Phepo ya dijo mo dikolong e netefatša gore bana ga ba phele ka tlala

Vukuzenzele Unnamed

Bana bao ba ka fetago dimilione tše senyane ba amogela dijo tša phepo dikolong gomme se ke ka lebaka la Lenaneo la Bosetšhaba la Phepo ya Bana ba Dikolo (NSNP), leo le tsebagaditšwego ka ngwaga wa 1994.
Lenaneo le le ikemišeditše go kaonafatša bokgoni bja bana bja go ithuta, ka go fokotša phepompe le tlala le go kaonafatša go tsena sekolo ga bana, kudukudu ka dikolong tšeo di hlokišitšwego menyetla.
“Lenaneo le le bohlokwa go tšwetša pele ditokelo tša baithuti tša molaotheo go phepo ya motheo le go thuto ya motheo,” gwa hlaloša Motlatšatona wa Thuto ya Motheo Ngaka Reginah Mhaule.
Ka lebaka la NSNP, bana ba bantši ba tla sekolong ka nako ebile ba tla ka mehla, gomme go theeletša ga bona ka mephatong go kaonafetše.
Go ya ka Kgoro ya Thuto ya Motheo (DBE), bana ba rutwa ka ga mekgwa ye mekaone ya go ja le ya mekgwa ya bophelo.
Dikolo di hlohleletšwa go hloma dirapana tša tšona tša dijo gore di kgone go tlaleletša tša lenaneo la dijo la NSNP. Baithuti, barutiši le batswadi ba rutwa go tšweletša dijo tša bona ka dirapaneng.
Difoka tša NSNP
Sekolo sa Phoraemari sa Thabang ka Bethlehem, Forei setata, ke se sengwe sa dikolo tše di holegago go NSNP.
Sekolo se se sa tšwa go thopa Sefoka sa Sekolo se Sekaone sa go Sepediša lenaneo la NSNP.
 Difoka tše di keteka mana-neo a phepo a dikolong ka go lebeledišiša ditiro tša ona tša pabalelo ya maphelo le tša polokego, dijo tša phepo, dirapana tša dijo le thuto ka ga phepo.
“Ke thabile kudu ge sekolo se se thopile sefoka,” gwa  bolela Seyanokeng Sejake, yo a nago le sebaka sa mengwaga ye 24 e le hlogo ya sekolo sa Phoraemari sa Thabang.
Sekolo sa Phoraemari sa Thabang se thomile go sepetša lenaneo la sona la phepo go tloga ka 1994. Lehono, se netefatša gore baithuti ba sona ba 1 065 ba hwetša dijo tša mesong tša phepo letšatši le lengwe le le lengwe tše di rekwago dikgwebong tša mo motseng.
Dijo di apewa ke maloko a setšhaba ao a sa šomego, bao ba thwalwago ke lekgotlataolo la sekolo (SGB).
Dijo tšeo di abilwego ke Kgoro ya Thuto ka go abela  sekolo se ditšhelete di apea ke baapei ba dijo ba tshela bao ba thwetšwego ka go ithaopa (VFH),” gwa bolela Sejake.
Yo mongwe le yo mongwe wa bašomedi ba di-VFH o hwetša letsenonyana le lennyane go mo leboga ka mošomo wa gagwe wa go apea dijo.
Sekolo sa Phoraemari sa Thabang se amogetše tlhompho ye kgolo ka moletlong wa kabo ya difoka ka lebaka la ge se šomile kudu gomme se gape ke ka lebaka la boikgafo bja SGB ya sona, sehlopha sa taolo le Komiti ya NSNP ye e šomago gabotse, gwa bolela Sejake. “Go tsena ka nako ke seo se dirwago letšatši le lengwe le le lengwe. Ga re dumelele gore baithuti ba se tle sekolong ka ntle le lebaka leo le kwagalago, ebile ga re na le bao ba tlogelago dithuto pele ba ka di pheta. Go theeletša ka šedi ga baithuti ba rena le go šoma gabotse mešomong ya bona ka moka ya sekolo le gona go kaonafetše,” a tlaleletša ka go realo.
Ka ge mpho ya ge re thopile sefoka e le khitšhi ya maemo a godimo ye e agilwego ke Tiger Brands Foundation, lenaneo la phepo la sekolo se le tlo kaonafala le go feta.
Sekolo se netefatša gape  gore go na le kabo ya dijo ye e lekanego yeo e laolwago gabotse, go netefatša gore go dula go na le dijo ka mo lenaneong le.
“Go fa mohlala, re na le serapana sa dijo seo se abago merogo go tlaleletša dijo tša NSNP,” gwa hlaloša Sejake.
Bathopadifoka
Ka go legoro la Dikolo tše Kaone, sekolo sa Grootdrink Intermediate, ka Seleteng sa Mgcawu District ka Kapa Leboa, se hweditše maemo a bobedi; gomme Sekolo sa Phoraemari sa Aaron Gqedu, ka Nelson Mandela Bay ka Kapa Bohlabela, se hweditše maemo a boraro.  Di tlo hwetša ditlabelo tša ka khitšhing go tšwa go Kgoro ya Thuto ya Motheo.
Sefoka se Sekaone sa ka Seleteng se thopilwe ke Umzinyathi (KwaZulu-Natal). Selete sa ZF Mgcawu (ka Kapa Leboa) se hweditše maemo a bobedi gomme sa Metro North (ka Kapa Bodikela) sona se hweditše mae mo a boraro. Selete se sengwe le se sengwe se thopile ditlabelo tša ka ofising le tša dikhomphutha.
Ka 2020/21, NSNP e fepile bana ka dikolong tše 21 189 ka dijo.