Et timidas puppes summa sub astra levant.
Rursum diducto iam fiunt aequore valles
Et timidas puppes Tartara ad ima trahunt.
Iam largi gelida funduntur grandine nimbi,
Aether eliso nubilus igne micat.
Quassatas laterum tabulas iam verberat unda,
Iam tonat horrendis ventus et unda sonis.
Iam crepitant remi, clavi tortique rudentes
Occultant mersas caerula salsa rates.
Exoritur clamor trepidantum, mortis imago
Undique, percellit pectora moesta timor.
Ipse ratis rector, navem qua dirigat arte
Inscius abrepto corda pavore stupet.
Eiiciunt alii mergendae pondera navis
Et Tyriis fallax mercibus unda scatet.
Invocat hinc varios quisquis, sua numina, divos
Et vovet incertis non bene vota Deis.
Astaroth hic clamat, stultum vocat ille Dagona,
Alter Neptuni numina vana rogat.
Non tamen accipiunt tam frivola munera Divi
Nec Deus impuras accipit aure preces.
Quo magis hi clamant surgit magis indique Pontus
Nec vota his possunt eripuisse malis.
Solus Ionas abest ( vix hoc mihi credere fas est )
Occupat hunc sparsus membra per alta sopor.
Vocibus hunc rigidis navis qui sceptra regebat
Increpat, in somno desidiose iaces?
Surge tuumque Deum sublimi voce precare
