Ut vestras fraudes sentiret turba misella
Cui vult vos promptas exhibuisse manus.
Quid iuvat inflatos miserorum sanguine pasci?
Quid iuvat infandis fallere quosque dolis?
Innocuis cur vos delectat bella movere,
Et rapere hostili tecta aliena manu?
Divitiis cur vos iuvat insudare prophanis?
Cur latet iniuste Gaza reposta domi?
„ Ah miseri, quotquot thesauros quaeritis auri
Perditis et verae prosperitatis opes.
Heu maledicta cohors, qui forti fiditis urbi:
„ Fortia non aliquos tecta iuvare queunt.
Ante Deum siquidem clamans iacet undique turba
Et partas sęva fraude queruntur opes.
Aspicit hęc Dominus, nec recto lumine cernit
Et meritas poenas iuditiumque parat.
„ Longanimis licet hic non velox verbera mittat
Atque animo miti crimina magna ferat.
„ Non tamen oblitus recti sufferre prophanam
Sentinam scelerum colluviemque potest.
„ Sustineat quamvis nonnullo tempore, diras
Poenas, ni melior vita sequatur, habet.
Illa probant Sodomae divinis ignibus ustae
Hęc vos fatorum tempora longa docent.
„ Non amplos Dominus thesauros divitis auri
Curat nec forti moenia facta manu
„ Corruit ante illum miseranda potentia mundi
Ceu cecidisse solent Sole calente nives. 
