӯрум та̄л ат ханищтавет, тамле отделение лаппантвес, тот рӯпитан хо̄тпат пуссын рӯпатаныл по̄хын ке̄тве̄сыт. Тамле отделение ювле ва̄руӈкве э̄ри, ма̄ньлат хо̄тпат ща̄нь ла̄тыӈ вос ханищтэ̄гыт. Э̄лаль ты ханты нэ̄ ла̄выс, ань «О науке» нампа са̄ккон мощ мо̄т щирыл хасвес. Пирмайтым са̄ккон щирыл йильпи та̄лныл наукат рӯпитан ма̄хум, «учёный степень» о̄щнэ хо̄тпат са̄внув олныл тах ойтавет. Тувыл ос таи лю̄ль, ты нам ат о̄щнэ э̄лумхо̄ласыт сэ̄лнэ олнаныл но̄х ат нё̄тавет. Валентина Николаевна ла̄выс, А̄с-угорский институтт рӯпитан са̄в соссаӈ хо̄тпат тамле учёный нам ат о̄ньще̄гыт. Ань та̄н мощща олныл ойтавет, тыи ма̄гсыл то̄ват рӯпатан 8 щёс порат ёхтэ̄гыт ос ӣтипа̄лаг 19 щёс мус рӯпитэ̄гыт, тох рӯпитаӈкве сака та̄рвитыӈ. Та̄н э̄рнэ рӯпата ва̄ре̄гыт, ма̄ньщи ос ханты ла̄тыӈ ос пе̄с йис ва̄рмалит ханищтэ̄гыт ос нэ̄пакыт хансэ̄гыт. Ты ма̄ньлат ма̄хум урыл хотёрувлаӈкве щар ат э̄ри, та̄нанылн о̄с са̄внув олн ойтуӈкве э̄ри. Ос хӯрмит потыртам тэ̄латэ та урыл о̄лыс, Валентина Николаевна йильпи ханты алфавит хансыс. Ханты учёный ма̄хум акв «орфографический комиссия» ва̄рсыт, ты йильпи щирыл хансым алфавит урыл такос потыртэ̄гыт ос са̄в та̄л сыс ла̄тӈаныл акван аты ёхтэ̄гыт. Тав такви хансум алфавитэ щирыл ат нэ̄пак та̄ратас. Ань В. Соловар ла̄выс, школат ня̄врамыт ханищтаӈкве, са̄всыр нэ̄пакыт ос газета ты алфавит хосыт та̄ратаӈкве э̄ре̄гыт. Наталья Западнова ты ханты нэ̄ ёмащакв хӯнтлыстэ ос ювле ла̄выс: «Алфавит урыл таи ла̄ве̄гум, округувт ты тэ̄ла хосыт туп ма̄нкирот рӯпитаӈкве ат ве̄рме̄в. Образование министерстват ос наука щирыл рӯпитан хо̄тпат туп та̄н ты хосыт рӯпитэ̄гыт. Ма̄ньщи манос ханты ла̄тыӈ ханищтан студентыт, наука щирыл рӯпитан ма̄ньлат хо̄тпат та̄рвитыӈ ва̄рмаляныл ам мӯсхалыг тах ханищтыянум». Урай ӯст о̄лнэ ветераныт концертыт ва̄рыглым Югра янытыл яласаӈкве таӈхе̄гыт. Тыи ма̄гсыл та̄н депутатнэ̄ палт олн во̄вуӈкве ёхталасыт. Акв э̄ква Наталья Западнован такви та̄рвитыӈ ва̄рмале урыл потыртас. Тав 13 со̄тыра солко̄ви са̄вит пенсия выг, ос акв э̄тпос сыс тав о̄лнэ колэ, ре̄г, вит, на̄йпос ма̄гсыл са̄т арыгкем со̄тыра солко̄ви ойты, тэ̄нэ ма̄гсыл олн ат хульты. Наталья Леонидовна тав палтэ ёхталам ка̄сыӈ хо̄тпан нё̄туӈкве ла̄вхатас. 1066 2013.12.20. Тамара МЕРОВА Са̄в ня̄врам тыт вос самын паты. Мо̄лалнув округ Общественный палата ма̄хум то̄ва кӯщаит ёт акванатхатыгласыт ос та̄н «демографическая ситуация» о̄вылтыт потыртасыт. Тувыл ка̄сыӈ кӯщай ла̄вум ля̄ххаланыл та̄н аквана̄рталасаныл ос матыр э̄лаль о̄лнэ ёмас ла̄тыӈ аквъёт киссыт. «Родители в защиту семьи и детства» нампа ва̄рмальт кӯщай нэ̄ Мария Федотова ла̄внэ̄тэ щирыл, ма̄н округув хо̄т та̄л сыс яныгса̄т со̄тыра са̄вит э̄лумхо̄лас са̄вмыс. Тох е̄мтыс, а̄ти са̄в ня̄врам самын патнэ ма̄гыс, тыи сака са̄в хо̄тпа по̄х ма̄ныл тыг о̄луӈкве ёхтэ̄гыт. Ань тыт округувт са̄внув ня̄врам самын вос патэ̄гыт, Мария Александровна аквъёт рӯпитан ма̄хманэ ёт сыресыр хӯлтыглан ла̄тӈыт щё̄питасыт. Рущ ла̄тӈыл та̄н «пути использования медикосоциальных инновационных ресурсов» тэ̄лаг хасве̄сыт. Александр Быстров, общественный связь Департаментыт рӯпитан хум, таи потыртас: «Ты та̄л лов э̄тпос сыс Юграт о̄лнэ ос рӯпитан ма̄гыс 188 со̄тыра 227 хо̄н ма̄ныл ёхтум хо̄тпа нэ̄паканыл ва̄руӈкве ке̄тсаныл. Та̄н халанылт туп са̄тпан нупыл акв э̄лумхо̄лас э̄лаль ханищтахтам высший образование о̄ньщи. Тувыл пуссын рӯпитан ма̄ныл тыт ат то̄влавет ос яныгпа̄лэ рущ ла̄тыӈ торыӈыщ ат ва̄ганыл». Та щирыл ма̄навн маныр ва̄руӈкве, ма̄навн ос хоталь ха̄йтуӈкве. Кӯщаит маныр номтыл о̄лэ̄гыт, ты урыл манрыг ат номсахтэ̄гыт. Тувыл пуп колт по̄йкщан хо̄тпат ос ле̄ккарыт мо̄т та̄рвит ля̄ххал тотсыт. Сергей Чесноков «За жизнь» намаим программа щё̄питас, тав ща̄ниг е̄мтнэ ва̄рмалит ма̄гыс пуӈктоты. Тох е̄мтыс, та̄рвитыӈыщ е̄мтнэ са̄в нэ̄т ань ня̄враманыл хотвинэ накын патхатэ̄гыт ос та̄нки пуста̄гыл э̄лаль о̄лнэ о̄вылтыт щар ат номсахтэ̄гыт. Тамле ва̄рмалит хотмус ёлпо̄илттаӈкве э̄ре̄гыт. Ань таима̄гыс ма̄ньлат ма̄хум ёт ва̄тихал ты урыл потыртаӈкве э̄ри, та̄нанылн са̄всыр хурит ос видеороликыт суссылтаӈкве э̄ре̄гыт. Та̄н ты урыл кина ва̄рсыт. Ще̄мья урыл о̄с я̄нас ла̄всыт, хунь э̄лумхо̄лас То̄рум нупыл агтта̄л о̄лы, то̄нт таве̄н ще̄мья ат э̄ри, ня̄врам ат э̄ри. Та щирыл э̄лаль о̄луӈкве ат ро̄ви. Округ здравоохранение департаментыт акушерство ва̄рмалит палт кӯщаиг о̄лнэ нэ̄ Софья Яковенко, ня̄врам хотвиӈкве тахнэ нэ̄т ёт хумус рӯпитэ̄гыт, маныр нё̄тмил та̄нанылн ва̄ре̄гыт, хо̄т та̄нанылн пусмалтахтуӈкве манос ханищтахтуӈкве ро̄ви, таит пуссын хӯлтсанэ. Тамле рӯпатаныл юипа̄лт то̄ва нэ̄квет ня̄врамыӈыг е̄мтэ̄гыт. Ос ня̄врам хотвинэ нак ва̄рнэ нэ̄ хо̄тпа тохилыӈ са̄в, ты та̄л онтолов э̄тпос сыс 10 со̄тыра 441 операция ва̄рвес. Мо̄лты аквты порат тыгыл са̄внув о̄лыс. Тувыл юио̄выл та̄лытыт нилахуйплов, атхуйплов та̄л яныт са̄внув а̄гит тамле операциян ёхталаӈкве патсыт. Сургутныл ёхталам ле̄ккар Анжелика Каспарова «Жизнь – как священный дар» нампа касыл о̄вылтыт потыртас. Ты проектаныл кастыл та̄н ня̄врам хотвинэ нак о̄с ёлпо̄илттэ̄гыт. Кит та̄л сыс 700 нэ̄т ня̄врамыӈыг е̄мтсыт. Ань тамле тэ̄лат акваг та̄рапаттым о̄ньщуӈкве ке, ве̄к ма̄хум номтыӈнуве̄г патнувыт ос маныр лю̄ль та̄н ва̄ре̄гыт, ань вос торгамтыяныл. 1066 2013.12.20. Александр ВЬЮТКИН Пе̄рщил щё̄питан хум потре. Сургутский районт Русскинские па̄вылт ханты ма̄хум халт пе̄рщин касыл о̄лнэ порат Степан Кечимов ёт ва̄щинтахтасум. Степан Антонович округув янытыл са̄лыт о̄щнэ ма̄хум халт президентыг пе̄риим о̄лы. Ме̄н хо̄нтхатыглахтамуме̄н порат «Нюл-Тахли» пе̄рщин касылн щё̄питахтын урыл ам таве титыгласлум. – На̄н ты касыл э̄лаль ялтуптаӈкв хунь номылматыслы̄н? – Са̄в мир та̄нти щир пе̄рщин касыл о̄ньще̄гыт. Та̄н та̄нти ялпыӈ хо̄таланыл янытлан порат аквписыг пе̄рщим касэ̄гыт. Таима̄гсыл мо̄лты ма̄н Союз этноспорта колт рӯпитан ма̄хум ёт тамле касыл йильпииг, э̄лаль ялтуптаӈкв потыртахтасӯв. Акваннё̄тхатым ва̄рнэ рӯпатав щирыл ма̄н касыл урыл са̄в пӯмащ тарапаттысӯв. Округув янытыл ма̄хум са̄всыр щирыл пе̄рще̄гыт. Русскинские па̄вылт ань ты касыл ма̄к пе̄с хольт ва̄рыслӯв». – Сургутский районт пе̄рщуӈкв ка̄сащан ма̄ньлат ма̄хум са̄в манос мощща? Хунь ма̄н ты касылув урыл ля̄ххал те̄тсӯв, та̄рапатыс, са̄в хо̄тпа пе̄рщуӈкв ка̄саще̄гыт. Янге, ма̄не пуссын а̄нумн свонитаӈкв патсыт. Аквъёт пуссын яныгса̄т ляпатем каснэ хум та̄нтина̄ныл каснэ ма̄гсыл хасылтасаныл. Са̄в хо̄тпа юн ва̄рнэ тэ̄ланыл щирыл тыг ёхтуӈкв ат ве̄рмысыт. Ань Русскинские па̄вылн ляпат о̄лнэ ӯсытныл ос па̄влытныл ма̄хум кассыт. Хумус ма̄н номсэ̄в, аквты «Нюл-Тахли» пе̄рщил касылн са̄в соссаӈ мир тах ёхты. Ма̄н ма̄гсылув ты касыл иӈ акв э̄рнэ пӯмащ. Халанылт ё̄раныл а̄рталан ня̄враманув ё̄рнуве̄г е̄мтэ̄гыт». 1066 2013.12.20. Валентина УЗЕЛЬ Валентина Васильева Н. И. Терёшкин яныгса̄т та̄лэ то̄влыс. Ханты ма̄хум халт ма̄к о̄выл учёныиг Николай Иванович Терёшкин ла̄ваве. Ань ты э̄тпос 25 хо̄талэ̄т ты хум яныгса̄т та̄лэ то̄влынув. Тав Согом па̄вылт 1913 та̄лт самын патыс, сака ма̄ниг о̄лме порат, а̄ще во̄рн минас, юв ат ёхтыс. Та юипа̄лт оматэ во̄раяӈкв минас, юв во̄рныл о̄с ат ёхтыс. Пыгрищакве такте̄т та хультыс, то̄нт тав туп тит та̄лэ то̄влыс. Ляпа рӯтанэ̄н вуйвес. 15 та̄лэ хунь то̄влыс, тав ущ о̄выл классын минас. Акв та̄л сыс та̄ра хӯрум класс а̄стлас. Э̄лаль тав Тобольск ӯсн ханищтахтуӈкв те̄твес, а̄стламе юипа̄лт Остяко-Вогульск (Ханты-Мансийск) ӯс педучилищан ёхтыс. Тот ханищтахтаме сыс, тав партийный школан те̄тым ма̄хум ханты ла̄тӈын ханищтасанэ. 1935 та̄лт тав ма̄нь па̄влыӈ ма̄н ня̄врамыт ханищтаӈкв те̄тыглавес. Акв та̄л тот рӯпитас, ювле ӯсн во̄ввес. Ханты-Мансийск ӯсныл тав Ленинград ӯсн народов Севера Институтн ханищтахтуӈкв минас. Тот тав Вольфганг Штейниц ёт ва̄йхатас. Та немец хум профессор нам о̄ньщис, ос та институтт ханищтахтын ма̄хум ханты ла̄тӈын ханищтасанэ. Николай такви ханты ла̄тӈе ёмащакв ва̄стэ, потыртас. Ос хунь тав ты немец хум палт ёхтыс, то̄нт ты та̄рапатыс, потыртаӈкв кос ха̄сы ос ла̄тныт э̄рнэ щирыл хансуӈкв ат ве̄рмиянэ. Та та̄лытт ма̄хум пувуӈкв та патве̄сыт. Акв хотты хо̄тал Николай Иванович ляпа юртэ вуйвес. Ка̄сыӈ хо̄тпа пилым о̄лыс. 1940 та̄лт Николай Терешкин институт а̄стластэ, аспирантурат э̄лаль вос ханищтахты, Ленинград ӯст хультуӈкв ла̄ввес. Ос яныг хо̄нт та о̄вылтахтас. Тав та̄ра хо̄нтлын ма̄н минас. 1944 та̄лт тав та̄кыщ сакватавес. Война порат институт Омск ӯсн тотвес. Николай Иванович пусмалтахтаме юипа̄лт тув ты минас. 1948 та̄лт аспирантура а̄стластэ. 1950 та̄лытт языкознание институт па̄лыл тав Тюменский областьн эспедициян са̄в щёс те̄тыглавес. Тот ты тав э̄кватэ хо̄нтыстэ. Таисья Дмитриевна школат рӯпитас, ня̄врамыт ос та̄н ща̄няныла̄щаныл хансуӈкв ос ловиньтаӈкв ханищтасанэ. Акванминаме̄н юипа̄лт Сергей пыге̄н самын патыс. 1968 та̄лт Николай Иванович учёный намыл майвес. Тав 1986 та̄лт а̄тимыг е̄мтыс, рӯпитаме палытыл са̄в научный нэ̄пак хансыс, ань ты мус то̄ва учебниканэ йильпиииг та̄ратавет ос та̄н хосытаныл ня̄врамыт ханты ла̄тӈыл потыртаӈкв ханищтавет. Ань тав пыге Сергей Николавич Санкт-Петербург ӯст о̄лы, студентыт ханищтыянэ, тав о̄с а̄ще хольт наука рӯпата ва̄ри, ханты ла̄тыӈ ханищтытэ ос са̄всыр нэ̄пакыт хансы. Ты потыр ма̄ньщи ла̄тӈыл Валентина Васильева хансыстэ. 1066 2013.12.20. Тамара МЕРОВА Тамара ХАТАНЕВА Пасан ва̄тат ёмщакв ӯнлантасыт. Ты э̄тпос лов щислат «Югра лылыеп» ассоциация колн Ханты-Мансийскат о̄лнэ матумпа̄ла соссаӈ хо̄тпат во̄виньта̄лве̄сыт. Тот округув нам хо̄талэ янытлан кастыл Фаина Иштимирова ос Раиса Гаврильчик, «Лылынг союм» нампа студият рӯпитан нэ̄г, пасан ва̄рыгласы̄г. Аквта хо̄талт тот кит нэ̄г нам хо̄талэ̄н о̄лум. О̄влэ̄т Людмила Александровна Алфёрова мӯй ма̄хум ёт пащалахтас, та̄наныл янытласанэ ос тувыл тав нам хо̄талэ̄т янытлавес. Ос Наталья Николаевна Чайникова, насати, 50 та̄лэ то̄влум. Тав по̄лям ӯсхул тотыс, атыӈ хӯлыӈня̄нь ва̄рум. Мӯй ма̄хум таве̄н яныг пӯмащипа ос пуста̄гыл э̄лаль о̄лнэ ла̄тыӈ ла̄всыт. Ты хо̄нтаӈ ма̄ньщи нэ̄ мо̄лалнув тав Ханты-Мансийсканыл Сургут ӯс нупыл миннэ лё̄х ляпат 22 ве̄рыстат «Лылынг маа» нампа па̄выл ӯнттуӈкве номылматас. Та ма̄т ханты ос ма̄ньщи ще̄мьят кол ӯнттын ма̄ виӈкве ка̄щилтыянэ. Туи то̄ва ма̄хманув та во̄рыӈ ма̄ хотсыстамтасаныл, па̄хвыӈ лё̄хъяс ва̄рсыт. Ань хотъют ма̄ ёвтуӈкве таӈхи ке, Наталья Чайникова вос китыглэ̄гыт. Тувыл Раиса Мартыновна ос Фаина Павловна мӯй ма̄хум ма̄гыс сыресыр кас щё̄пита̄лсы̄г, а̄мщит а̄мщисы̄г, нё̄тнэ̄г «Куринька» йӣкв йӣквсы̄г. Пасан ва̄тат ӯнлын ка̄сыӈ мӯй хо̄тпан потыртаӈкве э̄рыс, хоты та̄л па̄сыл тав Ханты-Мансийскан о̄лмыгтас. То̄нт ӯс манхурипаг о̄лыс, хумус ма̄хум о̄лсыт. Ка̄сыӈ хо̄тпа потранэ сака пӯмщиг о̄лсыт, таса̄вит ёмас ма̄хум номылматыгласанӯв. Ань соссаӈ ма̄хманув ма̄гыс тамле ялпыӈ хо̄тал акваг вос ва̄рыгла̄лнуве, ма̄нки ва̄тихал акван вос хо̄нтхатыгланувӯв. 1066 2013.12.20. Светлана РОМБАНДЕЕВА О̄лнэ ма̄наныл ӯргалыяныл. Ты хурит Владимир Алексеевич Кряжков ос ханты нэ̄г – Лилия Семёновна Петрушенко (а̄ги о̄парищ наме Ермакова) ос Елена Павловна Скрипникова (а̄ги о̄парищ наме Кечимова) по̄слым о̄лэ̄гыт. Сургут ӯст яныг таквс э̄тпост научнопрактический конференция о̄лме порат ты ма̄хум тув ёхталасыт. Кряжков о̄йка – юридический наукат доктор нам о̄ньщи, Москват о̄лы. Тав «Международноправовые нормы и российское законодательство в сфере защиты прав коренных малочисленных народов Севера» нампа доклад ловиньтас. О̄йка соссаӈ мир янытлытэ, са̄лыӈколыӈ ма̄хум тармыл патыянэ. Ханты нэ̄г Когалым ӯсныл ёхталасы̄г. Тэ̄н са̄лыӈ колт яласэ̄г, община кӯщаиг о̄лэ̄г. Лилия Семёновна ла̄внэ̄тэ щирыл, та̄н Когалым ӯст о̄лнэ кол о̄ньще̄гыт кос, ос янгыщ во̄рт о̄лэ̄гыт, са̄лыяныл ӯрияныл. Ма̄во̄й но̄хвинэ ма̄хум ёт акваг воритотэ̄гыт, са̄лыяныл ӯрнэ ма̄т та̄н ма̄во̄й но̄хвиӈкве ат та̄ратахтэ̄гыт. Тав а̄гипыг о̄ньщи, Елена Павловна о̄с ня̄врам о̄ньщи. Татем ёмас нэ̄кве̄г, мире̄н э̄руптытэ̄н, ща̄нь ла̄тӈе̄н янытлытэ̄н. Халэ̄нт тэ̄нти ла̄тӈыл потыртэ̄г. Хо̄тпа нупыл сымыӈ нэ̄кве̄г. Ты я̄тил ма̄хум пуссын пуста̄гыл вос о̄лэ̄гыт, пус ка̄т, пус ла̄гыл! 1066 2013.12.20. Светлана РОМБАНДЕЕВА Светлана ХОЗУМОВА Лелятов рӯт нэ̄. Анна Владимировна Албина Ха̄льӯс район Кульпас па̄вылт о̄лы. Ты ма̄ньщи нэ̄ а̄ги о̄парищ наме Лелятова, 1969 та̄лт Ягрим па̄вылт самын патыс. Оматэ Матрена Ивановна Лелятова, а̄ги о̄парищ наме Монина, Харщум (Куги) па̄вылт самын патыс. На̄н ань э̄лаль Анна потре ловиньтэлы̄н: – Омам хосат а̄тимыг е̄мтыс. А̄тям Владимир Васильевич Лелятов, Шомы па̄вылт самын патыс. Тав ань 79 та̄лэ ты то̄влыс. Са̄в та̄л рыбоучастокт рӯпитас, бригадирыг о̄лыс. Ма̄н нила ня̄врам о̄лсӯв – кит каӈкагум Сергей ос Андрей, ам, тувыл ма̄нь йӣгрищув Наталя. Каӈкагум сас а̄тимыг, йӣгрищум о̄с тыт, Кульпаст, ще̄мьятэ ёт о̄лы. Хӯрум ня̄врам о̄ньщи – Люда, Вика ос Абрам. О̄йкатэ Николай Абрамович Гындыбин ты туи а̄тимыг е̄мтыс. Ам Кульпаст ханищтахтасум, лов класс а̄стласум. Акв та̄л ня̄врам ӯрнэ колт нянечкаг рӯпитасум. Тувыл Тюмень ӯсн минасум, тот почтовый связь училищат акв та̄л ханищтахтасум. Тыт почтат та̄л арыг рӯпитасум, тувыл школаинтернатын тэ̄нут па̄йтнэ нэ̄г рӯпитаӈкве патхатасум. О̄йкам Юрий Борисович Албин, Ло̄пмус па̄вылт самын патыс. 1993 та̄лт акванминасаме̄н. Кит ня̄врам о̄ньщиме̄н. Маша а̄гиме̄н 1994 та̄лт самын патыс. Тав Ханты-Мансийск ӯст медицинский академият, акушерский отделеният ханищтахты. Олег пыгме̄н 1997 та̄лт самын патыс, тав ань школат ловит классыт ханищтахты. Анна Владимировна тох та потыртас. Ты я̄тил ма̄ньщи нэ̄ ще̄мьятэ ёт пуста̄гыл вос о̄лы, На̄янэ̄н, О̄тыранэ̄н вос ӯргалаве! 1066 2013.12.20. Светлана РОМБАНДЕЕВА Светлана ХОЗУМОВА Ма̄щтыр ханты э̄ква. Ты таквсы редакциявн акв пӯмыщ э̄ква щалтсас, наме Надежда Брониславовна Вялова. Тав нэ̄пакыл са̄всыр хурит яктуӈкве ха̄сы, ты рӯпататэ ма̄навн суссылтастэ. Со̄ль, ма̄навн татем пӯмыщ о̄лыс тав нуплэ сунсуӈкве. Я̄ӈк нэ̄пак выг, хӯрмах ман нилах щёс са̄гумтытэ, ё̄ӈхащлым якытлапитэ. Тувыл нэ̄паке састумыг пинумтытэ, яты, матыр хорам тэ̄лы ман хотты товлыӈӯй манос во̄рӯй. Тамле пӯмыщ рӯпата ва̄рнэ̄тэ коныпал, Надежда Брониславовна мо̄т са̄всыр тэ̄лат ва̄руӈкве ха̄сы – ханты суп ю̄нты, а̄канит ва̄ри, ня̄врамытн мо̄йтыт мо̄йты. Ма̄н э̄лыпа̄лувт а̄канянэ пасан тармыл тӯщталасанэ, театр хольт та ёнгалтыянэ. Та̄н э̄рттам та̄нти халанылт потраме̄гыт, ё̄ӈхатахтыглэ̄гыт. Ёт тав йӣво̄влыт тотыглы – ты о̄с ёнгынутыт. Йӣво̄вланэ ма̄н халувт уртгаласанэ, ань тав ётэ вос ёнгасэ̄в. Ка̄тын выганӯв, мощ но̄хнуве вущкасыянӯв, ка̄т алав тув тактапилӯв, матах тув та паты. Тувыл та̄наныл о̄с но̄хнув вущкаса̄лыянӯв, матах ве̄рме̄в пувуӈкве, та пувумтыянӯв. Хотьют са̄внув йӣво̄выл ка̄тынпатты, тав но̄х та паты. Тамле пӯмыщ ёнгил та. Ма̄н пуссын татем ёнгасасӯв, мовиньтасӯв, ня̄врамыт хольт маттем та ща̄гтакласӯв. Надежда Брониславовна Томск ӯсныл ёхталас. Тав ла̄внэ̄тэ щирыл, Кышик па̄вылн мины, тот хотты юрт нэ̄тэ о̄лы. Та па̄выл школан ялуӈкве номсы, ты мӯтранэёнгиланэ тот ня̄врамытын суссылтаӈкве таӈхи. Редакциявн тав Тамара Сергеевна Мерова палт щалтсас. Тэ̄н, насати, хосат ва̄йхатанэтэ̄н. Тав уре̄тыл Тамара «Луима сэ̄рипос» газетат 20й номерт 2010 та̄лт хансыглас. Э̄ква 1952 та̄лт самын патыс. Оматэ ханты нэ̄ о̄лум. Ащо̄йкатэ Семён Максимович Мурасов хӯл алыщлан, во̄раян хумыг о̄лыс. Тав ань Томский область Каргасокский район Бондарка па̄вылт ще̄мьятэ ёт о̄лы. О̄йкатэ̄нтыл ат ня̄врам янмалтасы̄г – кит пыг, хӯрум а̄ги. Та̄н ань пуссын янгыт, ще̄мьяӈыг е̄мтсыт. Пыгаге ащо̄йкатэ хольт хӯл алыщлаӈкве ман во̄раяӈкве о̄с сака ха̄сэ̄г. Надежда Брониславовна мӯтра тэ̄ланэ Россия янытыл са̄в ма̄т ва̄вет – Томский, Московский, Новосибирский областитыт, Хакасия Республикат. Са̄всыр фестивалит, конкурсыт ман мастерклассыт о̄лыгланэ̄ныл порат, тав тот акваг выступайта̄лы, тув яланта̄лы. Э̄ква са̄в Почётный грамотат ос ма̄глын тагатан по̄сыт о̄ньщи. Томский область губернаторын 2012 та̄лт грамотал ос премиял майвес. Ты мӯтраӈ э̄кван ма̄н пӯмащипа ла̄тыӈ ла̄всӯв. Тамле я̄тил ханты хо̄тпа пуста̄гыл вос о̄лы, пус ка̄т, пус ла̄гыл! 1066 2013.12.20. Александр ВЬЮТКИН Тыньщаӈ сагнэ ханищтап. Яныг таквс э̄тпос оигпан хо̄талэ̄т Ханты-Мансийск ӯст тыньщаӈ сагнэ ханищтап ва̄рыглавес. Ты ханищтап А̄с-угорский ма̄ньлат организацият рӯпитан ханты пыг ва̄рыглаӈкв номылматастэ, тав наме Руслан Богордаев, ты ханищтап губернатор грантолн вуйлым щирыл ва̄рыгластэ. Тыньщаӈ сагуӈкв ханищтан ма̄гсыл Белоярский район Касум па̄вылныл Яков Никифорович Тарлин ма̄щтыр ханты хум во̄виньта̄лвес. Тав «Россия ма̄щтыр» нам о̄ньщи. Мастеркласс «Югра лылыеп» соссаӈ мир организация колт ва̄рыглавес. Ханищтап о̄вылтан порат Александр Новьюхов, «Югра лылыеп» кӯщаиг о̄лнэ хум, ла̄тыӈ ла̄выс: «Ма̄н, яныгнувег о̄лнэ ма̄хум, ма̄ньлат хо̄тпанув нупыл сунсым, хотща̄гтэ̄в. Тыньщаӈ сагнэ ханищтап округувт щар о̄выл щёс ва̄рыглавес. Са̄лыӈ ма̄хмыт ма̄к та̄н ты ва̄гыт, тыньщаӈ сагнэ рӯпата манырсыр та̄рвитыӈ рӯпатаг о̄лы. Ма̄н та̄н рӯпатаныл ӯст о̄лнэ ма̄хмытын таима̄гсыл суссылтыянӯв. Ты хорамыӈ, та̄к ква̄лыг хумус сагаве, вос ва̄гыт. Сунсэ̄н ос ханищтахтэ̄н». Александр Новьюхов потыртан ма̄ныл а̄стуме юипа̄лт, Надежда Молданова ла̄тыӈ ла̄выс. Тав А̄с-угорский ма̄ньлат организация тармыл кӯщаиг пе̄риим о̄лы. Тав ла̄выс: «Ам Руслан Богордаевын тыньщаӈ ма̄щтырлан номтэ э̄лаль тотнэ ма̄гсыл, яныг пӯмащипа ла̄ве̄гум. Ам ва̄глум, ма̄н округувт тэ̄пыӈ ща̄рк иӈ са̄в. Таима̄гсыл ма̄навн тыньщаӈыт сагуӈкв ань ты ханищтахтуӈкв э̄ри». Мастеркласс о̄вылтан э̄лыпа̄лт, Яков тыньщаӈ сагнэ ма̄гсыл ня̄р щё̄питан урыл мощ потыртас. Хоты порат, маныр щирыл са̄лы то̄выль хотнёлхаптуӈкв э̄ри. Тувыл ос ханищтахтуӈкве ёхталам ма̄ньлат хо̄тпат хотнёлхатам, витыӈ ня̄р атэ вос торгамтыяныл, витыӈ та̄гыл ёт тотыгластэ. То̄ват то̄выль хотнёлхатнэ саюм атыл нёлсамасаныл ка̄тыл лаппонюмтым, иснас па̄лыгпунсым э̄лаль хӯнтлысыт. Титыт хо̄талт тыньщаӈ сагнэ ма̄гсыл ощщахоса ня̄р ква̄лыг яктуӈкв ос ка̄миньтаптуӈкв о̄вылтахтасыт. О̄влэ̄т титэ̄лмиӈ касаил ня̄р сов ощщаг яктуӈкв о̄вылтан порат, ня̄р акв па̄ӈвхит ква̄лгыг яктуӈкв ат а̄ртмыс. Ма̄ньлат ма̄хум та хо̄талт хо̄тал палыт тыньщаӈ сагнэ ня̄р ква̄лгыт щё̄питасыт. Ня̄р ква̄лыг каминьтлан ос сове ню̄нслан порат са̄в ё̄р э̄ри. Таима̄гсыл тыньщаӈ сагнэ ханищтахтын хо̄тпанув халанылт ва̄тихал пе̄нтхатым рӯпитасыт. Ӯщлахтанэ̄ныл порат ос исум ща̄й айсыт. Юио̄выл хо̄тал Яков Никифорович ханищтан ма̄хманэ тыньщаӈ сагуӈкв ханищтаӈкв о̄вылтасанэ. О̄влэ̄т тав та̄нанылн хӯлтыглас, хумус нилаг яктым ня̄р ква̄лгыт акв та̄к хорамыӈ тыньщаӈыг сагуӈкв э̄ри. Хоты ква̄лге хоталь пинуӈкв, хоты тулё̄влыл та̄наныл пувуӈкв. Ты урыл ёмщакв ля̄льт потыртасанэ ос щир мус хӯлтсанэ. Ёхталам ма̄хманэ са̄выӈпа̄лэ та̄ра тыньщаӈ сагуӈкв ханьщувласыт. Щё̄питам ня̄р ква̄лганыл са̄всыр па̄ӈвхитыл яктыманыл ма̄гсыл тыньщаӈаныл ос мо̄тмо̄т осытыг тэ̄лсыт. Та хо̄тал нила тыньщаӈ сагуӈкв о̄вылтахтасыт. Руслан Богордаев ла̄выс: «Ма̄навн ань ты рӯпата а̄стлан ма̄гсыл ма̄щтырлан колнак э̄ри хо̄нтуӈкв. Ань о̄вылтам рӯпатав тах ва̄тихал а̄стлылӯв». 1066 2013.12.20. Светлана РОМБАНДЕЕВА Ма̄щтыр ма̄ньщи хумиягӯв. Ханты-Мансийск ӯст «Торум Маа» музейт о̄лум семинар урыл потрум э̄лаль мины. Ма̄щтыр ма̄хманув тот ма̄щтырлахтынэ̄ныл сыс ка̄тыл ва̄рум пормасаныл урыл китыгласанум. Кит ма̄ньщи хумыг, Никита Калистратович Партанов ос Анатолий Васильевич Вадичупов, тот о̄с ма̄щтырласы̄г. Никита Калистратович ёргащлахтым ӯнлахо̄лыс, таве китыгласлум, маныр ёргащлы? – Хӯл алыщлан камка ва̄рнэ ма̄гыс са̄глат ёрге̄гум. Ты семинарув кастыл ам Хо̄нтаӈ ма̄ньщи хо̄тпав Анатолий Николаевич Хомяков палт Кондинский район Половинка па̄вылн ялсум, та ма̄щтыр о̄йка ёт ме̄н э̄рнэ йӣвыт щё̄питасме̄н. Во̄рн ялсуме̄н, ме̄наме̄н па̄выл пыгрищит нё̄тсыт. Тувыл йӣванаме̄н тыг ма̄шинал тотсанаме̄н, ань тыт ты ёргиянме̄н. – Камка ва̄руӈкве та̄рвитыӈ? – Атхунь та̄рвитыӈ, акв хо̄тал хунь ва̄раве. Ты сака та̄рвитыӈ рӯпата. Хунь нас сунсэ̄гын, номсэ̄гын, молях ва̄раве. А̄ти. Ме̄н ань нилыт хо̄талуме̄н ты ва̄рнэме̄н, ты э̄лыпа̄лт ля̄м йӣвыл ла̄кв ва̄рсуме̄н, тарыг йӣв атсуме̄н. На̄ӈк йӣвыл те ва̄руӈкве, тай ёмас, камка та̄к, хот ат саквалы. Тамле камка са̄в та̄л о̄ньщуӈкве ро̄ви. Хотты йӣв о̄влэ супыг те саквалы, мо̄т йӣвыл пе̄нтуӈкве ро̄ви. Э̄лнаӈ ма̄хманув ка̄сыӈ хо̄тал рӯпитасыт, камкат ос мо̄т са̄в э̄рнэ пормасыт ва̄рсыт. Таима̄гыс та̄нанылн матыр ва̄руӈкве сака та̄рвитыӈ ат о̄лыс. Пе̄с ма̄хманув ё̄рыт о̄лсыт. Ка̄сыӈ пормас та̄н э̄рнэ ма̄гыс ва̄рсыт – а̄рпи ва̄ре̄гыт, камка ӯнттэ̄гыт, хӯл пуве̄гыт. Ма̄н ос ань нас хӯлп ӯнттэ̄в, таима̄гыс ма̄навн камка ва̄руӈкве та̄рвитыӈ. Ань камкал алыщлаӈкве ат ро̄ви, рущ щирыл ла̄вавет – «браконьерские снасти», пувавен, штрафыл пинавен. Камка ва̄рнэ хо̄тпат иӈ о̄лэ̄гыт, та̄нанылныл ма̄н ханищтахтэ̄в. Рудольф Васильевич ос Анатолий Николаевич ха̄сэ̄г ва̄руӈкве, тэ̄натэ̄ныл ма̄н ханищтахтэ̄в. Тэ̄н а̄тимыг е̄мтэ̄г, хо̄ӈха ва̄руӈкве паты. Анатолий Николаевичин ань та̄рвитыӈ рӯпитаӈкве, яныгпа̄лаг е̄мтыс. Э̄рыӈ хо̄т о̄с о̄лэ̄гыт ты ва̄рмаль ва̄нэ хо̄тпат, хунь ва̄ве. Ка̄сыӈ хо̄тпа ханищтахтуӈкве ве̄рми, сунсы хумус ва̄руӈкве, тувыл э̄лаль та ханьщувлы. Ме̄н ань ты ва̄рсуме̄н – ты котиль камка, а̄ти сака яныг, ма̄нь о̄с а̄ти. – Ма̄нь порат наӈ камка ва̄рыгласын? – А̄тям ва̄рыглас, ам тай а̄ти. Пыгум о̄с ат ха̄сы. Лагерьт о̄лыгланэ̄ныл порат, ханищтанувет те, тай ва̄рнувыт, ханьщувланувыт. Омам со̄вт ю̄нтыс, па̄йп. Во̄рн акваг ялантасӯв, со̄вт ос па̄йп ка̄сыӈ о̄ньщас. Анатолий Вадичупов ос са̄сныл витвит ва̄рыс. Тав ляпатэ̄н ро̄влахтасум, китыглахтасум, хотьютн ханищтавес тох ма̄щтырлаӈкве? – Нэ̄мхотьютн ат ханищтаве̄сум. Юн, ма̄ньта̄гыл номилум, са̄сныл ва̄рим со̄втыт ман па̄йпыт о̄щсӯв. Ты нила хо̄тал сыс ам пус са̄с курщипыл ве̄тра ва̄рсум. Нуми па̄лыл о̄с са̄сыл пе̄рыслум, хӯрмиттыг о̄с пе̄рыслум, тав хӯрум писыг е̄мтыс. Осыӈ ве̄тра, тув пил пинуӈкве ро̄ви. Юн о̄щнэ ве̄тра, е̄ри ат паты. Ты музейт тамле ве̄тра о̄лы, пе̄с йис ве̄тра, яныгмамум порат тамле пормас ат ва̄сум. Ань ос са̄сныл улпыл нэ̄мхотьют пормас ат ва̄ри. Таима̄гыс тамле семинарыт ва̄рыглаӈкве э̄ри, ма̄нь ма̄хум вос ханищтахтэ̄гыт, пе̄с ма̄хманув маныр ва̄рыгласыт, хумус ма̄щтырласыт, вос ва̄ганыл. Тамле семинар э̄рыӈ хотмус мощ мо̄т щирыл ва̄руӈкве э̄ри, тыт сака ащирмаӈ, во̄тыӈ. Ма̄хум улпыл по̄лявет, тыг сака ат ю̄выт. То̄ванакт рӯпитаӈкве нас тай вуйхатэ̄гыт, тувыл по̄люӈкве патавет, хот та ое̄гыт. – Наӈ хо̄т самын патсын? – Кимкъясӯй па̄вылт 1964 та̄лт самын патсум, ам щар ма̄нь. Ат увщи о̄ньще̄гум – Аля, Анна, Галина, Лиля ос Вера. Та̄н юипа̄ланылт Слава каӈкум самын патыс 1962 та̄лт. Ам щар ма̄нь. Яныг увщим Саранпавылт о̄лы, тав ёлыпал кит увщиягум Сургут ӯст о̄лэ̄г, аквам Нефтеюганск ӯст, ма̄нь увщим Тюмень ӯст о̄лы. Омагма̄тягм хосат а̄тимыг. Тэ̄н сас са̄лыӈ ще̄мьяныл о̄лсы̄г. А̄тям Василий Николаевич Во̄лья (А̄рпи) па̄вылт самын патыс, ты Та̄гт па̄вылныл алгаль Са̄ӈкитӯр па̄выл. Омам Елена Ивановна Таратова, тав ос Нё̄р ёлыпал Во̄лиӈ па̄вылныл о̄лыс. Пе̄с порат яныг па̄выл о̄лыс. – Анатолий Васильевич, наӈ са̄сныл ма̄щтырланэн коныпал, матыр мо̄т пормас ва̄ре̄гын? – Мо̄т пормас ва̄ре̄гум – са̄ӈквылтап ос койп ва̄ре̄гум. О̄с амти ханищтахтасум. Салехард ӯст 1989-1990 та̄лытт ос йӣвныл ма̄щтырлаӈкве ханищтахта̄лсум. – Та яныг ӯсн, тапалыт ма̄, хумус тув минасын? – Тув ам амттем минасум, то̄нт Тюменьт о̄лсум. Салехард ӯст искусства училище о̄лы, 1984 та̄лт тув ёхтысум, ханищтахтуӈкве о̄вылтахтасум. Мо̄тыт та̄лт армиян вуйве̄сум, тувыл 1988 та̄л порат та̄л котиль э̄тпост о̄с аквтув ювле ёхтысум. 1990 та̄лт училище та а̄стласум. Та па̄сныл матыр акваг ва̄ре̄гум, ёрге̄гум. Юн то̄ва инструме̄нтыт о̄ньще̄гум. Ам ань тыт «Торум Маа» музейт рӯпитэ̄гум. Ты я̄тил ма̄ньщи хо̄тпагӯв тох та потыртасы̄г. Пуста̄гыл вос о̄лэ̄г, пус ка̄т, пус ла̄гыл! 1066 2013.12.20. Николай МЕРОВ Ма̄н мирув урыл кина по̄слувес. Ва̄т са̄грапнал э̄тпост 3-6 хо̄талытт Ханты-Мансийский округн Коми республиканыл Сыктывкар ӯсныл кина по̄слын хо̄тпат ёхталасыт. Тот «Финноугорский центр национальной культуры» нампа организация о̄лы. Та ма̄ныл Анна Бушуева, Олег Митрошин ос Сергей Гулько тыг ёхталасыт. Та̄н финноугор рӯт ка̄сыӈ мир урыл кина ва̄ре̄гыт. Мо̄лты та̄л ханты ма̄хум урыл кина по̄слысыт. Ань ос ма̄ньщи ма̄хманув о̄лнэхӯлнэ наканыл кинан хансуӈкве ёхталасыт. О̄влэ̄т та̄н Кульпасн минуӈкве е̄мталасыт. Тот са̄в ма̄щтырлан, хӯл алыщлан, во̄раян ма̄ньщи хо̄тпа о̄лы. Ань та па̄выл мус тэ̄лы лё̄ӈх иӈ а̄тим, туп товлыӈха̄пыл тув ёхтуӈкве ро̄ви. Ос та̄н тыламлан билет ка̄тынпаттуӈкве ат ве̄рмысыт. Тыима̄гыс туп Ха̄льӯс мус ялсыт. Кина ва̄рнэ хо̄тпат тот о̄лнэ ма̄ньщит хӯрум хо̄тал по̄слысаныл. Ты мӯй хо̄тпат хащта̄л ма̄т хот ул вос тыпсыт, ам та̄н ётаныл тув ялсум. Маныр та̄н тот по̄слысыт ос хотьют ёт хо̄нтхатыгласыт, на̄н ты урыл э̄лаль ловиньтэ̄н. «Хо̄талъят порат товлыӈха̄пув Ха̄льӯсн исыс. Тэ̄пъяламув юипа̄лт та̄ра рӯпитаӈкве о̄вылтахтасӯв. О̄влэ̄т Ха̄льӯст о̄лнэ «Центр национальной Культуры» нампа колн минасӯв. Тот ханты ос ма̄ньщи ма̄хманув – Дина Тимофеевна Лисова, Клавдия Васильевна Койнова, Раиса Петровна Загороднюк, Зоя Захаровна Сидорова ос мо̄т нэ̄ хо̄тпат ӯрхатасыт. Та̄н ётаныл кина по̄слын ва̄рмаль урыл потыртахтасӯв ос краеведческий музейн минасӯв. Тот ма̄ньщи мир урыл са̄в пе̄с йис потрыт ос пормасыт атым о̄лэ̄гыт. Э̄типала мус тот рӯпитасӯв. Китыт хо̄тал ма̄н Ха̄льӯс по̄хыт ӯнлын па̄вылн ялсӯв. Ты па̄выл ма̄ньщи ла̄тӈыл «Со̄рни Сэ̄й» намаявес. Тот пе̄с щирыл во̄рколыт, а̄мпарыт ос сӯмъяхыт ӯнттым о̄лэ̄гыт. Э̄лыл ёхталан ма̄хум пӯмащ ма̄гыс тот ва̄тихал ӯщлахтэ̄гыт. Ты па̄выл Ха̄льӯс район янытыл рӯпитан «Э̄лаль» нампа предприятие хосыт ӯнттувес. Кӯщаиг тот О. К. Филиппова рӯпиты. Тот хум хо̄тпат хӯлпыт уральтасыт, во̄раян ва̄рмаль суссылтасыт. Нэ̄ хо̄тпат ос хӯл яктысыт, исмит па̄йтсыт. Кина ва̄рнэ хо̄тпат ты ва̄рмалит пуссын ёмщакв кинан по̄слысаныл. Хӯрмит хо̄тал ос Ха̄льӯс налми ва̄тан ялсӯв. Карс сып пуӈкыт на̄ӈк щахыл о̄лы. Пе̄с порат та ма̄ ялпыӈыг ла̄ввес. Ань ты хо̄тал мус соссаӈ ма̄хманув пӯрлахтуӈкве тув атхатыглэ̄гыт. Пуӈк пинэ̄гыт, На̄й-О̄тыранылн по̄йкще̄гыт, йир тӯщтэ̄гыт. Ты ма̄ урыл са̄в пе̄с потыр о̄лы. Пе̄с порат Ха̄льӯсн яныг ка̄нащ о̄йка Александр Меншиков ще̄мьяӈ та̄гыл ссылкан ке̄твес. Ты ка̄нащ хотталь щалтме порат та щахылт ёлщё̄питавес. Ётыл яныг вит ва̄рум порат, та а̄врах на̄лув ловумтавес. Ань тот ты канащ о̄йка кастылэ яныг памятник тӯщтым о̄лы. Ам ты ялпыӈ щахыл урыл ос ты кинат по̄слахтум хо̄тпат урыл ётылнув нэ̄глын газетатт э̄лаль тах хансэ̄гум. 1066 2013.12.20. Людмила ТЕТКИНА Людмила Тасманова Не̄лм рӯтанув палт ялсыт. Ма̄н округувт «Языковое гнездо» нампа проект хосыт Белоярский ос Ха̄льӯс райныгт ат садик рӯпитэ̄гыт. Ха̄льӯс район Ня̄хщамво̄ль па̄вылт «Северяночка», Кульпаст «Брусничка» ос Сӯкыръят «Оленёнок» нампа садикытт ня̄врамыт ма̄ньщи ла̄тӈыл потыртаӈкве ханищтавет. Ха̄льӯс район Тэ̄к па̄вылт «Зайчик» нампа садикт ос Белоярский район Касум па̄вылт «Оленёнок» нампа садикт а̄гирищитпыгрищит ханты ла̄тӈыл потыртаӈкве ханищтавет. Ань тамле рӯпата Россия янытыл финноугрыт о̄лнэ ма̄нанылт ва̄раве. Ты садикытт рӯпитан хо̄тпат акв та̄л сыс акв щёс та̄нки рӯпатаныл урыл потыртаӈкве акванатыглавет. Ты та̄л воспитателит Мордовия республикан Саранск ӯсн во̄виньта̄лве̄сыт. Тот «Финноугорские языки и культура в дошкольном образовании: проблемы обучения, опыт, перспективы» нампа ханищтап яныг таквс э̄тпос 26 хо̄талныл ва̄т са̄грапнал э̄тпос о̄выл хо̄талэ мус ва̄рыглавес. Россия янытыл финноугорский мир о̄лнэ ма̄тт ма̄нь ня̄врамыт ёт рӯпитан 40 э̄лумхо̄лас тув ялсыт. Ма̄н округувныл нила хо̄тпа: Галина Войтова, Ня̄хщамво̄ль па̄выл садикт кӯщай нэ̄, Оксана Гоголева, Сӯкыръят воспитателиг рӯпитан нэ̄, Тэ̄к па̄вылныл садикт кӯщаиг рӯпитан нэ̄ Надежда Катрычева ос воспитатель Светлана Ковтун тув во̄виньта̄лве̄сыт. Ханищтап Мордовский педагогический институт ос «Поволжский центр культур финноугорских народов» щё̄питалсы̄г. Тамле ханищтап «Финляндия – Россия» нампа общество ва̄рыглаӈкве нё̄ты. Ханищтахтаманыл порат ма̄хум са̄всыр э̄рнэ тэ̄лат урыл хӯнтлысыт: – этнообразование щирыл манхурип ань йильпи са̄кконыт пирмайтаве̄сыт; – ня̄врамыт аквторыг кит ла̄тӈыл хумус ханищтаӈкв э̄ри; – са̄всыр планыт ос са̄в мо̄т нэ̄пакыт э̄рнэ щирыл хумус хансуӈкв. Ма̄н округувныл ханищтапын ялум ма̄хум та̄нки рӯпатаныл урыл тот о̄с потыртасыт. Тувыл та̄н Инсар ӯст рӯпитан садик сунсуӈкве тотыглаве̄сыт. Тув ялантан ма̄нь ня̄врамыт пуссын рущ ос мордовский ла̄тӈыл потыртэ̄гыт. Мӯй ма̄хум ма̄гсыл та̄н концерт ва̄рыгласыт. Галина Войтова ты урыл ла̄выс: «Тот ща̄нита̄щит ня̄враманыл ёт юн аквторыг кит ла̄тӈыл потыртэ̄гыт, тыи ма̄гсыл воспитателин тот рӯпитаӈкве мощ кӯпнитнув. А̄нумн тув ялуӈкве сака мӯстыс, ня̄врамыт такем ёмащакв э̄рге̄гыт, са̄всыр стихыт ханищтэ̄гыт. Ма̄н ты проект хосыт ты та̄лныл рӯпитаӈкве о̄вылтахтасӯв. Тувыл ма̄хманув ня̄враманыл ёт юн ща̄нь ла̄тӈыл ат потыртэ̄гыт, садикын ялантан а̄гирищитпыгрищит аквкит ла̄тыӈ туп ва̄гыт. Ань ня̄враманув ма̄ньщи ла̄тӈыл потыртаӈкве Нина Николаевна Курикова ханищтыянэ. Саран ня̄врамыт ос та̄нки ща̄нь ла̄тӈаныл ханищтаӈкве тах патэ̄гыт». 2012 та̄лт о̄с акв тамле ханищтап Коми республикат ма̄нь таквс э̄тпос 21-26 хо̄талытт рӯпитас. Россия янытыл «Языковое гнездо» нампа проектыт рӯпитан хо̄тпат тох акванатхатыгланэ̄ныл, та̄нки халаныл ва̄йхатэ̄гыт ос та̄нки ща̄нь ла̄тӈаныл э̄лаль тотыяныл. 1066 2013.12.20. Тамара МЕРОВА Пе̄с накыт ӯргалыянэ̄н. Удмуртиян ялнэм порат ма̄н Узей-Тукля па̄вылн тотыглавесӯв. Тот ремесла колн щалтсасӯв, ос ма̄хум маныр тот ва̄ре̄гыт, таи пуссын та̄рапаттысӯв. Ты коланыл 1994 та̄лт рӯпитаӈкве патыс, кӯщаиг тот Геннадий Сидоров о̄лы. Щар э̄рнэ тэ̄лаг тот таи ла̄ве̄гыт удмуртыт та̄нки пе̄с рӯпитан наканыл но̄хво̄рмалтым ос э̄лаль ханищтым вос о̄щве̄сыт. Таима̄гыс ты колт онтолов пе̄с тэ̄лат щирыл рӯпитэ̄гыт: йӣвныл матыр ёрге̄гыт, сэ̄тап та̄нки ва̄ре̄гыт ос са̄всыр маснут саге̄гыт манос ю̄нтэ̄гыт, йӣв пормасыт тармыл хансат по̄слэ̄гыт, ра̄ктыл матыр по̄щге̄гыт, сак хартэ̄гыт, то̄сам пумныл саге̄гыт ос яныг йӣвсупныл са̄всыр хури яктэ̄гыт. Ты ремёсла кол ва̄рнэ ма̄гыс Геннадий Евгеньевич Ува районный кӯщаитын са̄всыр э̄рнэ нэ̄пакыт хансыглас. Таит таве о̄влэ̄т ат торгамтасаныл, нэ̄матыр ва̄руӈкве ат та̄ртсыт. Тувыл та хольт па̄вылт о̄лнэ хо̄тпат ёт акваннё̄тхатым пе̄с ма̄хманыл ва̄рум пормасаныл атсаныл ос ёмас суссылтап ва̄рсыт. Ка̄сыӈ пормас хумус ос манрыг ва̄рвес, ты урыл потыртасыт. Ань пе̄с йис та̄гыл о̄щнэ ма̄щтыр пормасаныл нэ̄мхотьютн э̄лаль ат ке тотавет – та̄н та ёрувлавет. Ос удмуртыт номтыт о̄щнэ э̄лаль о̄лнэ ва̄рмаляныл ёмас тэ̄лаг та е̄мтыс. Мо̄тыт та̄лт тах ты коланыл хус та̄лэ то̄влы. Та сыс пе̄с йис та̄гыл о̄лум накыт Геннадий Евгеньевич аквъёт рӯпитан хо̄тпанэ ёт пуссын та̄рапаттысаныл. Тот ань са̄т хо̄тпат ма̄щтыр нам о̄ньще̄гыт, акв хо̄тпа иӈ ханищтыяныл. Ты ма̄хум ва̄рум пормасаныл са̄в ма̄т ва̄вет, хо̄н ма̄н суссылтаӈкве тотыглавет. 2009 та̄лт ты ремесла коланыл Удмуртия ма̄т щар ёмас рӯпитан колыг ла̄ввес. Геннадий Сидоров ань «Заслуженный работник культуры Удмуртской республики» нам о̄ньщи. Такви рӯпататэ о̄вылтыт тав ла̄выс: «Пормасыт пе̄с щирыл ва̄рнэм э̄лыпа̄лт ам матумпа̄ла ма̄хманув китыгласанум, маныр ос хумус ва̄руӈкве э̄ри. Са̄ртын ма̄н ма̄хманув йӣв хотсартнэ, пум са̄грын э̄лыпа̄лт по̄йкщасыт ос тувыл ущ матыра̄ти ва̄рсыт. Ма̄н о̄с пормасыг ва̄рнэ утанув (то̄сам пум, ра̄кт, йӣв) ма̄витувн ялмалтавет, таи ма̄гыс о̄с по̄йкще̄в. Са̄в тэ̄лат Кузьма Иванович Куликов а̄нумн хӯлтсанэ, тав хосат та̄гыл пе̄с йис накыт та̄рапаттысанэ». Ам сусте̄мт, ты хум йӣвныл сака са̄в ма̄щтыр пормасыт ёргум. Ты утыт халт ма̄н э̄лумхо̄лас ос мо̄йтныл о̄лнэ са̄всыр хурит ка̄саласӯв. Удмуртыт «лунт» товлыӈ ӯй сака ӯргалым ос янытлым о̄ньщияныл. Та̄н щираныл тав «семейнородовой хранитель счастья» о̄лы. Районаныл янытыл ма̄нь па̄вланыл хотталь ул вос со̄ймысыт, тот махум ёмщакв э̄лаль вос о̄лсыт, Геннадий Евгеньевич йӣвныл ва̄рим лунтыт тӯщтуӈкве номылматас. Ань тав нилахуйплов ма̄нь па̄влыт ма̄гыс тамле лунтыт ва̄рыс. Йӣв ёргын коныпал Геннадий Сидоров ка̄тыл хурит по̄слы. Са̄всыр о̄льпыл по̄слум хорамыӈ хуриянэ тот о̄с суссанӯв. Э̄кватэ Надежда Родионовна Сидорова тот колнорн тагатан, колканн нортнэ пунняпыӈ сэ̄тапыл нё̄тнэ то̄рыт саги. Тамле рӯпата пе̄с «ткацкий станокыт» ва̄ритэ. Таве̄н ма̄хум удмуртский супыт, мо̄т маснутыт сагуӈкве акваг ва̄рылтэ̄гыт. Ты пормасыт ма̄щтырыг ва̄рнэ̄тэ ма̄гыс нэ̄ са̄в э̄сгын нэ̄пакыл мӯйлуптавес. Мо̄т рӯпитан нэ̄т ос пыгыт ма̄н ётув о̄с пащалахтасыт, мощ потыртасыт ос нёмсаг та̄нки рӯпатаныл э̄лаль ва̄рсаныл. Акв нэ̄ рактыл сыресыр ӯйхулыт по̄щгыс, мо̄т нэ̄г то̄р сагсы̄г. Кит пыгыг станокытыт йӣвсупыт па̄ртыг сылталасы̄г. Ётыл ам таи номылматсум, 2005 та̄лт Екатеринбург ӯсн финноугорский ма̄хум акванатхатыгламаныл порат, акв хум Удмуртияныл ёхталас. Тав йӣвныл ёргим пормасыт суссылтаӈкве ёт тотыглас. Мӯй ма̄хумн та̄н сака мӯстысыт, ам то̄нт кит ӯйрищ ёвтсум. Тыи насати Узей-Тукля ремесла колт ва̄рим утыг о̄лсы̄г. Ань тыг мус о̄ньщиягум. 1066 2013.12.20. Александр ВЬЮТКИН По̄лям ма̄т хо̄нтым ма̄харакве. Таквсы Салехард ӯсн ялмум порат ам тот музейколн щалтсасум, тав «И. С. Шимановский» намыл пиным о̄лы. Хуньт хосат ё̄рн ма̄хум ё̄р ва̄гыл хащта̄л То̄рмын кащилтыманыл порат тув ты ёхтум пӯп о̄йка о̄парищ намыл музей намаявес. Ань тав йильпи яныг колыг ӯнттувес. Тот са̄в ёмас, пе̄с йис пормас атым о̄лы. Та̄н музеянылт ма̄ янытыл ва̄нэ акв пӯмащ о̄ньще̄гыт. Салехард ӯс ляпат хо̄нтым ма̄нь ма̄хар тот суссылтаве. Ты ма̄нь ма̄харакве 2007 та̄лт Юрибей я̄ ёлнилим а̄врах ва̄тат хо̄нтвес. Таве хо̄нтум хум наме Юрий Худи. Тав ще̄мьятэ ёт са̄лы ӯрим о̄лы. Та та̄лт Юрий та ма̄т са̄лыянэ ща̄рканыл мувылтым яласас. Ма̄хар хо̄нтме юипа̄лт тав аквта та̄ра молямтахтым ляпатнув о̄лнэ Яр-Сале па̄вылн ла̄тыӈ тотуӈкв минас. Па̄влын ёхтуме̄т тав тот о̄лнэ музей кӯщай хум Геннадий Зайцев палт щалтыс. Тувыл тэ̄н тамле хо̄нтум ут ёт рӯпитан ха̄снэ ма̄хум палт Салехард ӯсн свонитасы̄г. Салехард ӯс музей тамле рӯпата ва̄рнэ кастыл таса̄вит олн ат о̄щсыт. Таима̄гсыл музейкол «Единый Россия» партияныл нё̄тмил во̄всыт. Ма̄хар ханищтан ма̄гсыл манхурип нё̄тмил э̄рыс, «Единый Россия» па̄лныл пуссын нё̄тве̄сыт. Юрий Худи хунь учёный ма̄хманэ ма̄хар хо̄нтум ма̄н тотсанэ, ӯйе хо̄нтум ма̄тэ̄т туп нумыл пантыглам парщинэ хо̄нтыстэ. Лё̄ӈх коюӈкве минасыт ос Новый Порт па̄вылн ёхтысыт. Ма̄хар тув ё̄рн ма̄хумн тотыма, хо̄нтум утаныл ма̄ ёлыпалт ва̄рим по̄лям колн тӯлсаныл. Тувыл ма̄хар та̄н ё̄рнытныл хотвисаныл, ос ниласа̄т атпан ве̄рыста Салехард ӯс мус вертолётыл э̄лаль тотсаныл. Уяныл ул вос толы, таве яныг холодильникын пинсаныл. Тот тӣвре̄т нёлоловхойплов градус а̄щирма о̄лыс. Салехард ӯсн ма̄ янытыл о̄лнэ учёныит ма̄нь ма̄харакве ёт рӯпитаӈкве ёхталасыт. Та̄н хо̄нтум хум намыл ты ӯй намаяӈкв тахсаныл. Юрий Худи хоса ат номсахтас, такви э̄кватэ намыл «Любаг» намтуӈкв ла̄выстэ. Тот ма̄хараныл уральтыма юипа̄лт ӯй Япония ма̄н тотвес. Японият щар ёмас, йильпи са̄всыр ищхӣпыӈ мӯтра о̄лы. Тот ты та̄рапатыс, «Люба» порслыма порат тав иӈ ма̄ниг о̄лыс, хӯрмах э̄тпосэ туп. Ань щар о̄выл щёс хунь ве̄скалавес, та̄рвитэ атпан килаг ёхталас. Тав ётэ ма̄хум хоса рӯпитасыт. Ёлаль хуям па̄лэ па̄лыгвуйлавес. Тэ̄п хӯргеныл тэ̄м тэ̄нутанэ ханищтан ма̄гсыл вуйлуве̄сыт. Учёныит ма̄хар ханищтаманыл юипа̄лт ла̄всыт, тав 10–12 со̄тыра та̄л ювле хультум порат о̄лум. Ты ӯй ханищтаӈкве тотыглым порат Юрий Худи Санкт-Петербург ӯсн во̄виньта̄лвес. Са̄лыӈ хум ӯй хо̄нтме ма̄гсыл йильпи, яныг снегоходыл мӯйлуптавес. Ма̄харакве ул вос толы, кумыскаӈ хусапыл нумыл лаппантым о̄ньщаве. То̄тап тивре аквписыг хус градус ащирмаг о̄лы. Са̄всыр ат ва̄нэ нак ань ма̄ янытыл о̄лы, на̄й ла̄пхарыглан порат музей коланылт на̄й таквирот та̄ра но̄хпе̄ламлы. Ты ма̄гсыл на̄й пе̄ламтан электрогенератор нампа ут о̄ньще̄гыт. Тох ты тот о̄щнэ пе̄с йис пормасаныл пуста̄гыл ӯргалым э̄лаль о̄ньщияныл. 1066 2013.12.20. Тамара МЕРОВА Йильпи нэ̄пак та̄ратавес. Ма̄н редакциявн то̄внакт акв саран о̄йка щалтса̄лы, ма̄ньщи ла̄тӈыл ма̄н ётув пащалахты ос тэ̄ланув о̄вылтыт пӯмщалахты. Ты о̄йка профессор Е. А. Игушев, филология наукат доктор нам о̄ньщи. Тав Югорский госуниверситет студентытн финноугор мирыт ла̄тӈаныл урыл потырты ос са̄всыр ёмас нэ̄пакыт хансы. Евгений Александрович рӯтыг о̄лнэ мирыт ла̄тӈаныл пуссын аквана̄рталыянэ, матыр тэ̄лат та̄рапаттыянэ ос ётыл научный потрыт хансы. Ань «Занимательная лексика мансийского языка» нампа йильпи нэ̄пак хансыс. Тав тот ма̄ньщит, хантыт, сараныт ос венгрыт ла̄тӈаныл хумус акванро̄ве̄гыт, хумус ла̄вавет манос манрыг та̄н мо̄т щирыл пе̄нтхатэ̄гыт, таи оснпаттыс. Тот ка̄сыӈ мир ла̄тӈе̄т манхурип суй о̄ньщи ос ты суе акв по̄хат о̄лнэ мо̄т суит паттыиг хумус пе̄нтхатас, хоты ла̄тӈыт акв та̄р пуссын о̄ньще̄гыт ос ётыл ма̄хум та̄нки щирыл ла̄вуӈкве патсаныл. Тувыл ты ла̄тӈыт хумус ма̄нки ла̄внэ суянув ёт аквантэ̄лыгтасанӯв, Евгений Александрович ёмщаквег ханищтасанэ ос пуссын ты тэ̄лат хӯлтсанэ. Венгр, ханты ос ма̄ньщи ла̄тӈыт акв угорский группаг ловиньтахтэ̄гыт. Учёныит ла̄внэ̄ныл щирыл, ма̄н хантыт ёт 40% ла̄тӈанув акванро̄влахтэ̄гыт. Ос венгрыт ёт ма̄н 27% ла̄тӈанув щар акв хурипаг о̄лэ̄гыт манос то̄ват мощ мо̄т суил ля̄галыянӯв. Кос выгӯв, ма̄ньщит ла̄ве̄гыт: «нэ̄», хантыт – «нэ», венгрыт –«nо̄», та̄лтал-tе̄l, яӈкеӈк-jе̄g, касайкеши-kе̄s. Венгерский ла̄тӈыт «о», «е» суиг мо̄т нуми по̄сыл хансаве̄г кос, тэ̄н нуми щӯртмил пе̄нтсыл кит ман акв но̄ӈхаль тӯщтым щӯртмилыл хансумтаве̄г («запятой» по̄с хурип). Ты по̄санэ̄н хосыт матыр я̄нас ла̄тыӈ хӯлты. Тувыл Евгений Игушев «Манрыг тох ла̄ве̄в? » я̄нас пӯмыщ потрыт хансыс. Тав «со̄выр», «тӯлмах», «яныг», «хӯлуп», «ё̄рн», «со̄т», «иснас», «морах» ос мо̄т ла̄тӈыт та̄раныл ёмщаквег ханищтасанэ ос хумус та̄н толмащлавет, маныр хӯлтэ̄гыт, таи потыртас. Ань ты ва̄рум рӯпататэ ма̄гыс ма̄н Евгений Александровичин яныг пӯмащипа ла̄тыӈ ла̄ве̄в. Тав ос ты нэ̄паке та̄ратаӈкве «Дорога жизни» благотворительный фонд па̄лыл олныл нё̄твес. Тот кӯщаиг о̄лнэ хумн Роман Иванович Кичановын яныг пӯмащипа ла̄тыӈ ке̄ты. Тамле ёмас сымыӈ хо̄тпат ман йильпи ёхтын та̄лыл янытлыянӯв, пуста̄гыл вос о̄лэ̄гыт, рӯпатаныл ос о̄лупсаныл э̄лаль со̄тыӈыг вос о̄лы. 1066 2013.12.20. Александр ВЬЮТКИН Ащирма тотнэ о̄йкат ӯсувн ёхталасыт. - 1067 2014.01.10. Тамара МЕРОВА Йильпи та̄лыл ос Рождество хо̄талыл на̄нан янытлыянум! Ты ялпыӈ хо̄талыгт са̄в ща̄гтыл ос о̄лыглатта̄л ёмас со̄тыл на̄н сыманын вос та̄гиньтэ̄гыт. На̄н ляпа рӯтанын ос юрт хо̄тпанын пуста̄гыл вос о̄лэ̄гыт. На̄нки халанынт юртыӈыщ ос э̄руптахтым о̄лэ̄н, са̄в со̄т, са̄в щунь. Ос номтыт о̄щнэ матыр тахнэ ва̄рмалянын тэ̄лаг вос е̄мтэ̄гыт! Ма̄н то̄ва тэ̄ланув аквъёт ва̄рнэ̄в ма̄гыс, яныг пӯмащипа ла̄тыӈ на̄нан ла̄ве̄гум. Наталья Западнова, округ Думат депутатыг о̄лнэ нэ̄, ке̄тум ла̄тӈе ма̄ньщи ла̄тӈыг Т. Мерован толмащлавес. 1067 2014.01.10. Тамара МЕРОВА Ка̄сыӈ ня̄врам со̄тыӈыг вос о̄лы. Мо̄лалнув ня̄врамыт тэ̄лат ёт рӯпитан кӯщаит «России важен каждый ребёнок» нампа проект о̄вылтыт потыртаӈкве акванатхатыгласыт. Ханты-Мансийсканыл округт о̄лнэ ка̄сыӈ ӯст ман районт ты видеоконференция суссылтавес. Ань савалап ня̄врамыт, мо̄т ще̄мьятыт яныгман а̄гитпыгыт та̄н тэ̄ланыл Д. А. Медведевын «Единая Россия» партия па̄лыл акваг уральтым о̄ньщавет. Ос тыт, Юграт, ты партият рӯпитан депутат Н. Л. Западнова пуӈктоты. О̄влэ̄т мир ӯргалан департамент кӯщай нэ̄ Елена Немчинова потыртас. Округув янытыл 7 со̄тыра 471 савалап ос ща̄ньа̄щныл по̄хан вим ня̄врам о̄лы. Тыгыл ань 7 со̄тыра 114 а̄гитпыгыт мо̄т манос рӯт ще̄мьяӈ колт янмалтавет. А̄гмыӈмосыӈ ня̄врамыт ще̄мьян виӈкве ма̄хум о̄с ка̄саще̄гыт. 2013 та̄лт ВИЧ диагноз о̄щнэ 5 ма̄нь ня̄врам ос гепатит «С» о̄щнэ 2 ма̄нь ня̄врамыг ще̄мьян вуйве̄сыт. Савалап ня̄врам о̄щнэ колытыт янгыщ китхуйплов та̄л ос тыгыл яныгнув а̄гитпыгыт хультсыт. Ты яныт ма̄ньлат хо̄тпат то̄внакт та̄нки номтаныл щирыл о̄луӈкве воратэ̄гыт ос ла̄тыӈ щар ат хӯнтлэ̄гыт. Таима̄гыс мо̄т э̄лумхо̄ласыт хурахлэ̄гыт, номсэ̄гыт, тав ётэ та̄рвитыг паты тах. Та щирыл е̄мталы, ма̄хум ня̄врам выгыт ос ётыл ювле тотыяныл. Та̄н аквъёт юртыӈыщ о̄луӈкве ат ве̄рме̄гыт. Ты коныпал савалап ня̄врам такви ща̄ньа̄ще̄н хо̄нтаве ке, то̄нт тав мо̄т ще̄мьяныл ювле виӈкве ве̄рмаве. Ань савалап колт яныгман ня̄врамыт ле̄ккарытн сусве̄сыт. Татьяна Яковлева, здравоохранение департаментыт рӯпитан нэ̄ ла̄внэ̄тэ щирыл, са̄выӈпа̄лэ ня̄врамыт тэ̄п хӯрыгсов а̄гм о̄ньще̄гыт, сам а̄гм, лувта̄н нё̄влитыт (костномышечный) о̄щнэ а̄гм ос номтаныл лю̄лиг е̄мтнэ̄ныл ма̄гыс мори кантлэ̄гыт. Са̄всыр а̄гм о̄щнэ ня̄врамыт пуссын пусмалтаӈкве о̄вылтаве̄сыт, ӯщлахтан колн ке̄тыглавет. Наталья Леонидовна Западнова ты проект щирыл рӯпитан хо̄тпат пуссын э̄сгысанэ. Ка̄сыӈ ня̄врамытн со̄тыӈыг, пуста̄гыл о̄луӈкве ла̄выс. 1067 2014.01.10. Валентина УЗЕЛЬ Тав э̄лаль кӯщаиг пе̄риявес. «Югра лылыеп» общественный организация Белоярский ӯст соссаӈ ма̄хум съездын акванатыгласанэ. Ань ты съезд ХI щёс ва̄рыглавес. Та районт 3 со̄тыра арыгтем соссаӈ хо̄тпа о̄лы. Таима̄гыс ты ма̄хум тот акванатхатыгласыт. Съездын округ правительства па̄лыл Г. Бухтин, округ дума депутат В. Сондыков ос мо̄т са̄всыр ма̄тт рӯпитан кӯщаит ёхталасыт. Ань хӯрум та̄л сыс акв щёс ханты ос маньщи ма̄хум акванатыглавет. Тот са̄в та̄л Александр Новьюхов кӯщаиг о̄лы. Тав тув акваг та пе̄рияве, ань ты съездыт о̄с аквтох о̄лыс, э̄лаль тав кӯщаиг та ӯнттувес. О̄выл ла̄тыӈ атхатам ма̄хум э̄лыпалт тав ты ла̄выс. Потыртас, та̄н ань хумус рӯпатаныл ва̄рияныл, са̄всыр проект хосыт хумус рӯпитэ̄гыт. Нефтяной компаният ёт о̄с ёмащакв потыртахтым о̄лэ̄гыт, таит тананыл олныл мыганыл. Та̄нанылн нё̄тнэ мо̄т организацият пуссын ла̄всанэ. Ань та съездын Всемирный банкыт рӯпитан ма̄хум ёхталасыт, та̄н ос общинатн нё̄тэ̄гыт. Россия янытыл та̄н 1 со̄тыра арыгтем са̄всыр йильпи проект хосыт рӯпитан ма̄хум олныл мыганыл. Ма̄н округувт рӯпитан общинатн нё̄туӈкв та̄н о̄с ка̄саще̄гыт. Та съездын ань сака са̄в ма̄хум ат ёхталас. Ос тот о̄лум делегатхо̄тпат пуссын та̄нти ва̄рнэ рӯпатаныл урыл потыртасыт. М. Антонова потыртас, матах та̄л минам юипа̄лт соссаӈ ма̄хум пуссын о̄лнэ колыл майлуве̄сыт, са̄в та̄л очередит мо̄т ма̄хум халт ӯрхатуӈкв ат э̄рыс. Ань ты ва̄рмаль ёт кӯщаит рӯпитаӈкв сака ат таӈхе̄гыт. Ма̄ньлат ма̄хум организация сака э̄сгувес, та а̄гитпыгыт, со̄ль, сака ка̄ркамыг о̄лэ̄гыт. Р. Решетникова хансум потыр ма̄ньщи ла̄тӈыл В. Хозумова хансыстэ. 1067 2014.01.10. Тамара МЕРОВА Пенсия олныт урыл. 1967 та̄лт самын патум ос тыгыл ма̄ньлатыг о̄лнэ хо̄тпат пенсиян акванатнэ олнаныл йильпи щирыл ловиньтавет. Ань РФ Пенсионный фонд та̄н ма̄гсыланыл ла̄тыӈ ке̄тыс. 20142015 та̄лыгт та ма̄хум та̄нки вос пе̄рие̄гыт, хумле щирыл та̄н пенсия олнаныл акванатуӈкве патыяныл. Ань «обязательный пенсионный страхованиет» хасхатам атпан нупыл хо̄т та̄лэ то̄влум хо̄тпат ман тыгыл ма̄ньнув ма̄хум номсахтуӈкве ос кит та̄л сыс ла̄тыӈ ювле ке̄туӈкве э̄ри. Та̄н пенсиян атнэ олнаныл (рущ щирыл «накопительныиг» ла̄вавет) 6% щирыл э̄лаль аквтахольт акванатыяныл манос тох ат ка̄саще̄гыт ке, ос тув ойтум олнаныл «страховой» пенсия щирыл вос щё̄питавет. Ань э̄лумхо̄лас рӯпитан колэ̄ныл такви страховой пенсиятэ ма̄гыс 16% са̄вит сэ̄лнэ олнэ тув тах со̄пасыг атуӈкв патавет. Пуссын йильпи ва̄рум ля̄ххалыт ка̄сыӈ хо̄тпа такви о̄лнэ ма̄тэ̄т пенсионный фонд тармыл рӯпитан ма̄хумныл та̄ра вос паттыянэ. Негосударственный пенсионный фондын хасхатам ма̄хум та̄нки тэ̄ланыл тувыл вос китыглыяныл. Аквтох матыра̄ти ля̄ххал www. gosuslugi. ru сайтыт та̄рапаттуӈкве ве̄рме̄гыт. ХМАО-Югра ма̄т о̄лнэ Пенсионный фонд ке̄тум ла̄тӈе ма̄ньщи ла̄тӈыг Т. Мерован хасвес. 1067 2014.01.10. Александр ВЬЮТКИН Маныр э̄ри, тот пуссын тыналавес. Ка̄сыӈ та̄л аквта порат округув янытыл о̄лнэ мир Ханты-Мансийск ӯст атхатыглы. Та̄н тыг ёхталан ва̄рмаляныл рущ ла̄тӈыл «Товары земли Югорской» тох ла̄ваве. Ма̄хум та̄нти ва̄рум пормасаныл, янмалтам ос щё̄питам тэ̄нутаныл «Юграэкспо» нампа колн тыналаӈкве тотыглыяныл. Округув онтырса̄т нупыл хӯрум та̄лэ то̄влын кастыл ты ва̄рмаль нёлоловхойпловит щёс ва̄рыглавес. Та ярмарка хӯрум хо̄тал рӯпитас. Тыналам утыт нё̄тнэ̄г, хорамыӈыг щё̄питым о̄лсыт. Ханты-Мансийск ӯст о̄лнэ ма̄хум ты тыналахтын ва̄рмаль сака ӯрияныл. Тот тэ̄нут ман пормас тынаныл ла̄пка тын щирыл ат о̄лэ̄гыт, атыӈнуве̄г ос мощ тынта̄лнуве̄г тэ̄нутыл ёмщакв ёвтхатуӈкв ро̄ви. Тот пӯрщ, мис, янгӯй нё̄выль, юн янмалтан со̄выр ос са̄всыр щирыл щё̄питым са̄лы нё̄выль тыналавес. Белоярский район Касум па̄вылныл ёхталам ханты ма̄хум тыналан ма̄гсыл са̄лы нё̄выль мощща тотыгласыт. А̄с я̄ я̄ӈке иӈ во̄вта, таи ма̄гсыл тох е̄мтыс. Касум па̄выл ма̄хум та̄н мо̄лты та̄лт колпасаг ос тушонкаг ва̄рим са̄лы нё̄вляныл ань тотыгласаныл. Ты та̄л Ханты-Мансийск ӯст о̄лнэ «Колмодай» община тамле щирыл щё̄питым тэ̄нут о̄с тыналасыт. Атыӈ тэ̄нутаныл ӯсыӈ ма̄хум акваг ёвтэ̄гыт. Ты хӯрум хо̄тал сыс ӯс ос ляпа па̄влытт о̄лнэ мир матыр ёвтнэ ма̄гсыл акваг тув щалтсасыт. Тэ̄нут коныпал тот иӈ тыныӈ нё̄хс, во̄нтыр, норка, лэ̄пык, о̄хсар, ха̄йтнут со̄вытныл ю̄нтым рущ сахит ос те̄нтыт тыналаве̄сыт. Ла̄гыл маснут, са̄всыр хансал ю̄нтым пӯркат тыналаве̄сыт. Пуркат тыналан ма̄хум са̄выӈпа̄лэ Салехард ӯсныл ос Саранпа̄вылныл о̄лсыт. Хотьютн манырсыр яныт ла̄глыӈ маснут э̄рыс, та̄н палтаныл ёвтуӈкв ве̄рмысыт. Пӯркат тыналан Ха̄льӯс районныл о̄лнэ ма̄хум ла̄всыт: «Ка̄сыӈе̄мт мощща тотыглэ̄в, ты та̄л ма̄н щар са̄в пурка тыг тотсӯв. Ат ва̄глув, ёвтавет манос а̄ти». Ка̄тыл ма̄щтырлан ма̄хум та̄нти ва̄рум рӯпатаныл тот суссылтасаныл. Ма̄щтырыг ва̄рим касаит, са̄грапыт, са̄всыр щирыл хорамтым писаль ло̄сыт ос янгӯй, са̄лы а̄ньтыл яктым а̄ньщарыт, по̄слым хурит тыналаве̄сыт. 1067 2014.01.10. Людмила ТЕТКИНА Людмила Тасманова Соссаӈ ма̄хум Ассамблея сапра̄ни ва̄рыглас. 2013 та̄л оигпам э̄лыпа̄лт соссаӈ ма̄хум Ассамблеят рӯпитан ма̄хум яныгпа̄ла хо̄тпат, наука, культура ос искусство щирыл рӯпитан хо̄тпат, А̄с-угорский ма̄ньлат ма̄хум организацият рӯпитан а̄гитпыгыт тув во̄виньта̄лсаныл. Еремей Айпин ла̄выс: «Хус та̄л ювле хультум порат ва̄т са̄грапнал э̄тпос 12 хо̄талэ̄т щар ма̄к яныг са̄ккон Россия Конституция пирмайтавес. Та юипа̄лт окружной Дума рӯпитаӈкве о̄вылтахтас ос соссаӈ ма̄хум Ассамблея ва̄рвес. Ань ма̄ньщит, хантыт ос ё̄рн мирыт ёмащаквнув о̄лнэ̄ныл ма̄гсыл са̄кконыт ма̄н хансэ̄в ос Дума сапра̄нит о̄лыглан порат пирмайтыянӯв. Ты та̄лыт сыс Ассамблеят рӯпитан соссаӈ ма̄хум лов са̄ккон хассыт. Ты коныпал мо̄т 40 са̄кконыт, программат та̄н ма̄гсыланыл э̄рнэ тэ̄лат хансым о̄лэ̄гыт». Надежда Алексеева са̄кконыт урыл о̄с потыртас. «О территориях традиционного природопользования» нампа са̄ккон хосыт пе̄с йис ма̄т о̄лнэ ма̄ньщит, хантыт, ё̄рныт ма̄наныл та̄нки нупыланыл хансуӈкве ань ве̄рме̄гыт. «О святилищах» са̄ккон пирмайтым юипа̄лт ялпыӈ ма̄т ӯргалаӈкв патавет. Ос мо̄т са̄кконыт манхурип ёмас тэ̄ла соссаӈ ма̄хумн тотэ̄гыт, та урыл тав о̄с ла̄тыӈ ла̄выс. Э̄лаль потыртасыт, манхурип рӯпата йильпи 2014 та̄л сыс ва̄руӈкве тах патэ̄гыт. Ань та̄н «Об уполномоченном по правам КМНС» нампа са̄ккон щё̄питэ̄гыт. Тувыл «О святилищах» пирмайтым са̄ккон то̄ва ла̄тӈанэ мо̄т щирыл хансыяныл. Ос «О недропользовании» нампа са̄кконын пе̄с йис ма̄т о̄лнэ соссаӈ ма̄хум ма̄наныл ӯргалан ва̄рмаль урыл хансуӈкве таӈхе̄гыт. Ассамблея депутыт ос округувт са̄всыр ялпыӈ хо̄талыт кастыл ань о̄с щё̄питахтэ̄гыт. Са̄лы ӯрнэ ма̄хум, хӯл алыщлан хо̄тпат ялпыӈ хо̄таланыл, Ӯринэ̄ква хо̄тал ос са̄в мо̄т ялпыӈ хо̄талыт ма̄ньщит, хантыт ёт янытлаӈкв тах патэ̄гыт. Ты та̄л Елена Сагандукова, округувт яныг ле̄ккарыг о̄лум ханты э̄ква, 80 та̄лэ то̄влынув. Тав хо̄псы а̄гм пӯсмалтан пӯльницат са̄в та̄л рӯпитас. Таве кастын ма̄гсыл нэ̄пак ань щё̄питаве. Тувыл ты та̄л сыс конгрессыт, конференцият са̄всыр ма̄т ва̄рнэ порат тув тах ялэ̄гыт. Соссаӈ ма̄хум Ассамблея та̄л сыс са̄в рӯпата тах ва̄ри. 1067 2014.01.10. Александр ВЬЮТКИН Щахныл алхатнэ касыл. Ва̄т са̄грапнал э̄тпост Ханты-Мансийск ӯст бокс касыл ва̄рыглавес, тав рущ ла̄тӈыл «Кубок мира нефтяных стран, памяти первооткрывателя нефти в Сибири Фармана Салманова» намаим о̄лыс. Ты та̄л тав аквхойпловит щёс минас. Яныгса̄т арыгтем каснэ хо̄тпа тыг ёхталас. Ма̄ янытыл «Кубок мира нефтяных стран» ты нампа касыл ёмщаквег ва̄ве. Са̄в мир та̄нти каснэ ма̄хманыл тыг тотыглаӈкв таӈхияныл. Ты та̄л 14 хо̄н ма̄ныл ма̄хум тыг ёхталасыт. Ма̄н округувныл ва̄т нупыл ат боксёр кассыт. Касыланыл о̄вылтан хо̄талт тит чемпионыг Р. Проводников ос Е. Гродович ёхталасы̄г. Округ янытыл боксёрыт халт кӯщаиг о̄лнэ хум Рамиз Гаджиев ла̄выс: «Юн ӯнлын ма̄ньлат ма̄хум тэ̄н нупыланэ̄н телевизор хосыт сунсыманыл юипа̄лт, э̄рыӈ, о̄с хоты каснэ ма̄н хасхатуӈкв номылматэ̄гыт. Ам ва̄тихал мо̄тмо̄т ма̄т Евгений ос Руслан урыл потыртэ̄гум, тэ̄н сас Ха̄льӯс районныл о̄лэ̄г. Ня̄врамытын тэ̄н уре̄тыл ва̄ӈкв пӯмащ. Таима̄гсыл ты ма̄н палтылув та̄н хасхатэ̄гыт. Хотьют ма̄к каснэ ма̄т ханищтахтуӈкв номсы, та ня̄врамыт ты хультэ̄гыт. Та̄н халанылт са̄в ёмас боксёр яныгми. Россия янытыл лов боксё̄р халт Руслан ос Евгений щар ма̄к яныг ос ё̄р боксёрыг пе̄риявесы̄г. На̄нти ва̄гын, маныр тэ̄н ха̄сэ̄г ос ве̄рме̄г». Руслан боксёрытн ла̄выс: «Ам ва̄глум, ты нампа кубок о̄лнэ хосыт са̄в ёмас каснэ ма̄хум яныгми. Тамле каснэ ма̄т боксёрыт ты ва̄вет. Тувыл э̄лаль хотьют маныр номсы, ос хо̄т касуӈкв тав ка̄сащи, тув та мины. Ам ты касылт хӯрум щёс кассум, ос но̄х ат патыгласум. То̄нт ты ам бокс щирыл э̄лаль минуӈкв номылматсум. Любительский боксныл «професионалыг» ханищтахтуӈкв минасум. Та юипа̄лт хумус номсысум, тох э̄лаль а̄ртмуӈкв та патыс. Ань хӯрум са̄всыр нампа э̄нтап о̄ньще̄гум». Евгений ос ты касылт акв щёс касыс. Тав то̄нт но̄хпатме юипа̄лт, та̄ра «профессиональный бокс» касылн контракт нампа нэ̄пакт хасхатас. Ань тав о̄с ма̄ янытыл ма̄к яныг боксёрыг ловиньтаве. Евгений ос Руслан халэ̄нт юртыӈыщ о̄лэ̄г. Акватэ каснэ порат, мо̄танэ акв тот юртэ янытлым ляпат о̄лы. 1067 2014.01.10. Светлана РОМБАНДЕЕВА Кульпас па̄выл ма̄нь ле̄ккар. Ольга Николаевна Пуксикова Ха̄льӯс район Кульпас па̄вылт о̄лы, а̄ги о̄парищ наме Дудорева. Тав 1978 та̄лт лӯпта э̄тпост самын патыс. Кульпас школат аквхуйплов класс а̄стлас, э̄лаль Ханты-Мансийск ӯст медучилищат ханищтахтас. Оматэ Галина Федоровна, а̄тятэ Николай Николаевич, тэ̄н хосат а̄тимыг е̄мтсыг. Увщитэ Таня ос йӣгрище Евгения Советский ӯст о̄лэ̄г. Ольга Николаевна о̄йкатэ Сергей Васильевич Пуксиков, ма̄ньщи хум. Тав о̄с Кульпаст самын патыс, тот яныгмас. А̄ги о̄ньще̄г, наме Влада, таве̄н нёлолов та̄л. Йильпи кол ӯнттысы̄г, тот о̄лнэ̄ныл атыт та̄лыг ты е̄мтыс. Пӯльницат ма̄нь ле̄ккарыг тав онтолов та̄л арыг рӯпиты. Ам Ольга Николаевна китыгласлум, пӯльницат рӯпитаӈкве таве̄н мӯсты? Тав ювле ла̄выс: «Рӯпатам а̄нумн мӯсты, па̄выл ма̄хманувн тэ̄рпиӈ ю̄нтуп тӯщтэ̄гум, капельницат ва̄ре̄гум (ке̄лп та̄рс хосыт тэ̄рпи алпин та̄ратаве). Тэ̄рпи то̄ванакт мощща хультсы, ос илттыг а̄гмыӈыг е̄мтапан хо̄тпа ма̄гыс тай о̄ньще̄в. Во̄ртур э̄тпост э̄тэхо̄талэ рӯпитан пӯльницав лаппантвес, ань туп хо̄тыл порат рӯпиты. Тувыл ос ань дежурство ва̄рвес, ме̄н кит хо̄тпа Тамара Сергеевна Логвиненко ёт э̄тэхо̄талэ рӯпитыме̄н, акв хо̄тал тав, мо̄тыт хо̄тал ос ам. Э̄ткотильт хотьютув а̄гмыӈыг е̄мтапи те, пӯльницавн звонитэ̄гыт, акв хотьютаме̄н тув та мины. Рӯпата олнув сака кос яныг а̄ти, ос воссыг хоталь щалтэ̄в, тох та рӯпитэ̄в. Мощ но̄хнув те нё̄тумтануве, тай ёмас о̄лнув. О̄йкам о̄с тыт рӯпиты, машинал ма̄хум тыглетувле тотыглыянэ, пӯльницан э̄рнэ са̄всыр пормас ман тэ̄рпи тотыглы». Ольга Николаевна тамле нёмса, хо̄тпа нупыл сымыӈ нэ̄. Тав ла̄внэ̄тэ щирыл, Кульпаст самын патме ма̄гсыл, тав такви па̄влэ ос о̄лнэ ма̄тэ сака э̄руптытэ. Ты ёмас хо̄тпа пуста̄гыл вос о̄лы, ще̄мьятэ ёт со̄тыӈыщ, щуниӈыщ вос о̄лы! 1067 2014.01.10. Николай МЕРОВ Йильпи та̄л кастыл ма̄ньщи нэ̄т янытлыянӯв. Татьяна Петровна Конева, а̄ги о̄парищ наме Пузина, Ха̄льӯс район Саранпа̄вылт самын патыс. Оматэ Анна Никоновна, а̄ще Пётр Ильич Пузиныг о̄лсы̄г. Татьяна иӈ ма̄ниг о̄лыс, а̄ще холас. Анна Никоновна такке̄т ня̄врамыт янмалтасанэ. Татьяна Саранпа̄выл школа а̄стламе юипа̄лт 1993 та̄лт Ха̄льӯсн ва̄нтлыс. Хум ва̄рыс, о̄йкатэ̄нтыл хӯрум ня̄врам янмалтэ̄г. Яныг пыге Ягрим па̄выл колледжыт ханищтахты. Кит а̄гияге иӈ школан ялантэ̄г. Ня̄враманэ мощ ма̄ньщи ла̄тыӈ торгамтэ̄гыт ос юн ща̄нь ла̄тӈыл мо̄рсыӈ порат потыртэ̄гыт. Татьяна Петровна ань нэ̄мхо̄т ат рӯпиты, а̄гияге янмалты ос юн о̄лнэ са̄всыр рӯпата ва̄ри. О̄йкатэ рущ хум, тав я̄ хосыт катерыл яласым рӯпиты. Анастасия Васильевна Вынгилева Ха̄льӯсн 1975 та̄лт ёхтыс. Тав пӯльницат ня̄врамыт пусмалтым ма̄нь ле̄ккарыг рӯпиты. Э̄ква хӯрум а̄ги янмалтас. Кит а̄гияге университет а̄стласы̄г, акватэ иӈ ханищтахты. Ня̄враманэ та̄нки ще̄мьял о̄лэ̄гыт. Ань тав хо̄т апыг о̄ньщи. Анастасия Кимкъясуй па̄вылт самын патыс. А̄ще Василий Селивёрстович Вынгилев Кимкъясуй па̄выл хум о̄лыс. Оматэ Домна Гавриловна ос Сӯкыръя па̄вылныл о̄лыс. Тэ̄н аквъёт атпан нупыл кит та̄л са̄виткем са̄лыӈ колт яласасы̄г. Юио̄выл та̄лытт Саранпа̄выл совхозт са̄лы ӯрим рӯпитасы̄г. Колта̄гланылт аквхуйплов ня̄врам яныгмасыт: са̄т пыг, нила а̄ги. Ань хӯрум та̄лыг е̄мтыс, а̄ще хотталь щалтыс. Оматэ ос 1996 та̄лт а̄тимыг е̄мтыс. А̄ще о̄лме̄т йӣвныл са̄всыр хурит ё̄ргыс. Са̄лыӈ суныт, ёсат, матыра̄ти пуссын ва̄руӈкве хасыс. Оматэ о̄с сака ма̄щтыр нэ̄ о̄лыс. Совныл са̄всыр пормасыт ю̄нтыс. То̄ва пормасанэ музейт о̄ньщавет, то̄ванэ ос э̄л тыналаве̄сыт. Ха̄льӯст ялпыӈ хо̄талыт о̄лыглан порат Анастасия Васильевна ва̄тихал тув во̄виньта̄лаве. Са̄ртын культура колн э̄ргуӈкве ялантас. Ань юио̄выл та̄лытт ты ва̄рмалин мо̄рсыӈ порат яланты. Рӯпататэ щирыл сака ат ве̄рми. Ирина Константиновна Поята Ха̄льӯс район Ло̄пмус па̄вылт самын патыс. А̄ще Константин Корнилович, оматэ Ольга Максимовна Албиныг о̄лсы̄г. Э̄кваго̄йкаг колта̄глэ̄нт китхуйплов ня̄врам янмалтасы̄г. Ань са̄т хо̄тпа хультыс. Ирина школа а̄стламе юипа̄лт Салехард ӯс медучилищан ханищтахтуӈкве минас. А̄стламе юипа̄лт Ямал ма̄н Тарко-Сале ӯс пӯльницан рӯпитаӈкве ке̄твес. Тот мощ рӯпитас ос хум ва̄рыс. О̄йкатэ̄н Молдавия ма̄н о̄луӈкве тотвес. Тувыл 1990 та̄лт тэ̄н ювле Ха̄льӯсн ще̄мьяӈ та̄гыл ва̄нтлысы̄г. Нэ̄ пӯльницат терапевтле̄ккарн нё̄тым нёловхуйплов та̄л рӯпитас. Та юипа̄лт ос физиотерапия ва̄рмаль щирыл э̄лаль ханищтахтас. Ань ты пӯсмалтан ва̄рмаль щирыл Ха̄льӯс пӯльницат китхуйплов та̄л рӯпиты. Ирина Константиновна о̄йкатэ̄нтыл кит ня̄врам янмалтасы̄г. Пыге̄н юридический академия а̄стлас. Ань Ха̄льӯст о̄лы. А̄гитэ̄н ос Ханты-Мансийск ӯс педколледжит нилыт та̄л ханищтахты. Ам ты ма̄ньщи ще̄мьят йильпи та̄л кастыл янытлыянум. О̄лупсаныл кӯпнитыг вос о̄лы. Йильпи та̄лт та̄н щуниӈыг вос е̄мтэ̄гыт. Рӯтаныл, юртаныл ёт са̄в та̄л пуста̄гыл вос о̄лэ̄гыт. 1067 2014.01.10. Тамара МЕРОВА Я̄тил нэ̄кве̄в 50та̄лэ̄тыл янытлылӯв. Ты э̄тпос аквхуйплов щислат Альбина Романовна Станиславец нам хо̄талэ. Ань ты та̄лт нэ̄ атпан та̄лэ то̄влы. Ма̄н таве пуссын янытлылӯв ос тав уре̄т аквкит ла̄тыӈ хансуӈкве таӈхе̄в. Альбина Ха̄льӯс район Саранпа̄вылт самын патыс, а̄ги о̄парищ наме Хозумова. Тав яныг колта̄гылт яныгмас, та̄н Сӯкыръя па̄вылт о̄лсыт. Роман Хозумов а̄ще «Саранпаульский» совхозт рӯпитас, Евдокия оматэ юн ня̄враманэ янмалтас. Та̄н Агафья ане̄кванылн акваг нё̄тве̄сыт. Ня̄врамыт таве̄ныл са̄всыр пе̄с йис потрыт хӯлыгласыт. Ты ще̄мья лув, мис о̄щсыт. Туи акваннё̄тхатым пум са̄грысыт, пыгыт хӯл алыщлым, во̄раим яласасыт. Альбина Саранпа̄выл школа а̄стламе юипа̄лт Ленинград ӯсн э̄лаль ханищтахтуӈкве минас. Тот 1986 та̄лт А. И. Герцен нампа педагогический институт а̄стластэ ос тувыл Ханты-Мансийск ӯсн ёхтыс. Тыт тав педагогический училищат рӯпитаӈкве патыс, соссаӈ а̄гитпыгыт ма̄ньщи ла̄тӈыл потыртаӈкве ханищтасанэ. 1992 та̄лт тот «национальное отделение» пусвес, тав тот пуӈктотыс. Ётыл ты ханищтахтан кол колледжиг ва̄рвес ос Альбина Станиславец тот социальногуманитарный отделеният кӯщай нэ̄г паттувес. Та колт рӯпитанэ̄тэ па̄сыл ань ва̄т нупыл са̄т та̄лыг то̄влыс. Альбина Романовна тот ёмас ка̄ркам хо̄тпаг ва̄ве. Тав ма̄ньлат ма̄хманэ ёт сымыӈыщ рӯпиты, номтыӈыг ос мӯтраӈыг о̄луӈкве пуссын ханищтыянэ. Пе̄с йис накыт ос ща̄ньа̄щ ла̄тыӈ ва̄ӈкве акваг ла̄виянэ. Соссаӈ ма̄хум ла̄тыӈ ханищтан э̄рнэ ёнгыт, касылыт щё̄питы, са̄всыр потрыт, мо̄йтыт акваг кинсы. Ань студентыт ла̄внэ̄ныл щирыл, тав уроканэ пӯмщит, тувыл та̄н матыра̄ти номтыт ёмщакве̄г о̄ньщияныл. Та̄нанылн ётыл практика порат рӯпитаӈкве мощ кӯстырнуве. Нэ̄ ма̄ньщи ла̄тӈын ханищтан коныпал, ма̄ньлат хо̄тпат са̄всыр суссылтапын тотыглыянэ. Тувыл та̄н ётаныл ялпыӈ хо̄талыт щё̄пита̄лы, тот та̄н йӣкве̄гыт, э̄рге̄гыт. «Югорские встречи» ос «Ӯринэ̄ква ялпыӈ хо̄тал» ка̄сыӈ та̄л ва̄рыглэ̄гыт. Альбина ань тыг мус такви э̄лаль ханищтахты, тав педагогический рӯпататэ̄т са̄в ва̄нэ̄тэ ма̄гыс, са̄всыр курсыт хӯнтлуӈкве яланта̄лы. Финноугор рӯт ма̄хум Конгрессыт о̄лыгланэ̄ныл порат тув делегатыг пе̄рия̄лаве. Тох Финляндиян, Венгриян ялыс. Тувыл акв та̄лн, о̄с акв ма̄ньщи а̄ги Марина Хатанева ёт Венгриян ханищтахтуӈкве ке̄тыглавесы̄г. Альбина иӈ школат ханищтахтаме̄т акваг номтыӈыг ос ка̄ркамыг о̄лыс. Са̄т классыт ханищтахтаме порат тав тэ̄лы каникулт «Артек» нампа ня̄врамыт ӯщлахтын мирхал лагерьн ке̄тыглавес. Аля акв э̄тпос тот ӯщлахтас. Ань та тэ̄ла номылматаме̄т тав ла̄выс: «То̄нт Ха̄льӯсныл образование колныл Саранпа̄вылн ла̄тыӈ ке̄твес: «Акв хотты ма̄ньщи, ханты манос ё̄рн ня̄врамакве пе̄рияӈкве ос лагерьн тотыглаӈкве э̄ри». Ам то̄нт школат сак хартнэ кружокын ялантасум, ма̄щтырыг пальсакыт, турло̄псыт, олн пиннэ хӯрыгсовыт сакныл хартсум, тувыл сака ёмщакве̄г ханищтахтасум. Таима̄гыс тув ке̄тве̄сум. А̄нумн тот сака пӯмыщ о̄лыс, мо̄т ма̄ныл ёхталам са̄в а̄гитпыгыт пуссын акванюрщхатсӯв». Альбина Романовна институтт ханищтахтаме порат телевидение хосыт ам акв щёс ка̄сала̄лыслум, тот матырсырман телемост о̄лыс. Ань ты урыл тав тох потыртас: – Ты ва̄рмаль 1985 та̄лт о̄лыс. То̄нт СССР-Америка мирхал телемост ва̄рыглавес. Тав «Ленинград – Сиэтл: Встреча в верхах рядовых граждан» намаим о̄лыс. Тот кит яныг ӯсыгт о̄лнэ ма̄хум акванатыглаве̄сыт ос са̄всыр тэ̄лат урыл потыртасыт. Ма̄н, лӯима̄ ма̄ныл ханищтахтам студентыт, тув о̄с во̄виньта̄лвесӯв. Ты кастыл партком института акванатхатыглас ос лӯима̄ныл о̄лнэ ёмщакв ханищтахтан студентыт тув пе̄рияве̄сыт. Тувыл ма̄н Владимир Познер ёт акванхо̄нтхатыгласӯв ос маныр, хумус потыртаӈкве ро̄ви, мощ хӯлтыглавесӯв. Э̄лы хо̄н ма̄т Фил Донакью, мирн ва̄нэ журналист, такви ма̄хманэ ёт рӯпитас. Тувыл хо̄н ма̄хум пӯмщалахтасыт, СССРыт мощщаг хультум ма̄хум матыр права о̄ньще̄гыт манос а̄ти, мо̄т мирыт ма̄н ётув, со̄ль, юртыӈыщ о̄лэ̄гыт ман а̄ти? Ам ты о̄вылтыт, ва̄им, ёмас ла̄тыӈ ла̄всум. Мо̄т ла̄тыӈ ла̄вуӈкве хунь та̄ртавем. Ань мо̄т пораг е̄мтыс, ань ро̄ви». Альбина Романовна «Лӯима сэ̄рипос» газетан потрыт ос ля̄ххалыт хансыглас. Тав Оксана а̄гитэ янмалтым юн о̄лыс, ос ня̄врамыт ат ханищтанэ̄тэ халт, газетан рӯпитаӈкве во̄выглавес. Таве̄н то̄нт Т. С. Себурова, ханты газетат рӯпитам э̄ква, ёмщакв нё̄тыс. Альбина ля̄ххалыт манос потрыт юн хассанэ, ос Таисья Степановна тав палтэ щалтса̄лы, потрыт рӯпатан тотыянэ. Та̄н рӯпата колт печатайтавет ос та нэ̄н ювле сунсуӈкве тотыглавет. Ля̄ххалыт, потрыт уральтан юипа̄лт ущ газетан ва̄равет. Ос ётылнув мо̄т ма̄ньлат ма̄ньщи а̄гит тув рӯпитаӈкве ёхтысыт, Альбина ня̄врамыт э̄лаль ханищтаӈкве та патыс. Тувыл туи ма̄ньщи ла̄тыӈ ханищтахтан курсыт ва̄рыглаве̄сыт, тав о̄с ка̄сащим тот рӯпитас. Тох тав Ло̄пмусн матахмат щёс «Шешкинские чтения» нампа ханищтапн ялыс. А̄нъян ос Кимкъясуй па̄влыгн, Лӯсум ма̄ньщиянув палт о̄с ялыс. Сукыръян рӯт ма̄хманэ уральтаӈкве акваг яланта̄лы. Ты нэ̄ акв ма̄т ат ӯнлы, акваг матыра̄ти ва̄ри. Мо̄лалнув А. И. Герцен Российский государственный педагогический университет тармыл юил ёхталым аспирантурат ханищтахтуӈкве патыс. Научный яныг нэ̄пак ань щё̄питы. Рӯпататэ ка̄ркамыг ос ёмщакв ва̄рнэ̄тэ ма̄гыс Альбина Романовна са̄всыр янытлан нэ̄пакыл майлувес. Тав РФ Министерство образования па̄лыл, тувыл образование ос наука ХМАО-Югры па̄лыл янытлан нэ̄пакыл мӯйлуптавес. Юн тав Оксана а̄гитэ пыг янмалтаӈкве нё̄ты, тав а̄гитэ̄н сака э̄руптаве. Ма̄н ты сымыӈ нэ̄кве̄в нам хо̄талэ̄т янытлылӯв, пуста̄гыл вос о̄лы ос На̄й-О̄тыранэ̄н вос ӯргалаве, пус ка̄т, пус ла̄гыл! 1067 2014.01.10. Николай МЕРОВ Са̄лы янмалтан ма̄ньщи ще̄мья. Ва̄т са̄грапнал э̄тпос округ Дума депутат Татьяна Гоголева, таве̄н нё̄тмил ва̄рнэ а̄ги Елена Фризоргер ос ам Ха̄льӯс район Тӯрват па̄вылн мӯйлуӈкве ялсӯв. Та па̄вылт Савва ос Татьяна Самбиндаловыг ня̄враманэ̄н ос апганэ̄н ёт о̄лэ̄г. Э̄кватэ Татьяна Владимировна, такви о̄парищ наме Тасманова, Лэ̄пла па̄вылт яныгмас. Э̄кваго̄йкаг акванминаме̄н па̄сныл ань налыман нупыл китыт та̄лыг ты е̄мтыс. Савва Тӯрват па̄вылт яныгмас. Пе̄с порат а̄ще са̄в са̄лы о̄ньщис. Ма̄ньщи хум нэ̄ тотме порат яныгса̄т атпан са̄лы иӈ о̄ньщис. Ётыл пастух ат е̄мтыс, ма̄хум нё̄рт са̄лы ӯруӈкве ат тахсыт, са̄лыяныл тот та̄нкирот о̄лсыт. Тыщир ты са̄лыт лащал ла̄ккваминыгласыт. Юио̄выл са̄лыянэ 1996 та̄лт Илья Монин ёт юв тотсанэ̄н, аласанэ̄н. То̄ванэ ос йирхатнэ ма̄гыс э̄л майлысанэ̄н. Ань нэ̄гхумы̄г хо̄т ня̄врам о̄ньще̄г. Яныг а̄гитэ̄н наме Ольга, тав Дима пыге ёт Ня̄хщамво̄ль па̄вылт о̄лы. Дима онтолов та̄лэ то̄влыс, школат хӯрмит классыт ханищтахты. Ольга ос школат а̄нысан ловтым рӯпиты. Олег, Илья, Унтари ос Алексей Тӯрват па̄вылт о̄лэ̄гыт. Илья ос Унтари Тӯрват па̄вылт самын патсы̄г. Мо̄т ня̄враманэ̄н пуссын Ня̄хщамво̄льт самын патсыт. Нила пыг пуссын во̄рае̄гыт, янгуй, нё̄хыс ос мо̄т са̄всыр во̄руй алыщлэ̄гыт. Ка̄сыӈ хо̄тпа такви «Буран» о̄ньщи. Таквсы сыс са̄в нёхыс ке̄рнялил алыщлэ̄гыт, акванатыяныл, тувыл тыналыяныл. Ма̄хум акв нёхс сов нила со̄тыра солко̄вил ёвтыяныл. Ты коныпал Самбиндаловыт нё̄выль ос пил тыналэ̄гыт. Тыщир ты олн сэ̄лэ̄гыт. Матыра̄ти та̄нки ёвтуӈкве ве̄рме̄гыт. Па̄вланылт на̄й постын станция о̄ньще̄гыт. Э̄типа̄лаг на̄й пе̄ламтэ̄гыт, кина суссылтан то̄тап сунсэ̄гыт, компьютер о̄с о̄ньще̄гыт. Улякщи по̄слын утыл са̄лыт, во̄раян ва̄рмаль ос яласан лё̄ӈх акваг по̄слы. Ос ётыл такви кина ва̄ри. Матыр э̄рыг тув ханувъяпты, татем пӯмащ кина тэ̄лы. Ты пыгыт та̄нки ёса, са̄лы сун ос мо̄т са̄всыр пормас ма̄щтырлэ̄гыт. Мо̄лал Алябьево па̄выл леспромхозт рӯпитан ма̄хум та̄н о̄лнэ ма̄нанылт нор яктысыт. Тот нор яктынэ̄ныл ма̄гыс Тӯрват па̄вылт йильпи кол ӯнттысыт. Ань та̄н пуссын та яныг колт ты о̄лэ̄гыт. Савва котиль а̄гитэ о̄с Тӯрват па̄вылт о̄лы. Тав наме Ирина, кит ня̄врам янмалты, Кристина ос Никита. Тэ̄н иӈ ма̄ниг, Кристина нила та̄лэ то̄влыс, Никита ос та̄л охса яныт пыгрищ. Ня̄врамы̄г ща̄нь ла̄тыӈ сас ёмщакв торгамтэ̄г. Ты колта̄гыл халанылт туп ма̄ньщи ла̄тӈыл потыртэ̄гыт. 2011 та̄лт округ Ассамблея депутат Татьяна Гоголева та̄н ма̄гсыланыл Ямал ма̄ныл нёлсат са̄лы ёвтыс. Та па̄сныл кит та̄л минас. Ань ты ще̄мья хумус о̄лы ос са̄лыяныл хумус о̄ньщияныл, тыи уральтан ма̄гыс кӯщай нэ̄ тув ты ялыс. Савва са̄лыянэ «Э̄ти пурн тӯрт» о̄ньщиянэ. Па̄вылныл тув миннэ лё̄ӈхе ва̄тахкем ве̄рыста. Ма̄н кит «Бураныл» тув ялсӯв. Та сӯйт са̄лы тэ̄пыӈ ма̄ сака ёмас. Мо̄лты та̄лныл тот о̄ньщияныл. Ань тынакт туп хус са̄лы хультыс. То̄ват оясыт, то̄ват туи порсысыт ос са̄лы пурнэӯйн алыщлаве̄сыт. Ты ха̄йтнутыт та̄л сыс акв щёс хотты ма̄ныл тув ёхталэ̄гыт. Сака ощмарыӈыт, туйтыглахтым о̄лэ̄гыт. Ойттур э̄тпост акв ма̄нь ха̄йтнут во̄ркол по̄хат алыманыл юипа̄лт, ха̄йтнутыт э̄т палыт орвиньтасыт, ул ма̄нь утаныл киссаныл. Тӯяг ос ма̄колыӈо̄йкат ёхталэ̄гыт. Таима̄гыс са̄лы тэ̄пыӈ ма̄ мувлахил пусас ва̄рсыт, ань са̄лыт ат новавет. Тох са̄лыт уральтаӈкве кӯстыр, э̄л ат минэ̄гыт. Тув миннэ̄в порат тӯр ва̄тат нолвитын щалтсасӯв. Ворил ты «Буранув» но̄ххартыслӯв. Тувыл са̄лыт лё̄ӈханыл хосыт минасӯв, во̄р щахылт хо̄нтсанӯв. Та̄н э̄лмхо̄ласыл ат пилэ̄гыт. «Ня̄ньня̄нь» ла̄тӈыл во̄виянын, та ёхтыгпе̄гыт. Савва ла̄выс, ты хультум са̄лыт ёмщакв ханьщувласыт, э̄л ат минэ̄гыт. Ань ос са̄лыяныл э̄лаль са̄вмалтан ма̄гыс та̄н Саранпа̄выл совхозныл иӈ па̄сыгрищит ёвтуӈкве номсэ̄гыт. Са̄лы урнэ ва̄рмаляныл э̄лаль хумус мины, ма̄н мо̄т щёс ты урыл тах о̄с хансэ̄в. Ам ты мутраӈ ма̄ньщи ще̄мьян щунь паща ла̄тыӈ ке̄тэ̄гум. Са̄лыяныл э̄лаль вос са̄вме̄гыт. Йильпи та̄л та̄нанылн яныг со̄т вос тоты. Пус ка̄т, пус ла̄гыл вос о̄лэ̄гыт. 1067 2014.01.10. Валентина УЗЕЛЬ Валентина Хозумова Омамн паща ла̄тыӈ те̄тэ̄гум. Белоярский ӯст акв А̄с ма̄ньщи нэ̄кве ёт хо̄нтхатыгласум. Тав наме Виктория Ивановна Жемчужникова, а̄ги о̄парищ наме Бешкильцева. Тав а̄нумн такви уре̄тыл тамле потыр потыртас: Ам Полноват па̄вылныл о̄лэ̄гум. Омам Варвара Тарасовна Бешкильцева, тав ань Полноват па̄вылт о̄лы. Са̄в та̄л ня̄врамыт школат ханищтас. Та̄гт па̄вылт омам каӈке о̄лыс, Леонид Тарасович Костин. Тав са̄в та̄л школа кӯщаиг рӯпитас. Таима̄гыс омам тув минас, мощ тот о̄лыс. Ётыл Восыӈтур па̄вылт, Полноват па̄выл школат рӯпитас. А̄тям саран хум о̄лыс, Иван Иванович Бешкильцев. Тав Ня̄хщамво̄ль е̄рныл тувыл хотыл о̄лыс. Ам амти ма̄ньщи ла̄тӈум щар ат ва̄глум. Омамн акваг ла̄ве̄гум, манрыг ма̄нав ма̄ньщи ла̄тӈыл потыртаӈкв ат ханищтастэ. Ам школа а̄стламум юипа̄лт А. И. Герцен нампа институтт ханищтахтасум, рущ ла̄тыӈ ос литература учителиг хусахтем та̄л Сорум нампа па̄выл школат рӯпитасум. О̄йкам хотталь щалтыс, амти а̄гмыл е̄мтсум. Тувыл тыг Белоярский ӯсн ёхтысум, тыг а̄гиягум ёт о̄лмыгтасум. Яныг а̄гим ань Ханты-Мансийск ӯст о̄лы, журналистыг ханищтахтас, ань ма̄нь ня̄враме ёт юн о̄лы. Мо̄т а̄гим иӈ ма̄нь. Ме̄нттеме̄н о̄лыме̄н, тыг о̄лмыгтамуме̄н, ань тит та̄лыг ты е̄мтыс. Тюмень ӯст квартира о̄с о̄ньще̄гум, «переселение» нампа программа щирыл майве̄сум. Тув минэ̄гум ман а̄ти, ат ва̄глум. Тыт о̄луӈкв а̄нумн сака мӯсты, ты ӯс сака ёмас, сака яныг а̄ти. Омам а̄тятэ, ам ащо̄йкам, Тарас Григорьевич Костин Ялпӯс па̄вылт о̄лыс. Ма̄н тав палтэ акваг ялантасӯв. Ты мӯтраӈ хо̄тпакве сампыльта̄лыг о̄лыс, па̄влувн ёхты, ам таве рӯтанув палт та ва̄нттылум. Варвара Тарасовна омам ань пенсияолн вим о̄лы. Тав палтэ ма̄хум акваг ёхталэ̄гыт, пе̄с ва̄рмалянув, пе̄с наканув урыл титыглахтэ̄гыт. Са̄в та̄л школат рӯпитаме ма̄гсыл тав «Ветеран труда» нам о̄ньщи. Ам ань газетав ловиньтан ма̄хумн тамле ла̄тыӈ ла̄ве̄гум. Ща̄нь ла̄тӈе ва̄нэ хо̄тпа, пе̄с ва̄рмалянув э̄лаль тотнэ хо̄тпат – на̄н ты ва̄рмалитыл янытлахтым о̄лэ̄н. На̄н ма̄н мирув о̄лупса, ла̄тӈув э̄лаль тотылы̄н. На̄н щар ма̄к со̄тыӈ хо̄тпаг ты о̄лэгы̄н. Ам амти ла̄тӈум ат ва̄глум, тыи ма̄гыс сымум сака ща̄рги. Ань ка̄сыӈ хо̄тпа ялпыӈ хо̄тал кастыл янытлылум. Омам газета та̄ра паща ла̄тӈыл те̄тылум. Пуссын пуста̄гыл о̄лэ̄н, То̄рум ёт, О̄тыр ёт. 1067 2014.01.10. Валентина УЗЕЛЬ Ха̄льӯс ляпат о̄лнэ «Со̄рни сэ̄й» нампа ӯщлахтын ма̄. Ты хурит яныг таквс э̄тпост по̄слуве̄сыт. То̄нт Ха̄льӯст о̄лум конференциян са̄в ма̄хум ёхталасыт. "Со̄рни сэ̄й" нампа ӯщлахтын ма̄т та̄н ханты ос ма̄ньщи ма̄хумн ӯрве̄сыт. Валентина УЗЕЛЬ ва̄рум хурит 1067 2014.01.10. Людмила ТЕТКИНА Урай ӯс по̄хат ма̄хум ӯщлахтэ̄гыт. Ань округув янытыл общинат манос са̄всыр мо̄т организацият этнотуризм щирыл рӯпитэ̄гыт. Та̄н та̄нки палтыланыл мӯй ма̄хум во̄ве̄гыт. Урай ӯст по̄хат о̄лнэ «Силава» этностойбищан туристыт мӯйлуӈкве о̄с ёхталэ̄гыт. Кӯщаиг тот Ольга Александровна Фомичёва рӯпиты. Ювле хультум та̄л таквсы порат са̄всыр некоммерческий организацият Ханты-Мансийск ӯсн акванатыглаве̄сыт, то̄нт та̄н ма̄гсыланыл выставкаярмарка ва̄рыглавес. Ты суссылтапн «Силава» нампа этностойбищат рӯпитан хо̄тпат о̄с ёхталасыт. Тот ма̄хум та̄нки рӯпатаныл урыл потыртасыт ос та̄нки па̄вланылн мир мӯйлуӈкве во̄всаныл. Анна Изюмова ты этностойбищат хосат та̄гыл рӯпиты. Тав ла̄вме щирыл, тамле ярмаркат о̄лнэ порат са̄в мир ёт ва̄йхатэ̄гыт ос мо̄т ма̄т ма̄хум хумус рӯпитэ̄гыт, сунсэ̄гыт о̄с ханищтахтэ̄гыт. Ольга Фомичёва такви яныгмам па̄влэ о̄лнэ ма̄т ӯщлахтын ма̄ ва̄руӈкве номылматас, «Силава» нампа община ва̄рыс. Тот ма̄ньщи па̄выл ӯнттысыт. О̄выл щёс ня̄врамыт тув ӯщлахтуӈкве 2008 та̄лт ёхталасыт. Та ӯщлахтын ма̄ «Юрсил» намыл намаясаныл. Та̄н ос мо̄т общинат хольт грантолн винэ ма̄гсыл культура департаментын та̄нки нэ̄паканыл ке̄тыглыяныл. Ювле хультум та̄лт Урай ӯс по̄хат 50 а̄гирищитпыгрищит кит сменагт ӯщлахтасыт. Этностойбищат рӯпитан ма̄хум тамле рӯпата ва̄рим, туп тэ̄лы порат олн сэ̄луӈкве ве̄рме̄гыт. Та̄н ня̄врамыт таквсы, тэ̄лы ос туи каникуланыл порат тув ӯщлахтуӈкве во̄виньта̄лыяныл. Ты коныпал Урай ӯст о̄лнэ мир тот хӯл алыщлэ̄гыт манос нас ӯщлахтэ̄гыт. Ма̄хум ма̄гсыл та̄н программа ва̄ре̄гыт, ма̄ньщи пе̄с йис о̄лупса урыл потыртэ̄гыт. Анна Изюмова ла̄выс: «Ты рӯпата ва̄руӈкве о̄с са̄в олн э̄ри, природный ресурс департаментын ма̄нки нэ̄паканув грантолн винэ ма̄гсыл о̄с ка̄сыӈ та̄л ке̄тыглыянӯв. Ос са̄всыр спонсорхо̄тпат кинсэ̄в. Ма̄н Урай ӯст о̄лнэ са̄всыр организацият ёт рӯпитэ̄в. Этностойбищан яныгпа̄ла хо̄тпат во̄виньта̄лыянӯв, та̄н ма̄гсыланыл ӯщлахтын хо̄талыт ва̄рыглэ̄в. Тувыл ма̄хум та̄нки самын патум хо̄таланыл ос мо̄т са̄всыр ялпыӈ хо̄талыт то̄т янытлаӈкве ве̄рме̄гыт. Ювле хультум та̄лт ма̄н «Силава»» этностойбищавт «Чумбардия» нампа фестиваль ва̄рыглавес. Россия янытыл ма̄хум тув ёхталасыт. Ты э̄лыпалт хӯрум та̄л сыс ка̄сыӈ туи э̄ргуӈкве ха̄снэ ма̄хум ма̄н палтув ёхталасыт, а̄ращ ва̄тат ӯнлахо̄лсыт ос э̄ргыт э̄ргысыт. 2013 та̄лт Урай ӯс миркол ма̄хум ма̄навн сака нё̄тсыт. Ань тамле фестиваль ма̄н ка̄сыӈ та̄л ва̄рыглаӈкве патэ̄в». Этностойбище «Силава» ань э̄рнэ рӯпата ва̄ри, та̄н хо̄нтаӈ ма̄ньщит пе̄с йис ва̄рмаляныл но̄хво̄рмалтэ̄гыт. Пе̄с нэ̄пакыт щирыл хо̄нтаӈ ма̄ньщит супаныл нэ̄квет ю̄нтуӈкве ханищтахтасыт. Хунь рӯпитаӈкве о̄вылтахтасыт, та̄нанылн яныгпа̄ла ма̄ньщи э̄ква Нина Демьяновна Тихонова нё̄тыс. Тав Кондинский районт о̄лнэ ма̄ньщит пе̄с йис о̄лупса ёмащакв ва̄гтэ. Йильпи та̄л янытлан хо̄тал кастыл Урай ӯст о̄лнэ мир «Силава» этностойбищат хӯл алыщлаӈкве, нас ӯщлахтуӈкве ёхталасыт. Ань та ӯс ляпат мо̄т ӯщлахтын ма̄ воссыг а̄тим, ӯст о̄лнэ мир тув ёхталаӈкве ка̄саще̄гыт. 1067 2014.01.10. Светлана РОМБАНДЕЕВА Хōсыӈ урыл потыр. Хōсыӈ Та̄рак сӯйт ōлыс, щёлыӈ ōйка ōлыс. Та̄рак сӯйт колъёре ōлы. Аквматнакт на̄лув Хōрыӈпа̄вылн минуӈкве номылматас матыр тэ̄нут ма̄гыс. Тōнт мир са̄выӈпа̄лэ тэ̄лы па̄вылт ōлэ̄гыт. Та̄лматы, та мины, э̄кватэ колэ̄т хульты. Та мины, матрыг ёллю̄льсас, тувыл сунэ̄н ӯнтуӈкве е̄мталас, хӯрум сун йисыт, ёлтахамтасыт, та мувылматвес. Тōнт ё̄рн хōла сака са̄в ōлыс, хӯрум та̄н ōлсыт, ё̄рнрищит. Хӯрмит ут тав палтэ ме̄тхумыг рӯпитам ут, ōс ё̄рн, пувима, ты тотаве. Лапмувылматвес, ёлпуввес, китыглаӈкве патвес, хōт ōлы, са̄лыянэ хōт ōлэ̄гыт, та нуйгалаве. Ё̄рныт ке̄р ёсал ōлэ̄гыт, ке̄р товтыл ōлэ̄гыт. Акв утын ке̄р товтыл ю̄ныгтавес пальтытт, пальтытэ па̄лыгтōлматы, ке̄лпыл та сōсхаты. Тав нэ̄матыр ня̄лё̄вт ёт ат ōньщас. Тав палтэ ме̄тхумыг ōщнэ ё̄рн ōйкатэ̄н са̄лиг е̄мтапас, сунэ̄н вущкасаве, та нуясаптувес, таийыг та хультсыг. Ме̄тхум ва̄гтэ, хōт колэ ōлы, юв та нуйвес, ювкуратаптувес. Тувыл ё̄рн сунэ̄н та̄лматас, хотталь та тахас. Хōсыӈ хотловтвес, пуӈке пе̄рсалавес, пусмалтавес. Ня̄лыӈё̄втыӈыг е̄мтыс, ё̄рнанэ пуссын аласанэ. Тувыл тав сака тэ̄пъяп ōйка ōлыс, са̄в тэ̄нэ ōйка ōлыс. Ӯй матыр ка̄тынпатты, пе̄щ па̄йты, пуссын тэ̄гтэ. Сака та̄йпайп ōйка ōлыс. Ос матыр щёпыр ман хансаӈ алы, маныгтытэ, пе̄тытэ, па̄йты. Лов лэ̄ӈын нё̄выль па̄йты, пуссын тэ̄ганэ, та савит та тэ̄г. Янгуй те па̄тамты, тōвыль сунын та̄лттытэ, аквторыг харттытэ. Нё̄влянэ ювхартты, та маныр, ӯй нё̄выль па̄йты. Таяныт пе̄щ капай пуссын па̄йтытэ, аквторыг тэ̄гтэ. Тох ань тэ̄г, таима̄гыс та ё̄р. Пе̄с ма̄хум па̄лн совыл ква̄лыг сылталэ̄гыт, э̄лнаӈ янгуйт сованыл сака осыӈыт ōлсыт, ам ва̄санум. Хōсыӈ хунь ӯй пуссын та̄лттытэ, такте̄т харттытэ суныл, тōвыль суныл. Хасумты, ань ква̄лге супыгтōлматы, ла̄ви: «Ты маныр саюм пум». Та осыт ква̄лыг капай, эрттам саюм пум. Тамле Хōсыӈ таяныт ва̄гыл та ё̄р ōлыс. Па̄лн – янгуй (сōруп) сов тох ла̄ваве, тав осыӈ сов, ма̄хманув тамле осыӈ совыл ква̄лыг яктыгласыт. 1067 2014.01.10. Светлана РОМБАНДЕЕВА Та̄нвaрп э̄ква. Та̄нвaрп э̄ква тай мо̄йт сака ат о̄ньщас, акв потыр о̄лыс тав уре̄т. Ло̄пмуст май йильпи тотнэ мaньнэт э̄ти та̄н ва̄руӈкве ат та̄ртавет, э̄ти ат ро̄ви та̄н ва̄руӈкве. Тувыл акв йильпи тотым мaньнэ, ущ тотым нэ̄, ат ве̄ритас, марщум ман мaныр, номылматас та̄н ва̄руӈкве. О̄ныпаге̄накияге̄н ат та̄ртаве кос, тав тувыл ат агтыс, номсы: нэ̄матыр ва̄руӈкве, сар та̄н ва̄ре̄гум. Та̄н ва̄руӈкве ӯнтыс. Аквматэ̄ртн ань маньнэ та̄н ва̄рим ӯнлыматэ, кон а̄мп та ня̄ӈхалтахтаме суйты, тав хотрохтуптахтас, ла̄ви: – Маныр хомле е̄мтапас? А̄ви хо̄яве, пӯнсыгтаве, юв ты рагаты – Та̄нвaрп э̄ква тав. Та̄нвaрп э̄ква тулё̄вланэ пуссын акв тармыл о̄лэ̄гыт, тамле ка̄таге та. Ань ма̄ньнэ та̄ра хот та рохтыс. Акватэ ань тав по̄хен ӯнтыс, ла̄ви: – Ты нэ̄кве, ты нэ̄кве, ва̄риме̄н та̄н, хотьютаме̄н та̄н са̄ртын а̄сты, таиме̄н та алавеме̄н, ювтэ̄гавеме̄н. Тувыл тав та рохтыс. А та мат ут ня̄р, ке̄лпыӈ а̄мп сыстaн молях тулё̄влын та пе̄ритэ, мо̄ляхыл та̄н та ва̄ри. Са̄ртын та̄нэ а̄стыгпас, нэ̄ та пувумтастэ. Та̄нвaрп э̄ква май па̄выл о̄вылт о̄лыс, ань о̄лы, тольхыӈ мат урам ло̄мтыт, Ӯс щахылт. Ла̄ве̄гыт, пе̄с порат Та̄нвaрп э̄ква ма̄колт о̄лыс Ӯс щахылт. Тав Та̄нвaрп э̄ква кит а̄гирищигпыгрищиг о̄ньщас. Нэ̄ тув та нуясаптыстэ, тотыстэ, такос ро̄ӈхыс ман тисгыс. Тувыл ма̄хманэ но̄хрохтэ̄гыт, ня̄хнэро̄хнэ суйты, торгамтасаныл маньнэ̄ныл а̄тим. То̄нт, пе̄с порат, ня̄йт ма̄хум о̄лсыт, ня̄йтсыт, молямтахтым ква̄лапе̄гыт, ань маньнэ̄ныл тӯлмантавес. Аман та̄нти ня̄йт ман хо̄т во̄всыт ня̄йт о̄йка. Пупыг ман матыр ке̄тсыт, маньнэ Та̄нварп э̄ква колэ̄т ёхтыгпавес. Алуӈкве ат а̄лымияныл, тувыл пупыгн хот та вуйвес. Юв тотвес, ань пилуптавес ман рохтыс, пе̄с ла̄внэ щирыл исанэ хотрагатасыт, хосапыл ат о̄лыс, мощ о̄лыс, сорумн та патыс. Ло̄пмус па̄выл по̄хат е̄ӈтаг тӯр во̄ӈха о̄лы, та тӯр ам о̄с ва̄глум. Та̄нвaрп э̄ква пупыгн та тӯрн харттувес, ве̄латавес ман щама алвес. Та тӯрщахыл тувле о̄лы, ве̄латаме юипа̄лт та ма̄ тӯрыг е̄мтыс. Ты потрыг – мо̄йтыг Николай Иванович Хозумов тав потырта̄лсагемо̄йтыгласаге, нэ̄пакын С. Ромбандееван хасвесы̄г. 1067 2014.01.10. Николай МЕРОВ Нэ̄пак хаснэ хум янытлылӯв. Андрей Семёнович Тарханов, ловиньтан нэ̄пак хаснэ о̄йка, о̄выл нэ̄пак та̄ртме па̄сныл ань атпан та̄лэ то̄влыс. Ты кастыл са̄в мир таве янытлаӈкве ёхталасыт. Тав 1936 та̄л ма̄нь таквс э̄тпос 13 хо̄талэ̄т Хо̄нтаӈ ма̄т Аманья па̄вылт самын патыс. Ань та па̄выл а̄тим. Андрей Семенович 1956 та̄лт Ханты-Мансийск ӯс педучилище а̄стлас. Ос кина по̄слын хо̄тпаг ханищтахтуӈкве минас, тувыл А. М. Горький нампа литература институтт ос Санкт-Петербургыт о̄лнэ А. И. Герцен нампа институтт ханищтахтас. Та юипа̄лт Юмас па̄выл школат ня̄врамыт акв та̄л ханищтас. Тыгыл э̄лаль Ханты-Мансийск ӯст газетат, телевиденият ос творчество колт матахмат та̄л рӯпитас. Тав Угро-Ямал нэ̄пак хаснэ ма̄хум организациянылт кӯщаиг са̄т та̄л о̄лыс. Ётыл ты «Союз писателей России» организация Ханты-Мансийск ӯс нупыл хасвес. Андрей Семёнович «Почётный житель города Ханты-Мансийска» нам о̄ньщи. 1997 та̄л «Дружбы народов» нампа ма̄гылн тагатан по̄сыл майвес. Ань тав финноугор мирыт нэ̄пак хаснэ хо̄тпат Ассоциацият кӯщай ва̄ӈын хумыг о̄лы. О̄йка стиханэ рущ ла̄тӈыл хансыянэ. 1958 та̄лт «Ленинская правда» газетат «Утро» щар о̄выл стихотворениятэ хасвес. Тувыл «Первая завязь» нэ̄паке та̄ртвес. Ётылнув «Снежная симфония» нампа нэ̄пак хансыс. Тыи ма̄гыс тав «Лауреат премии губернатора автономного округа в области литературы» намыл майвес. «Исповедь язычника» нэ̄паке ма̄гыс ос «Лауреат Всероссийской литературной премии А. Т. Твардовского» нам о̄ньщи. Тав ань ты хо̄тал мус ловиньтан нэ̄пак са̄в хансыс, пуссын ма̄вит урыл хансым о̄лэ̄гыт. Тав хансум нэ̄паканэ ловиньтаӈкве кӯпнит ос сака пӯмащ. Ма̄н ты о̄йка юбилейхо̄талыл сымыӈыщ янытлылӯв. 1067 2014.01.10. Людмила ТЕТКИНА Хум ня̄врамыт ё̄раныл а̄рталасыт. Ка̄сыӈ та̄л ва̄т са̄грапнал саквалан э̄тпост Хулюмсунт школат ханищтахтын ня̄врамыт халт ФОК колт футболыл ёнгын касылыт ва̄рыглавет. Ты касыланыл «Кожаный мяч» намыл намаим о̄лы. Акв са̄т сыс 1-11 класс пыгрищит халанылт ёнге̄гыт, ё̄раныл а̄рталэ̄гыт ос но̄хпатнэ классыт мӯйлупсал мивет. Садикн юио̄выл та̄л ялантан пыгрищит о̄с ка̄сыӈ та̄л о̄выл классыт ханищтахтын пыгрищит ёт ё̄раныл а̄рталаӈкв ёхталэ̄гыт. Пӯмащ сунсуӈкв, хунь щар ма̄нь утквет ёнге̄гыт. То̄ва порат та̄нки воротанылн мечик са̄ӈхасаӈкв ве̄рме̄гыт, то̄ва та̄л садик но̄хпаты. Ты та̄л о̄выл класс но̄хпатсыт. 2-4 классыт халт 4 класс но̄хпатыс. 5-8 классыт халт 7 классыт ханищтахтын пыгрищит юртаныл ёлымтасаныл. 9-11 классыт халт 9 класс но̄хпатыс. 9 классыт ханищтахтын пыгрищит ты та̄л атынтыг но̄хпатыс. Футбол (ёныг) – хум ма̄хум та̄н ёнгиланыл. Ня̄врамыт ёнгын э̄лыпа̄лт ЛПУ организацият рӯпитан ма̄хум халанылт кассыт, газокомпрессорный служба ма̄хум но̄хпатсыт. Футбол тренерыг Д. Ю. Омельченко о̄лы. Ня̄врамыт тав палтылэ ялантаӈкв ка̄саще̄гыт, ханищтан хумияныл э̄руптыяныл. Яныг ма̄хум о̄с ка̄сыӈ хо̄тал ӣтипа̄лаг рӯпатаныл юипа̄лт спортзалт поргантэ̄гыт. Хо̄ӈха спорт нупыл ка̄сащи, лувесаме та̄ксарыг яныгми, пусыг о̄лы. Пусыг ке о̄лы – ё̄рыг о̄лы. 1067 2014.01.10. Анна АЛГАДЬЕВА Ня̄врамыт мӯйлуӈкв ялсыт. Таквсы па̄сныл Хулюмсунтыӈ ня̄врамыт Ня̄хщамво̄льн ялнэ номт о̄щсыт. Тот о̄лнэ ня̄врамыт ёт рӯмалахтаӈкв, ва̄нэ хо̄тпат ёт потрамаӈкв, пе̄с о̄лум ва̄рмалит ханищтаӈкв. Ты кастыл ня̄врамыт ханищтан хо̄тпаныл ёт са̄ртын та̄гыл докладыт, мастерклассыт, йӣквтан щё̄питыгласыт. О̄влэ̄т янгема̄не̄тыл 15 хо̄тпа ялуӈкв куссыт. Тувыл Ха̄льӯс па̄лыл ла̄тыӈ ёхтыс, туп нёлолов хо̄тпа вос мины. Т. А. Головина биология, химия ос наука рӯпата ханищтан нэ̄ тав ялыс, са̄т ханищтахтын а̄ги ёт тотыглас. Татьяна Андреевна яласам лё̄ӈхе урыл тох потыртас: – Юио̄выл хо̄тал мус я̄ссаг ат ва̄слӯв, минэ̄в ман а̄ти. Хунь ла̄ввесӯв, ущ та ща̄гтсӯв, хӯнтанув щё̄питапсанӯв, та а̄стапасӯв. Миннэ нупыл патсӯв, щё̄сохса ат минасӯв, Ня̄хщамво̄льн та исапасӯв. Ёхтысӯв, та̄ра школан тотвесӯв, ёмщакв тыттувесӯв, ханищтан хо̄тпат ос ня̄врамыт ёт потрамасӯв. Ма̄н ма̄нки школав урыл потыртасӯв, хумыс тыт ханищтахтэ̄в, каникуланув хумыс минэ̄гыт, хумыс йильпи щирыл ханищтаве̄в. Школа янытыл ё̄мыгтасӯв, па̄выл сунсыслӯв. Во̄раян лус хумыс ю̄нтаве, манах ще̄п о̄ньщи, са̄грап тагатан колятэ хоталь со̄лтаве, суссылтавесӯв. Тувыл пыгрищит кассыт: Гаврил Ануфриев са̄т ме̄тра арыг палытын порыгмас, атпан нупыл кит щёс сун ӯлтта Сергей Новенченко порыгмас. Ты юипа̄лт Наталья Константиновна Тасманова ма̄ньщи пормасыт суссылтан выставка ва̄рыглас. Елизавета Ильинична Монина хумыс кот хаслыл тытылтаве, тынтлаве, манарыл ётылтаве, суссылтас. Новтхатнэ па̄ртэ ос новтупе 100 та̄лэ̄н то̄влыс. Ӣтипа̄лаг Ольга Саввична Самбиндалова, са̄лыӈколыӈ а̄ги, ёт ва̄щинтахтасӯв, тав ма̄нав ма̄ньщи суп йинуӈкв ханищтастэ. Ня̄хщамво̄ль ма̄нь па̄выл, яласан ма̄хмыт ма̄гыс арыг о̄лнэ кол а̄тим. Кит а̄гиягӯв щаще̄кватэ̄н палт минасы̄г, ма̄н ос пуссын Н. К. Тасманова палт минасӯв. Наталья Константиновна колэ яныг, йильпи, тэ̄нккетэ̄н а̄гитэ̄нтыл о̄лэ̄г. Колыӈ нэ̄ хо̄тпа нупыл ёмас, ёмщакв кощтитавесӯв, йӣквуӈкв ханищтавесӯв, «Пил ва̄тнэ а̄гит» йӣквтан хумыс йӣкваве, суссылтавесӯв. Ма̄нки китыт хо̄тал ущ ма̄нкина̄в суссылтаслӯв, докладанув потыртасанӯв. Ювле миннэ порав молях та ёхтыгпас, та̄лматсӯв, юн хо̄ясӯв. Ма̄нав ханищтан ос матыра̄ти хӯлтыглан хо̄тпатн пӯмащипа ла̄ве̄в. Ялум лё̄ӈхув ма̄гыс яныг пӯмащипа ла̄тыӈ па̄влыӈ кӯщай нэ̄вн О. В. Баранован, директор нэ̄вн Г. В. Третьякован ла̄ве̄в. Ня̄хщамво̄лиӈ школа директор нэ̄н Т. А. Сагандукован ос тот ма̄н ётув о̄лум, нё̄тум, ханищтам хо̄тпанувн о̄с яныг пӯмащипа ла̄ве̄в. Тох ты Хулюмсунтыӈ ня̄врамыт Ня̄хщамво̄льн ялсыт, тот о̄лнэ ма̄хум хумыс о̄лэ̄гыт, суссыт. Анна АЛГАДЬЕВА: 1. А̄гит йӣкве̄гыт. 2. Вика Боженко кот ётылтаӈкв ханищтахты. 3. Ня̄хщамво̄лиӈ ма̄хум хумыс о̄лэ̄гыт, тот хансым о̄лы. 1068 2014.01.24. Александр ВЬЮТКИН Ля̄ххал тотнэ ма̄хум янытлаве̄сыт. Та̄л котиль э̄тпос хӯрумхойплов хо̄талт Россия янытыл журналистыг рӯпитан ма̄хум янытлан хо̄тал о̄лыс. Ты та̄л та̄н хӯрумса̄т аквхойпловитыг янытлаве̄сыт. Пе̄с порат, «Пётр I» хо̄н хумыг хунь о̄лыс, ты нампа хо̄тал щар о̄выл щёс янытлавес. Щар о̄выл нэ̄пак 1703 та̄лт нэ̄глыс. Та порат та̄ратам нэ̄пак «Ведомости» нэ̄пакыг ла̄ввес. Хо̄н хумув Пётр I такви тот рӯпитас. Такви номтанэ, о̄лыглан ля̄ххалыт тув хансыгласанэ. Аквъёт пуссын налыман нупыл онтолов нэ̄пак та̄ратавес. Ань рущ ла̄тӈыл ты хо̄тал «День российской печати» ла̄ваве. Ты та̄л округув янытыл телевизор хосыт потыртан, газетатт рӯпитан журналистыт халт са̄всыр нампа касыл ва̄рыглым о̄лыс. Щар ма̄к ёмащакв щё̄питым рӯпатаныл мирн пе̄рияве̄сыт. Но̄хпатум ма̄хум пуссын Ханты-Мансийск ӯсн во̄виньтӑлве̄сыт. Та̄наныл янытлан ос мӯйлупсал мӯйлуптан ма̄гсыл округ губернаторув Н. Комарова тув ёхталас. Щар о̄влэ̄т халанувт но̄хпатум журналистыт Диплом ос пӯмащипа ла̄тӈыӈ нэ̄пакыл мӯйлуптаве̄сыт. Та коныпал та̄н иӈ э̄рнэ ос тыныӈ ищхӣпыӈ пормасыл майве̄сыт. Э̄типа̄лаг ля̄ххал тотнэ ма̄хум мӑгсыл пасаныт щё̄питым о̄лсыт. То̄ват тот о̄с са̄всыр мӯйлупсал мӯйлуптаве̄сыт. Ма̄хум халанылт иӈ хоса потрамасыт ос ла̄ккваминуӈкве ат молямласыт. 1068 2014.01.24. Тамара МЕРОВА Но̄хпатум хо̄тпат наманыл ла̄вве̄сыт. «Аргументы и факты» газета 35 та̄лэ то̄влынэ̄тэ кастыл ос «АиФ-Югра» газета ат та̄л та̄ратан кастыл тот рӯпитан ма̄хум округув янытыл «Герои времени» касыл ва̄рыгласыт. Ты касылт лов са̄всыр тэ̄лат щё̄питалве̄сыт ос та̄н халанылт кит касылыг ня̄врамыт ма̄гыс о̄лсы̄г. Округт о̄лнэ ма̄хум ищхӣпыӈ ут хосыт ка̄сыӈ номинациятэ̄т хотты хо̄тпа пе̄рияӈкве ве̄рмысыт. А̄ти сака хосат тот но̄хпатум хо̄тпат наманыл ла̄вве̄сыт. «За вклад в развитие Югры» касылт Александр Филипенко но̄хпатыс. Тав атхуйплов та̄л округт кӯщаиг о̄лме сыс са̄в ёмас тэ̄ла ва̄рыс, са̄в ма̄хум таве сымыӈ ла̄тӈыл номияныл. «Человек и гражданин» касылт Еремей Айпин пе̄риявес. Тав соссаӈ ма̄хум о̄лупсаныл ӯргалан ос та̄н о̄вылтанылт потрыт хаснэ о̄йкаг ла̄ввес. «Просвещение» номинацият Геннадий Райшев ка̄тыл хурит по̄слын о̄йка но̄хпатыс. Тав по̄слум хуриянэ са̄всыр ма̄тт суссылтавет, матахмат хурит Москва ӯст Третьяковский галереят о̄лэ̄гыт. Руслан Проводников, чемпионыг о̄лнэ боксёр, «За волю к победе» щар ё̄р хо̄тпаг пе̄риявес. Пыг ма̄ньта̄гыл боксыт алхатуӈкве ханищтахтас. 22 та̄лэ то̄влуме порат Американ минас, тот о̄с э̄лаль ханищтавес. Мо̄лты та̄лт та хо̄н ма̄т о̄лнэ хум Майк Альварадо ёт алхатсы̄г, тот Руслан но̄хпатыс. Владимир Васкевич «Герой нашего времени» номинацият воритотнэ хо̄тпаг ла̄ввес. Тав нилыт та̄лэ то̄влуме порат сампыльта̄лыг е̄мтыс. Ос ётыл хум сампыльта̄лыг о̄лнэ ма̄хум ма̄гыс «Деловой город» нампа программа щё̄питас. Тот сыресыр ханищтапыт ва̄рыгла̄лы, ты коныпал тав «гоуболу» нампа ёнгилт (ты суй ва̄рнэ ме̄чикыл ёныг) «Мастер спорта» нам о̄ньщи. «Помощь без границ» номинацият но̄хпатум хо̄тпаг Анна Кондратович ла̄ввес. Тав кӯщай та̄л хультум катит ос кӯтьвыт, а̄мпыт ма̄гыс матыр нё̄тмил тоты. Ты коныпал «Гордость Югры» нампа премия о̄с ва̄рыглавес. Тот «Преодоленияг» намтым номинацият 2 со̄тыра 174 хо̄тпатн Людмила Ставцева пе̄риявес. Тав ДЦП та̄рвит а̄гм о̄ньщи. Ос а̄ги хурит по̄слуӈкве сака ха̄сы, Радужный ӯст тав по̄слум хуриянэ суссылтаве̄сыт. Сергей Кушкин ма̄гыс 1 со̄тыра 946 хо̄тпа пе̄риясыт. Ты хум Нижневартовскат о̄лы, массажистыг рӯпиты. Афганистаныт лӯсытас, сапёрыг о̄лыс. Тот сакватавес, инвалидыг е̄мтыс. Ос юв ёхтуме порат ле̄ккарыг ханищтахтас, ань а̄гмыӈмосыӈ ня̄врамыт пусмалты. «Кавалер ордена Красной звезды» по̄с о̄ньщи. Юрий Новьюхов, Тэ̄к па̄вылт о̄лнэ ханты хум, ма̄гыс 681 хо̄тпа пе̄рияс. Тав тот хӯл алыщлым ос во̄раим о̄лы. Онтолов та̄лэ̄т ла̄глаге а̄гмыӈыг е̄мтсы̄г, ё̄мыгтаӈкве воссыг ат ве̄рмыс. О̄йка акваг матыр ва̄ри, такви кит тракторыг ёмащакв щё̄питасаге, са̄всыр ма̄шинат о̄с ёмащакв щё̄питыянэ, баяныл э̄рыгсовыт ёнги, шахматыл ёнгуӈкве ха̄сы. Во̄рт пилыӈ ма̄т пуссын ва̄ганэ. Ань пуссын ты хо̄тпат мӯйлупсал майве̄сыт, ма̄н та̄наныл о̄с янытлыянӯв. Пуста̄гыл вос о̄лэ̄гыт. Ля̄ххал ма̄ньщи ла̄тӈыг Т. Мерован хасвес 1068 2014.01.24. Светлана РОМБАНДЕЕВА Соссаӈ ма̄хманув янытлавет. Ка̄сыӈ та̄л лӯпта э̄тпост Ханты-Мансийск ӯст соссаӈ ма̄хманув янытлаӈкве патавет. Ань ювле хультум та̄лт май округт о̄лнэ общественный связь департаментыт рӯпитан ма̄хум соссаӈ ма̄хманув ма̄гыс Юван Николаевич Шесталов нампа премия ва̄рсыт. Ханты ос ма̄ньщи ма̄хум халт хотты хо̄тпа матыр ёмас тэ̄ла ва̄ри те, нэ̄пак хансы манос мире ма̄гыс яныг парыс тоты, та хо̄тпа тамле премиял миве. Ка̄сыӈ та̄л акв организация ос кит хо̄тпа янытлаӈкве патавет (организация 200 со̄тыра солко̄вил миве ос кит хо̄тпагныл ка̄сыӈ 75 со̄тыра солко̄вил миве). Ань та департаментыл ма̄ньщи газетавн ла̄тыӈ ёхтыс, ма̄н, ля̄ххал тотнэ ма̄хум, ты урыл вос хансэ̄в, радио ос телевидение хосыт вос потыртэ̄в. Ю. Н. Шесталов нампа премия виӈкв ка̄сащан ма̄хум департаментын ла̄тыӈ вос ке̄тэ̄гыт, ма̄ньполь э̄тпос о̄выл хо̄талэ мус тув хансуӈкве ро̄ви. Но̄хпатнэ ма̄хум лӯпта э̄тпост тах наманыл ла̄вавет ос янытлавет. Ювле хультум та̄лт Ха̄льӯс район Саранпа̄вылт о̄лнэ «Са̄лы лё̄ӈх» э̄ргын ос йӣквнэ ансамбль ос кит нэ̄г – Нина Васильевна Шабаршина ос Светлана Селивёрстовна Динисламова та̄н но̄хпатсыт. Нина Васильевна ханты нэ̄, Ванзеват па̄выл библиотекат рӯпиты. Светлана Селивёрстовна ос ма̄ньщи нэ̄, Ханты-Мансийск ӯст Югорский университетт ма̄ньлат ма̄хум ханищтан нэ̄г о̄лы. Ты ма̄хманув пуссын Ханты–Мансийск ӯсн во̄ввесыт, округ губернаторувн янытлаве̄сыт, олныл ос хорамыӈ лӯптатыл майве̄сыт. Я̄тил тыныӈ ма̄ньщи ма̄хум, хотьют ка̄сащи те тот участие принимайтаӈкве, департаментын звонитэ̄н, телефон интернет хосыт хо̄нтэлы̄н: www. admhmao. ru. Ты ля̄ххал ма̄ньщи ла̄тӈыг С. Хозумован толмащлавес. 1068 2014.01.24. Тамара МЕРОВА Тамара ХАТАНЕВА Ёмщакв рӯпитасӯв, э̄рнэ са̄кконыт пирмайтасӯв. Та хультум та̄л оигпаме э̄лыпа̄лт ля̄ххал тотнэ хо̄тпат Борис Хохряков, округ Дума кӯщай, ёт акванхо̄нтхатыгласыт ос таве са̄всыр ва̄рмалит о̄вылтыт китыгласаныл. Округ депутатыт рӯпатаныл хумус ва̄рсаныл, ма̄хум хумус о̄лэ̄гыт, ты о̄вылтыт Борис Сергеевич ювле потыртас: «2013 та̄л сыс ма̄н округ Дума депутатыт ёт лов сапра̄нин акванатхатыгласӯв ос аквъёт 130 са̄кконыт манос тув матыр хӯлтыглан ла̄тӈыт хассӯв ос пирмайтасӯв. Ты коныпал 400 са̄вит са̄всыр постановлениенэ̄пак щё̄питасӯв. О̄влэ̄т ма̄н бюджет пирмайтан са̄ккон щар э̄рнэ̄г ловиньтылӯв. Ма̄н та̄л сыс та бюджетнэ̄пак ёт акваг э̄лаль рӯпитэ̄в. Мо̄лты та̄л яныгпо̄ль э̄тпост, тувыл яныг таквс э̄тпост бюджет олныт ма̄н са̄вмалтасанӯв. Ты кастыл рӯпитан ма̄хум э̄рнэ торыг олныл ойтыгла̄лсанӯв, а̄ртна ат о̄щсӯв. Тувыл ӯсыӈ ос районный мирколыт о̄лнэ колыт ӯнттын ма̄гыс пуссын олныл та̄стыглаве̄сыт. Юио̄выл сапра̄нин атхатыгламув порат 2014-2016 та̄лыт кастыл округ бюджетув э̄рнэ̄г э̄лаль пирмайтаслӯв. Округув щёлыӈыг э̄лаль о̄лнэ ма̄гыс, ма̄хманув ёмщакв вос пусмалтаве̄сыт, ня̄врамыт номтыӈыг вос ханищтахтасыт, ка̄сыӈ ня̄врам садикн вос ялантас, ёмас лё̄ӈх хосыт мо̄т ма̄н машинал яласаӈкве ма̄хум та̄нки вос ве̄рмысыт – пуссын ты тэ̄лат кастыл са̄всыр программат щё̄питым о̄лэ̄гыт. Ос та̄наныл тэ̄лаг ва̄рнэ̄в ма̄гыс бюджетныл олныл та̄стыянӯв». Ань Югра, Ямал ос Тюменский область хӯрум Дума та̄нки халанылт акваннё̄тхатнэ урыл нэ̄пак о̄ньще̄гыт, рущ щирыл тав «соглашение о сотрудничестве» ла̄ваве. Ты нэ̄пак щирыл та̄н я̄нас о̄лэ̄гыт ос рӯпитэ̄гыт, я̄нас бюджет олныл мивет ос туп ва̄рнэ тэ̄ланылт акваннё̄тхатэ̄гыт. Тувыл Борис Хохряков Юграт о̄лыглам та̄рвит ва̄рмалит урыл китыглавес. Тав ла̄внэ̄тэ щирыл, округт са̄в ма̄хум янгыщ ёмас о̄лнэ кол кинсэ̄гыт. Ты ва̄рмалит ёт округ Правительство кӯщаит ос депутатыт о̄с са̄в рӯпитэ̄гыт. Колыт ӯнттын программат акваг уральтым о̄ньщияныл. Тот яныг ще̄мьят, са̄всыр льготат о̄щнэ ма̄хум, колыт ӯнттын ма̄гыс та̄нки олн ойтум ос ётыл урккуптым хо̄тпат (дольщикыт) ань я̄нас са̄ккон щирыл ӯргалавет. 2014 та̄л кастыл жилищный программан о̄с йильпи ла̄тыӈ хасвес. Тот округт самын патум ос тыт акваг о̄лнэ хо̄тпат льготал мивет манос субсидияолныл нё̄туӈкве патавет. Тувыл лӯима̄т атхуйплов та̄л тыт о̄лнэ ос рӯпитан хо̄тпат аквтох тув ловиньтавет тах. Тамле ва̄рмалит ань таима̄гыс э̄ре̄гыт, ань юио̄выл та̄лытыт хо̄н ма̄ныл тыг сака са̄в ма̄хум ёхтуӈкве патсыт. Та̄н молях рӯпата ос о̄лнэ кол хо̄нтыгпе̄гыт. Ма̄нки ма̄хманув са̄в та̄л йильпи кол ӯрим манос пе̄с коланылт о̄лыманыл насска̄сыг ул вос саваласыт, та̄нанылн хотмус нё̄туӈкве э̄ри. Мо̄т мирыт ма̄н ма̄хманув ёт халанылт ул вос халмалтахтасыт, та̄нанылн федеральный са̄кконыт ва̄ӈкве э̄ри. Ма̄н ма̄хманув та̄н ётаныл юртыӈыщ о̄с вос о̄лэ̄гыт. Рӯпата тэ̄лат о̄вылтыт Борис Сергеевич таи ла̄выс, ма̄н округув ма̄гыс ма̄во̄й но̄хвинэ ма̄хум, энергетикыт, коммунальный хозяйстват рӯпитан хо̄тпат мӯсхал щирыл ханищтаӈкве э̄ре̄гыт. Тувыл Владимир Путин са̄в ма̄н депутатыт нупыл тамле ла̄тыӈ ке̄тыс, моще̄ртын о̄выл щёс школан миннэ ня̄врамыт миллион са̄витыг е̄мтэ̄гыт. Ты кастыл номсахтэ̄н, ань садикыг ӯнттын колыт ат э̄рмыгланэ̄ныл порат, та̄н ётыл школаколыг вос ва̄равет. Ты ва̄рмалитыл ма̄н, ва̄им, номсахтэ̄в, округувт са̄в ня̄врам самын патнэ̄ныл коныпал мо̄т ма̄ныл са̄в ще̄мья тыг о̄луӈкве ёхтэ̄гыт. Округт о̄лнэ ма̄хум депутатанув палт та̄нки та̄рвит тэ̄ланыл ёт о̄с ёхталэ̄гыт, потыртэ̄гыт. Тувыл са̄в ма̄хум тэ̄ланыл ёмщакв ва̄рнэ ма̄гыс олныл нё̄тавет, пусмалтахтуӈкве ке̄тыглавет, колыл миӈкве нё̄тавет. 1068 2014.01.24. Александр ВЬЮТКИН Та̄л котиль э̄тпос 25 хо̄талэ – студентыт янытлан хо̄тал. Ты хурит Хулюмсунт па̄вылт о̄лнэ ма̄ньщи пыг по̄слым о̄лы, тав наме Кирилл Алгадьев. Кирилл ань Ханты-Мансийск ӯст технологопедагогический колледжит электрикыг ханищтахты. Тыи ос ма̄ньщи супыл масхатым ма̄ньщи ма̄ньлат пыг наме Иван Гындыбин. Тав колта̄гыл рӯтанэ ос Ха̄льӯс районт Саранпа̄вылт о̄лэ̄гыт. Ваня ань Ханты-Мансийск ӯст о̄с та колт о̄выл та̄л ханищтахты. Ты хурит Тэ̄к па̄вылт о̄лнэ ма̄ньщи пыг по̄слым о̄лы, тав наме Антон Нахрачёв. Мо̄лты та̄л ня̄врамыт ханищтахтын кол а̄стламе юипа̄лт та̄ра Ханты-Мансийск ӯсн ханищтахтуӈкве минас. Ань тав ма̄шинат щё̄питан ос яласан хумыг ханищтахты. Ёлы хурит по̄слым ма̄ньщи пыг наме Максим Анямов. Тав Хулюмсунт па̄вылныл о̄лы. Ань технологопедагогический колледж колт о̄выл та̄л ханищтахты. Та э̄лыпа̄лт Максим Искусство центр школат о̄лым ханищтахтас. Хоты ма̄ныл, хоты витныл о̄лнэ ма̄ньлат ма̄ньщи пыганув са̄в ёмас ла̄тӈыл те̄тыянӯв. Ёмащакв вос ханищтахтэ̄гыт, пе̄с йис о̄лупса вос ва̄ганыл. На̄й-О̄тыранылн вос ӯргалавет, То̄рум ёт, О̄тыр ёт. Александр ВЬЮТКИН ва̄рум хурит 1068 2014.01.24. Людмила ТЕТКИНА «Кантык-Ях» рӯпататэ урыл. Ка̄сыӈ та̄л Сургутский районт во̄рт о̄лнэ соссаӈ ма̄хум акв яныг сапра̄нин Русскинская па̄вылт акванатыглавет. Тамле сапра̄нит та̄н кӯщаитн та̄нки та̄рвитыӈ ва̄рмаляныл урыл потыртэ̄гыт. Ос акв та порат ка̄ркамыг рӯпитан во̄раян хо̄тпат тот янытлавет ос благодарственный пищмал манос мо̄т янытлан нэ̄пакыл мивет. Игорь Владимирович Когончин, «Кантык-Ях» нампа предприятие кӯщай, тамле сапра̄нин о̄с ёхталы, тав палтэ та̄л сыс ка̄ркамыг рӯпитан хо̄тпат тот такви янытлыянэ. «Кантык-Ях» нампа общинат 50 арыгкем э̄лумхо̄лас рӯпиты. Та̄н халанылт 29 ханты хо̄тпа, та̄н во̄рае̄гыт ос пил ва̄тым, ла̄хыс атым олн сэ̄лэ̄гыт. Пуссын Сургутский район Угут па̄выл ляпат о̄лэ̄гыт. 2005 та̄л па̄сныл «Кантык-Ях» община «Яун-Ях» нампа община ёт акваннё̄тхатым рӯпитэ̄г. Ты кит предприятияг Владимир Семёнович Когончин тав ва̄рсаге. Ань пыге Игорь Владимирович Когончин «Кантык-Ях» кӯщаиг о̄лы. Та̄н ань хумус рӯпитэ̄гыт, манхурип та̄рвитыӈ ва̄рмаль о̄ньще̄гыт, Игорь Владимирович ма̄ньщи газетав ма̄гсыл тох потыртас: – Угут па̄выл по̄хат во̄рт о̄лнэ ханты ще̄мьят са̄выӈпа̄лэ пуссын ма̄н палтув рӯпитэ̄гыт. Русскинская па̄выл ляпат о̄лнэ ма̄хманув ма̄н ётув рӯпитаӈкве сака ат ка̄саще̄гыт. То̄ва порат ёхталэ̄гыт, китыглахтэ̄гыт, тувыл сысы та минэ̄гыт. Ам такос потыртэ̄гум, ма̄н нупылув ловиньтахтуӈкв ке патэ̄гыт, та̄нки о̄лнэ ма̄нанылт э̄лаль о̄луӈкве патэ̄гыт, туп договорнэ̄пак хосыт ма̄навн во̄руй совыт ос пил, ла̄хыс, па̄квсам миӈкве патэ̄гыт. Ма̄н ка̄сыӈ э̄тпос зарплатаолныл тах ойтыянӯв, ты коныпал ос мо̄т са̄всыр льготал ва̄риянӯв. Са̄ккон щирыл охотникыг рӯпитан хум 50 та̄лэ то̄влынэ̄тэ порат пенсиян минуӈкве ве̄рми. Ань во̄рт о̄лнэ са̄в хантыт та̄нки во̄рае̄гыт, ка̄тынпаттум ӯяныл э̄лаль та̄нки тыналыяныл. Тувыл ма̄хманув ат номсахтэ̄гыт, пенсиян хунь патхатэ̄гыт, ёмас пенсияолныл ойтуӈкве ат патавет. Ма̄н акв та̄л сыс во̄руй сов, пил, ла̄хыс ос па̄квсам 6 миллион арыгкем солко̄ви са̄вит тыналасӯв. Ты олнытыл ма̄н хӯрум арыгкем миллион солко̄ви зарплатаолн ма̄хумн ойтсӯв. Хультум олныт ма̄н мо̄т тэ̄ла ма̄гсыл тах холтыянӯв. Мо̄лты та̄л ма̄н Русскинская па̄вылт ла̄пка ма̄гсыл кол ёвтсӯв, тувыл Таурова, Тайлаково ос Каюково па̄влытт во̄р тэ̄нут пирмайтын приёмный пунктыт о̄с ёмащакв щё̄питасанӯв. Ты коныпал са̄всыр техника ёвтэ̄в. Акв хотты та̄лт са̄в пил тэ̄лыс, ты хосыт са̄внув олн сэ̄лсӯв. Сэ̄лым олныл ос на̄иӈха̄п ёвтсӯв. Тӯя, тэ̄лы ос таквсы порат ты ма̄нь па̄влытн колас, са̄ккар ос мо̄т тэ̄нут тотэ̄в. Ма̄навн Русскинская ос Угут па̄влыг мирколыг о̄с ёмащакв нё̄тэ̄г, тыи ма̄гсыл ма̄н яныг пӯмащипа ла̄тыӈ та̄нанылн ла̄ве̄в. Ань акваг са̄кконыт мо̄т щирыл хансавет, пирмайтавет. «Лесной кодекс» нампа са̄ккон то̄ва ла̄тӈанэ ань мо̄т щирыл хасве̄сыт. Тот тамле йильпи ла̄тыӈ хасвес, та общинат манос мо̄т предприятият во̄рт пил ва̄туӈкве ке ка̄саще̄гыт, пилыӈ ма̄ло̄мт аукцион щирыл та̄нки нупыланыл хансуӈкве ве̄рме̄гыт. Тувыл та ма̄ло̄мт ма̄гсыл арендаолн ойтуӈкв ос хӯрум э̄тпос сыс отчётнэ̄пак кӯщаитн ке̄туӈкве э̄ри. Ам ты ля̄ххал о̄с хӯлыслум, Угутский лесничестван ялсум, ты тэ̄ла урыл ёмащакв китыглахтасум. Аренда ма̄гсыл са̄в олн ойтуӈкве ат кос э̄ри, ос таса̄вит нэ̄пакыт э̄рмыглэ̄гыт, та̄наныл атнэ нупыл са̄в ё̄р тах мины. Тувыл акв та̄л са̄в пил тэ̄лы, мо̄т та̄лт пил щар а̄тим, арендаолн ка̄сыӈ та̄л ойтуӈкве э̄ри. Ань общинат манос са̄всыр мо̄т предприятият пиланыл, во̄руй сованыл ма̄гсыл субсидияолн виӈкве ке ка̄саще̄гыт, тамле ма̄ло̄мт арендан виӈкве ла̄вавет. Ат ке выгыт, ты олннё̄тмилыл миӈкве ат патавет. Сургутский районт соссаӈ ма̄хманув пуссын пе̄с йис щирыл о̄лэ̄гыт. О̄лнэ ма̄наныл та̄нки нупыланыл хассаныл. Ос та̄н ляпанылт са̄в компаният ма̄во̄й но̄хвуим рӯпитэ̄гыт. Ма̄н о̄лнэ ма̄вт мо̄т та̄рвит о̄лы пил ва̄тнэ ма̄ тыт сака мощща. Ань йильпи са̄ккон ма̄навн таса̄вит та̄рвит та тотыс. Ва̄тум пиланув Сургут ӯст тыналыянӯв, тот о̄лнэ предприятият ёт договорнэ̄пак хосыт рӯпитэ̄в. Ӯй совыт Тобольск, Тюмень ӯсыгн тотыянӯв. Таса̄вит та̄л сыс рӯпитым ёмащакв ва̄глӯв, хо̄т тыналаӈкве э̄ри. Во̄раян хо̄тпанув та̄нки са̄лы о̄ньще̄гыт. Ос са̄лы нё̄выль тыналаӈкве ке э̄ри, та̄нанылн о̄с нё̄тэ̄в. Игорь Владимирович потыртаме юипа̄лт китыгласлум: ма̄ньлат хо̄тпат та̄н палтаныл рӯпитаӈкве минэ̄гыт ман а̄ти. Кӯщай хум ювле тох ла̄выс: – Ма̄ньлат ма̄хманув ма̄н палтув рӯпитаӈкве ат ка̄саще̄гыт. Ань тамле ва̄рмаль а̄ти туп соссаӈ ма̄хум халт о̄лы, мо̄т мирыт халт о̄с тамле та̄рвит о̄лы. Ань а̄гитпыгыт пуссын юристыг, экономистыг ос мо̄т са̄всыр профессиян ханищтахтэ̄гыт. Ма̄н ханты ма̄хманув ёт рӯпитэ̄в, о̄влэ̄т та̄н халанылт бухгалтер, юристхо̄тпа киссӯв. Та̄н во̄рт о̄лыманыл, мо̄т ма̄н ханищтахтуӈкве ат минэ̄гыт. Аквкит ханты хо̄тпа на̄иӈха̄пыт рӯпиты. Ос то̄ват ла̄пкат тыналан нэ̄г рӯпитэ̄гыт. Мо̄таныт пуссын во̄раян хо̄тпаг о̄лэ̄гыт. Бухгалтерыг ам по̄х хо̄тпа во̄выслум. Тамле рӯпата ва̄нэ хо̄тпа ханты ма̄хум халт ат хо̄нтсум. Ам амки юристыг ханищтахтасум, тамле профессия та̄л общинат рӯпитаӈкве та̄рвитыӈ о̄лнув. Са̄всыр са̄кконыт, постановленият ос мо̄т нэ̄пакыт ёмащакв ва̄ӈкве э̄ри. Людмила ТЕТКИНА Людмила Каюкова ва̄рум хурит 1068 2014.01.24. Анна АЛГАДЬЕВА Хулюмсунт па̄выл. Тагт я̄ палытыл пе̄с та̄гыл ма̄ньщит о̄лэ̄гыт. Ань о̄лнэ Хулюмсунт па̄выл ӯнлын ма̄т В. Н. Чернецов тыт яласаме порат хӯрум о̄лнэ кол туп о̄лум. Война э̄лыпа̄лт са̄всыр а̄рталит, колхозыт ва̄руӈкв патве̄сыт, ма̄хум колыӈлӯтыӈ та̄гыл акванва̄нтлуптаве̄сыт. Ха̄ӈласам па̄выл та порат яныг па̄выл о̄лыс, са̄в ма̄хум Хулюмсунтын ва̄нтласыт. Йильпи нор мори са̄груӈкв ат та̄ртве̄сыт, о̄лум коланыл тыг ёт на̄тылтасаныл. Па̄выл янгыг е̄мтыс. Тувыл 1958 та̄л порат звероферма ва̄рвес. 1973 та̄лт Компрессорный станция ӯнттувес, рущ па̄выл ва̄рвес, о̄лнэ колыт ӯнттуве̄сыт. Мо̄лты рущ па̄влыг, ма̄ньщи па̄влыг халэ̄н ве̄рыстакем о̄лыс. Па̄влыг халт такем ёмас во̄р о̄лыс, матхурип пил туп а̄тим о̄лыс, па̄кв яныгмас. Ань тот пӯльница ӯнттувес. Йильпи колыт ӯнттуве̄сыт, па̄влыг акванёхтысы̄г. Па̄выл пӯльницаныл а̄лгаль ма̄ньщи па̄влыг ла̄ваве, пӯльницаныл ло̄ӈхаль рущ па̄влыг о̄лы. Хунь матыр янытлан хо̄тал е̄мты, ма̄хум акванатхатэ̄гыт, ялпыӈ хо̄тал ва̄ре̄гыт. Ты холам та̄лт Ха̄льӯс е̄р ма̄ (район) 90 та̄лэ то̄влыс, тувыл округ хо̄тал аквта ляпат о̄лыс, ты ма̄гсыл ишкола актовый зал колнакт ма̄н, па̄влыӈ ма̄хум, ос ня̄врамыт концерт ва̄рыгласӯв, ма̄хмыт акванатыгласӯв. Ва̄им, ты ва̄рмаль кастыл са̄ртын та̄гыл щё̄питахтасӯв. Йӣквтаныт, э̄ргыт ханищтасӯв. Нина Николаевна Гадебская ма̄хум хӯнтлан ма̄гыс суссылтан номерыт хансыс, такви хансум кит стихотворенияге ловиньтасаге, такем нё̄тнэ̄г «Та̄гт ва̄тат» э̄рыг э̄ргыс. Са̄в ня̄врамыӈ нэ̄кве̄г Марина Александровна ос Оксана Алексеевна Алгадьевыг такем са̄в э̄рыг э̄ргысы̄г, йӣкв йӣквсы̄г. Акв йӣквтан « Хӯл алыщлан ма̄хум урыл» пыгаге̄н ёт йӣквсы̄г. Максим ос Дима иӈ кос ма̄ниг, такем ты ма̄щтырыг, сома со̄лиӈыг толыг хартэ̄г. Такем ёмщакв йӣквсыт. Ам ос ня̄врамыт ёт «Хумыс ма̄таприщ ялымины» мо̄йт ханищтасӯв, тувыл ма̄хум э̄лыпа̄лт ёнгыслӯв, ма̄ньщи ла̄тӈыл потыртаслӯв. Коля Алгадьев ма̄таприщ э̄рыг ла̄тӈанэ щирыл такем ёмщакв э̄ргыстэ. Пыгрищит хум йӣквыл йӣквсыт, та̄н иӈ ма̄нит, о̄выл нак ущты йӣквсыт. Тахольтыл Серёжа Пуксиков ёхталас, тав янгыгнуваг о̄лы, 7 классыт ханищтахты, йӣквуӈкв такем ха̄сы. Пыгрищит тав юипа̄лэн о̄лтумтахтасыт, хотьют хумыс тэ̄лы, та порге̄гыт. Яныг пыгагув Максим Адин ос Денис Попов ты торыг ат а̄стысы̄г, классыт халт футболыл ёнгысы̄г, таима̄гыс ёхтуӈкв ат ве̄рмысы̄г. Надежда Константиновна Маслова э̄кват йӣквыл йӣквыс, тав Мария Сергеевна Мерова йӣквтан но̄хханищтастэ, тащирыл э̄рыг то̄тап хӯнтлым та йӣкви. Са̄ӈквылтан хо̄тпа ат о̄ньще̄в, са̄всыр диск кинсэ̄в, аппаратура тотэ̄в, тувыл та хосытыл тув хӯнтлым, хотум та йӣкве̄в, хӯталтахтыглэ̄в. Ма̄ньщи поэтув Ю. Н. Шесталов хансум «Миснэ» стихотворение пуссын аквъёт э̄ргыг э̄ргыслӯв. Мария Тихоновна Двинянинова такви хансум стихотворениятэ ловиньтас. Хумыс о̄влэ̄т ма̄ньщит сытам во̄рт о̄лсыт, тувыл газовикытн ёхтуве̄сыт. Ам тав стихотворениятэ ёлхансыслум, номсэ̄гум, ловиньтаӈкв пӯмащ паты. Тыт хумыс ва̄рмаль о̄лыс, тащирыл хансым о̄лы: МО̄т хурип О̄лупса Лӯи ма̄т, па̄ль во̄р, хара во̄р кӣвырт О̄лсытхӯлсыт соссаӈ мир. Са̄всыр о̄лупса о̄лыгла̄лас, Са̄всыр о̄лупса ювле хультыс. Ёмас, лю̄ль пуссын о̄лыс, Ань ос йильпи о̄лупса ёхтыс «Тамле о̄лупса, ань та е̄мтыс Маныр хо̄тал мус ма̄н о̄лыкев? » – О̄йка э̄кватэ нупыл ла̄ви, – Тымус э̄лаль хотталь сунсы. Сунсы, вертолёт тыламлы. «Ке̄лыгт тай, маныр о̄хтыртаве Та рущ сунн ӯлумт тох ат сунсылтаве Ты маныр тамле е̄мтыс? Манос о̄лы? Манос мирув китхал патыс? » Хумыс ве̄рми юн ӯнлуӈкв Ма̄тэвитэ со̄мпгалтан яныг о̄йка, Потырля̄ххал кинсуӈкв минас Хосава̄ти о̄йка минас, Аквматэ̄рт рӯма нэ̄глыс Газовикыг ла̄внэ хум. Потырля̄ххал та̄рапаттын ма̄гыс Яныг о̄йка китгалахтуӈкв патыс. «Ты хартаве газопровод Хильтал во̄р ос ке̄лгыт ӯлтта. Патэ̄гын машинал яласаӈкв! Лувын хот э̄ри ёрувлаӈкв! Цивильныиг тыт пуссын е̄мты». О̄йка нупыл рущ хум ла̄ви: «Газ тыгыл э̄лаль хартуӈкв Лё̄ӈхыл э̄ри пӯнсуӈкв, Ма̄нь па̄влыт ӯсынн ёхыттаӈкв». Тамле ля̄ххал хӯлме юипа̄лт Юв та о̄йка та̄лматас Юрткве, наӈ ул ка̄нсамлэн, Пуӈкын но̄хӯрим о̄ньще̄лын. Маныр ёмас о̄лнэ ка̄с Э̄лы хо̄талт ма̄нав ӯри! Ань тыг мус май хотталь минуӈкв Лё̄ӈхын хӯрмах хо̄тал мины. Тыгыл э̄лаль ӯнтэн вертолётын, Хоталь э̄ри тотыгпавен. Пуссын то̄рум ма̄гыс, ро̄щил та̄л Лё̄ӈх ос рӯпат ва̄рнэ сыс Тамле щунил мощ щуньлэ̄в, Тамле о̄лупсал мощ о̄лэ̄в! Со̄ль, та порат олн та̄л вертолётыл тыглата̄луӈкв ро̄выс. Потрум иӈыт оигпи. А̄гирищанув о̄с такем ёмщакв «Пил ва̄тнэ а̄гит» тан йӣквсыт. Тувыл акв рущ йӣквтан йӣквсыт. Па̄влыӈ ма̄хум ка̄тыл ва̄рум пормасаныл суссылтан ма̄гыс тотыгласаныл, хо̄ӈха тыналаӈкв ка̄сащас, тыналасаныл. Концертув а̄стум юипа̄лт ос Ня̄хщамво̄льн ялум ня̄врамыт, хумыс тот яласасыт, маныр ва̄щинтасыт – потыртасыт. Тамле хо̄талытн рущ ма̄хманув о̄с ёхталэ̄гыт, ма̄ньщи ва̄рмалит пӯмщалэ̄гыт. Мо̄т та̄л номсэ̄в, па̄влыӈ ма̄хум халт ма̄щтыр хо̄тпат, ма̄щтыр ка̄тке̄ныл ма̄гыс матыр мӯйлупсал ва̄руӈкв. Потрум та а̄стыс. Анна АЛГАДЬЕВА Хурит Хулюмсунт па̄выл ма̄хум ос ня̄врамыт по̄слым о̄лэ̄гыт. 1068 2014.01.24. Валентина УЗЕЛЬ Валентина Хозумова Тамле хо̄тпа са̄внув вос о̄лы. Ань пе̄с потрыт, мо̄йтыт ос пе̄с нэ̄пакыт атнэ ма̄хум са̄в кос о̄лы. Ос ма̄к соссаӈ ма̄хум халт тамле хо̄тпа мощща. Ань тит ханты нэ̄кве̄г урыл округув янытыл са̄в хо̄тпа ва̄г, тэ̄н сас ка̄ркамыг ос сака э̄рнэ рӯпата ва̄ре̄г. Акватэ – Нина Васильевна Шабаршина, тав Ванзеват па̄вылт па̄влыӈ ма̄хманэ, пе̄с о̄лупса урыл са̄в потыр атыс. Ань тыг мус ты рӯпататэ э̄лаль тотытэ. Мо̄танэ – Софья Максимовна Каксина, тав Касум па̄вылт о̄лы, школат рӯпиты. Ня̄врамыт ханты ла̄тӈыл потыртаӈкв ханищтыянэ, тав о̄с са̄в та̄л пе̄с потрыт такви па̄влэ урыл, пе̄с ма̄хманэ урыл акванаты. Ань кос хоты хо̄тпа Касум па̄выл урыл матыр ва̄ӈкв те таӈхи, тав та̄ра Софья Максимовна палт те̄таве. Ме̄н тав ётэ о̄с хо̄нтхатыгласме̄н, тав такви рӯпататэ ос колта̄глэ урыл мощ потыртас. Тав о̄йкатэ щирыл Каксинаг о̄лы. Са̄в та̄л школат рӯпиты, ня̄врамыт о̄выл классытт ханищтыянэ. 1989 та̄лт та̄н школанылт музей ва̄рвес, та па̄сыл Софья Максимовна тот о̄с рӯпиты. 2011 та̄лт та̄н школаныл 80 та̄лэ то̄влыс. Ты та̄лыт сыс са̄в хо̄тпа школат рӯпитас, ка̄сыӈ хо̄тпа наме та̄рапаттувес, хоты та̄лытт тав рӯпитас, хуритэ хо̄нтвес. Пуссын акванатве̄сыт, нэ̄пакыг ань тыг мус ва̄руӈкв ат ве̄рмияныл, олн ат о̄ньще̄гыт. Софья Каксинан ханищтахтын ня̄врамыт о̄с сака нё̄тэ̄гыт. Та̄н яныг хо̄нтын ялум хо̄тпат, тувыл юв ат ёхтум хо̄тпат ос ань лӯсытан ма̄хум урыл потыр атсыт. Ня̄врамыт юн та̄нти а̄щанылща̄няныл, рӯтаныл ёмащакв титыгласаныл, хум хо̄тпат хурияныл школан тотсыт. Ты потрыт о̄с пуссын акванатве̄сыт, нэ̄пакыг ва̄рве̄сыт. Ты нэ̄пак та̄ратан ма̄гыс район кӯщаяныл Сергей Маненков олн майлыс, яныгса̄т са̄вит нэ̄пак туп ва̄рвес. Ань округув янытыл ул ка̄сыӈ школат акв тамле музеит рӯпитэ̄гыт. Ос Касум па̄вылт музеяныл сака ёмащакв щё̄питым о̄лы. Хусахтем та̄л сыс та̄н атса̄т арыгтем пе̄с пормас тув атсыт. Ос школат рӯпитан хо̄тпат пуссын ты музей ма̄гыс о̄с матыр акваг ва̄ре̄гыт, пуссын нё̄тэ̄гыт. Ханты нэ̄кве а̄нумн ла̄выс: «Ам ань ты рӯпата ва̄рнэм ма̄гыс па̄влувт о̄лнэ ма̄хум палт акваг ялантэ̄гум. Та̄н палтаныл юв ёхтэ̄гум, пе̄с хурит пуссын суссылтыяныл, пе̄с рӯтаныл урыл потыртэ̄гыт. Ань яныг ма̄хманув иӈ о̄лэ̄гыт, ты рӯпата акваг ва̄руӈкв э̄ри. Ня̄враманув ань са̄выӈпа̄лэ ща̄нь ла̄тӈаныл ат ва̄ганыл, пе̄с ва̄рмалянув, пе̄с наканув урыл юн о̄с сака ат потыртавет. Са̄в та̄л мины, ань ва̄рнэ рӯпатам тах сака э̄рмыглы». Касум па̄вылт сараныт о̄с о̄лэ̄гыт, та̄н пе̄с порат тув о̄лмыгтасыт. Та̄н ань пуссын та̄нти маснутыл масхатым о̄лэ̄гыт, ня̄враманыл мольщаӈыл, ва̄ил масхатым ха̄йтыгтэ̄гыт. Халанылт та̄нти ла̄тӈыл потыртэ̄гыт. Ос та̄н уранылт Софья Максимовна тох ла̄выс: «Ма̄н сарананув ма̄н нупылув сака ат сунсэ̄гыт. Саран пыгыт туп саран а̄ги нэ̄г тотыяныл, халанылт сака юртыӈыщ о̄лэ̄гыт. Ос та̄н са̄выӈпа̄лэ пуссын ма̄н ханты ла̄тӈув торгамтыяныл, ос ма̄н ханты ма̄хманув нэ̄мхотьют та̄н ла̄тӈаныл ат ва̄ганыл». Тыи, со̄ль, тох о̄лы. Ам тит матум о̄йкаг ва̄сагум, акватэ – ханты о̄йка, мо̄танэ – саран. Акватэ ханты ла̄тныл потырты, мо̄танэ ювле саран ла̄тныл матыр ла̄ви, ос потыртанэтэ̄н порат щар акв рущ ла̄тыӈ аты хӯлыгласум. Тох ты ма̄н пе̄с ма̄хманув о̄лсыт, титхӯрум ла̄тӈыл потыртаӈкв ве̄рмысыт. Ань ла̄щал ща̄нь ла̄тӈанув та ёрувлахтэ̄гыт. Ос ма̄н халувт тамле ёмас ос ка̄ркам хо̄тпа са̄внув о̄лнув те, то̄нт маныр яныг рӯпатакапай та̄н ва̄руӈкв ве̄рмынувыт. 1068 2014.01.24. Светлана РОМБАНДЕЕВА Кимкъя па̄вылт самын патум нэ̄. Ты хурит Ха̄льӯс район Кульпас па̄выл ма̄ньщи нэ̄ Раиса Ивановна Долейко по̄слым о̄лы, а̄ги о̄парищ наме Таратова. Тав Кимкъясуй па̄вылт самын патыс ма̄ньполь э̄тпост 1968 та̄лт. На̄н ань э̄лаль Рая потре ловиньтэлын: – А̄тям Иван Иванович Таратов 1929 та̄лт Яныгво̄ль па̄вылт самын патыс. Ты па̄выл Хулимсунт по̄хат о̄лыс. Омам Домна Романовна Кугина 1935 та̄лт самын патыс, тав ос Ме̄сыг па̄выл нэ̄. Ты па̄выл Ло̄пмус алгаль о̄лыс, ань туп па̄вылъёре хультыс. Ма̄н ат ня̄врам о̄лсув. Люда увщим Украинан минас, тот о̄лы. Хӯрум ня̄врам ос ат апыг о̄ньщи. Коля каӈкум 1973 та̄лт Кимкъясӯй па̄вылт щаквт порсыс. Витя каӈкум 1966 та̄лт самын патыс, я̄ӈк на̄тнэ э̄тпост 1997 та̄лт а̄тимыг е̄мтыс. Тувыл ам самын патсум, ам ёлыпал а̄пщим Сергей, я̄ӈк на̄тнэ э̄тпост Победа хо̄талт самын патыс. Э̄кватэ Саранпа̄вылныл о̄лы, Людмила Тихонова. Кит ня̄врам о̄ньще̄г, Витя ос Лена. Школа ам тыт, Кульпаст, а̄стласлум. Э̄лаль 1985-1987 та̄лытт Украина ма̄т Донецкий область Крамоторск ӯст тэ̄нут па̄йтнэ нэ̄г ханищтахтасум. Практикам Крымт о̄лыс, тот пансионатыт я̄ӈк на̄тнэ э̄тпосныл ма̄нь таквс э̄тпос мус тэ̄нут па̄йтым рӯпитасум. Тувыл ювле амти ма̄мн йисум. О̄йка ва̄рсум, наме Михаил. Пыгуме̄н туп та̄лэ то̄влыс, о̄йкам а̄тимыг е̄мтыс. Ам амттем ва̄т нупыл акв та̄л о̄лэ̄гум, пыгум амттем янмалтаслум. Наме Фёдор, ма̄нь таквс э̄тпост ва̄т нупыл хӯрмит та̄лэ то̄влыс. Э̄ква тотыс, рущ нэ̄, Урай ӯс по̄ханыл о̄лы. Та̄н ань тот ты о̄лэ̄гыт. Кит апыг о̄ньще̄гум. Ам ань янгыщ Ха̄льӯст о̄лэ̄гум. Тот о̄йкам йӣгрище о̄лы, ат ня̄врам о̄ньщи, та̄н палтаныл ялантэ̄гум. Ре̄тыӈ ю̄свой э̄тпост Кимкъясӯй па̄вылн ялсум, тот Пе̄тр сасгум о̄лы. Тав тамле ка̄ркам хум, пум харты, на̄лмыл вит тоты. Ла̄ви: «Ӯнлуӈкве те патэ̄гум – матэ̄гум, тувка̄ртэ̄гум». Омамныл тав нилахуйплов та̄лэ ма̄ньнув. Ще̄мьянылт тав щар ма̄нь, такте̄т хультыс. Пыганэ тав ётэ юн о̄лэ̄гыт, рӯпитэ̄гыт, хӯл алыщлэ̄гыт. Раиса Ивановна тох та потыртас. Ма̄н, газетат рӯпитан ма̄хум, таве̄н са̄в ёмас, сымыӈ ла̄тыӈ ла̄ве̄в. Ще̄мьятэ ёт пуста̄гыл вос о̄лы, То̄рум ёт, О̄тыр ёт вос о̄лы! 1068 2014.01.24. Николай МЕРОВ Сым ща̄ргын ла̄тыӈ. Та̄л котиль э̄тпос 10 хо̄талэ̄т Ха̄льӯст Светлана Николаевна Кугина, а̄ги опарищ наме Пузина, а̄тимыг е̄мтыс. На̄н таве ул ва̄слын. Тав Ха̄льӯс район Я̄сунт па̄вылт 1960 та̄лт самын патыс. Светлана иӈ ма̄ниг о̄лыс, ща̄нягеа̄щаге хотталь щалтсы̄г. Колта̄гылт та̄н нила а̄ги Светлана, Рая, Ольга, Марина ос акв пыг Семён та̄нкке̄ныл хультсыт. Светлана щар янгыг о̄лыс. Тав Саранпа̄выл школа а̄стламе юипа̄лт та̄ра рӯпитаӈкве патыс. Йӣгрищанэ ос а̄пщитэ такви янмалтасанэ. Тувыл 1987 та̄лт Светлана Ха̄льӯсн ва̄нтлыс. Ты ма̄ньщи нэ̄кве тот совхозт, гостиницат колкан ловтым ос пӯльницат а̄гмыӈ хо̄тпат уральтым са̄в та̄л рӯпитас. Юио̄выл хӯрум та̄л Ха̄льӯст пенсияолн вуим о̄лыс. Тот ты хотты лё̄хъя̄ст ё̄мыс, машинал тармыл минвес, порславес. Ма̄н, редакцият рӯпитан хо̄тпат, Светлана Николаевна ня̄враманэ̄н ос рӯт хо̄тпанэ̄н сым ща̄ргын ла̄тыӈ ке̄тэ̄в. Ты мӯтраӈ, ве̄щкат, нёмса, сымыӈ нэ̄кве ма̄гыс ма̄н сыманӯв о̄с сака ща̄рге̄гыт. Редакцият рӯпитан ма̄хум 1068 2014.01.24. Александр ВЬЮТКИН Са̄в мӯтра ӯргалан кол. Ювле хультум та̄л ва̄т са̄грапнал э̄тпост Ханты-Мансийск ӯст о̄лнэ государственный архив колт «Гордость Югры» нампа выставка пусвес. Ты суссылтап округувт о̄лнэ мирн ва̄нэ соссаӈ ма̄хманув янытлан ма̄гсыл ва̄рвес. Выставка пуснэ порат яныгпа̄ла ма̄хум тув о̄с во̄виньта̄лве̄сыт. Та̄н халанылт яныгпа̄лаг о̄лнэ ма̄ньщи э̄ква Евдокия Ивановна Ромбандеева тот о̄лыс. Евдокия Ивановна ма̄ньщи мирувныл учёныит халт щар ма̄к мӯтраӈ хо̄тпаг о̄лы. Ань архивколт рӯпитан ма̄хум ты пӯмыщаныл ка̄сыӈ та̄л мо̄тмо̄т номтаныл щирыл э̄лаль ва̄руӈкв патэ̄гыт. Тув ёхталам ма̄хум халт Технологопедагогический колледжит ханищтахтын са̄в ма̄ньлат ма̄хум о̄лсыт. Выставкат о̄лум ка̄сыӈ хо̄тпа такви рӯпататэ ос рӯт ма̄хманэ наманыл тинсыс. Нэ̄пакыт коныпал са̄в пе̄с хури тот суссылтавес. То̄ва хурит Сортыӈъя па̄вылт ма̄ньщи ня̄врамыт ханищтахтын колт по̄слым о̄лсыт. Та хурит 1937 та̄лт ва̄рве̄сыт. Округ янытыл архивыт тармыл кӯщаиг о̄лнэ нэ̄ Людмила Сажаева атхатыглам ма̄хум нупыл о̄выл ла̄тыӈ ла̄вуӈкв во̄ввес. Людмила Дмитриевна ла̄выс: «А̄нум ты выставка рӯпитанэ̄тэ ма̄гсыл ёмас сыстам номтыл сымум ща̄рги. Ма̄н тох ва̄рнэ щирыл иӈ са̄в выставка номтыт о̄ньще̄в. Ань о̄лнэ суссылтап такви щире̄т та̄рвитыӈыг о̄лы. Нэ̄матыр хотёрувлаӈкв ос аквантэ̄лыгтаӈкве ат э̄ри. Тыт ань та порат о̄лум накыт ма̄к ва̄нэ ма̄хум о̄лэ̄гыт. Ань яныгпа̄лаг о̄лнэ хо̄тпат та̄нти ма̄ньлатыг о̄лманыл порат хансум нэ̄паканыл тыг мӯйлуптасаныл. Ты ма̄гсыл ам та̄нанылн яныг пӯмащипа ла̄тыӈ ла̄ве̄гум. Та̄н наманыл ма̄ янытыл са̄в ма̄т ва̄вет ос ёмас номтыл ка̄стыглавет. О̄лнэ̄ныл палыт та̄ратан нэ̄паканыл аквписыг ловиньтаӈкв патавет. Ань о̄лнэ ма̄ньлат ма̄хманув ма̄гсыл та̄н нэ̄паканыл тыныӈ нэ̄пакыг ловиньтахтэ̄гыт. Ма̄н ты выставка щё̄питамув порат тох номсахтасӯв: о̄лнэ ма̄в нотэ хоса, йис та̄гыл тамле ты ёмас тит соссаӈ мирыг тыт о̄лэ̄г. Ты урыл ма̄навн матыр ва̄ӈкв пуссын пӯмащ. Ка̄сыӈъе̄мт хунь ма̄н хотты пе̄с нэ̄пакыт хо̄нтэ̄в, ма̄н щар ма̄нь ня̄врамыт хольт ща̄гтэ̄в». Людмила Дмитриевна потре оигпам юипа̄лт, яныгпа̄лаг о̄лнэ ма̄хмыт пуссын са̄всыр оспа хорамыӈ лӯптал мӯйлуптаве̄сыт. Ос исум ща̄й аюӈкве пуссын пасан ва̄тан во̄вве̄сыт. Ты выставка я̄ӈк на̄тнэ э̄тпос мус рӯпитаӈкве паты. Хотьют ка̄сащи, пӯмащ ма̄гсыл тув ялэ̄н, сунсыглахтэ̄н, э̄рыӈ на̄нан э̄рнэ ля̄ххал тот хо̄нтэгы̄н. 1068 2014.01.24. Николай МЕРОВ Ма̄ньщи нэ̄ янытлавес. Мо̄лалнув Ха̄льӯсн ялмум порат акв ма̄ньщи нэ̄ ёт ва̄щинтахтасум. Тав наме Валентина Гавриловна Себурова, а̄ги о̄парищ наме Гоголева. Ты нэ̄кве Ха̄льӯс район А̄нъя па̄вылт самын патыс. Ань Ха̄льӯст ва̄т та̄л арыгтем о̄лы. Ма̄нь ня̄врамыт колт ня̄врамаквет ӯргалым рӯпиты. Ты ма̄ньщи нэ̄ кит ня̄врам янмалтас. Тэ̄н ань сас янгыг е̄мтсы̄г. А̄гитэ ва̄т нупыл онтолов та̄лэ то̄влыс. Пыге ос ва̄т нупыл хо̄т та̄лэ то̄влыс. Тэ̄н ань Ха̄льӯст оматэ̄н палт о̄лэ̄г. Валентина Гавриловна а̄ще Гаврил Иванович Гоголев А̄нъя па̄вылныл о̄лыс. Тав о̄лме̄т акваг во̄раим яласас. О̄йка пе̄с порат са̄в во̄ркол о̄ньщис, нёхыс совыт план щирыл государстван майлысанэ. Пенсиян патме мус во̄рт акваг яласас. Во̄раян пора мины, на̄лув ва̄глы ос хӯл алыщлаӈкве о̄вылтахты. Нэ̄мхуньт тэ̄тал ат о̄лсыт, нё̄выль, хӯл, матыра̄ти пуссын о̄лыс. Оматэ Александра Ивановна Гоголева, а̄ги о̄парищ наме Гындыбина, тав ос Ялъюс па̄выл нэ̄ о̄лыс. О̄йкатэ̄н тувыл ты А̄нъян тотвес. Мо̄лты та̄л Коми республика Сыктывкар ӯсныл Финноугорский Центрыныл кина по̄слын ма̄хум ёхталасыт. Та̄н округувт о̄лнэ соссаӈ ма̄хманув урыл кина по̄слысыт. Ма̄ньщи ма̄хманув по̄слын ма̄гыс та̄н Ха̄льӯсн ялсыт. Акв хо̄тал тот ма̄ньщи нэ̄квет а̄канит ю̄нтуӈкве во̄виньта̄лве̄сыт. Валентина Гавриловна тув ю̄нсхатуӈкве о̄с ёхталас. Тав а̄кань ю̄нтнэ̄тэ халт мо̄йт мо̄йтыс, нэ̄т ёт э̄рыг э̄ргыс ос са̄всыр пӯмащ потрыт потыртас. Валентина Гавриловна са̄в та̄л ма̄нь ня̄врам колт рӯпитанэ̄тэ̄ ма̄гыс Ха̄льӯс район образование па̄лыл «Отличник народного образования» ма̄гылн тагатан по̄сыл майвес. Ма̄н, редакцият рӯпитан ма̄хум, ты ва̄рмаль ма̄гыс Валентина Гавриловна сымыӈыщ янытлылӯв. Ты мӯтраӈ нэ̄ рӯпататэ аквты щирыл э̄лаль ёмщакв вос ва̄ритэ. Ня̄враманэ, апганэ, ляпа рӯтанэ ос юрт ма̄хманэ ёт са̄в та̄л пуста̄гыл вос о̄лы. То̄румн вос ӯргалаве, э̄лаль о̄лнэ хо̄талэ акваг посыӈыг вос о̄лы. Пус ка̄т, пус ла̄гыл ма̄н таве̄н ла̄ве̄в. 1068 2014.01.24. Светлана РОМБАНДЕЕВА Матъёмас тэ̄н ёхталасы̄г. Ювле хультум та̄л ва̄т са̄грапнал э̄тпосэ̄т Ханты-Мансийск ӯст ханты ма̄хум о̄выл учёныяныл Николай Иванович Терёшкин янытласаныл. Та порат тыг о̄йка пыге ос апге ёхталасы̄г. Пыге наме Сергей Николаевич, апге ос Николай Сергеевич. Тэ̄н Санкт-Петербург ӯст о̄лэ̄г. Ты яныг учёный о̄йка урыл Валентина Васильева (№ 24 2013 та̄л) газетат хансыглас. Терёшкин о̄йка о̄лнув те, ань яныгса̄т та̄лэ то̄влынув. Тав Ханты-Мансийск ӯст ханты ос мо̄т са̄в ма̄хумн самын патум хо̄талэ кастыл янытлавес. Ма̄хум тыт са̄в ма̄т акванатхатыгла̄лсыт, тав уре̄т са̄в потыр хӯнтлысыт. О̄йка ань о̄лме палыт маныр рӯпата ва̄рыс, хо̄т о̄лыс, хо̄т хо̄нтлыс, ще̄мьятэ урыл, та маныр ма̄хум са̄в потыртасыт. Таве ва̄м хо̄тпат, тав ётэ рӯпитам хо̄тпат о̄с аквкит ла̄тыӈ ла̄всыт. Пыге Сергей Николаевич ань Санкт-Петербург ӯст А. И. Герцен нампа институтт ма̄ньлат ма̄хум ханищтым рӯпиты, а̄тятэ хосат тот ты рӯпитас. Тав ань о̄с а̄тятэ хольт наука рӯпата ва̄ри, ханты мир э̄руптытэ ос янытлытэ. Акв хотты хо̄тал ма̄хум «Торум Маа» музейн во̄выглаве̄сыт, Сергей Николаевич пыге̄нтыл тув о̄с ёхталасы̄г. Ма̄хум пасан ва̄тат ӯнлахо̄лсыт, исум ща̄й айсыт, Николай Иванович Терёшкин урыл потыртасыт. Еремей Данилович Айпин ос Евдокия Андреевна Нёмысова о̄йка о̄лме порат ва̄стэ̄н, Санкт-Петербург ӯст тав колэ̄н ялсы̄г. Ты урыл тэ̄н хоса потыртасы̄г, хумус та̄н аквъёт рӯпитасыт, са̄всыр пӯмыщ ва̄рмалит номылмата̄лсы̄г, ма̄хум мощ мовиньтасыт. Сергей Николаевич пыге о̄патэ хурит пуссын акванатманэ, компьютер хосыт суссылтасанэ. Ань намыӈсуиӈ о̄патэ хо̄т о̄лыглас, хотьют ёт рӯпитас, аквъёт хо̄нтлум юртанэ хуритыт пуссын о̄лэ̄гыт, пуссын суссылтасанэ. Апге ла̄выс: «Ме̄н тыг матъёмас ёхтысаме̄н. Ам о̄пам самын патум ма̄тэн ялуӈкве сака тахсум, хо̄т тав яныгмас, ханищтахтас. Пумащипа на̄нанн! О̄пам урыл са̄в потыр хӯлсум, номтум сака ёмас». Пыг мольщаӈыл масхатым о̄лыс, тох и ӯнлахо̄лыс, потрамас. Татем ёмас, нёмса э̄лумхо̄лас. Сергей Николаевич о̄с ла̄тыӈ ла̄выс: «Ам номсысум, а̄тям урыл ам пуссын ва̄гум, насати, а̄ти. Тыт, Ханты-Мансийск ӯст о̄лнэме̄н сыс, тав уре̄т са̄в потыр хӯлсум. Та̄лыт молях ювле хультэ̄гыт, ляпа ма̄хманув матэ̄гыт, а̄тимыг е̄мтэ̄гыт. Ётыл ущ номсахтэ̄в, ты урыл ат китыглахтасум, та урыл тав а̄нумн ат потыртас, э̄рыс таве ёмащакв хӯнтлуӈкве. А̄тям такви о̄лупсатэ урыл са̄в кос потырта̄лыс, ос ам ань ва̄глум, тав а̄нумн пуссын потыртаӈкве ат а̄лымас. Тав о̄лупсатэ, насати, пӯмыщ о̄лум. Я̄тил тыныӈ ма̄хум, ханты ос мо̄т хо̄тпат, на̄нанн ам яныг пӯмащипа ла̄тыӈ ла̄ве̄гум! На̄н а̄щум о̄йка номилы̄н, тав ва̄рум рӯпататэ янытлылы̄н. Пӯмащипа, пуссын пуста̄гыл о̄лэ̄н! ». Тамле мутраӈ, сымыӈ хо̄тпан ма̄н о̄с са̄в ёмас, сымыӈ ла̄тыӈ ла̄ве̄в. Со̄ль, матъёмас тэ̄н ёхталасы̄г, тыт ханты мирн сака ӯрвесы̄г, пуссын сака ща̄гтсыт. Пуста̄гыл вос о̄лэ̄г, На̄янэ̄н, О̄тыранэ̄н вос ӯргалаве̄г! Светлана Ромбандеева Нуми хурит котильт С. Н. Терёшкин ӯнлахо̄лы, тав ёмаспа̄лэ̄т журналист э̄ква А. С. Глухих ос во̄ртыпа̄лэ̄т ханты учёный э̄ква Е. А. Нёмысова ӯнлэ̄г. Ёлы хурит ос Н. С. Терёшкин по̄слым о̄лы. 1068 2014.01.24. Людмила ТЕТКИНА Во̄рт яныгмам а̄ги яныг ӯст ханищтахты. Ты э̄тпос 25 хо̄талэ̄т студентыт янытлан хо̄талыг о̄лы, рущ ла̄тӈыл «Татьянин день» намаявес. Ты кастыл ам акв ханты а̄ги урыл потыртэ̄гум, тав наме Лилия Тэвлина. А̄ги Сургут ӯст нефтяной техникумыт китыт курсыт ханищтахты. Ам таве Сургутский район Русскинская па̄вылт са̄лы ӯрнэ ма̄хум ялпыӈ хо̄таланыл о̄лум порат по̄слыслум. Ос китыгласлум, хотьютын тамле нё̄тнэ сахил ю̄нтвес, тав ювле ла̄выс: «Омам тав ма̄щтырыг ю̄нсхаты. Ам тамле хорамыт ю̄нтуӈкве ат ха̄сэ̄гум. Ам сакныл турло̄псыт, пальсакыт хартэ̄гум, ты рӯпатам ёмаснуве̄г тэ̄лы». Лилия ща̄нягеа̄щаге во̄рт о̄лэ̄г, во̄рае̄г, хӯл алыщлэ̄г ос са̄лы ӯре̄г. Тэ̄н о̄с акв ма̄нь а̄ги янмалтэ̄г. Алла ань интернатт о̄лы ос атыт классыт ханищтахты. Лилия ла̄выс, школа а̄стламе юипа̄лт тав Сургут ӯсн бухгалтерыг ханищтахтуӈкве минас. Техникум а̄стлы, тав э̄лаль университетт ханищтахтуӈкве ос Сургут ӯст о̄луӈкве паты. Э̄лаль ам таве китыгласлум, ханищтахтуӈкве хунь а̄сты, манрыг ща̄нягеа̄щаге палт во̄рн минуӈкве ат ка̄сащи. Ханты а̄ги ювле ла̄выс, тав хунь ма̄ниг о̄лыс, Сургут ӯсн тотыглавес. Та пора номтэ̄т ёмащакв хультыс, то̄нт тав таквирот номсыс, хунь янгыг е̄мты, яныг ӯсн о̄луӈкве мины. Хумус номсыс, тох та е̄мтыс. Омагеа̄тяге нэ̄матыр ат ла̄всы̄г, а̄гитэ̄н яныг ӯст ханищтахтуӈкве та̄ртыстэ̄н. А̄тятэ Александр Андреевич Тэвлин нефтяникыт палт обходчикыг рӯпиты, оматэ Неля Леонидовна ос юн о̄лы, са̄хит, супыт ос мо̄т маснут ю̄нты, сакныл харты. Турло̄псыт, тучаӈыт ос са̄всыр нё̄тнэ ханты пормасыт ялпыӈ хо̄талыт о̄лыгланэ̄ныл порат тыналы. Та̄н нефтяникыт ёт соглашениенэ̄пак хосыт олныл ос пормасыл нё̄тавет. Лилия стипендияолныл ат ойтаве. Таве̄н омагеа̄тяге олн ке̄тэ̄г. Ань такви рӯпата кинсы ос тэ̄натэ̄н нё̄туӈкве таӈхи. 1068 2014.01.24. Анна АЛГАДЬЕВА Йильпи та̄л ты ёхтыс. Улпыл, ка̄сыӈ хо̄тпа ща̄гтым ӯрхаты, хунь йильпи та̄л ёхты. Ма̄хум са̄ртын та̄гыл щё̄питахтэ̄гыт, рӯтанылн ос руманылн мӯйлупса та̄стэ̄гыт, э̄лаль о̄лнэ ёмас посыӈ хо̄тал номсэ̄гыт. Ка̄сыӈ номсы, йильпи та̄л со̄тыӈыг ос щуниӈыг вос о̄лыс. Ма̄к ща̄гтэ̄гыт ос мо̄йт хольт мӯтра ӯре̄гыт – ня̄врамыт. Хулюмсунт па̄вылт ты та̄л ня̄врамыт ма̄гыс клуб колт «Ёлка» ва̄рыглавес. КСК колт рӯпитан ма̄хум ос тыг ялантан ханищтахтын ня̄врамыт «Морозко» рущ мо̄йт сценат суссылтасыт. Ты мойт телевизор хосыт ул пуссын ва̄щинта̄лыгласлы̄н. Со̄ль, матыр тахнэ номт ва̄рмалиг вос патыс, ма̄нкина̄вныл мины. Хо̄ӈха хумыс тахмаи, та щирыл та паты, туп матыр ва̄рнэ сымолн вос о̄лыс. Ка̄ркамыг о̄лнэ хо̄тпа таве̄н хо̄йхатнэ ва̄рмалянэ тэ̄лаг састлыянэ, э̄влаёра, пуӈке мус о̄лы. Мо̄йт а̄стум юипа̄лт ня̄врамыт ёнгысыт, э̄ргысыт. Ащирм о̄йка Тӯйт а̄гирищ апге ёт о̄лыс, о̄парище̄н нё̄тыс. Ла̄палахтыглан киснёлпэ̄ква о̄с ёхталас, о̄влэ̄т ня̄врамыт ёт мощ ощмарлас кос, тувыл номтэ патыс, ёмас а̄квыг пе̄румтахтас. Ты хо̄тал ащирм хо̄талыг кос о̄лыс, ня̄врамыт ащирманыл ат рохтысыт, ёнгын ма̄н ёхталасыт. Ёхталам ня̄врамыт пуссын ма̄нь мӯйлупсал ос канпетка хӯргыл майве̄сыт. Анна АНЯМОВА Сымолн – матыр сака та̄кыщ тахнэ номт. Э̄влаёра, пуӈке мус – ёмщакв, хумыс ка̄сащи, тащирыл о̄луӈкв, щёлыӈыг о̄луӈкв. Киснёлпэ̄ква – кисыӈ нёлпа э̄ква, акв тав кирпнёлпэ̄ква – кирпыӈ нёлпа э̄ква. Та̄нварпэ̄ква – та̄н ва̄рнэ э̄ква, ос аман хотьют? Аман о̄с акв тав? 1068 2014.01.24. Тамара МЕРОВА Валентин о̄лупсатэ э̄ргыг хансыстэ. Мо̄лал Ханты-Мансийск ӯст «Хо̄тал» (рущ щирыл «Солнце») нампа театрыт рӯпитан хо̄тпат акв йильпи ёныг суссылтасыт. Та̄н таве «Валя 86» намтсаныл. Тот пыгыт «рэп» щирыл са̄всыр э̄ргыт э̄ргысыт ос э̄ргум ла̄тӈаныл ёнгил хольт щё̄питасаныл. Ам режиссёрнэ̄ Анна-Ксения Вишневская ос э̄ргыт хаснэ пыг Валентин Неттин ёт ва̄щинтахтасум ос ты тэ̄лат урыл китыгласагум. Анна-Ксения ла̄выс: «Ты суссылтапув «драматический концертыг» намтуӈкве ро̄ви. Ма̄хум Валентин Неттин хансум э̄рганэ хӯнтлысыт. Ты э̄рганэ̄т тав округт ма̄нь па̄влыт самын патум ос тот яныгмам а̄гитпыгыт урыл потыртас. Тот ма̄ньлат хо̄тпат хумус та̄рвит о̄лупсал о̄лсыт, маныр номсысыт, пыг пуссын ты ва̄рмалит урыл потыртыэ̄рги («рэп» о̄вылтыт та щирыл ла̄вуӈкве ро̄ви). Пыг сымт о̄щнэ та̄рвит наканэ ма̄навн хӯлтыс, таима̄гыс мо̄т щирыл ла̄вуӈкве ке, тыи тав «исповедь» э̄рганэ. То̄внакт э̄лумхо̄ласн лю̄ль о̄лупсатэ урыл та̄рвитыӈ потыртаӈкве, та̄ра ла̄тӈыт ат хо̄нтхатэ̄гыт. Валентин, улпыл мощ номсахтым, «рэп» э̄рыгсов хосыт ущ э̄рнэ ла̄тӈын ёхтувес. Тав а̄щ та̄л яныгмас, иӈ ма̄ниг о̄лме̄т а̄ще ще̄мьяныл сысы минас. Оматэ ва̄тихал вина аюӈкве тӯлтхатас ос ётыл а̄тимыг е̄мтыс. Онтолов та̄лэ̄т Валентин такке̄т та хультыс. Ща̄нягеа̄щаге урыл тав о̄с э̄рыг о̄ньщи. Оматэ ёт тав э̄рге̄т, э̄рттам, нас потырты. Ты э̄рге ма̄гыс Ульяна Шульгинан ханты ла̄тӈыл э̄рыг щё̄питас. Пыг такви потре рущ щирыл э̄ргитэ, оматэ таве̄н ханты ла̄тӈыл ювле ла̄ви. Ща̄нь э̄ргаге Юля Яркина э̄ргысаге. А̄ще̄н тай пищма хансум. Тувыл мо̄т э̄рганэ̄т аквъёт яныгмам юртанэ, а̄гиянэ номылматыглыянэ, то̄ванэ ос а̄тимыг е̄мтмыт. Та̄рвит о̄лупсал о̄лыманыл, та̄н та̄нкина̄ныл но̄хсаватыманыл манос вина айнэ паттыиг, са̄всыр лю̄ль тэ̄рпи ос наркотикыт ма̄гыс хотталь щалтсыт. Ань артистанув пуссын тот ва̄рыглахтым матыр ёнге̄гыт. Ты ма̄хманум ёт а̄нумн сака пӯмыщ рӯпитаӈкве, та̄н ётаныл аквтупмат а̄ти нас рӯпитэ̄гын, та̄н ётаныл ам аквторыг о̄лэ̄гум. Валентин иӈ ма̄ньлатыг о̄лы кос, ос такви номтанэ̄т тав сака мӯтраӈ пыг. Тав о̄с та̄рвит о̄лупсал о̄лыс ос тахольт таквина̄тэ витыг ат тотыстэ. Ань то̄ва а̄гитпыгыт лю̄льсаӈ ул вос о̄лсыт, мори ул вос капыртасыт, таима̄гыс ма̄н ты концертув тох ва̄рыслӯв. Та̄н ма̄нав вос хӯнтамлыяныл, торгамтыяныл ос э̄лаль о̄лнэ посыӈ ёмас хо̄тал вос кинсэ̄гыт. Ты концертув спектаклиг ва̄рнэ щирыл щё̄питаӈкве ма̄н КТЦ «Югра-Классик» рӯпитан хо̄тпатн сака нё̄твесӯв. Та̄нанылн яныг пӯмащипа ла̄тыӈ ла̄ве̄в. Та̄н ма̄навн э̄рнэ маснут ю̄нтсыт, мо̄т э̄рмыглан пормасыт хо̄нтсыт. Тувыл ёнгилӯв на̄йпосыл ёмщакв постувес, ёмас суйил ва̄рвесӯв». Валентин Неттин такви уре̄т о̄с аквкит ла̄тыӈ потыртас. Тав о̄влэ̄т Тэ̄к па̄вылт о̄лыс. Оматэ а̄тимыг е̄мтме юипа̄лт Ха̄льӯс интернатын ке̄твес. Атыт классыт ханищтахтаме порат ханищтан нэ̄ ня̄врамытын матах ла̄тыӈ ловиньтас ос тыгыл э̄лаль матыр хансуӈкве ла̄выс. Тав мо̄тыт хо̄талэ̄т такви хансум ёмас стих тотыс. Та юипа̄лт пыг акваг матыра̄ти хансуӈкве патыс. То̄ва стиханэ радио хосыт ловиньта̄лсанэ, районный газетан хансыглаве̄сыт. Тувыл Валентин ёмащакв по̄слуӈкве ха̄сы. Ты ва̄рмале хосыт тав са̄тыт классыт Ханты-Мансийскан Искусство центр школан ханищтахтуӈкве во̄ввес. Ос тувыл матрыг таве̄н э̄ргуӈкве ос йӣквуӈкве сака таххатас. Тот аквторыг «актёрское мастерство» тэ̄лан ханищтаве̄сыт. Акв урок ма̄гыс таве̄н рэпэ̄рыг щё̄питаӈкве э̄рыс. Валентин та порат Децл хум э̄рганэ э̄ргысанэ. То̄нт тав о̄с э̄ргуӈкве, йӣквуӈкве ханищтахтас. Тувыл ты ва̄рмаль школа ма̄хманэ̄н такем мӯстыс. Ань та па̄сыл Валентин э̄рыгсовыт э̄лаль хансуӈкве та патыс. Ам номсыке̄м, тав э̄рганэ ла̄щмарт о̄с са̄в ма̄хумн тах хӯнтамлавет. Ань театр концертаныл кит щёс суссылтасаныл, тот ӯнлын ма̄ а̄тим о̄лыс, таса̄вит мир та ёхтыс. Тувыл, сусте̄мт, ма̄хум тот сака пӯмщалахтым хӯнтлэ̄гыт ос э̄рыгсовыт э̄ргим порат то̄ват ка̄тпатта ра̄тым ӯнлантасыт. 1068 2014.01.24. Светлана РОМБАНДЕЕВА Ня̄врамыӈ э̄щ. Ты мо̄йтэ̄рыг Николай Иванович Хозумов тав мо̄йтыстэ, нэ̄пакн С. Ромбандееван хасвес. Николай Иванович ла̄внэ̄тэ щирыл, ты мōйтэ̄рыг охсатэ э̄ргаве, охсатэ потыртаве. Ты, улпыл, пе̄с порат ōлум нак. Акв ōйка пастухыг ōлы, са̄лыӈ ōлыс. Э̄ква ōньщи, яга̄ги ōньщи, аквъёт са̄лыл яласасыт. Щёлыӈыт ōлсыт, са̄лыӈыт. Тав ōйка пастухыг ōлы, рӯпиты. Э̄ще ня̄врам ōньщис, а̄гирищ ōлыс. Таима̄гыс э̄ще ōньге̄н лавылнэ̄гылттавес, лю̄камтавес, халэ̄нт акваг ля̄втсы̄г. Тав каӈке̄н ла̄ви, каӈке ос э̄кватэ тармыл патытэ. Ётыл каӈке ла̄палытэ, ōньге̄н ат э̄руптанэ̄тэ ат ла̄ви. Тувыл ань э̄ще номылматас таквинатэ порслаӈкве. Щёлыӈыт ōлсыт, аквхурип хӯрум я̄ӈк ōщсыт. Каӈке̄н ла̄выс, са̄лыт юв вос тотыянэ: – Аквхурип хӯрум я̄ӈкум ёлпуве̄лын. Та на̄ӈкнэ ха̄льщахылн ялэ̄гум ща̄й маныгтаӈкве, пум маныгтаӈкве. Са̄лыянэ пувве̄сыт каӈке̄н, номсы, сōль, нас ялы. Каӈке сунсы, ань а̄гирище вōртыпал нупыл та̄лттыстэ, хаслыстэ, ёлнэ̄гсаластэ. Каӈке китыглахты: – Манрыг ня̄врам тох та̄лттылын, сохтыл та̄лттэ̄лын. Са̄лыянэ ос ке̄руӈкве патсанэ, вōртыпал нупыл ке̄риянэ. Каӈке ōс ка̄саластэ, ла̄ви: – Маныр, наӈ са̄лыянын ке̄руӈкве ёрувласын, вōртыпал нупыл ке̄риянын. Э̄кватэ юн ōлы, ань ōйкатэ э̄щ ат э̄руптытэ, хумус коннэ̄глы. Э̄ще э̄рги: Ягпыгкве, ягпыгкве, Акв хурипа хӯрум я̄ӈкте̄нын Ёлпувиньтэте̄на Та нэ̄ щахылна ща̄й маныгтаӈкве, Пум маныгтаӈкве ялэ̄гум Пе̄с май ща̄й нас маныгтэ̄гыт. Каӈке̄н аквхурип хӯрум я̄ӈке ёлпувве̄сыт, а̄гирище во̄ртыпал нупыл та̄лттыстэ, са̄лыянэ во̄ртыпал нупыл ке̄рсанэ, тувыл лю̄ньщимтыстым та минас. Каӈке ӯрхаты, э̄ще а̄ти, минаме хӯрмит хо̄тал. Кисмаитэ, та на̄ӈкнэ ха̄льщахылн минас. Тув ёхты, нэ̄матыр ща̄й ат маныгтас, пум ат маныгтас. Ёмащакв сунсы, ань са̄лыянэ касаил пуссын щамаве̄латаманэ, а̄гирище хотпорслам, такви порслахтам. Тувыл о̄йка кантмувес, юв ёхтыс, э̄кватэ о̄с щамаве̄латастэ, порсластэ. Потыр тувыл та. 1069 2014.02.07. Александр ВЬЮТКИН Губернаторувн янытлым хум. Газетав о̄выл ло̄псэ̄т Александр Дмитриевич Сайнахов хурит по̄слым о̄лы. Александр такви Ха̄льӯс район Сӯкыръя па̄вылныл о̄лы. Ань рӯт ма̄хманэ пуссын тот о̄лэ̄гыт. Яныг ӯсыӈ ма̄н армият лӯсытам юипа̄лт 1995 та̄лт ва̄нтлыс. Тот тав Сургут ӯст о̄лнэ ГПТУ № 17 йӣвныл матыр ма̄щтырлан хумыг тит та̄л ханищтахтас. Училище а̄стлуме юипа̄лт тав та̄ра «Пе̄с Сургут» нампа музей колн ма̄щтырлан хумыг рӯпитаӈкв вуйвес. Та па̄сныл тав тот акв ма̄т ма̄щтырлым рӯпиты. Такви ка̄тыл ва̄рум пормасанэ щирыл тав са̄в ма̄т ва̄ве ос ханьщаве. Хотьютын матыр э̄рмыглан порат, тав нэ̄мхотты порат по̄хан ат мины. Маныр э̄ри нё̄ты, хумус э̄ри хӯлты. 2008 та̄лт тав «Народный мастер России» намыл майвес. Та юипа̄лт 2012 та̄лт ма̄щтырыг о̄лнэ ма̄хум халт касыл о̄лнэ порат «Лучшая экспозиция» нампа каснэ ма̄т щар о̄выл ма̄н пе̄риявес. Ты йильпи ёхтум та̄лт Александр Дмитриевич рӯпатанэ щар ма̄к ма̄щтырыг ва̄рнэ̄тэ ма̄гсыл «Премия губернатора» нампа олн мӯйлупсал майвес. Ма̄н ос ты ёмас олнмӯйлупсал маима ва̄рмалитыл таве янытлылӯв. Са̄в ёмас са̄всыр утанэ та̄кыг, хорамыӈыг вос а̄ртме̄гыт. Тамле ёмас ма̄ньщи хотпа э̄лаль о̄лнэ хо̄таланэ вос са̄вме̄гыт. 1069 2014.02.07. Валентина УЗЕЛЬ Пенсияолн йильпи щирыл ловиньтаӈкв патаве. Ты э̄тпост округувт рӯпитан пенсионный фонд яныг кӯщае Татьяна Зайцева ля̄ххал тотнэ ма̄хум акванатыгласанэ. Мо̄лты та̄лт Россият йильпи федеральный са̄ккон пирмайтавес. Ань та са̄ккон щирыл 2015 та̄л па̄сныл пенсия щар йильпи щирыл ловиньтаӈкв патаве. Ос та та̄л мус пенсиян минам ма̄хум та̄н манах солко̄вил ловиньтаве̄сыт, э̄лаль аквтох ойтуӈкв патавет. Ос ань рӯпитан ма̄хум та̄нанылн ты са̄ккон щар ёмащакв ва̄ӈкв э̄ри. Ма̄н ка̄сыӈ хо̄тпа рӯпата олнанувныл «страховой взносыг» ла̄внэ олн ювпуваве. То̄ват ос ты коныпал мо̄т ма̄т (негосударственный пенсионный фондыт) олн о̄с атэ̄гыт. Та̄н манах олн пенсияныл мус ойтэ̄гыт, та са̄витныл та ловиньтавет. Ос ма̄к ты ва̄рмаль 2015 та̄лныл ва̄раве. То̄нт ты та̄рапаты: са̄в та̄л рӯпитам хо̄тпат, ат рӯпитам ма̄хум ос ма̄нь трудовой стаж о̄щнэ хо̄тпат та̄н пенсияныл манах са̄витыг е̄мты. Ты 2014 та̄л юипа̄лт ат рӯпитам ма̄хум та̄н сака мощща олныл ойтуӈкв патавет. Ань ты та̄л мус пенсиян минам ма̄хум та̄н пе̄с щирыл мощ са̄внув олныл тах ойтавет. Округувт ка̄сыӈ та̄л «минимальный прожиточный минимумыг» ла̄внэ ва̄рмаль манах солко̄вил хансаве, акв таса̄вит солко̄ви ат рӯпитам ма̄хум ань выгыт. Ос та та̄лныл щар мо̄т щирыл ва̄раве, нэ̄мхо̄т ат рӯпитан ма̄хум та̄н тыгыл тит щёс мощщанув олныл ойтуӈкв патавет. Ань ты та̄л округувт «прожиточный минимум» 8 со̄тыра 814 солко̄вил хасвес. Тувыл ты ловиньтаӈкв ро̄ви, стаж ат о̄щнэ ма̄хум пенсияныл манса̄витыг е̄мты. Ня̄врам о̄щнэ нэ̄квет та̄н ня̄враманыл ёт юн о̄лнэ та̄ланыл о̄с стажиг ловиньтавет. Тит ня̄врам о̄щнэ нэ̄ «минимальный стажиг» вос хансаве, таве̄н туп тит та̄л рӯпитаӈкв ро̄ви. Та̄ланэ акванловиньтавет, ат та̄лыг е̄мты. Хум хо̄тпатн акв тамле «минимальный стаж» ма̄гыс о̄с ат та̄л рӯпитаӈкв э̄ри. Тамле хо̄тпат пенсиян миннэ̄ныл порат «трудовой» пенсиял хансавет. Ос щар нэ̄мхо̄т ат рӯпитам ма̄хум та̄н «социальный» пенсиял тах мивет. Татьяна Зайцева э̄лаль тамле ва̄рмаль урыл потыртас. Та̄н палтаныл яныгпа̄ла ма̄хум ёхталэ̄гыт, пенсияныл урыл титыглахтэ̄гыт – нэ̄мхуньт ат рӯпитам хо̄тпа ос са̄в та̄л рӯпитам хо̄тпа пенсияге̄н а̄латы аквса̄витыг ловиньтаве̄г, манрыг тох? Кӯщай нэ̄ ты урыл тох ла̄выс, тыи ёмас ва̄рмаль хунь, со̄ль, тох ва̄руӈкв ат э̄ри кос. Ос кӯщаит ты ва̄рмаль та̄рапаттуманыл юипа̄лт ань йильпи са̄ккон э̄рнэ щирыл хассаныл. Ань тох ва̄раве, са̄в та̄л рӯпитам хо̄тпа са̄в олн тах выг, ат рӯпитам хо̄тпа ос пенсиятэ мощщаг ловиньтаве. Ань рӯпитан нэ̄квет пенсиян 50 та̄ланыл то̄влын порат минуӈкв ве̄рме̄гыт. Ос 55 та̄ланыл мус та̄н иӈ ат та̄л рӯпитаӈкв те патэ̄гыт ос пенсияныл ты ат та̄л сыс ат те выганыл, то̄нт та̄н са̄в пенсияолныл ловиньтавет. 1069 2014.02.07. Александр ВЬЮТКИН Ща̄нь ла̄тӈув э̄лаль ялтуптаве. Ханты ос ма̄ньщи ла̄тӈыг ханищтан ня̄врамыт халт касыл о̄лум порат ам Валентина Ильинична Вахрушева ёт ва̄йхатасум. Валентина Ильинична Кондинский район Шугур па̄выл школат ня̄врамыт ма̄ньщи ла̄тӈыл потыртаӈкв ханищтыянэ. Тав потре э̄лаль ловиньтэлы̄н: «Ма̄н школавт яныгса̄т ва̄т нупыл нёлолов ня̄врам ханищтахты. Та̄н халанылт нёлса̄т нупыл хо̄т соссаӈ ня̄врам о̄лы. Са̄выӈпа̄лэ ня̄враманув ма̄ньщииг хансым о̄лэ̄гыт. Кондинский район соссаӈ ма̄хум о̄лнэ ма̄наныл рущит мус щар ляпа ма̄г о̄лыс. Таима̄гсыл ты, тот о̄лнэ ма̄ньщит ща̄нь ла̄тӈаныл хотёрувласаныл. Ань яныгман ня̄враманув пе̄с ма̄хум о̄лупсаныл ос ла̄тӈаныл ат ва̄ганыл. Та̄н оманыл, а̄тяныл ща̄нь ла̄тӈаныл ат ва̄ганыл, хотьют ва̄г, халанылт ат потыртэ̄гыт. Таима̄гсыл ты ла̄тӈаныл хот ёрувлахтас». Валентина Ильинична палт аквписыг ва̄т ня̄врам ма̄ньщи ла̄тыӈ ханищтаӈкве яланты. Та̄н халанылт юио̄выл тит классыгт ханищтахтын на̄врамыт «Элективные курсы» нампа ханищтапн са̄т сыс акв щё̄с ялантэ̄гыт. Та коныпал мощ мо̄лалнув пирмайтым са̄ккон щирыл, о̄выл ханищтахтын хӯрум класс ня̄врамыт ёт ма̄ньщи ла̄тыӈ ханищтап ва̄рвес. Рущ ла̄тӈыл «Курсы мансийского языка» ла̄ваве. Та курсын ос аквхуйполов ма̄нь ня̄врам ёхталэ̄гыт. Валентина Ильинична ла̄ви: «Ты са̄т хо̄тал сыс туп акв щё̄с ла̄тыӈ ханищтан ма̄гсыл миве, тыи сака мощща. Ты хо̄тал ма̄н ты ла̄тӈыт ханищтыянӯв. Са̄т хо̄тал оигпан сыс ня̄врамыт ханищтам ла̄тӈыт хотёрувлыяныл. Акв та ла̄тӈыт о̄ста йильпииг ханищтаӈкв э̄ре̄гыт». Валентина Ильинична ма̄ньщи ла̄тыӈ ханищтан ня̄врамытыл Ханты-Мансийск ӯсн тит а̄ги Татьяна Кутмарова ос Лидия Рогачёва ёт тотыгласаге. Тэ̄н сас Кондинский район янытыл ма̄ньщи ла̄тыӈ касыл о̄лме порат ня̄врамыт халт но̄хпатсы̄г. Таня омагеа̄тяге сас ма̄ньщииг. Тэ̄н ма̄ньщи ла̄тӈыл щар ат потыртэ̄г. Лида омагеа̄тяге ос сас рущиг. Лида ла̄ви: «Ам ма̄ньщи ла̄тыӈ ханищтаӈкв, о̄лупсаныл ва̄ӈкв сака ка̄саще̄гум. Хосат, хунь ма̄н о̄парищанув та̄нти о̄лупсанылт тыг о̄лмыгтасыт, ма̄ньщи ма̄хум пе̄с йис о̄лупсаныл хоттыпылтасаныл. Таима̄гсыл ам ань на̄н о̄лупсан урыл пуссын ва̄ӈкв таӈхе̄гум. А̄нумн тыи нас пӯмащ». Э̄лаль ханищтан нэ̄ ла̄выс: «Ты коныпал а̄гирищанув ка̄тыл ма̄щтырлан ма̄н ялантэ̄гыт. Тот та̄н а̄канит ю̄нтэ̄гыт, сакыл са̄всыр хорамыт хартэ̄гыт, тувыл ка̄тыл по̄слуӈкве ханищтахтэ̄гыт. Ня̄врамыт ка̄тыл ма̄щтырлаӈкве Ирина Семёновна Шифторован ханищтавет. Хум ня̄враманув ос ма̄вит ӯргалан ва̄рмаль ханищтэ̄гыт. Та̄н во̄раяӈкв ос хӯл алыщлаӈкв о̄с ханищтахтавет, во̄рын атах хо̄талын тотыглавет, тот мощ во̄рае̄гыт, няслэ̄гыт. Ма̄н па̄выл ня̄враманув юртыӈыщ о̄лэ̄гыт, ханищтахтэ̄гыт. Яныг хо̄тпат нупыл ёмас самыл сунсэ̄гыт, тыи ма̄гыс ма̄н сыманув ща̄гтым о̄лэ̄гыт». 1069 2014.02.07. Александр ВЬЮТКИН Ла̄тӈув э̄лаль тотнэ ня̄врамыт. Та̄л котиль э̄тпост Ханты-Мансийск ӯст ма̄ньщи ос ханты ла̄тыӈ ва̄нэ ня̄врамыт халт ла̄тӈыг щирыл олимпиада нампа касыл ва̄рыглавес. Ты касыл Николай Иванович Терёшкин, ханты учёный хум, наме янытлан ма̄гсыл намая̄лвес. Николай Иванович о̄лме̄т, ханты ма̄хум халт мирн ва̄нэ щар о̄выл учёныиг о̄лыс. О̄лме щирыл тав ты та̄л яныгса̄т акв та̄лэ то̄влынув. Ты кастыл округув янытыл аквъёт пуссын хо̄тхуйполов ня̄врам Ханты-Мансийск ӯсн ёхталасыт. Титтыгуртхатым щирыл, халанылт онтолов ма̄ньщи ос онтолов ханты ня̄врам о̄лсыт. Ты та̄л олимпиада о̄лум хо̄тал малтып хо̄талыг то̄рмувн ва̄рыглавес. Таима̄гсыл ты са̄в каснэ ня̄врам ёхталас. Ня̄врамыт касыланыл о̄вылтаӈкве Надежда Геннадьевна Алексеевна ёхталас. Тав округ Дума соссаӈ ма̄хум Ассамблеят депутатыг о̄лы. Касыл о̄вылтан э̄лыпа̄лт ня̄врамытын янытлан ла̄тыӈ ла̄выс: «Ка̄сыӈ йильпи ёхтын та̄лт ма̄ньщи ос ханты ла̄тӈагув ва̄тихал мо̄тмо̄т ма̄т суйтыглэ̄г. Хотьют иӈ ма̄к потырты тыи яныгпа̄лаг о̄лнэ ма̄хманув. Ань тыгыл ты э̄лаль ща̄нь ла̄тыӈ тотнэ ма̄гыс потыртан мус таве ханищтаӈкв э̄ри. Мо̄т щирыл ла̄тыӈ та̄л хультын ма̄хум яныг мир халт тэ̄лыглы, таи ты сака лю̄ль. На̄нти ща̄нь ла̄тӈанын yльнаг ул хультуптэлы̄н, яныгпа̄лаг о̄лнэ ма̄хум ос ма̄н на̄н нупылын номт пинэ̄в. Ма̄н пуссын на̄нан агтэ̄в. Ка̄сыӈ та̄лт ла̄тыӈ ла̄тыӈ ва̄нэ на̄врамыт вос са̄вме̄гыт». Ма̄ньщи ос ханты ня̄врамыт титтыгуртхатым кассыт. Ма̄ньщи ня̄врамыт рӯпатаныл Маина Ефимовна Макарова, Диана Васильевна Герасимова ос Светлана Селивёрстовна Динисламова уральтым о̄лсыт. Ня̄врамыт са̄всыр нампа ат каснэ рӯпатал майлуве̄сыт. Ёмщакв ва̄рум рӯпатаныл ма̄гсыл хо̄тпан балл виӈкв ро̄выс. О̄выл рӯпатанылт ня̄врамыт ёт ща̄нь ла̄тӈыл потыртаӈкв э̄рыс. Ня̄врамытн торгамтаӈкв э̄рыс, маныр урыл таве титыглаве ос маныр таве̄н ювле ла̄вуӈкв э̄ри. Титыт рӯпатанылт ня̄врамн ос такви номтанэ щирыл манос хотты ма̄нь ма̄ньщи мо̄йт хансуӈкв э̄рыс. Хӯрмит заданиянылт ос мо̄йт ловиньтан щирыл касыл о̄лыс. Ня̄врамн таве хӯнтлан ма̄хмытн ла̄тӈанэ торгамтан щирыл мо̄йт ловиньтаӈкв э̄рыс. Та̄нанылн та̄рвитыӈ вос о̄лыс, мо̄йт ла̄тӈанэ мори тэ̄лыгта̄лве̄сыт. Ла̄тӈыт э̄рнэ щирыл акв юипа̄лт о̄лтуӈкв э̄рыс. Тувыл ёмщакв хаснэ ма̄гсыл акв задание майлувес. Тот ос са̄всыр щирыл тэ̄лыгтым лов предложения ёмщакв хансуӈкв э̄рыс. Ты задание та̄н ёмщаквег те ва̄рияныл, хӯс баллыл пинуӈкв ве̄рмуве̄сыт. Юио̄выл атыт рӯпатаныл ма̄ньщи ла̄тӈыл хансым потыр рущ ла̄тӈыл хансуӈкв э̄рыс. Ханты ня̄врамыт халт Белоярский район Касум па̄вылныл ёхталам ханты пыг Денис Ерныхов но̄хпатыс. Тав такви о̄лнэ районэ̄т ва̄рыглан касылт аквписыг касы. Тыт тав ханты ос ма̄ньщи ня̄врамыт халт щар са̄в, хо̄тпан нупыл са̄т балл вис. Пыгрищ юипа̄лт Рита Пяк но̄хпатыс. Тав хо̄тпан нупыл нила балл вис. Рита Сургутский районныл ёхталас. Хӯрмит хо̄тпаг Анжела Анадеева е̄мтыс. Тав атпан нупыл ат балл вис. Ма̄ньщи ня̄врамыт халт о̄выл места Ха̄льӯс район Саранпа̄выл ня̄врам Миша Ромбандеев вистэ. Тав хӯрмиттыг тыг касуӈкв ёхталас. Титыт места Екатерина Пашина вистэ. Тав Октябрьский районныл о̄лы. Хӯрмит ма̄ Кондинский районныл ёхталам а̄гин вуйвес. Тав наме Лидия Рогачёва. Каснэ̄тэ щирыл тав атпан нупыл нила балл вис. Но̄хпатум хӯрум ня̄врам дипломыл ос олн о̄щнэ сертификат нампа нэ̄пакыл мӯйлуптаве̄сыт. О̄выл места вим хо̄тпан ат со̄тыра̄, титыт места вим ня̄врам нила со̄тыра, юио̄выл хӯрмит места ма̄гсыл хӯрум со̄тырал мӯйлуптаве̄сыт. Тувыл мо̄т ня̄врамыт ос пӯмащипа ла̄тӈыӈ пищмал майве̄сыт. Касыланыл юипа̄лт жюриг о̄лнэ ма̄хум иӈ са̄в ёмас янытлаӈ ла̄тыӈ ня̄врамытын ла̄всыт. Та̄наныл хӯнтлум ня̄врамыт мо̄тантыг ёхталаӈкв о̄с ла̄вхатсыт. Хоты ма̄ныл, хоты витыл о̄лнэ ня̄врамыт, ма̄н та̄наныл пуссын cымыӈыщ янытлыянӯв. Та̄нти ща̄нь ла̄тӈаныл аквтох э̄лаль вос ханищтыяныл ос тотыяныл. Мо̄т ма̄хмыт та̄нти ла̄тӈыл потыртаӈкв о̄с ул вос э̄ссамтэ̄гыт. 1069 2014.02.07. Тамара МЕРОВА Культураг намаим та̄л кастыл рӯпата та о̄вылтавес. Ва̄т саграп нал э̄тпос ва̄тыт хо̄талэ̄т «Год культуры» о̄вылтахтам та̄л кастыл ӯсыт ос районыт культура колыт щирыл рӯпитан ма̄хум Ханты-Мансийскат акванатхатыгласыт. Та̄н «Сохранение и развитие духовных традиций народов Югры» нампа форум ва̄рыгласыт. Тот 200 э̄лумхолас акванхо̄нтхатыгласыт, Тюменский дума па̄лыл депутат Геннадий Корепанов ёхталас. О̄вылт мӯй ма̄хум э̄лыпа̄лт ӯс ос район кӯщаиг, православный ос мусульман мир яныг кӯщаиг, округ культура па̄лыл рӯпитан хо̄тпат паща ла̄тыӈ ла̄всыт. Екатерина Ермакова, Ханты-Мансийск культура профсоюзыт пуӈктотнэ нэ̄, э̄сгын нэ̄пакыл мӯйлуптавес. Тувыл хо̄тал сыс мӯй ма̄хум я̄нас хо̄т колнакыт рӯпитасыт. Та̄н та̄нки культурный программаныл о̄вылтыт, рӯпатаныл ва̄рнэ ма̄гыс олн нё̄тмил урыл потыртасыт. Тувыл маныр проектыт ёт та̄н аквъёт э̄лаль рӯпитаӈкве ве̄рме̄гыт, таи та̄рапаттысыт. Юио̄вылт Василий Филипенко, Ханты-Мансийск ӯс кӯщай, ос районыт о̄лнэ кӯщаит культура тэ̄лат ёт аквъёт рӯпитан соглашениенэ̄пак хассыт. Пуссыт ты ва̄рмалит о̄вылтыт ам ётыл я̄нас потыр тах хансэ̄гум. 1069 2014.02.07. Светлана РОМБАНДЕЕВА Ня̄врамыт самыл сунсым о̄ньщавет. Та̄л котиль э̄тпос 24 хо̄талэ̄т Ханты-Мансийск ӯст «Югра» нампа ля̄ххал тотнэ колт Татьяна Дмитриевна Моховикова потыртас. Ты нэ̄ округув янытыл о̄лнэ савалап ня̄врамыт тармыл патнэ ва̄рмаль палт кӯщаиг рӯпиты. Ля̄ххал тотнэ хо̄тпатн тав китыглавес, ань ня̄врамыт матыр та̄рвит о̄ньще̄гыт манос пуссын ёмащакв о̄лэ̄гыт, та̄рвит ва̄рмаль е̄мталан порат та̄наныл та̄н хумус нё̄тыяныл. На̄н ань э̄лаль Татьяна Дмитриевна потре ловиньтэлы̄н: Савалап ня̄врамыт манос ща̄ньа̄щныл по̄хан вуим ня̄врамыт ма̄н палтув пищма ва̄тихал ке̄тыглэ̄гыт, та̄рвитыӈ тэ̄ланыл урыл потыртэ̄гыт. Ювле хультум та̄лт 527 пищма ёхталас. Ма̄н ка̄сыӈ пищма ёмащакв ловиньтылӯв, пищма ке̄тум ка̄сыӈ ня̄врам ёт хо̄нтыглахтэ̄в, потраме̄в. Са̄выӈпа̄лэ та̄н кӯщаяныл урыл хансэ̄гыт, то̄ва ня̄врам ат нё̄таве, то̄ва ла̄пала̄лаве. Са̄в ня̄врам рӯт ма̄хманылн лю̄камтавет, роттыг о̄луӈкве ат ве̄рме̄гыт. То̄ва о̄лнэ кол ат о̄ньщи, то̄ва э̄рнэ нэ̄пак ка̄тынпаттуӈкве ат ве̄рми ос мо̄т са̄в тэ̄ланыл урыл пищманылт хансэ̄гыт. А̄гмыӈмосыӈ ня̄врам о̄щнэ хо̄тпат о̄с хансэ̄гыт. Ма̄н ка̄сыӈ ще̄мьян нё̄тэ̄в, ка̄сыӈ ня̄врам самыл сунсым о̄ньщилӯв. Ос сака та̄рвитыӈ тэ̄лат е̄мтапан порат, полициян пищма ке̄тэ̄в, тувыл сутытахтэ̄в. То̄ванакт ос пищма Павел Алексеевич Астаховын хансыглэ̄в, тав Россия янытыл ня̄врам вуянтан организацият кӯщаиг о̄лы. Депутатанувн о̄с хансыглэ̄в, нё̄таве̄в. Сака са̄в ще̄мьят нуса тотым та̄рвитыӈыщ о̄лэ̄гыт, ня̄врамыт савалэ̄гыт. Ма̄н са̄в рӯпитэ̄в, по̄х хо̄тпатыл нё̄тмил кинсэ̄в, э̄рнэ нэ̄пакыт хансэ̄в. То̄ва ще̄мьятын иӈ нё̄туӈкве ро̄ви, иӈ а̄лыме̄в, ос то̄ват ма̄н воссыг нэ̄матарыл нё̄туӈкве ат ве̄рмиянӯв. Ля̄ххал тотнэ нэ̄ С. В. Поливанова прививкат урыл китыглахтас. Тав ла̄внэ̄тэ щирыл, ань 14 та̄л яныт ма̄ньлат а̄гирищит пувласпи а̄гмыл (рак шейки матки) ул вос е̄мтэ̄гыт, прививкатыл ва̄руӈкве патавет. Ос таи лю̄ль, ты прививка ва̄рнэ юипа̄лт, са̄в а̄гирищ та̄рвитыӈ а̄гмыл е̄мтуӈкве ве̄рми. Япония ма̄т тамле ут ва̄рим юипа̄лт, нёлолов а̄гирищ савалаӈкве патсыт, ё̄мыгтаӈкве ат ве̄рме̄гыт. Тув мус та а̄гмыӈыг е̄мтсыт. Наӈ хумус номсэ̄гын, тамле прививкат ва̄руӈкве э̄ри? Татьяна Дмитриевна тох ла̄выс: Ам хӯрум а̄ги янмалтэ̄гум, а̄гиянум тамле прививкатыл ва̄руӈкве ам ат ка̄саще̄гум. Амти тамле утыл ат ва̄рыглаве̄сум, ам яныгмамум порат тамле ут матъёмас а̄тим о̄лыс. Ос ам хунь ла̄ве̄гум, тамле прививкат ат э̄ри ва̄руӈкве. Ка̄сыӈ ща̄ньа̄щ такви номсы, ня̄враме̄н прививка ва̄руӈкве ман а̄ти. Курский областьт май 135 ня̄врам ос 10 яныгхо̄тпа корь нампа а̄гмыл а̄гмыӈыг е̄мтсыт. Хунь ле̄ккарытын уральтаӈкве патве̄сыт, насати нэ̄мхотьютаныл прививкатыл аты ва̄рыглымат. Ты ёмас хунь, ма̄к э̄рнэ ка̄сыӈ прививка поратэ ёхты, ня̄врамытын атхунь та̄ра ва̄руӈкве э̄ри. Акв хумн тав Ренат пыгрищ урыл китыглавес. Ювле хультум та̄лт пыгрищ ань оматэ̄ныл хотвуйлыма, оматэ наркоманыг о̄лы, пыгрищ юн савалас. Тувыл оматэ сутытахтас, пыгрище ювле майвес, ос та мат лю̄ль пище ат хӯлистэ. Ля̄ххал тотнэ хум Ренат пыгрищ ма̄гсыл сыме ща̄рги, китыглахты, тав ань хумус о̄лы? Ща̄не ёт о̄лы? Татьяна Дмитриевна ла̄внэ̄тэ щирыл, ты ня̄врам та̄н ётыл о̄с хотвисаныл, тав ань ща̄не ёт ат о̄лы. Щаще̄кваге̄но̄паге̄н вуйвес, пыгрищ мӯсхал щирыл о̄ньщаве, янмалтаве. Тувыл о̄лнэ кол урыл китыглавес. Савалап ня̄врамыт о̄лнэ кол пуссын о̄ньще̄гыт ман а̄ти. Ты кӯщай нэ̄ ла̄внэ̄тэ щирыл, 2008 та̄л мус ты ва̄рмалюв та̄рвитыӈыг о̄лыс, то̄ва хо̄тпа о̄лнэ колыл миӈкве ат ве̄рмувес. Ань тай ма̄хманув ёмащакв рӯпитэ̄гыт, ня̄врамыт о̄лнэ колыл пуссын мивет, пуссын о̄ньще̄гыт. Ка̄сыӈ хо̄тпа нё̄таве, уральтаве, ань колэ мори ул вос тыналытэ, ул вос уркуптаве, кол та̄л ул вос хульты. Ма̄н ма̄хумн акваг ла̄выглэ̄в, матыр хӯнтамлэгы̄н те, эрыӈ савалап ня̄врам колэ тыналаӈкве таӈхи манос колэ̄н по̄х ма̄хум ёхталэ̄гыт, таве̄н торас ва̄ре̄гыт, ты урыл ма̄навн та̄ра ла̄ве̄н. Савалап ня̄врамн нё̄туӈкве э̄ри, тав ща̄ньа̄щ ат о̄ньщи, воссыг хотьютэ̄н нё̄таве. 1069 2014.02.07. Александр ВЬЮТКИН Ӯсыт порс халн ты тэ̄лыглэ̄гыт. Та̄л котиль э̄тпост ва̄т нупыл титыт хо̄талт Ханты-Мансийск ӯс мирколт кӯщаиг о̄лнэ ма̄хум сапра̄ни ва̄рыгласыт. Сапра̄ниянылт щар яныг кӯщаиг окру Та̄н округув янытыл мори па̄хвтын порс анят ос лю̄льсаӈ ва̄рим порс атнэ во̄ӈхат урыл потыртасыт. Ка̄сыӈ район манос яныг ӯс кӯщай та̄нти ва̄рум рӯпатаныл урыл доклад нэ̄пак ловиньтасыт. О̄влэ̄т Наталья Комарова ла̄тыӈ ла̄выс: «Хо̄т та̄л сыс мори хуиглам хӯрумса̄т ляпатем порс анят хотвуйве̄сыт. 2013 та̄л сыс округув янытыл хо̄тпан нупыл хӯрум мо̄ри па̄хвтым порсыӈ ма̄ акванатвес ос ма̄тэ сыстамтавес. Ма̄н тыг о̄лмыгтамув юипа̄лт, округ янытыл ка̄сыӈ та̄л йильпи порс во̄ӈхат ва̄ре̄в. Пе̄с порат рущ ма̄хум нэ̄матыр урыл ат номсысыт. Та̄н нас ма̄во̄й ос газ но̄хвинэ плананыл то̄варттасаныл, тувыл та. Манырсыр о̄лнэ порсаныл мори мо̄тмо̄т ма̄т хультуптым, па̄хвтым оссувласаныл. Ань та порс во̄ӈхат сыстамтаӈкве ос ёмащакв щё̄питаӈкве э̄ре̄гыт. Ёмщакв ат те щё̄питыянӯв, хотьютын ва̄ве, маныр лю̄ль е̄мтуӈкв ве̄рми. Ань ня̄враманув пуста̄гыл э̄лаль о̄лнэ хо̄таланыл урыл номсуӈкв э̄ри. Хотьют ам ётум тох ат те ка̄сащи, вос ла̄ви, хумус тав номсы». Губернатор юипа̄лт Когалым ӯс кӯщаиг о̄лнэ хум Владимир Иванович Степура нэ̄паке ловиньтастэ. Тав ла̄выс: «Ӯсув янытыл порс по̄хан тотнэ щирыл тит компания рӯпиты. Мо̄лты 2013 та̄лт тэ̄н акванпотыртахтым ос халэ̄нт нё̄тхатым рӯпитаӈкв вуйхатсы̄г. Ань ӯст порс атнэ ос лаппантхатнэ те̄р хусапыт йильпи щирыл ва̄рсаныл. Тувыл та̄н по̄ханылт порс атнэ ма̄гсыл яныг ма̄ щё̄питасыт. Та коныпал та̄н хо̄талыӈ хо̄тал хольт на̄й по̄стын люминесцентная нампа лампочкат, са̄всыр батарейкат ос градусникыт пирмайтан кол пӯссыт. Та̄наныл ёмщакв ат те щё̄питаӈкв, та̄н са̄в лю̄ль мо̄сыӈ а̄гм ва̄ре̄гыт. Та а̄гмыл э̄лумхо̄лас а̄тимыг е̄мтуӈкв ве̄рми. 2013 та̄л сыс ӯс янытыл 160 со̄тыра тонна са̄всыр порс акв ма̄н тотвес. Ос та сыс порс атнэ йильпи ма̄ ва̄руӈкв о̄вылтавес. Тав Сургут ӯс нупыл минэ лё̄ӈх ляпат ос Когалым ӯсныл онтолов ве̄рыстан ва̄раве. Тот о̄лнэ ма̄тэ мил во̄ӈхаг хилвес ос порс атнэ во̄ӈхатэ мӯвлахи те̄рыл ва̄рим карс пӯсасыл лаппантвес. Порс атнэ ма̄тэ рӯпитаптын мус э̄рнэ щаӈкванэ пуссын ёвтве̄сыт. Тав тынэ 280 млн. солко̄ви са̄витыг е̄мтыс. 2014 та̄л оигпанэ̄тэ мус тав тах ва̄раве». Хум потыртан ма̄ныл а̄стуме юипа̄лт, Покачи ӯс кӯщай хум Раян Замелович Халиуллин потыртас. Тав ла̄выс: «Ма̄н Покачи ӯсувт ань о̄лнэ порс атнэ ма̄ 1989 та̄л па̄сныл рӯпитаӈкв о̄вылтахтас. Ань та во̄ӈха палытэ нила ве̄рыстаг ты е̄мты. Хосат та̄гыл тув тотым порс нумыл ма̄л лапра̄гпыслӯв. Порс сайлын ма̄ ле̄ккарытн ос ма̄вит ӯргалан ма̄хмытын ва̄тихал уральта̄лаве. Ма̄н ань ос йильпи во̄ӈха ва̄руӈкв номсэ̄в. Хумус ва̄рилӯв, ань та план нэ̄паканув щё̄питан ма̄ныл моще̄ртын ты а̄стэ̄гыт. Тувыл порс атнэ во̄ӈха ва̄руӈкв та̄ра та вуйхатэ̄в. Атахтем та̄л тах йильпи во̄ӈхан порс тотуӈкв патэ̄в. Пермь ӯст о̄лнэ компания ты проект щирыл ма̄навн нё̄ты». Сергей Владимирович Пикунов округ янытыл ма̄вит ос во̄руй ӯргалан кӯщаиг о̄лы. Тав сапра̄ният ла̄выс: «Ма̄н округув янытыл мори по̄варалын са̄в те̄р пӯщкат, хотсаквалым са̄всыр машинат ос А̄с я̄ ва̄татэ палыт пе̄с харӈайтым на̄иӈха̄пыт оссувлым хуе̄гыт. Ма̄н хумус номсэ̄в, та мори повара̄лнэ те̄рыт пуссын атуӈкв э̄ре̄гыт. Мо̄т щирыл та̄н харӈайтыманыл порат лю̄ль утаныл ма̄н ёлпосавет. Тувыл э̄лаль ма̄вит о̄с лю̄ль утытыл та тэ̄лыгтаве. Тыи пуссын щир мус щё̄питан кастыл са̄в олн э̄ри. Олн ка̄тынпаттэ̄в, та юипа̄лт я̄ ва̄та янытэ̄т ёмщакв тах щё̄питылӯв». Юио̄вылт Наталья Владимировна ла̄выс: «Хунь ма̄н акваннё̄тхатым рӯпитаӈкве патэ̄в, то̄нт ва̄рмалюв э̄лаль тах ущ нёвумты. Ты урыл э̄лаль номсахтэ̄н, ты ва̄рмаль акваннё̄тхатым кустырыг ва̄руӈкв э̄ри». Губернаторув Наталья Комарова о̄лыс. 1069 2014.02.07. Людмила ТЕТКИНА Кондинский район 90 та̄лэ то̄влыс. Ты район 1923 та̄л яныг таквс э̄тпос 12 хо̄талэ̄т ва̄рвес. То̄нт тав Тобольский округ Уральский область нупыл ловиньтахтас. Районный центрыг Нахрачи па̄выл о̄лыс, ётыл 1961 та̄лт Кондинский па̄влыг намаявес. 