Iseduze Nokuphuma Ebujameni Behlekelele ISewula Afrika 

Vukuzenzele Unnamed

UMengameli u-Ramaphosa  umemezele mhlapha eKulumeni yakhe yobuJamo beliZwe yomNyaka wee-2022 (i-SoNA), ukuthi urhulumende ulungiselela ukubuqeda ubuJamo beHlekelele iSewula Afrika ekibo njenganje, njengoba ilizwe lingena esigabeni esitjha sokulawula isifo sengogwana i-Corona (i-COVID-19) ebesirhagele.
“Sinqophe ukubuqeda ubuJamo beHlekelele eliZweniloke nasiqeda ukusebenza ngamanye amagadango ngaphasi komThetho wezePilo weliZweloke neminye imithetho ukulawula isifesi,” kutjho uMengameli. 
Ngomhla we-15 kuNtaka wee-2020, uMengameli u-Ramaphosa wamemezela ukuthi iSewula Afrika se yifakwe ngaphasi kobuJamo beHlekelele, ngokomThetho wokuLawulwa kweHlekelele, wabe wamemezela nerherho lamagadango ekufuze alandelwe ukulawula ukwehla kwayo i-COVID-19.
UMengameli u-Ramaphosa uthi pheze yoke imibandela kezomnotho nezintweni ezenziwa mphakathi seyisusiwe; lokho-ke kusizwe khulukhulu lihlelo lokuhlabela i-COVID-19.
Ukhumbuze izakhamuzi ukuthi imijovo isikhali esihle kinazo zoke zokuzivikela ezifeni ekuguleni, ekufeni kunye nesifeni se-COVID-19 esele sibulele pheze i100 000 ekhethwapha.
“Ngiphele ngithi mina ngombonwami, nangathana  ngangingakahlabi, ukubanjwa kwami yi-COVID-19 ngoNobayeni mhlambe ngakwangenza kumbi, ibe namhlanjesi angingakajami lapha,” kulanda uMengameli. 
UMengameli wenze ithutjana wakhwezelela amaSewula Afrika ukuthi ahlabe ngoba ukuhlaba kuhlenga ipilo, godu aragele phambili ngokuthobela imilayelo yezepilo, abe ahlale ayelele.  
“Sizakukghona ukubuyela epilwenethu yemhleni, ngitjho nanyana ingogwana yesifesi isese nathi nje,” utjho ahlathulula, wabe wangezelela ngokuthi isifo esikhe sarhagalesi sithuwelelise ukuhlukana nokutjhiyana ngokomotho hlangana kwabantu abasebenzako nalabo abangasebenziko.
IsiKhwama SokuZwelana
UMengameli u-Ramaphosa umemezele ukuthi isiKhwama sokuZwelana (iSolidarity Fund) sibuthelele imali emabhiliyoni ama-R3.4 ehlanganiswe maSewula Afrika neenkhampani ezingaphezulu kwee-300 000, kwathi abantu ngamunye abangaphezulu kwama-400 neenkhampani ezili-100 zanikela ngesikhathi sazo nangemisebenzi yazo yesizo.
“Isikhwamesi senze umsebenzi oqakatheke khulu ekusekeleni amahlelo wokulwa nalesisifo nokuphungula ubudisi bomthwalo oqalene nelizwe lethu  nabantu  bekhethu.
Uthokoze boke abantu abafake isandla kilesisikhwama, ekubalwa hlangana nabo namanye amaLunga wePalamende namanye amagadango wokusekela labo abathintwe ngilesisifo  esikhe  sarhagala.  
UMengameli ubuye wathokoza nabasebenzi abaqalelela zepilo nabasebenzi ekubona bahlangana nabantu abagulako, abenza umsebenzi oqakathekileko wokulwa ne-COVID-19.
“Isitjhaba seSewula Afrika sithokoza kuzala umlomo ngabasebenzi bezepilo abazinikeleko nabanye abasebenzi abaqalana nabantu abagulako abadela ipilwabo bancamele ukuhlenga abagulako nabacaphazeleka lula ngalesisikhathi,” utjho aqedelela.
– SAnews.gov.za