Kuceceshwa netinsita temabhizinisi tamahhala

Kgatiso Tlhakole

Tikhungo letintsatfu tahulumende titibophelele ekwenteni kutsi kube malula kwenta ibhizinisi eNingizimu Afrika kute kutfutfukiswe kukhula kwemnotfo.
Umhlangano wevidiyo wakamuva weVuk Talks , wabanjwa teTeku chumana Tahulumende Netekwatisa, kute kwatiswe ummango mayelana neligunya, ngetinchubomgomo nangetinsita letiphakelwa Yikhomishini Yekubhalisa Tinkampani Nebunikati Bemphahla (i-CIPC), Umtimba Lobukene Netemacala Latsite Etinkampani (iCT) kanye Nekhomishini Yekunika La bamnyama Emandla Labanti Kutemnotfo (i-B-BBEE).
Ngito tonkhe leti tikhungo letingaphasi Kwelitiko Letekuhwebelana, Letetimboni Neletekuchudzelana.
Ngekusho  kwa-Ofentse Shakung, longuMphatsi we-CIPC Kutekuticambela Nekusebentisana futsi longuMcondzisi Weku fundza Nge-Inthanethi, i-CIPC yenta imisebenti lehlukahlukene, lefaka kubhaliswa kwetinkampani, imifelandzawonye kanye nekwemalungelo emphahla yekuticambela (timphawu tekuhweba, emalungelo  ebunikati, emadizayini nemalungelo ekushicilela).
I-CIPC isungule inkhundla yayo iBizPortal leniketa insita yekubhalisa inkampani nge-inthanethi nekwenta leminye imisebenti lemayelana naloko kute yente loluhlelo lwekubhalisa ibhizinisi lube malula nekutsi lulandzele tonkhe tidzingo.
IBizPortal iniketa labo labafuna kucala ibhizinisi indzawo leyodvwa yekubhalisa inkampani, yekubhalisela kukhokha intsela, yekubhalisa ligama lenkampani, yekufaka sicelo sesitifiketi se-B-BBEE, yekubhalisa Kusikhwama Sekuncephetelisa nakuMshwalense Wekulahlekelwa Ngumsebenti, neyekuvula i-akhawunti yasebhange.
“IBizPortal iyinchubo lengasebentisi emaphepha futsi inkampani ibhaliseka kungakapheli sikhatsi lesimahora la24 emva kwekutfunyelwa kwesicelo.
Siphindze futsi sangeta tinsita teGoogle tetemabhizinisi, letenta tinkampani tikhone kuba nephrofayili yebhizinisi kanye newebhusayithi letawuhlala ikhona yenkampani kuGoogle mahhala,” kwasho Shakung.
Kute ukhone kusebentisa letinsita, vakashela www.bizportal.gov.za  bese ucafata ‘register’ losetulu kwelikhasi.
Kulula kuzulazula kulenkhundla futsi ikuniketa sinyatselo ngasinye selwatiso lwekubhalisa ibhizinisi.
Kuceceshwa kwamahhala
I-CIPC futsi isandza kusungula inkhundla yayo yekuceceshwa nge-inthanethi yamahhala iLearn-i-Biz kute kusitakale emabhizinisi lamancane, lasemkhatsini kanye nebacondzisi bemabhizinisi lasafufusa nekutsi bosomabhizinisi bakhone kutfutfukisa emakhono abo ekuphatsa ibhizinisi ngemphumelelo, babe futsi bacinisekisa kutsi balandzela tidzingo temtsetfo.
“Lenkhundla iyinkhombandlela yekufundza lesebenta nge-inthanethi futsi ifaka tifundvo tevidiyo nesivivinyo sekutihlola saleso naleso sifundvo kuletisikhombisa,” kwasho Shakung. Letifundvo tifaka kuceceshwa mayelana nekutsi yini inkampani nekutsi umcondzisi uyini, ngebantfu labamcoka enkampanini, ngemisebenti yemcondzisi, ngetifiso temuntfu tetetimali kanye nekugcubutana kwetifiso, kuholelwa kwebacondzisi nekwabelana ngetinzuzo kanye nangebhodi yebacondzisi. Kute ubhalisele kuceceshwa, vakashela www.elearning@cipc.co.za.
Umtimba Lobukene Netemacala Latsite EtinkampaniniDkt. Mohammed Chicktay, longuSihlalo we-CT, wachaza watsi lesikhungo sisita kuletsa sisombululo masinyane uma kunekungcubutana emkhatsini kwetinkampani, lokumayelana neticelo netinsolo letentiwe ngekulandzela Umtsetfo Wetetinkampani We-71 Wemnyaka We-2008.
Loku kufaka ekhatsi kungcubutana lokumayelana nemagama etinkampani, bucondzisi bato nekuvumeleka kutsi kusungulwe emakomiti etenhlalakahle newendlela lekahle yekutiphatsa.
Lomtimba uphindze ubuyekete imilayeto yetemtsetfo lekhishwe yi-CIPC, lemayelana nekungetwa kwesikhatsi sekulungiselela kukhipha titatimende tetetimali temnyaka nekubamba imihlangano lemikhulu yemnyaka.
“I-CT isebenta ngeticelo letehlukahlukene.
Ngesikhatsi se-COVID-19, sibonelo, sitfole ticelo tekwelulwa kwesikhatsi sekubamba umhlangano lomkhulu letinengi,” kwasho Chicktay.
Lenye insita yamahhala leniketwa yi-CT kucatulula kungcubutana.
Umuntfu angatfumela indzaba yakhe kute isonjululwe ngekusebentisa kungenelela ngenhloso yekucwayisa, kubuyisana noma kulamula, njengendlela lencono kunekuya enkhantolo. I-CT isebenta njengemcumanisi emkhatsini kwemacembu laphikisanako.
“I-CT igcugcutela kutsi kusetjentiswe kungenelela ngenhloso yekucwayisa kute kuvikelwe  kulahleka kwemisebenti, kakhulu kulesikhatsi seCOVID-19, futsi kufuneka bantfu bacale kusebentisa lendlela kakhulu,” kwasho Chicktay.
Ikhomishini ye-B-BBEE 
Ngekusho kwaLindiwe Madonsela, Umphatsi Lomkhulu Kutekulandzela Umtsetfo we-B-BBEE, ligunya lalesikhungo kungamela, kubuka nekugcugcutela kutsi Umtsetfo we-BBBEE We-46 Wemnyaka we-2013 uyalandzelwa.
Iphindze iphenye imikhuba yekufranta (kubeka umuntfu lomnyama embili kute uzuze emaphuzu e-B-BBEE ngendlela lengekho emtsetfweni); ihlose kukhulisa lwatiso emmangweni mayelana ne-BBBEE, ngekusebentisa temfundvo netindlela tekwatisa; bese iniketa teluleko emmangweni.  Wonkhe umuntfu losola noma lowati kuphulwa kwaLomtsetfo, njengalapho kusetjentiswa khona bantfu labamnyama njengemafranti kute kutfolakale emaphuzu e-BBBEE, angafaka sikhalo kulekhomishini.
Sibonelo, tisebenti tesikhungo lesitsite kungenteka tati kutsi sikhungo sisebentisa lomkhuba wekufranta ngekubeka bantfu labamnyama njengebanikati bebhizinisi noma tikhulu letisetulu, kube akusinjalo, kwasho Madonsela.
Kutfola lwatiso lolubanti mayelana neKhomishini ye-B-BBEE, vakashela, www.bbbeecommission.co.za.