1924 та̄л ре̄тыӈ ю̄свой э̄тпос 1-2 хо̄талыгт депутатыг пе̄риим хо̄тпат о̄выл съезданыл о̄лыс. Та па̄сныл 90 та̄л ювле та хультыс. 1930 та̄лт Кондинский район Остяко-Вогульский национальный округ нупыл хасвес. Ань Кондинский районт 27 яныг ос ма̄нь павылквет о̄лэ̄гыт. Районный центрыг 1994 та̄лныл Междуреческий па̄выл ва̄рвес. Та ма̄т 34 со̄тыра арыгкем э̄лумхо̄лас о̄лы, та̄н халанылт 5 со̄тыра арыгкем соссаӈ ма̄хум. Та районт Анна Митрофановна Конькова, Матрёна Панкратьевна Вахрушева, Андрей Семёнович Тарханов, мирн ва̄нэ ма̄ньщит, самын патсыт. Ань район 90 та̄лэ то̄влын кастыл та̄л сыс са̄всыр ялпыӈ хо̄талыт, суссылтапыт, каснэ ва̄рмалит ва̄рыглаӈкве патавет. 1069 2014.02.07. Тамара МЕРОВА Ялъю̄с пе̄с ма̄ньщи па̄выл. Мо̄лты туи Ягримн ялмум порат ам Н. К. Захарова Ялъю̄с па̄вылт пе̄с о̄лупса урыл китыгласлум. Тав ты о̄вылтыт «Наследие» нампа пе̄с накыт кисхатнэ нэ̄н Л. Г. Галкинан ос ня̄врамытын са̄ртын потырта̄лыс. Ётыл та̄н пӯмащ нэ̄пак ва̄рсыт. Ань тувыл ам ловиньтам то̄ва ля̄ххалыт на̄нан хансыянум. «Березов острог» урыл хансым щар пе̄с потрыт палт тамле ва̄рмаль хӯлтэ̄гыт, Ялъю̄с па̄выл V-IV нотыт нижеобской культура о̄лыглам порат ӯнттыма. 1593 та̄лт Никифор Траханиотов Пе̄лум ма̄т ясак атнэ хум такви ма̄хманэ ёт Ха̄льӯс ӯнттуӈкве ке̄тве̄сыт. То̄нт ты ма̄хум Ялъю̄с па̄вылке урыл о̄выл щёс потырта̄лыгласыт. Ты па̄выл Лӯи Тагт я̄ хосыт сака нё̄тнэ карс ма̄т ӯнттувес. Са̄в нот ма̄ньщиянув тот о̄лсытхӯлсыт. Пе̄с порат ма̄хманув хумус о̄лсыт, маныр ва̄рсыт, ань ты о̄вылтыт Надежда Константиновна таи потыртас. «Ам Ялъю̄ст самын патсум, тот яныгмасум. Па̄влувт акв хоса ӯсхулы хосыт налыман арыгкем колыт ӯнттым о̄лсыт. Ма̄хманув пуссын та̄нки о̄лнэ коланыл по̄хат а̄мпарыт, мисколыт манос лувколыт о̄щсыт. Тувыл ка̄сыӈ ка̄рта кӣвырт ня̄нь ва̄рнэ кӯр кон ва̄рыгласыт. Па̄влув мувлахи такем ёмас сыстам во̄рыӈ ма̄т, са̄в ӯльпат, на̄ӈкыт, ховтыт, таргыт, ха̄ль ос хапка йӣвыт яныгме̄гыт. Ань то̄ва йӣвыт ниласа̄т та̄ланыл то̄влыс. Туи ма̄хманув па̄выл ляпат саӈквлыпил, морах, та̄хтпил, сӯйпил ва̄тсыт, сака э̄лы ма̄н минуӈкве ат э̄рыс. Та̄л палыт са̄всыр хӯл я̄т пувсӯв, ань ты е̄рувт туп ня̄лк толгыл алыщлэ̄в. Ма̄н пе̄с ма̄хманув хольт иӈ хоса о̄лсӯв, па̄влувт на̄йпос аты о̄щсӯв. Туи ёмас, э̄тыт посыӈыт, са̄в тэ̄лат ва̄руӈкве а̄лымасӯв. Во̄рт о̄лыгламувт, лё̄мвоитныл атыпыл пилсӯв. Ос сака илямтаве̄в ке, посымпут ва̄рыгласӯв. Тэ̄лы порат керащинаӈ ла̄мпал коланув постыгласанӯв. Номилум, кон сака ащирмаӈ, юн кӯрув ёмщакв па̄лтыглылӯв, ла̄мпав тэ̄г, ос ма̄н, ня̄врамыт, ане̄квав по̄хат акванатхатэ̄в ос тав мо̄йтанэ та хӯнтлэ̄в. Тав потырта̄лум ла̄тӈанэ юипа̄лт ма̄н акваг посыӈ номтыл э̄лаль о̄лсӯв, тав мо̄т ёмас о̄лупса е̄мтнэ урыл то̄внакт ма̄нав потырта̄лыс. Тувыл, со̄ль, на̄нки сусте̄нт, ань маныр йильпи о̄лупсал о̄луӈкве патсӯв. Ос то̄нт па̄влыӈ ма̄хманув пе̄с щирыл о̄лманыл халт са̄всыр ёмас манос та̄рвит накытн о̄с патыгла̄лсыт. 1913 та̄лт Ялъю̄с па̄выл та̄ра Ха̄льӯс нупыл «Морзе» телеграф ке̄р ква̄глыт хартуӈкве патве̄сыт. Телеграф потыртан то̄тап Молохов Паял колэ̄т ӯнттувес. Тав Ха̄льӯсныл ке̄тым ля̄ххалыт хӯнтлысанэ ос ма̄хумн потыртасанэ, па̄вылт о̄лум тэ̄лат ос тувле ке̄тыгласанэ. Советский Союзт хо̄т, маныр о̄лыглас ма̄н о̄с ва̄слӯв. О̄влэ̄т ма̄хум Октябрьский революция о̄вылтыт хӯнтамласыт. Ма̄н е̄рувт Красная Армия белогвардейцат ёт 1919 та̄л таквсы мус воритотсыт. 1941 та̄лт пилыщмаӈ ла̄тыӈ ёхтыс, война е̄мтыс. Хум хо̄тпанув о̄с тув тотыгпаве̄сыт. Па̄влувт нэ̄квет, ня̄врамыт ос яныгпа̄ла хо̄тпат хультсыт. Ма̄н пуссын акваннё̄тхатым хӯл алыщлым, во̄раим рӯпитасӯв. 1942 та̄лт Ялъю̄ст школа пусвес, тот Ираида Семёновна Кузьмина война оигпан мус ня̄врамыт ханищтасанэ. Тувыл мо̄т ма̄ныл ма̄хум тыг ке̄туӈкве патве̄сыт, рущ щирыл та̄н «спецпереселенцыг» ла̄вве̄сыт. Па̄влувт хӯрум ще̄мья Астрахань ӯсныл о̄лсыт, ос хӯрум колта̄гыл калмык ще̄мьят. Акв калмык хум Сергей Улемжиков ла̄пкат рӯпитас. Мо̄таныт Тагт я̄ тапа̄л ва̄тат о̄лсыт. Та̄н пуссын ма̄н ма̄ньщиянув ёт аквъёт «Леспромхозт» рӯпитасыт. Та̄н халанылт матахмат немец ще̄мья о̄лыс. Ма̄нки халувт пуссын юрщхатым о̄лсӯв. Ма̄хум а̄лпыл «гудок» суй хӯнтамлэ̄гыт, пуссын рӯпитаӈкве о̄вылтахтэ̄гыт. Ма̄н ма̄ньщи, рущ, немец, калмык ня̄врамыт пуссын школан ялантасӯв. Тот нила класс мус Желтова Таисья Васильевнан ос Таисья Васильевна Плоских ханищтавесӯв, школа кӯщаиг Галина Алексеевна Алексеева о̄лыс. Ётыл па̄влувт «Сталин» нампа колхоз ва̄рвес, нэ̄т мис поссыт, хум хо̄тпат вор яктым рӯпитасыт, туи картопка, капуста янмалта̄лсыт, хӯл алыщласыт, пум ва̄рсыт. А̄тям война оигпам юипа̄лт председателиг тув паттыглавес, ос 1948 та̄лт а̄тимыг е̄мтыс. Омам звероферма кӯщаиг о̄лыс, то̄нт тот ниласа̄т са̄вит сэ̄мыл охсар янмалтасыт. Па̄вылке̄вт ня̄нь ва̄рнэ кол о̄щсӯв. То̄нт ма̄н такем атыӈ ня̄нил тыттувесӯв. Киномеханик Сергей Гаврилюк ос нё̄тмил ва̄рнэ хумитэ Виктор Никитин ка̄сыӈ ӯщлахтын хо̄талт клубт кина суссылтасы̄г. Ты ва̄рмаль ма̄н аквписыг ӯрыслӯв, сака пӯмыщ пора о̄лыс. Медпункт о̄с о̄лыс, тот ле̄ккарыг Иван Давыдович Пакин рӯпитас. Тав э̄кватэ Агния Николаевна Пакина (Казаринова) клуб кӯщаиг о̄лыс. Ётыл ма̄нь колхозыт, совхозыт аквантотуӈкве патве̄сыт, ма̄хум ос яныг па̄вылн ва̄нтлуӈкве ла̄вве̄сыт. Ань па̄вылке̄в тох хотталь та со̄ймыс». Ма̄н ань Ялъю̄с па̄выл нас хультум наме коныпал матыр о̄лупсаӈ тэ̄лат та̄рапаттысанӯв. Ты пӯмыщ, э̄рнэ потыр ма̄гыс ам Надежда Константиновнан яныг пӯмащипа ла̄тыӈ ла̄ве̄гум. 1069 2014.02.07. Людмила ТЕТКИНА Ма̄хум пусмалтам э̄ква. Нина Петровна Камаева ёт ам Ха̄льӯст хо̄нтхатыгласум. Ты э̄ква Тэ̄к па̄вылт налыман арыгкем та̄л ма̄хум пусмалтым рӯпитас. Пенсиян патхатаме юипа̄лт тав Ха̄льӯсн ва̄нтлас. А̄тятэ Пётр Филиппович Филиппов саран хум о̄лыс, рыбкоопыт председателиг рӯпитас. Акв порат Тобольск ӯсн рӯпата щирыл ке̄твес, тот тав э̄кватэ ёт акванхо̄нтхатсы̄г. Тувыл яныг ӯст о̄лум а̄ги Ха̄льӯсн о̄луӈкве тотыстэ. Пётр Филиппович ос Елена Павловна хӯрум ня̄врам янмалтасы̄г. Нина Петровна ла̄выс: «Ам акв каӈк ос э̄щ о̄щсум. Каӈкум война порат хо̄нтлаӈкве вуйвес. Яныг хо̄нт оигпаме юипа̄лт юв ёхтыс. Хо̄нтлым сакватавес, хоса ат о̄лыс, а̄тимыг е̄мтыс. Ма̄н война порат яныгмам ня̄врамыт са̄в хунь ва̄щинтасӯв ос савалым, тэта̄л яныгмасӯв. Омагува̄тягув са̄в рӯпитасы̄г, ме̄н Тамара э̄щум ёт акваг юн ме̄нккеме̄н о̄лсуме̄н. Омав пӯльницат санитаркаг рӯпитас. А̄тяв о̄влэ̄т са̄лы ӯрим яласас, тувыл рыбкоопын рӯпитаӈкве патхатас. Ма̄ниг о̄лмум порат акваг омам палт пӯльницан ялантаӈкве э̄руптасум, ма̄нь та̄гыл ма̄хум пусмалтаӈкве тахсум. Тыи ма̄гсыл школа а̄стламум юипа̄лт Ханты-Мансийск ӯсн медицинский училищан фельдшерыг ханищтахтуӈкве минасум. Училище а̄стласум, Октябрьский па̄вылн рӯпитаӈкве ке̄тве̄сум. Тот о̄йкам Василий Иванович Камаев ёт акванминасаме̄н, тав трактористыг рӯпитас. То̄нт колхозыт о̄лсыт, тав акваг акв па̄вылныл, мо̄т па̄вылн рӯпитаӈкве ке̄тыглавес. Тох ме̄н Тэ̄к па̄вылн о̄луӈкве ва̄нтласме̄н. Октябрьский па̄вылт рӯпитымам са̄всыр ма̄нь па̄вылкве̄тын ке̄тыглаве̄сум, тот А̄с ма̄ньщит о̄лсыт. Тох яласымам, ма̄хум пусмалтым, ма̄ньщи ла̄тӈыл потыртаӈкве патсум. Хунь Тэ̄к па̄вылн ёхтысум ос ханты ла̄тӈыл потыртаӈкве ханьщувласум. Па̄влыӈ ма̄хманув са̄в хӯл тэ̄сыт. Са̄в э̄лумхо̄лас ма̄йтаныл а̄гмыӈыг о̄лсыт, та порат са̄в хо̄тпа ос хо̄псы а̄гм о̄щсыт. Та̄наныл пуссын Ха̄льӯсн пусмалтахтуӈкве ке̄тыгласанӯв. Па̄вылт ӯлщпуӈк пусмалтан ле̄ккар а̄тим о̄лыс, пуӈканыл о̄с ам пусмалтасанум». Нина Петровна Камаева о̄йкатэ̄ныл кит ня̄врам янмалтасы̄г. Ань яныг э̄ква 16 а̄пыгрищ о̄ньщи, та̄н пуссын Ха̄льӯст о̄лэ̄гыт. Нина Петровна та̄л коттиль э̄тпост намхо̄талэ о̄лыс. Ам ты яныг э̄ква намхо̄талэ кастыл янытлылум ос са̄в сымыӈ ла̄тӈыл ке̄тылум. Пус ка̄т, пус ла̄гыл. 1069 2014.02.07. Людмила ТЕТКИНА Ханты о̄йка хуриянэ суссылтавет. Ханты-Мансийск ӯст Геннадий Райшев, ка̄тыл хурит ханты о̄йка, о̄с акв суссылтапе рӯпиты. Тав 1960-1970 та̄лытт по̄слум хуриянэ тот суссылтавет. Та̄наныл сунсыглаӈкве са̄в мир ёхталас. Еремей Айпин, соссаӈ ма̄хум Ассамблея кӯщай хум, Геннадий Степанович ёт хосат та̄гыл ва̄йхаты. Еремей Данилович ла̄выс: «Та та̄лт ма̄н округув 83 та̄лэ то̄влыс. Округув ма̄гсыл са̄в рӯпата ва̄рнэ ма̄хум ма̄н янытласанӯв. Г. Райшев соссаӈ ма̄хум культура но̄хво̄рмалтан ма̄гсыл о̄с са̄в ё̄р пиныс. Тав хуриянэ нупыл сунсым, нё̄тнэ ма̄витув ма̄н ка̄салылӯв». Ты суссылтап Наталья Фёдорова, искусствоведнэ̄, щё̄питастэ. 1960-70 та̄лыт порат по̄слым хуриянэ хумус та̄н акванатсаныл ос суссылтапн ва̄рсаныл, та урыл потыртас. Тав ла̄выс, то̄ва хуриянэ Карпинск ӯсныл тыг тотве̄сыт, ӯсувт нэ̄мхуньт ат суссылтаве̄сыт. То̄ват са̄в та̄л акв ма̄т хуим, щар лю̄лиг е̄мтсыт. Та̄наныл мӯсхалыг щё̄питаӈкве са̄в хо̄тал э̄рмыглас. Ты э̄лыпа̄лт «Графика Райшева» нампа выставкатэ суссылтавес. Та та̄л о̄йка 80 та̄лэ то̄влыс, ты кастыл тав ётэ рӯпитан хо̄тпат са̄всыр суссылтапыт ань щё̄питэ̄гыт. Л. Спирякова хансум потре ма̄ньщи ла̄тӈыл Л. Теткина хансыстэ. 1069 2014.02.07. Валентина УЗЕЛЬ Та̄н пе̄с э̄ргыт, йӣквыт акванатыяныл. Ты 2014 та̄л «Культура та̄лыг »ла̄ввес Ань ты кастыл округувт о̄лнэ мир ма̄гсыл са̄в пӯмыщ ва̄руӈкв тах патаве. Ос ты та̄л сыс культура ман клубколытт рӯпитан ма̄хум янытлаӈкв патавет. Ма̄н ма̄ньщи газетавт пе̄с йис ва̄рмалянув э̄лаль тотнэ ма̄хманув урыл ва̄тихал хансуӈкв патэ̄в. Ань о̄выл потрув А̄с ма̄хум ма̄гсыл рӯпитан культура центр урыл ловиньтэ̄н. Белоярский ӯст о̄лнэ культура центр кӯщаиг 1995 та̄л па̄сныл Надежда Борисовна Костылева рӯпиты. Тав ханты нэ̄, школа а̄стламе юипа̄лт Ханты-Мансийск ӯс педучилищан ёхтыс. Тот ня̄врамыт ханищтан нэ̄г ханищтахтас. Училище а̄стламе юипа̄лт Белоярск ӯсн о̄лмыгтас, ты центрын рӯпитаӈкв минас. Тот рӯпитаӈкв о̄вылтахтаме порат, Тюмень ӯс культура институтн юил ялым э̄лаль ханищтахтуӈкв патыс, а̄стластэ. Надежда такви рӯпататэ урыл мощ потыртас, тав ла̄выс: «Ам училищат ня̄врамыт ханищтан нэ̄г ханищтахтасум. Ос тыг рӯпитаӈкв ёхтумум порат, маныр рӯпата ва̄руӈкв патэ̄гум, аты ва̄слум. Таима̄гыс та̄ра э̄лаль ханищтахтуӈкв минасум. Институт а̄стламум юипа̄лт ма̄к культура специалистыг та е̄мтсум. Кӯщаиг тув та ӯнттуве̄сум. То̄нт Фаина Павловна Иштимирова кӯщаиг рӯпитас, тав о̄с ханты нэ̄. Тав ётэ акваг та урыл потыртасме̄н, ка̄сыӈ та̄л пе̄с э̄ргыт, мо̄йтыт ва̄нэ ма̄хум мощщаг е̄мтэ̄гыт. Та̄н потраныл, э̄рганыл молях хансуӈкв э̄ре̄гыт, ма̄хманув минэ̄гыт, ос ма̄н э̄лаль маныр ва̄руӈкве патэ̄в. Ань ма̄нь па̄влытт о̄лнэ яныгпа̄ла ма̄хум наманыл пуссын акванатуӈкв патсанӯв, та̄н палтаныл ялантасӯв. Ка̄сыӈ яныг хо̄тпа ёт тот ва̄щинтахтасӯв, ёмащакв титыгласлӯв, по̄слыслӯв. Та̄н халанылт хотьют э̄рыг ман матыр пе̄с о̄лупса урыл ва̄г, хотьют йӣквуӈкв ха̄сы, пуссын та̄рапаттуӈкв э̄рыс. Та̄н э̄рганыл нэ̄пакн хассанӯв, йӣкваныл тинан по̄слысланӯв. Ва̄им, о̄влэ̄т та̄рвитыӈ о̄лыс. Та па̄сныл хусахтем та̄л та минас. Та порат ва̄рим хурит ос тинан по̄слым йӣквыт ань сунсымав, пе̄с э̄ргыт хӯнтлымав, ань сыманув тармыл татем кӯпнитыг е̄мты. Со̄ль, яныг рӯпата ва̄руӈкв а̄лымасӯв. Ань то̄ванакт ма̄нь па̄влытытн о̄с ялантэ̄в, тув ёхтэ̄в, яныг ма̄хманув а̄тимыт. Та̄ра номтын ёхтаве̄в, матъёмас ма̄н та хо̄тпа ва̄щинтаслӯв, потранэ пуссын хассанӯв, йӣкванэ по̄слысанӯв. Ка̄сыӈ яныг хо̄тпа пе̄с ялпыӈ хо̄талыт ос пе̄с ва̄рмалит урыл титыглаӈкв э̄ри, хумус э̄рнэ щирыл та̄наныл янытлаӈкв, маныр ва̄руӈкв э̄ри. Ма̄н са̄в та̄л сыс ва̄рум рӯпатав нэ̄пакытн хансыслӯв, рущит ла̄внэ̄ныл хольт «методичка» нэ̄пакыт ва̄рсӯв. Ань ты нэ̄пакыт хосыт мо̄т ма̄хум йӣквуӈкв ханищтахтэ̄гыт, э̄рганув э̄ргияныл, ялпыӈ хо̄таланув янытлыяныл. Ма̄н «Увас хурамат» нампа йӣквнэ коллектив о̄ньще̄в, пусссын тот йӣкве̄в. Тув ялантан а̄гит, нэ̄квет пуссын сака ёмащакв йӣквуӈкв ха̄сэ̄гыт. Ты коллективув ань хус та̄лэ то̄влыс, Фаина Павловна Иштимирова тав ва̄рыстэ. Ань то̄ва ма̄нь па̄вланувт о̄лнэ ма̄щтыр ма̄хманув ма̄н пуссын ва̄ганӯв. Та̄н ма̄н ма̄гсылув супыт ю̄нтэ̄гыт, ма̄нав ю̄нсхатуӈкв о̄с ханищтыяныл. Та̄н ма̄к ёмащакв ма̄щтырлаӈкв ха̄сэ̄гыт. То̄ват ма̄навн нё̄тым ань ты мус рӯпитэ̄гыт. » Ты культура центр ань са̄всыр ма̄т ва̄ве. Тот рӯпитан ма̄хум акваг хо̄та̄ти йӣквим, э̄ргим ялантэ̄гыт. Сака ёмас о̄лнув, ка̄сыӈ ма̄ньщи ос ханты культура кол ман центр тох те рӯпитанув, то̄нт э̄рганув, йӣкванув са̄в та̄л маттем та суйтынувыт. 1069 2014.02.07. Людмила ТЕТКИНА Леуши па̄вылт рӯпитан музей. Кондинский район Леуши па̄выл ты та̄л 430 та̄лэ то̄влы. Па̄влыӈ ма̄хум ты ялпыӈ хо̄тал тув порат янытлаӈкве щё̄питахтэ̄гыт. Хоты порат тот ма̄хум о̄лмыгтасыт, та урыл Елена Павловна Кульчицкая пе̄с нэ̄пакт ловиньтас. Ос тувыл «История села Леуши в документах и в воспоминаниях его жителей» нампа нэ̄пак та̄ратас. Тав Леуши па̄вылт школат ханищтан нэ̄г рӯпиты ос школьный музейт кӯщаиг о̄лы. Музей урыл таи потыртас: О̄влэ̄т Леуши па̄выл школат акв колнакт «История боевой славы» нампа суссылтап рӯпитас. Тот войнат хо̄нтлам ма̄хум хурияныл ос пормасаныл, нэ̄паканыл акванатым о̄лсыт. Яныг школа хунь ӯнттувес, суссылтап тыг тотвес. То̄нт ма̄н ня̄врамыт ёт э̄лаль са̄всыр пе̄с пормасыт акванатуӈкве патсӯв. Хунь ма̄хум ты ма̄н о̄лмыгтасыт, ам хо̄сат та̄гыл пӯмщалахтэ̄гум. Са̄всыр ма̄тт ла̄тыӈ кинсэ̄гум. Акв нэ̄пакт хансым о̄лыс, Ермак ма̄хманэ ёт са̄всыр мирыт ёт хо̄нтлас. Тав хунь порславес, ма̄хманэ киттыгӯртхатсыт, акват тыт хультсыт, мо̄таныт ювле минасыт. Ювле минаманыл порат ты Леуши па̄вылн хо̄игласыт. То̄нт ма̄ньщит та̄нки ще̄мьяныл ёт тыт о̄лсыт. Ты ва̄рмаль 1584 та̄л порат о̄лыс. Пе̄с нэ̄пакыт кисхатым, ам Тобольск ӯсн ялсум, тот архивколт ма̄нки па̄влув урыл ла̄тыӈ киссум. Тот ос акв пӯмащ ва̄рмаль хо̄нтсум. Леуши па̄вылт о̄лнэ ма̄хум ясак мощща о̄йтсыт. Ты ва̄рмаль 1614-1617 та̄лытт о̄лыс. Ам пуссын хо̄нтум нэ̄паканум районный Думан ке̄тсанум, депутатыт ловиньтасаныл ос постановление пирмайтасыт, ты та̄л па̄влув 430 та̄лэ то̄влы. Рущ ма̄хум ты ма̄т хосат та̄гыл о̄лэ̄гыт, кӯпса ма̄хум Леушит о̄с о̄лсыт. Та̄н халанылт Степан Сафронович Новосёлов щёлыӈ о̄йка о̄лыс. Советский власть ёхтум порат такви мисанэ, луванэ колхозн мисанэ, такви тот рӯпитаӈкве патыс. Тав о̄лум колэ̄т пӯльница ва̄рвес. Музеюв акв пе̄с хури о̄лы, тот ты пӯльница 1960 та̄л порат по̄слувес. Ос пупкол хунь тыт ӯнттувес, ты ва̄рмаль урыл ос нэ̄пакыт киссум. Музейт пе̄рна о̄лы, совеский власть ёхтум порат церковьколыт хо̄тло̄сталаӈкве, са̄кватаӈкве патве̄сыт, то̄нт ты пе̄рна Иван Кравченко ма̄нь пыгрищиг ёлпаттыстэ. Ань музеювт ты пе̄рна суссылтылӯв. «Югра» нампа энциклопедият ам таи ловиньтасум, Леуши па̄вылт пупкол 1888 та̄л порат ӯнттувес, ам ос Тобольск ӯст архивыт кисхатым мо̄т ла̄тыӈ хо̄нтсум. То̄нт йильпи пупкол ӯнттувес, ты э̄лыпа̄лт рӯпитам пупкол на̄йин ё̄свес. Мо̄т нэ̄пакыт ос ха̄нсым о̄лы, 1712 та̄лт пуп о̄йка Фёдор Лещинский Сатыги па̄вылн ма̄ньщит палт ялыс ос тыг ёхталас, то̄нт тыт Сатыгин ка̄нащ ще̄мьятэ ос рӯтанэ ёт о̄лыс. Тыт пуп о̄йка та̄наныл ос рущ То̄рум нупыл по̄йкщуӈкве ка̄щилтасанэ. Музеювт советский власть пора урыл ос са̄в нэ̄пакыт, хурит, пе̄с пормасыт акванатым олэ̄гыт. Тыт 1941-1942 та̄лыгт та̄ратым «Сталинская трибуна» нампа газета, са̄всыр докладнойнэ̄пакыт, по̄лщ тотнэ нэ̄пакыт ловиньтаӈкве ро̄ви. Ты нэ̄пакыт ма̄н акв пе̄с колыт хо̄нтсанӯв. Ма̄н палтув акв нэ̄ рӯпитаӈкве ёхтыс, тав пе̄с колт о̄лмыгтас. Акв порат куре хо̄тсаквалас, посым юв хартуӈкве патвес, хум хо̄тпат колалан тур сунсуӈкве но̄хха̄хсыт, тот таса̄вит нэ̄пак хо̄нтсыт. Пе̄с газетат, нэ̄пакыт пуссын музейн тотсаныл. Акв докладнойнэ̄пакт хансым о̄лыс, мис поснэ нэ̄ са̄в рӯпитаме ма̄гсыл щаквитыл ат майвес. Акв о̄йка мисэ а̄гмыл е̄мтыс, Ямки па̄вылныл ӯйхул пусмалтан ле̄ккар во̄выс. Тэ̄н аквъёт хӯрум хо̄тал вина айсы̄г, мисэ̄н ат пусмалтасы̄г. Тувыл мис алыстэ̄н ос нё̄выль э̄лаль тыналастэ̄н. Справка ва̄рсыг, э̄рттам мис а̄гм ат о̄ньщас. Тамле нэ̄пак ма̄н музейт ты о̄ньще̄в. Афганистан, Чечнят хо̄нтлам пыганув урыл о̄с суссылтап щё̄питасӯв. Па̄вылныл 24 пыгыт хо̄нтлуӈкве ялсыт. Та̄н халанылт акв пыг юв ат ёхтыс. Акв пыг «Орден мужества» нампа ма̄гылн тагатан по̄с о̄ньщи, тав Чечня ма̄т хо̄нтлым тамле ме̄талил майвес. Музеюв ма̄ньщи маснут ос мо̄т са̄всыр пормас мощща о̄ньще̄в. Са̄всыр мирыт пе̄с йис та̄гыл тыг ёхталаӈкве патсыт. Ма̄ньщиянув пуссын та̄н халанылт тэ̄лыгласыт. Та̄нки пе̄с йис ва̄рмаляныл ос ща̄нь ла̄тӈаныл хотёрувласаныл. 1069 2014.02.07. Людмила ТЕТКИНА Тав стиханэ ань ты мус ловиньтавет. Ханты-Мансийск ӯст окружной библиотекаколт са̄в мир акванатхатыглас. Тот ма̄хум Владимир Волдин ка̄стысаныл. Тав ханты ос рущ ла̄тӈыл стихыт хансыс. Ма̄хум тав хансыглам стиханэ ловиньтасыт, э̄ргыг э̄ргысаныл ос тав уре̄тыл потыртасыт. Ювле хультум та̄лт А̄с-угорский ма̄ньлат ма̄хум организация ос В. Волдин намыл намаим ханты культура центр «И наших душ, и наших рук я славлю единение » нампа проект аквъёт хассы̄г. Ос ювле хультум та̄л ва̄т са̄грапнал э̄тпост проектаныл ма̄гыс грантолныл майве̄сыт. Ань та̄н ма̄хум акванатыглэ̄гыт, та̄нанылн Владимир Волдин хансум стиханэ ос ва̄рум рӯпататэ урыл потыртэ̄гыт. Ӯст о̄лнэ ма̄ньщит, хантыт ос мо̄т мирыт, соссаӈ ма̄хум Ассамблеят рӯпитан депутатыт, Общественный палатат рӯпитан ма̄хум, «Союз писателей Югры» организация па̄лыл хо̄тпат библиотекаколн ёхталасыт. Ма̄хум В. Волдин урыл са̄в ёмас ла̄тыӈ ла̄всыт. Любовь Чистова, Общественный палатат кӯщаиг рӯпитан э̄ква, таи ла̄выс: «Владимир Семёнович са̄в та̄л ювле хультум порат а̄тимыг е̄мтыс. О̄лме порат тав хансум стиханэ ма̄гсыл мирн янытлавес. Тав са̄в та̄л ат о̄лыс, ос такем ёмас стихыт хансуӈкве а̄лымас. Ам нэ̄паканэ ловиньтасанум. Тав э̄кватэ Мария Кузьминична Волдина урыл хансум стиханэ а̄нум сака мӯстысыт. Э̄кватэ такем э̄руптастэ, янытластэ. Тыи ма̄гсыл такем сымыӈ стихыт тэ̄лсыт». Альфия Абдрашитова «У озера» ос «Радио» нампа стихаге э̄ргыг э̄ргысаге. Еремей Айпин, округ Дума депутат, поэт ёт ва̄йхатас ос тав уре̄тыл потыртас. Тав ла̄выс: «Ам 1971 та̄лт педагогическое училище а̄стласум. Ос сӯкыр э̄тпост Москва ӯсн литературный институтн ханищтахтуӈкве минуӈкв щё̄питахтасум. Ханты-Мансийск ӯст ханищтахтамум порат Владимир Волдин палт хансум потранум радион ловиньтаӈкве ялантасум. Хунь юио̄выл щёс ва̄щинтахтасме̄н, тав такви стиханэ ловиньтасанэ. Манхурип номт о̄ньщи ос манхурип рӯпата ва̄руӈкве таӈхи, та урыл са̄в потыртас. Тувыл ам Москва ӯсн минасум, кит э̄тпос ювле хультыс, тав а̄тимыг е̄мтыс. Владимир Семёнович сака ёмас хо̄тпаг о̄лыс, нэ̄мхуньт лю̄ль ла̄тӈыл ат потыртас, нэ̄мхуньт ат ля̄втыглас. Ка̄сыӈ э̄лумхо̄лас торгамтаӈкве таӈхыстэ. Тав мир э̄руптастэ, ка̄сыӈ хо̄тал ща̄гтым ӯрыстэ. Тав тамле сымыӈ, ёмас хо̄тпаг о̄лыс». Ханты-Мансийский район Кышик па̄вылныл Альбина Дмитриевна Хорова, ня̄врам ханищтам э̄ква, Зина Долевская, школат ханищтахтын а̄ги, поэт ханты ла̄тӈыл хансум стиханэ ловиньтасы̄г. Мария Кузьминична Волдина о̄йкатэ урыл о̄с ла̄тыӈ ла̄выс: «Ме̄н о̄йкаме̄нтыл туп хӯрум та̄л аквъёт о̄лсуме̄н. Тав а̄нум хӯрум ня̄враманум ёт нэ̄г тотыстэ. Ам ня̄враманум сака э̄руптасанэ, такви ня̄враманэ хольт янмалтасанэ. Ос хунь Танечка а̄гиме̄н самын патыс, такем ща̄гтыс. Такви ня̄врам хольт пӯмщалахтас, а̄гитэ ла̄глаге, ка̄таге нупыл сунсыглым такем мувиньтас. Акв порат таве̄н ла̄всум, Таня ёт юн вос о̄лы. Тав юн ӯнлуӈкве ат ве̄ритас, а̄гитэ радио рӯпатан тотыстэ. Юв ёхтысум, юн а̄тимыг, кисмаясагум. Рӯпатан минасум, тув ща̄лтсум, ма̄нь а̄гитэ пасан тармыл пиныстэ, ос тав ётэ рӯпитан ма̄хумн суссылтытэ. Тув мус ща̄гтым о̄лыс, ты урыл ма̄хманэ̄н потыртас, тамле ёмас хо̄тпаг о̄лыс». Ты юипа̄лт Мария Кузьминична о̄йкатэ урыл такви хансум э̄рге э̄ргыстэ. Аквта хо̄талт мӯй ма̄хум пуссын искусства центрын во̄вве̄сыт. Та колт Мария Кузьминична апыгрищанэ ос ма̄ньлат ма̄хмыт ёт «Так Молупси» «Сказ о Земле Югорской» нампа спектакль суссылтасыт. Ты спектакль Владимир Волдин хансум поэматэ щирыл ва̄рсаныл. 1069 2014.02.07. Тамара МЕРОВА Марий ма̄хум о̄лупсаныл о̄вылтыт. Валерьян Петров Марий Эл ма̄т Морко районный ӯст о̄лы. Тав ань пенсиян патхатым о̄лы, ос ты э̄лыпа̄лт «Морко мланде» районный газетат кӯщаиг рӯпитас. Мо̄лты туи о̄йка финноугорский газетатт рӯпитан хо̄тпат хурит по̄слуӈкв ханищтапн акванатыгласанэ. Ам о̄с тув ялсум, тот ханищтахтамув коныпал ма̄н марий ма̄хум о̄лупсаныл о̄вылтыт о̄с мощ пӯмщалахтасӯв. Акв хо̄талт Валерьян Васильевич ма̄нав такви рӯпитам колэ̄н ос район мирколн тотыгластэ. «Морко мланде» колэ̄т ма̄н тав ётэ рӯпитан ма̄хум ёт ва̄щинтахтасӯв. Рущ щирыл тав «Марийская земля» толмащлаве, редакцият рӯпитан хо̄тпат тамле газета рущ ла̄тӈыл о̄с таратэ̄гыт. Ань ты газетаг Моркинский районт хӯрум со̄тыра арыгкем хо̄тпатн ловиньтаве̄г. Тэ̄н акв са̄т сыс акв щёс та̄ратаве̄г. Ка̄сыӈ журналист газетан рущ манос марий ла̄тӈыл ля̄ххалыт ос потрыт хансы. Журналистыт ма̄нь па̄влыӈ ма̄н о̄с са̄в ялантэ̄гыт, марий мир о̄лупса о̄вылтыт потрыт кинсэ̄гыт. Тувыл район кӯщаяныл рӯпатаныл урыл са̄в ля̄ххал хансэ̄гыт. Марийцыт та̄нки ща̄нь ла̄тӈыл хансым газета ловиньтаӈкве сака таӈхе̄гыт, таи ма̄гыс газета сака ӯре̄гыт. Ма̄н мирколн о̄с ялсӯв, тот Моркинский район кӯщай Сергей Харитонович Григорьев ёт ва̄йхатасӯв. Тав ма̄навн та̄нки о̄лупсаныл урыл таи потыртас: «Ма̄н районувн Морки ӯс ос онтолов ма̄нь па̄влыт ловиньтахтэ̄гыт. Тыт 30 со̄тыра ниласа̄т са̄вит э̄лумхо̄лас о̄лы, та̄н халанылт 82% тыи марий ма̄хум, 8% рущ ос аквта са̄вит хатань ма̄хум о̄лэ̄гыт. Марийцыт та̄нки пе̄с йис агтаныл (рущ щирыл язычество) э̄лаль тотыяныл, то̄ват рущит хольт о̄с пе̄рна пинэ̄гыт, хатанит мусульман агтыл о̄лэ̄гыт. Морко ӯсувт матахмат хо̄тпат хосат о̄лмыгтасыт, та̄н буддизм агт тыг тотсыт. Ты хо̄тпат та̄нки ма̄гсыланыл ӯсувт ма̄нь кан щё̄питаӈкве во̄всыт, ма̄н ка̄сащасӯв. Ань ма̄н ма̄хманув о̄с тув ёхталэ̄гыт, нас пӯмщалахтэ̄гыт, сунсыглахтэ̄гыт. Та̄нанылн тот мӯсты, ла̄ве̄гыт, сыстам, посыӈ ма̄. Ма̄хманув янгыщ ӯйхул янмалтым, са̄всыр щӯртнит, ня̄нь пумыт янмалтым о̄лэ̄гыт. Мо̄лты та̄лт сака ре̄гыӈыг е̄мталас, са̄в та̄лыӈ йӣвыт хоттосуӈкве патсыт. Ма̄н ань 300 гектар ма̄ тармыл йӣвыт янмалтаӈкве сам пинсӯв, макев са̄в хорамыӈ йӣвыл э̄лаль вос яныгмаве. Па̄влыӈ ма̄хманув ӯйхул янмалтым, во̄р йӣвыт яктым ос па̄рт сылнэ ма̄т рӯпитэ̄гыт. То̄ват компрессорный станцият, кирпащ ва̄рнэ колт ос сыресыр пормасыт ва̄рнэ колт рӯпитэ̄гыт. Ляпа ӯсныл щёлыӈ хо̄тпат тыт пе̄с та̄гыл рӯпитан предприятият ёвтыяныл ос тувыл мо̄т рӯпатаӈ колыг щё̄питыяныл. Таи ёмас, ма̄н соссаӈ ма̄хманув тув рӯпитаӈкве вивет. Щищкурек янмалтан кол о̄с ӯнттысӯв, ты хосыт ма̄нки мӯӈи, нё̄выль о̄ньще̄в. Ма̄ньлат колта̄глытн ос са̄в ня̄врам о̄щнэ ще̄мьятын са̄всыр нё̄тмил ва̄ре̄в. Юио̄выл та̄лувт са̄внув ня̄врам самын патыс. Тыт ань 416 колта̄гыл яныг ще̄мьяг ловиньтахтэ̄гыт, та̄нанылн о̄лнэ кол ӯнттын ма̄гыс ма̄ло̄мтыл мисанӯв. Мо̄лал рӯпата ат хо̄нтнманыл ма̄гыс са̄в марийцат мо̄т ма̄н о̄луӈкве миныгласыт. Тувыл са̄в ма̄ньлат а̄гитпыгыт юристыг, бухгалтерыг ханищтахтэ̄гыт ос тыт рӯпата ат хо̄нтэ̄гыт, сысы о̄с та минэ̄гыт. Ам таи ла̄вуӈкве таӈхе̄гум, та̄н та̄нки самын патум ма̄наныл ат ёрувлыяныл, юв ёхталэ̄гыт. Та̄н аквтох пе̄с йӣс ялпыӈ хо̄талыт янытлэ̄гыт ма̄кев тыт сака ёмас». Ты э̄лыпа̄л хо̄талт ма̄н акв ялпыӈ ма̄н ялмув порат Уильем па̄вылт лё̄ӈхыт марийцат ёт хо̄нтхатыгласӯв. Тыи Татьяна Тихонова а̄гиягепыгаге ос о̄ныпе ёт ля̄льт ё̄мсыт. Ма̄н та̄н ётаныл мощ потыртасӯв. Татьяна хуньт Казаньт ня̄врам пусмалтан ле̄ккарыг ханищтахтас ос тувыл о̄йкатэ̄нтыл Лӯима̄н рӯпата киснэ ма̄гыс Дудинка ӯсн минасы̄г. Тав ань «скорый помощь» ле̄ккарыг рӯпиты. Пыге тэ̄н ётэ̄н нила та̄л тот о̄лыс, ос акв тыг э̄лаль ханищтахтуӈкве юв ёхтыс. Ань Пе̄тра пе̄с ялпыӈ хо̄тал янытлан кастыл (та̄н щираныл Сюрем хо̄тал) рӯт ма̄хманыл уральтан ма̄гыс та̄н отпускан ёхтысыт. Тащирыл ты марийцат о̄лэ̄гыт. 1069 2014.02.07. Светлана РОМБАНДЕЕВА Пусмалтахтан ос ӯщлахтан кол. Ма̄н округувт Нефтеюганск ӯс ляпат «Юган» нампа санаторий о̄лы. Тот ма̄хум янгема̄не пусмалтахтэ̄гыт ос ӯщлахтэ̄гыт. То̄ва хо̄тпа пӯльницаныл ле̄ккаре̄н тув ке̄таве, то̄ва ос такви путёвка нэ̄пак ёвты (тынэ налыман нупыл ат со̄тыра са̄виттем солко̄ви). Ка̄сыӈ хо̄тпа тот нёлоловхуйплов хо̄тал о̄лы, о̄лнэ колнакыл миве, са̄всыр щирыл пусмалтаве, тыттаве. Ва̄т са̄грапнал э̄тпост ам тот о̄лсум, пӯльница па̄лыл ле̄ккарумн тув ке̄тыглаве̄сум. Ювле хультум та̄л ре̄тыӈ ю̄свой э̄тпосэ̄т ты санаторий ва̄т та̄лэ то̄влум. Кӯщаиг Виталий Иванович Чехута тав о̄лы. Хум тот онтоловхуйплов та̄л рӯпиты, «Отличник здравоохранения РФ» намыл майвес. Виталий Иванович тув патхатаме юипа̄лт санаторий сака ёмащакв рӯпитаӈкве патыс. Ва̄т та̄л сыс тот 98 со̄тыра 532 хо̄тпа пусмалтахтас (та̄н халанылт: 22 со̄тыра 982 хо̄тпа – ня̄врамыт ос ма̄ньлат ма̄хум, 4 со̄тыра 571 хо̄тпа – а̄гмыӈмосыӈ ма̄хум, 1 со̄тыра 530 хо̄тпа – яныг хо̄нт порат хо̄нтлум ма̄хум пусмалтахтасыт ос ӯщлахтасыт). Тот са̄т яныг ле̄ккарыт (терапевт) рӯпитэ̄гыт, акв ле̄ккар э̄кват пусмалты, акв ле̄ккар ос ӯлщпуӈк пусмалты, са̄т ма̄нь ле̄ккарыт массаж ва̄ре̄гыт, онтоловхуйплов ма̄нь леккарыт физиотерапият рӯпитэ̄гыт, атпан нупыл ат хо̄тпа тэ̄нут па̄йтнэ колт рӯпитэ̄гыт, са̄в хо̄тпа колкан ловтэ̄гыт манос кол ӯре̄гыт. О̄влэ̄т ты санаторий акв накпа йӣв корпус ос тэ̄нут па̄йтнэ ма̄гыс ма̄нь колнак о̄ньщас. Та̄л сыс 1 со̄тыра 500 хо̄тпа туп пусмалтахтуӈкве ве̄рмыс. Ань тав ат корпус о̄ньщи (ма̄хум тот о̄лэ̄гытхӯлэ̄гыт), кит тэ̄нэ колнак, поликлиника, водолечебница, административный корпус, спортивный комплекс. Ма̄нь ня̄врамыт ма̄гыс ёнгын колнак о̄лы. Санаторият ань аквторыг 260 хо̄тпа пусмалтахтуӈкве ос ӯщлахтуӈкве ве̄рми. Та̄л сыс 5 со̄тыра арыг хо̄тпа тув яланта̄лы. Ма̄хум са̄всыр ваннатыл ва̄равет (яныг хуран пусмалтан вит со̄саве, хо̄тпа тот та хуйгала̄лы), тувыл массажыл ва̄раве (алписове мощ таӈращлаве), ша̄нька ня̄нь хурип исум утыл а̄гмыӈ ма̄тэ пинаве, лаплэ̄паве (хо̄тпа тох щё̄с охса ӯщлахты). Тот акв тамле пӯмыщ пусмалтан ва̄рмаль о̄лы – иглоукалывание. Хо̄тпа пусмалтан ма̄гыс ю̄нтупытыл тӯщтаве, ю̄нтупанэ ёт хусахтем кӯм хуйгала̄лы. Ма̄хум ингаляциял ва̄равет (тэ̄рпил лылтэ̄гыт), пусмалтан ща̄ил айтавет, физкультура ва̄ре̄гыт ос мо̄т са̄всыр щирыл пусмалтавет. Нэ̄пак ловиньтан колнак рӯпиты. Тот са̄всыр ёмас нэ̄пакыт, журналыт ман газетат пуссын о̄лэ̄гыт. Пусмалтахтан юипа̄лт ма̄хум мощ кон ё̄мыгтаӈкве ве̄рме̄гыт, ёсал ман сунсовыл тахсуӈкве ро̄ви. Ты санаторий тарыг йӣвыӈ ма̄т ӯнттувес, во̄рыӈ ма̄т, ляпат воссыг нэ̄матыр кол а̄тим. Туп ӯщлахтан ма̄гсыл акв база о̄лы, ма̄хум тув Нефтеюганск ӯсныл ёхталэ̄гыт, ёсал тахсэ̄гыт. Школаныл ня̄врамыт тув тотавет, манос ще̄мьяӈ ма̄хум ёхтэ̄гыт, тот маттем та тахсэ̄гыт, ёмас, сыстам лылые̄пыл лылтэ̄гыт. Ня̄врамытын тай атхунь пӯмыщ. Суныл тахсынэ̄ныл порат, ос сунсоврищаныл по̄хантӯщтыгпияныл, сып ёлыпа̄лн па̄п паттанылт та тахамлэ̄гыт. Ща̄гтаклым, мовиньтым тот та повара̄лэ̄гыт, пальтасоврищаныл тӯйтыл лаппе̄рыгтыяныл. Я̄тил ма̄ньщи ма̄хум, хотьют ка̄сащи те, тув ялэ̄н, мощ ӯщлахтэ̄н, пусмалтахтэ̄н. Пусмалтахтан леккаранын китыглэ̄н, эрыӈ путёвкал миве̄н. На̄нти тув звонитаӈкве о̄с ве̄рмегы̄н, ты «Юган» санатория тав телефонэ: 8 (3463) 23-88-96. Матыр китыглахтан ла̄тыӈ о̄ньщегы̄н те, тув звонитэ̄н, китыглахтэ̄н. Санаторият ёмас, сымыӈ ма̄хум рӯпитэ̄гыт. Пуссын пуста̄гыл о̄лэ̄н, пус ка̄т, пус ла̄гыл! 1069 2014.02.07. Тамара МЕРОВА «Монти Танья» ханты мо̄йт. Аньмунт Ханты-Мансийскат обскоугорский ма̄хум «Хо̄тал» нампа театр о̄с акв йильпи ёнгиланыл суссылтасаныл. Ты «Монти Танья» намаим спектакль, тав Тимур Салихов ма̄ньлат режиссёрын ва̄рвес. Танья тыи сургутский е̄рт о̄лнэ ханты ма̄хум та̄н Хо̄нт-О̄тыраныл. Ань ма̄хумн суссылтам хо̄нтлам ва̄рмаль XIV нотт порат о̄лыглам. Ты йис ва̄рмалит театрыт рӯпитан хо̄тпат таве ос мо̄йт щирыл щё̄питасаныл. Тувыл тамле пилыщмаӈ ва̄рмалит ма̄хумн хотмус суссылтаӈкве э̄рыс. Тимур Салихов ты спектакле то̄ва накыт пе̄с тӯлыглап хольт ва̄рсанэ. Тот артистат та̄нки ёнгын э̄ныл коныпал са̄с вильтхопил тӯлыглахтэ̄гыт. Акв хо̄нтлан ва̄рмаль а̄канит ёт щё̄питасаныл (рущ щирыл ке ла̄вуӈкве ты кукольный театр). Мо̄тынтыг исхорыт суссылтым потыртасыт. Са̄в э̄рнэ ла̄тӈыл Т. А. Молданован ос Е. А. Нёмысован хӯлтыглаве̄сыт . Тувыл спектаклит ёнгын хо̄тпат сургутский ханты ла̄тӈыл ёмщакве̄г потыртаӈкве Наталья Ачимован ханищтаве̄сыт. Ульяна Шульгина та̄нанылн э̄ргыт хансыс. Анна-Ксения Вишневская акв пилыщмаӈ нак урыл са̄с вильтыӈ ут нё̄тмилэ кастыл потыртаӈкве ла̄выс. Са̄с вильтыӈ ут хартыглахтым, ощща турсуил пилыщмаӈ нак урыл потыртас. Тох та̄рвит пищит сака пилнэ̄г ат сусхатэ̄гыт, соссаӈ ма̄хумн та̄н э̄рнэ̄г торгамтавет. Павел Мизёв художниканыл о̄с са̄в рӯпитас, тав сценан аквано̄лтым йиво̄влыт щё̄питаӈкве ла̄выс, та̄н нумыл ква̄лгыл нэ̄гсалаве̄сыт. Э̄рнэ торыг та̄н па̄лиӈ во̄р хосыт ё̄мыгтан ма̄г ва̄рапавет манос ё̄рнколыг тӯщтыгпавет. Евгений Литвинчук, "Хо̄тал" нампа театр кӯщай, ла̄выс: "Ты спектаклюв ма̄н 12 та̄л яныт ня̄врамытн суссылтаӈкве о̄с щё̄питаслӯв. Таима̄гыс то̄ва пилыщмаӈ утыт ощхуль ва̄рнэ щирыл ва̄рсанӯв. Та щирыл ханты ос ма̄ньщи ма̄хум та̄нки ёмщакве̄г тӯлыглахтуӈкве ха̄сэ̄гыт. Ня̄врамытын соссаӈ ма̄хум пе̄с наканыл ва̄ӈкве э̄ре̄гыт, пе̄с хо̄нт О̄тыраныл тэ̄ланыл о̄с вос ва̄гыт" Хуньт ты пе̄с мо̄йт Александр Иванович Силин, ханты ня̄врамыт ханищтан хо̄тпан, нэ̄пакн хасвес. Мо̄лал тав потырта̄лыс: «Ам ань «Монти Танья» потыр ловиньта̄лнэм сыс атпан та̄лн ювле хультум порам ка̄стылум. Тувыл мӯтраӈ о̄лупсан ханищтам ханты о̄йкат пуссын номылматыглыянум. Тыи ханты ла̄тӈыл пе̄с мо̄йт мо̄йтыглам Семён Фёдорович Покачев, а̄нумн потрыт рущ ла̄тӈын толмащлан хум Михаил Иванович Покачев. Ос Угут па̄вылт «выгыр ё̄рнколт» рӯпитам кӯщай Ефим Яковлевич Каюков а̄нумн ханты йис накыт о̄вылтыт са̄в потырта̄лыс, матыра̄ти хӯлтыглас. Ань пуссын ты юртанум хосат а̄тимыг е̄мтсы̄т. Туп ты «Монти Танья» йис потыр щирыл та̄н мо̄т мирн вос о̄с номавет, ма̄ньлат а̄гитнпыгытн ос апгытн вос ва̄вет». Ты мо̄йт тох потыртавес. Са̄ртын кит юртыӈыщ о̄лнэ колта̄глыг суссылтавесы̄г. Акв колта̄глыт «Са̄лы» намаим рӯт ма̄хум, мо̄т колта̄глыт «Ю̄свой» намаим рӯт ма̄хум о̄лсыт. «Юсвой» рӯт ма̄хум сака ё̄р, та̄ксар ма̄хмыг ловиньтахтасыт. Ты ма̄хум акв по̄хат о̄лсыт, хӯл а̄лыщлым ос во̄раим о̄лсы̄гхулсы̄г, то̄внакт тэ̄нки халэ̄нт мӯйлуӈкве хо̄игласыт. Акв щёс Норкаики «Са̄лы» рӯт ма̄хум яныгпа̄ла о̄йка Нэвикурек «Ю̄свой» рӯт ма̄хум яныгпа̄ла о̄йка палт мӯйлуӈкве хо̄яс. Тэ̄н ӯнлысы̄г, потыртасы̄г. Аквматэ̄рт мӯй о̄йка Нэвикурек нё̄тнэ а̄гитэ ка̄саластэ, таве нэ̄г виӈкве номылматас. Тувыл, ва̄им, ма̄ньлат нэ̄ матум хо̄тпан нэ̄г хунь виве. Таима̄гыс кит яныгпа̄ла о̄йкаг халэ̄нт халмалтахтасы̄г. Та сыс та̄н ма̄нанылт пилыщмаӈ пора ёхтыс. Мо̄т ма̄ныл хащта̄л ма̄хум та̄н ётаныл хо̄нтлуӈкве ёхтыгпасыт. Та̄н нэ̄мхотьют ат са̄литасыт, янгема̄не пуссын порслысаныл ос та̄нки кӯщайлахтуӈкве патсыт. То̄нт тӯлмах Норкаики таквина̄тэ ос рӯт ма̄хманэ лылыяныл нэ̄гылтан ма̄гыс хащта̄л утытн нё̄туӈкве ла̄вхатас. Ос тувыл во̄рт тӯйтыглахтам «Ю̄свой» рӯт ма̄хум порслаӈкве аквъёт та минасыт. Та̄н Нэвикурек та̄ксар ма̄хум э̄ткотильт хо̄нтсаныл ос лю̄ль ва̄рнэ ма̄гыс илттыг ёхтыгпасыт. Нэвикурек ма̄нь пыге̄н сысы оюӈкве кащилтастэ. Пыге̄н тав ла̄выс, такви ю̄свой рӯтэ э̄лаль вос тотытэ, ма̄хманэ ос ма̄тэ та̄кыщ вуянтым вос о̄ньщитэ, ю̄свой ма̄хум аквтох суиӈ намыл э̄лаль вос о̄лсыт. Ань ты пе̄с мо̄йт щирыл пуссын тох э̄лаль та е̄мтыс. Танья – тыи Нэви курек апыг. Нэви курек ма̄нь пыге во̄рт тӯйтыглахтам порат Васэк юртэ Айни йигрище ёт акванхо̄нтхатасы̄г. Тэ̄н рӯтанэ̄н пуссын порславе̄сыт, нэ̄мхотьют ат хультыс. Тувыл мо̄т сытам ма̄н о̄луӈкве та минасы̄г. Тох Танья пыг самын патыс. Ань тав ты ма̄тэ э̄лаль ӯргаластэ, таве̄ныл пуссын пилсыт. Такви рӯт наме, со̄ль, суиӈыг ва̄рыстэ. Тав уре̄т ань тыг мус ма̄хум потыртэ̄гыт, на̄н Танья турсуе хӯнтамлаӈкве тахмаегы̄н ке, туи порат «Орловский борка» ла̄внэ ма̄н минэ̄н. Тот яныг ӯрн но̄хха̄ӈхе̄н, тувыл палил ма̄ хӯнтлэ̄н, ёмщакв хӯнтлэ̄н. То̄нт на̄н хумус Танья, Ю̄свой рӯт ма̄хум Хо̄нтО̄тыр сыме путги, хӯнтамлылы̄н. Тав сыме щар мо̄йт щирыл акваг лылыӈ. 1070 2014.02.21. Тамара МЕРОВА То̄ва тэ̄лат йильпи щирыл ва̄равет. Та хультум э̄тпост са̄всыр кӯщаит округ губернатор Наталья Комарован кит щёс акванатыгла̄лве̄сыт. Кӯщаит са̄всыр са̄кконытн манос мо̄т документытн са̄всыр э̄рнэ ла̄тӈыт хассыт. Ань та̄н хансум ла̄тӈаныл ёт депутатыт ка̄саще̄гыт ке, са̄кконыг манос э̄рнэ нэ̄пакыг тах пирмайтавет. Акванатхатыглам кӯщаит государственный имущество ёт рӯпитан хо̄тпат ва̄рнэ рӯпатаныл мӯсхалыг уральтаӈкве патыяныл. Ань организацият манос ма̄хум та̄нки нупыланыл хансум коланыл нэ̄пакыт хӯрум хо̄тал сыс атуӈкве вос а̄лыме̄гыт. Та̄н ты тэ̄лат хосан ул вос хультуптыяныл. То̄ванакт ма̄хум наска̄ссыг хоса ӯрхатэ̄гыт. Тувыл ветеринарный служба рӯпатат са̄всыр тэ̄ланэ ань мо̄т щирыл щё̄питаӈкв патавет. Округн тэ̄нутыт тотнэ порат ос ӯйхул нё̄выль хосыт э̄лумхо̄ласыт а̄гмыл ул вос ха̄хтавет, ты тэ̄лат аргеннув та̄кыщ уральтаӈкве тах патавет. Ма̄хум пуста̄гыл вос о̄лсыт ос спорт хосыт та̄ксарыг ос ё̄рыг вос е̄мтсыт, каснэ колыт ань ёмащакв вос рӯпитэ̄гыт, та̄н округ правительство па̄лыл олннё̄тмилыл та̄ставет. Ань округт 18 тамле колыт субсидияолныл тах мивет. Мо̄т документнэ̄пак кӯщаит «Многофункциональный центр Югры» нампа колыт урыл пирмайтасыт. Ма̄хум ань «единое окно» хосыт та̄нки ва̄рмаляныл та̄рапаттуӈкве ве̄рмияныл. Мо̄т сапра̄нит 2014 та̄л ос 2015-2016 та̄лыт кастыл хансым окружной бюджет са̄кконын кӯщаит о̄с мо̄т ла̄тӈыт хӯлтсыт. То̄ва тэ̄латныл хультум олныт кӯщаит школат, пӯльницат, каснэ колыт ӯнттын ма̄гыс мыганыл. Ща̄ньа̄щта̄л хультум а̄гитпыгыт молях колыл вос мивет, тув о̄с са̄в олн та̄ставе. Тувыл та̄н округт «прожиточный минимум» ва̄рмаль о̄вылтыт потыртасыт. Рӯпитан хо̄тпат э̄тпос сыс 11 со̄тыра 588 солко̄вил хасве̄сыт, пенсият о̄лнэ хо̄тпат – 8 со̄тыра 814 солко̄вил, ня̄врамыт – 10 со̄тыра 358 солко̄вил хасве̄сыт. Тыгыл мощщанув олн винэ ма̄хум нё̄туӈкв патавет. 1070 2014.02.21. Людмила ТЕТКИНА Ре̄тыӈ ю̄свой э̄тпос 21 хо̄талэ ща̄нь ла̄тыӈ янытлан хо̄талыг о̄лы. Югра ма̄т о̄лнэ я̄тил мир! Ма̄н, округ Думат рӯпитан депутатыт, ща̄нь ла̄тыӈ янытлан Мирхал хо̄талыл на̄нан янытлыянӯв! То̄ва ялпыӈ хо̄талыт са̄всыр мирыт акваню̄рщхатым янытлэ̄гыт. Ща̄нь ла̄тыӈ янытлан Мирхал хо̄тал о̄с тамле хо̄талыг ловиньтахты. Ты хо̄тал ЮНЕСКО нампа мирхал организация ва̄руӈкве номылматастэ. Ос таима̄гсыл ва̄раве, ка̄сыӈ э̄лумхо̄лас ща̄нь ла̄тӈыл вос потырты, ул вос ёрувлытэ ос пе̄с йис ва̄рмалит э̄лаль вос тотыянэ. Щар о̄влэ̄т тамле ялпыӈ хо̄талыл ма̄ньщи ос хантыт мирыг янытлаӈкве э̄ри. Ань округувт соссаӈ ма̄хум ма̄гсыл пирмайтым са̄в са̄кконыт рӯпитэ̄гыт. Та̄н ла̄тӈаныл ул вос со̄йме̄гыт, яныг рӯпата ва̄раве. Ща̄нь ла̄тӈув э̄лаль тотым, ма̄н са̄всыр мирыт халт юртыӈыщ ос ёмащакв э̄лаль о̄луӈкве патэ̄в. Борис Хохряков, округ Дума кӯщай, ке̄тум ла̄тӈе ма̄ньщи ла̄тӈыл Л. Теткина хансыстэ. 1070 2014.02.21. Людмила ТЕТКИНА Ня̄врамыт ща̄нь ла̄тӈыл ханищтан нэ̄. Ты хурит Евдокия Ивановна Кугина по̄слым о̄лы. Тав Ха̄льӯс район Кульпас па̄выл школат ня̄врам ханищтан нэ̄г рӯпиты. Евдокия Ивановна 9, 10 ос 11 класс а̄гитпыгыт ма̄ньщи ла̄тӈыл потыртаӈкве ханищтыянэ. Ты урокын ма̄ньщи, рущ ос мо̄т ня̄врамыт щар пуссын ялантэ̄гыт. Тувыл ос таи лю̄ль, тамле урок са̄т сыс акв щёс туп ва̄рыглаве. Ос ма̄ньщи а̄гитпыгыт халт туп китхӯрум ня̄врам ща̄нь ла̄тыӈ торгамты, потыртаӈкве нэ̄мхотьют ат ха̄сы. Ма̄н ты ма̄ньщи нэ̄ ща̄нь ла̄тыӈ ялпыӈ хо̄талыл янытлылӯв ос са̄в ёмас сымыӈ ла̄тыӈ таве̄н ке̄тэ̄в, пус ка̄т, пус ла̄гыл таве̄н ла̄ве̄в. 1070 2014.02.21. Валентина УЗЕЛЬ Хо̄нтлам ос ань лусытан пыгыт нё̄тавет. Ты та̄л 25 та̄лыг ты е̄мтыс, Афганистан нампа э̄лы хо̄н ма̄т хо̄нтлын ва̄рмаль ёлпо̄илттавес. Ань ты ва̄рмаль кастыл ма̄н округув янытыл тот хо̄нтлам ма̄хум пуссын янытлавет. Ань та хультум са̄тыт журналист ма̄хум ёт потыртан ма̄гыс ат хо̄тпа ёхталасыт. Ты – округ военный комиссар Ю. М. Буров; – «Баграм» нампа общественный организацият кӯщай С. Г. Ниязов; – ма̄ньлат ма̄хум организациянылт кӯщай И. И. Есин; – комитет солдатских матерей кӯщай нэ̄ И. Ф. Браун; – ос Афганистан ма̄т по̄рслым хум увщитэ С. Ю. Балина. Юрий Михайлович Буров ла̄выс, ань са̄лтатыт хумус маставет, хумус тыттавет, ты ва̄рмалит пуссын уральтым о̄ньщавет. Ос ань армияв ма̄гыс сака са̄в олн холтаве, тув са̄в йильпи ищхӣпыӈ ут ёвтаве. Военный товлыӈха̄пыт, вертолётыт, ща̄рщит яласан катерыт ань пуссын пе̄нтавет, йильпи утыт щар номтыӈыг ва̄равет. Ань ма̄н ма̄в уральтан ма̄гыс ос матыр йильпи ут акваг та ва̄раве. Акв тамле ут рущ ла̄тӈыл тох ла̄ваве – скрытое управление войсками (СУВ). Ань ты ут лов са̄лтат пе̄нтсыл рӯпиты, такви маныр э̄ри – по̄слы, ма̄в янытэ̄т уральтаӈкв ве̄рмитэ. 2017 та̄л мус армияв «контрактныиг» ва̄раве. Ка̄сыӈ лӯсытан хо̄тпа олныл ойтуӈкв патаве. Тув мус армияв атса̄т со̄тыра са̄витыг тах е̄мты. Та ювле хультум 2013 та̄лт 81 со̄тыра хо̄тпа контрактнэ̄пакт хасхатасыт, ань ты та̄лныл армият контракт щирыл лусытан ма̄хум са̄вмуӈкв тах патэ̄гыт. Пыгыт армият лусытаӈкв вос ка̄саще̄гыт, ты военный комиссар такви ма̄хманэ ёт школатт ос колледжитт ханищтахтын ня̄врамыт ёт акваг хо̄нтхатыгла̄лы. Ты э̄тпост та̄н колледжитн ялсыт, пыгыт ёт армия урыл потыртасыт. Тувыл титыглаве̄сыт, армиян та̄н ялуӈкв ка̄саще̄гыт ман а̄ти. Пыгрищит пуссын ка̄сащасыт, щар акв хо̄тпа юн хультуӈкв ат таӈхи. Ты ёхталам ма̄хум халт тит нэ̄г о̄лсы̄г, акватэ Ирина Филипповна Браун, тав комитет солдатских матерей кӯщаиг о̄лы. Такви пыге ос хо̄нтлас, Чечнят порслувес. Ань ты нэ̄кве са̄всыр ма̄тт лӯсытан пыгыт уральтым яласы. Тав ётэ ща̄нит пыганыл палт воинский частин ялуӈкв о̄с ве̄рме̄гыт. Тав ла̄выс, таве̄н э̄тэхо̄талэ салтатыт ман та̄н ща̄няныла̄щаныл свонитаӈкв ве̄рме̄гыт, пуссын нё̄тыянэ. Ты хум хо̄тпат халт иӈ акв нэ̄кве о̄лыс, тав наме Светлана Юрьевна Балина. Тав а̄пщитэ о̄с Афганистаныт порслувес. Ань Ханты-Мансийск ӯст о̄лнэ школа №3 тав наме̄тыл пинуӈкв та̄н таӈхе̄гыт. Ос матрыг школа кӯщаит та̄н ётаныл ат ка̄саще̄гыт. Ань ты ва̄рмаль урыл та̄н мирн потыртэ̄гыт. Ӯст о̄лнэ ма̄хум вос ла̄ве̄гыт, ты школа Павел Моденцов намыл пинуӈкв э̄ри ман а̄ти. 1070 2014.02.21. Валентина УЗЕЛЬ Округувт о̄лнэ я̄тил хум хо̄тпанув! Ре̄тыӈ ю̄свой э̄тпос 23 хо̄талэ̄т на̄нан янытлыянӯв. Ты хо̄тал кастыл ма̄н са̄в ёмас ла̄тыӈ на̄нанн ла̄вуӈкв таӈхе̄в. 23 февраль – на̄н ма̄гсылын яныг ялпыӈ хо̄талыг о̄лы. Ма̄в ӯргалан российский са̄лтатанув э̄тэхо̄тал лӯсытэ̄гыт. Та̄н щарщит яласэ̄гыт, то̄румт товлыӈха̄пыл Россияв ӯргалыяныл, ма̄те̄в янытэ̄т са̄всыр утыл сунсыяныл, мо̄т ма̄ныл по̄х хо̄тпа тыг ул вос ёхты. На̄н ё̄ранын хосыт ма̄н ёмащакв, пилта̄л о̄лэ̄в, ня̄враманув янмалтыянӯв. Кос хуньт лусытам ман хо̄нтлам хо̄тпат пуссын та̄ксарыг о̄лсыт, ё̄рыг о̄лсыт. Ма̄н о̄лнэ ма̄в ӯргалым на̄нтина̄нын ат са̄литасаны̄н. Ань яныгман пыганув о̄с акв тамле хо̄тпаг вос яныгме̄гыт. Ма̄н Россияв, ма̄н Родинав вос янытлыяныл ос ёмас са̄лтатыг вос е̄мтэ̄гыт. Ты ялпыӈ хо̄талувт ка̄сыӈ колт на̄н ма̄гсылын пасан вос ва̄раве, пуста̄гыл о̄лнэ ла̄тӈыл пуссын вос ла̄ваве̄н. Округ Дума кӯщай Б. Хохряков те̄тум ла̄тӈе ма̄ньщи ла̄тӈыл В. Хозумова хансыстэ. 1070 2014.02.21. Александр ВЬЮТКИН О̄выл щёс ва̄рыглым пӯмащ. Ань ты э̄тпос котиль хо̄талэ̄т Ханты-Мансийск ӯст округ янытыл о̄лнэ са̄лыӈ ма̄хум халт яныг касыл ва̄рыглавес. Ты пӯмащ рущ ла̄тӈыл «Конкурс профессионального мастерства среди оленеводов Ханты-Мансийского автономного округа-Югры» намаим о̄лыс. Тамле касыл щар о̄выл щёс ты ва̄рыглавес. Округ янытыл о̄лнэ са̄лыӈ ма̄хум титыглахтасыт, касыланыл манрыг Ханты-Мансийск ӯст ва̄раве? Кӯщаит ла̄всыт: «Ханты-Мансийск ӯс округув котильт о̄лы, ты ма̄гсыл тыт ва̄рвес. Са̄всыр районытныл каснэ ма̄гыс ёхталам ма̄хум йинэ лё̄ӈханыл акв палытыг о̄лнэ щирыл тыт ва̄рвес». Са̄лыӈ ма̄хум каснэ хо̄таланыл э̄лыпал хо̄талт Ханты-Мансийск ӯсн са̄лыяныл тотве̄сыт. Ат районныл ма̄хум тыг касуӈкв ёхталасыт. Нижневартовский, Сургутский, Нефтеюганский, Белоярский ос Ха̄льӯс районныл ма̄хум о̄лсыт. Аквъёт пуссын хо̄тхуйполов каснэ са̄лыӈ сун тыг тотыглавес. Халанылт щар са̄в, са̄т са̄лыӈ сун, Сургутский районныл ёхталас. Тувыл ос са̄в саран ма̄хум о̄лсыт. Ма̄ньщи халт са̄лыӈ суныл каснэ хо̄тпа щар а̄тим о̄лыс. Са̄лыӈ колт рӯпитан ос матыр нё̄тмил ва̄рнэ щирыл хӯрум ма̄ньщи хо̄тпа ёхталас: Василий Ромбандеев Анна э̄кватэ̄нтыл ос Данил Вынгилев. Ӯсувн ёхтуманыл порат ат ё̄рнкол тӯщтысыт ос са̄лыяныл каснэ ла̄кв ханищтан щирыл а̄рталасаныл. Са̄лыӈ ма̄хум халанылт каснэ ва̄рмаляныл а̄лпыл онтолов щёс порат о̄вылтавес. О̄влэ̄т та̄н са̄лыяныл урыл са̄всыр щирыл титыглаве̄сыт. Тыи ва̄рмаль ос касылыг ловиньтахтас. «Кубок губернатора» нампа касыл о̄лнэ хо̄талт сака ащирмаӈ о̄лыс. Каснэ ва̄рмаль хунь о̄вылтавес, сунсуӈкв ёхталан ма̄хум мощща о̄лыс. Мӯй хо̄тпат са̄выӈпа̄лэ мольщаӈыл, сахил ос хорамыӈыщ ю̄нтым ва̄йил масхатам тот ё̄ӈхатахтыгласыт. Са̄лыт о̄щнэ ма̄хмыт номтаныл уральтан юипа̄лт ма̄к са̄лыӈ суныл яласан ва̄рмаль та о̄вылтавес. Ма̄хманув халанылт акваннё̄тхатым кассыт. Щар ма̄ньлатыӈ ка̄снэ хум Марк Рыков, щар янгыг Иосиф Кечимов о̄лсы̄г. Нэ̄ хо̄тпат халт акв ханты нэ Любовь Казанжи туп касыс. О̄влэ̄т ма̄хум са̄лыяныл урыл титыглахтан касыланыл щирыл мӯйлуптаве̄сыт. Но̄хпатум ма̄хум халт юио̄выл места Саранпа̄вылныл ёхталам саран хум Аркадий Хозяинов вис. Аркадий э̄лыпа̄лт Касум па̄вылныл о̄лнэ ханты хум Юрий Тарлин но̄хпатыс. О̄выл места Иван Попов вистэ. Тав о̄с Белоярский район Касум па̄вылныл ёхталас. Са̄лыл каснэ, тынщаӈ ре̄пнэ ос хӯрум щёс аквторыг поргын щирыл хӯрмит ма̄н Евгений Айпин е̄мтыс. Титыт места Альберт Покачев вистэ. Тэ̄н сас Сургутский районныл о̄лэ̄г. Са̄лыӈ суныл каснэ щирыл Юрий Тарлин но̄хпатыс. Соссаӈ ма̄хум халт «Кубок Губернатора» нампа щар ма̄к яныг мӯйлупса Юрий Кузьмич Тарлин вистэ. Ты ма̄гсыл тав те̄р ха̄пыл яласан яныг моторыл ос те̄р ква̄лгыт хосыт на̄йпос минэ генераторыл мӯйлуптавес. Мо̄т но̄хпатум ма̄хум ос «Буранын» ӯнттын йильпи двигателил мӯйлуптаве̄сыт. 1070 2014.02.21. Анна АЛГАДЬЕВА Ам я̄тил тыныӈ ща̄нькем. Са̄пса е̄рт Ке̄расколыӈъя̄ па̄вылт ам ща̄нькемомакем Александра Васильевна Анямова о̄лы. Тав 1939 та̄лт Та̄пыст самын патыс. Ня̄хщамво̄ль па̄вылт яныгмас, хӯрум та̄л ишколат ханищтахтас. Хунь интернат пусвес, ща̄нен интернатн ат майвес, юн нё̄туӈкв э̄рыс. Юв ханищтаӈкв минэ урокыт юн ханищтаӈкв ща̄не̄н ат та̄ртвес. «Урок ханищтаӈкв ӯнтэ̄гум, ща̄нюмн ка̄салавем, ла̄ви: «Ущты ханищтахтуӈкв ялыс, о̄с ты хансуӈкв ӯнтыс ». Хотталь ульйӣв тӯлуӈкв ман вит тотуӈкв та ке̄тыгпавем, тикати кутюв пут ва̄руӈкв э̄ри». Ща̄нюм ла̄ви: «Хунь йильпи манит лӯисупныл тотве̄сыт, ма̄н а̄гирищит та̄н нупланыл та сунсэ̄в, супанылсахияныл такем та хорамыӈыт, ма̄щтырыт, такем са̄в хорамыл та ю̄нтнэ̄ныл. Ме̄н юрт а̄гиме̄нтыл тув ка̄салахтасме̄н о̄с па̄квпа̄лыӈ суп та ю̄нтыме̄н. Па̄квпа̄ланме̄н нёланыл са̄всыр щирыл во̄лиламыт, ме̄н тай номсыме̄н, маныр ха̄сыме̄н. Э̄кватн ка̄сала̄веме̄н, ла̄ве̄гыт: «А̄гирищиг, маныр хорамыӈ! » Ме̄н тай о̄лнэме̄н ат ва̄глуме̄н, матаёраг та лю̄ляхо̄лыме̄н, ме̄нкинаме̄н а̄ӈквата̄лылме̄н, та ха̄йтыме̄н». О̄с ща̄нюм потырта̄лы: «Аквнакт Тапыст о̄лмувт арыгтам совсаквытл ам ма̄нь а̄кань ва̄йрищиг ю̄нтсум, тучаӈумн тагатасагум, Лӯсум э̄кван ка̄салавесы̄г, маткем та о̄щатахтыглас, ла̄ви: « Ятаты, ты а̄гирищкве хуньт тах матыр ва̄руӈкв, матыр ю̄нтуӈкв тав та ханьщувлы». Со̄ль, ам ща̄нюм маныра̄ти ва̄руӈкв пуссын ха̄сы. Ма̄нь та̄гыл ю̄нсхатуӈкв ханьщувлас: сахи, ва̄й, мольщаӈ, по̄рха, вуйкан кувщ, ня̄ра, нуй сахи, пӯрка, хорамыӈ суп ю̄нтуӈкв; па̄юп, со̄вт, са̄н, ны̄п ва̄руӈкв ха̄сы. Ве̄рмуме порат во̄рт яласас, пушнина вуим порат – лэ̄ӈнаяс, со̄рп ка̄тынпаттыгла̄лыс, нёхс алыгла̄лыс, охсар, со̄выр лэ̄сыл пувыгла̄лыс, щёпыр пил ва̄тнэ порат акваг ӯтаве. Ань о̄с иӈ мо̄рсыӈыг во̄рн яланты, мо̄лты таквс акв нёхс кутьво̄йкатэ̄тыл ӯтталас». Ва̄ти хо̄тал э̄тпос 29 числат ам я̄тил тыныӈ ща̄нькем самын патум хо̄талэ о̄лыс, таве̄н 75 та̄л то̄влыс. Ам таве̄н ёмас ӯлум ла̄тыӈ ке̄тэ̄гум. На̄й-О̄тыранэ̄н вос ӯргалаве. Са̄в та̄л пуста̄гыл вос о̄лы. Пус ка̄т, пус ла̄гыл! Наӈ ма̄нь а̄гин Хурит Александра Васильевна Анямова а̄гиа̄гияге ёт по̄слым о̄лы. 2013 та̄л. 1070 2014.02.21. Светлана РОМБАНДЕЕВА «Лӯима̄ сэ̄рипос» ма̄ньщи газетав 25 та̄лэ то̄влыс. Ты та̄л «Лӯима̄ сэ̄рипос» газетав 25 та̄лэ то̄влыс. 1989 та̄л порат ре̄тыӈ ю̄свой э̄тпос 11 хо̄талэ̄т Ханты-Мансийск ӯст ма̄ньщи ла̄тӈыл хансым о̄выл газета ва̄рвес. Тувыл э̄лаль ань ты хо̄тал ма̄ньщи газетав самын патум хо̄талыг та ла̄ваве. «Лӯима̄ сэ̄рипос» тох Клавдия Васильевна Афанасьеван намаявес, а̄ги о̄парищ наме Сайнахова. Ты ма̄ньщи нэ̄ Ха̄льӯс район Сӯкыръя па̄вылт самын патыс. О̄выл газетав ва̄рнэ э̄лыпа̄лт потрыт ман мо̄йтыт ма̄ньщи ла̄тӈыл «Остяковогульская правда» газетат хансыглаве̄сыт. Ты газета рущ ла̄тӈыл кос хасвес, ос то̄ва потрыт ма̄ньщи ос ханты ла̄тӈыл хансым о̄лсыт. Мощ ётылнуве, 1957 та̄л яныг таквс э̄тпос па̄сныл, ханты ла̄тыӈ газета ва̄руӈкве патвес, «Ленин пант хуват» намаявес (ма̄ньщи щирыл толмащлаве те «Ленин лё̄ӈх хосыт»). Та газетатт Юван Николаевич Шесталов стихотворениянэ, Пе̄тр Ефимович Шешкин потранэ, Матрёна Панкратьевна Баландина (Вахрушева) э̄рганэ хансыглаве̄сыт. 1978 та̄л яныг таквс э̄тпос газетат Наталья Васильевна Сайнахова «Ё̄р Юван» мо̄йтэ хансым о̄лы. Ты мо̄йт таве̄н Роман Алексеевич Сайнахов мо̄йтыглам, Ха̄льӯс район Сӯкыръя па̄вылт о̄лум хум. Тувыл тав Ю. Н. Шесталов, П. Е. Шешкин, Г. Н. Сайнахов ос мо̄т ма̄ньщи ма̄хманув урыл хансыс. 1986 та̄лт ма̄ньполь э̄тпос газетат Клавдия Васильевна Афанасьева «Олимпиада хо̄тал» статья хансыс, ань Саранпа̄вылт олимпиада о̄лум порат ма̄хум хумус кассыт, мӯйлысыт, та урыл хансыс. Ща̄нь ла̄тыӈ ханищтан ва̄рмаль урыл «Ленин пант хуват» газетат Клавдия Васильевна са̄в потыр хансыглас. Та̄л котиль э̄тпост 1989 та̄л порат та газетат тав юио̄выл потре хансыстэ, «Йис о̄лупсав э̄ри ялтуптаӈкве» намаястэ. Тувыл аквта та̄лт ре̄тыӈ ю̄свой э̄тпост «Лӯима̄ сэ̄рипос» о̄выл газета ва̄рвес. Та па̄сныл газетат потрыт, мо̄йтыт ос э̄ргыт туп ма̄ньщи ла̄тӈыл хансуӈкве патве̄сыт. «Лӯима̄ сэ̄рипос» газетат о̄влэ̄т ты ма̄ньщи ма̄хманув рӯпитасыт, статьят хассыт: Клавдия Васильевна Афанасьева, Наталья Васильевна Сайнахова, Николай Михайлович Садомин, Альбина Романовна Станиславец, Раиса Калистратовна Бардина, Татьяна Степановна Гоголева, Никита Калистратович Партанов. Мощ ётылнуве газетан рӯпитаӈкве ёхтысыт: Валентина Васильевна Узель, Светлана Матвеевна Ромбандеева, Тамара Сергеевна Мерова, Галина Рудольфовна Кондина, Людмила Ильинична Теткина, Николай Савельевич Меров, Анна Николаевна Алгадьева, Александр Васильевич Вьюткин. Ань ты нёлолов хо̄тпа «Лӯима̄ сэ̄рипос» газета та̄н ты ва̄рияныл. Ты 25 та̄л сыс са̄в потыр, мо̄йт, э̄рыг ос по̄слум хурит ма̄ньщи ма̄хманув газетан ке̄тыгласыт, хассыт. Ханты-Мансийск ӯс педучилищат ханищтахтан студентанув о̄с хансыгласыт. 1994 та̄лт ма̄ньщи а̄гииг Марина Александровна Алгадьева (а̄ги о̄парищ наме Монина, Кимкьясуйныл о̄лы) ос Татьяна Петровна Таратова (а̄ги о̄парищ наме Хатанзеева, Ло̄пмусныл о̄лы) са̄всыр статьят хансыгласы̄г. Та̄л арыгтем газетат Галина Николаевна Войтова рӯпитас. Ты ма̄хманув о̄с акваг хассыт и ань ты хо̄тал мус хансэ̄гыт: Евдокия Ивановна Ромбандеева, Анастасия Ильинична Сайнахова, Альбина Романовна Станиславец, Евдокия Ивановна Хозумова, Мария Тихоновна Двинянинова, Никита Калистратович Партанов, Валентина Селивёрстовна Иванова, Светлана Селивёрстовна Динисламова, Мария Владимировна Кумаева, Софья Алексеевна Ярцева, Наталья Борисовна Дудорева, Дарья Ивановна Белова, Ольга Ивановна Хатанева ос мо̄т ма̄хум. А̄тимыг е̄мтум хо̄тпанув о̄с са̄в хансыгласыт: Иван Афанасьевич Меров, Степан Гоголев, Анфиса Михайловна Хромова, Николай Михайлович Садомин, Нина Петровна Вынгилева. Газета ва̄рнэ хо̄тпатн Мария Кузьминична Волдина ос Таисия Степановна Себурова акваг нё̄тсыг, ты ханты нэ̄г са̄в та̄л «Ханты ясанг» газетат рӯпитасы̄г. Я̄тил ма̄хумате̄нув, ма̄н «Лӯима̄ сэ̄рипос» газетат рӯпитан хо̄тпат, на̄нан ты ялпыӈ хо̄талыл янытлыянӯв! Потрыт ма̄ньщи ла̄тӈыл хансэ̄н, редакциян ке̄тэ̄н. Газетав акваннё̄тхатым ва̄рилӯв, хансылӯв. Ща̄нь ла̄тӈувтыл потыртэ̄в те, газетав о̄лы те, ла̄тыӈте̄в мощ о̄с тах о̄лы, ма̄ янытыл мощ о̄с суйты. Пуссын пуста̄гыл о̄лэ̄н! На̄яны̄н-О̄тыраны̄н вос ӯргалаве̄н! Пус ка̄т, пус ла̄гыл! 1070 2014.02.21. Светлана РОМБАНДЕЕВА Ма̄ньщи ня̄врамыт ханищтан нэ̄. Ты хурит ма̄ньщи нэ̄ Светлана Савельевна Мерова по̄слым о̄лы. Ха̄льус район Саранпа̄вылн ялмум порат школан щалтсасум, тав ётэ хо̄нтхатыгласум. Светлана Савельевна тот рӯпиты, па̄выл ня̄врамыт ма̄ньщи ла̄тӈыл ханищтыянэ. На̄н ань тав потре ловиньтэлы̄н: Школат ам са̄тхуйпловит та̄л ты рӯпитэ̄гум, ня̄врамыт ма̄ньщи ла̄тӈыл потыртаӈкве ханищтыянум. Китыт классныл аквхуйплов класс мус ханищтахтан ня̄врамыт ща̄нь ла̄тыӈ урокын ёхталэ̄гыт. Ма̄н са̄всыр ла̄тӈыт ханищтэ̄в, стихотвореният, э̄ргыт. То̄ва ня̄врам ханищты, то̄ва ос ханищтаӈкве ат таӈхи. Па̄влынт ань ма̄ньщи ла̄тӈыл потыртан ще̄мьят о̄лэ̄гыт? Ань тамле ще̄мья мощща, аквакитыг. Юн аквписыг рущ ла̄тӈыл потыртэ̄гыт, таима̄гыс ня̄врамыт аты ха̄сэ̄гыт ща̄нь ла̄тӈыл потыртаӈкве. Наӈ ще̄мьянт юн ма̄ньщи ла̄тӈыл потыртэгы̄н? Омав ма̄ньщи ла̄тӈыл потырты ма̄н ётув, ам то̄ванакт о̄с потыртэ̄гум. О̄йкам о̄с ма̄ньщи, тав ётэ потыртыме̄н. Светлана Савельевна Хо̄сло̄х па̄вылт яныгмас, школат ос Саранпа̄вылт ханищтахтас. Омагеа̄тяге, Лидия Анатольевна ос Савелий Прокопьевич, са̄т ня̄врам о̄ньщигласы̄г. А̄тяныл хосат а̄тимыг е̄мтыс, оманыл ань ня̄враманэ палт Саранпа̄вылт о̄лы. Светлана Савельевна школа а̄стламе юипа̄лт Санкт-Петербург ӯсн минас, тот А. И. Герцен нампа университетт учителиг ханищтахтас. Тувыл ань такви ханищтахтам школатэ̄т ты рӯпиты. Тав ла̄внэ̄тэ щирыл, школат ня̄врамыт ёт рӯпитаӈкве таве̄н мӯсты. Ос хумус ат мӯсты? Тав ща̄нь ла̄тӈе ос ма̄ньщи о̄лупсав ёмащакв ва̄гтэ, мире э̄руптытэ, ла̄тӈе янытлытэ. Светлана Савельевна хо̄тпа нупыл сымыӈ нэ̄, тамле нёмса, ка̄ркам э̄лумхо̄лас. «Лӯима̄ сэ̄рипос» газетав ялпыӈ хо̄талэ кастыл, ма̄н ты я̄тил ма̄ньщи нэ̄те̄в янытлылӯв! Пуста̄гыл вос о̄лы, На̄янэ̄н-О̄тыранэ̄н вос ӯргалаве! 1070 2014.02.21. Светлана РОМБАНДЕЕВА Ло̄пмус па̄выл пыгрищ. Ты хурит ма̄ньщи пыгрищ по̄слым о̄лы Ваня Албин. Тав Ха̄льӯс район Ло̄пмус па̄вылт самын патыс, тот о̄лы. Ваня Рита а̄кве̄н янмалтаве, оматэ хосат а̄тимыг е̄мтыс. О̄выл нила классытт тав Ло̄пмуст ханищтахтас, э̄лаль ос Кульпас школан ханищтахтуӈкве ке̄твес. Тот ань нёлолов классыт ханищтахты, интернатт о̄лы. Ваня ань нилахуйплов та̄лэ то̄влыс, Саранпа̄вылн паспорт ва̄руӈкве ёхталас. Таве тот ва̄щинтаслум, потрамасме̄н, ня̄врамакве по̄слыслум. Ваня ла̄внэ̄тэ щирыл, школат ханищтахтуӈкве ёмас, тав классэ̄т атхуйплов ня̄врам ханищтахты. Ты я̄тил ма̄ньщи ня̄врамакве пуста̄гыл вос о̄лы, То̄рум ёт, О̄тыр ёт вос о̄лы, вос яныгми. 1070 2014.02.21. Анна АЛГАДЬЕВА Ке̄расколыӈъя а̄гииг (Со̄лиӈыг о̄лум ва̄рмаль, атхуйпловкем э̄рыӈ ос тыгыл са̄внув та̄лыг е̄мтыс). Акв па̄вылт кит ма̄ньщи а̄гииг о̄лсы̄г. Наманэ̄н Аннэ ос Лена. Акв ва̄тихал тэ̄н акванялантасы̄г, пил ва̄тым, ла̄хс атым во̄рт ха̄йтыгтасы̄г. Аквнакт ӣтипа̄лаг акв а̄гирищкве тэ̄н палтэ̄н щалтапас, ла̄ви: «Паль хотоигпас, ква̄лгыӈ та̄гыл кӯтьвытн сып ёлыпа̄лн та ня̄влувес». Паль Аннэ тав ягпыге во̄раян а̄мпе о̄лыс. Ягпыге ты торыг юн а̄тим о̄лыс, ще̄мьяӈ та̄гыл о̄ныпе палт мӯйлым яласас. Колэ, кӯтьванэ Аннэн уральтаве̄сыт. А̄гииг кон ква̄лапасы̄г, хӯнтлэ̄г. Со̄ль, сып ёлыпа̄лт кӯтювыт та хортнэ суяныл. «Ятаты, ань кӯтюв ква̄лгыӈ та̄гыл минас, ул ёл та тагапас, ул вос пурнуве». А̄гииг молях а̄стапасы̄г, тув та ха̄йтэ̄г. Минаме̄н порат Аннэ ща̄не̄н ла̄всас кос, тав ёмщакв ат торгамтамтэ, хоталь а̄гияге тахасы̄г. Минаме̄н мус акв а̄гитэ колэ̄н масхатуӈкв ха̄йтталас, ма̄нь писале матрыг ёт а̄лмаямтэ. Па̄выл ёлыпа̄лт Ке̄расколыӈъя о̄втахты ос посыӈ витуп со̄с о̄лы, Ке̄расколыӈъя̄н паты. Со̄с ӯлтта я̄ по̄х ня̄лиӈ лё̄хъяс о̄лы, мо̄лты па̄выл ущ ва̄рим ляпат Ке̄расколыӈъя по̄х суитт Аннэ ща̄не щёпыр ня̄лит о̄ньщас. Ань та лё̄хъяс хосыт а̄гииг та ха̄йтэ̄г. Ха̄йтэ̄гха̄йтэ̄г, ляпан ат ёхтэ̄г. Акв э̄ла, акв э̄ла кӯтьванэ̄н та патантэ̄гыт. Ха̄йтсы̄гха̄йтсы̄г, торгамтастэ̄н, кӯтьванэ̄н матыр ня̄влэ̄гыт. Ла̄ве̄г: «Мощ тотнув ты кос суйтэ̄гыт, тув нэ̄гылттахтыглыме̄н, маныр хортаве». Я̄н ва̄глыгпасы̄г, хӯсы ха̄ль хосыт я̄ ӯлтта ха̄йтсы̄г, ма̄нь ня̄р во̄ӈха хосыт тахасы̄г. Мощ тотнув, йӣв щахылт ты суйтэ̄гыт. Тувле тэ̄латэ̄н а̄ти, акв кӯтьве̄н тэ̄натэ̄ныл э̄ла ат сэ̄ты. Халэ̄нт потыртэ̄г: Хотьютаме̄н па̄тамты? Наӈ писалиӈ, наӈ и па̄тлуптэн. Тыхал хӯнтала̄лэ̄г, матыр товсакв саквалан ат суйты. Хунь со̄рп хортаве, паль йӣвыӈ ма̄н ке е̄мты, товсаквыт сакваланэ̄ныл суйтэ̄гыт. Ты нэ̄матыр ат суйты. Кӯтювыт лэ̄ганыл во̄пыстэ̄гыт. Ос ляпаннув минасы̄г. Аннэ а̄ла ля̄втуӈкв патыс: «Нэ̄матыр а̄тим, аман ня̄р лэ̄гп лэ̄ӈын я̄сса ты янытва̄гыл лоӈхитахтэ̄гыт». Лена та порат ла̄ви: «Во̄рто̄лно̄йка? » Сома акватэ̄н китыглытэ̄н. Аннэ ос та порат самаге но̄ӈхаль патсы̄г, ла̄ви: «Ага». Ювле кос а̄ӈкваты, акватэ тай ла̄глаге щё̄приныл вуйлыяге. Акв юипа̄лт нас вущкасахтыгласы̄г, сома туп во̄тн тотвесы̄г. Ня̄р во̄ӈха хунь хультыгпас, ул ат мосталастэ̄н. Акв та хӯсы ха̄ле̄н ёхтыгпасы̄г, хотьют кит щёс суй та та̄ратас, ня̄лахтас. Ёлротмапасы̄г. Тай ос аман хотьют? Лэ̄гыӈ утыт ло̄йгын ма̄ныл по̄йтыгпасыт. Насати, ягпыге̄н о̄с кӯтюв хортнэ ма̄н ха̄йтум. Тэ̄н минаме̄нт ягпыге̄н кол сыст са̄гырхатас. Тав, насати, Полум ма̄хум са̄лы та̄ртан лё̄х хосыт ха̄йтум. Унсах хосыт я̄ ӯлтта унсыгтам, я̄ мо̄т па̄лыл а̄мпанэ юипа̄лт минам. Ань ка̄ркам китыг тай ат ва̄гтэ̄н, маныр ва̄руӈкв. Аман юв ха̄йтуӈкв, аман акв тув лаквхатуӈкв. «Нумын ӯнлум уткапае̄н омаке̄тэ ке нэ̄глы? Тай матыр та е̄мты » Халэ̄нт ла̄ве̄г: «Хатэ, сар, кисувла̄лыме̄н. Хотьют о̄лы, ювле тах кисувлы». Со̄ль, хотьют ювле та кисувлас. Акватэ паляге̄н ат агты, ла̄ви: Наӈ о̄с кисувла̄лэн. Э̄рыӈ, ӯйрищ ро̄ӈхи. О̄с та суяще̄г. Аквматэ̄рт хӯнтлэ̄г, хотьют ла̄ви: «Тыг яе̄н». Яныг сам хартым, тув та минэ̄г. Ляпан ёхтуӈкв патсы̄г, ягпыге̄н ля̄льт нэ̄глыс. Тэ̄н о̄выл ла̄тӈе̄н – манах? Ягпыге̄н ла̄ви: Китыг оясы̄г. Нэ̄н ос маныр тыт ва̄регы̄н? Ме̄н кӯтюв хортнэ ма̄н йисме̄н, Паль ква̄лгыӈ та̄гыл ёлтагапи, номсыме̄н. Оям китыг тай а̄гииг. То̄ва ма̄хум, хо̄т маныр во̄псата̄лы, тувле суй та та̄раты, та новитэ па̄тлуптаӈкв. Ань во̄рн ялум ма̄хум юв ёхтысыт. А̄гииг тай ща̄нена̄квен мощ та та̄ӈвесы̄г, такыщ ла̄ввесы̄г. Мо̄тынтыг хоталь ат э̄ри, тэ̄нкинатэ̄н ул вус тотытэ̄н. Маныр ат е̄мты. Ягпыге̄н яныг ягпыге во̄выс, о̄с аквта ма̄тэн минасы̄г, а̄пщике̄тэ̄н э̄рнэ щирыл щё̄питастэ̄н, юв тотастэ̄н. А̄лпыл ёмщакв пӯрласаныл, тэ̄пыӈ пасаныл ва̄рыгласаныл, ос ущ парласаныл. Ты ма̄хум то̄нт иӈ аюмкитум о̄лсыт. Во̄рто̄лно̄йка наска̄ссыг ва̄гылттаӈкв о̄с ат ро̄ви. Таве̄н пӯрлахтын ут, йир э̄ри. Ке̄расколыӈ па̄выл ань щар сытамыг е̄мтыс, кит о̄лнэ кол туп о̄лы, пилва̄тно̄йкатво̄рто̄лно̄йкат па̄вылн нэ̄глалаӈкв патсыт. Ла̄хс атуӈкв минэ̄гын, о̄с нэ̄глуӈкв ве̄рмаве̄н. Таве ат ке новилы̄н, тав о̄с ат новхаты. Тох та во̄р кӣвырт ма̄ньщиянув о̄лэ̄гыт. Паль – сэ̄мыл ман хопсат палиӈ я̄ӈк кӯтюв тох намтаве; Хӯсы ха̄ль – ёлхӯсылам, ёлпатум ха̄ль. Ты потырт ха̄ль я̄ ӯлтта патум; Ла̄глаге щё̄приныл вуйлыяге – пе̄лпыщ ха̄йты; Та̄ӈвесы̄г такыщ ла̄ввесы̄г; Полум ма̄хум са̄лы та̄ртан лё̄ӈх хусахкем та̄л ювле ка̄сыӈ таквсытӯя Полум ма̄хум иӈ Ке̄расколыӈъя̄ па̄выл та̄ра са̄лыяныл по̄сгалым яласасыт. Ань са̄лыт холасыт, са̄лы по̄сгалам ма̄хмытныл о̄с нэ̄мхотьют а̄тим. Туп са̄лы та̄ртан ма̄наныл ос яласам лё̄ӈханыл наманыл хультсыт. 1070 2014.02.21. Светлана РОМБАНДЕЕВА Тав ма̄навн ань ты хо̄тал мус нё̄ты. Ханты-Мансийск ӯст о̄лнэ ханты нэ̄ Таисия Степановна Себурова ре̄тыӈ ю̄свой э̄тпос 23 хо̄талэ̄т самын патыс. Ты та̄л са̄тлов нупыл атыт та̄лэ то̄влы. Тав «Ханты ясанг» газетат ва̄т арыгтем та̄л рӯпитас, кӯщай ва̄ӈын нэ̄г о̄лыс. Таисия Степановна Ха̄льӯс район Тугияны па̄вылт 1949 та̄лт самын патыс, тот яныгмас. Оматэ Матрёна Григорьевна, атятэ Степан Леонтьевич. Э̄кваго̄йкаг хосат а̄тимыг е̄мтсы̄г. Акв э̄щ о̄ньщи, наме Елизавета, Нижневартовск ӯст ще̄мьятэ ёт о̄лы. Школа а̄стламе юипа̄лт, Таисия Степановна Ленинград ӯст о̄лнэ А. И. Герцен нампа институтт ханищтахтас. 1972 та̄лт институт а̄стламе юипа̄лт Ванзеват па̄вылн минас, школат ня̄врамыт ханищтас. Та юипал та̄л Ханты-Мансийск ӯсн ва̄нтлыс, ханты мир «Ханты ясанг» нампа газета редакциян рӯпитаӈкве патхатас. О̄влэ̄т ла̄тыӈ толмащлан хо̄тпаг о̄лыс, рущ ла̄тӈыл ханты ла̄тӈыг мо̄йтыт ос потрыт толмащлас. Ётылнуве корреспондентыг, тувыл ответственный секретариг рӯпитас. Са̄в та̄л газета кӯщай ва̄ӈын нэ̄г о̄лыс. Хо̄тпан та̄лэ то̄влуме юипа̄лт пенсиян минас. Таисия Степановна ща̄нь ла̄тӈе э̄руптытэ, янытлытэ. Ва̄рум рӯпататэ сака ёмащакв ва̄гтэ, мӯсхал щирыл ва̄рыстэ. Тав акваг са̄в рӯпитас. Ань газетанылт туп ёмас ос мӯтраӈ мо̄йтыт, потрыт вос хансавет, ханты ла̄тӈыл э̄рнэ щирыл вос хансавет, тув туп ёмас хурит вос по̄славет – ты урыл тав акваг номсыс, сыме ща̄ргыс. Ма̄н ма̄ньщи газетав, «Лӯима̄ сэ̄рипос» газетав, ма̄гыс о̄с сыме сака ща̄ргыс. Газета ва̄рнэ хо̄тпатн акваг нё̄тыс, акваг китыглахтас, потыр то̄вылхаты ман а̄ти, газета ва̄рнэ̄тэ ма̄гыс щё̄питавес ман а̄ти, э̄рыӈ матыр нё̄тмил э̄ри, акваг китыглахтас. Ханты ман ма̄ньщи газетат ущ рӯпитаӈкве о̄вылтахтам хо̄тпан о̄с акваг нё̄тыс, газета ва̄руӈкве ханищтастэ, э̄рнэ тэ̄лат хӯлтыглас. Газетат рӯпитаме коныпал тав педучилищат ос медучилищат ханищтахтан ма̄ньлат ма̄хум ханты ла̄тӈыл ханищта̄лсанэ. Радио хосыт о̄с потырта̄лыс, мо̄йтыт ос потрыт ханты ла̄тӈыл потырта̄лсанэ. Сака номтыӈ, мӯтраӈ хо̄тпаг о̄лнэ̄тэ ма̄гыс, 1982 та̄лт тав СССР журналистыт Союзаныл палт вуйвес. Рӯпитаме сыс са̄в почётный грамотатыл ос благодарственный пищматыл майлувес, са̄всыр мӯйлупсатыл мӯйлупта̄лвес. Таисия Степановна хо̄тпа нупыл сымыӈ э̄ква, нёмса, сэръёр э̄лумхо̄лас. Венгрия ос Финляндия учёный хо̄тпатн тав о̄с сака э̄руптаве. Са̄в та̄л тэ̄н Ева Адамовна Шмидт ёт юртыӈыщ о̄лсы̄г. Ты Венгр ма̄ныл намыӈсуиӈ учёный нэ̄ ма̄н ма̄вт соссаӈ мирагув халт са̄в та̄л о̄лыс, рӯпитас. Ты учёный хо̄тпав хосатнув а̄тимыг е̄мтыс. Нэ̄ Ханты-Мансийск ӯсн ёхталаме порат, акваг Таисия Степановна палт хо̄иглас. Аквъёт рӯпитасы̄г, э̄рнэ нэ̄пакыт хассы̄г, ханищтахтасы̄г. Ева Адамовна ханты ос ма̄ньщи ла̄тӈыл ёмащакв потыртас, пе̄с ла̄тӈыт ва̄с, пе̄с о̄лупса та маныр ханищтым о̄лыс. Мо̄т учёный ма̄хум Таисия Степановна палт ва̄тихал ёхталэ̄гыт, ханты о̄лупса урыл китыглахтэ̄гыт, тав ётэ пе̄с ла̄тӈыт толмащлэ̄гыт. Тав ань ат рӯпиты, пенсият о̄лы. Ос юн нас ат ӯнлы, ханты ла̄тӈыл нэ̄пакыт хансы, мо̄йтыт акванаты, нэ̄пакыг та̄ратыянэ. Ма̄н ос ань ты хо̄тал мус таве китыглылӯв, матыр китыглахтан ла̄тыӈ о̄ньще̄в те, та̄ра таве̄н звонитэ̄в. Таисия Степановнав сома ӯрхаты, хунь ма̄н матыр урыл китапахтэ̄в, тав ма̄навн пуссын ла̄ви, пуссын потырты. Мо̄лты та̄л тав дача кол ёвтыс, тӯя па̄сныл таквсы мус тот тэ̄пкант матыр ӯнтты, янмалты. Ӯсыӈ ма̄т акваг о̄луӈкве та̄рвитыӈ, тот ос матыр ва̄рнэ̄тэ те̄пыл, во̄рыӈ ма̄т мощ сакати ӯщлахты, сыстам лылые̄пыл лылты. Ма̄н, газетат рӯпитан ма̄хум, ты я̄тил хо̄тпав намхо̄талэ̄т сымыӈыщ янытлылӯв! Са̄в ёмас ла̄тыӈ таве̄н ла̄ве̄в, пуста̄гыл вос о̄лы, со̄тыӈыщ вос о̄лы! На̄янэ̄н-О̄тыранэ̄н вос ӯргалаве! 1070 2014.02.21. Тамара МЕРОВА Ёмас тэ̄ланыл ма̄гыс наманыл ка̄стыянӯв. Ты потрумт ам ма̄ньщи ла̄тӈыл щар о̄выл ля̄ххалыт хансум хо̄тпат о̄вылтыт хансэ̄гум. Ам «Ленин пант хуват» 1959 та̄лт та̄ратым пе̄с газетат сунсыгламум порат ханты ла̄тӈыл хансум потрыт коныпал ма̄ньщи ля̄ххалыт о̄с хо̄нтсум. Та̄н Ханты-Мансийский педучилищат ханищтахтам а̄гитнпыгытн хансыглымат. То̄нт са̄в потыр Иван Меров ос Пе̄тр Шешкин хассы̄г. Иван Меров Хо̄сло̄х па̄вылныл о̄лыс, тав Афанасий а̄ще Мувыӈкес па̄влыӈ хум. А̄ще 1938 та̄лт репрессировайтавес ос Омск ӯст порславес. Ос Ульяна ща̄не а̄ги о̄парищ наме, ла̄ве̄гыт, Монина о̄лыс, сампыльтал нэ̄. Э̄кваго̄йкаг Па̄ял, Прасковья ос Иван ня̄враманэ̄н Хо̄сло̄хт янмалтасанэ̄н. Иван Ханты-Мансийский педучилищат ханищтахтаме юипалт Ленинград ӯсн э̄лаль ханищтахтуӈкве о̄с ялум. Ты о̄вылтыт а̄нумн ань Светлана Щербинина Череповец ӯсныл ла̄тыӈ хансыс. Иван тув 1962 та̄лт Евдокия Спиридонова нэ̄тэ ёт минамы̄г, нэ̄тэ филологический ос тав математический факультетыт ханищтахтасы̄г. Тувыл институт сас ат а̄стламыг, акваг ювле нупыл номсысы̄г. Тот лӯи ма̄ныл ёхтум студентыт, тыи 24 хо̄тпа, пуссын акв колнакт о̄лсыт. Ма̄ньнув колнакыт туп матыр а̄гм о̄щнэ хо̄тпат я̄нас о̄луӈкве та̄ртве̄сыт. Тот акв та̄л ханищтахтаме юипа̄лт Иван Ханты-Мансийскат хультыс, Евдокия кит та̄л туп ханищтахтас ос хумитэ палт та минас. Тав тот «Югория» нампа радиокомпаният передачат ва̄рыс, «Потырты Спиридонова» тох потре о̄вылта̄лыстэ. Иван Меров рущ ля̄ххалыт ос стихыт ма̄ньщи газетан толмащласанэ. То̄ва потрыт Ульяна ща̄не ос Евдокия Мерова нэ̄тэ намыл хансым хо̄нтсанум. Тав ща̄не самаге пусмалтан ма̄гыс ӯсн тотыгламе. Ётыл э̄кваго̄йкаг хотталь Касум па̄вылн ва̄нтлысы̄г, тэ̄н Вика а̄ги о̄щсы̄г. Во̄ссыг нэ̄матыр ма̄н ат ва̄глув, ань а̄гитэ̄н хо̄т хо̄нтнувув ке, такем ёмас о̄лнув. Иван акв ляпа рӯтэ, Галина Кокорина а̄ӈква̄гитэ Саранпа̄вылт о̄лы, тав о̄с мощща ва̄г. Ханты-Мансийскат аквнакт акв матумпа̄ла э̄ква ёт акванхо̄нтхатыгласме̄н, о̄парищ намум хӯнтамластэ ос ам ётум мощ потыртас. Тав педучилищат Иван ва̄ме, ла̄ви, ёмас, номтыӈ хо̄тпаг о̄лыс. Са̄в потыр Пе̄тр Шешкин ма̄ньщи газетан хансыглас. Пе̄тр Ефимович Ло̄пмус па̄вылт самын патыс. Ма̄ньщи ла̄тӈыл хансум потранэ сака пӯмщит, тав «Русскомансийский словарь» щё̄питас, 642 ма̄ньщи ма̄хум пословицат ос поговоркат, 85 а̄мщит атыс ос нэ̄пакын хассанэ. Хансат о̄с ёмщакв ханищтасанэ ос та̄н ётыл альбомын по̄слуве̄сыт. Шешкин о̄лме̄т, йӣвныл са̄всыр щаӈквыт ма̄щтырлас, ань то̄ва йӣв хуриянэ са̄всыр музеитт ӯргалым о̄ньщавет. 1989 та̄лт «Лӯима сэ̄рипос» ма̄ньщи газета я̄насыг ва̄рим порат тот Наталья Сайнахова Сӯкыръяныл рӯпитас. Тав ма̄ньщи ма̄нь па̄влытн ялантас, тувыл ля̄ххалыт, потрыт, мо̄йтыт тотыглас ос та̄наныл газетан хансыгласанэ. Ханищтахтан ня̄врамыт ма̄гыс са̄всыр учебникнэ̄пакыт щё̄питаӈкве э̄рыс. Таима̄гыс тав повышение кадров институтн научный хо̄тпаг э̄лаль рӯпитаӈкве во̄ввес ос тот нэ̄пакыт, словарикыт щё̄питас. Аквтох ма̄ньщи газетан потрыт Николай Михайлович Садомин ос Анфиса Михайловна Хромова хассы̄г. О̄йка Та̄гт па̄вылныл ос э̄ква Сортыӈъя па̄вылныл о̄лсы̄г. Николай Садомин «Пася, рума! » акв потре я̄нас нэ̄пакыг ва̄рвес. Тувыл о̄йка то̄ва потранэ радио хосыт потырта̄лсанэ, ня̄врамыт ханищтан нэ̄пакыт щё̄пита̄лыс. Финныт ма̄гыс Библияпотрыт ма̄ньщи ла̄тӈыл толмащлаӈкве нё̄тыглас. Юио̄выл та̄лэ о̄лме порат Николай Михайлович Ханты-Мансийскан ёхталас. Тав редакциян щалтсас, хоса потыртасме̄н. Ос ётылнув такви ка̄тыл хансум библияпотрыт тотсанэ ос ла̄выс, амки палтум вос хультуптыянум. Анфиса Михайловна газетавн войнан ялум, матум хо̄тпат о̄вылтыт потрыт хансыглас. Та̄гт па̄вылт «На̄й-О̄тыр ма̄» ва̄рум музее ань тыг мус рӯпиты. Школат а̄гитпыгыт пальсакыт, турло̄псыт хартуӈкве ханищтасанэ, тувыл ялпыӈ хо̄талыт порат та̄н ма̄ньщи йӣквыт йӣквсыт, э̄ргыт э̄ргысыт. 1070 2014.02.21. Александр ВЬЮТКИН Ла̄тӈув э̄лаль тотнэ а̄гитпыгыт. Ты тув «Ма̄нь ӯскве» ня̄врамыт ӯщлахтын ма̄ хус та̄лэ то̄влы. Ты пӯмащ та̄ланэ янытлан кастыл щё̄питым о̄лыс. 2013 та̄лт Департамент общественных связей грант олннё̄тмил винэ щирыл ты пӯмащ номылматым о̄лыс. Ты ва̄рмаль ма̄н, «Ма̄нь ӯскве» ня̄врамыт ӯщлахтан ма̄т рӯпитан ма̄ньлат ма̄хмыт, ва̄рыгласлӯв. Номылматым пӯмщув «Во̄рщик питииг» намтыслӯв. Ты нам «Ма̄нь ӯскве» флагт во̄рщик ӯйрищ хорамыл ю̄нтым о̄лы. Таима̄гсыл ты э̄лаль ва̄рум ва̄рмалюв тамле намыл пиныслӯв. Яласан ма̄гсыл вуйлум грант олныл мощнув ат то̄влувесӯв. Олнанув ёмщакв вос то̄вылхатэ̄гыт, ма̄н ма̄нти халувт олныл пинхатым нё̄тхатсӯв. Янгема̄не пуссын аквъёт ва̄т нупыл акв хо̄тпа ӯсыт ос па̄влыт халт ва̄нтлысӯв. Халувт щар янгыг М. С. Мерова о̄лыс, щар ма̄ньлат ос Коля Семяшкин. Кӯщаитныл Н. Г. Алексеева ма̄навн нё̄тым яласас. Тувыл «Ма̄нь ӯскве» ня̄врамыт ӯщлахтын ма̄наныл тармыл кӯщаиг о̄лнэ нэ̄ Л. П. Стаканова яласас. Ма̄н, яласан ма̄хум, халанувт аквъёт пуссын ёмащакв ва̄йхатэ̄в, юртыӈыщ о̄лэ̄в. Ты, улпыл, таима̄гыс лё̄ӈхув та̄рвитэ атыпыл торгамтаслӯв. Ат хо̄тал сыс лё̄ӈхув палытэ акв со̄тыра нёлолов са̄ттем ве̄рыстаг хультыс. Ӯсыт ман па̄влыт халт ма̄н хӯрум машинал яласасӯв. О̄влэ̄т Саранпа̄выл ма̄хманув Павел Артеев ёт Приобье па̄выл мус йигмыгтасыт. Ма̄н ос мо̄тыт хо̄талт та̄н ётаныл хо̄нтхатнэ ма̄гыс Ханты-Мансийск ӯсныл тит машинал минмыгтасӯв. Хо̄талъя̄т порат акванхо̄нтхатасӯв. Приобье па̄вылт тэ̄пъяламув юипа̄лт та̄ра Белоярский район нупыл А̄с я̄ ӯлтта ханты ма̄ нупыл минмыгтасӯв. Касум па̄выл мус нила щё̄с минасӯв. Тув миннэ лё̄ӈхе састум, йильпииг ёмащакв щё̄питыма. Ам тув ялмумт хӯрум та̄лыг е̄мтыс. Та порат лё̄ӈханыл тэ̄лы яласан во̄р лё̄ӈх хурипаг о̄лыс. Ань та лё̄ӈхе атыпыл хащхаты. Э̄типа̄лаг тӯрманлан э̄лыпа̄лт Касум па̄вылн ущта ёхтысӯв. Тот та̄ра йильпииг ва̄рим музей коланылн во̄ввесӯв. Музеяныл па̄выл оигпан во̄р щахылт ӯнттым о̄лы. Пе̄с пора о̄лупса суссылтан кол пӯсасэ пе̄с хольт тольхыӈ о̄вланылт сома но̄хтӯщтым норыл ва̄рим о̄лы. Тув ляпан ро̄влахтамув порат, аквтупмат со̄ль, пе̄с пора па̄вылн ёхтысӯв. Музеяныл ёмас нё̄тнэ колыг ӯнттыма. Касум па̄вылт о̄лнэ «Нумсаӈ ёх» ня̄врамыт ёт ма̄н хосат юртыӈыщ о̄лэ̄в. Ка̄сыӈ тув акванёхталэ̄в. Таима̄гсыл ма̄н та̄н палтыланыл ёхтумув порат, па̄выл ня̄врамыт музей колт о̄лсыт. Ма̄н ётув ва̄щинтахтын кастыл та̄н ханищтан хо̄тпаныл ма̄н палтув во̄вхатасыт. Тот та̄н ма̄нав хо̄тал палыт ӯрсаныл. Ма̄н, тув ёхтум мӯй ма̄хум, та̄ра яныг пасан ва̄тан исум ща̄й аюӈкв ӯнттувесӯв. Ща̄й аимав юипа̄лт э̄лаль ва̄рнэ ва̄рмалянув урыл потыртахтасӯв. «Нумсаӈ ёх» ня̄врамыт ӯщлахтын ма̄ кӯщаиг Е. Т. Федотова о̄лы. Елена Терентьевна ты ӯщлахтын ма̄ рӯпитаӈкв о̄вылтахтаме па̄сныл рӯпиты. Та порат тав нас воспитателиг о̄лыс. Таима̄гсыл тав ня̄врамытн сымыӈыщ э̄руптаве. Э̄типа̄лаг ма̄н музей колт ма̄нтте̄в хультмув юипа̄лт мо̄йтув суссылтан щирыл щё̄питаӈкв о̄вылтаслӯв. Хуньт хосат ма̄н таве титахтем щё̄с ёнгыслӯв, тувыл та. Ань ос йильпииг ёнгын ма̄гсыл таве ёмщакв щё̄питаӈкв э̄рыс. Нилахтем щё̄с поргысӯв, йӣквсӯв ос мовиньтасӯв. Мо̄тыт хо̄тал а̄лпыл па̄выл ма̄хманув ёхталаӈкв патсыт. Хо̄талъятт тэ̄пъяламув юипа̄лт суссылтапув суссылтаслӯв. Концертув палытэ акв щё̄сыг а̄ртмыс. «Ма̄нь ӯскве» ня̄врамыт ӯщлахтын ма̄т ва̄рыглан наканув суссылтамув юипа̄лт, ханты ма̄хманув нас астал ӯнлысыт. Хунь ма̄н та̄наныл титыглаӈкв патсанӯв, та̄н ла̄всыт: «Ма̄н ты мо̄йт урыл э̄лаль номсахтэ̄в. Юио̄выл порат нэ̄глынэ Даучун нампа хум ё̄вт ня̄лэ супыгсакватаме юипа̄лт, тав ётэ э̄лаль маныр е̄мтыс, ты урыл номсахтэ̄в. Таима̄гсыл ты ма̄н суйта̄л, номсахтым ӯнлэ̄в». Ма̄н мо̄йтув хунь а̄стыс, о̄влэ̄т та̄наныл ат торгамтасанӯв, маныр е̄мтыс. Манрыг пуссын астал ӯнлэ̄гыт. Потыртамув юипа̄лт, ущта пуссын та̄рапатыс. Та юипа̄лт молямтахтым пормасанув машинан та̄лттысанӯв, ма̄нти ӯнтсӯв, ювле акв та лё̄ӈхыл Нягань ӯс нупыл та минмыгтасӯв. Тот ос Кадетский корпус нампа армият лусытан ня̄врамыт ханищтахтын колт мо̄йтув суссылтаслӯв. Та коланыл во̄рыӈ ма̄т о̄лы. Тот о̄с са̄в мир о̄лыс, та̄н халанылт ма̄ньщит ёхталасыт. Та̄н ла̄всыт: «Ма̄н ты суссылтап урыл мо̄лхо̄тал ущта ла̄ввесӯв. Са̄ртынув те ты ля̄ххал хӯлсӯв, са̄внув ма̄ньщи ёхтынув. Ты ма̄ньщит ма̄н о̄с ва̄ганӯв, акванпотыртахтасӯв, тыг вос ёхтэ̄гыт». Хо̄тыл торыг ма̄н та̄ра мо̄йтув суссылтаслӯв. Мо̄йтув суссылтамув порат яныгпа̄лаг о̄лнэ ма̄хум самвитаныл вотымта̄лым суссыт. Концертув оигпаме юипа̄лт ма̄хум ма̄н ётув ва̄йхатаӈкв, по̄слахтаӈкв ква̄лапасыт. Ма̄ньнув ня̄врамыт ёт ос туслы ёныг ёнгуӈкв «Ма̄нь ӯскве» ня̄врамытын ханищтаве̄сыт. Акв та хо̄талт э̄типа̄лаг ма̄н Урай ӯс нупыл минмыгтасӯв. Тув ёмщакв турманлан порат ёхтысӯв. Тот ма̄н Силава нампа пе̄с ма̄ньщи па̄вылт э̄т хӯлсӯв. Та па̄выл Урай ӯсныл мощ по̄хатнув о̄лы. Ӯсныл та па̄выл мус лё̄ӈх палытэ нилахуйплов ве̄рыста. Тот ос тув па̄лыт ня̄врамыт ӯщлахтынэ̄ныл ма̄гыс «Юрсил» нампа ма̄ о̄лы. Кӯщаиг О. А. Фомичёва рӯпиты. Ольга Александровна та̄л палыт та па̄выл тармыл о̄лы. Тот ат ёмас нор кол ос акв пувлын кол о̄лы. Ёмас урамыӈ, карс тарыг йӣвыӈ ма̄т па̄выл о̄лы. Таима̄гсыл тӯяг па̄влэ яныг вит порат витын ат а̄мараве. Тэ̄лы порат тув ос нас ӯщлахтан ма̄хум ёхталаӈкв ве̄рме̄гыт. Хотьют во̄рыӈ ма̄т ёлпо̄йтсалуӈкв таӈхи те, манса̄вит хо̄тал о̄луӈкв ка̄сащи те, таса̄вит тот вос о̄лы, туп олн вос ойты. Ольга Александровна тох таквина̄тэ̄н олн сэ̄лы. Силава па̄вылт э̄т хӯлымав юипа̄лт Урай ӯсн минасӯв. Тот ма̄н ӯс библиотекат суссылтапув ва̄рыгласлӯв. Нэ̄пак ловиньтан колн ёхтысӯв, ма̄н ётув та̄ра тот о̄лнэ ма̄ньщи ма̄хманув ва̄йхатаӈкв о̄вылтахтасыт. Та̄н тот ща̄нь ла̄тӈувтыл щар ат потыртэ̄гыт. То̄ва яныгпа̄лаг о̄лнэ ма̄хум аквтит ла̄тыӈ ва̄гыт, тувыл та. Мо̄йтув суссылтамув юипа̄лт, та̄н ка̄тпатта ра̄тым хоса лю̄льсыт. Суссылтапувт ма̄н аквписыг ма̄ньщи ла̄тӈыл потыртасӯв, таима̄гсыл та̄нанылн хӯнтлуӈкв пӯмащиг о̄лыс. Тувыл ма̄н ва̄т нупыл акв хо̄тпа та̄ра Ханты-Мансийск ӯс нупыл минмыгтасӯв. Ханты-Мансийск ӯсн ма̄н э̄ти хӯрум щё̄с порат ущ ёхтысӯв. А̄лпыл ос ка̄тыл хӯрит по̄слын хум Г. С. Райшев палт мо̄йт суссылтапув суссылтан ма̄гсыл атхатсӯв. Яласан ма̄ньнув ня̄враманув лё̄ӈхыт ва̄гта̄л патсыт, но̄х ворил ква̄лттысанӯв. Ка̄тыл по̄слын ма̄щтыр хум колт ма̄н ёлы кол наке̄т мо̄йтув суссылтаслӯв. Мо̄йтув суснэ ма̄гсыл налыман ляпатем хо̄тпа ёхталас. Та̄н халанылт соссаӈ мир Ассамблея кӯщай хум Е. Д. Айпин о̄лыс. Суссылтапув сунсум ма̄хум ла̄внэ̄ныл щирыл, мо̄йтув а̄ртмыс, сунсуӈкв пӯмщиг о̄лыс. 1070 2014.02.21. Светлана Динисламова Ма̄хманув янытлыянӯв («Лӯима̄ сэ̄рипос» газетавт рӯпитан ма̄хмытн те̄тнэ ла̄тӈум). "Лӯима̄ сэ̄рипос" газетат рӯпитан хо̄тпат янытлэ̄в, Ёмас потранылномтаныл ма̄гыс на̄нан ӯлылэ̄в, Ма̄ньщи ла̄тыӈте̄в на̄н э̄лаль тотылы̄н, Хо̄тпа тӯпкам сым туп на̄н та ре̄гылттылы̄н. Нэ̄пак ка̄тыт пувим – ма̄н ё̄рыӈыг ё̄ме̄ва, Нэ̄пак ловиньтым – номтыӈыг е̄мтэ̄ва, Мо̄йтыт, потрыт ма̄навн аквписыг э̄ре̄гыт, Ма̄ньщи ла̄тыӈте̄ва щар палит та суйтэ̄гыт. Хоты ма̄т, хоты витт на̄н та яласэгы̄на, Са̄в лё̄хъясыт хосыт на̄н та ё̄масалэгы̄на, На̄н ма̄гсылын кол а̄вит ща̄гтым пусхатэ̄гыт, Ма̄ньщи хо̄тпате̄нув куньгим ӯрхатэ̄гыт. Пе̄с йис о̄лупсате̄в ул вос со̄ймалтахты, Ща̄ньа̄щ ла̄тыӈте̄в но̄х вос ялтуптахты, На̄н, я̄тил хо̄тпанува, торге̄н рӯпитэ̄на, Хӯнтамла̄лум потрытл акваг уртхатэ̄на. Ва̄т нупыл ат та̄л потрыт хансэгы̄на, Ва̄т нупыл ат та̄л нэ̄пакыт та̄ратэгы̄на, Мир о̄лнэ йис – тав нэ̄матыр ат тӯйты, Ла̄тыӈте̄в тыхо̄тал суиӈыщ иӈ суйты. Лӯима̄ сэ̄рипосныл хо̄тал о̄вылтахты, То̄нт Со̄рни хо̄талакве саге та̄рамлахты, На̄н э̄лаль о̄лнэ нотанын э̄л вос поступтавет, Мирув о̄щнэ мӯтрат ул вос ёрувлавет. Светлана Динисламова (Садомина), 2014 та̄л. 1070 2014.02.21. Людмила ТЕТКИНА Та̄л сыс та̄н са̄в ща̄гт мирн тах тотэ̄гыт. Ты э̄тпос атыт хо̄талэ̄т Сургут ӯст округ янытыл о̄лнэ ма̄хум Культура та̄л янытлаӈкве акванатхатыгласыт. Та̄л сыс ма̄нь па̄вылкве̄т манос яныг ӯсытт яныгса̄т арыгкем са̄всыр суссылтапыт, фестивалит, ялпыӈ хо̄талыт ва̄рыглаӈкве патавет. Надежда Казначеева, культура департаментыт кӯщай нэ̄, ты ва̄рмалит урыл ля̄ххал тотнэ ма̄хумн потыртас. Ань округувт 15 со̄тыра арыгкем э̄лумхо̄лас 460 культура колтт рӯпитэ̄гыт. Тав ла̄вме щирыл, Культура та̄л янытлаӈкве та̄н пуссын мӯсхалыг щё̄питахтасыт. Та̄л сыс нас э̄ргуӈкве манос йӣквуӈкве та̄н ат патэ̄гыт, тыт о̄лнэ мирн та̄н са̄всыр ща̄гт тах тотэ̄гыт. Ос таи ёмас, ань культура ат ёрувлаве, тамле тэ̄ла нупыл са̄в олн та̄ставе. Округувт «Развитие культуры и туризма в ХМАО-Югре» нампа программа пирмайтавес. Ань онтолов йильпи культура кол тах ӯнттаве, 2014 та̄л сыс Октябрьский ос Сургутский районыгт хӯрум клуп кол ӯнттын ма̄ныл моще̄рт тах а̄ставет. Ре̄тыӈ ю̄свой э̄тпос 28 хо̄талныл Ханты-Мансийск ӯст «Дух огня» нампа кина суссылтан фестиваль рӯпитаӈкве о̄вылтахты. Ос мо̄т яныг тэ̄лат халт соссаӈ ма̄хум Мирхал фестиваляныл тах ва̄раве. Та 2013 та̄л Геннадий Райшев, ка̄тыл хурит по̄слан хум, 80 та̄лэ то̄влыс. Таве янытлан кастыл ӯсувт научнопрактический конференция ва̄раве. Тув Москва, Санкт-Петербург ос мо̄т ӯсытныл са̄в ма̄хум тах ёхталы. Ты та̄л Сургут ӯс 420 та̄лэ то̄влы, Кондинский район 90 та̄лэ, окружной библиотека ос 80 та̄лэ то̄влы. Ты кастыл са̄всыр ма̄тт рӯпитан ма̄хум сыресыр ялпыӈ хо̄талыт ань щё̄питэ̄гыт. Кӯщай нэ̄ ос таи ла̄выс, ка̄сыӈ район манос яныг ӯст та̄нки я̄нас программа о̄ньще̄гыт, ты нэ̄пак хосыт та̄л сыс рӯпата ва̄руӈкве патэ̄гыт. 1070 2014.02.21. Тамара МЕРОВА Ща̄нь ла̄тӈув э̄лы хо̄н ма̄т о̄с ханищтаве. Ма̄н хосат та̄гыл Чилла Хорват ёт акванюрщхатым о̄лэ̄в. Ты венгр ма̄ньлат а̄ги. Тав Сегед ӯст университетыт ханищтахтаме̄т тыг Ханты-Мансийскан Югорский государственный университетн во̄выглавес. Ос ма̄н ма̄ньщи студента̄гиянув венгр ма̄хум палт ялсыт. ЮГУ колт Чилла ма̄ньщи ла̄тыӈ ос культура урыл пӯмщалахтас, ос ма̄нь па̄влыӈ ма̄н ма̄хманув палт мӯйлуӈкве мощщан ялыс. Тав ань Сегедский университет а̄стластэ ос тот э̄лаль рӯпитаӈкве патыс. Тот финноугорский ла̄тӈыт ханищтан кафедрат венгрыт ма̄ньщи ма̄хум тэ̄ланыл урыл о̄с ат ёрувлэ̄гыт. Чилла ва̄рмалянув о̄вылтыт ма̄навныл ва̄тихал пӯмщалахты. Тувыл та̄н палтаныл маныр пӯмыщ ялпыӈ хо̄талыт манос суссылтапыт ва̄рыглэ̄гыт, ма̄навн ля̄ххалыт хансы, ма̄навн тыи о̄с э̄ри. Аньмунт ам таве̄н тамле китыглахтын ла̄тыӈ ке̄тыгласум: «Венгрият о̄лнэ университетытт манах хо̄тпа ма̄ньщи ла̄тыӈ ханищтэ̄гыт? » . Чилла тувыл а̄нумн ювле хансыс, Сегедский университетыт ань ат хо̄тпа ма̄ньщи ла̄тыӈ ханищтэ̄гыт. Хӯрум студентыт мо̄т хо̄н ма̄ныл та̄н палтаныл ёхтысыт. Та̄н ма̄ньщи ла̄тӈув о̄с пӯмщалыяныл. Ты университет Каталин Шипёць ос Бернадетт Биро ма̄ньщи ла̄тыӈ ханищтан нэ̄г рӯпитэ̄г. Каталин ёт ме̄н о̄с ва̄йхатым о̄лыме̄н. Тав Санкт-Петербург ӯсн А. И. Герцен нампа университетн ёхталаме порат ла̄тӈув о̄вылтыт пӯмщалахтас, ме̄н Нина Вынгилева ёт та порат тав ётэ ва̄щинтахтасме̄н. Будапешт ӯст ханты ла̄тыӈ сургутский диалектыл потыртаӈкве студентыт ва̄тихал ханищтавет. Ка̄сыӈ китыт та̄лытыт а̄т хо̄тпа ма̄ньщи ла̄тыӈ о̄с ханищтэ̄гыт. Тот Марта Чепреги хосат та̄гыл ла̄тӈув ханищтан щирыл рӯпиты. Мо̄т институтанылт ман университетанылт ма̄ньщи ла̄тнув, культурав учёныитн о̄с пӯмщалавет ос тувыл та̄н наука нэ̄пакыт, потрыт хансэ̄гыт. Печ ӯст Габор Секей о̄лы, тав а̄ти сака хосат лӯсум ма̄ньщиянув палт мӯйлуӈкве ялыс. Ос Дебрецен ӯст акв аспирантка ла̄тӈув ханищты. Ма̄н ва̄глув, мо̄т финноугорский ма̄т ос Германият ма̄н мирув пӯмщалан хо̄тпат о̄с о̄лэ̄гыт. Таима̄гыс Чилла Хорват «Фейсбук» сайт нампа ищхӣпыӈ утыт акв ло̄пс ва̄рыс. Тав ты ло̄пс «In mansi way/ мансийским способом/ маньщи щирыл» намаим о̄лы, тав 2012 та̄л ма̄нь таквс э̄тпос хо̄тхуйплов хо̄талныл рӯпитаӈкве патыс. Тот ма̄ янытыл о̄лнэ ма̄хум ма̄н ща̄нь ла̄тӈув та̄нки ханищтаӈкве ве̄рме̄гыт. Потрыт пуссын ма̄ньщи, рущ ос английский ла̄тӈыл Чиллан хансавет. Ань китса̄т э̄лумхо̄лас ты ло̄пс сунсыглы ос потрыт ловиньты. Та ма̄хум халт яныгса̄т са̄вит хо̄тпа хо̄н ма̄ныл о̄лэ̄гыт, аквта са̄вит хо̄тпат Россияныл, са̄выӈпа̄лэ ма̄ньщит. Ма̄хум та̄нки халанылт щар ат ва̄йхатасыт, ань тот румалахтэ̄гыт. На̄н ань ты ва̄рмаль ва̄нэ̄г о̄с вос о̄ньщилы̄н, ищхӣпыӈ ут палт ты ло̄пс кинсэ̄лын. Тувыл на̄нки ос матыр ма̄нь потрыт, мо̄йтыт, хурит суссылтан ма̄гыс тув ке̄туӈкве ве̄рмегы̄н тах. Ты та̄л о̄с акв йильпи ло̄пс тот ка̄саласлум, таве Габор Секей ва̄рыстэ. Тав ань лӯсум ма̄ньщиянув палт ялум лё̄ӈхе урыл тот ля̄ххалыт хансы. Ма̄ньщи ла̄тӈыл хаснэ газетав о̄с пӯмщалаӈкве патвес. Анна Феньвеши акв мирхал проект щё̄питас, тав ма̄нав акваннё̄тхатым, аквъёт рӯпитаӈкве во̄выстэ. Ма̄н ва̄им, ка̄сащасӯв. Ма̄ньщи мирув, ла̄тӈув, пе̄с йис наканув иӈ са̄в нот э̄лаль вос о̄лнувыт. 1070 2014.02.21. Светлана Динисламова Ня̄врамыт ма̄гыс та̄ратым нэ̄пакыт. Та минам 2013 та̄лт А̄с-угорский институтт рӯпитан хо̄тпат ня̄врамыт ма̄гыс са̄в йильпи нэ̄пакыт та̄ратасыт. То̄ва нэ̄пакыт школат ханищтахтын ня̄врамыт ма̄гыс хансым о̄лэ̄гыт, та̄н хосытаныл ханищтан хо̄тпат урокыт э̄рнэ щирыл ос ёмащакв ва̄руӈкве ве̄рме̄гыт. То̄ва нэ̄пакыт ма̄нь ня̄врамыт ма̄гыс хасве̄сыт. Людмила Николаевна Панченко (Хозумова) нё̄тнэ азбука щё̄питас, тот ка̄сыӈ буква ёт хури по̄слым о̄лы, ты щирыл ловиньтаӈкв ат ха̄снэ ня̄врамыт букват моляхнув та̄рапаттыяныл ос номтыт о̄ньщуӈкве тах патыяныл. Людмила Николаевна институтт ань хо̄тыт та̄л рӯпиты, тав рӯпататэ ялпыӈ хӯлтупыт ос ро̄вта̄лут хӯлтупыт урыл ва̄ритэ. Тамле хӯлтупыт са̄всыр ва̄рмалит урыл о̄лэ̄гыт: Тя̄к а̄квув солил пувтуӈкве ат ро̄ви, хунь ӯринэ̄ква йӣв тальхын ӯнтылматы, яныг вит е̄мты, лю̄лиӈ во̄р карсыг ке сусхаты – ащирмаг ēмты, хо̄тал ӯнты, юн мовиньтаӈкве ман ро̄хтахтаӈкве – ат тайи, – а̄ныса̄н ул ро̄хсалтэ̄н – сымын э̄тгалаӈкве патаве. Тав потранэ сака пӯмыщ ловиньтаӈкве, ка̄сыӈ щёс матыра̄ти та̄рапатхаты, номылматахты. Титыт нэ̄ Мария Владимировна Кумаева ня̄врамыт ма̄гыс о̄с нэ̄пакыт хансы. Институтт тав лов та̄л рӯпиты, ты сыс Югорский институт ос аспирантура а̄стлас, ань мощще̄ртын наука диссертациятэ хансытэ. Мария Владимировна сака ка̄ркам хо̄тпа, аквписыг нэ̄пакыт та ловиньты, матыр та хансы. Научный рӯпататэ ма̄ньщи ла̄тыӈ урыл хансытэ, хумус мо̄йт мо̄йтнэ торыг мо̄тмо̄т ла̄тыӈ ля̄галаве. Мария Владимировна та̄ратам нэ̄паканэ̄т хурит по̄слым о̄лэ̄гыт. Тав нила ос атыт классыт ма̄гыс ма̄ньщи ла̄тыӈ ханищтан нэ̄пакыг, ма̄ньщи мо̄йтытпотрыт хосыт рӯпитан нэ̄пак хансыс. Маныр урыл ты мо̄йт о̄лы, манрыг мо̄йтыт тох хансым о̄лы, хотьют ёмас, хотьют лю̄ль ва̄рмаль ва̄ри. . Воспитателит ос ня̄врамыт ханищтан хо̄тпат ма̄гыс ты сака пӯмыщ ос э̄рнэ нэ̄пак. Татьяна Дмитриевна Слинкина институтт ловит та̄л рӯпиты. Тав сака номтыӈ нэ̄пакыт хансы, ты нэ̄пакыт ка̄сыӈ ма̄ньщи хо̄тпан ловиньтаӈкве пӯмыщ. Акв нэ̄паке ма̄вит намыт урыл хансыстэ, тот нё̄рыт, я̄т, тӯрыт, па̄влыт намыт урыл хансым о̄лы, хоты ма̄ хумус ма̄ньщи щирыл намаим о̄лы. Рущ ла̄тӈыл тамле намыт «топонимыг» ла̄вавет. Татьяна Дмитриевна рӯпататэ̄т ос пе̄с йис тэ̄рныӈ э̄ргыт толмащлыянэ, тувыл а̄мщит ос э̄ргыт акванатыянэ, нэ̄пакыг та̄ратыянэ. Светлана Динисламова ма̄ньщи ня̄врамыт ма̄гыс нила нэ̄пак та̄ратас. Ань тамле нэ̄пакыт ка̄сыӈ э̄тпос э̄лаль тах та̄ратаӈкве патавет, нэ̄пак намаим о̄лы "Витсам". Ты нэ̄квет пуссын А̄с-угорский институтт рӯпитэ̄гыт, та̄н научный сотрудникыг о̄лэ̄гыт. Ма̄ньщи ня̄враманув ма̄гыс институтт ты ма̄хумн нэ̄пакыт э̄лаль вос хансавет, са̄в пӯмыщ хурит тот вос по̄славет. 1070 2014.02.21. Анна АЛГАДЬЕВА Лӯски О̄тыр о̄йка (тэ̄рныӈ мо̄йт). Яныг тӯр паттат па̄ль ховтыӈ во̄р кӣвырт тэ̄нки па̄влыӈ Лӯски о̄йкагэ̄кваг о̄лсы̄гхӯлсы̄г. Аквнакт Сакв я̄ лӯи па̄лныл ё̄рныт ёхтысыт. Та̄н хӯрум по̄рал йисыт, лов ёлпа ха̄пыл товсыт. Та̄гт Сакв хал яласам ё̄рнын тыг сытамыл тотве̄сыт. Та хумияныл ма̄хманэ нупыл ла̄ви: Тытты кос тэ̄нки па̄влыӈ Лӯски э̄кваго̄йкаг о̄лэ̄г. Аман ань алапиягӯв манос ювле миннэ̄в мус? Та̄н Лӯски тӯр нирыӈ ва̄тат лё̄х о̄выл такос кинсыяныл, лё̄х о̄выл хо̄нтуӈкве ат ве̄рмияныл. Юио̄вылт Лӯски О̄тыр о̄йка такви на̄лув нэ̄глы ос ла̄ви: Хе, тямакыт ё̄рныт! На̄лми па̄лныл лё̄х сунт щар па̄тыскан хольт на̄ӈки. На̄н щёхрам атыӈ тӯлмах хольт лаквхатэгы̄н, лё̄х хо̄нтуӈкве ат ве̄рмилы̄н. Па̄г ща̄й аюӈкве ялэ̄н. Та̄н Лӯски э̄кван тахольт войкан хӯл ёхлыл, хорыл тыттуве̄сыт, ня̄рпум лӯптаӈ ма̄ньщи ща̄ил айтуве̄сыт. Ё̄рн Хо̄нт О̄тыр о̄йка такви тэ̄латэ ма̄гыс кол сысы мины, а̄ӈкваты: кол сыс сырт па̄лыгхалылам ё̄вт ос щакариӈ ня̄лыт ханэ̄гыт. Тав юв щалты, ла̄ви: Ты тӯр, во̄руй кӯщай о̄йкакве, мощ по̄сн ат па̄тлуптэ̄ва? Лӯски о̄йка сӯпне̄лмта̄л ос кӯньгащлым посыӈ па̄рт тӯщты. Акв ё̄рн о̄йка хищра ё̄втэ та хартытэ ос та па̄тамты ня̄лэ нуми па̄рт е̄рн сартумтахты, мо̄т хумитэ ня̄лэ па̄рт во̄ртыпал по̄хыл мины, хӯрмит хум ня̄лэ ёмаспал па̄рт е̄рныл сартумтахтым тахи. Тувыл Лӯски о̄йка па̄лыгхалылам ё̄втэ, щакариӈ ня̄лэ выг. Ос кол сыст лю̄льнэ акв питпа ва̄т тарыг нупыл хӯрум щёс пуӈк пины ос та па̄тамты – по̄с па̄рт щар ра̄выг саквалы. Ё̄рныт пуӈк ёлта̄ртым, ка̄ста̄л ос э̄ссамтым на̄лув ё̄мсыт. Сунсэ̄гыт, ха̄паныл, тӯпаныл матырмат сэ̄мыл ӯитн ха̄ӈхимат. Акв хо̄нт ё̄рн о̄йка Лӯски О̄тыр о̄йка палт ха̄йты: Пе̄та, пе̄та! Ты ма̄ӈ О̄тыр о̄йка, на̄лув ялэ̄н. Ма̄н ха̄панув манырсыр ӯитн ха̄хве̄сыт! Яныг о̄йка на̄лув ё̄манты, китхӯрум щёс саквалы сэ̄мыл ӯит хотталь та со̄ймысыт. Тав роттыг па̄г ё̄манты. Сэ̄мыл пуӈкуп ё̄рныт ха̄пн та̄лэ̄гыт, Сакв алгаль минмыгтэ̄гыт. Ос Лӯски О̄тыр о̄йка ювщалты, э̄кватэ нупыл ла̄ви: Э̄квакве, ам пуӈкум а̄ӈквата̄лэ̄лн. Хотмус такем та лощги. Юртэ ювле ла̄ви: Тамле ертыщма торыӈ нэ̄матыр ва̄рмаль ат о̄ньще̄гын? Хотыл йим та̄кманын? Тыкос ка̄сыӈ хо̄тал консыянме̄н. Лӯски э̄ква о̄йкатэ пуӈк са̄нс тармыл пинытэ ос пуӈке а̄ӈквата̄лытэ, ла̄ви: Тыт нэ̄матыр а̄тим. О̄йка пуӈке консащлым но̄хлю̄ли ос ты торыг номтын ёхтыгпаве: Ты щир ман ро̄ви? Илттыг тах ё̄рныт Сакв талях ма̄хум палт ёхтыгпе̄гыт, нэ̄мхотьют лылыӈ та̄гыл ат хульты. Тав аквта нерс тарге̄н но̄хха̄ӈхи ос я̄ нупыл а̄ӈкваты: ё̄рныт а̄лыматта̄л алгаль тове̄гыт, во̄ль паттан ты ёхтэ̄гыт. Тав акваг пуӈке та лощги, са̄всыр лю̄ль номтын патыглаве: «Лю̄ль ля̄ххал тах тэ̄лы. . Мир тах ла̄ве̄гыт: ягныга̄ӈквыл тэ̄лум Лӯски о̄йка ос хоталь сунсыс, тямакыт алгаль минаманыл порат. Аман самаге сыкварн лапминыглавесы̄г, аман во̄руй хӯлнэ пальасаге па̄ӈкыл лаптохрыглавесы̄г? Ятаты, юио̄вылт па̄лыгхалылам ё̄втэ ос напар хурипа ня̄лэ та выгтэ ос ё̄втэ та хартыстэ, та па̄тамты. Щакариӈмокариӈ ня̄лэ нумн ущ тэ̄лум э̄тпос хольт волята̄лы. Тав ё̄рн по̄рат халт ёл та томраты, ёл паты. Ё̄рн яныг Хо̄нт о̄йка, та̄н кӯщаяныл, китыглахты: На̄н ос манрыг э̄лаль ат товегы̄н? ! Тэ̄лата̄л вит тармыл хулыщтэгы̄н. Ос ты тав ёмащакв а̄ӈкваты, насати, юрт ма̄хманэ пуссын витн патыгламыт. Тэ̄н туп лё̄х суссылтан ё̄рн ёт ха̄пт хультмы̄г. Лӯски о̄йка нумыл на̄лваль ро̄ӈхи: Ищ! Ня̄врамаквет, ам лю̄ль наклат ва̄рсум. Мо̄т накт тах ос та ам палтум хо̄нтлуӈкве ювы̄н. Тэ̄н сӯпне̄лмта̄л ха̄пе̄н ло̄ӈхаль ё̄ӈхыгпастэ̄н ос нас туп Лӯи Ме̄сыг нупыл во̄псата̄лсы̄г. Ты юипа̄лт Сакв нупыл лё̄ӈханыл хотёрувласаныл. Ты мо̄йт П. Ф. Сайнахов мо̄йтыстэ, М. Сотам нэ̄пакн хансыстэ. («Лӯима̄ сэ̄рипос» № 16 газетат хансым о̄лыс, 25 август 1990 та̄л). 1071 2014.03.07. Валентина УЗЕЛЬ Мирн пе̄риим ма̄хум рӯпатаныл. Ань округ Дума депутатанув тэ̄лы ӯщлахтаманыл юипа̄лт ты та̄л о̄выл сапра̄нияныл о̄лыс. Ре̄тыӈ ю̄свой э̄тпос 20 хо̄талэ̄т та̄н акванатхатыгласыт. Ты заседаниянылт ва̄тахтем са̄всыр са̄ккон урыл та̄н потыртасыт. Щар о̄влэ̄т та̄н ма̄ньщи поэтув Андрей Тарханов янытласаныл. Ты о̄йка «Почётный гражданин ХМАО-Югры» яныг намыл майвес. Мо̄т ма̄хум о̄с янытлаве̄сыт, та̄н ос Почётный грамотатыл майве̄сыт. Тувыл депутатма̄хум тамле ва̄рмаль урыл э̄лаль потыртаӈкв патсыт, 2016 та̄л ойттур э̄тпос па̄сныл ма̄н округувт о̄лнэ мир на̄йпос ма̄гыс йильпи щирыл ойтхатуӈкв патэ̄гыт. Акв хо̄тпа э̄тпос сыс туп 50 КВ электроэнергиял хансаве. Тав тыгыл са̄внув те холты, са̄внув олн ойтуӈкв тах паты. Ты ва̄рмаль ёт то̄ва депутатыт щар ат ка̄сащасыт, та̄н ла̄всыт, ма̄н округув щёлыӈыг ла̄ваве, тыт ма̄витыт са̄в щёл о̄лы. Ос мирув манрыг «нормаг» ла̄внэ ва̄рмалил хансавет? Мирн нё̄тнэ са̄кконыт Э̄лаль мирн нё̄тнэ са̄кконыт урыл та̄н потыртасыт. Ань федеральный са̄кконыт акваг йильпи щирыл хансавет, таима̄гыс ма̄н окружной са̄кконанув о̄с мо̄т щирыл хансуӈкв э̄ре̄гыт. Мария Краско социальный защита Департаментыт кӯщаиг о̄лы. Ань тав тамле ва̄рмаль урыл потыртас. Ма̄н округувт са̄в а̄гмыӈмосыӈ хо̄тпа о̄лы. То̄ват ще̄мья ат о̄ньще̄гыт, рӯт ат о̄ньще̄гыт. Та̄н ма̄гсыланыл я̄нас колыт ӯнттуӈкв патве̄сыт, рущ ла̄тӈыл «специальные домаинтернаты» тох ла̄вавет. Ань тув 50 та̄ланыл то̄влынэ̄ныл юипа̄лт э̄кват вивет, хум хо̄тпат 55 та̄ланыл юипа̄лт. Ос та са̄кконт хансым ат о̄лы, та хо̄тпа акваг округувт о̄лы ман а̄ти, э̄рыӈ тав мо̄т ма̄ныл тыг ёхтыс. Ань ка̄сыӈ хо̄тпа, хотьют о̄луӈкв тот ка̄сащи, тув тах виве. Депутатыт ты ва̄рмаль ёт ат ка̄сащасыт, ла̄всыт, ты са̄ккон ёмащакв вос хансаве, туп то̄нт тав пирмайтаве. Кол ма̄гыс ойтхатнэ олн ЖКХ тармыл кӯщаиг о̄лнэ хум Виктор Нанака тув о̄с во̄выглавес. Тав депутатытн титыглавес, та̄н та̄нти ва̄рнэ рӯпатаныл ос кол ма̄гыс ойтнэ олн урыл мирн манрыг ат потыртэ̄гыт. Ань ма̄хум та̄л котиль э̄тпосныл коланыл ма̄гыс са̄внув олн ойтуӈкв патсыт. Ты олныт таима̄гыс атавет, яныг колт о̄лнэ ма̄хум коланыл ёмащакв вос щё̄питаве, о̄льпыл вос сартаве, матыр мо̄т рӯпата тот вос ва̄раве, таима̄гыс ты олн мирныл атуӈкв патвес. Ты кӯщай ювле ла̄выс, ты ва̄рмаль та̄н та̄рапаттыяныл ос мирн тах ла̄ве̄гыт, манах солко̄ви ты ва̄рмаль ма̄гыс та̄н ма̄хумныл ювпувуӈкв патэ̄гыт. Ӯщлахтын ма̄ мус ялнэ лё̄ӈх Ты ва̄рмаль рущ ла̄тӈыл «льготный отпускаг» ла̄ваве. Ань ма̄хум лё̄ӈханыл олныл хумус ойтуӈкв патавет, ты урыл са̄ккон о̄с мо̄т щирыл хасвес. Округувт о̄лнэ мир са̄выӈпа̄лэ ща̄рыщ ва̄тан ӯщлахтуӈкв ялуӈкв патсыт. Ос тыглетувле ялнэ лё̄ӈханыл ма̄гыс та̄н справка щирыл олныл мивет. Ос то̄ванакт тох е̄мта̄лы, ма̄хум ӯщлахтын ма̄н ялнэ̄ныл ма̄гыс мощща олн ойтэ̄гыт, ос лё̄ӈх ма̄гыс тыгыл са̄внув олныл мивет. Та арыг олн та̄н та̄нтина̄нылн выганыл. Ань ты та̄лныл мо̄т щирыл ва̄раве. Лё̄ӈх олн ойтнэ ма̄гыс иӈ акв справканэ̄пак ма̄хумныл во̄вуӈкв патаве. Ты справкат билет тынэ хансым вос о̄лы. Манах тот хансаве, таса̄вит солко̄вил хо̄тпа тах миве. Мир ӯргалан ма̄хум рӯпатаныл Ка̄сыӈ та̄л о̄игпаме юипа̄лт полицият рӯпитан кӯщаит депутатыт э̄лыпа̄лт потыртэ̄гыт, та̄л сыс манаса̄вит лю̄ль ва̄рмаль ва̄рвес, манах хо̄тпа ӯнттувес. О̄влэ̄т Д. В. Шерман потыртас, тав округ следственное управление тармыл кӯщаиг о̄лы. Тав ла̄выс, 2013 та̄л сыс 1200 са̄вит «уголовный дело» хасвес, ты 2012 та̄лныл 200 са̄внуве̄г е̄мтыс. Са̄в хо̄тпа наркотик ёт пувве̄сыт. Ос сака са̄в хо̄тпа ня̄врамыт новманыл, маныгтасаныл. Та̄н пуссын хо̄нтве̄сыт. Ты хум депутатытн та̄ра ла̄выс, матыр э̄лаль ва̄руӈкв э̄ри, сака са̄в хо̄тпа ня̄врамыт нупыл лю̄ль номт о̄ньще̄гыт, та̄наныл новияныл. Ты ва̄рмаль ёлпо̄илттаӈкв э̄ри. Тав юипа̄лэ̄т В. И. Романица потыртас, тав УВД кӯщаиг о̄лы. Тав ос ла̄выс, лю̄ль ва̄рнэ ма̄хум акваг са̄вме̄гыт. Са̄в хо̄тпа о̄выл ва̄ре̄гыт. Ань ка̄сыӈ ӯст манос па̄вылт о̄лнэ мир камера щирыл уральтавет. Ос ты утыт ат то̄вылхатэ̄гыт, та̄наныл ёвтнэ ма̄гыс 400 млн. солко̄ви э̄ри. То̄нт лю̄ль ва̄рум хо̄тпа та̄ра хо̄нтуӈкв ро̄ви. Э̄лаль тав ла̄выс, ань полицият рӯпитан ма̄гыс ма̄ньлат ма̄хум ханищтаӈкв э̄ре̄гыт. Ос ляпат тамле ханищтан кол щар а̄тим, Екатеринбург, Нижний Новгород, Орел ос мо̄т ӯсытт та̄наныл ханищтаӈкв ро̄ви. Мирн пе̄риим ма̄хум хӯрум щё̄с арыгтем ань рӯпитасыт. Ва̄тахтем са̄ккон та̄н йильпи ла̄тӈыл хассаныл. Мо̄тыт э̄тпост та̄н о̄с тах акванатхатэ̄гыт. 1071 2014.03.07. Светлана РОМБАНДЕЕВА Ялпыӈ ма̄т ос пе̄с колыт ӯргалавет. Ре̄тыӈ ю̄свой э̄тпос 20 хо̄талэ̄т Ханты-Мансийск ӯст о̄лнэ «Торум Ма» музейт «е̄ӈта пасан» хо̄нтхатыглап ва̄рыглавес. Тув Служба государственной охраны объектов культурного наследия Югры нампа организацият рӯпитан ма̄хум ёхталасыт, кӯщаяныл Андрей Николаевич Кондрашёв. Округувт ань са̄в ялпыӈ ма̄ о̄лы, пӯмыщ колыт манос йис та̄гыл о̄лнэ са̄всыр памятникыт. Та̄н ань ты организациян та̄рапаттым о̄ньщавет, пуссын нэ̄пакын хасве̄сыт. Тот рӯпитан ма̄хум ла̄внэ̄ныл щирыл, тамле колыт мори лоӈхитаӈкве ат ро̄ви, ялпыӈ ма̄т нас тох ё̄мыгтаӈкве ат ро̄ви, тот морикапыртаӈкве ат тайи. Ты организация ка̄сыӈ та̄л тамле ма̄т ос пе̄с колыт та̄рапатты. Ань ты «е̄ӈта пасан» ва̄тат кӯщай хумияныл Андрей Николаевич ла̄выс: «Ты та̄л ма̄н хӯрум ма̄ ялпыӈыг хансуӈкве таӈхиянӯв – ты Белоярский районт о̄лнэ Нумто нампа тӯр, Кондинский районт Половинка па̄выл ляпат о̄лнэ карс сып ос Ханты-Мансийский районт о̄лнэ Согом па̄выл. Светлана ХОЗУМОВА Ты хурит Ха̄льӯс район Сӯкыръя па̄вылт ӯнлын пупкол по̄слым о̄лы. Нэ̄пакт хансым о̄лы, ань11 нот порат ма̄хум тув хо̄нтлуӈкве ёхталамыт, ты кол та па̄сыл ты ла̄вылтаве. Са̄в щёс йильпииг ӯнтталавес, 1905 та̄лт о̄с йильпииг ты щё̄пита̄лыма. 1071 2014.03.07. Тамара МЕРОВА Пуста̄гыл о̄лэ̄н. Ля̄ххал тотнэ хо̄тпат пӯльницат рӯпитан кит кӯщаиг ёт хо̄нтхатыгласыт. Тыи Ханты-Мансийск ӯст «Центр здоровья» нампа колт кӯщай Светлана Попова ос округ мир пусмалтан пӯльницат яныг ле̄ккар Всеволод Кольцов. Ань ма̄хум манырсыр а̄гм о̄ньще̄гыт, хо̄т, хумус пусмалтавет, ты о̄вылтыт тэ̄н потыртасы̄г. Светлана Александровна ла̄выс: «Ма̄н центрув туп хӯрум та̄л рӯпиты. Мо̄лты та̄л 3 со̄тыра 218 ма̄н палтув ёхталам хо̄тпаныл 2 со̄тыра 900 э̄лумхо̄лас ущ о̄вылтахтам а̄гммосаныл та̄рапаттысанӯв. Ты ма̄хум а̄гманыл уральтатта̄л воссыг ул вос о̄ньщияныл, ма̄н та̄наныл та̄ра пусмалтахтуӈкве ке̄тыянӯв. Пуста̄гыл о̄лнэ, ка̄тэла̄глэ пус 344 хо̄тпат о̄лсыт. 2013 та̄л сыс тамле хо̄тпа 5 процент са̄вит са̄внуве̄г е̄мтсыт. Ты ма̄хмыт та̄нки а̄гманыл хосан ат тотыяныл, та̄ра пусмалтахтэ̄гыт ос мо̄тынтыг ёхтынэ̄ныл порат то̄ват а̄гм та̄л о̄лэ̄гыт. Центрувн ёхталам хо̄тпат ма̄н ка̄сыӈ та̄л уральтахтуӈкве во̄виянӯв». Ма̄ньлат хо̄тпат пуста̄гыл о̄лнэ̄ныл ма̄гыс ты центрыт сака ӯравет. Ань тув 40 та̄ланыл то̄влын юипа̄лт ма̄хум ёхталэ̄гыт, са̄выӈпа̄лэ нэ̄ хо̄тпат. Тувыл янгыщ 50 та̄лныл 59 та̄л мус са̄в хо̄тпат тот уральтахтыглэ̄гыт. Ма̄хум са̄всыр ле̄ккарытын сунсавет. Та̄н давление ме̄ритэ̄гыт, тулё̄вылныл ке̄лп выгыт, самыт, ӯлщпуӈкыт ос сӯпасыт сунсэ̄гыт. Хо̄тпа ве̄скалаве, ос мо̄т ищхӣпыӈ утыл уральтаве. Та юипа̄лт пуссын та̄рапаттым ва̄рмалит ищхӣпыӈ утын хансавет. Ос хо̄тпа ла̄ваве, маныр а̄гм хо̄нтвес манос тав пуста̄гыл о̄лы. Са̄выӈпа̄лэ ма̄хум лю̄ль ос ат ро̄внэ тэ̄нут тэ̄гыт, тувыл тэ̄п хурганылт ос ма̄йтанылт а̄гм хо̄нтаве. То̄ват ке̄лпаныл лю̄ль, сӯпасанылт са̄всыр а̄гм о̄ньще̄гыт. Кантыӈ ос лю̄ль номтыл о̄лнэ хо̄тпат о̄с а̄гмыӈыг е̄мтэ̄гыт. Хохса хартнэ хо̄тпат ёт ле̄ккарыт о̄с я̄нас рӯпитаӈкве патсыт. А̄гмыӈ хо̄тпат пӯльницат ле̄ккарытн э̄лаль пусмалтавет. Ань Всеволод Станиславович ты о̄вылтыт потыртас. Акв хо̄тал сыс пӯльницат 125 хо̄тпат ёт са̄всыр ле̄ккарыт рӯпитэ̄гыт. Ос тот 75 койка щё̄питым о̄лэ̄гыт. 2013 та̄л сыс 1 со̄тыра 740 э̄лумхо̄лас пусмалтаве̄сыт. Пӯльницат лувнакт о̄лнэ а̄гмыт, сым а̄гм ос нервный система а̄гм о̄щнэ ма̄хум са̄в о̄лы. 15 со̄тыра хо̄тпа юн нас тэ̄рпил манос юил ёхталым са̄всыр процедурал ва̄рнэ утыл пусмалтэ̄гыт. Та̄н халанылт са̄в нэ̄т о̄с о̄лэ̄гыт, хум хо̄тпат пусмалтахтуӈкве сака ат ка̄саще̄гыт, а̄гманыл урыл щар ат номсэ̄гыт. А̄ти сака хосат ня̄врамыт ма̄гыс я̄нас центр ва̄рвес. Хо̄т э̄тпос сыс тот 480 ня̄врамыт пусмалтаве̄сыт. 47 самын патум ня̄врамаквет та̄рвитаныл мощщаг о̄лыс, та̄н са̄всыр ищхӣпыӈ утыл уральтымат, ёмщакв янмалтаве̄сыт. Ты яныг пӯльницат ма̄хум пуссын пусмалтаӈкве ат ве̄рмавет. Таима̄гыс Ханты-Мансийск ӯст мо̄т пӯльница ӯнттувес ос моще̄ртын ле̄ккарыт тот рӯпитаӈкве о̄вылтахтэ̄гыт. Округт йильпи пусмалтан накыг о̄с ва̄рвесы̄г. Акватэ рущ щирыл «грязелечение» намаим о̄лы, мо̄танэ «электрообезболивание». Тыт округувт ма̄хум пусмалтан ма̄гыс э̄рнэ па̄ӈк хо̄нтсыт ос са̄всыр ищхӣпыӈ утыл ма̄хум э̄лаль пусмалтавет. 1071 2014.03.07. Александр ВЬЮТКИН Ма̄ньлат мир ёт рӯпитан хӯрум кӯщай. Мощ мо̄лалнув ма̄ньлат ма̄хум тэ̄ланыл щирыл рӯпитан кӯщаит ёт ля̄ххал тотнэ хо̄тпат Ханты-Мансийск ӯст акванхо̄нтхатыгласыт. Та̄н халанылт Алексей Варлаков о̄лыс. Тав округ янытыл ма̄ньлат ма̄хум ёт рӯпитан департамент колт кӯщаиг о̄лы. Титыт хум наме Сергеус Гловацкас, тав э̄лы хо̄н ма̄тт ма̄ньлат ма̄хум ёт рӯпитан щирыл яныг специалистыг о̄лы. Хӯрмит хумияныл СНГ э̄лы хо̄н ма̄т халт о̄с яныг кӯщаиг рӯпиты, тав наме Михаил Пушкин. О̄влэ̄т округувт рӯпитан кӯщай А. П. Варлаков потыртас: «Рӯпитаӈкв ка̄сащан ма̄ньлат хо̄тпа рӯпитан ма̄ та̄ра хо̄нтуӈкв ве̄рми. Ат те ве̄рми хо̄нтуӈкве, тав нё̄таве. То̄ванакт ос тащирыл о̄лыглы, рӯпата минэ ма̄хум ханищтахтын ма̄ныл ущты а̄стум хо̄тпа рӯпатан ат выганыл. Таи ты лю̄ль, та̄наныл матахтем та̄л хо̄та̄ти професияныл щирыл рӯпитаӈкве э̄ри. Таима̄гсыл то̄ва ма̄ньлат ма̄хум мо̄т хотты ма̄н рӯпитаӈкве вуйхатэ̄гыт. Россия янытыл рӯпата ат о̄щнэ ма̄хум щирыл, ма̄н округувт юио̄вылт о̄лы. Та пе̄нтсыл са̄в ма̄ныл рӯпитаӈкв тыг ювыт. Ма̄н нэ̄мхотьют по̄хан те̄туӈкв ат ве̄рме̄в. Хотмус э̄лаль о̄луӈкв, та̄нанылн о̄с э̄ри». Ты хум юипа̄лт СНГ э̄лы хо̄н ма̄т халт рӯпитан хум М. Пушкин потыртас. Тав ла̄выс: «Ма̄н ма̄ янытыл са̄в ма̄тт рӯпитэ̄в. Са̄всыр ма̄т сыресыр щирыл о̄лыглы. Ам тыг йигмыгтамум порат номсысум, ка̄сыӈъе̄мт амти рӯпатам ва̄рилум, э̄рнэ щирыл хӯлтыянум. Тыг ёхтумумт ам торгамтаслум, тыт ма̄ньлат ма̄хум нас тох ат о̄лэ̄гыт, рӯпитан ма̄ о̄ньще̄гыт. Са̄выӈпа̄лэ ёмас ма̄т рӯпитэ̄гыт. Мо̄т ма̄ныл тыг са̄в мир рӯпитаӈкве ёхтыс. Ам ань номсэ̄гум, хумус на̄нан пуссын тох ва̄руӈкв а̄ртмыс. На̄н округын э̄лаль янытлаӈкв патылум». Тувыл хо̄н ма̄т рӯпитан хум Сергеус Гловацкас потыртас, тав ла̄выс: «На̄н о̄лнэ ма̄н олн такви сэ̄лы. Ма̄во̄й но̄хвинэ хосыт мир рӯпитан ма̄ иӈ о̄ньще̄гыт. Хунь ма̄во̄й холы, округын акв ма̄н нопуӈкв ве̄рми. Матыр тэ̄нут янмалтан ма̄гыс тыт сака ащирмаӈ. Таима̄гсыл ань э̄лаль матыр ва̄руӈкв э̄ри. То̄нт ма̄ньлат хо̄тпа рӯпитан ма̄ныл мо̄т ма̄н ат мины». Алексей Варлаков ювле ла̄выс: «Ма̄н округувт ма̄ньлат ма̄хум ма̄гыс ханищтахтын кол пунсым са̄в о̄лы. Та̄н ма̄во̄й но̄хвинэ коныпал иӈ са̄всыр мо̄т рӯпатан ханищтахтэ̄гыт. Мо̄т хо̄н ма̄ныл ёхтын ма̄хум урыл са̄всыр йильпи сакко̄ныт пирмайтым о̄лэ̄гыт. Та̄наныл рӯпатал минэ ма̄хум ва̄тихал уральтавет. Тувыл та̄н ань мори ёхтын мир рӯпитаӈкв ат выганыл. Таима̄гсыл тыт о̄лнэ ма̄нти ма̄хманув рӯпатан патхатнэ щирыл лыпащнуве̄г е̄мтыс». Хо̄нтхатыглапув оигпан э̄лыпа̄лт мо̄т ма̄ныл ёхталам хумы̄г ла̄всы̄г: «Ма̄н о̄выл щёс тыг ёхталасӯв, ань э̄лаль аквписыг рӯпата щирыл тыг ёхталаӈкв патэ̄в. Матыр нё̄тмил на̄нан э̄рмыглы те, та̄ра нё̄тыянӯв. Акваннё̄тхатуӈкве патэ̄в те, о̄луӈкве тах кӯстырнуве̄г е̄мты». 1071 2014.03.07. Валентина УЗЕЛЬ Тав пе̄с щирыл на̄й пе̄ламтас. Ты э̄тпос 7-16 хо̄талыт сыс Сочи ӯст «Паралимпиадаг» ла̄внэ яныг касыл ва̄раве. Ма̄ янытыл тув са̄в а̄гмыӈмосыӈ спортсменхо̄тпа тах мины. Ань ты кастыл Россия то̄ва ӯсытт на̄й пе̄ламтан ва̄рмаль о̄лыс. Ханты-Мансийск ӯсувт та хультум э̄тпос 28 хо̄талэ̄т са̄в мир акванатыглавес. Паралимпийский на̄й Андрей Хоров тав пе̄ламтастэ. Ты ханты хум Ханты-Мансийский район Кышик па̄вылт о̄лы. Кос акв ла̄гылпал, тав сака ка̄ркам хум, ӯс хосыт такви машинал яласы, община о̄ньщи. Ань ма̄н округувныл Сочи ӯсн нила хо̄тпа минасыт, та̄н «следжхоккеиг» ла̄внэ касылт касуӈкв патэ̄гыт. Та̄н наманыл ты – Константин Шихов, Василий Варлаков, Николай Терентьев ос Владимир Литвиненко. Та̄н пуссын ма̄нь сун тармыл ӯнлым хоккейт касуӈкв патэ̄гыт. 1071 2014.03.07. Александр ВЬЮТКИН Саквалым ёсал э̄лаль ха̄йтум хум. Мощ мо̄лалнув Сочи ӯс каснэ ма̄т ёсал ха̄йтум хум Антон Гафаров ёт Ханты-Мансийск ӯст потыр о̄лыс. Та хум ёт ва̄щинтахтан ва̄рмаль ща̄й айнэ пасан ва̄тат ва̄рыглавес. Антон ка̄сыӈъе̄мт округув ма̄гсыл касы. Ханты-Мансийск ӯст тав СДЮШОР нампа колт ёсал ха̄йтуӈкв ханищтахтас. Тав ла̄выс: «О̄влэ̄т а̄нумн ёсал ха̄йтнэ ва̄рмаль ат а̄ртмыс. То̄нт ам номсысум, пуссын ве̄рме̄гыт, ам манрыг ат ве̄рме̄гум? Яныгнуве̄г е̄мтмум юипа̄лт, номтыл ущ ёхтуве̄сум, ам то̄нт иӈ нас ма̄ниг о̄лсум, таима̄гсыл ты нэ̄матыр ат а̄ртмыс». Сочи ӯст мир халт ва̄рыглам касылт Антон титынтыг касыс. Та э̄лыпа̄л 2010 та̄лт тав Ванкувер ӯст касыс. Ань ёсал ха̄йтнэ «спринт» нампа касыл порат ёлпатыс. Ёлрагатаме порат во̄ртыпал ёсатэ супыгсаквалас. Антон та саквалам ёсатэ̄т ка̄таге̄тыл туйхатым э̄лаль ха̄йтыс. Сып пуӈкныл ёлаль тахамтаме порат титынтыг ёлрагатас. Супыгсаквалам ёсатэ э̄лыо̄влэ ювле нупыл ёхтын мус сакватастэ. Но̄хворатаме порат Канада хо̄н ма̄ныл о̄лнэ тренер Антон пус ёсал мистэ. Титыт ма̄т ёлрагатаме ма̄гсыл Антон щар юио̄влыт ёхтыс. Ма̄н каснэ хумув ёсатэ саквалан ма̄т са̄в ма̄хум ёлрагата̄лсыт. То̄ват писаль ло̄саныл, мо̄таныт ос ха̄йтнэ̄ныл порат туйхатнэ йӣваныл сакватасыт. Прессконференция оигпам порат Антон ла̄выс: «Ты пора ёсал ха̄йтнэ лё̄ӈхув сака та̄рвитыӈ о̄лыс. Тамле та̄рвитыӈ ос мори щакара̄лнэ лё̄ӈх нэ̄мхоты ма̄т воссыг ат ва̄сум. Ань ты та̄рвитыӈ касылныл мощ ущлахтанэм юипа̄лт Сыктывкар ӯсн ёсал ха̄йтнэ Россия ма̄хум халт касуӈкв ялэ̄гум. Ёсал каснэ ва̄рмальныл ам по̄хан минуӈкв ат номсэ̄гум. Мо̄т щёс Корея э̄лы хо̄н ма̄т акв тамле касыл ва̄раве. Та ва̄рмаль мус иӈ нила та̄л хультыс, тот ёмщакв каснэ ма̄гсыл ань щё̄питахтуӈкв э̄ри». Ма̄н ты пыгн ёмщакв щё̄питахтын ла̄тӈыл те̄тылӯв. Ла̄глаге мо̄ляхыг, ка̄таге ё̄рнуве̄г вос е̄мтэ̄г. 1071 2014.03.07. Александр ВЬЮТКИН Каснэ ма̄т хумус ос маныр о̄лыс. Ре̄тыӈ ю̄свой э̄тпост Сочи ӯст яныг касыл оигпан э̄лыпа̄л хо̄талт округувныл тув ялум ма̄хманув урыл потыртан ма̄гыс ӯсувт прессконференция о̄лыс. Ля̄ххал тотнэ ма̄хум ёт потыртан кастыл кӯщаиг о̄лнэ хӯрум хум ёхталас. Халанылт округ янытыл каснэ ма̄хум Департамент кӯщай хум Евгений Редькин о̄лыс. Мо̄танэ общественных ос внешних связей Департамент кол тармыл кӯщаиг рӯпитан хум Илья Верховский ёхталас. Хӯрмит хум наме Спартак Антоненков, тав ос «ЮграМегаСпорт» колт кӯщаиг рӯпиты. Ма̄н округувныл Сочи ӯст о̄лум касылн са̄т э̄лумхо̄лас каснэ ма̄гыс тув ялыс. Та̄н халанылт ёсал ха̄йтнэ нила хо̄тпа о̄лыс, та̄н наманыл Александр Легков, Сергей Устюгов, Антон Гафаров ос Евгений Шаповалов. Тувыл ёсал ха̄йтнэ ос малопулькаӈ писалил по̄сын па̄тлуптан тит хо̄тпа Алексей Волков ос Екатерина Шумилова тот кассы̄г. Юио̄выл са̄тыт хо̄тпа наме Екатерина Илюхина. Тав ос тит ла̄гыл акв по̄хан тӯщтын па̄хвыӈ ёсал карс сыпныл ёлтахамтым касыс. Каснэ ма̄хум коныпал тув иӈ мо̄т ма̄хум губернаторув Н. Комарова ёт ялсыт. Ма̄ янытыл о̄лнэ ма̄хум та̄нти о̄лупсаныл суссылтан колнак щё̄питым о̄щсыт. Ма̄н округув урыл тот суссылтап о̄с щё̄пита̄лвес. Кӯщаит ла̄внэ̄ныл щирыл, ма̄н колнакув мӯй ма̄хум пӯмщалахтым акваг щалтсасыт. Владимир Путин Россия Президентув ма̄н палтылув о̄с щалтсас. Та порат нэ̄мхотьют иӈ ат ва̄с, мирыт халт хотьютув щар ма̄к ё̄рыг о̄лы, хотьютув но̄хпаты. Аквтох но̄хпатнэ щирыл, ма̄н щар о̄выл щёс 1980 та̄лт но̄хпатыгласӯв. Ань о̄с мирын ё̄ранув та суссылтасанӯв. 1071 2014.03.07. Светлана РОМБАНДЕЕВА Ма̄н ма̄вн ё̄рва̄гыл ке̄тыглым ма̄хум. Та̄л котиль э̄тпос 29 хо̄талэ̄т Ханты-Мансийск ӯст Природы и Человека музейт ма̄хум акванатхатыгласыт. Тот хӯрум э̄тпостем «Жизнь в ссылке» нампа выставка рӯпитас. Ань 1930-1950 та̄лытт ма̄н о̄лнэ ма̄вн ма̄хум ё̄рва̄гыл ке̄тыглаве̄сыт, ты урыл музейт потыр о̄лыс. О̄выл ла̄тыӈ музей кӯщай Светлана Викторовна Лазарева тав ла̄выс: «Ювле хультум пора мо̄т щирыл ва̄руӈкве ма̄н ат ве̄рмилӯв. Матыр о̄лыс, та о̄лыс. Ос та пилыщмаӈ нак ва̄ӈкве ос номуӈкве э̄ри. Ты урыл ма̄н потыртаӈкве ат те патэ̄в, ма̄ньлат ма̄хманувн ат те ла̄ве̄в, та̄н ва̄ӈкве аты патэ̄гыт. Та порат миллион са̄вит хо̄тпа щар наска̄ссыг порслувес. Та та̄рвитыӈ та̄лыт урыл са̄всыр документыт, потрыт, пищмат ос хурит то̄ва музеитыт акванатым о̄лэ̄гыт. Ма̄н, Природы и Человека музейт рӯпитан ма̄хум, та о̄лупса урыл о̄с са̄в потыр акванатсӯв, хурит ка̄тынпаттысӯв. Та порат хансыглам со̄тыра са̄виттем документыт, пищмат ос киноплёнкат хо̄нтсӯв. Ты урыл ма̄н нэ̄пак хассӯв, намаяслӯв «Жизнь в ссылке». Ты коныпал ты нак щирыл ма̄н ань научноисследовательский рӯпата ва̄ре̄в». Светлана Викторовна потыртаме юипа̄лт Дмитрий Васильевич Филипчук ла̄тыӈ ла̄выс. Ты хум музейт научный сотрудникыг рӯпиты, «Жизнь в ссылке» нэ̄пак хансуӈкве тав о̄с нё̄тыс. Хум тох ты потыртас: «Ка̄сыӈ мир матыр та̄рвит тэ̄ла о̄ньщи, та урыл ма̄хум потыртаӈкве ат таӈхе̄гыт манос потыртаӈкве ат тайи. Ма̄н ань о̄с о̄ньще̄в тамле тэ̄ла. 20й нот ущнув ты оигпас, ты нак та нотт о̄лыс. Ма̄н ань ты хо̄тал мус матыр хӯнтамла̄лэ̄в, ва̄ӈкв ат ва̄слув, насати тох та о̄лум. Ма̄хум полщил ва̄рве̄сыт, лӯи ма̄н са̄всыр ма̄ныл ке̄тыглаве̄сыт. Ты нак ва̄рум хо̄тпат ат суссыт, ты яныгхо̄тпа ман ня̄врам, щёлыӈ ман нуса э̄лумхо̄лас, пуссын тыг ӯйхул хольт ня̄влуве̄сыт. Са̄в хо̄тпа турман колн ӯнттуве̄сыт, то̄ват са̄в та̄л ӯнлысыт, ётыл конта̄ртыглаве̄сыт, то̄ват ос тот и порсысыт. Ма̄хум янгыщ аты ва̄саныл манрыг та̄н о̄лнэ коланыл коння̄влуве̄сыт, о̄лум ма̄наныл тыг ё̄рва̄гыл ке̄тве̄сыт. То̄ва порат ха̄п я̄ ва̄тан пӯхвты, ма̄хум ня̄враманыл ёт па̄гтуясавет, таит ла̄внэ̄ныл: «О̄лнэ ма̄н ты, хотмус та о̄лэгы̄н. Ма̄нт вуе̄н, на̄нтина̄нын о̄лнэ кол ӯнттэ̄н. Соссаӈ мир ёт ул потыртэ̄н, та̄н ма̄гсыланыл на̄н сылкат». Ма̄хум я̄ ва̄тат та оссувлавет, ляпат щар акв кол а̄тим, акв а̄мп а̄тим. Йильпи ма̄т, хащта̄л ма̄т савалым хотмус та о̄лмыгтасыт. Па̄влытт о̄лум ма̄хум манос нуса ма̄хум тох о̄луӈкве воссыг тыа̄ти та ханьщувласыт. Ос яныг ӯсытт о̄лум хо̄тпатн, ня̄враманылн тамле о̄лупсан ханьщувлаӈкве сака та̄рвитыӈ о̄лыс. Мощ ётылнуве ма̄хум тыг ос национальность щирыл ке̄туӈкве патве̄сыт – немцыт, финныт, калмыкыт Ты о̄с акв сака пилыщмаӈ нак. Тувыл о̄луӈкве хотмус э̄ри, ма̄хум рӯпитаӈкве патсыт. Хул пирмайтан комбинатт рӯпитасыт, колыт ӯнттысыт. Та порат Ханты-Мансийск ӯс Остяко-Вогульскыг ла̄ввес. Ты ӯсув ӯнттуӈкве ань то̄нт тыг ке̄тыглам ма̄хум та̄н ты о̄вылтасаныл. Ты рӯпата сака та̄рвитыӈ о̄лыс». Та нак порат тыг о̄лмыгтам ма̄хум то̄ва пормасаныл, маснутаныл музей акв колнаке̄т акванатымат, пе̄с хурит колнорн но̄хтагталымат, пуссын ма̄навн суссылтаве̄сыт. Дмитрий Васильевич то̄ва хурит урыл потыртас. Акв хурит Борис Степанов ще̄мьятэ ёт по̄слым о̄лы. Хум Ха̄льӯст райком партия секретариг рӯпитам. Тав тамле та̄ксар, пилта̄л хум о̄лум. Сталинын пищма хансыглам, манрыг ань ма̄хум наска̄ссыг полщил ва̄равет, саватавет. Мо̄т хум ос журналистыг о̄лыс, Виктор Гулидов, лӯи ма̄н Москва ӯсныл ке̄тыглавес. Ха̄льӯст 1935 та̄лныл 1937 та̄л мус о̄лыс. Та̄н пуссын э̄кванылн ос оманылн са̄в пищма хансыгласыт. Ань та пищмат хосыт мощ та̄рапатыс, хумус та̄н ты ма̄т о̄лсыт, хумус саваласыт, маныр урыл номсысыт. Ты хумыг ос мо̄т са̄в ма̄хум урыл «Жизнь в ссылке» нэ̄пакт хансым о̄лы, ка̄тынпаттум хурияныл о̄с тув по̄слуманыл. Виктор Гулидов яныг таквс э̄тпост 1937 та̄лт Тюмень ӯст порслувес. Борис Степанов ос ма̄нь таквс э̄тпост 1937 та̄лт турман колн ӯнтталавес, 1939 та̄лт та̄ртвес. Хум тот сака саватавес, алнэ па̄сыл о̄щвес. Хунь кон та̄ртвес, тав областной прокурорн ос Омский область партколлегия секретарин пищма хансыс. Маныр номсыс, пуссын хансыс, ань хумус ма̄хум наска̄ссыг саватавет, порславет. Сталин о̄йкан о̄с хансыс: «Ты пилыщмаӈ нак о̄лнэ̄тэ ма̄гыс, мирн ла̄тыӈ ла̄вуӈкве тах наӈ патэ̄гын, наӈ китыглаӈкве патавен. Ты порав йисыг е̄мты, наӈ намын тах ла̄вуӈкве патаве». Щар со̄ль та ла̄выс. Борис Степанов хоса пыл ат о̄лыс, хо̄нтлын ма̄н вуйлувес, тот порслувес. Д. В. Филипчук потре оигпам юипа̄лт ма̄хум мо̄т колнакн во̄вве̄сыт, тот ос сцена о̄лы. Музей кӯщай С. В. Лазарева сценан «Жизнь в ссылке» нэ̄пак хансум ма̄хум во̄всанэ – «Новости Югры» газетат корреспондентыг о̄лнэ нэ̄ В. В. Патранова, журналист ос лӯи ма̄ урыл хаснэ хум В. К. Белобородов, музей кӯщай ва̄ӈын нэ̄ О. И. Приступа ос Д. В. Филипчук. Та̄н коныпаланыл тув кит э̄кваг во̄ввесы̄г, ты Лидия Васильевна Бубова ос Анна Ильинична Жукова. Тэ̄н ще̄мьянэ̄н та нак порат тыг ке̄твесы̄г. С. В. Лазарева ла̄внэ̄тэ щирыл, ты нэ̄пак акв хо̄тал хунь хасвес. Нэ̄пак хансум ма̄хманув хус арыгтем та̄л рӯпитасыт. Тувыл ты нэ̄пак хансум ка̄сыӈ хо̄тпа ла̄тыӈ ла̄выс. Э̄кваг о̄с потыртасы̄г, хумус тэ̄н ма̄хманэ̄н тыг ва̄нтлысыт, о̄лмыгтасыт, та̄нанылн сака та̄рвитыӈ о̄лыс. Анна Ильинична Жукова ла̄выс: «Ты музейн ёхтум ма̄хумн ам пӯмащипа ла̄тыӈ ла̄ве̄гум. Ань та пилыщмаӈ пора о̄лме ма̄гыс на̄н о̄с сыманын ща̄рге̄гыт. Соссаӈ мирн, ма̄ньщи ос ханты ма̄хумн, ам яныг пӯмащипа ла̄тыӈ ла̄ве̄гум. Та̄н хосытанылт ма̄н лылыӈта̄гыл хультсӯв. Та̄н ма̄навн са̄в нё̄тмил ва̄рыгласыт, тэ̄нутыл ос о̄щнутыл майлувесӯв. Омам та̄н о̄лупсаныл ханищта̄лыстэ, ва̄стэ, маныр ро̄ви ва̄руӈкве, маныр ат тайи. Ма̄нав акваг ханищтастэ, акваг потырта̄лыс. Тав соссаӈ мир сака янытластэ. Ма̄н ань о̄с омав хольт о̄лэ̄в. Соссаӈ мир э̄лыпа̄лт ам ма̄ мус хӯтсэ̄гум, яныг пӯмащипа ла̄тыӈ ла̄ве̄гум». Ты хо̄нтхатыглапув оигпаме э̄лыпа̄лт ма̄ньлат хо̄тпат Анна Ахматова хансум стихотворениянэ ловиньтасыт. Ма̄хум щар сӯпне̄лмта̄л тыстым та ӯнлахо̄лсыт. Пуссын ты потрыт ос стихотвореният хӯнтлуӈкве сака та̄рвитыӈ, ос аквтох сака пӯмыщ о̄лыс. Воссыг хоталь щалтэ̄в, ты ма̄н ма̄вт о̄лум нак, ты ма̄н йис о̄лупсав. 1071 2014.03.07. unknown Э̄кват ялпыӈ хо̄тал. Ты хурит Маина Ивановна Хозумова по̄слыма. Тав Ха̄льӯс район Та̄гт па̄вылт о̄лы. Оматэ Антонина Прокопьевна, а̄тятэ Иван Захарович Варсаковыг, саран э̄кваго̄йкаг о̄лсы̄г. Маина Ивановна о̄йкатэ ма̄ньщи хум, наме Алексей Родионович Хозумов. Тэ̄н аквъёт ат ня̄врам янмалтасы̄г, хӯрумхуйплов апыг о̄ньще̄г. Мо̄лты акваг Ло̄пмус па̄вылт о̄лсы̄г, рӯпитасы̄г, мислув о̄щсы̄г. Маина Ивановна 36 та̄л садикт тэ̄нут па̄йтым рӯпитас, «Ветеран труда» нам о̄ньщи. О̄йкатэ ня̄врамыт ханищтан хумыг школат рӯпитас, ла̄пкат тыналахтас, библиотекариг о̄лыс. Пенсиян патсы̄г, Та̄гт па̄вылн ва̄нтласы̄г. Ань онтоловит та̄л тот о̄лэ̄г, а̄гиа̄гиянэ̄н, а̄гипыганэ̄н, пыга̄гиянэ̄н, пыгпыганэ̄н янмалтэ̄г. Маина Ивановна э̄кват ялпыӈ хо̄талыл пуссын ня̄враманэ̄н янытлаве ос тамле ла̄тӈыт газета та̄ра ке̄таве: «Тӯя хо̄талыт, ма̄лтып хо̄талыт ёт со̄т ос йильпи ё̄р вос ёхты. Пуста̄гыл о̄лнэ хо̄талыт вос тоты. Кол со̄т, щунь ос хоса нот наӈынн. Ма̄н наӈын э̄руптылӯв». Наӈ ня̄враманын. 1071 2014.03.07. Анна АЛГАДЬЕВА Рущ ма̄хум мӯйлысыт. Рущ ма̄хум халт ялпыӈ хо̄тал о̄лы, ла̄ваве – Масленица. Тамле хо̄тал ка̄сыӈ ӯст, па̄вылт ка̄сыӈ тӯя е̄мт ва̄рыглаве. Ма̄хум тэ̄лы пора парлэ̄гыт, тӯя хо̄талытн ща̄гтэ̄гыт. Ты хо̄талт ке̄ра̄ны паттан во̄вта ня̄нь понславе, кол халт мӯйлым ё̄маве, а̄мщит а̄мщавет. Ха̄льӯс район Хулюмсунт па̄вылт тамле ялпыӈ хо̄тал ма̄ньполь э̄тпос китыт хо̄талт ва̄рыглавес. Ка̄сыӈъе̄мт ты хо̄тал а̄лпыл столовый колт са̄всыр пиракыт, салатыт, щищкурек пе̄щит, шашлык тыналаве. Хо̄талъят порат ос ёнгын нак ва̄раве. Ты накт ма̄хум пуссын яныг нё̄тнэ ФОК кол по̄хын атхатыгласыт. ЛПУ организацият рӯпитан ма̄ньлат ма̄хум ос школат ханищтахтын ня̄врамыт концерт ва̄рыгласыт: э̄ргыт, частушкат э̄ргысыт, мо̄йт суссылтасыт. Тув атхатыглам ма̄хум, ня̄врамыт халанылт ё̄ранылтыл а̄рталахтасыт. Но̄хпатум хо̄тпат мӯйлупсал майве̄сыт. Щар юио̄вылт пум пилтапэ̄кваныл но̄хпе̄лаяптасаныл. Ла̄ве̄гыт, та пум пилтап хотщарнэ хольтыл та̄л палыт атхатам матыр лю̄ль накыт хотпатэ̄гыт, минэ̄гыт. Ма̄лтып тӯя хо̄талыт ёт ёмас посыӈ хо̄талыт ёхтэ̄гыт. Мир сыстамыг паты. Тахольтыл ма̄лтып, посыӈ, хо̄талыӈ хо̄тал о̄лыс, ма̄хум ёмщакв ощхультасыт, ёнгасасыт, ёмас номтыл ла̄ккваминыгласыт. 1071 2014.03.07. unknown Та̄наныл янытлыянӯв. А̄с-угорский институтт ос «Лылыӈ со̄юм» студият я̄тил ма̄ньщи нэ̄ хо̄тпаквет рӯпитэ̄гыт. Са̄выӈпа̄лэ та̄н пуссын ма̄ньщи ла̄тӈыл потыртаӈкв ха̄сэ̄гыт. Институтт рӯпитан ма̄хум та̄н наука рӯпата ва̄ре̄гыт. Ос студият рӯпитан а̄гиянув та̄н ня̄врамыт ёт рӯпитэ̄гыт. Ань 8 март ялпыӈ хо̄тал кастыл ма̄н та̄наныл пуссын янытлыянӯв. То̄рум ёт, О̄тыр вос о̄лэ̄гыт! На̄й-О̄тыранылн вос ӯргалавет, пус ка̄т, пус ла̄гыл! 1071 2014.03.07. Людмила ТЕТКИНА Кит а̄гирищакве̄г ома хо̄нтсы̄г. Людмила ос Евгений Угрюмовыг Кондинский район Леуши па̄вылт о̄лэ̄г. Людмила Ильинична такви ще̄мьятэ урыл ла̄выс: – Ме̄н о̄йкаме̄нтыл хӯрум пыг о̄ньщиме̄н. Ам акваг а̄ги урыл номсысум. Тох та та̄ланум ювле хультсыт. Яныг пыгагум школа а̄стласы̄г, э̄лаль ханищтахтуӈкве минасы̄г. О̄йкам ос ма̄нь пыгме̄н ёт юн хультсӯв. То̄нт номсахтуӈкве патсум, э̄рыӈ савалап колт ма̄нь а̄гирищ виӈкве. О̄йкам ты урыл ла̄всум, тав тай ёмащакв ва̄гтэ, ам сака а̄гирищ о̄ньщуӈкве тахсум. Тувыл Урай ӯс савалап ня̄врам колн ялсуме̄н, тот ме̄нки нэ̄паканме̄н хульсанме̄н. Ос ты юипа̄лт са̄всыр справкат ос мо̄т нэ̄пакыт акванатуӈкве о̄вылтахтасме̄н. Нэ̄пакыт ёт капыртым акв та̄л минас. Ма̄нь а̄гирищкве кинсым Ханты-Мансийск, Тюмень ӯсыгн савалап ня̄врам колн ялсуме̄н. Нэ̄паканме̄н Новосибирск ӯст о̄лнэ савалап ня̄врам колн ос ке̄тсанум. Ань ка̄сыӈ тамле кол интернетыт такви ло̄пс о̄ньщи, тот о̄лнэ ня̄врамыт хурияныл сунсыглаӈкве ро̄ви. Тот ты ам Василиса хуритэ ка̄саласлум. Тув свонитасум, а̄ги урыл китыглахтасум, ювле ла̄вве̄сум, Василиса йӣгрищ о̄ньщи, наме Маргарита. Ос туп кит а̄ги виӈкве э̄ри, аквъёт вос яныгме̄г. Ме̄н о̄йкаме̄нтыл а̄гирищиг палт минасме̄н. Тэ̄н ётэ̄н хунь ва̄щинтахтасме̄н, Василиса ам нуплум нас сунсыс, Рита хащта̄л хо̄тпа ка̄саламе торыг, лю̄ньщалтахтас. Амки а̄латы тот лю̄ньщалтахтасум. То̄нт о̄йкам ла̄выс, ты а̄гииг сас выгагме̄н. Междуреченский па̄вылн нэ̄пакыт щё̄питаӈкве минасме̄н, ла̄вве̄сме̄н, о̄влэ̄т ханищтахтуӈкве э̄ри. Ханищтахтуӈкве а̄стлысме̄н, экзаменыл ва̄рвесме̄н, са̄всыр нэ̄пакыт хассуме̄н. Психологыт ос мо̄т хо̄тпат ме̄н ётуме̄н рӯпитасыт. Ос ты юипа̄лт ущ а̄гирищиг ма̄гсыл Новосибирск ӯсн минасме̄н. То̄нт Рита туп акв та̄лэ то̄влыс, Василиса хӯрум та̄лэ о̄лыс. Хунь юв тотсагме̄н, о̄влэ̄т лю̄щсы̄г, о̄йкамныл ос пыгумныл пилсы̄г. Савалап ня̄врам колт туп нэ̄ хо̄тпат рӯпитэ̄гыт, тыи ма̄гсыл о̄йкам ка̄саламе̄н порат сас лю̄ньщуӈкве о̄вылтахтасы̄г. Ань тай ханьщувласы̄г, о̄йкам рӯпатаныл сака ӯритэ̄н, юв ёхты, сас тав палтэ ха̄йтэ̄г, такем та аниглытэ̄н. О̄йкам МЧСт рӯпиты, ам садикыт ле̄ккарыг о̄лэ̄гум, а̄гиягум о̄с тув ялантэ̄г. Хо̄тал палыт ам по̄хамт о̄лэ̄г, садикыт акваг тэ̄н группатэ̄н щалтапа̄лэ̄гум, уральтыягум. Яныг пыгме̄н Андрей строительный институтыт ханищтахты, котиль пыгме̄н Илья машиностроительный колледжит о̄выл курсыт ханищтахты. Ма̄нь пыгме̄н о̄вылт классын яланты. Хӯрум ня̄врам янмалтым, ма̄н яныг ще̄мьяг ловиньтахтасӯв, са̄в-сыр льгота о̄щсӯв. О̄йкам са̄в олн сэ̄лыс, тыи ма̄гсыл пособияолныл ат ойтвесӯв. Пыганум школат кит щёс тыттуве̄сыт, ты коныпал мо̄т нё̄тмил ма̄н ат ва̄щинтасӯв. Ань а̄гирищит ма̄гсыл олныл ойтаве̄в, тувыл матыр ёвтуӈкве э̄ри, чекыт пуссын акванатыянум ос опекан тотыянум. Ма̄нав ӯральтаӈкве та̄н ва̄тихал ёхталэ̄гыт. Сунсэ̄гыт, хо̄т а̄гирищиг хуе̄г, манхурип маснут о̄ньще̄г, манхурип тэ̄нут тэ̄гы̄г. О̄влэ̄т маныр э̄ри, пуссын суссылтасум, тувыл номсэ̄гум, акваг тох ӯральтаӈкве о̄с ат э̄ри. Па̄вылт таса̄вит вина айнэ хо̄тпа о̄лы, ня̄враманыл нупыл тэ̄ланыл щар а̄тим. Нэ̄мхотьют ат пӯмщалахты, манхурип та̄н маснут масэ̄гыт, хо̄т хуе̄гыт ос маныр тэ̄гыт. Ос ювле ла̄вавем, олныл ойтавем ос тыи ма̄гсыл ты уральтавем. Ань о̄йкаме̄нтыл о̄лнэ колув ремонтыл ва̄рысламе̄н, Василиса ос Маргарита ма̄гсыл акв колнак йильпииг щё̄питаслуме̄н, са̄всыр йильпи ёнгын утытыл ёвтсагме̄н. Тэ̄натэ̄н ме̄н э̄руптым ос ӯргалым янмалтыягме̄н. Ма̄нь пыгум а̄гирищиг ёт акваг ёнгасы. Тав такви иӈ ма̄нь, о̄влэ̄т китыглахтас, манрыг ты а̄гирищиг тотвесы̄г. Ань ос тав ханьщувлас, школаныл ёхты, та̄ра а̄гирищиг урыл китыглахты. Людмила Ильинична ос о̄йкатэ Евгений Владимирович сас ма̄ньщииг, Кондинский районт самын патсы̄г, тот яныгмасы̄г. Акван хунь минасы̄г, Леуши па̄вылн о̄луӈкве ва̄нтласы̄г. Тэ̄нки яныг кол ӯнттысы̄г. Ам Людмила Ильинична нэ̄ янытлан хо̄талыл янытлылум. Тав сымыӈ хо̄тпаг о̄лы, савалап ма̄нь ня̄врамыг о̄ньщи. А̄гирищиг тав палтэ молях ханьщувласы̄г, таве омаг ла̄витэ̄н. Ты ще̄мья со̄тыӈыщ, щуниӈыщ э̄лаль вос о̄лы. Пус ка̄т, пус ла̄гыл. 1071 2014.03.07. Светлана РОМБАНДЕЕВА Сакв ма̄ньщиянув. Ха̄льӯс район Саранпа̄вылн ялмум порат ам акв ма̄ньщи нэ̄ ёт хо̄нтхатыгласум, наме Тамара Егоровна Гындыбина. Тав 1967 та̄лт яныгполь э̄тпост Саранпа̄вылт самын патыс, а̄ги о̄парищ наме Хозумова. На̄н ань тав потре ловиньтэлы̄н: Омам Александра Ивановна Я̄сунтыл о̄лыс, Ма̄нья нэ̄, 1934 та̄лт самын патыс. А̄ги о̄парищ наме Тихонова. А̄тям Егор Семёнович Хозумов Хо̄рыӈпа̄выл хум. А̄тягмомагм Я̄сунтыт акванхо̄нтхатсы̄г, а̄тям тот ла̄пкат рӯпитас. Ме̄н а̄пщиме̄нтыл самын патсуме̄н, хӯрум та̄л о̄с рӯпитас. Тувыл ла̄пка Я̄сунтыт лаппантвес, минасы̄г Хо̄рыӈпа̄вылн, о̄лмыгтасы̄г тув. А̄тям тот нёлолов та̄л рӯпитас, а̄тимыг е̄мтыс. Ма̄н тот и о̄лсув. Ханищтахтуӈкве патсуме̄н, Саранпа̄вылн ва̄нтлысӯв. Та па̄сыл ань тыт Саранпа̄вылт о̄лэ̄в. Омам 2008 та̄лт а̄тимыг е̄мтыс. О̄йкан хотыл о̄лы? Тав о̄с ма̄ньщи хум? О̄йкам Петр Иванович Кимкъясуйныл о̄лы, ма̄ньщи хум, нё̄рт яласас. Ме̄н са̄т та̄л нё̄рт яласасме̄н. Тувыл яныг пыгме̄н школан минас, на̄лув по̄йтсуме̄н. О̄йкам ань пенсиян патыс. Ам на̄лумт тыт тармыл совхозт рӯпитэ̄гум. Ме̄н нила ня̄врам о̄ньщиме̄н, ань пуссын янгыт хӯрум пыг, акв а̄ги. Пыганме̄н Серёжа, Ваня ос Алёша Ханты-Мансийск ӯст колледжит ханищтахтэ̄гыт. А̄гиме̄н Лена, школат нёлолов классыт ханищтахты. Кит пыгагме̄н армиян ялсы̄г, ма̄нь пыгуме̄н ань ты та̄л я̄ӈк на̄тнэ э̄тпост армиян виве. Ам ань совхозт сувенирный цехт рӯпитэ̄гум, пӯркит, тапочкат та матыра̄ти ва̄ре̄в, хансал яктыянӯв, ю̄нтыянӯв. Пӯркит ю̄нтуӈкве, улпыл, та̄рвитыӈ? Атхунь та̄рвитыӈ. Ханса яктуӈкве э̄ри, йинэ̄в, ю̄нтэ̄в. Ня̄враманын ма̄ньщи ла̄тӈыл потыртэ̄гыт? Та̄н ма̄ньщи ла̄тыӈ пуссын торгамтэ̄гыт, ане̄кваныл ёт яныгмасыт. Яныг пыгум потырты. А̄пщим яныг пыге Сашатэ ос ва̄г ма̄ньщи ла̄тыӈ. Ма̄ньнув ня̄враманув тай ат потыртэ̄гыт, ань матум хо̄тпа ат о̄ньще̄в, хотьют ёт ма̄навн потыртаӈкве. Ма̄н ань акв ла̄тӈув ма̄ньщи, китыт ла̄тӈув рущ, мори равтэ̄в. Торыӈ ла̄тыӈ ат хӯлэ̄гыт, хумус ва̄ӈкве патэ̄гыт. Школат тох тай ханищтэ̄гыт ща̄нь ла̄тыӈ, олимпиада та маныр, пуссын ва̄ре̄гыт. Ань ня̄врамыт ща̄нь ла̄тыӈ ханищтаӈкве сака ат таӈхе̄гыт, э̄ссамтэ̄гыт. «Лӯима̄ сэ̄рипос» ма̄ньщи газета на̄н палтылын ёхталы, ловиньтылын? Ёхталы, ам акваг ловиньтэ̄гум, то̄ванакт хотты ва̄нэ хо̄тпанув ка̄салэ̄гум. Матъёмас газетав о̄лы, ма̄нти ла̄тӈувтыл потрыт ловиньтэ̄в, сака ёмас. Тамара Егоровна тамле ка̄ркам, ма̄щтыр нэ̄. Пӯркит ва̄рнэ̄тэ коныпал тав ма̄ньщи суп ю̄нты. Ня̄враманэ кот тынтлаӈкве о̄с ха̄сэ̄гыт. Ты я̄тил ма̄ньщи хо̄тпав ще̄мьятэ ёт пуста̄гыл вос о̄лы, пус ка̄т, пус ла̄гыл! Ма̄н, редакцият рӯпитан ма̄хум, таве ос тав ще̄мьятэ нэ̄ хо̄тпат пуссын э̄ква ялпыӈ хо̄талыл янытлыянӯв! О̄выл хурит Тамара Егоровна ма̄хманэ ёт по̄слым о̄лы, во̄ртыпа̄лныл ёмаспа̄л нупыл лю̄ле̄гыт: Лена а̄гитэ, такви Тамара Егоровна, а̄пщитэ а̄гииг Люда ос Вика, а̄пщитэ пыг Саша ос Лена мане. Китыт хурит ос Тамара Егоровна пыганэ по̄слым о̄лэ̄гыт – Ваня, Алёша ос Серёжа. Ань тыт Ханты-Мансийск уст ханищтахтынэ̄ныл ма̄н та̄рапаттыслув, та̄наныл газета ва̄рнэ колн во̄выгласанув, тыт по̄слысанув. Ты я̄тил ма̄ньщи пыгыт со̄тыӈыщ вос о̄лэ̄гыт, На̄янылн-О̄тыранылн вос ӯргалавет! 1071 2014.03.07. Людмила ТЕТКИНА Нё̄рахи па̄вылт яныгмам нэ̄. Надежда Владимировна Тасманова ня̄врамаге ёт ам Ха̄льӯст о̄лум ялпыӈ хо̄талт по̄слысанум. Ма̄ньщи нэ̄ ще̄мьяӈ та̄гыл тот о̄лы. Такви тав Ха̄льӯс район Нё̄рахи па̄вылт яныгмас. Пе̄с порат тот яныг па̄выл о̄лыс, ань туп хӯрум кол хультыс. Акв колт фермеро̄йка о̄лы, мисыт, лувыт янмалты. Китыт колт Калининыт колта̄гыл ос хурмит колт Надежда оматэ Татьяна Семёновна Тасманова такке̄т о̄лы. Тав Нё̄рахи па̄вылн оматэ палт ва̄тихал яланты, таве̄н кол сори рӯпата ва̄руӈкве нё̄ты. Оматэ ёт яныг тэ̄пкант карто̄пка ӯнттэ̄г, са̄всыр мо̄т тэ̄нут янмалтэ̄г, пил ва̄тэ̄г, хӯл алыщлэ̄г ос во̄рае̄г. Ам Надежда Владимировна нэ̄ хо̄тпат ялпыӈ хо̄талыл янытлылум. О̄лупсатэ кӯпнитыг вос е̄мты, То̄румн са̄в ё̄рыл вос пинаве. Пус ка̄т, пус ла̄гыл! 1071 2014.03.07. Александр ВЬЮТКИН Хӯрум колта̄гыл. Ханты-Мансийск ӯст «Папа, мама, я – обскоугорская семья» нампа касыл хо̄тынтыг ва̄рыглавес. Ты хо̄т та̄л сыс пусcын аквъёт титхойплов соссаӈ колта̄гыл халанылт кассыт. Ты пӯмащ ва̄рмаль ка̄сыӈ та̄л «Лылыӈ со̄юм» колт ня̄врамыт ёт рӯпитан ма̄хум щё̄питыглыяныл. Ва̄рыглам ка̄сыланыл аквписыг пӯмащиг тэ̄лы. Ты порат о̄с сака пӯмащ о̄лыс. Соссаӈ ма̄хум халт тит ма̄ньщи ос акв ханты колта̄гыл кассыт. Щар яныг ще̄мьяг са̄в та̄л акъвёт о̄лнэ ханты колта̄гыл Раиса ос Валерий Головиныг, пыгаге̄н ос а̄гитэ̄н акваннё̄тхатым пуссын кассыт. Тувыл тит ма̄ньлат ма̄ньщи ще̄мьяг Анастасия Федий пыгаге ёт ос Максим, Татьяна Фоминых а̄гитэ̄н ёт о̄лсыт. Та̄н та̄нти самын патум ма̄наныл ос ань ты о̄лупсаныл урыл потыртасыт ос матыр такталасыт. Касыланыл щирыл та̄н йӣквсыт, э̄ргысыт ос са̄ӈквылтапыл са̄ӈквылтасыт. Пуссын аквтем пӯмщиг о̄лсыт. Жюри хо̄тпаг Мария Кузьминична Волдина, Наталья Фёдоровна Кривошапова ос Виктор Банк пе̄риялве̄сыт. О̄выл места ма̄ньлат ма̄ньщи Фоминых колта̄глын мисаныл. Тыи ма̄гсыл Татьяна ще̄мьятэ ёт тэ̄нут па̄йтнэ «мультиварка» нампа пӯтыл мӯйлуптавес. Та нампа пӯт тӣврыт са̄всыр тэ̄нут щё̄питаӈкв ро̄ви. Титыт местан Раиса ос Валерий Головиныг пе̄риявесы̄г. Тэ̄н ос «кухонный комбайн» нампа утыл мӯйлуптавесы̄г. Юио̄выл местан Анастасия Федий колта̄глэ е̄мтыс. Та̄н ос са̄всыр нампа фруктыт витыг сакватан утыл мӯйлуптаве̄сыт, ты ут рущ ла̄тӈыл «блендерыг» ла̄ваве. Ам ты хӯрум колта̄гыл щуниӈыщ э̄лаль о̄лнэ хо̄талыл ла̄виянум. Ня̄враманыл мовиньт коланылт ло̄ӈханьщап хольт акваг вос суйты. Нумыл ё̄хнэ, ёлыл ё̄хнэ ма̄витэ ня̄враманыл ма̄гсыл сыстам щирыл вос хульты. На̄й-О̄тыранылн вос ӯргалаве̄т, пуста̄гыл вос о̄лэ̄гыт. 1071 2014.03.07. Людмила ТЕТКИНА Ты ёмас хо̄тал янытлым ма̄н ла̄тӈув э̄лаль тотылӯв. Ща̄нь ла̄тыӈ янытлан мирхал хо̄талт Югорский университетыт ялпыӈ хо̄тал ва̄рыглавес. Соссаӈ ма̄хум институтт рӯпитан хо̄тпат ма̄ньлат ма̄хум тот акванатыгласаныл. О̄влэ̄т Татьяна Карминская, ЮГУ кӯщай нэ̄, студентыт янытласанэ. Тав ла̄выс: « Ма̄ янытыл хо̄т со̄тыра са̄виткем мир о̄лы. Ань тох е̄мтыс, то̄ва мирыт та̄нки ща̄нь ла̄тӈаныл хотёрувлаӈкве патсаныл. Э̄лаль ке тох мины, туп хӯрум со̄тыра ла̄тыӈ тах хульты. Ань ла̄тыӈ ва̄нэ яныгпа̄ла хо̄тпат а̄тимыг е̄мтэ̄гыт, ты хосыт ща̄нь ла̄тӈыт о̄с со̄йме̄гыт. Ма̄ янытыл о̄лнэ мирыт ща̄нь ла̄тӈаныл ул вос ёрувлэ̄гыт, ЮНЕСКО нампа организация ща̄нь ла̄тыӈ янытлан хо̄тал ва̄руӈкве номылматас. Югорский университетт рӯпитан ма̄хум ма̄ньщи, ханты ла̄тӈыг ос пе̄с йис ва̄рмалит но̄хво̄рмалтан ма̄гсыл яныг рӯпата ва̄ре̄гыт. Ты та̄лныл соссаӈ ма̄хум институт тот рӯпитаӈкве о̄вылтахтас. Ань а̄гитпыгыт та̄нки культураныл ос ла̄тӈаныл тот ханищтэ̄гыт. Тамле ялпыӈ хо̄талыт ва̄рыглан хосыт, мо̄т студентыт соссаӈ ма̄хум урыл са̄внув ва̄ӈкве тах патэ̄гыт». Студентыт янытлаӈкве Александр Новьюхов, «Югра лылыеп» нампа организация кӯщай, ёхталас. Тав Россия янытыл о̄лнэ соссаӈ ма̄хум яныг организация рӯпататэ урыл ла̄тыӈ ла̄выс, рущ ла̄тӈыл тох намаим о̄лы: «Ассоциация коренных малочисленных народов Севера, Сибири и Дальнего Востока». Тув Россия янытыл мощщаг хультум налыман мирыт хансым о̄лэ̄гыт. Александр Новьюхов акв ва̄рмаль урыл тот о̄с потыртас. Россият о̄лнэ мирыт намнэ̄паканылт национальность ань ат хансаве. Тав ла̄вме щирыл, национальность ат о̄щнэ̄ныл паттыиг, ма̄хум та̄нки ла̄тӈаныл ат ва̄ганыл ос культураныл урыл щар ат пӯмщалахтэ̄гыт. Тувыл ань ос акв лю̄ль тэ̄ла о̄лы, са̄в по̄х хо̄тпат соссаӈ ма̄хум нупыл хасхатэ̄гыт ос са̄всыр льгота о̄ньще̄гыт. Кӯщай хум ла̄выс, тамле хо̄тпат экзаменыл ва̄руӈкве э̄ре̄гыт, ма̄ньщииг манос хантыиг о̄луӈкве ке воратэ̄гыт, та̄н хотты ла̄тыӈ вос ханищтэ̄гыт. Мария Кузьминична Волдина ма̄ньлат хо̄тпат э̄лыпа̄лт такви хансум стихотворениянэ ловиньтасанэ ос такви уре̄тыл потыртас. Тав яныгмаме порат, ка̄сыӈ ханты хо̄тпа хӯрум ла̄тӈыл потыртас. Ты э̄ква ханты, рущ ос саран ла̄тӈыт ва̄ганэ. Ань яныгман ня̄врамыт туп рущ ла̄тыӈ ва̄гыт. Тыи ма̄гсыл ань ща̄нь ла̄тыӈ янытлаӈкве ос э̄лаль тотуӈкве э̄ри. Светлана Динисламова ма̄ньщи ос рущ ла̄тӈыл хансум стихотворениянэ ма̄хумн о̄с ловиньтасанэ. Студентыт ты ялпыӈ хо̄тал янытлаӈкве о̄с щё̄питахтасыт. Акв колнакт та̄н ё̄рнкол тӯщтысыт ос мӯй ма̄хумн ма̄ньщи ос ханты пе̄с йис ва̄рмалит урыл потыртасыт, йӣквыт йӣвсыт ос э̄ргыт э̄ргысыт. Библиотекат «Язык – как воздух, можно им дышать» нампа пӯмыщ суссылтап рӯпитас. 1071 2014.03.07. Татьяна Бахтиярова Ма̄нь а̄ги. Ха̄йты а̄гирищ, Мовиньты а̄гирищ Тахамты а̄гирищ, Тувыл ос но̄х сыпн ха̄йты. Сыме во̄йт хуи, Тав а̄пщи о̄ньщи, Тав яга̄ги о̄ньщи, Тав яныг ще̄мья о̄ньщи! Ща̄не юн ӯнлы, пӯрка ю̄нты, А̄ще щас кем туп холас, Во̄раяӈкве минас, Кӯтюве пе̄сталас, Тувыл ёса вотаяс А̄гирищ тыхо̄тал сыме во̄йт хуи, Тав а̄пщитэ̄н, тувыл яга̄гитэ̄н Тӯйткол ва̄руӈкв нё̄таве, Тӯйт кӣвырт повара̄лы, мовиньты. Мовиньт суе юв суйты. Ща̄ньке̄тэ юн ӯнлы, мовала̄лы Сыме ща̄рги, Суиӈ ма̄нь а̄ги о̄ньщи. 1071 2014.03.07. Людмила ТЕТКИНА Андрей Тарханов яныг намыл майвес. Ма̄ньщи поэт Андрей Семенович Тарханов «Почётный гражданин Ханты-Мансийского автономного округа –Югры» намыл майвес. Андрей Семёнович ма̄ньполь э̄тпос 13 щислат 1936 та̄лт Аманья па̄вылт Кондинский районт самын патыс. Школа а̄стламе юипа̄лт Ханты-Мансийский педагогический училищат ханищтахтас. Тувыл Ленинград ӯст А. И. Герцен нампа институт а̄стластэ. Ос ты юипа̄лт Кондинский район Юмас па̄выл школан рӯпитаӈкве ке̄твес. Тот мощ рӯпитаме юипа̄лт Ханты-Мансийск ӯсн о̄луӈкве ва̄нтлас. Андрей Тарханов «Ленинская правда» нампа газетат корреспондентыг о̄лыс. Ты коныпал телевиденият ос Творчество колт рӯпитас. Андрей Семёнович «Союз писателей России» ос финноугорский писателит Ассоциация палт наме хансым о̄лы. 50 та̄л сыс тав «Первая завязь», «Зелёный дождь», «Морошковое лето» ос са̄в мо̄т нэ̄пакыт та̄ратас. Тав стихотворениянэ болгарский, венгерский, чешский, финский, киргизский ос са̄в мо̄т э̄лы хо̄н ла̄тӈытн толмащлаве̄сыт. Губернатор прессслужбатэ ке̄тум ля̄ххал ма̄ньщи ла̄тӈыл Людмила ТЕТКИНА хансыстэ. 1071 2014.03.07. Тамара МЕРОВА Сапра̄нит йильпи кӯщай пе̄риясыт. Округ общественный палатат рӯпитан ма̄хум акванатхатыгласыт. О̄влэ̄т та̄н «Социальный кодекс Югры» документыт тув хансым йильпи ва̄рмалит урыл потыртасыт. Ос тувыл округныл Российский Федерация общественный палатат рӯпитан ма̄гыс хо̄тпа пе̄риясыт. О̄выл ва̄рмаль урыл мирн нё̄тнэ Департаментыт рӯпитан кӯщай нэ̄ Мария Краско потыртас. Округувт 91 са̄всыр тэ̄латыт щирыл мирн нё̄тэ̄гыт. Ос ты хосыт 386 со̄тыра э̄лумхо̄лас олннё̄тмилыл мивет манос матыр мо̄т льгота о̄ньще̄гыт. Тувыл ка̄сыӈ та̄л тамле хо̄тпат са̄вме̄гыт. Ань 19 нё̄тмил ва̄рнэ тэ̄латыт мо̄т щирыл ке хансуӈкве, то̄нт 5 со̄тыра са̄вит хо̄тпаг мощщами. Тыг Югра ма̄вн ущтынув ёхтум ма̄хум ат та̄л тыт вос о̄лэ̄гыт, тувыл ущ та̄н нё̄туӈкве патавет. Ты тэ̄ла ёт то̄ват ат ка̄саще̄гыт. Мир пусмалтан Департаментыт ла̄всыт, то̄ва та̄рвитыӈ а̄гм о̄щнэ хо̄тпат та̄нки ёранылт пусмалтахтуӈкве ат ве̄рме̄гыт. Та̄нанылн сака тыныӈ тэ̄рпит акваг ёвтуӈкве э̄ри ос ты нё̄тмиланыл хотвиве ке, хумус та̄н э̄лаль о̄луӈкве патэ̄гыт. Мо̄т нё̄тмил урыл потыртан порат акванатхатам ма̄хум о̄с мощ воритотсыт. Любовь Чистова, округ общественный палата кӯщай, ла̄выс: «Ма̄хум вос торгамтэ̄гыт, округ бюджет олнанув а̄ти туп нё̄тмил ва̄рнэ ма̄гыс о̄лэ̄гыт. Ка̄сыӈ хо̄тпан ма̄н аквписыг нё̄туӈкве о̄с ат ве̄рме̄в. Тувыл то̄ва рӯпитан ос ёмас олн сэ̄лнэ хо̄тпат та̄нки ща̄нянылна̄щаныл нё̄туӈкве ат ка̄саще̄гыт. Тох о̄луӈкве о̄с ат ро̄ви». Ань ты «Социальный кодекс Югры» намаим са̄ккон ма̄ньполь э̄тпос оигпаме мус э̄лаль щё̄питаӈкве патаве. Тув мус матыр э̄рнэ хӯлтнэ ла̄тыӈ хансуӈкве э̄ри. Тувыл э̄лаль ты сапра̄нит округ па̄лыл РФ общественный палатат рӯпитаӈкве ка̄сащам хӯрум хо̄тпа наманыл ла̄вве̄сыт: тыи Галина Галимова Сургутныл, ос Ольга Сидорова, Виктор Заболоцкий Ханты-Мансийсканыл. Та̄н тувыл пуссын э̄лаль ва̄рнэ тэ̄ланыл о̄вылтыт потыртасыт. Са̄выӈпа̄лэ акванатхатам ма̄хум пуссын Виктор Заболоцкий пе̄риясыт. Юио̄выл тэ̄латыт та̄н «губернатор премиял» минэ ма̄гыс В. А. Каданцев ос «Ю. Н. Шесталов нампа премиял» минэ кастыл В. Е. Енов урыл потыртасыт. Валерий Каданцев литература ма̄гыс ос Владимир Енов ханты ща̄нь ла̄тӈе но̄хво̄рмалтан, пе̄с потрыт, накыт э̄лаль тотнэ ма̄гыс вос мӯйлуптаве̄г. 1071 2014.03.07. Валентина УЗЕЛЬ Яныгпа̄ла хо̄тпат ёт потрамасӯв. Юио̄выл та̄лыт сыс ма̄ньщи ла̄тыӈ ва̄нэ ма̄хум акваг та мощщаме̄гыт. Ос ань газета ва̄рнэ колувт ма̄н нёлолов ма̄ньщи хо̄тпа рӯпитэ̄в. Пуссын ла̄тӈув ва̄глӯв, халувт туп ма̄ньщи ла̄тӈыл потыртэ̄в. Со̄ль, ща̄нь ла̄тӈыл потыртаӈкве татем ёмас. Ма̄н нэ̄мхотьютн ат торгамтаве̄в, маныр таӈхе̄в, та урыл та потыртэ̄в. Халувт хотьют пе̄с ла̄тыӈ номылматы, та̄ра ля̄галытэ. Тох ты халувт ханищтахтым, ла̄тыӈте̄в э̄лаль тотылӯв. Ань та хультум ре̄тыӈ ю̄свой э̄тпос 21 хо̄талэ̄т ма̄ янытыл Ща̄нь ла̄тӈыт янытлан яныг ялпыӈ хо̄тал о̄лыс. Ты кастыл ӯсувт о̄лнэ ма̄ньщи ос ханты ма̄хум А̄с-угорский институтт акванатыглаве̄сыт. Ты ва̄рмальт Светлана Динисламова кӯщаиг о̄лыс. Ма̄ньщи ма̄хманув са̄выӈпа̄лэ пуссын ма̄ньщи супыл масхатым о̄лсыт. А̄с ма̄хманув халт туп тит нэ̄г тэ̄нти супыл ёхталасы̄г. Ос ма̄к таи пӯмщиг о̄лыс, тув яныгпа̄ла ма̄ньщи хо̄тпат ёхталасыт – ты Мария Сергеевна Мерова, Николай Иванович Хозумов ос Егор Алексеевич Яркин. Николай Иванович Людмила а̄гитэ палт о̄лы. Егор Алексеевич о̄с а̄гитэ палт ёхтыс, тав а̄гитэ Раиса пӯльницат яныг ле̄ккарыг рӯпиты. Ща̄нь ла̄тӈув янытлан ма̄гсыл ма̄хум во̄вве̄сыт, та̄нти хансум потраныл, стихотворенияныл вос потыртыяныл. Ма̄ньщи ла̄тӈыл Светлана Селиверстовна ос ма̄ньлат ма̄ньщи а̄гиюв Татьяна Бахтиярова стиханэн о̄с ловиньтасы̄г. А̄с ма̄хманув ос маттем та потыртасыт. Ӯсувт ханты нэ̄кве о̄лы, наме Ульяна Шульгина. Ты сака ма̄щтыр нэ̄. На̄н «Северный дом» передача сунсылы̄н те, тот потыртан а̄гит ма̄ньщи ман ханты супыл масхатым о̄лэ̄гыт, ты Ульяна тав ю̄нтум супанэ. Ань ты о̄лум ялпыӈ хо̄талт Ульяна Николаевна ханты э̄ргыт э̄ргыс. Тав ма̄ньта̄гыл са̄лыӈколт яныгмас, ща̄не ёт о̄лыс. Сака са̄в э̄рыг ва̄г. Тав о̄с во̄выглавес э̄ргуӈкве. Ла̄тӈыт ат кос торгамтасанӯв, ос таве хӯнтлымав, э̄ргын турсуе щар сымын хо̄яс. Аквтуп ма̄ньщи хо̄тпа э̄рги. Тувыл ма̄хум пасан ва̄тан во̄вве̄сыт, та̄нти халанылт потыртаманыл сыс ща̄ил айтве̄сыт. Ань институтт рӯпитан ма̄хум пӯмащипа ла̄тӈыл ла̄виянӯв, матъёмас та̄н ма̄к ма̄ньщи, ханты ма̄хманув акванатыгласаныл, пуссын аквъёт ща̄нь ла̄тӈув янытласлӯв. 1071 2014.03.07. Людмила ТЕТКИНА Са̄т хо̄тал кина суссылтавес. Ре̄тыӈ ю̄свой э̄тпос 28 хо̄талныл ма̄ньполь э̄тпос 6 хо̄талэ мус Ханты-Мансийск ӯст «Дух огня» нампа кина суссылтан мирхал фестиваль рӯпитас. Ты фестиваль тыт 12 щёс ва̄рыглавес. Ювле хультум та̄лт ма̄н округувт Ха̄льӯс районт хо̄нтым газ 60 та̄лэ то̄влыс, тыи ма̄гсыл фестивалит ма̄во̄й но̄хвинэ ма̄хум урыл кинат суссылтаве̄сыт. Са̄т хо̄тал сыс Ханты-Мансийск, Сургут, Нижневартовск, Излучинск, Советский, Югорск ос Нефтеюганск ӯсытт о̄лнэ мир кина сунсуӈкв ялантасыт. Фестивалин тотыглым кинат билетаныл 40 солко̄ви тынэ туп о̄лыс. Тув ма̄хум ще̄мьяӈ та̄гыл ялантасыт. Ты порат яныгса̄т арыгкем кина суссылтавес. Ка̄сыӈ та̄л тыг Россия янытыл мирн ва̄нэ артистыт ос режиссёрыт во̄виньта̄лавет. Ты та̄л тыг Елена Яковлева, Алёна Хмельницкая, Эммануил Виторган, Станислав Говорухин ос мирн ва̄нэ мо̄т са̄в хо̄тпат тыг ёхталасыт. Кина ва̄рнэ хо̄тпат та̄нки рӯпатаныл тыг суссылтаӈкве тотыгласаныл. Жюрихо̄тпат ма̄к ёмас, пӯмащ кина пе̄риясыт. Щар ёмас кина «Золотая тайга» нампа мӯйлупсал ос 300 со̄тыра солко̄вил майвес. Китыт места вим хо̄тпа ос «Серебренная тайга» нампа мӯйлупса ос 200 со̄тыра солко̄вил вис. Ос хӯрмит места ма̄гсыл «Бронзовая тайга» 100 со̄тыра солко̄ви майвес. Кинат ёмащакв ёнгын нэ̄гхумыг о̄с пе̄риявесы̄г. Но̄хпатум хо̄тпаг ос янытлавесы̄г, мӯйлупсал ос олныл майвесы̄г. Ань ты фестивальт манхурип кина но̄хпатыс, ма̄н мо̄тыт газетат тах хансэ̄в. 1071 2014.03.07. unknown 55та̄лэ̄тыл янытлылӯв! Ре̄тыӈ ю̄свой э̄тпос нёлоловхуйплов хо̄талэ̄т Раиса Германовна Решетникова самын патум хо̄талэ о̄лыс. Тав ань 55 та̄лэ то̄влыс. Ты кастыл ос нэ̄ хо̄тпат ялпыӈ хо̄талув кастыл ма̄н газета кӯщаюв янытлылӯв. Ще̄мьяӈ та̄гыл та̄н пуста̄гыл вос о̄лэ̄гыт, са̄в щунь ос са̄в со̄т вос о̄ньще̄гыт. Пус ка̄т, пус ла̄гыл! То̄рум ёт, О̄тыр ёт! Редакцият рӯпитан ма̄хум. 1071 2014.03.07. Тамара МЕРОВА Финн учёный тэ̄ланэ э̄лаль тотавет. «Торум Маа» музейт рӯпитан А̄с ма̄ньщи нэ̄ Светлана Астапович та̄л котиль э̄тпост Финляндиян ялыс. Тот Хельсинки ӯст юио̄выл хо̄таланэ̄т «М. А. Кастрен и Сибирь» нампа ханищтап ва̄рыглавес. Матиас Кастрен ты финн ма̄хум та̄н учёныяныл, мо̄лты та̄лт тав 200 та̄лэ то̄влыс. Тав о̄лме̄т Россия лӯима̄ янытэ̄т яласастэ ос то̄нт о̄лум соссаӈ ма̄хум ла̄тӈаныл, культураныл урыл пӯмщалахтас. Юв ёхтуме̄т научный нэ̄пакыт хансыс. Тамле ва̄рмалит ань тыг мус мо̄т учёныитн э̄лаль ханищтавет ос ма̄хумн потыртавет. Ты ва̄рыглам семинарт Кастрен ханищтам ос та̄рапаттум пе̄с накыт ос ань ты пора лӯима̄т о̄лнэ о̄лупса аквана̄рталаве̄сыт. Тув ёхталам ма̄хум Хельсинский университетт рӯпитан хум Норман Лангерак потре хӯнтлысыт. Тав Матиас Кастрен ва̄рум тэ̄ланэ э̄сгиянэ, тав о̄вылтам рӯпататэ сака ёмащакв ва̄рманэ, ос ань учёныит таве̄ныл ханищтахтаманыл, аквтох э̄лаль рӯпитэ̄гыт. Энико Сий, Венгрияныл ёхталам э̄ква, Регули венгр учёный хо̄тпа о̄с ка̄стыстэ. Тэ̄н сас финноугорский ла̄тӈыт ос культурат ханищтым сака са̄в э̄рнэ тэ̄лат та̄рапаттысы̄г. Тувыл Олег Сергеев, марий хум, такви ща̄нь ла̄тӈе о̄вылтыт потыртас. Светлана Астапович «Музей моей жизни»: сохранение и трансляция традиционной культуры обских угров в Этнографическом музее под открытым небом «Торум Маа» о̄вылтыт потре ловиньтас. Та юипа̄лт мӯй ма̄хум пӯмыщ суссылтап сунсуӈкве во̄вве̄сыт. Ильдико Лехтинен, Финляндият яныг музейт рӯпитан кӯщай э̄ква, Матиас Кастрен яласам лё̄ӈхе ос лӯима̄ныл тотум пе̄с пормасыт, хурит суссылтас. Тувыл хуньт Матиас хансыглам пе̄с э̄рыг тот э̄ргувес. Йормо Етто ос Еса Тиккула, пианинал ёнгын нэ̄, э̄рыг йильпииг щё̄питастэ̄н. Йоуко Прами нё̄тнэ турсуил ты э̄рыг э̄ргыстэ. Мо̄т пӯмыщ ханищтап Улла Костиайнен ва̄рыглас. Тав мӯй ма̄хум а̄канит ва̄руӈкве ханищтас. Светлана Астапович тамле семинар ва̄рум ма̄хумн яныг пӯмащипа ла̄тыӈ ла̄ви. Тав тот о̄лме сыс Ильдико Лехтинен, Тармо Хаккарайнен ос Марья Лаппалайнен хо̄тпатын сака ёмащакв нё̄тве̄с. Та̄н потрыт рущ ла̄тӈын толмащласыт. Финляндият то̄ва музеит сунсыглым Светлана А̄с-угорский ма̄хмыт урыл матыра̄ти са̄внув ва̄ӈкве патыс. Тув ялме па̄сыл тав наука ма̄гыс са̄всыр тэ̄лат э̄лаль ханищтаӈкве ос нэ̄пакн хансуӈкве тахмаяс. Ма̄н таве̄н о̄с са̄в номтыӈ научный тэ̄лат э̄лаль ва̄руӈкве ла̄вилӯв. 1072 2014.03.21. Валентина УЗЕЛЬ Яныг кӯщаюв хо̄нтаӈ ма̄ньщит палт ялыс. Та хультум са̄тыт округ кӯщаюв Наталья Комарова Кондинский район нупыл ялыс. Акв хо̄тал сыс тав нила па̄влытт о̄лнэ ма̄хум ёт хо̄нтхатыглас. Ань тав ялум лё̄ӈхе урыл ты потыр ловиньтэлы̄н. Карым па̄выл Пе̄с порат Карым па̄выл Шугур па̄выл ляпат о̄лыс. Ты Вахрушевыт та̄н о̄лум па̄вланыл. Тувыл та па̄вылныл ма̄хум мо̄т ма̄н ва̄нтлуптаве̄сыт. Са̄в та̄л минас, ос тот о̄лум Вахрушев ягпыгыт ань та па̄выл йильпииг ӯнттысаныл ос община тот ва̄рсыт, «Карым» намыл пинсаныл. Ань хусахтем та̄л та̄н тот о̄лэ̄гыт, хӯл алыщлэ̄гыт, пил, ла̄хыс атэ̄гыт. Пуссын аквъёт лов хо̄тпа тот рӯпитэ̄гыт. Та община кӯщаиг Евгений Александрович Вахрушев о̄лы. Та̄н палтаныл ты о̄влэ̄т округ кӯщаюв ялыс. Наталья Комарова па̄выл янытэ̄т сунсыстэ, ма̄хум ёт потыртас. Тувыл тав Евгений Вахрушев колн щалтуӈкв во̄ввес, тот ща̄й аиманыл сыс тав потыртавес, хумус ты община рӯпиты, маныр ва̄рмаль та̄н о̄ньще̄гыт. Ты община ма̄хум хӯл алыщлан аквхуйплов рыбучасток о̄ньще̄гыт. Я̄ хосыт яласан ха̄пыт ман ма̄нь катерыт, хӯл са̄всыр тэ̄нутыг ва̄рнэ оборудование о̄с ёвтсыт. Мо̄лты та̄л сыс та̄н титахтем тонна са̄всыр щирыл щё̄питым тэ̄нут тыналасыт. Пил, ла̄хыс, хӯл, во̄руй нё̄выль та̄н са̄всыр тэ̄нутыг ва̄руӈкв ха̄сэ̄гыт. Округ кӯщаювн та̄н ла̄всыт, родовой общинат рӯпитан хо̄тпат кол ӯнттын олныл о̄с вос мивет. Ты ва̄рмаль са̄кконанувт я̄насыг хансуӈкв э̄ри, то̄нт та̄н пуссын ма̄нь па̄влытт о̄лмыгтанувыт. Н. Комарова ювле ла̄выс, тав ты урыл тах номсахты. Э̄лаль тав общинат рӯпитан ма̄хум э̄сгысанэ, та̄н ёмащакв рӯпитанэ̄ныл ма̄гсыл янытласанэ. Мортка па̄выл Кӯщаюв та па̄влын ёхтынэ̄тэ кастыл Кондинский район Мортка па̄вылт каснэ ма̄гыс яныг кол ӯнттын ма̄ныл а̄стлавес. Тув ёхтуме порат тав та колн минас, тот ня̄врамыт то̄ват бассейныт пувлысыт, мо̄таныт мечикыл ёнгим ха̄йтыгтасыт. Губернаторув ёхтуме порат ня̄врамыт пувлуӈкве Оксана Веревкан ханищтаве̄сыт, тав олимпийский чемпионкаг о̄лы. Кӯщай нэ̄ тот о̄лум ня̄врамыт ос ма̄хум ёт потыртас. Та район янытыл лё̄ӈхыт пиным о̄лэ̄гыт, машинал ман автобусыл па̄влыт халт яласаӈкв ро̄ви. Ань губернаторув кӯщаитн ла̄выс, мо̄т па̄выл ня̄врамыт ты йильпи каснэ колн вос ёхталэ̄гыт, касуӈкв о̄с вос ханищтахтэ̄гыт, автобусыт акваг тыглетувле вос яласанувыт. Тувыл Н. Комарова тот ня̄врамыт ханищтан ма̄хум, ща̄нита̄щит комитетанылт рӯпитан хо̄тпат акванатыгласанэ, та̄н ётаныл потыртас, ва̄рмаляныл урыл титыгласанэ. Тав ла̄выс, тамле яныг колкапай ӯнттувес, са̄внув ня̄врам тув вос яланты, пуссын касуӈкв вос ханищтавет. Сотник па̄выл Та па̄вылт округ кӯщаюв Малышевы са̄в ня̄врамыӈ колта̄гыл палт ялыс. Тот тав ла̄ввес, ты па̄выл мус ёмас лё̄ӈх а̄тим. Та̄лэтуве сыс лё̄ӈх хотсакватаве, палытэ̄т та яныг во̄ӈхакапаит. Кӯщаюв ты ва̄рмаль урыл ва̄ме, тав та па̄вылн машинал тотвес. Э̄лаль тав ла̄выс, ты лё̄ӈх йильпииг вос ва̄раве, 600 миллион солко̄ви э̄ри. Ань 13 млн. солко̄вил та̄стуве̄сыт. Лё̄ӈх пиннэ рӯпата моще̄рт тах ты о̄вылтаве. Ты па̄выл ма̄хум иӈ акв яныг ва̄рмаль о̄ньще̄гыт – ка̄сыӈ туи порат па̄вланыл на̄йн а̄латы ё̄саве. Па̄выл во̄рыӈ ма̄т о̄лы. Во̄р но̄хпе̄ламлы те, та̄н э̄тэхо̄тал коланыл уральтыяныл. Вит о̄щнэ яныг во̄ӈхат хилункв э̄ри. Ты урыл потыртаманыл порат Кондинский район кӯщай хум Михаил Шишкин о̄лыс, тав ла̄выс, ты рӯпата та̄н ва̄рияныл, олн о̄лы. Ма̄хум ул вос пилэ̄гыт. Междуреченский па̄выл Ты та̄н районный па̄вланыл. Тот ты яныг сапра̄ни ва̄рыглавес. Ляпат о̄лнэ па̄влытныл ма̄хум тув ёхталасыт. О̄влэ̄т Наталья Комарова спортсмен ма̄хум янытласанэ, са̄в ёмас ла̄тӈыл ла̄всанэ. Кондинский районныл са̄в намыӈсуиӈ спортсменхо̄тпа о̄лы. Ты кастыл кӯщаюв та̄н тренераныл пуссын янытласанэ. Янытлам ма̄хум халт Сочи ӯст о̄лум олимпиадат но̄хпатум ёсал ха̄йтнэ пыг Сергей Устюгов ос тав тренере Иван Брагин о̄лсы̄г, тэ̄н сас яныг намыл майвесы̄г. 2013 та̄л сыс та̄н спортсменаныл каснэ ма̄т 192 щёс но̄хпатыгласыт. Тувыл та̄н мо̄т са̄всыр ва̄рмаль урыл потыртасыт. Губернатор прессслужбаныл те̄тым ля̄ххал ма̄ньщи ла̄тӈыл Валентина Хозумова хансыстэ. 1072 2014.03.21. Людмила ТЕТКИНА Тав ё̄рва̄гыл йильпи колыл майвес. Савалап ня̄врамыт 18 та̄л то̄влынэ̄ныл юипа̄лт са̄ккон щирыл о̄лнэ колыл мивет. Ха̄льӯст о̄лнэ Ксения Гындышева савалапыг яныгмас, 18 та̄лэ то̄влуме порат номсыс, о̄лнэ колыл о̄с миве. То̄нт Ха̄льӯс мирколт ла̄ввес, таве янмалтам рӯтанэ о̄лнэ колыл майве̄сыт, тыи ма̄гсыл тав колыл воссыг ат миве. Ты юипа̄лт а̄ги Ханты-Мансийск ӯсн ханищтахтуӈкве минас. Ты ӯст мир ӯргалан Департаментын ялыс, такви та̄рвитыӈ ва̄рмалянэ урыл потыртас. Тот ла̄ввес, Ха̄льӯс районный миркол ёт вос сутытахты, туп тох колыл миӈкве ве̄рмаве. Сут щирыл колыл майвес. 2012 та̄л яӈк на̄тнэ э̄тпост Ха̄льӯст йильпи колн тав ва̄нтлас. Ксения кит пыг янмалты. О̄влэ̄т ма̄ньлат нэ̄ такем ща̄гтыс, номсыс, такви колт ёмащакв о̄лмыгты. Та̄н туп хӯрум э̄тпос ёмащакв о̄лсыт, тувыл таквсы пора ёхтыс, кон ра̄квуӈкве патыс, ащирмаӈыг е̄мтыс. То̄нт ты тав торгамтастэ, о̄лнэ колэ мӯсхалыг ат ва̄рима. Ра̄квыӈ хо̄талыт юипа̄лт кол са̄манэ хо̄тсайсыт ос ха̄ссытаве̄сыт. Тамле колт о̄лыманыл ня̄врамаге акваг а̄гмыл хартсы̄г. Ксения о̄влэ̄т мирколн ялантас, ты урыл акваг потыртас, тувыл тав кол ӯнттын ма̄хум палт ке̄твес. Кол ӯнттын ма̄хум тав колэ̄н ёхталасыт, хо̄тсаюм кол норанэ о̄льпыл са̄ртсаныл ос сысы та минасыт. Аквкит э̄тпос ювле хультыс, кол норанэ ос та ха̄ссытаве̄сыт. Ксения ты урыл ла̄выс: «О̄лнэ колумт о̄влэ̄т слесарный мастерская о̄лыс, тувыл та кол лаппантвес. Са̄в та̄л кола̄л ат о̄ньщас, тувыл акв о̄йка ты пе̄с кол ёвтыстэ ос нила квартира тот ва̄рыс. Районный администрациян тыналастэ. Ты колт ма̄н нила ще̄мья квартирал майвесӯв. О̄влэ̄т жилищный инспекцият рӯпитан ма̄хум палт та̄рвитыӈ ва̄рмалянув урыл потыртаӈкв ялсум, та̄н ам палтум ёхталасыт, колум ёмащакв суссаныл. Ос а̄нум пищма ке̄тсыт, тот хансым о̄лыс, колув вентиляциял ат ва̄рвес, таи ма̄гсыл тох хо̄тха̄ссытаве. Ам ты пищма ёт ос та кол ӯнттум ма̄хум палт минасум. Та̄н ам палтум ёхтысыт, ваннат яныг ас ва̄рсыт ос тув яныг тӯрпа нарыгтасыт, ла̄ве̄гыт, тамле вентиляция колумт рӯпитаӈкве паты. Ты юипа̄лт са̄всыр кӯщаит палт амки ва̄рмалюм урыл са̄в пищма хансыгласум». Ма̄н, редакцият рӯпитан ма̄хум, таве̄н нё̄туӈкве тахсӯв. Акв порат губернатор Наталья Комарова ёт прессконференция о̄лум порат Ксения о̄лнэ колэ урыл потыртасӯв. То̄нт яныг кӯщай нэ̄ таве̄н нё̄туӈкве ла̄выс. Ты ва̄рмаль юипа̄лт са̄в э̄тпос ювле хультыс, ам Ксения ёт ва̄щинтахтасум, о̄лупсатэ урыл китыгласлум. Тав ла̄выс: «Ам о̄влэ̄т номсысум, губернаторув тох ке ла̄выс, ань тах молях нё̄тавем. Ты юипа̄лт Любовь Коротун, районный миркол кӯщай нэ̄, такви палтэ а̄нум во̄выстэ. Ла̄выс, манрыг ам тох лю̄льсаӈ ва̄ре̄гум, хо̄та̄ти пищма хансэ̄гум. О̄лнэ колыл майве̄сум, нас амки э̄лаль ёмащакв о̄луӈкве ат ве̄рме̄гум. Ам о̄с таве̄н амки нэ̄паканум пуссын суссылтасанум, то̄нт тав ва̄ныӈ хо̄тпанэ̄н ла̄выс, о̄лнэ колум мӯсхалыг вос щё̄питаве. Ха̄льӯс миркол рӯпитан хо̄тпат ла̄внэ̄ныл щирыл, колувт колкан ёлыпа̄лт матхурип тӯрпат пинуӈкве э̄ри, то̄нт саюӈкве ос лю̄ль а̄тыл пасуӈкве ат паты. Ос тамле рӯпата ва̄руӈкве, колканэ хотло̄сталаӈкве э̄ри. То̄нт ма̄н нила ще̄мья пуссын ла̄ввесӯв, ма̄нки пормасанув, маснутанув та̄гыл мо̄т ма̄н ва̄нтлуӈкве вос щё̄питахтэ̄в. Ам ня̄врамагум амккем янмалтыягум, пасананум, уласанум ос мо̄т порамасанум тыглетувле хотьютын харттата̄луӈкве патавет. Кӯщаит палт ты урыл китыглахтасум, ювле ла̄вве̄сум, ёмас колт о̄луӈкве ке ка̄саще̄гум, пормасанув ёт амки вос а̄лмтахтэ̄гум». Та кол о̄лнэ ще̄мьят ремонтыл ань ты хо̄тал мус аты ва̄рве̄сыт, э̄лаль тох та о̄лэ̄гыт. Ксения ремонт ӯрим, районный миркол ёт сутытахтуӈкве патыс. Та̄л котиль э̄тпост сут о̄лыс, тав мо̄т колыл миӈкве ла̄ввес. Ре̄тыӈ ю̄свой э̄тпос тав йильпи колн ва̄нтлас. Тав ла̄выс: «Та пе̄с колт о̄с савалапыг яныгмам акв ма̄ньщи пыг о̄лнэ колыл майвес. Тав ос кӯщаит палт акваг пищма хансыглас ос районный миркол ёт сутытахтас. Тав сут о̄лум порат ла̄ввес, колэ ёмас, э̄лаль вос тот о̄лы. Ань тав окружной сутн такви нэ̄паканэ ке̄тсанэ, ӯрхаты, маныр тот ла̄ваве». 1072 2014.03.21. Тамара МЕРОВА Кӯщаит та̄л сыс ва̄рум рӯпатаныл уральтавет. Округ губернатор Наталья Комарова ма̄ньполь э̄тпос о̄выл щислатэ мус Департаментыт пуссын та̄нки рӯпатаныл о̄вылтыт мир э̄лыпа̄лт потыртаӈкве ла̄всанэ. Ань ма̄хум матыр пӯмщалан ва̄рмаль о̄ньще̄гыт ке, та̄нанылн ла̄тыӈ вос хансэ̄гыт. Та̄н ювле потыртан ла̄тӈыл тах ке̄тавет. Тувыл ты э̄тпос ва̄т нупыл нёлолов щислат пуссын матыр хӯлтыглан манос йильпииг та̄рапаттым тэ̄лат урыл Наталья Владимировна э̄лаль потырты тах. Ля̄ххал тотнэ хо̄тпатн ань ты то̄ва тэ̄лат урыл Илья Верховский, внутренних ос внешних связей Департаментыт кӯщай хум, ла̄тыӈ хӯлтыс. Ка̄сыӈ департамент такви ка̄сащан щире̄тыл ла̄тыӈ тоты. То̄ват са̄в ма̄хум акванатхатам колт рӯпатаныл урыл потыртасыт, ос тот ва̄рнэ тэ̄ланыл ма̄гыс китыглаве̄сыт. Та щирыл Госзаказ, ЖКХ ос энергетика, Илья Аркадьевич кӯщай хум департамент рӯпататэ ос онтолов мо̄т кӯщаит та̄нки отчётаныл ловиньтасаныл. Мо̄т онтолов колыт ётылнув аквтох ма̄хум атэ̄гыт, акваннё̄тхатым э̄лаль рӯпитаӈкве потыртахтэ̄гыт. Мо̄таныт ищхӣпыӈ ут хосыт потраныл хассаныл. Ма̄хумн тот ловиньтавет ос тувыл та̄нки китыглан манос матыр хӯлтыглан ла̄тыӈ хансуӈкве ве̄рме̄гыт. Тамле тэ̄лат мирн нё̄тмил ва̄рнэ департамент, ханищтап ос ма̄ньлат ма̄хум ёт рӯпитан ос мо̄т ат кӯщаит ва̄рсыт. Ма̄вит ӯргалан департамент видеоконференция хосыт ма̄хум ёт рӯпитасыт. Тамле потыртан рӯпата рущ щирыл «очнозаочный» ва̄рмалиг ла̄ввес. На̄н ты ва̄рмалитыл матыр пӯмщалаӈкве патэгы̄н ке манос хотты департаментыт рӯпатаныл уральтаӈкве тахмаегы̄н ке, то̄нт ищхӣпыӈ ут хосыт департамент наме тув хансэлы̄н ос тувыл тот э̄лаль кисхатэ̄н. Округ янытыл са̄в ва̄рмалит та̄рапаттын ма̄гыс мо̄лал ищхӣпыӈ ут палт «Югражданин» нампа ос «Югра многоликая» ло̄псыг ва̄рвесы̄г. На̄н ты утыг о̄с тот сунсуӈкве, ловиньтаӈкве ве̄рмегы̄н. 1072 2014.03.21. Тамара МЕРОВА Хӯлтыглан ла̄тӈыт. Мощ мо̄ланув губернатор ва̄ӈын кӯщае Геннадий Бухтин соссаӈ яныгпа̄ла хо̄тпат ёт акванхо̄нтхатыглас. Тав йильпи хӯлтыглан ла̄тӈыт о̄вылтыт потыртас. Наталья Комарова, округ губернатор, «О гарантиях прав коренных малочисленных народов Российской Федерации» Федеральный са̄ккон щирыл акв йильпи хӯлтыглан ла̄тыӈ ва̄рыс: округ Правительство ёт рӯпитан ма̄гыс соссаӈ ма̄хмыт Советн атуӈкв э̄ре̄гыт. Тувыл ка̄сыӈ район манос ӯс та̄нки Уставаныл акв яныг Положение нэ̄пакын э̄рнэ щирыл хансуӈкве э̄ре̄гыт. Геннадий Фёдорович ань кӯщаитн щё̄питам Положение нэ̄пак соссаӈ яныгпа̄ла хо̄тпатын мӯсхалыг сунсуӈкве ла̄всанэ. Тот «задачи, функции, права Совета» ва̄рмалит ёмащакв хансым о̄лэ̄гыт. Тувыл ты Советн ма̄хум хо̄т ос хумус пе̄риявет, хоты ма̄ныл манах хо̄тпа пе̄рияве, пуссын хансым о̄лы. Ма̄н «Совет старейшин» комиссияв ань матыр ла̄тыӈ тув хансумтаӈкве о̄с ве̄рме̄гыт. Ты соссаӈ ма̄хум йильпи Советн округ янытыл 21 хо̄тпа пе̄рияве тах. Та̄н округ Правительство кӯщаитн сапра̄нин акванатыглаӈкве патавет ос матыр та̄рвит тэ̄лат ёт акваннё̄тхатым э̄лаль рӯпитэ̄гыт тах. Ха̄льӯс район па̄лыл Саранпа̄выл, Кульпас, Ло̄пмус, Сӯкыръя, Кимкъясуй ос Сортыӈъя̄ па̄вылныл Совет ма̄гыс кит хо̄тпа пе̄рияӈкве э̄ри. Тувыл акв э̄лмхо̄лас Ня̄хщамво̄ль, Усть-Манья ос Нёрохи па̄влытныл ос кит хо̄тпа Ха̄льӯс, Тэ̄к, Устрём, Пугоры, Ванзеват, А̄нъя ос Шайтанка па̄влытныл вос пе̄риявет. Я̄грим ты нэ̄пакт ат хасвес, аман ёрувлавес, тав о̄с ул тув тах ловиньтаве? Белоярский районныл кит хо̄тпа ос Советский, Октябрьский районыгныл акв хо̄тпа та Советн хасве̄сыт. Тувыл Хо̄нтаӈ районныл хӯрум хо̄тпа пе̄рияве: Кондинский, Болчары, Алтай, Кама ос Шугур па̄влытныл акв э̄лмхо̄лас ос Междуреченский, Половинка, Мулымъя, Мортка, Юмас, Ямки ос Леуши па̄влытныл кит хо̄тпаг. Ос мо̄т ӯсытныл манос па̄влытныл акв хо̄тпал пе̄рияӈкве патаве. Соссаӈ ма̄хум та̄нки о̄лнэ ма̄нанылт сапра̄нин акван вос атыглавет ос та̄нки э̄рнэ э̄лмхо̄лас вос хо̄нтэ̄гыт. Ӯринэ̄ква ялпыӈ хо̄тал урыл Геннадий Бухтин о̄с потыртас. Ханты-Мансийскат тав яныгполь э̄тпос 12 щислат янытлаӈкве патаве. Ма̄хум «Югорская Долина» ма̄н мӯйлуӈкве во̄вавет. Тув ялнэ ма̄гыс ӯс ма̄хум я̄нас автобусыл тотавет тах. Юио̄вылт кӯщай э̄кват ос хум хо̄тпат ялпыӈ хо̄таланыл кастыл мӯйлупсал мисанэ. 