МАҲАЛЛИЙ ХОМАШЁЛАРДАН ИШЛАБ ЧИҚАРИЛГАН ШАКЛДОР ИПЛАРНИНГ ҲАЖМДОРЛИК ҲОЛАТИНИ КЎРИБ ЧИҚИШ

Мақолада маҳаллий хомашёлардан термик ишлов бериш усулида олинган шаклдор ипларнинг ҳажмдорлик хусусияти ўрганилган. Хомашё сифатида кимёвий иплар, яъни 17,4 ва 19,8 тексли полиэфир ва 16, 3 ва 23,4 тексли вискоза иплари олинган. Танлаб олинган кимёвий ипларнинг термик ишлов беришга кўрсатган таъсиридан келиб чиқиб, турли нисбатларда эшилган ип намуналари олинган. Ипларга 50, 100, 150, 200, 250, 300, 350, 400 бр/м берилган. Термик ишлов бериш қуруқ ва нам иссиқ муҳитда олиб борилган. Ишлов бериш давомийлиги 2, 5, 10, 15 ва 20 минут, ишлов бериш 40, 50, 60, 70, 80 ва 90^оС ҳароратларда олиб борилган. Ишлов берилган ипларнинг ҳажмдорлиги ўрганилганда, 50, 100, 150 бр/м бурам берилган иплар юқори ҳажмдорлик хусусиятларини кўрсатган ва бу натижаларга ишлов бериш давомийлиги 15, 20 минут ва  80, 90^оС ҳароратда эришилган. Иплардаги ҳажмдорлик хусусияти 1 м ипдаги ихтиёрий кесмаларни танлаб олиб тадқиқ қилиш орқали кўриб чиқилган. Кесиб олинган ихтиёрий кесмаларнинг массаси, чизиқли зичлиги, диаметри ва ҳажми аниқланган. Олинган натижалар бўйича Maple дастуридан фойдаланиб графиклар қурилган ва таҳлил қилинган.