I-CACH Ihlanganisa Abafundi Namathuba Wokufunda

Silusapho Nyanda

Abantu abatjha abangakabukufumana iinkhala zokufunda  emaziko wezefundo ephakemeko  bangayokubawa isizo eZiko lokuHlungwa kweemBawo Zoke(i-CACH).
I-CACH sisetjenziswa sikarhulumende sobunzinzolwazi esilawulwa mNyango wezefundo ePhakemeko nokuBandula (i-DHET).
Sisiza labo abafuna isikhala sokufunda  eyunivesithi, emaKholiji weFundo yamaKghono neBandulo leTheknikhali (ama-TVET) nokufumana amathuba wokuthuthukisa amakghonofundwa.
“Isizo le-CACH lithome ukufumaneka ukusukela mhlana ama-24 kuTjhirhweni wee-2022, lizokugcina nakama-31 kuNtaka wee-2022 ukusiza labo abatlhoga ukuyokufunda emazikweni wefundo ephakemeko kodwana abaneentjhijilo zokufumana iinkhala zokufunda,” kutjho uNgqongqotjhe wezefundo ePhakemeko nokuBandula  uDorh. Blade Nzimande.
I-CACH ingasiza labo abafaka iimbawo eyunivesithi namkha ekholiji kusese nesikhathi nyakenye (umnyaka wee-2021) kodwana iimbawo zabo akhange zamukelwe eemfundweni abazikhethele zona.
IDHET ihlathulule ukuthi lokhu vane kwenzeke lokha ofake isibawo angafikeleli iimfuneko ezibekiweko zokungena namkha lokha izikwelo nasele lifike esilinganisweni sesibalo sabafundi abangatloliswa.
I-CACH ingasiza godu labo egade benze isibawo  eziko lezefundo ephakemeko, bemukelwa, kodwana sele bafuna ukutjhugulula iimfundo zabo.
I-CACH izokuthumela abantu ukuyokufumana iinsiza zokuthuthukiswa kwamabizelo nokuthi, nakukghonakalako, bavulelwe ithuba lokuqalelelwa ngeenkhala zokufunda  ezisafumanekako emayunivesithi nemakholiji we-TVET namkha umKhandlu weFundo neGunya lokuThwasisa (i-SETA), ibandulo lomsebenzi, ngaphandle kokuya mathupha eziko lezefundo.
Woke amayunivesithi wombuso, amakholiji we-TVET namaSETA angafikelela ibuthelelomininingwana ukufuna abantu abaneemfuneko ezifaneleko zeenkhala ezisavulekileko.
“Amaziko akhetha abafundi abafunyenwe kubuthelelomininingwana ye-CACH bese athintana nabo bunqopha, labo bakhethiweko,” kutjho umkhulumeli we-DHET, uIshmael Mnisi.
Abafake iimbawo abatlolise ku-CACH kufuze bathumele imininingwanabo, kufaka hlangana ibizelo abafuna ukulifundela.
Abafake iimbawo banethuba lokwamukela  namkha ukwala iimfundo abazikhethelwa lihlelo leCACH.
Amaziko wezefundo ephakemeko azokukghona ukufumana imininingwana yabafake iimbawo zabo ehlelweni le-CACH kwaphela, nasele bafake iimbawo bazitlolisile, bafaka nemiphumela yabo yeGreyidi ye-12.
UMnisi uthi i-CACH ibuye isize abafundi abasatlolisako abanokuzaza ngokukhetha ibizelo ngokuthi ibathumele ehlelweni leSizo ngokuKhetha iBizelo (i-Khetha Career Development Service), elilawulwa yi-DHET.