1072 2014.03.21. Тамара МЕРОВА Ка̄ркам соссаӈ а̄гитпыгыт. Ты э̄тпост МООУН (тыи ханты ос ма̄ньщи ма̄ньлат хо̄тпат организацияныл) Ханты-Мансийскат о̄лнэ соссаӈ а̄гитпыгыт акванатыгла̄лсанэ. Та̄н та̄нанылн ва̄рум рӯпатаныл о̄вылтыт потыртасыт. Надежда Молданова, та тэ̄латыт кӯщай нэ̄, о̄выл ла̄тыӈ ла̄выс. Та̄н Югорский университетт, Ханты-Мансийский колледжит, Центр искусстват ханищтахтын а̄гитпыгыт, тувыл Обскоугорский нампа институтт, телевиденият, газетат ос мо̄т са̄всыр ма̄тт рӯпитан хо̄тпат ёт акваннё̄тхатым матыр ёмас тэ̄лат ва̄ре̄гыт. Ты организациян 60% са̄вит ты ма̄ньлат а̄гит, ос 40% ма̄ньлат пыгыт, тув хасхатым о̄лэ̄гыт. Ань сапра̄нин са̄выӈпа̄лэ пыгыт акванатхатыгласыт. Ос ӯст о̄лнэ ма̄хум коныпал тыг Нижневартовск ос Югорск ӯсныл мӯй хо̄тпат ёхталасыт. Ма̄ньлат ма̄хум ёт рӯпитан организация соссаӈ а̄гит ос пыгыт та̄нки халанылт юртыӈыщ ос ка̄ркамыг о̄луӈкве пуссын ла̄виянэ. Матыр та̄рвит о̄ньще̄гыт ке, акваннё̄тхатым, акванпотыртахтым по̄хан вос ла̄квтыяныл. Та̄н ма̄нь па̄влытыт о̄лнэ ма̄хум палт ос акв тамле ла̄тыӈ ке̄тэ̄гыт. 2009 та̄лт ты организация матахмат па̄влытытн ня̄врамыт ёт ва̄йхатуӈкве ялсыт. Ка̄сыӈ ма̄т та̄н са̄всыр касылыт ва̄рыгла̄лсыт. Матыр тэ̄лат ва̄рнэ ма̄гыс МООУН са̄в проектыт щё̄питэ̄гыт, та̄наныл олныл та̄стын ма̄гыс воритотэ̄гыт. Олныл мивет ке, та̄н тэ̄ланыл щирыл холтыяныл. Тох Ханты-Мансийскат "Радуга" нампа савалап колт о̄лнэ ня̄врамыт Ка̄сум па̄вылн тотыгласаныл. Ӯст о̄лнэ соссаӈ ма̄хум ханты ос ма̄ньщи ла̄тӈыг ханищтасыт. Ма̄хум ща̄нь ла̄тӈыл потыртан щё̄ст мо̄йтыт, потрыт ловиньтасыт, та̄наныл толмащласаныл, э̄ргыт э̄ргысыт. Та таквсы па̄сыл нэ̄ хо̄тпа супыт ю̄нтнэ ханищтапыл ва̄рве̄сыт. Ханты суп ю̄нтуӈкве Галина Сергеевна Молданован ханищтавет. Ма̄ньщи суп ю̄нтуӈкве Мария Сергеевна Мерован ханищтавет. Хумус суп йинаве ос хорамыл ю̄нтаве, пуссын ты тэ̄лат кинан по̄славет. Ма̄хум сак хартнэ ва̄рмаль о̄с пӯмщалаӈкве патсыт, та̄н тамле ханищтап э̄лаль щё̄питэ̄гыт тах. Туи "Нумсаӈ ёх" ос "Ма̄нь ӯскве" этнолагериг рӯпитан порат тот о̄с матыр нё̄тэ̄гыт. Ка̄сыӈ туи Пойковский ӯсн ма̄ньха̄пыл касуӈкве ялантэ̄гыт. Ӯринэ̄ква ялпыӈ хо̄тал янытлан порат сыресыр ёнгилыт, кас ва̄ре̄гыт. Ва̄ӈын кӯщаит рӯпатаныл Э̄лмхо̄лас та̄ксарыг е̄мтнэ тэ̄лат палт Руслан Богордаев пуӈктоты. Тав такви рӯпататэ урыл я̄нас потыртас, ос та̄л сыс каснэ порат но̄хпатум пыгыт э̄сгын нэ̄пакыл мӯйлуптасанэ. Соссаӈ ма̄хманув палт акв пе̄с касыл «нюлтахли» пыгыт акваг э̄лаль ва̄руӈкве таӈхияныл. Мо̄т пыгрищит пе̄рщуӈкве ханищтан ма̄гыс та̄н ёмас колнак кинсэ̄гыт. Культура щирыл тэ̄лат ма̄гыс Виктор Банк пуӈктоты. Округ янытыл соссаӈ ма̄хум йӣкваныл ос э̄рганыл э̄лаль тотым 36 коллективыт рӯпитэ̄гыт. Тыгыл 12 коллективыт мирн ёмас ва̄вет, суиӈ намыл майве̄сыт. Та̄н са̄всыр фестивалин акваг во̄виньта̄лавет. Юио̄выл та̄лытыт Ханты-Мансийскат "Этнодискотека" ва̄рыглаве. Ма̄хумн тыи сака мӯсты. Алла Иштимирова-Посохова финноугор рӯт мирыт ёт аквъёт ва̄рум тэ̄лат урыл потыртас. Мо̄лты та̄лт та̄н "Культурная столица финноугорского мира" проект щирыл о̄с ла̄тыӈ хансыгласыт. Та̄н Ка̄сум, Кышик ос Русскинские па̄влыт тув пе̄риясыт. Тувыл пуссын ма̄нь па̄влыт халт удмурт ма̄хум та̄н Быгы па̄вланыл но̄хпатыс. Ань тот ты та̄л ма̄нь таквс э̄тпос нёлоловхуйплов щислат ялпыӈ хо̄тал ва̄ре̄гыт тах ос рӯт ма̄хум мӯйлуӈкве во̄вавет. 2015 та̄л сыс ос хотты финнугорский па̄выл но̄хпаты, тот ла̄ваве. Таима̄гыс Алла ань йильпи проектыт Саранпа̄выл ос Полноват па̄выл хӯлтыяге. Акваннё̄тхатым о̄лэ̄гыт Округ янытыл ма̄ньлат ма̄хум Парламентыт кӯщай хум Константин Репин о̄с сапра̄ниян ёхталас. Та̄н ань акв пӯмыщ "В единстве сила" нампа экспедиция щё̄питасыт. Ты э̄тпост ма̄ньлат хо̄тпат Нягань ӯст акванатхатэ̄гыт ос Саранпа̄выл нупыл тэ̄лы лё̄ӈх хосыт минэ̄гыт. Неро̄йка ос Народа нё̄р мус ялуӈкве кусэ̄гыт. Миннэ̄ныл мус та̄н па̄вланувн соссаӈ ма̄хум ёт ва̄йхатуӈкве хо̄иглэ̄гыт. Таима̄гыс ща̄нь ла̄тыӈ ва̄нэ хо̄тпат ма̄ньлат а̄гитпыгыт халт о̄лэ̄гыт ке, ос та̄н ётаныл экспедициян ялуӈкве во̄вавет. Константин акваннё̄тхатым рӯпитаӈкве ма̄хманув ла̄всанэ. Ос "Югра бесконечный драйв" видеоролик суссылтас. Тувыл Надежда Молданова ос Константин Репин аквъёт рӯпитан ос мо̄т тэ̄лат акваннё̄тхатым ва̄руӈкве договорнэ̄пакыгт хасхатсы̄г. Та юипа̄лт сапра̄нин атхатам ма̄хум пасан ва̄тан ща̄й аюӈкве во̄вве̄сыт. 1072 2014.03.21. Николай МЕРОВ Ва̄т нупыл ат та̄л лусытам хум. Мо̄лал Дмитрий Васильевич Лельхов, ма̄ньщи хум ёт хо̄нтхатыгласум. Тав Ханты-Мансийск ӯст о̄лы. Округт сутытым ма̄хумн нё̄тнэ комиссият кӯщаиг рӯпиты. Ам таве о̄лупсатэ ос рӯпататэ урыл китыгласлум. На̄н тав уре̄тыл э̄лаль ловиньтэ̄н. Дмитрий Васильевич Ха̄льӯс район Новинские па̄вылт 1950 та̄лт самын патыс. Та па̄выл ма̄нь А̄с я̄ ва̄тат ӯнлыс. Ма̄ниг о̄лме̄т, тав номитэ, па̄влыӈ ма̄хум мо̄т карс сыппуӈкыӈ ма̄н ва̄нтлысыт. Са̄ртын тот са̄в во̄р яныгмас. Хум хо̄тпат тот кол ӯнттын ма̄гыс йӣв са̄грысыт, нор яктысыт. Пе̄с па̄выл торыг ка̄сыӈ та̄лныл сыппуӈк яныг вит порат ёлнильвес. Ётыл я̄ сака э̄лын патыс, таквсы порат тув мус миннэ лё̄ӈхе сака вущлахыӈыг е̄мтыс. Таима̄гыс па̄выл мо̄т ма̄н тотвес. Дмитрий Васильевич а̄ще Василий Андреевич Ярлин акваг во̄раим ос хӯл алыщлым яласас. Тав Новинские па̄вылт ма̄ньщи ще̄мьят яныгмас. Василий ща̄не сака та̄ксар нэ̄ о̄лыс, колхозт кӯщаиг рӯпитас. Оматэ Елена Алексеевна Лельхова, ханты нэ̄, Пашторы па̄вылныл о̄лыс. Тав о̄ньге̄н янмалтавес, иӈ ма̄ниг о̄лыс, ща̄не хотталь щалтыс. А̄ще китыт э̄кватэ̄ныл нёлолов ня̄врам о̄ньщис. Пуссын аквъёт онтолов ня̄врам яныгмасыт. Ты па̄влыг халэ̄нт атхуйпловкем ве̄рыстаг о̄лыс. Василий Андреевич ос Елена Алексеевна ма̄нь та̄гыл ва̄йхатсы̄г. Яныг хо̄нтлын нак о̄вылтахтын порат Новинские ос Пашторы па̄вылныл хум хо̄тпат пуссын хо̄нтлын ма̄н тотве̄сыт. Дмитрий Васильевич а̄ще эпилепсия а̄гм о̄ньщис, тыима̄гыс хо̄нтлын ма̄н ат вӯйвес. Тав сыме̄т хотум е̄мталас, ротпаттыиг ёлпатыглас. Ащо̄йкатэ ос тав хӯрум каӈканэ пуссын хо̄нтлуӈкве тотве̄сыт. Та̄н пуссын юв ат ёхтысыт, хотты ма̄т порславе̄сыт. Дмитрий Васильевич ща̄нягеа̄щаге хо̄нтлын нак э̄лыпа̄лт акванминасы̄г. Э̄кваго̄йкаг Новинские па̄вылн о̄лмыгтасы̄г. Оматэ ётыл тох потыртас: «Ам хунь хум ва̄рсум, о̄йкам колта̄гыл рӯтанэ пуссын ма̄ньщи ла̄тӈыл потыртасыт. Ам щар нэ̄матыр ат торгамтасум. Та̄л палыт тох о̄лсум. Тувыл ущ ла̄щалла̄щал ма̄ньщи ла̄тыӈ ханищтаслум». Ётылнув Юван Шесталов тав оматэ урыл тох ла̄выглас: «Наӈ хотыл йим ханты, наӈ ма̄к ма̄ньщи нэ̄». Тув мус та ёмщакв ма̄ньщи ла̄тӈыл потыртас. Юван Николаевич о̄влэ̄т номсыс, тав ма̄ньщи э̄ква. Ётылнув нэ̄гхумыг кит а̄ги Люба ос Лиза о̄щсы̄г. Та порат о̄лупса сака та̄рвитыӈ о̄лыс. Дмитрий Васильевич самын патме э̄лыпа̄лт та увщияге сас а̄тимыг е̄мтсыг. Тувыл тав ёлыпал кит йӣгрищаге Лида, Таня ос акв а̄пщитэ самын патсыт. А̄ще Василий Андреевич акв та̄л о̄лыс, 1957 та̄лт тӯя̄г хӯл алыщлан ма̄т сыме хотум е̄мтыс, витын патыс, хулпын тагапас, щаквыт та порсыс. Нила мань ня̄врам оманыл ёт та̄нкке̄ныл хультсыт. Дмитрий са̄т та̄лэ, Лида ат та̄лэ, Таня хӯрум та̄лэ, ма̄нь а̄пщияныл ос туп та̄лэ то̄влыс. Та̄н акв мисэ̄ква о̄щсыт. Оманыл ос такви во̄раим ос хӯл алыщлым яласас, ты тэ̄нутыл ты о̄лсыт. Э̄ква ня̄враманэ такви ё̄ре̄тыл, ёмас номтыл пуссын янмалтасанэ. Дмитрий Васильевич нёлолов класс мус Во̄сыӈтур па̄выл школат ханищтахтас. Тувыл э̄лаль школа а̄стлан мус Ха̄льӯс школат ханищтахтас. Лов класс юипа̄лт Тюмень ӯс кол ӯнттын ва̄рмалин ханищтахтуӈкве минас. Та̄л тот ханищтахтас ос военный хо̄тпаг училищан ханищтахтуӈкве минас. 1974 та̄лт та училище лейтенантыг а̄стластэ. Тувыл Дмитрий Васильевич Ленинградский военный округн понтонный взвод командирыг лусытаӈкве ке̄твес. Та̄н вит ёлыпа̄лт ӯнсахыт уральтым ос ӯнттым яласасыт. Та порат «Блокада» нампа кина по̄слувес. Та̄н взводаныл о̄с ты кинат по̄слувес. Ты ва̄рмаль тав сыме̄н сака хо̄яс, ань ты мус ёмщакв номитэ. Тюмень ӯс училище а̄стлам пыгыт Германият, Чехословакият, Польшат, Венгрият ос мо̄т хо̄н ма̄т лусытасыт. Дмитрий Васильевич Ленинград ӯс юипа̄лт ос Монголия ма̄н разведывательноводолазный взвод командирыг ке̄твес. Ётылнув ма̄хум мовиньтасыт, аман манрыг вит ёлыпа̄лт рӯпата ва̄рнэ хо̄тпаг тув ке̄тве̄сыт. Тот вит щар а̄тим, та то̄сам ма̄ рущ щирыл «Юг пустыни Гоби» ла̄ваве. Та сыс тот са̄всыр э̄рнэ ва̄рмаль ва̄рсыт. Та ма̄т тав кит та̄л лусытас. Тувыл ос Бурятия ос Монголия граница ӯргалаӈкве Кяхта ӯсн ке̄твес. Тот тав а̄ги ёт ва̄йхатуӈкве патыс. Ётыл тэ̄н акванминасы̄г. Э̄кватэ наме Фамия Фаттаховна, тэ̄н аквъёт ва̄т арыгкем та̄л о̄лэ̄г. Фамия колта̄гланылт са̄т ня̄врам яныгмасыт. Тав оматэ Дмитрий Васильевич нёлоловит ня̄врамы̄г ла̄выгластэ, ва̄псэ сака э̄руптастэ. Кяхта юипа̄лт Дмитрий Васильевич Молдавия ма̄т, Германият, Оренбургский областьт лусытас. Тувыл ос ювле Тюмень ӯсн лусытаӈкве ёхтыс. Пуссын аквъёт армият ва̄т нупыл ат та̄л лусытас, тувыл по̄хын минас. 1977 та̄лт тав ще̄мьяӈ та̄гыл Ханты-Мансийск ӯсн ва̄нтлыс. Матах та̄л соссаӈ ма̄хум округ Луима Комитетт рӯпитас. Та юипа̄лт тав «Комиссия по помилованию» округ общественный организациян рӯпитаӈкве паттувес. Ань китхуйпловит та̄л ты ва̄рмаль щирыл рӯпиты. Тэ̄н э̄кватэ̄нтыл кит ня̄врам янмалтасы̄г: акв пыг, акв а̄ги. Тэ̄н ань сас я̄нас ще̄мьял о̄лэ̄г. Ам ты мӯтраӈ, ве̄щкат ма̄ньщи хо̄тпан ос тав рӯтанэ̄н пуста̄гыл о̄лнэ ла̄тыӈ ке̄тэ̄гум. На̄й-О̄тыранылн вос ӯргалавет. Пус ка̄т, пус ла̄гыл э̄лаль вос о̄лэ̄гыт. 1072 2014.03.21. Светлана РОМБАНДЕЕВА Саранпа̄выл школа. Яныгполь э̄тпос о̄выл хо̄талэ̄т Ха̄льӯс район Саранпа̄выл школа 112 та̄лэ то̄влы. Саранпа̄вылн ялмум порат ам тув щалтсасум, тот рӯпитан ма̄хум ос ня̄врамыт ёт потрамасум. Кӯщаиг Андрей Дмитриевич Попов тав о̄лы. Школа урыл кӯщай ва̄ӈын нэ̄ Раиса Михайловна Капшук потыртас, на̄н ань тав потре ловиньтэ̄лын: – О̄выл школа Сӯкыръят о̄лыс, тот ня̄врамыт о̄выл классытт ханищтахтасыт. Саранпа̄вылныл тув мус ялантаӈкве сака хоса о̄лыс, ня̄врамыт са̄вмуӈкве патсыт, ханищтахтан колнакытыл ат то̄влуве̄сыт. Ма̄хум кӯщаитн пищмат хансуӈкве патсыт, ань Саранпа̄вылт йильпи школа вос ӯнттаве. Та порат хо̄н о̄йка о̄лыс, тав ка̄сащас, школа ӯнттувес. О̄влэ̄т туп нила класс о̄ньщас, тувыл нёлолов класс мус ва̄рвес, мощ ётылнуве ос лов класс мус ва̄рвес. 1956 та̄лт Саранпа̄выл школат ханищтахтан ня̄врамыт о̄выл щёс лов класс а̄стласыт. Мощ ётылнуве аквхуйплов класс ва̄рвес. Ань ты хо̄тал мус ня̄врамыт тыт аквхуйплов класс мус та ханищтахтэ̄гыт. Школа са̄в ма̄т о̄лыс – акв кол ащирмаӈ о̄лыс, мо̄тыт кол ма̄нь, аквмат порат ос нила колытыт ня̄врамыт ханищтахтасыт. Ётыл 1987 та̄лт кит накпа кол ӯнттувес, та кол хӯрум щёс на̄йн но̄хё̄сыглавес. Тувыл 2006 та̄лт ань ты школан ущта ва̄нтлысув, хӯрум накпа кирпащ кол. Спортивный зал о̄лы, нэ̄пак ловиньтан колнак, концерт ва̄рыглан ма̄гыс колнак. Ёлы наке̄т акв охсатэ ань интернат нупыл майвес. О̄влэ̄т интернат я̄нас колт о̄лыс, ань ос школа нупыл паттувес. Тот са̄т ня̄врам туп о̄лы. Э̄лнаӈ са̄в ня̄врам о̄лыс, Хо̄сло̄хныл, Хо̄рыӈпа̄вылныл, Я̄сунтныл, Сӯкыръяныл тув тотыглаве̄сыт. Нё̄рт яласан ма̄хум ня̄враманыл о̄с интернатт о̄лсыт. Ты коныпал тыт па̄вылт о̄лнэ вина айнэ ще̄мьят ня̄враманыл тув вуйлуве̄сыт, ань йильпи са̄ккон щирыл та̄наныл виӈкве ат ро̄ви. Ань туп мо̄т па̄вылт о̄лнэ ма̄хум ос нё̄рт яласан ма̄хум ня̄враманыл интернатт о̄луӈкве ве̄рме̄гыт. Ам хунь ты школат рӯпитаӈкве патсум, 870 ня̄врам ханищтахтас. Ань тыт 375 ня̄врам ханищтахты, та̄н халанылт 196 ма̄ньщи ня̄врам. – Сӯкыръят о̄с школа о̄лы? – Тот о̄лы школа, ма̄нь ня̄врамыт садик о̄с аквта колт о̄лы. Хунь та школа ӯнттувес, тот о̄с кӯщай о̄лыс. Ань хӯрум школат тармыл – Саранпа̄выл, Сӯкыръя ос Кимкъясӯй, акв кӯщай А. Д. Попов. Та школагт ос кӯщай ва̄ӈын хо̄тпаг рӯпитэ̄г. Школант ня̄врамыт ма̄ньщи ла̄тыӈ пуссын ханищтэ̄гыт? А̄ти, пуссын ат ханищтэ̄гыт. Ань хотьют ка̄сащи ма̄ньщи ла̄тыӈ ханищтаӈкве, ня̄врам ща̄нягеа̄щаге заявление нэ̄пак хансэ̄г, ты юипа̄лт тав ущ ла̄тыӈ ханищтаӈкве ве̄рми. Ты са̄ккон нэ̄глынэ̄тэ э̄лыпа̄лт ма̄н та̄наныл китыгласанӯв, хоты ла̄тыӈ ханищтаӈкве таӈхе̄гыт, ма̄ньщи манос саран ла̄тыӈ. Ня̄врам такви номсы, хоты ла̄тыӈ ханищтаӈкве ка̄сащи, тув та хансаве. О̄выл классытт са̄ттем акв урок о̄лыглы, ос яныгнув классытт кит урок. Ань 11 классыт ма̄ньщи ла̄тыӈ туп кит хо̄тпа ханищтэ̄г. Акв пыгув Миша Ромбандеев ща̄нь ла̄тыӈ олимпиада о̄лыгланэ̄тэ порат кит щёс но̄хпатыглас. Школавт финноугорский мир йис о̄лупса, соссаӈ мир культура ос ка̄тыл матыр щаквщин урокыт о̄лсыт, ань хотвуйве̄сыт. Ты урокыт пуссын «Поиск» нампа ДЮЦ (детскоюношеский центр) нупыл хасве̄сыт. Кӯщаиг тот Альбина Васильевна Попова тав рӯпиты. Ань 8 ос 9 классыг ма̄гыс Искусство урок ва̄рвес. Э̄лнаӈ урокн ма̄н ма̄щтыр ма̄хум, во̄раян ос хӯл алыщлан ма̄хум во̄виньта̄лсув. Во̄раян хо̄тпан пыгрищит ня̄ль во̄ртуӈкве, лэ̄с ос ке̄рняль ӯнттуӈкве, ё̄рнкол тӯщтуӈкве ханищта̄лве̄сыт. А̄гирищит ос щаквщуӈкве ханищтахтасыт, матыр йинсыт, ю̄нтсыт. Ань а̄гирищитпыгрищит янас ханищтаӈкве ат ро̄ви, таима̄гыс ма̄н ань нэ̄мхотьют во̄вуӈкве ат ве̄рме̄в. Хунь ма̄н палтув яныгхо̄тпат ёхталасыт, татем ёмас о̄лыс. Ма̄ныр ва̄сыт, ма̄ныр ва̄руӈкве ха̄ссыт, пуссын ня̄врамытын потырта̄лсыт. Ам ань рӯпитан колнакумт яныгхо̄тпат ка̄тыл ва̄рум пормасаныл о̄лэ̄гыт – Сакв ма̄ньщиянув а̄канит, Сургут ӯс па̄лыл ёхталам хантыт, Венгрияныл ёхталам хо̄тпат ос рущ ма̄хум а̄канит. Александра Егоровна Рокина, Александра Фёдоровна Лесманова ос Антонина Егоровна Хозяинова са̄в а̄канит ва̄рыгласыт, тыт ты лю̄ле̄гыт. Ня̄враманув о̄с ха̄сэ̄гыт ва̄руӈкве. – «Лӯима̄ сэ̄рипос» газета на̄н палтылын ёхталы? – Ёхталы. О̄йкам газета сака э̄руптытэ. Ам юв тотылум ма̄ньщи газета, тав словарь нэ̄пак выг, тот та ловиньты. Тав тыт самын патыс, ты школат ханищтахтас. Саран ла̄тыӈ ва̄гтэ, ма̄ньщи мир о̄лупса ва̄г. – Раиса Михайловна, таяныт ёмас ва̄рен, наӈти урынт аквкит ла̄тыӈ ла̄вен. Хо̄т самын патсын, хо̄т яныгмасын? – Ам Новосокольники па̄вылт Псковский областьт самын патсум, 1947 та̄лт сӯкыр э̄тпост. А̄тям кол ӯнттын ма̄т рӯпитас, строителиг о̄лыс, таима̄гыс ма̄н са̄в ма̄т о̄лсӯв, а̄тям ёт яласасӯв. Белоруссият Витебск ӯст яныгмасум, тот май мирн ва̄нэ «Славянский базар» о̄лыглы. Тот и школа а̄стласум. Та юипа̄лт Смоленск ӯст педагогический институтт ханищтахтасум, история ос английский латыӈ ханищтан учителиг патсум. 1972 та̄лт тыг, Саранпа̄вылн, рӯпитаӈкве ке̄тве̄сум. Тыт налыман арыгтем та̄л ты о̄лэ̄гум, школат рӯпитэ̄гум. О̄йкам наме Алексей, ты па̄вылт акванхо̄нтхатасме̄н, кит пыг янмалтасме̄н. Яныг пыгме̄н Коля тыт о̄лы, ма̄нь пыгме̄н Юра, тав ос Санкт-Петербург ӯст щемьятэ ёт о̄лы. – Ты па̄вылт о̄луӈкве наӈын мӯсты? – Тыт атхунь ёмас о̄луӈкве, ёмас па̄вылкве, лылые̄пе сыстам. Па̄выл мир о̄с ёмас, сымыӈ э̄лумхо̄ласаквет. Ос туп таи лю̄ль, хо̄тпа илттыг матаре хотум е̄мтапи те, яныг ле̄ккар ат о̄ньще̄в, таве э̄ри яныгнув па̄вылн ман ӯсын тотуӈкве. Э̄лнаӈ тыт операцият ва̄рыглаве̄сыт, ня̄врамыт самын патсыт. Та порат товлыӈха̄пыт ёмащакв яласасыт, са̄в о̄лыс. Аквта хо̄тал тыгыл Ха̄льӯс та̄ра Москван ман Свердловскын тыламлаӈкве ро̄выс. Ань а̄ти тох, хотталь минмыгтанэ̄в порат, минуӈкве ат ве̄рме̄в, лё̄ӈхув сака та̄рвитыӈ. Потруме̄н та оигпас. Школа янытэ̄т суссылтастэ, тот мощ ё̄мыгтасме̄н, ня̄врамыт ханищтахтан колнакытын щалтсасме̄н, ханищтан хо̄тпат ёт потрамасум. Раиса Михайловна английский ла̄тыӈ ос история урок ня̄врамытн ханищты. Тав тамле мӯсхал, сэ̄ръёр э̄лумхолас, хо̄тпа нупыл сымыӈ нэ̄кве. Ня̄врамыт э̄руптыянэ, рӯпататэ янытлытэ. Ётыл ам нэ̄пакыт ловиньтасум, тав насати «Отличник народного просвещения» ос «Ветеран труда» нам о̄ньщи. Раиса Михайловнан ам са̄в ёмас, сымыӈ ла̄тыӈ ла̄ве̄гум. Ще̄мьятэ ёт пуста̄гыл вос о̄лы, со̄тыӈыщ вос о̄лы! Ня̄врамаквет ёмащакв вос ханищтахтэ̄гыт, ла̄тыӈ вос хӯнтлэ̄гыт. Пус ка̄т, пус ла̄гыл вос о̄лэ̄гыт! 1072 2014.03.21. Людмила ТЕТКИНА Леуши па̄вылт ма̄хум йильпи клуб о̄с уре̄гыт. Кондинский район Леуши па̄вылт культура та̄л янытлан кастыл ма̄хум манхурип рӯпата ва̄руӈкве патэ̄гыт, ты урыл ма̄ньщи газета ма̄гыс Елена Бурдаева потыртас. Тав та па̄вылт рӯпитан клубт кӯщаиг о̄лы. Тув ялмум порат ам таве варнэ рӯпатаныл урыл китыгласлум. – Елена Васильевна, ты клубкол хунь ӯнттувес? – Ты кол леспромхоз о̄лме порат 1968 та̄лт ӯнттувес. Ювле хультум та̄лт клубув 45 та̄лэ то̄влыс. Таяныт колкапайт акваг ащирмаӈ, тыи ма̄гсыл молях пе̄сыг е̄мтыс, а̄латы ёллоньхаты. Са̄т та̄л ювле хультум порат ма̄н сметанэ̄пак ос проектнэ̄пак ва̄рсув, йильпи яныг клубкол ӯнттуӈкве кӯсыгласӯв. Тувыл та̄рвитыӈ пора (кризис) е̄мтыс, олнанув ювле вуйве̄сыт. Мощ ӯрхатуӈкве ла̄ввесӯв, ань ты мус ӯрхатэ̄в. Кондинский район янытыл тамле хо̄т пе̄с клубкол о̄лы. Миркол кӯщаит ла̄ве̄гыт, ат та̄л сыс ка̄сыӈ па̄вылт йильпи клубкол тах ӯнттаве. Клубколув МЧС рӯпитан хо̄тпат уральтаӈкве ёхталэ̄гыт, акваг штрафолныл хансаве̄в. Тамле пе̄с колт са̄всыр на̄йпос ква̄лгыт лю̄льсаӈ ва̄рим о̄лсыт, ань мӯсхалыг щё̄питасанӯв. Тувыл та̄н ла̄всыт, пе̄с а̄вит о̄с хотвыганӯв, ке̄р а̄вит вос ва̄ре̄в. Ты рӯпата ва̄руӈкв пилэ̄в, колув ёл ул вос ра̄гаты. Ты та̄л культура янытлан та̄лыг намаявес, ма̄н номсэ̄в, кӯщаит ма̄н та̄рвитыӈ ва̄рмалянув та̄ра тах паттыяныл. – Ты та̄л Культура та̄л хумус янытлаӈкве патэгы̄н? – Та̄л сыс ма̄н са̄всыр ялпыӈ хо̄талыт, концертыт ос мо̄т рӯпата ва̄руӈкве патэ̄в. Ты та̄л Леуши па̄выл 430 та̄лэ то̄влы. Тамле ялпыӈ хо̄тал ма̄н о̄йттур э̄тпост янытлаӈкве патэ̄в, та хо̄тал кастыл ань щё̄питахтэ̄в. Ма̄н учрежденияв тох намаим о̄лы «Культурноспортивный комплекс». Леуши, Дальний, Листвиничный ос Ягодный па̄влытт о̄лнэ клубыт акванловиньтахтэ̄гыт. Ты ялпыӈ хо̄тал ма̄н пуссын аквъёт ва̄руӈкве патэ̄в. Леушит клубт хо̄т коллектив о̄лы. Хус та̄л тыт «Ветеран» нампа коллектив рӯпиты, тот э̄кват са̄всыр э̄ргыт э̄рге̄гыт. Школат рӯпитан нэ̄т та̄нки ансамбль ва̄рсыт, ат та̄л э̄рге̄гыт. Па̄влыӈ ня̄врамыт «Огонёк» нампа коллективыт йӣкве̄гыт. Ювле хультум та̄л та̄н «Кондинские роднички» нампа конкурсын ялсыт, тот но̄хпатсыт, юв дипломнэ̄пак тотсыт. Па̄вылт ос концерт хунь ва̄рыглэ̄в, ща̄няныла̄щаныл ос мо̄т рӯтаныл пуссын ёхталэ̄гыт. Листвиничный, Дальний ос Ягодный па̄влытт рӯпитан клубт о̄с та̄нки я̄нас коллективыт о̄ньще̄гыт. – На̄н каснэ ва̄рмаль щирыл рӯпата о̄с ва̄регы̄н? – Ма̄н волейбольный площадка о̄ньще̄в. Туи порат ма̄ньлат ма̄хум тув ёнгуӈкве ёхталэ̄гыт. Тэ̄лы ёсал ха̄йтыгтаӈкве ро̄ви. Ань па̄влувт лыжный база ӯнттуӈкве о̄вылтаве, то̄нт са̄внув ма̄хум ёсал ха̄йтыгтаӈкве тах паты. – Леуши па̄вылт са̄в ма̄ньщи ма̄хум о̄лы, «Ӯринэ̄ква хо̄тал» ос мо̄т ялпыӈ хо̄талыт тыт ва̄рыглэгы̄н? – Ма̄ньщи ма̄хум тыт са̄в кос о̄лы, тувыл та̄нки пе̄с ва̄рмаляныл ат ва̄ганыл, ща̄нь ла̄тӈыл о̄с ат потыртэ̄гыт. Ань «Ӯринэ̄ква хо̄тал» ва̄рыглаӈкве пуссын ла̄ваве̄в. О̄выл щёс ялпыӈ хо̄тал ва̄рыгламув порат, тыт о̄лнэ ма̄ньщит китыгласанӯв, ма̄ньщит ты товлыӈ ӯй манрыг янытлэ̄гыт, манхурип мо̄йтыт, потрыт тав уре̄тыл о̄ньще̄гыт, та̄н ты урыл щар нэ̄матыр ат ва̄гыт. Интернет хосыт кисхатуӈкве патсӯв, тот нэ̄матыр ат хо̄нтсӯв. Соссаӈ ма̄хум пе̄с йис ва̄рмаляныл урыл хансым нэ̄пакыт о̄с ат о̄ньще̄в. Тувыл Половинка па̄выл музейт рӯпитан ма̄хум китыгласанӯв, та̄н ма̄навн нё̄тсыт. Полина Андреевна Токова, Ягодный па̄вылт о̄лнэ ма̄ньщи нэ̄, ма̄навн о̄с ёмащакв нё̄тыс. Тав ётэ ма̄н хосат та̄гыл рӯпитэ̄в, тав ань пенсият о̄лы, тыг ёхталы, ня̄врамытн соссаӈ ма̄хум культураныл урыл потырты. А̄гирищит са̄всыр пормасыт сакныл хартуӈкве ханищты. Тамле кружок клубт рӯпиты. Ка̄сыӈ та̄л во̄ртур э̄тпос 9 щислат соссаӈ ма̄хум мирхал ялпыӈ хо̄тал янытлэ̄в. Па̄влыт о̄лнэ соссаӈ ма̄хум акванатыглыянӯв, мӯйлэ̄в. – Елена Васильевна, ня̄врамыт клубн сакныл хартуӈкве ёхталэ̄гыт, ос ма̄ньлат ма̄хум манос яныг хо̄тпат тыг во̄виньта̄лыяны̄н? –Ня̄врамыт тыт ка̄тыл хурит по̄слэ̄гыт, са̄всыр э̄ргыт хӯнтлэ̄гыт, йӣкве̄гыт, кина сунсэ̄гыт. Ӯщлахтын хо̄талыт акваг тыг ёхталэ̄гыт. Ма̄ньлат ма̄хманув ёт ма̄н рӯпитаӈкве о̄с ка̄саще̄в. Та̄н та̄нки клубн ат ёхталэ̄гыт, Междуреченский па̄вылн ӯщлахтуӈкв ялантэ̄гыт. Па̄влувныл тув мус туп лов ве̄рыста. Междуреченский мус акваг автобус яласы, тув та̄лматэ̄гыт, яныг па̄вылн та минэ̄гыт. Ма̄ньлат ма̄хум ма̄гсыл ӯщлахтын хо̄талыт ва̄рыгласӯв, та̄н щар ат ёхталэ̄гыт. Китыглыянӯв, манрыг тыт ӯщлахтуӈкве ат ка̄саще̄гыт, та̄н ювле ла̄ве̄гыт, пе̄с клубн щалтуӈкве нас пилыщма. Ам номсэ̄гум, йильпи колыл ӯнттаве̄в ке, ма̄ньлат ма̄хманув клубн ёхталаӈкве патэ̄гыт. Яныг хо̄тпат пуссын пенсият о̄лэ̄гыт, та̄наныл во̄вуӈкве ат э̄ри, та̄нки ёхталэ̄гыт. Э̄ргуӈкве, йӣквуӈкве пуссын ха̄сэ̄гыт, та̄н ётаныл рӯпитаӈкве сака пӯмащ. –Па̄влыӈ ма̄хум ма̄гсыл ялпыӈ хо̄талыт ва̄рыглым, олн на̄нки сэ̄лэгы̄н? – Акв порат акв нэ̄ ам палтум ёхтыс, китыглахтас, клубколт ня̄враме намхо̄талэ ва̄руӈкве ро̄ви ман а̄ти. Такви тав ма̄нь колт о̄лы, таи ма̄гыс са̄в ня̄врам акванво̄вуӈкве ат ве̄рми. Та̄н пуссын тыг ёхтысыт, ма̄н та̄н ма̄гсыланыл са̄всыр касылыт ва̄рыгласӯв, а̄мщит а̄мщисӯв ос са̄в мо̄т ощхуль ва̄рыгласӯв. Ня̄врамыт маткем та поргысыт, юв минуӈкве ат тахсыт, ялпыӈ хо̄тал та̄нанылн такем мӯстыс. Ань па̄влыӈ ма̄хум тыг ёхталэ̄гыт, та̄н ня̄враманыл ялпыӈ хо̄талыл ва̄рыглыянӯв. Па̄влыӈ ма̄хум ма̄гсыл ӯщлахтын хо̄талыт о̄с ва̄рыглэ̄в, тыт та̄н ма̄гсыланыл пасан ва̄рыгла̄лэ̄в. Та̄н пасан ва̄тат ӯнлахо̄луӈкве сака э̄руптэ̄гыт, йӣкве̄гыт. Акв та̄л сыс ма̄н яныгполь э̄тпос о̄выл хо̄талыт яныг концерт щё̄питалэ̄в, тув билет тыналэ̄в. Ма̄хманув тув ялантаӈкве сака ка̄саще̄гыт. О̄влэ̄т билет тынэ 15 солко̄ви о̄лыс. Ань тынэ 100 солко̄ви ва̄рыслӯв, ма̄хум билетыт ёвтэ̄гыт, концерт сунсуӈкве ёхталэ̄гыт. Тамле рӯпата ва̄рим, мощ олн сэ̄лэ̄в, тувыл депутатытныл олн во̄выглэ̄в. Са̄всыр грантолн ма̄гсыл ма̄нки нэ̄паканув ке̄тыглэ̄в. Ма̄навн Геннадий Степанович Корепанов, депутатхум, сака ёмащакв нё̄тыс. Тав ма̄йлум олнытыл ма̄шина ёвтсӯв. Ань мо̄т па̄вылт концерт ва̄руӈкве ма̄нки ма̄шинал яласэ̄в. «Все работы хороши, выбирай на вкус» нампа проектнэ̄пак хассӯв ос Ханты-Мансийск ӯсн грантолн ма̄гсыл ке̄тыгласлӯв, тот кас щирыл но̄хпатсӯв. Ты проект хосыт рӯпитым, ня̄врамыт ёт са̄всыр рӯпата ва̄рнэ хо̄тпат ёт хо̄нтхатыгласӯв. О̄влэ̄т на̄й харыгтан ма̄хум палт ялсӯв, та̄н ня̄врамытын та̄нки рӯпатаныл урыл потыртасыт. Пӯльницат ле̄ккарыт хумус рӯпитэ̄гыт, а̄гирищитпыгрищит сунсуӈкве о̄с тотыгласанӯв. Ма̄н клубколн тэ̄нут па̄йтнэ хо̄тпа во̄виньта̄лыслӯв, тав о̄с рӯпататэ урыл потыртас, ня̄врамыт ма̄гсыл тэ̄нут пайтыс. Парикмахернэ̄ тыг о̄с ёхталас, а̄т хӯратаӈкве хумус ха̄сы, о̄с суссылтас. Ня̄врамытын ты ма̄хум ёт хо̄нтхатыглаӈкве сака пӯмащ о̄лыс. Ты коныпал ня̄врамыт ёт «Спасти и сохранить» нампа акция о̄лыгланэ̄тэ порат са̄в рӯпата ва̄рыглэ̄в. Па̄выл хосыт ос Туман нампа тӯр по̄хыт порс а̄тэ̄в. Ты рӯпата ва̄рнэ̄в ма̄гсыл янытлан нэ̄пакыл майвесӯв. 1072 2014.03.21. Анна АЛГАДЬЕВА «Ма Мувем» – «Ам Ма̄м». Хулюмсунтыӈ школа искусств колн ялантан ня̄врамыт акваг са̄всыр ханищтахтын конференциятн ялантэ̄гыт. Тот та̄н матыр э̄рнэ докладыт ловиньтэ̄гыт, ка̄тыл матыр ва̄руӈкв ханищтахтэ̄гыт, та̄нки маныр ва̄гыт суссылтэ̄гыт. Мощ мо̄лалнув Ха̄льӯст КМЦ «Звёздный» па̄лыл ханты щирыл «Ма Мувем», ма̄ньщи щирыл ке ла̄вуӈкв «Ам Ма̄м» культурный проект минас. Тув Ягрим, Хулюмсунт па̄влыгныл школа искусств колытн ялантан ня̄врамыт ма̄щтыраныл суссылтаӈкв ялсыт. Культура колн ялантан Ня̄хщамво̄лиӈ ня̄врамыт о̄с о̄лсыт. Тэ̄к па̄вылныл, Шайтанка па̄вылныл ня̄врамыт ёхтала̄сыт. Ма̄н па̄влувныл Надежда Константиновна Маслова тув ялыс, хӯрум а̄гирищ ёт тотыглас. Ам таве яласам лё̄ӈхе урыл мощ китыгласлум: Хумыс яласасы̄н? Ёмщакв яласасӯв. О̄выл тув ёхтумув хо̄тал ня̄врамыт танки ва̄рнэ рӯпатаныл урыл потыртасыт, презентация ва̄рсыт. КМЦ «Звёздный» колт ёт тотам пормасаныл суссылтан выставка о̄лыс. Тув ёхтум ма̄хум ос соссаӈ хо̄тпат ва̄рум рӯпатаныл ёмщакв сунсыгласаныл. Хумыс ос манарыл ва̄рим, сагим ман ю̄нтым о̄лэ̄гыт, та̄рапаттысаныл. Тувыл ӯс сунсыглым пе̄с ма̄тытн тотыглавесӯв, ялпыӈ на̄ӈк щахылн, Меншиков памятникн ялсӯв. Китыт хо̄тал «Сорни сэй» нампа туи порат ня̄врамыт ӯщлахтын ма̄н тотвесӯв. Такем нё̄тнэ, ёмас, йильпи нор колкве тот о̄лы. Тот ю̄нсхатсӯв, сак хартсӯв, рущ ла̄внэ щирыл – мастеркласс суссылтасӯв. Хоты ня̄врамыт ёт тотыгласын? Маныр рӯпата суссылтасын? Ма̄н нилал ялсӯв: Вика Боженко, Диана Хайменова, Таня Сивцова ос ам. Ма̄н хӯрум са̄всыр а̄кань суссылтасӯв: акв рущ а̄кань, нас то̄рло̄мтытыл пе̄рыгтаве, акв ханты а̄кань – пилсам о̄с акв нас лӯи ма̄хум а̄кань. Пуссын ма̄нь а̄канит то̄рныл ва̄рим о̄лэ̄гыт, ӯргалапыг ла̄вавет. Маныр йильпи ут ва̄сын, хащсын? Тэ̄к па̄вылныл о̄лум э̄кван щакариӈ нак ю̄нтуӈкв ханищтаве̄сум, наме матыр о̄лыс, аты ва̄глум, ат китыгласлум, ётыл ущ кос номсахтэ̄гум. «Сорни сэй» кӯщай нэ̄ Ольга Константиновна Филиппова са̄сныл ва̄рнэ ма̄нь ло̄ӈханьщапыт хумыс ва̄равет, суссылтас ос такви ла̄внэ̄тэ щире̄тыл «со̄рни сэйкат» ва̄рыс ӯщлахтын ма̄ныл по̄с. Ёмщакв яласасӯв, ща̄гтым о̄лэ̄в. А̄гирищит номтаныл ёмас. Лӯи ма̄хум ёнгытыл ёнгысӯв, са̄лы то̄выль тармыл сыпныл тахсасӯв. Ты ма̄щтыр хо̄тпат нас ат о̄лэ̄гыт, акваг ма̄щтыр ка̄тке̄нылтыл матыр ва̄ре̄гыт, хо̄та̄ти яласэ̄гыт, та̄нки ханищтахтэ̄гыт, маныр ха̄сэ̄гыт, маныр ва̄гыт, э̄лаль суссылтыяныл. Маныр ат ва̄щинтэ̄гыт, пуӈкын выганыл, номуӈкв патыяныл. Э̄лаль о̄с тыгыл са̄внув йильпи номтын вос ёхтавет. Посыӈ, со̄тыӈ, щуниӈ хо̄талыт на̄нанн. 1072 2014.03.21. Тамара МЕРОВА Э̄тпос яныгман порат соссаӈ ма̄хум пӯрлахтэ̄гыт. Ма̄ньполь э̄тпос атыт щислат Ханты-Мансийск ӯст о̄лнэ ханты ос ма̄ньщи ма̄хум «Тылыщ пори» пӯрлахтын кан ва̄рыгласыт. Рущ щирыл ке толмащлаӈкве, ты ялпыӈ хо̄тал «Праздник угощения Луны» ла̄ваве. Ма̄ньщи ла̄тӈыл ма̄н таве ос «Э̄тпос пӯрииг» ла̄вилӯв. Ань ӯст о̄лнэ ос мо̄т ма̄ныл ёхтум мӯй ма̄хум нилыттыг «Торум Маа» музейт акванатхатыгласыт ос тот йильпииг яныгман э̄тпос нупыл по̄йкщасыт. Ма̄ӯнтталам, ма̄вит о̄лыглам па̄сныл йис ма̄хум Э̄тпос ос Хо̄тал урыл тамле пе̄с мо̄йт мо̄йтыгласыт. «Э̄тпоспыг Хо̄тал нэ̄тэ̄нтыл о̄лсы̄г. Тувыл Хо̄тал хумитэ юипа̄лт ня̄влалахтам нэ̄ ёт Э̄тпоспыгн консыгтахтасы̄г ос кит нупыл харттуӈкве та патыстэ̄н. Тув мус капыртасы̄г, Э̄тпоспыг киттыгманумтастэ̄н. Хо̄тал нэ̄н сымта̄л о̄лнэ па̄лэ ликмыс. Нэ̄ то̄нт та ло̄мтэ ма̄нь ня̄врам хольт ма̄нигтастэ, а̄пан пиныстэ ос тот нёвитым, э̄рпащиӈыг та янмалтытэ. Ты ня̄враме хота мус яныгми, хӯрум хо̄тал туп яныг хо̄тпаг е̄мтала̄лы ос тувыл о̄ста ма̄ниг е̄мтапи. Тувыл ма̄нь ня̄врамыг е̄мтум утэ а̄пан хуюптытэ, нёвитытэ, ос э̄лаль янмалтахтым тох та о̄лэ̄г. Таитэ аквтох хӯрум хо̄талн янгыг е̄мталы, та юипа̄лт оста ма̄ниг ва̄рхаты. Юио̄вылт нэ̄ туре̄н ёхтыс, ка̄таге̄тла̄глаге̄т щар ва̄гта̄л патыс. Тав нёвитам ло̄мтэ пӯврыг ва̄рыстэ ос хотталь но̄ӈхаль та вущкасастэ, ла̄выс: «Ам ат ве̄рмысум Наӈ То̄румн ань вос янмалтавен ос э̄руптым вос о̄ньщаве̄н». Пӯвыр утэ То̄румт Э̄тпосыг е̄мтыс. Тувыл э̄лаль тав аквтох яныгма̄лы ос аквта щирыл ма̄ниг ва̄рхаты». Соссаӈ ма̄хманув «Тылащ пори» манос «Э̄тпос пӯри» ялпыӈ хо̄таланыл тӯя̄г Э̄тпос яныгман порат ва̄рияныл. Ты порат хо̄таланув ка̄сыӈъе̄мт хосаннув по̄стыглэ̄гыт, кон ма̄лтыпыг е̄мты, ма̄витув о̄с но̄хса̄йкалы. Ань ма̄хум по̄йкще̄гыт, хӯл вос са̄вми, ӯйхул вос са̄вми, та̄нки о̄с пуста̄гыл, щуниӈыг вос о̄лэ̄гыт. Ты пе̄с ялпыӈ хо̄тал янытлаӈкве ос ёмас ва̄рмалит ма̄гыс пӯрлахтуӈкве «Торум Маа» музейн ань З. Н. Лозямова, Е. А. Нёмысова, М. А. Лапина, Л. К. Зубакина, Т. А. Молданова, Р. Г. Решетникова, Ф. А. Иштимирова, А. М. Константинов, Д. В. Лельхов, Ю. Г. Кондин, Т. А. Молданов Ханты-Мансийскат о̄лум ханты хо̄тпат ос Белоярск ӯсныл Т. С. Пятникова ос М. Ф. Яркина во̄виньталве̄сыт. Ты А̄с ма̄хум пуссын ётыл культура Департамент па̄лыл мӯйлупсал майве̄сыт. Педагогический колледжит ханищтахтын а̄гитпыгыт, «Хо̄тал» нампа А̄с-угорский ма̄хум театрыт рӯпитан хо̄тпат матыр ва̄руӈкве тот о̄с нё̄тсыт. Тувыл музейт рӯпитан нэ̄т нё̄влиӈ исмит па̄йтсыт, мӯй ма̄хум атыӈ исмитыл тыттысаныл. Пуссын ёмащакв мӯйлысыт, та̄нанылн тот мӯстыс. «На̄й лылы» нампа кинофестивальн ёхталам мӯй хо̄тпат о̄с тув ёхталасыт. Сергей Иванов, режиссёро̄йка, соссаӈ ма̄хманув пе̄с ва̄рум накыт нупыл сунсым сака пӯмщалахтуӈкве патыс, тав ань йильпи кина ва̄руӈкве номылматас. 1072 2014.03.21. Тамара МЕРОВА Хоты рӯтныл о̄лы, тав ат ва̄ме. Ханты-Мансийскан соссаӈ ма̄хум ёт ва̄йхатуӈкве Анхель Миляков ёхталас. Тав нё̄тнэ хурит ка̄тыл по̄слы, ос по̄слум хуриянэ̄н ты наме тув хансытэ. Такви намнэ̄пакет тав Андрей Васильевич Миляховыг хансым о̄лы, 1974 та̄лт Пермь ӯст самын патыс. Ос щар ма̄ньта̄гыл савалап ня̄врам колт Самара ӯст янмалтавес. Мо̄лты тав хотты рӯтанэ кинсуӈкве патсанэ ос ма̄н округувт увщитэ хо̄нтыстэ. Лариса Пойковский ӯст ще̄мьятэ ёт о̄лы. А̄пщитэ̄нтыл о̄выл щёс акванхо̄нтхатсы̄г. Тэ̄н соссаӈ ма̄хманув халт оматэ̄н манос хотты рӯтанэ̄н о̄вылтыт китыглахтэ̄г. Оматэ̄н наме Мария Кузьминична Миляхова о̄лыс, тав 1933 та̄лт самын патыс. А̄щаныл белорусо̄йкаг ла̄ваве. Лариса ос Андрей э̄лыпалэ̄нт э̄кваго̄йкаг Алексей, Василий ос Света ня̄врамыт о̄щсы̄г. Ха̄льӯс район па̄влытыт хо̄т тот о̄лсыт. Лариса Хо̄рыӈпа̄вылт самын патум. Тувыл кит та̄лэ то̄влумет ща̄няныл турманколн ӯнттыма. Тэ̄н Светатэ̄нтыл Тюменьн савалап ня̄врам колн ке̄тымаг. Каӈкаге̄н мо̄т ма̄н хотталь тотвесы̄г. Унтари а̄пщияныл Пермь ӯст турманколт самын патыс. Света увщитэ (мо̄лалнув а̄тимыг е̄мтыс) потырта̄лыс, оманыл Тюменин ёхталам, тэ̄н Ларисатэ̄нтыл таве ва̄щинтаме̄н. Ос ётыл о̄ста тыпылтастэ̄н, ла̄ве̄гыт, о̄с ӯнттувес. Тувыл Алексей каӈке̄н армият лусытам юипа̄лт а̄гирищиг Тюменьт хо̄нтсаге. Тэ̄н каӈке̄н ат номыстэ̄н, таве̄ныл хоттӯйтхатмыг, то̄нт тохиӈ ат потыртасыт. Василий урыл туп ва̄гыг, тав Алексей каӈке̄ныл хо̄т та̄лын ма̄ньнув о̄лыс. Андрей Самара ӯст яныгмас, армият лусытаме юипа̄лт о̄с тув о̄луӈкве, рӯпитаӈкве минас. Тав по̄слум хуриянэ савалап , а̄гмыӈмосыӈ ня̄врамытын суссылтыянэ. Та̄нанылн матыр нё̄тмил ва̄ри. Такви уре̄т тав ла̄выс: "Ам акваг номсысум, ам ул хатаниг о̄лэ̄гум. Мӯсхалыг кисхатуӈкве патсум, насати, ханты. Ханты-Мансийскан ме̄н Ларисаме̄нтыл Алла Иштимирова-Посохован, соссаӈ ма̄ньлат ма̄хум колыт рӯпитан нэ̄н, во̄ввесме̄н. Таве̄н яныг пӯмащипа ла̄виме̄н. Ос ты ёмас хо̄тпат ма̄гыс ам мо̄лхо̄тал э̄типалаг хури по̄слыслум, таве та̄нанылн мӯйлуптылум". Я̄тил ма̄ньщи ма̄хум, на̄н тэ̄н оматэ̄н наме хо̄т хӯлыгласлын ке, таяныт ёмас ва̄ре̄н, ма̄н газетавн ла̄тыӈ ке̄тэ̄н. 1072 2014.03.21. Светлана РОМБАНДЕЕВА Са̄в ня̄врамыӈ нэ̄. Хурит Ха̄льӯс район Саранпа̄вылт о̄лнэ нэ̄ Мария Ильинична Семьяшкина по̄слым о̄лы. Школан щалтсамум порат, ам таве тот ва̄слум, потрамасме̄н. На̄н ань Мария Ильинична потре ловиньтэлы̄н: Ам Саранпа̄вылт, самын патсум, тыт яныгмасум. О̄йкам наме Владимир. Ме̄н нё̄лолов ня̄врам о̄ньщиме̄н, пуссын школа а̄стласыт, рӯпитэ̄гыт. Яныг пыгме̄н Восыӈтӯрт о̄лы, тав коныпа̄лэ̄т пуссын тыт, Саранпа̄вылт, о̄лэ̄гыт. А̄гиянме̄н пуссын тэ̄нут па̄йтнэ нэ̄г рӯпитэ̄гыт. Са̄т апыгрищ о̄ньщиме̄н. Школат онтоловхуйплов та̄л рӯпитэ̄гум, колкан ловтэ̄гум. Ня̄врамыт палт рӯпитаӈкве а̄нум мӯсты. Тыт ань кит апыгрищагум ханищтахтэ̄г. О̄лупсавт пуссын ёмас, ос ма̄к таи, ня̄врамыт пуста̄гыл вос о̄лэ̄гыт, ща̄гтаклым вос яныгме̄гыт. Мария Ильинична со̄тыӈ нэ̄, тав са̄в ня̄врам янмалтас, ань ос апыгрищанэ яныгме̄гыт. Ты я̄тил нэ̄ пуста̄гыл вос о̄лы, пус ка̄т, пус ла̄гыл! 1073 2014.04.04. Валентина УЗЕЛЬ Округувт хус та̄л са̄кконыт хансавет. Ты э̄тпос 3 хо̄талэ̄т округ Дума рӯпитаӈкв о̄вылтахтаме па̄сныл 20 та̄лэ то̄влы. Ты та̄лыт сыс ат щёс тув депутат ма̄хум округувт о̄лнэ мир пе̄рия̄лыс. Ань рӯпитан депутатыт рущ ла̄тӈыл тох ла̄вавет – пятый созыв. Та̄н 2015 та̄л ма̄ньполь э̄тпос мус рӯпитэ̄гыт. Тувыл ос йильпи пе̄риян ва̄рмаль тах ва̄раве. Хус та̄л сыс ва̄рум рӯпатаныл урыл потыртан ма̄гыс ля̄ххал тотнэ хо̄тпат палт тит кӯщаиг ёхталасы̄г: Александр Сальников ос Сергей Дегтярев, тэ̄н сас округ Дума кӯщай ва̄ӈыг хумыг рӯпитэ̄г. Тэ̄н ла̄всы̄г, ань та̄нанылн рӯпитаӈкв кӯпнитнув. Дума хунь рӯпитаӈкв ущ о̄вылтахтас, то̄нт ты ма̄к та̄рвитыӈ о̄лыс. Юио̄выл та̄лыт сыс та̄н хосат хансым са̄кконыт ёмащакв хансыяныл, федеральный са̄кконытн а̄рталыяныл. Тыи э̄рнэ рӯпата та̄н таима̄гыс ва̄рияныл. Округувт матыр са̄ккон хансаве, ос то̄ва ла̄тӈанэ лю̄льсаӈ те хансымат, ты са̄ккон Москваныл ювле те̄таве, э̄рнэ щирыл вос хансаве. Александр Сальников тамле пӯмыщ ва̄рмаль урыл потыртас. То̄ва хансым са̄кконыт мирн сака ловиньтавет, ты урыл са̄всыр ма̄т потыртэ̄гыт. Хӯрум са̄кон: э̄типа̄лаг вина ул вос тыналаве, «губернаторский надбавкат» урыл ос ня̄врамыт э̄типа̄лаг кон ул вос ха̄йтыгтэ̄гыт та̄н ты хӯрум йильпи са̄ккон пирмайтаманыл юипа̄лт мирув сака пӯмщалахтуӈкв патыс, ты урыл потыртаӈкв патсыт. Ань 37 хо̄тпа депутатыг тот рӯпитэ̄гыт, халанылт пуссын кӯщаиг ат кос о̄лэ̄гыт. Ловиньтан нэ̄пак хаснэ ма̄хум, спортсменхо̄тпат, наука рӯпата ва̄рнэ хо̄тпат та̄н ётаныл о̄с рӯпитэ̄гыт. Ос та̄н халанылт са̄выӈпа̄лэ, ва̄им, ма̄во̄й но̄хвинэ ма̄тт рӯпитан нефтяникхо̄тпат. Ялпыӈ хо̄таланыл кастыл та̄н хосат та̄гыл щё̄питахтэ̄гыт, ва̄рнэ рӯпатаныл урыл тина по̄слувес, са̄всыр нэ̄пакыт тах та̄ратавет. Ты хус та̄л сыс округ Думат рӯпитам ос ань депутатыг о̄лнэ ма̄хум пуссын Ханты-Мансийск ӯсн мӯйлуӈкв тах во̄вавет. 1073 2014.04.04. Николай МЕРОВ Кол ма̄гыс ойтхатнэ тэ̄ла. Ма̄ньполь э̄тпос Ханты-Мансийск ӯст Общественный палатат рӯпитан ма̄хум сапра̄ни ва̄рыгласыт, та̄н тот жилищнокоммунальный ва̄рмалит урыл потыртасыт. Округ янытыл са̄всыр ма̄ныл пуссын аквъёт налыманкем кӯщай хо̄тпа тыг ёхталас. Общественный палата кӯщай Любовь Чистова ла̄внэ̄тэ щирыл, кол ма̄гыс олн ойтнэ ос колыт ёмащакв щё̄питан тэ̄латытт са̄в ва̄рмаль о̄лы. Са̄выӈпа̄лэ ма̄хум ты урыл нэ̄матыр ат ва̄гыт. Таима̄гыс ты сапра̄нит кӯщай нэ̄ ёхтум ма̄хум ма̄к та̄рвитыӈ ва̄рмалит урыл потыртаӈкве ла̄всанэ. Ань ты накт ма̄хум ва̄тихал кол ма̄гыс ойтхатнэ ва̄рмаль урыл китыглахтэ̄гыт. Манаса̄вит олн ос маныр ма̄гыс ойтаве, ты урыл ЖКХ департамент кӯщай Марат Юсупов потыртас. Тав ла̄выс: «Округувт са̄внакпа колт газ, сыстам вит, кол па̄лтыглан ва̄рмаль урыл ЖКХ департамент ло̄псыт пуссын хансым о̄лы. На̄н интернет хосыт сунсуӈкве ве̄рмегы̄н. Ань ЖКХ департаментыт региональный фонд рӯпиты. Тув са̄внакпа колыт хотщё̄питан ма̄гыс олн та̄ставе. Тувыл ань кол ма̄гыс ойтхатнэ ва̄рмаль акваг уральтым о̄ньщаве. Тынэ а̄рген но̄х ул вос а̄лмаве. Ма̄хум норматив щирыл ойтхатэ̄гыт. Тох ат ке ка̄саще̄гыт, колытт счётчик ӯнттуӈкве ве̄рмегы̄н. Ты хосыт туп э̄рнэ са̄вит олн ойтуӈкве патэ̄гыт». Тувыл ань ос тамле йильпи программа щё̄питавес: 2016 та̄л мус рӯпата лю̄льсаӈ ва̄рнэ ЖКХ компаният арыгтаптавет тах. Ты рӯпата мо̄т ёмас компаниян миве. Ань ты тэ̄лат э̄лаль акваг мӯсхалыг щё̄питаӈкве патавет. 1073 2014.04.04. Тамара МЕРОВА Та̄л сыс са̄в ёмас тэ̄ла ва̄рвес. Мо̄лты та̄л губернатор Наталья Комарова «Год информационной поддержки добрых дел» намаястэ. Ань ма̄хум ва̄рум ёмас тэ̄ланыл журналистытн та̄рапаттуве̄сыт. Тувыл о̄лыглатта̄л ос номтыӈыг ва̄рим тэ̄лат урыл ёмщаквег хаснэ журналистыт мӯйлупсал майве̄сыт. Ты 2014 та̄л губернаторув «Год доброй воли в Югре» намтуӈкве ла̄выстэ. Ты тэ̄ла хумле щирыл э̄лаль ва̄раве, хоты хо̄тпат ты ва̄рмалитыт рӯпитэ̄гыт, пуссын ты о̄вылтыт журналистыт э̄лыпа̄лт Ирина Максимова потыртас, тав общественный палатат рӯпиты, ня̄врамыт ос ма̄ньлат ма̄хум акваннё̄тхатнэ ассоциацият кӯщаиг о̄лы. Ирина Ивановна ла̄выс: "Ань "Добрая воля" ва̄рмальт ма̄хум та̄нки тэ̄ланыл ка̄сащан щирыл вос ва̄рияныл. Тот хо̄тпа нэ̄мхотьютн ё̄рва̄гыл матыр ва̄руӈкве ул вос кащилтаве. Ка̄сыӈ хо̄тпа такви вос пе̄рии, хо̄т, манхурип тэ̄лат тав ма̄хумн нё̄туӈкве паты. Тувыл са̄всыр нё̄тмил ва̄рнэ тэ̄лат ма̄н мӯсхалыг ханищтасанӯв ос «Зажги свою звезду» нампа проект щё̄питасӯв. Тот ат направление хосыт рӯпитаӈкве ро̄ви. О̄выл ва̄рмаль "Равный равному" намаим о̄лы. Тот ма̄ньлат ма̄хум яныгпа̄ла хо̄тпат ёт акваннё̄тхатым рӯпитаӈкве ве̄рме̄гыт. Китыт тэ̄ла "Волонтёрский всеобуч", тот ма̄хум матхурип йильпи тэ̄лан ханищтавет. Хӯрмит ханищтап «Infoдобро" намтыслӯв. Ма̄н ты сэ̄ръёр тэ̄лат урыл ма̄хумн ма̄к щирыл вос потыртасӯв. Нилыт ва̄рмалюв «Ядоброволец» намтыслӯв. Тот ка̄сыӈ хо̄тпа такви ханьщувлам наканэ̄тыл мо̄т хо̄тпат вос ханищтанув. Ос атыт направление "Меценатство" намаим о̄лы. Тот коммерческий колыт са̄всыр тэ̄лат ва̄рнэ ма̄гыс олн вос та̄стэ̄гыт, та̄н нё̄тмилыл минэ ма̄хманыл ёт аквъёт э̄лаль вос рӯпитэ̄гыт. Ань пуссын ты ат тэ̄лат акванёхтэ̄гыт. Ос ма̄н аквъёт юрщхатым матыр ва̄руӈкве ке патэ̄в, то̄нт рущит ла̄внэ̄ныл хольт совув пе̄ламлы ос ка̄сыӈ ва̄рум тэ̄ланув э̄лаль миргантаӈкв патэ̄гыт. Тамле рӯпатат округ янытыл ла̄щал ва̄руӈкве патве̄сыт. Ты тэ̄латыл матыр пӯмщалаӈкве таӈхегы̄н ке, на̄н общественных ос внутренних связей департамент ос образование, ма̄ньлат ма̄хум ёт рӯпитан департамент ищхӣпыӈ ло̄псыт ля̄ххалыт тах кинсэ̄н. 1073 2014.04.04. Николай МЕРОВ Ма̄во̄й но̄хвинэ ма̄хум нё̄тэ̄гыт. Мо̄лал «Лукойл – Западная Сибирь» ма̄во̄й но̄хвинэ компания ма̄н редакциявн тамле ла̄тыӈ ке̄тыс. Та̄н «Югра лылыеп» общественный организациян нё̄тмил ва̄рсыт, 5 миллион солко̄ви мисыт. ОАО «Лукойл» компаният ос округ Правительстват рӯпитан ма̄хум халанылт соглашениенэ̄пак хансым о̄ньще̄гыт. Ань ты олнытыл соссаӈ ма̄хманув ма̄гыс съездыт, конференцият, координационный советыт ос ялпыӈ хо̄талыт щё̄питаӈкве патавет. «Лукойл» компания ос «Югра лылыеп» организация хосат та̄гыл аквъёт рӯпитэ̄г. 2010 та̄лныл соглашениенэ̄пак хосыт та̄н пуссын аквъёт 25 миллион солко̄ви са̄всыр тэ̄ла ма̄гыс та̄нанылн майласыт. «Лукойл» компания ке̄тум ля̄ххал ма̄ньщи ла̄тӈыг Н. МЕРОВ хансыстэ. 1073 2014.04.04. Людмила ТЕТКИНА Мир пусмалтан ма̄гсыл са̄в олн та̄ставе. Ка̄сыӈ са̄тыт Наталья Комарова, губернаторув, такви ва̄ӈын кӯщай хо̄тпанэ акванатыглыянэ. Тот та̄н са̄всыр постановленият, распоряженият пирмайтэ̄гыт. Ос акв тамле сапра̄ни о̄лме порат кӯщаит мир пусмалтан ва̄рмаль урыл потыртасыт. Пирмайтым нэ̄пак щирыл ма̄хум пусмалтан ма̄гсыл федеральный бюджетныл 163 миллион солко̄ви округувн миве. Ма̄н округувт ты тэ̄лан акв миллиард 269 миллион солко̄ви тах та̄сты. Наталья Комарова губернаторув ла̄вме щирыл, ты олнытыл пӯльницат са̄всыр ищхӣпыӈ утыл ёвтавет. Тамле утыл сым а̄гмыт, пувласпи а̄гмыт ос мо̄т та̄рвитыӈ а̄гмыт пусмалтаӈкве ро̄ви. Владислав Нигматулин, округувт мир пусмалтан департаментыт рӯпитан хум, ла̄выс, ювле хультум та̄л сыс тамле ищхӣпыӈ утыл 7 со̄тыра арыгкем хо̄тпа та̄рвитыӈ а̄гманыл пусмалтаве̄сыт. Ос ты та̄л кастыл та̄стым олныл 8 со̄тыра арыгкем э̄лумхо̄лас пусмалтаӈкве то̄вылхаты. Ос аквта порат кӯщаит «Об основах общественного контроля в РФ» нампа са̄ккон урыл потыртасыт. Наталья Комарова ла̄вме щирыл, ты са̄ккон Государственный Думат хунь пирмайтаве, то̄нт ма̄хманув кӯщаит уральтаӈкве тах ве̄рмияныл. Общественный объединеният тамле рӯпата ва̄руӈкве патэ̄гыт. Ты са̄ккон таима̄гсыл пирмайтаве, кӯщаит та̄нки рӯпатаныл мӯсхалыг вос ва̄рияныл. 1073 2014.04.04. Александр ВЬЮТКИН Акв сунпаттаӈ касыл. Сочи ӯст а̄гмыӈмосаӈ ос сакватахтам ма̄хум халт касыл минам юипа̄лт Ханты-Мансийск ӯст следжхоккеил каснэ хум ёт прессконференция ва̄рыглавес. Та хум наме Константин Шихов. Тав округувт ма̄ следжхоккейт каснэ ма̄хум халт капитаныг пе̄риим о̄лы. Тав ётэ иӈ Эдуард Исаков ос Александр Зыков о̄лсы̄г. Тэ̄н сас са̄кватахтам ма̄хум каснэ щирыл щё̄питан кӯщаиг рӯпитэ̄г. Ты касылт ла̄глыл ат ё̄мыгтан ма̄хум ёнгэ̄гыт. Та̄н акв э̄лмиӈ те̄р сунпаттаӈ сунын ӯнттым ос ёмщаквег ёлнэ̄гсалахтым я̄ӈк тармыл яласэ̄гыт. Ка̄танылт ос тит ма̄нь клюшка пувим о̄ньще̄гыт, таияныл ёт ты касэ̄гыт. Эдуард Исаков ла̄выс: «Ма̄н палтылув ты нампа касыл ва̄рим па̄сныл моще̄ртын ат та̄лыг ты е̄мты. Мо̄т хо̄н ма̄ ма̄хум палт тав хосат та̄гыл ва̄ве. США хо̄н ма̄т тамле сыр хоккеил хо̄тпан нупыл ат ма̄т касэ̄гыт. Таима̄гсыл ща̄рыщ тапалт о̄лнэ ма̄т Россият каснэ ма̄гыс кӯпнитнув ма̄хум пе̄рияӈкв о̄лыс. Ма̄н ос Россия ма̄в янытыл хо̄т ма̄т туп тамле касылн ма̄хум ханищтавет. Сочи ӯст касум ма̄хманув хосат акванатсанӯв. Ма̄н та̄наныл ёмщакве̄г ва̄ганӯв. Ма̄н каснэ ма̄хманув нила та̄л сыс са̄в а̄лымасыт, ёмщакве̄г щё̄питахасыт». Тувыл ма̄к следжхоккейт каснэ хум Константин Шихов потыртас: «Ты касыл ма̄гсыл ма̄н кӯщаянув са̄в ёмас тэ̄ла ва̄рсыт. Ам та̄нанылн яныг пӯмащипа ла̄тыӈ ла̄ве̄гум. Хунь ам щар о̄выл щёс ты касылн во̄вве̄сум, ам номсахтасум, манрыг а̄нум тыи э̄ри, ам сун тармыл ӯнлуӈкв ат ве̄рме̄гум, ты коныпал иӈ ёнгуӈкв э̄ри. Мощ ёнгимам юипа̄лт, ам торгамтаслум, ты касыл та̄л о̄лупсам тамле пӯмщиг ат о̄лнӯв. Ань ты Сочи ӯст о̄лум касылн ма̄н э̄тэхо̄талэ сыс щё̄питахтасӯв. Ты касылт Россия ма̄в ма̄гсыл ма̄н ма̄нтина̄нув щар ат са̄литасанӯв, ща̄лыго̄лн те̄р по̄с висӯв». Каснэ хум юипа̄лт таве щё̄питан хум Александр Зыков потыртас: «Со̄ль, хунь ма̄н тув щё̄питахтумув порат, ма̄нтирот номсахтасӯв. Ма̄навн э̄лыо̄вылн хотты ма̄н те е̄мтуӈкв, ёмасыг о̄лнув. Ма̄ янытыл са̄в ёмас ё̄р следжхоккеил ёнгын команда о̄лы. Аквъёт нё̄тхатым каснэ ма̄хманув титыт ма̄ висыт». Прессконференция оигпан э̄лыпа̄лт Эдуард Исаков ла̄выс: «Ма̄н ань следжхоккейт ёнгасан ма̄гсыл иӈ тит команда атуӈкв номсэ̄в. Хотьют таквина̄тэ уральтаӈкв ка̄сащи те, звонитэ̄н, ёхталэ̄н». 1073 2014.04.04. Людмила ТЕТКИНА Тав яласам лё̄ӈхе хосыт ма̄хум ёсал ха̄йтсыт. Ха̄льӯс районт «Лыжнёй Андрея» нампа касыл о̄лыс. Ня̄врамыт ос ма̄ньлат хо̄тпат Саранпа̄вылныл Кульпас мус ёсал хӯрум хо̄тал ё̄мсыт. Акв э̄т та̄н Хо̄рыӈпа̄вылт хӯлсыт, мо̄т э̄т Ло̄пмус па̄вылт. Ты та̄л 26 э̄лумхо̄лас ёсал ты лё̄ӈхыл минасыт. Тамле пӯмащ касыл Андрей Яковлевич Хатанев тав ва̄руӈкве номылматас. Ма̄ньщи хум Саранпа̄выл школат ня̄врам ханищтан хумыг рӯпитас. Та па̄сныл са̄в та̄л ювле хультыс, Татьяна Степановна Гоголева ёсал ха̄йтнэ тэ̄ла но̄хво̄рмалтаӈкве номылматастэ. О̄выл щёс Саранпа̄вылт о̄лнэ ма̄хум 2009 та̄л Кульпас мус минасыт. Татьяна Степановнан Олег Хатанев нё̄ты, ты Андрей Яковлевич Хатанев тав пыге. Тав о̄с а̄тятэ хольт каснэ ва̄рмаль щирыл рӯпиты. Олег ты рӯпата урыл тох ла̄выс: «1960-1980 та̄лытыт Саранпа̄вылт о̄лнэ ма̄хум ка̄сыӈ та̄л Кульпас мус ос ювле ёсал ялсыт, ты лё̄ӈх палытэ 120 ве̄рыста. Аквнакт Кульпаст ос Ло̄пмуст о̄лнэ ма̄хум Саранпа̄вылн ёсал ё̄мсыт. «Югра-Мегаспорт» нампа организациян ос Татьяна Степановна Гоголеван ам яныг пӯмащипа ла̄тыӈ ла̄ве̄гум, ка̄сыӈ та̄л ты касыл ва̄руӈкве нё̄тэ̄гыт». Елена Савчук, Кульпаст о̄лнэ нэ̄, ты та̄л о̄выл щёс ёсал ё̄мыс. Тав ла̄выс: «О̄выл хо̄тал ма̄н Саранпа̄вылныл Хо̄рыӈпа̄выл мус минасӯв. Ты па̄выл мус 40 ве̄рыста. Китыт хо̄тал Ло̄пмусн ёхтысӯв. Таса̄вит ве̄рыста ёсал ха̄йтуӈкве, ам мощ ва̄гта̄л патсум». Ма̄хум халт щар яныг хо̄тпаг Иван Вокуев о̄лы. Тав о̄с мо̄т ма̄хум ёт ёсал ха̄йтнэ ты касыл щё̄питы. Тав ла̄выс: «Ме̄н Андрей Яковлевич ёт школат аквъёт рӯпитасме̄н. То̄нт тав ты рӯпата ва̄руӈкве о̄вылтастэ. Матъёмас ань тав пыге ос мо̄т ма̄хум тав о̄вылтам тэ̄латэ э̄лаль тотыяныл ос ня̄врамыт акванатыглыяныл. Ам амки о̄с са̄в та̄л ня̄врамыт ёт рӯпитасум, 70 та̄лум то̄влыс, ханищтан пыганум акваг ам палтум ёхталэ̄гыт, тох ам каснэ ва̄рмалюм урыл ат ёрувлэ̄гум». Алексей Хатанзеев Саранпа̄вылт «Поиск» нампа центрыт ня̄врамыт ёт рӯпиты. Тав ла̄выс: «Ня̄врамыт ёт ма̄н ёсал акваг ха̄йтыгтэ̄в, халувт касэ̄в. Тыи ма̄гсыл акв па̄вылныл мо̄т па̄выл мус минуӈкве ма̄н пуссын ве̄рме̄в. Ам Иван Николаевич Вокуевын яныг пӯмащипа ла̄тыӈ ла̄ве̄гум. Тав ма̄нав ма̄ньта̄гыл ёсал ха̄йтуӈкве ханищтастэ. Тав палтэ ялантан ня̄врамыт пуссын ёмас хо̄тпаг яныгмасыт, то̄ват МЧСыт, то̄ват на̄й харыгтан хо̄тпаг, ле̄ккарыг, ня̄врам ханищтан колт рӯпитэ̄гыт». Кульпаст ёсал ёхтум хо̄тпат пуссын па̄влыӈ ма̄хумн ӯрве̄сыт. Мӯй ма̄хум ма̄гсыл та̄н ялпыӈ хо̄тал ва̄рсыт. Ос аквта порат Саранпа̄выл музейт рӯпитан хо̄тпат «На горных ветрах времени» нампа конференция ва̄рыгласыт. Н. Анадеева ке̄тум потре ма̄ньщи ла̄тӈыл Л. Теткина хансыстэ. 1073 2014.04.04. Светлана РОМБАНДЕЕВА Сӯкыръя па̄выл школа. Ха̄льӯс район Сӯкыръя па̄вылт о̄выл классытт ханищтахтан школа о̄лы. Та школат ма̄нь ня̄врам садик рӯпиты. Сӯкыръян ялмум порат ам тув щалтсасум, тот рӯпитан ма̄хум ёт хо̄нтхатыгласум, потрамасум. Кӯщай ва̄ӈын нэ̄ потре Тамара Савельевна Ванюта кӯщай ва̄ӈын нэ̄г о̄лы, тав ла̄внэ̄тэ щирыл, школаныл ань Саранпа̄выл школа нупыл паттувес, кӯщаяныл Андрей Дмитриевич Попов. –Школавт хӯрум ня̄врам ханищтахты о̄выл классыт акв ня̄врам, китыт акв, нилыт о̄с акв ня̄врам. Та̄наныл ханищтан нэ̄г Евгения Андреевна Гриценко ос Ольга Андреевна Ванюта. Мо̄лты та̄л кит ня̄врам ханищтахтас, мо̄тынтыг тах о̄с туп кит ня̄врам ханищтахтуӈкве паты. Садикын ос лов ня̄врам яланты. Школав аквхуйплов та̄л ты рӯпиты. Кит хо̄тпа ня̄врам ханищтэ̄г, кит воспитатель садикт рӯпитэ̄г. Пуссын аквъёт ма̄н тыт са̄тхуйплов хо̄тпа рӯпитэ̄в. Са̄выӈпа̄лэ Саранпа̄вылт о̄лэ̄в, ка̄сыӈ хо̄тал тыг рӯпитаӈкве та ёхталэ̄в, па̄влыг халэ̄н ат ве̄рыста. Ань автобус яласы, тув та̄лматэ̄в. Хотьют машина о̄ньщи, тай кӯстырнуве, та̄нти яласэ̄гыт. Э̄рнэ нэ̄пакыт, са̄всыр ищхӣпыӈ утыт, та маныр пуссын о̄ньще̄в. Кӯщаювн акваг нё̄таве̄в, матыр э̄рмыглы, та̄в та̄ра ке̄тхаты. Ты та̄л садик ма̄гыс са̄всыр ёнгын утыт ёвтавет. Школавт ре̄гыӈ, кӯре па̄лтыглым нила хо̄тпа рӯпиты, та̄н пуссын Сӯкыръят о̄лэ̄гыт, ня̄враманыл ты школан ос садикын ялантэ̄гыт. Тамара Савельевна а̄ги о̄парищ наме Вьюткина, 1974 та̄лт самын патыс. А̄тятэ Ме̄сыг па̄вылныл о̄лыс, оматэ ос Тутлейм па̄выл нэ̄. Э̄кваго̄йкаг ань сас а̄тимыг. Увщитэ Татьяна Савельевна ще̄мьятэ ёт Ханты-Мансийск ӯст о̄лы. Тамара Савельевна кит ня̄врам о̄ньщи. Артём пыге онтолов классыт, Зина а̄гитэ ос китыт классыт Саранпа̄выл школат ханищтахтэ̄г. О̄йкатэ Юрий Алексеевич ма̄ньщи хум, Со̄рахта нупыл хӯл алыщлаӈкве ос во̄раяӈкве яланты. Туи порат та̄н ще̄мьяӈ та̄гыл Ме̄сыг па̄вылн ялантэ̄гыт, щаще̄кватэ кол уральтыяныл. Тот пил ва̄тэ̄гыт, хӯл алыщлэ̄гыт. Ня̄врамыт ханищтан нэ̄ Евгения Андреевна Гриценко ня̄врамыт ханищтым лов та̄л рӯпиты. На̄н ань тав потре ловиньтэлы̄н: –Ты школат рӯпитаӈкве а̄нум сака мӯсты, аквъёт рӯпитан ма̄хманум пуссын ёмас хо̄тпаквет, акваннё̄тхатым рӯпитэ̄в. Тыт ань хӯрум ня̄врам ханищтахты, ка̄сыӈ классыт акв ня̄врам. Э̄рнэ нэ̄пакыт о̄ньще̄в, матыра̄ти пуссын о̄лы. Хотты нэ̄пак ман матыр ищхӣпыӈ ут э̄рмыглы те, хасылтэ̄в, ке̄тхатэ̄в, каникулыт сыс тотаве̄в. Ня̄врамыт ма̄гсыл са̄всыр конкурсыт ва̄рыглэ̄в, халанылт касэ̄гыт, тувыл хотьютаныл хоты места вы̄г, дипломытыл ос мӯйлупсатыл мыганӯв. Кол тӣвырт ханищтахтынэ̄ныл коныпал, ма̄лтып хо̄талытт та̄н кон ёнгасэ̄гыт, физкультура урок порат ёсал ос сунсовыл тахсэ̄гыт. Ам Саранпа̄вылт самын патсум. А̄тям ань пенсият о̄лы, омам пӯльницат рӯпиты. Пыг о̄ньще̄гум, хо̄тыт классыт ханищтахты. Ане̄квам Анастасия Ивановна Сангилева, Няхлаӈ па̄выл ма̄ньщи хо̄тпа. Тав ань ма̄н ётув о̄лы, паляге̄тыл сака ат хӯлы, самаге о̄с лю̄льсаӈ постэ̄г. Саранпа̄вылт щар яныг хо̄тпа тав ты, яныгполь э̄тпост 96 та̄лэ то̄влы. Нила ня̄врам о̄ньщиглас хӯрум пыг, акв а̄ги, тыи ам омам. Пыганэ пуссын а̄тимыт, омам такте̄т хультыс. Ань потруме̄н та оигпас. Садикт рӯпитан нэ̄кве̄г Хурит ос садикт рӯпитан нэ̄г по̄слым о̄лэ̄г – воспитатель Елена Григорьевна Кропотова ос ма̄нь ле̄ккар Ирина Германовна Кустышева. Елена Григорьевна Ханты-Мансийск ӯст педагогический колледж а̄стлас, тувыл та̄ра Сӯкыръя садикн рӯпитаӈкве патхатас. Тав ла̄внэ̄тэ щирыл, ань тув лов ня̄врам яланты, пуссын иӈ ма̄нит, китхӯрум та̄л яныт ня̄врамаквет. Рӯпитаӈкве таве̄н мӯсты, э̄рнэ матыр пуссын о̄ньще̄гыт. Ёнгын утыт, нэ̄пакыт, телевизор, са̄всыр ищхӣпыӈ утыт, та маныр, пуссын о̄лы. Ня̄врамыт тэ̄нутыл па̄йтавет, тыттавет. Елена Саранпа̄вылт олы, Сӯкыръян та̄н ань автобусыл ёхталэ̄гыт, туи порат ос ха̄пыл яласаӈкве патэ̄гыт. Елена Григорьевна Саранпа̄вылт самын патыс, тот яныгмас. Оматэ ё̄рн нэ̄, а̄тятэ ма̄ньщи хум. Тэ̄н ань сас а̄тимыг. Елена кит каӈк ос увщи о̄ньщи, та̄н щаще̄кваныл палт яныгмасыт. Щаще̄кваныл Евдокия Илларионовна Тальмич, а̄ги о̄парищ наме Рахтымова, Сӯкыръя нэ̄, ань Саранпа̄вылт о̄лы. Елена кит ня̄врам о̄ньщи, пыге о̄выл классыт ханищтахты, а̄гитэ ты та̄л школан мины. Ирина Германовна о̄с Саранпа̄вылт о̄лы. Сӯкыръят рӯпитанэ̄тэ лов та̄лыг ты то̄влыс. Тыг патхатаме э̄лыпа̄лт Саранпа̄выл пӯльницат ма̄нь ле̄ккарыг рӯпитас. Ань тыт ня̄врамыт ёт рӯпитаӈкве таве̄н мӯсты, э̄рнэ тэ̄рпи пуссын о̄лы. Прививкатыл ня̄врамыт Саранпа̄вылт ва̄равет. Сӯкыръя па̄выл – нё̄тнэ ма̄ньщи па̄вылкве, тыт о̄луӈкве та̄нанылн сака ёмас, лылые̄пе сыстам. Ирина Германовна Ха̄льӯст самын патыс, хо̄т та̄лэ то̄влуме порат ще̄мьятэ Саранпа̄вылн ва̄нтлыс. О̄йкатэ соссаӈ хум, совхозт трактористыг рӯпиты. Тэ̄н хӯрум ня̄врам о̄ньще̄г. Яныг а̄гитэ̄н ще̄мьяӈ та̄гыл Саранпа̄вылт о̄лы, пыге̄н Ханты-Мансийск ӯст медицинский академият ханищтахты. Ма̄нь а̄гитэ̄н нила та̄лэ, садикн яланты, ма̄ньщи ла̄тыӈ ханищты. Тот ань ща̄нь ла̄тыӈ ханищтан группа о̄лы, а̄гирище̄н тув яланты, ма̄ньщи ла̄тӈыл са̄всыр стихотвореният ханищты. Ирина Германовна мовиньты, ла̄ви, та̄н ань юн таве̄н пуссын нё̄тэ̄гыт, ма̄ньщи ла̄тыӈ аквъёт ханищтэ̄гыт. Садикын щалтсамум порат, ня̄врамыт ань хо̄талъя̄тт тэ̄пъяламаныл юипа̄лт ёлхуюптымат, ат та по̄слысанум. Школат рӯпитан ма̄хум ос ня̄врамыт тай мощ по̄слысанум. Ты я̄тил ма̄ньщи ма̄хуматенув, ня̄врамаквет пуссын пуста̄гыл вос о̄лэ̄гыт, На̄янылн-О̄тыранылн вос ӯргалавет! 1073 2014.04.04. Светлана РОМБАНДЕЕВА Ха̄ӈла ос Ло̄пмус па̄выл ма̄хум. Ха̄льӯс район Саранпа̄вылн ялмум порат ам акв ма̄ньщи ще̄мья ёт хо̄нтхатыгласум. Дмитрий Николаевич ос Татьяна Васильевна Ивановыг нила ня̄врам янмалтэ̄г. На̄н ань Дмитрий Николаевич потре ловиньтэлы̄н: – Ам Саранпа̄вылт самын патсум, 1977 та̄лт ва̄т са̄грапнал э̄тпост. Ма̄н ще̄мьявт ат ня̄врам о̄лыс, ам щар яныг. Виктория э̄щум о̄с тыт Саранпа̄вылт о̄лы. Ма̄ньнув э̄щагум, Людмила ос Рая, Югорск ӯст о̄лэ̄г. Виталий а̄пщив а̄тимыг е̄мтыс. Омав Прасковья Дмитриевна, а̄ги о̄парищ наме Сайнахова, о̄с хосат хотталь щалтыс. Ма̄н яглаӈумн янмалтавесӯв, Виктор Семёнович Егоров. Тав ты ма̄н Волгоград ӯсныл ёхталас, нё̄рт рӯпитас. Омам ёт тыт акванхо̄нтхатсы̄г, акванминасы̄г, ам то̄нт ма̄ниг о̄лсум. Яглаӈум о̄с а̄тимыг е̄мтыс. Ане̄квам Лукерья Дмитриевна Сайнахова Ха̄ӈла па̄вылныл о̄лыс. Тэ̄н ащо̄йкам ёт нила ня̄врам о̄ньщигласы̄г, хӯрум пыг ос акв а̄ги, ты ма̄н омав. Та̄н Ха̄ӈла па̄вылт яныгмасыт. Ане̄квагумащо̄йкагум тэ̄нти ня̄враманэ̄н коныпал, кит савалап ня̄врам янмалтасы̄г, Артеев а̄гирищигпыгрищиг, Миша ос Лида. Тэ̄н ща̄няге̄на̄щаге̄н саран нэ̄гхумыг о̄лсы̄г. Ня̄врамыт пуссын аквъёт яныгмасыт. Михаил Тюмень ӯст о̄лы. Лида ос Ха̄льӯст, о̄йкатэ щирыл ань мо̄т о̄парищ намыл о̄лы. Омам яныг ягпыге Николай Ванзеват па̄вылт о̄лы, Василий Ха̄льӯст о̄лы. Семён каӈке Ямал ма̄т о̄лыс, кит пыг янмалтас. Хотталь щалтме атах та̄лыг ты е̄мты. 1979 та̄лт ане̄квам колэ на̄йн но̄хё̄свес, кипятильникыл вит исылтас, тувыл хотмус но̄ххораяс. То̄нт ам та̄л арыгтем туп о̄лсум. Тав а̄нум кон тотыгпастэ, ань документанэ ма̄гыс аквтув ювле щалтапи, то̄нт та алпитэ янытэ̄т на̄йн котаравес. О̄влэ̄т Ха̄льӯс пӯльницан тотыглавес, тувыл Вася пыге̄н Тюмень ӯсн тотвес. Тот о̄с мощ пусмалтавес, тох иӈ но̄х ат ве̄рмхатас, кит са̄ттем туп о̄лыс, а̄тимыг та е̄мтыс. Ане̄квам, лаве̄гыт, сака та̄ксар нэ̄ о̄лыс. Тамле нак ат те е̄мтыс, улпыл хоса о̄лнув. Коланыл я̄ ва̄та нупыл ӯнлыс, ань та ма̄т мо̄т кол ӯнлы, тот рӯт ма̄хманув о̄лэ̄гыт. – Дмитрий Николаевич, э̄кван хотыл о̄лы? – Э̄квам Татьяна Васильевна, а̄ги о̄парищ наме Чалданова, Ло̄пмус па̄вылныл о̄лы. Ме̄н нила ня̄врам о̄ньщиме̄н, яныг пыгме̄н ты та̄л о̄выл классын минас. Китгагме̄н садикын ялантэ̄г, щар ма̄нь а̄гиме̄н са̄тыт э̄тпосэ туп то̄влыс. Ам кол ӯнттын ма̄т рӯпитэ̄гум. То̄ванакт хӯл алыщлаӈкве ман во̄раяӈкве Ло̄пмус нупыл ялантэ̄гум, Тораст во̄ркол о̄ньще̄гум. Ты таквсы хӯл мощ пувсув, ӯйсов ань тай щар тынта̄лыг е̄мтыс, сака ат китыглаве. Ань потруме̄н та оигпас. Дмитрий Иванович ще̄мьятэ ёт та̄нти колт о̄лэ̄гыт. Э̄кватэ тамле ёмас нэ̄, юн акваг матыр колсори рӯпата ва̄ри, посхаты, тэ̄нут па̄йты. Ам ТатьянаВасильевна китыгласлум, хо̄т самын патыс, э̄лаль ань тав потре ловиньтэлы̄н: – Ам Лопмус па̄вылт самын патсум, яныгмасум. Тот ань омам о̄лы, наме Маргарита Геннадьевна. Ма̄н ще̄мьявт ат ня̄врам о̄лсув. Надя увщим ще̄мьятэ ёт Кульпаст о̄лы, Василиса э̄щум о̄с ще̄мьяӈыг е̄мтыс, о̄йкатэ̄нтыл хӯрум ня̄врам о̄ньще̄г, Ло̄пмуст о̄лэ̄гыт. А̄тяв Василий Степанович клуб колт рӯпитас. Та порат, 1985 та̄лытт, Ло̄пмуст пе̄с клуб кол ӯнлыс. А̄тяв тув са̄всыр инструментыт манос ёнгын утыт хасылта̄лыс. Мощ ётылнуве клубын тотыглаве̄сыт. Ма̄хум ань ты хо̄тал мус номияныл, ла̄ве̄гыт, та̄н клубт татем ӯщлахтасыт, э̄ргысыт, ёнгасасыт. А̄тяв ос каӈкагува̄пщиягув а̄тимыг е̄мтсыт. Омав ань юн такте̄т о̄лы, апыгрищанэ тав палтэ акваг ха̄йтэ̄гыт, ане̄кваныл э̄руптыяныл. Кит мис о̄ньщи акв поснэ мис, мо̄танэ иӈ ма̄нь. Туи порат пум ва̄ри, а̄гияге̄нва̄псаге̄н нё̄таве. Ты я̄тил ма̄ньщи ще̄мья пуста̄гыл вос о̄лы, ня̄врамыт со̄тыӈыщ вос яныгме̄гыт. На̄янылн-О̄тыранылн вос ӯргалавет! Пус ка̄т, пус ла̄гыл! 1073 2014.04.04. Людмила ТЕТКИНА Ма̄ньщит – ма̄ сым ма̄хум. «Торум Маа» музейт Светлана Динисламова (Садомина) щё̄питам суссылтапе рӯпитаӈкве о̄вылтахтас. Ма̄ньщи нэ̄ такви рӯтанэ наманыл Алгадьевыт, Садоминыт, Новьюховыт (Носкиныт) ос Кугиныт акв яныг нэ̄пакн хассанэ. О̄влэ̄т выставкан ёхтум ма̄хум э̄лыпа̄лт Светлана Астапович, «Торум Маа» музейт рӯпитан нэ̄, ла̄тыӈ ла̄выс: «2008 та̄лт ма̄н о̄выл щёс «История семьи в истории страны след прожитой жизни» нампа суссылтап ва̄рыгласӯв. Мӯй ма̄хманув ты урыл сака пӯмщалахтасыт. Тыхо̄тал Алгадьевыт, Садоминыт, Кугиныт ос Новьюховыт (Носкиныт) хумус та̄нки халанылт рӯтыг о̄лэ̄гыт, тыт ловиньтаӈкве ро̄ви. Светлана Селивёрстовна такви рӯтанэ урыл ва̄рум суссылтапе «Люди сердца Земли» намаястэ. Тамле нам тав Савелий э̄ргум э̄рге̄тыл вистэ. Савелий Сотам ла̄выглас: «Пе̄с порат сараныт ма̄ньщит вогулыг ос во̄рт о̄лнэ ма̄хмыг ла̄выгласаныл. Ма̄ньщит – Ма̄ сым ма̄хум, та̄н Ма̄лтып ма̄ныл тыг ёхтысыт, хо̄т ма̄ киттыгӯртвес». Ты ла̄тыӈ «Паща рума» Николай Михайлович Садомин нэ̄паке̄т хансым о̄лы. Светлана ты рӯпататэ 1995 та̄лт ва̄руӈкве о̄вылтастэ, то̄нт оматэ Татьяна Романовна Садомина (Кугина) такви рӯтанэ урыл потыртас. Та̄н урыл ла̄тыӈ кинсым, ма̄ньщи нэ̄ Ха̄льӯст о̄лнэ архивын ялыс, тот рӯпитас. Интернетыт «Мемориал» нампа архивыт хо̄нтлум рӯтанэ урыл ла̄тыӈ хо̄нтыс. Тот хансым о̄лы, хо̄т та̄н хо̄нтласыт, хунь порславе̄сыт ос хоты ма̄т ёлщё̄питаве̄сыт. Светлана ты рӯтанэ кинсым Хулюмсунт, Саранпа̄вылн, Кульпасн ялыс, тот о̄лнэ ма̄хум ёт хо̄нтхатыглас. Ты юипа̄лт тав яныг таблицакапай ва̄рыс, тув акв со̄тыра арыгкем рӯт ма̄хманэ наманыл хассанэ. Тав нэ̄паке щирыл нила ще̄мья – Алгадьевыт, Садоминыт, Новьюховыт (Носкиныт) ос Кугиныт пуссын акв рӯтыг о̄лэ̄гыт. Светлана Селивёрстовна ла̄выс: «Ты рӯпата ва̄руӈкве а̄нумн сака мӯстыс, яныг пӯмащипа ла̄тыӈ а̄нумн нё̄тум хо̄тпатн ла̄ве̄гум. Пе̄с порат о̄лум ма̄хманум ос ань о̄лнэ рӯтанум пуссын акв нэ̄пакн хассанум. Таяныт таблица ва̄рнэм сыс, торгамтаслум–таса̄вит рӯт о̄ньще̄гум». Светлана а̄тятэ Селивёрст Семёнович Садомин. Тувыл нэ̄ таи хо̄нтыс, а̄тятэ Алгадьев о̄лум. Селивёрст Семёнович ма̄нь ня̄врамыг а̄щ та̄л хультыс. Оматэ мо̄т о̄йка ва̄рыс, ма̄нь пыгрищ ӯвщитэ̄н янмалтавес. Ма̄нь Селивёрст Ме̄ӈквъя па̄вылныл Кульпас па̄вылн о̄луӈкве тотвес. Садоминыт таве та̄нки о̄парищ намыл хассаныл, тох Селивёрст Садоминыг патыс. Тав ка̄ркамыг ос ёмас хо̄тпаг о̄лыс. Война порат хо̄нтлас, Берлин ӯс мус ялыс. Яныг хо̄нт оигпаме юипа̄лт нэ̄ тотыс, э̄кватэ̄нтыл са̄в ня̄врам янмалтасы̄г. Музейт тав э̄сгын нэ̄паканэ, ма̄глын тагатан по̄санэ о̄с ка̄салаӈкве ро̄ви. 1073 2014.04.04. Александр ВЬЮТКИН Йильпи та̄лн йильпи номтыл. Белоярский ӯст «Год культуры 2014» нампа хо̄тал ва̄рыглавес. Та ва̄рмаль «Центр культур» нампа колт о̄лыс. Районаныл янытыл ма̄щтыр ханты ма̄хум пуссын выставкан во̄виньта̄лве̄сыт. Та̄н тот та̄нти ю̄нтум пормасаныл суссылтасаныл. Тув ёхталам ма̄хум халт хотьютаныл ка̄сащас, о̄с матыр ма̄щтырлаӈкв ве̄рмыс. Тот совныл ю̄нтым тучаӈыт, ня̄врамыт о̄щнэ совъя ва̄ит со̄сныл па̄йтым э̄льмыл хорамтасаныл. Та коныпал то̄рныл са̄всыр а̄канит ос пе̄с порат пуӈкын пиннэ э̄ква то̄рыт ю̄нтсыт. Ня̄врамыт халанылт ос туслы нампа пе̄с ёнгилыл ёнгысыт. То̄ват ос нарсъюхыл са̄ӈквылтаӈкв ханищтахтасыт. Та̄н Олег Потпот ханищтаве̄сыт. Тав хуньт хосат ос Дмитрий Георгиевич Агеев палт ханищтахтас. Тувыл А̄с-угорский театрыт рӯпитас. Ань ня̄врамыт са̄ӈквылтаӈкв ханищтым ос нарсьюхыт ва̄рим аквта «Центр культуры» колт рӯпиты. Выставка тит щё̄с ляпатем рӯпитас, та юипа̄лт концерт ва̄рыглавес. Концерт о̄вылтахтын э̄лыпа̄лт Белоярский район кӯщаӣ хум Сергей Петрович Маненков ва̄рум рӯпатаныл урыл потыртас. Тав потре э̄лаль ловиньтэлы̄н: «2013 та̄л сыс ма̄н районув янытыл са̄в йильпи ёмас лё̄ӈх, о̄лнэ ос ханищтахтын кол ӯнттысӯв. Ва̄рум рӯпатав ма̄гсыл 4 млн. 196 со̄тыра солко̄ви ойтым о̄лыс. А̄нумн на̄н халынт о̄луӈкв пӯмащ. Ам кӯщаиг рӯпитаӈкв о̄вылтахтамум па̄сныл моще̄рт атхойплов та̄лыг ты то̄влы. Мо̄лты та̄л Белоярский ӯсув округувт щар ёмас, сыстам ӯсыг пе̄риим о̄лыс. Ка̄сыӈ ёхтын та̄л ма̄н ӯсув самын патнэ ня̄врамытыл са̄вми. Минам та̄л сыс пӯльницат 434 ня̄врам самын патыс. Ам ва̄глум, ӯсувт та̄н ханищтахтын ма̄л пуссын то̄влавет. Хӯрум та̄лыг ты е̄мтыс, хунь ма̄н о̄выл щёс ты урыл номсахтаӈкв патсӯв. Тувыл яныг пӯмащипа ам а̄лы ма̄ныл тыг ёхтын ма̄хмытын ла̄ве̄гум. Та̄н тыг о̄лмыгтэ̄гыт, нэ̄матыр лю̄ль ат ва̄ре̄гыт. Та сыс та̄н акваннё̄тхатым юртыӈыщ о̄лэ̄гыт. Ка̄сыӈ колн са̄в со̄т, са̄в щунь, са̄в та̄л пуста̄гыл на̄нан о̄луӈкв ла̄ве̄гум». Сергей Петрович потыртан ма̄ныл а̄стуме юипа̄лт концерт та о̄вылтавес. Э̄ргыт, йӣквыт суссылтан ма̄гыс са̄в мир округ янытыл ёхталас. Сака пӯмыщ о̄лыс. 1073 2014.04.04. Александр ВЬЮТКИН Ха̄пыт суссылтаве̄сыт. Мощ мо̄лалнув Ханты-Мансийск ӯст о̄лнэ «Центр ремёсел» колт йӣвныл са̄грим ханты ма̄ньха̄пыт выставкат суссылтаве̄сыт. Ты пӯмащ Нягань ӯст о̄лнэ ма̄щтыр хум щё̄пита̄лыгла̄стэ. Тав наме Сергей Константинович Лукьянченко. Сергей Константинович такви ка̄тыл хурит по̄слын хумыг ханищтахтас. Ань ат та̄лыг ты е̄мтыс, хунь тав о̄выл щёс йӣвныл ма̄щтырлаӈкв о̄вылтахтас. Ма̄ньха̄пыл каснэ ва̄рмаль е̄мталан порат тав ханты ма̄хум яласан ма̄ньха̄п са̄груӈкв номылматас. Нижневартовский районт о̄лнэ са̄лыӈ кол хум Семён Айпин палт ха̄п ва̄рнэ щирыл ханищтахтуӈкв минас. Щар о̄выл ха̄пе тит хо̄тпаг са̄т хо̄тал са̄грыстэ̄н. Сергей Константинович ха̄нты хумн маныр ос хумус пасатаӈкв ос хо̄т э̄ри са̄груӈкв, хӯлтвес. Та па̄сныл тит та̄лыг ты то̄влыс. Ма̄щтыр о̄выл ва̄рнэ ха̄панэ торыӈ щирыл ат а̄ртмысыт. Хоты ха̄пе сови хартаве, мо̄тананэ па̄лыгпоклысыт, тувыл такви са̄в ха̄п сака во̄втаг саграпа̄лсанэ. Ты коныпал тав иӈ са̄в са̄всыр туп са̄грыс. Тувыл такви номтанэ щирыл хорамтасанэ. 2013 та̄лт Сергей Константинович ха̄пыл щё̄питым выставкатэ Москва ӯсн тотыглавес. Тот ат хо̄тал суссылтапе рӯпитан сыс ат со̄тыра ляпатем ма̄хум тав палтылэ щалтсас. Мӯй ма̄хум Сергей ёт акваг потыртасыт ос тав ётэ по̄слахтасыт. Та юипа̄лт тав та̄ра «Народный мастер России» намыл пинвес. Ань ос йильпи ва̄рум выставкатэ Ханты-Мансийск ӯст суссылтаве. Хотьют ка̄сащи, ялэ̄н, сунсэ̄н. 1073 2014.04.04. Тамара МЕРОВА Соссаӈ нэ̄тхумит кассыт. Ювле хультум э̄тпост Сургутский район Русскинская па̄вылт са̄лы ӯрнэ, во̄раян ос хӯл алыщлан ханты ос ё̄рн ма̄хум ялпыӈ хо̄талыл ва̄рыглаве̄сыт. Тамле ва̄рмаль район ос па̄влыӈ кӯщаит акваг щё̄пита̄лэ̄гыт. Па̄вылн ань са̄всыр ма̄ныл мӯй ма̄хум ёхталасыт. Соссаӈ ма̄хум ялпыӈ хо̄таланыл са̄лыт ха̄йтнэ касылыл о̄вылтавес. Ты та̄л сака са̄в са̄лыӈ ма̄хум тув ёхталас. Русскинская, Нижний Сортым па̄влыгт ос ты ляпат во̄рыӈ ма̄т о̄лнэ хантыт ос ё̄рныт коныпал тув Белоярский район Нумто ма̄ныл Пяк колта̄гыл касуӈкве ёхталас. Ань са̄лыт о̄щнэ атпан хум хо̄тпат та̄нки халанылт кассыт. Ос я̄нас касылыт ва̄т са̄виткем нэ̄ хо̄тпат касуӈкве ка̄сащасыт. Са̄лыӈ ма̄хум кит хо̄тпал аквторыг касуӈкве во̄виньта̄лве̄сыт, ты э̄лыпа̄лт та̄н нэ̄пакн хансым о̄лсыт ос вим номераныл щирыл ла̄кквауртве̄сыт. Касылт то̄ва хо̄тпат са̄лыяныл та̄ра ёмащакв нёвумтэ̄гыт, то̄ват ул хотрохтэ̄гыт, илттыг ювле та ё̄ӈхыгпе̄гыт. Мӯй ма̄хум пӯсас ос старт ляпат лю̄люӈкве ат кос та̄ртве̄сыт. Та̄н тай хури по̄слуӈкве тув сака воратасыт. Та щирыл матахмат каснэ хум ос нэ̄квет са̄лыяныл ювле ё̄хсыт, та̄н воссыг касуӈкве ат ве̄рмысыт. Тох ва̄им лю̄ль, то̄ват тапалыт ма̄ныл Русскинская па̄вылн ёхтысыт, ёмащакв каснэ ма̄гыс щё̄питахтасыт, тувыл вунщалыг та хультсыт. Ты та̄л хум хо̄тпат халт Александр Станиславович Лемпин, Нижний Сортым па̄вылныл о̄лнэ о̄йка, но̄хпатыс. Тав юипа̄лэ̄т Владимир Иванович Сопочин о̄лыс, ос хӯрмит места Геннадий Александрович Покачев вистэ. Нэ̄ хо̄тпат халт Русскинская па̄вылныл Зоя Павловна Русскина но̄хпатыс, китыт места Лидия Алексеевна Покачева вистэ, ос хӯрмит местат Капитолина Ивановна Покачева о̄лыс. О̄выл места вим хо̄тпаг "Газпром нефть" компания па̄лыл "Бураныл" мӯйлуптавесы̄г. Мо̄таныт ос мо̄т са̄всыр э̄рнэ пормасыл майве̄сыт. Китыт касыл "Бег в национальной одежде" намаим о̄лыс. Тот нэ̄квет халт Виолетта Ивановна Сопочина но̄хпатыс ос тав маснут поснэ утыл мӯйлуптавес. Китыт местат Анастасия Анатольевна Компина о̄лыс, хӯрмит местат Кристина Евгеньевна Вылла. Хумит халт Леонид Борисович Комтин но̄хпатыс, тав на̄йив сартнэ утыл мӯйлуптавес. Олег Вячеславович Мултанов китыт места вис, ос юио̄вылт Валерий Кузьмич Кечимов о̄лыс. Хум хо̄тпат суныт ӯлтта о̄с поргысыт. Тот Валерий Кечимов сака са̄в щёс порыгмас, тав юипа̄лэ̄т Леонид Комтин о̄лыс, ос хӯрмит места Виталий Русскин вистэ. Нэ̄ хо̄тпат халт маснут нё̄тнэ̄г ю̄нтнэ касыл ва̄рыглавес. Тот нэ̄квет та̄нки ю̄нтум тэ̄лы маснутаныл мӯй ма̄хум э̄лыпа̄лт суссылтасаныл ос та̄нки ма̄щтыр рӯпатаныл урыл потыртасыт. Та сыс хум хо̄тпат «Нюл тахли» касылт пе̄рщисыт. Па̄выл кант ярмарка ва̄рыглавес. Ань соссаӈ ма̄хум та̄нки ю̄нтум пормасаныл, са̄всыр пилыт, са̄лы нё̄выль ос хӯл тыналасыт. Ёрнколыт тӯщтыглаве̄сыт, ма̄хум тув ща̄й аюӈкве, нё̄влиӈ исмит тэ̄ӈкве ос нас исылтахтуӈкве щалтсасыт. Хо̄тал палыт са̄в ма̄ныл ёхталам мир мӯйлыс, тот кит финныг ос американецхум о̄лсыт. Ос та̄н уранылт ётылнуве тах хансэ̄гум. 1073 2014.04.04. Валентина УЗЕЛЬ «Ӯринэ̄ква хо̄тал» янытлавес. Ювле хультум са̄тыт Югорск ӯст «Ӯринэ̄ква хо̄тал» янытлавес. Та ӯст са̄в та̄л «Суеват па̄выл» нампа музей рӯпиты. Тот рӯпитан ма̄хум та̄н ты ялпыӈ хо̄тал ва̄рыглэ̄гыт. Са̄тхуйплов ве̄рыстат во̄рт са̄в пе̄с кол ӯнттым о̄лы, ляпат Эсс нампа я̄ овты. Тот ты ма̄хум мӯйлысыт. Та е̄рт тӯрыт, я̄т пуссын ма̄ньщи нам о̄ньще̄гыт. Ам ялпыӈ хо̄тал о̄лум порат яныгпа̄ла хо̄тпат титыгласанум, ты я̄ манрыг тох ла̄ваве. Та̄н ла̄всыт, ма̄ньщи ма̄хум ты я̄ тох ла̄всаныл – Пе̄с я̄. Ос рущит та̄н ты «Эссыг» ла̄вуӈкв патсаныл. Та хо̄тал сака ма̄лтыпыг о̄лыс, хо̄талыӈ. Са̄в мир музей о̄лнэ ма̄н ёхталасыт. Пе̄с колыт сунсыглым тыглетувле ё̄мыгтасыт, по̄слахтасыт. Тувыл ялпыӈ хо̄тал та о̄вылтавес. Югорск ӯс кӯщай хум Раис Закиевич Салахов атхатам мир нупыл потыртас, тав ла̄выс: «Ӯсувт о̄лнэ мир ос ань тыг ёхтум мӯй ма̄хум! Тыхо̄тал ма̄н «Ӯринэ̄ква хо̄тал» янытлылӯв. Ты ялпыӈ хо̄тал хантыт ос ма̄ньщит та̄н янытлыяныл. Ос ма̄навн, тыг мо̄т ма̄ныл ёхтум мир, та̄н пе̄с ва̄рмаляныл, пе̄с ялпыӈ хо̄таланыл ва̄ӈкв о̄с э̄ри. Ма̄н та̄н ма̄наныл тармыл о̄лэ̄в, таима̄гыс ты ма̄н пуссын та̄н ётаныл тыхо̄тал мӯйлэ̄в. Ань ма̄лтыпыг ты е̄мты, тӯя юипа̄лт туи ёхты. Тыхо̄тал на̄н ёмащакв мӯйлэ̄н, ӯщлахтэ̄н. Ня̄враманын каснэ ма̄т вос касэ̄гыт, ат те ха̄сэ̄гыт, вос ханищтахтэ̄гыт. Ма̄н тыт о̄лэ̄в, ма̄навн соссаӈ мирыт культураныл ва̄ӈкв э̄ри». Тамле ты ёмас сымыӈ ла̄тӈыл ялпыӈ хо̄тал о̄вылтавес. Э̄лаль Нина Георгиевна Рукова потыртас, такви хансум стиханэ ловиньтасанэ. Ма̄хум йӣквсыт, э̄ргысыт. Тувыл пуссын каснэ ма̄н во̄вве̄сыт. Хум хо̄тпат, нэ̄квет йӣвсуп па̄хвтысыт, халанылт хотьют э̄лнув вущкасытэ. Ляпат ос ня̄врамыт кассыт, та̄н сун ӯлтта поргысыт. Ма̄ньнув ня̄врамыт ос нэ̄пакныл ӯринэ̄ква ва̄руӈкв ханищтаве̄сыт, тав ма̄гсылэ пити ва̄рсыт, хурит по̄слысыт. Ка̄сыӈ ма̄т но̄хпатум хо̄тпат ос ня̄врамыт пуссын янытлаве̄сыт, мӯйлупсал майве̄сыт. Тувыл ущ пуссын пасан ва̄тан во̄вве̄сыт, соламатыл тыттуве̄сыт. Ам та е̄рн о̄выл щёс ялсум, мир хумус тот мӯйлы, ма̄ньщи ма̄хманув тот хумус о̄лэ̄гыт, ты урыл я̄нас потрыт тах хансэ̄гум. 1073 2014.04.04. Александр ВЬЮТКИН Касум па̄вылт са̄лыл кассыт. Ма̄ньполь э̄тпос овыл хо̄талэ̄т Белоярский район Касум па̄вылт са̄лыл каснэ хо̄тал ва̄рыглавес. Та пӯмащ касыланыл ты та̄л «юбилейныиг» намтым о̄лыс, нёлса̄т нупыл атыт щёс ва̄рыглавес. Касум па̄выл ма̄хум тох ла̄ве̄гыт: «Са̄лыл каснэ йильпи, ёмас ма̄ щё̄питавес. Ты э̄лыпа̄лт тамле хо̄тал Амня я̄ титтыго̄втнэ ма̄т о̄лыглас. Ань ос па̄вылныл мощ алгальнув йильпи музей кол торыг са̄лыт ха̄йтнэ лё̄ӈх тӯйтэ няӈраг ёлялыглым щё̄питалвес». Са̄т щёс порат са̄лыӈ суныл каснэ ма̄хум са̄лыяныл щё̄питаӈкв о̄вылтасаныл. Каснэ ла̄кв хосыт лё̄ӈх та̄рапаттын ма̄гсыл са̄лыяныл ня̄влыгласаныл. Онтолов щё̄с порат ма̄хум ще̄мьяӈ та̄гыл тув атхатаӈкв о̄вылтахтасыт. Лов щё̄с юипа̄лт са̄лыл каснэ ва̄рмаль та о̄вылтахтас. Яныг кӯщаит са̄лыӈ колыӈ ма̄хмытн янытлан ла̄тыӈ ла̄всыт. Москва ӯсныл Леонид Яковлевич Симановский ёхталас. Тав Российский Федерация Государственный Думат депутатыг о̄лы. Тав са̄лыӈ ма̄хум янытлым ла̄выс: «Хунь ам тыг йинэ щирыл щё̄питахтасум, ам ётум рӯпитан ма̄хманумн титыглаве̄сум: «Наӈ хоталь минэ̄гын? » «Ам ма̄н са̄лыӈ ма̄хум каснэ лӯи ма̄н минэ̄гум». «Таи манырсыр тамле касыл? ». «Та касыл пе̄с та̄гыл ва̄рыглаве. Ань хоталь минэ̄гум, тот нёлса̄т нупыл атыт щёс ва̄раве. Ам тув ялмумт, тот ёмас номтыл, сыстам сымыл о̄лнэ ма̄хум ва̄сум. Хунь ма̄н та̄н кӯстырыщнуве̄г о̄лнэ̄ныл ма̄гсыл йильпи са̄кконыт пирмайтэ̄в те, ма̄н пуссын тув тах ялуӈкв ве̄рме̄в. Сунсуӈкв, манырсыр ты каснэ хо̄тал ос ма̄хум хумус тот о̄лэ̄гыт». Хум юипа̄лт Касум па̄выл миркол тармыл кӯщаиг о̄лнэ нэ̄ Алсу Касымовна Назырова такви па̄выл ма̄хманэ янытласанэ. Тав ла̄выс: «Касум па̄вылт о̄лнэ са̄лыӈ колытт яласан ма̄хумаквет, ам на̄нан ты ёмас каснэ хо̄талыл янытлыянум. Округув янытыл са̄лыӈ ма̄хманув халт на̄н щар ё̄рыг о̄лэгы̄н. Ма̄н па̄влувн са̄в ма̄ныл мир ёхталы, та̄нанылн ма̄н о̄лупсав пӯмащ. О̄панын ащо̄йканын о̄лупсаныл э̄лаль тотнэ̄н ма̄гсыл на̄нан яныг пӯмащипа ла̄тыӈ ла̄ве̄гум». Ханты-Мансийск ӯсныл ёхталам нэ̄ Татьяна Петровна Колегова сценан о̄с во̄виньта̄лвес. Тав округ янытыл ма̄вит ӯргалан Департамент колт специалистыг рӯпиты. Ма̄хум янытлан ла̄тӈанэ ты: «На̄н палтылын ам мо̄т ва̄рмалянум щирыл кос ёхтысум. А̄нумн Белоярск ӯст ань рӯпитаӈкв кос э̄рыс. Хунь ам титыглаве̄сум: са̄лыӈ суныл касыл суснэ ма̄гсыл Касум па̄вылн ялэ̄гум ман а̄ти, ам хоса ат номсахтасум, та̄ра ка̄сащасум. А̄нумн ты касыл сака мӯсты. Таима̄гсыл ам ве̄рмынэ̄м щирыл порат тыг акваг ёхталаӈкв патэ̄гум». Тав юипа̄лэ̄т Степан Антонович Кечимов са̄лы о̄щнэ ма̄хманэ янытласанэ. Тав округ янытыл о̄лнэ са̄лыӈ ма̄хум халт президентыг о̄лы. О̄влэ̄т тав такви ханты ла̄тӈыл ма̄хум янытласанэ. Тувыл ла̄вум ла̄тӈанэ рущ ла̄тӈыл потыртасанэ. Ма̄хум ат са̄всыр касылытт кассыт. Са̄лыяныл «рысь» ос «мах» нампа ха̄йтыл та̄ртым, тувыл сун та̄рмыл лю̄лим, ёса масым са̄лыяныл юипа̄лт пувумтахтым ос сун то̄выль тармыл ӯнлым кассыт. Музей кант хӯрум ё̄рнкол тӯщтым о̄лыс. Коланылт мӯй ма̄хум па̄йтым атыӈ нё̄влиӈ исмит ос исум ща̄й айсыт. Кон ос тынщаӈ сув нумпа̄лн ре̄пуӈкве, сун ӯлтта поргуӈкв ос акв торыг тит ла̄глыл хӯрум щёс э̄лаль порыгмаӈкв ро̄выс, тамле касылыт ва̄рыглавесыт. Ма̄хум та̄нти ё̄раныл тот а̄рталасыт. Но̄хпатум ма̄хум са̄всыр мӯйлупсал мӯйлуптаве̄сыт. Са̄лыӈ ма̄хум халт «на рысь» каснэ ма̄т Николай Тасьманов но̄хпатыс. Са̄лыяныл султыл миннэ Михаил Молданов о̄влэ̄т ёхтыгпас. Сун тармыл но̄хлю̄лим Иван Попов са̄ртын ёхтыс. Сун то̄выль тармыл ӯнлым о̄с Михаил Молданов са̄ртын ёхтыс. Ё̄са масым касылт Александр Тасьманов но̄хпатыс. Округ са̄лыӈ ма̄хум халт щар ё̄рыг Юрий Кузьмич Тарлин пе̄риявес. Ханты-Мансийск ӯст «Кубок Губернатора» нампа мӯйлупсал тав майвес. 1073 2014.04.04. Николай МЕРОВ Са̄лыӈ колт рӯпитан хум. Ха̄льӯс район Саранпа̄вылт акв ма̄ньлат ма̄ньщи хум Яков Васильевич Ромбандеев ёт хо̄нтхатыгласум. Тав такви о̄лупсатэ ос са̄лыӈ колт ва̄рнэ рӯпататэ урыл а̄нумн потыртас. На̄н тав потре э̄лаль ловиньтэлы̄н: – Ам Ха̄льӯст 1989 та̄лт самын патсум. То̄нт а̄щум са̄лыт урим яласас. Ам самын патмум юипа̄лт китах э̄тпос Саранпа̄вылт о̄щве̄сум, тувыл са̄лыӈ колн тотве̄сум. А̄щум Саранпа̄вылт самын патыс. Тав са̄тхуйплов та̄л яныт порат са̄лыт ӯруӈкве нё̄рн минас. Тот рӯпитыматэ, такви суныт, ё̄сат, матыра̄ти ма̄щтырыг ва̄руӈкве ханищтахтас. Тувыл 1995 та̄лт са̄лыӈ колт рӯпитаӈкве по̄йтсас. Саранпа̄вылт йильпи кол ӯнттыс, па̄вылн о̄лмыгтас, плотникыг рӯпитас. Та сыс акваг са̄лыӈ колн минуӈкве таӈхыс. Ка̄сыӈ таквс па̄влувт са̄лыт нё̄влиг ва̄рнэ порат, тав ос са̄лыт нуим тот рӯпитас. Ётылнув колэ а̄стластэ, ос ювле са̄лыӈ колн рӯпитаӈкве патхатас. О̄влэ̄т атыт бригадат рӯпитас. То̄нт тот са̄лы мощща о̄лыс. Таима̄гыс та̄н нилыт бригадан аквантӯлве̄сыт. А̄щум тот кӯщаиг паттувес. Ань ты мус тот рӯпиты. Ам Саранпа̄выл школа а̄стламум порат, э̄лаль ханищтахтуӈкве номтум щар ат патыс, са̄лыӈ колн рӯпитаӈкве воратасум. Ханищтахтамум порат туп ӯщлахтын хо̄талыт е̄мтэ̄гыт, та̄ра са̄лыӈ колн тотве̄сум. Онтолов класс мус ханищтахтасум, воссыг ат ве̄ритасум, са̄лыӈ колн та минасум. Ань а̄щум ёт аквхуйплов та̄л рӯпитэ̄гум. Ма̄н бригадавт нёлолов пастуххо̄тпа о̄лы. Пуссын аквъёт кит со̄тыра атса̄т са̄лы пуӈк аня о̄ньще̄в. Ань амки атхуйпловкем са̄лы о̄ньще̄гум. Ма̄н колта̄глувт ат ня̄врам яныгмасӯв. Яныг ӯвщим ань Ханты-Мансийск ӯст о̄лы. Котиль увщим ос а̄пщим Ханты-Мансийск ӯст ханищтахтэ̄г, ма̄нь йӣгрищум иӈ Саранпа̄выл школат ханищтахты. Та̄н са̄лыӈ колт о̄луӈкве ат ка̄саще̄гыт, ам туп ща̄нягума̄щагум ва̄рнэ рӯпататэ̄н э̄лаль тотылум. Са̄лыл каснэ ва̄рмалин ма̄н тӯя̄г щё̄питахтуӈкве о̄вылтахтэ̄в. Хоты са̄лыт та̄ксарнувет, пе̄лпыӈыщ ха̄йтэ̄гыт, таит выганӯв. Ам сунумн ат са̄лы ке̄ре̄гум: нила са̄лы сун хартым ха̄йтэ̄гыт, акв са̄лы по̄хыт лыпащиг ха̄йты. Тав таима̄гыс лыпащиг ке̄раве, сӯлтыл ул вос мины. Ты са̄лы вожакыг ла̄ваве. Таве атахкем та̄л ханищтаӈкве э̄ри. По̄хыт по̄сумта̄лылын, ёмаспал нупыл ха̄йты. Ква̄лге ювле мощ по̄сумтылын, тав во̄ртыпал нупыл мины. Састумы̄г ювле хартылын, ёл та лю̄ли. Сун хартнэ са̄лыт таве ты хӯнтлэ̄гыт. Ма̄щтыр хо̄тпат касыл ма̄гыс са̄лы суныт во̄втаг ва̄рияныл. Тэ̄лы порат ха̄ль йӣвныл ва̄рим сун ёмас. Тамле сун кӯпнит ос ёмщакв лакви. Каснэ порат са̄лыт молях ха̄йтэ̄гыт. Сакваланэ̄тэ порат со̄пас сун ёт акваг о̄ньще̄гыт. Тӯя̄г ос хо̄втыл ва̄рим йӣв суныл яласэ̄в. Яков Васильевич са̄лыӈ колт яныгмас. Са̄лыӈ суныл ма̄щтырыг яласы. Саранпа̄вылт каснэ ва̄рмаль о̄лыглан порат са̄в щёс призыл майлувес. Ты рӯпитан ма̄тэ̄ныл воссыг нэ̄мхотталь минуӈкве ат таӈхи. Рӯпататэ ма̄гыс ка̄сыӈ э̄тпос ёмас са̄вит олныл ойтаве. Ӯщлахтан хо̄таланэ порат па̄вылн ёхталы. Ам ты ма̄ньлат ма̄ньщи пыгын ос тав рӯтанэ̄н пуста̄гыл о̄лнэ ла̄тыӈ ке̄тэ̄гум. О̄лупсаныл кӯпнитыг вос о̄лы, колта̄гланыл со̄тыл вос пинаве. Са̄в та̄л щуниӈыщ э̄лаль о̄лэ̄н, На̄й-О̄тыранын вос ӯргалаве̄н! 1073 2014.04.04. Тамара МЕРОВА Ӯсыӈ мир э̄ргыт хӯнтлысыт. Ма̄ньполь э̄тпос сыс Ханты-Мансийскат о̄лнэ ма̄хманув ма̄гыс сыресыр пӯмыщ накыт ва̄рыглаве̄сыт. Мӯй ма̄хум культура колн во̄выглаве̄сыт, ос та̄н тот матыр кас манос ёнгил суссыт. Хо̄тхуйпловит хо̄талт нэ̄пак ловиньтан окружной колт «Литературные встречи» сапра̄ни ва̄рыглавес. Тот ма̄хум Юрий Вэлла, потрыт хансум ё̄рн хум, ка̄сталавес. Китхуйпловит щислат тав са̄тпан нупыл хо̄тыт та̄лэ то̄влынув, ос мо̄лты таквсы пувласпи лю̄ль а̄гме ма̄гыс а̄тимыг е̄мтыс. Нэ̄пак ловиньтан колт Владимир Пшеничников ос Людмила Кипарис ё̄рн хум хансум стиханэ щирыл э̄рыг ва̄рсы̄г ос э̄ргысанэ̄н. «Хо̄тал» нампа А̄с-угорский ма̄хум театрыт рӯпитан хо̄тпаг Альфия Абдрашитова ос Татьяна Огнева «Земля любви» Юрий Кылевич хансум потре хосыт ма̄нь спектакль суссылтасы̄г. Тувыл са̄тхуйпловит щислат обскоугорский институт нэ̄пак ловиньтан колн соссаӈ ма̄хум во̄выглаве̄сыт. Тот «Музыка весны» нампа ӯщлахтан щё̄с ва̄рыглавес. Та хо̄талт Светлана Динисламова, потрыт ос стихыт хаснэ нэ̄, намхо̄талэ о̄лум. Тав ма̄гсылэ о̄с ма̄нь концерт щё̄пита̄лвес. Тот Татьяна Огнева Константин Меладзе «Оттепель» кина ма̄гыс хансум э̄рге, ос Белла Ахмадуллина стихе щирыл «Снегурочка» э̄рыг э̄ргысаге. Э̄рыгсов та̄ныт Вероника Кузнецован ёнгуве̄сыт. Ты коныпал Татьяна нё̄тнэ турсуил Юрий Вэлла ос Андрей Тарханов, ма̄ньщи хум, хансум стиханэ̄н ловиньтасаге. Альфия Абдрашитова Светлана Селивёрстовна «Мама» хансум потре ловиньтастэ. Тав ма̄н ма̄ньщи нэ̄в сака э̄сгыстэ. Ла̄выс, то̄ва потрыт ловиньтаме порат самвитанэ нэ̄глэ̄гыт, о̄лупсавт о̄лнэ пищит такем ёмщакве̄г ос э̄рнэ ла̄тӈыл хансавет, такем сымын хо̄е̄гыт. Ма̄ньщи нэ̄в ва̄рнэ тэ̄ланэ янытлан ма̄гыс Мария Волдина ос Владимир Енов ханты хо̄тпаг ёхталасы̄г. Мария Кузьминична потрыт хаснэ соссаӈ хо̄тпат урыл мощ потыртас ос акв э̄рыг э̄ргыс. Тав уре̄т ам таи хансуӈкве таӈхе̄гум, а̄ти сака хосат тав Екатеринбург ӯст «Поэзия» номинацият «Сердце поёт» та̄ратам нэ̄паке ма̄гыс мӯйлупсал майвес. Тот «Литературная премия Уральского федерального округа» нампа касыл ва̄рыглавес. Потрыт, стихыт хаснэ хо̄тпат та̄нки халанылт са̄всыр номинацият кассыт. Тот атхуйплов э̄лумхо̄лас но̄хпатыс, та̄н ты янытлаве̄сыт. Тувыл «За вклад в отечественную словесность» я̄нас премия Юрий Вэллан щё̄питавес. Владимир Енов Светлана Селивёртовнан са̄в ёмас ла̄тыӈ ла̄выс ос такви хансум поэматэ ловиньтастэ. Хулюмсунтныл ёхталам мӯй э̄ква Мария Тихоновна Двинянинова нё̄тнэ ма̄ньщи э̄рге э̄ргыстэ ос такви ка̄тыл сагум то̄ре Светланан мӯйлуптастэ. Светлана Динисламова мӯй ма̄хумн ювле ла̄тыӈ о̄с ла̄выс. Мо̄тынтыг тав атпан та̄лэ тах то̄влы, ос тав хансум стиханэ, потранэ щирыл обскоугорский театрыт рӯпитан хо̄тпат матыр йильпи ёнгил щё̄питаӈкве кусэ̄гыт. Культура тармыл рӯпитан хо̄тпат янытлан хо̄таланыл о̄с о̄лыс. Та кастыл ма̄хум В. И. Игошев музейколн во̄выглаве̄сыт. Тот ос «Любовь и жизнь актрисы» пӯмыщ концерт суссылтавес. Татьяна Огнева, Софья Шесталова сыресыр пе̄с э̄ргыт э̄ргысы̄г, э̄рыгсов та̄ныт Ирина Плотникован ёнгуве̄сыт. Ӯст о̄лнэ ма̄хум ёмащакв ӯщлахтасыт. 1073 2014.04.04. Людмила ТЕТКИНА Та̄н пе̄с ва̄рмалитыл пӯмщалахтэ̄гыт. Ма̄ньполь э̄тпос 27-29 хо̄таланэ̄т Ханты-Мансийск ӯст «Ремёсла и промыслы: прошлое и настоящее» нампа конференция рӯпитас. Тамле конференция Ремёсла центрыт рӯпитан ма̄хум ка̄сыӈ та̄л ва̄рыглэ̄гыт ос округ янытыл о̄лнэ ня̄врамыт тыг во̄виньта̄лэ̄гыт. Ты та̄л ня̄врамыт ос ханищтан хо̄тпат Ха̄льӯс район Хулюмсунт па̄вылныл, Октябрьский район Талинка па̄вылныл, Нефтеюганский район Салым па̄вылныл, Сургут, Лянтор, Радужный, Нефтеюганск, Урай ӯсытныл тыг ёхталасыт. Ханты-Мансийск ӯст «Лучик» ня̄врам ӯргалан кол ос «Лылыӈ союм» нампа студиян ялантан ня̄врамыт та̄нки докладаныл ловиньтасаныл ос мастерклассыт суссылтасыт. Конференция о̄вылтахам порат ня̄врамыт э̄лыпа̄лт Тамара Николаевна Глушкова, Сургутский университетытт рӯпитан нэ̄, ла̄тыӈ ла̄выс: «Кит хо̄тал сыс тыт рӯпитым, на̄н халынт ва̄йхатэгы̄н ос ханищтахтэгы̄н. Матьёмас на̄н пе̄с йис ва̄рмалитыл пӯмщалахтэгы̄н ос э̄лаль тотыяны̄н. Тыи ма̄гсыл ка̄сыӈ ня̄врамын ам яныг пӯмащипа ла̄тыӈ ла̄ве̄гум». Людмила Сенгепова Лянтор ӯсныл тыг ёхталас. Ханты а̄гирищ атыт классыт ханищтахты. Лянтор ӯс ляпат о̄лнэ хантыт хумус та̄н ва̄ре̄гыт, та урыл тав конференцият потыртас. Ос ханищтапыт ма̄хум та̄н ва̄руӈкве ханищтасанэ. Людмила ла̄выс, оматэ ма̄щтырлаӈкве сака ха̄сы, са̄лы та̄ныл сахи ос мо̄т маснут ю̄нты. Тыи ма̄гсыл а̄гирищ тамле рӯпата ва̄руӈкве о̄с ёмащакв ха̄сы. Татьяна Юмина Сургут ӯсныл ёхталас, тав о̄с са̄лы та̄н ма̄хум ёт ва̄рыс. Татьяна о̄с атыт классыт ханищтахты. Тав «Старый Сургут» нампа центрын яланты. Тот ма̄ньщи хо̄тпат ня̄врамыт ёт са̄всыр щирыл ма̄щтырлэ̄гыт. Александр Дмитриевич Сайнахов ос Мария Владимировна Ситникова «Старый Сургут» центрыт рӯпитан хо̄тпаг, а̄гирищ ма̄щтырлаӈкве ханищтастэ̄н. Ты коныпал Татьяна «Лӯима̄ ханса» нампа коллективыт э̄рги. Тав ма̄ньщи ос ханты культурал сака пӯмщалахты, тыи ма̄гсыл тамле конференциян ёхталас. Ты рӯпата ма̄ньщит пе̄с порат ос ань хумус ва̄ре̄гыт, тав та урыл доклад ловиньтас. Татьяна Петрова, Октябрьский район Талинка па̄вылт о̄лнэ а̄ги, ма̄хум са̄всыр сас хусапыт ва̄руӈкве ханищтасанэ. Тав Галина Георгиевна Сунгатова, таве ханищтан хо̄тпа, ёт тыг ёхталас. Галина Георгиевна ла̄выс: «Талинка па̄вылт культура центр рӯпиты, тот ма̄н ня̄врамыт ёт ма̄щтырлэ̄в. А̄гирищитпыгрищит ёт са̄сныл са̄всыр хусапыт ва̄ре̄в. Тамле утыт ва̄рнэ ма̄гсыл са̄с ма̄н я̄ӈк на̄тнэ э̄тпос ос лӯпта э̄тпос порат нуюӈкве ялантэ̄в. Ам ты ма̄т хосат та̄гыл о̄лэ̄гум, ма̄ньщи, ханты культурал сака пӯмщалахтэ̄гум. Та̄н са̄сныл ва̄рим со̄втыт, па̄йпыт хумус ю̄нтэ̄гыт, о̄с ёмащакв ва̄глум. Пе̄с порат рущ ма̄хум а̄ныяныл о̄с са̄сныл ва̄рсаныл. Рущит ос соссаӈ ма̄хум са̄сныл ва̄рӯм то̄ва хусапаныл аквхурипаг о̄лэ̄гыт. Амки рущиг о̄лэ̄гум, тыи ма̄гсыл на̄н пе̄с йис ва̄рмалянын ханищтыянум ос э̄лаль тотыянум». Мо̄т ня̄врамыт конференцият йӣвныл са̄всыр а̄ньщарыт яктуӈкве, а̄канит ю̄нтуӈкве, ра̄ктыл а̄ныса̄ныт ва̄руӈкве ос мо̄т щирыл ма̄щтырлаӈкве ханищтахтасыт. 1074 2014.04.18. Тамара МЕРОВА Олннё̄тмил урыл. Округ губернаторув Н. Комарова то̄ва кӯщаит акванатыгласанэ. Та̄н са̄кконытытн йильпи хӯлтыглан ла̄тӈыт хассыт. Ань сапра̄нит ва̄т нупыл кит ля̄ххалыт урыл потыртасыт. Округувт са̄всыр организациятт рӯпитан ма̄хум ӯщлахтын ма̄н ялнэ лё̄ӈх олнаныл ювле ойтуӈкве патавет. Лӯи ма̄т рӯпитан ма̄хум пуссын тув ловиньтахтэ̄гыт. Ты э̄лыпа̄лт туп округ бюджетный ма̄т рӯпитан хо̄тпат лё̄ӈх олнаныл ювле ойтыглаве̄сыт. Победа хо̄тал 69 та̄лэ янытлан кастыл округ бюджетныл 15 миллион солко̄ви та̄стувес. Ань ты олнытыл хо̄нтлуӈкв ялум хо̄тпат 3 со̄тыра солко̄вил ойтавет. Война порат ос хо̄нтлам о̄йканыл та̄л ань хультум э̄кват, Ленинград ӯс блокада щирыл тыг ке̄тым хо̄тпат, концлагерьт о̄ньщим хо̄тпат ос хо̄нт порат рӯпитам ма̄хум 2 со̄тыра солко̄вил мивет. Ос хо̄нтыт порслым са̄лтатыт та̄н ня̄враманыл акв со̄тыра солко̄вил та̄ставет. Я̄ӈк на̄тнэ э̄тпос 23 хо̄талныл ос лӯпта э̄тпос 20 хо̄талэ мус округ янытыл «Спасти и сохранить» акция рӯпататэ о̄вылтаве. Кӯщаит тув щё̄питан тэ̄лат та̄рапаттысаныл ос са̄всыр нё̄тмил ва̄рнэ ма̄гыс ка̄сащасыт. Ня̄врамыт этнолагерит ӯщлахтын ма̄гыс 21 миллион солко̄ви та̄стым о̄лы. Мо̄лты та̄л тамле ма̄т 503 соссаӈ ня̄врам ӯщлахтасыт. Юио̄выл та̄лытыт са̄внув ня̄врам тот ӯщлахтуӈкве таӈхи. Та̄нанылн тот о̄луӈкве мӯсты. «Развитие культуры и туризма» программан о̄с са̄всыр хӯлтыглан ла̄тыӈ хасвес. Субсидия олннё̄тмилыл искусства колыт тах мивет. Та̄н э̄рнэ йильпи пормасыт ёвтуӈкве ве̄рме̄гыт. 1074 2014.04.18. Людмила ТЕТКИНА Но̄хпатум хо̄тпат янытлаве̄сыт. 2012 та̄л па̄сыл округ Думат «Думать поюгорски» нампа касыл ва̄рыглаве. Газетатт, журналытт, телевиденият рӯпитан хо̄тпат та̄нки рӯпатаныл тув ке̄тыглыяныл. Ты та̄л ля̄ххал тотнэ ма̄хум Дума урыл хансум 120 потраныл тув ке̄тыгласаныл. Депутатыт ос «Союз журналистов» нампа организацият рӯпитан хо̄тпат щар ма̄к ёмащакв хансым потрыт пе̄риясыт. Ма̄ньполь э̄тпос 28 хо̄талэ̄т но̄хпатум хо̄тпат янытлаве̄сыт. О̄выл места «Новости Югры» нампа газетат рӯпитан ма̄хум висыт. Китыт местал ос «Югра-Информ» нампа агентстват рӯпитан хум Сергей Банных майвес. Ос хӯрмит места «Местное время» нампа газетат рӯпитан хо̄тпат майве̄сыт. Ты та̄л ос кит я̄нас премия ва̄рвес. Акв премия Ольга Пламадилова вис, «Югра» нампа журналт рӯпитан нэ̄, ос китыт премиял Галина КОНДИНА, «Лӯима̄ сэ̄рипос» газетавт рӯпитан нэ̄, майвес. 1074 2014.04.18. Николай МЕРОВ О̄лнэ кол урыл потыр. Мо̄лты та̄л округувт жилищный программа пирмайтавес. Тув са̄всыр э̄рнэ тэ̄лат хасве̄сыт. Ты программа ма̄ньлат ще̄мьят, са̄в ня̄врамыӈ ще̄мьят, атхуйплов та̄л арыгкем тыт о̄лнэ хо̄тпат ос мо̄т ма̄хум ма̄гыс щё̄питавес. Ма̄ньполь э̄тпост округув янытыл яныг ӯсытт сапра̄нит ва̄рыглаве̄сыт. Ма̄ньлат хо̄тпат китыглаве̄сыт, ты урыл та̄н маныр номсэ̄гыт. Ань Общественный палата кӯщай нэ̄ Любовь Чистова ты ма̄гыс ма̄хум акванатыгласанэ. Кина суснэ то̄тап хосыт Сургут, Нефтеюганск ос Нижневартовск ӯсытт кол минэ ва̄рмаль щирыл рӯпитан хо̄тпат са̄всыр та̄рвитыӈ тэ̄лат урыл потыртасыт. Ка̄сыӈ ӯст ма̄хум номтаныл акванёхтэ̄гыт. Щар о̄влэ̄т ма̄ньлат ще̄мьят, са̄в ня̄врамыӈ ще̄мьят ос нусаг о̄лнэ ще̄мьят нё̄тмилыл ва̄руӈкве э̄ре̄гыт. Ань тох е̄мтыс, 2010 та̄лт очередин хансым хо̄тпат субсидия винэ ма̄гыс очередяныл ущты ёхтыс. Ты программа ёмщакв рӯпитаӈкве ат ве̄рми, олн а̄тим, тыи ма̄гыс акваг ювле хульты. Тувыл ань ты очередь э̄лаль акваг са̄вмуӈкве паты. Тув иӈ са̄внув олн э̄рмыглы. Юио̄выл та̄лытт округувт са̄в ня̄врам самын паты, мир акваг са̄вми. Ма̄ньлат ма̄хум о̄с акв ва̄рмаль урыл потыртасыт, ипотека процентыт мощщануве̄г ва̄рнувет ке, сака ёмас о̄лнув. Тувыл ань йильпи кол акв квадратный метратэ тынэ сака яныг, мощща олн сэ̄лнэ хо̄тпат кол ёвтуӈкве ат ве̄рме̄гыт. Таима̄гыс округувныл то̄ва ма̄хум мо̄т ма̄н о̄луӈкве минэ̄гыт. Тыт о̄лнэ мир мо̄т ма̄н ул вос о̄лмыгтэ̄гыт, кол ёвтнэ ва̄рмаль мӯсхал щирыл щё̄питаӈкве э̄ри. Ань о̄лнэ сапра̄нин ма̄ньлат ма̄хум ёмщакв щё̄питахтыгласыт. Пуссын ва̄рмаляныл нэ̄пакн хассаныл. Ты тэ̄ла щирыл та̄н э̄лаль ёмащакв тах номсахтэ̄гыт. 1074 2014.04.18. Людмила ТЕТКИНА Э̄рнэ нэ̄пакыт ань акв ма̄т виӈкве ро̄ви. Александр Сучков многофункциональный центрыт кӯщай хо̄тпаг рӯпиты. Ля̄ххал тотнэ ма̄хум ёт хо̄нтхатыгламе порат ва̄рнэ рӯпатаныл урыл потыртас. Ань округ янытыл 19 многофункциональный центр ва̄рвес. Тамле кол Ханты-Мансийск ӯст 2012 та̄л сӯкыр э̄тпосэ̄т рӯпитаӈкве о̄вылтахтас. Ты центр урыл ма̄хум ань ёмащакв ва̄гыт, акв хо̄тал сыс 250-350 э̄лумхо̄лас тув ёхталы. Нижневартовск, Сургут яныг ӯсыгт тыил са̄внув хо̄тпа нё̄тавет. Ань та колт ма̄хум намнэ̄пакыл, медицинский полисыл ва̄равет. Ня̄враманыл пособияолныл ойтнэ ма̄гсыл нэ̄паканыл о̄с тот щё̄питавет. Ты коныпал пенсиян миннэ хо̄тпат тот нё̄тавет. Росреестр рӯпататэ ань о̄с ты центрыт ва̄раве. Кӯщай хум ля̄ххал тотнэ хо̄тпатн китыглавес, ань тамле колыт яныг ӯсытт ос районный па̄влытт ва̄рве̄сыт, ма̄нь па̄влытт о̄лнэ мир справканэ̄паканыл ма̄гсыл ос акв тащирыл яныг ӯсн ялантэ̄гыт. Александр Сергеевич ла̄выс: «2013 та̄л оигпаме э̄лыпа̄лт ма̄н конкурс ва̄рыгласӯв, тот «Почта России» нампа организация но̄хпатыс. Ань почтат рӯпитан хо̄тпат ты рӯпата ва̄руӈкве тах патэ̄гыт. Ты та̄лт ма̄н Советский район янытыл хо̄т почтатыт тамле отделеният ва̄рсӯв. Коммунистический, Агириш, Таёжный, Алябьево, Зеленогорск ос Юбилейный па̄влытт о̄лнэ мир тув ялантаӈкве ве̄рме̄гыт, справканыл ма̄гсыл яныг ӯсн минуӈкве та̄нанылн воссыг ат э̄ри. Ты рӯпата ма̄н э̄лаль ва̄руӈкве патылӯв, мо̄т ма̄нь па̄влытт тамле центрыт о̄с тах ва̄ре̄в». 1074 2014.04.18. Николай МЕРОВ Ма̄хум Нё̄рт ӯщлахтасыт. Ма̄ньполь э̄тпост ма̄ньлат ма̄хум Нё̄рн ялсыт. Хумус та̄н тот ӯщлахтасыт ос манхурип та̄рвит тот о̄лыс, ты урыл Сергей Черепин, ты тэ̄ла тармыл кӯщаиг о̄лум хум, ос Константин Репин, округ Думат ма̄ньлат ма̄хум ёт рӯпитан кӯщай, потыртасы̄г. Ты экспедиция ань китынтыг щё̄пита̄лвес. Ань ты накт пуссын аквъёт ва̄т хо̄тпа тув ялсыт. Лё̄ӈхыт то̄ва порат ма̄шинаныл манос «Бурананыл» саквала̄лсыт ос мо̄т са̄всыр та̄рвит ва̄рмаль е̄мталас. О̄влэ̄т Нораты нё̄рн ха̄ӈхуӈкве номтаныл о̄лыс. Нё̄рыт халт ты нё̄р щар карсыг о̄лы. Та̄н ма̄шинал Саранпа̄выл мус минуӈкве кӯссыт. Тувыл э̄лаль ос вертолётыл Нораты мус тыламлаӈкв е̄мталасыт ос турапыг е̄мтыс. Тыима̄гыс та̄н Нё̄ро̄йка нупыл минмыгтасыт, тув мус лё̄ӈх о̄лы. Нё̄ро̄йка сака карсыг ат кос о̄лы, ос тув ха̄ӈхуӈкве сака та̄рвитыӈ. Са̄в тӯйт о̄лнэ ма̄гыс та̄н Саранпа̄вылныл Нё̄ро̄йка мус ловманкем щё̄с яныг колёсаӈ ма̄шинал ос вездеходыл минасыт. Тувыл тот но̄хха̄хсыт, такос ӯрхатасыт, ёмас хо̄тал тох аты ва̄рыс. Ос ювле Саранпа̄вылн та минасыт. Тувыл э̄лаль ос тэ̄лы лё̄ӈх хосыт Нягань ӯс мус ва̄т нупыл нила щё̄с минасыт. О̄выл щёс Нё̄рн туп Нягань ӯст ос Ха̄льӯс районт о̄лнэ ма̄хум я̄лсыт. То̄нт налыманкем хо̄тпа тув тотыглавес. Ты хо̄тпатныл онтолов хо̄тпа Нё̄ро̄йка нумпа̄лн ха̄хса̄лсыт. Ты та̄л са̄всыр ма̄ныл ма̄хум ялсыт. Нё̄рн миннэ лё̄ӈханыл Ханты-Мансийск ӯсныл о̄вылтахтас. Ка̄сыӈ ма̄нь па̄вылн хо̄игласыт. Соссаӈ мирн сака сымыӈыщ ӯрве̄сыт. Па̄влытт ща̄ил айтве̄сыт, то̄ват тэ̄нут ёт майлысыт. Та̄н пуссын аквъёт кит со̄тыра ве̄рыста палыт лё̄ӈх минасыт. Тыгыл акв со̄тыра хӯрумса̄т ве̄рыста ты тэ̄лы лё̄ӈх. Ха̄льӯс районныл акв нэ̄ хо̄тпа та̄н ётаныл ялыс. Константин Репин ла̄выс: «Та нэ̄ Нё̄ро̄йкан но̄х ат ха̄ӈхыглас. Пе̄с та̄гыл нэ̄ хо̄тпатн тув щар ат ро̄ви». Ань ты ӯщлахтын ва̄рмаль э̄лаль тотуӈкве патаве. Ты тэ̄ла ма̄гыс олн та̄ставе ке, Нё̄р ляпат э̄т хӯлнэ ма̄ ос пувлын колыт ӯнттавет тах. Ань ты накт Екатеринбург, Москва ос мо̄т яныг ӯсытныл олныӈ ма̄хум ӯщлахтуӈкве тув акваг ялантэ̄гыт. Тыт о̄лнэ ма̄хум тот ӯщлахтуӈкве о̄с вос ве̄рмынувыт. 1074 2014.04.18. Александр ВЬЮТКИН Ма̄ньщи хо̄тпанув янытлаве̄сыт. Мощ мо̄лалнув Ханты-Мансийск ӯст «Год культуры – 2014» нампа хо̄тал янытлавес. Та ва̄рмаль ӯст о̄лнэ Центр искусств нампа колт о̄лыс. Округув янытыл са̄в мир ёхталас. Та̄н пуссын ва̄рум рӯпатаныл ма̄гсыл пӯмащипа ла̄тӈыӈ пищмал, дипломнэ̄пакыл ос ма̄гылн тагатан са̄всыр нампа по̄сыл янытлаве̄сыт. Ма̄ньщи мирув халт ат хо̄тпа губернаторув Наталья Владимировнан са̄всыр мӯйлупсал мӯйлуптаве̄сыт. Та̄н наманыл – Андрей Семёнович Тарханов, Александр Дмитриевич Сайнахов, Светлана Селивёрстовна Динисламова, Галина Рудольфовна Кондина ос Галина Николаевна Ларионовна. Ты ма̄хум пуссын са̄в та̄л культура ма̄т рӯпитэ̄гыт. 1074 2014.04.18. Александр ВЬЮТКИН Са̄лыӈ суныл каснэ ма̄хум урыл. Ханты-Мансийск ӯст са̄лыӈ ма̄хум урыл потыртан ма̄гсыл Геннадий Бухтин, Евгений Платонов, Александр Новьюхов ос Степан Кечимов ёхталасыт. Та̄н пуссын акванпотыртахтым са̄в э̄рнэ тэ̄ла щё̄питэ̄гыт. О̄влэ̄т Степан Кечимов потыртас. Тав округ янытыл са̄лыӈ ма̄хум халт президентыг пе̄риим о̄лы. Тав ла̄выс: «Ам са̄лыӈ ма̄хум ёт акваг потыртэ̄гум. Та̄нанылн округув янытыл ёхталам са̄лыӈколыӈ ма̄хум халт ва̄рыглам касыл сака мустыс. Хумус та̄н ла̄всыт: «Мо̄тынтыг ты каснэ хо̄тал ва̄рыгланэ̄н порат, ма̄н каснэ лё̄ӈхув хара ма̄т вос ва̄раве. Белоярский ос Ха̄льӯс районт о̄щнэ са̄лыянув тамле карыс кол ат ва̄щинтасыт, таима̄гсыл ӯст сака пилэ̄гыт». Э̄ти ма̄хум са̄лыт ӯрнэ щирыл хультсыт, та̄нти халанылт ва̄йхатасыт, потыртахтыгласыт хотьютаныл э̄ти са̄лыяныл ӯруӈкв паты. Ты порат са̄лыл каснэ ма̄хум халт акв ма̄ньщи а̄тим о̄лыс. Саранпа̄вылныл ёхталам хо̄тпат халт ма̄ньщит кос о̄лсыт, та̄н пуссын ё̄рнкол тӣвырт рӯпитасыт. Мо̄тынтыг сакати титахтем ма̄ньщи са̄лыӈ сун касуӈкве вос ёхталы». Степан Антонович потыртаме юипа̄лт округ янытыл ма̄вит ӯргалан Департамент тармыл кӯщаиг о̄лнэ хум Евгений Платонов ла̄тыӈ ла̄выс: «Ма̄н щар о̄влэ̄т ты хо̄тал урыл 2012 та̄лт номылматсӯв. Белоярский ӯст совещание о̄лум порат Степан Антонович такви номтэ ма̄навн потыртастэ. Ма̄н тав номтэ нё̄тхатым э̄лаль та тотыслӯв. О̄влэ̄т ты пӯмащ хӯрум та̄л сыс акв щёс ва̄рыглаӈкв потыртахтасӯв. Ань са̄лыл каснэ ма̄н ёхталам ӯс ма̄хум ма̄навн ла̄всыт, ты хо̄тал ва̄тихал вос ва̄рыглылӯв. Ань тах номсахтэ̄в, хо̄т, хумус ос хоты порат ты касыл ва̄рилӯв». Александр Новьюхов «Югра лылые̄п» соссаӈ мир организация тармыл президентыг о̄лы, тав ла̄выс: «Ты порат маныр ат а̄ртмыс ва̄руӈкв, ам номсэ̄гум, мо̄тынтыг тах ва̄ре̄в. Ёрнколытт рӯпитан ос кон тэ̄нут тыналан хо̄тпанув щар нэ̄матарыл ат мӯйлуптасанӯв. Та̄наныл мо̄тынтыг тах о̄с мӯйлупсал щё̄питыянӯв». Юио̄вылт губернатор ва̄ӈын хум Геннадий Бухтин потыртас: «Мощ мо̄лалнув ма̄н округувт са̄лыянув мощщамласыт. Ань са̄лыт ротмалтан ма̄гсыл са̄всыр са̄кконыт пирмайтэ̄в. Округ ма̄тэ яныг, ма̄навн тыт атпан ляпатем со̄тыра са̄лы о̄ньщуӈкв ро̄ви. Ты ма̄гсыл яныг рӯпата ва̄ре̄в. Зоотехникыг рӯпитан ма̄хум Екатеринбург ӯсн са̄лы те̄лп уральтаӈкв ва̄тихал те̄тыглэ̄гыт. Ань ка̄сыӈ са̄лы пале̄т такви по̄с о̄ньщи. А̄гмыӈмо̄сыӈ ӯйхул та по̄с щирыл та̄ра хо̄нтаве. Са̄лыӈ колт рӯпитан ма̄ньлат ма̄хум лусытан ма̄н ве̄рмавет ат виӈкв. Та̄н ань титыглавет, ка̄саще̄гыт та̄н лусытаӈкв манос а̄ти. Ма̄ньлат хум маныр ла̄ви, тох та е̄мты». Ма̄ньщи са̄лыӈколыӈ ма̄хумаквет, на̄н касылт но̄хпатнэны̄н ма̄гсыл ма̄нав са̄в щё̄питахтуӈкв э̄ри. На̄нан ла̄вуӈкв таӈхе̄гум, пуста̄гыл о̄лэ̄н, мо̄тынтыг е̄мтнэ касылн щё̄питахтэ̄н, ёхталэ̄н. 1074 2014.04.18. Тамара МЕРОВА Та̄ксар хо̄тпаг э̄лаль о̄лы. Феодосья Давыдовна Пакина ёт ам таквсы Ханты-Мансийск ӯст ва̄йхатасум. Тав пӯльницан ёхталас ос юв миннэ̄тэ э̄лыпа̄лт ме̄н тав ётэ хо̄нтхатыгласме̄н, ос щё̄с арыгкем потыртасме̄н. Ам тав о̄лупсатэ урыл пӯмщалахтасум. Феодосья Пакина 1930 та̄лт сӯкыр э̄тпос нилахуйплов хо̄талт Резимово па̄вылт самын патыс. Ты ма̄нь па̄выл Восыӈтӯр ос Ягрим па̄влыг халт о̄лыс. Э̄ква ань 83 та̄лэ то̄влыс. О̄лупсатэ ты кос та̄рвитыӈ о̄лыс, ма̄нь порат а̄гмыӈмосыӈыг е̄мтыс, ань сусте̄мт, тав иӈ ка̄ркамыг о̄лы ос аквтох ощхуль ва̄рнэ хо̄тпаг хультыс. Ханты-Мансийскан э̄ква самаге пусмалтаӈкве ёхталас. Тав нила та̄лэ порат аквпа̄л саме акве̄н то̄сам пумыл хо̄илттыма. Омагеа̄тяге во̄раян ма̄ныл ёхтысы̄г, а̄гирище̄н ка̄саластэ̄н, вильтэ̄т ос пальтытт ке̄лп со̄схаты. Хотрохтысы̄г, маныр ва̄руӈкве, ле̄ккар ляпат а̄тим. Восыӈтӯр па̄выл нупыл минуӈкве са̄тлов ве̄рыста, Ягрим мус аквтаса̄витыг о̄лы. Тувыл Восыӈтӯрн та минмыгтасыт, я̄ хосыт ло̄ӈхаль моляхнув тув ёхтэ̄гыт. Тот еврей ле̄ккар ма̄хум сэ̄ръёрыг пусмалтас. Тав ре̄ге̄тыл саме ёмасыг е̄мтыс, туп пале̄тыл мощ лю̄льсаӈ хӯлуӈкве патыс. Школат ханищтахтуӈкве таве̄н сака мӯстыс. О̄выл ханищтан нэ̄тэ, Елизавета Васильевна, ань тыг мус номитэ. Ты рущ нэ̄ Тамбов ӯсныл о̄лыс. Ханищтан коланыл сака ащирмаӈ о̄лыс, ке̄р кӯр па̄лтыгласыт кос, кол аквты щёс по̄ляве. Пасаныл, уласыл ня̄врамыт пуссын ат то̄влавет, по̄лям колкан тармыл та ӯнтэ̄гыт, хансэ̄гыт ос ловиньтэ̄гыт. Рущ нэ̄ ре̄гыӈ маснут торыӈыщ о̄с ат о̄ньщис, соссаӈ хо̄тпатн ва̄ил, сахил майлаве, тав ат масыянэ. Тох та пе̄с пальтуве̄т, со̄пакаге̄т по̄льтахтас. Ха̄льӯсн лувыл миннэ̄тэ порат туп са̄хи ос ва̄й масыглас. Ӯсныл китхӯрум сыстам нэ̄пак тоты, ня̄врамыт тот туп контрольный рӯпатаныл хансуӈкве та̄ртавет. Ты э̄лыпа̄лт ня̄врамыт са̄с тармыл хассыт. Ма̄ньщи хо̄тпатныл туи порат са̄с нуюӈкве ханьщувласыт. Ёмас хаснэ йӣв о̄с ат о̄щсыт, чернилал ос ма̄нь йӣво̄влыл са̄с тармыл тот та щуртсыт. «Ань тай, со̄рни поскве, манрыг ат ханищтахтуӈкве? – Феодосья Давыдовна ла̄выс, – маныра̄ти э̄рнэ ут пуссын о̄лы, туп номтыӈ хо̄тпаг о̄лэ̄н. А̄ти, ня̄врамыт, ма̄ньлат хо̄тпат савыӈыг о̄лэ̄гыт ос мори капыртэ̄гыт, яныг хо̄тпа ла̄тыӈ ат хӯнтлэ̄гыт, ты маныр ман о̄лнэ пищ! Ма̄н матумпа̄ла хо̄тпат, оманува̄щанув, ханищтан нэ̄в ла̄вум ла̄тӈаныл сака хӯнтлысӯв. Елизавета Васильевнан ма̄н нила класс мус ханищтавесӯв. Тувыл туи Тамбов ӯсн ювле минас, воссыг ат та ёхталас. Ётыл хӯлыгласӯв, тав а̄тимыг е̄мтум». Война е̄мтум порат Феодосья Давыдовна лов та̄лэ о̄лыс. А̄ще Давыд Семёнович Пакин хо̄нтлуӈкве тотвес. Хо̄нтлын ма̄т са̄в рӯтанэ порславе̄сыт, э̄ква ты урыл потре ам на̄нан я̄нас хансылум тах. Ня̄врамыт янгема̄не пуссын юн хультум хо̄тпатн нё̄тсыт. Оматэ Татьяна Давыдовна Монина хӯл алыщлас, во̄раяс. Ане̄кватэ Марфа Павловна Самбиндалова лувыт уральтым рӯпитас. Тав о̄с акваг таве̄н нё̄тыс, таи ма̄гыс трудовой нэ̄паке̄т хансым о̄лы: колхозт нила та̄л хӯрум э̄тпос хо̄тхуйлов хо̄тал конюхыг рӯпитас. Та та̄рвит та̄лыт урыл э̄ква потыртас: «Ма̄н а̄лпыл кит щё̄скем школат ханищтавесӯв ос юв та ке̄таве̄в. Юн мощ ӯщлахтэ̄в, тэ̄гӯв ос рӯпитаӈкве о̄вылтахтэ̄в. Во̄рт тыпйӣв са̄грысӯв ос хӯл алыщлаӈкве ялсӯв. То̄нт матыра̄ти ва̄руӈкве о̄памн ханищтаве̄сум. Таве ёмщакв номилум, 99 та̄лэ мус о̄лыс. Щаще̄квам война юипа̄лт ат та̄л туп о̄лыс ос а̄тимыг е̄мтыс. О̄лме̄т таквина̄тэ о̄с ат са̄литастэ, во̄раяӈкве такви ялыс, акваг матыр ка̄тнпатталас. Ма̄н, ня̄врамыт, тэ̄лы ул вос по̄льтахтэ̄в, то̄сам пум тармыл ӯнттаве̄в, лапма̄нигтаве̄в ос лувыӈ суныл во̄рн та тотаве̄в. Хӯл алыщлэ̄в ке, аквтох то̄сам пумыл пантаве̄в, та̄ра ат по̄ляве̄в. Тох та о̄лсӯв, яныгмасӯв. Ётыл ма̄хум мо̄т ма̄н рӯпитаӈкве манос ханищтахтуӈкве мингаласыт. Ань Резимово па̄выл туп наме хультыс». Ха̄льӯсн увщитэ̄н о̄луӈкве во̄ввес. Тав тот хо̄псы а̄гм пусмалтан пӯльницат налыман та̄л рӯпитас. Самагепаляге а̄гм ма̄гыс э̄лаль ханищтахтуӈкве ат минас, туп Ханты-Мансийскан ле̄ккарыг ханищтан курсын та̄лохсан ке̄тыглавес. Тувыл Ха̄льӯс пӯльницат хо̄псы а̄гм о̄щнэ хо̄тпат палт лов та̄л санитаркаг рӯпитас. Тот акв ма̄т хоса рӯпитаӈкве ат та̄ртве̄сыт. Тав маснутыт ловтнэ колнакн рӯпитаӈкве ке̄твес. Ос тувыл пенсиян та патхатас. Ань Ха̄льӯст Татьяна а̄гитэ палт о̄лы. Александр пыге хосат а̄тимыг е̄мтыс. Ӯст тав ёмащакв пусмалтавес, таквсы порат ле̄ккаре̄н о̄с ёхталаӈкве ла̄ввес. Тав ётэ потыртамум порат маттем та мовиньтасме̄н. Тамле ощхуль ва̄рнэ ёмас э̄ква ёт ам та ва̄йхатасум. 1074 2014.04.18. Людмила ТЕТКИНА Мирн ва̄нэ ма̄ньщи о̄йка тот о̄с ханищтахтас. Кондинский район Леуши па̄выл школан 270 ня̄врам яланты, та̄н халанылт 95 а̄гирищпыгрищ ма̄ньщииг манос хантыиг о̄лэ̄гыт. Школа Леуши ос Листвиничный па̄выл халт ӯнлы. Ты кит па̄влыгт о̄лнэ ня̄врамыт тот ханищтахтэ̄гыт. 2005 та̄лт ты школа Кирилл Петрович Механошин намыл пинвес. Ты о̄йка яныг хо̄нтлан нак о̄лум порат хо̄нтлас. Тав «Герой Советского Союза» яныг нам о̄ньщас. Андрей Семёнович Тарханов, ма̄ньщи поэт, о̄с та школат ханищтахтас. Ты та̄л тав «Почётный житель ХМАО-Югры» яныг намыл майвес. Леуши школат рӯпитан ма̄хум ос ня̄врамыт ты хо̄тпаг сака янытлыяныл. Ань тот Татьяна Степановна Билоухая кӯщаиг рӯпиты. Леуши па̄вылн ялмум порат ам тав ётэ хо̄нтхатыгласум ос школаныл урыл китыгласлум. Тав ла̄внэ̄тэ щирыл, Леуши па̄вылт йильпи школа 2001 та̄лт ӯнттувес. Школат аквторыг 400 а̄гирищитпыгрищит ханищтахтуӈкве кос ве̄рме̄гыт. Тувыл ань ты йис ня̄врамыт колнакыл ат то̄влавет. Ка̄сыӈ та̄лныл са̄внув ня̄врам школан ёхты, ань о̄выл классын 28 а̄гирищпыгрищ яланты. Па̄вылт мир акваг са̄вми ос са̄в ще̄мья савалап ня̄врам янмалтаӈкве выгыт. Ань Леуши па̄вылт 23 савалап а̄гирищпыгрищ ще̄мьят о̄лэ̄гыт. Ань «региональный компонентыг» ла̄внэ программа школат ва̄рвес. Ты хосыт о̄выл классыт «Мы дети природы» нампа предмет ня̄врамыт ханищтэ̄гыт. 5-7 классыт соссаӈ ма̄хум литература урыл та̄н потыртавет. 8-9 классыт «Экология и география ХМАО», 10-11 классын ялантан ня̄врамыт «История ХМАО» нампа урокыл ва̄рве̄сыт. Йильпи программат щирыл ма̄ньщи манос ханты ла̄тыӈ ханищтаӈкв таӈхе̄гыт ке, туп то̄нт ла̄тыӈ ханищтан урокыл ва̄равет. Леуши па̄вылт ня̄врамыт ма̄ньщи ла̄тыӈ ва̄ӈкве ат ка̄саще̄гыт. Татьяна Степановна ла̄выс: «Па̄влувт ма̄ньщи ла̄тыӈ ва̄нэ хо̄тпа а̄тим, ты ма̄т о̄лнэ ма̄ньщит хосат та̄гыл ща̄нь ла̄тӈаныл хо̄тёрувласаныл. Улпыл тыи ма̄гсыл ня̄враманыл ты ла̄тыӈ ханищтаӈкве ат таӈхе̄гыт. Ма̄н ня̄врамыт ма̄гсыл кружок ва̄рыгласӯв, ня̄врамыт сак хартуӈкве ханищтасанӯв. Тув аквкит ня̄врам туп ялантас, тыщирыл ма̄щтырлаӈкве о̄с ат ка̄саще̄гыт. Школат музей рӯпиты, кӯщаиг тот Елена Павловна Кульчицкая о̄лы. Тав ня̄врамыт ёт пе̄с пормасыт, нэ̄пакыт, хурит тув акванаты. То̄ва а̄гитпыгыт ёт са̄всыр докладпотрыт хансэ̄гыт, са̄всыр конференциян ва̄тихал ялантэ̄гыт. Ты рӯпатал та̄н пӯмщалахтэ̄гыт». Школат ма̄ньлат хо̄тпат рӯпитэ̄гыт ман а̄ти, ты урыл ам Татьяна Степановна китыгласлум. Кӯщай нэ̄ ювле ла̄выс: «Ань ма̄н школавт 9 ма̄ньлат хо̄тпа рӯпиты. Та̄н халанылт акв нэ̄ туп Леуши па̄вылныл о̄лы. Тав школа а̄стлан юипа̄лт э̄лаль ня̄врам ханищтан нэ̄г ханищтаӈкве минас, тувыл ювле рӯпитаӈкве ёхтыс. Нёлолов хо̄тпа мо̄т ма̄ныл о̄лэ̄гыт. Ань йильпи са̄ккон щирыл мо̄т ма̄ныл хо̄тпат рӯпитаӈкве тыг ке во̄вавет, та̄наныл о̄лнэ колыл миӈкве э̄ри. То̄ват служебныиг ла̄внэ колыл майве̄сыт. То̄ва ма̄ньлат хо̄тпат та̄нки о̄лнэ кол хо̄нтсыт, арендаолн ойтым о̄лэ̄гыт. Тамле колт о̄лнэ ханищтан хо̄тпанув на̄йпос, вит, коланыл па̄лтыглан ма̄гсыл олныл нё̄тавет. Ос мо̄т са̄ккон щирыл университет очный отделения а̄стлан а̄гитпыгыт та̄ра школан рӯпитаӈкве ке ёхтэ̄гыт, кит та̄л сыс ка̄сыӈ э̄тпос арыг кит со̄тыра солко̄вил мивет. Ань ня̄врамыт ханищтан хо̄тпат са̄в олныл ойтавет. Бюджетыт рӯпитан хо̄тпат хольт акв та̄л сыс рӯпата олнаныл но̄хнё̄тавет. Тыи ма̄гсыл ма̄ньлат хо̄тпат ань школат рӯпитаӈкв ка̄саще̄гыт». Ня̄врамыт ЕГЭ хумус хансэ̄гыт, ты урыл Татьяна Степановна тох ла̄выс: «Акв та̄лт 9 классыт 33 ня̄врам о̄лыс, школат э̄лаль ханищтахтуӈкве туп аквхуйплов ня̄врам хультыс. Мо̄т ня̄враманув Междуреченский па̄вылт о̄лнэ колледжит ханищтахтэ̄гыт, а̄лпыл тув минэ̄гыт, ӣтипа̄лаг ювле ёхтэ̄гыт. Мо̄лты та̄л акв а̄ги ЕГЭ хансуӈкве ат ве̄рмыс, аттестат пе̄нтсыл справканэ̄пакыл майвес. Тамле ва̄рмаль акв щёс туп о̄лыс, тох тай ня̄враманув пуссын экзаменыт ёмащакв хансэ̄гыт». 1074 2014.04.18. Светлана РОМБАНДЕЕВА Та̄ныт са̄ӈквылтан ма̄ньщи хум. Яныгполь э̄тпос 28 хо̄талэ̄т Владимир Иванович Шесталов атпан та̄лэ то̄влы. Намыӈсуиӈ ма̄ньщи хо̄тпав Юван Николаевич Шесталов ты тав пыге. Владимир Иванович Ханты-Мансийск ӯст о̄лы, искусства школат рӯпиты, ня̄врамыт са̄ӈквылтапыл та̄ныт са̄ӈквылтаӈкве ханищтыянэ. Э̄лаль ань тав потре ловиньтэлы̄н: – Ам 1964 та̄лт Тюмень ӯст самын патсум. Омам Елизавета Владимировна, а̄ги о̄парищ наме Иванова. А̄тямн Лылыиг ла̄ввес, Лылы – рущ ла̄тыӈ щирыл – душа. Тэ̄н 1959 та̄л порат Санкт-Петербург ӯст акванминасы̄г. 1960 та̄лт Аринэ увщим самын патыс. 1971 та̄л мус ма̄н Тюменьт о̄лсӯв, тувыл Ленинград ӯсн ва̄нтлысӯв, увщиме̄нтыл тот яныгмасме̄н. Э̄ргуӈкве манос музыкальный инструментытл ёнгуӈкве ма̄нь та̄гыл тахсум, э̄рыгсов та̄н сака са̄в хӯнтлысум. Увщим Жданов нампа пионерыт колн ялантас, э̄ргыт э̄ргыс. А̄нум о̄с тув во̄выгластэ, тот э̄ргысум. Увщим акваг э̄ргыс, са̄всыр инструментытыл ёнгыс. Ам ос хӯнтлысум, ханищтахтасум, тувыл э̄рыгсовыт, та̄ныт ла̄щалла̄щал ва̄ӈкве патсанум. Ка̄тыл са̄всыр хурит по̄слысум, а̄тям номсыс, ам хурит по̄слын хо̄тпаг е̄мтэ̄гум. Ос ам акваг э̄ргын ва̄рмаль нупыл хартсум. Хо̄тхуйплов та̄лум порат гитарал ёнгуӈкве ханьщувласум. Эстрадный э̄рыг сака са̄в хӯнтлысум, та порат май тамле группат о̄лсыт: «АББА», «Бони М», «Битлз», «Роллинг Стоун». Та̄н э̄рганыл ам сака э̄руптасанум, хӯнтлысанум. Ма̄н, та порат яныгмам ма̄ньлат ма̄хум, та̄н хольтаныл э̄ргуӈкве сака тахсӯв. То̄нт ты э̄рыгсовыт хансуӈкве патсум. О̄выл э̄ргум Джон Леннон а̄тимыг е̄мтум хо̄талт хансыслум, тувыл та̄нсовыл ва̄рыслум – ва̄т са̄грапнал э̄тпос 9 хо̄талэ̄т 1980 та̄лт. 1985 та̄л па̄сныл а̄тямн тыг, Ханты-Мансийск ӯсн, во̄вуӈкве патве̄сум. Ам номсыте̄мт, яныг ӯст яныгмасум, тамле ма̄нь па̄вылн хумус минэ̄гум, тот ань ӯсхулыт хосыт мисыт ё̄мыгтэ̄гыт. Та порат ам ва̄т нупыл хӯрмит та̄лум то̄влыс. Тувыл маныр ва̄руӈкве, а̄тям ла̄вум ла̄тӈе хӯнтлуӈкве э̄ри, тув хотталь та ка̄сащасум. Ленинградыт ам заводыт рӯпитасум, тыт ос кол ӯнттын ма̄т плотникыг патхатасум. Ётылнуве, 1987 та̄лт, ам педучилищат ханищтахтуӈкве патсум. Э̄рыг та̄ныт ханищтан мир, э̄рыг э̄ргын хо̄тпат ам та па̄сныл ты ва̄ганум. 1989 – 1990 та̄лытт ам ма̄ньщи мирув та̄ныт ос э̄ргыт ханищтаӈкве патсум. 1991 та̄лт педучилище а̄стламум юипа̄лт, Новосибирск ӯст о̄лнэ консерваториян поступайтан ре̄тыл минасум. Тот ань май э̄рыг тэ̄ла ханищтаве. Ос ам тот ханищтахтуӈкве ат ка̄сащасум, аман хотэ̄ссамаве̄сум манос хотрохтысум, ювле пе̄румтахтасум. Тувыл та порат тот ты э̄квам ёт акванхо̄нтхатасме̄н. Тав ам сымумн та̄ра хо̄яс, таве э̄руптаӈкве патыслум, наме Софья. Ам таве̄н о̄с сака мӯстысум. Ханты-Мансийскын аквъёт ёхтысаме̄н, тыт акванминасаме̄н, пӯри тэ̄сув. 1993 та̄лт ме̄н э̄кваме̄нтыл Санкт-Петербург ӯст о̄лнэ А. И. Герцен нампа институтт ханищтахтуӈкве о̄вылтахтасме̄н. Та тув тыт финноугорский мир нилыт мирхал фестиваляныл о̄лыс. Ма̄хум мӯйлысыт, э̄рыг э̄ргысыт, йӣквсыт. То̄нт ты ам са̄ӈквылтапыл ёнгуӈкве ханьщувласум, «Кӯринька» йӣкв йӣквсум. Тувыл Восыӈтӯрныл ёхталам ма̄ньщи хо̄тпа Василий Николаевич Яркин ёт ва̄йхатаӈкве патсум. Тав а̄нум такви са̄ӈквылтапе мӯйлуптастэ. Мощ ётылнуве о̄йка а̄тимыг е̄мтыс. Институтт ханищтахтамуме̄н коныпал, ме̄н 1996 та̄лт Петрозаводский консерваторият ханищтахтуӈкве патсуме̄н. Тот ам э̄рыг ва̄рмаль ва̄нэ яныг хо̄тпат ёт ва̄йхатсум. – Владимир Иванович, кит ма̄т ханищтахтуӈкве хумус а̄лымасын? – Сака та̄рвитыӈ о̄лыс. Та порат ам тӯлыглахтан ва̄рмаль ханищтаӈкв патыслум. Ты э̄лыпа̄лт Кышик па̄вылт Ӯй йӣквес, ам тув ялсум, тот мощ суссум. Ханищтахтан ма̄ныл а̄стысум, 2001 та̄лт ювле йисум, тыт искусства центрыт рӯпитаӈкве патхатасум. 1995 та̄лт э̄рыг ханищтан урыл кит нэ̄пак хассум, 2001 та̄лт хӯрмит нэ̄пакум хансыслум. Ань потруме̄н та оигпас. Владимир Иванович 2011 та̄лт искусствоведение кандидат намыл майвес. А̄тятэ, Юван Николаевич, сака ща̄гтыс, ань пыге намыӈсуиӈыг е̄мтыс. Владимир Иванович тӯлыглахтан ва̄рмаль ва̄т нупыл ат та̄л арыгтем ханищты, э̄ргыт, йӣквыт ханищты, пуссын нэ̄пакын хансыянэ. Ма̄н, редакцият рӯпитан ма̄хум, ты я̄тил ма̄ньщи хо̄тпав нам хо̄талэ̄т янытлылӯв! Ще̄мьятэ ёт пуста̄гыл вос о̄лы, На̄янэ̄н-О̄тыранэ̄н вос ӯргалаве! 1074 2014.04.18. Светлана РОМБАНДЕЕВА Ма̄хум кассыт. Ма̄ньполь э̄тпос 24-28 хо̄таланэ̄т Ханты-Мансийск ӯст «Педагог года Югры – 2014» нампа конкурс о̄лыс, ня̄врамыт ханищтан ма̄хум халанылт кассыт. 2014 та̄л культура та̄лыг намаявес, ты конкурс ань таи ма̄гыс ты ва̄рыглавес. Ма̄ньщи ос ханты ма̄хманув тот о̄с кассыт, то̄ва хо̄тпанув тыг мо̄т па̄влытныл ёхталасыт. Акв ма̄ньщи нэ̄ Ха̄льӯс район Кульпас па̄вылныл ёхталас, Евдокия Ивановна Кугина. Школат тав ма̄ньщи ла̄тыӈ ос литература ханищтан учителиг рӯпиты. Та̄н рӯпатаныл о̄вылтыт потыртасыт, уроканылт ань ня̄врамыт ёт хумус рӯпитэ̄гыт, ма̄хумн пуссын суссылтасыт. Владимир Савельевич Меров тав но̄хпатыс. Ты ма̄ньщи хум Ханты-Мансийск ӯст о̄лы, «Лылынг союм» центрыт рӯпиты, ня̄врамыт ма̄ньщи ла̄тӈыл потыртаӈкв ханищтыянэ. Ма̄н, редакцият рӯпитан ма̄хум, ты я̄тил ма̄ньщи хо̄тпав но̄хпатме ма̄гсыл янытлылӯв! Пуста̄гыл вос о̄лы, э̄лаль о̄с аквтох ка̄ркамыг вос рӯпиты, На̄янэ̄н-О̄тыранэ̄н вос ӯргалаве! О̄выл хурит В. С. Меров ня̄врамыт ёт по̄слым о̄лы. Китыт хурит по̄слым о̄лэ̄гыт: И. М. Молданова (Ханты-Мансийск ӯст те̄хнологопедагогический колледжит рӯпиты, ма̄ньлат ма̄хум ханты ла̄тӈыл потыртаӈкв ханищтыянэ), Е. И. Кугина, В. С. Меров ос М. Е. Макарова (Ханты-Мансийск ӯст о̄лы, соссаӈ ня̄врамыт ма̄гыс ханищтан нэ̄пакыт ва̄рнэ ма̄т рӯпиты). 1074 2014.04.18. Светлана РОМБАНДЕЕВА О̄выл класс ханищтан нэ̄. Хурит Ха̄льӯс район Саранпа̄выл школат о̄выл класс ня̄врамыт ханищтан нэ̄ по̄слым о̄лы, наме Зайтуна Биктимировна Магафурова. Ня̄врамыт ань иӈ ма̄нит, наме ла̄вуӈкве ат ве̄рмияныл, Зинаида Петровнаг ла̄вияныл. На̄н ань тав потре ловиньтэлы̄н: – Ам ханищтан классумт 13 ня̄врам ханищтахты – 9 соссаӈ ня̄врамаквет, 2 рущ ос 2 саран. Тыт ам ань о̄выл та̄л рӯпитэ̄гум. Ня̄врамаквет халанылт юртыӈыщ о̄лэ̄гыт, акваннё̄тхатэ̄гыт. Хотьютаныл хоса ат те ёхталы, ка̄саныл холы, ӯрияныл, халанылт э̄руптахтэ̄гыт. Акв ще̄мья хольт о̄лэ̄гыт, ат алхата̄лэ̄гыт. Ща̄няныла̄щаныл о̄с пуссын мӯсхал ма̄хум, сапра̄ни ва̄рыгланэм порат пуссын ёхталэ̄гыт, матыр тэ̄ланув ёмащакв ёлхансыяныл. Ань май йильпи ханищтап ква̄лтапаптувес, та̄наныл мо̄т щирыл ханищтаӈкве э̄ри. Ня̄враманылн акваг нё̄тэ̄гыт, юв минэ урокыт акваннё̄тхатым ва̄рияныл. Ты ма̄гыс ам номтум сака ёмас, ня̄врамаквет матъёмас тамле мӯтраӈ ща̄ньа̄щ о̄ньще̄гыт. Акв ма̄т ӯнлуӈкве та̄нанылн та̄рвитыӈ, таима̄гсыл са̄всыр кружокыт о̄лэ̄гыт, тув о̄с ялантэ̄гыт, йӣкващлэ̄гыт, э̄рге̄гыт. Зайтуна Биктимировна хо̄тпа нупыл сымыӈ нэ̄, ёмас э̄лумхо̄лас, щар ма̄ньщи хурипа. Пуста̄гыл вос о̄лы, со̄тыӈыщ вос о̄лы! 1074 2014.04.18. Николай МЕРОВ Ма̄щтыр нэ̄ ня̄врамыт ханищты. Галина Петровна Самбиндалова 1998 та̄лт Ня̄хщамво̄ль па̄вылн ва̄нтлыс. Ты э̄лыпа̄лт Ягрим па̄вылт о̄лыс, тот рӯпитас. Тувыл хум ва̄рыс, о̄йкатэ наме Тимофей Константинович Самбиндалов, тэ̄н са̄в та̄л аквъёт о̄лэ̄г. Ам ты ма̄ньщи па̄вылн ялмум порат Галина Петровна ёт хо̄нтхатыгласум, тав а̄нумн такви о̄лупсатэ урыл мощ потыртас. На̄н тав потре ловиньтэлы̄н: – Ме̄н о̄йкаме̄нтыл о̄влэ̄т Яныгпа̄вылт о̄лсуме̄н. О̄йкам ща̄не хотталь щалтме юипа̄лт, а̄ще а̄гмыӈыг е̄мтыс. Таима̄гыс тот акв та̄л о̄лсуме̄н. Тувыл а̄гим ханищтахтан поратэ ёхтыс, ма̄н ще̄мьяӈ та̄гыл Ня̄хщамво̄льн ва̄нтлысӯв. Тыт клубыт ам художественный руководителиг рӯпитаӈкве патсум. То̄нт ма̄н музейкол пунсуӈкве тахмаясӯв. Са̄ртын э̄лыл ёхталам хо̄тпат па̄вылт о̄лнэ пе̄с пормасыт пуссын ӯс музейн тотыгласаныл. Яныгпа̄вылт о̄лмум порат Югорск ӯсн сака са̄в пе̄с пормас вуйвес. Ам ла̄всум, манрыг наска̄ссыг э̄л миӈкве, ма̄нки пормас атнэ кол ва̄ре̄в. Тыт хультэ̄гыт ке, сакати ня̄враманув сунсэ̄гыт. Ам клубколт рӯпитасум. Хотьют музейн ёхты, та̄ра во̄вавем. Ма̄хум сака пӯмщалахтасыт. Ма̄н ка̄сыӈ та̄л суссылтап щё̄пита̄лсув. Ялпыӈ хо̄талыт о̄лыгланэ̄ныл порат ю̄нтум ос сагум пормасанув пуссын тот суссылтасанӯв. Тувыл Хулюмсунт па̄вылн йильпи кӯщай паттувес. Тав румэ̄кватэ таве̄ныл па̄влувт тыналахтын ма̄гыс колнак во̄выс. Таима̄гыс клуб кӯщай пе̄с пормасыт та колнакыл хотвиӈкве ла̄всанэ. Та румэ̄ква тот пормасыт тыналаӈкве патыс. Музеюв рӯпитан ма̄ныл по̄илттаслӯв, то̄ва пормасанув па̄влыӈ ма̄хумн ювле мисанӯв, то̄ват ма̄н палтув хультсыт. О̄йкам ва̄рыглам сол ква̄лганэ хоткулатасыт. Омамныл хультум са̄хи ань но̄хвиӈкве пилэ̄гум, о̄с сака пе̄сыг е̄мтыс. Та колнак клуб нупыл хансым о̄лы. О̄влэ̄т тот кина суссылтавес. Ма̄н та нэ̄ ты колнак ма̄гыс ойтхатуӈкве ла̄выслӯв. Олн ат ойтнэ̄тэ ма̄гыс, ма̄н ань та колнак туманыл лаппантыслӯв. Ань миркол кӯщаюв та колнак о̄с музейколыг ва̄руӈкве ла̄выстэ. Ос ма̄н пе̄с пормасыт пуссын ла̄кквамисанӯв. Тувыл ос то̄ва пормасыт сака пе̄сыг е̄мтсыт. А̄гим ханищтахтын ма̄ныл а̄сты, ты рӯпатаныл по̄хын минуӈкве таӈхе̄гум, пенсиян патхатэ̄гум. Тав па̄вылт о̄луӈкве щар ат таӈхи, тыт рӯпата а̄тим. Ань ма̄хум мирколт, ма̄нь ня̄врамыт колт, школат, пӯльницат ос клубыт рӯпитэ̄гыт. Тувыл та, воссыг нэ̄мхо̄т рӯпитан ма̄ а̄тим. Клуб колт 2002 та̄л па̄сныл «Ма̄нь са̄лыкве» нампа кружок о̄ньще̄в. Са̄ртын ловманкем ня̄врам ма̄щтырлаӈкве тув ёхталас. Ка̄тыл ва̄рим пормасаныл ӯсн ке̄тыгласанӯв. Юио̄выл та̄лыт сыс мощща ня̄врам тув ялантаӈкве патыс, ань а̄гирищанув сакыл матыр сагуӈкве ос ю̄нсхатуӈкве ат таӈхе̄гыт. Тувыл та̄наныл Саранпа̄вылн «Ма̄нь ӯскве» нампа ня̄врамыт ӯщлахтын ма̄н тотыглаӈкве патсанум. Ам ла̄ве̄гум, кружокн ялантаӈкве ат патэгы̄н ке, тув ат тотыглыянум. Ты хосыт ань атах а̄гирищ яласаӈкве патыс. Ма̄ньщи то̄р ос мо̄т са̄всыр пормас ю̄нтэ̄в. Ты та̄л ре̄тыӈ ю̄свой э̄тпост рӯпатанув ос Ха̄льӯсн тотыгласанӯв. Мо̄лты ма̄н ма̄ньщи э̄ква саг сагсӯв, ма̄ньщи суп йинсӯв. А̄гит ёмщакв ю̄нсхатуӈкве ат ха̄сэ̄гыт, ты кос ханищтыянӯв (мовиньты), ю̄нтмиланыл ка̄салэгы̄н ке, такем янгыт. Саранпа̄выл а̄гит татем ёмщакв ю̄нсхатэ̄гыт, ма̄н ня̄враманув тох ат ха̄сэ̄гыт. Ань а̄канит ма̄гыс ма̄нь то̄рыт ю̄нтэ̄в. Ханищтахтэ̄в, тувыл пуӈкын пиннэ яныг то̄рыт ущ ю̄нтуӈкве патэ̄в. Ам Галина Петровнан са̄в ёмас ла̄тыӈ ке̄тэ̄гум. Тав ня̄врамыт са̄всыр пормасыт ю̄нтуӈкве ос сакныл пормасыт сагуӈкве ханищты. Ты ма̄щтыр нэ̄ хо̄тпа ма̄н янытлылӯв. Са̄в та̄л пуста̄гыл э̄лаль вос о̄лы! 1074 2014.04.18. Анна АЛГАДЬЕВА Ма̄н Ӯринэ̄ква хо̄талув ӯлыглэ̄в. Ӯринэ̄ква ро̄ӈхувлы ке, тӯя по̄ра та ёхтыс, ма̄лтыпыг ты е̄мты. Ма̄лтып посыӈ тӯя хо̄талакве̄тн ма̄хум ща̄гтэ̄гыт. Лӯи ма̄ е̄р па̄влытт, ӯсытт «Ӯринэ̄ква хо̄тал» акваг ӯлыглаве. Ка̄сыӈ па̄выл, ка̄сыӈ ӯс такви щирыл мӯйлы. Хулюмсунт па̄вылт «Ӯринэ̄ква хо̄тал» яныгполь э̄тпос китыт ӯщлахтын хо̄тал о̄лум порат минас. Са̄в ня̄врам, яныг хо̄тпа ма̄ньщи па̄вылн атхатыгласыт. Школат ханищтахтын ня̄врамыт ос то̄ва яныг ма̄хум концерт суссылтасыт: э̄ргысыт, йӣквсыт, стихыт ловиньтасыт. Ня̄врамыт ма̄гыс са̄всыр ёнгыт, касылыт о̄лсыт, хо̄т та̄н са̄всыр мӯйлупса та̄нкина̄нылн сэ̄лсыт. «Ӯринэ̄ква хо̄тал» омат ос ня̄врамыт хо̄талыг ла̄ва̄ве. Тыи ма̄гыс о̄с акв ёмас пищ ма̄н па̄влувт о̄лы – ка̄сыӈ тӯя е̄мт та̄л сыс самын патум ня̄врамыт ты хо̄тал ма̄нь мӯйлупсал мивет. Мо̄т па̄влыӈӯсыӈ ма̄т ты хо̄тал ма̄гыс олн та̄ставе, йис о̄лупса койнэ ос музеит рӯпитан ма̄хум са̄ртын та̄гыл ты кастыл щё̄питахтэ̄гыт, рӯпитэ̄гыт. Хулюмсунт па̄вылт ты ёнгын хо̄тал ва̄руӈкв ё̄рыл нэ̄мхотьют ат кащилтаве. Ма̄хум пуссын та̄нки номтыл, хумыс ка̄саще̄гыт, тох ва̄ре̄гыт. Нэ̄мхотьют ты ма̄гыс олныл ат ойтаве. Ня̄врамыт ӯрхатэ̄гыт, китыглахтэ̄гыт, хунь «Ӯринэ̄ква хо̄тал» е̄мты. Та̄н ханьщувласыт, тыт ёмщакв ёнгасаӈкв ос поргащлаӈкв ро̄ви. Яныг ма̄хум ос, сакати, нас потраме̄гыт. Ты хо̄тал са̄в хо̄тпа акванатхаты, па̄влыӈ рущанув о̄с ёхтэ̄гыт, то̄ват пасанн тэ̄нут тотэ̄гыт. Ты ва̄рмаль о̄с ва̄ганыл. Марина Александровна Алгадьева ос Оксана Алексеевна Алгадьева са̄в нё̄тнэ э̄рыг э̄рге̄г, ня̄враманэ̄н ёт йӣквта̄ныт йӣкве̄г. Ма̄хмытн сака мӯсты, маныр тэ̄н щё̄питэ̄г, концерт ва̄рнэ а̄гитн нё̄тэ̄г. Ты ма̄гыс я̄нас пӯмащипа тэ̄натэ̄н. Яныг хо̄тпатыл Константин Георгиевич Адин ос Галина Константиновна Алгадьева аквъе̄мт нё̄тнэ ёмас э̄ргыт э̄рге̄г. Константин Георгиевич потыртас, пе̄с ма̄хманэ̄ныл, ла̄ви, хӯлыглас: «Пе̄с о̄с аквтох са̄в хо̄тпа акванатхатнэ ма̄т, волк (та̄нкке̄ныл о̄лнэ) ма̄ньлат ма̄хум юртхо̄тпа та̄нкина̄нылн сунсыгласыт. Аквтох э̄ргысыт, йӣквсыт, ёнгысыт, ощхульласыт, акванрумалахтасыт. Тувыл акванминнэ ма̄хум акванминасыт. Тох о̄лнэ ва̄рмаль э̄лаль минас». Тӯя хо̄талыт ёт Ка̄сыӈ колн со̄т вос щалты, Ка̄сыӈ колта̄гыл ща̄гтым вос о̄лы. Ка̄сыӈ хо̄тпа пуста̄гыл вос о̄лы, Ка̄сыӈ ня̄врам со̄тыӈыг вос яныгми. Пӯмащипа ла̄тыӈ па̄влыӈ мирколувн ла̄ве̄в. Миркол кӯщай нэ̄в О. В. Баранова ня̄врамыт ма̄гыс мӯйлупса ёвтнэ олнломт майлалы. ЛПУ кӯщаигн С. Г. Подкатиловн ос А. Н. Ермоловн пӯмащипа ла̄ве̄в, ка̄сыӈ е̄мт тӯйт няртнэ ё̄рыл майла̄лаве̄в. Ты хосытыл ня̄врамыт ёнгын канувт лощтыг поргащлэ̄гыт, э̄п тӯйтыт ат сусыгтэ̄гыт. 1074 2014.04.18. Николай МЕРОВ Ня̄хщамво̄льт о̄лнэ во̄раян нэ̄. Мария Ильинична Рочева, а̄ги о̄парищ наме Монина, Ха̄льӯс район Ня̄хщамво̄ль па̄вылт о̄лы. Тав Усть-Манья па̄вылт самын патыс. То̄нт тот фельдшерский пункт рӯпитас. Та па̄вылныл ва̄т нупыл ат ве̄рыстат кит во̄рколыг ӯнлысыг. Мария тот ты яныгмас. Пе̄с порат та ма̄нь па̄вылт Мониныт кит ще̄мья во̄раясыт ос хӯл алыщласыт. Та во̄рпа̄выл Мониныт нам о̄ньщис. А̄ще наме Илья Николаевич Монин о̄лыс, акваг во̄раим ос хӯл алыщлым яласас. Тав 2007 та̄лт во̄рт хоттыпыс. Оматэ ос Анна Ивановна Монина. Э̄кваго̄йкаг ат ня̄врам янмалтасы̄г. Ань Мария Ильинична кит э̄щаге Лиза ос Соня Ня̄хщамво̄льт о̄лэ̄г. Акв каӈке а̄тимыг е̄мтыс, мо̄танэ ос Усть-Манья ляпат хотты ма̄т во̄р яктым рӯпиты. Та̄н колта̄гланыл 1986 та̄лт Ня̄хщамво̄льн ва̄нтлыс. Мария Ильинична тот хум ва̄рыс. О̄йкатэ Владимир Яковлевич Рочев саран хум, во̄раим рӯпитас. Ос ма̄щтыр хум матыра̄ти пуссын ва̄руӈкве ха̄сы. Ань пенсиян патыс кос ос во̄раян ма̄тэ̄н иӈ яланты. Та йис ма̄тэ такви нупылэ тох аты хансыстэ. Ос па̄влыӈ ма̄хум ва̄ганыл, по̄х хо̄тпат тув ат воратэ̄гыт. Са̄ртын а̄ще тот са̄лы о̄ньщис, са̄в та̄л пастухыг рӯпитас. Ётылнув са̄лыянэ ла̄щалла̄щал холасыт. Совхоз лаппантым юипа̄лт о̄йкатэ тот такви во̄раяӈкве патыс. Та ма̄ ёмщакв ва̄гтэ. Э̄кваго̄йкаг тэ̄нккетэ̄н о̄лэ̄г. Па̄вылн ёхтуме̄н порат Мария Ильинична о̄влэ̄т ня̄нь ва̄рнэ колт кӯщаиг рӯпитас. Тувыл та порат сокращение е̄мтыс, тав по̄хын ке̄твес. Та юипа̄лт школат мощ рӯпитас. Ос тот рӯпитаӈкве такви ат ка̄сащас, матахмат та̄л рӯпата ат о̄щнэ̄тэ ма̄гыс олныл ойтыглавес. Тувыл пенсиян патыс. Пуссын аквъёт нёловхуйпловкем та̄л рӯпитас. Ань о̄йкатэ̄нтыл аквъёт во̄руй алыщлым яласэ̄г. Таквсы порат хумитэ такке̄т во̄раи. Йильпи та̄л юипа̄лт ущ аквъёт минэ̄г. Владимир Яковлевич э̄кватэ ма̄гыс во̄вта ёса ва̄рыс. Ёса паттаге котыл хартсаге, аквъёт во̄рт ё̄мыгтэ̄г. То̄ванакт па̄вылн ёхтуӈкве ат а̄лыме̄г, я̄ та̄кыщ я̄ӈкыл лаппо̄ляве, ха̄пе̄н па̄г харттытэ̄н ос ла̄глыл па̄вылн та минэ̄г. Лё̄ӈхыт во̄рколт ӯщлахтэ̄г ос ща̄й ае̄г. То̄ванакт са̄в тӯйт паты ке, ёсал ё̄ме̄г. О̄лнэ ма̄тэ̄ныл о̄выл во̄ркол мус ва̄т нупыл ат ве̄рыста палыт лё̄ӈхе. Мо̄лты йильпи та̄л тэ̄н во̄рколт мӯйлысы̄г. Тот нёхыс ке̄рняль ӯнттым о̄ньще̄г. Ты коныпал во̄руй пувнэ ма̄гыс ня̄лит во̄ртэ̄г. Ань ты накт нёхыс со̄в тынэ ёмас са̄витыг но̄хнё̄твес. Таима̄гыс во̄раян ма̄хум ань таве алыщлаӈкве патсыт. Са̄выӈпа̄лэ лэ̄ӈын ос нёхыс ка̄тынпаттэ̄г. Ты сованэ о̄йкатэ договор щирыл Ха̄льӯс промхозн тыналыянэ. Мария Ильиничнан Ня̄хщамво̄ль па̄вылт о̄луӈкве сака мӯсты. Ос тамле та̄рвит ва̄рмаль о̄лы: колэ̄н 1969 та̄лт ӯнттувес, щар пе̄сыг е̄мтыс. Кол ёвтнэ субсидияолн винэ ма̄гыс нэ̄пакыт атсанэ кос, ос ань ты мус ӯрхаты. Ань та колэ̄нт ва̄т нупыл са̄тыт та̄л о̄лэ̄г. Кол ма̄гыс уртнэ олныт ат то̄вылхатэ̄гыт. Таима̄гыс очередь ворил ты э̄лаль лакви. Мо̄лты та̄л китыглахтас, кӯщаит ла̄всыт, олн иӈ а̄тим. Тувыл колэ̄н сака ма̄нь, акв колнакт о̄лэ̄г ос мо̄т колнакт тэ̄нут па̄йтэ̄г, тувыл та. Тамле колт мӯсхал щирыл о̄луӈкве ат ве̄рме̄г. Тэ̄лы порат тув мус та а̄щирмаӈ, колалатэ сака карс, кӯр па̄лтнэ порат ре̄ге пуссын но̄ӈхаль мины. Таима̄гыс колканэ сака ащирмаӈ. Тамле колт тох та о̄лантэ̄г. Кӯщаитн тувле тэ̄ла а̄тим. Ты ма̄щтыр нэ̄ па̄вылт ка̄сыӈ хо̄тпан ёмщакв ва̄ве. Ма̄хум таве̄н пӯркат, юн ё̄мыгтан ла̄гыл маснут, ня̄рат ос мо̄т са̄всыр маснутыт ю̄нтылтэ̄гыт. О̄йкатэ янытэ̄т такви ю̄нтум пормасыл мастыстэ. Сахи ос мольщаӈ нэ̄мхуньт ат ю̄нтыглас, ос а̄рталахтуӈкве тахнув кос ос нэ̄мхотьютн ат э̄ри. Ам ты мӯтраӈ, нёмса ос ма̄щтыр нэ̄ хо̄тпакве̄н пуста̄гыл о̄лнэ ла̄тыӈ ке̄тэ̄гум. Колта̄глэ ос рӯт ма̄хманэ са̄в та̄л пуста̄гыл э̄лаль вос о̄лэ̄гыт, о̄лупсаныл кӯпнитыг вос е̄мты. Та̄рвит ва̄рмаляны̄н мӯсхалыг щё̄питэ̄н. На̄й-О̄тыраны̄н вос ӯргалаве̄н. Пус ка̄т, пус ла̄гыл э̄лаль о̄лэ̄н! 1074 2014.04.18. Тамара МЕРОВА О̄лупсав наука нэ̄пакн хансаве. Мо̄лалнув ам Инна Шрёдер, Германия ма̄ныл ёхталам нэ̄, ёт хо̄нтхатыгласум. Тав округувн са̄в щёс ёхталам. Ань маныр тыт ва̄рыс, манхурип тэ̄лат пӯмщалы, ты о̄вылтыт ам таве китыгласлум. Инна ювле ла̄выс: – Ам Галле ӯс Макс Планка нампа институтт 2010 та̄лныл рӯпитэ̄гум. Институтт ма̄н ма̄ янытыл о̄лнэ са̄всыр мирыт о̄лупсаныл, пе̄с наканыл ханищтыянӯв ос тувыл диссертация щё̄питэ̄в. Рущ щирыл ла̄вуӈкве ке, ма̄н «этнологический исследование» ва̄ре̄в. Германият тамле акв кол туп рӯпиты, воссыг нэ̄мхот а̄тим. Тот Евразия янытэ̄т, Африкат о̄лнэ ма̄хум та̄н государстваныл тэ̄лат пуссын ханищтавет. Ма̄н, аквъёт рӯпитан хо̄тпат, Россия лӯима̄т о̄лнэ тэ̄лат ханищтэ̄в. Лӯима̄ нампа центрув лов арыгкем та̄л институтт рӯпиты. Культура колыт са̄всыр па̄влытт манос ӯсытт э̄ре̄гыт ман а̄ти, та̄н рӯпатаныл урыл, ма̄н ты тэ̄лат пуссын та̄рапаттысанӯв. Ма̄хум советский та̄лыт порат хумус ӯщлахтасыт, маныр ва̄рсыт ос ань хумле о̄лэ̄гыт, таитыл пӯмщалахтэ̄в. Ам туи порат на̄н округынт Ха̄льӯс ос Белоярский районыгт о̄лнэ соссаӈ ма̄ньлат хо̄тпат ӯщлахтын ва̄рмаляныл ханищтыянум. -Наӈ наӈки номтытыл ты рӯпата ва̄руӈкв патыслын манос хотьютын ла̄вве̄сын? – Ам са̄ртын лӯима̄т ма̄лтыпнуве̄г е̄мты ман а̄ти, таитыл пӯмщалахтуӈкве тахсум. На̄н округын ам о̄выл щёс 2006 та̄лт ёхталасум. То̄нт Белоярский районт «Парламент мировых народов» нампа форум Хуллор ханты ма̄нь па̄вылт ва̄рыглавес. Ам тув Германияныл о̄лнэ ма̄хум ёт рущ ла̄тӈыл немец ла̄тӈын толмащлан хо̄тпаг ялсум. Тувыл тот о̄лыглам тэ̄лат, лӯима̄ мирыт а̄нумн сака мӯстысыт. Тот ам ка̄саласум ос хӯнтамласум, са̄выӈпа̄лэ ма̄хум маныр ма̄гыс сыманыл ща̄рге̄гыт. Ханты ос ма̄ньщи ла̄тӈыг ос пе̄с накыт хот ты ёрувлавет, ма̄ньлат хо̄тпатын ань э̄лаль ат ке тотавет, хотталь та со̄йме̄гыт. Та па̄сыл ты номаясум, ам ты е̄рт о̄лнэ ма̄хум та̄н культураныл э̄лаль пӯмщалаӈкв тах патыянум. Тот сака пӯмыщ ос э̄рнэ ва̄рмалит урыл хантыт ос ма̄ньщит потыртасыт. Пе̄с наканыл хумле щирыл о̄лэ̄гыт, та̄наныл са̄в мирн суссылтаӈкве ро̄ви ман а̄ти, манос э̄лаль сытамыг о̄ньщуӈкве ос нас ва̄ӈкве э̄ре̄гыт. То̄нт туризм тэ̄лат о̄вылтыт о̄выл щёс потыртасыт. Ольга Александровна Кравченко ос Любовь Павловна Стаканова ёт тот ва̄йхатасум. Тэ̄н ётыл Германиян о̄с ялсы̄г, туризм палт са̄всыр тэ̄лат та̄рапаттысы̄г ос немец хо̄тпат лӯи ма̄н мӯйлуӈкве во̄всанэ̄н. Тэ̄н ётэ̄н ам ёмщакв юрщхатасум ос 2010 та̄лт Галле институтт аспиранткаг патнэм па̄сныл ка̄сыӈ та̄л «Ма̄нь ӯскве» этностойбищан ялантаӈкве патсум. – Манах та̄л тот о̄лэ̄гын? Ос маныр акваг пӯмщалэ̄гын? – Ма̄н мо̄т ма̄т матыр тэ̄ла ханищтэ̄в ке, ма̄навн тот кит та̄л рӯпитаӈкве э̄ри. Ма̄ янытыл о̄лнэ ма̄хум акваг ханищтыянӯв, тувыл ущ наука нэ̄пак хансуӈкве та̄ртаве̄в. Тувыл аспирант акв та̄л мо̄т хо̄н ма̄т ке о̄лы, тав та ла̄тыӈ сэ̄ръёрыг ханищтытэ, тот о̄лнэ о̄лупса ёмщакв торгамтытэ. Ам 2010 та̄лт акв э̄тпос арыгкем "Ма̄нь ӯсквет" рӯпитасум. 2011 та̄лт Саранпа̄вылт ат э̄тпос о̄лсум, та юипа̄лт хӯрум э̄тпосн о̄с ёхталасум. Ань кит э̄тпос сыс о̄с са̄всыр тэ̄лат урыл пӯмщалахтасум. А̄нумн тыг ёхталаӈкве пӯмащ, са̄в юрт хо̄нтсум. Ня̄врамыт ос ма̄ньлат хо̄тпат хумус туи порат ӯщлахтэ̄гыт, маныр ва̄ре̄гыт, маныр пӯмщалэ̄гыт, ты о̄вылтыт наука нэ̄пак тах щё̄питэ̄гум. – Наӈ ётын рӯпитан ма̄хманын хоталь ялантэ̄гыт ос маныр урыл нэ̄пак хансэ̄гыт? – Та̄н Сибирь ма̄т яласэ̄гыт, тот рӯпитэ̄гыт. Акв нэ̄ якут ма̄хум Ясах ялпыӈ хо̄таланыл о̄вылтыт хансыс. Мо̄т нэ̄ помор ма̄хум хӯл алыщлан наканыл ханищтас. То̄ват алтай ма̄хум палт ялантэ̄гыт, тот ялпыӈ ма̄наныл ханищтэ̄гыт. – Лӯима̄ ма̄хум пуссын шаманыг ла̄вавет ос язычество щирыл о̄лэ̄гыт. То̄ват тыитыл хурахлэ̄гыт манос со̄ви сунсэ̄гыт. Наӈ ты о̄вылтыт маныр номсэ̄гын? – Ма̄н "этнология" ханищтан щё̄сыт лӯима̄ ма̄хум хурит ка̄сала̄лсанӯв, о̄лупсаныл урыл кинат суссӯв, таи ма̄гыс ам тамле ва̄рмалит ва̄ганум. Этнология мӯсхалыг ханищтанэ̄м сыс торгамтасум, ма̄ янытыл са̄всыр мирыт та̄нки щиранылт пуссын о̄лэ̄гыт. То̄ват пе̄с щирыл э̄лаль о̄луӈкве номсэ̄гыт. Ам ты ва̄рмаль ханищтаӈкве таӈхилум, а̄нумн сака пӯмыщ. Германият ань са̄в хо̄тпа язычество ос неошаманизм ва̄рмалит о̄вылтыт потрыт ловиньтэ̄гыт. Тувыл та̄нки пе̄с культуранылт о̄щнэ са̄всыр пе̄с потрытыл, мо̄йтытыл пӯмщалахтуӈкве патсыт. Ань та̄наныл ёмщакв торгамтан ма̄гыс мо̄т мирыт пе̄с наканыл ханищтэ̄гыт. Тох немцыт Байкал тӯрн ос тот о̄лнэ соссаӈ ма̄хум палт яланта̄лэ̄гыт. Ка̄сыӈ хо̄тпа таквинатэ̄н э̄рнэ тэ̄ла ос номт хо̄нты. Инна потре ма̄гыс пӯмащипа ла̄тыӈ ла̄ве̄гум ос наука рӯпататэ молях вос а̄стлытэ. 1074 2014.04.18. Светлана РОМБАНДЕЕВА Ӯринэ̄ква янытлавес. Ты э̄тпос 12 хо̄талэ̄т Ханты-Мансийск ӯст «Ӯринэ̄ква хо̄тал» ва̄рыглавес. Йис та̄гыл ма̄ньщи ос ханты ма̄хум ӯринэ̄ква янытласыт. Тӯя̄г тав ёхтынэ̄тэ порат матыр а̄ныса̄н щё̄питасыт, ялпыӈ хо̄тал ва̄рыгласыт. «Ӯринэ̄ква хо̄тал» ма̄н округувт 2011 та̄л па̄сыл ва̄руӈкве патвес. Ты ялпыӈ хо̄тал кӯщаитн са̄ккон щирыл ва̄рвес, нэ̄пакын хасвес. Ань ка̄сыӈ та̄л яныгполь э̄тпос китыт субботатэт округт о̄лнэ мир вос мӯйлэ̄гыт. Ханты-Мансийск ӯст ма̄хум «Югорская долина» нампа гостиница по̄хат мӯйлысыт. Тот татем ёмас, сыстам во̄рыӈ ма̄кве. А̄ти сака яныг сцена ва̄рыглавес, ма̄хум тувыл ты выступайтасыт. О̄выл ла̄тыӈ губернатор ва̄ӈын хум Геннадий Бухтин тав ла̄выс: «Ӯринэ̄ква хо̄тал – ты ка̄сыӈ колта̄гыл ма̄гыс ялпыӈ хо̄тал. Йис та̄гыл ты хо̄талт ма̄ньщи ос ханты ма̄хум ща̄ньа̄щаныл ос ня̄враманыл янытласаныл. Ань ты ювле хультум та̄л сыс ма̄н ӯсувт соссаӈ ма̄хум халт са̄в ня̄врам самын патыс, та̄наныл ма̄н пуссын янытлыянӯв». Ты хум потыртаме юипа̄лт сценан ня̄врам самын паттум нэ̄тхумит ня̄враманыл ёт во̄вве̄сыт, пуссын янытлаве̄сыт, диплом нэ̄пакыл ос мӯйлупсатыл майве̄сыт. Ты та̄л сыс Ханты-Мансийск ӯст, насати, хо̄тхуйплов ма̄ньщи ос ханты ня̄врам самын патум. Округ кӯщай Наталья Комарова тув о̄с ёхталас, ла̄тыӈ ла̄выс, ма̄хум янытласанэ. Нэ̄пак хаснэ ханты э̄ква Мария Кузьминична Волдина э̄рыг э̄ргыс, апыгрище ханты йӣкв йӣквыс. Ты юипа̄лт мир мӯйлуӈкве та патыс. Концерт ва̄рыглавес, ма̄хум янгема̄не э̄ргысыт, йӣквсыт. Ня̄врамыт ос ма̄ньлат ма̄хум ма̄гыс са̄всыр ёнгилыт ва̄рыглаве̄сыт – халанылт пе̄рщисыт, са̄грап па̄хвтысыт, ё̄втыл ня̄л та̄ратасыт. Кит ё̄рнколыг тӯщталавесы̄г, ма̄хум тув щалтсасыт, ӯнлахо̄лсыт, хӯл исмитыл ос исум ща̄ил айтве̄сыт. Ма̄хум ёсал кассыт Аквта хо̄тал Иртыш я̄ тармыл ма̄хум ёсал кассыт. 1200 спортсменыт ё̄раныл а̄рталаӈкве тув ёхталасыт. Та̄н халанылт намыӈсуиӈ спортсменыт о̄лсыт – Евгений Дементьев, Александр Легков ос округув янытыл спорт ва̄рмаль Департаментыт кӯщаиг о̄лнэ хум Евгений Редькин. Ты коныпал тув соссаӈ ма̄хманув во̄виньта̄лымат. Сургутский район Русскинская па̄вылныл ханты ма̄хум ёхталасыт – э̄квато̄йкат, нэ̄тхумит ос ма̄ньлат пыгыт, пуссын та̄нти ма̄снутанылт масхатым о̄лсыт. Ё̄рнкол тӯщталасыт. Та̄нти халанылт ща̄нь ла̄тӈыл потыртэ̄гыт. Хум хо̄тпаныл ёсал кассыт. О̄выл места Леонид Конкин тав вис, китыт – Сергей Русскин, хӯрмиттыг ос Виталий Русскин тав ёхтыгпас. Но̄хпатум ма̄хум пуссын мӯйлупсатыл мӯйлуптаве̄сыт, янытлаве̄сыт. 1074 2014.04.18. Людмила ТЕТКИНА Пыть-Ях ӯст ялпыӈ хо̄тал о̄лыс. Ты э̄тпос 12 хо̄талэ̄т Пыть-Ях ӯст о̄лнэ мир «Ӯринэ̄ква хо̄тал» о̄с янытласыт. Ялпыӈ хо̄тал та ӯст о̄лнэ музей ва̄рыглы. Кӯщаиг Зоя Лазаревна Жавко тот рӯпиты. Такви тав хантыиг о̄лы, о̄парищ наме Каюкова. Тав а̄нумн ла̄выс: «Ӯринэ̄ква хо̄тал хӯрум та̄л ювле хультум порат окружной ялпыӈ хо̄талыг ва̄рвес. Та па̄сныл ма̄н ма̄хум тыг акванатыглыянӯв. Ӯсувт туп 67 ма̄ньщи ос ханты хо̄тпа о̄лы, та̄наныл о̄с пуссын тыг во̄виньта̄лыянӯв». Пыть-Ях ӯст рӯпитан музей ос Ханты-Мансийск ӯст о̄лнэ «Торум Маа» нампа музей хольт ва̄рвес. Ӯс по̄хат во̄рт соссаӈ ма̄хум о̄лнэ кол, со̄мьях, ня̄нь ва̄рнэ кӯр ос мо̄т во̄р коланыл ӯнттуве̄сыт. Тув ёхталан ма̄хум ма̄ньщит ос хантыт о̄лупсаныл, культураныл урыл потыртавет. Пыть-Ях ӯст «Ӯринэ̄ква хо̄тал» ма̄хум та̄нки щирыл янытлэ̄гыт. Ты э̄лыпа̄лт музейт рӯпитан хо̄тпат ка̄сыӈ организациян нэ̄пак ке̄тыгласыт, ма̄хум са̄всыр конкурсыт касуӈкве во̄выгласаныл. Ты та̄л нёлолов организация та̄нки ма̄хманыл тув касуӈкве ке̄тыгласаныл. Пӯльницат, садикыт, ӯс мирколт, ма̄во̄й но̄хвинэ ос мо̄т ма̄тт рӯпитан ма̄хум са̄лы сун ӯлтта поргысыт, тынщаӈ па̄хвтысыт ос хотьют моляхнув ха̄йтыгты, тох о̄с кассыт. Жюрихо̄тпат та̄н халаныл щар ма̄к ё̄р хо̄тпа пе̄риясыт. Ялпыӈ хо̄тал о̄вылтахтаме порат Инна Петровна Тарасова, Пыть-Ях ӯс кӯщай нэ̄, ос Радика Ивановна Стадлер, ӯс миркол кӯщай нэ̄, ма̄хум янытласанэ̄н. Ос ты юипа̄лт Владимир Шесталов са̄ӈквылтапыл са̄ӈквылтас, тувыл а̄ще Юван Шесталов хансум стихотворениятэ э̄ргыг ва̄рме, о̄с э̄ргыстэ. Ты коныпал воссыг нэ̄мхотьют аты э̄ргыс, аты йӣквыс. Ты урыл Зоя Лазаревна ла̄выс: «Пыть-Ях ӯс миркол кӯщаянувн ла̄ввесӯв, соссаӈ ма̄хум э̄рганын, йӣкванын ӯсыӈ мир хӯнтлаӈкве ат патэ̄гыт, ма̄н туп аквкит э̄рыг манос йӣкв вос щё̄питэ̄в, тыил са̄внув ат э̄ри. Ос ялпыӈ хо̄талын са̄в ма̄хум вос ёхталы, пӯмащ касыл вос ва̄ре̄в. Тыи ма̄гсыл то̄ва ма̄хманув «Ӯринэ̄ква хо̄тал» рущ ла̄тӈыл «День здоровья» тох ла̄вияныл. Ам ка̄сыӈ та̄л Ханты-Мансийск ӯсн манос мо̄т ма̄н ялуӈкве такос кусэ̄гум, кӯщаитн ат та̄ртавем. Ӯринэ̄ква хо̄тал мо̄т ма̄т хумус янытлаве, сунсуӈкве таӈхе̄гум. Тувыл ма̄нки ты ялпыӈ хо̄тал мӯсхалыг ва̄рнувлӯв». Ты та̄л та ӯст ма̄ньщи ос ханты нила ня̄врам самын патыс. Та̄н ялпыӈ хо̄тал о̄лум порат туп наманыл ла̄вве̄сыт ос оманыла̄тяныл сценан аты во̄виньта̄лве̄сыт, аты янытлаве̄сыт. Ам ты ва̄рмаль урыл Зоя Лазаревна китыгласлум, тав ювле ла̄выс: «Ты э̄лыпа̄лт ма̄ньщи, ханты ня̄врам янытлалсанӯв ос мӯйлупсал майла̄лсанӯв. Ань та̄л сыс самын патум ня̄врамыт ща̄няныла̄щаныл олныл ойтавет, тыи ма̄гсыл сценан ат во̄выгласанув». 1074 2014.04.18. Валентина УЗЕЛЬ Йӣквуӈкв о̄с ха̄суӈкв э̄ри. Ма̄н, округувт о̄лнэ соссаӈ ма̄хум, пуссын пе̄с ма̄хманув хольт о̄луӈкв воратэ̄в. Ос нэ̄квет, а̄гирищит халт са̄выӈпа̄лэ ма̄н пуссын йӣквуӈкв ат ха̄сэ̄в. «Кӯринька», «Пил ва̄тнэ а̄гит» ос мо̄т йӣквыт ат ва̄ганӯв. Ханты-Мансийск ӯст «Культура» нампа творческий объединение кол рӯпиты, тот рӯпитан ма̄хум ос ма̄ньлат хо̄тпат организация та̄н тамле йильпи ва̄рмаль ва̄рыгласыт – округувт о̄лнэ ос са̄всыр ма̄тт рӯпитан нэ̄квет ос ма̄ньнув а̄гит акванатыгласаныл ос та̄наныл йӣквуӈкв ханищтасаныл. Ты э̄тпост о̄выл щёс тамле ханищтап ва̄рыглавес. Ха̄льӯс, Белоярский, Сургутский, Ханты-Мансийский районытныл ос Сургут ӯсныл ма̄хум ёхталасыт. Ха̄льӯс районувныл туп Тэ̄к па̄вылныл ханты нэ̄квет тыт о̄лсыт. Ма̄ньщи ма̄хумныл аман матрыг туп Сургут ӯсныл акв ма̄ньщи а̄ги Людмила Мелентьева тыг во̄выглавес, тувыл та. Воссыг нэ̄мхотьют тыг ат ёхталас. Та̄нанылн лӯима̄ мирыт йӣкваныл урыл акв учёный о̄йка Вячеслав Николаевич Нилов потыртас. Тав Москва ӯсныл ёхталас, наукат ань яныг нам о̄ньщи. О̄йка Россият о̄лнэ мощщаг хультум мирыт йӣкваныл хусахтем та̄л ханищты. Тав та урыл потыртас, ань йӣквнэ ос э̄ргын коллективыт маснутаныл са̄всыр щирыл ю̄нтыяныл, соссаӈ мир йӣкваныл о̄с сака мори йӣквияныл. Тох щар ат кос ро̄ви. О̄влэ̄т ма̄к ма̄ньщи ман ханты йӣквыт ханищтаӈкв э̄ре̄гыт. Яныг хо̄тпат та̄н хумус йӣкве̄гыт, ёмащакв сунсуӈкв э̄ри, тувыл ущ мо̄т ма̄хум ханищтаӈкв. Ма̄ньщи ман ханты йӣквыт йӣквуӈкв та̄рвитыӈ кос а̄ти, ос ма̄к э̄ргыт, йӣквыт, пе̄с потрыт ос мо̄йтыт хосыт пе̄с йис о̄лупса э̄лаль ты тотаве. Таима̄гыс хотты по̄х хо̄тпа ня̄врамыт ма̄н йӣкванувн ханищтаӈкв те о̄вылтахты, ты ёмас хунь. Ня̄врамыт сыресат щирыл ханищтавет, лю̄льсаӈ ю̄нтым маснутыл маставет ос концертыт та суссылтавет. Мо̄т мирыт та номсэ̄гыт, ма̄ньщит ос хантыт тох та йӣкве̄гыт. Соссаӈ нэ̄ хо̄тпат «Кӯринька» ман мо̄т йӣкв йӣквнэ̄ныл порат ка̄таныл, ла̄гланыл татем ёмащакв хӯтсэ̄гыт, э̄рнэ щирыл ос нё̄тнэ̄г тотыглыяныл. Татем ма̄щтырыг ё̄ӈхатахтыглэ̄гыт, щар сома лув ат о̄ньще̄гыт, нё̄выль ат о̄ньще̄гыт. Ань ты семинарт ма̄хум хӯрум хо̄тал ханищтаве̄сыт, йӣквнэ ма̄гыс манхурип маснут ю̄нтуӈкв э̄ри, йӣкванув мирн хумус суссылтаӈкв. Та̄н Фаина Павловна Иштимирован йӣквуӈкв ханищтаве̄сыт, Татьяна Александровна Молданова ос маснут урыл та̄нанылн потыртас, ос манхурип маснут ю̄нтуӈкв ат ро̄ви, са̄всыр хури суссылтас. Пыгыт хум йӣквыт йӣквуӈкв Игорь Магарамовын ханищтаве̄сыт. Тав йӣквыт ёмащакв йӣквиянэ, «Са̄лы лё̄ӈх» театрыт са̄в та̄л ёнгыс. Юио̄выл хӯрмит хо̄талт тыг ёхталам ма̄хум йӣквуӈкв хумус ха̄сэ̄гыт, та суссылтасыт. Са̄ӈквылтан та̄н туп сумыллас, яты, ма̄хманув та йӣквалтахтасыт. Со̄ль, то̄ват татем ёмащакв ханищтахтамыт. Ма̄ньщи а̄гиюв Людмила Мелентьева та̄н ётаныл о̄с йӣквыс. Тамле ты ёмас ханищтап ӯсувт ва̄рыглавес. Ма̄ньщи йӣкванув ма̄н ма̄нти пуссын йӣквуӈкв те патыянӯв, сака ёмас о̄лнув. 1074 2014.04.18. Тамара МЕРОВА Хорамыӈ маснутаныл э̄лыл ка̄салавет. Русскинская па̄вылт акв со̄тыра 870 э̄лумхо̄лас о̄лы, та̄н халанылт 986 э̄лумхо̄лас – хантыт ос ё̄рныт. То̄ваныл во̄рыӈ ма̄т акваг о̄лэ̄гыт ос па̄вылн ва̄тихал ёхталэ̄гыт. Ты соссаӈ ма̄хум хорамыӈ маснутыл масхатэ̄гыт, таи ма̄гыс та̄н э̄лныл на̄ӈке̄гыт. Ань са̄лыл яласан, во̄раян ос хӯл алыщлан хо̄тпат ялпыӈ хо̄таланыл порат нэ̄ хо̄тпат ма̄гыс «Йыс сохит варэм варэт» касыл ва̄рыглавес. Ма̄ньщи ла̄тӈыг ке толмащлаӈкве, «Йис та̄гыл ва̄рнэ пормасыт» нампа касыл. Тот нё̄лоловхуйплов нэ̄ хо̄тпа та̄нки ю̄нтум маснутаныл ос пормасаныл мо̄т ма̄хум э̄лыпа̄лт суссылтасаныл. Ос са̄лы совныл манос нуйныл манхурип хансал, манаса̄вит хо̄тал сыс ю̄нтсаныл, таи потыртасыт. Ка̄сыӈ нэ̄ такви щире̄тыл маснутанэ хорамтыянэ. То̄ва нэ̄ хо̄тпат сахил масхатасыт, мо̄таныт нуй сахи о̄щсыт. Нуй сахияныл пуссын са̄всыр оспа нуитныл ю̄нтыяныл ос сакыл сыресыр хансал хорамтыяныл. Ня̄враманыл мольщаӈыл, а̄гирищаквет ос сахил мастысаныл. Хум хо̄тпат ня̄раныл са̄всыр хорамыт о̄ньще̄гыт. То̄ват ня̄раныл янытэ̄т хансал ю̄нтым о̄лэ̄гыт. Ня̄врам маснутыт пе̄рна, хо̄тал хурип ман мо̄тсыр хури хансал ва̄римат. Жюрит о̄лум ма̄хум: Р. Ф Марценковский, Л. М. Косько, Е. П. Пинчук, В. Т. Шадрина, С. Н. Калинченко, В. Кочева хӯрум номинация щирыл но̄хпатнэ ма̄хум пе̄риясыт. Тох «Традиционное искусство» номинацият та̄н пе̄с ма̄хум маснутаныл ю̄нтнэ нак ос ма̄щтыр тэ̄ланыл суссыт. Ма̄к ма̄щтыр нэ̄г тот Раиса Ивановна Тэвлина ла̄ввес, тувыл Людмила Дмитриевна Покачева ос Алина Олеговна Тэвлина. «Авторское искусство» номинацият йильпи хурил ю̄нтым маснутыт ос ма̄щтырлан накыт та̄рапаттуве̄сыт. Тот Светлана Викторовна Мултанова, Антонина Дмитриевна Тэвлина янытлавесы̄г. Ос «Декоративноприкладной искусство» номинацият Тамара Мултанова, Раиса Тэвлина, Фёкла Бондаренко, Людмила Сопочина, Наталья Покачева хорамыӈ пормасаныл ма̄гыс э̄сгуве̄сыт. Нэ̄т пуссын мӯйлупсал майве̄сыт. Ялпыӈ хо̄талт соссаӈ ма̄хум пуссын та̄нки маснутанылт масхатым о̄лсыт. Мо̄т хо̄тпат та̄наныл пӯмщаласаныл, по̄слахтын ма̄гыс акваг ляпан во̄выгласаныл. 1075 2014.05.09. Тамара МЕРОВА Рӯтанув урыл номуӈкв э̄ри. Мо̄лалнув Октябрьский район Талинка па̄вылныл ма̄н газетавн Татьяна Никифоровна Непкина пищма ке̄тыс. Ань мо̄рсыӈ хо̄тпа ща̄нь ла̄тӈыл матыр ла̄ви, янгыщ рущ ла̄тӈыл потыртэ̄в. Э̄ква потре ма̄ньщи ла̄тӈыл хансыстэ, на̄н ань таве ловиньтэлы̄н: «Миннэ са̄лы хуриӈ нёл Ха̄йтнэ са̄лы хуриӈ нёл Октябрьский район Лӯи о̄влэ̄т кит па̄выл о̄лы: Лӯи Нярихумит ос Алы Нярихумит. Алы Нярихумит карыс сумат ӯнлы. Па̄выл ляпат карыс, осыӈ ӯльпат ос хо̄втыт яныгме̄гыт. Та̄н, э̄рыӈ, ма̄ ӯнтум па̄сыл яныгме̄гыт, па̄влыӈ ма̄хмытн ат са̄гравет. Э̄лыл ёхтум о̄йка Ремер тот кол ӯнттыс, тувыл ӯльпат савыӈкант ӯльювыг са̄груӈкве пирмайтахта̄лыс. Па̄влыӈ ма̄хманэ̄н та̄рапаттувес, кӯщаитын са̄груӈкве ёлпо̄илттавес. Ань кол иӈтаг пӯсасэ па̄ртыл щар лапра̄тыстэ. Маныр йӣвыл колэ па̄лтыглытэ, ат келы. Во̄рт са̄в ӯльпа яныгми, ма̄хум па̄кв атэ̄гыт, са̄всыр пил тэ̄лы. Па̄выл э̄лыпа̄лт посалыт ове̄гыт, са̄в тӯр, со̄юмыт, ма̄нь посалыт о̄лэ̄гыт. Ма̄хум хӯл алыщлэ̄гыт. Тамле щуниӈ, нё̄тнэ ма̄т Егор Алексеевич Яркин самын патыс, тот яныгмас ос о̄лыс. А̄ще Алексей Данилович Яркин 1941 та̄лт армиян тотвес. Та̄н хӯрум пыгрищ Егор, Володя ос Петя а̄ӈканыл ёт хультсыт. Екур кӯщаиг хультыс, тав то̄нт хо̄т та̄лэ о̄лыс. Ме̄н тав ётэ ма̄ньта̄гыл аквъёт яныгмасме̄н. Коланме̄н акв по̄хат ӯнлысы̄г. А̄щагме̄н ягпыгыӈыщ о̄лсы̄г. Ам а̄щум о̄с фронтын тотвес. Ме̄н Екур ёт туи а̄ращ па̄лтуӈкве йӣв тагыт ос а̄щагме̄н тотум осыӈ норыт, йӣвыт тэ̄лы кастыл юв а̄лумтыме̄н. Тэ̄лы кастыл мис тыттуӈкве ос куращ ва̄рнэ ма̄гыс нёрщи таг ос ха̄ль таг сакватасме̄н. Тӯя̄г по̄льщаӈщи лэ̄сыл алыщласме̄н. Мощ яныгнуве̄г е̄мтсуме̄н, а̄щагме̄н хӯлпанэ̄н ӯнттысме̄н, ма̄нкинавн тэ̄нэ хӯл алыме̄н. Ур хосыт ха̄йтыгтыме̄н, ва̄с муӈи атыме̄н. А̄лпыл тэ̄нутыӈ та̄гыл юв ёхтыме̄н, рӯтанме̄н хотща̄гтэ̄гыт. Тащирыл та о̄лсӯв. Война оигпаме юипа̄лт Екур а̄ще Алексей Данилович юв ёхтыс. Аквкит хо̄тал юн о̄лыс ос Аренинан на̄тылтаӈкве ке̄твес. Екур пыге сыступыл товнэ ма̄гсыл ёт вистэ. Ос таквсы па̄лаг Алексей аким ня̄врамыт толгуӈкве атсанэ. Нилахкем тув тав ётэ толгысӯв, тыи Егор Яркин, Миша Собянин, Женя Яркина (Нестерова), Лена Яркина, Варвара Лыскова (Плесовских) ос ам, Татьяна Яркина (Непкина). Акв щёс тамле ва̄рмаль о̄лыс. Алексей акимн ялпыӈ канн толыг ре̄пыгтаӈкве тотвесӯв. Ме̄н Варяме̄нтыл ат тахсуме̄н кос, ме̄наме̄н тав хӯнтлуӈкве хунь патыс. Толыг ре̄пыгтасӯв, Алексей аким ос Авдотья аквум по̄сумт. Ме̄н товсуме̄н, Екур толыг па̄хвтыс. Па̄г пӯхтысӯв, ме̄н Варя ёт па̄г ат ква̄лсуме̄н, ха̄пнёлын хуясме̄н. Та̄н тыкос хартсытхартсыт, толганыл нэ̄мхотталь ат ла̄кви. Ме̄н нупыламе̄н ро̄ӈхе̄гыт: «Ха̄пныл сакати, хартэ̄на! » Ме̄н ха̄пныл хартуӈкве патсуме̄н, толгув щар нэ̄мхотталь ат ла̄квсы. Тувыл ювле со̄хтыслӯв, щар рав маныгтаслӯв ос но̄х та тагатаслӯв. Тувыл ма̄н ханищтахтуӈкве минасӯв. Екур то̄нт Миша Собянин ёт Тобольск ӯсн рыбтехникумын минасы̄г. Женя ос Варя Ханты-Мансийскт медучилищан, ме̄н Лена ёт педучилищан ханищтахтуӈкве минасӯв. Ос ка̄сыӈ тув ма̄н Екатерина Ивановна Шадрина, ам, Екур а̄ще ёт А̄ст хӯлпыл на̄тылтасӯв. Мо̄т ня̄врамыт пумкант рӯпитасыт. Колхозт яныг хо̄тпа мощща о̄лыс, таима̄гыс ка̄сыӈ тув ня̄врамыт нё̄тсыт. Екур Тобольский рыбтехникум а̄стламе юипа̄лт са̄в та̄л рыбакыг рӯпитас. Ты коныпал совхозт са̄всыр рӯпата ва̄рыс. Пенсиян миннэ̄тэ э̄лыпа̄лт лесникыг рӯпитас, рӯпатта̄л щар ат о̄лыс. Алы Нярихумит матнэ̄тэ мус тохиӈ тот о̄лыс. Та па̄вылт электричество а̄тим, газ а̄тим. Ань улюв тотуӈкве ат ве̄рми. Ӯст а̄гитэ па̄лт о̄луӈкве ат таӈхи, аквписыг юв вораты. Тав ла̄выс: «Ам ма̄нь та̄гыл рӯпитасум, а̄нумн ёмас о̄лнэ кол э̄ри. Ма̄ньнув ма̄хум, э̄лыл ёхтум ма̄хум колыл мивет, ам ма̄нь та̄гыл война порат, война оигпаме юипа̄лт матнэм мус рӯпитасум. Таима̄гыс Луи Нярихумит па̄вылт акв колнакыӈ колыл вос минувем. Ма̄н совхозув ётыл та па̄вылн тотвес». Егор Алексеевич Кевавнёл па̄вылт пе̄с колыл майлувес, тав тот щар ат о̄лыс. Ла̄внэ̄тэ, мо̄т хо̄тпан та кол вос миве, таве̄н Луи па̄вылт кол э̄ри, тот о̄лнув. Ань а̄гитэ палт Ханты-Мансийскан ва̄нтлыс. Ма̄н е̄рувт акв матумпа̄ла соссаӈ хо̄тпа туп тав хультыс, ань сысы минас. Ам таве̄н паща ла̄тыӈ ке̄тэ̄гум, пус ка̄т, пус ла̄гыл, На̄й-О̄тыранэ̄н вос ӯргалаве! » Ма̄н, редакцият рӯпитан хо̄тпат, Татьяна Никифоровнан потре ма̄гыс яныг пӯмащипа ла̄тыӈ ке̄тэ̄в, пуста̄гыл са̄в та̄л вос о̄лы! 1075 2014.05.09. Слинкина Т. Д. Хо̄нтлын накт порсум ма̄ньщи ма̄хманув. Янгыщ 1941 та̄лт таквсы, хунь Ленинград немцытын мовылтаӈкв патвес. 1942-1943 та̄лытт ущпылнэ̄г са̄в хум ма̄хум та хо̄нтлын ма̄т порсысыт. То̄ва хум похоронкатэ рӯтанэ палт ёхталас, та̄н сакати ва̄гыт, хо̄т патыс, хо̄т ёлщё̄питавес. Ам интернетыт тисхатымам акв нэ̄пакыт «Книга памяти. Тюменская обл. Т. 3» 53 ло̄псыт хӯрум хум наманыл хо̄нтсанум, насати рӯтаныл ань тыг мус та̄н уранылт нэ̄матыр ат ва̄мыт. Войнан тотыманыл юипа̄лт пищма ат пыл ёхталас, похоронка о̄с а̄тим о̄лыс. Ня̄хщамво̄ль па̄вылт о̄лнэ хум Самбиндалов Сергей Петрович тит ляпа рӯтаге, о̄патэ Самбиндалов Кирилл Николаевич ос тав пыгтēтэ Самбиндалов Иван Кириллович (Сергей Петрович сасге) хомос тотвесы̄г военкоматын, воссыг суēн а̄тим о̄лыс. Насати Самбиндалов Кирилл Николаевич сакватым нюлмиянэ та̄рвитыӈыт о̄лмыт, таиянэ̄т 11.08.1944 та̄лт хотталь щалтум, Ленинградский областьт тот ёлщё̄питыма. Ос пыгтēтэ Самбиндалов Иван Кириллович Германият 17. 01.1945 та̄лт порсум. Хунь Сергей Петровичин тэ̄н урēнтыл телефон хосыт ла̄всум, тав маттем та тыстым ща̄ргыс порсум титгаге ма̄гыс. Тамле савыӈ ла̄тыӈ хӯлуӈкв сым тарум ёмас хунь. Ань тай сакати та̄н рӯт ма̄хманыл ва̄ганыл, хо̄т я̄тил о̄патēныл ос сасганыл ёлщё̄питавесы̄г. О̄с войнат порсум хӯрмит ма̄ньщи хумкве о̄с акв та нэ̄пакыт хо̄нтыслум, 34 ло̄псыт наме хансым о̄лы. Ты Качанов Никифор Николаевич, Ха̄ӈла па̄выл хум. О̄парищ наме со̄ви хансыма – Кочанов. Таима̄гыс тисхатнэ порат такви о̄парищ намēт ма̄хманэ̄н ат хо̄нтаве. Тав о̄с ань тыг мус рӯтанэ̄н ат ва̄йвес, хо̄т порсыс. Та̄н Ха̄ӈланыл хӯрум Качанов ягпыг добровольцыг войнан минасыт: Качанов Ефим Николаевич (1905), Качанов Никифор Николаевич (1913), Качанов Илья Николаевич (1921). Юв туп Ефим Николаевич лылыӈ та̄гыл ёхталас. А̄ги апыгтēтэ, Хозяинова Анастасия Анатольевна, хансы, яныг ащо̄йкатэ 1941 та̄лт о̄йттур э̄тпост войнан тотвес, «602 сд» дивизият лусытам. Победа ёхтум порат тав Прага ӯст о̄лум. 1943 та̄лт тит щёс саквата̄лыма: тӯяг ла̄глэ хо̄им, туи ос пуӈкēт осколокын хо̄иглым, таин акв самтēтэ хот сакватым, ос акв осколок ло̄мт тохиӈ пуӈкēт пыл хультум. Пусмуме юипа̄лт э̄лаль хо̄нтлын ма̄н минас. «За оборону Ленинграда» ме̄талил майлувес. Мо̄т ме̄тале «За отвагу» ётыл 1948 та̄лт ущ тавēн майвес. Войнаныл 27 числат лӯпта э̄тпост 1945 та̄лт юв та̄ртвес. Никифор ос Илья ягпыгаге 1942 та̄лт, хунь тэ̄н ущты войнан тотвесы̄г, Ленинград ӯс ляпат хо̄нтыгламаге. Юил йим ма̄ньщи маснутанылт, тэ̄нут та̄л савалым мо̄т са̄всыр ма̄хманувт аквъёт тотымат. Ётыл Илья Николаевич лусытам «ОСБр» нампа дивизият Калининский область, Ржевский район, Анеево па̄вылт 11.12.1942 та̄лт порсум. Никифор Николаевич «85 стрелковый дивизият» лусытам, 2. 09.1942 та̄лт порслыма. Хо̄т ёлщё̄питавес, та нэ̄пакын ат хансыма. Никифор Николаевич э̄кватēтэ Качанова (Шешкина) Мария Семёновна тактēтэ нила а̄гитēнэ (Пелагея, Римма, Клава, Дина) та янмалтасанэ. Ты Качанов ягпыгаквет урыл Ефим Николаевич а̄гитēтэ Качанова Елена Ефимовна а̄нумн потырта̄лыс, тав Саранпа̄вылт о̄лы. Та̄н ляпа рӯтаныл Качанов Дмитрий Петрович (1900) Никифор Николаевич ёт о̄с акв та «85 стрелковый дивизият» лусытас. Тав о̄с порсыс, Ленингадский область Колпино ӯст ёлщё̄питыма. Тав яныг пыгтēтэ Качанов Дмитрий Дмитриевич о̄с порсыс. Нэ̄пак юв ёхталам, тот «пропал без вести» хансым о̄лыс. Ётыл 1970 та̄лт ёлщё̄питым ма̄тэ братский могилат пионерытн хо̄нтыма, о̄с Ленинградский областьт порсум. Адресэ письмат о̄лум кос, ётыл хоттыпум. Э̄ще палт Качанова (Солянова) Матрёна Дмитриевнан ос а̄пщитэ палт, Качанов Митрофан Дмитриевичин, мēталянэ юв тēтсымат. Туп та пионерыт хосыт порсум ма̄тэ та̄нанылн та̄рапатыглас. Тав урēт а̄нум Качанова (Солянова) Матрёна Дмитриевна а̄гиягепыгаге потырта̄лсы̄г: Лидия Алексеевна Терентьева (Восыӈтӯр па̄вылт о̄лы), ос Солянов Николай Алексеевич (Ло̄пмус па̄вылт о̄лы). Качанова Матрёна Дмитриевна ос Митрофан Дмитриевич а̄тятэ̄н Дмитрий Петрович хо̄нтлын ма̄т порсыс, оматēтэ̄н Качанова (Хозумова) Татьяна Ивановна, Ха̄ӈла па̄вылт 1942 та̄лт порсыс. Ня̄врамыг савалапыг хультсы̄г. Рӯтанэ̄н ё̄рыл хотмос савалым тэ̄та̄л та̄рвит порат та яныгмасы̄г. Качанов Ефим Николаевич акитэ̄н войнаныл юв ёхтуме юипа̄лт ня̄врамыг тав колэ̄т о̄лсы̄г. Ётыл тэ̄нти щēмъянэ̄нт сас са̄в ня̄врам янмалта̄лсы̄г. Аквта хо̄нтлым порат Хо̄сло̄х па̄вылт хӯрум ня̄врам о̄с савалапыг хультсыт. Ты Ромбандеев Иван Петрович (1917) ос Ромбандеева (Хозумова) Акулина Викторовна тэ̄н ня̄враманэ̄н: Хозумова Зоя Ивановна, Хозумов Василий Иванович, Хозумова Елена Ивановна. А̄тяныл Иван Петрович 9. 12.1942 та̄лт порсыс Ленинградский областьт, тот ёлщё̄питыма. Ос оманыл 18. 08.1943 та̄лт щаквыт порсыс. Та̄н хӯл алнэ бригаданыл са̄витэт хӯрум нэ̄, ос нилыттыг ма̄нь нилахуйплов та̄л яныт а̄гикве о̄лыс, Ромбандеева Матрёна Ивановна (тав школат ханищтахтас). Сака няӈра щахыл во̄т капай та хо̄талт во̄тыс. Та̄н толгуӈкв ат кос миннувыт тамле пилыщмаӈ турапыт. Председателиг саран Ла̄ска о̄йка о̄лыс, тав та̄наныл по̄йкуманэ толгуӈкв ялуӈкв. Война порат ка̄сыӈ хо̄тал э̄рыс план ва̄руӈкв, а̄тиӈк сутытавет. Тувыл по̄рал нэ̄гим ма̄нь ха̄пыгтыл толыг рēпыгтаманылт ха̄паныл а̄хвтас нёлт яныг хумпын та̄лыма. Акулина Викторовна ха̄пныл кональ патыс, ма̄нь а̄гикве Ромбандеева Матрёна Ивановна уюӈкв ха̄сыс, улпыл тавēн нё̄туӈкв витн порыгмам. Сас та порсысыг, ё̄ртенэ̄н ат ёхтысы̄г тамле пилыщмаӈ во̄т хумпыт ёт. Ха̄пыт ӯнлум тит самва̄гта̄л э̄кваг туп хультсы̄г, тай лылыянэ̄н нэ̄глысы̄г. Акулина Викторовна савалапыг хультум хӯрум ня̄враме яга̄гиянэ̄н та янмалтавēсыт. Матрёна Ивановна оматэ пити патта ма̄нь а̄ги о̄лыс. Тав оматэ, Ромбандеева Мария Дмитриевна, ам ане̄квам. О̄йкатэ, ам ащо̄йкам, Ромбандеев Иван Петрович (Мувыӈкēс Ва̄нька о̄йка) репрессия порат наска̄ссыг порславес. Мощ мо̄лалнув ам войнат ēмтум акв нак о̄с хассум. Мувыӈкēс хум, (наме тыг ат хансыслум ма̄хманэ сым ща̄рыг ма̄гыс) на̄иӈтӯйтыл хо̄нтлын ма̄н миныманыл хотты ма̄т станцият хохса хартнэ са̄р ёвтуӈкв ха̄йтум. Та кӯмт на̄иӈтӯйтэ нёвумтам ос минам, тав станцият та хультум. Таи ма̄гыс тав военный трибуналн сутытыма, эрттам тав дезертир, нас ояс. Тав ётэ юв хультум ат хо̄тпа о̄с сутытаве̄сыт. Таяныт щёхлаӈ та о̄лыс. Тав то̄нт ма̄ньщиянув хотыл рущ ла̄тыӈ ва̄сыт? ! Маныр команда ла̄ваве, та̄н хомос торгамтыяныл? Война о̄вылтахтам порат торыӈ писаль, торыӈ э̄рнэ са̄вит патрон а̄тим о̄лыс, щар нас алнэ ма̄гыс ма̄хумтēнув та тотвēсыт аквпис хо̄тал кастыл. Ётыл ущ автоматытыл, та̄нкытыл, пулемётытыл са̄лтатанув майвēсыт. На̄н Ханты-Мансийск ӯст «Парк Победы» ва̄рим а̄хвтас парт тармыл порсум ма̄хум намыт хансым халт хотты ма̄ньщи о̄парищ нам хо̄нтыгласына? Тит нам хансым кос о̄лэ̄г, ос татем мори хансымаг – хо̄ӈхаг аты торгамтахтэ̄г. Ам та намыг интернет хосыт «Мемориал» архивыт ат пыл хо̄нтсагум. Тувыл ма̄ньщи газетат рӯпитан нэ̄ Светлана Ромбандеева а̄нумн хӯлтсаге, наманэ̄н ущта торгамтасагум. Акватэ Ромнадеев И. П. , ты насати Ромбандеев Иван Петрович (нумыннув тав урēт ты хассум). Мо̄танэ ос Ромбанцев Л. А. , ты Хорыӈпа̄выл хум Ромбандеев Леонид Александрович (1906) наме тох со̄ви хансыма, тав 7. 03.1943 та̄лт аквта Ленинградский областьт порсыс. Ты Хозумов Николай Иванович оматэ ягпыг о̄лыс. Хо̄сло̄х па̄вылныл о̄с хӯрум ягпыг хо̄нтлуӈкв войлаве̄сыт. Ты Лончаков Георгий Дмитриевич (1919), Лончаков Василий Дмитриевич, Лончаков Пётр Дмитриевич. А̄тяныл Лончаков Дмитрий Иванович (1897) репрессия порат 21. 01.1938 та̄лт порславес. Георгий Дмитриевич юн Ёхорыг намтым о̄лыс. Войнан 1942 та̄лт войвес. Оматэ палт нэ̄пак ёхталас, тот хансым «Пропал без вести 29 марта 1943 г. в Смоленской обл». Хосанув о̄лманыл юипа̄лт Георгий Дмитриевич ма̄хманэ̄н пищма тēтсыс. Насати, тав плент о̄лум, та юипа̄лт Белоруссият лагерьт о̄ньщима. Оматэ̄ныл тэ̄нут во̄вум посылкал, хансум, рӯпитэ̄гыт кос, ос щар тэ̄та̄л о̄ньщавет, ка̄сыӈ хо̄тал са̄в ма̄хум тэ̄та̄л сорум патэ̄гыт. Та пищматэ юипа̄лт такос оматэ̄н ӯрвес, нэ̄матыр суе воссыг а̄тим о̄лыс. Мо̄т пыге Лончаков Василий Дмитриевич (1928) Кавказыт трудармият лусытам. Хо̄нтлын ма̄ныл юв йийиматэ Самарово (Ханты-Мансийск) мус ёхталам, Ендырев Василий тав ётэ ва̄йхатам. Тӯя я̄ӈк Иртышт то̄нт кӯлатам тēмыг ēмтум, Василий Дмитриевич ла̄глыл юв минмыгтам. Та юипа̄лт аты хо̄нтыглавес, юв ат пыл ёхталас. Хӯрмит ягпыганыл Лончаков Петр Дмитриевич тай хо̄нтлын ма̄ныл юв ёхталас. А̄тимыг ēмтме мус саквата̄лым нюлмиянэ̄т та савалас. Э̄кватэ̄нтыл Анна Прокопьевна ёт яныг щēмья янмалта̄лсы̄г. Та̄н Хо̄сло̄х па̄выл хӯрум хум янмалтам оматēныл Лончакова Мария Викторовна яныгса̄т та̄лтем о̄лыс. Па̄выл ма̄хманувн ла̄ввес Мēсыг па̄выл Виктор о̄йка а̄ги. Тав самын патмēт оматēтэ а̄тимыг ēмтум. Ане̄кватэ̄н ос Мувыӈкēс Ванька о̄йка сасгēн янмалта̄лвес. Ань ты йист са̄всыр хо̄н ма̄т о̄лнэ мир акваг халанылт хо̄нтлуӈкв наламтахтэ̄гыт. На̄нти сунсэ̄н, ВОВ порат, ётыл Афганистаныт, Чечнят, сыресыр терактыт порат манах пыганув, ня̄враманув ос нас о̄лнэ мирув порславēсыт. Ань ос Украинат о̄лнэ оссам утыт мо̄т хо̄нпал политика хуйтпин ёхтувēсыт. Тыгыл э̄лаль То̄рум А̄щувн тамле оссам сола хольт капыртан утыт хотмос ёл вос торамтанувет, пуӈканыл номтыӈ са̄йтыл вос пиннувет. Т. Д. Слинкина, Урай Ханты Мансийск, ОУИПИиР, научный сотрудник. 1075 2014.05.09. Анна АЛГАДЬЕВА Тӯяг Хулюмсунтын цирк ёхталас. Ка̄сыӈ та̄л Хулюмсунт па̄вылн цирк ёхтала̄лы. Ты тӯя ка̄с ос ощхуль тотнэ ма̄хум Санкт-Петербург ӯсныл о̄лсыт. Тӯлыглахтам хо̄таланыл э̄кват ялпыӈ хо̄талн е̄мтыс. Матке̄пыл юв щалтнэ ма̄т олн тыныӈ кос о̄лыс, па̄влыӈ ма̄нь клуб колув ня̄врамытыл та та̄гиньтас. (Ощхоль ӯре̄гыт. ) Ам номсэ̄гум, клоун о̄йка ня̄врамытн сака мӯстыс, хунь тав сценан нэ̄глы, ня̄врамыт маткем та мувиньтэ̄гыт. Клоун коныпал ос мо̄т артистат о̄лсыт, ӯйхулыт тотыглаве̄сыт. Акв а̄ги я̄ӈк колала ӯитголубит суссылтас. Тяклиӈ пунпа ма̄нь я̄ӈк кӯтюврищ о̄лыс, на̄е ёт йӣквыс, ла̄глыг халт щалтсас, ла̄кв ӯлтта поргыс. О̄с акв ялпыӈ ӯйнакталӯй суссылтавес, ня̄врамыт э̄лыпа̄лн ляпан тотыглавес. Акв ва̄ӈныӈконсыӈ ма̄ньлат ё̄р хум о̄лыс, ва̄т нупыл нила кила та̄рвитпа гирят щар кӯстырыг па̄хтащласанэ, аквторыг кит нэ̄ пунканэ̄тыл но̄ха̄лми. Рущ ла̄внэ щирылфокусник о̄лыс, сэ̄мыл то̄тап кӣвырт уля пе̄ламты. Клоун о̄йка тай ня̄врамыт ёт ёнгыс, ощхультаӈкв сценан но̄хво̄выгласанэ. Хунь тӯлыглахтын ма̄ныл а̄стысыт, ӯйхулыт ёт олн мус по̄слахтуӈкв ро̄выс. Ос коны а̄висунт колнакт аквта клоун о̄йка ощщахоса пувласхӯргытыл шарикытыл са̄всыр хорамыӈ лӯптат, кӯтюврищит, сыраит ва̄рыс, ос олн мус. Ла̄вуӈкв ро̄ви, тулыглахтын ма̄хум ёмщакв ща̄гтыл тотсыт, ёмщакв рӯпитасыт, сэ̄лхатасыт. Ня̄врамыт о̄с ёмщакв ӯщлахтасыт, мувиньтасыт. Накталӯй – змея Тяклиӈ щаклиӈ. 