Cum pedibusque pedes nectit, niveosque lacertos 
Iniiciens humeris corpus cum corpore iungit,
Sępius invito iuveni sua basia libans. 
Ast ubi necquicquam sese luctarier ille 
Conspexit, tandem visum est male viribus uti. 
Opponit brachiis humeros cervice reflexa 
Calcitrat et cubito pondus depellit inane. 
At constans animi mulier nunc usque resistit 
Et plus quam mulier furibundo pugnat amori. 
Non tamen hęc potuit iuvenis devincere vires 
Debilis, et tandem brachiorum vincla remittit 
At rapuit vestem manibus, hanc ille remittens
Ah miser aufugit trepidus, sed foemina cunctos 
Evocat hinc famulos clamans incensa furore,
Falsaque crudeli meditatur crimina lingua. 
Approperate viri ( clamat ) nunc ocyus omnes,
Accurrite heus famuli, dominam servate furentis 
E manibus iuvenis, qui nunc violare pudorem 
Instituit nostrum, heus heus accurrite tandem.
Talibus hęc aulam totam clamoribus implet,
Accurrunt famulę et famuli clamore vocati 
Et dominam flentem inveniunt vestemque tenentem,
Proh dolor ( exclamat ) quam me male sanus Ioseph 
Afflixit miseram? proh quanta audatia mentis?
Ah narrare pudet, quanto nunc ille furore 
Aggressus miseram lectum thalamosque iugales 
Sollicitare meos cępit nec destitit ante, 
Quam clamore meo confugit territus inde.
His addit lachrymas fictas vultuque pudorem 
Pręfert, ne desint sceleri fraudesque dolique. 
Interea famulûm longa comitante caterva 
Putiphar incedit, resonat clamoribus aula. 
Miratur dominus lachrymas magnumque tumultum 
