Isacides fratres genuit quos divus Iacob
Pastores pecoris fuerant, gens dura laboris.,
Non tamen hi vetuli faciunt sacra iussa parentis, 
Sed sceleri scelus accumulant et crimina iungunt. 
Nam Simeon dirus, crudeli et pectore Levi 
Non bene sunt ulti violatae stupra sororis. 
Haud licitos intrat thalamos, lectumque paternum 
Conscendit Ruben senior, cunctique repugnant 
Divinis monitis, iŭnior sed solus Ioseph 
Pręceptis hęret patriis et iussa capescit,
Quem genitor cunctis redamat prae fratribus unum,
Affectus patrios monstrans vestemque decoram 
Tradidit, ut cunctos lęto superaret honore. 
Sępius ad patrias dĭligens hic pertulit aures 
Infames animos, et saevûm crimina fratrum 
Prodidit exosus generoso pectore iniquos. 
Non tenuere truces animos irasque nefandas, 
Invida fraterno surgit sub pectore flamma. 
Utque leves surgunt flammae celeresque favillae
Quas arido in ligno nutrit cum fomite ventus, 
Principio exiguus ignis, non ulla pericla 
Adsunt, non miseri trepidant metuuntve coloni,
At spatio longo valido cum robore ventus 
Exoritur vęhemens furibundo flamine spirans 
Emicat et lato serpit cum tramite flamma,
Iamque ardent frutices, viridantis robora sylvae,
In segetesque ruit volitans lateque per agros 
Discurrens rabidus sęvit modo et aestuat ignis,
Ullaque non dantur miserûm impedimenta malorum 