1075 2014.05.09. Светлана РОМБАНДЕЕВА Са̄лыӈколыӈ колта̄гыл. Ханты-Мансийск ӯст «Ӯринэ̄ква хо̄тал» о̄лме порат ма̄хум ёсал кассыт. Сургутский район Русскинская па̄вылныл ханты ма̄хум ёхталасыт нэ̄тхумит, ма̄ньлат пыгыт. Пуссын та̄нти маснутанылт о̄лсыт, халанылт ща̄нь ла̄тӈыл потыртасыт. Ёсал касманыл порат Сережа ос Виталий Русскиныг китыт ос хӯрмит места висы̄г. Ам ты пыгыг а̄тятэ̄н ёт хо̄нтхатыгласум, потрамасум, наме Алексей Антонович. О̄влэ̄т потыртаӈкве ат таӈхыс, ла̄ви, рущ ла̄тӈыл потыртаӈкве ат ха̄сы. Ам ювле ла̄вегум, ам ма̄ньщи нэ̄, рущ ла̄тӈыл потыртаӈкве торыӈыщ о̄с ат ха̄сэ̄гум. Тувыл хум ань тув хотталь та ка̄сащас. На̄н ань Алексей Антонович потре ловиньтэлы̄н: Тыг пыганум ёт ёхтысум, хӯрум пыганум. Э̄квам наме Зоя Павловна, ме̄н акв а̄ги ос нила пыг о̄ньщиме̄н – Виталий, Валера, Вова ос Сережа. Ня̄враманме̄н ханты ла̄тӈыл пуссын ёмащакв потыртэ̄гыт, «Ханты ясанг» нампа ханты газета ловиньтэ̄гыт, ань пуссын грамотныит. Я̄ӈк на̄тнэ э̄тпост ам атпан нупыл онтолов та̄лум то̄влы. Акв э̄щ о̄ньще̄гум. Омаме̄н ма̄н ётув во̄рт о̄лы, а̄тяме̄н ос ам ат та̄л янытыг о̄лмум порат а̄тимыг е̄мтыс. Ам ще̄мьям ёт во̄рт о̄лэ̄гум, кол ӯнттысӯв. Ма̄лтып порат то̄ванакт ё̄рнкол тӯщталэ̄в, са̄лыянув ӯрим тот о̄лэ̄в. Ханты-Мансийск ӯсн ам о̄выл щёс ёхтысум, тыт а̄нумн пуссын сака мӯстыс, татем ёмас ма̄хум тыт о̄лэ̄гыт. Потрыӈ пыг Алексей Антонович но̄хпатум пыге Виталий тамле потрыӈ, тав потре ам о̄с хансыслум, э̄лаль ань ловиньтэлы̄н: – Ма̄н тыг во̄ввесӯв, ялнэминнэ ма̄шинал майвесӯв. Номсэ̄в, манрыг ат ро̄ви ялуӈкве, ялэ̄в. Ам Сургутский университетт ханищтахтэ̄гум, учителиг рӯпитаӈкве патэ̄гум. Ань ты касылт ам хӯрмиттыг ёхтысум. Сережа каӈкум ам э̄лыпа̄лумт ёхтыгпас, китыт места вис. Ма̄нти ва̄рум ёсанувт ха̄йтсӯв. Тамле ёсал ма̄н ма̄ньта̄гыл яласэ̄в. Ам номсыте̄мт, ты сака пӯмыщ ва̄рмаль, матъёмас тыг ёхтысӯв. Мо̄тынтыг о̄с те во̄ваве̄в, атхунь ёхтэ̄в. Виталий Русскинская па̄выл школат ханищтахтас, интернатт о̄лыс. Моще̄ртын хус та̄лэ ты то̄влы. Лӯи ма̄ мир касыл палт тав «кандидат в мастера спорта» намыл маим о̄лы. Ань май школат ханищтахтан ня̄врамыт халт са̄всыр олимпиадат ва̄рыглавет, Виталий ща̄нь ла̄тыӈ щирыл касыл о̄лыглам порат Ханты-Мансийск ӯсн во̄виньта̄лыма, тыт кит щёс о̄выл места вуйлам. Тав, насати, тамле ка̄ркам ос номтыӈ пыг. Ты ханты ще̄мья пуста̄гыл вос о̄лы, ня̄врамыт со̄тыӈыщ вос яныгме̄гыт. Пус ка̄т, пус ла̄гыл! 1075 2014.05.09. Александр ВЬЮТКИН Ты урыл мир мощща ва̄гыт. Ювле хультум э̄тпост ма̄ янытыл «День всемирного наследия» хо̄тал янытлавес. Ты та̄л тав ва̄тыт щёс янытлавес. Ханты-Мансийск ӯст о̄лнэ «Ма̄вит ос э̄лумхо̄лас» нампа музей колт та хо̄тал янытлан щирыл суссылтап щё̄пита̄лвес. Тот ма̄н ялпыӈ ма̄нанувт о̄щнэ пормасанув мо̄т мирын суссылтан ма̄гсыл акванатве̄сыт. Выставкат о̄лнэ пормасанув халт ялпыӈ койпыт, са̄ӈквылтапыт, а̄рсыныт ос пе̄с ща̄лголныт пасан тармыл пинтлым о̄лсыт. То̄ва пормасыт хо̄тхойплов нот па̄сныл о̄лэ̄гыт. Ты суссылтап рӯпататэ о̄вылтан кастыл са̄выӈпа̄лэ ма̄ньщи ос учёный ма̄хум тув атыглаве̄сыт. Ёхталам нэ̄ хо̄тпанув пуӈканыл пуӈк то̄рыл пинсаныл. Э̄лаль ялпыӈ пормасыт о̄лнэ колнакын та̄н ат щалтсасыт. Ат ва̄нэ рущ нэ̄ хо̄тпат та ляпат пуӈк то̄р та̄л, ва̄ти ка̄тсорыӈ ос ва̄ти супыл тот ё̄ӈхатахтыгласыт. То̄ват ат тулё̄влыӈ я̄ӈк па̄ссаӈ ка̄тыл ялпыӈ по̄рмасанув сунсыглым ка̄тын вуйлысаныл. Ка̄сыӈ хо̄тпа ты урыл такви щире̄т номсы, ам ос тох номсэ̄гум: «Ялпыӈ пормасанув ялпыӈ ма̄т о̄ньщуӈкв э̄ре̄гыт. Ма̄н та̄н ялпыӈ пормасанувн хунь новхатэ̄в. Та̄нанылн ма̄н пормасанув ул вос суссылтавет. О̄тыранув ка̄сталан та̄л ма̄н ма̄ньщи мирув хотталь ул вос со̄йми». 1075 2014.05.09. Николай МЕРОВ Ма̄ньлат хо̄тпат олныл майве̄сыт. Округт о̄лнэ ма̄ньлат ма̄хумн нё̄тнэ ма̄гыс губернаторув постановлениенэ̄паке щирыл 2007 та̄л па̄сныл ма̄ньлат хо̄тпат, хотьют мир ма̄гыс э̄рнэ рӯпата ёмщакв ва̄ри, та̄н ка̄сыӈ та̄л губернатор премияолныл мивет. Ань ты хо̄тал мус пуссын аквъёт 191 ма̄ньлат хо̄тпа округ губернатор премиял майве̄сыт. Ты наука ос ханищтап ва̄рмальт, культурат, общественный организацият, ля̄ххал хаснэ хо̄тпат ос мо̄т са̄всыр ма̄тт рӯпитан а̄гипыгыт янытлаве̄сыт. Ты ва̄рмаль ханищтап ос ма̄ньлат ма̄хум департаментыт рӯпитан хо̄тпат та̄н ва̄руӈкве номылматсыт. Ань тот экспертноконсультативный совет рӯпиты. Та̄н ка̄сыӈ та̄л акванатхатыглэ̄гыт, ма̄ньлат хо̄тпат ва̄рнэ рӯпатаныл уральтыяныл ос щар ёмас рӯпатат ма̄гыс премияолн та̄стэ̄гыт. Ты тэ̄ла щирыл 14-30 та̄л яныт хо̄тпат олныл мивет. Акв хо̄тпа рӯпататэ ма̄гыс 15 со̄тыра солко̄вил миве. Ань ты пора 33 ма̄ньлат хо̄тпа губернатор премиял майве̄сыт. Та̄н халанылт Ханты-Мансийск ӯст соссаӈ ма̄хум ва̄рмалит щирыл рӯпитан хӯрум хо̄тпа янытлаве̄сыт. Ты А̄с-угорский мир театрыт рӯпитан пыг Дмитрий Решетников, культура отделт рӯпитан нэ̄ Надежда Молданова ос соссаӈ ма̄ньлат мир организацият ля̄ххал хаснэ а̄ги Дарья Сумакова. Та̄н хосат та̄гыл соссаӈ мир о̄лупса э̄лаль тотым рӯпитэ̄гыт. Тувыл ос Русскинская па̄выл школаинтернатт 8 классыт ханищтахтын ханты а̄ги Виолетта Сопочина янытлавес. Губернатор нэ̄ та̄нанылн са̄в янытлан ла̄тыӈ ла̄выс. 1075 2014.05.09. Анна АЛГАДЬЕВА Хотёрувлаӈкв ат ро̄ви. Яныг хо̄нт о̄лум порат мирув но̄хпатум хо̄тал янытлаве ос ва̄ве. Ка̄сыӈ ма̄нь па̄вылт ос яныг ӯст ты хо̄тал мирыл атхатэ̄гыт ос хо̄нтлам ма̄хум п9 май хо̄тал ляпаман э̄лыпа̄лт яныгполь э̄тпос15 числат Хулюмсунт па̄выл ишколат рӯпитан ма̄хум ос ханищтахтын ня̄врамыт акванюрщхатым акв яныг ва̄рмаль ва̄рыгласыт. Ты ва̄рмаляныл «Хотёрувлаӈкв ат ро̄ви» намаим о̄лыс, тот ня̄врамыт яныг хо̄нт о̄лум пора ханищтасыт. Ты кастыл то̄ва классыт, халанылт хащхатнэ, аквхурип ке̄нтыт ва̄рсытмассыт, то̄ват сыпто̄рыт нэ̄гсыт, то̄ват георгиевский ленточкат ма̄гылт о̄щсыт. То̄ва ня̄врамыт кина по̄слан ос ля̄ххал тотнэ хо̄тпаг ма̄ оспа ӯламыл масхатым о̄лсыт. Яныг хо̄нт ёмщакв торгамтан ма̄гыс «Тыт ос ань» о̄луӈкв ла̄вве̄сыт. О̄влэ̄т ня̄врамыт пуссын рота щирыл ла̄кквауртхатасыт, ка̄сыӈ колнакт мус война порат о̄лум щирыл ёлпо̄йтса̄лнэ ма̄т станцият ва̄рсыт. Ма̄колыт ма̄кол хольтыл турманыг ва̄рсаныл, иснасанэ сэ̄мыл то̄рыл лаптагатасаныл. Ка̄сыӈ рота такви командир о̄ньщас. Ка̄сыӈ командир нэ̄пак ло̄мтыл майвес, ос та юипа̄лт хӯлтым наканыл щирыл минасыт. «Ма̄кол» класс котильт а̄ращ по̄слым, а̄ращт пӯтсов ханы, ла̄мпа тэ̄г. Ня̄врамыт тыт хо̄нтлым пора э̄ргыт ханищтасыт. «Блокадный Ленинград» иснасыт лаптагатымат, нэ̄пакыл лапханлымат. Ювщалтнэ ма̄т ня̄врамыт карточкал майве̄сыт, та хосытыл ма̄нь сэ̄мыл ня̄нь ло̄мтыл уртве̄сыт ос вит ло̄мтыл айтве̄сыт. Тыт та̄н Ленинград урыл потрыт хӯнтласыт, «Таня Савичева дневник» щирыл та порат о̄лум ва̄рмалит суссыт. Ты о̄лум нак такем пуӈканылн висаныл, вильтаныл щирыл та̄раӈ о̄лыс, та̄н торгамтасаныл, манса̄вит та̄рвитаӈ нак та пора ма̄хманув ва̄щинтасыт. Пилыщмаӈ о̄лыс ос тэ̄ӈкв таххатас. «Сталинград. Салтатн пищма» тыт хо̄нтлым порат ва̄рим хурит сунсыгласыт, маныр тот по̄слым, ты урыл потыртаве̄сыт. «Лё̄ӈх лапо̄лнэ ма̄» тыт витыӈ ня̄р ӯлтта минуӈкв, хара ма̄ хосыт ва̄ӈкуӈкв ос лӯпи ӯлтта воратаӈкв э̄рыс. «По̄с па̄тлуптан ма̄» тыт па̄тлуптан ма̄гыс по̄сыт ва̄рыглаве̄сыт ос писалит о̄лсыт. Пыгрищитн тыт сака мӯстыс. «Санчасть» хумыс а̄гмыӈут пусумлаве, супыгсаквалан ма̄ хумыс пе̄рыгтаве, тыт ханищтаве̄сыт. «Салтатн посылка» тыт картон нэ̄пакыл то̄тапсов ва̄рсыт. То̄тапаныл нэ̄пак маснутыл, тэ̄нутыл та̄глэ̄кв пинсаныл. «Воинский званият» тыт ка̄сыӈ ня̄врам та̄нкина̄нылн погоныт яктысыт, пуссын майорыг, генералыг патсасыт. Ты коныпал о̄с мот станцият о̄лсыт. Акв ма̄т война урыл хансым нэ̄пакыт сунсыгласыт, военный стихыт, э̄ргыт хӯнтласыт. Мо̄т ма̄т йӣквуӈкв ханищтаве̄сыт. Москва ӯс урыл о̄с потыртавес. Манах э̄рнэ ма̄ пуссын минаманыл юипа̄лт ос пуссын актовый залн атхатыгласыт. Тыт ты ма̄ӈ ветерананув урыл ня̄врамыт та̄нки потыртасыт. Ханищтам э̄рганыл э̄ргы̄сыт, пе̄с йӣквыл йӣквсыт. А̄стуманыл юипа̄лт классный руководителит ханищтан ня̄враманыл классаныл мус атыгласаныл. Тох ты ня̄врамыт потыртасыт: – Ювле хультум накыт хотёрувлаӈкв ат ро̄ве̄гыт. Ты урыл ва̄ӈкв э̄ри. – «Блокадный Ленинград» ёмщакв торгамтаслум. Армиян ялуӈкв э̄ри. – Ты пылыщмаӈ нак ёмщакв торгамтаслӯв. Родинав ма̄гыс хо̄нтлам ма̄хум номуӈкв ос янытлаӈкв э̄ре̄гыт. Тамле пилыщмаӈ нак нэ̄мхуньт воссыг ул вос е̄мты. – Ма̄н посыӈ хо̄талыл о̄луӈкв таӈхе̄в. Яныг пӯмащипа ла̄тыӈ ветерананувн, юн рӯпитам хо̄тпанувн ла̄ве̄в. Тох ты ма̄нь па̄влыӈ ма̄т тамле яныг ва̄рмаль ня̄врамытн суссылтаве. Ты хосытыл ущ яныгман ня̄врамыт пилыщмаӈ ос та̄рвитаӈ нак ёмщаквнув ва̄ӈкв патыяныл. Сака ёмас э̄рнэ рӯпата номтыӈ мӯтраӈ ханищтан хо̄тпанув ханищтахтын ня̄враманыл ма̄гыс ва̄ре̄гыт. Ты ма̄гыс та̄нанылн я̄нас пӯмащипа. Но̄хпатум хо̄талыл пуссын янытлыянӯв! Я̄тил тыныӈ ветеранхо̄тпанув, са̄в та̄л пуста̄гыл о̄лэ̄н! Ляпа ма̄хманын вос ӯргалаве̄н, уральтаве̄н. Хоса щуниӈ нот на̄нанн! 1075 2014.05.09. Николай МЕРОВ Я̄тил ветеран хо̄тпаквет! Округ Дума депутатыт ос ам на̄нан Победа хо̄талыл сымыӈыщ янытлыянӯв! Яныг хо̄нт оигпам па̄сныл са̄в та̄л минас. Та сыс ма̄н ты ва̄рмаль ань тыг мус ёмщакв номилӯв. Та пилыщмаӈ накт хо̄нтлам хо̄тпат ма̄в ӯргалым та̄ксарыг лю̄льсыт. Юн о̄лнэ ма̄хманув о̄с са̄в рӯпитасыт. Хумус ве̄рмысыт, нё̄тсыт, тэ̄нутмаснут хо̄нтлын ма̄н ке̄тыгласыт. То̄нт ты щар са̄в мир порславес. Ка̄сыӈ хо̄тпа Родинав та̄кыщ вуянтас. Аквъёт фашистыт ювле ня̄влуӈкве ве̄рмысанӯв. Ань о̄лнэ мир ты пилыщмаӈ нак о̄с ат ёрувлыяныл. Янгема̄не пуссын аквтем ва̄ганыл, ветераныт хосыт ань ма̄н посыӈ хо̄талт э̄лаль ты о̄лэ̄в. Ветераныт ос хотьют хо̄нтлын накт та̄рвитыӈ рӯпата ва̄рыс, ма̄н та̄н э̄лыпа̄ланылт ма̄ мус хӯтахлэ̄в. Та хо̄тпат о̄с ат ёрувлыянӯв, хотьют хо̄нтлын нак юипа̄лт са̄в рӯпитас. Ань ка̄сыӈ та̄лныл хо̄нтлам хо̄тпа мощща хульты. Ма̄н та̄наныл сака э̄руптыянӯв. Посыӈ хо̄талыл са̄в та̄л э̄лаль вос о̄лэ̄гыт. Тыныӈ ма̄хумаквет, Победа хо̄талыл на̄нан пуссын янытлыянӯв! Округ Дума кӯщай Б. С. Хохряков ке̄тум ля̄ххал ма̄ньщи ла̄тӈыг Николай МЕРОВ хансыстэ. 1075 2014.05.09. Николай МЕРОВ Яныг хо̄нт порат рӯпитам э̄ква. Ты ва̄рмальн ветеран э̄ква Нина Георгиевна Попова во̄виньта̄лвес. Тав такви уре̄т мощ потыртас. На̄н тав потре э̄лаль ловиньтэлы̄н: «Ам Ханты-Мансийск ӯст хо̄тпан нупыл акв та̄л о̄лэ̄гум. Амки Москва ӯсныл Минск ӯс нупыл миннэ лё̄ӈх хосыт ӯнлын па̄вылт самын патсум. Хо̄нтлын нак э̄лыпалт ма̄н, ня̄врамыт, са̄всыр та̄рвит рӯпата ва̄рсӯв. Тувыл лӯпта э̄тпос 22 щислат илттыг пилыщмаӈ капай е̄мтыс. Фашистыт ма̄н ма̄вн хо̄нтлым ёхтасысыт. Ма̄н па̄влув Москва ӯсныл яныгса̄т са̄тлов ве̄рыстат ӯнлыс. Та̄н тув ма̄нь таквс э̄тпос ловит хо̄талт ёхтысыт. Фашистыт сака молях э̄лаль минасыт. То̄нт са̄в мир порславес. Ельня, Вязьня па̄влыг торыг ты кос ма̄хманув хо̄нтлысыт, ла̄щал ювле та я̄ртве̄сыт. Немцыт Москва ӯсн сака молямтахтасыт, тыи ма̄гыс сака са̄в ё̄р пинсыт, та̄кыщ алхатасыт. Москва нупыл миннэ̄ныл порат, нас о̄лнэ мир ат новсаныл. Ётылнув, хунь ювле ня̄влуӈкве патве̄сыт, та̄н па̄влытытт о̄лнэ мир нупыл сака кантыӈыт о̄лсыт. Та порат са̄в хо̄тпа наска̄ссыг порславес. То̄ва колыт э̄лумхо̄ласыӈ та̄гыл но̄хпе̄ламтасаныл. Мир хоталь ве̄рмысыт, тув ха̄йтсыт. Ам ва̄т нупыл атахтем ве̄рыста ла̄глылл ё̄мсум. Тувыл пормас тотыглан на̄иӈтӯйтын та̄лсум, Украина ма̄н тотве̄сум. Тот немцыт кит арыгтем та̄л о̄лсыт. Та̄н ётаныл о̄лмувт, ка̄сыӈ хо̄тпа по̄йкщис, ма̄нки хо̄тпанув хо̄нтлым моляхнув вос ёхтынувыт. Маттем та саваласӯв. Ётыл, хо̄нт юипа̄лт, ам Украинат хультсум, са̄т та̄л тот о̄лсум. Ка̄сыӈ хо̄тал ма̄нки ё̄ранув ат са̄литасанӯв та̄рвит рӯпата ва̄рсӯв. Война порат ма̄в щар пулиго̄хтыртавес. Коланув щё̄питасанӯв, тэ̄пкант тэ̄нут янмалтасӯв. Родинав ёмасыг е̄мтнэ ма̄гыс ма̄нки сака рӯпитаӈкве тахсӯв. Тыщир ты о̄лсӯв. О̄йкам Тобольск ӯсныл о̄лыс. Тав армият са̄т та̄л лусытас. Ме̄н 1949 та̄лт акванминасме̄н ос Украина ма̄ныл тав о̄лнэ ма̄тэ̄н о̄лмыгтасме̄н. Тот нор яктым рӯпитасме̄н. Тувыл 1963 та̄лт Ханты-Мансийск ӯсн ва̄нтлысаме̄н. Са̄всыр ма̄т аквъёт пуссын атпан нупыл нёлолов та̄л рӯпитасум. Ты та̄лытныл налыман нупыл ат та̄л Ханты-Мансийск ӯст рӯпитасум». Нина Георгиевна хо̄нтлын нак порат Украина ма̄т партизанытн нё̄тыс. Сытамыг та̄нанылн тэ̄нут, маснут тотыглас. Тувыл ща̄гтын хо̄тал ёхтыс. Та̄л котиль э̄тпост 1944 та̄лт Украинан ма̄нки хо̄тпанув хо̄нтлым ёхтысыт. Тувыл ты фашистыт акваг ювле ня̄влуӈкве патве̄сыт. Ты пилыщмаӈ накт са̄в хо̄тпа порславес. Хотьют рӯт та̄л, хотьют ща̄ньа̄щ та̄л, хотьют ня̄врам та̄л хультыс. Ты сака та̄рвитыӈ ва̄рмаль о̄лыс. Ма̄н, редакцият рӯпитан хо̄тпат, Нина Георгиевна пус ка̄т, пус ла̄гыл э̄лаль о̄луӈкве ла̄вилӯв. 1075 2014.05.09. Светлана РОМБАНДЕЕВА Хо̄нтлам ма̄хум о̄лнэ колыл мивет. 2008 та̄лт Россия Президентув Указ хансыс, ань яныг хо̄нт порат хо̄нтлум ка̄сыӈ хо̄тпа, «Жителю блокадного Ленинграда» ма̄глын тагатан по̄с о̄щнэ ма̄хум, та̄н э̄кваныл пуссын о̄лнэ колыл вос мивет. О̄лнэ кол ёвтнэ ма̄гыс государствавн та̄н 1 миллион 917 со̄тыра 741 солко̄вил мивет. Ты коныпал ань йильпи са̄ккон щирыл, та̄н ты олнаныл мощ но̄хнув нё̄тавет, ты ма̄гыс 36 миллион 264 со̄тыра солко̄ви та̄стувес. Олныт ветераныт о̄лнэ ма̄нанылн ке̄тавет: Ханты-Мансийск, Нефтеюганск, Нижневартовск, Когалым, Нягань, Пыть-Ях ос Югорск ӯсытн, Сургутский ос Советский районыгн. 2005 та̄л мус округув янытыл очередин 530 хо̄тпа хансым о̄лсыт. Ты та̄лыт сыс 456 хо̄тпа о̄лнэ колыл майве̄сыт, 36 а̄тимыг е̄мтсыт, 15 – хотщуртумтаве̄сыт (та̄н кол о̄щнэ̄ныл). Ань ты хо̄тал мус 23 хо̄тпа кол ӯре̄гыт. Диана Юрьевна ла̄вме щирыл, ань тай олн то̄вылхаты, ка̄сыӈ хо̄тпа о̄лнэ колыл миве. Тувыл нэ̄ Чечнян ялум ма̄хум урыл потыртас. Округ янытыл ань 3 со̄тыра 725 хо̄тпа очередин хансым о̄лэ̄гыт. Та̄н о̄с пуссын нё̄тавет. 2013 та̄лт 635 хо̄тпа о̄лнэ колыл майве̄сыт, тыгыл э̄лаль ла̄щалла̄щал о̄с тах миӈкве патавет, кол та̄л нэ̄мхотьют ат хульты. 1075 2014.05.09. Тамара МЕРОВА Нэ̄мхотьют ул вос ёрувлаве. Ты тэ̄ла щирыл музейт рӯпитан хо̄тпат ос ӯст о̄лнэ ма̄ньлат а̄гитпыгыт ань таи ва̄руӈкве таӈхе̄гыт: 1941-1945 та̄лытыт хо̄нтлуӈкве ялум хо̄тпат манос войнат порслам хо̄тпат наманыл пуссын "Бессмертный полк" нампа нэ̄пакн хансым вос о̄лсыт. Таима̄гыс ӯст о̄лнэ ма̄хмытн хо̄нтлам рӯт хо̄тпаныл урыл музейн ла̄тыӈ ке̄туӈкве э̄ри. Тот наме вос хӯлтыяныл, хоты ма̄т тав хо̄нтлыс ос хумус таве̄н рӯтыг о̄лы. Тувыл та са̄лтат хуритэ ва̄раве, рӯтанэ̄н миве ос Победа хо̄талт ты хури ёт тав ӯс кан хосыт ё̄муӈкве паты. Юио̄выл хультум та̄лытыт войнан ялум хо̄тпат ка̄сыӈъе̄мт мощщамлэ̄гыт. Ма̄ньлат хо̄тпат та̄нки о̄паныл, ащо̄йканыл манхурип пилыщмаӈ нак порат о̄лсыт, ты о̄выл тыт хотёрувлаӈкве патсыт. Та̄н а̄гиянылпыганыл о̄с нэ̄матыр потыр ат хӯлыглэ̄гыт. Ань "Бессмертный полк" акция ва̄рнэ кастыл ня̄врамыт хо̄нтлуӈкве ялум хо̄тпат хурияныл вос ка̄салыяныл. Тувыл Победа хо̄тал манрыг таве э̄лаль янытлаӈкве э̄ри, ня̄врамаквет са̄внув ва̄ӈкве патэ̄гыт. Ты коныпал та̄нки яныг ащо̄йканыл, яныг о̄паныл наманыл о̄с та̄рапаттыяныл, мо̄тынтыг та̄нки ӯс канын хуриӈ та̄гыл о̄с тах ёхтэ̄гыт. На̄нан ты ва̄рмаль мӯстыс ке, тамле акция на̄нки ӯсытн манос па̄влытн э̄лаль щё̄питаӈкве ве̄рмегы̄н. Таима̄гыс таи ва̄ре̄н: – ищхӣпыӈ ут хосыт www. podvignaroda. ru; www. soldat. ru; www. pomnite-nas. ru ло̄пс хо̄нтэ̄н ос тот о̄пан, ащо̄йкан манос мо̄т рӯтанын наманыл кинсэ̄н. Наманыл а̄тимыт ке, на̄нки тув ла̄тыӈ ос хури ке̄тэ̄н. Лангепас ӯст о̄лнэ ма̄хум хо̄нтлуӈкве ялум рӯтаныл та̄рапаттын ма̄гыс музейт рӯпитан хо̄тпат та̄нки коланылн во̄вияныл ос тот нё̄туӈкве ла̄вавет. Тувыл ма̄хум хо̄нтлам рӯтаныл хурит вос ва̄рияныл, (та̄нки ат ке ве̄рме̄гыт, акция ва̄рум хо̄тпатн нё̄тавет тах). Ма̄хум ты хуриӈ та̄гыл я̄ӈк на̄тнэ э̄тпос Победа хо̄талт та̄нки о̄лнэ ӯсыӈ манос па̄влыӈ канын вос минэ̄гыт ос тот «Бессмертный полк» ва̄рнэ колоннат вос ё̄ме̄гыт. Ты сака ёмас ос э̄рнэ ва̄рмаль. Та щирыл хо̄нтлуӈкве ялум ма̄хманув ка̄стыянӯв ос ка̄сыӈ йильпи та̄лт но̄хпатум хо̄талт та̄н аквтупмат та̄нки ма̄н халувт ё̄ме̄гыт. 1075 2014.05.09. Александр ВЬЮТКИН Рӯпата минэ ма̄хум уральтан хум. Рӯпитан ма̄хум урыл о̄лум прессконференцият журналистыт ёт Евгений Кривобоков потыртас. Ма̄хум кӯщаитн ул вос ӯрккуптавет, ты ва̄рмаль щирыл тав Государственный инспекция кӯщаиг рӯпиты. Евгений Владимирович о̄влэ̄т рӯпата минэ ма̄хум уральтан тэ̄ла урыл потыртас: «Ма̄н ва̄глув, то̄ва ма̄хум рӯпата ва̄рнэ̄ныл ма̄гсыл олныл щар ат ойтавет. То̄ват ойтавет кос, ос сака мощщал. Та̄н договорнэ̄паканылт хансым о̄лы, рӯпатаныл ма̄гсыл олнаныл пуссын ат ойтавет. Са̄выӈпа̄лэ̄ тох кайнэ ма̄хум ЧОП нампа ма̄т рӯпитэ̄гыт. Ань ма̄н та̄н ётаныл рӯпитэ̄в, хумус та̄нанылн мир ёт рӯпитаӈкв э̄ри ос маныр э̄ри ва̄руӈкв. Тувыл та̄нанылн ма̄н ётув рӯпитаӈкв кӯстырнуве паты. Манавн налоговый ос социальный страхование фонд ёмщакв нё̄тэ̄г. Та̄н ЧОП ма̄хум ва̄тихал уральтыяныл. Хунь матыр хо̄нтэ̄гыт, ты урыл та̄ра ма̄навн пищма те̄тэ̄гыт. Ма̄н та пищма щирыл о̄с та э̄лаль уральтыянӯв. Матыр те лю̄ль хо̄нтэ̄в, олныӈ штрафыл пиныянӯв». Рӯпитан ма̄н ущты вим хо̄тпат то̄ванакт нэ̄мхотты нэ̄пакт ат хасхатэ̄гыт. Рӯпатат хунь матыр лю̄ль е̄мты, тот рӯпитам хо̄тпа нэ̄матырыл ат нё̄таве ос олныл ат о̄йтаве. 1075 2014.05.09. Тамара МЕРОВА Тыт ӯщлахтуӈкве о̄с ро̄ви. Округ губернатор Наталья Комарова Белоярский ӯсн ялыс, тот Семейный совет Югры сапра̄ни ва̄рыглас. Тав тувыл ӯсыт ос районыт ёт ищхӣпыӈ ут хосыт ня̄врам ӯщлахтан тэ̄лат о̄вылтыт потыртас. 2014 та̄лт ня̄врамыт ёмащакв ӯщлахтын ос пусмалтахтын ма̄гыс 1 миллиард 735 миллион солко̄ви та̄стувес. Ты олннё̄тмилытыл 95% округт о̄лнэ ня̄врамаквет са̄всыр ма̄т ӯщлахтуӈкве ос пусмалтахтуӈкве ве̄рме̄гыт тах. Таима̄гыс 380 миллион солко̄ви пусмалтахтын колыт щё̄питан ма̄гыс холтавет. Та щирыл хо̄т яныг центрыт ёмащакв щё̄питавет. Ос округув янытыл ты та̄лт ня̄врамыт ма̄гыс 510 са̄всыр ӯщлахтын колыт пунсавет. Округувт йильпи этноцентрыт, этнолагерит ос акванатхатан мо̄т са̄всыр колыт ва̄руӈкве патве̄сыт. Ня̄врамыт тот во̄рт ӯщлахтэ̄гыт, сыресыр э̄рнэ ос мӯтраӈ тэ̄лан ханищтавет. Та̄нанылн тот ӯщлахтуӈкве сака мӯсты. Ханты-Мансийский район Елизарово па̄вылныл Валентин Александрович Еремеев ищхӣпыӈ ут хосыт потыртас, во̄рт о̄лнэ лагерит о̄лнэ̄ныл сыс ня̄врамыт та̄ксарнуве̄г е̄мтэ̄гыт, та̄нки халанылт акванюрщхатэ̄гыт. Тувыл то̄ва ня̄врамыт ща̄ньа̄щаныл ёт тув ялантэ̄гыт, тыи о̄с ёмас тэ̄лаг о̄лы. Тох та̄н та̄нки халанылт акваннё̄тхатым э̄лаль о̄лэ̄гыт. Акв а̄гирищ Дарина Кайгородова, «Поколение +» ня̄врамыт ёт рӯпитан колэ урыл сака ёмас ла̄тыӈ ла̄выс. Тав мо̄т а̄гитпыгытн тамле ла̄тыӈ ке̄тыс: «Юграт ӯщлахтуӈкве модныиг о̄лы». Валерия Шведова, Радужный ӯсныл ёхталам а̄ги, тамле ӯщлахтын колыт о̄вылтыт ос таи ля̄галас: «Тот интернет та̄л о̄лэгы̄н ке, мӯсхал щирыл ӯщлахтэгы̄н! ». «Югра» телерадиокомпаният мирн нё̄тмил ва̄рнэ программат щё̄питан нэ̄ Оксана Вожатова о̄с потыртас. Та̄н ня̄врамыт ма̄гыс са̄всыр ёмас кинат, ёнгилыт, касыт о̄ньще̄гыт. Соссаӈ ма̄хум ла̄тӈаныл ханищтан ма̄гыс «Югорика» нампа программа, «Кошкиосторожки» проектаныл, «Жемчужина Югры – Приполярный Урал» документальный кинат ос мо̄таныт. Ань пуссын ты передачаныл та̄н школат ос лагерьт рӯпитан хо̄тпатн миӈкв ве̄рмияныл. Та̄н туп телекомпаниян ла̄тыӈ вос ке̄тэ̄гыт. Ня̄врамытын округт о̄лнэ ма̄хум ёмщакв ва̄ӈкве э̄ри, тувыл манхурип нё̄тнэ ма̄т та̄н о̄лэ̄гыт, кинат ка̄салыяныл ос ве̄к хотты накт тув ялуӈкве тахмае̄гыт. Тувыл яныг ӯсытыт ос районытт о̄лнэ ма̄хум та̄нки ӯщлахтын коланыл урыл потыртасыт. Ольга Дмитриевна Пилецкая, Сургут ӯсныл о̄лнэ нэ̄, номтыӈ ня̄врамыт (одаренные дети) ӯщлахтуӈкве ос та сыс э̄лаль ханищтаӈкве хо̄т ӯравет, таи хӯлтыс. Мо̄лты ня̄врамыт Суздаль ӯсн тотыглаве̄сыт, та̄нанылн тот сака мӯстыс. Ты коныпал 21 со̄тыра ня̄врам ща̄рщ ва̄тан тотыглаве̄сыт. Тох та̄н Россият манос мо̄т хо̄н ма̄т ӯщлахтэ̄гыт. Болгариян 550 а̄гитпыгыт ялэ̄гыт тах, мо̄таныт Владивосток ӯсн «Океан» нампа лагерьн ос Туапсе ӯсн «Орлёнок» нампа лагерьн тотыглавет. Ты та̄л Крымт о̄лнэ «Артек» нампа лагерь о̄с рӯпитаӈкве паты, тув 134 ня̄врамыт ке̄тавет. Крымт войнат порслам ма̄хум памятниканыл ань тыг мус ӯргалым о̄ньщавет. Ща̄ньа̄щитн о̄с ла̄тыӈ ке̄тсыт, та̄нки Крымн ялуӈкве таӈхе̄гыт ке, ня̄враманыл ёт вос ялэ̄гыт. Ань тув ялнэ̄ныл ма̄гыс лё̄ӈханыл ма̄гыс мощща олн тах ойтэ̄гыт. 1075 2014.05.09. Людмила ТЕТКИНА Та̄н та̄рвитыӈ ва̄рмаляныл ат ёрувлавет. Общественный палатат рӯпитан ма̄хум сапра̄нит а̄гмыӈмосыӈ хо̄тпат та̄рвитыӈ ва̄рмаляныл урыл потыртасыт. Кӯщаит тув о̄с во̄виньта̄лве̄сыт. Станислав Кононенко, Общественный палатат рӯпитан хум, тох ла̄выс: «Ань а̄гмыӈмосыӈ ма̄хум квота щирыл рӯпитаӈкве вивет. Ты э̄лыпа̄лт пирмайтым са̄ккон хосыт яныгса̄т а̄гмыӈмосыӈ э̄лумхо̄лас туп тох рӯпата хо̄нтуӈкве ве̄рмысыт. Йильпи са̄кконыт та̄н 35 квотал хасве̄сыт. Ань организацият инвалидхо̄тпат рӯпитаӈкве ке выганыл, округ бюджетныл олныл нё̄тавет. Тувыл то̄ват лю̄ль ва̄ре̄гыт, ма̄хум рӯпитаӈкве мощщан вуйлыяныл, ты олныл та̄ставет, ты юипа̄лт та̄наныл по̄хын ке̄тыяныл. Ос то̄ват рӯпитаӈкве кос вивет, тувыл ос ӯрккуптым мощща олныл ойтавет. Ты ва̄рмалит урыл ма̄н Наталья Комарова, губернаторув ёт, хо̄нтхатыгламув порат потыртасӯв. Тав ты тэ̄лат та̄рапаттым о̄ньщиянэ». Елизавета Лаптева, мир ӯргалан Департаментыт рӯпитан нэ̄, ос та̄нки рӯпатаныл урыл ла̄тыӈ ла̄выс. 2013 та̄лт акв со̄тыра 986 а̄гмыӈмосыӈ хо̄тпа рӯпата кинсыс. Та̄н халанылт 960 э̄лумхо̄лас рӯпатал хо̄нтве̄сыт. Кӯщай нэ̄ ла̄вме щирыл, ты ма̄хум юн о̄лым, са̄всыр пособиял ос пенсияолныл ойтавет, тыи ма̄гсыл та̄нки рӯпитаӈкве сака ат ка̄саще̄гыт. Округ янытыл сапра̄нин ёхталам а̄гмыӈмосыӈ ма̄хум та̄нки та̄рвитыӈ ва̄рмаляныл урыл потыртасыт. Кӯщаит та̄нанылн нё̄туӈкве ла̄вхатсыт. 1075 2014.05.09. Александр ВЬЮТКИН Ловиньтан нэ̄пак хаснэ хо̄тпат янытлаве̄сыт. Нэ̄пак ловиньтан окружной колт «Литературная премия Югры 2013» ма̄хум мӯйлупсал янытлан ва̄рмаль о̄лыс. Ты премия 2007 та̄лт ва̄рвес. Та юипа̄лт 2009 та̄л па̄сныл тав ма̄ янытыл янытлаве. Ань тыг мус пуссын аквъёт налыман хо̄тпа ты мӯйлупсал майве̄сыт. Та коныпал ты та̄л Ханты-Мансийск ӯст о̄лнэ нэ̄пакыт ловиньтан кол нёлса̄т та̄лэ то̄влы. Ты та̄л та премиял са̄т хо̄тпа майве̄сыт. Округувныл Андрей Тарханов, Еремей Айпин ос Мария Волдина соссаӈ мир культура янытлан ма̄гсыл о̄с мӯйлуптаве̄сыт. Тувыл Воронеж ӯст о̄лнэ хум Иван Щелоков Россия ма̄в урыл ёмас, нё̄тнэ стихыт хаснэ̄тэ ма̄гсыл янытлавес. Та юипа̄лт Германияныл о̄лнэ нэ̄ Алексас Парнис ты премиял майвес. Азербайджан ма̄ныл о̄лнэ хум Мамед Орудж о̄с янытлавес. Тав ханты ос ма̄ньщи мо̄йтанув такви ла̄тӈе̄нт толмащланэ̄тэ ма̄гсыл премиял майвес. Юио̄выл Македония хо̄н ма̄ныл Венко Андоновский ёхталас. Тав ос такви ма̄тэ̄т о̄лнэ рущ ма̄хмыт урыл нэ̄пак хасме ма̄гсыл литературный премиял майвес. Ты янытлым ма̄хум пуссын мир янытыл ёмщакв ва̄вет ос ёмас ла̄тӈыл ӯлыглавет. Ка̄сыӈ хо̄тпа такви мире̄н са̄в ё̄мас тэ̄ла ва̄рыс. Хоты ма̄ныл, хоты витныл о̄лнэ ма̄хум То̄румн, О̄тырн вос ӯргалавет. 1075 2014.05.09. Александр ВЬЮТКИН Лё̄ӈхыт мӯсхал щирыл яласэ̄н. Ювле хультум э̄тпост Ханты-Мансийск ӯст ГИБДД рӯпитан ма̄хум ня̄врамыт ма̄гыс «Твой вклад в безопасность дорог Югры» нампа акция о̄вылтасаныл. Ты ханищтап щё̄питан щирыл округ губернатор ва̄ӈын кӯщаиг о̄лнэ хум Алексей Путин та̄нанылн нё̄тыс. Ты акция щирыл яныгнув классытыт ханищтахтан ня̄врамыт ос студентыг о̄лнэ ма̄ньлат ма̄хум лё̄ӈх тармыл рӯпитан полицият ёт ӯс хосыт яласасыт. О̄влэ̄т ма̄ньлат ма̄хум ГИБДД колт акванатыглаве̄сыт. Тот та̄нанылн лё̄ӈхыт маныр ос хумле э̄ри ва̄руӈкв, хӯлтве̄сыт. Ма̄ньлат ма̄хум пуссын аквъёт атхойплов хо̄тпа о̄лыс. Та̄н хо̄т ма̄шинан ла̄ккваурттым о̄лсыт. Ань ты о̄выл акция щирыл ня̄врамыт тит щёс ГИББД ма̄хум ёт лё̄ӈхыт рӯпитасыт. Ма̄шинан ӯнтын э̄лыпа̄лт ма̄ньлат ма̄хум ёт Департамент колт рӯпитан хум Геннадий Забадин потыртас, тав ла̄выс: «Ань ма̄н нас сунсэ̄в, хумус ты ва̄рмаль мины. Тыил ма̄н ла̄ве̄в, ма̄хум лё̄ӈхыт рӯпитан ГИБДД ма̄хмыт вос янытлыяныл. Лё̄ӈхыт та̄н нас тох ат лю̄ле̄гыт, та̄н ва̄рнэ та̄рвитыӈ рӯпатанылт нё̄туӈкв э̄ри. Таима̄гсыл ты ма̄н тамле ёмас тэ̄ла э̄лаль тотылӯв. Лё̄ӈхыт миннэ̄н порат нэ̄мхотталь ул молямлэ̄н, ӯргалахтым яласэ̄н». 1075 2014.05.09. Александр ВЬЮТКИН Крым урыл ля̄ххал. Мо̄лалнув э̄тпост Ханты-Мансийск ӯст Государственный Дума депутат Вячеслав Николаевич Тетёкин ёт потыртасӯв. Потрув Украина хо̄н ма̄ ва̄рмалянэ урыл о̄лыс. Вячеслав Николаевич тув ялыс. Тав ла̄выс: «Со̄ль, ань Россияв ма̄ янытыл щар ё̄рыг ловиньтаве. Э̄лы хо̄н ма̄т о̄лнэ ма̄хум са̄выӈпа̄лэ ма̄н ётув юртыӈыщ о̄луӈкв таӈхе̄гыт. То̄ват та̄нтина̄ныл такталым нас ва̄рыглахтэ̄гыт. Ань ты Украина ма̄т о̄лнэ ва̄рмаль 2007 та̄лт Германия хо̄н ма̄т Мюнхен ӯст мирхал конференция о̄лме порат о̄вылтавес. То̄нт ма̄н Президентув Владимир Путин Америка хо̄н ма̄ нупыл та̄н ва̄рнэ тэ̄ланыл урыл щар ля̄льт потыртас. Та порат Владимир Владимирович ла̄вум ла̄тӈанэ та̄нанылн ат мӯстысыт. Ань ты порат о̄лнэ ва̄рыглам наканыл ла̄щлакв та о̄вылтаве̄сыт. Хунь тыи пуссын о̄вылтахтас, маныр э̄лаль ва̄руӈкв э̄ри нэ̄мхотьют ат ва̄стэ. То̄нт ма̄н Российский са̄лтатанув Крымт о̄лнэ рущ ма̄хманув ӯргалан ма̄гсыл тув те̄тсанӯв. Парашютыл нумыл поргын са̄лтатанув мо̄т маснутыл мастым, писалиӈ та̄гыл, вильтаныл лаппантым тув те̄тыглаве̄сыт. Ань НАТО нампа армия ма̄нав пилуптан ма̄гыс са̄в лю̄ль ва̄ри. Мощ мо̄лалнув Крым ща̄рще̄т вит ёлыпа̄лт яласан США хо̄н ма̄ тит на̄иӈха̄паге ка̄салавесы̄г. Ма̄н ань ты на̄иӈха̄пыг аквписыг тармыл ӯрим о̄ньщиягӯв. Та̄н ты урыл ва̄гыт, таима̄гсыл хурахлэ̄гыт. Украина армиятэ армияг ла̄вуӈкв ат ро̄ви. Яныгпа̄лэ хо̄нтлын утаныл, танкыт, товлыӈха̄пыт ос на̄иӈха̄пыт щар ат рӯпитэ̄гыт. Та̄н армияныл хосат ла̄ккватӯлмантавес. Таима̄гсыл та̄н э̄рттам мо̄т хо̄н ма̄ныл нё̄тавет. Украинат Президент пе̄риян юипа̄лт тав, улпыл, кӯстырнуве̄г о̄луӈкв тот паты. Ань о̄лупса тот сака та̄рвитыӈ. Ма̄хум хунь ёмщакв о̄лмыгтэ̄гыт, та урыл иӈ нэ̄мхотьют ат ва̄гтэ. Тыи пуссын я̄ӈк на̄тнэ э̄тпос ва̄т нупыл атыт хо̄талэ юипа̄лт тах та̄рапаты». Прессконференция оигпаме э̄лыпа̄лт Вячеслав Тетёкин ла̄выс: «Ты тув мус пуссын ёмасыг сойиг е̄мты. Хотьют ка̄сащи, Крым ма̄н ӯщлахтаӈкв ялэ̄н, ул хурахлэ̄н. Тот ре̄гыӈ, ща̄рщ витэ сыстам. Та̄л палыт пуста̄гыл о̄лнэ̄н ма̄гсыл тот ӯщлахтэ̄н! » 1075 2014.05.09. Николай МЕРОВ Ханты ма̄хманув са̄лыл кассыт. Ты та̄л Сургутский район Когалым ӯст соссаӈ ма̄хманув са̄лыл каснэ ва̄рмаль ва̄рыгласыт. Хо̄тал нэ̄глын е̄рт о̄лнэ ханты ма̄хум пуссын та̄нки са̄лы о̄ньще̄гыт. Та̄н Ямало-Ненецкий округ ляпат о̄лэ̄гыт. Та ма̄ныл ё̄рн ос ханты хо̄тпат ты ялпыӈ хо̄талн ка̄сыӈ та̄л ёхталэ̄гыт. Са̄лыӈ ма̄хум нё̄выль, пил ос мо̄т са̄всыр тэ̄нут ос ка̄тыл ва̄рим пормасаныл тот тыналэ̄гыт. Соссаӈ ма̄хманув пуссын хорамыл ю̄нтым маснутыл масхатым о̄лсыт. Та ӯс ляпат о̄лнэ па̄влытныл, ӯсытныл ты ва̄рмаль сунсуӈкве са̄в мӯй ма̄хум ёхталас. Ялпыӈ хо̄тал сака пӯмщиг минас. Когалым ӯс культура колт рӯпитан ма̄хум концерт щё̄пита̄лсыт. Хара ма̄т яныг сцена ва̄рыглавес. Тот ёнгын колыт са̄ӈквылтасыт, э̄ргысыт ос йӣквсыт. Ты ялпыӈ хо̄тал «Лукойл Западная-Сибирь» нампа ма̄во̄й ма̄ныл но̄хвинэ компания 2004 та̄л па̄сныл ва̄рыглытэ. Та порат Когалым ӯст соссаӈ ма̄хум съезданыл о̄выл щёс минас. Та съездыт кӯщаит са̄лыл каснэ ва̄рмаль ка̄сыӈ та̄л ва̄рыглаӈкве потыртахтасыт. Ань са̄лыӈ колытныл китса̄ткем ще̄мья ӯсн мӯйлуӈкве тотыглаве. Та̄наныл тотнэ ма̄гыс нефтяникыт машина майлэ̄гыт. Ямало-Ненецкий округныл са̄лыӈ хо̄тпат о̄с ёхталасыт. Та̄н мӯй ма̄хум пӯмащ ма̄гыс са̄лыӈ суныл тотыгласаныл. Акв щёс ялнэ ма̄гыс ма̄хум атпан солко̄ви ойтсыт. Мир ща̄гтым мӯйлысыт. Ащирман по̄льнэ хо̄тпат ё̄рнколт толтыглахтасыт. Тув щалтнэ ма̄гыс яныгса̄т солко̄ви ойтуӈкве э̄рыс. Тэ̄нут ма̄гыс ма̄хум о̄с я̄нас ойтхатасыт. О̄выл щёс каснэ ва̄рмаль о̄лум порат мощща са̄лыӈ ма̄хум касуӈкве ёхталасыт. Ты та̄л пуссын аквъёт са̄тпан нупыл ат са̄лыӈ хо̄тпа кассыт. Каснэ лё̄ӈханыл акв со̄тыра китса̄т метра палытыг о̄лыс. Хум хо̄тпат халт о̄выл места Владимир Иванович Сопочин, Русскинская па̄вылныл о̄лнэ хум, китыт места Василий Яковлевич Сопочин, Тром-Аган па̄выл хум, хӯрмит места Геннадий Александрович Покачев, Русскинская па̄вылт о̄лнэ хум, та̄н висыт. Э̄кват халт о̄выл места ос Зоя Фёдоровна Русскина, Русскинская па̄вылт о̄лнэ нэ̄, китыт места Анастасия Анатольевна Комтина вис, тав ос Русскинская па̄вылт о̄лы, хӯрмиттыг Зинаида Ивановна Кечимова, Когалым ӯст о̄лнэ нэ̄, ёхтыс. О̄выл места вим ма̄хум «Буран» нампа тӯйт тармыл яласан утыл мӯйлуптаве̄сыт. Китыт ос хӯрмит местаг ма̄гыс на̄йпос ва̄рнэ станция ос бензопила майвесы̄г. Ты коныпал са̄лыӈ хо̄тпат пе̄рщисыт, тынщаӈ па̄хвтысыт ос са̄лыӈ сун ӯлтта поргим кассыт. Тувыл ты ялпыӈ хо̄талт са̄лыӈ ма̄хум халт ё̄рнколт рӯпитан щар нё̄тнэ ос ка̄ркам э̄кваго̄йкаг пе̄риявесы̄г. Но̄хпатум хо̄тпат пуссын ёмас мӯйлупсал майве̄сыт. 1075 2014.05.09. Людмила ТЕТКИНА Э̄ква та̄рвитыӈ пора номитэ. Александра Кузьмовна Питухина, такви о̄парищ наме Юткина, Кондинский район Леуши па̄вылт о̄лы. Ты та̄л яныгполь э̄тпос 20 хо̄талэ̄т 88 та̄лэ то̄влыс. Яныг хо̄нт оигпаме юипа̄лт 1946 та̄лт ма̄глын тагатан по̄сыл майвес, рущ ла̄тӈыл «За доблестный труд в Великой Отечественной войне 1941-1945 годов» намаим о̄лы. Ты коныпал тав са̄в грамотанэ̄пакыт ос мо̄т янытлан нэ̄пакыт о̄ньщи. Леуши па̄вылт ма̄ньщи э̄ква сака янытлаве. Александра Кузьмовна та пора урыл ла̄выс: «Война о̄вылтахтаме порат ам 15 та̄лум то̄влыс, то̄нт школат ханищтахтасум. Ма̄н ще̄мьявт ат ня̄врам яныгмасӯв. Омам рущ нэ̄, Свердловский областьт о̄лыс. Тав Леуши па̄вылн пил ва̄туӈкве ке̄твес, тыт а̄тям ёт акванминасы̄г. А̄тям ма̄ньщи хум о̄лыс. Тав кӯпсао̄йка яныг колэ ёвтыстэ, та порат кол 475 солко̄ви тынэ о̄лыс. Ойтхатнэ ма̄гсыл акваг са̄в рӯпитас, во̄раяс, хӯл алыщлас. Таквина̄тэ щар ат са̄литастэ, тох рӯпитым, а̄гмыл е̄мтыс, 1932 та̄лт а̄тимыг е̄мтыс. Омав такке̄т ат ня̄врам ёт хультыс. Та порат колхозыт ва̄руӈкве о̄вылтаве̄сыт, ма̄хум ӯйхуланыл тув пуссын мисаныл. Омам о̄с ла̄ввес, мисанэ, луванэ тув ат ке мыганэ, яныг налоголн ойтуӈкве паты. Пуссын ӯйхуланув колхозн та мисанэ, такви о̄с тув рӯпитаӈкве минас. Воссыг хоталь щалты, ма̄нав тыттуӈкве, мастуӈкве э̄рыс. 1934 та̄лт ам о̄выл классын минасум, 1943 та̄л порат школа а̄стласум. Ты э̄лыпа̄лт 1942 та̄лт Паша каӈкум хо̄нтлаӈкве вуйвес. Юв воссыг ат ёхтыс, хоты ма̄т порславес ос ёлщё̄питавес, аты ва̄глӯв. Война порат ма̄н ня̄врамыт о̄с пуссын рӯпитасӯв, туи пум ва̄рсӯв, хӯл алыщласӯв. Номилум, на̄иӈха̄п ёхты, юипа̄лэ̄т яныг баржа хартты, ма̄н па̄влыӈ ма̄хум пуссын тув рӯпитаӈкве ке̄таве̄в. Тэ̄нут, пормас тув та̄лттэ̄в. Ам амки талква, таяныт хӯргыт хо̄тал палыт та а̄лумтасум. Ӣтипа̄лаг юв ёхтэ̄гум, ла̄глагум щар нас то̄рге̄г. Акв хурыг 50 кила та̄рвитэ, ам амки тыил кӯпнитнуве̄г о̄лсум. Таяныт та̄рвит хумус но̄ха̄лмыгласум, ат ва̄глум. То̄нт та̄рвит рӯпата ва̄рим, ма̄н туп Победа урыл номсысӯв. Ам са̄т класс а̄стласум, Ханты-Мансийск ӯсн бухгалтерыг ханищтахтуӈкве минасум. А̄лпыл ханищтахтэ̄в ос ӣтипа̄лаг рӯпитэ̄в. Училища а̄стламум юипа̄лт Ларьякский районын ке̄тве̄сум. Кӯщаит палт минасум, лю̄ньщим юв во̄вхатсум, омамн нё̄туӈкве э̄рыс. Юв юрт а̄гиянум ёт минмыгтасӯв, то̄нт тай на̄иӈха̄пыт торыӈ ат яласасыт. Ханты-Мансийск ӯст на̄лми ва̄тат на̄иӈха̄п акв э̄тпос ӯрыслӯв. На̄иӈха̄пыт па̄г пӯхталэ̄гыт, са̄всыр пормасыл, тэ̄нутыл та̄глэ̄кв та̄лттавет, э̄лаль фронт нупыл та минэ̄гыт. На̄лми ва̄тат ӯнлымав, карточка щирыл майлым тэ̄нутанув холасыт, ма̄н грузчикыг тот рӯпитасӯв. Лӯпта э̄тпос оигпаме э̄лыпа̄лт Нахрачи па̄вылн ущта ёхтысӯв. Юн рыбкоопн рӯпитаӈкве патхатсум. А̄лпыл олн ловиньтасум, ӣтипа̄лаг ос колхозт рӯпитасум. Па̄влувт о̄лнэ ла̄пка, маснут ю̄нтнэ цех, пӯльница, школа пуссын ӯльювыл па̄лтыглаве̄сыт. Ма̄н, па̄влыӈ ма̄хум, пуссын аквъёт а̄лпыл нила щёс порат во̄рн ӯльюв сартуӈкве минэ̄в. Тэ̄лы кастыл ӯльюв щё̄питасӯв. Нёлолов щё̄с порат ювле ёхтэ̄в ос колхоз рӯпата ва̄ре̄в». Яныг хо̄нт оигпаме юипа̄лт Александра Кузьмовна хум ва̄рыс. О̄йкатэ̄ныл, Константин Константинович Питухин ёт, нила ня̄врам янмалтасы̄г. Ма̄ньщи э̄ква 1976 та̄лт пенсиян минас. Ты урыл тав ла̄ви: «Война юипа̄лт ам леспромхозт рӯпитасум, 1973 та̄л ты организация мо̄т ма̄н ва̄нтлуптавес. Ам по̄хан ке̄тве̄сум, пенсия мус пӯльницат рӯпитасум. Пенсиян патхатасум, пӯрщ, мис, лув о̄щсум. Ань тай ё̄р та̄л, ӯйхул ат о̄ньще̄гум, Андрей пыгум палт о̄лэ̄гум». Александра Кузьмовна Победа ма̄гсыл са̄в ё̄р пиныс, са̄в рӯпитас. Ма̄н, редакцият рӯпитан ма̄хум, ма̄ньщи э̄ква Победа хо̄талыл янытлылӯв, са̄в ёмас сымыӈ ла̄тӈыл ке̄тылӯв. 1075 2014.05.09. Александр ВЬЮТКИН Са̄в та̄л пӯльницат рӯпитам э̄ква. Тэ̄лы «Ма̄нь ӯскве» ня̄врамыт ёт округув янытыл яласамум порат Нягань ӯст яныгпа̄лаг о̄лнэ потрыӈ ма̄ньщи э̄ква ёт ва̄йхатасум. Тав наме Матрёна Никитична Рещикова. Тав А̄с я̄ ва̄тат о̄лнэ Хал па̄вылт 1938 та̄лт самын патыс. Ане̄кватэ, ащо̄йкатэ о̄лнэтэ̄н палытыл Хал па̄вылт о̄лсы̄г. Ащо̄йкатэ Герасим Григорьевич Рещиков яныгса̄т ат та̄л о̄лум. О̄лме̄н порат тэ̄н э̄кватэ̄нтыл хӯл алыщлым ос во̄раим рӯпитасы̄г. Матрёна Никитична а̄тятэ наме Никита Константинович Савинов. Тав о̄с хӯл а̄лыщлан ос во̄раян хумыг о̄лыс. Война о̄лум порат са̄в хӯл ос нё̄выль хо̄нтлын ма̄н те̄туӈкв э̄рыс. 1943 та̄лт таквсы порат хӯл алыщлан ха̄паныл та̄глэ̄кв хӯлыл та̄лттысаныл, юв миннэ̄ныл порат турманыт ха̄паныл на̄тнэ щухын хоми ё̄хтувес. Матрёна Никитична а̄тятэ по̄лям витыт по̄льтахтыматэ юипа̄лт а̄гмыл та е̄мтыс. Та порат торыӈ тэ̄рпи а̄тим о̄лыс, Никита Константинович а̄гме̄н хотталь та тотвес. А̄тяныл хотталь щалтме порат та̄н ат ня̄врам хультсыт. Щар янгыг Сергей каӈке о̄лыс, тувыл Настя увщитэ. Ос котиль ня̄врамыг Матрёна тав ты о̄лыс. Тувыл иӈ тит а̄пщирищиг Альберт ос Петр яныгмасы̄г. Альберт а̄тимыг е̄мтме ань хӯрум та̄лыг ты е̄мтыс. Пити патта а̄пщирище Петя ос Перегрёбный па̄вылт ще̄мьяӈ та̄гыл о̄лы. О̄матэ Хал па̄выл колхозт лув о̄щнэ нэ̄г рӯпитас. Та порат почта, тэ̄нут тотыглан ма̄шина ос товлыӈха̄п иӈ а̄тим о̄лыс, лувыл пуссын хартсыт. Таима̄гсыл ты та̄н колхозанылт са̄в лув о̄щвес. Тэ̄нут тотыглан ма̄хум хотты па̄вылт луваныл пе̄нтнэ̄ныл юипа̄лт, э̄лаль та минэ̄гыт. Луваныл мощ ӯщлахтэ̄гыт, ювле миннэ лё̄ӈханылт та̄нти луваныл о̄с та те̄рияныл. Матрёна Никитична Посалтыт па̄вылт о̄лум интернат колт ханищтахтас. Юио̄выл тит класс Шеркалы па̄вылт а̄стлас. Та юипа̄лт 1955 та̄лт Ханты-Мансийск ӯсн ле̄ккарыг ханищтахтуӈкв минас. Хӯрум та̄л сыс фельдшерыг ханищтахтас. Ханищтахтаме юипа̄лт та̄ра Октябрьский па̄вылт о̄лнэ пӯльницан ле̄ккарыг рӯпитаӈкв те̄твес. Октябрьский пӯльницат хоса ат рӯпитас, тувыл тав э̄лаль Чемаши па̄вылн рӯпитаӈкв те̄твес. Чемаши па̄выл пӯльницат хӯрум та̄л рӯпитаме юипа̄лт Перегрёбный пӯльницан паттувес. Та па̄вылт ос хӯрумхой плов та̄л рӯпитас, тот о̄йкаӈыг е̄мтыс. Тэ̄н о̄йкатэ̄нтыл тит пыг ос акв а̄ги янмалтасы̄г. Пыгаге Владимир ос Петр ань сас а̄тимыг. А̄гитэ наме Лариса. Ань тав о̄парищ наме Головина. Ще̄мьяӈ та̄гыл Нягань ӯст о̄лы. Тав нэ̄ хо̄тпат ма̄гсыл маснут тыналан ла̄пкат о̄ньщи. Тэ̄н о̄йкатэ̄нтыл нила ня̄врам янмалтасы̄г. Яныг а̄гитэ наме Алёна. Алёна ос тэ̄нут тыналан ла̄пкат тыналахтын нэ̄г рӯпиты. Тав юипа̄л пыге наме Павел, ӯс янытыл интернет ва̄рнэ хӯмыг рӯпиты. Тит ма̄ньнув пыгаге Богдан ос Даниил школат ханищтахтэ̄г. Матрёна Никитична о̄матэ ёт ма̄ньщи ла̄тӈыл аквписыг потыртас. Ань хосаг ты е̄мтыс, хунь юио̄выл щёс тав ща̄нь ла̄тӈе̄тыл хотьют ёт потырта̄лыс. Хумус тав ла̄ви: «Нягань ӯст о̄лнэ ма̄ньщиянув ёт ма̄н торыӈ щирыл ат ва̄щинтахтыглэ̄в. Таима̄гсыл ла̄тӈув ла̄щал хотталь та со̄йми. Ань халувт ма̄ньщи ла̄тӈыл потыртан ма̄хум мощща хультыс. Хультум ма̄хманув щирыл хотмус ща̄нь ла̄тӈув э̄лаль ялтуптаӈкв э̄ри». 1075 2014.05.09. Валентина УЗЕЛЬ Айнэ ут тыналан ма̄хум ма̄гыс са̄ккон. Ювле хультум э̄тпост са̄ккон хаснэ ма̄хум акванатхатыгласыт, та̄н заседанияныл о̄лыс. Ань та̄н сака мощща рӯпитасыт, акв щё̄стем сыс титхуйплов са̄ккон туп ловиньтасыт. О̄влэ̄т Думат рӯпитан ма̄хум янытлаве̄сыт. Округ янытыл МВД кӯщай В. Романица Дума кӯщаит пуссын янытласанэ, тувыл окружной суд кӯщай о̄с аквта хо̄тпат янытлас. Туп таи ёмас о̄лыс, Ассамблея кӯщаюв Е. Айпин та̄н халанылт о̄с янытлан нэ̄пакыл майвес. Ань йильпи са̄кконыт ат пирмайтаве̄сыт, хосат хансым са̄кконыт то̄ва ла̄тӈаныл мо̄т щирыл хассаныл, тувыл та. Ма̄нь ня̄врамыт ӯргалан са̄ккон урыл потыртаманыл порат Еремей Айпин ла̄выс, тот соссаӈ ня̄врамыт урыл Bad Credit Auto Loans Alberta Canada я̄нас вос хансаве. Во̄рт о̄лнэ ма̄хум та̄н ня̄враманыл ты ёмащакв ӯргалаӈкв э̄ре̄гыт. Та̄н а̄щанылща̄няныл во̄рт о̄лэ̄гыт, рущ ла̄тӈыл потыртаӈкв торыӈыщ ат ха̄сэ̄гыт, ва̄им са̄кконыт о̄с ат ва̄ганыл. Татьяна Моховикова «уполномоченный по правам ребенка» тамле яныг нам о̄ньщи, ня̄врамыт ӯргалым рӯпиты, тав ювле ла̄выс, соссаӈ ня̄врамыт ма̄гыс та̄н са̄ккон мощ мо̄т щирыл тах хансыяныл. Мо̄т ва̄рмаль урыл депутат ма̄хум халанылт мощ воритотсыт. Ты са̄ккон вина тыналан урыл хансым о̄лы. Ань э̄типа̄лаг нёлолов щё̄с юипа̄лт вина ла̄пкат ат тыналаве. Ос яныг ӯсытт са̄в ма̄нь ла̄пка о̄лы, тот кос хунь айнэ ут ёвтуӈкв ро̄ви. Та̄н нэ̄мхотьютн ат уральтавет. Ня̄врамыт хохса, сур пуссын ёвтуӈкв тот ве̄рме̄гыт. Ань мирн пе̄риим ма̄хум ты ва̄рмаль оснпаттысаныл ос тамле ла̄тыӈ са̄кконын хассыт – ма̄нь ла̄пкат вина тыналаӈкв ат ро̄ви, кос а̄лпыл, кос э̄типа̄лаг. Ты урыл прессконференцият потыртаманыл порат, Еремей Айпин тамле пе̄с ва̄рмаль номылматас, советский власть порат я̄ӈк вина сака лю̄льсаӈ лаппантым о̄лыс, пулпе тамле ма̄ньрищ. Сулья пӯнсаве те, лаппантуӈкв воссыг ат ве̄рмаве. Таима̄гыс хум хо̄тпат тох ла̄выгласыт, та̄н э̄лаль аюӈкв ат кос тахсыт, ос хоталь ва̄рхатэ̄гыт, сулья пӯссаныл, янытэ̄т аюӈкв э̄ри. Па̄лыг те о̄лы, ё̄рета мины, таима̄гыс ты пуссын айсаныл. То̄ва ма̄нь па̄влытт о̄лнэ ханты мир кӯщаитн ла̄выглэ̄гыт, та̄н палтаныл айнэ ут щар ул вос тыналаве. Тох о̄с ва̄руӈкв ат ро̄ви. То̄ват сака ае̄гыт, мо̄таныт мощ юв ӯрхатэ̄гыт, та̄нанылн манрыг лю̄ль ва̄руӈкв. Тамле ты йильпи ла̄тыӈ са̄кконанувн хасвес. Мо̄тыт э̄тпос та̄н о̄с тах атхатэ̄гыт, ос матыр э̄рнэ тэ̄лат тах пирмайтэ̄гыт. 1075 2014.05.09. Тамара МЕРОВА По̄слум хуриянэ мирн суссылты. Мо̄лалнув Сургутский район Русскинская па̄вылн ялмум порат хо̄н ма̄т о̄лнэ хум ёт ва̄йхатасум. Тав наме Тодд Принц, хум Америка ма̄ныл о̄лы. Ань такви уре̄т Тодд таи ла̄выс: – Ам Нью-Йорк ӯст самын патсум. Ювле хультум лов арыгкем та̄л порат ам Москван минасум ос та ӯст та хультсум. Россия ма̄ ам акваг пӯмщалым о̄ньщислум, тувыл Нью-Йоркат са̄в рущ хо̄тпат о̄лэ̄гыт. Та̄н мощ мо̄таныт ос са̄в мирыт халт хащхатэ̄гыт. Акваг номсахтасум, манрыг тох. Таи ма̄гыс ам Европан сака ат тахсум, Россиян минуӈкве куссум. Амки ӯсумт о̄лмумт рущ хо̄тпат ёт о̄с румалахтасум. Та̄н та̄нки о̄лупсаныл о̄вылтыт са̄в потыртасыт. А̄нумн пуссын пӯмыщ о̄лыс, ос таи ма̄гыс амки матыра̄ти ка̄салаӈкве тахсум. Ты коныпал российский ма̄т о̄лыглам пе̄с накыт ос ловиньтан рущ нэ̄пакыт ва̄нэм ма̄гыс ханищтапын ялантасум. Ты потрыт а̄нумн сака мӯстысыт ос сымын хо̄ясыт. Москван ёхтумумт о̄влэ̄т журналистыг рӯпитасум ос на̄н экономикан урыл са̄всыр ля̄ххалыт хассум. Са̄всыр ӯсытытн манос па̄влытытн ялсум, а̄нумн ва̄та̄л са̄всыр пӯмыщ ва̄рмалит ка̄сала̄лсанум ос хурин по̄слысанум. Мо̄лалнув финансовый институтт рӯпитаӈкве патсум, пе̄с рӯпатам о̄с ат ёрувлылум. Лӯи ма̄н са̄лыӈ ма̄хум ялпыӈ хо̄таланыл сунсуӈкве хӯрмиттыг ёхтысум. Ёрн ма̄хум ос хантыт палт мӯйлысум. Та̄н о̄лнэ во̄р коланылн тотыглаве̄сум, йис о̄лупсаныл та̄рапаттыслум. Тамле накыт тувыл ам хоса номиянум. Амки о̄лнэ ма̄мт ма̄хум Россия урыл мощща ва̄гыт. Ань таима̄гыс «фейсбук» нампа ищхӣпыӈ утыт ам я̄нас ло̄пс ва̄рсум ос тот то̄ва по̄слум хуриянум суссылтыянум. Юртанум, рӯтанум та̄нки матыр тот ка̄салэ̄гыт. То̄внакт по̄слум хуриянум урыл китыглавем, ам ла̄тыӈ ювле хансэ̄гум. Моще̄ртын о̄с акв ло̄пс щё̄питаӈкве номсэ̄гум. Са̄всыр ӯсытт манос па̄влытт о̄лнэ э̄лумхо̄ласыт по̄слыянум ос маныр та̄н ва̄ре̄гыт, хо̄т рӯпитэ̄гыт, китыглыянум ос хури ёлыпа̄лт хансыянум. Ты э̄лыпа̄лт ам китхӯрум хури тох ва̄рыгласум, юртанумн сака мӯстыс ос та̄н э̄лаль пӯмщалахтуӈкве патсыт. Тох ва̄рнэм сыс, сакати, амки ма̄мт о̄лнэ ма̄хум Россия мир ёт мощ ва̄йхатэ̄гыт, та̄н о̄лупсаныл та̄рапаттыяныл. Тамле ля̄ххал а̄нумн Тодд потыртас, ме̄н ань ищхӣпыӈ ут хосыт рӯмаӈыг о̄лыме̄н. Ань тав Русскинская па̄вылт по̄слум хуриянэ суссылтаӈкве тув щё̄питыянэ. 1076 2014.05.23. Людмила ТЕТКИНА Кол ёвтнэ урыл ля̄ххал. Ты та̄лныл округувт «Накопительная ипотека» нампа йильпи ва̄рмаль рӯпитаӈкве о̄вылтахтас. Евгений Чепель, Ипотечный агентства колт кӯщай, ос Владимир Вешняков, Ханты-Мансийский банкыт рӯпитан хум, ты тэ̄ла урыл потыртасы̄г. Программа хумус рӯпитаӈкве паты ос ма̄хумн хумус тах нё̄ты ты урыл Евгений Чепель ла̄тыӈ ла̄выс. Кол ат о̄щнэ хо̄тпат о̄влэ̄т Ипотечный агентстват очередин хасхатнэ̄ныл ма̄гыс э̄рнэ нэ̄паканыл тотыяныл. Ос ты юипа̄лт ты ма̄хум Ханты-Мансийский банкыт ос агентства ёт соглашениенэ̄пак хансэ̄гыт. Тувыл ка̄сыӈ э̄тпос хо̄т со̄тыра 250 солко̄ви тув пинуӈкве о̄вылтахтэ̄гыт. Са̄в олн ке сэ̄лэ̄гыт, тыгыл са̄внув олн тув ке̄тэ̄гыт. Кол ёвтнэ хо̄тпат тох 1-6 та̄лыт сыс олн акванатуӈкве ве̄рме̄гыт. Ипотечный агентстван нэ̄паканэ тотыяныл, ос ты банкыт олн акванатуӈкве ке патэ̄гыт, ка̄сыӈ э̄тпос округ бюджетныл акв ще̄мья банкын 12 со̄тыра 500 солко̄вил ке̄таве. Акв ще̄мья округ бюджетныл 450 со̄тыра солко̄вил миӈкве ве̄рмаве. Владимир Вешняков ла̄выс: «Э̄лумхо̄лас акванатнэ олнанэ̄тыл ос округ бюджетныл ке̄тнэ нё̄тмилыл (ты 900 со̄тыра солко̄ви) кол ёвтуӈкве ат ве̄рми. Тыи ма̄гсыл та̄н ма̄н палтув ипотекаолн виӈкве ве̄рме̄гыт ос 15-30 та̄лыт сыс ювле ойтхатуӈкве». Ты та̄л хӯрум э̄тпос сыс Ипотечный агентстван 150 э̄лумхо̄лас та̄нки нэ̄паканыл тотсаныл, та̄н халанылт 91 ще̄мья тув хасвес. Та̄н олн тох акванатуӈкве ань о̄вылтахтасыт. Евгений Чепель ла̄выс, ма̄ньлат ще̄мьят, соссаӈ ма̄хум, балокыт о̄лнэ хо̄тпат ос кол ат о̄щнэ ще̄мьят пуссын тув хасхатуӈкве ве̄рме̄гыт. Ты программа 2020 та̄л мус рӯпитаӈкве паты. Кит со̄тыра арыгкем ще̄мья кол ёвтнэ̄ныл ма̄гсыл олныл ты щирыл тах нё̄тавет. Ма̄хум ос китыглахтасыт, ты олныт акванатуӈкве мо̄т банкыт ро̄ви ман а̄ти. Евгений Чепель ос ювле ла̄выс: «Ма̄н ань мо̄т банкыт ёт потыртахтэ̄в тах, ань ты программа хосыт Ханты-Мансийский банк рӯпитаӈкве ка̄сащас. Тыи ма̄гсыл ань туп ты банкыт олн атуӈкве ро̄ви». О̄с акв ва̄рмаль урыл кӯщай хум ла̄выс, ань йильпи са̄ккон щирыл атхойплов та̄л арыгкем округувт о̄лнэ ще̄мьят туп та̄н бюджет олныл нё̄тавет. Мо̄т ма̄ныл ёхтум ос округувт мощща та̄л о̄лнэ ма̄хум ты программан ат хансавет. 1076 2014.05.23. Людмила ТЕТКИНА Ӯс по̄хат ма̄нь ӯльпат ӯнттуве̄сыт. Во̄р ӯргалан ма̄хум ка̄сыӈ та̄л я̄ӈк на̄тнэ э̄тпос 17 хо̄талэ̄т йӣвыт ӯнттэ̄гыт ос ты э̄рнэ тэ̄ла ва̄руӈкве ма̄хум во̄выглэ̄гыт. Тамле рӯпата таи ма̄гсыл ва̄рыглаве, ма̄хум во̄р вос ӯргалэ̄гыт, ма̄вит урыл ул вос ёрувлэ̄гыт. Рущ ла̄тӈыл ты хо̄тал «Всемирный день древонасаждения» намаим о̄лы. Тамле тэ̄ла округ янытыл ка̄сыӈ та̄л ва̄рыглаве. Ты та̄л та хо̄талт кит со̄тыра 500 арыгкем э̄лумхо̄лас 33 со̄тыра арыгкем са̄всыр йӣвыт ӯнттысыт. Ханты-Мансийск ӯст ты акция нилыт та̄л о̄лыс. Ӯс ма̄хум пуссын Байбалак я̄ ляпат о̄лнэ ӯщлахтан ма̄н во̄виньта̄лве̄сыт. Ты та̄л тув 300 э̄лумхо̄лас ульпа йӣвыт ӯнттуӈкве ёхталасыт. А̄тхатам ма̄хум нупыл о̄влэ̄т Мария Кузьминична Волдина, ханты э̄ква, потыртас. Тав ла̄выс, соссаӈ ма̄хум пе̄с та̄гыл во̄р ӯргалэ̄гыт. Во̄р урыл та̄н са̄всыр мо̄йтыт, потрыт ос а̄мщит о̄ньще̄гыт. Потыртаме юипа̄лт тав «Ёшак най» нампа ансамбле ёт э̄ргыс ос йӣквыс. «Лылыӈ со̄юм» нампа студиян ялантан ня̄врамыт ма̄хум э̄лыпа̄лт ма̄ньщи, ханты йӣквыт йӣквсыт. Йӣвыт ӯнттуӈкве кӯщаит о̄с ёхталасыт. Ма̄хум нупыл Пётр Захаров, Ханты-Мансийский район миркол кӯщай хум, потыртас. Тав ла̄выс: «Ма̄н во̄р ӯнттым яныг тэ̄ла ва̄ре̄в, ма̄вит ӯргалэ̄в. Тамле хо̄талыт на̄н тыг матъёмас ёхтысын, ма̄н пуссын аквъёт са̄в йӣвыт тах ӯнттэ̄в». Ӯльпа ӯнттын хо̄талт на̄й ха̄рыгтан машинат тот суссылтаве̄сыт, ня̄врамыт ты утыл сака пӯмщалахтасыт. Тамле суссылтап ос таи ма̄гсыл ва̄рыглаве, ма̄хум во̄рн ялантым а̄ращ ёмащакв лап вос ха̄рыгтэ̄гыт ос во̄рт порс мо̄ри ул вос па̄хвтэ̄гыт. Я̄ӈк на̄тнэ э̄тпост Сургутский ос Советский районыгт во̄р но̄хпе̄ламла̄лыс, ань лапхарыгтавес. Во̄р ӯргалан хо̄тпат йӣвыт ӯнттуӈкве хосат тагыл щё̄питахтасыт. Байбалак я̄ ляпат ма̄ хилсыт ос кит хӯрум та̄л яныт хӯрумса̄т ӯльпат ос мо̄т йӣвыт тув тотсыт. МЧСыт, ЮТЭКыт, студентыт, во̄р ӯргалан ма̄хум, ля̄ххал тотнэ хо̄тпат пуссын аквъёт тот йӣвыт ӯнттысыт. То̄ва ма̄хум ще̄мьяӈ та̄гыл тув ёхталасыт. Ма̄н ма̄ньщи ос ханты редакциявт рӯпитан ма̄хум о̄с тув ялсӯв, ӯльпат ӯнттысӯв. Округ 22 районытт ос ӯсытт ма̄хум йӣвыт ӯнттысыт. Тамле рӯпата природный ресурс департамент ва̄рыглы ос ма̄хум тув во̄выглы. Тот рӯпитан ма̄хум ла̄внэ̄ныл щирыл ты ӯнттум йӣвыт нас тох ат о̄сувлавет акваг ӯральтавет. 10-15 та̄л сыс ты ӯльпат яныг йӣвыл е̄мтэ̄гыт. 1076 2014.05.23. Николай МЕРОВ Яныгпа̄ла хо̄тпанув нё̄тавет. Я̄ӈк натнэ э̄тпост Победа хо̄тал кастыл мирн нё̄тмил ва̄рнэ департамент кӯщай Мария Краско ля̄ххал тотнэ ма̄хум акванатыгласанэ. Ань ветеран хо̄тпат ос хотьют хо̄нтлын накт рӯпитас, та̄н манхурип нё̄тмилыл ва̄равет, тав потыртас. Округувт ань хо̄т со̄тыра ветеран хо̄тпа о̄лы. Та̄н халанылт 441 э̄лумхо̄лас а̄гмыӈмосыӈ хо̄тпа ос хо̄нтлум ма̄хум; 5 со̄тыра 288 яныг хо̄нт порат са̄всыр та̄рвитыӈ рӯпата ва̄рум хо̄тпат; 80 – Ленинград ӯс блокадат о̄лум ма̄хум; 191 – тӯрманколт фашистытн са̄ватым хо̄тпат. Ты коныпал тот порсум хо̄тпат та̄н э̄кваныл ос яныг хо̄нт порат яныгмам ня̄врамыт ань ос пуссын нё̄тавет. Ты ма̄хум 9 май хо̄тал кастыл о̄с олныл ойтве̄сыт. Кӯщай нэ̄ ла̄выс: «Ма̄н мир пусмалтан департамент ёт акванпотыртахтым рӯпитэ̄в. Ты хосыт ветеран хо̄тпат пусмалтахтуӈкве ва̄тихал ке̄тыглыянӯв. Яныгпа̄ла хо̄тпанув са̄внув та̄л вос о̄лсыт, ма̄н яныг рӯпата ва̄ре̄в». Хо̄нтлум ма̄хум янытлан ма̄гыс округ бюджетныл 26 миллион солко̄ви та̄стыглавес. Ка̄сыӈ хо̄тпа премияолныл майвес. О̄с акв ва̄рмаль урыл потыр о̄лыс. Ань ты хо̄тал мус 30 ветеран хо̄тпа йильпи кол иӈ ат о̄ньще̄гыт. Ты ветеранытныл китхуйплов э̄лумхо̄лас ма̄гыс ань федеральный бюджетныл олн майвес. Ты та̄л оигпан мус та̄н колыл ёвтавет тах. Та сыс, иӈ нёлоловхуйплов хо̄тпа кол та̄л о̄лы. Та̄л холнэ мус пуссын колыл вос минувет. Тувыл ос ань округувт 79 ветераныт рӯт та̄л хультсыт. Ты хо̄тпат ма̄гсыл округувт я̄нас колыт ӯнттуве̄сыт. Та̄н тот о̄лэ̄гыт, ле̄ккарытн акваг уральтавет. 1076 2014.05.23. Николай МЕРОВ Но̄хпатум хо̄тал янытлавес. Я̄ӈк на̄тнэ э̄тпос онтоловит хо̄талт Ханты-Мансийск ӯс кант Победа хо̄тал кастыл яныг парад щё̄пита̄лвес. Яныг хо̄нт оигпам па̄сныл ань 69 та̄лыг то̄влыс. Ялпыӈ хо̄тал о̄лум порат сака во̄тыс ос ащирмаӈ о̄лыс. Ос ты а̄ти, ӯс канын са̄в мир ёхталас. Ветеран хо̄тпат рӯтаныл ёт ёхталасыт. Ма̄хманув хумус мӯйлысыт, на̄н ты урыл э̄лаль ловиньтэ̄н. Ялпыӈ хо̄тал лов щё̄ст о̄вылтахтас. Мир э̄лыпалт о̄влэ̄т округ губернатор Наталья Комарова потыртас. Тав ла̄выс: «Ты хо̄тал мир ма̄гыс ща̄гтнэ хо̄тал. Ка̄сыӈ ще̄мьят ма̄хум ёмщакв мӯйлэ̄гыт. Ма̄н э̄лаль ёмщакв о̄лнэ̄в ма̄гыс ма̄хманув ты хо̄нтлысыт. Ты ялпыӈ хо̄талн атхатыгланэ̄в порат ма̄н о̄панув, ащо̄йканув ос рӯт ма̄хманув хоты ма̄т хо̄нтлысыт, акваг номылматыгла̄лэ̄в. Ам хо̄нтлын ма̄ныл ке̄тыглам пищма са̄в ловиньтасум. Владимир Манин Самарово па̄вылныл о̄лыс. Тав тох хансыс: «Ам ва̄тихал по̄слым хури сунсылум, тот э̄квам, а̄гим ос ам, ма̄н пуссын аквъёт лю̄ле̄в. Ты хурим акваг ёт о̄ньщилум, аквтупмат ма̄н аквъёт фашистыт ёт хо̄нтлэ̄в. Ты хури а̄нум сака ӯргалытэ, таима̄гыс иӈ пуста̄гыл о̄лэ̄гум». Мир пуссын ва̄ганыл, ма̄н са̄лтатанув ма̄ янытэ̄т фашистытныл хотсыстамтасаныл. Россият о̄лнэ ветераныт но̄хпатнэ ма̄гыс ма̄к та̄н са̄в ё̄р пинсыт. Таима̄гыс ты ялпыӈ хо̄талт ам хо̄нтлам хо̄тпат пуссын сымыӈыщ янытлыянум. Победа хо̄талыл на̄нан, тыныӈ ма̄хумаквет! » Тав юипалэ̄т ос Ханты-Мансийск ӯс кӯщай Василий Филипенко потыртас. Тав ла̄выс: «Ты ялпыӈ хо̄талт ветерананув янытлан кастыл ща̄гтым мӯйлэ̄в. Ма̄н хо̄нтлум хо̄тпанув сака э̄руптыянӯв. Ты посыӈ хо̄тал кастыл та̄н та̄нкина̄ныл са̄литта̄л хо̄нтлысыт. Ма̄в вуянтан ма̄гыс са̄в хо̄тпа порславес. Ты хо̄тпат пуссын номиянӯв. Ань мир ёмщакв о̄лнэ ма̄гыс та̄н са̄в ё̄р пинсыт, ма̄в вуянтасаныл. Ам ос Ханты-Мансийск ӯст о̄лнэ мир, пуссын ветераныт Победа хо̄талыл янытлыянӯв. Яныг пӯмащипа на̄нан ла̄ве̄в. Рӯтанын ёмщакв вос ӯргалаве̄н, пуста̄гыл э̄лаль о̄лэ̄н». Тувыл ос Виктор Яковлевич Башмаков, Ханты-Мансийск ӯст о̄лнэ ветеран хо̄тпа, мир нупыл потыртас. Тав 1924 та̄лт Ханты-Мансийский район Реполово па̄вылт самын патыс. Хо̄нтлын нак е̄мтыс, тав то̄нт нёлохуйплов та̄лэ иӈ ат то̄влыс. Таима̄гыс рӯпитаӈкве ке̄твес. Колхозт тракторыл рупитым яласас. То̄нт ка̄сыӈ пыг моляхнуве̄г фронтын минуӈкве таӈхыс. Ётылнув та̄ланэ то̄влысыт, та̄ра хо̄нтлын ма̄н тотвес. Та порат ма̄н са̄лтатанув фашистыт ёт та̄кыщ хонтлуӈкве патсыт, акваг ювле ня̄влуӈкве патсаныл. Война э̄лыпа̄лт Виктор Яковлевич па̄выл школат нёлолов класс а̄стлас. Таима̄гыс хо̄нт оигпам э̄лыпа̄лт тав ханищтахтын ма̄н ке̄туӈкве е̄мталавес, ос тав ат ка̄сащас, э̄лаль хо̄нтлуӈкве хультыс. Берлин ӯс мус мощща ве̄рыста хультсас кос, ос о̄йка тув мус тох аты ёхталас. Акв хотты хо̄нтлын ма̄т сакватыма хо̄нтвес ос пӯльницан тотвес. Во̄ртыпал ка̄тэ снарядын та̄кыщ сакватавес, ле̄ккарытн хотвуйвес. Ань тав та па̄сныл туп акв ка̄тыл о̄лы. Хо̄нтлын нак оигпас, Виктор Яковлевич юв ёхтыс. Ё̄рыг о̄лнэ ма̄гыс тав ка̄сыӈ хо̄тал та̄кмалтахтуӈкве патыс. Товтыл касыс ос нас ха̄йтыс. Каснэ ва̄рмалитн акваг во̄виньта̄лаве, са̄в щёс но̄хпатыглас. Тав Ханты-Мансийск ӯс «Почётный гражданин» намыл майвес. Тыт о̄лнэ мирн тав ёмащакв ва̄ве ос янытлаве. Война юипа̄лт тав са̄в та̄л судколт лю̄ль нак ва̄рнэ хо̄тпат сутытым рӯпитас. Ты та̄л ма̄нь таквс э̄тпос 17 хо̄талт тав 90 та̄лэ то̄влы. Яныгпа̄ла хо̄тпакве пуста̄гыл э̄лаль вос о̄лы. Ма̄н таве̄ныл сака янытлахтэ̄в. Потрыт а̄стысыт, ма̄хум акв кум астал лю̄льсыт, порсум мир номылматыгласаныл. Тувыл ос полицият, МЧСт, ма̄ньлат курсантыт ос военный хо̄тпат акв юипа̄лт ряд щирыл нё̄тнэ̄г ё̄мсыт. Ӯс кан хосыт кит хо̄нтлын машинаг минасы̄г. Та юипа̄лт пуссын ма̄хум а̄хвтасыӈ па̄рт тармыл хорамыӈ лӯптат пинсыт. Ты ялпыӈ хо̄талт ӯс кант мир хо̄нтлын писалит сунсыглаӈкве ве̄рмысыт. Тувыл ма̄хум хо̄нтлын нак порат э̄ргыглам э̄ргыт э̄ргысыт, ка̄сащан ма̄хум каша пут а̄рталасыт ос исум ща̄й айсыт. Тот ре̄г ма̄гыс я̄ӈк вина ломт мощ пинумта̄лвес. Я̄тил, ветеранхо̄тпат, На̄й–О̄тыранын вос ӯргалаве̄н. Са̄в та̄л пуста̄гыл э̄лаль о̄лэ̄н. 1076 2014.05.23. Людмила ТЕТКИНА Туи порат сака ре̄гыӈ паты. Александр Тиртока округувт МЧС яныг кӯщай хумыг олы. Яныг вит ёхты ман а̄ти ос туи во̄рыӈ ма̄ на̄йн тэ̄ве ман а̄ти, тав ёмащакв ва̄гтэ. Александр Александрович ла̄вме щирыл, округувт Нижневартовский, Нефтеюганский, Кондинский, Октябрьский, Белоярский, Ханты-Мансийский ос Ха̄льӯс районытт 26 па̄влытт яныг вит ва̄руӈкве ве̄рми. Тот акв со̄тыра 894 кол витын а̄мараӈкве ве̄рмавет. Та колытт 9 со̄тыра 194 э̄лумхо̄лас о̄лы. Яныг вит ке ва̄ри, ты ма̄хум пуссын мо̄т ма̄н ва̄нтлуӈкве нё̄тавет. Ты кастыл округ янытыл о̄лнэ колыт щё̄питаве̄сыт, рущ ла̄тӈыл ла̄вавет – «пункты временного размещения». Александр Александрович ла̄вме щирыл, ты та̄л яӈк на̄тнэ э̄тпос оигпанэ̄тэ ос лӯпта э̄тпос о̄вылтахтанэ̄тэ порат яныг вит ёхтуӈкве ве̄рми. Ань МЧСт рӯпитан ма̄хум ты кастыл мӯсхалыг щё̄питахтасыт, округувт о̄лнэ ма̄хум ул вос пилэ̄гыт. Кӯщай хум во̄р ӯргалан ва̄рмаль урыл таи потыртас. Ты та̄л туи порат сака ре̄гыӈ паты, тыи ма̄гсыл округувт сака са̄в во̄р на̄ин тах тэ̄ве. Во̄р Белоярский ос Ха̄льӯс районыгт янгыщ тот ты на̄ин ё̄саве. Кондинский, Ханты-Мансийский ос Сургутский районытт тарыг яныгман во̄р но̄хпе̄ламлаӈкве ве̄рмаве. Ань МЧСыт 12 со̄тыра 500 на̄й ха̄рыгтан хо̄тпа рӯпиты. Та̄н акв со̄тыра 300 са̄всыр техника о̄ньще̄гыт, на̄й лапхарыгтаӈкве ве̄рме̄гыт. На̄й са̄в лю̄ль ул вос ва̄ри, МЧСт рӯпитан хо̄тпат округувт о̄лнэ мир ёт рӯпитаӈкве ань о̄вылтахтасыт. Ма̄хум потыртавет, во̄рн яласанэ̄ныл а̄ращаныл ёмащакв лап вос харыгтыяныл ос хохса тот мори ул вос па̄хвтэ̄гыт. 1076 2014.05.23. Тамара МЕРОВА Ня̄врамыт пе̄с о̄лупса вос ва̄гыт. Соссаӈ ня̄врамыт ёт рӯпитан хо̄тпат ма̄гыс Ханты-Мансийскат ханищтап ва̄рыглавес. Тамле ва̄рмаль региональный образование институтт рӯпитан ма̄хум щё̄пита̄лсыт. Ос рущ щирыл тав «Новые подходы к реализации проекта «Погружение в этническую среду» намаим о̄лыс. Губернатор ва̄ӈын хумн нё̄тмил ва̄рнэ нэ̄ Людмила Алфёрова о̄влэ̄т акванатхатыглам ма̄хум ёт пащалахтас ос та̄н ва̄рнэ рӯпатаныл янытласанэ. Тав юипа̄лэ̄т Ирина Лисютина, округ янытыл соссаӈ ма̄хум образованияныл ос ма̄ньлат хо̄тпат тэ̄ланыл ёт рӯпитан нэ̄, ты проект щё̄питан ос ва̄рнэ рӯпатаныл урыл потыртас. Тувыл Сургутский район Угут ос Русскинская па̄влыг школагт соссаӈ ма̄хум ня̄врамыт ёт хумус рӯпитэ̄гыт, манхурип пӯмащ тэ̄лат та̄н ва̄рыгласыт, ты о̄вылтыт потыртасыт. Кит хо̄тал сыс ёхталам ма̄хум ӯст о̄лнэ музеитын тотыглаве̄сыт. Тот «Торум маа» музейт ос Г. С. Райшев тав мастерскойколэ̄т, соссаӈ ма̄хум о̄лупсаныл ос пе̄с наканыл суссылтаве̄сыт. Тувыл «Лылыӈ союм» этноцентрын ялсыт, тот ма̄ньщи ос ханты культура, ла̄тыӈ ханищтан ня̄врамыт ёт потыртасыт. Ты ма̄хум та̄нки халанылт акваннё̄тхатым э̄лаль рӯпитаӈкве ла̄вхатсыт. На̄н матыр тэ̄лат пӯмщалаӈкве ос та̄рапаттуӈкве таӈхегы̄н ке, ищхӣпыӈ ут хосыт ugutschool. ru манос russhooli. ru ло̄псыт са̄всыр потрыт, ля̄ххалыт ос хурит хо̄нтуӈкве ве̄рмегы̄н. 1076 2014.05.23. Тамара МЕРОВА Кӯщаит мир ёт са̄внув вос рӯпитэ̄гыт. Округ Общественный палатат рӯпитан кӯщаит акванатхатыгласыт ос та̄нки ва̄рнэ тэ̄ланыл о̄вылтыт потыртасыт. Любовь Чистова, Общественный палатат кӯщаиг о̄лнэ нэ̄, ла̄выс, ань та̄н щиранылт са̄всыр департаментыт манос службат акв тамле 30 общественный советыт ва̄рве̄сыт ос тув 265 э̄лумхо̄лас рӯпитаӈкве пе̄рияве̄сыт. Ань ты щё̄питан ва̄рмалит па̄сыл кит та̄лыг ты е̄мтыс, туп то̄ват торыӈыщ аты рӯпитасыт. То̄ва ма̄т сапра̄ни ва̄рнэ ма̄гыс ма̄хум о̄выл щёс акванатыглаве̄сыт, тот совет тармыл кӯщай хо̄тпа пе̄риясыт ос тувыл рӯпатаныл та оигпас. Тот рӯпитан ма̄хум та̄рвитыӈ тэ̄лат ёмщакв ва̄рнэ ос та̄нанылн нё̄тнэ ма̄гыс ва̄рве̄сыт кос. Советыт та̄рвит ва̄рмалит ёмащакв та̄рапаттуӈкве вос нё̄тэ̄гыт ос ётыл са̄кконыт мӯсхалыг хаснэ̄ныл ма̄гыс ма̄к ла̄тыӈ хӯлтуӈкве вос ве̄рмысыт. Тамле тэ̄лат совет тармыл рӯпитан хо̄тпат акваг уральтым вос о̄ньщияныл. Тувыл та̄н Правительство кӯщаитн э̄лаль ла̄тыӈ вос тотэ̄гыт. Ты кӯщаит са̄всыр ва̄рмалит та̄рапаттым порат са̄кконыт о̄с торгамтым щё̄питаӈкве патыяныл. Губернатор ва̄ӈыг хум Андрей Филатов ты о̄вылтыт ла̄выс, советын пе̄риян хо̄тпат округ ма̄хумн нё̄тнэ ма̄гыс ве̄щкатыг вос рӯпитэ̄гыт. Ма̄хум хӯлтыглан ла̄тӈанылн о̄с вос хӯнтамлэ̄гыт. Та щирыл акваннё̄тхатым та̄н пуссын рӯпатаныл ёмащакв ос ма̄кыг ва̄рияныл. Общественный ос внешний связь департаментыт кӯщаиг о̄лнэ хум Илья Верховский потыртас: «Советыт пуӈктотнэ хо̄тпат ос та̄нанылн нё̄тмил ва̄рнэ хо̄тпат та̄нки са̄кконыт, экономика ля̄ххалыт пуссын ёмщаквег о̄с вос ва̄ганыл. Тэ̄лат урыл хо̄та̄ти номтыӈыг потыртаӈкве вос ха̄ссыт. Тувыл вос ва̄гыт, ты рӯпатаныл урыл та̄н мо̄т кӯщаитн уральтаӈкве ос китыглаӈкве ве̄рмавет. Тамле уральтан накыт кастыл общественный советыт рӯпитаӈкве ка̄саще̄гыт ке, вос э̄лаль рӯпитым хультэ̄гыт. Тувыл ма̄хум та̄нанылн агтуӈкв патэ̄гыт, та̄нки тэ̄ланыл ма̄гыс та̄н палтаныл ля̄льт сымыӈыщ ювыт. Ос ёмас тэ̄лат ва̄рнэ̄ныл ма̄гыс янытлаӈкве патавет». Ирина Астапенко, гражданский служба ос кадровый политика тэ̄лат ва̄ӈын кӯщай нэ̄, са̄всыр ханищтапыт о̄вылтыт потыртас. Кӯщаиг воратан хо̄тпат ма̄хум ёт номтыӈыщ ос сымыӈыщ рӯпитан ма̄гыс ханищтаӈкве э̄ре̄гыт. Таима̄гыс та̄н сыресыр касылыл ос ханищтапыл щё̄питавет, таит юипа̄лт экзаменыл ва̄равет. ЖКХат ос энергетика рӯпитан колыт общественный совет мо̄лты та̄лт ва̄рсыт. Тот хо̄т хо̄тпат акванатхатыглэ̄гыт ос маныр та̄рвит тэ̄лат ёмщаквег ва̄рнэ щирыл аквъёт номсахтэ̄гыт. Ты о̄вылтыт ла̄тыӈ Виктор Нанака ла̄выс, ты колт кӯщаиг о̄лы. Та̄н Общественный советаныл та̄л сыс 9 сапра̄ни ва̄рыглас ос са̄кконыт щё̄питан порат э̄рнэ торыг та̄н ла̄тыӈ ва̄рсыт. 1076 2014.05.23. Александр ВЬЮТКИН Ма̄ньлат ма̄хум ханищтан тэ̄ла. Округ мирколт соссаӈ мир ёт рӯпитан Ассамблея колт ма̄нти ща̄нь ла̄тӈанув э̄лаль тотнэ щирыл сапра̄ни о̄лыс. Тот о̄лум кӯщаянув ос ма̄хманув халт щар янгыг Наталья Западнова ос Татьяна Гоголева о̄лсы̄г. Пуссын аквъёт налыман нупыл атахтем хо̄тпа тув атхатыглас. Тот ща̄нь ла̄тӈагув э̄лаль тотнэ урыл, тэ̄н ул вос ёрувлахтэ̄г ос ма̄ньлат ма̄хум ханищтан ва̄рмаль урыл потрув о̄лыс. О̄влэ̄т Татьяна Степановна ма̄ньщи ос ханты ня̄врамыт урыл такви щё̄питам докладпотре ловиньтастэ. Тав юипа̄лэ̄т округ янытыл ханищтап щирыл рӯпитан Департамент ва̄ӈын кӯщаиг о̄лнэ нэ̄ Валерия Кугаевская потыртас. Валерия Александровна округ янытыл э̄лаль ханищтахтын соссаӈ ма̄ньлат ма̄хум урыл докладэ о̄лыс: «Округувт онтоловхойплов ханты ос ма̄ньщи ня̄врам рӯпатаныл пе̄риян щирыл ханищтахтэ̄гыт. Пуссын аквъёт 919 соссаӈ ма̄хум халт 226 ня̄врам высший образование щирыл рӯпитаӈкв таӈхе̄гыт. Мо̄таныт ос мо̄т са̄всыр рӯпата щирыл ханищтавет. Са̄выӈпа̄лэ соссаӈ ма̄ньлат хо̄тпат Ханты-Мансийск ӯст ханищтахтэ̄гыт. Мо̄лты йильпи са̄ккон хасвес. Ань онтолов класс а̄стлын ня̄врам аттестатт хансым оценканэ щирыл колледжит ханищтахтуӈкв ве̄рми. Таве̄н ЕГЭ экзамен тот ат э̄рмыглы. Ты та̄л таи ма̄гсыл са̄в ня̄врам онтолов класс юипа̄лт пе̄риян рӯпата щирыл э̄лаль ханищтахтуӈкв номсэ̄гыт. Тыи ма̄гыс а̄гитытнпыгытн колледжин э̄рнэ нэ̄паканыл та̄нтина̄нылн атуӈкв э̄ре̄гыт». 1076 2014.05.23. Тамара МЕРОВА ЕГЭ урыл потыртасыт. Лилия Максимова ханищтап ос ма̄ньлат ма̄хум тэ̄лат округ департаментыт кӯщай ва̄ӈыг нэ̄г рӯпиты. Мо̄лалнув тав ЕГЭ ва̄рмалит школат хумус минэ̄гыт, та о̄вылтыт мирн потыртас. Ты та̄л округ янытыл 11 со̄тыра арыгкем а̄гитпыгыт школа а̄стланэ̄ныл щирыл ловиньтахтэ̄гыт. Та̄наныл уральтан ос экзаменыт минэ ма̄гыс округт 124 ханищтан колыт сыресыр ищхӣпыӈ утыл ва̄рве̄сыт. Тувыл 974 экзамен пирмайтан колнаканыл пуссын кит видеокамера о̄ньще̄гыт. Ня̄врамыт тот по̄х ма̄ныл нэ̄матыр ул вос ловиньтэ̄гыт, та̄н э̄лыпа̄лныл ос сыспа̄лныл уральтаӈкве патавет. Ты коныпал то̄ва ща̄ньа̄щит ня̄врамыт нас уральта̄лыглаӈкве во̄вавет. Экзамен минэ порат а̄гитпыгыт колнакн паспортаныл щирыл та̄ртавет, ос ёт туп гелевый хаснэйӣв, линейка, транспортир вос выгыт. То̄ва экзаменыт калькуляторыт э̄рмыглэ̄гыт ке, ня̄врамыт тах ла̄вавет. Тувыл а̄гмыӈ ня̄врамыт тэ̄рпияныл ёт тотуӈкве ве̄рмияныл. Лилия Владимировна ща̄нитна̄щитн ла̄выс: «На̄нан ос ня̄враманын тамле экзамен порат пилуӈкве щар ат э̄ри. Тот ня̄врамыт школат аквхуйплов та̄л сыс ханищтан номтаныл уральтавет. Та̄н щар нэ̄матыр ловиньтатта̄л, ханищтатта̄л хунь о̄лэ̄гыт. Урокыт порат та̄н са̄всыр контрольный рӯпатат хансэ̄гыт ос оценкал пинавет. Та̄н туп сытмыл нэ̄пакныл манос мо̄т ищхӣпыӈ утныл ул вос хассыт. Комиссиян хо̄нтавет ке, экзаменыл сысы ня̄влавет ос ты та̄л воссыг тув ат та̄ртавет, мо̄тыт та̄лн хультуптавет. Та щирыл ты та̄лт нэ̄мхотталь э̄лаль ханищтахтуӈкве ат вивет». Школа а̄стлам ка̄сыӈ ня̄врамн ЕГЭ щирыл рущ ла̄тыӈ ос математика хансуӈкве э̄ри. Рособрнадзор ма̄т рӯпитан ма̄хум таи хӯлтэ̄гыт, рущ ла̄тыӈ экзамен ёмщакв минэ ма̄гыс 36 балл ловиньтахты, математика ма̄гыс 24 балл. Хо̄тпа тыгыл мощща балл о̄ньщи ке, тав экзаменэ лю̄лиг ловиньтаве ос мо̄тыт щёс сдавайтаӈкве ла̄ваве. Ты экзаменыг коныпал ЕГЭ щирыл ня̄врамыт мо̄т урокыт та̄нки пе̄рие̄гыт. Ты та̄л са̄выӈпа̄лэ а̄гирищитпыгрищит обществознание экзаменын минэ̄гыт, мо̄таныт физикан. Ня̄врамыт э̄лаль хоталь ханищтахтуӈкве минэ̄гыт, тув э̄рмыглан урок та пе̄рие̄гыт. Тувыл та оценканыл щирыл хотты университетн манос институтн вивет ке, экзаменыл тот ат ва̄равет. Ты кастыл тай ЕГЭ хансуӈкве ёмасыг о̄лы. Са̄ртын май университетт манос институтт э̄лаль ханищтахтын ма̄гыс экзамен о̄с я̄нас хассыт. Ань туп нэ̄пакыт акванатуӈкве э̄ри ос аквкит ма̄н ке̄туӈкве ро̄ви, тувыл ювлела̄внэ ла̄тыӈ ӯруӈкве э̄ри. 1076 2014.05.23. Тамара МЕРОВА Кит районыгныл ке̄тым ля̄ххалыг. Хо̄нтаӈ район кӯщай хум Алексей Поздеев Супра ма̄нь па̄выл уральтаӈкве ялыс ос тот о̄лнэ ма̄хум тэ̄ланыл та̄рапаттыс. Ань ты па̄вылквет туп лов арыгкем хо̄тпа о̄лы ос та̄н Мулымъя мирколн ловиньтавет. Алексей Николаевич Пехтышев э̄кваго̄йкаг ёт тот хо̄нтхатыглас. Тэ̄н потыртасы̄г, па̄вылт ма̄хум вит амартан во̄ӈханыл ёмщакв щё̄питаӈкве э̄ри. Ос ӯсхуланыл хосыт на̄йпос тотнэ а̄ӈквалыт ва̄рнувет ке, щар ёмас о̄лнув. Тувыл Супра ос Шаим па̄влыгт то̄ва колыт, ма̄ ло̄мтыт э̄рнэ нэ̄пакын ат хасве̄сыт. Таима̄гыс пе̄с колыт ёмащакв щё̄питаӈкве ат ве̄рмавет, ма̄хум олныл ат нё̄тавет. Ле̄ккарыт та̄н палтаныл щар ат ёхталэ̄гыт. Ань ма̄хум нэ̄пакыт та̄нки ва̄рмаляныл урыл хассыт, нё̄тмил во̄всыт ос хотты накт ле̄ккарыл вос ке̄тыглавет. Пуссын ты ва̄рмалит Алексей Поздеев акваг уральтаӈкве патыянэ. Ха̄льӯс районт о̄лнэ ма̄хум «Спасти и сохранить» нампа экологический акцият са̄всыр тэ̄лат ва̄руӈкве ла̄вхатсыт. Та̄н та̄нки па̄вланылт ос ӯсыт порс акванатнэ хо̄талыт ва̄ре̄гыт тах. Во̄р ляпа ма̄наныл ос я̄ ва̄таныл о̄с сыстамтыяныл. Тамле тэ̄лат рӯпитан предприятият пуссын ва̄руӈкве патэ̄гыт. Тувыл ка̄сащан ка̄сыӈ хо̄тпа йӣвыт ӯнттуӈкве ве̄рми. Район янытыл па̄влыт «Чистый посёлок» касылт тах касэ̄гыт. Но̄хпатум па̄влыт олннё̄тмилыл мӯйлуптавет. Ня̄врамыт ма̄гыс сыресыр касылыт ос суссылтапыт ва̄равет. А̄гирищитпыгрищит «Красная книга» глазами детей» нампа касылн катыл по̄слум хурияныл вос ке̄тыяныл. Мо̄таныт «Югра таёжная» касылн фотоаппаратыл по̄слым хурит вос мыгыт. Ты ля̄ххалыг ма̄ньщи ла̄тӈыг Тамара МЕРОВАн толмащлавесы̄г. 1076 2014.05.23. Александр ВЬЮТКИН Ма̄хум мо̄т мирыт ва̄ӈкв ханищтавет. Югорский университет колт ханищтахтын ма̄ньлат ма̄хум ма̄гыс научнопрактический конференция о̄лыс. Ка̄сыӈ порат ты ханищтап ханты ос ма̄ньщи студентыт ёт рӯпитан ма̄ньщи э̄ква Диана Васильевна Герасимова ва̄рыглы. «Этножурналистика» нампа кафедрат ханищтахтын ма̄ньлат ма̄хум ма̄гсыл ты конференция ва̄рим о̄лыс. Диана Васильевна та̄нанылн ань ла̄выс: «Ма̄н округувт са̄всыр нэ̄пакыт та̄ра ос телевизор хосыт программат ва̄равет. Ам то̄ва порат телевизор хосыт хоты ма̄хум урыл суссылтаве, щар ат торгамтэ̄гум. То̄ванакт тох о̄лыглы, ханты урыл кос хансэ̄гыт ма̄ньщи хурит тув ва̄равет. Хумус э̄ри, та̄ра ат паттыяныл, ля̄ххалт аквантэ̄лыгтым номтаныл мирн тох та тотыяныл. Са̄в студент Россия янытыл са̄всыр ма̄ныл тыт ханищтахты. Таи ма̄гсыл ты ма̄н журналистыг ханищтахтын студентанув ёт соссаӈ мирув о̄лупса ханищтаӈкв о̄вылтасӯв. Ты та̄л «этножурналистика» нампа курс титыт та̄лэ ты то̄влы. Акв та̄л сыс тит щёс тамле семинар ва̄рыглэ̄в. Ня̄врамытын са̄всыр мир о̄лупсаныл ханищтаӈкв пӯмщиг о̄лы. Ханищтахтынэ̄ныл сыс матыр ат торгамтэ̄гыт те, та̄н та̄нти ам палтум ёхталэ̄гыт, титыглахтэ̄гыт. Маныр та̄нанылн э̄ри, ёмщакв хӯлтэ̄гум». 1076 2014.05.23. Маргарита Ковалюк Валентина Васильева Во̄сыӈтӯрныл те̄тым потыр. Ха̄льӯс район Во̄сыӈтур па̄вылт о̄лнэ нэ̄ Маргарита Витальевна Ковалюк (Шесталова) ма̄н редакциявн пищма те̄тыс. Тав мирколт рӯпиты, ань тав па̄влыӈ ма̄хманэ урыл хансыс, ялпыӈ хо̄талыт порат хумус та̄н мӯйлысыт. «Ӯринэ̄ква хо̄тал» та̄н хумус янытласаныл, ты урыл тав хансум пищматэ ловиньтэлы̄н. Ка̄сыӈ тӯя соссаӈ ма̄хманув ӯринэ̄ква ёхтын кастыл щё̄питахтэ̄гыт, ялпыӈ хо̄тал ва̄ре̄гыт. Ты та̄л ювле хультум э̄тпос нилыт хо̄талэ̄т ма̄н культура колувт рӯпитан хо̄тпат па̄влыӈ ма̄хманув акванатыгласаныл. Та хо̄тал кон мощ ащирмаӈ о̄лыс. Ос ня̄врамыт, яныгхо̄тпат пуссын тув ёхталасыт. Ня̄врамыт ос хум хо̄тпат ма̄гыс са̄всыр касылыт щё̄пита̄лве̄сыт, та̄н са̄грап па̄хвтысыт, сун ӯлтта поргысыт, йӣв ла̄кквахартсыт. Людмила Савельевна Хозумова а̄гирищит ёт ма̄ньщи йӣквыт йӣквыс. Тав Ло̄пмус па̄вылныл о̄лы, ма̄ньщи ла̄тӈыл потырты. Ань ня̄врамыт ёт рӯпиты, та̄наныл сак хартуӈкв, йӣквуӈкв ханищтыянэ. Клуб колт рӯпитанэ̄тэ ма̄гсыл ань олныл ат ойтаве, моще̄рт э̄рыӈ тав ойтуӈкв патаве. Ирина Никифоровна Муравьёва (а̄ги о̄парищ наме Гришкина) «Ӯринэ̄ква хо̄тал» урыл мирн потыртас, соссаӈ ма̄хум хумус пӯрлахтэ̄гыт. Тав оматэ Мария Тимофеевна Октябрьский районныл о̄лыс, а̄ще Никифор Петрович Сюмин хотыл А̄с я̄ е̄рныл о̄лыс. Такви Ирина Тобольск ӯст ханищтахтас, ань ня̄врамыт рущ йӣквытн ханищтыянэ. Анна Дементьевна Канева (такви о̄парищ наме Шесталова) о̄с ма̄ньщи яныгпа̄ла хо̄тпа. Ялпыӈ хо̄тал о̄лум порат тав нэ̄ хо̄тпат ос ня̄врамыт ёт арсын йӣвн нэ̄гсалас. Пӯрлахтаманыл юипа̄лт мӯйлын ма̄хум пуссын хӯл исмитыл айтве̄сыт, соламатыл тыттуве̄сыт. Хӯлыӈ ня̄нь ёт исум ща̄й айсыт. Тох ты ма̄н ёмащакв мӯйлысӯв. Маргарита Ковалюк хансум потре ма̄ньщи ла̄тӈыл Валентина Васильева хансыстэ Хурит па̄влыӈ ма̄хум ос ня̄врамыт по̄слым о̄лэ̄гыт. 1076 2014.05.23. Николай МЕРОВ Тэ̄нут ма̄нки о̄лнэ ма̄вт ва̄ре̄в. Ань округувт АПК (агропромышленный комплекс) э̄лаль тотнэ ма̄гыс са̄в рӯпата ва̄раве, кӯщаиг тот Евгений Платонов рӯпиты. 2013 та̄лт та̄н хумус рӯпитасыт, тав ты урыл потыртас. Юио̄выл та̄лытт ты ва̄рмаль акваг са̄вмалтаӈкве патвес. Тыи ма̄гыс са̄в олн та̄ставе. Та̄нки рӯпата ва̄рнэ хо̄тпат са̄внув ӯйхул о̄ньщуӈкве патсыт. Ма̄хум мисыт, пӯрщит ос щищкуре̄кыт янмалтэ̄гыт. Ань округувт о̄лнэ ла̄пкатт са̄выӈпа̄лэ ма̄нки ва̄рум тэ̄нутанув тыналавет. Мо̄лты та̄л налыман нупыл нёлолов са̄вит пе̄рма пӯсвес. Тот рӯпитан хо̄тпат нёлолов со̄тыра арыгтем тонна нё̄выль, хӯрумхуйплов арыг тонна щаквит тыналан ма̄гыс та̄стысыт. Щар са̄внув ща̄квит ос нё̄выль Ханты-Мансийский, Нефтеюганский, Сургутский ос Нижневартовский районытт рӯпитан пе̄рмат мыгыт. Округувт ань са̄в нэ̄щищкуре̄к янмалтаве, та̄н са̄в муӈи тотэ̄гыт. Сэ̄мыл о̄хсар янмалтаӈкве патвес. Ты ӯит ка̄сыӈ та̄лныл акваг са̄вме̄гыт. Са̄лыт о̄с са̄вмалтавет. Ань ты накт округувт ва̄т нупыл хӯрум со̄тыра арыгтем са̄лы е̄мтыс. Ань та̄л котиль э̄тпос мус Саранпа̄выл совхозт аквхуйплов со̄тыра атса̄т арыгкем са̄лы ань ӯраве. Белоярский районт ОАО «Касум павыл оленеводческий компаният» са̄т со̄тыра са̄лы о̄лы. Ханты-Мансийский район Кышик па̄выл «Вар» нампа общинат хӯрумса̄ткем са̄лы янмалтаве. Касым па̄выл «Осетные» нампа соссаӈ ма̄хум общинат китса̄т арыг са̄лы о̄ньщаве. Кышик па̄выл «Ай-Тупос» нампа общинат ос хо̄тхуйплов са̄лы о̄лы. Ты общинат соссаӈ хо̄тпат во̄раим, хӯл алыщлым ос во̄рт са̄всыр пил, ла̄хыс атым рӯпитэ̄гыт. Мо̄лты та̄л сыс са̄лыӈ ма̄хум пуссын аквъёт кит со̄тыра атпан са̄вит тонна нё̄выль тыналан ма̄гыс ва̄рсыт. Тыгыл э̄лаль округувт совхоз са̄лыт акваг са̄вмалтаӈкве тах патавет. Та̄нки са̄лыяныл янмалтан хо̄тпа о̄с са̄в о̄лы. Округувт пуссын са̄лыт акванловиньтаӈкве ке, налыман нупыл нёлолов со̄тыра са̄вит са̄лы пуӈк аня е̄мты. Ты коныпал ос мо̄т са̄всыр э̄рнэ рӯпата ва̄раве. Ты сака ёмас ва̄рмаль, тэ̄нут ма̄нки о̄лнэ ма̄вт ва̄ре̄в. 1076 2014.05.23. Валентина УЗЕЛЬ Ле̄ккарыг рӯпитам о̄йка. Андрей Алексеевич Головин 1936 та̄лт Саранпа̄вылт самын патыс. Тав саран хум, ань Ха̄льӯст о̄лы. Оматэ Фёкла Фёдоровна «Сталин» нампа колхозт рӯпитас, а̄ще Алексей Степанович во̄руй совыт пирмайтас. Алексей Степанович 1941 та̄лт хо̄нтлын ма̄н вуйвес, 1943 та̄лт июль э̄тпост Орловский областьт порслувес. Ща̄няныл хӯл алыщлым сака по̄льтахтас, аквта та̄л октябрь э̄тпост а̄тимыг е̄мтыс. Андрей Устинья увщитэ̄нтыл тэ̄нттетэ̄н хультсы̄г. То̄нт тав хо̄т та̄лэ то̄влыс, Устинья мощ яныгнуве̄г о̄лыс. Пыг 1944 та̄лт са̄т та̄лэ то̄влыс, школан та минас. О̄влэ̄т Саранпа̄выл школат ханищтахтас, тувыл Кульпаст, Ло̄пмуст. Школа Кульпаст а̄стластэ. Та та̄рвитыӈ пора урыл Андрей Алексеевич тох потыртас: «Ме̄н увщиме̄нтыл ме̄нттеме̄н хультсуме̄н, нэ̄мхотьют ме̄наме̄н ат нё̄тыс. Тав рӯпитаӈкв патыс, Нё̄рн са̄лыт ловиньтаӈкв те̄твес. Ам юн амттем хультсум. Мисув рӯтанувн та̄ра алвес, нё̄вле ла̄кквамайвес. На̄йванум холасыт, кӯрум па̄лтыглаӈкв э̄ри. Ам конторан на̄ив виӈкв минасум, тот та̄ра та пувве̄сум, ань манрыг ат титыглахтасум, виӈкв ро̄ви ман а̄ти. Мо̄тыт хо̄тал на̄йвыл тотве̄сум. То̄нт Кульпас школат Алексей Васильевич Голошубин рӯпитас, тав ам увщим тув рӯпитаӈкв во̄выстэ. 1945 та̄лт тув та минасме̄н. Ам школат ханищтахтасум, увщим рӯпитас. Школа а̄стламум юипа̄лт ам Ханты-Мансийск ӯсн фельдшерскоакушерский школан (ФАШ) ханищтахтуӈкв минасум. Акв та̄л ат ханищтахтасум, ос олн та̄л о̄луӈкве та̄рвитыӈ, рӯпитаӈкв та патсум. То̄нт Мария Ивановна Воскресенская кӯщаиг тот о̄лыс, тав а̄нумн э̄лаль ханищтахтуӈкв ювле во̄выстэ. Та та̄лытт амнистия щирыл сака са̄в хо̄тпа турманколныл юв та̄ртве̄сыт. Ӯст то̄нт ты са̄в о̄выл ва̄рвес, ма̄хум пилым о̄лсыт. Колыт но̄х ул вос пе̄ламтавет, ма̄н э̄ти титхӯрум хо̄тпал ханищтан колув уральтаӈкв патыслӯв. Акв э̄ти лув о̄щнэ кол но̄хпе̄ламтавес, тот леспромхоз лувыт о̄щве̄сыт. Са̄в лув тот порсыс. Ам ФАШт ёмащакв ханищтахтасум, лю̄ль оценкал те тӯщтаве̄в, стипендияолныл ат майлувесӯв. 1955 та̄лт та школа а̄стлыслум. Устрем па̄выл пӯльницан рӯпитаӈкв те̄тве̄сум, тот туп хӯрум э̄тпос рӯпитасум, ос армиян та вуйве̄сум. Юв ёхтысум, Ха̄льӯс район пӯльница кӯщай а̄нумн ла̄выс, Тугияны па̄вылт акв та̄л сыс хӯрум хо̄тпа по̄хан те̄тве̄сыт, пуссын вина аюӈкв тӯлтхатасыт. Ам тув вос минэ̄гум. Ам акв та̄лтем тот рӯпитасум, номсахтуӈкв патсум, ты па̄вылт э̄лаль те хультэ̄гум, о̄с аквтох вина айнэ хо̄тпаг е̄мтэ̄гум. Мо̄т ма̄н во̄вхатуӈкв патсум. Во̄сыӈтур па̄вылн те̄тве̄сум, тот хӯрум та̄л рӯпитасум. 1959 та̄лт нэ̄ тотсум, э̄квам Нина Фёдоровна. Тав ща̄не щирыл Ользинаг о̄лы, та̄н А̄с ма̄хум. Таве Тугияны па̄вылныл ёт во̄выслум. То̄нт тав школа ущ а̄стлыс. Ме̄н аквъёт са̄в та̄л о̄лыме̄н. Хӯрум ня̄врам о̄ньщиме̄н, Валентина яныг а̄гиме̄н Ха̄льӯс пӯльницат рӯпиты, котиль а̄гиме̄н Татьяна Хулюмсунт па̄вылт о̄лы, школат рӯпиты, пыгме̄н Алексей Тюмень ӯст полицият майор нам о̄ньщи. Ам пӯльницат ня̄врам самын патнэ ма̄т рӯпитасум. Титыт а̄гим самын патнэ порат сака та̄рвитыӈ о̄лыс, ма̄нь ле̄ккар нэ̄в хотрохтыс, юв ояс. Э̄квам ёт амти хультсум, а̄гиме̄н самын патыс, ат лылты. Ам ты рӯпата ва̄глум, а̄гим па̄пе̄т титхӯрум щёс ю̄ныгтаслум, тав та лю̄ньщалтахтас. Э̄квам ос ам нупылум ро̄ӈхи, ня̄врам манрыг ра̄тылум. Ам ювле ла̄ве̄гум, ам таве̄н ат те нё̄тнувум, а̄гиме̄н ань ат о̄лнув. Районув янытыл ам са̄в ня̄врамн самын патуӈкв нё̄тсум, та̄наныл пуссын номиянум, ва̄ганум. Хо̄т ос хунь самын патсыт, номе̄гум. Акв хотты та̄лт ам Тюмень ӯсн ялсум, тот Алексей Васильевич Голошубин ёт хо̄нтхатыгласум. Тав а̄нумн потыртас, репрессия та̄лыт порат таве винэ ма̄гсыл Саранпа̄вылн Ха̄льӯсныл НКВД ма̄хум ёхталасыт. Ам а̄тям таве виӈкв ат та̄ртыстэ, Качанов о̄йка тав пе̄нтсылэ пуввес, хотталь тотвес. Тамле ты пилыщмаӈ порат та̄н о̄лсыт. Пенсият о̄лнэ̄м сыс ловиньтан нэ̄пакыт хансуӈкв патсум. О̄выл нэ̄пакум «История здравоохранения Березовского района» хосат та̄ртвес, то̄нт районный пӯльницав 165 та̄лэ то̄влыс. Титыт нэ̄пакум «Березовской больнице 200 лет» намаим о̄лы. Пӯльницат рӯпитам ка̄сыӈ хо̄тпа наме тот хансым о̄лы, пе̄с хурит тув по̄слуве̄сыт. Ты нэ̄пакыг пӯмыщ ловиньтаӈкве». Ма̄н Ха̄льӯс районувт Андрей Алексеевич са̄в хо̄тпан ва̄ве, тав ань ва̄тахтем та̄л пенсият о̄лы. Пуста̄гыл э̄лаль вос о̄лы, ляпа рӯтанэн акваг вос уральтаве, То̄румн вос ӯргалаве. 1076 2014.05.23. Светлана РОМБАНДЕЕВА Са̄в ня̄врамыӈ нэ̄. Хурит ма̄ньщи нэ̄ Надежда Калистратовна Филиппова по̄слым о̄лы. Ха̄льӯс район Сӯкыръя па̄вылн ялмум порат ам школан щалтсасум, тав ётэ хо̄нтхатыгласум. Надежда Калистратовна тэ̄нут па̄йтым тот са̄в та̄л рӯпиты. Ме̄н потрамасме̄н, на̄н ань тав потре ловиньтэлы̄н. – Тыт ам школа ӯнттын па̄сыл рӯпитэ̄гум, садикын ос школан ялантан ня̄врамыт ма̄гыс тэ̄нут па̄йтэ̄гум. Ат ня̄врам о̄ньще̄гум. Яныг пыгум ва̄т нупыл китыт та̄лэ то̄влыс, наме Андрей. Ханты-Мансийск ӯст училища а̄стлас, ань Ха̄льӯст рӯпиты. Хӯрманум школат ханищтахтэ̄гыт Яна а̄гим онтолов классыт, Федя пыгум хо̄тыт классыт ос Максимум нилыт классыт. Щар ма̄нь пыгум Антошам нила та̄лэ, садикын яланты. О̄йкам о̄с ты школат кӯр па̄лтыглым рӯпиты. Ам ще̄мьям ёт Сӯкыръя па̄вылт о̄лэ̄гум, о̄йкаме̄нтыл кол ӯнттысаме̄н. – Наӈ хо̄т яныгмасын? – Саранпа̄вылт яныгмасум. А̄тям Калистрат Петрович Хозумов, Хо̄рыӈпа̄выл хум. О̄лме палыт совхозт рӯпитас. Омам Нина Афанасьевна, а̄ги о̄парищ наме Качанова, Ха̄ӈла па̄вылт самын патыс. Ма̄н хо̄т ня̄врам о̄лсӯв. Яныг ка̄ӈкум Петр а̄тимыг емтыс. Альбина увщим Украина хо̄н ма̄т о̄лы, Лена увщим Я̄сунт па̄вылт о̄лы. Надежда тамле ка̄ркам, потрыӈ ма̄ньщи нэ̄кве. Ты я̄тил хо̄тпав ще̄мьятэ ёт пуста̄гыл вос о̄лы, На̄янылн-О̄тыранылн вос ӯргалавет! 1076 2014.05.23. Светлана РОМБАНДЕЕВА Са̄лы ӯрнэ хум. Ханты-Мансийск ӯст ӯринэ̄ква янытлан хо̄талт Иртыш я̄ тармыл ёсал каснэ ва̄рмаль ва̄рыглавес. Сургутский район Русскинская па̄вылныл ханты ма̄хум ёхталасыт э̄кват, о̄йкат, ма̄ньлат а̄гипыгыт. Пуссын та̄нти маснутанылт масхатым о̄лсыт. Ё̄рнкол тӯщталасыт, та по̄хат лю̄ляхо̄лсыт, ё̄ӈхатахтыгласыт. Рущитн ос мо̄т хо̄н мирн маттем та пӯмщалаве̄сыт, та̄н ётаныл по̄слахтасыт. Ам акв хум ёт потрамасум, наме Дмитрий Васильевич Тэ̄влин. Ань ме̄н потруме̄н э̄лаль ловиньтэлы̄н. – Дмитрий Васильевич, Ханты-Мансийск ӯст мӯйлуӈкве наӈын мӯсты? – Тыт атхунь ёмас, нё̄тнэ ма̄кве, ма̄хум ма̄н нуплув сымыӈыщ сунсэ̄гыт, маснутанув тай акваг та пӯмщалавет. Тыг ма̄н «Лукойл» нефтяная компания па̄лыл автобусыл тотвесӯв, ва̄т нупыл ат хо̄тпа ёхтысӯв. Ёсал ма̄н онтолов хо̄тпа кассӯв. – Наӈ хо̄т самын патсын? – Ам Ямал ма̄т самын патсум. Ща̄нягума̄щагум хосат а̄тимыг е̄мтсы̄г, китхуйплов та̄лум порат савалапыг хультсум. Кит каӈк ос увщи о̄ньще̄гум, та̄н ётаныл яныгмасум. Рӯт тай са̄в о̄ньще̄в. Ма̄н ань ще̄мьянув ёт пуссын во̄рт о̄лэ̄в. Э̄квам наме Наталя, тав о̄с ханты нэ̄, ме̄н хӯрум ня̄врам о̄ньщиме̄н. Ка̄сыӈ хӯрум э̄тпос нефтяникытын олнло̄мтыл ойтыглаве̄в, сака са̄в а̄ти, ня̄нь винэ те̄мыл майлаве̄в. Ка̄сыӈ нила та̄л сыс акв щёс «Буран» нампа тӯйт тармыл яласан машинал майлаве̄в. – «Ханты ясаӈ» нампа газета ловиньтэгы̄н? – Ловиньта̄лэ̄в, то̄ва ла̄тӈыт ат торгамтыянӯв, тот мощ мо̄т диалектыл хансым о̄лы. Ма̄н ма̄нти халувт тай ма̄нти ла̄тӈувтыл потыртэ̄в, ня̄враманув о̄с сака ёмащакв потыртэ̄гыт. Яныг ня̄врамагме̄н Русскинская па̄вылт интернатт о̄лэ̄г, школат ханищтахтэ̄г. Тот тай пуссын акваг рущ ла̄тӈыл потыртэ̄гыт. Ос хунь юв ёхтэ̄г, туп ханты ла̄тӈыл потыртэ̄г. Ты я̄тил ханты ма̄хум пуста̄гыл вос о̄лэ̄гыт, На̄янылн-О̄тыранылн вос ӯргалавет! 1076 2014.05.23. Людмила ТЕТКИНА Ха̄льӯс музей ты та̄л 35 та̄лэ то̄влы. Я̄ӈк на̄тнэ э̄тпос 18 хо̄талэ̄т музей янытлан хо̄талыг о̄лыс. Ты кастыл ма̄н Ха̄льӯс районт о̄лнэ музей урыл потыр хансэ̄в. Кӯщаиг тот Людмила Васильевна Андрианова рӯпиты ловиньтан. Тав ла̄выс: «Ты та̄л музейколув 35 та̄лэ то̄влы. Са̄всыр музеитт рӯпитан ма̄хум, учёныйхо̄тпат конференциян таквсы порат тыг во̄виньта̄лыянӯв. Ос музей рӯпататэ урыл нэ̄пак тах щё̄питэ̄в. Ты пора сыс музейт 20 со̄тыра са̄всыр пормасыт, хурит, нэ̄пакыт акванатсӯв. Ты э̄лыпа̄лт музеюв 19 но̄т порат ӯнттум колт о̄лыс. Ты яныг йильпи колн ма̄н 2003 та̄лт ва̄нтлысӯв. Колув кос яныг, тувыл са̄всыр йильпи суссылтапыт ва̄рыглаӈкве колнакыт ат о̄ньще̄в. Ха̄льӯст о̄лнэ ка̄тыл по̄слын хо̄тпат ёт акваг рӯпитэ̄в, та̄н по̄слум хурияныл мирн суссылтаӈкве о̄с таӈхе̄в. Колув по̄хат Добровольский кӯпса о̄йка ӯнттум колэ ёмащакв ань щё̄питаве. Ты кол музейн майвес, тот ма̄н ка̄тыл по̄слум хурит суссылтаӈкве тах патэ̄в. Музейт щар яныг колнакт газ хо̄нтум ма̄хум урыл выставка суссылтэ̄в. Мо̄т колнакыт ос соссаӈ ма̄хум пормасаныл ка̄салаӈкве ро̄ви. Ма̄н хунь ты суссылтап ва̄рыслӯв, Ха̄льӯст о̄лнэ ма̄ньщит, хантыт ёт потыртасӯв, китыгласанӯв. Та̄н ла̄всыт, соссаӈ ма̄хум ялпыӈ пормасыт нупыл нэ̄ хо̄тпан сунсуӈкве щар ат ро̄ви. Тыи ма̄гсыл ты пормасыт акв ма̄нь колнакн атсанӯв ос яныг торыл лаптагатасанӯв. Ма̄хум суссылтап сунсуӈкве ке ка̄саще̄гыт, тув щалтсэ̄гыт. Ты ялпыӈ пормасыт Новосибирск ӯс институт этнография щирыл рӯпитан ма̄хум ма̄навн ке̄тыс. Ты э̄лыпа̄лт Новосибирск ӯсныл Ха̄льӯс районын ма̄ньщи мир о̄лупса ханищтаӈкве са̄в учёный хо̄тпат ёхталасыт. Та̄н ты ма̄ныл са̄в ма̄ньщи ялпыӈ пормасыт Новосибирск ӯсн тотсыт. 18-19 но̄т порат ю̄нтым ма̄ньщи ялпыӈ пормасыт, ань ма̄н музеювт ка̄салаӈкве ро̄ви. Музейт Митрофан Тебетев по̄слум хуриянэ о̄лэ̄гыт. Ха̄льӯс районт о̄лме порат ты хуриянэ по̄слыгласанэ. Ань мо̄т музеит тав хуриянэ мирн суссылтаӈкве во̄вияныл. Пе̄тр Шешкин ва̄рум рӯпатанэ о̄с тыт суссылтыянӯв. Пормасанэ Ханты-Мансийскын ос мо̄т ӯсытн о̄с акваг тотыглавет. Пе̄тр Шешкин ма̄ньщи ла̄тӈыл хансум потранэ о̄с тыт о̄лэ̄гыт. Ань Кульпаст о̄лнэ ма̄ньщи нэ̄т тав потранэ рущ ла̄тӈын толмащлыяныл, ты юипа̄лт ма̄н та̄наныл акв нэ̄пакыг ва̄риянӯв. Кит та̄л сыс «Меншиковские чтения» нампа конференциян Россия янытыл учёный ма̄хум тыг во̄виньта̄лыянӯв. Ха̄льӯс районт о̄лнэ ня̄врамыт ма̄гсыл научный конференция ва̄рыглэ̄в. Щар о̄влэ̄т а̄гитпыгыт ма̄ньщи ос ханты пе̄с йис ва̄рмалит урыл хансым нэ̄пакныл докладыт хассыт. Ань ня̄врамыт па̄вланылт о̄лнэ хо̄тпаныл мо̄йтыт, потрыт нэ̄пакн хансыяныл. То̄ват та̄нки пе̄с порат о̄лум рӯтаныл урыл нэ̄пак хансэ̄гыт. Тамле докладыт хӯнтлаӈкве сака пӯмащ. Ка̄сыӈ та̄л «Ночь музеев» нампа ялпыӈ хо̄тал ва̄рыглэ̄в. Я̄ӈк на̄тнэ э̄тпост кон ат турманлы, тыи ма̄гсыл ма̄н ре̄тыӈ юсвой э̄тпос ӣтипа̄лаг ма̄хум ма̄нки палтылув во̄выглыянӯв. Ты кастыл ма̄н са̄всыр йильпи выставка щё̄питэ̄в. Акв та̄л сыс 20 со̄тыра арыгкем э̄лумхо̄лас музейн ёхталы». Ха̄льӯст о̄лнэ музей тамле э̄рнэ рӯпата ты ва̄ри. Ма̄ньщи ос ханты пе̄с пормасыт акванатым, суссылтапыт ва̄рыглым пе̄с йис ва̄рмалит э̄лаль тотыяныл. 1076 2014.05.23. Тамара МЕРОВА Ка̄сыӈ ӯст манос па̄вылт музеит рӯпитэ̄гыт. Музеит янытлан кастыл 1977 та̄лт Россия па̄лыл мо̄т хо̄н ма̄н ла̄тыӈ ке̄твес. Ос 1978 та̄л па̄сыл тот рӯпитан ма̄хум ялпыӈ хо̄талыл ва̄рве̄сыт, ань 150 арыгкем са̄всыр ма̄тт ты хотал янытлаве. Ам о̄выл щёс Лангепасн минамумт, ты ӯс ос тот о̄лнэ ма̄хум урыл мощща ва̄сум. Ӯс хотмус ха̄щта̄лыг о̄лыс. Тувыл аквъёт рӯпитан нэ̄ме̄нтыл Музейновыставочный центрын ялсуме̄н. Кол кӯщаиг о̄лнэ хум ёт Андрей Николаевич Дробышев ос са̄всыр суссылтапыт щё̄питан хум Александр Николаевич Седов ёт тот ты ва̄йхатсуме̄н. Тэ̄н пуссын суссылтапыт ме̄наме̄н суссылтасанэ̄н ос ка̄сыӈ тэ̄ла урыл я̄нас потыртасы̄г. Та юипа̄лт ме̄н ӯс ва̄рмалит ос ӯст о̄лнэ то̄ва хо̄тпат ва̄рум ёмас тэ̄ланыл ма̄гыс ва̄ӈкве патсанме̄н. Ань ма̄ янытыл о̄лнэ ма̄хум аквтох музеин щалтнэ̄ныл порат хурит, пормасыт суснэ̄ныл сыс матыр ханищтэ̄гыт. Са̄всыр мирыт о̄лупсаныл, маснутаныл ос пе̄с та̄гыл о̄щнэ наканыл та̄рапаттыяныл. Ня̄врамыт музеин ялантым о̄с номтыӈнуве̄г е̄мтэ̄гыт, мо̄т хо̄тпа нупыл сымыӈыщ сунсым о̄лэ̄гыт. Музеит рӯпитан хо̄тпат тамле ёмас тэ̄лат акваг ты ва̄ре̄гыт. Тувыл ма̄хум та̄нки о̄с пӯмщалахтэ̄гыт, таима̄гыс мо̄лал та̄н лощит музейколыл ӯнттуве̄сыт. Андрей Дробышев ла̄выс, ювле хультум хӯрум та̄л порат та̄н ӯсанылт са̄всыр ма̄нь музеит, искусство центрыт аквантотве̄сыт ос акв йильпи яныг колыл майве̄сыт. Та̄н ань пуссын акв колт рӯпитэ̄гыт. Ме̄н музейт са̄в пӯмыщ ка̄саласме̄н. То̄ва суссылтапыт акваг рӯпитэ̄гыт, мо̄таныт мо̄рсыӈ порат щё̄пита̄лыглавет, то̄внакт пормасыт суссылтаӈкве мо̄т ма̄ныл тув тотыглавет. Тувыл тот акваг суссылтан пормасыт, хурит о̄с пе̄нтуӈкве ве̄рмавет. «История города» нампа колнакт Лангепас ӯс о̄вылтыт потыртэ̄гыт. Ты ӯс 25 та̄лэ ущтынув то̄влыс. Ты э̄лыпа̄лт тот во̄р о̄лыс, ма̄во̄й хо̄нтвес ос тув аквты щёс ма̄хум са̄в ма̄ныл рӯпитаӈкве ёхтысыт, о̄влэ̄т та̄н балокытт о̄лсыт, тувыл йӣв колыт ӯнттуве̄сыт. Ань тав ӯсыг е̄мтыс, кирпащиӈ са̄в яныг кол ӯнттувес. Тот атпан нупыл хӯрум со̄тыра са̄вит э̄лумхо̄лас о̄лы. Хосат та̄гыл ӯст о̄лмыгтам хо̄тпат то̄внакт ня̄врамыт э̄лыпа̄лт мовиньтэ̄гыт, ла̄ве̄гыт, та̄н о̄лнэ коланыл по̄хат ма̄хум пил ва̄тсыт ос во̄раясыт. Ма̄во̄й но̄хвинэ ва̄рмаль о̄вылтыт о̄с я̄нас колнак щё̄питавес. Тот нефтяникыт пормасаныл ос са̄всыр техникат суссылтавет. Соссаӈ ма̄хум ос «Природа Югры» нампа колнак акв ляпан ва̄рвесы̄г. Та е̄рт о̄лнэ хантыт о̄лупсаныл мӯсхалыг ханищтымат ос потраныл музеит акванатымат. Ма̄навн тот таи мӯстыс, са̄всыр о̄лыглам накыт ма̄кыг щё̄питаве̄сыт, пормасыт э̄рнэ ма̄н пинве̄сыт, ос соссаӈ ма̄хум о̄лупсаныл урыл потыртым нэ̄матыр ат тэ̄лыгтэ̄гыт. Та̄н та е̄рт о̄лнэ хантыт коныпал мо̄т ма̄т о̄лнэ хантыт ос ма̄ньщит пе̄с йис наканыл, коланыл мощ мо̄т щирыл ке о̄лэ̄гыт, о̄с ва̄ганыл ос ма̄хумн хӯлтыяныл. Мо̄т колнакт ма̄ ёлыпа̄лт хо̄нтым сака пе̄с пормасыт суссылтавет. Андрей Николаевич ма̄хманэ ёт ты утыт Сургут ӯс ляпат хо̄нтсаныл ос тувыл но̄ххилсаныл. Та̄н пуссын ищхӣпыӈ ут хосыт суссылтавет. Пуссын ты выставкат музеит акваг рӯпитэ̄гыт, та̄н хот ат вивет. Ос маныр ма̄гыс, маныр иӈ пӯмщалаӈкве ӯст о̄лнэ ма̄хум тув щалтсэ̄гыт, манхурип касылыт, э̄ргынйӣквнэ накыт тот ва̄рыглавет, хумус ма̄хум ӯщлахтэ̄гыт, ты урыл ам мо̄т потыр тах хансэ̄гум. Ань музеит рӯпитан хо̄тпат ма̄н ялпыӈ хо̄талыл янытлыянӯв, ос са̄всыр мӯтраӈ ва̄рмалитын мӯй ма̄хманыл вос ханищтыяныл, пӯмщалыяныл. 1076 2014.05.23. Светлана РОМБАНДЕЕВА Сакв ма̄хманув пормасаныл о̄щнэ кол. Ха̄льӯс район Саранпа̄выл школат музей о̄лы. Тув щалтсамум порат Виктория Валерьевна Хозяинова ёт хо̄нтхатыгласум, тав ань та музейт рӯпиты, ты коныпал ня̄врамыт ханищты. Виктория Валерьевна ма̄ньщи нэ̄, а̄ги о̄парищ наме Качанова. Ме̄н тав ётэ потрамасме̄н, на̄н ань э̄лаль потруме̄н ловиньтэлы̄н: – Школант о̄лнэ музеин манах та̄л рӯпиты? – О̄влэ̄т тав пе̄с школат о̄лыс, та школа на̄йн но̄хё̄свес. Тувыл 2002 та̄лт музей йильпииг ва̄рыслӯв, школат колнакыл майвесӯв. Матъёмас тамле музей колнак о̄ньще̄в, сакати ты хосыт ханищтахтан ня̄врамыт та̄нти культураныл урыл мощ ва̄ӈкве патэ̄гыт. Ма̄ньщи мир пормасыт акванатуӈкве са̄в хо̄тпа нё̄тыс – ня̄врам ханищтан ма̄хум, ня̄врамыт, яныгхо̄тпат. Пуссын акваннё̄тхатым ма̄н яныг тэ̄ла ва̄рсӯв. Ам омам Елена Ефимовна Качанова ты музейт са̄в та̄л рӯпитас, кӯщаиг о̄лыс. Ма̄нь па̄влытт са̄всыр пормасыт атыс – Сӯкырьят, Я̄сунтыт, Саранпа̄вылт, Хо̄рыӈпа̄вылт. Музеювт ань 218 пормас о̄ньще̄в – маснут, ла̄гыл маснут, а̄ныса̄ныт, са̄всыр хусапсовыт, хӯл алыщлан ос во̄раян пормасыт, та маныр пуссын о̄лы. Ты та̄л ма̄нь таквс э̄тпост районув янытыл о̄лнэ школат халт конкурс ва̄раве. Хоты школат щар ма̄к ёмас музей о̄лы, тав та но̄хпаты. Ма̄н о̄с таӈхе̄в тот касуӈкве, э̄рыӈ хотты места выгӯв. – Ня̄врамыт музейн ёхталэ̄гыт? – Атхунь ёхталэ̄гыт, пӯмщалахтэ̄гыт, тыт экскурсиял ва̄рыглыянӯв. То̄ва пормасыт урокын тотыглыянӯв, ня̄врамытн сунсыглавет, ка̄сыӈ пормас урыл потраме̄в. Ма̄ньщи ла̄тыӈ урок ханищтан нэ̄ Светлана Савельевна Мерова музейт матыра̄ти ва̄тихал вуйлы. Ня̄врамытн ла̄тыӈ ханищтанэ̄тэ порат матыр суссылты, тыхал ла̄тыӈ ханищтэ̄гыт. Ты та̄л па̄сыл школавт «Совет бабушек» хо̄нтхатыглап ва̄рсӯв. То̄ванакт яныгхо̄тпанув ёхталэ̄гыт, ня̄врамыт ёт матыр ма̄щтырлэ̄гыт, потраме̄гыт. – Наӈ хо̄т самын патсын? –Ам тыт, Саранпа̄вылт, самын патсум, школа а̄стласум. Э̄лаль Санкт-Петербург ӯст А. И. Герцен нампа университетт история ос культурология учителиг ханищтахтасум. Ань ты школат ам соссаӈ мир ос ма̄ янытыл о̄лнэ мирыт культураныл урок ханищтэ̄гум. Ме̄н о̄йкаме̄нтыл хӯрум ня̄врам о̄ньщиме̄н. Яныг пыгме̄н Женя Санкт-Петербург ӯст университет а̄стлас, ань Тюмень ӯст рӯпиты. Паша пыгме̄н о̄с Санкт-Петербург ӯст ханищтахты, Настяме̄н школат атыт классыт ханищтахты. Ме̄н Виктория Валерьевна ёт музей колнакн щалтсасме̄н. Ам ма̄ньщи ма̄хманув ва̄рыглам пормасыт сунсыгласум, пӯмщаласанум, по̄слысанум. Тав то̄ва пормасыт урыл мощ потыртас. Акв хӯрыг ка̄саласум, китыглахтэ̄гум, маныр совыл ю̄нтым о̄лы, насати, сыг совыл ю̄нтыма. Та ляпат мо̄т хӯрыг хуи, тав ос сорт совыл ю̄нтвес. Тув колас манос сыртэп пинуӈкве ро̄ви. Хӯргыг Елена Ефимовна Качанова ю̄нтыгламаге. Ра̄ктыл ва̄рим пӯтсов лю̄ли, ты ос Я̄сунтыт о̄лум э̄ква Анна Дмитриевна Немдазина тав ва̄рыгламе. Сӯкыръят о̄лум о̄йка Иван Данилович Сайнахов ӯльпа та̄рыл са̄всыр хусапсовыт ва̄рыглам, то̄ванэ о̄с музейн тотве̄сыт, тот ты о̄ньщавет. Виктория Валерьевна тамле ёмас э̄рнэ тэ̄ла ва̄ри – ма̄ньщи ма̄хманув ва̄рыглам пормасыт мирн суссылты, потырты. Ты я̄тил ма̄ньщи нэ̄те̄в ще̄мьятэ ёт пуста̄гыл вос о̄лы, На̄янэ̄н-О̄тыранэ̄н вос ӯргалаве! 1076 2014.05.23. Александр ВЬЮТКИН Тув кастыл щё̄питахтын ва̄рмаль. Тув палыт ня̄врамыт ӯщлахтын ва̄рмаляныл палт кӯщаиг о̄лнэ ма̄хум ма̄гыс округ мирколт сапра̄ни ва̄рыглавес. Тот щар яныг кӯщаиг Алексей Андреевич Путин о̄лыс, тав округ губернатор ва̄ӈын хо̄тпаг рӯпиты. О̄влэ̄т Елена Владимировна Немчинова потыртас. Тав мирн нё̄тнэ департаментыт ня̄врамыт ёт рӯпитан тэ̄ла тармыл кӯщай нэ̄г о̄лы. Тав ла̄выс: «Ты тув ня̄врамыт ӯщлахтынэ̄ныл ма̄гсыл округ бюджетныл 1 млрд. 720 млн. 600 со̄тыра солко̄ви та̄стувес. Ты тув ня̄врамыт ӯщлахтынэ̄ныл ма̄гыс 524 ма̄т рӯпитаӈкв патэ̄гыт. Ос 4 со̄тыра 500 ня̄врам ӯщлахтуӈкв тот ве̄рми. Ты та̄л то̄ва ӯщлахтын ма̄т са̄внув ня̄врам та̄нти палтыланыл виӈкв матрыг ат ка̄саще̄гыт. Тот рӯпитан ма̄хум ты урыл тох ла̄ве̄гыт: «Ма̄н са̄в ня̄врам таи ма̄гсыл виӈкв ат ка̄саще̄в, сака са̄в нэ̄пак щё̄питаӈкв э̄ри. Тувыл та̄л палыт та нэ̄паканув пирмайтаӈкв ат ве̄рмавет. Мощщанув ня̄врам те ёхты, тэ̄лав моляхнув мины. Ты та̄л соссаӈ ма̄хум пе̄с йис о̄лупсаныл суссылтан щирыл 7 млн. солко̄ви майвес. Тамле ма̄т ӯсыӈ ос яныг па̄влыӈ ма̄т о̄лнэ ня̄врамытын ӯщлахтуӈкв сака пӯмащ. Са̄выӈпа̄лэ тув ялнэ̄ныл юипа̄лт аквта ма̄н ялуӈкв мо̄т щёс о̄с во̄вхатэ̄гыт. Ты кастыл ма̄н ня̄врамыт ма̄гсыл са̄внув ӯщлахтын ма̄ щё̄питаӈкв таӈхе̄в». Та юипа̄лт мир пусмалтан Департамент колт ва̄ӈын кӯщаиг рӯпитан нэ̄ Тамара Давыдовна Овечкина ва̄рнэ рӯпатаныл урыл ма̄хумн потыртас: «Ань ма̄н йильпи яныг нэ̄пак щё̄питэ̄в, моще̄ртын ты а̄стлылӯв. Ты нэ̄пакт та урыл хӯлтэ̄в, хо̄т, хумус ос маныр мӯсхалыг щё̄питаӈкв э̄ри. Ты та̄л округув янытыл акв со̄тыра хӯрумса̄т ляпатем са̄всыр ле̄ккар рӯпитаӈкв паты. Онтоловхойплов со̄тыра а̄гмыӈмосыӈ ос сакватахтам ня̄врам пусмалтахтын ос ӯщлахтын ма̄н тотнэ щирыл о̄лэ̄гыт. Тувыл «клещевой энцефалит» а̄гм о̄щнэ те̄рыӈхомлахытн ня̄врамыт ул вос то̄вмавет, ӯщлахтын ма̄т во̄рыӈ ма̄наныл тӯяг тэ̄рпил рассалтавет». Тэ̄н потыртаме̄н юипа̄лт лё̄ӈхыт тармыл о̄лнэ полиция ос на̄й харыгтан щирыл рӯпитан тит хумыг тув кастыл щё̄питахтын урыл потыртасы̄г. Ня̄врамыт ӯщлахтын ма̄н минмыгтанэ̄ныл э̄лыпа̄лт кӯщаит о̄с тах акванатуӈкв ла̄вве̄сыт. Хотьют матыр ва̄руӈкв ат те а̄лыми, штрафыл пинаве. 1077 2014.06.06. Светлана РОМБАНДЕЕВА Ю̄нтупытыл пусмалтан ле̄ккар. Нефтеюганск ӯс ляпат «Юган» нампа санаторий о̄лы. Ма̄хум тот янгема̄не пусмалтахтэ̄гыт. Ма̄ньщи ос ханты ма̄хум па̄выл ле̄ккаранылн тув ва̄тихал ке̄тыглавет. Ам тув ялмум порат ю̄нтупытыл пусмалтан ле̄ккар ёт потыртасум, наме Наталья Владимировна Гарбуз. Э̄лаль на̄н ань тав потре ловиньтэлы̄н. – Ам Самарский область Отрадный ӯст самын патсум. Нефтеюганск ӯсн 1968 та̄лт омагума̄тягум ёт ёхтысум, школа тыт а̄стласум. Тувыл Тюмень ӯсн медицинский институтн ханищтахтуӈкве минасум, 1982 та̄лт а̄стласлум. О̄влэ̄т «Юганскнефтегаз» нампа медсанчастит ма̄нь ня̄врам пусмалтан ле̄ккарыг рӯпитасум. Ня̄врам ӯримам та̄рвитыӈыщ о̄лмум сыс, ам ханищтахтан курсытн ялантасум, ю̄нтупытыл пусмалтаӈкве ханищтахтасум. Э̄лаль Пятигорск ос Москва ӯсыгт ханищтахтасум, рефлексотерапевт ле̄ккарыг патсум. Ты санаторият 1991 та̄л па̄сыл рӯпитэ̄гум, ма̄хум ю̄нтупытыл тӯщтым пусмалтыянум. Тыт рӯпитанэм сыс ва̄тихал ханищтахта̄лэ̄гум. 1991 та̄л порат тыг Китай ма̄ныл ле̄ккарыт ёхталасыт. Рущ ла̄тӈыл потыртаӈкве ат ха̄ссыт, английский ла̄тыӈ мощ ва̄сыт. Ам ань ты мо̄т хо̄н ла̄тыӈ о̄с ва̄глум, ла̄тӈаныл толмащлаӈкве нё̄тсанум. Та̄н ос а̄нум ю̄нтупытыл пусмалтаӈкве ханищтасаныл. Тувыл Новокузнецк, Новосибирск, Челябинск ӯсытт ханищтахтасум, ты коныпал са̄в нэ̄пак ловиньтасум. Ты рӯпата сака пӯмыщ, ка̄сыӈ хо̄тпан тав яныг парыс тотуӈкве ве̄рми. Ты щирыл пусмалтан ле̄ккарын акваг э̄ри ханищтахтуӈкве ос са̄в нэ̄пак ловиньтаӈкве. Э̄лумхо̄лас алпитэ са̄в точкат о̄ньщи, ка̄сыӈе я̄нас а̄гм пусмалты. Таима̄гыс та̄наныл пуссын ёмащакв ва̄ӈкве э̄ре̄гыт. Нэ̄пакытт ты урыл сака са̄в хансым о̄лы. Ю̄нтупытыл пусмалтан ва̄рмаль рущ щирыл рефлексотерапияг ла̄ваве, ты пе̄с йис пусмалтан тэ̄ла. Тав Китай ма̄т та̄рапаттувес. Ма̄хум ю̄нтупытыл пусмалтаӈкве тот ты о̄вылтаве̄сыт. Тувыл Корея ма̄т ле̄ккарыт тох пусмалтаӈкве патсыт, намаясаныл Суджоктерапия. Ты сака ё̄мас пусмалтан ва̄рмаль, тав ка̄сыӈ хо̄тпан нё̄ты. Ань тэ̄рпит ае̄в, тувыл мо̄т матаранӯв а̄гмыӈыг е̄мтэ̄гыт, са̄всыр аллергия а̄гмыт но̄ххулиглэ̄гыт, хо̄тпа алпитэ лощгуӈкве паты та маныр. Ос ты пусмалтан ва̄рмалюв а̄ти тох э̄лумхо̄лас ю̄нтупытыл пусмалтахтаме юипа̄лт, нэ̄матаре ат а̄гмыӈ, номтэ ёмас. – Манах та̄л яныт хо̄тпа ю̄нтупытыл пусмалтаӈкве ро̄ви, ня̄врамыт тох о̄с пусмалтавет? – Хӯрум та̄лныл са̄т та̄л яныт ня̄врамыт ма̄ньнув ю̄нтупытыл ва̄равет, нэ̄матыр а̄гм ат суйты. Э̄лаль ос яныгхо̄тпа хольт ва̄равет, ве̄ританте̄м о̄лы. Са̄всыр ня̄врам о̄лы, то̄ва пилы, ёл ат ротми, тыглетувле нёвсы, то̄ва ос туп хӯрум та̄лэ, щар ат пилы, са̄лтат хольт сохтыл хуи. Яныгхо̄тпат нёлса̄т нупыл ат та̄л мус ю̄нтупытыл пусмалтаӈкве ро̄ви. А̄гм о̄влэ̄т сумылла̄лы, тувыл хотталь та со̄йми. То̄ванакт хо̄тпа ёлойилматаве, то̄ва нас хуйгала̄лы, ӯщлахты. – Наталья Владимировна, наӈ ань ле̄ккарыг ты рӯпитэ̄гын, таяныт ёмас ва̄рен, ла̄вен, пуста̄гыл о̄лнэ ма̄гыс хо̄тпан маныр э̄ри ва̄руӈкве, хумус о̄луӈкве? – Ам китайцыт ёт са̄в рӯпитасум, та̄н тох ла̄ве̄гыт: «На̄н, Россият о̄лнэ мир, хунь сака а̄гмыӈыг е̄мтэгы̄н, ущ та номсуӈкве патэгы̄н: хумус пусмалтахтуӈкве, манхурип тэ̄рпи аюӈкве э̄ри. Ущ та хо̄нтылы̄н. Ос ма̄н, китайцыт, ты урыл ма̄нь та̄гыл номсэ̄в. Пуста̄гыл о̄лнэ ва̄рмаль ма̄н о̄лнэ̄в палыт ханищтылӯв». Мӯтраӈ китайцыт со̄ль ла̄ве̄гыт, ань ма̄хманув номсэ̄гыт: ма̄н пӯльницат ле̄ккаранувн пусмалтаве̄в, тэ̄рпил миве̄в, пусме̄в тах. А̄ти, тох о̄луӈкве щар ат ро̄ви. О̄лнэ хо̄таланув урыл, алписованув урыл ма̄нтина̄нувн номсуӈкве э̄ри, ле̄ккарытн ма̄н сака хунь э̄ре̄в. Хо̄тал палыт са̄в вит ае̄н, физкультура ва̄ре̄н, мощ хӯтсэ̄н. Ва̄тихал кон ё̄мыгтэ̄н, сыстам лылые̄пыл лылтэ̄н, са̄в мовиньтэ̄н. Ка̄сыӈ хо̄тал ща̄гтым о̄лэлы̄н. Ань телевизор хосыт ю̄нтупытыл пусмалтан ва̄рмаль урыл то̄ванакт лю̄ль потыр хӯлэ̄в, тав эрттам хо̄тпа ат пусмалты. Тамле полщ ань намыл тотаве, ма̄хум аптекан вос ялантэ̄гыт, тэ̄рпи вос ёвтэ̄гыт. Тэ̄рпи ва̄рнэ ос тыналан ма̄хум олн сэ̄лэгыт, тэ̄рпияныл ат те ёвтавет, та̄нанылн лю̄ль, олнаныл но̄х ат лапи. Хо̄тпа хунь матаре а̄гмыӈ, тэ̄рпи аи, мо̄т матаре а̄гмыӈыг е̄мтапи. Тувыл тав мо̄т а̄гмыӈ ма̄тэ ма̄гыс тэ̄рпи о̄с та ёвты, юваялытэ, ты юипа̄лт ос хӯрмит ма̄тэ а̄гмыӈыг е̄мты. Тох акваг та пусмалтахты, тэ̄рпиянэ̄н пусмалтан пе̄нтсыл витыг та тотаве. Ка̄сыӈ хо̄тпа такви вос пусмалтахты, ляпа ма̄хманэ̄н вос нё̄ты. Пуста̄гыл ос со̄тыӈыщ о̄луӈкве э̄ри, ка̄сыӈ э̄лумхо̄лас э̄руптаӈкве э̄ри. Ос щар ма̄к таи То̄рум А̄щув э̄руптэлы̄н. Пуссын пуста̄гыл о̄лэ̄н! Ань потруме̄н та оигпас. 1077 2014.06.06. Людмила ТЕТКИНА Та̄н рущ ла̄тыӈ ханищтаӈкв ла̄вавет. Мо̄т хо̄н ма̄ныл ань акваг са̄в ма̄хум рӯпитаӈкве ос о̄луӈкве тыг ёхтэ̄гыт. Та̄н халанылт то̄ваныл рущ ла̄тӈыл лю̄льсаӈ потыртэ̄гыт, то̄ват ла̄тыӈ щар ат торгамтэ̄гыт. Ще̄мьяӈ та̄гыл ёхтэ̄гыт, ня̄враманыл школан тыт минэ̄гыт. Рущ ла̄тыӈ ва̄нэ та̄л та̄нанылн тыт ханищтахтуӈкве сака та̄рвитыӈ. Ты ня̄врамыт урыл кӯщаит сапра̄нит потыртасыт. Округ кӯщай нэ̄ Наталья Комарова общественный организациятт рӯпитан хо̄тпат ос ханищтап щирыл рӯпитан ма̄хум тув во̄виньта̄лсанэ. Кӯщай нэ̄ та̄н нупыланыл ла̄выс: «Са̄всыр мирыт юртыӈыщ то̄нт о̄луӈкве патэ̄гыт, хунь та̄н рущ ла̄тыӈ ёмащакв ва̄ӈкве ос янытлаӈкве патыяныл. Ань мо̄т хо̄н ма̄ныл ёхтум ма̄хум та̄нки рущ ла̄тӈыл потыртаӈкве ат хасэ̄гыт ос ня̄враманыл ат ханищтыяныл. Тамле ня̄врамыт школан миннэ̄ныл порат, рущ ла̄тыӈ ат торгамтанэ̄ныл ма̄гсыл, мӯсхал щирыл ханищтахтуӈкве ат ве̄рме̄гыт. Ань та̄н ща̄няныла̄щаныл ёт рӯпитаӈкве э̄ри, тыт э̄лаль о̄луӈкве ке ка̄саще̄гыт, рущ ла̄тыӈ вос ханищтэ̄гыт». Округ янытыл ты ня̄врамыт хумус ханищтавет, та урыл Лилия Максимова, ханищтап департаментыт рӯпитан нэ̄, потыртас. Тав ла̄выс, ань мо̄т хо̄н ма̄ныл тыг ёхтум 51% ще̄мьят та̄нки халанылт ос ня̄враманыл ёт туп ща̄нь ла̄тӈыл потыртэ̄гыт, тыи ма̄гсыл та̄н рущ ла̄тыӈ ат ва̄гыт. Ань тамле ня̄врам сака са̄в о̄лы, яныг ӯсытт та̄н ма̄гсыланыл школат пунсавет, тот пуссын ханищтавет. Акв тамле школа Нефтеюганск ӯст рӯпиты ос хӯрум школа Нижневартовск ӯст о̄лы. Наталья Комарова ханищтап щирыл рӯпитан департаментын ос миграционный службат рӯпитан ма̄хум аквъёт рӯпитаӈкве ла̄всанэ. Ты ня̄врамыт ща̄няныла̄щаныл нэ̄паканыл мӯсхалыг вос уральтыяныл. Э̄рнэ нэ̄пакыт ат ке о̄ньще̄гыт, та̄нки о̄лнэ ма̄нанылн ювле вос ке̄тавет. Кӯщай нэ̄ э̄лаль ла̄выс: «Ма̄н тыт ма̄нки ня̄враманув ма̄гсыл школа ат то̄вылхаты, та̄н кит смена щирыл ханищтахтэ̄гыт. Ма̄н мо̄т хо̄н ма̄ныл ёхтум ня̄врамыт ма̄гсыл яныг школа пӯнсэ̄в, тув са̄в олн та̄стэ̄в. Ты школат ос ёмащакв уральтэ̄н». Сапра̄нин ёхталам ма̄хум ос та̄нки проектаныл урыл потыртасыт. Рустам хазрат Аминов Религиозный Духовный управление мусульман нампа организацият рӯпиты, тав ня̄враманыл рущ ла̄тӈын ос тыт о̄лнэ мирыт янытлаӈкве хумус ханищтыяныл, та урыл потыртас. Ань та̄н «Я знаю, я уважаю, и я изучаю русский язык» нампа проект щирыл рӯпитэ̄гыт. Ня̄враманыл ты урыл са̄всыр хурит по̄слэ̄гыт, потрыт, стихыт рущ ла̄тӈыл хансэ̄гыт, ла̄тыӈ ты щирыл ты ханищтэ̄гыт. Ос акв та порат ма̄хум «Дни славянской письменности и культур» нампа ва̄рмаль урыл потыртасыт. Тамле ялпыӈ хо̄тал Ханты-Мансийск ӯст я̄ӈк на̄тнэ э̄тпос 23-24 хо̄талэ̄т о̄лыс. Ты рӯпата таи ма̄гсыл ва̄рыглаве, рущ ма̄хум та̄нки ща̄нь ла̄тӈаныл вос янытлэ̄гыт ос пе̄с йис ва̄рмаляныл ул вос ёрувлыяныл. 1077 2014.06.06. Людмила ТЕТКИНА Ма̄вит ӯргалан тэ̄ла э̄лаль тотаве. Я̄ӈк на̄тнэ э̄тпос 23 хо̄талныл Югра янытыл «Спасти и сохранить» нампа акция рӯпитаӈкве о̄вылтахтас. Ань тыт са̄всыр ханищтапыт, касылыт, фестивалит, конференцият ва̄рве̄сыт. Ма̄хум йӣвыт ӯнттэ̄гыт, порс акванатэ̄гыт ос са̄в мо̄т э̄рнэ тэ̄лат ва̄ре̄гыт. Сергей Пикунов, ма̄вит ӯргалан службат кӯщай хум, ла̄выс, тамле рӯпатаныл хосыт та̄н ма̄хум ма̄вит янытлаӈкве, ӯргалаӈкве ханищтыяныл. Округувт ма̄во̄й но̄хвинэ ма̄хум рӯпитэ̄гыт, та̄н са̄в та̄л сыс ма̄витув па̄ӈктысаныл. Тамле акция хосыт та̄н нефтяникыт ма̄вит янытлаӈкве, сыстамтаӈкве о̄с ханищтыяныл. Та̄н ань ма̄во̄й мори ат со̄сантэ̄гыт, во̄р нас тох ат са̄гре̄гыт, тот са̄всыр пе̄с пӯщкат ос пе̄с ке̄рломтыт хо̄та̄ти ат па̄хвтэ̄гыт. Акция рӯпитаӈкве о̄вылтахтам порат Ханты-Мансийск ӯст акв конференция рӯпитас. Тув округ янытыл ня̄врамыт ханищтан хо̄тпат во̄виньта̄лве̄сыт. Та̄н «Экология безопасности жизнедеятельности» нампа предмет урыл тот потыртасыт. Ань ӯсувт то̄ва школат ня̄врамыт ты предметын ханищтаӈкве тах патавет. Тувыл мо̄т школатыт о̄с акв тамле урок тах ва̄раве. Ханищтап департаментыт рӯпитан нэ̄ Антонина Урсу-Архипова ла̄внэ̄тэ щирыл, тох та̄н ня̄врамыт ма̄ньта̄гыл ма̄вит ӯргалаӈкве ханищтыяныл. Акция о̄вылтан кастыл Ханты-Мансийск ӯст ялпыӈ хо̄тал о̄лыс. Ӯскант аквторыг 22 са̄всыр суссылтап рӯпитас. Ка̄сыӈ хо̄тпа таве̄н пӯмащ тэ̄ла хо̄нтуӈкве тот ве̄рмыс. Акв ма̄т ня̄врамыт ка̄тыл хурит по̄слысыт, мо̄т ма̄т ӯйхулыт суссылтаве̄сыт, хӯрмит ма̄т ос тэ̄пкан ӯнттын хорамыӈ лӯптат тыналаве̄сыт. «Лылыӈ со̄юм» студият рӯпитан хо̄тпат а̄кань ва̄руӈкве а̄гирищитпыгрищит ханищтасаныл. Ма̄ньлат ма̄хум «Макулатура, сдавайся» нампа акция ва̄рыгласыт. Ка̄сыӈ э̄лумхо̄лас тув ат э̄рнэ ловиньтан пе̄с нэ̄пакыт миӈкве ве̄рмыс. Ты акция нилахуйплов хо̄тал рӯпитас, ты пора сыс ӯст о̄лнэ ма̄хум 9 арыгкем тонна пе̄с нэ̄пак тув тотсыт. Ма̄хум янытлаӈкве Геннадий Бухтин, губернатор ва̄ӈын хум, ёхталас. Тав ла̄выс, ма̄хум ма̄вит ӯргалан ва̄рмаль урыл потыртаӈкве са̄всыр ма̄ныл тыг ёхталэ̄гыт, ты ма̄гсыл ты акция ма̄ янытыл ань ва̄ве. Ка̄сыӈ та̄л «Обь-Иртышский бассейн: молодёжь изучает и сохраняет природное и культурное наследие в регионах великих рек» нампа конференция ва̄рыглаве. Ты та̄л ма̄ньлат ма̄хум я̄ӈк на̄тнэ э̄тпос 25-29 хо̄талытт акванатхатыгласыт ос ва̄рнэ рӯпатаныл урыл тот потыртасыт. Лӯпта э̄тпост ля̄ххал тотнэ хо̄тпат ма̄гсыл ос «Спасти и сохранить» нампа касыл рӯпитас. Ты касыл «Югория» нампа телекомпания щё̄пита̄лыглы. Ма̄хум ма̄вит ӯргалан ва̄рмаль урыл по̄слум кинаныл тув ке̄тыгласыт. Ты та̄л онтоловхуйпловит фестиваляныл о̄лыс. Акция лӯпта э̄тпос 20 хо̄талэ мус рӯпитаӈкве тах паты, ты пора сыс округувт ма̄вит ӯргалан ма̄гсыл 400 са̄всыр рӯпата тах ва̄раве. 1077 2014.06.06. Александр ВЬЮТКИН Ла̄тӈув ул вос ёрувлылӯв. Я̄ӈк на̄тнэ э̄тпос хусыт хо̄талэ̄т Ханты-Мансийск ӯст соссаӈ мир о̄лупсав ос ща̄нь ла̄тӈагув урыл заседания о̄лыс. Ма̄хум акванатхатыглан ма̄т щар яныг кӯщаиг губернатор ва̄ӈын хум Геннадий Бухтин ос Ассамблея кӯщай Еремей Айпин о̄лсы̄г. Заседаният округув са̄всыр ма̄ныл ёхталам кӯщаиг о̄лнэ ма̄хум та̄нти ва̄рум рӯпатаныл урыл докладыт ловиньтасыт. Щар о̄влэ̄т Ирина Лисютина докладэ ловиньтастэ. Тав соссаӈ ма̄ньлат ма̄хум ёт рӯпитан Департамент колт кӯщаиг о̄лы. Тав ханты ос ма̄ньщи ма̄хум хо̄т ханищтахтэ̄гыт, та потре урыл о̄лыс: «Ты та̄л округув янытыл са̄т со̄тыра 896 соссаӈ а̄гипыг са̄всыр ма̄тт ханищтахты. Ма̄к са̄в ма̄хум Ха̄льӯс районныл о̄лы. Тувыл акв со̄тыра 506 ня̄врам 39 са̄всыр ма̄тт ханищтахтэ̄гыт. Та юипа̄лт Ханты-Мансийск ӯс, тот акв со̄тыра 139 хо̄тпа 29 ма̄тт ханищтахтэ̄гыт. Кондинский районт 895 ханты, ма̄ньщи ня̄врам 33 школатыт ханищтахтэ̄гыт. Тувыл э̄лаль Нижневартовский, Белоярский ос Сургутский районыт халт са̄в соссаӈ ня̄врам ханищтахты. Ка̄сыӈ йильпи та̄лт соссаӈ мир ла̄тӈыл потыртан ма̄хум мощщами. Лов та̄л ювле хультум порат яныг ӯсыӈ ма̄н ёхтум ханты манос ма̄ньщи ня̄врам та̄нти ла̄тӈанылт потыртасыт, ат те потыртасыт, сакати торгамтасыт. Ань ща̄нь ла̄тыӈ ва̄нэ ня̄врам сака мощща. Ма̄н ня̄врамыт ханищтан Департамент колт ты урыл са̄в номсахтэ̄в. Округувт акв со̄тыра 694 школатт ня̄врамыт та̄нти ла̄тӈаныл ханищтэ̄гыт. Ханты ня̄врамыт халт акв со̄тыра 138 ня̄врам хӯс ханищтахтын колытт ла̄тӈаныл ханищтэ̄гыт. 436 ня̄врам нёлолов колт ма̄ньщи ла̄тыӈ ханищтыяныл. Мо̄лты соссаӈ ня̄врамыт оманыл, а̄тяныл ханищтан урыл титыгласанӯв. Та̄н халанылт ёмас са̄виттем мир та̄нти ня̄враманыл ща̄нь ла̄тӈаныл ханищтаӈкв ат ка̄саще̄гыт. Та урыл та̄н ла̄ве̄гыт: «Манрыг наска̄ссыг ня̄враманув саватаӈкв, ва̄ти манос хоса хультыс, ла̄тӈув тох та мины». Округувт ханты ос ма̄ньщи ла̄тыӈ ханищтан ма̄хум са̄выӈпа̄лэ средний специальнй образование о̄ньще̄гыт. Таима̄гсыл ма̄н са̄всыр ханищтап, та̄н халанылт каснэ курсыт ва̄рыглэ̄в. Округ касылыт но̄хпатнэ ма̄хум ос Россия ма̄ янытыл ла̄тӈыт ханищтан ма̄хум халт касуӈкве те̄тыглыянӯв». Ха̄льӯс районт ня̄врамыт ханищтан щирыл кӯщаиг рӯпитан нэ̄ Наталья Прожога та̄нти ва̄рум рӯпатаныл урыл потыртас: «Ма̄н Ха̄льӯс районувт соссаӈ мир ла̄тыӈ ханищтан са̄т кол о̄лы. Тот нила со̄тыра 989 ня̄врам ханищтахты. Та̄н халанылт акв со̄тыра 506 соссаӈ ня̄врам ла̄тӈаныл ханищтэ̄гыт. Са̄выӈпа̄лэ тот ма̄ньщи ла̄тӈыл потыртан мир о̄лы. Саранпа̄выл школат на̄врамыт са̄ран ла̄тыӈ, Тэ̄к па̄вылт ос ханты ла̄тыӈ ханищтэ̄гыт. 2012 та̄лныл округувт «Языковое гнездо» нампа проект ва̄рим о̄лы. Ма̄н районувт ма̄ньщи ла̄тыӈ ханищтан хӯрум садик о̄лы. Та̄н Саранпа̄вылт, Кульпаст ос Ня̄хщамво̄ль па̄влытт рӯпитэ̄гыт. Тув 65 ня̄врам ла̄тыӈ ханищтаӈкве яланты. Ка̄сыӈ тув ня̄врамыт ӯщлахтын «Мань ускве» ос «Сорни сэй» тит ёмас ма̄г рӯпитэ̄г. Тот та̄н ма̄ньщи мир о̄лупсаныл ос ла̄тӈаныл ханищтэ̄гыт. Ты ма̄г ма̄навн яныг нё̄тмил ва̄ре̄г. Ма̄ньщи ла̄тыӈ ханищтан хо̄тпа ат то̄вылхаты. Ма̄ньлат ма̄хум ӯсыӈ ма̄т о̄лнэ̄ныл юипа̄лт па̄влыӈ ма̄н ва̄нтлуӈкв ат ка̄саще̄гыт». Ты кӯщаиг юипа̄лт А̄с ма̄хманув та̄нти ва̄рыглан наканыл урыл потыртасыт. 1077 2014.06.06. Наталья Анадеева (RUS) Николай МЕРОВ (MNS) Са̄лыӈ ма̄хманув хо̄нтлын накт нё̄тсыт. Яныг хо̄нтлын накт соссаӈ ма̄хманув хумус хо̄нтлысыт, ты урыл мощща потыр о̄лы. То̄нт са̄выӈпа̄лэ лӯима̄т о̄лум хо̄тпат писалил по̄сын ёмщакв хо̄йнэ̄ныл ма̄гыс снайперыг вуйлуве̄сыт. «Новости Югры» нампа газетат ля̄ххал тотнэ нэ̄ Наталья Анадеева ты ва̄рмаль щирыл потыр кинсыс. Насати, хо̄нтлум накт соссаӈ ма̄хманув са̄лыӈ суныл яныг нё̄тмил ва̄рсыт. Та̄н Ленинград ӯс блокада о̄лум порат тэ̄нут, пормас тув тотыгласыт. 1941 та̄лт яныг таквс э̄тпос Государственный Комитет Обороны СССР приказ щирыл са̄лыӈ суныл яласан хо̄тпат акванатуӈкве патве̄сыт. Соссаӈ хо̄тпат Ямало-Ненецкий округныл ос Коми республиканыл атве̄сыт. То̄нт ты саран, ё̄рн ос саам ма̄хманув са̄лыӈ та̄гыл хо̄нтлуӈкве вуйве̄сыт. Та̄н халанылн акв ма̄ньщи хо̄тпа Семён Сайнахов тув ликмыс. Ты ма̄ньщи о̄йка Ха̄льӯс район А̄нъя па̄вылт самын патыс, тот яныгмас. Ты Тамара Семёновна Мезенцева тав а̄тятэ о̄лыс. Тамара Семёновна ань Ягрим па̄вылт о̄лы. Тав ты урыл ля̄ххал тотнэ нэ̄н Наталья Анадееван тох потыртас: «Ам а̄щум Семён Кириллович, омам ос Анастасия Степановна Сайнаховыг о̄лсы̄г. А̄щум омам Люлюкары па̄вылныл тӯлмантастэ. Э̄кваго̄йкаг акваг А̄нъя па̄вылт о̄лсы̄г. Тэ̄н война о̄вылтахтан мус ат ня̄врам о̄щсы̄г, война холам юипа̄лт о̄с ат ня̄врам самын паттысы̄г. Пуссын аквъёт лов ня̄врам янмалтасы̄г. Хо̄нтлын нак о̄вылтахтам порат а̄щум та̄ра войнан вуйвес. Омам ня̄враманэ янмалтасанэ ос колхозт са̄всыр та̄рвитыӈ рӯпата ва̄рыс. То̄нт ня̄врамыт, нэ̄т ос яныгпа̄ла хо̄тпат та̄нкина̄ныл са̄литта̄л рӯпитасыт. Па̄влыӈ ма̄хум пуссын аквъёт тӯя па̄сныл я̄ӈк по̄льнэ мус ня̄р ла̄глыл по̄лям витыт сусым хӯл алыщласыт. Тэ̄лы порат пувум хӯланыл лувыӈ суныл Ханты-Мансийск ӯсн тотыгласаныл. Ты хӯланыл ма̄гыс та̄н сыртэпыл, коласыл ос са̄ккарыл майлуве̄сыт. А̄тям а̄ще (ам о̄пам) Кирилл Васильевич наме о̄лыс. Тав са̄в пыг о̄ньщис. Ма̄нь пыганэ пуссын Ха̄льӯс пупкол школан ханищтахтуӈкве майлысанэ. Ня̄врамыт халт а̄щум щар янгыг о̄лыс, таима̄гыс тав ща̄няге̄на̄щаге̄н ханищтахтуӈкве ат майвес, юн са̄всыр рӯпата ва̄рим о̄лыс. Школан ат ялантаме ма̄гыс рущ ла̄тыӈ щар ат ва̄с. Хо̄нтлам ма̄т ущта рущ ла̄тыӈ ва̄ӈкве патыс». Ще̄ман о̄йка Ленинград ӯс вуянтас ос Курский дугат хо̄нтлыс. Ма̄хманув тот сака та̄кыщ алыщлахтасыт. Аквматнакт тав китыглавес: са̄лыӈ суныл яласаӈкве ха̄сы манос а̄ти. Тав ва̄им, ха̄сыс, а̄ще са̄лыӈ хумыг о̄лыс. Ты потыр юипа̄лт тав са̄лыӈ сӯныл майвес ос Ладожское нампа тӯр ӯлтта Карелия ма̄ныл блокадный Ленинград ӯсн тэ̄нутпормас тотыглаӈкве ке̄твес. Та порат Ленинград ӯст о̄лум ма̄хум тэ̄тал са̄валасыт. Фашистыт ӯс мӯвылтасаныл, то̄нт тот са̄в мир тэ̄тал порсыс. Ще̄ман о̄йка тув тэ̄нут хартыс, ювле ос ня̄врамыт сунын та̄лттым тотсанэ. «Новости Югры» рущ газетат рӯпитан ма̄ньщи а̄ги Наталья Анадеева ты ва̄рмаль щирыл э̄лаль кисхатуӈкве патыс. Интернетыт Щеман Сайнахов урыл хоты потрыт о̄лсыт, пуссын ловиньтасанэ. Аквматэ̄рт тамле потыр хо̄нтыс: «Приказ 253 стрелковому полку 45 стрелковой дивизии Карельского фронта 1 июля 1944 года». Ты потыр щирыл 1942 та̄лт яныгпо̄ль э̄тпост 28 хо̄талт Сайнахов Семён Кириллович «За отвагу» нампа ма̄гыл по̄сыл майвес. Ленинградский фронтыт тамле ва̄рмаль о̄лыс, Пушкин ӯс винэ порат, немцыт са̄в патроныӈ писалил са̄лтатанув па̄тлуптасаныл, э̄лаль ат та̄ртсаныл, та̄кыщ юв я̄ртхатыгласыт. Ще̄ман о̄йка командирын та писаль лаппо̄илттаӈкве ке̄твес. Тув лаквме̄тэ ня̄лын хо̄йвес ос ка̄ркам ма̄ньщи хо̄тпакве тув граната вущкасаӈкве а̄лымас, ты хосыт пулемёт хотпоилттаӈкве ве̄рмыстэ. Та юипа̄лт тав ма̄хманэ̄н та̄ра пӯльницан тотвес. Китынтыг ос Сталинград ӯс вуянтым ня̄лын та̄кыщ саквата̄лвес. Пӯльницат пусмалтавес, ос э̄лаль лусытаӈкве минас. Ля̄ххал тотнэ нэ̄ ты нэ̄пак э̄лаль ловиньтыматэ, хото̄щатахтас. Насати, тав осетиныг хансым о̄лы. Осетиныт малтып ма̄т о̄лнэ ма̄хум тох ла̄вавет. Ты тэ̄ла щирыл тав округ военкоматын звонитас, та̄н ла̄всыт: «Тамле нам акв хо̄тпа о̄ньщис. Тав Ха̄льӯс район А̄нъя па̄вылныл о̄лыс». Та̄н ла̄внэ̄ныл, ань таима̄гыс тох е̄мтыс, Ще̄ман о̄йка рущ ла̄тӈыл потыртаӈкве ат ха̄сыс, остякыг улпыл ла̄вхатас кос, ос мо̄т щирыл торгамтавес. Осетин ма̄хум мирн ёмщакв ва̄вет, ул таима̄гыс тав та ма̄хум нупыл ты хасвес. Тамара Семёновна 1952 та̄лт самын патыс. А̄ще хо̄нтлум нак урыл сака са̄в ат потырта̄лыс, то̄ва потрыт пуссын ёмщакв номиянэ. Ще̄ман ойка потре щирыл, аквматнакт та̄н Карелия ма̄т ӯнлысыт. Кон татем ащирмаӈ ос сэ̄ӈкв о̄лыс. Сусте̄нт, а̄гирищ торыл пантхатым лю̄ли. Тав палтэ ё̄мыс, китыглахты, ат по̄ляве. Вильтэ̄н а̄ӈкватас, насати э̄ква лю̄ли, тав тох ла̄выс: «Пыгкве, наӈ хо̄нтлэ̄н, хо̄нтлэ̄н, ам ат по̄лявем». Курский дугат хо̄нтлум ва̄рмаль о̄с номыл матыгла̄лыстэ. Акв хотты накт та̄рвитыӈ хо̄нт юипа̄лт щар суйта̄лыг е̄мтыс. Ще̄ман о̄йка писалиӈ та̄гыл траншеял но̄хворатас, а̄ӈкватас, тав э̄лыпалэ̄т мощ э̄лыннӯв немец о̄йка писалиӈ та̄гыл лю̄ли. Сас тув ка̄ртсы̄г, акв ляльт нас та сунсэ̄г. Тувыл немец илттыг ма̄н ёлӯнтылматас. Ще̄ман о̄йка о̄с ювле порыгмас, писале уральтастэ, насати ня̄л та̄л о̄лыс. Тамле ты нак о̄лыглас. Ётылнув хо̄нтлын нак по̄йтыс. Ще̄ман о̄йка А̄нъя па̄вылн юв ёхтыс. Тот тав колхозт во̄раим ос хӯл алыщлым рӯпитаӈкве патыс. Тав хо̄нтлум нак урыл э̄ргыглам э̄ргыт сака э̄руптасанэ, ва̄тихал э̄ргысанэ. О̄йка пе̄с йис о̄лупсат ёмщакв ва̄санэ. 1959 та̄лт тав па̄вылт Ӯй йӣквнэ ва̄рмаль ва̄рыглас. Та ялпыӈ хо̄тал юипа̄лт тав мирколн са̄пранин во̄ввес, партбилетэ пасанын пинуӈкве ла̄ввес. Тав хот ат ро̄хтыс, тох ла̄выс: «Ам ты партбилетум ке̄лп хосыт сэ̄лыслум. На̄н ос хо̄нтлын ма̄т о̄лсы̄на? » Ос тав ня̄враманэ ма̄гыс сака пилыс, та̄нтте̄ныл ул вос хультсыт, таима̄гыс партбилетэ па̄санын пиныстэ ос сысы та минас. Семён Кириллович 78 та̄л о̄лыс. Ня̄лын саквата̄лум ма̄нанэ акваг лоӈхитаве̄сыт. Тамара Семёновна таве акваг пусмалтастэ. Ётыл а̄ще тав нупылэ тох ла̄выс: «А̄гикве, ле̄ккарыг ханищтахтэн, наӈ ка̄тагын татем кӯпнитыг». Тамара Семёновна ле̄ккарыг ат е̄мтыс, о̄лнэ па̄лытыл клуб колт акваг рӯпитас. Тав хунь война урыл кина сунсы, акваг а̄ще номылматыгла̄лытэ, аквтупмат таве тот ка̄салытэ, тав потырта̄лум потранэ ос кинат щар аквхурипат. Ты потыр Наталья Анадеева хансыстэ, ма̄ньщи ла̄тӈыг Николай МЕРОВ толмащластэ. 1077 2014.06.06. Николай МЕРОВ Во̄рт ӯргалахтым о̄лэ̄н. Ань ма̄лтыпыг е̄мтыс. Сыресыр хащта̄л а̄гмыт нэ̄глэ̄гыт. Ты кастыл мир пусмалтан департамент кӯщай Александр Филимонов ля̄ххал тотнэ хо̄тпат акванатыгласанэ. Тав прививкаукол тӯщтын ва̄рмаль урыл потыртас. На̄н тав потре э̄лаль ловиньтэлы̄н. – Ма̄н ка̄сыӈ та̄л округувт о̄лнэ мир прививкауколыл тӯщтыянӯв. Ты а̄гмыт урыл акваг потыртэ̄в. Ма̄н во̄рыӈ ма̄т о̄лэ̄в. Ань тӯииг е̄мтыс о̄с ке̄рыӈхомлахыт та ква̄лапасыт. Рущ щирыл та̄н «клещиг» ла̄вавет. Та̄н сака та̄рвитыӈ а̄гм (энцефалит, боррелиоз) тотэ̄гыт. Тувыл ос мо̄т ӯитныл а̄гм ха̄хтуӈкве ве̄рме̄гыт. Хо̄тпа ты ӯйн пурасаве ке, тав а̄лпитэ сака исыглы, са̄йтта̄л патуӈкве ве̄рми ос то̄рыгтаӈкве патаве. Пурасам хо̄тпат то̄ват пусмалтаӈкве ат ве̄рмавет, ты а̄гм хосыт хотталь щалтэ̄гыт. Прививкаукол тӯщтуӈкве таима̄гыс ты э̄ри. Ты коныпал мо̄лты та̄л ма̄хум тамле а̄гмыл е̄мталасыт: ты туляремия – ма̄порсӯит ос лё̄мвоит тотнэ а̄гм ос описторхоз – хӯлытныл со̄рыгуй а̄гм. Туляремия а̄гмыл са̄выӈпа̄лэ во̄раян ос ӯйхул янмалтан хо̄тпат ма̄к та̄н ты ха̄хтавет. Ты а̄гм та̄ра ат суйты, кит са̄ткем мины, ущ та сумыллы. Ты а̄гм порат хо̄тпа а̄лпитэ илттыг исыглаве, аквтупмат грипп а̄гм нупыл харты, нё̄влянэ а̄гмыӈыг е̄мтэ̄гыт. Ща̄пак, хулюмхӯл, сорт ос мо̄т хӯлыт хосыт э̄лумхолас «описторхоз» а̄гмыл е̄мты. Со̄рыгуй ул вос о̄ньщегы̄н, хӯланы̄н ёмщакв па̄йтэ̄н ос ша̄ритэ̄н. Тамле та̄рвит а̄гм хосыт хо̄тпа о̄с по̄рсуӈкве ве̄рми. Ты а̄гмыл е̄мтнэ̄н порат сымкакр щар ва̄гта̄лыг паты, алпи ос витыг пе̄рыглы. Ётылнув а̄гм тув ӯнты, хроническииг е̄мты. А̄гмыл е̄мтнэ̄н порат та̄ра пӯльницан минэ̄н. На̄нки ул пусмалтахтэ̄н. Ӯргалахтым о̄лэ̄н, во̄рныл юв ёхтынэ̄н порат маснутаны̄н ёмащакв сунсыглэ̄н. 1077 2014.06.06. Людмила ТЕТКИНА Ня̄врамыт янытлан хо̄тал. Ханты-Мансийск ӯст о̄лнэ «Торум Маа» музейт ня̄врамыт ма̄гсыл «Ворщик хо̄тал» нампа ялпыӈ хо̄тал ва̄рыглавес. Ты ялпыӈ хо̄тал пе̄с порат хо̄нтаӈ ма̄ньщи ма̄хум та̄н янытласыт. Музейт рӯпитан ма̄хум ты ва̄рмаль урыл пе̄с нэ̄пакыт ос Анна Митрофановна Конькова «День трясогузки» хансум мо̄йтэ̄т ловиньтасыт ос ты ялпыӈ хо̄тал янытлаӈкве о̄вылтахтасыт. Хо̄нтаӈ ма̄ньщит ла̄выгласыт, ворщик ке ёхтыс, я̄ӈк та нёвумты. Пе̄с порат тамле потыр о̄лыс, ты товлыӈ ӯй тыг ёхты, я̄н исы, лэ̄ге̄тыл я̄ӈк сакватытэ, такви товлаге̄т ре̄гыӈ ос малтым хо̄тал ёт тоты. Ворщик луйгим турман ӣтит хотня̄влыянэ ос туи пора лӯи ма̄н во̄витэ. «Торум Маа» музей «Ворщик хо̄тал» лӯпта э̄тпос о̄выл хо̄талэ̄т нилыт та̄л ты янытлавес. Тамле ялпыӈ хо̄тал та̄н ня̄врамыт ӯргалан хо̄тал кастыл ва̄рыглэ̄гыт. Ань Ханты-Мансийск ӯст о̄лнэ ма̄хум ты ялпыӈ хо̄тал ёмащакв ва̄ганыл, ос ка̄сыӈ та̄лныл тув са̄в мир ёхталы. Музейт рӯпитан ма̄хум а̄гирищитпыгрищит ма̄гсыл са̄в пӯмащ ва̄рыгласыт. Та̄н ворщик урыл мо̄йтыт мо̄йтсыт ос ма̄вит урыл са̄всыр а̄мщит а̄мщисыт. Ня̄врамыт са̄лы сун ӯлтта поргысыт, тынщаӈ па̄хвтысыт ос мо̄т щирыл кассыт. 1077 2014.06.06. Тамара МЕРОВА Сапра̄нит са̄в тэ̄лат урыл потыртасыт. Ювле хультум э̄тпост округ правительство кӯщаит сапра̄нин акванатхатыгласыт ос са̄всыр са̄кконыт э̄рнэ ла̄тӈыл хассаныл. Акв сапра̄нит округ губернатор Наталья Комарова тав пуӈктотыс ос мо̄танэ̄т Геннадий Бухтин. Кӯщаит са̄всыр тэ̄лат урыл потыртасыт. Округув янытыл во̄р но̄хпе̄ламлаӈкве патыс. Ты э̄лыпа̄лт ӯсытыт ос па̄влытыт на̄й харыгтан колыт пуссын ёмщаквег щё̄питахтуӈкве ла̄вве̄сыт. На̄й харыгтан утыт э̄рнэ торыг мӯсхалыг вос рӯпитасыт ос акваг уральтым вос о̄щве̄сыт. Ты о̄вылтыт та̄н природный ресурс департамент па̄лыл ла̄тӈыл хӯлтыглымат. Тот кӯщаиг о̄лнэ хум Евгений Платонов ла̄выс: «Округувт я̄ӈк на̄тнэ э̄тпос кит са̄т сыс китхуйплов ма̄т на̄й о̄выл е̄мтме та̄рапаттысанӯв, та сыс во̄рт 88, 8 гектар са̄вит ма̄тэ на̄йн ё̄свес. Ма̄хум ялпыӈ хо̄талыт порат во̄рт ӯщлахтасыт, во̄раяӈкве ялсыт. Ма̄витув ань авиация ос во̄р уральтан служба па̄лыл ӯргала̄лым о̄ньщаве ос тот на̄й пистам е̄мтнэ порат та̄н та̄ра на̄й лапхарыгтыяныл. Тыи ма̄гыс 13 организацият рӯпитэ̄гыт». Вера Дюдина, округ бюджет олныт ловиньтан нэ̄, потыртас, ты та̄л хӯрум э̄тпос сыс та̄н 39 миллиард 917 миллион арыг солко̄ви сэ̄лсыт. Мо̄лты та̄л тыгыл мощщануве̄г о̄лыс. Ань са̄внув олн налог щирыл атсыт. Ос та олнытыл 34 миллиард 180 миллион солко̄ви са̄всыр программат ма̄гыс холтве̄сыт. Са̄выӈпа̄лэ олныт ма̄хум ханищтан ос пусмалтан ва̄рмалит ма̄гыс та̄стымат. Мо̄т па̄лэ мирн нё̄тмил ва̄рнэ, колыт ӯнттын ос лё̄ӈхыт пиннэ ма̄гыс, ЖКХ, па̄влыӈ ос во̄рыӈ хозяйстват но̄хво̄рмалтаӈкве уртве̄сыт. Туи порат ханищтахтын ня̄врамыт хотты ма̄т рӯпитаӈкве кусылэ̄гыт кос. Тамле тэ̄лат тармыл пуӈк тотнэ хо̄тпат ка̄сыӈ ня̄врам ёт ёмащакв вос потыртахтэ̄гыт ос матыр нё̄тмил та̄нанылн вос ва̄ре̄гыт. Ты программан о̄с я̄нас олн та̄стым о̄лы. Тувыл Алексей Варлаков, рӯпитан ма̄хум ос та̄н тэ̄ланыл ӯргалан департаментыт кӯщай хум, акв йильпи проект урыл потыртас. Ань хотты предпринимателит ка̄сащим матумпа̄ла хо̄тпат та̄нки палтаныл рӯпитаӈкве выганыл ке, та̄н грантолныл нё̄тавет тах. Ётылнув кӯщаит Геннадий Бухтинын китыт сапра̄нин акванатыглаве̄сыт. Та̄н о̄влэ̄т ЕГЭ ва̄рмалит урыл потыртасыт. Премьерминистр РФ Дмитрий Медведев ты урыл о̄с ла̄тыӈ ва̄рыс. Ты та̄л российский итоговый аттестация щирыл Крымт ос Севастополь ӯст школа а̄стлан ня̄врамыт о̄выл щёс номтаныл а̄рталавет тах. Округувт экзамен пирмайтан ма̄гыс колыт ёмащакв щё̄питаве̄сыт. Пуссын о̄лыглан ва̄рмалит кӯщаит та̄нки кос хотыл ищхӣпыӈ утыт хосыт уральтаӈкве ве̄рмияныл. Тувыл «Партнер» нампа компания правительствав ёт аквъёт рӯпитан соглашениенэ̄пакыт ловиньтасыт. Та̄н ма̄хумн о̄лнэ колыт ӯнттын тэ̄лат урыл ла̄вхатэ̄гыт. Кол ӯнттын э̄рнэ пормас та̄нки ва̄ре̄гыт ос колыт молях ӯнттыяныл. Ты коныпал рӯпатата̄л о̄лнэ хо̄тпат та̄нки палтаныл рӯпитаӈкве выганыл. Сургут ӯст кол ӯнттын пормасыт ва̄рнэ завод ӯнттуӈкве ве̄рме̄гыт. Кӯщаитн тамле тэ̄лат мӯстысыт ос та̄н ты ва̄рмалит э̄лаль тотуӈкве ла̄всыт. Мо̄т договорнэ̄пакт «Дорожный карта» о̄вылтыт хансым о̄лыс. Тав кастылэ, та̄н образование, наука, культура ос здравоохранение ва̄рмалит та̄рапаттысаныл ос манах солко̄ви тув холтэ̄гыт, таи а̄рталасыт. 1077 2014.06.06. Николай МЕРОВ Мо̄йтыт ос потрыт хансэ̄н. Ма̄ньщи мо̄йтыт ос потрыт хансум ма̄ньщи э̄ква Анна Конькова номылматыглан кастыл ань округувт ка̄сыӈ та̄л ня̄врамыт ма̄гыс конкурс ва̄рыглаве. Ты конкурсын нёлоловхуйплов та̄ланыл иӈ ат то̄влын а̄гитпыгыт та̄н тув хансуӈкве ве̄рме̄гыт. Тув акв, кит, хӯрум потыр соссаӈ мир о̄лупса урыл хансуӈкве ро̄ви. Тот тамле номинацият щирыл потрыт вивет: «Стихотворение», «Потыр» (эссе, новелла), «Мо̄йт» (пе̄с йис потыр), «Миф». Ты конкурсын рӯпата ке̄тнэ ма̄гыс ня̄врамытн о̄влэ̄т заявканэ̄пак хансуӈкве э̄ри. Тувыл ос ты тэ̄ла культура Департамент ло̄псыт http: //www. depcultura. admhmao. ru та̄рапаттуӈкве ро̄ви. На̄нки потрын ос заявкан ты адрес щирыл ке̄тэ̄н: электронный адрес Cultura-ugra@admhmao. ru, пищман ос ты адресын: Ханты-Мансийск ӯс, ӯсхулы Мира, кол 14а, 207 колнак. Рӯпатанын лӯпта э̄тпос 30 хо̄талэ мус ке̄туӈкве ве̄рмияны̄н. Культура Департамент ке̄тум потре ма̄ньщи ла̄тӈыг Николай МЕРОВ хансыстэ. 1077 2014.06.06. Светлана РОМБАНДЕЕВА Ня̄врамыт ӯргалавет. Ня̄врамыт ӯргалан щирыл округ янытыл рӯпитан нэ̄ Татьяна Дмитриевна Моховикова ос ма̄н ма̄вт о̄лнэ савалап ня̄врамыт тэ̄ланыл палт кӯщаиг о̄лнэ нэ̄ Елена Владимировна Немчинова ля̄ххал тотнэ ма̄хум э̄лыпа̄лт ня̄врамыт о̄лупсаныл урыл потыртасы̄г. Тэ̄н ла̄внэтэ̄н щирыл, ювле хультум та̄л сыс 700 арыгтем ня̄врам ос яныгхо̄тпат нё̄тмил киссыт, янгыщ ань о̄лнэ кол урыл китыглахтасыт. Т. Д. Моховикова тох ты потыртас: «То̄ва ӯсытт манос районытт рӯпитан кӯщаит тэ̄ланыл ёмащакв ат ва̄рияныл. Савалап ня̄врамыт нё̄тмил ре̄тыл та̄н палтаныл такос ялантэ̄гыт, ат иӈ хӯнтлавет, пуӈканыл ёлта̄ртым кон та минэ̄гыт. А̄гмыӈмосыӈ ня̄врам о̄щнэ колта̄гыл о̄с сака са̄в, та̄н о̄с нё̄тмил такос во̄ве̄гыт, нэ̄мхотьютн атпыл хӯлавет. Ма̄н ка̄сыӈ тэ̄ла уральтылӯв, пуссын нё̄тыянӯв. Ос хунь ла̄тӈанув акван ат ёхтэ̄гыт, сутытахтэ̄в. Ань ты ва̄рнэ рӯпатав хосыт мо̄лты порат Сургутский ос Нефтеюганский районыгт нила колта̄гыл о̄лнэ колыл майве̄сыт. Ка̄сыӈе а̄гмыӈмосыӈ ня̄врам о̄ньщи, кӯщаит та̄нанылн нё̄туӈкве щар ат тахсыт. Округув янытыл кӯщаит хӯрум ӯст щар ма̄к ёмащакв рӯпитэ̄гыт – Ханты-Мансийск, Нягань ос Мегион. Мо̄т ма̄т о̄лнэ хо̄тпат тай э̄лаль нас пувтыянӯв, молямтыянӯв, ань ка̄сыӈ ня̄врамн вос нё̄тэ̄гыт, пуссын о̄лнэ колыл вос мивет. Округувт о̄лупса ань сака ёмас, ня̄врамыт са̄всыр нё̄тмилыл ва̄равет, садикыт ос школат ӯнттавет. Таима̄гыс тыт ань са̄в ня̄врам самын паты. Ювле хультум та̄лт 27 со̄тыра 876 ня̄врам самын патыс. Савалап ня̄врамыт халт 95, 7% са̄вит колта̄глытн о̄луӈкве вуйве̄сыт, ня̄врам о̄щнэ колт мощща ня̄врам хультыс. Ма̄н рӯпатавт ма̄к таи, ань ня̄врам такви ща̄нягеа̄щаге ёт вос о̄лы. Мо̄лты та̄л 200 са̄вит хо̄тпа та̄нти ня̄враманыл ювле майве̄сыт. Тувыл ка̄сыӈ тамле колта̄гыл ма̄н акваг уральтылӯв, нё̄тылӯв». Я̄ӈк на̄тнэ э̄тпос 15 хо̄талэ – колта̄гыл ялпыӈ хо̄талыг о̄лыс. Ты хо̄талт ма̄ янытыл о̄лнэ мир пуссын мӯйлэ̄гыт, ка̄сыӈ колта̄гыл янытлаве. Татьяна Дмитриевна ос Елена Владимировна округт о̄лнэ ма̄хум пуссын ты хо̄талыл янытласанэ̄н, са̄в ёмас сымыӈ ла̄тыӈ ла̄всы̄г. 1077 2014.06.06. Людмила ТЕТКИНА А̄гмыӈ а̄гитпыгыт ёнгын утыл мӯйлуптаве̄сыт. Ма̄ньполь э̄тпос 22 хо̄талныл я̄ӈк на̄тнэ э̄тпос 22 хо̄талэ мус округувт «Коробка храбрости» нампа акция рӯпитас. Э̄тпос сыс акв со̄тыра арыгкем э̄лумхо̄лас а̄гмыӈ ня̄врамыт ма̄гсыл ёнгын утыт ке̄тсыт. Тамле тэ̄ла Татьяна Моховикова, ня̄врамыт ӯргалан нэ̄, тав ва̄руӈкве ла̄выс. Акванатым мӯйлупсат тав Ханты-Мансийск ӯст пӯльницат пусмалтахтан ня̄врамытн мӯйлуптасанэ. Татьяна Дмитриевна ла̄выс, хунь та̄н тамле рӯпата ва̄руӈкве номылматсыт, о̄влэ̄т туп рака̄гм о̄щнэ а̄гирищитпыгрищит ма̄гсыл мӯйлупсат акванатсыт. Тувыл мощ номсахтым, та̄н торгамтасыт, мо̄т а̄гмыӈ ня̄врамаквет о̄с са̄всыр уколыл тӯщтавет о̄с мо̄т са̄в а̄гмыӈ процедурал ва̄равет, та̄н о̄с лю̄ньще̄гыт ос савалэ̄гыт. Тыи ма̄гсыл «Коробка храбрости» нампа тэ̄ла та̄н пуссын а̄гмыӈ ня̄врамыт ма̄гсыл ва̄рсыт. Пӯльницан ялме порат тав педиатрический отделеният пусмалтахтын ня̄врамыт ёт хо̄нтхатыглас ос мӯйлупсал мисанэ. Татьяна Моховикова округувт о̄лнэ ма̄хум ос Нефтеюганск ӯст «Светозар» савалап ня̄врамыт колн мӯйлупсат ма̄гсыл яныг пӯмащипа ла̄тыӈ ке̄тыс. Тамле ёнгын ут акванатнэ ма̄хум ня̄врамытн са̄в ща̄гт тотэ̄гыт, ос ня̄врамыт хунь ща̄гтэ̄гыт, мувиньтэ̄гыт, то̄нт моляхнув пусмалтахтэ̄гыт. Лӯпта э̄тпос хӯрмит хо̄талэ̄т ня̄врамыт уральтаӈкве Татьяна Моховикова Нижневартовск ӯсн ялыс. Тот тав пувласпиа̄гм пусмалтан ня̄врамыт ёт хо̄нтхатыглас ос пуссын ёнгын утыл мӯйлуптасанэ. Кӯщай нэ̄ ла̄выс, тамле акция та̄н ва̄тихал ва̄рыглаӈкве патэ̄гыт. 1077 2014.06.06. Александр ВЬЮТКИН «Вы̄гыр» нампа нэ̄пак йильпииг нэ̄глыс. Ханты-Мансийск ӯст ма̄вит ӯргалан Департамент колт йильпи нэ̄пак суссылтавес. Тав рущ ла̄тӈыл ла̄ваве «Красная книга». Та нэ̄пакт округ янытыл мощщаг хультум ӯйхулыт, во̄рт яныгман са̄всыр лӯптаӈ пумыт ос ла̄хсыт урыл тот хансыма ос хурияныл суссылтавет. «Вы̄гыр нэ̄пак» лов та̄л сыс акв щёс ва̄рыглаве. Ты кастыл кӯщаиг о̄лнэ тит хумыг тув ёхталасы̄г. Акватэ наме Евгений Петрович Платонов, тав округ янытыл ма̄вит ӯргалан Департамент тармыл кӯщаиг о̄лы. Мо̄танэ ос Сергей Владимирович Пикунов, тав ма̄вит ос ӯйхул ӯргалым округ янытыл кӯщаиг рӯпиты. Ва̄рмаляныл о̄вылтан порат кӯщаиг ма̄хум янытлан ма̄гсыл потыртаӈкв во̄выглавесы̄г. Евгений Платонов ла̄выс: «Тыхо̄тал ам яныг пӯмащипа ла̄тыӈ ма̄вит ос ӯйхул ӯргалан ма̄хмытын ла̄ве̄гум. Та̄н та̄рвитыӈ рӯпатаныл ма̄гсыл ма̄н иӈ са̄всыр мо̄рсыӈ ӯйхул ка̄салаӈкв ве̄рме̄в. Та ма̄хмытын ма̄н ня̄враманув яныг пӯмащипа ла̄вуӈкв иӈ патэ̄гыт». Тувыл э̄лаль Сергей Пикунов ла̄выс: «Ам ос ты йильпи «Вы̄гыр нэ̄пак» щё̄питан ма̄хмытын ла̄ве̄гум. Та̄н ты ма̄гсыл са̄в рӯпата ва̄ре̄гыт. Ва̄рум рӯпатаныл щирыл ань ос ма̄вит ос ӯйхул ӯргалан ма̄хмытын кӯстырнуве̄г рӯпитаӈкв паты. Ма̄нтина̄нувн ма̄в сыстамыг ос ӯйхуланув са̄литым щирыл о̄ньщуӈкв э̄ри. Акваннё̄тхатым ань о̄лнэ осыӈ «Вы̄гыр нэ̄пакув» ущ тах во̄втами». Округувт щар о̄выл тамле нэ̄пак 1999 та̄лт та̄ратавес. Нэ̄пак щё̄питан ма̄гсыл тит хо̄тпаг рӯпитасы̄г. Тыи Виктор Андреевич Галинки, тав ань ма̄вит ӯргалан государственный инспекторыг рӯпиты. Тувыл Антонина Федоровна Тарханова, тав округ янытыл о̄лнэ экологический фонд тармыл председателиг о̄лы. Тэ̄н ты тит ёмас, ань ты нэ̄пак щё̄питан кастыл са̄выӈпа̄лэ потрыт атсы̄г. Антонина Федоровна «Заслуженный эколог Российской Федерации» нам о̄ньщи. Ӯйхул ӯргалан урыл хӯрум доклад о̄лыс. Ловиньтам нэ̄паканыл пуссын ма̄вит ӯргалан ма̄т рӯпитан ма̄хмытын щё̄пита̄лве̄сыт. Потраныл халт та̄н ла̄всыт: «Ӯйхуланув, са̄всыр хорамыӈ лӯптанув ос ла̄хсанув хультуптан ма̄гсыл ма̄навн та̄н о̄лнэ ос яныгман ма̄наныл сыстамыг о̄ньщуӈкв э̄ре̄гыт. Ма̄н округувт тамле ма̄ мощща. Таима̄гсыл ма̄н ань ты э̄лаль номсахтэ̄в, хоты ма̄т ӯргалаӈкв э̄ре̄гыт. Округув янытыл тамле хурип нила ма̄ ва̄ре̄в. Акватэ Нё̄ранув ляпат, тувыл хо̄талув нэ̄глын е̄рт тит ма̄ ва̄руӈкв э̄ри. Та коныпал ос тит ма̄ Лордовский ос Базуковский нампа ма̄вит ӯргалан ма̄нь ма̄г янгыг щё̄питаӈкв номсэ̄в. Э̄рнэ нэ̄паканыл щё̄питаӈкв э̄ре̄гыт. Ты ма̄гсыл матахтем та̄л э̄ри. Щар ма̄к са̄в ёмас сыстам ма̄т Нё̄р нупыл о̄лэ̄гыт. Тот ма̄витэ щар ма̄к сыстамыг хультуптаӈкв ты э̄ри. Яныгман мирув ма̄нь та̄гыл ма̄витув сыстамыг о̄ньщуӈкв ос ӯргалаӈкв вос ханьщувлэ̄гыт. То̄нт ты о̄лнэ ма̄в хосан сыстамыг хульты». Тув ёхталам мир пуссын ты йильпи «Вы̄гыр нэ̄пакыл» мӯйлуптавесӯв. Тав, со̄ль, матыр та̄рапаттын ма̄гсыл ёмас нэ̄пакыг тэ̄лыс. 1077 2014.06.06. Александр ВЬЮТКИН Са̄в та̄л ня̄врамыт ёт рӯпитан нэ̄. Урай ӯст ам ка̄ркам, потрыӈ ма̄ньщи нэ̄ ёт ва̄йхатыгласум. Тав наме Тамара Ивановна Голованова, такви а̄ги о̄парище наме щирыл Тайлакова. Тамара Ивановна щаще̄кватэ, о̄патэ пе̄с та̄гыл Тап нампа ма̄нь па̄вылт о̄лсы̄г. Та па̄вланыл Конда ос Тап я̄г акванпатнэ ма̄т о̄лыс. Конда я̄ ва̄та хосыт о̄лнэ пе̄с па̄влыт пуссын акв я̄ ва̄та хосыт ӯнлэ̄гыт, туп Тап па̄вланыл тапал ва̄тат о̄лыс. Тамара Ивановна 1952 та̄лт та̄л котиль э̄тпост Тап па̄вылт самын патыс. А̄тятэ наме Иван Александрович о̄лыс. Колхозаныл яныг о̄лме порат тув палыт ӯйхул тэ̄нэ кастыл пум ва̄рнэ, хӯл алыщлан хумыг рӯпитас. Тэ̄лы на̄йив са̄грыс ос во̄раяс. Оматэ наме Дарья Васильевна, тав ос мис поснэ нэ̄г рӯпитас. О̄патэ наме Александр, яныг хо̄нт порат тав Ленинград, ань Санкт-Петербург ӯс, по̄хат порслувес. Щаще̄кватэ̄н похоронка нампа нэ̄пакыл атпыл тотыглавес. Война юипа̄лт рӯтананыл юио̄выл пищмат ёхталан ма̄н са̄в пищма те̄тыгла̄лсыт. Тувыл ювле пищмал ёхталаве̄сыт, тот хансым о̄лыс: «Александр Георгиевич хо̄т порслувес, ат ва̄ве, тав наме нэ̄мхо̄т а̄тим. Э̄рыӈ ма̄н ётув хо̄нтлан ма̄хум палт минас». Тамара Ивановна мощ ётылнуве та̄рапаттыстэ. Хо̄нт а̄стын юипа̄лт са̄в мир тамле хурип пищмал ёхтыглаве̄сыт. Опатэ Александр Георгиевич войнан минам порат щаще̄кватэ Наталья Семёновна ат ма̄нь ня̄враманэ ёт хультыс. Халанылт тит а̄ги, хӯрум пыг яныгмасыт. Ня̄враманэ тыттын ма̄гсыл Наталья Семёновна са̄в рӯпитас. Пыганэ мощ яныгнуве̄г е̄мтманыл юипа̄лт ущ кӯстырнуве̄г о̄луӈкв патыс. Тамара а̄тятэ̄н потырта̄лвес, хумус тав оматэ хӯл пувим, на̄йив са̄грим ос пум ва̄рим э̄тэхо̄талэ рӯпитас. Юв мощщаквен ёхталы, ня̄враманэ тыттыянэ, тувыл рӯпитаӈкв о̄с та мины. Щаще̄кватэ тав о̄с ёмщакв номитэ, тох ла̄выс: «Са̄в рӯпитаме ма̄гсыл тав такви та̄ланэ̄н ат сусхатас. Тав матумнуве̄г о̄лыс». Тамара Ивановна самын патум Тап па̄влэ̄т нила класс мус ханищтахтас. Тувыл Леуши па̄вылн интернатын э̄лаль ханищтахтуӈкв те̄твес. Каникулытт ӯщлахтын хо̄талыт порат а̄тятэ̄н аквписыг юв тотыглавес. Леуши па̄вылт иӈ нила та̄л ханищтахтас. Нёлолов класс а̄стламе юипа̄лт Ханты-Мансийск ӯсн ня̄врамыт ханищтан нэ̄г ханищтахтуӈкв минас. Та юипа̄лт Тобольский институтн «Физикоматематический» факультетн ханищтахтуӈкв минас. Тот хӯрмит курс а̄стламе юипа̄лт о̄йкаӈыг е̄мтыс. Тувыл та̄ра Урай ӯсн ювле та ва̄нтлыс. Ань о̄лнэ ӯсн ёхтуме порат о̄влэ̄т тав ат та̄л ня̄врамыт ханищтас. Тувыл садик колн воспитателиг патхатас. Тот тав пенсиян миннэ̄тэ мус рӯпитас. Ань тав ла̄выс: «Урай ӯс о̄лнэ то̄ва ма̄хум ёт ма̄ньта̄гыл ва̄йхатэ̄гум. Хунь хо̄т ка̄салавем, ханьщавем, аквписыг пащалахтэ̄гыт. Та̄н ла̄вум акв «Паща» ла̄тӈыл, ам сымум аквтупмат та ка̄мнями». Тэ̄н о̄йкатэ̄нтыл тит пыг янмалтасы̄г. Пыгаге сас ще̄мьяӈыг, Урай ӯст о̄лэ̄г, омаге̄на̄тяге̄н акваг нё̄тэ̄г. Тамара Ивановна щаще̄кватэ о̄лме порат ма̄ньщи ла̄тӈув потыртантем торгамтастэ кос. Та па̄сныл хосаг е̄мтыс, ла̄тӈув хотёрувластэ. Пенсиян ква̄лме юипа̄лт нас тох ат о̄лы. Яныгпа̄лаг о̄лнэ ма̄ньщи хо̄тпат ёт ка̄сыӈ са̄тыт хо̄талт акванатхатыглэ̄гыт. Та̄н акванатхатыглан ва̄рмаляныл «Возрождениег» намаясаныл. Та̄н тот а̄канит ю̄нтэ̄гыт, сакныл ма̄ньщи хорам хартуӈкв ханищтахтэ̄гыт, ма̄ньщи ла̄тыӈ ханищтэ̄гыт ос ма̄ньщи э̄ргыт э̄рге̄гыт. Урай ӯст о̄лнэ ёмас колта̄глыт са̄в со̄т вос о̄ньще̄гыт, ня̄враманыл пуста̄гыл вос о̄лэ̄гыт! Та̄нти На̄й-О̄транылн вос ӯргалавет! 1077 2014.06.06. Валентина УЗЕЛЬ Мирув янытлан нэ̄кве. Ма̄н акв ма̄ньщи нэ̄кве̄в стихыт хаснэ̄тэ ма̄гыс мирн ва̄ӈкв патвес, тав наме Светлана Селивёрстовна Динисламова, а̄ги о̄парищ наме Садомина. Тав ань такви Тагт па̄влэ нупыл ялыс, тот па̄влыӈ мир ёт хо̄нтхатыглас. Ме̄н тав ётэ ты урыл потыртасме̄н, тав потре ловиньтэлы̄н. – Наӈ на̄ӈти па̄влын тӯяг ялсын. Газетав ма̄гыс потыртэн, маныр тот ва̄рсын? Хотьют ёт тот хо̄нтхатыгласын? – Тот ам Тагт па̄вылт о̄лнэ мир ёт хо̄нтхатыгласум. Ма̄н клубт, ёнгын колт акванатхатыгласӯв. Любовь Зорина тав ты ва̄рмаль ва̄руӈкве номылматас, а̄нумн тыг Ханты-Мансийск ӯсн свонитас, ме̄н потыртахтасме̄н, тув таима̄гыс ты ялсум. – Наӈ ётын хо̄нтхатыглан ма̄гыс са̄в хо̄тпа ёхталас? – Клубт сака са̄в мир ат о̄лыс, ва̄тахтем хо̄тпа. А̄нумн та̄н ётаныл потрамаӈкве сака пӯмыщ о̄лыс, та̄нанылн стиханум ловиньтасанум. – Па̄влыӈ ма̄хманын наӈ стиханын хумус хӯнтлысаныл? Маныр та̄нанылн потыртасын? – Тагт па̄вылт о̄лнэ хо̄тпатн, ам номсэ̄гум, пӯмыщ хӯнтлаӈкве о̄лыс. Ам та̄нанылн са̄ртын ма̄ньщи мир урыл ос ма̄ньщи ла̄тыӈ урыл потыртасум. Тамле потрыт ка̄сыӈ хо̄тпан сымын щалтэ̄гыт. Пе̄с порат, хунь рущ ма̄хманув тыг иӈыт ёхтысыт, то̄нт ма̄н мирув сака ёмащакв о̄лыс. Атса̄т та̄л минам порат ма̄ньщи мир сака ё̄р мирыг о̄лыс, са̄в ва̄рмаль то̄нт ва̄руӈкве ха̄сыс. Ань ла̄ве̄гыт – ма̄н туп вораяӈкве ос хӯл алыщлаӈкве ха̄сэ̄в. Ва̄им, ты сака э̄рнэ ва̄рмаль, тыи та̄л мирув о̄луӈкве ат ве̄рми, хосат та̄гыл тох мирув о̄лыс. Ос ты коныпал тав иӈ са̄в ва̄рмаль ва̄с. То̄нт, пе̄с порат, ма̄ньщи хо̄тпат ня̄нь янмалтаӈкве ха̄ссыт, ке̄р толтуӈкве ос та ке̄рныл са̄всыр пормасыт ва̄руӈкве, тыналахтын ва̄рмаль о̄лыс, са̄всыр э̄лысам ма̄н яланта̄лсыт – яныг ярмаркытн, тот вы̄гыр сов ӯит, сэ̄мыл сов ӯит мо̄т пормасытн пе̄нтса̄лсыт. То̄нт ма̄ньщит хо̄нтлан ва̄рмаль о̄с сака ёмащакв ва̄сыт. Нё̄р тыпал е̄рн ма̄ньщи мир о̄лнэ ма̄н нэ̄мхо̄тпа хоса та̄лыт миннэ̄ныл сыс ёхтуӈкве ат ве̄рмыс, сака няӈраг хо̄нтлам ка̄нащит ос та̄н аяӈхумпыганыл о̄лсыт. Ты урыл ам Тагт па̄выл мирн потыртасум, тувыл стиханум ловиньтасанум. – Па̄влыӈ мирн, рӯтанын матыр ла̄тыӈ газетав та̄ра те̄тэ̄гын? – Тагт па̄вылт о̄лнэ хо̄тпатн са̄в ёмас ла̄тыӈ ла̄вуӈкве таӈхе̄гум. Та̄н э̄лаль ос тамле сымыӈ хо̄тпаг вос о̄лэ̄гыт, ёмас рӯпата вос о̄ньще̄гыт, ще̄мьянылт пуссын пуста̄гыл вос о̄лэ̄гыт, ня̄враманыл э̄лаль вос ханищтахтэ̄гыт. Ань о̄лнэ ка̄сыӈ хо̄тпан са̄в мӯтра ва̄ӈкве э̄ри, са̄в мӯтра ханищтаӈкве, то̄нт тах о̄лупсаныл кӯпнитнуве̄г паты. Ань о̄лнэ йис ханищтап та̄л рӯпата хо̄нтуӈкве та̄рвитыӈыг патыс. Ня̄врамыт, ханищтахтэ̄н, пӯмщалахтэ̄н, алам пе̄с йис порат о̄лум на̄н яныг щаще̄кваныно̄панын, ане̄кванынащо̄йканын сака са̄в ва̄сыт. Та̄н сака са̄в номтыӈмӯтраӈ потрыт, мо̄йтыт хультуптасыт, матъёмас ты потрыт венгр ос финн учёныитн яныгса̄т атпан та̄л арыгтем па̄сныл ёлхансыгла̄лве̄сыт. Тыхо̄тал ты потрыт ловиньтым, самвитанув нэ̄глэ̄гыт – яныг номт, яныг мӯтра та̄н та ва̄мыт. Акв стихум ловиньтэлы̄н. "Витсам" Амти мāм нэ̄ – лāтыӈ тāл ат ōлэ̄гум, Нотум палытэ̄т щāнь лāтӈум ӯлылэ̄гум, Номтум вōйт овим потранум лāвиянум, Сымум вōйт хуим потранум тотыянум. Тагт я̄ сыстам витквет витсамыг ове̄гум, Сульгин я̄ӈкыт халт я̄ӈксамыг вольге̄гум, Сōсхатнэ раквыт ёт раквсамыг патэ̄гум, Ё̄ӈхамлан тӯйт ёт тӯйтсамыг ё̄ӈхе̄гум. Йисыт миннэ̄ныл сыс сāв щёс ōлыглāлмум, Щāньтем сāнсаге̄т сāв щёс ӯнлыглāлмум, Овыӈ я̄ витсамыг аквнакт хунь овсум, Мāньщи мирум халт аквнакт хунь ōлсум. Кāсыӈ вōр лё̄хъясыт лāглум ё̄масāлум, Э̄лаль миннэ лё̄ӈх номттем хōнтсāлум. Тōрум мāвит э̄рге ам та хӯнтамлāлмум, Щāньтем э̄ргум э̄рге ам та э̄ргалтамлум. Суиӈыщ ман суйтāл э̄ргум ōвылтаслум, Самвит сэ̄гумтāлым кāсум оссувласлум, Ōлнэ хосытумтыл вос витсамыг хультэ̄гум, Миртем э̄ргытпотрыт ул вос ёрувлэ̄гум. С. Динисламова ёт В. Хозумова потыртас. 1077 2014.06.06. Людмила ТЕТКИНА Хо̄нтаӈ ма̄ньщит нэ̄пакыт ловиньтаӈкве э̄руптэ̄гыт. Та э̄тпос оигпам э̄лыпа̄лт 27 щислат библиотекат янытлан хо̄талыг о̄лыс. Ма̄н округувт яныг ӯсыт манос ма̄нь па̄вылквет 237 нэ̄пак ловиньтан кол о̄лы. Акв тамле библиотека Кондинский район Леуши па̄вылт рӯпиты. Татьяна Александровна Нохова, ты библиотекат рӯпитан нэ̄, ла̄выс: «Леуши па̄вылт нэ̄пак ловиньтан кол 60 арыгкем та̄л о̄лы. Ам яныгпа̄ла хо̄тпат ёт хо̄нтхатыгласум, ты ва̄рмаль урыл китыгласанум. Александра Кузьмовна Питухина, ма̄ньщи э̄ква, таи а̄нум ла̄выс, Леуши па̄вылт о̄лнэ пупколт нэ̄пак ловиньтан кол рӯпитас, рущ ла̄тӈыл «изба читальня» намаим о̄лыс. Тав ла̄вме щирыл, ма̄н па̄влувт библиотека 90 арыгкем та̄л рӯпиты. Ань 530 э̄лумхо̄лас библиотекан хасхатым о̄лэ̄гыт, та̄н халанылт 210 – ня̄врамыт. Ма̄хманув тыг вос ёхталасыт ос нэ̄пакыт вос ловиньтасыт, ам акваг са̄всыр суссылтапыт, ялпыӈ хо̄талыт ва̄рыглэ̄гум. Па̄влувт коррекционный школа рӯпиты. Ня̄врамыт тыг район янытыл ханищтахтуӈкве ке̄тавет. Та̄н ма̄гсыланыл ам суссылтап о̄с щё̄пита̄лэ̄гум. Акв порат са̄всыр пе̄с а̄нысаныт, ма̄ньщи па̄йпыт, со̄втыт ос мо̄т утыт тыт суссылтасанум. Ня̄врамаквет ты выставкал сака пӯмщалахтасыт. Ань та̄н ва̄тихал тыг ёхтала̄лэ̄гыт. Па̄влыӈ ня̄врамыт нэ̄пакыт вос ловиньтасыт, та̄н ма̄гсыланыл о̄с са̄всыр пӯмащ ва̄рыглэ̄гум, са̄всыр касылыт щё̄питалэ̄гум. Ловиньтан нэ̄пак хосыт са̄всыр ла̄тыӈ китыглэ̄гум, та ня̄врамыт хотьют са̄внув ва̄г, мӯйлупсал мӯйлуптыянум. Ка̄сыӈ та̄л ма̄ньполь э̄тпос «Неделя детской книги» нампа ялпыӈ хо̄талыт ва̄рыглэ̄гум. Туи порат нэ̄пакыт библиотекат виӈкве ул вос ёрувласыт ос яныг программа щё̄пита̄лэ̄гум. Яныг хо̄тпанув тыг во̄выглаӈкве ат э̄ри, та̄н тай нэ̄пакыт ловиньтаӈкве ка̄саще̄гыт. Хӯрум та̄л «Центр общественного доступа» тыт рӯпиты. Ма̄хум интернет щирыл рӯпитаӈкве библиотекат ве̄рме̄гыт. Па̄влувт ты ут сака лю̄льсаӈ рӯпиты, тыи ма̄гсыл ма̄ньлат ма̄хманув акваг тыг ёхталэ̄гыт. Яныгпа̄ла хо̄тпанув компьютерыл рӯпитаӈкве о̄с ханищтахтыянӯв. Тамле ханищтап ма̄н хӯрум щёс ва̄рыгласӯв. То̄ва яныгпа̄ла хо̄тпат ты утыл рӯпитаӈкве молях ханищтахтасыт, то̄ват щар ат ве̄рмысыт, акв хо̄тал ёхталасыт, тувыл сысы та минасыт. Ма̄н библиотекат туп 18 со̄тыра арыгкем нэ̄пак о̄ньще̄в. Тыи ма̄гсыл ты компьютер сака э̄ри, интернет хосыт са̄всыр нэ̄пак хо̄нтуӈкве ос ловиньтаӈкве ро̄ви. Соссаӈ ма̄хум пе̄с йис ва̄рмаляныл ос ща̄нь ла̄тӈаныл урыл хансым нэ̄пак тыт сака мощща. Ма̄ньщи ос ханты писателит хансум нэ̄паканыл тай о̄ньще̄в. Мо̄лты та̄л Юрий Вэлла, стихыт хансум ё̄рн хум, а̄тимыг е̄мтыс. Тав нэ̄паканэ ам акванатыгласанум ос суссылтап ва̄рыгласум. Ма̄хманув ты суссылтап ка̄салым, нэ̄паканэ ловиньтаӈкве вуйла̄лсаныл. Еремей Айпин потранэ о̄с тыт о̄лэ̄гыт, тав нэ̄паканэ ма̄хум ловиньтаӈкве сака э̄руптэ̄гыт. Андрей Тарханов хансум нэ̄паканэ ос пуссын тыт акванатсанум. Ма̄ньщи о̄йка тыт самын патыс, тыт яныгмас, школат тыт астластэ. Ёмас о̄лнув, Андрей Семёнович яныгмам па̄вылн ке ёхталанув, ма̄хманэ ёт ва̄щиньтахтанув, та̄нанылн такви нэ̄паканэ урыл потыртас ос стиханэ ловиньтас. Татьяна Александровна библиотекат 18 та̄л рӯпиты. Нэ̄пакыт ловиньтаӈкве такви э̄рупты, тыи ма̄гсыл рӯпататэ ёмащакв ва̄ритэ, ма̄хманэ нэ̄пак ловиньтаӈкве ханищтыянэ. 1077 2014.06.06. Тамара МЕРОВА Тӯлыглапыт хурин по̄слысанэ. Музеит янытлан хо̄талт ма̄хум ӯщлахтын ма̄гыс са̄всыр колытытн во̄виньта̄лве̄сыт. Та̄н пуссын олн ойтнэ та̄л тув щалтсасыт, ос маныр ва̄рмалит тот о̄лэ̄гыт, мӯсхалыг пӯмщалаӈкве ве̄рмысыт. Г. С. Райшев, ка̄тыл хурит по̄слын о̄йка, галереямастерской колэ̄т са̄в ня̄врамыт ща̄ньа̄щаныл ёт атхатыгласыт. Тот «Музейная ночь с маэстро2014 » нампа программа щё̄пита̄лвес. Кон кол а̄висӯнт по̄хат мӯй ма̄хум Олег Боровков ӯрсанэ, тав саксофоныл нё̄тнэ э̄рыгсов таныт ёнгыс. Тувыл Геннадий Райшев мӯй ма̄хум ёт пащалахтас ос та̄наныл о̄влэ̄т кон матыр по̄слуӈкве ла̄всанэ, ётыл юв суссылтапыт сунсыглаӈкве во̄всанэ. Музей кант яныг осыӈ то̄рыт нортве̄сыт ос са̄всыр а̄хвтасыт ла̄кквапиным о̄лсыт. Ня̄врамыт ща̄ньа̄щаныл ёт тув ё̄мантасыт ос кисточка ка̄тн вуим а̄хвтасыт са̄всыр о̄льпыл сартсаныл ос мувлахи то̄р тармыл хурит по̄слысыт. Та̄наныл «Югорская легенда» яныг хури ва̄руӈкве э̄рыс. Мо̄т хо̄тпат мольберт нампа па̄рт тармыл хурит по̄слуӈкве патсыт. Ты хотьют са̄всыр хаснэ йӣвытыл, мелыл манос о̄льпыл по̄слуӈкве ка̄сащас, таи та вис. Акв нэ̄ ӯсувт о̄лнэ Храм кол нупыл сунсым та кол по̄слуӈкве патыс. Лена увщим школат ханищтахтаме порат о̄с сака ёмащакв по̄слуӈкве ха̄сыс, ань тав ма̄н Саранпа̄выл ляпат ӯнлын Нё̄ранув суссылтаӈкве тахмаяс ос таиянэ по̄слыс. Геннадий Степанович ка̄сыӈ хо̄тпа ляпан ёхталас, та̄н ётаныл потыртас манос матыр урыл хӯлтыглас. Тувыл мӯй ма̄хум музей колн щалтсыт. Тот «Хо̄тал» нампа обскоугорский театрыт рӯпитан хо̄тпат ос «Э̄ргыт, йӣквыт пувлын ма̄хум» нампа коллектив пӯмыщ ёнгилыт ва̄рсыт ос мощ тӯлыглахтасыт. Тот мӯй ма̄хум э̄лыпа̄лт культурат рӯпитан кӯщаит ос кит искусствоведнэ̄г Надежда Владиленовна Сухорукова, Наталья Николаевна Фёдорова потыртасыт. Тувыл «Диалоги с Райшевым: Надежда Талигина «Медвежьи игрища» суссылтапе сунсуӈкве во̄вве̄сыт. Надежда Михайловна ханты нэ̄, тав Сыня я̄ ва̄тат Ямалт самын патыс. Ма̄нь та̄гыл са̄всыр мӯтрат ва̄ӈкве яныгхо̄тпатныл ханищтахтас, матыр пе̄с накыт о̄вылтыт акваг пӯмщалахтас. Ты нэ̄ совыл, хӯлсовыл, нуил, то̄рыл пормасыт ю̄нты, сакныл хорамыӈ утыт харты. Ань ханьщувлам тэ̄ланэ пуссын э̄лаль тотыянэ ос мирн суссылтыянэ. Тав 1980 та̄лт Салехард ӯст культурнопросветительский училище а̄стлас. Ётыл Москва ӯст С. Г. Строганов нампа художественный училищат ханищтахтас. Ос Салехардыт Л. В. Лапцуй нампа культура ос искусство училищат ня̄врамыт ханищтас. Ань история ос археология институтт наука рӯпата ва̄ри. Надежда Талигина ка̄тыл нё̄тнэ̄г ва̄рум пормасанэ ма̄гыс «Ма̄щтыр намыл» маима о̄лы, ты коныпал история наукат учёный нам вуянтас. Сыньский ханты ма̄хум культураныл урыл са̄в потрыт ос нэ̄пакыт хансыс, тувыл ка̄тыл нё̄тнэ хурит по̄слы. Ка̄сыӈ по̄слум хуритэ̄т Надежда Михайловна лӯима о̄лупсат э̄лумхо̄лас та̄кыг о̄лнэ ё̄ре ос ё̄р номтэ суссылтытэ. Тав по̄слум хуриянэ Москва, Салехард, Санкт-Петербург, Сургут, Тюмень, Ханты-Мансийск ӯсытыт мирн суссылтаве̄сыт. Сомбатхей ӯс Венгриян ос Женева ӯс Щвейцария хо̄н ма̄н тотыглаве̄сыт. Ань тыт о̄с сака ёмас суссылтап ва̄рвес. Тувыл мӯй ма̄хум мо̄т колнакт акванатве̄сыт, тот «Музыкальное приношение» концерт о̄лыс. Гнесиных нампа академия филиалыт ханищтахтын нэ̄г Ирина Пасхальная ос Ирина Поспелова тот э̄ргысы̄г. Та юипа̄лт Геннадий Райшев рӯпитан колэ ма̄хумн янытэ̄т суссылтаве̄сыт ос «Моя Сибирь» мозаика яныг хури о̄вылтыт потыртасыт. Акв та сыс «Природы ос Человека» нампа мо̄т музейт о̄с акв пӯмыщ ва̄рмаль о̄лыс. Тот рӯпитан хо̄тпат «Парк советского периода» суссылтап ва̄рыгласыт. Та̄н та та̄лыт порат о̄лыглам накыт щё̄пита̄лыгласыт ос мӯй ма̄хум тув мӯйлуӈкве во̄выгласаныл. Ня̄врамыт ма̄гыс я̄нас колнак о̄лыс, та̄нанылн советский порат по̄слым мультикыт суссылтаве̄сыт. Вожатыиг масхатам а̄гитпыгыт ня̄врамыт ёт пе̄с ёнгын утыл ёнгысыт. Тувыл та̄н ща̄ньа̄щаныл октябрёнкаг ос пионерыг о̄лум пораныл урыл потыртасыт. Яныгнув а̄гирищит, пыгрищит «Юный техник», «Продлёнка», «Живой уголок» нампа кружокытын ӯрве̄сыт. Мо̄т колнак «коммунальный квартира» щирыл ва̄рвес. Са̄ртын китхӯрум колта̄гыл аквъёт о̄лсытхӯлсыт. Ань кол пормасыт аквта хольт ӯнтталаве̄сыт. Ще̄мьяӈ ма̄хум пе̄с щирыл масхатыгласыт ос о̄лупсаныл суссылтасаныл. Ня̄врамыт стихыт ловиньтасыт, ма̄ньлат хо̄тпат гитарал, гармошкал ёнгысыт ос э̄ргысыт. Тувыл ма̄хум са̄всыр пе̄с йӣквыт йӣквуӈкве ханищтаве̄сыт. Ты коныпал лото ёнгысыт, пе̄с газетат, журналыт ловиньтасыт ос сыресыр советский маркат суссыт. Акв колнакт мӯй ма̄хум ща̄й аюӈкве ос тэ̄пъялаӈкве ве̄рмысыт. Музейт хо̄тал палыт сака пӯмащ о̄лыс. 1078 2014.06.20. Александр ВЬЮТКИН Рӯтыг о̄лнэ мирыт ма̄н ма̄вн ёхталасыт. Лӯпта э̄тпост онтоловит хо̄талэ̄т Ханты-Мансийск ӯст «Консультативный Комитет финноугорских народов» нампа заседание о̄лыс. Ты кастыл са̄всыр ма̄ныл, са̄всыр ла̄тӈыл потыртан рӯт мирыт тыг ёхталасыт. То̄ват ос та̄нти тэ̄ланыл щирыл тыг ёхталаӈкв ат ве̄рмысыт. Ань сараныт, ё̄рныт, мордва ос Финляндия ма̄ныл ма̄хум тыт о̄лсыт. Ты Консультативный Комитет заседаниятэ акв хо̄тал минас. Тот халувт потыртан кастыл пуссын аквъёт титхуйплов хо̄тпа о̄лыс. Мӯй ма̄хум ёт пащалахтын ма̄гыс округ губернатор ва̄ӈын кӯщай хум Геннадий Бухтин ёхталас. Финноугорский мирыт янытлан ос юртыӈыщ о̄лнэ ва̄рмаляныл урыл ма̄н потрув о̄лыс. Ос э̄лаль ва̄рнэ рӯпатав акваннё̄тхатым тах ва̄рилӯв. Таквсы Петрозаводск ӯст яныг конференция ва̄раве. Тот сӯкыр э̄тпос хӯрмит щислат заседание тах е̄мты. Ты кастыл тот ань пуссын щё̄питаве. Ка̄сыӈ мирныл тув хӯрум хо̄тпа ёхталаӈкв во̄вавет. Хоты ма̄ныл ма̄хум ёхтэ̄гыт, та̄нанылн та̄нти ва̄рум рӯпатаныл ос о̄лупсаныл урыл акв доклад ловиньтаӈкв э̄ри. Докладаныл са̄т кум палытыг вос о̄лы. Ты урыл Алексей Цыкарев потыртас. Тав финноугорский ма̄ньлат ма̄хум ёт рӯпиты. Та юипа̄лт ма̄ янытыл о̄лнэ соссаӈ ма̄хум ма̄гыс 2014 та̄лт сӯкыр э̄тпос 22-24 хо̄талытт Америка Нью-Йорк ӯст конференция ва̄раве, ты урыл о̄с потыртавесӯв. Тот маныр рӯпата ма̄нь мирыт ма̄гыс ва̄раве, та урыл потраныл е̄мты. Тув ка̄сыӈ мирныл аквтит хо̄тпа ялуӈкв ве̄рми. Мощ мо̄лалнув Нью-Йорк ӯсн ялнэ ма̄гсыл ма̄ньщи мирныл Оксана Рыжкова пе̄риявес. Оксана ат те мины, то̄нт Елена Фризоргер тув ялы. Петрозаводск ӯст доклад ловиньтан щирыл ос Николай Меров пе̄риявес. «Консультативный Комитет финноугорских народов» оигпан э̄лыпа̄лт Алексей Цыкарев Карелия ма̄т о̄лнэ ма̄ньлат ма̄хум ва̄рнэ тэ̄ланыл урыл потыртас, тав ла̄выс: «Ма̄н республикавт киновидео нампа ва̄рмальн ма̄ньлат ма̄хум ханищтан нампа кол пунсуӈкв номсэ̄в. Тот ханищтахтын ос ща̄нь ла̄тӈыл потыртан студентыт хӯрум со̄тыран стипендияныл но̄хнё̄тавет. Ты щирыл ханищтапаныл ты таквс о̄вылтаве. Хӯрум та̄лын а̄рталаӈкв номсаве. Пуссын ёмасыг те а̄ртми, э̄лаль ва̄раве». 1078 2014.06.20. Александр ВЬЮТКИН Пе̄с порат хансым нэ̄пакыт. Мощ мо̄лалнув Ханты-Мансийск ӯст о̄лнэ А̄с-угорский институт колт нэ̄пакыт ловиньтан колнаке̄т музей пусвес. Тав рущ ла̄тӈыл «Национальный музей образования и наук» тох ла̄ваве. Музеяныл пуснэ порат институт кӯщай нэ̄ Виктория Ивановна Сподина о̄выл ла̄тыӈ ла̄вуӈкв во̄ввес. Тав ла̄выс: «Тамле хурип музей мощща. Мирн суссылтан ма̄гсыл са̄в ёмас, пе̄с йис порат та̄ратым о̄выл нэ̄пакыт суссылтым о̄лэ̄гыт. Ханты ос ма̄ньщи ла̄тӈанув ёт рӯпитан учёныит хансум нэ̄паканыл о̄с суссылтавет. Хотьютын пӯмащ, ёхталаӈкв ве̄рмегы̄н, матыр на̄нан э̄ри те, тыт тисхатэ̄н, ловиньтэ̄н». Тав юипа̄лт пе̄с йис о̄лупса ханищтан кол кӯщай хум Михаил Фёдорович Пыршов ла̄тыӈ ла̄вуӈкв во̄виньта̄лвес. Тав ла̄выс: «На̄н ётын, на̄н ма̄гсылын ма̄навн рӯпитаӈкв пӯмащ. Ань ты щё̄питан музеюв такви щире̄т сака пӯмащ. Тыт ро̄ви хо̄нтуӈкв, хоты порат, хо̄т на̄н о̄парищанын ёт ла̄тыӈ ханищтым мо̄т ма̄ныл ёхталам ма̄хум рӯпитасыт. А̄нумн на̄нан ань ты урыл потыртаӈкве те, са̄в э̄т, са̄в хо̄тал э̄рмыгланув. Хуньт хосат тыт рӯпитам учёный ма̄хум урыл писатель хум Анатолий Минчук ла̄выс: «Рыцари Севера! ». Та̄н ва̄рум рӯпатаныл щирыл ма̄н та̄наныл ка̄сыӈе̄мт ка̄сталаӈкв патыянӯв. Таима̄гсыл ма̄н на̄нан аквписыг тыт ӯриянӯв, тыг ёхталэ̄н». Та юипа̄лт Елена Степанова, А̄с-угорский институтыт нэ̄пак ловиньтан колт рӯпитан ханты нэ̄, музей щё̄питан урыл мощ потыртас. Тав ань йильпи музей тармыл кӯщаиг ӯнттаве. 1078 2014.06.20. Валентина УЗЕЛЬ Та̄н ма̄н ма̄гсылув са̄кконыт хансэ̄гыт. Та э̄тпос юио̄выл хо̄талэ̄т мирн пе̄риим округ депутатанув акванатхатыгласыт. Та̄н хусахтем са̄всыр са̄ккон йильпи ла̄тӈыл хассаныл. То̄ва порат туп ЛДПР партия депутатыт мощ воритотсыт. Рӯпитаӈкв о̄вылтахтаманыл порат акв депутат та̄ра потыртаӈкв во̄вхатас. Тав ла̄выс: «Ма̄н ты созывн пе̄риим ма̄хум пуссын депутатыг о̄лэ̄в. Ос ма̄н халувт то̄ват матрыг Дума заседаниян щар ат ёхталэ̄гыт, ма̄н ётув ат рӯпитэ̄гыт. Акваг доверенностьнэ̄пак хансэ̄гыт, мо̄т ма̄хум та̄н пе̄нтсыланыл са̄кконыт пирмайтэ̄гыт. Ка̄сыӈ депутатхо̄тпа са̄в мирн пе̄риявес. Ам ма̄гсылум 130 со̄тыра хо̄тпа нэ̄пак та̄ратасыт. Ам лю̄льсаӈ рӯпитаӈкв ат ве̄рме̄гум, та̄н а̄нумн номт пинсыт, та̄н а̄нум ва̄ганыл. Ань ты щирыл рӯпитан депутатыт ёт матыр ва̄руӈкв э̄ри. » Ты хо̄тпа ёт са̄в депутат ка̄сащас, ос Дума кӯщай Борис Хохряков ювле ла̄выс, ты щирыл рӯпитаӈкв ро̄ви, федеральный са̄кконыт пуссын депутатын ӯргалан ма̄гсыл хансым о̄лэ̄гыт. Тувыл та̄н округ бюджет олнанэ урыл потыртаманыл порат са̄в воритотсыт. О̄влэ̄т олн ловиньтан департаментыт кӯщай нэ̄ Вера Дюдина 2013 та̄л урыл потыртас, та ювле хультум та̄лт ос ты 2014 та̄л нила э̄тпосанэ сыс манах солко̄ви холтвес. В. Маркин ЛДПР партия па̄лыл депутатыг рӯпиты, тав ла̄выс, налоголн са̄в кос атаве, ос манрыг мирн нё̄тнэ программат мощща олныл та̄ставет. Ты социальный программат ма̄гыс туп 19, 2% са̄вит олн майвес. Ос мо̄т программа ма̄гыс, тав «Национальный оборонаг» хансым о̄лы, тав ос 100% са̄вит олныл та̄стувес. Тувыл э̄лаль ты ва̄рмаль ёт депутатыт ка̄саще̄гыт ман а̄ти, та̄рапатыс. Та̄н са̄выӈпа̄лэ пуссын ка̄сащасыт, туп ЛДПР депутатыт ты отчёт ат пирмайтасаныл. Ань яныг ос тыныӈ ма̄шина о̄щнэ ма̄хум туп та̄н налоголн ойтэ̄гыт, мо̄т ма̄хум налогыл ат пинавет. Ос ты о̄лум заседаният депутатыт тамле са̄ккон пирмайтасыт, ань ты налог мо̄тыт та̄л ма̄нь таквс э̄тпос мус ойтуӈкв ро̄ви. СА̄в йильпи пӯльница ӯнттаве Дума юипа̄лт депутатма̄хум округ правительство кӯщаит ёт хо̄нтхатыгласыт, та̄н пӯльницат ӯнттын ва̄рмаль урыл потыртасыт. Э̄лы матах та̄л сыс 18 йильпи пӯльница округувт ӯнттаве. Мо̄тыт та̄л Нижневартовск ӯст яныг пӯльница ӯнттын ма̄ныл а̄стлаве, акв сыс тот 1 со̄тыра 100 хо̄тпа пусмалтахтуӈкв ве̄рми. Сургут ос Ханты-Мансийск ӯсыгт ма̄нь ня̄врамыт пусмалтан «перинатальный центрыг» ла̄внэ пӯльницаг ӯнттавег. Нефтеюганский район Пойковский па̄вылт, Нижневартовский район Корлики па̄вылт ос Советский район Коммунистический па̄вылт пӯльницат ӯнттавет. Ханты-Мансийск ӯст «Анти-СПИД» нампа центр, хо̄псы а̄гм пусмалтан диспансер ос «восстановительный» нампа пӯльница йильпи колыл ӯнттаве. ВО̄ранув урыл Ма̄н ма̄вт 130 са̄всыр организацият ос предпринимательхо̄тпа во̄р са̄грим ос па̄ртыт сылым рӯпитэ̄гыт. Та̄н округ па̄лыл о̄с нё̄тавет, субсидияолныл мивет. Тот рӯпитан ма̄хум ма̄гыс касылыт ва̄рыглавет: «Славим человека труда», «Лучший вальщик леса с моторными пилами». Кредит вим организацият туп олнаныл ювле ойтыяныл, процентолн ат мыгыт, тох та̄н округныл нё̄тавет. Тувыл кӯщаит ос депутатыт лё̄ӈхыт урыл потыртасыт, товлыӈха̄пыл миннэ ма̄гыс билет олн сака тыныӈыг ул вос о̄лы, округ правительстваныл ты предприятият о̄с са̄всыр субсидияолныл мивет. Ты хосыт билетыт тынаныл 64% са̄вит мощщануве̄г е̄мтэ̄гыт. 1078 2014.06.20. Николай МЕРОВ Турва̄т па̄вылт са̄лыт янмалтавет. Ха̄льӯс район Турва̄т па̄вылт Савелий ос Татьяна Самбиндаловыг ще̄мьяӈ та̄гыл о̄лэ̄г. Тот о̄лнэ ма̄ньщиянув нот па̄лытыл йис о̄лупса э̄лаль тотыяныл. Пе̄с порат Савелий а̄ще са̄в са̄лы о̄ньщис. Таима̄гыс та̄н Ялпыӈ Нё̄р сыспалъе̄рт Сысъя ляпат са̄лы янмалтан ва̄рмаль ань но̄хво̄рмалтаӈкве патсыт. 2011 та̄лт Савелий соссаӈ ма̄хум Ассамблея кӯщаитн нэ̄пак хансыс, са̄лы ёвтнэ ма̄гыс нё̄тмил во̄выс. Ань ты ва̄рмаль щирыл са̄в э̄рнэ программа пирмайтым о̄лы. Ты хосыт я̄нас рӯпата ва̄рнэ хо̄тпатн олн миве. Аквта та̄л туи порат кӯщаянув э̄рнэ нэ̄пакыт акванатсаныл ос «Йильпи са̄лыӈ кол» нампа проект щё̄питасыт. Та юипа̄лт ты ще̄мья ма̄гсыл Ямал ма̄ныл нё̄лса̄т са̄лы ёвтвес. Ты са̄лыӈ кол рӯпататэ хумлег э̄лаль мины, округ Дума депутат нэ̄ Татьяна Гоголева акваг уральтым о̄ньщитэ. Тав ка̄сыӈ та̄л тув яланта̄лы. Ты коныпал телефон хосыт ва̄тихал та̄н ётаныл потырты, маныр э̄ри, китыглахты. Ань лӯпта э̄тпост ам о̄с та̄н ётаныл тув ялсум. Ма̄н ты хо̄тпат ялсӯв: Ханты-Мансийск ӯсныл кит депутатыг Татьяна Гоголева ос Надежда Алексеева, Югорск ӯсныл Татьяна Сысоева апа̄гитэ Лена ёт, Саранпа̄вылныл са̄лыӈ колт яныгмам пыг Александр Попов ос Екатерина Гоголева. Советский ӯсныл вертолётыл хӯрум щё̄с Турва̄т па̄выл мус тыламласӯв. Йильпи па̄рт ос кит кӯрала тув тотсӯв. Мо̄лты та̄л та̄н ма̄гсыланыл плотникыт Сысъя урам ляпат йильпи кол ос пувлынкол ӯнттысыт. Тэ̄лы порат са̄лыяныл та тэ̄пыӈ ма̄т о̄ньщияныл. Ань са̄лы ӯрнэ хо̄тпат акваг тот о̄луӈкве ве̄рме̄гыт. Тувыл мо̄тынтыг Турва̄т па̄вылт ос акв яныг кол ӯнттаве. Савелий пыганэ Олег, Илья, Унтари о̄с Улякси тув ва̄нтлэ̄гыт. О̄выл хо̄тал ялпыӈ колт пӯрлахтасӯв, пуӈк пинсӯв, На̄й-О̄тыранувн по̄йкщисӯв. Ща̄й айсӯв, о̄лупса ва̄рмалит урыл потыртасӯв. Турва̄т ма̄хманув кина суссылтан то̄тап о̄ньще̄гыт. Ма̄н Руслан Проводников, ма̄ньщи боксёр, уре̄тыл кина ёт тотыгласӯв. Ты ма̄ньщи пыг Америка хо̄н ма̄т ка̄миньт пассал алхатаме̄т но̄хпатыглас. Ань ма̄ янытыл такви весовой категориятэ̄т о̄с та̄ксар хо̄тпаг о̄лы. Мощ мо̄лалнув хо̄н ма̄т кина по̄слын хо̄тпат тав уре̄тыл кина ва̄рсыт. Э̄типа̄лаг на̄йпос станция ква̄лтапан порат та кина ма̄хманувн суссылтаслӯв. Мо̄тыт хо̄тал ос Александр Попов, саран пыг, са̄лы мӯӈияге яктысаге. Тав ма̄нь та̄гыл са̄лыӈ колт яныгмас. Са̄лыт урыл матыра̄ти пуссын ва̄г. Тав Савелий пыганэ сун хартнэ са̄лыт пе̄щхал мӯӈит яктуӈкве ханищтас. Акв са̄лы муӈияге яктын порат Турва̄т пыгыт сайтта̄л патнэ мус маттем та мовиньтасыт. Са̄лы ёлпаттысаныл, нила хо̄тпа таве та̄кыщ пӯвсаныл. Александр са̄лы мӯӈияге тыньщаӈыл аквантаӈыртасаге, йӣвсупыл ты кос ра̄тсаге, тох аты сакваласы̄г. Ята, ос касаил колхӯрге па̄лыгяктыстэ, мӯӈииг конхартсаге ос ка̄тыл акванпувим хотпатнэ̄г мус маныр ё̄р о̄ньщис, та ё̄хтысаге. Са̄лыюв тай супасэ па̄лыгхартыстэ, самаге лаппантым ос туп лылтым та хуяс. Ты ва̄рмаль а̄стын юипа̄лт са̄лы хоттарматсаныл, аквав ква̄лапас, хотталь та ха̄йтыс. Матъёмас китыт хо̄тал колхӯрге пусмалтахтын нупыл е̄мтыс. Ань таве тэ̄лы порат сунын ке̄руӈкве ро̄ви. Тав ёмщакв сун хартуӈкве паты. Тувыл хо̄тал котильт ма̄н Ма̄нь Та̄гт ос Лӯи Та̄гт я̄г акванпатнэ ма̄н йӣв ха̄пыл ялсӯв. Тот я̄тэ сака овыӈ, ва̄танэ ос ке̄расыӈыт. Ло̄ӈхаль йӣвыл туйхатым на̄тылтасӯв. Я̄г акванпатнэ ма̄т Илья ня̄с па̄хвтыс, ма̄нь а̄лнхӯл пӯвыс. Та ма̄т исмит па̄йтсӯв, ня̄рхул тэ̄сӯв. Мощ ӯщлахтасӯв ос ювле ла̄глыл са̄т ве̄рыста ё̄мсӯв. Туп ня̄врамыт ха̄пыл тотве̄сыт. Ювле миннэ лё̄ӈхе сака о̄выӈ о̄лыс. Ты коныпал я̄т яныг а̄хвтасыт хуе̄гыт, витэ ма̄ниг о̄лыс. Са̄в хо̄тпа та̄лнэ порат ха̄п ёлӯнты. Э̄типа̄лаг юв ёхтысӯв. Ӯлякщи хӯрум ёса ва̄рнэ ма̄ныл а̄стласанэ. Таитыл пӯмщалахтасӯв. Тав сака ма̄щтырыг са̄грапыл са̄гырхаты ос касаил ёрыгхаты. Тав ла̄внэ̄т, ты ёсат хӯрмахкем э̄тпос ва̄рсаге. Ёса паттаге ӯй котыл ю̄нтсаге. Ты ёсат Саранпа̄вылт о̄лнэ хо̄тпатн заказ щирыл ва̄рсанэ. Мо̄лалнув Савелий Саранпа̄вылн ялыс, хо̄тыт са̄лыӈколныл китхуйплов ма̄нь са̄лы ёвтыс. Ты са̄лыт ӯнттын ма̄гыс висанэ. Та̄н хащта̄л ма̄т молях ханьщувласыт. Э̄л ат минэ̄гыт, кол ляпан хо̄тал сыс хӯрум щёс ёхталэ̄гыт. Татьяна э̄кватэ та̄наныл комбикормыл, ня̄нил тыттыянэ. Ос акв ва̄рмаль о̄лы. Са̄лы ӯрнэ а̄мп ат о̄ньще̄гыт. Ань о̄лнэ а̄мпанэ, пуссын во̄раян а̄мпыт. Та̄наныл ёлнэ̄гим о̄ньщияныл. Лыпащ та̄ратым тай са̄лыт юил сака ня̄влалыяныл. Ётылнув э̄рыӈ ханьщувлэ̄гыт. Ань ты накт Турва̄т па̄вылт пуссын аквъёт налыманкем са̄лы о̄лы. Савелий тох ла̄ви: «Са̄лы о̄ньщуӈкве патсӯв, сымумт сака ёмас патыс. Пыганум во̄рт хультэ̄гыт, па̄влын о̄луӈкве сакати ат минэ̄гыт. Ла̄щал, ла̄щал са̄лы ӯрнэ ва̄рмалин ханьщувлэ̄гыт, ты ва̄рмаль э̄лаль тотыяныл. Ань са̄лыӈ суныл яласаӈкве та̄наныл ханищтаӈкве э̄ри. Ӯсытт, па̄влытт о̄лнэ ма̄хум рӯпата ат о̄ньще̄гыт, нэ̄матыр ат ва̄рнэ хосыт вина ае̄гыт. Манаса̄вит хо̄тпа ты хосыт порсыс. Тыт о̄лнэ̄в ма̄гсыл нэ̄матыр ва̄рмаль а̄тим». Тот о̄лмув сыс хо̄талыт татем хо̄талыӈыг о̄лсыт. Ма̄н са̄всыр ва̄рмаль ва̄рсӯв, ос аквтупмат нас ӯщлахтуӈкве ялсӯв. Ка̄сыӈ мӯй хо̄тпан тот о̄луӈкве сака мӯстыс. Ам ты ще̄мьян щуньпаща ла̄тыӈ ке̄тэ̄гум. О̄лупсаныл аквтыхольт ёмщакв э̄лаль вос мины. Са̄лыяныл акваг э̄лаль вос са̄вме̄гыт. Колта̄гыл пуста̄гыл вос о̄лэ̄гыт. То̄рум ёт, О̄тыр ёт, пус ка̄т, пус ла̄гыл та̄нанылн ла̄ве̄гум. 1078 2014.06.20. Светлана РОМБАНДЕЕВА Тав самын патум ма̄тэ э̄руптастэ. Лӯпта э̄тпос 22 хо̄талэ̄т ма̄ньщи поэтув Юван Николаевич Шесталов самын патум хо̄талэ о̄лыс. О̄йка о̄лыс те, 77 та̄лэ то̄влынув. Ханты-Мансийск ӯст ань пыге о̄лы, Владимир Иванович Шесталов. Тав ётэ хо̄нтхатыгласум, а̄ще урыл потрамасме̄н. На̄н ань э̄лаль потруме̄н ловиньтэлы̄н. – Владимир Иванович, ма̄ньта̄гыл а̄тян хумус номилын, манхурипаг тав олыс? – Увщиме̄нтыл ме̄наме̄н тав э̄руптасаге. Юн ос торыӈыщ таве ат ва̄щинтаслуме̄н, акваг хо̄т рӯпитым яласас. Ты номилум, тав акваг рӯпитас, са̄в хансыс. А̄тям хо̄тыт та̄лэ мус рущ ла̄тыӈ ат ва̄с, потыртаӈкве ат ха̄сыс. 1954 та̄лт Ленинград ӯст тав А. И. Герцен нампа институтт ханищтахтуӈкве патыс. Тав хансум «Гроза» нампа о̄выл стихотворениятэ «Ленин пант хуват» газетат хансыглавес. О̄выл нэ̄паке намаястэ – «Ма̄кем ат». 