CACH e kgokaganya baithuti le dibaka tša go ithuta

Silusapho Nyanda

Bafsa bao ba sego ba hlwa ba hwetša dikgoba ka dihlongweng tša thuto ya godimo ba ka kgopela thušo go Lefelo la go Thuša Barutwana bao ba Hlaetšwego ke Dikgoba Ditheong tša Thuto ya Godingwana (CACH).
CACH ke tirelo ya inthaneteng ya mmušo yeo e  laolwago ke Kgoro ya Thuto le Tlhahlo tša Godingwana (DHET). E thuša bao ba nyakago go fihlelela dithuto tša yunibesithi, tša dikholetšhe tša Thuto le Tlhahlo tša Sethekniki le tša Matsogo tša Godingwana (TVET) le bao ba nyakago go fihlelela dibaka tša tlhabollo ya mabokgoni.
“Ditirelo tša CACH di thomile go hwetšagala go thoma ka la 24 Pherekgong 2022 gomme di tla tswalelwa ka la 31 Mopitlo go thuša bao ba nyakago go tsenela dithuto tša godingwana eupša ba lebane le ditlhohlo tša go hwetša sekgoba,” gwa bolela Tona ya Thuto le Tlhahlo tša Godingwana Ngaka Blade Nzimande.
CACH e ka thuša bao ba dirilego dikgopelo tša se kgoba ka yunibesithing goba ka kholetšheng ka 2021 eupša ba se ba fiwa sekgoba ka thutong yeo ba e kgethilego.
DHET e hlalošitše gore se ka tlwaelo se direga ge modiradikgopelo a sa fihlelele dinyakwa tša maleba goba ge sehlongwa sa thuto se fihlile magomong a palo ya baithuti bao e ka kgonago go ba ngwadiša.
CACH e ka thuša gape bao ba dirilego dikgopelo go sehlongwa sa thuto ya godingwana gomme ba amogetšwe, eupša bjale ba nyaka go fetoša thuto yeo ba nyakago go e dira.
CACH e tla lebiša bakgopedi go ditirelo tša go ba hlahla ka tsebo ya dirutwa tša mešomo ka go fapana gomme fao go kgonagalago, ya ba fa sebaka sa gore ba fiwe dikgoba tšeo di sa lego gona ka diyunibesithing le ka dikholetšheng tša TVET goba le ka dikgobeng tša go ithutela mešomo tša ka Bolaoding bja Lekala la Thuto le Tlhahlo (SETA), ka ntle le gore ba ye sehlongweng sefe goba sefe.
Diyunibesithi tša mmušo ka moka, dikholetšhe tša TVET le di-SETA di ka kgona go fihlelela tshedimošo ye e bolo kilwego ya CACH go nyaka batho bao ba fihlelelago dinyakwa tša dikgoba tšeo di sa lego gona.
“Dihlongwa tša thuto le tlhahlo di kgetha batho go tšwa go tshedimošo ye e bolokilwego go CACH gomme tša ikgokaganya le bao ba kgethilwego thwii,” gwa bolela seboleledi sa DHET Ishmael Mnisi.
Badiradikgopelo bao ba ingwadišetšago CACH ba swanetše go romela dintlha tša bona, go akaretšwa dirutwa tšeo ba batlago go ithutela tšona. Badiradikgopelo ba  na le kgetho ya go amogela goba go gana dikgoba tša go ithuta tšeo di lego go lenaneo la CACH.
Dihlongwa tša thuto ya godingwana le tšona di tla kgona go fihlelela tshedimošo ya badiradikgopelo go CACH, ge badiradikgopelo ba šetše ba ingwadišitše ebile ba loutile dipoelo tša bona tša Marematlou.
Mnisi o bolela gore CACH e thuša gape baithuti bao ba sego ba hlwa ba tšea sepheto mabapi le dikgetho tša mešomo ka go ba romela go Tirelo ya DHET ya go Ditirelo  tša go Hlahla Badiradikgopelo ka Tsebo ya Dirutwa tša Mešomo ye ba ka Ithutelago yona ya Lesolo la Khetha.