At si tantus amor fraterno crimine dextras 
Inficere, et durę germanum tradere morti
Deprecor hoc unum ( si quid mea flectere possunt  )
Verba ) ut non proprio infoelix hic concidat ense,
Sitque satis miserum fatis occumbere acerbis. 
Est cisterna procul viridis sub tegmine sylvę 
Horrida, quę latices obscura haud continet ullos,
In quam vos iubeo captum demittere fratrem,
Et servare manus fraterno sanguine mundas. 
Haec tum germanus fraterno protulit ore 
Ruben, dum saevae fratrem subducere morti 
Nititur et misero puerum servare parenti.
Et potuit tantum doctae facundia linguae, 
Flecteret ut foelix horrentia pectora fratrum. 
Interea celeri fratres ad venit Ioseph 
Gressu, nec simplex animi conamina sensit 
Isacidum, properat veniens dicitque salutem. 
Ast hi crudeli surgentes murmure fratrem 
Corripiunt, rigidis feriunt sua pectora palmis,  
Ingeminant plagas, summum ferit aethera clamor. 
Moxque trahunt variam tenero de corpore vestem,
Et molles lento constringunt vimine palmas. 
Ast hic ceu iuvenis longe qui matre relicta 
Hinnulus, in sylvis errans vel montibus altis 
In stabula alta ferę sęvae dum nescius intrat
Corripitur trepidans et aduncis unguibus hęret 
Multaque suspirans animo fit praeda ferarum
Sic etiam ad fratrum coetum dum venit Ioseph 
Inscius haud fraudes metuens aut corda dolosa 