1962 та̄лт трудовой книжкатэ Союз писателей ма̄н мистэ. Та па̄сыл атпан та̄л минас, ос 2012 та̄лт ам Союз композиторов России ма̄н хасве̄сум. Ты ма̄гыс ам номтум сака ёмас – атпан та̄л овумтам юипа̄лт ам о̄с а̄тям хольт намум мирн ва̄ӈкве та патвес. 1964 та̄лт Тюмень ӯст тав педагогический институт а̄стлас. А̄тям намыӈсуиӈ писателит ёт ва̄йхатас – Константин Симонов, Михаил Светлов, Александр Твардовский, Евгений Евтушенко, Сергей Баруздин, Лев Ошанин, лӯи ма̄ ос соссаӈ ма̄хманув халт Микуль Шульгин, Юрий Рытхэу, Владимир Санги. Та̄нти халанылт та̄н пуссын юртыӈыщ о̄лсыт. 1979 та̄лт тав М. Горький нампа премиял майвес. – А̄тян самын патум па̄влэ̄н наӈ ялсын, рӯтанэ ва̄санын? – Тав самын патум ма̄тэ̄н ма̄н яланта̄лсӯв, Во̄сыӈтурт о̄лсӯв. О̄пам ва̄слум, ёмащакв таве номилум. Тав китыт э̄ква тотыглас, таве о̄с ва̄слум, ты улпыл 1960й та̄лыт порат о̄лыс. А̄тям о̄ньген сака мат ат э̄руптавес, юв ёхталаме порат юн ат о̄лыс, интернатт о̄лыс. Щаще̄квам Уринэ Васильевна хосат а̄тимыг е̄мтыс, 1946 та̄лт. То̄нт а̄тям иӈ ма̄ниг о̄лыс. Оматэ сака э̄руптастэ, тав уре̄т са̄в стихотвореният хансыглас. Хунь увщим самын патыс, таве оматэ нам ляпан намтыстэ Аринэ. А̄тям такви самын патум ма̄тэ, ма̄ньщи мире сака э̄руптастэ. Ма̄тэ урыл ма̄навн акваг потырта̄лыс. Ётыл тыг о̄луӈкве та йис, ма̄н о̄с тав ётэ тыг ва̄нтлысӯв. Омам ат таӈхыс кос ты ӯсн йиӈкве, ос воссыг хоталь щалты, тох та йисӯв. Увщим ос Санкт-Петербург ӯст хультыс, пыгаге ёт тот о̄лы. Омагума̄тягум аквъёт атпан нупыл кит та̄л о̄лсы̄г, омам а̄тям э̄лыпа̄лт а̄тимыг е̄мтыс. Тыт, Ханты-Мансийск ӯст, а̄тям «Торум ма» музей ва̄руӈкве нё̄тыс. Ань ты ма̄т о̄луӈкве а̄нумн ёмас. Тыт ма̄ньщи ма̄хманӯв о̄лэ̄гыт, рӯтанӯв о̄лэ̄гыт. Тыт а̄тям ща̄нь ла̄тӈе суйты. Ты ма̄т ам са̄ӈквылтап та̄н са̄ӈквылтаӈкве ханьщувласум, ма̄ньщи ос ханты мир о̄лупса ва̄ӈкве патсум. Ты ма̄ ам э̄руптылум, ты ма̄ ма̄гыс а̄тямн яныг пӯмащипа ла̄тыӈ ла̄ве̄гум. 1078 2014.06.20. Валентина УЗЕЛЬ Тина по̄слын хо̄тпаг. Ань ма̄вит ӯргалан ма̄гыс са̄всыр рӯпата ва̄раве. Округувт ка̄сыӈ та̄л акв э̄тпостем «Спасти и сохранить» нампа акция о̄лыглы. Са̄всыр ма̄ныл тыг ёхталан ма̄хум йӣвыт ӯнттэ̄гыт, мир ёт хо̄нтхатыглэ̄гыт, та̄н ётаныл потыртэ̄гыт – ма̄вит пуссын вос ӯргалым о̄ньщияныл. Ты акция о̄лнэ̄тэ сыс округувт са̄всыр па̄влытт ос яныг ӯсытт ма̄вит ӯргалан ва̄рмаль урыл тинат суссылтавет, рущ ла̄тӈыл ты рӯпата «телевизионный фестивалиг» ла̄ваве. Тот суссылтан тинат халт щар ма̄к ёмас ос пӯмыщ тина пе̄рияве. Тувыл ты фестиваль юио̄выл хо̄талэ̄т тина ва̄рнэ ма̄хум янытлавет, хотьютаныл но̄хпатыс. Ты та̄л ты касылн 480 тина тотыглавес. Россия, Финляндия, Армения, Иран, Франция ос Эстония ма̄тт о̄лнэ ма̄хум ня̄врамыт, ма̄витув ӯргалан ва̄рмаль урыл тинат суссылтасыт. Ань та̄н халанылт ё̄рн э̄ква Анастасия Тимофеевна Лапсуй «11 изображений человека» нампа тинатэ но̄хпатыс. «Со̄рни та̄хт» щар ма̄к яныг мӯйлупсал (рущ щирыл – «Золотая гагара») тав ты янытлавес. Ты яныг мӯйлупса таве̄н губернатор ва̄ӈын хум Геннадий Бухтин мистэ. Акв хо̄тал Анастасия Лапсуй Павел Славин юртэ ёт ма̄н рӯпитан колувн щалтсасы̄г, тэ̄нти уре̄нтыл ма̄навн мощ потыртасы̄г. То̄нт хоты тина но̄хпатыс, нэ̄мхотьют ат ва̄с. Ма̄н ща̄й аим пасан ва̄тат аквъёт ӯнлахо̄лсӯв, потыртасӯв. Ты ё̄рн э̄ква Ямал ма̄т 1944 та̄лт самын патыс, са̄лыӈколт яныгмас. Школа а̄стламе юипа̄лт педагогический училищат ханищтахтас, та юипа̄лт Уральский госуниверситетыт. Ва̄тахтем та̄л радиот рӯпитас, ё̄рн ла̄тӈыл са̄всыр ля̄ххалыт мирн ловиньтас. Тувыл ня̄врамыт ма̄гыс нэ̄пакыт хансыс, рущ потрыт ё̄рн ла̄тӈыг толмащласанэ. 1991 та̄лт тав хум ва̄рыс, о̄йкатэ финныг о̄лы, наме Марку Лехмускаллио. Тэ̄н Финляндият о̄лэ̄г. Аквъёт тина по̄слэ̄г. То̄ванакт тина по̄слын порат Анастасия Тимофеевна такви артисткаг о̄лы, тинат по̄слахты. Лӯима̄т о̄лнэ ё̄рн ма̄хманэ урыл са̄всыр пӯмыщ тина ва̄ри. Тав ла̄выс: «Ам ё̄рн нэ̄ хо̄тпа. Са̄лыӈколт самын патсум, тот яныгмасум. Ва̄глум, ё̄рн нэ̄кветн тот кӯпнит хунь. Кон сака ащирмаӈ, э̄ква а̄лпыл ква̄лы, кӯре па̄лтытэ, тэ̄нут па̄йты. Ма̄хманэ тыттыянэ, щё̄питыянэ. Ам амти тох о̄лсум, таима̄гыс тинат ты урыл акваг та по̄слэ̄гум. » Ань ты йильпи тинанэ тав о̄йкатэ ёт сака ёмащакв ва̄рыстэ̄н. Анастасия Лапсуй тот ё̄рн э̄кваг по̄слыма, ма̄хманэ ёт хумус са̄лыӈколт о̄лэ̄гыт. Акв щёс тамле пӯмыщ ва̄рмаль о̄лыс. Тина ва̄рнэ э̄лыпа̄лт о̄влэ̄т сценарийнэ̄пак хансаве, ты нэ̄паке ёт тав Ямалн минас. Тот щар яныгхо̄тпа палт ёхтыс. Та ё̄рн о̄йка онтырса̄т та̄лыг ул е̄мтыс. Анастасия таве̄н тина урыл потыртас, ла̄выс, нэ̄матыр пори тав ул вос по̄слы, ты о̄йкан вос ла̄ваве, ё̄рн ма̄хум о̄лупсаныл ёмащакв хумус по̄слуӈкв э̄ри. О̄йка таве хӯнтлыстэ, тувыл рӯтанэ, нэ̄ хо̄тпат ня̄врамыӈ та̄гыл, пуссын акв ё̄рнколн во̄всанэ ос та̄нанылн ла̄выс: «Ты нэ̄ ёнгуӈкв таӈхи, тав ётэ ёнгасэ̄н». Тамле ва̄рмаль номылматыгла̄лым, Анастасия Тимофеевна ла̄выс: «Матъёмас ма̄н соссаӈ э̄лмхо̄ласанув аквтоп ма̄нь ня̄врамыт хольт хультсыт. Са̄в та̄л ма̄во̄й ос газ ма̄ныл но̄хвиве, ма̄ та̄л ты хультэ̄в. Ос ма̄н халувт тамле ёмас сыстам номтыл о̄лнэ мӯтраӈ хо̄тпат ты о̄лэ̄гыт. » Яныгӯит урыл тина ва̄рум хум Павел Сергеевич Славин ты фестивальн такви по̄слум «Неведомый остров» нампа тинатэ о̄с тотыгластэ. Тот тав та урыл по̄слам, Москва ӯс ляпат «Лосиноостровский» нампа заповедник о̄лы, та ма̄т яныгӯит пе̄с та̄гыл о̄лэ̄гыт, та̄н э̄лмхо̄ласн сака ат ханьщувласыт. Ос та ма̄ мувлахи коттеджиг ла̄внэ колыт ӯнттуӈкв патве̄сыт. Са̄в олн о̄щнэ ма̄хум тот ма̄ ёвтэ̄гыт, ос колыт ӯнттэ̄гыт. Канализация тӯрпат пуссын заповедник нупыл пинве̄сыт, ты па̄ӈкыӈ вит тув о̄вты. Ляпат о̄лнэ ма̄хумн тув нупыл тэ̄ла щар а̄тим. Яныгӯит а̄гмыӈыг е̄мтэ̄гыт. Заповедникт рӯпитан ма̄хум Россия Президентын пищма хансыгласыт, нэ̄мхотьют та̄нанылн ат нё̄тыс. Ань та ма̄ кӯщай хум по̄хан минас, воссыг тот рӯпитаӈкв ат ка̄сащи. Э̄лаль маныр е̄мты, нэ̄мхотьют ат ва̄г. 1078 2014.06.20. Тамара МЕРОВА Та̄н ма̄хманувн ща̄гт тотэ̄гыт. "Хо̄тал" нампа А̄с-угорский театрыт рӯпитан ма̄хум "Дети неба" ёнгиланыл ёт тӯяг Москва ӯсн ялсыт. Та̄н тув "Золотая маска" нампа яныг фестивальн во̄выглаве̄сыт ос тот мо̄т театрыт ёт хӯрум касылытт кассыт. Тув та̄н российский театрыт экспертный совет па̄лыл пе̄риялве̄сыт. Ты э̄лыпа̄лт ты совет 767 са̄всыр спектаклит суссыт ос щар ёмас, пӯмащ ёнгилыт э̄лаль касуӈкве висаныл. «Дети неба» ёнгил та̄н «Лучший спектакль в театре кукол» (Вячеслав Зайчиков), «Лучшая работа режиссёра» (Мария Литвинова, Вячеслав Игнатов) ос «Лучшая работа художника» (Павел Мизёв) номинациян ке̄тсаныл. «Хо̄тал» нампа колув мо̄т каснэ театрыт халт мощща та̄л рӯпиты, артистанув мирн иӈ сака ат ва̄вет. Та̄н тамле намыӈсуиӈ театрыт ёт, Мариинский театр, театр им. Е. Вахтангова ос са̄в ма̄хумн ва̄нэ артистат ёт рӯпитасыт. Ма̄н ма̄ньщи, ханты артистанув рӯпатаныл о̄с ма̄щтырыг тот ва̄рсаныл. Ань пе̄риян номинацият та̄н но̄х ат патсыт кос, ос мо̄т театрытын ань ва̄вет, тувыл са̄всыр э̄рнэ пищитн э̄лаль ханищтахтасыт. Тэ̄лы А̄с-угорский ма̄хум театрув «Монти Танья» ёнгил щё̄питан порат Евгений Литвинчук, кӯщаиг о̄лнэ хум, потыртас: «Ма̄н театрув ювле хультум хӯрум та̄л сыс ёмас спектаклит щё̄питаӈкве а̄лымас ос та тэ̄ланув ма̄гыс сака э̄сгувесӯв. Тувыл Йошкар-Ола ӯсн, Москван, Санкт-Петербургын спектаклянув суссылтаӈкве ялсӯв. Ам номсэ̄гум ты таима̄гыс, тыт номтыӈ, ка̄ркам ос акванюрщхатнэ ма̄ньлат хо̄тпат рӯпитэ̄гыт. Анна-Ксения Вишневская мӯтраӈ ос сымыӈ режиссёр нэ̄, такви рӯпататэ сака ёмащакв ва̄ритэ. Та̄н пуссын акваннё̄тхатым рӯпатаныл пӯмщиг ва̄рияныл. Са̄в та̄л рӯпитан хо̄тпат Александр Тургачёв, Вадим Важенин, Дмитрий Решетников, Марина Кашпирева мо̄т артистат халт ос та̄н сака ма̄щтырыг ёнге̄гыт, потыртэ̄гыт. Ма̄н ка̄сыӈ артистув такви щире̄тыл ва̄рнэ ёмас пищ о̄ньщи, ос таитэ̄тыл тав мо̄т ма̄хумн ханьщаве ос э̄руптаве. Тувыл художникув, композиторув рӯпатаныл ёмащаквег ва̄рнэ̄ныл ма̄гыс спектаклит о̄с пӯмщиг о̄лэ̄гыт. Ма̄хумн та̄наныл сунсуӈкве сака мӯсты. Ма̄н ёнгиланув искусство тармыл са̄в та̄л рӯпитан хо̄тпатын о̄с ва̄вет, таима̄гыс ма̄н сыресыр театральный фестивальн во̄виньта̄лаве̄в. Тот ма̄н спектаклянув хосыт ханты ос ма̄ньщи ма̄хум культураныл, о̄с мирн ва̄ӈкве патавет. Соссаӈ ма̄хум ла̄тӈыг о̄с э̄лаль тотылӯв, пе̄с э̄ргыт, йӣквыт хотты ёнгилытн ва̄риянӯв. Фестивалитн яланталнэ̄в порат хус са̄вит театрыт халт касыглэ̄в. Тох «Чёрная песня», «Всё, наконец», «Любить. » ёнгиланыл суссылтаӈкве тотыгласанув. Финноугорский рӯт ма̄ныл тув акваг ма̄хум ёхталэ̄гыт. Та̄н о̄с та̄нки мираныл урыл матыр пе̄с потрыт манос мо̄йтыт суссылтэ̄гыт. Ма̄нки халувт тот акваг ханищтахтэ̄в, театральный искусстватыт йильпи накытн а̄рталахтэ̄в. Ань аквъёт касыглан то̄ва театрыт э̄лыпа̄лт ма̄н о̄выл ма̄н е̄мтсӯв, тох "Золотая маска" яныг фестивальн хӯрум номинацият янытлавесӯв. Тот мо̄т ма̄хум халт но̄хпатэ̄в манос а̄ти, а̄т ва̄глӯв. Ос ам таи ла̄вуӈкве таӈхе̄гум, округт ты э̄лыпа̄лт нэ̄мхотты театр тамле яныг мӯйлупсан ат пе̄рия̄лвес. Ма̄н о̄выл щёс са̄в суиӈнамыӈ театрыт ос са̄в мирн ва̄нэ артистат ёт аквъёт касуӈкве патэ̄в тах. Ма̄н ма̄гсылув тыи ань о̄с но̄хпатнэ ва̄рмалиг о̄лы". Ва̄им, ма̄н о̄с аквтох номсэ̄в. Тувыл ты театрув мо̄т ӯсытн ялантанэ̄тэ сыс са̄в ма̄хумн э̄лаль ва̄ӈкве патве̄сыт. Ханты-Мансийскат та̄н рупатаныл о̄с акваг пӯмщалавет. Ань «И дольше века длится день» намаим спектакляныл мо̄т ӯсыт, па̄влыӈ ма̄т китыглаве ос тот ӯраве. Театрыт рӯпитан хо̄тпат ань туи пора сыс мощ ӯщлахтэ̄гыт, ос таквсы порат ма̄н мо̄т ёнгиланыл тах ӯриянӯв. 1078 2014.06.20. Александр ВЬЮТКИН Са̄всыр ма̄ныл ёхталам ма̄щтыр ма̄хум. Лӯпта э̄тпост Сургут ӯст о̄лнэ «Старый Сургут» нампа музей кант ма̄щтырлан ва̄рмаль о̄лыс. Ты кастыл ка̄тыл са̄всыр пормасыт ва̄рнэ ма̄щтыр ма̄хум ма̄ янытыл акв ӯcн атыглаве̄сыт. Та пӯмащ хӯрум хо̄тал минас, рущ ла̄тӈыл «Международный фестиваль ремёсел коренных народов мира «Югра – 2014» ла̄ввес. Тав ань нёлоловит щёс ва̄рыглавес. Ма̄щтырлан ма̄хум ма̄ янытыл са̄в ма̄ныл тув ёхталасыт. Акв хум щар э̄лыл Конго нампа Африка ре̄гыӈ хо̄н ма̄ныл о̄лыс. Тав такви ю̄нтум ос са̄гум маснутанэ суссылтасанэ ос то̄ва пормасанэ тот тыналасанэ. Пуссын аквъёт хӯрумса̄т арыгтем хо̄тпа тот о̄лыс. Фестиваль рӯпататэ о̄вылтан кастыл Сургут ӯс тармыл кӯщаиг о̄лнэ хум Дмитрий Валерьевич Попов сценан но̄хво̄виньта̄лвес. Тав ла̄вум янытлан ла̄тӈанэ э̄лаль ловиньтэ̄н: «Ты ёмас, ре̄гыӈ хо̄талыӈ хо̄тал То̄рмув тав, улпыл, на̄н ма̄гсылын ва̄рыстэ. Тамле ре̄гыӈ хо̄тал ты та̄л ма̄н иӈ ат ва̄щинтасӯв. Ӯс янытыл са̄всыр пӯмащ ва̄раве. «Пе̄с Сургут» музей кант ань щар са̄в мир тыт акванатхатас. Ам номтум тамле, ты нампа пӯмащ ма̄н ӯсувт акваг вос ва̄рыглаве». Дмитрий Попов юипа̄лт округ Департамент культура кӯщаиг о̄лнэ нэ̄ Надежда Михайловна Казначеева потыртас, тав ла̄выс: «Ма̄н округувт са̄всыр ла̄тӈыл потыртан са̄в мир о̄лы. Таи ма̄гсыл тамле фестиваль ма̄н на̄н ма̄гсылын ва̄руӈкве номылматсӯв. Тыт йис та̄гыл о̄лнэ соссаӈ мирыт о̄лупсаныл ос пе̄с ва̄рмаляныл тыг ёхталан мирн ва̄ӈкв э̄ри. Ханты ос ма̄ньщи ма̄хманув ат ва̄нэ хо̄тпатн та̄н щар ат ханьщавет. Хотьют ва̄г, туп тав та̄ра ла̄ви, хотьют ма̄ньщи манос ханты. Са̄выӈпа̄лэ ты мирыг ат ва̄вег. Ты хо̄тал ам на̄нан э̄лаль пуста̄гыл о̄лнэ хо̄талыл ла̄виянум ос ты ялпыӈ хо̄талыл янытлыянум». Ханты-Мансийск ӯст о̄лнэ центр ремёсел нампа кол кӯщай нэ̄ Ольга Дмитриевна Бубновене хӯрмит хо̄тпаг ма̄хум янытласанэ. О̄влэ̄т тав та̄л сыс ва̄рум рӯпатаныл урыл потыртас: «Минам та̄л на̄н ма̄щтырлам пормасанын са̄в ӯсыӈ ма̄т тыналаве̄сыт ос мирн суссылтым хо̄та̄ти тотыглаве̄сыт. Ма̄н округ ма̄щтыр хо̄тпанув урыл са̄в хо̄н ма̄тт ос Россия янытыл ва̄вет. Ты хӯрум хо̄талыт сыс на̄н номтыт о̄щнэ тэ̄ланын урыл халувт мощ потыртэ̄н, тувыл пуссын акваннё̄тхатым э̄лаль рӯпитаӈкв вуйхатэ̄н. Халувт ма̄навн юртыӈыщ о̄луӈкве ос рӯпитаӈкв э̄ри. Матъёмас ма̄н округув янытыл о̄лнэ ханты ос ма̄ньщи ма̄щтыр ма̄хманув ёмщакв ва̄вет ос э̄руптавет». Ты ма̄щтырлан ва̄рмаль ты та̄л сыс титынтыг ва̄рыглавес. О̄выл пӯмщаныл рущ ла̄тӈыл: «Этнос – Традиция – Ремесло» тох ла̄ввес. Тав ре̄тыӈ ю̄свой э̄тпос о̄выл хо̄талт о̄вылтавес, яныг таквс юио̄выл хо̄таланэ мус минас. Та сыс тот рӯпитам ма̄щтыр ма̄хум суссылтапаныл округ ос Россия ӯсыт янытыл выставкат щирыл тотыглаве̄сыт. Ань Сургут ӯст о̄лум ты йильпи суссылтапаныл «Река – Ремесло – Жизнь» тох намтым о̄лыс. Пуссын аквъёт хӯрумса̄т арыгтем хо̄тпа атхатыглас. Тув ёхталам ма̄щтырыт о̄выл хо̄талт та̄нти пормасаныл суссылтан ма̄гсыл щё̄питыгласаныл. Та юипа̄лт соссаӈ ма̄хум пе̄с пораныл о̄щнэ пормасаныл выставкан майлысаныл, мо̄т ма̄ныл ёхталам ма̄хум пуссын ты суссылтап сунсуӈкв во̄виньта̄лве̄сыт. Ма̄ньщи хо̄тпаныл тот округувт ёмщаквег ва̄нэ тит ма̄ньщи ма̄щтырыг о̄лсы̄г. Нэ̄ хо̄тпа наме – Мария Владимировна Ситникова, тав «Народный мастер России» нам о̄ньщи. Мария Владимировна такви ма̄ньщи маснутыт ю̄нты, хумус номылматы, та щирыл хорамыл пиныянэ. Тав ю̄нтум пормасанэ са̄всыр ма̄н тотве̄сыт. Титыт ма̄щтырлан хо̄тпав наме – Александр Данилович Сайнахов. Тав о̄с «Народный мастер России» нам о̄ньщи, са̄лы ос яныгӯй а̄ньтыл, йӣвныл са̄всыр пӯмащит яктын ма̄щтырыг о̄лы. Мария Владимировна ос Са̄нтырав сас Сургут ӯст о̄лэ̄г, «Пе̄с Сургут» нампа музей колт рӯпитэ̄г. «Пе̄с Сургут» выставкат о̄лнэ пормасыт пуссын пе̄с щирыл ва̄рим о̄лэ̄гыт. Та̄н аквтоп пе̄с па̄выл ё̄рт ма̄ ёлыпа̄лныл но̄ххилым пормасыт хольт сусхатэ̄гыт, нас аквта хурияныл щирыл суссылтан ма̄гсыл йильпииг ва̄рве̄сыт. Тот са̄в пормас рактыл, а̄нох те̄рныл, йӣвныл, яныгyй а̄ньтыл ва̄римат. Товат тыналан ма̄гсыл тув пиныглаве̄сыт. Пе̄с щирыл ва̄рим пормасыт сунсыгламаныл порат, ма̄щтыр хотпанув та̄нти халанылт та пормасыт урыл потыртасыт. Маныр, хумус ва̄рвес ос хумус ань э̄ри ва̄руӈкв. Мо̄тыт хо̄тал а̄лпыл ма̄щтыр ма̄хум та̄нти ка̄тыл ва̄рум ёттотыглан пормасаныл выставкан пинтлысаныл. Ка̄сыӈ хо̄тпа такви ва̄рум утанэ урыл муй ма̄хумн потыртас. Та коныпал ӯст о̄лнэ ос тув ёхталам ма̄хум ка̄сащан щирыл ма̄щтыр ма̄хум ёт матыр ма̄щтырлаӈкв ве̄рмысыт. Хӯрум хо̄тал сцена тармыл ма̄хум аквписыг йӣквсыт ос э̄ргысыт. Са̄тловтем са̄всыр ма̄ныл ёхталам коллективыт та̄нти э̄рганыл, йӣкваныл суссылтасаныл. Мастерклассыт минам юипа̄лт ма̄хум «Ремёсла центр» кол кӯщай нэ̄ Ольга Бубновене ос округ Департамент культура кӯщаиг рӯпитан нэ̄ Надежда Казначеева дипломнэ̄пакыл ос савсыр пӯмащипа ла̄тӈыӈ пищмал майве̄сыт. Тамле фестивальн ёхталам ма̄щтыр ма̄хмытын ань ты ва̄рыглым ялпыӈ хо̄талыт сака мустысыт. Та̄н ла̄всыт: «Ань тыт о̄лум фестиваль щар ёмасыг ты а̄ртмыс». 1078 2014.06.20. Александр ВЬЮТКИН Мир йӣквтын ва̄рмаль. Мощ мо̄лалнув Ханты-Мансийск ӯст «Год культуры 2014» нампа янытлан кастыл э̄ргын ос йӣквнэ фестиваль ва̄рыглавес. Ты пӯмащ ва̄рмаль рущ щирыл «Живущие по солнцу» намыл пиным о̄лыс. Ты фестиваль мо̄лты та̄лныл о̄вылтавес, ань титынтыг ва̄рыглавес. Та кастыл округув янытыл э̄ргын, йӣквнэ ос са̄ӈквылтан са̄всыр коллективыт ёхталасыт. Акванатхатыглахтам ма̄хум пуссын та̄нти суссылтан пӯмщаныл щирыл халанылт кассыт. Пуссын аквъёт яныгса̄т ляпатем мир о̄лыс. Ханты-Мансийск ӯсн Ненецкий, Ямало-Ненецкий ос Ханты-Мансийский хӯрум округныл ма̄хум ёхталасыт. Пуссын йӣквим, э̄ргим ос са̄ӈквылтым тит хо̄тал кассӯв. Фестиваль оигпам хо̄талт коллективыт пуссын акванатыглаве̄сыт. Ма̄н тот пе̄с йис пораныл э̄лаль тотнэ са̄ӈквылтан та̄ныт, йӣкванув ос э̄рганув урыл потыртасӯв. То̄ва ма̄ньщи хо̄тпат тох ла̄всыт: «Ма̄н ханты ма̄хманув ёт акв ляпат о̄лнэ̄в ма̄гсыл пе̄с э̄рыгсов та̄нанӯв пуссын акванатэ̄лыгтасанӯв. Хоты ма̄ныл манырсыр та̄н о̄лы, таве та са̄ӈквылтыянӯв». Тувыл жюрихо̄тпат ла̄всыт: «Саранпа̄вылныл ёхталам «Са̄лыӈ лё̄ӈх» ня̄врамыт ос «Э̄ргыт, йӣквыт пувлын ма̄хум» тит коллективыг са̄ӈквылтан та̄наныл ос йӣквыт пе̄с йис хурияныл хольт хультсыт. Ёмщакв те сунсуӈкв, туп ты тит коллективыг щар ма̄щтырыг ты сусхатэ̄г». Хурит йӣквнэ ос э̄ргын ма̄хум по̄слым о̄лэ̄гыт. 1078 2014.06.20. Ирина Самсонова (RUS) Людмила ТЕТКИНА (MNS) Ма̄ньлат хо̄тпат ханищтахтуӈкве ялсыт. Туи о̄вылтахтам порат Мордовия ма̄т Рузаевский район Сузгарье па̄вылт ма̄ньлат финноугрыт ханищтапын акванатхатыгласыт. «Роль общественных организаций в сохранении финноугорских языков и культур» нампа ханищтап Финляндско-Российский нампа проект щирыл ва̄рыглаве. Ты хосыт финноугрыт та̄нки халанылт ва̄йхатым, акванюрщхатым та̄нки пе̄с йис ва̄рмаляныл ос ща̄нь ла̄тӈаныл ханищтыяныл ос э̄лаль тотыяныл. Мордовия ма̄н ханищтахтуӈкве Финляндияныл, Удмуртияныл, Карелияныл, Мордовияныл, Коми ос Марий Эл республиканыл, Пензенский областиныл, Санкт-Петербург ос Москва ӯсыгныл 34 ма̄ньлат хо̄тпа во̄виньта̄лве̄сыт. Ма̄н округувныл А̄с-угорский ма̄ньлат ма̄хум организацияныл ат хотпа: Диана Букаринова, Алла Ишимирова-Посохова, Лариса Миляхова, Антон Нахрачёв ос Ирина Самсонова, «Ханты ясанг» газетат рӯпитан нэ̄, тув ялсыт. Ханищтап о̄вылтахтан порат Рику Савонен, финноугорский проект щирыл рӯпитан хум, ос Юрий Мишанин, Поволжский финноугорский культурный центр кӯщай хум, паща ла̄тыӈ ла̄всы̄г. Тэ̄н юипа̄лт Владимир Абрамов, «Финноугорский мир» нампа мирхал журналыт кӯщай хум, финноугорский организацият манхурип э̄рнэ тэ̄лат ва̄ре̄гыт, та урыл потыртас. Ты юипа̄лт ка̄сыӈ ма̄ньлат хо̄тпа такви хансум проектэ урыл ла̄тыӈ ла̄выс. Ӣтипа̄лаг мӯй ма̄хум э̄лыпа̄лт «Торама» нампа ансамбль э̄ргыс ос йӣквыс. Ты ансамбльт э̄рганыл туп мордовский ла̄тӈыл э̄ргияныл. Мо̄т хо̄талт ма̄ньлат ма̄хум «Язык», «СМИ» ос «Менеджмент» хӯрум группан уртхатым рӯпитасыт. Ма̄хум тот са̄всыр проектыт хансуӈкве ос ты ва̄рмаль хосыт э̄лаль хумус рӯпитаӈкве, ханищтаве̄сыт. Аквта хо̄талт ма̄хум Подлесная Тавла па̄вылн тотыглаве̄сыт. Та па̄вылт рӯпитан школат ня̄врамыт йӣвныл са̄всыр пормас яктуӈкве ханищтавет. Ма̄ньлат хо̄тпат ты школа сунсуӈкве щалтсасыт. Тувыл Владимир Ромашкин музейколэ суссыт. Ты о̄йка Мордовия ма̄т сака ёмащакв ва̄ве. Тав о̄лнэ̄тэ сыс мордва мир пе̄с йис потрыт, э̄ргыт акванатыянэ. Тыи ма̄гсыл тав тот сака янытлаве. Хӯрмит хо̄талэ̄т ма̄хум са̄всыр проектыт хансуӈкве ханищтаве̄сыт. Ӣтипа̄лаг мӯй ма̄хум Саранск ӯсн ялсыт. Тот та̄н И. Д. Воронин нампа республиканский краеведческий музей суссыт. Тувыл «Мерема» нампа ансамбль мӯй ма̄хум ма̄гсыл концерт ва̄рыглас. Ты ансамбль о̄с туп та̄нки ща̄нь ла̄тӈыл э̄ргыт э̄ргияныл. Нилыт хо̄талэ̄т та̄н хӯрум хо̄тал сыс хансум проектаныл урыл потыртасыт. Ма̄ньлат хо̄тпат «Финский за 6 минут», «Финноугриада», «МИНФИН», «ЭТНОкалендарь» ос са̄в мо̄т проектыт тот хӯрум хо̄тал сыс хассыт. Китыт тамле ханищтап таквсы порат сӯкыр э̄тпост Удмуртия ма̄т рӯпитаӈкве паты. Са̄всыр ма̄т о̄лнэ а̄гитпыгыт та̄нки проектаныл тув ке̄туӈкве ве̄рме̄гыт. Щар ма̄к ёмас проектыт хансум ма̄ньлат хо̄тпат Удмуртия ма̄н ханищтапн о̄с тах во̄вавет. Ирина Самсонова хансум потре ма̄ньщи ла̄тӈыл Людмила ТЕТКИНА хансыстэ. 1078 2014.06.20. Александр ВЬЮТКИН Ма̄щтырлан ма̄хум акванатыглаве̄сыт. Мощ мо̄лалнув ма̄хум нэ̄рнэйӣвыт Ханты-Мансийск ӯст ма̄щтырласыт. Ма̄щтырлан коныпал тув ёхталам ма̄хум са̄ӈквылтаӈкв ханищтахтасыт. Ты ва̄рмаль хӯрум хо̄тал минас. Та кастыл округувныл Саранпа̄вылныл, Нижневартовск, Сургут, Пыть-Ях ос Урай ӯсытныл соссаӈ ма̄хум ёхталасыт. Пуссын аквъёт хусахтем хо̄тпа о̄лыс. Нэ̄рнэйӣв ма̄щтырлан кастыл мирн ёмщакв ва̄нэ тит ма̄щтыр хӯмыг ханищтан ма̄гыс во̄выглавесы̄г. Тэ̄н наманэ̄н – Анатолий Вадичупов ос Герман Хатанзеев. Тэ̄н сас са̄ӈквылтапыт, на̄рсъюхыт, ко̄йпыт, тумраныт ос нэ̄рнэйӣвыт ёмас ва̄ре̄г, ма̄щтырыг о̄лэ̄г. Са̄выӈпа̄лэ са̄ӈквылтан ма̄хум са̄ӈквылтапыт тэ̄натэ̄н ты ва̄рылтэ̄гыт. Ханищтахтан ма̄хум ёт та̄н хӯрум хо̄тал сыс са̄т нэ̄рнэйӣв ва̄руӈкв а̄лымасыт. Нэ̄рнэйӣвыл са̄ӈкылтаӈкв ханищтахтам ма̄хум титаххӯрмах та̄н ханищтасыт. Ма̄щтырлан ва̄рмаль оигпан э̄лыпа̄лт та̄н ма̄нь суссылтап щё̄пита̄лыгласыт. 1078 2014.06.20. Людмила ТЕТКИНА Та̄н яныгпа̄ла хо̄тпат ма̄гыс рӯпитэ̄гыт. Кондинский район Леуши па̄вылт «Совет ветеранов» нампа организация яныгпа̄ла ма̄хумн хумус нё̄ты ос манхурип э̄рнэ тэ̄ла ва̄ри, ты урыл ма̄ньщи газетав ма̄гсыл Надежда Витальевна Набатова потыртас. Тав ань секретарьхо̄тпаг тот рӯпиты. – 2013 та̄лт та̄л котиль э̄тпос 31 хо̄талэ̄т пе̄риян ва̄рмаль о̄лыс. То̄нт ма̄н «Совет ветеранов» организациян Лидия Петровна Мармышева кӯщаиг пе̄рияслӯв. Ань ты Советыт ма̄н са̄т хо̄тпа рӯпитэ̄в. Архивнэ̄пакыт кисхатым ам «Совет ветеранов» нампа организацияв урыл ла̄тыӈ хо̄нтсум. Ангелина Ивановна Ковалдина тот тох хансыс: «1993 та̄лт ма̄ньполь э̄тпос 3 хо̄талэ̄т «Совет ветеранов» организациян кӯщаиг Александр Никитич Филиппов пе̄риявес». Ты о̄йка юипа̄лт Вера Иванова Шишкина рӯпитас, тувыл Лидия Петровна Мармышева пе̄риявес. Ма̄н рӯпитаӈкве хунь патсӯв, о̄влэ̄т па̄вылт пенсият о̄лнэ ма̄хманув пуссын акв нэ̄пакн хассанӯв. Ос ка̄сыӈ хо̄тпа намхо̄талэ янытлаӈкве патыслӯв. Хум хо̄тпат 60 та̄лэ ос нэ̄ 55 та̄лэ то̄влын кастыл мӯйлупсал мӯйлуптыянӯв. Ма̄н «Совет ветеранов» па̄лыл та̄наныл янытлаӈкве юв ялэ̄в. Та̄н пуссын такем ща̄гтэ̄гыт. Ка̄сыӈ хо̄тпа номтэ ёмас, хунь тав номаве ос ат ёрувлаве. Тамле рӯпата ва̄руӈкве хунь номылматсӯв, о̄влэ̄т спонсорыт кинсым, хотальа̄ти пимща хассӯв. Ма̄навн Геннадий Семёнович Корепанов, областной Думат рӯпитан депутат, ат со̄тыра солко̄ви ке̄тыглас. Владимир Яковлевич Иванов, ма̄н районный Думавт депутатыг о̄лнэ хум, хӯрум со̄тыра солко̄ви мис. Ты коныпал мо̄т депутыт о̄с олн майлысыт. Па̄влувт рӯпитан предпринимателит о̄с ёмащакв ма̄навн нё̄тэ̄гыт. Тыи ма̄гсыл ма̄н та̄нанылн яныг пӯмащипа ла̄тыӈ ла̄ве̄в. Тувыл ма̄н «Забота» нампа проектнэ̄пак хассӯв ос Ханты-Мансийск ӯсн общественный связь Департаментын ке̄тыслӯв. Тот касыл щирыл но̄хпатсӯв, ань 200 со̄тыра солко̄вил майвесӯв. Па̄влув янытлан кастыл «Исторический ансамбль: 430 лет селу Леуши» нампа проектнэ̄пак щё̄питаслӯв. Гранолн винэ ма̄гсыл ты проект ке̄тыслӯв, тот о̄с но̄хпатсӯв, 200 со̄тыра солко̄вил майвесӯв. Ты олныл ма̄н па̄влыт о̄лнэ памятникыт мӯсхалыг щё̄питыянӯв. Па̄вылт акв памятник хосат тӯщтувес. Са̄в та̄л ювле хультум порат та ма̄т коммунистыт алве̄сыт ос ёлщё̄питаве̄сыт. Акв порат ты памятник мӯсхалыг щё̄пита̄лвес, тувыл тот ёлщё̄питам хо̄тпат наманыл аты хасве̄сыт. Та па̄сныл 40 та̄л минас, памятник намыт та̄л тох та лю̄ли. Ма̄н ты рӯпата ва̄рилӯв, наманыл тув хансыянӯв. Ань коммунистыт ат янытлавет, ат э̄руптавет. Тувыл историяв ос ты ма̄хум хотёрувлаӈкве ат э̄ри, тыи ма̄гсыл ма̄н ты рӯпата ва̄руӈкве вӯйхатсӯв. Ты коныпал ты олныл ма̄н па̄влувт акв йильпи памятник о̄с тах тӯщтэ̄в. Хо̄нтлам хӯрум яныгпа̄ла хо̄тпа ос «Труженики тыла» нам о̄щнэ 11 хо̄тпат Леушит ань о̄лэ̄гыт. Та̄н о̄лнэ коланылн ма̄н па̄рт тагатасӯв, ма̄хум вос ва̄гыт, хоты колт та̄н о̄лэ̄гыт. Грантолныл ма̄н акв нэ̄пак о̄с та̄ратаслӯв. Тот войнат хо̄нтлум ма̄хманув наманыл пуссын хассанӯв. Ка̄сыӈ э̄лумхо̄лас урыл потыр хассӯв, хоты ма̄т хо̄нтлас, хоты ма̄т ёлщё̄питавес, манхурип ма̄глын тагатан по̄с о̄ньщас. Победа хо̄талыл ветерананув янытламув порат ты нэ̄пакыл мӯйлуптасанӯв. 2013 та̄лт па̄влувт о̄лнэ «Ветеран» э̄ргын коллективув 20 та̄лэ то̄влыс, ты кастыл ма̄н «И льётся песня из души » нампа нэ̄пак та̄ратаслӯв. Мо̄т китыт нэ̄пак ма̄н Леуши па̄вылт о̄лнэ кит э̄кваг янытлан кастыл ва̄рыслӯв. Акв э̄ква наме Александра Георгиевна Зольникова. Тав 30 арыгкем та̄л школат ня̄врам ханищтан нэ̄г рӯпитас. Э̄ква «Отличник просвещения», «Заслуженный учитель РФ» нам ос «Знак почёта» ма̄глын тагатан по̄с о̄ньщи. Тав наме «Югория» нампа энциклопедиянэ̄пакт хансым олы. Китыт э̄ква Мария Трифоновна Тропина. Тав о̄с «Отличник просвещения» нам о̄ньщи. Э̄ква наме «Золотая книга Кондинского района» тув хасвес. Тамле мӯтраӈ, сымыӈ ос ка̄ркам э̄кваг ма̄н па̄влувт ты о̄лэ̄г. Са̄в та̄л ка̄ркамыг рӯпитам яныгпа̄ла хо̄тпанув благодарственный пищмал манос мо̄т янытлан нэ̄пакыл вос мивет, нэ̄паканыл акванатыянӯв ос районный межведомственный комиссиян ке̄тыянӯв. Тув ходатайствонэ̄пакыт ке̄тыглым па̄влувт 18 э̄лумхо̄лас янытлаве̄сыт ос ты нэ̄пакыл майве̄сыт. Ка̄сыӈ та̄л ма̄ньполь э̄тпос «Ярмарка некоммерческих организаций» Ханты-Мансийск ӯст ва̄рыглаве. Округ янытыл ма̄хум та̄нки рӯпатаныл урыл потыртаӈкве ос выставканыл суссылтаӈкве тув ялантэ̄гыт. «Совет ветеранов» нампа районный организацияв о̄с тув во̄виньта̄лвес. Анна Ивановна Клачкова, ты организацият кӯщаиг о̄лнэ э̄ква, ты выставка суссылтаӈкве ялыс. Ма̄н проектанув хосыт та̄ратым нэ̄паканув тот о̄с суссылтасанэ. Леуши па̄вылт о̄лнэ яныгпа̄ла хо̄тпат са̄всыр ялпыӈ хо̄талытн, концертытн ва̄тихал акванатыглыянӯв. Победа хо̄тал кастыл ма̄н яныгпа̄ла хо̄тпанув клубн во̄виньта̄лсанӯв. Акв хо̄талт ма̄н «Вечер народной частушки и песни» нампа концерт ва̄рыгласӯв. Са̄всыр э̄ргыт ос частушкат ва̄нэ хо̄тпат пуссын тув во̄виньта̄лсанӯв. О̄влэ̄т номсысӯв, ма̄хманув тах ат ёхтэ̄гыт. Тувыл таса̄вит мир ёхтыс, маткем та э̄ргысӯв, маткем та мовиньтасӯв. Яныгпа̄ла хо̄тпат ма̄гсыл «Спросите у доктора» нампа тэ̄ла ва̄рыглэ̄в. Ма̄н Вера Ивановна Швейкина, Леуши па̄выл ле̄ккарыг о̄лнэ нэ̄, ёт рӯпитэ̄в. Яныгхо̄тпа ле̄ккар нэ̄ па̄лт са̄всыр а̄гм урыл китыглахтуӈкве ке таӈхи, тув ёхталаӈкве ве̄рми. Акв хо̄тал леккар давлениеа̄гм урыл, мо̄т щёс тав сым а̄гм урыл потыртас, хӯрмит хо̄талэ̄т са̄всыр йильпи тэ̄рпи урыл ла̄тыӈ ла̄выс. Ма̄н нила щёс библиотекат акванатхатыгласӯв, ма̄хумн тамле тэ̄ла сака мӯстыс. Яныгпа̄ла ма̄хманув юн о̄лыманыл, та̄нки а̄гманыл урыл акваг ул вос номсахтэ̄гыт, ты ле̄ккар нэ̄ ёт ва̄тихал хо̄нтхатыглаӈкве тах патэ̄гыт. Надежда Витальевна Набатова ань пенсият о̄лы. Тав ма̄ньлатыг о̄лме порат Леуши па̄вылн школан рӯпитаӈкве ёхтыс. То̄нт а̄ги номсыс, мощ рӯпиты, ювле яныгмам ма̄н о̄луӈкве мины. Тувыл номтанэ мо̄т щирыл минасыт, Леушит па̄вылт тав хум ва̄рыс, о̄луӈкве тот та хультыс. Надежда Витальевна 36 та̄л сыс школат ня̄врам ханищтан нэ̄г рӯпитас. О̄йкатэ̄нтыл кит ня̄врам янмалтасы̄г. Пыге Москва ӯст юристыг ханищтахтас, ань Междуреченский па̄вылт рӯпиты. А̄гитэ ос Москва ӯст ханищтахтас, тот хум ва̄рыс, ань а̄гитэ янмалтым о̄лы. Надежда Витальевна пенсиян минаме юипа̄лт рӯпата та̄л нас ӯнлахо̄луӈкве ат таӈхыс. «Совет Ветеранов» нампа организацият рӯпата ва̄руӈкве вуйхатас. Тувыл такви ня̄враманэ о̄с ат ёрувлыянэ. Пыге хӯрум ня̄врам о̄ньщи, Надежда Витальевна тот акваг нё̄ты. Москва ӯсн а̄гитэ̄н нё̄туӈкве о̄с ва̄тихал яланта̄лы. Надежда Витальевна ла̄ви: «Ам нас тох тэ̄ла та̄л о̄луӈкве ат ве̄рме̄гум, акваг матхурип рӯпата а̄нумн ва̄руӈкве э̄ри». 1078 2014.06.20. Татьяна Хозяинова Юрты̄г. Кит юрты̄г Сантыра ос Коша о̄лсы̄гхӯлсы̄г. Нё̄тнэ во̄р ос Нё̄р ляпат о̄лсы̄г. Тэ̄н кон мечикыл ёнгуӈкве, ёсал ос велосипедыл яласаӈкве сака э̄руптасы̄г, халэ̄нт юртыӈыщ о̄лсы̄г. Ка̄сыӈ таквс во̄р хӯнтлуӈкве ялантасы̄г. Лӯптат хумус тот суртге̄гыт, товлыӈ ӯит турсуяныл хӯнтлысы̄г, сӯйпил лӯпта, саӈквлыпил, ӯльпа па̄кв атыгласы̄г. Аквматнакт тэ̄н о̄с во̄рн минасы̄г. Во̄р хосыт ё̄ме̄г, илтты̄г лэ̄ӈынкве ка̄саласы̄г. Тав хорамыӈ ос пуныӈ о̄лыс. Тэ̄н ща̄гтым, поргим ос ёнгим лэ̄ӈын юипалт ха̄йтылтахтасы̄г. Лэ̄ӈын акв йӣвныл ос мо̄т йӣвн поргим тэ̄натэ̄н па̄ль во̄рн тӯлыстэ. Пыгрищиг номылматсы̄г, хот та тыпсы̄г. Сатапаӈкве патыс, Сантра ос Коша пилуӈкве патсы̄г. Во̄р хосыт хоса ё̄мсы̄г, ва̄гтал патсы̄г, во̄рт э̄т хӯлсы̄г. Э̄т сыс тэ̄н акваг акв по̄хат о̄лсы̄г, Таквсы э̄тыт ащирмаӈыг о̄лсыт, тэ̄н парщин курткал лэ̄пхатасы̄г. А̄лпыл ювле миннэ лё̄ӈх кинсуӈкве минасы̄г. Ня̄врамыг ё̄ме̄г, ощхуль ва̄ре̄г, атым пиланэ̄н киттыгуртыянэ̄н. Во̄рт сака пилсы̄г, тэ̄нки халэ̄нт акваннё̄тхатэ̄г. Юртыӈыщ о̄луӈкве о̄парище̄н ханищта̄лвесы̄г. Тэ̄н о̄парище̄н потырта̄лум ла̄тӈыт ёмщакв номитэ̄н: каӈк – ты ма̄к ю̄рт, тэ̄н аквписыг аквъёт. Хунь аквъёт – тэ̄н ё̄ры̄г. Хоса ё̄мыгтасы̄г, а̄ӈкватасы̄г, хо̄тал та̄кыщ но̄хпатыс. Мо̄лхо̄тал хольт ос пыгрищиг йӣв ка̄саласы̄г. Ты пе̄с яныг ӯльпа, тованэ осыӈыт. Та йӣв тармыл лэ̄ӈынкве ӯнлыс, ты лэ̄ӈнын тэ̄н во̄рн хуйтвесы̄г. Юрты̄г лё̄ӈхе̄н ханьщистэ̄н. Та лё̄ӈх хосыт ща̄гтым ха̄йталтахтасы̄г ос во̄рныл па̄вылн нэ̄глысы̄г. Лэ̄ӈынкве лэ̄ге хосги ос ла̄ви: «Ка̄сыӈ ю̄рт ё̄р». Пыгрищиг ёмащакв юв минасы̄г. Хунь юв ёхтысы̄г, тэ̄н ат потыртасы̄г, аквансыныгтахтым лю̄щсы̄г, тэ̄нкинатэ̄н пӯмащипа ла̄тыӈ ла̄всы̄г. Ань тэ̄н яныгмасы̄г, ла̄кква ма̄т о̄лэ̄г, хунь тэ̄нки па̄влэ̄н ёхтэ̄г, тэ̄н ты урыл аквписыг номылматыгла̄лэ̄г. Ань тэ̄нки ня̄враманэ̄н ханищтэ̄г, хумус юртыӈыщ о̄луӈкве э̄ри ос хумус о̄парище̄н ханищтавесы̄г. Ты потыр Саранпа̄выл школат ханищтахтын а̄ги Татьяна Хозяинова хансыстэ. 1078 2014.06.20. Михаил Ромбандеев Амки ма̄кем. Сака нё̄тнэ хо̄тал ӯнтнэ ма̄, На̄й хольт хорая̄лы. Сака ёмас хо̄тал нэ̄глын ма̄, Я̄т тав о̄лыгла̄лы. Тыт сыстам лылые̄п, Тыт вуйкан нё̄рыӈ вит. Тыт па̄хвыӈ, лощит ма̄: Ос сака са̄всыр во̄р тыт. Ам ща̄гтым ла̄ве̄гум: «Ам тыт о̄лэгӯм, Ам тыт самын патсум Тыи ам ма̄м! » Ты стихотворение Михаил Ромбандеев, Саранпа̄вылт о̄лнэ ма̄ньщи пыг, хансыстэ. 1078 2014.06.20. Диана Панаева Пупа̄пщикве. Пе̄с порат ма̄ньщи ма̄квет акв колта̄гылт ма̄ньщи а̄гирищ самын патыс. А̄гирищ каӈк о̄ньщис. Тав наме Посыӈсам о̄лыс. Ма̄нь па̄вылт тав сака ё̄рыг о̄лыс, ща̄нягена̄щаген э̄руптавес. Аквнакт тав са̄лы во̄раяӈкве минас. Во̄р хосыт хоса ё̄мыгтас, акваг нэ̄матыр ат хо̄нтыглас. Та та̄лыт нуса ос тэ̄талыӈ о̄лсыт. Юв ёхтыс, На̄й-О̄тыранэ̄н по̄йкщуӈкве патыс, ща̄нягеа̄щаге ма̄гыс матыр во̄р вос мыг. О̄ста во̄рн минас. Во̄р хосыт ёсал ё̄ми, ты ёсаге яныг ащо̄йканыл таве̄н хультсы̄г, ӣлттыг э̄лын сэ̄мыл ут ка̄салас. Такви ла̄ви: « Пӯпапщикве, ялпыӈ ӯйкве, наӈ ты ам ё̄рум. » Ёмщакв сунсы, яныг пӯпапщиквекапай лю̄ли. Ща̄гтыс, ань тах ща̄нягума̄щагум ма̄гыс мӯйлупса паты. Такви ё̄втэ но̄хлэ̄ватастэ, та̄кыщ хартыстэ, маныр ё̄р о̄ньщис, ня̄лэ на̄й хольт та̄ратастэ, пупа̄пщикве щар сыме̄н хо̄яс. Пупа̄пщикве по̄лям ма̄н ёл та рагатас, каӈке о̄с На̄й-О̄тырын та вуйвес. Тыщир тав пупа̄пщиквег та е̄мтыс. Ща̄нягеа̄щаге палт та ха̄йтыс. Тот та̄н пуссын хотрохтысыт, тав пупа̄пщикве хурипа, йӣгрище̄н хащвес. Ань та йисныл ма̄ньщи э̄лмхо̄ласн пупа̄пщикве каӈкыг ловиньтаве. Ты потыр Диана Панаева, Саранпа̄выл школат ханищтахтын а̄ги, хансыстэ. 1079 2014.07.11. Людмила ТЕТКИНА Мир ма̄гсыл пирмайтым са̄кконыт. Лӯпта э̄тпос оигпан э̄лыпа̄лт Ханты-Мансийск ӯст округ Думат сапра̄ни о̄лыс. Депутатхо̄тпат тот 18 са̄ккон ос са̄всыр программа урыл потыртасыт, тувыл пирмайтасаныл. Ты халт та̄н мирн нё̄тнэ са̄кконын йильпи ла̄тыӈ хассыт. Бюджетный организацият рӯпитан ма̄хум кит та̄л сыс акв щёс ӯщлахтын ма̄н ялнэ ма̄гсыл олныл мивет, рущ ла̄тӈыл «льготный проездыг» ла̄ваве. Ты э̄лыпа̄лт тамле ва̄рмаль о̄лыс, хо̄тпа понедельникыл ӯщлахтын хо̄таланэ о̄вылтахтэ̄гыт ке, тав ос ты хо̄тал ат ӯрыстэ ос субботат манос воскресениет ӯщлахтуӈкве минас. То̄нт билет ёвтнэ ма̄гсыл олныл тав ат ойтвес. Ма̄хум кит хо̄тал юн ул вос ӯрхатсыт ос та̄ра ӯщлахтуӈкве минуӈкве вос ве̄рмысыт, депутатыт тамле йильпи ла̄тыӈ са̄кконын хассыт. Сапра̄нит депутатыт «Лесной кодекс РФ» нампа яныг са̄ккон урыл потыртасыт. Ань ты нэ̄пакт тох хансым о̄лы, организацият манос нас хо̄тпат, аренда щирыл та̄нкина̄нылн ма̄ ке хансэ̄гыт, та̄н ка̄сыӈ та̄л декларациянэ̄пак ва̄ре̄гыт. Ма̄во̄й но̄хвинэ компаният ты нэ̄пак акваг ул вос щё̄питасыт, ма̄н депутатанув йильпи ла̄тыӈ «Лесной кодексн» хансуӈкве таӈхе̄гыт. Хансум номтаныл та̄н Государственный Думан ос Совет Федерациян ке̄тсаныл. Любовь Чистова, Общественный палата кӯщай э̄ква, депутатыт нупыл рӯпататэ урыл потыртас. Тав ла̄выс, та̄н палтыланыл акваг са̄в хо̄тпа та̄рвитыӈ ва̄рмаляныл ёт ёхталэ̄гыт. Та̄н халанылт са̄в ма̄ньлат ще̄мьят о̄лы. Йильпи са̄ккон щирыл атхуйплов та̄л округувт о̄лнэ ще̄мья кол ёвтнэ ма̄гсыл очередин хансавет ос олныл нё̄тавет. Ань тамле ва̄рмаль о̄лы, нэ̄гхумы̄г акванминасы̄г ке, хум тыт самын патыс, тыт яныгмас, ос нэ̄тэ тыг о̄луӈкве мо̄т ма̄ныл ёхтыс ке, тэ̄н ань йильпи са̄ккон щирыл кол ёвтнэ ма̄гсыл нё̄тмилыл ат миве̄г. Кӯщай э̄ква, ла̄вме щирыл, ты пирмайтым са̄кконыт тамле ще̄мьят урыл я̄нас ла̄тыӈ хансуӈкве э̄ри. Надежда Алексеева, соссаӈ ма̄хум Ассамблеят рӯпитан депутат, пе̄с йис ма̄т о̄лнэ ма̄хум ма̄гсыл пирмайтым са̄ккон 2013 та̄л сыс хумус рӯпитас, та урыл потыртас. Надежда Геннадьевна ла̄выс, ювле хультум та̄л сыс соссаӈ ма̄хум халт нэ̄мхотьют пе̄с йис ма̄наныл та̄нки нупыланыл ат хассыт. «Социальноэкономическое развитие КМНС ХМАО-Югры» нампа программа мощща олныл та̄ставе, таи ма̄гсыл ты са̄ккон лю̄льсаӈ рӯпиты. Ты программа са̄внув олныл хансуӈкве э̄ри, туп то̄нт соссаӈ ма̄хум мӯсхалыг нё̄туӈкве патавет ос та̄н ма̄гсыланыл пирмайтым са̄кконыт ёмащакв рӯпитаӈкве патэ̄гыт. Лӯпта э̄тпос депутатыт юио̄выл сапра̄нияныл о̄лыс, мо̄т щёс та̄н сӯкыр э̄тпост тах акванатхатэ̄гыт. 1079 2014.07.11. Николай МЕРОВ Са̄лыт уральтан хум. Ха̄льӯс район Саранпа̄выл совхозт Данил Васильевич Вынгилев рӯпиты. Ам тув ялнэ̄м порат, тав ётэ хо̄нтхатыгласум. Тав такви уре̄тыл мощ потыртас. На̄н тав потре э̄лаль ловиньтэлы̄н. «Ам ща̄нягума̄щагум Кимкъясуй па̄вылт о̄лсы̄г. Тот Кульпас па̄выл рыбоучастокт хӯл алыщлым рӯпитасы̄г. Тувыл Саранпа̄вылн ва̄нтлысы̄г. Тот са̄лыӈколн рӯпитаӈкве патхатсы̄г. О̄влэ̄т са̄тыт бригадат рӯпитасы̄г. Ётылнув ос о̄выл бригадат ловманкем та̄л са̄лы ӯрим яласасы̄г. Тувыл 1983 та̄лт пенсиян патсы̄г. Саранпа̄вылн на̄лув ва̄глысы̄г. Та юипалт ам 1985 та̄лт ща̄нягума̄щагум ва̄рмалянэ̄н э̄лаль тотнэ ма̄гыс са̄лыӈколн рӯпитаӈкве минасум. Нёловхуйплов та̄лум то̄влыс, армиян вуйве̄сум. Юв ёхтысум, о̄с са̄лы ӯруӈкве минасум. Та па̄сныл акваг са̄лыт ёт рӯпитэ̄гум. Са̄в та̄л пастухыг яласасум. Ма̄н ще̄мьявт ня̄врамыт пуссын са̄лыӈколт ма̄нь та̄гыл яныгмасӯв. Таима̄гыс о̄лупса ва̄рмалит пуссын ёмщакв ва̄ганум, нэ̄матыр та̄рвит а̄тим о̄лыс». Данил Васильевич ань Саранпа̄выл совхозт зоотехникыг рӯпиты. Са̄лыт уральтым ва̄тихал яласы. А̄гмыл ул вос е̄мтсыт, прививкауколыл тӯщтыянэ ос нас уральтыянэ. Ты рӯпата таве̄н сака мӯсты. 1079 2014.07.11. Людмила ТЕТКИНА Нэ̄ кол ёвтнэ ма̄гсыл такви олн аты. Ты та̄лныл округувт «Накопительная ипотека» нампа йильпи программа рӯпитаӈкве о̄вылтахтас. Кол та̄л о̄лнэ ще̄мьят ты хосыт олннё̄тмилыл мивет. Ма̄хум о̄влэ̄т та̄нки нэ̄паканыл Ипотечный агентстван тотыяныл, тот та̄н очередьн хансавет. 2014 та̄л ат э̄тпос сыс округ янытыл 190 ще̄мья тув заявлениенэ̄пак тотсыт, ань 110 ще̄мья тув хасвес. Ты юипа̄лт очередьн хансым ма̄хум Ипотечный агентстваныл уведомлениенэ̄пакыл ке̄тавет. Тамле пищма яныгполь э̄тпосныл ма̄хумн ке̄туӈкве о̄вылтаве̄сыт. Ты пищмал тотым ще̄мьят Ханты-Мансийский банкын вос ялэ̄гыт ос «Накопительная ипотека» нампа вклад вос пунсэ̄гыт. Тот 3-6 та̄л сыс кол ёвтнэ ма̄гсыл олн акванатуӈкве э̄ри. Ще̄мья акв э̄тпос сыс 6-25 со̄тыра са̄вит солко̄ви тув пинуӈкве ве̄рми. Ос акв та порат ще̄мьят Ипотечный агентстват ёт соглашениенэ̄пак хансэ̄гыт. Тох кол ёвтнэ ма̄гсыл олн атым, хо̄тпа округ бюджетныл ка̄сыӈ э̄тпос 12 со̄тыра 500 солко̄вил ке̄таве. Пуссын та̄лыт сыс 450 со̄тыра солко̄ви са̄вит нё̄тмилыл тах миве. Щар о̄влэ̄т тох кол ёвтнэ ма̄гсыл олн атуӈкве Нягань ӯст о̄лнэ нэ̄ о̄вылтахтас. Тав хӯрум та̄л Ханты-Мансийский банкын олн пинуӈкве паты. Ты сыс тав округ бюджетныл ос арыг 450 со̄тыра солко̄вил тах миве. Ань йильпи са̄ккон щирыл, округувт 15 та̄л ат о̄лум ще̄мьят ты программан ат хансавет ос кол ёвтуӈкве ат нё̄тавет. Са̄в та̄л тыт о̄лнэ ще̄мьят пуссын тув хасхатуӈкве ве̄рме̄гыт. Ипотечный агентстваныл ке̄тым ля̄ххал ма̄ньщи ла̄тӈыл Людмила ТЕТКИНА хансыстэ. 1079 2014.07.11. Людмила ТЕТКИНА Белоярский ӯст лылые̄п сака па̄ӈктаве. Ма̄н округувт ма̄вит ӯргалан тэ̄ла ань акваг та̄рапаттым о̄ньщаве. Ты хосыт рӯпитан ма̄хум ва̄тихал акванатхатыглэ̄гыт ос ты урыл потыртэ̄гыт. Акв тамле сапра̄ни губернатор ва̄ӈын хум Геннадий Бухтин ва̄рыглас. Ма̄вит ӯргалан службат рӯпитан хо̄тпат округ янытыл яласэ̄гыт, ка̄сыӈ районт ма̄, я̄т ос лылые̄п мӯсхалыг ханищтэ̄гыт. Ос ты ва̄рмалит пуссын акв нэ̄пакн хансыяныл. Ма̄вит ӯргалан ма̄хум ты нэ̄паканыл щирыл, Белоярский ӯст лылые̄п щар па̄ӈкыӈыг о̄лы. Та ӯст са̄в та̄л газокомпрессорный станция рӯпиты. Тав са̄в лю̄ль ут кон ты та̄рты. Щар сыстамыг Кондинский ос Советский районыг ловиньтахтэ̄г, тот мощща предприятие рӯпиты, та̄н ма̄, я̄т сака ат па̄ӈктыяныл. Яныг ӯст халт щар па̄ӈкыӈ Нижневартовск ӯс ловиньтахты. Ты юипа̄лт Сургут, Нефтеюганск ос Ханты-Мансийск ӯсыт хансым о̄лэ̄гыт. Кӯщаит ос таи ла̄всыт, ты нила ӯсытт сака са̄в ма̄шина яласэ̄гыт, та̄н сака лылые̄п па̄ӈктэ̄гыт. Ты коныпал ты ӯсыт ляпат ма̄во̄й но̄хвинэ са̄в компаният рӯпитэ̄гыт, та̄н о̄с са̄в лю̄ль ва̄ре̄гыт. Округувт ма̄вит хумус ӯргалаве, хо̄т ма̄вит сака па̄ӈктаве ос хумус сыстамтаве, ты урыл кӯщаит ка̄сыӈ та̄л яныг докладнэ̄пак щё̄питэ̄гыт. Ма̄хум та̄н хансум нэ̄паканыл ловиньтаӈкве вос ве̄рме̄гыт, таве интернетын ва̄рияныл. 1079 2014.07.11. Николай МЕРОВ Округувт о̄лнэ пыганув Президентув палт лусытэ̄гыт. Мо̄лал Югра ма̄ныл Президентув полкын нёлоловхуйплов та̄ланыл то̄влын пыгыт лусытаӈкве тотве̄сыт. Та̄н Московский область Ногинский район «Купавна» нампа военный лагерьт ма̄в ӯргалан ма̄гыс присяга мисыт. Ты ва̄рмаль кастыл округ губернатор Наталья Комарова о̄с тув ялыс. На̄н ты урыл э̄лаль ловиньтэ̄н. Ма̄н округувныл пуссын аквъёт атхуйплов пыг тув тотве̄сыт. Та̄н ща̄няныла̄щаныл Президентский полкын присяга сунсуӈкве о̄с ёхталасыт. Наталья Комарова лусытан пыгыт ос та̄н рӯтаныл сымыӈыщ янытласанэ. Ты пыгыт Ханты-Мансийск, Нижневартовск, Нягань, Нефтеюганск, Сургут, Лангепас ӯсытныл ос Кондинский, Советский районыгныл о̄лэ̄гыт. Та̄н рӯтанылн писаль лосталан ос ряд щирыл нё̄тнэ̄г ё̄мнэ ва̄рмаль суссылтасыт. Тот лусытан пыгыт Россия яныг кӯщаит ос «Красный площадь» ӯргалыяныл. Президентув полкын винэ ня̄врамыт о̄лупсаныл уральтавет, хо̄тпа нас тох тув ат ликми. Ня̄врамыт хумус школат ханищтахтасыт, маныр номт о̄ньще̄гыт, манхурип ще̄мьят та̄н яныгмасыт, ёмщакв уральтавет. Югра ма̄т о̄лнэ ня̄врамыт 2007 та̄лныл тув вивет. Та па̄сныл ань тыг мус тот 120 пыг лусытас. 1079 2014.07.11. Людмила ТЕТКИНА Округ кӯщай нэ̄ Нё̄рн ялуӈкве номсы. Мо̄лты та̄л Югра ма̄н 450 со̄тыра мӯй ма̄хум ёхталас. Ирина Арканова, туризм щирыл рӯпитан кӯщай нэ̄, ла̄выс, са̄в ма̄хум тыг ӯщлахтаӈкве вос ёхталэ̄гыт, округ янытыл са̄всыр турбазат, этностойбищат ос мо̄т мӯйлын колыт рӯпитэ̄гыт. Ма̄хум тыт ма̄ньщит, ханты о̄лупсаныл сунсуӈкве, хӯл алыщлаӈкве, Нё̄рн ялуӈкве ос мо̄т щирыл ӯщлахтуӈкве ве̄рме̄гыт. Округ кӯщаит туризм нупыл ань акваг са̄в олн кос та̄стэ̄гыт, тувыл тот иӈ са̄в та̄рвитыӈ ва̄рмаль о̄лы. Тыт ёмас яласан лё̄ӈх а̄тим, тыи ма̄гсыл туристыт тыг ёхталаӈкве сака ат ка̄саще̄гыт. Мо̄т та̄рвит округ янытыл гостиницаколыт э̄т хулнэ ма̄гсыл са̄в олн выгыт. Ирина Арканова ла̄внэ̄тэ щирыл, туризм хосыт иӈ са̄в рӯпата ва̄руӈкве э̄ри, туп ты юипа̄лт са̄в мӯй ма̄хум тыг ёхталаӈкве патэ̄гыт. Ма̄н ма̄в урыл мо̄т ма̄т о̄лнэ мирыт са̄внув вос ва̄гыт ос тыг вос ёхталэ̄гыт, ань са̄всыр рӯпата ва̄раве. Ма̄ньполь э̄тпост ма̄ньлат хо̄тпат Ха̄льӯс район Нё̄рн ялсыт. Ты ва̄рмаль урыл телевизор, газетат ос интернетыт ля̄ххал хансыглавес. Са̄внув мир Нё̄ранув урыл вос пӯмщалахтэ̄гыт, ты та̄л во̄ртур э̄тпос яныгса̄т э̄лумхо̄лас тув ялуӈкве щё̄питахтэ̄гыт. Антон Тимкин, ма̄ньлат ма̄хум ос ханищтап Департаментыт рӯпитан хум, ты урыл ла̄выс: «Ка̄сыӈ хо̄тпа ма̄н ётув Нё̄рн ялуӈкве ве̄рми. Ань ня̄врамыт, ма̄ньлат а̄гитпыгыт, МЧСыт ос са̄в мо̄т ма̄тт рӯпитан хо̄тпат тув минуӈкве ка̄саще̄гыт. Наталья Комарова, губернаторув, Нё̄рн ялуӈкве о̄с щё̄питахты. Ма̄н группа щирыл ла̄кквауртхатэ̄в, акват ла̄глыл тув ё̄ме̄гыт, мо̄таныт яныг ма̄шинал ос акв группа велосипедыл тув ялэ̄гыт». Тамле рӯпата ос таи ма̄гсыл ва̄раве, са̄внув мир ма̄н округувн ӯщлахтуӈкве вос ёхталы. 1079 2014.07.11. Людмила ТЕТКИНА Та̄н ма̄вит ӯргалаӈкве ханищтавет. Лӯпта э̄тпос «Спасти сохранить» нампа ва̄рмаль Югра янытыл рӯпитас. Манхурип э̄рнэ тэ̄ла ты акция мирн тоты, манхурип рӯпата ты пора сыс ва̄рвес, ты урыл Геннадий Бухтин, губернатор ва̄ӈын хум, ос Сергей Пикунов, ма̄вит ӯргалан служба кӯщай, потыртасы̄г. Геннадий Бухтин ла̄выс, ма̄вит ӯргалан акция о̄лум порат аквторыг са̄в рӯпата ва̄рвес. А̄гирищитпыгрищит «Красная книга глазами детей» нампа касылн ка̄тыл по̄слум хурияныл ке̄тыгласыт. Ты порат «Сохраним цветущий мир Югры» нампа форум о̄лыс. Тув са̄всыр ма̄ныл 200 э̄лумхо̄лас ёхталасыт. «Спасти и сохранить» нампа телефестивальн 450 хо̄тпат та̄нки по̄слум кинаныл тотыгласаныл. Ты коныпал мо̄т са̄в мирхал конференцият, ханищтапыт та э̄тпос сыс рӯпитасыт. Сергей Пикунов ла̄вме щирыл, ма̄вит ӯргалан акция ма̄н округувт акваг ва̄рыглаве. Тамле касылыт, ханищтапыт хосыт ня̄врамыт ма̄нь та̄гыл ма̄вит ургалаӈкве ханищтавет. Ты коныпал ты акцият рӯпитан ма̄хум ос мо̄т яныг рӯпата ва̄ре̄гыт, ма̄во̄й но̄хвинэ ма̄хум ма̄вит ӯргалаӈкве ос сыстамтаӈкве ханищтыяныл. Ань нефтяникыт ты тэ̄ла урыл о̄с сака ат номсахтэ̄гыт. Та̄н ма̄во̄й ма̄ныл но̄хвуим газ нас тох но̄хпе̄ламтыяныл, хо̄тал палыт та тэ̄г, ты хосыт ты ма̄вит сака па̄ӈктаве. Ань округувт тамле факелыт лапхарыгтан ма̄гсыл ты йильпи программа рӯпитаӈкве о̄вылтахтас. Ты нэ̄пак щирыл нефтяникыт мӯсхалыг уральтавет ос ты утыт лапхарыгтаӈкве ла̄вавет. Ты ва̄рмаль хосыт рӯпитан ма̄хум 2015 та̄л сӯкыр э̄тпост яныг конференциян акванатхатэ̄гыт. Ма̄ янытыл рӯпитан ма̄во̄й но̄хвинэ компаният пуссын ты урыл потыртаӈкве ос матыр нэ̄пак хансуӈкве Ханты-Мансийск ӯсн тах во̄виньта̄лавет. 1079 2014.07.11. Валентина УЗЕЛЬ Ӯст о̄лнэ соссаӈ ма̄хум. Ты хурит Татьяна Александровна Молданова Надежда Васильевна Лукина ёт по̄слым о̄лэ̄г. Тэ̄н сас наука рӯпата ва̄рнэ хо̄тпаг. Надежда Васильевна «доктор исторических наук» яныг нам о̄ньщи, тав ань Санкт-Петербург ӯст о̄лы. Татьяна Александровна ос «исторический наукат кандидат» нам о̄ньщи. 1079 2014.07.11. Валентина УЗЕЛЬ Юван о̄йка памятникыл ва̄рвес. Юван Николаевич Шесталов о̄лме̄т сака намыӈсуиӈ хо̄тпаг о̄лыс. Тав потыртаӈкв о̄вылтахты те, таве хӯнтлаӈкв сака пӯмыщ о̄лыс. Ма̄ньщи мирув, ща̄нь ла̄тӈув ос ма̄н пе̄с ва̄рмалянув урыл акваг потыртас. Потранэ щирыл мо̄т мирыт, рущ ма̄хум то̄ва ла̄тӈаныл пуссын ма̄ньщи ла̄тӈыл тэ̄лмыт. Ань Юван Николаевич та̄л, со̄ль, ма̄ньщи мирув урыл воссыг нэ̄мхотьют тох потыртаӈкв ат паты. Та ювле хультум э̄тпост тав 77 та̄лэ то̄влынӯв. Ос ты кастыл ляпа рӯтанэ, юрт ма̄хманэ тав ма̄гсылэ а̄хвтасныл яныг памятник ва̄рмыт. «То̄рум ма̄» музейт тав намхо̄талэ порат са̄в мир акванатхатыглас. О̄влэ̄т кӯщаиг о̄лнэ ма̄хум потыртасыт. Округ губернатор ва̄ӈын хум Геннадий Бухтин ла̄выс, Юван Шесталов ма̄ньщи мирув урыл ма̄ янытыл потыртаме ма̄гсыл ань ма̄н ты хосыт ты ва̄ве̄в. Тав юипа̄лэ̄т са̄в мо̄т ма̄хум о̄с потыртасыт – Т. С. Гоголева, А. С. Тарханов, М. К. Волдина. Ка̄сыӈ хо̄тпа тав уре̄тыл са̄в ёмас ла̄тыӈ ла̄выс. Владимир пыге э̄кватэ ёт э̄ргысы̄г, хуньт а̄тятэ хансум стихотворениятэ Владимир э̄ргыг ва̄рыстэ. Ань акваг та э̄ргитэ. Аквъёт рӯпитам ма̄хманэ Юван о̄йка о̄с ка̄стысаныл, ЮГУт рӯпитан ма̄хум о̄с э̄ргысыт. Ты ма̄н ма̄ньщи поэтув ща̄нь ла̄тӈув сака янытластэ. О̄выл потранэ, стиханэ пуссын нё̄тнэ ма̄ньщи ла̄тӈыл хансым о̄лэ̄гыт. Тав ма̄тэ улылан, хо̄тпа улылан са̄в потыр хансыглас. Ос пе̄с порат та̄ратым нэ̄пакыт ань нэ̄мхо̄т хо̄нтуӈкв ат ро̄ви, туп ловиньтан колнакытт о̄лэ̄гыт. Та̄н ань йильпииг те та̄ратанувет, ма̄к ёмас ва̄рмаль о̄лнув. Тамле нё̄тнэ, ма̄к ма̄ньщи ла̄тӈыл хансым нэ̄пак сака мощща. Мир потыртаманыл юипа̄лт памятник нумыл пантым то̄ре хотхасумтавес. Ма̄хманув ка̄саласыт, ма̄ньщи о̄йкав татем ёмас памятникыл та ва̄рима. Тав э̄ще Альбина Николаевна Мехнина ла̄выс, ты памятник ва̄рнэ ма̄гыс ма̄во̄й но̄хвинэ ма̄хум са̄т миллион солко̄ви маймыт. Хуритэ а̄хвтасныл Володя Саргсян, архитекторо̄йка, тав ва̄рыстэ. Музей юипа̄лт то̄ва ма̄ньщи ма̄хманув тав ёлщё̄питам ма̄тэ нупыл ялсыт. Юван о̄йка о̄лме̄т ла̄выглас, тав ӯс савынканын ёл ул вос щё̄питаве, такви я̄нас ма̄ хо̄нтыс. Тув та тотвес. Ань тот кӯщаит «городищаг» ла̄внэ ма̄ ва̄руӈкв таӈхе̄гыт. Ма̄ньщи мир пе̄с колыт, ма̄колыт пуссын тот ӯнттавет. 1079 2014.07.11. Николай МЕРОВ Во̄раян хум э̄ква кинсы. Мо̄лал Ха̄льӯс район Тӯрва̄т па̄вылн рӯпата щирыл ялнэ̄м порат акв ма̄ньщи о̄йка ёт хо̄нтхатыгласум. Ты хум наме Василий Владимирович Тасманов, тав рӯтанэ уральтаӈкве тув ёхталас. Ам таве о̄лупсатэ урыл китыгласлум. На̄н тав потре э̄лаль ловиньтэлы̄н. «Ам 1964 та̄лт Свердловский область Ивдельский район Полумъя па̄вылт самын патсум. Та па̄выл ань а̄тим. Яныгпа̄ла хо̄тпат пуссын холасыт. Ма̄хум ӯсытн манос па̄влытн ла̄кквамингаласыт. Акв хум туп хультыс, ань тот о̄лы. Ам тот ты яныгмасум. Са̄ртын тот Самбиндаловыт ще̄мья о̄лыс. Та̄н о̄с пуссын а̄тимыт. Ма̄н тот хоса ат о̄лсӯв. 1970 та̄лытт Советский район Лэ̄пла па̄вылн ва̄нтлысӯв. Лэ̄плат ань туп кит кол ӯнлы. Тот ме̄н Коляме̄нтыл ос акв хум во̄рае̄в. Хумыт коныпал тот кит нэ̄, акв ма̄нь пыгрищ о̄лы, воссыг нэ̄мхотьют а̄тим. Ам о̄лнэ со̄самум тот та, тыг нас ёхталэ̄гум. Лэ̄пла па̄вылныл Тӯрва̄т па̄выл мус налыман нупыл атахкем ве̄рыста ла̄глыл ё̄ме̄в. Сака хоса а̄ти, ва̄тихал мӯйлуӈкве ёхтыгпа̄лэ̄в. Ма̄шинал яласан тэ̄лы лё̄ӈх о̄лы, тувыл ё̄ме̄в. Во̄р па̄влумт ка̄сыӈ та̄л во̄рае̄гум. Нёхыс манос со̄руп ка̄тынпаттыглэ̄гум. Таил ты о̄лэ̄гум. Ань воссыг торыӈ ӯй а̄тим. Алыщлам утанум хоталь вивет, тув тыналыянум. То̄ванакт хотты ямсыкт ёхтэ̄гыт, то̄ва порат ос амки па̄вылн ва̄гылсэ̄гум. Нёхыс ёвтнэ хо̄тпат та̄нки а̄нум хо̄нтыяныл. Хащта̄л хо̄тпат тыт ва̄тихал матыр кинсым яласэ̄гыт. То̄ва хо̄тпат ёт потыртахтэ̄гум, таквсы сыс алыщлэ̄гум ос та̄нанылн та тыналэ̄гум. Туи порат, хунь витэ яныг, мотор ха̄пыл яласэ̄гум. «Буран» пе̄сыг е̄мтыс, хотсаквалас, щаӈкв тав ма̄гсылэ хо̄нтуӈкве ат ве̄рме̄гум, тох та лю̄ли. Са̄ртын «Тула» нампа мотоциклыт о̄лсыт. Та ут хотло̄сталаслум, мощ мо̄т щирыл атыслум. Туп мотор щаӈкве ос раматэ вислум, хӯрум яныг колёса тув натапасанум. Ань лё̄хта̄л ма̄т пилта̄л яласэ̄гум. Витыӈ ос я̄ӈкылмаӈ ма̄т ёл ат ра̄гпи, хоталь ат ве̄рме̄гум, тув та ёхтэ̄гум. Пе̄с порат ща̄нягума̄щагум са̄в са̄лы о̄щсы̄г. Са̄ртын ма̄хум пуссын са̄лы янмалтасыт, таил ты о̄лсӯв. Ётыл, перестройка е̄мтум порат, са̄лыт пуссын хотталь тотве̄сыт. То̄ва ма̄хум вертолётыл тыламлым са̄лыт па̄тлуптэ̄гыт. Нумыл сунсэ̄гыт, атахкемхо̄тахкем ве̄рыстат са̄лыт ка̄салэ̄гыт, тув вертолётыл ёхтыгпе̄гыт, манах э̄ри, па̄тлуптэ̄гыт, та̄лттапияныл, та тахе̄гыт. Наӈ хунь тув мус ёхтуӈкве а̄лыме̄гын, тыщир та холасыт». Лэ̄пла па̄вылт пе̄с порат ма̄хум Ӯй акваг йӣквыгласыт. Са̄всыр па̄влытныл мир тув мӯйлуӈкве ёхталасыт. Яныгпа̄ла хо̄тпат ма̄нь ня̄врамыт аквтем тӯлыглахтасыт, сака пӯмащ о̄лыс. Ань ты ва̄рмаль ос э̄лаль тотуӈкве о̄вылтавес. Мощ мо̄лал Лэ̄плат о̄с Ӯй йӣквыгла̄лвес. То̄нт Ханты-Мансийск ӯсныл, Ха̄льӯс районныл са̄в мир мӯйлуӈкве ёхталасыт. Василий Владимирович ты та̄л матыр ка̄тынпатты ке, о̄с тах мӯй ма̄хум йӣквуӈкве во̄виянэ. Ос акв ва̄рмаль урыл потыртас. Тав ань э̄ква та̄л о̄лы. Хотты нэ̄ ты нё̄тнэ ос ка̄ркам ма̄ньщи хум ёт во̄рт о̄луӈкве ка̄сащи те, ма̄н редакциявн хансэ̄н, ха̄йтталаӈкве нё̄тылӯв. 1079 2014.07.11. Валентина УЗЕЛЬ Дунаев колта̄гыл ня̄врамыт. Хурит Дунаев Унтя Галина ос Дарья э̄щаге ёт по̄слым о̄лэ̄гыт. Та̄н Са̄пса е̄рт Висумтыт па̄вылт о̄лэ̄гыт. Унтя 12 та̄лэ то̄влыс, сака сэ̄ръёр, роткам пыгрищ, хӯл пувуӈкв сака ка̄сащи. Туи юн о̄лнэ̄тэ сыс акваг я̄ ля̄льт каскан па̄хтым лю̄лянты. Рӯтанэ палт Лэ̄пла па̄вылн а̄лнхул, о̄щщахӯл пувуӈкв ла̄глыл яланты. Анна Анямова ва̄рум хури. 1079 2014.07.11. Анна АЛГАДЬЕВА Ма̄ньлат хо̄тпаг потре̄н. Та̄л палытыл са̄всыр янытлан, мощнув янытлан ос нас хо̄талыт о̄лэ̄гыт. Ка̄сыӈ ялпыӈ ма̄н ялпыӈ та̄л хо̄тал мӯйлуӈкв ва̄г ат ёхты. Са̄р э̄тпос колта̄гыл ма̄хум янытлым хо̄тал порат, газетат, о̄выл ло̄псыт Петровыт колта̄гыл по̄слым о̄лсыт. Ам ты ма̄ньлат хо̄тпаг ёт хо̄нтхатыгламум порат, потрув ёлхансыслум: – Оля, наӈки урынтыл мощ потыртэн. Омагна̄тягн хотьютыг? Маныр наманэ̄н? – Омам наме Татьяна Селивёрстовна Номина. А̄тям Иван Тихонович Номин о̄лыс, а̄тимыг е̄мтме 21 та̄лыг е̄мтыс. Ма̄н иӈ ма̄нит о̄лсӯв, омав мо̄т хум ва̄рыс. Яглаӈум наме Анатолий Никитович Адин. Ня̄врам э̄рупты, акваг нё̄ты, ня̄нькалахты. – Манах ягпыг, а̄пщи, яга̄ги о̄ньще̄гын? – Ма̄н кит а̄ги, кит пыг, пуссын Хулюмсунт па̄вылт о̄лэ̄в. Тыт яныгмасӯв, школан тыт ялантасӯв. Яныг ягпыгум наме Никита, ЛПУ организацият плотникыг рӯпиты. Ваня а̄пщим ла̄пкат грузчикыг о̄лы. Наташа э̄щум заправкат рӯпиты. – Наӈки манах ня̄врам о̄ньще̄гын? – Нила ня̄врам: хӯрум пыг, акв а̄ги, а̄гим щар ма̄нь. Яныг пыгум ты та̄л о̄выл класс а̄стлыс. Акв пыгум садикн яланты, туп ма̄нь пыгум ос а̄гирищум юн о̄лэ̄г. – О̄йкан маныр наме? Хо̄т акванхо̄нтхатсы̄н? – Ойкам рущ хум, наме Евгений Александрович Петров. Ханты-Мансийск ӯст акванхо̄нтхатсуме̄н. Ам тот тэ̄нут ва̄руӈкв ханищтахтын ма̄т ханищтахтасум. Тав ос официантыг тот рӯпитас. Тот акванрӯмалахтасме̄н. Такви уре̄тыл вос такви потырты. – Евгений, наӈ хотыл о̄лэ̄гын? – Ам 1997 та̄л порат Кыргызстаныл ты ма̄н ёхтысум. Октябрьский район Сергино па̄вылт ане̄квам ёт о̄лсум. Ханты-Мансийск ӯст официантбарменыг ханищтахтасум, тувыл акв тот рӯпитасум. – Тыт хо̄т рӯпитэ̄гын? –Ла̄пкат грузчикыг рӯпитэ̄гум. – Тыт о̄луӈкв марщум а̄ти? – А̄ти, ханьщувласум. Ам тыт э̄квам ягпыгыга̄пщииг ёт хӯл алыщлым яласэ̄гум, во̄рае̄гум. Шар о̄выл ка̄тынпаттум уюм – ва̄с. Тыт маныр ат о̄луӈкв! Тыт сытам, ёмас, ма̄шина мощща. Яныг ӯсыӈ ма̄т пуссын хотталь ха̄йтэ̄гыт, молямлэ̄гыт, таса̄вит са̄всыр ма̄шина, потыльм, нас ва̄гта̄л патэ̄гын. А̄нумн ёмас тыт о̄луӈкв. Ты ма̄ньлат китыг то̄ва ма̄хмыт хольтыл, тэ̄нки о̄лнэ кол ат о̄ньще̄г, мо̄т хо̄тпа колт о̄лэ̄г, о̄лнэтэ̄н ма̄гыс ме̄т ойтэ̄г. Хунь тэ̄нки о̄лнэ колыӈыг е̄мтэ̄г, ат ва̄йхаты. Юио̄выл хӯрум та̄л сыс Хулюмсунт па̄вылт кит яныг о̄лнэ колыг на̄йн хотё̄свесы̄г, таса̄вит ма̄хум кол та̄л хультсыт. Хотьют рӯт о̄ньщи, рӯтаныл палт о̄лэ̄гыт. Хо̄ӈха ёмас рӯма о̄ньщи, руманылн во̄вве̄сыт, ювта̄ртве̄сыт. То̄ва ма̄хум ня̄врамыӈ та̄гыл иӈ пӯльницат о̄лэ̄гыт. Мирколт ла̄ве̄гыт, о̄лнэ колыт ӯнттуӈкв ат патавет. Ос йильпи ма̄ньлат ще̄мьят аман хо̄т о̄луӈкв патэ̄гыт? Кӯщаит аман маныр ва̄ре̄гыт? Ма̄хум о̄лэ̄гыт, йильпи ще̄мьят е̄мтэ̄гыт. Та̄нанылн хо̄тт о̄луӈкв э̄ри. 1079 2014.07.11. Николай МЕРОВ Соссаӈ ма̄хманув ма̄щтырлаӈкве ёхталасыт. Лӯпта э̄тпос 16-19 хо̄талытт Ханты-Мансийск ӯст ма̄щтыр хо̄тпат акванатхатыгласыт. Ты семинар «Внутреннее убранство обских угров: музееведческие и технологические аспекты» тох намаим о̄лыс. Ты ва̄рмаль «То̄рум маа» музейт рӯпитан хо̄тпат та̄н щё̄пита̄лсыт. Хотьютыт тыг ёхталасыт ос манырсыр рӯпата та̄н ва̄рсыт, на̄н ты урыл э̄лаль ловиньтэ̄н. Ты семинар пуснэ хо̄талт учёный хо̄тпанув о̄влэ̄т докладнэ̄пакыт ловиньтасыт. Мӯй хо̄тпатн та̄наныл хӯнтлуӈкве сака пӯмащ о̄лыс. Ма̄хум пе̄с о̄лум ва̄рмалит номылматыгла̄лсаныл. Ма̄к ма̄щтыр хо̄тпат ты потрыт хӯнтлысыт, та̄нанылн сака мӯстыс. Округ янытыл ты ма̄щтыр хо̄тпат о̄лсыт. Ха̄льӯс район Хо̄рыӈпа̄вылныл Рудольф Васильевич Меров ёхталас. Тав пе̄с щирыл ва̄рыглам пасаныт, уласыт ос мо̄т са̄всыр утыт ва̄рыс. Тав такви ва̄рум рӯпатанэ урыл мощ потыртас: «Пе̄с порат ма̄хум пасаныт ос уласыт тарыг йӣвыл ке̄рсоль та̄л ва̄рыгласыт. Тарыг йӣв ка̄миньта, па̄лыг ат по̄клы. О̄влэ̄т партыт та̄ставет, састумыг ёргавет. Тувыл та̄наныл акваннатапан ма̄гыс ӯсхулныл ханлын ут ва̄раве. Ӯсхул саханэ̄т хӯрыгсов о̄лы, тав ёмщакв хоттославе, тувыл витыт тытылтаве, э̄люм та е̄мты». Рудольф Васильевич ань пенсият о̄лы. Па̄влэ̄т хӯл алыщлы ос во̄раи. Пе̄с йис о̄лум ва̄рмалит ёмщакве̄г ва̄ганэ. Тав ва̄тихал «То̄рум маа» музейн матыр пормасыт ва̄руӈкве во̄виньта̄лаве. Ань ты накт мощща яныгпа̄ла хо̄тпа хультыс, хотьют пе̄с йис пормасыт ва̄руӈкве ха̄сы. Матъёмас ань тамле семинарыт ва̄рыглаӈкве патве̄сыт. Ма̄ньлат ма̄хманув ты ва̄рмалил пӯмщалахтэ̄гыт, ты тэ̄ла сакати э̄лаль тотылӯв. Яков Тарлин Белоярский район Касум па̄вылныл ёхталас. Ты ханты хум тумраныт, ко̄йпыт ма̄щтырыг ва̄ри, тынщаӈыт саги, матыра̄ти пуссын ва̄руӈкве ха̄сы. Ты коныпал тав школат ханищтахтын ня̄врамыт соссаӈ ма̄хум каснэ ва̄рмальн ханищтыянэ. Та̄наныл округ янытыл касылн акваг тотыглыянэ. Ня̄врамыт са̄лы сун ӯлтта порге̄гыт, тынщаӈ па̄хвтэ̄гыт, пе̄рще̄гыт ос са̄грап э̄л вущкасэ̄гыт. Ань о̄лум семинарт тав хӯнах ос а̄нысан ва̄рыс. Тав ма̄ньта̄гыл са̄гырхатуӈкве ос ёрыгхатуӈкве а̄ще̄н ханищтавес. Тувыл Анатолий Вадичупов, Ханты-Мансийск ӯст о̄лнэ хум, тув о̄с во̄виньта̄лвес. Ты ма̄ньщи хум Кимкъясуй па̄вылныл о̄лы. Хосат та̄гыл ӯсн ва̄нтлыс. Тав пӯт хӯнах ва̄рыс ос ма̄ньлат хо̄тпатн ёрыгхатуӈкве нё̄тыс, та̄наныл ханищтасанэ. Анатолий Васильевич са̄ӈквылтапыт ма̄щтырыг ва̄руӈкве ха̄сы. Тав ва̄рум са̄ӈквылтапанэ ёнгын порат сака нё̄тнэ суил суйтэ̄гыт. Матыр ёргын манос са̄грын порат, тав акваг тув во̄виньта̄лаве. Тав ла̄выс: «Ма̄щтырлаӈкве амки ханищтахтасум. Па̄вылт яныгпа̄ла хо̄тпат матыр ва̄рнэ̄ныл порат ам акваг суссум. Тувыл ань ты накт нэ̄пакт пе̄с пормасыт урыл са̄в потыр хансым о̄лы. Са̄выӈпа̄лэ нэ̄пакыт хосыт ма̄щтырлэ̄гум. Мо̄лты порат са̄ӈквылтапыт ос мо̄т са̄всыр пормасыт ва̄тихал ва̄рыгласум. Ань ты накт мо̄рсыӈ порат ма̄щтырлэ̄гум. Юн са̄в рӯпата о̄лы». Ты ва̄рмальн нэ̄ хо̄тпат о̄с ёхталасыт. Надежда Васильевна Лукина ла̄выс: «Ам тамле семинарн о̄выл щёс ёхтысум. Ты пормасыт са̄ртын нас музейт ва̄санум, а̄мки нэ̄мхуньт ат ва̄рыгласум. Ань ты порат атхуйпловит семинар минас. Ам сусте̄мт, ка̄сыӈ та̄лныл са̄внув ма̄ньлат хо̄тпат тамле ва̄рмальн ханищтахтуӈкве ка̄саще̄гыт. Соссаӈ ма̄хманув о̄лупса акваг э̄лаль тотаве. Матъёмас ты музей нё̄тнэ, во̄рыӈ ма̄т ӯнттувес. Ка̄сыӈ хо̄тпа яныг ща̄гтыл тыт ма̄щтырлас». Тувыл ос Ханты-Мансийск ӯсныл ханты э̄ква Людмила Калистратовна Зубакина ёхталас. Тав са̄ртын «Ханты ясаӈ» газетат рӯпитас. Ань пенсият о̄лы. Тэ̄н кит хо̄тпаг татем нё̄тнэ хасап ю̄нтсы̄г. Ма̄хум маттем та пӯмщалахтасыт. Людмила Калистратовна ханты супыт ос мо̄т са̄всыр пормасыт такви ю̄нты. Ю̄нсхатнэ ва̄рмальн ма̄ньта̄гыл ханищтахтас. Соссаӈ ма̄хманувн тав ёмщакв ва̄ве. Альбина Лазаревна Ярсомова лӯи ханты хо̄тпа, Сургутский район Угут па̄вылныл ёхталас. Ты нэ̄ ня̄врамыт ёт рӯпиты. Тав палтэ ат ханты ня̄врам яланты. Та̄н са̄кныл хорамыт хартэ̄гыт, са̄сныл са̄всыр пормасыт ю̄нтэ̄гыт ос мо̄т рӯпата ва̄ре̄гыт. Тав ос ты урыл ла̄выс: «Ма̄н ню̄лы йӣв сулыл са̄всыр хусапыт ю̄нтэ̄в. Тыт о̄лнэ̄в сыс ню̄лы сулыт ос ля̄мйӣв ма̄гыс во̄рн ялсӯв. Сулыт мощ то̄слыянӯв, ущта хусапы̄г ва̄риянӯв. Хусап ля̄мйӣв ла̄квыл аквано̄лтылӯв. Тивре са̄сныл ю̄нтылӯв. Тыщир ва̄рим хусапытсака нё̄тнэ̄т ос та̄кыт, мори ат саквалэ̄гыт. Ню̄лы сулыл ма̄хум хосат та̄гыл хусапыт ат ва̄ре̄гыт. Ма̄н о̄вылтахтасӯв, ань ты ва̄рмаль э̄лаль тотуӈкве патвес. Ма̄ниг о̄лмум порат суссум, хумус щаще̄квам тамле хусапыт ва̄рыс. Ётылнув ос омам ва̄рыс, ла̄щалла̄щал ханищтахтасум. Пе̄с порат ты хусапыт хум хо̄тпат о̄щсыт. Тув патроныт, сэ̄лят ос сакнёлыт пинтла̄лсыт. Хусап паттатэ ос алатэ ха̄ль са̄сныл ва̄раве, хот ат ёсаве». Тамле ты пӯмащ потрыт ма̄хум потыртасыт. Юио̄выл хо̄талт ма̄щтыр хо̄тпат та̄нки рӯпатаныл пуссын янытэ̄т а̄стласаныл. Тувыл музей кӯщай нэ̄ Валентина Николаевна Кочетыгова мӯй ма̄хум пуссын янытласанэ. Та̄н нупыланыл са̄в сымыӈ ла̄тыӈ ла̄выс ос янытлан нэ̄пакыл мисанэ. Ань соссаӈ ма̄хманув хуньт о̄с акванатхатыглахтуӈкве потыртахтасыт. 1079 2014.07.11. Александр ВЬЮТКИН Хо̄н ма̄ныл ёхталам тит а̄гииг. Лӯпта э̄тпост хусыт хо̄талэ̄т Венгрия хо̄н ма̄ныл тит пӯмащ ма̄ньлат а̄гииг ёхталасы̄г, тэ̄н наманэ̄н Нори ос Юдит Ковач. Халэ̄нт увщииг о̄лэ̄г. Тыг ёхталан щирыл та̄н хӯрум хо̄тпа о̄лсыт. Тэ̄н ётэ̄н Москва ӯст Венгрия Посольство колт советникыг рӯпитан хум Андраш Барани о̄лыс. Тав тэ̄н потранэ̄н рущ ла̄тӈын толмащлан хо̄тпаг о̄лыс. Андраш Россият о̄лнэ̄тэ титхойполов та̄лыг ты то̄влыс. Тав ла̄выс: «Моще̄ртын ам амтина̄нум россияниныг ловиньтаӈкв патылум. Манаре лю̄ль, тит ма̄ халт тох о̄луӈкв о̄с ёмас». Андраш тыг тотыглам а̄гияге Мадьяр ма̄ янытыл ёмщакве̄г ва̄ве̄г. Тэ̄н э̄ргын э̄ргананэ̄н пе̄с йис та̄гыл о̄лнэ э̄ргыт. Юдит «Цитере» нампа утыл са̄ӈквылты, Нори увщитэ ос э̄рги. Тэ̄н суссылтапанэ̄н тох ты минэ̄гыт, Юдит са̄ӈквылтан ут коныпал иӈ «Барача» нампа тискын утыл ёнги. «Цитере» утаныл пе̄с потрыт щирыл ӯйхул тыттын а̄ныл о̄лыс. Тэ̄н суссылтапанэ̄н такталаӈкв о̄вылтахтаме̄н па̄сныл, ты та̄л лов та̄лыг ты е̄мтыс. Ты сыс хус са̄всыр э̄ргыт э̄ргын альбом мирн хӯнтлын ма̄гсыл та̄ратасы̄г. Ань ос ты пӯмщаныл йис пораныл рӯтыӈыщ о̄лнэ ма̄хманылн суссылтан ма̄гсыл тыг ёхталасыт. Венгрия ма̄хум ма̄н ма̄гсылув щар ляпа рӯт ма̄хмыг ловиньтахтэ̄гыт. Ханты-Мансийск ӯст та̄н хӯрум хотал о̄лсыт. Тыт о̄лнэ̄ныл сыс та̄н ма̄н ӯсувт са̄всыр пӯмащ о̄щнэ ма̄н тотыглаве̄сыт. «Лылыӈ со̄юм» ня̄врамыт ханищтахтын колт ня̄врамыт ёт хо̄нтхатыгласыт. Та̄н тув ёхтуманылт ня̄врамыт пуссын юв та̄ртве̄сыт, нэ̄мхотьютаныл тот а̄тим о̄лыс. То̄нт та̄н «Э̄ргыт, йӣквыт пувлын ма̄хум» ма̄н коллективув урыл мощ пӯмщалахтасыт. О̄влэ̄т а̄гииг са̄ӈквылтан утыт урыл титыглахтасы̄г. Хоты са̄ӈквылтан утыл, хоты порат ос хоты ма̄т са̄ӈквылтаӈкв ро̄ви. Тувыл хунь ос манырсыр йӣвныл та̄н ёргавет. Ма̄н Владимир Меров ос Елена Фризоргер ёт та̄нанылн ты урыл пуссын потыртасӯв ос са̄ӈквылтан та̄нанув суссылтасанӯв. Та юипа̄лт тэ̄н о̄йкат ос э̄кват ма̄ньщи йӣквыт урыл мощ пӯмщалахтасыт. Хоты ма̄ныл, манырсыр йӣкв, та урыл пуссын тэ̄натэ̄н пӯмащ о̄лыс. Ма̄н та̄нанув ос мо̄т пӯмщанув суссылтамув юипа̄лт тэ̄н ос ма̄н ма̄гсылув ма̄нь суссылтап суссылтасы̄г. О̄влэ̄т та̄нти са̄ӈквылтан утаныл урыл мощ потыртасы̄г. Потраныл хащматаныл юипа̄лт са̄ӈквылтасы̄г, йӣквсы̄г ос э̄ргысы̄г. Та̄н э̄рыгсов та̄наныл, э̄рганыл ос йӣкваныл а̄ти ма̄н утанув хурипат. Э̄рганув, йӣкванув холыгпан юипа̄лт акв ля̄льт иӈ хоса потыртым ӯнлантасӯв. Тэ̄натэ̄н ма̄н о̄лупсав урыл пуссын пӯмащ хӯнтлуӈкв о̄лыс. Мо̄т щёс хуньт ёхталэ̄гыт те, ма̄нь па̄влыӈ ма̄н ялнэ номт о̄ньще̄г. 1079 2014.07.11. Людмила ТЕТКИНА Ля̄ххал хаснэ хо̄тпат акванатхатыгласыт. Лӯпта э̄тпос 19-21 хо̄талытт Марий Эл республика Йошкар-Ола ӯст ля̄ххал тотнэ хо̄тпат хо̄тыт Форуманыл рӯпитас. Тамле ва̄рмаль ты республика культура Министерстваныл ос финноугорский журналистыт Ассоциация аквъёт ва̄рыгласы̄г. Са̄всыр ма̄ныл тув 60 арыгкем хо̄тпат ёхталасыт. Тот «Финноугорские СМИ Российской Федерации в условиях развития новых информационных технологий. Опыт, проблемы, решения» нампа конференция рӯпитас. О̄влэ̄т тув ёхтум ма̄хум суссылтап сунсуӈкве во̄вве̄сыт. Александр Саликович Абдулов, РАФУЖ ос «Марий Эл» нампа газетат кӯщаиг о̄лнэ хум, ла̄выс: «Ма̄н хурит по̄слан хотпат ма̄гсыл ханищтапыт ва̄рыгласӯв. Акв ханищтап Коми республикат Ижма па̄вылт о̄лыс. Мо̄т щёс ма̄хманув Мордовия Саранск ӯст акванатхатыгласыт. Акв тамле ханищтап Ханты-Мансийск ӯст рӯпитас. Тот по̄слым ёмас хурит суссылтапн щё̄питаве̄сыт ос Россия янытыл са̄всыр ӯсыт суссылтым тотыглаве̄сыт. Тамле выставка сунсыглым мо̄т мирыт ва̄гыт, хумус ань финноугрыт о̄лэ̄гыт. Тыхо̄тал ма̄н о̄с акв тамле суссылтап ва̄рыслӯв ос «Финноугорский мир сегодня» намаяслӯв». Ма̄н, редакциявт рӯпитан ма̄хум, тув ма̄ньщит, хантыт по̄слым хӯрияныл о̄с ке̄тыгласанӯв. Форум рӯпитаӈкве хунь о̄вылтахтас, ма̄хум нупыл Михаил Васютин, Марий Эл республикат культура министрыг рӯпитан хум, потыртас. Тав ла̄выс, ля̄ххал тотнэ финноугор хо̄тпат Ассоциацияныл ань Россия янытыл ва̄ве. Та̄н пуссын аквъёт яныг ос э̄рнэ рӯпата ва̄ре̄гыт. Ля̄ххалыт, потрыт ща̄нь ла̄тӈыл хансым, та̄н пе̄с йис ва̄рмаляныл э̄лаль тотыяныл. Матъёмас, та̄н халанылт тох ва̄йхатэ̄гыт ос юртыӈыщ о̄лэ̄гыт. Конференцият ма̄хум та̄нки рӯпатаныл урыл потыртасыт. Ань финноугрыт ща̄нь ла̄тӈыл ля̄ххал хансым пуссын аквхурип та̄рвитыӈ ва̄рмалит о̄ньще̄гыт. Та̄н хансум ля̄хханыл, потраныл интернетыт ань о̄с ловиньтаӈкве ро̄ви. Тувыл ка̄сыӈ мир такви букват о̄ньщи, то̄ва порат интернет ты ут ат ханьщи, ты ма̄гсыл то̄ва ла̄тӈыт ма̄хум ловиньтаӈкве ат ве̄рме̄гыт. Ты потрыт интернетыт мӯсхалыг вос тэ̄лсыт, ты ищхӣпыӈ ут ма̄гсыл э̄рнэ программа ва̄руӈкве э̄ри. Мо̄т та̄рвит газетат, журналыт юв тотнэ ма̄гсыл ка̄сыӈ та̄лныл «Почта Россия» са̄внув олн выг. Тувыл газетат, журналыт яныг каталогнэ̄пакн хаснэ ма̄гсыл о̄с са̄в олн э̄ри. Александр Абдулов, «Марий Эл» нампа газетат кӯщай ла̄выс, ань та̄н газетаныл хасылтан ма̄гсыл 900 арыгкем солко̄ви ойтуӈкве э̄ри. Ма̄хум таса̄вит олн ойтуӈкве ат ка̄саще̄гыт, тыи ма̄гсыл ка̄сыӈ та̄лныл мощщанув э̄лумхо̄лас та̄н газетаныл хасылты. Ос таи лю̄ль, ка̄сыӈ та̄лныл мощщанув ща̄нь ла̄тыӈ ва̄нэ хо̄тпа хульты. Ма̄ньлат хо̄тпат та̄нки ла̄тӈыл потыртаӈкве сака ат ка̄саще̄гыт. Резолюциянэ̄пакн ма̄хум таи хассыт, ань Россият ща̄нь ла̄тӈыл газетат, журналыт та̄ратан ма̄гсыл яныг программа вос пирмайтаве. Туп то̄нт финноугорский ла̄тӈыл хансым нэ̄пакыт э̄лаль мӯсхалыг та̄ратаӈкве патавет. Ты ла̄тыӈ та̄н Россия Правительстван тах ке̄тыяныл. Ты юипа̄лт ма̄хум Ассоциациян йильпи кӯщай пе̄риясыт. 11 та̄л Александр Саликович Абдулов ты рӯпата ва̄рыстэ. Ань йильпи кӯщаиг Николай Иванович Ишуткин пе̄риявес. Ты хум Мордовия ма̄т о̄лы, «Чилисема» нампа ня̄врамыт ма̄гсыл та̄ратан журналт кӯщаиг рӯпиты. Николай Иванович ла̄выс, тав Ассоциация рӯпататэ о̄с ка̄ркамыг ва̄руӈкв патытэ. Ля̄ххал тотнэ хо̄тпат халанылт вос ва̄йхатэ̄гыт, ханищтахтэ̄гыт ос акваннё̄тхатым э̄лаль вос рӯпитэ̄гыт, ва̄тихал акванатыглаӈкве патыянэ. Ос та юипалт ля̄ххал хаснэ мир халт ва̄рыглым касылт но̄хпатум хо̄тпат янытлаве̄сыт. Ма̄н редакцияв «Региональное издание» нампа номинацият янытлавес. «Ханты ясаӈ» нампа газета китыт местал майвес. Та̄н по̄слум хурияныл ма̄гсыл тот янытлаве̄сыт. Ма̄ньщи газета ос хӯрмит местал майвес, мирн ва̄нэ финноугрыт урыл хансум потранув ма̄н тув ке̄тыгласанӯв. Ты касылт Россия янытыл 40 арыгкем э̄лумхо̄лас та̄нки халанылт кассыт. 1079 2014.07.11. Людмила ТЕТКИНА Ты хо̄тал та̄н пе̄с та̄гыл янытлыяныл. Ка̄сыӈ та̄л лӯпта э̄тпост мариец ма̄хум акванатхатыгла̄лэ̄гыт. Та̄н «Пеледыш пайрем» (Праздник цветов) та̄нки ялпыӈ хо̄таланыл тот янытлэ̄гыт. Ма̄хум тэ̄пкант картопка ос мо̄т тэ̄нут ӯнттуӈкве а̄стланэ̄ныл кастыл тамле яныг ялпыӈ хо̄тал ва̄рыглэ̄гыт. Марий Эл республика янытыл о̄лнэ ма̄хум пуссын тув мӯйлуӈкве ёхталэ̄гыт. Ты та̄л ялпыӈ хо̄тал лӯпта э̄тпос 21 хо̄талэ̄т о̄лыс. Ма̄хум лов щёс порат яныг ӯскант акванатхатуӈкве патсыт. Та̄н пуссын мариец мир маснутыл масхатым о̄лсыт. Са̄всыр районытт о̄лнэ марийцыт супаныл мощ мо̄т щирыл ю̄нтыяныл. Аквъёт та̄н пуссын такем нё̄тнэ̄г сусхатасыт. Ос тув атхатыглам ма̄хум та̄нки халанылт туп марийский ща̄нь ла̄тӈыл потыртасыт. Тувыл китхуйплов щёс порат та̄н ӯсхулы хосыт акв яныг колонна щирыл мо̄т ӯскан мус ё̄мсыт. Тув ёхтуманыл порат Марий Эл республика президент Леонид Игоревич Маркелов ма̄хум ялпыӈ хо̄талыл янытласанэ. Тав ла̄выс: «Тамле ялпыӈ хо̄тал ва̄рыглым, на̄н на̄нки пе̄с йис ва̄рмалянын э̄лаль тотыяны̄н. Ты ма̄т марийцыт, рущит, хатанит ос мо̄т мирыт о̄лэ̄гыт, ты ялпыӈ хо̄тал ма̄навн пуссын юртыӈыщ э̄лаль о̄луӈкве нё̄ты. Тыхо̄тал ка̄сыӈ колн са̄в со̄т ос щунь вос тоты». Ты юипа̄лт са̄в мо̄т кӯщаит ла̄тыӈ ла̄всыт ос акванатхатам мир ялпыӈ хо̄талыл янытласаныл. Таи ёмас, кӯщаит пуссын марийский ща̄нь ла̄тӈыл ёмащакв потыртэ̄гыт. Ты юипа̄лт ка̄ркамыг рӯпитан трактористыт, ма̄ сакватан хо̄тпат, мис по̄снэ нэ̄т ос мо̄т рӯпата ва̄рнэ ма̄хум са̄всыр янытлан нэ̄пакыл майве̄сыт ос янытлаве̄сыт. 16 районныл ёхталам ма̄хум пуссын та̄нки я̄нас па̄сан ва̄рыгласыт, са̄всыр тэ̄нут тув ӯнттыгласыт. Ка̄сыӈ хо̄тпа та̄н па̄санылт матыр тэ̄нут виӈкве ос тэ̄пъялаӈкве ве̄рмыс. Россия янытыл о̄лнэ марийцыт ты ялпыӈ хо̄талн тув о̄с ёхталэ̄гыт. Ты та̄л Башкирия, Татарстан, Свердловский областьт о̄лнэ марийцыт тув мӯйлуӈкве ялсыт. Та̄н о̄с пасан щё̄пита̄лыгласыт, концерт о̄лум порат о̄с э̄ргысыт, йӣквсыт. Йошкар-Ола ӯст о̄лнэ ма̄хум тамле хо̄талт мӯйлуӈкве о̄с сака ка̄саще̄гыт, тыи ма̄гсыл та̄н ще̄мьяӈ та̄гыл тув ёхталэ̄гыт. Ӣтипа̄лаг мӯйлын ма̄хум пуссын аквторыг йӣквсыт, йӣкваныл рущ ла̄тӈыл «марийская круговая» намаим о̄лы. Ты юипа̄лт ма̄ньлат а̄гитпыгыт ма̄гсыл этнодискотека о̄лыс. Тох марийцыт «Пеледыш пайрем» ялпыӈ хо̄талт мӯйлысыт. 1079 2014.07.11. Александр ВЬЮТКИН Соссаӈ мир ёт хо̄нтлам нак урыл суссылтап. Сургут ӯс янытлан хо̄талт «Пе̄с Сургут» нампа музей кант пе̄с порат о̄лыглам накыт урыл суссылтап ва̄рыглавес, рущ ла̄тӈыл та пӯмащ «Мангазейский ход» намтым о̄лыс. Та ва̄рмаль Сургут ӯс 420 та̄лэ то̄влын кастыл ва̄рыглавес. Хуньт хосат 1594 та̄лт ань Сургут ӯс ӯнлын ма̄ тармыл Бордек нампа ханты ка̄нащ кӯщайлахтас. Акв то̄нт ты Русь янытыл Федор Иванович, Иван Грозный пыге, хо̄ныг ӯнлыс. Тав ты А̄с я̄ хосыт ӯс ӯнттын ма̄ тиснэ ма̄гсыл казак ма̄хум те̄тсанэ. Тыг йигмыгтам казакыт халт воевода нампа кӯщаиг Иван Оньчкин паттым о̄лыс. Та пе̄с порат о̄лум накыт урыл ань ты ма̄нь суссылтап суссылтавес. Пӯмщаныл такталан ма̄хум та порат о̄ньщум маснутыл масхатым о̄лсыт. Тит телекал тотыглым яныг ня̄лыл па̄тлуптам писаляныл турсӯнтэ хосыт селятэ писальн пинаве. Та коныпал пе̄щ по̄хат ханнэ сыраит, сыспалъе̄рт о̄щнэ ва̄ти ё̄втыт ос хоса налпа са̄грапыт о̄щсыт. Та̄н нупыланыл сунсымав порат номтанувт аквтупмат, со̄ль, та поран ты е̄мтыгпасӯв. Суссылтапанылт аквпа̄л ма̄хманыл сома но̄хтӯщтым норыл ва̄рим пӯсас тапалъе̄рт лаппантхатасыт. Мо̄тананыл ос та̄н нупыланыл халанылт писалянылт толтылахтым ля̄льт лаквхатасыт. Тув нупыл суснэ ма̄хум писалит то̄лматын порат хотрохтуптахтым суссыт. Акв ля̄льт ляпан ёхтуманыл юипа̄лт сыраяныл ос ё̄втаныл ка̄тын висаныл. Акванха̄йтнэ ма̄т те̄рнлахтым ма̄хум пӯсас тӣврын та щалтсыт. Та̄н но̄х та патсыт. Та па̄сныл та ма̄ Сургут ӯсыг намтым ты о̄лы. Щар о̄влэ̄т 280 хо̄тпа тув о̄лмыгтас. Ань ты мус ма̄н округув янытыл тав щар яныг ос са̄в мирыӈ ӯсыг ловиньтахты. 1079 2014.07.11. Анна АЛГАДЬЕВА Йӣквта̄ныт ханищтан нэ̄. Са̄в та̄л Хулюмсунт па̄выл клуб колт йӣквуӈкв ханищтан нэ̄г Ася Анатольевна Горенятенко о̄лыс. Са̄в ня̄врам тав па̄лтылэ ялантас, та̄н са̄в яныг ӯсыӈ ма̄т йӣквим акваг яласасыт, но̄хпатум нэ̄пак ос мӯйлупса сэ̄лыгла̄лсыт. Мо̄лты тӯя нэ̄ рӯпитан та̄ланэ то̄влысыт, по̄хын минас. Таквсы мо̄т ма̄ньлат ханищтан нэ̄ рӯпитаӈкв ёхтыс. А̄тэ нэ̄, ущ ханищтахтам ма̄нь а̄ги Анна Витальевна Самохвалова. Такви Казахстаныл о̄лы. Ща̄нягеа̄щаге тот хультсы̄г. Пензинский училище а̄стламе юипа̄лт Челябинский академият культура ос искусства ханищтан ма̄т ханищтахтас. О̄лум ма̄тэ̄т манарыг ханищтахтас, та рӯпататэ щирыл ня̄врамыт ёт рӯпитас. Ты ма̄т о̄луӈкв ос тыт рӯпитаӈкв па̄влыӈ спорткомплекс па̄лыл во̄ввес, общежитиет та̄ра о̄лнэ колхусапыл майвес. Хумыс таве̄н тыт о̄лхаты, ты урыл ме̄н мощ потрамасме̄н, э̄лаль ловиньтэлы̄н: – Тыг ёхтумум ма̄гыс, щар номтум ат савалы. А̄нумн тыт ёмас, ня̄врамыт ёмасыт, па̄вылкве ёмас, сыстам. Ам амки о̄с ма̄нь па̄вылныл о̄лэ̄гум. – Са̄в ня̄врам наӈ палтылн яланты? – Ня̄врамыт йӣквуӈкв сака ка̄саще̄гыт, пуссын а̄гирищит нила группаг уртым о̄лэ̄гыт: яныгнув, котильарт, ма̄ньнув ос щар ма̄нит. Щар ма̄нь ханищтан ня̄враманум иӈ садикн ялантэ̄гыт. Ос акв нэ̄т группа о̄лы, тыг туп э̄кват рӯпата щё̄саныл юипа̄лт ёхталэ̄гыт. –Манхурип йӣквта̄ныт ханищтэгы̄н? –Са̄всыр йӣквта̄н ханищтэ̄в: пе̄с йӣквта̄ныт, ань йӣквнэ йильпи та̄ныт. Ханищтахтын та̄л оигпам ляпат щар ма̄нь а̄гирищит юио̄выл щёс йӣквуӈкв ялманыл порат ам о̄с сунсуӈкв ялсум. Хумыс та̄н тот ню̄нсала̄лавет, порыгтавет, суссум. Ты а̄гирищит ты ханищтахтам та̄л сыс нэ̄мхо̄т ат йӣквсыт, хумыс ос манкем ханьщувласыт, туп оманыла̄тяныл э̄лыпа̄лт та̄нкина̄наныл суссылтасыт. Та̄н иӈ ма̄нит. Ханищтан нэ̄ныл ла̄ви: «Ма̄н иӈ ма̄ньрищит о̄лсӯв, мощнув яныгме̄в, ма̄к намыӈсуиӈыг е̄мтэ̄в. » Тох ты со̄ль ва̄рмаль о̄лы. Тамле ка̄ркам, нёмса, ёмас ханищтан нэ̄ маныр пуссын а̄лыми. Ня̄враманэ̄н сака э̄руптаве, тав ла̄тӈе̄н хӯнтлэ̄гыт. Такви о̄с хо̄тпа нупыл ёмас нэ̄, ёмщакв рӯпиты. Э̄лаль о̄с аквтох ханищтан ня̄враманэ ёт юртыӈыщ вос о̄лэ̄гыт. Посыӈ номтыл, йильпи ё̄рыл таквсы э̄лаль вос рӯпитэ̄гыт. Майвес – мивес Намыӈсуиӈ са̄в мирн ва̄нэ Номтум ат савалы – а̄нумн тыт мусты. 1079 2014.07.11. Анна АЛГАДЬЕВА Ты хурит Алгадьева Диана по̄слым о̄лы. Ты хурит Алгадьева Диана по̄слым о̄лы. Тав садикн ялантаме па̄сыл А. А. Горенятенко палт йӣквуӈкв ялантас. Ёмщакв йӣквнэ̄тэ ма̄гыс йӣквнэ порат Ася Анатольевнан акваг э̄лт тӯщтувес. Ань э̄лаль А. В. Самохвалова палт яланты. Йӣквуӈкв ханищтан нэ̄тэ̄н э̄сгаве, матыр концерт порат акваг йӣкви. Диана сака ёмас а̄гирищкве, ёмщакв ханищтахты, таквсы 4 классыт ханищтахтуӈкв паты, йӣквнэ кружок коныпал э̄ргын ос ка̄тыл по̄слаӈкв ханищтахтын кружокн яланты. Ханищтан щё̄сэн юв ат хульты, хоталь таве̄н э̄ри, пуссын а̄лыми. 1079 2014.07.11. Валентина УЗЕЛЬ Ма̄таприщ урыл йильпи нэ̄пак. А̄с-угорский институтт рӯпитан хо̄тпат ня̄врамыт ма̄гыс йильпи нэ̄пак та̄ратасыт. Ты нэ̄пакмо̄йт щар ма̄нь ня̄врамыт ма̄гыс хансым о̄лы. «Таквина̄тэ э̄руптан ма̄таприщ» тох намаим о̄лы. Ханты-Мансийский банк ё̄рыл тав та̄ратавес. А̄с-угорский институт ма̄гыс ты банк, рущ ла̄тыӈ щирыл ке ла̄вуӈкв – «спонсорыг» о̄лыс. Ты нэ̄пак хӯрум ла̄тӈыл хансым о̄лы: ё̄рн ма̄хум ла̄тӈыл, рущ ла̄тӈыл ос английский ла̄тӈыл. Ма̄н нэ̄пакув ма̄нь ня̄врамыт ёт рӯпитан ма̄хумн ос ня̄врамыт ма̄гыс сака пӯмащ ос э̄рнэ нэ̄пак. Нэ̄пакув та̄ратан ма̄гыс та э̄тпост нёлоловхуйплов хо̄талэ̄т А̄с-угорский институтт рӯпитан хо̄тпат суссылтап ва̄рыгласыт. Та̄н ня̄врамыт ёт «Лылыӈ со̄юм» центрыт хо̄нтхатыгласыт. Нэ̄пак пӯмщалан ма̄гсыл са̄в э̄лмхо̄лас ёхталас. Та̄н халанылт Ханты-Мансийский банкыл ос ханищтап Департаментныл тит нэ̄г о̄лсы̄г. Ты нэ̄пак по̄слын хо̄тпа И. В. Соколова ня̄врамыт ма̄гыс мастеркласс ва̄рыглас. Манырсыр по̄слын нак о̄лы, хумус ро̄ви по̄слуӈкве, пуссын тав ханищтас. Ня̄врамаквет тав ётэ мощ по̄слысыт. Ты хурит С. С. Динисламова «Витсам» нампа такви ва̄рнэ нэ̄пакн тув по̄слыянэ. Светлана Селивёрстовна ня̄врамыт ма̄гыс о̄с пӯмащ, э̄рнэ ла̄тыӈ ла̄выс: институтт ос манхурип нэ̄пакыт хансым о̄лэ̄гыт, хотьют ты нэ̄пак ва̄руӈкве нё̄ты, манса̄вит э̄лмхо̄лас ты нэ̄пакыт хансэ̄гыт, нэ̄пак ва̄рнэ порат манырсыр та̄рвитыӈ ва̄рмаль о̄лы, пуссын тав потыртас. Манхурип мо̄йтыт, пе̄с потрыт о̄лэ̄гыт, ос таи ня̄врамытн пуссын ла̄выс. Суссылтап а̄стын юипа̄лт ня̄врамаквет атыӈ мӯйлупсал ос нэ̄пакыл мӯйлуптаве̄сыт. Нэ̄пак суснэ ма̄гсыл ты ма̄хманув коныпал ос «Югория» телерадиокомпания ёхталас, та̄н кина ва̄рсыт. Та̄нанылн О. Д. Ерныхова ос С. С. Динисламова потыртасы̄г. Хотьют ма̄навн ты нэ̄пак ва̄руӈкве нё̄тыс, пуссын сымын э̄рнэ ла̄тӈыл ла̄виянӯв. Пуста̄гыл вос о̄лэ̄гыт! 1080 2014.07.25. Людмила ТЕТКИНА Рӯпатаныл по̄хын ке ке̄таве̄н тув хансэ̄н. Хо̄тпа рӯпатаныл по̄хын минуӈкве акваг ке ла̄ваве манос сэ̄лум олныл та̄ра ат ойтаве, тав Евгений Кривобоков палт ты урыл пищма хансуӈкве манос тав палтэ ялуӈкв ве̄рми. О̄йка ты ма̄хумн нё̄туӈкве ла̄выс. Тав рӯпата ӯргалан инспекцият кӯщаиг о̄лы. Евгений Владимирович акваг ла̄ви, э̄лумхо̄лас рӯпататэ̄ныл нас тох по̄хын ке ке̄твес, та̄н палтанылын ёхталаӈкве ул вос пилы. Хо̄тпа инспекцият заявлениенэ̄пак ке хансы, то̄нт та̄н та̄ра ты организация уральтаӈкве о̄вылтахтэ̄гыт. Ты та̄л хо̄т э̄тпос сыс та̄н акв со̄тыра 756 организация уральтасыт. Тот 5 со̄тыра 506 лю̄ль тэ̄ла хо̄нтсыт. Ты организацият яныг штрафолныл пинсаныл. Та̄н пуссын аквъёт 24 миллион арыгкем штрафолн ойтсыт. Югра ма̄т рӯпитан организацият халт кол ӯнттын ма̄хум лю̄льсаӈ о̄ньщавет, са̄всыр щирыл урккуптавет, мощща олныл ойтавет. Инспекция тот 949 лю̄ль тэ̄ла хо̄нтыс. Хо̄т э̄тпос сыс ты та̄л 12 э̄лумхо̄лас рӯпитым а̄тимыг е̄мтыс, 39 хо̄тпа са̄кватахтас. Та организацият, хо̄т тамле лю̄ль тэ̄ла о̄лыс, ань пуссын уральтавет. Евгений Кривобоков о̄с акв ва̄рмаль урыл потыртас. Ты э̄лыпалт тав палтэ са̄в ма̄хум акв та̄рвитыӈ ва̄рмаль ёт ёхталасыт, та̄н ӯщлахтын ма̄н ялнэ билетнэ̄паканыл ма̄гсыл олныл ат ойтве̄сыт. Кӯщай ла̄вме щирыл, ты урыл 2006 та̄л пирмайтым са̄ккон то̄ва ла̄тӈанэ йильпииг хасве̄сыт. Ка̄сыӈ организация такви положениенэ̄пак хансыс, ты хосыт ма̄хумн билет ёвтнэ ма̄гсыл олн мис. Са̄в кӯщаит ты нэ̄пак ат ва̄рсыт, ма̄хум мо̄т ма̄н ӯщлахтуӈкве ялнэ̄ныл ма̄гсыл олныл ат ойтве̄сыт. О̄йка ла̄выс: «Ма̄н ты кӯщаит ёт са̄в рӯпитасӯв, са̄всыр нэ̄пакыл хансыгласанӯв, та̄нки ма̄хманыл ул вос урккуптасаныл, олныл вос ойтыяныл. Таи лю̄ль, ма̄хманув са̄кконыт та̄нки ат ловиньтыяныл, тыи ма̄гсыл та̄нки тэ̄ланыл вуянтаӈкве ат ве̄рмияныл». 1080 2014.07.25. Людмила ТЕТКИНА Та ма̄ныл ёхтум ще̄мьят тыт о̄с нё̄тавет. Ань Украина ма̄ныл Россиян са̄в ма̄хум о̄луӈкве ва̄нтлэ̄гыт. Ты ще̄мьят округувн о̄с ёхталаӈкве патсыт. Манаса̄вит ще̄мья тыг ёхтыс ос хумус та̄н нё̄тавет, ты урыл кӯщай нэ̄т потыртасыт. Ольга Полякова миграционный службат кӯщаиг рӯпитан нэ̄, ла̄выс, ма̄н округувт 12 со̄тыра 500 арыгкем украинцыт «вид на жительство» нампа нэ̄пак щирыл о̄лэ̄гыт ос рӯпитэ̄гыт. Украинат хо̄нтлан нак о̄вылтахтаме па̄сыл Луганский ос Донецкий областигныл тыг 12 э̄лумхо̄лас ёхтыс, тыт нэ̄паканыл ва̄рсаныл ос тыг о̄лмыгтасыт. Ты коныпал 51 хо̄тпа заявлениенэ̄пак хассыт, тыт о̄луӈкве о̄с ка̄саще̄гыт. Ты ма̄хум «О беженцах» нампа са̄ккон щирыл нё̄тавет ос э̄рнэ нэ̄пакытыл ва̄равет. Ты юипа̄лт та̄н ня̄враманыл тыт садик ма̄гсыл очередин хансавет, школан ханищтахтуӈкве вивет, са̄всыр пособияолныл ойтавет. Тувыл ёхтум мирыт Россия гражданствал ань моляхнувег ва̄равет. Мо̄т кӯщай нэ̄ Светлана Лотова акв са̄ккон урыл потыртас. Тав ла̄выс, Россиян ёхтум ще̄мьят «Переселение соотечественников» нампа программа хосыт о̄с нё̄туӈкве ве̄рмавет. Ты программа ма̄гсыл округ бюджетыт 25 миллион солко̄ви хансым о̄лы. Светлана Тимофеевна ла̄выс: «Украинал ёхтум ма̄хум миграционный службат нэ̄паканыл хунь ва̄рияныл, ма̄н палтув ёхтуӈкве ве̄рме̄гыт. Ма̄н та̄нанылн рӯпата хо̄нтуӈкве нё̄тэ̄в. Ты программа хосыт о̄лнэ кол ойтхатнэ ма̄гсыл о̄с олныл мыганӯв. Акв ще̄мья акв э̄тпос сыс 25 со̄тыра солко̄вил ойтыянӯв. Ще̄мьят ты олныл акв та̄л сыс нё̄тыянӯв. Ты юипа̄лт о̄лнэ коланыл ма̄гсыл та̄нки ойтхатуӈкве патэ̄гыт. Мария Краско, мирн нё̄тнэ департаментыт кӯщай нэ̄, ла̄выс, та̄н Украинал ёхтум ще̄мьят ма̄гсыл са̄всыр тэ̄нут, пормасыт пирмайтэ̄гыт. Тамле колыт ань округувт янытыл рӯпитэ̄гыт, ка̄сыӈ хо̄тпа тув пормас, тэ̄нут тотуӈкве ве̄рми. 1080 2014.07.25. Александр ВЬЮТКИН Пальта̄л ма̄хум касыланыл ты ляпами. Мощ мо̄лалнув Ханты-Мансийск ӯст пальта̄л ма̄хум 2015 та̄лт е̄мталан ёсал каснэ касыланыл урыл прессконференция о̄лыс. Та касыл рущ ла̄тӈыл ла̄ваве: «Сурдоолимпийские игры». Журналистыг рӯпитан ма̄хум ёт тит хум Евгений Редькин ос Спартак Антоненко потыртаӈкв ёхталасыг. Тэ̄н сас каснэ щирыл кӯщаиг рӯпитэ̄г. О̄влэ̄т Евгений Леонидович ла̄выс: «2014 та̄л о̄вылтахтан порат округ губернаторув Наталья Комарова Москва ӯст пальта̄л манос лю̄льсаӈ хӯлнэ ёсал ха̄йтнэ ма̄хум округувт каснэ ва̄рмаляныл ва̄рыглан ма̄гсыл э̄рнэ нэ̄пакыт мир янытыл а̄гмыӈмосыӈ ма̄хум ёт рӯпитан комитет колын ма̄йлыс. Нэ̄паканув уральтан юипа̄лт касыл та̄н тыт ва̄рыглаӈкве ка̄сащасыт. Ты касыл нёлоловхойпловитыг тах е̄мты. Тамле касыл ма̄н Россия ма̄вт щар о̄выл щёс ты ва̄раве. Та мус нёлолов э̄тпос хультыс, ма̄навн пуссын алымаӈкв э̄ри». Евгений Леонидович юипа̄лэ̄т Спартак Геннадьевич о̄с мощ потыртас: «Та кастыл ва̄рнэ рӯпатав уральтаӈкве ты та̄л э̄лы хо̄н ма̄ныл ма̄хум уральтан щирыл титынтыг ёхталасыт. Ань то̄ва тэ̄лат та̄н хӯлтнэ щираныл э̄лаль э̄рнэ̄г щё̄питыянув. Ты коныпал ма̄навн иӈ хӯрумса̄т арыгтем нё̄тмил ва̄рнэ хо̄тпа ханищтаӈкв э̄ри. Са̄выӈпа̄лэ пальта̄л ма̄хум ёт рӯпитан щирыл студентыг о̄лнэ ма̄ньла̄т ма̄хум хасхатаӈкв ёхталэ̄гыт. Э̄рнэ са̄вит нё̄тмил ва̄рнэ хо̄тпат атнэ̄в юипа̄лт ма̄н тах та̄н ма̄гсыланыл пальта̄л ма̄хум ёт ка̄тыл хӯлтхатым потыртан ханищтап ва̄ре̄в». 1080 2014.07.25. Александр ВЬЮТКИН Хохса хартыман на̄нтина̄нын лю̄ль ва̄регы̄н. О̄йттур э̄тпос о̄выл хо̄талэ̄т Ханты-Мансийск ӯст ОТРК «Югра» РИЦ нампа колыт хохса хартнэ ма̄хум ма̄гсыл хансым йильпи са̄ккон урыл прессконференция о̄лыс. Потрув лӯпта э̄тпос о̄вылтахтын хо̄талыт хохса хартнэ щирыл йильпи пирмайтан са̄ккон урыл о̄лыс. Та урыл ма̄н ётув потыртан кастыл хӯрум хум ёхталас. Халанылт та̄н мо̄тмо̄т ма̄т рӯпитэ̄гыт. Йильпи са̄ккон нэ̄глын щирыл та̄н акваннё̄тхатым рӯпитэ̄гыт. Ёмаспал нупыл ӯнлын хум наме Василий Иванович Костин, тав «Центр медицинской профилактики» нампа пӯльница тармыл ле̄ккар кӯщаиг рӯпиты. Котильт о̄лнэ хум наме Роман Игоревич Надыба, тав ос полицият рӯпиты. Хӯрмит хумияныл наме Константин Сергеевич Репин, тав округ Дума колт ма̄ньла̄т ма̄хум ёт рӯпитан парламент тармыл председателиг о̄лы. О̄влэ̄т пӯльницат рӯпитан хум хохса хартнэ ма̄хум урыл мощ потыртас. Тав ла̄выс: «Россия янытыл ка̄сыӈ та̄лт сака са̄в мир хохса хартнэ пе̄нтсыл о̄лнэ а̄гмыл хотталь щалты. Хохса хартнэ ма̄хум халт са̄выӈпа̄лэ сым ос хо̄псы а̄гмыл хотталь щалтэ̄гыт. Хум хо̄тпат халт налыман та̄л мус ат о̄лнэ хо̄тпат са̄выӈпа̄лэ о̄лнэ̄ныл палыт акваг хохса хартым о̄лсыт. Ма̄н округув янытыл хохса хартнэ хо̄тпа пусмалтан ма̄гсыл ва̄т нупыл ат колнак рӯпиты». Ле̄ккар юипа̄лт ос полицият рӯпитан хум ла̄выс: «Хохса хартнэ ма̄хум ёт рӯпитанэ̄в моще̄ртын лов та̄лыг ты е̄мты. О̄влэ̄т хохса мори тыналан ва̄рмаль хотпо̄илттаслӯв. Тувыл ня̄врамыт ханищтахтын колыт ляпат хохса хартуӈкв по̄илттасӯв. Ань ос тэ̄нэайнэ колытыт хохса хартнэ нак хотпо̄илттаӈкв номсэ̄в. Тувыл ань са̄всыр вокзалыт, ла̄пкат ос ма̄хум ӯщлахтын ма̄т ляпат хо̄хса хартуӈкв о̄с ат та̄ртаве. Йильпи пирмайтым са̄ккон щирыл посым потылтан ма̄хум хохса хартуӈкв ат ро̄внэ ма̄ныл атхойплов метран по̄хан э̄ри минуӈкв. Ты коныпал ла̄пкат хохса о̄щнэ норманыл хотвиӈкв ла̄вве̄сыт. Тувыл ос са̄всыр ма̄нь ла̄пкат хохса тыналан лицензиянэ̄паканыл хот–вуйве̄сыт. Хохса тыналан щирыл та̄рапаттын ма̄т яныг штрафолныл пинуӈкв ве̄рмавет». Тав потыртан ма̄тэ̄ныл а̄стынэ̄тэ юипа̄лт Константин Сергеевич ла̄выс: «Ма̄н ма̄ньлат ма̄хманув ёт са̄всыр пӯмащ номт о̄ньще̄в. Ань «Добровольная дружина» ма̄гсыл хохса ат хартнэ ос вина ат айнэ ма̄ньлат ма̄хум атэ̄в. Ма̄н ты ма̄ньлат ма̄хум о̄влэ̄т Нягань ӯст номсэ̄в атуӈкв. Ма̄навн полицият рӯпитан ма̄хум нё̄туӈкв патэ̄гыт. Ань ты са̄кконыт пирмайтан па̄сныл округув янытыл лӯпта э̄тпос сыс акв со̄тыра 391 хо̄тпа штрафыл хансыглаве̄сыт. Штрафыт са̄всыр тын о̄ньще̄гыт. Автобус ӯрнэ ма̄т хосха хартнэ ма̄гсыл хо̄тпат атса̄т солко̄вил хасылтавет. Тувыл ня̄врамыт ёнгасан ма̄т хохса хартнэ ма̄гсыл титхӯрум со̄тырал пинуӈкв ве̄рмавет. Щар яныг штраф хо̄тса̄т со̄тыран ёхты. Ань хо̄хса хартнэ урыл са̄всыр кина охсат ва̄рнэ ма̄гсыл ма̄хум та яныт штрафыл пинавет. Хохса хартнэ ма̄ныл по̄йтэ̄н, са̄в та̄л пуста̄гыл о̄лэ̄н. 1080 2014.07.25. Людмила ТЕТКИНА Та̄н Юван Шесталов намыл пиным премиял майве̄сыт. Округувт пирмайтым нэ̄пак хосыт соссаӈ ма̄хум пе̄с йис ва̄рмаляныл, ща̄нь ла̄тӈаныл но̄хво̄рмалтан ос э̄лаль тотнэ ма̄гсыл Юван Шесталов намыл пиным премияолныл мивет. Ма̄ньщи манос ханты культура ма̄гсыл са̄в рӯпата ос э̄рнэ тэ̄ла ва̄рнэ хо̄тпат ос коллективыт та̄нки нэ̄паканыл тув ке̄туӈкве ве̄рме̄гыт. Коллектив 200 со̄тыра солко̄вил ос хо̄тпа 75 со̄тыра солко̄вил ойтавет. Ты та̄л округ янытыл са̄в ма̄хум ты премия ма̄гсыл нэ̄паканыл ке̄тыгласаныл. Жюрихо̄тпат акванатхатыгламаныл порат но̄хпатум коллектив ос кит хо̄тпа пе̄риясыт. Ты та̄л олныл «Ма̄нь Ӯскве» нампа стойбище, Лариса Николаевна Карпенко (Хозумова) ос Маргарита Фёдоровна Рябова (Яркина) майве̄сыт. Лариса Николаевна Карпенко Октябрьский район Ня̄рихумит па̄выл школат ма̄ньщи ла̄тыӈ ханищтан нэ̄г рӯпиты. Ты коныпал ня̄врамыт са̄кныл хартуӈкве, ю̄нсхатуӈкве ос са̄всыр щирыл ма̄щтырлаӈкве ханищтыянэ. Такви тав Саранпа̄вылныл о̄лы, та ма̄т самын патыс, тот яныгмас. Ханищтахтуӈкве а̄стламе юипа̄лт ма̄ньщи нэ̄ Ня̄рихумит па̄вылн рӯпитаӈкве ке̄твес, та па̄сныл тот о̄лы. Са̄в та̄л школат ня̄врам ханищтым тав ма̄ньщи ла̄тыӈ ханищтан нэ̄пакыт такви хансыс. Ка̄ркамыг рӯпитанэ̄тэ ма̄гсыл Лариса Николаевна са̄всыр янытлан нэ̄пакытыл майлувес. Ма̄ньщи нэ̄ «Учитель года» ос «Учитель родного языка и литературы ХМАО-Югры» нампа касылт мо̄т ханищтан хо̄тпат ёт касыс. Тав са̄в та̄л ма̄ньщи газета ёт рӯпиты, такви ос ня̄враманэ хансум потраныл, мо̄йтаныл тыг ке̄тыс. «Сохраним язык в семье» нампа касылт ос мо̄т са̄всыр касылт ня̄враманэ касыгласыт. Тав ханищтан а̄гирищанэпыгрищанэ о̄выл, китыт манос хӯрмит места са̄в щёс вӯйласыт. Маргарита Фёдоровна Рябова 1996 та̄лт Белоярский район Ванзеват па̄вылт «Тутые» нампа ансамбль ва̄рыс. А̄гит ханты э̄ргыт э̄ргуӈкве ос йӣквыт йӣквуӈкве ханищтасанэ. Маргарита Фёдоровна ханищтам а̄гиянэ ань тав тэ̄латэ э̄лаль тотыяныл, та̄н ня̄врамыт ханты э̄ргыт э̄ргуӈкве ос йӣквуӈкве ань та̄нки ханищтыяныл. То̄ва а̄гит А̄с-угорский театрыт рӯпитэ̄гыт. 1994 та̄лт Ха̄льӯс район Я̄сунт па̄вылт «Ма̄нь Ӯскве» нампа стойбище рӯпитаӈкве о̄вылтахтас. 20 та̄л сыс Я̄сунт па̄вылт кит со̄тыра арыгкем ня̄врам ӯщлахтас. А̄гирищитпыгрищит Кондинский, Нижневартовский, Белоярский, Сургутский, Ханты-Мансийский ос Ха̄льӯс районытныл тот ӯщлахтасыт. Тюмень, Тобольск, Новосибирск, Пермь, Томск ӯсытныл Ямал, Эвенкия ма̄ныл, Удмуртия ос Коми республикал мӯй ма̄хум ос ня̄врамыт тув ялсыт. Ты коныпал ма̄хум Германия, Чехия, Венгрия, Канада, Эстония, Финляндия, Голландия, Франция ос США хо̄н ма̄ныл тув ёхталасыт. Ӯщлахтын ма̄т Любовь Павловна Стаканова кӯщаиг са̄в та̄л о̄лы. Тав «Ма̄нь Ӯскве» рӯпитан ма̄гсыл са̄в ё̄р тув пиныс, сака са̄в рӯпитас. Ма̄н, редакцият рӯпитан ма̄хум, «Ма̄нь Ӯскве» нампа стойбищат рӯпитан хо̄тпат, Лариса Николаевна Карпенко, Маргарита Федоровна Рябова сымыӈыщ янытлыянӯв. Та̄н э̄лаль ос аквта щирыл ка̄ркамыг вос рӯпитэ̄гыт, ма̄ньщи ос ханты пе̄с йис ва̄рмалянув э̄лаль вос тотыяныл. 1080 2014.07.25. Анна АЛГАДЬЕВА Са̄в та̄л ка̄ркамыг рӯпитан хо̄тпа. Рущ па̄влыӈ, рущ ӯсыӈ ма̄т рӯпата тал о̄луӈкв та̄рвитаӈ, ка̄сыӈ хо̄тпа та̄квина̄тэн матыр рӯпата кинсы. Во̄рт о̄лнэ ма̄хум о̄с нас ат о̄лэ̄гыт. Нювсаӈкв ат ке патэ̄гын – манарын тэ̄гын? Хулюмсунт па̄вылт са̄вке̄пыл а̄ти рӯпат ма̄, рущема̄ньщитэ̄тыл пуссын аквъёт рӯпитэ̄гыт. Сосьвинский ЛПУ Хулюмсунт рӯпитанэ̄тэ па̄сныл налыман нупыл са̄т та̄лыг е̄мтыс. Татьяна Даниловна Самбиндалова ты организацият «Служба связи» ма̄т ва̄т арыг та̄л рӯпиты. Ёмщакв ка̄ркамыг рӯпиты, рӯпататэ э̄руптытэ, са̄всыр службат халт спортивный соревнованиятн яланты: ёсал ха̄йты, волейбол, теннисыл ёнги. Ам тав колэ̄н ялсум, рӯпататэ ос о̄лупсатэ урыл ме̄н мощ потрамасме̄н: – Хо̄т самынпатсын, яныгмасын, ханищтахтасын? – Ня̄хщамво̄ль па̄вылт самынпатсум. Николай Михайлович Сагандуков та порат леккарыг о̄лыс, ма̄ньщитн леккар-Коляг ла̄ввес. Нёлолов та̄л мус Ня̄хщамво̄льт о̄лсум, тот садикн ялантасум, хӯрум та̄л яныт порат садикн майве̄сум. Та порат ясли группа а̄тим о̄лыс. Са̄т та̄л школан минасум. Тувыл омам хум ва̄рыс, Няхлаӈ па̄вылн минас. Тама̄гыс акв та̄л Та̄гт па̄выл школаинтернатт ханищтахтасум. Лов та̄лум нупыл патум порат 69 та̄лт тыг Галя о̄ньгум ос Илья яглаӈум па̄лт ёхтысум, тэ̄н па̄лттэ̄н о̄лмаясум. Тэ̄н та порат иӈ ма̄нь китыг, Катяг-Ленаг ма̄ниг о̄лсыг, Миша та таквсы самынпатыс. Та порат Хулюмсунтыӈ ня̄врамыт Ня̄хщамволь па̄вылт ханищтахтасыт. Ам о̄с нёлолов класс мус Ня̄хщамво̄льт ханищтахтасум. Нёлоловхуйплов та̄л яныт порат «Тюменьтрансгаз» организациян колкан ловтуӈкв патхатасум, акв та̄л рӯпитасум, Салехард ӯсн торговый училищан ханищтахтуӈкв ялсум, тувыл тот а̄гмыл е̄мтсум. Ётыл Ха̄льӯст пирикаскаг ханищтахтасум, хулнё̄выль рущ щирыл рыбамясо тыналан ла̄пкат кит та̄л пирикаскаг рӯпитасум, амки общежитиет о̄лсум. Тувыл 1981 та̄лт ювле Хулюмсунтн ёхтысум, о̄с «Туменьтрансгаз» рӯпат ма̄н патхатасум, хурум та̄л ОРС-4 буфетт рӯпитасум. Отпускат о̄лмум сыс Ягримн ханищтахтуӈкв ялсум, Учебный комбинатт телефонисткаг акв э̄тпос ханищтахтасум. Ёхтысум ос 1984 та̄л па̄сныл связьн телефонисткаг вуйве̄сум. Ань матах та̄л электромонтерыг ты хо̄тал мус о̄лэ̄гум. Связьт ва̄т та̄л рӯпитэ̄гум, та э̄лыпа̄лт хӯрум та̄л ос буфетчицаг о̄лсум. – Телефонисткаг о̄лмынт маныр рӯпата ва̄рсын? Хумыс рӯпитасын? – Та порат коммутатор о̄лыс. Колхал ӯлтта ман мо̄т ляпа па̄вылхал потыртан ма̄гыс хотьют звониты, китыглылум ос хо̄ӈха таве̄н э̄ри та ёт ке̄рква̄лганэ̄н аквано̄лтыягум, ма̄хум тащир ущта потыртасыт. Потыр аквано̄лтсум. Ань хо̄льтыл хунь, хоталь э̄ри тув ро̄хлыгты. 1995 тал порат ущ компьютерный связь патыс. Рация хо̄сыт потыртаӈкв во̄ваве̄в. – Электромонтер ос маныр ва̄ри? – Кабель –телефон ква̄лгыт пинэ̄в. Хот ма̄ хо̄сыт миннэ ма̄т, ма̄ хилуӈкв ке э̄ри ма̄ хилэ̄в, нумыл тотуӈкв ке э̄ри –нумыл тотылув. Хо̄т э̄ри но̄хнэ̄гсалыянув, тувыл хото̄люптыянув. Рӯпитан ма̄вт са̄всыр аппаратура о̄лы, таит хотсэ̄гсалыянув, колкан ловтэ̄в. – Наӈки матыр рӯт о̄ньще̄гын? –Рӯт о̄ньще̄гум, тыт па̄вылт Галя о̄ньгум о̄лы. –Оман маныр наме о̄лыс? –Омам Самбиндалова Дарья Степановна о̄лыс. Няхщамвольт о̄лыс, тувыл Няхлаӈ па̄вылн хум ва̄рыс. О̄йкатэ наме Пе̄тр Егорович Вынгылев о̄лыс. Ётыл омам по̄хын минас, ювле ёхталас, тыт Хулюмсунтт о̄лыс. Марина э̄щум а̄нумныл са̄т та̄лэ ма̄нь, о̄с тыт Хулюмсунтт о̄лы, рӯпиты. Та ёлыпа̄л Люда, тав Югорск ӯст о̄лы. Тувыл Нина ос Вася, щар ма̄ниг. Нина Ханты-Мансийскат о̄лыс, та̄лыг е̄мтыс а̄тимыг е̄мтме. Вася Ягримт о̄лы. Амки пыгум наме Илья, Новосибирск ӯст о̄лы, тот ханищтахтас, э̄лаль тув хультыс. Колыл ёвтыслум, ань тот о̄лы. Амки ва̄тихал тув ялантэ̄гум. Потруме̄н та оигпас. Пуста̄гыл о̄лнэ са̄в та̄л таве̄н, э̄лаль ёмщакв рӯпитаӈкв. Хоса нот, со̄т ос щунь! 1080 2014.07.25. Александр ВЬЮТКИН Сытамыг но̄хпатум чемпион. Лӯпта э̄тпост ва̄т нупыл са̄тыт хо̄талт Ханты-Мансийск ӯсн щахныл алхатым каснэ ма̄ньщи хумиюв Руслан Проводников юв миннэ̄тэ порат хоиглас. Руслан ань тит э̄тпос палыт Америкат о̄лыс. Ты оигпам лӯпта э̄тпост нилахойплов хо̄талт ма̄н каснэ хумиюв американец Крис Алигьери ёт касыс. Тэ̄н Крис самын патум ос ань о̄лнэ Нью-Йорк ӯст кассы̄г. Потыртахтынэ̄ныл порат ща̄рщ тапа̄лыл о̄лнэ ма̄хум тох тахмаясыт, мо̄т щирыл Крис касуӈкв ат ка̄сащас. Руслан таквсы Майк Альворадо ёт каснэ̄тэ порат хотвим WBO Чемпионский э̄нтапе ань ос Крис Алигьери хумин хотвуйвес. Хотьют та касыл сунсыс, тав ва̄гтэ, халэ̄нт хотьютэ̄н ё̄рнуве̄г о̄лыс. Каснэ хумиюв Ханты-Мансийск ӯсн хо̄игламе порат депутатыг о̄лнэ тит ма̄ньщи нэ̄г Татьяна Гоголева ос Надежда Алексеева Руслан ёт ва̄щинтахтын пӯмащ ва̄рыгласы̄г. Мир янытыл ва̄нэ ма̄ньщи хумиюв ёт потыртан кастыл янгема̄не ва̄т арыгтем хо̄тпа ёхталас. Та порат ты ам Руслан Крис ёт каснэ урыл потыртасум. – Руслан, хумус наӈ номсэ̄гын, манрыг тох е̄мтыс, манрыг на̄ӈ э̄нтапын мо̄т хумин майвес? Тав ювле ла̄выс: Хотьютын ва̄ве, ань та урыл са̄в ро̄ви потыртаӈкв. Халме̄нт касыл о̄вылтахтын порат тав та̄ра со̄выррищ хольт ринг янытыл поргуӈкв о̄вылтахтас. Ам тох каснэ хо̄тпат щар ат э̄руптыянум. Касуӈкв те ла̄вхатсын, манрыг ха̄йтыгтэ̄гын. Каснэме̄н порат тит щирыл ам таве са̄ӈалалым колканын ёлпаттыгласлум. Тувыл то̄ва порат ам таве мощ са̄литаслум. Юио̄выл хӯрмит раундыт Фреди Роуч ам тренерум ла̄выс: «Руслан, наӈын таве ёлпаттуӈкв э̄ри. Ма̄н тав ма̄тэ̄т, тав ӯсэ̄т касэ̄в, мо̄т щирыл но̄хпатуӈкв ма̄н нэ̄мхотьютн ат та̄ртаве̄в». Хумус Фреди ла̄всас, тох та е̄мтыс. Ам таве̄н сам ёлыпа̄лн ёмщакв хо̄игламум порат тав сам ёлыпал лӯве акв ма̄т хотпокматас. Таима̄гсыл Крис сам нё̄вле мо̄лях лапторхатас. Бокс щирыл, хунь каснэ хум саме ат ка̄салы ос сам нё̄влянэ̄н лапхартаве, касыл по̄илттаве. Крис ёт а̄лхатамум порат тох ат е̄мтыс. Тав пе̄нтсылэ ам самум мощнув те лаппантхатнув, касыл та̄ра та по̄илттануве. Алхатамуме̄н юипа̄лт о̄лум прессконференцият ам ты урыл о̄щнэ номтанум пуссын потыртасанум. Каснэме̄н юипа̄лт Крис саме ма̄гсыл та̄ра пӯльницан тотвес. Ань ам ётум рӯпитан юрт хумим Вадим Корнилов Крис ёт каснэ ва̄рмаль титынтыг ва̄руӈкв номсы. Та па̄л ма̄хманув титынтыг ам ётум касуӈкв воссыг ат ка̄саще̄гыт». – Руслан, на̄ӈ та̄рвит рӯпатан ва̄рнэн юипа̄лт хумус ӯщлахтаӈкв ос маныр ва̄руӈкв номсэ̄гын? – Юн мощ о̄лэ̄гум, тувыл ще̄мьяӈ тагыл Байкал тӯр ляпан ӯщлахтаӈкв ялэ̄гум. Яныг ӯст суяныл та̄л сытамнув ма̄т ӯщлахтуӈкв таххаты. Руслан та̄л сыс акв щёс касыс, тамле ма̄т каснэ хо̄тпан таи а̄ти ёмас. Мо̄тыт ка̄сылэ хо̄т ос хунь е̄мты, иӈ ат ва̄гтэ. Таима̄гсыл ты урыл тав нэ̄матыр ат ла̄выс. 1080 2014.07.25. Светлана РОМБАНДЕЕВА Ло̄пмус па̄выл ня̄врамыт. Ты ма̄ньщи ня̄врамыт Ха̄льӯс район Ло̄пмус па̄вылт о̄лэ̄гыт. Ло̄пмусн ялмум порат та̄наныл по̄слысанум. Ӯщлахтан лагеряныл туп лӯпта э̄тпост рӯпитас, тувыл та. Ня̄врамаквет ла̄внэ̄ныл щирыл, о̄с аквман э̄тпос рӯпитанув те, ёмас о̄лнув. Тот та̄н ёнгасасыт, матыр ханищтасыт, щаквщисыт, па̄йтым тэ̄нутыл тыттуве̄сыт. Ань ос та̄нти кон та ёнгасэ̄гыт, ха̄йтыгтэ̄гыт, Ло̄пыӈ я̄т пувлэ̄гыт. Ты порат кон сака лё̄мвоиӈ ос ма̄ньӯйиӈ, та̄н атпыл пилэ̄гыт. Пуравет те̄пыл, Ло̄пыӈанылт та пувлэ̄гыт, туп мовиньтаныл суйты. Ты я̄тил ня̄врамаквет пуста̄гыл вос о̄лэ̄гыт, со̄тыӈыщ вос яныгме̄гыт! 1080 2014.07.25. Людмила ТЕТКИНА Ха̄льӯст о̄лнэ ма̄ньщи нэ̄. Валентина Гавриловна Себурова, о̄парищ наме Гоголева, ва̄т арыгкем та̄л Ха̄льӯст ня̄врам ӯргалан колт воспитателиг рӯпиты. Ма̄ньщи нэ̄ такви рӯпататэ сака э̄руптытэ. Са̄в та̄л ка̄ркамыг рӯпитан ма̄гсыл Валентина Гавриловна «Отличник народного образования» намыл майвес. Ма̄ньщи нэ̄ такви уре̄т таи ла̄выс: «Ам А̄нъя па̄вылныл о̄лэ̄гум, тот нила класс мус ханищтахтасум. Атыт классын Ягрим па̄вылн интернатын ке̄тве̄сум. Тот лов класс а̄стласум. Тувыл Ханты-Мансийск ӯст педагогический училищат воспитателиг ханищтахтасум. То̄нт увщим ще̄мьяӈ та̄гыл Ха̄льӯст о̄лыс, тав а̄нум тыг о̄луӈкве во̄выстэ. Ха̄льӯсн хунь ёхтысум, садикт рӯпитаӈкве патусм. Щар о̄влэ̄т ам палтум ялантан ня̄врамыт ань та̄нки ня̄врамыӈыт. Ха̄льӯст а̄нум ка̄салыяныл, та̄ра пащалахтэ̄гыт. Сымум такем ёмас, таса̄вит та̄л ювле хультыс, а̄нум номияныл, ат ёрувлыяныл. Ме̄н увщим ёт тыт о̄лмыгтасме̄н, омаме̄н А̄нъя па̄вылт такке̄т хультыс. Таве Ха̄льӯсн о̄луӈкве во̄выслуме̄н, тав ла̄выс, туп колэ, мисанэ, луванэ, а̄мпанэ ёт тыг ва̄нтлы. А̄нъя па̄вылт о̄лнэ кол хо̄тлостласлӯв ос Ха̄льӯсн тотыслӯв. Тыт тав такви колэ̄т э̄лаль о̄лыс. Ань то̄ва порат А̄нъя па̄вылн ялуӈкве кос таӈхе̄в, тувыл о̄лнэ кол тот ат о̄ньще̄в, тыи ма̄гсыл тув ат ялантэ̄в. А̄гим ос пыгум хунь ма̄ниг о̄лсы̄г, омам тэ̄н ётэ̄н юн ӯнлыс. Ань нэ̄ хо̄тпа ня̄враме ёт хӯрум та̄л мус юн о̄луӈкве ве̄рми, са̄всыр пособияолныл ойтавет, тыщирыл нё̄тавет. Ма̄н ня̄враманув янмалтамув порат тамле ёмас ва̄рмаль а̄тим о̄лыс, тыи ма̄гсыл юн ат ӯнлахо̄лсув, та̄ра рӯпитаӈкве минасӯв. Училище а̄стламум юипа̄лт о̄влэ̄т Ягрим па̄вылн о̄луӈкве номсысум. Ягримныл А̄нъя па̄выл мус лё̄ӈхе а̄ти сака хоса, акваг юв ялантаӈкве ве̄рмынувум. Ань таса̄вит та̄л Ха̄льӯст о̄лэ̄гум, тыг ханьщувласум. О̄йкаме̄нтыл тыт яныг кол ӯнттысаме̄н, ань ня̄врамагме̄н янгыг, сас ме̄н ётуме̄н о̄лэ̄г. О̄йкам ханты хум, Тугияны па̄вылныл о̄лы. Тав яныгмам па̄влэ̄н тай яланталы. Настя а̄гиме̄н школа а̄стламе юипа̄лт Ханты-Мансийск ӯст Югорский университетыт экономистыг ханищтахатас. О̄влэ̄т Ханты-Мансийск ӯсн о̄лмыгтас, тот рӯпитас, пыге такке̄т янмалтытэ. Тувыл тот о̄лнэ кол ат о̄ньщас ос ня̄враме садикн ат ялантас, тыи ма̄гсыл ювле Ха̄льӯсн ёхтыс, ань ме̄н ётуме̄н о̄лэ̄г. Ань тав тыт многофункциональный центрыт рӯпиты, ма̄хумн са̄всыр нэ̄пакыт ва̄руӈкве нё̄ты. Тот рӯпитаӈкве таве̄н мӯсты. Миша пыгуме̄н о̄с Югорский университетыт ханищтахтас, ань ос Ха̄льӯст о̄лы, тыт рӯпиты. Валентина Гавриловна ма̄щтырлаӈкве ха̄сы, са̄всыр пормасыт сагуӈкве сака э̄рупты. Тувыл садикыт рӯпитым ма̄щтырлаӈкве ат а̄лыми. Ха̄льӯст ма̄ньщит, хантыт ва̄йхатэ̄гыт, нэ̄ хо̄тпат акванатхатэ̄гыт, ю̄нсхатэ̄гыт, сакныл хартэ̄гыт. Ӯринэ̄ква хо̄тал ос мо̄т ялпыӈ хо̄талыт о̄лыглам порат акванатхатыглэ̄гыт. Ма̄ньщи нэ̄ о̄с тув яланты, Ха̄льӯст о̄лнэ соссаӈ ма̄хум ёт ва̄щинтахты ос ва̄йхаты. Тамле сымыӈ ос ка̄ркам нэ̄ Ха̄льӯст о̄лы. Ам Валентина Гавриловнан паща ла̄тыӈ ке̄тэ̄гум ос са̄в сымыӈ ла̄тыӈ ла̄ве̄гум. Пус ка̄т, пус ла̄гыл таве̄н. 1080 2014.07.25. Александр ВЬЮТКИН Ванзеват па̄выл ханты хум. Тӯяг Белоярский район Касум па̄вылт са̄лыӈ ма̄хум каснэ хо̄талын ялмум порат пӯмащ ханты хум ёт ва̄йхатасум. Тав наме Герасим Николаевич Дыбин. Ань тав Ванзеват па̄влыт о̄лы. А̄тятэ наме Николай Тимофеевич Дыбин, о̄лнэ̄тэ палытыл колхозт хӯл алыщлым, во̄раим о̄лыс. Оматэ наме Евгения Петровна, тав колхозт мис поснэ нэ̄г рӯпитас. Ӯйхуланыл ма̄гсыл пум са̄грынэ̄ныл порат тэ̄н ще̄мьяӈ та̄гыл пум ва̄рнэ ма̄н те̄тыглавесы̄г. Тэ̄н колта̄глэ̄н яныг о̄лыс, нила ня̄врам янмалтасыг хӯрум а̄ги ос акв пыг. Щар яныг а̄гитэ̄н наме Ольга Ефимовна, о̄йкатэ щирыл Скакунова. Тав ань Нефтеюганск ӯст о̄лы. Ольга Ефимовна ханищтахтын ма̄ныл а̄стуме юипа̄лт пенсиян ква̄лнэ̄тэ мус ма̄нь ня̄врамыт ханищтан нэ̄г рӯпитас. Ань тав пенсият олы, ӯщлахты. Тав юипа̄лэ̄т Евдокия Николаевна, о̄йкатэ щирыл Калинина. Тав ань ня̄враманэ̄н нё̄тым, а̄пганэ янмалтым, о̄с Нефтеюганск ӯст о̄лы. Хӯрмит э̄ще̄н наме Галина Николаевна, тав ань а̄тим. Щар питипатта ня̄врамыг тав ты Герасим Николаевич самын патыс. Тав ханищтахтын колн миннэ̄тэ мус са̄мын патум Ванзеват па̄влэ̄т са̄т та̄л мус яныгмас. Ханищтахтуӈкв Полноват па̄влын интернатын те̄твес. Ня̄врамыт ханищтахтын коланыл а̄стлан мус Ванзеват ос Полноват тит па̄влыг халт яласым о̄лыс. Герасим Николаевич ханищтахтаме порат нас тох о̄луӈкв ат ве̄рмыс. Та̄вен аквписыг матыр ва̄руӈкв э̄рыс. Таима̄гсыл ка̄сыӈъе̄мт ялпыӈ хо̄талыт е̄мталан порат тав тот э̄ргыс, йӣквыс, пӯмащ ма̄гсыл матыр э̄рыс, тав пуссын ва̄рыс. Концерт суссылтан щирыл та̄н аквписыг Ха̄льӯс район янытыл о̄лнэ па̄влытт тотыглаве̄сыт. Та порат Ха̄льӯс район ань о̄лнэ тит районыг яныт о̄лыс. Ханищтахтын ма̄ныл а̄стуме юипа̄лт тит та̄л во̄рян хумыг о̄лыс. Тувыл газ ма̄гсыл о̄лнэ те̄р турыт пиннэ ма̄т СМУ-2 нампа колт тит та̄л рӯпитас. Тот рӯпитаме порат армиян лусытаӈкв вуйвес. Ла̄гл а̄гме щирыл тав хо̄са ат лусытас, юв те̄твес. Па̄влэ̄т нэ̄мат хоса а̄т о̄лыс, аквта та̄л таквсы Салехард ӯсн Культпросвет училищан ханищтахтуӈкв минас. Хӯрум та̄л баяныл ёнгасан хумыг ханищтахтас. Ханищтахтын ма̄ныл а̄стуме юипа̄лт та̄ра нэ̄ тотыс, э̄кватэ наме Ирина. Тав ос та порат Салехард ӯст тэ̄нут па̄йтнэ нэ̄г ханищтахтын ма̄ а̄стлас. Акванминаме̄н юипа̄лт тэ̄н сас Катравож А̄с я̄ ва̄тат о̄лнэ па̄влын рӯпитаӈкв те̄твесы̄г. Тот тэ̄н тит та̄л арыгтем о̄лсыг. Торыӈ о̄лнэ кол ат о̄щсы̄г, ня̄врамыӈыг е̄мтме̄н юипа̄лт Ха̄льӯс районын о̄луӈкв ва̄нтлысыг. Ванзеват па̄вылт рӯпитан ма̄ а̄тим о̄лыс, тэ̄н район мирколныл Ня̄хщамво̄ль па̄вылн рӯпитаӈкв те̄твесы̄г. Герасим Николаевич тот клубт хӯрум та̄л рӯпитас. Ха̄льӯс мус яласан лё̄ӈхе хо̄саг о̄лыс, таима̄гыс 1981та̄лт такви самын патум Ванзеват па̄влэ̄н ще̄мьяӈ та̄гыл о̄луӈкв та ва̄нтлысы̄г. Ань мус тот та о̄лэ̄г. Герасим Николаевич о̄влэ̄т колхозын рӯпитаӈкв патхатыглас. Нэ̄матыр хо̄са тот ат рӯпитас клубын рӯпитаӈкв во̄ввес. Та коныпал тав ня̄врамыт ханищтахтын колт ня̄врамыт э̄ргуӈкв ханищтан хумыг о̄лыс. Ханищтан ня̄враманэ ёт ханты ла̄тӈыл э̄ргын коллектив ва̄рыглас. Та ня̄враманэ ёт округ янытыл концерт суссылтым ва̄тихал яласасыт. 1994 та̄лт Ханты-Мансийск ӯст Дмитрий Агеев ёт ва̄йхатас. Таве̄н са̄ӈквылтап ос нарсьюх са̄ӈквылтан суянэ сымын хо̄ясыт. Та юипа̄лт тав такви пӯмащ ма̄гсылэ нарсьюхыл са̄ӈквылтаӈкв са̄т та̄н ханищтас. Э̄кватэ о̄с ня̄врамыт ханищтахтын колт тэ̄нут па̄йтнэ нэ̄г пенсиян ква̄лме мус рӯпитас. Ты та̄л рӯпитаӈкве хотпо̄йтнэтэ̄н па̄сныл ат та̄лыг ты то̄влыс. Тэ̄н хӯрум ня̄врам янмалтасыг. Яныг пыге̄н наме Коля, ё̄рн ма̄хум о̄лнэ ма̄т на̄й харыгтан ма̄т рӯпиты. Тав юи¬па̄лэ̄т тит а̄ги янмалтасыг. Яныгнув а̄гитэ̄н наме Оля, о̄йкатэ о̄парищ нам щирыл ань Хуланхова. Тав ань Ванзеват па̄вылт ня̄врамыт ханты ла̄тӈыл ханищтан нэ̄г рӯпиты. Питипатта а̄гитэ̄н наме Катя, тав колта̄глыӈыщ Ханты-Мансийск ӯст о̄лы. Садикт ня̄врамыт пусмалтан ле̄ккарыг рӯпиты. Тамле ёмас хум ёт потыртаӈкв нас пӯмащ. Са̄в та̄л пуста̄гыл вос о̄лы, таве̄н щунь паща ла̄тыӈ те̄тэ̄гум. 1080 2014.07.25. Людмила ТЕТКИНА Тэ̄к па̄выл я̄ ва̄татэ витын ёлниляве. Ха̄льӯс район Тэ̄к па̄вылныл ма̄н редакциявн пищма ёхтыс. Анна Константиновна Самбиндалова, ма̄ньщи э̄ква, такви о̄лнэ па̄влэ урыл потыр ке̄тыс. Э̄лаль тав потре хансым о̄лы. – Тэ̄к па̄выл ма̄н о̄лнэ ма̄в. Ма̄н, Тэ̄к па̄вылт о̄лнэ ма̄хум, ма̄нки па̄влув сака э̄руптылӯв. Ханты ма̄хум па̄выл «Тэ̄к курт» тох ла̄вияныл. 2006 та̄лныл Тэ̄к па̄выл Ха̄льӯс нупыл хасвес, мирколув ос кӯщаянув пуссын тот о̄лэ̄гыт. Э̄лумхо̄лас ке китыглаве, хоты ма̄ныл тав Родинатэ о̄вылтахты, тав илтторыг ты урыл ювле ат ла̄ви. Тав самын патум ма̄тэ, о̄лнэ ма̄тэ, улпыл, тамле ма̄г ловиньтахты. Ма̄н ма̄гсылув Тэ̄к па̄выл тамле ма̄г о̄лы, тыт рӯпитэ̄в, ня̄враманув янмалтэ̄в. Ань Югра янытыл акв миллион 500 со̄тыра арыгкем э̄лумхо̄лас о̄лы. Та̄н халанылт 30 со̄тыра туп ма̄ньщит, хантыт ос ё̄рн хо̄тпат. Ха̄льӯс районт 6 со̄тыра соссаӈ ма̄хум о̄лэ̄гыт. Ты мирыт ӯргалан ма̄гсыл ань Россият са̄всыр са̄кконыт рӯпитэ̄гыт. Округувт ма̄ньщит, хантыт ма̄гсыл са̄кконыт, программат о̄с пирмайтаве̄сыт. Тамле ма̄нь па̄вылкве нэ̄мхотьютын ань ат э̄ри, ма̄н ва̄рмалянув урыл кӯщаит хотёрувласыт. Па̄влувт ёмас яласан лё̄ӈх а̄тим, тыт са̄в ма̄хум рӯпата та̄л о̄лэ̄гыт, ма̄ньлат ма̄хум рӯпата кинсым мо̄т ма̄н о̄луӈкве мингалэ̄гыт. Тэ̄к па̄выл урыл пе̄с мо̄йт о̄лы. На̄й-О̄тыр Тохлен Курэк Ики такви о̄лнэ ма̄ ат о̄ньщас. Тав лӯи ма̄ныл ма̄ло̄мт таквина̄тэ̄н тотуӈкве тахмаяс. Тувле нупыл минас. Тув ёхтыс, ма̄ ёлыпа̄лн хисматас, тувыл но̄хтыламлас ос ма̄ло̄мт ёт алмаяс. Ма̄ло̄мтэ ёт алы ма̄ нупыл минмыгтас. Алы ма̄ нупыл миныматэ ма̄ло̄мтэ ёлрагатас. Хоталь ма̄ло̄мт патыс, яныг ма̄ е̄мтыс. Пе̄с мо̄йт щирыл Тэ̄к па̄выл акв тамле ма̄ло̄мтыт ӯнлы. Па̄выл ӯнлын ма̄ пе̄с порат ялпыӈ ма̄г ловиньтахтас, ма̄хум тыт коланыл ат ӯнттысаныл. Пе̄с ма̄хум Тэ̄к-Ики нупыл по̄йкщуӈкве тыг ялантасыт. Ань па̄влувт акв яныг та̄рвитыӈ ва̄рмаль о̄лы, я̄ ва̄тав витын ёлниляве. Тэ̄к па̄вылт са̄в та̄л сыс «19 Партсъезд» нампа колхоз рӯпитас, тот пилорама, пувлын кол, ня̄нь ва̄рнэ кол, рыбкооп ос мо̄т колыт о̄лсыт. Я̄ ва̄тав ёлнильвес, ты колыт пуссын ёллоньхатасыт ос витн патсыт. Ка̄сыӈ та̄л я̄ ва̄та моляхнув ёлниляве, са̄в ще̄мья тах колта̄л хульты. 2005 та̄лт Обская ӯсхулы аквпалъе̄рт о̄лнэ ще̄мьят Ха̄льӯст колыл майве̄сыт, та̄н тув ва̄нтласыт. Хотъют тув минуӈкве ат ка̄сащас, Тэ̄к па̄вылт о̄луӈкве хультсыт. Ӯсхулы мо̄тпалъе̄рт о̄лнэ ще̄мьят мо̄т колыл ат мивет, мо̄т ма̄н о̄луӈкве ат ва̄нтлуптавет. Та̄н акваг пилым о̄лэ̄гыт, я̄ ва̄та та̄н коланыл мус ты ёхты. Ань Ха̄льӯс район мирколт акваг мо̄тмо̄т кӯщаит рӯпитэ̄гыт. Та̄н я̄ ва̄тат о̄лнэ ще̄мьят пуссын мо̄т колыл миӈкве ла̄всыт. Потраныл тэ̄лаг аты е̄мтэ̄гыт. Ань ты хо̄тал мус ма̄хманув я̄ ва̄тат о̄лэ̄гыт. Александра Владимировна Разбоева, Людмила Владимировна Тарлина, Юрий Михайлович Новьюхов коланыл а̄латы витын рагатэ̄гыт. Софья Васильевна Новьюхова, Валентина Григорьевна Новьюхова, Евдокия Ивановна Миляхова мо̄т колн ва̄нлуӈкве аты а̄лымасыт, а̄тимыг е̄мтсыт. Хӯрум манос нила щёс луванув, мисанув я̄ ва̄тат пум маныгтым витн ра̄гата̄лсыт. Ты юипа̄лт ма̄хманув та̄нки ӯйхуланыл кон та̄ртуӈкве пилэ̄гыт, ня̄враманыл о̄с я̄ ва̄тат ёнгуӈкве щар ат та̄ртыяныл. Кӯщаит акваг ла̄выглэ̄гыт, па̄влувт яныг кол ӯнттаве, тув я̄ ва̄тат о̄лнэ 12 ще̄мьят о̄луӈкве ва̄нтлуптавет. Тамле ла̄тыӈ ма̄н хо̄т та̄л сыс хӯнтлэ̄в, ань ты мус кол ӯнттуӈкве аты о̄вылтавес. «Сельская школа» нампа программа хосыт па̄влыт йильпи кирпащ школа са̄в та̄л сыс ӯнттаве, а̄стлаӈкве ат ве̄рмаве. Ка̄сыӈ та̄л районный миркол кӯщаит школа а̄стлан ма̄гсыл олн та̄стуӈкве ла̄вхатэ̄гыт, ты мус нэ̄матыр тот ат ва̄раве. Округувт «Чистая вода» нампа программа рӯпиты. Ты хосыт яныг ӯст манос яныг па̄влыт вит сыстамтан утыт ва̄равет. Ма̄н, Тэ̄к, Пугоры ос Устрём па̄вылт о̄лнэ мир, ты тэ̄ла урыл туп хӯлыгласӯв. Ма̄н тай улпыл, э̄лаль акв та щирыл паӈкыӈ вит я̄ныл аюӈкве патэ̄в. 2002 та̄л во̄ртур э̄тпос «Жизнь Югры» газетат акв потыр хансым о̄лыс. Тот хансым щирыл ма̄н па̄влувт водопровод ва̄раве. Ты ла̄тыӈ туп газетат хультыс, ма̄н акв та щирыл вит я̄ныл тотэ̄в. Ты халт акв ёмас тэ̄ла о̄лыс, 2003 та̄лт па̄влувт йильпи садик ос интернат рӯпитаӈкве о̄вылтахтас. Яныг кол «Сельская школа» программа хосыт ӯнттувес. Ма̄н пуссын такем хотща̄гтсӯв, тамле ёмас, яныг кол па̄влувт рӯпиты. Та па̄сныл лов та̄л арыгкем ювле хультыс, па̄влувт йильпи кол воссыг аты ӯнтталавес. Любовь Константиновна Коротун, районный миркол кӯщаиг рӯпитан нэ̄, ёхталас. Па̄влувт йильпи ФАП ӯнттуӈкве ла̄выс. Йильпи пӯльница яныгполь э̄тпост а̄стлаӈкве э̄рыс, ойттур э̄тпос ювле ты хульты, пӯльница ӯнттуӈкве аты о̄вылта̄лвес. Юван Николаевич Шесталов а̄тятэ Тэ̄к па̄выл колхозт кӯщаиг рӯпитас. Ма̄нь та̄гыл Юван А̄с я̄ ва̄тат яныгмас, такви ма̄тэ сака э̄руптастэ ос янытластэ. Тав такви яныгмам ма̄тэ, я̄ урыл таса̄вит нё̄тнэ стихотвореният хансыглас. Тав хансум ла̄тӈе щирыл, А̄с я̄ ва̄тат лю̄лим ос нё̄тнэ я̄тэ нупыл сунсым сыме э̄ргыс. Ма̄н ань А̄с ва̄тат лю̄люӈкве пилэ̄в. Турап, во̄тыӈ хо̄талытт туп та урыл номсэ̄в, хумпыт я̄ ва̄тав ул вос сакватыяныл. Тыщирыл э̄лаль ке мины, я̄ ва̄тав тох молях ёлнилюӈкве патаве, Тэ̄к курт ма̄нь па̄выл номтанувт туп хульты. Анна Константиновна Самбиндалова, Тэ̄к па̄вылт о̄лнэ Совет Ветеранов кӯщай э̄ква, хансум потре ма̄ньщи ла̄тӈыл Л. Теткина хансыстэ. 1080 2014.07.25. Александр ВЬЮТКИН Мохсаӈ хӯл янытлан хо̄тал. Ань о̄лнэ э̄тпост хусыт хо̄талт Ханты-Мансийск ӯс ляпат Шапша па̄вылт мохсаӈ хӯл янытлан хо̄тал ва̄рыглавес. Та хо̄тал рӯщ ла̄тӈыл «День муксуна» ла̄ввес. Ты атыӈ хӯл янытлан хо̄тал округувт щар о̄выл щёс ва̄рыглаве̄с, тав хӯл а̄лыщлан ма̄хум янытлан хо̄таланыл кастыл щё̄пита̄лвес. 1080 2014.07.25. Александр ВЬЮТКИН Ма̄хманув ма̄ньха̄пыл кассыт. Ка̄сыӈ та̄л о̄йттур э̄тпост э̄лы о̄выл ӯщлахтан хо̄талыт порат ханты ма̄хум ма̄ньха̄панылт каснэ ва̄рмаль ва̄рыглэ̄гыт. Ты та̄л тав хӯрумхойпловитыг о̄лыс. Рущ ла̄тӈыл «Кубок губернатора ХМАО-Югры по гонкам на обласах» ла̄ваве. Тав Нефтеюганский районт «Сказка» нампа ӯщлахтын ма̄т ва̄рыглаве. Ань о̄лум касыл ты та̄л о̄выл щёс мирхал касылыг намтвес. Ты кастыл ма̄хум тыг хӯрум са̄всыр нампа хо̄н ма̄ныл касуӈкв ёхталасыт. Эстония, Финляндия ос Латвия ма̄ныл о̄лсыт. Та̄н халанылт щар яныг делегация Финлядияныл о̄лыс, ат хо̄тпа. Округув янытыл ёхталам ма̄хум Нижневартовский, Белоярский, Березовский, Советский, Ханты-Мансийский, Нефтеюганский районытныл ос Когалым, Урай, Ханты-Мансийск ӯсытныл касуӈкв ёхталасыт. Ты коныпал Тюменский областьныл акв команда о̄лыс. Аквъёт пуссын са̄тхойплов команда, титса̄т ляпатем хо̄тпа атхатыглас. Ма̄нь ха̄пыл каснэ ва̄рмаль о̄вылтахтаме порат округ губернаторув Наталья Комарова о̄лыс. Тав ла̄выс: «Тыт о̄лнэ соссаӈ ма̄хум са̄в мутраӈ потрыт о̄ньще̄гыт. Ам та̄н мутраӈ потраныл номылматнэм порат мо̄тмо̄т ма̄т ва̄тихал ӯлылыянум. «Ка̄тыт пувим витын та̄рматан хӯл, ювле виӈкв ат ве̄рмилын». Тох ты ань ма̄нь ха̄пыл каснэ ва̄рмаль ёт е̄мтыс. Хуньт хосат тав номылматавес, щё̄питавес, ань ты хо̄тал мус тав уре̄т са̄в ма̄т ва̄ве. Ты та̄л ма̄н палтыланув касуӈкв, ёраныл суссылтаӈкв тыг хӯрум хо̄н ма̄ныл ма̄хум ёхтысыт. Ма̄н округув янытыл са̄в я̄ овты, пе̄с йис та̄гыл тит о̄лнэ соссаӈ ма̄хманув тамле ха̄пыл яласасыт. Таи ты ёмас та̄н пе̄с йис о̄лупсаныл щирыл ань ты хотал мус о̄лэ̄гыт. Ма̄н та̄наныл ты ма̄гсыл э̄руптыянӯв». Каснэ ва̄рмаль о̄вылтахтаме порат пуссын ёл «Горная» нампа я̄ ва̄тан «Витхон» янытлаӈкв минасув. «Витхон» Русскинский па̄вылныл о̄лнэ ханты ма̄хум пасан щё̄пита̄лсыт. Наталья Комарова ма̄н ётув о̄с вит ляпат лю̄ляхо̄лыс. Пурлахтамув юипа̄лт касыл ущ та о̄вылтавес. Касыл ма̄ньлат ма̄хумн о̄вылтавес, тан юипа̄ланныл ос яныгнув ма̄хум кассыт. Ма̄нь ха̄пыт ат то̄вылтахтсыт, халаныл ӯрсаныл, тох та касыт. Нижневартовкий, Сургутский ос Нефтеюганский районытт о̄лнэ ханты ма̄хмыт каснэ ха̄паныл ёт тотыгласаныл. Ма̄ньха̄п ва̄рнэ ма̄хум ка̄сыӈ хо̄тпа такви щире̄т ха̄п са̄гри. Каснэ ма̄т манах ха̄п о̄лыс, халанылт акв хурип ва̄рим ха̄п щар а̄тим о̄лыс. Сургутский район Русскинский па̄выл ма̄хум каснэ ха̄паныл ощща хосаг са̄грим о̄лсыт. Та̄н ма̄хманыл ва̄тихал хо̄ми ёӈхыгпа̄лсыт. Ха̄п ат о̄щнэ ма̄хум «Сказка» ӯщлахтын ма̄т о̄лнэ ха̄пыл касуӈкв майлуве̄сыт. Тот о̄лнэ ха̄пыт ханты ма̄щтыр хумин Василий Михайлович Хоровын ва̄рве̄сыт. Василий тох ла̄ви: «Ам ма̄ньлат хумыг о̄лнэм порат о̄выл ха̄п ва̄рсум. О̄влэ̄т ва̄рнэ ха̄панум ловиньтым о̄щсанум, ань ат пыл номилум ма̄нах ха̄п ам са̄грыгласум. Ва̄рнэ ха̄панум тынаныл яныг, хо̄тпатын ёмас ха̄п э̄ри те, тынэ урыл щар ат номсахтэ̄гыт, та̄ра та ва̄рылтэ̄гыт». Ха̄льӯс районныл касуӈкв ёхталам ма̄хум ма̄гсыл Василий Хоров тот о̄лнэ ха̄пытныл ха̄п такви пе̄рияс. Ёхталам ма̄хум ла̄всыт: «Ты пора ха̄панув витыт ёмащакв ла̄кве̄гыт! Ты э̄лыпал та̄ланувт ёхталамув порат ха̄панув ха̄п хӯрип ат о̄лсыт, ха̄пыг ла̄вуӈкв ат хо̄йхатасыт. То̄ва ха̄пыт со̄вииг ва̄римат, та̄рвитыӈыт ос сака хӯмплыӈ ха̄пыл ликмыгла̄лвесӯв. Ты порат тай касуӈкв ро̄ви». О̄выл хо̄тал ма̄хум вит тармыл каснэ ма̄ныл а̄стуманыл юипа̄лт ос ма̄ тармыл кассыт. Ё̄раныл а̄рталан щирыл, акванпӯхвтым касыл о̄вылтавес. Пе̄рщин ва̄рмаляныл «Нюлтахли» намаим о̄лы. Тох пе̄с йис порат ма̄хманув пе̄рщисыт, таве тащирыл ты ва̄рсаныл. Тамле касыл мо̄лты о̄выл щёс Русскинский па̄вылт ва̄рыглым о̄лыс. Таима̄гсыл ань тыт Русскинский па̄вылт касманыл щирыл ма̄хум кассыт. Ла̄гыл нёлыл мо̄т хумитэ ла̄гыл ва̄ӈкыртым ёлпаттуӈкв щар ат ро̄ви. Ка̄таныл мо̄т хум сыспа̄лн акванпувим ё̄рва̄гыл пе̄рщуӈкв э̄рыс. Халэ̄нт хотьютэ̄н са̄ртыннув ёлпаттаве, пе̄рщин ма̄ныл тав та арыгтаптаве. Халанылт каснэ щирыл хо̄н ма̄ныл ёхталан ма̄хум касуӈкв о̄с ла̄вхатсыт. Та̄н халанылт акв ма̄ньлат пыг туп о̄лыс, таима̄гсыл тав о̄лнэ ма̄хманэ ёт купнитнуве̄г касыс. Мо̄тананэ пуссын та̄рвитыӈнув ма̄хум ёт кассыт. Та̄н тыг пе̄рщуӈкв ёхталасыт, халанылт пуссын матыр пе̄рщин касыл ханищтасыт. Та̄наныл ты пе̄рщил хащталыг о̄лнэ ма̄т, таима̄гсыл пе̄рщин порат хо̄н ма̄хум нэ̄мхотьютаныл но̄х ат патыглас. Титыт хо̄тал о̄влэ̄т акв хо̄тпал кассыт. Тувыл титгыл щар юио̄вылт акв ха̄пыл хӯрмаххо̄тпа ӯнтым товсыт. Ха̄льӯс районыл ёхталам ма̄хум титгыл каснэ порат акв щёс пувлыст. Хӯрмыл товым ха̄пыл нила щёс хоми ё̄ӈхыгласыт, финишин онтоловит ха̄пыт ёхтысыт. Но̄хпатнэ районанув щирыл о̄влэ̄т Нефтеюганский район ла̄ввес. Тав юипа̄лэ̄т Нижневартовский район, хӯрмит места Сургутский район вистэ. Касыл оигпаме юипа̄лт каснэ ма̄хум Диплом ос пӯмащипа ла̄тӈыӈ пищмал янытлаве̄сыт. Ма̄н ма̄хманув халт Валентина Спиридоновна Вьюткина па̄нт телевизорыл ос «За волю к победе» нампа Дипломыл майвес. Ты порат щир ма̄ньлатыӈ хо̄тпат халт тит ня̄врам янытлавесы̄г, ты Ксения Коргополова, тав Урай ӯс командат касыс, тувыл ос Федор Аганджи, тав Нижневартовский районыл ёхталас. Щар яныгпа̄лаг каснэ хо̄тпа Марина Яковлевна Сенгепова, тав Сургутский районт са̄лы о̄ньщим во̄рыт о̄лы. Мо̄тынтыг акв та порат, акв та ма̄т тамле пумащ тах о̄с ва̄раве, ка̄сащан ма̄хум пӯмащ ма̄гсыл тув тах ялэ̄н, сунсэ̄н. 1080 2014.07.25. Валентина УЗЕЛЬ Стихыт хаснэ э̄ква. Нина Георгиевна Рукова Югорск ӯст о̄лы. Тав ань та ӯст о̄лнэ мирн ва̄ве, хосат та̄гыл стихыт хансы. Ялпыӈ хо̄талыт о̄лыгланэ̄ныл порат тав акваг тув во̄выглаве, такви хансум стиханэ мирн ловиньтыянэ. Тӯяг ме̄н тав ётэ хо̄нтхатыгласме̄н, тав такви уре̄тыл мощ потыртас. Тав а̄ще Георгий Александрович Ануфриев Ма̄нья па̄вылныл о̄лыс, 1930 та̄лт самын патыс. Ще̄мьяныл сака яныг о̄лыс. Нина Георгиевна о̄патэ Александр Матвеевич тит щёс нэ̄ тотыглас. О̄выл э̄кватэ а̄тимыг е̄мтме юипа̄лт лов ня̄враманэ ёт такте̄т хультыс. Титынтыг нэ̄ тотыс, иӈ лов ня̄врам самын патыс. Пуссын аквъёт та̄н хус ня̄врам яныгмасыт. А̄тятэ щар ма̄нь ня̄врамыг о̄лыс. О̄лме̄т са̄в та̄л во̄р ӯргалан хо̄тпаг рӯпитас. Оматэ Прасковья Гавриловна 1926 та̄лт самын патыс, тав такви а̄ги о̄парищ наме Фирсова о̄лыс. Та̄н Омский областьныл о̄лсыт, тэ̄та̄л о̄лум порат хӯрум лувыӈ суныл Конда ма̄ нупыл ва̄нтлысыт. Оматэ рущ нэ̄г о̄лыс, яныг хо̄нт порат педучилищат ханищтахтас. 1946 та̄лт Ня̄хщамво̄ль па̄вылн рӯпитаӈкв те̄твес. Тот хум ва̄рыс, ойкатэ̄нтыл нила а̄ги янмалтасы̄г. Прасковья Гавриловна налыман нупыл акв та̄л школат рӯпитас, ня̄врамыт ханищтас. Э̄лаль Нина Георгиевна а̄нумн такви уре̄тыл мощ потыртас, тав ла̄выс: «Ам «ветеран труда» нам о̄ньще̄гум. Ты ӯст 1978 та̄лныл о̄лэ̄гум, ты э̄лыпа̄лт Казахстан ма̄т о̄лсум. Ань юио̄выл та̄лыт сыс ам то̄рыл са̄всыр пормас ю̄нтэ̄гум, хӯл совныл матыр ма̄щтырлаӈкв ханищтахтэ̄гум. Сов ёмащакв ат тынтлылум, сов тармыл хораманэ то̄нт ат на̄ӈке̄гыт. Ма̄щтырлаӈкв о̄вылтахтамум порат ам торыӈыщ нэ̄матыр ва̄руӈкв ат ха̄ссум. Сортхул сове па̄рт тармыл ат то̄слыслум, номсысум, тув ханувьи. Кумыска тармыл пиныслум, хӯл сове тувто̄суӈкв патыс, кумыска ма̄ниг щар пулиг хотсакватавес, та̄ра хотвущкасаслум. Ань матыр ва̄рнэм э̄лыпа̄лт о̄влэ̄т ханищтахтэ̄гум, тувыл ущ ма̄щтырлэ̄гум. Стихыт ам школат ханищтахтамум па̄сныл хансэ̄гум. Пенсиян минамум юипа̄лт то̄нт ты са̄в хансуӈкв патсум. То̄ванакт школатт ман садикытт рӯпитан ма̄хум а̄нум во̄вияныл, та̄н ма̄гсыланыл матыр вос хансэ̄гум. Ань титыт ловиньтан нэ̄пакум ты та̄ратавес. Ам хӯрум ня̄врам о̄ньще̄гум, акв а̄ги ос тит пыг. Та̄н пуссын я̄нас колта̄глыл о̄лэ̄гыт. Та̄нанылн ня̄враманыл янмалтаӈкв нё̄тэ̄гум. Са̄в та̄л ма̄н, ӯсувт о̄лнэ соссаӈ ма̄хум, акванатхатыглэ̄в, ка̄ркам хо̄тпав Альбина Петровна тав ма̄навн атыглыянэ. Югорск ӯсув сака яныг кос а̄ти, ос тыт о̄лнэ ма̄хум ма̄ньщи ос ханты мир урыл са̄выӈпа̄лэ нэ̄матыр ат ва̄гыт. Матъёмас ялпыӈ хо̄талыт ва̄рыглавет, тув са̄в мир ёхталы, сака пӯмщалахтэ̄гыт». Нина Георгиевна сака ёмас сымыӈ хо̄тпа, тав ань са̄всыр ма̄н во̄выглаве, округувт о̄лнэ ма̄щтыр ма̄хумн ва̄ве. Пус ка̄т, пус ла̄гыл э̄лаль вос о̄лы. 1080 2014.07.25. unknown Кульпас ня̄врамыт ка̄тыл по̄слэ̄гыт. Ты хурит Ха̄льӯс район Кульпас па̄выл школат ханищтахтан ня̄врамыт та̄н ка̄тыл по̄слысыт. Школанылт ма̄ньщи ла̄тыӈ ханищтан нэ̄ Евдокия Ивановна Кугина тыг, Ханты-Мансийск ӯсн, ёхталас, «Лӯима̄ сэ̄рипос» газета ва̄рнэ колн щалтсас, ня̄врамыт хурит ма̄навн мис. Ма̄ньщи ня̄враманув ка̄тыл по̄слуӈкве татем хасэ̄гыт, хурияныл матъёмас ма̄ньщи газетавн тотве̄сыт. Ма̄н, редакцият рӯпитан ма̄хум, Евдокия Ивановнан пӯмащипа ла̄тыӈ ла̄ве̄в. Ня̄врамаквет пуста̄гыл вос о̄лэ̄гыт, о̄с са̄в хурит вос по̄слэ̄гыт, газета ва̄рнэ колувн вос ке̄тыяныл. Пуссын пуста̄гыл вос о̄лэ̄гыт, На̄й-О̄тыранылн вос ӯргалавет! 1081 2014.08.08. Редакцият рӯпитан ма̄хум Сым ща̄ргын ла̄тыӈ. Ты э̄тпос хӯрмит хо̄талэ̄т Ханты-Мансийск ӯст ханты нэ̄ Евдокия Николаевна Вожакова а̄тимыг е̄мтыс. Тав 1949 та̄лт Ха̄льӯс район Нумто па̄выл ля̄пат (налымантем ве̄рыста) во̄рколт самын патыс. А̄тятэ хул алыщлан ос во̄раян хумыг о̄лыс. Евдокия Николаевна Ка̄сум па̄выл школат ханищтахтас, 1966 та̄лт тот нёлолов класс а̄стлас. Э̄лаль Ханты-Мансийск ӯст о̄лнэ педучилищат ханищтахтас (1966-1970 та̄лытт), тувыл Ленинград ӯст А. И. Герцен нампа педагогический институтт ханищтахтас (1970-1976 та̄лытт). Институт а̄стламе юипа̄лт тав школат рущ ос ханты ла̄тыӈ ханищтан учителиг о̄лыс (1976-1979 та̄лытт), ня̄врамыт ханты ла̄тӈыл ханищтан ма̄гыс нэ̄пакыт ос словарит хансыс (1979-1991 та̄лытт), Обскоугорский институтт научный сотрудникыг рӯпитас (1991-1999 та̄лытт), «Югория» нампа округ радиот ханты ла̄тӈыл передачат ва̄рыс (2001-2005 та̄лытт). Евдокия Николаевна кит а̄ги ос акв пыг о̄ньщиглас. Тав хо̄тпа нупыл сымыӈ нэ̄ о̄лыс. Ань иӈ о̄лнув, а̄гме̄н ёлпаттувес. Ма̄н, редакцият рӯпитан ма̄хум, тав ня̄враманэ̄н ос рӯт хо̄тпанэ̄н сым ща̄ргын ла̄тыӈ ке̄тэ̄в. Ты мӯтраӈ, нё̄мса нэ̄кве ма̄гыс ма̄н сыманув о̄с ща̄рге̄гыт. 1081 2014.08.08. Александр ВЬЮТКИН Пе̄риян кастыл щё̄питахтан ва̄рмаль. О̄йттур э̄тпос оигпан хо̄талэ̄т Ханты-Мансийск ӯст о̄лнэ ОТРК-Югра РИЦ нампа колт Тюменский область губернатор пе̄рияпын щё̄питахтан ма̄гыс прессконференция ва̄рыглавес. Журналистыт нупыл аквтит ла̄тыӈ ла̄вуӈкве Борис Хохряков ёхталас. Борис Сергеевич округ янытыл «Единая Россия» тармыл кӯщаиг о̄лы. Щар о̄влэ̄т тав ла̄выс: «Область губернатор юио̄выл щёс 2001 та̄лт пе̄риясув. То̄нт Тюменский область губернаторыг Сергей Собянин но̄хпатыс. Та юипа̄лт пе̄риян ва̄рмаль хо̄тпо̄илтта̄лвес. Ты та̄лныл таве ос э̄лаль ялтуптаӈкв номылматвес». Ля̄ххал тотнэ хо̄тпат титыглахтасыт: «Манрыг ма̄навн, округт о̄лнэ ма̄хмытын, э̄лынт о̄лнэ кӯщай пе̄рияӈкв? » Ты урыл Борис Сергеевич Хохряков ювле тох ла̄выс: «О̄лнэ колынт колпо̄х хо̄тпа пе̄рияӈкв ро̄выс те, на̄н ос сыстамыг о̄лнэ, потыльма ат ва̄рнэ хо̄тпа пе̄риянувын. Акв та щирыл ма̄н тох ты пе̄рие̄в. Область губернаторув мир торгамтан кӯщаиг вос о̄лы. Тувыл ос но̄х–патнэ хо̄тпа ма̄н округувн вос нё̄ты. «Единый Россия» партияныл ма̄н Владимир Владимирович Якушев тув ла̄выслув. Ам та хум хо̄сатта̄гыл ва̄глум, ма̄н округувн тав ётэ рӯпитаӈкв кӯстыр». Тюменский область губернатор пе̄рияӈкв ё̄рн ма̄хум ма̄наныл (Ямало-Ненецкий автономный округ) о̄с паты. Ты пе̄рияп сӯкыр э̄тпост нёловит хо̄талыт тах ва̄раве. Пе̄рияӈкве ялэ̄н, хотьют на̄нан мусты, таве пе̄рие̄н. 1081 2014.08.08. Александр ВЬЮТКИН Са̄в мир акв то̄рыг акв ма̄т. Во̄ртур э̄тпост Ха̄льӯс районт Саранпа̄вылт йильпи пӯмащ ва̄раве. Рущ ла̄тӈыл III Окружной туристический слёт форум «Просторы Югры» ла̄ваве. Аквъёт пуссын яныгса̄т арыгтем хо̄тпа Нораты нё̄р палт мины. Халанылт та̄н са̄т группа щирыл уртхатэ̄гыт. Касыӈ группаныл та̄нти лё̄ӈханылт Нораты ос Корпиншор я̄г акванхо̄йнэ ма̄ мус нёлолов щислат ёхтуӈкв э̄ри. Тот ты палатканылт о̄луӈкв патэ̄гыт. Акванёхтынэ̄ныл хо̄тал юипа̄л хо̄талт ос Нораты нё̄р нумпа̄лэ̄н ха̄хсан номт о̄ньще̄гыт. Но̄хво̄раталнэ̄ныл юипа̄лт ос тит нупыл Нораты я̄ ло̄ӈхаль ос Кедрасью я̄ нупыл ё̄ме̄гыт. Э̄лаль та тит я̄г щирыл катомаран ха̄пыл Саранпа̄выл мус на̄тылтым минэ̄гыт. 1081 2014.08.08. Александр ВЬЮТКИН Са̄всыр те̄рныл хорамыт щё̄питан хум. Сургут ӯст са̄всыр пормасыт ма̄щтырлан ма̄хум акванатыглаве̄сыт. Ам Дмитрий Алексеевич Прибыльнов ёт ва̄йхатасум. Тав пе̄с пора щирыл те̄рныл ва̄рнэ хорамыт ма̄щтырлан хумыг о̄лы. Дмитрий рӯпитан ма̄тэ «Сибирская БРОНЗА» ла̄ваве. Таве̄н ты ва̄рмаль студентыг о̄лме порат пӯмащиг е̄мтыс. Такви о̄лум Тобольск ӯс ма̄тэ̄т ка̄тыл по̄слын колт ханищтахтас. Ка̄сыӈ тув ӯщлахтанэ̄ныл порат, юрт ма̄хманэ ёт пе̄с па̄вылканыт хилуӈкв ялантасыт. Колъёрыт но̄ххилум ма̄ныл ос хо̄нтыглам пормасаныл учёныиг о̄лнэ ма̄хмытын ханищтаве̄сыт. Хо̄нтыглам хораманыл Дмитрий такви пӯмщаласанэ, сунсыгласанэ ос по̄слысанэ. Тувыл ханищтахтын ма̄ныл а̄стуме юипа̄лт акв та пе̄с хольт а̄нох ос ща̄лыголн те̄рныл хорамыт ва̄руӈкв номылматас. О̄влэ̄т нас уральтан щирыл ва̄рыс, та̄н виӈкв патавет ман а̄ти. О̄выл ва̄рыглам хораманэ та̄ра пуссын вуйве̄сыт. Тувыл та̄наныл э̄лаль ва̄руӈкв та патыс. Ань ты коныпал тав иӈ янгуй, са̄лыӈ а̄ньтыл ос ма̄хар лувыл хорамыт якты. Ва̄рнутанэ халт пальщимщакыт, тулят, сыплувын тагатан хорамыт ос са̄всыр хурил э̄нтап те̄рыт ва̄ри. Хораманэ ам ва̄санум, пуссын ма̄щтырыг а̄ртме̄гыт. Потыртамуме̄н сыс са̄в хораманэ ма̄хумн ёвтве̄сыт. То̄ват та̄нти о̄щнэ ма̄гсыланыл, то̄ват ос нас хотьютын мӯйлуптаӈкв. Мӯйлуптан щирыл Дмитрий ва̄рум утанэ щар ма̄к ёмасыт. Ёхталам ма̄хумн Дмитрий Алексеевич сымын ро̄внэ номтыӈ ла̄тӈыл, э̄лаль о̄лнэ хо̄талыл янытлавес. Ам таве̄н э̄лаль пуста̄гыл о̄лнэ ла̄тыӈ о̄с те̄тэ̄гум. 1081 2014.08.08. Александр ВЬЮТКИН А̄ньт лувыл хорамыт яктын нэ̄. Сургут ӯст ма̄щтыр ма̄хум ва̄йхатнэ мирхал фестиваль о̄лме порат ам ка̄тыл по̄слан ос янгӯй, са̄лыӈ а̄ньтыл са̄всыр хорамыт яктын нэ̄ ёт ва̄йхатыглахтасум. Тав наме Ирина Викторовна Могутова. Тав пӯмащ ва̄рмале атхойплов та̄л ты ва̄ритэ. Ань тав Тюмень ӯст о̄лы, такви тэ̄ла о̄ньщи, такви ма̄гсылэ рӯпиты. Тав ётэ юрт нэ̄тэ Зинаида Леставская рӯпиты. Тэ̄н ма̄щтырлан ва̄рмале̄н щирыл ма̄ янытыл са̄в ма̄т яласасыг. Хо̄н ма̄н ва̄тихал во̄виньта̄лыглаве̄г. А̄ньт лувыл яктын са̄всыр ханищтап ва̄руӈкв во̄ваве̄г. Та коныпал тэ̄н Тюмень ӯст о̄лнэ «Центр прикладных исследований и разработок» нампа колт ханищапыт ва̄рыгла̄лэ̄г. Ирина Викторовна ла̄ви: «А̄нумн тох рӯпитаӈкв пӯмащ. Мансавит солко̄ви сэ̄лыме̄н, пуссын ме̄нти ще̄пме̄н пиныянаме̄н. Манахыл ойтавен пуссын, наӈти утанын». Ирина Викторовна Сургут ӯсн ёхталаме порат са̄в та̄л ма̄щтырламе ма̄гсыл янытлан нэ̄пакыл майвес. 1081 2014.08.08. Тамара МЕРОВА Пе̄с о̄лупса ӯргалан э̄кваго̄йкаг. Хантыт ос ма̄ньщит халт пе̄с накыт ӯргалан хо̄тпа ка̄сыӈъе̄мт мощщамлы. Тувыл тамле хо̄тпат ёт ва̄йхатахтынэ̄в порат ма̄н хотща̄гтым о̄лэ̄в. То̄внакт та̄н ты кос та̄рвит о̄лупсал о̄лэ̄гыт, ос пе̄с наканыл ат хультуптыяныл, э̄лаль тотыяныл. Мо̄лал Русскинская па̄вылн ялмумт акв ханты нэ̄ ёт ва̄щинтахтасум. Нэ̄ наме Клавдия Григорьевна Покачева, тав ще̄мъяӈ та̄гыл са̄лыл каснэ ва̄рмальн ёхталас. На̄н потре э̄лаль ловиньтэлы̄н. – Ме̄н о̄йкаме̄нтыл акв юипа̄лт хӯрмит та̄л тыг са̄лыл касуӈкве ёхтала̄лыме̄н. Ты та̄л омам ме̄н ётме̄н о̄с ёхтыс, тав 77 та̄лэ то̄влыс. А̄тям ювле хультум нила та̄л порат та̄рвит а̄гме ма̄гыс хотталь щалтыс. Са̄ртын ма̄н колта̄глыл Пим я̄ по̄хат Винка ма̄т о̄лсӯв, ма̄нки атпан са̄вит са̄лы о̄щсӯв. Ще̄мъяв яныг, омагума̄тягум онтолов ня̄врам янмалтасы̄г, ань са̄т ня̄врам хультсыт. Ам 1973 та̄лт во̄рт самын патсум. Тувыл ма̄н яныгнуве̄г е̄мтмув порат Русскинский па̄выл ляпан ва̄нтлысӯв. Тув ханищтахтуӈкве тотыглавесӯв. Ос ты е̄рт о̄лмувт нусаг о̄луӈкве патсӯв, са̄лыянув мощщамласыт. Омам ань ва̄т нупыл ат са̄вит са̄лы туп о̄ньщи. Ётыл ам хум ва̄рсум, хумум наме Альберт Николаевич Покачев. О̄йкам ща̄нягеа̄щаге хосат а̄тимыг е̄мтсы̄г, тэ̄н о̄с са̄лы янмалтым о̄лсы̄г. Ам ще̄мьям ёт ань Тромаганыт о̄лэ̄гум. Ма̄н о̄с ва̄т са̄вит са̄лы о̄ньще̄в. Тыи пуссын ма̄нки янмалтым са̄лыянув, по̄х ма̄ныл ат ёвтыгласӯв. Ме̄н о̄йкаме̄нтыл хо̄т нэ̄ви са̄лы о̄щсуме̄н, мо̄лты акв нэ̄ви са̄лыюв хоттыпыс, нэ̄мхот ат та хо̄нтыгласлуме̄н. Ӯйхул пусмалтан ле̄ккарыт ма̄н палтув та̄нки ат ю̄выт. Та̄н палтаныл ла̄тыӈ ке̄тэ̄в ос тувыл ма̄нки ДНС ляпа ма̄н са̄лыянув по̄сыянӯв. Та ма̄т та̄н прививкатыл ва̄равет ос тувыл ювле та минэ̄в. Тамле ва̄рмаль ма̄навн сака та̄рвитыӈыг о̄лы. Ма̄нки Русскинская па̄вылн ёхталанэв порат ле̄ккарыт палт ялантэ̄в. Во̄рн та̄л сыс аптечкато̄тапсов щирыл тэ̄рпил ке̄тыглаве̄в. Ань тыг ёхтумувт пӯльницан щалтсуӈкве ат а̄лымасӯв. Ялпыӈ хо̄тал ма̄гыс ё̄рнколыт тӯщтымав, кӯрыт па̄лтымав сыс порав аквта щёс минам. Каснэ ма̄гыс тыг ёхталаӈкве ма̄н 120 ве̄рыста са̄лыл ёхталэ̄в. Лё̄ӈхув та̄рвит кос, ос ма̄навн тыт пӯмащ. Са̄в ма̄хманув ёт тыт акванхо̄нтхатыглэ̄в, тувыл ня̄врамагме̄н тыт ханищтахтэ̄г. Милана а̄гиме̄н хо̄т классыт ханищтахты, Радик пыгме̄н атыт классыт. Света а̄гиме̄н онтолов класс а̄стлас, ос ётыл хум ва̄рыс. Кит ня̄врамагме̄н а̄тимыг е̄мтсы̄г. Касылыт са̄лыянув ёт но̄х ат патыгласӯв, ма̄хумныл сака пилэ̄гыт. Юн о̄лте̄вт хотты мӯй хо̄тпа о̄лэ̄гыт ке, та̄н коральн ат щалтэ̄гыт, во̄рт хо̄т ха̄йтыгтэ̄гыт. Ма̄нки хультэ̄в, тувыл ущ щалтэ̄гыт. Нефтянникытн мощ нё̄таве̄в. Хӯрум э̄тпос сыс акв хо̄тпа кит со̄тыра солко̄вил ойтаве, тыгыл ма̄н налоголныл ювле пуваве̄в. Снегоход «Бураныл» нила та̄л сыс акв щёс майла̄лаве̄в ос китхойплов пе̄нщинпӯщкал майла̄лаве̄в. Тыгыл ат товлаве̄в, ма̄нки я̄нас о̄с ёвтэ̄в. Тувыл «Буран» хотсаквалы ке, ма̄нки о̄с ва̄риянув. Тув сыресыр щаӈквыт ёвтуӈкве э̄ре̄гыт. Тэ̄нут ёвтнэ ма̄гыс олн мощ ма̄нки сэ̄лэ̄в. Пил ва̄тэ̄в, тувыл Нижний Сортым па̄вылн, Сургут ӯсн манос машина яласан лё̄х хосыт тыналаӈкве тотыянӯв. Тамле о̄лупсал та о̄лэ̄в. Ня̄враманме̄н пе̄с нак щирыл о̄луӈкве патэ̄гыт манос а̄ти, ат ва̄глуме̄н. Ханты ла̄тыӈ ва̄гыт, юн потыртэ̄в. Тувыл ма̄нки хурип ю̄нтым супыл, сахил, ла̄гыл маснутыл ос масхатэ̄гыт, ат э̄ссамтэ̄гыт. Касыл ва̄рнэ хо̄талыт Клавдия Васильевна са̄лыянэ̄н ювлеё̄ӈхыгпаве̄сыт. Акв э̄лумхо̄лас та̄н э̄лыпа̄лытыт хури по̄слуӈкве нэ̄глапас, нэ̄ са̄лыянэ рохтуптасанэ. О̄йкатэ мо̄т каснэ хумит халт мощнув ювлехультыс. Я, тав кос, ве̄к мо̄тынтыг тэ̄н со̄тэ̄н е̄мты. Ма̄н ос ты колта̄гыл мирхал соссаӈ ма̄хум ялпыӈ хо̄талыл янытлыянӯв. Тувыл ты э̄тпост э̄кваго̄йкаг акванминамен пасыл хус та̄лыг е̄мтыс. Пус ка̄т, пус ла̄гыл, ос То̄рум ёт, О̄тыр ёт та̄н э̄лаль вос о̄лэ̄гыт! 1081 2014.08.08. Людмила ТЕТКИНА Хо̄нтаӈ ма̄ньщи э̄ква. Нина Алексеевна Маркевич 1945 та̄лт сӯкыр э̄тпос 16 хо̄талэ̄т Кондинский район Карым па̄вылт самын патыс. То̄нт Карым яныг па̄влыг ловиньтахтас, са̄в мир тот о̄лыс. Нина Алексеевна школат тот ханищтахтас. Тувыл Ханты-Мансийск ӯсн минас, 1961 та̄лт педагогический училище а̄стлас. Та пора урыл ма̄ньщи э̄ква таи ла̄выс: «Ма̄н группавт са̄в ма̄ньщи а̄гит ханищтахтасыт, та̄нки халанылт та̄н акваг туп ща̄нь ла̄тӈыл потыртасыт. Ма̄н Кондинский районыл ёхтум ма̄ньщи а̄гит та̄н ла̄тӈаныл ат торгамтасанӯв. Омам ма̄ньщи ла̄тӈыл ёмащакв потыртаӈкве ха̄сыс, ам ма̄нь та̄гыл юн ща̄нь ла̄тыӈ хулсум, тувыл мӯсхал щирыл потыртаӈкве ат тэ̄лыс. Училищат ма̄н Та̄гт ма̄ньщи ма̄хум ла̄тӈаныл ханищтасув. Ань тай хо̄нтаӈ ма̄ньщи ла̄тыӈ ва̄нэ хо̄тпа щар а̄тим, тыи ма̄гсыл ам ща̄нь ла̄тӈум о̄с хо̄тёрувлаӈкве патыслум. Советский власть о̄лум порат, пуссын рущиг ва̄рвесӯв, ща̄нь ла̄тӈыл потыртаӈкве ат та̄ртвесӯв. Тыи ма̄гсыл ам ня̄враманум ма̄ньщи ла̄тӈыл потыртаӈкве о̄с ат ханищтасанум». Нина Алексеевна яныг ще̄мьят яныгмас, ща̄нягеа̄щаге онтолов ня̄врам янмалтасы̄г. Ще̄мьянылт тав щар ма̄ниг о̄лыс. Оматэ Ефросинья Дмитриевна Карым па̄вылныл о̄лыс, тот интернатыт ня̄врам ӯргалан нэ̄г са̄в та̄л рӯпитас. А̄тятэ Алексей Семёнович Чадов, Свердловский областил ёхтум рущ хум. Тав Карым па̄вылн школа ӯнттуӈкве ёхтыс, тот Ефросинья Дмитриевнал акванхо̄нтхатсы̄г, акванминасы̄г. Нина Алексеевна о̄йкатэ̄нтыл нила ня̄врам янмалтасы̄г. Кит та̄л ювле хультум порат о̄йкатэ а̄тимыг е̄мтыс. Акв а̄гитэ̄н Шугур па̄вылт колта̄глэ ёт о̄лы, кит а̄гияге Ханты-Мансийск ӯсн ва̄нтласы̄г. Пыге туп э̄лы ма̄н о̄луӈкве минас, ань ще̄мьяӈ та̄гыл Ивановский областьт о̄лы. Э̄ква ла̄ви: «Та палыт ма̄т о̄лым, пыгум а̄нум ат ёрувлытэ, мӯйлуӈкве тыг ёхталы. Ханты-Мансийск ӯсн амки ва̄тихал ялантэ̄гум, а̄гиягум ёт тот ва̄щинтахтэ̄гум. Ань ма̄ньлат ма̄хум тай пуссын яныг ӯст о̄луӈкве воратэ̄гыт. Тувыл ӯст ос ёмас рӯпата хо̄нтуӈкве ат ве̄рме̄гыт. Ань тай о̄лнэ колыл ат мивет, о̄лнэ кол та̄нки кинсэ̄гыт, тув яныг олн ойтэ̄гыт. Ма̄н ма̄ньлат хо̄тпаг хунь о̄лсӯв, тармле та̄рвитыӈ ва̄рмаль а̄тим о̄лыс. Ханищтахтан ма̄ныл а̄стлысӯв, та̄ра рӯпитаӈкве ке̄твесӯв. Рӯпитан па̄вылн ёхтысӯв, о̄лнэ колыл майвесӯв. Ань тай ма̄ньлат ма̄хум рӯпата ос кол та̄л тох та са̄валэ̄гыт». Нина Алексеевна Шугур па̄вылт школат ня̄врам ханищтан хо̄тпаг са̄в та̄л рӯпитас. 60 та̄лэ то̄влуме порат пенсиян минас. Нина Алексеевна колэ̄т акваг ня̄врам мовиньт суйты, тав палтэ а̄пыгрищанэ акваг ёхталэ̄гыт. Ань тав палтэ а̄гитэ а̄ги Маша ӯщлахты. Маша такви уре̄т ла̄выс: «Ам намум Маша Нохова, сӯкыр э̄тпост ам о̄выл классын ханищтахтуӈкве минэ̄гум. Ам ловиньтаӈкве ёмащакв хасэ̄гум, ка̄тыл хурит по̄слуӈкве э̄руптэ̄гум. Ам са̄в рӯт о̄ньще̄гум, та̄н наманыл: Ксюша, Соня, Рита, Захарка, Данька. Ма̄н аквъёт акваг ёнгасэ̄в. Ам кӯтюврищ о̄ньще̄гум тав наме Туман, ты коныпал ос кати о̄ньще̄гум тав таме Бусинка, яныг ка̄тим наме Фигаро. Ос акв каӈкум урыл ла̄вуӈкве хотёрувласум, тав наме Михейка, тав ётэ о̄с ёнге̄гум». Тамле потрыӈ ма̄нь а̄гирищ Нина Алексеевна палт ӯщлахты, ане̄кватэ̄н са̄в ща̄гт тоты. Наталья Ткачук ке̄тум потыр ма̄ньщи ла̄тӈыл Л. Теткина хансытэ. 1081 2014.08.08. Светлана РОМБАНДЕЕВА Ло̄пмуст о̄лнэ колыт ӯнттавет. Ха̄льӯс район Ло̄пмус па̄вылт о̄лнэ колыт ӯнттавет. Колыт ӯнттын ва̄рмаль урыл ам Сергей Владимирович Хозумов ёт потыртасум. Тав ма̄ньщи хум, Ло̄пмуст самын патыс, тот яныгмас. Ань колыт ӯнттын ма̄т тав бригадирыг рӯпиты. Сергей Владимирович ла̄вме щирыл, ты колыт Ягримт о̄лнэ «Сосьва» нампа национальный община па̄лыл ӯнттавет, кӯщаяныл Николай Геннадьевич Полуянов. О̄лнэ колыт та̄н 1991 та̄л па̄сыл ӯнттэ̄гыт, ты коныпал тэ̄лы лё̄ӈх ва̄ре̄гыт, сыстамтэ̄гыт – Саранпа̄выл, Приполярный, Кульпас ос Кимкьясуй па̄влыт халт рӯпитэ̄гыт. Ты общинат рӯпитан ма̄хум аквтох Ягримт ос Саранпа̄вылт колыт ӯнттэ̄гыт. Са̄в кол Кульпаст ӯнттысыт – ат кол кит квартира о̄ньще̄гыт, тувыл ат янас кол. То̄ва пе̄с колыт йильпииг щё̄питасаныл. Ло̄пмуст ань хӯрум кол ӯнттэ̄гыт – кит кол кит квартира о̄ньще̄г, акв кол ос хӯрум квартира о̄ньщи. Сергей Владимирович ла̄ви, колыт та̄н йильпи та̄л кастыл а̄стлыяныл, ма̄хум тах коланылн ва̄нтлэ̄гыт. Хотальа̄ти э̄рнэ ма̄шинат, тракторыт, катерыт манос колыт ӯнттын магыс э̄рнэ матыр пуссын о̄лы. Колыт ӯнттын ахвтас утыт (блокыг ла̄вавет) та̄н Екатеринбург ӯсныл тотэ̄гыт. Насати, та палыт ма̄ныл тыг та харттынэ̄ныл. Тот ань атхуйплов хо̄тпа рӯпиты, олныл ка̄сыӈ э̄тпос ойтавет. Ма̄ньщи пыгыт Хурит хӯрум ма̄ньщи пыганӯв по̄слым о̄лэ̄гыт. Та̄н ань пуссын кол ӯнттын ма̄т рӯпитэ̄гыт. Александр Сергеевич Лыткин Кимкьясуй па̄вылт олы, 1983 та̄лт самын патыс. Оматэ Евдокия Владимировна Ло̄пмус па̄выл нэ̄, а̄ги о̄парищ наме Албина. Атятэ Сергей Валентинович Лыткин. Увщи о̄ньщи, наме Люба, тав Ня̄хщамво̄ль па̄вылт о̄лы, хӯрум ня̄врам о̄ньщи. Саша э̄кватэ Анна, а̄ги о̄парищ наме Анямова. Тэ̄н кит пыг янмалтэ̄г – Данил ос Дима, Кимкьясуй па̄вылт о̄лэ̄гыт. Яныгнув пыге Данил о̄с а̄тятэ ёт Ло̄пмус па̄вылн ёхтыс, па̄выл ня̄врамыт ёт тот ты ёнгасы, ха̄йтыгты. Ам пыгрищ нупыл ла̄ве̄гум, ты щаще̄кван тав яныгмам па̄влэ, ань ос наӈ тыт та ё̄мыгтэ̄гын, поргащлэ̄гын. Саша китыглылум, та̄н ань «Лӯима̄ сэ̄рипос» ма̄ньщи газета ловиньтэ̄гыт ман а̄ти. Ла̄ви, ловиньтэ̄гыт, ща̄нягеа̄щаге ма̄ньщи ла̄тӈыл потыртэ̄г. Котильт лю̄льнэ пыгув тай Александр Владимирович Таратов. Саша Ло̄пмуст самын патыс, яныгмас. Ты та̄л яныгполь э̄тпост тав оматэ Клавдия Ивановна а̄тимыг е̄мтыс. Таима̄гыс ам тав палтэ ат ялсум, ат китыглахтасум. Саша ще̄мьятэ ёт Ло̄пмус па̄вылт о̄лы, ня̄враманэ янмалты. Хӯрмит пыгув Юрий Николаевич Черепков 1988 та̄лт самын патыс. Оматэ Ольга Леонидовна Остерова Потрасуй па̄выл нэ̄, а̄тятэ Николай Николаевич Черепков Ха̄льӯс па̄выл хум. Юрий о̄выл классытт Ха̄льӯст ханищтахтас, тувыл э̄лаль Кульпаст ханищтахтас, тот аквхуйплов класс а̄стлас. Школа а̄стламе юипа̄лт Ягрим па̄вылн минас, тот колледжит бульдозерит ва̄рмальн ханищтахтас. Тав ань ще̄мьятэ ёт Кульпаст о̄лы, э̄кватэ наме Алена, пыге Илья. Ло̄пмус па̄вылт тамле ка̄ркам пыгыт та рӯпитэ̄гыт. Та̄н ла̄внэ̄ныл щирыл, тот та̄нанылн пуссын мӯсты, туп лё̄мвой сака са̄в, рӯпитан уракыл ат мивет. Рӯпитан ма̄хум Светлана Герасимовна Хатанзееван тэ̄нутыл па̄йтавет, тэ̄пъялэ̄гыт, мощ ӯщлахтэ̄гыт, тувыл о̄с э̄лаль та рӯпитэ̄гыт. Ты я̄тил ма̄ньщи хо̄тпанув пуста̄гыл вос о̄лэ̄гыт, На̄й-О̄тыранылн вос ӯргалавет! 1081 2014.08.08. Тамара МЕРОВА О̄лупсав пе̄с хуриянув щирыл ханищтаве. Ты накт о̄с акв йильпи нэ̄пак та̄ратавес, «Портреты обских угров» намаим о̄лы, таве Раиса Бардина щё̄питастэ. Тот ювле хультум нотт 1930-1970 та̄лыт сыс пӯмыщ хурит акванатым о̄лэ̄гыт. Мо̄лты та̄л ва̄ти хо̄тал э̄тпост ме̄н Раиса Калистратовна ёт ты нэ̄пак урыл потыртасме̄н. То̄нт тав ла̄выс: «Ам йильпи нэ̄пак та̄ратан щирыл ань рӯпитэ̄гум. Ма̄ньщи ос ханты рӯтанум палт ялнэм порат са̄всыр пе̄с хурит ка̄сала̄лсум. Та̄н тот та̄нки ю̄нтум маснутанылт о̄лсыт. Ётыл таил э̄лаль пӯмщалахтуӈкве патсум. Тувыл матахмат хурит акванатсум, ты э̄лыпа̄лт хансум нэ̄паканумн то̄ват тув по̄слыгласанум. Соссаӈ ма̄хманув та̄нки рӯтаныл тот ка̄салыяныл ос а̄нумн матыр ла̄тыӈ ке̄тэ̄гыт. Та̄нки палтаныл о̄лум пе̄с хурит о̄с а̄нумн суссылтыяныл ос матыр потыртэ̄гыт. Та юипа̄лт хуриӈ нэ̄пак ва̄руӈкве а̄нумн Надежда Васильевна Лукина номт пиныс. Ты э̄ква ам диссертациям хаснэм ос таве вуянтамум порат научный кӯщаиг о̄лыс. Туп ань ты нэ̄пакум щё̄питамум порат нэ̄мхумус нё̄туӈке ат ве̄рмыс, такви са̄в рӯпата о̄ньщис. Ам хурит ос тув хансум потранум Новосибирский институтт археология ос этнография тармыл о̄лнэ издательствоколн ке̄тсанум. Та̄н ётаныл аквъёт рӯпитан договорнэ̄пак хассум. Хуриӈ нэ̄пакум ва̄рнэ ма̄гыс амки олн тув ойтсум. Ос ты нэ̄пакум хорамыӈыг ва̄рнэ̄ныл щирыл иӈ олн кинсуӈкве э̄ри кос. Нэ̄пакум моляхнув ва̄руӈкве, ва̄им, таӈхе̄гум. Тот ма̄нки соссаӈ ма̄хманув хумус пе̄с порат о̄лсыт, манхурип маснутыл масхатым о̄лсыт, манхурип рӯт хо̄тпа о̄щсыт, пуссын хури нупыл сунсым та̄рапаттавет. Ам номсэ̄гум, ты ва̄рум рӯпатам са̄в хо̄тпатн тах пӯмщиг е̄мты». Раиса хури по̄слум нэ̄паке та̄ратанэ̄тэ ма̄гыс ань кит ма̄ньщи хо̄тпагн олныл нё̄твес. Тыи российский боксёрпрофессионал Руслан Проводников ос такви ма̄гсылэ рӯпитан предприниматель нэ̄ Наталья Чайникова. Тэ̄н коныпалэ̄н Раиса Бардина о̄с са̄в хо̄тпатн пӯмащипа ла̄тыӈ ла̄ви, тыи пе̄с хурит майлам ще̄мьятытн ос хурит о̄вылтыт ла̄тыӈ хӯлтнэ ма̄хумн. Ты коныпал сака ёмас нётмил ва̄рсыт, рӯтаныл о̄вылтыт я̄нас потыртасыт. Нё̄тмил ва̄рнэ ма̄хум наманыл пуссын нэ̄пакыт хансым о̄лэ̄гыт. «Портреты обских угров» нэ̄пакет 355 са̄всыр хурит по̄слуве̄сыт. Тыи янгыщ А̄с я̄ ос Лӯи е̄р Та̄гт я̄ ва̄тат о̄лнэ соссаӈ ма̄хум. Ма̄хум па̄вланыл щирыл хури по̄хат хасве̄сыт. Тувыл нэ̄пакт карта по̄слым о̄лы, тот ка̄сыӈ па̄выл хӯлтвес. Хурит пуссын та̄ланыл щирыл ла̄ккваӯртве̄сыт ос я̄насыг суссылтавет. О̄влэ̄т 1930 та̄лт ос тыгыл э̄лаль миннэ та̄лыт порат по̄слум хурит нэ̄пакн щё̄питаве̄сыт, тувыл 1940йт, 1950ит, 1960ит ос 1970ый та̄лыт порат. Сака пе̄с хурит са̄всыр учёныит хантыт ос ма̄ньщит палт ялманыл порат по̄слыгласаныл. Тувыл ма̄нь па̄влытын хури по̄слум хо̄тпат ке̄тыгла̄лве̄сыт. Ма̄хум то̄нт ще̄мъяӈ та̄гыл по̄слуве̄сыт. Ма̄ньлат а̄гитпыгыт хо̄т ханищтахтынэ̄ныл порат манос пыгыт армият лусытан сыс о̄с по̄слахтасыт. Ханты ос ма̄ньщи ма̄хум маснутаныл ханищтым А. А. Богордаева учёный нэ̄ ты о̄вылтыт са̄в потыр хансыс. Ань акв ма̄нь потре о̄с ты нэ̄пакыт хасвес. Хурит нупыл сунсым ханты ос ма̄ньщи ма̄хманув о̄лупсаныл ёмащакв иӈ э̄лаль ханищтаӈкве ро̄ви. Тыи э̄рнэ ёмас нэ̄пак мо̄т учёныитн о̄с пӯмщалаве тах. 1081 2014.08.08. Александр ВЬЮТКИН Каснэ ма̄т рӯпитан пыг. Касум па̄вылт Белоярский районт ма̄ньлат потрыӈ ханты хум о̄лы. Тав наме Наиль Артурович Салахов. Ты хум ма̄ньта̄гыл лӯи ма̄ ма̄хум касылыт касы. 2000 та̄лт тав «Мастер спорта России» намыл ма̄йвес. Щар о̄влэ̄т тэ̄лы ащирмат юрт пыгрищанэ̄т кон ха̄йтыгтаманылт толтыглахтын ма̄гсыл каснэ колн щалтапасыт, Наиль то̄нт ты о̄выл щёс лӯи ма̄ ма̄хум касыл ка̄саластэ. Та порат тав лов та̄л яныт пыгрищиг о̄лыс. Мо̄т щёс ёхталаме̄т нас тох по̄хт сунсым ат люлис, такви но̄тпа хум ня̄врамыт ёт касыс. Каснэ̄тэ порат а̄ти тох та̄ра пуссын а̄ртмуӈкв патыс. О̄выл тит та̄л каснэ̄тэ сыс аквписыг котиль ма̄т вис. Тувыл касыл э̄лаль артмуӈкв та патыс, ва̄тихал но̄хпатыглас. Школа а̄стлуме юипа̄лт та̄ра Ханты-Мансийск ӯсн каснэ щирыл ня̄врамыт ханищтан хумыг ханищтахтуӈкв минас. Колледж нампа колт Наиль ат та̄л ханищтахтас. Тот ханищтахтын ма̄ныл а̄стуме юипа̄лт ювле такви Касум па̄влэ̄н о̄луӈкв минас. Тот тав интернат колт ня̄врамыт каснэ щирыл ханищтан хумыг рӯпитаӈкв патхатас. Тувыл э̄лаль ханищтахтуӈкв номылматас. А̄с угорский университетын ос акв та каснэ̄тэ щирыл ханищтахтуӈкв минас. Тот тав акв та̄л сыс тит щёс юил ёхталан щирыл хо̄т та̄л ханищтахтас. Ханищтахтан ма̄ныл а̄стуме юипа̄лт та̄ра Касум па̄вылт о̄лнэ яныг каснэ колн методистыг рӯпитаӈкв патхатас. Ань тав па̄лтылэ налыман ня̄врам яласы, ёхталан ня̄врамыт каснэ по̄рат аквписыг ёмщакв касэ̄гыт. То̄ва ня̄враманэ касыл е̄мтнэ э̄лыпа̄лт щёпитахтуӈкв ёхталэ̄гыт. Таи ма̄гсыл та̄н нэ̄матыр места виӈкве ат ве̄рме̄гыт, нас та касэ̄гыт. Наиль ханищтан ня̄враманэ каснэ порат касуӈкв пуссын ла̄виянэ. Ат ёхталан ня̄врамыт ма̄гсыл тав такви яланты, ка̄т палыл ва̄нттыянэ. Акв, тит щёс тох тотыгланэ̄тэ юипа̄лт, мо̄т щёс ня̄враме ат те ёхталы, тав та ня̄врам юипа̄лт тисхатым во̄ссыг атпыл ха̄йтыгты. Ня̄враманэ каснэ̄ныл порат Наиль сыме ща̄рги. Та каснэ щирыл щё̄питахтын ня̄врам э̄тэхо̄талэ каснэ колт поргуӈкв ве̄рми. Наиль такви касыгла̄лме по̄рат округ ма̄гсыл касыс. Щар са̄в щёс тав сӯн ӯлтта 330 щёс порыгмас. Тит ла̄глыл аквторыг хӯрум щёс э̄лаль порыгман щирыл лов метра, хус сантиметра ёхталас. Тыньщаӈ сувын ре̄пыгтан щирыл акв торыг щар са̄в щёс онтырса̄т нупыл хо̄т щёс тыньщаӈе сувын хо̄иглас. Ще̄мятэ̄т та̄н хӯрум ня̄врам яныгмасыт, халанылт пуссын пыгрищит. Наиль щар янгыг о̄лы. Та̄н пуссын ма̄нь та̄гыл халанылт нё̄тхатым лӯи ма̄ ма̄хум касылын ханищтахтасыт. Котиль а̄пщитэ Виталий о̄с каснэ щирыл Россия ма̄щтыр нам о̄ньщи. Тамле ёмас ханты ма̄ньлат хумин ам са̄в щуньпаща ла̄тыӈ те̄тэ̄гум. Ще̄мьятэ На̄й-О̄тыранылн вос ӯргалаве, са̄в та̄л пуста̄гыл вос о̄лы. 1081 2014.08.08. Тамара МЕРОВА Ма̄ янытыл о̄лнэ соссаӈ мирыт янытлавет. Во̄ртур э̄тпос 9 хо̄талэ Ма̄ янытыл соссаӈ мирыт янытла̄н хо̄талыг о̄лы. Ань ты кастыл хо̄та̄ти са̄всыр суссылтапыт манос ханищтапыт ва̄равет. Тох Екатеринбург ӯст о̄лнэ ма̄хумн лӯсум ма̄ньщит о̄лупсаныл урыл хурит суссылтаӈкве патавет. Тамле потыр Екатерина Турдакина ищхӣпыӈ ут хосыт хансыс. Тав Юстмедиа нампа ля̄ххал тотнэ колт рӯпиты, ань ты нэ̄ хансум потре ам на̄нан рущ ла̄тӈыл э̄лаль толмащласлум. – Ты суссылтапыт лӯсум ма̄ньщиянув хумус ань тыг мус пе̄с щирыл о̄лэ̄гыт, маныр ва̄ре̄гыт, пуссын хурин по̄слуве̄сыт. Хурит Виктор Тинигин Карпинск ӯст о̄лнэ хум по̄слыгла̄лыс. Тав то̄ва по̄слум хуриянэ Карпинский музейн о̄с во̄виньта̄лавет ос тот пӯмщалавет. Ань тав ва̄т нупыл ат хуриянэ «Гринвич» нампа яныг ла̄пка капай ос ӯщлахтан колыт суссылтаӈкве патавет. Я̄нас хотты ма̄хум о̄вылтыт потыртан суссылтап тот о̄выл щёс щё̄питавес. Ты э̄лыпа̄лт ӯст о̄лнэ хо̄тпатн са̄всыр пормасыт манос ма̄хум ӯщлахтан ва̄рмалит матыр урыл туп потырта̄лсыт. «Гринвич» нампа колт рӯпитан кӯщай хум Илья Клюжин ла̄выс: «Ма̄н тамле тэ̄ла таима̄гыс ва̄руӈкве номылматсӯв, ӯсыӈ манос тыг ёхталан мӯй хо̄тпат вос ва̄гыт, хоты соссаӈ ма̄хум халт та̄н о̄лэ̄гыт. Ты ма̄т лӯсум ма̄ньщит о̄лэ̄гытхӯлэ̄гыт, та̄н та̄нки пе̄с наканыл, ла̄тӈаныл э̄лаль тотыяныл». Ань Екатеринбург ӯст ты суссылтап во̄ртур э̄тпос нёлоловит хо̄талныл ва̄т нупыл ат хо̄тал мус рӯпитаӈкве паты тах. Ос лӯсум ма̄ньщиянув о̄вылтыт Свердловский областьт э̄лумхо̄лас праванэ ӯргалан кӯщай нэ̄ Татьяна Мерзлякова тамле ва̄рмалит хӯлтыс, ты мӯтраӈ ос нёмса мир ма̄н областюв лӯима̄ е̄р нупыл Ушма, Те̄расколыӈъя̄ ос Бурмантово па̄влытыт о̄лэ̄гыт. Та̄н пуссын Са̄пса ӯс миркол нупыл хансым о̄лэ̄гыт. Тувыл тот кӯщаит «Общество по выживанию и социальноэкономическому развитию манси» ва̄рмалит щирыл рӯпитэ̄гыт. Тот кӯщай ва̄ӈын нэ̄ Зубайда Щербак потыртас: «Са̄пса е̄рт ань лӯсум ма̄ньщииг 150 хо̄тпа ловиньтахтэ̄гыт, янгыщ тыи хус та̄лныл налыман та̄л мус яныт хо̄тпат ос тувыл ня̄врамыт. Та̄н халанылт щар яныгпа̄лаг Александра Васильевна Анямова о̄лы. Ты тэ̄лы порат тав 80 та̄лэ то̄влыс. Хум хо̄тпат во̄рае̄гыт, хӯл алыщлэ̄гыт, нэ̄ хо̄тпат пил ва̄тэ̄гыт, тэ̄рпи лӯптат атэ̄гыт. А̄ти сака хосат лӯсум ма̄ньщит са̄лы о̄щсыт ос са̄лыл яласа̄сыт. Ань тамле та̄рвитыӈ рӯпатан нэ̄мхотъют вуйхатуӈкве ат таӈхи ос атыпыл ха̄сы. То̄ват щар ма̄нь па̄вылт о̄лэ̄гыт, коланыл на̄й поста̄л, тохиӈ хотмус та о̄лэ̄гыт». Татьяна Мерзлякова э̄лаль таи потыртас: «Ӯсытт манос яныг па̄влытыт о̄лнэ хо̄тпат соссаӈ ма̄хум палт яланталэ̄гыт. Ӯйсовыт манос пил ёвтнэ коныпал винал тотыяныл, ма̄хум айтыяныл. Тамле лю̄ль пищ воссыг ул вос ва̄рнувыт. Ма̄ньщит та̄нки пе̄с наканыл ӯргалым э̄лаль са̄в та̄л ёмащакв вос о̄лнувыт». Ма̄н о̄с аквтох номсэ̄в кос. Ань на̄н во̄ртур э̄тпост Екатеринбург ӯст мӯйлуӈкве патэ̄гын ке, суссылтап сунсуӈкве щалтапа̄лэ̄н. Ищхӣпиӈ ма̄т хансум ля̄ххал ма̄ньщи ла̄тӈын Тамара МЕРОВАн толмащлавес. 1081 2014.08.08. Тамара МЕРОВА Ня̄врамыт ёт рӯпитаӈкве таве̄н мӯсты. Санкт-Петербург ӯст А. И. Герцен нампа университетт ханищтахтамум порат ам ётум Ямал ма̄ныл акв ма̄ньлат а̄ги ханищтахтас. 1995 та̄лт университет а̄стласме̄н ос ла̄ккваминасме̄н. А̄ти сака хосат ме̄н ищхӣпыӈ ут хосыт хо̄нтхатахтасме̄н. Тав наме Галина Возелова о̄лыс, ань о̄йкатэ щирыл Змитрович. Юрта̄гим Лангепас ӯст о̄лнэ̄тэ. Яныгполь э̄тпост ме̄н ва̄щинтахтасме̄н ос тав такви о̄лупсатэ урыл мощ потыртас. – Ам Шурышкары па̄вылт самын патсум. Кит та̄лыг то̄влумум порат, ма̄н тувыл сысы минасӯв. А̄тяв, Иван Иванович Возелов, партийный рӯпататэ щирыл Мужи па̄вылн ке̄твес. Тот о̄выл классыт та̄л охса ханищтахтасум ос тав Лопхари па̄вылн миркол кӯщаиг паттуве̄с, ма̄н тув та ва̄нтлысӯв. Та па̄вылт хӯрум классыт ханищтахтамум мус о̄лсӯв, тувыл а̄тям Шурышкары па̄вылн ювлеминуӈкве тахмаяс. Омам са̄ртын тув ат ка̄сащас кос, Лопхарит о̄луӈкве таве̄н мӯстыс. Ос а̄тямн райкомыт э̄лаль рӯпитаӈкве э̄рыс, ма̄н тав ётэ Шурышкары па̄вылн ювле та минасӯв. Ам самын патум ос мощ яныгмам колн ювле та ёхтысӯв. А̄тям омаме̄нтыл Ленинград ӯст акванхо̄нтхатсы̄г, сас лӯима̄ ня̄врамыт институтт ханищтахтуӈкве патыгласы̄г. Та ӯст а̄тям акваг а̄гмыӈыг е̄мталас, тот о̄луӈкве хоса ат ве̄рмыс, таима̄гыс нэ̄гн та̄гыл ювле та минас. Омам селькупка нэ̄, наме Раиса Алексеевна Безруких, тав Красноселькупский районт Сидорово ма̄нь па̄вылт самын патыс. Ханты ла̄тӈыл потыртаӈкве такви ханищтахтас. О̄йкатэ̄н ё̄рнколн тотвес, тувыл тав матахмат хо̄талыт во̄раяӈкве ялнэ̄тэ сыс тав о̄ныпе ос акитэ ёт хультсы. Тэ̄н рущ щирыл потыртаӈкве щар ат ха̄ссы̄г, ань тэ̄н ётэ̄н ва̄тихал тох хульса̄лыглыматэ молях ла̄тыӈ ханищтас. Туп ам свидетельство о рождении нэ̄пакумт омам селькупкаг хансым о̄лыс. Ётыл ханты ла̄тыӈ ёмас ва̄нэ̄тэ ма̄гыс а̄тыпыл китыглаве, тав селькуп манос мо̄т хотты хо̄тпа. Йигрищанум, а̄пщиянум палт омам хантыиг хансыглыма. Юн ща̄нягума̄щагум ханты ла̄тӈыл потыртасы̄г кос, ос ма̄н, ня̄врамыт, ёт нэ̄мхотьют сака ат потырта̄лыс. Школа а̄стлам юипа̄лт ам тэ̄н ла̄внэ̄тэн щирыл Герцен нампа институтын минасум. Амки тув ат миннувум кос, ос тэ̄н хосат та̄гыл номсысы̄г, хотты а̄гитэ̄н Санкт-Петербургын ханищтахтуӈкве вос ялнув. Ты э̄лыпа̄лт увщим Тюмень ӯсн инженерностроительный институтн ханищтахтуӈкве минас, таима̄гыс ам тув та ке̄тве̄сум. Тувыл университет а̄стламум юипа̄лт ам са̄т та̄л Шурышкары школат «рущ ла̄тыӈ ос литература» ханищтан нэ̄г рӯпитасум. Ня̄врамыт ёт а̄нумн рӯпитаӈкве сака мӯстыс. Ос амки номтумтыл ам акваг хотты ма̄ньнув ӯст о̄луӈкве тахсум. Ма̄н школат ханищтахтамув порат са̄всыр нэ̄пакыт акванатуӈкве ла̄ввесӯв ос та̄н йильпи ӯнттум ӯсытн нэ̄пак ловинтан колн ке̄тве̄сыт. Ам та па̄сныл номсыгласум, ам о̄с тамле ӯсн о̄луӈкве минэ̄гум тах, хоттынакт акв тамле посылкал вос ке̄тнуве̄м. Ань ты тэ̄ла номылматыглылум, э̄лаль мовалалэ̄гум. 2002 та̄лт ме̄н Антонина Ануфриева ёт Лангепас ӯсн минасме̄н ос тот о̄лмыгтасме̄н. Тав соссаӈ ня̄врамыт э̄ргуӈкве ос йӣквуӈкве ханищтасанэ. Ам ос «Радуга» нампа дополнительный образование центрыт рӯпитаӈкве патсум. Ня̄врамыт ханты ла̄тӈыл потыртаӈкве ос сак хартуӈкве ханищтасанум. Ты коныпал соссаӈ мир о̄лупсатэ, пе̄с наканэ урыл пӯмщаласанум. Школат иӈ рӯпитанэ̄м порат ма̄н «Региональный компонент» программа щирыл рӯпитаӈкве ла̄ввесӯв. То̄нт ам ханты, ма̄ньщи ос ё̄рн ма̄хум о̄вылтыт э̄рнэ нэ̄пакыт ловиньтасум, са̄всыр наканыл та̄рапаттысанум. Ань ӯст о̄лнэ ня̄врамаквет хумус пӯмщалаӈкве э̄рыс, ам ва̄слум. Тувыл ма̄нки яныгмамув сыс матумпа̄ла хо̄тпаныл са̄всыр ва̄рмалитыл о̄с пӯмщалахтасӯв. То̄внакт ялпыӈ канн тотыглавесӯв, тот матыра̄ти суссӯв манос хӯлыгласӯв. А̄тям ёт са̄в щёс хӯл алыщлаӈкве ялсӯв, номилум яныг хӯл капайт алыщласӯв. Тувыл А̄с я̄ сака хумпыӈ я̄, ха̄пув тыглетувле нас хосгащлаве. Ань ты ва̄рмалит ӯст яныгман ня̄врамытн о̄с потырталыянум. Са̄ртын центрын са̄в соссаӈ ня̄врамыт ялантасыт. Ам амки ща̄ньа̄щаныл палт юв ёхталасум, ня̄враманыл кружокыт ялантаӈкве во̄выгласанум. То̄ват ща̄ньа̄щит та̄нки о̄с са̄в пӯмщалахтым о̄лсыт. Та̄н ня̄враманыл ань яныгмасыт, э̄лаль ханищтахтуӈкве минасыт. Ань юио̄вылт щар мощща ханты хо̄тпа центрын ёхталаӈкве патыс. Тувыл та̄н ща̄ньа̄щаныл та̄нки нэ̄матарыл сака пӯмщалахтуӈкве ат патсыт. Ты е̄рт о̄лнэ хантыт та̄нки маснутаныл хосат та̄гыл ат масыглыяныл, ла̄тӈаныл ёрувласаныл, мо̄т агт о̄ньще̄гыт. Ам палтум рущ ман мо̄т мирыл о̄лнэ ня̄врамыт ялантаӈкве патсыт. Ня̄врамыт пуссын ам э̄руптыянум, та̄н ётаныл а̄нумн рӯпитаӈкве ёмас. 1081 2014.08.08. Александр ВЬЮТКИН Ка̄таге̄т тав ма̄щтыр. Ханты ма̄хум халт ка̄таге̄т ёмщакв ма̄щтырлан хум о̄лы, тав наме Николай Анатольевич Тасьманов. Тав рӯтанэ пуссын Касум па̄вылт Белоярский районт о̄лэ̄гыт. Коля ма̄нь та̄гыл са̄лыӈколт яныгмас. Хум хо̄тпанэ матыр ма̄щтырланэ̄ныл порат, пыгрищ аквписыг та̄н ляпанылт ё̄ӈхатахтыглас, сунсыс, ма̄ныр хумус ва̄раве. Мощ яныгнуве̄г е̄мтыс, такви ёргуӈкв ос са̄грхатуӈкв патыс. Та па̄сныл тав ань ты хо̄тал мус аквписыг маныр э̄ри, пуссын ма̄щтырлы. Ва̄рум рӯпатанэ ма̄гсыл 2006 та̄л «Народный мастер России» намыл майвес. Николай ань Касум па̄вылт о̄лы. Йильпи музейт кӯр па̄лтыглы ос нас мо̄т рӯпата ва̄ри. Та коныпал тав иӈ тув па̄лыт ос ня̄врамыт ӯщлахтан «Нумсаӈ ёх» ма̄т рӯпиты. Тот тав ня̄врамыт ма̄щтырлаӈкв ханищты. Тав ла̄ви: «Ня̄врамыт ёт рӯпитанэм порат, та̄н юипа̄ланылт аквписыг сунсуӈкв э̄ри. То̄ва ня̄врамыт касай пувуӈкв ат ха̄сэ̄гыт. Матараныл хотум те е̄мтапи, ты урыл тах ам титыглавем. Ёмас хунь титаххӯрмах ня̄врам ханищтахты. Та̄н аквписыг самыл сунсым ёрыгхатэ̄гыт. Касае лю̄льсаӈнув те выгтэ, та̄ра наӈки. Тувыл та̄н ма̄к ма̄щтырыг та е̄мтэ̄гыт. Ам ханищтам то̄ва ня̄враманум а̄нумыныл ма̄щтырнуве̄г матыр ва̄руӈкв ханьщувласыт. Мо̄т ущты касай ка̄тын винэ ня̄врамыт ёт рӯпитаӈкв а̄нумн нё̄тэгыт. Ты магсыл ам та̄наныл во̄рын щёпыр па̄тлуптаӈкв ос хӯл а̄лыщлаӈкв тотыглыянум». Ты ёмас потрыӈ хумин ам ла̄ве̄гум: Ма̄щтырлан пормасанэ та̄кыг, хорамыӈыг вос а̄ртме̄гыт. Тамле ёмас хо̄тпа э̄лаль о̄лнэ хо̄таланэ вос са̄вме̄гыт, На̄й-О̄тыранэ̄н вос ӯргалаве! 