CACH yi hlanganisa swichudeni na nkateko wo dyondza

Silusapho Nyanda

Vantshwa lava nga se kumaka tindhawu eka swivandla swa dyondzo ya le henhla va nga ya eka Sisiteme ya Ndhawu yo Hetisisa Swikombelo ya Tiko Hinkwaro (CACH) ku ya kuma ku pfuneka.
CACH i vukorhokeri bya mfumo bya le ka inthanete lebyi fambisiwaka hi Ndzawulo ya Dyondzo ya le Henhla na Vuleteri (DHET).
Vukorhokeri byi pfuna lava lavaka ku fikelela yunivhe-siti, tikholichi ta  Dyondzo na Vuleteri bya swa Xitheki niki na Mitirho ya Mavoko (TVET) na mikateko ya nhluvukiso wa vuswikoti.  “Vukorhokeri bya CACH byi ve kona ku sukela hi ti24 Sunguti 2022 naswona byi ta pfala hi ti31 Nyenyankulu ku pfuna lava lavaka ku nghena eka dyondzo ya le henhla kambe va hlangana na mitlhontlho yo kuma ndhawu,” ku vula Holobye wa Dyondzo ya le Henhla na Vuleteri Dok Blade Nzimande. CACH yi nga pfuna lava nga endla swikombelo swo amukeriwa eyunivhesiti kumbe kholichi hi nkarhi hi 2021 kambe va nga nyikiwi ndhawu eka nongoloko lowu va nga hlawula wona.
DHET yi hlamuserile leswaku leswi swi tala ku endleka loko mukomberi a nga fikeleli swilaveko leswi faneleke kumbe ndhawu yo dyondza yi fikelerile eka nhlayo ya swichudeni leswi yi nga swi tsarisaka.  CACH yi nga tlhela yi pfuna lava nga endla swikombelo eka ndhawu ya dyondzo ya le henhla naswona va amukeriwile, kambe se va lava ku cinca khoso.
CACH yi ta hundzisela vanhu eka vukorhokeri bya nhluvukiso wa ntirhovutomi naswona laha swi kotekaka, yi va nyika nkateko wo langutisisiwa eka tindhawu leta ha riki kona eka tiyuni-vhesiti ni le ka tikholichi ta TVET kumbe nongonoko wo letela hi vuswikoti bya ntirho hi Vulawuri bya Dyondzo ya Xiyenge na Vuleteri (SETA), handle ko famba va ya eka tindhawu tihi ni tihi ta dyondzo.
Tiyunivhesiti hinkwato ta mfumo, tikholichi ta TVET na tiSETA ti nga fikelela databesi ya CACH ku lava vanhu lava fikelelaka swipimelo swa tindhawu leta ha riki kona.“Tindhawu ta dyondzo ti hlawula vanhu ku suka eka databesi ya CACH kutani ti tihlanganisa ni lava ti nga va hlawula,” ku vula muvulavuleri wa DHET Ishmael Mnisi.
Vaendli va swikombelo lava nga titsarisa eka CACH va fanele ku yisa vuxokoxoko bya vona, ku katsa na leswi va tsakelaka ku dyondzela swona. Vaendli va swikombelo va nga hlawula ku amukela kumbe ku ala ku  amukeriwa ka vona eka sisiteme ya CACH.
Tindhawu ta dyondzo ya le henhla ti ta kota ntsena ku fikelela vuxokoxoko bya vaendli va swikombelo eka CACH, ntsena loko vakomberi va se va titsarisile no hoxa mbuyelo wa vona wa Giredi  12.
Mnisi u vula leswaku CACH yi tlhela yi pfuna swichudeni leswi nga ni ku tsakela leswi nga se tekaka xiboho mayelana ni ku hlawula ntirhovutomi hi ku va hundzisela eka Vukor hokeri bya Nhluvukiso wa Ntirhovutomi wa Kheta wa DHET.
