CACH i khou tumanya matshudeni na zwikhala zwa u guda

Silusapho Nyanda

Vhaswa vhane a vha athu u wana zwikhala kha zwiimiswa zwa pfunzo dza nṱha vha nga ya kha sisiṱeme ya Central Application Clearing House (CACH) u wana thuso.
CACH ndi tshumelo ya online ya muvhuso i lang waho nga Muhasho wa Pfunzo dza Nṱha na Vhup fumbudzi (DHET).
Tshumelo i thusa avho vhane vha ṱoḓa u dzhena dziyunivesithi, dzikhoḽedzhi dza pfunzo na vhupfumbudzi zwa mishumo ya zwanḓa na zwa thekhinikhala (TVET) kha thihi na zwikhala zwa mveledziso ya zwikili.
“Tshumelo dza CACH dzo thoma u wanala u bva nga ḽa 24 Phando 2022 nahone dzi ḓo vala nga ḽa 31 Ṱhafamuhwe u itela u thusa avho vhane vha ṱoḓa u dzhena kha pfunzo dza nṱha fhedzi vha vha vha tshi khou ṱangana na khaedu dza u wana fhethu hune vha nga guda hone,” vha ralo Minisṱa wa Pfunzo dza Nṱha na Vhupfumbudzi Vho Dokotela Blade Nzimande.
CACH i nga thusa avho vhane vho ita khumbelo nga tshifhinga nga 2021 ya u ṱanganedzwa yunivesithi kana khoḽedzhini, fhedzi vha songo kona u fhiwa tshikhala kha mbekanyamushumo ye vha vha vha vho ṋanga yone.
Vha DHET vho ṱalutshedza uri hezwi zwi anzela u itea musi mutshudeni a sa swikeleli ṱhoḓea dzo teaho kana gudedzi iḽo ḽo no swikisa tshivhalo tsha matshudeni vhane tsha nga kona u ṅwalisa vhone.
CACH i nga kona hafhu u thusa avho vhane vho ita khumbelo kha tshiimiswa tsha pfunzo dza nṱha nahone vha ṱanganedzwa, fhedzi zwa zwino vha khou ṱoḓa u shandukisa buḓo ḽavho ḽa u guda.
CACH i ḓo fhirisela vhathu kha vha tshumelo ya mveledziso ya mabuḓo nahone hune zwa konadzea, i ḓo vha ṋetshedza tshikhala tsha uri vha ṱanganedzwe kha zwikhala zwo salaho dziyunivesithi na kha dzikhoḽedzhi dza TVET kana kha zwikhala zwa ngudo kha Zhendedzi ḽa Nḓowetshumo ya zwa Pfunzo na Vhupfumbudzi (SETA), hu si na zwa u tou ya nga tshavhukoma kha zwiimiswa izwo.
Yunivesithi dzoṱhe dza muvhuso, khoḽedzhi dza TVET khathihi na dziSETA vha a kona u dzhena kha dathabeizi ya CACH u sedza vhathu vhane vha swikelela ṱhoḓea dza zwikhala zwine zwa kha ḓivha hone.
“Zwiimiswa izwi zwi nanga vhathu kha dathabeizi ya CACH zwa kona u kwama avho vhe zwa vha nanga,” vha ralo muambeli wa DHET Vho Ishmael Mnisi.
Matshudeni vho itaho khumbelo vhe vha ṅwalisa kha CACH vha tea u ṋetshedza zwidodombedzwa zwavho, hu tshi katelwa na zwine vha takalela u gudela zwone.
Matshudeni vho itaho khumbelo avho vha a kona u ṱanganedza kana u hana tshikhala tsho ṋetshedzwaho kha sisiṱeme ya CACH.
Zwiimiswa zwa pfunzo dza nṱha zwi ḓo kona fhedzi u swikelela zwidodombedzwa zwa matshudeni o itaho khumbelo kha CACH, musi matshudeni o itaho khumbelo vho no saina na u swikisa mvelelo dzavho dza Gireidi ya 12.
Vho Mnisi vha ri CACH i dovha hafhu ya thusa matshudeni vhane vha khou ṱoḓa u guda fhedzi vha sa athu dzhia tsheo nga ha mabuḓo a mushumo nga u vha rumela kha Tshumelo ya Mveledziso ya Mabuḓo ya Khetha kha muhasho wa DHET.