1081 2014.08.08. unknown Кульпас ня̄врамыт ка̄тыл по̄слэ̄гыт. Ты хурит Ха̄льӯс район Кульпас па̄выл школат ханищтахтан ня̄врамыт та̄н ка̄тыл по̄слысыт. Са̄т хурияныл ма̄н ты э̄лыпа̄л газетат (14 номерт) ва̄рыгласанӯв, ань ос э̄лаль мо̄т хурияныл на̄нанн суссылтыянув. Я̄тил ня̄врамаквет, пуссын пуста̄гыл о̄лэ̄н, о̄с са̄в хури по̄слэ̄н, газета ва̄рнэ колн ке̄тэ̄н. Со̄тыӈыщ о̄лэ̄н, На̄й-О̄тыранын вос ӯргалаве̄н! 1081 2014.08.08. Александр ВЬЮТКИН Ма̄ньщи нупыл суснэ ма̄хум. Пермь ӯст та̄нтина̄наныл ма̄ньщииг ло̄виньтан ма̄хум о̄лэ̄гыт. Та̄н Кама я̄ хосыт Волгоград ӯс мус «Урал» нампа яныг на̄иӈха̄пыл яласан пӯмщаныл ты та̄л нилыттыг ва̄рияныл. Миннэ лё̄ӈханылт ат яныг ӯс та̄лтын пӯхталэ̄гыт. Та пӯмщаныл «Яныг хулыл» намтым о̄лы. Палытэ̄т тав хус хо̄тал мины. Тыи пуссын «Нанук» нампа Фонд тармыл кӯщаиг о̄лнэ нэ̄ Надежда Георгиевна Окорокова янытлытэ. Тав ӯсыӈ ма̄т студентыг о̄лнэ ма̄ньлат ма̄хум ёт рӯпиты. Та коныпал тав Пермский край янытыл ма̄щтыр мир ёт рӯпиты. Ма̄щтырлан пормасанэ ка̄сыӈъе̄мт ма̄щтыр ма̄хум акванатхатыглахтан са̄всыр ма̄н тотыгла̄лыянэ. Ань ты на̄йиӈха̄пыл миннэ лё̄ӈханылт о̄с тах са̄всыр мастеркласс е̄мты. Мо̄т о̄с акв тамле ва̄рыглам пӯмщаныл Ма̄хар Пермский край янытыл тотыглыяныл. Надежда Георгиевна ла̄ви: «Тэ̄лы порат Пермь ма̄ янытыл яласаӈкве кӯстыр. Миннэ лё̄ӈхувт хоты ма̄нь па̄влыт о̄лэ̄гыт, пуссын хо̄иглыянув. Тот о̄лнэ ма̄хманувн пӯмащ ма̄гсыл ма̄нь концерт такталэ̄в. Суссылтапанув суссылтанэ̄в юипа̄лт ща̄й айнэ пасан щё̄пита̄лэ̄в. Хо̄талъя̄т порат ма̄нти щирувт во̄рыӈ ма̄т о̄с пӯрлахтэ̄в. Ма̄н ва̄глув кос, матыр ат ва̄нэ щирыл ул вос ва̄ре̄в, хумус ве̄рме̄в ос ха̄сэ̄в, тох та ва̄ре̄в. Ам ма̄ньщит пӯрлахтанэ̄ныл урыл са̄в нэ̄пак ловиньтасум, тувыл са̄всыр пе̄с йис кинат суссум. А̄нум та урыл пуссын пӯмащ. Таима̄гсыл на̄н пе̄с йис о̄лупсан ам ханищтэ̄гум». Надежда Окорокова ёт ам лӯпта э̄тпост Сургут ӯст ва̄щинтахтасум. Ме̄н тав ётэ тот о̄лнэ «Старый Сургут» нампа музей каныт «Международный фестиваль ремёсел коренных народов мира (Югра -2014)» на̄мпа ма̄щтырлан ва̄рмаль порат потыртасуме̄н. Та порат тав ма̄щтырыг о̄лнэ хум Иван Конюков ёт ёхталас. Иван Иванович ра̄ктыл а̄ныт ва̄ри, тувыл ха̄ль са̄сныл са̄всыр хусапсовыт ма̄щтырлы. Ты коныпал тав йӣвныл колпо̄хн тагтан хорамыӈ хӯрит якты. Ка̄таге̄тыл ма̄щтырлаӈкв Иван Иванович ма̄ньта̄гыл о̄вылтахтас. Таве̄н матыр яктуӈкв, сагуӈкв ос по̄щгуӈкв пӯмащ. Тав тох ла̄ви: «Матыр ва̄рнэ̄м порат ам ӯщлахтэ̄гум»! Матъёмас тамле ма̄хум о̄лэ̄гыт. Тамле номт тотнэ ма̄хум ма̄гсыл ма̄н, ма̄ньщи ма̄хум, мир янытыл са̄в ма̄т ва̄ве̄в, ёмас номтыл ӯлыла̄лаве̄в. 1081 2014.08.08. Светлана Динисламова Акв хо̄тал «Мāнь ӯсквет». О̄йттур э̄тпос атыт числат мāн Я̄сунт пāвылн ялсув. Ма̄н – тыи ам, Каталин Шипёц, Бернадетт Биро, Сильвия Немет ос Анастасия Сайпашева. Ты нила āгитнэ̄т Венгрияныл ёхтала̄лсыт, тит āгииг Сегед ӯсныл, тит āгииг Будапештныл. Каталин – тав учёный нэ̄, тав филология докторыг о̄лы, университетт āгитпыгыт мāньщи лāтӈыл ханищтыянэ. Тав мāньщи лāтӈыл сака ёмащакв потырты, ос тав ётэ ёхталам āгит мāньщи лāтӈыл о̄с потыртэ̄гыт. Тыи ам таимāгыс хассум – нāн, мāньщи хо̄тпаквет, торген нāнти лāтӈын ӯлылэ̄н, ханищтэ̄н, щāнь лāтӈыл потыртэ̄н. Сунсэ̄н, мāн лāтӈув мо̄т хо̄н мāт татем вāве, янытлаве, ханищтаве. Ята, мāн Я̄сунт пāвылн ялсув, тот о̄лнэ «Мāнь ӯсквег» лāвнэ э̄тностойбищат о̄лсув. О̄йтттур э̄тпос о̄выл сāтэ̄т тот о̄выл смена рӯпитас, сāв ня̄врам тот о̄лыс. Янгемāне пуссын аквторыг та порат тот ӯщлахтасыт. Яныгнув ня̄врамыт, мāньлат хо̄тпат пуссын мāньнув ня̄врамыт сāвсыр э̄рнэ вāрмалитн ханищтасаныл: йӣквуӈкве, ю̄нсхатаӈкве, мāщтырлаӈкве, по̄слуӈкве, ра̄ктыл ёнгын утыт по̄щгуӈкве, ты коныпал иӈ сāв пӯмыщ вāрмаль тот ня̄врамыт вāре̄гыт. Мāн акв хо̄тал туп «Мāнь ӯсквет» о̄лсув, ты хо̄талув сыс татем сāв пӯмащ ка̄саласув, аквтоп са̄ттем тот о̄лсув. Яныг пӯмащипа лāтыӈ Любовь Павловна Стаканован лāве̄в. Ты нэ̄ хо̄тал сыс вāгта̄л улпыл щар ат патыглы, мāтырāти пуссын вāруӈкве āлыми, ущты ня̄врамыт ёт по̄слыс, хансыс, тыт та̄ра мāн ё̄рнколын во̄ввесӯв, тāв яныгнув ня̄врамыт ёт презентация мāнавн суссылтас. Мощ хал минас ос рӯпитан хо̄тпат аканитыл кукольный театр тāнти вāрум мо̄йтаныл хосыт суссылтасыт. А̄лпыл па̄сыл э̄ти мус Любовь Павловна ня̄врамыт ёт аквписыг та о̄лы, кāсыӈ хо̄тпа мāгыс ёмас лāтыӈ хо̄нты, кāсыӈ ня̄врам мāгыс тав щар аквтоп омаг о̄лы. Ты ма̄гыс тāве янытлылув. «Мāнь ӯсквет» ня̄врамыт мāгыс хо̄тал онтолов щё̄с порат о̄вылтахты. А̄лпыл, тэ̄пъяланэ̄ныл юипāлт щё̄скем ня̄врамыт по̄слэ̄гыт, щаквще̄гыт, э̄рыгйӣкв ханищтэ̄гыт. Тувыл пыгрищит ё̄рнколын мо̄т матыр ва̄руӈкве минэ̄гыт, āгит янас колыт Мария Сергеевна Мерован ю̄нсхатуӈкве ханищтавет. Кāсыӈ āгирищин āкань ос пуӈкто̄р ю̄нтуӈкве э̄ри. Венгрияныл ёхталам āгитнэ̄т тāнти мāгсыланыл о̄с āканит ю̄нтуӈкве алымасыт. Вāим, сāв нё̄тмил тāнаныл Мария Сергеевна тāв вāрыс, э̄типа̄ла мус āканяныл āканиг тэ̄лсыт. Хо̄талъя̄т порат ня̄врамыт ёмащакв тэ̄пъялэ̄гыт, тувыл щё̄скем о̄с щаквще̄гыт, хӯрум щё̄с по̄рат спорт о̄вылтахты. Яныг ӯс каныт тāн маттем та ха̄йтыгтасыт. Аквтоп нэ̄матыр лё̄мвой а̄тим, нэ̄матыр посым пӯт ат э̄ри, ща̄гтым, мовиньтым торген та ёнгысыткассыт. Ты вāрмаль юипāлт концерт о̄лыс, насати ня̄врамыт венгр лāтӈыл тит э̄рыг ханищтамыт, э̄ргысыт. Тувыл тāн мāгсыланыл венгр мāхманув о̄с э̄рыг э̄ргысыт. Э̄типа̄лаг ос тӯлыглап о̄лыс, маттем та мовиньтасув. Хо̄тал хосаг о̄лыс. Лов щё̄с порат ня̄врамыт ёлхуюптаве̄сыт, пāвыл суйтāлыг е̄мтыс. Мāн ты э̄т Я̄сунт пāвылт хӯлсув. Хунь хӯлнэ колувн ё̄мсув, Каталин а̄нумн лāвыс: «Ам тамле сэ̄ръёр, юртыныщ о̄лнэ ня̄врамыт нэ̄мхо̄т ат ка̄сала̄лсум. Тыт налыман ня̄врам акв колта̄гыл хольт о̄лэ̄гыт, нэ̄мхо̄т кантыӈ лāтыӈ ат хӯнтамлэ̄гын, нэ̄мхотьют ат ня̄ӈхи, ат тысты, пуссын ща̄гтым аквонтасыг ӯнлахо̄лэ̄гыт, ёнгасэ̄гыт, ха̄йтыгтэ̄гыт. Ам номсэ̄гум, венгрия ня̄врамыт мощ мо̄тхурипат. . » Ам таве̄н лāвсум: «Венгрия ня̄врамыт тыг ёхтынувыт, ты этностойбищат о̄лнувыт, ты о̄лупса ка̄саланувыт, о̄с акв яныг ще̄мьят яныгман ня̄врамыт хольт о̄лнувыт». Пāвылныл мāн «Мāнь ӯскве» нупыл суссув, посыӈ лӯи э̄тыт пуссын на̄ӈки: тит норколыг ос палаткат ӯнлэ̄гыт, ё̄рнколыт лю̄ле̄гыт, а̄ращ посымлы, Любовь Павловна ня̄враманэ уральтым, холыт мāгыс вāрмалянэ вāрим, ё̄мыгты. . Мāн сыманув ща̄гтым путге̄гыт – матъёмас Я̄сунт пāвылн ялсув, ты хо̄тпа ёт хонтхатсув, тав э̄рнэ рӯпататэ та̄рапаттыслув. Потрум ты лāтӈытыл а̄стлылум: титыт хо̄тал, хунь мāн ювле минуӈкв щё̄питахтасув, акв мāнь āгирищкве тыи касалым, хотлю̄ньщалтахтас, мāн юв ул вос минэ̄в. Таимāгыс лāве̄гум: «Мāнь ӯсквен» сāв мир, сāв ня̄врам ман яныг хо̄тпат ялуӈкве вос вēрме̄гыт, тув ялум хо̄тпат сыманылн аквписыг тув вос хартавет». 1082 2014.08.22. Тамара МЕРОВА Ка̄ркам ма̄ньщи хум. Мо̄лал Лангепас ӯсн ялмумт ме̄н аквъёт рӯпитан нэ̄ме̄нтыл «Фортуна» нампа колн ялуӈкве ла̄вхатсуме̄н. Тот, ла̄ве̄гыт, пӯмыщ хо̄тпат ёт ва̄йхатыме̄н ос акв ма̄ньщи хум ёт хо̄нтхатахтыме̄н. Хум наме Евгений Игоревич Захаров, тав «Фортуна» нампа центрыт кӯщаиг рӯпиты. Тот ня̄врамыт ос ма̄ньлат ма̄хум са̄всыр тэ̄ланыл ёт рӯпитэ̄гыт. Ме̄н Евгений Захаров ка̄саланэме̄н порат таве та̄ра ханьщисламе̄н. 2006 та̄лт тэ̄лы тав Антонина Ануфриева ёт Ханты-Мансийскан ёхталас ос «Дед Мороз и Снегурочка» Россия янытыл ва̄рыглан касылыт кассы̄г. Тэ̄н маснутанэ̄н соссаӈ ма̄хманув хансал хорамтасанэ̄н. То̄нт тэ̄н но̄хпатсы̄г ос хо̄н ма̄н Париж ӯсн ялнэ путё̄вкал мӯйлупта̄лвесы̄г. Ань Евгений Игоревич такви рӯпататэ ос о̄лупсатэ урыл таи ла̄выс: Рӯпитан кол урыл – Ма̄н ты колув 2006 та̄лт яныг таквс э̄тпост рӯпитаӈкве патыс. О̄влэ̄т ма̄н культура тэ̄лат щирыл туп рӯпитасӯв. 2009 та̄л па̄сыл ня̄врамыт ос ма̄ньлат ма̄хум ма̄гыс ва̄рнэ тэ̄лат о̄с тыг тотве̄сыт. Тувыл центрыг ла̄вуӈкве патвесӯв. Рӯпатав культура па̄лыл э̄лаль ӯргалаве кос, ос са̄в тэ̄лат образование нупыл о̄лэ̄гыт. Ань ма̄н ат са̄всыр программа щирыл рӯпитэ̄в: тыи ӯсувт са̄всыр мирыт культураныл суссылтан ва̄рмаль, ще̄мьят ёт рӯпитан ва̄рмаль, ня̄врамыт ӯщлахтан ос туи рӯпата нё̄тнэ тэ̄ла, коррупция ва̄рмалит та̄рапаттын накыт ос ма̄ньлат ма̄хум тэ̄ланыл ёт рӯпитан палата. Ты тэ̄ланув ва̄рнэ ма̄гыс ма̄н культура ос образование па̄лыл олныл та̄ставе̄в. То̄ванакт ма̄нки матыр проектыт щё̄питэ̄в ос грант щирыл олн сэ̄лэ̄в. Ще̄мьят ёт рӯпитан колнакыт психологыт, юристыт рӯпитэ̄гыт. Та̄н ще̄мьяӈ хо̄тпатын та̄рвит тэ̄ланыл порат нё̄тэ̄гыт. Мо̄т колнакыт ня̄врамыт хотталь ӯщлахтан миннэ̄ныл порат манос туи сыс рӯпата кинсуӈкве нё̄тавет. Пуссын маныр тэ̄лат ёт ма̄н рӯпитэ̄в, таит «Молодежное информационное агентство» нампа колнакт рӯпитан а̄гитнпыгытн ля̄ххалыг, потрыг хансаве̄т ос ищхӣпыӈ утын ва̄равет. Ты коныпал та̄н сыресыр хурит по̄слэ̄гыт ос нэ̄пакло̄псыт ва̄ре̄гыт. Матыр пӯмщалахтан утыт урыл интернет ло̄псувт на̄нки тах ловиньтаӈкве ве̄рмегы̄н. СА̄всыр мирыт суссылтан колнак – Ты колнакувт 2007 та̄л яныг таквс нила щислат, са̄в мирыӈ ма̄хум акванюрщхатан ялпыӈ хо̄талт рӯпитаӈкве о̄вылтахтасӯв. То̄нт нила мирколыт халт аквъёт рӯпитан, акваннё̄тхатнэ нэ̄пак хасве̄с, тыи ӯс миркол, ӯс Дума, «Лангепас нефтегаз» кол ос са̄всыр мирыт ёт рӯпитан организация. Лангепас ӯсувт са̄тхойплов са̄всыр ма̄хум акванатхатнэ я̄нас организация о̄ньще̄гыт. Та̄н ань пуссын тыт акванатхатахтыглэ̄гыт. Тыт ка̄сыӈ мир урыл суссылтап щё̄питым о̄лы. Ӯсыӈ ма̄хумн пе̄с о̄лупсаныл, маснутаныл суссылтавет. Тувыл акв хотты хо̄талт акв хотты мир тыт э̄рганэ, йӣкванэ суссылтаӈкве акванатхатэ̄гыт. Тыт янгема̄не ма̄хум пуссын аквъёт ӯщлахтэ̄гыт, ка̄с ва̄ре̄гыт. Таи ма̄гыс концерт ва̄рнэ кан о̄ньще̄в. Центрув мо̄т са̄всыр ёмас колнакыт о̄с о̄ньщи. То̄ванакт хотты ва̄рмалянув урыл потыртаӈкве э̄рмыглы ке, ма̄н яныг кӯщаит тыг во̄виньта̄лыянӯв. Са̄всыр политикыт, спортсменыт, артистат тыг мӯйлуӈкве щалтсэ̄гыт. Ты коныпал ма̄хум ёт ва̄йхатуӈкве пуп о̄йка ос имам о̄йка ёхталэ̄г. Ня̄врамыт ос ма̄ньлат ма̄хум ма̄гыс «толерантность» ханищтан нак ва̄рыглэ̄в. Ка̄сыӈ хо̄тпа такви ма̄хманэ коныпал мо̄т мирыт э̄руптым ос ва̄нэ̄г вос о̄ньщиянэ. Акв колнак ёмас ищхӣпыӈ утыл ва̄рим о̄лы. Тот ма̄хманув мо̄т ӯсыт о̄лнэ ма̄хум ёт телемост щирыл потыртаӈкве ве̄рме̄гыт. Мо̄лтынув ма̄н белоруссанув Москва ӯст о̄лнэ белоруссыт ёт потыртасыт. Лангепаст соссаӈ ма̄хманув тэ̄ланыл ёт Маргарита Филипповна Заяц рӯпиты. «Форсмажор» театр урыл – Ты театрувтыл школат ханищтахтын яныг ня̄врамыт ёт «Бесстрашная Татья» нампа спектакль щё̄питасӯв. Тав А. М. Конькова хансум мо̄йтанэ щирыл о̄лы. Таве суссылтамув юипа̄лт «Образцовый театр» намыл майвесӯв ос грантолн висӯв. Акв пал са̄вит олнэ нё̄тнэ маснутыт ма̄гыс холтсанӯв, мо̄т олнытыл йильпи проект щё̄питэ̄в. Сусте̄мт, ты ня̄врамытын соссаӈ ма̄хум пе̄с наканыл ва̄ӈкве сака пӯмщиг о̄лы. Та̄н са̄всыр мирыл о̄лэ̄гыт, мо̄тмо̄т школат, са̄всыр классыт ханищтахтэ̄гыт. Ос тыт акванюрщхатасыт. Таи лю̄ль, ты та̄л то̄ват ханищтахтуӈкве а̄стэ̄гыт, ос мо̄т ӯсн минэ̄гыт. Такви рӯтэ урыл – Ам рӯтанум щирыл хо̄нтаӈ ма̄ньщииг о̄лэ̄гум. Яныг пыгум школат ханищтахтаме порат «Рӯт ма̄хум» о̄лнэ накытыл кисхатас. Кисхатам тэ̄латэ XVII нотэ мус тотыстэ. Тувыл таи та̄рапатыс, ма̄н Сатыга канащо̄йка рӯтыг о̄лэ̄в. Яныг ане̄квам а̄ще о̄парищ наме Сатыгина, та̄нки о̄с Сатыга па̄вылт о̄лсыт. Антон пыгум ты урыл пе̄с э̄рнэ нэ̄пакыт ос хурит хо̄нтыс. Э̄квам рӯт ма̄хманэ о̄с кинсуӈкве о̄вылтахтас. Та̄н Питухина о̄парищ намыл о̄лэ̄гыт. Ты ма̄хум Петр I ляпат акваг о̄лмыт. Антон ань Санкт-Петербург ӯст «Экономика и управление связи и строительства» тэ̄латын ханищтахты. Григорий, ма̄ньнув пыгум, моще̄ртын школа а̄стлы. Амки рӯпатамт ам то̄ва депутатытн, предпренимательхо̄тпатын яныг пӯмащипа ла̄тыӈ ла̄вуӈкве таӈхе̄гум. Тэ̄ланув ёмасыг ва̄рнэ̄в ма̄гыс та̄н ма̄нав олныл нё̄тыяныл. 1082 2014.08.22. Тамара МЕРОВА Акваннё̄тхатым э̄лаль рӯпитэ̄гыт. Округ губернаторув Наталья Комарова ос Тюменский областьт ва̄ӈын кӯщай пе̄нтсыл рӯпитан губернатор Владимир Якушев Нягань ӯст акванхо̄нтхатыгласы̄г. Тэ̄н ос мо̄т кӯщаит аквъёт ва̄рнэ тэ̄ланыл урыл потыртасыт, тувыл ӯсыӈ ма̄хум о̄лупсаныл о̄вылтыт пӯмщалахтасыт. Та юипа̄лт Югорск ӯсн ялсыт. О̄влэ̄т кӯщаит Нягань ӯст о̄лнэ пӯльницан тотыглаве̄сыт. Ты яныг э̄рнэ колыт округт о̄лнэ ма̄хум а̄гманыл сыресыр ищхӣпыӈ утыл пусмалтавет. Ле̄ккарыт 48 са̄всыр пусмалтан а̄гм щирыл рӯпитэ̄гыт. Ос ма̄хум янгыщ тот сым а̄гманыл пусмалтавет. Таима̄гыс матыр э̄рнэ ут ёвтым пуссын о̄лы. Тот акв матумпа̄ла э̄ква сым а̄гме та̄рапаттын ма̄гыс операциял ва̄рвес. Ле̄ккарыт ты ва̄рнэ рӯпатаныл сунсуӈкве тув кӯщаит та̄ртсаныл. Ань э̄ква матыр сым а̄гм о̄ньщи ке, таи пуссын са̄всыр ищхӣпыӈ утыт хосыт та̄рапатэ̄гыт. Ты коныпал яныг ма̄хум мо̄т рӯпитан колнакытн щалтсасыт ос тот са̄всыр а̄гмыт пусмалтан утыл та̄н суссылтаве̄сыт. Сергей Доганин, пӯльницат кӯщаиг о̄лнэ хум, ла̄выс: «Ма̄н матыр э̄рнэ пусмалтан утыт ёвтуӈкве «Сотрудничество» программа щирыл олныл нё̄твесӯв. Тувыл ма̄н палтув сака номтыӈ ле̄ккарыт рӯпитэ̄гыт, та̄нки тэ̄ланыл янытэ̄т ва̄ганыл ос ищхӣпыӈ утыл рӯпитаӈкве мӯсхалыг ханищтахтасыт. Пуссын ты кастыл ма̄хум а̄гманыл ёмащакв пусмалтавет». Наталья Комарова ос Владимир Якушев пӯльницат рӯпитан ма̄хумн ёмас сымыӈ ла̄тыӈ ла̄всы̄г. Ла̄тӈанэ̄н мӯй хо̄тпат ёхталам нэ̄пакт хассанэ̄н ос мӯйлупса мисы̄г. Ма̄н губернаторув ня̄врам пусмалтан колын матыр ёвтнэ ма̄гыс олн нё̄тмил нэ̄пак мӯйлуптас. Тыгыл кӯщаит Няганский ГРЭС ма̄н тотве̄сыт. Тот та̄н ты йильпи рӯпитан кол суссыт ос ма̄хум ёт потыртасыт. Та̄н «Фортум» нампа корпорцияг ла̄вавет. Александр Чуваев, ва̄ӈыг кӯщай хум ла̄выс: «Ты гидроэлектростанция мо̄лты та̄л яныгпо̄ль э̄тпост рӯпитаӈкве о̄вылтахтас. О̄влэ̄т 420, 9 мегаватт ва̄ге̄т рӯпитас, ётылнув китыт энергоблокыл ва̄рыслӯв ос тав 454 мегаватт о̄ньщис. Моще̄ртын хӯрмит энергоблок ва̄рилӯв ос тав тыгыл са̄внув ва̄г о̄ньщуӈкве паты тах. Пуссын янытэ̄т ГРЭС акв со̄тыра 254 мегаватт ва̄ге̄тыл рӯпитаӈкве паты тах». Наталья Комарова ла̄вме щирыл, ань ты о̄щнэ кол кастыл Лӯима̄т о̄лнэ ма̄хум на̄йпоста̄л ат хультэ̄гыт, ос нэ̄мхотты мо̄т та̄рвитын ат я̄рме̄гыт. Владимир Якушев э̄лаль потре тотыстэ, тувыл Няганский электростанция попутный газ ёт рӯпитанэ̄тэ кастыл Юграт, Ямалт ос Тюменский областьт о̄лнэ ма̄хум тынта̄лнув на̄йпос о̄ньщуӈкве патэ̄гыт. Ты о̄с сака ёмас ва̄рмалиг о̄лы. Тувыл яныг кӯщаит Нягань ӯст ос Октябрьский районыт о̄лнэ ма̄хум ёт ва̄щинтахтасыт, са̄в э̄рнэ тэ̄ланыл о̄вылтыт аквъёт потыртасыт. Та юипа̄лт кӯщаит Югорск ӯсн ми насыт, тот аквтох Советский, Югорск, Урай ӯсыӈ ма̄хум ос районт о̄лнэ ма̄хум ёт акванхо̄нтхатыгла̄лсыт. Губернаторыг ма̄хумн са̄всыр тэ̄лат урыл китыглавесы̄г, то̄ват матыр нё̄тмил ва̄рнэ тэ̄ла киссыт. Ань «Содружество» программа щирыл Югра, Ямал ос Тюменский область акваннё̄тхатым э̄лаль рӯпитаӈкве патэ̄гыт. Ты э̄тпос нилахойплов щислат Тюменский область 70 та̄лэ то̄влыс. Наталья Комарова ма̄хум ты ялпыӈ хо̄талыл янытласанэ, ос Владимир Якушевын ёмщакв рӯпитанэ̄тэ ма̄гыс пӯмащипа ла̄тыӈ ла̄выс. 1082 2014.08.22. Александр ВЬЮТКИН Кӯщаит ёт ва̄рыглан ёнгил. Во̄ртур э̄тпост нёлолов хо̄талт Ха̄льӯс районт Я̄сунт па̄вылт о̄лнэ ня̄врамыт ӯщлахтын «Мань Ускве» ма̄н округ губернаторув Наталья Комарова вертолётыл ёлиссас. Тав ётэ тот ва̄щинтахтын кастыл депутатыг о̄лнэ тит ма̄ньщи нэ̄г Татьяна Степановна Гоголева ос Надежда Геннадьевна Алексеева ёхталасы̄г. Тувыл ня̄врамыт ёт са̄в та̄л рӯпитан «Мань Ускве» ма̄ тармыл кӯщаиг о̄лнэ нэ̄ Любовь Павловна Стаканова, яныгнув ня̄врамыт ёт тот о̄лыс. «Мань Ускве» ня̄врамыт губернаторув ёт ёхталан кӯщаит та̄ра пе̄с порат о̄щнэ лахрыл мастуве̄сыт ос пуӈкыт о̄щнэ сагыл нэ̄гсалаве̄сыт. Наталья Комарова ма̄ньщи супыл мастувес, пуӈкто̄рыл пинвес ос ма̄ньщи хорамыӈ а̄гииг пе̄риявес. Ва̄ӈын ма̄хманэ ос таве ӯргалаӈкве ла̄ввесыт. Та юипа̄лт во̄рт о̄лнэ сома лю̄льнэ пӯсасыӈ па̄влын ва̄нттуве̄сыт. «Мань Ускве» ма̄ньлат хум ма̄хум ос та̄н ётаныл пе̄рщуӈкв ёхтын щирыл ла̄вхатсыт. Тох ты ёнганыл та о̄вылтасаныл. Губернаторув ня̄врамыт ос Мария Сергеевна Мерова ёт ка̄тын нэ̄гумтан ква̄лыг ло̄мт сагуӈкв ханищтахтас. Нэ̄матыр хо̄са та̄н пӯсасаныл тӣврыт нас то̄х ат о̄лсыт, «Мань Ускве» ма̄ньлат хум ма̄хмыт ха̄йтыл ёхтыгпасыт, мӯй ма̄хум пуӈкын пиннэ саганыл хо̄т та няртумтасаныл. Ёнганыл а̄стынэ юипа̄лт яныг кӯщаиг о̄лнэ ма̄хум ма̄нь ня̄врамыт хольт, халанылт иӈ хо̄са номтанылт пе̄нтхатым потыртасыт. Губернаторувн «Мань Ускве» ня̄врамыт ӯщлахтын ма̄ сака мӯстыс. Тав ла̄выс: «Тамле пӯмащ ёнгил нэ̄мхотты порат ат ёнгыгласум. Ам ань ва̄ӈын хо̄тпанум нупыл сунсэ̄гум, амтиротум номсэ̄гум, та̄наныл ам то̄х а̄прамтахтым нэ̄мхотты порат ат ва̄санум. На̄н сака ёмас ва̄рмаль э̄лаль тотэгы̄н. Таима̄гсыл ам на̄нанн яныг пӯмащипа ла̄вегум». Тувыл Наталья Владимировна «Мань Ускве» ня̄врамыт ӯщлахтын колн те̄рха̄пыл яласан мотор ос ханты ма̄хум яласан ма̄ньха̄п мӯйлупм. Тав ос хоса та̄йтыӈ лё̄мвой то̄рыӈ ня̄врамытын ю̄нтым супохсал мӯйлуптаве̄с. Акв та порат, аквтамле супохсал «Мань Ускве» ня̄врамытын аквписыг нё̄тмил ва̄рнэ ма̄гсыл Татьяна Степановна о̄с мӯйлуптавес. Тох ты ма̄н округувт о̄лнэ яныг кӯщаюв «Мань Ускве» ма̄н ёхталас. Любовь СТАКАНОВА те̄тыглам потре ма̄ньщи ла̄тӈыл Александр ВЬЮТКИН хансыстэ. 1082 2014.08.22. Александр ВЬЮТКИН О̄лнэ колыт ӯнттын урыл ля̄ххал. Мощ мо̄лалнуве Ханты-Мансийск ӯст ОТРК РИЦ – Югра нампа колт ля̄ххал тотнэ ма̄хум губернатор ва̄ӈын хум Дмитрий Викторович Шаповал ёт хо̄нтхатыглахтасыт. Тав округ янытыл са̄всыр колыт ӯнттын ва̄рмаль палт кӯщаиг о̄лы. О̄влэ̄т Дмитрий Викторович кол ӯнттын ма̄хум ялпыӈ хо̄таланылт янытласанэ. Тав ла̄выс: «Та̄н ва̄рнэ рӯпатаныл ма̄гсыл ам та̄наныл аквписыг ёмас ла̄тӈыл ӯлылыянум. Ты та̄л сыс округув янытыл акв миллион са̄вит метра о̄лнэ кол ӯнттувес. Ты ма̄гсыл ам та̄нанылн яныг пӯмащипа ла̄вегум». Щар о̄выл щёс кол ӯнттын ма̄хум ялпыӈ хо̄таланыл 1956 та̄лт янытлавес. Тувыл э̄лаль ка̄сыӈ та̄л во̄ртур э̄тпост титыт ӯщлахтан хо̄талыт та̄н ӯлылавет. Дмитрий Викторович ма̄хманэ янытлан ма̄ныл а̄стуме юипа̄лт ля̄ххал тотнэ хо̄тпатн титыглавес: – Со̄ль, ань округувт са̄в яныг, карс ос хорамыӈ колыт ӯнттавет! Ты ӯнттын колыт, аман со̄ль, тамле та̄ксарыг о̄лэ̄гыт, хумус ты урыл кол ӯнттын ма̄хум ла̄ве̄гыт? – Ма̄н та̄н рӯпатаныл ва̄тихал уральтыянӯв. Кол ӯнттуӈкве о̄вылтахтынэ̄ныл э̄лыпа̄лт ма̄навн те̄тум договор нэ̄паканыл щирыл та̄н палтыланыл минэ̄в. Нэ̄паканылт хансум ос по̄слым щирыл уральтыянӯв, ат а̄лыманэ̄ныл порат хо̄талыл ма̄йлыянӯв. Рӯпатаныл э̄лаль ат нё̄вумтан порат олныӈ штрафыл пиныянӯв. Хӯрмиттыг ёхтынэ̄в, рӯпатаныл акв ма̄т лю̄ли те, кол ӯнттын щирыл о̄щнэ нэ̄паканыл хот та выганӯв. Нэ̄паканыл магсыл та̄н сака пилэ̄гыт, таи ма̄гсыл та̄н ёмащакв ос э̄рнэ щирыл мо̄лях ва̄регыт. Кӯщай хум о̄с акв ва̄рмаль урыл титыглавес: – Округув янытыл са̄в йильпи ма̄ньлат щё̄мья о̄лы. Та̄н ма̄гсыланыл матыр ӯнттаве манос а̄ти? – Са̄выӈпа̄лэ ма̄н та̄н ма̄гсыланыл колыт ты ӯнттэ̄в. Та о̄лнэ колыт «Экономкласс» колыг ла̄вавет. Щар яныг тамле кол 59 квадратный метран туп ёхты. Яныгнуве̄г таве ва̄руӈкв ат ро̄ви. Тамле колыт ма̄ньлат ма̄хум ма̄гсыл ты номылматве̄сыт. Ань йӣльпи колыт ёвтнэ ма̄гсыл са̄всыр нё̄тмил ва̄рнэ саккон са̄в пирмайтым о̄лы. Округ ма̄тэ янгыг о̄лнэ щирыл ты пирмайтан тэ̄ланув пуссын э̄рнэ щирыл ат рӯпитэ̄гыт. Та̄наныл уральтаӈкв та̄рвитыӈ. О̄лнэ кол ёвтнэ щирыл ань Нижневартовский районт щар лыпащ, кол тынэ тот сака яныг а̄ти. – Ты та̄л сыс ня̄врамыт ханищтахтан ос са̄всыр мо̄т кол ма̄нах ӯнттувес ос ӯнттаве? – Округув янытыл ня̄врамыт ханищтан ма̄гсыл са̄тхойплов кол ӯнттаве. Тувыл титхойплов кол ма̄нь ня̄врам ӯрнэ колыг ва̄равет. Тувыл ос Нижневартовск ӯст ма̄хум пусмалтан кол э̄лаль ва̄руӈкв о̄вылтавес. Тав са̄в та̄л ӯнттуӈкве ат ве̄рмувес, ань тав юио̄выл атыт наке а̄стлаве. Та коныпалт ос Сургут ӯст ма̄хум пусмалтан яныг кол ӯнттаве. Тувыл Нефтеюганск ӯст каснэ ма̄гыс округув янытыл ма̄к яныг кол ӯнттаве. Моще̄ртын ты а̄сты, ань тӣвыр рӯпатанэ ва̄равет. Тав рӯпитан щирыл сӯкыр э̄тпост тах та пӯнсаве. 1082 2014.08.22. Тамара МЕРОВА Юртанэ̄н ка̄стувес. Ты э̄тпос нёлоловит хо̄талэ̄т Митрофан Алексеевич Тебетев 90 та̄лэ то̄влынув. Тыи ханты о̄йка, тав ка̄тыл са̄всыр хурит по̄слыс. Ювлехультум хӯрум та̄л порат а̄тимыг е̄мтыс. Ханты-Мансийскат Природы ос Человека нампа музейт рӯпитан ма̄хум нам хо̄талэ кастыл суссылтап щё̄питасыт. Тот тав то̄ва по̄слум хуриянэ суссылтаве̄сыт. Са̄выӈпа̄лэ хурит Шеркальский ос Ха̄льӯс музеит акванатым о̄лэ̄гыт. Митрофан Алексеевич Октябрьский район Лохтоткурт па̄вылт самын патыс. Ань ты ма̄нь па̄влэ по̄хат Шеркалы па̄выл о̄лы, тэ̄н тот Тамара Васильевна Диодорова ёт музей ва̄руӈкве номылматсы̄г. Мо̄т ма̄хумн тэ̄н о̄с нё̄твесы̄г. Ётыл Тебетев ще̄мьятэ ёт Ха̄льӯсн ва̄нтлыс, тот рӯпитас. Ань таима̄гыс Шеркалы ос Ха̄льӯс музеигт о̄йка са̄в по̄слум хуриянэ акванатве̄сыт, э̄лаль ӯргалым тот о̄ньщавет о̄с ма̄хумн суссылтавет. Ханты-Мансийскат тэ̄н э̄кватэ̄нтыл ювле хультум хус арыгкем та̄л о̄лсы̄г. О̄йка тыт э̄лаль о̄с рӯпитас. Ма̄ньлатыг о̄лме порат тав Ханты-Мансийск ӯст ханищтахтас ос то̄нт ӯсхулыт, колыт по̄слыглам. Та па̄сыл са̄в та̄лыт ювлехультсыт, ӯст мо̄т йильпи яныг колыт ӯнттуве̄сыт, мо̄т ӯсхулыл ва̄рве̄с. Ань ӯс пе̄с о̄лупсатэ Тебетев хуриянэ щирыл туп ка̄салаӈкве ве̄рмавет. Та̄н Природы ос Человека нампа музейт суссылтавет. Тот кӯщаиг рӯпитан нэ̄ Светлана Лазарева суссылтапын атхатам ма̄хум ёт пащалахтас ос Тебетев о̄йка ва̄нэ мӯй хо̄тпатын матыр потыртаӈкве ла̄выс. О̄влэ̄т Людмила Алфёрова, губернатор ва̄ӈын хо̄тпа палт советникыг о̄лнэ нэ̄, потыртас: «Ма̄н ты хо̄тал а̄лпыл Митрофан Алексеевич ёлщё̄питам ма̄тэ̄н ялсӯв. О̄йка памятникыл ва̄рвес, ос таве тув тотыслӯв. Ты э̄лумхо̄лас ам ёмащакв номилум. Ань о̄выл щёс е̄мтыс, по̄слум хуриянэ ма̄н тав та̄лэ̄т суссылтыянӯв. Митрофан Алексеевич ка̄сыӈ хуритэ урыл ма̄хумн такви потырта̄лыс. О̄лмет тав сака са̄в юрт ат о̄ньщис. О̄йка акваг ма̄к киснэ ла̄тыӈ ос пилта̄л хо̄тпаг о̄лыс. Кӯщаит матыр лю̄ль тэ̄ла ва̄ре̄гыт ке, ты о̄вылтыт та̄нанылн ля̄льт ла̄выглас. Ам тав ётэ Ханты-Мансийскат «Югра лылые̄п» ассоциацият рӯпитамум па̄сныл рӯмалахтасум. Тав такви ла̄внэ̄тэ щирыл: «Ам ат рӯпитан тулё̄влыт о̄ньще̄гум, та̄наныл хурит по̄слэ̄гум. Ос са̄всыр тэ̄ланум мо̄т хӯрум тулё̄вланумн ва̄руӈкве нё̄таве̄м, тыи Людмила Алфёрова, Леонид Струсь ос Юрий Кондин». Ты хо̄тал пуссын тыг атхатам ма̄хумн пӯмащипа ла̄тыӈ ла̄ве̄гум. Мирн ёмас тэ̄лат ва̄рнэ хо̄тпат пуссын номуӈкве э̄ре̄гыт, та̄наныл ёрувлаӈкве ат э̄ри». Леонид Филиппович Струсь ла̄выс: "Митрофан Тебетев ёт ме̄н 1994 па̄сныл ва̄йхатуӈкве патсуме̄н. Тав, со̄ль, то̄внакт нас хо̄тпат коныпал яныг кӯщаит о̄с ля̄выльттасанэ. О̄лме порат тав такви колэ̄т музейкол щё̄питаӈкве таӈхыс. Ты тэ̄латэ э̄лаль тотнэ щирыл ма̄н таве̄н о̄с нё̄тсӯв. Ты ва̄рмалюв са̄всыр та̄рвитын ёл пувыглавес, тохиӈ э̄лаль нэ̄матыр ва̄руӈкве ат та та̄ртвесӯв. Ам Митрофан Алексеевич о̄вылтыт видео суссылтан утыт о̄ньще̄гум, тав о̄лупсатэ кинан по̄слыслум. Ты суссылтапыт а̄нумн мӯйлуптан хурииг о̄лэ̄гыт. Акв хурит фруктыт по̄слысанэ. Акв щёс ам тав палтэ мӯйлуӈкве щалтсасум ос ты атыӈ утыт тотсум. Тав хотмовалас ос ла̄ви: «Сар ла̄щ, ам та̄наныл о̄влэ̄т по̄слыянум, тувыл ущ тэ̄ганум». А̄нумн мӯйлуптам мо̄т хуритэ̄т соссаӈ ма̄хум са̄с а̄ныса̄н ос пилыт по̄слысанэ. Ты лӯима ма̄ о̄с са̄всыр атыӈ тэ̄нутыт о̄ньщи ос соссаӈ ма̄хумытн ёмащакв ӯргалаве». Тувыл Леонид Филиппович музейн акванатхатам мӯй ма̄хум ма̄гыс «Колесо судьбы» э̄рыгсов ла̄тӈанэ ловиньтас, Тебетев о̄йкан ты э̄рыгсов сака мӯстыс. Музейт мӯйлын ма̄хум ма̄гыс Фаина Павловна Иштимирова пе̄с йӣкв йӣквыс, Юлия Яркина са̄ӈквылтапыл са̄ӈквылтас. Тэ̄н «Ялпус ма̄хум» нампа э̄ргынйӣквнэ тэ̄ла ва̄рсы̄г. Суссылтап сӯкыр э̄тпос ва̄т щисла мус рӯпитаӈкве паты тах. 1082 2014.08.22. Светлана РОМБАНДЕЕВА Ма̄вит мо̄т намыл пинвес. Ты туи о̄йттур э̄тпос 25 хо̄талэ̄т «Природный парк «Кондинские озера» йильпииг намаявес – «Природный парк «Кондинские озера» имени Л. Ф. Сташкевича». Ты ма̄вит ӯргалан ва̄рмаль Леонид Федорович Сташкевич тав о̄вылтаме, тот тав са̄в та̄л рӯпитас. Ты ма̄вит ӯргалан парк тав наме̄тыл намтуӈкве са̄в хо̄тпа тахсыт, та̄н пуссын са̄в ма̄т рӯпитэ̄гыт: Советский район мирколт рӯпитэ̄гыт, экологыт, Советское лесничество, «Малая Сосьва» ос «Юганский» нампа заповедникыгт, «Нумто», «Сибирские Увалы» ос «Самаровский чугас» паркытт рӯпитан ма̄хум ос са̄в мо̄т хо̄тпат. Тувыл округ мирколт рӯпитан ма̄хум та̄н ётаныл ка̄сащасыт, ты ма̄вит ӯргалан парк о̄йка наме̄тыл та пинвес. Леонид Федорович о̄йттур э̄тпос 19 хо̄талэ̄т 1935 та̄лт Ростов на Дону ӯст самын патыс. Тав ще̄мьятэ̄т пуссын учителиг рӯпитасыт. 1965 та̄лт Омск ӯст физкультура ос спорт институт а̄стлас. Ма̄н ма̄вн о̄йка 1970 та̄лт ёхтыс, Советский ӯст о̄лмыгтас. Тот са̄в ма̄т рӯпитас – физкультура учителиг о̄лыс, Советский райисполкомыт инженерыг, кол ӯнттын ма̄т бригадирыг ос мо̄т ма̄т рӯпитас. 1976 та̄лт тав «Малая Сосьва» нампа ма̄вит ӯргалан ма̄н кӯщаиг паттувес. 1981-1994 та̄лытт Леонид Федорович «Остров Врангеля» ос «Курильский» заповедникыгт пуӈк тотнэ хо̄тпаг паттувес. Тот рӯпитаме сыс тав акваг ма̄вит по̄слыс, хурит ва̄рыс, матыр ка̄салы, пуссын кинан по̄слыянэ. Ма̄вит ӯргалан урыл атпан арыг потыр хансыглас, хӯрум нэ̄пак та̄раталыс, намаясанэ – «Заповедник Малая Сосьва», «Арктическая заповедь. Записки директора заповедника», «Мои перевалы». Округув янытыл выставкат о̄лыгланэ̄ныл порат та̄в тот такви ва̄рум хуриянэ мирн ва̄тихал суссылта̄лсанэ: «40 лет геологического поиска», «35 лет Шаимской нефти». 1995 та̄лт о̄йка «Кондинские озера» нампа ма̄вит ӯргалан парк ва̄руӈкве номылматас, тот такви кӯщаиг патыс. Ань та ма̄вит нэ̄мхотьютн ул вос новаве, ул вос хилаве, тув нас мори яласан ма̄хум ул вос ялантэ̄гыт, ма̄ ул вос па̄ӈктыяныл. Ты ма̄гсыл тот са̄в хо̄тпа рӯпитаӈкве патыс – наука щирыл ос ма̄ янытэ̄т ӯргалан щирыл, са̄всыр хо̄нтхатыглапыт ва̄руӈкве патве̄сыт. Ань ма̄хум акван вос хо̄нтыглахта̄лэ̄гыт, ма̄вит ӯргалан урыл вос потраме̄гыт. Та ма̄т ма̄во̄й но̄х ул вос хилаве, о̄лнэ ма̄в курщипыг ул вос ва̄раве. Мо̄лты таквсы Леонид Федорович а̄тимыг е̄мтыс. О̄йка о̄лме палытыл ма̄вит ӯргалым о̄лыс, са̄в ёмас тэ̄ла ва̄рыс. Таима̄гыс тав акваг янытлавес, ма̄глын тагатан по̄сытыл майлувес. 2006 та̄лт «Заслуженный эколог Российской Федерации» намыл ма̄йвес. 1082 2014.08.22. Светлана РОМБАНДЕЕВА Округт о̄лнэ я̄тил ма̄хум! Ма̄н, округ Думат рӯпитан ма̄хум, на̄нан ма̄ янытыл о̄лнэ соссаӈ мирыт Мирхал хо̄таланылт янытлыянӯв! Ты ялпыӈ хо̄тал Ма̄ янытыл о̄лнэ мирыт Акванпотыртахтам Мирколаныл (Организация Объединенных Наций) щирыл хус арыгтем та̄л ты ва̄рыгла̄лаве. Ма̄ янытыл о̄лнэ соссаӈ мирыт – ты ань ма̄в янытыл та̄нти пе̄с йис о̄лупсанылт о̄лнэ пӯмыщ ма̄хум. Округувт кит тамле мирыг о̄лэ̄г ма̄ньщи ос ханты ма̄хманув. Пе̄с йис та̄гыл та̄н та̄нти о̄лупсанылт о̄лэ̄гыт, мӯтраӈ ма̄хманыл хольт ма̄витаныл ӯргалым, культураныл, ща̄нь ла̄тӈаныл янытлым о̄лэ̄гыт. Округувт ань ма̄во̄й но̄х виве ос ма̄витт о̄лнэ тыныӈ матарт кинсавет, ка̄тнпаттавет. Соссаӈ мирн тамле ма̄т о̄луӈкве атхунь та̄рвитыӈ. То̄ванакт та̄н тораставет, та̄нти о̄лупсанылт мӯсхал щирыл о̄луӈкве ат ве̄рмегыт. Та̄н ма̄гсыланыл ма̄навн са̄в ёмас тэ̄ла ва̄руӈкве э̄ри, та̄н ань мӯсхал щирыл о̄луӈкве вос ве̄рмегыт, та̄нти культураныл но̄х вос во̄рмалтыяныл, ща̄нь ла̄тӈанылт вос потыртэ̄гыт. Ам номсыте̄мт, ань соссаӈ ма̄хманув ма̄гыс хансыглам сакконанув манос э̄рнэ нэ̄паканув та̄нанылн нё̄тэ̄гыт. Округт о̄лнэ я̄тил ма̄хум, соссаӈ мир, на̄нан ам ялпыӈ хо̄талыл янытлыянум! Пуссын пуста̄гыл олэ̄н, со̄тыӈыщ, щуниӈыщ о̄лэ̄н! Округ Дума кӯщай хум Б. С. Хохряков потре ма̄ньщи ла̄тӈыг С. Ромбандееван толмащлавес. 1082 2014.08.22. Светлана РОМБАНДЕЕВА Ня̄врамыт пувлым ат а̄стысыт. Ты хуритыт Ха̄льӯс район Ло̄пмус па̄вылт о̄лнэ ма̄ньщи ма̄хум по̄слым о̄лэ̄гыт. О̄йттур э̄тпос о̄выл хо̄таланэ мощ хо̄талыӈыг о̄лсыт, та порат Ло̄пмус па̄выл ня̄врамыт пувлуӈкве а̄лымасыт. Ам ань кит а̄гирищ ос кит пыгрищ урыл аквкит ла̄тыӈ ла̄вуӈкве таӈхе̄гум – ты Диана Ромбандеева, Наташа Хозумова, Даниил Узаков ос Павлик Ромбандеев. Ло̄пмуст кит са̄ттем о̄лнэ̄м сыс ты нила ня̄врам ка̄сыӈ хо̄тал, хо̄талпалыт та пувлысыт. Хо̄талъя̄тыг иӈыт е̄мты, то̄ва ня̄врамыт иӈ хуе̄гыт, ты нила а̄гирищитпыгрищит я̄нанылт та сумыллэ̄гыт. На̄лваль ё̄ме̄гум, Ло̄пыӈ я̄н нэ̄гылттахтэ̄гум, яа, та̄н мовиньтым, ро̄хтахтым ты пувлэ̄гыт. То̄ванакт мощ во̄тыӈыг е̄мтапалы ман раквалтахтыглы, та̄н тох иӈ та пувлэ̄гыт. Э̄типа̄лаг ос лё̄мвоиӈыг ман ма̄ньӯиӈыг е̄мты, пуравет ман а̄ти, та̄нти та ва̄ганыл, тот та ёнге̄гыт, витн мӯрмыглэ̄гыт. Тувыл тыхал касэ̄гыт, ань хотьютаныл я̄ тапа̄лн моляхнуве̄г уйи. Юв такос во̄виянув, ма̄навн хунь хӯнтлэ̄гыт. Ань моще̄ртн таквсыиг ты е̄мты, школан минэ̄гыт, Ло̄пыӈ я̄нанылт пувлуманыл урыл матыр потыр тах улпыл хансэ̄гыт. Со̄ль, та̄нанылн нэ̄мхотты ща̄рщ ат э̄ри, та̄н сома ща̄рщ ва̄тат ӯщлахтасыт. Ты я̄тил ня̄врамаквет пуста̄гыл вос о̄лэ̄гыт, со̄тыӈыщ вос яныгме̄гыт! 1082 2014.08.22. Александр ВЬЮТКИН Хусыт та̄лэ та то̄влыс. Ха̄льӯс районт Я̄сунт па̄вылт о̄лнэ ня̄врамыт ӯщлахтын «Мань Ускве» ма̄ ка̄сыӈ тув рӯпиты. Ты та̄л тав хусыт та̄лэ то̄влыс. Щар о̄влэ̄т тав рӯпитаӈкве о̄вылтахтаме порат тот нэ̄матыр а̄тим о̄лыс. То̄нт ты ма̄ньщи мирув пуссын аквщир номт о̄ньщим, акваннё̄тхатым ань о̄лнэ «Мань Ускве» ва̄рсаныл. Щар яныг нё̄тмил Татьяна Степановна Гоголева ва̄рыс. Ты ма̄гсыл ма̄н та̄нанылн яныг пӯмащипа ла̄тыӈ ла̄ве̄в. Ань ты порат о̄лнэ ёныг урыл а̄нумн тув ялум ма̄ньлат хум Сергей Ремизов потыртас. На̄н ань тав потре э̄лаль ловиньтэлы̄н. – Ты та̄л ва̄рыглам пӯмащаныл ойттур э̄тпост ва̄т нупыл атыт хо̄талэ̄т о̄вылтасаныл, ат хо̄тал сыс о̄лыс. Округ янытыл са̄в ня̄врам тув ёхталас. Ханты-Мансийск ӯсныл, Ягримныл, Ха̄льӯсныл, Кульпасныл ос Хулюмсунтныл ма̄хум ёхталасыт. Аквъёт пуссын нёлса̄т ляпатем хо̄тпа о̄лыс. Тув ялантан ня̄врамыт са̄выӈпа̄лэ халанылт ва̄йхатэ̄гыт, юртыӈыщ о̄лэ̄гыт. Смена о̄вылтахтын хо̄тал, хунь ня̄врамыт Я̄сунт па̄вылн тотве̄сыт э̄типа̄лаг выгыр нампа ё̄рнкол котильт а̄ращ па̄лтыглан порат халанылт пуссын э̄рнэ щирыл ва̄йхатасыт. Ка̄сыӈ ня̄врам такви уре̄т, ва̄рыглам тэ̄ланэ урыл мощ потыртас. Мо̄тыт хо̄талыт, а̄лпыл ня̄врамыт ма̄гсыл Москва ӯсныл ёхталам нэ̄ Елена Геннадьевна Федорова тыт о̄лнэ пе̄с пора о̄лупсав урыл потыртас. Елена Федорова яныг ӯсыӈ ма̄т студентыг о̄лнэ ма̄ньлат ма̄хум ханищтан нэ̄г рӯпиты. Ма̄н пе̄с йис ма̄хманув о̄лупсаныл урыл тав са̄в ханищтас. Хо̄талья̄т юипа̄лт а̄гит, пыгыт щё̄питахтын щирыл ла̄ккваминасыт. А̄гирищит та̄нти ма̄гсыланыл пуӈкын пиннэ то̄р ос тучаӈ ю̄нтсыт. А̄с-угорский ма̄ньлат ма̄хум ёт рӯпитан хум Руслан Богордаев пыгрищит «Нюл тахли» нампа пе̄рщил ханищтасанэ. Хум ня̄врамытын ты пе̄рщил сака мӯстыс, халанылт та̄н иӈ хо̄са пе̄рщисыт. Титит хо̄талт пыгрищит халанылт титтыг уртхатасыт. Та э̄лыпа̄лнувет ос ма̄к щар яныг кӯщаиг ос судьяг щирыл Владимир Меров ос Константин Георгиевич Адин о̄луӈкв ла̄ввесы̄г. Та юипа̄лт ущ уртхатаӈкв о̄вылтахтасыт. Титтыг мингалан порат акв са̄вит ё̄р о̄щнэ щирыл уртхатасыт. Та юипа̄лт халанылт янгыг о̄лнэ ка̄нащиг пе̄риясыт. Ка̄нащиг Валера Сайнахов ос Вадим Чекмазов о̄луӈкв ла̄ввесы̄г. Тувыл та̄нти халанылт хумус ла̄вхатнэ нам пе̄риясыт. Владимир Меров ос Вадим Чекмазов ма̄хманэ «Нила во̄т хо̄н ма̄хум» намыл намтхатсыт. Константин Георгиевич ос Валера Сайнахов «Лӯи я̄ ма̄хум» ла̄вхатасыт. А̄гирищит ос пуӈкын пиннэ то̄р ос тучаӈ ю̄нтнэ̄ныл юипа̄лт Мария Сергеевна Мерова ма̄щтыр ю̄нтмилыл ю̄нтым а̄гит пе̄рияс. Щар хорамыӈ ю̄нтмиланыл Люба Артеева, Влада Штакм ос Даша Татаринова о̄лсыт. Та̄н халанылт Люба Артеева нё̄тнэ ма̄ньщи а̄гииг пе̄риявес. Хӯрмит хо̄тал а̄лпыл хумус э̄ри масхатасыт, ёт винэ пормасаныл щё̄питасаныл ла̄кква та минасыт. Константин Георгиевич такви «Лӯи я̄» ма̄хманэ ёт во̄рт о̄лнэ пӯсас тӣврын минасыт. Владимир Меров «Нила во̄т хо̄н» ма̄хманэ ёт ос во̄рын минасыт. Ёнгын порат пӯсас тӣвыр ма̄хум ма̄ньщи нё̄тнэ а̄гияныл ӯргалым о̄лэ̄гыт. Таве пӯсас тӣврыт о̄лнэ ма̄ кол тӣврыт о̄ньщияныл. Во̄рт о̄лнэ ма̄хум ва̄тихал во̄р па̄влын хо̄нтлуӈкв ёхталэ̄гыт. Хум ня̄врамыт пуӈканылн са̄гыл нэ̄гсаласаныл. Хотьют са̄ге пуӈке̄ныл хотхасумтаве, та хо̄тпа ёнгын ма̄ныл по̄хан ква̄лы. «Мань Ускве» ёрнколыт о̄лнэ ма̄н та̄ра тув та мины. О̄выл ёнгасан хо̄талт Константин Георгиевич ёт о̄лнэ ня̄враманэ во̄р па̄влыӈ ёнгасан ма̄т но̄хпатсыт. Та юипа̄лт ос ё̄рнкол по̄хат о̄лнэ сыстам ма̄т пе̄рщиманыл порат та̄н ёлпаттуве̄сыт. Мо̄тыт хо̄талт ос Владимир Меров ня̄враманэ ёт о̄с акв та щирыл е̄мтыс. Ӯсыӈ ма̄т тох та каймыт, акв ляльт ёхтынэ сыстам ма̄т та̄н пуӈк саганын пуссын хотхасумтымат. Ты та̄л нэ̄мхотьютаныл но̄х ат патыс. Халанылт та̄н титгылтитгыл но̄хпатыгласыт. Юио̄выл хо̄таланылт Хулюмсунт ма̄хманув ма̄гсыл вертолёт ёхталаме юипа̄лт «Мань Ускве» ня̄врамыт о̄лнэ ма̄наныл хо̄т щё̄питасаныл. Ё̄рнкол парщинаныл то̄слысаныл, о̄лнэ ма̄наныл округ губернатор Наталья Комарова ёхталан кастыл щё̄питасаныл. 1082 2014.08.22. Александр ВЬЮТКИН Во̄рыӈ ма̄т ӯщлахтасыт. Ты хурит Ха̄льӯс район Я̄сунт па̄вылт «Мань Ускве» ӯщлахтын ма̄т ня̄врамыт по̄слым о̄лэ̄гыт. Та̄н пуссын ва̄тихал тув ӯщлахтаӈкв ялантэ̄гыт, халанылт ёмащакв ва̄йхатэ̄гыт, акваннё̄тхатым юртыӈыщ о̄лэ̄гыт. Моще̄ртн ӯщлахтан хо̄таланыл ты оигпе̄гыт. Хо̄ты ма̄ныл, хо̄ты витныл о̄лнэ я̄тил ня̄врамаквет ёмащакв вос ханищтахтэ̄гыт, пуста̄гыл во̄с о̄лэ̄гыт, На̄й-О̄тыранылн вос ӯргалавет! 1082 2014.08.22. Тамара МЕРОВА Са̄в нот о̄лнэ соссаӈ мирыт. Во̄ртур э̄тпос онтоловит хо̄талэ Ма̄ янытыл о̄лнэ соссаӈ мирыт янытлан хо̄таланыл. Тамле ва̄рмаль ООН Генеральный Ассамблеят рӯпитан хо̄тпатын 1994 та̄лт ва̄рвес. Ты пора таима̄гыс пе̄риявес, ты э̄лыпа̄лт 1992 та̄лт во̄ртур э̄тпос онтоловит щислат соссаӈ мирыт тэ̄ланыл ӯргалан группа о̄выл щёс рӯпитаӈкве патыс. Ма̄ янытыл 370 миллион са̄вит э̄лумхо̄лас соссаӈ мирыг ловиньтавет. Та̄н ма̄ янытыл 70 са̄всыр хо̄н ма̄т о̄лэ̄гыт. Ты мирыт пуссын та̄нки ма̄кеныл ӯргалым о̄ньщияныл ос пе̄с йис наканыл э̄лаль тотыяныл. Россияв янытыл 47 са̄всыр нацият соссаӈ мирыг ловиньтахтэ̄гыт. Та̄н пуссын акванловиньтавет ке, тыи 280 со̄тыра э̄лумхо̄лас. Тувыл то̄ва ма̄хум та̄нки щиранылт намаим республикатт, областитт манос округытт http: //www. abbeylandsnursinghome. com//best-payday-loan-company о̄лэ̄гыт. Ханты-Мансийский автономный округт соссаӈ мирыт ялпыӈ хо̄таланыл 2005 та̄л па̄сыл янытлаӈкве патвес. Тыт мощщаг хультум хӯрум соссаӈ мир о̄лы – тыи хантыт, ма̄ньщит ос ё̄рныт. 2010 та̄лт Россия ма̄хум пуссын нэ̄пакын хансым порат тамле ва̄рмаль та̄рапатыс: округувт 19 со̄тыра 68 са̄вит э̄лумхо̄лас хантыиг хасве̄сыт, ма̄ньщииг – 10 со̄тыра 977 хо̄тпа ос 1 со̄тыра 438 ё̄рныт. Ё̄рныт са̄выӈпа̄лэ Ямал ма̄т о̄лэ̄гыт. Ань соссаӈ ма̄хум янытлан хо̄таланыл кастыл округув янытыл ӯсыӈ манос па̄влыӈ ма̄т сыресыр пӯмыщ ва̄рмалит щё̄пита̄лавет. Ханты-Мансийск ӯст ка̄сыӈ та̄л соссаӈ ма̄хум «То̄рум Маа» нампа музеин мӯйлуӈкве во̄виньта̄лавет. Ялпыӈ хо̄тал ва̄руӈкве культура департамент ос «Югра лылые̄п» ассоциация па̄лыл матыр щё̄питаӈкве нё̄тэг. Ты та̄л ялпыӈ хо̄тал нёлоловит хо̄талт ва̄рвес, тыи Митрофан Алексеевич Тебетев тав самын патум хо̄талэ. О̄йка о̄лнув ке, 90 та̄лэ то̄влынув. Тыт тав по̄слум хуриянэ о̄с суссылтаве̄сыт, тав уре̄тыл потыртасыт. Тувыл Ульяна Николаевна Шульгина ханты ма̄хум пе̄с накыт ӯргалан ос э̄лаль тотнэ̄тэ ма̄гыс, са̄в рӯпата ва̄рме ма̄гыс мӯйлупсал майвес. Кышик па̄вылныл Лидия Алексеевна Алясова «Мощ хот» (ма̄ньщи ла̄тыӈ щирыл «Мо̄йт кол») нампа э̄ргынйӣквын колэ ёт тот мӯйлыс. Ма̄ньщи пе̄с э̄рыгсов та̄н са̄ӈквылтан порат, э̄ква со̄с косамта̄лыс ос мӯй ма̄хум э̄лыпа̄лт такталастэ. Тав ётэ ёхталам кит пыгыг «Во̄раян хум йӣкв» йӣквсы̄г. Ма̄ньлат нэ̄т Галина Яптина, Марина Кашпирева ос Юлия Яркина нё̄тнэ та̄ныт са̄ӈквылтасыт ос ётыл ма̄щтырыг йӣквсыт. Мария Кузьминична Волдина апганэ ёт о̄с э̄ргыс, йӣквыс, тувыл пуссын мӯй ма̄хум То̄рум нупыл по̄йкщан ла̄тыӈ ла̄вуӈкве ла̄выс. Соссаӈ мирыт халт э̄лы ма̄ныл са̄в рущ манос мо̄т хо̄тпат ёхталасыт. Таи ма̄гыс пуссын рущ ла̄тӈыл «Света и добра! » са̄т щёс ро̄ӈхувласыт ос тувыл акв ма̄т лю̄лим хӯрум щёс мувлахи ё̄хсыт. Ханты-Мансийск атпан нупыл кит хо̄тпат нилахойплов са̄всыр ӯсыӈ ма̄ныл ёхталасыт. Та̄нкина̄ныл та̄н «этноэкспедицияг» ла̄вияныл. Та̄н халанылт ва̄т нупыл хо̄т ханищтахтын ня̄врам о̄лы. Ты а̄гирищитпыгрищит ханты ос ма̄ньщи ма̄хум о̄лупсаныл пӯмщалыяныл. Ялпыӈ хо̄тал ва̄рнэ ма̄гыс «То̄рум Маа» музейт рӯпитан хо̄тпатн я̄нас пӯмащипа ла̄вуӈкве э̄ри. Та̄н акваг ня̄врамыт ма̄гыс сыресыр касылыт ва̄рыглэ̄гыт. Тувыл мӯй ма̄хум ма̄гыс атыӈ тэ̄нут па̄йтэ̄гыт. Мо̄т ма̄ныл ёхтум хо̄тпатын ня̄няныл сака мӯстыс. Тав хӯл коласыл ва̄рим о̄лыс, ня̄врамыт такем тэ̄пъяласыт. Ты коныпал сыресыр касылыт кассыт, по̄слысыт, ёнгысыт. Ты о̄вылтыт ам тах я̄нас потыр хансэ̄гум. Хо̄тал палыт ёмас, посыӈ хо̄талыг о̄лыс, мӯй ма̄хум пӯмщиг ӯщлахтасыт. 1082 2014.08.22. Редакцият рӯпитан ма̄хум Сунсэ̄н ос пусмалтахтэ̄н. Ань ищхӣпыӈ ут хосыт сыресыр пӯмыщ ля̄ххалыт, кинат манос мультикыт хо̄нтуӈкве ро̄ви. Мо̄лал тот сунсыглахтым ма̄н «Зарядка ва̄рнэ тэ̄ла» ос «Закаливание» нампа мультикыг хо̄нтсӯв. Тэ̄н тамле пӯмащ о̄ньще̄г, ань са̄всыр мирыт ла̄тӈаныл щирыл толмащлымаг. Ма̄н округт о̄лнэ соссаӈ ла̄тӈгыгн о̄с толмащлымаг. Тамле тэ̄ла округувт «Центр медицинской профилактики» па̄лыл ва̄рвес. Ань ма̄ньщи ла̄тӈыл э̄рыгсов хольт тэ̄н Петр Анямовын э̄ргаве̄г, ханты ла̄тӈыл ос Ульяна Данило. Ань ты ма̄ньщи э̄рыгсовыг ёлхассагӯв, на̄н ловиньтэ̄н. Гимнастика-Э̄рыгсов Е̄мтапи те тамле ва̄рмаль Урок та̄л ос рӯпат та̄л, Та̄ра спортыг ла̄внэ ма̄гыс Хо̄нтыгпе̄в ма̄н потрыӈ хал. Ма̄н ты хо̄тал на̄нан ла̄ве̄в, О̄луӈкве пуста̄гыл хумус, Поргын ва̄рмаль суссылталэ̄в, Ва̄гта̄л ул патэ̄н ты мус. Молях аквъёт поргащлэ̄ва, Ла̄гланува та̄кталэ̄ва, Ё̄рнув та̄н вос е̄мтапе̄гыт. Акв ман а̄гманув по̄хан вос минэ̄гыт, Ювле ул вос ёхтэ̄гыт. Ань ос ка̄тыл рӯпитэ̄ва, Ё̄р вос ка̄тыт о̄ньщиглэ̄ва, Сунсэ̄н, хумус нё̄тнэ упражнение, Ва̄руӈкве тах на̄нан! Ва̄ре̄н ты щир, ва̄ре̄н та щир, То̄нт ё̄рыг е̄мтэгы̄н, Ва̄ре̄н ты щир, ва̄ре̄н та щир, То̄нт апрыг е̄мтэгы̄н, Ва̄ре̄н ты щир, ва̄ре̄н та щир, То̄нт нё̄тнэ̄г е̄мтэгы̄н, Ва̄рен ты щир, ва̄ре̄н та щир, То̄нт пусыг о̄лэ̄гы̄н! Закаливание-Э̄рыгсов Упражнение юипа̄лыт Э̄ри молях ё̄р кинсуӈкве. Тыима̄гыс э̄ри ка̄сыӈ хо̄тал А̄лпыл по̄лям витыл со̄схатаӈкве. Та̄кмалтахтэ̄н ла̄щмарылыл, Та̄кмалтахтэ̄н аквписыг, Акв ман а̄гм урыл ёрувлэ̄гы̄н, Тэ̄рпит урыл ёрувлэ̄гы̄н, Нэ̄мхо̄т аквтоп а̄гм, нэ̄мхо̄т асыӈ. Туи порат та̄кмалтахтэ̄н, Сэ̄ит повара̄лэ̄н, Ёнге̄н, пувлэ̄н, апмрамтахтэ̄н, Алпин котралэлы̄н. Хунь та тэ̄лы пора о̄вылтахты, То̄внакт ёса масэ̄н, Торге̄н ащирма сэ̄ӈкв лылтэ̄н, А̄гмын пусмалтаӈкве ха̄сэ̄н. Ва̄ре̄н ты щир, ва̄ре̄н та щир, То̄нт ё̄рыг е̄мтэгы̄н, Ва̄ре̄н ты щир, ва̄ре̄н та щир, То̄нт а̄прыӈ е̄мтэгы̄н, Ва̄ре̄н ты щир, ва̄ре̄н та щир, То̄нт нё̄тнэ̄г е̄мтэгы̄н, Ва̄рен ты щир, ва̄ре̄н та щир, То̄нт пуста̄гыл о̄лэ̄гы̄н! Ань хотты хо̄тпа ты ва̄рмалитыл пӯмщалахтуӈкве паты ке, тав ищхӣпыӈ ут хосыт э̄лаль вос кисхаты. Таима̄гыс о̄влэ̄т «Гимнастика» манос «Закаливание» ла̄тыӈ хансэ̄н, тэ̄н по̄хатэ̄н ма̄ньщи ла̄тыӈ хӯлтэ̄н, тувыл «видео» палт ва̄релы̄н. Та юипа̄лт э̄рнэ утыт тот нэ̄глэ̄гыт тах. Я̄тил ня̄врамаквет, ма̄ньта̄гыл пусмалтахтэ̄н, пуста̄гыл о̄лэ̄н! 1083 2014.09.05. Светлана РОМБАНДЕЕВА Округт о̄лнэ я̄тил ма̄хум! Ма̄н, округ Думат рӯпитан ма̄хум, на̄нан номт тотнэ хо̄талыл янытлыянув! Сӯкыр э̄тпос о̄выл хо̄талэ – ты ань ханищтахтан хо̄тпат ма̄гыс сака ёмас ялпыӈ хо̄тал. Ханищтахтан ва̄рмаль ты хо̄талыл ты о̄вылтахты, ма̄ньлат ма̄хум номтыӈыг е̄мтэ̄гыт, тувыл э̄лаль мӯсхал щирыл рӯпитаӈкве патэ̄гыт. Ня̄врамыт ханищтахтан тэ̄ланыл акв щирыл хунь мины, то̄ванакт матыр та̄рвит о̄лыглы, ос ка̄сыӈе̄мт ты сака пӯмыщ ва̄рмаль. Та̄н са̄в хащтал матыр ва̄ӈкве патэ̄гыт, йильпи ва̄рмалит та̄рапаттэ̄гыт, матыра̄ти ва̄руӈкве ханищтахтэ̄гыт. Ка̄сыӈ ня̄врам маныр ва̄г, маныр ха̄сы, ханищтахтынэ̄тэ порат пуссын но̄ххулиглы, тав ва̄рнэ тэ̄ланэ мирн ка̄салавет, ва̄ӈкве патавет. Я̄тил ня̄врамаквет, ма̄ньлат ма̄хум, ханищтахтан тэ̄лан на̄нан акваг вос нё̄ты, э̄лаль о̄луӈкве на̄нти ханищтахтэ̄н, матыр э̄рнэ тэ̄ла ва̄руӈкве на̄нти вос ха̄сэгы̄н. На̄н хуньт тах округув янытыл рӯпитаӈкве патэгы̄н, о̄лнэ ма̄вн са̄в ёмас тэ̄ла ва̄регы̄н. Ты йильпи ханищтахтан та̄л сыс номтыӈыг е̄мтэ̄н. Ханищтан хо̄тпат ёмас номтыл вос рӯпитэ̄гыт, ща̄ньа̄щит та̄нти ня̄враманылн вос нё̄тэ̄гыт, мӯтраӈыг вос о̄лэ̄гыт, ня̄врамыт ос ё̄мащакв вос ханищтахтэ̄гыт! Округ Дума кӯщай Б. С. Хохряков ке̄тум ля̄ххалэ ма̄ньщи ла̄тӈыг С. Хозумован толмащлавес. 1083 2014.09.05. Светлана РОМБАНДЕЕВА Ня̄врамыт автобусыл мӯйлуптаве̄сыт. Сургутский ра̄йон Русскинская па̄выл интернатт о̄лнэ соссаӈ ня̄врамыт о̄выл ханищтахтан хо̄тал кастыл «ЛУКОЙЛ-Западная Сибирь» рӯпитан ма̄ныл автобусыл мӯйлуптаве̄сыт. ОАО «ЛУКОЙЛ» рӯпитан ма̄ ос округ правительство халэ̄нт юртыӈыщ о̄лэ̄г. Ты компания округувт о̄лнэ мирн матыр нё̄тмил тэ̄ла ва̄тихал ва̄рапа̄лы. Ань ос «ЛУКОЙЛ-Западная Сибирь» рӯпитан ма̄ ня̄врамытн тамле нё̄тнэ, тыныӈ автобус мӯйлуптас. Тув ва̄т нупыл кит улас ва̄рим о̄лы. Ка̄сыӈ ӯнлын ма̄ мӯсхал щирыл щё̄питавес, ла̄гыл тӯщтын ма̄гыс ха̄ӈхылтапыт ёмащакв ва̄рим о̄лэ̄гыт, ня̄врамыт на̄йпос но̄хпе̄ламтаӈкве ве̄рме̄гыт ос мо̄т са̄в э̄рнэ матарт тув ва̄рим о̄лэ̄гыт. Ня̄врамытн ань па̄влыт халт яласаӈкве кӯпнит, ёмас номтыл ӯнлахо̄лэ̄гыт, минэ̄гыт. 1083 2014.09.05. Светлана РОМБАНДЕЕВА Ханищтахтан кол ӯнттувес. Ма̄н округувт Нефтеюганск ӯст ма̄ньлат ма̄хум ма̄гыс йильпи ханищтахтан кол ӯнттувес, политехнический колледжиг ла̄ваве. Тот ма̄ньлат ма̄хум округ янытыл са̄всыр ма̄т рӯпитан ма̄гыс ханищтавет – сварщикыт, слесарит, плотникыт, колыт ӯнттын ма̄хум, электромонтёрыт, тэ̄нут па̄йтнэ ма̄хум ос кондитерыт. Тот ань 630 хо̄тпа ханищтахты. Ты коныпал тот туи порат школат ханищтахтан ня̄врамыт ма̄гыс са̄всыр ханищтапыт ва̄рыглавет. Кӯщаиг Сергей Николаев тав о̄лы. Ань ты хум ла̄внэ̄тэ щирыл, колледжанылт ханищтахтан ма̄гыс хотальа̄ти э̄рнэ матыр та̄н пуссын о̄ньще̄гыт. Ты э̄рнэ рӯпатат коныпал та̄н иӈ хӯрум специальность щирыл ханищтап щё̄питэ̄гыт – ты автомеханик, токарь ос пуӈк хуратан тэ̄ла. Тув округ кӯщаюв Наталья Комарова ос Тюменский область губернатор пе̄нтсыл рӯпитан хум Владимир Якушев ялсыг. Тэ̄натэ̄н ты ханищтахтан кол сака мӯстыс. 1083 2014.09.05. Редакцият рӯпитан ма̄хум Пе̄рияп ва̄рмаль. Ты э̄тпос нилахойпловит хо̄талэ̄т Тюменский область ма̄гыс губернатор пе̄рияве. Тюмень ӯс по̄хат о̄лнэ районыт коныпал яныг кӯщай пе̄рияӈкве Ханты-Мансийский автономный округт ос Ямало-Ненецкий автономный округт о̄лнэ ма̄хум о̄с патэ̄гыт. Пе̄рияп ва̄рмаль во̄рт о̄лнэ соссаӈ ма̄хум палт ань ва̄ре̄гыт. Тюменский область губернаторыг е̄мтнэ ма̄гыс нила хо̄тпа воритотэ̄гыт, ты Дорохин Павел КПРФ партия па̄лыл, Пискайкин Владимир «Справедливая Россия» партия па̄лыл, Селюков Михаил ЛДПР партия па̄лыл ос Якушев Владимир «Единая Россия» партияныл. Владимир Якушев ань губернатор ва̄ӈын хо̄тпаг о̄лы. Юграт ос Ямалт о̄лнэ ма̄хум, на̄н ос пе̄рияӈкве во̄ваве̄н. Пе̄рияӈкве ялэ̄н тах, хот ул ёрувлэ̄н. 1083 2014.09.05. Тамара МЕРОВА Ня̄врамыт ханищтахтуӈкве о̄вылтахтасыт. 2014-2015 та̄лыг кастыл округ янытыл 187 со̄тыра ня̄врамыт школан ханищтахтуӈкве минасыт. Та̄н халанылт 21 со̄тыра 600 са̄вит ма̄нь ня̄врамаквет о̄выл классыт ханищтахтуӈкве патсыт. Ань ка̄сыӈ а̄гирищакве ос пыгрищакве «Подарок первокласснику Югры» нампа нэ̄пакыл мӯйлуптавес. Ты нэ̄пак щирыл ня̄врамыт Россия ма̄т о̄лнэ са̄всыр мирыт урыл ва̄ӈкве патэ̄гыт. Тувыл округт яныгман во̄р ӯйит, хӯлыт, ма̄витув о̄вылтыт потрыт ловиньтэ̄гыт. Та̄наныл пуссын пӯмыщ ма̄гыс нё̄тнэ хуритыт ка̄салыяныл. Ты коныпал ня̄врамаквет ГИБДД па̄лыл о̄с мӯйлупсал щё̄питаве̄сыт. Та̄н я̄ӈк хуриӈ по̄сыл майве̄сыт. Таве коны о̄щнэ маснутын хотталь ва̄руӈкве э̄ри. Кон турманыӈыг е̄мтнэ порат тамле по̄с ёмщакв постуӈкве паты ос машинат яласан лё̄ӈхыт посэ э̄лныл на̄ӈки. Ты таквсыиг Ханты-Мансийскат ос Сургут ӯст йильпи школаг рӯпитаӈкве патсы̄г. Ка̄сыӈ школат 825 а̄гитпыгыт ханищтахтуӈкве ве̄рме̄гыт. Советский район Зеленоборск па̄вылт о̄с йильпи школа ӯнттувес. Тув ня̄врамыт о̄выл щёс ханищтахтуӈкве щалтсыт. 1083 2014.09.05. Николай МЕРОВ Товтыл каснэ лё̄ӈх щё̄питавес. Мощ мо̄лал товтыл каснэ мирхал ва̄рмаль щё̄пита̄лнэ кӯщаит Ханты-Мансийск ӯст акванатхатыгласыт. Ма̄н округувныл Алексей Путин – губернатор ва̄ӈын хум, тувыл Борут Нунар – рейсмирхал Кубок кӯщай хум, Владимир Мелехов – Россият биатлон ва̄рмаль э̄лаль тотнэ кӯщай ва̄ӈын хум ос Спартак Антоненков – «ЮграМегаСпорт» нампа организация кӯщай та̄н о̄лсыт. Югра ма̄т о̄лнэ биатлонный центр каснэ ма̄гыс мӯсхал щирыл щё̄питым о̄лы ма̄н а̄ти, ёхталам кӯщаит уральтасаныл. Та юипа̄лт та̄н ля̄ххал тотнэ ма̄хум ёт хо̄нтхатыгласыт ос ты урыл потыртасыт. Ля̄ххал тотнэ хо̄тпатн Алексей Путин тох ла̄выс: «Округувт каснэ ва̄рмаль ёмасыг мины, ма̄н каснэ хо̄тпанув ма̄ янытыл о̄лыгла̄лум кассылыт ва̄тихал но̄хпатыглэ̄гыт. Ты ма̄т касылын щё̄питахтан хо̄тпанув а̄ти сака хосат, мирхал олимпиада о̄лум порат, Россия ма̄гыс ма̄гылн тагатан са̄в по̄с тотсыт. Та̄н халанылт товтыл каснэ порат Алексей Волков со̄рни по̄с вис. Ма̄н округувт ты каснэ ва̄рмаль акваг э̄лаль тотуӈкве патылӯв. Ань Биатлонный центр ты коныпал ёмаснуве̄г ва̄рилув тах. Тахсын лё̄ӈхыт йильпииг щё̄питыянӯв, кина по̄слын ма̄ о̄с ёмащакв ва̄риянӯв тах». Э̄лыл ёхталам кӯщаиг Борут Нунар ос Владимир Мелихов каснэ лё̄ӈхыт ос ма̄хум ӯнлын ма̄т ёмщакв уральтасанэ̄н. Тэ̄н ла̄внэтэ̄н щирыл, округт о̄лнэ биатлонный центр каснэ ма̄гыс ёмщакв ва̄рим о̄лы. Тыт о̄лнэ мир мӯй ма̄хум яныг ща̄гтыл ӯрияныл. Ка̄сыӈ хо̄тпан тыт ӯщлахтуӈкве сака мӯсты. Каснэ ма̄хум ма̄гыс маныр э̄ри, пуссын щё̄питым о̄лы. Хотьют ты ма̄гыс яныг рӯпата ва̄рыс, тэ̄н та хо̄тпат сака янытласанэ̄н. Сӯкыр э̄тпос о̄выл хо̄талытт товтыл каснэ ва̄рмаль ва̄рнэ хо̄тпат мирхал Конгресс щё̄питэ̄гыт тах. Ты Конгрессн ма̄хум нила та̄л сыс акв щёс акванатхатыглэ̄гыт. Маныр та̄рвит ва̄рмаль о̄ньще̄гыт, ты урыл потыртаӈкве патэ̄гыт ос акваннё̄тхатым та̄рвитаныл мӯсхал щирыл щё̄питыяныл тах. Кӯщай хо̄тпат о̄с акв ва̄рмаль урыл потыртасыт. Каснэ тэ̄ла сунсуӈкве са̄в мир ёхталы. Та̄н ма̄гсыланыл ӯщлахтын кол сака мощща о̄лы. Ань тах ос йильпи колнакт ӯнттуӈкве патавет. Тувыл каснэ лё̄ӈх, суснэ ма̄ ос кина по̄слын ма̄ я̄нас щалтнэ ма̄л щё̄питаве. Пуссын ты ва̄рмолит ма̄хум ща̄гт ма̄гыс щёпитавет. 1083 2014.09.05. Николай МЕРОВ По̄х хо̄тпан мори ул агтэ̄н. Ань ты накт тӯлмантан хо̄тпат са̄всыр щирыл ма̄хум урткуптыяныл. Ты ва̄рмаль урыл полицият рӯпитан хо̄тпат мощ мо̄лалнув потыртасыт. Ма̄хум ты накын ул вос патсыт, мир ӯргалан хо̄тпат ла̄тыӈ ке̄тсыт. Ма̄н округувт рӯпитан полиция хо̄тпат ла̄внэ̄ныл щирыл, ань ты ва̄рмаль та̄кыщ уральтым о̄ньщаве, тыи ма̄гыс ты ощмар мощщаг е̄мтыс. Мо̄т та̄лыт ловиньтаӈкве ке, тох е̄мты: 2012 та̄лт – 1 со̄тыра 94 ла̄палахтын нак, 2013 та̄лт – 871 ла̄палахтын нак, 2014 та̄л са̄т э̄тпосэ сыс – 658 ла̄палахтын ва̄рмаль о̄лыс. Ты хо̄тал мус 378 о̄выл е̄мтнэ нак осн иӈ ат паттувес. Тамле ощмар ва̄рнэ хо̄тпат пувуӈкве сака та̄рвитыӈ. Ты коныпал то̄ват суд щирыл ӯнттуӈкве ат ве̄рмавет. О̄выл ва̄рапам наке ёмщакв та̄ра ат ке паттаве, тав та та̄ртаве. Тамле ощмар ва̄рнэ хо̄тпат тӯлмантан ва̄рмаль акванюрщхатым щё̄питэ̄гыт. Хо̄тпа ла̄пала̄лаве, пормасанэ хотвивет. Ётыо̄вылт е̄мты тох, э̄лумхо̄лас пормасанэ э̄рттам такви э̄л мисанэ. Ла̄палахтын ма̄хум хо̄тпа номтэ ёмщакв то̄ргамтыяныл. Аквтупмат хо̄тпа нупыл юртыг о̄лэ̄гыт. Тувыл ос акв тамле ва̄рмаль о̄лы. То̄ва ла̄палам хо̄тпат полициян ат ювыт, заявлениенэ̄пак хансуӈкве ат таӈхе̄гыт. Ты хосыт о̄выл ва̄рнэ хо̄тпат пувуӈкве ат ве̄рмавет. Ощмар ва̄рнэ ма̄хум янгыщ яныгпа̄ла хо̄тпат тох урткуптыяныл, э̄рттам та̄нанылн нё̄тнэ щирыл рӯпитэ̄гыт. Та̄н палтаныл ёхтэ̄гыт, сырсыр хащта̄л нэ̄пакт суссылтэ̄гыт, тувыл олн та няртэ̄гыт. Са̄выӈпа̄лэ ос тамле ощмар о̄лы: телефон хосыт звонитэ̄гыт, уркпотыр тотэ̄гыт. Э̄лумхо̄лас ла̄палыяныл, олныл та ойтапавет. Ётыл та олнаныл акваг хотталь та минэ̄гыт. Са̄выӈпа̄лэ турманколт ӯнлын хо̄тпат тамле ощмар ва̄ре̄гыт. Та̄н хотты хо̄тпан звонитэ̄гыт, ла̄ве̄гыт, э̄рттам юртэ манос рӯтэ матыр лю̄ль нак ва̄рапанэ̄тэ ма̄гыс полициян пуввес. Ос таве тувыл та̄ртнэ ма̄гыс олн во̄ве̄гыт. Тамле нак са̄в щёс о̄лыглас, то̄ва хо̄тпат олн ойтэ̄гыт. Ты хо̄тпатн щар ул агтэ̄н. Ты потыр о̄влэ̄т ёмщакв та̄рапаттуӈкве э̄ри. То̄ва ла̄палахтын хо̄тпат сыресыр тэ̄рпи манос матыр пормасыт тыналэ̄гыт. Та̄наныл юв мори ул та̄ртэ̄н, та̄н тыналан пормасаныл о̄с ул ёвтэ̄н. На̄н ул вос ла̄палавесы̄н, полицият рӯпитан хо̄тпат тамле потыр щё̄питасыт. Маныр ва̄руӈкве э̄ри, ты урыл э̄лаль ловиньтэ̄н. Хотьют на̄н палтын звониты ке, ул рохтэ̄н. О̄влэ̄т ляпат о̄лнэ рӯтанын ёт потраме̄н. Тувыл ос та юртын манос рӯтын палт звонитэ̄н, хотьют урыл потыр о̄лыс, таве китыглэ̄лын. Тав телефонэ ат выгтэ ке, юртанэ̄н манос аквъёт рӯпитан ма̄хманэ палт звонитэ̄н, тав уре̄тыл тот китыглахтэ̄н. Маим телефонын манос банковский номерн щар ул звонитэ̄н, на̄нки банковский карта номерын по̄х хо̄тпан о̄с ул ла̄велын. Банковский карта палт на̄нки паролин ул пинэлы̄н, ощмар ва̄рнэ хо̄тпан ка̄тынпаттаве ке, олнанын пуссын хота̄лмаявет. Олнанын Банкколт ӯнттум банкоматытт манос та ляпат ӯнлын колытт вуе̄н, та̄н пуссын видеокамера хосыт сунсавет. Интернет хосыт банковский картал матыр ма̄гыс ойтхатнэ̄н порат антивирус программан ёмащакв вос рӯпиты. Хащта̄л Интернетсайтыт о̄с нэ̄матыр ул ёвтэ̄н. Тамле ощмарлан ва̄рмаль ул вос е̄мтыс, полицият рӯпитан ма̄хум са̄в рӯпата ва̄регыт кос, ос на̄н на̄нки о̄с ӯргалахтым о̄лэ̄н. Мори ма̄хум на̄нки колын ул та̄ртэ̄н, хащтал хо̄тпат потрын та̄ра ул агтэ̄н. Ос тамле накн ликмысын ке, та̄ра «02» телефон хосыт звонитэ̄н, тот на̄н ва̄рмалин щирыл полиция ма̄хумн нё̄таве̄н. УУР УМВД России округув янытыл ке̄тум ля̄ххал ма̄ньщи ла̄тӈыг Николай МЕРОВ хансыстэ. 1083 2014.09.05. Тамара МЕРОВА Э̄рнэ нэ̄паканув молях щё̄питавет. Ювле хультум э̄тпост РИЦ «Югра» колт ля̄ххал тотнэ ма̄хум кит кӯщаиг ёт хо̄нтхатахтыгласыт – тыи ищхӣпыӈ утыт ёт рӯпитан департаментыт кӯщай Андрей Бородин ос «Многофункциональный центр» нампа колт кӯщаиг о̄лнэ хум Александр Сучков. Андрей Бородин Департаментэ рущ щирыл «информационных технологий» намаим о̄лы. Ань ты кӯщаиг тэ̄нки рӯпататэ̄н о̄вылтыт ма̄хум ма̄гыс ля̄ххал тотсы̄г. О̄влэ̄т Александр Сучков потыртас: «Ань ма̄хум Пенсионный фондныл ос социальный развитие департаментныл акванатнэ э̄рнэ нэ̄пакыт ма̄н палтув щё̄питаӈкве ве̄рме̄гыт. Материнский капиталыг намаим тэ̄лат палт ма̄н нэ̄ хо̄тпатн нё̄тэ̄в. Во̄раян пора о̄вылтахтынэ̄тэ э̄лыпа̄лт хум хо̄тпат «во̄раяӈкве ма̄гыс та̄ратан нэ̄пакыл» ва̄руӈкве нё̄тыянӯв. Тувыл пенсионерыт манос мо̄т хо̄тпат Ханты-Мансийский банкныл винэ «Социальная карта» ань о̄с МФЦ па̄лыл щё̄питаӈкве патве̄сыт. Налог ойтнэ ма̄хум та̄нки тэ̄ланыл та̄рапаттуӈкве манос сыресыр э̄рнэ нэ̄пакыт кинсуӈкве о̄с ма̄н палтув вос ёхталэ̄гыт». Тувыл мо̄лты та̄лныл Юграт «Универсальная электронная карта» нампа проект рӯпататэ о̄вылтавес. Тамле УЭК пластиковый картал ка̄сыӈ хо̄тпа ва̄руӈкве ве̄рмаве, туп вос ка̄сащанув. Тот медицинский полис, страховой счет ос банк ма̄гыс хансым номерыт хӯлтавет. Ты карта о̄щнэ̄н порат на̄н я̄нас документанын мо̄тмо̄т ма̄т кинсуӈкве ат э̄ре̄гыт тах. Та щирыл ма̄хум пӯльницат ос Пенсионный фондыт тэ̄ланыл нэ̄мат хосан ат тагапе̄гыт. Округ янытыл 25 многофункциональный центрытыт УЭК пластиковый картат щё̄питавет. Ань ты хо̄тал мус 7 со̄тыра хо̄тпа карта ва̄рнэ щирыл ӯрхатэ̄гыт. Кит со̄тыра арыгкем хо̄тпа тамле ут ка̄тын майве̄сыт. Ма̄хум ань МФЦ о̄вылтыт матыр ля̄ххал ва̄нэ ма̄гыс http: //mfchmao. ru. ло̄псыт вос кисхатэ̄гыт. Андрей Бородин э̄лаль ла̄выс: «Ка̄сыӈ хо̄тпа ищхӣпыӈ ут хосыт МФЦ ло̄пс палт такви наме, о̄парищ наме ос сотовый номере хӯлтуӈкве ве̄рми. Ты коныпал СНИЛС манос паспортын хансым утыт о̄с хӯлтыянэ ке, то̄нт МФЦ па̄лыл сыресыр справкат манос документыт кисхатнэ торыг та̄ра хо̄нтавет ос э̄рнэ нэ̄паканэ молях ва̄равет. Ань мус 267 со̄тыра э̄лумхо̄лас тув хасхатым о̄лы. Туп ювле хультум са̄т э̄тпос сыс 192 со̄тыра э̄лумхо̄лас хасхатасыт. Ма̄нь па̄влыӈ ма̄т ма̄н о̄с многофунциональный центрыт рӯпитан щирыл щё̄питыянӯв. Та̄наныл ищхӣпыӈ утыл ке̄тыянӯв ос ва̄риянӯв. Тувыл ма̄хум ищхӣпыӈ утыл рӯпитаӈкве о̄с ханищтыянӯв. Таи ма̄гыс «Электронный гражданин» ханищтап са̄в ма̄т ва̄ре̄в. Округ янытыл ань 60 со̄тыра хо̄тпат тамле ханищтапын ёхталасыт. Та юипа̄лт МФЦ ло̄псын хасхатнэ хо̄тпа та̄ра мощ са̄вми». Тувыл ты кӯщаиг о̄с акв е̄мтапам ва̄рмаль урыл потыртасы̄г. Та̄н ань Украина ма̄ныл ёхтум хо̄тпат ёт са̄в рӯпитаӈкве патсыт. Ты ма̄хум тэ̄ланыл ёмщакв щё̄питан ма̄гыс миграционный служба ёт рӯпитэ̄гыт. Украина ма̄ныл оим 3 со̄тыра 538 хо̄тпат та̄н палтаныл нё̄тмил кинсуӈкве хасхатасыт. Пуссын Россият акваг о̄лмыгтан ва̄рмаль во̄ве̄гыт ос таима̄гыс э̄рнэ нэ̄паканыл кинсуӈкве ос ма̄кыг щё̄питаӈкве э̄ре̄гыт. Ты коныпал хотты колыт нё̄тмилыл ва̄равет, хо̄т маныр о̄лы, ма̄хум пуссын хӯлтавет. Ма̄н номсыте̄вт, ты та̄рвит хо̄нтлан ва̄рмаль та̄н палтаныл моляхыл ёл вос по̄илттавет. Хота мус нас ма̄хум саватаӈкве ро̄ве̄гыт. Та̄н ётаныл рӯпитаӈкве са̄в хунь кос, тувыл ос ойгалам ма̄хум са̄лиг о̄лы. Ты ма̄хум тыт о̄лнэ колыл хо̄нтавет, рӯпатал кинсавет. Аньмунтув ущты акв ля̄ххал о̄с та̄рапатыс, округ янытыл са̄всыр школанувт 500 арыгкем тувыл ёхтум ня̄врамыт ханищтахтуӈкве патэ̄гыт. 1083 2014.09.05. Тамара МЕРОВА А̄с я̄ ва̄тат ӯнлын па̄вылкве. Шеркалы па̄выл Октябрьский районт о̄лы. Тав А̄с я̄ ва̄тат ӯнттувес. Тув та̄л палыт мӯй ма̄хум ёхталэ̄гыт ос ты нё̄тнэ ма̄кве пӯмщалыяныл. Тот 1 со̄тыра 361 э̄лумхо̄лас о̄лы. Та̄н халанылт 341 соссаӈ хо̄тпа о̄лы, тыи 309 хантыт, 28 ма̄ньщит ос 9 ё̄рн хо̄тпат. Мо̄лты та̄лт па̄выл кӯщаиг тот Людмила Валерьевна Мироненко пе̄риявес. Ты э̄лыпа̄лт нэ̄ 1994-1997 та̄лытыт миркол кӯщаиг о̄лыс. Шеркалыт школаинтернат, ня̄врам ӯрнэ кол, клуб, музей ос ла̄пкат о̄лэ̄гыт. Ма̄хум тот нёлоловхойплов са̄всыр предприятиятт рӯпитэ̄гыт. Тувыл мощща хо̄тпат мо̄т ма̄н о̄луӈкве минэ̄гыт. Ма̄хум тот о̄лнэ колыт ӯнттэ̄гыт. Та̄нки ма̄ке̄ныл э̄руптыяныл, па̄вланыл урыл нё̄тнэ э̄ргыт о̄ньще̄гыт, ос ялпыӈ хо̄талыт порат акваг э̄ргияныл. 1083 2014.09.05. Николай МЕРОВ Ка̄тыл са̄всыр пормасыт ва̄рнэ нэ̄. Нина Георгиевна Рукова, Советский район Югорск ӯст о̄лы. Ты нэ̄ Ня̄хщамво̄ль па̄вылт яныгмас. Тав а̄ще тувыл ты о̄лыс. Ща̄не Парасковья Гавриловна, о̄йкатэ щирыл Ануфриева, ма̄ньщи нэ̄, Ха̄льӯст олыс, школат рӯпитас. Тувыл 1946 та̄лт са̄лыӈ суныл Ня̄хщамво̄льн тотвес, тот школат ня̄врамытн ма̄ньщи ла̄тыӈ урок ханищтас. Ща̄нягеа̄щаге тот акванминасы̄г, тувыл Нина самын патыс. Та па̄сныл са̄в та̄л минас. Нина Георгиевна ма̄нь ня̄врам колт налыман нупыл акв та̄л рӯпитас. Пенсиян патме юипа̄лт тав соссаӈ мир пормасыт ка̄тыл ва̄руӈкве о̄вылтахтас. Ам аквматнакт тав палтэ ёхталасум, тав а̄нумн ма̄щтырлан пормасанэ суссылтас ос акв пӯмащ мо̄йт потыртас. На̄н тав потре э̄лаль ловиньтэлы̄н: – Ам о̄влэ̄т соссаӈ мир о̄лупса урыл стихотвореният хансуӈкве патсум. Э̄лумхо̄лас, ма̄вит ос мо̄т мирыт урыл са̄в стихотворение хассум. Кит ма̄нь нэ̄пак та̄ратасум. Ётылнув ос пормасыт ка̄тыл ва̄руӈкве номылматсум. Ты ва̄рум пормасанум хосыт ам соссаӈ ма̄хум йис о̄лупса мирн суссылтэ̄гум. Пе̄с ма̄хум хумус о̄лсыт, манырсыр номт тотсыт, ты пормасыт хосыт та̄рапаттуӈкве ро̄ви. А̄тям саран хум о̄лыс, тав лесникыг рӯпитас, ма̄ньщи мир урыл са̄в потырта̄лыс. Акваг та̄н халанылт о̄лыс. Акв мойт ань потыртылум: «Ёрнколт Ищтапан о̄йка о̄лыс. Пе̄с порат, ялпыӈ хо̄талыт о̄лыглам порат, ма̄ньщи ос рущ ма̄хум халанылт пормасыл тыналахтасыт. Ма̄ньщи хо̄тпат тэ̄нутпормасаныл рущ па̄вылн тотыгласаныл. Тот матыр мо̄т пормас ма̄гыс пе̄нтыгласаныл. Аквматнакт Ищтапан са̄лыӈ суныл минас. Ло̄ӈханьщапыт суяныл э̄лыл суйтсыт, во̄р во̄тын хосгувес. Тав э̄ргантым ла̄щалла̄щал минас. Аквматэ̄рт во̄рт тав лю̄ньщ суй хӯнтамлас. О̄йка са̄лыӈ сунэ ёлпо̄йтыгпаптастэ. Номсы, э̄рыӈ са̄лыӈ сун паттатэ щихырты. Мощ хӯнтлыс, нэ̄матыр ат суйты, о̄с э̄лаль минмыгтас. Хӯнтлы, о̄с э̄рттам ня̄врам лю̄ньщи. Тав лё̄ӈх коныпалн ёмыс, сунсы, во̄р щахылт а̄па ӯнлы, та а̄пат ня̄врам хуи. Тыглетувле сунсыглахтас, ляпат нэ̄мхотьют а̄тим. Номсы, аман хотьют а̄па тыт хультуптас, ня̄врам по̄ляве. Воссыг маныр ва̄руӈкве, ня̄врам вистэ, ёмщакв лапма̄нигтастэ ос э̄лаль такви па̄влэ̄н та минмыгтас. Лё̄ӈхыт миныматэ номсахты: Ос хумус ам таве янмалтаӈкве патылум. Ам э̄ква ат о̄ньще̄гум, амккем о̄лэ̄гум. Мирн маныр ла̄ве̄гум, хотыл ам ня̄врам вислум. Ам нупылум номсахтуӈкве патэ̄гыт, э̄рыӈ ам тӯлмантаслум. Ты ма̄гыс тах хотум ва̄равем. Ты номтэ̄т тав ювле ёӈхыс, рущ па̄вылн минмыгтас. Тув ёхтыс, ӯщлахтын колт хӯрум хо̄тал о̄лыс, ӯрхатас. Номсы, хотьют ня̄врам кисмаитэ, тав палтэ ёхты. Тох нэ̄мхотьют аты ёхтыс. Тот о̄лыматэ ня̄врам щар ат лю̄ньщис. Ты кос ӯрхатас, тувыл маныр ва̄руӈкве воссыг, ювле такви па̄влэ̄н та минас. Юв ёхтыс, ня̄врам па̄лыгутыстэ, насати а̄гирищ. Ята вос, Ищтапан о̄йка та а̄ги такви но̄хянмалтастэ. А̄гикве во̄раяӈкве ханищтахтас. Во̄рт ёсал ё̄мыгтас, сака ёмащакв па̄тлуптас, лэ̄ӈын саме̄н хо̄яс. Юн колсори рӯпата ва̄рыс. Ос аквматнакт тэ̄лы порат Ищтапан о̄йка ё̄рнколныл конква̄лыс. Со̄ви ла̄гыл ё̄мнэ лё̄ӈх касалас. А̄гитэ̄н ла̄выс: – Ме̄н ё̄рнколме̄н по̄хыт хотты хащта̄л хо̄тпа ё̄мыгты, наӈ ӯргалахтым о̄лэ̄н, наӈте̄н э̄л ул минэн. Хотталь тӯлмантаӈкве ве̄рмавен. А̄гитэ ты урыл нас мовалас ос ла̄выс: – Хотьютын ам тӯлмантавем. О̄с аквматнакт а̄ще а̄лпыл ква̄лыс, а̄гитэ а̄тим. Насати тав во̄р исхорытн тотвес. Та̄н тох ла̄всыт: – Тав во̄р а̄ги, а̄ще̄н во̄рт хо̄нтвес. Ты а̄ги янгыг е̄мтнэ̄тэ мус ма̄н хоса ӯрхатсӯв. Ань таве а̄пгув палт ха̄йталылӯв. А̄гирищ самаге па̄лыгпуссаге, хотьютын ты тотаве. Нё̄тнэ хара ма̄н ёхтысыт, мувылтахи яныг йӣв капайт лю̄ле̄гыт. А̄ги хунь торгамтастэ, маныр накн патыс, хотрохтыс. Я̄та, сунсы, акв ва̄ӈкариӈ йӣв тав ляльтэ ё̄ми. Тав юипа̄лэ̄т пе̄с йӣвыт ё̄ме̄гыт. Ляпан ёхтысыт, а̄ги нупыл ла̄ве̄гыт: – Наӈ во̄р а̄ги, ма̄н наӈын хосат та̄гыл ӯрилӯв. Наӈ ань ма̄н палтув, во̄рт о̄луӈкве патэ̄гын. А̄ги ущпылнэ̄г хотрохтыс ос во̄р исхорыт нупыл ла̄ви: – Та яныт ёмас ва̄ре̄н, а̄нум юио̄выл щёс а̄щум ёт ва̄щинтахтуӈкве та̄ртэлы̄н. Вор исхорыт хоса ма̄н ва̄ти номсахтасыт, та та̄ртсаныл. Пуссын аквъёт а̄ще палт та минасыт. Ёрнколн ёхтысыт, а̄гирищ кол кивырн щалтыс, а̄ще ка̄салас, тав палтэ ха̄йталтас, ма̄гылн сынумтахтас ос лю̄ньщуӈкве та о̄вылтахтас. Та лю̄ньщи, та лю̄ньщи, ты торыг акваг ма̄ниг е̄мты. Юио̄вылт ӯйрищиг е̄мтыс, ё̄рнколныл кон та тыламлас. Во̄р исхорыт ос ё̄рнкол по̄хыт та ӯрхатэ̄гыт, хунь а̄гирищ конква̄лы. Ань тыг мус ё̄рнкол э̄лыпалт та лю̄ле̄гыт». Нина Георгиевна ка̄тыл ва̄рум пормасанэ ма̄хумн пӯмащ ма̄гыс сака ёвтавет. Тав са̄всыр семинарытн яланта̄лы, пе̄с йис пормасыт ва̄руӈкве ханищтахты. Тав ла̄внэ̄тэ щирыл, то̄ва хо̄тпат са̄в пормас выгыт, юрт хо̄тпанылн мӯйлуптыяныл. Ты мо̄йт Маргарита Анисимкова нэ̄пакн хансыстэ. Нина Георгиевна аквматнакт ловиньтастэ, сака сымын хояс. Таима̄гыс ты хосыт ка̄тыл хӯрит по̄слыс. Ты ка̄ркам, хо̄тпа нупыл сымыӈ нэ̄ мо̄йтыт коныпал са̄в э̄ргыт ва̄г. Ам ётум потыртаме порат тав ты хал э̄ргыт э̄ргыс ос стихотвореният ловиньтас. Ам Нина Георгиевнан щунь паща ла̄тыӈ ке̄тэ̄гум. Тав сака пӯмащ ва̄рмаль э̄лаль тоты. Нё̄тнэ пормас о̄с са̄внув вос ва̄ри. Ты мӯтраӈ нэ̄ са̄в та̄л пуста̄гыл вос о̄лы, То̄румн вос нё̄таве, На̄й-О̄тыранэ̄н вос ӯргалаве! Юио̄выл хурит Нина Георгиевна а̄пге Лена Соколова по̄слым о̄лы. Лӯпта э̄тпост тав Тӯрват па̄вылн мӯйлуӈкве ялыс. Йив ха̄пыл Тагт я̄ хосыт миннэ̄тэ порат ам таве по̄слыслум. 1083 2014.09.05. Т. Д. Слинкина Ам ётум Кульпас школат ханищтахтам ня̄врамыт. Атпан нупыл са̄т та̄лыг ēмтыс ам школа а̄стламум юипа̄лт. Ам ётум Кульпас па̄вылт ханищтахтам ня̄врамыт ань пуссын матсыт, пенсионерыг ēмтсыт. То̄ванув та па̄сыл а̄тимыг ēмсыт. Лов арыгтем ма̄ньщи па̄влытыл атым ня̄врамыт аквъёт интернатыт о̄лсӯв: ты Я̄сунт па̄выл, Сӯкыръя па̄выл, Саранпа̄выл, Ха̄ӈла па̄выл, Хо̄сло̄х па̄выл, Хо̄рыӈпа̄выл, Ло̄пмус па̄выл, Потрасуй па̄выл, Кимкьясуй па̄выл, Няхлаӈ па̄выл, Сортыӈъя па̄выл. Ты па̄влытт то̄ва школат 1953-1954 та̄лытт лаппантвēсыт, туп Ло̄пмус па̄вылт ос Кимкьясуй па̄вылт нила класс мӯс ня̄врамыт ханищтавēсыт. Атыт классныл нёлолов класс мӯс Кульпас па̄выл школаинтернатыт та ханищтахтасӯв. Хоты хо̄тпа э̄рыӈ таквина̄тэ хурит ка̄салытэ – хот ща̄гты. Нумыннув хурит ма̄н нёлоловит класс та̄гыл ня̄врамыт 1966-1967 та̄лытт ханищтахтасӯв. То̄ва ня̄врамыт са̄тыт класс юипа̄лт Саранпа̄вылн минасыт ханищтахтуӈкве, таи ма̄гыс та та̄л ма̄н тит классыг акванюрщувēсӯв. Ма̄н классувт 25 ня̄врам ханищтахтас. Нумын лю̄лēгыт во̄ртыпа̄лныл ёмаспа̄л нупыл: Кимлобазова Клавдия Васильевна (Кимкьясуй па̄выл), Филиппова Любовь Николаевна (Кульпас па̄выл), Вынгилева Клавдия Петровна (Няхлаӈ па̄выл), Ендырева (Слинкина) Татьяна Дмитриевна (Хо̄сло̄х па̄выл), Афанасьев Валерий Афанасьевич (Кульпас па̄выл), Нагибин Александр Петрович (Кульпас па̄выл), Вадичупов Пётр Семёнович (Кимкьясуй па̄выл), Сайнахов Владимир Васильевич (Я̄сунт па̄выл), Качанов Ефим Абрамович (Кульпас па̄выл), Неумоев Сергей Григорьевич (Кульпас па̄выл, щаквыт порсыс). Та̄н э̄лыпа̄ланылт ӯнлэ̄гыт: Таратова Светлана Николаевна (Потрасуй па̄выл), Липина Зинаида Николаевна (Кульпас па̄выл), Кушнин Александр Фёдорович (Кульпас па̄выл), Спивакова Нэля Павловна (классный руководителюв, тав о̄выл та̄л география учителиг рӯпитас), Гындыбин Сергей Николаевич (Кимкьясуй па̄выл), Хатанзеев Василий Терентьевич (Саранпа̄выл), Хатанзеев Иван Селивёрстович (Кульпас па̄выл). Ёлын ӯнлын нила ня̄врам: Бешкильцева Лидия Васильевна (Кульпас па̄выл), Ванюта Иван Георгиевич (Саранпа̄выл), Вадичупов Владимир Дорофеевич (Хо̄рыӈпа̄выл), Хилиманюк Николай Андреевич (Кульпас па̄выл). Ты коныпал нила ня̄врам ат по̄слахтасыт. Ты Гындыбина Валентина Егоровна (Кимкьясуй па̄выл), Анямова Елизавета Владимировна (Хо̄рыӈпа̄выл), Попов Александр Александрович (Сортыӈъя па̄выл), Хатанзеев Анатолий Алексеевич (Кульпас па̄выл). Ам ань ты матмыг ēмтум ма̄хмытн яныг паща ла̄тыӈ тēтэ̄гум. Пӯс ка̄т, пус ла̄гыл вос о̄лэ̄гыт, На̄й-О̄тыранылн вос ӯргалавет. Āтимыг ēмтум ма̄хманув ёмас номтыл номиянӯв. Мо̄тыт хурит тай са̄тыт класс ня̄врамыт 1965 та̄лт сентябрьт Лю̄лиӈ-Во̄рт по̄слахтасӯв. Ка̄сыӈ таквс са̄тыт класс ня̄врамыт матах хо̄талын Лю̄лиӈ-Во̄рн ва̄нтта̄лвесӯв. Тот а̄хвтас саквыӈ тēрас о̄лы, ма̄н «Горой семиклассников» намтым о̄ньщислӯв. Та тēрас по̄ӈкыт ма̄н ты ха̄хталахтэ̄в по̄слахтым. Во̄ртыпа̄лныл ёмаспал нупыл: Т. Д. Ендырева, М. А. Филиппова, И. Гындыбин, Л. И. Хозумов, Н. Мелентьева, З. В. Хозумова, В. Е. Гындыбина. Ёлыннув хӯрум пыгрищ: А. Оманов, В. В. Сайнахов, И. Таратов. Хӯрмит хурит ма̄н учителюв Пётр Парамонович Кимлобазов (ма̄ньщи хум) Ленинградыт ханищтахтаме порат по̄слахтам. Кульпас па̄выл школат тав са̄в та̄л география ос физкультура учителиг рӯпитас. Татьяна Дмитриевна Слинкина (а̄ги о̄парищ наме Ендырева), Обскоугорский институт, Ханты-Мансийск ӯс. 1083 2014.09.05. Анна АЛГАДЬЕВА Лӯсум ма̄ньщит. Свердловский областьт Са̄пса е̄р ма̄т сака мощща ма̄ньщи хультыс, яныгса̄тныл мощ са̄внув, ма̄кыг ке ла̄вуӈкв 112 э̄лумхо̄лас. Ма̄к ма̄ньщи хо̄тпа тыгыл китхӯрумпис мощща. Ма̄к ма̄ньщит туп во̄р па̄влытт хультсыт. Во̄р па̄влытт о̄лнэ хо̄тпат иӈ ма̄ньщи щирыл о̄лэ̄гыт, янгема̄не̄тыл пуссын ма̄ньщи ла̄тӈыл потыртэ̄гыт, ӯрхатэ̄гыт, во̄рае̄гыт, хул пуве̄гыт, пил ва̄тэ̄гыт, па̄квсам ва̄ре̄гыт. Маныр во̄рныл сэ̄лэ̄гыт, таянылтыл та о̄лэ̄гыт. Тыналан ма̄гыс со̄рп котныл пӯрка ю̄нтэ̄гыт. Са̄лыт хосат холасыт, туп во̄рса̄лыт алыглэ̄гыт. Ма̄ньщи ӯламыл о̄лнэ хо̄тпа ань тай мори ат ка̄салэ̄гын, пуссын ла̄пкаӈ маснутыл масхатэ̄гыт. Акваг ма̄ньщи супыл, ма̄ньщи ня̄рава̄ил нила э̄ква туп о̄лэ̄гыт: Александра Васильевна Анямова, тав Ке̄расколыӈъя̄ па̄вылт о̄лы, Мария Васильевна Тасманова, тав Мирон-Ващка па̄вылт о̄лы о̄с кит ма̄ньщи супыӈ э̄кваг Лэ̄пла па̄вылт о̄лэ̄г – Екатерина Васильевна Тасманова ос тав мане Татьяна Владимировна Анямова. Альбина Александровна Анямова Висумтыт па̄вылт о̄лнэ э̄ква мо̄рсыӈыг ма̄ньщи супыл масхатыглаӈкв патыс, мо̄лты ма̄ниг о̄лме порат акваг ма̄ньщи супыл, сахил, ня̄рал о̄лыс. Во̄р па̄вылт та̄рвитаӈ о̄луӈкв. Ӯльйиввит тотуӈкв э̄ри. Пос а̄тим, ма̄хум иӈ ла̄мпал о̄лэ̄гыт. Пекарня а̄тим, ма̄хум пуссын та̄нки ня̄нь ва̄ре̄гыт. Ла̄пка а̄тим, матыра̄ти ёвтуӈкв тэ̄нут ман мо̄т матыр пормас ма̄гыс рущ па̄вылн ялантаӈкв э̄ри. Са̄пса ӯсын сака мат хо̄са а̄ти кос, 150 ве̄рыста туп лё̄ӈхе лю̄ль. Висумтытныл Вижай мус хӯрум я̄ Висма, Томпусум, Ялпыӈя̄ ӯлтта минуӈкв э̄ри. Таквсытӯя яныг вит порат я̄т ӯлтта ат патаве. Хуньт сутытым утыт ва̄рыглам унсахыт хосат хотсайсыт, яныгнув я̄т мӯстаныл нас хотщаритаве̄сыт. Кос манке̄м та̄рвитаӈ кос яласаӈкв – рущ ма̄хмыт, са̄всыр туристат, яласан ма̄нанылныл тай ат та по̄йтса̄лэ̄гыт. Нё̄рн миннэ лё̄ӈх Висумтыт та̄ра о̄лы. Та̄н щёлыӈ ма̄хум, ӯщлахтым яласэ̄гыт, ё̄р машинал тахата̄лэ̄гыт, тыкати Са̄пса па̄сныл яныг машина ме̄талэ̄гыт, тох та тыглетувле яласэ̄гыт, я̄т ӯлтта сӯлттэ̄гыт, нэ̄мхотталь ат тагапе̄гыт. То̄ват хӯл а̄лыщлым яласэ̄гыт, я̄ хо̄сытыл на̄тылтэ̄гыт. Туп тэ̄лы ащирм порат мощ кӯм е̄мталы, сака ат нэ̄глэ̄гыт. Тэ̄лы яласан лёӈх тӯйтэ хот атняртыглаве, атщё̄пита̄лаве. Ма̄хум матыр тэ̄лал Вижай па̄выл мус, тыкати Хо̄сво̄ль па̄выл мус бураныл яласэ̄гыт. Хосволь па̄вылн акв са̄т сыс кит щёс Са̄псаныл автобус яланты. Вижай па̄выл мощ мо̄лтынув улян ё̄свес, колыт щар пӯссын витыг тотве̄сыт, тот нэ̄мхотьют ат о̄лы, туп хӯл рӯтмалтан утыт йӣльпи па̄выл я̄ ва̄тан ва̄рсыт. Та̄лэтуве̄тыл тот о̄лэ̄гыт, рӯпитэ̄гыт. О̄с акв румао̄йка яласан лё̄х ва̄тат о̄лы, са̄всыр туристат машинат ӯри. То̄ва ямсыкыт тыг мус танки машинанылтыл ёхтэ̄гыт, э̄лаль ла̄глыл миннутыт ла̄глыл минэ̄гыт, Нё̄рытн ялантэ̄гыт, сыстам лылые̄пыл лылтэ̄гыт. Хӯл алыщлан утыт алгаль та минэ̄гыт, ло̄ӈхаль та на̄тылтэ̄гыт, рещинка хапыл я̄т хосыт яласэ̄гыт. Автобус Вижайн ат яланты, туп нас мори яласан рущит а̄рапаптахтэ̄гыт, тыкати са̄ртын таксофон та̄ра матыр миннэ ёр кинсэ̄гыт, ӯс мус тотавет. Ювле о̄с акв тох. Евгений Михайлович Алексеев «ОВСЭРМ» кӯщай хумыг о̄лнэ хум ма̄ньщитн нё̄ты кос, такос са̄всыр нэ̄пак хотальа̄ти хансы. Нас потыр коныпал э̄лаль тэ̄лаг ат мины. Пума ос Та̄лтъя̄ па̄влыг ляпат яныг каръер ва̄рвес, тот рӯпитан ма̄хум аргин ос цинк хилэ̄гыт. Евгений Михайлович та̄н кӯщаянылн пищма хансыс, ань ты па̄влыгт о̄лнэ ма̄ньщит та̄л акв щёс олныл ойтыглавет. Та олнытыл та̄л палытыл тэ̄нут ёвтэ̄гыт: колас, саккар, сыртэп, во̄й, ща̄й. Мощ мо̄лалнув ос а̄гитпыгыт ма̄ньщи пормасыт ва̄рсыт: тучаӈыт, а̄канит, ю̄нтуп тӯщтын утыт, телефон пиннэ хурыгсовыт. Ва̄рум утаныл э̄лаль Екатеринбург ӯсн суссылтаӈкв тотавет, Са̄псаӈ ма̄ньщит вос ва̄вет, вос ка̄салавет, ма̄ньщит иӈ о̄лэ̄гыт. Хо̄ӈхан ты пормасыт мӯстэ̄гыт, э̄рыӈ ёвтуӈкв номылматэ̄гыт, мо̄тынтыг тыналан ма̄гыс ва̄руӈкв патэ̄гыт, ты хосытыл олн сэ̄лэ̄гыт. Тох та ма̄хум о̄лэ̄гыт. Ямсык – ма̄ньщииг ат о̄лнэ са̄всыр мори яласан ма̄хум, Лӯсум ма̄ньщитн тох ла̄вавет. 1083 2014.09.05. Анна АЛГАДЬЕВА Пил ва̄тнэ а̄гит. Ты тув То̄рмув сэ̄кв тув ва̄рыс. Пилыт молях ат понсэ̄гыт. Ре̄гыӈ тувытт Илья хо̄тал порат ля̄м ва̄таве, ля̄мыӈ со̄ломт ман ля̄мыӈ пирак ва̄ра̄ве. Ты тув тай акваг та ащирмаӈ, морахт ёмщакв понсуӈкв ат ве̄рме̄гыт. Ля̄мыт о̄с ущпыл ётыл понсэ̄гыт. Ам пил ва̄тнэ а̄гит ёт кит хо̄тал сыс кит щёс морах ва̄туӈкв ялсум. Хо̄сан хунь ялсув, па̄выл по̄х ня̄рувт ё̄мыгтасув. Пиланув ёмщаквнув ат кос понсамыт: то̄ва морахт щар ёмщакв толувъямыт, то̄ват мощ иӈ по̄лямнуват кос о̄лсыт, ма̄н тай тох та ва̄тасаске̄нув. Э̄кват ла̄ве̄гыт, пуссын ёмщакв понснэ ӯруӈкв патэ̄в, нэ̄матыр ат а̄рыгты. Тыхурип атыӈ пилквет, са̄в хо̄тпа халт аквты щёс ва̄тасавет. Морах пилкве ка̄сыӈ тув ат тэ̄лы. Хо̄ӈха ва̄туӈкв а̄лыми, тэ̄лы кастыл со̄паслы. Тэ̄лы ащирм хо̄талытт морах самкве исум ща̄йкве ёт маныр атыӈ! 1083 2014.09.05. Тамара МЕРОВА Ма̄щтыр ма̄хум акванатыглаве̄сыт. Во̄ртур э̄тпос ва̄т нупыл нилыт щислат ва̄т нупыл хо̄тыт щисла мус Октябрьский район Шеркалы па̄вылт «Союз мастеров» нампа съезд о̄лыс. Тув округ янытыл ма̄щтыр нам о̄щнэ соссаӈ ма̄хум акванатыглаве̄сыт. Тамле тэ̄ла округт ань нилыттыг ва̄рыглавес. Щар о̄выл съезд 1995 та̄лт лӯпта э̄тпост о̄лыс. Тав «Югра лылые̄п» ассоциация тармыл «Сорни ёш» намаим акванатхатам хо̄тпатн щё̄пита̄лвес. Ма̄ньщи ла̄тӈыл ла̄вуӈкве ке, тыи «Со̄рни ка̄т». Ты хо̄тпат хантыт ос ма̄ньщит пе̄с щирыл ю̄нтнэ маснутаныл, ка̄тыл ва̄рнэ пормасаныл аквта хольт хультуптаӈкве, мо̄т ма̄хум ханищтаӈкве ла̄вхатсыт. Тувыл Ха̄льӯсн ёхталасыт ос соссаӈ ма̄хум йис та̄гыл ма̄щтырлан наканыл, тамле ва̄рмалит ӯргалан ос та̄наныл э̄лаль тотнэ хо̄тпат ёт ва̄йхатуӈкве, та̄н ётаныл хумус рӯпитаӈкве, манах щёс акванатхатахтыглаӈкве, пуссын ты урыл потыртахтасыт. Ма̄хум нила та̄л сыс акв щёс акванхо̄нтхатахтуӈкве тахсыт. Та юипа̄лт ма̄хум са̄в та̄л акванхо̄нтхатуӈкве ат ве̄рмысыт. Соссаӈ ма̄хум пе̄с йис наканыл ӯргалан ма̄гыс Художественный фондын вуйлуве̄сыт. Ла̄щалт ты ва̄рмалит мо̄тмот ма̄н ла̄кквахарттуве̄сыт, ос ётыл а̄латы ёрувлаве̄сыт. Таи ёмас, 1994 та̄лт Россия янытыл о̄лнэ ма̄хум пе̄с йис наканыл э̄лаль тотнэ щирыл хӯлтнэ ла̄тыӈ хансым о̄лыс. Ты кастыл тувыл са̄ккон щё̄питавес ос пирмайтавес. Аквта торыг Ханты-Мансийск ӯст «Центр народных художественных промыслов и ремесел» рӯпитан кол па̄лыгпусвес. Хантыт ос ма̄ньщит пе̄с йис наканыл ӯргалаӈкве ос э̄лаль тотуӈкве тув паттуве̄сыт. Тувыл «Сорни ёш» нампа ма̄щтыр союз ос ты центр 2002 та̄лт Ханты-Мансийскат китыт съезд ва̄рыгласыт. Ос хӯрмит съезданыл 2006 та̄лт Белоярский ӯст о̄лыс. Ма̄щтырлан хо̄тпат ёт акваг Светлана Кирилловна Гындышева рӯпитас ос та̄н тэ̄ланыл ма̄гыс пуӈктотыс. Соссаӈ ма̄хум са̄всыр ханищтапын во̄выглаве̄сыт. Ма̄ньлат а̄гитпыгыт тот маснут ю̄нтуӈкве, йӣвылт сыресыр пормасыт ёргуӈкве, сак хартуӈкве, са̄с ёт рӯпитаӈкве ханищтаве̄сыт. Та порат сака ёмащакв ма̄щтырлан яныгпа̄ла хо̄тпат та̄рапаттуве̄сыт ос та̄н «Народный мастер РФ» намыл майве̄сыт. Та па̄сыл мо̄т нэ̄ ман хум хо̄тпат пе̄с наканув э̄лаль пӯмщалаӈкве патсаныл ос ла̄щмарт матыр ва̄руӈкве ханьщувласыт. То̄ват о̄с ма̄щтыр хо̄тпаг пе̄рияве̄сыт. Ань тыг нилыт съездын са̄в ма̄ныл о̄лнэ 60 ма̄щтыр хо̄тпатныл 55 хо̄тпа туп Шеркалы па̄вылн ат ёхталасыт. Нижневартовский районныл щар нэ̄мхотьют ёхтуӈкве ат ве̄рмыс. Съезд 1996 та̄лт по̄слум кина суссылтым о̄вылтавес. Тот та пора па̄сныл са̄всыр ханищтапыт ва̄рнэ тэ̄лат акванатым о̄лсыт. То̄ват та̄нкинаныл ма̄ньла̄тыг о̄лнэ̄ныл пораныл манос мо̄таныт ща̄няныл, ане̄кваныл ка̄саласаныл. Тувыл мӯй ма̄хум ёт Октябрьский район кӯщай ва̄ӈын нэ̄ Татьяна Галеева ос Александр Ковешников, ма̄вит ӯргалан ос соссаӈ ма̄хум тэ̄ланыл ёт рӯпитан Департаментныл кӯщай хум пащалахтасы̄г ос э̄рнэ тэ̄лат мӯсхалыг э̄лаль тотнэ щирыл ла̄всы̄г. Людмила Алфёрова, губернатор ва̄ӈын хо̄тпа палт советникыг о̄лнэ нэ̄ ос са̄в ёмас ла̄тыӈ ос ёмащакв рӯпитаӈкве ла̄выс. Светлана Гындышева, ма̄щтыр хо̄тпат кӯщай нэ̄, такви рӯпататэ о̄вылтыт ла̄тыӈ тотыс. Ос э̄лаль рӯпитан ма̄гыс са̄всыр комиссиян хо̄тпат пе̄рияве̄сыт. Таюипа̄лт Татьяна Молданова, исторический наукат кандитатыг о̄лнэ нэ̄, соссаӈ ма̄хум пе̄с маснутыт ю̄нтым о̄вылтыт сака э̄рнэ потыр ва̄рыс. Тав са̄всыр хурит суссылтаме порат мӯй ма̄хумн потыртас, ма̄щтырыг ва̄рнэ манхурип пормасыт «традиционный» щирыл ловиньтавет, ос та̄наныл ва̄рнэ хо̄тпат, со̄ль, мирн ва̄нэ ма̄щтырыг намтуӈкве ро̄ве̄гыт. Ос манхурип пормасыт аквта щирыл ва̄рыглавет кос, ос та̄н туп «сувенирный продукцияг» о̄лэ̄гыт. Наталья Фёдорова, мирн ва̄нэ искусствоведнэ̄ о̄с ла̄тыӈ ке̄тсас. Потре С. К. Гындышеван ловиньтавес. Тав туп ма̄ньщит ос хантыт ханьщувлым пе̄с наканэ о̄вылтыт хансыс. Ка̄сыӈ мир такви щире̄тыл ханьщувлым матыра̄ти ва̄ри, та̄наныл тэ̄лыгтаӈкве ат кос э̄ре̄гыт. Тувыл ма̄щтыр хо̄тпат та̄нки ю̄нтум маснутаныл, ка̄тыл ва̄рим пормасаныл выставкан щё̄пита̄лсаныл. Татьяна Александровна ётылнув ка̄сыӈ пормас ка̄тн вуйластэ ос та̄н о̄вылтаныт я̄нас потыртас, матыра̄ти э̄рнэ ва̄рмалит хӯлтыс. То̄нт то̄ва хо̄тпат ущты торгамтасыт, соссаӈ ма̄хум палт манхурип пормасыт ма̄кыг о̄лсыт, маснут хансанэ ма̄ниг ю̄нтыглаве̄сыт, то̄р ло̄мтанэ са̄кпакыг аквансо̄лтыглаве̄сыт. Пе̄с супыт аквкит хансаӈ то̄рныл ю̄нтыглаве̄сыт. Пормасыт о̄с нё̄тнэ̄г ва̄рыглаве̄сыт. Ань тай ка̄сыӈ хо̄тпа хумус тахмаи, та щирыл маснут ю̄нты, пормас ва̄ри. То̄ва пормасыт мо̄т лӯи ма̄хум о̄щнэ хурипаг ва̄равет. Та̄н ханты ос ма̄ньщи ма̄хманув нупыл ловиньтаӈкве ат э̄регыт. Ань таи ма̄гыс ма̄ньлатыг о̄лнэ ма̄щтыр хо̄тпат выставканыл щё̄питан юипа̄лт Татьяна ос Тимофей Молдановыг, Светлана Гындышева, Людмила Алфёрова пормасыт, маснутыт ёмщакве̄г суссаныл ос та̄наныл мощ ла̄кквауртсаныл. Пе̄с щирыл щё̄питан пормасыт я̄нас пинсаныл, йильпи щирыл ва̄рум пормасыт мо̄т ма̄н атве̄сыт. Та̄н рущ щирыл «сувенирный продукцияг» ла̄вавет. Са̄прани э̄лаль ва̄рнэ порат ма̄щтыр хо̄тпат та̄нки ва̄рмаляныл урыл потыртасыт. Хӯрум хо̄тпа «Народный мастер ХМАО-Югры» нампа нам кисхатнэ ла̄тыӈ ва̄рсыт, тыи Ирина Семёновна Молданова, Тамара Семёновна Мезенцева (Сайнахова) ос Надежда Алексеевна Гришкина. Тувыл сыресыр комиссиян хо̄тпат пе̄риясыт. Грантыт вуянтан порат та̄н о̄с тув рӯпитаӈкве во̄выглавет. Ма̄щтыр ма̄хум палт ань йильпи кӯщай хо̄тпа пе̄риявес. Са̄в хо̄тпат Надежда Молданова ма̄гыс ла̄тыӈ тотсыт. Ань тав ма̄щтыр ма̄хум тэ̄ланыл э̄лаль тотыянэ тах. Светлана Гындышева аквтох таве̄н нё̄туӈкве паты. Мо̄т са̄всыр о̄лыглам ва̄рмалит ос мӯй ма̄хум ла̄вум ла̄тӈаныл ам мо̄т потрыт хансыянум тах. 1083 2014.09.05. Александр ВЬЮТКИН Интат ма̄щтырыг ва̄рнэ хум. Ты хурит по̄слым хум ка̄таге̄т матыр ва̄руӈкв сака ма̄щтыр. Тав наме Владислав Борисович Белявский. Ам таве Сургут ӯст ма̄щтыр ма̄хум акванатыглахтанэ̄ныл порат ва̄щинтаслум. Ань тав Белоярский районт о̄лы. Владислав та э̄лыпалт Ха̄льӯс район Саранпа̄вылт о̄лыс. Школат ханищтахтын ма̄ныл а̄стуме юипа̄лт Иркутск ӯст пушномеховой техникум «Охотоведзверовод» ма̄т ханищтахтас. Та юипа̄лт Саранпа̄вылт са̄в та̄л ня̄врамыт ханищтахтын колт во̄раян щирыл хум ня̄врамыт ханищтым рӯпитас. Ня̄врамыт ёт во̄раяӈкв ос хӯлпъяӈкв ва̄тихал ялантас. Та коныпал тав ханищтан пыгрищанэ ка̄тыл матыр ва̄руӈкв ханищтасанэ. Са̄всыӈпа̄л ханищтан ма̄хманэ тав са̄всыр ӯйхул интат ва̄руӈкв ханищтасанэ. Интат ва̄руӈкв тав Иркутск ӯст ханищтахтаме порат ханьщувлас. Владислав ще̄мьяӈ тагыл ань Верхнеказымский па̄вылн ва̄нтлыс. Тот тав «Верхнеказымский ЛПУ» ма̄т на̄й харыгтан хумыг рӯпиты. Тав ла̄ви: «Тот рӯпитаӈкв ёмас. Рӯпитан ма̄тэ̄т акв э̄т ӯрнэ юипа̄лт титаххӯрмах хо̄тал юн ӯщлахтым о̄лэ̄гум. Юн о̄лнэ ва̄рмалянум ёмщакв ва̄руӈкв а̄лыме̄гум. Таи ты иӈ ёмас, во̄рын ялапалуӈкв аквписыг ве̄рме̄гум». Владислав ты коныпал пе̄с порат о̄ньщиглам мо̄т са̄всыр пормасыт ма̄щтырлы. Выставкат о̄лыгланэ̄ныл порат тав аквписыг матыр суссылтаӈкв во̄выглаве. Мо̄т ма̄ныл ёхталан ма̄хумн матыр хорамыӈ ут ос хотты интат ва̄руӈкв во̄виньталаве. Владислав Борисович тыныӈ совныл матыр лю̄льсаӈ ва̄руӈкв манос хотсайлан совныл матыр ва̄руӈкв ат пилы. Тав ла̄тӈанэ: «Ва̄нэ щирыл сов ёт рӯпитан порат, нэ̄матыр лю̄ль ат е̄мты. То̄ва ма̄хумн хотлэ̄гпын совыл инта ва̄руӈкв во̄выглавем. Сованыл сунсым, манаре хумус ёмаснуве̄г хотлэ̄гпын ма̄тэ ат на̄ӈкнэ щирыл ва̄руӈкв ро̄ви. Рӯпатам а̄стынэм юипа̄лт амтиротум номсэ̄гум, хумус тох ня̄р ма̄тэ ат на̄ӈкнэ щирыл а̄ртмыс? ! » Ма̄к соссаӈ ма̄хум о̄лупсав щирыл рӯпитан ос ма̄щтырлан ма̄хум ма̄н округув янытыл сака мощща. Таима̄гсыл ты хум ам ёмас янытлан ла̄тӈыл те̄тылум. На̄й-О̄тыранэ̄н вос ӯргалаве. Тав колтаглэ щуниӈыщ, со̄тыӈыщ вос о̄лы. 1083 2014.09.05. Тамара МЕРОВА Са̄в ня̄врамытн ва̄ӈкве патвесӯв. Во̄ртур э̄тпос о̄выл лов хо̄таланэ̄т Ханты-Мансийскыт са̄всыр ӯсытныл ёхталам хо̄тпат мӯйлысыт. Та̄нкинаныл та̄н «Этноэкспедицияг» ла̄выгласаныл. Ты мӯй хо̄тпат ма̄витув ханищтым сунсыгласаныл, соссаӈ ма̄хум о̄лупсаныл урыл пӯмщалахтасыт ос матыра̄ти та̄рапаттысыт. Тамле ва̄рмаль Москват о̄лнэ «Федеральный детский экологобиологический центр» нампа колныл щё̄пита̄лвес. Ань тот рӯпитан ва̄ӈын кӯщай нэ̄ Клавдия Васильевна Сенчилова таи потыртас: – Ма̄н, атпан нупыл кит хо̄тпа, тыг Россия янытыл нилахойплов са̄всыр ма̄ныл ёхтысӯв. Тыи ва̄т нупыл хо̄т ня̄врам ос хо̄тхойплов ханищтан манос учёный хо̄тпат. Ня̄врамыт Башкирия ос Калмыкия республиканыл, Воронежский, Калужский, Кировский, Московский, Нижегородский, Новосибирский, Оренбургский, Псковский ос Свердловский областитныл, Москва ос Санкт-Петербург ӯсыгныл тыг тотве̄сыт. Тувыл хӯрум этнограф учёныит ос э̄рыгсовыт ханищтан акв хум ма̄н ётув рӯпитэ̄гыт. Ты э̄лыпа̄лт тамле экспедициян ма̄н Алтай ос Коми республикан, Архангельский областин ос Ямал ма̄н ялсӯв. Тот ня̄врамыт ма̄вит, ӯйхулыт, во̄руйит, я̄т манос тӯрыт ханищтым акваг пӯмщалахтасыт. Ань Югра ма̄н щё̄питахтынэ̄в порат, ня̄врамыт ма̄гыс ханищтапув мощ мо̄тщир ва̄рыслӯв, таве «Природа, культура, этнос» намтыслӯв. Тыт ма̄витэ та̄рапаттын коныпал а̄гитпыгыт ханты ос ма̄ньщи ма̄хум пе̄с о̄лупсаныл вос ханищтыяныл, ос ты урыл потыр хансуӈкве патэ̄гыт тах. Ма̄н ань ма̄нки тох тэ̄лав ва̄рнэ̄в ма̄гыс хотща̄гтым о̄лэ̄в. Ханты ос ма̄ньщи ма̄хум урыл ма̄н са̄в ва̄ӈкве патсӯв. Та̄н ка̄сыӈ э̄лумхо̄ласн вос ва̄нувет. Ты ма̄хум пе̄с йис та̄гыл ма̄вит ӯргалым акваг о̄лсыт. Тувыл манырсырман во̄рӯйит, хӯлыт о̄лэ̄гыт, манхурип йӣвыт, лӯптат яныгме̄гыт, ты урыл та̄н сыресыр потрыт ос мо̄йтыт о̄ньще̄гыт. Ӯст о̄лнэ соссаӈ хо̄тпат ёт о̄с ва̄йхатсӯв, та̄н пе̄с пора о̄лупсаныл о̄вылтыт потыртасыт. Са̄всыр тэ̄латыл ма̄нки о̄с пӯмщалахтасӯв – тыи ня̄врам самын патнэ̄тэ порат хоты хо̄тпан ля̄хтхаты, манах ща̄нин о̄ньщаве; ма̄ньлат а̄гитпыгыт нэ̄гхумыг о̄луӈкве манах та̄л порат акванминэ̄гыт. Со̄ль ман а̄ти, а̄гияныл ман пыганыл иӈ ма̄ниг о̄лнэ̄ныл порат акванминнэ̄ныл ма̄гыс та̄н ща̄ньа̄щаныл та̄нки халанылт потыртахтэ̄гыт. Ня̄враманув пе̄с накыт урыл нэ̄пакытт ловиньтасыт, то̄ва ва̄рмалит ёмщакв ат торгамтасаныл, таима̄гыс ань матыра̄ти э̄лаль китыглахтэ̄гыт. Ма̄навн Ханты-Мансийскат сака мӯстыс, тыт соссаӈ хо̄тпат ань тыг мус пе̄с ма̄хманыл о̄лманыл щирыл о̄лэ̄гыт. Та̄н нё̄мса э̄лумхо̄ласыт, ма̄витаныл ёмащакв ӯргалыяныл, та̄нки То̄рманылн агтэ̄гыт ос та̄нки На̄й-О̄тыраныл нупыл пуӈк пинэ̄гыт, та̄наныл ат ёрувлыяныл. Ма̄н номсысӯв, ты ва̄рмалит хосат та̄гыл туп нэ̄пакыт хансым хультсыт. Ань ма̄н ётув рӯпитан ханты ос ма̄ньщи хо̄тпатын ма̄н яныг пӯмащипа ла̄тыӈ ла̄ве̄в. Тыт «Торум Маа», «Природы и Человека», «Нефти и газа» музеитн тотыглавесӯв. Ка̄сыӈ хо̄тал нэ̄пак ловиньтан колын яланта̄лсӯв. Ос тыт рӯпитан хо̄тпат ма̄навн сака ёмщакв нё̄тсыт, са̄всыр э̄рнэ нэ̄пакыт ма̄навн майласыт. Тувыл я̄нас колнакыл щё̄пита̄лвесӯв, ма̄н тыт са̄в пӯмыщ хо̄тпат ёт акванхо̄нтхатыгласӯв. «Лӯима̄ сэ̄рипос» ос «Ханты ясанг» газетаг ва̄рнэ колн щалтсасӯв, тот рӯпитан ма̄хум ёт ва̄йхатсӯв. Ань экспедиция кӯщаит ювле миннэ̄ныл э̄лыпа̄лт конференция ва̄рыгласыт. Ня̄врамыт соссаӈ ма̄хманув палт маныр пе̄с накыт та̄рапаттысыт, таияныл потрыг хассаныл ос ловиньтасаныл. Псков ӯсныл ёхталам а̄гирищиг ты ма̄вт о̄лнэ ӯйрищит о̄вылтыт матыра̄ти тэ̄латыл пӯмщалахтасы̄г ос та̄н уранылт потыр хассы̄г. Лиза Родионова «Торум Маа» музейт Ма̄ янытыл мирыт янытлан ялпыӈ хо̄тал ва̄рнэ̄в порат пуӈк паттатэ̄н акв ӯйрищ исыглас ос хоса тот та ӯнлантас. А̄гирищ ты кос тыглетувле ё̄ӈхыгпа̄лы, ӯйрищ о̄влэ̄т ва̄ӈнэ̄н исыглас ос тувыл ювле пуӈк паттатэ̄н исыс. Мо̄т хо̄тпат нупыл тай уре а̄тим. Ма̄н ла̄всӯв, тыи ёмас ва̄рмаль. Ма̄ниг о̄лмув порат, ма̄н пуӈк а̄танув ловтым порат, улпыл ул вос ня̄хсӯв, ла̄ваве̄в «сыстам номтыӈ пуӈкын ӯйрищ исы тах». Ма̄н тув агтсӯв. Ань Лиза ёт ул аквтох е̄мтыс. Оренбург ӯсныл о̄лнэ пыгрищиг во̄раян тэ̄лат урыл потыр щё̄питасы̄г. Тэ̄натэ̄н тыт Вячеслав Кондин, Прокопий Молданов, Р. Г. Решетникова ос М. К. Волдина нё̄тсыт. Новосибирский областьныл ёхталам а̄гирищиг хӯл алыщлан пормасыт та̄рапаттысанэ̄н. Башкирия ма̄ныл о̄лум хӯрум а̄гит, тувыл Калужский областьныл ёхталам а̄ги ма̄н палтув яныгман йӣвыт урыл потыртасыт. А̄канит манос сыресыр ёнгын утанув урыл башкир а̄гирищ ос тувыл Киров ма̄ныл ёхталам а̄гирищигпыгрыщиг ла̄тыӈ ва̄рсыт. Калмыкия ма̄ныл ёхталам пыг лӯптал ман пилыл пусмалтан ва̄рмаль о̄вылтыт пӯмщалахтас. А̄гирищ ня̄нь ва̄рнэ тэ̄нутыт ханищтам. Московский областьныл о̄лнэ хо̄тпат ка̄тпосанув та̄рапаттысыт. Калуга ӯсныл ёхталам а̄гииг ня̄врам самын патнэ юипа̄лт ва̄рыглам тэ̄ла пӯмщаластэ̄н. Екатеринбург ма̄ныл о̄лнэ хо̄тпат во̄руянув урыл ос соссаӈ ма̄хум пе̄с йис потрыт ос мо̄йтыт о̄вылтыт потыртасыт. Санкт-Петербург ӯсныл ёхталам пыгыг рӯпитан хо̄таланыл хурин по̄слысаныл ос ань хурит суссылтасыт. Пуссын хансум потрыт ма̄навн о̄с пӯмыщ хӯнтлуӈкве о̄лыс. Та сыс а̄гитпыгыт ат торгамтам тэ̄ланыл ва̄нэ хо̄тпатын ёмащакв хӯлтыглаве̄сыт. Ма̄ньщи па̄лыл С. С. Динисламован хӯлтыглаве̄сыт, ханты па̄лыл ос М. К. Волдинан. Ань ня̄врамыт о̄вылтам тэ̄ланыл мӯсхалыг э̄лаль ханищтыяныл тах, тувыл тэ̄лы Москват о̄с акванатыглавет, тот тах ты потраныл мо̄т ма̄ньлат ма̄хум э̄лыпа̄лт ловиньтыяныл. Пуста̄гыл вос о̄лэ̄гыт, номтыӈыщ э̄лаль вос ханищтахтэ̄гыт. 1084 2014.09.19. Тамара МЕРОВА Пе̄рияп ва̄рмаль та минас. Россия янытыл нэ̄пак та̄ратан ва̄рмаль та оигпас. Ма̄н, Югравт о̄лнэ ма̄хум, Тюменский область губернатор хо̄тпа о̄с пе̄риясӯв. Тувыл то̄ва ма̄т ӯсыӈ манос районный депутатхо̄тпа ос па̄влыӈ кӯщай пе̄риясыт. Округ янытыл 386 со̄тыра 600 э̄лумхо̄лас пе̄рияӈкве ялсыт, тыи туп 35, 22 % пе̄риян ма̄хум. Щар са̄в хо̄тпа Белоярский, Ха̄льӯс, Советский районытт нэ̄пак та̄ратасыт. Мощща ма̄хум Нижневартовск ос Сургут ӯсыгт пе̄рияӈкве ёхталасыт. Юграт о̄лнэ са̄выӈпа̄лэ хо̄тпат Тюменский область губернаторыг Владимир Якушев пе̄риясаныл. Тав ма̄гсылэ 83, 39 % ма̄хум ка̄тпос пинсыт, Михаил Селюков ма̄гыс – 9, 14% ос Владимир Пискайкин – 4, 29%. Ты коныпал Сургутский район Нижнесортымский па̄вылт о̄лнэ ма̄хум па̄выл кӯщаиг Елена Никифорова пе̄риясыт, Белый Яр па̄выл кӯщаиг Пётр Рымарев э̄лаль хультуптавес. Кондинский район Болчары па̄выл кӯщаиг Сергей Мокроусов паты, ос Нижневартовский район Ларьяк па̄выл кӯщаиг Евгений Звезда пе̄риявес. Пе̄рияп ва̄рмалит пуссын ёмщакв минасыт, нэ̄мхо̄т лю̄ль накыт ат ва̄рыглаве̄сыт. 1084 2014.09.19. Людмила ТЕТКИНА Соссаӈ ма̄хум олннё̄тмилыл та̄ставет. Округ Правительство кӯщаит сапра̄нин акванатхатыгланэ̄ныл порат, акв нэ̄пак пирмайтасыт. Кӯщаит «Социальноэкономическое развитие коренных малочисленных народов Севера ХМАО-Югры» нампа программан йильпи тэ̄ла хассыт. Та̄н ты нэ̄пакн арыг 15 миллион солко̄ви хассыт. Ты олныт федеральный бюджетныл ма̄ньщит, хантыт нё̄тнэ ма̄гсыл ке̄тве̄сыт. Наталья Комарова, губернатор нэ̄, ты урыл ла̄выс: «Ты э̄лыпа̄лт ка̄сыӈ миркол ма̄навн нэ̄пак ке̄тыглас, соссаӈ ма̄хум нё̄тнэ ма̄гсыл манаса̄вит олн та̄нанылн э̄ри, тув хансыгласыт. Ань та̄стым олнытыл ма̄н пе̄с йис ма̄тт о̄лнэ ще̄мьят са̄лыл ос э̄рнэ пормасыл ёвтуӈкве нё̄тыянӯв. Ты ма̄т о̄лнэ соссаӈ ма̄хум ва̄рмаляныл ма̄н акваг та̄рапаттым о̄ньщиянӯв». Ты коныпал ты олныл университетыт, колледжит манос училищат ма̄ньщи ос ханты а̄гитпыгыт ханищтахтан ма̄гсыл ойтхатуӈкве нё̄тавет. Олныл та ма̄ньщит ос хантыт мивет, хотьют та̄нки ойтхатуӈкве ат ве̄рме̄гыт. Губернатор прессслужбатэ ке̄тум ля̄ххал ма̄ньщи ла̄тӈыл Людмила ТЕТКИНА хансыстэ. 1084 2014.09.19. Тамара МЕРОВА Мир пусмалтан ёмас пӯльница. Мо̄лал ля̄ххал тотнэ хо̄тпат ёт Нягань ӯсн ялмумт ма̄н яныг пӯльницан тотыглавесӯв. Тот Сергей Михайлович Догадин яныг ле̄ккарыг рӯпиты, ма̄нав кон ӯрыстэ. Тувыл мощ потыртамув юипа̄лт, тав ма̄нав пӯльница сунсыглаӈкве во̄выстэ. Ты та̄л ва̄ти хо̄тал э̄тпост Нягань ӯс о̄выл пӯльница рӯпитаӈкве о̄вылтахтам па̄сныл налыман та̄лэ то̄влы. Ос ювле хультум во̄ртур э̄тпос са̄тыт щислат йильпи яныг пӯльница лов та̄лэ о̄лыс. Ты э̄лыпа̄лыт ӯс янытыл о̄лнэ 29 са̄всыр пусмалтан ма̄нь колыт пуссын ла̄кква рӯпитасыт, тувыл та̄н аквантотве̄сыт. То̄нт ле̄ккарыт са̄всыр а̄гмыт пусмалтан ма̄гыс ищхӣпыӈ э̄рнэ утыл ёвтве̄сыт. Ты коныпал сака та̄рвит а̄гм о̄щнэ хо̄тпат ос сакватахтам, а̄гмыӈмосыӈ хо̄тпат тот ёмас ха̄ӈхылтапыл, я̄нас лифтыл ва̄рве̄сыт. Пӯльница такви я̄нас на̄йпос ва̄рнэ станция о̄ньщи, на̄йпос лапхарыгмаптынэ̄тэ сыс, тав такви на̄й тах пе̄ламты. Операция ва̄рнэ колнакыт, лабораторият сыстам лылые̄пыл лылтнэ ма̄гыс э̄рнэ утыл тотве̄сыт. Вит сыстамтан утыл о̄с ӯнттуве̄сыт. Сергей Догадин ла̄выс: «Ма̄н ле̄ккаранув 48 са̄всыр а̄гмыт пусмалтым рӯпитэ̄гыт. Нягань ӯст, Ха̄льӯс, Октябрьский районыгт о̄лнэ ма̄хум о̄с тыт пусмалтыянӯв. Тувыл «сосудистая хирургия» а̄гмыт ма̄н палтув сака ёмщакве̄г пусмалтавет. Тот э̄лумхо̄лас ке̄лп та̄ранэ уральтавет, сыресыр лю̄ль утыт та̄рапаттавет. Тамле а̄гмыт ле̄ккаранувн ва̄нэ̄г о̄ньщавет, таима̄гыс тыг округ янытыл ма̄хум о̄с ёхталэ̄гыт. Ань тыг мус онкозаболевание ос ке̄лп а̄гмыт щирыл ле̄ккарыт ат со̄тыра арыгкем операция ва̄рсыт. Са̄в операцият сым а̄гм пусмалтан щирыл о̄лсыт. Пусмалтахтын ма̄гыс ма̄хумн олн ойтуӈкве ат э̄ри. Ты яныг пӯльницат 468 э̄лумхо̄лас ма̄гыс койкат щё̄питым о̄лэ̄гыт. Мо̄т ма̄хум тыт о̄с уральтавет ос тувыл юн тэ̄рпил пусмалтахтуӈкве ла̄вавет. Пӯльницавт нэ̄ хо̄тпат ос хум хо̄тпат о̄щнэ а̄гманыл пусмалтан ва̄рмаль ка̄сыӈе̄мт са̄вмалтаве. Ле̄ккарыт ищхӣпыӈ утыл рӯпитаӈкве э̄лаль ханищтахтэ̄гыт. Паль, нёл ос тур (рущ щирыл лор) пусмалтан ле̄ккарыт, сам пусмалтан ле̄ккарыт пуссын о̄с номтыӈыщ рӯпитэ̄гыт. То̄ва ле̄ккаранув «нейрохирургия» намаим йильпи ва̄рмальн ханищтаӈкв патве̄сыт. Моще̄рт ма̄н пӯльницавт тамле а̄гмыт пусмалтаӈкве о̄с патавет, ань матыра̄ти э̄рнэ ищхӣпыӈ утыт ёвтавет ос ёмащакв щё̄питавет». Мо̄т тэ̄лат урыл Сергей Михайлович тох потыртас, та̄н пӯльницанылт 1 со̄тыра 376 э̄лумхо̄лас рӯпиты. Тыгыл 176 ле̄ккарыт, та̄н халанылт аквхойплов хо̄тпа медицина наукат учёный нам о̄ньще̄гыт. 544 хо̄тпа ма̄нь ле̄ккарыг о̄лэ̄гыт. 389 медикхо̄тпа тот рӯпиты. Та̄н пуссын хо̄та̄ти медицина ва̄рмалитын ханищтаве̄сыт. Ле̄ккарыт са̄всыр конференциян о̄с яланта̄лэ̄гыт, матыр а̄гмыт пусмалтан щирыл йильпи накыт та̄рапаттэ̄гыт. Мо̄т хо̄н ма̄н о̄с во̄виньта̄лавет, тот ханищтавет. Мо̄лалнув Россия Президентув № 597 хӯлтнэ ла̄тыӈ ке̄тыс, ле̄ккарыт рӯпатаныл ма̄гыс ёмас олныл вос ойтавет. Ань пӯльницат рӯпитан ма̄хум са̄внув олн сэ̄луӈкве патсыт. Яныг ле̄ккар ла̄внэ̄тэ щирыл, ань Нягань ӯс пӯльницат ле̄ккарыт 90 со̄тыра са̄вит солко̄вил ойтавет, яныг медсестраг рӯпитан хо̄тпат 46 со̄тыра са̄вит солко̄ви ос ма̄нь медсестраг о̄лнэ хо̄тпат 32 со̄тыра са̄вит солко̄ви сэ̄лэ̄гыт. Пӯльницанылт са̄всыр рӯпитан хо̄тпа товылхаты. Хо̄т ле̄ккар ат ке то̄вылхаты, та̄нки кинсэ̄гыт манос та̄нки хо̄тпаныл э̄лаль ханищтахтуӈкве ке̄тыглыяныл. Ма̄н округт о̄лнэ ма̄хум пуста̄гыл о̄луӈкве ла̄виянӯв. Ос матыр а̄гм о̄ньще̄гыт ке, хосан ул вос хартыяныл, та̄ра вос пусмалтахтэ̄гыт. Пус ка̄т, пус ла̄гыл! 1084 2014.09.19. Светлана РОМБАНДЕЕВА Ма̄ янытыл о̄лнэ мир ма̄гыс хансым ма̄к потыр. Ка̄сыӈ ма̄т са̄всыр э̄рнэ сакконыт хансым о̄лэ̄гыт. Та̄н халанылт кит тамле сакконыг хансым о̄лэ̄г: Ма̄ янытыл о̄лнэ мир ма̄гыс хансым ма̄к потыр (Всеобщая декларация прав человека) ос Ма̄ янытыл о̄лнэ мирыт Акванпотыртахтам Мирколаныл соссаӈ мирыт урыл хансум ма̄к потре (Декларация Организации Объединенных наций о правах коренных народов). Я̄тил ма̄ньщи ма̄хум, на̄н ань ты сакконыг ма̄ньщи ла̄тӈыл ловиньтэ̄н. Ма̄ янытыл о̄лнэ мирыт Акванпотыртахтам Мирколаныл (Организация Объединенных Наций) Генеральный Ассамблея резолюция нэ̄паке 217 А (III) ва̄т са̄грапнал э̄тпос 10 хо̄талэ̄т 1948 та̄лт пирмайтавес. Ва̄нэ̄в щирыл, ань э̄лумхо̄лас янытлаӈкве э̄ри, ка̄сыӈ мир та̄нти о̄лнэ ма̄нанылт пуссын аквте̄м вос о̄лэ̄гыт, сэ̄ръёрыг вос о̄лэ̄гыт, халанылт вос э̄руптахтэ̄гыт, ма̄ янытыл хо̄нтлан нак нэ̄мхуньт ул вос е̄мты; ос ва̄нэ̄в щирыл, хунь э̄лумхо̄лас ат янытлаве, ӯльнаг яныгми, тувыл тав са̄в мир порслуӈкве ве̄рми, тох о̄луӈкве ат ро̄ви, хо̄тпа ань ёмас ма̄т, ёмас ма̄хум ляпат вос о̄лы, такви номтэ щирыл потыртаӈкве вос ве̄рми, пилыщма ул вос ва̄г, нуса ул вос тоты, э̄лы хо̄тал нупыл вос сунсы, матыр та̄рвит порат но̄х хотталь вос вораты; ос ва̄нэ̄в щирыл, ань ка̄сыӈ хо̄тпа саккон тотнэ ма̄хумн вос ӯргалаве, вос вуянтаве, саккон щирыл тармыл ат те патаве, тав атиӈк матыр о̄выл ва̄руӈкве ве̄рми, таве̄н лю̄ль ва̄рум хо̄тпа такви сутыл сутытаӈкве ве̄рмитэ; ос ва̄нэ̄в щирыл, ма̄ янытыл о̄лнэ мирытн нё̄туӈкве э̄ри, халанылт та̄н юртыӈыщ вос о̄лэ̄гыт; ос ва̄нэ̄в щирыл, Ма̄ янытыл о̄лнэ Акванпотыртахтам мирыт Устав нэ̄пак ёт ка̄сащасыт, та̄н агтэ̄гыт, ань э̄лумхо̄лас сакконанэ̄н ӯргалаве, янытлаве, кос нэ̄, кос хум хо̄тпа пуссын аквте̄мыт, ма̄хум пилта̄л о̄лэ̄гыт, ты ма̄гсыл та̄н о̄лнэ ма̄наныл ма̄гыс ущпылнэ̄г са̄в ёмас тэ̄ла ва̄руӈкве патэ̄гыт, ка̄сыӈ хо̄таланыл ёмасыг вос о̄лы; ос ва̄нэ̄в щирыл, ань ка̄сыӈ государство Ма̄ янытыл о̄лнэ мирыт Акванпотыртахтам Миркол Генеральный Ассамблеятэн нё̄туӈкве ла̄выс, сакконыт ос мо̄т э̄рнэ тэ̄лат ва̄ӈкве ос янытлаӈкве ла̄выс; ос ва̄нэ̄в щирыл, ты саккон ма̄ янытыл о̄лнэ ма̄хумн пирмайтавес, ка̄сыӈ ма̄т тав ва̄ве, тувыл ань тав щире̄т о̄луӈкве кӯстыр, Генеральный Ассамблея, ань ты Ма̄ янытыл о̄лнэ мир ма̄гыс хансум ма̄к потре, ма̄к сакконэ, мирн ты мыгтэ, мирн ты потыртытэ, ань ты щирыл пуссын вос о̄лэ̄гыт, ка̄сыӈ хо̄тпа, ка̄сыӈ мир ос рӯпитан колыт ты ма̄к потыр вос ва̄ганыл, акваг ляпат вос о̄ньщияныл, таве акваг номим вос о̄ньщияныл, сакконанэ вос янытлыяныл, са̄всыр мирыт акванхо̄нтыглахтынэ̄ныл порат халанылт юртыӈыщ вос о̄лэ̄гыт, аквъёт мӯсхал щирыл вос рӯпитэ̄гыт, Ма̄ янытыл о̄лнэ мирыт Акванпотыртахтам Мирколаныл палт хансым о̄лы ман а̄ти, манос нас хотты ма̄ нупыл хансым о̄лы, пуссын юртыӈыщ ос ща̄гтым вос о̄лэ̄гыт. 1ыл статья Ма̄ янытыл о̄лнэ мир пуссын аквхольт самын патэ̄гыт, аквте̄м вос о̄лэ̄гыт, аквте̄м нё̄тмил вос кинсэ̄гыт. Та̄н пуӈк о̄ньще̄гыт, номсуӈкве ве̄рме̄гыт, э̄сырма о̄ньще̄гыт, халанылт ягпыгыӈыщяга̄гиӈыщ вос о̄лэ̄гыт. 2ыт статья Ты саккон щирыл, ань ма̄ янытыл о̄лнэ ка̄сыӈ хо̄тпа хумус таӈхи о̄луӈкве, тох вос о̄лы, нэ̄матарыл ул вос пилы, тав ань хоты ма̄ныл о̄лы, алпи осэ манхурипа, нэ̄ хо̄тпа тав манос хум хо̄тпа, хоты ла̄тӈыл потырты, То̄рум нупыл сунсы ман а̄ти, политика тэ̄ла палт хотты ма̄т рӯпиты ман а̄ти, нуса ман щёлыӈ, пуссын ты нупыл нэ̄мхотьют ул вос сунсы. Ма̄хум нэ̄мхотьютн ул вос лю̄камтавет, кос хоты ма̄т вос рӯпитэ̄гыт, кос хоты ма̄т вос о̄лэ̄гыт, о̄лнэ ма̄нанылт кӯщаиг та̄нти о̄лэ̄гыт манос мо̄т хо̄н ма̄ныл о̄лнэ ма̄хум та̄н палтаныл кӯщайлахтэ̄гыт, нэ̄мхотьютн ул вос тораставет. 3ит статья О̄луӈкве ла̄вим ка̄сыӈ хо̄тпа вос о̄лы, роттыг вос о̄лы, нэ̄мхотьютн лю̄ль ла̄тӈыл ул вос ла̄ваве. 4ыт статья Нэ̄мхотты хо̄тпа нэ̄мхо̄т ё̄рва̄гыл ёл ул вос пуваве, пилата̄лым ул вос о̄ньщаве; э̄лумхо̄лас тыналан ва̄рмаль ма̄ янытыл нэ̄мхо̄т а̄тим, нэ̄мхотьют нэ̄мхотталь ул вос тыналаве. 5ыт статья Нэ̄мхотты хо̄тпа ул вос ра̄таве, алнэ па̄сыл ул вос о̄ньщаве, э̄лумхо̄лас хуритэ витыг ул вос тотаве. 6ыт статья Кос хоты ма̄т о̄лнэ хо̄тпа такви ма̄тэ̄т кӯщаиг вос о̄лы, э̄рнэ нэ̄пакыт вос о̄ньщи. 7ыт статья Саккон э̄лыпа̄лт пуссын аквхурипат, кос хоты ма̄ныл, кос хоты мирныл о̄лнэ ма̄хум пуссын аквте̄м вос вуянтавет. Нэ̄мхотьют ул вос лю̄камтаве манос намталаве, ос тувыл тамле пилыщмаӈ тэ̄ла ва̄руӈкве хо̄тпа нэ̄мхотьютн ё̄рва̄гыл ул вос кащилтаве, хо̄тпа лю̄ль матыр ва̄ри те, тав ты саккон щирыл ат о̄лы, тыт хансым ла̄тыӈ ат хӯнтлы. 8ит статья Ка̄сыӈ хо̄тпа сутытахтаме юипа̄лт, тав сустетэ̄т, ань тэ̄латэ ёмащакв ат хӯнтлувес, Конституция ос мо̄т сакконыт щирыл ат нё̄твес, тав э̄лаль нё̄тмил вос кинсы, такви о̄лнэ ма̄тэ̄т ма̄к саккон щирыл вос нё̄таве. 9ит статья Нэ̄мхотты хо̄тпа нас тох, нас хо̄тпатн ёлпувуӈкве ат ве̄рмаве манос такви о̄лнэ ма̄тэ̄ныл по̄хання̄влуӈкве ат ве̄рмаве. 10ит статья Хо̄тпа насска̄сыг ёлпуввес те, э̄рнэ нэ̄паканэ уральтавет манос мо̄т хотты хо̄тпа ва̄рум о̄выл тав нупылэ ла̄ваве, тав нё̄тмил молях вос кинсы, сутытахтан порат тэ̄латэ саккон ва̄нэ ма̄хумн вос ловиньтаве. 11ит статья 1. Э̄лумхо̄лас иӈ ат те сутытавес, тав нуплэ ат ро̄ви ла̄вуӈкве, ань о̄выл тав та ва̄рыс. Тав туп саккон щирыл вос сутытаве, таве вуянтан хо̄тпа тот о̄с вос о̄лы, тэ̄латэ мӯсхал щирыл вос сунсыглаве. 2. Хо̄тпа матыр о̄выл ва̄рапас те, ос та порат та ма̄т о̄лнэ саккон манос мирхал саккон щирыл ты ва̄рмале лю̄ль ва̄рнэ тэ̄лаг ат ловиньтавес. Тувыл ань та ва̄рапам ва̄рмале ма̄гыс ты э̄лыпа̄лт ма̄хум сака ат те нюсве̄сыт, тав ань о̄с аквтох сака та̄кыщ ул вос сутытаве. 12ит статья Хо̄тпа о̄лупсатэ урыл, ще̄мьятэ урыл нэ̄мхотьют мори ул вос потырты, ул вос пӯмщалахты, тав о̄лнэ колэ̄н во̄вта̄л манос тав та̄лэ нэ̄мхотьют ул вос щалты, тав пищманэ ос э̄рнэ нэ̄паканэ ловиньтаӈкве ат ро̄ви. Тамле нак е̄мтапан порат ка̄сыӈ хо̄тпа таквина̄тэ вос вуянтытэ, саккон тотнэ ма̄хум палт нё̄тмил вос во̄ви. 13ит статья 1. Хо̄тпа такви о̄лнэ ма̄тэ янытыл кос хо̄т яласаӈкве ве̄рми, хо̄т о̄луӈкве ка̄сащи, тот вос о̄лы. 2. Хо̄тпа мо̄т хо̄н ма̄т яласаӈкве ве̄рми, тувыл такви ма̄тэ̄н ювле вос ёхты. 14ит статья 1. Ка̄сыӈ э̄лумхо̄лас такви ма̄тэ̄т лю̄камтаве те, тав о̄лнэ ма̄гсыл мо̄т ма̄н во̄вхатуӈкве ве̄рми, ань тув вос та̄ртаве ос такви ма̄хманэ̄ныл тот хот вос тӯйтаве. 2. Хо̄тпа мо̄т ма̄н та порат та̄ртаве, хунь тав политика щирыл о̄выл ва̄рыс, ос мо̄т матыр пилыщмаӈ о̄выл ва̄рапас те, тав мо̄т государстван ат та̄ртаве, Ма̄ янытыл о̄лнэ мирыт Акванпотыртахтам Миркол рӯпататэ щирыл э̄лумхо̄лас торыг ва̄рапан лю̄ль ва̄рмаль нэ̄мхотьютн тармыл ат патаве. 15ит статья 1. Ка̄сыӈ хо̄тпа гражданство вос о̄ньщи. 2. Нэ̄мхотты хо̄тпа гражданстватэ ё̄рва̄гыл хотвиӈкве ат ве̄рмаве, манос гражданстватэ мо̄т ма̄н пе̄нтуӈкве номылматы те, тав нэ̄мхотьютн ёлпувуӈкве ат ве̄рмаве, пе̄нтхатаӈкве таӈхи те, тав тэ̄латэ. 16ит статья 1. Ты саккон щирыл, ма̄ньлат хо̄тпа нёлоловхуйплов та̄лэ то̄влынэ̄тэ порат яныг хо̄тпаг та е̄мты, о̄лупсатэ̄т ма̄к тэ̄ланэ тав ань такви ва̄руӈкве ве̄рмиянэ. Хо̄тпа кос хоты мирныл о̄лы, То̄рум нупыл сунсы ман а̄ти, ка̄сыӈ такви ще̄мья о̄ньщуӈкве ве̄рми. Нэ̄гхумыг акванминнэтэ̄н порат, аквъёт о̄лнэтэ̄н сыс манос киттыгминнэтэ̄н порат э̄рнэ нэ̄паканыл пуссын акв саккон щирыл щё̄питавет. 2. Нэ̄гхумыг акванминнэ нэ̄паке̄н та порат хансаве, хунь тэ̄н акванминуӈкве аквъёт ка̄саще̄г. 3. Ка̄сыӈ государстват ще̄мья ты ма̄к тэ̄ла, ще̄мьят матыр та̄рвит е̄мтапан порат тав саккон щирыл тармылпатаве, вуянтаве. 17ит статья 1. Ка̄сыӈ хо̄тпа матыр о̄лтул о̄ньщуӈкве ве̄рми, такте̄т манос ляпа ма̄хманэ ёт. 2. Матыр о̄лтуланэ тав ва̄та̄лэ нэ̄мхотьютн хотвиӈкве ат ве̄рмавет. 18ит статья Ка̄сыӈ хо̄тпа такви номтэ̄т вос о̄лы, матыр ва̄руӈкве тахмаи, вос ва̄ри, тав кӯщай. То̄рум нупыл сунсы ман а̄ти, хумус сунсы, манарын агты, такте̄т манос хотты ма̄хум ёт, То̄рум нупыл юн по̄йкщи манос пуп колн яланты, тав тэ̄латэ. 19ит статья Хо̄тпа матыр номт о̄ньщи те, тав ты урыл мирн потыртаӈкве ве̄рми, ты номтэ ма̄гыс тав нэ̄мхотьютн нэ̄матарыл ул вос ла̄ваве, э̄лы хо̄н ма̄хумн матыр пищма ке̄туӈкве ве̄рми, пищмал ювле вос ке̄таве. 20ыт статья 1. Ка̄сыӈ хо̄тпа хотты ма̄хум ёт акванатхатыгла̄луӈкве ве̄рми, са̄всыр ассоциацият ос мо̄т акванатхатахтыглан тэ̄ла палт ялантаӈкве ве̄рми. 2. Нэ̄мхотьют тув ё̄рва̄гыл ул вос харттаве. 21ыл статья 1. Ка̄сыӈ э̄лумхо̄лас такви государстватэт кӯщайлахтуӈкве ве̄рми, ма̄к яныг тэ̄лат ва̄руӈкве ве̄рми, такви кӯщаиг ат те о̄лы, тув мирн пе̄риим ма̄хум хосыт хотты ма̄к тэ̄латэ вос ва̄раве. 2. Ка̄сыӈ такви о̄лнэ ма̄тэ̄т яныг кӯщаиг о̄луӈкве ве̄рми, государстватэ ма̄к яныг тэ̄лат палт рӯпитаӈкве ве̄рми. 3. Ма̄хум о̄лнэ ма̄нанылт та̄нти номт вос о̄ньще̄гыт, хумус номсэ̄гыт, ла̄вуӈкве вос ве̄рме̄гыт, кӯщай та̄нти вос пе̄рие̄гыт, тамле пе̄рияпыт вос ва̄рыгла̄лавет, ань хо̄тпа хотьютэ пе̄риянэ̄тэ порат ма̄хум вос сунсэ̄гыт манос сытамыӈыщ вос пе̄рии. 22ыт статья Э̄лумхо̄лас такви о̄лнэ ма̄тэ̄т кӯщаянэ̄н вос нё̄таве, ёмащакв вос о̄лы, вос ханищтахты, рӯпата олныл вос ойтаве, хо̄та̄ти вос ё̄мыгты, вос ӯщлахты, матыр та̄рвит порат мирхал саккон щирыл вос нё̄таве. 23ит статья 1. Ка̄сыӈ хо̄тпа рӯпата вос о̄ньщи, хо̄т тахмаи, тот вос рӯпиты, рӯпитан ма̄тэ рӯпитанте̄м вос о̄лы, сыстамыг вос о̄лы, хо̄тпа ул вос по̄ляве, по̄хан ул вос ня̄влаве. 2. Хо̄тпа рӯпитанэ̄тэ ма̄гыс олныл вос ойтаве, нэ̄мхотьют ул вос лю̄камтаве, ул вос ла̄пала̄лаве. 3. Рӯпитан ка̄сыӈ хо̄тпа рӯпататэ ёмащакв вос ойтаве, тав мӯсхал щирыл о̄луӈкве вос ве̄рми, ще̄мьятэ̄н нё̄туӈкве вос ве̄рми, олнанэ ат те то̄вылхатэ̄гыт, матыр нё̄тмилыл вос миве. 4. Ка̄сыӈ хо̄тпа рӯпататэ вуянтан ма̄гыс профессиональный союз ва̄руӈкве ве̄рми манос нас тув вос хасхаты. 24ыт статья Ка̄сыӈ хо̄тпа ӯщлахтуӈкве ве̄рми, рӯпитанэ̄тэ порат ӯщлахтан ма̄гыс ос матыр хал вос о̄лы, отпускын миннэ̄тэ порат олныл вос ойтаве. 25ыт статья 1. Ка̄сыӈ хо̄тпа о̄лупсатэ̄т хотальа̄ти э̄рнэ матыр пуссын вос о̄ньщи, тэ̄нут, маснут, о̄лнэ кол, пусмалтахтуӈкве вос ве̄рми, та̄рвитыӈ порат нё̄тмилыл вос нё̄тумта̄лаве, таквина̄тэ̄н ос ще̄мьятэ̄н тав нё̄туӈкве вос ве̄рми, рӯпататэ̄ныл по̄хан ке̄таве те, олнло̄мтыл вос ойтаве, а̄гмыӈыг е̄мты те, вос пусмалтаве, яныгпа̄лаг е̄мтме порат ос пенсия олныл вос ойтаве, мо̄т матыр та̄рвитыӈ ва̄рмаль е̄мтапан порат, о̄с вос нё̄таве. 2. Ня̄врам самынпаттын ва̄рмаль ка̄сыӈ ма̄т сака ёмащакв нё̄таве ос вуянтаве, ома ос ня̄врам янытлаве̄г. Ня̄врамыт ща̄няныла̄щаныл акванхасхатасыт ман а̄ти, пуссын аквте̄м нё̄тавет. 26ыт статья 1. Ка̄сыӈ хо̄тпа школат олн ойтта̄л вос ханищтахты. Ка̄сыӈ хо̄тпан о̄выл классыт а̄стлуӈкве э̄ри. Рӯпитан ма̄гыс ханищтахтуӈкве ка̄сыӈ вос ве̄рми. Высший образование ма̄гыс хотьют ве̄рми ханищтахтуӈкве, вос ханищтахты. 2. Э̄лумхо̄лас ханищтахтан ва̄рмале таве̄н ёмас па̄рыс вос тоты, тав номтыӈыг вос е̄мты, сакконыт вос ва̄ганэ. Ань То̄рум нупыл ка̄сыӈ такви щире̄т сунсы, пуссын аквхурипат хунь, тав ка̄сыӈ мир янытлаӈкве вос ханищтахты, хо̄тпа ёт потыртаӈкве вос ха̄сы, Ма̄ янытыл о̄лнэ мирыт Акванпотыртахтам Мирколн вос нё̄ты, ань ма̄ янытыл о̄лнэ мир хо̄нтта̄л вос о̄лы. 3. Ща̄ньа̄щит ня̄враманыл ма̄гыс ханищтахтан кол та̄нти вос пе̄рие̄гыт. 27ыт статья 1. Культура тэ̄ланэ ва̄рыглан ма̄н ка̄сыӈ хо̄тпа ялантаӈкве ве̄рми, тот вос ӯщлахты, вос сунсы, матыр вос ханищты, йильпи тэ̄ла о̄лыглан порат тав о̄с матыр ка̄тын вос патты, йильпи нэ̄пакыл ман мо̄т матарыл вос миве. 2. Хо̄тпа нэ̄пак хансыс те, ка̄тыл хури по̄слыс ман мо̄т яныг научный рӯпата ва̄рыс те, тав ва̄рум рӯпататэ мо̄т хо̄тпан хот ул вос виве, саккон щирыл тав ӯргалаве. 28ит статья Тыт хансым саккон щирыл ка̄сыӈ хо̄тпа вос ӯргалаве, о̄лте̄т ань матыр та̄рвит ва̄рмаль е̄мтапи манос мирхал тэ̄ланэ палт матыр китыглахтан ла̄тыӈ о̄ньщи те, саккон тотнэ хо̄тпатн вос нё̄таве. 29ит статья 1. Э̄лумхо̄лас мир халт о̄лы, тот яныгми, ханищтахты, нэ̄гхумыг е̄мты, ма̄хум халт тав роттыг, саккон щирыл вос о̄лы. 2. Тох о̄лыглы, ань э̄лумхо̄лас матыр ва̄руӈкве тахмаи, ос саккон щирыл тох ат ро̄ви. Тав хунь кос таве̄н лю̄ль ва̄рнэ ма̄гыс ат та̄ртаве, тав ань мо̄т хо̄тпан лю̄ль матыр ул вос ва̄рапи, таи ма̄гыс мощ ёлпо̄илттаве, тэ̄латэ ва̄руӈкв ат та̄ртаве. Ты саккон таи ма̄гыс хасвес, ань ма̄ янытыл о̄лнэ мирыт халанылт юртыӈыщ вос о̄лэ̄гыт, ляпа ма̄хманыл вос э̄руптыяныл, сакконыт вос янытлыяныл. Пуссын пуста̄гыл вос о̄лэ̄гыт. 3. Ма̄ янытыл о̄лнэ ма̄хум о̄лупсаныл ань Ма̄ янытыл о̄лнэ мирыт Акванпотыртахтам Мирколанылт хансум сакконыл со̄ви ул вос мины. 30ыт статья Тыт хансым сакконыт нэ̄мхотьютн мо̄т щирыл ул вос ва̄рапавет, нэ̄мхотьют ул вос ла̄ви, ань та̄н пуссын тав ма̄гсылэ манос хотты я̄нас ма̄ ма̄гыс хасве̄сыт. Ты сакконыт ма̄ янытыл о̄лнэ ка̄сыӈ хо̄тпа ма̄гыс хасве̄сыт. Хо̄тпа та̄н щиранылт ат те о̄лы, ты сакконыт таве̄н тах нё̄туӈкве ат патэ̄гыт. 1084 2014.09.19. Светлана РОМБАНДЕЕВА Ма̄ янытыл о̄лнэ мирыт Акванпотыртахтам Миркол соссаӈ мирыт урыл хансум ма̄к потре. ООН Генеральный Ассамблея ты резолюция нэ̄паке 61/295 сӯкыр э̄тпос 13 хо̄талэ̄т 2007 та̄лт пирмайтавес. Генеральный Ассамблея, ань Ма̄ янытыл о̄лнэ мирыт Акванпотыртахтам Мирколаныл (Организация Объединенных Наций) Устав нэ̄паке щирыл ос ка̄сыӈ государство тох о̄луӈкве ла̄тыӈ ла̄внэ̄ныл ма̄гыс, ка̄сащи, ань ма̄ янытыл о̄лнэ соссаӈ мирыт мо̄т мирыт ёт пуссын аквте̄м вос о̄лэ̄гыт, ос ка̄сыӈ мир мощ такви хурипатэ, тав ань ты урыл ла̄вуӈкве ве̄рми, манхурипаг о̄лы, тох вос ва̄ве, вос янытлаве, аквтох та урыл ка̄сащи, ань ка̄сыӈ мир такви матыр пӯмыщ о̄ньщи, о̄лупсатэ мирн суссылты, мо̄т мирыт ёт культураныл та маныр аквантэ̄лыглэ̄гыт, пуссын акв мир хольт та о̄лэ̄гыт, э̄лаль та ёт о̄с ка̄сащи, ань то̄ванакт хӯлыгла̄лэ̄в, э̄рттам акв хотты мир ёмаснуве, манос акв хотты хо̄тпа такви мире щирыл, То̄рум нупыл суснэ тэ̄латэ манос культуратэ щирыл ёмаснуве, тамле номт мирн ос ма̄вн лю̄ль тоты, ма̄хум халанылт халмалтахтэ̄гыт, наука щирыл тамле номт пе̄сыг е̄мтыс, сакконт ты урыл хансым ат о̄лы, тамле ва̄рмаль ма̄гсыл ма̄хум савалэ̄гыт, тох о̄луӈкве ат ро̄ви, ка̄сащи, ань соссаӈ ма̄хум роттыг вос о̄лэ̄гыт, нэ̄мхотьютн ул вос лю̄камтавет, ул вос тораставет, ты ма̄гыс сыме ща̄рги, ань пе̄с йис порат соссаӈ мирыт тораставе̄сыт, таима̄гыс я̄нас ма̄н ня̄влуве̄сыт, ра̄тыглаве̄сыт, о̄лнэ ма̄наныл хотвуйла̄лве̄сыт, ма̄нанылт ман ма̄наныл тӣвырт маныр о̄лы, пуссын мо̄т ма̄хум нупыл та патэ̄гыт, тох та̄н хумус э̄лаль о̄лэ̄гыт, мӯсхал сакконт о̄лсыт те, та̄н ёмащакв о̄лнувыт, ва̄им, ма̄ янытыл о̄лнэ соссаӈ мирыт янытлаӈкве э̄регыт, политика ос олн сэ̄лнэ тэ̄ланыл ва̄рнэ̄ныл порат ёмас ла̄тӈыл ла̄вуӈкве э̄ре̄гыт, та̄нти культураныл ос пе̄с йис о̄лупсаныл щирыл вос о̄лэ̄гыт, та̄нти ма̄хманыл о̄лум ма̄нанылт вос о̄лэ̄гыт, ва̄им, соссаӈ ма̄хум ос та̄н о̄лупсаныл янытлаӈкве э̄ри, ты урыл ань ма̄ янытыл о̄лнэ государстват са̄всыр э̄рнэ нэ̄паканылт хансым о̄лы, соссаӈ мирыт тэ̄ланыл та̄н акваннё̄тхатым ва̄рияныл, ос ва̄им, ань соссаӈ мирыт нэ̄мхотьютн ул вос тораставет, ул вос саватавет, таима̄гыс та̄н акваннё̄тхатэ̄гыт, политика, культура ос олн сэ̄лнэ тэ̄ланыл пуссын аквъёт ва̄рияныл, тав ва̄гтэ, ань ка̄сыӈ соссаӈ мир мо̄т соссаӈ ма̄хум о̄лупсаныл урыл ва̄ӈкв патэ̄гыт те, та̄рвитыӈ тэ̄ланыл та̄рапаттыяныл те, то̄нт ка̄сыӈ мир такви культуратэ, пе̄с йис ва̄рмалянэ но̄хво̄ртуптаӈкве патыянэ, ка̄сыӈ такви ве̄рмынте̄м ханищтахтуӈкве паты, ва̄им, мо̄т мирыт соссаӈ ма̄хум культураныл ос пе̄с йис о̄лупсаныл янытлаӈкве патыяныл те, та̄н тах ща̄гтым э̄лаль ханищтахтуӈкве патэ̄гыт, о̄лнэ ма̄в тах ущпылнэг та̄кыщ ӯргалаӈкве патыяныл, таи ва̄гтэ, ань ма̄ янытыл о̄лнэ мирыт ёмащакв о̄лэ̄гыт, олн сэ̄лнэ тэ̄ланыл, э̄лаль ханищтахтан тэ̄ланыл мӯсхал щирыл мины, ма̄хум ос мирыт та̄нти халанылт э̄руптахтым ос юртыӈыщ о̄лэ̄гыт, соссаӈ мирыт о̄с тох о̄лнэ̄ныл ма̄гыс ань сака яныг рӯпата ва̄раве, та̄н о̄лнэ ма̄наныл таима̄гыс ты вуянтаве, тыи ос ва̄нэ щирыл о̄ньщитэ, ань ма̄к сакконыт щирыл, соссаӈ мирыт ще̄мьянылт ос общинанылт пуссын акваннё̄тхатым вос о̄лэ̄гыт, ня̄враманыл та̄нти вос янмалтыяныл, ханищтыяныл, таи тыг те ловиньтаӈкве, ань соссаӈ мирыт то̄ва сакконаныл манос мо̄т э̄рнэ нэ̄паканыл мирхал сакконыт палт хансым о̄лэ̄гыт, таима̄гыс та̄н мо̄т хо̄н ма̄т о̄лнэ саккон тотнэ хо̄тпатн янытлавет, вуянтавет, та̄н тэ̄ланыл мирхал тэ̄лаг ла̄вавет, тыи о̄с тыг те ловиньтаӈкве, ка̄сыӈ соссаӈ ма̄хум хансум са̄всыр э̄рнэ нэ̄паканыл ма̄ янытыл о̄лнэ соссаӈ мирытн сака яныг па̄рыс тотэ̄гыт, государстваныл халанылт ты коныпал юртыӈыщ о̄луӈкве патэ̄гыт, ва̄им, ань Ма̄ янытыл о̄лнэ мирыт Акванпотыртахтам Миркол Уставе, олн сэ̄лнэ ос культура Мирхал саккон, гражданский ос политический тэ̄лат Мирхал саккон, Венский декларация ос Программа действий пуссын аквъёт та̄н ла̄ве̄гыт, ань ка̄сыӈ соссаӈ мир такви я̄нас мирыг о̄лы, политика, олн сэ̄лнэ манос культура тэ̄ланыл та̄н та̄нти ва̄руӈкве ве̄рмияныл, э̄лаль хумус о̄луӈкве, та̄н та̄нти вос номсэ̄гыт, номитэ, тыт хансым нэ̄мхотты потыр соссаӈ мирытн лю̄ль ул вос ва̄ри, мирхал сакконыт щирыл та̄н о̄с тармылпатавет, тав щире̄т, ань ма̄ янытыл о̄лнэ соссаӈ мирыт ос тыт хансым сакконыт ва̄ӈкве ос янытлаӈкве патавет те, то̄нт тах государстват халанылт юртыӈыщ о̄луӈкве патэ̄гыт, ка̄сыӈ ма̄т о̄лнэ соссаӈ ма̄хум кӯщаянылн нё̄туӈкве патавет, нэ̄мхотьют ла̄палахтуӈкве ат паты, ма̄хум лю̄камтаӈкве ат патавет, нё̄тнэ щирыл о̄лы, ань ка̄сыӈ государство такви соссаӈ ма̄хманэ̄н вос нё̄ты, саккон щирыл манхурип нё̄тмил та̄нанылн э̄ри ва̄руӈкве, вос нё̄тумтыянэ, мирхал тэ̄ланыл ва̄руӈкве о̄с вос нё̄тэ̄гыт, соссаӈ ма̄хум матыр сакконыт ат те ва̄ганыл, вос хӯлтыяныл, ва̄нэ̄тэ щирыл, ань Ма̄ янытыл о̄лнэ мирыт Акванпотыртахтам Миркол соссаӈ мирытн нё̄туӈкве ла̄выс, та̄наныл тармылпатуӈкве вуйхатас, номсыте̄т, ань тыт хансым сакконыт соссаӈ мирн сака ёмащакв нё̄тэ̄гыт, та̄н хосытанылт ка̄сыӈ мир ва̄ве, саккон тотнэ хо̄тпатн та̄н тармылпатавет, Ма̄ янытыл о̄лнэ мирыт Акванпотыртахтам Мирколн ты саккон нэ̄пак сака яныг парыс тоты, ва̄нэ̄тэ щирыл ла̄вегыт, соссаӈ ма̄хум ань ма̄ янытыл о̄лнэ мо̄т мирыт хольт вос о̄лэ̄гыт, ма̄к яныг сакконыт манос мирхал сакконыт о̄с аквтох та̄н ма̄гсыланыл рӯпитэ̄гыт, та̄н нэ̄мхотьютн ул вос лю̄камтавет, мо̄т ма̄хум хольт о̄с вос ханищтахтэ̄гыт, со̄тыӈыщ, щуниӈыщ вос о̄лэ̄гыт, ва̄нэ̄тэ щирыл, ка̄сыӈ ма̄т ос ка̄сыӈ государстват соссаӈ ма̄хум о̄лупсаныл аквхурип а̄ти, ка̄сыӈ мир ань о̄лупсатэ мощ мо̄тхурипа, тав о̄лнэ ма̄тэ ос мо̄т ма̄ а̄ти аквхурипа, пе̄с йис о̄лупсатэ ос культуратэ о̄с мо̄тхурипа, Генеральный Ассамблея сохтыл лю̄лим ла̄ви, ань тыгыл э̄лаль Ма̄ янытыл о̄лнэ мирыт Акванпотыртахтам Мирколаныл соссаӈ мирыт ма̄гыс хансум саккон нэ̄паке ма̄ янытыл о̄лнэ мирытн вос ва̄ве, вос янытлаве, тав щире̄тыл ма̄хум вос о̄лэ̄гыт, аквъёт вос рӯпитэ̄гыт, халанылт вос э̄руптахтэ̄гыт: 1ыл статья Соссаӈ мирыт, акв хо̄тпа манос са̄в хо̄тпа пуссын аквъёт, сакконыт щирыл тэ̄ланыл та̄нти ва̄руӈкве ве̄рмияныл, та̄наныл вуянтан сакконыт Ма̄ янытыл о̄лнэ мирыт Акванпотыртахтам Мирколаныл Устав нэ̄пакт, Ма̄ янытыл о̄лнэ мир ма̄гыс хансым ма̄к потрыт ос мирхал сакконыт палт хансым о̄лэ̄гыт. 2ыт статья Соссаӈ хо̄тпа, соссаӈ мирыт ос ма̄ янытыл о̄лнэ мо̄т мирыт пуссын аквхурипат, хотьют хо̄т о̄луӈкве таӈхи, вос о̄лы, матыр ва̄руӈкве тахмаи те, вос ва̄ри, нэ̄мхотьютн ул вос лю̄камтаве, ул вос ла̄ваве, наӈ ань та манос ты мирныл о̄лэ̄гын. 3ит статья Соссаӈ мирыт таӈхе̄гыт те, та̄нти о̄лупсанылт вос о̄лэ̄гыт. Саккон щирыл, та̄н политика, олн сэ̄лнэ тэ̄ла, о̄лупсаныл ос культураныл та̄нанылн э̄рнэ щирыл хансуӈкве ве̄рме̄гыт, саккон нэ̄пакыт пирмайтаӈкве ос та̄нти о̄лупсал о̄луӈкве ве̄рме̄гыт. 4ыт статья Соссаӈ мирыт та̄нти тэ̄ланыл саккон щирыл ва̄рияныл те, та̄н о̄лнэ ма̄наныл я̄нас ма̄г ловиньтаӈкве ро̄ви (рущ щирыл ла̄ваве – автономия), то̄нт са̄всыр тэ̄ланыл та̄н та̄нти ва̄рияныл, ма̄нанылт сэ̄лнэ олныт хоталь ойтуӈкве э̄ри, та̄н та̄нти ойтэ̄гыт, ос мо̄т са̄всыр тэ̄лат хумус ва̄руӈкве э̄ри, та̄н та̄нти номсахтэ̄гыт. 5ыт статья Соссаӈ мирыт ка̄саще̄гыт те, та̄н о̄лупсаныл, культураныл, политика ос олн сэ̄лнэ тэ̄ланыл саккон нэ̄пакыг хансуӈкве ве̄рмияныл, ты коныпал та̄н та̄нти государстваныл тэ̄ланэ – политика, олн сэ̄лнэ ос культура тэ̄ланэ палт пуӈк тотнэ хо̄тпанылн нё̄туӈкве ве̄рме̄гыт. 6ыт статья Ка̄сыӈ соссаӈ хо̄тпа гражданство вос о̄ньщи. 7ыт статья 1. Соссаӈ хо̄тпа о̄луӈкве ла̄ввес те, вос о̄лы, алпитэ, пуӈке, ка̄танэла̄гланэ пуста̄гыл вос о̄лэ̄гыт, тав палтэ нэ̄мхотьют ул вос пе̄рхаты, нэ̄мхотьютн ул вос пащралаве, ул вос тораставе. 2. Хо̄нтта̄л о̄лупсат, хунь хо̄тпа нэ̄мхотьютн ат новаве, роттыг о̄лы, соссаӈ ма̄хум о̄с та̄нтирот о̄луӈкве ве̄рме̄гыт, та̄н я̄нас мирыг вос ловиньтавет, нэ̄мхотты мирн ул вос тораставет, ул вос саватавет, ня̄враманыл хот ул вос вивет, мо̄т ма̄н ул вос тотавет. 8ит статья 1. Соссаӈ мирыт ос та̄н нупланыл хансым ма̄хум та̄нти о̄лнэ ма̄наныл мо̄т ма̄н ё̄рва̄гыл ул вос тотавет, пе̄с йис о̄лупсаныл ос культураныл ул вос лю̄камтаве. 2. Ты накыт е̄мталан порат, ка̄сыӈ государства такви соссаӈ ма̄хманэ та̄ра тармылпатыянэ ос вуянтыянэ: а) хунь та̄н тораставет, ла̄ккваня̄влавет манос э̄рнэ пормасаныл хотвиӈкве таӈхавет; b) о̄лнэ ма̄наныл хотвиӈкве таӈхаве, ма̄наныл по̄хан ня̄влавет; c) хунь та̄н ё̄рва̄гыл мо̄т ма̄н ке̄тавет, са̄всыр щирыл саватавет, сакконаныл ва̄ӈкве ат таӈхавет; d) та̄н намыл мо̄т ма̄н ё̄рва̄гыл тотавет, ань мо̄т мир халн вос тэ̄лыглэ̄гыт, тувыл хотталь вос со̄йме̄гыт; e) хунь ма̄хум та̄н уранылт лю̄льсаӈ потыртэ̄гыт, полщил ва̄равет, са̄в хо̄тпа акванатэ̄гыт, таитн ань та̄н о̄с вос лю̄камтавет. 9ит статья Соссаӈ хо̄тпа хо̄т о̄луӈкве таӈхи, тот вос о̄лы, такви ма̄хманэ ёт манос мо̄т мирыӈ ма̄т о̄лы, тав тэ̄латэ. Ты ма̄гыс тав нэ̄мхотьютн лю̄ль ла̄тӈыл ул вос ла̄ваве, ул вос лю̄камтаве. 10ит статья Соссаӈ ма̄хум о̄лнэ ма̄наныл мо̄т ма̄н ё̄рва̄гыл ул вос ке̄тавет. Та̄н ка̄саще̄гыт те хотталь минуӈкве, ты урыл нэ̄пак вос хансэ̄гыт, тот пуссын вос хасхатэ̄гыт. Мо̄т ма̄н ва̄нтлынэ̄ныл ма̄гыс олныл вос ойтавет, ос ювле минуӈкве ро̄ви те, ювле вос минэ̄гыт. 11ит статья 1. Ка̄сыӈ соссаӈ мир таӈхи те, такви о̄лупсал вос о̄лы, такви культуратэ но̄х вос во̄рмалтытэ, пе̄с йис ва̄рмалянэ мирн вос суссылтыянэ. Пе̄с коланыл, пе̄с о̄лтуланыл, ка̄тыл ва̄рнэ са̄всыр пормасаныл, ка̄тыл по̄слын хурияныл, та маныр пуссын вос янытлыяныл. 2. Ка̄сыӈ ма̄т саккон тотнэ ма̄хум са̄всыр тэ̄лат хосыт соссаӈ миранылн нё̄тэ̄гыт, та̄н культураныл, ханищтахтан тэ̄ланыл ос То̄рум нупыл суснэ ва̄рмаляныл но̄хво̄рмалтан ма̄гыс та̄н пуссын аквъёт э̄рнэ нэ̄пакыт хансэ̄гыт, ос о̄лнэ ма̄наныл хосат хот те вуйве̄сыт, ты урыл о̄с са̄в рӯпитэ̄гыт, э̄рнэ нэ̄пакыт акванатэ̄гыт, ань пе̄с йис ма̄наныл ювле вос мивет. 12ит статья 1. Саккон щирыл, соссаӈ мирыт та̄нти пе̄с о̄лупсаныл ос То̄рум нупыл суснэ ва̄рмаляныл мирн суссылтаӈкве ве̄рмияныл, но̄хялтуптаӈкве, ма̄ньлат ма̄хум ханищтаӈкве ос э̄лаль тотуӈкве ве̄рмияныл; ялпыӈ ма̄наныл по̄х хо̄тпатн суссылтаӈкве ат те таи, ул вос суссылтыяныл, ӯргалым вос о̄ньщияныл; а̄тимыг е̄мтум ма̄хманыл та̄нти щиранылт ёл вос щё̄питыяныл, о̄лум ма̄нанылн вос тотыяныл. 2. Та̄нанылн э̄рнэ пормасаныл манос На̄й-О̄тыраныл хо̄т э̄лынт о̄лэ̄гыт те, кӯщаянылн ка̄тынпаттуӈкве вос нё̄тавет, ос хотты хо̄тпа хо̄т э̄лы хо̄н ма̄т ёл те щё̄питавес, таве юв тотуӈкве вос нё̄тавет. Пуссын ты урыл э̄рнэ нэ̄пакыт та̄н аквъёт хассыт. 13ит статья 1. Соссаӈ мирыт та̄нти пе̄с о̄лупсаныл, ла̄тӈаныл, хансум нэ̄паканыл ос э̄рганыл, мо̄йтаныл но̄х вос ялтуптыяныл, яныгман ня̄врамытн вос хӯлтыяныл, общинаныл, о̄лнэ ма̄наныл ос самын патум ня̄враманыл та̄нти намыл вос намтыяныл, ӯргалым вос о̄ньщияныл. 2. Ка̄сыӈ ма̄т саккон тотнэ хо̄тпат соссаӈ ма̄хманыл вуянтан сакконыт акваг уральтым о̄ньщияныл, соссаӈ мирыт та̄нти сакконаныл вос ва̄ганыл, хотты ма̄хум ёт халмалтахтынэ̄ныл ос воритотнэ̄ныл порат потыртаӈкве вос ха̄сэ̄гыт, вуянтахтуӈкве вос ве̄рме̄гыт, кӯщаянылн вос хӯлавет, вос торгамтавет. 14ит статья 1. Соссаӈ мирыт ня̄враманыл та̄нти ла̄тӈыл ханищтан школат ман институтт ӯнттуӈкве ве̄рме̄гыт, тот та̄нти вос кӯщайлахтэ̄гыт, ня̄враманыл та̄нти ва̄нэ щирыл вос ханищтыяныл. 2. Соссаӈ ня̄врамыт хо̄та̄ти вос ханищтахтэ̄гыт, ань соссаӈыг о̄лнэ̄ныл ма̄гыс ханищтахтан ма̄нанылт ул вос лю̄камтавет. 3. О̄лнэ ма̄нанылт школа а̄тим те, ня̄врамыт ханищтахтан ма̄н вос тотавет, тот мӯсхал щирыл вос о̄ньщавет, ща̄нь ла̄тӈаныл ханищтаӈкве, та̄нти халанылт ща̄нь ла̄тӈыл потыртаӈкве вос ве̄рме̄гыт, ос матыр та̄рвитыӈ порат, китыглахтан ла̄тыӈ са̄в о̄лы те, соссаӈ ма̄хум ос кӯщаит пуссын аквъёт вос номсэ̄гыт, маныр хумус ва̄руӈкве, ня̄врамыт мӯсхал щирыл ханищтахтуӈкве вос ве̄рме̄гыт. 15ит статья 1. Соссаӈ ма̄хум та̄нти о̄лнэ ма̄нанылт мӯсхал щирыл вос о̄лэ̄гыт, пе̄с йис о̄лупсанылт вос о̄лэ̄гыт, о̄лупсаныл ань ханищтахтан ос ля̄ххал тотнэ ва̄рмаль хосыт вос на̄ӈки. 2. Ка̄сыӈ ма̄т рӯпитан кӯщаит соссаӈ ма̄хманыл мо̄т мирытныл тармыл вос патыяныл, та̄н ань соссаӈыг о̄лнэ̄ныл ма̄гыс ул вос тораставет, ул вос намталавет, ос соссаӈ ма̄хманыл ёт вос номсэ̄гыт, маныр э̄ри ва̄руӈкве, ань ма̄хум пуссын аквъёт юртыӈыщ вос о̄лэ̄гыт. 16ит статья 1. Соссаӈ мирыт ля̄ххал тотнэ я̄нас колыт ва̄руӈкве ве̄рме̄гыт, та̄нти ла̄тӈанылт вос потыртэ̄гыт, вос хансэ̄гыт, э̄лы хо̄н ма̄хум ля̄ххалыт вос хӯнтлэ̄гыт, вос ловиньтэ̄гыт, нэ̄мхотьютн нэ̄матарыл ул вос ла̄вавет. 1084 2014.09.19. Светлана РОМБАНДЕЕВА Ня̄врамыт яныг кӯщайн уральтаве̄сыт. Ня̄врамыт ханищтахтан ва̄рмаляныл о̄вылтахтан кастыл округ Дума кӯщай Борис Сергеевич Хохряков Ханты-Мансийск ӯст ос Шапша па̄вылт о̄лнэ са̄в ня̄врамыӈ колта̄глыт палт ялыс. Уральтасанэ, ань ня̄врамыт хумус о̄лэ̄гыт, ханищтахтан ма̄гыс э̄рнэ матыр пуссын о̄ньще̄гыт ман а̄ти. Шапша па̄вылт Шумиловыт колта̄гыл палт ялыс. Тот хӯрум ня̄врам яныгми – 8, 10 ос 12 та̄л яныт ня̄врамыт. Нэ̄гхумыг яныг пыге̄н 21 та̄лэ, тав ань а̄ще̄н нё̄ты. Ня̄врамытн Борис Сергеевич ханищтахтан ма̄гыс э̄рнэ пормасыт ос школан ялантан кощтюм парат мӯйлуптас. Ханты-Мансийск ӯст ос Трифонов колта̄гыл палт ялыс. Тот о̄с хӯрум ня̄врам о̄лы – 4, 6 ос 8 та̄л. Та̄нанылн тав о̄с са̄всыр ёнгилыт, ханищтахтан ма̄гыс э̄рнэ пормасыт мис. Ка̄сыӈ ще̄мья ёт потрамас, китыглахтас, матыр та̄рвит о̄ньще̄гыт ман а̄ти. Борис Сергеевич ла̄выс: «Ма̄н о̄лнэ ма̄вт кӯщаянув ня̄врамыт урыл акваг номсысыт. «Единая Россия» партия та̄рвитыӈыщ о̄лнэ ще̄мьятн о̄с акваг нё̄ты. Ка̄сыӈ та̄л тав «Помоги детям собраться в школу» нампа акция ва̄рыглы. Тот рӯпитан ма̄хум са̄в ня̄врамыӈ ос нусаг о̄лнэ ще̄мьятын, савалап ня̄врамытын ос мо̄т са̄в хо̄тпатын нё̄тэ̄гыт. Ня̄врамыт ань школат ханищтахтуӈкве та о̄вылтахтасыт. Та̄нанылн ам са̄в ёмас, сымыӈ ла̄тыӈ ла̄ве̄гум, пуссын пуста̄гыл вос о̄лэ̄гыт, со̄тыӈыщ вос яныгме̄гыт». Округ Думаныл ке̄тым ля̄ххал ма̄ньщи ла̄тӈыг Светлана ХОЗУМОВАН толмащлавес. 1084 2014.09.19. Валентина УЗЕЛЬ Кӯщаюв э̄лы хо̄н ма̄т соссаӈ мир урыл потыртаӈкв паты. Округ кӯщай о̄выл ва̄ӈын хо̄тпаг Геннадий Бухтин рӯпиты. Соссаӈ ма̄хумн нё̄тнэ са̄всыр программат щирыл кӯщаиӈ хо̄тпат хумус рӯпитэ̄гыт, тав пуссын ты ва̄рмалит уральтым о̄ньщиянэ. Ты э̄тпос тав э̄лы хо̄н ма̄н мины, ООН (Организация Объединённых наций) яныг мирколт ма̄н округув, тыт о̄лнэ соссаӈ мирыт урыл тав потыртаӈкв паты. Маныр урыл тот потырты, тав ма̄н газетав ма̄гыс такви хансум потре мистэ. Ма̄ янытыл о̄лнэ соссаӈ мирыт 2009 та̄л па̄сныл иӈ лов та̄л э̄лаль янытлаӈкв патавет. Ань округувт о̄лнэ мощщаг хультум ос ма̄нь мирыг ловиньтахтын ханты, ма̄ньщи ос ё̄рн ма̄хумн нё̄тнэ ма̄гыс организационный комитет рӯпиты, кӯщаиг тот округ губернатор Наталья Комарова олы. Та̄н са̄всыр рӯпата ва̄ре̄гыт. Хус та̄л сыс соссаӈ ма̄хум ма̄гыс 56 са̄всыр хӯлтнэ нэ̄пакыт пирмайтаве̄сыт, 13 са̄ккон округт о̄лнэ ма̄ньщи, ханты ос ё̄рн ма̄хум ма̄гыс хансым о̄лэ̄гыт. Концепция устойчивого развития коренных малочисленных народов нампа щар ма̄к яныг нэ̄пак щирыл та̄н 2011 та̄л па̄сныл рӯпитэ̄гыт. Округув янытыл са̄в соссаӈ хо̄тпа, ты са̄выӈпа̄лэ хантыт, та̄нти пе̄с йис та̄гыл о̄лнэ ма̄наныл та̄нти нупыланыл хассаныл, ань 475 тамле ма̄ о̄лы. Та ма̄ тармыл о̄лнэ ханты хо̄тпат ма̄во̄й но̄хвинэ ма̄хум рӯпитаӈкв тув та̄ртыяныл те, олныл ойтавет. Таит ос ханты мир рӯпатал мыганыл, ня̄враманыл э̄лаль ханищтахтын ма̄гыс олныл нё̄тыяныл. Са̄в хо̄тпа община ва̄ре̄гыт. Аквъёт рӯпитан ма̄хум хӯл алыщлэ̄гыт, пил ва̄тэ̄гыт, во̄рае̄гыт, олн та̄нти ма̄гсыланыл сэ̄лэ̄гыт. Са̄внув хо̄тпа са̄лы о̄ньщуӈкв ка̄сащасыт, ань округувт 40 со̄тыра арыгтем са̄лы ӯравет. Мир пусмалтан рӯпата тыт о̄с ёмащакв ва̄раве. Соссаӈ ма̄хманув ле̄ккарытн акваг уральтавет. Ма̄нь па̄влытт, во̄рт о̄лнэ мир хотьютаныл а̄гмын сака илямтаве те, тав товлыӈха̄пыл ман вертолётыл пӯльницан тотаве. 2013 та̄л сыс 1 со̄тыра 858 щёс тамле санзадание о̄лыс. Ка̄сыӈ тув ос плавполиниклиника ят хосыт яласы, ма̄нь па̄влытн хоиглым ле̄ккарыт па̄влыӈ мир пусмалтэ̄гыт. Са̄в ФАП ӯнттувес. Ань округувт кол ӯнттын ма̄гыс са̄всыр программмат хансым о̄лэ̄гыт. Хотьют такви кол ӯнттуӈкв те таӈхи, тав нё̄таве. Мо̄т ма̄хум ос субсидияолныл мивет. 2009-2013 та̄лыт сыс тув 4 млрд солко̄ви холтвес. Соссаӈ ма̄хум та̄нти ща̄нь ла̄тӈаныл э̄лаль вос тотыяныл, ня̄врамыт ща̄нь ла̄тӈаныл вос ханищтыяныл, ты рӯпата ма̄гыс о̄с са̄в олн холтаве. Округувт 9 садикытт ма̄нь ня̄врамыт ос 22 школатт яныгнув ня̄врамыт та̄нти ханты ман ма̄ньщи ла̄тӈаныл ханищтыяныл. Школа юипа̄лт э̄лаль ханищтахтуӈкв ка̄сащан ня̄врамыт о̄с нё̄тавет, ханищтан нэ̄пакыт, маснут ёвтнэ ма̄гыс олныл мивет. Ущты ханищтахтуӈкв о̄вылтахтам ня̄врамыт 40 со̄тыра солко̄вил маснут ёвтнэ ма̄гыс мивет, а̄стланэ̄ныл э̄лыпа̄лт 50 со̄тыра солко̄вил мивет. Тыглетувле ялнэ лё̄ӈханыл олныл о̄с ойтавет. Юио̄выл хӯрум та̄л сыс 2 со̄тыра 166 ханищтахтан ня̄врам тох нё̄твес. Ты 2014 та̄лныл йильпи рӯпата о̄вылтавес, ань соссаӈ мир ма̄гыс хансым са̄кконыт пуссын ханты ос ма̄ньщи ла̄тӈын тах толмащлавет. Ма̄ янытыл о̄лнэ мирыт ма̄гыс хансым тит ма̄к яныг са̄кконыг на̄н ань ты газета о̄выл ло̄псанэ̄т ловиньтаӈкв ве̄рмегы̄н. Тувыл иӈ акв яныг ва̄рмаль о̄лы – округувт о̄лнэ са̄в соссаӈ хо̄тпа рӯпата ат о̄ньще̄гыт. Ос ты ва̄рмаль ань акваг та̄рапаттым о̄ньщаве, ты хосыт ань туп 204 хо̄тпа рӯпата та̄л хультыс. Ос ты э̄лыпа̄л 2009 та̄лт 2 со̄тыра 944 хо̄тпа рӯпата та̄л о̄лыс. Ты потыр ма̄ньщи ла̄тӈыл Валентина Хозумова хансыстэ. 1084 2014.09.19. Людмила ТЕТКИНА Ле̄ккарыт палт ялуӈкве ул ёрувлэ̄н. Ма̄н округувт мир пусмалтан департаментыт кӯщаиг Александр Филимонов рӯпиты. Тав ля̄ххал тотнэ ма̄хум ёт хо̄нтхатыглас, мир пусмалтан ва̄рмаль урыл потыртас. Ань ка̄сыӈ хо̄тпа интернет щирыл ле̄ккар палт хасхатуӈкве ве̄рми. Тувыл таи лю̄ль, ты хосыт мо̄т ма̄хум ле̄ккар палт талон виӈкве щар ат ве̄рме̄гыт. Кӯщай хум ла̄выс, ты щирыл та̄н ёмас ва̄руӈкве кос тахсыт, э̄лумхо̄лас а̄лпыл но̄х ул вос ква̄лыс, хо̄тал палыт очередит ул вос лю̄лис. Ань мо̄т щирыл е̄мтыс, то̄ва ма̄хум, хотьют интернет щирыл ле̄ккар палт хасхатуӈкве а̄лымасыт, пӯльницан ат ёхталэ̄гыт. Ле̄ккар компьютер щирыл хасхатам э̄лумхо̄лас такос ӯриты, мо̄т а̄гмыӈ хо̄тпат ат пирмайтыянэ, ат пусмалтыянэ. Тыи ма̄гсыл ань мир пусмалтан департаментыт ма̄хум номсахтэ̄гыт, хумус ва̄руӈкве э̄ри, са̄внув а̄гмыӈ хо̄тпат ле̄ккар палт очередь та̄л вос ёхталасыт. Округув янытыл рӯпитан пӯльницатт ле̄ккар то̄вылхаты ман а̄ти, ты урыл ля̄ххал тотнэ ма̄хум о̄с пӯмщалахтасыт. Александр Филимонов ос таи ла̄выс, ань ле̄ккар хо̄тпат рӯпата олнаныл ва̄тихал но̄хнё̄тавет, ма̄нь па̄вылквен миннэ ле̄ккарыт о̄лнэ колыл мивет ос са̄всыр нё̄тмилолныл ойтавет. Тыи ма̄гсыл ма̄ньлат хо̄тпат ле̄ккарыг рупитаӈкве минэ̄гыт. Ма̄нь ня̄врам пусмалтан ле̄ккар ат то̄вылхаты. Ань то̄ва яныг ӯсытт о̄лнэ ща̄нита̄щит ня̄враманыл ёт ле̄ккар палт са̄в щё̄с ӯнлэ̄гыт. Ма̄нь па̄вылквен ань тэ̄рпи хумус тотаве ос пуссын тэ̄рпи тот о̄лы ман а̄ти, та урыл тав ла̄выс, ань ма̄нь па̄вылкветт о̄лнэ мир тэ̄рпил тотавет, тэ̄рпи та̄л нэ̄мхотьют ат хӯльты. Ка̄сыӈ пӯльницат ле̄ккархо̄тпа такви хансы, манхурип тэ̄рпи тав пусмалтан ма̄хманэ̄н э̄ре̄гыт, тувыл ты нэ̄паке щирыл пӯльница э̄рнэ тэ̄рпил ке̄таве. Ос акв ва̄рмаль осннэ̄глыс, ты туи порат Нижневартовский районт са̄в хо̄тпа корь нампа а̄гмыл е̄мталасыт. Ха̄льӯс район Ягрим па̄вылт ос туляремияа̄гм о̄лыс. Ань тамле а̄гмыл ма̄хум ул вос ха̄хтавет, ты кастыл ня̄врамыт ма̄ньтагыл прививкал пуссын вос тӯщтавет. Ос ка̄сыӈ хо̄тпа такви пуста̄гыл о̄лнэ̄тэ урыл ул вос ёрувлытэ ос ле̄ккар палт ва̄тихалнув вос яланты. Округувт о̄с акв тэ̄ла рӯпиты, ка̄сыӈ э̄лумхо̄лас пӯльницан уральтахтуӈкве ёхталаӈкве ве̄рми, рущ ла̄тӈыл «всеобщий диспансеризацияг» ла̄ваве. Э̄лумхо̄лас та̄рвитыӈ а̄гме са̄ртыннув ке хо̄нтаве, ёмащакв пусмалтаӈкве ве̄рмаве. Тыи ма̄гсыл туп пӯльницан ва̄тихал ялуӈкве э̄ри. 1084 2014.09.19. Людмила ТЕТКИНА Кол ӯнттын ва̄рмаль урыл потыр. Кондинский район Леуши па̄вылт миркол кӯщаиг Владимир Зольколин о̄лы. Ты кӯщай хум ёт хо̄нтхатыгламум порат кол ӯнттын ва̄рмаль урыл китыгласлум. Тав таи потыртас: – Леуши па̄вылт районный программа щирыл колыт ӯнттавет. Ма̄н мирколув нупыл иӈ хӯрум па̄выл: Листвинечный, Ягодный ос Дальний ловиньтахтэ̄гыт. Леуши ос Лиственичный па̄влыг щар акв по̄хат ӯнлэ̄г, тот о̄лнэ ще̄мьят акв очединин хасве̄сыт, пуссын аквъёт 59 ще̄мья. Ягодный ос Дальний па̄влыгт 30 ще̄мья о̄лнэ кол ӯре̄гыт. 2014 та̄лт олныл щар ат та̄стыглавесӯв, тыи ма̄гсыл йильпи колыт ат ӯнттуве̄сыт. 2013 та̄л олныл майлувесӯв, та та̄л сыс Леушит онтолов ще̄мья йильпи колн ва̄нтласыт. Ань са̄кконыт щирыл ма̄н ты очеридин хансым ще̄мьят колыл ёвтыянӯв. О̄влэ̄т па̄влыт кол ӯнттын ма̄гсыл ма̄ хо̄нтэ̄в, межевание ос са̄в мо̄т нэ̄пакыт щё̄питэ̄в. Тувыл кол ӯнттын компаният ёт аукцион щирыл рӯпитэ̄в. Тот но̄хпатум компаният па̄вылт кол ӯнттуӈкве о̄вылтахтэ̄гыт. Та̄н о̄влэ̄т та̄нки ӯнттэ̄гыт, хунь а̄стлыяныл, ма̄навн тыналэ̄гыт. 2013 та̄лт Леуши па̄вылт са̄т кол акв компания ос кит кол мо̄т компания ӯнттысы̄г. Районувт акв квадратный метра 44-46 со̄тыра солко̄ви тынэ о̄лыс. Ты тынэ щирыл ма̄н колыт ты ёвтсанӯв. Акв компания са̄т кол молях ӯнттыгпасанэ, мо̄танэ колаге ӯнттуӈкве о̄вылтасаге кос, тувыл олнанэ холасыт. Матахкем э̄тпос нэ̄матыр ат ва̄рыс, олн кинсыс, олн хо̄нтыс, э̄лаль рӯпитаӈкве патыс. Колаге хунь а̄стлысаге, ма̄навн тыналасаге. Ты колыт ма̄н социальный найм щирыл очередин хансым ще̄мьятытн мисанӯв. Ань ма̄хум йильпи кол ёвтэ̄гыт, кол кивыр рӯпататэ пуссын та̄нки ва̄ре̄гыт, тув ос са̄в олн холтэ̄гыт. Ма̄н па̄влувт ӯнттын колыт кӣвыр рӯпатаныл ос пуссын ва̄рим о̄лэ̄гыт, тув ва̄нтлам ще̄мьят ремонт урыл щар ат номсахтэ̄гыт. Ма̄хум о̄лнэ колн хунь ва̄нтласыт, о̄влэ̄т ёмащакв сунсыглахтасыт, матыр лю̄льсаӈ ва̄рим ке о̄лыс, ос заявлениенэ̄пак хассыт. Тувыл ма̄н ос ты кол ӯнттум ма̄хум тыг во̄всанӯв, ла̄всанӯв, ты рӯпатаныл мӯсхалыг вос ва̄рсаныл. Тамле колт о̄лнэ хӯрум ще̄мья заявлениенэ̄пак хансыглас. Акв ще̄мья ла̄выс, кола̄латэ лю̄льсаӈ ва̄рвес, мо̄т колт колкананыл сака полям о̄лыс, хӯрмит колт иснананыл лю̄льсаӈ ва̄рве̄сыт, тувыл ащирмал хартыс. Кол ӯнттын хо̄тпат ёхталасыт, лю̄льсаӈ ва̄рум рӯпатаныл ёмащакв ва̄рсаныл. Тыщирыл кос ёмас, тувыл ма̄хманув нас о̄луӈкве ос нэ̄матыр ат ва̄руӈкве сака ханьщувласыт, та̄нки кол ӯнттуӈкве ат ка̄саще̄гыт. Та ӯрхатэ̄гыт, хунь йильпи колыл мивет. Ань тыт туп кирпащ колыт ӯнттавет. Кирпащит ос мо̄т э̄рнэ утыт э̄лы ма̄ныл тыг тотавет, тыи ма̄гсыл ӯнттум колыт тынаныл янгыг е̄мты. Кондинский район Мортка па̄вылт нор, па̄ртыт сылнэ предприятие о̄лы. Кол ӯнттын ма̄гсыл маныр э̄ри, тот пуссын ва̄раве. Тувыл тамле колытт ще̄мьят о̄луӈкве ат ка̄саще̄гыт, улпыл тыи ма̄гсыл предприятие мӯсхалыг рӯпитаӈкве ат ве̄рми. Па̄влытыт полицейский участок ӯнттын ма̄гсыл я̄нас программа рӯпиты. Ма̄н па̄влувт ты хосыт тамле кол о̄с ӯнттувес. Ты та̄л яныгполь э̄тпос ты кол а̄стлавес. Аквпалъе̄ре̄т полицейский участок ва̄рвес, мо̄тпалъе̄ре̄т ос о̄лнэ колыл ва̄рим о̄лы. Ма̄н номсысӯв, хунь ты кол ӯнттаве, участковый тыг рӯпитаӈкве тах ёхты. Нижневартовск ӯсныл участковый рӯпитаӈкве тыг ёхталас. Тав ты йильпи колн о̄луӈкве ва̄нтлас. Тав ты нила па̄влыт тармыл участковыиг рӯпитас. Таве̄н акваг Лиственичный, Ягодный, Дальний па̄влытытн ялантаӈкве э̄рыс. Тох рӯпитаӈкве таве̄н улпыл та̄рвитыӈ о̄лыс, тыи ма̄гсыл хоса ат ве̄ритас, ювле та минас. Павлув о̄ста участковый та̄л хультыс. Ань йильпи кол нас тох та ӯнлы. Миркол кӯщай ам ня̄врамыт ханищтан колыт урыл о̄с китыгласлум. Тав ла̄выс, Леуши па̄влыт йильпи садик ӯнттаве, ма̄нь таквс э̄тпос тах а̄стлаве. Леуши ос Лиственичный па̄вылт о̄лнэ ня̄врамыт тув ялантаӈкве патэ̄гыт. Кӯщай хум ла̄выс, та̄н па̄вланыл ат ёрувлавет, са̄всыр программат щирыл олныл та̄ставет, ты хосыт па̄влыт о̄лнэ колыт ты ӯнттавет. Па̄вланылт пе̄с пӯльница ос са̄в пе̄с кол о̄лы, та̄н ань ты ва̄рмаль урыл кӯщаитн акваг хансэ̄гыт, па̄вылт пӯльница вос ӯнттаве. 1084 2014.09.19. Валентина УЗЕЛЬ Тав ма̄щтырлаӈкв такви ханищтахты. Ты тӯяг ва̄рим хурит Югорск ӯст о̄лнэ ще̄мья по̄слым о̄лы. Нэ̄ наме Анна, о̄йкатэ о̄парищ наме щирыл Зайцева. Тав ханты нэ̄, Октябрьский районныл о̄лы. Такви ще̄мьятэ урыл ма̄ньщи газетав ма̄гыс тав тох потыртас. – Ам А̄с я̄ ва̄тат Октябрьский па̄вылт самын патсум, тот яныгмасум. А̄тям Владимир Георгиевич, тав ханты о̄йка о̄лыс, Пальяново па̄вылныл тув ёхтыс. Тав а̄тимыг е̄мтыс, ань туп омам хультыс. Омам па̄лыл о̄лум пе̄с рӯтанув тыг ссылкан те̄тве̄сыт. Ам ане̄квам Фёкла Васильевна Осинцева ма̄навн потырта̄лыс, яныг хо̄нт э̄лыпа̄лт са̄в ще̄мья ня̄врамыӈ та̄гыл, яныгпа̄ла хо̄тпат пуссын аквъёт тыг ня̄влуве̄сыт. Тыг йиманыл порат лё̄ӈхыт хум хо̄тпат пуссын вуйве̄сыт, хотталь мо̄т нупыл тотве̄сыт. Октябрьский район Каменное па̄выл ӯнлын ма̄ мус туп э̄кват, ня̄врамыт ос яныгхо̄тпат ёхтысыт. Та̄н ё̄раныл хосыт ты па̄выл ӯнттувес. Ане̄квамащо̄йкам тот ты акванминасы̄г, лов ня̄врам о̄щсы̄г. Ане̄квам ам сака э̄руптаслум. Тав э̄ргуӈкв сака ха̄сыс, турсуе татем суиӈыг о̄лыс. А̄нум тав ты ма̄щтырлаӈкв ханищтастэ. Школа а̄стламум юипа̄лт ам э̄лы ма̄н ханищтахтуӈкв минасум. Новокуйбышевский техникумт маснут ман мо̄т са̄всыр пормас ю̄нтуӈкв ханищтахтасум. Юв ёхтысум, рӯпата ат хо̄нтсум. Югорск ӯс училищан рӯпитаӈкв во̄вве̄сум, тот ня̄врамыт ханищтасанум. О̄йкам ёт хо̄нтхатсум, тав ты ӯсн рӯпитаӈкв те̄твес. Пӯльницат мир пусмалтан са̄всыр техника уральты, саквалэ̄гыт те, ёмащакв ва̄риянэ. Акванминасаме̄н, пыгме̄н самын патыс. Тав туптуп хӯлы, паляге лапминым о̄лэ̄г. Ня̄врам ёмащакв ат те хӯлы, ва̄им, тав пуста̄гыл яныгмаӈкв ат ве̄рми. Таима̄гыс ам та̄ра рӯпатаныл по̄хан минасум, ань пыгум ёт юн о̄лэ̄гум. Амти ханты мирум урыл пӯмщалахтуӈкв патсум. Э̄ква маснут хумус ю̄нтаве, щулкит хумус сагавет, нэ̄пакытт тисхатуӈкв патсум. Тох амти хумус ве̄рме̄гум, ю̄нсхатуӈкв та о̄вылтахтасум. Са̄ӈквылтаӈкв ханищтахтэ̄гум. Ань ханты ос ма̄ньщи ма̄хум ма̄гыс са̄всыр ханищтапыт ва̄рыглавет, са̄ӈквылтаӈкв ханищтавет, ю̄нсхатуӈкв. Хотты ханищтахтын ма̄н нэ̄мхотталь ялуӈкв ат ве̄рме̄гум, о̄йкам акваг рӯпиты, пыгме̄н такте̄т хультуптаӈкв ат ве̄рмиламе̄н, акваг тав ляпатэ̄т о̄луӈкв э̄ри. Тох амтирот нэ̄пакыт щирыл, интернет щирыл ла̄щал ма̄щтырлаӈкв та ханищтахтэ̄гум. О̄йкам Василий гитарал са̄ӈквылтаӈкв сака ёмащакв ха̄сы, такви стихыт хансы, э̄ргыг ва̄риянэ. Ялпыӈ хо̄талыт порат то̄ванакт мир э̄лыпа̄лт э̄рге̄гум, йӣкве̄гум. Ме̄н аквъёт атхуйплов та̄л о̄лыме̄н, тав сака ёмас хо̄тпа. Тамле потыр ты нэ̄кве та потыртас. Ӯст о̄лнэ соссаӈ мирн тав ва̄ве, янытлаве, э̄руптаве. Та̄н акванхо̄нтхатыгланэ̄ныл порат Анна акваг тув ёхталы, аквъёт ма̄щтырлэ̄гыт, халанылт ханищтахтэ̄гыт. 1084 2014.09.19. Тамара МЕРОВА Ляма я̄ ва̄тат о̄лнэ ще̄мьят урыл. «Торум маа» музеит рӯпитан хо̄тпат «История семьи в истории страны – след прожитой жизни» намаим проектаныл щирыл э̄лаль рӯпитэ̄гыт. Ты э̄тпос о̄выл щислат тот «Ляма, ставшая судьбой» йильпи суссылтап пӯсвес. Хосат та̄гыл Кантеровыт, Песиковыт ос Сопочиныт ханты ще̄мьят Большой Юган я̄ныл Сургутский район Ляма я̄ ва̄тан о̄лмыгтасыт. Ань хумус ма̄хум тот о̄лсыт, маныр ва̄рсыт, ты о̄вылтыт Аграфена Семёновна Сопочина мирн потыртас. Аграфена Сопочина – ханты э̄ква, округ мирн ва̄нэ хо̄тпаг о̄лы. Тав соссаӈ ма̄хум о̄лупса ёмщакв ва̄гтэ ос сургутский хантыт ла̄тӈаныл щирыл са̄всыр ханищтан нэ̄пакыт хансыс. Тувыл рӯт ма̄хманэ пуссын ёлхассанэ ос «родословный» нампа яныг ло̄пс ва̄рыс. Тув Кантеровыт, Каюковыт, Лозямовыт, Песиковыт ос Сопочиныт хансым о̄лэ̄гыт. Аграфена Семёновна пе̄с ма̄хманэ о̄лупса янытлан ма̄гыс ты суссылтап щё̄питастэ ос ка̄сыӈ рӯтэ о̄вылтыт я̄нас потрамас. Песиков ханты о̄парищ нам «па̄сыг» ла̄тӈыныл э̄лаль хансуӈкве патвес. Та̄н са̄лы о̄щнэ ма̄хмыг о̄лсыт. 19 нотт котиль та̄ланэ порат та̄рвит а̄гм е̄мтум сыс са̄в хо̄тпа а̄тимыг е̄мтсыт. Акв па̄вылквет кит пыгрищиг тэ̄нккетэ̄н пусыг хультсы̄г ос Ханты-Мансийский район Селиярово па̄выл по̄хан о̄луӈкве минасы̄г. Ётыл акватэ, Павел Николаевич Песиков, мо̄т ма̄н о̄лмыгтас. Тав Фёдор Кантеров о̄лнэ ма̄н ликмыс ос та па̄сыл Песиковыт ос Кантеровыт акв рӯтыг ловиньтаӈкве патве̄сыт. Павел Николаевич Песиков тыи Аграфена тав о̄патэ. О̄йка 114 та̄лэ мус о̄лыс, о̄лме сыс са̄всыр ва̄рмалит ва̄щинтас. Акв ма̄т ат ӯнлыс, Балык, Белогорье, Назым, Салым я̄т хосыт акваг хотальа̄ти ялантас. Тав ханты ма̄хум йис мо̄йтыт ва̄м о̄йкаг о̄лыс, са̄в пе̄с э̄ргыт э̄ргыглас. Татьяна Павловна Песикова (Кантерова) э̄кватэ, ты ос Аграфена щаще̄кватэ, колсори рӯпатат пуссын такви ва̄рсанэ. Ос о̄йкатэ яласанэ̄тэ сыс такви хӯл алыщлас ос во̄раяс. Ла̄ве̄гыт, нэ̄ сака со̄тыӈыщ о̄лыс. Тав увщитэ, Дарья Павловна Комтина, номтыӈ ос та̄к хо̄тпаг ла̄выглавес. Ханты мир халт тав Найратнэ̄г намыл ла̄ввес. Та̄н е̄ранылт Кушников кӯпса хум хӯл алыщлан тӯр такви нупылэ хансуӈкве таӈхыстэ. Найратнэ̄ са̄в мирколытн ла̄тыӈ ке̄тсалыс, Тобольск ӯс нупыл такви ялыс. Юио̄вылт кӯпса тувыл губернатор па̄лыл пищмал тотвес, тав сысы минуӈкве ла̄ввес. Ань Сопочиныт кит ве̄рыста тувыл мощ по̄хат таргыт яныгман во̄рыӈ ма̄т о̄лэ̄гыт. Аграфена а̄ще Семён Павлович Песиков яныгмам та̄ланэ хо̄нтлан та̄лытын е̄мтсыт. 1945 та̄лт школа а̄стламе юипа̄лт тав Пим нампа колхозт о̄влэ̄т секретариг рӯпитас, ётыл ревизорхо̄тпаг паттувес. Тувыл «Калинин» нампа колхоз о̄лнэ̄тэ мус тот бухгалтерыг рӯпитас. Марфа Константиновна, Аграфена оматэ, ма̄ньлатыг о̄лме̄т фронт ма̄гыс са̄в рӯпитас. Таима̄гыс «За доблестный труд в ВОв» ма̄гылт о̄щнэ по̄сыл майвес. Ты э̄кваго̄йкаг ханты пе̄с йис накыт нэ̄мхуньт ат ёрувла̄лсанэ̄н, ня̄враманэ̄н ща̄нь ла̄тӈыл потыртаӈкве ос пе̄с накыт ва̄ӈкве ханищтасанэ̄н. Ань ты суссылтапыт мӯй ма̄хум са̄всыр пормасыт, маснутыт, хурит суссыт. Сургут ӯс е̄р тапа̄лт о̄лнэ соссаӈ ма̄хум ань тыг мус та̄нки ю̄нтум маснутыл масхатэ̄гыт. Акв супе урыл Аграфена Семёновна тох ла̄выс, тав Анна-Лайма Екабовна Галеииеце латышка о̄ныпе̄н супыл мӯйлупта̄лвес. Ты супе хоса о̄ньщистэ ос тувыл мощ мо̄т щирыл йинумтастэ ос хансал ю̄нтыстэ. Супе ханты ма̄хум супыг е̄мтапас. О̄ныпе колта̄глэ ёт репрессия та̄лытыт лӯима ма̄н о̄луӈкве ке̄тве̄сыт. Та̄н ще̄мьяныл тот са̄в та̄л о̄лсыт . 1990 та̄лыт минам юипа̄лт та̄нки о̄лум Латвия ма̄н минуӈкве номылматсыт. То̄нт Аграфена Сопочина о̄йкатэ̄нтыл киттыгминасы̄г, ня̄врамаге̄н ос а̄щен ёт минасы̄г. Та̄нки халанылт акваг ва̄йхатым, ёмас номтыл о̄лсыт. Такви Аграфена Семёновна ханты ма̄хум ла̄тӈе ос пе̄с о̄лупсатэ ханищтаӈкве патыстэ. Са̄всыр ма̄н ялантым тав Иосиф Антонович Сопочин ёт хо̄нтхатас ос тувыл тэ̄н акванминасы̄г. Аквъёт са̄лы янмалтым о̄лсы̄г. Ос хум а̄тимыг е̄мтме порат, нэ̄ «Ханто» нампа община ва̄рыс ос тот э̄лаль рӯпитаӈкв патыс. Ань хумус рӯт ма̄хманэ пе̄с щирыл иӈ о̄лэ̄гыт, тувыл тотым пормасыт суссылтым тав ты урыл мирн потыртас. Ты коныпал Аграфена Сопочина (Песикова) ня̄врамыт ма̄гыс сургутский ханты ла̄тыӈ ханищтан сыресыр 22 нэ̄пак ос букварит хансыс. То̄ват о̄с тот ка̄салаӈкве ро̄ве̄гыт. Евдокия Андреевна Нёмысова акв йильпи ва̄рум нэ̄паке суссылтастэ, ты нэ̄пак моще̄ртын ущ са̄витыг та̄ратаве. Ань туп акв нэ̄пак ка̄тн майлувес, Евдокия Андреевна таве Аграфена Семёновнан мӯйлуптастэ. Тувыл Валерий Ледков, э̄ргыт хаснэ хум, таве̄н акв э̄рыг э̄ргыс. Мӯй ма̄хумн такем мӯстыс, та̄н иӈ э̄рыг э̄ргуӈкве таве во̄всаныл. О̄йка «Ханты – значит человек» хансым стихыт щирыл э̄рыгсов щё̄питам. Ты э̄рге э̄ргум порат то̄ва хо̄тпат о̄с тав ётэ э̄ргуӈкве патсыт. Та юипа̄лт мӯй ма̄хум пуссын тэ̄нэ пасан ва̄тан во̄вве̄сыт, пе̄с ма̄хманыл ка̄стысаныл, йис о̄лупсаныл урыл потыртасыт. Ты суссылтап яныг таквс э̄тпос юио̄выл щислатэ мус рӯпитаӈкве паты тах. 1084 2014.09.19. Николай МЕРОВ Финноугор мирыт Конгрессын щё̄питахтэ̄гыт. 2012 та̄лт Венгрия ма̄т Шиофок ӯст финноугор мирыт VI мирхал Конгрессаныл о̄лыс. Та̄н ты ва̄рмалин нила та̄л сыс акв щёс акванатхатыглэ̄гыт. Тот соссаӈ мирыт та̄рвит ва̄рмаляныл урыл потыртэ̄гыт ос акваннё̄тхатым ты тэ̄лат мӯсхалыг щё̄питыяныл. VII Конгресс 2016 та̄лт Финляндия ма̄т Лахти ӯст е̄мты тах. Ань ма̄н округувныл ма̄хум о̄с тув щё̄питахтэ̄гыт. Ты Конгрессыт о̄лыглам халт, ка̄сыӈ порат финноугор мирыт конференция ва̄рыглэ̄гыт. Рӯпатаныл хумус э̄лаль мины, маныр ва̄рсыт, маныр та̄рвит иӈ о̄ньще̄гыт, ты урыл тот потыртэ̄гыт ос мо̄тыт Конгрессын щё̄питахтэ̄гыт. Щар ма̄к яныг ва̄рмаль ща̄нь ла̄тӈув э̄лаль тотнэ тэ̄ла. Ань ты та̄л сӯкыр э̄тпос 3-4 хо̄талыгт Карелия ма̄т Петрозаводск ӯст финноугор ма̄хум тамле конференциян акван ты атхатыгласыт. Ма̄н округувныл хо̄т хо̄тпа тув ялсыт. Ма̄ньщи хо̄тпат Нина Николаевна Гадебская, Ха̄льӯс район Хулюмсунт па̄вылт ле̄ккарыг рӯпитан нэ̄, Светлана Селивёрстовна Динисламова, Ханты-Мансийск ӯс Югорский университетт рӯпитан нэ̄, ос ам, Николай Меров. Ханты хо̄тпатныл Алла Иштимирова-Посохова, Ханты-Мансийск ӯс А̄с-угорский театрыт рӯпитан нэ̄, Фёкла Семёновна Бондаренко, Нижневартовский район Аган па̄выл музейт рӯпитан э̄ква, ос Людмила Александровна Алфёрова, округ губернатор ва̄ӈын хо̄тпа палт советникыг о̄лнэ нэ̄, тув ялсӯв. Ты конференция кит хо̄тал минас. Россия ма̄ныл Марий Эл, Удмуртия, Мордовия, Коми республикатныл, Ямало-Ненецкий ос ма̄н округувныл ма̄хум о̄лсыт. Хо̄н ма̄ныл Финляндия, Эстония ос Венгрия ма̄ныл ма̄хум ёхталасыт. Са̄всыр ма̄ныл пуссын аквъёт яныгса̄т арыгтем хо̄тпат тот атхатыгласыт. Мирхал конгресс рӯпататэ э̄лаль тотнэ ма̄гыс кӯщаиг Валерий Марков пе̄риим о̄лы. Тав ты рӯпата урыл докладнэ̄пак ловиньтас. На̄н тав потре э̄лаль ловиньтэлы̄н: «Хо̄тыт конгресс о̄лум порат маныр тэ̄ла ма̄н пирмайтасӯв, хумус ты ва̄рмаль щирыл рӯпатав э̄лаль мины, ань ты урыл потыртэ̄в. Ма̄н ань тамле конференциян хӯрмиттыг акванатхатыглэ̄в. Кит щёс Мордовия ма̄т Саранск ӯст о̄лыс. Са̄всыр ма̄ныл ёхталан финноугор ма̄хум маныр та̄рвит о̄ньще̄гыт, ты ва̄рмалит мӯсхалыг щё̄питан ма̄гыс ма̄н акваннё̄тхатым рӯпитэ̄в. Ма̄нки халанувт ханищтахтэ̄в. Ты конференцият са̄выӈпа̄лэ ты урыл хӯнтлуӈкве тахнувӯв: финноугор мирыт рӯпатаныл хумус ва̄рияныл, маныр та̄рвит ва̄рмаль о̄ньще̄гыт ос йильпи проектыт урыл потрыт». Валерий Харламов, финноугор мирыт консультативный комитет кӯщай хум, ла̄внэ̄тэ щирыл, финноугор мирыт ма̄гыс щар яныг ва̄рмаль ты ща̄нь ла̄тыӈ э̄лаль тотнэ тэ̄ла. Ань ты накт ма̄нь па̄влытт рӯпитан школат лаппантуӈкве патве̄сыт. Та сыс туп тамле школат ня̄врамыт ща̄нь ла̄тыӈ ханищтаӈкве ве̄рме̄гыт. Ты школат лаппантнэ̄ныл юипа̄лт ня̄врамыт яныг школан ханищтаӈкве ке̄тавет, тот ща̄нь ла̄тыӈ ханищтан урок а̄тим. Ётыл ня̄врамыт та̄нки ща̄нь ла̄тӈаныл ла̄щал та ёрувлыяныл. Тыи ма̄гыс ань са̄в ня̄врам ща̄нь ла̄тӈыл потыртаӈкве ат ха̄сы. Тувыл ос ты хосыт ла̄тӈанув со̄йме̄гыт. Ще̄мьят ща̄ньа̄щит ня̄враманыл ёт о̄с ат потыртэ̄гыт. Ня̄врам ёт ма̄нь та̄гыл ща̄нь ла̄тӈыл потыртэгы̄н ке, ты потыр тав номтэ̄н ёмащакв хо̄и ос молях ханищтытэ. Пе̄с о̄лум ва̄рмалянув ул вос ёрувлахтасыт, Валерий Харламов общественный организацият ща̄нь ла̄тыӈ э̄лаль тотнэ ма̄гыс рӯпитаӈкве во̄всанэ. Ма̄ньлат ма̄хманув ёт са̄в потыртаӈкве э̄ри, ща̄нь ла̄тӈув э̄лаль вос тотыяныл, атиӈк хотталь со̄йми. Та̄нанылн тох ла̄вуӈкве э̄ри, ла̄тыӈ ханищтан номтыл вос ёхтавет. Тав ла̄выс: «Ща̄нь ла̄тӈув вос суйты, ня̄враманын ханищтэ̄н, та̄н ётаныл акваг потыртэ̄н, ул э̄ссамтэ̄н. Ня̄врамыт ма̄гыс ща̄нь ла̄тӈыл са̄внув нэ̄пак, газета та̄ратэ̄н. Школат, нэ̄пак ловиньтан колт ос ма̄нь ня̄врам колт ты нэ̄пакт та̄стым вос о̄лэ̄гыт. Интернет хосыт на̄нки халанынт о̄с ща̄нь ла̄тӈыл потраме̄н. Тувыл ня̄врамыт китыглаӈкве э̄ре̄гыт, манрыг та̄н ща̄нь ла̄тыӈ ханищтаӈкве ат таӈхе̄гыт. Ты ва̄рмаль о̄с та̄рапаттуӈкве э̄ри, то̄нт э̄рыӈ мо̄т матыр йильпи ва̄рмаль щё̄питэ̄в. Ла̄тыӈ ханищтаӈкве ня̄враманув акваг хуйтуӈкве э̄ре̄гыт». Тувыл ос «Карельский Конгресс» нампа общественный объединеният рӯпитан кӯщай хум Анатолий Григорьев ты ва̄рмаль урыл потыртас. Карелия ма̄т карелыт, вепсыт ос финн ма̄хум о̄лэ̄гыт. Мо̄т финноугор мирыт халт та̄н щар та̄рвитыӈыщ о̄лэ̄гыт, ща̄нь ла̄тӈаныл, пе̄с йис о̄лупсаныл моще̄ртын акваг со̄йми. Ты урыл та̄н сыманыл сака ща̄рге̄гыт. Анатолий Григорьев ла̄выс, ты таима̄гыс тох е̄мтыс, яныг кӯщаит культура э̄лаль тотнэ ма̄гыс олн мощща та̄стэ̄гыт. Са̄ртын Петрозаводск ӯст «Karelia» нампа журнал финн ла̄тӈыл та̄ратавес. Ты нэ̄пак са̄в ма̄хум ловиньтэ̄гыт. Ань юио̄выл та̄лт ты журнал щар мощщаг нэ̄глуӈкве патыс. Ты коныпал республикат сака са̄в во̄р яктаве ос мо̄т ма̄щунь сэ̄лаве, ос ты олныт пуссын э̄лы ма̄н минэ̄гыт. Ты конференцият са̄в мир та̄нки ва̄рмаляныл урыл потыртасыт. Ма̄н ма̄хманув урыл потыр а̄тим о̄лыс. Та сыс, финноугор ма̄хум о̄лпусаныл акваг э̄лаль мины. Ща̄нь ла̄тӈаныл э̄лаль тотнэ ма̄гыс са̄в рӯпата ва̄раве. Мо̄т мирыт потраныл хӯнтлуӈкве сака пӯмащ о̄лыс. Тув ёхталам мӯй ма̄хум Петрозаводск ӯс суссылтаӈкве тотыглаве̄сыт. Ма̄ньлат ма̄хум ханищтахтын консерваторият йӣквнэ, э̄ргын ос ёнгын хо̄тпат концерт ва̄рыгласыт. Хотьют ка̄сащас, музейн ялуӈкве ве̄рмыс. Ка̄сыӈ хо̄тпан тот рӯпитаӈкве сака мӯстыс. Ань финноугор ма̄хум мо̄тыт мирхал Конгрессын щё̄питахтэ̄гыт. 1085 2014.10.10. Анна АЛГАДЬЕВА Ля̄ххалыт. Лариса Юрьевна Хозумова налыман нупыл акв та̄л Ха̄льӯс район Хулюмсунт школат рӯпиты, о̄выл классыт ханищтан нэ̄г о̄лы. Лариса Юрьевна сака ка̄ркам, нёмса хо̄тпа. Ня̄врамытн э̄руптаве, рӯпитан юртанэ̄н янытлаве. Ханищтан хо̄тпат янытлан хо̄талыл пуссын янытлыянӯв! Са̄в та̄л пуста̄гыл о̄лэ̄н. Посыӈ хо̄тал, щуниӈ хо̄тал на̄нанн. Йильпи номт, хоса нот. Ханищтан ня̄враманын ла̄тыӈ вос хӯнтлэ̄гыт, ёмащакв вос ханищтахтэ̄гыт. 1085 2014.10.10. Валентина УЗЕЛЬ Мирколытт рӯпитан мир урыл ля̄ххал. Ювле хультум э̄тпост округ миркол кӯщаит сапра̄нияныл о̄лыс, тувыл округ Дума депутатыт акванатхатыгласыт. Та̄н та̄нти ураныл хансым са̄ккон ань ловиньтасаныл ос мо̄т щирыл хассаныл. Та са̄кконт тамле ва̄рмаль урыл хансыглавес. Округув янытыл мирколытт рӯпитан ма̄хум (рущ ла̄тӈыл та̄н «госслужащииг» ла̄вавет) о̄лнэ кол ёвтнэ̄ныл ма̄гыс я̄нас субсидияолныл маиглымат. 2006 та̄л па̄сныл 2012 та̄л мус 356 хо̄тпа кол ёвтмыт, та̄н пуссын аквъёт 267 млн. солко̄ви вимыт. Ань ты олн ӯрим 345 хо̄тпа очередин хансым о̄лы. Округ губернаторув Наталья Комарова ла̄выс, 2017 та̄л о̄выл э̄тпосэ мус та̄н кӯщаиг о̄лнэ ма̄хум кол ёвтнэ ма̄гыс олныл миӈкв ат патыяныл. Округувт субсидияолн са̄в ма̄ньлат хо̄тпа, соссаӈ мир ӯре̄гыт, о̄влэ̄т та̄нанылн нё̄туӈкв э̄ри. Губернатор прессслужбаныл те̄тым ля̄ххал ма̄ньщи ла̄тӈыл В. Хозумова хансыстэ. 1085 2014.10.10. Людмила ТЕТКИНА Пенсият о̄лнэ ма̄хум олныл мивет. Округ правительстват рӯпитан кӯщаит сапра̄ни ва̄рыгласыт, та̄н пенсият о̄лнэ ма̄хум урыл нэ̄пак пирмайтасыт. Ты нэ̄пак щирыл Югра ма̄т ос Тюменский областьт о̄лнэ 220 со̄тыра пенсионерхо̄тпа олныл мивет. Тюменский областьт туп та ма̄хум мивет, хотьют 15 арыгкем та̄л округувт рӯпитас. Мирн нё̄тнэ округ департаментыт кӯщаиг рӯпитан нэ̄ Мария Краско ля̄ххал тотнэ ма̄хум ёт потыртаме порат ла̄выс: «Округувт пенсият о̄лнэ ма̄хманув яныг таквс э̄тпост акв со̄тыра солко̄вил тах ойтавет. Та̄нанылн заявлениенэ̄пак хансуӈкве ат э̄ри, ты олннё̄тмил пенсияныл ёт тах ёхты». Пенсият о̄лнэ ма̄хум тамле олннё̄тмилыл ка̄сыӈ та̄л округув янытлан хо̄тал кастыл мивет. Губернатор прессслужбатэ ке̄тум ля̄ххал ма̄ньщи ла̄тӈыл Л. Тасманова хансыстэ. 1085 2014.10.10. Тамара МЕРОВА Ты э̄тпос о̄выл хо̄талэ яныгпа̄ла хо̄тпат янытлан хо̄талыг о̄лыс. Югра ма̄т рӯпитан депутатыт ос ам яныгпа̄ла хо̄тпанув ялпыӈ хо̄талыл янытлыянӯв! Тыи на̄н ва̄рум рӯпатан хосыт ма̄н округув но̄хпатыс. На̄н яныг хо̄нт о̄лум та̄лыт порат пилта̄лыг ма̄в вуянтаслы̄н, хӯл алыщлым ос во̄раим фронтын нё̄тсы̄н. Тувыл ма̄н па̄вланув, ӯсанув ӯнттысаны̄н, са̄всыр ма̄т ос ма̄во̄й но̄хвинэ ма̄т ёмщакв рӯпитасы̄н. На̄н пенсиян патхатым ӯщлахтуӈкве о̄с ат а̄лымегы̄н, на̄н ань культура тэ̄лат, пусмалтахтан накыт э̄лаль тотыяны̄н. Таима̄гыс ма̄н на̄нан яныг пӯмащипа ла̄тыӈ ла̄ве̄в, со̄тыӈыщ ос пуста̄гыл са̄в та̄л о̄лэ̄н. Округ Дума кӯщай Б. Хохряков ке̄тум ла̄тӈе ма̄ньщи ла̄тӈыг Т. Мерован хасвес. 1085 2014.10.10. Валентина УЗЕЛЬ Ханты-Мансийск яныг ӯсыг е̄мты. Ханты-Мансийск ӯст мирколт рӯпитан ма̄хум тамле ля̄ххал те̄тсыт. Ты та̄л хо̄т э̄тпос сыс ӯсувт 906 ня̄врам самын патыс, 3 со̄тыра арыгтем хо̄тпа мо̄т ма̄ныл ма̄н ӯсувн о̄луӈкве ёхтысыт. Ӯсыӈ мир пуссын ловиньтаве̄сыт, нэ̄пак щирыл ӯст ань 95 со̄тыра 310 хо̄тпа о̄лы. Хусахтем та̄л ювле хультум порат ӯсувт туп 30 со̄тыра арыгтем мир о̄лыс. Са̄выӈпа̄лэ са̄в нэ̄, а̄ги о̄лы 49 со̄тыра 371 хо̄тпа; хумыт, хум ня̄врам мощщанув – 45 со̄тыра 939 хо̄тпа. Ӯс кӯщай Максим Ряшин ла̄выс, ӯст о̄лнэ мир яныгса̄т са̄витыг хунь е̄мты, миркол нэ̄пакыт пуссын мо̄т щирыл хансуӈкв э̄ре̄гыт, ты Уставнэ̄паке, са̄внув депутат ӯс Думан пе̄рияӈкв э̄ри, мо̄т са̄всыр рӯпата тах ва̄ре̄гыт. Ӯс мирколныл те̄тым ля̄ххал ма̄ньщи ла̄тӈыл В. Хозумова хансыстэ. 1085 2014.10.10. Тамара МЕРОВА Ханищтан хо̄тпат губернаторн янытлаве̄сыт. Ты э̄тпос нилыт хо̄талэ̄т округ губернаторув Наталья Комарова Нефтеюганск ӯсн ялыс. Тав тот са̄всыр школатт рӯпитан ма̄хум ёт ва̄щинтахтас ос ётыл мо̄т тэ̄лат уральтас. Округ янытыл ёхталам ханищтан хо̄тпат «Обь» нампа культура центрыт акванатхатыгласыт. Та̄н ётаныл Наталья Комарова пащалахтас ос ялпыӈ хо̄таланыл кастыл пуссын янытласанэ. Тувыл са̄в та̄л школат ёмщакв рӯпитан ма̄хум ос тэ̄ланыл ка̄ркамыг, мӯсхалыг ва̄рнэ хо̄тпат мӯйлупсал мисанэ. Ханищтан хо̄тпат халт хӯрум э̄лумхо̄лас Россия Президент па̄лыл янытлаве̄сыт. Нижневартовск ӯс лицей кӯщай нэ̄ Нина Егоровна Арий «За заслуги перед Отечеством» II степени по̄сыл майвес. Мо̄т хӯрум хо̄тпа ханищтан тэ̄ланыл ёмщакв ва̄рнэ̄ныл ма̄гыс премияолныл о̄с та̄стуве̄сыт. Тувыл нилахуйплов хо̄тпа Министерство образование па̄лыл яныг намыл майве̄сыт ос э̄сгын нэ̄пакыл мӯйлуптаве̄сыт, ос кит хо̄тпа округ па̄лыл э̄сгувесы̄г. Ты коныпал округ янытыл о̄лыглам касылыт но̄хпатум ма̄хум о̄с янытлаве̄сыт. Ётыл ты мӯйлуптым ма̄хум ёт Наталья Владимировна я̄нас хо̄нтхатыглас ос та̄н ётаныл ща̄й айнэ порат са̄всыр тэ̄лат урыл потыртас. Аквта хо̄талт хӯрумхуйплов ханищтан хо̄тпат йильпи о̄лнэ колн щалтсыт. Ты кол о̄выл «арендный» колыг ла̄ваве. Ань йильпи ӯнттым колн округ кӯщаюв о̄с ялыс. Тот колыл маим ма̄хум туманне̄лмыл мӯйлуптаве̄сыт. Пуссын хотща̄гтсыт, та̄н ма̄гсыланыл тыи хосат та̄гыл ӯрхатнэ ос ма̄к э̄рнэ мӯйлупсаг о̄лыс. 1085 2014.10.10. Валентина УЗЕЛЬ Са̄ккон хаснэ ма̄хум рӯпитасыт. Туи ӯщлахтаманыл юипа̄лт мирн пе̄риим депутатыт акванатхатыгласыт, та̄н ань округ Дума о̄выл заседанияныл о̄лыс. Ловиньтам са̄кконаныл та̄н ань са̄выӈпа̄лэ пуссын йильпи ла̄тӈыл хассаныл. О̄лнэ мА̄гыс олныт нО̄хнё̄твЕ̄сыт «Прожиточный минимумыг» ла̄внэ олныт са̄ккон хаснэ ма̄хум ань но̄хнё̄тсаныл. Ня̄врамыт ма̄гыс ань тыса̄вит олн хасвес – 11 со̄тыра 354 солко̄ви, ты э̄лыпа̄л э̄тпосытт ня̄врамыт ма̄гыс 11 со̄тыра 118 солко̄ви хансым о̄лыс. Пенсия винэ ма̄хумн акв э̄тпосн 9 со̄тыра 566 солко̄ви хасвес. Ты пирмайтым са̄ккон щирыл 2015 та̄л о̄выл э̄тпосныл пенсионерыт ос ня̄врамыт арыг 230 солко̄вил миӈкв патавет. Аквма̄н патум хо̄тпатытн нё̄тмил те ва̄раве, та̄н хотты казённый колт о̄ньщавет те манос та̄нанылн нё̄туӈкв ма̄хум юв ёхталэ̄гыт те, та̄н пенсияныл 75% са̄вит олн ювӯраве. Ты ва̄рмаль ма̄гыс са̄ккон о̄с акваг йильпииг хансаве. Соссаӈ мир мА̄гыс хансым сА̄кконыг Ань депутатыт ты заседаниянылт соссаӈ мир ма̄гыс хансым тит са̄кконыг урыл потыртасыт. Акв са̄ккон рущ ла̄тӈыл тох ла̄ваве – «О факториях», мо̄танэ – «О территориях традиционного природопользования». 