Ukwakha Kabutjha Nokuvuselela Imisebenzi Ekuphilwa Ngayo Ngemva Kweenkhukhula    

Vukuzenzele Unnamed

Pheze seziinyanga ezimbili solo iinkhukhula ezinamandla zagiriza zabanga umonakalo omkhulu kezinye iindawo zaKwaZulu-Natala, ePumalanga Kapa neTlhagwini Tjingalanga, lapho zabulala khona abantu, zagiriza imizi, imakhiwo nemithangalasisekelo.
Khengavakatjhela eThekwini eKwaZuluNatala mhlapha ngayokubonana nabosomabhizinisi kilelidrobha kobanyana ngizobasekela emizameni yabo yokuvuselela  imisebenzabo.                      
Lokhuya nakwenzeka lehlekelele yemvelo, kwaba nevalo lokuthi iimphathimandla azizukuba namandla, azizukuba naso nesifiso sokusiza kuhle ngendlela elisizo elibonakalako ebujameni bamatlhuwo balabo abalahlekelwe ngikho koke.                      
Ngemva kobana sengikhe ngavakatjhela idrobheli kwesibili solo kwasahlela iinkhukhula, nginesiqiniseko sokuthi lelavalo ebelikhona lehlile. KwaZulu-Natala, njengePumalanga Kapa, neTlhagwini Tjingalanga, boke ababelani bebasebenza ngamandla ukuthi bavuke kilamahlungu abasele kiwo.                                    
IZiko lokuLawula iHlekelele eliZweniloke belithungelela zoke iingaba zikarhulumende emizameni yokusiza amakhaya amanengi asahlelwe ziinkhukhula ngesizo lobuntu.  Kube yinto ethabisako ukubona  iinhlangano ezingasizombuso, abosomabhizinisi neenhlangano zesizo zihlanganyela ukusebenzisana norhulumende kulethwe isizo ebelifuneka khulu lokulamulela abantu ebebasesihlengeleni.
Boke ababelani banikele ngokugoma, ngezambatho, ngeengubo, izinto zokuhlanzekisa umzimba kunye nangejinifomu yesikolo emindenini ebeyisesihlengeleni kobanyana izokuphumelelisa iindingo zayo zangemihla.
Njenganje bazii7 000 abantu abasizwa ngokutholelwa iindawo zokuhlala eenyingini ezine ezingezigirikelwe khulu KwaZulu-Natala.  Sewuthomile nomsebenzi wokwakha iindawo zokuhlalisa imindeni ethintekileko kwesikhatjhana endaweni yombuso. Sezikhonjiwe neendawo ekuzakuthuthelwa  kizo abantu abasesihlengeleni khona KwaZulu-Natala.                            
UmNyango wezangeKhaya, nomNyango wezePilo nezokuThuthukiswa komPhakathi beyisiza iindawo ezithintekileko kobanyana zikghone ukuthola izenzelwa eziqakathekileko.
Isibonelo, ama-ofisi abo makhamba ngendlwana asiza labo abalahlekelwe ziincwadi eziqakathekileko eenkhukhuleni ukuthi bathole abomazisi (ama-ID) abatjha bamakarajana, babe benzelwe neentifikethi zokubelethwa ezitja.
Eendaweni lapho kungakabukuba namaziko wezepilo asebenza ngokupheleleko, abantu bathunyelwa amatlinigi abomakhamba ngendlwana, hlangana nawo ekubalwa nalawo wokujovela iCOVID-19.
Sekwenziwe namahlelo  wokuthi basizwe ngesibonelelo (semali) sembusweni abantu abathintekileko kilokhu.
Amatlasi abomakhamba ngendlwana asabuthelelwa, kobanyana ukufunda nokufundisa kungazokuliyeka ukudlula lesisikhathi esele kuliyeke ngaso eenkolweni zeendawo lapho kusahlele khona iinkhukhula.   
Sewuthonyiwe nomsebenzi wokuvuselela iindawo zokuhlanzekisa amanzi, neenteyitjhi ezipompa amanzi kunye namahlelo wokukhambisa amanzi. Ziyalungiswa neendlela ezonakeleko.
Ali-18 amabhlorho amatjha alungiselelwa ukwakhiwa njengengcenye yehlelo le-Welisizwe Rural Bridges.
Yihle indima esele yenziwe ngokulungisa umthangalasisekelo oqakathekileko osekela iKhumulo lemiKhumbi le-Durban. Njengoba lelikhulumulo liqakatheke kangaka nje elizweni njengesika yomnotho welizwe lekhethu newekhonthinenthi ye-Afrika yoke, izinto ezithuthela nezithutha ipahla kilelikhumulo sezibuyiselwe ehlelweni lazo  lokusebenza elijayelekileko, umsebenzi wokukhweza nokwehlisa sewubuyele ngokupheleleko endimeni yokusebenza, kanti sewuthomile nomsebenzi wokuvuselela umthangalasisekelo wesiporo owonakeleko.                   
Kusahlanganiswa amanye amahlelo  wokusiza amabhizinisi amancani namakhulu kilawo acaphazeleke kumbi. Lokhu-ke kuyinto erhabekileko, kobanyana amabhizinisi azokuhlala asebenza, nabantu bangazokonakalelwa  misebenzi
Ngeenkhathi ezihlukileko emlandweni welizwe lekhethu wehlelo lentando yenengi, sikhe sahlangabezama nezehlakalo nobujamo obulinge amandla wabantu bekhethu wokurarulula imiraro kunye namandla wekghono lesisekelo sethu.
Sibone ukuzwelana okunamandla ngendlela engakajayeleki nesekelo ebantwini abacaphazelekileko KwaZulu-Natala, ePumalanga Kapa kunye neTlhagwini Tjingalanga.
Abomasipala kunye naborhulumende beemfunda bebasebenzisana ngokubambisana neminyango karhulumende omkhulu neenjamiso ezithunywe ukusiza kobanyana kusizwe abantu kobana bavuselele ipilwabo babe babuyise nemisebenzi yomnotho yeendawo  ngeendawo.
Bebasebenzisane nabo boke ababelani kizo zoke iindawezi ukuqinisekisa ukuthi yoke imisebenzi yokuvuselela nokwakha ngobutjha ihlangana kuhle besikghone nokuhlela besakhe ngobutjha ngendlela ezakwenza ukuthi ngomuso izehlakalo ezinje sibe namandla angcono wokujamelana  nazo.                                    
Ukubambelela kwabantu eendaweni ngeendawo ezithintekileko, ukuzibophelela kwabo, ukuphumelela kunye nekghono labo lokuhlangana babe yinyanda ngeenkhathi zobudisi kube sikhuthazo esikhulu.
Sibathokoza asiwuvali umlomo boke labo ababe yingcenye yomzamo wokusiza abantu beemfunda ezithintekileko.
Njengorhulumende, sikhwezelela yoke imithombo yamandla ekhona besizibophelela ngakho koke ukuqinisekisa ukuthi kungabi namuntu ozakusala ngemva njengoba sivuselela, sisakha ngobutjha nje.
