Nec modo perpendit quanta sit laude superba
Urbs, sed nubicogae quanta sient.
〈 Ionas Nineven ingreditur. 〉 Ingreditur portas lateque patentia tecta
Et vigili lustrans lumine cuncta videt
Miratur niveo constructa palatia Regum
Marmore, miratur compita, templa, vias.
Nunc spectat firmo surgentes aggere muros,
Nunc virides stupida mente revolvit agros.
Mox tamen hos cernens in crimina sęva ruentes
Infandis vitiis perdita cuncta videt.
Hic inopes spectat contrito corde gementes,
Infames luxus illicitosque thoros.
Et iustas sentit divini pectoris iras
Nec Dominum vanis intonuisse minis.
Hinc fora summa petit, qua maxima concio vulgi
Constitit, et mediis se inserit ipse viris.
Cives mirantur stupidi quae nuncia portet,
Nam procul externa gente venire vident.
Hic medius celebri vulgi spectante corona
Talia de sancto pectore verba dedit.
〈 Concio Ionae 〉 EXAUDITE viri Nineves, quae fundere verba
Me iubet astripotens, quae modo fata feram.
Vestrorum penetrat scelerum sub nubila clamor
Et videt immensus crimina vestra DEUS.
De vestra ad Dominum suppressi fraude queruntur,
Hic horum facili percipit aure preces.
Non vobis Dominus tribuit tot munera vitae,
Nec vos divitiis praevaluisse dedit