2013 та̄лт общинат «факторияг» ла̄вуӈкв патве̄сыт. Округув янытыл 11 тамле организация рӯпиты. Ты йильпи тэ̄ла о̄вылтам порат та̄н сака ёмащакв нё̄тве̄сыт. 2013 та̄лт та̄н ма̄гсыланыл 58 млн. солко̄ви майвес, ты 2014 та̄лт 1 млн. 200 со̄тыра солко̄ви миве. Мо̄тыт 2015 та̄лт туп 453 со̄тыра солко̄ви та̄ставе. Еремей Данилович Айпин депутатытн ла̄выс, та̄н округ кӯщаюв Наталья Комарова палт ялсыт, ла̄всыт, соссаӈ мир факторияныл ма̄гсыл сака мощща олн та̄ставе. Округувт ка̄сыӈ районт аквтит тамле рӯпитан ма̄ о̄лы. Ха̄льӯс районувт 2 фактория рӯпиты – ты «Рахтынья» ос межрайпотребсоюз. Сургутский районт «Яунях» нампа община ва̄рвес, тот 248 хо̄тпа рӯпиты. Та̄н 1 млн. солко̄вил майве̄сыт. Общинат рӯпитан хо̄тпатн рӯпата олн ойтнэ ма̄гыс олн щар ат то̄вылхаты. Ты урыл Айпин кӯщаюв ла̄выс, ань Россияв ма̄гыс са̄всыр «экономический санкция» хо̄н ма̄т ты ва̄ре̄гыт. Ты хосыт тэ̄нутыт, пормасыт тынаныл сака но̄хлапе̄гыт. Ос ань ма̄н соссаӈ ма̄хманув пил ва̄тэ̄гыт, хӯл алыщлэ̄гыт, са̄лы о̄ньще̄гыт. Ты хосыт округувт о̄лнэ мир тыттуӈкв о̄с кос ро̄ви. Таима̄гыс община о̄щнэ ма̄хум нё̄туӈкв э̄ре̄гыт, та̄нанылн ань олн миӈкв э̄ри, матыр э̄рнэ ут та̄н ёвтуӈкв вос ве̄рме̄гыт. Мо̄т са̄ккон ос таима̄гыс мо̄т щирыл хасвес. Са̄в та̄л ювле хультум порат ка̄ркамнувег о̄лнэ соссаӈ ма̄хум та̄нти о̄лнэ ма̄наныл «родовой угодияг» хассаныл. Ань ты йильпи са̄кконыт щирыл та̄н о̄лнэ ма̄наныл тох ла̄вавет – «территории традиционного природопользования». Округув янытыл 475 тамле ма̄ о̄лы. Ты ма̄т тармыл о̄лнэ ос нэ̄паканыл атуӈкв а̄лымам ма̄хум ань са̄всыр олныл ойтавет, нё̄тавет. Ос ты коныпал са̄в соссаӈ хо̄тпа нэ̄пак ва̄руӈкв ат а̄лымасыт. Та̄н о̄с во̄рт о̄лэ̄гыт, са̄лы ӯре̄гыт, пил ва̄тэ̄гыт, во̄рае̄гыт. Пе̄с о̄лупсав э̄лаль тотыяныл. Та̄нанылн о̄с нё̄туӈкв э̄ри. Ань ты хо̄тпат наманыл пуссын акв нэ̄пакн хансавет, ос округ миркол па̄лыл нё̄туӈкв патавет. Тамле хо̄тпа округув янытыл сака са̄в о̄лы. 1085 2014.10.10. Светлана РОМБАНДЕЕВА На̄й харыгтан ма̄хум ань ханищтахтэ̄гыт. Округув янытыл ма̄вит ӯргалан колт кӯщаиг о̄лнэ хум Евгений Платонов ля̄ххал тотнэ хо̄тпатн аквкит ла̄тыӈ ла̄выс. Ань ты та̄л манса̄вит ма̄т во̄рув на̄йн но̄хё̄свес, ты урыл тав мощ потыртас. Ты хум ла̄внэ̄тэ щирыл, ты та̄л о̄лнэ ма̄вт во̄рув туп мо̄рсыӈ ма̄т но̄хпе̄ламла̄лвес. Лӯпта э̄тпос па̄сныл сӯкыр э̄тпос мус округувт 219 во̄рыӈ ма̄ пе̄ламла̄лвес. Мо̄лты та̄л ос 640 тамле ма̄ ло̄мт о̄лыс. 2012 та̄лт май туи порат сака ре̄гыӈ о̄лыс, та порат 1600 во̄рыӈ ма̄ но̄хё̄свес. На̄й не̄лме щар па̄влыт мус ёхталас, ма̄хум торыӈыщ лылтуӈкве ат ве̄рмысыт. Та порат во̄рт на̄й харыгтан хо̄тпа ат то̄вылхатас, ма̄хум тыг э̄лы хо̄н ма̄ныл во̄выглаве̄сыт, во̄рт рӯпитан са̄в десантникыт тыг ёхталасыт, нё̄тсыт. Товлыӈха̄пыт ос вертолётыт но̄х акваг тыламла̄лсыт, во̄рыӈ ма̄нанув уральтасаныл. 11 са̄вит Ан-2 товлыӈха̄пыт округув янытыл акваг яласасыт, Ми-26 ос Ми-8 вертолётыг ос вит ёт но̄хлапыгласы̄г, ма̄в нумыл со̄сантастэ̄н. Та̄рвитыӈ порат рӯпитан ма̄хум ос десантникыт ань ханищтахтэ̄гыт, та̄н ма̄гсыланыл Радужный ӯст ос Уват па̄вылт ханищтахтан колкапаиг ӯнттувесы̄г. Евгений Платонов ла̄внэ̄тэ щирыл, на̄й харыгтан ма̄хманув 2015 та̄л кастыл ань ёмащакв ханищтахтэ̄гыт, о̄лнэ ма̄в тах мӯсхал щирыл ӯргалыяныл. 1085 2014.10.10. Светлана РОМБАНДЕЕВА Колыт ма̄гыс са̄внув олн виӈкв патаве. Сӯкыр э̄тпос онтоловит хо̄талэ̄т Ханты-Мансийск ӯст ля̄ххал тотнэ ма̄хум кит яныг кӯщаиг ёт хо̄нтхатыгласыт. Акв хум наме Виктор Николаевич Шаповал, тав округ янытыл кол ӯнттын ма̄т ос на̄йпос ва̄рмаль палт кӯщаиг о̄лы, китыт хум ос Сергей Викторович Макаров, тав ос Югорский фонд нампа колыт йильпииг щё̄питан ма̄т кӯщаиг о̄лы. Тэ̄н кит тэ̄ла урыл потыртасы̄г: «Колыт ань та̄л кастыл хумус щё̄питаве̄сыт» ос «Ка̄сыӈ э̄тпос о̄лнэ колыт ма̄гыс ойтхатнэ порат ма̄хум о̄с акв йильпи тэ̄ла ма̄гыс олн ойтуӈкве патэ̄гыт – кол йильпииг щё̄питан ма̄гыс». Виктор Николаевич ла̄внэ̄тэ щирыл, округув янытыл 60-70 % са̄вит о̄лнэ колыт йильпииг щё̄питаӈкве э̄ре̄гыт. Колыт акваг кос щё̄пита̄лве̄сыт, ос ма̄хум ты рӯпата ат янытласаныл. Ань та̄нти олн ойтуӈкве патэ̄гыт, тах ущ пӯмщалахтэ̄гыт, коланыл коны ма̄тэ сыстам ман а̄ти, йильпииг ва̄рнэ поратэ ёхтыс ман тох иӈ мощ ве̄риты. Тыи ма̄гыс ты кӯщаит тох ва̄руӈкве номылматсыт. Ка̄сыӈ кол 15 та̄л сыс акв щёс йильпииг щё̄питаве. Сака пе̄с колыт ма̄гыс ма̄хум ойтхатуӈкве ат патэ̄гыт. Ма̄хум та̄нти олн ойтнэ̄ныл коныпал государствав о̄с нё̄ты, мо̄т охсатэ ос тав ойтытэ. Москва ӯст тох 2 миллиард солко̄ви атвес. Та̄н хунь ты йильпи нэ̄пак хассыт, китыглахтан ла̄тыӈ сака са̄в о̄лыс. Колыт пуссын аквторыг йильпииг ва̄рапаӈкве хунь ве̄рмавет. Кӯщаит о̄влэ̄т пе̄рие̄гыт, ань ка̄сыӈ та̄л хоты колыт щё̄питаӈкве, тувыл рӯпитаӈкве ущ о̄вылтахтэ̄гыт. Ханты-Мансийск ӯст о̄влэ̄т Чехов ос Мира ӯсхулыг хосыт ӯнлын колыт щё̄питавет, мо̄т колыт ос ётылнув тах ущ щё̄питавет. Ты ма̄н ма̄к яныг ӯсув, таве ёмащакв ва̄руӈкве э̄ри. Сергей Викторович ла̄внэ̄тэ щирыл, 2014-2016 та̄лыт сыс о̄лнэ колыт ма̄гыс 6 миллиард са̄вит солко̄ви та̄стувес. Округув янытыл ань яныг колытт о̄лнэ хо̄тпа ёлаль ос но̄х тотыглан те̄р колхусап (рущ щирыл лифтыг ла̄ваве) – 44 са̄вит тамле колхусап пе̄нтуӈкве э̄ри. Та̄н матыр щаӈканыл хотсакваласыт манос хосат та̄гыл ат рӯпитэ̄гыт. Туп Нягань ӯст 22 тамле те̄р колхусап пе̄нтуӈкве э̄ри, акв тамле ут тынэ 2 миллион са̄вит солко̄ви. Мо̄таныт ос округув янытыл пуссын пе̄нтавет тах. Ка̄сыӈ ӯст, ка̄сыӈ районт кӯщаит та̄нти номсэ̄гыт, та̄нанылн хумус рӯпитаӈкве, хоты колыт о̄влэ̄т щё̄питаӈкве э̄ри. Ка̄сыӈ колт о̄лнэ ма̄хум ты рӯпата та̄нти о̄с тах уральтыяныл, коланыл мӯсхал щирыл ва̄раве ман а̄ти. Та̄л кастыл колыт мӯсхал щирыл щё̄питаве̄сыт ман а̄ти, Виктор Николаевич тох ла̄выс: «Округув янытыл колыт та̄л кастыл ёмащакв щё̄питаве̄сыт. Колыт ма̄гыс 3 миллиард 357 миллион са̄вит солко̄ви та̄стлувес. 505 котельныит йильпииг щё̄питаве̄сыт, вит тотнэ турпат 4226 ве̄рыста йильпииг пе̄нтвес. Исум вит со̄снэ турпат 85% йильпииг ва̄рве̄сыт. Ань ты хо̄талытт ре̄г тотнэ турпат хосыт исум вит ты та̄ратаве, ка̄сыӈ колт ре̄гыӈыг е̄мты. Ма̄н акв та̄рвитыӈ ва̄рмаль о̄ньще̄в – сака са̄в хо̄тпа о̄лнэ коланыл ма̄гыс ат ойтхатэ̄гыт, са̄выӈпа̄лэ на̄йпос ма̄гыс ат ойтэ̄гыт. Ань ты хо̄тал мус 200 миллион арыг солко̄ви ойтуӈкве э̄ри, та̄н ань а̄рнта олныг та о̄лэ̄гыт. Округт о̄лнэ ма̄хум, о̄лнэ коланын ма̄гыс та̄ра ойтхатэ̄н. А̄рнта ат те о̄ньщегы̄н, то̄нт роттыг о̄лэгы̄н». 1085 2014.10.10. Людмила ТЕТКИНА Э̄ква рӯпата та̄л ат ӯнлы. Октябрьский район Карымкары па̄вылт «Совет ветеранов» нампа организацият кӯщаиг Раиса Ивановна Агеева рӯпиты. Тав та па̄вылт самын патыс, тот яныгмас. Карымкары школат нила класс туп ханищтахтас, атыт классын Подгорный па̄вылн тотвес. То̄нт та па̄вылт са̄в мир о̄лыс, тот школаинтернат рӯпитас, са̄т класс тот а̄стлас. Раиса Ивановна ты урыл таи номылматас: «Ма̄н ще̄мьяв тыг ссылкан ке̄твес. Та та̄рвитыӈ порат ам омам акваг рӯпитас, таве аты ва̄щинтаслӯв. То̄нт тыг рущит, калмыкыт ос немцыт ссылкан ке̄тве̄сыт. Омам 17-18 та̄л яныт рущ ос калмык а̄гит халт пиркатирыг о̄лыс. Па̄вылт хум хо̄тпа а̄тим, э̄кват ос а̄гит та̄нки та̄рвитыӈ рӯпата ва̄рсыт. Война порат рӯпитан хо̄тпа ат то̄вылхатас. Школат туп кит нэ̄ ня̄врамыт ханищтасы̄г. Акватэ о̄выл ос нилыт классыт ня̄врам ханищтасанэ, мо̄танэ китыт ос хӯрмит классын ялантан ня̄врамыт ёт рӯпитас. Ам тай ма̄ньта̄гыл ханищтахтуӈкве сака ка̄сащасум, са̄т класс Подгорный па̄вылт а̄стласум, Октябрьский па̄вылт нёлолов классыт ханищтахтасум. Туи порат юв ёхтэ̄гум, омам колхозт рӯпитаӈкве нё̄тыслум. То̄нт тыт рыбучасток о̄лыс, на̄иӈха̄пыт тыг акваг пӯхталасыт. Хӯланув Тобольск ӯс нупыл тотве̄сыт. Та хо̄тал ма̄н я̄ ва̄тат рӯпитасӯв, на̄иӈха̄п пӯхтыс, тот Октябрьский па̄вылт ам ётум ханищтахтам а̄гиянум ка̄саласанум. Та̄н а̄нум э̄лаль Тобольск ӯсн ханищтахтуӈкве во̄всаныл. Ам юв ха̄йтталасум, чемоданум а̄лмаяслум, а̄гиянум ёт э̄лаль ханищтахтуӈкве та минасум. Тобольск ӯст ам культпросвет училищат библиотекариг ханищтахтасум. Тюменский область Казанский район Огнёва па̄вылт нэ̄пак ловиньтан колт хӯрум та̄л рӯпитасум. Ӯщлахтан порат омам палт мӯйлуӈкве юв ёхтысум. То̄нт па̄вылт клуб ӯнттувес, ам тот рӯпитаӈкве хультсум. Та па̄сныл пенсия мус 44 та̄л Карымкары па̄вылт та рӯпитасум». Раиса Ивановна клубт, тувыл библиотекат рӯпитас. Ты юипа̄лт тав са̄в та̄л па̄выл мирколт депутатыг о̄лыс. Э̄ква ла̄выс: «Ма̄н таса̄вит та̄л коммунизм ма̄гсыл рӯпитасӯв, тувыл 1991 та̄лт ла̄ввесӯв, ань мо̄т щирыл о̄луӈкве ос рӯпитаӈкве патэ̄в. Ань хумус е̄мтыс, ма̄хманув рӯпитаӈкве ат ка̄саще̄гыт, ня̄врамыт ханищтахтуӈкве о̄с ат таӈхе̄гыт. Ма̄н яныгмамув порат пуссын рӯпитасӯв, нэ̄мхотьют рӯпата та̄л ат ӯнлыс. Ам 1993 та̄лт пенсиян патхатасум. 1995 та̄лт Михаил Трифонович Букаринов па̄вылт «Совет Ветеранов» нампа организация ва̄рыс. Ам нас тох юн ӯнлуӈкве ат ханьщувласум, тав ётэ рӯпитаӈкве патсум. О̄йка кӯщаиг пе̄риявес, ам ос тав ва̄ӈын хо̄тпаг о̄лсум. 1999 та̄лт тав а̄тимыг е̄мтыс, тав ва̄рум тэ̄латэ ам э̄лаль тотуӈкве патыслум. Ты рӯпата 15 та̄л сыс ва̄рилум. Ам ётум хо̄т хо̄тпа рӯпиты. Карымкары па̄вылт о̄лнэ яныгпа̄ла хо̄тпат ма̄н акваг уральтыянӯв. Та̄нкке̄ныл о̄лнэ яныг хо̄тпат палт ялантэ̄в, ӯльюв ат ке о̄ньще̄гыт, миркол кӯщаин ла̄ве̄в, ӯльювыл вос ёвтыяныл. Хум хо̄тпат ос нэ̄ хо̄тпат янытлан хо̄талыт кастыл ос ялпыӈ хо̄талыт ва̄рыглэ̄в, клубт акванатхатэ̄в, ща̄й ае̄в, потраме̄в. Пенсият о̄лнэ ма̄хум самын патум хо̄талыл янытлаӈкве юв ялантэ̄в. Победа хо̄тал кастыл ос аквъёт мӯйлэ̄в. Школат ня̄врамыт ёт хо̄нтхатыглэ̄в. Кит та̄л сыс па̄влыӈ мир ма̄гсыл «Зажженная свеча» нампа тэ̄ла ва̄рыгласӯв. Па̄вылт тӯщтым памятник палт ня̄врамыт ёт ялантэ̄в, тот хо̄нт порат по̄рслым хо̄тпат ка̄стыянӯв. Хӯл алыщлан хо̄тпат янытлан хо̄талыл, па̄выл янытлан хо̄тал, мо̄т ялпыӈ хо̄талыт кастыл о̄с са̄в рӯпата ва̄ре̄в». «Совет ветеранов» нампа организация такви ансамбль о̄ньщи. Ювле хультум та̄лт «Родные напевы» нампа ансамбляныл 15 та̄лэ то̄влыс. Та̄н са̄всыр ялпыӈ хо̄талын э̄ргуӈкве акваг во̄виньта̄лавет. Мо̄тыт та̄л ма̄ньполь э̄тпос Октябрьский районт «Совет Ветеранов» рӯпитанэ̄тэ 40 та̄лэ, я̄ӈк на̄тнэ э̄тпос Победа хо̄талув 70 та̄лэ тах то̄влэ̄г. Ты ялпыӈ хо̄талыг янытлаӈкве та̄н ань щё̄питахтэ̄гыт. Яныг э̄ква ла̄внэ̄тэ щирыл, тав ты рӯпата таи ма̄гсыл ва̄ритэ, яныгпа̄ла хо̄тпат ул вос ёрувлавет ос янытлавет. Ань Карымкары па̄вылт 323 пенсионер хо̄тпа о̄лы. Та̄н халанылт 4 э̄лумхо̄лас «Труженик тыла» нам о̄ньще̄гыт. Ты ма̄хумн нё̄тым э̄ква ты рӯпиты. 1085 2014.10.10. Анна АЛГАДЬЕВА Яныгхо̄тпат янытлан хо̄тал. Яныгхо̄тпанув та̄л э̄лаль о̄лнэ хо̄тал а̄тим о̄лнув. О̄лнэ ва̄рмаль ва̄щинтам, номтыӈ, мӯтраӈ хо̄тпанув тармыл ка̄сыӈ кол ӯрхаты. Яныгхо̄тпат янытлан хо̄таланылт ка̄сыӈ хо̄тпан пуста̄гыл о̄лнэ хо̄тал ла̄вуӈкв таххаты. Щуниӈ пасаныл вос ӯнлахо̄лэ̄гыт, хоса нот вос о̄лэ̄гыт. Ня̄враманылн, апганылн, рӯт ма̄хманылн ос рӯманылн ва̄тихал вос уральтанувет. Мощ мо̄лалнув, яныгхо̄тпат янытлан хо̄тал ва̄тимам ля̄пат, ам Хулюмсунт па̄вылт о̄лнэ э̄кваго̄йкаг палт щалтсасум, ты Константин Георгиевич ос Зоя Емельяновна Адиныг палт. Тэ̄н сас пе̄нсият о̄лэ̄г, па̄влыӈ ма̄хумн акваг ва̄ве̄г. Константин Георгиевич Сосьвинское ЛПУМГ организацият са̄в та̄л рӯпитас, компрессорный ӯнттыс, яныг техникал рӯпитас. Ёмщакв рӯпитаме ма̄гыс ме̄таль о̄ньщи – «За освоение недр и развитие нефтегазового комплекса Западной Сибири», 1985 та̄лт Москваныл ке̄тыглавес. Ма̄ньщи о̄лупса ва̄нэ̄тэ ма̄гыс ка̄сыӈ тув ня̄врамыт ёт рӯпитаӈкв «Ма̄нь ӯсквен» яланты, «Почётный гражданин Берёзовского района» нам о̄ньщи, «За развитие культуры малочисленных народов Севера» нампа ме̄талил 2010 та̄лт округ па̄лыл мӯйлуптавес. Константин Георгиевич ос Зоя Емельяновна атпан нупыл нёлолов та̄л аквъёт о̄лэ̄г, кит ня̄врам янмалтасы̄г, ат апыг, акв апыгпыг о̄ньще̄г. Во̄ртур э̄тпост соссаӈ мир янытлан хо̄талт о̄с акв ме̄талил мӯйлуптавесы̄г – «День семьи, любви и верности в Российской Федерации». Потрув э̄лаль мины: – Константин Георгиевич, наӈки урынтыл мощ потыртэн, хо̄т самын патсын, яныгмасын? – 1946 та̄л июль э̄тпос 25 числат тыт Хулюмсунт па̄вылт самын патсум. Омам Федосья Степановна Адина о̄лыс. Са̄всыр та̄рвит ва̄щинта̄лас. Репрессия ва̄с, война. Война та̄лыт сыс а̄гитэ̄кват пиркатирыг о̄лыс. Тыгыл Сортыӈъя̄ тапа̄лн О̄лттумпын толгуӈкв ялантасыт. Плананыл то̄влынэ̄г тот та ло̄ӈхитахтасыт. Ювле пе̄що̄выл ква̄лгыл хартсыт. Хунь Я̄гримн тыламлэ̄гын, аквано̄лтхатым хӯрум тумп то̄ва порат на̄ӈке̄гыт. Тот та хӯл алыщласыт. – Хо̄т ханищтахтасын? – Ня̄хщамво̄льт ханищтахтасум, тыт нила класс мус ханищтаве̄сыт. Ам акв та̄л туп тыт ханищтахтасум. Школа юипа̄лт Ханты-Мансийскат механизация училищат кит та̄л ханищтахтасум. Направление щирыл Карымкары па̄вылн леспромхозн ке̄тыглаве̄сум. Тот хоса ат о̄лсум, ювле ёхтысум. -Манарыг рӯпитасын? – Я̄грим сумыллас. Колыт ӯнттуӈкв са̄в во̄р йӣв э̄рыс. Тыт хулюм кӣвырт нор яктысӯв. Акванятым кол лаквап хольт ва̄рим, пор ква̄рекыг о̄лтым щирыл, Ягримн ка̄терыл хартве̄сыт. Ла̄кква ул вос ло̄сылэ̄гыт, са̄маныл ке̄рта̄ныл акванпе̄рыгтаве̄сыт. Тыщир ты во̄р йӣв лоӈхитасӯв. Сальки хо̄втыт, ӯльпат – осыӈыт, хосат. Ма̄н норанув э̄сгуве̄сыт. Иснас со̄плаг, а̄ви со̄плаг ва̄рве̄сыт. Тувыл Ха̄льӯсн ва̄нтласӯв, тыт ханищтахтамум щирыл рӯпата а̄тим о̄лыс. Ха̄льӯст тракторыл рӯпитасум. Хунь тыт компрессорный ӯнттуӈкв патвес, ювле йисум. Тыт рӯпитанэ̄м сыс яныг та̄рвитаӈ бульдозерыл рӯпитаӈкв Омск ӯсн ханищтахтуӈкв ке̄тыглаве̄сум. Трубоукладчикыг ханищтахтуӈкв Магнитогорск ӯсн ялсум. Чебоксарский Белый Ярн ялсум. Бульдозеристыг, сваибойщикыг, трубоукладчикыг о̄лсум, яныг техникал рӯпитасум. Константин Георгиевич ань пенсият кос о̄лы, нас о̄луӈкв ат ка̄сащи. Акваг матыра̄ти ва̄ри, ха̄п ва̄ри, во̄раи, хӯл алыщлы, са̄всыр рӯпата кон то̄вылхаты. Потрув иӈыт оигпи, Зоя Емельяновна э̄лаль потырты: – Зоя Емельяновна, хо̄т самын патсын, яныгмасын? – 20 сентябрь 1941 та̄лт самын патсум, а̄тям наме Емельян Игнатович Новьюхов войнан вуйлавес, ранитавес, юв ёхтыс. Омам Наталья Петровна Новьюхова, нёлоловхуйплов та̄л яныт порат хум ва̄рыс, а̄тям ловманкем та̄лэ таве̄ныл яныг о̄лыс. Ва̄тахкем та̄л яныт порат войнан минас. Хоты та̄л порат самын патыс, нэ̄пак ат о̄ньщас. Во̄раян хумыг о̄лыс. Ягпыгум хӯрум та̄л а̄нумныл яныг о̄лыс, тав 1938 та̄лт самын патыс, наме Ефрем Емельянович Новьюхов. Э̄щум Мария Емельяновна Новьюхова, 1944 та̄лт самын патыс. 1953 та̄лт а̄щув а̄тимыг е̄мтыс, Сталин о̄йка холам та̄лт. Ма̄н ма̄нкке̄в хультсӯв, та̄рвитаӈ о̄лыс. Ягпыгум иӈ ма̄нь та̄гыл во̄раяӈкв, хӯл алыщлаӈкв патыс. А̄щум о̄лум порат Васлёры па̄вылт о̄лсӯв, ётыл ущ Тэ̄к па̄вылн ва̄нтласӯв. Ань ма̄н колув о̄лум ма̄ ёлнильвес, нэ̄матыр ат хультыс. А̄щум колта̄гылт лов хум о̄лсыт, акв э̄щ туп о̄ньщасыт. Халанылт ёмщакв о̄лсыт, таяныт мисколыт о̄щсыт. Репрессия порат о̄пав аман хотыл мостыстэ, во̄рт па̄выл ва̄рум, мисколыт ӯнттум, пум ва̄рум. Матахмат мис, ма̄нь мисыт, сурты мисыт тув оймалтаманэ, такви о̄с тув ва̄нтлам, хоттӯйтхатам. Ӯйхулыт няртгалым порат тав тох ты ощмар ва̄рум. Юн о̄лум ӯйхуланэ тай та вӯймет. Та порат май арыг ӯйхулыт акваг хотняртгалаве̄сыт. Ётыл мощ сытамыгнув е̄мтыс, акв ювпо̄сасаманэ. Васлёры па̄вланылт ёмщакв о̄лсыт, щёлыӈыг о̄лсыт. Са̄в во̄раясыт, хӯл алыщласыт. Тыналахтымва̄талахтым Са̄пса ӯс па̄сныл сӯлттасыт. Хотаӈ пун тыналасыт, пун маныгтан порат – хоса пуныт я̄нас маныгтавет, някв пуныт я̄нас атавет. Матах хум атхатэ̄гыт, пушнинал, хӯлыл, пун хӯргытыл та̄лтхатэ̄гыт, та минэ̄гыт. Ты Сортыӈъя̄ лё̄ӈх хосыт Хулюмсунт та̄ра ты яласасыт, рущитн ты лё̄ӈх царский лё̄ӈхыг ла̄ввес. – Манарыл яласасыт? – Лувыл яласасыт, лувыӈ суныл. Сунаныл щар та̄глэ̄кв та̄лттыяныл. Тот матыр тэ̄нутыг, пормасыг пе̄нтыяныл. Ювле о̄с та̄глыӈ суныл та ёхтэ̄гыт. Война э̄лыпа̄лт тох яласасыт. Ёмщакв о̄лсӯв. Ма̄н колувт тамле яныг то̄тап (сунтук) о̄лыс, ам номилум, кӣвре ло̄мтыӈ са̄ккар о̄ньщас. Ягпыгум тамле са̄ккар тэ̄ӈкв сака ка̄сащас. Яныг нё̄тнэ то̄рыт а̄щув тотыглалас. Та порат матыр ёмаснув э̄лава̄рсаныл. Ам а̄щумн яныг нё̄тнэ то̄рыл майлаве̄сум, Ханты-Мансийскан ханищтахтуӈкв минасум, то̄рум ёттотыгласлум. А̄гит ка̄саласаныл, ла̄ве̄гыт, ла̄ккваяктылав. Та порат мотно о̄лыс, то̄рыл о̄луӈкв. Ща̄нюмн со̄рниӈ туля – яныг а̄хвтас пуӈкпаттаӈ туля тотыглас. Омам ла̄ви, яныгме̄гын, наӈын тах ты туля мыглум. Пе̄с, май, ма̄хум та̄нки туля ва̄рсыт. Са̄в туля акваннэ̄гим са̄с то̄тап кӣвырт о̄лсыт, та туля о̄с та ёто̄лыс. Тэ̄кн ва̄нтламувт, аман хоталь тахасыт, аман хоттӯлмантаве̄сыт. Ам ма̄нь порамт акваг а̄тям ёт хӯл алыщлым яласасум. Тӯяг сорх хӯл ёмщакв пӯхтас. Толгысыт, толыг ква̄лыг лувыл хартсыт. – Хо̄т ханищтахтасын? – Ам Ханты-Мансийскат фельдшеракушерыг нила та̄л ханищтахтасум. 1959 та̄лт минасум. Та порат ёмас о̄лыс, ма̄нь ма̄хум ханищтахтын ма̄ныл а̄стэ̄гыт, направление щирыл рӯпитаӈкв ке̄тавет. Ам Ха̄льӯсн ке̄тве̄сум, тот поликлиникат мощ рӯпитасум. Аквнакт яныг ле̄ккарув ла̄ви, Хулюмсунтыт ле̄ккар э̄ри. Са̄в ма̄нь ма̄хум, ла̄ви, тыт о̄лы, ратио лӯт о̄лы. Ёхтысум, нэ̄мат а̄ти. – Хо̄т о̄лсын? – О̄влэ̄т медпунктыт о̄лсум. Матахмат э̄т хӯлсум, амки сака пилащи осум, тупъер акваг хотьют та ё̄ми. Ӣти осма хӯргыӈ та̄гыл тётя Катя палт минасум, тув о̄лмаясум. Ме̄н аквъёт рӯпитасме̄н, тав санитаркаг о̄лыс. – О̄йкантыл хумыс румалахтасын, акванхо̄нтхатасын? – Тав о̄с Ханты-Мансийскат трактористыг ханищтахтас. О̄влэ̄т, ла̄ви, нас э̄лыл сунсыс, пищма хансуӈкв кӯсыс. Тувыл каникулыт е̄мтсыт, тав ёхтыс, танцыт румалахтасме̄н. Тох ла̄щалла̄щал аквъёт о̄луӈкв патсуме̄н. Та̄рвитаӈ рӯпитаӈкв о̄лыс, рация а̄тим. О̄щхатнэ э̄кватн ня̄враманыл самынпаттуӈкв нё̄тсум, тётя Катя посхатас, тэ̄нут па̄йтыс, пос ӣти ат тэ̄г, шприцанмен кӯралат па̄йтсанме̄н. То̄ва порат лувыӈ суныл тотыглаве̄сум, Ме̄ӈквъя па̄вылн, Ха̄ӈылсам па̄вылн. Тыт мощ о̄лсуме̄н, 1969 та̄лт тӯяг Ха̄льӯсн минасме̄н. 1971 та̄л па̄сныл 1982 мус садик ле̄ккарыгвоспитателиг о̄лсум. Ёмщакв рӯпитанэм ма̄гыс ӯскант Доска почёта па̄ртыт хурим ханас. О̄йкам тракторыл яласас, Восыӈтӯр совхоз тэ̄пканыт рӯпитас, пум са̄грысыт. Тувыл тыт компрессорный ӯнттуӈкв патвес, тав ла̄ви, амки ма̄мн рӯпитаӈкв минэ̄гум, та̄л рӯпитас, ювле Ха̄льӯсн ёхтыс. Аквта ма̄тэ̄т мощ рӯпитас о̄с Хулюмсунтын минас. Пыгме̄н школа а̄стлас, армин вуйвес. Ам ос тыг Хулюмсунтын ва̄нтласум. А̄гиме̄н Маша э̄щум палт хӯлислум, иӈ школан ялантас. Ты ма̄гыс ань мус ме̄н нуплуме̄н кантлы, такке̄тэ хӯлислуме̄н. Тыт газовый котельныйн операторыг вуйве̄сум, пенсиян патнэм мус тот рӯпитасум, ань пенсия выгум. Тамле ты хоса потыр ма̄н потыртасӯв. Ты со̄тыӈ хо̄тпаг матыра̄ти пуссын о̄ньще̄г. Тэ̄нки ӯнттум яныг нё̄тнэ колэ̄нт о̄лэ̄г. Ня̄враманэ̄н акваг нё̄таве̄г. Са̄в та̄л пуста̄гыл о̄лэ̄н. Пус ка̄т, пус ла̄гыл! 1085 2014.10.10. Валентина УЗЕЛЬ Пе̄с ва̄рмалит э̄лаль тотнэ а̄ги. Ты хурит Анна Павловна Дунаева по̄слым о̄лы. Тав а̄ще Павел Дунаев, о̄йка «Малая Сосьва» нампа заповедникт во̄р са̄грим рӯпиты. Тот рӯпитаӈкв о̄вылтахтаме па̄сныл ань ва̄т та̄лыг ты е̄мты. Анна оматэ удмуртка нэ̄. А̄ги Ханты-Мансийск ӯст Югорский университет а̄стлас, тувыл юв минас. Ань Югорск ӯс музей колт рӯпиты. Ты сака ёмас ще̄мья. Акв хотты та̄лт округув янытыл ва̄рыглым касылт «Семья года» та̄н кассыт, округ кӯщаювн тот янытлаве̄сыт. 1085 2014.10.10. Николай МЕРОВ Ма̄ньщиянув акванатхатыгласыт. Мо̄лал Карелия ма̄т Петрозаводск ӯст финноугор ма̄хум мирхал конференцияныл о̄лыс. 2016 та̄лт Финляндия ма̄т Лахти ӯст финноугор ма̄хум VII мирхал конгрессаныл е̄мты. Ма̄н округувныл ма̄ньщи, ханты ос ё̄рн хо̄тпанув тув ялуӈкв о̄с щё̄питахтэ̄гыт. Ты э̄лыпа̄лт нэ̄глум газетат ам ты урыл хансыгласум. Тувыл аквта торыг тот консультативный комитетт рӯпитан ма̄хум акванатхатыгласыт. Ма̄н округувныл Татьяна Гоголева, округ Дума депутат нэ̄, тув ялыс. Ань ты накт тав ӯст о̄лнэ соссаӈ ма̄хманув мирколн во̄виньта̄лсанэ. Та сапра̄нит маныр ва̄рмалит урыл та̄н потыртасыт, ты урыл э̄лаль ловиньтэ̄н. Т. С. Гоголева ла̄выс: «Финноугор ма̄хманув са̄в та̄рвит ва̄рмаль о̄ньще̄гыт. Ма̄н таима̄гыс акванатхатыглэ̄в, тыщир та̄рвитыӈ ва̄рмалянув мӯсхалыг щё̄питаӈкве кӯпнитнув о̄лы. Финноугор мирыт халт щар та̄рвит ва̄рмаль – ты ща̄нь ла̄тӈыт э̄лаль тотнэ тэ̄ла. Мо̄тыт Конгрессыт финноугор ма̄хманув ща̄нь ла̄тӈыт э̄лаль тотнэ ва̄рмаль урыл потыртаӈкве патэ̄гыт. Па̄влыӈ школатыт ня̄врамыт ща̄нь ла̄тӈын ханищтан тэ̄ла, ма̄нь па̄влытт пӯльницат лап ул вос пантавет ос мо̄т ва̄рмалит ёмщакв щё̄питаӈкве э̄ре̄гыт. Са̄тыт мирхал конгрессыт ма̄хум янгыщ ты урыл потыртаӈкве тах патэ̄гыт. Ань таима̄гыс Консультативный комитетт рӯпитан ма̄хумн 2015 та̄лт округув янытыл са̄в тэ̄ла щё̄питаве. Ща̄нь ла̄тыӈ э̄лаль тотнэ ма̄гыс финноугор мирыт халт яныг конференцият ва̄равет. Акв тамле ва̄рмаль ща̄нь ла̄тӈыл нэ̄пак хаснэ хо̄тпат ма̄гыс щё̄питаве. Тувыл финноугор мирыт янытлан хо̄тал кастыл Ханты-Мансийск ӯст яныг научный конференция ва̄раве. Ты тэ̄ла рущ щирыл тох намаим о̄лы: «Инновационные технологии в сфере образования». Ты ва̄рмальн ня̄врамыт ща̄нь ла̄тӈыл ханищтан хо̄тпат са̄всыр па̄влытныл во̄вавет. Ты коныпал Удмуртия ма̄ныл ос Коми республиканыл финноугор ма̄хманув тыг ёхталэ̄гыт. Тыи ос мо̄т э̄рнэ тэ̄лат пуссын мо̄тыт та̄лт щё̄питавет тах. 1085 2014.10.10. Тамара МЕРОВА Нё̄тнэ ма̄ке̄в. Таквсы порат ма̄витув сака нё̄тнэ̄г о̄лы. Лӯима̄т акв таксв э̄тпос сыс ма̄тэ са̄всырыг е̄мтапа̄лы. Во̄р, я̄т, то̄рум нупыл сунсуӈкве сака пӯмыщ. Мо̄лал ам Лида Прописнова (Хозяинова) руманэ̄м по̄слум хуриянэ ка̄саласанум. Лидия Саранпа̄вылт о̄лы, ос са̄лы ӯрнэ рӯтанэ палт Нё̄рн ва̄тихал яланта̄лы. Тав са̄лы ӯрнэ ма̄хум о̄лупсаныл ос та̄н яласан ма̄ке̄ныл хурин акваг по̄слыянэ. Ань тав по̄слум хуриянэ на̄н сунсыглэ̄н. 1085 2014.10.10. Николай МЕРОВ Ма̄хум янытлаве̄сыт. Са̄всыр мирыт та̄нки халанылт ёмщакв вос о̄лэ̄гыт, тыи ма̄гыс округувт ка̄сыӈ та̄л «Губернатор премия» нампа олннё̄тмил миве. Ты ва̄рмаль рущ щирыл «За вклад в развитие межэтнических отношений в Ханты-Мансийском автономном округе – Югре» ла̄ваве. Мо̄лал Ханты-Мансийск ӯст Экспертный советт рӯпитан хо̄тпат акванатхатыгласыт. Хотьют Губернатор премияолныл ань майвес, на̄н ты урыл э̄лаль ловиньтэ̄н. Округ губернатор постановлениятэ щирыл, ты премияолн 2011 та̄л па̄сныл майлаве. 2014 та̄лт ты совет хӯрмиттыг акванатхатыглас. Округ янытыл са̄всыр ма̄ныл пуссын аквъёт налыман нупыл нёлолов хо̄тпа урыл заявлениенэ̄пак ёхтыс. Ос ты премиял щар ма̄к хо̄йхатнэ хо̄тпат мивет. Таима̄гыс экспертный советт рӯпитан хо̄тпат ты ма̄хум та̄рапаттысаныл. Ты совет кӯщаиг Юрий Александрович Изосимов о̄лыс. Тав ань культура департамент кӯщай пе̄нтсыл рӯпиты. Таве̄н Евгения Михайловна Касаткина нё̄тыс, ты нэ̄ творчество кол отдел кӯщаиг о̄лы. Секретариг Елена Евгеньевна Исламуратова, культурат рӯпитан нэ̄, о̄с о̄лыс. Та̄н ётаныл Людмила Александровна Алфёрова, губернатор ва̄ӈын хум палт советникыг рӯпитан нэ̄, Елена Борисовна Плеханова, са̄всыр мирыт ёт рӯпитан нэ̄ ос мо̄таныт, пуссын аквъёт лов хо̄тпа ты ва̄рмаль щирыл рӯпитасыт. Советыт рӯпитан хо̄тпат ма̄хум ке̄тыглам заявлениянэ̄пакыт пуссын ёмащакв ловиньтасаныл ос ты хо̄тпат губернатор премия олныл мисаныл. Ты ма̄хум янытлаве̄сыт: – М. Ф. Рябова, Белоярский ӯс «Увас хурамат» нампа ёнгын колт рӯпитан нэ̄; – Л. Р. Хомляк, Белоярский ӯс «Увас хурамат» ёнгын колт рӯпитан нэ̄; – М. В. Кабакова, Белоярский район Ка̄сум па̄выл соссаӈ ня̄врамыт «Нумсаӈ ёх» нампа ӯщлахтын ма̄ кӯщай нэ̄; – Н. С. Цыбина, Нижневартовск ӯст ма̄нь ня̄врамыт ханищтан нэ̄; – А. К. Франгу, Сургутский район Солнечный па̄выл нэ̄пак ловиньтан кол кӯщай; – Л. Ш. Кашапова, Ханты-Мансийск ӯс творчество колт ма̄нь ня̄врамыт ханищтан нэ̄; – З. С. Куканбаева, Ханты-Мансийск ӯс «Дуслар» нампа татаробашкирский клуб колт рӯпитан э̄ква; – О. М. Норова (Анямова), Ханты-Мансийск ӯс «Лылыӈ со̄юм» нампа ня̄врамыт ханищтан колт соссаӈ ня̄врамыт ёт рӯпитан ма̄ньщи нэ̄; – С. Э. Киберов, Ханты-Мансийск ӯс «Дагестан» нампа мир юртыӈыщ о̄лнэ культура колт рӯпитан хум; – Е. Н. Молданова, Ханты-Мансийск ӯст о̄лнэ ма̄ньлат ма̄хум организацият рӯпитан ханты нэ̄. Ты коныпал ос ты организацият ёмащакв рӯпитанэ̄ныл ма̄гыс премияолныл майве̄сыт. Ха̄льӯс район Я̄сунт па̄вылт о̄лнэ «Ма̄нь ӯскве» нампа ня̄врамыт ӯщлахтын кол, тот ма̄ньщи нэ̄ Л. П. Стаканова кӯщаиг о̄лы. Нижневартовск ӯс «Ватан» нампа общественный организация янытлавес, тот кӯщаиг З. Ю. Валеева о̄лы. Нягань ӯст о̄лнэ «Алания» нампа осетин ма̄хум культура коланыл, тот кӯщаиг В. Х. Абаев рӯпиты. Сургут ӯст «Рущ ма̄хум культура» нампа общественный организация, кӯщаиг тот Е. В. Лоншакова рӯпиты. Сургутский район Фёдоровский па̄вылт о̄лнэ «Кумыки» нампа кумык ма̄хум культура кол, тот кӯщаиг А. К. Керимов о̄лы. Ханты-Мансийск ӯст о̄лнэ «Немецкая национальнокультурная автономия» нампа общественный организация, тот кӯщаиг Е. И. Кизнер рӯпиты. Ханты-Мансийск ӯст о̄лнэ хо̄нтлам ма̄хум общественный организацияныл, кӯщаиг тот В. А. Корнеева о̄лы. Ханты-Мансийск ӯст о̄лнэ «Ялпус ма̄хум» нампа ще̄мьяӈ ёнгын кол, кӯщаиг тот А. Р. Иштимирова-Посохова, ханты нэ̄ о̄лы. Ханты-Мансийск ӯст о̄лнэ «Вахдат» нампа таджик ма̄хум культура коланыл, тот Ш. Б. Норов кӯщаиг рӯпиты. Ханты-Мансийск ӯст о̄лнэ «Гармония» нампа культура кол, тот Г. А. Выдрина кӯщаиг о̄лы. Ты хо̄тпат рӯпатаныл ма̄гыс пуссын премияолныл майве̄сыт. «Культура» творческое объединение ке̄тум потре ма̄ньщи ла̄тӈыг Николай МЕРОВ толмащластэ. 1085 2014.10.10. Людмила ТЕТКИНА Пыть-Ях ӯст о̄лнэ музей йильпи колыл ӯнттувес. Ты э̄тпос 9 хо̄талэ̄ныл Пыть-Ях ӯскант йильпи кол рӯпитаӈкве о̄вылтахтас. Яныг кирпащ колт аквпалъе̄ре̄т нэ̄пак ловиньтан кол ос мо̄тпалъе̄рт музей рӯпитаӈкве патэ̄г. Ты кастыл ялпыӈ хо̄тал о̄лыс, са̄в мир тув акванатхатыглас. Зоя Лазаревна Жавко, такви а̄ги о̄парищ наме Каюкова, музейт кӯщаиг рӯпитан нэ̄, ла̄выс: «Ма̄н музей колув 2001 та̄лныл рӯпиты, Пыть-Ях ӯс ляпат во̄р халт ханты па̄выл ӯнттувес. Тыг ёхталан мирн ма̄н суссылтэ̄в ос потыртэ̄в, хумус ма̄ньщит, хантыт пе̄с порат о̄лсыт. Ты пора мус акв та̄рвитыӈ ва̄рмаль о̄лыс, са̄всыр йильпи выставкат суссылтаӈкве колнакыт ат о̄щсӯв. Ма̄н 16 э̄лумхо̄лас пуссын акв колт рӯпитасӯв. Ань йильпи колт колнакыл миве̄в, тот ма̄н са̄всыр выставкат щё̄питаӈкве патэ̄в. Ос таи ёмас, ты кол ӯскан по̄хат ӯнттувес, ам номсэ̄гум, тув тах са̄внув мир ёхталаӈкве паты. Галина Петровна Марченко, «Югра лылые̄п» общественный организацият рӯпитан нэ̄, тав ты музей ва̄руӈкве номылматас. Та порат ӯс мирколт кӯщаиг Валерий Михайлович Веснин рӯпитас. Галина Петровна тав палтэ ялыс, такви номтэ урыл потыртас. Тот ювле ла̄ввес, номтанэ пуссын нэ̄пакн вос хансыянэ, миркол кӯщаит олн хо̄нтэ̄гыт ос соссаӈ ма̄хум культураныл э̄лаль тотнэ ма̄гсыл музей тах ӯнттэ̄гыт. Ты юипа̄лт «Балыклес» нампа организация норыт, па̄ртыт ос са̄в мо̄т э̄рнэ утыт тотсыт. О̄влэ̄т та̄н пе̄с йис ва̄рмалит ва̄нэ соссаӈ ма̄хум киссыт, та̄н музей ма̄гсыл со̄мъяхыт, ханты колыт пе̄с щирыл вос ӯнттыяныл. Пыть-Ях ӯст ты ва̄рмаль ва̄нэ ма̄ньщи ос ханты хо̄тпат ат хо̄нтсыт. Ты рӯпата нас по̄х хо̄тпатн ва̄рвес. Музеюв ёмащакв рӯпитанэ̄тэ ма̄гсыл Ольга Николаевна Кузнецова о̄с са̄в ё̄р пиныс. Та порат тав соссаӈ ма̄хум культураныл но̄хво̄рмалтан центрыт кӯщаиг о̄лыс. Ты рущ нэ̄ Угут па̄вылт самын патыс, тот яныгмас. Ща̄нягеа̄щаге тув ссылкан ке̄твесы̄г. Ханты ма̄хум халт о̄лыматэ сыс, Ольга Николаевна ма̄н ла̄тӈув ос та̄рвитыӈ ва̄рмалянув ёмащакв ханищтасанэ. Ты центрыт рӯпитым, ма̄ньщитн, хантытн сака нё̄тыс. Ты ма̄гсыл соссаӈ ма̄хманувн тав сака янытлаве. 2007 та̄л мус музейт туп 300 са̄всыр пе̄с пормас акванатым о̄лыс. То̄нт ма̄н яныг рӯпата ва̄рсӯв, во̄рт манос ма̄нь па̄влытт о̄лнэ ханты ще̄мьят палт ва̄тихал ялантасӯв. Та̄н ты пе̄с пормасыт музей ма̄гсыл мисыт. Ам амки Угут па̄вылныл о̄лэ̄гум, ӯщлахтын порат во̄рт о̄лнэ рӯтанум палт ялантэ̄гум. Са̄всыр пе̄с пормасыт атэ̄гум. Ты пормасыт ёвтуӈкве кос э̄ре̄гыт, тувыл ты рӯпата ма̄гсыл олныл щар ат та̄стыглаве̄в. Наталья Кононовна Поянкина, музейт рӯпитан нэ̄, Лемпино нампа такви яныгмам па̄влэ̄н о̄с яланты, тот рӯпиты. Наталья Кононовна рӯтанэ о̄с пуссын пе̄с ма̄хманув щирыл о̄лэ̄гыт. Са̄т та̄л сыс ма̄н 3 со̄тыра арыгкем са̄всыр пе̄с пормасыт, маснутыт, хурит акванатсанӯв. Тыт рӯпитан а̄ги музейт о̄щнэ пормасыт пуссын нэ̄пакын хассанэ. Ма̄н щё̄питам суссылтапанув ӯст рӯпитан организациятытн тотыглыянӯв. О̄влэ̄т ты организацият ёт потыртахтэ̄в, та̄н ма̄навн колнак вос мыгыт, тувыл щё̄питам выставкав тув тотылӯв. Ма̄хум ёхталэ̄гыт ос суссылтапув сунсыглэ̄гыт. Ма̄н ань о̄с олн сэ̄луӈкве ла̄ваве̄в, музейн ёхталан ма̄хумн билет тыналэ̄в, тынэ ня̄врам ма̄гсыл 20 солко̄ви, мо̄т ма̄хум ма̄гсыл 40 солко̄ви. Акв та̄л сыс 6-7 со̄тыра э̄лумхо̄лас тыг ёхталы. Ты коныпал мо̄т ӯсытт, па̄влытт о̄лнэ организацият ёт рӯпитэ̄в. 2013 та̄лт Нефтеюганск ӯст туризм щирыл рӯпитан фирма ёт соглашениенэ̄пак хассӯв. Та̄н Нефтеюганск ӯсныл ня̄врамыт музеювн тотыгласаныл. Салым ос Пойковский па̄влыгныл а̄гирищитпыгрищит музей сунсуӈкве ёхталасыт. Тох ня̄врамыт туи порат тыг тотыглавет. Наталья Кононовна ма̄щтырлаӈкве сака ёмащакв ха̄сы, са̄всыр сувенирыт, ма̄ньщи ос ханты ма̄хум пормасыт ю̄нты. Ӯст о̄лнэ ялпыӈ хо̄талыт кастыл са̄всыр суссылтапыт ва̄рыглэ̄в, ма̄нки ю̄нтум пормасанув тот тыналыянӯв. Ханты-Мансийск ӯсн во̄виньта̄лаве̄в. Ка̄сыӈ та̄л тот «Югра-Тур» нампа выставкан яланта̄лэ̄в. Тот о̄лнэ музеит ёт рӯпитэ̄в. «Торум Маа» музей са̄всыр конференцият, ханищтапыт, суссылтапыт щё̄пита̄лыглы, ма̄н акваг во̄выглаве̄в. Тувыл тув ялантаӈкве олн ат о̄ньще̄в». Ты коныпал Зоя Лазаревна «Экологоэтнографическая тропа» нампа проект урыл потыртас. Та̄н «Культура» программа хосыт олныл та̄стуве̄сыт. Ты олныл та̄н музейт ос акв суссылтап щё̄питэ̄гыт, пе̄с порат соссаӈ ма̄хум хумус во̄раясыт, ёхталан мирн та̄н суссылтаӈкве ос та урыл потыртаӈкве патэ̄гыт. Зоя Лазаревна са̄т арыгкем та̄л тот кӯщаиг о̄лы. Тав сака ка̄ркам нэ̄, ты та̄лыт сыс музей ма̄гсыл са̄в рӯпата ва̄рыс. Ань ӯст о̄лнэ ка̄сыӈ э̄лумхо̄лас музей урыл ва̄г. Ма̄хум тув вос ёхталэ̄гыт ос тот ва̄рыглам суссылтапыл вос пӯмщалахтэ̄гыт, ты нэ̄кве ма̄хманэ ёт ка̄сыӈ та̄л Ӯринэ̄ква хо̄тал ос мо̄т ялпыӈ хо̄талыт ва̄рыглы. Ӯст о̄лнэ мир пуссын мӯйлуӈкве во̄виньта̄лыяныл. Кӯщай нэ̄ ла̄выс: «Пыть-Ях ӯст са̄всыр мир о̄лы, са̄в хо̄тпа мо̄т ма̄ныл тыг о̄луӈкве ёхты. Мо̄т ма̄ныл ёхтум ма̄хум китыглавет, округув манрыг тамле нам о̄ньщи, та̄н аты ва̄ганыл. Тыи ма̄гсыл соссаӈ ма̄хум ялпыӈ хо̄талыт тыт ва̄рыглэ̄в, потыртэ̄в. Мо̄т мирыт ма̄ньщит ос ханты о̄лупсаныл урыл са̄внув вос ва̄гыт ос та̄наныл вос янытлыяныл». 1085 2014.10.10. Тамара МЕРОВА Пӯмыщ суссылтап ва̄рвес. Хури по̄слан о̄йка Г. С. Райшев мастерскойколэ̄т йильпи суссылтап ва̄рвес ос ювле хультум э̄тпост тав рӯпитаӈкве о̄вылтахтас. Тот Геннадий Степанович атпан та̄л сыс, ты 1960 та̄лныл 2010 та̄лыт мус, по̄слум хуриянэ акванатве̄сыт. О̄йка ты по̄слум хуриянэ са̄всыр щирыл ва̄рманэ. Рущ щирыл та̄н я̄нас нам о̄ньще̄гыт, тыи линогравюра, офорт, монотипия. Ты хурит та̄нки щирыл по̄слым о̄лэ̄гыт. Тох Геннадий Райшев «Сибирские мотивы» намаим хуриянэ линогравюра щирыл щё̄питасанэ. Ты выставкатэ 1998 та̄лт ма̄хумн суссылта̄лвес, ань тувыл вим то̄ва хурит мӯй хо̄тпат о̄с тот ка̄салаӈкв ве̄рмияныл. Райшев о̄йка юио̄выл та̄лытыт по̄слум рӯпатанэ «живопись искусстваг» ла̄вавет. Ань ты суссылтапн «Калевала» ос «Героический эпос манси. Песни святых покровителей» хансым пе̄с йис потрыт щирыл по̄слым хурит щё̄питаве̄сыт. Финныт ос карелыт пе̄с йис потраныл щирыл хурит ос ольпыл сартсанэ. Ос пе̄с ма̄ньщи потрыт щирыл тав хурит сэ̄мыл хаснэ йӣвыл по̄слысанэ. О̄йка Карпинск ӯст о̄лме̄т сыресыр хурит о̄с по̄слум. Ань тувыл тотым са̄тхуйплов хури тыт суссылтаве. Ты коныпал мо̄лты та̄л о̄вылтам «Космос ос человек» хуриянэ ты выставкат о̄лэ̄гыт. Такви Геннадий Степанович ла̄выс: «Ам ань яныгпа̄лаг е̄мтсум, са̄в мирыт нупыл, о̄лупсав нупыл На̄й-О̄тыранув хольт нумыл сунсэ̄гум. Ма̄ке̄в матыра̄ти пуссын хӯлы, хо̄та̄ти сунсы, номтанув ва̄вет. Ань таима̄гыс тамле хурит по̄слуӈкве номылматсум». Ты суссылтап сунсуӈкве са̄в мир вос ёхталы, тав сака пӯмщиг ва̄рим о̄лы. 1085 2014.10.10. Тамара МЕРОВА Та̄н ма̄щтырлаӈкв ханищтаве̄сыт. Октябрьский район Шеркалы па̄вылн ёхталам мӯй ма̄хум ма̄щтыр хо̄тпа съезданыл номуӈкве тах иӈ хоса патыяныл. Ва̄им, та̄н са̄в та̄л акван ат атыглаве̄сыт, ма̄ньлат соссаӈ хо̄тпат са̄в ва̄рмалит урыл нэ̄матыр ат хӯлыгласыт. То̄ват маснут ю̄нтсыт, сакныл матыр хартсыт ос йӣвныл, совныл са̄всыр пормасыт ва̄рсыт. Та̄н атыпыл номсысыт, то̄ва маснутаныл, пормасаныл, насати, лю̄льсаӈ ва̄рманыл. Ханты ос ма̄ньщи ма̄хум са̄ртын та̄н щиранылт хорамтым маснут, хо̄та̄ти ат э̄рнэ хансал супаныл мори ат ю̄нтыгласаныл ос мо̄т мирныл вуим хащта̄л нак ат о̄щсыт. Ма̄хманув пе̄с щирыл о̄лсыт ос йис наканыл э̄лаль тотсаныл. Ты ва̄рмалит урыл Татьяна Александровна Молданова потыртас: «Ма̄н ма̄щтыр ма̄хманув ёт хосат та̄гыл акван ат атхатыгласӯв. Ос Л. А. Алферова ма̄навн тахольт нё̄тыс, кӯщаит па̄лыл олн хо̄нтыс ос ма̄н тыт акванхо̄нтхатасӯв. Тыг са̄всыр ма̄щтыр хо̄тпат ёхтысыт ос та̄нки ва̄рум пормасаныл ёт тотсаныл. Пормасаныл пуссын пӯмщит, хорамыӈыт. Ма̄н пе̄с щирыл ва̄рим пормасыт та̄ра я̄нас атсанӯв, йильпи щирыл ва̄рим утыт по̄ханнув пинсанӯв. Ос ты о̄вылтыт ма̄щтыр хо̄тпанув ёт ёмщакв потыртасӯв. Ты ма̄хумн та̄рала̄всӯв, ма̄н туп пе̄с йис ханищтан ма̄гсыл ос та̄наныл э̄лаль тотнэ щирыл рӯпитаӈкве таӈхе̄в. Мо̄т мирыт о̄щнэ ва̄рмалит та̄н акван ул вос тэ̄лыгтыяныл. Ма̄н суссылтап суссӯв, ос рущ щирыл ке ла̄вуӈкве «сценический» супыт, «сувенирный продукцият» по̄ханатсанӯв. То̄ва хо̄тпанув кантлуӈкве о̄вылтахтыгласыт, манрыг та̄н хансал ю̄нтым хорамыӈ супаныл манос ёмщакв сагим маснутаныл по̄хан пинве̄сыт. Тав ты кос нё̄тнэ, туп ма̄н пе̄с ма̄хманув тамле сака хансаӈ маснутыл ат о̄лсыт. Касум па̄вылт яныгпа̄ла ма̄хманув ма̄ньлат хо̄тпат ма̄к тэ̄лан ханищтыяныл. Ты рӯпата ва̄рнэ ма̄гыс са̄всыр потрыт, кинат щё̄питавет ос тувыл ханищтапыт порат суссылтавет. Ма̄ньщи ма̄хум халт М. С. Мерова ма̄щтырыг супыт ю̄нтнэ ос пе̄с накыт ва̄нэ хо̄тпаг о̄лы. Ма̄н пуссын таве̄ныл ханищтахтэ̄в, матыра̄ти ва̄рмалит пӯмщалэ̄в. Ань йильпи щирыл пормасыт вос ю̄нтыяныл, туп та̄н ма̄к ма̄ньщи ман ханты пормасыг ул вос ла̄вияныл, наска̄ссыг мо̄т ма̄хум ул вос ла̄палыяныл». Светлана Кирилловна Гындышева ла̄выс: «Ты съездыт ханищтапанув о̄с ёмщакв минасыт. З. Н. Лозямова ханты супыт ю̄нтнэ тэ̄лат урыл потыртас, Яков Тарлин хум хо̄тпа э̄нтапыт ва̄рнэ тэ̄лат ос йӣвыл щё̄питан пормасыт урыл потыртас. Татьяна Уколова ос Галина Волдина ма̄хум са̄сыл рӯпитаӈкве ханищтасанэ̄н. То̄нт ма̄ньлат ма̄хум та̄рапаттысаныл, хумус пе̄с ма̄хманув пормасаныл ва̄рыгласаныл, ю̄нтыгласаныл, манрыг ханса тув мори по̄слуӈкв ат ро̄ви. Тувыл хоты хорамлан то̄рыт мо̄т то̄рн ю̄нтуӈкве ат э̄ре̄гыт, таил хӯлтве̄сыт. Юио̄выл хультум та̄лытыт, ва̄им, этнотуризм тэ̄лат кастыл то̄ва ма̄хманув, ва̄им, са̄всыр пормасыт ва̄руӈкве ква̄лапасыт. Матыр ва̄ре̄гыт ос номсэ̄гыт, тытты ма̄ньщи манос ханты ма̄хум ма̄к пормасаныл. Та щирыл ва̄руӈкве воссыг ат э̄ри. Ма̄н ань ма̄ньлат хо̄тпат пе̄с йис ва̄рмалит торгамтаӈкве ханищтыянӯв, тыгыл э̄лаль маныр ва̄руӈкве патэ̄гыт, та̄н та̄нки вос номсахтэ̄гыт. Ма̄н ос та̄нанылн нё̄туӈкве патэ̄в». Шеркалы па̄влыӈ ма̄хум тув о̄с во̄виньта̄лве̄сыт. Рущ о̄йка Юрий Николаевич Кушнин потыртас: «Ам ты па̄вылт о̄лнэ кол ёвтсум ос хӯрум та̄л тыт о̄лэ̄гум. Амки тыт кос самын патсум, ос ётыл мортым ма̄н о̄луӈкве минасум. Тот о̄лымам марщумлаве̄сум, насати, хӯл алыщлаӈкве, во̄раяӈкве тахнэм. Ювле та ва̄нтлысум. Мо̄т юртанум о̄с ла̄кквамингаласыт. Ос то̄внакт мощщан мӯйлуӈкве тыг ёхтыгпа̄лэ̄гыт, та̄нанылн тыт мӯсты. Ам ань ты суссылтап сунсыслум ос таке̄м ща̄гтсум. Ма̄ньта̄гыл йӣвныл ёргуӈкве о̄с сака тахсум, туп э̄лаль ат ханищтахтасум. Тыт ань пӯмыщ потрыт хӯнтлысум. Тамле накыт ва̄тихал вос ва̄рыглавет. Юртанум ань минасыт, та̄наныл о̄с тыг тотнуванум. Тамле нё̄тнэ пормасыт, супыт о̄с вос ка̄саланувыт. Соссаӈ ма̄хум культураныл о̄вылтыт са̄внув о̄с вос ва̄гыт. А̄нумн тыт сака пӯмыщ о̄лыс». Потыртам ма̄хманумн яныг пӯмащипа ла̄тыӈ ла̄ве̄гум. 1085 2014.10.10. Анна АЛГАДЬЕВА Яныг ӯс колыл акваг та ӯнттаве. Манах щёс Ханты-Мансийскан ёхталэ̄гум, ӯсув акваг нё̄тнэ̄г та е̄мты. Ам ханищтахтамум порат студентыт о̄лнэ ӯс о̄вылт щар во̄р о̄лыс. Ханищтахтын ма̄хум ма̄гыс ат накпа ат о̄лнэ коланыл э̄лыл та на̄ӈксыт. Ань тай таса̄вит та яныт колкапаит та ӯнттымат, хоттыпуӈкв ро̄ви. Нэ̄пак та̄ратан хо̄тал ӯс кант ё̄мыгтасум, йильпи ӯнттым колытыл о̄щатахтыгласум. Тох ялгала̄лым, ӯс кан котиль ха̄ль щахылн ёхтысум. Хуньт о̄лум нас ха̄ль ща̄хыл тох та ва̄рапиме. Ня̄врамытын ёнгасан та са̄вит са̄всыр ёнгын ма̄: та сып, та тя̄тьтялахтын ма̄, са̄всыр ха̄хталахтын ха̄ӈхылтапыт, нас ӯнлахо̄лнэ ӯнлын ма̄т. Ма̄н ханищтахтамувт ха̄ль ща̄хыл та̄ра нас лё̄хъяс о̄лыс. Ань тай та па̄ӈхвит а̄хвтас лё̄ӈх. Ха̄ль щахыл котильт ма̄нь турво̄х ва̄рим, турво̄х кӣвырн ке̄рас ло̄мт, та ке̄рас мувал ты ма̄т о̄лнэ са̄всыр ӯйхулыт ва̄римат: во̄рто̄лно̄йка, со̄рп, кит са̄лы, хӯрум ха̄йтнут, во̄р пӯрщ, ращ. Тувыл са̄всыр нё̄тнэ вит со̄схатнэ ма̄т, рущ щирыл – фонтаныт, ня̄врамыт тахсан паровозикыт, са̄всыр нё̄тнэ каруселит о̄лэ̄гыт. Ма̄хум такем са̄в. Тот сунсыглахтым колала ӯиӈ «Дерево дружбы» по̄хын ёхтысум. Хорамыӈыг масхатым клоуныт такем поргащлэ̄гыт, йӣкве̄гыт. Ӯсыт о̄лнэ са̄всыр дополнительное образование ханищтан ма̄хум ва̄рнэ рӯпатаныл суссылтасыт, организацият, ма̄хум ма̄гыс ёнгын предпринимателит, са̄всыр учрежденият. Ты халт «Лылыӈ со̄юмт» рӯпитан хо̄тпат о̄с о̄лсыт, лӯпта а̄канит, тарыг па̄кв а̄канит, ма̄нь то̄р а̄каняквет хумыс ва̄равет, суссылтасыт. «Юный натуралист» нампа станция ӯйхуланыл суссылтасыт. Ты халт са̄всыр атыӈ утыт тыналаве̄сыт. Ма̄хум ӯщлахтын хо̄тал рӯпитам наканыл порсыг ат минас, са̄в хо̄тпа ня̄врамыӈ та̄гыл тот ё̄мыгтасыт, ӯщлахтасыт. Хотьютын матарыг ханищтахтын ва̄рмаль мӯстыс, э̄лаль ты ма̄хмыт палт ханищтахтуӈкв ялантаӈкв патэ̄гыт. Тох ты ӯст о̄лнэ са̄всыр ва̄рмаль суссылтаве. 1085 2014.10.10. Николай МЕРОВ Ха̄льӯс на̄ӈк щахыл урыл потыр. Раиса Петровна Загородняя – ханты нэ̄, тав Ха̄льӯст соссаӈ мир культура центр колт лов та̄л рӯпиты. Та̄н тот ка̄тыл са̄всыр пормасыт ва̄ре̄гыт. Тав ла̄выс, хунь о̄выл щёс ӯсн ёхтыс, Ха̄льӯс налми ва̄тан на̄ӈкыт яныгман щахылн пӯрлахтуӈкве ялыс. Та ма̄ сыме̄н татем хо̄яс, та па̄сныл акваг тув яланты. Ӯст о̄лнэ соссаӈ ма̄хманув пӯрлахтуӈкве тув ва̄тихал ялантэ̄гыт. Мо̄лты ам Ха̄льӯсн ялмум порат Раиса Петровна а̄нумн та ма̄ урыл пе̄с потыр потырта̄лыс. Ань на̄н тав потре э̄лаль ловиньтэлы̄н. – Хосат пе̄с ма̄хум та на̄ӈк щахылн са̄т та̄л сыс акв щёс пӯрлахтуӈкве яланта̄лсыт. Та̄н тот йир тӯщтыгласыт. Халанылт потрамасыт, хоты ма̄т ос хумус хӯл алыщлаӈкве ос во̄раяӈкве ро̄ви. Ма̄хум тот та̄нки о̄лупса ва̄рмаляныл урыл потыртасыт ос йильпи ля̄ххалыт тотсыт. Та ма̄т та̄н ня̄враманыл ха̄йтыгтасыт ос нас ва̄щинтахтыгласыт. Ханты ма̄хум та ялпыӈ ма̄ «Аяс на̄ӈк пай» ла̄вияныл. Ты потыр ма̄ньщи щирыл «Ма̄нь А̄с я̄ То̄рум» толмащлаве. Ха̄льӯс ля̄пат Лӯи Тагт я̄ по̄хыт ма̄нь А̄с я̄ овты. Таима̄гыс ты на̄ӈк щахыл тох намаявес. Пе̄с ма̄хум тох потырта̄лсыт: «Пе̄с йист таквсы порат я̄ хосыт ма̄ньщи ос ханты похатыр хо̄тпат минасыт. Та̄н татем нё̄тнэ, урамыӈ ма̄ ка̄саласыт, па̄гпӯхтысыт, а̄ращ ва̄рсыт, э̄т хӯлсыт. А̄лпыл но̄хква̄лсыт ос э̄лаль минмыгтаӈкве атхатасыт. Ос миннэ̄ныл э̄лыпа̄лт, ты нё̄тнэ ма̄ ма̄гыс, То̄рум янытлан кастыл, та̄нки йӣв суваныл тот тӯщтым хультуптасаныл. Ты йӣв сувыт тӯяг но̄хтэ̄лумтасыт ос на̄ӈк йӣвыг е̄мтсыт. Та па̄сныл та̄н ань ты хо̄тал мус тот лю̄ле̄гыт. Ань ты йӣвкапаит карсыг, та̄кыг е̄мтсыт. Ты ма̄ урыл о̄с акв пе̄с потыр о̄лы. Тав ос тох потырта̄лвес. Хосат, ма̄ тэ̄лум порат, То̄рум а̄щанув ма̄ уртсыт. Ка̄сыӈ То̄рум такви ма̄тэ вуянтас. Карс аки товлыл яласас, тав Ма̄нь А̄с я̄ аки ёт ты на̄ӈкыт яныгман ма̄ ма̄гыс хо̄нтлыс. Тув мус та алыщлахтасы̄г, на̄ӈк йӣв тольхыт пуссын ёлаль хӯтсыт. Аквтупмат намыл хӯтувъяптуве̄сыт. Со̄ль, та на̄ӈк щахылн ляпаман порат хӯтум йӣв тольхыт ёмщакв ка̄салаӈкве ро̄ви. На̄н Ха̄льӯсн ёхтэгы̄н ке, ты нё̄тнэ ма̄н пӯмащ ма̄гыс о̄с ялэ̄н. 1085 2014.10.10. Людмила ТЕТКИНА Юван Шесталов рӯпитам колэ музеиг ва̄рвес. Ма̄нь таквс э̄тпос китыт хо̄талэ̄т Ханты-Мансийск ӯст о̄лнэ соссаӈ ма̄хум Югорский университетн во̄виньта̄лве̄сыт. Та ханищтан колт Юван Шесталов намыл пиным музей рӯпитаӈкве о̄вылтахтас. Нэ̄пак хансум ма̄ньщи о̄йка 2011 та̄лт а̄тимыг е̄мтыс. О̄лме порат тав Югорский университетыт рӯпитас. Тот соссаӈ ма̄хум пе̄с йис ва̄рмалит, ла̄тӈаныл ханищтан ос но̄хво̄рмалтан центрыт кӯщаиг о̄лыс. Ты музейт ань тав нэ̄паканэ, хуриянэ ос пормасанэ акванатве̄сыт. Юван Шесталов намыл намаим кол «Торум Маа» нампа музей нупыл ловиньтахты. Тот рӯпитан хо̄тпат ты кол ӯргалаӈкве тах патэ̄гыт. Музей ва̄руӈкве Юван о̄йка яга̄гитэ Альбина Николаевна Мехнина номылматас. Ты кол рӯпитанэ̄тэ ма̄гсыл тав, Светлана Динисламова, мо̄т ма̄ньщит ос хантыт са̄в ё̄р пинсыт. Югорский университетыт кӯщаит ты музей ва̄руӈкве щар ат ка̄сащасыт. Ӯст о̄лнэ соссаӈ ма̄хум, «Торум Маа» нампа музейт рӯпитан ма̄хум са̄всыр кӯщаитн ты музей урыл пищма хансыгласыт. Тох кит та̄л ювле хультыс, Юван Шесталов музее рӯпитаӈкве ань та о̄вылтахтас. Акванатхатыглам ма̄хум музей сунсыгласаныл ос Юван Шесталов номылматыгла̄лсаныл. 1085 2014.10.10. Николай МЕРОВ Финноугор ня̄врамыт мӯйлуӈкве о̄вылтахтэ̄гыт. Ты э̄тпос 16 хо̄талт Россият о̄лнэ финноугор ня̄врамыт ма̄гыс нилыт мирхал фестиваль ва̄раве. Ань йӣквнэ ос э̄ргын ня̄врамыт Марий Эл ма̄ныл мӯйлуӈкве о̄вылтахтэ̄гыт. Та юипа̄лт Коми республикан минэ̄гыт. Тувыл ос Удмуртия ма̄н, ос юио̄выл концертаныл Коми-Пермяцкий округт ва̄раве. Ты ва̄рмалин ня̄врамыт са̄всыр ма̄ныл акванатхатэ̄гыт. Ты коныпал 2015 та̄лт Карелия ма̄т финноугор мирыт о̄с акв тамле яныг концерт тах ва̄ре̄гыт. Щар о̄выл концерт 2008 та̄лт о̄лыс. Та па̄сныл ты тэ̄ла акваг э̄лаль тотаве. Ма̄хум ты ва̄рмаль сака э̄руптыяныл, йӣквнэ ос э̄ргын ня̄врамыт яныг ща̄гтыл ӯрияныл. Ты мӯйлын ва̄рмаль ка̄сыӈ та̄лныл мо̄тмо̄т щирыл пӯмщиг ва̄рыглаве. Финноугор мирыт культура Центр колныл ке̄тым ля̄ххал ма̄ньщи ла̄тӈыг Николай МЕРОВ хансыстэ. 1085 2014.10.10. Людмила ТЕТКИНА Са̄всыр мирыт юртыӈыщ вос о̄лэ̄гыт. Ты та̄л Ханты-Мансийск ӯст йильпи организация рӯпитаӈкве о̄вылтахтас, рущ ла̄тӈыл « Совет по делам национальнокультурных объединений и религиозных организаций» намаим о̄лы. Тагир Аюпов, Ханты-Мансийск мирколт депутатыг рӯпитан хум, кӯщаиг тув пе̄риявес. Ань ты Советын са̄всыр мирыт общественный организацияныл хансым о̄лэ̄гыт. Ма̄ньщи ос ханты яныгпа̄ла хо̄тпат хосат та̄гыл о̄с Совет ва̄рсыт, рущ ла̄тӈыл: «Окружной Совет старейшин коренных малочисленных народов Севера» ла̄ваве. Ань тот М. К. Волдина, Д. В. Герасимова, Д. В. Лельхов, А. М. Константинов ос мирн ва̄нэ мо̄т хо̄тпат рӯпитэ̄гыт. Яныгпа̄ла хо̄тпат янытлан хо̄тал э̄лыпа̄лт ты Советыт рӯпитан ма̄хум яныг сапра̄нин акванатхатыгласыт ос соссаӈ ма̄хум тув во̄виньта̄лсаныл. Тагир Аюпов та̄н нупыланыл ла̄выс: «Ма̄ньщи, ханты ма̄хум пе̄с пора та̄гыл тыт о̄лэ̄гыт ос та̄нки ла̄тӈаныл ос ва̄рмаляныл э̄лаль тотыяныл. Ань тыт са̄всыр мирыт о̄лэ̄гыт, та̄нки халанылт юртыӈыщ вос о̄лэ̄гыт, тыи ма̄гсыл ма̄навн аквъёт рӯпитаӈкве э̄ри. Ма̄ньщи, ханты хо̄тпат ты Советыт о̄с вос рӯпитэ̄гыт». Д. В. Герасимова, Югорский университетт рӯпитан э̄ква, ла̄выс: «Ань мо̄т ма̄ныл ёхтум мирыт то̄ва порат тыт о̄лнэ соссаӈ ма̄хум ат янытлыяныл. Тамле ва̄рмаль таи ма̄гсыл о̄лы, та̄н ма̄н пе̄с йис ва̄рмалянув ат ва̄ганыл. Ань ма̄навн са̄всыр ялпыӈ хо̄талыт аквъёт ва̄рыглаӈкве ос тыт о̄лнэ са̄всыр мирыт тув во̄выглаӈкве э̄ри». Сапра̄нит тыт кит Советыгт рӯпитан ма̄хум э̄лаль аквъёт рӯпитаӈкве потыртахтасыт. Ханты-Мансийск ӯс мирколыл ке̄тум ля̄ххал ма̄ньщи ла̄тӈыл Людмила ТЕТКИНА хансыстэ. 1085 2014.10.10. Тамара МЕРОВА Ня̄врамыт туи ёмщакв ӯщлахтасыт. Наталья Ткачук, Ханты-Мансийск ӯст А̄с-угорский институтт рӯпитан нэ̄, тав соссаӈ ма̄хманув ань о̄лнэ о̄лупсав ханищтытэ ос нэ̄пакн хансытэ. Ма̄н газетав ва̄рнэ колувн то̄внакт щалтапа̄лы ос ма̄ньщи па̄вылт о̄лнэ хо̄тпанув о̄вылтыт потрыт ос та̄н хурияныл тоты. Ты туи Наталья Ня̄хщамво̄льн ялыс ос ня̄врамыт ӯщлахтан тэ̄ланыл урыл матыра̄ти та̄рапаттыс. Ань ты о̄вылтыт ма̄н ты потрыт щё̄питасанӯв. Инесса кА̄ркам А̄гирищкве урыл – Паща о̄лэ̄н, ам намум Инесса Номина, ты та̄л ам о̄выл щёс школан минасум. А̄нумн ма̄ньщи ла̄тыӈ ханищтаӈкве сака мӯсты. Ма̄н Наталья Константиновна Самбиндалован ханищтаве̄в. Ань тамле ма̄ньщи ла̄тӈыт ва̄ганум: ома, пил, мис, лув, кӯтюв ос мо̄т са̄всыр ла̄тӈыт ханищтыянум тах. Ам кит ма̄нь йӣгрищ о̄ньще̄гум, тыи Эвелина, тав нила та̄лэ то̄влыс ос Мирослава ущтынув самын патыс. Ам щар яныг, таима̄гыс омамн акваг нё̄тэ̄гум. Ма̄нь йӣгрищагум ёмщакв ӯриягум. Ам са̄всыр стихыт ва̄гум. А̄нумн Агния Барто хансум «Я выросла» стихе сака мӯсты, ам таве акваг ловиньтылум. Школат ам ёмщакв, номтыӈыг ханищтахтуӈкве тах патэ̄гум. Туи ӯщлахтын пора Ня̄хщамво̄ль па̄выл сака нё̄тнэ ма̄т ӯнлы. Ма̄хум я̄т хӯл алыщлэ̄гыт, ӯщлахтэ̄гыт, во̄рт са̄всыр пил ос ла̄хыс атэ̄гыт, тот лылые̄пе сыстам. Света ос Виталий Побокиныг Ня̄хщамво̄льт самын патсы̄г, тот о̄лэ̄г. Света ань атыт классыт ханищтахты, Виталик китыт классыт. Тэ̄н туи ӯщлахтын поратэ̄н о̄вылтыт тох потыртасы̄г: – Ме̄н туи ща̄нягме̄на̄щагме̄н ёт Усть-Манья̄н акваг ялантыме̄н. Тот са̄в ӯсморах яныгми, пил ва̄тэ̄в. Тув порат мотор ха̄пыл хо̄т щё̄с тув минуӈкве э̄ри, тэ̄лы туп акв щё̄с тув минэ̄в. А̄тяме̄н ла̄выс, Ме̄сыг я̄в тыглетувле щакара̄лы, таима̄гыс ма̄н хоса минэ̄в. Ос тэ̄лы я̄тэ тувпо̄ляве, таима̄гыс лё̄ӈхе сохтыл ва̄раве. Усть-Маньян миннэ̄в мус ма̄н кит ма̄нь ма̄ньщи па̄влыг ос во̄р колыт та̄ра минэ̄в. Ма̄н то̄внакт хотты ма̄т ща̄й аюӈкве па̄гпӯхтыглэ̄в. Ма̄ньщи па̄влыг тыи: Холпа̄выл ос Яныгпа̄выл. Тувыл ляпат овнэ я̄т наманыл о̄с ва̄ганме̄н: Няйс, Лэ̄пла, Тапсуй, Та̄гт я̄. Школат сочинение хансуӈкве ла̄ваве̄в ке, ам Усть-Манья урыл хансэ̄гум. Тав нё̄тнэ карс уранэ нупыл сунсуӈкве а̄нумн сака мӯсты. Акв уре ма̄хумн во̄рто̄лн э̄кваг намтвес. Па̄вылт о̄лнэ хум Толя Ивукин мисыт, лувыт о̄ньщи. Ма̄н тот о̄лмувт ӯйхулыт нупыл суссӯв, а̄лпыл та̄н та̄нки я̄ ва̄тан вит аюӈкве минэ̄гыт ос хо̄тал палыт пум яныгман ма̄т ё̄мыгтэ̄гыт. Нё̄тнэ сэ̄мыл лувыт мощ вотгащлаӈкве таххаты кос, туп та̄н ляпан нэ̄мхотьют ат та̄ртэ̄гыт. Та сыс Виталик мовалас ос э̄лаль потыртас: – Ма̄н колувн ёхтынэ̄в порат па̄вылт такем суиӈыг е̄мты. Кол по̄хан а̄мпыт, лувыт, мисыт пуссын атхатэ̄гыт. Пӯсас та̄ра а̄ӈквата̄лэ̄гыт, аквтупмат китыглахтэ̄гыт: «Хотьют ёхтыс? Сунсуӈкве э̄ри». Ты а̄гирищигпыгрищиг туи ӯщлахтан поратэ̄н пӯмщиг, ка̄сыӈыг минас. Ань тэ̄н ла̄ве̄г, мӯй ма̄хум та̄н палтаныл ёхталэ̄гыт ке, та̄н пуссын ща̄гтым о̄лэ̄гыт. Туи Ханты-Мансийсканыл Олеся Ткачук увщитэ̄н мӯйлуӈкве ёхталас. Таве̄н Усть-Маньят о̄с сака мӯстыс, мо̄тыт та̄л о̄с ёхталаӈкве таӈхи. Ты потрыг ма̄ньщи ла̄тӈыг Тамара МЕРОВА толмащласаге. 1086 2014.10.20. Людмила СПИРЯКОВА Са̄ккон хаснэ хо̄тпат сапра̄нияныл о̄лыс. Ты э̄тпос 14 хо̄талэ̄т округ Думат рӯпитан депутатыт са̄всыр са̄кконыт пирмайтасыт. Округувт рӯпитан са̄ккон щирыл, ань вина э̄типа̄ла 8 щё̄с мус ла̄пкат тыналаве. То̄ва депутатыт ла̄ве̄гыт, ты са̄ккон мо̄т щирыл хансуӈкве э̄ри ос вина э̄типа̄ла 10 щё̄с пора мус вос тыналаве. Ма̄хум мощщанув вина аюӈкве ат патсыт. Ань ма̄хум хумус ва̄ре̄гыт, ла̄пка лаппантнэ э̄лыпалт са̄внув вина ёвтэ̄гыт ос тувыл пулигайхатэ̄гыт, мори та капыртэ̄гыт. Ла̄пкат ӣти мус вина тыналаӈкве ке патаве, та̄н тох ва̄руӈкве ат патэ̄гыт. Борис Хохряков ос ла̄выс, ма̄хум ань сака са̄в вина ат ае̄гыт ос лю̄ль сака ат ва̄ре̄гыт. Ты са̄ккон ёмащакв рӯпиты, тэ̄ла та̄л мо̄тмо̄т щирыл таве хансуӈкве ат э̄ри. Сапра̄нит ма̄хум о̄с акв йильпи ва̄рмаль урыл потыртасыт. Ка̄сыӈ э̄лумхо̄лас о̄лнэ колэ ма̄гсыл налоголн о̄йты. Ань «налоговый кодекс» яныг нэ̄пакт мо̄т ва̄рмаль урыл хасвес, тыи ма̄гсыл округувт ос тамле са̄ккон пирмайтавес. Ма̄н о̄лнэ коланув ма̄гсыл «кадастровый оценка» нампа нэ̄пак щирыл налоголн ойтуӈкве тах патэ̄в. Ты нэ̄пакыт кол тынэ янгыг хансаве, тыи ма̄гсыл са̄в олн тув ойтуӈкве тах патэ̄в. Йильпи налоголн ма̄н 2016 та̄л па̄сныл ойтуӈкве о̄вылтахтэ̄в. Кӯщаит ла̄ве̄гыт, тыщирыл округ бюджетн са̄в олн ювле ёхтуӈкве паты тах. Акв та порат ма̄хум 2015 ос 2016-2017 та̄лыт кастыл хансым бюджет урыл о̄выл щёс потыртасыт. Мо̄т сапра̄нит та̄н ты са̄ккон урыл потыртаӈкве о̄с тах патэ̄гыт. 1086 2014.10.20. Людмила ТЕТКИНА Соссаӈ мир ма̄гсыл хансым нэ̄пакыт. Геннадий Бухтин, губернатор ва̄ӈын хум, соссаӈ ма̄хум ос са̄всыр департаментыт рӯпитан хо̄тпат сапра̄нин во̄выгласанэ. Та̄н тот ма̄ньщит, хантыт ос ё̄рн мирыт культураныл ос ща̄нь ла̄тӈаныл ханищтан нэ̄пакыт урыл потыртасыт. О̄влэ̄т Дмитрий Осминкин, общественный связь департаментыт рӯпитан хум, ла̄тыӈ ла̄выс. Тав ла̄внэ̄тэ щирыл, ты та̄л сыс та̄н 4 со̄тыра 800 са̄вит нэ̄пак та̄ратасыт. Ты халт та̄н Еремей Айпин, округ Думат соссаӈ ма̄хум Ассамблея кӯщай хум, «Божья матерь в кровавых снегах» нэ̄паке ос Владимир Енов, «Ханты ясаӈ» газетат рӯпитан хум, мо̄йтанэ ос са̄в мо̄т ма̄хум хансум нэ̄паканыл та̄ратасыт. Ань са̄в э̄лумхо̄лас та̄нки нэ̄паканыл та̄н палтаныл тотыяныл. Ты нэ̄пакыт та̄ратан ма̄гсыл 14 миллион солко̄ви тах э̄рмыглы, ты та̄л та̄н туп хӯрум миллион солко̄вил майве̄сыт. Дмитрий Осминкин ла̄выс, соссаӈ ма̄хум пе̄с йис ва̄рмаляныл ос ла̄тӈаныл урыл хансым нэ̄пакыт ма̄гсыл са̄внув олн та̄стуӈкве э̄ри. Надежда Казначеева, культура Департамент кӯщай нэ̄, ты урыл о̄с потыртас. Та̄л сыс соссаӈ ма̄хум пе̄с йис ва̄рмаляныл э̄лаль тотнэ ма̄гсыл яныгса̄т арыгкем са̄всыр ханищтапыт, ялпыӈ хо̄талыт ос мо̄т тэ̄лат ва̄рыгласыт. Округ янытыл рӯпитан библиотекат ань соссаӈ ма̄хум урыл хансым 7 со̄тыра 200 нэ̄пак о̄лы. Ань таи ёмас, то̄ва нэ̄пакыт интернет хосыт ловиньтаӈкве ро̄ви. Ханищтап щирыл рӯпитан департамент манхурип рӯпата ва̄ри, ты урыл Ирина Лисютина ла̄тыӈ ла̄выс. Ань А̄с-угорский институтт рӯпитан хо̄тпат ня̄врамыт ма̄гсыл ма̄ньщи ос ханты ла̄тӈыл ханищтан нэ̄пакыт хансэ̄гыт, та̄ратэ̄гыт. Югорский университетт соссаӈ ма̄хум ма̄гсыл ань институт ва̄рвес. Тот ма̄ньщи, ханты ос ё̄рн ня̄врамыт ханищтавет. Сапра̄нит ма̄хум ханты мир алфавит урыл потыртасыт. Евдокия Андреевна Нёмысова, ханты мир учёный э̄ква, мо̄т учёныйхо̄тпат ёт йильпи алфавит ва̄руӈкве таӈхе̄гыт, ты ва̄рмаль урыл хо̄та̄ти акваг потыртэ̄гыт. Геннадий Бухтин та̄н нупланыл ла̄выс, о̄влэ̄т ханты ла̄тӈыл ня̄врамыт ханищтан хо̄тпат ос газета ловиньтан ма̄хум вос китыглыяныл, хоты алфавит та̄нанылн а̄ртми, ос та юипа̄лт ущ алфавитаныл мо̄т щирыл вос хансыяныл. 1086 2014.10.20. Тамара МЕРОВА А̄гитпыгыт та̄ксарыг яныгме̄гыт. Нягань ӯст ня̄врамыт ма̄гыс «Патриот» нампа ханищтан ос ӯщлахтын кол о̄лы. Округ губернатор Наталья Комарова та ӯсн ялме порат тув щалтсас ос тот рӯпитан хо̄тпат, а̄гирищитпыгрищит ёт ва̄йхатас. Ня̄врамыт нила тэ̄латытн тот э̄лаль ханищтавет. Пыгыт армият лусытан ма̄гыс та̄ксар хо̄тпаг о̄луӈкве щё̄питавет ос самын патум ма̄наныл вос э̄руптасаныл. Пуста̄лыг ос ё̄рыг о̄лнэ ма̄гыс са̄всыр спортивный колнакыт тот рӯпитэ̄гыт. Лув тармыл яласаӈкве ханищтавет. Тувыл во̄рт хумус о̄луӈкве ро̄ви, ня̄врамыт ма̄ньта̄гыл тамле ва̄рмалит ва̄ӈкве о̄с ханищтавет. Наталья Комарова, округ Дума кӯщай хум Борис Хохряков ос мо̄т кӯщаит о̄влэ̄т каснэ колнакыт суссыт. Акв колнакт а̄гирищитпыгрищит ме̄чикыл ёнгасасыт, мо̄т колнакыт писалил патлумтасыт. Губернатор нэ̄ писаль ка̄тн вуйлас, тав о̄с мощ па̄тлуптаӈкве таӈхыс. Тувыл мӯй хо̄тпат «Афганец» нампа клубн ялантан ня̄врамыт ёт хо̄нтхатыгласыт. Андрей Еськов, тот пуӈктотнэ хум, са̄всыр ханищтапыт урыл потыртас. Ня̄врамыт маныр тот ва̄ре̄гыт, ты о̄вылтыт кина суссылтас. То̄ва пыгрищит парашютыл поргуӈкве ха̄сэ̄гыт, мо̄таныт аквалангыл витт мӯрсалэ̄гыт. Туи нё̄р ляпан тотыглавет, та̄н альпинистыт хольт ха̄хталахтын яласэ̄гыт. Пуссын ты ва̄рнэ ёнгилыт кастыл та̄н ё̄рыг, та̄ксарыг е̄мтэ̄гыт. Моще̄ртын школат ГТО нормат ва̄руӈкве патавет. Ты ня̄врамыт тай ёмщаквег ханьщувлым о̄лэ̄гыт. Та̄н ань сыресыр касылын тотыглавет ос тот но̄хпатэ̄гыт. Юио̄выл та̄лытыт ты клубн а̄гирищит ялантаӈкве о̄с ка̄саще̄гыт. Та̄нанылн тот пӯмыщ, та̄н аквтох пе̄рщуӈкве, пилта̄лыг парашютыл поргуӈкве таӈхе̄гыт. Армияныл ёхтум хӯрум пыгыт яныг кӯщаит ёт о̄с потыртасыт. Та̄н «Патриот» центрын ма̄ньта̄гыл ялантасыт. Тот ханищтам ва̄рмалит лусытыманыл сыс пуссын сака э̄рмыгласыт. Нягань ӯст о̄лнэ хо̄тпат ты ханищтан ос ӯщлахтын центраныл сака янытлыяныл. Тувыл ня̄врамыт губернатор нэ̄н ла̄вве̄сыт: «Ань Украина ма̄ныл тыг са̄в ма̄хум ёхтэ̄гыт. Тувыл ёхтум ня̄врамыт на̄н ётын школат ханищтахтуӈкве патэ̄гыт ке, манос ты центрын ялантаӈкве патэ̄гыт – на̄н та̄нанылн нё̄тэ̄н, та̄н ётаныл аквтох юртыӈыщ о̄лэ̄н». 1086 2014.10.20. Николай МЕРОВ Яныгпа̄ла хо̄тпат нё̄тавет. Ты э̄тпост Мария Геннадьевна Краско, мирн нё̄тмил ва̄рнэ Департаментыт рӯпитан кӯщай нэ̄, ля̄ххал тотнэ ма̄хум акванатыгласанэ. Ань яныгпа̄ла хо̄тпат ос нусаг о̄лнэ ма̄хум маныр нё̄тмилыл ва̄равет, тав ты урыл потыртас. На̄н тав потре э̄лаль ловиньтэлы̄н: На̄н пуссын ва̄глы̄н, округувт о̄лнэ яныгпа̄ла хо̄тпат, э̄кват 55 та̄л, о̄йкат 60 та̄л порат пенсиян минэ̄гыт. Ма̄н лӯи ма̄т о̄лэ̄в, таима̄гыс са̄ртыннув пенсиян минэ̄в. Яныгпа̄ла хо̄тпат ма̄гыс нё̄тмилыт пуссын ла̄кквауртым о̄лэ̄гыт. Яныг хо̄нт порат хо̄нтлум хо̄тпат, хо̄нт порат юн са̄всыр рӯпата ва̄рум хо̄тпат ос мо̄т са̄всыр ма̄т хо̄нтлум ма̄хум я̄нас щирыл нё̄тавет. Округувт атхуйплов арыгкем та̄л рӯпитам яныгпа̄ла хо̄тпат, пенсияныл коныпал губернатор па̄лыл арыг олныл ойтавет. Та̄н ань пуссын пенсияолн винэ ма̄хманув округ янытлан хо̄тал кастыл акв щёс премияолныл майлавет. Тувыл хотьют «Сотрудничество» нампа программа щирыл Тюмень ӯсн о̄луӈкве минас, та хо̄тпат о̄с ат ёрувлавет, та̄н тот о̄с премияолныл ойтавет. Яныгпа̄ла хо̄тпат ты ва̄рмаль щирыл акваг нё̄тавет: олныл мивет, путёвка щирыл ӯщлахтын ма̄н ке̄тыглавет, ӯлщпуӈкыл ӯнттавет ос тэ̄рпил мивет. Россия янытыл яныгпа̄ла хо̄тпат лов со̄тыра арыгтем пенсияолн выгыт. Югра ма̄т ма̄хманув ос хо̄тхуйплов со̄тыра арыгтем солко̄вил ойтавет. Хо̄нтлум ма̄хманув ос хотьют ущтынув пенсиян патсыт, та̄н тыгыл иӈ са̄внув пенсияолныл ойтавет. Ос тамле хо̄тпат о̄лэ̄гыт, хотьют матыр ва̄рмаль щирыл щар мощща пенсияолныл ойтаве. Ты тэ̄ла щирыл ань о̄с яныг рӯпата ва̄раве. Мощща олн винэ хо̄тпат пенсияныл ла̄щалла̄щал но̄хнё̄туӈкве тах патаве. Округувт пуссын аквъёт 387 со̄тыра пенсияолн винэ хо̄тпа о̄лы. А̄гмыӈмосыӈ хо̄тпат ос ща̄ньа̄щ та̄л хультум ня̄врамыт о̄с тув пуссын акванловиньтавет. Мария Геннадьевна о̄с акв ва̄рмаль урыл потыртас. Мо̄тынтыг яныг хо̄нт оигпаме па̄сныл 70 та̄л то̄влы. Ты кастыл ветераныт о̄лнэ коланыл хотщё̄питаӈкве патавет. Югра ма̄т пуссын аквъёт 1 со̄тыра 800 хо̄нтлам хо̄тпа ты ва̄рмаль щирыл нё̄туӈкве э̄ри. Та̄н коланыл 2015 та̄л я̄ӈк на̄тнэ э̄тпос мус тах щё̄питавет. 1086 2014.10.20. Людмила ТЕТКИНА Мощщаг хультум мирыт хо̄н ма̄т атхатыгласыт. Сӯкыр э̄тпост США ма̄т Нью-Йорк ӯст ООН штабквартират ма̄ янытыл о̄лнэ соссаӈ ма̄хум яныг сапра̄нин акванатхатыгласыт. Россия ма̄ныл ма̄хум тув о̄с ялсыт. Россия соссаӈ ма̄хум Ассоциацияныл, ос «Союз общин» нампа организацияныл ос финноугрыт халт делегатыт пе̄риялве̄сыт. Ма̄н округувныл Геннадий Бухтин, губернатор ва̄ӈын хум, ос Александр Новьюхов, «Югра лылые̄п» организация кӯщай хум, яныг сапра̄нин ялсы̄г. Александр Вячеславович ла̄выс, та̄н тот кит хо̄тал сыс рӯпитасыт, соссаӈ ма̄хум та̄рвитыӈ ва̄рмаляныл урыл потыртасыт. 2007 та̄лт ты мирыт ма̄гсыл ООН яныг нэ̄пак пирмайтасыт, рущ ла̄тӈыл «Декларация по правам коренных народов мира» намаим о̄лы. Тот хансым о̄лы, соссаӈ ма̄хум та̄нки пе̄с йис ма̄т вос о̄лэ̄гыт ос та̄нки пе̄с ва̄рмаляныл, ла̄тӈаныл э̄лаль вос тотыяныл. Ты ма̄ныл ма̄хум нэ̄мхотьютын хотня̄влуӈкве ат ве̄рмавет. Ань ма̄ янытыл то̄ва государстват ты нэ̄пак щирыл рӯпитэ̄гыт ос мо̄таныт таве пирмайтаӈкве щар ат ка̄саще̄гыт. Ма̄ янытыл о̄лнэ государстват мощщаг хультум мирыт та̄рвитыӈ ва̄рмаляныл ул вос ёрувлыяныл ос та̄н акваг вос нё̄тавет, 2004 та̄лт ООН нэ̄пак пирмайтавес, рущ ла̄тӈыл «Второе десятилетие коренных народов мира» намаим о̄лыс. Ты лов та̄л сыс манхурип рӯпата ва̄рвес, яныг сапра̄нит ма̄хум о̄с потыртасыт. ООН ма̄т Россияныл Виталий Чуркин акваг рӯпиты. Россияныл ёхталам ма̄хум ты кӯщай ёт хо̄нтхатыгласыт ос та̄нки тэ̄ланыл урыл таве̄н потыртасыт. 1086 2014.10.20. Тамара МЕРОВА Ма̄витув ӯргалан ва̄рмалит. Сергей Пикунов, ма̄вит ӯргалан службат кӯщай хум, ля̄ххал тотнэ хо̄тпат ма̄гыс тамле ла̄тыӈ ла̄выс. Тав округ янытыл ма̄вит ос во̄руй уральтан тэ̄лат урыл потыртас. Ань ма̄витув ка̄сыӈ та̄л арген па̄ӈктуӈкве патвес. Сергей Владимирович ла̄выс: «2013 та̄л сыс ма̄н палтув ма̄хум 246 полыщ тотнэ нэ̄пак ке̄тыгласыт. Тыгыл 45% са̄виткем ма̄хум та̄нки хо̄та̄ти порс мори па̄хвтэ̄гыт. Ты та̄л онтолов э̄тпос сыс 244 полыщ тотнэ ла̄тӈыл ке̄твесӯв. Тамле тэ̄лат ма̄н пуссын уральтыянӯв. Лю̄ль нак ва̄рнэ рӯпитан колыт манос хо̄тпат шрафыл пиныянӯв. Мо̄лты та̄лт 3 со̄тыра 578 рӯпитан колыт порс ва̄рнэ щирыл та̄рапаттуве̄сыт. Тувыл 3 со̄тыра 16 тэ̄лат палт ма̄н олн ойтнэ нэ̄пак хасылтасӯв. Та щирыл са̄всыр организацияныл 50 млн. солко̄ви атуӈкве э̄рыс. Ань тыг мус 2 со̄тыра 947 тэ̄лат ма̄гыс ма̄н 44 млн. 127 со̄тыра солко̄ви атсӯв. Мо̄таныт иӈ ат ойтхатасыт. То̄ванакт олныт сут та̄ра выганӯв. Ма̄во̄й но̄хвинэ компаният халт «Роснефть» ос тав ётэ рӯпитан «РН-Юганскнефтегаз» нампа колыг тэ̄н ма̄витув сака па̄ӈктытэ̄н». Яныг ӯсыӈ ос па̄влыӈ ма̄т ма̄хум порсанят мори ва̄ре̄гыт. Тамле лю̄ль накыт то̄ванакт ЖКХ рӯпитан колыт о̄с та̄рапаттавет. 2013 та̄лт са̄всыр ма̄тт 338 тамле порсанят хо̄нтве̄сыт, тыгыл 309 хотщё̄питаве̄сыт. Ты та̄л 135 ма̄ хотщё̄питаӈкве а̄лымаве̄сыт. Айнэ вит о̄с уральтавес. Тот 98% уральтым ма̄т витэ̄т са̄в витхурип ке̄р ща̄лыг хо̄нтвес. Порсыт мори хуигланэ̄ныл ма̄гыс, тувыл ма̄во̄й ос газ хо̄та̄ти со̄ссантан щирыл я̄т ос тӯрыт сака па̄ӈктаве. Тувыл то̄ва ЖКХ ма̄т, янгыщ Нефтеюганск ос Нягань ӯсыгт, вит сыстамтан утыт щар пе̄сыг е̄мтсы̄т. Ма̄во̄й тотнэ турпат о̄с пе̄сыт. Та̄н о̄с ма̄ сака па̄ӈктыяныл. Тамле лю̄ль ва̄рмалит пуссын витн тэ̄лыгтахтэ̄гыт ос витув аюӈкве ат хо̄йхаты, таве са̄в щёс сыстамтаӈкве э̄ри. Ань ты ва̄рмалит акваг уральтым о̄ньщавет. 1086 2014.10.20. Валентина УЗЕЛЬ Ня̄врамыт округувт вос ханищтахтэ̄гыт. Югорский университет яныг кӯщаиг Татьяна Дмитриевна Карминская рӯпиты. Ты э̄тпос тав ля̄ххал хаснэ ма̄хумн ва̄рнэ рӯпатаныл ос ЮГУ урыл потыртас. Ты этпост ЮГУ рӯпитанэ̄тэ па̄сыл 13 та̄лэ то̄влыс. Ты ханищтан кол рӯпитаӈкв о̄вылтахтаме порат Ханты-Мансийск ӯст рӯпитан са̄всыр институтыт пуссын тув тотве̄сыт. Ань тот ня̄врамыт ханищтым са̄в хо̄тпа рӯпитэ̄гыт, та̄н халанылт са̄выӈпа̄лэ пуссын учёный нам о̄ньще̄гыт, са̄в хо̄тпа наукат «доктор» нам о̄ньще̄гыт, са̄в хо̄тпа «кандидатыг» е̄мтсыт. Кос хо̄т ня̄врамыт ханищтан ва̄рмаль ань йильпи щирыл ва̄раве. ЮГУт ка̄сыӈ ханищтан хо̄тпа такви я̄нас программа хансы. Ос ты э̄лыпа̄лт та̄н планнэ̄пакыл майлуве̄сыт, тот хансым о̄лыс ня̄врамыт хумус ханищтаӈкв э̄ре̄гыт, манхурип лекция та̄н ма̄гсыланыл ловиньтаӈкв э̄ри. Татьяна Карминская ла̄выс, ты тал та̄н университетаныл нупыл тит колыг хасвесы̄г ты Нижневартовский нефтяной техникум ос Нефтеюганский индустриальный колледж. Ань та̄н ма̄во̄й но̄хвинэ ма̄т рӯпитан кӯщаитн ла̄вавет, манхурип специальность щирыл ня̄врамыт ханищтаӈкв э̄ре̄гыт, манхурип специалист ат то̄вылхаты. Та̄рапатыс, бурильщикыг рӯпитан ма̄хум сака мощща, са̄внув хо̄тпа ты рӯпатан ханищтаӈкв тах патавет. Тувыл э̄лаль кӯщай нэ̄ потыртас, ты 2014 та̄лт манах хо̄тпа университетн ханищтахтуӈкв ёхтыс. Туи порат 3 со̄тыра 709 хо̄тпа заявление хассыт, ос та ма̄хумныл 1 со̄тыра 417 хо̄тпа тот хультуптаве̄сыт: 908 хо̄тпа очный щирыл ханищтахтэ̄гыт, 509 хо̄тпа – заочно. Ты а̄гитпыгыт халт то̄ват ханищтахтынэ̄ныл ма̄гыс олн ойтуӈкв патэ̄гыт. Ка̄сыӈ та̄л са̄внув ня̄врам тув ханищтахтуӈкв ёхты. Та̄н нила та̄л тот ханищтавет. То̄ват ка̄саще̄гыт те, иӈ тит та̄л э̄лаль тах ханищтахтэ̄гыт, ты рӯпата рущ ла̄тӈыл тох ла̄ваве – магистратура. Тот хо̄тпа ма̄к мӯсхал рӯпатан ханищтаве. ЮГУ а̄стлам хо̄тпат рӯпата хо̄нтуӈкв о̄с нё̄тавет. Югорский университет а̄стлам 250 хо̄тпа «Ханты-Мансийский банкыт» ань рӯпитэ̄гыт. Ты та̄л округувныл са̄всыр ӯсытныл, па̄влытныл 455 хо̄тпа тув ханищтахтуӈкв ёхтыс, Ханты-Мансийск ӯсныл 225 хо̄тпа. Мо̄т мир пуссын са̄всыр мо̄т э̄лы ма̄ныл ёхтысыт. 1086 2014.10.20. Тамара МЕРОВА Йильпи ханищтан нэ̄пакыт вос хансавет. Школат соссаӈ ня̄врамыт ханищтан хо̄тпат Ханты-Мансийск ӯсн акванатыглаве̄сыт. Та̄н наука ос образование департамент ос А̄с-угорский институт па̄лыл тув во̄виньта̄лве̄сыт. Ма̄хум ня̄врамыт ханищтан нэ̄пакыт урыл потыртасыт. Ты ва̄рмаль урыл Майя Ефимовна Макарова, региональный образование институтт рӯпитан нэ̄, тох ла̄выс: – Ма̄навн школат рӯпитан соссаӈ хо̄тпат ла̄тыӈ ке̄тсыт. Та̄н школат ханты, ма̄ньщи ос ё̄рн ла̄тыӈ ханищтан щё̄сыт ма̄гыс олныл ойтуӈкве моще̄рт ёл ты по̄илттавет. Ты ва̄рмалит ань хосат хансым нэ̄паканув ма̄гыс е̄мтсыт. Ань образование палт са̄кконыт мо̄т щирыл щё̄питаве̄сыт. Федеральный государственный образовательный стандартыт, рущ щирыл ФГОС, хансым о̄лы, ня̄врамыт ат та̄л ювлехультум порат хансым нэ̄пакыт щирыл ханищтаӈкве ве̄рмавет. Ты э̄лыпа̄л та̄ратым нэ̄пакыт пуссын пе̄сыг ловиньтавет. Ханищтан нэ̄пакыт пуссын уральтаве̄сыт ос ётыл та̄н акв реестрын хасве̄сыт. Туп тув хансым нэ̄пакытыл ня̄врамыт школат ханищтаӈкве ро̄ви. Соссаӈ ла̄тӈанув ханищтан нэ̄пакыт, ва̄им, тув ат хасве̄сыт. Ма̄н нэ̄паканув пуссын хус манос ва̄т арыгкем та̄л ювле хультум порат щё̄пита̄лве̄сыт. Йильпи нэ̄пакыт ма̄н ат о̄ньще̄в. Ань округувт образование тармыл о̄лнэ кӯщаит ат ва̄ганыл, хумус соссаӈ ла̄тӈыт ханищтан хо̄тпатн э̄лаль рӯпитаӈкве э̄ри. Манрыг ма̄н тамле нэ̄пак ат о̄ньще̄в, хотты хо̄тпаныл ань китыглаӈкве, ма̄н о̄с ат ва̄глӯв. Рущ ла̄тыӈ ос мо̄т предметыт ханищтан нэ̄пакыт хаснэ ма̄гыс са̄всыр институтыт рӯпитэ̄гыт. Тот са̄в учёный хо̄тпат э̄рнэ щирыл нэ̄пакыт хансыяныл. Ща̄нь ла̄тӈыт ханищтан нэ̄пакыт ка̄сыӈ республика ос округ та̄нки щё̄питаӈкве ла̄вве̄сыт. Округувт ты рӯпата ва̄руӈкве нэ̄мхотьют ат вуйхатас. Ма̄н институтувт о̄влэ̄т лаборатория о̄лыс, ня̄врамыт хумус ханищтаӈкве э̄ре̄гыт, тот ма̄н ханищтан хо̄тпат хӯлтыглаӈкве туп ве̄рмысанӯв. Нэ̄пакыт ма̄нки ат хассӯв. Ща̄нь ла̄тыӈ ханищтан нэ̄пакыт щирыл хӯлтыглан потрыт ва̄рыгласӯв. Ётыл нэ̄пакыт хансуӈкве А̄с-угорский институт ма̄хум ла̄вве̄сыт. Та̄н ловиньтан нэ̄пакыт та̄ратасыт кос, ос ань ня̄врамыт ма̄гыс э̄рнэ букварит а̄тимыт. Ты нэ̄пакыт пуссын «типовой» нампа программа щирыл ва̄равет, ос ща̄нь ла̄тыӈ ханищтан программа нэ̄мхотьют щё̄питаӈкве ат вуйхаты. Ма̄н ань ты ва̄рмалит та̄рапаттын ма̄гыс ханищтан хо̄тпат ёт акванхо̄нтхатыгласӯв. Акваннё̄тхатым йильпи нэ̄пакыт хаснэ урыл потыртахтасӯв. 1086 2014.10.20. Тамара МЕРОВА Лю̄ль нак та̄рапаттувес. Ты э̄тпост госнаркоконтроль тэ̄лат тармыл рӯпитан кӯщай Алексей Якименко ля̄ххал тотнэ хо̄тпат ёт хо̄нтхатыглас. Тав Сургут ӯс ос районытыт осннэ̄глум лю̄ль ва̄рмаль о̄вылтыт потыртас. Тот акв са̄т сыс 200 са̄вит хо̄тпат пӯльницан тотыглаве̄сыт. Ты э̄лыпалт та̄н ва̄та̄л та̄ври ёвтыгламыт ос тувыл хохсаг хартнэ̄ныл юипа̄лт савалаӈкве патсыт. Нёлолов хо̄тпат а̄тимыг е̄мтыс. Ты ма̄хум пуссын наркотик хосыт о̄лэ̄гыт. 68 э̄лумхо̄лас пӯльницат хультсыт, мо̄таныт э̄лаль пусмалтахтуӈкве ат ка̄сащасыт, юв минамыт. Округувт наркоконтроль тэ̄лат палт рӯпитан хо̄тпат губернатор ос мо̄т кӯщаит ёт акванхо̄нтхатыгласыт ос та̄н ётаныл акваннё̄тхатым ты тэ̄лат уральтаӈкве потыртахтасыт. Полицият рӯпитан хо̄тпат ты лю̄ль нак ва̄рнэ хо̄тпат са̄всыр ма̄т э̄тэхо̄талэ уральтым о̄щсаныл, ос лю̄ль тэ̄рпи тыналан ма̄т та̄рапаттысаныл. Мо̄тмо̄т ма̄т та̄н наркотикыт тыналан ат хо̄тпа пувсыт. Ты хо̄тпат ищхӣпыӈ ут хосыт манос ще̄пт о̄щнэ телефон щирыл потыртахтым ма̄хумн ты лю̄ль тэ̄рпит тыналэ̄гыт. Наркотик хартнэ хо̄тпа ла̄ваве, хоты ма̄н таве̄н олн пинуӈкве э̄ри, ос тувыл мо̄т ма̄т лю̄ль тэ̄рпил пинаве, тав ань ханьщувлым о̄лы, тувыл акваг та выганэ. Сургутыт матахмат тамле ма̄ хо̄нтвес, та̄н ӯс картан по̄слым о̄лнэ̄ныл ос туп э̄рнэ хо̄тпатн та̄н ва̄вет. Ты ат хо̄тпа ма̄гыс «уголовное дело» нэ̄пакыт хасве̄сыт ос пуссын та̄н ва̄рнэ тэ̄ланыл ань уральтаӈкв патавет. Та юипа̄лт Сургут ӯст о̄с нила хо̄тпа пуввес. Ты хум хо̄тпат я̄нас гараж о̄щмыт ос тот тӯлмахыл лю̄ль тэ̄рпит ва̄рмыт. Тувыл та̄нки ос са̄всыр ма̄н пинсаныл. Та̄н мо̄т ӯсыӈ ма̄ныл олн сэ̄луӈкве тув ёхтумыт. Хоты хо̄тпат ёт та̄н рӯпитэ̄гыт, ань э̄лаль та̄рапаттаве. Лю̄ль тэ̄рпи ва̄рнэ ма̄гыс сыресыр лӯптат ос пуӈк манос мо̄т а̄гмыт пусмалтан тэ̄рпит аптекат ёвтнэ̄ныл. Тувыл тыит та̄врииг ва̄рияныл, ос ацетон ман мо̄т сыресыр ут тув пинэ̄гыт, лю̄ль вит ёт мощ тэ̄лыгтыяныл, то̄слыяныл ос наркоманхо̄тпатын та тыналыяныл. Манырсырман та̄ври ва̄раве, манос о̄лы. Аквантэ̄лыгтан утыт пуссын я̄нас наркотикыг кос ат ловиньтахтэ̄гыт. Тувыл сунсэ̄н, хумус ма̄хум пуӈканыл тэ̄лыгтавет ос сыманылма̄йтаныл ётыл а̄гмыӈыг, са̄йтта̄л патэ̄гыт. Ань тамле пилыщмаӈ ва̄рмалит ла̄щмарт ёлпо̄илттаӈкве патавет тах. Сыресыр тэ̄рпит ёмщакв уральтавет ос то̄ват туп ле̄ккарытн хасылтаӈкв патавет. Та̄н ань «психоактивный вещество» ат та̄ратан нэ̄пакн хансым ат о̄лэ̄гыт, таи ма̄гыс гаражт хо̄нтым са̄в утыт наркотикыг ат ловиньтавет. Тот та̄врииг ва̄рим туп матахмат хӯрыгсовыт щё̄питым о̄лсыт. Тувыл э̄лаль хотыл ва̄глӯв, манах хо̄тпа палт та̄н ка̄тн патэ̄гыт ос ты хосыт иӈ манах хо̄тпа порсы. 1086 2014.10.20. Александр ВЬЮТКИН Пальта̄л ма̄хум касыланыл. Мощ мо̄лалнув Ханты-Мансийск ӯст ат хӯлнэ ма̄хум 2015 та̄лт ёсал каснэ касыланыл щирыл прессконференция о̄лыс. Та касыл рущ ла̄тӈыл «XXVIII Сурдлимпийские игры» ла̄ваве. Ля̄ххал тотнэ ма̄хум ёт Эдуард Владимирович Исаков потыртаӈкв ёхталас. Тав «Центр адаптации спорта Югры» каснэ кол тармыл кӯщаиг рӯпиты. О̄влэ̄т Эдуард Владимирович ла̄выс: Тамле касыл ма̄н Россия ма̄вт щар о̄выл щёс ты ва̄раве. Ат хӯлнэ ма̄хум тыт ёмащакв о̄лнэ̄ныл ма̄гсыс са̄в тэ̄ла йильпииг э̄рыс щё̄питаӈкв. Ты Сурдлимпийские щирыл нила касыл ва̄раве. Ёсал хайтуӈкв ос «сноубордыл» касуӈкв патэ̄гыт. Ты касылт ма̄хум акв па̄хвыӈ ёсан тит ла̄гыл акв юипа̄лт тӯщтым щирыл сып пуӈкныл ёл тахамтым касэ̄гыт. Та коныпал иӈ хоккей ос «кёрлинг» нампа ёнгил пальта̄л ма̄хум халанылт касуӈкв патэ̄гыт. Сыпныл тахамтан касыл Магнитогорск ӯс по̄хат «ММК–Курорт» нампа ӯщлахтын ма̄т каснэ ма̄наныл е̄мты. Ма̄н округувт о̄лнэ сыпанув а̄ти тамле карсыт ос па̄хвыӈыт, мансавиттем та̄нанылн э̄ри. Ля̄ххал тотнэ хо̄тпат титыглахтасыт: Манса̄вит хо̄н ма̄ныл ос манах каснэ ма̄хум тыг ёхты? Тувыл каснэ мир халт округув ма̄гсыл манса̄вит хо̄тпа касуӈкв паты? Ма̄ янытыл ва̄т нупыл хо̄т э̄лы хо̄н ма̄ныл мир тыг ёхтуӈкв ла̄вхатсыт. Аквъёт пуссын 450 каснэ хо̄тпа ёхты. Ма̄н округув ма̄гсыл хо̄т хо̄тпа касуӈкве паты. Та̄н халанылт ат хотпа ёсал ха̄йты, акв а̄ги ос сып пуӈкныл тахамтым касы. Ань та̄н пуссын Германия хо̄н ма̄т, Оберхот ӯс по̄хат ты яныг касылт касуӈкве щё̄питахтэ̄гыт. Хо̄н ма̄ныл ёхталан ат хулнэ ма̄хум ос ма̄н ма̄вит о̄лнэ ат хӯлнэ хо̄тпат халанылт потраныл хумус торгамтыяныл? Ты кастыл на̄н маныр ва̄регы̄н ос хотьют ханищтэгы̄н? Со̄ль, пальта̄л ма̄хум халанылт ат хащхатэ̄гыт. Ты кастыл ма̄н ань хӯрумса̄т арыгтем нё̄тмил ва̄рнэ хо̄тпа ханищтэ̄в. Са̄выӈпа̄лэ пальта̄л ма̄хум ёт рӯпитан щирыл студентыг о̄лнэ ма̄ньла̄т ма̄хум супта̄л потрын ханищтахтэ̄гыт. Та̄н халанылт ёмщакв тит ла̄тӈыл супне̄лмта̄л потыртан атхойполов хо̄тпа о̄лы. Ты коныпал иӈ та̄нти хо̄н ма̄ныл ёхталан супне̄лмта̄л потыртан ма̄хманыл нё̄туӈкв патэ̄гыт. Ам номсэ̄гум, пальта̄л хо̄тпат ёт потрув акв ма̄н ат нопи. 1086 2014.10.20. Николай МЕРОВ Ма̄ньщи хо̄тпаг потре̄н. Клавдия Ефимовна Сайнахова Ха̄льӯс район Ло̄пмус па̄вылт самын патыс. Кульпас па̄выл школа а̄стламе юипа̄лт тав Ханты-Мансийск ӯсн фельдшер нэ̄г ханищтахтуӈкве минас. Та ханищтап а̄стластэ, тувыл 1981 та̄лт Ня̄хщамво̄ль па̄вылн рӯпитаӈкве ке̄твес. Аквматнакт ам та па̄вылн ялсум, тав колэ̄н щалтсасум. Э̄ква такви о̄лупсатэ урыл а̄нумн мощ потыртас. То̄нт о̄йкатэ лылыӈта̄гыл о̄лыс, наме Вячеслав Юрьевич. Ты тал тав а̄тимыг е̄мтыс. На̄н ань Клавдия Ефимовна потре ловиньтэлы̄н. Па̄влувт ма̄н ла̄щлакв о̄лантэ̄в. Мис а̄гирищ о̄ньще̄гум. Ам пӯльницат рӯпитэ̄гум. Ань ос тамле ва̄рмаль е̄мтыс, рӯпатавт то̄ва хо̄тпат по̄хын ке̄тве̄сыт. Са̄ртын а̄гмыӈ хо̄тпат пӯльницат хуясыт, тот пусмалтаве̄сыт. Ань ты ва̄рмаль ёлпо̄илттавес. То̄ва ма̄нь ле̄ккарыт рӯпата та̄л хультсыт. Ма̄н пӯльницав кит накпа йӣв колт о̄лыс. Ётылнув йильпи кирпащиӈ кол ӯнттувес, пӯльницав тув ва̄нтлуптавес. Таи ёмас, лощит кол, колнаканэ посыӈыт, а̄гмыӈ хо̄тпат тот пусмалтаӈкве сака ёмас. Тувыл ань ты накт ос мо̄т яныг ле̄ккар пӯльницан рӯпитаӈкве ёхтыс. Ты о̄йка Астрахань ӯсныл о̄лы. Ам номсэ̄гум, манрыг тапалыт ма̄ныл хащтал ма̄хум рӯпитаӈкве тыг во̄вавет, ма̄нки хо̄тпанув, тыт рӯпитанувыт ке, ёмаснуве̄г о̄лнув. Тувыл ань па̄вылт тамле ва̄рмаль о̄лы, ма̄хум са̄выӈпа̄лэ рӯпата ат о̄ньще̄гыт. Хӯл алышлым, во̄раим, ла̄хыс атым ос пил ва̄тым о̄лэ̄гыт. Мо̄т щирыл олн сэ̄луӈкве нэ̄мхотмус, ты хосыт та о̄лэ̄в. Ам пӯльницат ставка охса щирыл акушерыг рӯпитэ̄гум. Ты урыл ла̄вуӈкве ве̄рме̄гум, ань юио̄выл та̄лытт мощща ня̄врам самын паты. Па̄влув яныг, атса̄т арыгкем хо̄тпа о̄лы. Мо̄лты та̄л сыс туп хо̄т ня̄врам самын патыс. Па̄влув ма̄гыс ты сака мощща. Ма̄ньлат ма̄хманув таима̄гыс са̄в ня̄врам о̄ньщуӈкве ат таӈхе̄гыт, рӯпата щар а̄тим. Тувыл ань я̄т хӯл о̄с сака мощща пӯхты, ма̄хум туп тэ̄нэ са̄вит алыщлэ̄гыт». Клавдия Ефимовна о̄йкатэ Вячеслав Юрьевич Сайнахов, а̄ще о̄парищ наме Хозумов о̄лыс, тав Хорыӈпа̄вылт яныгмас. Рӯтанэ Саранпа̄вылт ос Сӯкырьят о̄лэ̄гыт. Та̄н колта̄гланылт ат ня̄врам яныгмасыт. Ма̄нь порат Хо̄рыӈпа̄вылт о̄лсыт. Ётыл, колхоз е̄мтнэ порат, та̄н пуссын Ло̄пмусн ва̄нтлысыт. Ло̄пмуст тав кина суссылтан хо̄тпаг рӯпитас. Тэ̄н Клаватэ̄нтыл хунь Ня̄хщамво̄льн ёхтысыг, тот рӯпата а̄тим о̄лыс. Таима̄гыс тав тот ат рӯпитас. Тувыл Саранпа̄выл экспедициян рӯпитаӈкве патхатыглас. Вячеслав Юрьевич яныг э̄ще, Лариса Юрьевна, Хулюмсунт па̄вылт о̄лы. Ма̄ньнув э̄ще, Фаинатэ, Надым ӯст о̄лы. Тэ̄н сас ще̄мьяӈыг. Хулюмсунт па̄вылт о̄лнэ э̄ще палт Яков а̄пщитэ о̄лы. Там ма̄ньта̄гыл а̄гм нупыл харты, ань увщитэ̄н о̄ньщаве. Лариса а̄гитэ Света сака номтыӈыг яныгмас. Школат ёмащакв ханищтахтас, а̄стламе юипа̄лт Норвегия ма̄т хо̄н ла̄тыӈ толмащлан хо̄тпаг э̄лаль ханищтахтас. Ань Санкт-Петербург ӯст о̄лы, хотты ма̄т ты ва̄рмаль щирыл рӯпиты. Тав са̄в хо̄н ла̄тыӈ ва̄г. Э̄кваго̄йкаг акв пыг о̄ньще̄г, наме Миша, тав о̄с ще̄мьяӈ та̄гыл Ня̄хщамво̄ль па̄вылт о̄лы. Тав Ханты-Мансийск ӯс ле̄ккар училищат лаборантыг ханищтахтас. Ты коныпал автомеханикыг ханищтахтас. Э̄кватэ Ло̄пмус па̄вылныл о̄лы, наме Юля, а̄ги о̄парищ наме Хозумова. Тэ̄н кит ня̄врам о̄ньще̄г. Клавдия Ефимовна о̄йкатэ̄нтыл хус арыгкем та̄л Ня̄хщамво̄льт аквъёт о̄лсы̄г. Вячеслав Юрьевич а̄тимыг е̄мтме ма̄гыс ма̄н таве̄н сым щаргын ла̄тыӈ ке̄тэ̄в. Ты я̄тил ма̄ньщи колта̄гыл пуста̄гыл вос о̄лы, На̄янылн-О̄тыранылн вос ӯргалавет. 1086 2014.10.20. Николай МЕРОВ Ма̄н Ягрим ос А̄нъя па̄влыгн ялсӯв. Ты э̄тпост округ Дума депутат нэ̄ Татьяна Гоголева, тав ётэ рӯпитан а̄ги Оксана Рыжкова ос Светлана Динисламова, А̄с-угорский институтт рӯпитан нэ̄, Ягрим па̄вылн ос А̄нъя па̄вылн рӯпата щирыл ялсыт. Та̄н тот соссаӈ ма̄хум ёт хо̄нтхатыгласыт. Ам та̄н ётаныл тув о̄с ялсум. На̄н ты урыл э̄лаль ловиньтэ̄н. 1086 2014.10.20. Людмила ТЕТКИНА Ма̄ньщи нэ̄ ще̄мьятэ ёт яныгмам ма̄тэ̄н о̄луӈкве ёхтыс. Людмила Ивановна Калиниченко, такви о̄парищ наме Кугина, ще̄мьятэ ёт Украинат Донецкий область Краснолиманский район Коровий Яр па̄вылт 34 та̄л о̄лыс. Во̄ртур э̄тпост ма̄ньщи нэ̄ такви колта̄глэ ёт яныгмам ма̄тэ̄н о̄луӈкве ёхтыс. Тав ла̄выс: «Ам Ха̄льӯс район Кульпас па̄вылт самын патсум, тот яныгмасум. Школа а̄стламум юипа̄лт Тюмень ӯсн э̄лаль ханищтахтуӈкве минасум. Тот Сергей о̄йкам ёт акванхо̄нтхатасме̄н, акванминасме̄н. То̄нт ам 18 та̄лум то̄влыс, ханищтахтуӈкве по̄йтсум, о̄йкам ёт Украина ма̄н о̄луӈкве та минасум. Ме̄н кит пыг ос а̄ги янмалтасме̄н. О̄лнэ ма̄вт хо̄нтлан нак ат ке о̄вылтахтас, э̄лаль тот о̄лнувӯв. Ам таса̄вит та̄л хащта̄л ма̄т о̄лымам, тув ханьщувласум. Тот о̄лнэ колув, ӯйхуланув пуссын хультуптасанӯв. Ма̄н хунь ва̄слӯв, тох е̄мты, ам ня̄враманум яныгмам ма̄нанылн тамле пилыщмаӈ нак ёхты. О̄влэ̄т номсысӯв, война ат о̄вылтахты, ма̄н коланув нумипа̄лт са̄всыр истребитель нампа товлыӈха̄пыт яласаӈкве ат патэ̄гыт ос коланув нупыл бомбат па̄хвтуӈкве ат патавет. Тот о̄лымам акваг ня̄враманум ма̄гсыл пилсӯм. Украинат хунь тамле хо̄нтлан ва̄рмалит о̄вылтахтасыт, о̄йкам, пыгагум ос а̄гим Россиян о̄луӈкве минуӈкве акваг во̄всанум. Тот пилым, тӯйтхатым о̄лсӯв. Ӣти щар ат хуясум, акваг лю̄ньщим номсысум, хумус э̄лаль о̄луӈкве патэ̄в. Та̄н тыг минуӈкве щар ат ка̄сащасыт, па̄влувт хунь истребитель товлыӈха̄пыт акваг яласаӈкве патсыт, туп то̄нт тыг минуӈкве щё̄питахтасыт. Ня̄враманум ос апыгрищанум ёт во̄ртур э̄тпос 12 щислат па̄вылныл Россия нупыл минмыгтасӯв. Олныл Россия границатэ мус ёхтуӈкве туп то̄влувесӯв. Матъёмас Россият рӯтанум о̄лэ̄гыт, Светлана Динисламова (Садомина) ма̄навн лё̄ӈх олн ке̄тыс. Во̄ртур э̄тпос 20 щислат Сургут ӯсн ущта ёхтысӯв. О̄йкам Украинат пенсиятэ ӯрим хультыс, туп сӯкыр э̄тпос 20 щислат тыг ёхтыс. Сургут ӯсн хунь ёхтысӯв, та̄ра УФМСн минасӯв, тот пуссын э̄рнэ нэ̄пакыл ва̄рвесӯв. Страховой полисыл пуссын молях майвесӯв, пӯльницан ле̄ккарыт палт уральтахтуӈкве ке̄твесӯв. Виталя пыгум хо̄псытэ по̄слувес, тувыл пӯльницан пинвес. Тав 2011 та̄лт хо̄псытэ а̄гмыӈыг е̄мтыс, то̄нт пӯльницат сака хоса пусмалтавес. Ле̄ккарытн то̄нт ла̄ввес, пӯльницан уральтахтуӈкве ва̄тихал вос ёхталы. Сургут ӯст хо̄псытэ по̄слувес, ле̄ккарыт тот матыр о̄ста ка̄саласыт. Пыгум ма̄гсыл ань такем сымум а̄гмыӈ. Ань Виталям Сургут ӯс пӯльницат пусмалтахты, ня̄враманум Ханты-Мансийск ӯст Света Динисламова палт о̄лэ̄гыт. Тыт Украина ма̄ныл ёхтум мирыт ань ёмащакв нё̄тавет. Ма̄н мирн нё̄тнэ центрын ялсӯв, тот ня̄враманув ма̄снутыл майве̄сыт. Кит щёс ос тэ̄нутыл майлувесӯв. Тыи ма̄гсыл ам яныг пӯмащипа ла̄тыӈ ла̄ве̄гум. Ме̄н о̄йкаме̄нтыл Кульпасн о̄луӈкве ань миныме̄н, Рая э̄щум колэ̄т о̄луӈкве патыме̄н. Тав ань Ха̄льӯсн ва̄нтлас, пыге ос Урай ӯсн рӯпитаӈкве минас, о̄влэ̄т тэ̄н колэ̄нт о̄луӈкве патыме̄н. А̄гиме̄н хӯрум ня̄враманэ ёт выганум, ам ётум тув минэ̄гыт. Пыгагме̄н тыт Ханты-Мансийск ӯст хультэ̄г. Александр яныг пыгум водителиг ханищтахтас, Виталям ос трактористыг рӯпитас. Юля а̄гим ос маснут ю̄нтым рӯпитас. Ва̄псум Александр о̄с трактористыг ханищтахтас. Ма̄н тыт «центр занятости» колн ялсӯв, нэ̄паканув тув мисанув. Алёна манюм о̄с маснут ю̄нтым рӯпитас. Виталий э̄кватэ ос а̄гитэ Украинат Краснолиманск ӯст о̄лэ̄г, тэ̄н тав ётэ киттыгминасы̄г. Хумус тэ̄н тот о̄лэ̄г, ты урыл акваг номсэ̄гум. Ты э̄лыпалт тав ётэ телефон хосыт потыртасум, ла̄выс, пилым, тӯйтыглахтым о̄лэ̄гыт. Ма̄н ётув тыг минуӈкве ат тахмаяс, тот оматэ палт хультыс. Внучкам тыг ёт виӈкве ат мистэ. Украинан ювле ма̄н воссыг ат минэ̄в, тыг о̄лмыгтэ̄в. Хунь ма̄хум Украинат хо̄нтлаӈкве по̄йтэ̄гыт, колув уральтаӈкве туп ялэ̄в. Ня̄враманум о̄с ла̄ве̄гыт, тув туп рӯтаныл палт мӯйлуӈкве ялантаӈкве патэ̄гыт. 1997 та̄лт ма̄н украинский намнэ̄пакыл майвесӯв. Та порат ам о̄йкам Россиян о̄луӈкве во̄выгласлум. Ам ма̄ньщииг о̄лэ̄гум, тыт самын патсум, тыт яныгмасум, ань ӯрхатэ̄гум, тыт о̄лнэм ма̄гсыл э̄рнэ нэ̄пакытыл вос ва̄равем. Ты урыл хунь номсэ̄гум, а̄латы лю̄ньще̄гум. Туп ань торгамтаслум, ты гражданство урыл то̄нт номсахтуӈкве э̄рыс. Ань ма̄н «статус временного убежища» нэ̄пакыл майвесӯв, Россия гражданствал мо̄тыт та̄лт тах ущ ва̄раве̄в. Ам Татьяна Гоголева ос Надежда Алексеева, округ Дума депутат нэ̄гн, Еремей Айпин, соссаӈ ма̄хум Ассамблеят кӯщай хумн яныг пӯмащипа ла̄тыӈ ла̄ве̄гум. Та̄н ма̄навн ёмащакв нё̄тсыт. Людмила Алфёрован о̄с яныг пӯмащипа ла̄тыӈ ке̄тэ̄гум. Ты нэ̄ Геннадий Бухтин, губернатор ва̄ӈын хум, палт нё̄тмил ва̄рнэ нэ̄г рӯпиты. Тав ма̄навн о̄с ёмащакв нё̄тыс». 1086 2014.10.20. Валентина УЗЕЛЬ Тит ща̄нь ла̄тыӈ ва̄нэ хо̄тпа. Клавдия Васильевна Койнова Ха̄льӯст о̄лы, тав а̄ги о̄парищ наме щирыл Рочева. Ня̄хщамво̄ль па̄вылт о̄лыс, тот ханищтахтас, яныгмас. Тувыл тав Украина ма̄н ва̄нтлыс, тот хус арыгтем та̄л о̄лыс. Ха̄льӯст хо̄нтхатыгламуме̄н порат мощ потыртасме̄н, Клавдия Васильевна рӯтанэ ос такви уре̄тыл тох ла̄выс. Ам Ня̄хщамво̄льт самын патсум. Омав Федосья Даниловна Анемгурова о̄лыс, а̄щув Василий Иовлевич Рочев, саран хум. Ма̄н ма̄ньта̄гыл тит ла̄тӈыл потыртасӯв, ма̄ньщи ос саран ла̄тӈыл. Ханищтахтуӈкв о̄вылтахтамув порат рущ ла̄тӈыл потыртаӈкв щар ат ха̄ссӯв. Ащо̄йкам Данил Васильевич Анемгуров Ха̄ӈылсам па̄вылныл о̄лыс, ты па̄выл ӯнлум ма̄т ань туп аквтит кол хультыс. Ане̄квам Анастасия Ивановна Няхлаӈ па̄вылныл о̄лыс. Тэ̄н ат ня̄врам о̄щсы̄г, нила а̄ги Федосья, Анна, Ольга ос Дарья, ос акв пыг – Петр. Яныг а̄гитэ̄н Федосья – ты ма̄н омав. Тэ̄н са̄лы о̄щсы̄г, са̄лы ӯрим яласасы̄г. Хо̄нт э̄лыпа̄лт 1937 та̄лт ащо̄йкав о̄с хотталь тотвес, лов та̄л минас, 1947 та̄лт юв ёхтыс. Ты лов та̄л сыс ане̄квав ня̄враманэ ёт такте̄т о̄лыс, та̄нти хотмус са̄лы ӯрим яласасыт. Омав а̄тяв ёт 1941 та̄лт акванминасы̄г, омав то̄нт 18 та̄лэ ущ то̄влыс. А̄тяв войнан ат вуйвес, са̄лы ӯруӈкв хультуптавес, а̄пщитэ тув тотвес. Ма̄н нёлолов ня̄врам самын патсӯв, йӣгрищув та̄лэ ат то̄влыс, а̄тимыг е̄мтыс. Са̄т ня̄врам хультсӯв. Школан миннэ̄в мус ма̄н омагувна̄тягувн са̄лыӈ колт тотыглавесӯв. Ма̄н иӈ ма̄ниг о̄лмув порат ома та̄л хультсӯв, ма̄нтирот о̄лсӯв, ма̄нти яныгмасӯв. А̄тяв са̄лы ӯрим нё̄рт яласас. Туи порат па̄вылт о̄лсӯв, пил ва̄тсӯв, ла̄хыс атсӯв. Ане̄квавнащо̄йкавн, Дарья а̄квувн нё̄твесӯв. Школа а̄стламум юипа̄лт ам педучилищат ханищтахтасум. Мощ рӯпитасум, ще̄мьяӈ та̄гыл Украина ма̄н минасӯв, тув о̄лмыгтасӯв. Хус арыгтем та̄л тот о̄лсӯв, ювле йигмыгтамув порат Щерки ма̄нь пыгум 20 та̄лэ то̄влыс. Ам Ня̄хщамво̄ль интернатт воспитателиг мощ рӯпитасум, тувыл Ӯсн (пе̄с ма̄хманув Ха̄льӯс тох ла̄выгласаныл) ва̄нтлысум. Тыт пе̄с э̄ргыт, мо̄йтыт атнэ колт рӯпитасум, тувыл культура центрыт рӯпитаӈкв патсум. Ань ма̄н ты рӯпитан колув мо̄т щирыл ла̄вуӈкв патвес, отделыг ва̄рвес. Нила хо̄тпа тыт рӯпитэ̄в, Р. П. Загородняя, Т. В. Тунгусова, ам ос колкан ловтнэ нэ̄. Тит пыгагум сас тыт о̄лэ̄г, рӯпитэ̄г. Щерки пыгум ань Коми республикат о̄лы, тот нэ̄ тотыс. Э̄кватэ саран а̄ги, яныг а̄гитэ̄н саран ла̄тӈыл потыртаӈкв сака ёмащакв ха̄сы. Тамле ты потыр Клавдия Васильевна потыртас. То̄ванакт тав ма̄н газетавн потрыт те̄тса̄лы, тав хансум потранэ пӯмыщ ловиньтаӈкв. Ма̄н таве̄н са̄в ёмас ла̄тыӈ те̄тэ̄в, На̄й-О̄тыранэ̄н вос ӯргалаве, пуста̄гыл вос о̄лы. Э̄лаль потрыт ма̄навн вос хансы. 1086 2014.10.20. Николай МЕРОВ Соссаӈ ма̄хманув мӯйлысыт. Ты э̄тпос о̄выл хо̄талытт Ханты-Мансийск ӯсн Лӯима̄, Сибирь ос Дальний Восток ма̄ныл мощщаг хультум соссаӈ ма̄хум мӯйлуӈкве ёхталасыт. Ты ва̄рмаль рущ щирыл «Северное сияние» намаим о̄лыс. Ма̄хум Алтай, Таймыр, Камчатка, Ямало-Ненецкий округытныл о̄лсыт. Та̄наныл Мария Кузьминична Волдина, яныгпа̄ла ханты э̄ква, сымыӈ ла̄тӈыл янытласанэ. Тав ёнгын колэ «Ешак най» нам о̄ньщи. Ты ще̄мьяӈ ёнгын кол округувт о̄лнэ мирн ёмщаквег ва̄ве. Ка̄сыӈ ма̄ныл ёхтум ма̄хум йӣквсыт, са̄ӈквылтапыл са̄ӈквылтасыт ос э̄рыг э̄ргысыт. Та̄н нупыланыл сунсуӈкве сака мӯстыс. Ты ва̄рмаль таима̄гыс щё̄питавес, ка̄сыӈ мир халанылт юртыӈыщ вос о̄лсыт. О̄влэ̄т та̄н «Ма̄вит ос э̄лумхо̄лас» нампа пе̄с пормас атнэ музей колт йӣквсыт. Тувыл Октябрьский ос Нефтеюганский районыгн э̄лаль мӯйлуӈкве ялсыт. Мо̄тыт хо̄тал Ханты-Мансийск ӯсн ювле ёхтысыт. Тыт юио̄выл хо̄тал яныг концерт щё̄пита̄лсыт. Ты пӯмащ ва̄рмаль сунсуӈкве са̄в мир атхатыглас. 1086 2014.10.20. «Лӯима̄ сэ̄рипос» ос «Ханты ясаӈ» газетаг редакцият рӯпитан ма̄хум Сым ща̄ргын ла̄тыӈ. Ты э̄тпос хо̄тхуйпловит хо̄талэ̄т Ханты-Мансийск ӯст ма̄ньщи хо̄тпав Владимир Иванович Шесталов а̄тимыг е̄мтыс. Тав яныгполь э̄тпос 28 хо̄талэ̄т 1964 та̄лт Тюмень ӯст самын патыс. Та порат а̄тятэ Юван Николаевич Шесталов тот педагогический институтт ханищтахтас. 1971 та̄л ще̄мьяныл Санкт-Петербург ӯсн ва̄нтлыс, Владимир Иванович тот яныгмас. Ва̄т нупыл хӯрмит та̄лэ то̄влуме порат тав Ханты-Мансийск ӯсн ва̄нтлыс. 1987 та̄лт тыт педучилищат ханищтахтуӈкве о̄вылтахтас. 1989-1990 та̄лытт ма̄ньщи мирув э̄рыгсов та̄ныт ос э̄ргыт ханищтаӈкве патыс. Ты юипа̄лт Владимир Иванович Санкт-Петербург ӯст о̄лнэ А. И. Герцен нампа институтт ханищтахтас. Тувыл 1996 та̄лт Петрозаводский консерваторият ханищтахтуӈкве о̄вылтахтас, тот э̄рыг ва̄рмаль ва̄нэ яныг хо̄тпат ёт ва̄йхатуӈкве патыс. 2011 та̄лт искусствоведение кандидат намыл майвес. Са̄в та̄л искусства школат рӯпитас, ня̄врамыт са̄ӈквылтапыл та̄ныт са̄ӈквылтаӈкве ханищтасанэ. Владимир Иванович тӯлыглахтан ва̄рмаль ва̄т нупыл ат та̄л ханищтас, ма̄ньщи э̄ргыт, йӣквыт ханищтас, пуссын нэ̄пакын хассанэ. Ты На̄й-О̄тырыӈ ма̄т тав ща̄гтым ё̄мыгтас, рӯпататэ э̄руптастэ, ханищтам ня̄враманэ янытласанэ. А̄ще ма̄, а̄ще ща̄нь ла̄тыӈ сака э̄руптастэ, сака янытластэ, хо̄тпа нупыл сымыӈ э̄лумхо̄ласыг о̄лыс. Рӯт хо̄тпанэ̄н ма̄н сым ща̄ргын ла̄тыӈ ке̄тэ̄в, тав ма̄гсылэ ма̄н сыманув о̄с ща̄рге̄гыт. «Лӯима̄ сэ̄рипос» ос «Ханты ясаӈ» газетаг редакцият рӯпитан ма̄хум. 1086 2014.10.20. Анна АЛГАДЬЕВА Иныг йӣвыӈ, лям йӣвыӈ па̄выл. Таквсы кит ӯщлахтын хо̄талыг сыс школат ханищтахтын ма̄ньщи ня̄врамыт, школат рӯпитан кит ханищтан нэ̄г о̄с то̄ва па̄влыӈ ма̄хум Ме̄ӈквъя па̄вылн ялсыт. Ме̄ӈквъя па̄выл ва̄т нупыл ат ве̄рыстат Хулюмсунт па̄вылныл ло̄ӈхаль о̄лы. Ты па̄выл па̄влыӈ ма̄хманэ̄н наме̄тыл ат ла̄ваве. Пе̄с о̄лум ма̄хманэн Иныг йӣвыӈ, ля̄м йӣвыӈ па̄влыг ла̄ввес. Ань о̄лнэ па̄влыӈ ма̄хманэ̄н, нас, та па̄влыг ла̄ваве. По̄х хо̄тпан тай Ме̄ӈквъя па̄влыг ла̄вуӈкв ро̄ви. Тыг ялнэ номт хосат та̄гыл о̄лыс. Биология ос химия урокыт ханищтан нэ̄ Т. А. Головина таквс палытыл щё̄питахтас, ханищтан ня̄враманэ ёт са̄ртын та̄гыл ты урыл потыртас. Сака таӈхыс ялуӈкв. Наска̄ссыг хунь ла̄ве̄гыт, хунь номтынтыл сака ке та̄кыщ матыр таӈхе̄гын, ва̄рмаль та щирыл та паты. Ам ма̄ньщи ла̄тыӈ ханищтан нэ̄г школат о̄лэ̄гум, ам о̄с ты ма̄хум ёт ялсум. Хоса щё̄питахтасӯв, аквматэ̄рт ты а̄стысӯв. Миннэ па̄лаг патсӯв, ат ха̄п е̄мтыс. Миркол кӯщай нэ̄в О. В. Баранова ат ве̄ритас, хо̄тыт ха̄пыл такви ё̄рыл о̄с ма̄н ётув ялыс. Янгема̄не̄тыл пуссын аквъёт ва̄т нупыл нила э̄лумхо̄лас. Яласамув сыс ёмащакв рӯпитасӯв, аквтымус ӯщлахтасӯв. Па̄выл коныпа̄лт ё̄мыгтасӯв, во̄ре манхурип та̄ра паттыслӯв. Хумыс нир тыт поталы, сэ̄ныг, со̄с, ха̄ль пӯӈат яныгми, суссӯв. Хара па̄вылкан хосыт нас ё̄мыгтасӯв. Галина Константиновна Алгадьева щар яныг хо̄тпаг ма̄н халувт о̄лыс. Тав ущ хум ва̄рме порат о̄йкатэ Илья Никитич Алгадьев ёт ос о̄ныпе Мария Васильевна Алгадьева ёт ты па̄вылт о̄лыс. На̄лми ва̄тат пе̄с кол ӯнлы. Галина Константиновна ла̄ви: «Та пе̄с кол сыспа̄лн минуӈкв нэ̄ хо̄тпан ат ро̄ви. Та кол са̄мт хуньт пе̄с порат Миснэ колъёр о̄лум. Па̄выл о̄лыме̄тэ порат мислув о̄щсыт, ӯйхул тув ке мины, тот ке ё̄мыгты, тоӈханэ э̄лнэ̄лттавет. » Тох ты, та кол сыспа̄лэ вуянтахты. Ва̄та̄л ма̄т мори ё̄муӈкв ат ро̄ви. Ма̄н ялмувт вит яныг о̄лыс, улпыл таима̄гыс пыгрищит такос хӯл нясласыт, нэ̄матыр ат пувсыт. А̄гирищит о̄с та̄н па̄лтыланыл юрщигтахтыглэ̄гыт кос. Ма̄тар хилсыт, такос ня̄сласыт. Исмитув ат тэ̄лыглас. Хум хо̄тпат хӯлп ӯнтталасыт, акв хулюмхул муӈкпыг туп пе̄рыглалас. Галина Константиновна та хӯлыл хумыс ёхыл ва̄раве, суссылтас. А̄гит иныг, пащар, ля̄м ва̄тсыт. Пыгрищит ӯльйив халытасыт. Тэ̄нут а̄ращт па̄йтсӯв, акв яныг па̄саныл кон тэ̄пъяласӯв. Акв э̄т туп хӯлсӯв. Кит кол мус о̄лсӯв. Галина Константиновна колэ ма̄нь, колыӈ ма̄хум та̄нки тот хӯлсыт. Семён Ильич Алгадьев колэ яныг, са̄в па̄л о̄ньщи. Ёхталам ма̄хум са̄выӈпа̄лэ пуссын тот хӯлсыт, па̄лн ат то̄влуве̄сыт, колканн нортгалахтыгласыт. Ӣтипа̄лаг са̄всыр мо̄йтыт мо̄йтсӯв. Такем ёмщакв яласасӯв, ня̄врамытн сака мустыс. Китыглахтэ̄гыт, хунь о̄с аквтох аквъёт хотталь минэ̄в? Са̄ртын ла̄вхатуӈкв ат патсӯв, ма̄лтыпыг е̄мты, ущ ос номсахтэ̄в. Ягануво̄парищанув хуньт во̄рт яныгма̄ласыт, во̄рыл ханищтахтыгласыт. Манхурип та̄л, таквс, хо̄тал е̄мты, са̄ртын ва̄саныл. Ма̄н о̄с акв ты ва̄рмаль койгалым, во̄р ханищтым кос яласэ̄в. 1086 2014.10.20. Тамара МЕРОВА Тав ща̄нь ла̄тӈе̄тыл пӯмщалахты. Мо̄лалнув ищхӣпыӈ ут хосыт ам Валентин Дёмин ёт ва̄йхатасум. Тав уре̄тыл а̄нумн Софья Власенкова (Рукова) потырта̄лыс. Тэ̄н сас ма̄ньщи хо̄тпаг. Софья Ильинична ань Калужский область Жиздра ӯст о̄лы. Ме̄н тав ётэ рӯтыӈыщ о̄лыме̄н. Ос Валентин тав ва̄нэ хо̄тпатэ. Ты ма̄ньлат пыг Ивдель ӯст о̄лмет а̄нумн свонита̄лыс, ме̄н то̄нт мощ потыртасме̄н ос тувыл ищхӣпыӈ ут хосыт ам таве о̄лупсатэ урыл ёмщакв китыгласлум. Мо̄лты ювле хультум та̄л па̄сныл ма̄ньщи ла̄тыӈ такви ханищтаӈкве о̄вылтаме. Тав э̄рнэ ханищтан нэ̄пакыт хо̄нтыс, матыра̄ти тэ̄лал акваг пӯмщалахтас, ос тоха та э̄лаль ма̄н ла̄тӈув ва̄ӈкве патыстэ. Валентин ань ищхӣпыӈ ут хосыт ма̄ньщи газетав ловиньтаӈкве ве̄рми. Тувыл ща̄нь ла̄тыӈ э̄лаль тотнэ ма̄гыс тав такви номылматан ма̄ньщи потырохсат, мо̄йтыт хансуӈкве патыс. Сыресыр рущ потрыт, стихыт тав онтолов та̄лныл хансы. Такви уре̄т пыг таи потыртас: «Ам хус та̄лум то̄влыс, Дятлово па̄вылт самын патсум. Ты па̄выл Московский область Зарайский районт о̄лы, ты а̄тям тав самын патум па̄влэ, тав рущ о̄йка. Омам Свердловский область Ивдельский районт Бахтияровыт о̄лум ма̄ныл о̄лыс. Тав ма̄ньщи нэ̄. Ты ва̄рмаль ам туп мо̄лты та̄л та̄рапаттыслум. А̄нумн сака пӯмащ о̄лыс, та па̄сныл ам акваг ма̄ньщи ма̄хум о̄вылтыт номсахтуӈкве патсум, мирув о̄лупса, ща̄нь ла̄тӈув ханищтаӈкве патыслум. Ма̄н ще̄мьявт нила хо̄тпа, тыи а̄тям, омам, ам ос а̄пщим. Щаще̄ква, о̄па о̄с о̄ньще̄гум. Ам школат онтолов класс а̄стласум, тувыл нила та̄л техникумыт ханищтахтасум. Ты та̄л таве а̄стласлум, ань рӯпата кинсэ̄гум. Амки ле̄ккарыг о̄луӈкве таӈхе̄гум, ма̄хум пусмалтаӈкве ос та̄нанылн нё̄туӈкве патэ̄гум». Ос аньмӯнтнув Валентин Дёмин ма̄ньщи ла̄тӈыл такви хансум мо̄йтэ ке̄тыстэ. На̄н ань ты мо̄йт ловиньтэлы̄н. Са̄лыт ӯрнэ ос во̄раян хумы̄г Са̄лыт ӯрнэ хум ос во̄раян хум о̄лсы̄г. Акв ляпат о̄лсы̄г. Аквнакт са̄лы ӯрнэ хум йильпи кол ӯнттуӈкве тахмаяс, колэ пе̄сыг е̄мтыс. Э̄рнэ ут, матыр вис ос рӯпитаӈкве патыс. Акв хо̄тал ва̄ри, китыт хо̄тал ва̄ри. Нэ̄матырыг ат е̄мты. Акв хо̄тпан рӯпитаӈкве та̄рвитыӈ. Тав нор тармыл ӯнтыс ос та тысты. Та̄ра во̄раян хум ё̄мыс. Тав са̄лы ӯрнэ хум ка̄саластэ ос китыглытэ: Паща о̄лэ̄н, рума. Наӈ манрыг тыстэ̄гын? Ос хумус ат тыстуӈкве? Йильпи кол ӯнттуӈкве таӈхе̄гум, колум пе̄с, щар лю̄лиг е̄мтыс. Туп нэ̄матыр ва̄руӈкв ат ве̄рме̄гум. А̄нум акваг та̄рвит. Моще̄ртын тэ̄лыиг ты е̄мты. Ул тыстэн! Ам наӈын нё̄тэ̄гум. Во̄раян хум хӯрум пыганэ во̄всанэ. Аквъёт кол ӯнттуӈкве о̄вылтахтасыт. Рӯпатаныл кӯпнитыг минас. Та̄н молях кол ӯнттысаныл. Нё̄тнэ, ре̄гыӈ кол ӯнттысыт. Са̄лы ӯрнэ хум хотща̄гтыс, ла̄выс: Пӯмащипа, юрт. Наӈ а̄нумн ат ке нё̄тсын, колта̄глум тэ̄лы по̄льнуве. Пӯмащипа ла̄тыӈ ул ла̄ве̄н. Ам юртумн акваг ща̄гтым нё̄тэ̄гум. Та̄лэтуве минас. Аквнакт са̄лы ӯрнэ хум во̄раян хум колэ ляпат минас ос во̄раян хум тыстым ка̄саластэ. -Наӈ манрыг тыстэ̄гын? Маныр е̄мтыс? – са̄лы ӯрнэ хум китыглахты. Ос хумус ат тыстуӈкве? Ты та̄л во̄раян ва̄рмаль лю̄ль. Во̄руй ат ликмыгла̄лы. Ам во̄рт ты кос ё̄мыгтэ̄гум ос нэ̄матыр ка̄тн ат паттыглэ̄гум. Ам колта̄глум тэ̄та̄л ты хульты. Ул тыстэ̄н. Ам ётум минэн. Тэ̄н са̄лы ӯрнэ хум палт ёхтысы̄г. Са̄лы ӯрнэ хум са̄в са̄лы о̄ньщи, тав ла̄выс: Манах са̄лы э̄ри, вӯен. Наӈ колта̄глын тэ̄та̄л воссыг ул вос о̄лы. Во̄раян хум са̄лыт висанэ. Юрткве, пӯмащипа. Ма̄н ань тэ̄та̄л ат щуӈкырлэ̄в. Пӯмащипа ла̄тыӈ ул ла̄ве̄н. Ам юртумн акваг ща̄гтым нё̄тэ̄гум. Та па̄сныл са̄в та̄л минас. Са̄лы ӯрнэ хум ос во̄раян хум колта̄глаге̄ныл ёт ань тыг мус о̄лэ̄гыт. Халэ̄нт юртыӈыщ о̄лэ̄г, нуса ат ва̄гыг. Тамле пӯмащ мо̄йт Валентин ма̄ньщи ла̄тӈыл ты хансыс. Таве̄н ма̄н о̄с яныг пӯмащипа ла̄тыӈ ке̄тэ̄в. Тав такви щирыл тахнэ номтанэ тэ̄лаг вос е̄мтэ̄гыт. Пус ка̄т, пус ла̄гыл, То̄рум ёт, О̄тыр ёт! 1086 2014.10.20. Алёна Рокина О̄лнэ ма̄вт хӯлюм посыӈ лё̄ӈхе. Ханты-Мансийск ӯст Лопарева ӯсхулыт «Доммузей народного художника СССР В. А. Игошева» нампа кол о̄лы. Та колт ольпыл по̄слым са̄всыр яныг манос ма̄нь хорамыӈ ло̄псын нэ̄пакыт, хурит суссылтавет. В. А. Игошев хурин са̄в ма̄ньщиянув по̄слысанэ. Щар о̄выл щёс ма̄ньщит па̄лт тав 1954 та̄лт ёхталас. Ня̄хщамво̄ль па̄вылт тав Степан Куриков, Максим Рокин, Тасмановыт ще̄мьяныл ос мо̄т ма̄хум по̄слысанэ. Ня̄хщамво̄ль школат тав ма̄нь а̄гирищ по̄слыстэ, хуритэ «Озорница» намаястэ. Ань ма̄ньщит ты музейн та̄нки йис о̄паныл сунсуӈкве ялантэ̄гыт. Ты ма̄гсыл яныг пӯмащипа та ма̄хумн ла̄вуӈкве э̄ри, хотьют ты музей ӯнттын ма̄гсыл са̄в ё̄р пиныс. Максим Рокин Нё̄рныл Ня̄хщамво̄ль па̄вылн са̄лыянэ ёт на̄лув ва̄глыс. 1931 та̄лт тав нэ̄ тотыс, э̄кватэ̄нтыл лов ня̄врам янмалтасы̄г. Па̄вылн хунь ёхтыс, китнакпа кол ёвтыс, та порат купсат та̄н тамле колт о̄лсыт. Такви ос э̄лаль са̄лы ӯрим Нё̄рт яласас. Ты кол Владимир Игошев о̄с хурин по̄слыстэ, «Дом охотника М. Я. Рокина» намыл пиныстэ. О̄йка такви ос по̄слыма, та хури музейт о̄с ханы. Са̄лы ӯрнэ хум ос 1974 та̄лт хурин по̄слыстэ, «Максим Яковлевич Рокин» намаястэ. Ань ма̄хум ты хурит нупыл сунсым ос китыглахтэ̄гыт, ма̄ньщит во̄рт ёмыгтым хумус ат тыпе̄гыт, хумус ва̄ганыл, хоты ма̄т о̄лэ̄гыт. Во̄раян хум ка̄сай ос ще̄ранка ке о̄ньщи, тав лылытэ та нэ̄глы. Во̄рт акв пумта̄рс ке о̄лы, хо̄т о̄лэ̄гын, торгамтаӈкве ро̄ви ос ювле миннэ лё̄ӈхын хо̄нтхатуӈкве. Во̄раян ма̄хум ще̄пт ка̄сай ос ще̄ранка акваг о̄ньще̄гыт. Тамле «лё̄ӈх» ма̄хум та̄нки юипа̄ланыл та хультуптасаныл. Ам ма̄ньщи ла̄тыӈ о̄выл та̄л ханищтылум, са̄ртыӈ саран ла̄тыӈ ханищтаслум. Потыр ма̄ньщи ла̄тӈын толмащлаӈкве щаще̄квамн нё̄тве̄сум, школат ос ханищтан нэ̄н словарьнэ̄пакыл рӯпитаӈкве ханищтаве̄сум. Потрум тыщирыл та тэ̄лыс. Пӯмащипа. Алёна Рокина, Ня̄хщамво̄ль па̄выл школат ловит классыт ханищтахтан а̄ги. 1086 2014.10.20. Людмила ТЕТКИНА А̄с я̄ ва̄тат ӯнлын па̄выл. Октябрьский район Карымкары па̄вылт ань акв со̄тыра арыгкем э̄лумхо̄лас о̄лы. Ты па̄вылкве урыл 16-17 нот порат та̄ратым нэ̄пакыт хансым о̄лыс, то̄нт ханты ма̄хум ты па̄выл Карингвош намаясаныл. Па̄выл ляпат ма̄нь я̄ о̄вты, тот ка̄рай хӯл сака са̄в о̄лыс. Пе̄с порат па̄выл по̄хат ялпыӈ ма̄ о̄лыс, са̄всыр ма̄ныл хантыт та̄нки На̄й-О̄тыраныл нупыл по̄йкщуӈкве тув ёхталасыт. Ань тот о̄лнэ хантыт мо̄т мирыт халн тэ̄лыгласыт, та̄нки пе̄с йис ва̄рмаляныл нупыл сака ат сунсэ̄гыт, ща̄нь ла̄тӈыл ат потыртэ̄гыт. Тыи ма̄гсыл Карымкары ань рущ па̄влыг ловиньтахты, ханты ма̄хмытыл туп наме хультыс. 1086 2014.10.20. Людмила ТЕТКИНА Архив кол 80 та̄лэ то̄влыс. Ты э̄тпос о̄выл хо̄талэ̄т окружной Архив кол 80 та̄лэ то̄влыс. Ты кастыл Югра янытыл архивытт рӯпитан ма̄хум Ханты-Мансийск ӯсн во̄виньта̄лве̄сыт ос янытлаве̄сыт. 1934 та̄л ма̄нь таквс э̄тпосэ̄т Остяко-Вогульск ӯст «Окружное Архивное бюро» ва̄рвес. Ты юипа̄лт Кондинский, Лярьякский, Октябрьский, Сургутский ос Ха̄льӯс районт тамле колыт рӯпитаӈкве о̄вылтахтасыт. 1960-1970 та̄лыт Нефтеюганск ос Урай ӯсыгт са̄всыр пе̄с нэ̄пакыт архивн атуӈкве патве̄сыт. Ань ка̄сыӈ районт манос яныг ӯст 22 тамле кол о̄лы. Округ янытыл о̄лнэ архивколт 140 э̄лумхо̄лас рӯпиты, тот 809 со̄тыра 906 са̄всыр э̄рнэнэ̄пакыт акванатым о̄лэ̄гыт. 857 организация ань та̄нки нэ̄паканыл тув ке̄тыяныл. Ты коныпал тот 30 со̄тыра 654 пе̄с хурит о̄лэ̄гыт. Ты ма̄хум яныг рӯпата ва̄ре̄гыт, пе̄с э̄рнэ нэ̄пакыт, хурит акванатсаныл ос акв ма̄т ӯргалым о̄ньщияныл. Тыщирыл ма̄н пе̄с о̄лупсав ат ёрувлылӯв. Хо̄нтлан нак э̄лыпа̄лт тыт сака са̄в ма̄хум наска̄ссыг порславе̄сыт. Ты пилыщмаӈ ва̄рмалит урыл архивыт о̄лнэ нэ̄пакытт хо̄нтуӈкве ро̄ви. Ань са̄в ма̄хум тув ялантэ̄гыт, рӯтаныл урыл хансум ла̄тыӈ кинсэ̄гыт. Пенсиян миннэ ма̄хум та̄нки рӯпитам организацияныл нэ̄пакыт о̄с тот хо̄нтуӈкве ве̄рме̄гыт. Акв та̄л сыс 75 со̄тыра арыгкем э̄лумхо̄лас са̄всыр нэ̄пакыт кинсым тув ёхталы. Тот рӯпитан хо̄тпат са̄в пе̄с нэ̄пакын «Электронный архив Югры» нампа тэ̄ла палт хассаныл. Ты нэ̄пакыт интернет хосыт ань ловиньтаӈкве ро̄ви. Архив тамле э̄рнэ рӯпата мир ма̄гсыл та ва̄ри. Соссаӈ ма̄хум о̄лупсаныл урыл са̄всыр пе̄с нэ̄пакыт ос хурияныл архивыт ос акванатым о̄лэ̄гыт. 80 та̄л ювле хультум порат округувт янытыл колхозыт ос совхозыт рӯпитаӈкве о̄вылтахтасыт. Ань та колт са̄в пе̄с нэ̄пакыт о̄лэ̄гыт, хот хансым о̄лы, хумус план ма̄гсыл ма̄ньщит, хантыт рӯпитасыт, манаса̄вит ӯйхул пувсыт, манаса̄вит пил ва̄тсыт. Тамле нэ̄пакыт ань туп архивыт ка̄салаӈкве ро̄ви. Ялпыӈ хо̄тал о̄лме порат «Архивная служба. 80 лет вместе с Югрой» нампа суссылтап ва̄рыглавес. Ань ма̄хум хумус рӯпитэ̄гыт ос пе̄с нэ̄пакыт хумус ӯргалым о̄ньще̄гыт, та урыл кина суссылтавес. «Югра-Классик» нампа колт ос «История Югры в архивных документах» мо̄т суссылтап рӯпитас. Ты выставка сунсуӈкве са̄в ма̄хум ёхталасыт. Та̄н нупланыл Людмила Сажаева, окружной Архивыт кӯщаиг о̄лнэ нэ̄, ла̄выс: «Тыт ма̄н округ янытыл о̄лнэ архивыт са̄всыр нэ̄пакыт ос хурит акванатсанӯв. Тыт Югра ма̄в йис поратэ ос ма̄хум пе̄с о̄лупсаныл урыл ловиньтаӈкве ро̄ви. То̄ва нэ̄пакыт щар о̄выл щёс суссылтыянӯв». Ты юипа̄лт архивыт са̄в та̄л рӯпитан ка̄ркам хо̄тпат кӯщаитн янытлаве̄сыт. Алексей Путин, губернатор ва̄ӈын хум, ма̄хум нупыл ла̄выс: «На̄н нэ̄пакыт акванатым, са̄в э̄рнэ тэ̄ла варегы̄н. Ань на̄н палтын пенсионный фондыл, мирн нё̄тнэ департаментыл ос округувт о̄лнэ ма̄хум нэ̄паканыл кинсым архивн ёхталэ̄гыт. Ты рӯпата ма̄гсыл на̄нанн яныг пӯмащипа ла̄тыӈ ла̄ве̄в». Борис Хохряков, округ Дума кӯщай хум, ос Василий Филипенко, Ханты-Мансийск ӯст миркол кӯщай хум, са̄в ёмас, сымыӈ ла̄тыӈ ла̄всы̄г ос са̄в та̄л ка̄ркамыг рӯпитан ма̄хум янытлан нэ̄пакыл мисаныл. 1086 2014.10.20. Анна АЛГАДЬЕВА Ӯльпа щахыл. Ӯльпа – щуниӈ йӣв. Ӯльпа та̄лныл, ӯльпа о̄ӈхныл тэ̄рпи ва̄раве, па̄квсамытныл во̄й пащиртаве. Йӣве̄ныл ха̄п, ёса ва̄раве. Па̄кв ке тэ̄лы, щуниӈ таквсыиг ла̄ваве. Ха̄льӯс район Хулюмсунт па̄выл школа а̄висунт э̄лыпа̄лт ӯльпа щахыл яныгми. Хӯрмит классыт ханищтахтын ня̄врамыт о̄выл та̄л ханищтахтаманыл порат школа э̄лыпа̄лн ма̄нь ӯльпа пыгрищит ӯнттыгласыт. Мощ мо̄лалнув, акв хотты хо̄тал, пыгрищит 11 классыт ханищтахтын а̄гирищит ёт ӯнттум ӯльпаныл сунсуӈкв ялсыт. Ӯльпаныл уральтасаныл, ловиньтасаныл, йӣваныл по̄хыт ма̄тэ мощ хотхилащласаныл. Ёты хо̄тал классанылт а̄гирищаныл ля̄льт потыртасыт. Та̄н ань ва̄ганыл, ӯльпа йӣв сака ла̄щал яныгми, па̄квын о̄с молях ат тэ̄лаве. Янмалтан ма̄гыс ӯнттым йӣв ва̄тихал уральтаӈкв э̄ри. О̄выл классыт ханищтахтын ня̄врамыт о̄с кит хо̄тал мус ма̄вит урыл потыртаве̄сыт. Хумыс ӯльпа яныгми, та̄ланэ манхурипат, маныр о̄нтас ӯльпа йӣвныл е̄мты, пуссын ты урыл 11 классыт ханищтахтын а̄ги Виктория Лаверина ня̄врамытн потыртас. Тувыл та̄наныл ма̄нь ӯльпа пыгрищитыл мисанэ. Урокыт холам юипа̄лт биология урокыт ханищтан нэ̄ Т. А. Головина ёт, ханищтан нэ̄ныл Н. В. Ожгибесова ёт ос 11 классыт ханищтахтын а̄гит ёт ня̄врамыт йӣваныл ма̄н ӯнттысаныл. Ӯнттум йӣваныл иӈ сака ма̄нит. Тыт рӯпитам ма̄хум пуссын таӈхе̄гыт, хуньт ты ма̄нь ӯльпарищаныл яныг ӯльпаг вос яныгмасыт. Тамле ханищтапыт пуӈкын хосан пухтэ̄гыт. Ка̄сыӈ ня̄врам «Кедровая школа» нампа удостоверениел мӯйлуптавес ос ӯльпа па̄квыл майвес. Ань школа э̄лыпа̄лт ва̄т нупыл онтолов ӯльпа яныгми. 1087 2014.11.07. Анна АЛГАДЬЕВА Кит а̄ги урыл мо̄йт. Во̄р па̄вылт о̄лсыг э̄кваго̄йкаг. Э̄ква такви торыг а̄ги о̄ньщас. О̄йка такви торыг а̄ги о̄ньщас. А̄гияге̄н янгыг е̄мтсыг. Аквматэ̄рт э̄ква ла̄ви: Маныр а̄гин, во̄рт э̄лнув ма̄нь колхусапыл ва̄рапе̄лын, вос такви тот о̄лы. Яныг а̄ги. О̄йка хоталь щалты, та минас. Ма̄нь ёмас яныт колхусап ва̄рыс, а̄гитэ тув та ва̄нтлуптастэ. Наӈ тыт о̄лэн, ла̄ви, такви лю̄ньщи. Воссыг хумле ва̄рилум, о̄ньгын ляпан ат вивен, акваг тораставен. Тот та о̄лы. О̄йка о̄лыо̄лы, уральтытэ. Нуса порат пе̄с тэ̄нутыл тотытэ. Аквматэ̄рт ёхтыстэ, а̄гитэ ӯнлы, щёвалт такем ты пӯтэ па̄йтахты. Айкве, наӈ хотыл нё̄выль висын? Осын такем ты нё̄влиӈ. Юв щалтыс, сунсыглахты, колэ̄т тай щар акваг сэ̄млуйвыгруй ханта̄л акв ле̄ӈк а̄тим. Акваг осэва̄тал нёхсыт па̄рт осыл ханащлэ̄гыт. Наӈ хотьют о̄ньще̄гын? А̄ти, ат суйтыглы а̄гитэ. А̄щ, ӯнтэ̄н. Пӯтэ а̄стыс, пӯтыл хӯныстэ, манарастэ. Тыттыстэ, манарастэ. Юв минуӈкв патыс. Тытты, пӯт ва̄рнэ нё̄выль вуе̄лн, юв тотэ̄лн. Сунсовн та̄лтхатас, о̄йка юв та харты. Юв ёхтыс, э̄кватэ ляльт ла̄ви: А̄гиме̄н такем та ёмщакв о̄лы, колэ̄т тай таса̄вит сэ̄млуйвы̄груй нас хананты. Кон со̄млях сове та̄глэ нё̄выль. Вос тах туииг е̄мты, ам а̄гим о̄с я̄нас колыл ва̄рапе̄лын. О̄с о̄йка о̄лыо̄лы, о̄ста яланты уральтаӈкв. А̄гитэ тай акваг сэ̄млуйвы̄груй нас хананты. Наӈ хумыс тох о̄лэ̄гын? Ам Мисхумн ва̄глуве̄сум. Тав э̄лумхо̄ласн ат суссылтахты. Во̄рт акваг та яласы, акваг матыра̄ти алыщлы, осэва̄тал во̄руй юв тоты. Ёмас. О̄йка сыме ёмас, а̄гирище ёмщакв о̄лмыгтас, манарас. Тӯяпа̄лаг патыс, нэ̄тэ тай акваг та вораты. Моляхмолях кол ва̄рен. А̄гирищум колыл ва̄рапе̄лн, ӯнттыгпе̄лн. Вос такви я̄нас о̄лы, э̄рыӈ о̄с тах щёлыӈ хум ва̄ри. Тӯяпа̄лаг патыс, о̄йкарищ колхусап та ва̄ри, манари, щё̄питас а̄гитэ ма̄гыс. Туп а̄стапас, та̄ра а̄гитэ а̄лмаястэ, пормасыӈ та̄гыл тув та ха̄йттастэ. А̄гитэ о̄лы, аквматэ̄рт о̄лыме̄тэ, хотьют та ло̄хи. Щалтапен, кей, щалтапен, а̄ви па̄лыго̄лы. Юв та щалты. Ме̄ӈквын ёхтувес. Матыр тэ̄нут о̄ньще̄гын? Ии, тав тай та ха̄йты, манари. Тэ̄нут такос аты, пасанн такос ӯнтты. Манарн пуки сове то̄влаве. Та тэ̄с, та тэ̄с. О̄с тэ̄ӈкв таӈхи, такви та лохасавес. Саманэпалянэ аялаве̄сыт, пуӈк хопаритэ а̄виха̄пн ӯнттыгпавес. Такви ань та мины. Э̄кваго̄йкаг тай та о̄лэ̄г. Аквматэ̄рт матпалыт хоса о̄лсы̄г, ва̄ти о̄лсы̄г. Сар, ам ялэ̄гум, а̄гим уральтылум, хумыс о̄лы, э̄ква ла̄ви. Тув та мины. Тув мины, сунсы. Яя, а̄ги тай кол а̄витэ па̄лыг, ул нё̄выль пут па̄йты. Такем та ре̄гтыглыма, кол а̄витэ па̄лыгпиныма. Ляпан та ёхтыс, ёмщакв сунсуӈкв патыстэ, яа, манаре, а̄гитэ туп пуӈк хопаритэ ӯнттыгпиме, ӯнлы. Саханэ пӯт йӣвн пе̄румтымат. Лю̄ньщим, поварим юв та мины, ля̄втым. Хумитэ палт ёхтыс. -Наӈ а̄гин нэ̄матрыг ат таи, тав тай ёмас щёлыӈ хум ва̄рыс. Ам а̄гирищум витыг та минас. Мо̄йтум та оигпас. Ты мо̄йт а̄нумн Елена Константиновна Самбиндалова мо̄йтыстэ. Тав Ня̄хщамво̄ль па̄вылт о̄лы. Аква̄тихал Хулюмсунтын ёхтала̄лы. Тыт тав а̄гияге ос а̄ги ня̄враманэ о̄лэ̄гыт. Мо̄йт таве̄н тав ща̄не Мария Григорьевна Самбиндалова, а̄ги о̄парищ наме Тасманова, потырта̄лас. 1087 2014.11.07. Александр ВЬЮТКИН Ща̄нь ла̄тӈув э̄лаль тотнэ хум. Тӯяг соссаӈ ла̄тӈыл потыртан щирыл ня̄врамыт ханищтан ма̄хум халт окружной касыл ва̄рыглавес. То̄нт ма̄ньщи ос ханты ма̄хум халт ма̄н ма̄ньщи хумиюв но̄хпатыс, тав наме Владимир Савельевич Меров. Володя ань Ханты-Мансийск ӯст о̄лы. Тав ня̄врамыт ханищтым «Лылыӈ союм» колт рӯпиты. Ня̄врамыт са̄ӈквылтапыл, нарсъюхыл са̄ӈквылтаӈкв, хум ня̄врамыт йӣквуӈкв ос тӯлыглахтуӈкв ханищтыянэ. Моще̄рт Всероссийский нампа касыл ты е̄мты. Ты та̄л тав яныг таквс э̄тпос са̄тхойполов хо̄талт Москва ӯст ва̄раве. Тув Россия ма̄ янытыл са̄всыр ща̄нь ла̄тӈыл ня̄врамыт ханищтан ма̄хум ёхтэ̄гыт. Ка̄сыӈ ёхтын хо̄тпа такви ма̄тэ̄т о̄с акв тамле щир касылт но̄хпатыс. Ты касыл титхӯрум хо̄тал тах мины. О̄влэ̄т та̄нти ва̄рнэ рӯпатаныл мастеркласс щирыл такталаӈкв э̄ри. Та касыл рущ ла̄тӈыл «Мой регион, моя школа, моя профессиональная деятельность» тох ла̄ваве. Тувыл лов кум палыт телевизор хосыт ня̄врамыт ёт рӯпитан ханищтап суссылталаӈкв э̄ри. Та хо̄таланыл сыс ка̄сыӈ хо̄тпа такви маснутыл масхатым вос о̄лы. Ты коныпал та̄нти маснутаныл ос хораманыл урыл иӈ мощ потыртаӈкв во̄вавет. Владимир Меровн касылн щё̄питахтын ма̄гсыл Майя Ефимовна Макарова ос Ирина Борисовна Белявская нё̄тэ̄г. Москва ӯст ма̄ньщи хумиювн ёмащакве̄г каснэ̄тэ щирыл ма̄н са̄в щунь ос но̄хпатнэ ла̄тыӈ те̄тэ̄в. На̄й-О̄тыранэ̄н вос ӯргалаве ос нё̄таве. 1087 2014.11.07. Александр ВЬЮТКИН Ня̄врамыт ханищтан ма̄хум касыланыл. Ма̄нь таквс э̄тпос котиль хо̄талытт Ханты-Мансийск ӯст ня̄врамыт ханищтан ма̄хум халт ва̄рнэ касыл урыл прессконференция о̄лыс. Та ва̄рмаляныл рущ ла̄тӈыл «Всероссийский конкурс «Любимый учитель в Югре» намаим о̄лыс. Ля̄ххал тотнэ ма̄хум ёт потыртан ма̄гыс нила хум ёхталасыт. Округ губернатор ва̄ӈын хум Алексей Андреевич Путин о̄лыс, тувыл «Единая Россия» партият центральный совет кӯщай ва̄ӈын хум Олег Павлович Пташкин ёхталас. Ос Иван Михайлович Пачин, тав мо̄лты та̄лт Россия янытыл ва̄рыглым касылт финал мус ёхтыс. Юио̄выл хум Александр Евгеньевич Муромский о̄лыс, тав «Рекорд Гиннеса» нампа нэ̄пакт наме са̄т щёс хансыглавес. О̄влэ̄т Алексей Путин ня̄врамыт ханищтан ма̄хум халт ва̄рнэ касыл урыл потыртас: – Ма̄н округувт тамле касыл щар о̄влэ̄т 2011 та̄лт ва̄рыглавес. То̄нт тав иӈ окружной нам о̄ньщис. Ты порат таве Всероссийскийиг ва̄рилӯв. Россия ма̄ янытыл аквъёт пуссын ва̄т нупыл са̄т ма̄ныл ма̄хум ма̄н округувн касуӈкв ёхтэ̄гыт. Ты хӯрум щёс ва̄рыглам касыланувт но̄хпатум ма̄хум ма̄шинал мӯйлупта̄лсанӯв. Ты порат о̄с олныӈ мӯйлупсал мӯйлуптыянӯв. Та юипа̄лт Олег Пташкин ля̄ххал тотнэ хо̄тпатын титыглавес: – Россия янытыл ты касыл ва̄рнэ щирыл ос манрыг Югра пе̄риявес? – Ты урыл ма̄н хоса атыпыл номсахтасӯв, хо̄т таве ва̄руӈкв. О̄выл номтанув та̄ра на̄н округынт ва̄рнэ щирыл е̄мтыс. Тыт пуссын хумус ва̄раве, воссыг нэ̄мхотты ма̄т тох ва̄руӈкве ат ве̄рме̄гыт ос ат ха̄сэ̄гыт. Ань ты касылув юипа̄лт, ам номсэ̄гум, мо̄тынтыг Россия янытыл пуссын на̄н палтылын касуӈкв тах ёхтэ̄гыт. Тувыл Александр Муромский титыглавес: – Хумле номсэ̄гын, ма̄н округув ёмщакв ты касылын щё̄питахтуӈкв ве̄рми ман а̄ти? – Ам на̄н палтылын нилыттыг ты ёхтысум. Ва̄глум, хумус на̄н ты рӯпата ёмщакв ва̄рилын. Ка̄сыӈ щёс тыг ёхталанэм порат матыр ёмас, йильпи пӯмащ на̄н суссылтэгы̄н. Ань ос амтирот ты номсэ̄гум, нэ̄мхотьютн ат ва̄нэ пӯмащ щё̄питым о̄ньщегы̄н. Тав потре оигпам юипа̄лт Иван Пачин титыглавес: – Тамле касыл ня̄врамыт ханищтан ма̄хмытын э̄ри манос а̄ти? – Тыхурип касыл ма̄навн сака э̄ри. Ам о̄влэ̄т касуӈкв щар ат номсысум. Нас тох амти пӯмащум ма̄гсыл хасхатасум. Щар о̄влэ̄т ня̄врамыт ханищтан хо̄тпат каснэ̄ныл ма̄гсыл ня̄врамытын пе̄риявет. Тувыл ущ э̄лаль ма̄н касуӈкв ве̄рме̄в. Ня̄враманӯв ма̄н хумус ханищтыянӯв, тох э̄лаль о̄луӈкв патэ̄в. Ам та̄наныл ёмащакв ханищтаӈкве ос та̄н ётаныл пилта̄л о̄луӈкв таӈхе̄гум. Ты ма̄н рӯпатав хосыт ма̄н ма̄к яныг ёмас тэ̄ла ва̄ре̄в. 1087 2014.11.07. Людмила ТЕТКИНА Ма̄нь па̄вылт рӯпитан школа. Октябрьский районт Карымкары па̄выл А̄с я̄ ва̄тат ӯнлы. Па̄выл котильт яныг ӯрай о̄лы. Ты ӯрай па̄выл киттыг уртытэ. Акв ва̄тат пе̄с па̄выл, мо̄тыт ва̄тат йильпи па̄выл. Па̄влыӈ ма̄хумн тэ̄н тох ты ла̄ваве̄г. Пе̄с па̄выл котильт яныг кирпащ школа ӯнттувес. Нина Олеговна Мудрецова школа кӯщай нэ̄г о̄лы. Тав ла̄выс: «Ма̄н школав «малокомплектныиг» ловиньтахты. Ты та̄л тыт 140 ня̄врам ханищтахты. Та̄н халанылт 19 а̄гирищпыгрищ ма̄ньщиг манос хантыиг о̄лэ̄гыт. Соссаӈ ня̄врам тыт мощща, тыи ма̄гсыл ща̄нь ла̄тыӈ школат та̄н ат ханищтэ̄гыт. Ты э̄лыпа̄лт са̄всыр кружокыт ва̄рыгласӯв, та̄наныл сак хартуӈкве ос ю̄нсхатуӈкве ханищтасанӯв. Тувыл а̄гирищит тув ёхталаӈкве сака ат ка̄сащасыт. Ты кружок рӯпитаӈкве воссыг ат патыс. Округув янытлан хо̄тал кастыл ка̄сыӈ та̄л концертыт, суссылтапыт, каснэ ва̄рмалит ва̄рыглэ̄в. Ты коныпал классный щёс урок порат ма̄ньщит, хантыт культураныл урыл потыртэ̄в. Ня̄враманув ёмащакв ва̄ганыл, хоты мирыт пе̄с йис та̄гыл тыт о̄лэ̄гыт». Карымкары па̄выл школат ня̄врам ханищтым 19 хо̄тпа рӯпиты. Кӯщай нэ̄ ла̄внэ̄тэ щирыл, та̄н халанылт ма̄ньлат хо̄тпа щар а̄тим. Нина Олеговна ма̄ньлат хо̄тпат тув рӯпитаӈкве кос во̄виянэ, тувыл ма̄нь па̄вылн нэ̄мхотьют минуӈкве ат ка̄сащи. Ань ты школа а̄стлан а̄гит ня̄врам ханищтан хо̄тпаг э̄лаль ханищтахтуӈкве ке̄тыяныл. Мо̄тыт та̄л тах кит а̄ги университет а̄стлэ̄г ос о̄лнэ па̄влэ̄н ёхтуӈкве номсэ̄г. Тувыл кӯщай нэ̄ ла̄выс, ханищтахтам а̄гияге ӯст рӯпата ке хо̄нтэ̄г, то̄нт та̄н тах ханищтан хо̄тпа та̄л о̄с та хультэ̄гыт. Ты э̄лыпалт кӯщай нэ̄ интернет хосыт ня̄врам ханищтан хо̄тпа кинсыс, са̄в ма̄н пищма ке̄тыглас. Хо̄тпа тув рӯпитаӈкве ке ёхты, та̄ра о̄лнэ колыл миӈкве э̄ри, та̄н арыг о̄лнэ кол ат о̄ньще̄гыт. Тыи ма̄гсыл нэ̄мхотьют Карымкары па̄вылн ёхтуӈкве ат ка̄сащи. Нина Олеговна ла̄выс: «Ма̄н ма̄нь па̄вылквет кос о̄лэ̄в, тувыл школат маныр э̄ри пуссын о̄ньще̄в. Са̄всыр ищхӣпыӈ партыл, компьютерыл ёвтвесӯв. О̄выл классын ялантан а̄гирищитпыгрищит ты ищхӣпыӈ утыл рӯпитаӈкве акв колнакт ханищтахтэ̄гыт. Мо̄т колнакт яныгнув ня̄врамыт рӯпитэ̄гыт. Школат интернет ва̄рвес. Ань акв та̄рвит о̄лы, ты утув лю̄льсаӈ рӯпиты. Ты урыл кӯщаит палт акваг хансыглэ̄в, ла̄ве̄гыт, моще̄ртн тах па̄вылт яныг вышка тӯщтаве, то̄нт интернет ёмащакв рӯпитаӈкве ущ паты. Мо̄лты та̄л ма̄н грантолн ма̄гсыл нэ̄паканув ке̄тыгласанӯв, то̄нт 600 со̄тыра солко̄вил майлувесӯв. Ты олныл ма̄н компьютерный ос спортивный классыг ёвтсагӯв. Ня̄врам ханищтан нэ̄пакыт пуссын о̄ньще̄в. Ка̄сыӈ та̄л нэ̄пакыт хасылтэ̄в ос тувыл э̄рнэ нэ̄пакытыл ке̄таве̄в. Ща̄ньа̄щит ты нэ̄пакыт щар ат ёвтыглэ̄гыт, э̄рнэ ханищтан нэ̄пакыл ня̄врамыт школат мыганӯв». Ты та̄л Карымкары па̄вылт о̄выл классын 20 а̄гирищпыгрищ ёхтыс. Ос 11 классыт лов ня̄врам ханищтахты. Лов классыт туп хӯрум ня̄врам ханищтахты, са̄в ня̄врам ты та̄л училищан манос колледжин э̄лаль ханищтахтуӈкве минасыт. Карымкары па̄выл по̄хат ма̄во̄й но̄хвинэ компания рӯпиты, са̄в ня̄врам нефтегазовый колледжин ханищтахтуӈкве минэ̄гыт. Таи ёмас, ханищтахтуӈкве а̄стлэ̄гыт, пуссын ювле рӯпитаӈкве ёхтэ̄гыт. 1087 2014.11.07. Александр ВЬЮТКИН Ма̄ мувлахи яласан хум. Минам э̄тпос ва̄т нупыл титыт хо̄талэ̄т Ханты-Мансийск ӯст ка̄тыл по̄слын хурит суссылтан колт пӯмащ суссылтап о̄лыс. Ты хурит ма̄ янытыл яласан хум Фёдор Филиппович Конюхов по̄слысанэ. Фёдор Конюховын ва̄т са̄грапна̄л э̄тпос титхуйплов хо̄талт са̄тлов нупыл хӯрмит та̄лэ ты то̄влы. Тав Украинат Запорожский оласть ма̄т Чкалово па̄вылт самын патыс. Ма̄н округувн тав ань о̄выл щёс ёхталас. Тыт ва̄рыглам выставкатэ̄т атпан са̄виттем хури суссылтас. Хӯриянэ яласам ма̄нанэ̄т по̄слыгласанэ. Фёдор Конюхов налыман ляпатем са̄всыр ма̄н экспедициян ялыс. Хо̄т щёс такте̄т пары̄сыӈ ха̄пыл ма̄ мувылтастэ. Яласам лё̄ӈхе палытэ То̄рум э̄тпос акиюв мус ёхты. Та палытэ 384 со̄тыра арыгтем ве̄рыста о̄лы. О̄йка хунь яласан ма̄тэ̄ныл юв ёхты, тав номтэ щирыл хуриянэ та̄ра ёмащакв щирмус по̄слыянэ. Пуссын аквъёт тав хӯрум со̄тыра хури по̄слыс. Фёдор Филиппович суссылтапе пӯснэ кастыл са̄в мир ёхталас. Мир халт округ Дума кӯщаиг о̄лнэ хум Борис Хохряков о̄лыс. Тав ла̄выс: – Ма̄н округув ма̄тэ такви щире̄т сака нё̄тнэ ос пӯмащ. Таима̄гсыл хотьют ма̄н палтылув ёхталас те, тав титынтыг тыг ёхтуӈкв ла̄ви. Ма̄н округувн мирн ва̄нэ са̄в учёный ма̄хум ёхталасыт. Та̄н наманыл касталан щирыл Самарово нампа ӯс палъе̄рыт а̄нох памятник ва̄рим о̄лы. Ань ос ма̄ янытыл яласан мирн ва̄нэ хум ма̄н ӯсувн ёхтыс. Ты ма̄гсыл ам таве̄н яныг пӯмащипа ла̄тыӈ ла̄ве̄гум. Яласан лё̄ӈхе̄т То̄рмувн ёмщаквег вос ӯргалаве. Борис Хохряков юипа̄лт ка̄тыл хурит по̄слын хум Геннадий Степанович Райшев э̄лыл ёхтум хум янытлаӈкв во̄ввес, тав ла̄выс: – Ам тамле ёмас хум ёт хосат ва̄йхатаӈкв номсысум. Тав пӯмащ рӯпатанэ а̄нумн сака мӯстысыт. Фёдор Филиппович са̄в а̄лыми ва̄руӈкв, ты ма̄гсыл ам таве хурин тах по̄слылум. Ка̄тыл по̄слын ханты о̄йка потыртаме юипа̄лт выставка пуснэ хум Фёдор Филиппович потыртас: – Ам на̄н округын урыл хосат хӯлыгласум, аквписыг тыг ёхталаӈкв номсысум. Ань ам номтум тэ̄лаг ты е̄мтыс. На̄н округын сака ёмас, тыт лылтуӈкв кӯстыр. На̄н Ханты-Мансийск ӯсын мо̄т ӯсыт хурип а̄ти. Тав мо̄т хурипнув ӯсыг о̄лы, тыт о̄лнэ мире о̄с мо̄тсырнувег сусхатэ̄гыт. Ам са̄в ма̄т о̄лсум, ва̄глум. Ам ётум ва̄йхатнэ кастыл ёхтумын ма̄гсыл на̄нанн яныг пӯмащипа ла̄тыӈ ла̄ве̄гум. 1087 2014.11.07. Светлана РОМБАНДЕЕВА Ма̄ньлат а̄гипыганув ханищтахтэ̄гыт. Ханты-Мансийск ӯст Технологопедагогический колледжит нила со̄тыра арыгтем ма̄ньлат хо̄тпа ханищтахты. Та̄н халанылт 330 – соссаӈ ня̄врамыт. Ты ханищтахтан колт са̄в та̄л рӯпиты ма̄ньщи нэ̄ Альбина Романовна Станиславец, а̄ги о̄парищ наме Хозумова. Ма̄ньлат а̄гипыгыт тав ма̄ньщи ла̄тӈыл ханищтыянэ. Ам Альбина Романовна ёт потрамасум, китыглахтасум, ма̄ньщи ня̄враманув хотыл ёхтысыт, хумус ханищтахтэ̄гыт, хумус о̄лэ̄гыт. На̄н ань э̄лаль Альбина Романовна потре ловиньтэлы̄н. – Ты колт хӯрумса̄т арыгтем соссаӈ а̄гипыг ханищтахты, та̄н халанылт яныгса̄т ляпатем – ма̄ньщит. Са̄выӈпа̄лэ Ха̄льӯс районныл о̄лэ̄гыт – Кульпасныл, Саранпа̄вылныл, Ло̄пмусныл, Кимкьясӯйныл, Ягримныл. Кондинский районныл хо̄нтаӈ ня̄врамыт о̄лэ̄гыт. Акв а̄гиюв Свердловский областьныл ёхтыс, Нина Анямова, лӯсум а̄ги. А̄гит янгыщ садикт рӯпитан воспитателиг ос о̄выл классыт учителиг ханищтахтэ̄гыт. Пыгыт ос судоводителиг, автомеханикыг, электромонтерыг, кол ӯнттын ва̄рмальн ос мо̄т рӯпатан ханищтахтэ̄гыт. Ань тамле группа а̄тим, хо̄т туп соссаӈ ня̄врамыт ханищтахтэ̄гыт. Ка̄сыӈ хо̄т ка̄сащи, тот ханищтахты. Ань май экзаменыт ат мыгыт, нас аттестатаныл щирыл вивет. Хотьют оценканэ ёмасыт, ёмаснув специальностин ликми. Ань нэ̄матыр льгота а̄тим, кос ма̄ньщи, кос рущ ня̄врам, пуссын аквхурипат. Хотьют ве̄рми ханищтахтуӈкве, тав та ханищтахты. Ма̄н ханищтахтан колув хӯрум корпус о̄ньщи. Уроканув са̄всыр ма̄т о̄лэ̄гыт, хӯрум колыт халт та яласэ̄в. Соссаӈ хо̄тпат отделениянылт ам кӯщаиг о̄лэ̄гум. Тамле отделение а̄тим кос, ос ня̄врамыт ёт рӯпитаӈкве э̄ри, таима̄гыс ам тув та паттуве̄сум. Хӯрум колыт халт яласэ̄гум, тох та рӯпитэ̄гум. Ма̄нь таквс э̄тпост, хунь ущты ёхтэ̄гыт ханищтахтуӈкве, ам та̄н ётаныл ва̄йхатэ̄гум, китыглыянум, хотыл о̄лэ̄гыт, пуссын наманыл ос телефонаныл нэ̄пакын хансыянум. Ла̄виянум, хунь матыр та̄рвит е̄мтапи, матыр нё̄тмил э̄ри те, та̄ра ам палтум тыг вос ёхтэ̄гыт, рӯпитан колнакум номере ла̄вилум. – Альбина Романовна, ма̄ньщи ла̄тыӈ пуссын ханищтэ̄гыт? – А̄ти, туп дошкольный ос о̄выл классыт ханищтан отделениягт ханищтэ̄гыт, хӯрмит ос нилыт курсыт. Мо̄т ня̄врамыт ат ханищтэ̄гыт. – Ла̄тӈув ва̄нэ а̄гипыг о̄лы? – Ща̄нь ла̄тӈув ва̄нэ хо̄тпа сака мощща. Туп акв а̄ги Нина Анямова ма̄ньщи ла̄тӈыл ёмащакв потырты, ла̄тӈе ва̄гтэ. Дошкольный отделеният ам палтум Настя Хозумова – Ло̄пмус па̄вылныл ос Вика Никитина – Ясунт па̄вылныл ханищтахтэ̄г, тэ̄н ма̄ньщи ла̄тыӈ ёмащакв торгамтэ̄г, потрыт рущ ла̄тӈыг толмащлаӈкве ве̄рмиянэ̄н. – Ма̄н ня̄враманув пуссын общежитият о̄лэ̄гыт? – Та̄н общежитият о̄лэ̄гыт. Пыгрищит Учхозыт о̄лэ̄гыт. Па̄влыӈ ма̄ныл са̄в пыгрищит ёхтысыт. О̄лнэ коланыл ёмас кос, ос ка̄сыӈ колнакт сака са̄в хо̄тпа о̄лы. Та̄н ма̄гсыланыл колнаканылт кит накпа пе̄ринат ӯнттуве̄сыт, тох хотмус та хуе̄гыт. Мо̄лхо̄тал ам Та̄гт па̄выл ос Касум па̄выл пыгрищит китыглыянум: «На̄н тыт ат ра̄таве̄н? » Ла̄ве̄гыт: «А̄ти, ат ра̄таве̄в, ма̄н тыт са̄в хо̄тпа о̄лэ̄в, яныгнув курсыт ханищтахтан пыгрищитн вуянтаве̄в». Ань общежитият видеокамерат о̄лэ̄гыт, хотьют мори капырты ман алхаты, тот пуссын на̄ӈки, таима̄гыс та̄н тот ань мощ роттыгнув о̄лэ̄гыт. Стипендия олныл туп та ня̄врамыт ойтавет, хотьют ёмащакв ханищтахты, нила ос ат оценкат о̄ньщи. Хунь хӯрум оценкат о̄ньщи, олныл ат миве. Нё̄тмил олныл туп нусаг о̄лнэ ня̄врамыт ойтавет. Та̄нанылн са̄в нэ̄пак акванатуӈкве э̄ри, то̄нт олныл ущ мивет. То̄ват о̄вылтахтэ̄гыт ханищтахтуӈкве, тувыл хотпо̄йтэ̄гыт, ща̄нянылна̄щанылн олныл нё̄туӈкве ат ве̄рмавет. Ёмас, хунь та̄н юил нё̄тавет. Нас тох по̄хан ма̄н ня̄врамыт ат утыянӯв, та̄н ётаныл акваг потыртэ̄в, рӯпитэ̄в, ла̄ве̄в, на̄нанн ханищтахтуӈкве э̄ри. Ос хунь та̄нти ат таӈхе̄гыт ханищтахтуӈкве, то̄нт по̄хан минэ̄гыт. Альбина Романовна потре та оигпас. Таве̄н ам яныг пӯмащипа ла̄тыӈ ла̄всум. Тав такви о̄с ма̄ньщи па̄вылт яныгмас, Ха̄льӯс район Сӯкыръя па̄вылт, са̄т а̄пщи о̄ньщас. Атхунь ва̄гтэ, хумус та̄нанылн та̄рвитыӈ мо̄т мир халт о̄луӈкве. Таима̄гыс та̄н ма̄гсыланыл тав сыме ща̄рги. Ты я̄тил ма̄ньщи ма̄хумате̄нув, Альбина Романовна ос ханищтахтан а̄гипыганув, пуссын пуста̄гыл вос о̄лэ̄гыт, На̄янылн-О̄тыранылн вос ӯргалавет! 1087 2014.11.07. unknown Тит нё̄тнэ ма̄ньщи а̄гииг. Ты хурит Оксана Рыжкова (Станиславец) по̄слым о̄лы. Тав округ Дума депутат Т. С. Гоголеван нё̄тнэ хо̄тпаг рӯпиты. Ты хурит Татьяна Сивцова по̄слым о̄лы, тав Хулимсунт па̄выл школат 11 классыт ханищтахты. 1087 2014.11.07. Валентина УЗЕЛЬ Округ кӯщаюв э̄лы хо̄н ма̄н ялыс. Ювле хультум э̄тпос 28 хо̄талэ̄т округ кӯщаюв Наталья Комарова Франция э̄лы хо̄н ма̄т Париж ӯст ЮНЕСКО нампа колт ма̄н округув урыл потыртас. ЮНЕСКО – ты кол ООН (Организация Объединённых Наций) па̄лыл рупиты. Ма̄н округ кӯщаюв Наталья Комарова ёт са̄в соссаӈ хо̄тпа тув ялыс, «Хо̄тал» нампа театр, «Торум маа» нампа музейт рӯпитан ма̄хум, «Ешак най» нампа ще̄мьяӈ ансамбль ос мирн ва̄нэ мо̄т хо̄тпат. Тот ма̄ньщи, ханты ос ё̄рн мирыт о̄лупсаныл урыл потыртасыт. Ма̄хманув йӣквсыт, э̄ргысыт. Та̄н нупыланыл сунсуӈкв ёхталам ма̄хумн ма̄н йӣкванув, э̄рганув сака мӯстысыт. Округувт ань ЮНЕСКО кол акв кафедратэ 2008 та̄л па̄сныл Югорский университетт рӯпиты. Тот рӯпитан ма̄хум ань ма̄витув ханищтыяныл. Та̄н та̄рапаттуӈкв таӈхе̄гыт, ка̄сыӈ та̄лэтуве манрыг ма̄лтыпыг е̄мты, то̄ванакт манрыг яныг вит ва̄ри. Моще̄рт ма̄ янытыл о̄лнэ мирыт ща̄нь ла̄тӈаныл пуссын акв яныг нэ̄паккапайн хансавет, рущ ла̄тӈыл тох ла̄ваве – Атлас языков мира. Ма̄н округувт о̄лнэ ма̄ньщи мир, ханты ос ё̄рн мирыг ла̄тӈанув тув о̄с хансавет. Ты рӯпата о̄с ЮНЕСКО колт ва̄раве. 1087 2014.11.07. Светлана РОМБАНДЕЕВА О̄лнэ коланув урыл ля̄ххал. Ювле хультум э̄тпост РИЦ «Югра» колт ля̄ххал тотнэ ма̄хум акванатапа̄лве̄сыт. Тот ань округ янытыл налоговый служба палт кӯщаиг о̄лнэ нэ̄ Ольга Анатольевна Литова тав потыртас. Э̄лумхо̄лас о̄лнэ колэ, колэ ӯнлын ма̄ ос яласан ма̄шинатэ ма̄гыс налоголн ойты. Ка̄сыӈ та̄л яныг таквс э̄тпос мус ойтхатуӈкве э̄ри. Ольга Анатольевна ла̄вме щирыл, хотьют налоголн ойтуӈкве ат те таӈхи манос ат ве̄рми, тав ё̄рва̄гыл ойтхатуӈкве ла̄ваве. Хо̄тпа олнэ яныгса̄т арыгтем со̄тыра са̄вит те, ос тувыл ойтхатуӈкве ат те ка̄сащи, тав та̄л сыс э̄лы хо̄н ма̄н минуӈкве ат ве̄рми, ань налоговый службан нэ̄мхотталь ат та̄ртаве. Ювле хультум та̄л сыс округувныл 555 хо̄тпа э̄лы ма̄н минуӈкве ат ве̄рмысыт, ка̄сыӈанылн яныгса̄т арыгтем со̄тыра ойтуӈкве э̄рыс, пуссын аквъёт – 100 млн. арыгтем солко̄ви. Ты хотьютн яныгса̄т арыгтем солко̄ви ойтуӈкве э̄ри, ос мо̄т ма̄хум ёт – та̄нанылн 14, 5 млрд. солко̄ви ойтуӈкве э̄ри. 2008 та̄лт ма̄хум 28 млрд. солко̄ви ойтуӈкве ат ве̄рмысыт. Налоголн ойтуӈкве ё̄рва̄гыл кащилтан тэ̄ла – ты сака та̄рвитыӈ рӯпата. Таве ма̄н са̄всыр службат ёт акваннё̄тхатым ва̄рилӯв, ма̄хум ёт потыртэ̄в, ла̄ве̄в, ань Россияв ма̄к са̄кконэ щирыл, налог олн ка̄сыӈ хо̄тпан ойтуӈкве э̄ри. Хунь хо̄тпа щар нэ̄мхотмус ойтхатуӈкве ат те таӈхи, то̄нт ма̄н тав матыр э̄рнэ утанэ хотвыганӯв. Округт о̄лнэ ма̄хум ёт ма̄н ёмас щирыл потыртэ̄в, та̄н ётаныл нур тотуӈкве ат таӈхе̄в. Хо̄тпа налоголнэ хӯрум та̄л арыг ат те ойтытэ, тав олнанэ хӯрмахнилах щёс но̄хлапе̄гыт, тувыл таве щёровн ойтуӈкве э̄ри. Ма̄хум ты урыл ат номсэ̄гыт, та̄нтина̄нанылн лю̄ль ва̄ре̄гыт. Ты кӯщай нэ̄ о̄с акв тэ̄ла урыл ля̄ххал ла̄выс, ань тыгыл э̄лаль, 2015 та̄л па̄сныл, о̄лнэ коланув ма̄гыс са̄внув олн ойтуӈкве патэ̄в. Россия Президентув ма̄нь таквс э̄тпос хо̄тыт хо̄талэ̄т йильпи са̄ккон хансыс. Ты са̄ккон щирыл, ань э̄лумхо̄лас о̄лнэ колэ ма̄гыс а̄ти та пе̄с тынэ̄тыл (кадастровая стоимость ла̄ваве) налоголн ойтуӈкве паты, ос ань йильпи щирыл о̄лнэ колэ тынэ манса̄вит (рыночная стоимость ла̄ваве), тувыл ойтуӈкве паты. Кос выгӯв, хо̄тпа о̄лнэ колэ тынэ 180 со̄тыра о̄лыс, налог тав тыгыл ойтыс. Йильпи щирыл ос ты колэ тынэ 3 млн. 500 со̄тыра солко̄ви, ань тав тыгыл олн ойтуӈкве паты. Ты атхунь сака са̄в. Ты са̄ккон хансум ма̄хум ла̄внэ̄ныл щирыл, Россияв янытыл ань са̄в колыт ӯнттавет, тынаныл сака янгыт, ос ты э̄лыпалт ӯнттум колыт тынаныл а̄ти тамле янгыт о̄лсыт. Хосат ӯнттум колыт тынаныл пуссын йильпииг ловиньтавет. Ты са̄ккон та̄н ань таима̄гыс хассыт, ма̄хум о̄лнэ коланыл ма̄гыс аквса̄виттем вос ойтэ̄гыт. Округувт ань о̄лнэ кол о̄с са̄в ӯнттуӈкве патвес. Ма̄хум кол та̄нти ёвтэ̄гыт, ӯнттуӈкве о̄с та̄нти ве̄рме̄гыт. Мо̄тыт та̄лныл ма̄н, Россият о̄лнэ мир, о̄лнэ коланув ма̄гыс тах маттем ойтхатуӈкве та патэ̄в. Яласан ма̄шинат урыл я̄нас потыр о̄лыс. Ма̄хум ань яласан ма̄шинаныл ма̄гыс налоголн о̄с ойтуӈкве патэ̄гыт. 100 лув ё̄р мус яныт ма̄шинат – акв щирыл ойтхатэ̄гыт, 100-250 лув ё̄р яныт ма̄шинат – ойтхатан олнаныл мощ мо̄тнув щирыл ловиньтавет, 250 ос тыгыл са̄внув лув ё̄р о̄щнэ ма̄шинат ос щар ма̄к са̄в олн та̄н тах та ойтэ̄гыт. Пенсият о̄лнэ ма̄хум ос а̄гмыӈмосыӈ хо̄тпат сака са̄в олн ойтуӈкве ат патэ̄гыт, та̄н ма̄гсыланыл са̄всыр льготат хансым о̄лэ̄гыт. 1087 2014.11.07. Тамара МЕРОВА Та̄н йильпи колыл молях майве̄сыт. Мо̄лалнув Нефтеюганск ӯсн ялмум порат ма̄н акв йильпи ӯнттым колн тотыглавесӯв. Ты кол «о̄выл арендный колыг» ла̄ваве. Тот хӯрумхуйплов ханищтан хо̄тпат туманне̄лмыл майве̄сыт. Та̄нанылн туманне̄лмыт округ губернатор Наталья Комарова ос Ипотечный агентстват рӯпитан кӯщай хум Евгений Чепель мисыт. Округт ты кол акв йильпи программа щирыл ӯнттувес. Тав «Проект по развитию рынка доступного арендного жилья» намаим о̄лы, ос 2012 та̄лт рӯпитаӈкве о̄вылтавес. Ты программа щирыл ле̄ккарыт, ня̄врамыт ханищтан ма̄хум ос полицият рӯпитан хо̄тпат о̄лнэ кол молях миӈкве патавет. Колыт са̄всыр компаниятн ӯнттавет ос тувыл Ипотечный агентство па̄лыл ёвтавет. Таи ма̄гыс округ бюджетныл олн та̄ставе. Ипотечный агентство ты колыт аквтох э̄рнэ пормасыл ёвтыянэ. Тув щалтнэ ма̄хумн пасаныт, уласыт, шкап манос диван ёвтуӈкве ат э̄ри. Та̄н туп тот о̄лнэ̄ныл сыс ка̄сыӈ э̄тпос округн олн ойтуӈкве патэ̄гыт. Акв па̄лэ ще̄мьят та̄нки ойтэ̄гыт, мо̄т па̄лэ рӯпитан ма̄ныл аренда олн ойты. Евгений Чепель э̄лаль таи потыртас: « Ань ты арендный колт 94 са̄всыр колнакыӈ колыт ма̄хумн майве̄сыт. Та̄н пуссын са̄всыр ойтнэ тын о̄ньще̄гыт, тув ловиньтаве: кол манах колнак о̄ньщи, хоты лю̄лит этажит тав о̄лы, пе̄с манос йильпи пормасыл ёвтвес. Тувыл ма̄хумн таи ёмас, та̄н тот пропискал ва̄равет. То̄нт та̄н та̄нки ма̄гсыланыл э̄рнэ справкат щё̄питаӈкве ве̄рме̄гыт, ӯс па̄лыл нё̄тмилыл о̄с ва̄равет, пусмалтахтуӈкве манос ӯщлахтуӈкве путёвкал мивет. Ты колт акв колнак о̄щнэ квартира ма̄гыс хо̄тпат ка̄сыӈ э̄тпос 15 со̄тыра солко̄ви ойтуӈкве патэ̄гыт. Тамле колыт янытаныл 30 са̄виткем квадратный ме̄тра. Хӯрум колнакыӈ кол ма̄гыс, та̄н 80 са̄вит ме̄тра о̄ньще̄гыт, ма̄хум 30 со̄тыра солко̄ви ойтуӈкве патэ̄гыт тах. Ты коныпал колт на̄йпос ос турпат энергосберегающий ёмас утыл ва̄рве̄сыт. Та щирыл «коммунальный оплата», тыи со̄сантым вит, холтым на̄йпос, ре̄г ос мо̄т утыт ма̄гыс ойтнэ олн са̄в ат атхаты. Тот ще̄мьят та̄нки я̄нас ойтхатэ̄гыт. Ты йильпи о̄лнэ колыт по̄хат садикыт, школа, са̄всыр ла̄пкат, аптека, пусмалтан колыт ӯнттым о̄лэ̄гыт. Автобусыт ва̄тихал вос ялантэ̄гыт, ты тэ̄лат о̄вылтыт ань ӯсыӈ кӯщаит мӯсхалыг номсахтэ̄гыт ». Ма̄н туманне̄лмыл маим хо̄тпат ёт потыртасӯв. Та̄н пуссын мо̄т ма̄ныл тыг ёхтумыт. Са̄выӈпа̄лэ Башкирияныл, Марий Эл ма̄ныл о̄лэ̄гыт. О̄выл туманне̄лмыл Чулпан Гиззатуллина майвес. Тав колэ̄т ма̄хум акванатыглаве̄сыт. Нэ̄ мо̄лалнув Башкирияныл ёхтыс, тыт нила номер школат логопедыг рӯпиты. Фарида Шурихина о̄йкатэ̄нтыл Челябинский областьныл тыг ёхтысы̄г. Тав нёлолов школат биология ос химия урокыг мыг. Тыг мо̄лалнув а̄гитэ ёхтыс, тав Уфа ӯст ма̄во̄й но̄хвинэ институт а̄стлас ос тыг рӯпитаӈкве ёхтыс. Ань пуссын Нефтеюганскын о̄лмыгтасыт. Ты э̄лыпа̄лт та̄нки о̄лнэ кол киссыт, колыӈ кӯщаитн та̄нки ойтхатасыт. Тувыл тахольт молях о̄лнэ колыл майве̄сыт, ань пуссын хотща̄гтым о̄лэ̄гыт. Наталья Комарова ла̄выс: «На̄н школатт ня̄врамыт номтыӈыг ханищтыяны̄н, ма̄н на̄нан яныг пӯмащипа ла̄тыӈ ла̄ве̄в. На̄н ань тыт э̄лаль ёмащакв рӯпитасын, округ па̄лыл тынта̄лнув колыт ӯнттэ̄в». Тамле колыт э̄лаль ӯнттуӈкве патавет. Моще̄ртыт Сургутт ос акв тамле 170 квартираӈ кол, Ханты-Мансийскат 90 квартираӈ кол ты а̄стлаве̄г. Ань Сургут ӯст 260 квартираӈ кол ӯнттуӈкве о̄вылтавес. 2015 та̄лт ма̄хум тув о̄лмыгтэ̄гыт. Колыл маим хо̄тпат ла̄ве̄гыт, ты программа школатт, пӯльницатт рӯпитан хо̄тпатытн сака э̄ри. Ня̄врамыт ханищтаӈкве, ма̄хум пусмалтаӈкве мощща хо̄тпа ка̄сащи. Ёмас о̄лнэ колыл та̄ра ке мивет, то̄нт са̄внув хо̄тпа ты рӯпатан ханищтахтуӈкв патнувыт. Тав кос мо̄т ма̄ныл ма̄хум тыг сака ул вос ёхтынувыт. 1087 2014.11.07. Николай МЕРОВ А̄нъя па̄выл кӯщай нэ̄ потре. Ха̄льӯс район А̄нъя па̄выл кӯщаиг са̄в та̄л Татьяна Михайловна Рукова рӯпиты, такви о̄парищ наме Гындыбина. Ам таквсы порат тув ялсум, тав ётэ хо̄нтхатыгла̄сум. Ты нэ̄кве такви уре̄т ос ща̄нягеа̄щаге урыл мощ потрамас. На̄н тав потре э̄лаль ловиньтэлы̄н. «Ам 1958 та̄лт Кимкъясуй па̄вылт самын патсум. Ма̄н 1964 та̄лт колта̄глыл А̄нъя па̄вылн ва̄нтлысӯв, тыт яныгмасум. Ягрим па̄выл школаинтернатт ханищтахтасум. А̄щум Михаил Егорович Гындыбин, омам ос Елизавета Павловна Гындыбина, такви о̄парищ наме Гоголева о̄лыс. Ма̄н колта̄глувт хо̄т ня̄врам яныгмасӯв: хӯрум пыг, хӯрум а̄ги. Омав ма̄н нупылув «хӯрум ӯринэ̄кват» мовиньтым ла̄выглас. Тав ма̄нав пил ва̄туӈкве ханищтастэ. Пе̄с порат тох о̄лыс, ня̄врам са̄ткем та̄лэ то̄влы, тав во̄рн пил ва̄туӈкве тотыглаӈкве та о̄вылтаве. Таима̄гыс ма̄н ты рӯпатал щар ат пилэ̄в, ма̄нь та̄гыл ханьщувлым о̄лэ̄в. Ка̄сыӈ таквс пил ва̄туӈкве яласэ̄в. Ань о̄лнэ ня̄враманув тай во̄рн минуӈкве ё̄рыл кащилтыянӯв. Пил мощ ва̄тэ̄гыт, тувыл та, ка̄саныл та холы. Кимкъясуй па̄вылт о̄лмувт, юн пуссын ма̄ньщи ла̄тӈыл потыртасӯв. Ань ты накт ос рущиг е̄мтсӯв. Морсыӈ порат ма̄ньщи ла̄тӈыл потраме̄в. Ам хунь А̄нъя па̄вылн тотве̄сум, хо̄т та̄лум о̄лыс, рущ ла̄тыӈ щар ат ва̄сум. Ань па̄влувт Алексей каӈкум, Щерки а̄пщим ос Нина Михайловна Ендырева йигрищум о̄лэ̄гыт. Увщим нэ̄пак ловиньтан колт рӯпиты. Ма̄н ань нила хо̄тпа хультсӯв. Ща̄нягува̄щагув Нё̄рт са̄лы ӯрим нёлоловкем та̄л яласасы̄г. Са̄ртын колхозт са̄в са̄лы о̄лыс. То̄ва са̄лыӈ ма̄хум ва̄нтлым Карский ща̄рыщ мус яласасыт. Ща̄нягума̄щагум тай та ща̄рыщ мус ат ялсы̄г. Тэ̄н ма̄нки Нё̄ранув ляпат яласасы̄г. Та та̄лытт хӯрум ня̄врам самын паттыгласы̄г. Ос то̄нт сыре̄сыр а̄гм е̄мталас, тэ̄рпи ос а̄тим о̄лыс. Та ня̄врамыт пуссын а̄тимыг е̄мтсыт. Таима̄гыс омам нилыт щёс та̄рвитыӈыщ е̄мтыс, тав а̄щум ёт са̄лы ӯргалан ма̄ныл по̄йтсы̄г, на̄лув ва̄глысы̄г. Кимкъясуй па̄вылт о̄луӈкве патсы̄г. Тувыл ма̄н акв юипа̄лт хо̄т ня̄врам самын ты патсӯв. Пуссын пуста̄гыл э̄лаль яныгмасӯв. Ань па̄выл кӯщаиг рӯпитэ̄гум. Ме̄н о̄йкаме̄нтыл ат ня̄врам янмалтасме̄н. Хӯрум пыганме̄н Ягрим па̄вылт я̄нас ще̄мьяӈ та̄гыл о̄лэ̄гыт. Кит пыгагум субсидия хосыт тэ̄нки ма̄гсылэ̄н кол ёвтсы̄г. Акв пыгум ос субсидия ма̄гыс хансым о̄лы, ань ӯрхаты. Округувт кол ёвтнэ программа ёмщакв рӯпиты. Ты ва̄рмаль ма̄гыс кӯщаянувн пӯмащипа ла̄тыӈ ла̄ве̄гум. Яныг а̄гим А̄нъят о̄лы. Тав хӯрум ня̄врам о̄ньщи. Ма̄нь пыгме̄н Алёша хо̄тхуйплов та̄лэ то̄влыс, ме̄н ётме̄н о̄лы». Татьяна Михайловна китыт щёс хум ва̄рыс. О̄выл о̄йкатэ щаквыт порсыс, то̄нт хӯрум ня̄враманэ иӈ ма̄ниг о̄лсыт. Тувыл ётылнув тав китынтыг хум ва̄рыс. О̄йкатэ наме Виктор Романович Чалданов, тэ̄н аквъёт ва̄т нупыл са̄т та̄л о̄лэ̄г, аквъёт кит ня̄врам янмалтасы̄г. Яныг а̄гитэ̄н ват нупыл ат та̄лэ, питипатта пыге̄н хо̄тхуйплов та̄лэ то̄влыс. Ам ты колта̄глын пус ка̄т, пус ла̄гыл о̄лнэ ла̄тыӈ ке̄тэ̄гум. О̄лупсаныл кӯпнитыг вос о̄лы, коланылн ща̄гт вос ёхты. На̄й-О̄тыранылн вос ӯргалавет! 1087 2014.11.07. Николай МЕРОВ Тӯрват ма̄хманув йильпи коланыл а̄стлысаныл. Ма̄нь таквс э̄тпост округ Дума депутат нэ̄ Татьяна Гоголева Ха̄льӯс район Тӯрват па̄вылн рӯпата щирыл ялыс. Тот Савелий ос Татьяна Самбиндаловыг колта̄глыл ня̄враманэ̄н ос апганэ̄н ёт та̄лэтуве о̄лэ̄гыт. Ма̄н та̄н о̄лупсаныл урыл ва̄тихал хансыглэ̄в. Ты ма̄ньщи ще̄мья са̄лыт о̄ньщиманыл па̄сныл ань нилахкем та̄лыг ты е̄мтыс. 2012 та̄лт йис ма̄нанылт колыт ӯнттын ма̄гыс та̄н 70 процент са̄вит субсидияолныл майлуве̄сыт. Ты 990 со̄тыра са̄вит солко̄ви. Кит та̄лыг сыс маныр та̄н ӯнттысыт, ты колыт пирмайтан ма̄гыс Ха̄льӯс район миркол па̄лыл комиссия тув ялыс. Йис ма̄т ӯнттын колыт уральтан ма̄гыс Ханты-Мансийск ӯсныл округ Дума депутат нэ̄ Татьяна Гоголева, Ха̄льӯсныл миркол кӯщай ва̄ӈын хум Вадим Максимов, тав ётэ рӯпитан кит хо̄тпаг ос ам вертолётыл тув ялсӯв. О̄влэ̄т ма̄н вертолётув Турват па̄вылн исыс. Тот кит йильпи а̄мпар ос акв пувлынкол ӯнттым о̄лэ̄гыт. Та колыт по̄слысанӯв. Ам Савелий Дмитриевич ёт мощ потрамасум. Тав ла̄выс: «Ань ты накт туп нёлолов са̄лы хультыс. Са̄лы тэ̄нэ ма̄ мувлахил, са̄ткем ве̄рыста па̄лыт ма̄, ты кос яныг пӯсасыл ва̄рыслӯв, ос са̄лыт ха̄йтнутытн тох та алыщлавет. Хомлахыт э̄лыл ёхтыгпа̄лэ̄гыт, во̄ртур э̄тпост са̄т са̄лы алапасыт. Янытэ̄т ювтэ̄саныл, туп пуӈк хопалыяныл хультсыт. Мо̄т щёс ёхталасыт о̄с са̄т са̄лы алапасыт. Сака о̄щмарыӈыт, мори самын ат нэ̄глэ̄гыт. Са̄лыт э̄лаль янмалтан ва̄рмаль ат мыгыт. Ты кос ня̄влалыянӯв, нэ̄матыр ё̄р ат ёхты». Таима̄гыс ань ты хультум са̄лыяныл кол э̄лыпа̄лт ма̄нь пӯсас кӣвырт о̄ньщияныл. Я̄ па̄лыго̄лум порат са̄лы тэ̄п ха̄пыл тотыгласыт. Юн тыттым о̄ньщияныл. Ань ты та̄л о̄с тах Саранпа̄вылныл ма̄нь са̄лыт ёвтуӈкве номсэ̄гыт. Мо̄лты та̄гыл ӯнттум коланыл ань пуссын а̄стысыт. Ты ма̄гыс олныл ойтавет ке, о̄с тах са̄лы выгыт. Са̄лы ӯрнэ ма̄гыс акв яныг пӯсас Тӯрват па̄вылт ва̄рим о̄лы. Туи порат са̄лыт па̄выл ляпат о̄ньщияныл. Тэ̄лы кастыл са̄лыяныл ос Сысъя Нё̄р ляпан ва̄нтлуптыяныл. Тот та̄наныл ӯрнэ ма̄гыс о̄с пӯсас щё̄питым о̄лы. Сысъят о̄лнэ ма̄гыс яныг кол, тэ̄нутпормас о̄щнэ а̄мпарыт, сӯмъях, пувлынкол ӯнттысыт. Ма̄н та колыт пирмайтан ма̄гыс вертолётыл тув ты ялсӯв. Тот кӯщаянув ка̄сыӈ кол карсытэ ос палытэ нэ̄пакн хассаныл ос по̄слысаныл. Тувыл ётылнув ты тэ̄ла щирыл Ха̄льӯс мирколт сапра̄ни ва̄рыглавес. Комиссия ёт ялум хум Вадим Максимов ла̄выс: «Ма̄н комиссия ёт тув ялсӯв, ӯнттум коланыл пуссын ёмщакв суссанӯв. Тувыл МЧС организацият рӯпитан хо̄тпа о̄с тув ялыс. Тав колыт палытаныл, хосытаныл пуссын ловиньтасанэ ос ла̄выс, ёмщакв ӯнттым о̄лэ̄гыт. На̄й тэ̄нэ порат но̄х ат ё̄савет. Комиссия секретариг Наталья Курикова, Ха̄льӯс мирколт рӯпитан нэ̄, о̄лыс. Ты ва̄рмалит тав пуссын нэ̄пакн хассанэ ос колыт хурин по̄слысанэ. Ма̄н нэ̄пак щирыл суссӯв. Округ ма̄вит ӯргалан Департамент ёт хансыглам договорнэ̄пак щирыл манырсыр кол ӯнттуӈкве э̄рыс, пуссын о̄лы. Ты Департамент колыт ӯнттын ма̄гыс олн ойтыглас. То̄ва колыт проект щирыл ат кос ӯнттуве̄сыт. Ос ты пе̄нтсыл мо̄т ӯнттым колыт тув хансуӈкве ро̄ви. Ам тох ла̄вуӈкве таӈхе̄гум, проект щирыл маныр кол э̄рыс, Самбиндаловыт о̄лнэ йис ма̄т пуссын ёмщакв ӯнттуве̄сыт. Ты коныпал арыгнув а̄мпар ӯнттым о̄лы. Та̄ра на̄ӈки, ты ще̄мья та̄нки ма̄гсыланыл колыт ӯнттысыт. Манаса̄вит олн майлувес, пуссын тэ̄лаг минасыт. Ань ма̄н ты ва̄рмаль щирыл э̄рнэ нэ̄пакыт щё̄питэ̄в. Ам номсэ̄гум, ма̄хманув 30 процент са̄вит хультум олнаныл ойтавет тах. Ты 424 со̄тыра 500 солко̄ви ойтнэ щирыл хультыс». Со̄ль, ма̄хманув такем ёмас колыт ӯнттысыт. Арыг ӯнттым колыт о̄с пуссын нэ̄пакн хасве̄сыт. Договор щирыл Савелий Дмитриевичн по̄ль кол ӯнттуӈкве э̄рыс. Ос тав ты кос хилуӈкве арталахтыглас, во̄ӈха та̄ра витыл а̄мараве, тот тэ̄нут о̄ньщуӈкве ат а̄ртми. Такви ё̄ре̄тыл по̄ль кол ва̄руӈкве ат ве̄рми. Тувыл ос та̄н Нё̄р ляпат о̄лэ̄гыт. То̄ва ма̄т туп ма̄нтыл акв щёс хилаяӈкве ро̄ви, тувыл та, ёлаль акваг а̄хвтас. Таима̄гыс по̄ль кол пе̄нтсыл тав тэ̄нутпормас о̄щнэ а̄мпар ӯнттыс. Туи порат та̄н са̄лы нё̄выль солвалтыяныл ос ке̄раст по̄лям витыт о̄ньщияныл. Тот тамле ке̄рас са̄в о̄лы. Тувыл о̄с акв ва̄рмаль урыл потыртасыт. Ха̄льӯс район комиссият рӯпитан ма̄хум ла̄внэ̄ныл щирыл, Самбиндаловытн туп Сысъя ма̄т колыт ӯнттуӈкве э̄рыс. Ос Са̄ва йис ма̄тэ яныг, ты хосыт та̄н ла̄тӈаныл акванёхтысыт, Тӯрват па̄вылт ӯнттум кит а̄мпарыг, акв пувлынкол о̄с тув ловиньтаве̄сыт. Ты ма̄ньщи ще̄мья ань ӯнттум коланыл ма̄гыс хультум олнытыл моляхнув вос ойтве̄сыт, комиссият рӯпитам хо̄тпат нё̄туӈкве ла̄всыт. Ва̄им, Ха̄льӯс район янытыл туп акв тамле ма̄ньщи ще̄мья о̄лы. Та̄н пе̄с йис ва̄рмалит но̄хво̄рмалтэ̄гыт, таима̄гыс та̄нанылн нё̄туӈкве э̄ри. Ам ты колта̄глын яныг паща ла̄тыӈ ке̄тэ̄гум. О̄лупсаныл кӯпнитыг вос о̄лы. Номтыт о̄щнэ ва̄рмаляныл тэ̄лаг вос е̄мтэ̄гыт, са̄лыяныл э̄лаль вос са̄вмалтыяныл. Пус ка̄т, пус ла̄гыл э̄лаль вос о̄лэ̄гыт, щуне̄гыт. На̄й-О̄тыранылн вос ӯргалавет, вос нё̄тавет! 1087 2014.11.07. Николай МЕРОВ Нё̄тнэ пормасыт суссылтавет. Ха̄льӯс район Ягрим па̄вылт концертновыставочный колт суссылтап пӯсвес. Тот са̄выӈпа̄лэ ты ма̄ньщи хо̄тпанув Валентина Дорофеевна Саратина, Елизавета Селивёрстовна Мерзлякова ос Тамара Семёновна Мезенцева ка̄тыл ва̄рум пормасаныл ка̄салаӈкве ро̄ви. Ты яныгпа̄ла хо̄тпат ма̄ньщи супаныл, сахияныл, ла̄гыл маснутаныл, сыресыр хӯрыгсовыт сака нё̄тнэ̄г ю̄нтыяныл. Сакныл хорамыӈ пальсакыт, турло̄псыт ос мо̄т са̄всыр пормасыт саге̄гыт. Ты коныпал тот мо̄т ма̄хманув пормасаныл, ка̄тыл по̄слын хурияныл о̄с ка̄салаӈкве ро̄ви. Ягримн ёхтэ̄гын ке, на̄н пӯмащ ма̄гыс ты пормасыт сунсуӈкве о̄с тув ялэ̄н. 1087 2014.11.07. Валентина УЗЕЛЬ Рӯтанэ пуссын паща ла̄тӈыл те̄тыянэ. Федосья Алексееевна Пуксикова ань Югорск ӯст о̄лы. Тав 1957 та̄лт Хулимсунт па̄вылт самын патыс. О̄йкатэ украинец хум, наме Дмитрий Валентинович Токиа. Тэ̄н о̄йкатэ̄нтыл 1986 та̄лт Югорск ӯсн о̄лмыгтасы̄г. Ань тэ̄нттетэ̄н о̄лэ̄г. Федосья ань матах та̄л пенсият о̄лы. Ты э̄лыпа̄лт тав «Суеват павыл» нампа музейт ат та̄л рӯпитас, тувыл пенсиян минас. Тот рӯпитаме порат та̄н ма̄ньщи хо̄тпат то̄ва порат акванатхатыгласыт, пӯрлахтасыт. Ань юио̄выл та̄лытт туп ялпыӈ хо̄тал порат тот хо̄нтхатыглэ̄гыт. Федосья Алексеевна ла̄выс, ань музейт ма̄ньщи хо̄тпат щар ат рӯпитэ̄гыт, пуссын по̄хан минасыт. Са̄всыр по̄х хо̄тпа тув рӯпитаӈкв ёхтысыт. Ялпыӈ хо̄талыт пуссын ты музейт ва̄рыглавет. Нэ̄кве тох ла̄выс: «Рущ щирыл ва̄равет». Тав рӯтанэ пуссын Хулимсунт па̄вылт о̄лэ̄гыт. Федосья та̄нанылн газетав та̄ра паща ла̄тыӈ те̄ты: каӈке̄н Павел Алексеевич Пуксиковн, тав э̄кватэ̄н Прасковья Ивановнан, Пуксиковытн, Сюминытн, Сивцовытн ос мо̄т рӯтанэ̄н. Увщитэ Галина Алексеевна Вынгилева Ха̄льӯст о̄лы, тав 73 та̄лэ то̄влыс. То̄рум ёт, О̄тыр ёт пуссын вос о̄лэ̄гыт, пус ка̄т, пус ла̄гыл. На̄й-О̄тыранылн вос ӯргалавет. 1087 2014.11.07. Александр ВЬЮТКИН Ка̄сыӈ та̄л аквты порат музей янытлаве. Ма̄нь таквс э̄тпос ва̄тыт щислатэ Ханты-Мансийск ӯст о̄лнэ «Торум маа» музей янытлан хо̄талыг о̄лы. Ты та̄л тав ва̄т нупыл са̄тыт та̄лэ то̄влыс. «Торум маа» музей кант та̄л сыс ниласа̄т са̄вит экскурсия ва̄рыглаве. Та сыс тув хус со̄тыра ляпатем мӯй ма̄хум ёхталы. Музейт нила со̄тыра арыгтем са̄всыр пе̄с йис пормас ӯргалым о̄ньщаве. Музей янытлан порат щар о̄выл ла̄тыӈ «Торум маа» музей тармыл кӯщаиг о̄лнэ нэ̄ Валентина Николаевна Кочетыгова ла̄выс: Ма̄н музей намхо̄талув, со̄ль, ёмас хо̄талыг о̄лы. Тыт рӯпитан ма̄хманум ёт кӯстыр рӯпитаӈкве. Та̄н та̄нти рӯпатаныл ёмащакв ва̄ганыл ос э̄руптыяныл. Ты минам та̄лыт сыс ма̄н са̄в тэ̄ла ва̄руӈкве а̄лымасӯв. Са̄в пе̄с йис ялпыӈ хо̄тал но̄хялтуптасӯв. Мо̄тынтыг музей ма̄тэ яныгнувег ва̄руӈкв таӈхилӯв. Та тэ̄ла щирыл э̄рнэ нэ̄паканув пуссын щирмус щё̄питым о̄лэ̄гыт. Ты та̄л оигпан кастыл ма̄тэ урыл пуссын та̄рае̄мты. Ма̄н тот ханты, ма̄ньщи пе̄с йис о̄лупсаныл такталан коныпал сараныт, ё̄рныт ос рущит о̄лупсаныл суссылтаӈкв патэ̄в. Ам номсэ̄гум, ты рӯпата ва̄руӈкв о̄с э̄ри. Кӯщай нэ̄ потыртан ма̄ныл а̄стуме юипа̄лт, ты та̄л сыс «Торум маа» музеин рӯпитаӈкв ёхтум ма̄ньлат ма̄хум ва̄йхатнэ ма̄гсыл но̄хква̄лсыт. Та̄н пуссын аквъёт лов хо̄тпа. Та юипа̄лт «Торум маа» музейн нё̄тнэ яныгпа̄лаг о̄лнэ соссаӈ ма̄хум янытлаве̄сыт, ты Евдокия Александровна Белявская, Зоя Никифоровна Лозямова ос Мария Сергеевна Мерова. Та̄н пуссын ма̄нь мӯйлупсал мӯйлуптаве̄сыт. 1087 2014.11.07. Тамара МЕРОВА Лӯима̄ янытыл о̄лнэ мирыт. Ювле хультум э̄тпос юио̄выл хо̄талытт Финляндияныл театрыт рӯпитан финныт ёхталасыт. Та̄н «Народы ледяного края» нампа проект щирыл рӯпитаӈкве во̄виньта̄лве̄сыт, ты финноэстонский театральный проект. Тот Кирсика Моринг, «Хельсинки саномат» нампа газетат рӯпитан нэ̄, пуӈктоты. Тав ётэ аквтох сценарист Арии-Пекка Лахти, режиссер Паулийна Хулкко ос хореограф Хана Бротерус рӯпитэ̄гыт. Та̄н та̄нки артистаныл, э̄ргыт ос йӣквыт ва̄нэ хо̄тпаныл ёт акваннё̄тхатым лӯима̄т о̄лнэ мирыт палт ялантэ̄гыт. Ма̄хманув сыресыр ёнгын ва̄рмалитн ханищтыяныл ос та сыс сунсыглахтэ̄гыт. Проектаныл щирыл финныт мирхал театральный фестиваль ма̄гыс акв спектакль щё̄питаӈкве таӈхе̄гыт. Ты спектаклит ёнгуӈкве та̄н са̄всыр ма̄тт о̄лнэ хо̄тпат тув кинсэ̄гыт. Ос та ёнгил 2016 та̄лт Финляндият фестиваль порат тах суссылтаве. Мо̄лтынув финныт саамыт палт ялмыт, ань ос ма̄н соссаӈ хо̄тпанув ёт ва̄йхатуӈкве ёхталасыт. Тыи Самули Нордберг, тав сыресыр йӣквнэ тэ̄лат ва̄г, Туомас Роунакари э̄рыгсов та̄ныт спектаклин щё̄питы, такви э̄рги, са̄ӈквылты. Тувыл Яркко Лахти ос Ип Лахти, кит ягпыгыг, акватэ артистаг о̄лы, мо̄танэ режиссёрсценарист. Яркко ма̄хманув тӯлыглахтын ва̄рмалитн ханищтыянэ, Ип матыра̄ти пуссын хӯнтлы, сунсы ос ётыл потрыт, ла̄тӈыт хансы ос спектаклин ва̄риянэ. Мо̄т мӯй хо̄тпаг Ип Пасси, тав тыт ва̄рнэ тэ̄лат пуссын кинан по̄слыянэ, ос Мерья Йокела финныт потраныл рущ ла̄тӈыл толмащлыянэ. Кинан по̄слым утыт проектыт рӯпитан хо̄тпатын ётыл ёмщакв сунсавет ос тувыл хотты э̄лумхолас пе̄рие̄гыт. А̄с-угорский театр рӯпитан колт та̄н кит хо̄тал сыс ма̄н ма̄хманув ёт рӯпитасыт. Тув атпан са̄виткем э̄лумхо̄лас атхатыглас. Тыи ЮГУт, Ханты-Мансийский технологопедагогический колледжит ханищтахтын а̄гитпыгыт, ӯст о̄лнэ соссаӈ хо̄тпат. Тот са̄в хантыт, ма̄ньщит халт акв рущ, акв ё̄рн ос Калмыкия, Украина, Узбекистан ма̄ныл ёхтум студентыт о̄лсыт. Та̄н халанылт хо̄тпат нэ̄мхо̄т ос нэ̄мхуньт та̄нки ат ёнгыгласыт, тув нас пӯмщалахтуӈкве ёхталасыт. Ань ос та̄н ма̄к ёнгуӈкве кащилтаве̄сыт. То̄ват э̄ссамтасыт, мо̄таныт хурахлым лю̄ляхолсыт – ты пищаныл пуссын по̄хан яртуӈкве ла̄вве̄сыт. Ос хумус хотяртуӈкве э̄ре̄гыт, ты урыл потыртаве̄сыт ос тувыл э̄рнэ накыт аквъёт ханищтаӈкве патсыт. Акванатхатам мир тувыл хо̄т группан ла̄кквауртве̄сыт ос тувыл о̄лупсат о̄лыглам нак пӯмыщ ёнгыг щё̄питаӈкве ла̄вве̄сыт. Ты ёныг ла̄тыӈ та̄л ва̄руӈкве э̄рыс, туп то̄внакт матхурип турсуил э̄ргуӈкве ро̄выс, ос тэ̄лат пуссын хотмус щакаралым манос вильтсованыл хартыгла̄лым суссылтаӈкве ла̄вве̄сыт. Ёнгыт пӯмщиг о̄лсыт, ма̄хманув э̄ссамаӈкве по̄йтсыт. Финнытн тыи сака мӯстыс. Та̄н ла̄всыт: «На̄н пуссын ёмщакв тӯлыглахтасын, тэ̄лан сымыӈыщ ва̄рсаны̄н. Тыт таи ёмас, на̄н акванюрщхатым са̄в ма̄хум э̄лыпа̄лт пилта̄лыг рӯпитаӈкве патсы̄н. Э̄лумхо̄лас лю̄ль манос ёмас пищанэ ма̄кыг суссылтыяны̄н». Мерья Йокела юио̄вылт ла̄выс: «Ма̄н на̄нан яныг пӯмащипа ла̄тыӈ ла̄вуӈкве таӈхе̄в. Кит хо̄тал сыс акваннё̄тхатым такем ка̄ркамыг рӯпитасӯв. Ма̄нки о̄с са̄всыр хащта̄л тэ̄лат тыт ка̄саласанӯв, спектаклянувт тах э̄лаль тотыянӯв». Тамле ханищтапыт ва̄тихал вос ва̄рыгланувет. 1087 2014.11.07. Людмила ТЕТКИНА Ю̄нсхатуӈкве ане̄кватэ̄н ос щаще̄кватэ̄н ханищтавес. Ма̄нь таквс э̄тпост Пыть-Ях ӯст о̄лнэ музей йильпи колн ва̄нтлыс. Ань ӯст о̄лнэ мир выставкат сунсуӈкве тув ёхталэ̄гыт. Пе̄с порат хумус ханты ма̄хум та ма̄т о̄лсыт, манхурип маснут о̄щсыт, хумус во̄раясыт, хӯл алыщласыт, тот ка̄салаӈкве ро̄ви. Музейт рӯпитан хо̄тпат та ма̄т о̄лнэ ханты ще̄мьят палт ялантасыт ос пе̄с пормасыт музей ма̄гсыл тот акванатсаныл. Наталья Кононовна Поянкина Пыть-Ях ӯс музейт 2003 та̄л па̄сныл рӯпиты. Тав Нефтеюганский район янытыл о̄лнэ ханты ма̄хум палт са̄в щёс яланта̄лыс. Тав ла̄выс: «Ам рӯтанум во̄рт пе̄с йис щирыл о̄лэ̄гыт. Та̄н о̄лнэ ма̄наныл та̄нки нупыланыл хассаныл, ань тот во̄раим ос хӯл алыщлым о̄лэ̄гыт. Та̄н а̄нумн музей ма̄гсыл са̄в пе̄с пормасыт мисыт. Ам Нефтеюганский район Лемпино па̄вылныл о̄лэ̄гум. Музейт ам ня̄врамыт сакныл сагуӈкве, а̄канит ю̄нтуӈкве ханищтыянум. Ма̄н ань школат, садикыт ёт акваг рӯпитэ̄в. Тув ялантэ̄гум, соссаӈ ма̄хум культураныл урыл ня̄врамытын потыртэ̄гум, а̄канит ю̄нтуӈкве ос мо̄т щирыл ма̄щтырлаӈкве ханищтыянум. Нефтеюганский район Пойковский па̄выл по̄хат «Сказка» нампа ӯщлахтын ма̄ о̄лы. Касыӈ та̄л соссаӈ ма̄хум ма̄ньха̄пыл касуӈкве тув ёхталэ̄гыт. Округ янытыл о̄лнэ ня̄врамыт ӯщлахтуӈкве о̄с тув тотыглавет. 2013 та̄л ам акв э̄тпос сыс тот рӯпитасум, ня̄врамыт ма̄щтырлаӈкве ханищтасанум, ма̄ньщи ос ханты культура урыл потыртасум. Ма̄н музеювн ня̄врамыт Нефтеюганск ӯсныл ос мо̄т па̄влытныл тотыглавет. А̄гирищит, пыгрищит музейн хунь ёхталэ̄гыт, акваг китыглахтэ̄гыт, пӯмщалахтэ̄гыт, та̄н ётаныл рӯпитаӈкве сака пӯмащ». Наталья Кононовна Лепмино па̄вылт нёлолов класс а̄стлас, э̄лаль Нефтеюганск ӯс школан ханищтахтуӈкве ке̄твес, тот тав интернатт о̄лыс. Тувыл э̄лаль Тобольск ӯст крановщикыг ханищтахтас. Училище а̄стламе юипа̄лт кол ӯнттын ма̄т рӯпитас. Хум ва̄рыс, кит а̄ги ос акв пыг янмалтас. Ань ня̄враманэ пуссын та̄нки ще̄мьяныл ёт я̄нас о̄лэ̄гыт. Наталья Кононовна нила апыгрищ о̄ньщи. Ханты нэ̄ такви яныгмам поратэ урыл ла̄выс: «Пе̄с порат рӯтанум Салым я̄ ва̄тат о̄лсыт. Война о̄вылтахтаме порат ам ащо̄йкам хо̄нтлуӈкве вуйвес, ане̄квав ня̄враманэ ёт хультыс. Во̄рт таккет о̄луӈкве ат ве̄рмыс, Лемпино па̄вылн о̄луӈкве ва̄нтлас. Ащо̄йкам хо̄нтлан ма̄ныл ювле ат ёхтыс, хоты ма̄т ёлщё̄питавес, аты ва̄глӯв. Ам ане̄квам ёмащакв номилум, тав ма̄щтыр э̄ква о̄лыс. Ханты маснут ю̄нтуӈкве, щулки сагуӈкве сака ха̄сыс. Улпыл, тыи ма̄гсыл ам сакныл хартуӈкве, маснут сагуӈкве ос ю̄нсхатуӈкве э̄руптэ̄гум. Щаще̄квам о̄с ма̄щтыр э̄ква о̄лыс. Тав яныг тучаӈт ю̄нтупыт, тулят ос са̄всыр то̄рло̄мтыт о̄ньщасанэ. Ты тучаӈ сунсыглаӈкве тав палтэ акваг ялантасум. Сак ква̄лганэ ке̄р хусапыт о̄щсанэ, ты хусап ка̄тыт пувуӈкве о̄с э̄руптасум. Ам иӈ ма̄ниг о̄лсум, хунь омам а̄тимыг е̄мтыс, ане̄квамн ос щаще̄квамн ю̄нтуп ка̄тыт пувуӈкве ханищтаве̄сум. То̄нт ма̄н ща̄нь ла̄тӈыл потыртаӈкве ат та̄ртвесӯв, интернатт о̄лымав порат, акваг ля̄выльттавесӯв. Тыи ма̄гсыл ам амки ня̄враманум ёт ща̄нь ла̄тӈыл о̄с ат потыртасум. Апыгрищанум ханты ла̄тӈыл ханищтыянум, ань аквкит ла̄тыӈ ва̄гыт. Та̄наныл ханты маснутыл ю̄нтсанум. Музейт ялпыӈ хо̄талыт о̄лыглам порат акваг э̄рге̄гыт, йӣкве̄гыт. Лемпино па̄вылн ос во̄рт о̄лнэ рӯтанум палт тотыглыянум. Тув ялантанэ̄ныл порат сунсэ̄гыт, хумус ханты рӯт ма̄хманыл о̄лэ̄гыт». 1087 2014.11.07. Тамара МЕРОВА Йильпи э̄рыгсов та̄ныт хӯнтлысыт. Ка̄сыӈ та̄л ань ма̄нь таквс э̄тпост финноугор мирыт та̄нки о̄лнэ ма̄нанылт ялпыӈ хо̄тал ва̄рыглэ̄гыт. То̄нт рӯтыг о̄лнэ мӯй хо̄тпат мӯйлуӈкве во̄выглыяныл ос аквъёт пӯмыщ ка̄с ва̄ре̄гыт. Ань Ханты-Мансийск ӯст о̄лнэ соссаӈ ма̄хум «Октябрь» нампа ёнгын колт о̄с акванатхатыгла̄лсыт. Та̄н ма̄гсыланыл тот рущ щирыл ла̄вуӈкве ке, «Фолквечеринка» о̄лыс. Ты «Культура» нампа творческий объединение ос соссаӈ ма̄ньлат ма̄хум ёт рӯпитан кол тамле ялпыӈ хо̄тал ва̄рыгласы̄г. Мӯй ма̄хум тув йӣквуӈкве во̄выглаве̄сыт. Ос йӣквнэ̄ныл халт сыресыр йильпи э̄рыгсов та̄ныт хӯнтлысыт. Тувыл та сыс соссаӈ мир о̄щнэ пе̄с наканыл о̄с номылматыгла̄лсаныл. О̄влэ̄т тув ёхталам ма̄хум ёт Людмила Крицкая, культура тармыл рӯпитан кӯщай ва̄ӈын нэ̄, пащалахтас ос та̄наныл финноугор рӯтыг о̄лнэ мирыт ялпыӈ хо̄тал кастыл янытласанэ. Тав юипа̄лэ̄т Надежда Молданова, соссаӈ ма̄ньлат ма̄хум ёт рӯпитан нэ̄, потыртас. Надежда а̄гитнпыгытн акваннё̄тхатым ва̄рнэ тэ̄ланыл ма̄гыс пӯмащипа ла̄тыӈ ла̄выс. Ос то̄ват э̄сгын нэ̄пакыл мӯйлуптасанэ. Мо̄т ӯсытныл ос па̄влытныл ма̄хум о̄с ёхталасыт. Фёдор Ларюшкин, Кышик па̄выл клубт рӯпитан хум, мӯй хо̄тпат э̄лаль ка̄с ва̄руӈкве во̄всанэ. Касум па̄вылт о̄лнэ «Нумсаӈ ёх» этностойбищан ялантан а̄гирищитпыгрищит пе̄с ма̄хум йӣкваныл мощ йильпи щирыл йӣквсаныл. Валентина Тарлина ос акв пыг ханты ла̄тӈыл «Пе̄тущ, Пе̄тущ кумие» э̄рыг э̄ргысы̄г. Ханты-Мансийский педагогический колледжит ханищтахтын а̄гирищит маткем та поргысыт, йӣкващласыт. Та̄н рущ э̄рыг пӯмыщ йӣквыг ва̄рсаныл. Ты та̄л ты йӣквнэ ва̄рмаль «этнорокфолк» щирыл щё̄питым о̄лыс. Ма̄хум тот Алёна Дубасова, «Ямра» группат э̄ргын нэ̄, э̄рганэ хӯнтлысыт. Ты группа матахмат та̄л ювле хультум порат Ханты-Мансийскат ЮГУт ханищтахтам пыгытн ва̄рвес. Та̄н ёнгум э̄рыгсов та̄наныл этнорокыг ла̄вияныл. Тувыл щё̄скем Лянтор ӯсныл ёхтум аквта хурип «Тень мигранта» ансамбль концерт ва̄рсыт. Ты ансамблит Вера Кондратьева рущ щирыл хансум стиханэ тав ща̄нен ханты ла̄тӈыл толмащлавет. Та юипа̄лт Вера ёт рӯпитан пыгыт ты стихытныл э̄рыгсов та̄н ва̄ре̄гыт ос рокэ̄ргыг та э̄ргияныл. Вера э̄рганэ халт то̄внакт койп ра̄ты, то̄внакт тумраӈыл манос ло̄ӈханьщапыл ёнги. «Хо̄тал» нампа А̄с-угорский ма̄хум театрыт рӯпитан пыг Валентин Неттин ос такви хансум рокэ̄рганэ э̄ргысанэ. Ты порат тув ёхталам мӯй ма̄хум са̄в ат йӣквсыт, та̄н янгыщ э̄ргыт хӯнтлым нас лю̄лянтасыт. Этнорок ва̄рмаль ма̄хум мощ хащта̄лнувег о̄ньщияныл. Тамле йильпи тэ̄лан улпыл ла̄щмарт ханьщувлаӈкве э̄ри. 1088 2014.11.21. Мария Тихоновна Двинянинова «Лӯима̄ сэ̄рипос» газета щё̄питан ма̄хумн. Яныг таквсы э̄тпос «Лӯима̄ сэ̄рипос» газета ва̄т нупыл атыт та̄лэ ущты янытлавес. Таима̄гыс тыт рӯпитан ма̄хум та̄ратан газетаныл ёт пуссын янытлыянум. Пуста̄гыл вус о̄лэ̄гыт, хаснэ ля̄ххал вус хо̄нтэ̄гыт. Ёмас а̄гит, ёмас пыгыт «Лӯима̄ сэ̄рипос» газетат рӯпитэ̄гыт, Номтыӈ потыр, ля̄ххал хансэ̄гыт, Ка̄сыӈ па̄вылн, колн ля̄ххал тотэ̄гыт. Мир халт е̄мтнэ номтыӈ потыр Та̄н та ха̄сэ̄гыт толмащлаӈкв, Пуӈк тотнэ мирыт тотнэ ва̄рмаль Та̄н та ве̄рме̄гыт мирн хӯлтыглаӈкв. Та̄рвитыӈ рӯпата ва̄ре̄гыт, Сосса мирн торгамтан щирыл, Рущ мӯтра са̄всыр та̄рвитыӈ ла̄тӈыт Кӯстырыг ля̄галанэг толмащлыяныл. Са̄в номтыӈ ла̄тӈыл вус ёхтавет, Номтыл акваг вус пинавет, Рӯпатаныл ха̄сым ва̄ре̄гыт, Посыӈ номтыл вус о̄лэ̄гыт. Газетав ловиньтан ма̄хумн «Потрытля̄ххалыт тотнэ ва̄рмалит ка̄сыӈ мир ща̄нь ла̄тӈыл та̄ратан нэ̄пакт маныр щирыл ос хумле минэ̄гыт», тох ты семинараныл намаим о̄лыс. Ва̄т нупыл ат та̄лэ «Лӯима̄ сэ̄рипос» газета то̄влыс! Ты сыс мощща вит хунь овтыс, Ты сыс мощща ля̄ххал хунь о̄лыс. Ла̄щалла̄щал яныгмантас, Потре та ёт са̄вмантас, Лӯима̄ сэ̄рипос постын хольт Э̄лаль тав та постыгланты. Вус пыл посты сэ̄рипос хольт, Ка̄сыӈ колн ща̄гт вус тоты. Ёмас ля̄ххал, ёмас потыр Ма̄ньщи мирн тав вус тоты. Ма̄ янытыл суйтнэ ва̄рмаль Ка̄сыӈ мире̄н вус хӯлаве. Мир халт е̄мтнэ номтыӈ потыр, Сосса мирн вус ловиньтаве. 