BETHSABA
Nempe ut eram nuper tristi confecta dolore
Obrepit lachrymis lumina fessa sopor.
Utque dedi molli pulvino colla ferenda
Hęc mihi languenti noctis imago venit.
Hortus erat vernus florenti gramine densus
Rivus erat medio dulce sonantis aquae.
Non deerant violae, non lilia pulchra nec ipso
Matris Acidaliae sanguine tincta rosa
Rosmaris et laurus, myrthus quoque nigra colore
Et pulcher placido flore hyacinthus olet.
Summa tenet gelidus claro fons pulchrior auro,
Credebam tali numen inesse loco.
Hic ego cum spatior tristis solatia luctus
Inquirens pulchras ungue refringo rosas.
Ut vero curis studiisque intenta legendi
Progredior, videor te prope adesse mihi.
Lęva tenet citharam, resonans tua dextera plectrum
Purpureus fuerat veste nitente color.
Ut video, indoleo, trepidis vox faucibus hęret
Et retinent stupidos frigora lenta pedes.
Acceleras ad nos dextram tua dextera prendit,
Atque aedis tales ore tremente sonos.
Quid facis hei tristis nimium? quid pectora luctu
Conficis? incultus cur nitet ore pudor?
An quia vir cecidit crudeli perditus ense,
Non capies animo gaudia grata tuo? 
