Ukuthwasiswa Kwasimahla Nezenzelwa Zamabhizinisi

Vukuzenzele Unnamed

Iinjamiso zikarhulumende ezintathu ziqalene nomsebenzi wokuphumelelisa ukuragwa kwamabhizinisi eSewula Afrika kobanyana kuzokuhluma  umnotho. 
Mhlapha iZiko likaRhulumende lezokuThintana nokuNikela ngeLwazi (i-GCIS) libambe imiKhulumiswano yeThungelelwano ngekhomphyutha ebizwa ngokuthi yiwebinar, ngomnqopho wokuphandlulula ngomsebenzi, imithethokambiso kunye nezenzelwa ezenziwa yiKomitjhini yamaKhampani wobuNikazingqondo (i-CIPC), iBandla lamaKhampani (i-CT) kunye neKomitjhini yokuHlonyiswa kwabaNtu abaNzima ngezomNotho (i-B-BBEE).  Leziinjamiso zoke nje ngezomNyango wezeRhwebo, zamaBubulo nezePhaliswano.Ngokutjho kwaka-Ofenste Shakung, umPhathi wezaMandla wokuSungula nezokuSebenzisana nomNqophisi weE-Learning ngaphasi kwe-CIPC, i-CIPC inemisebenzi ehlukahlukileko, ekubalwa hlangana nayo nokutloliswa kwamakhampani, amabhizinisi ahlanganyelweko namalungelo wobunikazingqondo (amatshayo werhwebo, amalungelo wobunikazi  akhethekileko, imitlamo kunye  nelungelo  lomtlolo).
I-CIPC yakhe ikundla yeBizPortal lapho izakutlolisa khona amakhampani ngehlelo lethungelelwano lekhomphyutha neminye imisebenzi ekhambelana naleyo ukuwenza ube lula umsebenzi wokutlolisa ibhizinisi nokukhambisana nemibandela  efunekako.
IBizPortal ivula ikundla ephethe koke kilabo abafuna ukusungula ibhizinisi kobanyana bazokukghona ukutlolisa ibhizinisi, batlolisele umthelo, batlolise ibizo ledomain, benze isibawo sesitifikethi se B-BBEE, batlolise isiKhwama seeMali zokuLilisa kunye nesiKhwama sabaPhelelwe mSebenzi, babe bavule ne-akhawundi yebhanga yebhizinisi.
“Leli-ke lihlelo elingasebenzisi phepha kanti-ke ikhamphani izakutloliswa kungakapheli ama-awa ama-24 isibawo sifakiwe.  Singezelele nangomsebenzi kamathungatha iGoogle kezamabhizinisi esiza amakhamphani akwazi ukusingatha imininingwana yebhizinisi nobunzinzolwazi bekhamphani kuGoogle, simahla,”  kutjho  u-Shakung.
Nawufuna ukusebenzisa lezizenzelwa, vakatjhela kuwww.bizportal.gov.za  bese uqhwarhaza u-’Register’ ngehla kwekhasi. Lesisisetjenziswa sisebenziseka lula, begodu sikunikela igadango negadango malungana nokuthi ibhizinisi uyitlolisa njani.
Ukuthwasiswa Simahla
I-CIPC mhlapha ibuye yavula nekundla yokuthwasisa ngethungelelwano lekhomphyutha simahla iLearn-i-Biz ukusiza abanqophisi nabosomabhizinisi abancani, abalingeneko kunye nabancancani kobanyana bazokwakha amandlabo wokuraga ibhizinisi ngepumelelo, ukube ngahlanye baqinisekisa ukuthi bathobela imibandela  neemfuneko  zomthetho. “Ikundla le iyikombandlela ebudijithali ephethe nevidiyo efundisako neyokuzilinga ngeenhlahlubo zokuzenzela kesinye nesinye isiqetjhana kilezo ezilikhomba,” kuhlathulula u-Shakung.