1088 2014.11.21. людмила алгадьева Ма̄ньщи газетав янытлаӈкве са̄в хо̄тпа ёхталас. Ты та̄л «Лӯима̄ сэ̄рипос» газетав ре̄тыӈ ю̄свой э̄тпост 25 та̄лэ то̄влыс. О̄выл ма̄ньщи газетав 1989 та̄л порат та̄ратавес. Ты яныг ва̄рмаль кастыл ма̄н хоса щё̄питахтасӯв, са̄в рӯпата ва̄рсӯв, туп ты э̄тпос 6 хо̄талэ̄т семинар ущта ва̄рыслӯв, са̄в мир тув во̄виньта̄лсӯв. Семинарув «О роли и значении СМИ, издаваемых на родных языках» намаяслӯв. Газетат рӯпитан хо̄тпат янытлаӈкве ма̄ньщи ма̄хум ос финноугрыт ёхталасыт. О̄влэ̄т Вера Царёва, губернатор прессслужбат кӯщаиг рӯпитан нэ̄, ма̄навн сымыӈ ла̄тыӈ ла̄выс. Тав ла̄внэ̄тэ щирыл, ма̄ньщи ла̄тӈыл потрыт хансым, ма̄н ща̄нь ла̄тӈув ос пе̄с йис ва̄рмалянув э̄лаль тотыянӯв. Илья Верховский, общественный связь департаментыт кӯщай хум, о̄с са̄в ёмас ла̄тыӈ ла̄выс. Тав Ханты-Мансийск ӯст самын патыс, тыт школат ханищтахтас. Ня̄врамыг о̄лме порат Юван Николаевич Шесталов хансум стиханэ ос Ме̄ӈквыт урыл мо̄йтыт ловиньтаӈкве э̄руптас. Ма̄н культурав урыл пӯмщалахтым торгамтас, ма̄ньщи ла̄тыӈ ва̄нэ ма̄хум мо̄т щирыл номсахтэ̄гыт, мир нупыл мо̄т щирыл сунсэ̄гыт. Ла̄выс, ля̄ххалыт, потрыт ща̄нь ла̄тӈыл хансым, ма̄н щар ма̄к яныг ос э̄рнэ рӯпата ва̄ре̄в. Людмила Алфёрова губернатор ва̄ӈын хум Геннадий Бухтин палт нё̄тнэ нэ̄г рӯпиты, газетав о̄с янытластэ. Тав ла̄выс, ма̄н тэ̄ла та̄л щар ат ӯнлэ̄в, акваг рӯпитэ̄в. Редакцияв интернетт ло̄пс ва̄рыс, тот ма̄ньщи потрыт ловиньтаӈкве ань о̄с ро̄ви. Газетав са̄в ма̄хум вос ловиньтасыт, хансум потранув рущ ла̄тӈын толмащлыянӯв. Татьяна Гоголева, округ Думат рӯпитан депутат, ёмас ла̄тыӈ ла̄выс. Ма̄нь па̄влытн яласанэ̄тэ порат, тав ма̄нав акваг ёт во̄виньта̄лыянэ. Татьяна Степановна хоты па̄вылн ялыс, хоты ма̄хум ёт хо̄нтхатыглас, хумус ма̄ньщи мирн нё̄ты, та урыл ма̄н ва̄тихал хансыглэ̄в. Тав ла̄выс: «Тыхо̄тал таса̄вит нё̄тнэ мир тыт акванатхатас. На̄н, газетат рӯпитан ма̄хум, ка̄сыӈ хо̄тал туп ща̄гтым рӯпатан ёхталэ̄н. Э̄лаль акв та щирыл ма̄нь па̄вылквет о̄лнэ мирыт урыл хансэ̄н, ханищтахтэ̄н ос ма̄ньщи яныг учёныиг е̄мтэ̄н». Ты юипа̄лт ма̄хум та̄нки хансум потраныл ловиньтасаныл. О̄влэ̄т Раиса Решетникова, редакциявт кӯщай нэ̄, ат та̄л сыс маныр рӯпата ма̄н ва̄рсӯв, та урыл потыртас. Николай Ишуткин Саранск ӯсныл ёхталас. Тав ня̄врамыт ма̄гсыл «Чилисема» нампа журналыт та̄раты, тот кӯщаиг о̄лы. Ты коныпал ты та̄лныл тав ля̄ххал тотнэ финноугорский ма̄хум ассоциациянылт кӯщаиг рӯпиты. Са̄всыр газетат, журналыт та̄рвитыӈ ва̄рмаляныл урыл потыртас. Ань ща̄нь ла̄тыӈ ва̄нэ ма̄хум мощщанув е̄мты, ма̄ньлат ма̄хум та̄нки ла̄тӈанылт ат потыртэ̄гыт. Ос ка̄сыӈ та̄лныл ты газетат, журналыт ма̄хумн тотнэ ма̄гсыл «Почта России» са̄в олн виӈкве патыс. Тыи ма̄гсыл газетат, журналыт мощща хо̄тпа хасылтэ̄гыт. Юлия Накова такви рӯпататэ урыл потыртаӈкве Салехард ӯсныл ёхталас. Тав 1996 та̄л па̄сныл ля̄ххал тотнэ нэ̄г телевиденият рӯпиты. Ямал ма̄ янытыл яласы, тот о̄лнэ соссаӈ ма̄хум о̄лупсаныл урыл кина по̄слы. Са̄в ма̄хум ёт хо̄нтхатыгла̄лы, ма̄ньщи ще̄мьят ёт ва̄йхатуӈкве патыс. Та ма̄т ань Сайнаховыт, Китаевыт колта̄глыт о̄лэ̄гыт. Та̄н ма̄ньщииг ловиньтахтэ̄гыт ос ща̄нь ла̄тӈыл ат потыртэ̄гыт. Пе̄с порат та̄н рӯтаныл хӯл алыщлаӈкве А̄с я̄н ёхталасыт ос о̄луӈкве тот хультсыт. Юлия Николаевна Сайнаховыт ёт хо̄нтхатыглас, потыртас ос ты ще̄мьят урыл архив колт о̄лнэ пе̄с нэ̄пакытт потыр кинсыс. Ос таи хо̄нтыс, наса̄ти Сайнаховыт Ямал ма̄н са̄ӈквылтап тотмыт, тот о̄лнэ ханты ма̄хум са̄ӈквылтаӈкве та̄н ты ханищтасаныл. Клавдия Васильевна Койнова Ха̄льӯсныл ёхталас. Тав ла̄выс «Лӯима̄ сэ̄рипос» газетат ма̄нь па̄вылквет о̄лнэ са̄в ма̄хум урыл ловиньтаӈкве ро̄ви. Манхурип та̄рвитыӈ ва̄рмаль тот о̄лы, газетат хансыглаве. Клавдия Васильевна ла̄выс, матъёмас ма̄ньщи газета ка̄сыӈ ще̄мьян тотаве, ань ловиньтаӈкве са̄внув мир ве̄рми. Татьяна Слинкина о̄с такви доклад щё̄питас. Тав Урай ӯст ня̄врамыт ма̄ньщи ла̄тыӈ ханищтаӈкве вуйхата̄лыс. Э̄рнэ ханищтан нэ̄пак ат хо̄нтыс, а̄гирищитпыгрищит газетавт хансым потрыт щирыл ла̄тӈын ханищтасанэ. Ос ма̄навн ла̄выс, манрыг ма̄н «щ» буква хансуӈкве патсӯв. Правила щирыл «с» хансуӈкве э̄ри «ся̄нь», ос «ща̄нь» хансуӈкве ат ро̄ви. Ты юипа̄лт ма̄н мо̄т потыр рӯпатав урыл хӯлсӯв. То̄ват ла̄ве̄гыт, ля̄ххаланув щар аквхурипаг о̄лэ̄гыт ос ма̄ньщи газетан са̄в рущ ла̄тыӈ хансэ̄в. Ма̄навн пе̄с мо̄йтыт, потрыт ловиньтаӈкве э̄ри, туп то̄нт потранув ёмащакв тэ̄луӈкве тах патэ̄гыт. Ты урыл хӯлым ос таи ювле ла̄ве̄в, тыщирыл ке ма̄хум ла̄ве̄гыт, хансум потранув та̄н мӯсхал ловиньтыяныл. Семинар оигпаме э̄лыпа̄лт резолюциянэ̄пак ловиньтаслӯв. Манхурип э̄рнэ тэ̄ла ва̄руӈкве э̄ри, тув хассӯв. Ань ля̄ххал тотнэ финноугорский ма̄хум «Российские финноугорские журналисты» нампа нэ̄пак щё̄питаӈкве ос та̄ратаӈкве таӈхе̄гыт. Тувыл Николай Михайлович Садомин хансум потранэ «Живой источник» нампа нэ̄пакн о̄с вос хансавет. Ты коныпал Григорий Лазарев намыл пиным премия ва̄руӈкве э̄ри. Ты премия ма̄ньщи ос ханты ла̄тӈыл ля̄ххал хаснэ ма̄хум касыл щирыл вос мивет. Ос акв тэ̄ла урыл ты нэ̄пакт хансым о̄лы, Белоярский ос Ха̄льӯс районыгт «Юный корреспондент» нампа ханищтап вос ва̄раве. Та ма̄т о̄лнэ ма̄ньщи манос ханты ла̄тыӈ ва̄нэ ня̄врамыт ща̄нь ла̄тӈыл ля̄ххалыт, потрыт хансуӈкве вос ханищтавет. Ты юипа̄лт Светлана Динисламова «Витсам» нампа журнал урыл потыртас. Нэ̄паке ты та̄лныл тав ня̄врамыт ма̄гсыл ва̄руӈкве о̄вылтастэ. Акв э̄тпос сыс акв журнал та̄раты. Ты нэ̄пакт а̄гирищитпыгрищит ма̄ньщи ла̄тыӈ ханищтаӈкве, ка̄тыл хурит по̄слуӈкве ос са̄в пӯмащ ва̄рмаль урыл ловиньтаӈкве ве̄рме̄гыт. Ханты ма̄хум тамле нэ̄пак ня̄врамыт ма̄гсыл о̄с ва̄ре̄гыт. Ты журнал «Ханты ясанг» нампа газетат рӯпитан хо̄тпат та̄ратэ̄гыт. Надежда Вах ты рӯпатаныл урыл ла̄тыӈ ла̄выс. Тувыл ма̄н йильпи нэ̄пакыг урыл ма̄хумн потыртасӯв. «Лӯима̄ сэ̄рипос» газета 25 та̄лэ то̄влын кастыл редакцияв «Ма̄ньщи ма̄хманув потрыт» нампа нэ̄пак та̄ратас. Тув са̄всыр та̄лыт порат газетат хансыглым потрыт акванатсанӯв. Тот Николай Садомин, Пе̄тр Шешкин, Мария Двинянинова, Анфиса Хромова ос ма̄н хансум потранув хассанӯв. Ты коныпал ма̄н ос «25 лет с газетой» нампа нэ̄пак та̄ратаслӯв. Са̄всыр порат ва̄рим хурит тув ва̄рсанӯв. Мӯй ма̄хманув ма̄гсыл «Лозьвинские манси» ос «Финноугорский мир сегодня» нампа кит суссылтапыг о̄лсы̄г. Акв суссылтап Денис Речкин, «Марий Эл» нампа газетат рӯпитан хум, Йошкар-Ола ӯсныл тыг тотыгластэ. Мо̄т суссылтап Тамара МЕРОВА щё̄пита̄лыгластэ. Тамле ялпыӈ хо̄тал «Лӯима̄ сэ̄рипос» газета янытлан кастыл та о̄лыс. Ма̄н палтув ёхталам мӯй ма̄хумн паща ла̄тыӈ ке̄тэ̄в. Матъёмас ёхталасыт, ма̄навн са̄в ща̄гт тотсыт. 1088 2014.11.21. Валентина УЗЕЛЬ Ма̄н округ кӯщай пе̄рияӈкв ат патэ̄в. Ты э̄тпост са̄всыр ма̄тт рӯпитан журналистыт округ мирколт акванатыглаве̄сыт. Та̄н ётаныл округ Дума Борис Хохряков ос са̄всыр политический партия кӯщаит потыртасыт. Округувн ань тамле ла̄тыӈ ёхтыс. 2015 та̄л ма̄ньполь э̄тпост ма̄н, округувт о̄лнэ мир, губернатор пе̄рияӈкв ат патэ̄в. Россия Президент хӯрум хо̄тпа наманыл ла̄виянэ, тувыл округ дума депутатыт ты хо̄тпат халт акв хо̄тпа пе̄рие̄гыт, округ губернаторыг рӯпитаӈкв тав та паты. Ты йильпи щирыл кӯщай пе̄риян ва̄рмаль туп хӯрум ма̄тт ва̄равет – ма̄н округувт, Ямало-Ненецкий округт ос Архангельский областьт о̄лнэ Ненецкий округт. Ля̄ххал тотнэ ма̄хум кӯщаит ёт потыртаманыл порат акваг титыглахтасыт, ты манрыг тох ва̄раве – тыт о̄лнэ мир кӯщай пе̄рияӈкв та̄нти ат ве̄рме̄гыт? Ма̄нав манрыг ат титыглыяныл, ма̄н ка̄саще̄в ман а̄ти – по̄х хо̄тпа яныг кӯщаиг тыт вос рӯпиты? Кӯщай ма̄хум пуссын акв щирыл ювле потыртасыт. Ма̄н округув, Ямал ос Ненецкий округ – ты хӯрум Лӯи ма̄ та̄н ты са̄выӈпа̄лэ Россия бюджетэ олныл та̄гиньтаптыяныл. Таима̄гыс щар ат таи, хотты по̄х хо̄тпа округ губернаторыг ма̄н ул вос пе̄рие̄в, э̄рыӈ тав ма̄к яныг кӯщаянувн ат ро̄внэ рӯпата ва̄руӈкв паты. Ань ты кастыл ма̄н округув яныг Уставнэ̄паке мо̄т щирыл хансуӈкв э̄ри. Ос са̄всыр ма̄ кӯщаит пе̄риян ва̄рмаль урыл хансым федеральный са̄ккон ос йильпи щирыл тах хансаве. Тӯяг пе̄риян ва̄рмаль э̄лыпа̄лт Россия Президент ты хӯрум хо̄тпа наманыл ла̄виянэ. Ос округ дума депутатыт та̄н ты хо̄тпаныл акв хо̄тпа пе̄рие̄гыт ос округ кӯщаиг ӯнттыяныл. 1088 2014.11.21. Людмила ТЕТКИНА Ня̄врамыт ӯргалан урыл потыр о̄лыс. Ханты-Мансийск ӯст яныг мирколт округ янытыл ёхталам ма̄хум сапра̄нин акванатхатыгласыт. Та̄н ня̄врамыт янмалтан ос ӯргалан ва̄рмаль урыл потыртасыт. Ханищтан колытт, полицият, мир ӯргалан департаментыт ос са̄в мо̄т ма̄тт рӯпитан хо̄тпат тув во̄виньта̄лве̄сыт. Татьяна Черкашина округ Правительстват ня̄врамыт ӯргалан ва̄рмаль торыг рӯпиты. Тав ла̄внэ̄тэ щирыл, ань округ янытыл атса̄т арыгкем ще̄мьятт ня̄врамыт лю̄льсаӈ о̄ньщавет. А̄гирищитпыгрищит ул вос саваласыт, тамле ще̄мьят акваг уральтавет. Ты ще̄мьят ёт акваг рӯпитым, ты та̄л сыс 148 ща̄ньа̄щ вина аюӈкве по̄йтсыт, ос ня̄враманыл мӯсхал щирыл янмалтаӈкве патсаныл. Ты ня̄врамыт ща̄няныла̄щаныл нупыл сунсым вина аюӈкве, хохса хартуӈкве ос мо̄т лю̄ль ва̄рмаль ва̄руӈкве ул вос о̄вылтахтасыт, та̄н ётаныл психологыт ос ханищтан хо̄тпат рӯпитэ̄гыт. Сапра̄нит кӯщаит потыртасыт, ты ще̄мьят яныгман ня̄врамытн хумус мӯсхалыг нё̄туӈкве. Москва ӯсныл ты сапра̄нин Николай Ковалёв ёхталас. Ма̄ньлат хум «Поиск пропавших детей» нампа отрядыт кӯщаиг рӯпиты. Россия янытыл ӯстым ня̄врамыт та̄н хумус кинсыяныл, та урыл потыртас. Тав ла̄выс, ань Москва ӯст туп акв хо̄тал сыс атса̄т арыгкем ня̄врам тыпи. Таи лю̄ль, кит о̄выл хо̄тал сыс тыпум ня̄врамыт ат ке хо̄нтхатэ̄гыт, та̄н халанылт са̄в а̄гирищитпыгрищит воссыг юв ат ёхтэ̄гыт. То̄ва ня̄врамыт са̄в та̄л кинсавет. Ань та̄н интернетт ло̄пс ва̄рсыт, ӯстым ня̄врамыт пуссын наманыл тув хансыяныл. Ща̄ньа̄щит тув хансуӈкве ве̄рме̄гыт, та̄н ня̄враманыл кинсуӈкве тот нё̄тавет. Сапра̄нин ёхталам ма̄хум ла̄всыт, та̄н ты ма̄ньлат хо̄тпа ёт рӯпитаӈкве э̄лаль патэ̄гыт, округувт ня̄врамыт киснэ ма̄гсыл тамле отряд о̄с тах ва̄раве. 1088 2014.11.21. В. Аксёнова Па̄выл ос район кӯщаит рӯпатаныл урыл. Округ кӯщаюв Наталья Комарова са̄всыр ма̄тт кӯщаиг рӯпитан ма̄хум акванатыгламанэ порат тамле ла̄тыӈ та̄нанылн ла̄выс. Ань Россия янытыл кӯщаит ма̄гыс яныг нэ̄паккапай пирмайтавес, рущ ла̄тӈыл тох ла̄ваве – Стратегия национальной политики. Ты хосыт округув янытыл 50 са̄всыр тэ̄ла щирыл ма̄хум рӯпата ва̄руӈкв тах патэ̄гыт. Ань ты йильпи ва̄рмаль таима̄гыс о̄вылтавес, округувт о̄лнэ мирыт халанылт юртыӈыщ вос о̄лэ̄гыт, мо̄т национальностил о̄лнэ ма̄хум лю̄ль самыл ул вос сунсавет. Ка̄сыӈ хо̄тпа такви о̄лнэ ма̄тэ вос янытлытэ, тав ляпатэ̄т о̄лнэ мирыт ул вос лю̄камтыянэ. Ань ма̄хум ты рӯпатан ханищтаӈкв патавет, ня̄врамыт ос школат ты урыл тах потыртавет. Ты рӯпата ёмащакв вос ва̄раве, ка̄сыӈ районт, ка̄сыӈ ӯст ос па̄влытыт ты рӯпата уральтан хо̄тпат ӯнттавет. Мирыт халанылт ёмащакв ос юртыӈыщ э̄лаль вос о̄лэ̄гыт, ты ва̄рмаль 2025 та̄л мус та̄н уральтаӈкв тах патыяныл. Губернатор прессслужбаныл те̄тым ля̄ххал ма̄ньщи ла̄тӈыл В. аксёнова хансыстэ. 1088 2014.11.21. Светлана РОМБАНДЕЕВА Йильпи щирыл нё̄туӈкве патаве̄в. Ты э̄тпос 17 хо̄талэ̄т РИЦ «Югра» колт нё̄тмил урыл потыр о̄лыс. Ля̄ххал тотнэ ма̄хум ёт Тереза Анатольевна Пономарева потыртас, тав мирн нё̄тмил ва̄рнэ колт кӯщаиг о̄лы. На̄н ань э̄лаль тав потре ловиньтэлы̄н. – Мирн нё̄тмил ва̄рмаль 2015 та̄л па̄сныл йильпииг мины. Ань ты йильпи са̄ккон щирыл, округувт о̄лнэ ка̄сыӈ хо̄тпа я̄нас нё̄туӈкве патаве. Ка̄сыӈ хо̄тпа о̄лупсатэ урыл китыглаве, маныр та̄рвит о̄ньщи, тэ̄ланэ пуссын мӯсхал щирыл нэ̄пакын хансавет. Тувыл нё̄тмил ва̄рнэ колт комиссия атхаты, ма̄хум номсахтэ̄гыт, ань таве̄н хумус нё̄туӈкве. Тав государственный ман нас мирн нё̄тмил ва̄рнэ мо̄т колытн нё̄туӈкве ве̄рмаве. Хоталь ка̄сащи, тув та хансаве, та кол па̄лыл нё̄туӈкве патаве. Э̄лумхо̄лас та порат нё̄таве, хунь такви нё̄тмил во̄ви, ёхты, та̄рвитыӈ тэ̄ланэ урыл потырты. Ма̄н о̄лнэ ма̄вт ма̄хум тох нё̄тавет: то̄ват щар ат ойтхатэ̄гыт, то̄ват мощща олн ойтэ̄гыт, то̄ват ос ка̄сыӈ нё̄тмил ма̄гыс ойтэ̄гыт. А̄гмыӈмосыӈ ма̄хум ос хо̄нтлам ма̄хум тай атхунь о̄с аквта щирыл ойтхатуӈкве ат патэ̄гыт, нас тох нё̄тавет. 1088 2014.11.21. Тамара МЕРОВА Мирн ва̄нэ о̄йка янытлавес. Ты э̄тпос 16 хо̄талэ̄т Геннадий Степанович Райшев 80 та̄лэ то̄влуме кастыл ос 50 та̄лэ хурит по̄слынэ̄тэ ма̄гсыл са̄всыр суссылтапыт ос ханищтапыт Ханты-Мансийск ӯст ва̄рыглаве̄сыт. Яныг суссылтап «Пространство и время» намаим о̄лы, ма̄хум таве Г. С. Райшев галереямастерской колэ̄т сунсуӈкве ве̄рмегыт. Ты коныпал «Творчество Г. С. Райшева в контексте современной культуры. 1960-2010 годы» нампа ханищтап о̄лыс. Ханты-Мансийскан искусство учёныит Барнаул, Екатеринбург, Москва, Омск, Санкт-Петербург ос Тюмень ӯсытныл ёхталасыт. Та̄н ка̄тыл хурит по̄слум хо̄тпат рӯпатаныл о̄вылтыт са̄в потыртасыт, са̄всыр пӯмыщ тэ̄лат аквъёт та̄рапаттысыт. Пуссын ты ва̄рмалит урыл ма̄н мо̄тыт газетат тах хансэ̄в. 1088 2014.11.21. Валентина УЗЕЛЬ Рӯпата минэ ма̄хум акваг уральтавет. Ма̄н округувт хусахтем та̄л акв организация рӯпиты, рущ ла̄тӈыл ла̄ваве – государственная инспекция труда. Тот рӯпитан кӯщай хум Евгений Кривобоков ва̄рнэ рӯпатаныл урыл мирн акваг потырта̄лы. Тав ань онтолов э̄тпос сыс ва̄рум рӯпатаныл урыл тамле ла̄тыӈ ла̄выс. Ты э̄тпосыт сыс та̄н хӯрум со̄тыратем рӯпитан ма̄ уральтасыт. Ты инспекцият рӯпитан хо̄тпат та̄нти хотты предприятие уральтаӈкв ат ве̄рмияныл. Та̄н ма̄хумн пищмал хансавет те, то̄нт ты та̄н та предприятие уральтыяныл. Са̄выӈпа̄лэ нэ̄ хо̄тпат та̄н полщ тотнэ нэ̄пак хансэ̄гыт. Та̄н са̄в рӯпитаӈкв ла̄вавет, ос ты рӯпата ма̄гсыл олныл сака ат ойтавет. Вахта щирыл рӯпитан ма̄хум о̄с са̄всыр щирыл ла̄пала̄лавет. Та̄н Лӯи ма̄т рӯпитэ̄гыт, олныл та̄ра ат мивет, юв та минэ̄гыт. Юв ёхтэ̄гыт, олнаныл такос ӯрияныл, нэ̄матыр олн а̄тим. Та̄н халанылт то̄ват са̄кконыт ёмащакв ат ва̄ганыл, са̄кконыт ловиньтанэ̄ныл порат торгамтаӈкв ат ве̄рмияныл. Ӯщлахтын пораныл хунь ёхты, номсэ̄гыт – са̄в отпусколн тах выгыт. Ос рӯпитан э̄тпосаныл ловиньтавет, туп хо̄т э̄тпос та̄н рӯпитамыт. Ты э̄тпосыт ма̄гыс олныл та мивет. Таима̄гыс ты са̄в хо̄тпа ты инспекциян пищма хансэ̄гыт. Е. Кривобоков ла̄выс, са̄в хо̄тпа рӯпитан ма̄наныл ёт сутытахтэ̄гыт. Ос та̄н по̄хан те̄туӈкв хунь патавет, то̄нт ущ сутн минэ̄гыт. Ты э̄лыпа̄лт матыр та̄рвитыӈ ва̄рмаль те о̄лыс, та̄н кӯщаяныл нупыл нэ̄матыр ля̄льт ат ла̄выгласыт, нас роттыг о̄лсыт. Турн ёхтын мус та̄н ве̄ритэ̄гыт. Сут о̄лнэ порат ты инспекцияныл акв специалистхо̄тпа тот о̄с о̄лы, тав ты хо̄тпа тармылпаттытэ. Колыт ӯнттын ма̄т сака са̄в ма̄хум сакватахтэ̄гыт. Мо̄лты та̄л 17 хо̄тпа рӯпитаманыл порат а̄тимыг е̄мтсыт. Ань ос ты та̄л онтолов э̄тпосанэ сыс 12 хо̄тпа порсыс. Тамле ты та̄рвитыӈ ва̄рмалит е̄мталэ̄гыт. 1088 2014.11.21. Людмила ТЕТКИНА Ӯст о̄лнэ ня̄врамыт ханищтан ва̄рмаль. Ханты-Мансийск ӯст «Лылыӈ союм» нампа ханищтан колт ня̄врамыт ма̄ньщи, ханты ла̄тӈыл потыртаӈкве, ка̄тыл хурит по̄слуӈкве, ю̄нсхатуӈкве, сакныл хорамыт хартуӈкве ханищтавет. Ты э̄тпост тот рӯпитан хо̄тпат «Этнокультурное образование: поиски и перспективы» нампа конференция ва̄рыгласыт. Кондинский район Шугур па̄вылныл, Урай ӯсныл ос Ханты-Мансийск ӯст ханищтан колытт рӯпитан хо̄тпат конференциян ёхталасыт. Ма̄хум рӯпатаныл урыл потыртым та̄нки халанылт ханищтахтасыт. Ань «Лылыӈ союм» нампа студиян 200 арыгкем ня̄врам ёхталы. Ты коныпал тот рӯпитан ма̄хум ӯст о̄лнэ школатытн ня̄врамыт ханищтаӈкве ялантэ̄гыт. Татьяна Вадичупова, кӯщай нэ̄, ла̄внэ̄тэ щирыл, ня̄врамыт ханищтан нэ̄пакыт ос са̄всыр методический пособият та̄н ат о̄ньще̄гыт. А̄гирищит, пыгрищит ма̄ньщи ла̄тӈыл, сакныл хорамыт хартуӈкве ос са̄ӈквылтапыл са̄ӈквылтаӈкве ханищтан нэ̄пакыт ань нэ̄мхотьют ат хансы. Та̄н са̄в та̄л тох рӯпитым, ты нэ̄пакыт та̄нки хансуӈкве о̄вылтахтасыт. Татьяна Савельевна ла̄выс, та̄н хансум нэ̄паканыл щирыл мо̄т ма̄хум рӯпитаӈкве о̄с ве̄рме̄гыт. Конференцият та̄н ты нэ̄пакыт ос ня̄врамыт ханищтан ва̄рмаль урыл потыртасыт. Любовь Федоркив «Лылыӈ союм» ханищтан колт ня̄врамыт ханты ла̄тӈыл ханищтыянэ. Ня̄врамыт ща̄нь ла̄тӈыл потыртаӈкве вос ка̄сащасыт, тав акваг са̄всыр пӯмащ урок щё̄питы. Ня̄врамыт мо̄йтыт хосыт ща̄нь ла̄тӈыл потыртаӈкве ханищтыянэ. Раиса Гаврильчик ма̄ньщи тучаӈ ос э̄нтап урыл потыртас. Пе̄с порат ты кит пормасы̄г хумус хорамтавесы̄г, ос хумус а̄гирищитпыгрищит ань ма̄щтырлаӈкв ханищтаӈкве ро̄ви, та урыл ла̄тыӈ ла̄выс. Мо̄т ханищтан хо̄тпат та̄нки рӯпатаныл, уроканыл урыл конференцият о̄с потыртасыт. Ты ханищтан кол тамле конференция ка̄сыӈ та̄л ва̄рыглы. Тот ловиньтым докладыт та̄н акв нэ̄пакын щё̄питыяныл. Ханищтан хо̄тпат ты нэ̄пак хосыт о̄с э̄лаль тах рӯпитаӈкве патэ̄гыт. 1088 2014.11.21. Тамара МЕРОВА То̄ва тэ̄лат мо̄т щирыл хасве̄сыт. Губернаторув Наталья Комарова ва̄ӈын кӯщаянэ акванатыгласанэ ос та̄н аквъёт то̄ва округ программат палт йильпи ла̄тыӈ хассыт. Тох та̄н яныг квартираӈ колыт ёмщакв щё̄питан урыл хансым программан я̄нас ла̄тыӈ хӯлтсыт. Ты тэ̄лат ань ва̄руӈкве са̄всыр ӯсытныл манос па̄влытныл о̄лнэ ма̄хум та̄нки во̄вхатсыт. Ань то̄ва колыт ӯнттыманыл па̄сыл 70% пе̄сыг ке о̄лэ̄гыт, э̄лаль щё̄питаӈкве ат патавет. Тамле колытт о̄лнэ ма̄хум мо̄т «пе̄с колныл ёмас колыл минэ программан» хансуӈкве патавет. Михаил Козлов, кол ӯнттын департаментыт кӯщай ва̄ӈын хум, ла̄выс: «Ты э̄лыпа̄лт российский са̄кконытыт сыресыр хӯлтыглан ла̄тӈыт хансыглаве̄сыт. Ань ос ка̄сыӈ регион такви э̄рнэ ла̄тыӈ тув хӯлтуӈкве ве̄рми». Ты коныпал мо̄т ма̄хум кол щё̄питан тэ̄ланыл ма̄гсыл са̄всыр арыг рӯпатал мивет ос ма̄хумныл са̄внув олн виӈкв ла̄вавет. Тувыл губернаторув Ипотечный агентство Югры ёт акв соглашениенэ̄пак хассы̄г. Ань Украина ма̄ныл рӯпитаӈкве ёхтум ще̄мьят «арендное жильё» нампа программа щирыл йильпи колыл миӈкве тах патавет. Таи ма̄гыс ты хо̄тпат труда ос занятости департамент колн заявление хансуӈкве вос ёхталэ̄гыт. Тамле квартират о̄лнэ ма̄гыс та̄н мощщанув олн ойтуӈкве ла̄вавет. О̄выл арендный кол ань Нефтеюганскыт ӯнттувес, таквсы ма̄хум тув ва̄нтлысыт. Та ще̄мьят арендаолнаныл рӯпитан ма̄ныл ойтавет, акв э̄тпос сыс туп ва̄т нупыл ат со̄тыра солко̄ви тыгыл са̄внув ойтуӈкве та̄н ат ве̄рме̄гыт. Моще̄ртын Сургут ӯст ос Ханты-Мансийскат акв тамле колыт ӯнттуӈкве а̄стлаве̄т. Ля̄ххал ма̄ньщи ла̄тӈыг Тамара МЕРОВАн хасвес. 1088 2014.11.21. Людмила ТЕТКИНА О̄лнэ ма̄вт ёмащакв ӯщлахтуӈкве о̄с ро̄ви. Юграт хоты ма̄т ӯщлахтуӈкве ро̄ви, «ЮграТур-2014» нампа выставкат суссылтавес. Суссылтап ма̄нь таквс э̄тпос 13-15 хо̄талытт Ханты-Мансийск ӯст рӯпитас. Ка̄сыӈ район такви суссылтапе тыг тотыгластэ. Ты коныпал Болгария, Чехия ос Крым ма̄ныл ма̄хум та̄нки ӯщлахтын ма̄наныл урыл потыртаӈкве тыг ёхталасыт. Хӯрум хо̄тал сыс тыт са̄всыр конференцият, ханищтапыт рӯпитасыт. Соссаӈ ма̄хум общинат мӯй ма̄хум та̄нки о̄лнэ ма̄нанылн мӯйлуӈкве ӯщлахтуӈкве о̄с во̄виньта̄лыяныл. Та̄н о̄с мо̄т организацият ёт ты э̄лыпа̄лт та̄нки нэ̄паканыл грантолн ма̄гсыл ке̄тыгласаныл. Суссылтап рӯпитам порат та̄н пуссын тыг ёхталасыт ос проектнэ̄паканыл урыл жюрихо̄тпат э̄лыпа̄лт потыртасыт. Та̄н хо̄т номинацият щирыл олныт майве̄сыт, ты рӯпата ма̄гсыл 12 миллион солко̄ви та̄стувес. Ты та̄л Надежда Алексеева, округ Дума депутат, Людмила Алфёрова, «Югра лылые̄п» кӯщай ва̄ӈын нэ̄, Елена Молданова, Общественный палатат рӯпитан нэ̄, мо̄т жюрихо̄тпат ёт рӯпитасыт. Евгений Платонов, Правительстват рӯпитан кӯщай хум, ла̄выс, Югра янытыл са̄всыр йильпи ӯщлахтын ма̄т щё̄питаве̄сыт. Ань округувт 26 арыгкем э̄лумхо̄лас ты рӯпата ва̄ри. Мӯй хо̄тпат Сургутский, Нижневартовский ос Нефтеюганский районыт пе̄с йис ма̄т о̄лнэ соссаӈ ма̄хум палт мӯйлуӈкве во̄вавет. Тот та̄н хӯл пувуӈкве, са̄лы суныл яласаӈкве, ос ханты ще̄мьят хумус о̄лэ̄гыт, сунсуӈкве ве̄рме̄гыт. Ха̄льӯс районт мӯй ма̄хум Нё̄рн ялуӈкве ве̄рме̄гыт. Белоярский районт ос ханты ма̄хум палт хӯл алыщлаӈкве ма̄хум во̄выглавет. Ань округувт са̄в ма̄хум туризм щирыл рӯпитаӈкве ка̄сащи. Ка̄сыӈ та̄лныл са̄внув ма̄хум та̄нки нэ̄паканыл грантолн ма̄гсыл ке̄тыглэ̄гыт. Наталья Комарова, округ кӯщай нэ̄, выставка сунсуӈкве о̄с ёхталас. Но̄хпатум ма̄хум янытласанэ. Губернатор нэ̄ ла̄выс, мӯй ма̄хум тыг ӯщлахтуӈкве во̄вим, та̄н соссаӈ ма̄хум культураныл э̄лаль тотыяныл. Ты мирыт урыл Россия янытыл ос мо̄т хо̄н ма̄т ма̄хум тах ва̄ӈкве патэ̄гыт. Эдуард Куриков Белоярский район Полноват па̄вылныл ёхталас. Тав такви нэ̄паканэ ты олн ма̄гсыл ке̄тыгласанэ ос жюрихо̄тпатн такви рӯпататэ урыл потыртас. Мо̄т ма̄хум халт но̄хпатыс, щар ма̄к ёмас проект хансыс, тав 3 миллион 500 со̄тыра солко̄вил майвес. Ты олныл такви о̄лнэ ма̄тэ̄т мӯй ма̄хум ма̄гсыл яныг кол тах ӯнтты. О̄лнэ ма̄т кол о̄ньщи, тот ат хо̄тпа туп о̄луӈкве ве̄рме̄гыт. Яныг колэ хунь а̄стлытэ, аквторыг 20 хо̄тпа тав палтэ ёхталаӈкве тах патэ̄гыт. «Чуэльско-Ветляховская» нампа общинатэ 1994 та̄л па̄сныл рӯпиты, ты та̄лыт сыс та̄н хӯл алыщлым олн сэ̄лсыт. Туризм щирыл рӯпитан ма̄хум олныл ань мивет, тав о̄с ты рӯпата ва̄руӈкве вуйхатас. Хӯрум та̄л сыс тав палтэ Екатеринбург, Пермь, Челябинск ӯсытныл мӯй ма̄хум хӯл алыщлаӈкве ёхталэ̄гыт. Тав интернетыт о̄с такви ло̄пс ва̄рыс, такви общинатэ ос ӯщлахтын ма̄тэ урыл тув потыр хансыс. То̄ва хо̄тпат таве интертет щирыл хо̄нтсаныл. Акв хо̄тпа хӯл алыщлан ма̄гсыл ёхталым, акв хо̄тал сыс кит со̄тыра солко̄ви ойты. Ханты хум хӯл алыщлаӈкве мӯй ма̄хум во̄ртур ос сӯкыр э̄тпосыгт туп во̄выглыянэ, мо̄т порат хӯл тот а̄тим. Тыи ма̄гсыл туп кит э̄тпос сыс мӯй ма̄хум ёт рӯпитэ̄гыт, мо̄т порат та̄н во̄рае̄гыт. Общинат ань хо̄т хо̄тпа рӯпиты. «Колмадай» нампа община хӯрум миллион солко̄вил майвес. Тот рӯпитан ма̄хум Ханты-Мансийск ӯст по̄хат па̄вылкве ӯнттуӈкве таӈхе̄гыт. Тот та̄н ё̄рнкол тӯщтэ̄гыт, са̄лы тув тотэ̄гыт, ӯст о̄лнэ ма̄хум тув ӯщлахтуӈкве тах во̄ве̄гыт. Ма̄хум тот са̄лы суныл яласаӈкве, са̄лы ёт по̄слахтуӈкве тах патэ̄гыт. Хӯл исмитыл ос нё̄влил тах тыттавет, ща̄ил айтавет. Мо̄т номинацият рущ хо̄тпат но̄хпатсыт, та̄н о̄с танки палтыланыл мӯй ма̄хум ӯщлахтуӈкве во̄вуӈкве патыяныл. 1088 2014.11.21. Александр ВЬЮТКИН Тит ма̄ньлат колта̄глыг. Сургутский район Нижнесортымский ӯсн ялмум порат, тит ма̄ньлат ма̄ньщи нэ̄квег ёт тот хо̄нтхатыгласум. Тэ̄н наманэ̄н Татьяна ос Юлия, халэ̄нт тэ̄н яга̄гиӈыщ о̄лэ̄г. Тэ̄нти о̄парищ наме̄н Анямовыг. Самын патум ма̄тэ̄н Саранпа̄выл. Ляпа рӯтанэ̄н пуссын Ха̄льӯс районт о̄лэ̄гыт. Саранпа̄вылт ань оматэ̄н Нина Митрофановна Анямова ос Маша котиль яга̄гитэ̄н ще̄мьяӈ та̄гыл о̄лэ̄г. Таня тот ханищтахтын кол а̄стлуме юипа̄лт та̄ра Ханты-Мансийск ӯсн ханищтахтуӈкв минас. Тав А̄с-угорский университетт ма̄ньщи ла̄тӈыл ня̄врамыт ханищтан нэ̄г ат та̄л ханищтахтас. Ханищтахтам ма̄ныл а̄стуме юипа̄лт та̄ра хумиӈыг е̄мтыс. Хумитэ наме Виталий Айваседа. Тэ̄н халэ̄нт ханищтахтаме̄н порат ва̄йхатасы̄г. Виталий такви ё̄рн хум. Омагеа̄тяге Белоярский ос Сургутский районыг титтыг халмыгтан во̄рыӈ ма̄т о̄лэ̄г. Тэ̄н пыге̄н ос апыгрищанэ̄н уральтаӈкве ос та̄н палтаныл мӯйлуӈкв ва̄тихал ёхталэ̄г. Таня о̄йкатэ̄нтыл ань хӯрум ня̄врам янмалтэ̄г. Щар яныг а̄гитэ̄н наме Ксюша, мо̄тынтыг тав ханищтахтуӈкв мины. Тувыл Катя, тав моще̄ртын хӯрум та̄лэ ты то̄влы. А̄гирищиг юипа̄лт питипатта пыгрищ о̄ньще̄г, тав наме Антон. Пыгрищиӈыг мощ мо̄лалнув е̄мтсы̄г, титыт э̄тпосэ ущ ты е̄мты. Та̄н хӯрум яга̄ги пуссын Дмитрий Георгиевич Агеев палт са̄ӈквылтапыл са̄ӈквылтаӈкв, э̄ргуӈкв ос ма̄ньщи нэ̄ йӣквыт йӣквуӈкв ханищтым яласасыт. «Са̄лыӈ лё̄ӈх» ня̄врамыт ёт ма̄ньщи пӯмщанув суссылтым Дмитрий Георгиевичин ма̄ янытыл ва̄тихал тотыглаве̄сыт. Юля Саранпа̄вылт ханищтахтын ма̄ныл а̄стуме юипа̄лт Ханты-Мансийск ӯсн ма̄нь ня̄врамыт ёт рӯпитан нэ̄г ханищтахтуӈкв минас. Тот тав хӯрум та̄л ханищтахтас. Ханищтахтаме порат ю̄рт пыгрищиӈыг е̄мтыс, наме Павел Молданов, тав ханты хо̄тпа. Та па̄сныл тэ̄н аквъёт о̄лэ̄г. Павел А̄с-угорский «Солнце» нампа театрыт са̄в та̄л актёрыг рӯпитас. Юля ханищтахтам ма̄ныл а̄стуме юипа̄лт Таня увщитэ̄н о̄лнэ Нижнесортымск ӯсн о̄луӈкв во̄ввес. Паша рӯпитан ма̄тэ̄ныл по̄хан минаме юипа̄лт тэ̄н Юлятэ̄нтыл та ӯсн о̄луӈкв ва̄нтлысы̄г. Тот Паша «Газпром» ма̄н операторыг рӯпитаӈкв та̄ра вуйвес. Нэ̄матыр хоса ат о̄лсы̄г, пӯри ва̄рсы̄г. Ань тэ̄н тит ня̄врам о̄ньще̄г. Яныгнув пыгрище̄н наме Кирилл, тав мо̄тантыг ханищтахтуӈкв мины. Тав юипа̄л а̄гирище̄н наме Алина, тав ос моще̄ртын хӯрум та̄лэ ты то̄влы. Паша такви Белоярский район Юильск нампа ханты ма̄нь па̄вылныл о̄лы. Омагеа̄тяге са̄лы о̄ньщим во̄рт о̄лэ̄г. Тэ̄н па̄влыӈ ма̄т о̄луӈкв щар ат ве̄рме̄г, таима̄гсыл пыге̄н палт яныг ӯсытн мощщан ёхталэ̄г. О̄влэ̄т ма̄во̄й ос газ но̄хвинэ ма̄ мус «бураныл» минэ̄г, тувыл пыге̄н о̄лнэ ӯс мус э̄лаль вертолётыл тотаве̄г. Тэ̄лы сыс нилахтем щёс ёхталэ̄г. Нижнесортымский ӯст тит ёмас та̄ксар колта̄глыг ты о̄лэ̄г. Э̄лаль аквтох юртыӈыщ вос о̄лэ̄гыт, ам та̄нанылн щунь ла̄тыӈ те̄тэ̄гум. Хоты ма̄ныл, хоты витныл о̄лнэ ня̄врамыт На̄й-О̄тыранылн вос ӯргалавет. 1088 2014.11.21. Николай МЕРОВ Са̄в ма̄т ле̄ккарыг рӯпитам хум. Николай Павлович Сянклин Ха̄льӯс район А̄нъя па̄вылт о̄лы. Тав О̄лттумп па̄вылт самын патыс. Ты яныгпа̄ла о̄йка ань пенсияолн вуим о̄лы, хӯл алыщлы. Ам тав колэ̄н щалтапа̄лсум. Ты ве̄щкатыӈ хум такви о̄лупсатэ ос ща̄нягеа̄щаге урыл а̄нумн мощ потрамас. На̄н ты урыл э̄лаль ловиньтэ̄н. Николай Павлович оматэ Матрёна Николаевна 1924 та̄лт самын патыс. Ане̄квагео̄паге Николай Ефимович ос Анна Ивановна Гоголевыг о̄лсы̄г. Нэ̄гхумыг ат ня̄врам янмалтасы̄г: кит пыг, хӯрум а̄ги. Яныг пыге̄н кулакыг ла̄ввес, 1937 та̄лт хотталь тотвес. Юв воссыг ат ёхтыс, Ханты-Мансийскат порславес. Китыт пыге̄н а̄гмыл е̄мтыс, пӯльницан пинвес. То̄нт торыӈ тэ̄рпи а̄тим о̄лыс. Таима̄гыс пусмалтаӈкве ат ве̄рмувес, юв ке̄твес. Юн мощ о̄лыс, а̄тимыг е̄мтыс. Матрёна ма̄ньлатыг о̄лме̄т матахмат та̄л Саранпа̄вылт о̄лыс. Ётылнув война о̄вылтахтаме э̄лыпа̄лт та̄н ще̄мьяӈ та̄гыл О̄лттумпын ва̄нтлысыт. Тот хӯл алыщласыт ос во̄раясыт. Пилыщмаӈ хо̄нт нак о̄вылтахтаме порат Матрёна са̄тхуйплов та̄лэ ущты то̄влыс. 1941 та̄лт тав О̄лттумпыт хӯл алыщлан ма̄т кассирыг рӯпитас. Тувыл ос хӯл пувнэ хо̄тпат палт бригадирыг паттувес. Па̄вылт о̄лум китхуйплов ос атхуйплов та̄л яныт а̄гитпыгыт ёт хӯл алыщлас. Та̄нки картопка ва̄ӈныл хартыгласыт. Са̄всыр та̄рвитыӈ рӯпата аквъёт ва̄рсыт. Та порат хӯл алыщлан бригада кӯщаиг Пётр Семёнович Вынгилев рӯпитас. Тоболдино па̄выл мус ла̄глыл яласасыт. Ювле ос яныг толгыӈ та̄гыл тӯпыл товим минасыт. Бригадат туп хӯрум яныгпа̄ла хум хо̄тпа о̄лыс. Ты Пётр Вынгилев, Михаил Гоголев (тав ётылнув Тоболдино па̄вылн а̄рпи ва̄руӈкве минас, я̄ӈк ёлыпа̄лн ра̄гпыс, а̄тимыг е̄мтыс) ос Ефим Чалданов. Та̄н война порат тот ня̄врамыт ос нэ̄ хо̄тпат ёт хӯл алыщлым яласасыт. Тувыл О̄лттумпын акв о̄йка рӯпата щирыл ёхтыс, ля̄ххал тотыс. Тав хо̄нтлын нак оигпам урыл та̄нанылн ла̄выс. Матрёна Николаевна ты ля̄ххал ос э̄лы ма̄т хӯл алыщлан хо̄тпатн э̄лаль тотыстэ. Тох ты та порат ма̄хум война холам урыл хӯнтамласыт. Хо̄нтлын нак юипа̄лт 1946 та̄лт Матрёна Николаевна хум ва̄рыс. О̄йкатэ Павел Кириллович Сянклин, О̄лттумп хум о̄лыс. Ань та па̄выл а̄тим. Яныг хо̄тпат потраныл щирыл, пе̄с порат О̄лттумпыт колхоз о̄лыс. Павел Кириллович тот ӯйхул янмалтан ма̄т бригадирыг рӯпитас. Та порат са̄в мис ос лув тот о̄щвес. Павел Кириллович э̄кватэ хольт о̄с 1924 та̄лт самын патыс. Тав яныг хо̄нт порат хо̄нтлын ма̄н о̄с тотыглавес. Аквматнакт Курский Дуга ма̄т хо̄нтлуме порат ла̄глэ писаль ня̄лн сакватавес. Ты ва̄рмаль ма̄гыс верховный главнокомандующий таве̄н янытлан нэ̄пак мис. Тувыл ос китынтыг ня̄лн сакватым юипа̄лт 1945 та̄лт ма̄ньполь э̄тпост сувыӈ та̄гыл юв ёхтыс. Хо̄нтлын нак оигпам юипа̄лт тав нэ̄ тотыс. Э̄кватэ̄нтыл туп нила та̄л о̄лсы̄г. 1950 та̄лт сӯкыр э̄тпост О̄лттумпыт ма̄колыӈо̄йка мисыт таӈыртаӈкве ватаяхтас. Па̄влыӈ хум хо̄тпат писалиӈ та̄гыл таве юил койлыгтасаныл. Пупа̄пщикве палт нэ̄глысыт, о̄влэ̄т Павел о̄йка ё̄мыс, тав юипа̄лэ̄т ё̄мум хум писале илттыг э̄лто̄лматас. Ня̄лэ Павел сысэ̄н хо̄яс, ты та̄рвит ва̄рмаль щирыл тав а̄тимыг та е̄мтыс. Та̄ксар о̄йка хо̄нтлын ма̄ныл ты кос лылыӈ та̄гыл юв ёхтыс, ос юн тамле накн та патыс. Со̄ль ла̄ваве, э̄лы лё̄ӈх ат на̄ӈки, хоты ма̄т хомле е̄мтэ̄гын, хунь ва̄глын. Тав порсуме юипа̄лт хус хо̄тал минас, китыт пыге самын патыс. Ты э̄лыпа̄лт тэ̄н э̄кватэ̄нтыл акв а̄ги ос акв пыг о̄щсы̄г, наме Николай. Ань ты урыл тав ты потыртас. А̄пщитэ 1996 та̄лт а̄тимыг е̄мтыс. Яныг увщитэ Зина Павловна Ефимова ань тыг мус А̄нъя па̄вылт о̄лы. Николай атахкем та̄лэ яныт о̄лыс, О̄лттумпыт о̄лум колхоз лаппантуӈкве патвес. Ма̄хум мо̄т па̄влытын ла̄кквамингаласыт. То̄нт ты та̄н ще̄мьяӈ та̄гыл А̄нъя па̄вылн ва̄нтлысыт. А̄нъя колхозт ва̄т манос налыманкем мис о̄щвес. Пӯиннув яныг мискол ӯнлыс, ань тот туп харама̄ о̄лы. Хӯл алыщлан бригада о̄с са̄в о̄лыс, туп савыӈ хо̄тпа рӯпата та̄л ӯнлыс. Па̄вылт ла̄пка, ня̄нь ва̄рнэ кол, школа матыра̄ти пуссын о̄лыс. Николай А̄нъят са̄т класс а̄стлас. Тувыл нёлолов класс Ха̄льӯст а̄стластэ. Та юипа̄лт ос техникумыт э̄лаль ханищтахтуӈкве е̄мталас. Ос номтэ щирыл школан онтоловит классыт ханищтахтуӈкве хультыс. Акв э̄тпос ханищтахтас, ка̄сэ та холас. Пормасанэ атсанэ ос ювле такви па̄влэ̄н та минас. Па̄выл совхозт акв та̄л рӯпитас. Тувыл ос Ханты-Мансийск ӯс училищан ма̄нь ле̄ккарыг ханищтахтуӈкве минас. Фельдшер хо̄тпаг тот ханищтахтас. А̄стламе юипа̄лт ос армиян вуйвес. Кит та̄л тот ле̄ккарыг лусытас. Юв ёхтыс, ты рӯпататэ щирыл ос Саранпа̄выл совхозн са̄лыт ӯрнэ ма̄н мо̄т ле̄ккарыт ёт рӯпитаӈкве ке̄твес. Та̄н ё̄рнколаныл «Красный чум» намаим о̄лыс. Нилахкем та̄л са̄лыӈ ма̄хум пусмалтым нё̄рт яласас. То̄нт са̄лыӈ колытт са̄выӈпа̄лэ саран ос ё̄рн ма̄хум яласасыт. Бригадат туп аквкит ма̄ньщи хо̄тпа о̄лыс. Ётыл тот рӯпитаӈкве по̄йтыс. Николай Павлович рӯпататэ щирыл Ха̄льӯс район янытыл Ягрим, Кульпас, Кимкъясуй па̄влыт пӯльницатн, Саранпа̄выл са̄лыӈ колытн, Белоярский район «Нумто» нампа са̄лыӈ колытн ос Касум па̄выл са̄лыӈ ма̄хум пусмалтаӈкве ялантас. Та порат о̄лум соссаӈ ма̄хумн тав ёмащакв ва̄йвес. Аквматнакт аквъёт ханищтахтам юртэ са̄лыӈ колт ва̄щинтастэ. Та хум о̄с са̄лыӈ колт ма̄хум пусмалтым яласас. Николай Павлович о̄лупсатэ сака пӯмащ, тав са̄в ма̄т яласас. А̄нумн таве хӯнтлуӈкве сака мӯстыс. 1088 2014.11.21. Анна АЛГАДЬЕВА Мартын а̄ги Вера. Ка̄сыӈ хо̄тпа такви о̄лнэ ма̄тэ̄н хартаве. Ка̄сыӈ хо̄тпа такви самын патум ма̄тэ ӯлылытэ, э̄руптытэ, янытлытэ, э̄сгитэ. Тав ма̄гсылэ яныгмам ма̄тэ во̄ре посыӈ, ма̄тэ сыстам, витэ атыӈ. Ка̄сыӈ лё̄хъяс ман ӯсхулы, ка̄сыӈ а̄хвтас, со̄съял ман вит во̄ӈха, ка̄сыӈ яныгман йӣв ман пумтар, ка̄сыӈ са̄м ло̄мт таве̄н тыныӈ. Ань ат а̄лыман то̄рмувт, рущ рӯпатан нэ̄гхатым о̄лым, э̄лын о̄лнэ ма̄хум яныгмам ма̄нанылн ялуӈкв ӯщлахтын пора та ӯре̄гыт. Кос хоты хо̄тпа са̄выӈпа̄лэ туи порат ӯщлахтуӈкв ка̄саще̄гыт. Туи яласаӈкв ма̄лтып, ня̄врамыт ӯщлахтэ̄гыт, пувлуӈкв ро̄ви, пил ва̄туӈкв, ла̄хс атуӈкв, па̄кв паттуӈкв ха̄йтталаӈкв ро̄ви. Туи порат сытам ща̄ньа̄щ колыт суиӈыг та е̄мтэ̄гыт. Ты тув Мартын а̄гит Хулюмсунт па̄вылн атхатыгла̄лсыт. Ма̄н халувт рӯтыг кос о̄лэ̄в. Туп яныгмамув порат ат ва̄щинтахтыгла̄лсӯв. Ща̄нянува̄щанув тай халанылт ва̄йхатасыт кос, мӯйлым акваняланта̄лыгласыт. Мартын Ильич Анямов такви Ё̄рыӈколыӈ хум о̄лыс, 1930 та̄лт Сапса е̄р ма̄т Хосво̄ль па̄вылт самын патыс. Илья Васильевич Анямов нотаныл палытыл са̄лы о̄щсыт, Нё̄рт яласасыт, юио̄выл та̄лытт Ня̄хщамво̄льт о̄лсыт. Мартын ма̄нь та̄гыл а̄ще ёт яласас. Хунь яныгмас, Ня̄хщамво̄лиӈ промхозт са̄лы ӯрим о̄лыс, тувыл па̄рт сылнэ ма̄т рӯпитас. Э̄кватэ наме Анна Андреевна, интернатт рӯпитас. Э̄кваго̄йкаг хоса ат о̄лсы̄г, ня̄враманэ̄н иӈ ма̄нит о̄лсыт, хотталь ща̄лтсы̄г. Мартын а̄ги Вера ам о̄лнэм па̄лытыл китынтыг ущ ты ва̄слум. Хо̄нтхатыгламме̄н порат, мощ ты потыртасме̄н. Газета ма̄гыс о̄с потыр хассуме̄н. – Наӈки урынтыл мощ потыртэн: хо̄т самын патсын? Хоты ма̄т яныгмасын? – Ам намум Вера Мартыновна Анямова, Ня̄хщамво̄льт самын патсум. Омам Анна Андреевна Анямова, а̄щум Мартын Ильич Анямов о̄лсы̄г. – Манах а̄гипыг колынт о̄лсы̄н? – Нёлолов: хурум пыг, ат а̄ги. – Хо̄т ханищтахтасын? Манарыг ханищтахтасын? – Ня̄хщамво̄лиӈ школат лов класс мус ханищтахтасум, тувыл Тюменьн минасум. Са̄ртын секретарьмашинистыг ханищтахтасум. Тувыл э̄лаль ханищтахтуӈкв минасум, Свердловский университетт историкархивистыг ханищтахтасум. Ань Тюменский областной архивт рӯпитэ̄гум. Отчёт ва̄рнэ ма̄т кӯщаиг о̄лэ̄гум. Са̄всыр нэ̄пакыт акв ма̄т о̄ньщиянӯв. Са̄всыр рӯпата ма̄ пе̄с нэ̄пакыт ма̄навн мыгыт. То̄ва нэ̄пакыт са̄тхуйпловит нот па̄сныл о̄лэ̄гыт. Ма̄хум акваг ёхталэ̄гыт, китыглахтэ̄гыт. То̄ват йис о̄парищаныл, ща̄ньа̄щ рӯтаныл кинсэ̄гыт. – А̄гипы̄г о̄ньще̄гын? – Агим наме Юля, культура институтт ханищтахты, «менеджер по туризму и ресторанному бизнесу» паты. О̄йкам кол ӯнттын ма̄т рӯпиты, кол кӣвыр рӯпата ва̄ри. Ам тыт ла̄хс ма̄гыс ха̄йттала̄лэ̄гум, э̄щанум ёт пил ва̄тэ̄гум. – Э̄лын о̄лэ̄гын, ювле хартавен? – Ня̄хщамво̄льт нэ̄мхотьют ат хультыс. Ам нила классыт ханищтахтамумт, омам хотталь щалтыс, а̄тям та э̄лыпа̄лт. Ма̄н интернатт о̄лсӯв. Тыт Хулюмсунт па̄вылт яга̄гим ос э̄щум о̄лэ̄г. Тэ̄н па̄лтэн ёхтала̄лэ̄гум. Кит э̄щагум Ханты-Мансийск ӯст о̄лэ̄г, ма̄н ань пуссын тыт о̄лэ̄в. Хосаг е̄мтыс, тыг ёхталамум онтолов та̄л. Люба Номина ам ётум ханищтахтас, школат аквъёт ханищтахтасме̄н, аквъёт архивт рӯпитасме̄н. – Матыр ялпыӈ хо̄тал Тюмень ӯст ва̄рыглаве? – Ам нэ̄мхотталь ат ялантэ̄гум. «Ӯринэ̄ква хо̄тал» о̄с ва̄ра̄ве. Ханты, ма̄ньщи а̄гит тув ялантэ̄гыт, йӣкве̄гыт. О̄лнэ̄кем хантыт, ма̄ньщит тув ялантэ̄гыт. ДК «Строитель» колт национальных культура центр о̄лы, са̄всыр ма̄хмыт тув атхатэ̄гыт: хатанит, украинцыт , белоруссыт, казахыт, хантыт, ма̄ньщит, ё̄рныт. Э̄рге̄гыт, йикве̄гыт, йӣс о̄лупсаныл но̄хво̄ртмалтэ̄гыт. А̄гирищум о̄с тув ялантас. Студентыт тув ялантэ̄гыт. Ос матырмат «Кедр» о̄лы, тув о̄с студентыт ялантэ̄гыт. Кӯщаяныл ма̄ньщи хум, наме хотёрувласлум. Вера Мартыновнан, тав ще̄мьятэ̄н ос э̄щанэ̄н яныг паща ла̄тыӈ ке̄тэ̄гум. Ос ма̄хмытн ла̄вуӈкв таххаты: яныгмам ма̄н ул ёрувлэ̄лын, ва̄тихал юв ёхтала̄лэ̄н. Та порат ня̄врамыт рӯтаныл ва̄ӈкв патыяныл. 1088 2014.11.21. Светлана РОМБАНДЕЕВА Ла̄тыӈ щирыл ма̄н рӯтыг о̄лэ̄в. Ка̄сыӈ та̄л ма̄нь таквс э̄тпос юио̄выл хо̄таланэ̄т ла̄тыӈ щирыл рӯтыг о̄лнэ ма̄хум (финноугорский мир) мӯйлэ̄гыт. Та хо̄талытт та̄н акванатхатыглэ̄гыт, ща̄нь ла̄тӈанылт потыртэ̄гыт, э̄рге̄гыт, пе̄с йис йӣкваныл суссылтэ̄гыт. 1989 та̄лт Марий Эл ма̄т Йошкар-Ола ӯст нэ̄пак хаснэ финноугор ма̄хум мирхал конференцияныл о̄лыс. То̄нт та̄н та урыл потыртасыт, ань ла̄тыӈ щирыл рӯтыг о̄лнэ ма̄хманув ва̄тихал акван вос хо̄нтхатыглэ̄гыт, мӯйлэ̄гыт, ялпыӈ хо̄талыт вос ва̄рыглэ̄гыт. Хосат ос, 1900 та̄лт, финн ма̄хум учёныит яныг конференцияныл о̄лме порат М. А. Кастрен нампа Общество ва̄руӈкве номылматсыт. То̄нт пуссын ка̄сащасыт, тав ань Финляндият вос о̄лы. Тувыл мощ ётылнуве ты Общество финноугор мирыт ма̄гыс ма̄к яныг центрыг ва̄рвес, тот ла̄тӈанув ос культуранув ханищтаӈкве патве̄сыт. Ты та̄л ма̄н, Ха̄льӯст о̄лнэ финноугор ма̄хум, о̄с акванатхатыгласӯв – ма̄ньщит, хантыт ос сараныт. Са̄всыр конкурсыт ва̄рыгласӯв, то̄ванув э̄ргысыт, ма̄щтыр ма̄хум ка̄тыл ва̄рум пормасаныл суссылтасыт. Пе̄с йис та̄гыл тэ̄щинтан тэ̄нут тотыгласӯв, мощ тэ̄пъяласӯв, ӯнлахо̄лсӯв, потрамасӯв. Кит ма̄ньщи учёный нэ̄г, Любовь Васильевна Кашлатова ос Светлана Алексеевна Попова, соссаӈ ма̄хманув йис о̄лупса урыл потыртасыг. Ты юипа̄лт конкурс ва̄рыглавес, но̄хпатум хо̄тпат янытлан нэ̄пакыл майве̄сыт. Соссаӈ ма̄хум тэ̄нут ва̄рнэ ма̄т щар ма̄к атыӈ пӯт Дина Тимофеевна Лисова тав па̄йтыс. Ты ма̄ньщи э̄ква пе̄с йис о̄лупса ос ща̄нь ла̄тӈе ёмащакв ва̄гтэ. Ща̄нь ла̄тыӈ ва̄нэ тэ̄ла палт ос Раиса Владимировна Новьюхова но̄хпатыс. Э̄рыг э̄ргын ма̄т – Нина Михайловна Панкратова, йис о̄лупса ӯргалан тэ̄ла палт – Варвара Васильевна Ямру, ма̄щтырлахтан тэ̄ла палт – Варвара Михайловна Новьюхова. «Изьватас» нампа саран ма̄хум э̄ргын коллективаныл саран ла̄тӈыл э̄ргысыт, Иван Андреевич Архипов гармошкал ёнгыс. Тамле ёмас ялпыӈ хо̄тал Р. П. Загородняя, Т. В. Тунгусова, К. В. Койнова ос В. В. Ямру щё̄пита̄лсыт. Та̄нанылн яныг пӯмащипа ла̄тыӈ ла̄ве̄в, пуста̄гыл вос о̄лэ̄гыт. Р. П. Загородняя ке̄тум потре ма̄ньщи ла̄тӈыг Светлана Ромбандееван толмащлавес. 1088 2014.11.21. Александр ВЬЮТКИН Ма̄ньлат хо̄тпат ты урыл вос ва̄гыт. Ханты-Мансийск ӯст нэ̄пак ловиньтан колт Россия янытыл пе̄с йис порат ня̄врамыт янмалтан ва̄рмаль урыл потыр о̄лыс. Та кастыл щар ма̄нь ня̄врамыт ёт рӯпитан ма̄гсыл ханищтахтын ма̄ньлат ма̄хум тув акванатыглаве̄сыт. О̄влэт тот рӯпитан нэ̄ Светлана Петровна Берендеева пе̄с порат та̄ратым тит нэ̄пакыг урыл мощ потыртас. Ты нэ̄пакыг пе̄с порат ня̄врамыт ханищтам колыт урыл хансымаг. О̄выл тамле нэ̄пак 1770 та̄лт хасвес. Ня̄врамыт ханищтахтынэ̄ныл порат астал, роттыг ӯнлым хӯнтлуӈкв э̄рыс. Ханищтан хо̄тпа юипа̄лт ёхтум ня̄врамн колн щалтуӈкв ат ро̄выс. Ат те хӯнтлы ос ётылнув те ёхты, та ня̄врам тыпйӣв нирыл сысэ̄т ос ла̄гыл паттаге̄т хосгувес. Та коныпал ётылнув ёхтум ня̄врам колканын равтасам яныгнув сыртэп ос горох тармыл хоса лю̄люӈкв ла̄выглавес. Та порат ня̄врамыт са̄йтта̄л патнэ̄ныл мус саватаве̄сыт. Светлана Петровна потыртан ма̄ныл а̄стуме юипа̄лт рущит, хатанит ос башкир ма̄хум та̄нти ня̄враманыл хумус янмалтыяныл, та урыл потыртасыт. Та̄н юипа̄ланылт ос ма̄н, соссаӈ ма̄хум, ма̄нти ня̄враманув янмалтан урыл мощ потыртасӯв. Ханты ма̄хум «Сорт пуӈке тэ̄лнэ» мо̄йт Татьяна Огнёван суссылтым мо̄йтвес. Ма̄ньщи ня̄врамыт янмалтан урыл ос Светлана Динисламова потыртас. Тувыл такви номтэ̄тл акв юипа̄лт хорамыӈыщ о̄лтым хансум ла̄тӈанэ потыртасанэ. Тув ёхталам ма̄ньлат ма̄хмытын ты урыл хӯнтлуӈкв нас пӯмащиг о̄лыс. Та ва̄рмаль оигпаме юипа̄лт пуссын ка̄миньт, атыӈ ня̄нил тыттуве̄сыт ос исум ща̄ил айтве̄сыт. Та̄нанылн пуссын пӯмащ о̄лыс, ща̄й аиманыл та̄нти пӯмащаныл ма̄гсыл са̄всыр тэ̄лат урыл титыглахтасыт. 1088 2014.11.21. Светлана Динисламова Я̄тил ма̄м хосыт ща̄гтым ё̄ме̄гум. Вāгтāл товлагумтыл но̄х вос лапнувум, Мā янытэ̄тыл вос кāсаланувум, Пēс йисыӈ мāхманув тох яласа̄лмыт, Кислаквыӈ мāке̄в тāн, соль, мувылта̄лмыт. Ты хāйтнэ тулыт тāн нумыл ялманыл, Ты миннэ тулыт ёлхультупта̄лманыл, ё̄ранылмӯтраныл То̄румн туп вāвēт, Нāй-О̄тырыт наманыл ат ёрувлавēт. Тāн о̄ньщум мутраныл хоталь минасыт? Хо̄т, хотты йисыт сыс та̄н тыпыгласыт? Манрыг тыхо̄тал мāн но̄х ат лапēва? Манарын, хотьютытн ёлпувавēва? Āти, тāн э̄рганыл о̄с сумылласыт, Тāн пинум лāтӈаныл но̄хлапаясыт, Мāньщи мирув аквтоп товлыӈыг ēмтыс, Хунь пēс мāхум потрыт хӯнтамлаӈкв вēрмыс. Э̄квапыг пыгрищ о̄с но̄хялтуптавес, Тав мӯтраӈ номте̄тэ ат тыпылтавес, Паль о̄щнэ хо̄тпан тав хӯлуӈкв патаве, Сам о̄щнэ хо̄тпан тав ка̄сала̄лаве. Товлагум вāгталыг, но̄х ат лапēгум. . Я̄тил мāм хосыт ам щāгтым ё̄мēгум! Нāй-О̄тырыӈ мāвитт матъёмас о̄лэ̄гум, Мир о̄лнэ хо̄тал То̄румныл по̄йкще̄гум. 1088 2014.11.21. Наталья Константиновна Тасманова Владимир Высоцкий стиханэ мо̄т хо̄н ла̄тӈыл хансавет. Ма̄нь таквс э̄тпост ищхӣпыӈ ут щирыл ма̄н Ня̄хщамво̄ль школавн пищма ёхтыс. Школа яныг кӯщаюв Татьяна Андрияновна Сагандукова пищма ам палтум тотыстэ. Тот хансыма: «Паща о̄лэн, Наталья Константиновна, ня̄врамыт ма̄ньщи ла̄тӈыл ханищтан нэ̄. Музей яныг кӯщай нэ̄ Марлена Зимна наӈын хансы». Э̄лаль пищматэ̄т тав ты урыл хансыс, Польшат мо̄т хо̄н ма̄т Кошалин ӯст «Музей Владимира Семёновича Высоцкого» о̄лы. Та̄н палтаныл ялуӈкве во̄вхатэ̄гыт. Мирхал проект хосат та̄гыл щё̄питым о̄лы -«Владимир Высоцкий на языках мира. Новые переводы». Ос Владимир Семёнович Высоцкий кос акв стихотворениятэ ма̄ньщи ла̄тӈыг толмащлаӈкв нё̄туӈкве э̄ри. Ты китыт проект та̄н музеянылт паты. Ос ань ты порат Владимир Высоцкий поэзиятэ яныгса̄т нупыл кит са̄всыр мирыт ла̄тӈанылн толмащлым о̄лы. Яныгса̄т са̄тхуйплов йильпи толмащлым стихотвореният та̄н мо̄т хо̄н ла̄тӈын ань тыг мус хассаныл. Ань ты проектаныл кастыл рӯпатат акванатавет, йильпи толмащлым стиханэ, э̄рганэ акванщё̄питавет. Са̄в мир ла̄тыӈна стиханэ ань мус толмащлым ат о̄лэ̄гыт (ты хинди, дари, селькупский, шорский, нанайский, кельтский ос мо̄т са̄в мир ла̄тӈын). Та ялпыӈ хо̄тал мус йильпи экспозиция щё̄питэ̄гыт, ань ущты толмащлым потрыт тот суссылтэ̄гыт. Ма̄хумна о̄выл щёс ущты нэ̄пакн хансавет, мир вос ка̄салыяныл ос вос ловиньтыяныл. То̄ва ма̄ныл о̄лнэ мирн ва̄нэ литераторыт ос лингвистыт Владимир Высоцкий потрыт мо̄т хо̄н мир ла̄тыӈна толмащлым щё̄питэ̄гыт, хоты ма̄т иӈ ат толмащла̄лве̄сыт. Ме̄н ты проектын нё̄туӈкв ос музейный рӯпатат нё̄тмил тотуӈкв ка̄сащасме̄н, ты рӯпата намаим о̄лы «Творчеству выдающегося поэта, певца Владимира Высоцкого». Ты о̄выл экспонат ма̄ньщи ла̄тӈыл хансым паты, та̄н музеянылт суссылтаве ос потыртаве. Катерина, Катя, Катерина Катерина, Катя, Катерина! Наӈ палтын, нан торгылын Ам номтум паты! Наӈ хо̄вт хурип, Торас лю̄лит лю̄ле̄гын, Наӈ тыныӈ супыл о̄лэ̄гын. Ам ярмакыл наӈын мастылум, Ос каминьт нуил пе̄рыгтылум Вос То̄рум наӈын нё̄ты Тамарканыл нё̄тнэ̄г сусхатэ̄гын, Пе̄с порат тамле номтна ёхтуве̄сум. Ул пилэн, Катя. Катерина, ме̄нки ва̄рмаляме̄н, О̄лнэ ва̄рмаляме̄н – ӯс морых! Ам э̄кват ка̄сыӈ та̄л ат пе̄нтэ̄гум. Катерина, то̄влы, ул пилэн! Суп ма̄глум па̄лыгманумтылум, Пуссын ва̄слын! Тахсуӈкв миныме̄н! Паты ялпыӈ хо̄тал 1965 та̄л. Ам, Наталья Константиновна Тасманова, ос рущ ла̄тыӈ ханищтан нэ̄ Надежда Степановна Артеева толмащлам потруме̄н на̄нанн ты хансысламе̄н. 1088 2014.11.21. Николай МЕРОВ Ме̄ӈквыт урыл йильпи нэ̄пак нэ̄глыс. Мо̄лалнув нэ̄пак хаснэ ханты хум Владимир Енов китыт нэ̄паке нэ̄глыс. Ты нэ̄пак «Подарок Меӈква» намаим о̄лы. Тав о̄выл хансум нэ̄паке «Сказы рода правдивых людей» 2013 та̄лт та̄ратавес. Ань ты хо̄тал мус пуссын аквъёт налыман мо̄йт тав хансыс. Владимир Егорович Ямало-Ненецкий округт Шурышкарский районт Карвожи па̄вылт хӯл алыщлан ос во̄раян ще̄мьят самын патыс. Школа а̄стламе юипа̄лт Томск ӯс педагогический университет ханищтахтас. Тувыл юв ёхтыс ос та̄ра школан рӯпитаӈкве патхатас. Ня̄врамыт рущ ла̄тыӈ урокн ханищтасанэ. 2001 та̄лт ма̄н округувн рӯпитаӈкве ёхтыс. О̄влэ̄т тав «Югория» нампа телерадиокомпаният рӯпитас. Ань «Ханты ясаӈ» газетат ля̄ххал тотым рӯпиты. «Подарок Меӈква» нэ̄паке ханты ос рущ ла̄тӈыл хансыстэ. Тав мо̄йтанэ ма̄нь ня̄врамыт ос школат ханищтахтын ня̄врамытн ловиньтавет. Яныг хо̄тпат тав мо̄йтанэ̄тыл о̄с сака пӯмщалахтэ̄гыт. Ка̄сыӈ мо̄йтпотырт тав ма̄вит ӯргалан ва̄рмаль, о̄лнэхӯлнэ нак ос пе̄с йис о̄лупса номтыт э̄лаль тотыянэ. 1089 2014.12.05. Николай МЕРОВ Ля̄ххал тотнэ ма̄хум акванатхатыгласыт. Ты э̄тпост 20-21 хо̄талыгт округ янытыл ля̄ххал тотнэ ма̄хум ловит щёс Ханты-Мансийск ӯст акванатхатыгласыт. Ты ва̄рмаль общественный ос внешний связь округ Департаментыт рӯпитан ма̄хум та̄н щё̄пита̄лыглэ̄гыт, рущ щирыл «Информационный мир Югры» ла̄ваве. Ань ля̄ххал тотнэ ма̄хум та̄нки рӯпатаныл урыл выставка тот ва̄рыгласыт. Ты тэ̄лан э̄лы ма̄ныл яныг кӯщаит ёхталасыт. Форум пуснэ порат округ губернатор о̄с тув ёхталас, ля̄ххал тотнэ хо̄тпат ёт потыртас. Тав ла̄выс: «Округув са̄выӈпа̄лэ ля̄ххал тотнэ хо̄тпат та̄нки рӯпатаныл ёмщакв ва̄рияныл. Ос таи ла̄вуӈкве таӈхе̄гум, та̄нанылн ты урыл номсахтуӈкве э̄ри та̄нки ва̄рнэ рӯпатаныл хосыт мирн нё̄тмил вос ва̄ре̄гыт. Мо̄лалнув Россия Правительстват рӯпитан ма̄хум хус регион ла̄всаныл, тот ля̄ххал тотнэ ма̄хум номтыӈыщ ос э̄рнэ щирыл ля̄ххалыт суссылтэ̄гыт ос хансэ̄гыт. Ты ва̄рмаль щирыл ма̄н округув хӯрмит ма̄т о̄лы. Ты урыл тох ла̄вуӈкве ро̄ви, Югра ма̄вт ма̄хум о̄лупсаныл ёмаснувег е̄мтыс, сака яныг та̄рвит а̄тим. Ты статистика щирыл тох о̄лы. Амки ты урыл ос тох номсэ̄гум, ля̄ххал тотнэ ма̄хум мирн са̄в номт тотэ̄гыт. Таима̄гыс ам акваг та̄н ётаныл рӯпитэ̄гум. Ма̄н ва̄рнэ рӯпатав урыл ос ма̄хум та̄рвитыт урыл та̄н ты хансэ̄гыт. Ам тахнувум, ля̄ххал хаснэ хо̄тпат та̄нки рӯпатаныл ёмас номтыл вос ва̄рияныл. Аквматнакт газетат акв ля̄ххал ка̄саласум, тот тамле потыр хансым о̄лыс. Вах я̄ унсах ӯлтта яласан ма̄гыс мирныл арге̄н са̄в олн виве. Ам ты ва̄рмаль урыл таи номсэ̄гум, хо̄ӈха намыл арге̄н са̄в олн виӈкве паты, ля̄ххал тотнэ хо̄тпа ул такви номтэ щирыл тох хансыс. Ты потыр хансыматэ аман маныр урыл номсыс. Ма̄хум тав потре ловиньтыяныл, тох номсуӈкве патэ̄гыт. Ма̄н олнанув хосыт ты ӯнсах ӯнттувес, та̄н ань яласан ма̄гыс арге̄н са̄в олн выгыт. Ма̄хум ты потыр ёмщакв ат торгамтыяныл, кантлуӈкве патэ̄гыт. Ам тамле потрыт нупыл сака ат сунсэ̄гум. Ка̄сыӈ хо̄тпа юипа̄лт ха̄йтыгтаӈкве ат патэ̄гум. Ос ам таи ла̄ве̄гум, ля̄ххал тотнэ ма̄хум мир ма̄гыс са̄в э̄рнэ потыр хансэ̄гыт. Ка̄сыӈ хо̄тпа матыр ва̄рмаль урыл потре номтыӈыг вос хансытэ, то̄нт ущ тав рӯпататэ ма̄хумн янытлаӈкве патаве. На̄н рӯпатан сака э̄ри, мир ма̄гыс са̄в нё̄тэгы̄н». Ты та̄л газетат ля̄ххалыт хаснэ хо̄тпат ос кина по̄слын то̄тап хосыт ля̄ххалыт ва̄рнэ хо̄тпат ма̄гыс ханищтап щё̄пита̄лвес. Тот ма̄хум газета щё̄питан ва̄рмальн ханищтаве̄сыт, ма̄н редакциявт рӯпитан хо̄тпат о̄с тув ханищтахтуӈкве ялсыт. Тувыл ань мо̄лал ля̄ххал тотнэ хо̄тпат халт конкурс щё̄пита̄лвес. Хотьют щар ёмщакв потыр хансыс, та̄н тот янытлаве̄сыт ос мӯйлупсал майве̄сыт. Тувыл мӯй ма̄хум ма̄гыс экскурсият щё̄пита̄лве̄сыт. Ты та̄л ля̄ххал тотнэ хо̄тпат тох ты рӯпитасыт. 1089 2014.12.05. Мария Двинянинова Тыныӈ нэ̄ хо̄тпат, Югра ма̄т о̄лнэ нэ̄т! Ханты-Мансийский округ Дума депутатыт ос ам янытлан ла̄тӈыт на̄нан ла̄ве̄в тамле ёмас ялпыӈ хо̄талт – Ома хо̄тал! Ты хо̄тал са̄всыр ялпыӈ хо̄талыт халт янгыг ловиньтахты. Ма̄н ва̄глӯв, о̄лнэ хо̄тал оманыл о̄вылтахты. Ома – щар яныг ос тыныӈ хо̄тпа, кос маныр янытыг вос о̄лнув, ма̄н пуссын та̄рвитыӈ хал порат ома палт ха̄йтэ̄в. Хунь матыр ща̄гтальпи манос матыр посыӈ ва̄рмаль ма̄н о̄лнэ хо̄талувт е̄мтапи, молямтахтэ̄в таве̄н палямтахтуӈкв. «Ома» ла̄внэ сымыӈ ла̄тыӈ ма̄навн о̄лнэ ё̄рва̄г мыг ос са̄всыр та̄рвит та̄ра минуӈкв нё̄ты. То̄нт наӈкина̄н агтэ̄гын, номтын та̄кыг о̄лы. Таима̄гыс Ома хо̄тал, тав рущ щирыл яныг таквс э̄тпос оигпан ляпат янытлаве, ёмас ва̄рмалиг ловиньтахты. Ос аквман щёс юв ялнэ нак атапахтуӈкв, ще̄мья пуссын аквъёт ос ома ёт ӯнлахо̄луӈкв, потрамаӈкв, таве сымыӈыщ янытлаӈкв. Тыныӈ омат, Юграт о̄лнэ омат! Ам на̄нан ла̄вуӈкв ка̄саще̄гум – пуста̄гыл о̄лэ̄н, со̄тыӈыщщуниӈыщ ос нотыӈ о̄лупсал о̄лэ̄н. На̄н ня̄враманын о̄с ёмащакв вус о̄лэ̄гыт, на̄нан ща̄гтальпиӈ кас вус ва̄ре̄гыт ос сымыӈыщ ре̄гыӈ э̄рупса щирыл на̄нан вус уральтыяныл. Б. С. Хохряков ке̄тум янытлан ла̄тӈе ма̄ньщи ла̄тӈыг М. Т. Двинянинован толмащлавес. 1089 2014.12.05. Анна АЛГАДЬЕВА Са̄в ще̄мья о̄лнэ кол ёвтсыт. 2007 та̄лныл Россият китыт ня̄врам самын паттум ще̄мьят олныл ойтавет, рущ ла̄тӈыл «материнский (семейный) капиталыг» ла̄ваве. Та па̄сныл округувт о̄лнэ 77 со̄тыра 512 ще̄мьят тамле сертификатнэ̄пакыл майве̄сыт. Та̄н халанылт 30 со̄тыра 981 ще̄мья кол ёвтнэ ма̄гсыл олныл висаныл. Ты ще̄мьятын нё̄тнэ ма̄гсыл Пенсионный фонд 10 млрд. солко̄ви та̄стыс. Ос кит со̄тыра 568 ще̄мья олн ос ня̄враманыл ханищтан ма̄гсыл холтсаныл. Ты ма̄хумн Пенсионный фонд 100 млн. солко̄ви мис. Ты халт туп 87 ще̄мьят олнаныл пенсияныл са̄вмалтан ма̄гсыл тув ке̄тсаныл. Ты та̄л округ янытыл 9 со̄тыра 638 ще̄мьят китыт ня̄враманыл самын патыс, та̄н пуссын тамле сертификатнэ̄пакыл майве̄сыт. Пенсионный фонд ке̄тум ля̄ххал ма̄ньщи ла̄тӈыл Л. Алгадьева хансыстэ. 1089 2014.12.05. Людмила тасманова Округ ма̄к яныг са̄кконэ йильпи ла̄тӈыл хасвес. Ювле хультум э̄тпос 19 хо̄талэ̄т округ Думат рӯпитан депутатыт акванатхатыгласыт ос са̄всыр са̄кконыт пирмайтасыт. То̄нт акв хо̄тал сыс та̄н кит сапра̄ни ва̄рыгласыт. А̄лпыл та̄н 28 са̄ккон манос программанэ̄пакыт пирмайтасыт, ӣтипа̄лаг ос 2015-2017 та̄лыт ма̄гсыл хансым округ бюджет олныт урыл потыртасыт. Ты э̄лыпа̄лт Борис Хохряков, округ Дума кӯщай хум, ос мо̄т депутатыт ля̄ххал тотнэ хо̄тпат ёт хо̄нтхатыгласыт ос тамле ля̄ххал тотсыт. Та̄н ла̄всыт, округув Уставн, ты щар ма̄к яныг са̄кконын, йильпи ла̄тыӈ хансуӈкве э̄ри. Депутатыт пуссын ты йильпи тэ̄ла ма̄гсыл номт ке пинэ̄гыт, округувт о̄лнэ ма̄хум губернатор пе̄рияӈкве ат патэ̄гыт. Россия Президентув хӯрум хо̄тпат наманыл округ Думан ке̄тыянэ ос депутатыт та хо̄тпатныл акв хо̄тпа губернаторыг тах пе̄рие̄гыт. Сапра̄нит депутатыт йильпи щирыл хансым Устав та пирмайтасаныл. Депутатыт ты урыл маныр номт о̄щсыт, пуссын китыглаве̄сыт. Щар ма̄к яныг са̄ккон мо̄т щирыл хансуӈкве ос пирмайтаӈкве та̄н пуссын ка̄сащасыт. Ань пирмайтым нэ̄пак та̄н Государственный Думан ке̄тыяныл. Тот рӯпитан ма̄хум ты тэ̄ла о̄с ке пирмайтыяныл, 2015 та̄лт ма̄ньполь э̄тпост ма̄н округувт пе̄риян ва̄рмаль ат ва̄раве. Аквта хо̄талт депутатыт хӯрум та̄л кастыл хансым округ бюджет пирмайтасыт. Ты нэ̄пак урыл сака хоса потыртасыт. ЛДПР партият рӯпитан депутатыт ты бюджетнэ̄пак пирмайтаӈкве щар ат ка̄сащасыт. Та̄н ла̄внэ̄ныл щирыл, хӯрум та̄л ма̄гсыл хансым олныт мо̄т щирыл уртуӈкве э̄рыс. Та̄н ла̄тӈаныл аты хӯнтлуве̄сыт, хӯрум та̄лн хансым бюджетолныт та пирмайтаве̄сыт. Мо̄т щёс округ Думат рӯпитан депутатыт ва̄т са̄грапнал э̄тпос 10 хо̄талэ̄т сапра̄нин о̄с тах та во̄вавет. 1089 2014.12.05. Людмила ТЕТКИНА Йильпи та̄лныл ма̄хум олнаныл но̄хнё̄тавет. Округувт о̄лнэ ма̄хум ань са̄всыр программат щирыл олннё̄тмилыл ойтавет. Мо̄тыт та̄л са̄в ня̄врам янмалтан ще̄мьят, яныгпа̄ла хо̄тпат, «Труженик тыла», «Ветеран труда» нам о̄щнэ хо̄тпат ос мо̄т ма̄хум пособиеолнаныл но̄хнё̄тавет. Ты ва̄рмаль урыл округ Правительстват рӯпитан ма̄хум сапра̄нит потыртасыт ос постановлениенэ̄пак пирмайтасыт. Ирина Уварова, округ мирн нё̄тнэ департаментыт рӯпитан нэ̄, ты урыл ла̄выс: «Ма̄н ты ма̄хумн олн ойтнэ ма̄гсыл 2015 та̄лт 500 миллион солко̄ви тах холтэ̄в. 2016-2017 та̄лыг кастыл о̄с аквты са̄вит олн хассӯв». 2015 та̄л та̄л котиль э̄тпос о̄выл хо̄талэ̄ныл 170 со̄тыра хо̄тпат олнаныл но̄хнё̄тавет. Округ губернатор прессслужбатэ ке̄тум ля̄ххал ма̄ньщи ла̄тӈыл Людмила ТЕТКИНА хансыстэ. 1089 2014.12.05. Николай МЕРОВ Э̄лы ма̄т ӯнлын па̄влытн э̄рнэ пормас тотаве. Округувт э̄лы ма̄т ӯнлын па̄влытн налыман нупыл кит тонна э̄рнэ пормас тотаве. 2015 та̄л кастыл нилахуйплов тонна бензин ос солярка, тувыл нёлоловхуйплов тонна кӯр па̄лтыглан а̄хвтас тах ёвтаве. Ты та̄л яныг таквс э̄тпост округ Правительстват рӯпитан кӯщаит заседание ва̄рыгласыт, тот та̄н ты ва̄рмаль урыл потыртасыт. Ты тэ̄ла ма̄гыс олныт округ бюджетныл а̄рнтаг миӈкве патавет. Пормас тотнэ хо̄тпат аукцион щирыл пе̄риявет. Кӯщаянув ла̄внэ̄ныл щирыл, ты хосыт э̄лы ма̄т ӯнлын па̄влытт о̄лнэ ма̄хум о̄лупсаныл кӯпнитнуве̄г е̄мты, мощ нё̄тавет. Губернатор ва̄ӈын хум Геннадий Бухтин ла̄выс, ты ва̄рмаль мӯсхал щирыл э̄лаль тотнэ ма̄гыс акваг уральтаӈкве патаве. Губернатор прессслужбатэ ке̄тум ля̄ххал ма̄ньщи ла̄тӈыг Николай МЕРОВ хансыстэ. 1089 2014.12.05. Тамара МЕРОВА Пӯмыщ ханищтапыт ос суссылтапыт о̄лсыт. Та са̄тыт Ханты-Мансийскат «Ма̄вит ос Э̄лумхолас» нампа музейт са̄в ма̄хум акванатхатыгласыт. Тот «VI Югорская полевая музейная биеннале» нампа ханищтап о̄лыс. Са̄всыр ӯсыӈ ос мо̄т ма̄ныл ёхталам ма̄хум та̄нки музеяныл урыл тот потыртасыт ос са̄всыр пӯмащ суссылтап ва̄рыгласыт. Ма̄н ань о̄лнэ поравт пе̄с пормасыт хумус ёмщакве̄г ӯргалаӈкве э̄ре̄гыт, хоты ма̄т пе̄с пормасыт кинсуӈкве ро̄ви ос са̄всыр мирыт аквантэ̄лыглахтам э̄лыпа̄лт манхурипаг о̄лсыт, та тэ̄лат та̄рапаттуве̄сыт. Музеит рӯпитан хо̄тпат са̄всыр проектыт о̄щсыт, та̄н таияныл ищхӣпыӈ утыт хосыт суссылтасыт. Кит пӯмыщ мастеркласс ва̄рыглавес. Тувыл мӯй ма̄хум Ханты-Мансийский район Селиярово па̄вылн тотыглаве̄сыт. Ос ётыл акванатхатыгламаныл порат туриндустрия урыл потыртасыт. 1089 2014.12.05. Александр ВЬЮТКИН Ма̄ньщи хумиюв касыс. Та хультум э̄тпост ня̄врамыт ханищтан ма̄хум халт Москва ӯст Всероссийский нампа касыл о̄лыс. Тув Россия ма̄ янытыл са̄всыр ща̄нь ла̄тӈыл ня̄врамыт ханищтан ма̄хум акванатхатыгласыт. Тув ёхталам ка̄сыӈ хо̄тпа такви ма̄тэ̄т акв тамле касылт но̄хпатыс. Пуссын аквъёт ва̄т нупыл акв хо̄тпа о̄лыс. Хатанит, ё̄рныт, калмыкыт, алтайцыт, тувинцыт о̄лсыт, Мордовияныл, Удмуртияныл, Чечняныл ос Дагестан республиканыл ма̄хум ёхталасыт. Касыланыл тит хо̄тал о̄лыс, хӯрмит хо̄талт та̄н ос Государственный Дума нампа колн ялсыт. Ма̄н округувныл Москва ӯсн ты яныг касылн ма̄н хӯрум ма̄ньщи хо̄тпа ялсӯв: Владимир Савельевич Меров, тувыл таве̄н нё̄тнэ нэ̄, Майя Ефимовна Макарова, ос ам. О̄выл хо̄талт каснэ ма̄хум хотьютаныл ос хунь касуӈкв паты, халанылт ты тэ̄ла та̄рапаттысаныл. Ка̄сыӈ хо̄тпа такви но̄ххартум нэ̄пакломтэ̄т хансым по̄сэ щирыл касыс. Владимир Савельевич каснэ ма̄т хо̄тхуйпловитыг о̄лыс. Та юипа̄лт та̄нти ва̄рнэ рӯпатаныл щирыл мастеркласс суссылтасыт, рущ ла̄тӈыл «Мой регион, моя школа, моя профессиональная деятельность» ла̄ввес. Ка̄сыӈ хо̄тпа такви мире маснутыт ос хорамыт урыл мощ потыртас. Ты касыланыл та̄н э̄типа̄ла мус суссылтасаныл. Ма̄н хӯрум хо̄тпа пуссын аквъёт Володян нё̄тсӯв. Касылэ са̄ӈквылтапыл са̄ӈквылтан «Нэ̄ йӣкв» пе̄с та̄ныл о̄вылтастэ. Тувыл потре э̄лаль та хащматас. Потре̄т такви ще̄мьятэ, ханищтан колэ, о̄лнэ ос рӯпитан ма̄тэ урыл потыртас. Та юипа̄лт ма̄ньщи хумиюв йӣкв йӣквыс ос «Са̄лыӈ хум э̄рыг» э̄ргыстэ. Ма̄н ляпавт ӯнлын ма̄хмытын Владимир суссылтапе сака мӯстыс. Та̄н Володян ла̄всыт: «Холытан наӈ суссылтапын акв тамле ёмас суссылтапыг те е̄мты, наӈ но̄х та патэ̄гын». Каснэ ма̄гсыл ёхталам ма̄хум суссылтапаныл са̄выӈпа̄лэ пуссын яныг экраныӈ телевизор хосыт суссылтасаныл. Таима̄гсыл ма̄н юипа̄лувт о̄лнэ ма̄хум та̄нти суссылтапаныл мощ мо̄т ширыл ва̄рсаныл. Ты э̄лыпа̄лт то̄ва каснэ хо̄тпат акв ма̄т лю̄лим потыртасыт, мо̄тананыл тыглетувле ё̄мыгтым потыртасыт. Нэ̄матыр хоса ат ӯрхатсӯв, аквматэ̄рт ня̄врамыт ханищтан ма̄хум йӣквуӈкв ос э̄ргуӈкв та тӯлтхатасыт. Татарстан ма̄ныл ёхталам хум ёт йӣквнэ ос э̄ргын ма̄хум тув ёхталасыт. Ты касыланыл э̄типа̄ла онтолов щё̄с мус о̄лыс. Титыт каснэ хо̄тал о̄с а̄лпыл о̄вылтахтас. Тот ос лов манос атхуйплов кум палыт ня̄врамыт ёт рӯпитан ма̄хум ханищтап суссылтасыт. Ка̄сыӈ хо̄тпа такви ща̄нь ла̄тӈыл потыртан кина такталас. Ма̄н Ханты-Мансийск ӯсувт о̄лнэ «Лылыӈ со̄юм» колт ханищтахтын ня̄врамыт ма̄ньщи ла̄тыӈ ат ва̄гыт. Таима̄гсыл Владимир Савельевич та̄наныл рущ ла̄тӈыл ханищтыянэ, ты урыл кина суссылтас. Ты, улпыл, таи ма̄гсыл ма̄н каснэ хумиюв ювле хультыс. То̄ва хо̄тпат та̄нти уранылт таглым, хоса номсахтым потыртасыт. Э̄типа̄лаг хо̄т щё̄с порат жюриг о̄лнэ ма̄хум ня̄врам ханищтан ма̄хум халт ма̄к ёмас хо̄тпа пе̄риян ма̄гсыл мо̄т колнакн минасыт. Тот та̄н щё̄с арыгтем потыртасыт. Номтаныл акванёхтуманыл юипа̄лт ма̄хум янытлаӈкв ущта о̄вылтахтасыт. Алтай ма̄ныл ёхталам нэ̄ но̄хпатыс. Владимир Савельевич о̄выл степень о̄щнэ «За индивидуальность» нампа дипломнэ̄пакыл майвес. Хӯрмит хо̄талт ос ня̄врамыт ханищтан ма̄хум Государственный Дума колн тотыглаве̄сыт. Тот са̄всыр мӯйлупсал ос пӯмащипа ла̄тӈыӈ пищмал майве̄сыт. 1089 2014.12.05. Александр ВЬЮТКИН Па̄ссаӈ щахныл каснэ хумиюв. Яныг таквс э̄тпос ва̄т нупыл нёловит хо̄талт Москва ӯст бокс нампа яныг касыл о̄лыс. Па̄ссаӈ щахныӈ ка̄тыл каснэ ма̄хум халт ма̄н ма̄ньщи хумиюв Руслан Проводников касыс. Тав ма̄ янытыл янытлаве ос ёмащакв ва̄ве. Руслан ты э̄лыпа̄л касылэ̄т WBO чемпионский нампа э̄нтап о̄ньщас. Лӯпта э̄тпос нилахуйплов хо̄талт яныг ща̄рыщ тапалъе̄рт США ма̄т Нью-Йорк ӯст касме порат Крис Альджиери каснэ хумитэ̄н э̄нтапе хотвуйвес. Та па̄сыл Руслан ёт касуӈкв ка̄сащан хо̄тпа хоса хо̄нтуӈкв ат ве̄рмувес. Тав ётэ нэ̄мхотьют касуӈкв ат ка̄сащас. Ань Москва ӯст о̄лум касылн Мексика ма̄ныл о̄лнэ хум Хосе Луис Кастильо касуӈкв ёхталас. Луис Кастильо ань налыман талэ. Каснэ палытыл нёлса̄т щёс алхатас. Са̄тлов нупыл хо̄т щёс тав но̄хпатыглас. Тав ётэ касум хо̄тпан нупыл са̄т э̄лумхо̄лас тав са̄ӈала̄лнэ мус ра̄тсанэ. Руслан ёт каснэ мус хӯрумхуйплов щё̄с ра̄тыглавес. Акв щёс халэ̄нт каснэ хумитэ ёт нэ̄мхотьютэ̄н но̄х ат патыс. Луис Кастильо мощ ма̄ньлатнувег о̄лме порат са̄в та̄л «чемпионский» нампа э̄нтап такви палтылэт о̄ньщистэ. Ань ос ма̄н ма̄ньщи хумиюв ёт Москва ӯст касуӈкв ка̄сащас. Касыл о̄лум хо̄талн хӯс хо̄талын са̄ртынув ёхтыс. Мо̄т ма̄т каснэтэ щирыл са̄в щё̄питахтуӈкв э̄ри. Та̄н тот о̄лнэ щё̄саныл лов щё̄сын юв хульты. Таима̄гсыл та̄н щё̄питахтын щирыл са̄ртынув тув манос тыг ялантэ̄гыт. Тувыл касыл э̄лыпа̄лт те̄лпаныл са̄всыр тэ̄рпил ул вос тэ̄лыгтаве, ва̄тихал уральтым о̄ньщавет. Руслан каснэ хо̄талт тав э̄лыпа̄лэ̄т па̄ссаӈ ка̄тыл каснэ иӈ онтолов хум касыс. Ма̄н Россия ма̄в ма̄гсыл каснэ ма̄хум пуссын но̄хпатсыт. Щар ва̄ти касыл са̄тхуйплов кум минас. Ты Волгодонск ӯсныл о̄лнэ Дмитрий Кудрешов Куба ма̄ныл ёхталам хум Хуан Карлос Гомес ёлпаттыстэ. Дмитрий Кудрешов каснэ ма̄т «кувалда» нам о̄ньщи. Тав ётэ каснэ ма̄хум пуссын пӯӈк ва̄лманыл то̄рнуве̄сыт, са̄ӈала̄лым ёлпатыгласыт. Аквъёт пуссын ань хо̄тхуйплов хо̄тпа тох ра̄тыгласанэ. Руслан Проводников Луис Кастильо халэ̄нт атыт раунд мус алхатсы̄г. Касылэ̄н о̄вылтахтаме порат Руслан хумитэ та̄ра ра̄туӈкв та о̄вылтастэ. Луис Кастильо аквписыг лаппантхатым ювле ла̄квхатас. Юио̄выл атыт раундыт ма̄н каснэ хумиюв ща̄рыщ тапа̄лныл ёхталам хум мощщакве̄н ёлпаттыгластэ. Луис Кастильо но̄хква̄лме юипа̄лт Руслан таве̄н вильтэ̄т титынтыг ёмщакв ю̄ныгтастэ. Кастильо воссыг нэ̄матыр ва̄руӈкв ат ве̄рмыс, тувыл рефери нупыл пуӈке хосгим ёл та ӯнтыс. Та юипа̄лт касылэ̄н та по̄илттавес. Касыл о̄лум колн са̄в мир ёхталас. Ро̄ӈхимав кол алатэ но̄х а̄лты а̄лмыслӯв, пуссын хот ща̄гтсӯв. Хотьют хумус ве̄рмыс, тох та ро̄ӈхыс. Ты алхатнэ касылт Руслан ты та̄л юио̄выл касылэ ты о̄лыс. Мо̄тыт касылэ ре̄тыӈ ю̄свой манос ма̄ньполь э̄тпост тах е̄мты. Та урыл нэ̄мхотьют иӈ ат ва̄гтэ. Руслан мир янытыл ва̄нэ ма̄хманэ̄н э̄лаль о̄лнэ ёмас ла̄тӈыл янытлаве. Ма̄н таве о̄с са̄в ёмас ла̄тӈыл те̄тылув. На̄й-О̄тыранэ̄н вос ӯргалаве. 1089 2014.12.05. Людмила ТЕТКИНА Лё̄ӈхыт ос вина тыналан ва̄рмаль урыл. Округ кӯщай Наталья Комарова па̄влыӈ ос ӯсыӈ мирколытт рӯпитан кӯщаит Ханты-Мансийск ӯсн сапра̄нин во̄выгласанэ. Тот кӯщаит ма̄шинал яласан лё̄ӈхыт ос вина тыналан ва̄рмалиг урыл потыртасыт. Кӯщай нэ̄ та̄нанылн ла̄выс: «Ты та̄л округ миркол ёмащакв рӯпитанэ̄тэ ма̄гсыл Россия Правительстваныл олныл майвес. Ты олныт ӯсытт, па̄влытт лё̄ӈхыт ёмащакв ва̄рнэ ос то̄ва ма̄тт йильпи лё̄ӈхыт пиннэ ма̄гсыл майве̄сыт. Ма̄хманув акваг ла̄ве̄гыт, лё̄ӈхыт щар лю̄лиг е̄мтсыт, яласан кемыг аты ва̄равет. Ты рӯпата ма̄н акваг уральтым о̄ньщилӯв. На̄н ос ӯсыт, па̄влыт миркол кӯщаит ты ва̄рмаль урыл о̄с ул ёрувлэ̄н». Ювле хультум та̄лт ты рӯпата ва̄рнэ ма̄гсыл 823 миллион солко̄ви майвес, ты та̄л акв миллиард 350 со̄тыра солко̄ви та̄стувес. Округув янытыл 80% са̄вит лё̄ӈхыт йильпииг щё̄питаве̄сыт. Ань туп Ха̄льӯс ос Ханты-Мансийский районыгт ма̄шинал яласан лё̄ӈхыт лю̄льсаӈ ва̄рим о̄лэ̄гыт. Та районыгт ос округ янытыл 450 ве̄рыста палыт лё̄ӈхыт ёмащакв ань щё̄питаӈкве э̄ре̄гыт. Яныг кӯщаюв Наталья Комарова мирколытт рӯпитан хо̄тпат ла̄всанэ, та̄стым олныт хумус холтавет, хумус лё̄ӈхыт щё̄питавет, вос уральтыяныл, олнаныл ёмащакв вос ловиньтыяныл. Ка̄сыӈ районт лё̄ӈх щё̄питан ма̄гсыл я̄нас фонд о̄лы, туп Белоярский ос Ха̄льӯс районыгт тамле рӯпата иӈ ат ва̄рвес. Э̄лаль тав кӯщаит ты рӯпата моляхнув ва̄руӈкв ла̄всанэ. Кондинский район миркол кӯщай Михаил Шишкин сапра̄нит ты рӯпата урыл о̄с потыртас. Та районт туп аквкит па̄выл мус ма̄шина яласан лё̄ӈх а̄тим, мо̄т па̄влытт о̄лнэ мир та̄л сыс машинал тыглетувле яласэ̄гыт. Тав ла̄выс, ань тот мо̄т та̄рвит о̄лы. Та̄н ма̄шинат яласан лё̄ӈхыт акваг уральтыяныл, тэ̄лы порат тӯйт хотщё̄питэ̄гыт, сэ̄ил, солвалыл манос мо̄т утыл лё̄ӈханыл паргалтыяныл. Ты рӯпата ма̄гсыл олн акваг ат то̄вылхаты. Ос акв ва̄рмаль урыл кӯщай хум ла̄выс, ань лё̄ӈх ва̄рнэ ма̄хум аукцион щирыл пе̄риявет, хотьют ты рӯпата ма̄гсыл мощщанув олн во̄ви, тав но̄х та паты. Ты та̄л та̄н ты рӯпата о̄с ва̄рсыт, тамле организация хо̄нтсыт. Ань акв та̄л та ӯрхатэ̄гыт, лё̄ӈханыл ат ва̄равет. Тамле организация олн ат о̄ньщи, рӯпата ёмащакв ва̄руӈкве ат ве̄рми. Тувыл олн ке хо̄нты, рӯпататэ молях ва̄рапитэ, аквкит та̄л ювле хульты, лё̄ӈханыл о̄ста лю̄лиг е̄мтэ̄гыт, миркол кӯщаит олн во̄вуӈкве о̄ста о̄вылтахтэ̄гыт. Тав ла̄внэ̄тэ щирыл, лӯима̄т лё̄ӈх ва̄рнэ ма̄гсыл олн са̄литаӈкве щар ат э̄ри. Ты ва̄рмаль урыл Борис Сочинский о̄с потыртас. Тав Нефтеюганский район Усть-Юган па̄выл миркол кӯщаиг о̄лы. Та̄н о̄с па̄вылт ёмас лё̄ӈх ва̄руӈкве кос о̄вылтахтасыт. О̄с аукцион ва̄рыгласыт, маткем та ӯрхатасыт, та̄н ма̄нь па̄вланылт рӯпитаӈкве нэ̄мхотьют ат ка̄сащас. Тав лё̄ӈх ва̄рнэ организацият палт такви ялыс, ос рӯпитан хо̄тпа во̄выглас. Ювле туп акв ла̄тӈыл ла̄ввес, 5 ве̄рыста палыт лё̄ӈх ва̄руӈкве та̄н тув ат минэ̄гыт. Тув са̄всыр техника хартнэ ма̄гсыл са̄в олн холтэ̄гыт ос тыкем лё̄ӈх ва̄рим са̄в олн ат сэ̄лэ̄гыт. Тыи ма̄гсыл ты та̄л та ма̄нь па̄вылквет о̄лнэ ма̄хум ёмас лё̄ӈхыл ат ва̄равет. Э̄лаль кӯщаит вина тыналан ва̄рмаль урыл потыртасыт. Наталья Комарова ла̄выс, мо̄тыт та̄лныл акв йильпи са̄ккон рӯпитаӈкве о̄вылтахты. Ла̄пкат вина тыналан хо̄тпат лицензиянэ̄пакыл мо̄т щирыл миӈкве патавет. Тав ла̄выс: «Ань предпринимателиг рӯпитан хо̄тпатн ты йильпи са̄ккон урыл потыртэ̄н. Вина тыналан хо̄тпат э̄лаль аквта щирыл уральтым о̄ньщэ̄н. Та̄н лю̄ль вина ул вос тыналэ̄гыт. Ня̄враманув, ма̄ньлат хо̄тпанув вина аюӈкве ул вос кащилтыяныл. Ос ла̄пкат ӣти мус вина тыналым ул вос рӯпитэ̄гыт». Ханты-Мансийск ӯс миркол кӯщай Максим Ряшин ос Родика Стадлер, Пыть-Ях ӯс миркол кӯщай нэ̄, вина тыналан ва̄рмаль урыл о̄с потыртасы̄г. Людмила ТЕТКИНА, Фото прессслужбы губернатора. 1089 2014.12.05. Светлана РОМБАНДЕЕВА Потыр ща̄нь ла̄тыӈ урыл о̄лыс. Яныг таквс э̄тпос 25 хо̄талэ̄т Ханты-Мансийск ӯст технологопедагогический колледжит научнопрактический конференция ва̄рыглавес. Потыр тот ща̄нь ла̄тыӈ урыл о̄лыс. Ты акванхо̄нтхатыглап округ янытыл рӯпитан соссаӈ мир Ассамблея па̄лыл ва̄рыглавес. Ма̄хум са̄всыр ма̄ныл ёхталасыт. Округ янытыл то̄ва па̄влытныл ня̄врамыт ща̄нь ла̄тӈыл ханищтан ма̄хум о̄лсыт Ха̄льӯс район, Белоярский, Советский, Сургутский ос мо̄т ма̄ныл ма̄хум ёхталасыт. Студентыг о̄лнэ ма̄ньлат хо̄тпат ос са̄всыр кӯщаит о̄лсыт. Акв профессор ойка Уигет Эндрю Москва ӯсныл ёхталас, тот тав государственный университетт исторический факультетт ма̄ньлат ма̄хум ханищты. О̄выл ла̄тыӈ депутатыг о̄лнэ ма̄ньщи нэ̄ Татьяна Степановна Гоголева ла̄выс. Тув ёхтум ма̄хум тав янытласанэ, э̄лы ма̄ныл ёхтум хо̄тпатн са̄в ёмас сымыӈ ла̄тыӈ ла̄выс. Тувыл о̄с депутатыг о̄лнэ ханты хум, Еремей Данилович Айпин, потыртас. Тав ла̄выс: «Ма̄н пе̄с йис о̄лупсав, пе̄с порат о̄лум ва̄рмалянув, ща̄нь ла̄тӈанув та маныр, пуссын но̄хво̄рмалтаӈкве э̄ри. Ла̄тӈув о̄луӈкв паты те, ма̄н са̄в э̄рнэ тэ̄ла ва̄руӈкве ве̄рме̄в тах. Ка̄сыӈ хо̄тпа такви о̄лнэ ма̄тэ янытлытэ, ӯлылытэ, ам о̄с ма̄н пе̄с йис ма̄в сака э̄руптылум. Ма̄н, округ Думат рӯпитан ма̄хум, са̄в э̄рнэ тэ̄ла ва̄рсӯв, са̄в э̄рнэ са̄ккон хассув. То̄ва тэ̄лат э̄лаль молях ат лакве̄гыт, ма̄н ул кос тахнувув, ань та̄н тэ̄лаг молях вос е̄мтэ̄гыт. Тамле тэ̄лат палт сака са̄в ё̄р пинуӈкве э̄ри, мо̄т ма̄хум ёт са̄в рӯпитаӈкве э̄ри. Я̄тил ма̄хум, матъёмас тыг ёхтысы̄н, тыхо̄тал пуссын аквъёт рӯпитэ̄в, ла̄тӈанув тэ̄лаг вос е̄мтэ̄гыт». Образование Департамент кӯщай ва̄ӈын нэ̄ Лилия Владимировна Максимова, Ханты-Мансийск ӯст о̄лнэ технологопедагогический колледж кӯщай нэ̄ Ольга Афанасьевна Бывалина, Ханты-Мансийск ӯст о̄лнэ соссаӈ мир институт кӯщай нэ̄ Диана Васильевна Герасимова о̄с мо̄т са̄в ма̄хум потыртасыт, докладыт ловиньтасыт. Лилия Максимова ла̄выс: «Округув янытыл 6 со̄тыра арыгтем соссаӈ ня̄врам ханищтахты, 29 школатыт ща̄нь ла̄тыӈ ос соссаӈ мир культура 1 со̄тыра16 са̄вит ня̄врам ханищты. Ня̄врамыт таима̄гыс ла̄тыӈ ханищтаӈкве ат таӈхе̄гыт, та̄н ань ща̄няныла̄щаныл ат ка̄саще̄гыт. Та̄н ла̄ве̄гыт, манрыг таве ханищтаӈкве, щёровн моще̄рт хотталь со̄йми». Ольга Бывалина ла̄выс: «Колледжит ань 320 соссаӈ хо̄тпа ханищтахты. Та̄н са̄всыр рӯпатан ханищтахтэ̄гыт. А̄гит янгыщ о̄выл классытт ня̄врам ханищтан хо̄тпаг ос садикт рӯпитан воспитателиг ханищтахтэ̄гыт. Ма̄н са̄лы ӯрнэ ос хӯл алыщлан рӯпатан ханищтан урокыт ва̄руӈкве номылмата̄лсӯв, ос тот ханищтахтуӈкве нэ̄мхотьют ат ка̄сащас. Тувыл ты номтув та хӯлислӯв. Соссаӈ ня̄врамытныл 7 хо̄тпа сака ёмащакв ханищтахтэ̄гыт, 125 хо̄тпа о̄с мӯсхал щирыл ханищтахтэ̄гыт, ёмас оценкат о̄ньще̄гыт. Ка̄сыӈ студент та̄л палыт нё̄тмил олныл ойтаве. Ма̄н туп э̄рнэ нэ̄пакыт ос словарит ат о̄ньще̄в». Сургутский районныл са̄лы ӯрнэ ханты хум ёхталас, Иосиф Иванович Сопочин. Тамле яныг конференциятын тав ва̄тихал во̄виньта̄лаве. Ка̄сыӈъе̄мт тав во̄р тэ̄ланыл, о̄лупсаныл урыл потырты. Ань хум ла̄тыӈ о̄с ла̄выс: «Ам хус та̄л ювле хультум па̄сыл депутатыт ёт рӯпитаӈкве патсум. Ма̄н, во̄рт о̄лнэ ма̄хум, кӯщаитн сака ат нё̄таве̄в. Та̄н та̄нти ма̄гсыланыл рӯпитэ̄гыт, ще̄паныл олныл тохрим ат а̄стэ̄гыт. Ня̄враманыл янмалтэ̄гыт, ма̄н йис та̄гыл о̄лнэ ма̄нанувт о̄лнэ колыт ос дачат ӯнттэ̄гыт. Са̄лыт ня̄влалэ̄гыт, во̄руй пилуптэ̄гыт. Ма̄нав о̄с пилата̄лым о̄ньщияныл. Кит колта̄глыг о̄лнэ ма̄т ма̄во̄й хо̄нтвес. Нефтяникыт ань тот ма̄ хилуӈкве таӈхе̄гыт. Я̄тил ма̄хум, таяныт ёмас ва̄ре̄н, ма̄навн нё̄тэ̄н. Ма̄н моще̄ртн витыг ты тотаве̄в. Ма̄нти ма̄н нэ̄матыр ва̄руӈкве ат ве̄рме̄в, ма̄нтина̄нанув вуянтаӈкве ат ве̄рме̄в. Та̄нанылн э̄рнэ нэ̄пакытт хасхатэ̄в те, та юипа̄лт ма̄н хотталь та со̄йме̄в, ма̄в ос но̄хо̄хтыртаве. Ма̄навн нё̄тнэ хо̄тпан такос свонитэ̄гум, турпка ат выгтэ. Тох та савалэ̄в». Уигет Эндрю, Американыл о̄лнэ хум, тох ты потыртас: «Ка̄сыӈ ма̄т соссаӈ мирыт пуссын аквхурип та̄рвит о̄ньще̄гыт. Ам ань то̄ва мирыт урыл мощ потыртэ̄гум. Мексикат 10 миллион соссаӈ хо̄тпа о̄лы, тот о̄лнэ мирныл ты 10% са̄вит. О̄лнэ ма̄нанылт та̄н 70 арыгтем университет о̄ньще̄гыт. Ща̄нь ла̄тӈаныл ханищтан ма̄гыс са̄всыр программат хансэ̄гыт. Ла̄тыӈ ханищтан учителит ма̄гыс о̄с са̄всыр я̄нас программат о̄ньще̄гыт, сыресыр курсыт ва̄рыглэ̄гыт. Новая Зеландия ма̄т маури нампа соссаӈ мир о̄лы, тот о̄лнэ мирныл 15% са̄вит. Та̄н о̄с институтыт о̄ньще̄гыт, та̄нти ла̄тӈаныл ханищтан ма̄гыс та̄нанылн ро̄внэ программат о̄с та̄нти хансэ̄гыт. Австралият 700 со̄тыра соссаӈ хо̄тпа о̄лы. Ка̄сыӈ та̄л 4 со̄тыра ма̄ньлат хо̄тпа ханищтахтуӈкве о̄вылтахта̄лэ̄гыт. Ос туп 300 са̄виттем хо̄тпа ханищтахтан коланыл а̄стлыяныл. Яныг ӯст о̄луӈкве та̄нанылн та̄рвитыӈ, таима̄гыс то̄ват ханищтахтуӈкве та по̄йтэ̄гыт. Канадат эскимосыт ос индейцыт о̄лэ̄гыт. Ка̄сыӈ община такви колледж о̄ньщи, ня̄враманыл та̄н та̄нти ханищтыяныл, пе̄с йис о̄лупсаныл урыл та̄нанылн потыртэ̄гыт. Пуссын аквъёт тот 20 колледж рӯпиты, кӯщаиг ос учителиг та̄нти соссаӈ ма̄хманыл рӯпитэ̄гыт. 1976 та̄лт индейцыт университет ӯнттысыт, тот ань 800 хо̄тпа ханищтахты. Мощ ётылнуве ос институт Права ӯнттысыт. Аляскат ма̄т (США) 5 миллион хо̄тпа о̄лы, 25% са̄вит хо̄тпаныл юн та̄нти ла̄тӈанылт ат потыртэ̄гыт. О̄лнэ ма̄нанылт колледжит ӯнттысыт. То̄ва ня̄враманыл Гарвардский университетт ханищтахтэ̄гыт, тув са̄в олн ойтуӈкве э̄ри. Ня̄врамыт индейский общинат па̄лыл нё̄тавет. Тамле общинат а̄ти кос щёлыӈыт, ос ня̄враманыл ханищтан ма̄гыс олн та̄н та̄стлэ̄гыт. Тот о̄лнэ ня̄врамыт то̄ваныл ща̄нь ла̄тыӈ ат ва̄гыт, ёрувласаныл. Ос хунь ща̄няныла̄щаныл палт ёхталэ̄гыт, ща̄гтэ̄гыт, та̄нтина̄наныл индейцыг ловиньтыяныл». Э̄лы хо̄н ма̄ныл ёхталам хумиюв тох та потыртас. Потыртаме сыс тав ищхӣпыӈ ут хосыт та ма̄хманэ пуссын суссылтасанэ, потре сака пӯмщиг о̄лыс. Тувыл ма̄хманувн маттем та китыглавес. Юио̄выл ла̄тӈе тамле о̄лыс: «Ща̄нь ла̄тыӈ ханищтан урыл ма̄н са̄в потыртаӈкве ве̄рме̄в, ос юн ат те потыртэ̄в, ня̄врамыт ла̄тыӈ ат те хӯлэ̄гыт, нэ̄мхотьютаныл потыртаӈкве ат ханьщувлы». Ты конференциян ёхталам ма̄хум пуссын ка̄сащасыт, ань тамле хо̄нтхатыглап ва̄тихал ва̄рыглаӈкве э̄ри. Ла̄тыӈ о̄лы те, ма̄ янытыл суйты те, мире о̄лы, хӯлы. 1089 2014.12.05. Светлана РОМБАНДЕЕВА Ханищтахтан ма̄ньлат а̄гииг. Ты хурит Ханты-Мансийск ӯст о̄лнэ технологопедагогический колледжит ханищтахтан ма̄ньлат а̄гииг по̄слым о̄лэ̄г во̄ртыпал нупыл Ирина Сергеевна Плешкова ос ёмаспал нупыл Мария Ивановна Головкина ӯнлэ̄г. Колледжит тэ̄н ма̄ньщи ла̄тыӈ ханищтэ̄г. Ам та ханищтахтан колн щалтсамум порат, Альбина Романовна Станиславец ёт потрамасум, тав ма̄ньлат ма̄хум ма̄ньщи ла̄тӈыл потыртаӈкве ханищтыянэ. То̄нт ам ты кит а̄гииг ёт потыртасум, сас хӯрмит курсыт ханищтахтэ̄г. Китыгласагум, хотыл о̄лэ̄г, хумус ханищтахтэ̄г. На̄н ань Ирина потре ловиньтэлы̄н: – Ам тыт, Ханты-Мансийск ӯст, самын патсум, яныгмасум. Омам наме Евгения, а̄ги о̄парищ наме Щербицкая. Тав ла̄ви, ма̄н ащо̄йкав ос ане̄квав ма̄ньщи ман ханты хо̄тпаг о̄лсыг. Э̄лнаӈ ань май паспортанылт национальность хасвес, ос хунь тот хансым о̄лыс ма̄ньщи ман ханты, ты щар нё̄тталыг о̄лыс. Таима̄гыс ма̄хманув пуссын рущиг хасве̄сыт, тувыл э̄лаль акваг рущиг та патсыт. А̄тям наме Сергей, тав Сибирский па̄вылныл о̄лы. Акв йигрищ о̄ньще̄гум. Тыт ханищтахтуӈкве а̄нумн сака мӯсты. Ань хӯрмит курсыт ханищтахтэ̄гум, о̄выл классыт ханищтан учителиг рӯпитаӈкве патэ̄гум. Ма̄ньщи ла̄тыӈ ты та̄л ущты ханищтаӈкве патсӯв. Ам сусте̄мт, ла̄тыӈ сака та̄рвитыӈ, щар нэ̄матыр ат торгамтэ̄гум, потыртаӈкве иӈ ат ве̄рме̄гум. Ам номсэ̄гум, ма̄ньщи ла̄тыӈ пӯмыщ ла̄тыӈ, ла̄щалла̄щал тах ва̄ӈкве патылум. Китыт а̄гиюв ос Мария, тав Ягрим па̄вылныл ёхтыс. А̄не̄кватэ ма̄ньщи э̄ква. Мария ще̄мьянылт щар яныг, кит йигрищ ос акв а̄пщи о̄ньщи. Тыт тав ща̄гтым ханищтахты, общежитият о̄лы. Тамле ма̄ньлат а̄гиквег ёт та потрамасум. Пуста̄гыл вос о̄лэ̄г, То̄рум ёт, О̄тыр ёт. 1089 2014.12.05. Валентина УЗЕЛЬ Армиян винэ пыгыт урыл. Ювле хультум э̄тпос 8 хо̄талныл та̄л оигпанэ̄тэ мус округув янытыл 18 та̄ланыл то̄влум пыгыт армиян вивет. Кӯщаит ла̄ве̄гыт, ань тыхо̄тал мус са̄в хо̄тпа армият лусытаӈкв ат ка̄саще̄гыт, са̄в хо̄тпа хотты ма̄т хоттӯйтхатасыт, призывной ма̄н ат ёхталэ̄гыт. Ань ты ва̄рмаль та̄рапаттын ма̄гсыл ма̄н, Ханты-Мансийск ӯст о̄лнэ ля̄ххал тотнэ ма̄хум, Пыть-Ях ӯсн тотыглавесӯв. Тот ӯс ляпат рущ ла̄тыӈ щирыл «сборный пункт» о̄лы. Ӯсныл тув мус атхуйплов ве̄рыста минуӈкв э̄ри. Тув ёхтумув порат ма̄н ётув «Комитет солдатских матерей» кӯщай нэ̄ Ирина Филипповна Браун потыртас. Тав ла̄выс, тӯяг ос таквсы пыгыт армиян винэ порат тав акваг тув ёхталы, пыгыт ёт потырты. Та̄н ща̄няныла̄щаныл тув о̄с ёхталэ̄гыт, ка̄сыӈ хо̄тал э̄типа̄лаг акв щё̄с та̄н ня̄враманыл ёт тот о̄луӈкв ве̄рме̄гыт. Ань ты мус округув янытыл туп 440 ня̄врам армиян вуйве̄сыт. Ты э̄тпос оигпанэ̄тэ мус иӈ 1 со̄тыра 700 пыг виӈкв э̄ри. О̄выл пыгыт пуссын Восточный военный округ Хабаровск ӯс нупыл тотве̄сыт, та палыт ма̄т лусытаӈкв та патэ̄гыт. Ма̄н тот о̄лмув порат пыгыт Елань нампа военный частин тотве̄сыт. Та юипа̄лт Ульяновский частин те̄тве̄сыт. Ты армиян винэ ма̄т призывникыт хӯрумнила хо̄тал о̄лэ̄гыт. О̄выл хо̄талт та̄н та̄ра ле̄ккарытн ёмащакв сунсавет, хо̄псыяныл по̄славет. Та юипа̄лт та̄н психологле̄ккарн сунсавет, рущит ла̄внэ̄ныл щирыл «психологический портрет» ва̄раве. Пыг о̄лупсатэ̄т манхурипа, ищхипыӈ ут хосыт ты ва̄рмаль та̄рапаттаве. Та юипа̄лт комиссия ма̄хум ла̄ве̄гыт, хоты войскыт пыг лусытаӈкв ве̄рми. Пыть-Ях ӯст, пыгыт армиян винэ ма̄т, яныг кӯщаиг Сергей Борисович Коваленко яныг кӯщаиг о̄лы. Тав ты ма̄навн пуссын потыртас. Журналист ма̄хум ёт хо̄нтхатыглан ма̄гыс тав ётэ казак хум ёхталас – Артём Николаевич Еремеев. Ма̄н округувт «Обь-Иртышское казачье общество» о̄лы, та̄н округ янытыл рӯпитэ̄гыт. Артём Еремеев Сургут ӯст о̄лнэ казакыт халт кӯщаиг о̄лы. Та̄н ты та̄л ущты призывной ма̄т рӯпитаӈкв патсыт. Ты хум ла̄выс, мо̄лты та̄л са̄в офицер ос прапорщик хо̄тпа по̄хан те̄тве̄сыт. Ань пыгыт армиян винэ порат военный хо̄тпа ат то̄вылхаты. Таима̄гыс ты казакма̄хум тув нё̄туӈкв во̄вве̄сыт. Полковник хум Сергей Коваленко ла̄выс, казакыт та̄нанылн сака ёмащакв нё̄тэ̄гыт. Та̄н пыгыт ёт а̄лпыл зарядка ва̄ре̄гыт, рат щирыл ёмащакв ё̄муӈкв ханищтыяныл. Армият хумус лусытаӈкв э̄ри, та̄н ётаныл ты урыл потыртэ̄гыт Э̄лаль ты кӯщай ла̄выс, ань армиян винэ пыгыт пуссын ёмас частит лусытаӈкв таӈхе̄гыт. То̄ват «Президентский полкын» во̄вхатэ̄гыт. Ос 2008 та̄лныт ка̄сыӈ та̄л тӯяг туп атхуйплов хо̄тпа тув виве, «ВДВ» ма̄н налыман хо̄тпа, «специальный назначение» ма̄нва̄т нупыл ат хо̄тпа. Таквсы нэ̄мхотьют тув ат виве. С. Коваленко, полковник о̄йка, ань о̄лнэ та̄рвитыӈ пора урыл тох ла̄выс: «Ань ты йист ка̄сыӈ яныг ос ма̄нь военный частит акваг «боевой готовностит» о̄лэ̄гыт. Кос хоталь пыгыт ань лусытаӈкв вос тотавет, та̄н армиян сака э̄ре̄гыт». 1089 2014.12.05. Тамара МЕРОВА Ёмас номтыл ка̄стылӯв. Яныг таквс э̄тпос ва̄т нупыл нилыт щислатэ̄т Анфиса Михайловна Хромова 80 та̄лэ то̄влыс. О̄лмет э̄ква ма̄ньщи мирув ма̄гыс са̄в ёмас тэ̄ла ва̄рыс. Тав Ханты-Мансийский педучилище ос ётыл Ленинград ӯст (ань Санкт-Петербург) А. И. Герцен нампа институт а̄стламе юипа̄лт са̄в та̄л школат рӯпитас. 1962 та̄лныл 1983 та̄л мус Саранпа̄вылт ос ётыл Кульпас школат рущ ла̄тыӈ ос литература ня̄врамытн ханищтас. О̄йкатэ Владимир Вячеславович Хромов о̄с тот ня̄врамыт ханищтас, тувыл Кульпас па̄выл школат кӯщаиг о̄лыс. Анфиса Михайловна 1984-1987 та̄лытыт РСФСР Министерство просвещения тармыл научноисследовательский институтн рӯпитаӈкве вуйлавес, тот «Ма̄ньщи ла̄тыӈ» ханищтан нэ̄пак хансуӈкве нё̄тыс. Тувыл 1984 та̄лныл 1997 та̄л мус ще̄мьятэ ёт Кульпас па̄вылт о̄лсыт. Тот Анфиса Михайловна соссаӈ а̄гирищит ма̄гыс «Сэ̄рипос» йӣквнэ ос э̄ргын ансамбль ва̄рыглас. Тав акв ма̄т нэ̄мхуньт ат ӯнлантас. Ня̄врамыт ёт рӯпитаме коныпал Тюменский область депутатыг пе̄рия̄лвес, ос Кульпас па̄влыӈ нэ̄ хо̄тпат Советанылт пуӈктотыс. Тав номтэ̄т тот 1990 та̄лт «Найотыр маа» музей ӯнттуӈкве патвес. Музей ань тыг мус рӯпиты, тот ма̄ньщи пе̄с коланув ӯнттуве̄сыт. Са̄в ма̄ныл тув ёхталан мӯй ма̄хум йис о̄лупсал пӯмщалахтэ̄гыт. Та̄гт ма̄хум ка̄сыӈ тув Ӯринэ̄ква ялпыӈ хо̄тал тот янытлэ̄гыт. Финноугорский рӯт мирыт акванатхатыгламаныл порат, Анфиса Михайловна ма̄ньщи пе̄с йис тэ̄лат урыл акваг потыртас. 1997 та̄лт о̄йкатэ̄нтыл Ханты-Мансийск ӯсн ва̄нтлысы̄г, тыт Вася ос Серки пыгаге̄н о̄лэ̄г. Тыт Анфиса Михайловна «Торум маа» музейт рӯпитас. Тув о̄с са̄всыр пормасыт атыс, ма̄ньщи потрыт нэ̄пакн хансыс, хурит по̄слыс. Тэ̄н о̄йкатэ̄нтыл аквъёт са̄всыр нэ̄пакыт та̄ратасы̄г, ма̄ньщи нэ̄пакыт щё̄пита̄лсы̄г. «Лӯима̄ сэ̄рипос» газетавн тав о̄с акваг нё̄тыс, ма̄ньщи хо̄тпанув о̄вылтыт потрыт ке̄тсалыс. Рӯпататэ мӯсхал щирыл ва̄рме ма̄гыс тав ма̄гылт о̄щнэ по̄сыл майлувес ос «Отличник просвещения» намыл янытлавес. Ма̄н таве ёмас посыӈ номтыл ка̄стылӯв. 1089 2014.12.05. Тамара МЕРОВА Ялпыӈ хо̄талт мӯйлысӯв. «Югра лылые̄п» ассоциация ты та̄л 25 та̄лэ то̄влыс. Ты кастыл Ханты-Мансийскат ялпыӈ хо̄тал щё̄пита̄лвес. Ос тув округ янытыл ассоциацият рӯпитан хо̄тпат во̄виньта̄лве̄сыт. Та̄н акваннё̄тхатым, соссаӈ ма̄хум о̄лупсаныл ӯргалым ос э̄лаль тэ̄ланыл ёмащакв ва̄рнэ ма̄гыс пуссын аквъёт рӯпитэ̄гыт. 1989 та̄лт ассоциация рӯпитаӈкве о̄вылтахтаме та̄лт тот Татьяна Гоголева пуӈктотыс. Тувыл тав округ Дума депутатыг пе̄риявес, ань тот рӯпиты. Татьяна Степановна юипа̄лэт Валентин Михайлович Молотков рӯпитас. Тав пенсиян патхатаме порат Тюмень ӯсн ва̄нтлыс. Тот 1996 та̄лт хантыт, ма̄ньщит, ё̄рныт тэ̄ланыл палт акваннё̄тхатнэ «Кедр» нампа кол ва̄рыс. Ань та па̄сыл ӯст Ӯринэ̄ква ялпыӈ хо̄тал акваг янытлэ̄гыт. 2002 та̄лныл ты ва̄рмалит Владимир Климовн э̄лаль тотуӈкве патве̄сыт. Валентин Молотков ань ӯщлахты, тав ӯсн о̄с ёхталас. Тав юипа̄лэ̄т Александр Новьюхов пе̄риявес. Тав ос Людмила Алфёрова, таве̄н нё̄тнэ нэ̄, ань тыг мус соссаӈ ма̄хум тэ̄ланыл аквъёт э̄лаль тотыянэ̄н. Мо̄т ӯсыӈ ос па̄влыӈ ма̄т соссаӈ ма̄хум ёт рӯпитан я̄нас колыт ва̄рве̄сыт. Тувыл ассоциация па̄лыл са̄лы ӯрнэ ма̄хум Союз, ма̄щтыр хо̄тпат Союз, ма̄ньлат ма̄хум организация рӯпитаӈкве патсыт. Ты ма̄хум пуссын мӯйлуӈкве ёхталасыт ос ёмас рӯпатаныл ма̄гыс та̄н ма̄гылт о̄щнэ по̄сыл манос э̄сгын нэ̄пакыл майве̄сыт. Ульяна Данило «Притоки великой Оби» та̄ратам йильпи нэ̄паке урыл потыртас. Тот ханты хо̄тпат хансум потраныл ос стиханыл Ульянан акванатве̄сыт ос нэ̄пакыг ва̄рве̄сыт. 1089 2014.12.05. Николай МЕРОВ Пе̄с йис о̄лупса ханищтан ма̄хум акванатхатыгласыт. Яныг таквс э̄тпост йис о̄лупса ос о̄лнэхӯлнэ накыт э̄лаль тотнэ ва̄рмаль щирыл Ханты-Мансийск ӯст китыт мирхал Конгресс ва̄рыглавес. Ты ва̄рмальн Россия янытыл ос мо̄т хо̄н ма̄ныл са̄в мир ёхталас. Ма̄хум хӯрум хо̄тал са̄всыр секциян ла̄кквауртхатым рӯпитасыт, та̄нки пе̄с йис ва̄рмаляныл урыл докладыт ловиньтасыт. На̄н ты урыл э̄лаль ловиньтэ̄н. О̄выл тамле Конгресс 2011 та̄лт Ханты-Мансийск ӯст о̄лыс. Ты ва̄рмаль «ЮНЕСКО» нампа мирхал организация па̄лыл Россият рӯпитан комиссия, округ культура Департамент ос ремёсла Центр колт рӯпитан ма̄хум та̄н щё̄пита̄лыгласыт. Тот потырта̄лым потрыт та̄н нэ̄пакыг ва̄рсаныл. Ты Конгресс мирн таима̄гыс э̄ри, ма̄хум та̄нки пе̄с йис о̄лупсаныл, о̄лнэхӯлнэ тэ̄ланыл ёмщакв вос ва̄ганыл. Пе̄с ма̄хум о̄ньщум ма̄снутаныл ань мощ мо̄т щирыл ю̄нтуӈкве патве̄сыт. Са̄всыр мирыт маснутаныл ос хансаныл аквантэ̄лыгтаве̄сыт. Ты ва̄рмаль йис пора но̄хво̄рмалтан ма̄гыс ты щё̄питавес. Белоруссия ма̄ныл Ольга Александровна Лобачевская ёхталас. Тав Минск ӯст Государственный университетт о̄лнэхӯлнэ ва̄рмалит щирыл ма̄ньлат хо̄тпат ханищты. Тав искусствоведение наукат кандидатыг о̄лы. Ты нэ̄ белорус ма̄хум о̄ньщиглам хорамыӈ супаныл ос хансаныл суссылтасанэ ос ты урыл потыртас. Акв э̄ква таве̄н ла̄выс, Молдавия ма̄т о̄лнэ ма̄хум пе̄с порат ю̄нтум маснутаныл о̄с аквты хурипат, ты ма̄к та̄н пормасаныл. Маткем ты урыл та потыртасыт. Ётылнув ла̄тӈаныл акванёхтысыт, насати хотты порат ма̄хум ю̄нтум хорамыӈ супаныл аквантэ̄лыгтымат. Тамле тэ̄ла ма̄ янытыл са̄в ма̄т о̄лы. Тувыл о̄с акв нэ̄ Ксения Андреевна Артеева Сургут ӯсныл ёхталас. Тав рӯтанэ Саранпа̄вылт о̄лэ̄гыт. Та̄наныл киснэ ма̄гыс хотты порат тув ялуӈкве таӈхи. Ты нэ̄ 2010 та̄лт Сургут ӯс университетыт журналистыг ханищтахтас. А̄стламе юипа̄лт ос ханты ма̄хум о̄лупса урыл потрыт хансуӈкве патыс. Ты ва̄рмаль щирыл Сургутский районт о̄лнэ йис ма̄н ялыс, ханты ма̄хум ёт са̄лыӈколт матахмат хо̄тал о̄лыс. Та е̄рт о̄лнэ са̄лыӈ хо̄тпат са̄выӈпа̄лэ рущ ла̄тӈыл потыртаӈкве ат ха̄сэ̄гыт. Нэ̄ ла̄выс, о̄выл щёс та̄н ётаныл потыртаӈкве сака та̄рвитыӈ о̄лыс. Тот о̄лыматэ, та̄н о̄лупсаныл мощ ханищтастэ, та юипа̄лт ущ ханты ма̄хум тав нупылэ ёмас самыл сунсуӈкве патсыт. Аквъёт во̄рн тэ̄рпи пум атнэ ма̄гыс ос ӯльпа та̄р яктуӈкве ялантасыт, хӯл алыщлан а̄рпи уральтасыт ос мо̄т са̄всыр рӯпата ва̄рсыт. Ханты хо̄тпат таве̄н йис о̄лупса урыл потыртаӈкве патсыт. Хумус пе̄с порат ма̄хум о̄лсыт, маныр ва̄рсыт. Ань мощ мо̄т щирыл соссаӈ ма̄хум о̄лэ̄гыт, ос ты а̄ти то̄ва о̄лупса тэ̄лат ань ты мус э̄лаль тотавет. Соссаӈ ма̄хум халт о̄луӈкве таве̄н сака мӯстыс. Хантыт во̄рт маныр ва̄ре̄гыт, Ксения Андреевна ты ва̄рмалит пуссын кина по̄слын то̄тапын хансуӈкве патсанэ ос интернетн ва̄рсанэ. Тав по̄слум кинатныл са̄в хащта̄л хо̄тпат пӯмщалахтуӈкве патсыт. Ань нэ̄ «Сургутская трибуна» нампа газетат соссаӈ ма̄хум о̄лупса урыл хансы. Тав потранэ мирн сака ловиньтавет. Таима̄гыс тав ты рӯпата э̄лаль ва̄руӈкве патыстэ. Ксения Андреевна ты Конгрессын ёхталам хо̄тпатн соссаӈ ма̄хум урыл такви по̄слум пӯмащ кинатэ суссылтастэ, ма̄хумн ты кина сака мӯстыс. Юио̄выл хо̄талт мӯй ма̄хум акванатхатыгласыт. Ка̄сыӈ секцият рӯпитам хо̄тпат та̄нки ва̄рмаляныл урыл потыртасыт. Сапра̄ни оигпаме юипа̄лт та̄н хуньт тах о̄с акванатхатуӈкве потыртахтасыт. 1089 2014.12.05. Тамара МЕРОВА Нэ̄квег акв ма̄т ат ӯнлантэ̄г. Югорск ӯст о̄лнэ ма̄ньщи нэ̄ Дарья Белова мо̄лалнув Ханты-Мансийскан ёхталаме порат кит потрыг ма̄навн тотыс. Ам тэ̄натэ̄н ма̄ньщи ла̄тӈыг толмащласа̄гум, на̄н ань ты потрыг ловиньтэ̄н. Лӯпта э̄тпост Дарья Ивановна Белова ос Нина Георгиевна Рукова Ямал ма̄н ялсы̄г. Тот Шурышкарский районт Ханты-Мужи па̄вылт «Земля мастеровая-2014» нампа фестиваль ва̄рыглавес. Тэ̄н тув во̄виньта̄лвесы̄г. Тот мо̄т мӯй хо̄тпат ёт «Кедровый остров» ня̄врам ӯщлахтан колн тотыглаве̄сыт. Тав «Живун» нампа паркмузейт сыстам, нё̄тнэ ма̄т ӯнттым о̄лы. Анна Геннадьевна Брусницына ты музейт кӯщаиг рӯпиты. Тот о̄лнэ хантыт коланыл пе̄с щирыл ӯнттуве̄сыт ос са̄всыр пе̄с пормасыт тув акванатве̄сыт. Ня̄врамыт тот ӯщлахтынэ̄ныл сыс соссаӈ ма̄хум са̄всыр пе̄с йис ва̄рмалянылн ханищтавет. Ётыл та̄н ты накыт ул вос ёрувлыяныл, яныг хо̄тпатн касылыл ва̄равет. А̄гирищитпыгрищит та̄рапаттым са̄всыр тэ̄лат урыл та̄нки э̄лаль потыртэ̄гыт. Ос пе̄с ва̄рмалит ёмщакв ва̄нэ ня̄врамаквет мӯйлупсал мивет. Ща̄ньа̄щаныл тув мощщан мӯйлуӈкве о̄с во̄виньта̄лавет. Та̄н о̄с матыра̄ти пӯмщалаӈкве тот ве̄рме̄гыт. Ты та̄л ня̄врамыт ма̄ньщи ма̄хум пе̄с ва̄рмалит урыл матыр ва̄ӈкве патсыт. Дарья Ивановна ос Нина Георгиевна та̄нанылн ма̄ньщи хансат урыл потыртасы̄г, нуйил, хӯл совныл пормасыт ю̄нтуӈкве ос турло̄псыт, пальсакыт сакныл хартуӈкве ханищтаве̄сыт. Пе̄с йис мо̄йтыт хӯнтлысыт. Нэ̄квег тэ̄нки мо̄т хо̄тпат ёт ва̄йхатуӈкве патсы̄г. Тэ̄н Ольга Григорьевна Самсонова (Бадагова) ёт румалахтасы̄г. Тав, насати, ма̄ньщи нэ̄. Ты паркмузейт тав о̄выл кӯщаиг о̄лум. Ольга Григорьевна 1951 та̄л я̄ӈк на̄тнэ э̄тпос хо̄тыт хо̄талт Ня̄хщамво̄ль па̄вылт самын патыс. Ща̄не Софья Васильевна о̄лыс, а̄ще Григорий Григорьевич. Нэ̄ Ня̄хщамво̄льт школа а̄стламе юипа̄лт культпросвет училищан Салехард ӯсн минас. Ос таве а̄стламе юипа̄лт о̄влэ̄т Красноселькупский район Сидоровка па̄вылт о̄лнэ клубн рӯпитаӈкве ке̄твес, ётыл Шурышкарский район Восяхово па̄вылт рӯпитас. 1973 та̄лт Мужи па̄выл районный клубт рӯпитаӈкве патыс. Тот э̄ргынйӣквнэ кружокыт ва̄рыглас, сырсыр сценкат щё̄пита̄лыс. Ос тувыл са̄всыр па̄влыӈ ма̄н агитбригада ёт яласас. Ты ка̄ркам, номтыӈ нэ̄ Мужи па̄вылт 1999 та̄лт музей ва̄рыс ос тот кӯщаиг паттувес. Тав ма̄хум ёт рӯпитаӈкве сака ёмщакв ха̄сы, тав палтэ акваг са̄в ма̄хум ёхтала̄лэ̄гыт. Ольга Григорьевна Новосибирск ӯс учёныит ёт, Литва, Латвия ос Эстония ма̄ныл о̄лнэ этнографыт ёт ва̄йхаты. Та̄н ма̄гсыланыл этнографический экспедицият щё̄пита̄лыглы. Ты коныпал профсоюзный комитетыт рӯпитас. Тот культура тармыл рӯпитан хо̄тпат тэ̄ланыл ёмащакв ва̄руӈкве акваг нё̄тыс. «Ямалпотомкам» нампа ассоциацият соссаӈ ма̄хум акванатхатнэ̄ныл порат та̄н ма̄гсыланыл ханищтапыт ва̄рыглы. Ёмащакв рӯпитанэ̄тэ ма̄гыс Ольга Самсонова «Ветеран Ямала» нам о̄ньщи, Ямал губернатор па̄лыл ос «Знание» нампа Всероссийский общество па̄лыл янытлан нэ̄пакыл мӯйлуптавес. Нэ̄ ань пенсиян патхатас. Тав кит а̄ги ос пыг о̄ньщи, апганэ янмалтаӈкве нё̄ты. Ос тувыл Илья каӈке ня̄врамыг, Татьяна ос Петя, янмалтасаге. Пётр армият лусытас ос БАМт рӯпитас, тав таима̄гыс правительственный наградал майвес. Ольга Григорьевна ма̄нь пора та̄ланэ ва̄тихал номылматыгла̄лыянэ. Та̄н а̄щаныл ёт во̄раим, хӯл алыщлым пуссын яласасыт, пил ва̄тсыт. Ня̄врамыт ма̄вит ӯргалаӈкве ос яныгпа̄ла хо̄тпат янытлаӈкве ханищтаве̄сыт. Школат о̄выл ханищтан нэ̄тэ Прасковья Гавриловна Ануфриева ёмас номтыл номылматыглытэ, тувыл школат ос интернатт рӯпитан хо̄тпат, тыи Г. А. Артеева, М. М. Подосенина, Н. Е ос Т. Ф. Собяниныг ос Ня̄хщамво̄льт ань о̄лнэ матумпа̄лаг е̄мтум ма̄хум пуссын номиянэ. Та̄нанылн тав паща ла̄тыӈ ке̄ты. Ма̄н ос тамле ёмас сымыӈ хо̄тпа урыл хӯнтамласӯв, ма̄навн тыи о̄с ёмас. Мо̄т ва̄рмаль урыл Дарья Белова тох потыртас. Югорск ӯст о̄лнэ музей 15 та̄лэ то̄влыс. Тот история ос этнография суссылтапыг ма̄хумн щё̄питавесы̄г. А̄ти сака хосат ты колт II мирхал театральный фестиваль ва̄рыглавес. Тот ӯст о̄лнэ са̄всыр мирыт акванатхатыгласыт ос та̄нки маснутыл масхатым мӯй ма̄хум ӯрсаныл. Наталья Николаевна Нестерова, культура тармыл кӯщаиг о̄лнэ нэ̄, ма̄хум ёт пащалахтас. Ос ётыл башкирыт ос хатанит «Тупыр» нампа театр, рущ ос соссаӈ ма̄хум та̄нки э̄рганыл, йӣкваныл суссылтасаныл. Музейт рӯпитан хо̄тпат суссылтапыт о̄вылтыт потыртасыт. Ты театральный фестиваль сака пӯмщиг о̄лыс. Ма̄хум пуссын ща̄гтым, ёмас номтыл ла̄кквамингаласыт. Дарья Белова потраге ма̄ньщи ла̄тӈыг Тамара МЕРОВАн толмащлавесы̄г. 1089 2014.12.05. Тамара МЕРОВА Яныг о̄йка ма̄н о̄с янытлылӯв. Геннадий Степанович Райшев яныг таквс э̄тпос о̄выл хо̄талэ̄т 80 та̄лэ то̄влыс ос тувыл тав хурит по̄слынэ̄тэ па̄сыл 50 та̄лыг ты е̄мтыс. Тав намхо̄талэ кастыл округувт са̄всыр суссылтапыт ва̄рыглавет. Акв яныг суссылтап тав рӯпитан колэ̄т щё̄питавес. Тот «Пространство и время» намаим са̄в та̄л сыс по̄слум хуриянэ акванатве̄сыт. Хурит ла̄кквауртве̄сыт ос ка̄сыӈ пора такви я̄нас намыл пинвес, тыи «Детство», «Зрелость», «Мудрость» ос «Музыка». Тувыл мо̄лты та̄л сыс по̄слум «Э̄лумхо̄лас. Ма̄. То̄рум» нампа хуриянэ я̄нас суссылтапыг ва̄рве̄сыт. Геннадий Степанович Ханты-Мансийск (пе̄с щирыл Самарово) ляпат Сивохрап ӯнлум па̄вылт самын патыс. Ты па̄вылкве А̄с я̄н патнэ Салым я̄ ва̄тат ӯнлыс. А̄ще Степан Миронович Райшев ханты хумыг о̄лыс, ос оматэ Евгения Фёдоровна Конева рущ нэ̄г о̄лыс. Ты лӯи ма̄вт кит мирыг хосат та̄гыл акв ляпат о̄лсы̄г. Ань таима̄гыс Геннадий Степанович ла̄выс: «На̄н то̄ва по̄слум хуриянум суснэ̄н порат, рущит манос хантыт палт о̄лум пе̄с пищит хо̄нтэгы̄н тах. Тот хӯрум лувыт акв сунын ке̄рим хурит манос са̄лыл яласан хо̄тпат ка̄салэгы̄н. Тыи ам ща̄нягума̄щагум пе̄с о̄лум ва̄рмале̄н, ос тыт о̄лнэ о̄лупсав хӯлтуӈкве таӈхилум». Тувыл «Югра» телерадиокомпаният рӯпитан хум Ринат Халиуллин «Ассиметричный Райшев» нампа кина по̄слыс. Ань конференциян ёхталам хо̄тпатн суссылтавес. Тот Геннадий Степанович самын патум ма̄тэ по̄слым о̄лы, тав тув акитэ палт мӯйлуӈкве ялыс. Ос хара ма̄т ё̄мыгтым, я̄ ва̄тат ӯнлантым сыс такви номтанэ ла̄выс. Тувыл хумус тамле номтыт нэ̄пак тармыл хурииг тэ̄лэ̄гыт, таи мощ потыртас. Акв э̄типа̄лаг ӯст о̄лнэ ос мӯй ма̄хум «Югра-Классик» колн во̄виньта̄лве̄сыт. Тот о̄йка намхо̄талэ̄т янытлавес ос «Небом посланная жизнь» ёнгилыл ва̄рвес. Ханты-Мансийск ӯст о̄лнэ хо̄тпат ос мӯй ма̄хум Геннадий Райшев галереямастерской колэ̄т йильпииг ос хосат по̄слум хуриянэ сунсуӈкве вос ёхтала̄лэ̄гыт. Тот сака пӯмыщ. Ма̄н ты яныгпа̄ла о̄йка о̄с янытлылӯв, са̄в та̄л пуста̄гыл о̄луӈкве ла̄вилӯв, То̄рум ёт, О̄тыр ёт вос о̄лы! 1089 2014.12.05. Анна АЛГАДЬЕВА Ка̄пъя о̄йка мо̄йт. Ка̄пъя э̄кваго̄йкаг о̄ньщасыг хӯрум пыг. Яныг пыге̄н нэ̄ӈ, ня̄врамыӈ о̄лыс. Кит пыгаге нэ̄ ат о̄ньщасы̄г. Хоса ман ва̄ти о̄лсыт, Нё̄рт яласасыт. Э̄кватэ а̄тимыг е̄мтыс, ань вуньщалыг та минас. Арыгтас хӯрум пыге ёт ос мане. Та о̄лсыт, та о̄лсыт. Яа, маныр ва̄руӈкв. Тувыл ань Ка̄пъя о̄йк ань Я̄ӈкыӈ ща̄рыщ ва̄тан юрт тотуӈкв та минас. Таӈкыр хаслы хӯрум хо̄пт ке̄рыс, та минас. Хоса ман ва̄ти яласас, ёхтыс, хӯрум пыганэ о̄ньгыл тотсанэ. Минаме порат, ань нэ̄тэ Я̄ӈкыӈ ща̄рыщ ва̄та хӯрум апщитэ̄н ла̄выс: – Тах ты миннэм хӯрмит тув на̄н ёхтэ̄н тув, ань Ка̄пъя о̄йка па̄лт. Са̄лыт тыгле тотъянув. Хоса ман ва̄ти о̄лсыт. Та о̄лэ̄гыт. Та хурип ёмас кӯтюв о̄ньщасыт, са̄лы кӯтюв. Со̄тыр са̄лы палт ке̄тъяныл, акв щёс мӯвылматы, юв ёхты. Ёмас ке, лэ̄г хосги. Ос ат ке а̄ртми: хотты сурты, хотты па̄сыг кональ ке мины та щӣньги. Китыглаве, нас щӣньги. Ань о̄ньганыл ёхтуме хӯрмит тӯя, та хурип ёмас са̄лы кӯтьваныл ань са̄лыяныл палт ке̄тсаныл. Ань Ка̄пъя о̄йк тав ке̄тытэ. Са̄лы кӯтюв миннэ э̄лыпа̄лт, са̄лыт палт иӈыт мины. Пыганэ нупыл ла̄ви: – Ялэ̄н сар, ман тыкем сун, тыкем ва̄рмаль, тыкем то̄с йӣв, тыкем са̄йт йӣв тотэ̄н. Пыганэ минасыт. Кӯтюве ялыс, са̄лыянэ палт ёхтыс. Ята: – Пӯняквепӯня, Со̄тыр са̄лы пӯӈ ло̄мтме̄н, Ма̄сйӣв та̄лыӈ тыныӈ лэ̄гын Тыщир хосге̄лн. Ма̄сйӣв та̄лыӈ та̄глыӈ лэ̄гын Тыщир хосге̄лн. Кӯтюве ат хосгитэ, лэ̄ге ат хосги. Номсы, маныр е̄мтыс. –Сӯй пил лӯпта ма̄нь не̄лмыкен ню̄витэ̄лн. Кӯтюве о̄с не̄лме ат ню̄витытэ. – Ята, во̄рин куккук ӯлыӈ туркен вос суйтыглы, лай. Во̄р хулах ӯлыӈ туркен та̄рата̄лэ̄лн. Кӯтюв ат суйтыглы. Ты маныр е̄мтыс? Та о̄лсы̄г, та о̄лсы̄г. Яа, пыганэ сысы ке̄тсанэ. Хоса ман ва̄ти яласасыт. Ха̄ль ва̄тан но̄хёхтэ̄гыт. Яа, сунсэ̄гыт, маныр тот на̄ӈки? Ань Ка̄пъя о̄йка хӯрум пыг пуссын аквъёт но̄ӈхаль минэ̄гыт, сув йӣв та̄глыӈта̄глыӈ суныл. Вущрам хо̄птыл ке̄рхатым, но̄ӈхаль хартавет. Та кос сунсэ̄гыт, ат торгамтыяныл. Яа, маныр е̄мтыс. – А̄мп по̄х щахыл та̄глыӈ ут Ул та ёхтыглыме̄ва. А̄щке̄в аман хо̄т о̄лы? Хоталь миныгламке̄тэ? Ёрнкол ань а̄тим. Сунсэ̄гыт, хӯрум сун ёлаль ты сӯлттэ̄гыт. Та̄н хӯрум а̄пщи ёлаль ань та̄лматасыт. Ща̄нь о̄ньщам, а̄щ о̄ньщам хӯрум пыг та минэ̄гыт. Ха̄ль ва̄т ёлыпа̄лн ёхтысыт. Яныг ягпыганыл сӯлттыме̄тэ па̄лха̄льйӣве по̄ри утыгпас, тув хотрагатас. Тот та ёхтувес, о̄втаӈ па̄лха̄льйӣвыл тот та тотыгпавес. Китыг та сӯлттэ̄г, кит а̄пщи. Акватэ о̄с ань сунэ̄ныл хотрагатас. Пе̄с совъя ва̄ил о̄лэ̄гыт, совъя ва̄й ква̄лге хотнирасаӈкв ёлпо̄йтыгпа̄лас. Тув о̄с та хультыгпас. Хультыгпас, о̄с та ёхтувес. Тот та хультыс. Ма̄нь а̄пщитэ̄н арыгтас. Яа, хоса ман ва̄ти сӯлтты. Юил ты ёхтаве. Сунсы, ты ёхтаве. Ёхтуӈкв патвес, ань а̄хвтас осыл сунэ по̄ри хисатас. Хот рагатас. Та ха̄йты, та ха̄йты. Хоса ман ва̄ти ла̄глыл ха̄йтыс. Аквматэ̄рт сунсы, ты ню̄саве, па̄нт а̄хвтас ёлыпа̄лн та щалтапас, тув ань тӯйтыгпахтас. Тот та хуи. Хоса ман ва̄ти хуяс. Нэ̄матыр суй а̄ти, нэ̄матыр а̄ти. Но̄хква̄лыс, та сунсглахты. Нэ̄мхотьют а̄ти. Яа, маныр ва̄руӈкв. Лай: – А̄щин о̄лум тыныӈ ма̄кем, Хоталь хӯлянтыке̄лум. Со̄тыр са̄лы ма̄нь пӯӈло̄мтум Хоталь ню̄вумтаптувес? Та э̄ргыс, такви уре номсахтас. Та лю̄ляхо̄лас, номсахтас, э̄ргыс. Тувыл та ё̄мантас. Лай: – А̄щум о̄лум ты̄ныӈ колъёр Нас кос ё̄мыгта̄лылум. Тув минас. Яа, хо̄лы ат о̄ньще̄гыт, нэ̄матыр ат о̄ньще̄гыт. Сунсыглахты. Хӯрыгсов ёлпиныме, па̄нт а̄хвтас ёлыпа̄лна. Ня̄нь тот хуи, тыньщаӈ тот хуи. Яа, маныр ва̄руӈкв? Тэ̄нут хо̄нтас. Хоталь минуӈкв? Такви ат ва̄гтэ. Та номсахтас, та номсахтас: «Мо̄т са̄лыӈ колна тув минэ̄гум, сар тув ялэ̄гум. Аман хоса минэ̄гум, аман ва̄ти минэ̄гум, тув ялэ̄гум». Та минас. Тув иӈыт ёхты. Са̄лы а̄ти, нэ̄матыр а̄ти, колъёр о̄с а̄ти. – По̄ри тулсып по̄ри юв Хо̄таль лакванта̄ламын, Сэ̄мыл тулсып сысы мины, По̄ри тулсып по̄ри лакви. Са̄лыт ань по̄ри тотавет, по̄ри ва̄нтлэ̄гыт. Та ё̄мыс, та ё̄мыс. Э̄т ё̄мыс, хо̄тал ё̄мыс. Та ёхтыс, тув ёхтыс. – Яа, маныр ка̄с. Маныр потыр, маныр ва̄рмаль, маныр ла̄тыӈ? Та лю̄ляхо̄лас, лю̄ляхо̄лас. – Со̄тыр са̄лы пӯӈло̄мтув хота̄рмалтаве̄сыт. Ка̄пъя о̄йк хӯрум пыг о̄лсӯв. Арыгтамум аква ам. Маныр ва̄руӈкв? – Наӈ маныр ва̄ре̄гн? – А̄нумн таӈкыр хаслы хӯрум хо̄пт ке̄рен. Са̄кваляк сампа хӯрум хо̄пт юил нэ̄гъянум. Тувыл та майвес. Таӈкыр хаслы хӯрум хо̄птыл та сӯлтты. Лай: – Нё̄рин вальйӣв нумипа̄лныл, Нумылнува ӯсувла̄лэ̄на, Нё̄рин ахвтас нумипа̄лныл Нӯмылнувыл минанта̄лэ̄на. Вущрам хо̄птанэ̄тыл ань ёлыл мины, ма̄ мощщакв нумпа̄лнылнув. Минаме э̄лыпа̄лт ла̄выс: – Ты миннэм са̄тыт хо̄тал таӈкыр хаслы хӯрум хо̄птын юв ёхты. Са̄кваляк сампа хӯрум хо̄птын э̄лаль та минэ̄гыт. Та хо̄птанэ̄тыл та сӯлттас, та сӯлттас. Аман э̄т сӯлттас, хӯрум сӯлттас. Аквмартэ̄т, яа, нумыл миннэ хулах ро̄ӈхувла̄лы: «Хувых». Хулах о̄йк ро̄ӈхувла̄лы. – Ты хо̄тал хӯрмит хо̄тал ань, Ка̄пъя о̄йк са̄лыт во̄р ӯлтта ты уста̄вет тах. Во̄р ӯлтта ты тотавет. Таӈкыр хаслы хо̄птанэ хот та та̄ратасанэ. Солвал сампа хӯрум хо̄птэ, са̄кваляк сампа хӯрум хо̄птанэ̄тыл э̄лаль мины. – Са̄кваляк сампа хӯрум хо̄птум, Солвал сампа хӯрум хо̄птум Ты ке ке̄рантыке̄нум, Ты ке минмыгтэгина. Ха̄йтнэ(га) пув(ы)с нуми па̄лна Но̄халапанталэ̄н(а). Миннэ пувыс тулсып хольтыл На̄н ты лапантыке̄н(а). Тащир та минас. Хоса ман ва̄ти минас. Ос ань та са̄кваляк сампа хӯрум хо̄птэ̄тыл юил та ёхтысанэ. Во̄р ӯлтта унсуӈкв ат ве̄рмысыт. Иӈыт а̄лыме̄гыт. Я̄ӈкыӈ ща̄рыщ ва̄т хӯрум пыг са̄лы по̄сэ̄гыт. Ка̄пъя о̄йк са̄лыт по̄сэ̄гыт. Ща̄няныл тай э̄ргим ӯнлы, хартаве. О̄ньге, тай, лю̄ньщим ӯнлы. Ва̄гтэ, ань па̄нтэ арыгтас. Хоса ман ва̄ти тащир минасыт. Яа, а̄ӈкватас, па̄нтэ ӯнлы. Са̄ртын щё̄питам, ань хо̄лыянэ тахурип та̄к тыньщаӈ щё̄питас а̄лмаян щирыл. Па̄нтэ кисувлас, хо̄лыянэ та ёлпинумтасанэ. Я̄ӈкыӈ ща̄рыщ ва̄т о̄ныпе, лай: – Манрыг ёлпо̄йтыгпа̄ласын наӈ? – Ам тай ква̄лумпал хо̄птум ань ка̄тэ тув пиныс, хотутыгпаслум. Ань ва̄нт сун хо̄птэ. Номсы, аманрыг. – Наӈ тах ты ма̄нь о̄кка, ма̄нь са̄лын тах юв ёхты, лохащлахтуӈкв паты, наӈ ла̄вен: «Ты ань тав ёхтыс». Ва̄гтэ, па̄нтэ тах ёхты. (Мощ хотнув ёрувласлум, э̄лытнув итъямтахтасум. ) Па̄нтэ̄н ла̄ваве: – Наӈ Я̄ӈкыӈ ща̄рыщ ва̄таӈ хӯрум о̄втаӈ пыг , хӯрум ня̄лыӈ пыг осма ёлыпа̄лт пуссын ня̄ланылёвтаныл хотяктэ̄н. Кӯтюв ке хормыгты тах, кон ул ква̄лэн. Ань торгамтастэ. Тувыл аквматэ̄рт, со̄ль. Ва̄гтэ, ань па̄нтэ ты ёхты. – На̄н ос о̄ньганылн ла̄вавен, са̄лыянын палт Ка̄пъя о̄йка пӯӈло̄мт ла̄кква ул вос минэ̄гыт. Ты Нё̄рыӈ ма̄, ты со̄втыӈ ма̄, аняг о̄ньще̄н». Та минасыт. та̄лматасыт. Ня̄ланылё̄втаныл ёт висаныл. Ята, Ка̄пъя о̄йк ма̄нь пыг та ро̄ӈхувла̄лым сӯлтты. Ро̄ӈхувла̄лы, ань юв. Лай: – Са̄кваляк сампа хӯрум хо̄птум Хо̄птанум ве̄рманта̄лэ̄гыт. Миннэ(га) пувыс нумипа̄лныл Ёл та патанта̄мыкем. Ха̄йтнэ(га) пувыс нумипа̄лныл, Ёл та ёхтыгла̄лкема. (Мо̄йтанум ань ёрувлыянум. ) Тащир та ёхтыс. Таяныл ань Ка̄пъя о̄йк пӯӈло̄мтаныл мӯвылтым та сӯлттэ̄гыт ля̄льт. Ля̄льт сӯлттэ̄гыт. Мо̄тан ня̄лэ кос хасмыгты, ня̄лэ хотсаквалы. Китыт кос хасмыгты, та̄нэ хотто̄лматы. Хӯрмит кос хасмыгты, ё̄втэ хотсаквалас. Пуссын тот та порсласанэ. Аман хоса тот ман ва̄ти пуссын тув та ра̄гматасыт. Я̄ӈкыӈ ща̄рыщ ва̄т хӯрум а̄пщитэ. Ё̄рнколн тув ёхтыс. Яа, о̄ньге э̄кв ӯнлы, суйты: – Ка̄пъя о̄йка яныгса̄т, со̄тыр са̄т са̄лы А̄пщике̄нум по̄санта̄лэ̄гыт, Ма̄щтыр ва̄рнут ма̄нь ка̄тке̄гум А̄пщиянум ва̄ранта̄лэ̄гум. Аквматэ̄рт ё̄рнкол ань курсалтаӈкв патвес. Яа, маныр е̄мтыс, китыглахты. – А, тай окка са̄лы юв ёхтыс. Ё̄рнкол а̄ви па̄лыгпӯсвес. Яа, Ка̄пъя о̄йк ма̄нь пыгрищ тот лю̄ли. О̄ньге харни щё̄льщи хурил ва̄рапахтас, та ояс. Са̄кваляк сампа хӯрум хо̄птэ̄тыл та кос минас: но̄хлапсы, ёлпатсы. Юил ат ёхтытэ. Хоса ман ва̄ти ня̄влыстэ, о̄ньге э̄кв сахитэ та вущкасас, ва̄й та вущкасас. Юил ат ёхтыстэ. Хоса ман ва̄ти ня̄влыстэ, тыа̄ти, юв та ё̄ӈхас. Юв ё̄ӈхас, ань о̄ньге палт ёхтыс. Са̄кваляк сампа хӯрум хо̄птэ о̄с э̄лаль тӯщтысанэ. Ка̄пъя о̄йк а̄ще ма̄ло̄мтна, витло̄мтна, ань о̄ньге ювле та тотастэ. Хоса ман ва̄ти минасыг. Та о̄лум ма̄нылн ёхтысыт, о̄ньге ань пыгрищиӈ та̄гыл. Са̄т я̄ӈк тӯщтысы̄г, са̄т хансаӈ тӯщтысы̄г. Юв ёхтысы̄г, йирыг та тӯщтысанэ̄н. – Няӈра турпа тӯрыӈ вот, Во̄т вос ва̄рсанта̄лнувын. Няӈра турпа тӯрыӈ во̄т(а) Во̄т вос хо̄игла̄лнува. Я̄ӈк ща̄рыщ ва̄та ва̄танувл Ул вос ёхтала̄лнувкве. Та щирыл э̄ргыс. Тувыл та йирхатсы̄г. Я̄ӈк са̄т тӯщтысы̄г, са̄т хансаӈ тӯщтысы̄г. О̄ньге̄н э̄кв ат ёхтыс. А̄пщиянэ порславе̄сыт. Тэ̄нки э̄лаль ань та щуне̄г, ань та о̄лэ̄г. Ты мо̄йт а̄нумн Мария Васильевна Тасманова 2004 тал порат мо̄йтыстэ. Мария Васильевна а̄пщитэ̄нтыл о̄лэ̄г. А̄пщитэ наме Алексей Васильевич Тасманов. Тэ̄н Лэ̄пла я̄ талихт пе̄с Миран-Ващка па̄вылт о̄лэ̄г, йильпи кол мо̄лтыт тув ӯнттысы̄г. Но̄т ос щунь тэ̄натэ̄н. Пупганэ̄н-То̄рманэ̄н вос ӯргалаве̄г. Пуста̄гыл вос о̄лэ̄г. 1090 2014.12.19. Людмила Алгадьева Сэ̄лнэ олнанув урыл. Округувт о̄лнэ мир акв ля̄ххал урыл акваг потыртэ̄гыт, йильпи 2015 та̄лныл лӯима̄т рӯпитан ма̄хум «районный коэффициентыг» ла̄внэ олнаныл хотвиӈкв ве̄рмавет. Тамле ва̄рмаль ке ва̄раве, ма̄н тыт рӯпитан хо̄тпат мощща олн сэ̄луӈкве патэ̄в. Ань ма̄н пуссын 1, 7 са̄вит районный коэффициентыл ойтаве̄в, йильпи са̄ккон щирыл 1, 5 са̄витыг ва̄раве. Кондинский районт 1, 3 са̄вит ма̄хум ойтуӈкве патавет. Вячеслав Тетёкин Москва ӯст Государственный Думат депутатыг рӯпиты. Тав тыт ля̄ххал тотнэ хо̄тпат ёт хо̄нтхатыгламе порат ты ва̄рмаль урыл о̄с потыртас. Тав ла̄выс, тамле са̄ккон пирмайтаӈкв щар ат ро̄ви. Москва ӯст рӯпитан кӯщаит та̄нки лӯима̄т ат о̄лсыт, хумус ма̄хум тыт рӯпитэ̄гыт, хумус тыт о̄лэ̄гыт, ат ва̄ганыл. Тыт о̄лнэ мирн тэ̄ӈкве ёмащакв э̄ри, са̄в маснут ёвтуӈкве э̄ри. Ащирмаӈ хо̄талыт порат ма̄хум на̄йпос, ре̄г ма̄гсыл са̄в олн ойтэ̄гыт. О̄йка ла̄выс, ма̄хум мощщанув олныл ойтуӈкве ке патавет, са̄в ще̄мьят мо̄т ма̄н о̄луӈкве минмыгтэ̄гыт. Ань Россия янытыл ма̄хум пуссын ёмащакв о̄лэ̄гыт, са̄в олн сэ̄лэ̄гыт, тыи ма̄гсыл ань лӯима̄т мощща э̄лумхо̄лас рӯпитаӈкве ка̄сащи. Ма̄хум тыт э̄лаль вос рӯпитасыт, та̄н сэ̄лум олнаныл ва̄тихал но̄хнё̄туӈкве э̄ре̄гыт. В. Тетёкин округув янытыл яласас, тыт о̄лнэ ма̄хум ёт хо̄нтхатыглас. Са̄в хо̄тпа таве̄н ла̄всыт, тамле са̄ккон ке пирмайтаве, та̄н мо̄т ма̄н о̄луӈкве минэ̄гыт, тамле та̄рвитыӈ рӯпата ва̄руӈкве тыт воссыг ат патэ̄гыт. Тав ла̄выс, ты са̄кконнэ̄пак пирмайтын э̄лыпа̄лт о̄влэ̄т лӯима̄т о̄лнэ ма̄хум китыглаӈкве э̄рыс. Тамле са̄ккон ул вос пирмайтаве, тав ма̄н округувн хумус ялыс, ма̄хум манхурип номт ты са̄ккон урыл о̄ньще̄гыт, Государственный Думат рӯпитан депутатытн тах потырты. 1090 2014.12.19. Александр ВЬЮТКИН Йильпи та̄л ты ляпами. Ва̄т са̄грапнал э̄тпос ловит хо̄талэ̄т Россия ма̄ янытыл йильпи та̄л тотнэ, ащирма ва̄рнэ я̄ӈк тусыӈ о̄йкат онтоловиттыг Ханты-Мансийск ӯст атхатыгласыт. Касыланыл хӯрум хо̄тал сыс минас. Каснэ ма̄гсыл хо̄тхуйплов ма̄ныл тусыӈ о̄йкат апыг а̄гияныл ёт ёхталасыт. Великий Устюг ӯсныл щар яныг Дед Мороз ёхталас. Тав Россия ма̄ янытыл ма̄к яныг ащирма тотнэ о̄йкаг ла̄ваве. Тав тув пе̄рияме па̄сныл ты та̄л атхуйплов та̄л минас. Ащирма тотнэ о̄йкат янытлан кастыл ӯс котильн са̄в мир ёхталас. Кон ащирмаӈ кос о̄лыс, нэ̄мхотьют ат по̄львес. Акв ма̄т по̄льтахтым нэ̄мхотьют ат лю̄лис. Янгема̄не пуссын йӣквсыт, э̄ргысыт ос ёнгысыт. 1090 2014.12.19. Валентина УЗЕЛЬ Округ кӯщаюв ма̄ньщи ос ханты ла̄тӈыг урыл потыртас. Округув намхо̄талэ̄т ва̄т са̄грапнал саквалан э̄тпос 10 хо̄талэ̄т округ Дума депутатыт акванатхатыгласыт. Та̄н о̄ста са̄в са̄ккон йильпи щирыл хассаныл. О̄влэ̄т та урыл потыртасыт. Та̄н ётаныл рӯпитам о̄йка В. С. Валеев по̄ханте̄тсаныл, тав пе̄нтсылэ ань мо̄т хо̄тпа рӯпитаӈкв паты. Та депутат лю̄ль ва̄рум, тэ̄нут тыналан нэ̄ са̄всыр лю̄ль ла̄тӈыл пиныстэ. Ляпат камера о̄лум, ты ва̄рмаль по̄слыма, ань ты тина ищхӣпыӈ утыт ка̄салаӈкв ро̄ви. Тувыл ма̄хум янытлаве̄сыт, Ханты-Мансийск ӯс кӯщай Василий Филипенко янытлавес, ты ма̄н округ о̄выл кӯщаюв Александр Филипенко тав пыге, тав ма̄гылн тагатан по̄сыл майвес. Тав ётэ 18 хо̄тпа округ Дума па̄лыл Почетный грамота нэ̄пакыл майве̄сыт. Сӯкыр э̄тпосныл ма̄н о̄лнэ коланув ма̄гсыл са̄внув олн ойтуӈкв ла̄ввесӯв, кол ёмащакв щё̄питан ма̄гсыл ты олн ювпуваве. Ань округувт о̄лнэ са̄выӈпа̄лэ ма̄хум ты олн ойтуӈкв ат ка̄саще̄гыт, са̄всыр яныг кӯщаянувн пищма хансэ̄гыт. Тыи ма̄гыс ты ва̄рмаль урыл хансым са̄ккон акваг йильпи щирыл та хансаве. Ань депутатма̄хум тамле ла̄тыӈ тув хассыт – йильпи колн ущты о̄лмыгтам ма̄хум 5 та̄л ты ва̄рмаль ма̄гыс олн ойтуӈкв ат патэ̄гыт. Кол ӯнттын порат олн ойтум ма̄хум, та̄н рущ ла̄тӈыл «дольщикыг» ла̄вавет, та̄н о̄с матахмат та̄л ойтхатуӈкв ат патэ̄гыт. Округувт ты олн атнэ ма̄гыс «Югорский» нампа фонд ва̄рвес. Та̄наныл уральтан ма̄гыс ань комиссия ва̄раве. Ос ка̄сыӈ кол ма̄гыс мирн ойтым олныт я̄нас атуӈкв патавет, акван ат пинавет. Ты хосыт кос хоты колт о̄лнэ хо̄тпа ва̄ӈкв паты, тав о̄лнэ колытныл манах солко̄ви атвес, хумус та̄н холтавет. Округув янытыл манах олн холтаве, ул ка̄сыӈ сапра̄нит депутатыт ты урыл потыртэ̄гыт. Ань та̄лув ты оигпи. Олн ловиньтан департаментыт кӯщай нэ̄ Вера Дюдина та̄нанылн потыртас, онтолов э̄тпос сыс округувт 119 млрд. солко̄ви холтвес, 8 млрд. солко̄ви со̄пасыг хультыс. Та̄л оигпан мус та̄н матыр э̄рнэ ва̄рмаль ма̄гыс тах холтавет. Депутатыт рӯпитаманыл халт округ кӯщай нэ̄ Наталья Комарова ты сапра̄нин ёхталас. Тав мощ хӯнтлыс, са̄ккон хаснэ ма̄хум маныр урыл потыртэ̄гыт. Тувыл та̄наныл округ намхо̄талэ кастыл янытласанэ ос ты урыл потыртас. Ты 2014 та̄л сыс депутат ма̄хум 114 са̄всыр са̄ккон пирмайтасыт. Та̄н округ миркол кӯщаит ёт халанылт нё̄тхатым ёмащакв рӯпитасыт. Э̄лаль аквтох рӯпитаӈкв э̄ри. Ма̄ньщи ос ханты ла̄тӈыг урыл тав тох ла̄выс. Ма̄н округувт ты ла̄тӈыг э̄лаль тотнэ ма̄гыс яныг рӯпата ва̄руӈкв э̄ри. Ты рӯпата соссаӈ мир Ассамблеят рӯпитан ма̄хум акваг та̄рапаттым вос о̄ньщияныл. Мощ ётылнув журналистыт Еремей Айпин титыгласаныл: «Ма̄ньщи ос ханты ла̄тӈыг ӯргалан ма̄гыс округувт ман мощща рӯпата ва̄раве? Манрыг яныг кӯщаюв Н. Комарова ты урыл ва̄тихал потырта̄лы? » Еремей Данилович ла̄выс, со̄ль, ань ма̄ньщи манос ханты ла̄тыӈ ва̄нэ хо̄тпат акваг мощщаме̄гыт. Школат ла̄тыӈ ханищтан урокыт хотвуйве̄сыт, туп ка̄сащан ня̄врамыт та̄н ща̄нь ла̄тыӈ ханищтэ̄гыт. Ёмас ханищтан нэ̄пакыт о̄с а̄тимыт, йильпи нэ̄пакыт хансуӈкв э̄ре̄гыт. Са̄в ва̄рмаль о̄лы, са̄в рӯпата ва̄руӈкв э̄ри. Матъёмас ань округ кӯщаюв ты урыл акваг потыртаӈкв патыс. 1090 2014.12.19. Александр ВЬЮТКИН Сытам во̄рыӈ ма̄ тиснэ во̄руй. Ханты-Мансийск ӯс ос Шапша па̄выл ляпат о̄лнэ во̄р «Самаровский чугас» нампа колт рӯпитан ма̄хмытын аквписыг ӯргалым о̄ньщаве. Ка̄сыӈ та̄л тэ̄лы ащирмат ос йильпи тӯйт патум юипа̄лт во̄рт о̄лнэ ӯянув ха̄йтыгтан лё̄ӈханыл щирыл ловиньтавет. Ань тох туп ма̄колыӈо̄йкат хансаныл щирыл ловиньтаӈкве ат а̄ртми. Та̄н ань та̄нти ёмщакв щё̄питым, тӯйтыл нумыл лаплэ̄пхатым ма̄коланылт хуе̄гыт. Ты таквс Ханты-Мансийск ӯс ляпат ма̄хум са̄в щёс ма̄колыӈо̄йкат ка̄сала̄лсаныл. Кон хотты хо̄тпа титыглэлы̄н те: «Ӯс ляпат манах во̄рто̄лнут о̄лы? » Аквпа̄лэ ла̄ве̄гыт са̄в, мо̄тананыл атахтем, са̄тахтем. Ты урыл торыӈыщ нэ̄мхотьют ат ва̄гтэ. Ма̄ янытыл во̄рто̄лнутыт са̄всыр щирыл ловиньтавет. Ма̄н, «Самаровский чугас» во̄р ӯргалан ма̄хум, таквсы о̄выл тӯйт патыгланэ порат ма̄колыӈ о̄йкат хансаныл щирыл ловиньтыянув. Ты та̄л Ханты-Мансийск ӯс ос Шапша па̄выл ляпа во̄рт лов ма̄колыӈо̄йка ва̄щинтавес. Во̄рто̄лнутанув э̄лумхо̄лас ляпан о̄лмыгтан тэ̄ланыл нэ̄мхотьютн иӈ ат ва̄вет. Ты ва̄рмаль та̄рапаттын ма̄гсыл ма̄вит, во̄ре ос во̄рӯй ӯргалан департамент колт ма̄хум ты рӯпитэ̄гыт. Та̄н ань о̄щнэ номтаныл тамле: «Ань ты юио̄выл ат та̄л сыс округувт хо̄тал нэ̄глын е̄рт сака са̄в ма̄во̄й ос газ но̄хвинэ рӯпата ва̄раве. Тапалъе̄рт о̄лнэ во̄руит сытам ма̄наныл ма̄шинал э̄лаюв яласавес. Тав, улпыл, тувыл тот о̄лнэ во̄руянув хо̄тал ёлпа̄тыран сытамнув о̄лнэ ма̄ нупыл минэ̄гыт. Тувыл ос Ханты-Мансийск ӯс по̄хат порс атнэ яныг ма̄ о̄лы. Тав лю̄ль саюм атэ во̄тн э̄латотыглаве, таи ма̄гсыл ма̄колыӈо̄йкат та ляпа атхатэ̄гыт. Тот ляпат рӯпитан ма̄хумн та̄н ва̄тихал ва̄щинтавет. «Самаровский чугас» ма̄т рӯпитан ма̄хум ла̄ве̄гыт, Ханты-Мансийск ӯс ос Шапша па̄выл по̄хат хотты хо̄тпат во̄рто̄лнутыт те ва̄щинтасыт, ты урыл та̄нанылн ля̄ххал вос те̄тэ̄гыт. Во̄р ӯргалан ма̄хум потраныл Александр ВЬЮТКИН ма̄ньщи ла̄тӈыл хансыстэ. 1090 2014.12.19. Валентина УЗЕЛЬ Тав ляпа рӯтанэ хо̄нтлын ма̄т о̄лэ̄гыт. Ты хурит по̄слым нэ̄ Евгения Алексеевна Полякова Югорск ӯст о̄лы. Тав такви уре̄т тох потыртас. Ща̄нягеа̄щаге ань Донбасс ма̄т о̄лэ̄г. Мо̄т ма̄н о̄лмыгтаӈкв щар ат ка̄саще̄г. Тэ̄н ань сас яныгпа̄ла хо̄тпаг. Тав а̄ще военный хо̄тпаг о̄лыс. Лусытаме̄т ще̄мьяӈ та̄гыл са̄всыр ма̄т о̄лсыт. Лусытан хо̄тпат акв ма̄т ат о̄лэ̄гыт, акваг тыглетувле те̄тыглавет. Ты а̄гитэ̄н лё̄ӈхыт миныманыл порат на̄иӈтуйтыт самын патыс. А̄ги ма̄ньлатыг о̄лме порат оматэ̄н акваг ла̄выглавес, лусытан хо̄тпа хумыг ул вос выгтэ. Ос тох та е̄мтыс, а̄гитэ о̄с лусытан хо̄тпа палт минас. Евгения Алексеевна о̄йкатэ 1986 та̄лт ма̄н округувн Комсомольский па̄вылн рӯпитаӈкв те̄твес. Ты па̄выл ётыл Югорск ӯсыг ва̄рвес. Та па̄сыл тот та о̄лэ̄гыт. Тит пыгаге я̄нас о̄лэ̄г, акватэ Югорск ӯст ща̄не ляпат о̄лы, мо̄т пыге Украина ма̄т йильпи рӯпитан ма̄ ва̄рыс, кӯщаиг тот о̄лы. О̄йкатэ̄нтыл титтыгминамме̄н юипа̄лт тав ня̄врамаге такви янмалтасаге. Тав школа юипа̄лт Киев ӯст консерваториякол а̄стлас. Акв хотты юио̄выл та̄лт нэ̄ та ӯсн ялыс, ханищтахтам колэ̄н щалтсас. Маныр тав тот ка̄салас, ань ты мус сыме ща̄рги. Ла̄выс, та кол ханищтан кол хурип а̄ти, тув мус лю̄лиг та ва̄рвес. Матъёмас ты ва̄рмаль таве ханищтам хо̄тпат ат ва̄саныл, та̄н ань пуссын а̄тимыг е̄мтмыт. Ты нэ̄ ань Югорск, Советский ӯсыгт ос Советский районт о̄лнэ ма̄ньлат ма̄хум ёт рӯпиты. Тав такви ёнгын кол пӯнсыс, тув э̄ргуӈкв ос йӣквуӈкв ха̄снэ ма̄ньлат хо̄тпат акванатсанэ. Та̄н ма̄гсыланыл стихыт хансы, а̄гитпыгыт ос тав стиханэ э̄ргыг ва̄рияныл манос спектакль щирыл ёнгияныл. Тит э̄тпос сыс акв щёс ӯст о̄лнэ мир акванатыглэ̄гыт, концерт та̄нанылн суссылтэ̄гыт. Ялпыӈ хо̄талыт о̄лнэ порат та̄н тув о̄с акваг во̄виньта̄лавет. Ам таве титыгласлум, мо̄т ма̄н о̄лмыгтан номт о̄ньщи ман а̄ти. Тав ювле ла̄выс, ты урыл щар ат номсахты, тыт тав са̄в та̄л о̄лы, э̄лаль ты ма̄т о̄луӈкв паты. 1090 2014.12.19. Валентина УЗЕЛЬ Яныг кӯщай э̄ква янытлавес. Округув янытыл Любовь Чистова намыӈсуиӈ хо̄тпаг о̄лы. Ювле хультум э̄тпос 28 хо̄талэ̄т э̄ква 65 та̄лэ то̄влыс. Тав «Почетный гражданин ХМАО-Югры», «Заслуженный юрист РФ», юридический наукат кандидат, тамле яныг намыт ты о̄ньщи. Ань Общественная палата нампа ма̄т яныг кӯщаиг рӯпиты. Любовь Александровна Ханты-Мансийск ӯст самын патыс, школа тыт а̄стлас. Э̄лаль тав Свердловский юридический институтн ханищтахтункв минас, тувыл юв рӯпитаӈкв те̄твес. Тыт хус арыгтем та̄л прокуратурат рӯпитас. 1990 та̄л па̄сыл 2006 та̄л мус мирн округ Дума депутатыг пе̄рия̄лвес. Матахмат та̄л Дума кӯщай ва̄ӈыг хо̄тпаг о̄лыс. Са̄в та̄л ювле хультум порат нэ̄ хо̄тпат ма̄гыс общественный организация ва̄рыс, рущ ла̄тӈыл «Женская инициатива» ла̄ваве. Та̄н ань ты мус аквъёт рӯпитэ̄гыт, та̄рвитыӈ ва̄рмаль о̄щнэ нэ̄кветн нё̄тэ̄гыт. Ань ты э̄ква са̄в хо̄тпатн янытлавес. Округ Дума кӯщай хум Борис Хохряков тамле ла̄тыӈ таве̄н те̄тыс: «Наӈ са̄в та̄л ма̄н округувт о̄лэ̄гын, са̄в та̄л тыт рӯпитэ̄гын. Наӈ намын ань са̄в хо̄тпан ва̄ве. Тыт рӯпитанэн сыс ма̄н та̄рапаттыслӯв, наӈ номтыӈ политикхо̄тпа, рӯпатан сака ёмащакв ва̄рилын, са̄в хо̄тпан нё̄тэ̄гын. Наӈ ё̄рын хосыт ма̄н округувт са̄в э̄рнэ са̄ккон хасвес, са̄в хо̄тпат нё̄тве̄сыт. Ань ты ялпыӈ хо̄талын кастыл ма̄н наӈын са̄в ёмас сымыӈ ла̄тыӈ ла̄ве̄в – пуста̄гыл о̄лэн, рӯпатант са̄в ёмас тэ̄ла ва̄рен. Ка̄сыӈ йильпи хо̄тал наӈ ма̄гсылын посыӈыг вос о̄лы, номтыт о̄щнэ ва̄рмалянын пуссын ёмас тэ̄лаг вос е̄мтэ̄гыт. » Э̄ква янытламе юипа̄лт яныг кӯщай о̄йка Любовь Александровнан мӯйлупса мис. Э̄ква таве̄н ос такви ущты хансум йильпи нэ̄паке мӯйлуптастэ. Округ Думаныл те̄тым ля̄ххал ма̄ньщи ла̄тӈыл Валентина Хозумова хансыстэ. 1090 2014.12.19. Анна АЛГАДЬЕВА Ам яныг ащо̄йкагумане̄квагум урыл. Ам яныг ащо̄йкам наме Николай Михайлович Сагандуков. Колта̄гланылт тав хӯрмит ня̄врамыг о̄лыс, 1926 та̄л порат Курганский район Наунак па̄вылт самын патыс. Ма̄нь поратэ̄т А̄с я̄ ва̄тат яныгмас. 1942 та̄лт Полноват па̄выл школат 7 класс а̄стлас. 1942 та̄лныл 1945 та̄л мус Ханты-Мансийск ӯст медучилищат ханищтахтас. Медучилище а̄стламе юипа̄лт Хальӯс районын ювле ёхтыс, 37 та̄л Ня̄хщамво̄ль пӯльницат рӯпитас. Ты сыс ос 5 та̄л леккарыг ханищтахтас, фельдшерыг рӯпитас. Ат та̄л «Красный чумт» па̄влыт мус яласан ле̄ккарыг о̄лыс. Са̄в та̄л яныг ле̄ккарыг пульницат о̄лыс. Ня̄врам самын паттын порат кос хунь ма̄хум таве ӯрсаныл. Илттыг э̄рнэ операция порат ле̄ккарытн нё̄тыс. 1981 та̄лт пенсиян ялыс, тувыл акв та̄л о̄с рӯпитас ос ущ акваг ӯщлахтуӈкв минас. 1947 та̄л порат Ня̄хщамволиӈ миркол щекретарь а̄ги нэ̄гыг тотастэ. Нила пыг янмалтасыг: Владимир, Александр, Виктор ос Борис. Верховный Совет СССР па̄лныл кит металь о̄ньщи: «За трудовое отличие» 1971 та̄лт мӯйлупта̄лвес ос «Ветеран труда» 1982 та̄л порат майлувес. 2008 та̄лт хотталь щалтыс. Ам яныг ане̄квам наме Татьяна Ивановна Сагандукова. Тав Ня̄хщамво̄льт 1927 та̄лт та̄л котиль э̄тпос 25 хо̄талэ̄т самын патыс. Та̄н коланылт ат а̄ги о̄лсыт, яныгмасыт. Хо̄т та̄л яныт порат тав школан минас, 4 класс мус Ня̄хщамво̄лиӈ школат ханищтахтас, 5 класс Саранпа̄вылт ханищтахтас. 6-7 классыг Сосьват. 1942 та̄л порат Нахрачинский заводн рӯпитаӈкв минас, пил вӣнэ ма̄т о̄лыс. Тувыл Тапссунт хӯл алыщлан ма̄т рыбучастокт рӯпитас: таквсытӯя хӯл вис, пирмайтас, тэ̄лы конторат рӯпитас. 1946 та̄лт Ня̄хщамво̄ль мирколт щекретариг о̄лыс. Акв та та̄л лӯпта э̄тпос 5 числат хум ва̄рыс, Николай Михайлович Сагандуков палт минас. Рыпкоопт, порумхозт, испедицият рӯпитас, тувыл о̄с мирколн патсас. Ань пенсият о̄лы. Ам яныг ане̄квам сака э̄руптылум, тав палтылэ мӯйлуӈкв ва̄тихал ялантэ̄гум. Иван Кешфетдинов, Ня̄хщамво̄ль па̄выл школат 6 классыт ханищтахтын пыг, хансум потыр ма̄ньщи ла̄тӈыг Анна АЛГАДЬЕВАн толмащлавес. 1090 2014.12.19. Николай МЕРОВ Тыналахтын хо̄тпат ёхталасыт. Ты та̄л ва̄т са̄грапнал э̄тпос ловит хо̄талт ма̄н округув 84 та̄лэ то̄влыс. Ты кастыл округт о̄лнэ та̄нки рӯпата ва̄рнэ хо̄тпат Ханты-Мансийск ӯсн ёхталасыт. Та̄н та̄нки ва̄рум тэ̄нутпормасаныл тыт суссылтасыт ос тыналасыт. Рущ щирыл ты ва̄рмаль «Товары земли Югорской» ла̄ваве. Ты тэ̄ла округ мирколт рӯпитан хо̄тпат ос тыналахтын ма̄хумн нё̄тмил ва̄рнэ колт рӯпитан хо̄тпат та̄н э̄лаль тотуӈкве нё̄тэ̄гыт. Тыналахтын ва̄рмаль пӯснэ хо̄талт о̄выл ла̄тыӈ округ губернатор ва̄ӈын хум Сергей Михайлович Заукеев ла̄выс: «А̄нумн тыналахтын хо̄тпат тыт ка̄салаӈкве сака мӯсты. Матъёмас ма̄н тамле э̄рнэ тэ̄ла э̄лаль тотылӯв. Тыи ма̄гыс маныр э̄ри, пуссын о̄лы, туп хо̄тпа рӯпитаӈкве вос тахнув. Ань тэ̄нутпормас ма̄нки ва̄руӈкве ве̄рме̄в. Тыт суссылтан тэ̄нутыт ка̄сыӈ хо̄тпа а̄рталаӈкве ве̄рми. Пормасыт о̄с ка̄тыт пувуӈкве ро̄ви. Ётыл хо̄тпа номтэ паты ке, ты пормас тав ёвтытэ. Ань ты та̄л тэ̄нутпормас тыналан ва̄рмаль округ намхо̄талэ̄т ва̄рвес. Ам Югра ма̄т о̄лнэ ма̄хум пуссын сымыӈыщ янытлыянум. Ма̄н ма̄вт ма̄во̄й ос газ ма̄ныл но̄хвиве. Россия ма̄гыс са̄в олн сэ̄лэ̄в. Тыил сака янытлахтэ̄в кос, ос ты коныпал ань ма̄н ма̄нки тэ̄нутпормас тыт ва̄ре̄в. Ты хосыт округ экономикав ма̄нки са̄вмалтылӯв. Ос ты урыл ла̄вуӈкве таӈхе̄гум. Са̄р хо̄тал ам ты тэ̄нутпормасыт сунсым ё̄мыгтасум. Ты урыл тох номсэ̄гум, ма̄нки ты рӯпата ат ке ва̄ре̄в, нэ̄мхотьютытн ат нё̄таве̄в. Тыщир акваннё̄тхатым э̄лаль рӯпитаӈкве патэ̄в ке, округув ёмщакв но̄хво̄рмалтылӯв. Ань май мо̄т хо̄н ма̄т о̄лнэ мир ма̄н нупылув кантлым о̄лэ̄гыт. Ты хосыт хо̄н ма̄ныл тотыгла̄лым то̄ва тэ̄нутпормасыт тыналаӈкве тыг воссыг ат тотавет. Ань ам ва̄глум, ма̄н ма̄нки тэ̄нутпормас ва̄руӈкве ве̄рме̄в. Россияв яныг, рӯпата ка̄сыӈ хо̄тпа хо̄нты. Ня̄враманув, а̄пганув э̄лаль ёмщакв о̄лнэ̄ныл ма̄гыс аквъёт са̄в рӯпитаӈкве патэ̄в». Та юипа̄лт Ольга Андреевна Сидорова, тыналахтын ма̄хумн нё̄тмил ва̄рнэ колт рӯпитан нэ̄, потыртас. Тав ла̄выс, ма̄к са̄в со̄т ос щунь ма̄н округув ма̄гыс ты тыт о̄лнэ ма̄хум. Ка̄сыӈ хо̄тпа предпринимателиг рӯпитаӈкве ат ве̄рми. Ань округувт тыналахтын хо̄тпатн нё̄тмил акваг ва̄раве. Ты хосыт та̄н рӯпатаныл мӯсхал щирыл мины. Та̄н э̄лаль о̄лнэ хо̄тал урыл акваг номсэ̄гыт. Маныр тэ̄нут э̄ри, тыт пуссын о̄лы. Йильпи та̄л кастыл ка̄сыӈ хо̄тпа па̄санын атыӈ тэ̄нут ёвтуӈкве ве̄рми. Юио̄вылт кӯщай нэ̄ ла̄выс, ты рӯпата ва̄рнэ хо̄тпат акваг ӯргалаӈкве ос нё̄туӈкве тах патавет. Тувыл ос торговопромышленный палата кӯщай Альфия Павкина потыртас. Тав пуссын мӯй ма̄хум та̄нки ва̄рнэ рӯпатаныл ма̄гыс о̄с янытласанэ. Ань тыналахтын ма̄хум онтоловхуйпловит щёс акванатхатыгласыт. Ты та̄лыт сыс са̄в хо̄тпа тыналахтын ма̄н ёхталас. Выставкан тотыглам тэ̄нутпормасыт ка̄сыӈ та̄лныл акваг са̄вме̄гыт. Ма̄хум йильпи проектыт щё̄питэ̄гыт. Са̄всыр та̄рвит о̄лыглы, ос ма̄хум э̄лаль рӯпитан ё̄р акваг хо̄нтэ̄гыт. Ты тэ̄лат палт ма̄к та̄ксар хо̄тпат рӯпитэ̄гыт. 1090 2014.12.19. Людмила ТЕТКИНА Па̄влыӈ мир о̄лупсаныл. Октябрьский район Карымкары па̄вылт хус арыгкем та̄л миркол кӯщаиг Михаил Климов о̄лы. Тав па̄влыӈ ма̄хманэ о̄лупсаныл ос та̄рвитыӈ ва̄рмаляныл ёмащакв ва̄ганэ. Кӯщай хум ла̄выс: «Карымкары ос Горнореченск па̄влыг акв миркол нупыл хансым о̄лэ̄г. Тот акв со̄тыра 360 э̄лумхо̄лас о̄лы, та̄н халанылт 140 хо̄тпа ты соссаӈ ма̄хум. Па̄влыӈ ма̄хманув ёмащакв о̄луӈкве ке ка̄саще̄гыт, та̄н рӯпитэ̄гыт, олн сэ̄лэ̄гыт. Карымкары по̄хат 2004 та̄лныл «Сургутнефтегаз» нампа компания ма̄ныл ма̄во̄й но̄хвыг. Хум хо̄тпанув пуссын тув рӯпитаӈкве патхатасыт. Рӯпитан ма̄наныл мус 25 ве̄рыста минуӈкв э̄ри. А̄лпыл хо̄т щё̄с порат тув ма̄шинал тотавет. Ӣтипа̄лаг о̄с аквта щирыл ювле ёхтэ̄гыт. Ка̄сыӈ хо̄тал тыглетувле та яласэ̄гыт. Ма̄во̄й но̄хвинэ компания па̄влув ляпат ма̄шинат яласан лё̄ӈх ва̄рыс. Ань та̄л сыс Сургут мус ялантаӈкве ве̄рме̄в. Таи лю̄ль, ты лё̄ӈхныл па̄влув мус 7 ве̄рыста яласан лё̄ӈх а̄тим. Ты компания Сургут мус яласан лё̄ӈх такви рӯпататэ ма̄гсыл ва̄рыстэ, рущ ла̄тӈыл «ведомственныиг» ла̄ваве. Мо̄т хо̄тпан ты лё̄ӈх хосыт яласаӈкве ат ро̄ви. Па̄влыӈ ма̄хманув ань пуссын тот рӯпитэ̄гыт, тыи ма̄гсыл ма̄н ты лё̄ӈх хосыт Сургут мус яласэ̄в. Яныг ӯсн хунь минэ̄в, намнэ̄паканув ётвиӈкве ла̄ваве̄в. Нэ̄пакыт щирыл ты лё̄ӈх а̄тим, тыи ма̄гсыл ты са̄т ве̄рыста ёмащакв ва̄рнэ ма̄гсыл олныл ат миве̄в. Нэ̄ хо̄тпанув ня̄врам ханищтан колт, садикт, пӯльницат рӯпитэ̄гыт. Ань совхозт, почтат, ЖКХат рӯпитан хо̄тпа ат то̄вылхаты. Пищмат, газетат ма̄хумн тотуӈкве, мис посуӈкве, па̄выл лё̄ӈхыт тӯйт хо̄тхилуӈкве нэ̄мхотьют ат ка̄сащи. Ма̄хманув пуссын нефтяникыт палт рӯпитаӈкве воратэ̄гыт, па̄вылт о̄лнэ рӯпата ва̄руӈкве ат таӈхе̄гыт. Тувыл таи ёмас, ма̄во̄й но̄хвинэ компания тыт рӯпитаӈкве о̄вылтахтас, мирув са̄вмуӈкве патыс. Ма̄ньлат хо̄тпанув мо̄т ма̄н воссыг ат ва̄нтлэ̄гыт, о̄луӈкве тыт хультэ̄гыт. Ань ка̄сыӈ та̄лныл са̄внув ня̄врам самын паты. Ам яныгмамум порат тыт школат 270 ня̄врам ханищтахтас. Тувыл колхозув рӯпитаӈкве хотпо̄йтыс, ма̄хманув мо̄т ма̄н мингаласыт. То̄нт яныгса̄т ня̄врам туп ханищтахтас. Ань 140 а̄гирищпыгрищ школан яланты. Ты та̄л ос йильпи садик ӯнттуӈкве о̄вылтавес, тув 75 ня̄врам ялантаӈкве патэ̄гыт. Ань Карымкары па̄вылт кит садикыг рӯпитэ̄г. Акв кол 1968 та̄л порат ӯнттувес, норанэ щар хотсайсыт, ка̄сыӈ та̄л мӯсхал щирыл такос щё̄питылӯв, а̄латы ёллоньхаты. Ань йильпи садик ӯнттуӈкве касыл щирыл э̄ри. О̄влэ̄т хунь ты рӯпата ва̄руӈкве о̄вылтаслӯв, нэ̄мхотьют садик ӯнттуӈкве ат касащас. Па̄влувн са̄всыр пормасыт, кирпащ, иснасыт, цемент тотуӈкве туп яныг вит порат ро̄ви. Мо̄т ма̄ныл ты утыт хартым, са̄в олн та̄н ат сэ̄лэ̄гыт, тыи ма̄гсыл тамле ма̄нь па̄вылквет колыт ӯнттуӈкве ат ка̄саще̄гыт. Ты э̄лыпа̄лт районувт кол ӯнттын организацият ёт потыртахтыгласум. Ань акв организация тыт рӯпитаӈкве ка̄сащас, садик ӯнттуӈкве моще̄рт ты о̄вылтахты. Колхоз рӯпитаме порат па̄влувт яныг клуб ӯнттувес, ёмас кол о̄лыс, тувыл на̄йн ё̄свес. Клуб ань ма̄нь пе̄с колт рӯпиты. Тот колнакыт ма̄нит, ялпыӈ хо̄талыт ос са̄всыр концертыт ва̄рыглаӈкве ма̄хум ат ве̄рме̄гыт. Йильпи клуб ӯнттын ма̄гсыл олн такос во̄ве̄в, кӯщаит ювле акваг ла̄ве̄гыт олн а̄тим. Ань мо̄т та̄рвит о̄лы, Сургут ӯсныл са̄всыр по̄х хо̄тпат па̄влувн ёхталэ̄гыт, ма̄ньлат хо̄тпанув са̄всыр лю̄ль хохса хартуӈкве, тэ̄рпи аюӈкве, лю̄ль тэ̄рпиӈ ю̄нтуп тӯщтуӈкве кащилтавет. Лё̄ӈх та̄л о̄лмув порат, ты лю̄ль урыл а̄гиянувпыганув нэ̄матыр ат ва̄сыт. Лё̄ӈх ёт тамле та̄рвит ма̄навн та тотвес. Тыи ма̄гсыл па̄влувн клубкол сака э̄ри, ма̄ньлат хо̄тпанув ёт рӯпитаӈкве ань акваг э̄ри, мо̄ри ул вос капыртэ̄гыт». 1090 2014.12.19. Николай МЕРОВ Са̄в рӯпитам ма̄хум янытлаве̄сыт. Ты та̄л округув 84 та̄лэ то̄влум кастыл Ханты-Мансийск ӯст «Югра-Классик» нампа колт округ губернатор нэ̄ Наталья Комарова са̄в та̄л тыт рӯпитан ма̄хум янытласанэ. Пуссын аквъёт атпан арыгкем хо̄тпа о̄лыс. Кӯщай нэ̄ нила хо̄тпа урыл я̄нас потыртас. Ты Марина Александровна Плотникова, тав хус та̄л округ гимназият рущ ла̄тыӈ ос литература ня̄врамытн ханищты. Тав «Заслуженный учитель России» нам о̄ньщи. Марина Александровна ханищтан ня̄враманэ са̄всыр олимпиадат са̄в щёс но̄хпатыгласыт. Ань округувт ма̄во̄й ма̄ныл но̄хвинэ па̄сныл атпан та̄лэ то̄влыс. Ты кастыл Сергей Павлович Тосников, «Сургутнефтегаз» нампа ма̄во̄й винэ компаният ва̄т арыгкем та̄л рӯпитан хум, янытлавес. Ты хум рӯпататэ ма̄гыс «Орден за заслуги перед Отечеством» ма̄гылн тагатан по̄сыл майвес. Округув щёлыӈыг е̄мтнэ ма̄гыс ма̄к Сергей Павлович хурип ма̄хум са̄в рӯпата ты ва̄рсыт. Хунь округув экономикатэ са̄вми, мир о̄лупсатэ о̄с ёмасыг е̄мты. Махум пуста̄гыл о̄лнэ̄ныл ма̄гыс Юрий Алексеевич Чемакин о̄с са̄в рӯпата ва̄ри. Тав Сургут ӯс ке̄лп а̄гм пусмалтан пӯльницат яныг ле̄ккарыг о̄лы. Ва̄т арыгкем та̄л тот рӯпиты. Та пӯльницат ле̄ккарыт ва̄рнэ рӯпатаныл хосыт са̄в хо̄тпа ань пуста̄гыл о̄лы. Тувыл кӯщай нэ̄ о̄с акв э̄ква урыл потыртас. Ты Людмила Ивановна Голик, тав «Заслуженный строитель Югры» нам о̄ньщи. Ма̄ньлат поратэ̄т Нягань ӯсн колыт ӯнттын ва̄рмаль щирыл рӯпитаӈкве ёхтыс. О̄влэ̄т ма̄щтыр хо̄тпаг о̄лыс. Ань тав технический отдел кӯщаиг рӯпиты. Та̄н компанияныл о̄лнэ колыт, школат, ӯнсахыт, заводыт ос мо̄т са̄всыр колыт ӯнттэ̄гыт. Ты потыр юипа̄лт Наталья Владимировна ма̄хум янытлаӈкве о̄вылтасанэ. Та̄н халанылт акв ма̄ньщи хум наме ла̄ввес. Ты Никита Калистратович Партанов, «Торум Маа» музейт са̄в та̄л рӯпитам хум. Тав наукат ос соссаӈ ма̄хум йис ва̄рмалит э̄лаль тотнэ ма̄гыс Почётный намыл майвес. О̄йка наме хунь ла̄ввес, тав сэ̄ръёрыг кӯщай нэ̄ палт ё̄мыс, ка̄тэ анигластэ ос мӯйлупсал та майвес. Тамле ва̄рмаль мирн сака пӯмщиг о̄лыс. Ма̄хум маткем ка̄тпатта таве̄н та ра̄тсыт. Тувыл Нижневартовский районт о̄лнэ акв ханты хум пе̄с йис о̄лупса э̄лаль тотнэ ма̄гыс о̄с Почётный намыл майвес. Ты хум наме Виталий Егорович Казамкин, тав такви ва̄рнэ рӯпататэ̄т ӯщлахтын тэ̄ла э̄лаль тотытэ. Соссаӈ мир ва̄рмалит щирыл акв яныгпа̄ла рущ э̄ква Альбина Сергеевна Глухих мӯйлупсал ос Почётный дипломнэ̄пакыл майвес. Тав «Новости Югры» нампа газетат атпан та̄лкем рӯпиты. Округувт ты щар пе̄с газета, та̄ратан па̄сныл ань нёлса̄ткем та̄лыг е̄мтыс. Альбина Сергеевна та газетат ма̄ньщи, ханты ос ё̄рн ма̄хум о̄лупса ос о̄лнэхӯлнэ накыт урыл са̄в потыр хансыс. Тыт о̄лнэ ӯсыт, па̄влыт ос соссаӈ ма̄хманув йис та̄гыл о̄лнэ ма̄наныл пуссын яласасанэ. Тав ла̄выс, ты маим мӯйлупса пе̄с порат рӯпитам хо̄тпат номылматыглан ма̄гыс о̄ньщуӈкве патытэ. 1090 2014.12.19. Светлана РОМБАНДЕЕВА Ма̄хум пусмалтан ле̄ккарув. Ва̄т са̄грапнал э̄тпос 19 хо̄талэ̄ ма̄н ма̄вт о̄лнэ христиан ма̄хум ма̄гыс сака яныг ялпыӈ хо̄талыг о̄лы – Николай Чудотворец манос Николай Угодник янытлан хо̄тал. 1959 та̄лт о̄с аквты хо̄талт Ха̄льӯс район Ло̄пмус па̄вылт ма̄ньщи а̄гирищ самын патыс, Валяг намаявес. Валентина Борисовна Албина са̄в та̄л Сургут ӯст о̄лы, яныг ле̄ккарыг рӯпиты. Ам тав ётэ хо̄нтхатыгласум, о̄лупсатэ урыл китыгласлум. На̄н ань э̄лаль тав потре ловиньтэлы̄н: – Ам Ло̄пмус па̄вылт самын патсум, тот яныгмасум. 1967 та̄лт таквсы школан минасум. О̄выл учителюм Галина Алексеевна Таратова. Нилыт классын ма̄н, па̄выл ня̄врамыт, Кульпасн тотвесӯв, э̄лаль тот ханищтахтасӯв, интернатт о̄лсӯв. Мо̄т па̄влытныл о̄с са̄в ня̄врамыт о̄лсыт – Кимкъясуй, Потрасуй, Сортыӈъя. 1975-1977 та̄лытт ам Ха̄льӯст ханищтахтасум. Тот о̄с интернатт о̄лсум. Са̄в ня̄врам Тэ̄к, Устрём, Ка̄сум, Восыӈтӯр, Кульпас ос мо̄т па̄влытныл ханищтахтасыт. Колнакт ма̄н нёлолов хо̄тпа о̄лсӯв – кит Тоняг, акватэ Неттина, Тэ̄к па̄вылныл о̄лсы̄г, Раиса Молданова, Галина Рябчикова, Шайтанканыл Аля Морозова о̄лыс. Ма̄н, ханты, ма̄ньщи, саран ос рущ ня̄врамыт, пуссын аквъёт ёмащакв о̄лсӯв, нэ̄мхуньт ат ля̄втыгласӯв, тэ̄ланув пуссын аквъёт ва̄рсанӯв, ёмащакв ханищтахтасӯв. Акв воспитателюв ма̄ньщи нэ̄ о̄лыс, Дина Тимофеевна Лисова, тав Потрасуй па̄вылт са̄мын патыс. Акв ос Канева, саран нэ̄. Тэ̄н сака ёмас, ласкат нэ̄г, ма̄нав пуссын э̄руптасанэ̄н. Школа а̄стламум юипа̄лт э̄лаль ам Ханты-Мансийск ӯс медучилищат ма̄нь ле̄ккарыг ханищтахтасум. Училище а̄стламум юипа̄лт Ха̄льӯс пӯльницат интенсивный терапия отделеният ма̄нь ле̄ккарыг рӯпитаӈкве патсум. Та порат тот яныг ле̄ккарыг Владимир Иванович Берсенёв о̄лыс. Тав сака мӯтраӈ ле̄ккар о̄лыс, ты о̄йка палт ам са̄в ёмас э̄рнэ тэ̄ла ханищтасум. 1983 та̄л мус тот рӯпитасум, та та̄лт ам Тюмень ӯс мединститутн ханищтахтуӈкве минасум. Институт 1990 та̄лт а̄стласлум, тувыл тыг, Сургут ӯсн, ва̄нтлысум. Ань тыхо̄тал мус тыт о̄лэ̄гум, поликлиникат терапевт ле̄ккарыг рӯпитэ̄гум. Атыт курсыт ханищтахтамум порат Дима пыгум самын патыс. Тыт Сургут ӯст яныгмас, школа а̄стлас. Ань Тюменьт ӯлщпуӈк пусмалтан ле̄ккарыг ханищтахты. – Валентина Борисовна, ле̄ккарыг рӯпитаӈкве та̄рвитыӈ? – Ам рӯпатам сака пӯмыщ, ханищтахтуӈкве акваг э̄ри, са̄в нэ̄пак ловиньтаӈкве э̄ри. Ка̄сыӈ хо̄тпа алписове туп таквихурипаг о̄лы, аквхурип хо̄тпа а̄тим. Таима̄гыс то̄ванакт э̄лумхо̄ласын тэ̄рпи хансуӈкве та̄рвитыӈ. Акв хо̄тпан тэ̄рпи нё̄ты, мо̄т хо̄тпан ос аквты тэ̄рпи нё̄туӈкве ат ве̄рми. Яныг ӯст о̄лнэ ма̄хум ос ма̄нь па̄вылт о̄лнэ ма̄хум о̄лнэ хурияныл аквхурип а̄ти, таима̄гыс та̄наныл я̄нас щирыл пусмалтаӈкве э̄ри. Э̄лнаӈ о̄лупсав щар мо̄тхурипаг о̄лыс. Ма̄хум са̄в рӯпитасыт, коны ма̄т са̄в яласасыт, ня̄врамыт кон хоса ёнгасасыт. Ань яныг ӯст о̄лнэ ма̄хум коны ма̄т сака ат о̄лыглэ̄гыт, ня̄врамыт янгыщ юн ӯнлантэ̄гыт, са̄всыр ищхӣпыӈ утыт хосыт ёнге̄гыт. Таима̄гыс уроканылт хоса ӯнлуӈкве ат ве̄рме̄гыт, сысаныл а̄гмыӈыт. Ань сым а̄гм ос са̄всыр пувласпи пилыщмаӈ а̄гмытыл ма̄ньлат ма̄хум а̄гмыӈыг е̄мтуӈкве патсыт. Э̄лнаӈ тамле а̄гмын туп яныгхо̄тпа ёлпаттаве, ань янгема̄не савалы. Ма̄н ань ща̄ньа̄щитн акваг ла̄ве̄в, ня̄враманыл пуста̄гыл о̄луӈкве ма̄ньта̄гыл вос ханищтыяныл, кон торген вос ха̄йтыгтэ̄гыт, вос пувлэ̄гыт. Акваг ул вос ханищтахтэ̄гыт, ёмас оценкат – ты атхунь ёмас, ос алпияныл те ва̄гталыт, ты ёмас хунь. – Наӈ ма̄нь па̄вылт яныгмасын, яныгмам поран ос наӈти ма̄хманын урыл аквкит ла̄тыӈ ла̄вен. – Омам наме Татьяна Павловна, а̄ги о̄парищ наме Ромбандеева, Хо̄сло̄х па̄вылныл о̄лыс. А̄тям Борис Николаевич Албин, Ло̄пмус па̄выл хум. О̄лме палытыл хӯл алыщлас, рыбакыг рӯпитас. Ӯсхул, сӯкыр ос сорх та̄им яныгмасӯв. Э̄лнаӈ а̄тяв рыбакыт ёт А̄сн ке̄тыглаве̄сыт, ма̄н, ня̄врамыт ос оманув, о̄с ёттотаве̄в. Тот супыгхул, мохсаӈ ос ка̄рай хӯл тэ̄сув, супыгхул по̄р тэ̄сув. Та пора ам акваг номылмата̄лылум, сымумт татем ёмас. Ам ань тыхо̄тал мус ла̄пкат хӯл ат та ёвтыгласум. Я̄тил хӯлкве ам туп юв ялантанэм порат тэ̄щинта̄лэ̄гум. Саша каӈкум ос Зоя увщим а̄тимыг е̄мтсыг. Кульпаст Юра а̄пщим ос Наталя э̄щум ще̄мьяӈта̄гыл о̄лэ̄г. Саранпа̄вылт Лена э̄щум о̄лы, ат ня̄врам о̄ньщи. Ма̄н яныгмамув порат акваг ща̄нь ла̄тӈувтыл потыртасӯв. Интернатт то̄ванакт ат та̄ртаве̄в ма̄ньщи ла̄тӈыл потыртаӈкве, ма̄н, Ло̄пмус ня̄врамыт, нэ̄мхотьют ат хӯнтлысӯв, тох и потыртасӯв. Па̄влувт Ӯй йӣквыгла̄лвес, ма̄н ня̄врамыт о̄с пуссын тув ялантасув. Ам номилум, Ефим Семёнович Ромбандеев аким колт Ӯй йӣквес. Тувыл Владимир Семёнович Албин, Егор Петрович Таратов ос Алексей Михайлович Хозумов колт. Анна Ильинична Албина то̄нт ма̄ниг о̄лыс, тот сака нё̄тнэ̄г йӣквыс. Ма̄ньщи супыл масхаты, то̄р пины, тав ляльтэ сунсуӈкве сака пӯмыщ о̄лыс. О̄йкатэ о̄парищ нам щирыл тав ань Хозумова. Та порат сака мӯтраӈ, нёмса, ощхуль ма̄хум о̄лсыт. 1972 та̄лт а̄тяв рӯпататэ щирыл Василий Карпович Бешкильцевын Кульпасн во̄ввес, тувыл ще̄мьяв о̄с тув та ва̄нтлыс. Рыбакыт Ра̄ктъя па̄вылт хӯл алыщласыт. Омав о̄с акваг а̄тяв ёт яласас. Аквматнакт а̄тяв Ха̄льӯс пӯльницан товлыӈха̄пыл тотвес. Ам юрт а̄гим Раиса Алексеевна Качанова, ань о̄йкатэ о̄парищ нам щирыл Проводникова, ётыл потырты: «А̄вин хотьют ра̄ты, ань па̄лыгпӯнсылум, яа, оман ты лю̄ли, ма̄ньщи супыл масхатым о̄лы, кӯньгантым лю̄ляхо̄лы. Тав ла̄ви, ань а̄тян тыг пӯльницан тотвес, китыт хо̄тал тав о̄с товлыӈха̄пын ӯнтылматас, тыт ты мины». Омагума̄тягум акваг аквъёт о̄лсыг, ань омав улпыл номсы, о̄йкатэ аман хоталь тотвес, тав юипа̄лэ̄т Ӯсын та тыламлас. – Ма̄ньщи нэ̄ Раиса Алексеевна ань Руслан пыге щахныл ю̄нгата̄лхатнэ ма̄т касы, намыӈсуиӈ хо̄тпаг е̄мтыс. Раиса хоты па̄вылныл о̄лы? – Тав Сӯкыръя па̄вылныл о̄лы. 1978-1980 та̄лытт тэ̄н Зоя увщим ёт Ха̄льӯс рыбокомбинатыт рӯпитасы̄г, общежитият о̄лсы̄г. То̄нт ам медучилищат ханищтахтасум, каникулын юв миннэм порат тэ̄н палтэ̄н хо̄игласум, тот э̄т хӯлэ̄гум. Ётылнуве Зоям рӯпататэ̄л по̄ханминас, ань юв минуӈкве щё̄питахты. Юрт а̄гитэ Раиса то̄нт о̄йкатэ армиян вуйвес, такви ос мо̄т щирыл о̄лы, увщим нупыл ла̄ви: «Ам ос хоталь минэ̄гум? » Зоям ювле ла̄ви: «Ам палтум миныме̄н, ам омагума̄тягум ёмас хо̄тпаг» Кульпасн ёхтысы̄г, омам ла̄ви: «Ма̄н ма̄ньщи а̄гирищув, вус о̄лы» Тот ос аквъёт зверофермат рӯпитасы̄г. Ма̄н колувт Рая кит та̄л ляпатем о̄лыс. Омам таве такви а̄гитэ хольт э̄руптастэ. Тувыл тот, Кульпаст, 1980 та̄лт таквсы Раиса ня̄врам самын паттыс, а̄гирищ. Мощ ётылнуве Миша о̄йкатэ ёхтыс, та̄н Ха̄льӯсн та минасыт. Та па̄сыл ма̄н юртыӈыщ о̄лэ̄в. Раиса омав акваг номылмата̄лытэ, ла̄ви: «О̄лупсамт хунь сака та̄рвитыӈ о̄лыс, на̄н колта̄глын а̄нум нё̄тыс, матъёмас на̄нанн ва̄ганум». Ётылнуве Руслан пыге ос Наташа а̄гитэ самын патсыг. Тэ̄н ня̄враманэ̄н ма̄ниг о̄лманыл порат, Наталя ос Лена э̄щагум Ха̄льӯсн ёхтэ̄г, Раян матыр колсори ва̄руӈкве нё̄тэ̄г, сома увщитэ̄н палт ёхтэ̄г. Ань Руслан пыге ма̄гыс ма̄н сыманув ща̄рге̄гыт. То̄ванакт оматэ тав ётэ каснэ ма̄н яланта̄лы. Ваим, ка̄сыӈ оман тамле касыл нупыл сунсуӈкве та̄рвитыӈ. – Валентина Борисовна, пуста̄гыл о̄лнэ ма̄гсыл ма̄ньщи ма̄хманувн хумус о̄луӈкве э̄ри? – Ма̄н ма̄хманув сака ё̄рыт, пе̄с та̄гыл са̄в рӯпитасыт, ма̄вит ляпат акваг о̄лсыт, во̄раясыт, хӯл алыщласыт. Атхунь таӈхе̄гум, та̄н ань яласан ма̄гыс матыр э̄рнэ ма̄шинат ман моторха̄пыт вос о̄ньще̄гыт, о̄лупсаныл мощ кӯпнитнуве̄г вос е̄мты. Ань матъёмас телевизорыт о̄ньще̄гыт, э̄тэхо̄талэ на̄йпос тэ̄г. Ма̄к туп таи – тыглетувле яласан ёмас лё̄ӈхыл вос ва̄равет, яласаӈкве вос ве̄рме̄гыт. Ам са̄в рӯт о̄ньще̄гум, Ха̄льӯс районт ос мо̄т ма̄т о̄лэ̄гыт. Я̄тил рӯт ма̄хманум, я̄тил ма̄ньщи мир, пуссын пуста̄гыл о̄лэ̄н, ня̄враманын янмалтэ̄н, халанынт нё̄тхатэ̄н. Пус ка̄т, пус ла̄гыл о̄лэ̄н, На̄янын-О̄тыранын вос ӯргалаве̄н! Ань потруме̄н та оигпас. Валентина Борисовна тамле мӯтраӈ э̄лумхо̄лас, хо̄тпа нупыл сымыӈ нэ̄. Тав о̄лнэ̄тэ палыт ма̄хум пусмалты, ка̄сыӈ хо̄тал э̄рнэ тэ̄ла ва̄ри. Па̄выл ма̄хманэ̄н ос рӯтанэ̄н тав э̄руптаве ос янытлаве. Ма̄н, газетат рӯпитан ма̄хум, таве намхо̄талэ кастыл о̄с янытлылӯв, са̄в ёмас сымыӈ ла̄тӈыл ла̄вилӯв. Пуста̄гыл вос о̄лы, со̄тыӈыщ вос о̄лы! 1090 2014.12.19. Т. Д. Слинкина То̄рум ла̄вум ща̄нь ла̄тӈув та̄кыщ ӯргалэлы̄н ос ханищтэлы̄н. Ты э̄лыпа̄лт нэ̄глум «Лӯима̄ сэ̄рипос» газетат (№22) Людмила Алгадьева хансум статьятэ̄т («Ма̄ньщи газетав янытлаӈкве са̄в хо̄тпа ёхталас») тав ам потрум атнув торгамтамтэ. Ам то̄ва ма̄ньлат учёныит урыл нас о̄щатахтым ла̄всасум. Ма̄ньщи ла̄тыӈ ханищтан ня̄врамыт ма̄гыс та̄н учебный пособият хансэ̄гыт. Тынув халт йильпи «номт» хо̄нтмыт: ща̄нь ла̄тӈанылт «ча», «ща» паттыиг ро̄вта̄л «чя», «щя» хансэ̄гыт, «чу», «щу» паттыиг «чю», «щю» хансэ̄гыт. Йис та̄гыл о̄лнэ ма̄ньщи ща̄нь ла̄тӈув йитыпари хансуӈкв патсаныл: «щахыл, чахыл» паттыйыг«шяхыл, чяхыл» хансэ̄гыт, «щунь» паттыиг «щюнь» хансэ̄гыт. (Тамле щирыл хансым титыт классыт ханищтахтын ня̄врамыт ма̄гыс атпан нэ̄пак та̄ртвес). Евдокия Ивановна Ромбандеева, мир янытыл ва̄нэ яныг учёныюв, хунь ты ощмараныл та̄рапаттыстэ, маттем та ща̄ргатахтыглым та нэ̄паканылт со̄ви хансум ла̄тӈаныл щургаласанэ. Таи ма̄к ва̄ӈкве э̄ри: хунь хоты ма̄ньщи ла̄тыӈ ка̄миньт «с» буква ёт хансаве, то̄нт тав юипалэ̄т «я» буква хансуӈкве э̄ри: буква «с» ка̄миньтаг о̄лы «щ» буква юртэ̄ныл. Аквта ла̄тыӈт «с» ~ «щ» юртыӈыщ о̄лэ̄г, кос хотытэ хансэ̄н, та ла̄тыӈ толмащпитэ ат тыпи: сяхыл~щахыл туча; сяхны~щахны – кулак; сюнь~щунь – счастье, благоденствие; ся̄нь~ща̄нь – мама, мать, матушка. Ты ка̄миньт «с» ос «щ» букваг хоты юртыӈ тит ла̄тӈыгт хансым те о̄лэ̄г, та ла̄тӈыг аквщир торгамтахтэ̄г ос толмащлахтэ̄г: пася о̄лэн ~ паща о̄лэн – здравствуй; Сила па̄выл ~ Щила па̄выл – деревня Силантия; сяпрах ва̄та ~щапрах ва̄та – твёрдый плёс; сёпыр ~ щёпыр глухарь; Сёртаӈ-Я̄ ~Щёртаӈ-Я̄ – река Сёртынъя (на картах). Ма̄ньщи газетавт ща̄нь ла̄тӈув ӯргалым о̄ньщаве, хунь ка̄миньт «с» буква пе̄нтсыл корреспондентанув «щ» буква хансуӈкве патсыт, та̄н учёный ма̄хумн сака ломгуве̄сыт, финноугорский научный мир халт нэ̄паканылт са̄р та̄гыл ка̄миньт «с» хансуӈкве ос ла̄вуӈкве потыртахтасыт. Тыт рӯпитан корреспондентыт хо̄та̄ти ма̄нь па̄влытт ман яныг ӯсытт яласэ̄гыт, соссаӈ ма̄ньщитн аквписыг ломгуве̄сыт, ка̄миньт «с» буква «щ» пе̄нтсыл хаснэ̄ныл ма̄гыс. Йис та̄гыл о̄лнэ то̄ва ла̄тыӈ та̄нанылн ат мӯстынэ̄тэ, манос илттыг та̄ра ат торгамтахты, маныр урыл газетат хансаве. Тахольт та̄н соссаӈ ма̄ньщи мирувн хӯнтлысыт. Та̄нти халанылт потыртахтасыт ка̄миньт «с» паттыиг «щ» буква хансуӈкве патсыт. На̄н сунсэ̄н, ханты ла̄тыӈ хомос та̄рвит тоты, та̄н алфавитаныл торыӈ щирыл иӈыт щё̄питыяныл, пе̄с ма̄к учёныяныл ты ва̄рмаль сохытлаӈкв ат а̄лымасаныл, йильпи учёныит халанылт такос потыртэ̄гыт, воритотэ̄гыт. Та̄н ща̄нь ла̄тӈаныл са̄в диалектыт о̄ньщи, таи ма̄гыс ла̄тӈаныл аквхурипат а̄ти, аквхурип алфавит ва̄руӈкв ос аквщир ла̄тӈыт хансуӈкв, ва̄им, ат а̄ртми. Ма̄нь па̄влытт ман яныг ӯсытт о̄лнэ соссаӈ ханты мираныл ёт те ёмщакв потыртахтэ̄гыт, тах ущ матыр ёмас хал хо̄нтэ̄гыт. Ма̄н ма̄ньщи ла̄тӈув Евдокия Ивановна Ромбандееван яныг учёныит ёт мӯсхал щирыл щё̄питавес. Янгыщ алфавитув ва̄руӈкве а̄лымасаныл, ос «Просвещение министерство» э̄лыпа̄лт 1989 та̄л ва̄т са̄грапнал саквалан э̄тпос 12 хо̄талэ̄т воянтасаныл, ань нэ̄матыр пе̄нтсуӈкве ат э̄ри. Ханищтахтын ма̄гыс э̄рнэ нэ̄пакыт Евдокия Ивановнан пуссын ва̄рве̄сыт: ня̄врамыт ма̄гыс букварьт, учебникыт, мо̄т са̄всыр нэ̄пакыт хосат а̄лымас хансуӈкве. Учёныит ма̄гыс ос ВУЗ, СУЗ студентыт ма̄гыс ма̄ньщи ла̄тыӈ ханищтаӈкве са̄в яныг рӯпатат ва̄рыс: ма̄ньщи словарь, синтаксис, морфология, графика, орфография, фонетика, пунктуация– ты пуссын тав мӯсхал щирыл ва̄рсанэ. Мир янытыл ты нэ̄пакыт хосыт ма̄ньщи ла̄тыӈ ханищтаве, потыртаве. Мо̄т хо̄н ма̄т о̄лнэ учёныит (венгрыт, финныт, немцыт, французыт) ма̄ньщи ла̄тыӈ сака ӯргалым номтыӈыщ ханищтыяныл, со̄ви ат хартыяныл, мори ат хансыяныл. Ма̄нти соссаӈ учёныянув аман манрыг ща̄нь ла̄тӈаныл торыӈ ат ва̄та̄л хоттэ̄лгата̄лыяныл? ! Хосат та̄гыл о̄лнэ сым ща̄ргын мо̄т ва̄рмаль урыл ла̄вуӈкве о̄с э̄ри: ма̄ньщи алфавитувт о̄лнэ лов гласный букванув нум па̄лт ма̄н май по̄ри щуртмил по̄с «-» (долгота знаке) хансэ̄в: А̄а̄, Е̄е̄, Ё̄ё̄, Ӣӣ, О̄о̄, Ӯӯ, Ы̄ы̄, Э̄э̄, Ю̄ю̄, Я̄я̄. На̄н о̄с тыи ва̄глын, то̄нт ла̄тыӈ мӯсхал щир ла̄вхаты ос толмащлахты, ты по̄с та̄л ма̄к ла̄тыӈ толмаще нас хоттыпи. Ты букват нумпа̄л по̄ри по̄с йильпи учёныит ман школат рӯпитан учителит о̄с йитыпари хансыяныл: хо̄т э̄ри – ат хансыяныл, хо̄т ат э̄ри – хансыяныл. На̄нти номсэ̄н: сам – глаз, кол са̄м – угол дома, хӯл са̄м – чешуя рыбы, сай – гной; са̄й – прикрытие; суй – звук; сӯй бор. Ты по̄ри щуртмил «-» э̄рнэ ма̄т ат те хансаве, та ла̄тыӈ ма̄к толмаще та тыпи: «сӯйн» миннэ паттыйыг нас «суй» та тэ̄лы. Ань та нумыннув ла̄вылтам титыт класс ма̄гыс хансым нэ̄пакыт ты по̄ри по̄с са̄в ма̄т хотӯстыма. Ева Адамовна Шмидт Венгрияныл ма̄н ма̄вн рӯпитаӈкве ёхтуме̄т ханты мир ла̄тыӈ ёмщакв ва̄стэ, ты коныпал ма̄ньщи ла̄тыӈ тыт о̄лыматэ таквирот молях ханищтапастэ. Щар ма̄к ма̄ньщи хольт ма̄щтырыг потрамас. Венгрияныл, Финляндияныл ёхталан янгема̄не учёный ма̄хум ма̄ньщи ла̄тӈыл ма̄навныл ёмаснуве̄г потыртэ̄гыт. А̄нумн нас пыл э̄сырма хӯнтлуӈкве ос ловиньтаӈкве, хомос то̄ва соссаӈ ма̄ньщи учёныянув, учителянув ща̄нь ла̄тӈаныл мори то̄стыяныл Кос йильпи нэ̄пакыт, кос словарикыт –о̄щатахтым, тыстым та̄н мори хаснутаныл нас пыл та щуртгалыянӯв. Ты йист о̄лнэ ма̄ньщит тай рущ ла̄тыӈ, английский, французский, немецкий ла̄тӈыт мӯсхал ва̄ганыл, ёмщакве̄г потыртэ̄гыт, хансэ̄гыт. Ос ща̄нь ла̄тӈаныл аманарыг тох э̄сырма та̄л савалап ня̄врам хольт саватыяныл? . Ма̄ньщи ла̄тӈув саватан ма̄хманув э̄рыӈ матнэ̄ныл о̄румт ущ номтыгтэ̄гыт, э̄рыӈ то̄нт ущ То̄рум ла̄вум ща̄нь ла̄тӈаныл номсахтта̄л саватаӈкв ат патыяныл. Ӯрай ӯст о̄лнэ учитель о̄йка ня̄врамытн акв щёс ла̄вум потре аквписыг номтумн ёхталы: «Кос рущ ла̄тыӈ, кос хоты мо̄т мир ла̄тыӈ ма̄к «таблица умножения» хольт ханищтаӈкв э̄ри. Акв щёс ловиньтан ре̄гыл хащта̄л ла̄тыӈ такви пуӈк тӣвырн хунь щалтапи, сӯпын, не̄лумн такви хунь ханувьи. Кос хоты мир ла̄тыӈ мӯсхал щирыл, ма̄щтырыг хансуӈкве, потыртаӈкве ханищтахтэ̄н». Ты Лев Иосифович Либов ла̄вум потре. Тав нотэ па̄сыл Урай ӯст школат рӯпитас, ань ос пенсиян патыс, ӯсувт о̄лнэ са̄всыр ма̄хум урыл матахтем нэ̄пак хансыс, «Оттиск» нампа литературный журнал ва̄рыс. Мӯтраӈ яныг хо̄тпа са̄в мо̄т мир ла̄тыӈ ва̄г, пӯмщалы. Тав хум ты ма̄н ӯсувт о̄лнэ ма̄ньщит ща̄нь ла̄тӈаныл ялтуптаӈкве акванатыгласанэ. Хӯрум та̄л сыс ня̄врамыт, оманыл, а̄щаныл ёт ма̄ньщи ла̄тыӈ мощ ханищтаӈкве а̄лымасыт. Тувыл ӯсувт о̄лнэ «Управление образования» сокращение ва̄рапасыт: Либов, ма̄ньщи ла̄тыӈ та̄нанылн ат э̄рнэ̄тэ. Округувт ма̄ньнув па̄влытт ман ӯсытт о̄лнэ школат о̄с аквтох ва̄тихал ща̄нь ла̄тыӈ ханищтан учителит урок щё̄саныл хотвивет, манос та̄нти хотарыгтаптавет. Тыгыл э̄лаль ла̄тӈув ул вос хоттыпи, ул вос ще̄лумты, таи ма̄гыс ма̄ньщи газетав на̄н, ма̄хумкве, ловиньтэлы̄н, та хосытыл ма̄к сохтыл хансуӈкве ос потыртаӈкве ханьщувлэгы̄н. Щар ма̄к ёмас ва̄рмаль газетавт ва̄руӈкв ро̄ви: ма̄ньщи ла̄тыӈ ханищтан ма̄гыс аквман нэ̄пак ло̄пс манос я̄нас приложение урокыт хольт ва̄руӈкве э̄ри. Ма̄ньлат ма̄хум на̄нти халынт ва̄тихал хо̄нтхатыглэ̄н, потыртахтэ̄н, титыглахтэ̄н, хомос хоты ла̄тыӈ мӯсхал хансуӈкве э̄ри. Ма̄н А̄с-угорский институтувн ёхталэ̄н, на̄нан нё̄тнэ ма̄хум тот о̄с рӯпитэ̄гыт. Йильпи хаснэ нэ̄пакан ла̄тыӈ ва̄нэ хо̄тпан суссылта̄лэ̄н, халанувт ма̄нти ат те ханищтахтэ̄в, ат те нё̄тхатэ̄в – воссыг хо̄ӈхан ханищтаве̄в, нё̄таве̄в? Тах То̄рмув такви ма̄навн ла̄вум ща̄нь ла̄тӈе ӯргалаӈкве ма̄к нё̄тытэ, э̄лаль юртыӈыщ о̄луӈкве о̄с тах нё̄тытэ. Ма̄ньщи ла̄тӈув ат те тыпылтылӯв, ма̄нти са̄в мир халт о̄с ат тыпе̄в, хот ат со̄йме̄в. Тыныӈ ма̄хумакве, янгема̄не̄т То̄рум нупыл, На̄й-О̄тыр нупыл ща̄нь ла̄тӈыл по̄йкщим э̄лаль пуста̄гыл, щунь тотым о̄лэ̄н. Т. Д. Слинкина, Ханты-Мансийск, ОУИПИиР, научный сотрудник. 1090 2014.12.19. Александр ВЬЮТКИН Пе̄с ва̄рыглам наканыл. Ханты-Мансийск ӯст нэ̄пакыт ловиньтан яныг колт «Югорский культурный форум» ва̄рмаль пӯнсым о̄лыс. Та пӯмащ титынтыг ты ва̄рыглавес. Ты 2014 та̄л Россия янытыл «Культура» та̄лыг намаим о̄лыс. Та̄лув оигпан мус матахтем хо̄тал ты хультыс, таве янытлан ма̄гсыл са̄всыр пӯмащ та ва̄раве. Ань ты выставканыл округув пе̄с йис о̄лупсатэ урыл о̄лы. Тот пе̄с порат о̄лум соссаӈ ма̄хманув ва̄рыглам рӯпатаныл урыл са̄всыр нэ̄пакыт ос хурит суссылтавет. Акв тамле пе̄с хури Кульпас па̄вылт «Культбаза» о̄лум порат 1937 та̄лт нэ̄ хо̄тпат янытлан хо̄талт по̄слыглавес. Та коныпал иӈ са̄в мо̄т пе̄с ва̄рмаляныл суссылтавет. Соссаӈ ма̄хум щар о̄выл йӣквнэ ос э̄ргын концертаныл 1958 та̄лт о̄вылтавес. 1970 та̄лт соссаӈ мир халт ма̄к яныг фестиваль ва̄рыглавес. То̄нт Ха̄льӯс районныл о̄лум са̄ӈквылтан, э̄ргын ос йӣквнэ ма̄хум но̄хпатсыт. «Та па̄сныл Ха̄льӯс районныл ёхталан ма̄хум аквписыг но̄хпатэ̄гыт, » тох округ культура тармыл кӯщаиг о̄лнэ нэ̄ Н. М. Казначеева ла̄выс. Со̄ль, тот сунсыглахтым ё̄мыгтаӈкве сака пӯмащ. Ханты-Мансийск ӯст о̄лнэ ос мӯйлын щирыл ёхталан ма̄хум пӯмащ ма̄гсыл тув вос ялэ̄гыт. 1090 2014.12.19. Александр ВЬЮТКИН Ща̄нь ла̄тӈе э̄лаль тотнэ нэ̄. Россия ма̄ янытыл ня̄врамыт ща̄нь ла̄тӈыл ханищтан ма̄хум халт касыланыл о̄лнэ порат, ам Архангельский район Ненецкий автономный округ ма̄ныл ёхталам нэ̄ ёт ва̄йхатыгласум. Тав наме Прасковья Ивановна Выучейская. Прасковья Ивановна са̄лыӈколт яныгмас. Яныгмаме порат хӯрум са̄всыр ла̄тӈыл потыртас. Такви ё̄рн ща̄нь ла̄тӈе коныпал рущ ос саран ла̄тӈыл потыртас. Та̄н са̄лыӈколаныл яласан ма̄нанылт саран ма̄хум са̄лы о̄ньщим о̄с яласасыт. Акванёхталаманыл порат халанылт аквписыг тит ла̄тӈыл потыртасыт. Нэ̄ рущ ла̄тыӈ ма̄нь та̄гыл о̄с ёмщаквег ва̄гтэ. Ханищтахтаме порат Красный нампа па̄вылт школаинтернатыт яныгмас. Омагеа̄тяге а̄гитэ̄н уральтаӈкве ва̄тихал ёхталасы̄г. Хоса ӯщлахтан хо̄талыт е̄мталан порат таве аквписыг са̄лыӈколн ёттотыгластэ̄н. Прасковья Ивановна такви ма̄нь та̄ланэ номылматыгламе порат ла̄выс: – Ам юв са̄лыӈколн ёхталамум порат, амти са̄лыянум уральтаӈкв та̄ра кон та ха̄йтэ̄гум. Наманыл щирыл во̄виянум, та̄н ам палтылум э̄ӈамтахтым ня̄нь тинсым та ёхтыгпе̄гыт. Са̄лыянум ня̄нил тыттынэм порат ёлпатталавем, то̄ванакт ос лю̄ньщтавем. Са̄лырищанум халт яныгмаӈкв сака пӯмащ о̄лыс. Прасковья Ивановна ханищтахтам ма̄тэ̄ныл а̄стуме юипа̄лт Санкт-Петербург ӯсн А. И. Герцен нампа РГПУ колн ня̄врамыт ханищтан нэ̄г ханищтахтуӈкв минас. Та кол а̄стуме юипа̄лт та̄ра такви Красный па̄влэ̄н рӯпитаӈкв ёхтыс. 1997 та̄лт таквсы ня̄врамыт ханищтан ва̄рмале та о̄вылтастэ. Рӯпитаӈкв вуйхатаме па̄сныл ты та̄л са̄тхуйплов та̄лыг та е̄мтыс. Ща̄нь ла̄тыӈ ханищтан нэ̄ ань ла̄выс: – Хунь ам рӯпитаӈкв о̄вылтахтасум, са̄выӈпа̄лэ ня̄врамыт та̄нти ла̄тӈыл иӈ ёмащакв потыртасыт. Ань юио̄выл атахтемса̄тахтем та̄л сыс ё̄рн ла̄тӈыл потыртан ня̄врам мощщаг е̄мтыс. Ла̄тӈув щар ул вос оймыгтас, та̄н ётаныл аквписыг ща̄нь ла̄тӈыл потыртаӈкв э̄ри. Ма̄н та̄н ётаныл хумус ве̄рме̄в, ла̄тӈув та щирыл та ханищтылӯв. Са̄выӈпа̄л ня̄врамыт оманыл, а̄тяныл ёт юн халанылт рущ ла̄тӈыл потыртэ̄гыт. Тыи ма̄гсыл ханищтан ня̄враманув ювле о̄с аквта рущ ла̄тӈыл потыртаӈкв та ханьщувлэ̄гыт. Кос хоталь ва̄рхатэ̄в, ща̄нь ла̄тӈув ла̄щлакв та холы! Прасковья Ивановна о̄лнэ ма̄тэ̄т ёмащакв ва̄ве. 2010 та̄лт нэ̄ хо̄тпат халт «Женщина года» касыл о̄лнэ порат «Душа тундры» нампа номинацият но̄хпатыс. Тамле ёмас ё̄рн нэ̄квен ам са̄в щуньпаща ла̄тыӈ те̄тэ̄гум. На̄й-О̄тыранэ̄н ще̄мьятэ вос ӯргалаве. Прасковья Ивановна са̄в та̄л пуста̄гыл вос о̄лы, ща̄нь ла̄тӈыл ня̄враманэ э̄лаль вос ханищтыянэ. 1090 2014.12.19. Тамара МЕРОВА Округувт о̄лнэ музеит янытлаве̄сыт. Ханты-Мансийск ӯст Ма̄вит ос Э̄лумхо̄лас нампа музейт ва̄рим суссылтапыт о̄вылтыт ам э̄лаль хансэ̄гум. Тот «биеннале» – хащта̄л ла̄тӈыл ла̄внэ сыресыр ханищтапыт ос суссылтапыт ва̄рыглаве̄сыт. Тув са̄всыр яныг ӯсытныл, Тарту (Эстония) ӯсныл музейт рӯпитан хо̄тпат ёхталасыт. Ос 2013 та̄л сыс хоталь та̄н ялсыт ос тот маныр рӯпата ва̄рсыт, та урыл потыртасыт. Акв колнакт ма̄н округувт о̄лнэ музеит са̄всыр рӯпатаныл суссылтасыт ос тувыл та̄нки халанылт кассыт. Ты та̄л мӯй ма̄хум хус йильпи суссылтап сунсуӈкве ве̄рмысыт. Музеит халт Югорск ӯст о̄лнэ «Музей истории и этнографии» но̄хпатыс. Та̄н «Печатный пряник на Руси» нампа пӯмыщ ва̄рмаль щё̄пита̄лыгласыт. Ань пе̄с порат ня̄нь сумил хумус тэ̄лыгтавес ос пряникыг хумус ва̄рвес, та̄н пуссын суссылтасыт. Тэ̄нут ва̄рнэ пе̄с рецептыт ос ёнгилыт ма̄хум ёт ханищтасыт. Ва̄рум пряниканыл такем атыӈыт о̄лсыт, ювта̄япаве̄сыт. Китыт места Касум па̄вылт о̄лнэ музейн майвес. Та̄н «История переселения комизырян в Приказымье» суссылтап ёттотыгласыт. Хӯрмит места Нягань ӯст о̄лнэ музейнокультурный кол вистэ. Та̄н «Страницы прошлого листая » рӯпатаныл э̄сгувес. Мо̄т колнакт Екатеринбург ос Москва ӯсныл ёхталам хо̄тпат та̄ратам йильпи нэ̄паканыл, альбоманыл урыл потыртасыт. Та̄н наука щирыл хансым са̄всыр пӯмыщ нэ̄пакыт, ма̄нь ня̄врамыт ма̄гыс нё̄тнэ журналыт, а̄гирищитпыгрищит ма̄гыс ханищтан нэ̄пакыт ёттотыгласыт. То̄ва нэ̄пакыт сака тыныӈыг о̄лсыт, тувыл ты суссылтапн атхатыглам ма̄хум ма̄гыс ёмас тэ̄ла ва̄рвес. Нэ̄пакыт пуссын са̄т солко̄ви тыныл пинве̄сыт. Ма̄вит ос Э̄лумхолас нампа музеюв ос Санкт-Петербургыт «Инфостудия«экон» рӯпитан хо̄тпат ёт аквъёт щё̄питам «История ссылки и спецпереселений в Ханты-Мансийском автономном округе–Югре» проектаныл ищхӣпыӈ ут хосыт суссылтасаныл. Ос аквта щирыл щё̄питым «Виртуальная реальность Тобольского Кремля» тэ̄ла урыл Тобольск ӯст историкоархитектурный музейзаповедникыт рӯпитан хо̄тпаг потыртасы̄г. Тувыл Владислав Карташов Сургутныл ёхталам хум музейт о̄щнэ пормасыт хумус ищхӣпыӈ ут хосыт суссылтаӈкве ро̄ве̄гыт, тамле ёмас ва̄рмаль щё̄питам. Томский университетт рӯпитан музей ос Горноправдинскыт о̄лнэ школа акваннё̄тхатым тыт «Палеогеновое море» нампа суссылтап ва̄рсы̄г. Тот 25 миллион та̄лыт ювле хультум порат Лӯима̄в манхурипаг о̄лыс, та ма̄витэ урыл потыртасыт. Пе̄с йис порат яныгмам йӣвыт, лӯптат ос манхурип хӯлыт та порат о̄лсыт, таит пуссын та̄рапаттысаныл. Ос акв пӯмыщ «Мыс священной собаки» суссылтап о̄лыс. Ямал ма̄т Шурышкарский район Питляр па̄вылн ялум хо̄тпат тот та̄рапаттум ва̄рмаляныл урыл потыртасыт. Яныгпа̄ла ма̄хманув ла̄внэ̄ныл щирыл, та па̄влыӈ ма̄ «Ялпыӈ а̄мп я̄ нёлыг» ла̄ввес. Ань тот пе̄с ма̄хманув хӯл алыщлам ос во̄раям пормасаныл, маснутаныл ос са̄всыр хурит суссылтавет. Ань пуссын ты выставкат ӯсувт о̄лнэ музейт 2014 та̄л оигпан мус тах рӯпитэ̄гыт. Матыр пӯмщалаӈкве тув ёхталэ̄н. 1090 2014.12.19. Николай МЕРОВ Сымын хо̄йнэ потрыт хаснэ нэ̄. А̄с-угорский институтт рӯпитан ма̄ньщи нэ̄ Светлана Селивёрстовна Динисламова мо̄лал Ягрим ос А̄нъя па̄влыгн мӯйлуӈкве ялыс. Ты нэ̄ ма̄ньщи ос рущ ла̄тӈыл стихотвореният ос потрыт хансы. Ос ня̄врамыт ма̄гыс ма̄ньщи ла̄тӈыл «Витсам» нампа журнал 2014 та̄л о̄вылтахтам па̄сныл та̄ратытэ. Па̄влыӈ ма̄хум ёт хо̄нтхатыгламе порат, тав та̄нанылн такви ва̄рум рӯпататэ урыл потыртас. Тав ла̄выс: – Ам са̄в ма̄т яласасум, са̄в ма̄хум ёт хо̄нтхатыгласум, Ягрим ос А̄нъя па̄влыгт иӈ ат о̄лсум. Таима̄гыс ща̄гтым тыг ёхтысум. Ма̄хум ёт хо̄нтхатыгланэм порат ты урыл потыртэ̄гум, хунь хо̄тпа такви пе̄с йис о̄лупсатэ та̄рапаттытэ, хунь ёмщакв ва̄гтэ, тав номтэ татем та ёмасыг е̄мты. Тав ля̄галан ла̄тыӈ акваг о̄ньщи, ма̄к тамле хо̄тпа ща̄нь ла̄тӈе э̄лаль ты тотытэ. Акв проектум щирыл ма̄ньлат хо̄тпат ма̄ньщи ла̄тӈыл ханищтыянум. Рӯпатам щирыл па̄влытн ва̄тихал ялантэ̄гум. Ань нэ̄пакыт та̄ратэ̄гум. Тот ка̄сыӈ па̄выл урыл мощломт хансэ̄гум ос по̄слум хуриянум тув ва̄риянум. Китыт рӯпатам щирыл ос ня̄врамыт ма̄гыс ма̄ньщи ла̄тӈыл журнал та̄ратэ̄гум. Кит та̄л ювле хультум порат о̄с акв тамле тэ̄ла щирыл рӯпитасум. То̄нт туп хӯрум нэ̄пак та̄ратасум. На̄нан тамле хӯлтнэ ла̄тыӈ ла̄ве̄гум, ань тамле субсидияолн миве, ты хосыт на̄н матыр проект ва̄руӈкве тахмае̄гын ке, ты субсидия хосыт тах нё̄таве̄н. Хо̄т матыр касыл ва̄руӈкв хунь патаве, на̄н на̄нки проектын суссылтаӈкве тот о̄с ве̄рмилын. Ёмащакв хансыслын ке, ты ва̄рмаль э̄лаль тотнэ ма̄гыс нё̄таве̄н. Тувыл китахкем та̄л ювле хультум юипа̄лт ам ос тамле ва̄рмаль щё̄питыгласлум. Омам о̄лме̄т ла̄выглас: «А̄гикве, ам о̄лнэм сыс, ва̄нэ рӯт хо̄тпанум наманыл нэ̄пакн хансэ̄н». Тувыл ам ты ва̄рмаль щирыл рӯпатам ва̄руӈкве о̄вылтаслум. Нэ̄пакн туп нила ло̄пс хассум. Омам атхуйплов та̄лэ нупыл минас, тав а̄тимыг е̄мтыс. Ос та хо̄тпат, хотьют нэ̄пакын хассанум, та̄н ма̄ньлат хо̄тпат номтанылт вос хультсыт, ураныл ам нэ̄пак та̄ратасум. Ты нэ̄пак рущ щирыл «Допиши свою историю» намаяслум. Тот ам са̄в ма̄ньщи хо̄тпа урыл хассум. Хоты та̄лт, хоты ма̄т тав самын патыс, хо̄т а̄тимыг е̄мтыс, хо̄т омагеа̄тяге о̄лсы̄г, о̄йкатэ, э̄кватэ ос ня̄враманэ урыл хассум. Насати, са̄выӈпа̄лэ ма̄ньщи хо̄тпат халанылт рӯтыг о̄лэ̄гыт. Та нэ̄пакт пуссын аквъёт акв со̄тыра атпан са̄т э̄лумхо̄лас урыл хассум ос атпан хури тув ва̄рсум. Ты нэ̄пак ань э̄лаль хансуӈкве таӈхилум. Ловиньтан ма̄хманумн о̄с сака нё̄тавем. Хотьют урыл хумус хансуӈкве э̄ри, та̄н хӯлтыглэ̄гыт. Са̄ртын ам радиот рӯпитасум. То̄нт са̄в ма̄ньщи хо̄тпа ёт хо̄нтхатыгласум. Татем пӯмащ потрыт хансыгласум. Ам номсэ̄гум, ты потрыт наска̄ссыг архивыт манрыг о̄ньщуӈкве патавет, о̄с пуссын нэ̄пакн хассанум. Тот Ивдельский районт Лопсъя, Овыӈъя, Улям тэ̄н па̄влыӈ хо̄тпат потраныл о̄лэ̄гыт. Ань ты та̄л, хунь нэ̄пакум ва̄руӈкве патыслум, мощща олныл майве̄сум, та̄рвитыӈ о̄лыс. Нэ̄пакум та̄ратан ма̄гыс маткем олн та киссум, юио̄вылт та̄ратаӈкве ве̄рмыслум». Светлана Селивёрстовна щё̄скем соссаӈ ма̄хум э̄лыпа̄лт такви нэ̄паканэ урыл потыртас ос стихотворениянэ ловиньтас. Ма̄хумн таве хӯнтлуӈкве сака мӯстыс. Потре оигпам юипа̄лт тав ка̄сыӈ хо̄тпан такви хансум нэ̄паке мӯйлуптастэ. Ты ма̄ньщи нэ̄ стихотворениянэ рущ ос ма̄ньщи ла̄тӈыл хансыянэ. Ма̄хумаквет, на̄н хуньт тав хансум нэ̄паканэ ка̄тынпаттыяны̄н ке, о̄с ловиньтэ̄н. Тав хансум потранэ ос стихотворениянэ ловиньтаӈкве сака кӯпнит, аквтупмат э̄рыг хольт овтэ̄гыт, сымын сака хо̄егыт. 1090 2014.12.19. Людмила Алгадьева Мӯтраӈ ма̄ньщи о̄йка. Ты э̄тпос 10 хо̄талэ̄т округув 84 та̄лэ то̄влыс. Ты кастыл Анатолий Николаевич Хомяков ка̄ркам хо̄тпа урыл хансэ̄в. Ты та̄л тав о̄с 84 та̄лэ то̄влыс. Хо̄нтаӈ ма̄ньщи о̄йка Кондинский район Половинка па̄вылт музей ӯнттыс. Ос тот о̄лнэ ма̄ньщит пе̄с пормасаныл тув акванатсанэ. 24 та̄л ювле хультум порат ва̄т са̄грапнал э̄тпос 10 щислат, округув янытлан хо̄тал кастыл, музей кол мир ма̄гсыл пунсыстэ. Ань тав пенсият о̄лы, а̄гитэ Галина Анатольевна Мостовых музей кӯщаиг рӯпиты. Анатолий Николаевич рӯпата та̄л ат ӯнлы, ка̄сыӈ хо̄тал музейн ёхталы. Тав ла̄выс: «Ам ма̄нь та̄гыл рӯпитаӈкве ханьщувласум, рӯпата та̄л о̄луӈкве ат ве̄рме̄гум. Ты талыт сыс хо̄т со̄тыра арыгкем пе̄с пормас акванатсӯв, то̄ват ам амки ва̄рсанум. Пормасыт о̄щнэ колнак ат о̄ньще̄в, тыи ма̄гсыл тох молях лю̄лиг е̄мтэ̄гыт. Ань ва̄тихал ёхталэ̄гум ос пормасыт мӯсхалыг щё̄питыянум». Ма̄ньщи о̄йка та ма̄т самын патыс, тот яныгмас, пенсиятэ мус колхозт рӯпитас. Пенсиян минаме порат Половинкат музей ва̄руӈкве вӯйхатас. Тав ётэ хо̄нтхатыгламум порат ва̄рум рӯпататэ урыл таи ла̄выс: «Па̄вылт музей ӯнттуӈкве хосат та̄гыл номт о̄щсум. Тувыл колхозт са̄в рӯпата о̄лыс ос ня̄враманум янмалтаӈкве э̄рыс. Тыи ма̄гсыл хунь пенсиян патхатасум, туп то̄нт музей ӯнттыслум. Ань тох номсэ̄гум, музей ва̄руӈкве са̄ртыннув э̄рыс. То̄нт ам омам ос мо̄т яныг хо̄тпат па̄вылт о̄лсыт, хо̄нтаӈ ма̄ньщит пе̄с о̄лупсаныл урыл са̄в ва̄сыт. Та порат ты рӯпата ва̄руӈкве ке о̄вылтахтасум, тыт са̄внув пе̄с пормас акванатсум. Ам омам хо̄нтаӈ ма̄ньщи ла̄тӈыл ёмащакв потыртаӈкве ха̄сыс, ма̄ниг о̄лмум порат ам о̄с ща̄нь ла̄тыӈ торгамтаслум. Тувыл рущ халт о̄лым ла̄тӈум хотёрувласлум. Омам 92 та̄лэ мус о̄лыс. Акв порат словарьнэ̄пак ва̄руӈкв о̄вылтахтыгласум. Ань номсэ̄гум, омам палт ка̄сыӈ хо̄тал ялантаӈкв э̄рыс, то̄нт са̄внув ла̄тыӈ нэ̄пакумн хансуӈкве ве̄рмынувум. Тамле рӯпата ва̄руӈкве ат а̄лымасум, ты ма̄гсыл ань сымум ща̄рги. Ань музейт хо̄нтаӈ ма̄ньщит то̄ва пе̄с пормасыт наманыл Та̄гт я̄ хосыт о̄лнэ ма̄ньщи ла̄тӈаныл щирыл хассанӯв. Музей котильт ам «Ялпыӈ ма̄» ва̄рсум. Тувыл ва̄глум, хо̄нтаӈ ма̄ньщитн ты ма̄ мо̄т щирыл ла̄выглавес. Ты ма̄ хумус ла̄выгласаныл, аты номилум». Анатолий Николаевич музей такви ӯнттыстэ. О̄влэ̄т миркол кӯщаит таве̄н щар ат нё̄тсыт, музей хунь ва̄рыстэ ос ма̄хум тав палтэ ёхталаӈкве патсыт, туп то̄нт мощ нё̄туӈкве патвес. Э̄лаль тав тох потыртас: «Акв порат мирколт ла̄вве̄сум, ты рӯпата э̄лаль вос ва̄рилум, тыт о̄лнэ ма̄ньщит пе̄с йис ва̄рмаляныл э̄лаль вос тотыянум. Ты юипа̄лт па̄выл клубн баянистыг хасве̄сум, олныл ойтуӈкве патве̄сум. Тох кит манос хӯрум та̄л баянистыг ловиньтахтасум, туп ты юипа̄лт музей нэ̄паканэ пуссын ва̄рсанум. О̄влэ̄т амккем тыт рӯпитасум, амки кӯщаиг, научный сотрудникыг, охранникыг, хранителиг о̄лсум. Тувыл а̄гим тыг рӯпитаӈкве во̄выслум. Ань тыт лов э̄лумхо̄лас рӯпиты, ка̄сыӈ хо̄тпа такви рӯпата о̄ньщи». Мӯтраӈ, ка̄ркам ма̄ньщи о̄йка ёт потыртаӈкве сака пӯмащ о̄лыс, о̄лупсатэ урыл ос музей урыл сака са̄в потыр о̄ньщи. Тав потранэ мо̄т газетат тах хансыянум.