Kha vha thivhele u vha tshipondwa tsha u rengiswa ha vhathu  

Silusapho Nyanda

Musi tshivhalo  tsha milandu ya u rengiswa ha vhathu i vhigwaho tshi tshi khou engedzea, ndi zwa ndeme uri vha dzhie maga u khwaṱhisedza tsireledzo yavho.Uri vha sa vhe tshipondwa tsha u rengiswa ha vhathu vha fanela u ṱutshela u tshi mbila vhe vhoṱhe vhusiku kana zwiṱaraṱani zwi si na vhathu.Ndi zwa ndeme uri vha limuwe zwine zwa khou bvelela hoṱhe hune vha vha hone zwifhinga zwoṱhe. U dzula vho fhaṱuwa zwi ḓo vha thusa u vhona zwithu zwo bvaho nnḓa ha nḓila. Arali vha vhona muthu kana goloi i tshi khou vha sala murahu, kha vha wane fhethu ho ḓalaho vhathu vha kwame mapholisa kana muthu ane vha mu fulufhela nga u ṱavhanyedza.Vharengisi vha vhathu tshifhinga tshinzhi vha shumisa pfulufhedziso ya mushumo u dzhia nga khani zwipondwa zwavho vha dzhena zwipondwa izwo nga u zwi ṋea mushumo kana luṅwe lushaka lwa tshikhala. Maitele aya a zwiito izwi zwa u rengisa vhathu a nga itea huṅwe na huṅwe – na kha vhu-davhidzani ha midia, tshi koloni, mimoḽoni na nnḓa ha nnḓu yavho.Vha khwaṱhisedze uri vha ita ṱhoḓuluso ya vhuronwane nga ha vhatholi vhenevho phanḓa ha musi vha tshi ya u ṱangana navho lwa ṋama u itela dziinthaviu. Hezwi zwi nga itiwa nga u khwaṱhisedza uri nangoho khamphani i a tshila nga u kwamana na Khomishini ya Nḓivho ya Ndaka na Dzikhamphani. Vha fanela u vhudza muthu ane vha mu fulufhela musi vha tshi khou ya inthaviu vha dzudzanya navho uri vha vha founele nga murahu ha tshifhinga tshingafhani. Arali zwi tshi konadzea, kha vha vhe na muṅwe wa u ṱuwa navho.  Vha ṱhogomele musi vha tshi shumisa vhudavhidzani nga midia, zwihulu musi muthu ane vha si mu ḓivhe a tshi ḓiṋetshedzela u thusa, u ṋea tshelede, fhethu ha u dzula kana tshikhala tsha mushumo hu phindulo ya zwe vha ṅwala.Arali vha tshi khou ya u ṱangana na muthu muswa, kha vha zwi ite fhethu ha nnyi na nnyi vha dovhe hafhu vha vhudze muthu ane vha mu fulufhela hune vha vha hone.Musi vha tshi khou bva na vhana, vha vha sendedze tsini vha dovhe vha vhone uri vha khou kona u vha vhona tshifhinga tshoṱhe.Vha songo vhuya vha ruma vhana u ya u ita mishumo mikene hu si na muthu muhulwane a fulufhedzeaho wa u vha ṱhogomela. Kha vha ḓidzhenise kha nḓo welo ya u ṱola vhana vhavho tshifhinga tshoṱhe, uri vha ḓivhe hune vha vha hone.
U ḓivha zwinzhi nga ha u rengiswa ha vhathu vha founele Nomboro ya Lushaka nga ha u  rengiswa ha vhathu kha: 0800 222 777. U vhiga zwiito zwa u rengiswa ha vhathu vha founele  mapholisa kha: 10111.Mafhungo aya vho a ṋetshedzwa nga  Muhasho wa Vhulamukanyi na Mveledziso ya Ndayotewa