Go fedišwa ga Seemo sa Masetlapelo ka Afrika Borwa go bonala go le kgauswi

Vukuzenzele Unnamed

Mopresidente Cyril Ramaphosa o sa tšwa go bolela nakong ya Polelo ya Maemo a Setšhaba (SoNA) ya 2022 gore mmušo o beakanya go fediša Seemo sa Masetlapelo sa Bosetšhaba ka ge naga e tsena legatong le leswa taolong ya leuba la Bolwetši bja Kokwanahloko ya Khoro na (COVID-19).
“Ke maikemišetšo a rena go fediša Seemo sa Masetlapelo sa Bosetšhaba ge re se no fetša go tla ka mekgwa e mengwe ka tlase ga Molao wa Maphelo wa Bosetšhaba le melao e mengwe ya go re kgontšha go laola leuba le,” gwa realo Mopresidente.  Ka la 15 Hlakola 2020, Mopresidente Ramaphosa o ile a goeletša nako ya Seemo sa Masetlapelo sa Bosetšhaba go ya le ka Molao wa Taolo ya Mase tlapelo gomme a tsebiša le mekgwa ya go fapafapana ya go laola go phulega ga COVID-19.
Mopresidente Ramaphosa o rile dikiletšo go tša ikonomi le leago di nyakile di fedišitšwe ka moka, gomme seo se hlotšwe ke go abja ga meento.
O gopoditše badudi gore meento ke yona mokgwa wo mokaonekaone kgahlanong le go lwala, lehu le COVID-19 yeo e bolailego batho ba palo ya go batamela 100 000 ka mo  nageng.
“Ke phela ke bolela ke re ge nkabe ke se ka entelwa ge ke be ke fetelwa ke COVID-19 ka kgwedi ya Manthole, mohlomongwe nkabe ke se ka ema mo lehono,” a realo.
Mopresidente o tšeere nako go hlohleletša Maafrika Borwa go hlabelwa moento o wa go boloka maphelo, le go tšwela pele go latela mekgwa ya motheo ya go itšhireletša ba be ba dule ba ntšhitše mahlo dinameng.
“Re tla kgona go tšwela pele ka bophelo le ge kokwanahloko e sa le gona,” a realo, ebile a tlaleletša ka gore leuba le hlotše karoganyo e kgolo  gareng ga bao ba šomago le bao ba sa šomego.
Sekhwama sa Solidarity 
Mopresidente Ramaphosa o tsebišitše gore Sekhwama sa Solidarity se kgobokeditše tšhelete ya go lekana dibilione tša diranta tše 3.4 yeo e lego meneelo ya go feta ye 300 000  go tšwa go Maafrika Borwa le dikhamphani, mola batho ba go feta 400 le dikhamphani tša go feta 100 di ithaopile go thuša ka ditirelo tša tšona.
“Sekhwama se ralokile karolo e bohlokwa thekgo ng ya karabelo ya tša maphelo ya bosetšhaba le go fediša masetlapelo ao a  wetšego batho le naga ya borena.”
O lebogile batho ka moka bao ba tsentšhitšego mašeleng ka sekhwameng, go balwa le ba bangwe ba Maloko a Palamente, mmogo le mananeo a mangwe a go thekga bao ba amilwego ke leuba.
Mopresidente o ile gape a lebiša ditebogo go bašomedi ba tša maphelo le ba tša ditirelo tše bohlokwa ba bantšhi bao ba ralokago karolo e bohlokwa ntweng kgahlanong le COVID-19.
“Setšhaba se tloga se leboga kudu bašomedi ba tša maphelo mmogo le bašomedi ba bangwe ba ditirelo tše bohlokwa bao ba beilego maphelo a bona kotsing ba hlokometše bao ba lwalago le bao ba lego kotsing mo nakong ye,” a realo. – SAnews.gov.za