Ihlelo Lokuphakela Abantwana Liqinisekisa Bona Abahlwi Ngendlala 

Vukuzenzele Unnamed

Abantwana abangaphezu kweengidi ezilithoba bafumana ukudla okunepilo eenkolweni ngesizo leHlelo leliZweloke lokoNdliwa eenKolweni (i-NSNP), elahlonywa ngomnyaka we1994. Lelihlelo linqophe ukukhuphula ikghono labantwana lokufunda, ngokunciphisa ukungondleki kuhle nendlala nokukukhuphula ukukarekela kwabentwana ukuya esikolweni, khulukhulu eenkolweni ezadinywa amathuba ngaphambilini.
“Ihlelweli liqakathekile ekuthuthukiseni amalungelo wabafundi, lawo anzinze kumThethosisekelo wokufumana ukudla nefundo esisekelo,” kutjho iSekela likaNgqongqotjhe wezeFundo esiSekelo uDorh. Reginah Mhaule. Ngesizo le-NSNP, banengi abantwana abafika esikolweni ngesikhathi begodu baya  esikolweni ngamalanga bekuthi nezinga lokulalela nokuzwisisa kwabo ngetlasini libe ngcono.
NgokomNyango wezeFundo esiSekelo (i-DBE), abafundi bafundiswa imikgwa emihle yokudla neyepilo.
Iinkolo ziyakhuthazwa ukutjala imirorho ema baleni wesikolo ukungezelela imenyu ye-NSNP.
Abafundi, abotitjhere nababelethi bafundiswa ukuzilimela ukudla kwabo.
Abonongorwana be-NSNP
I-Thabang Primary School ese-Bethlehem, eFreyistata, ingesinye seenkolo esizuzako kile-NSNP.
Isikolwesi sithumbe mhlapha unongorwana  i-NSNP Best School Award.
Unongorwana lo ubuka amahlelo wokudla eenkolweni ngokutjheja ikambiso yokuphepha neyezepilo, ukudla okunepilo, iingadi zemirorho nefundo ethe tjha  eza ngokudla okunepilo.
“Ngithabe khulu ukuthi isikolwesi sithumbe unongorwana,” kwatjho u-Seyanokeng Sejake, onguTijherehloko osele aphethe i-Thabang Primary School iminyaka ema-24 edlulileko.
I-Thabang Primary School selokhu iziphathele ihlelo lokudla okunepilo ukusukela ngomnyaka we-1994.
Namhlanjesi, ihlelweli liqinisekisa ukuthi abafundi abayi-1 065 qobe lilanga bafumana ukudla kwekuseni okunepilo okunikelwa libhizinisi elisemphakathini.
Ukudla kuphekwa malunga womphakathi  angasebenziko, akhethwa mKhandlu oLawula isiKolo (i-SGB).
“Abasebenza ngokuzinikela abasithandathu ekungibo abalawula  ukuphakelwa kokudla (ama-VFH) bapheka ukudla okunikelwe  mNyango wezeFundo esiSekelo ngokweemali ezabelwe isikolo,” kutjho u-Sejake.
Umvolontiyi ngamunye we-VFH ukhongozela isibonelelo somsebenzi wokupheka ukudla.
I-Thabang Primary School iphume phambili ngabonongorwana ngokusebenza ngamandla nokuzinikela  kwe-SGB yayo, abaphathi neKomiti ephilako ye-NSNP, kutjho u-Sejake.
Ungezelele ngokuthi, “Ukugcina isikhathi kilesi isikolo siphetho. Asikuvumeli ukulova ngaphandle kwesizathu esizwakalako begodu asinabo abantwana abalisa isikolo phakathi.
Izinga lokulalela nendlela abasebenza ngayo kukhuphukile”.
Njengombana umtlomelo wokuthumba kukukwakhelwa iKhwitjhi lesimanjemanje elakhiwe yi-Tiger Brands Foundation, ihlelo lesikolo lokudla lizokuba ngcono khulu.
Isikolo siqinisekisa  ukuthi kuhlale kunokudla okwaneleko okuphathwa ngefanelo, ihlelweli lihlale linokudla.
“Isibonelo, sinengadi esikha kiyo imirorho yoku zaliselela isabelo se-NSNP,” kwahlathulula u-Sejake.
Abathumbi Bakanongorwana 
Emkhakheni weeNkolo eziphume phambili, i-Grootdrink Intermediate esesiYingini seMgcawu eseTlhagwini Kapa, siphume Ebujameni besiBili; begodu i-Gqedu Primary School, ese-Nelson Mandela Bay, ePumalanga Kapa, saphuma ebuJameni besiThathu. Bazokufumana iinsetjenziswa zangekhwitjhini ezinikelwe mNyango wezeFundo esiSekelo.
UNongorwana wesiYingi esiPhume phambili uthunjwe siyingi Umzinyathi (KwaZulu-Natala). I-ZF Mgcawu District (eseTlhagwini Kapa) yathatha ubujamo besibili godu i-Metro North (eseTlhagwini Kapa) yathatha ubujamo besithathu. Isiyingi ngasinye sithumbe iinsetjenziswa zange-ofisini nemitjhiningqondo.
Ngomnyaka wee-2020/21, i-NSNP yapha abantwana ukudla eenkolweni ezizii-21 189.
