Siku ro hetelela ra nkwama wa NSFAS ri le ku tshuneleni

Sphelele Ngubane 

Swichudeni na vantshwa ku suka eka mindyangu leyi nga ni vusweti na lava miholo ya vona yi nga ehansi va hlohloteriwa ku endla swikombelo swo hakeleriwa ku suka eka Xikimi xo Pfuneta Swichudeni hi swa Timali xa Rixaka (NSFAS).
Ku ya hi Ndzawulo ya Dyondzo ya le Henhla na Vuleteri, nkwama wa NSFAS wu nyikiwa vantshwa lava se va nga heta ku dyondza eswikolweni kumbe lava va nga ekudyondzeni eka levhele yihi kumbe yihi eka xivandla xa dyondzo ya le hehla.
Va nga endla swikombelo  swo hakeleriwa ku suka eka NSFAS leswaku va ya dyondza eka yunivhesiti ya mani na mani kumbe eka kholichi ya dyondzo na vuleteri bya swa xithekiniki na mitirho ya mavoko (TVET), kambe va fanele ku swi endla ku nga si fika siku ro pfala ra 7 Sunguti, 2022.
Vakomberi va fanele ku va:
• Vaakatiko va Afrika-Dzonga kumbe vatshami va nkarhi hinkwawo lava lavaka ku titsarisela kumbe lava se va dyondzaka eka tiyunivhesiti ta mani na mani kumbe tikholichi ta TVET; 
• Vaamukeri va mali ya mpfuneto wa Ejensi ya swa Vuhlayiseki bya Vaaki ya  Afrika-Dzonga; 
• Va suka eka mindyangu leyi miholo ya yona ya nhlanganelo yi nga tluriki R350 000 hi lembe.
Vumundzuku  lebyinene
Nhlakanipho Mkhize (26) i mutirhi wa swa gezi loyi a nga swi thwasela, ku khensiwa nkwama wa NSFAS, lowu hakeleleke tidyondzo  ta yena eKholichi ya Umfolozi ya TVET eKwaZulu-Natal.
Mkhize, wo huma eRichards Bay, u kumile Xitifikheti xa Rixaka xa Ntirho wa Vumaki bya Switirhisiwankulu swa Gezi hi 2017.
Ku engetela eka ku dyondza a ri karhi a tshama ekhampasi, u tlhele a va na nkateko wo hetisa ndzetelo wa le ka ndhawu yo tirhela na ku pasa xikambelwana xa ntirho.
Ekusunguleni ka tidyondzo ta yena, Mkhize u vile na nkateko wa ku titoloveta leswi a swi dyondzeke, ku tiyisisa leswaku u va na ku titshemba eka vuswikoti bya nkoka lebyi a ri ku byi antswiseni.
“Tanihi xichudeni xa lembe ro sungula, se a ndzi lulamisa swiphiqo swa gezi emugangeni wa mina. Kholichi ya Umfolozi ya TVET yi hi dyondzisile swa mianakanyo na ku titoloveta.
“Ku vuyeriwa loku swichudeni swa TVET swi nga na kona a hi ku va na vutivi ntsena, kambe ku tlhela ku va xiphemu lexi bohaka xa ku dyondza eka ndhawu ya ntirho ku tiyisisa leswaku swi ni vuswikoti loko swi nga si amukela mithwaso ya swona,” ku vula yena.
Ku fana ni vantshwa va Afrika-Dzonga votala lava humaka eka mindyangu leyi nga ni vusweti, Mkhize a swi tiva leswaku a lava ku fikelela ntirho wa vuinjhiniyara, kambe a ku ri hava na un’we eka ndyangu wa  ka vona loyi a ta fikelela tihakelo ta kholichi.
“Loko se ndzi lemukile hi nkwama wa NSFAS, ndzi swi tivile leswaku swi ta ndzi kongomisa laha a ndzi lava ku ya kona – ku va muinjhiniyara,” ku vula yena.
Nkwama wa Mkhize wa NSFAS wa malembe manharhu wu n’wi hakelerile tibuku, tidyondzo na swifambo, naswona u amukele mali  ya mpfuneto wo tihlayisa.
