Sesisondzele Sikhatsi Sekuphela Kwesimo Senhlekele e-SA

Vukuzenzele Unnamed

Mengameli Cyril Ramaphosa usandza kumemetela Enkhulumeni Yebunjalo Besive (i-SoNA) yakhe yemnyaka we-2022 kutsi hulumende uhlele kususa Lesimo Savelonkhe Senhlekelele njengoba lelive lingena kusigaba lesisha sekulawula lobhubhane Wesifo Seligciwa ne leKhorona (iCO VID-19).
“Kuyinhloso yetfu kucedza Simo Senhlekelele Yavelonkhe masinyane uma sesivumelene ngaletinye tindlela letingaphasi kweMtsetfo Wavelonkhe Wetemphilo kanye naleminye imitsetfo  yekulawula lobhubhane,” kusho Mengameli.
Mhla ti-15 Indlovulenkhulu 2020, Mengameli Ramaphosa wamemetela leSimo Senhlekelele Yavelonkhe ngekulandzela Umtsetfo Wekulawula Inhlekelele futsi wamemetela tindlela letehlukahlukene tekuvikela kucubuka kweCOVID-19.
Mengameli Ramaphosa utse cishe yonkhe imibandzela lemayelana netemnotfo netenhlalo sevele isusiwe, ikakhulu ngenca yalokwetfulwa kwaloluhlelo lwekuphakelwa  kwemitsi  yekugoma. Ukhumbute bantfu kutsi imitsi yekugoma iyincenye  lencono yekuvikela kugula, kufa neCOVID-19, lesevele itsetse imiphefumulo yebantfu lecishe ibe-100 000 eveni letfu.
“Bengisolo ngisho ngekubona kwami kutsi, uma ngabe bengingakagomi, ngeNgongoni ngesikhatsi ngibanjwa yiCOVID-19, ngiyatsemba kutsi ngabe akusimi lome lapha,” wabeka njalo.
Mengameli utsatse lesikhatsi kuncusa bantfu baseNingizimu Afrika kutsi batfole lomtsamo losindzisa imphilo futsi bachubeke nekulandzela tindlela tetemphilo letisisekelo nekutsi bahlale bacaphele njalo.
“Sitawukhona kuchubeka ngetimphilo tetfu, nanoma ngabe leligciwane lisemkhatsini kwetfu,” usho njalo, wangeta ngekutsi leligciwane likhulise ligeba lelisemkhatsini kwalabo labasebentako nalabo labangasebenti.
Sikhwama Sekubumbana
Mengameli Ramaphosa wamemetela kutsi leSikhwama Sekubumbana sitfole emabhiliyoni la-R3.4 lavela ebantfwini baseNingizimu Afrika nakutinkhapani, ngaleso sikhatsi bantfu labangetulu kwe-400 netinkhapani leti-100 bavolontiya ngesikhatsi sabo nangetinsita tabo.
“Lesikhwama sadlala indzima lenkhulu kusekela kumphendvulo yetemphilo tavelonkhe nasekucedzeni lenhlekelele lebukene nelive letfu kanye nebantfu  bakitsi.” Ubonge wonkhe umuntfu lonikelile kuleSikhwama, lokufaka ekhatsi Emalunga Ephalamende kanye naletinye tindlela tekusekela labo labatsintsekile ngalobhubhane.
Mengameli uphindze watfula sigcoko kuletisebenti tetemphilo letinengi naletinye tisebenti letenta umsebenti lobucayi etikhungweni tetemphilo letidlale indzima lenkhulu ekulweni neCOVID-19.
“Sive kufuneka sibonge kakhulu kuletisebenti tetemphilo ngekutibophelela kwato nakuleto letenta umsebenti lobucayi ngekutidzela ngemphilo yato nangekubeka imphilo yato engotini kute tinakekele labagulako nalabo lababutsakatsaka ngalekhatsi,” usho njalo.  – SAnews.gov.za
