I-Operation Vulindlela ivula indlela yekukhulisa umnotfo

Vukuzenzele Unnamed

Umnotfo waseNingizimu Afrika, njengawo wonkhe umnotfo, angeke usebente, futsi angeke ukhule, ngaphandle kwekusebenta nekucudzelana kahle kweluchungechunge lwetimboni. Letimboni leti – letifaka ekhatsi gezi, emanti, tigitjelwa netekuchumana ngetincingo – tingumtsambo wekuphila kwetemnotfo.
Tinkinga letimayela nekuhleleka kulomkhakha tabonwa kudzala taba nguletinye tihibe letihamba embili ekukhuleni kwemnotfo waseNingizimu Afrika.  Kungasebenti kahle kanye netindleko letisetulu tenethiwekhi kuvimbela kwenta ibhizinisi kulelive.
Kubukana nekusombulula letinseyeya, sisungule iOperation Vulindlela ngeMphala 2020 njengalenye indlela yelihhovisi laMengameli neleMgcinimafa Wave lonkhe yekunika emandla tingucuko tekuhleleka kuloluchungechunge lwetimboni.  Ngalesikhatsi ematiko netikhungo tahulumende tenta letingucuko, iOperation Vulindlela  yona itawugadza futsi ibuke tinseyeya netihibe. Lapho kudzingeka khona, itawuniketa kusekela lokufanele kulamatiko.  Lombiko wekota losandza kuphuma uchaza kahle umsebenti losewentiwe yiOperation Vulindlela  kanye nematiko lanemsebenti wekwenta letingucuko.
Kuwo wonkhe hulu-mende, sigcile kakhulu kutingucuko letisisekelo naletiletsa luntjintjo; letitawenta kabusha indlela lensha yekusebenta kwemnotfo wetfu.
Loku kufaka kufakwa endalini kwebuchakachaka betekuchumana ngemagagasi emoya, lokubanjelelwe iminyaka lengetulu kwalelishumi lokugcine kucedzelwa ngeNdlovulenkhulu. Lokukhululwa kwalobuchakachaka lobusha kutawutfutfukisa kuchumana futsi kwehlise tindleko tedatha.
Kusungulwa kweLuphiko Lwetemachweba Avelonkhe abe incenye lengaphansi kwe-Transnet lomnyaka lowengcile kwabambeleleka ngeminyaka lengetulu kwelishumi nesihlanu. Loku bekusinyatselo sekucala lesimcoka lesenta kutsi kungene umkhakha lotimele nesekukhulisa kusebenta kahle kwematheminali emachweba.
Siphindze futsi sabuyisa luhlelo lweBlue Drop, lweGreen Drop nelweNo Drop kwekucala kusuka ngemnyaka we-2014 kucinisekisa kutsi silandzelela kahle kusetjentiswa nekusebenta kwemanti lasezingeni.
Sishicilele saphindza sabuyeketa Luhlu Lwemakhono Labucayi, nawo kwekucala kusukela ngemnyaka we-2014.
Loku kunguletinye tibonelo letikhomba kutsi, ngekufaka emandla kumitamo nasekubukisiseni tingucuko letimbalwa leticaliswa embili, lohulumende lona ukhonile kuta nenchubekela embili.
Ngekusebentisa iOperation Vulindlela , sikhonile kulandzela indlela lenembako kakhulu nalefaka konkhe kuletingucuko, lecinisekisa kuchumana lokuncono lapho khona kungenelele ematiko lahlukahlukene netikhungo.
Sibonelo lesihamba embili saloku sikulomkhakha wetemandla, lapho kube khona tingucuko letinengi letimcoka, letinekuchumana letitawentiwa kute sintjintje indlela lesiphehla ngayo gezi nalesiwusebentisa ngayo.  Lokucophe umlandvo kufaka ekhatsi kukhushulwa kwemkhawulo wemalayisensi emiklamo lemisha yekuphehla gezi iye ku-100MW, kuvumela lemiklamo kutsi ichume kumzila lomkhulu nekutsi itsengisele bantfu gezi.
Sibuyekete Luhlelo Lwekutsenga Gezi Kubakhiciti Labatimele ngekuvula sikhatsi lesisha sekufaka ticelo.
Tingucuko kumitsetfo mgomo mayelana nekukhicita kabusha emandla tivumele bomasipala kutsi batitsengele gezi kwekucala ngca. Futsi tingucuko temtsetfo titawubanga kutsi kube nekuchudzelana lokusha kumakethe yegezi, letawusekelwa kushicilelwa kweMtsetfosivivinywa Wekuchibiyela Tinchubo mtsetfo Tegezi futsi umsebenti wekuchibiyela Inchubomgomo Yetindleko Tagezi usentiwa.
Luhlelo lwekuhlukanisa tigaba te-Eskom lusendleleni, lapho khona lesikhungo sihambisana nesikhatsi lesibekiwe lesiyiNgongoni 2021 sekutsi kusungulwe Inkampani Yavelonkhe Yekukhicita Gezi. NgeNgongoni kulomnyaka sinelitsemba lekutsi sitawucedzela kuhlukanisa letigaba teEskom tekukhicita nekusabalalisa gezi.  Umbiko wekota uchaza letinye tintfo letinengi letentiwe, kanye netindzawo lapho kusadzingeka kusentiwe khona umsebenti lomkhulu.
Kulomkhakha wemanti, iOperation Vulindlela  beyiniketa kusekela lokubucayi kuLitiko Letemanti Nekutfutfwa Kwendle kute kube neluhlelo lwekugucula simo kulokuniketwa kwemalayisensi ekusebentisa emanti, ngenhloso yekuphotfula ticelo leti-80% etinsukwini leti-90.
Umsebenti wekusungula i-Ejensi Yavelonkhe Yesa  khiwonchanti Semitfombo Yemanti usetawenti wa letawucinisekisa kulawulwa kahle kwemitfombo yavelonkhe yemanti.
Kumkhakha wetigitjelwa, kungasebenti kahle kwemachweba nemizila yetfu yetitimela kube nemtselela lomkhulu kulamandla etfu ekuhambisa imphahla emaveni angaphandle. Umsebenti wekucala wekusebentisana nemkhakha lotimele usetawentiwa kute kutjalwe timali kusakhiwonchanti semachweba nekutfutfukisa kuphatfwa kwematheminali eticukatsi kumachweba aseThekwini naseNgqura.
Umbiko Wahulumende lomayelana neNchubomgomo Yavelonkhe Yetemizila Yetitimela, lowavunywa yiKhabhinethi ngeNdlovulenkhulu, ubuka kahle tindlela tekuvuselela sakhiwonchanti semzila wetitimela nekuvumela labanye balingani labatimele kutsi basebentise Imizila Yetitimela te-Tra  nsnet. Luhlelo lolusebenta ngalokuphelele lwee-Visa lusunguliwe emaveni la-14, lafaka ekhatsi lamanye emave latimakethe letinkhulu tetfu tekuvakasha.
Kubuyeketa lokukhulu kweluhlelo lwekusebentisa ivisa nalo lusalungiswa kute sikhone kuheha emakhono ladzingwa live lakitsi.
Letingucuko tibangwe kutsi kube nekusebentisana nematiko lahlukene ahulumende lasebentisa luhlelo lwekusebentisana kuletsa tingucuko.
Senta lubito kubosomabhizinisi nebatjalimali kutsi batsatse lelitfuba letingucuko letitawulandzela kutsi bantjintje tetsembiso tabo nekutibophelela kwabo kube ngilokubambekako, lokutawakha lutjalomali lolutawuvula ematfuba emsebenti.