Leziinqetjhana ziphethe isifundo esifundisa ngokuthi yini ikhampani, yini umnqophisi, bobani abantu abaqakathekileko ekhamphanini, yini imisebenzi yomnqophisi, iinrhuluphelo zeemali zomuntu ngesiyena kunye nemiphambo yeenrhuluphelo, umrholo  wabanqophisi nokuhlukaniswa kwabo kunye nebhodi yabanqophisi.  Nawufuna ukutlolisela ukungena kilesisifundo, vakatjhela kuwww.elearning@cipc.co.za 
Ibandla eliLawula Amakhamphani  
UDorh. Mohammed Chicktay, onguSihlalo we-CT, uhlathulula ukuthi isijamiswesi sisiza ukurarulula imibango yekhampani msinyana ephathelene neembawo kunye neenlilo ezifakwe ngokomThetho weenKhampkani (umThetho Nomboro 71 womNyaka  wee-2008).
Lapha-ke kubalwa imibango ephathelene namagama weenkhamphani, ubunqophisi kunye nokungabi nasibopho sokusungula amakomidi wezomphakathi newokuziphatha.  Lesisijamiso sibuye godu sibuyekeze izaziso zokuthotjelwa komthetho kweenkhampha ni ezikhutjhwe yi-CIPC, malungana nokungezelelwa kwesikhathi sokulungiselela iintatimende zeemali zaqobe mnyaka nokubiza imihlangano yaqobe mnyaka. “I-CT isebenza ngeembawo ezihlukahlukileko. Isibonelo, ngesikhathi se-COVID-19, sithole iimbawo ezinengi ezibawa ukwelulelwa kwesikhathi sokubanjwa kwemihlangano yaqobe mnyaka,” kutjho u-Chicktav.
Okhunye i-CT ekwenza simahla kulamula umbango. Umuntu angathumela icala ukuthi liyokulanyulwa, kuyokubuyisaniswa iinqhema eziraranako kilo namkha liyokuthathelwa isiqunto sokuthi lilanyulwa njani, kunobanyana liye ekhotho.  I-CT isebenza njengomkhwezeleli hlangana neenqhema. “I-CT ikhuthaza amahlelo wokulamula ukuthi ahlenge imisebenzi, khulukhulu ngesikhathi se-COVID-19, begodu abantu bakhuthazwa ukuthi bande ngokusebenzisa amahlelo la,” kutjho u-Chicktay. Eminye imininingwana ngemisebenzi eyenziwa yi-CT ungayithola ngokuvakatjhela kuwww.companiestribunal.org.za.  
IKomitjhini YeB-BBEE
Ngokutjho kwakaLindiwe Madonsela, umPhathi omKhulu wezokuThotjelwa komThetho eKomitjhinini ye-B-BBEE, lesisijamiso sithunywe ukubeka ilihlo, ukwelusa kunye nokukhuthaza ukuthotjelwa  komThetho 46 wee-2013 we-B-BBEE.  Godu iphenya imikghwa yokusitha phambili ngabantu ababedimeke amathuba eenkampanini ukube abananto abayizuzako; inqophe ukwandisa ilwazi nokuphandlulula umphakathi nge-B-BBEE ngokusebenzisa amagadango wezefundo newokuphandlulula; itjengisa ikombandlela emphakathini.
Nanyana ngubani osola unga namkha owazi ukuthi kwephulwa umThetho, njengokuthi nje kusithwa ngabantu abanzima eenkhamphanini kobanyana ikhamphani leyo izokuzuza amaphuzu weB-BBEE, angathumela isililo esimalungana nalokhu ekomitjhinini.
Isibonelo, abasebenzi esijamisweni bangalimuka ukuthi isijamiso sabo sinomukghwa wokusitha ngabantu ababedinywe amathuba phambili ngokuveza abantu abanzima njengababelani namkha njengeenkhulu eziphetheko, ukube kanti akusinjalo, kuhlathulula uMadonsela.