Dixerat, haec volvit trepidanti mente propheta
Et dubio versat pectore iussa Dei.
Impellit pietas, Domini quae spernere legem
Impedit, hinc cruciat pectora moesta timor.
Illa iubet, timor inde vetat studiumque salutis
Quo magis hęc urget, hoc magis illa premit.
Nec bene divino munitus numine vates 〈 Fuga Ionae 〉 
Succumbens animo diva pericla fugit.
Perque fugam ( stultae tanta est dementia mentis )
Se coeli dominum posse latere putat.
Et petit insignis spumantia littora Ioppes,
Ut sęvo fugit sęva pericla mari.
„ Ah, male mortales quanta haec dementia vexat
„ In summis sperant dum bona summa malis.
Hic homines metuit, non dira pericula ponti
Formidans, queis nil sęvius esse potest.
Conscendit naves et in aequore vectus aperto
Ereptum diris se putat esse malis.
Falsaque iam timidum delectant gaudia pectus
Et tales gaudet se reperisse dolos.
Ah miser, et non his foeliciter artibus use,
Nescis que dominus iam tibi fata paret.
Ecce procelloso consurgunt turbine venti, 〈 Tempestatis descriptio 〉
Undique vaesanus fluctus et aura ruit.
Algificus Boreas trepidando flamine stridet
Et Notus oppositum concutit usque latus.
Iam salsi tumidae montes volvuntur aquai
