Quid mea commoto sic culpas pectore Iona
Iudicia? an iusti causa doloris adest?
Cur reduces perdam? qui non sine numine sancto
Amissos mores restituisse student?
His ubi commonuit vatem, mox altera rursum
Signa parat, rigidum queis docuisse queat.
Ut discat Dominum clementem perdere nolle
Qui sua non duro pectore iussa colant
ECCE novum subito consurgit stipite germen
Et vati fesso crescit ut umbra siet.
〈 Fruticis descriptio 〉 Dicere quod possis hederam, sed firmior illi
Caules et foliis latior umbra cadit.
Illico quod crescens capiti circumdatur alto
Ne possit vapidi solis obesse calor.
Illius utque umbra iam delectatur Ionas
Et miri forma germinis usque stupet,
Nox venit et coelo decurrunt astra silenti,
Pręcipites Phoebus sub mare mittit equos.
Cum subito immittit vermem pia cura tonantis
Funesto plantam qui cito dente voret.
Impetit hic sęvis radices morsibus imas
Et nimium rapidis dentibus antra cavat
Illa perit moriens, in terram sternitur alte
Et cadit ut misso grandine spica solet.
Damna videns vates tristatur pectore toto
Et rursum irata iurgia voce movet.
Hinc ubi flammivomus medio Sol constitit orbe,
Siccus et arentes Syrius ussit agros,
