HISTORIAE IO:
SEPHI LIB. I 
Horrida fert animus describere crimina fratrum
Quos genuit divo promissos semine Iacob,
Aegyptique famem, pueri curasque fidemque. 
Vos rogo Castalides, fontes mihi pandite sacros, 
Calliopeque tuo mea carmina tramite ducas, 
Ut semel exorsos liceat finire labores. 
Ut Deus immensi statuit fundamina mundi 
Aethereasque suo munivit robore sedes, 
Mox hominem e terrę massa, primumque parentem 
Condidit, et sociam vitę sibi tradidit Evam. 
Hunc deus instituit dominum, regemque potentem 
Et modo fundati tribuit moderamina mundi. 
Foemina sed misero simplex dum noxia suadet 
Consilia et summi linquit bona iussa parentis, 
Excidit infoelix solio detrusus ab alto. 
Ne tamen excelsi caderet male gloria mundi, 
Et genus humanum meritas pro crimine poenas 
Occumbens lueret, dominus solatur amicis 
Consiliis, proprii promittens semina nati.
Scilicet ut mundus tenebris immersus in atris 
Acciperet foelix divini lumina nati. 
Pollicita hinc eadem domini bonus accipit Abram, 
Qui vetulus natum promissaque semina cernit. 
Nascitur Isacides domino dilectus Iacob, 
Bis senos genuit proprio qui semine natos. 
Quos mea musa canet, vestrum aspirate favorem
Pierides, liceat casus mihi scribere duros.
